عرض مشاركة واحدة
قديم 20-07-12, 12:10 AM   #17

درة الاحساء

نجم روايتي ومشرفة سابقةومصممه

 
الصورة الرمزية درة الاحساء

? العضوٌ??? » 213582
?  التسِجيلٌ » Dec 2011
? مشَارَ?اتْي » 6,499
?  نُقآطِيْ » درة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond reputeدرة الاحساء has a reputation beyond repute
افتراضي

[CENTER]الج 16 زء ..
لطوف : ساروه حمد ضايقج بشي ؟؟
قلت : لا ..
لطوف : عيل ليش جي خليتينا نقوم ؟
قلت : ما قدرت استحمل القعده معاه ..
لطوف : ساروه انسي .. انسي ..
قلت : ما اقدر .. لا تطلبين مني شي مب بيدي ..
لطوف : للحين تحبينه ؟؟
قلت : لا تسأليني ؟
لطوف : بس انا ابي جواب .
قلت : شيهمج اذا انا احبه والا لا .. هو تزوج خلاص ..
لطوف : لا يهمني ..قووولي .. انتي تحبينه ..؟
قلت : هذا كان حبي الاول .. ولازم بتأثر اذا شفته ..
لطوف : تحسبين هالجواب كافي .؟
قلت بملل: ايه كافي ..
لطوف : شفيج عصبتي ؟
قلت : ما عصبت.. بس انتي تسأليني اسأله انا ما اعرف جوابها ..
لطوف : لازم تعرفين جوابها .. لانج راح ترتبطن ما واحد ..
قلت : منو ؟
لطوف : انتي غبيه والا تسغبين .. راكان ما قلتي انه خطبج ..
قلت : امبلا بس انا للحين ما قلت رايي ..
لطوف : يعني بترفضين ؟
قلت : ليش لا ..؟
لطوف : لان لازم يكون عندج سبب مقنع .. وانا اللي عرفته عن راكان منج انه ولد حبوب وحليو ..
قلت : بس اذا رفضته تكون لي عذاري الخاصه .. مب الكل لازم يعرفها ..
لطوف تنهدت : بروح اجيب لج شي يبرد اعصابج ويهديج ..
تنهدت وتسندت على الكرسي .. صج انا ما ادري شفيني اليوم .. وبالذات يوم شفت حمد ..
ذكرت ربي عشان اهدأ شوي .. مب وقته قاعده في بيت ناس ومعصبه ..
يات لطوف ومعاها عصير ..
لطوف : تفضلي .
قلت : دام فضلج ..
حطيت العصير على الطاوله ..
قلت : اسفه لطوف .. كنت معصبه شوي ..
لطوف : عادي فديتج .. مراعيه شعورج ..
سكت وانا منزله راسي ..
لطوف : المهم .. ما قلتيلي .. شراااااايج في كشختي ؟؟
فصخت شيلتي : تجننين .. اسميه خالي انهبل ..
لطوف انحرجت : مشكوره ..
ضحكت : ههههههههههههههه يحليلج ..
قلت : ما قررتو متى العرس ؟
لطوف : توه من سكر من عندي من شوي قال لي شرايج بعد شهر ..
قلت : لااااااا .. قريب .. عرس هجور بعد شهر ..
لطوف : شاسوي .. قلت له قريب .. هو يبي جي ..
قلت : عيل اذا حجر الفندق روحي جهزي عمرج ..
لطوف: ايه اكيد .. انا من امس ابتدت رحلتي ..
قلت: الله يوفقج فديتج ..
لطوف : ويوفقج انتي حبيبتي
رن جوالي .. شفت المتصل خالي ..
رديت : هلا خالي ..
خالي : اهلين .. وينج ؟
قلت : في الصاله مع لطوف ..
خالي : انا طلعت من بيتهم ها .. بروح مع الربع .. اذا بترجعين البيت قولي حق تركي والا خالد يجيبونج .
قلت : انزين ليش ما خذتني معااك .؟
خالي : مادري .. ما قلتي .. اذا تبين تروحي اتصلي لهم ..
قلت : اوكي ..
خالي : يلا مع السلامه ..
قلت : في امان الله ..
قلت : راح ..
لطوف : راح مشاري ؟
قلت : ايه راح .. ما خذاني معاه .
لطوف : يااسلاااام .. وتبين تروحين بدون عشا ..
قلت : كاهو خالي راح ..
لطوف : خالج برويه شغله .. بس خلني اكلمه ..
ضحكت : ههههه .. زين بقعد ..
وتمسكنا نسولف ونضحك .. وجابت لي صور رحلتهم .. وتمت تعلق وتقول مغامراتها في المكان .. والله وناسه فرنسا ..وشوي اسمع صوت حمد ..
حمد من ورى الباب : هوووود ..
لطوف : حمد بيدخل ..
قلت : شيبي ؟
لطوف : مادري ..
عدلت قعدتي ولبست شيلتي ..
لطوف: تعااااال ..
نزلت راسي نطرته يروح غرفته ..
