[درة الاحساء]

الج 17 زء
شفت ابوي يمسك بطن غايوه .. ومستانس عليه .. وغايوه شكلها منحرجه .. هههههههه والله شكلها يضحك ..
ابوي : مبرووووووك ساره .. نسيت اقول لج من البدايه ..
ابتسمت : الله يبارك فيك ..
تمينا نسولف ونضحك وعقب امي حطت العشا وتعشينا ..
غايوه : يلا عيل انا بروح .. مع السلامه يا جماعه ..
ابوي : وين ..؟
غايوه : ماجد عند الباب ..
امي : الله يحفظج .. وسلمي عليه ..
غايوه : الله يسلمج .. ان شالله يوصل ..
وطلعت .. وشفت ابوي قام ..
ابوي : يلا عيل انا بعد بروح ..
قلت : وين .؟
ابوي : بكره ان شالله بجي وباخذكم البيت اليديد .. الحين اخليكم ترتبون اغراضكم ..
امي قامت وطلعوا في الحوش .. وانا رحت غرفتي وقمت ارتب بعض اغراضي .. وعقب تركي دخل علي ..
تركي : ادخل .؟
قلت : حياك ..
تركي: للحين ترتبين ..
قلت : ايه انت شعليك .. قاعد ومشاعل المسكينه اللي ترتب اغراضك ...
تركي : لا انا رتبت معاها ..
قلت : انزين هالبيت شبتسوون فيه .؟؟
تركي : مادري عن ابوي .. يبي يبيعه والا يأجره ..
قلت : اهاا ..
تركي : انا قلت حق راكان ان بنغير البيت ..
قلت : وانزين ؟
تركي : يعني اذا حاطه في بالج ان بتأجلين الملجه فماراح تأجلين ..
اووف الله يسندره انا كنت ناسيه ..
قلت : وانت ليش جي مشتط وشاد حيلك .. ليش تبيني اتزوج بسرعه ..
تركي : انا مالي خص فيج .. بس راكان هو اللي يقولي ان الملجه في هاليوم .. وعقب انتي راح تسمعين منه كل شي .. لانه راح يكون زوجج ..
سكت وتميت ارتب اغراضي وانا ساكته .. وكاتمه حرتي .. بااط جبدي .. يتحكم فيني على كيفه ولا يقول لي ان راكان الي قالي .. يبي يكرهني فيه .. اوووف شهالحاله ..
حطيت اغراضي كلها في شناط ووديتهم الصاله ..
امي : هذول كل اغراضج .؟
قلت وانا اتنهد : ايه كلهم ..
ورحت غرفتي وطحت على الفراش ونمت .. حسيت براحه مب طبيعيه ..
انزعجت من صوت امي اللي صار لها ساعه تصارخ ..
امي : قووووومي ما في وقت ساااروه ..
قمت معصبه : يماااااااااه .. شتبين قومتني الساعه 9 .. شفيج ؟؟
امي: ليش قمتي حبيبتي .. جان كملتي نومج وخليتيني اصاارخ عليج لين ما اموت .. وعقب بكل برود فلعي علي نعالج >> عزكم الله << وقوليلي طلعي برع ..
ضحكت .. اول مره اشوف امي جي معصبه ..
قلت : هههههه شفيج يمه الله يهداج .. انزين ليش تقعديني الحين .؟
امي : قووومي رووحي السوق بروح معاج ..
قلت :ليش ؟؟
امي : ليش يعني ...؟ عشان تشترين لج شي تلبسينه حق ملجتج .. والا نسيتي ان اليوم ملجتج يا ست الحسن ..
قلت : ويي .. ايه صح بروح .. زين فكرتو عني .. يلا بسبح وبطلع ..
امي : عقب تسبحي .. يلااا قومي ..
قمت وسمعت امي تتحرطم ..
امي : يعني الواحد ما يبي يصارخ ويعصب .. بس ناس ما يساعدونه ..
ابتسمت ورحت الحمام اغتسل .. وطلعت حطيت لي بودره خفيفه وحكل بني .. ومشطت شعري ولبست كليب بني .. وفتحت كبتي ولبست تنوره سكريه وبدي بني .. ولبست عباتي وشيلتي .. ورحت الصاله سمت ( بسرعه ) ..
خالي وتركي : تو النااس ..
ابتسمت : صبااح الخير ..
خالي : صباح النور .. يلا تأخرنا ..
قلت : انزين ليش مستعجلين ..؟ السوق مابيخلص ..
خالي : وانتي تحسبين احنا ما ورانا غيرج ..؟ ورانا شغل وعفسه .. هه ليش مستعجلين قالت ..
قلت : انزين يلاا ..
قاموا واستغربت يوم مشاعل وتركي جاو معانا .. واستغربت اكثر يوم ما شفت اليهال ..
سألت امي وانا اركب السياره: وين اليهال .؟
امي : خليتهم في بيت خالتج .. بعد مالي بارض اجابلهم في السوق ..
