10-10-12, 11:24 AM
| #11 | ||||
| نجم روايتي ومشرفة سابقةومصممه 
|  تركي: الله يهداك صورتيها لي ملاك متلبس بصورة انسان....واللي شفته العـــكس.... عبير انبهتت زياده: وبعدين......يعني ماتبيها؟؟؟....... تركي بحزن مصطنع: الصراحه ابيك تدورين لي حجه كيف انسحب؟؟؟...البنت ذي ما أبيها....أحس دمها ثقيل وسخيفه.... عبير بعصبيه:تبي تنسحب؟؟؟ تركي بحزنه المصطنع:صدقيني الأمر مو بيدي....النفس وماتهوى...نفسي عافت البنت وماأبيها.... عبير وهي معصبه:عفت البنت هاه؟؟؟...أصلا انت ماتستاهل إن الواحد تخليه يدور لك وحده مافيه مثلها ثنتين....وشذى والله وهذا أنا أحلف إنها بنت مافيه أحسن منها....بس ما أقول إلا إن الله يعطيها اللي أحسن منك بألف مره وجعلك ما تلقى احسن منها... تركي بعد ما شاف كيف خالته تأثرت قعد يضحك عليها وعلى موقفها بالسالفه... عبير عرفت إنه كذاب: تكذب علي أنت ووجهك هاه؟؟....أقول لا تمزح معي كذا زين؟؟؟....من جد خرعتني يا الأهبـــــل... تركي وهو يضحك:أنا أهبل؟؟...بس مقبوله منك يا أخت امي..... عبير: تركي تكلم جد وش رايك بشذى؟؟؟..... تركي وهو يعدل جلسته:تبين الجد يا عبير؟...شذى توقعتها أحلى من كذا على حسب كلامك...بس والله إني مرتاح لها وأبيها... عبير باستغراب: ليه شذى مهوب حلوة؟؟؟....والله إنها تهبل... تركي يماشي خالته: حلوة ما اختلفنا...بس انتي من وصفك لها توقعتها ملاك... عبيـــــر: تقصد يا تركي إني مبالغه بوصفي لها... تركي: بصريح العبارة إيــــه وبقوة بعد....بس لا تخافين شذى أبيها وعاجبتني وداخله مزاجي بعد.... عبير: داخله مزاجك ليه هي كورة؟.... تركي ضحك من كلام خالته ومن تعليقه عليها... عبير: تضحك....بس يله ما علينا...أبيك تقول لي وش صار معك لما رحت لهم... تركي:أدري ما عزمتيني إلا عشان اقول لك.... عبير : اخلص علي وقول.... تركي بابتسامته الفاتنه: تآمرين آمـــــــــــر....يا أحلى خطابه شفتها... وقعد تركي يحكي لخالته وش صار معه لما راح لهم وشاف شذى العروس ووصف لها شعوره ناحية شذى واهلها اللي ارتاح لهم..... | ||||
|  |
|
10-10-12, 11:25 AM
| #12 | ||||
| نجم روايتي ومشرفة سابقةومصممه
| في الصباح يوم الجمعه..... وبالتحديــــــد في بيت ابو بندر.... ام بندر: بشاير شوفي الشغاله حضرت كل شي ترى ابوك وتركي بيوصلون بعد نص ساعه تقريبا... بشاير وهي تعدل شعرها : لا تخافين مامي كل شي تمام واوكيـــــــــــه.... ام بندر: شوفي بشاير مو اول ما يجي ابوك تنطين عنده وتقعدين تسوين مناحه عشان ما رحت معه...لأنه بيجي تعبان... بشاير ولا كأنها سمعت كلام امها:يمه شعري كذا حلو؟؟؟.... ام بندر: انتي سمعت اللي قلته ولا لأ؟؟؟.... بشاير: ياحياتي يا يمه...هذا ثالث مرة تقولين لي الكلام نفسه درينا وعرفنا وفهمنا...خلاص اللي يشوفك يقول إني بزر... ام بندر:أعرفك اول مايجي ابوك تنسين كل اللي قلته... بشاير: خلاص خلاص فهمنا والله فهمنا....بس ماقلتي لي شرايك بشعري ؟؟؟... ام بندر: تدرين إني ما احب الشعر الأجعد ...حلاة البنت يكون شعرها ناعم وحلو....مو مثلك كل شوي وانتي تلعبين فيه بهالجل... بشاير: بالعكــس شعري وهو مجعد شكل احلى ويعطني لوك اجنبي...الشعر الناعم ما احبه... ام بندر: كيفك....بس هذا رايي... بشاير:يمه....عزمتي سارا ومتعب على الغدا تراني ما اتصلت عليهم...بس اتصلت على بندر وفاطمه وقلت لهم يجون على الغدا... ام بندر: لا متعب انا كلمته من أمـــــــس...ورح يجي هو وزوجته .... بشاير: زين طمنتيني...بعد خفت سارا تزعل مني... ام بندر: لااا سارا اعرفها قلبها ابيض وطيبه ما تشيل بخاطرها.... وبعد كذا طلعت بشاير لغرفتها وقعدت ام بندر بالصاله تنتظـــــــــر زوجها وولدها وأخبارهم.... .................................................. ............................... ........:ليـــــه مو عاجبك ؟؟؟..... محمد: ما أدري يامريم احسه مغرور ومتكبــــر...وانا هالفئه ما اطيقها... مريم: ولو هذا مو سبب....اخوانك وابوك الكل يمدح فيه.... محمد: وش اسوي لهم؟؟؟....الولد هذا مهوب عاجبني وماني مرتاح ازوجه ختي... مريم: احسن شي لشذى إنكم تزوجونه لها....بيعيشها بنعيم ماحلمت فيـــه... محمد: الغنى والفلوس موسبب يخلينا نزوجه لاختي.....تركي هذا ما عمرنا شفناه إلا لما جا يخطب... مريم انقهرت من محمد الكل موافق على تركي حتى شذى اللي ما يعجبها احد موافقه عليه إلا هو وهي ما تصدق متى الفكه من شذى ام المشــــاكل برايها... مريم تحاول تقنع محمد:محمد حبيبي...لا توقف في طريق اختك...إذا تبيه خلها على راحتها...موهذا كلامك.... محمد بضيق:إيــــه كلامي...بس ابوي طلب رايي بالموضوع...ورح اقوله اللي بخاطري... مريم: محمد....قول لأبوك رايي من رايك يا يباه.... والراي المهم للشذى وابوك... محمد: وأنــــــا...ولا تكونين ناسيه إني اخوها الكبير... مريم:لأ...مانسيت يا عمري....بس انت كذا بتوقف بطريق اختك....ويمكن تقعد حاقده عليك طول حياتها لأنه ما رح تلقى مثله... محمد:بس يا مريم هذا ما نعرفه.....ولو نزوجها واحد من اقاربنا أحسن وافضل.... وقعدت مريم تقنع في محمد إلى ما حست إنه مش رافض بس بنفس الوقت مهوب موافق.... .................................................. ..................... كانت الساعه تدق على الواحده ظهرا.... كانت شذى قاعده بالصاله اللي بالطابق الثاني ببيتهم وتطالع التي في وحاطه على مسلسل مصري تابعه، وهي بنفس الوقت سرحانه بعالم ثاني ولا هي حاسه باللي حواليها.... شذى بخاطرها تفكر بصالح ولد صديقة امها فوزيه اللي كانت بينهم قصة حب ملتهبه بس المشكله كانت إنها من طرف واحد بس اللي هو من طرف شذى، كان صالح هذا رفيق وصديق الطفوله بالنسبه لشذى، صدق ما كان حلو بس هو في نظرها انسان مافيه احلى و املح منه، صالح أكبر من شذى بسنتين كان ولد مشكلجي وصاحب هواش وفزعات وكانو كل الأولاد اللي بسنه يخافون منه وهو وحيد امه وابوه ومع هذا ماكان دلعهم مأثر فيه وكان يعتبر شذى مثل أخته لأن ماعنده اخوات...