[taman]

يوم الاربعاء ..


نور ويدتها وغلا قاعدين في الصاله

...ام جابر تكلم بنتها وضحى والبنات قاعدين يسولفون عن العشا بكره ..شبيلبسون وشلون بيكون

شكل بنت العم ..


غلا : تصدقيين ..للحين مب مصدقه ان لنا عيال عم ..

نور : والله وعيال العم ..

غلا : ههههه مالت عليج انا ماجفت الاعينه وحده ..احبطتني اني اتعرف على البقيه ..

نور : نصيحه لاتجوفيين الباقي بيصديج احباط كامل ..

غلا بفضول : ليش من جفتي ..؟

نور بصوت واطي : بكيتج بتفضحيني قصري صوتج ..

غلا بصوت واطي : منننننننننن من ؟

نور : راس الحيه ...

غلا وعيونها بتطلع من الصدمه ..: فهد ..؟

نور : ايه ..

غلا : وجع يالكذوب ... مستحيل ..

نور :الكذوب وجهج ...اسمعي هو اللي بدا بكيته ..

غلا : عز الله كليتيه ...شمسويه ..

نور : يالبقره ماسويت شي ...هو عفانا الله عليه لسان سوط ..

غلا : علينا انتي نوير ام سواهي والدواهي ماسويتي شي ...

نور : قلعتج ماصدقتي ... بس نصيحه ..ترى هالعيله مستحيل تعتبرنا عيال عم ... لانهم مايجوفن الناس الا من فوق ..واكبر دليل

انتي جفتيه ..

غلا ..: انزين نوير شلون بنتعامل معاهم في المستقبل ..

نور : عندي لج حل خوووش حل ..

غلا : شنو !

نور : نتجنبهم ....كأنهم ماسكنوا جنبنا...

غلا: ماراح تقدرين ..لو كانو مب نفس الحوش يمكن ..بس الحين في الطلعه ودخله بتشوفينهم ..وفي الاعياد والمناسبات اللي ابوي

مايقصر ..مافيه حد مار الاومسوي له ذبيحه ..

نور : عيل ..تذليين نفسج لهم ..

غلا : نور ..عن الحساسيه الزايده مب لهدرجه ..

نور : والله انج مقصه ...عيل تبيني مثل يالبقره من غير احساس .. وخلي اي حد يدعس علي ...مستحيل ...

غلا : نوير فهد مسوي لج شي ...؟
نور : بعدين اقولج ..مب هني وهي تأشر على يدتها اللي نزلت سماعه واللتفت عليهم ..

غلا : زين ..

ام جابر : شعندكم روسكم في بعض وتغامزون ...

نور : ولاشي يمه سوالف عاديه ..

ام جابر : ايه اني خابره ...

غلا : يمه انتكلم عن بيت عمي ..

نور وهي تساسرها ..: بكيتج بطيتي البرمه ..

ام جابر : شبلاهم ..؟

نور : مابلاهم شي ..غلوي ...بس كذا تسأل عن حالهم شبيكون ..

ام جابر : بيكون الله ساتره بس انتوا صفوا القلوب ويمشي الحال ..

نور : والله قلوبنا صافيه الدور عليهم ..

ام جابر : وانتي يالعوبا ..وشدراج بلي في القلوب ..؟

نور : مايحتاج اعرف ..بروحج جفتي ..بنت العم ..شلون سلمت ماتجوف طروح نجد ..(مثل يقال للانسان المغرور ) ..

ام جابر : ماجفت اللي جفتيه ...واذا هي رافعه خشمها يحق لها ..
نور : لاوالله على وش ..

ام جابر : نوير لاتنسين انها جايه من عز ورخى ...وبين رمشة عين كل شي تحول ..يعني بعدها على عيشة عز عمرها ماتعاملت مع

ناس مهب من مستواها ..

نور : بنت محمد اجوفج تعذرين لها ..وشي اللي وراج ..؟

ام جابر : وراي العصا ..اللي بتلعب على ظهرج ...يالعوبا ...معيه لاتفهمين ..

نور : يمه فاهمه ... بنجوف بكره ..بتقدرين عليها ...

