[لامارا]

#$#$#

ببيت ابو عبدالله .. تفطروا وبعدها كلمن راح على شغله .. ويوسف وعبدالعزيز وفاطمه طبعا راحوا الجامعه .. اما باقي البنات كانوا جالسين بالغرفه ..
وسن بتملل : اووف متى نرجع زهقت
رغد : شنو انتي وش فيك كذا بسم الله الرحمن الرحيم هذي بداية الاسبوع
ريم ابتسمت وقالت : ايه بعد تحججي علشان تشوفين ..
قاطعتها رغد بالمخده اللي جت بوجه ريم ..
رغد : هههههههههههه احسن علشان ماتكثرين كلام ماله داعي
وسن عفست وجهها بقرف : وييييييع ويييع وش هالكلام
ريم : هههههههههههه شفتي ياوسن
رغد فتحت عيونها : جب جب
ريم : هههههههههه زين لا تطلع عيونك علينا
رغد تغير الموضوع : تعااالوا الحين امي ماقالت لكم ليش عبدالله دخل السجن
ريم : اييه ايييه غيري الموضوع
وسن : اوص ريمو .. رغدو امي وش قالت لك ؟؟
رغد : لا بس انا سمعت كلام بس مو اكيد
وسن وريم رموا عليها المخدات وقالوا بصوت واحد : قوووليييي ..

#$#$#

الساعه 1 الظهر ورائد .. فتح باب البيت وبيطلع .. لما طلع شاف فاطمه تنزل من سيارة شباب وطبعا كانت بعيده شوي .. شافها كيف تضحك بصوت عالي وبدلع وهي تودعهم .. اشمئز وعصب كان بيروح ويسحبها من شعرها ويضربها ضرب ما بعده ضرب .. لكن هو ماكان يبي مشاكل ولما فكر بالموضوع شاف انه ماله دخل وفاطمه معروفه الكل يسميها " أم لسان " لسانها طويل .. فقرر انه يعطيها انذار وان عادتها بيقول لأخوانها وهم بكيفهم .. شافها قربت وفتح رائد سيارته كان بيدخل لكن اللي وقفه صوت فاطمه وهي تقول بدلع ماصخ : اووه رائد لا ماشاءالله صاير حلو
رائد التفت عليها وعطاها نظرة من تحت لفوق ورجع يطالع سيارته وركبها .. اتنرفزت فاطمة وعصبت قربت من السيارة وكان الشباك مفتوح راحت له وقالت بنفس الدلع الماصخ : رااائد شفيييك
رائد طالعها وقال ونفسيته بخشمه : وخري عن السيارة
فاطمه بدلع أكثر : لا ماراح اوخر .. رائد شفيك
رائد عصب وقال بنبرة تهديد : فطيم حشمي نفسك احسن لك وسمعيني زين اذا شفتك راكبه مع ذيك السيارة مره ثانيه اخوانك راح يدرون وراح يفصلون راسك عن جسمك .. فــاهمه ولالا
ورجعت شوي فاطمه كانت شوي مصدومة وحرك رائد سيارته ..
فاطمه رفعت راسها وهي تراقب سيارة رائد تروح .. حست بخوف فظيع هزت راسها تبي تبعد هالخوف وقالت وابتسامة الخبث على وجهها : ( بنشوف منو اللي راسه راح ينفصل عن جسمه ماشي يارئود ماااشي ) ورجعت تمشي بثقة لداخل البيت .. لكن كانت سرحانه بكلامه وخايفه وموش مركزه على قدامها ابد فجأه انفتح الباب وكان عبدالعزيز وماكان شايف قدامه فخبط ( صقع أو صدم ) بفاطمة وعصب وقال بعصبيه : عما بعينج ان شاءالله شنو انتي عميه ماتشوفين
فاطمه طالعت بأغراضها اللي طايحة بالأرض وطالعت بعبدالعزيز وقالت بعصبيه : وقص لسان ان شاءالله اصغر عيالك انا تكلمني جذي شنو ماتستحي
عصب عبدالعزيز وقال بصراخ : هييه انتي شنو قص لسان يامال الشاحنه اللي تشيلج يالخمه
فتحت عيونها فاطمة .. والتفت عبدالعزيز بيطلع لكن فاطمه مسكته من بلوزته من ورا والتفت عليها عبدالعزيز ودفها وطاحت فاطمة على الارض وقال وشرار العصبيه بيطلع من عيونه : اذا تبين تنطقين نفس طق عبيد لج مدي ايدج مرة ولا هالمرة مو عبيد هالمرة انا يعني انهيج من الدنيا
ومشى .. فاطمة قامت وشالت أغراضها اللي على الارض ودخلت للبيت بسرعة ومن كثر ماهي تحاول تمنع نفسها من الإنهيار جوالها طاح وانكسر وهي تصعد على الدرج طاحت شنطتها وصلت لغرفتها وسكرت الباب بقوة وقفلته وطاحت على الارض تشاهق وهي تتذكر ذاك اليوم بالجامعة ( كانت اول سنة لها بالجامعة وكانت تحاول تتأقلم مع الجامعة تعرفت على شلة بنات كانوا في منتهى الدناءة .. طبعا سحبوها معاهم الين صارت مثلهم يعني فاطمة ماكانت تكلم شباب بس من تعرفت على هالشلة تغيرت بشكل مو طبيعي وصارت تطلع مع شباب .. طبعا ذولا البنات مو متعرفين عليها حبا فيها لا علشان يبغون يمصخرونها مجرد تسلية وبس .. وحده من البنات قالت لعبدالله انه فاطمة تواعد شباب وطبعا عبدالله قال ليوسف وراحوا هم الاثنين للجامعة وشافوها بتركب سيارة شباب .. فعبدالله ويوسف عصبوا واسحبوها من السيارة من شعرها .. واضربوها ضرب قدام الجامعة كلهم وتفشلت فاطمة ومن بعد هذاك اليوم وقفت قيدها وعادت السنة وطبعا ابوها وامها مايدرون ولا كان ذبحوها من زمان .. والكل لما يشوفها يتكلمون من وراها " أوه هذي الصايعه اللي تكلم شباب امبيه طااافج اخوانها طقووها طق " وغيره وغيره من الكلام .. بدت فاطمة تنسحب اشوي اشوي عن الناس وتحاول ماتحتك فيهم .. حقدت على عبدالله ويوسف وحلفت انها تنكد عليهم عيشتهم .. أكيد بتقولون حشا وش ذي البنت اللي حاقده على اخوانها بشكل مو طبيعي كأنهم موب أخوانها أبد ! هذي البنت تراكم بقلبها الحقد والكره .. وبدت اول شي بالبنات اللي سوو فيها كل هذا .. انتقمت منهم وتلذذت بإنتقامها .. وبدت فعلا تمشي على كلام البنات وصارت فعلا تماشي الشباب ) .. ضمت رجولها وهي تبكي وتحاول تخفي شهاقها .. وكأنها تحس بآلام الضرب على جسمها ..

#$#$#

خلص البارت الاول اتمنى تكون اعجبتكم اتقبل النقد البناء ..
وطبعا اتشرف بمتابعتكم لي وهالروايه من تأليفي ..
يلا استنى الردود الحلوه والتقييم ..