[taman]

اليوم بتتعرفون على نمر وسبب اسمه

وفي البارتات الاخيره بتعرفون سبب اسم عوق

اول النجوم كانت لنوف بنت نايف الي توقعت ان عوق لقيطه وكان توقعها بالبارت الاول

وتوقعات كثيره اصابوافيها البنات بتظهر بوقتها بأذن الله

البارت اهداء للجميع وخصوص البنات الي حفظهم شوي صعب ويتعبون با المذاكره

.

.

.


تعالوا معاي نشوف وش صار على عوق المزايين



البارت الثالث..
.
.
.



خلااااااااااص تعبت ..تعبت ..من التفكير...!

احس نفسي ادور بدايره مغلقه...,


ماني عارفه البدايه من النهايه فيها...

والحين انا صرت على مفترق طرق ...,

مستقبلي الدراسي

وخصوص ان هذي اخر مرحله لي لازم اشد حيلي...

وامسك سلاح بيدي يحميني من دوائر الأيام ..!

اواستسلم لأحزاني واضيع مستقبلي ...؟

خلاص عوق اذا ما تقدرين تنسين الي عرفتيه

على الاقل تناسيه الوقت ماهو في صالحي لازم اسابق الوقت ...

امي اذا عاشت اليوم الله اعلم بكراوعقب عين امي ما ادري وش راح يكون مصيري..

يارب تحفظ لي امي وتمد بعمرها الي حمتني وضفتني تحت جناحها

وهي ماتدري وش بتشوف مني بيصدق فيني مقولة ابن الحرام ماينفع فيه معروف ..

اواني برد لها الجميل الي سوته فيني..؟


.

.

.

من يوم لقيت الاوراق وفي اقل من 24ساعه حسيت اني كبرت اضعاف عمري

كيف بتقبل حياتي الجديده اني لقيطه..!

وكل تصرف خاطئ يصدر مني ولو با الغلط بينقال ماعليها شرهه بنت حرام..!

.

.

.

اكيد الكل عارف اني لقيطه...

والا عهود ماتكلمت من فراغ يا ما جلست مع اهلها وصديقاتها وكانت عوق اللقيطه محور حديثهم

وانا الي كنت عايشه بوهم الله يسامح الي جنوا علي وجابوني لدنيا رموني با النار وكلن شاف حياته..

امي يمكن ذبحوها اهلها وارتاحت من عذاب الدنياوابوي رجال ما يعيبه شي ..!

الله اعلم كيف ارتبط مع امي بعلاقه..!

هل كان ابوي ذئب بشري استدرجها والحلم الوردي انقلب كابوس..؟

بعد ما أعلن عن قدومي لدنيا..

او يمكن صور لها ان نهاية حبهم العذري راح يعيشون بجزيرةالاحلام ما تضمهم الا هم الاثنين..

وبعد ما طيحها بمستنقع الرذيله تركها تغرق با المستنقع..

واكيد هرب من حياتها ونسى الي سواه ...,

والعذر انه رجل وتاب وعيب الرجال بجيبه


يا ترى درى ان امي جابت له بنت او يمكن طلب من امي تتخلص مني والحين عايش مرتاح وغلطته اندفنت تحت التراب وانمحت

.

.

.

وصلت للمدرسه بوجه ثاني حتى صديقاتي المقربات انعزلت عنهم ابي بس اختلي بنفسي..

يسألوني وش فيك عوق والجواب للجميع شوي ارهاق لاتشغلون بالكم


.
.
.

من اليوم ببدا عوق جديده

عوق اليوم غير الامس

.

.

.


مرت الايام وقاربت السنه الدراسيه على الانتهاء...,


و مستواي الدراسي تقدم بشكل ملحوظ...,

انا حفظي جدآ صعب ولي طقوس با الحفظ عندي سبوره كبيره طريقة حفظي انسخ الماده الي راح احفظها عشرات المرات

اذاكر بصوت عالي على الرغم من ان طبعي هادي ومن كثر ما اكتب على السبوره حتى اصابع ايدي صارت تتحسس واحيان تتورم


صوتي يتعب من كثر ما اكرربصوت عالي الدرس الي بحفظه

امي تنزعج من صوتي ماتسمح لي بعض الأوقات اذاكر عندها اذا هي جالسه بمظلتها

تقول انتي صوتس طويل لا يمر واحد من الجيران ويسمعه

بيتنا فيه غرف فاضيه ما نحتاجها بماان البيت مافيه الا انا وامي

حولت وحده من الغرف الي فصل مدرسي لكن بشكل مصغر سبوره وطباشير وكراسي وطاوله

ومرات اتقمص شخصية معلمه ومرات طالبه المهم اني احفظ الماده بأي طريقه كانت..!!

