باقي لهم في قلبي الطاهر حنين/ للكاتبة روزيلا

[لامارا]

البارت ( 9 ) ....




همس بنت نايف ...



في أحد أحياء جدة .. فله مكونه من طابقين ...


وقفت جنب شباك الغرفة المطلة على البوابة والشارع ..وفاتحة الستارة فتحة

بسيطة ..والغرفة غارقة في الظلام ..أو بالأصح الشقة بالكامل غارقة بالظلام ..

وماسكة الجوال بيدي : ايوه كملي ...

قالت سمارا : بس .. ذا اللي صار .. قلت طيب يعني ماوضح لكم وش الحكاية ..

بس مشكلة وصارت وماتوا وأنتهت القصة !!

قالت سمارا : نو نو حاول جابر .. ولاعطاه فرصة .. كل اللي يبيه يفتح صفحة

جديدة وبس .. وبسخريه .. هه صفحة جديدة والقديمة ماتسكرت ..

قلت بتريقة : الله يامن يسلمني ذا الشايب وبكم بوسة مني وهو خار الاولي

والتالي ..

ضحكت سمارا بقوة لدرجة بغت تفقع أذني .. وبعدت السماعة ورجعتها مرة ثانية

قلت باستهزاء : بشويش ماما بشويش .. الناس تطورا الأ أنتي مانتي ناوية

تطورين الضحكة ولا ترقينها .. فقعتي أذني ..

بالقوة سكتت وهي تأخذ نفس وقالت : انتي وين رجلك عنك .. والله ماهو بحولك

يا أم الشيبان ..اجل بوسة الله يقرفك ..

قلت وأنا الف خصلات شعري بدلع : والله ذي الطريقة اللي جابت برأس بعلي ..

لكن يظهر مفعولها قرب ينتهي ..يبغالها تجديد ..

قالت سمارا باستهزاء : لا دخيلك .. تكفين يابرنسيسة .. ارحميه من بوساتك ..

ماهج منك من أمر خير .. ارفقي بقلبه ..

قلت : تتمسخرين سويم ... يرحم زمان أول ..

..لحظة سمارا ..

سكت يوم طالعت من الشباك وشفت سيارة زي سيارتة قلت بسرعة : قفلي باي

باي شكله جاء ..

قالت بسرعة : من اللي جاء... بنتتت ..

ابتعدت السيارة عن البيت وأنا أتافف : لا ماجاء اووووف ..

قالت سمارا : من هو ذا ؟؟؟

قلت بقلت صبر : بعل العافية .. فصووول ..

ضحكت سمارا : ههههه ياحراام وين هو عنك يالمسكينة ..

قلت بقهر : طلع يسربت .. له فترة على هالعادة .. مايرجع الا أخر الليل ..

قالت سمارا بهدوء : يابنتي عااادي .. خليه شوي يغير النظام الصارم اللي عايش

فيه .. خليه يتنفس ..

قلت وأنا مصرة على رأي : لا يعني لا .. نحن ماشين على نظام .. يمشي عليه

زينا الله لايهينه .. قال مافي شغل أبيك تتفرغين لي ولبيتك وعيالك .. قلنا أوكي

سمعا وطاعة .. ومشينا فترة على ذا النظام وبعدين يسحب علي !!.. لاا وكمان

ذي الخرجات بطلعها من عيونه .. بس خليه يجي .. ومايقهرني بعد الا مشاويره

اللي تبدا العصر الى الليل .. كل يوووم .. وين يروح فيه ... وأنا كأني زينة في

البيت .. أستنى جنابه يشرفني بطلته البهية ....

قالت سمارا : هدي هدي .. كل شي بالتفاهم يصير ..أسأليه بهدوء مو بهجوم

وكأنة في محاكمة سمعتي ...

قاطعتها : سألته وأنا مافي أروق مني .. قال كالعادة مع راشد .. ايش يسوي مع

ذا الراشد ؟؟؟

سكتت سمارا وجيت بكمل الموال بس سكت يو م شفته دخل من البوابة ..

وأصيح في سمارا : جاء ياسمارا باي .. وأقفل الخط بسرعة .. وأعدل الستارة ..

وأرمي حالي على السرير .. واتغطى بالبطانية .. وقلبي بيخرج من مكانة ..

حاولت أهدي نفسي .. ريلااكس هموسه ريلاكس ..ومع شهيق وزفير غمضت

عيوني وسويت حالي نايمة ..

خمس دقايق مرت .. وسمعت فتحت الباب .. دخل بهدوء وحسيته اقترب من

السرير وولع الابجورة اللي في جهتة ..

قال بهمس : هموووس .. حبي .. بنت نايمة .. همس ..

مارديت مطنشة وكاتمة على أنفاسي ..

جلس عالسرير وشال البطانية بشويش وأنا معطيته ظهري مسك ذراعي وهزني

بشويش : يابنت ردي .. معقولة نايمة ..قومي بسولف معك

قلت وأنا مسوية حالي غارقة في النوم : هممممممممم ..

قال بصدمة : نايمة .. الساعة 11 وهمس نايمة لا صراحة تكتب لك في التاريخ

..وش فيك تعبانة .. وحط يده على جبهتي .. ورجف جسمي من دفات يده ..

رديت وأنا أتافف : همممم بعد عني أبي أنام .. وسحبت البطانية وتغطيت فيها ..

وفتحت عيوني وأنا مبتسمة .. لسى باقي ماشفت شي ياحبي... صبرك علي يا أبو

السهر ..

والله لاخليك تسولف مع الجدران..

قام من فوق السرير وهويقول خلاص نامي ..وراح وشوي سمعت صوت باب

الحمام انفتح وبعدها انقفل وسمعت صوت الموية .. استنيت دقيقة تحت البطانية

وبعد ماتأكدت من عدم خروجه .. قمت بسرعة وأنا أتلفت أدور ثيابة ..

ولقيت التيشرت حقة ومسكته وأنا أشم ريحته .. بس مافي الا ريحة جسمة

..وشلت بنطلونه وفتشت في جيوبه ولا لقيت شي ..ورميتها بسرعه يوم تسكرت

المويه.. وأنط بسرعة عالسرير بغى ينكسر بي .. وتغطيت بسرعة .. شوي وطلع

من الحمام وبعد دقيقة .. بعد مابغى يكسر الدواليب وهويقفل ويفتح .. رمى حاله

عالسرير .. ومرت دقيقة ودقيقتين ونص ساعة وساعة والوضع هدوء ..طفشت

تحت البطانية وأنكتم نفسي ..فتحة فتحة بسيطة اتنفس منها .. ياصبر أيوووب ..

وبعدين يعني .. الى متى أنتظر .. ماجاني نوم ولو قمت أخاف يحس فيني ..

وما ابغى أخرب الخطة .. يالله أنتظر وش وراي ..

جلست ساعة ثانية .. وضاقت فيني .. رفعت البطانية عني بشويش .. ولفيت

لجهتة .. لقيته راقد وشكله واصل للحلم المئة بعد ..ابتسمت بانتصار .. ذي أول

انتصاراتي والجايات أكثر والفوز حليفي هههههههههه..

ويادوب جلست عالسرير وجيت بقوم .. وشهقت بقوة .. يوم انسحبت من ذراعي

من الخلف وانرميت عالسرير ..

وهو ماسك ذراعي : لااااا يالكذوب راقدة هااااا .. وأنا المسكين جاي كلي شوق

لك والقى العيال عند أمي تحت .. قلت بس الليل سهره صباحي ..

وأثاريك ناويه على نية يالزعول ..من يوم أعرفك وأنتي ترامين بذا البطانية

ماتخلينها عليك .. حتى في عز البرد ..وقرص خدي بقوة وكمل .. واليوم متغطيه

كللك بالبطانية .. وبغمزة .. عن مين متغطيه ياحلوة هاااا ...

سكت وأنا متورطة ... يالليل الــــــبــــقـــررررر ....



*****************




صعب ...

بعد ثلاث اسابيع..

عصر الثلاثاء...

رجعت من العمل للديرة .. كنت طوال الاسبوع اللي فات وأنا مستلم ..

وصار عندي أسبوع أجازة .. وجاني أتصال من عيال عمي حسين مخططين على

رحلة بموافقة أبوي ..مدام أنها فترة صيفية والعيال معطلين ..

وخططوا على أنه بكره يتحركون ....

خرجت برأ عند أبوي .. جالس في الحوش بروحه ويسبح ويستغفر ..

وجت وعد بالقهوة ..وأبوي سأل وهوياخذ الفنجال منها : أنت وراك شي اليوم ؟؟

قلت مستغرب : لاااا .. ليه ؟؟

قال : أبغاك تروح معي حول أبو زايد .. ولده أعفو عنه .. وبروح أهنية ...

قلت بفرح : الله يبشرك بالخير .. متى صار ذا الكلام ؟؟

قال : من قبل أمس .. سعوا فيها أهل الخير .. وتنازلوا أهل الميت عن دم ولدهم ..
قلت برضى : يارب لك الحمد .. الله يجزاهم بالجنة .. ويجعلها في موازين

حسناتهم ..ويجبر مصابهم في ولدهم ..

قال أبوي بتنهيدة : يابوك فقد الولد صعب ويكسر الظهر .. وش عاد لو مقتول ..

ولا قاتل معروفه نهايته تحت يد السياف ..كلها توجع .. وماترحم ..

قلت : صدقت يوبه .. هيا أن كان تبغانا نتيسر الحين .. مشينا

قال : ايو الله ماورانا شي .. عاوني وأنا ابوك .. وهو ماد يده ..مسكت كفة

وعاونتة للسيارة الموقفة داخل الحوش ..

وجيت أبركب والا وعد متمسكه فيني : عميييي تكفى قبل ماتروح تعال شوف

العيال .. مارضوا يشترون اغراضي من السوبر ماركت ..

قلت وأنا اقفل باب السيارة : أخوانك ذولا ماأكلوا من عقال أبو فهد .. الا لو أنهم

ذاقوه كان أمداهم هبت ريح وقت الشغلة ..

قالت بمكر : طيب ذوقهم من عقالك .. يمكن يفيد فيهم ههههههههه..

دفيتها قدامي وأنا أدخل البيت : أقول عن شغل المحارش لاتذوقينه قبلهم ..

دخلت عليهم وهم جالسين يفصفصون ويتفرجون في مباراه.. وأعطيتهم كم كلمة

حلوة .. تبقى في عقولهم ماتنسى ..

وخرجت برا لأبوي .. بس أنصدمت ب ال أف جي الواقفه بجهت قسم الحريم ..

وصوت بنت وهي ترد التحية لأبوي بثقل .. وقفت عند الباب وأنا معطيهم ظهري
..
توقعت أنها من بنات عيال عمي .. بس لمين ذا السيارة ..

بس الصدمة لما سألها أبوي عن اخوانها وينهم.. قالت بنبرة مثيرةحسيت فيها

رقة : يـــاجــــدي .. ماتعرف الشباب وحالهم .. سهر بالليل ونوم بالنهار ..

استمعت لبقية الكلام وانا مبلم ..

قال أبوي بعتب : وراهم ماجاء واحد منهم معك .. لكن من ذي الدشرة للصبح ..

اليوم ماجاء عبدالله الا الفجر هو سلطان ولد فايز .. كانوا مع أخوانك ..

قالت : صحيح .. كانوا عندنا في البيت.. وبهدوء ..وترى ياجدي السواق ثقه ..

ماينخاف علينا ونحن معه..

