[taman]

	شيخه سكرت فتحة المرحاض وقعدت وجسمها كله يرتجف من التعب والخوف ...هاذا شيسوي هني ..كأني ناقصه ...حطت راسها بين ايدينها لان كان يدور فيها .. وقفت بخطوات تتهاود ...وفتحت الباب بتشكك ..وبطلة فتحه صغيره وطلت وتأكدت ان مافيه حد .. وطلعت من الغرفه ...وهي تمشي بتعب ...ومنزله راسه ...وهي تمشي طلعت حصه في ويهها ...حصه استغربت من اختها طالعه جذي من غير نقاب وجلال شيخه من النوع اللي ماتفسخها الا في البيت ...شفيها استخفت لا وطالعه من غرفة محمد .. حصه بخوف وهي تقرب منها بعد ماجافت مشيتها الغير طبيعيه ..: شيوخ ....شفيج ..؟ وقربت منها تمسكها ... شيخه وهي اطالع حصه بتعب ..: تعبااانه .. حصه قربت منها ولمتها من خصرها وساعدتها تدخل غرفة نور ...وسدحتها على السرير وعطتها قلاص مااي ...نور كانت توها طالعه من الحمام ...وجافتها وتخرعت ...: حصه شفيها شيخه ..؟ حصه : ماادري جفتها في الصاله وقالت لي تعبااانه ... نور وهي تقعد جنب شيخه على السرير وتمسح يبهتها ....: بسم الله عليج ...شيوخ شفيج .. شيخه بوهن ...: ماااشي ...بس جبدي كانت لاعيه بعد مارجعت ارتحت ... غلا وبعد خلصت من الصلاه وهي تفسخ الجلال هي وشهود اللي متحجبه بجلال نور ...: شيوخ احسن الحين ...؟ بعد مارجعتي .. ووقفت جنب نور .. نور : شيوخ اعطيج حبوب مالت اللوعه .. شيخه ..: لالالا مايحتاج احس اني احسن الحين ... حصه : شيوخ جبتي دوا القولون معاج .. شيخه : ايه ..في الشنطه ... حصه : يمكن القولون ملتهب ... شيخه : عطيني الشنطه ..باكل حبه ... نور : اكيد بيلتهب ...من الشطه اليوم في الكفتريا ...صابتها كلها على الجبس ... شيخه ...: اشتغلت وضحى الثانيه ... حصه : شيوخ ...حرام هاي صحتج مسؤوله عنها امام رب العالميين .. شيخه : انزين خلاص فكووني من الصدعه وعطيني الحبوب ..وهي اطالع حصه ومابي امي تعرف .. حصه وهي تعطيها الشنطه ...: معليه ...بس هالمره ...ياويلج ..ان عدتيها ... شيخه وهي تضحك وتبطل الشنطه ..: معليه ... نور : شيوخ هاذا وانتي تسوين رجييم ...لازم ..شبس وشطه ..لين اطيحين علينا مره وحده ... شيخه : نوير ضفي ويهج ... اللي يجوفج مره ماتعسينه ...الله يرحم الكبت المسكر ... غلا : انزين يالعوانس ...بلا هذره زايده ..يله ننزل ..نخلص اللي ورانا ...وانتي شويخ ريحي شوي .. شيخه : لالالالا باكل حبوبي وبانزل ...ناقصه وضحى تتطلع لي تسوي لي محاظره ..وتحط حرة حمد فيني ... نور : بصلي وانزل انا ويها .... غلا : يله انزين خلصوا ...وطلعت هي وشهد ..اللي كانت تلعب في الجلال ..مسويه روحها فله وترقص مثلها وهي تغني اغانيها ... ------------------------------------------- ماسك الجوال ويسمع بتملل ..ويرد بشكل آلي ...: ايه ...معليه ...ماقدر ...لالالالالا..بجوف بعدين هالايام ماقدر اجوفج ...اوكي يله انا بدخل الميلس عندي ريايل ...باي خالد سكر الجوال ..وهو زهقان منها ...مايسوى على عطيتها ويه لزقت وتبي تشوفني بعد .. صج بنات مغسول ويهها بمرق ... ماتستحي ..بكيت ويهها ... دخل الميلس ..كان ابوه قاعد هو محمد ..واثنين من جيرانهم ...سلم عليهم وقعد جنب محمد اللي يطالعه بنظرات ..: وينك ؟ خالد : رحت الحلاق ...ليه ..؟ محمد : انزين كان قلت لي ...البيت يبغون اغراض ..وان من مغرب ملتزم بهالشيبان .. خالد : والله شاسوي تدري دوامي من فير مافي وقت ..