حمد : شخبارج ساره ..
رفعت راسي لقيته قاعد مجابلني وجنبي لطوف ..
طالعت لطوف وقلت : بخير ..
حمد : شمويه ؟
قلت : ما شي ..
حمد كأنه يتطنز : حبيتي غيري ..
طالعته باحتقار : لا مخطوبه اخوي ..
شفته وكأنه انصدم ..
حمد : من صجج ؟
قلت : ليش انت مب متوقع اني اتزوج والا شلون ؟
حمد : لا توقعت للحين حبي في قلبج ..
قلت : وشلون احبك وانت تزوجت غيري بعد ما وعدتني بالزواج ؟
حمد : بس انتي تدرين ان السالفه مب بيدي ..
قلت : حمد ارجوك ما ابي اتكلم في هالسالفه .. لو ما انخطبت وتزوجت شبتسوي انت يعني .؟
حمد : بتزوجج ..
قلت : لااااااا والله ..
حمد : ساره انا للحين اح ,,
قاطعته : لا تقص على روحك وتقص علي .. اي حب اللي تتكلم عنه وانت متزوج حاظرتك .. دام انك تحبني على قولتك ليش تزوجت ..؟
حمد : انتي تدرين يا ساره ومافي داعي اعيد هالسالفه ..
قلت : وانا مب مستعده اخذ واحد يبيع حبه عشان ناس قالوا له اترك حبيبتك وتزوج غيرها .. هذا اصلا عذر ما يقنع احد ..
حمد : بس امي مب اي احد .. امي هي اللي قالت لي ..
وقفت : على العموم آسفه اذا ازعجتكم .. انا رايحه .
لطوف وقفت ومسكت يدي : لا سااروه . الحين حمد بيروح ..
قلت : لا لطوف مره ثانيه .. الوقت تأخر ..
حمد : من اللي خطبج ؟
التفت عليه : هذا ما يخصك ..
حمد : يعني ما يصير اعرف ..
لطوف : بس حمد بس .. البنت في بيتك احترمها عاااد ..
خذت شنطتي وطلعت برع .. ولطوف وراي ..
لطوف : سوري ساروه .. ارجوووج مسحيها في ويهي .
قلت : ما صار شي ..
مسكت قبضه الباب ..
قلت : مع السلامه ..
ورحت بسرعه ما ابي حد يشوفني امشي بروحي .. وصلت البيت ودخلت الصاله ..
قلت : السلام عليكم ..
تركي : من وين يايه ..؟
طنشته ورحت غرفتي بسرعه وطحت على السرير وانا اصيح ..
ليش شفته ياربي ليش .؟؟ ليش رحت بيتهم .. آه ياربي .. ابي انساه .. ابي انسى ..
سمعت طقه باب ..
رحت الحمام بسرعه .. وغسلت ويهي وطلعت .. لقيت تركي واقف عند باب الغرفه .. طالعته ..
تركي : من وين يايه ؟
قلت : من بيت لطوف ..
تركي : يا سلااام ..؟ وبأذن منو رحتي ؟
قلت : خالي كان معاي ..
تركي : وينه الحين .؟
قلت : راح مع ربعه ..
تركي : تدرين لو جايه بروحج البيت ما بيحصل لج خير ..
قلت : ليش يعني .. انا يايه من باار ؟
تركي صرخ علي : لاا تطولين لسااااانج ..
قلت : وانت كله مكبر السالفه وبس ..
تركي : يعني انتي يايه من بيت بوحمد بروووحج ..
قلت : ايه بروحي ..
تركي : ومشاري ؟
قلت : خالي طلع قبلي وراح مع ربعه .. وانا جيت بروحي .. ما اعتقد ان البيت بعيد .. كلها خطوتين ..
تركي صرخ : بس انتي تدرين السالعه كم الحين ؟؟
طالعت السعه لقيت1 ..
تركي : شوفي سوير .. انا طلعتي مكان حتى لو مع مشاري .. بدون علمي ما تلومين الا نفسج ..
صرخت : لااااا يكون زوجي وانا مادري ..
ما وعيت الا انا على الارض .. لانه صفعني صفعه فرت راسي ..
تركي هدى شوي: شوفي ساروه .. انتي الطيب ما نفع ولا العنف .. شتبيني اسوي فيج ..
صحت : يعني انا شسويت الحين ..
تركي : شلون تطلعين في نص الليل بروحج .. ترى كله هذا خوف عليج .. بس انتي ما تفهمين ..
غطيت وجهي بيدي وتميت اصيح .. جا تركي وضمني لسدره .. ما صدقت خبر .. على وزاد صياحي ..
تركي : بس خلاص زين .. انا آسف .. واذا ما كررتي اللي سويتيه ما راح امد يدي مره ثانيه ..
ما صدقت ان هذا تركي .. بس نفس الصوت .. نفس الشكل .. نفس العنف .. بس هالحنيه ما مرت علي ..
قام تركي عني ..
تركي : قومي غسلي ويهج يلا ..