قال أبوي : الله يستر عليك ويحفظك .. المهم ترى مالك رجعه الا بعد ماتعشين

عندنا .. وندق على أخوانك يجون ..

قالت برقة وهي تترجاه : لا تكفي ياجدي .. والله تعبانه ومافيه شدة ..

هذي رجعتي من دوامي وطوالي عندكم .. حتى راما جابها عمي أمين معه

ولامريت للبيت .. تكفى خلها مرة ثانية ..

قال أبوي : طيب مسموحه ذي المرة .. لكن أصبري الحين وراي مشيوير صغير

بخلصة وأعوّد لك .. لاتروحين..

تراجعت لداخل البيت .. وأنا أفكر .. طلعت البنت لسطام ..

وشوي سكت منصدم .. البنت جاية مع سواق .. وبغضب .. سلامات أيش شغل

الحضر ذا ..وبعد وحدها .. وأخوانها مو معها ,.. ياقلّت الحياء ... ماعد بها
مراجل ..

سمعت صوت بوري السيارة .. وعرفت ان أبوي خلص هرجته معها ..

خرجت والا هي واقفة ومعطيتني ظهرها وتكلم السواق ..وتأشر على كراتين

راصها جنب البيت : عم أمين الله يرضى عليك رصها هنا وبعدها توكل أنا بدق

عليك اذا خلصت بس خلك قريب .... ودخلت داخل ..

جفلت يوم دق البوري مره ثانيه .. التفت لسيارتي والا أبوي يأشر لي بعصاته ..

رحت له وركبت السيارة وقفلت الباب بقوة .. ومشيت ..

قلت بسخرية : ماشاء الله وبنات سطام يمشون مع سواويق بروحهن ..

قال أبوي بهدوء : الله يهديهم ..

قلت بغضب : الله لايهديهم .. ايش قلت الحياء ذي .. ماعد بها مرجله ..

ماعندنا غارية على حريمنا.. نطلقهم في الشوارع لاحسيب ولارقيب..

المصيبة ماشين في مناطق مقطوعة .. لو تعطلت بهم السيارة .. لو تعرض لهم

ابن حرام ..لو السواق بنفسه طلع ابن حرام ..ايش يصنعون ذاك الوقت ..

قال أبوي بمحاوله لتهدئة غضبي : ان شاء الله ماعليهم خلاف.. وترا سواقهم

انسان يخاف الله ومعه سلاح لوقت الحاجة .. جانا قبل ذي المرة .. لكن كان معه

جابر الله يصلحه .. ومدري وش فيهم ذي المرة .. لكن بعون الله مايتعودونها ..

قلت وأنا أشد في دعس البنزين :: ايش يعني يخاف الله .. ترأ الشيطان للحين

مامات ..والمصيبه أن معه سلاح ..

قال أبوي : أقول خفف من ذي السرعة .. لاتذبحنا .. وبعدين أذا جو راجعين

برسلك ولا برسل معهم واحد من العيال .. مابخليهم لحالهم ..وشو بعد .. اللهم صلي على

محمد ..ايه تذكرت دق على أختك طيبه خلها ترسل ولدها نواف وساره بنت

فايز عندنا للبيت .. مطلوبين من بنت سطام الصغيره ..

قلت بهدوء : أبشر ..

سكت وأنا متكدر .. وصدري ضايق من هالتفاهات اللي تصير ..





********************

يتبع......

[لامارا]

سمارا .....





أحاول قدر الامكان أني أوثق العلاقات مع أعمامي ..

بعد عشانا عند عمي صالح ..حسيت بالرضى من التقدم اللي صار ..

طلع لنا أبوي نايف بعد عدة ايام ليقابلهم .. وفعلا ً تم اللقاء بينه وبين جدي

وأعمامي ..وعملوا له عشا في بيت جدي عبدالله ..وكان سعيد به الشئ ..وتمنى

لو ان أبوي أتخذ هالخطوة قبل وفاته ..لكن أنت تريد وهو يريد والله يفعل مايريد .

أخواني طبعاً نزلوا لجده كلهم .. مابقي عندي غير رائد وجابر .. معطلين ...

وجابر الحمدلله تم قبوله في الجامعة .. ورائد على ماهو عليه.. مافي شئ تغير في
حياته .. والاثنين أندمجوا مع عيال عمي .. سلطان وعبدالله .. وتكررت اللقاءات

بينهم أكثر من مره ..

أما عني أنا ... صار بيني وبين شملاء تواصل .. ورحت لهم مرتين .. عن جد

هالادميه .. مره طيوبه وحبوبه وتدخل القلب ..

أما جدتي أم فهد .. أمممممممم أيش أقول عنها ؟؟ انسانه غامضة .. وفيها

نباهه وفطنة .. مع انها كبيرة في السن .. وتحس أنها تفوت بعض الاشياء

وتنساها لكن مع كذا ينخاف منها .. حاولت أتقرب منها .. أسالها عن حياتهم

زمان .. وحكت لي عن حياتهم لكن بحذر .. وتحاول ماتتطرق للامور ثانية غير

عيشتها مع جدي .. واكتشفت شي ثاني عنها أنها قصيميه .. أصلاً واضح من

لهجتها ماشاء الله .. بس مازالت محتفظة فيها مع انها تزوجت وهي بنت 13

.. يعني غيرها كان نسى اللهجة وأندمج مع اهل المنطقة في لهجتهم .. بس هي

متمسكة جداً بكل شئ متعلق بديرتها .. حلو حلو .. نقطة مهمة هالاهتمام يصب

في مصلحتي .. عشان كذا أرسلت طلبية .. لمزرعتنا في القصيم .. مزرعة

صغيرة مشتركة بين أبوي سطام ونايف .. يرسلون لي من تمور المزرعة ..

وفعلاً أتصل على العم أمين سواقنا .. وخبرني عن وصولها .. وأخذتها عذر حتى

ازورهم .. اتصلت على جابر وأنا في العمل ولارد .. وزدت اتصلت على رائد

ولارد ..دقيت على تلفون البيت وردت على الخدامة وقالت انهم نايمين ..

اذاً مالي الا السائق .. دقيت عليه وبلغته يجيني في العمل ومعاه راما والاغراض
..
وارسلت رسالة لجابر اني رحت لاعمامي ..

وصلت عندهم بعد صلاة العصر وراما نايمة في السيارة ومارضت تقوم نزلت يوم

شفت جدي عبدالله في السيارة الظاهر انه رايح .. رحت سلمت عليه وصار

يعاتبني على اني جايه وحدي مع السائق ..وانتبه لراما اللي صحيت وجلست

تطالع فينا من باب السيارة وهي تمسح على عيونها وعاااااابسه .. الاخلاق زيرو

عندها ..أشر لها جدي عبدالله ولاردت قال بابتسامة : وش فيها أختك الله يكفينا

الشر مادة البوز ..

قلت وأنا المحها وهي ترجع ترمي حالها في السيارة : نائمة الطريق كله .. ماجت

الا عشان أصحابها نواف وسارة ..

قال أنه بيرسل أحد يجيبهم لها .. وطلب مني ابقى للعشا عندهم ولارضيت .. انا

مقدر أطول أكثر من كذا .. لازم قبل المغرب وانا ماشية .. لاني مخططه أجلس

نص ساعة بس وأمشي ..




قراءة ممتعة ...

لاتلهيكم الرواية عن الصلاة ..


خــاتـمـة .... فِ زحام حَياتَكم استغفروا الله كَثِيراً ؛

فلا تَدرُون كَم من البَلآء قَد يَنزَاحْ عَنكُم ..~!!

[فيتامين سي]

السلام عليكم ورحمة الله وبركاته
تسلم يمينك روزيلا بارت رااائع خفيف الظل لكن مافيه تقدم
كبير بالأحداث
همس
ياحبي لك هموسه هههههه مسويه كلب بوليسي تشمشمين
في ملابس زوجك تطمني زوجك ماهومثل ماتظنين زين مامسك
وإنت تشمشمين في ملابسه ههههه فاشله في التمثيل لاعاد تعيدينها

سمارا
مصممه على هدفها لكن ما أظن أحد بيقول لها الحقيقه إلا
لوسمعتها بالصدفه من ناس يتكلمون في موضوع جدها
محمد وأخوه حسن بدون مايحسون بوجودها

صعب
عكس إسمه أشوفه سهل وطيب من اللي عرفته عنه وغضبه
من سمارا لجيتها لهم مع السواق ماألومه فيه هومعه حق
الطريق مقطعه ولوسارلهم شيء كيف راح يتصرف السواق
غير إنه مثل ماقال الشيطان مامات ومثل مايقولون حرص ولا تخون
أظن هو اللي بيرافق سمارا في عودتها وأكيد بيسمعها كم كلمه
ويمكن يطلب منها ماعاد تجي لهم مع السواق لوحدهاويمكن يكلم أخوانها في هالموضوع
شكرا لامارا على الإنتقاء الراقي و النقل المميزوعلى الدعوه
لقراءة روايه بهذا الرقي لاخلا ولا عدم منك يارب

[dorga]

جميل جدا بدية جميلة ورائعة.. سرد سلس استمتعت باللهجة اكثر.. مثقنة بشكل جميل وممتع..شكر للكاتبة روزيلا موفقة..
شكرا جزيلا عزيزتي لامارا على الكلمة الجميلة والطيبة في حقي..
موفق بإذن الله ... لك مني أجمل تحية.

[لامارا]

البارت ( 10 )...




سمارا .....




وصلت الساعة 5 ونص وجدي ماجاء... ياربييي لازم أمشي

الحين .. جت شملاء بصحن تمر من اللي جبته لهم .. وقدمت لأم

فهد ..اللي بغت تطير من الفرح .. يوم دريت أنه من القصيم ...

وتشكرتني ودعت لي ..

قالت وهي تأخذ تمر من الصحن : ايه ذا التمر الزين ..تسلم

يمناتس يابنت سطام يوم انتس ذكرتيني بذا التمر ..

تاولت تمر من الصحن اللي أمامي اللي جابته شملاء وقلت :

بالعافيه يومه وأن شاء الله كل شهر بيجيك مثله وأزود ..

قالت : لاتكلفين على نفستس وأنا امتس ..ذا اللي جبتيه يكفينا

سنة .. الله يرحم أبوتس ويجعلها في ميزان حسناته..وبتنهيدة

..ايه يومه ذكرتيني بريحة اهلي ..لي سنين مبطي عنهم ..

قلت : ليه يومه وراك مازرتيها .. والله ياروحةُ لها ترد الروح ..

قالت : ادري .. تعلميني بديرتي .. لكن الشكولله ..كبر السن شين

وأنا امتس ..حتى عزا اخوي مارحت له .. الله يرحمه يوم اني

ذكرته ..

قلت بأسف على حالها : الله يرحمه .. طيب تقدرين يومه بالطائره

تروحين لها .. وماهي صعيبة عليك نص ساعة وانتي هناك ..

قالت شملاء :عمتي صيتيه ماتقدر في الطائرات ينخفض عليها

الضغط .. وتنكتم ..مره وحده جينا بنسفرها بالطائرة .. بغت

تموت علينا .. وهبطت الطائرة هبوط اضطراري ..وودينها

المستشفى ومنعها الدكتور من السفر ..

قالت أم فهد : ماعد بوصلها الا وانا مكفنه .. وصيتي لهم

يقبورني بديرتي ..