وبعدين وينهم عيال العم ..ماوصلوا للحين .. محمد : مادري للحين ...بعدين تو الوقت توها ست المغرب ...بعدين يله فارج لنور ...تبي اغراض من الدكان ... خالد : والدريول وينه ..؟ محمد : مطرشه ابوي ...ياخي بتروح والا انا وانت اقعد صب قهوه لشيبان .. خالد : لالالالا بروح ... --------------------------------- واقفين في المطبخ الثنتين ...ويوزعون اطباق الحلا في صحون التقديم ..نور تقطع وشيخه تحطها في قراطيس التقديم وتحطها في الصينيه ... شيخه : نوير جزاره ...قطعي قطع صغار .. نور : سكتي لاقطعج وحطج مع الفواله .. شيخه : لالالالا مايصير ...حلااي واييد ... نور : وععععععععععع ... شيخه وهي شايله الملعقه تبي تظربها فيها ...: وععع من شيفتج ... نور وهي رافعه السكين في ويه شيخه ..: بتؤلي ايه ...لالالا اسمعي بئا ...مش كل طير بيتاكل لحموه ..انا ائئطعك ووزعك على كل الحتت ...(بالمصري ) شيخه وهي تضحك ..: شعنده بوحه ..ههههههه نور وهي تضحك ..: بوحه بكيتج ...هالشين ..ريلج ان شاءالله ... شيخه : ههههههاااي ...لالالا..حبيبتي ...الا ريلج ...يصلح لج مثلج جزار .. نور : سخييييييييييفه .. شيخه : مب اسخف منج .. نور : خلصي يله خلي نخلص نروح نلبس ..قبل لاتجي اميره زمانها ..وتشوفنا جذي عشان صج تنتفخ علينا .. شيخه : نوير ..تغاريين منها عشانها حلوه ..صح ..؟ نور بجديه وهي اطالع شيخه ..: ليه شيوخ انتي خابرتني كذا ..؟ شيخه : مب قصدي ...بس انتي وايد متحامله عليها ... نور : لان ...وايد رافعه خشمها علينا ...ذكرتني ....بخلود .. شيخه : الله يرحمها ..نوير انسي .. نور : كنت ناسيه لين ذكرتني هالريم فيها .. شيخه : نور ..سامحي ..صاحب شأن خلاص عايش حياته ...ولايفكر .. نور : لايكون غارج بسكوته ...ترى يوفه نار مانطفت اخوي واعرفه بحر ..محد يعرف له ...بس الله يرحمها ..حتى في موتتها ذبحته ..مب كافي ذبحت روحه وهي حيه ... شيخه : الله يعينه ...بس ماظن ريم نفسها ..ريم على الاقل مب قاعده في بيتهم وتتامر ..تشتغل يعني لها كيان ..مستقره نفسيا ...مب مثل خلود .. نور : ماادري ...شيوخ ..مادري ... بس ترى احنا مانستاهل .. شيخه وهي اطالعها بحنان ..وقربت منها ولمتها بحنان ..: اهم شي انكم عندي تسون الدنيا ومافيها .. نور طرى على بالها شي ..كان في ايدينها بقايا كراميل ....بعد مابعدت عنها مسحت الكراميل في ويهها .....شيخه شهقت من صدمه :يالخايسه ..كانت خدودها كلها كراميل ... نور شردت على طول وحطت ريلها داخل الفله ...شيخه كانت ادور شي ..عشان تحطه عليها ..حصلت بخاخ الدهن شلته ..وراها ..طلعت تركض .. بس ...لم تكمل المشوار لأصطدامها ...بجسم قوي ...تناهي لمسمعها آنينه من الاصطدام ..وأحاطها بذراعيين قويين ..شيخه كانت مسكره عيونها ماتبي اتبطلها من الخوف ..شيخه سحبت نفسها بسرعه وهي وترتجف ..بطلت عيونها بشوي ...كان جدامها بياض ثوب وذقن ملتحي بشعر خفيف ..رفعت عيونها شوي ..لتشتبك ...مع عيون سود ..متروسه مرح ..وبريق غريب ...داعب اطرفها مثل التيار الكهربائي ...وزاد من ايقاع قلبها ..ونظم تنفسها ..بلعت ريقها بصعوبه ...وانسحبت من جدامه بخطوات متعثره ... وراحت للفله ..من غير لاتشوف جدامها كانت تشوف كل شي ابيض ... خالد دخل المطبخ وهويبتسم ...مسح خده بأصبعه ...وطالعها كانت مغطاه بالكراميل ..اكيد من ويه شيوخ ..ضحك ...تذكر شكلها ...رجع يطالع صبعه ...