ام جابر : يمه لاتخلين قلبج يحكمج ..مب من مره تعرفين الواحد ...من مره مرتين يمكن فيها يكون شين ومره يكون زين ..لازم

تعاشرينه ..عشان تحكمين ...لاتغرج النظره الاولى بعظهم ودج به من تشوفينه بس من معاشرته تكرهينه ..وبعضهم تبغضينه بس

بعدين ودج به ولا الناس كلهم ..واظن قد عرفتي هالشي ..


نور عرفت يدتها من تقصد مرة محمد المرحومه ..: الله يرحمها يمه ..
ام جابر : عشان جذي اقول لج لاتتسرعين ...ابخسي الناس اول بعدين احكمي ...مثل مانتي الحين تنقدين عليهم اكيد هم بعد ينقدون

عليج ..

نور تذكرت موقفها مع فهد اكيد اول واحد بيتنقد علي هو ..: ان شاء الله يمه ..بحاول ..
ام جابر : بعدي بنتي ... خليكم دايما ...كذا لاتنقدون حد ولاحد ينقد عليكم ...

غلا : يمه نبي ..نروح الجمعيه ..

ام جابر: شعندكم ...

غلا : بكره عندنا عشا وناقصه اغراض ..

ام جابر : وين خوانكم ..؟

نور : خالد راقد من بعد صلاة العصر ...ومحمد مادري وين طلع ..؟
ام جابر : يامكم عاجزه من المراح ...

نور : انزين شنسوي ..

ام جابر : انطرو محمد ...

نور : اففففففففففففف نقعد ننطر شورانا ...

ام جابر : خلونا من ذا الهرج ..قوموا افرشوا لنا برى ..وقوموو شهد ..

نور : ان شاء الله ...
البنات قاموا يفرشون الحصير ...ويعدلون القعده للجده ..وبعد ماخلصو

غلا راحت تصحي شهد ونور راحت للمطبخ تجيب القهوه

والشاهي والحليب ... اول ماوصلت المطبخ حصلت الخدامات مسويين فطاير وكيك ..قالت للخدامت يلحقونها بالقهوه وهي بتشيل

الصحون ..وراحت لمكان اللي فارشين فيه ونزلت الاغراض ..وانسدحت على المفرش وراسها على مركى اليده اللي للحين مايات ..
ام جابر وهي نازله من الدري بمساعده غلا ..اللي ماسكه شهد وهي دايخه من النوم ..: نوير ...اخسي على الوجه وين النقاب ..
نور وبعدها منسدحه : يمه نقابي هنا ..اذا حد جا لبسته ...
ام جابر وهي تقعد : اذا حد جا وليه تنطرين حد يجي وبعدين تلبسين ...البسيه يمال العافيه ..لاتنسين البيت اللي جمبج فيه رياجيل ..
نور وهي قاعده وتلبس نقابها بمضض ..وبعاداتهم هي وختها في البيت يلبسون جلال نقاباتهم اذا طلعوا برى عند يدتهم ..: وهاذا

لبست ..
ام جابر: بعدي بنتي الجيده ...
نور مسكت الدلال وقعدت تقهوي يدتها ..وشلت شهد في حظنها اللي تتسدح بعد النوم فيها ..: من اللي بيروح معاي الجمعيه ..؟
شهد وهي تصحصح من سمعت الكلمه السحريه : ابي الوح ..اموووووووه (ابي اروح عمموه)
نور : اولا اشربي الحليب ويي ابوج انروح .... شهد خذت القلاص اللي بردته لها نور وعطتها اياه ..شهد وقت اللي تبي شي تكون

اطيع منها مايوجد ..




----...----...----...----...----




كان يتمشى في الحديقه متملل من اجواء بيتهم ريم وفهد طلعوا مادري وين راحوا وامه قاعده ترتب باقي الاغراض مع الخدم ...

وصل لقريب من الفاصل العشبي اللي بين البيتين ...سمع اصوات وضحك .... كان وده يقرب ..بس تراجع .... ماحب يتطفل ...