قلت : وانزين ليش تركي ومشاعل جاين معانا ..؟
امي : يعني ما يطلعون ..؟
قلت : امبلا بس مالهم بالعاده يطلعون ..
امي : ساروه لا تجننيني .. اليوم ملجتج .. ولازم مشاعل تكشخ وتلبس وتتعدل ..
قلت : هذي ملجه .. وبعدين هاذي ملجتي يعني انا الي أكشخ مو مشاعل
امي : يااااااربييييييي هالبنت بتجننييييييييي ..
خالي : هههههههههههههههههههه .. ماما ساره .. خلاص ..
امي : وبالمره نشتري حق عرس خالج ..
خالي : احم احم .. عاد كشخووو في عرسي هااا ..
قلت : ايه افااا عليك .. اذا بيضت الوجه في ملجتي .. بكشخ لك كشخه بنت ....
امي : بنت شنو ..
قلت : كشخه بنت امي .. ههههههههي ..
امي ابتسمت : ايه حسبالي ..
وتمينا طول الوقت واحنا نسولف عن عرس خالي .. ووصلنا الستي ..
نزلت من السياره : يمه .. انا يوعانه ..
امي : بنتغذى داخل .. بس سكتي ..
استانست وسكت ..
دخلنا وعلى طول محل الفساتين ..
هم قالوا لي ان هم بيسون حفله صغيره .. الفستان ليش ؟
قلت : يمه ..
امي : شنو ؟
قلت : بشتري فستان ؟؟؟
امي : ليش ما تبين ..؟
قلت : امبلا بس ليش .؟ انتو قلتو ان بسوي ملجه صغيره .. يعني مافي داعي حق الفستان ..
امي مسكت راسها : ساروه انتي بتجننيني .. شفيج اليوم ..؟؟
قلت : شنووو ؟؟
امي : وفي السياره صار لنا نرطن ساعه عن اي موضوع ..؟
قلت : مادري ..!!
امي : اشتري الفستان وانتي سااكته ..
قلت : انزين ابي اعرف حق اي مناسبه عشان احدد فخامه الفستان ..
امي تنفخ : حق عرس خالج حبيبتي .. حق عرس خالج .. ارجووج حفظي الكلام هااا ثبتيه في مخج ...
ضحكت : ههههه زين ..
دخلنا المحل وتميت اختار .. بس ما لقيت شي يعجبني ..
قلت : يمه مافي شي عجبني .. ابي افصل ..
امي : مافي وقت .. و عرس خالج بعد شهر .. يمديج تختارين القطعه وتختارين الموديل وتفصلين .. وبعد اي مصصم واي خياط بخيط لج ؟؟؟
قلت : اوووووه .. يمه في هالساعه بيحلها الف حلال ..
امي : انزين اختاري حق ملجتج شي ناعم ..
ودرت في المحل ورحت محل ثاني .. وشفت فستاان عجبني ..
قلت : يمه يمه يمه ..
امي : خير ..؟
قلت : هالفستان عجبني .. ناعم مافيه شي ..
امي : ايه حلو .. قايسيه يلاااا ..
دخلت غرفه القياس اللي دلتني عليها صاحبه المحل وقسته .. طلع على جسمي .. عجبني ..
طلعت : يمه ابيه ..
امي : اكيد تبينه .. مب نوصل البيت تغيرين رايج ..
قلت : لا تطمني عاجبني ..
شريته.. ورحت محل ثاني حق الاكسسورارات .. وشريت ..
قلت : يماااااااه ..!!
امي : وصمه ..
قلت بدلع : يمه انتي وايد صايره قاسيه علي .. " ومديت البوز "
امي : شتبين الحين ..
قلت : يوعانه .. مقعديني من النوم على لحم بطني وبعد ما تبوني اكل .. معدتني تهاوشني من مساعه ..
امي : زين باتصل حق خالج ..
قلت : ليش هو وينه ..؟
امي : يعني وينه .. تلاقينه راح منيه والا منيه ..
اتصلت امي حق خالي وكان قريب منا .. ورحا مطعم ناندوز الموجود في الستي .. المطعم المفضل عند خالي .. مع اني اشوفه عادي وبعد ما قعدنا جا تركي ومشاعل .. وشكلهم جاين من برع .. يعني طلعوا من المركز وردو ..
امي : وين رحتوا ..؟
تركي : المستشفى ..
امي حطت يدها على قلبها : حق منو ؟؟
تركي : وانتي كله متخرعه وبس .. تطمني .. احنا رايحين المستشفى حق مشاعل ..
امي تطالع مشاعل : شفيج ..؟ عسى ماشر ..
مشاعل : ما شر يمه .. بس رحت اشيك ..
امي : ايه على شنو .. قولوا غثيتوني ..
تركي : مبرووك بتصيرين يده ..