حتى شخصيتي حسيت اني صرت عدوانيه وانانيه وبسرعة اتنرفز...!

كانت دفاتري با الماضي تنتقل بين زميلاتي...,

بمااني مجتهده ودفاتري كامله...

صرت ارفض اعطي دفاتري بحجة انها ناقصه ..!

اواقولها صراحه الفصل مليان بنات موجودين مع المعلمه طوال الحصص ..!

او وش معنى دفاتري بس الي عليها طلب ..!
.

.

.

قطعت علاقتي بكل صديقاتي الاوحده كان بيتها قريب جدآمن بيتي وامي كانت تقول اهل البيت هذا اهل بيت صالحين


ابوصديقتي رجل كبير با السن وامها شابه صغيره

وامي كانت تسمح لي في بعض المرات اني اطلع اذاكر عندها او هي تجي عندي نذاكر مع بعض

وبماان اخوانها اطفال صغاروابوها رجل مسن كانت امي ماتخاف علي اذا اجتمعت فيهم,

سبحان الله الحياه لها انظمه عجيبه..!

زوجة جارنا بنت صغيره جميله,

وزوجها رجل كبير في السن وبناتها واولادها تحت سيطرتها

فيهم ادب ومتفوقين دراسيآ على الرغم من ان الاب كان لايقرا ولايكتب وزوجته تعلمت بمدارس محو الاميه

تعليمها المتأخر مامنع ابدآ انها هي المربي لهم..

ودائمآ تكرم زوجة جارنا بمدرستنا بأنها الأم المثاليه..

اعجب جدآمن مقولة تربية حريم..!؟

زوجة جارنا حرمه لكن قدرت انها تدير اسره كبيره..

مكونه من خمس بنات وثلاث اولاد تربيه وتعليم با الرغم من وجود الاب الذي كان مجرد ظلال لهم...!

وكثير عوايل اولادهم مع وجود كل المقومات الي تعين على تنشئة جيل صالح الاانهم يخرجون للمجتمع شباب فاسد مستهتر..!


احب زوجة جارنا وحكمتهاوحسن تدبيرها لشؤن اسرتها والاهم حب جارتناام ابراهيم لأمي..

.

.

.

انتهت الامتحانات النهائيه والمرحله الحاسمه في حياة كل طالب الثانويه عامه..

وفي انتظار النتائج...؟



.

.

.



قبل تطلع نتايجنا بأيام سمعت مره امي تكلم شخص با الهاتف



ام عوق\ انا علمتها العلم جو متأخرين وصحوتهم ماعادفيها فود لا لهم ولالناوش عاد بيتغير...

....\....

ام عوق با اصرار\الكلام النهائي عطيته مشاعل قبل خمس شهورقلت لها مالكم شي عندي,الا اذانفذتوا شرطي

يا ساره انا حرمه مريضه ولا عدت استحمل مثل قبل وانا ما جبرتكم انتم الي جبرتوني ,

والله اني اتماسك علشان بنيتي اخر تلفون لمشاعل اتعبني ونومت با المستشفى بغى يروح على البنت اختبارها وهي اخر سنه

ساره\....

ام عوق\مالكم شي عندي والا ترى ما يردني الا باب الاماره

ساره\....

ام عوق ببغضب\من الي يدورالفضايح غيركم ربكم ستركم والحين بتفضحون عمركم..


ياساره فكوني من شركم وخلوني اعيش بسلام انسوني مثل ما نسيتوني قبل ..


امتس ماصدقت اني ابعد عنها انا هجيت في بنتي وحطيت بيني وبينكم ديار

ساره\....

ام عوق \لا والله ماالومها..!!

ساره\....

