|
حب مع الأيام الكاتبة / غير معروفه ( مكتملة )
|
بســـــــــــم الله الرحمن الرحيم .. الجزء الأول :: في الصالون : نور : بسرعة تراني متأخرة على الحفلة الكوافيرة : أوك مدام نور : أي عفية و بعد ربع ساعة كملت الكوافيرة تسريحة شعرها .. فخذت ثيابها و راحت تبدل .. نور : كم صار ؟ الكوافيرة : 20 دينار نور : تفضلي .. مع السلامة الكوافيرة : مع السلامة ركبت سيارتها و قعدت تمشي بسرعة جنونية لأن حفلة زواج خالها بدأ و هي لحد الحين مب هناك .. و ما أنتبهت الا على صوت ارتطام .. فطلعت من سيارتها مستحمقة .. نور : أنت عمي ما تشوف ؟ .... : مسامحة أختي ما كنت أقصد أدعمج بس لأني مستعجل .. نور و هي تقاطعه : لا و الله بس تفكر بنفسك حتى انا مستعجلة .... و هو يطالعها من فوق لتحت : اي يبين عندج حفلة .. عيل ماني معطلتج و لة معطل نفسي .. بعطيج رقم موبايلي عشان تتصلين فيني و نحدد تكاليف سيارتج .. نور : شوف يا .. .... : يوسف نور : شوف يا أخ يوسف أنا ما أقدر أطول الحين .. أنت هات الرقم و انا بعطيه لأبوي عشان يتصرف يوسف : تفضلي نور : دام فضلك يوسف : أكرر أسفي .. في أمان الله نور : مع السلامة .. و ركبت سيارتها بس ها المرة كانت تمشي بهدوء و تفكر بالحادثة اللي صار لها الى أن وصلت تفكر في الأخ اللي دعمها .. كان وسيم بطوله و شكله .. نور و هي تقول بقلبها : أعوذ بالله أنا في شنو قاعدة أفكر .. بس شخصيته كانت قوية .. ليكون هاي أعجاب ؟ .. و استغرقت في تفكيرها الى أن وصلت للفندق .. في الفندق :: نور : السلام عليكم نوف : و عليكم السلام .. و ينج ؟ جان رقدتي أكثر ؟ نور : شاسوي في طريجي واحد دعمني نوف و هي تشهق : الله يقطع ابليسه ما لقى الا اليوم يدعمج .. بس عسى سيارتج ما تضررت وايد ؟ نور : لا بس انشمخت شوي .. و هو عطاني رقمه عشان يدفع تكاليف التصليح نوف : لازم يدفع الا تعالي امج وايد تحاتيج نور : وية عليها مسكينة نوف : بسرعة امشي ندش القاعة عشان تتطمن عليج نور : يالله عيل أمشي ( نوف هي أعز رفيجة عند نور .. و اللي قوى علاقتهم أكثر هو أن اليوم عرس خال نور ( حسن ) من خالة نوف ( أحلام ) ) في القاعة : أم نور : وينج يمة تأخرتي وايد ؟ نور : شاسوي يمة تدرين زحمة الشوارع و لا واحد دعمني أم نور و هي خايفة : وية على بنيتي الوحيدة عسى ما صادج شىء ؟ نور : لا يمة الحمدلله بس سيارتي شوي تشمخت أم نور : الف حمدلله بدال السيارة عشر .. ما يغلى عليج شىء بنيتي نور : يعلني ما انحرم منج يمة أم نور : شخبارج نوف ؟ و شخبار أمج ؟ نوف : الحمدلله كلنا بخير .. أم نور : أمج ما تبين وينها ؟ نوف : اكاهي عند العروس أم نور : عيل أستأذنكم بروح عندها نوف : نوارة قومي نرقص ؟ نور : اوك .. في قاعة الرياييل : يوسف : تدري أحمد شصادني في الطريج أحمد : شدراني .. ليكون شايفني ساحر يوسف : خخخخ تنكت وية ويهك أحمد : الا تعال شصادك ؟ يوسف : دعمت سيارة من السرعة أحمد : عسى ما صار شىء ؟ يوسف : لا الحمدلله سيارتي صاحية بس سيارة البنية شوي تشمخت أحمد و هو فاج عيونه : داعم بنية ؟ يوسف و هو سرحان : ولة كل البنات أحمد : أقول يا السرحان .. شتفكر فيه ؟ تراني أفهمك .. فضفض اللي في قلبك يوسف : هااا مدري شصادني من أول ما شفتها أحمد : نقدر نقول حب يوسف : هه روح ول .. اي حب يا ريال .. اممممم بس يمكن اعجاب أحمد : كل شىء ممكن .. بعدين بنسولف عن ها السالفة .. قوم الحين نشاركهم بحفلة زواج خالتك أحلام .. .. ****** |
