[taman]

	(الفصل الخامس ) دخل الصاله وحط نظارته والسويج فوق التلفزيون بعصبيه ...حصل يدته قاعده حب راسها وقعد جنبها ..طالعته بحنان وحطت يدها على ظهره ... ام جابر : وين وضحى والبنات ؟ خالد : جايين ينزلون الاغراض .. ام جابر : شلي مضيق خاطرك ... خالد : ماشي ...يمه يمكن الحر .. مسحت على شعره بحنان ..: قم يمه حط راسك شوي قبل صلاة العصر ... خالد هز راسه مواقف قام وحب راسها وهو رايح لغرفته ... وهو مايبي يتواجه مع شيخه لانه يعرف نفسه بيفقد اعصابه ...وهو يبي يعطيها درس بس على هداوه ... دخل غرفته حذف روحه على السرير ... وانبطح على بطنه وحط المخده تحت ذراعه ... وغمض عينه يبحث عن السكينه من افكاره ..المختلطه .... لكن رنين الجوال قطع افكاره ....رفع الجوال ...جاف الرقم ...ضحك بسخريه ...حطه سايلنت ...وحط راسه يريح شوي ....اذا قام بيتصل ... -------------------------- دخلت الصاله وهي محمله اغراض ... نزلتها على الارض عشان الخدامه توديها فوق ..تقدمت خواتها وقربت من يدتها وسلمت عليها وحبت راسها ... وقعدت جنبها ... وضحى وبناتها سلموا وقعدوا والوجوم مخيم عليهم ماعدا نوره اللي مب حاسه بلي حوالينها .. تبحث بعيونها عن صديقة دربها شهد ... فبعد ماتخلصت من ايدين امها ويدتها اللي كانت تحبها ...راحت ادور شهد ... وضحى بضيق : شلونج يمه ..؟ ام جابر : الله يسلمج .. شلونكم ..وشلون بناتج ..؟ وضحى وهي اطالع شيخه بنظرات عتب غاضبه ...: ازهليهم هالبنات عند ارواحهم عايشين .. على طول ذا الاسن لاتخافيين مهب صايير لهم شي .. شيخه تنهدت بغضب مايسوى علينا هالخلود ...يسب ويشخط فينا .. واذا حد رد عليه قامت الثورات عشانه .. .شيخه عارفه ان طول ماهي تشوفها بتقعد تعيد وتزيد وتجبرها على شي ...لو تموت ماسوته ...انها تعتذر ... .فشالت نفسها وراحت لغرفة نور .... دخلت الغرفه حصلت نور منسدحه على جنبها وشهد جنبها ...راقده ...قربت من السرير وفسخت عباتها وحذفتها على الكرسي القريب منها وكان مصير النقاب والشيله نفس الشي ...ونسدحت جنب نور .... نور وهي نعسانه ...: يتوو..؟ شيخه وهي منسدحه وتفكر ...: تونا ...نامي ...لاني برقد ... نور كملت رقدتها وشهد حاظنه يدها ..شيخه ....كانت في عالم ثاني ... عالم متأرجح بين الندم وبين القهر ..ندمت انها فقدت اعصابها قدام امها ... والقهر ان الكل بيشوفها غلطانه ... وهي مراح تقدر ادافع عن نفسها ...والكفه كلها لصالح خالد ....وانا كرامتي فوق اي اعتبار حتى لو على قطع رقبتي ...غمضت عينها تبحث عن الراحه من أفكارها ... ---------------------------- قامت على صوت اذان الساعه ...كانت الساعه 3 عصرا ً..طالعت جنبها مها بعدها نايمه ..كان فيه راقد تحت على الارض طلت من فوق السرير ...حصه كانت نايمه ..غلا ضحكت على شكلها كانها طايحه من فوق رجل في صوب وايدينها مفتوحه ..قامت تتمدد عضلات ايدينها وراحت تتوضى لصلاة العصر ....بعد ماطاعت نشفت ايدينها بفوطتها الزهريه ...وطلعت لها جلال ابيض يناسب جلابيتها الورديه مالت البيت ..وطلعت تجوف خوانها راحوا المسيد وتقوم نور ... مرت صوب غرفة محمد ..... حصلته قاعد على السرير بسروال وفانيله وبعد النوم فيه ...: الصلاه لاتفوتك ... محمد طالعها بعيون حمر من تأثير الرقاد ..وحك راسه : ان شاءالله .... شهد وينها ..؟ غلا ببتسامه حنونه ...: اعتقد عند نور يمكن راقده .. محمد وهو يقوم يتمدد ..: تأكدي ..وينها ... غلا : ان شاء الله ..مر على خالد قومه .. طلعت من عنده وهي متوجه لغرفة نور ...دخلتها كانت مظلمه ..الستاير مسكره وشيخه ونور راقدين وشهد اللي لازقه في ظهر نور ..ودافنه ويهها فيه .. بطلت الليت ..وفتحت الستاير ...: نور ...شيخه ...قوموا لصلاة العصر ... نور حطت ايدها على عيونها .. : كم الساعه ..؟ غلا : 3وربع ..قومي ورانا عشى ...وقومي شيخه ..لصلاه .. نور : اوكي ..وقعدت في نص السرير لان شيخه وشهد راقدين على كل طرف ..ونزلت من الطرف الوراني مال السرير ....غلوي ولاعليج امر قومي شهود لين اتوضى .. غلا وهي تقعد على السرير عند ريول شهد ...: شهووود ...وحركت ريولها .....حبيبي ...