اول حاجة من دابة حددي المكان لي غاذي ينعس فيه او لي غاذي يبغي يسترح فيه فحال بيت ديالو صغير. ممكن تصايبي ليه علبة ديالو بالعود الخشب عند اي نجار عطيه غير العبار ديالها تطلع ليك رخيصة 150 د او 200 بالكثير، حاولي الباب ديالها يكون على ذكل دائرة و تكون كبيرة تدخل قط صغير و قط كبير عاقل. و تكون تقدري تركببها و ديمونطيها كاملة. قطعي بونجا غليظة من عند اي صانع الاتات و ديريها ليه في العلبة ديالو و خوذي معاها حتى مخذة صغيرة تكون رطبة. و ديمة في الليل سخني الما و ديريه في قرعة و حطيها داخل العلبة في القنت باش تدفيه مزيان.شري شي بانيو مربع ديال البلاستيك، و اذا حداك شي جلسة ديال الياجور خوذي الرملة و لا كاين منين تجيبي التراب فابور مزيان. حطي البانيو ديال التراب حدا البيت ديالو. خوذي طاسات ديال اينوكس او الزاج وحدة للماكلة و وحدة للماء، وكليه 3 المرات في النهار، و ظبطي وقت الماكلة، ما تعطليش الوقت باش يبقى ديما مولف هاذ الروتين. مثلا كل 4 سوايع وجبة. و عبري وزن الوجبة شحال و حطي ليه. بان ليك كملها، زيديه شويا معبور و ديك الساعة تعرفي شحال كمية الاكل لي خاصاه. ملي يكمل الوجبة و مازال ما وصل وقت الوجبة الاخرى و كنت انت بغيتي تاكلي شي حاجة و جا عندك ما تعطيش و جري عليه بلطف علميه انه عندو وجبات ديالو عندها اوقات محددة. شري ليه كرات صغيرة ديال التوب فحال كبة ديال الخيط شي جوج، نونوسات ديال التوب حطيهم ليه. لعبي معاه و مشطي ليه و بقاي تشدي ليه يديه و رجليه. غيري ليه التراب يوميا او فين ما يبان ليك دار شي حاجة غير يكمل هزيها في البلاصة. و ديري رشاشة فيها الكريزيل حركي تراب فحال الحرث و رشي الكريزيل راه معقم. جري التراب بيديه و علميه كيفاش يدير. مني تشوفيه تعلم. مرة مرة بعدي بانيو التراب علي البيت لي فيه. كل مرة في 3 ايام في اتجاه طواليط. حتى تدخليها لطواليط و هو غادي يولي يدخل لطواليط يلقاها ثما. من بعد حطيها فوق لاشاس. و خليه حتى يولفها. من بعد نقصي التراب و خليها فوق لاشاص. من بعد حيدي التراب و ديري فيها تقبة، و خليه يولف. من بعد حيديها مرة و مرة رديها من بعد حيديها بمرة و خليه يمشي لا شاء. بالنسبة للاكل خوذي ليه ريوس الدجاج و بقايا اللحم و العظومة من عند الجزار، تنقية ديال الحوت غسلي داكشي طحنيه مع خيزو و بطاطا مسلوقة، خوذي ليه لي فيطامين عند البيطري و شربيهم ليه في الرضاعة. |