وقربه من ثمه وذاقه ..احلى كراميل ...خذ الفاين ومسح ويهه ...وهو يبتسم .. ----------------------------------- شيخه دخلت الغرفه بويه ثاني من غير لاتجوف اللي قدامها ..نور كانت واقفه عند الكبت اطلع له ملابس ...طالعت شيخه بستغراب ..شفيها ...شيخه فسخت الجلال ...ودخلت الحمام من غير لاتعلق بشي ..او اللي صار معاها ....وقفت قدام المرايه اطالع ويهها .. كان الكراميل منمسح شوي من خدها ....نزلت ويهها شوي للمغسله وغسلت ويهها بهداوه ...كأنها مخدره ...بعد ماغسلت ويهها .. رجعت اطالع نفسها ..تتسأل ...ليش كنت مثل الغبيه تنحت في ويهه ..ليش ماقلت شي ..لا وهاي ثاني مره يجوفني من غير نقاب ... اكيد بيقول اني قاصده هالشي ..ابيييه ...لايكون بس فهم شي ...بمووت بيقول اني ميته عليه وبيكبر راسه صج علي ..بس انا احبه ..بس مب هالطريقه ....مابي اقط نفسي على حد ...مب انا .... اندق الباب ..بشويش ...: شيخه ..شيخه فيج شي ...كانت نور خايفه عليها ... شيخه انتبهت لنفسها ..مابي حد يعرف عشان مايتفسر بشكل غلط ...شيخه رفعت عينها على رف جنب المغسله ..لمحت دبة بودره ..ضحكت ...وقت الانتقام ..شلت الدبه وفتحتها وهي تضحك ..وقفت عند الباب وفتحته بسرعه وظغت الدبه بقوه ...تطايرت البودره البيضاء في وجه نور .... نور وقفت في مكانها منصدمه ...كان ويهها ابيض مثل المهرج ...وحمدت ربها انها كانت لابسه الجلال ..: شيووووووووووووخ .. شيخه رجعت للحمام وقفلت الباب ..وهي ميته من الضحك والخوف من اللي بتسويه نور فيها ..وبتحدي ...: عشان ثاني مره ماتتحرشين في الشيخه بنت حمد .. نور بقهر وهي ادق الباب بقوه ..: بطلي يابنت حمد ...يالبايخه ..اذا ماحلقت راسج على الصفر بطلي .... شيخه ..: تهبيين انتي وخشتج ... نور انقهرت منها ...: شيوخ ..والله فيج ..بس اصبري ... شيخه طالعت حوالينها ..جافت ..هووز الماي شلته وشغلت الماي وسكرت الفوه بأصبعها وفتحت الماي ....بطلت الباب بيد وحده.. نور كانت واقفه وحاطه ايدينها على خصرها .. شيخه ..: حركه وحده بس ..وتلوميين نفسج .. نور : يالخبله ..بتخيسين غرفتي .. شيخه : كيفج ..ماتبينها تخيس ...عطيني وعد ماتسويين شي .. نور بقهر : يالجبانه .. شيخه : عيل ..اظمن روحي ..عشان ماتكليني .. نور : وععععععع من حلاتج ...خلاص ...وعد ماسوي شي ...بس طلعي من الحمام اغسل ويهي ..قبل لاحد ايي ... شيخه وهي تسكر الماي ..: ترى وعد الحر دين ...طلعت بتوجس .. نور فسخت الجلال ..ودخلت الحمام اللي كانت شيخه تطلع منه وكفختها على راسها ..: فارجي بس .. شيخه وهي ماسكه راسها ..: بكيتج .. -------------------------------- دخلت بيت عمها وهي تمشي بخطوات مغصوبه ورى امها ..بعد مانزلهم فهد هو وسعد ودخلوا الميلس ...كانت رافضه ترووح ودار بينها وبين امها جدال قوي ...لين تدخل فهد ..وقال لها ..:انتي روحي اليوم وحكمي منفسج ..وبعدين لج حرية الراي تروحيين لهم ولا لأ وعد محد يقول لج شي .. ريم ماكانت مقتنعه بس عشان فهد مايزعل منها ...وتقصر المشكله ...ويمكن فضول بعد اللي ساعد قرارها في الذهاب او دافع اخر لرؤية صاحب النظرات الجليديه .. دخلوا صاله كبيره مفروشه بسيراميك البيج واثاثها فستقي راقي ...كان فيه ثلاث نسوان قاعدين ..وحده كبيره في السن اللي جات هذاك اليوم مع بنات عمها وحده قاعده جنبها اصغر منها واصغر من امها ...