صـــالح كان ماخذ عقل شذى من أيام الطفوله إلى أيـــام الصبا...كان في نظرها الحبيب والصديق...بس اللي صدمها لما عرفت إنه ينظر لها كأخت وليس كحبيبه...كانت تشوف إنه شريك حياتها المستقبليه وإيش أحلى من حياه تقضيها مع صالح...بس اللي جرحها زياده هو لمن قالت أمه فوزيه صديقة ام محمد إنه مايفكر يتزوج بوحده غير ببنت خاله...ولحظتها عرفت إنه حتى ما يفكر فيها وبكت على حظها الي خلها تحبه وتعرفه...وحاولت تتنسى حبها الأولاني، وقعدت تفكر بتركي اللي شاغل هو تفكيرها ألحيــن و حياتها معه إذا بتتزوجه...وكيف رح تقـــدر تعيش بعيد عن أهلها وتصير متزوجه وتترك عالم البنات و أحلامهم وتدخل الحيــــاة الزوجيه....... وهي قاعده سرحانه ما تحس إلا بصوت أفلام الكرتون على سبيس تون وتطالع إلا بنات محمد ريم ورنا يطالعون التلفزيون.... شذى: من غير القناة وحط على سبيس تون؟؟؟...... ريــــم:مامــا.... شذى: وبعدين مع امكم...ماتشوفيني قاعد اتابع التلفزيون تجي تغير القناة.... وتدخل مريم بهاللحظة وسمعت كلام شذى.... مريم: اولا المسلسل هذا اللي كنت تابعينه انتهى...وشفتك بوادي ثاني والبنات ازعجوني قلت اشغلهم بالتلفزيون ويفكوني... شذى:اوكيــــــــه خلاص...وين محمد؟؟؟.... مريم: راح المطار من قبل نص ساعه لأن عنده رحلـه لدبي.... شذى:يرجع بالسلامه إن شالله.... مريم:ليـــــــه بغتي منه شي؟.... شذى تبي تقهرها:سالفه خاصه بيني وبينه.... وقامت شذى من الصاله ونزلت تقعد مع ابوها بالطابق اللي تحت، وهي ماكان عندها لا سالفه محمد ولا شي بس كانت تبي تقهر مريم لأنها فضوليه.... | ||||
|
| |
|
10-10-12, 11:26 AM
| #13 | ||||
| نجم روايتي ومشرفة سابقةومصممه
| بالريــــاض ببيت ابو بنـــدر...... وبعد ماقام الكل من الغدا.... فاطمه لأبوها: مشالله عليك يباه رحت خفيف انت وتركي ورجعتوا خفاف.... ابو بندر: إيــــــــــــه يا بنتي كذا أحسن و أفضل في امور مثل كذا..... فاطمه: بس ما كأنكم استعجلتو شوي بالروحه...كان سألتوا عن البنت زياده وعن اهلها... و خزها تركي بقوة على كلامها... فاطمه تكمل: أنا قلت شي غلط يا تركي؟؟؟.... تركي:إيــه لأن خلاص خطبنا وقضينــا....فكلامك هذا ماله داعــــي... عصبت فاطمه من كلامه: تركي...انا ماقلت كذا إلا عشان مصلحتك...... تركي:اقـــــول كلامك مامنه فايده....فعشان كذا ياليت تسكرين هالسيــــرة.... فاطمه بعصبيه: تراني اختك....ومصلحتك تهمني...وأنا ماقلت كذا إلا عشان بعدين ماتتحسف او تقول إنك استعجلت... تركي:آسف يافاطمه ولا تزعليـــن...وإعرفي إنك عزيزة وغاليه بس هالكلام من جد مامنه فايده.... يتدخل متعب:بس أما يا تركي شذيت عن القاعده وأخذت وحده من برا العايله..... فارس:وانت صادق...الصراحه ياعم تركي...أنا معك في إن إحنا نضخ دماء جديدة في العائله ونغير شوي وناخذ من برا... وقعد الكل يضحك من كلام فارس ولد بندر.... تركي بابتسامه: سمعت يا فاطمه هذا الكلام ولا بلاش..... متعب بمزح: مافيــــه ...فارس ياخذ بنت عمه نجود اللي هي بنتي.... ابو فارس بندر: عزالله كدينا خيــر إذا بزوج بنتك ولدي...بنتك هذيك ولد اعوذ بالله مو بنت قشرا ومفترسه... متعب وهو يمدح بنته:أقول لا يغركم مظهرها من برا تراها كلها نعووومه ورقه... ابو بندر: ما علينا ألحيـــن من انجود المهم....ترى إذا تركي بياخذ بنت ابو محمد بتصير الخطوبه بعيــد الأضحى والزواج بالصيف.. ابو فارس: مشالله يباه اتفقتوا بعد على كل شي....كان جبتوا البنت معكم مرة وحده... تركي:بندر اقول اترك عنك الطنازة انت ووجهك....ابوي نفسه بكذا.... الخطبه بعد شهرين بعيد الأضحى والزواج بالصيف... متعب:أنا اقول بعد كذا أحســــــن...إذا ردوا بجواب اهل العروس اتفقوا معهم على كذا... تركي وهو يناظر اخته فاطمه اللي حس إن الكلام مو عاجبها: وش رايك يا فاطمه براي ابوي؟؟؟.... فاطمه من غير نفس:وش لي كلام وراي من بعد كلام ابوي...اللي يبيه ابو بندر يصير..... ابو بندر:بارك الله فيك يافاطمه وانا دايم اقول ماحد في الحريم مثل فاطمه...... تركي بابتسامه خبيثه:اقول فاطمه....وين ناصر عن الكلام هذا والمدح عشان يسمعه.... فاطمه بثقه: تطمن ناصر يعرف مكانتي زيـــن..... .................................................. ............................................... سارا:هاه بشاير وش قال تركي عن العروس لمن شافها؟؟؟..... بشاير: تركي هذا لعين يوم سألته عن شكلها وأوصافها ما جاوب علي طنشني وقال لي باختصار إنها حلوة وعاجبته.... سارا:اسمع خالتي ام بندر تقول إن عبير هي اللي دلتكم عليها وإنها مستخفه على البنت وهي اللي قعدت ورى تركي لين خطبها... بشاير:إيه صادقه امي...بس تركي بعد يوم راح دورته العسكريه اللي بالشرقيه شاف اخوها وتعرف عليه عن طريق زميل له.... سارا بتعجب: سبحان الله...صدفه خير من ألف ميعاد... بشاير: فاطمه اختي مهوب راضيه....وكانت تبي لتركي سلمى بنت عمي اخت عايشه مرة بندر اخوي.... سارا: لا وش يبي بسلمى...سلمى ألحين بالأردن مع اخوها تكمل دراستها بالكيميا وتبي تصير ياحظي دكتوره فيها... بشاير: بيني وبينك أحسن خل تذلف سلمى ما أطيقها ولا أحبها....مغرورة بعمرها ودراستها خليهم ينفعونها.... سارا:لا تقولين كذا هذي بنت عمك..... بشاير: روحي زين...أصلا هي ترد المعاريـس من زمان عشان حجة هالدراسه والقرف حقها.... سارا: بس بيرجعون بعد سنه وهي مشالله عليها بتصير الدكتورة سلمى...يعني هي مهوب هينه... بشاير: ما علينا من هالسلمى....تدرين عن مرة تركي اسمها شذى؟؟؟.... سارا:إيــــه اعرف تو خالتي ام بندر قالت لي....اسمها ناعم ودلوع.... بشاير قعدت تضحك من سارا.... سارا: ممكن اعرف وش اللي قلته يضحك.... بشاير بضحكه: وش دلوع؟؟؟....اول مره بحياتي اشوف اسم دلوع.... سارا بابتسامه: وانتي انشالله تقعدين تعلقين على كل كلمه اقول لها....انا اقصد إنه اسم دلع... وهنا دخلت عليهم عايشه مرة بندر وسكتوا.... عايشه لبشاير: مبروك يا بشاير على خطبة تركي.... بشاير:الله يبارك فيك...وعقبال ولدك فارس... عايشه:آمــــــــــــــين... . وقعدوا يسولفون سارا وبشاير وعايشه بمواضيع ثانيه ....عشان عايشه أخت سلمى معروف إنها كانت تتمنى إن اختها تتزوج تركي بس الأمـــور سارت عكس هواها وهذا الشي قهرها.... | ||||
