12-10-12, 02:29 PM
| #101 | ||||
| نجم روايتي ومشرفة سابقةومصممه 
|  أبو عبدالكريم:أقول يا أم عبدالكريم وش رايك باللي صار؟؟... أم عبدالكريم:طيب ليه يكتمون على الخطبه؟؟... أبو عبدالكريم:هذا شرطهم الوحيد...وبعدين مع الملكه بيعلنون كل شي مره وحده... أم عبدالكريم:غريبه...حتى ام بندر ماتدري وش هذي الزواجه... أبوعبدالكريم:لا تصيرين متشائمه..وبعدين يكفي سلمى فخر إنها بتاخذ تركي.. أم عبدالكريم:ويكفي تركي فخر إنه أخذ سلمى.... أبوعبدالكريم:صدقيني مافيه أحسن لسلمى من تركي اللي بيحطها بعيونه وبيغمض عليها... أم عبدالكريم تدعي:يالله ياكريم يا مجيب الدعاء إنك تمم زواج سلمى من تركي على خير يا حي يا قيوم... أبوعبدالكريم:آميـــن... حصه اللي راحت لزيارة لبيت أخوها أبوبندر... حصه:وينك يا أم بندر ماعاد بينتي أبد؟؟؟... أم بندر:بس والله مشغوله هاليومين...ولا إنتي عزيزة وغاليه... حصه:إلا مبروك خطبة بشاير.. أم بندر:الله يبارك فيك إنشالله... حصه بإبتسامه يخالطها الدهشه:ما أصدق بشاير بتصير مره وتمسك بيت... أم بندر:شفتي كيف الأيام بتركض..والله ما أدري كيف اقعد بالبيت بعد بشاير... حصه:الله يعين يا وخيتي... أم بندر:مثل ما قلت الله يعين... حصه:إلا شخبار أم عبدالكريم..من زمان عنها... أم بندر:إيه والله حتى أنا من زمان عنها... حصه:وش رايك نروح لها بكره؟؟؟... أم بندر:خلاص إنشالله إذا ما منعني شي... حصه:إلا أقول شخبار مرة تركي شذى؟؟؟... أم بندر:الحمدلله... حصه:تصدقين يا وخيتي والله إني حبيتها بالحيل هالبنت...ما أدري أحس إني أعرفها من سنين... أم بندر:حتى أنا والله...في بداية زواجها ما حبيتها الصراحه...بس بعدين والله إنها حبيبه هالبنت...وأحسها قريبه مني...ماعمرها أذتني بكلمه أو نظرة...بس فاطمه الله يهداها ماتحبها ما أدري ليش؟؟؟.. حصه:من متى فاطمه حبت أحد الله يهداك؟؟؟... ام بندر:لا تصيرين كذا متحامله عليها...والله إن قلبها أبيض لا تغرك المظاهر... حصه:والله قوليلها هالكلام...مهوب أنا...هي وعايشه... أم بندر:حتى عايشه والله إنها طيبه... حصه تضحك بسخريه:وافق شن طبقه... *** كانت الأيام تمر بسرعه...والزمن رفض يوقف...وكان موعد ملكة بشاير على سعود اللي الكل كان ينتظرها...ماعدا فاطمه ومحمد اللي ودهم إنها تتفركش على قولة إخواننا المصريين... وجاء أبو محمد وسعود طبعا..ومعهم جا خالد...محمد رفض إنه يجي وتحجج بعمله...وإنشالله بيعوضها بالزواج؟؟؟... أول ما وصلوا كانوا مثل الخطبه راحوا لبيت شذى...اللي كان في إستقبالهم شذى وتركي...بس هالمره كانت غير...كانت المعنويات والنفسيه مرتفعه عندهم الإثنين...وبعد الوصول...إرتاحوا من السفر وقعدوا سوالف وسعة خاطر... سعود:أقول تركي...مشالله كأنك هاليومين زايد وزنك... تركي:لا..لا تقول..بالله تحس وزني زاد؟؟؟... سعود:إيه والله زاد عن المره اللي جيتكم فيها... شذى:بالعكس أشوفه عادي مازاد وزنه... خالد:مو أنتي ساكنه معه...وبإستمرار تشوفينه..فما تلاحظين التغيرات اللي يشوفها اللي برى... شذى:لا..ولو ما زاد وزنه...أحس إنه عادي تركي... سعود يقلدها:عادي...يا الخبله شوفي كرشته كيف برزت... شذى تناظر بتركي:سعود يا الخبل..روح قص لك نظاره..وين الكرش ما أشوفه... تركي يناظر بعمره:طلعت كرشه؟؟؟...سعود لا تستهبل علي... سعود:أقص لي نظاره ها؟؟...والله روح يا استاذ و أوزن نفسك وشوف الزياده... شذى:ما عليك منه يا تركي...هو يقول كذا يبي يهبل فيك... قام سعود وراح لأخته اللي كانت جالسه قريب منه ومسكها مع رقبتها بمزح... سعود:أقول يا أم شوشه...أنا أهبل في زوجك الغثيث..من زينه الحمدلله والشكر عشان أهبل به... شذى وهي تضحك وتحاول تفك يد سعود:أقول سعود فك يدك يا جعلها اللي ماني بقايله... سعود يلف على تركي اللي كان يبتسم:أقول وش مسوي بأختي؟؟..صايره تدعي علي؟؟؟...خل عنك الإبتسامات وأعترف..بدل ماتسوي دعايه سجنال تو... خالد كان يضحك...أما تركي قعد يقوله:أقول سعود خل عنك حركات أبطال الديجيتال...وأقعد...ولا تسوي بشذى شي ولا ترى ماعندنا ملكه... خالد:أحلى يا القوي... سعود فك شذى وقعد بهدوء وقال:لا وش مافيه ملكه...لا خلاص بفك هالسوسه... شذى ومتكتفه:مين السوسه؟؟؟... سعود:حكم القوي على الضعيف...أنا السوسه ياوخيتي إرتحتي خلاص؟؟.. شذى تضحك:إيه إرتحت... خالد:والله عرفوا يسكتونك يابو الشباب... سعود بحسره:الله كريم...يهون الجرح الأليم...وإن صار ماصار..خلك على الدنيا حليم... *** اليوم ملكة سعود على بشاير...الكل كان ينتظر هاليوم بفارغ الصبر... سعود يعد الساعات...وبشاير تعد الدقايق...الفرح كان سمة تركي وشذى هذاك اليوم...هو فرحان بأخته وهي فرحانه بأخوها...كان سعداء اما فاطمه وعايشه وسلمى اللي كانوا موجودين وقاعدين متحيزين بصف واحد..مو عاجبهم الوضع...كيف تاخذ بشاير واحد أقل منها...أما بشاير فكانت طالعه في هالليله...باربي بفستانها الفوشي والفيروزي..طالعه آيه جماليه متقنه.. كانت روعه...أما الميك آب كان روج فوشي الفاقع...والشدو الفيروزي.. بس كانت روعه من جد... بالملكه لمن دخلت بشاير على سعود..وقف قلبه...وقال يا ويلي منها هذي تبي تذبحني... لاحظ تركي نظرات سعود لأخته... | ||||
|  |
|
12-10-12, 02:30 PM
| #102 | ||||
| نجم روايتي ومشرفة سابقةومصممه
| تركي يمزح:سعود..قل لا اله إلا الله...شوي شوي عيونك بيطلعون... ضحكت شذى اللي كانت واقفه معهم... سعود:وأنت حد حطك تراقبني... تركي:بشاير الله يعينك عليه.. سعود:أي الله يعينها علي...(تذكر بشاير)مبروك بشاير...حسبي الله على إبليس اخوك نساني أبارك لك... بشاير:الله يبارك فيك... سعود:طيب قولي لي مبروك... تفشلت بشاير:...مبروك... تركي:شوي شوي على البنت...أول مره أشوف واحد يقول للناس غصب قولوا لي مبروك... ضحكت شذى:إي والله صح يا سعود وش ذا؟؟؟.. سعود إنقهر إنهم تحدوا ضده:كلكم الحين علي انا المسيكين... بشاير بتهور:أنا معك... بعدها إستوعبت بشاير..وتفشلت(الحين أكيد بيقول هذي اكيد مشفوحه)... سعود بإبتسامه:فديت حرمتي..معي ضد الأعادي... تركي بمزح:بشاير؟؟؟...عيب... سعود:وش عيب الحين شافتكم كلكم علي لازم تدافع عني... شذى:مبروك يا بشاير... وبعدها قدعوا سوالف ووناسه...طلعوا تركي وشذى من عندهم شوي عشان ياخذون راحتهم...وما قعدوا خمس دقايق إلا تركي راجع... سعود:ياذي النشبه....وش تبي؟؟؟.. ضحكت بشاير.... تركي:على باله ألحين ميت عليه...اقول الرجال بالمجلس يبونك... سعود:قولهم مشغول... تركي ضحك:وش مشغوله...عذرا انت اكبر معرس مشفوح بالعالم.... بشاير ماتت ضحك على كلام تركي... سعود:وأنتي تضحكين على زوجك...هذا بدل ماتدافعين... تركي:يله سعود إمش قدامي... سعود:طيب عادي أكلم بشاير... تركي:طبعا لأ... سعود بترجي:بليــــز... تركي:يا شين البليز عليك...طيب... إبتسم سعود وضحك وطلع مع تركي...وقبل ما يطلع تركي قال لبشاير بهمس... تركي يخبث:تراني أضحك عليه..