الجزء الثاني :: أحمد : كل شىء ممكن .. بعدين بنسولف عن ها السالفة .. قوم الحين نشاركهم بحفلة زواج خالتك أحلام .. يوسف : لا أمش نطلع برع .. أبي أشم شوية هوا بعيد عن الازعاج أحمد : زين عيل قوم ( يوسف و أحمد ربع من هم صغار .. جنة أخوان و أكثر ) .. في قاعة الحريم :: نور : وايد ازعاج أمشي شوي نطلع نوف : اي و الله انا مصدعة نور : زين بروح اييب شيلتي و برد نوف : ييبي شيلتي وياج نور : تامرين أمر .. في حديقة الفندق :: نوف : الله شحلاة الجو نور : يهبل مب مثل داخل الصالة حر و ازعاج .. يوسف : قوم نروح الحديقة .. نشوف الطبيعة و الورود شوية أحمد : أشوف الأخ صار رومانسي يوسف : فج وية ويهك أحمد : هههههه يوسف و هو مستغرب : شوف هناك قاعدة البنية اللي دعمتها أحمد : تقصد اللي قاعدة وية أختك ؟ يوسف و هو يشد ايد أحمد : اي قوم نسلم عليهم .. نوف : شوفي ها اللي قاعد ييي اخوي يوسف .. أنتي ولة قط مرة شفتيه نور : أي ما شفت اخوج ابد .. نور و هي مفججة عيونها : تشوفين اللي لابس بدلة .. هاي اللي دعمني نوف : هاي هو اخوي نور ما مداها تتكلم : .. يوسف و أحمد : السلام عليكم نوف و نور : و عليكم السلام يوسف و هو يأشر على نور : مب أنتي اللي دعمتج ؟ نور : اي انا نوف : يوسف ما عرفتها هاي نور أعز رفيجاتي علطول أكلمك عنها يوسف : هذي نوووووووووووووور ؟ نور : اي انا نور يوسف: تشرفنا بمعرفتج .. نوف علطول تكلمنا عنج نور : عسى بالخير ؟ يوسف وهو يبتسم : أي علطول بالخير أحمد و هو يقطع حديثهم : شلونج نوف ؟ نوف بحيا : الحمدلله بخير أنت شلونك ؟ أحمد : الحمدلله يسرج حالي يوسف : يالله نترخص نوف : في حفظ الله بعد ما راحوا يوسف و أحمد نور : اقول يا الخاينة طلعتي تخشين عني سوالفج نوف : اي سالفة نور : اي بعد تغيبي .. قصدي عن سالفة أحمد نوف أنقلب ويهها لون أحمر : عبالي عندج سالفة .. الله يسلمج هاي رفيج أخوي .. وايد وية بعض جنهم أخوان نور : اهاااا يعني بس جذي ؟ نوف : شتقصدين نورو ؟ نور : اقصد يا الرومانسية أنج تحبينه نوف و هي ترتجف : اي حب انتي وية ويهج نور : ترى عيونج قاعدة تفضحج .. و تكشف الحقائق و تقول انج تحبينه نوف و هي سرحانه : اي أحبة .. احبه نور : ترى الحب مو حرام اذا كان صادق و بريىء نوف و هي تقرب راسها من صدر نور : تظنين ها الشىء ؟ نور : اي .. في الصالة :: حسن : هاي أحلى يوم بحياتي أحلام بحيا : حتى أنا حسن : شوفيني يا أحلام .. رفعي راسج أحلام : ......... حسن : أوعدج أن حياتنا تكون مبنية على السعادة أحلام : أتمنى ها الشىء حسن : قومي حبيبتي نقطع الكيك أحلام : أنشاءالله ****** |
الجزء الثالث :: تمت حفلة الزواج على خير و الحين حوالي الساعة الساعة 4 الفجر .. و المقربين من العروس و العريس لحد الحين في الفندق .. أم نور : يالله أخوي تأخر الوقت لازم تلحقون على الطيارة حسن : زين انتوا وديتوا الشنط المطار ؟ أم نور : السواق وداهم حسن : تعبتج معاي يا ختي أم نور : لا تقول جذي .. انا اللي ربيتك بعد وفاة أمنا الله يرحمها .. و سهرت على راحتك .. انت قبل ما تكون أخوي أعتبرك ولدي اللي أنحرمت من أنجابه .. حسن : الله على كل شىء قدير .. يمكن ها الولد اللي ما يا يكون خير لج و لأبو نور أم نور : و نعم بالله .. الا الطيارة متى بتحلق ؟ حسن : الساعة 6 الصبح أم نور : عيل سرعوا .. انا بروح أجهز لكم السيارة حسن و هو ينادي أحلام : يالله حياتي , لازم نروح المطار أحلام : وااااااااي تعبانة حسن : رقدي في الطيارة .. في المطار :: حسن : مع السلامة أم نور و هي تبجي : الله يسلمك يا الغالي .. تروح و ترد لنا بالسلامة حسن : لا تبجين أم نور .. أم نور : شاسوي .. تعودنا على دمك الخفيف .. و فضولك الزايد .. و راح نفقد كل ها الاشياء في فترة سفرك .. نور و هي تضحك : حسووووون لا تنسى تييب لي الساعة اللي خبرتك عنها حسن : هيي شايفتني أصغر عيالج .. نور و هي تطلع لسانها : لا شايفتك أخوي هههه حسن : صج مالت عليج .. بس ولة يهمج ابشري الساعة بشتريها لج نور : فديــــــــــت ها الخال و الله حسن : يا اللوســــة مصلحجية .. يوسف من بعيد كان يطالعهم و كان يضحك على حركات نور الطفولية .. حسن و هو يصارخ : يوسف قرب يوسف : هلا بو علي انشاءالله تروح و ترد بالسلامة .. حسن : وية ويهك احترمني يا أخي مب جني زوج خالتك يوسف : الا و النعم .. بس لا تنسى ان خالتي تربت وياي ببيت واحد من صغري ( حسن و أحلام عانوا من صغرهم .. حسن ابوه مات لما كان في بطن أمه .. و امه ماتت بسبة مرض السرطان يوم كان 9 سنين .. فربته أخته الوحيدة أم نور .. أما عن أحلام فأمها و أبوها ماتوا يوم كانت 5 سنين في حادث سيارة .. فعاشت مع أختها الوحيدة أم يوسف .. ) حسن : هيه التاريخ قاعد يعيد نفس الأحداث من بعيد أم يوسف كانت تلوح لهم .. ولما أقتربت .. أم يوسف : ها حسن دير بالك على أحلام .. تراها قطعة من كبدي حسن : ابشري . الا وينها الحين ؟ أم يوسف: وية عليها تعبانة قاعدة على الكرسي هناك حسن : عيل بروح أناديها لان الوقت وايد تأخر أم يوسف : لا أنت روح كمل أجرائات السفر .. بقول لنور تروح تخبرها حسن : انشاءالله أم يوسف و هي تقول لنور : روحي نادي خالتج نور : انشاءالله يمة .. حسن يوم كمل كل اجرائات السفر .. و كان يبي يرد عشان ياخذ احلام لقى بطريجه بو نور و بو يوسف .. بو نور : هلا بالمعرس .. حسن : هلا و غلا بزوج اختي بو يوسف : انشاءالله تروح و ترد بالسلامة حسن : الله يسلمك بو يوسف : ترى الطريج لفرنسا طويل .. حسن : اي و الله .. الله يستر على ما اضن بشوف اكثر من 7 افلام في الطيارة بو نور : ههههههههه عيل توفير عشان شهر ما تروح السينما بو يوسف و حسن : ههههههههههههه بو نور : متى بتحلق الطيارة ؟ حسن : اوووووو نسيت احنا وايد متاخرين .. خلونا الحق على المدام بو نور : قوم اركض قبل ما تلحقك بالعصا حسن : حرااااااااام بو يوسف : ان كيدهن عظيم حسن : ترى ما ارضى على حرمتي .. ووي فمان الله .. تراني وايد متاخر .. راح حسن و خذ زوجته و دخلوا في الطيارة .. بأنتظار موعد التحليق .. ****** |
الجزء الرابع :: في الطيارة :: الكابتن : بسم الله الرحمن الرحيم .. الآن اربطوا احزمة الأمان .. اتمنى لكم رحلة موفقة باذن الله .. أحلام كانت قاعدة صوب الدريشة تتأمل ساحة الطائرات في المطار .. حسن : حبيبتي ربطي حزامج أحلام : ربطته من زمان حسن : شفيج ليش كل ها اللحزن على ويهج أحلام : ما فيني شىء بس بشتاق لأهلي و بلدتي وااااايد حسن و هو يضغط على ايدها : تطمني حبيبتي ما دامج وياي اكيد بتكونين بخير أحلام سكتت و قالت في قلبها : هيه يا حسن حاسة ان شىء جايد بيصير في حياتي و من التعب نامت .. .. حسن : أحلام قومي عقب ربع ساعة بنوصل أحلام : لحد الحين تعبانة حسن : لما بنوصل الفندق نامي أحلام : لا خلاص النوم راح من عيني حسن : اكاهي المضيفة يات.. شتبين فطور أحلام : كروزون حسن و هو يكلم المضيفة : 2 كروزون لوسمحتي المضيفة : تفضل .. و مشت عنهم حسن : اكلي حبيبتي أحلام بحيا : مشكور حسن : فديت ها الحيا و الله أحلام : يووووووز عني حسن : هههه .. و بعد ربع ساعة و صلوا مطار فرنسا .. و الطيارة كانت وايد زحمة فخاف حسن انه يفقد أحلام حسن : حبيبتي تعالي هني أحلام : وايد زحمة اخاف اضيع حسن يود ايدها و قال لها : الحين ما بتضيعين أحلام ابتسمت : .......... .. في المطار كان ينطرهم سايق الفندق .. فركبوا وياه .. .. لما وصلوا الفندق :: السايق : بابا انت روح داخل و انا بنزل كل شىء حسن : تعرف رقم الغرفة ؟ السايق : اي بابا غرفة 9 حسن : اي عيل احنا بندش دخلوا و كملوا اجرائات الاقامة في الفندق .. و بعدين ركبوا لغرفتهم كانت غرفة وايد فخمـــــــــة فعجبت أحلام .. أحلام : يا سلام الغرفة روووووعة حسن : اهم شىء عاجبتج أحلام : كل شىء منك حلو حبيبي حسن : عيدي الكلمة من يديد اول مرة تقولينها أحلام أستحت فغيرت السالفة : جنة السايق وايد تأخر حسن حس بخوفها فيود ايدها و قعدها يمه على السرير : احلام انتي الحين زوجتي و انا زوجج يعني لازم ما تستحين أحلام و هي منزلة راسها : .... حسن : خلاص توعديني انج ما تستحين أحلام هزت راسها : ...... حسن ما مداه يتكلم الا دق الجرس : جنة السايق ياه فقام و راح بطل الباب .. و خذ الشنط للداخل .. فقعدت أحلام ترتب و تصفف الملابس في الخزانة .. و في ها الوقت حسن من تعب الطيارة رقد .. فهي راحت قعدت في الصالة تشوف التلفزيون .. ******* |