امي استانست : ويه .. مشاعل حااااااامل ..؟
مشاعل انرجت ونزلت راسها ..
تركي : ايه حامل ..
امي : مبروووووك مبروووك ..
تركي : الله يبارك فيج ويخليج .. يلا الفال تشوفين عيال مشاري ..
خالي : شوي شوي علي.. انا عرس للحين ما عرست ..
تركي : بعد لازم عرس .. ملجه وخلاص ..
قلت : ايه ايه لا تقعد تخرب مخ خالي ..
مسكت يد خالي ..
قلت: خالي ما عليك منه .. بشتري فستان فضيع حق عرسك .. بخلي المصمم زهير مراد يصمم لي اياه ..
خالي شق الحلج ..
طلبنا وكلنا وكان المكان محتشر من سوالفنا وضحكنا ..
امي : وي وعليّا اليهاااااااااال .. ( وعليّا يعني مساكين ^.^ )
قلت : ليش شفيهم بعد ؟
امي : من مساعه مخليتهم في بيت زينب .. حرام بروحهم قاعدين ..
خالي : هاا جبتو سيره القط جانا ينط .. كاهو شوفوهم ..
التفتنا صوب ما خالي أشر .. لقينا فطوم وميمي ماسكين يد بعض ويمشون خطوه وينقزون (يقفزون ) وناصر وراهم اللي يقول محرم هع .. وخالتي ونور ونجوى وجاسم وراهم ..
قمنا عشان نسلم عليهم ..
نور وتفتح يدها لي : سااروووه .
قلت بنفس النبره : نووروووووه ..
وضمينا بعض واحنا نضحك ..
نور : وحشتيني وينج يالخايسه ..
قلت : والله موجوده في بيتنا بعد وين بكون .. انتي ليش ما تجين ..؟
نور : والله عندنا حوسه ..
قلت : حوسة شنو ؟
نور : رفيجتي هنادي بتعرس قريب .. وانا وياها دوم .. هذي اللي بتاخذ حمد جاركم..
قلت : ايه عرفتها .. تطلع رفيجتج ..؟
نور: ايه ..
قلت : عيل تعرفين هجور بنت عمتي ..؟
نور: ايه هجور .. اعرفها بس مب وياها دوم ..
قلت : صج الدنيا صغيره ..
وشوي الا احس بشي ظرب ظهري بقوه .. التفت لقيت نجوى متكتفه وتطالعني ..
نجوى : لا كملي سالفتج .. كملي سالفتج حبيبتي وطنشيني واعتبريني انا والطوفه واحد ..
ضحكت ورحت اسلم عليها : هههههههههههه والله مادري وين كنتي ..
نجوى : وين غايوه فديتها .. هي اللي تجي تركض لي تسلم .. مب انتي .. مطنشتني انا والطوفه واحد ..
نور : خلاااااااص درت عارفت .. حفظت .
ضحكت : ههههههههههههه ..
والله سوالفهم تجنن .. الله يخليهم لبعض .. شفت تركي يأشر لي ..
رحت صوبه : خير .؟
تركي : لا تقعدون تتكركرون جدام الله وخلقه ..
قلت : ليش .. شي ضحكني وضحكت يعني ما يصير ..
تركي : ضحكي بس مب لازم المركز كله يعرف انج ضحكتي ..
قلت : ان شالله اخوي .. تامرني بشي ثاني ..؟
تركي ابتسم : سلامتج الغاليه ..
رحت صوب نور ونجوى اللي من هديتهم وهم يتهاوشون ..
قلت : بس انتي وياها ويلا خلنا نتشرى ..
وتمينا ندور في المحلات وشفت فستان عجبني .. اخضر عشبي واحمر واصفر ومن هالدرجات .. بس ما لقيت سايزي .. كنت بموت من القهر .. انا بالزور يعجبني شي .. بعد ما القى قياسي ..
امي: خيرها في غيرها .. امشي كاهو فستان حلو ..
دخلت المحل وهو ثاني محل ادخله للفساتين .. لان الستي مافيه وايد محلات للفساتين .. المهم .. دخلت وشفت فستان اسود ناااااعم .. وكلاسك .. عجبني ..
امي: بس وايد ناعم .. خليه حق ملجتج ..
قلت : لا انا خذت حق ملجتي ..
امي : عيل هذا وايد ناعم حق عرس خالج ..
قلت : احسن ناعم ..
رحت عنها وقايسته وطلع اوكي ..
وبعد الحوسه واللمه رجعتنا البيت .. وكنت اتمنى ان نجوى ونور يجون معانا البيت .. بس احنا بننقل الحين ..
نزلت من السياره وانا حاسه ان ظهري بينكسر ..
شليت لي كيسين ورحت على طول الغرفه وانسدحت على السرير ..
امي دخلت علي : قومي قومي .. مافي وقت .. كاهو ابوج اتصل وقال لنا يلا البيت جاهز .. وبنروح الصالون عشان تتحنين ..
