[مكحولة العين]

ولاني تأخرت عليكم تفضلو بعد

الفصل الرابع
....................

منصور : شما شسالفه؟
شما : امي ملزمه تشل ثيابها وتطلع من البيت ..
محمد : بس يا امي انتي مستحيل تطلعين من هالبيت اذا في حد بيطلع فهو منصور ..
منصور: هالبيت هو بيتي مثل ماهو بيتك ومحد يقدر يطلعني من هنيه واللي مو عاجبنه يتفضل يطلع محد ماسكه..
محمد: افهم من كلامك انك تطرد امي من البيت ..
منصور : انا ما طردت حد ...روحي لمها تريدج..
محمد: ومن هاذي بعد؟
منصور : اووووه ما بشرتو اخوي ليش ما تدري اخوك تزوج ؟
محمد:شو ؟
منصور : مثل ما سمعت ...الحين اسمحولي رايح اشم هوا الجوهنيه يسد النفس..


طق طق طق
شما : سلاام..
مها : هلا تفضلي شما ..
ودخلت شما وهي تشوف اللي واقفه قدام المرايه وتجفف شعرها ولافه وجهها..
شما : الله على شعر مرت اخوي يجنن..
ولفت لها مها : ههه مشكوره ..
شما جمدت مكانها تمت تشوفها ..
مها : فيج شي ليش سكتي؟
شما : لا ما فيني شي بس شكلج..
مها : بلاه شكلي يخوف؟
شما : لا بالعكس انا انبهرت من جمالج وايد وايد حلوه
مها : بس عاد عن المجامله ..
شما : لا والله مو مجامله انتي ملاك ماشالله عليج ..
مها : بس ترى ما تعودت حد يقولي كذيه ترى بتكسر..
شما : لا عاد اكيد منصور ما قصر من الكلام الحلو واحد عنده حرمه مثلج ..
مها : آسفه بس ما اتذكر شي ..
شما : مسكينه انزين انتي ليش رافضه تروحي المستشفى يمكن يقدرون يردون لج ذاكرتج ؟
مها : لا انا من اسمع كلمة مستشفى احس بخوف وكأنج تطرين لي الموت دخيلج ما اريد اروح..
شما : طيب مثل ما تريدين بس هذا لمصلحتج ولمصلحة اخوي المسكين هو مستهم عليج وخايف عليج وايد..
لمحة شما رقبة مها اللي كانت تملاها الكدمات وشافتها مها وحاولت تغطيهن
شما : لحظه خليني اشوف ........هاذي كدمات وجروح ........ظهرج مليان جروح وكدمات ..
مها : لو سمحتي لا تلمسيني فهالمناطق ..
شما : انا آسفه بس شو منه كل هاذا؟
مها : مادري..
شما : لا اكيد من الطيحه لازم اخلي منصور ياخذج المستشفى ..
مها : دخيلج لا , ما اريد المستشفى ..
شما : انتي ليش صايره مثل اليهال هم ما راح ياكلونج..
مها : الله يخليج لا ..

........

محمد: هذا ما اييب غير المشاكل انا بكلم ابوي بخليه ايي يتصرف معاه ..
ام منصور : لا لا تقوله ابوك ما فيه له خله مستانس بروحته ..وانت يا ولدي روح لجامعتك تأخرت وايد..
محمد : خلاص راح اليوم ماله داعي اروح للجامعه.. وبعدين شو سالفة البنت هاذي متى تزوج؟
ام منصور : البنت سالفتها سالفه............

........

شما : الو منصور؟
منصور : هلا شما
شما : منصور مها لازم تروح المستشفى وبالقصب بعد ..
منصور : ليش شي صار الها ؟
شما : لا لا البنت جسمها كله متكدم ومجروح لازم تتداوا..
منصور :بس
شما : بس شو
منصور"انا ما دعمتها من شو بيكون متكدم"
شما : منصوور ليش سكت؟
منصور: هي مو راضيه تروح
شما : وانت بتمشي على شورها بنوديها بالقصب ..
منصور : الحين ياي عندكم..