الجزء الخامس :: في البحرين :: ( بالأخص في بيت بو نور ) نور قاعدة تكلم نوف في التلفون : قوة يا الغلا نوف : الله يقويج حبيبتي .. نور : ها مستعدة حق الجامعة بكرة نوف : اي اليوم رحت الشوبنق و شريت كل شىء نور : بكرة أول يوم .. شكثر مشتاقة حق رفيجاتي اللي كانوا وياي في التوجيهي نوف : اي و الله حتى انا مشتاقة حق الشلة .. تعالي نورو انتي مختارة أي تخصص ؟ نور : محاسبــــــــــــــــــــ ة .. و انتي ؟ نوف : هندســة .. بس أخوي يوسف مختار مثلج محاسبة نور : ليش نوفو أخوج في اي سنة جامعة ؟ نوف : قدنا نور : هااااااااا .. انتوا تؤأم ؟ نوف : اي ما تدرين .. كل ها السنين صديقتي و ما تدرين نور : لا و الله ما كنت دارية نوف : عيل يمكن يكون ويايج في الصفوف نور : كل شىء جايز يالله بخليج الحين أمي تناديني نوف : اوكي تيك كير باي باي نور : يو تو باي .. نور : ها يمــــــــــة خير ؟ أم نور و هي خايفة : خالج ما أتصل ؟ نور : لا يمة اشدعوة بيتذكرتا الحين .. أم نور و هي مستحمقة : لا تقولين جذي عن خالج نور : ها الحقيقة يمة الريال رايح شهر العسل يعني اكيد مشغول .. رن التلفون : ترن ترن ترررررررررررررررررن أم نور نقزت في مكانها و بسرعة راحت ردت على التلفون : الوووووو حسن : يا احلى الوووووو شخبارج ؟ أم نور : بخير يا خوي .. بسماع صوتك .. شخبارك ؟ شمسوي ؟ حسن : ههه شوي شوي علي .. لها الدرجة مشتاقة لي .. الله يستر اذا شهر ما بتشوفيني .. أم نور : اي الله يستر ها طمني عليك و على العروس حسن : كلنـــــــــــــــا بخير .. الف حمدلله .. جو باريس عجيب أم نور : عسى الله يسعدكم دوم نور و هي تكلم أمها : عطيني التلفون بكلم خالي أم نور و هي تكلم حسن : اكاهي أم لسانين تبي تكلمك حسن : هههههههههه وينها ؟ نور : أكــــــــــــــــاني يا الخال .. ها لا تنسانا .. اخاف قعدة الحبايب تنسيك الاهل حسن : افا و الله يا بنت أختي .. نور : عطني خالتي أحلام بكلمها حسن و هو ينادي أحلام : نور تبي تكلمج أحلام : الوو سلام عليكم نور : و عليكم السلام أحلام : شخبارج نور ؟ نور : تمام خالة انتي شخبارج ؟ أحلام : اوكي .. نور : ها عاد اذا خالي سوى لج شىء ولة ضايقج .. اول شىء لازم تسوينه تدفقين علي عشان اادبه أحلام : ترى ما أرضى على زوجي حسن و هو يكلم أحلام : شقالت ها الخبلة أحلام : تقول اذا ضايقتني اتصل فيها عشان تأدبك حسن سحب التلفون من أحلام : مع السلامة و صك التلفون على ويه نور نور : ويعـــــــــــــــــة أم نور : تستاهلين شنو ها الكلام اللي قلتيه ؟ نور : يووووووووو خليني .. بروح أرقد ابرك لي بكرة وراي دوام الجامعة أم نور : الله يهديج .. .. ************* |
الجزء السادس :: في البحرين ( بيت ابو نور ) : في الصباح : أم نور : قومي تأخر الوقت نور : يمة تكفين بس خمس دقايق أم نور : يالله قومي بلا مصاخة من قبل نص ساعة كله تقولين بقوم بعد خمس دقايق نور : في ها البيت محد يقدر ينام أم نور : من قال لج ترقدين مـتأخر ؟ نور و هي عاقدة حواجبها : محد .. الا الساعة جم الحين ؟ أم نور : ثمان و نص نور : ياويلي أول محاضرة بتبتدي الساعة 9 أم نور : عيل بسرعة قومي تزهبي نور و هي تنط من على السرير : ابشري دقايق و قامت بسرعة راحت الحمام و لبست ثياب يديد و حملت كتبها في ايدها و قبل ما تطلع من الغرفة وقفت جدام المنظرة من يديد تشوف نفسها .. و اطلقت زفرة طويلة بعدها طلعت من الغرفة و نزلت للطابق السفلي .. نور : يمـــــــــــــة أم نور : هلا نور : صباح الخير أم نور : صباح الورد و الفل و الياسمين نور بابتسامة رائعة : شخبار الغالية اليوم ؟ أم نور : بخير ما دامج بخير نور : ها شمسوية لنا فطور ؟ أم نور : سويت لج روتي بجبن اخذي وياج و في الطريج اكليه لان ابوج ينطرج في السيارة نور و هي تشوف ساعتها : وووووي وايد تأخر الوقت .. خلاص يمة مشكورة بعد المحاضرة بروح الكافتيريا و باكل لي شىء أم نور : على هواج نور : يالله استأذن باي أم نور : بايات .. في السيارة : بو نور : جان رقدي اكثر نور : هههه صبحك الله بالخير بو نور بو نور و هو معصب : صباح الخير .. يالله بسرعة ركبي .. عشان اوصلج الجامعة بعدين عندي اجتماع نور : انشاءالله انشاءالله بو نور طول الطريج ساكت : ................ نور : شفيك يبة ؟ بو نور : افكر يا بنيتي نور : في شنو ؟ بو نور : اليوم بعقد صفقة وية شركة بو فارس .. و هي من اهم الصفقات بحياتي نور : الله يوفقك بو نور : ويوفقج بنيتي .. اكا وصلنا الجامعة ديري بالج على روحك نور : تامر امر بو نور : ما يامر عليج عدوج .. تابع الجزء السادس :: في الجامعة : يوسف : نوف انا بروح الحين محاضرتي بتبدا بعد 3 دقايق نوف : اوكي انا بروح اقعد في الكوفي شوب ليما تبتدي محاضرتي الساعة 10 يوسف : بس ديري بالج على نفسج نوف : ما يحتاج توصي حريص يوسف : نوف نوف : نعم يوسف : نور وياي في المحاضرة ؟ نوف : اي وياك بس مدري وينها تاخرت يوسف و هو يقول بقلبه : عسى ما صادها شىء .. يا ربي ليش احاتيها نوف : هلوووووو شفيك سرحت يوسف : ها مافيني شىء .. الا شوفي هناك مب شنها نور نوف : امبلة هي نور جربت منهم : السلام عليكم نوف و يوسف : و عليكم السلام نور : شخباركم ؟ نوف و يوسف وية بعض : الحمدلله بخير نور : اترخص الحين عندي محاضرة يوسف : محاضرة الأستاذ غازي ؟ نور : اي يوسف : عيل انتي وياي نوف : مب جنك سألتني ها السؤال و انا قلت لك اي يوسف : جاوبتيني بس كنت ابي اتاكد .. مع السلامة بروح الحق على المحاضرة نور : حتى انا بروح الحق مع السلامة نوف .. بنطرج الساعة 11 في الكافتيريا نوف : اوكي انا محاضرتي بس ساعة يعني اقدر اشوفج الساعة 11 نور : باي نوف بلا حماس : باي و اتجهت للكافتيريا اما يوسف و نور أتجهوا للمحاضرة .. في قاعة محاضرة الاستاذ غازي :: يوسف طول الوقت سرحان صوب نور .. و يفكر : انـــــــا احبها لازم اواجه نفسي بها الشىء .. احبها و الله احبها نور انتبهمت لها الشىء بس ما علقت لانها ما تبي تسوي فضايح لها و لرفيجتها في المحاضرة كان أحمد قاعد بجنب فارس ( كانوا وية بعض من الروضة الى الصف الثالث بعدين افترقوا ) فيوسف رسل له ماسج : أحمدو ليش قاعد عند ها الولد تعال اقعد يمي .. أشفيك ؟ فجاوبه أحمد : سوري فارس .. انت ييت متاخر فانا قعدت عند فارس رسل له يوسف : و مداك تتعرف عليه حتى تعرف اسمه ؟ رسل له أحمد : فارس كان اعز رفيج عندي قبل ما اعرفك .. بعدين افترقنا لانه راح لمدرسة ثانية .. يعني عشرة عمر فرسل له يوسف : اهاااااا شذي .. خلاص حبيبي بشوفك بعد المحاضرة .. فارس : أشفيك وية ها المسجات ؟ أحمد : هاي واحد من الربع يسألني .. خلك من هاي الحين تدري شكثر انا مستانس اليوم لاني شفتك فارس بضحكة ما تنسمع : حتى انا .. يا ما ايام قضيناها وية بعض بالحلوة و المرة أحمد : اي و الله عسانا ما ننحرم من بعض بعد اليوم فارس : آميــــــــــــــــــــــ ـن .. أحمد شوف البنية اللي لابسة قميص أحمر هناك أحمد : اي شفتها هاي نور فارس : أسمها نور ؟ أحمد : اي فارس : ليش تعرفها ؟ أحمد : لا بس هي رفيجة أخت رفيجي فارس و هو عاقد حواجبه : شعندك تحب حتى تعرف رفيجة اخت رفيجك ؟ أحمد : ما اقدر اخش عليك شىء الصراحة اي أحب فارس : من ؟ أحمد : رفيجة نور .. اللي تصير أخت رفيجي فارس : عيل نقول مبروك أحمد : اي مبروك توى الناس لازم اكمل دراستي و اشتغل بعدين افكر في الزواج .. بس تعال ليش سألتني عن نور فارس و هو سرحان : مدري من اول ما شفتها احس باني اعرفها من زمان .. أحمد : يعني شنو تحبنها ؟ فارس : تقدر تقول حب سريع و لا من طرف واحد أحمد بحزن يقول في قلبه : اعز ربعي يحبون نفس البنت .. شالمصيبــــــــــــــة !! .. *********** |
