حب مقيد بعقد ، بقلم/ قاف،سعودية (مكتملة)

[فيتامين سي]

	بسم الله الرحمن الرحيم السلام عليكم ورحمة الله وبركاته الحمدلله والصلاة والسلام على رسول الله وعلى آله وصحبه أجمعين اعضاء روايتي الغالين نقدم لكم رواية ((حب مقيد بعقد )) بقلم/ قاف قراءة ممتعة للجميع ...

[فيتامين سي]

رابط لتحميل الروااية

https://www.rewity.com/forum/t361793.html#post11741502

بسم الله الرحمن الرحيم .. ‏‏‏‏
رواية ( حب مقيــد بعَقــد )
i.g.62
البدايـــه ��.. ‏‏‏‏
أحببت قبل كل شيء أن أكتب نبذه صغيره عن الروايه وعن طريقة سردي لها لتكونوا على بينه
أنا "قاف" .. هذا اسم مستعار ليس إلا
لي روايات كثر من قبل ولكنها مدفونة في صندوق أبيت أن أخرجها منه لأني أشعر بأنها ناقصه ولا أحب أن يكون لي عمل يشهده الناس ويكون ناقصاً ! لذا تحتم علي دفنها قبل ولادتها ..
على أي حال بدأت أجول في مواقع التواصل الاجتماعي فوجدتها ممتلئه بالروايات "خصوصاً الانستقرام" وكأنه ساحة مفتوحه لكل من أراد الكتابه والنشر
فقررت أن اتجرأ وأشمر عن ساعداي لابدأ بحياكة قصة تجول في عقلي منذ مده وأفعل كما فعل البقيه..
سأنزل كل يوم فصلاً.. وإن لم أستطع سأخبركم بذلك بإذن الله .. الأحداث ستكون بالفصحى غالباً أما حديث الأبطال سيكون بالعامي ..
من سأكتب اسمائهم هم شخصيات يلعبون أدواراً هامه في الروايه أما من ليس لهم أدوار كبيره سيتم الإشاره لهم دون ذكر اسمائهم لتجنب تشتت أذهانكم . .
إن أعجبكم ما أكتب فلطفاً ((اكتبوا تعليقاتكم وتوقعاتكم وتحليلاتكم تحت كل فصل لأنكم كذا بتحمسوني إني اكتب اسرع .. واذا أعجبتكم الروايه احكوا لناس تعرفو انهم يحبون الروايات عن روايتي و بكون لكم من الشاكرين )) ..
نبذه عن الحكايه:
قصي شاب في مقتبل العمر ، قضى سنيناً من حياته يعد أيامها بإنتظار تلك اللحظة التي سيجتمع فيها مع حب طفولته ولكن .. ليس كل ما يحبه المرء يدركه !
نوع الحكايه ��: غموض ، رومانسيه ..‏‏‏‏ ‏‏‏‏
في الختام شكراً لاستقطاعكم جزءاً من وقتكم لقراءة ما أكتب ..
أتمنى لكم قراءه ممتعه و يوماً سعيداً ..
كونوا بالقرب دائماً فتواجدكم هو كل من أريد ���� ..

[فيتامين سي]

*الفصــل الأول*
-
-

بدأت أجمع الأوراق اللازمه للتقدم لوظيفه-
علي أن أحصل على هذه الوظيفه مهما كلف الثمن لأذهب لمنزلها واطلبها من والدها
تلك التي منذ أدركت الحياة وأنا أحبها وهي تحبني
ترعرعنا معاً ، ذات الطفوله وذات الذكريات
نقضي الكثير من الساعات سوية دون كللٍ أو ملل
هي فريده لا تشبه بنات جنسها ، لا تحب الدمى من باربي وامثالها بل كانت تسابقنا لركل الكرة وإدخالها في مرماً وهمي نصبناه على قارعة الطريق
كانت مولعة بكرة السله ولقصرها لم تكن تدخل الكره فكنت اجثوا على أطرافي الأربع وظهري ممتد كطاوله فتأتي هي من بعيد مسرعه
تضع قدماً على ظهري وتقفز هاتفة " الكــرة الملتهببببه " مرددة كلمة ذاك الفتى الكرتوني ذي الشعر الاحمر
لأول مرة تدخل الكره في السله فأخذت ترقص وتغني اغنية .. سلام دانك .. *كانت معجبه بذلك المسلسل*
بينما انا معطوب الظهر اثر تلك القفزه ، نظرت الي وقالت " بلاش دلع قوم "
فأجبت متأوهاً " كم وزنك ؟ الفيل أخف منك "
لم أنهي جملتي حتى ركلتني بقوة على ظهري فصرخت " يا مجنونه "
تركتني ودخلت للمنزل .. كانت قاسية جدا !
..
-
..
-
في يوم تشاددنا بالكلام انا وبعض أبناء الحي فانتهى بنا الأمر بشجار عنيف خرجت منه مفلوق الرأس ومكدوم الوجه
أتت للمنزل ورأتني فثارت غاضبه
أمسكت بيدي وبيدها الاخرى كيس قد ملأته بحصى صغيره
سألت متعجباً " وين بنروح ؟ "
أجابتني وهي مقطبة حاجبيها غضباً " بنضرب الي ضربوك ، يحسبون مافيه أحد ينتقم لك ، أنا أوريك فيهم "
قلت مقاطعا " أبوي وأبوهم تكلموا أمس وأنتهت السالفه "
توقفت ونظرت لي وعيناها مشتعله " أنت غلطت عليهم ؟ "
اجبتها " لا "
سالتني " هم تأذوا ؟ "
أجبت حزينا " كانوا كثير ما أمداني أضربهم ولا اهرب حتى"
قالت بابتسامه جانبيه " أجل العين بالعين والسن بالسن والجروح قصاص"
سألت " ايش يعني هذا الكلام ؟ "
ضحكت " مدري بس الظاهر الي يضربك اضربه "
ضحكت معها رغم اني ما زلت لم أفهم كل ما قالته
تسللنا خلف شجره بأوراق كثيفه وجلسنا
همست " أول ما يطلعون من باب بيتهم بنرجمهم بهذي الحجاره .. تمام؟"
قلت بخوف " لكن أخاف يقولون لأبوهم وأبوهم يقول لأبوي ويضربني "
وضعت يدها على صدرها " لا تخاف أنا هنا "
خرجوا من منزلهم فادخلنا ايدينا في الكيس وقبضنا على الحجاره .. قالت بهمس ( 1.... 2..... 3.)
نهضنا من خلف الشجره وأخذنا نقذف الحجاره عليهم بكل ما اوتينا من قوه وهم يصرخون
فجأةً خرج أخاهم الكبير الذي لم يكن ضمن خطتنا بتاتاً وأصابت رأسه أحد حجارتنا المقذوفه
همست هي " أو أو"
صرخت وهي تهم بالهرب " أركض " وركضت
أما أنا فتجمدت قدماي وعيناي تصنمت في عينا ذلك الأخ الطويل الغاضب
أنزل عقاله عن رأسه وتحرك ناحيتي
أحسست بأن منيتي قد حانت .. هذا يوم وفاتي لا محاله ..
أحدهم أمسك بيدي ، كانت هي .. عادت لتنقذني ، سحبت يدي وجرتني خلفها وهي تركض ..
رفع ذلك الأخ ثوبه وأخذ يلحق بنا صارخاً " وقفووووووا يا كلاااااااب "
أكاد اقسم أن نبضات قلوبنا أصبحت مسموعه
ركضنا وركضنا حتى اختبأنا خلف سيارة ..
تباطأت خطواته وهو يقول " اطلعوا بالطيب احسن لكم "
نظرت ناحيتي واشارت بسبابتها اسفل سياره ، تطلب مني الدخول تحتها ، دخلت ودخلت هي خلفي
عبر من جانبنا دون ان ينتبه لنا ، يئس من إيجادنا فعاد أدراجه وهو يحدث نفسه " والله ما أخليكم ، إن ما جلدتكم بعقالي ما أكون سالم "
ما ان ابتعد عنا وتأكدنا من عدم تواجده بالقرب منا نظرنا لبعضنا ثم انفجرنا ضحكا, فرحا بإنتصارنا والأخذ بحقي
ولكن تلك الفرحه لم تدم فما أن عدنا لمنزلي حتى وجدنا سالم واخوته الذين اصبناهم منتصبين في مجلس البيت وأبي معهم ووجهه مكتسي بالغضب والخجل
انتهى الأمر بـ ١٥ جلدة لها ولي ٥ من أبي بعقال سالم
خرجوا وتركونا ، نظرت لها وهي مطأطأة رأسها " تبكين ؟ "
قالت متجاهلةً سؤالي "يا جعل عقاله التلف قال سالم قال ، الله لا يسلم فيه عظمه "
ضحكت على كلامها
نهضَت "انتظر هنا"
خرجت لدقيقه ثم عادت وفي يدها كيس به ثلج ، رمته به إلي وقالت " حطه على المكان الي يوجعك عشان يخف الالم "
قلت " انتظري خذيه أنتِ "
فتحت الباب " ما ابغى برجع بيتنا "
ابتسمت سعيداً بما حدث وأنا أراها تختفي عن ناظري
أخذت بحقي ، فعلت مالم يفعله والدي.. كانت لـطـيفه جـداً
آه .. هناك الكثير من المواقف منها المضحك ومنها المبكي ولكن أكثر الأيام ألماً بالنسبة إلي ذلك اليوم الذي وقف اخويتي فيه أمامي ليخبروني بأنه يتوجب علي أن لا أخرج أمامها من الآن فصاعداً فقد وجب علينا الا نرى بعضنا فقد *كبرنا*
ألم يكن باستطاعتهم إخباري بذلك القرار من قبل فأنا لم احسب لهذه اللحظه حساباً أبدا
لو علمت مسبقاً لكنت قضيت معها ساعات أكثر وأكثر لكنت التصقت بها حتى آخر لحظة
ولكن هاقد مر الزمان وأنا اصبر نفسي بقدوم اليوم الذي سنجتمع فيه سوية من جديد .. مصبراً نفسي بذلك اليوم الذي سألتقي فيه بها ويكون انتظار العشر سنين لم يذهب هباءاً منثورا
خرج رجل من المكتب وهتف " قصي ال*** "
نهض قصي (بطل قصتنا ) " سم "
" تعال "
دخل خلفه للغرفه وأجرى المقابله ، خرج من المكتب وذلك الرجل خلفه ، وضع يده على كتف قصي " ما شاء الله سيرتك الذاتيه جيده أتوقع تتوظف عندنا بإذن الله "
-ابتسم قصي " الله يبشرك بالخير "
بادله الرجل الإبتسامه " انتظر منا اتصال بكره "
قصي " على خير إن شاء الله "
مضى اليوم وهي لا يكاد يفارق هاتفه
اتاه الاتصال .. " .......... الاسبوع الجاي يبدا دوامك"
الابتسامه تحتل وجهه " بإذن الله .. الله يعطيك العافيه ، مع السلامه "
اغلق الهاتف ورفع رأسه للأعلى " وهووووووووو " وكأنه نال جائزةً عظيمه ، نهض من على فراشه وأخذ يقفز في الهواء وهو يصرخ بسعاده " الحمد لك يا رب"
توجه للقبلة وسجد شكرا ، نهض وخرج من غرفته سريعاً ، نزل درجات السلم وهو يهتف " أممممممممييييي .. أممممممممممممييييي "
-
-