رجع ورى وكمل طريقه واصواتهم تجذبه ...وقف في نص الطريق متردد ... وده يقرب منهم بس يمكن يكون وجوده غير مرحب فيه

...بس وده يتعرف عليهم ...اذا ماهو ابتدا بالخطوه الاولى مستحيل هم يبتدون فيها ...

سعد رجع ... لازم اتعرف على هلي ...رجع

وقف عند الحاجز ...وعطى نفسه دافع شجاعه كانت ناقصته ..تنح تنح ..
وقفت وحده مب طويله وطالعته بنظرات عيونها الكبار بستغراب

..سعد بخجل ..: سلام عليكم ....انا سعد ولد عمكم ..

ام جابر من ورى الحاجز : حياك يمه ...قرب ..قرب...فديتك ..


سعد ارتفعت معناوياته بعد نظرات هالقزمه ...حس انها بتطرده ..: الله يحيج يمه قرب منها وحب راسها ...وقفت وحده ثانيه طويله

شوي اطول من الثانيه ...وقفت جنب القزمه ...


وسعد يطالعهم ...: شلونكم بنات ..؟

نور : الله يسلمك شلونك انت ..؟

سعد : بخير يابنت العم ...قعد جنب اما جابر مكان ماأشرت له يقعد....وصبت له قلاص حليب كرك وقربت له صحون الفطاير


والكيك ..
سعد حس انه قاعد في مكان خيالي كانه يحلم ...حلم من احلامه العائله مجتمعه واليده اللي عمره يتمنى يكون عنده مثلها

.
..حس بسعاده ..بس فيه حاجز بينه وبينهم كان وده يكسره ...فطالع

بنات عمه ..: الحين القزمه منه والنخله من فيكم ...؟

نور انصدمت منه ...سكتت شوي تستوعب اللي قاله .... الدب ..: القزمه اسمها الشيخه نور والنخله غلا يالزلمه ..

سعد ضحك عليها مهي بهينه بنت العم ..مربوشه ...زين والله فيه حد مثلي ...: قصدج الشيخ سعد ..الا يالشيخه نور مخلصه ولا ..

نور ابتسمت شكله ولد العم نفسه خفيفه مب مثل ثقيل الطينه اخوه

..: الله يسلمك تخرج تخصص رياض اطفال ..

سعد : مشاء الله عيوز يعني تخرج ...

نور : عيز حيلك يالبزر ..

سعد : ههههه على الاقل بعدني ريعان شباب ..وانتي النخله ..؟

غلا : نخله زرعت في راسك ...سنه اولى ..

سعد : روضه ..

غلا : لا الروضه حقك انت وشهووود ..جامعه ..

سعد : فديت الروضه اذا فيه مثل هالقمر ..مسك شهد وباس خدها ...

نور : شوي شوي على بنتنا لا تاكلها ..

ام جابر : اهبي على قوة ذا الوجه يانوير ..

سعد : يمه عادي ...عمتها يمكن خاطرها تاكلها بلسانها ..

نور : بكيتك ..يالدب ..عليك لسان يغطي علي ..

سعد : ماديرتي العرق دساس ..طالع عليج ..

نور : وينه هالعرق عشان اقطعه ...

سعد ابتسم ...: اسمعوا بنات العم عندي لكم كلمه واتمنى تسمعوني ..

نور وغلا بفضول طالعوله واستمعوا ...ام جابر : تفضل ..

سعد : حن عيال اليوم ...وانا ماددري شصار من عشرين سنه ..ولايهمني ..اللي يهمني اني لقيت هلي ...واتمنى ان نكون عيال اليوم


ونتجاوز خلافاتنا ...لان ودي اكون اخوكم ..ونذر على هالرقبه ماتشوفون مني شي مايعجبكم ...

ام جابر ببتسامة فخر : تسلم ياولد عبدالعزيز هاذا العشم فيك ....

سعد : هاه وشقلتوا ياخواتي ..

نور : مثل مااعتبرت نفسك اخونا احنا عادينك اخونا البزر ..

سعد ارتاح لانه عرف انهم ماردوه وضحك كان وده يقوم يرقص ...: تسلمين يالقزمه ...

غلا وهي تضحك بنعومه ..: والله وجا يومك يانوير واللي يقدر لج ..