ام عوق\اي بالله هذا اخر ماعندي ومشاعل تدري ان بنتي بتضركم اكثر من ما تنفعكم لكن البلا منتس انتي ساس البلا من دريتي وانا ماني بخير

ساره\....

ام عوق\قولي وضحى تقول انا على كلامي الي انتم خابرينه ذيك السنين وامتس شاهده عليه..


لا تحرثين النار ياساره والله ان اول من بيحترق بها انتي..!

ساره\...


ام عوق\ انتم الي غيرتوا كلامكم..



ساره\...


ام عوق\لاتجون ولا ابي اشوف منكم احد ماتت وسميه الله يرحمها انقطع قلبي عليها ما حضرت عزاها ما ابي احد يشك بشي


ساره\...

ام عوق با استهزاء\ ما تدرين وليه ماحضرت العزا

ساره\....

ام عوق\وان شافو الناس البنت معي وش بيقولون انا ماني مثلكن شوفتي عند عيني انا نظرتي امدها لقدام

ساره\...

ام عوق\ الله يعوض عليكم وتلقون له علاج من غير بنتي..

ساره\.......

ام عوق\وهذا آخر ماعندي ومع السلامه..!
.
.
.


دخلت على امي بعد ما سمعت المكالمه الي مافهمت منها الا ان امي يوم ارتفع ضغطها كان بسبت تيلفون رفع ضغطها

طيب مين الناس الي امي كلمتهم يعني يمكن ناس بيخطبوني وامي رافضه

انا كبرت وكل يوم اسمع وحده من زميلاتي انخطبت..!

اكيد هم عيال حموله وانا بنت حرام وامي خايفه علي..

لكن امي وش تقصد من كلامها ربي ستركم وانتم بتفضحون عمركم والا نظرتها لقدام..!

وشكل السالفه فيها احد مريض طيب انا وش دخلني ..!

بسأل امي عساها تعطيني وجه ..!

سلمت على راس امي وقعدت اقهويها قلت يمه من كنتي تكلمين

.
.
.


ام عوق\ وحده مبطيه عنها وبعدين وش له تسألين

ام عوق بحده\متى بس تظهر نتايجكم

عوق\ يمكن اسبوع ... يمه وش ودتس ادرس ترى انا ادبي يعني تخصصاتنا محدوده

ام عوق\ وانا امتس ادرسي الشي الي تقدرين عليه وانتي اخبر بنفستس

ماهو تبركين لحمل ما تقدرين تشيلينه ثم يطيح عليتس ويذبحتس

وشوفي ريم بنت ام ابراهيم وش ودها تدرس ترى البنيه جيده وذهين بسم الله عليها اجود منتس

يا الله قومي دقي على ام ابراهيم خليها تجي ولا تكثرين البربره با التلفون

كلمت ام ابراهيم جارتنا وجات عندنا بسرعه هي عارفه ان امي ما تطلبها الا لشديد القوي

وقعدو يسولفون قالت امي لأم ابراهيم ريم وش ودها تدرس

ام ابراهيم\ ما ادري لكن بتستخير بين الدراسات وعلم النفس والي فيه خيره يقدمه الله

التفتت علي ام ابراهيم \ وانتي ياعوق وش ودتس ترى الدراسات زينه بنات عيال عمي يمدحونها

عوق\ ما ادري بشوف ريم ونتشاور

ام عوق\ كان ودتس تروحين لريم روحي بس لاتأخرين

ام ابراهيم\ روحي بسرعه ترى ريم بالشه بعمرها من صبح وهي وخواتها يقلبون غرفتهن

يبون الغرفه تكبر يقولون يمه غرفتنا صارت صغيره

ام ابراهيم بضحك\الغرفه هي هي بس بناتي فضن من الدروس ولا عاد لهن شغل الا مناظر غرفتهن

ام عوق\ يا نوره ازهمي نمر جعلي ماخلا منه يجي ياخذها

.
.
.