[فيتامين سي]

*الفصــل الثانــي*
-
-
" أممممممممييييي .. أممممممممممممييييي "
خرجت من المطبخ ويداها مليئة بالعجين " اشششش نقص صوتك اخوك نايم "
اقترب منها واحتضنها "ابشرك قبلوني ، توظفت الحمدلله "
ابتسمت " الحمدلله الله يوفقك يارب .. عاد ما صار لك عذر تتصدد به عن الزواج اللحين "
وضع يده على رقبته وابتسم " أصلاً كنت بكلمك في هذا الموضوع "
دخلت للمطبخ ودخل هو خلفها ، قالت الأم بسعادة لابنتها " باركي لأخوك ، توظف الحمدلله "
نظرت له أخته " صدق ؟ ألـــف ألـــف مبروك " " الله يبارك فيك "
امه " اللحين جاء دورنا ندور له ذيك العروسه السنعه الحلوه ذات القوام الرشيق "
نظرت اخته له ثم لامها " توه توظف وش ندور له على عروسه .. بدري على ذي السوالف اللحين خليه يجمع حق المهر ويشتري له بيت ويضمن الوظيفه قبل أي شيء يمكن يقلعونه من أول يوم "
الأم " فال الله ولا فالك "
قصي بوجه متجهم " أكرمينا بسكوتك قال يقلعونه قال يحمدون ربهم أنهم بيملكون موظف مجتهد مثلي "
الام " وهو صادق ليتك قعدتي ساكته "
اخته " بسم الله الرحمن الرحيم أنا قلت يمكن وإن شاء الله ما يصير بس سالفة ندور له عروس أخريها ، باقي وراه المهر والبيت "
الأم " المهر والبيت من عند أبوك "
اخته " ما شاء الله مين بيتزوج بالضبط أبوي ولا قصي ؟ "
قصي " عادي أبوي يدفع اللحين وأنا أرد له مع كل راتب لين اقضيه "
امه " لا وش ترد له .. مال أبوك مالك ومثلك مثل أخوانك من قبلك أبوك بيساعدك مثل ما ساعدهم ما تنقص عنهم ولا تزيد "
ابتسم " ايوه نتكلم عن العروسه .. "
اخته " شكله يبغى يتزوج من زمان أوي .. استح على وجهك .. صير ثقيل شوي ، لا تصير واضح كذا "
ما زال مبتسم " مالك دخل "
أمه تعجن بذمه وضمير " فيه كذا وحده في راسي حلوات وسنعات يحبهم قلبك .. بفكر أنا وأختك زين ونختار لك أحسنهم "
شابك أصابع يديه " علميني مين الي في بالك ؟"
" كثير والله قلت لك بفكر أنا وأختك وناخذ احسنهم لك "
" ما يمدي تقولين لي اسمائهم يعني ؟ "
اخته " اسمائهم !! "
"ايه .. يمكن يهف قلبي لاسم وحده منهم فاختارها ونختصر المشوار بدل ما تفكرون أنتم وتتعبون "
اخته بسخريه " يهف قلبك لاسمها ! خف علينا يا قيس بن الملوح قال يهف قلبي لاسمها "
قصي " أنتِ مالك دخل "
امه تنظر لابنتها وتغمز لها سرا " تبغى تعرف اسمائهم ابشر .. فيه جميله ، رقيه ، زبيده .. "
اكملت اخته " فطيمه ، تماضر .."
قاطعهم " بتزوجوني وحده في الثلاثين وفوق أنتو ؟ "
أمه " اسكت واسمع .. فيه بعد مروج ، عبير ، سحر ، منيره .. مين بعد ! "
اخته " فيه نوره أخت سالم "
قاطعها " أعــــوذ بالله "
ضحكت " والله البنت تجنن "
" قلتيها تجنن ، وحده بتجنني ما ابيها بعدين ما لقيتي إلا سالم يعني من زين العلاقه إلي بيننا "
ضحكت أمه " طيب .. قلنا لك اساميهم ما فز قلبك لوحده منهم "
تجهم وجهه " هذول الي عندكم بس ! "
أخته " لا عندنا قائمه وش طولها بس قلنا لك احسنهم "
قصي " كنسلوهم هذول ما أعجبوني "
اخته تقلده " كنسلوهم هذول ما أعجبوني .. قولها بطريقه أفضل على الأقل "
قصي " يا لييييل "
أمه " طيب قلنا أنت وش المواصفات الي تبغاها.. وش الاسم الي بيخلي قلبك يفز ؟ "
وضع يده على ذقنه بتفكير مصطنع " اممممم .. اسم يبدأ بحرف الواو "
أمه " الواو ! طيب " ، ادارت وجهها عنه لكي لا يرى ابتسامتها التي لم تستطع اخفائها .
أخته " الواو أجل !!.. امم فيه وداد بنت صديقتك يمه حليوه ما عليها وفيه وسن ذيك إلي شفناها بزواج يوم الجمعه صديقة بنت جارتنا تجنن مره صح ؟ "
أمه " ايه صادقه "
وجهه يعلوه الاحباط " الاولى حليوه ما ابيها والثانيه تجنن مره قلت لك ما ابي وحده تجنني "
امه " وش تبي أنت كل ما قلنا لك شي قلت ما ابي .. شوفهم ثم أحكم مو كل ما قلنا لك شي قلت لا "
في نفسه " لازم اقول اسمها بنفسي يعني "
نظر لامه " اذكروا لي كل البنات الي تعرفونهم بحرف الواو "
أخته مبتسمه ابتسامه صغيره " ليش الواو بالذات ؟"
تجاهلها وأكمل حديثه لامه " لا تقولين ان وداد ومدري مين الثانيه هم الي تعرفينهم بس ؟ على كذا ما أعرست "
أمه " أنت بتبطل الزواج عشان اسم .. صاحي أنت ؟"
" ايه "
" لا حول ولا قوة الا بالله "
أخته " لا تكفى لا تبطل ، يوم سعدي تطلع من البيت .. اممم اصبر بفكر ،ايه فيه ثانيات .. فيه ود ، اممم .. ولاء .. مين بعد يا ربي . اممم وفيه بعد وئـ... لا هذي ما تنفع أنت تقول ما تبغى وحده تجنن "
التفت لها وكأنه نال ما يريده " كملي اسمعك ؟"
اخته "خلصت الاسامي "
" وئـ .. ايش ؟ "
" وش وئ ؟!! "
" الاسم الي كنتي بتقولينه بس سكتي "
" ايه قلت لك ما تصلح هي تجنن وأنت ما تبي وحده تجننك "
قصي بنفاذ صبر " قولي اسمها بشوف ؟"
" وش الفايده إذا قلت اسمها أنت قلت ما تبي وحده تجنن ! " .
" اخلصي علي .. قولي اسمها لا تنرفزيني "
اخته بغباء " اسم مين ؟ "
صرخ " اسم وئام الي ما كملتيه .. اسم مين يعني؟"
انفجرتا بالضحك .. استدرك ما قاله ، قفز اسمها من شفتيه وكشف ما في قلبه ، وضع يده على وجهه " حسبي الله ونعم الوكيل "
أمه متكئه على أحد دواليب المطبخ " ااهه .. قل من البدايه وئام لا تلف وتدور "
اخته " بطني .. " ترفع يدها بغضب مثله وتقلده " اسم وئام الي ما كملتيه اسم مين يعني ؟"
قصي " انكتمي "
امه " الحب اعماه يا بنتي .. خليه في حاله "
اخته توقفت عن الضحك وبجديه " ما يهم الحب اعماه ولا قتله عشقاً .. البنت مخطوبه كيف نخطبها ؟"
خلى وجهه من التعابير وكأن الحياة سلبت منه "كيف مخطوبه ! متى صار هذا الكلام ؟ "
اخته " الأسبوع الي فات كلمتها وقالت لي انها انخطبت "
بذهول وعدم وعي قال " كيف انخطبت ومتى !.. ك..كيف انخطبت وهي لها كم سنه ترفض الي يخطبونها ! ليه وافقت اللحين ؟"
ادخل يده في جيبه بربكه يبحث عن هاتفه
اخته " اش تسوي ؟ "
" مستحيل ، ليه وافقت ، مو على كيفها ؟ مووو علللى كيفها "
اخته " هيه قصي هدي هدي .. " ، همست " امزح معك "
نظر لها بحده وعيناه تكاد تفترسها " ايش قلتي ؟ تمزحين معي ! هذا موضوع ينمزح فيه انتي ووجهك المخيس هذا "
أمه قربت منه ووقفت بينهم تمنعه من التقدم بإتجاه اخته " هدي قصي .. الموضوع ما يسوى"
" ما يسوى ! قلبي كان بيوقف وتقولون لي ما يسوى "
وضعت اخته خلفه كرسيا " اسم الله على قلبك توبه ما أعيدها .. أجلس واذكر الله "
جلس ، وضع يده على جبينه وأرخى رأسه للخلف
أمه تحرك يديها أمام وجهه لتحرك الهواء " قل بسم الله .. هي لك بإذن الله وما ياخذها أحد غيرك "
نظر لامه ، امسك يديها برجاء " نروح نخطبها اليوم ، تكفين لا ترديني "
-
-

[فيتامين سي]