قلت : يمه ..
امي : هاا ..
قلت : ابوي شبيسوي في هالبيت ..؟
امي : بيعطيه تركي ..
قلت : بس تركي شل ثيابه واغراضه ..
امي : لان بيعدله قبل لا يسكنه ..
قلت : اهاااا ..
امي : يلا قومي ..
يا خالي وتركي وتموا يشيلون الاغراض .. وخالد يساعدهم شوي ..
( مادري ليش احسكم ماتعرفون منو خالد ..تعرفونه ..؟ هههههههه خالد اخوي عمره 10 سنوات ^.^)
ركبت السياره بعد ما ركبوا الاغراض في سياره تركي .. وفي الطريج .. مسكت جوالي واتصلت حق لطوف .. ما ردت .. حطيت جوالي في الشنطه ..وطالعت الطريج ..
10 دقايق ووصلنا الصالون .. ما كان في زحمه لان الحين الظهر .. محد يجي وايد .. قلت لهم ابي اتحنى .. وجاو ثنتين هنديات وبدوا يشتغلون .. وانا اشوفهم ومندمجه .. وحنوني لين الكوع .. من ظهر اليد ومن بطنها .. خلصت وانتظرت الحنه تنشف .. شوي ونشفت بس امي ماخلتني اغسلها .. قالت لي في البيت .. المهم طلعنا من الصالون متوجهين للبيت .. عشر دقايق ووصلنا البيت .. طالعته من الدريشه قبل لا انزل .. كان شكله حلو وكبير .. اابوي من وين له كل هالفلوس عشان يشتري هالبيت ..؟ وشلون شراه بهالسرعه .. سؤااال يحير ..
خرعني تركي يوم طق علي الدريشه ..
تركي : مب نازله ..؟
قلت : امبلا بنزل ..
ونزلت ودخلت .. شفت امي واقفه في وسط الحوش ..
ضميتها من ورى وقلت : عجبج البيت ..
امي : ايه. . حلو من برع ..
كملنا لين وصلنا داخل البيت ,.,
أول مافحنا الباب كان أبوي بأستقبالنا ..
رحنا سلمنا عليه ..^_^
ابوي : شحالكم ..
امي : بخير كلنا الحمدلله ..
ابوي : وين الباقي ..
امي : ينزلون الاغراض ..
ابوي : بروح اشوفهم عيل .. وانتو شوفوا البيت .. اخذووا راحت راحتكم ..
ابتسمت وطرت يمين ويسار وفوق وتحت اشوف البيت .. كان مكون من 6 غرف .. وحده لي ^.^ ووحده حق امي وابوي ووحده حق تركي وزوجته ووحده حق خالي ووحده حق خالد وناصر ووحده حق ميمي وفاطمه .. والمطبخ فخم وحلو .. وفي مجلس بس برع ..
نزلت من فوق ..
امي : عجبج ..؟
قلت : ايه يمه فضيع .. روحي فوق شوفيه ..
امي : عيزانه .. اذا رحت فوق ارقد بروح اشوفه ..
ضحكت : ههههههههه يمه ما اخبرج كسوله جي ..
امي : انا مب كسوله .. لكن انتي عيزتيني .. تدورين في السوق دوراة اليهد .. وين ما اتعب ..
ضحكت :هههههههههه عيل تبوني اشتري من محل واحد ..
امي : سكتي بس .. وروحي ودي شنطتج غرفتج ..
قلت : بس انا ما اعرف اي وحده غرفتي .. انا اللي اعرفه ان لي غرفه .. بس اي وحده ما ادري ..
سمعت حس حد من وراي : غرفتج مجابله الدري ( السلم )
التفت الا ابوي يطالعني وهو مبتسم : وانت محدد لي في اي غرفه اقعد ..؟
ابوي : ايه ..
قلت : اوكي .. الحين بودي اغراضي .. شليت شنطتي الصغيره لاني ما اقدر على الكبيره .. وشليت شنطه في اغراضي من العطور والمكياج .. ورحت غرفتي فوق .. واول ما وصلت غرفتي رن جوالي .. رحت بسرعه صوب شنطتي وفتحها وشفت هاجر المتصله ..
رديت : هلا والله هلا ..
هاجر : اهلين بمرت اخوي ..
ضحكت بخجل : ههههههه هلا فيج .. شخبااارج ..؟
هاجر : طيبه الحمدلله .. انتي شحالج .؟
هاجر : اليوم بالذااات بخير .
قلت : دوووم ان شالله مب يوم ... بس شالسبب .؟
هاجر : مب اليوم ملجتج ..
تذكرررررررررت .. ايه صح اليوم ملجتي .. شلون جي انا نسيت .. مع ان امي الصبح مذكرتني ورايحين السوق عشان هالسبب ..
قلت : ايه امبلا ..