قلت : الله يطول بعمرك يومه .. وان شاء الله يمد بعمرك

وتوصلينها على رجلينك بعد..وأنا أطبطب على رجليها ..

قالت : يالله حسن الخاتمة وش ابغى أكثر من ذا العمر ..ماجاني

من هالدنيا كفاني ..

قطعنا جدي عبد الله بدخلته علينا وهو يتعكز على عكازة : وش

فيك يامره على سيرة الموت .. كل ماجيتك وانتي تشكوين ..

السلام عليكم ..

قمت له وقامت شملاء ونحن نرد تحيته ونعاونع عشان يجلس ..

قالت ام فهد وهي تتعدل بجلستها بعد ماكانت متكئه على مسند

اليد : مابقى من هالعمر مثل ماراح .. ماحد بيظل على حاله

يالشيبة ..وبسخريه ..أما انت حماك الله ماتسنك باطاً تسبدي

بشكوايس ..

قال جدي وهومسوي حاله متفاجئ : أنا .. لا والله ماصدقتي بذي

..لو اني اتشكو ماكان امداني اتحرك .. كان الحين فارشا فرشتي

جنبك وأون ..وبمغايضة .. لا وبعد أبشرك تراني خطبت في بنية

لي .. ازين منك .. وبعرس عليك يالعجوز ..

قالت باستهزاء وانت بك شدة عالعرس .. بتفشل بعمرك لا منك

اعرست ..

يااااا فشلتيييييي من سواليف هالشيبان ماكأننا جالسين معهم ..

لفيت وجهي وأنا اضحك عليهم .. وشملاء ماسكه نفسها بالقوة

لدرجت وجهها حمر واشغلت نفسها بالفناجين ووعد فحطت من

الغرفة ..

دق جوال جدي واعطاه لشملاء عشان تفتحه له واخذه منها : ايوااا ..وين

ساااري .. خلاص ..الله يحفظك .. وداعة الله ..

قالت جدتي / من هو ذا اللي كلمك ؟؟

قال جدي : ولدك يعني من بيكون .. يقول وراه مشوار بيقضيه ويجي ..

مدت شملاء القهوة لجدي واعطته من التمر وهي تقول : ذوق ذا

التمر اللي جابته سمارا .. ترااه زين ..

اخذ تمره وهو يطالع لجدتي ام فهد بنص عين : من فين جبتي ذا

التمر .. واكل حبه .. لاوالله انه زين ماشاء الله ..

قلت بابتسامة : ذي من مزرعتنا بالقصيم ..

قال : ايواااااا قولوا من اول ان بها سيرة القصيم ..

وأنا اقول وش فيها ذا العجوز مشتطه .. ونافشه ريشها علينا ..

اثرك جايبه لها من ديرة اهلها .. والتفت لجدتي .. اربك مازلتي

تبغين اقبرك فيها ..

قالت بزعل : ايه بتقبروني وانتم ماتشوفون الدرب ..


ضحكت عليهم وضحك جدي وهوناوي يرفع ضغطها وقال :

بتخيسين يامره ماوصلنا بك لها ..ازين لك نقبرك هنيه ..براااد

وارضا زينة .. وقريبة مني لابغيت أدعي لك وازور قبرك ..

قالت بقهر : حتى لو خست تراني ميته .. ومابي أرضكم ذي

شبعت منها ..من يوم أني جاهل وانا فيها ..ودوني لديرتي وبس

.. واذا مابك الحيله اقعد مكانك وولدي صعب يقبرني بها ..

ودعاك واصل لرب العباد لامنك ذكرتني .. ما أحتاج اكون قريبة

منك .. هذا أذا مافطست قبلي ..

قال : والله ولدك صعب تحت شوري ..اذا قلت له كلمة قال سمعاً وطاعة
..ومابيعارضني فيها ..

قالت بنبرة هادئة : ولدي صعب حقاني ..ويعرف أن الوصاة لزوم ينعمل بها ..

لو بها موته .. فديت طاريه ماقد عارضني بطلب طلبته منه .. ولاقد عصاني

..ويدور رضاي دواره .. الله يطول بعمري وأشوف ذريته ..

عم الهدوء الغرفة لدقايق حسيتها ساعات .. وشملا منقلب وجهها .. وجدي

مسرح وهو يمسح على لحيته وهو بعالم ثاني .. وجدتي أم فهد تتأملني ..

وأنا انقلب وجهي أحمر .. الله يصلحها ماني لوحة فنية تتاملها .. ابتسمت لها

ابتسامة غبية مدري كيف طلعت مني .. وردت لي الابتسامة ولفت تتطالع بشملا

اللي تعذرت بالشاي تروح تسويه ..

قال جدي بعد فترة صمت : أقول يابنتي .. ما أخذتي اجازة من دوامك لبكرة ..

قلت : والله ياجدي مارضوا حاولت فيهم وماطاعوني ..وبحاول فيهم بكرة ..

استئذنت منهم بمشي .. وقال جدي : وقفي بأزهم على واحد من العيال يمشي

معكم ..

قلت باستغراب : ليه يوبه ..

قال بصراحة :أخاف عليك تمشين لوحدك والدنيا بدت تظلم ..وثاني شي لا

تعودينها وتجين لي لحالك محد معاك من اخوانك ..أنا مارضى بذا الشئ ..أنتم

مهما كان عارنا .. ولا هو من سلومنا بناتنا يمشون مع أغراب ..اذا بغيتي تجين

ومافي أحد من أخوانك يجيبك .. ابشري والله باللي يجيبك ..أعمامك وعيالهم من

أكبرهم ال أصغرهم تحت امرك ..أنتي اطلبي ونحن نلبي.. لكن تروحين وتجين مع

سواق ل والله .. أنا ما أبغاك تزعلين علي وتأخذين في خاطرك مني .. انا كل اللي

ابيه مصلحتك والشي اللي في صالحك ..وممشاك مع السواق لوحدك مايجوز

ومايرضيني ان كان تبغين رضاي ....

قلت بضيق وضح في صوتي ولبسي للعباية : يصير خير ابشر باللي يرضيك ..

يالله اشوفكم على خير ..

سلمت عليهم وطلعت ناديت على راما .. وجت وركبنا السيارة وقفلت الباب بقوة

..تستاهلين تستاهلين .. أنتي اللي جاية تراكضين على شانهم .. وفي النهاية

اعطاك وداعية محترمة .. مانبغى بناتنا يمشون مع اغراب .. ومن متى صرت من

بناتهم .. مالي يومين من يوم شفتهم وبدأ شغل التحكّام .. يحسبوني باأرضخ لهم
..

لفت انتباهي واحد جالس يكلم العم أمين وابتسم وبعدها مشى وركب السيارة اللي

ورانا .. قلت للسواق : عم أمين وش يبغى ذا منك ؟؟

قال وهو يحرك السيارة : واللهي يابنتي ذا الزول بيقولي أنا بمشي وراكم ..

عشان يبغى يعرف بيتكم ..

اهااااا ذا مرسال جدي .. شكله ولد شملاء ..

مشينا وأخذنا ساعة في الطريق ويوم وصلنا لابها وهو مازال ورانا .. فكرت أرفع

ضغطة في الدواره ورانا . اتقضى كم شغلة قبل ما أروح للبيت ومنها اطفره ..

زي ماطفروني ورفعوا ضغطي ..ويوم فكرت شوي .. يابنتي بلاه هالسخافة ..

الرجال ما ضرك بشى .. ايش شغل البزرن ذا ..عالبيت أحسن ..

وصلنا البيت وقرب سيارته من الباب وودع السايق ومشى ..

وانا كملت طريقي وفتحت الباب ودخلت .. نزلت عباتي وراما راحت جلست قدام

التلفزيون .. ورحت أوضي لصلاة المغرب .. استغفر الله .. اذن في الطريق ولا

قدرنا نوقف .. وتأخرت في الصلاة.. قلت لراما تضعف صوت التلفزيون .. وأخذت

السجادة وفرشتها وصليت .. سلمت من الصلاة والتفت يساري لجابر اللي جلس

عالصوفا وهو لابس ثوبه .. وشكله مو رائق ..ابتسمت له شكله دوبه صاحي من

النوم والنفس شينة ..

قلت وانا انزل جلال الصلاة : صح النوم شكلك الحين صاحي .. خلاص اصبر

بروح اسوي لك قهوة تصحصحك مزبوط ..

قام وهو يقول بصوت غليظ : تعال المطبخ بكلمك ..

يااااا الهي .. أخذت نفس ومشيت وراه ..

دخلت المطبخ وعلى طول رحت مسكته وسلمت على راسه وأنا أتأسف منه : حقك

علي يا ابو سطام .. أدري أنك زعلان علي .. وسلمت على راسه مرة ثانية ..

عارفة أني أخطيت .. ومالي عذر أني مشيت بدون أذنك ..

قال وهو مبين عليه القهر : يعني عارفة أنك اخطيتي .. وعارفة ان روحتك بدون

علمي غلط .. طيب ليشت سوينها دام أنها غلط .. ليش تقللين من قدري .. كأني

جدار عندك .. مالي شور ولا كلمة عليك يالكبيرة .. يالعاقل ..

إذا سطام مات ترأ بعلمك ولده مازال عايش ..

قلت بهدوء وأنا أحاول أوضح له قدرة وقيمته عندي وأنه مهما كان يضل رجال

البيت وله كلمة وشور علي ويأمر على الروح .. حتى أعزز هالشي فيه ويكون

عنده ثقة بنفسه : الله يطول بعمرك ياجابر ولا هو تقليل بقدرك .. قدرك عالي وأنا

أختك ولا عاش من يقلل من قيمتك .. لكن أنا دقيت عليكم ولقيتكم نايمين وأنا

مضطرة أروح ..قلت بأرسل لك رسالة وكلها شغلة نص ساعة وراجعة ومادريت

ان جدي بيمسكني ويالله تركني ..

ضرب على طاولة المطبخ وانتفضت منها وبنبرة مرتفعة : نائم صحيني قولي قوم

ياجابر الله لايرحمك وصلني وبوصلك وأنا ما أشوف الدرب .. مو تروحين وانا

وراك مثل اللوح ..وش يقولون عنا الناس مات سطام وبناته انفلتوا في الشوارع

مالقيوا لهم رجال يوقفهم .. اقرب القريب اعمامك وش بتكون صورتي قدامهم

وأنتي رايحة لهم من دوني والا من دون واحد من أخوانك ..

حسيت بصدااااع بدأ يتخلل رأسي .. وتوتر من كلام جابر .. دوبي انتبهت لغلطتي

..ماني في جدة حتى أروح واجي بكيفي ..

مسكت جبيني وانا امسح عليه قلت بضيق: وجهك ابيض يأبو سطام ويخسى من

يقلل بقدرك ويقلّ من شأنك ..وماهم بنات سطام اللي سيرتهم تتداول على كل

لسان .. أرقد وامن وأنا اختك ماتنعاد ذي الغلطة ..

رفع يده بتهديد : وقسم بالله ياسمارا تنعاد هالحركة البايخة ليوصل العلم لابوي

نايف وأنتي اكثر وحدة عارفته يكره الحال المائل ...

[لامارا]

وخرج من المطبخ .. وانا رميت حالي عالكرسي بانزعاج .. اوووووف الله لايعيده

من روحه .. أن شاء الله بس توقف على جابر وتهزئيه .. ولاتوصل لرائد يومه

من ذا الولد شري مايتفاهم الابيده ..