*الفصــل الثالـــث*
-
-

نظر لامه ، امسك يديها برجاء " نروح نخطبها اليوم ، تكفين لا ترديني "
امه " اليوم ! مهبوول أنت ؟ أصبر خلنا نقول لأبوك أول "
" انا اكلمه اللحين بس قولي تم "
ضربته على جبينi بخفه " أنا مجنونه أذا قلت تم ، اصبر هذي الأمور ما تتم بالهبل هذا "
قصي برجاء " أمي تكفين "
" اصص موضوعك عندي انساه .. لا تتكلم فيه أنا بتكفل بكل شي أنت بس أصبر وخل عنك هبل الحب هذا "
طأطأ برأسه " طيب " ، نظرلها " بس لا تطولين تكفين "
رن جرس المنزل .. أمه " هذا أبوك جاء قم افتح له الباب "
" أبشري بس فاتحيه اللحين في الموضوع تكفين "
" قم افتح الباب "
" طلبتك قولي تم "
" تم تم اذلف افتح الباب "
وقف وقبل راسها قبل متتاليه سريعه " الله يطول بعمرك "
ركض ليفتح الباب والابتسامه تحتل وجهه " هلا هلا بالأب الحنون ، هلا بالطش والرش تو ما نور البيت "
نظر له والده " هلا بك .. الله يجعلها دايمه وش مفرحك يبوي؟ شوي واشوف ضرس العقل من كبر ابتسامتك "
" أبشرك توظفت "
"الحمدلله فضل ربي كبير .. عاد لا أوصيك الله الله بالإجتهاد "
" بإذن الله "
نظر الأب للخارج " فيصل جاء معاي ، شوفه يشيل المقاضي رح ساعده "
" أبشر "
خرج ليجد فيصل يحمل العديد من الأكياس اقترب من فيصل وقبل رأسه " هلا بعزوتي ، هلا بالغالي "
ضحك فيصل " هلا بك ، أشوف مستوى الترحيب زايد عندك اليوم وش صاير ؟ "
" الحمدلله توظفت "
" ألـف مبروك .. لكن من فرحتك شوي وتطلع لك أجنحه ، كثير توظفوا قبلك ولا فرحوا فرحتك هذي " .. رفع حاجبيه سوياً " علمني السبب الحقيقي "
" هههههه ما يتخبا عنك شيء "
" أخرج مافي جعبتك اشوف"
وضع يده خلف رقبته " أمي بتخطب لي "
نظر له لثوانٍ صامتاً ثم انفجر ضحكاً " كل هذا عشان بتخطب لو أدري إنك بتفرح كذا كان خاطبين لك من زمااان "
" فاتت علينا ذي بس ما يخالف عندي لك شي ثاني .. عطني مقدم البيت الي بشتريه " بسط يده وكأنه يطلب منه أن يضع مالاً فيها
ابتسم فيصل " ابشر لكن قولي مين تعيسة الحظ الي بتنخطب من واحد مثلك !"
عبس " تعيس الحظ أنت "
" ههههههههههههه قول مين ؟"
رفع قصي حاجبيه سريعاً " ســر " إستطرد .. " إلا ليش ماجبت بناتك من زمان عنهم اشتقت لهم " ،، " أنا ما أصدق أهرب منهم وأنت تبيني أجيبهم " ،،
" أفااا .. والله لو تسمعك أمي ما تخليك تدخل مع الباب "
ضحك فيصل " فكنا وتعال شيل معي "
حمل عنه بعض الأكياس ودخلا للمنزل ..
-
-
-
في غرفة الجلوس.. القهوه والتمر أمامهم وكل منهم ممسك بفنجانه
قصي يغمز لأمه سراً يحثها على الإسراع والتحدث ، وهي تعض على شفتها تطلب منه الهدوء .. تهمس أخته " لا عاد تغمز أهجد خل أمي تتكلم براحتها "
همس لها " طيب طيب " ، نظر لأمه وغمز لها من جديد
وضعت اخته يدها على حبتها وهزت رأسها أسفاً
أمه " يا أبو فيصل ودي أفاتحك بموضوع "
نظر لها " سمي .. عساه خير ؟"
" خير بإذن الله .. تعرف قصي كبر وهذا هو توظف وبسم الله عليه مو ناقصه شي اللحين فقلت وش رايك نخطب له ؟ "
" صادقه .. مشورتك وهداية الله .. أبدي تحرياتكم أنتم يالحريم ودوري له بنت تليق به "
ابتسمت " موجوده "
ابتسم قصي واخته كذلك ، اقترب فيصل و همس " مخططين من زمان وأنا آخر من يدري .. مين تعيسة الحظ ؟"
همس قصي " اصص خلني أسمع كلام امي "
ابتعد فيصل عنه وهو مبتسم وأخذ يرتشف من قهوته
الأب " ما شاء الله لقيتيها بذي السرعه .. مين هي ؟"
الأم " بنت أخوي .. وئام "
شرق فيصل بقهوتهه ..
قصي يطبطب على ظهره " بسم الله عليك "
همس فيصل ووجه أحمر " ماء "
نهضت أخته لتجلب له كوباً ، مدته له فشربه كله بنفسٍ واحد
أمه " بسم الله عليك لا تشربه دفعه وحده بعدين يوجعك بطنك "
الأب متجاهل شرقة فيصل " من جدك أنتِ وئام بنت أخوك ما غيرها !"
الأم " ايه وش فيها ؟ بسم الله عليها كامله والكمال لله "
الأب " كامله ما قلنا شي لكنها أكبر من قصي ! صاحيه أنتِ ؟"
الأم " الله أكبر وإذا أكبر منه ما فيها شي ، هي أكبر منه بعامين بس "
" ولو نص عام .. تظل أكبر منه "
تحدث قصي الذي بدا عليه التوتر " ترا ماهو ذنب إذا هي أكبر مني بعام هذا الرسول عليه الصلاة والسلام تزوج خديجه وهي أكبر منه بأعوام "
نظر له فيصل " هذا الرسول موب أنت .. مجنون والله تصير سالفه للناس ، ما لقى إلا بنت أكبر منه "
قطب حاجبيه " ووش علي أنا من الناس ! وش دخلهم اخذت وحده أكبر مني بعام ولا ألف عام ما لهم دخل وأنت كنت أبغاك عون طلعت فرعون !"
الأب " قصـــي أخوك الكبير تكلم معاه بإحترام لا ترفع صوتك عليه "
"ما برفع صوتي وهو لا يكسر عودي .. وش فيها لو تزوجت وحده أكبر مني؟.. جيبولي دليل واحد من القرآن ولا السنه يحرم الزواج من فتاه تكبرني سناً .. اعطوني واحد بس "
الأب " ما فيه "
" أجل ليه تعترضون ؟"
" يا ولدي الناس ما بيرحمونكم بيطلعون عليكم كلام رايح جاي "
" ما علي منهم ولا من كلامهم .. الرسول وهو رسول ما سلم من ألسنتهم بأسلم أنا !! "
اخته تمسك بيده " قصي هدي "
بغضب " هدي هدي " نفض يده من يدها وقال " تخطبون لي وئام ولا اقسم بالله ما أتزوج أبداً واذا سألوكم الناس بكره وش به ولدكم ما تزوج؟ قولوا لأنا رفضنا البنت الي يبيها"
فيصل " لا تحلف "
نظر له بحده " أنت يا تساعدني و تقنعهم ولا اسكت "
الأب " قصــــي "
-
-

[فيتامين سي]

