[شوق2012]

الفصل الثانى

طبعا علاقة اسرار بصديقاتها في بغداد ما انقطعت بالعكس كانت تتصل على هبة دائما وتوافيها بالتفاصيل دائما وتتصل كذلك على عبير وصدى وكانت فقط ترسل سلامها لعمار وهشام.

وبيوم من الايام اتصلت عليها هبة وكالتلها : اسرار حبي اريد ادزلج شوية غراض وية سهير بنت عمي بيوم الاربعاء على الساعة 9 ونص اريدج تكونين موجودة ابقي واكفة يم باب القاعة حتى بسرعة تنطيج الغراض اوكي.
اسرار: ما افتهمت شنو الغراض اللي تدزيهة زين انتظريني لما اجي لبغداد ؟
هبة : لالالالا ضروريات كلش ولا تساليني اكثر انتي تشوفيهن وتعرفين يلة حبي باي .
اسرار ظلت حايرة بس كالت انتظر واشوف . وفعلا بيوم الاربعاء عالساعة 9 وو20 دقيقة لمحت اسرار صديقتها سهير بس ايدهة كانت فاضية واستغربت , اشرتلها سهير بيدها وراحت اسرار وسلمو على بعض .
وسالتها اسرار: ها سهير وين الغراض اللي دازتهة هبة؟
سهير كالتلهة: موجودات وياية بس تعالي لهذا الممر القريب من القاعة وفعلا راحت وياهة اسرار وتتفاجيء بوجود (هبة , عبير, صدى, عمار , هشام )واكفين ينتظروهة ومن شافوها صاحو : سبرايز .
اسرار طار عقلها من الفرحة لما شافت صديقاتها وبعد متعرف شتسوي ومو مصدكة عيونها تلتقي بيهم . طبعا اسرار وصديقاتها صارو محط انظار الطلبة لان بنات غريبات عن الكلية وجايات بكامل اناقتهن وزينتهن وصارو بعض الطلبة يضايقوهم بالسوالف ,طبعا عبد الرحمن اشتعل من الغيرة وتضايق من هالشيء بس ما كدر يتصرف ,اما عبد الله فاعتبر هذا الشيء حرية شخصية لكن( عزيز) ابد ما عجبه الوضع وراح وسلّم على شلة اسرار.
عزيز: السلام عليكم .
اسرار وشلتها:وعليكم السلام ,
اسرار حبت تلطف الجو : اهلا عزيز اعرفك على صديقاتي هبة وصدى وعبير وعلى زملائي عمار وهشام.
عزيز: اهلا وسهلا تشرفنا بيكم .
الشلة : تسلم فرصة سعيدة تعرفنا عليك.
عزيز: بس اترخص منكم احجي وية اسرار بكلمتين .
واخذ اسرار على جنب : اسرار يعني شلون راح تبقون واكفين بالممر والله ميصير ماكو مجال حتى نمشي. اسرار: اسفة والله بس انتظر الريست (حصة الفراغ) يصير ونروح للكافتريا .
عزيز: احلفي بس , زين تعالي وياية على رئيس القسم خلي اخذلج اجازة اليوم.
اسرار(عيونها تشع من الفرح):صحيح والله ؟ ما اريد احرجك عزيز اخاف ميرضى الاستاذ وعيب .
عزيز: لا تعاندين صيحيلهم خلي يجون ويانة . وفعلا راحو لرئيس القسم وعزيز صار يحجي وياه باسلوب لبق ومؤدب وفعلا اخذت اسرار اليوم اجازة وزادت معزّة (عزيز)بقلبها واعتبرته من اليوم اخوها الكبير لان فعلا حس بيهة . وبوقت الريست نزلو الشباب للكافتريا وكانت اسرار منطلقة وية صديقاتها والفرحة مو سايعتهة وهي تسألهم عن اخبار الجامعة والاساتذة ومقالب الطلاب .
عبد الرحمن شافها بين صديقاتها وزملائها وشلون تحجي بحريتها قرر انه ينسى شي اسمه اسرار لانه (في نظره) اسرار من عالم مختلف عن عالمه . انتهى هذا اليوم بالنسبة لاسرار بسرعة وبالنسبة لعبد الرحمن كان اطول يوم يمر بيه وكان الاسبوع القادم عدهم امتحانات الشهر الاول ف(اسرار)كانت مرتاحة نفسيا واستعدت للامتحان اما عبد الرحمن فما كان عنده نفس يفتح كتاب . ولان كان وقت امتحانات فالكل كان شايل كتابه ومشغول لان الكل يريد يثبت نفسة من الشهر الاول وحتى اسرار ما كانت تلتقي بالشلة الا نادرا, وفعلا انتهت الامتحانات وطلعت النتائج وكانت اسرار محققة درجات عالية وكذلك الشلة .