نور بشموخ : انا الشيخه نور هالبزر يقدر لي اقري العب مع شهد ..

سعد : ههههههه والله كنت شاك ان عمي ماخذ مصريه ..
نور : بكيتك ..



: السلام عليكم ..

سعد انتفض من هالصوت البارد ...
رفع عينه جاف ولد عمه محمد ...
يطالعه بنظرات وقف شعر جسمه منه ..برود وغضب كانت


نظراته موزعه بينه وبين خواته ....
سعد تحدى هالنظره وقف يسلم عليه ...

محمد سلم وقعد جنب الجده وهو يطالع اخواته وده يذبحهم

على هالقعده مع سعد وبعد فالينها يسولفون ..

محمد بصوت بارد ..: شلونك سعد ..؟

سعد بشاشه ..: الله يسلمك ولد العم شلونك ..عسى ماخلاف ..؟

محمد : بخير ..الله يسلمك ..

سعد : السموحه ...ترى دقيت الميلس ماحصلت حد ويوم رجعت جفت بنات العم قلت اسلم ...

ام جابر : سعد يمه لاتعذر هاذا بيتك ..وبيت عمك وقت مابغيت تعال العين اوسع لك من الدار ...

محمد خفت نظراته ..: سعد البيت بيتك ...واحنا اهل ..

سعد ارتاح ...بس بعد حس ان محمد للحين مب متقبله ...فنحرج من هالشي بس تحمل ..عشان مايبين له ...قعد يشرب قلاص الحليب

..

محمد وهو يطالع خواته ..: خير شعندكم حارقيين الجوال بتصالاتكم ...؟

نور : الخير بوجهك ...بغينا الجمعيه ..
شهد وهي تنقز من حضن الجده ..: بلوح الدمعيه ..(بروح الجمعيه )

محمد : وانتي بعد ؟ لالا عيب البنات يروحون ..

شهد وعيونها انترست دموع ...: بلوح ..

محمد وهويسحبها لحضنه ...ويبوس خدودها بقوه ...: اودي مندوبج ...لو تبين بروحج انروح ...بس لاتصيحين ..

نور : لاوالله على كيفك ..

محمد : لاوالله على كيف الشيخه شهد بنت محمد ..

سعد بضحكه ..: مشاء الله بيتكم متروس شيوخ ..

نور : ماعليك بس حقوق الطبع لدى الشيخه نور ....

محمد : انزين اي جمعيه ...تبغون ...؟

نور : كارفور اللي في فيلاجيو ..أقرب لنا ...

محمد : معليه........... بس ياليت تخلصون لان وراي شغل بعد المغرب ...محمد طالع سعد ...: تخاوينا ...؟

سعد : والله ودي بمخاواكم بس الوالده بروحها ...

محمد : اهاا ..على هواك ...

البنات قاموا يلبسون وشهد معاهم اللي تجدد نشاطها بعد طاري الجمعيه ...

سعد قعد شوي ورجع لبيتهم ...وهو مملؤ بمشاعر يديده

..ماعرف لها ...سعاده انتماء وخوف من المستقبل اذا عرفوا خوانه بهالخطوه ...



----...----...----...----...----




واقف قدام محل الاثاث بتملل ..ينطر ريم تخلص ...طالعها كانت واقفه عند الكشير ..تحاسب ...

فهد طلع سويجه عشان يطلعون من

ظهر وهم في المجمع زهق ..

ريم : فهد ممكن نمر كارفور ..

فهد بزهق ..: بعد ...معليه بس لاتتأخريين ..

ريم : لالا ماراح أتأخر ...شغله بسيطه ...