محد يبيه بس ابيه يقوم... إنقهرت بشاير...ما كان ودها سعود يقوم كانت مستانسه معه... بشاير:ليه قومته...((البنت فصخت الحيا)).. تركي يفتح عيونه:عيب عليك..مافيه..اولا حيبت أخرب عليكم القعده..ثانيا تعرفين أخوك غيور... *** وكعادة أبو محمد ما جلس عقب الملكه إلا يومين..وبعدها بيرجع للشرقيه.. وفي هذا اليوم كان مقرر أبومحمد إنه يرجع هو وعياله للشرقيه...وهم مجتمعين ببيت تركي يسولفون ويضحكون...إستئذن تركي الجميع ونادى أبو محمد...لأنه يبي يكلمه على إنفراد..الكل إستغرب وخاصه شذى قعدت تقول بخاطرها..وش عنده تركي...وش يبي من أبوي... بس بعدها على طول رجعت إندمجت بالسوالف مع إخوانها خالد وسعود... شذى:خالد ليه ما ألحيتوا على أبوي إن أمي تجي؟؟؟.. خالد:أبوك رفض...وقال مالها داعي الزحمه..وبعدين يوم تركي جا يخطب ما حد جاء معهم من حريمهم... شذى:بس أهلهم كلهم جو بخطوبتي...ومادام إن سعود ماسوى خطبه...تجي بالملكه عادي... سعود وهو باقي مو مصدق إنه خلاص تزوج بشاير:يا جماعه أنا للحين ماني مصدق إني ملكت على بشاير... خالد:ياخي وش فيك كذا مشفوح...إركد وأنا أخوك... سعود:أقول إسكت واللي يرحم والديك...خليني كذا فرحان وماني مصدق... خالد:أقول لا تكون ملكت على ديانا سبنسر وأنا مدري... سعود:تخسي ديانا واللي جابوا ديانا..عند بشاير... خالد ضحك:أقول يا شينك وأنت عزوبي...وزاد شينك يوم ملكت... سعود:دق على الخشب...ادري إنك منقهر مني لأني ازين من خشتك.. خالد:ما راح أرد عليك...وإذا خاطبهم الجاهلون قالوا سلاما... سعود:مسوي لي فيها حكيم زمانه...خالد حبيبي من اللي ضحك عليك؟؟... خالد:ما راح أرد... سعود:أقول شذى..ماعليك منه هالحكيم...إلا وش يبي رجلك بالوالد... شذى:وأنا وش يدريني...علمي علمك... خالد:أقول سعود..والله مشاوير هالزواج..ورى ما أخذت منال بنت عمك؟؟.. سعود:هذا اللي يبيني أرتكب فيه جريمه...وش جاب طاري منال على لسانك... خالد:لا..بس والله حرام...كانت بنت عمك أولى فيك من هذي... سعود:شذى جيبي لي سكين...خالد يا الخبل...وش قاعد تقول ألحين لو يسمعك تركي والله ليفسخ هالزواج... شذى:تركي بالمجلس مع أبوي ما بيسمع... سعود:بس زوجك عليه سمع...ماهوب صاحي... شذى:قل أعوذ برب الفلق...قول مشالله...ألحين لا تنفقع طبلة إذنه... سعود:مشالله مشالله...لا تموتين علينا ألحين...بعدين أخوك عينه بارده.. خالد يضحك:أي بارده إلا فلفل... سعود:خالد رجاءً لا تنكت...إذا بتنكت وتستخف دمك قولي من ألحين عشان أقوم... * * بالمجلس كان أبو محمد يسمع كلام تركي بكل عنايه وإهتمام...كان وقع السالفه عظيم على قلبه...بس حاول يمسك ويربط اعصابه...إلى ما ينتهي تركي من كلامه...اللي كان يقوله عن سالفته مع أبوه بخصوص خطبة سلمى سلمى...شرح له تركي إنه مغصوب...وإنه مايبيها...بس أبوه امره بالهشي...وإنه ماقدر يرفض طلب أبوه...بين له إنه يحب شذى وهي تحبه..وعايشين حياتهم من أحسن مايكون...وقاله إنه شذى أكيد مارح ترضى بهالشي...وأكيد بتزعل..وتتركه...قاله تركي الموضوع هذا... عشان إذا أعلن الملكه..ما يزعل أبو محمد...ويسحبون بنتهم منه... أو يسحبون قلبه من بين ضلوعه... بعد ما إنتهى تركي من كلامه:اتمنى يا عمي...إنك تكون فاهم موقفي.. أبو محمد تنهد:وش أقولك يا تركي...بس فيك الخير يوم سمعت كلام أبوك.. والله أدري إن مالك غير هالحل إنك تاخذ بنت عمك.. تركي:والله يابو محمد ماتدري كيف أنا عايش بحيره..بين أبوي وبين شذى.. أبو محمد:لا يا تركي إلا أبوك...هذا أبوك لازم تسمع كلامه... تركي:طيب يا عمي وش رايك أنت بهالسالفه... أبومحمد:شذى قصرت معك في شي؟؟؟...أو شاف أبوك منها شي أجبرك بعدها على بنت عمك؟؟؟... تركي:أبد...والله ما شفنا كلنا من شذى إلا الخير...و شذى معروف عنها الخير بالعايله..تربيتك يابو محمد... قعد أبو محمد ساكت لفتره ظن فيه تركي إن أبو محمد ما بيرد..بعدها قال.. أبو محمد:إرقد وآمن ياتركي...وشذى إن زعلت صدقيني ماراح تطلع من بيتها... فرح تركي إن أبو محمد يكون معه بصفه... أبو محمد:بس هاه...لا أسمع إنك أهملتها أو تركتها...أو قهرتها..ورحت مع بنت عمك... تركي:افا يا عمي...شذى بتكون في عيوني...وأنا كلي لها... إبتسم أبو محمد:بارك الله فيك...هي أكيد بتزعل مثل كل الحريم....بس زعلها ما بيطول... * * خالد:قلت لشذى عن الهديه اللي جبتها لخطيبتك؟؟؟... سعود يناظره:لأ.. | ||||
|
| |
|
12-10-12, 02:31 PM
| #103 | ||||
| نجم روايتي ومشرفة سابقةومصممه
| شذى:هلا والله...قمت تجيب هدايا من وراي وأنا ما أدري... سعود:لأنها أكيد ماراح تعجبك...بعدين لا تصيرين كذا ملقوفه... شذى:طيب وش جبت لها؟؟؟... سعود بإبتسامه ساحره:جبت لها قطوة... شذى تصرخ:قطوة؟؟؟...يا الخبل فيه واحد يهدي خطيبته يوم ملكته قطوة... سعود:أنا خبل؟؟؟...إلا إنتي الخبله...يا أم شوشه...وبعدين أنا وبشاير مهوب تقليديين... خالد:اللهم عافنا مما إبتليتهم وعافهم يارب العالمين.... سعود:ياخي أول مره بحياتي أشوف حكيم حاشر نفسه بكل شي... شذى:سعود من جدك جبت لها قطوة؟؟؟... سعود يبتسم:إي والله جبت لها قطوة...بس تهبل باقي صغيره... شذى:وش حكمتك لمن إخترت قطوة؟؟؟...ضاقت عليك الهدايا تجيب قطوة... سعود وهو يعدل جلسته:عشان تذكرني فيها...وعندي إحساس يقولي إن القطوة صديقة البنات... خالد:خذ الحكمه من أفواه المجانين... سعود وهو يأشر على خالد:ياناس هذا الرجال مسوي لي أزمه في الحياة... * * بعدها سافر عيال أبومحمد وأبو محمد...ورجعوا للشرقيه بعد ما قط تركي نصف همه...سألته شذى عن الموضوع...قال موضوع خااااص...سكتت وقالت بخاطرها مصيري بأعرف....وفعلا أكيد بتعرف...لأن الموضوع يدور عنها هي... كانت شذى تعبانه...وكان عندها موعد بالمستشفى..راح معها تركي... وسوت لها بعض التحاليل وهي تنتظرها...دق جوال تركي وطلع أبوه أبوبندر...يبيه....بَعَد تركي شوي عن شذى وكلم أبوه... تركي:هلا يباه؟؟؟... أبوبندر:وينك؟؟؟... تركي:مع شذى بالمستشفى... أبوبندر يستفسر:ليه عسى ماشـــر؟؟؟... تركي:أبد الشر ما يجيك...بس موعد عندها بالمستشفى... أبوبندر:هي بخير... تركي:إيه الحمدلله... أبوبندر:ألحمدلله...المهم بغيت أقولك إني كلمت عمك أبوعبدالكريم...وحددت الملكه بعد أسبوع... تركي متفاجأ:وش أسبوع؟؟؟... أبوبندر:أجل متى تبيها يا أستاذ تركي؟؟؟... تركي عصب:يباه...من متى صرت تخطط وتقولي بعدها... أبوبندر:تعال طقني أحسن...أنا أبوك يا تركي...ولا تقعد تعارضني.... تركي بعّد عن شذى بعد ماحس إنها إنتبهت له ولنبرة صوتها... تركي:محشوم يابوبندر...وحقك علي إن غلطت...بس مو زين والله اللي قاعد تسويه لي... أبوبندر:طيب وش تبي أنت ألحين؟؟؟.. تركي:أجلها يباه... أبوبندر:لو أقعد أطيعك يا تركي...ما بتملك عليها لو بعد سنه...فقلت خير البر عاجله... تركي:كل تأخيره وفيها خيره... أبوبندر:خلاص جهز نفسك على الأسبوع الجاي الملكه... تركي:يبــاه... أبوبندر:إذا بتكلمني في هالسالفه خلاص قضينا...