وجنبهم بنت من عمرها او اصغر ...كانت جوز العيون اطالعهم بفضول ..وترحيب دافيء ..هز ريم ..واحرج موقفها ...اللي كانت ماخذته .. ام جابر وهي واقفه ومعنزه نفسها على عصاتها ...: يامرحبا ..اقلطوا فديتكم .. ام فهد وهي تسلم على ام جابر ..: الله يرحب بج يالغاليه ... ام جابر : حياكم الله ..استهلت وامطرت ..واسفر البيت .. ريم سلمت على ام جابر ..اللي مسكتها بحنان وباستها ...: حياج الله يابنيتي ... ريم حست بموج حنان يعتري صدرها من مشاعر هالعيوز بس مابينته لانها مب متعوده على هالمشاعر ..سلمت على وضحى والبنت اللي كانت جنبها ...وقعدت جنب امها .. ام جابر : هاذي بنتي وضحى واللي جنبها بنتها مها .. ام فهد : مرحبا بهم .. وضحى وتمسك طرف النقاب ..: الله يرحب فيج ... ريم كانت في عالم ثاني تستكشف البيت بنظراتها كل زاويه وكل قطعه تبحث عن اجوبه لاتعرف أسألتها ...لفت نظرها صوره على طاوله قريبه ..صوره واحد لابس نظرات وبنيه صغيره في حظنه ملوي عليها ويضحك ...نفسه ..نفس الشخص ..ولد عمها اللي جافته في كارفور وعرفت اسمه من فهد بعدين ..محمد ..وبنته شهد ...اهو نفس الشخص اللي اقلق مضجعها ...ومنعها من النوم والتفكير السوي ..ولا من اللي كان يتوقع انها تدخل بيت عمها ..والسبب هو ..وعيونه الجليديه ....كانت تبي تعرفه وتعرف نظرته لها ... قطع حبل افكارها دخول ثنتين ...وحده لابسه تنوره سودا وقميص حريري مخطط بالابيض وشيله ..بس قصيره شوي ..والثانيه اطول منها لابسه تنوره بيج وبدي نمري مزين بالورود الزرقاء وشيله ...بس القصيره عيونها نفس عيون محمد وشهد ..اكيد وحده من خواته ..سلموا عليها وعلى امها وقعدوا ..وام قميص الاحمر مسكت الدلال وقعدت تصب قهوه وتمدهم فيها ... ام فهد وهي اطالعها ببتسامه ..: انتي نور ولاغلا ...؟ نور وهي تمدها بالقهوه وهي واقفه والدله في يدها ..: نور فديتج .. ام فهد : عاشت الاسامي يانور .. نور بخجل يصبغ خدودها الخاليه من المكياج ...: عاشت ايامج يمه ... ام فهد ابتسمت لها من ورى نقابها ...كانت اطالع نور وهي تقهوي يدتها وخالتها وتسولف عليهم ... كانت خالقه جو حلو حوالينها .. قطع حديث نور دخول وحده ثانيه طولها فارع ..لابسه تنوره حريريه سوداء مزينه بورود بيضاء ولابسه معاها قميص أبيض ..نزلت الصينيه اللي تشلها هي والخدامات اللي يشلون مثلها صواني عليها انواع الحلا ..سلمت عليهم وقعدت جنب شيخه بخجل ... نور بتعريف ..: هاي غلا ..واللي جنبها شيخه بنت حمد بنت امي وضحى ..وطالعت خالتها وضحى تدري ان وضحى تنقهر منها اذا قالت لها امي وضحى تتحسسها انها عيوز ...وضحى طالعتها بنظره ..هيين بعدين ... ريم كانت اطالع شيخه وغلا ونور اللي واقفه قريبه منهم توزع الحلى في صحون ..كانوا يتبسمون ..ريم حست بالحسد لانهم كلهم مع بعض ...بس نفضت هالافكار من راسها ..مب محتاجه حد ...انا بنت عبدالعزيز الكل يتمنى يتعرف علي ...مب محتاجه هالزمره البايخه ولفت ويهها بكبرياء .. نور الحركه مافاتتها ...كان ودها تكب صحن الحلا فوق راسها ..بس مسكت اعصابها عشان يدتها مب عشان ويهها الكريهه ..ريم مدتها بصحن الحلا ...وهي طالعها بنظرات ..هاه شعندج .. ريم طالعتها برود ..ورفضت بحركه من اصابعها ..: لابس مشكوره مابي ..ماكل حلا .. نور في داخلها احسن وفرتي ...نزلت صحن على طاوله قريبه من ريم ..ورجعت توزع على الباقيين ...بعد ماخلصت قعدت ..