*الفصــل الرابــــع*
-
-

الأب بحده " قصــــي "
إلتقط قصي هاتفه وخرج من المنزل صافقاً الباب خلفه بكل قوته .
نظرت الأم لفيصل " الله يهديك "
فيصل " ما قلت شي غلط !"
نظر الأب للأم " هو الي أفكر فيه صح !"
الأم " وش؟"
"المجنون هذا يحب بنت أخوك ؟"
اخت قصي " أوهووووه من زماااان أوي"
أخذ الأب مسبحته يتلاعب بها بين أصابعه " يصير خير "
فيصل " يبه طلبتك لا تطاوع المجنون هذا .. لا تزوجه وئام "
الأم بشك " أنت وش فيك معارض ؟"
" ما ابيه يتزوجها "
" ليــه؟"
" لأن ...... لأن هي أكبر منه والناس بيصيرون يتكلمون فيهم طالع نازل "
الأخت " وش علينا منهم دام هو يبيها طز بالناس .. إذا سعادته معاها وش لنا ووش للناس "
فيصل " أنتِ مالك دخل ؟"
الأم بحده " إذا هي مالها دخل حتى أنت مالك دخل .. عيب عليك توقف ضد سعادة أخوك عشان كلام ناس لا يزيد ولا ينقص "
" يمه .. طلعت اللحين الغلطان !"
" الي سمعته .. إذا أخوك يبيها لا توقف بوجهه "
وقفت وخرجت من المكان وخرجت ابنتها خلفها
نظر فيصل لوالده " يبه تكفى لا تطاوعه .. هو مجنون وبيأذي نفسه بزواجه منها "
" ما سمعت اختك وش قالت ؟ ما شفت تصرفاته ! الولد يحبها .. بنزوجه منها وأنتهى .. "
فيصل " قال يحبها قال .. اسمعني يبه تراني ابي مصلحته .. البنت ما تصلح له هي اكبر منه والناس ما بيرحمونه ولا يرحمونا .. انت بس ارفض طلبه كل ما جاء يتكلم معاك عنها .. شهر واحد وبيمل وتشوف أنه ما يحبها .. صدقني مجرد نزوه يبه .. وبعدين هو صاحب مشاكل وهي أدهى منه لو أجتمعوا الاثنين هذول بيكونون مافيا .. نسيت مشاكلهم وهم صغار "
ضحك الأب " أما في هذي صدقت "
" أسمع شوري يبه وتصدد عنه وأرفضه كل ما جاء يتكلم معك عن هذا الموضوع وصدقني شهر واحد وما عاد بيفتح السالفه مره ثانيه وبتشوف ان الي هو فيه نزوه مو حب "
"شورك وهداية الله .. شهر .. لكن إذا إنتهى الشهر وهو باقي يذكر ذا الموضوع فبعطيه الي يبيه وأنت بعد بتوقف بصفه وتعاونه "
بمجامله " ان شاء الله "
-
-
-
مضى الشهر وهو في صراع مع والده
هو يريدها وأباه يرفضها بسبب عمرها
لم يتحدث مع والده منذ أسبوع
يجلس في غرفته أمام مكتب صغير ، يرتدي بنطالاً أسود وقميصاً أسود و الكآبه تعلو وجهه .. وكأن له حبيباً ميتاً
يمسك بقلم وينظر لورقة أمامه وبجانبها *حصالة* نقود كبيره على شكل كرة قدم
أنزل القلم ووضع يده على الكره ، همس بسخريه "حسافة التجميع"
منذ الجامعه وهو يدخر مالاً في هذه الكره المجوفه، لأجل شهر عسلٍ يخطط له منذ زمن
أدخل يديه في شعره يشده وجسده يتأرجح للأمام والخلف .. صرخ فجأةً " آآآآآآآآهههه "
أمسك الكرة بيديه ، رفعها عالياً ورماها بكل قوته على الحائط ، تهشمت وخرج ما بداخلها من أوراق مالية ، صرخ مرة أخرى " آآهههه .. آههه .. آه "
دخلت أمه بسرعه وخلفها أخته , نظرتا له بخوف وهما تريان تلك الحصاله المحببه لقلبه قد تهشمت
أمه تقترب منه ببطء " قصي بسم الله عليك يمه اشفيك ؟"
أدخل يديه ذات العروق البارزه في شعره من جديد ليشده " راسي يمه .. راسي أحســه بينفجـــر "
وضعت يديها على يديه لتسحبها من شعره " تعال أجلس واذكر الله "
أبتعد عنها متراجعاً للخلف عدة خطوات " ما اقدر , ما اقدر اجلس"
عادت أخته وهي تحمل كأس ماء بارد ، اقتربت منه " أشرب وتعوذ من ابليس "
نظر لها " ما ابي ابعدي عني "
اخته " قصي .. "
قاطعها صارخاً " أطلعوا وخلوني لحالي .. أطلعـــوا "
دخل والده وهو مقطب حاجبيه " وش ذا الصراخ ؟ "
أنتتف قصي كوب الماء من يد أخته وألتف بجسده ناحية الحائط و ظهره لهم
شربه كله دفعة واحده ثم أنزله على المكتب بكل حده فانكسر وقطع ابهامه
شهقت والدته " بسم الله عليك "
اقتربت منه " اشوف يدك "
امسكت كفه لترى جرحه ولكنه سحب يده " ارتاحي يمه "
الأب " أنت وش تسوي في البيت بهذا الوقت ! مفروض تكون بدوامك ولا أنا غلطان ؟"
سار ناحية الباب دون أن ينظر لوالده " هذا أنا رايح " .. خرج من الغرفه
هتف والده " غير ملابسك قبل تروح "
نظر لزوجته فإذا بها تنظر له معاتبه، نظر لابنته فإذا بها تنظر له بالنظرات ذاتها ، سأل " نعم ! خير تناظروني كذا ؟"
الأم " معجبك حال ولدك !! شايف كيف صار ! .." قاطع عتابها دخول قصي للغرفه
والده " زين انك رجعت .. وش بيقولون عنك الناس وانت رايح بذي الملابس للعمل "
توقف عن المشي وأغمض عينيه بقوه ، همس غاضباً " الناس الناس الناس"
أكمل طريقه لمكتبه وأخذ الورقه ، أمسك بالقلم ليوقع سريعاً ، لف الورقه بعجل والتف ليخرج .. استوقفه والده " ايش الي في يدك هذي ؟"
اجابه ببرود " ورقه "
" ادري انها ورقه بس وش فيها ؟"
قال بسخريه " رسالة انتحار "
اتسعت عينا والده " نعــم " .. أمه واخته كذلك قالتا
قصي يوسع عيناه بذهول مثل والده " وش فيك تفاجأت !"
بسرعه خطف الأب الورقه من يد قصي ، فتحها ليجدها ورقة (استقاله)
نظر لابنه بغضب " خير وش عندك بتستقيل ؟"
تكتف قصي " ما اعجبني العمل "
" تستهبل ! هذي الوظيفه الي كنت تتمناها كيف ما اعجبتك ؟ "
ابتسم بسخريه " انا كنت اتمناها لأن مركزها كويس وراتبها بعد .. كنت اتمنى هذي الوظيفه عشان اقدر افتح بيت واتزوج بس بما انك يا طويل العمر رافض ماله داعي اشتغل "
" مجنون انت ؟"
" ايه .. ايه مجنون .. ايـــه "
-
-

[فيتامين سي]