بس إذا عندك شي ثاني قوله... تركي:طيب مافكرت في بشاير وسعود أخو شذى... أبوبندر:سعود وبشاير مالهم دخل... تركي:بس يباه هو أخوهــا.... قطع كلامه أبوبندر وقال:يالله مع السلامه...شكلك يا تركي راعي طويله... صكر أبوبندر..وترك وراه ولده بدوامه من الحيره والغضب والحزن وكل معنى حزين...كان تركي يحس بالإهانه...كان يحس بمثل الطوفان يجتح حياته وهو مهوب قادر يسوي شي غير إنه ينتظر هالطوفان؟؟؟... * * في هذي الأثنــاء جات النيرس لشذى اللي كانت تراقب تركي بإستغراب وش فيه؟؟...صاير غامض...مره راضي...ومره زعلان...مره حنون ومره قاسي...كانت تناقضات كثير تمر بتركي...اللي يعيش بأكثر من حاله باللحظه نفسها... النيرس لشذى اللي كانت مستغرقه بأفكارها:مبروك مدام.... شذى إنتبهت لها:هاه طلعت التحاليل... النيرس بإبتسامه:مبرووك مدام إنت حامل... شذى مو مستوعبه:وش تقوليـــن؟؟؟... النيرس تضحك:مدام إنتي حامل... شذى فرحانه:حامـــل...الله يبارك فيك... راحت شذى مع النيرس عشان تشوف النتايج.... * * رجع تركي لمحل شذى مالقاها...عصب وفور زياده..كافي اللي هو فيه يجي الهانم تزيدها...خاصه الوقت ظهر...دق جوال عليها ردت وهي فرحانه... تركي بعصبيه:وينك إنتي..أروح دقيقتين تختفين... شذى تبخرت فرحتها لمن عصب عليها كذا:ممكن تتكلم بأدب معي... تركي عصب:شذى وينك...ترى والله ماني ناقص مع هالقايله... شذى:لا تعصب علي... تركي:شوفي أنا بروح أجيب السياره من الباركات وجاي ألقاك عند البوابه... شذى حزنت:طيب... صكرت وهي حزينه...طلعت عند البوابه...حست بالحزن إن تركي بيدمر فرحتها...أكيد بيفرح لو يدري..بس هو ما أعطاها فرصه... طلعت له لقته بعد دقيقتين تقريبا واقف عند بوابة المستشفى...ركبت السياره وهي معصبه...دخلت بدون ماتسلم...مشى تركي وهو معصب ومتضايق من اللي صار...بعد فترة صمت... تركي يلف عليها:ترى السلام سنه... شذى:إنت أعطيتني فرصه..مره ثانيه تركي لا تقعد تعصب علي تراني مهوب أصغر عيالك فاهم... تركي:وما إنت بزر بعدت شوي عنك أكلم...قمتي عقبي على طول... شذى:ليه بضيع يعني...ولا لازم أمشي على حسب تعليماتك يا تركي.... تركي تنرفز من أسلوبها:شذى...ترى ماني ناقص أحطك هم على همومي... شذى إنقهرت من أسلوبه:هم؟؟؟...أنا هم...ليه وش همومك يا تركي... لا تكون بتحرر فلسطين..ولا شاغلتك أحداث 11سبتمر... تركي ناظرها:تتطنزين يا شذى... شذى:ماتشوف عمرك...تقول إني هم على قلبك... تركي:مو هم إلا أكبر هم على قلبي طيب... سكتت شذى وهي معصبه...حاولت تحس دموعها...بس كانت أقوى منها وقعدت تصيح بصوت تحاول إنها تكتمه...حس تركي فيها... لام نفسه إنه عاملها كذا...المفروض إنه يعاملها بأحسن من كذا بكثير..وش بقى للكارثه اللي بتصير؟؟؟؟... وصلوا البيت..وقبل ماتنزل شذى مسكها تركي مع يدها...وقالها بكل حنيه.. تركي:حبيبتي لا تكونين زعلتي؟؟؟... ناظرته شذى وفكت يده منها ونزلت وهي تصيح...حاسه إن كل علاقتها ماتزين معه...تتدهور أكثر وأكثر...ما تدري وين بتوصل معه... دخلت وهي محمله بالمشاعر الحزينه الجياشه...نزلت وقعدت تصيح بغرفتها... أما هو ما دخل البيت كان حاس نفسه إنه متضايق..حس إنه لازم ينفرد مع نفسه شوي...يفكر..ويحاسب نفسه...يحصي غلطاته...ويصلح عيوبه... *** سعود صاير يكلم بشاير وهذي المكالمه الثانيه بينهم... سعود:أقول بشورتي وش رايك بالقطوه؟؟؟... بشاير:مع إني اخاف من القطاوه..بس حبيتها والله... سعود:والله...هذا اهم شي...إلا عاد وش سميتيها؟؟؟... بشاير:سميتها مايا... سعود:مايا...حلوه ما دام إنتي اللي إخترتيه... بشاير:مشكور هذا من ذوقك... سعود:تدرين يا بشاير خاطري في إيش ألحين؟؟؟... بشاير:في إيش؟؟؟... سعود:إني أعترف لك إعتراف خطير... بشاير مهتمه:وشو؟؟؟... سعود بصوت هاديء:إني أقولك إني حبيتك من جد والله..وإنك سكنتي اعمق وجداني..صرتي معي على قولة الشاعر في حلي وترحالي... بشاير وهي ماتقدر تصكر فمها الإبتسامه شاقته مره:طيب وبعدين؟؟.. سعود يكمل:إنتي صرتي ألحين عندي ما ادري وش أقول ما أعرف اعبر.. بشاير:يعني كيف؟؟... سعود يبي يحرجها:إنتي ساعديني..شي ما أقدر أستغني عنه... بشاير:يعني مثل الهوا... سعود يبي يقهرها:لا عاد مو لهالدرجه... بشاير إنقهرت:......... سعود يزيدها:بشايرصدق إني حبيتك...بس عاد تقارنين نفسك بالهوا قويه شوي صح؟؟.. بشاير:سعود..تآمر على شي؟؟...((البنت موصله معها))... سعود ضحك:ههههههههه ليه تبين تصكرين؟؟؟.. بشاير بعصبيه:عفوا..أنا قلت شي غلط؟؟؟... سعود:لأ بس في نص كلامي تقولين تبين تصكرين...مايصير كذا يا بشاير هذا مو من الذوق تصكرين بوجه حبيبك... بشاير:من حبيبي؟؟... سعود بغرور:أنا...ولا عندك شك في هالشي... بشاير:مداح نفسه يبي له...عاد إنت كمل هالمثل... سعود يستهبل:أنا الصراحه ما أحب الأمثال...عشان كذا انا مقاطعها... بشاير:يعني تبي تفهمني إنك ماتعرفه... سعود:لأ بس أعرف مثل واحد... بشاير:وش هالمثل اللي إنت مو مقاطعه... سعود:امممممم...أحبك لو تكون حاضر أحبك لو تكون غايب... بشاير تضحك:بس هذي أغنيه... سعود ضحك:أدري...وش فيك الله يهداك عصبتي علي؟؟؟... بشاير:مشالله عليك من كلمتك وأنت تحاول ترفع ضغطي... سعود ببرائه:أمـــزح...وش فيك...صيري مرنه في التعامل يا حبي.. بشاير بثقه:أنا مرنه..بس إنت صاير مثل الصلصال دمك ثقيل... سعود ضحك:هههههههه إلعبي على غيري مو انا اللي أصدق بسرعه.. بشاير:ههههههههه سعود:تدرين بشاير إني من جد والله حبيتك...لا تستغربين إذا قريتي واحد بيوم في الجريده إسمه مجنون بشاير... ماقدرت بشاير تعلق..حست إنها تعيش من جد احلى أيام عمرها...يارب لا تحرمني منها أبد...أبد... | ||||
|
| |
|
12-10-12, 02:35 PM
| #104 | ||||
| نجم روايتي ومشرفة سابقةومصممه
| يمكن شذى عليها ألحين إنها تحزم أمتعتها وتغادر أراضي الرياض!!...بدأ العد التنازلي...وساعة الصفر قربت...والأفق يضيق...والعواصف تبي تعلن هبوبها...خلاص...ألحين موعد ملكة تركي...اللي كل ماتقرب.. يحس نفسه يضيق أكثر...والتوتر يزيد ويزيد...والهوا ماعاد يكفي صدره..اللي يحسه مخنوق...كان موعد ملكة تركي يوم الخميس...كان الحزن يقطع أوصال شذى...كانت تحس بالنيران تكويها...هي عرفت بالملكه يوم الثلاثاء أي قبل الملكه بيومين...ما زالت ولا تزال...تتذكر شكل تركي لمن قالها الخبر... ما صدقت بالبدايه..بس بعدين حست بالحزن...تذكرت الحوار اللي دار بينهم... شذى:بتاخذ سلمى يا تركي؟؟؟... تركي:............. شذى بدت دموعها تنزل:ليه يا تركي كذا؟؟؟...ليه أنا وش سويت لك... ليه خلاص إنتهت العشره اللي بينا...خلاص مافيه أي إحترام لي أو تقدير لمشاعري... تركي بحزن:لا بالعكس شذى والله إنك إنتي الوحيده اللي حبيتها من قلبي... شذى تصيح بحرقه:لا تكذب علي يا تركي...لا تكذب...اصلا ألحين أنا عرفت إنها مسألة وقت وتقطني عقبها...تذكر يا تركي تذكر... لمن أول ما رجعنا من باريس عشان أبوك تعب وطاح تذكر....لمن قالوا لي فاطمه وعايشه إنك بترجع لسلمى..