آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
09-01-11, 12:02 AM
| #21 | ||||||||||||||
| مراقبة ومشرفة سابقة ونجم روايتي  
|  %الجزء الثاني والعشرين ماقبل الاخير % اليوم الاربعاء بكره بيكون ملكه شوق على خالد كانت خايفه بشكل كبير ويزيد خوفها كلما قرب الموعد ماتدري وش السبب رغم انها تحبه ومرتاحه له لكن بعد اللي صار لها حست ان فيه لغز اللي محيرها ان خلود ماصارت تدخل بعد سالفه اسيل تبي تعرف وش صار عليها مافيه أي وسيله تقدر توصل لاخبارها وضحى كانت جالسه على السرير وتلمس بطنها بشويش : حبيبي ان شاء بابا يرجع لنا ويشوفك ويستانس فيك انا متأكده انه بيرجع هو يحبنا مستحيل يتخلى عنا بالسهوله هذي ( نزلت دمعه على خدها) يمكن مشغول في حاجه يمكن حب يكون لحاله عشان يهدأ مستحيل مثل مايتكلمون عنه الناس انه راح عشان يتزوج علي صح حبيبي يالله نقوم نجلس عند جده لانها لحالها طلعت وشافت ام عبدالله جالسه على قناه المجد وتسبح بالمسبحه : ليش قمتي يابيتي وضحى: وش اسوي مشتاقه لك كثير قلت اجي اجلس معك وهذا انا جالسه وراي ماخد شوفي ام عبدالله: ربي يحفظك يابنيتي وضحى: يمه وش فيك شكلك متضايقه؟ ام عبدالله: أي والله متضايقه من بنتي اللي تسوي عمليات مر خشمها ومر جسمها ومهمله عيالها حتى ملكة ولدها لو لا انها خايفه لايقولون ربعها مقصره ولا ماكان سوت شي له وولدي اللي مايندري وينه وضحى : طويلي بالك يمه الله كريم بعدين مصيرها تعرف ان اللي تسويه غلط ويقسي قلوبهم عليها اما عبدالله ان شاء الله يرجع بسلامته ام عبدالله وهي ترفع ايدها: يارب / / / اليوم رحلت العوده الى ارض الوطن الى ارض الامن والامان بعد مااغمى عليها الريم بسبب هبوط في الضغط والحاله النفسيه اللي عاشتها يومين على طول صقر حجز باقرب رحله ، صقر كان متعذب وضميره يأنبه على الحاله اللي وصلت لها الريم بسبته ماصارت تكلمه وهو فضل يخليها ترتاح بعدين يفهمها على كل شي صقر : ياللا يالريم اعلنوا عن رحلتنا قامت الريم وهي تحس بغربه الروح جات وهي متضايقه معه بس عاشة اسبوعين في ميونيخ ماتقدر تناساه وتذكر انها من اجمل اللحظات اللي قضتها ، لكن شي بداخلها انكسر في جارمش كرهتها واللعنت الساعه اللي قضوها فيها تحبه ؟ تعشقه ؟ لكن ماتقدر تنسى اللي سواه فيها تعبها من اول ارتبط فيها الى الحين وهي تعاني منه اولها اعناده وشكه واتاليتها خيانته اصعب شي عالمرأه واللي ماعتقد انها راح تسامح عليها الخيانه ومتى؟ في شهر العسل ماهو عذر حتى لو ماعطته حقوقه مايحق له يرتكب المعصيه / / / ماجد كلمه الرجال يهدد فيه كالعاده لكن ماجد سوا نفسه انه خلاص راح ياخذ البطاقات ويمشي اموره وفعلا راح يتم الامر يوم السبت ويرتاح نهائي منهم ومن تهديداتهم ، خدمه قدمها عشان وطنه ليه هو يسكت على الغلط ؟ صحيح مهمل في دوامه لكن اذا اشتغل اشتغل بضمير وحق شهور هذا ماجد وهذي شخصيته والكل يعرفه كم مره انتبهه لاشياء وملاحظات كان يكتشفها اذا راجع شغل زملائه تسجيل مواليد بجنسيات ثانيه والسبب عشان يضمنون ان هالاولاد يعيشون في السعوديه لكن هذا الشي فيها خديعه للدوله ... / / / ليان وراكان سلطان وريناد اهملناهم في الاجزاء السابقه لكن لاجديد بحياتهم ماغير ان كل واحد ينتظر اليوم اللي يجتمع مع شريكه حياته راكان كان حلمه ليان كانت تعجبه عفويتها رزانتها في اوقات هبالها وان شاء الله قرب الوقت اللي يجلس معها ويشوفها على راحته خصوصا ان فارس مسافر ومرتاحين منه ريناد كانت متضايقه من سلطان لانه مايبي الا زواج على طول لكن احترمت قراره ورضت وهذا الشي كبرها بعيون سلطان اكثر صار سلطان يجي عمه كل يوم عشان يعوضه عن غياب ولده ومايخلو من الصدف اللي كانت تجمعهم ببعض وتزيد تعلقهم / / / فارس وغسان التهوا عن دينهم وصارت جنتهم هي دنياهم انغمسوا بشهواتهم في ارض الغرب لكن نسوا ان الدنيا تدور وانه كما تدرين تدان واان فيه رب يحاسبهم ويكتب كل كبيره وصغيره / / / مشاعل كلمت ام ماجد اللي بالغصب ردت عليها وقالت لها ان رهف سافرت مع زوجها وعطتها رقم ياسر كانت تبي تصحح غلطتها ، خافت ان الدور بيجيها بعد ماشافت بنت خالتها واللي صار فيها وكذا مره دقت على ياسر لكن ماكان يرد لاختلاف الاوقات / / / وصلوا الريم وصقر وكل واحد قلبه شرق وغرب قراب من بعض لكن روحهم بعيده الريم: احد يدري اننا راجعين ؟ صقر: مايحتاج قلت للسواق يجي وهو على وصول مانبي نصحيهم الساعه 3 الحين الريم سكتت وهي اصلا ماعندها شي تقوله وماتبي تتكلم معه كثير جاهم السواق وصلهم للبيت ودخلوا بهدوء لكن شافوا الجازي وهي نازله كانت تبي تشرب ماي الجازي : صقر الريم ماني مصدقه صقر: اشششش وطي صوتك لاتصحينهم سلمت عليهم وهي تضم فيهم ومبسوطه : ليش رجعتوا خبري فيكم الاسبوع الجاي الريم: ياشيخه اشتقنالكم بعدين شوق وحنتها جابوا فايده الجازي وهي تناظر اخوها اللي يطالع الريم: ااااي يالاخو ماشبعت منها ثلاث اسابيع وهي قدام وجهك مامليت الريم وهي تجامل : هههههه ااص شكلك بتخربين علينا المفاجأه اللي بنسويها لخالتي صقر بمزح: يالله وخري من طريقي الجازي : بسم الله هذا وانت توك جاي وش هالدفاشه شلون متحملتك الريم مادري؟ الريم نزلت راسها ورقت الدرج بعد ماستأذنت منها واتجاهلت كلامها دخلت الجناح حقها ونبهرت فيه ماتوقعته كذا الاثاث فخم احسن بألف مره يوم شافته في الكتالوج كان مع التعتيق روعه ومنتاسقه والتحف اللي مزينه المكان ومخليته انيق صقر: تفضلي الغرفه وارتاحي انا بروح اصلي الفجر في المسجد الريم غمضت عينها ودخلت الغرفه كانت كبيررررره والاثاث في منتهى الاناقه اضاف جو للغرفه حلو والالوان اللي فيها زادها جمال كان بنفسجي وبالوانه المتدرجه والمداخله مع لون الخشب العودي طالع حيل هادي كان بدايته عباره عن جلسه فيها كنب أبيض وعليه قماش بنفسج والمخاد تبعه بنفسجيه وجنب البلكونه كرسي هزاز بعدين درجتين توصل سرير النوم اللي كان عريض مره حط الاغراض ودخل الحمام وضى وطلع وهو توه يأذن ، الريم كانت تحس بتعب وخمول بجسمها وراحت الحمام تاخد لها دش دافي وضت وصلت وعلى طول راحت تنام وهي تفكر باهلها اللي اشتاقت لهم ، تفكر ترجع مثل اول الريم اللي كانت عايشه براحه وماحد يقدر يزعلها تفكر بكره وشلون تتعامل مع صقر عند اهلها هي تعبت منه بس لازم تجامل لاجل اللي حولها ... صقر يوم جا شافها نايمه ومبين انها مرهقه لانه حتى اللحاف مو متلحفه لحفها وهو يتأمل وجهها بدقه عيونها الكبيره واللي جزء منها مفتوح وهي نايمه والرموشها الكثيفه ،تحركت وشالت خصله باين انها ازعجتها لانها كانت طايحه على وجهه حس على نفسه ونقص على التبريد لان الغرفه كانت بارده مع الرخام وراح ينام بالغرفه الثانيه بعد ماخذ اغراضه اللي يحتاجها كانت هالغرفه مخليها احتياط ويبيها اذا ربي رزقهم بطفل راح وهو يتأمل ان اليوم بيكون افضل من الايام اللي راحت وعلى امل تتحسن علاقته فيها بعد مايعتر ف ويوضح لها الامور على صلاة الظهر سمعت الريم صوت الباب حق الجناح يندق فتحت الباب شافت الجازي متخصره الجازي بهمس: ساعه لين تفتحون يالله صلاه بعدين مو قادره اسكت ترا نص ساعه اذا مانزلتوا بتكلم واقول انكم وصلتوا صقر وهو يخرج من الغرفه الثانيه لان الصوت ازعجه وبيده فوطه ويحك شعره : وش صاير؟ الريم اختبصت ماتبي تحسس احد بمشاكلهم : طيب خلاص بنصلي وننزل لكم الجازي استغربت ليه صقر نايم بالغرفه الثانيه لايكون متخانقين مع بعض .... صقر وكأنه فهم سكوتها: يالريم الاغراض الزايده اللي حطيتها بالغرفه هذي خليهم يرتبونها فهمت الريم انه يصرف: أي ان شاء الله قلتلك خل اغراضك قريب بتحتاجها وين تجلس رايح جاي بين الغرفتين الجازي ماقتنعت تحس برتباك وتوتر بين الاثنين وفضلت تنسحب : اوك يالله انتظركم تحت الريم سكرت الباب وراها وتنهدت وهي مغمضه عينها صقر كان يتأملها كان شكلها حلو وهي قايمه من النوم فتحت عينها وشافته يناظرها انصبغ وجهها باللون الاحمر لكن سوت نفسها عادي ومشت للغرفه وهي تقول : عن اذنك بروح اجهز نفسي قبل تخرب علينا الجازي صقر هز راسه ( للحين ماتبينا نتفاهم ؟ اصبر والله يعين... اصبر لمتى مادري؟؟؟ ) / / / خالد كان مبسوط وشلون ماينبسط واليوم ملكته من شوق ، يالله وش قد انتظر هاليوم ماتوقع ان فيه احد بينسيه حبه الاول لكن شوق اثبت العكس ودخلت قلبه وتملكته والاحلى من كذا انها تبادله الشعور ومتأكد انها تحبه لكن خايف ،، ايه خايف لانه يبي يصارحها بكل شي مايبي يخبي عنها شي هي بتكون زوجته شريكه حياته ورفيقه دربه لازم تعرف ماضيه وانه سبب في اللي كان بيصيبها من جهه ثانيه شوق كانت تفكر ليه تحس بنتاقض في احساسها هي فرحانه بس فيه شي يعكر صفوها ، تفكيرها متلخبط ومشاعرها متضاربه ، يعني هي متقبله خالد وتكن له مشاعر لكن اللي صار فيها اثرت على نفسيتها ، اللي صار بغى يضيعها ويدمرها لكن ليه صار كل هذا؟ هنا السؤال ؟ جالس على السرير مدد هذا حاله من شهرين زهق يبي يطلع يشوف الناس، مشتاق لاهله لديرته لكن متى؟ متى؟ نفسيته تحسنت بعد العلاج لكن محتاج لاهله وحبايبه حوله؟ اخذ القرآن علاج روحه وبدأ يقرا بخشوع عشان يحس براحه وطمأنينه ويترك الوسواس عنه شخصيه جديده على نهايه القصه يابحرالغلا معقوله بيطلع الحين؟ وينه من بداية القصه؟ بحر: كل شي جايز حبايبي لكن كملوا راح تعرفون الاجابه وان شاء الله خير / / / طشت العطر وعدلت نفسها للمره الاخيره ، ابتسمت استعداد للمجامله آآآه لو تدورن وش اخبي ورا الابتسامه ، ينتابني حزن فضيع مجرد ماشوف وجهه صقر يعذبني باقسى انواع العذاب ياليتني امسك مشاعري يالتني ماحبيته كان انا مرتاحه الحين ومايهمني اللي صار دخل صقر بعد مادق الباب وكان لابس الثوب والطاقيه وبأيده الشماغ اللي متعلقه بالعقال الريم من زمان ماشفته كذا وتحرك شي بقلبها لكن سرعان مالفت بوجهها وخذت البلشر بس تلهي نفسهاوبرسميه: هلا بغيت شي؟ صقر وهي يدقق فيها بلبسها اناقتها جمالها المفتون، بكبريائها وعنادها : ياللا ننزل تأخرنا عليهم الريم وهي ترتتب اغراض : ابي اروح لاهلي العصريه صقر: مو مشكله نروح ونسلم عليهم بس ماراح نتأخر عشان يمديك تتجهزين لملكه خالد الريم طالعت فيه: باخذ اغراضي واتجهز من عندهم وماحب يعاندها: خلاص اللي يريحك الريم وصقر نزلوا كانت العنود حاطه بنتها في حضنها وترضعها طارق : ماما وانا ابي حليب ام صقر: هههه لا انت بطل كبرت بتشرب من حليب الكبار الجازي: الله البزر طول عمره بزر وش تفهمين فيه طارق فهم عليها وبعصبيه: انا ردال قال بابا الريم وهي تسمعه وميته عليه ومشتاقه له : أي رجال من قال مو رجال التفتوا الكل على الدرج ويشوفونهم ام صقر فزت على طول وراحت تحضن ولدها وكانت الريم تتأملهم صقر وهو حاضن امه : يمه لاتبكين هذا انا قدامك بخير العنود بمزح: يمه خلصتيه علينا بسك عاد بعدين لاتنسين انه متزوج الحين وفيه ناس يغارون الريم ابتسمت بخجل وسلمت على العنود اللي حطت بنتها هلا والله وغلا مبروك يام طارق العنود: الله يبارك فيك يامرة اخوي عقبالك ام صقر جات وحضنت الريم : هلا ببنيتي ، هلا وغلا نورتي بيتك الريم : هلا بك يمه وانبسطت من استقبالها لانها تعاملها نفس بنتها سلموا على بعض والجازي شايله طارق طارق: ليم ليم احبك الريم وهي تشيله : يابعد قلبي انت وجلست تبوس خدوده لين حمر وجهها وتضايق: حلاصصصصص انا ردال كبيل الريم : هههههه أي صح صقر همس لها: بس ترى فيه واحد يغار هنا الريم تجاهلته وحضنته زياده وجلست تمسك خدوده وتعضضه ام صقر: اشوى للحين سوقه ماشي طارق صقر: هههه اكيد هو الاساس عطيني طارق يالريم انتهى دورك طارق راح لخاله وسلم عليه خشم وضحكت الريم عليه لان خشمه نتفه عند صقر العنود: يوووه طاح حضك يابنيتي ماحد عبرك الريم قامت من الكنبه : افا عليك هههه عشان طارق نسانا عطيني ياها بس ترى مو ذاك الزود اعرف اشيل الصغار الجازي : ان شاء الله قريب نشوفك ام ام صقر : يارب الريم حست بحراره الجو خصوصا ان صقر يناظرها وهو تشيل الجوري : يمااااه احس بطيح ضعيفه شلون تشيلنها العنود بمزح: لاتطيح بنتي اجلسي ترا تعب تسعه اشهر الكل:هههههههههههه جلسوا يسولفون وتغدو بعدين استأذنت الريم منهم عشان تروح لاهلها بعد ماجهزت اللي بتلبسه الليله / / / رهف تكلم خالد رهف وهي تغمز لياسروحاطه على السبيكر : خالد امانه اوصف شعورك هالحزه خالد وهو يتسهبل: شعوري مثل أي واحد فرحان انه خذ سياره فراري رهف وياسر: هههههههههههه ياسر: طيب طيب بوصي رهف تكلمها تقولها اجل تشبهه بسياره خالد ويسوي نفسه خايف: لا تكفى ادري فيك تأثيرك قوي على رهف وماتقدر تقولك لا رهف ابتسمت لياسر: أي مو زوجي لازم اسمع كلامه حتى لو انت الضحيه خالد: لنا الله يارهف طيب ياسر تعرف رهف كانت تقول (وكمل وهو يغير صوته لبنت): لااا ماقدر اتزوج دكتور جراح هذا ماعنده قلب شلون يشرح الناس ولايتأثر ياسر طالع رهف وبوز: رهف: كذاااااااااااااااااب والله يلعب عليك ماقلت شي خالد: هههههههههههههههههههههه ياسر : اقول شكلك استخفيت روح يالله لاتفشلنا عند البنت خلك رزين خالد : امزح معكم ترا عالعموم مشكورين عالاتصال رهف وياسر: الف مبروك مره ثانيه ربي يسعدكم رهف: كان ودي احضر لكن ظروف يالغلا وان شاء الله الزواج نحضره خالد : ان شاء الله ياسر: يالله سلم على الجماعه رهف : باااااااااي خالد : الله معكم / / / كان ابو لافي وام جراح وراكان وجراح في الصاله مجتمعين بعد الغداء اللي ياكل فواكه واللي يشرب شاي دق جوال جراح وقام بسرعه لعند الباب ابو لافي: هذا الصبي ماهو بصاحي من يوم قام وهو يناقز وراه شي اقص يدي راكان: خلك تدري انه مهبول مو انا دايم تدافع عنه جراح: ترى اسمعك هاه؟ ام جراح : هههههه لاتسبون بكري ابو لافي: اخبار وضحى ياسعاد ام جراح: لا احسن هذا انا يوم ورا يوم اروح لها ويوميا اكلمها فديتها لو يجي زوجها تكتمل فرحتها ابو لافي: الله يرجعه بالسلامه الغايب عذره معه وعبدالله رجال ولد رجال الله يرحم ابوه اللي كان صديق دنيا جراح دخل من الباب وهو يقول : سبرااااااااااايز الا الريم وصقر وراه الكل قام وهم متفاجأين سلموا عليها بالاحضان اما الريم انفجرت تبكي من شوقها لهم صقر تضايق حيل هو صار مايتحمل يشوفها تبكي يذكره بسوايه قبل وش قد اذاها نفسيا وعيشها مع شكها وغيرته راكان وهو يضرب جراح: وش دراك يانذل جراح: وش فايده متزوج الجازي من الفجر داري ام جراح وهي تهدد بيدها: ولاتعلمني طيييييب حسابي مو معك مع مرتك الكل : ههههههه صقربمزح: ترى اخوها هنا هههه راكان: الريم اكيد بتمسح على عقلك وتنسى الكل بوجودها انحرجت الريم وضمت ابوها بقوه لانها جالسه عنده ومشبكه ايدينها بيدنيه ابو لافي مسح على شعرها بحنان وهي تهمس له :مشتاقه لك يبه صقر ناظر فيها وهو يسولف مع جراح لكن باله مع الريم اللي رجعت طفله ومتمسكه ببوها راكان: أي يالحبيبه ترا صرتي مره متزوجه لاتفضحينا عند زوجك قومي من عند ابوي ام جراح وهي تجلس عندها: خلوها وش عليكم منها جراح غمز لصقر: ماهي ناقصه دلع ياناس الريم ضحكت : خلوني اتدلع عليهم مشتاقه لهم واستمر ت السوالف والضحك والريم طلعت لغرفتها شافت كل شي مثل ماهو اغراضها هداياها اللي من اخوانها وغيره وغيره اشتقت لهالمكان ... اشتقت لحياتي قبل .. آآآآآآآه ياليت الايام ترجع لورا ومر الوقت وبسرعه اذن المغرب وكلا تجهز عشان يبون يرحون بدري / / / ام فيصل : اشربي هالعصير عشان تهدين شوق : مابي يمه وضحى اللي كانت جالسه وجايه من بدري : اشربيه ياشوق بلاعناد ام فيصل: وضحى تكفين اول ماتخلص العصير دخلى الكوفيره خليها تبدا شغلها وضحى: ابشري ام فيصل: عند اذنكم بروح اتطمن على الترتيبات مابقا شي ويجون الضيوف / / / صقر : خلصتي الريم ؟ الريم : ياللا صقر بس عطني خمس دقايق وانزل بعد خمس دقايق انزلت وهي جاهزه راكان بحركاته صفر: لا لا غطيتي علينا وعلى حبيبت قلبي الريم استحت وضربته جراح طالع صقر اللي ماشال عيونه عنها : اااااااااي يابو الشباب اول مره تشوف اختي صقر ضحك وقام : ياللا ماراح تمشون؟ راكان وهو يضبط عقاله: الا خلاص مشينا جراح: انا باستنى ابوي وامي لاني انا اللي بوديهم الريم : امي جاهزه ليش ماتروح معنا ام جراح وهي لابسه العبايه: لالا ماخلي زوجي روحي انتي الله يستر عليكم الريم : هههه تعال يبه اسمع امي وش تقول وركبوا السياره وحل الصمت بين الريم وصقر صقر ماحب هالشي وقرر يقطعه : الريم أعجبك الجناح؟ الريم ومن فرحتها بشوفت اهلها وملكة شوق نست : مره حلوو حيل اعجبني واهم شي ان ريحه الصبغ راحت لانها تكتمني صقر ابتسم لانها ماتجاهلته مثل كل مره : لا انا قايل للامي انها كل يومين تدخل تبخره بعود وتخلي الشغاله تنظفها الريم: أي صح اشم ريحه العود حتى متركز على اللحاف / / / مرت الساعات وكانت مفاجأه للجميع جيه الريم وصقر لدرجه ان شوق ماصدقت بكت من الفرحه وضحى نفس الكلام كانت الملكه مرتبه جدا وشوق وجود عمتها عطاها شي من الراحه وماهي الا ساعات ودخلت شوق على خالد اللي كان ينظرها على احر من الجمر وبعد لبس الشبكه والكل بارك صاروا لحالهم خالد: الف مبروك ياشوق شوق وهي منزله راسها: الله يبارك فيك خالد مسك ايدها اللي كانت شادتها : هدي شوي ؟ شوق بتردد: خالد؟ خالد: عيونه شوق توترت من رده وبلعت ريقه ( افاتحه الحين ولا مايصير اخرب هالليله اهم شي اني بخير وهو معي ) خالد وكأنه فهم باللي يدور بالها وشد على ايدها بحيث خلاها تنتبه له: شوق صدقيني انا احبك واخترتك عن قناعه بقولك شي انا مابي ابدا حياتي معك بكذب ابيك تعرفين عني كل شي انا انسان مش معصوم عن الغلط لكن الحمدلله اني ماتماديت وانجرفت اكثر اوعديني شوق تفهميني ولاتخلين الكلام اللي بقوله يأثر على علاقتنا شوق بدا قلبها يدق بسرعه : تفضل اوعدك خالد: انتي تحبيني؟ شوق : ..... خالد: اذا تحبيني راح تسامحيني شوق : خالد تكفى تكلم لاتعبني اكثر من كذا خالد سم بالرحمن وبدا من سالفه مكالمته لها وووووو لين وصل لسالفه اسيل يوم كلمته عشان ينقذها / / / / صقر كان تعبان شاف ان معظم الناس راحوا ماجد: خساره العنود لو هي مو نفاس كان حضرت صقر: يالله نرجع الحين عشان نسمر معها ماجد: والله فكره اجل انا بروح قدامك صقر : اوكي اتصل على الريم لكن ماردت لانها مع السوالف والرقص مانتبهت الجازي : انتي ترى جوالك يدق الريم : اوووه افتحته وشافت اربع اتصالات من صقر هذا صقر شكله يبينا نروح وش ذا بدري وضحى: ماعليه الايام بينا اتصلت عليه وراحت لغرفه شوق تكلمه عشان الازعاج هلا صقر ماسمعته من الازعاج صقر: طيب يالله اطلعوا انتي وامي والجازي نبي نرجع الريم: بدري شوي صقر صقر: لا خلاص العنود لحالها وماجد سبقني عشان نسمر معها شوي الريم وهي ماتبي تروح: طيب خذ الجازي وخالتي وخلني اروح مع هلي انام عندهم والله مشتاقه لهم صقر عصب مايتخيل يوم من غيرها : لالا بكره اوديك لهم من الصبح لو تبين الريم تضايقت : زين يالله خمس دقايق وجايين باي نادت الجازي وام صقر وطلعوا والريم ميته قهر منه لكن مع السوالف نست غيضها شوي شوي / / / شوق وجهه احمر والكحل سال والمكياج اخترب: فيه شي ثاني؟ خالد وهو مازال ماسك ايدها: شوق تكفين لاتظلمين قلبك وقلبي ولاتنسين الوعد صدقيني ماقدر استغني عنك شوق وهي متفأجاه ومصدومه باللي سمعته قامت تبي تطلع خالد: ارجوك شوق شوق : اشش لاتترجاني خالد بس محتاجه وقت لين اهدا واتقبلك بعد ماعرفت الحقيقه خالد تضايق لكن هو استخار وشاف ان اللي سواه بصالحه على راحتك لكن راح اتصل فيك اتطمن عليك ممكن؟ شوق هزت راسها وطلعت ... / / / صحت بدري اليوم اكشخت كالعاده وهالمره لبست بنطالون برمودا ابيض فيه جيوب من الجوانب كبيره وبلوزه بيضا جابنيز وفيها كتابات بالانجليزي بالاسود رفعت شعرها على فوق ونزلت الخصل من الجوانب بشكل عشوائي وكتفت بمكياج صباحي ناعم شافت الساعه 9 احتارت تروح تصحي صقر ولا لا هو سهر وطول سهره مع ماجد دقت شوي شوي لكن مافيه أي اجابه فتحته بهدوء وشافت صقر نايم على جنب وشكله كان محتر لانه نايم من غير بجامه استحت ورجعت تبي تطلع لكن صقر حس بوجودها من ريحة العطر اللي صحته وتو بتسكر الباب صقريرفع نفسه من السرير: الريم ؟؟ الريم وهي ترجع الخصل ورا اذنها: اممم الساعه 9 اذا شبعت نوم تعال افطر صقر فرك عيونه وطالعها بعمق: الفطور تحت؟ الريم: أي الجازي كلمتني وقالت انزل لان خالتي تبينا نفطر سوا تنزل ؟ صقر وهو يقوم ويأخذ الفوطه: يالله عشر دقايق وجاي الريم تبي تسكر الباب لانها خلاص منحرجه من شكله لكن صقر وقفها: الريم؟ الريم : نعم صقر وهو يدخل الحمام ومتعمد: جهزي لي لبس على ذوقك عشان اذا طلعت على طول اللبسه مافيني ادور ودخل من غير مايسمع وش بيكون ردها الريم ارتبكت ( هدي يالريم مو شوفته وكلامه تخربطك وتنسيك اللي صار ) اختارت له تيشرت زيتي وبنطالون اسود برمودا وحطتها على السرير وبسرعه خرجت قبل يطلع من الحمام سمع صوت الباب وهو توه بيطلع وابتسم قهر للحين تتهرب منه خذ البلوزه وهو للحين يشم بقايا ريحتها بالغرفه لبسوتو بيطلع الا جراح يتصل فيه / / / الريم : صباح الخير خالتي باستها فوق راسها وشافت طارق قايم من النوم وشكلها يهبل بالبجامه وشعره الطويل المجعد العنود: الريم تكفين غسلي وجهه عشان يفطر الريم : من عيوني ؟ غسلته وجلسته على طاوله الطعام الريم: خالتي وين الجازي ؟ ام صقر: مادري شكله فوق اتوقع الريم : لايكون نايمه حلوه تصحيني وترجع تنام العنود: ترى تسويها دايم فيني اصلا ماشفتها نزلت الريم قامت تشوف وش فيها مانزلت وفعلا وحصلتها نايمه الريم وهي تتخصر : الجااااااازي قومممممممممممي حضرتك تصحيني وتنامين الجازي متلحفه وتتكلم من ورا البطانيه: خليني انام شوي بس الريم : ماعلي منك قومي كان صقر نازل بس سمع صوت الريم في غرفه الجازي وراح لهم الريم : ياللااااااااااااااا قومي الجازي: ريمووو خليني انااااااااااااااااااااااا ااام مانمت الا متأخر الريم رقت على السرير وجلست تنطط فيه : قومي يالا والله ماتهتنين بالنومه وانا صاحيه صقر ابتسم وهو يشوفها تنط ويطيح شعرها من النط الجازي قامت وهي رافعه حواجبها : اف اف وش اللي جايبكم الحين لو انكم للحين ماجيتوا من شهر العسل كاني مرتاحه وابتسمت وهي تشوف صقر مبتسم ومتكتف عند الباب الريم وهي تجلس وتعبت من النط: ههههههههههههههه شوفي حبيبتي اخوي مايحب الوحده اربع وعشرين ساعه نايمه وماتصحى الا الظهر الجازي وهي تضحك: واخوي اللي وراك مايحب الوحده تزعجه وتنطط فوق السرير وكأنها بزر عشان تصحيه لفت الريم وراها وشافته وفزت: من متى هنا؟ صقر: من اول مانطيتي ونقازين تصحينها الريم تفششششششششششششششششششلت وطلعت ومرت من جنبه لكن هو وقفها من كتفها : لحظه ننزل سوا الجازي قامت من السرير: الله يخسك يالريم طيرتي النوم من عيوني / / / راسها يعورها اللي صار البارح مع خالد خلاها تبكي وتعيد كل شي صارلها يعني خالد كان اول يلعب علي ويتصل فيني ، يعني اسيل ورجعت تبكي اسيل كانت تبي تدمرني وتعلمني عالطريق الشر خلود هي خالد ماني مصدقه ، كل شي قلته له يعني يعرف اني كنت احب سلطان قبل ، يعرف اني احبه الحين ، يعرف ادق التفاصيل انا كنت مع خلود واضحه وكل شي اقوله لها اسمعت جوالها يدق وشافت الرقم وعرفت انه خالد تبي ترفعه لكن ماهي قادره ؟ تعبانه منه ؟ للحين تحس بالجرح والخديعه من البارح يدق وانا مارفع اكيد خايف علي ، لكن ماني نفس اسمع صوته او حتى اشوفه بعد اللي عرفته رجع يدق مره ثانيه وثالثه لين اعلنت الانهزام ورفعت بصوت مبحوح ردت: الوو خالد بخوف ولهفه: هلا عيوني شوق انتي بخير؟ شوق: بخير الحمدلله خالد: حرام عليك خوفتني عليك ليش ماترفعينه شوق: نايمه كنت خالد بحنان: حبيبتي خلاص ارجعي نامي واذا صحيتي بكلمك شوق : ان شاء الله خالد وهو متحطم لانه عارف انها للحين زعلانه: مع السلامه شوق والعبره ماسكتها: باي وادخلت من جديد في نوبه بكي ........ / / / يوم الجمعه صقر والريم راحوا لبيت ابو لافي وبعد الموت خلها تنام عندهم ، امها هاوشتها شلون تترك زوجها وتنام وهي ماصار لها شهر لكن هي عنيده الا تنام صقر رجع البيت متأخر ودخل الجناح وهو متضايق تعود عليها وعلى وجودها ، هي صحيح ماتحتك فيه هالايام لكن دايم قدام عينه يكفي انه يشوفها تضحك وتسولف مع هله تذكر وش صار الظهر يوم دخل المطبخ وشافها تساعد امه والجازي ميته ضحك عليها الجازي: هههههههههههههههههههههههه وربي شكلك فلته ام صقر: بدال هالكركره روحي ساعدي اختك في بنتها الجازي وهي تلقم طارق: وهذا اللي مو راضي يشبع وش اسوي فيه ام صقر وهي تضرب راسها وتجيب الملح: قولي لا اله الا الله لاتنظرين الصبي الجازي: ااااح قلنا ماشاء الله طارق وهو يفتح فمه: بعد حاله الريم وهي لابسه حق الطبخ: روحي ساعديها وانا القمه ماقدر اروح ريحتي طبخ ام صقر: الله يهديك قلتلك ارتاحي الريم: بالعكس ياخالتي احسن من الجلسه عالاقل سويت شي مفيد الجازي وهو تشوف صقرعندالباب مرت من جنبه: الله سعاده الاستاذ صقر متكرم وداخل المطبخ ماهو بالعاده صقر شاف الريم بلبس الطبخ وشكلها مندمجه وتلقم طارق الريم : يالله افتح فمك اهممممم طارق مبسوط : شوفي عضلاتي الريم : لالا تتكلم وفمك اكلك صقر يبيها تنتبه له: الريم عطيني كاس مويه الريم نزلت طارق وغسلته : ان شاء الله صبت له مويه وعطته : تفضل الريم فسخت روب الطبخ : خالتي الله لايهينك انتبهي على المصقعه بس بروح اتروش واغير ملابسي ام صقر: ابشري صقر شرب المويه : يمه الريم اللي طابخه؟ ام صقر : أي يمه مارضت قالت الا تساعدني وهذي سوت مصقعه وحلا وانا كملت الاصناف الباقيه صقر: ماتوقعتها تعرف تطبخ ام صقر ابتسمت: لا ياولدي الريم ماشاء الله عليها رغم انها مدلعه لكن ماهي من بنات هالايام اللي ماتحب تدخل المطبخ بالعكس سعاد معلمتها وكانت تشجعها لين صارت تحب تطبخ صقر زاد اعجابها بزوجته اكثر وحمد ربه على النعمه اللي هو فيها وعلى هذي الذكره صمم انه ينفذ اللي في باله لازم ينهي الخلاف ويعيش حياته مع زوجته الانسانه اللي صار يعشقها لحد الجنون / / / .... : خلاص يادكتور يمكنني العوده الى اهلي دون خطوره الدكتوره ابتسم: نعم ولكن لابد ان تتلزم بالعلاج والمواعيد التي سوف اكتبها لك .....: متى سوف تكتب لي الخروج؟ الدكتور: بعد اسبوع حتى نتأكد من استقرار حالتك؟ حمد ربه وشكره على نعمه العافيه الى عطاه بعد ماحس نفسه على وشك الموت ، قام وضى وصلى ركعتين شكر وبدا يقرأ وهالمره الفرحه مو سايعته / / طبعا الريم وصقر مثل ماهم عليه لكن صقر وصلت عنده وقال لازم يحط حد لهالموضوع امس كانت الريم عند اهلها وبعد الموت رضا يخليها تنام واليوم بيجيبها لانه مايقدر يستغني عنها اكثر ويتحمل فراقها ماجد تواعد مع الرجال وبعد محاولات منه عشان يعرف من اللي تحته يأس كان يلف ويدور وكأنه يقول خلص شغلك وانت ساكت طبعا الشرطه كانت تراقبه وتسمعهم عن طريق جهاز خاص للتنصت وبلحظه قال: هذي الاوراق والاسماء عندك نبي كل شي رسمي احنا نبيهم يدخلون وبصراحه مانبي شغلنا يتعطل لاننا نتربح من وراهم وهذا الكلام كافي للقبض عليه عشان يجبرونه على انه يقول من هو اللي مرسل له ....بتهديد : والله لاتندم ياماجد على لعبتك معنا ماجد اسفهه وابتسم للملازم وصافحه الملازم: مشكور ياماجد خلاص انتهى دورك وخل الباقي علينا احنا راح نعرف نجيبهم ماجد: الله يعطيكم العافيه بالاذن / / / جا صقر بالليل وبعد ماسلم على عمه وجلس ساعه استأذن وقال للريم تتجهز الريم ماتبي تروح لكن مجبوره ماتبي احد يحس ان بينهم شي خذت اغراضها وسلمت على اهلها وراحت صقر: وش فيك ساكته؟ الريم برود: ماعندي شي اقوله؟ صقر: استنانستي عند اهلك الريم بقهر: ايه الحمدلله بس انت فشلتني كل شوي تدق علي كأني ماراح ارجع لك صقر وهو مبتسم ومروق : وش اسوي مشتاق لك الريم ارتجف قلبها ولفت لدريشه السياره صقر :يعني عادي انك تغيبين عني ماشتقت لي؟ الريم ( الا والله اشتقتلك والدليل اني ماعرفت انام البارح زين وانت مو قريب مني ) ..... صقريبي ينرفزها وناوي عليها: وتقول احبك امحق حب ! الريم وهي تستغرب الطريق: وين مو هذا طريقنا؟ صقر ابتسم : مفاجأه الريم خافت تتأثر فيه ويرجع يجرحها : وين رايحين امانه؟ صقر : للمزرعه حقتنا مابقا الا كم يوم وارجع ادوام قلت نغير جو هنا الريم ( مابي اجلس معك بروحي ماقدر ... انا يالله اتحمل وجودك بالجناح ... شلون واحنا بروحنا اكيد بضعف واسامحك وانا مابي : واغراضي شلون ؟ صقر وهو يشوف ايدها اللي تشبكها بقلق: لاتخافين قلت للجازي تجهز لك الاغراض اللي تحتاجينها وماقصرت جهزتها والحين هي ورا الريم اسكتت وبدت تفكر وش بتسوي معه هو يعرف نقطه ضعفي ويعرف شلون يأثر على خصوصا يدري اني احبه ياربي وش اسوي ؟؟؟..... صقر والله ماخلي هالفرصه تعدي لازم تدرين بالحقيقه ماقدر اتحمل جفاك اكثر من كذا انا غلطت اول لكن الحين لا والف لا / / / خالد جا لبيت ابو فيصل وطلب انه يشوف شوق وبعد الموت انزلت له الكل فسرها انها خجلانه لكن اللي تحس فيه غير اللي داخلها صدمه وخوف من المستقبل بعد ماعرفت غلا كانت جالسه عند خالد غلا: يعني الحين بتأخذ اختي من بيتنا مثل عمتي الريم؟ خالد : هههه أي بس مو الحين بعدين فهد: يالله نطلع غلا جات شوق شوق : السلام عليكم خالد طالعها كانت منزله راسها سلمت عليه مصافحه غلا: شوق ماعليه اجلس عندكم شوق ابتسمت لاختها لكن فهد مسك ايدها : غلا وش قال ابوي قبل لايطلع غلا: وخر قال اذا جات روحوا بس دام شوق راضيه عادي فهد همس بأذنها: تعالي ابي اتحداك بالبلاستيشن غلا راحت معه بسرعه خالد : اخبارك شوق؟ شوق: الحمدلله وانت ؟ خالد وهو ينتهد: تعبااااان ياشوق تعباااان شوق اوجعها قلبها وسكتت خالد مسك ايدها بحنان: شوق تفكريني مو حاس فيك ومو عارف وش التفكير اللي في بالك ، يحق لك لكن انا اطلبك عطيني فرصه ابين لك اني تغيرت شوق نزلت دموعها: بس خايفه؟ خالد: مني؟؟ تخافين مني؟ شوق: خايفه انصدم بعدين ؟ خالد: انا وعدتك ياشوق شوق:.... خالد غير الموضوع : متى راح تدامون الجامعه؟ شوق وهي تناظر فيه عشان تعرف رده فعله: بعد زواج الجازي باسبوع خالد: الله يوفقهم طيب متى ناويه يكون زواجنا شوق توترت : ..... خالد: ماراح نحدد لين اتأكد انك شوق اللي حبيتها وقف وقال: راح اترك لك القرار انا اللي سويته مو هين لكن اعترفت بغلطتي اذا تحبيني للحين وحابه نكمل حياتنا سوا راح اكون اسعد انسان؟ وكمل بألم واذا ماتقبلتيني وتشوفيني خالد الاولي ولاتبين تعطيني فرصه راح اتركك بالمعروف لكن تأكدي انك بتتركيني بقايا انسان فكري ياشوق ماراح اضغط عليك في امان الله راح وتركها بدموعها , مصدومه من القرار اللي طرحه عليها خيرها بين بعده وقربه ، بين انها تكون زوجته ولا وحده بعيده عنه على طول راحت الغرفه وبكت لين نامت / | ||||||||||||||
|  |
|
09-01-11, 12:05 AM
| #22 | ||||||||||||||
| مراقبة ومشرفة سابقة ونجم روايتي
| %الجزء الثاني عشر والأخير% دخلوا المزرعه ورجعت كل الذكريات الحلوه والمره فيها غمضت عينها وبصعوبه فتحتها لانها حست بدموع تحرقها صقر : وصلنا تفضلي دخلوا مع بعض بعد مانادا الخدم يشلون الشناط صقر مسك ايد الريم هالمره ماراح يترك لها فرصه تهرب لازم تسمعه الريم ارتجف جسمها كله وطالعت فيه وقلبها يدق وكأنها عارفه انه بيفتح معها الموضوع اللي مانسته وكل الليله لازم دموعها تطيح عشانه صقر: تعشيتي زين ولا اطلب منهم يسون لك عشى الريم وهي تترك ايده: الحمدلله تعشيت صقر دخلها الغرفه حقته ورجعت الريم تتذكر وش صار بالغرفه يوم طاحت اللؤلوه وشافها توهم مخطوبين هذا اول موقف دق قلبها له ماتنسى مشاعرها ذيك الحزه وعلى طول حمر وجهها فسخت عبايتها وشالت التوكه برقه واتنشرت شعرها وغطى نحرها صقر توتر شوي لكن مصمم على اللي بسويه لازم يبدا بالخطوه هذي سكر الباب ومسك ايد الريم اللي كانت تبي تفتح الشنطه وتتهرب بترتيبها جلسها على الكنبه وهو جلس بركبته عندها وهالشي احرج الريم زياده وصدمها بحركته صقر ركز بعيونه على عيونها: الريم اسمعيني يكفي جفا يالريم العمر يمشي واحنا ماتقدمنا كل يوم حالتنا تتراجع نزلت راسها ورفعه بكفوفه : الريم عطيني فرصه اوضح لك الريم دمعت عينها وأشرت على نفسها: اعطيك فرصه ؟ وانا ياصقر شهرين انتظر الفرصه افهمك وبكل مره تصدني بتصرفاتك شهرين ابي اوضحلك اللي صار في هذي المزرعه لكن وش عطيتني غير الاحتقار والكلام القاسي ووكملت وهي تمسح خدها وانفاسها سريعه مدري من قربه ولا من الحزن اللي بداخلها وطلعه: وانت حتى اسبوع ماقدرت تتحمل تبيني اعرف صقر مسك ايدها بقوه وباليد الثاني مسح دموعها:الحق مععك يابنت عمي انا غلطت انا اصلا ماستاهل هالدمعه اللي تنزل بسبتي الله يأخذ روحــ.. الريم سكرت على فمه بأصابعها: لاتدعي على نفسك تكفى وكملت تبكي صقر : الا بدعي دامني سببتلك هالحزن بتسرعي وغيرتي الزايده وشكي الريم انا تغربت سنين (وبتردد صاحبه خجل من ذنبه) مانكر ان دارين قدرت علي ولفت على عقلي لكن تبت حسيت بالندم انا شاب وبغربه وهي كانت تلاحقني وين ماروح ، بس عمري ماحبيتها الريم غمضت عينها ونزلت دموع جديده : وقدرت عليك مره ثانيه؟ صقر : لااا وربي لااااا انت بقلبي شلون اخونك معها وانا عرفتك وقدرتي تدخلين قلبي من اول يوم شفتك فيه ، انتي يالريم ملكتي كل شي بلحظه قلبتي حياتي مانسى ذاك اليوم يوم اشوفك مع غلا كان احلى صدفه بحياتي دارين قدرت تزرع الشك بقلبك تدرين ليش لانها ماحققت اللي تبيه قالها وش صار بالتفصيل وكانت الريم تبكي وتشكي حظها اللي رمى وحده ماتخاف ربها بطريقها وسببت مشاكل بينهم بعد ماحبيته ومال قلبها له / / / هذي نهاية الطريق اللي مشيت فيه احب انسان على قلبي مايبي قربي شاف البحر يرسل موجه جديده وشبهه حياته فيه كل مانفتح باب جديد وقال الحظ خذ وفرحت يجي شي ويخرب علي فرحتي ويسرقها في نفس الوقت شوق صحت من النوم وكان الوقت متأخر شافت عيونها حمرا وتذكرت خالد ماتخفي انها تحبه هو اعتذر وضح لها ليه انا ماعطيه فرصه تخيلت حياتها لو تركته شلون بتعيش بعد ماتعلقت فيه ، تذكرت انه بغا ينجن يوم درى انها بخطر انها انقذها ولولا ان الله ارسل لها خالد ولا كان مدري وش صار فيها تعوذت من ابليس وشافت ان الصلاه والقران هم افضل حل انها ترتاح من التفكير والهم اللي داخلها / / / وينك حرام عليك ، ليش تركتنا عبدالله كان لابس ثوب ابيض ويأشر لها من بعيد وهو مبتسم وضحى : عبدالله تعال تعبت وانا ألحقك عبدالله : لاتجين وضحى ماراح توصلين لي وضحى تبكي: ليش؟ ليش؟ عبدالله ابتسم وضحى جلست عند شجره تبكي لكن حست بأيد وراها وخافت وناظرت ورا شافت عبدالله قامت من النوم وهي تحس بالعطش من كثر ماركضت في الحلم ، تلمست بطنها ودلكت ظهرها اللي ألمها باطراف اصابيعها الله يستر يارب ان شاء الله قربت رجعتك ياقلبي شربت ماء وحست بألم تتزايد بظهرها خافت ودقت على راكان عشان يوديها المستشفى لكن مارد ورجعت ودقت على جراح وشافت جواله انتظار كان يكلم الجازي جراح: حبيبتي شوي عندي خط انتظار الجازي : من ؟. جراح: لاتخافين مو البنت هذي وضحى اخاف فيها شي الجازي خافت: خلاص كلمها وطمني بعدين جراح : ان شاء الله اتصل عليها وقالت له انها تعبانه وعلى طول راح لها / / / الريم كانت مخبيه وجهها بكفوفها وتبكي ماتدري حست انها ودها تفرغ اللي بقلبها بالبكي صقر وده انه يضمها لكن خايف من ردة فعلها واخيرا نطق: الريم انا بخليك ترتاحين الحين فكري ان حياتنا مع بعض ماتصلح تستمر على هذا الحال انا قلت لك كل شي والله يشهد علي اني شاريك وابيك ومن يوم حبيتك وانا انسان ثاني حتى هلي تفاجأو بتصرفاتي تنهد بتعب وشال يدها من وجهها ومسح دموعها بحنان : دموعك هذي مابي اشوفها تكفين يالريم طلبتك طلع وراح يتمشى برا حس نفسه ارتاح يوم قال كل اللي بخاطره الدور عليها الحين اعترف بخطئه واعتذر فهمها كل شي والحين هو مبسوط باللي سواه اما الريم ماتنكر انها بعد ماسمعت كلامه حست بالفرح هو اعترف بحبه واعترف بخطائه لمست خدها وكأنها اشتاقت لحنانه ليه مانسى وابدا من جديد ؟ ليه يالريم تحاولين تنكرين حبك له وشوقك فجريها يالريم اعلنيها بقووه / / / كانت مشاعل سهرانه وتفكر في اسيل وتفكر شلون توصل لياسر اللي مايرد ضميرها صحى وصارت ماتنام الليل من كثر التفكير والخوف مشاعل كانت يوميا تزور اسيل وتتطمن عليها اليوم احسن حالتها لكن مانطقت بس شافة مشاعل ودمعت عينها خذت الجوال وهي تدعي ربها ان ياسر يرد ويكون الوقت زين واخيرا رد ياسر اللي كان يتغدى مع رهف هلا اختي امري رهف وقفت عن الاكل عشان تعرف من المتصل ياسر: أي نعم ياسر معك زوج رهف رهف عقدت حواجبها ياسر: لو سمحتي اختي اهدي شوي عشان افهم وش تقولين رهف ماتحملت : من؟ ياسر: مادري رهف عطني الجوال ياسر: تفضلي رهف معك رهف : هلا مشاعل وهي تصيح: رهف ؟ رهف عرفتها: مشاعل؟ مشاعل: ايه رهف سامحيني رهف سامحيني؟ رهف : مشاعل وش فيك؟ مشاعل: زوجك عندك؟ رهف : ايه مشاعل: حطي على السبيكر ضروري ابيه يسمع كل شي رهف حطت على السبيكر لانه تدري انها تخبي شي وتبي ياسر يعرفه مباشره مشاعل: رهف انا اسفه كنت حقوده اشوفك بالجامعه وحبيت اذلك لانك ملفته للانظار علمتك مثل ماعلمت بنت خالتي الطريق الشين وسويت نفسي صديقه لك وانا كنت اكن لك الكرهه اعمتني الغيره والحقد عليك ونستني انه فيه رب يراقبني ياسر هز راسه بأسف رهف: ليه يامشاعل ماني مصدقه قالي ياسر بس قلت مستحيل تسوينها مشاعل: يعني عرفتي؟ رهف: انتي اللي خذتي الصور ؟ مشاعل وهي تصيح: ايه لكن اللي ماتعرفينه اني انا اللي خليت غسان يراقبك ويكلمك ويأذيك انا اعرف ان غسان اكبر مغازلجي وسيرته على كل اللسان كلمته عنك وصفتك له وعطيته كل المعلومات عنك حتى صورك بس عشان يدمرك خصوصا يوم دريت انك انخطبتي وعشان اضمن طلاقك قلت له يعطيها لزوجك ويرسل رساله تشككه فيك ولانه ملتزم راح يطلقك وماراح يسامحك على الشي اللي سويته لكن بعد ماعرفت قبل يومين انك للحين معه ارتحت وقلت الحق اقول له لانك مظلومه يارهف رهف دمعت : تدرين اني عشت بسواد وايام صعبه بسبتك حرام عليك يامشاعل حرام عليك ماهو سبب انا ماذيتك بشي ياسر شاف رهف يوم انهارت تبكي وخذ الجوال ياسر: مشاعل ياليت تخلين الله دايم قدام عيونك انتي كنتي بدمريني معها روحي الله يهديك وارجوك لاتحاولين انك تكلمينها مانبي نسمع عنك شي مشاعل : سامحوني ابي ارتاح ضميري مأنبني ياسر : الله يهديك ويصلحك مع السلامه قرب من رهف وجلس يهديها صعب الواحد يثق في شخص ويتعبره الصديق الوفي ويكتشف انه عدوه ياسر حمد ربه على الحقيقه اللي عرفها قبل لايسعى لها توضحت الامور وربي ارد انهم يعرفونها قبل لاتتأزم الامور / / / طلعت برا الريم لان الجو حلو وتحبه هالوقت وراحت للساحه وبايدها عصير وشافت صقر يطلق الخيل بمهاره كانت تراقبه وهو ابتسم لها قرب من عندها ورجعت بسرعه رغم انها محوطه الساحه صقر: هههه للحين خوافه ؟ الريم ابتسمت : من يشوف خيلك وعيونه يخاف صقر مد ايده : عطيني العصير عطشان الريم رفعت حواحبها: بروح اجيب لك صقر: لا ابي بعدك ترى بيوجعك بطنك الريم : هههه لا مو ناقصه خذ خذه وشربه مره وحده : هني وعافيه ادخل اجيب لك شكلك عطشان؟ صقر: لا خلاص تعالي اركبي الريم: لالا ماعرف صقر: مو هذا ههههههههه الثاني الوديع على قولتك الريم : والله ماعرف صقر: اركبي وانا بمشيه لك الريم تجرأت شوي : طيب صقر دخل خيله واخذ خيل ماجد : يالله قلبي اركبي الريم ابتسمت على كلمته وتشجعت ساعدها ومشاها بالساحه كانت كبيره وخضرا تفتح النفس الريم:ههههههههه احس اني عملاقه وانا عليه وناسسسه صقر: دوم يارب مبسوطه عقبال ماتطلقين خيلي الريم: هههه خلني اطلق خيل ماجد وافكر بعدين مشى اليوم بسرعه وكان الوضع هادي ومستقر بينهم وهالوضع فرح صقر وارتاح من قلبه وشاف ان الدنيا بدت تبتسم له من جديد اصلا الريم قلبها طيب وبسرعه يسامح وينسى يابختك ياصقر فيه؟؟ صقر: قولي لااله الا الله عليها يابحر بحر الغلا: بسم الله طيب طالع على امك انت صقر: ههههه كملي قصتك بسرعه تراني ماقدر اصبر كثير خلينا سعيدين تعبنا ترى بحر الغلا: ابشر من عيوني الريم: أي انتي ناسيه انه متزوج واغار عليه بحر الغلا: لاحووول طيب اسفين صقر والريم: ههههههههه / / / عزمت بعد ماستخارت امس وارتاحت وكلمت خالد اللي اول ماشاف الاسم طار من الفرحه خالد: هلا والله شوق بخجل: هلا بك شلونك؟ خالد: بخير مدامني سمعت صوتك؟ شوق: تسلم اسكتوا وطال الصمت وبعد الموت تكلمو كلهم في نفس الوقت: انـا سكت خالد عشان تتكلم وكذالك شوق شوق ابتسمت: تكلم؟ خالد: هههه لا تكلمي انتي اللي متصله شوق باحراج: ممكن تجي اليوم لاني اشتقتلك خالد بلم: هاه عيدي وش قلتي شوق ضحكت وهي تحس براحه خالد: افهم من كلامك انك شوق: ايه الله لاجيب الزعل بيني وبينك خالد : الحمدلله يارب كنت خايف ياشوق ربي يخليك لي ولايحرمني منك يالله جايكم شوق : الله يحيك / / / بعد ماتعشوا واسمروا مع بعض جلست الريم على التلفزيون وصقر كان يشتغل بالاب توب الريم حست بنعاس لانها صاحيه من بدري: عن ذانك صقر بنام صقر تضايق بس مابين لها : اوك انا بخلص اللي بيدي ماراح انام الحين طلعت الريم ودخلت خذت حمام وتفكر لمتى صقر بيسكت عن حقه انا منقصه عليه لكن مو بيدي من المشاكل اللي واجهتنا نوت انها تكشخ له اليوم وتترك خجلها وهي مقرره تلبس من القمصان اللي اشترتها وضحى وتخلي هالليله ماتتنسى تذكرت وش قد دخل السعاده بقلبها يوم سافروا واليوم كان طيب معها بقوه اما صقر جلس يفكر ينام معها ولا يخليها تتقبله اكثر وهو يشتغل شاف ان اللاب توب يبي له شحن تذكر ان الشاحن فوق مع الشنطه وماجبه طلع فوق وكأنه ماصدق بالعذر وكانت الريم توها طالعه من الحمام ولافه روب السباحه على جسمها وتنشف شعرها بالفوطه صقر دخل بسرعه عشان يجيب الشاحن قبل لايطفا عليه وشافها ، الريم