|
| |
|
10-10-12, 11:34 AM
| #14 | ||||
| نجم روايتي ومشرفة سابقةومصممه
| الجزء الثاني.... كان ابو محمد وعيالــه الثلاثه محمد وخالد وسعــود وام حمد كلهــــم مجتمعيــن بالمجلس عنده بالبيـت... عشـــان ياخذ ابو محمد رايهم بزواج شذى وخطيبها تـركـــي.... سعود: الصراحـــه يا يباه انا ماعندي مانــع من تركي مادام الكل يمدح فيـــه وهو مشالله عليه مبين إنه رجل بمعنى الكلمه... ابو محمد:يعني يا سعود مانت معترض على زواج اختك شذى من تركي؟؟؟ سعود: وليه اعترض...مشالله رجال ينشد الظهر فيه...والراي رايك يا بومحمد انت والوالده....وصاحبة الشان شذى... خالد: حتى انا يا يباه ماعندي أي اعتـــراض بالعكس،ناس يشرفون.... ابو محمد وهو ناظر ولــده محمد: هاه يا محمد وش رايك؟؟؟....عندي احساس يقول انت مهوب راضي على تركي... محمد: الراي رايك يابو محمد....اللي تقوله يصيـــر... ابومحمد: لا...بس رايك يهمني، اخوانك كلن قال رايه وانت بعد قــــول رايــك؟...تراه يهمنا كلنا... محمد بغى يقول اللي بخاطره بس تذكر زوجته مريم وكلامها له وكيف إنه بيوقف في طريق اخته شذى إذا اعترض لأن ابوه دايم يقتنع بشوره ورايه،وفي نفس الوقت حس إن اهله يبونه وإن شذى تبيه وماحب إنه يخرب عليهم... محمد: تركي ما ينرفض يايباه....وإذا شذى تبيه على بركة الله... ام محمد:الله يوفقك يا محمد...الصراحه كلامك عيــن العقل وكنت اشوف وش كنت بتقول لأني اثق برايك وكلامك... خالد:هالله هالله يا يماه...عشان محمد ساكن عندك تقولين كذا وانا ما كأني ولدك ولا كأن كلامي يهمك... سعود: ما عليــك ياخالد من الوالده...الله لنا.... ام محمد بابتسامه: لا والله بالعكس رايكم كلكم يهمني...بس لأن محمد الكبير وبكري بعد... فلازم اعرف وش رايه ولا كلامكم كله صح... ابو محمد بجديته المعروفه:أقـــــول يام محمد أنتي وش رايــك بالموضوع؟... ام محمد:اللي تشوفونه...انا ماعندي مانع و الخيـــر في المكتوب إن شالله... ابو محمد:إنشالله...عاد انا باكلم ابو بندر وأرد لهـــم خبر عشان نحدد باقي الأمـــور... محمد:يعني يباه شذى موافقه؟؟؟... ابومحمد:أكيــــد رايها الأول....امك سألتها وانا كنت جامعكم عشان أشوف إذا أحد عنده اعتراض او لأ...... سعــود بابتسامه:والله وكبرتي ياشذى وصرتي عروس؟؟؟.... ام محمد:سبحان الله | ||||
|
| |
|
10-10-12, 11:35 AM
| #15 | ||||
| نجم روايتي ومشرفة سابقةومصممه
| وببيت خالد أخـــو شذى... كان خالد وزوجته مها قاعدين بالصاله يتابعون التلفزيون.... خالد وكأنه مل من الفيلم اللي يطالعونه:أقــــول مهاوي...وش اخبار عمي والله من زمان عنه... مها وهي تناظره:والله هذا من كثر ماتكلمه مشالله عليك.... خالد وهو يمدد رجله :تدرين والله مشغول وماني فاضي... مها:أنــا ما قلتلك رح زوره بالجبيل...قلت تكلمه بالجوال كلها خمس دقايق ولا خايف على فاتورتك؟؟؟... ابتسم خالد من كلام زوجته وقال:يعني انا بخيل؟؟؟...بس الحق معك والله خليني اكلمه الحيــن... وياخذ الجوال ويدق على عمه...ويلقى الجوال مغلق...وحاول كذا مرة ويطلع الجوال مغلق... خالد يناظر مها بقلة حيله: الجوال مغلق... مها:أكيد ألحين تتعذر لي بهالعذر....حاول مرة ثانيه دق عليه بوقت ثاني... خالد:إيه بدق عليه بوقت ثاني...بس تدرين جهزي نفسك على الأسبـــوع الجاي نروح الجبيل زيارة لأهلك... مها والفرحه طايره من عيونها:والله؟؟...من جد تتكلم خالد نروح لهم... خالد:إيـــــه اتكلم من جد...وش فيك ماتصدقيني يعني؟؟؟.... مها:إلا مصدقتك...بس هاه مو قبل السفر بليله تأجله وتقول عندك شغل وما أدري ايش عندك... خالد بابتسامه:لا إنشالله مايصير عندي ظروف ونروح لهم....بس عندي شرط... مها: وشو؟؟؟... خالد:بنروح لهم الأربعاء بستأذن من شغلي ونروح لهم...بس كلها يوم واحد ماتفشليني هناك وتطلبين ننام عندهم... مها: خلاص ولا يهمك اللي تبيه بيصير....بس تدري خلني أدق على اخواتي وأبشرهم... خالد:لا خليهم مفاجأه أحســـن.... مها بفرح: وأنت الصادق....مفاجأة احسن... خالد:إلا ما سألتيني وش صار اليوم لمن دعاني أبوي عنده... مها وكأنها تتذكــر:إي صح نسيت أسألك وش صار...أكيد عشان زواج شذى صح؟؟.... خالد:إي صح... مها:يعني يبي ياخذ رايـــكم بالموضوع؟؟؟... خالد:إيـــه ،طبعا الكل موافق...أمي سعود ابوي وحتى شذى أمي تقول إنها موافقه...بس محمد... مها باستغراب:وش فيه محمد؟؟.. خالد وهو يفكر:أحس إنه مو موافق...كأنه متردد...حتى ذاك اليوم لمن جا ابو بندر وتركي...أحس إن محمد مهوب عاجبه تركي... مهــا:يعني محمد معتـــرض؟؟؟... خالد: مو معترض...لمن سأله الوالد ما قال إنه موافق...قال اللي تشوفونه...غريبه من محمد عمره ماكان سلبي كذا وماله راي...دائما رايه يمشي...عند أبوي...تدرين لو قال محمد مانبيه ارفضوه...ابوي بيرفضه.... مها:غريبـــه من محمد.... خالد:بسابوي بيرد لهم خبر إن إحنا موافقين عليهم.... مها:إيـــه....لهم من خطبوا وجو الشرقيه أسبوعين وأكثـــر.... خالد:ما أصدق شذى بتتزوج....والله كأني أذكرها باقي مالبست العبايه صغيرة كأنه يوم أمس... مها:إي والله حتى أنا...بنفقدها... كان خالد ومها كأنهم اصدقاء مو بس أزواج يسولفون مع بعض وياخذون راي بعض في أبسط الأمور ولو تكون تافهه وعلى كذا دايم متفاهمين ونادر مايجي واحد منهم ويزعل الثاني...وتجمع بينهم طيبة قلبهم وطولة بالهم... ******* كانت شذى و سعود قاعدين بالصاله عندهم بالطابق الاول... شذى: ياربـــــــي وبعدين معك....متى توديني السوق لي يومين وانا أطر منك... سعود وهو يلعب بجواله:نعم خيـــــر وش تبين؟؟؟.... شذى بضيق: أنت ماتفهم عربي...أقولك ابي السوق... سعود:زين وأنا إيش دخلني إذا تبين السوق.... شذى مقهورة: يا أخي عليك برود ماشفته على أحد....