نمر ولد ام ابراهيم عمره سبع سنين وامه سا محه له متى ما بغيت مشوار ناديته يطلع معي ومسمينه المحرم

اسم نمرله حكايه بسيطه

خالتي ام ابراهيم قبل تولد نمر كان قبله 5بنات ولد

وكانت تتمنى ولد امي حلمت حلم فسرته لخالتي ام ابراهيم انها بتحمل وبيجي لها ولد

وتحقق حلم امي ان ام ابراهيم تحمل ومولودها كان ولد

وطلبوا من امي تسميه وسمته على ابوها نمر



استأذنت من امي وام ابراهيم كلمت على بيتها وعلى طول جا نمر طاير بياخذني لخواته..

وتركت امي وام ابراهيم لأن واضح ان امي تبي تصرفني بأي طريقه والا با العاده ما تخليني اطلع لريم الا بعد حب خشوم..!


.
.
.

دخلت بيت ريم لقيتها مثل ما قالت خالتي ام ابراهيم قالبين الدنيا

يا حبي لعايلة ام ابراهيم خمس بنات بغرفه وحده لكن كنهم بنت وحده فيهم ادب ربي يحفظهم وماخذين الحياه ببساطه

.
.
.

عوق\ ريم وش بلاتس حايسه الدنيا

ريم/ تعرفين نشاط بعد الامتحانات وتغيير..

وبعدين الغرفه احسها صايره حيل زحمه ابي طريقه اقدر ارتب سراير خواتي ويتغير شكل غرفتنا..!



واحوس مع ريم وارسل على شغالتنا تساعدنا وبا الاخير قدرنا نرتب الغرفه بطريقه ارضت ريم وخواتها

غرفتهم حيل كبيره لكن الاسره كان وضعها عشوائي وكان باين شكلها زحمه

وصار حتى مكان جلسه حلوه


.

.

.



جلست انا وريم باالجلسه وخواتها كل وحده ترتب ملابسها واغراضها بهدوءما شاء الله عليهم

وريم تعطي الاوامر من بعيد على ان اعمارهم مقاربه لبعض لكن احترام بينهم عجيب

عوق \ ريم وش بتدخلين ..!


ريم\ما ادري ودي علم نفس وامي تبي دراسات مثل بنات عيال عمها..!

عوق تضحك\يعني لازم التقليد..!

ريم با استعطاف\ حرام عليتس تقول بيساعدونتس مافي احد منهم داخل علم نفس

ريم\وانتي وش قررتي..!

عوق بحيره\ ما ادري ..؟

عوق تتنهد بحسره\تدرين تحسفت ما دخلت علمي لو يرجع الزمن كان دخلته علشان ادخل طب والا حتى تمريض علشان اتوظف بسرعه

ريم با استغراب \ انتي صاحيه انا وهو انا ما فكرت كذا

شوفي انا ابوي رجال كبير ربي يحفظه ويعافيه واخواني صغار,

وضعنا المادي وسط وابوي محتاج وظيفتي وانتي عارفه اني لو بدخل علمي بتفوق فيه ..

لكن اهلي رفضوابسبب نظرة المجتمع القاصره لطب والتمريض للبنات..!

او يمكن في ناس في ها المجال تصرفوا تصرفات خاطئه

والناس اخذت فكره ولا راح تتغير ..!

وانتي ما شاء وضعكم المادي ممتاز انتي وخالتي وضحى يعني ماراح تشيلين هم الو ظيفه’

طيب وش رايك ندخل دراسات ان شاء الله بنمشي فيها انا وانتي وبنجيب معدلات عاليه


عوق\ لااا الا دراسات ما راح ادخلها

استغربت ريم \ حرام عليك عوق هذا وانتي تبارك الله ملتزمه تقولين كذا لاتلفزيون ولا اغاني ما شاء الله

وملتحقه با التحفيظ..

والدراسات ان شاء الله بتزيدك وتغذي ايمانك بربك..,

عوق با استدراك\ماهو قصد لكن ان شاء الله اني با ابقى كذا ولا تنقطع صلتي بربي وبعدين المحاضرات الي نحضرها انا وامي..


ولا تنسين حلقة التحفيظ الي ادرس فيها..

كلها من فضل ربي تقوي ايماني ..

لكن انا ابي تخصص غير اخدم فيه نفسي ومجتمعي

ريم بضحك\ ياهوه على المواهب المندعسه عند عوق بتطلعها الايام..!