وبعدين عبد الرحمن نسى السالفة بمزاجة ورجعت علاقة اسرار بالشلة مثل الاول لكن لما كانو يوكفون سوة كانت اكثر شي تاخذ راحتها بالكلام وية عزيز اما عبد الرحمن فقط مجرد سؤال عن مادة او محاضرة او يشتركون بنقاش عام اما عبد الله فهو العنصر الفاعل لان مقالبه ومداخلاته ما سلمت منها حتى اسرار ورغم هذا كان لة مكانة خاصة بقلب اسرار لان تحسه انسان صريح واللي بقلبه على لسانه عكس عبد الرحمن اللي كانت تحس بغموض نظراته وما عرفت شلون تترجمهن .
وبيوم من الايام وكالعادة اسرار دتحجي وية هبة بالتلفون وتنقللها احداث ايامها الجامعية
هبة : اسرار هاي منو يمج بالغرفة اسمع صوت جهال؟
اسرار: هههههههه ذولة جهال اختي ازهار صارلهة يومين من اجتنا للبيت وراح تبقى اسبوعين تعرفين صار عدهة بنوتة وية ولدها الاثنين وماخذة اجازة امومة هسة فاستهلت الاجازة في بيتنا بس شنو جايبتلي اشون قمصان روعة تنفع للدوام وللمناسبات واكو موديل يخبل جايبتلي منه 2 فقررت انطيج واحد منهن لان القياس بالضبط عليج .
هبة : امواااااااه اسورة حبيبة عمري زين ايمتة تجين لبغداد حتى تجيبيلي القميص ؟ يمااااه شيصبرني يمكن هسة اخذ تكسي واجيكم مخصوص علمود القميص .
اسرار: هههههههههه ماكو فايدة بيج شكد متلبسين ما تقنعين يعني اليسمعج يكول خطية مو كنتورها (دولابها)مليان اشكال والوان .
هبة: اسرااااااااار اصبري علية اجتني فكرة بما انه ما اكدر انتظر فراح ادزلج سهير بت عمي بيوم الاربعاء انطيهة القميص وهي توصلة ها شنو رايج بالفكرة؟ عبقرينو مو؟
اسرار ضحكت من قلبها على صديقتها : اوكي حبي تدللين انتي وبت عمج . وفي يوم الثلاثاء اتصلت هبة على اسراروخبرتها انه (سهير) مريضة وما راح تكدر تجي ولهالسبب راح يمر (سامر) اخو (سهير) وهو اللي ياخذ القميص ويوصلةل(هبة).
وفعلا بيوم الاربعاء سامر مرّ على اسرار للقسم
سامر: السلام عليكم اشونج اسرار؟
اسرار:وعليكم السلام اهلا سامر.
سامر بمزح: والله هبة خبلتني عالقميص متكوليلي وينة ؟ يومية تخابر وتوصيني عليه , خليني اخذه واخلص بس ان شاء الله يطلع صغير عليها ومتعرف تلبسه كولي امين .
اسرار ضحكت من كلام سامر: لاااا حرام عليك هاية هباوي الغالية ,, انتظرني لحظة وراجعتلك .
رجعت اسرار وبيدهة الكيس وانطتة بيد سامر ووصتة يسلملها على هبة حييييييل وبهالاثناء كان عبد الرحمن مع اصدقائة بس تنرفز لما شاف اسرار واقفة وية سامر وتضحك وياه وبسرعة استأذن من اصدقائة وراح على اسرار.
عبد الرحمن(بغضب): السلام عليكم !!
اسرارمرتبكة : وعليكم السلام.
سامر استاذن من اسرار وسلم عليها وراح .
عبد الرحمن بصوت يرجف من العصبية وعينة بعيون اسرار: هذا منو انوب ؟
اسرار وصوتها يرجف: هذا........ اااا........ ااا... اخو صديقتي.
عبد الرحمن وبنفس العصبية: وخير ان شاء الله اخو صديقتج شرايد بعد؟
اسرار : ااااا...لالالا.... ميريد شي بس اجة ياخذ شوية غراض موصيتني عليهن .
عبد الرحمن : وليش متجي هية بنفسها لو تدز وحدة من صديقاتها؟
اسرار: ..................ساكتة وترجف من عصبيتة.
عبد الرحمن: اسمعيني اسرار هاي المرة الثانية اللي راح اعديهة بمزاجي بس قسما بالله اذا شفت واحد غريب واكف يم باب القسم راح اكسر رجلة افتهمتي لو لا؟ ومتلومين الا نفسج .
طبعا اسرار امتلت عينها دموع وما كالت ولا كلمة بس مشت من يم عبد الرحمن واخذت جنطتها وراحت للحمام وخلت دموعها تنزل بحرية ورجعت غسلت وجهها وحطت ميك اب خفيف وراحت للقسم لكت الاستاذ موجود لكن سمحلهة تدخل رغم تأخرها..وبنظرة خاطفة لمحت السيت الاخير وانتبهت انه عبد الرحمن متغيب عن المحاضرة.