وقالت لغلا ..: قومي صبي قهوه .. شيخه : شعندها ست الحسن ..لاتكون تسوي رجييم مثلي نور : بكيتها ..لولا يدتي كان دفنتها هني في الصاله .. شيخه : ماعليج منها ..لاتعطينها الزله تقبظها .. نور : قهرتني ..عكس امها ...الطيبه كلها تفيض منها ... دخلت شهد بفستانها الابيض المزين بالورود المطرزه الصفراء ...لزقت في نور ودفنت ويهها في زندها ..مستحيه من الحريم ..نور شلتها وقعدتها في حظنها وهي منزله راسها ...: شهووده من وين يايه ..؟ شهد برائه وهي ماسكه شعرها ...: بلا ..(برى ) نور : عيل وين نوره .. شهد : بلا ... نور وهي تنزلها من حظنها وتوقف ...: انزين يله نسلم على خالوه ...ودتها تسلم على ام فهد وريم وهي كارهه خطواتها صوبها ..ام فهد خذت شهد في حظنها وحبتها وسمت عليها ..بعدين ودتها صوب الريم ...اللي كانت اطالع شهد بنظرات كلها حنان وحب وخذتها في حظنها ..تحت نظرات الدهشه من نور ... ريم ..بعاطفه ..: حبيبي ..انا اللي كنت في الجمعيه تذكريين .. شهد هزت راسها ..: امووووه ..( عموووه ) ريم : ايوا عموه ريم .. شهد : اييم ...اتي حووه ..(ريم انتي حلوه ) ريم : انتي حلوه ؟ شهد : ايوا .. ريم : عيل خلاص انا بعد حلووه مثلج .. شهد وهي تسحب نقاب ريم ..: اتووف .. نور اللي قعدت جنبها ..: شهد عييب ..فكي نقاب عمووه .. شهد طالعت ريم بنظرات كلها برائه ...ريم بحنان ...: عادي خليها ...ريم رفعت نقابها ...تحت نظرات البنات اللي بغت تطلع من محاجرها .. شيخه وهي تساسر غلا : والله يحق لها الخقه ..مشاء الله عليها ... شهد وهي تحط ايدينها ورى رقبت الريم ..: اموووه حوووه وباستها في خدها بقووه .. ريم ضحكت على طفولية شهد ...ولوت عليها بعاطفه جياشه ...وباست شعرها ....: فديت الحلوه ..شهد دفنت ويهها في صدرريم ...ريم طالعت شهد بحنان ...اللي خلى نور في حيره ...شلون ريم بغرورها تحظن شهد ...وبمشاعر حقيقه ..نور لانت شوي من صوب الريم ...يمكن لان الريم فاقده هالحنان ...بس امها مبين عليها طيبه ...مادري بس هالريم مب نفس ماتوقعت ..كسرت صورتها القبيحه ... نور بلطف ...: لاتعطينها ويه زياده بتلزق .. ريم وهي تلعب في خدود شهد .....: عادي ..خليها ..فديتها الله يخليها لكم ... نور : تسلميين ...ريم .. ريم وهي اطالع شهد ماتبي ترفع عينها لنور ..ماتدري ليه بس كانت ماتبي ترفع راسها ...: هلا .. نور : ريم ..في اي مدرسه ادرسين ... ريم رفعت راسها لنور ..وطالعتها ...: مدرسة ال..... الثانويه ادرس ثالث ثانوي علم نفس ... نور : مشاءالله ...اول سنه ..؟ ريم : ايه ...شلون عرفتي ...؟ نور : مبين من شكلج صغيره مب اكبر مني وايد .. ريم استحت ...: وانتي ادرسين بعد ..؟ نور : في المستقبل ...هالسنه تخرج ...رياض اطفال ... ريم بشعور ماتعرف تفسره ...حست انها كانت خاذله هالناس بشعورها كانت حاقرتهم وهم جازوها بالطيب ...: الله يوفقج .. نور : يميع ..شهد يله قومي عييب روحي لعبي مع نوره ..ومسكتها من يدها .. ريم مسكت يد نور : لا............ خليها ....نور ....انا .....سكتت شوي .................. نور : ريم ...شفيج قولي ... ريم وهي تنزل عيونا بأحراج .....: نور ...يمكن بديت معاكم بدايه خاطئه ...وانا .. نور : ريم حن عيال اليوم ...لاتفكريين في اللي مضى ...وانتي ماكنتي تعرفيين حد منا عشان تحكمين ..واحنا ماكنا نعرفج ..عشان جذي خذنا موقف غلط ... ريم ..: نور ماكان ودي ...