دخلوا كارفور .ريم بخطوات سريعه عشان فهد مايعصب عليها راحت قسم الشامبو تاخذ لها ..وهي واقفه ...جذبها صوت ضحكه


قد سمعته في مكان قريب ...اللتفت جنبها ..فهد ماكان موجود ..بس بنيه صغيره لابسه فستان كاروهات وردي مع ابيض واصفر

وشعرها الناعم مفتوح يداعب خدودها المليانه.....جافتها مع بنات عمها ..واقفه جنبها وتضحك ..قالت بصوتها الطفولي ..: اموووه

بابا ...يحقني ...(عموه بابا يلحقني ..)
ريم بضحكه لان شهد كانت مشبهه عليها لان لابسه نقاب ..: حبيبي ..انا مب عموه ..ومسكتها من زنودها ...شسمج ..
شهد ببتسامه ..: انا دهوود ...( شهوود)
ريم : عهود ..ياحلو اسمج ..انتي حلوه ..
شهد : انتي حووووه ...وااايد ..
ريم : مب مثلج ...تعالي اوديج عند ماما ..
شهد : ماما ..وين ماما ..؟
ريم : بندور لها مع بابا فهد ...

شهد : ابي ماما ...امووووووه تليني ...(شليني )

ريم وهي تشيلها ..: تعالي ...

حصلت فهد واقف ورى رف الكتب يتصفح له كتاب ..طالعها بنظرات
استغراب ..: خير ..

ريم ..: مادري على بالها اني امها ..

فهد بضحكه حزينه ..: ما أظن امها ...امها متوفيه ...

ريم بصدمه ..: والله ...حرام ..طالعت شهد اللي اطالعهم بنظرات استفسار ..مب فاهمه السالفه ...
ريم حست بحزن يجثو على

صدرها ..لمت شهد وباست راسها ...شهد ماصدقت ريحت راسها ولمتها ..

فهد : ممكن تخليين حصص الامومه فضحتينا ..

ريم انحرجت نست نفسها ..: ابيه سوووري ...بس كسرت خاطري ..

فهد : انزين ..اكيد الحين اهلها ..يدورون لها ..مشغوليين ..

ريم : مبيين ...شلون هاديينها بروحها ..

بصوت رجولي خشن ....: شهد ..
شهد تمللت من حضنريم وركضت صوب الصوت
...اللي كان صاحبه شاب وسيم رجفت اطراف ريم من منظر الحنان اللي لم فيه


شهد ورفعها لصدره ..وباس خدها ..كان حضوره طاغي ...هز كيانها ...

محمد قرب منهم وسلم على فهد ..: السموحه ازعجتكم ...ماتخلي حركتها ..كل مره ..طالعها اخر مره اوديج ..
شهد : حلات مألووح بابا ..(خلاص بابا ماروح ).

فهد : ماحصل الاالخير ..الله يعينك على شطانتها ..

محمد بضحكه ..: الله يعيين ..يله استأذن الاهل معاي ...

ريم وهي تكلم شهد اللي واقفه جنب ابوها ..: باي شهود واشرت لها بيباي ..

محمد تجاوز الريم وهو يطالعها بنظرات جليديه .. لانه عرف صاحبة الصوت ..من كلمت بنته ..كان الاحتقار ماليه ....شال بنته

وراحوا تحت صدمة الريم من نظرات ولد عمها ...

فهد : خلصتي ...؟

ريم وهي بعدها تايهه ...:
لا ...ورجعت للقسم اللي كانت فيه وهي مب في شعورها من ولد عمها اللي خلبط كيانها ..من الوسامه

لنظرات الجليديه ...ليه ..؟

-

----...----...----...----...----



رجع يتصفح الكتاب وهو متملل ..ينطر اخته تخلص .. وهو يفر الصفحه ...انتبه لصوت وراه ...صوت مب غريب ....معاه صوت

ثاني ...
غلا : خذي هالقصص احلى ...

نور : اقلبي وجهج اقولج مبزره ...تقوليين قصص ...ابي كتب تعبيريه يعني اصور فيها تعبر اكثر ..

غلا : انزين خذي لهم احرف ...

نور : شكلي باخذ خيزران ...هههههه عشان العن خيرهم ...مايزعجوني ..

غلا : مالت من مدرسه ...هاذا وانتي تدريب جذي عيل بعدين ..

نور : اوقفهم في الحوش..خخخخخخ
غلا : هههههه بكيتج .... والله مادرس عيالي عندج ...

نور : زمن اللي يقول انج بتعرسين ...بتقعديين عااانس ...