صحيح غلطت بروحتي لهم من غير ما اخبرهم .. لو اننا بجدة كان الوضع ايزي

.. لكن هنا والله المنطقة مقطوعة وغريبة علينا .. لكن جابر زعله كله على

روحتي من غير أذنه وهذا معه حق فيه ..

طلعت برا المطبخ وشفت انوار المجلس والعه .. يمكن جابر هناك .. قلت بروح

اطيب بخاطره شوي ..دخلت بس مو فيه ولقيت صحن ضيافه وقهوة .. ناديت

الخدامه وسألتها قالت أنه في رجال كبير جاء وطلب جابر .. وضيّفه جابر في

المجلس وبعدها راح الرجال وطلع جابر زعلان ..

غريبة من هالشخص اللي جاء .. وجابر ماله اختلاط بأحد من اهل المدينة غير

عبدالله وسلطان عيال عمي ..

طلعت لغرفتي بانهاك .. ورميت حالي عالسرير ..تعبانه مووت مووت موووت ..

ودي أنام ولا أصحى ..اليوم متعب بشكل فضيع .. غطيت في نومه حلوه وجميله

جداً .. وخربت علي الخدامة وهي تدق الباب وتفتحه فتحت نص عين وانا طافيه

مافيني افتح اكثر ..ودخلت وهي تصحيني أصلي العشاء.. قلت وأنا مخدرة: كم

الساعة ..

قالت انها عشرة في الليل وان رائد يبيني ... لاحوووول الظاهر وصله الخبر ..

قمت بتثاقل وأنزعاج .. استغفر الله فوّت صلاة المغرب والعشاء وماصليتها بوقتها
..

رحت الحمام وتحممت عشان اصحصح زين .. صليت ونزلت لهم .. ولقيتهم

فارشين سفرة عالارض ومجتمعين الثلاث راما وجابر ورائد عليها ..

قال رائد بمرح : حي الله ذا الوجه .. أقربي تعالي ذوقي من ذا الكبسة سوات

ايديني الله يسلمني ..

قربت منهم وجلست عالكنب وانا مالي خلقهم : وبس ذا اللي مناديني عليه وبعدين

من يتعشى على كبسه ..الناس تتعشى على خفايف حتى مايثقلون وقت النوم ..

أعطاني جابر نظرة يعني اني زعلان .. وقال رائد : انتي بس قربي وذوقي والله

ماتندمين .. قالت راما بضجر : تعاااالي تراني جايعة ومابستناك ..وجهت كلامها

للعيال .. اقولكم كولوا ترى بطني اوجعني وانا انتظركم .. وبعجلة حطت يدها

بالاكل .. ونطت ونطت وصاحت من حرارته ..ونحن ميتين ضحك عليها ..

راحت تجري للمطبخ .. وشوي وجت ومعها علبة فيها ثلج ومغطسه يدها فيها ..

قالت وهي مبرطمة : تعالي والله تجين وتأكليني ..

ضحك جابر عليها وحسيت بتفاؤل من ضحكته الله يسعده : ههههههههههه وانتي

بعد فيك حيل تأكلين بعد الحرق ..

قال رائد : ذي لوبها موتها ماتخلت عن الكبسه ههههههههه بينهم قصة عشق

..والمصيبة تزط الصحن كامل ولا بين فيها ..

قلت وأنا اقرب منها واجلسها عالسفرة : تعوذ من الشيطان ذي الامور ماينمزح

فيها .. وبالعافيه عليها .. ماأكلت الا من خير أبوها لاتقعد تمنن عليها ..

وبنظرة ترجي لجابر والكلام موجه لرائد .. هااا متجهز لطلعه بكره ..

قال بحماس : افاااا عليك .. لوبيدي اول واحد متيسير .. الطلعة فيها صيد ..

قال جابر لرائد : العيال بيجيبون معهم بنادق الصيد وبنروح نقنص .. والحلو أن

صعب مجهزلي خصيصا سلاح يحبه قلبك ..

سبحان مغير الاحوال ..ومبدل حال رائد وجابر .. تطور سريع ووين كنا وفين

صرنا بالاول ماكانوا طايقين سيرتهم .. والحين متحمسين يمشون معهم..

مر بقية اليوم بهدوء .. واليوم الثاني رحت للعمل ويالله ارخصوني صلاة الظهر

.. رجعت البيت .. ولقيت الخدامة مجهزة اللي وصيتها عليها من معجنات وحلى

والقهوة والشاي .. وعمي صالح كل شوي داق على اخواني وينكم فيه وليه

تاخرتم .. ماشاء الله عليهم مشوا من الصبح .. وبلغ جابر أن واحد من عيال

عمي ماجاء .. ويبغونا نمر عليه .. ويالله تحركنا من البيت الساعة 2 ..وتلقينا

ولدعمي فائز والظاهر اسمه خالد .. وركب معنا قدام وجابر يسوق ورائد ركب

ورا خالد وجنبه انا وجنبي الخدامة وراما في النص طبعا بين خالد وجابر ..

ورفعة ضغطه ليش تركب معنا .. وانت اخو ابو سعبوله مدري من فين جابت ذا

الاسم .. وانت مو حلو وع ياكشتك .. ونحن نسكت فيها ولا فاد .. ويوم التفت لها
خالد وأعطاها نظرة غضب .. احترمت نفسها ورجعت جنبي ماكأنها خالفت ..

وجابر يضحك عليها أنه لقي من يسكتها ..

اخذنا حوالي الساعتين في الطريق ..نزلنا العقبة وأنا أتشهد .. من اللي شفته

العقبة مو مزفلته والطريق ترابي وضييييق مايسمح الا بمرور سيارو وحدة ..

نزل جابر من السيارة وسلم القيادة لخالد .. وماشاء الله قدر يتحكم فيها .. وصلنا

نهاية العقبة وأنا احلف ان طلعتها مره ثانيه .. صراحة جنون اللي سويناه .. من

المجنون اللي سواها .. يعني قدروا البلدية يسون العقبة ليش مايكملون جميلهم

ويوسعون الخط ويزفلتونه ..

ومشينا في منطقة مهجور وخالية من السكان بين جبال شاهقة .. والارض

خضراء .. وقسم بالله كأني خارج السعودية .. ماتوقعت منطقه بها الجمال ..

دخلنا في وادي بقيادة خالد طبعا هو الاعرف بالمنطقه .. وصاكعنا بروسنا طول

الطريق .. والسبب اننا نمشي على صخور كبار .. واختفى الطريق الترابي ..

ياحسرتي على سيارتنا راحت فيها ..قطعنا الوادي بالمنتصف .. وطلع خالد على

منطقة شوي مرتفعه عن بطن الوادي .. ومشينا مسافة حق نص ساعة وشوي

ونشوف السيارات ويضرب خالد بالبواري يعلن عن وصولنا .. وبعدها بدأ أطلاق

نار من جهتهم .. ترحيب بوصولنا ولّ عليهم أذني بغت تنفقع من صوت الاطلاق

مع الصدى .. وجابر ورائد بغوا يتقطعون من الحماس .. وراما فقعت طبلت اذني

من الصياح ...

وقفت السيارة ونزلوا العيال وسمعت خالد يكلمهم يوقفون الاطلاق .. نزلت من

السيارة وراما متيبسة في السيارة تصيح .. حاولت أنزلها ورفضت .. جاها رائد

بعد ماسلم عالحاضرين .. حاول فيها وكنها هدت وتعلقت فيه وأخذها معه .. قلت

للخدامة تنزل الاغراض ورحت لجلست الحريم ..

جت زينه مسرعة وحضنتني : ياقلبي ياسمارا .. الحمدلله انك جيتي .. تعالي

شوفي المفاجاة اللي خبرتك عنها ..

فكتني ورحت سلمت على وعد جنبها وانا اقول : الله يكفيني شر مفأجتك ذي

وانتي متحمسه بها الشكل ..

قالت وعد : والله لتطيرين ماتوقعين من حلاوتها ... وهي تلعب بحواجبها ..

رحت سلمت على بقية الحريم ..

كان مكاننا على الوادي والجبل من ورانا و جلست الحريم تحت شجرة كبيرة بشكل

.. والرجال بجهه ثانية .. والسيارات حاطينها بالمنتصف بين جهتنا وجهتهم ..

قلت وانامستغربة حاجة : بنات ليه ماركبوا الخيام الا الان الدنيا بتظلم بعد شوي

ولا راح يبصرون ..

ضحكوا البنات بجنون .. وأنا أطالعهم بغباء .. قلت وأنا متشككه أني قلت كلمه

غلط : سلامااات .. قايله شي غلط .. ضحكوني معكم ..

قالت زينة وهي متقطعة من الضحك : هههههههههههههه ذي المفاجأه اللي

اقولك عنها .. ماااافي خياااام ..

قلت مستغربه : ليه نسيوها ..

قالت زهرة : لااااياقلبوش مانسيوها .. طال عمرك ذي أوامر جدي عبدالله .. يقول

أن تبوني أطلع معكم ماأبي شي يغطي عني سماء ربي ...

فتحت عيوني على أقصاها : كذاااااااابه .. وبغباء .. ننام كذا ماعلينا حجاب ..

انتي تقولينه صادقة ...

قالت شهد : يامسكينه الله يعينك على سهرة الليل ... اتحداااك ان نمتي ..

قلت بخوف : ومن قال بنام .. ليلي سماري .. عندي المصيبة اللي جايبتها معي ..

والله اللي مارقدتكم كلكم .. ماااتطيق الظلما .. هذا وأنا جايبه لها كشافات ..

قطعت علينا جليله يوم جت وسلمت عليها قالت: تعالوا بنااات بنقطع الوادي اللي

قدامنا ونروح الجهة الثانيه .. فيها مويه من أثر المطر .. تعالوا نلحق عليها قبل

ماتظلم الدنيا ..

قلت : اوكي بجي معك بس اعمامي ماسلمت عليهم ...

قالت وهي تسحبني بيدي : اعمامك لاحقه عليهم والعيال عندهم الحين دوبهم جو

من الصيد ..

جت وعد قالت أنا معكم .. أما البقية رفضوا قالوا بكره بيروحون لها الحين

تعبانين ..

مشيت معها وانا مستمتعة ببرودة الجو وبريحة الارض .. الظاهر جاء مطر عليها

قريب .. واضح من ريحة التربة .. مشيت شوي والا راما تناديني .. وقفت لها

لحد ماوصلت .. وسمعنا جدي ينادي ..وراحت له وعد .. وشوي ورجعت لنا

قالت: جدي يقول أرجعوا .. بتظلم الدنيا بعد شوي

قلت بخيبة : لييييه ..

قالت جليله :اقولكم امشوا ماعلينا خلاف معي كشاف .. وبس بنشوف المويه

ونرجع ..

قالت وعد : اما انا راجعه بيزعل علي جدي ...

راحت وعد وحنا كملنا طريقنا .. لحد ماوصلنا وطلعنا كم صخره.. وااااو مكان

يجنننن ..




*****************


: الظاهر ان بيجي سيل عالوادي ... المنطقة اللي هناك ماطرة .. والسيل أكيد جاي ..


: الله يرحمنا برحمته .. مكاننا زين حايد عن مجرى السيل ماعلينا خلاف ان شاء الله ..


: نبه على العيال لاحد يقطع الوادي ..




قراءة ممتعة ....

لاتلهيكم الرواية عن الصلاة ...



