آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
02-12-13, 06:47 PM
| #11 | ||||||||
| مراقبة عامة ومشرفة منتدى الروايات المنقولة  
|  بعد ان تركها شريف .. ذهب الى المطعم الرئيسي للقريه .. دخل مباشرة الى المطبخ الملحق بالمطعم .. ما إن رآه الشيف حتى نده عليه الشيف : اهلا كابتن شريف شريف : ها .. الحاجه جاهزه؟ الشيف : ربع ساعه بالظبط .. شريف بضيق : ربع ساعة ايه بس انا مأكد عليك من شويه .. الشيف : معلش ياكابتن عشان اعملك حاجه عاليه رن هاتف شريف باسم غاده ورد عليها سريعا .. انهى المكالمه .. وقف انتظر الشيف وهو ينظر لساعته ويتحسس جيبه بين الحين والاخر .. ________________________________________ دخل بخفه ودون ان يصدر صوتا .. تأكد انها بالغرفه .. جهز كل شئ دون ان يصدر صوتا .. ثم دخل عليها .. وجدها جالسه على الكرسي المقابل للنافذه وعلى عينيها اثار الدموع .. فزع شريف لمنظرها .. اقترب منها سريعا وقال : غاده .. مالك نظرت له بلوم وعتاب مخلوط بضيق : مفيش حاجه قامت من مكانها وازاحت الغطاء استعدادا للنوم شريف : انتي بتعملي ايه؟ غاده : هنام زي مانت شايف .. شريف : دلوقتي ؟ غاده : الساعه اتناشر شريف : احنا كل يوم بنسهر .. مالك في ايه ياغاده ؟ نظرت له وقالت : انت كنت فين ؟ شريف بضحك : هو ده اللي مضايقك؟ غاده : ماجاوبتنيش شريف وهو يمد لها يده : طيب تعالي اقولك لم تستطيع مقاومة سحر ضحكته كالعاده وقامت معه على الفور ونسيت حتى سؤالها .. خرجت معه الى الصاله .. تفاجأت بالذي تراه والذي كان غير موجود عندما دخلت الحجره .. الصاله مطفأة الأنوار .. الشموع مرصوصه في كل مكان .. وعلى الطاوله الموجوده يوجد تورته صغيره على شكل قلب مكتوب عليها بمنتهى البراعه والحرفيه " بحبك ياغاده" وعلى الأرض منثور أوراق الورد ذو الرائحه الجميله .. وضعت يدها على فمها .. حاولت ان تهدئ من انفعالها لما تراه امامها .. سارت على الارض المليئه بالورود .. تأملت قالب الحلوى .. تحسست الشموع بيدها لتتأكد من حقيقة ما تراه .. دمعت عيناها اكثر وأكثر .. التفتت اليه والذي كان واقفا على باب الحجره ينظر لها بكل حب .. ركضت نحوه وارتمت في حضنه وهي تبكي .. ملس شريف على شعرها الناعم وقال : بتعيطي ليه دلوقتي ؟ غاده : عشان زعلت منك ومكنتش اعرف انت كنت بتعمل كل ده عشاني مسكها من ذقنها ونظر مليا في عينها : انا بحبك انتي ياغاده .. انتي وبس ثم مسكها من يدها وقال : تعالي اقعدي .. جلسوا على الاريكه : حبيبتي انا عارف ايه اللي بيدور في دماغك .. وكل بصه بتبصيها لاي واحده في اي مكان واحنا سوا ببقى عارف البصه دي لمين وعشان ايه كانت تستمع اليه وهي محرجه منه .. فأكمل : حاولت اخليكي تتكلمي وتطلعي كل اللي جواكي .. بس انتي فضلتي تكتمي احساسك بالغيره عليا مع انه مالوش اي سبب .. ثم مسك وجهها بكفيه وقال : عشان انا مفيش في قلبي مكان غير ليكي انتي بس .. ويوم ماتجوزتك وبقيتي مراتي .. خلاص .. كل الستات قدامي كائن واحد زيهم زي الرجاله .. محدش هيقدر يهز فيا شعرايه .. غاده ومازالت تذرف دموعا ولكن دموع السعاده : بجد ياشريف ؟ هتفضل تحبني طول عمرك ومش هتبص لواحده غيري؟ شريف : اموت لو بصيت لغيرك غاده سريعا : بعد الشر شريف : انا بتكلم جد .. اموت لو بصيت لغيرك .. لو عملت كده هبقى فعلا قلبي ميت لانه خلي من حبك .. وزي ماقلتلك قبل كده .. اطمني ياغاده انا كلي ليكي قلبي وعقلي وكل حياتي ليكي وانا كمان بطلب منك ده غاده : بتطلب ايه؟ شريف : اني اكون حبيبك رقم واحد في حياتك .. غاده بصوت فرح : ياااااه ياشريف .. انت بتطلب حاجه موجوده فعلا .. انا معنديش اهم منك ولا من سعادتك .. أوعدك هفضل احبك طول عمري .. ولو اتغير حبي ليك هيتغير للأقوى مش للأضعف .. شريف بسعاده : أيييييييوه كده .. عايزك كده على طول الخط .. حبيني ودلعيني .. وانا هبقى كل دنيتك وحياتك وعمري ماهجرحك ياغاده .. وأنا قد كلمتي دي .. شيلي بقى الأفكار اللي ممكن تضايقك مني من دماغك .. وريحي عقلك خالص من التفكير في الحته دي .. سيبي نفسك ياحبيبتي .. ماتعمليش حاجه في الدنيا الا انك تحبيني وبس .. احتضنته غاده من فرط سعادتها بكلماته التي انزلت السكينه على قلبها الثائر .. ثم تناولا جزءا صغيرا من قالب الحلوى .. لم يستطيعا انهاؤه فهم يشعرون بالشبع من الحب الذي يملأ قلبهما في هذه الليله السعيده دخل الحجره وهو ممسكا يدها .. أجلسها على كرسي التسريحه غاده متسائله : انت مقعدني هنا ليه؟ لم يرد عليها ولكنه اعطاها ظهره ثم التفت اليها مجددا وفي يدها سلسله ذهبيه يتدلى منها قلب مفرغ ومرصع اطاره بفصوص الماس .. شهقت غاده في انبهار ونظرت اليه وهو يلبسها اياه .. تحسسته بيدها وهي تنظر اليه بالمرآه غاده : ايه ده ياشريف ؟ ليه كل ده؟ مسك يدها وأوقفها من جسلتها وقال : عشان حاجه واحده .. عشان بحبك ياغاده نسيت غاده كل ماكانت تفكر به .. اقنعها شريف بأفعاله وأثبت لها حبه الشديد لها .. حتى أنها تصورت للحظه أنه يحبها أكثر من حبها له .. نسيت كل ما وسوس لها الشيطان .. وثقت في زوجها لأبعد حد .. نعم هو يحبها هي فقط .. هناك بالفعل من هي أجمل منها ولكن لماذا اختارها هي من بقية النساء .. لأنه يحبها ويذوب في عشقها .. ارتاحت واستكانت في ليلتها هذه وهدأ القلب الذي كان يشتاط غضبا منذ قليل .. وحمدت ربها على نعمة الزوج المحب لها .. *************** | ||||||||
|  |
|
02-12-13, 06:48 PM
| #12 | ||||||||
| مراقبة عامة ومشرفة منتدى الروايات المنقولة
| الفصل الرابع وصلت الطائره أرض مطار القاهره .. وكان في استقبالهم رامي بسيارته .. أوصلهم للمنزل على وعد بزيارته لهم في الغد .. وصلوا في ساعه مبكره .. كانت الهام في انتظارهم .. الهام : حمدلله على السلامه يااولاد .. قبلها شريف من وجنتيها ومن يدها وقال : الله يسلمك ياأمي أقبلت عليها غاده بابتسامه فرحه : وحشتيني اوي ياطنط الهام : وانتي وحشتيني اكتر ياغاده .. قوليلي ياماما بقى بقينا في بيت واحد صعدوا وجلسوا في حجرة المعيشه .. الهام : والله يابنتي مانا عارفه انتي اصريتي ليه تعيشي معانا هنا غاده مداعبه : ايه ماما هتقل عليكوا ولا ايه؟ الهام : لا والله بتكلم جد .. انتي عروسه ومن حقك تعيشي في بيت ماحدش يضايقك فيه غاده : بس انا عارفه انك طيبه وانا مش هتضايق من قعدتي معاكي هنا .. بالعكس .. ثم قالت بمرح : دانتي هتبقي في صفي لو شريف فكر يزعلني ولا حاجه .. مش كده ولا ايه؟ الهام : كده ونص .. هو حد يقدر يزعلك طول مانا عايشه شريف : الله الله .. انتوا اتفقتوا عليا .. لا ياماما انا عايزك تنشفي كده وتبقي ولا ماري منيب في زمانها الهام : عليك انت انما غاده حبيبتي لا طبعا ضحكت غاده من قلبها .. قامت وجلست جوارها وقبلت رأسها .. الهام : قوموا ارتاحوا دلوقتي .. ناموا شويه لحد ما اخلص الغدا .. غاده : لا انا مش هنام انا هساعدك في المطبخ الهام : لا لا .. انا عايزاكي ترتاحي وتبقي رايقه عشان بليل اهل شريف جايين يباركلكوا وقفت غاده : يعني متأكده انك مش عايزه مساعده انا والله ماتعبانه ومش جايلي نوم أوي شريف : انتي بتتهربي ولا ايه ؟ الست بتقولك روحي ارتاحي .. افهمي بقى نظرت له غاده وهي تبرق له بعينيها بينما ضحكت الهام لمداعبته وقالت : انا ياخويا مش قصدي حاجه .. ثم قالت بلؤم : ولو عايزه تيجي تساعديني خلاص ياغاده انا غيرت رأيي .. تعالي يابنتي شريف وهي يشد غاده الى حجرتهما : هو انا ماليش رأيي في البيت ده .. هترتاحي يعني هترتاحي سعدت الهام لفرحة شريف بعروسته .. دعت لهم بالحياه السعيده والذريه الصالحه .. وفي وقت الغذاء شريف : مين اللي جاي بليل ياماما الهام : خالتك طبعا وبناتها .. وعمتك هدى قالت انها هتيجي شويه بعد العشا هي وخالد .. واحتمال عمك حمدي يجي بس مأكدش بنفسه .. هدى هي اللي قالت انه احتمال يجي واحتمال لأ شريف : جايين من الشرقيه على هنا ولا هما اصلا في القاهره ؟ الهام : من هناك على هنا على طول وهيروحوا في نفس اليوم مش بايتين ثم نظرت لغاده وقالت : ماتكلمي ولاد عمك ومامتهم يجوا النهارده يتعرفوا عليهم غاده : النهارده ؟ طيب هكلمهم واشوف ظروفهم ايه وفي المساء .. جاءت خالة شريف امال .. وبناتها ايمان واماني وامنيه استقبلتهم الهام وجلست معهم الى ان نزل اليهم شريف وهو ممسك يد غاده .. سلم عليهم جميعا هو وغاده وجسلوا معهم في بهو الفيلا .. امال : طبعا انتي مش فاكره حد فينا .. مع ان احنا سلمنا عليكي في الفرح ايمان : هتفتكر مين ولا مين ياماما .. الفرح ماشاء الله كان مليان .. شريف : اومال لو شفتي القاعه عندنا كانت عامله ازاي .. زحمه جدا حتى الصحفيين والمصوريين كانوا اكتر من المعازيم نفسهم ضحكت امنيه وقالت : وفي الاخر مالاقيش ولا صوره ليا في اي مجله من اللي نزلوا صور الفرح شريف : ازاي يافالحه .. المصوريين كانوا عند قاعة الرجاله بس وبعدين كنتي خرجتي وقولتيلي وانا اتصورت معاكي مخصوص امنيه : لا ياخويا مانت كنت في ملكوت تاني خالص .. وقالت وهي تنظر لغاده : الحب الحب بقى شريف : ماتزعليش منها ياغاده .. امنيه دي لسانها فالت منها على طول نستني اعرفك على الباقي ثم قال: ايمان خريجة اداب متجوزه وجوزها في السعوديه حاليا .. اماني السنه الجايه بكالريوس صيدله .. واخر العنقود الست امنيه في ثانويه عامه .. غاده : انا مبسوطه اوي اني اتعرفت عليكوا .. امنيه: وبما اننا اخوات آبيه شريف .. هتلاقينا ناطيين عندك كل شويه .. يمكن يجي حظي في صحفي كده يكتشفني غاده : انتي عايزه تطلعي ممثله ولا ايه؟ امنيه : لا لا ممثله ايه وكلام فاضي ايه .. انا حلمي في الصحافه نفسها غاده : طيب يعني تدخلي اعلام بقى ودي عايزه مجموع عالي امال : اعلام ايه بس .. جامعة الزقازيق مافيهاش اعلام .. هتعملي ايه امنيه : عارفه والله ياماما.. بس لو جبت مجموعها .. يبقى تستاهل اني انزلها كل يوم القاهره امال : طيب انجحي الاول ونشوف اللي ممكن يحصل امنيه : شكلك بتسكتيني ياأم إيمان امال : اسكتي بقى صدعتي الناس برغيك ده .. غاده : لا والله دي دمها خفيف جدا امنيه : اخيرا لقيت حد ينصفني في العيله دي شريف : اه ياندله بتبيعيني .. دانا اللي الوحيد اللي بستحملك ياظريفه غاده : بس اماني ساكته ليه مابتتكلميش اماني : هه .. لا ابدا .. امال : هي امنيه مديه فرصه لحد يتكلم امنيه : يادي امنيه .. انا هطلع بره في الحديقه .. الجونينه اللي بره دي .. امال : احسن اهو تريحينا خرجت امنيه وجلست بالحديقه الصغيره بالخارج وفي اذنيها سماعات التليفون تستمع لاحدى الاغاني .. بينما ظل الجميع بالداخل.. وبعد قليل وجدت امنيه من يقف بسيارته امام المنزل .. عمة شريف وابنها .. هنا قالت امنيه لنفسها : مممم عشان كده يااماني متنحه من ساعت ما جيتي... عبروا البوابه الخارجيه .. لمحوا أمنيه التي تجلس قرب الفيلا .. سلمت عليهم ورافقتهم الى حيث الباب .. أستأذنتهم أن تدخل قبلهم لكي تنبه غاده بإرتداء الحجاب هنا قال خالد : لا لا خليها براحتها أنا هقعد هنا أستنى شريف هدى : ماشي ياحبيبي شعر بالضيق يغزو قلبه .. فكان على وشك أن يراها ولكن لم يكن الحظ حليفه .. ذهب الى الكرسي الموجود في الحديقه منتظر شريف وهو يهز قدمه في عصبيه *************************** | ||||||||
|
| |
|
02-12-13, 06:49 PM
| #13 | ||||||||
| مراقبة عامة ومشرفة منتدى الروايات المنقولة
| دخلت أمنيه ومعها هدى .. سملت عليهم واحده تلو الآخرى .. بينما كان عينا أماني تنظر الى الباب منتظره ظهور شخص ما .. مالت عليها أمنيه وقال بخفوت : هيدخل إزاي يافالحه وغاده قاعده بشعرها ومش متغطيه وبعدين ماتبصيش على الباب هتفضحي نفسك عقدت أماني حاجبيها وجلست عائده الى صمتها مره اخرى قالت هدى : خالد بره مستنيك ياشريف .. الهام : مادخلش ليه هدى هدى : عشان لو غاده واخده راحتها ولا حاجه شريف : انا طالعله جلس شريف في الحديقه الخارجيه .. وجلست النساء بالداخل .. وبعد حوالي ساعتين .. امال : احنا يادوب نمشي بقى الهام : ماتباتي ياامال .. وسافري الصبح .. هتركبوا مواصلات دلوقتي؟ امال بصوت خافت : نبات ايه .. البيت في عرايس الهام : طيب شريف يوصلكوا موقف السلام بس واركبوا من هناك مواصله واحده على هناك على طول امال : لا خليه هو مع عروسته واحنا هناخد تاكس للسلام ونركب من هناك هدى : ايوه فعلا خلي شريف وخالد هو اللي هيوصلهم الهام : طيب ماشي سلمت هدى وامال وبناتها على الهام وغاده .. وشرعوا في الخروج من المنزل .. وكلما اقتربت أماني من الباب زاد خفقان قلبها .. فهي على بعد خطوات منه .. قصدت أن تتلكأ في خطواتها لكي تكون أخر الخارجين من المنزل .. خرجوا من الباب .. وقف خالد وشريف .. هدى : يلا ياخالد .. هنوصل امال والبنات لحد السلام .. خالد : اوي اوي .. اهلا وسهلا امال : معلش يابني هنتعبك معانا خالد بابتسامه : ابدا ياطنط .. حضرتك تؤمريني سلم على بناتها بإماءه من وجهه .. ونظر الى أماني التي كانت تتحاشى النظر اليه .. كان يتمنى أن يرى في عينيها أي تأثر برؤيته .. لماذا دائما يراها ولا تتقابل عينهما .. نسى نفسه للحظات وهو يتأملها من بعيد .. لكن أمنيه التي لا يفوتها شئ لاحظت ذلك .. اقترب خالد من والدته وقال لها هامسا : بقولك ياماما الوقت اتأخر أوي .. أنا رأيي أوصلهم لبيتهم أحسن بدل مايركبوا مواصلات .. بنات لوحدهم هدى : هتروح الزقازيق وترجع في الوقت المتأخر ده؟ خالد : عادي ياماما .. هوصلك إنتي الأول وبعدين هوصلهم .. هدى : وماله يابني بس خد بالك وأوعى تنام وانت سايق خالد بسعاده : ماشي حاضر بعد ان استقروا داخل سيارته امال : والله ياجماعه كان تاكسي هيوصلنا ولا تتعبوا نفسكوا خالد : مايصحش ياطنط لا تاكسي ولا ميكروباص .. انا هوصلكوا لحد باب البيت نظرت أمنيه وأماني الى بعضهما في دهشه بينما قالت امال : لا لا مايصحش الساعه داخله على عشره .. خالد وهو يقول بهدوء : ماهو عشان كده ماينفعش تركبوا لوحدكوا مواصلات دلوقتي .. بس هنوصل ماما البيت ونرجع على الطريق على طول نظرت له من خلفه بإعجاب شديد وسعاده بالغه .. فهو يشعرها بأنه رجلهم ويخاف عليهم .. وسعاده بأنه سيرافقهم مده طويله الى بيتهم .. نزلت هدى الى منزلها وودعتهم .. جلست امال بجانبه مكان هدى .. والفتيات الثلاث بالمقعد الخلفي انطلق خالد مره اخرى الى طريقه .. نامت امال وكذلك ايمان وأمنيه .. ولكن أماني لم تضيع لحظه واحده في النوم وهي معه في مكان واحد كان ينظر لها في المرآه الداخليه كل دقيقه .. بينما هي لم تنظر له .. فقط شعورها وهي قريبه منه يشعرها بالسعاده البالغه .. هكذا هي أماني رصينه في جلستها .. متحكمه في مشاعرها .. غير مندفعه في كلامها .. كانت تنظر الى الطريق وتفكر به في نفس الوقت الذي هو يجلس قربها .. لم تنظر اليه .. فقط مطمأنه أنها جواره .. وصلوا لمنطقه في الطريق اختفت فيها أعمدة الإناره .. فغلف الظلام المكان .. فجأه وجدته يضئ النور الداخلي للسياره .. نظرت له تلقائيا والتقت عينهما في المرآه .. اختلج قلبها لنظرته الثاقبه .. قال لها بصوت هادئ : مانمتيش ؟ قالت : لأ خالد : في بكالريوس السنه الجايه ؟ أماني : إن شاء الله ابتسم وقال : بالنجاح إن شاء الله أماني : شكرا .. عاودت النظر الى الطريق .. وهو الى صمته والنظر لها خلال المرآه .. وصلوا الى المنزل .. شكرته امال كثيرا على تعبه اطمأن خالد على صعودهم المنزل .. وعاد الى القاهره مره اخرى .. وهو مازال يفكر في تلك الفتاه التي شغلت قلبه منذ صغره .. يحبها وربما من قبل ان تشعر هي به .. لفتت نظره من صغرهما .. هدوئها ورقتها جذبته من الصغر .. فهو انسان عاقل ولم يكن في صباه ومراهقته كباقي اقرانه .. لم يكن طائشا او متهورا او يسعى لعلاقات مع البنات .. بل كان ينفر ممن يراهم هكذا .. وهذا ما لفت نظره في أماني .. كانت طالبه متفوقه وهادئه .. تفكيرها يسبق سنها .. عندما كان هو في السنه الاولى في كليته كانت هي في الاول الاعداي .. ولكن كلامها واسلوبها كأنها اكبر من ذلك بكثير وهذا ما أثار اعجابه بها ولكنه فضل ان يكون هذا في قلبه ولم يبوح به احد حتى والده ووالدته الى ان يحين الوقت المناسب لإعلان حبه لها .. *********************** | ||||||||
|
| |
|
02-12-13, 06:51 PM
| #14 | ||||||||
| مراقبة عامة ومشرفة منتدى الروايات المنقولة