هاجر: ايه هاي المونسني ..
قلت : هجووور ابيج تقولين لي الصج ..
هاجر : خير قولي .. بقول لج كل اللي اعرفه ..
قلت : من قال حق راكان يتزوجني ..
هاجر شكلها مستغربه من سؤالي : هااا ..؟
قلت : جاوبي ..
هاجر : محد قال له .. هو اللي جا وقالي عشان اقول لج..
قلت : يعني محد قال له روح تزوجها والا شار عليه ..
هاجر : يعني من بيقول له .؟ محد قال له عنج ..
قلت : مادري .. خلاص زين انسي السالفه .. شخبار عبدالله ..
هاجر تغني : ززززي العسل على البي هوااه ..
ضحكت : ههههههههههه دوووم ياربي دوووم ..
وتمينا نسولف ونضحك وعقب سكرت وانا نمت على طول ..
قمت بسرعه متخرعه من صوت امي ..
قلت : شفيج ؟؟
امي : قووومي شوفي الساعه كم الحين .. وانتي للحين ما جهزتي ولا سويتي شي ..
قلت : ليش وين بنرووح .؟
امي : ياربي هالبنت بتذبحني .. بتذبحني ..
قمت ومسحت ويهي بيدي : اسم الله عليج يمه .. اسم الله عليج .. بس ليش البس ^.^
امي تنهدت : ملجتج اليوم على راكان ولد عمتج .. والا انتي نسيتي بعد ..
قلت : لا ما نسيت .. بس انتي دودهتيني .. تصرخين علي وانا نايمه ..
امي : آسفه الشيخه ساره .. قومي يلاا. .
ابتسمت ورحت الحمام اتسبح .. وطلعت شفت الساعه 6 ونص .. بسرعه رحت حق امي تحت ..
قلت : يمه شاسوي الحين ..
امي : الحين بتجي مره طلبتها لج مشاعل .. بالزور رضت تجي اليوم ..
قلت : شتسوي لي المره ..؟
امي : حق الشعر تسوي شعرج ..
قلت : والمكياج ..؟
امي: المكياج ..مشاعل بتمكيجج .. ماشالله عليها تعرف ..
قلت : صج ..؟
امي : ايه يلا بسرعه الحين بتجي المره ..
قلت : اووووكي ..
ورحت غرفتي وعلقت فستاني الذهبي الناعم البسيط .. وما كان معفس (مكرمش ) مع ان القطعه حرير .. ورحت المطبخ وشفت وحده مستمته قاعده على الكرسي .. وشكلها اندونيسيه ..
قلت : منو انتي ؟؟..
.....: انا سونيتا ..
قلت : منو سونيتا .؟
سونيتا : كداما ..
اهاااا .. خداااامه .. والله خوش فله .. يايبين عندنا خدامه .. زين سوا ابوي ..
قلت : انزين سوي بخور .. تعرفين ..
سونيتا : ايه انا يعرف .. انا يشتقل في سوديا اول ..
اهااا .. مشتغله في السعوديه ..
قلت : يلا سوي بخور بسرعه زين ..
سونيتا : شنو اسمك ..؟
قلت : ساره ..
ورحت عنها عند امي. . لقيتها كاشخه بجلابيتها الكشخه ومتعطره ومنسله الشعر ..
قلت : يه يه يه .. شهالحلاااااه ..
امي مبتسمه : عيونج الاحلى .. بس يلا روحي .. المره في الصاله الثانيه .. روحي لها مافي وقت ..
قلت : زين ..
رحت عندها ..
قلت : هااي ..
قالت : هاااي .. انتي العرووس. .
ابتسمت : ايه انا العروس ..
قالت : اقعدي هنيه .. " اشرت على الكرسي اللي جدامها "
قعدت وبدت تسوي شعري .. وانا طبعا قلت لها اني ابي حركه بسيطه .. ما احب الدفش ..
بعد نص ساعه يمكن خلصت شعري ورحت على طول صوب المنظره .. وطالعت نفسي .. عجبتني التسريحه .. تناسب ويهي .. مسويه شعري باف ( يعني مرفوع او منفوخ على فوق بس مو كله ) وحاطه سلسله جابتها بطريقه حلوه .. المهم عجبتني التسريحه وخاصه انها مخليه شعري على طوله .. وخاصه انه طولان ..
الكوافيرا : ما عجبتج التسريحه ؟
قلت : لااااا بالعكس .. واايد حلوه .. مشكووره تسلم يدج ..
قالت : العفو حبيبتي ..
جات امي حاسبتها وراحت و جات وراها مشاعل ومعاها عدة المكياج ..
مشاعل : طلبااتج ..؟
ضحكت : هههههههه شنو بتخطبيني حق اخوج..
مشاعل : ههههه لا شدعوه .. بس يعني طلباتج للمكياج .. تبينه سموك تبينه قصه والا تبينه وحشي والا شلووون ؟؟
قلت : والله مادري .. ابيه لبناني ..