خاتمة ... الل?ُم إرّزقنا رؤيت? ، ۆ زيآرت? ، ۆ مجآورت? ، ۆ شَفاعته? ، ۆ صحبته? فيّ الفردوس الاعلىّ

[الل?م صلِ وسلَم وبارك علىّ نبينآ مُحمد وآل مُحمد]

[فيتامين سي]

	السلام عليكم ورحمة الله وبركاته هذا ثاني رد أكتبه كتبت رد وطار بارت الهدوء اللي يسبق العاصفه الله يستر من عناد سمارا وجليله الجد منعهن وظن إنهن سمعن الكلام والخوف من مفاجأت السيل لهن وحجزه لهن هذا إذا ماتعرضت حياتهن للخطر اللي زار جابر هو صعب وهو اللي كلم جده وقال إنه ساري أكيد راح لجابر وسمعه كم كلمه عن روحت أخته مع السايق لوحدها والطريق خطره لكن جابر ما ذكر هذا لأخته وخلا الكلام منه هو حتى مايصغر في عينها أم فهد ما أعرف سبب تعاملها مع بهذه الطريقه مع شملاء رغم طيبة شملاء معها لكن الأكيد إنها تخطط لزواج مصعب من سمارا تسلم يمينك روزيلا منتظرينك يعطيك العافيه وشكرا لامارا على النقل لاخلا ولاعدم منك يارب

[لامارا]

البارت ( 11 ) ....






خالد ....






فتحت عيوني بتثاقل والارهاق لاعب فيني ..وضوء الغرفة مزعجني ..حطيت ايدي

على عيوني وأنا ازفر بضيق ..تذكرت اللي حصل امس وزادت الضيقة بصدري..

انقلبت على جنبي وتغطيت بالبطانية وأحاول أنسى اللي صار ..ليش سمينا بانسان

الا لكثرة نسيانه .. اجل انسى يا أنا انسى وريحني .. ضاقت فيني ومل الصبر

مني ..أنا بشر ولي قلب مجروح .. ولا لقيت له دواء وطب .. وش عاد بيدي ,,

وش بسوي بحياتي .. وين بلقى توفيقي .. مازالت كلمت أبوي ترن بعقلي ( منيين يجيك التوفيق

وامك ميته غضبانه عليك ).. هه شفتم كيف حالي .. امي ( غ ض ب ا ن ه)..

صحيح كيف بتوفق في حياتي الزفت .. وحالي من سئ الا اسوء ..


قمت بهدوء مستغفر لربي .. انا مؤمن لقضاء الله ..وقدرته على قلب حال الا حال
..
توضيت وصليت لربي عله يشرح صدري .. تلفت باحث عن جوالي .. ولقيت

بقاياه.. بعد معركتي مع نفسي امس ..اقتربت ململم لاجزاءه.. و اعادت تركيبه

.. أكتملت أجزاءه مع كسر في الشاشه .. ونقص في بعض اجزاءه .. ولكن بعض

التحسينات من لصق او غراء يفي بالغرض ..هههه اكثر واحد متاذي مني

هالجوال .. بس مع كذا مخلص لي وعمره ماتخلى عني ..

جهزت أغراضي .. حتى الحق بأهلي ..فاأنا شخص اكره ارتباطي بأحد ..وامشي

على هواي ..بدون منغصات ..ولكن الورطة .. لما أكتشفت أن سيارتي معلنة

العصيان لرغباتي ..ولعنت خامس جد لها .. ماقلت لكم ..أن الحياة ماخذه حقها

بامتياز ..وأنا سعيييييييد لهذا الوضع ..اتصلت بعمي صالح .. فهو والدي

الحقيقي ..حلال ازماتي .. معين لي بعد الله في مجابهة الحياة بعد تخلي الاغلبيه

عني واولهم من ارتبط اسمي به ..

وخبرني عن وجود عيال عمي سطام بالقرب منا .. ومشيت معهم مرغم ..

وعلى سوالف بسيطة متبادله بيننا ..تسلمت دفت القيادة ...و حسيت بنشوة وأنا

امشي يسيارتهم .. بدون ما أسمع صرير احد المحركات أو توقفها فترة لا خذ

نفس ..بس مع كذا سيارتهم ذي حضرية .. ماقد مشت في ارض جلفة مثل ارضنا

..وعلمتها أنا معنا القسوة والجلافة بعد ما ضربتها بكم صخرة واعتدلت .. وصلنا

لمقر العائلة واعلنت وصولي بنغمات من بوري السيارة .. وانرد لي بالمثل

بطلقات ناريه في الجو ..وصرخة وحدة من الخلف .. تسببت لي بالصمم ..

اكره ذي البنت اكرهها واكره البزران لو مالحياء من اخوانها كان لعبت فيها صح ..وقطعت لسانها ..

..نزلت لهم وانا اطلب منهم يوقفون الضرب .. وبعد السلامات لفتني البنات

يضمون بعض .. لفيت بوجهي عنهم بكدر .. مالك امل ياخالد ..

انشغلت مع العيال بالسوالف بعدها سمعنا هدير السيل .. قمنا نتفرج فيه ..وهو

يقطع الوادي أمامنا بقوة غير مهتم بما أمامة ..ومعلن سيادته في المنطقة..

أخذت كاميرا تصوير من ماركة غاليه من جابر.. يبغاني أصوره مع رائد ..

وماسكين بعض وهم عاملين حركات غبيه و معطين الوادي ظهورهم ..

التقطت كم صورة وفي اخر صورة حسيت باضاءت بسيطة ماتبان من الجهة

الثانيه للوادي.. غمضت عيوني معتقد ان للفلاش اثر باللي اشوفه ..

فتحتها مره ثانيه واختفى الضوء .. لمحت مغيب الشمس واعجبتني تناسق الوانه

مع الجبال واخذت له صوره .. والتفت للعيال وهم منزعجين يبغوني بعد اصورهم

..زميت شفايفي بغيض منهم بدا يطفح الكيل ..وبديت في تعديل الكاميرا لاخذ

صورة ثانية لهم .. لكن عودة الضوء بقوة تسبب لي برعشة غريبة ..

نزلت الكاميرا وأناا قرب من الحافة بسرعة .. وتنبهت على حقيقة الضوء ..

وتجمدت مكاني وحسيت بانسكاب ماء بارد على راسي .. وقت ماسمعت صرخة

خوف : الحـــــقــــــــــو الـــــــــبــــــــنــــ ــــــااااااات ...





******************




سمارا...





وصلت المكان اللي خبرتني عنه جليله بعد كم صخرة طلعناها بشق الانفس ..

صراحة يوم شفت المسافة بين مكاننا والجهة الثانية من الوادي توقعت المسافة

قصيرة .. لكن بعد ماقطعتها بنفسي حسيتها كبيييييره .. تسلقت الصخور وراما

متعلقه فيني .. غلطتي اني جبتها معي .. كان خليتها عند البنات احسن .. انا يالله

يالله اشيل نفسي .. واخيراا وصلنا المكان ... كان جداً يجنن ..عبار عن بركة من

ماء المطر .. متجمعه في مكان في صخره مجوفه تجويفة بسيطه .. أدت لتجمع

المياه فيها .. وجريانها للاسفل بشكل خرافي ..منظر رائع .. جلست بجنب الماء

وأنا بالقوه اخذ نفس ..وطلعت بخاخ الربو من الشنطه .. اخذت بختين .. حتى

استرد تنفسي الطبيعي ..طالعت في راما وجليله وهم يلعبون في المويه ويرشون

على بعض ..وقت ما هديت أخذت ايفوني اصور المنظر ..وقفت حتى القط الصور

بشكل اخر .. وبعد كم صوره لهم .. لفيت اتفرج في المكان وانتبهت للجهه الثانية

اللي جالسين فيها اعمامي .. كانوا بالضبط امامي ..اخذت لهم بعد كم صوره حلوة

.. وبعدها رحت للبنات .. لهيت معهم وشوي سمعنا صوت غريب .. توقعته صوت

الهواء .. لان مكاننا محاط بشجر يصدر مع الهواء صوت غريب .. ماعطيت بال

للسالفة .. لكن فزت جليله بخوف .. والصوت بدا يقترب بشكل مخيف .. خلاني

ايبس مكاني وعروق دمي نشفت .. ضربت جليله على خدها برهبة وهي تقول :

يــــاويلـــــــــــــي .. يامصيبة وطاحت على رأسك ياجليله ...


تمسكت في عبايتها وأنا ارفع نفسي بالقوة .. ولافيني قوة التفت للخلف مع شدة

الصوت ..قلت برعب وأنا متمسكه فيها : وشــــــــفــــيـــك ..وش ذا الصــــوت ..

تكلمي الله يأخذك ...

قالت وهي ترجع تضرب على أفخاذها : وشفيني .. فيني المصيبة اللي طحنا فيها

.. وبرعب وهي تشير لخلفي .. ماتسمعين صوت السيل ..

التفت للخلف وقلت بتوتر بعد ماشفت جريان السيل : منيين جاء؟؟ .. طالعت

للسماء ورجعت طالعت في جليله .. مافي مطر ؟؟.. كيف جاء؟؟ ..

قالت وهي قاربت تبكي : يعني من فين أجل .. اكيد سيول منقوله جايه من مكان

ثاني .. واردفت وهي تنزل من الصخر اللي كنا واقفين عليها .. عزالله رحنا فيها

..كيف بنعوّد عند اهلنا والسيل قاطعنا ليتني سمعت كلام البنات ولارحنا .. بكت ..

كـ ــلـ ــه مــ ني كـ ـــلـ ـــه مـــ ني .. مـــ ــــاأتـ ــوب..

انتبهت لراما اللي واقفة جنب المويه وتطالع فينا بخوف .. ناديت عليه تجي عندي

وأنا احاول ابتسم حتى لا ارعبها .. وقلت لجليله وأنا ابلع ريقي : جليله ترى

مايخوف .. كلها شوية موية وتخلص .. ويوم طالعتني مستغربة وهي تمسح

دموعها .. اشرت لها على راما حتى تسكت ..

ورحت لراما اللي رفضت تجيني قلت بهدوء وأنا امسح على شعرها : روحي ..

لا تخافين .. ترى مافي شي يخوف ..

قالت وهي تعض اصبعها : وش هو هالصوت .. مره يخوف .. وجليله ليش خايفه
؟؟
اخذتها لجهت السيل وأنا اوريها المنظر وقلت ببساطه : عادي مويه المطر تجري

في الوادي .. شوفي شكلها كيف يجنن .. وكملت وانا اعطيها الجوال .. هيا خذي

جوالي والقطي صور حلوه عشان نوريها البنات بعدين ..

هزت رأسها وهي تاخذه مني .. وانا رحت لجليله .. قلت لها وانا احس بقوة

المصيبه اللي حنا فيها وأطالع للشباب اللي كانوا موقفين على الجهه الثانية ومو

منتبهين لنا: كيف بنرجع .. الليل قرب .. ومافي الا احنا بهاذي الجهه..

قالت وهي تطلع الكشاف من شنطتها وتمسكه بيد مرتجفة : ابكبس لهم بالكشاف

عشان ينتبهون لنا ..يمكن يساعدونا

نورت الكشاف بأتجاه الشباب ومن رجفت ايدها طاح الكشاف منها وانفكت

البطاريه .. رجعت شالته وهي تلعن حظها ..حاولت تركب البطاريات بس بسبب

خوفها صارت تلخبط في ادخاله .. أخذته منها وأنا اطلبها تتعوذ من الشيطان

وتجلس .. دخلته بهدوء وأنا ادعي الله يفرجها علينا.. كبست لهم مرتين.. وماكان

في انتباه وفي المره الثالثة حسيت فيهم وهم يطالعون بجهتنا .. ومن الفرحه

جلست احرك الكشاف باتجاههم بحركات متتاليه.. وبعد ماحسيت اني لفت انتباههم

.. لانهم تجمعوا في مكان واحد ويأشرون لنا .. جلست بارتياح بجانب جليله .. ان

شاء الله تنحل المساله مادام انهم عرفوا بوضعنا ..