| جلست أمنيه على سرير أماني في حجرة الأخيره .. نظرت الى اختها التي وقفت تمشط شعرها ببطء أمام المرآه وهي شارده أمنيه : انتي كنتي عارفه ان طنط هدى جايه عند شريف؟ أماني : أيوه أمنيه : عشان كده أماني : عشان كده ايه؟ أمنيه بصوت رجولي : السنه الجايه بكالريوس مش كده؟ ثم عدلت صوتها وقالت بتهكم : ايه ياختي الرجاله دي !! هما دول الكلمتين اللي عرف يقولهم؟ اش حال ماكنا كلنا نايمين والجو رايق نظرت لها أماني في حده وقالت : احترمي نفسك ياأمنيه .. وبعدين انتي كنتي عامله نفسك نايمه وبتتصنتي علينا أمنيه : انا كنت نايمه فعلا بس صوتكوا صحاني .. وبعدين انتوا هتجننوني .. انا واثقه انه على الاقل بيفكر فيكي .. ده غير ان سيادتك بتموتي فيه أماني بعصبيه : ماتسكتي بقى يابت انتي .. انا غلطانه اني قلتلك على الموضوع ده من الاول أمنيه : قولتيلي ايه دانا اللي عرفتها لوحدي .. فطنه اوي انا أماني : طيب ياست الفطنه امشي بقى على اوضتك عايزه انام أمنيه : اسمعيني بس ..الراجل مافيش حد في حياته وانا شايفه ان انتوا بينكوا حاجات كتير زي بعض يبقى انتي انسب واحده ليه أماني بسخريه : أنسب اه .. انما اقرب لقلبه ماعتقدش أمنيه : طيب ايه رأيك اني لاحظت انه بصلك اكتر من مره .. أماني : عادي بحكم اني واحده من اللي قاعدين وهو بيوجه كلامه للكل أمنيه : بت انتي فاقده الاحساس كده ليه؟ مش عارفه تحددي اذا كان بيبصلك عادي ولا عشان حاجه تانيه مسكت أماني الشماعه التي كانت على الكومودينو وضربت بها اختها ضربات متتاليه : طيب اطلعي بره ياممتلئة الاحساس انتي بأه وقفت أمنيه وهي تتأوه من ضربات أختها وجريت خارج الحجره وقالت لها أماني وهي تطردها من الغرفه : حلو الاحساس ده ياطفله؟ اغلقت أماني باب حجرتها وأطفأت النور .. نامت وهي تفكر فيه كعادتها كل يوم .. لا تراه الا كل فترة طويله نظرا لبعد العلاقه العائليه بينهم . فهو ابن عمة ابن خالتها .. تراه فقط قدرا عندما تكون في زياره عائليه عند خالتها .. وليس كل مره .. والذي لم تكن تعلمه أماني .. أن خالد هو الآخر يفكر فيها قبل أن يدق هو باب قلبها ________________________________________ في اليوم التالي .. استيقظت غاده في نشاط .. بينما شريف مازال نائما .. اغتسلت وبدلت ملابس النوم بآخرى .. فستان نهاري قصير نوعا ما .. صففت شعرها ورفعته عاليا بمظهر أنيق وتركت بعض الخصلات على ظهرها العاري .. خرجت غاده من حجرتها واطمأنت على الهام وجدتها مازالت نائمه .. نزلت الى المطبخ وأعدت وجبة الإفطار .. وبعد قليل دخلت الهام المطبخ عليها .. الهام : صباح الخير ياغاده غاده : صباح الورد ياماما قبلتها من يدها .. ثم أعطت لها ورده كانت قطفتها من الحديقه .. الهام : ربنا يخليكي لينا ياغاده .. طول عمري كان نفسي في بنت .. بس ربنا ماأردش غير اني اجيب شريف وبس .. بابا شريف هو اللي كان بيصبرني ويقولي ماتخافيش بكره شريف يتجوز ويجيبلك بنت تبقى زي بنتك بالظبط .. غاده : الله يرحمه .. كان نفسي اتعرف عليه اوي الهام : كان روحه في شريف .. كان كل حاجه بيعملها يقول عشان شريف .. غاده : ربنا يخليكي ليه .. حضرتك كل حاجه بالنسباله الهام : ويخليكي لينا ياغاده .. غاده : أنا هطلع أصحيه عشان يلحق الفطار وهو سخن الهام : ماشي ياروحي وانا هحضر السفره لحد ماتنزلوا صعدت غاده الى حجرتهما .. دخلت عليه وجدته مازال نائما .. مسكت طرف خصله من شعرها .. وعبثت بها في وجهه بطريقه طفوليه .. وقالت : شيري .. ياشيري .. اصحى ياحبي .. لم يرد ومازال نائما .. كررت النداء ولم يرد .. فقط يهز رأسه ويكمل نومه .. أدرات جسدها شرعت في مغادرة السرير .. فتح عين واحده وابتسم واغمضها مره اخرى سريعا وقال كأنه يحلم : تؤ تؤ تؤ .. مش دلوقتي التفتت اليه وقالت مستفسره : ايه اللي مش دلوقتي .. شريف .. ياشريف شريف تكلم مره آخرى متظاهرا بالنوم : استني لما مراتي تنام وانا هقوم اكلمك .. غاده بصدمه : ايه اللي بتقوله ده .. انت بتحلم تعالت دقات قلبها .. اقتربت منه وهزته بشده وقالت بغضب: قوووووم .. مين دي يااستاذ اللي بتستغفلني وتكلمنها لما انام فوجئت بشريف ينفجر من الضحك ويجلس كأنه لم يكن نائما .. وقفت امام السرير ووضعت يدها في وسطها وقالت : ممكن اعرف فيه ايه بالظبط؟؟؟؟؟ شريف وهو مازال يضحك : انتي صدقتي ولا ايه؟ غاده : يعني ايه؟ شريف : يعني انا كنت صاحي من اول مادخلتي الاوضه .. تجمعت الدموع في عينيها وشعرت بوجع في قلبها وقالت بضعف : ربنا يسامحك .. وذهبت تجاه الباب والدموع بدأت في الخروج بغزاره من عينها وجدت شريف واقفا أمامها يحول بينها وبين الباب .. حاولت الاتفاف حلوه للوصول لمقبض الباب .. ولكنه منعها بكل جسده شريف : خلاص والله كنت بهزر معاكي لم تستطيع المغادره فلم يكن في وسعها غير انها تقف وتضع وجهها بين كفيها وانهمرت دموعها اكثر واكثر .. لدرجة ان شريف نفسه شعر بالندم على مزاحه معها بهذه الطريقه ... شريف : خلاص بقى ياحبيبتي انا قلتلك بهزر .. والله كنت صاحي لم ترد غاده ومازالت تضع وجهها بين كفيها احتضنها شريف وهي كذلك .. وقبل رأسها شريف : انا مش قلتلك تشيلي الكلام الفاضي ده من دماغك قالت مدافعه عن نفسها : انا فعلا شلته بس انت رجعته بالكلام اللي قلته ده شريف : لا المفروض مهما حصل تكوني واثقه فيا اكتر من كده .. دانا المفروض كنت نايم امال لو شفتيني واقف مع واحده وانا صاحي كنتي عملتي فيا ايه؟ غاده : تاني ياشريف ؟؟ تاني؟ شريف بضحك : خلاص انا اسف .. غاده : ربنا يسامحك .. بوظت مكياجي .. كنت مظبطاه على الاخر شريف : طيب تعالي اقولك على حاجه .. غاده : ايه؟ شريف : مش انتي كده كده هتظبطي مكياجك تاني؟ غاده : اه شريف : طيب تعالي ابوظهولك على حق غاده : لا ياسيدي مامتك مستنيه تحت والفطار سخن .. هنتأخر عليها كده شريف : اتلككي اتلككي طبعت قبله على خده وقالت : تصبيره اهي لحد بليل شريف : اما اشوف .. غاده وهي تغادر حجرته : ماتتأخرش بقى عشان طنط ماتحسش بتغيير بجوازنا ياحبيبي اغلقت الباب خلفها .. سعد شريف باهتمامها بمشاعر والدته .. اغتسل وابدل ملابسه .. لحق بهم على المائده .. قالت غاده : هنطبخ ايه النهارده ياماما؟ الهام : والله انا ماشفتش عروسه بتسأل عن الطبيخ في شهر العسل ضحكت غاده وقالت : ماخلاص شهر العسل خلص .. وسافرنا واتفسحنا وجينا شريف : ياستي حد يلاقي الدلع ومايتدلعش .. ده حتى يبقى حرام عليكي .. ماتتعبوش نفسكوا بقى في التفكير .. انا عازمكوا على الغدا بره .. الهام : فكره حلوه ياحبيبي .. بس معلش بقى اعفوني .. روحوا انتوا .. انا ماليش في قعدة المطاعم المنشيه دي شريف : اختاري اكتر مطعم بترتاحي فيه واحنا نروحه الهام : لا بجد والله انا بحب اكل براحتي في بيتي غاده : خلاص نجيب دليفري الهام : وانتوا ليه تحكموا نفسكوا بيا .. خليكوا براحتكوا وانا هتغدى هنا غاده : احنا بقينا عيله واحده .. نروح سوا ونيجي سوا .. ولا انا بقى جيت وفرقتكوا عن بعض الهام : ياحبيبتي ماتقوليش كده بس.. شريف مقاطعا : خلاص .. اخر كلام .. بعد العصر هروح اجيب اكل من بره وناكل هنا .. ومش هخيركوا على المطعم .. هتقعدوا سنه تتعازموا على بعض مين اللي يختار .. وساعتها الليل هييجي من غير ماناكل غاده : طيب ممكن استأذنكوا في حاجه بس شريف : خير ياحبيبي غاده بحرج : طنط فوزيه وكلهم هناك عايزين يجوا يباركولي النهارده .. بعد اذنكوا الهام : لا انا زعلانه منك ياغاده غاده بحيره : ليه ياماما؟ الهام : مجرد انك تستأذني يبقى انتي لسه ماحستيش ان ده بيتك وتقدري تعملي اللي انتي عايزاه فيه .. اي حد يجي يزورك براحتك يابنتي .. من غير اذن غاده : لا العفو ياطنط .. الاصول اصول .. حضرتك وشريف لازم تعرفوا الاول الهام : وبعدين مش انا قولتلك امبارح خليهم يجوا حتى يتعرفوا على اختي وعلى عمة شريف غاده : انا قولتلهم والله بس طنط فوزيه قالت خليكوا براحتكوا وهما يجوا بكره الهام : يشرفوا في اي وقت .. وبعد كده ماتستأذنيش .. انا عايزه الاقيهم داخلين علينا في اي وقت غاده : ربنا مايحرمني منك .. ________________________________________ | ||||||||
|
| |
|
02-12-13, 06:52 PM
| #15 | ||||||||
| مراقبة عامة ومشرفة منتدى الروايات المنقولة