مشاعل : اووكي .. واللبناني لايق عليج اكثر من اي مكياج ثاني .. لان ملامح ويهج حلوه وناعمه ..
ابتسمت وجات عندي وحطت عدتها على الطاوله الموجوده في نصف الصاله و بدت تمكيجني ..
بعد فتره امي جات : ما خلصتوا ..؟ ترى مافي وقت.. توه راكان متصل حق ابوج وقال له ان هم في فريجنا ( الحي , الحاره ) ..
خفت : شنو ..؟
امي : ايه هم قراااب .. يلا جهزي ..
قلت وانا شوي واصيح: يمااا وين غاااايووووووه .. ؟
امي : قالت لي عند الباب وطرشت خلود يفتح لها الباب ..
خلصت مشاعل من المكياج وراحت هي تتعدل .. وشفت نفسي في المنظره وعجبني المكياج .. ما شالله عليها مشاعل تعرف تمكيج ..
وشوي الا دخلت غايوه ..
غايوه : السلام عليكم .. هلا بالعرووووووس ..
كتمت الصيحه : غايووووووه ..
ورحت لها وضميها ..
غايوه : هههههههههه شفيج حبيبتي .. لا تقلبينها مناحه وصياح .
قلت : الحين بيجوون ..
غايوه : انزين يلا روحي لبسي ..
مسكتني من يدي وودتني الغرفه فوق ..
قلت : انتي شفتي البيت ..
غايوه : ايه صباح النور. . شفته ويوم سألت عنج قالوا لي راقده ..
قلت : ليش انتي جيتي العصر ؟؟
غايوه : ايه .. كنا انا وماجد برع ومرينا صوب بيتكم ونزلنا نشوف ..
قلت : اهااا ..
غايوه : يلا لبسي ..
قلت : وانتي بتقعدين تتفرجين علي ..
غايوه : ههههههههههههه عادي الا اختج ..
قلت : يلا عاد . انا استحي .. خلج عند الباب عشان ما ادورج ..
غايوه : زين بتم هنيه .. بس لا تطولين ..
قلت : زين .. بس وين لطوف ..؟
غايوه : لطوف برع عند امي .. يلا تنتظرج هي ..
قلت : اوكي ..
سكرت الباب وتميت اطالع الفستان مده .. عقب لبسته .. وحاولت اسكر السحاب لكنه صعب .. ورى في الظهر .. ما قدر له .. فتحت الباب شوي شوي وناديت غايوه ..
غايوه : شتبين .. خلصتي .؟
قلت : لا تعالي سكري لي الفستان ..
غايوه : زين ..
ودخلت وسكرت لي الفستان .. وطلع يجنن علي .. مع اني ضعفاانه وايد عن قبل .. بس مو ذاك الضعف الشين ..
غايوه : ساروه الفستان خبااال عليج ..
قلت بتوتر : صج .؟ حلو ..؟ .. انزين شوفي مكياجي مب مخترب ..شعري ..؟
غايوه : هههه شفيج .. كلج على بعضج قمر .. يلا روحي خلي امي تشووفج .. وعلى فكره .. ترى وصلو ..
قلت بروع : منو ..؟
غايوه : راكان واهله ..
قلت : من اهله ..
غايوه : يعني بعلمج منو عيال عمتج ..؟
قلت : لا يعني اقصد من اللي جا معاه .؟.
غايوه : هجور واريجوه العنز وامهم الي هي عمتي نهله ..
ضحكت على تعليقها : ههههههههه وليش تقولين العنز .. ؟ حرام عليج ..
غايوه : ايه الحين صارت اخت راكان حبيب القلب ما نقدر نتكلم ..
قلت : هههههه قومي زين .. بس كاسره خاطري مسكينه ..
غايوه : ليش مسكينه ..؟
قلت : انفصلت هي وخطيبها الله يكافينا ..
غايوه :صج والله ..؟ ليش ؟
قلت : مادري والله .. ما عرفت السبب .. الي عرفته ان سوء تفاهم صار بينهم ..
غايوه : الله يستر علينا .. يلا يلا قووومي نزللي .. ترى هم ينتظرونج ..
قلت : وخالتي زينت ما جات ..
غايوه : امبلا تحت كلهم .. يلا نزلللللي عاااااااد ..
سمعت حس من ورى غايوه ..
.....: يعني شدعوووه ما تبين تنزلين لنا آآآآآآآآنسه ساره ..
طليت من ورى غايوه ابي اشوف منو .. الا لقيت هجور ..
فتحت يدي : هجوووووووووووووور ..
هاجر : فديتج سااااروووه طالعه تجننين .. يابخت اخوووووووي فيج .
ابتسمت باخجل : عيونج الاحلى حبيبتي ..
هاجر : يلا نزلي من مساعه امي تسال عنج ..