قلت لجليله : خلاص ان شاء الله انها محلوله .. مادام انهم عرفوا اننا تورطنا

..وبيجون يساعدونا

قالت جليله بسخريه : لا والله ماهي محلوله .. ومابتنحل الا اذا انتهى السيل ..

مسكت يدي وهي تأشر لي على جهتهم .. بالله طالعي في اشكالهم .. الحين كم

من دعوة دعوها علينا ..والله لو اننا قراب منهم كان اكلونا بدون ملح ..

قلت : قابله انهم ياكلوني .. بس ارجع لهم ..وبضيق .. جليله شكله اذن المغرب

.. كيف بنرجع .. الدنيا اظلمت .. والمكان موصاحي .. وبرعب .. هنا في مويه

يعني اكيد الحيوانات بتجي تشرب ..

انتفضت جليله بخرعة : بنت اسكتي لاتفجعيني زياده.. والله مو ناقصه رعب ..

قلت وأنا اروح لراما واقومها وشادة على يدها: لانه هذا الصحيح .. طيب عندي

حل ..اشرايك ننزل لتحت ونحاول نقطع السيل .. لانه كذا واضح ان السيل مو

قوي..

قالت بهلع وهي تضرب يدينها في بعض : منجدك .. نقطع السيل .. ليه مجنونه

ارمي حالي للموت ..انثبر مكاني الله لايعينني لحد مايلقون لنا حل او ينتهي السيل

..انتي بس حصني نفسك واختك وان شاء الله مايجينا الا ماكتب الله ..

قلت بقلت صبر وانا ماسكه راما اللي تحاول تفلت مني وانا ماسكتها من الخوف

:بيطول الوقت .. جليله ترى انا مرعوبه بقوة .. لازم نلقى لنا حل ..صرخت في

راماوتركتها يوم عضتني .. ووجع يوجعك .. ناقصتك انا يالبلوه ..

قالت راما بزعل : اوجعتيني .. وبميلان شفايفها منذره ببكاء .. انقلعي والله اعلم

عليك عمار ..

قلت بمحاولة لتهدئة غضبهااللي اوشك على انفجار لايعرف تبعاته : سوري رومي

.. اسفه ما اعيدها .. انا حماره ماافهم .. والا من يزعل راما الحلوه ..

وبصوت يصم الاذان : واااااااااااااااااااااااا ااع رجعيني عند اخواني

واااااااااااااااااااااااا ااااااع سمااااااااااااااااااااااا ااااااارا صار فيه ظلام.. وبشهقات

متتالية وهي تضرب ارجولها بالارض.. ابغى ارجع سمارا برجع .. رجعيني لهم

..مابجلس معكم ..

مسكتها وانا اشدها لصدري بخوف: رومي حبيبي اهدي .. بسم الله عليك .. بسم

الله عليك ..لاتخافين ياقلبي شوي ونرجع بس اسكتي لاتبكين ..

رفعت وجهها المتدفق منه سيول من العين والانف والفم ايضا ومسحت عليه

بطرف طرحتي وشهقاتها مستمره ..ورجعت ضميتها وهي مستمره بالبكي ..

قالت جليله وهي واقفة وراية : سمارا سمي عليها مو زين البكي وقت المغرب ..

حصنيها بالاذكار..

شديت من احتضانها وجلست اقرئ عليها لعل الله يهدي نفسي ونفسها ويحفظنا

من كل مكروه ..

ورجعت تبكي مره ثانية بعد لحظات من هدوءها وتطالب بعمار ..ضربت على

راسي يوم تذكرت التلفون .. ياغبائي ..اخذته من راما .. وجيت بتصل ولا لقيت

شبكة .. يالحظ النكد ..ايش الدبره الحين ..اعطيته جليله حتى تتحرك حتى تلقط

شبكة .. وبعد جهد جهيد صاحت بفرح لالتقاطها شبكة لدرجة افزعتنا ورجعت

راما تصيح ..لاحوووووول ...

قمت وراما متعلقة فيني بقوة .. ورحت لجليله .. واخذت الجوال منها ودقيت على

رائد .. ورد وصوته يلعلع لدرجة غطى على صوت هدير السيل ..

ابعدت الجوال عن اذني من قوة صوته .. ورجعت رديته : هاااا خلصت ..الواحد

مايعرف يتفاهم معك ..

وبكل مسبة في العالم طالني منها نصيب ..: يااازفته.. الله ياخذكم .. حسبي الله

عليكم .. ووجع يوجعكم وش وداك لهناك .. مامدانا نوصل والا انتي تهيسين في

الارض ..

ماتعرفين تجلسين .. الله واكبر عليك ارجولي تكسرت في الطريق وماصدقت

اوصل وانا رجال وانتي بك قوة تفرفرين .. وبعد جارة معك راما ... قولي لي

كيف اطلعكم من هالمصيبة .. الله لايرحمك لا انتي ولا اللي معك ماهمني الا

راما ..وش فيها تصيح صوتها وصلنا ..

قلت بخرعة : ايش يعني بتخلونا هنا .. رائد ياحمار طلعنا من هنا .. تلفت للمكان

اللي نحن فيه وكان مخيف عكس النهار .. تعاااال بسرعة .. سو أي شي .. والله

ليطير عقلي .. كفاية راما سوت لنا اعلان في المنطقة .. يامخلوقات نحن هنا ..

دخيييلك تعااال ....

قال رائد بغضب : وسم ان شاء الله .. هاذي عمايل ايديك .. بعدها سكت واسمع

واحد يكلمه.. وكمل .. الحين تروحين تنطقين انتي واللي معك على حافة الوادي

قدامنا عشان نشوفكم.. لاتروحين لايمين ولايسار سمعتي .. وخلي الجوال بيدك

واذا حسيتي بحاجة والا شي دقي علي .. وبزفرة .. روحي صلي المغرب واذكري

الله على راما وسمي عليها ..مع السلامه ..

وقفل الخط بوجهي .. ابعدت الجوال بقلق ..

قالت جليلة : مافي حل صح ..

هزيت راسي لها ..وقلت بضيق : خلينا نقوم نصلي ولاحقين عالهم .. كيف القبلة
..

اشارت لي باتجاه القبلة .. ومسكت راما عشان تبعد حتى اصلي ورفضت ..

وبالمسايسه جلست وهي متمسكة برجولي .. وقفت جنبي جليله بعد ماوضت

وصلينا .. وفي السلام الاخير انتبهت لاحتلال الليل للمنطقة بشكل كامل ..

تعوذت من الشيطان .. وجلسنا بانتظار الفرج .. مرت نص ساعة والا الان مافي

شئ يدل على توقف السيل المستمر بالجريان بقوة ..اضاءات توجهت لنا من

الجهة الثانية .. كانت اضاءات كشافات ..حسينا شوي بالراحة .. واضاءت لنا

المكان بشكل بسيط .. سولفت انا وجليله شوي .. وراما ماسكه جوالي وتلعب فيه

..وبعد فترة .. حسينا بحركات خلفنا .. رجف جسمي بشكل مو طبيعي وحسيت

شعر جسمي وقف من الرعب .. وجليلة كانت اخس مني تيبست مكانها ..

وعيونها توسعت بشكل مخيف وهي تحاول تطالع فيني .. مديت يدي المرتجفة

وانا احس بانعدام قدرتي للتنفس لجوالي.. واخذته واتصلت بسرعة على رائد

بس الزفت مافي شبكة ..طاح الجوال من يدي بسبب رجفتها يوم حسيت باقتراب

صوت حركة اقدام تدوس على قطع اغصان ..التفت ببطئ اشوف المصيبة اللي

مقبله علينا .. وانصدمت بالطول الفارع وانعدام الملامح بسبب الظلام هيئ لي

اشكال مرعبة ..

ببرود : وش فيكن شايفات جني ..

شهقت جليله .. وانا ارتفع معدل نبضات القلب عندي وتسارعي تنفسي بشكل

اعدم علي القدرة على التنفس ..تخبطت ادور على شنطتي .. ادور على بخاخ

الفنتولين ..وبسبب خوفي وانعدام التفكير بها الموقف نسيت اني حاطة الشنطة

بحظني ..شهقت بقوة حتى اخذ نفس .. وقفت وأنا احاول احني نفسي بوضعية

الركوع .. ل أسترجع انفاسي الضايعة ..حسيت يبد جليلة تحاول تمسكني وانتبهت

لشنطي المرمية عند اقدامي .. وابعدت يد جليله بقوة ومسكت الشنطة وطلعت

البخاخ .. وانا استخدمه لعدت مرااات ..جلست بتعب وصوت صفير بصدري

يخترق سكون المكان .. قالت جليله : سمااارا قولي يالله قولي يالله .. اهدي هذا

ابو عبد الله .. صعب ...




*********************

[لامارا]

البارت ( 12 ) ....







صعب ..





اختبصت يوم شفت البنت تلوى مدري وش صابها .. اقتربت منهم حتى اشوف

وش فيها بس من قامت واحنت نفسها .. قلت بس ركبتها جنية .. ويوم لاحت لي

الفكرة اقشعر جسمي .. سميت بالله ..وجيت بمسكها بتردد من ذراعها .. يوم

شفت ان الثانية باقي مرعوبه ورمت الغطا على وجهها ..قربت منها ومسكت

كتفها عشان أثبتها وأنا استغفر الله لانه مايجوز لكن الضرورات تبيح المحضورات

..بس بقفى يدها ضربت يدي ومسكت شنطتها واخرجت شي منه وصارت

تستخدمه لاكثر من مره .. تراجعت للخلف بعد مافهمت سالفتها ولفيت وجهي

عنها .. حتى تنتبه على نفسها وتتغطى مع ان ملامحها موواضحة بسبب الظلام

بس لمعة بسيطة على خدها كانت تنزل بهدوء .. كتمت نفسي عندها وانا اتابع

نقطة وصولها على طرف ذقنها ..

راحت الثانية عندها وهي تهديها وتعلمها عني .. بس كان الصفير الصادر من

صدرهاعند الزفير .. كفيل بمعرفة كمية الالم اللي عانته لاخذ نفس ..ومنعها من

حتى الالتفات لها ..

جلست على وحده من الصخوراللي كانوا جالسين عيها البنات بعد مالقطت اشاره

للجوال وكلمت الشباب وطمنتهم عن وصولي للبنات وانا اشر لهم بيدي ..لانهم

اتصلوا علي وانا راجع من الصيد ..وبلغوني عنهن .. وصلت لهم بس ماكانوا

منتبهين لي ..قلت بنفسي والله لاأطير عقولكن اللي مركبه شمال .. واخليها

توبتكن ما اكون ولد عبدالله.. رميت الطيور اللي صايدها والبندقية على الارض ..