حطت ايدها على قلبها من الخوف وشهقت : يمه خوفتني صقر : اسف بسم الله عليك الريم انحرجت وشدت على الروب وكملت التنشيف وهي ترجف : لا عادي صقر وكأن شي يجذبه له ونسى الشاحن قرب منها ولمس شعرها وهي خلاص وماقدرت تشيل عينه من عيونها صقر تكلم بهمس وقال آه من ريمٍ غزتني وسحرتني بالجمال هي أميرة قلبي اللي تسكنه ومحدٍ معاها ذوق يمشي في خطاها وكسرت عين الدلال مشيها كله نعومة ياعسى تسلم خطاها لا تثنت كنها غصنٍ تثنى واستمــــــــــال فز قلبي من مكانه ثم ترك صدري وجاها بعد كل اللي أشوفه جتني تسألني سؤال عن محبتنا وهوانا لي متى آخر مداها ليه صرنا تايهين وليه نقصر في الوصال هو ملل والا النفوس تخاف تصدم في هواها اسمعيني ياحياتي واستظلي في الظلال نظرتك هذي لعيني أرخصت عيني فداها تحسبين اني بدونك بأسعد بوقتي... محال! وشهو حالي لو رحلتي واخسرت عيني ظناها والله اني ماحتمل وضعي ولوهو بالخيال عاد لو صارت حقيقه واختفيتي ياضياها والله اني لأنتحر واكتب في قبري بالرمال دنيةٍ ريمي جفتها والله انه ما وراهــــــــا... / / / وضحى عطوها مثبتات وقالوا لازم ترتاح ولاتجهد نفسها لانه خطر عليها وفعلا استلموها ام عبدالله وام جراح وصاروا مايخلونها تنزل من السرير الا للصلاه خالد وشوق طووا صفحة الماضي وقرروا يعشون حياتهم خطوه بخطوه وحددو زواجهم بعد عيد الاضحى رجعوا الريم بعد يومين قضوها من اجمل ايام حياتهم اتفقت الارواح والعشق صار عنوانهم ، تركوا الماضي وارسموا مسقبلهم مع بعض كانت الريم تطل السعاده من عيونها وصقر نفس الشي الريم راضيه عنه وهو صار بحياته كل شي يشوف بعيونها الحب مثل ماتشوفه هي بعيونه / / / / ماجد: متأكد من الكلام هذا هو كلمني وهددني اذا ماطلع اللي قبضتوا عليه راح يأذيني جراح: شوي ياماجد خلنا افهم الملازم مادري شكلهم اكثر من شخص وكل يوم يهددون فيه الملازم: لاتخافون انتم راح تكون عيونا عليكم واللي مسكناه راح يعترف من اللي مرسله جراح رجع للبيت وماجد راح للعنود لانه اشتاق لها ويحس بالامان اذا شافها / / / راكان مابقا الا يومين على ملكته والفرحه مو سايعته اما ليان كانت من سوق لي سوق ناقصها بعض الكماليات ودها سلطان بعد ماشرط عليها تقنع ريناداللي بالموت رضت انبسط انها شافها واستانس صارت قريبه منه ويحس بمشاعر اتجاهها / / / صقر: وش صاير؟ العنود وهي تبكي : مادري وين طارق صارلنا ساعه ندور عليه ماجد وهو يطالع صقر لانه توه واصل وسمع كلام العنود: شلون ماتدرون وينه؟ طلع صقر يدوره فوق لانه ساعات يكون عند الريم لكن لقا الريم وجهها متغير وباين انها متأثره ومعها الجازي صقر: متى اخر مره شفتيه؟ الريم: كان يلعب في الحديقه مع الشغاله تقول انها دخلت دقايق ورجعت مالقته الجازي وهي تصيح : بلمحه اختفى ماندري وينه صقر نزل وهو متشتت وسمع ماجد يكلم وهو يسب والله لو يصير لولدي شي مايحصلك طيب ، مالك دخل فيه رجعه ايش ا... قطع الخط وماجد ضرب بيده في الباب صقر : ماجد من تكلم ماجد: يراقبوني هددوني لكن ماتوقعت انهم انذال كذا طارق معهم معهم ياصقر صقر: ماعليك انت يالله نروح للشرطه نعطيهم خبر العنود وهي منهاره وجالسسه تبكي: ابي ولدي ياماجد وش مسوي انت فيهم ام صقر: يابنتي اذكري الله بيرجع ان شاء الله / / / راحوا للشرطه وبلغوهم ومن حسن الحظ ان الشرطه لقت معلومات عنهم بعد ماعترف الرجال وماهي الا ساعات ويهجمون عليهم ولقوا طارق بغرفه مربط ومغمضين عيونها وشكلهم معطينه منوم لانه ماله صوت اخذ ماجد ولده وحضنه وهو يبكي بغى يروح ولده من بين يدينه صقر كلمهم وطمنهم لان العنود بتموت وهي تبكي على ولدها واللي اعرفت انه انخطف / / / اليوم ملكه ليان وراكان وضحى كانت متجهزه وتبي تروح لانها صممت بالرغم انها حذروها وهاوشها ام عبدالله: سويتي اللي براسك؟ وضحى: ترى كشخت مستحيل يروح تعبي خساره يمه هذي ملكة اخوي ام عبدالله: الله يستر يابيتي اقري على نفسك ياحليلك ياوضحى الثوب مبين كريشتك وضحى كانت لابسه ساتان ومبين بطنها اللي انتفخ شوي لانه بقا اسبوع وتدخل اربعه : ههههه فديته ام عبدالله مسحت على بطنها بحنان ودمعت وشوي ينفتح الباب ناظروا باستغراب لكن كانت المفاجأه عبدالله يشوفونه واقف قدامهم بشحمه ولحمه وضحى جلست على الكنبه : عبدالله؟ ام عبدالله بكت: يمه وليدي بخير اخيرا شفتك ركض عبدالله وحب يد امه وحظنها وضحى قلبها يدق وعيونها تراقبه بعتاب لكنه لاحظت انه ضعيف مره ومتغير شوي ناظر فيها عبدالله: ماودك تسلمين علي ؟ وضحى برود: هلا حمدالله عالسلامه عبدالله حس بالجفا : مشتاقتلي ياوضحى انا عبدالله؟ ام عبدالله: الا مشتاقه لكن عتبانه وينك ياولدي وينك لاتتصل ولاتسأل ولاندري وين ديارك حتى سألنا عنك السفاره قالوا مو بلندن وضحى قامت بتعب : وتقول رايح للشغل مهم (دمعت) ليش تكذب ليش؟ عبدالله قام لعندها: يعني كذا تستقبليني ياوضحى ؟ وضحى لفت وجهها : .... عبدالله: يمكن انا اناني باللي سويته لكن من خوفي عليك لاجرحك انتي ماتدرين انتي بالنسبه لي ايش خفت عليك خفت وضحى: من ايش تخاف ؟ اذا على الزوجه قلتلك تزوج انت اللي مارضيت لكن تخدعني وتكذب علي وتسافر وتقول شغل لا ام عبدالله خافت على وضحى من الانفعال ولانها واقفه : يابنيتي اجلسي ماهو زين لك ماصدقنا على الله يتم حملك عبدالله انصدم: حامل؟. وضحى باستهزاء: هههه أي حامل لايكون بطلقها خلاص جا ولي العهد عبدالله لفها لجهته وعيونه مغرقه من الفرحه ومن الكلام القاسي اللي يسمعه من حبيبته وزوجته : وش تقولين انتي؟ وضحى وجلست تبكي عبدالله : انا ماتزوجت وضحى ام عبدالله: اجل وينك كلام الناس واجد وصدقنا كلامهم بسبت قطيعتك وافعالك عبدالله : يمه وضحى واللي خلقني انا كنت خايف عليكم انا كنت مسافر علاج انا كنت مصاب بسرطان الكبد لكن بفضل ربي اسئصلوه وانا بخير قدامك وضحى من بين دموعها: شهقت ايش؟ ام عبدالله : حطت ايدها على راسها وبكت عبدالله : كنت خايف عليكم مابي اشوف الحزن بعيونكم ويوم اكتشفت المرض اللي فيني كان بدايته الحمدلله وقلت انه شغل عشان ابعد الشك عنكم لكن تعبت شوي ومنعوا عني الاتصالات وانقطعت عنكم وضحى بكت وراحت تضمه وهو بدروه ضمها وضم امه معه وضحى: الحمدلله يارب الحمدلله انك رجعت ام عبدالله: الحمدلله ماتيتم ولدك هذا بفضل ربي نشكره ونحمده عبدالله ابتسم رجع وسمع هالخبر اخيرا بيصير اب : الحمدلله مسك بطن وضحى : وانا اقول وش في وضحى صارت دوبه وضحى وهي تضحك : وانا اقول وش في عبدالله نحيف وحالته حاله الكل: ههههههههههههه تعذرت من الملكه وتفاهم اخوها وضعها خصوصا بعد ماعرفوا ان عبدالله رجع وعرفوا كل شي / / / تقريبا الكل انتهى دوره لكن فيه اشخاص درات فيهم الدنيا وعلمتهم ان الله حق عبير ولدت بالثامن وكتشفوا ولدها فيه تضخم بالكلى وتحت رحمة الله وهالخبر ضايق الجميع وسبب تراجع نفسيه عبير وابراهيم لكن اهلهم وقفوا معم بضيقتهم غسان : آآآآآآآه راسي يوجعني ماهو بطبيعي هالورم الاسود اللي فيني فارس وهو يشيل الشناط ويدخلها السياره توهم مبسطين جايين من السفر ومصممين على تنفيذ الخطه : ههههههه اقول عن العياره يوم رجعت السعوديه اااه ياراسي وهناك لعبت لين قلت أمين غسان وهو يسوق: لا والله يجيني الالم بس كنت اتجاهله واشرب بندول فارس : ياعمي روح الشقه نشرب ونكمل سهره والله لو فيه مثل اللي شفناهم هناك يردون الروح ياخي غسان وهو يشوف الدنيا مقلوبه مال بالدركسون فارس : انتبه لاااااااا انزل تبينا نصدم نزل لكن شاف ان خويه يحتاج لمستشفى وراحوا للمستشفى وكانت الطامه الدكتور: من متى هالاصابه براسه فارس: من تقريبا ثلاث اسابيع.. شهر غسان وهو يسمع وساكت:..... الدكتور: وهالاصابه كانت من قزاز اتوقع فارس خاف : ايه يادكتور الدكتور: شلون مانظفتوا ليش ساكتين لهالوقت ماستغربتوا تغير اللون وهالورم الغريب لف بجهه غسان ماحسيت بالم ؟ فارس رد: يادكتور كان يحس لكن يستخدم مهدئات وبنادول لاننا تونا راجعين من السفر الدكتور باستهزاء : يعني هناك مافيه مستشفيات الله يهديكم وبهمس: احنا شاكين ان فيه الغارغرينا ولازم نسوي الفحوصات فارس : ايششششششششش؟ غسان سمع وجن جنونه وتحول الهدوء اللي كان فيه وركض على طول برا وهو يقول مابي اموت مابي اموت فارس لحقه وحاولوا يمسكونه لكن طلع بسرعه وصدمته سياره ولحسن الحظ كانت مش مسرعه حيل خذوه ودخلوه العمليات واخذوا دم من فارس لانهم محتاجين وهو في السيب حق المستشفى ويحس بالخوف ويفكر باللي صار بخويه اللي لعب معه اللي كان شريكه بكل شي شلون الله عاقبه بمرض خبيث والمشكله في الراس وهذا نادر والغارغرينا اذا جات بالعضو لازم يبتر لكن في الراس يعني يتنظر موته خلاص فكر فكر لين بكا من كثر الخوف وهو يبكي شاف وحده على كرسي وكأنه عرفها طالع فيها لكن خرج الدكتور وقطع عليه: المعذره اخوي لازم تجي نعيد الفحص من جديد الدكتور وكان معه ثنين من الرجال: احنا سوينا فحص وجدنا عندك ايدز ولازم تجي علشان نعيده فارس وهو يصرخ: وش تقولون انتوا انا بخير مافيني شي؟ خلت الممرضه توقف وجلست تبكي وهو تشوفه يصرخ الله حق واخذ حقي منك الحين فارس لف باتجاهها : من انتي؟ .....: ليه ماعرفتني بعد ماشوهتني وخليتني مقعده انت وصاحبك فارس وهو يبكي : اسيل؟ اسيـــــــل؟ اسيل: أي اسيل اللي خذت روحها والحين الله اللي بياخذ روحك وبتشوف الموت البطئ مثل حالي فارس بكا بكا واخذوه الرجال لانه بيكون خطر لو يخلونه يروح وهذا غسان بين الحيا والموت سبحان الله نهايه شنيعه من منا مايتمنى يموت موته طاهره من منا مايدعي ويقول يالله بحسن الخاتمه ، انسان يلتهي بالملذات وينسى انه خلق علشان شي واحد انسان يحقد يكرهه يدمر دون حساب وفي الاخير ترجع عليه ابو ماجد خسر فلوسه بعد ماخدعه واحد مثله وجا واللي انذل منه لكن اول ماطاح من وقف معه اليد اللي لوها صقر وابو لافي ام ماجد اللي كان الكل يحسب لها حساب لانها سيده مجتمع بعد خسران زوجها ماحد ناظر فيها لان اللي مثل صديقاتها عندهم قاعده عندك فلس تسوى فلس عندك مليون تسوى مليون انطوت على نفسها ولاصار احد يجيها ولاتجي احد صارت تناظر بالمرايه وتشوف انها كبرت وصارت عجوز مثل امها من كثر ماسوت بنفسها اول / / / بعد مرور عدة سنوات الجازي : تعالي يالريم شوفي جراح بسرعه على الهوا مباشره وخلي منك التجهيزات عرفنا انك تخرجتي الريم جات وبيدها جنى: بدت الحلقه ؟ الجازي : فديت زوجي يازينه من مذيع شاعر يستضيف الشعراء وبرنامج ناجح والكل يمدحه ام صقر: بسك اكل صرتي تريله الجازي : يمه وش اسوي انا اكل حق روحين ترى الريم : ههههه اللي يشوفها يقول اول وحده تحمل بتوؤم العنود تدخل ومعها صقر اللي جابها لان ماجد مسافر برا يعالج امه بعد اللي صارلها صقر : شوف مو تتحكم ببنتي اعرفك ياطارق تتسلط عليها طارق : خالي وش فيك علي والله اني احبها جوري تجري تبوس جدتها ام صقر: هلا فيكم ياروح جده الريم تضحك تشيل جنى اللي عمرها ثلاث سنين وتخبت من شافت طارق: هههههه تحبها هاه؟ اجل ليش تخاف منك طارق وهو منحرج : هههههه بس اقول اني بتزوجك لي كبرتي بعدين وتبكي الكل : هههههههههههههههههههههههه صقر ناظر بعيون هيامه للريم وغمزت له عشان ماحد ينتبه الجازي شافتهم: ترى صارلكم اربع سنين متزوجين عن المغازل وشوفوا زوجي فديته ماحلاها ياناس صقر: ومن اللي يغازل الحين الكل: ههههههههههههههههه شوق وخالد صار عندهم ولد وبنت وعايشين حياتهم في احسن مايكون وفعلا الطيور على اشكالها تقع لانهم كلهم هاديين ورمنسين / / / ياسر ورهف بعد ماكانت حياتهم مهدده بالفراق ...صاروا مايستغنون عن بعض خصوصا ان رهف تغيرت وتابت وصارت ونعم الزوجه بفضل الله ثم فضلها ياسر صار مستشار في افضل المستشفيات بالشرقيه ورهف خلصت الجامعه وشجعها ياسر لتحضير ماجستير...وحاليا هي حامل بالشهر الرابع... / / / ليان وهي تجري ورا رفيف : تعالي خليني امشط شوشتك رفيف تتخبا وراء راكان: بابا شوف ماما راكان: يالليل ياليان خلي البنت بحالها ليان : اقول لاتخبلها علي كفايه انها تمشي البيت على كيفها راكان: طالعه على امها هههههههههههه ليان تجي وتضرب راكان وتمسكه وتدغدغه ويحاول يتفادها لايعطيها بوكس يطيرها : اجل طالعه علي هاه راكان: هههههههههههههههههههه رفيف جلست تدغدغ مع امها وتضحك راكان: ههههههه وانتي مع امك يانتفه ليان : مو تقول طالعه علي اجل تستاهل صرنا ضدك / / / سلطان وريناد انتقلوا للجبيل عشان شغله وللحين بانتظار اول مولد لهم لانهم ماتزوجوا الا من سنيتن بعد ماتخرجت ريناد من الجامعه / / / نسينا اللي طول انتظراها عشر سنين وطول حملها والحين بفضل رب العالمين عندها اربعه >> ماصدقت على الله وهي تراكض وراهم لانها جابتهم وراء بعض ويالله تلحق على طلباتهم / / / مشاعل واسيل سجلوا في ندوه وصاروا مسجلين في مركز لتحفيظ القران بعد ماظلوا وقرصتهم الدنيا غسان توفى بعد بعد شهر من الحادث وفارس للحين يشوف الموت البطئ بعيونه ، وكل ماشاف هله يزورونه يموت ألف مره ويتذكر كم مره عاقهم وبهذلهم انتهت روايتي على امل ان فيها من الشي اللي يفيد هذي ثاني قصه اكتبها اتمنى انها اعجبتكم واتمنى انها كانت افضل وانضج فكرا من راويتي السابقه تحياتي لكل من قرئها اختكم بحر07 الغلا | ||||||||||||||
|
| |
|
10-01-11, 02:36 AM
| #23 | ||||
| تسلمي أختي على الرواية الرومانسيه...عجبتني كثير و تناقس أكثر من موضوع...الشك و الغيره و التسرع في الحكم على الأخرين و الأستهتار بـأعراض الناس و الحب و التضحية...عسى ربي يهدي شبابنا و يبعد عنهم الخطيئة. | ||||
|
| |
|
27-05-11, 07:45 PM
| #26 | |||||||||||
| نجم روايتي وقاصة بقصص من وحي الأعضاء وكاتبة في قلوب أحلام وكاتبة ومحرر لغوي بقسم وحي الخيال - مقيم التسالي - منسق المجلد الأول لوحي الخيال - م  
| حلوة كتير يسلمو عليها | |||||||||||
|
| |
|
| أدوات الموضوع | |
| انواع عرض الموضوع | |
|
|
.png)
.png)
العرض العادي