قمت وانا حاسه ان جسمي مكسر .. رحت غسلت ويهي وانسدحت على السرير بملابسي ونمت ..
حسيت بضيق .. فتحت عيوني لقيت نفسي نايمه بملابسي .. اوووف .. قمت رحت الحمام وبدلت ولبست لي بيجامه .. وصليت الظهر وطلعت .. لقيت امي توها نازله من فوق السطح .. اكيد تنشر الملابس ..
قلت : السلام عليكم ..
امي : وعليكم السلام ..
قلت : وانتي للحين تنشرين الملابس فوق السطح .. ما تطورتي ..
امي : بعد شلون اتطور .. انتشرهم في غرفتي .؟
قلت : ههههه لا اشتري لج نشافه .. وهي بتنشف كل الملابس ..
امي : يصير خير ..
رحت قعد في الصاله وحطيت على برنامج مال الفن والرسم ومادري شنو وقعدت اطالعه ..
خالي دخل : السلام عليكم ..
قلت : وعليكم السلام ..
خالي : شخبار ؟
قلت :زينه ..
خالي قرب صوبي وهمس لي : ما ردت امج جواب ..
قلت بنفس النبره : على شنو ..؟
خالي : على ابووج ؟؟
قلت : لا والله ما ردت ..
خالي يصوت : فاااااااطمه..
قلت : شنو بتقول لها ؟
خالي : بتسمعين الحين ..
امي : هلا مشاري .. خير .؟
خالي : شنو ردج على راشد .؟
امي : اي رد ؟
خالي يطالعني ويطالع امي : شفيكم انتو اليوم .. يومين ونسيتو السالفه .. ردج على راشد موافقه انه يرجع لج والا لا .. لانه مللني. . كل يوم يتصل لي ..
قلت : امبلا امي موافقه ..
امي : من قال لج ..
قلت : عيل ؟
خالي : مب موافقه ..؟
امي : من قال لك ..؟
خالي : ياااااااااااااااااااااااا اااااااا .. حيرتيني معاج ..؟
امي ابتسمت : موافقه ..
نطيت عليها وبوستها تبويس ..
قلت : فديتج يمه والله ..
خالي : مبرووووك يالعروووس ..
امي شكلها انحرجت وراحت ..
وانا وخالي تمينا نضحك .. وشوي ويدخل تركي..
تركي : السلام عليكم ..
انا وخالي : وعليكم السلام ..
تركي : وين مشاعل عنكم ؟
قلت : مادري انا من قمت ما لقيتها ..
راح غرفته وخالي بعد .. وانا رحت المطبخ اساعد امي ..
حطينا الغدى في طاوله الطعام الجديده ويا خالي وتركي ومشاعل .. وكلنا ..
تركي قام: ساره بعد الغدا ابي اكلمج ..
بعد لقمتي : خير ,,
تركي : خير ان شالله ..
انسدت نفسي .. مادري حسيت ان في مشكله يايه في الطريج ..
غسلت يدي ورحت الصاله .. ما شفت تركي .. رحت غرفته ولقيته قاعد على السرير يقرى جريده ..
قلت : خير ..؟
تركي : تعالي قعدي ..
قعدت جنبه وانا انتفض ..
تركي : ما سمعنا رايج ..
قلت : في شنو ؟
تركي : في راكان ..
قلت : بس انا للحين ما فكرت ..
تركي : والريال ينتظر الرد منج ..
قلت : بفكر ..
تركي : انا ما راح اجبرج نفس ما جبرتج على ماجد .. بس كل ما تكبرين اكثر فرصه الزواج تقل ..
قلت : انا مب ملتقعه على الزواج .. الزواج اصلا من اخر خصوصياتي .. وانا بعد مب من كبري .. توني ياهل .. الا غايوه اللي مزوجينها وهي بزر ..
تركي : يعني شنو ؟
قلت : مادري ..
تركي: ابي جواب الحين .. موافقه على راكان والا ..
حطيت يدي على قلبي .. ما عرفت شاسوي .. اخاف اقول قراري واندم ..
تركي: السكوت علامه الرضا .. بس ويهج ما يدل على جي ..
قلت : مادري يا اخوي مادري ..
تركي تربع : شوفي .. راكان غير عن ذياب ..
بطلت عيني وطالعته ..
تركي : ايه غير .. ذياب حركاته طايشه وللحين ياهل .. يركض ورى البنات وورى الموضه في كل شي .. يعني ما يصلح كزوج .. اما راكان ماشالله عليه عين الرزانه .. رجال والنعم فيه .. محامي عود ويعتمد عليه ..وهو قد الزواج ..
نزلت راسي .. xxxxxه ..خايفه اظلمه اذا خذته .. واخاف هو يظلمني ..
تركي : ما قلتي شي ..
سكت ..
تركي : اذا مب موافقه عطيني خبر .. ترى الرجال ينتظر .. بيني وبينج هو امس كلمني يستعجلج في الرد .. بس انا قلت لج اليوم ..
قلت : اوكي خلاص ..