قلت لك..بس ماصدقت..(زاد صياحها) قلت لي إنه كل اللي أقوله خرابيط...تركي ليش...ليش تضحك علي... ليش تقول إنك تحبني...ليش كذب وتقول إني حبك...ليش تلعب بقلبي وعواطفي ... ليش هذا كله...((وقعدت تصيح وهي دافنه وجهها بين يديها))... تركي من جد تقطع قلبه عليها حس إنه هو وده يصيح بعد:حبيبتي.. قلبي والله إنك عورتي قلبي...إنتي حبيبتي...وإنت الحب اللي ممكن يعيش بقلبي.. وغيرك مستحيل أحب أو حتى اطالع... شذى كانت توشك على الإنهيار من الصياح. كانت تبي تتكلم بس عبراتها تخنقها فترجع تبكي مره ثانيه... تركي حاول يفك يدها بس ي تزيد صلابه..حس إنه ماله داعي يضغط عليها... كان قلبه بهذي اللحظه يعوره...حس إن شذى ما تستاهل... حقد على سلمى وعلى عمه اللي مارفض واحد متزوج... وقعد يدعي الله إنه يسامح أبوه على اللي صار... شذى وهي تصيح:إنت تحبها صح يا تركي؟؟؟... تركي تلقائيا:لا...لا والله ما أحبها... شذى:تكذب يا تركي...باقي تكذب...قول قول إنك متيم فيها... حرام عليك والله حرام اللي سوته فيني... إنت على بالك بنات الناس لعبه عندك... تركي إبعد عني رجــاء... تركي:شذى...لحظه خليني أقولك ليش تزوجتها... شذى تمسح دموعها:تركي...ليه طول الوقت تحاول تجرحني... ليه تطول لسانك علي...ليه تحاول تضيق علي... ليه دايم تحاول تبي تبين لي مالي مكان هنا... تركي مستغرب:أنا يا شذى؟؟؟... أنا والله لو أقولك كلمه تزعلك... أزعل قبلك... شذى تبتسم بسخريه:فاطمه وعايشه فيهم الخير...كل مايشوفوني يقطون كلام وإني مارح اطول بالرياض...ويحسسوني دايم إني أقل منهم.. ولمن أقولك يا تركي...ما تحرك ساكن... وانا أسكت بعض الأحيان أقول لا أخرب علاقات الأخوان مع بعض... تركي كان حزين مره من اللي صاير:شذى... والله واللي خلقني إنك أنتي الحب الوحيد في حياتي...وأوعدك من ألحين إني ما أزعلك بكلمه.. ولا أجرحك.. ولا أضيق عليك أبد...إنتي ماتدرين أنتي وش تعنين لي... شذى تصيح وتناظره وعيونها وأهدابها مليانه دموع: طبعا بتجتمع بحبيبة قلبك سلمى وش اللي بيخليك دايم متضايق... وأنا مكاني دايم الزاويه المهمله من حياتك... تركي وهو يمسك بيديها الثنتين الصغار بين يدينه الكبار ويقرب منها ويقولها برجاء...بحب...بحزن.. تركي:شذى..يمكن ماتصدقيني...بس من جد والله... إنت الحب الوحيد بحياتي... وإنتي الوحيده إذا شفتك حسيت إن الدنيا بخير بوبجودك... إنت قلبي...شذى... إنتي حبيبتي...وروحي...من قلبي اقولك احبك..احبك موت.. انا ماصدقت إني لقيتك...إنسانه بكل هالطهر والنقاء تحبني وتعزني.. انا لمن أشوف دموعك تنزل والله إني ودي أموت ولا أشوفك لحظه حزينه.,..وسلمى مالها أي مكان بقلبي...أحلى لحظات حياتي كانت لمن انتي جنبي... صدقيني إبتسامتك عندي احلى شي يمكن يكون بهالعالم.. شذى كانت تسمع كلامها ودموعها تنزل...كانت تسمع كلامه وتحاول تصدقه..بس وين تصدقه وأفعاله غير أقواله... شذى وهي تقوم من عنده:تركي...انا مالي قعده عندك هنا بالرياض ولا يوم... بعدها على طول طلعت لغرفتها وهي تصيح... وتشوف احلامها كيف إنهارت...تشوف إن السعاده بعيده عنها.. تحس إنها خلاص حياتها إنتهت مع تركي... تذكرت كيف إنها كلمت اهلها بالشرقيه...توقعت إنهم بيحمون لها... بس إستغربت ردة فعل أبوها اللي أمرها إنها تلزم بيتها...حاولت تقنعه إنها ماعاد تبي تركي...رفض...ورفض حتى الجدال بهالشي...بكت... ترجته.. تستعطفه..حاولت تميل خواطره معها بس أبد مافيه فايده... تذكرت لمن اخوانها إستشاطوا غضب من هالسالفه... أصر محمد إنه يروح يجيب أخته من الرياض...بس أبوه رفض وتوعد اللي يسوي هالشي بيندم من عياله... تذكرت كيف حست إنه كرامتها مهدوره...حست من جد بالمهانه من تركي.. وإنها رخيصه...تذكرت إنها باقي ماقالت له إنه حامل كانت تنتظر الوقت المناسب...بس شكل العمر يمشي والوقت المناسب ما بيجي.. رجعت لواقعها...كان الوقت عصر...واليوم ملكة تركي... تحس إنها ودها إن الله ياخذ أمانته فيها...قبل هذا اليوم...كانت تمضي أوقاتها بين البكاء والصلاة إن الله يطلعها من اللي هي فيه... جتها مع العصر بشاير وهي تصيح وعيونها حمر...فتحت لها الشغاله الباب...دخلت وشافت شذى قاعده بالدور الثاني طلعت لها...راحت لها بشاير وتحاول تبان طبيعيه... بشاير:شذى ماعليك... شذى وعيونها ورموا من كثر الصياح:وش اللي ما علي منه يا بشاير... بشاير:والله يا شذى توني أمس عرفت...بغيت أجيك بس الوقت متأخر.. واليوم جيتك...حسبي الله على سلمى... شذى بحزن:ليه كذا اخوك يسوي فيني؟؟..حرام والله حرام.. بشاير بدت دموعها تنزل مع شذى:شذى تكفين لا تصيحين والله قطعتي قلبي... شذى تصيح:بشاير...ليه...ليه ياخذني مادام إنه مره ثانيه بيرجع لسلمى ليه.. مو هو خطبها بس ردته... بشاير تصيح:شذى...مصير تركي يعرف قدرك والله... شذى تصيح وترد بإنفعال:بعد إيش...بعد ما أموت بحسرتي...إنت ماتدرين عن شعوري...احس إني اموت باللحظه مية مره... هذا إذا بيرجع لي اخوك..وما أتوقع إن لي أي مكان بقلبه... بشاير وهي تصيح:أنا اللي مقهورة...ليه كذا يسوي معك...والله إنك اطهر وأنظف قلب يمكن أشوفه... | ||||
|
| |
|
12-10-12, 02:38 PM
| #105 | ||||
| نجم روايتي ومشرفة سابقةومصممه
| شذى والله إني أمس طول الليل قعدت أصيح من القهر... شذى قعدت تصيح بصمت... بشاير وهي تمسح دموعها:وين تركي؟؟؟... شذى تأشر بغرفته:في الغرفـــه... بشاير:طبعا وش عليه اليوم معرس... شذى:بشاير...الله يخليك لا تذكريني... بعدها بفترة بسيطه...طلع تركي من غرفته...وهو لابس وكاشخ... هو ما وده بس لازم يروح وهو كاشخ كشخة اميــر... ناظرته بشاير وعيونها مليانه دموع...وحقد.. ناظرها تركي:هلا...بشاير إنتي هنا... بشاير:ليـــه كذا يا تركي....ليه؟؟؟...حرام والله حرام... تركي بحده:بشاير ماني ناقصك إنتي بعد... بشاير:طبعا مالك خلق...اليوم موعد الملكه مع الدكتورة وحبيبة القلب... لازم تكون رايق من البدايه... تركي يصرخ:بشــايــر.. بشاير:لا تصرخ علي...الله ينتقم من يا تركي...ويحرق قلبك مثل ماحرقت قلبها... تركي ناظرها بإستحقار ونزل وهو عرف إنه مهو قد هالمواجهه... لحقته بشاير...أما شذى فكانت كفيله كلمات بشاير إنها تنقلها لحزن سرمدي ماله نهايه... أما بشاير لحقت أخوها لتحت... تركي لف عليها وقال لها:نعم وش تبين؟؟؟... بشاير وهي معقده حواجبها:ليش كذا يا تركي..ليه..وش سوت لك شذى؟؟.. تركي:مالك دخل بخصوصياتي يا بشاير... بشاير بإصرار:إلا لي دخل...ليه كل هذا التكتيم على الملكه وفجأة تقولنا أنت وأبوي من دون مقدمات....ليه مو إحنا عايله وحده... تركي:ليه...لهالدرجه تهمك شذى؟؟؟... بشاير:طبعا تهمني...مو صديقتي وأختي...والله ماتستاهل...إنت وش تبي بسلمى...ولا تبي تحيي حبك الأولاني... تركي:بشاير كفايه والله اللي فيني مكفيني.... بشاير:روح يا تركي...وش تنتظر... تركي:بتجين يا بشاير؟؟؟... بشاير بغضب:طبعا لأ...أنا بأقعد مع شذى...ولا مافكرت في مشاعرها... طلع تركي..