أبيك توديني السوق فاهم؟... سعود وهو يطالعها:أنــا أوديــك؟؟؟....لا اسمحيلي اليوم بطلع مع أخوياي معزوم... شذى:لاااا إلعب على غيري دائما تقول(وتقلده) ...أبطلع اليوم مع اخوياي...أنا معزوم عند أخوياي.... سعود يبي يقهرها: اعذريني اليوم باطلع وبكره واللي بعده ؛خويي سلطان جاي الشرقيه من الرياض ...اللي كان معي ببريطانيا يدرس... شذى:أوكيه إذا أنت لهالدرجه مو قادر تأجل موعدك كذا خذني معك وقطني بالسوق ولمن تخلص مر علي وخذني من السوق... سعــود بطنازة:باللــه؟؟؟....تصدقين فكرة... شذى:تتطنـــز؟؟؟... سعود بجديه:طبعا أتطنز أنتي ووجهك تتكلمين من جد ،حلوة هذي أخليك بالسوق لحالك... شذى:حبيبي ماأحد يوديني السوق غيرك... سعود:وانا يوم كنت أدرس من كان يوديك؟؟؟...خلي محمد ولا خالد ياخذونك السوق مشالله كل واحد فيهم مثل كبر الباب... شذى:هذول متزوجين وعندهم حريم وعيال...أنت عزابي لاعندك شغل ولا حرمه ولاعيــال بمعنى أصح فاضي ماعندك إلتزامات... سعود بطنازة:حلوة إلتزامات ذي،بس تتطنزين علي ياشذى؟ الأسبوع هذا كله مافيه سوق وخلي غيري يوديك اوكيـــه؟؟.... شذى:عـــادي آخذ تاكسي وأروح يعني ابد متكسرة انا عندك... سعود وهو يقوم ويحط جواله بجيبه:تاكسي أنتي ووجهك هاه؟عشان وجهك هذا أغير معالمه وزين إذا تذكرتي إن اسمك شذى... شذى مقهورة:............ سعود وهو طالع عند الباب:سي يو....... شذى بعد ماطلع أخوها:اقلب وجهك ياالنذل...تهدد مالت عليك يا الخايس يعني أبد متقطعه أنا عندك... وقامت وشغلت التلفزيون وقعدت تطالع فيـــلم أجنــبي....من الزهق اللي هي فيه.... كانت مريم وبناتها عند أهلها طول هذاك اليوم،وام محمد عند صديقتها فوزيه ام صالح....وابومحمد معزوم عشا عند صديق قديم له... ******* بانتظار آراءكم | ||||
|
| |
|
10-10-12, 11:36 AM
| #16 | ||||
| نجم روايتي ومشرفة سابقةومصممه
| بالريــــاض...الليل الساعه عشر... بشــاير:أقــــول تـــركي... تركي وهو يقرا المجله:نعـــم.... بشاير:وش رايك لو تكلم أمي.... تركي بدون مايرفع عينه :في إيــش اكلمها؟؟؟.... بشاير:في إنها تخليني أروح عند صديقتي مرام... تركي ومايزال مطنشها:ليه هي رافضه؟؟؟.... بشاير بضيق:إيه رافضه.... تركي يقرا:خلاص مو لازم تزورينها... بشاير بقهر:زين ياخي على الأقل عبرنا،طالع فينا شوي إيش هذا؟؟؟.... ما أحب اكلم أحد وهو ملتهي في شي ثاني... تركي توه يرفع عيونه يطالع أخته:نعم إيش تبين؟؟..... بشاير بهدوء:تركي كلم أمي الله يخليك،البنات كلهم مجتمعين عندها بعد بكره وأمي رافضه هالشي بتاتا إني أروح... تركي:ليـــــــه رافضه؟...أكيد قلتي لها شي يزعل او إنك سويتي شي... بشاير متردده:تقريبـــا...بس أمي الله يهداها زعول...بسرعه تزعل... تركي رجع يقرا المجله وطنشها.... بشاير بقهر:تـــــــــــــركــــ� �ــــــــــــي.... تركي يناظرها:خير وش تبين... بشاير : ابيك تكلم امي... تركي ببرود:آسف أنا مالي دخل بينكم انتي وامي... بشاير:تكفى الله يخليك.... تركي:زين انتي مع هالوجه إيش سويتي علشان تزعل... بشاير:لأني رفضت إني اروح معها بيت خالي المصون اللي هو أخوها وقلت قرف ما ابي اروح لهم لأنه ببيت خالي تجيني الغلقه... تركي:وبعدين... بشاير تكمل:بعدين امك زعلت ومارضت اقول عن اخوها كذا،فقالت لي ترضين احد يقول عن بيت اخوك متعب كذا قلت بطنازة وبمزح طبعا إنه عادي عندي إذا احد قال كذا عن متعب وبيته وبالعكس رح أشجعه فزعلت وانقهرت مني فقالت لي:أنا ماني ام بندر إذا رحتي لخويتك.. تركي بابتسامه:عشان كذا رافضه...بس ليه زعلتيها كان رحتي مجامله لها... بشاير:ياخي طول عمري وانا اجامل قلت بس هالمره...بس طلعت امك ياي ماعندها ديمقراطيه.... ابتسم لها تركي وقال:الصراحه كسرتي خاطري،بس اعذريني مااقدر اكسر كلمة امي... بشاير:بس امي تعزك ولو كلمتها انت... وجيت واعتذرت انا لها بتوافق.... تركي:اولا تستاهلين لأنك رفعت ظغط امي ثانيا ما أحب اتدخل ثالثا تراني اقدر اخليك تروحين بس كذا منذله مارح اكلم امك على قولتك... بشاير:بليـــــــــز تركي... تركي:خلاص اقلبي وجهك مارح اكلمها... بشاير:بس انا اختك الوحيده... تركي:ووحده كبر امك اسمها فاطمه وين راحت... بشايربرجاء:طالعني انا بشورة أختك اشاركك البيت وفاطمه هذي متزوجه وعندها عيال وتاركه البيت من يوم انا وانت صغار،انا اختك الصغيرونه تركي بجديه:أنتي هيه لا تتمسكنين...ما رح اكلمها.... بشاير:ليه خايف تكسحك وترفض؟؟؟..... تركي بثقه:لو انتي مو متأكده إن كلمتي عند امي ماتطيح ماكان كلمتيني يا الهبله بس على كلامك ذا مارح اكلمها.... بشير بتوسل:تكفى تركي الله يخليك... تركي:لأ.... بشاير بابتسامه:زين وإذا قلت عشان خاطر شذى كلمها بس..... تركي وهو يبحلق فيها بعيونه:وش دخل شذى ألحين... بشاير تزيدها:الله يخليك زين موعشاني انا اختك اللي أدري انك تموت فيني وعلي... تركي بطنازة:إي موت انا احبك... بشاير:بس عشان خاطر البنت الأمورة اللي تنتظرك بالشرقيه وقطعت الصحاري والفيافي عشانها وعشان تطلب يدها من السلطان... قعد تركي يضحك من كلامها...وبعدها قال:خلاص بشاير باكلم أمي بس هاه هذي اخر مرة تطلبيني بشي اسمه شذى ولا ترى اذبحك... بشاير:اوكيه اخر مرة...بس هذي يسمونها غيره؟؟؟... تركي وهو راجع يقرا المجله:لأ ...يسمونه الغلا... بشاير وهي قايمه:بدينــــا.... تركي يخزها..... بشاير وهي فرحانه وقايمه من عنده تبي تبشر صديقاتها:آسفه على كلمتي ...بأسحبها... وطلعت تركض لحجرتها... تركي بخاطره ((من جد هالبنت هبله إذا اندلت على شي تعلق فيه)).... ورجع يكمل يقرا المجله الي ماخلته بشاير يقراها زيـــن.... ******* وبالخبر كان سعود وخويه سلطان قاعدين بستار بكس.... سعود بابتسامه:هاه شرايك بالشرقيه...ماتغيرت للأحسن؟؟؟... سلطان:وأنت صادق...طالعه أحسن وأحلى من الأول.... وقعدوا يسولفون وياخذون أخبار بعض خاصه إن لهم سنتين ماشافوا بعض...... وبعدها قال سعود:الصراحه ياسلطان في سالفه ودي أفاتحك فيها بس خايف... سلطان:لا وش دعوة...