الجزء السابع :: في شركــة بو فارس :: بو فارس : يا هلا و الله بابو نور .. بو نور : هلا فيك بو فارس : توه ما تنورت الشركة بنورك بو نور : تسلم .. شخبارك ؟ بو فارس : بخير الحمدلله .. بو نور : الف حمدلله بو فارس : على العموم خلنا الحين في الشغل .. موافق على شروط الصفقة ؟ بو نور : اكيد موافق .. بو فارس : عيل نتوكل على الله .. ترى بعقدنا لها الصفقة راح يكون خير لي ولك بو نور باستغراب : شلون ؟ بو فارس : أنا الحين بخبرك .. احنا صفقتنا هي عن بيع الملابس .. و راح تستمر ها الصفقة لمدة سنة .. خلالها راح نضم شركاتنا وية بعض .. لتسهيل العملية و طبعا الارباح النص بالنص .. بو نور : يشرفني بان تكون شريكي بو فارس : و انا بعد يشرفني بان اكون شريكك .. و اذا ارتحنا لبعض بعد السنة نقدر نضم شركاتنا لبعض للأبد بو نور : عيل خلاص هات الاوراق عشان اوقع بو فارس : تفضل بو نور و هو يوقع : خلاص صرنا شركاء بو فارس و هو يصافح بو نور : مبروك بو نور : الله يبارك فيك حتى انت مبروك .. .. اما في الجامعــــــــة :: بعد ما انتهت محاضرة الاستاذ غازي .. برع القاعة :: يوسف : هلا احمد شخبارك ؟ أحمد : اوك و انت ؟ يوسف : تمام أحمد و هو متحمس : يوسف هاي رفيجي فارس اللي خبرتك عنه يوسف و هو يسلم على فارس : تشرفنا فارس : و انا بعد تشرفت بمعرفتك .. أحمد : اشفيكم الى متى بنظل واقفين .. قوموا نروح الكفتيريا نقعد يوسف : شوف فارس شاللي يريحه ؟ فارس : اي شىء يريحكم يريحني أحمد : عيل أمشوا في الكافتيريا :: نوف كانت تنطر نور .. نور : السلام عليكم نوف : و عليكم السلام نور : ..... نوف بتذمر : دومج مو مضبوطة في مواعيدج نور : شا سوي الطريج من قاعة المحاضرة الى هني طويل نوف : واااااااااي زين تعالي قعدي نور : اكاني قعدت نوف : أحبــــــــــــــــــه نور : تحبين منو؟ نوف : أحمد نور : تقصدين رفيج أخوج ؟ نوف : اي .. اليوم رسل لي رسالة كاتب لي فيها قصيدة يبين مشاعره .. نور : اقريه لي نوف و هي تطلع من شنطتها ورقة : لا انتي اقريه اخاف احد يسمعنا نور بصوت اقرب للهمس قاعدة تقرا الشعر : أنتي يا اللي سكنتي داخلي .. حبج مالي في قلبي .. صرتي الهوى اللي اتنفسه .. بدونج الدنيا معفسة .. عبالج انا مينون و الله بجاوبج انا مينون .. مينون بعشقـــــــج يا بنت امج و ابوج نور بعد ما قرت : .......... نوف : شفيج ؟ نور : ما فيني شىء .. بس و الله خايفة بانج في يوم من الأيام تنصدمين .. ولة يطلع .. نوف و هي تخلي ايدها على فم نور : اوووووس لا تكملين .. قصدج انه بيطلع جذاب نور تهز راسها : ....... نوف : ترى انا نوف محد ما يقدر يجذب علي نور : ياما ناس قالوا جذي و في النهاية ندموا .. نوف : لا تخليني يائسة من عيشتي نور : شوفي حبيبتي انتي حبيه بس لا تحاولين بان تبينين له عشان لا يلعب في مشاعرج .. نوف : ما فهمت ؟ نور : يعني اذا قال لج كلمة حاولي توقفينه عند حده عشان يعرف انج محترمة و ما عندج ها السوالف نوف : ........... نور : شوفي هناك أخوج و أحمد و واحد ثاني قاعدين نوف بابتسامة يائسة و هي تشوف : اي اكاهم نور : عيل قومي نطلع انا تعبانة بروح البيت ارتاح .. نوف : اي تعالي عن سالفة الليسن متى بتطلعين لج ؟ نور : ما دري بس انشاءالله ها الايام بروح اتعلم السواقة نوف : عيل قولي لي عشان ايي وياج .. نور : اليوم بسال ابوي و بتصل فيج .. نوف : اوك .. الا تعالي من بيوديج البيت نور : ابوي الحين بيي ياخذني .. لازم اطلع الحين انطره باي نوف : باي باي ************ |