اللي عاش اخر أيامه بدوامه من الحزن عشان شذى... أما بشاير رجعت لشذى... شذى:راح يا بشاير؟؟؟... أومأت بشاير راسها بالإيجاب... بعدها صاحت بحزن يقطع القلب...راحت لها بشاير وضمتها وقعدت تصيح معها...وقالت بكل حزن بشاير:حسبي الله عليك يا تركي... شذى:لا تدعين عليه يا بشاير... بشاير:يا عمري عليك يا شذى تخافين عليه وهو مافكر فيــك... شذى حطت راسها على صدر بشاير اللي كان مليئ بالعواطف..والحنان.. والحب.. * * أما من الجهه الثانيه كانت فاطمه وعايشه مستانسين مره ومو مصدقين إن أفكارهم تحولت إلى واقع محسوس وملموس...أما نوف كانت زعلانه.. وصاحت من القهر...بغت بعد تروح مع بشاير لشذى...بس امها رافضت هذا الشي بتاتا..وأصرت إنها تاخذها معها..لملكة خالها الصحيحه؟؟.. أما سلمى فكانت مشاعرها متضاربه..بين فرح وحزن...حزن إنها ودها تكون الملكه كبيره...بس إنشالله بيعوضها بالزواج...وفكرت في عادل..آه يا عادل منك ومن حبك...اللي عيشني بمكان ماهو مكاني... أما أم بندر فإنصدمت بعد ماعرفت عن الملكه قبلها بيومين وعصبت... وشلون ولدها يملك ويخطب من وراها...حست إنه مالها قيمه أو أي مكانه.. بس أبو بندر..عالج الموقف..وخفف من وطأة غضبها...اللي كان بعد بسبب شذى...اللي تشوف إنها ماتستاهل...كانت رافضه إنها تروح.. بس بطلب من تركي...ومن أبوبندر...ومن فاطمه راحت... ولمن عرفت فاطمه ردت فعل بشاير وإنها مابتروح قالت بخنق وغيض.. فاطمه:طبعا حبيبة قلبها شذى...ما أقول غير إن الله ياخذها... * * كان الوقت عشاء...يعني خلاص الحفل بدا...كانت شذى وبشاير...في حالة هدوء تام...كانت شذى متمدده بالصاله على الكنب حست إنها تعبانه...أما بشاير فكانت قاعده تناظرها وتراقبها...كان الجو حزين...عكس بيت أبو عبدالكريم اللي كانت مظاهر الفرح باديه على كل زاويه من زواياه...في بيت شذى..وهم قاعدين سمعوا صوت جرس...إستغربوا من جاء بهالوقت.. عيونهم كانت متسمره على الباب...اللي راحت الشغاله تشوف مين جاء.. فجأة دخلت عليهم سارا مرت متعب ومعها بنتها إنجود...راحت وسلمت على بشاير وشذى..وقعدت معهم... بشاير:ليه مارحتي الملكه؟؟؟.. سارا بعصبيه:ما أبي أروح...قلت بروح لشذى...يا قليبي عليها... بشاير:بس اليوم ملكة اختك وصديقتك وبنت خالك..غريبه مارحتي... سارا:بس والله نذله هالسلمى...ما تستحي تاخذ واحد متزوج... شذى تتدخل:وليه هو مايستحي لمن طلبها؟؟؟... سارا:آه من هالرجاجيل...مامنهم أمان...الوحده ما تأمن نفسها مع رجلها... بصراحه ماتوقعتها من تركي أبد... شذى:وش أسوي يا سارا... سارا:ما عليك منه...مصيره بيندم على اللي سواه...ولا فيه أحد يسوي سواته... | ||||
|
| |
|
12-10-12, 02:39 PM
| #106 | ||||
| نجم روايتي ومشرفة سابقةومصممه
| في هاللحظه يدق جوال شذى ردت طلع اخوها سعود... سعود:هلا شذى... شذى:هلا سعود... هنا فز قلب بشاير من طاري سعود... سعود:آه من هذاك النذل...والله لو إني قريب كان قطعته... شذى:لا تتعب نفسك سعود...اللي ما يبينا ما نبيه... سعود:ماعليك منه يا شذى...بحاول بعد أسبوع امر وأخذك...انا كنت باخذك من اول ما دريت والله انا ومحمد اللي عصب وحاس الدنيا عندنا... شذى وعينها دمعت من موقف اخوانها:يا عمري يا محمد... سعود بجديه:كنت باخذك...بس أبوي حلف وتوعد بس من يروح الرياض او يكلم تركي حتى...بإنه مابيصير طيب...تعرفين أبوك به السكر وما نبي نرفعه عليه...بس خلي الأمور تهدأ...وبجي اخذك...وحريقه بتركي واللي جاب تركي... شذى وتحس عبراتها تتجمع:تكفى سعود...لا تخليني...تعال خذني من هنا.. إختك تحس بالمهانه يا سعود...لا تخلوني هنا...كل شي حولي هنا يا سعود أحسه ظلمني...ظلمني...ما عاد فيني شده على المشاكل..أبي أبعد من هنا قد ما أقدر...سعود...لا تتركوني هنا... حس سعود بإن قلبه ينفطر على اخته ..سعود كان حساس مثل شذى.. على خفة دمه وهباله...بس أي كلمه تأثر فيه... سعود بحزم شديد:افا عليك يا شذى...والله ما أخليك...والمهانه ما ارضى إنك تحسين فيها...يا جعلي ما أبكيك يا شذى هدي عمرك ولك مني اللي تبين...خذي سجادتك وصلي...صلي إن الله يخفف عنك... شذى وهي تمسح دموعها:إنشالله...سلم لي على امي... سعود:يوصل... شذى ناظرت ببشاير:أقول سعود... سعود:هلا... شذى:ما ودك تدق على بشاير... بشاير هنا إحمر وجهها..حست بالإحراج... سعود:ليه هي وينها؟؟؟... شذى:جات هي هنا عندي...ماراحت الملكه...عشاني.. سعود:يا بعدي والله...بادق عليها الحين... * * كانت الملكه قايمه ببيت أبو عبدالكريم... عايشه لسلمى:قمر لا إله إلا الله... سلمى:من جد طالعه حلوة؟؟؟... عايشه:إلا تاخذين العقل...الله يهني تركي فيك... سلمى تبي تخفف التوتر اللي فيها:طيب..صديقاتي جو... عايشه:إيه...جات سمر...وجات كم وحده ما اعرفهم...تقريبا ست... سلمى:جو ناس كثير؟؟؟... عايشه:يعني...تعرفين الملكه مختصره؟؟؟... دخلت فاطمه... فاطمه بفرح:سلمى حرام عليك.... سلمى:وشو اللي حرام؟؟؟... فاطمه:حرام عليك...تبين قلب أخوي يوقف...وش هالجمال...وش هالحلا.. عايشه:أووه يا أم ريان خوفتيني...قعدت أقول وش عندها المره... فاطمه بإبتسامه واسعه:مبروك يا سلمى...عقبال ما أشوفك بالكوشه مرتزة مع أخوي... بعدها إبتسمت سلمى بخجــل... سلمى كانت من جد طالعه فاتنه..كانت لابسه فستان أحمر... طويل وذيل ملوكي وراها... كان شعرها مرفوع بطريقه مهيبه مع بعض الخصل النازله على جوانب وجهها...كان الفستان عاري الصدر والأكمام... كان الميك آب حقها مهوب مبالغ فيه مره...بس كان الروج أحمر صارخ وكحل عربي كثيف على عيونها صارت من جد ذباحه...وزايد جمالها جمال..مع مناكير لونها أحمر..طلعت من جد كأنها نجمه من نجمات هوليوود الفاتنات.. * * عند الرجـــال... متعب:أقول يابو فارس...وش هالملكه المفاجأة؟؟؟.. ابوفارس بإستغراب:تدري والله إني زعلت...ليه ما قالوا لي... متعب:المشكله ماله تركي متزوج إلا ثمانيه شهور... ما أمداه يفكر بوحده ثانيه... أبو فارس:قد قلت له...خذ سلمى من البدايه...بس اخوك عنيد... متعب:مسيكينه يا بنت أبو محمد... أبو فارس:إيه والله... بالجهه الثانيه كان قاعد تركي متوسط أبوه و صديقه طلال... طلال:لا لا ما نقدر...مشالله ثنتين بسنه وحده... تركي:قول مشالله... طلال يبتسم:إلا بأقول الحمدلله الذي عافانا مما إبتلاكم... تركي:ليه وش السبب وأنا أخوك... طلال:مهبول أنت... ما أمداك شبعت من مرتك الأولى...قمت تاخذ الثانيه.. تركي:والله حريه شخصيه... طلال بهمس:حريه شخصيه...ولا أمر من السلطات العليا... سكت تركي...لأنه قد حكى السالفه كلها لطلال من قبل... تركي:طلال واللي يرحم والديك...لا تذكرني...والله احس بالغيض.. طلال يحاول يمسك ضحكته:تدري يا تركي...إني ضحكت من قلب لمن قلتي إن أبوك قالك جمع هالحريم على قلبك... تركي يصر على أسنانه:تتطنز أنت مع هالخشه... طلال:لا والله ما أتطنز..الله يعينك يا خوي..