تركي : شنو خلاص .؟
نزلت راسي : موافقه ..
تركي ابتسم وباسني على راسي : مبرووووك .. مبروك مقدما ..
قلت : الله يبارك فيك ..
طلعت من غرفته ورحت غرفتي على طول .. انسدحت على السرير افكر ..
آه .. ان شالله ما اندم على هذا القرار .. هذا مصيري ياربي ..القرار اللي اتخذته صحيح والا لا .. آآه ياربي انا متحاره ..
دخلت علي امي : الف الف الف مبروك ياحبيبتي ..
باستني وبستها : الله يبارك في حياتج ..
قلت : يمه ..
امي : نعم ؟
قلت : متى بترجعين حق ابوي .؟
امي : مادري .. مشاري يكلمه .. انا مادري ..
قلت : اوه عيل عرسي وعرسج مع بعض .. هههههههههههههه
امي : هههههههههه .. الله يسندر بليسج .. انا مب مسويه شي ..
قلت : لا يمه لازم نسوي حفله صغيره .. وعقب تروحون فندق ..
امي : ههههههههه شدعوه تونا معاريس .. اذا رجعنا بيكون يوم عادي .. ما بسوي حفله ولا شي .. وبنام في بيتي ..
قلت : يه شدعوه ..
امي : ايه حبيبتي .. كيفي ..
قلت : اوكي كيفج ..
طلعت امي ودخلت مشاعل : مبرووووك حبيبتي ..
ابتسمت : الله يبارك فيج ..
مشاعل : واخيرا باحظر عرس ..
قلت : انتي ما سويتي عرس صح ..
مشاعل : ايه ما سويت .. لان ابوي كان متوفي من سنه .. وما حبيت اسوي عروس ودوشه .. سوينا حفله بسيطه وخلاص ..
قلت : مشاعل ودي اسألج سؤال .. بس ابيج تجوابيني بصراحه ..
مشاعل : قولي حبيبتي .. اسمعج ..
قلت : بتجوابيني بصراحه ..
مشاعل : امممممم ايه بجوابج ..
قلت : انتي كانت لج علاقه مع تركي قبل لا تتزوجون ؟؟
مشاعل بلعت برجها : تبين الصج ..
قلت: ايه ..
مشاعل : ايه كانت لنا علاقه ..
قلت : من متى ؟
مشاعل: والله من زمان .. كلمته بالصدفه .. حسبالي اخوي . لان يختلف على اخر رقم .. وانا بدال ما اضرب 6 .. ضربت 5 واتصلت حق تركي .. وطلع نفس الصوت .. هههههههه لا تذكريني ترى افتشل ..
قلت : ليش ؟ شقلتي له ..
مشاعل : هههههه كنت متهاوشه مع اخوي الصغير وجر شعري .. وانا اتصلت حق مشعل اخوي على اساس يكلمه ويهاوشه ..
قلت : انزين ..
مشاعل : اتصلت حق تركي وانا مادري وقلت : مشعل تعال بسرعه شوف عزوز ..
تركي : من ؟
مشاعل : شووف عزوز طقني ..
تركي: طقيه ..
مشاعل : لا انت تعال هاوشه ..
تركي : انا بعيد ..
مشاعل : انزي هاك كلمه على التلفون .
تركي : لا ما ابي اكلمه .. انتي منو ؟
مشاعل : انا شعول ما تعرفني يعني .. والا رقمي مب مسجل في جوالك ..
تركي : لا مسجل بس انا ما شفت منو ..
مشاعل : انزييييييييييين هاوشه .. انا هددته فيك ..
تركي : انزين تأكدي انتي حق منو داقه تلفون وساعتها تكلمي ..
مشاعل تكلمني : عاد انا هنيه صخيت ..
ضحكت : هههههههههههه وتركي كمل معاج في البدايه ..
مشاعل : ايه كمل .. وهذا اللي خلاني ما اشك فيه .. لانه يتكلم نفس برود مشعل ..
قلت : وبعدين ..
مشاعل : وبس حفظ رقمي وتم يتصل لي ويقول : هااا عزوز طقج والا لا ..
ضحكت: هههههههههههههه ويتطنز بعد ..
مشاعل : ايه وانا كل ما يجيب لي السالفه اضحك وانحرج ..
قلت : والله خوش تعرف ..
مشاعل : اي بس لا تقولين حق تركي ..
قلت : ايه افا عليج .. ما راح ابطل حلجي ..
عقب ناديت : تركي ..!!
مشاعل : يااااااااماااااااااااال العافيه .. انطمي ..
ضحكت : هههههههههههههههه ..
عقب تذكرت .
قلت : لحظه لحظه ..
مشاعل :شنو ؟
قلت : بس انا سمعت محادثه بينكم .. ان تركي كان يبي يبات عندج ..
مشاعل تغيرت ملامحها ..
قلت : شفيج ..
مشاعل : لانا تزوجنا بالسر وعقب اعلنا زواجنا ..
قلت : وليش تزوجتو بالسر ..؟
مشاعل: مادري .. تركي شار علي .. وانا كنت اموت فيه . ما قدرت ارفض ..