قول اللي بخاطرك إحنا أخوان وأكثر... سعود بتردد:ولا تزعل؟؟... سلطان:ولا آخذ بخاطري بعد... سعود:الصراحه ياسلطان الآسباب والاعذار اللي خلتك تقطع دراستك في بريطانيا وترجع السعوديه مهيب مقنعتني واحس إنــك... ووقف سعود عن الكلام ويبي يشوف تعابير وجه خويه سلطان إذا ماشيه معه ولا لأ... سلطان:كمل كلامك وش فيك وقفت؟؟؟.... سعود:أحس إنك تخبي وراها أسباب ثانيه،يعني بالله عليك سبب إنك تخلي دراستك وباقي لك سنه ونص وتاخذ الشهاده عشان إنك اشتقت للسعوديه ولأهلك وحنينك زاد لهم.... سلطان بدفاع عن نفسه:يعني الواحد مايشتاق لأهله؟ لبلده؟.... سعود وهجومه زاد:لأ مو كذا ياسلطان،كلنا اللي معك إشتقنا لأهلنا حتى زياد أذكر كان والله بالليل يوم عيد الفطر يبكي وكأن ميت له احد منة كثر مااشتاق لهم،بس إحنا بغربه كلنا مو لوحدك،وبعدين رجعتك كانت غريبه ياخي حتى وداع ماودعتنا ولا تركت لنا خبر ومادرينا إحنا أخوياك اللي معك بالشقه إنك سافرت إلا لمن دقيت علينا وقلت إنك وصلت السعوديه وحتى الجامعه فصلتك،ورجعتك كانت غريبه... سلطان مارد وقعد يطالع بسعود وهو يشرب قهوته.... سعود:لأنك كنت متفوق وشاطر،ولأن طموحك كان أعلى من كذا،أذكر إنك كنت تقولي تبي منصب يهز بلد....وإنك كنــ... سلطان يقاطعه بسخريه:من كثر الوظايف ألحين... سعود وهو يشرب قهوته:لا بس بشهادتك كنت تقدر تسوي اللي تبيه وفجأة رجعت كذا وبوظيفه اسمح لي أقول إنها صغيره بحقك،إنك تشغل بشركه خاصه وبراتب ضئيل... سلطان وهو يطالعه:وبعدين وش عندك؟؟؟؟.... سعود وهو يشد على يد سلطان:سلطان أنا خويك وماحد يعرفك بالشله كثري، فضفض قول اللي بخاطرك وصدقني بترتاح وتريحني معك... سلطان وهو يناظر سعود:لهالدرجه يهمك أمري؟؟؟... سعود بجديه:وأكثر مماتتصور،صدقني ياسلطان إنت اخوي اللي ماجابته أمي.... سلطان:باقولك ياسعود،بس ياليت الكلام مايطلع لأحد.... سعود بشدة:أفا بس ياسلطان عيب عليك هالكلام،كلامك في بير ماله نهايه... سلطان بحزن:سامحني ياسعود،بس اللي فيني يهد الصخر... سعود يناظره:قول يا سلطان اللي مضيق عليك انا كنت متوقع وراك شي.... وناظره سلطان بحزن،وقعد يحكي له همومه وش اللي صار معه وسعود كان منصدم من اللي قاله سلطان... حتى نسى إنه يبشره بخطبة أختـــه شذى.... | ||||
|
| |
|
10-10-12, 12:04 PM
| #17 | ||||
| نجم روايتي ومشرفة سابقةومصممه
| وبعد هذا اليوم بيومين دق ابو محمد على ابو بندر يبلغه موافقتهم وإنه يشرفهم مناسبتهم والزواج منهم... ابو بندر لتركي:أبشر بعزك يا تركي اهل العروس وافقوا... تركي:والله ...الله يبشرك بالخير... ابو بندر:الصراحه توقعت ردة فعلك أكبر من كذا... تركي:بس انا كنت واثق إنهم بيوافقون... ابو بندر:تركي...ترى الغرور مهوب زين... تركي بجديه:المسأله مهيب غرور يابو بندر قد ماهي ثقه بنفسي وبمكانتي وإني ما انرد... ابو بندر:ما اقول غير الله يصلحك يا تركي... تركي:آميــــن.... ابو بندر: اجل إستعد الاسبوع الجاي نروح الشرقيه ونتفق معهم على كل شي... تركي بحماس:اللي تامر به يا يباه... ويدق جوال تركي... تركي: هلا بمتعب... متعب: وين الوالد دق على جواله مغلق... تركي وهو يناظر أبوه:الناس تسلم بالأول...وبعدين هذا هو أبوي عندي... متعب:عطني ابوي باكلمه... تركي يمد لجوال لأبوه... تركي:يباه هذا متعب... ابو بندر يكلم متعب:هلا بمتعب وينك... متعب:هلا فيك يباه،بس وينك الله يهداك أدق على جوالك مقفل... ابو بندر:إيه صح نسيته قفلته بالصلاه وماتذكرت افتحه ،ليه خير إنشالله... متعب:ماعلينا،بس بغيت أقول لك الأرض اللي عندك بالروضه بيعها لأني لقيت لها مشتري اللي وصيتني عليها... ابو بندر:زين الله يبشرك...وبيدفع قيمتها؟؟؟... متعب:أفا عليك بس والسعر اللي حددناه وفوق اللي شرطته لي... ابو بندر:اقول متعب أهل عروسة تركي ردوا علينا إنهم موافقين ... متعب فرحان لأخوه:مبروك والله يستاهل تركي... ابو بندر:الاسبوع الجاي بنروح لهم عشان نتفق معهم على كل شي... متعب:زين والله.. ابو بندر:عاد قلت تخاوينا؟؟؟... متعب:أفا عليك بس أكيد بروح معكم... ابو بندر:أجل يله ما اطول عليك...في حفظ الرحمن... متعب:في حفظ الله يا الغالي... وسكر متعب من ابوه... ابو بندر:متعب اخوك بيخاوينا لأهل عروسك... تركي بابتسامه:عز الخوي والله متعب.... .................................................. ....................... | ||||
|
| |
|
10-10-12, 12:05 PM
| #18 | ||||
| نجم روايتي ومشرفة سابقةومصممه
| تابع الجزء الثاني.... وهو بسيارته راجع البيت فكـر بشذى..(والله مسكينه لها أسبوع وهي تبيني أخذها للسوق)..فكر باقي على بال مايوصل للبيت ربع ساعه ويمكن أكثر من هالزحمه اللي بالشوارع خاصه إن الوقت عشا... أخذ الجوال اللي كان حاطه بجنبه ويبي يدق عليها طالع الساعه بالجوال ماكان باقي على صلاة العشا شي وأخذ يتأكد من ساعة يده إلا يسمع الآذان بكل مكان بدت المساجد تأذن ويطالع المحلات بعد هي بدت تسكر وتغلق أبوابها إلى بعد الصلاه(الأسواق بالسعوديه تسكر بوقت الصلاة)... فكر وقال((بعد الصلاة أمر عليها،وخلني أدق عليها من ألحين تتجهز مو تتركني ساعه أنتظرها))... دق على تليفون البيت... ريم بنت محمد بصوت طفولي:ألــــو... سعود:ألو هلا ريم... ريم بتعجب:مين على التليفون... سعود بضيق:أنا عم سعود... ريم بفرحة الأطفال:عم ثعود...أنا أحبك... سعود بضيق أكثر:ثعود بعد غيرتي اسمي.....وأنا بعد أحبك...وين شذى؟؟ ريم:من زمان ماثفتك...انا أحبك مرررره... سعود وهو مهوب طايق لفلسفة الأطفال:ريم حبيبتي نادي لي شذى بسررررعه عشان أعطيك حلاوة كبر راسك... ريم مستغربه:فيه حلاوة كبر راسي؟؟؟... طووط...طووط...