والله لا يحطني في هالموقف.. * * بشاير تبتسم:زين طرينا على بالك... سعود:إنت أصلا غبتي عشان تطرين... بشاير:تتكلم من جد...ولا تضحك علي... سعود:لا والله أتكلم من جد...بس والله إن غلاك زاد يا بشاير لمن قعدتي مع شذى... وما رحتي لملكة اخوك... بشاير:شذى ترى والله ماتهون علي... سعود بعصبيه:يرضيك اللي سواه أخوك بأختي... بشاير:لا ما يرضيني... سعود بقهر:ما أقول غير حسبي الله عليه..ليه ما يتكلم من قبل... بشاير:سعود...إحنا مالنا دخل...وأنا مالي أي يد في هالسالفه... سعود:طبعا يا حبيبتي إنتي وأنا مالنا دخل بالسالفه أبد...بس قهرني اخوك على أختي وحرق قلبي عليها... بشاير:ما ألومك والله يا سعود... * * بعد ما جا الشيخ وملك تركي على سلمى...دخل تركي على سلمى... أول ما دخل كان يفكر بشذى...وينفس الوقت يحاول يتذكر ملامح سلمى اللي له فتره ما شافها... أول ما دخل سلم على امه وأم عبدالكريم..وحصه.. أخته فاطمه..أما نوف...فكانت تشاهد الموقف من بعيد وقلبها يعتصر بالحزن.. بعد ما سلم على الكل شاف سلمى..إنبهر من جمالها وفتنتها..شاف إمرأه مغريه بكل الأبعـاد..شاف حبه الأولاني..شاف حب الطفوله والصبا وباكورة الشباب...شافها وحس بالأرتباك من جمالها ومن حبها القديم ومن الحال اللي وصلوا لها.. كانت جميله تقريبا إلى درجة الكمال... أما هي شافت ولد العم... والحبيب القديم.. اللي كانت تعيش ليالي الثانوي والمتوسط وهي تفكر فيه... شافت الوسامه والقامه الرجوليه الجذابه.. لمحت نبل اخلاقه وهو يسلم على اهله... شافت الإبتسامه اللي ممكن تقتلها وتحييها بالوقت نفسه...حست بمثل الجانب اللي كان نايم من قلبها وصحى ..وحست بمثل البراكين والزلازل بقلبها...تعلن عودة تركي..حبيب وقريب.. وزوج؟؟... قرب تركي منها وسلم عليها... تركي:مبروك يا سلمى... سلمى بهدوء:الله يبارك فيك... تركي:مشالله وش هالجمال... سلمى بخجل:عيونك الحلوة... تركي يبتسم:ما دام قلتي عن عيوني حلوة خلاص ما أحتاج شهاده من أحد.. لاحظ تركي نوف اللي كانت واقفه عند الباب ولا سلمت عليه... تركي:ماتبين تسلمين يا نوف؟؟؟.. نوف وهي تحاول تبان طبيعيه:إلا بأسلم... وبعد ما سلمت.. تركي:وما رح تقولين مبروك... نوف وهي رايحه لأن مشهد خالها جنب سلمى حارق قلبها:مبروك... طلعت وهي تحس بالقهر...معقوله ممكن عن الواحد يحب ويتزوج ثنتين بالسنه نفسها...معقوله... * * عايشه تقول لفاطمه:وأخيرا ما بغينا.. فاطمه:إي والله...بس مقهورة يا عايشه... عايشه:ليـــه؟؟... فاطمه:تركي رفض إنه يطلق شذى لمن جا المملك... عايشه بخساره:لااااا... لا تقولين؟؟؟.. فاطمه:إيه...أحس إن نص اللي كنت ابيه خرب... | ||||
|
| |
|
12-10-12, 02:41 PM
| #107 | ||||
| نجم روايتي ومشرفة سابقةومصممه
| بعد هذا الليل اللي الكل مارح ينساه..وكلن رجع لبيته..ورجعت بشاير وسارا بيوتهم...وشذى مستحيل تنسى وقفتهم معها أبد..رجع تركي وهو ما يدري وش يقولها..أو حتى شلون يناظرها... راح لها وشافها مقفله الغرفه اللي إستقلتها لنفسها بعيد عنه...بغى يدق الباب عليها..بس تراجع أخر لحظه وش بيقولها غير إنه بيحر قلبها...حط إذنه على الباب وسمع صوت بكائها الهادئ...حس نفسه إنه حقير.. وبدون أي إنسانيه...كيف يتزوج قدامها...ويمنعها إنها تروح لأهلها...وهي مرات كثيره يعصب عليها...دخل غرفته وإنسدح وهو يفكر بسلمى اللي كانت من جد تزداد جمال سنه بعد سنه...وفكر بشذى...اللي كانت فيه من البراءه والحب والملوحه الشــيء الكثيــر...وشاف الموازنه بينهم صعبه... *** كانت تمـــر الأيام وهي حزينه.. العلاقه بينهم مبتورة..جفاء إلا أقصى الحدود..البرود يشمل جميع جوانب حياتهم..كانت تحس بالرخص من الحبيب وإنها إنحطت بطريقه ومتضايق منها...وما أصعب شعور الوحده لمن تحس غنها ثقيله من حبيبها...أما هو يحاول يلطف العلاقه بينهم.. بس تزداد بعد و عزله...كانت حابسه نفسها بمثل شرنقه من الحزن.. خلاص اكيد هو إبتلش فيني لمن عرف إني حامل...تذكرت لمن علمت بشاير كيف فرحت لها بشاير...وأصرت إلا تنشر الخبر عشان سلمى وأنصار سلمى يحسون بالنصر...والقهر...والغيره... وعشان تحاول تصلح العلاقه بينها وبين تركي...طبعا تركي عرف من أمه بعد ما خبرتها بشاير... تفاجأ لمن شاف أمه تبارك له... تركي:وش تقولين يمه؟؟؟.. ام بندر:افا يا تركي ما تعلم أمك مبروك والله فرحت لك لمن قالت لي بشاير تركي:بشاير هي اللي قالت لك؟؟؟... أم بندر واللي هي على نياتها:إيه هي اللي قالت لي..شذى علمتها.. تركي:شذى هي قالت لها إنها حامــل؟؟؟... أم بندر:وإنشالله تبون تكتمون السالفه إلى متى...إلى ماتولد مرتك... تركي يحاول يبان عادي:ههههههه لا وش دعوة يمه... أم بندر:مبروك يا تركي...والله فرحت لك من كل قلبي... تركي:الله يبارك فيك ويعزك..ياأم بندر... بعد ما صكر تركي من أمه راح لشذى وهو فرحان من جد لمن سمع الخبر و بنفس الوقت زعلان...المفروض يسمع الخبر منها مو من غيرها.. أول ما وصل لقاها كعادتها قاعده بغرفتها... تركي اول ما دخل:السلام عليكم... لفت عليه وناظرته..وبعدها قامت تبي تطلع من الغرفه اللي أخذتها بعيد عن غرفتهم المشتركه... تركي مسكها قبل ما تطلع وقالها:السلام سنه..والرد واجب... شذى من غير نفس:وعليكم السلام... وبغت تطلع إلا إنه بقى ماسكها... تركي:ممكن اتكلم معك؟؟؟.. شذى بكبرياء:لأ... تركي:لا عاد أنا أصر...شذى شلون تقولين لأهلي إنك حامل وماتقولي لي؟؟... شذى ماتدري ليه حست بالأرتباك:وش تبيني...اقولك؟؟.. تركي:طبعا تقولين لي... شذى:ما فيه وقت مناسب... تركي يحط يده على كتفها:بالعكس...إنتي ماتدرين وش فرحت لمن دريت.. شذى:يفرحك؟؟؟.. تركي بإبتسامه:طبعا يفرحني...لمن يكون لي طفل من اللي احبها وأعشقها.. شذى بإبتسامه سخريه:يمكن أصدقك لو قلتي هالكلام في وقت غير هالوقت... وطلعت من عنده وهو حيران ما يدري وش يرضيها...لاكنه متأكد من الداخل إنه طعنها ي صميم أنوثتها..ومشاعرها...وما يدري متى يقدر إنه يفتح حوار بينهم...لأنها ماتتقبل حتى النظره منه...وإبتسم بسخريه لمن شاف الغرفه وهو واقف فيها...إنه لمن يزعل أي واحد يلجأ لها...حس من الداخل وده إنه يلغيها... *** كانت حزينه تحس بالقهر... ماكانت تدري ايش تسوي مع اللي صار... أبوها رفض يستقبلها...وأمها متعاطفه معها...بس هي مارح تسكت عن حقها أبد...مشكلتها كانت تكمن بالجنين اللي بين أحشائها...كان ودها إنها ماحملت ولا فكت الحبوب..ألحين هي تبي الطلاق بأي وسيله..بس مشكلتها إنها حامل وش ذنب الطفل اللي بيجي للعالم وسط هالمشاكل...كانت تبي تطلع من هالتجربه بأقل الخسائر..بس هو متمسك فيها أكيد عشانها حامل مهوب لسواد عيونها...وهي في زحمة تفكيرها هذي..دخل عليها تركي.. آخر شخص بالعالم..تتمنى إنها تشوفه..لأن كل ماتشوفه يجدد عذابها ولوعتها..دخل عليها وهو ممتقع الوجه...كان مبين إن وراه كلام..حست بالخوف لمنظره...حست إن معاه خبر شين..سككت وحطت يدها على قلبها تنتظره يتكلم... أما تركي مهوب عارف كيف يوصلها الخبر..أكيد بتحزن..أكيد بتبكي.. أكيد بيزيدها شقاء على شقاها...بس لازم تدري لازم تعرف... تركي ومهوب عارف من وين يبدى:شذى والله ما أدري وش أقولك بس جهزي حالك بنسافر الشرقيه... شذى واللي حست بقلبها طاح ببطنها وطلع إحساسها صادق..قالت وعيونها مالينه خوف:تركي حد من أهلي صار فيه شي؟؟؟... تركي مايبي يخوفها:لأ ما صار...بس مو إنتي تبين تروحين لهم؟؟؟.. شذى وخوفها يزداد:تركي لا تخوفيني زياده قولي من ألحين..حد فيه شي؟.. تركي:لا يابنت الناس ماحد فيه شي..بس أبوك طاح تعبان شوي... | ||||