قلت : امج واخوج يدرون ..
مشاعل : امي تدري .. بس اخوي لا .
قلت : انزين شلون ما حس ؟؟
مشاعل : مشعل دووم يسافر .. وما يقعد في البلاد ابد .. اذا بيطول في الدوحه يقعد شهر .. وهو مب داري عنا ..
قلت : وشلون تزوجتي .؟
مشاعل: امي قالت حق عمي الوحيد وعمي وقف معاي وساعدني ..
قلت : ما خفتي ؟
مشاعل : امبلا خفت .. بس تركي كان يشجعني .
قلت : وليش تزوجتو بالسر ..؟ ليش ما قلتو حق احد ..
مشاعل : انا ما كنت ابي اتزوج بالسر .. بس تركي اللي لزم علي ..
قلت : ليش ؟
مشاعل : اقول لج مادري .. وهذا الشي الوحيد اللي محيرني لليوم ..
قلت : ما سألتي تركي .؟
مشاعل : سألته .. سألته وايد .. بس دوم يضيع السالفه والا يقول السالفه طويله .. والا يقول مب مهم .. ما عرفت منه الجواب ..
قلت : انتي شنو تتوقعين ..
مشاعل : ممممادري .. بس انا شاكه في شي ..
قلت بلقافه : شنو ؟؟
مشاعل : كان هذا اول مشاورنا انا وتركي عشان نتزوج ..
قلت : ليش زواجكم كان له مشاوير ..
مشاعل : ايه ..
قلت : انزين ..
مشاعل : تركي قال لي بروح اخطبج من اهلج .. وانا قلت له الباب مفتوح حياك الله في اي وقت .. وبعد كم يوم تقدم لي من اخوي .. وقال لي تركي بعد ما طلع من بيتنا وكان معصب ..
تركي معصب : انتي ليش ماقلتيلي ان اخووج مشعل ؟؟
مشاعل : وانا شدراااني انك تبي تعرفه منو .. شسوى فيك .؟
تركي : انصدمت يوم عرفت ان هو اخوووج .. ويوم قلت له اني ابي اتزوجج رفضني ..
مشاعل : ليش انزين ..؟
تركي : تسأليني انااا .. بس انا ما راح اخليه .. ما راااح اخليه .. بتزوجج يعني بتزوجج ..
وسكر التلفون في ويهي .. وما اتصل لي الا بعد يومين ..
قلت : وما عرفتي منه السالفه ..
مشاعل : لا .. كان يقول ان مشعل كان يعرفه قبل .. يعني كانوا ربع ..
قلت : وهاي اللي مضايق تركي ..؟
مشاعل : مادري عنه ..
قلت : انزين شلون عقب تزوجتو .؟
مشاعل : كلمني تركي وقال لي إنا نتزوج بالسر .. انا قلت لا على طول .. بس هو قال انه يحبني وما قدري يستغنى عني .. وعقب لان راسي ووافقت .. وقلت له اني بقول حق امي .. وقلت لها وامي طبعا رفضت .. بس انا بكيت في حظنها وقلت لها ان مشعل ما راح يزوجني .. وانا بكبر ومشعل مب دراي عني .. وامي من النوع اللي بسرعه ينقص عليها لانها طيبه .. فقالت لي سوي اللي تبينه بس انتي اللي بتتحملين اللي بيصير .. وانا كنت واثقه من تركي كل الثقه .. وكنت متطمنه .. وقلت حق تركي وتزوجنا الحمدلله ..
قلت : شلون عقب اخوج وافق ؟
مشاعل : من قال لج انه وافق ..
قلت : عيل شلون اعلنتو زواجكم .؟
مشاعل : انا اقول لج .. رجع مشعل من السفر بعد ما صار لنا متزوجين شهرين .. وياني مشعل وقال لي ان في واحد خطبج مني ..وانا رفضته .. ومشعل يبي يغصبني عليه .. ورحت على طول اتصل حق تركي .. وقلت له .. وتركي عصب ويا البيت .. اللي هو بيتنا .. وتهاوش مع مشعل .. وانا في هالحزه كنت في غرفتي مع امي اصيح .. خايفه تركي يطلع من البيت ومشعل يذبحني ..
قلت بندماج : انزززززززززين ..
مشاعل : عقب تركي اتصل لي ..
تركي : شعول تعالي الميلس بسرعه ..
مشاعل :رحت الميلس مع امي .. ما قدر اروح بروحي .. واول ما دخلت الميلس لقيت مشعل وتركي واقفين جدام الباب وشكلهم معصبين ..
مشاعل : خير ؟
مشعل معصب: الكلام اللي يقووووله هذي صح ؟؟
مشاعل بخوف : اي كلام ؟
مشعل : زواااااااجج منه ..
مشاعل قربت من تركي : ايه صح .. انت رفضته .. وانا احبه وهو يحبني . وتزوجنا على سنه الله ورسوله ..