بس الانسان فيه مواقف مايقدر يتحكم في نفسه ... نور : ريم خلاص ...احنا خوات اليوم ...ومسكت يدها بحنان ...وضحكت .. ريم : شفيج ..؟ نور : طالعي شيخه بنت خالتي وغلا اختي شلوون يطالعونا ...كانهم بقر جايفه حريقه ... ريم ضحكت ...: لهدرجه كنت لعينه مستغربيين مني اي شي .. نور : بعض الشي .. ريم : والله صريحه بنت العم .. نور : بعض الشي خخخخخخخخ ... ريم حركت يدها ..تناديهم يقعدون معاهم ..شيخه وغلا قاموا وهم يطالعون بعض بستغراب ..وقعدوا جنب نور وهم يطالعون ريم .. ريم : ترى ماأكل .. شيخه : صراحه كان جايني انطباع انج اكلة لحووم بشريه ..ههههه ريم : والله من اللي معطيج هالانطباع ..؟ شيخه وهي تمد يدها على بنات خالتها ..: هالبقرتيين .. ريم وهي تضحك ..: الله يسامحج ترى ما أسمح بنات عمي .. نور : تحيا بنت العم .. شيخه : عشتووو ومالت عليكم من الحين دقيتو حزب .. ريم : ايه مب عاجبج ظربي راسج في الطوفه ...شكثرهم ..اختاري وحده ... شيخه : صج من ال .... عليكم طول لسان ... البنات طفسوا من الضحك ......وكانت هناك عيون اطالعهم ببتسامه ..وامل ...الحمد الله قدرت تندمج معاهم ...الله يسامحه ابوها اهو اللي خرب شخصيتها ...الله يرحمه ...وطالعت اللي جنبها بقميصها الاحمر كانت داخله مزاجها عدل ..كانت من النوع النادر من البنات تربيه حريم اول ...الاحترام والخجل ..ام فهد كانت سرحانه في نور تبني لها مستقبل في فكرها ... --------------------------------------- كان يمشي وفي يده دلة الشاهي ومتوجه للمطبخ ....وقبل لايدخل سمع صوت ضحكه نسائيه ناعمه ...جنب المطبخ مكان الالعاب شهد من الدورفه والزحليقه .. حط دله على طاولة المطبخ وقال للخدامه ..تسوي شاهي ... وطالع من المطبخ والفضول ذابحه يبي يعرف من اللي قاعد هني ..خصوصا المكان مظلم جزئيا ً ....قرب شوي ..وسمع صوت بوضوح ..: خلاص التوبه ..ماعيدها ...بس انت لاتزعل ....والله ماعيدها فديتك ... خالد تيبس مكانه هاذا صوت شيخه ....من هاذا اللي تكلمه بهالطريقه جليله الحيا ...بذبحها ...خالد والشر يتطاير من عيونه راح له وهي قاعده على الدورفه وترسم بريلها دواءر ... شيخه انصدمت من خالد خصوصا انها كانت رافعه ناقابها ...سكرت التلفون بخوف وعدلت نقابها ...: خاااالد .. خالد وهو يزبد ..: ايه خالد ..يالي ماتستحيين هاذي نهاية تقة هلج فييج .. شيخه بصدمه ..: شتقووول ..انت شتخربط ...؟ خالد وهو يمسكها من زنودها وهوينفضها ويصارخ فيها ...: لاتمثليين علي ... منهو ...قولي وهو ينفضها ... شيخه من انلجم لسانها من الصدمه ومنكثر مانفضها تشتت افكارها ....خالد ولع زياده يوم جافها ماردت عليه ...: شييوخ منهو .. قولي والا ذبحتج .. شيخه وهي تحاول تخلص نفسها من قبضته ..بس خالد مافكها ..: خالد فكني ..مالك حق تمسكني فكني .. خالد : لا مب فاكج ليين تقوليين .. شيخه وهي خايفه ..: شقول لك فكني ...لاحد يجوفنا ...شبيقولون ...خالد تكفى فكني ...وانترست عيونها دموع ... خالد : يعني هاللي مخوفج ...واللي تسوينه ماخفتي منه ... شيخه وهي تصارخ ..: خالد شسويت ...؟ خالد بغضب يغلي في صدره ..: لاتصااااااارخيين ..مابقى الا انتي اطوليين حسج ... شيخه بلعت الم كلماته ..لهدرجه مااسوى عنده شي ...وانحدرت من خدها دمعه ونزلت راسها ...: ممكن تقولي شتتكلم عنه ..؟ خالد : هالخايس اللي تكلميينه ..