|
| |
|
12-10-12, 02:43 PM
| #108 | ||||
| نجم روايتي ومشرفة سابقةومصممه
| شذى وهي تحط يدها على فمها:أبوي...وش فيه أبوي؟؟؟... تركي وهو من جد خايف عليها:مافيه شي بس إنقلوه للمستشفى... شذى ودموعها بدت تنزل:المستشفى؟؟..تركي أبوي فيه شيء كبير صح؟.. تركي وهو راح يجلس جنبها يبي يطمنها:لأ..بس تعب بسيط... شذى دفنت وجهها بين يدينها وقعدت تصيح:أبوي لا..تركي ألحين بنمشي على الشرقيه... تركي بإستغراب:ألحين..أنا حجزت رحلة بكره الظهر... شذى والدموع تنزل:لا أنا قلت ألحين..نسافر الليله يا تركي..ماعندي إستعداد أقعد لحظه هنا بالرياض.. تركي:بس مافيه رحلات... شذى:بالسياره نسافر مهوب لازم طياره.. تركي وهو حط يده على كتفها بحنان:شذى..مهوب زين سفر الطياره لك وللي بطنك..بالطياره كلها ساعه وإحنا هناك..إذا بنسافر بسياره بنقعد أربع ساعات.. شذى وهي تبعد عنه:تركي رجاءً لا تقعد تسوي لي فيها الحنون..قلت أبي أروح ألحين أشوف أبوي..وماني مستعده أقعد لبكره فاهم؟.. تركي بهدوء:خلاص الحين إرتاحي..وبعدها نروح.. شذى وهي قايمه:لأ ألحين بجهز شنطتي ونمشي... تركي ناظرها..شاف عيونها مليانه دموع..شاف الخف يطل منها على أبوها..تذكر هو بشهر العسل وش صار فيه لمن عرف بيطحة أبوه.. وكيف قطع عليها سفرتهم وهي ماقالت كلمه لأنها مقدرة موقفه..وماعمرها تبرمت من هالشي..سكت..وفي النهايه قرر السفر الآن للشرقيه..لعيون شذى والله تستاهل...دق على خويه طلال وشرح له الموقف...وبين له إنها ظرف طارئ سفره..لأن بكره عند دوام وخلاه يعتذر له إنه مارح يجي بسبب هالظرف... ***** ألحين لوين الأحداث بتمشي وسط هالعلاقات المتأزمة.... انتظر ردوودكم على أحر من الجمــــر... | ||||
|
| |
|
12-10-12, 02:46 PM
| #109 | ||||
| نجم روايتي ومشرفة سابقةومصممه
| .....((الجزء الثالث عشر))..... كانوا طول الطريق ساكتين..ما فيه حوار بينهم..زاد الطريق كآبه عليهم..تركي كان يكلمها بعض الأحيان وهي ماترد عليه.. كانت طول الطريق تحاول تتماسك وتدعي الله إنه يحفظ لها أبوها.. ويساعده إنه يرجع سالم مثل اول وأحسن...تركي كان حاس فيها وبحزنها...وهو ماهو عاجبه جو الحزن اللي هم فيه.. تركي:شذى وش فيك كل ما أكلمك ما تردين علي؟؟... شذى سكتت وماردت عليه... تركي:شذى...أنا ماجيت هالوقت إلا عشانك وبكره علي دوام... يعني على الأقل عبريني وردي علي... شذى بعد طلعة الروح:وش بغيت؟؟؟... تركي:شذى خلاص كفايه طول أربع ساعات وأنتي ساكته..أكلمك ولا تردين...ليه هذا كله؟؟؟... شذى:كم باقي ونوصل؟؟؟... تركي ناظرها يعني مافيه فايده..وقال بعدها:إنشالله 60كيلو وإحنا واصلين.. شذى:أول ما نوصل وين نروح... تركي بهدوء:كيفك..تبين نروح لفندق وبكره تروحين تزورين اهلك وأبوك.. أو تبين تروحين الليله لأهلك وبكره لأبوك..براحتك... شذى وهي تناظر الطريق قدامها:لأ..أول مانوصل بنروح لأبوي وبعدها لأهلي... تركي يناظرها:وين تروحين وإحنا بآخر الليل...بكره الصباح تزورينه... ِشذى بإصرار:لأ..الليله بزور أبوي...وبعدها بروح لأهلي... تركي:ما يصلح لك سفر وبعدها مستشفيات(يعلي صوته)بكره تروحين لأبوك... شذى بعناد:لأ يا تركي الليله بروح لأبوي..وإذا ما بتوديني بخلي اخواني ياخذوني لأبوي... تركي إنقهر:يعني السالفه عناد يا أخت شذى؟؟؟... شذى:إحسبها زي ماتبي بس أبوي بروح له الليله..لو شيصير... تركي:أنا أبي أعرف إنتي ليش كل ما أقول شي تبين تعانديني فيه ليش؟.. ترى إذا أنا سكت لك هاليومين ..مو معناته إني راضي... شذى وهي تبي تصيح:تركي...رجاء إفهمني..أبوي تعبان بين الحياة و الموت وإنت تقولي لا تزورينه..بالله وين العدل... تركي بدفاع عن نفسه: لا تقولين منعتك من زيارته...أنا قلت أجليها وهذا عشانك إنتي بعد... شذى والعبره خانقتها:تركي لمن رجعنا من فرنسا ورحت لأبوك على طول من المطار للمستشفى ما منعتك ولا ناقشتك لأن هذا من حقك تطمن على أبوك..ولمن مالقيت حجز من باريس للرياض..دورت بالحجوز إلين لقيت عن طريق الكويت وأنا ماقلت شي بعد...فتركي رجاءً رجاء خاص خلني أشوف أبوي...إنت ماتحس فيني...أبوي هذا تعرف وش معنى أبوي... حس تركي فيها وما قال شي..حب إنه يطمنها ويهدي بالها قبض على يدها وفي قلبه ألف معنى حب و مودة لهالإنسانه... * * * أول ما وصلوا الشرقيه راحوا المستشفى اللي مترقد فيه أبو شذى..دخلوا لقوه بالعنايه الفائقه...خافت شذى...بالبدايه منعوهم من الدخول بس بعد ما كلم تركي الدكتور المناوب إنهم جايين من الرياض..وشرح له إنهم لازم ضروري يشوفونه الليله..ولأن المستشفى خاص دخلوا على أبو محمد... أول ما دخلوا كان قلب شذى يدق بقوة..خاصه بعد ما عرفت إنه بالعنايه الفائقه..كانت تحس بوجع بقلبها...على أبوها...شافته ممدد على الفراش الأبيض والأجهزه حوله بكل مكان..يالله إيش كثر كان المشهد يعور بالقلب...وكان نايم بس مبين فيه الألم...ماتحملت شذى الموقف.. وقعدت تصيح بصوت مكتوم وهي حاطه يدها على فمها..وتمسكت بتركي بيدها الثانيه..وحطت راسها على صدره...أما تركي حس هالمشهد إنه شافه من قلب مع أبوه...سبحان الله...مسك شذى وحاول يهديها... شذى وهي تحاول تتماسك:تركي..وين تعب بسيط شوف حالته شلون صايره... تركي يتكلم بهدوء:شذى حبيبتي وش فيك..هو بخير لا تبالغين... شذى تناظر أبوها: يا تركي لا أبالغ ولا شي..حرام عليك شوف كيف المرض هد حيله.. تركي:إنشالله بيصير بخير...أبوي كانت طيحته أشد من ذي..والحمدلله قام منها... شذى وهي دموعها تنزل:الله يسمع منك يا تركي ويقوم... مع أصواتهم قام أبو محمد وفتح عيونه بتعب..شاف شذى..فرح من جد لمن شافها...حس إنه نهايته قريبه..يبي يشوفها يبي يقولها عن مشاعره لها... أبو محمد بأنين: شــذى.... شذى بلهفه وهي تنفك من تركي وتروح لأبوها:لبيه... أبو محمد يحاول يبتسم:وينك يا شذى... شذى وهي تمسك يد أبوها وتحبها:هذا انا هنا حولك يباه.. أبو محمد:شخبارك أنتي؟؟؟...يقولون إنك متضايقه وزعلانه... يالله معقوله أبوي يهتم فيني إذا أنا متضايقه أو زعلانه...الله يرحم حالك يا يباه... شذى تحاول تمسك دموعها من النزول:لأ يباه لاني متضايقه ولا زعلانه... إنت الأهم..وش أخبارك ألحين وش تحس فيه؟؟؟... أبو محمد يناظر السقف:احس إن نهايتي قربت يا بنت فيصل... شذى دموعها تنزل:لا لا تقول كذا يا يباه...من لنا غيرك لو تروح... الله يطول عمرك..ويخليك ذخر لنا...