خفت وحسيت نفضه في جسمي ..
قلت : لا مب نازله .. ابي امي ..
هاجر : وي وي وي .. شرايج بعد نجيب لج مرضاعه وحليب ونعطيج حليب قبل لا تناعمين ..
قلت وانا شوي واصيح : ابي امي مالي شغل ..
غايوه : بروح اناديها لج ..
هاجر : قعدي انتي ودبتج .. انا بناديها ..
غايوه : هههههههههههه بتشوفين يالدبه .. بيجونج يهال ..
هاجر وهي رايحه : ههههههههههههههه لا ان شالله ..
قعدت على في الصاله اللي فوق .. وكل شوي التفت اشوف المنظره .. وشوي الا جات امي ..
قلت : يماااااااه ..
امي : وي شفيج ..
قلت : ما ابي انزل .. يمه يصير تكنسلون الموضووع ..
امي : ويه حسبي الله على عدوج .. قومي يلا اهووه .. الحريم نتظرونج تحت .. وعمتج كل دقيقه سألت عنج .
قلت : شهالحب اللي نزل مره وحده عليها ..
امي : عيب يلا عيب .. وعمتج ترى مستويه حليوه .. مادري عشان بتصيرين جنتها والا شي مستوي عندهم ..
قلت : قبل لا استوي جنتها كنت بنت اخوها ..
امي: الله اعلم شفيها .. بس يلااا قومي بلا دلع .. والحين بيجيبون لج العقد توقعين عليه ..
لطوف ياتني : هلااااا ساااروه ..
فتحت يدي لها : لطووووووووف ..
ياتني وسلمت علي : يلاا يلا نزلي .. الكل متحمس يشوفج ..
قلت : صج ..؟
لطوف : ايه يلا .. تراج طالعه قمر ..
ابتسمت ..
لطوف : يلا انا بنزل اول وعقب انتي نزلي .. عشان اشوفج وانتي نازله .. هههه
نزلت وشغلوا غنيه "الف الصلاه والسلام" والكل كان يطالعني وعيونهم علي .. نزلت بنعوومه ودلع تصنعته عشان أكون نعووومه .. وفي نفس الوقت كان يتراودني شعور الخوف والرجفه ..
وأول مانزلت سلمت على عمتي ..
عمتي : مبرووك حبيبتي مبروووووك ..
قلت بخجل : الله يبارك فيج عمتي ..
وجوا كلهم يباركون لي ..
ويوم جات أريج تسلم علي قالت : مبروك ..
وكانت طالعه منها بجفاااا ..
قلت : الله يبارك فيج ..
وسلمت على نور ونجوى اللي كانوا بيطيرون من الفرح .. وهالشي كان باين من عيونهم ..
نور : مبرووووك فديتج مبرووك ..
قلت : الله يبارك فيج .. الفال لج .. ^.*
نور : لا واللي يسلمج .. الفال حق نجوى ههههههه .. انا ما ابي اتزوج ..
نجوى: ايه وين الجبله .. الله يسمع منج قولي آآآآمين ..
ضحكت : ههههههههههههههههه الله يسندركم ..
امي سكت يدي ..
امي : يلا تعالي ..
قلت : وين .؟
امي : بتقعدين مكانج بعد وين.. والا عاجبتج الوقفه هنيه ..
قلت بدلع : يمه اليوم ملجتي وانتي تزفيني ..؟
امي باستني : وي اسفه يا نظر عيني .. يلا حبيبتي ..
ابتسمت رغم الخوف اللي سكني ..
وقعدت مكاني وانا ماسكه باقه ورد صغيره واهز ريلي من التوتر .. شفت غايوه وامي يضيفون الحريم والخدامه وخدامه غايوه بعد .. والكل يدور وكأنهم نسوني .. حسيت روحي وحيده رغم ان الكل متجمع صوبي .. ونور شكلها تأقلمت زياده مع هاجر رغم معرفتهم السطحيه ببعض .. ونجوى مع غايوه تروح وتجي .. واريج تطالعني وكأني خطفت اخوها منها .. وعمتي نهله ولا التفتت صوبي .. وخالتي كل شوي طالعتني وابتسمت .. حسيت بالملل مع ان ما صار لي وقت من قعدت .. بس ما احب اكون انا صاحبه الحفل .. الكل يخدمني وانا قاعده .. احب اكون معاهم .. اسوي اللي يسوونه .. ما تعودت اقعد جي .. خنقتني العبره ونزلت دمعه تحرق من عيوني ..
امي طلت في ويهي : يمه ساره .. شفيج ..
صحت زياده .. كأني انتظرها تكلمني ..
امي : شفيج بسم الله عليج ..
قلت : ليش خليتوني ورحتو ..؟
امي : وين خلينااج .. احنا معاج يمه ..
قلت : لا مب معاي .. كنتوا مشغولين وخليني انا العروس بروحي .. ما ابي استوي عرووس خلااص ..