ماتسحيين ...خساره فيج امي وضحى وحمد ..مايستاهلوون وحده خايسه مثلج ..توطي روسهم تالي عمرهم ... شيخه ...انصدمت ..من كلامه ..خالد يعتقد اني اكلم ريال غريب ...انا شيخه بنت حمد ...اسوي جذي ...تجمع غضب العالم والاهانه في صدرها ...ودزته من صدره بقوه غريبه ...وطالعته بنظرات كلها نار الاهانه ..ومسحت عينها اللي نزلتها منها دمعه عشانه ... ورفعت يدها في وييه ..: يكوون في علمك حمد يعرف يربي ...وربى ريال مب حرمه ...والحمد الله حافظه نفسي قبل لاحفض اسم ابوي ...ويكون في علمك بس ...قبل لاتطلق اي حكم ...اللي كنت اكلمه ........................ابوي ....سمعت يالشيخ ....ابوي ... ومدت جهاز الجوال في ويهه ....: تفضل شيك ..عشان تصدق ... خالد ...حس برود في اطرافه ..وحراره في راسه ...ظلمتها ....حس نفسه انسان تافه ..طالعها بنظرات كلها اسف ...بس شيخه ...كانت تغلي من الغضب ...طالعته بأسف وهزت راسها ...: الله يسامحك على هالثقه ...ومشت من قدامه ...وخالد متجمد في مكانه ..ماتحرك مازال هول الصدمه شال اطرافه ...مايعرف شلي صار معاه معقوله كان اعمى البصيره ....مايدري بس من سمع ضحكاتها ..واعتقاده انها تضحك لحد فوورت الدم في راسه ...مايعرف ليش ...بس ..كره هالشي ...وكره نفسه انه ماوثق فيها ... حط ايدينه على خصره وطالع السما وتنهد بحرقه ... ------------------------------------- بعد ماتعشوا ...قعدوا يسولفون ونور ملاحظه غياب شيخه من اطلعت تكلم ابوها مارجعت ...يمكن راحت للغرفه ..حتى مارضت تتعشى يوم طرشت حصه ..يمكن عشان ابوها اول مره يسافر ...بس هي متعوده على دوامه الشفتات .. لالالالا شيوخ فيها شي ..نور كان بالها مشغول ولاسمعت جوالها اللي في حضنها يرن .. نور : الوووو محمد : سنه لين ترديين .. نور : كان بعيد مني ..كذبت عليه عشان مايلعن خيرها .. محمد : انزين ابوي يبنا كلنا في الصاله الصغيره احنا وعيال عمج ومرة عمج وبنتها ... نور : ليش ..؟ محمد : وانتي شلج ...بس تعالوا .. نور : اوكي يله جايين .. نور بغت ام فهد وريم ..اللي استغربت هالاجتماع ....نور: انا بروح اللبس عبايتي ... نور وغلا اصعدوا فوق يلبسون نقاباتهم وعباياتهم ...لان لبسهم كان ضيق ...نور دخلت الغرفه ...حصلت شيخه قاعده على الكرسي جنب الدريشه وطالع برى .....:شيووخ .. شيخه طالعتها بملامح جامده ..: هلا .. نور وهي تقعد على السرير ..: شفيج ... شيخه ببتسامه ..: ماشي ...ليش نور وهي تعرف شيخه عدل تحاول تخفي ..: شيوخ مب علي شفيج ... شيخه : ولا شي بس اشتقت لبوي .. نور ارتاحت شوي ..وقربت منهاولمتها وهي واقفه ..: دانا ماما وبابا وكل حاجه ...بس مدايئش خلئك ..ياحببتي ..وباست خدها .. شيخه ضحكت ..: وانتي شعندج ابله عطيات شعندج شاله العباه .. نور وهي تلبس العباه وتضحك ..: الله يسلمج عيلة ال....عندهم اجتماع سري ...مغلق وابوي يبنا كلنا تحت ... شيخه : هههها ..انزين ..لاتنسين عاد قوللي لي اسرار عيلتكم الموقره .. نور : خلي اجوف اول شيبون بعدين بفكر .. شيخه : مالت ... نور طلعت من الغرفه بعد ماعدلت عباتها ونقابها وشيلتها ونزلت مع غلا تحت لصاله ..وخذوا معاهم ام فهد وريم وتوجهوا لصاله .. ودخلوا كان الكل قاعد سعد وفهد ومحمد وخالد وابومحمد ...: حياكم تعالوا ... بعد السلام قعدوا ام فهد وجنبها ريم ونور وغلا ...