انتهت المحاضرة
وهية بالها يم الكلمة اللي كالها عبد الرحمن(هاي المرة الثانية اللي راح اعديهة
بمزاجي)يعني شيقصد المرة الثانية ............ ليكون يقصد من زاروني الشلة بهذاك
اليوم ؟ وبعدين هو شعلية بية ؟ ياااااا ربيييييي والله راسي راح ينفجر.
بعدين سمعت عبد الله يسال عزيز: اكوول عزوز وين عبد الرحمن؟
عزيز: اخذ اجازة يكول مالي واهس ادخل محاضرة.
عبد الله يمزح: تتصوره متواعد وميريد يكول؟
عزيزبعصبية : عبد الله اسكت احسنلك التفت عالشباك وشوفة كاعد
عالمصطبة كدامك.
عبد الله التفت من ناحية الشباك: اي والله دا اشوفه لا وبيدة جكارة(سكارة) هذا شبيه ؟شنو اللي غيّر حاله؟؟اليوم الصبح ما بيه شي!!
عزيز: والله ما ادري حالي حالك بس هو يكول لزمني صداع واريد ارتاح شوية .
اسرار كانت تستمع لكل كلمة والتفتت للشباك انعصر قلبها من شافتة يدخن وينفخ بالهوا واحتارت بمشاعرها . لكن بعد هذا الموقف اسرار قررت تحط حد للعلاقة بينها وبين الشلة الى ان تقطعهة نهائي وفعلا صارت متوكف يم باب القاعة
وصارت بس تسلّم عليهم وتدخل تشغل نفسها بأي شي وصارت تقوي علاقتها بسهير حتى لا تحس بفراغ , كل هذا تسوية, أما عبد الرحمن فكانت تحرص انه متسلّم عليه ولا تتقابل ويااه باي موقف.
عبد الرحمن كان يعرف انه اسرار شايلة بخاطرها ! لكن عبد الله وعزيز استغربو منها بس ما حبو يثقلون عليها لان كانو يشوفوها مشغولة
‘طبعا اسرار اتصلت على هبة كالعادة وسولفتلها كلشي
بالتفاصيل وكانت تحجي وتبجي.
هبة(عالتلفون): الله ياخذه لهالمعقّد مو ناقصنا بس هالاشكال وانتي على شنو
قاهرة نفسج خليه يولي روح يا عبد الرحمن
ان شاء الله الله يقهرك..
(قاطعتهااسرار): هبووووووووووش لا تدعين عالولد آني ما كلتلج ادعي عليه ,,وبعدين كلمن غالي على اهلة.
هبة: هبوش بعينج ليش عيني ما ادعي عليه ؟؟مو هو اللي صارلج ساعة تحجيلي عنه ومقهورة منه.
اسرار احجي الصدك انتي تحبيييه مو ؟ والله شاكة بيج بس دا اكذّب نفسي.
اسرار (سرحت شوية): هاااا لالالالا احبة شنو وين عرفتة اني؟ تعرفيني مو من نوع اميل بسرعة لأي شخص
بس ... بصراحة ....احس كلامة حيييل ياثر بية.
وبيوم من الايام
عزيز وعبد الرحمن كاعدين بالساحة .
عزيز : اكول عبد الرحمن ما تحس انه اسرارمتغيرة علينا هالايام؟؟
تتصور شنو اللي مغيرها؟؟وبعدين هي تسلّم عليك لو لا ؟
عبد الرحمن بعصبية: لااا ماتسلّم ولا اريدهة تسلّم .
عزيز: ليييييييييش
صاير شي؟
عبد الرحمن :
كلشي مو صاير اتركنا منها ومن سيرتها خلينة مرتاحين.



توقعاتكم للبارت القادم

تتصورون ليش عبد الرحمن يتصرف بهالطريقة؟
واسرار هل تنقطع علاقتها بشلة العبادلة؟؟