*الفصــل الخامــــس*
-
-

والده " باقي للحين تبي ذي الوئام ؟"
قصي " وش رايك ؟"
"مالك خاطر بأي بنت غيرها ؟"
قصي " تسأل وأنت تعرف الجواب !! " بسط يده " عطني الورقه يبه "
رفعها الأب في الهواء " تبي هذي "
نظر له قصي بصمت .. شقها لنصفان ورماها أرضاً
قصي " عندي وحده ثانية "
اتجه لمكتبه لكن والده استوقفه " انا وامك بنسوي الي علينا بس إذا رفضتك البنت ، بتتزوج أي بنت بتختارها لك أمك .. فاهم ! "
اخته بابتسامه " مستحيل ترفضه على ضمانتي "
نظر الأب للأم " كلمي أخوك وقولي له بنزوره يوم الجمعه عشان نطلب بنته لولدنا قيس بن الملوح "
ابتسمت الأم " ابشـــر "
خرج الأب وهو يضحك سراً على ابنه
اخته تمسك بيده وتهزها وهي مبتسمه " أخيراً أخيراً .. يلا أضحك ورنا أسنانك من زمان عنها ، اشتقنا لها "
الأم " وين حطيت جوالي ؟"
الاخت " وش تبين فيه يمه ؟"
أمه "وش ذا السؤال .. بكلم زوجة خالك عشان موضوع قصي "
سحب قصي يده من يد اخته " انا بجيبه لك .. انتظري هنا "
خرج من الغرفه بسرعه
ضحكت اخته " شكله باقي مو مصدق "
امه "بعد الي صار ما أظنه بيصدق إلا إذا شافها قدامه "
رجع بالهاتف وهو عاقد حاجبيه " وش مسميتها يمه ؟"
" أم عبدالإله "
همس " لقيتها " .. ضغط على زر الإتصال ثم السماعه
مدت امه يدها لتأخذ الهاتف إلا أنه سحب يده للخلف ، همس " حطيته سبيكر تكلمي وهي بتسمعك "
سحبت امه هاتفها من يده " أقول .. عن الهرج الفاضي "
أغلقت السماعه ووضعت الهاتف على أذنها ، أقترب من أمه وألصق أذنه بالهاتف ليسمع هو أيضا
دفعته أمه " أبعد "
همس " تكفين بس بتسمع "
ضربته من جديد " أبعد" ولكنه لم يبتعد
وضعت الام سبابتها على فمها بمعنى "اص" واخذت تتحدث مع ام وئام وهي تحاول ابعاد قصي لتتحدث بأريحيه ولكنه أبى الإبتعاد
اما اخته فكانت تمسح دموعها الناتجه عن ضحكها المكتوم على حال أخيها الذي كان يتحمل ضربات امه لأجل أن يسمع ما تقوله والدة حبيبته .
أغلقت أمه الخط ، سأل " وش قالت ؟"
هنا انفجرت اخته ضحكاً
نظرت له أمه وهي تتماسك لكي لا تضحك " أهبل أنت ؟ أذنك كانت لاصقة بالجوال وسمعت كل الكلام "
قصي " عيديه "
قالت وهي مبتسمه " تقول حياكم الله ، بيكونون بانتظارنا "
وضع يديه على خاصرته ، اخذ نفساً عميقاً ثم زفره ، ألتفت حوله بنظره
وقعت عينيه على الكره المهشمه والمال الخارج منها .. اتجه لها واخذ يجتذب المال من بين الحطام .
امه " انتبه ليدك لا تجرحها "
اجابها " طيب " ، نهض واخذ سلة قمامه صغيره كانت تحت مكتبه ، وضعها على الأرض أمام حطام الكره وجلس بجانبها
جمع الأجزاء المحطمه في السله وأخذ يعد المال بتركيز تام
همست اخته لأمه لتنسحبا من الغرفه بهدوء
عد المال فإذا به أكثر مما توقع ، خبأه في درج مكتبه وأغلق عليه بمفتاح ، اتجه لخزانة ملابسه ليبدل ثيابه ويذهب للعمل ..
-
-
-
*في مكان آخر*
أم وئام " وأنا قلت لها حايكم الله "
والد وئام " أي يوم قالت ؟ "
" الجمعه "
" كويس ما بيكون عندي دوام "
والدتها " المشكله مو بدوامك المشكله بوئام عنيده وراسها يابس "
"قلتي لها شي ؟"
" لا ما قلت لها بس أنت تعرف كم جاها من خطاب قبل ورفضتهم كلهم .. اخاف ما توافق على قصي بعد .. هي رافضه ما تبغى تتزوج "
"معليك .. بس أنتِ انتبهي لا تقولين لها شيء .. لين تصير أمام الأمر الواقع "
والدتها بخوف من ردة فعل ابنتها " بتفضحنا "
"لا تطمني ، صح رأسها يابس لكن ما بتخالفنا ذي المره لأن لو رفضت تعرف أن علاقتي أنا وأختي بتتأثر من رفضها .. إن شاء الله ما يصير شيء وبتوافق بإذن الله "
رفعت أمها يديها " يا كريم "
-
-
-
٦:٣٠ مساء يوم الجمعه ~
*منزل عائلة وئام*
والدها وأخاها الذي يصغرها سناً يستقبلون الرجال
وئام وأمها ترحبان بأم قصي وابنتها
جلسوا جميعهم أما هي فأخذت تصب لهم القهوه
أم قصي تنظر لها وتبتسم ووئام تبادلها الإبتسامه غير مدركه لما يحدث
جلست بجانب والدتها .. أم وئام بابتسامه واسعة "زارتنا البركة تو ما نور البيت "
أم قصي تبادلها الإبتسامه " النور نورك " ، نظرت لوئام "أخبارك حبيبتي من زمان عنك ؟ ألهتك الحياة ولا عاد شفناك "
" المعذره يا عمه أدري إني مقصره بحقك ، لكن انشغلت بعملي "
" الله يعينك .. كيف وظيفتك عساك مرتاحه فيها ؟"
قالت وهي مبتسمه " أبشرك فصلت منها "
" أفا .. ليه ؟"
وئام " ما كنت مرتاحه فيها "
أكملت أمها " بس هي عندها شغل الحمدلله ربحت منه أضعاف الراتب الي كانت تاخذه "
أم قصي " ما شاء الله ، وش شغلها ؟ "
أم وئام " خبيرة تجميل "
تحدثت أخت قصي " أنتِ الميك أب ارتيست وئام يوسف ما غيرها "
ضحكت وئام " ايوه أنا "
" يا خاينه ولا قلتي لي "
" هذا أنتِ عرفتي"
نظرت أخت قصي لأمها " يمه تذكرين يوم أوريك صور حريم وأعجبك مكياجهم .. وقلتي لي كلمي الي حطت لهم و احجزي عندها عشان تسوينا في زواج بنت جيرانا "
أم قصي " ايه !"
ابنتها " الي حطت المكياج للحريم ذولاك هي وئام "
نظرت أم قصي لوئام " ما شاء الله .. والله أن شغلك يفتح النفس يا بنتي "
ابتسمت " الله يسلمك "
أخت قصي " اليوم ما بطلع من هنا لين تسوين لي وجهي "
ضحكت وئام " تامرين أمر من عيوني الثنتين "
أخت قصي " تسلم عيونك ..ما توقعت ابد تكونين ميك اب ارتست لأنك ما تحطين المكياج كثير رغم كذا ما شاء الله ابدعتي "
أم وئام " هي ما تحطه لأنها ما تحبه "
أخت قصي " غربيه ما تحبينه وتبدعين فيه ؟ "
وئام " مو ما أحبه ما أحبه .. لا يعني أحطه على الناس ايوه بس أحط لنفسي ما أحب أحس ما أرتاح إذا فيه شيء على وجهي وإذا حطيت ما أصدق يمر الوقت عشان أمسحه .. أحب أكون على طبيعتي أكثر "
ام قصي " ايه احسن يا بنتي عشان يشوفك قصي على طبيعتك "
رمشت بعيناها " قصــي ! "
أم قصي " ايه يا بنتي قصي .. ما قالت لك أمك حنا خطبناك " أكملت بمزاح " لصديق الطفوله "
ضحكت أم وئام وهي تقرص وئام سراً " إلا قلت لها بس هي فاهيه الله يصلحها .. قومي يمه جهزي الشاهي عشان الرجال "
التفتت لأمها ونظرت لها بذهول ..
-
-

[فيتامين سي]

