[لامارا]

#$#$#

نرجع للكويت تحديدا عند اسماء ..
اول ماخلصت من المكالمة الغريبه او بالأحرى الرقم اللي حافظته عن ظهر قلب .. ترتجف مو مصدقه هو اللي متصل عليها هــو !!
فجأه ابتسمت وبعيونها دموع ماتدري شوق ولا حب ولا خوف ولا ايش بالضبط .. ضمت الجوال وهي تهمس بفرحه : حمد
جالها زوجها محمد طالعها وهو مستغرب : حياتي شفيج
اسماء اول ماشافته تخربطت وتركت الجوال ومسحت دموعها وقالت بإبتسامه كلها إرتباك : هاه لا ماكو شي
محمد : اوكي انزين اقولج اليهال وانا حدددنا يوعانين
اسماء ابتسمت له وقالت : اوكي من عيوني
وراحت اسماء للمطبخ ..
محمد موش راضي يصدق انه اسماء مافيها شي الفرحه اللي هي فيها عمره ماشافها ..
راح لعند الجوال لكنه تعوذ من ابليس مستحيل اسماء تخونه .. ونزل تحت


#$#$#

ببيت ابو عبدالله .. تحديدا عند غرفة البنات ..
وسن ارتبكت وقالت : كـ كنت طالعه وشافني فقالي امشي اوصلج البيت
ريم كانت بترد عليها لكن قاطعها رنة جوالها راحت وشافت المتصل تنهدت بعصبيه وراحت ببلكونة غرفتهم ..
رغد بنرفزه : وسون ريم ماراح تسكت لج انتبهي لتصرفاتج وعقلي لايغرج هدوئها اذا عصبت عصبت
وسن ببرود وهي تحط السماعات وتنسدح : بالطقاق
رغد وهي تتحلطم : ماكو فايده ماراح تتوبين الا لما تنطقين طق


#$#$#

نروح لبريطانيا ..

من بعد ماطلعت هند مع ابراهيم وهي نفسيتها زفت وماتبي تكلم احد وماتروح للجامعه وطبعا الكل يسأل عنها وهي ماتجاوبهم ابد كله تصيح وبس وموش عارفين وش سالفتها ..
دخلت على غرفتها ريناد وجلست قدامها على السرير ..
ريناد بحنيه : حبيبتي هنوده شفيج كلش مو على بعضج
هند مسحت دموعها وقالت بإكتئاب وااضح : مافيني شي
ريناد تنهدت : هند مو علي هالكلام شصاير لا يكون الجلب متحرش فيج
هند : لا (كملت بسخريه ) قالي احبك
ريناد تنرفزت : يعني تحرش فيج
هند تنهدت بضيق : لا السالفه مو كذا
ريناد : عيل ليش متضايقه جذي جنه هموم الدنيا كلها فوق راسج
هند ودموعها تتجمع بعيونها : تذكرت راشد وكأنه مستحيل انساه كأنه قريب ما ادري حسيته كذا يشبهه واجد واااجد يشبهه
وضمت رجولها ورجعت تبكي
ريناد انكسر خاطرها عارفه تفاصيل حياتها كلها هي صديقتها من الثانويه ابو ريناد كان عنده شغل بالسعوديه لفتره طويله في مرحلة الثانويه فنقلها لمدرسة ثانويه وبكذا تعرفت على هند ومن يومها مستحيل هند تخبي على ريناد اي شي..
ريناد بملامح حزينه : حياتي والله مو قلت لج خلاص انسيه
هند وهي تبكي وتحس نفسها منهاره : طلع كويتي وفوق هذا كله اسمه ابراهيم .. ماتقولين لي وش اسوي بعمري انا تعبت والله تعبت
ريناد استغربت : كويتي !!!
هند وهي تبكي هزت راسها بإيه ..
ريناد قربت جمبها وضمتها تهديها وهي تقول : خلاص ياهند خلاص ياحبيبتي
هند وهي تبكي : والله ماني قادره انا احس نفسي منهاره .. خلاص والله مو قادره حرام عليه ليه يسوي فيني كذا ليييه انا شسويت له
ريناد تضايقت على حالتها واجد فنزلت دموعها على :خلاص ياحبيبتي اهوه لو يحبج صج جان ماخلاج تتعذبين جذي عفيه اهدي مايصير تسوين بعمرج جذي
هند وخرت عن ريناد وقالت ودموعها ماوقفت : بس انا احبه
ريناد وهي تمسح دموعها : حياتي انتي ماتحبينه انتي سافرتي وتغربتي عن
اهلج كله بس علشان تنسينه وبعدين حطيتي حرتج بالدراسه علشان بعد تنسينه خلاص انتي تعديتي مرحلة البجي والعذاب اللي رجعتيه انتي بنفسج الحين
هند وهي تبكي اقوى : حاولت اقنع نفسي والله حاولت بس ماقدرت والله ماقدرت
ريناد : لا امبلا تقدرين مافي شي اسمه ما اقدر كل واحد مننا وعنده قدره يسوي الشي اللي يبيه اهوه .. انتي ماتبين تنسينه هذي السالفه كلها
هند ودموعها تنزل بصمت : اللي مثله مستحيل ينتسى جرحني ياريناد جرحني
ريناد : والله مايسوى تسوين بعمرج جذي اهدي ومسحي دموعج انا بروح اسوي لج عصير ليمون تهدين فيه اعصابج اوكي هند مسحت دموعها وهزت راسها بإيه ..
وراحت ريناد تسوي عصير الليمون ..
بعد تقريبا 3 دقايق توجهت لغرفة هند وانصدمت لما شافت هند طايحه على الأرض حطت العصير بسرعه على اقرب طاوله واتصلت على الإسعاف ..



#$#$#