وحسيت بانقطاع صوتهم .. زدت اقتربت بهدوء وانا احرك اغصان الشجر اللي

امر من جنبها بقوة حتى تكمل جو الرعب ..وابتعدت عن مكان الضوء حتى ماتبان

ملامحي .. ههههههه تصدقون اني ارعبت نفسي بسواتي قبل ما ارعبهن ..ويوم

شفت خبصتها بالتلفون وتحاول تتصل قربت اكثر منهن تستاهلن هاذي نهاية

الهياته.. التفتن لي برعب بطريقة ارضتنيييي ...تكلمت حتى اهديهن : وش فيكن

شايفات جني ..

وليتني مانطقتها.. وابتدت الحوسة ..



*********************




سماراااا ....





تمنيت ان امحي الحياء وأقوم اتوطئ ببطنه ... ياسماجته .. وع وع ذا مزح ..

حسبه الله بغت تطلع روحي .. ولا وبكل وقاحه يقول شايفات جني .. مايدري ابو

الشباب انه ابليس بكبره ..عمى بشكله ..

جلس في مكاننا واحنا رجعنا للخلف وجلسنا متسندين على شجره.. شوي وسمعته

يكلم العيال وأنا اناظره بحققققد ..وارجع استخدم علاجي ..

بعدها التفت علينا وهو يكلم وقفل بعدها .. سال ببرود : من بناته انتن ؟؟؟

لفيت وجهي عنه وأنا مومتغطيه بس بطرف الطرحه حطيتها حاجز حتى لايشوفني

وانا ادعي عليه ..

قالت جليله بصوت واطي : انا بنت فائز .. ومعي بنات عمي سطام ..

لوى شفايفه .. وهو يقول : وانتن ماتتبن من الدواجه .. ليه يومن تشوفن الليل

اظلم ماتنطقين مكانكن .. وثاني شي يعني يابنت فائز تراك اعرف بالمنطقة من

اللي معك .. وتعرفين انه في أي وقت يجي السيل ويقطع الوادي ..يعني من قلّ

الاماكن في الجهه الثانيه حتى تجين لذا المكان ..وفرضا ماكنت قريب منكن

بتقعدن الليل كله وحدكن بذا المكان.. والا لو طلع عليكن واحد غيري ايش كنتم

بتسوون هااا ؟؟؟

ماااالت ثم مااالت.. والله لو طلع لنا واحد غيرك كان ابرك .. بغيت تطلع بروحي

يافهيم .. وجع يوجعك ..

دقتني جليله تبغاني اتكلم وطنشتها قالت بخجل :صادق يابو عبدالله .. بس ماكنا

ندري انه هذا اللي بيصير .. مالنا اعتراض على قدر الله ..

قام وهو يقول : حصل خير واتمنى ماتنعاد مره ثانية واعتقد انكن تبتن ..

وبعد ما ابتعد عنا .. قالت جليله بهمس : كيفك انتي الحين .. اربك تحسين بشي

؟؟

قلت وأنا اخذ شهيق : وش احس هااا تدرين ايش احساسي .. احساسي لما يدني

منك الموت وتقولين خلاص هذي النهايه مامنها مفر وبقدرة الله ينقلب الحال

وترجع لك الحياه هذا احساسي .. هالادمي من ايش مصنوع مايخاف الله..

مايحس ويقول ذولا بنات .. مفكرعندنا قلوب بقساوة قلبه .. حسبي الله عليه

امرضني ..

ضحكت جليله وهي تقول : شوفي يدي وقسم بالله ترجف الا الان ..وانتي بغيتي

تفضحينا وش هالمسبات .. ماخفتي يسمعك ثمن يمردغك ..

قلت بغباء : أي مسبات .. كانت بيني وبين نفسي .. اهبي كيف سمعتيها ...

ضربتني وهي تقول : اذكري الله .. بعدين ماكانت بينك وبين نفسك ياحلوة .. اجل

كيف سمعتها .. تتكلمين وانتي ماتدرين عن نفسك .. كله تأثير الخرعة من صعب

ههههههههه..

سكتنا يوم رجع وجلس بنفس مكانه ومعه طيور شكله صايدها ..ومسك الطيور

وجلس ينتف ريشها .. وقامت له راما بعد ماشدها اللي يسويه ووقفت على راسه

تتابع ..وبعد ماخلص منها استخرج سكين صغيره من جيبه وفتحها وبدا يقطع

برؤوس الطيور .. صديت بوجهي عن اللي يسويه بقرف .. واشرت لراما تجي

عندي وعنّدت ..قال وهو منشغل باللي يسويه وبدون مايلتفت لنا : بدال جلستكن

هاذي .. قومن اجمعن لي حطب .. حتى نشوي هالصيد ونتعشى عليه ..لان قعدتنا

بتطول بذا المكان ..

قامت جليله وانا رفضت اقوم عنااااد فيه وثانيا لسى صدري يوجعني ومو وقت

حركة لحد ما اهدى ..

رجعت اطالع باللي يسويه ..وملت بالنظر لشكله العام .. طوييييل وفي ضخامة

بجسمه مو يعني دبه .. وكان لابس بنطلون جيشي وعليه جاكت بنفس اللون

وحاط على راسه كاب ..طالعت في وجهه كانت ملامحه مقاربة لملامح عمي سالم

..قطع علي جيت جليله شايله حطب ورمته على الارض بجنبهم ورجعت عندي

..قالت باستهزاء : وش فيك قطعتيه بعيونك.. ماكفاك الدعاوي .. اربك تبغين

تسدحينه بعينك ؟؟

قلت بنص عين : بااااايخة ..لاتعيدينها ...

جلست جنبي وانا مطنشتها .. وهو بعد ماخلص من الطيور ..راح لمكان منقع

الماء ..وبعدها رجع لنا وهو مفصخ جيكيته وباقي على الفانيله اللي مبرزة

عضلات صدره ..مر من قدامنا .. وجليله تمسخر : لا اله الا الله .. من شر حاسد

اذا حسد..

طنشتها ومارديت عارفة تبغى ترفع ضغطي ..بس لفتني يوم اخذ جكيته ولبسه

لراما .... ياقلبييييي .. اكيد ذبحها البرد وانا لاهيه بنفسي ..

جلس يسولف معها وهي مبسوطه باللي يسويه وقلها انه هي اللي بتشوي

الطيور .. وبغت تطير من الفرحة ..

اخذوا الحطب وجمعوه وجلس يشعل فيه لحد ماولع .. واخذ الطيور واعطى واحده

منها لراما لتشويها .. وفي غمرة سوالفهم اللي كان اغلبه خراااااط من راما قال

لها بسخرية : وكيف حبيبك رشود .. ارب صدره يوجعه ويكح للحين ..

تجمدت مكاني والبخاخ اللي كنت العب فيه طاح من يدي .. والبرودة تسربلت الا

جميع اجزاء جسمي .. وبوجع لا متناهي .. والله مو وقت طاريه مو وقته ..


******************





زينه بنت متعب ....





كان بداية يومي تعيس .. وأنا اشوف جميع عائلة سعد الشهبان واحفاده مجتمعين

الا واحد ..تأملت بجيته وخاب املي بعد ماخبرتني جليله بالمشكله الالف من

مشاكله وهالمره مع ابوه .. وعلى نفس السالفة .. كان يطالب عمي فائز بمبلغ

من المال ليصلح سيارته ..وقابله عمي بالاهانات المستمره .. طبع هالعم مايتغير

.. مايعترف باسلوب الحوار .. انته غلط والله ل أهينك لحد ماتعتدل ..

بالله كيف تبيه يعيش حياته وانته بالطالعة والنازلة مقلل من قدره ..

اكيد راح يحس بالنقص واليأس ..

بس الحمدلله رب العالمين ربي اجاب دعوتي .. يوم شفته مقبل علينا مع عيال

عمي سطام .. قلب وجهي وصااار احمر من شدة الانفعال ولفيت بوجهي عن بنات

عمي لاني صايره مفضوحه بينهم .. ومن بين تعليقات ساخره منهم حسيت قلبي

يرفرف .. الله لنا .. بنات ذا مو قلب زينة طلع له ارجول وراح يجري لعند الحبايب

قالت شهد :الروح ظميا على شوفه ومنهده وماغاب لحظة عن التفكيرمن بالي..

( كلمات شاعر ريم )
ايو الله صادقين ان الروح ظميا على شوفه .. شفته راح يسلم على الاهل.. وشفت

سمارا نزلت من السياره .. رحت لها اجري وظميتها من الفرحه.. مايهمني أي

شي .. مايهمني رداءة حظه .. ولاحاله ولاماله .. ولازينه ولا شينه .. مادام ذا

القلب مانبض الا له ..

جلسنا شوي احنا والبنات وأنظاري كل شوي تتجه له .. وبعدها راحت جليله

وسمارا .. واحنا رفضنا أرجولنا تكسرت من الفرفرة من الصبح ..

ولما بدا السيل رحنا نتفرج فيه ولاهين عن الثنتين اللي راحوا .. بس استوعبنا

عدم وجودهم من شغالت عيال عمي سطام تسال عن سمارا .. وتورطنا ...

المصيبة كيف بنقول للرجال .. والله ليذبحونا وحنا مالنا ذنب .. علمنا جدتي صيته

.. و صاحت في الرجال.. وتعالوا شوفوا استلمونا دعاوي .. وحلفوا فينا ان خطينا

شبر عن مكاننا اللي حنا فيه ليخلونا نعوف التماشي ..

نزل اثنين من العيال ومعهم خالد للسيل اذا كان يمديهم يقطعونه ولا لا ... بس

كان في خطورة عليهم .. فقال لهم جدي عبدالله يتركونهن في مكانهم ويسلطون

عليهم كشافات .. اهم شي انهم مو بخطر .. وبعدها عرفنا ان صعب ولد جدي

عبدالله انه راح لهن ..وراحت زهرة تبلغ جدتي باللي سمعته .. قالت بسعادة :

مادام ان صعب معهم ماعليهم خلاف ..





***********************





شملاء ....





على حافة الوادي واقفة وغايبة عن العالم .. وانا اشوف حلمي يتبدد ..ويضيع مع

الريح.. ليه ياصعب ليه ..وش ذنب قلبي الغبي اللي تعلق فيك .. حتى تدوس عليه

انت وأمك ..انت لي حلالي انا .. حاولت انساك ولاقوى قلبي .. معلن العصيان

..لأبوك ياذا القلب ماجبت لي الا المهانة والمذلة ..




قراءة ممتعة ....

لاتلهيكم الرواية عن الصلاة ...


خــاتمة ... «إذا أعطتك الحياة سبب لتحزن، أعطها مئة سبب لتسعد!»

[لامارا]

البارت ( 13) ....





سمارا ....





حسيت بتقلصات في المعدة من سمعت بطاريه .. هذا وانا احاول قدر الامكان الهي

نفسي عنه وعن التفكير فيه ... لكن وش بيلهي رامااا ..وهو بالنسبة لها شئ

مميز .. حبّيه يابنت أبوي .. حبّيه لكن بعيد عني .. لا اتعبك ولاتتعبيني وياك ..

زفرت بضيق من بدأت تتكلم عنه .. وصعب مجاريها في الاستماع ..

اخذت تعدد على اصابعها : هوووو بخيييير وكمااان ياخذ علاج عشاااان مايوجعه

قلبه لانه داييييم يقوول انوا قلبه يوجعه .. وهوووو كان يدخن زيك انتااا

ورائد..فقلوبكم بتوجعكم زيه ..

ضحكت بنفسي .. هه يوجعه قلبه ..يسلم له قلبه أبو قلب..