طووط.... قفل الخط سعود التليفون ودق على جوال شذى... سعود يكلم نفسه:وش هالذكاء كان دقيت من البدايه على جوالها بدل زحمة البزارين هذي ... شذى:إنت هيه تكلم نفسك؟؟؟... سعود متفاجأ:إنتي من متى على الخط؟؟؟... شذى:من أول ما دقيت... سعود:بسم الله منك امداك تردين يوم سمعتيه يدق... شذى:لأنه كان معي اقرا مسج توه جاي وإنت طلعت لي والعياذ بالله... سعود:هذا جزاي تقولين كذا وأنا الحين داق عليك عشان تتجهزين بعد الصلاة آخذك للسوق... شذى بفرح:والله؟؟ ياحياتي ياسعود آسفه وهذي كلمتي وسحبتها... سعود :شوفي هذا أنا سامحتك،بعد الصلاة مباشرة ألاقيك مخلصه من ألحين استعدي وجهزي حالك... شذى بابتسامه:طياره... سعود:تشاو... شذى:بايو... بعد ما صكرت من سعود...((واااااااو وأخيرا ما بغى ياخذني السوق...بس غريبه هو يدق بنفسه ويعرض السوق علي من دون طلب او واسطة امي)) وبعدها قالت بخاطرها...((وأنا وش دخلني من نفسه او غيره خلني اروح ألبس واستعد...بس لا يهون)).... وبعدها راحت تلبس وتستعد وخلصت بسرعه...وبعد كذ صلت العشا، ونزلت بالصاله تنتظر اخوها وهي لابسه عبايتها ومتجهزة بس تنتظر يدق عليها جوال وتطلع له.... ******* ريم:ماما...عم ثعود يقول بيجيب لي حلاوة كبر راسي... كانت مريم ومعها الخدامه توكل بناتها الصغار بالصاله اللي فوق عشان تنومهم مبكر لأن ريم تروح الصباح الروضه ورنا النوم المبكر أفضل لصحتها ولنموها وطبعا عشان تفتك منهم باقي الليل وتقعد على راحتهـــا... مريم باستغراب:مين قالك كذا؟؟؟ ريم والشغاله تأكلها:عم ثعود... مريم:متى قالك الكلام؟؟؟... ريم ببرائة الأطفال:هو قال لي لما دق تليفون... مريم تحقيقها يزيد:زين ماما وش كان يبي؟؟؟... ريم:كان يقول يبي عمه ثذى... مريم مستغربه:وش كان يبي فيها؟؟؟... هزت ريم كتفها بالنفي ولفت تطالع التلفزيون...أما مريم فكانت تموت وتعرف وش كان يبي بها.... ******* بالريــاض... متعب:أقول سارا ويـن انجود يا قلبي من الصبح ماشفتها؟؟؟... سارا:من الظهر مرت علي بشاير أختك وهي راجعه من المدرسه وأخذتها مع السواق لأن خالتي ام بندر تبيها... متعب:عاد ألحين امي بتدق علي وتقول تعالوا خذوا بنتكم أزعجتنا وبهذلتنا... ضحكت سارا من كلام متعب وقالت: إي والله تصدق غريبه من الظهر وللحين وهي عندهم ومادقوا وقالوا خذوها او هم جابوها... متعب: يمكن خلاص تعودوا عليها وعلى حركات الاولاد حقتها...(ويفتح سالفه ثانيه)تدرين إن أهل خطيبة تركي وافقوا؟؟... سارا بفرح:لا والله ما أدري...بس مبـــــرووووك يستاهل تركي كل خير... متعب:أبوي وتركي بيروحون الاسبوع الجاي عشان يتفقون معهم على كل شي وأبوي قال لي تعال معنا... سارا: وبتروح؟؟؟.... متعب بتأكيد:أكيـــد بروح، ومرة وحده أشوف أهل زوجة تركي ونشم هوى هناك على البحر مو هنا غلقه لا بحر ولا نهر... سارا بغرور: ياللا مناك، تتطنز أنت ووجهك على الرياض...والله إنها أحسن مدينه بالعالم كله... متعب:اللي يشوفك ألحين أبد يقول هذا ماهو ساكن بالرياض من يوم جابته أمه...أدري إن الرياض احلى مكان بالعالم كله،بس الواحد وده يغير جو سارا:زين وخالتي ام بندر بتروح معكم هي وبشاير؟؟؟... متعب: ما أدري...بس ليه تسألين؟؟؟.... سارا بتردد:عشان إذا راحـــوا... متعب:إيه و بعدين... سارا: أروح أنا بعد معهم... متعب بتسلط:إنتي هيه مافيه روحه لك...حتى لو يروحون إنتي مارح تروحين... سارا بزعل:والله إذا راحوا خالتي وبشاير بروح معهم... متعب:انثبري هنا بالبيت أحسن لك هذا زين إذا رحتي الخطوبة او الزواج... سارا بقهر:إن شالله تبي تحرمني إني أروح الخطوبه او الزواج؟؟؟؟... متعب:وش تسوين عند ناس ماتعرفينهم ولا عمرك لقيتيهم؟؟؟... سارا بدفاع: عادي أتعرف عليهم... متعب وهو قايم بيطلع:أقول صدق إنك ماتنعطين وجه... سارا:ويـــن رايـــح؟؟؟.... متعب:في أرض الله الواسعه.... وطلع متعب من بيته وراح يقضي مشاويره... ******* بشاير كانت جالسه مع أمها وأبوها بالصاله وبنت متعب انجود تلعب عندهم وتنطط على الكنب والطاولات ومعها كورة تلعب فيها... ابو بندر وهو متضايق من هالإزعاج:أوففففف وبعدين مع هالإزعاج محد يقدر يرتاح.... بشاير وهي تخفي ابتسامتها من أبوها: وش يباه عادي انجود دايم لعبها كذا... ام بندر:الصراحه بغيت أردها لأهلها...بس بشاير رفضت وخلتها هنا تقول مونستها... بو بندر:وش اسوي فيها هالبنت ماخلتنا نشوف التلفزيون زين ولا ريحتنا في جلسه... وما كمل ابو بندر كلامه إلا رمت انجود الكورة اللي معها وضربت براس جدها ابو بندر... فهاللحظه ما قدرت أم بندر وبشاير يكتومن ظحكتهم عليه...ولمن شافتهم انجود يضحكون قعدت تضحك معاهم... ابو بندر وهو معصب:إيش قلة الأدب هاذي؟؟؟....هالبنت ماتقعد هنا دقيقه وحده(ولف على بشاير)أقول بشاير دقي على أبوها ياخذها... بشاير وهي باقي تضحك خاصه إن الكورة لمن ضربت بأبوها خربت شكل الشماغ وحاسته:ليه يباه حرام خلها تتعشى معنا... ابو بندر:لأ مافيه دقي عليه ياخذها نعنبوها ولد ذي مو بنت،ومع هالشعر اللي قاصته والبنطلون تقول ولد من الشــارع.... بشاير وهي تدافع:بس هي باقي طفله عمرها 5سنين وماتعرف... ابو بندر بعصبيه:اقول دقي عليه بسرعه... بشاير:انشالله.... ودقت على متعب وقالت له يمر وياخذ بنته...وطبعا هو ظحك من عرف اللي سوته بنته فيهم وقال بيمر بعد الصلاة ياخذها... بشاير بعد ماسكرت:يقول بعد الصلاة بياخذها... ابو بندر:خليني اروح المسجد من ألحين... ام بندر:بس باقي ما أذن.... ابو بندر:باقعد فيه إلى ما يأذن أحسن وأبرك... ام بندر:براحتـــك... وبعد ما طلع ابو بندر... بشــاير:الصراحه يمه...هذي انجود تحفه هي الوحيده اللي تهبل فيك إنتي وأبوي ماحد يطلع من شوركم غيرها من عيالكم إلى أحفادكم... ام بندر:وأنتي مبسوطه منها،بس هذي انجود على شطانتها بس إني أموووت فيها... طبعا كانت انجود تطالع التلفزيون بعد ماتعبت من النطنطه واللعب... بشاير وهي تأشر عليها:تعبت بنت الحلال من اللعب...بس ماعلينا منها مشكـــورة يمه إنك خليتيني أروح لرفيقاتي والله إنبسطت عندهم... ام بندر:عشان تعرفين إن أمك طيبه... بشاير :إي والله الحمدلله إنك أنتي أمي صدق أحيان احس إنك شديدة بس لمن اشوف اختي فاطمه مع عيالها اقول الحمدلله إنها مهوب امي... ام بندر بدفاع عن فاطمه:ليــه وش فيها فاطمه؟؟؟... بشاير:أبد ما فيها شي...