*الفصــل الســـــادس*
-
-

أم قصي " ايه يا بنتي قصي .. ما قالت لك أمك حنا خطبناك " أكملت بمزاح " لصديق الطفوله "
ضحكت أم وئام وهي تقرص وئام سراً " إلا قلت لها بس هي فاهيه الله يصلحها .. قومي يمه جهزي الشاهي عشان الرجال "
التفتت لأمها ونظرت بذهول ، تحولت نظراتها لنظرات مبهمه.. همست وهي تقف " ابشري "
مشت بتماسك حتى وصلت للمطبخ .. وضعت يدها على عينيها "يالله ناوين يزوجوني غصب ؟ "
أبعدت يدها عن عينيها " مستحيـــل "
أخذت تدور حول نفسها وهي تهمس " فكري فكري "
توقفت وتحدثت مع نفسها "أحرق وجهي عشان يروح .. وبعدين .. يروح وأضل أنا بوجه مشوه لا ما ينفع .. أولع في البيت عشان ينقلعون.. بس كذا ممكن يرجع بعدين .. ما ينفع بعد.. لقيتها بحط مكياج يخرع .. لا لا أبوي بيدخل معاي والله يخليني أمسحه قبل أدخل .. وش أسوي يا ربي !"
أخوها " سويتي الشاهي ؟"
" هاه "
قلدها " هاه !! أسألك الشاهي جاهز ولا لا ؟ "
" مدري " ..
نظر لها لثوانٍ .. مرتبكه على غير عادتها .. سألها وهو مبتسم "عرفتي ؟"
نظرت له بغضب " كنت تعرف !"
اجابها "لا .. والله العظيم توني دريت"
ادخلت يدها في شعرها " وش اسوي يا ربي ؟"
نظر لها " ما تبغينه ؟"
" أنا ما أبغى أتزوج ابداً لا هو ولا غيره "
" إلى متى ؟ "
" لين أموت "
" وش السبب ؟"
نظرت له في صمت لثوانٍ ثم همست "كذا .. ما أتخيل نفسي متزوجه ابداً "
" عذر فاشل مع احترامي الشديد .. انا بقول لك ايش قاعد يصير ابوي وامي ما قالوا لك لأنهم دارين انك بترفضين وابوي ما وده يرفض ولد اخته لأنها بتزعل من رفضنا لولدها بتسأل وش السبب بنقول لها والله كذا بنتنا مو متخيله إنها بتتزوج في يوم من الأيام .. بيكبر زعلها وبيصير فيه فجوه بينها وبين أبوي .. إذا ناسيه ترا أبوي ما عنده أخت غيرها .. هي الي باقيه له من ريحة أمه فلا تفرقين بينهم بقراراتك المتهوره "
" الله أكبر صرت اللحين أنا الي بفرق بينهم "
" تنكرين هذا الشيء .. لو رفضتي بتزعل عمتي أكيد ومن حقها"
"ما شاء الله أشوفك واقف بصفهم .. جروني كلكم وارموني عليه "
"عشانه قصي انا قاعد اقول هذا الكلام لأنه رجال والنعم ينشد به الظهر لو هو رجال ثاني كان وقفت معاك ضد اهلي .. لكن زي ما قلت لك هو رجال ما فيه منه ولا تنسين علاقة ابوي و عمتي وش بيصير فيها لو رفضتي "
تنظر له بصمت وعيناها محتقنه بالدموع .. مد يده ووضعها على وجهها "لا تبكين"
أبعدت يده وأدارت ظهرها له " ما ببكي .. خمس دقايق وبيكون الشاهي جاهز "
تنهد وخرج من المطبخ
مسحت الدموع من عينيها وهمست لنفسها " لا تستسلمين .. فكري فكري أكيد فيه حل "
اهتز هاتفها معلناً عن قدوم رسالة من رقم غريب .. نص الرساله (أرفضيه .. لا توافقين عليه تكفين)
قطبت حاجبيها مستنكره !
-
-
-
في مجلس الرجال .. والد وئام وأخاها ، والد قصي ، قصي وأخوانه (5 اخوان) وسالم الذي يعده والد قصي كأحد ابنائه
جميعهم مبتسمين ولكن هو أكبرهم ابتسامه و أكثرهم سعاده
في ذات المجلس اصدر هاتف احدهم صوتاً منبهاً عن وصول رسالة ، كان نصها (!)
كتب من جديد ( ارفضيه ) وارسلها.
اهتز هاتفها.. اخذته وقرأت الرساله .. زفرت .. نسخت الرقم وذهبت لاحد برامج كشف الارقام .. ادخلته وضغطت ايقونة البحث .. لم تجد اي نتائج !!
وضعت هاتفها جانباً .. اعدت الشاي وجهزته .. نظرت حولها في المطبخ وهي تفكر.. وقعت عيناها على الليمون
ابتسمت واخذت منه ٣ حبات وعصرتها .. وضعتها في كأس واضافة له الماء حتى امتلأ .. فتحت خزانه فوق رأسه واخذت منها علبه لونها أحمر ، كانت صبغه ملونه للطعام
وضعت قطرتان ، حركت العصير فاصبح احمر اللون .. ابتسمت و احضرت كؤوس اخرى وملأتها بعصير فواكه مشكله
عاد أخاها " جهز الشاهي ؟ "
التفتت له وهي مبتسمه " ايه "
نظر لها بتمعن " امداك تطلعين خطه ؟"
بإنكار " مين قال ؟ "
أشار لوجهها " إبتسامتك هذي وراها شيء "
" بسم الله يعني الواحد ما يبتسم "
نظر لها بجديه " ما استوعبتي الوضع للحين .. أعيد الكلام يعني !"
"والله فهمت فهمت .. بس اسمع أبغى اقعد معاه لحالنا "
اتسعت عيناها " نعم ! وتتوقعين اوافق على هذا الشي !"
"وش فيها ؟"
" وش الي مو فيها .. شايفتني غبي أخليكم لحالكم عشان تقولين له تراني ما أبغاك "
نظرت له بجديه " أهبل أنت ! مجنونه أقوله ما أبغاك.. عشان يروح يقول لأمه وأمه تزعل من أبوي ويرجع أبوي علي .. ووقتها بيزوجني من أي واحد يدق الباب "
نظر لها بشك " جد تتكلمين ؟"
" لا أمثل ! هذا موضوع ما فيه مزح أنت ووجهك .. بس زي ما طلبتك الله يسعدك أبغى أقعد معاه لحالنا "
"ليه إن شاء الله ؟"
" عشان أتمقل فيه لعل وعسى يدخل مزاجي أو أقع في حبه من النظرة الأولى.. إذا كنت موجود أنت أو أبوي ما باخذ راحتي "
نظر لها بدهشه " ما تستحين أنتِ تقولينها في وجهي بتمقل فيه "
"مــا فيها شيء ! .. مو بتخلوني زوجته في نهاية المطاف .. خلاص خلوني اتمقل فيه اذا كان حلو حبيته واذا كان هه نص ونص بحاول أقنع نفسي اتقبله "