الجزء الثامن :: نور طلعت في الحر تنطر ابوها ليما وصل فركبت السيارة .. نور : قوة يبة ابو نور : الله يقويج .. شسويتي في اول يوم لج في الجامعة ؟ نور : كان يوم عادي .. وصلت الجامعة متأخر فبسرعة رحت محاضرتي بعدين قعدت وية نوف في الكافتيريا و اكاني الحين في السيارة معاك ابو نور : انا اللي اقصده يومج وية ربعج القدامى نور : ما شفتهم .. يبين اوقاتهم مختفلة .. الا شخبار الصفقة ؟ ابو نور : قصدج الصفقة اللي وية شركة بو فارس ؟ نور : اها ابو نور : كل شىء تمام نور : الحمدلله ابو نور : اشفيج يا بنيتي ساكتة .. قولي لي !! نور : الصراحة يبة انا ابي اروح اتعلم السواقة عدل .. مع اني اعرف اسوق و عندي سيارة بس المشكلة ما عندي ليسن فاخاف في يوم من الايام الشرطة تصيدني و اروح فيها .. ابو نور و هو يفكر : اي صدقتي الله ستر يوم دعمج اخو رفيجتج نور : يعني يبة اروح ابو نور : اكيد لازم تروحين و باسرع وقت نور : مشكوووووووووور ابو نور : لا تشكريني الا لما تروحين الكورس .. الحين بتصل في المدرب اللي درب خالج على السواقة عشان يعلمج .. نور بابتسامة كبيرة : ............ ابو نور اتصل في المدرب بعد ما طلع رقمه اللي كان مخزن في جواله : الو المدرب : نعم من معاي ؟ بو نور : معاك ابو نور المدرب : يا هلا .. شلون اخدمك اخوي بو نور : ابي اييب بنتي عشان تتعلم السواقة .. المدرب : لحظة بشوف اللستة اللي عندي .. عشان اعرف متى فاضي بو نور : خذ وقتك المدرب بعد ما شاف اللستة : يناسبها يوم الخميس للتدريب .. بو نور : اي وايد زين بس ما خبرتني جم مرة لازم تيي عشان تحصل رخصة القيادة ؟ المدرب : على حسب .. هي تعرف تسوق ؟ بو نور : اي تعرف المدرب : آه منهم ها الجيل كلهم طايشين .. بو نور : ههههه هاي بعد قدرنا احنا نعاني منهم المدرب : خلاص يوم الخميس ييبها و اذا تعرف وايد زين تسوق .. بعطيها اختبار و اذا نجحت فيه بتحصل الرخصة بكل سهولة بو نور : مشكور المدرب : لا شكر على واجب الحين خلونا نرجع للجامعة :: نوف كانت واقفة برع الكافتيريا تنطر أخوها .. و كانت تستحي تدش داخل الكفتيريا لان أحمد موجود .. فقالت في قلبها : ابرك شىء اروح اتصل فيه و اقول له اني قاعدة أنطره عشان يسرع و يي .. نوف : الو يوسف : ها نوف شتبين ؟ نوف : تعال بسرعة اخوي صار لي ربع ساعة انطرك برع الكافتيريا يوسف : ربع ساعة ليش ما خبرتيني ؟ نوف : خفت اسوي لك ازعاج يوسف : حصل خير الحين بيي و بوديج البيت نوف : اكاني ناطرتك باي يوسف : مع السلامة .. قام يكلم أحمد و فارس : باي شباب أحمد : على وين يوسف ؟ يوسف : نوف تنطرني برع فارس : ما شبعنا من جلستك أحمد : بسرعة روح حرام عليك خال اختك بروحها يوسف و هو مستغرب : شالحماس أحمدو أحمد : لا حماس ولة شىء .. بس حرام عليك خالها بروحها يوسف بطنازة : تبي الفكة مني ؟ أحمد : اي تصدق يوسف : مالت عليك .. خلني اروح لاختي احسن أحمد : هههههههه يوسف : اي اضحك و مشى عنهم .. و خذ أخته و راحوا البيت .. في الطريج نور اتصلت في نوف : نور : الو نوف : هلا بالطش و الرش و ماي المرد و الزعفران نور : الله الله كل هاي لي نوف : و اكثر نور : يا بعد جبدي انتي .. تعالي نوفو انا ابوي اتصل لمدرب خالي و خذ لي موعد عشان يعلمني السواقة نوف : قصدج المدرب نايف ؟ نور : اي هو نوف : هاي بعد درب يوسف على السواقة نور : عيل زين اتصلوا فيه و اخذي لج موعد نوف : خلاص عيل نور : بخليج الحين سي يو تومورو نوف : باي .. يوسف : نور كانت على الخط ؟ نوف : اي نور بس ليش تسأل ؟ يوسف : يعني حرام اسال نوف : لا بس هاي اول مرة تسأل .. مدري احس انك وايد مهتم فيها يوسف : و اذا كنت مهتم فيها انتي شدخلج .. يالله نزلي وصلنا البيت .. طلعت نوف من السيارة و على ويهها علامة استفهام كبيرة .. *********** |