غلا: احسن اقعد مع ابوي اوانسه وحدته ..

نور : ههههه مسكينه ...

غلا : ليه مسكينه جايفتني اطر ..مثلج ههههه

نور: بكيتج انتي وياه ..واللي يقولج سالفه ....

غلا : ههههه والله مسخره ..

نور : المسخره شكلج ... يالسخيفه ...والله لوجفته مره ثانيه امسح في خشته القاع .. البايخ ..بكيت ويهه ..

: ليش شايفه ويهي ...؟

نور وغلا اشهقوا من الصدمه ...نور طالعت وراها ...كان واقف وراها ومكتف ايدينه على صدره ويطالعها بنظرات تحدي ....نور

الصدمه لجمت لسانها ...

غلا استغلت اللحظه فسحبت اختها وراحت معاها ...لانها تعرفها مب ساكته ....ملسونه ...وهم بعيد منه


اللتفت نور له بنظرات غضب ...
بس هو رد النظرات بتحدي واضح ...وهي ترد عليه راح ارويك ياولد العم ...وفهد يبتسم بسخريه


..وعطها ظهره ...نور انقهرت منه ومشت وهي تتحلف فيه ....

فهد رجع الكتاب مكانه وهو يضحك ...
كان عارف مافيه حد قريب منهم عشان جذي
كلمها ...والله طلعت قويه بنت العم مب هينه

هالقصيره ...بنجوف شبتسوين ...بتقدرين علي والا ...؟
فهد حس كان فيه مثل الشعله تتقد في صدره ...تحدي ...سعاده ..شعور


خفي يداعب اطراف صدره من جاف عيونها الكبار ...المتحديه ...يمكن لانها اول وحده اطالعه بنظرات غير الشفقه ..من حالته ..



----...----...----...----...----


من طرف اخر ..كانت تشل اغراض وتحطها في السله من غير لاتشوف ...وغلا ترجع الاشياء اللي مب محتاجينها
....وتهز راسها

لانها تعرف عصبية نور ..

غلا بقهر : نوير خلاص ...شفيج ...فضحتينا ..

نور : ماقدر اللي مايستحي ..داري اني ماراح اقدر ارد عليه ...بكيت وجهه ...

غلا : نوير ممكن تخليين التعصيبه في البيت ...ترى محمد قريب ...
نور انتبهت ...: افففف ..خذتي فايين ..

غلا : ايه ...يله نروح نحاسب ...

نور مشت ورى غلا وباله مع مكان ثاني لشخص
...اشعل الحرائق في فؤادها ... ثاني مره يحقرها ...اهو ليش جذي معاي ..كله في

موقف غلط ...في وقت غلط ...بس محد قاله يسمع ...لان اللي يتسمعون ماراح يسمعون شي يعجبهم ...بس براويه ..اذا ماكنت نوير

بنت ابوي ...


واقفه في نص الغرفه وتجهز اغراضها في شنطه صغيره ..جلابيات وبدلتين ..وكم جلال ..وفرشاتها ...ولوازم سهر طبعا كلها دايت



..وابييه ..الابتوب ...بعد نسيته ...شالته من فيشة الكهرب وحطته في الشنطه ..مب مصدقه ..من قالت امها انهم بيباتون في بيت



خالتهم ...ابوهم سافر لسعوديه ..عشان واحد من ربعه صاير له مشكله ..ويمكن يطول هناك ..كم يوم ...يوم اتصلت في نور تبلغها



..نور ماصدقت قالت بطرش لهم محمد ...عشان يوون من ظهر عشان محد عندهم ...لانها تعرف ان حمد مايحبهم يروحون مع دريول

بروحهم خصوصا اذا هو مب موجود في البلاد ...

شيخه لبست عبايتها ونقابها المحفور شوي وكانت حاطه كحل مامسحته من يات من المحاظره وشيلتها ...ونزلت اغراضها لصاله

اللي كانت معفوسه ..اغراض خواتها ..وامها ...اللي يجوفهم مهاجريين مب يوميين ..

شيخه : وحليلي ..وانا اللي متكاثره اغراضي ...حصوص وين امي ..

حصه وهي ماده البوز ..: مادري ..