هز رأسه أسفاً " ما كنت اعرف انك بذي الجرأه .. طلعتي على حقيقتك اللحين" .. ضحك وهو يحمل الشاي " ابشري بخليكم لوحدكم و تمقلي فيه زين "
"بحفظه حفظ لا تخاف "
" أجل بسألك عن مواصفاته إذا طلعتي"
" أقول أنقلع "
نظر لها بطرف عينيه " شكلي بدخل أنا و أبوي معاكم "
نظرت له بخوف " تمزح صح !"
ضحك " الله يخلف .. تجهزي خمس دقايق و تعالي قابليني عند مجلس الرجال الي جوا "
"طيب"
-
-

[فيتامين سي]

*الفصــل الســـــابع*
-
-

ما أن خرج حتى اخفت وجهها بيديها "قال بتمقل فيه قال"
ابعدت يديها عن وجهها وخداها اكتسيا باللون الاحمر خجلاً
اخذت نفس " ركزي .. " زفرت هواء صدرها
والدتها " وئام حبيبتي !"
التفتت لأمها وهي مبتسمه " سمي يا نور عيني "
اقتربت منها ، وضعت يدها على جبين وئام
ضحكت "اشبك أمي !"
نظرت لها بشك " بنتي مستوعبه الي قاعد يصير ! ترا مو مزحه "
"أدري "
" تدرين ! "
ضحكت مره أخرى " يمه اشبك تناظريني كذا ؟"
" لا بس توقعت اجي القاك مقومه الدنيا ومقعدتها والدخاخين تطلع من راسك "
ابتسمت وئام " وش دعوه ؟"
سألتها أمها مره أخرى " عمتك جات عشان تخطبك لولدها قصي .. متأكده إنك مستوعبه؟" ،،
" ايوه واللحين بروح عشان يشوفني واشوفه "
" يعني موافقه عليه !"
ابتسمت ابتسامه صغيره تخفي خلفها مغزاً " ايوه عبدالإله يمدحه وهو ولد عمتي في نهاية المطاف يعني ما بلاقي أحسن منه "
ابتسمت والدتها .. قبلت رأس ابنتها بسرور " الله يفرحك زي ما فرحتيني والله كنت خايفه .. هم وانزاح .. اشوف شعرك .. حطيه على جنب .. ملابسك كوسيه ماله داعي تغيرينها "
ابتسمت وئام بإرتباك " مبسوطه لاني موافقه ؟"
"مره مره مره .. ماني قادره أوصف سعادتي "
أبتلعت ريقها بصعوبه ، التفتت لتحمل العصير وهمست "انا بروح " ..
اهتز هاتفها ، امسكته فإذا بها رسالة جديدة من ذلك الرقم المجهول .. (لا تطلعين .. لا يشوفك )
ضغطت زر المسح .. وضعت هاتفها على الصامت وحملت كؤوس العصير
ذهبت للمجلس وهي تتمتم" يا رب ساعدني "
والدها وأخوها ينتظرونها أمام باب المجلس
ابتسمت بتوتر.. فتح والدها الباب و همس " تعالي حبيبتي "
نظرت لوالدها ثم نظرت لأخوها .. غمز عبدالإله لها وأشار بيده ( كل شي تمام )
نظرت للكؤوس وهمست لنفسها " الي في الوسط .. الي في الوسط "
اقترب أخاها " هات اشيلهم عنك ؟"
هزت رأسها بالرفض " أنا بشيلهم "
" يدينك ترتجف بتكبين العصير عليه "
" لا معليك " .. أخذت نفساً ودخلت
كان ثصي في منتهى السعاده والتوتر في آن واحد ..
أخيراً..
أخيراً سيراها ..
ابلتع ريقه بصعوبه وهو يرى الباب يفتح ونبضات قلبه كانت أشبه بطبول افريقيه مجنونه
دخل خاله .. نظر له مستنكراً " ليش جالس عندك ؟ "
وقف قصي بإرتباك " وين أجلس فيه ؟"
والد وئام " على الأرض "
هم أن يجلس على الأرض إلى أن خاله أطلق ضحكه صاخبه
دخل عبدالإله وخلفه وئام تختبئ .. والدها " الله يصلحك .. قم قم أجلس على الكنب "
نهض وهو يبتسم بإرتباك ، جلس على الكنب وجلس خاله على الكنبه المجاوره له
نظر عبدالإله خلفه و همس "أدخلي يلا "
كان ينظر لعبدالإله الذي يقف عائقاً أمام الباب .. يريد أن يبعده ليراها
خرجت من خلفه وهي مطأطأه رأسه
ارتسمت على شفتيه ابتسامه واسعه لم يستطع إخفائها
تقدمت ناحيته وهي تشعر بأن انفاسها ستتوقف أما هو فكان يشعر بأن قلبه سيقفز من صدره .. أمسكت بكأس العصير الأوسط ومدته له لكي لا يختار كأساً آخر
أمسك بالكأس و تلامست أطراف أصابعهم .. سرت قشعريره في جسدها من ملامسته
أنزلت الكؤوس وجلست بجانب والدها وهي ما تزال مطأطأة رأسها .. همست لنفسها "لازم تواجهين .. ارفعي راسك "
سأل مبتسماً .. " كيفك وئام ؟" -
-اجابت بهمس " بخير "
" دايم يا رب "
قرب الكأس من شفتيه وهو ينظر لها وشرب من العصير ، شرق به لحموضته ..
خاله " بسم الله عليك ، نظر لابنه " جب له ماء " ، انصاع الابن لوالده ..
والد وئام يطبطب على ظهر قصي " بسم الله عليك "
عاد الابن بكأس الماء ومده لقصي .. شربه كله
والد وئام " شوي شوي يا ولدي لا تشربه بسرعه "
همس قصي بصوت منخفض " ليمون"
خاله باستنكار " ليمون !"
رفعت وئام رأسها وتكلمت بسرعه " ما أعجبك العصير .. تبغى عصير ليمون ! "
نظرا لها مستنكراً وهو واضع يده على أسفل عنقه
همست بداخلها " يارب يفهم يا رب " ، نطقت " تحب عصير الليمون ! أنا ما أحبه .. أهلي يغصبوني إلا اشربه كل ما مرضت .. ما أبغاه رغم كذا يغضبوني عليه "
خلا وجهه من التعابير كان ينظر لها فقط وكأنه أدرك ما تعنيه
تريد أن توصل له رسالة بأنها لا تريده دون أن تدرك عائلتها
العصير ليمون ولكن لونه أحمر لكي لا يفهم والدها أو أخاها بما يحدث يدور بينهما
والدها " تبغى عصير ليمون .. اجيب لك واحد اللحين ابشر "
همس " لا خالي ارتاح "
وقف عبدالإله " يبه تعال أبغاك شوي "
وقف الأب " طيب "
غمز عبدالإله لوئام وهمس " تمقلي فيه زين "
أحمرا خديها سريعاً وطأطأت برأسها
خرجا وبقيا الاثنان بمفردهما ..
-
-