غير إنها شديده ومتسلطه وعصبيه و ما تثق بعيالها....بس هذا هوطال عمرك... ام بندر:هذا جزاتها إنها تخاف عليهم وهذا من كثر ماتحبهم...أما العصبيه فهذا طبع فيكم كلكم... بشاير:لأ من قال لك...بس فاطمه وتركي هم العصبيين وطالعين على أبوي أما أنا وبندر ومتعب مشالله علينا ريلاكس.... بس تقولين كذا عشانها... ام بندر:مين عشانها؟؟؟.... بشاير بنص عين:من يعني فاطمه...حبيبة القلب بس أنا مستغربه من شي واحد أذكر آخر العنقود هو حبيب اهله مو أكبرهم... ام بندر:وانتي تغارين من أختك يا الهبله...وبعدين أنا أحبكم كلكم نفس الشي بس هي لأنها ساكنه بعيد عني وإنتي معي بالبيت... بشاير:الله اللي يسمعك يقول هذي أبد ساكنه بتبوك...كلنا بالرياض وبعدين خمس دقايق بالسيارة وأنتي عندها... وبعدها بشاير تذكرت شي...وقبل لا تتكلم أمها... بشاير بابتسامه:أقول يماه... ام بندر وزهقت من بنتها:نعم وش تبين أنا ما أقعد معك إلا وتدوخيني... بشاير:جهزي حالك حق الصدمه اللي باقولك إياها ألحين وإلبسي دروع وخوذه... ام بندر:وش عندك وأي صدمه؟؟؟... بشايربابتسامه:جهزتي حالك حق الصدمه؟؟؟... ام بندر بضيق:إيــــــه.... بشاير باستهبال:وين باقي ما ربطت الحزام.... ام بندر ضحكت من بنتها وقالت:اخلصي علي... بشاير تذكرها:تعرفين يمه الفازا الكبيرة اللي شراها أبوي لمن سافر تركيـــا؟؟؟..... ام بندر:إيه الكبيرة اللي بجنب مجلس الحريم... بشاير:عليك نــــووور...هذي هي... ام بندر:وش فيها؟؟؟.... بشاير:انجود الحبيبه كسرتها اليوم بهالكورة اللي معها.... ام بندر مصدومه:من جد تتكلمين؟؟؟...((وناظرت انجود إلا تشوفها رااااايحه بسابع نومه)) حسبي الله على ابليسك يا انجيد... بشاير وهي بتسم لأمها:تاكلين غيرها عـــــــادي تصير بأحـسن العوايل.... ****** | ||||
|
| |
|
10-10-12, 12:10 PM
| #19 | ||||
| نجم روايتي ومشرفة سابقةومصممه
| وبالسيـــارة وهم راجعيـــن... شذى بفرح:مشكــــور يا سعود الصراحه كنت متبهذله اليوم وش رح ألبس بكره بالكليه... سعود :عاد انتي الحين شريتي أغراض الترم كله... شذى:لأ....هذا بس يكفيني شهر تقريبا... سعود:مشالله عليك هذا بس شهر،اليوم شليتي اللي بالسوق كله وبغيتي تاخذين العمال معك بالغلط... قعدت شذى تضحك من كلام أخوها وقالت:لا تستخف دمك أنت ووجهك...ولا أنت اليوم الحمدلله والشكر عيونك بغت تطلع وانت تقز بالبنات سعود متفاجأ:أنــــا يا النصابه؟؟؟... شذى وهي تمزح:إيه أنت ولا تسوي لي فيها ثقيل، ياخي اليوم كسرت خاطري بغيت اقول لك روح معهم.... سعود عرف إن اخته تبي تهبل فيه:أقول إلعبي غيرها...مهوب انا اللي امشي ورا الحريم والبنات بشكل خاص... شذى بطنازة:لاااااا.... سعود بثقه:البنات هم اللي يمشون وراي مهوب أنا اللي أمشي وراهم.... شذى:وااااااو مشكلتك الثقه الزايده .......تراها بالتدمرك يا الحبيب.... سعود وهو يوقف بالإشارة: هذا الكلام قوليه لنفسك مهوب أنا يا شيخه... شذى بهبال:اسمي شذى مو شيخه... سعود بطنازة: كركركر تصدقين ضحكتيني موووت... شذى:اقول بسم الله عليك من الموووت يا كازانوفا البنات.... سعود ضحك من كلام أخته وبعدها قال:تدرين الله يعين تركي عليك من جد دمك ثقيــل الصراحه..... ما توقعت إنك رح تتزوجين... شذى وهي متعجبه:ليه يا عيوني تتوقع إني بأعنس... الناس من يوم أنا بالثانوي وهم يخطبون عندنا يبوني بس انا اللي أردهم.... سعود يبي يهبل فيها :مهابيل اللي بيونك...وغير كذا إنك قبيحه... شذى وتأشر على عمرها:أنا قبيحه؟؟؟....اقول روح إلبس نظارة ازين لك.... سعود وهو يمشي من الاشارة:وغير إنك قبيحه مو بس رح تخلين قبحك لك لااا رح تورثينه عيالك من بعدك وتجيبين لهم عقد نفسيه من أشكالهم شذى:انا هاه؟؟؟... سعود يزيدها:وبكذا رح تخربين على تركي نسله مسكين والله.... وبهالشي رح ينتشر القبح في الأمه السعوديه والعربيه... شذى:أنا انشر القبح انت ووجهك.... سعود :إيه لأن عيالك رح يتزوجون بعد وبكذا القبح بينتشر وبتطلع في البشريه فصيله جديدة... شذى كانت تدري إن سعود يمزح بس قهرها من جد... شذىبعصبيه:أقول يا زينك وأنت ساكت.... سعود باستغراب: شذى زعلتي؟؟؟؟....... شذى :إيـــه... سعود بابتسامه:أحـــســن.... شذى انقهرت منه وزعلت من جد:اقول سعود رجعني البيت بسرعه... سعود:من جد زعلتي يا شذى؟؟؟... شذى بجديه:مالك دخل... سعود بجديه:زعلتي؟؟؟؟... شذى وهي موصله:مالك خص... سعود وهي يبتسم لها:لاااا ما نقدر على زعل العروس.... شذى:لاااا تسوي لي فيها إنك تراضيني.... سعود:زين وش رايك نتعشى برا.... شذى:ما أبي أتعشى.... سعود يراضيها:والله اختاري المطعم اللي تبينه وأعشيك فيـــه... شذى بفرح:والله؟؟... سعود:والله؟؟؟... شذى:أبي مطعم تشليز اللي بالواجهه البحريه... سعود وهو يغير مسار السيارة:اوكيـــــــــــــ� � آنسه شذى... سعود من النوع المرح وهو يعز أخته شذى موت لأنها آخر العنقود وأخته الوحيده صدق هو يهبل فيها بس بالأخير يحبها ويعزها وهو يحز بخاطره إنها تتزوج وتروح تبعد عنهم وتسكن بالريــاض وهي الوحيدة اللي فاهمته وهو يعتبرها في بعض الأحيان صديقه مو أخته يشكي لها ويفضفض لها وشذى معاه كذا وهو عندها غيـــر أخوانها والسبب يمكن يكون في إنه هو أقرب واحد لها في العمر.... ******* | ||||
|
| |
|
10-10-12, 12:11 PM
| #20 | ||||
| نجم روايتي ومشرفة سابقةومصممه