مها:ليش ليش تسوين كذيه حرام عليج"وبدت تصيح"
شما : مها طولي بالج ليش تصيحين ماراح يسوون فيج شي ..
مها :انا مو خايفه من المستشفى انا خايفه من اخوج
شما : من منصور بس ليش ؟
مها : احس انه هو السبب باللي صار لي انا اليوم ماعرف منو انا بسببه دخيلج انا خايفه منه ماريد اروح معاه ماريد اشوفه ..
شما : بس هذا زوجج وهو خايف عليج اكثر مني مستحيل يسوي فيج شي ..
مها : دخيلج دخيلج يا شما ماريد اروح دخيلج

طق طق طق
منصور : ها بنات جهزتو؟
شما : منصور ؟
منصور اللي لمح مها من دون شيله طلع برا بسرعه
شما : انا رايحه اكلمه انتي اهدي شوي..

منصور"استغفر الله انا شلي بلاني فيج"
شما: منصور ..
منصور: ها بتروحن ؟
شما : البنت خايفه منك تفتكر انك انت السبب باللي صار لها ..
منصور: "تتهرب مره ثانيه كل شوي بتييب حجه "...سمعي قوليلها تعالي بالطيب لا اييها بالغصب واوديها
شما : الامور ما بتنحل بهالطريقه البنت خايفه منك وانت تبا تزيد خوفها..
منصور : اووووووووووه ....وراح صوب الغرفه ودخل

مها :شما..
فهاللحظه منصور انصدم من شكلها
مها وقفت تشوفه :انا وين شفتك من قبل؟
شما : هذا زوجج منصور..
مها وكأنها وعت للواقع اللي هي فيه انتبهت لنفسها وجرت لغرفة الملابس
منصور "انا في حلم ولا بعلم"
شما : منصور ..منصور ..منصور
منصور : ها
شما : بلاك ..انت سمعت اللي سمعته مها بدت تتذكر
منصور ما رد على اخته وشل عمره وطلع من الغرفه

...........

نوره: رشود انت هنيه ليش ما رحت للمدرسه؟
راشد"يغير الموضوع ":نوروه تدرين منو لقيت ؟
نوره : لا تغير الموضوع وقلي ليش غايب ؟
راشد : زين باقولج من لقيت ....لقيت منصور ولد عمي ..
نوره : ها منصور ولد عمي والله متى شفته ؟
راشد : البارح في الليل الساعه 2 شفته نازل من السياره هو وحد معاه بس ما عرفت منو ..
نوره: وانت شو تسوي الساعه 2 برا البيت ..
راشد: اووووه مالج خص انا هب ياهل تحاسبيني..
نوره: ياهل الا انت ..
راشد : اوووه فكينا..
نوره "وينك يا ابوي راشد محتاج لحد يربيه ويشوفه وانا ما اقدر عليه الله يرحمج يا امي "
نوره : منصور ...بدق على شما بسألها عنه..

.......

هيا : ها احمد علومك كحلت عينك..
احمد: لا قبل لا ادخل سمعت وقعه وصريخ قلت احسن ارجع وما ادخل ...مسكين منصور كل ما ايي تصير هالحفله..
هيا : ليش هم شو مشكلتهم معاه ؟
احمد : ما يخصج يهال آخر زمن خليج على الخط الثاني هاذي مشاكل كبار لا تتدخلين..
هيا : بسم الله بس كنت أسأل كلتني بقشوري حشى ..
ام احمد : السلام عليكم ..
هيا +احمد : وعليكم السلام
احمد : ها ام احمد اخبار الغنم ..
ام احمد :يسلمن عليك ...وووه هيا شحقه ما سرحتي المدرسه..
هيا : بس تعبانه شوي ..
احمد : تعبانه ورابعه من الصبح بيت خالتي ..
ام احمد : وووه ذكرتنيه باروح صوب خويتيه حليلها دقت اليه تعبانه تقول منصور ياهم ومضوي الحرمه معاه..
احمد : اي حرمه ؟
ام احمد : انا داريه ببدل ثيابيه وباروح صوبها ..
احمد : هياااوي ...قوليلي عاد من يومين انتي هناك معقوله ما تعرفين شي؟
هيا : وانت شلك بسوالف الحريم خلك على الخط الثاني لا تتدخل ..
احمد : بنت ..والله ان مسكتج ما ارحمج ..
هيا : شما قالتلي ما اقول لحد..
احمد: عاد شما اللي قايله ما نقدر نجبرج على شي هي تباه بس هين يالحمار تدرين وما قلتيلنا ..

.....

منصور : ياربي انا شاللي خلاني ادخل عليها بهالطريقه ليتني ما دخلت ولا شفتها , انا يمكن كنت اتخيل ...يالله شكثر تشبهها , آآخ يا مها جددتي الجرح اللي برا من زمان...