بس تكفي يباه لا تقول هذا الكلام حرام عليك والله إني أحسه سكاكين بقلبي... أبو محمد:بسم الله عليك يا شذى..اهم شي إنك مانتي شايله علي شي؟؟؟... شذى تصيح:أشيل على الدنيا كلها ولا أشيل عليك...يباه.. أبو محمد:سمي.... شذى:أبيك توعدني إنك تحاول تقوم من اللي فيك..وترجع لنا مثل أول... أبو محمد سكت وما قال شي...بس تم يناظر في بنته وحيدته... شذى تكمل ودموعها تنزل وتقول بعبره:أبيك تقوم يا يباه..وتشوف ولدي اللي بجيبه...يباه أبيك تكون يمي لمن أصير أم أبي ولدي يتعلم من جده منك يباه... أبو محمد يبتسم بوهن:الله يسمع منك يا شذى... أما تركي كان يناظر موقف شذى مع أبوها حس بالحزن يعصر قلبه..حس إن المشهد مؤثر لحد البكاء... تركي بهدوء:الحمدلله على السلامه يابو محمد... أبو محمد:حياك يا تركي... راح تركي سلم على أبو محمد..وقعد يساله عن أخباره مع تعبه الشديد.. أما شذى فقعدت تصيح بحزن بألم...كانت تشوف أبوها في قمة ضعفه في قمة وهنه...كانت تشوف الأب القوي اللي ما يقهر طايح بكل تعب ووهن على الفراش... أبو محمد إنتبه لبنته...وقالها:شذى خلاص لا تصيحين.. تركي:شذى خلاص..أبوك ترى ما بيأثر عليه كثر دموعك... شذى تحاول تمسح دموعها... وبعد فترة بسيطه جاتهم النيرس مع الطبيب وطلعوم من عند أبو محمد... لأنهم أثروا على صحته بوجودهم... أول ماكبوا السيارة...قعدت شذى تصيح على أبوها تذكرت شكله وهو يدعوها ويوصيها على عمرها واللي في بطنها...صدق عاطفة الأبوة تطلع في أصعب اللحظات تذكرت لمن ضمها قبل ما تطلع...يالله كانت أول مره في حياتها أبوها ياخذها بحضنه...بس شكلها بتكون تجربه يتيمه... تركي يهديها:خلاص شذى كفايه...شوفي شلون طلعوك من عنده لأنك أثرت عليه... شذى:ما قدرت امسك نفسي ما قدرت أطلع اللي بقلبي....تركي مانت حاس فيني ولا بموقفي.. | ||||
|
| |
|
12-10-12, 02:47 PM
| #110 | ||||
| نجم روايتي ومشرفة سابقةومصممه
| في نفس الليله... أبو بندر عرف السالفه من أم بندر..قالها تركي قبل لا يسافر... ابو بندر متفاجأ:وش تقولين يا أم بندر؟؟؟... أم بندر:أبو محمد...طاح تعبان... أبو بندر:من متى...وليه ماقالي تركي... أم بندر:هو سافر مع مرته الليله...عشان تشوف أبوها... أبو بندر:طيب ليه ما خبرني قبل لا يروح... أم بندر:كان مستعجل...ووصاني أقولك... أبو بندر:والله ما يستاهل أبو محمد... أم بندر:قول أستغفر الله يا بو بندر...هذا قضاء الله وقدره... أبو بندر بتراجع: أستغفر الله...اللهم لا تواخذنا باللي قلنا... *** وقفوا قدام البيت كانت الساعه وحده بالليل... تركي:وش رايك نروح الفندق..وبكره نجي لأهلك اكيد ناموا... شذى وهي تناظره:لأ بنزل لأهلي... تركي:بس هم أكيد نايمين لا تنسين بكره دوامات... شذى وهي نازله:انا بنزل...إذا بتجي معي حياك.... تركي وهو نازل:بوصلك..وبأسلم عليهم...وبعدها بروح للفندق... ما ردت شذى عليه...وراحت تدق الجرس...كانتمتوترة لدرجة إنها نست تدق عليهم من جوالها...بس من زمان عن بيتهم من يوم عرسها...لمن طلعت من بيتهم بالعصر...وهي مستغرقه بأفكارها إلا ينفتح الباب... سعود وهو يناظر تركي وشذى وهو مستغرب:هـــلا... شذى وهي تدخل مع تركي:هلا والله سعود شخبارك؟؟؟... سعود:الحمدلله...سلامة الأسفار.. شذى:الشر ما يجيك... وبعدها سلم تركي على سعود كان سلامهم بارد خصوصا بعد ملكة تركي على سلمى... عكس شذى اللي سلمت على سعود داخل بالحوش بحرارة...دخلوا كان البيت هاديء جدا...حست شذى بمثل الحنين هذيك اللحظه لهالبيت... شذى بهدوء:وين الباقي يا سعود؟؟؟... سعود:محمد نايم...وأمي نايمه بعد... شذى:لا يكون سويت إزعاج... سعود بهدوء:لا ما أزعجيتيني... تركي حس وجوده مهمل...حقد من قلبه عليهم... تركي:أجل يله أنا أستئذن... سعود ببرود:على وين... تركي:بروح..بس حبيت أوصل شذى...شذى توصين على شي... شذى تناظره ببرود بعد:ســلامتك... تركي وهو طالع:مع السلامه... طلع من عندهم وهو حاقد عليهم...عاذرهم بداخل نفسه..بس بنفس الوقت تركي مومتعود حد يعامله كذا...خصوصا سعود...و شذى؟؟؟... بعد ما طلع من عندهم تركي...راح سعود وشذى قعدوا بالمجلس عشان مايسوون إزعاج... سعود:مريتي على أبوي؟؟؟... شذى:إيه مريت عليه... سعود:كيف دخلوك؟؟؟... شذى: قعدنا فوق راسهم إلين دخلونا.... سعود:طيب كيف شفتيه؟؟؟... شذى بحزن وهي تطالع الجهه الثانيه:تعبان يا سعود..تعبان بمعنى الكلمه.. سعود يخفف عنها:أنا جيته اليوم العصر..وهو بخير كان والحمدلله.. شذى:أتمني هذا يا سعود اتمنى هذا الشي... سعود:طيب ما ودك تريحين بعد السفر... شذى:إلا بس ودي أشوف أمي... سعود:أمي نايمه... شذى وهي قايمه:خلاص يالله تصبح على خير...بروح أنام من جد تعبانه... سعود:تصبحين على خير... راح سعود بعدها غرفته اللي بالدور الأول... اما شذى دخلت الصاله...قعدت تناظر حولها كل شي..حست بالحزن والحنين لهذا البيت يزيد لحظه عن لحظه...مع بساطته حست فيه بالراحه النفسيه...عكس قصر تركي..والمشاكل اللي شافتها فيه... طلعت بهدوء..هي تبتسم بحزن..تبتسم للذكريات...تشوف نفسها بكل زاويه بهالبيت...طلعت وراحت للدور ثاني...راحت لغرفتها تبي تنام..بس لقتها مقفله...ناظرت لأخر الممر شافت جناح مريم ومحمد أخوها..إبتسمت غصب عنها..تذكرت مريم...حست حتى هي لها مثل الحنين بقلبها... صدق على مشاكلهم بس حست ببساطة مشاكلها مع مريم...مقارنه مع فاطمه وعايشه وسلمى؟؟؟؟... بعدها قعدت واقفه...ما تدري وين تروح...بغت تروح لغرفة امها بس خافت تصحيها من نومها...بس ما منعها فضولها إنها تروح لغرفة امها...وقفت عندها وسعت صوت إذاعة القرآن...حست بمثل الحركه داخل عرفت منها إن أمها صاحيه...دقت الباب...وبعدها سمعت جواب أمها صوت أمها الحنون... ام محمد:مين... شذى ما قدرت إلا إنها تفتح الباب... أول ما دخلت شافت امها قاعده وهي لابسه جلال الصلاه... وجالسه تسمع إذاعة القراى بكل خشوع وطمأنينه... ام محمد بفرح ممزوج مع إستغراب:شـــذى... شذى وهي رايحه لأمها:إيه شذى يمه...شخبارك يالغاليه... راحت شذى وسلمت على امها...وباستها على راسها ويدها... وبعد ماسلموا على بعض وقعدوا سوالف... أم محمد:متى وصلتي يا شذى... شذى:توني واصله من قبل نص ساعه تقريبا... أم محمد:ليه ما جيتيني من البدايه... شذى:سعود قالي إنك نايمه... أم محمد:والله تو مانورت الدار بك يا الغاليــه... شذى:إلا شخبارك يمه بعد تعب أبوي؟؟؟... أم محمد بحنين:ادعوا الله سبحانه بآخر هالليل إنه يقومه سالم مثل اول وأحسن... شذى:إنشالله يمه...عاد توني جيت من عنده... أم محمد:هاه أخباره يا شذى؟؟؟.... شذى بحزن مرسوم في عيونها:بخير...إنشالله بخير... أم محمد:خلاص يا شذى روحي إرتاحي وبكره لاحقين على القعده مع بعض... شذى:يمه أبي أقعد معك شوي... أم محمد بحنان:لا روحي تكفين نامي...ما تشوفين وجهك شلون صاير من التعب... شذى:خلاص طيب...بس وين مفتاح غرفتي قبل شوي رحت لها ولقيتها مقفله... | ||||
|
| |
 |
| أدوات الموضوع | |
| انواع عرض الموضوع | |
|
|
45Likes
العرض العادي