عوق با استسلام\خلاص ريومه بستخير واشوف والي فيه خير يقدمه الله..؟

ريم تضحك فجأه

عوق با استغراب \بسم الله عليتس وش بلاتس تضحكين

ريم\اضحك تذكرت الامنيه الجديده لتس ..

عوق بخوف \وش امنيته ..


ريم با استهزاء\ قبل شوي وش قلتي ماتبين كلية طب..

عوق بحسره\رحم الله امرء عرف قدر نفسه

ريم بترجي\ لاتكفين عوق لا يكون زعلتي علي ماخبرتس زعول

عوق\لا والله عادي انتي صادقه اصلن انا انجح با البركه ربي سبحانه شايفني وعارفن حالي معطيني على قد تعبي واكثر

ريم \ لا والله انتي مجتهده يا عوق ولا تقصرين على نفستس بشي تسوين الي عليتس والتوافيق من الله وان كان همتس الوظيفه تراها نصيب

على طاري الطب ولد خالي نواف الي يدرس با امريكا طب رجع اجازه وابوي عازمه بكرا تكفين تعالي بكرا خلينا نستانس

عوق بضحك\ يا حضه يدرس طب ..!!

ريم بتهكم\الله يعينا بكرا على بنات خالي قال نواف وسوى نواف مافي احد درس طب با الكون غيره

عوق \ تلومينهم اخوهن فرحانات فيه واول واحد بعايلتكم بيصير دكتورهو

ريم تضحك \لا بالله مانيب لايمتهن عسى الله يوفقه ويصير اكبر دكتور على مستوى المملكه

رجعت لبيتنا مع الشغاله والمحرم نمر ونادته امي وقالت نمر يا بوي قل يارب انك تفرج عنا كل ضيقه

رد نمر وهو مستحي من امي وخدوده حمرت وقال يارب تفرج عنكم كل ضيقه


.

.

.
سلمت على راس امي ولاحظت عيونها محمره

سألتها وجوابها كا العاده مافي شي

دخلت غرفتي الكبيره الواسعه مافيها الا سريري

وكل مافيها يخصني بس انا من يوم امي عمرت لنا البيت خصصت الغرفه هذي لي وهي اكبر غرفه با البيت المفروض تكون لها

لكن امي رفضت تقول انتي بنت وغريضاتس واجد الغرفه هذي ما تصلح الا لتس

حسيت غرفتي صارت موحشه ومرات احسها تخنقني من عرفت اني لقيطه..!

غرفة ريم وخواتها رغم زحمة الاسره الا انها فيها اؤنس غريب..!

عكس غرفتي الي كانت فرحتي فيها ما تنوصف اول ما سكنا بيتنا لكن تغير كل شي ..

ريم كانت تغبطني على غرفتي الحين تبدل الحال انا الي اغبط ريم...


قعدت افكر بكلام ريم شكلها بتدخل دراسات وتبيني معها

كيف يا ريم ادخل دراسات وادرس الحلال والحرام وانا بنت حرام القسم هذا ماهو لي

المواريث واحكامها حكم التبني اللقطاء..!

وكلها اشياء مخالفه لواقعي وانا ما احب ..

اسوي شي عكس الي بداخلي..

ادرس المواريث وانا امي وضحى كل الي يخصها حولته با اسمي سواء كان هبه او بيع وشرا..

واقولها يمه وهي ماهي امي ..؟

بستخير وانا نفسي مايله لعلم النفس يمكن القى علاج لنفسيتي ووضعي الي انا عايشته

.

.

.
مرت الايام وظهرت النتايج ودخلت ريم دراسات وانا دخلت عربي علم النفس كان يبي معدل اعلى من الي جبته


وبدأت مرحله جديده من حياتي الدراسيه الحياه الجامعيه تختلف اختلاف جذري عن المراحل الي قبلها...!!


(كلمه اخيره)

أصاب العمى رجلآ فكان عالة على مجتمعه وأصاب العمى " إبن باز " فكان عالم عصرِه * إن الأحداث لآتصنع حياتنا ولكن ردة فعلنا هي التي تصنع الفرق !*


الي الملتقى قريبآ بأذن الله

وسالفه جديده


طيف الأحباب

ام الوليد