تركي : سمعت الكلام بنفسك .. اظن الحين لي الحق اني اخذها بيتي ..
مشعل : لا حبيبي .. بتطلقها الحين ..
مشاعل شهقت ..
تركي يضحك ضحكه استهزاء : اطلقها .. ليش انا تزوجتها عشان اطلقها ..؟
مشعل : انت خذتها بدون شوري ولا راي رجال ..
تركي : بس الحين القرار قرارها .. وانا ما انتظرك تقبل والا ترفض .. والحين انتهى الكلام اللي بيني وبينك .. ومشاعل بتجي معاي الحين ..
مشعل : سويتها .. سويتها ياتركي ..
تركي : انت اللي ما رضيت من البدايه .. وانا قلت لك اني بتزوجها ..
مشعل يطالع مشاعل : لا انتي اختي ولا انا اعرفج .. برررررررررررع ..
امي : مشعل استهدي بالله ..
مشعل : يمه انتي لا تتدخلين .. بنتج نجسه .. نجسسسسسسسه ..
تركي صرخ : احترم نفسك .. هذي زوجتي صارت .. وهي الحين بتاخذ اعراضها وبتجي معاي .. من زين القعده معاااااك ..
مشاعل تكلمني : وخذت اغراضي وانا اصيح وودعت امي .. ومن طلعت من البيت ما شفتها ..
قلت : ومن طلعتي من بيتكم جيتي بيتنا ..؟
مشاعل : لا سكنت في فندق مع تركي .. وقال لي انه بيجهز كل شي وبيرتب الامور وبياخذني بيتكم ..
قلت : وشلون كانت امي تستقبلج ؟
مشاعل : عادي .. رحبت وهلت .. اصلا امج عسل ..
تفتح الباب بسرعه خرعني .. شفت تركي واقف ..
تركي : انتي هنيه وانا ادورج ..
مشاعل : خير ؟
تركي : ليش مندسه هنيه .. تعالي ..
مشاعل قامت : ان شالله ..
رحت صاله شفت امي تسولف وهي منفعله ..
امي : لااااا انا مب طالعه من البيت يعني مب طالعه ..
خالي : فاطمه الله يهداج .. ما بيحذفج في مزبله .. بيوديج فله احسن من هالبيت ..
امي : بيتي وتعوت عليه .. ما اقدر افارجه ..
قلت : خير خير .. شصااير ..؟
امي : سمعي رمسة خالج .. يقول ابوج يبي يشتري بيت ثاني ويسكنا فيه ..
قلت : ايه يا زين ما قرر ابوي ..
امي : وانتي موااافقه .؟
قلت : ايه .. عادي ..
خالي : شفتي .. هذا البيت يا فاطمه قديم .. اذا انتي ما تبين تطلعين منه .. الحكومه بتطلعج بالغصب ..
امي : شخانتها الحكومه فيني وفي بيتي ..
خالي : خلاص هالمنطقه بياخذونها كلها .. وبيعطونكم بيوت يديده .. يعني روحي البيت اللي قال عنه راشد احسن لج ..
امي سكتت ..
قلت : واخير بنروح بيت ثاني ..
خالي : ايه صح .. مبروووك انتي..
ابتسمت : الله يبارك فيك ..
خالي : بكره الملجه هاا ..
قلت : بل بل .. بهالسرعه تبون تفتكون مني ..
خالي : ايه خلاص .. ياج نصيبج وروحي مع زوجج ..
رحت عند امي ولميتها : لا حبيبي .. انا بتم مع امي شوي .. ما ابي اروح بسرعه ..
خالي : انتي بتروحين بيتروحين .. بسرعه والا شوي شوي ..
قلت : لااااا خالي .. ابي اشوف البيت اليديد وابي احجز لي غرفه ..
خالي : ههههههههههههه قولي جي من البدايه ..
امي : هههههههههههه .
تركي : عيل يلا .. خلنا نرتب اغراضنا عشان نطس ..
ورحت غرفتي وفتحت الكبت وطلعت كل اللي فيه وحطيته على السرير .. فتحت الشنطه وقمت ارتب ملابسي .. وشوي الا دخلت علي مشاعل .. تخرعت .. دخلتها علي غريبه .. هي بالعاده تطق الباب .. شصاير ..
طالعتها مستغربه ..
مشاعل منزله راسها : ممكن ادخل ..
قلت : حياج مشاعل .. شفيج ..؟
مشاعل : طلع زواجي منه تحدي .. تحدي يا ساره تحدي ..
قلت : مشاعل شفيج ..؟ فهميني شصاير ..؟
مشاعل تصيح : طلع متزوجني عشانه متحدي مع مشعل ..
قلت : مشاعل اهدي وفهميني شصار.. شلون تحدي ..
يات وقعدت على السرير .. وانا قعدت جنبها ..
مشاعل مسحت دموعها : انا سألته .. سألته عن كل شي محيرني.. سألته ليش تزوجنا بالسر .. قلت له ابي اعرف كل شي الحين .. تم ساكت وشكله مستغرب من اللي اقوله .. صرخت عليه وقلت له يقول لي الصج .. وقال لي كل شي وياريته ما قال ..