قومي ... شهد وهي تمتم بكلمات غير مفهومه وادس ويهها في المخده ...غلا ..: شهوده ...من اللي بيسوي معاي كيك ... شهد انسدحت وهي تفرك عيونها ...وبصوت نعسان ...: انا ..ابي .. غلا : يله قومي ..نصلي ونروح نسوي كيكه ...غلا شلتها ..وشهد دفنت ويهها في رقبتها وحظنت عمتها ..غلا راحت فيها لغرفتها ...عشان تغسل ويهها ..وتصلي ... دخلت الغرفه حصلت مها بعدها راقده ..وهزت راسها ماتشبع راقد ...دخلت شهد الحمام ((وانتوا بكرامه)) وغسلت ويهها ..وطلعتها ومسحت ويهها بفوطتها ...بس مامسحت ايدينها بعدها فيها ماي ...لان كان لها نيه ...قعدت شهد على كرسي التسريحه ..وافترت لمها وايدينها متروسه ماي ...ومسحت ويهها فيه ...مها تخرعت ...وبطلت عيونها من الخرعه .... غلا : يله قومي صرنا المغرب وانتي ماصليتي ... مها وهي تمسح ويهها ..: وجع بكيتج خرعتيني .. غلا : احسن بتفوتج الصلاه .. مها وهي تقعد ...: هاي حصوص .... غلا : ايه .. مها : وليش ماقومتيها ...؟ غلا : بقومها بعد ماتخلصين .... خليها تريح شوي ... مها : لاوالله ...وانا المسيكينه مالي رب .. غلا : خلصي يله بخلي شهود تقومها عشان تقوووم بسرعه .. مها : معليه ..ياويليج اذا طلعت وهي ماقامت ... غلا : بس يله خلصي ... بعد مادخلت مها الحمام ...قعدت على الارض تقوم حصه ....: حصوص ...حصوص.. حصه كانت خارج نطاق التغطيه ماردت عليها ..في سابع نومه ...غلا بزهق ..: حصوص ...قومي .. حصه ماردت .... غلا انقهرت منها ..: شهوود تعالي قوميها .. شهد وهي تلعب في غراش العطر ..: مابي تبدني ..(مابي تظربني ).. غلا : تعالي ماراح تظربج بظربها ... شهد وهي تنزل من الكرسي وتقرب من غلا وتحط ايدها على رقبتها ...وبصوت هادي : حده ..حده ..(حصه ) غلا : وايد عليج ..ركبي على بطنها ..وقوميها .. شهد ماصدقت حذفت روحها على بطن حصه ..اللي نقزت من الخرعه ...وقامت ..: حدوود دومي ..(حصوص قومي ).. حصه وهي تمسك شهد من زنودها عشان ماتنقز زياده على بطنها ..: بقوم ..بس نزلي حد قايل لج ملاهي ..نزلي .. غلا : لاوانتي الصاجه حماار .. حصه : حمار ريلج ..شلي بنتكم لا اعضها الحين ... شهد وهي تنزل خايفه ..وتروح ورى غلا ..: ماتقدر تسوي لج شي بعضها .. حصه وهي ادز ركبة غلا : بس فارجي يالعصلا ..كف واحد الا وانتي لازقه في الطوفه .. غلا وهي تشيل شهد ..وتاخذ كرتون الفاين وتفره على راس حصه اللي بعدها منسدحه في الفراش ..حصه فزت من الظربه وقعدت على حيلها ... حصه : بكيتج ارويج ... غلا شردت لغرفة نور ...عشان تصلي ...اول مادخلت .....جافت شيخه قاعده على طرف السرير وشعرها ملتف حوالينها وحاطه يدها على حلجها ويهها اصفر ... غلا بخوف ...: شيوخ شفيج ..؟ شيخه بصوت واهن ...: جبدي لايعه ...احس برجع ...(وانتوا بكرامه ).. غلا : انزين ايب لج شي يودي اللوعه .. شيخه وملامح القرف زادت عليها وهي تنفي ..: لالالا ..بس ابي الحمام برجع .. غلا ...: حمامي خواتي فيه .. شيخه وقفت لانها ماعادت تقدر تتحكم في نفسها ..وطلعت من الغرفه ادور اقرب حمام (وانتوا بكرامه ) ...اول غرفه في ويهها كانت غرفة محمد دخلتها وسيده الحمام ....لين فرغت اللي في بطنها .... ------------------------------- ركب الدري بخطوتيين سريعه ... يبي سويج سيارة ..يبي يلحق يروح الحلاق قبل العشى بكره عنده دوام ومافي وقت ....غترته على جتفه وعقاله في يده ولابس الطاقيه اللي راده شعره الناعم لورى .... دخل غرفة محمد ياخذ السويج بسرعه ...بس فيه صوت وقفه في مكانه ...صوت حد يأن ... خالد وقف يسمع الصوت عدل يبي يتأكد من وين جاي ...الصوت كان جاي من الحمام .. توجه له بخطوات متردده ..كان الباب مفتوح فتحه بسيطه ..حط يده على الباب وفتحه بهدوء ... كانت واقفه عند المغسله وتغسل ويهها ...وشعرها مغطيها مثل الستار ... خالد تجمد في مكانه ..يبي يطلع بس ريوله رفضت لانه عارف ان هاي مب وحده من خواته ...رفعت راسها بوهن ..وطالعته بصدمه وعيون مرعوبه ..اتلاحقت عمرها وسكرت الباب بخوف وقفلته...خالد بعده واقف في مكانه بعد ماتسكر الباب ...هاي شيخه ...امبلى شيخه ...الملامح ماتغيرت ..نفسها طفوليه ...خالد خذ السويج وباله معاها ...شفيها ... يتبع