قال صعب وهو يقلب في الصيد على الجمر : بس أنا مايوجعني قلبي .. لاني اقوى

من رشّودك ..

سعل يوم تغير اتجاه الهواء وهب دخان الشوي على وجهه .. وراااما ميته ضحك

عليه .. تبسمت على ضحكها بابتسأمه بسيطة ..راما من مايشوفها مبسوطة

وماينبسط معها .. الله يحفظها يارب ..

قال وهو مازال يسعل ويمسح على عيونه بسبب الدخان : تضحكين يابنت ابوك ..

طيب على اللي يخليك تاكلين وخلي رشودك ينفعك ..

قالت بدلع وهي مازالت تضحك : ههههههههه انتا تستاهل لانك ضعيف .. لكن

رشودي حراااام مسكين ..وثانيا ابتعشى ماعلي منك لاني شوييت معاااك والا

بشكيك لعمااار ..لانه يحبني وانا احوووبه بيوريك ..

رجع صعب وجلس وهو يكمل الشوي قال بمسكنه : طيب حبيني بعد ترى انا بعد

احبك .. عشان كذا خليتك تشوين معي ..

سبلت بعيونها وقالت : لا لا انا بس احب عمار ورشودي بسسسس ..

قال: واخوانك طيب ماتحبينهم ..

قالت : بس عمور ورشود بس بس .. رائد ماحبه ولااحب عادل وجابر وع ماحبه

وهموسه اكرها تضربني انا وراكان عشان عيالها المعفنين ..وسماااااراااا ..

طالعت فيني وهي تميل راسها بتفكير .. كشيت عليها يوم شفتها تفكر .. وبس

كشيت على طول قالت : لاااااااا ماحبها شينه معفنه ..

قالت جليله لي بهمس : بسم الله على اختك .. وش ذا الدلع اللي طب عليها فجأه

وهي اول كنها تاااز المشاكس ..

قلت بسخريه : والله ينرحم تاااز عندها .. هاذي سلمك الله شكله انها حبت صعب

عشان كذا ابتدى وقت الدلع والغنج اللي مايظهر الا بحضور اخوي عماار وو ...

المهم فهي بتسوي كذا حتى تاكل عقله ..

ضحكت جليله وقالت : ولّ عليها اختك شغلها حامي .. تؤمنين بالله انه ماقد شفت

صعب يضحك مع احد من عيالنا الصغار دائم كاااش فيهم ..والحين وقته كله

يتبوسم لاختك .. والله لجابت راسه ..

تأملت مشاكستها على صعب وهي بتشيل الكاب عن رأسه وبتلعب بشعره اللي

مايتجاوز طوله السانتي ..بتحليقه عسكريه حتى

تزعجة وهو مسوي معصب عليها وعلى وجهه ابتسامه خفيفة وبنفسي جابت

براس اللي قلبه حجر صوان بيصعب عليها تجيب برأس الصعب ..






***********************





صعب ...






اسندت راسي على شجرة خلفي .. وانا احس بخمول بكامل جسمي بعد وجبة

العشا ..ما ابغى الا فراش اتمدد عليه وانام ..على صحيتي من الصبح والحين

الساعة 10 بالليل ومازلنا بانتظار توقف السيل .. غمضت عيني شوي بس

اريحها من التعب .. بس شكلي غطيت في النوم لاني صحيت مفجوع على صوت

بكاء راما وهي تضرب رجلها بالارض وتبكي عند اختها..سالت وانا امسح وجهي

واستغفر : وش فيك ليه تبكين ...اشرت لها بيدي تجي عندي .. تعالي عندي

وعلميني وش فيك ..

بس رفضت تجي وهي تقولي وصوتها مختنق من البكاء : ابغى مويه عطشانة ..

وسمارا ماعندها مويه ..وزادت من ضرب رجلها على الارض ورفعت صوت

بكاها .. مااااااالي مااااالي ابي مويه جيبولي مويه ...

قمت لها واقتربت منهم مديت يدي لها ورفعتها عن الارض وهي مستمرة تبكي

قلت : لاتبكين ياحلوة .. تبغين موية تامرين امر نجيب لك الموية .. واردفت وانا

اسال البنات .. مامعكم موية ..

تكلمت اختها بصوت منخفض : لا والله مامعنا خلصت ..

قلت : طيب مافي قارورة صحة فاضية..

حركت راسها لي وهي تلف لشنطتها وتطلع القارورة قالت : الا فيه ..

مدتها لي واخذتها ..ومسحت على عيون راما الغرقانة بالدموع : هالعيون الحلوة

ماتبكي .. الحين نجيب لك الموية .. بس بشرط نبي البوسة خلاص ..

هزت راسها بأيه وعلى وجهها مشارف ابتسامة ..ضحكت منها ذي البنت

عفريييته .. اللي تبية لازم يتنفذ مع ان لسانها اطول منها بس والله تدخل القلب

..يكفي يُتّمها على صغر سنها ..تستحق تلقى شوي اهتمام منا ..

نزلتها على الارض ومشيت وانا ماسك كفهاواخذت الكشاف من البنات وتوجهت

لموية المطر اللي في الوجرة ..

وجيت بروح اعبي القارورة بالموية بس توقفت يوم حسيت بالحركة خلفي ..التفت

باتجاه الصوت ووجهت الكشاف ناحيته وشفت أختها قربت منا وهي متنقبة

وتصد بوجها يوم سلطت الاضاءة عليها ..

قلت وأنا انزل الكشاف : ايش فيكم تبغون موية ؟؟؟

هزت راسها بلا وقالت بتاتاه وحسيت التوتر يشوبها من حركت يديها : لاا

يــ ـعننيي ممن فيين ببتجيبون موويه ؟؟

حركت راسي باشارة للمنقع المطر : من ذا .. وبسخرية .. اجل من فين بأجبلكن

موية ..

تركتها ورحت ابغى اعبي القارورة بس وقفت يوم قالت : بس الموية مونظيفة ..

كيف بتخليها تشرب من موية وسخه ..

لفيت وجهي لها وقلت متعجب منها : وين الوساخة الموية موية مطر .. نظيييفة

شربت منها ولابها علة ..

قالت برفض : لااا اختي ماتشرب منها .. الموية موبؤه ويمكن تكون مفورسه ..

وكمان الحيوانات بتشرب منها ..

ضحكت من سخافة تفكيرها ومن طريقة نطقها للمفورسة .. نظيفة الحضرية

..تبي لها موية صحة معقمه .. خاليه من الشوائب ويمكن بعد توديها مختبر

وتفحصها ..

رحت للموية وجلست اعبي القارورة وانا اقول بهدوء : الله يصلحك سنين الله

هاذي كلها ونحن نشرب من مناقيع المطر احنا واهلنا.. ولاصار لنا شئ ..

اعرفي شي واحد .. ترى عمرك وحياتك ماراح تلاقين احسن من مياهنا لانها مياه

طبيعة ..

أخذت الموية وشربت منها شوي .. واعطيتها لراما وشربت العلبة كاملة .. وهي

تتنفس بقوة وتقول انها كانت بتموت من العطش .. وانه انا انقذتها من الموت ..

التفت للخلف متوقعها بعد موجودة .. بس ماكان لها أثر يمكن زعلت ..واذا ..

تزعل وبعدها ترضى .. موزين نتشدد في كل حاجة .. لازم يكون في استثناءات..

رجعت اعبي القارورة

مرة ثانية ومشيت انا وراما .. واعطيتها القارورة تعطيها للبنات ..

ورحت جلست مكاني .. وانا انتظر الوقت يمر لان المكان مو مريحني ..

والحركات احس فيها من بعيد ..

مكاننا غلط بقرب الموية .. لانه بالتاكيد راح تجي الحيوانات تشرب منه ..وطبعا

مو أي حيوان ..

زدت من الحطب على النار شوي .. وكل شوي وانا مسلط الضوء في مكان حتى

تخاف الحيوانات وتبتعد ...مر الوقت بصعوبة وصارت الساعة وحدة في الليل ..

وحسيت بالسيل خفيف .. ناديت على البنات .. حتى نمشي ..شلنا اغراضنا ونزلنا

اسفل الوادي .. وخليت راما تتعلق بظهري وشلتها والبنات وراي .. سمعت

همساتهم بينهم .. قلت : ترى مازال في موية تجري .. بس يمدينا نقطعه بسهوله

.. اهم شئ تمسكن ببعضكن ..وكشفن بالكشاف قدامكم ترى الاحجار تزلق ..

مشيت وانا اشد على مسكت راما لرقبتي..ومشيت في الوادي .. حسيت برعشة

بكامل جسمي من برودة الموية .. وزدت كملت المشي وانا متحامل على نفسي ..

التفت للخلف ناحيت البنات .. وهن بالقوة يتحركن كأن بهن عاهه ..

وقفت المشي انتظرهن عساهن ماتحركن .. سلاحف مو حريم ..ارجولي تجمدت

وانا مسرع خطواتي وش عادهن.. وهن بالحركة البطيئة يمشين ..ويوم اقتربوا

مني مشيت بخطوات بطئيه وهن وراي

بس جفلت يوم تعلقت يد متمسكة بذراعي وبعدها سمعت صرخة بسيطة وعلى

طول تركت يدي و سمعت خبطه في الماء .. التفت لها

بس انصدمت باللي طايحة في الموية والثانية ماسكتها بيدها .. خفت لايكون صار

لها شي لانها ماعد تحركت .. وانا حاسس بنار اشتعلت بذراعي محل اثر اليد..

صابتني رعشة خفيفة يمكن من برودة الموية ..

ويادوب اللي قربت خطوة .. واسمع الضحكة من

البنت اللي واقفة .. وهي تبتعد شوية عن الثانية وهاذيك استلمتها سب ولعن ..

قامت البنت تنتفض من البرد وهي غرقانة بالموية .. وماتشوفها الا هبت ريح ..

مشت بسرعة .. والثانية تحاول تلحقها وهي ميتة من الضحك .. لفيت عنهم

وكملت مشي .. امش يابو عبدالله البرد ذبحك وراء البقرات .. وكن فيني بداية

حمى ..حسبي الله عليهن ان كان بيمرضوني .. ومرت البنت من جنبي بسرعة ..

وراما تضحك عليها :

هههههههههههههههههه سمااارا طاحت .. ههههه تروشت بموية باااردة

هههههههههه..

مسكت يد راما ولفيتها لجهتي وبنذاله احنيتها لجهت المويه : وانتي بعد

بتتروشين بالموية الباردة زيها ..

ضحكت برعب وهي تمسك يدي بقوة : لااااا ههههههههه صعب لااا الموية باردة

هههههههههههه.. خلاااص مابضحك ..

رجعتها وقلت : لا عاد تضحكين على اختك .. عيب ذي الكبيرة .. بتزعل عليك ..

سكت وانا اشوف العيال نازلين وقفوا قريب من الموية وشفت رائد وجابر ماسكين

اختهم ونزل رائد جكيته ولبسها وجابر ضامها قربت منهم ونزلت راما قريب منهم

ومشيت عنهم .. اشرلي خالد اجي عنده عالفرشة اللي كان جالس عليها هو

والعيال بعيد عن باقي العايلة النايمين.. طنشته ورحت اخذت لي بطانية ووساده

ورميت حالي عالفراش ..وحتى بنطلوني الغرقان ماغيرته .. تعبان والحمى بتلعب

فيني .. تغطيت بالبطانية وانا انتفض من البرد ... النوم خير لي ..



********************