قلت : انزين شقال ..؟
مشاعل : قال ان كانت له علاقه مع بنت .. وكان يحبها .. واكتشف ان مشعل اخوي اللي هو رفيجه يحبها بعد .. وتصادفو وصارت هوشه كبيره .. وراحت البنت حق اخوي مشعل .. وطلعت خاينه له ولتركي .. يعني طلعت تلعب عليهم هم الاثنين .. وتركي كان يبي يقهر مشعل .. وحلف انه يتزوج اخته .. وهو كان له علاقه معاي .. يوم عرف اني اخته تزوجني عشان يقهره ..
قلت : بس هو كان يعرفج قبل لا تصير هالسالفه ..
مشاعل : لا هالسالفه استوت قبل لا يعرفني .. يوم عرفني ما كان يعرف اني اخت مشعل .. ويوم خطبني عرف ان اخوي مشعل .. من جي عصب ..ورفضه اخوي .. يعني كان مصر على زواجي عشان يحر مشعل .. مو حب فيني ..
قلت : يعني تركي يكرهج ؟
مشاعل : ما اعرف عن مشاعره الحين .. انا اللي كنت اعرفه انه يحبني وانا احبه .. بس الحين ما ادري ..
انفتح الباب بسرعه .. التفت لقيت تركي ..
تركي : وينج انتي ..؟ رايحه تتشكين لها ..
مشاعل : اتشكى حق منوو ؟؟ يعني ما يصير اقعد مع اختك شوي اذا كنت متضايقه ..
تركي : وشنو اللي مضايقج .. عشان قلت الصج .. انتو يالبنات ما تحبون تسمعون الا كلام الغزل بس ..
قلت : شفيك تركي الله يهداك .. مشاعل ما سوت شي ..
تركي : انت سكتي .. " ويأشر على مشاعل " وانتي مشي يلاا ..
وراحت مشاعل مع تركي .. الله يستر شبيصر معاهم .. ان شالله ما يتهاوشون .. اوووف ياربي ..
رحت وحطيت في الشنطه كم لبسه وعقب انسدت نفسي .. رحت الصاله ما لقيت حد غير فطوم وميمي ..
قلت : وين ماما ..
ميمي : ماما داحل عفتها ( ماما داخل غرفتها )
امحق لغه ..
دخلت داخل لقيت امي ترتب اغراضها واغراض اليهال ..
قلت : متى بنطلع .؟
امي : ليش مستعجله .؟
قلت : لا بس اسأل ..
امي : مادري ..
تنهدت وطلعت .. تميت ادور في البيت .. تمللت ورحت انام ..
فتحت جوالي لقيت مسج ومكالمه .. فتحته لقيته من حمد ..
" انا اكلمج لازم تردين علي .. مب تطنشيني .. على فكره انا كنت محترمج عشانج كنتي في بيتنا .. والا كنت بطلع كل اللي في قلبي "وي هذا شفيه .. انا اشهد انه مب صاحي .. الحين على ذمته مره .. وانا قايله له اني مخطوبه ويسوي جي ..
شفت المكالمه بعد منه .. يوم رحت حق التفاصيل طلع هالكلام من يوم رجعت من بيتهم ..
بل ما شيكت على موبايلي طول هالفتره ..
حطيت الجوال على الطاوله اللي عند راسي وقمت البس بجامتي ..وانسدحت على السرير وانا افكر بحمد .. شسالفته .؟ شيبي مني .. خلاص انا ما ابيه ..على ذمته مره .. اووف .. ارقد احسن لي من هالتفكير .,
غمضت عيوني ونمت ..
حسيت باصابع يدي تعورني .. فتحت عيوني لقيت نصور وفطوم مشبصين على اصابعي ..
صرخت : آآآآآآآآآآآآآآآآآآآآآآآآآ آآآآآآآآآآآآآآآآآآآي .. قوووووموووووووووووووووووا ..
قاموا عني وهم متخرعين .. مسكت اصابعي اهمزهم ..
قلت : شفيكم .. هديتوا اكل البيت وجيتو على اصابعي .. متووووحشين ..,
رحت الحمام وتسبحت وطلعت .. نشفت شعري وكششته واستشورت غرتي وصليت الظهر وطلعت .. لقيت خالي وتركي ومشاعل وامي في الصاله ..
قلت : صباااااح الخير ..
امي : اي صباح .. الحين الظهر قريب العصر ..
قلت : عاد انا عندي صبح ..
وقعدت جنبها ..
قلت : شلونج ..؟
امي: وي شطاري عليج ؟؟
قلت : ولا شي .. بس مالكم بالعاده متجمعين في الصاله .. شالسالفه .؟
خالي : ماما اليوم اليمعه ..
قلت : ااهاااا ..
امي : ما حددتو الملجه ..
خالي : لا ما كلمت راكان بالموضوع ..
تركي :انا كلمته ..
طالعته بسرعه ..
تركي طالعني ..