امي : ويه ساروه .. شفيج يمه مستوي عقلج عقل ميمي .. حبيبتي كنا نشتغل حق المعازيم .. والحين بيجيج راكان بينسيج هالزعل .. " قالتها وهي مبتسمه "
يات خالتي ووقفت جنبي : يمه ساره شفيج ..؟
قلت : لا خالتي سلامتج ..
امي : يلا زينب الحين بيجي راشد .. قولي حق بناتج يتغطن ..
قلت : ليش ابوي يجي .؟
امي : عشان توقعين على العقد ..
قلت : واذا ما وقعت على العقد شبيصير ..؟
امي : اذا ما وقعتي على العقد ما راح تتزوجينه .. ساره لا تصغرين مخج يمه .. خلاص ..
سكت وشوي الا ابوي يايني وهو كاشخ فديته ..
ابوي : يلا يلا وقعي نبي نباارك ..
ابتسمت ومسكت القلم وانا ارجف ..
قلت : وين اوقع ..؟
ابوي : تحت هنيه .." واشر لي وين اوقع "
في هاللحظه خفت اني اندم على هالخطوه .. خفت هالتوقيع يكلفني حياتي ..
ابوي : ساره ..؟
صحت .. ما قدرت اكتم اكثر ..
ابوي : ساره ..؟ انتي موافقه والا لا ..؟
قلت : مادري ..
ابوي : يه ..؟ شلون بعد ما تدرين .. الملاج والشهود وراكان وابوه والكل في الميلس ينطرون توقيعج .. وانتي قلتي انج موفقه .. والا انا ما راح اغصبج على شي ما تبينه ..
سكت ..
ابوي : ليكون تركي غصبج ؟
قلت : لا ما غصبني .. خلاص بوقع ..
ابوي مسك القلم وبعده عني ..
ابوي : انتي تبينه ..؟
تصدقون .. ما سألت نفسي هالسؤال .. والله مادري اذا ابيه والا ما ابيه يا يبه .. ما تفرق عندي ..
قلت بتردد : امبلا ..
ابوي: عيل ليش ما توقعين ..؟
خذت القلم من عنده ووقعت .. وابتسم لي وباسني فوق راسي ..
ابوي : مبروك .. الف الف مبروووك ..
قلت بصوت ما ينسمع : الله يبارك فيك ..
وراح عني .. ويات امي وسلمت علي وباركت لي .. ومن بعدها عمتي وخالتي والبنات وغايوه ومشاعل ..
قلت : الله يبارك فيكم .. الفال لكم يابنات .,’
وشوي تميت قاعده مع نور ونجوى .. واضحكت على سوالفهم اللي ما تخلص .. وشوي الا جاتني عمتي ..
عمتي : يلا حبيبتي .. راكان اتصل لي وقال لي انه يبي يدخل ..
شهقت : شنو ..؟
عمتي : هههههه شفيج ..؟
قلت : ليش يدخل ..؟
عمتي : عشان الكرسي اللي جنبج فاضي ..
طالعت الكرسي وانا احس برجفه .. وييي فشيله جي يشوفني راكان .. لبسي عاري .. فستاني مافيه اكمام ..
قاموا البنات من عندي وراحوا لبسوا شيلاتهم وتغطوا ويات هاجر عندي ..
هاجر : يلا من قدج .. بتاخذين اخووووي ..^.^
قلت : لا والله .. سكتي هجوور تراني ميته من الروع ..
هاجر : ليش حبيبتي .. الا بيجي يسولف معاج بس ..
سمعت وقفوا الاغنيه وحطوا اغنيه ثانيه .. وكانت اغنيه نوال ( تفضل )
وقامت يدي ترجف وماعرفت شاسوي .. يات امي جنبي..
امي : وقفي ..
قلت : ليش داخل علي الشيخ وانا مادري ..
امي : ساروه ؟!!؟!
قمت وانا مب مقتنعه .. وشوي الا اشوف عمتي دخلت .. لانها طلعت برع عشان تدخل راكان .. وراكان وراها .. وانا اول ما شفته نزلت راسي .. ورفعت عيني ابي اشوف وين وصل .. شفته راح حق امي وباسها على راسها .. ويوم شفته ياي صوبي نزلت راسي ..
بحط لكم مقاطع من الج 18 زء
راكان : انزين ليش تصارخين ..؟
هاجر : لا لا مب ماسكه لسااني .. خليني اعبر عن فرحتي ..
قلت : خايف تمل ..؟
مشاعل : وليش تقولينها وكأنج مفتكه منه ..؟
جاسم :كنت ناوي اتزوج .. بس هونت ..
تركي : على كيفج ..! بدت حبيبتي ..
راكان : عيل نبتدي بالهواش ..
قلت : احنا في السياره .. بنروح المستشفى ..
تركي : غرفه الدكتور ..
كملت : ويمكن تموت ..!