شيخه : اخسي يالنفس الخايسه ...
حصه : وانتوا ماحلى لكم المراح الا الحين ....ما كأن احنا راديين
من المدارس تعبانيين ..

شيخه : اها ..كل هاذا عشان الرقده ..خبروها عليج ...فارقي بس ...طلعي اغراض مهوي ...لانها بتطلع مع غلوي مناك ..

حصه : بعد هاذا اللي ناقص ..اشتغل عندج انتي واختج ...مشكلتج روحي انتي ..

شيخه وهي باديه تعصب : حصوص ..روحي دام النفس عليج طيبه ..

حصه : لا مب رايحه شبتسوين ...

شيخه وهي تسحب الخيزران من فوق كبت الصاله مكان ابوها مايحطها ..: بامردغها على ظهرج ..

حصه شردت لغرفة امها اللي تحت وهي تصارخ : يمااااااااااااااااااااااا ااااااه ....يماااااااااااااه ..

شيخه فسخت صندلها عشان مايعوقها ..ولحقتها ...: طلعي ..لاشلخها الحين ...

وضحى وهي واقفه بينهم ..وحصه ورى امها ..: خير خير شعندكم ...؟
شيخه بعصبيه ..: ملعونة الصير ذي اطرشها تقولي منا بخدامتكم ...
حصه : والله اني صادقه الخدامه في المطبخ ليه ماطرشها ...تحنها وانا ماتحني ..توني جايه تعبانه من المدرسه ..

شيخه : وليه يالشيخه محد تعبان الا انتي ..كلنا تعبانيين ..

وضحى ..: حصه روحي للاختج مطرشتج له من غير مناقشه وخلصوا ولد خالتكم ينطر برى ..عيب عليكم استحوا شوي ..

حصه طلعت من الغرفه وهي تحلطم ...على شيخه ..شيخه استانست من الخاطر انها مشت كلمتها ...

وضحى بعد ماطلعت حصه : وانتى يالكبيره ...تشوفينها جايه عاجزه تمريين عليها ارحمي شوي ..

شيخه بقهر : والله مطرشتها لاغراض اختها ...جزاتي مابغي الخدامه تحرك اغراضها ..

وضحى : وانتي ياراعية المعروف ليه ماجهزتيها لها ..

شيخه : والله وهي شعازتها قاعده في الصاله وحاطه رجل على رجل ...

وضحى : شيوخ اصطلبي ...ورحي حطي الاغراض في السياره انتي والخدامه ودي نوره معج عشان اقفل البيت اذا طلعت حصه ..

شيخه راحت الصاله وهي تصارخ تنادي الخدامه تشل الاغراض معاها ..ونوره ..

كانت سياره موقفه صوب البوابه يعني الدبه صوب بوابة الصاله ...حطت الشنط والاغراض ورى وسكرت الباب بقوه لانها معصبه

على اختها ..كانت سيارة محمد يوكن 2007 بطلت الباب الثاني اللي ورى اللي جنب السواق ..وركبت نوره ...وهي تحلطم ..
: شوي شوي على الباب كسرتيه ... مب يد عليج ولا مريم الغضبان ...
شيخه بصدمه : خااالد ..
خالد وهو يلتفت عليها ويرفع نظراته يرفع فيها شعره الناعم ماكان لابس غتره وفاك الزرار الفوقاني ..ومرجع ايدين ثوبه الكبك ورى

:خير ..
شيخه : لا على بالي محمد اللي بيجي ..
خالد : وليه ..شفيني مب عاجبج ..
شيخه الحين هاذا انا ناقصته يكفي امي وخواتي مصدعيين فيني : شبي في عشان تعجبني .. بتشتغل عندنا .. وركبت وسكرت الباب

بقوه عناد فيه ..
خالد رجع لكرسيه ولف المنظره عليها ...: كسرتي سيارتنا ...ترى مب جايبينها من الكراج ..
شيخه : مهيب سيارتك ...بعدين ليه ماجيت في سيارتك ...خايف عليها ...؟
خالد : عشان تبعجينها ...لا لامانا مستغني عنها ..
شيخه : وععع من زينها ... والله لو تحط لي مليون ريال لين بابها ماركبتها ...
خالد : اصلا ماركب سيارتي الدبب ..تكسرينها ...
شيخه حزت الكلمه في خاطرها ...سكتت تبلع الم الكلمه اللي معقدتها ...وتحاول تخفي دموعها ..لفت على الدريشه ..ونزلت طرف