خالي : متى حددتوها ..
تركي : بكره ..
شهقت : شنوووووو ؟؟
تركي : شوي شوي على احبالج .. بكره ملجه عاديه .. وعلى ما اعتقد مافي خطوبه .. لان العرس راح يكون قريب ..
امي : شلون يعني .؟
تركي : يعني بكره بيملجون و بيجيها ويلبسها الشبكه بدون معازم بدون حس .. وخلاص ..
قلت : بس ؟
تركي : وشتبين يعني .. اذا عرسج قريب شتبين في الخطوبه .؟
قلت : انا ما اابي خطوبه .. بس من قال لك ان عرسي قريب .. شنو انتو تحددون كل شي من وراي ..
تركي : لا مب من وراج هذا احنا قلنا لج ..
طالعت امي ابيها تتكلم .. بس ساكته ..
قلت : بس انتو تعطوني الخبر بصيغه امر .. مب خبر ..
تركي طفر: يه .. امر والا خبر شفرقت يعني .. بينقص من عمرج يوم ..؟ بكره الملجه وانتو حددو العرس .. بس على فكره .. راكان الي قال لي ان يبي العرس قريب ..
قام وراح غرفته .. طالعت امي بحيره ..
قلت : راضيه عن اللي يصير ..
امي : شصار .. اخوج قال الكلام الي قاله راكان ..
قلت : وهم يحددون كل شي وانا ما ادري .. ما بقى الا يحددون العرس وقبله بيوم يقلون لي ..
خالي : الحين شصار ..؟ خلاص الحين دريتي .. لا تكبرين السالفه ..
طالعتهم وفي قلبي حره قلت :الحين انا مكبره السالفه ؟؟ يجيني خبر ان بكره ملجتي وانا مادري .. وعرسي يقلون انه قريب وانا ما عندي خبر .. وبعد ما تبوني اتكلم .. شنو انا مب من البشر .. شنو جنسكم انتووو ..
وقمت رحت غرفتي ورقعت الباب وقفلته .. ما عرفت شاسوي من العصبيه .. مسكت المخده وقعدت اضربها في السرير انا اصيح .. اصيح على حالي .. مادري حالي بيتطور يوم بتزوج الا لا ..
هديت المخده لان حسيت ان يدي تكسرت .. طحت على السرير وضميت روحي .. رن جوالي .. ما شفت من المتصل .. حذفت على الارض وتفتح .. سمعت طقه باب ..
قلت : منو ؟
مادري كان صوت منو .. يا خالي يا تركي ..
رحت وفتحت الباب .. وانصدمت بوجود ابوي.. ايه ايه ابوي ..
صرخت : يبه ..
ابوي ابتسم .. وطحت في حظنه وانا اصيح .. وتم يمسح على شعري ..
ابوي : شفيج حبيبتي ..؟ من زعلج ..
قلت : وينك يبه .. ليش ما جيب من زماان ..
ابوي : كاني جيت حبيبتي خلاص ..
قمت عن حظنه وانا امسح دموعي ..
قلت : رجعت امي .؟
ابوي ابتسم : ايه ..
ما عرفت شاسوي من الفرحه .. نقزت عليه وحظنته ..
ابوي : هههههههههههه شوي شوي ..
خالي : وانا اقووووول وين راح راشد ..
ابوي ابتسم : يلا بكره بننقل البيت الجديد ..
قلت : صج ؟؟
ابوي يقلد صوتي : ايه .. الا وين غايوه .. ما تجيكم ..؟
خالي : امبلا تجي .. بس اليوم ما جات ..
غايوه من ورى خالي : ومنوووو قااااااااال ..؟
ابوي : هلا هلاااا والله .. هلا بغايتي هلا والله ..
وضمها وسلموا على بعضو ورحنا الصاله ..
وتجمعنا كلنا .. امي وابوي .. واختي واخوي .. وخالي ومشاعل .. واليهال يلعبون .. والله فرحتي ما تتصور ..
راح احط لكم مقاطع من الاحداث اللي راح تصير في الجزء ال 17
ابوي : بكره ان شالله بجي وباخذكم البيت اليديد .. الحين اخليكم ترتبون اغراضكم ..
تركي : يعني اذا حاطه في بالج ان بتأجلين الملجه فماراح تأجلين ..
امي : ليش يعني ...؟ عشان تشترين لج شي تلبسينه حق ملجتج .. والا نسيتي ان اليوم ملجتج يا ست الحسن ..
قلت : يوعانه .. مقعديني من النوم على لحم بطني وبعد ما تبوني اكل .. معدتني تهاوشني من مساعه ..
تركي : المستشفى ..
هاجر : مب اليوم ملجتج ..
هاجر تغني : ززززي العسل على البي هوااه ..
كتمت الصيحه : غايووووووه ..
قلت بروع : منو ..؟
.....: يعني شدعوووه ما تبين تنزلين لنا آآآآآآآآنسه ساره .
.[/CENTER]


درة الاحساء غير متواجد حالياً   رد مع اقتباس