ام فهد ..: خير يابومحمد موصي علينا .. ابومحمد : الخير بوجهج ياأم فهد ...انا اليوم جامعكم ...عشان نلم شمل العيله ...وننسى اللي صاير ..ونبتدي صفحه جديده ...واحنا عيال اليوم ..ولازم نسي اللب فات عشان نعرف نعيش ويعيشون عيالنا ..بعد من الحقد الماضي ...ونقرب القلوب من بعض ..اظن يكفي بعد وهجر في هالعيله ...لازم عيلة ال......ترجع مثل اول عيله متماسكه وقويه ... نور رفعت عينها اطالع اخوانها تبي تعرف ردة فعلهم ....محمد كان عادي كانه متوقع كلام ابوه او عارفه بس ينطر ردة فعل الطرف الاخر ..خالد .........كان في عالم ثاني مب عارف شلي يدور حوالينه ...نور استغربت ..خالد توقعت انه بيكون له ردة فعل قويه ..بس ماكان مهتم في الموضوع مشغول فكره ...شفيه خالد ...؟ قطع حبل أفكارها ..نظرات تخترقها ...مالت بعينها لشخص اللي من دخلت تحاول انها ما أطالعه ...كان يطالعها بنظرات ...ماعرفت تحدي ام سخريه ..نور عطته نظره ولفت يعني ماتهمني ... فهد ضحك داخل نفسه ..: يبه ...احنا من يدك اليمين لشمال ...ومثل ما قلت تعبنا من القطيعه .. ابومحمد ارتاح وابتسم بعيون متروسه دموع ...: تسلم ياولدي هاذا العشم فيك ... فهد قام وحب راس عمه وسعد معاه ..محمد وخالد وقفوا جنب ابوهم اللي مستانس ..وخذوا عيال عمهم بالاحظان بفرحه ...ام فهد انترست عيونها دموع هي وغلا...اما نور على قد ماكانت فرحانه بفرحة ابوها ...بس كانت كارهه هالعلاقه اللي بتجمعها مع فهد .. ولد عم بكيته ... ريم كانت مشاعرها مختلطه ...خايفه وفرحانه ...خايفه من هالمجتمع اليديد ..ومن صاحب النظرات الجليديه اللي مازال يطالعها فيها ...كانت بتموت من نظرته من شوي بس لف ويهه مايبي يطالعها ..ريم شي داخله تزعزع ... فهد نادى الريم وقفها جنبه وحط يده على ظهرها ...: يبه هاي الريم ..الريم سلمي على عمي ... الريم طالعت ابومحمد ...كان طويل نسبيا والشعر البيض صابغ لحيته وشعره ويتخللها بعض الشعيرات السوداء...كان الحنان والطيبه يشع من عيونه ...ريم قربت منه ...وحبت راسه ...وسقطت من عينها دمعه ...ابومحمد لمها لحظنه ...ريم ماصدقت ... انهارت في حظنه من الصياح ...كانها لقت ابوها ...بس شخص حنون وطيب ..كريم المشاعر ...ابومحمد قعد يمسح على ظهرها .. ويهديها لين تمالكت نفسها ..: بس يابوج مابي اجوف هالدموع كيفي ..نبي نسمع ضحكه .. ريم ابتسمت بحنان لعمها ...: ان شاءالله يبه .. فهد بضحكه ..:فضحتينا ...ريم هاذولا عيال عمج محمد ابو شهد وخالد .. خالد : حياج الله ريم .. ريم بخجل : الله يحيك .. محمد برود للحين مب متوقع اللي صار من شوي ...وين بنت عبدالعزيز ...اللي ماخلت كلمه الا وقالتها ...لالالا...هاي اكبر ممثله ..انا متأكد وراها شي ...مستحيل بعد الكلام اللي قالته ...تنهار جذي ..اكيد تمثل ...: اهليين بنت العم .. ريم برودته جمدت اطرافها ...وهزت قلبها ..ريم نزلت راسها عشان مايكتشف ..ردة فعل نظرته ..: الله يحيك ولد العم ..كان تهتز من وهي تنطق .. بعد ماقعدوا ..فهد تعمد يقعد قدام نور ...وكل شوي يطالعها بنظره ناريه ..احرقت اعصابها ..بس نور ترد له نظره بأقوى منها .. وفهد يضحك من داخله ...: يبه مادام كلنها مجتمعيين بغيت اقول لكم ان عمتي عفراء بتيي ..الليله ..متأخر وبتستقر نهائي ... ابومحمد انصدم عفراء ..يبدو ان افكاره ماراح تنجح ..مثل ماتوقع ... -------------------------------- نهاية الفصل الخامس