| وبعـد هالكلام بأسبـــوع راح تركي وأبو بندر ومتعب معهم للشرقيـــه عشان يتفقون على كل شي بس طبعا من دون أم بندر وبشاير وسارا هههههه كالعادة لأن السالفه بنظر ابو بندر ما تحتاج إن الحريم يروحون معهم أما بندر فقعد بالرياض وما راح معهم لأنه ملتهي بالشغل كان تركي سعيد ومرتـــاح مرة لأنه حس إن الله يسير زواجه وجاي مريح بس العيب الوحيد فيه هو السفر للشرقيه ومشوار400كيلو هههههه بس كله يهون عشان شذى... المهم بعد إتفاق أهل تركي مع أهل شذى على كل شي ...اتفقوا إن الخطوبه تصير بعيد الأضحى يعني تقريبا بعد شهر ونص لأن ابو بندر رغب بهالشي أبومحمد ما اعترض بالعكس رحب .... ******* وبعد رجعة تركي للريــاض مع ابوه وأخـــوه بكم يـــوم تذكر عمته حصه...هذي الشخصيه اللي ماتكلمنا عنها وكانت في الظل ألحين رح تظهر لنا وبصورة قويه بعد...حصه هذي اخت ابوبندر تزوجت وماجابت عيال عقيم وكانت تعتبر تركي ولدها وتركي يبادلها المحبه بمثل محبته لأمه إلا إن عمته حصه تزيد عن أمه في إنها فاهمته وهي بطبعها متفهمه وتحيطها بحبها ورعايتها...تركي من النوع اللي مايحب يشكي لأحــد همومه ومشاكله لكن هذي القاعده تشذ عند عمته حصه بس...هي الوحيده اللي لها مفعول السحر معه تسحب منه الكلام بطريقه عجيبه مايخش عنها شي وكان يرتاح لها...كان يلقي همومه عند عتبة بيتها..و حصه قلبها طيب وأبيض مثل الثلج و حكيمه...والصفات هذي كلها كان لها تأثير عجيب على علاقتها بتركي.... هي من النوع الهادي لا تحب الحش ولا الذم...وكانت أمينه ومحافظه على علاقتها بتركي ولدها ....كانت كذا تحب تسميه...كان تركي يقولها عن أدق تفاصيل حياته حتى الخصوصيه منها وهي من النوع الأميــن اللي تحفظ سره....وكانت لها خاصية الإستمـــاع اللي تخلي الواحد غصب عنه يقولها ويفضفض باللي في نفسه....الكل كان يعرف إنها تحب عيال أخوانها كثير بس كان تركي عندها غيــر.... ******* شذى بتوتر:ليــه يا يمه خليتوا الخطوبه مبكره كذا؟؟؟ ام محمد:هذا أبــوك مو أنا...وبعدين لا تقعدين كذا تزنين فوق راسي خلاص قضينا من هالسالفه...تكلمنا فيها كثيــر... شذى:بس أنا ما استعديت ولا شي... ام محمد:على الأقل احمدي ربك إن أبوك ما خلى الزواج بعيد الأضحى... شذى متفاجأه:إيش دعوة يمه؟؟؟ مو لهالدرجه أنا كذا ثقيله عليكم...وبعدين أبوي أنا بنته الوحيد ما يصير يسوي فيني كذا... ام محمد مستغربه:ليـــه وش سوى فيك ابوك هاه؟؟؟.... شذى:إنه ما استشارني ولا سألني حتى ما كأني أنا صاحبة الشان... ام محمد: تدرين لو أنا مكان أبوك إيش سويت؟؟؟... شذى:ويش تسوين؟؟؟.... ام محمد:في زيارتهم الأخيره أهل خطيبك كان زوجتك مرة وحده وافتكيت منك.... شذى:أفا يمه ماتوقعتك كذا تبين الفكه مني.... ام محمد:اقول يله اذلفي عن وجهي وفكيني.... وقامت شذى من عند أمها اللي ما استفادت ولا شي من قعدتها معها وراحت لغرفتها...وقعدت تفكر بحالها.... كان ابو شذى ابومحمد إنسان رابطته بالعادات والتقاليد قويه مرة...إنسان شديد وحازم مع نفسه ومع مرته وبالذات مع عياله وبالأخص شذى... كانت كلمة بو محمد ماتطيح لو شيصير وكلامه لازم يتنفذ ومافي جدال معه في موضوع انتهى عنه...كانت علاقته مع شذى رسميه وماكانت تطلب منه شي أو تبي من عنده شي إلا عن طريق أمها مع حبه الشديد لها بس ماكان يبين هالشي...طيب ويحب الخير وعلى كذا عنده إن المرة ماتطلع عن شور زوجها ولو يسبب هذا في إنها تنقطع عن أهلها....وهو يبي إن شذى تتزوج عشان تصير لها حياتها المستقله...لأنه مارح يقعد لها طول العمر...واخوانها مصيرهم يلتهون مع ازواجهم وعيالهم.... ******* كانت قاعده في المطبخ تقطع الخضارمع الشغاله،وما كان أحد ساكن معها بالبيت غير هي والشغاله وزوجها اللي يبات ليله عندها وليله عند مرته الثانيه وهي قاعده تقطع إلا تسمع صوت الجرس يدق استغربت من اللي بيجيها هالحزة من دون تليفون خاصه إن هذي الليله ليلة زوجته الثانيه... طالعت ساعتها كانت 11وثلث بالليل..توكلت على الله وردت على الجرس... ميـــن على الباب؟؟؟... تركي:أنا تركي يا يمه افتحي الباب.... حصه بفرح:هلا والله بقلبي ادخل حياك.... وفتحت له الباب من داخل من عندها لأنه اوتوماتيكي...وراحت تفتح أنوار المجلس وتشغل المكيف وهي طالعه من المجلس تبي تستقبله إلا تشوفه بوجهها حصه بفرح:هلا فيك وينك... تركي:والله من زمان عنك يا يمه... وراح لها وسلم عليها وباسها في جبهتها و راح قعد هو وعمته... تركي:والله لك وحشه يا يمه من زمان عنك... حصه:إي هذا من كثر ماتزوني أوتسلم علي.... تركي:والله مشغول...وتعرفين ألحين عندي تدريبات وزحمة... حصه:ما علينا...بس شخبار الخطوبه...وأخبــار خطيبتك؟؟؟... تركي:الخطوبه تمام....والخطيبه على قولتك من شفتها بخير.... حصه:إلا على الطاري يمه...ما قلت لي ولا بشرتني...لو أمك ماتقول لي ما كان دريت.... تركي:هذا أنا جيتك وأبقولك...بس هاه عندي شرط... حصه:وشو شرطك؟؟؟... تركي:بالخطوبه...أول وحده تمشي معي إنتي يمه أبيك تروحين وتشوفينها...أبي رايك ... حصه:لو علي أنا كان رحت معك...بس ابو فيصل وش اسوي إذا رفض... تركي:مو على كيفه بهالسالفه...لازم تروحين معي وباحاول معه... حصه:يلحقنا خير لهذاك اليوم...على البركه حددتوا الخطوبه.. تركي:إيه وبعيد الأضحى... حصه:إنشالله أروح خاطري أشوف من اللي الله موفقها وكاتب لها إنها تاخذك...بس ماقلت لي وش رايك فيها يا تركي؟؟؟... تركي بابتسامه جذابه:مملوحه...عاجبتني...وخا� �تي عبير بتنهبل عليها...(ويطالع بعمته)هي اللي اختارتها لي... حصه:الصراحه خالتك عبير طيبه وحكيمه...أكيد بتختار لك زين... تركي:يا هنيالك.. حصه:مين هذي؟؟... تركي:عبير...بعد مين مادامك مدحتيها.... حصه:عبير خالتك...عيب تقول اسمها حاف كذا... تركي:عادي أنا اناديها حاف هي كبر متعب يعني بسني وبعدين هي عادي عندها ماعندها مشكله من الناحيه... حصه:ياخوفي بعد تقول من وراي اسمي حاف كذا حصه.... تركي:وانا اقدر؟؟؟.....إنتي بالذات اقول امي حصه... حصه:يا بعد قلبي والله... تركي:أنا جيت اقول لك يا يمه عن خطوبتي وأبي اسمع رايك فيها وأبي اسمع أخبارك وش مسويه... حصه:عن نفسي أنا الحمدلله بخير وماعلي خلاف..بس إنت قول اللي بخاطرك هذا انا اسمعك يا تركي... وقعد تركي يحكي لها...صار يقول كل اللي بخاطره لعمته...ياناس هالإنسانه مامثلها أمــــووت أنا عليها...وما ألقى الراحه إلا هنا عندها وبين يديها... قعد يقول لها وش خاطره فيه واللي خايف منه واللي يبيه من خطيبته.... | ||||
|
| |
 |
| أدوات الموضوع | |
| انواع عرض الموضوع | |
|
|
45Likes
العرض العادي