الجزء التاسع :: في فرنسا :: حسن و أحلام قاعدين يمشون على البحر .. أحلام : شاللي يعجبك في ها المكان ؟ حسن : البحر أحلام : انا اكره البحر .. أكرهه من كل قلبي حسن بتعجب : ليش ؟ أحلام : أخاف ياخذ في يوم من الأيام أعز الناس على قلبي .. حسن : بس انا احب البحر وايد .. يوم كنت صغير كل يوم كنت ايي عند البحر و احكي له همومي .. البحر هو جزء مني .. أحلام : كل أنسان في ها الدنيا يجب أشيا و يكره أشيا حسن : الدنيا عجيبة بمعنى الكلمة .. أمشي نروح ها المجمع نسوي شوبنق .. أحلام : حبيبي اذا ما عندك مانع يصير توديني برج ايفل ؟ حسن : انتي آمري و تدللي و انا بقول لج شبيك لبيك عبدك بين يديك أحلام بحيا : مشكور حسن : يالله الحين قومي نمشي للمجمع .. تراه جريب بعدين بنروح برج ايفل أحلام : اوك مشوا للمجمع و دخلوه .. و أحلام من مكان لمكان تركض و تشتري .. تدرون الحريم و طبعهم .. حسن : أحلام و الله ريولي تعورني .. أحلام : حسن حسن : خلاص عيل ما بوديج بر ايفل أحلام : لا لا الا بر ايفل ابي اروحه .. حسن : زين خلاص يدي و ريولي تكسروا من ها الأكياس .. الحين بتصل في سواق الفندق عشان ياخذهم ويوديهم الفندق .. و احنا بنروح برج ايفل أحلام بفرح : صج حسن : و انا عند وعدي ية السواق و خذ الأكياس .. و هم قعدوا يمشون للبرج .. ليما وصلو أحلام : روووووووووعة حسن : اي ها البرج اهم شىء في فرنسا .. أحلام : علطول كنت اسمع عنه بس ما شفته حسن : اكا شفتيه أحلام : أمش ندشه حسن : يالله مسك ايدها و ركبوا للطابق الفوقي للبرج .. و هناك شاف حسن واحد من ربعه القدامى حسن : يا هلا خالد خالد : حســـن شالصدفة الحلوة حسن : شتسوي هني يا ريال ؟ خالد : انا عايش في فرنسا .. انت شتسوي هني ؟ حسن : ياي في شهر العسل مع المدام خالد : مبروك مبروك حسن : الله يبارك فيك .. خالد : ماني معطلك بعطيج رقم كارتي و عنوان بيتي .. زورني باجر الليل تراك معزوم على العشا الساعة 8 حسن : انشاءالله بحاول .. خالد : يالله يا الحبيب فمان الله حسن : في حفظه .. في اليوم الثاني :: حسن : حبيبتي انا معزوم الليلة في بيت خالد أحلام : منو خالد ؟ حسن : رفيجي اللي أمس شفته أحلام : هاي حالة انا في شهر عسل و تبي تهدني حسن : بس ليلة حبيبتي أحلام : اوك بس لا تتأخر حسن : اوك ماني متأخر باي أحلام : بايات .. و قعدت على الكرسي تفكر : ها الريال اللي اسمه خالد مدري انا مو مرتاحة له .. الله يستر .. واي شكثر مشتاقة لأهلي .. مشتاقة لأختي و عيالهـــــــا .. و مشتاقة للكل .. رن جرس التلفون : ترن ترن ترررررررررررررررررن أحلام : الو أم يوسف أحلام حبيبتي شخبارج ؟ أحلام : بخير خيو .. أنتي شخبارج ؟ أم يوسف : مب بخير أحلام : افا أم يوسف : لها الدرجة نسيتيني حتى صرتي ما تتصلين وايد أحلام : سامحيني حبيبتي .. حقج علي .. بس لان ما عندي وقت أم يوسف : ما دام شذي سامحناج أحلام : الحمدلله ههههههه أم يوسف : بس بغيت أسلم عليج .. يالله مع السلامة أحلام : على وين .. ما مداني أكلمج أم يوسف : انشاءالله يوم بتردين من السفر بنتكلم وايد .. مع السلامة أحلام : مع السلامة .. اما عن حسن .. عط العنوان اللي رفيجه عطاه لسواق الفندق عشان يوديه .. و يوم وصل للعنوان .. كان بيت فخم .. و وايد عود .. و شكله كان حلو .. طق الجرس ففتح له خالد الباب .. خالد : يا حيا الله من يانا حسن : الله يحييك خالد : تفضل حسن : دام فضلك .. قعدوا يسولفون بعدين .. يابوا الخدم العشا .. و أكلوا ليما شبعوا .. حسن : الف حمدلله .. خالد : بالعافية حسن : الله يعافيك .. أشكر المدام على العشا خالد : هه انا مو متزوج حسن : مو متزوج !! خالد : اي مو متزوج .. الطباخ هو اللي طابخ حسن : انا عبالي انت متزوج .. مسامحة خالد : لا عادي .. و بعد العشا يابت الخدامة الشاي .. و كان حسن رايح الحمام .. فخلى خالد في شاي حسن حب بعد ما شرب حسن شايه حس بدوخة .. حسن بخبث : شفيك ؟ خالد : راسي .. مدري تعبان .. شنة خالين شىء في الشاي .. حسن : لا عادي مافيه شىء .. خالد : لا لازم ارد الحين البيت مشكور .. حسن : العفو .. فمان الله .. بعد ما راح حسن .. ضحك خالد بصوت عالي .. اكيد عرفتوا شنو الحب هو المخدرات ************* |
| الساعة الآن 03:15 PM |
Powered by vBulletin®
Copyright ©2000 - 2024, vBulletin Solutions, Inc.