شيلتها على عيونها ...
خالد كان يتعبث في المسجل ماأنتبه لسكوتها .. ولاعلق يمكن ماعندها رد ..طنش وقعد يكمل بحثه عن شريط يسمعه ...وصلت خالته

وركبت السياره وسلمت عليه ...حصه جات صوب الباب اللي قاعده عنده شيخه ..وفتحته ...: زحمي ..
شيخه : فارقي الصوب الثاني ...
حصه : وانتي ليه ماتزحميين تعبانه الف ...
شيخه : حصوص فارقي مالي خلقج ..وسكرت الباب بعصبيه ..حصه خافت لانها تعرف ان شيخه ..معصبه ...اهي كانت تبي

تغايضها بالعاده تتقبل منها ..
خالد : بل يالدبه ماخذه المكان كله كان زحمتي لها ...
شيخه : دبه مب من خيرك .... من خير ابوي ..
وضحى : شيوخ اهبي على طولة ذا اللسان ...
شيخه : والله ماقلت شي ..الدور على ولد الخاله ...اللي ذلنا على هالمشوار ..
خالد وهو يطالعها بنظرات ناريه : مهب العشم فيج يابنت الخاله ..تنداس رقبته في تراب اللي بيذلكم ..
وضحى : تكرم يالغالي ماعليك منها ...وضحى اللتفت لشيخه بنظرات غاضبه ..وتهديد اذا زوديتها ياويلج ...شيخه ماهمتها نظراتها

اهم شي انها انتقمت لكرامتها منه ...
خالد كانت النار تتصاعد داخله ماحب يطولها عشان خالته ولا كان عرف شيسوي معاها شيوخ ...ماتيوز عن هاللسان ... بس ماعليه

اراويج اذا ماكنت خالد اراويج ....صج المذله ...



----...----...----...----...----



وقفت اطالع الظالم اللي لاف البيت بنظره اخيره ...كان بيتها لسنوات طووويله ..وسنييييييين طويله من الغربه اخيرا بترجع للبلاد

..وبترجع لأهلها ...لبيتهم القديم ...مثل ماعرفت من فهد ..البيت الكبير ...سكرت الباب ...على ذكريات حلوه بس وحيده ... اخير

بترجع ...عشان تستقر هي وعيلتها ..
: يمه خلصتي ...؟
طالعته بنظرة حنان : ايه يالغالي خلصت ...يله ..
: يله ..مشينا ابوي ...بيوصلنا وبيرجع وراه وفد يستقبله ..
: يله ..
نزلت لسياره مع ولدها حمد وهو يشيل شنطتها ....ركبت السياره ...وهي تودع بيتها وحيها بحزن ...يمكن عشان الذكريات الحلوه ..
ابوحمد وهو يكب جدام ..ويطالع مرته : عفرا اكيد مافيه شي في البيت ...لان مافيني ادور ..يادوب اخلص هالاسبوع وانا لاحقكم ..


عفرا : لا مافيه شي متأكده ...
حمد : يبه ..نروح بيت خالي ...

ابوحمد : ايه ...اول ماتوصلون تكلموني ..وكل مطار توقفون فيه بعد ...
حمد : ان شاء الله ...

(( حمد 23 سنه وحيد امه وابوه .. وسيم ..طويل عريض المنكبيين ...شاب طموح توه متخرج من جامعه في

امريكا اللي كان ابوه يشتغل في سفارة البلاد في امريكا ...تخصص هندسه عمرانيه ..حمد كان جماله شيوخي والكل كان مييت عليه

في الجامعه من الجنس الناعم ...وهو من النوع اللي يتخقق بهالشي بس مايعطيهم ويه ..وفيه غرور بس مب زياده يعني ثقة نفس

..))

نهاية الفصل الرابع