[فيتامين سي]

*الفصــل الثـــــامن*
-
-

نبضات قلبه أصبحت خافته جداً
لم يبقى سواهما في تلك الغرفه ولكنه لم يدرك
ما قالته جعل عقله يتوقف عن الإدراك
بعد صمت دام دقيقة أو تزيد
همس " الليمون الي أهلك غاصبينك عليه هو أنا !
اختطفت النظر له .. كان وجهه خال من التعابير !
أومأت رأسها موافقه
اتسعت عيناه ذهولاً .. كيف هذا ؟ .. هو يحبها وهي تحبه .. أكان ذلك وهماً ؟
أكان يكن لها المحبه وكونها تكن له الحب أيضا مجرد خيال أختلقه هو !
قلبه يعتصر ، أنفاسه تختل و يشعر بأنه سيفقد توازنه
نهض يريد الهروب
وقفت في طريقه " إنتظر "
نظر لها .. هي قريبة منه .. قريبة منه جداً .. ابتلع ريقه وهو ينظر لعيناها التي ترمش ارتباكاً .. تراجع للخلف خطوة .. تراجعت هي أيضاً
همست " باقي ما تكلمنا "
همس وهو ينظر لها بعينان ترجوا أن يكون ما سمعه مزحه .. " وش باقي ؟"
كانت تنظر للأرض تشعر بالخجل الشديد من الوقوف أمامه
قالت " أبغاك ترفضني "
قطب حاجبيه .. شعر بأن سكينا غرزت في قلبه " نعم !"
شابكت يديها بتوتر " أبغاك تقول لأهلك إنك ما تبغاني "
صمت لثوانٍ .. ابتسم ابتسامه جانبيه، ابتسامة سخرية على نفسه " ما أقدر "
رفعت رأسها له " ليه ؟"
عندما نظرت له هاج قلبه .. أصبح ينبض بقوة من جديد
أغمض عيناه لكي لا يراها .. قال بصعوبه "ليش ما ترفضين أنتِ ؟"
همست " ما أقدر "
فتح عيناه ونظر لها " وأنا بعد ما أقدر "
نظرت له بجديه " ليه ما تقدر إن شاء الله !"
" كذا "
" حلوه ذي .. تكفى والله صدقني فيه ألف بنت تتمناك أرفضني وطالع حولك بتلقى ألف بنت تنتظرك .. أرفضني ، أنا ما أقدر"
بسخريه " ألف بنت ! " .. خلا وجهه من التعابير " ما تقدرين ترفضين لأنك مغصوبه !"
" ايه "
" وأنا بعد ما أقدر أرفض لأني مغصوب "
انذهلت " حتى أنت !" .. أكملت هامسه " الظاهر عرق في العايله يغصبون أولادهم على الزواج "
ابتعد عنها وخرج من المجلس
هتفت " هيه إنتظر باقي ما إتفقنا ... "
صمتت لأنه ذهب .. نظرت لكؤوس العصير .. أمسكت بكأس عصير الليمون وشربت منه .. سعلت بشده .. شربت كأس عصير الفواكه دفعه واحده
مسحت فمها وهمست " المسكين كنت بقتله "
جمعت الكؤوس وخرجت .
عاد للمجلس .. قبل أن يدخل زفر هواء رئته بقوه وأخذ يفرك صدره
يشعر وكأن لا هواء حوله
أسند يده على الجدار ومال بجسده
خرج فيصل من دورة المياه (أكرمكم الله ) فرأى قصي واضعاً يده على صدره
هرول له ، " بسم الله .. وش فيك ؟"
قصي بهمس " مكتوم "
فيصل " وش جاك ؟ "
قصي " طلعني من هنا ابي هوا "
أمسك فيصل به وخرجا سوياً ..
أمسك فيصل بهاتفه وهو يدير المقود لتتحرك السياره ، وضعه على أذنه وما هي إلا ثوانٍ حتى أتاه الرد من الطرف الآخر
فيصل " عبدالإله .. اسمع أنا وقصي طلعنا .. لقيته مكتوم وبآخذه للمستوصف .. ايه .. ابشر بطمنكم عليه "
أنزل هاتفه والتفت لأخيه ، همس " قصي "
التفت قصي له فإذا بأنفه يسيل دماً دون أن يشعر
أمسك فيصل بمناديل ومدها له " أنفك ينزف " .. أخذها منه و همس " ودني البيت "
فيصل " بنمر المستوصف أول يعطونك بخار "
قصي " لا .. البيت "
فيصل " خلني اتطمن عليك !"
قصي " البــيـــت "
" طيب "
توقفا أمام المنزل
قصي وهو يفتح باب السياره " أنت توكل "
فيصل " خلني أنزل أقعد معاك وأتطمن عليك "
قصي " أنا بخير.. كتمه ومرت.. رح "
أغلق الباب ودخل للمنزل .. هز فيصل رأسه " لا حول ولا قوة إلا بالله "
أسند ظهره على الباب ونظر حوله للمنزل الفارغ .. تدحرجت دمعة من عينه .. رفع عيناه للأعلى يمنع دموعه من النزول ولكنها أبت مطاوعته وأخذت تسيل يمنة ويسره .. مشى سريعاً لغرفته .. دخل وأغلق الباب غطى وجهه بشماغه وأجهش بالبكاء ، لم يستطع التماسك أكثر .
..
الآن أنا فقط أدركت لما لم أكن أراها ولو صدفة خلال الثلاثة عشرة سنة الماضيه .. كانت تلتصق بأمها طيلة مده زيارتهم لنا .. لم تكن تحاول صنع الصدف مثلي .. الآن أنا أدرك السبب :
هي لم تكن مهتمه ! ..
-
-