شكراً زوزو على الفصل المستفز جدا جدا جدا

أولاً أحب أنوه عن شيء إن سبب استفزازي ليست الأحداث ولكنها النهاية التي نتوقعها لأنك زوزو لا تحبي النهايات التعيسة يعني نديم وفارديا هيعيشوا في تبات و نبات وهيخلفوا صبيان وبنات !

الإثارة ورسم الأحداث مكتوب بشكل رائع جدا لكن وماذا بعد بتثير في رغبات اجرامية تجاه نديم بصراحة

نديم لا يوجد منطق يخبرني أنه طبيعي عنده خلل نفسي وصعب علاجه يعني لازم يروح لطبيب ويخضع لعلاج مطول ويكون راضي وعايز يروح ويتحمل العلاج حتى يشفى إن شفي

أنا بتكلم بناءا عن المعطيات اللي قدامي تجاه نديم المغلق تماماً ولا يظهر منه إلا إنفعالات

فارديا أنا تفهمت ردود فعلها الفصل السابق هي مريضة بسبب أمها اللي زرعت فيها سمموها طول عمرها وولدنا لنسود .. والدتها عاشت واخدة دور الرجل طول عمرها تستلذ بإذلال زوجها الطيب وهو أيضاً كان خانع لها .. الآن هي تعكس الأمر بما رفضته في قرارة نفسها عن هيئة الأنثى كانت تريد لأمها بعض الخضوع تجاه والدها فلما جاءها نديم بكل عقده وقسوته الخالية من الإنسانية تقبلتها داخلياً .. تقبلت أنوثتها التي تشعر بها بين يديه ولو بهذا الشكل الغريب وتعاليم والدتها تقرع رأسها لتردد أنا أكرهه لا أريده لكنها داخليا تريده

هي مريضة بالمازوشية وتاريخ تربيتها يمكن أن يبرر هذا بسهولة

لكن نديم ليه السادية دي , تجلدها بالحزام على ظهرها يعني لو فار دمك الحامي يا حر عشان عرفت إنها هتهرب مع جمال كان فار قبل كده لما شالها الحارس على كتفه وعادي خليته ولا طردته مثلا ولا حاجة

غايته ايه من ده كله صلاح وبنات محمود النجار عايشين حياتهم ومش عارفين باللي بيحصل يبقى انت بتشفي غليلك في واحدة ملهاش صلة بيه مالا بأخ مش شافته طول حياتها

مش متعجبة ان حال العائلة بالتفكك الرهيب شيء مريع إن كلهم عارفين غاية ساري من أسما وساكتين مخروسين يا بشر حد يثبتلي فيكم غير غروب إنه غير مشوه أو أنه بيقاوم اللعنة

أماني انتحرت ماشي ممكن ناس يقولوا لو كل واحدة خطيبها سابها حصلها كده كان زمان مستشفيات المجانين بقت أكتر من المطاعم .. لكن ممكن يحصل لما تكون أماني كانت بريئة جدا نظيفة جدا وجاتلها خيانة مزدوجة ممكن تفقد عقلها خاصة لو كانت نبتة صالحة وسط عائلة مسمومة مفيش حد هيقدر يسندها في ضعفها يعني قيمها ونقاءها اللي محمود النجار لوثه بعملته هما اللي كانوا بيسندوها ولما راحوا خلاص بقت ورقة في مهب الريح

لكن نديم يبقى مستقري في التعليق دائماً عنده .. ليه يا نديم ليه ده كله , مش أعتقد إنك جربت جلد ست في حياتك ولا شفت حد يعمل كده ليه لجأت لهذا مع فارديا وبلييييييييييييييز ما تقولي غيرة والكلام ده , أنا هرضى لما تتعاقب عقاب شخصي يعني في جسمك وتعرف يعني ايه انسان ممكن الواحد يكون بلا حول ولا قوة عشان تشوف الحياة على حقيقتها مش بس ذئاب ونعاج غالب ومغلوب

وفارديا وكبريائك الزائف يا بنتي انت بتسعي لمرمغتك في الوحل من البداية من وقت ما ترفعت عن طلب المساعدة من أخوكِ وقبلت بنديم كزوج ووقت لما رفضت تردي عليه في التيلفون ودلوقتي جرجرت جمال الشاب البسيط اللي وراه عائلة بأكملها تعتمد عليه عشان تحافظي على كبريائك طيب سلميلي عليه من فضلك كبريائك وقوليلي هو باقي منه تنتوفة صغيرة ؟

أنتِ مشوهة مثله ولا أعلم كيف ستطبب زوزو وتعالج هذا التشوه بقلمها الفريد لنتقبل اجتماعكما من جديد رغم أني أتمنى من كل قلبي أن يتم الفراق لأني لا أجد نقاط للعودة في حاجات كده تحصل متقدريش ترجعي بعدها عشان على الأقل تقدري تبصي لنفسك في المرآة بدون خجل

ساري تصدق إنك صعبان عليا عن نديم رغم كل أفكارك المنحرفة بس حاسه إنك دخلت في الغريق ورغم إن الكل بيتفرج على أسما الآن على إنها الضحية أنا شايفة إن الرؤية كاذبة وإن اللي دخل في الغريق انت مش أسما وهتشوف

غروب قلبي عندك الثقل على صدرك حسيته جثم عليا أنا كيف بتعيشي في بيت مماثل وما تصابي بالجنون انتِ بطلة إنك محافظة على صحتك النفسية لحد دلوقتي رغم كل الخراب حولك والله بطلة بجدارة يا حبيبتي لدرجة تلجأي لرجل عشان يتزوجك وتخرجي من الجحيم ده اليوم شفت غروب البنت اللي بتقاوم كل ده من طفولتها وتعبت من المقاومة وتريد الحياة في سلام

نضال هل تحب غروب حقاً أم تتعلق بها لأنها أخر بقايا الحياة في معتزل آل فهمي المخيف تريدها كنافذة ينفذ منها أوكسجين الحياة إليك , تشعر معاها بإنسانيتك بدون رتوش

أنتظر القادم ماذا سيفعل نديم لفارديا بعد انتحار أماني وهو لم يؤخر شيء لم يفعله حتى الآن

وأسما وساري أنتظر القادم بينهما بترقب وتوجس لا أنكره لكني عندي أمل في أسما وأمل كبير أن تعيد إليه قلبه المسلوب وحينها فقط لن تحتاج إلى حماية لأن موازينه ستنضبط من جديد

فصل رائع زوزو و اعذريني في انفعالي فأنا اعتدت أن أسكبه كما هو ولأنك تحبينه هكذا أيضاً

في أمان الله يا مستبدة