| اتصل رامي على لمياء .. رامي : ازيك لمياء : الحمد لله مطحونه رامي : انتي روحتي باركتي لغاده لما رجعت من السفر لمياء : لا ماروحتش .. وبصراحه مكنتش ناويه اروح رامي : ليه؟ لمياء : يعني عشان بيت حماتها .. مش عايزه اسبب لها احراج .. صحابها داخلين طالعين من البيت .. مايصحش رامي : يبقى انتي ماتعرفيش طنط الهام كويس .. عموما انا رايح النهارده .. وكنت عايزك تيجي معايا لمياء : مش هينفع رامي : ليه؟ رامي : انت بتسأل ازاي ؟ هو انا خرجت معاك من ساعة الخطوبه؟ رامي : ماهو عشان كده بقولك نروح مع بعض .. مابنخرجش خالص لمياء : ماينفعش نخرج لوحدنا دلوقتي .. مش قبل كتب الكتاب رامي بتفكير : طيب ماشي اغلق معها .. وبعد قليل اتصل مره اخرى رامي : انا كلمت باباكي واستأذنته ووافق لمياء ببهوت : وافق على ايه؟ رامي : هتيجي معايا بليل عند شريف وغاده لمياء بضيق : بس انا مش موافقه .. ومش عارفه ازاي بابا وافق رامي بضحك : انتي عامله زي باباكي بالظبط .. لا ياستي ماوافقش زي مانتي متخيله .. قالي هيخلي أخوكي حسام يجي معانا لمياء : يانهار ابيض هنروح للناس وجايبه اخويا معايا .. حماتها هتموتها رامي : ياستي ده زي بيتي وطنط الهام بعاملها زي مامتي بالظبط لمياء : انت اللي قلت .. انا ماليش دعوه لو اتحرجنا قدام الناس رامي : طيب هعدي عليكي على 8 كده لمياء : يااه .. هكون لسه واصله من الشغل رامي : ماتغيري مواعيدك وتخليها الصبح لمياء : كنت ناويه اعمل كده بعد الجواز .. عشان يبقى في حجه قويه اني اغير مواعيدي .. هنا كل دكتور ماسك في معاد الصبح ده كأنه كنز .. وبصراحه عندهم حق .. شغل بعد الضهر ده بيموت رامي : ربنا يقويكي ياحبيبتي لمياء : هاااا .. قلت بلاش كده دلوقتي رامي : خلاص هانت كلها كام يوم وتبقي مدام رامي . ابتسمت لمياء عندما سمعت لقبها الجديد من رامي شخصيا رامي : انتي نمتي ولا ايه لمياء : لا ياظريف .. رامي بدهشه : ظريف؟ ايه ده انتي بتهزري اهو.. وانا اللي كنت فاكرك واخداها جد على طول لمياء : عشان في الخطوبه بس رامي بحب : يعني هتغيري الوش ده بعد المأذون مايمشي؟ لمياء : على فكره كده احنا اتكلمنا كتير وشكلك كده داخل في سكة كلام لا تجووووز .. اتفضل يلا على شغلك وسيبني اشوف شغلي رامي بسعاده : مع السلامه يازوجة المستقبل لمياء بفرحه : سلام ________________________________________ أحضر شريف الطعام وأدخله المطبخ .. جهزت غاده المائده وأتت بالأطباق من الداخل .. شريف : جبتلكوا سمك .. ها تمام؟ ضحكت غاده : اه طبعا تمام .. ملك التفصيص الهام : انتي عرفتي حكاية التفصيص دي كمان شريف : عيب عليكي غاده : من ليلة الدخله وانا بفصصله الفراخ والحمام الهام : انت يابني متجوزها عشان تعذبها شريف وهو يميل على غاده : ايه رأيك ياغاده ؟ انا بعذبك غاده بخجل : لا ياماما لا عذاب ولا حاجه .. الهام : بقولك ايه .. انت فصص لنفسك او كل جمبري ولا سبيط من اللي انت جايبه وماتتعبش البنت معاك غاده : ياماما والله انا مش مضايقه ولا هتعب في حاجه .. الهام : خلاص هفصصله انا .. شريف : ااااه يادماغي .. انتوا هتفضلوا تتعازموا على بعض كده كتير .. انا هاكل رز وسلطه حاف .. حلو كده ثم أكمل : الحل الوحيد ليكوا .. ان غاده تبقى زي تيسير فهمي في ابناء ولكن وانتي ياماما تبقى زي ماري منيب في حماتي ملاك ضحكت غاده والهام على كلامه .. وجاء الليل .. وصلت فوزيه مع محمود وساره وبعدهم جاء هاني وجيهان .. وأخيرا رامي ولمياء وحسام أخيها بعد قليل .. انفرد شريف برامي ومحمود وهاني مع حسام بالحديقه خارج المنزل .. وفوزيه والهام في جانب و جلست غاده مع لمياء وساره وجيهان يتبادلون الاخبار لمياء : هتنزلي المستشفى والعياده امتى ياغاده؟ غاده : المفروض المستشفى اول الاسبوع .. الحد ان شاء الله انما العياده ممكن أأجلها كمان أسبوع لمياء : ان شاء الله غاده : اتفقتوا على ايه؟ لمياء : العقد في البيت عندنا بعد بكره .. والبناء الخميس اللي بعده على طول باذن الله غاده : النهارده الخميس يالمياء .. ماشاء الله .. يعني بعد أسبوع هتتجوزي خلاص لمياء : والله انا مخضوضه اوي من السرعه دي .. بس رامي بقى الله يسامحه مش عارفه اقنع بابا ازاي ضحكت ساره وقالت : شكل العريس مستعجل اوي لمياء بخجل : انا مش عارفه ليه جيهان : انا عارفه ليه .. هما كل الرجاله بيستعجلوا على الجواز ومايحبوش لا الخطوبه ولا حتى كتب الكتاب .. عايزين يدخلوا في الجد على طول غاده : مش بقولك اخلاقك باظت بعد الجواز لمياء : ياريت ياساره انتي وجيهان تحضروا الفرح .. هبقى مبسوطه وانتوا موجودين معايا ساره : من عنيا ياحبيبتي جيهان : اعتبريني هناك من دلوقتي غاده : وانا مش معزومه ولا ايه؟ لمياء : يابنتي انتي وشريف صحاب الفرح اصلا .. مش انتوا سبب معرفتي برامي ساره : يارب من فرح لفرح دايما جيهان : بمناسبة الفرح على فكره ياساره غاده ماتعرفش ساره : اه صحيح نسينا نقولها غاده بتساؤل : تقولولي على ايه؟ جيهان وهي تشاور على نفسها وعلى ساره : احنا الاتنين حوامل شهقت غاده بفرحه بينما قالت ساره بضحك : حوامل؟ ودي جمع حامل ولا ايه؟ غاده بسعاده بالغه : الف مبروك ياساره . . الف مبروك ياجي جي .. اللهم بارك ويقومكوا بالسلامه لمياء : مبروك يابنات .. ساره : عقبالك ياغاده غاده : يارب اللهم امين وعند الرجال .. محمود : هترجع الفريق امتى ؟ شريف : بعد شهر باذن الله .. هستمر بس تمرينات وعلاج طبيعي وهرجع رسميا بعد شهر من العلاج رامي : حمدلله على سلامتك ياوحش شريف : وانت يارامي هتدخل القفص امتى؟ رامي : الخميس الجاي .. زي النهارده كده ان شاء الله شريف : هترفع راسنا ؟ تنحنح رامي وقال : ايه ياعم .. أخوها قاعد معانا انتبه شريف وقال : منور ياحسام حسام بانبهار : شكرا ياكابتن .. الصراحه انا مكنتش متوقع اني ممكن اكون قاعد معاك كده شريف : مش قوي كده حسام : لا ازاي .. حضرتك الناس كلها بتحبك .. وانا عن نفسي بحترمك وبحبك جدا وبحب لعبك شريف : انت في سنه كام؟ حسام : تانيه هندسه .. اتصالات شريف : ربنا يوفقك رامي : اوعى حد يتأخر عن الفرح ياشباب هاني : هنيجي ان شاء الله محمود : باذن الله وانتهت السهره .. ------------------------------------------ | ||||||||
|
| |
|
02-12-13, 06:53 PM
| #16 | ||||||||
| مراقبة عامة ومشرفة منتدى الروايات المنقولة
| جاء يوم العقد .. بصم رامي ولمياء على القسيمه .. سعادتهما لا توصف .. اخيرا اصبحت هي زوجته .. واصبح هو زوجها ورجلها .. ابتعدا عن الجمع .. جلست بمفردها معه ولأول مره بدون حجاب .. تكلمت كثيرا من قلبها .. سمعها .. مشتاق لها وهي جواره .. تمنى لو أن يأخذها الى بيته الآن .. فهي الان أزالت الوجه القاسي التي كانت تتكلم من خلفه في ايام خطبتها له .. انما الان هي زوجته .. اكتشف انها ارق مما تظهر .. أطيب مما كان يتصور .. حمد الله على زوجته وعلى توفيق الله له باختيارها .. جاء يوم الاحد .. عادت غاده الى عملها بالمستشفى ولكن في الفتره الصباحيه بينما كان اخر اسبوع للمياء تذهب في الفتره المسائيه .. أوصلها رامي بنفسه الى باب المستشفى رامي : كنتي ارتحتي الاسبوع ده من الشغل لمياء : لا كده احسن عشان اخلص اكبر شغل اقدر عليه واعرف بعين قويه اقدم على اجازه طويله رامي : طيب لما تخلصي هعدي عليكي نتغدى بره ونكمل المشاوير اللي باقيه لمياء : هنروح فين النهارده؟ رامي : في معاد عند بتاع الستاير .. وباقي التحف والنجف صاحب المحل قال انهم هيجوا الليله .. لمياء : تمام .. اشوفك كمان كام ساعه رامي : ان شاء الله .. خدي بالك من نفسك لمياء : حاضر .. وانت كمان رامي : في رعاية الله ترجلت من السياره .. ودعته مبتسمه .. ودت لو لم تفارقه.. ولكن هانت .. فقط اخر الاسبوع وتبقى معه كل الوقت .. أدرات ظهرها وتحرك هو بسيارته .. على وشك الدخول للباب الرئيسي .. لحق بها فرد الأمن رضا رضا : دكتوره لمياء .. يادكتوره التفتت له لمياء : ايوه يارضا في حاجه؟ رضا : ايوه .. حضرتك العربيه اللي نزلتي منها لمياء : مالها رضا : الراجل اللي كان سايقها .. هو اللي كان باعت العلبه لحضرتك .. قطبت جبينها وقالت بتساؤل : علبة ايه؟ رضا : العلبه اللي حضرتك زعقتيلي عشان أخدتها منه من غير ماعرف هو مين .. هو ده الراجل اللي ادهاني ودي كانت عربيته لما جه هنا صمتت لمياء تحاول ان تربط الصله بين رامي وبين الهديه وبين انه تعامل معها انه لا يعرف شئ عنها وبين انه الى الان لم يتحدث عن هذا الموضوع لمياء بضيق : انت متأكد انه اللي كان في العربيه ده هو اللي اداك العلبه؟ رضا : متأكد جدا يادكتوره نظرت لمياء الى خارج المستشفى .. تملأها عشرات الأسئله .. أولها : في ايه بالظبط؟؟؟؟ *********** | ||||||||
|
| |
|
02-12-13, 06:54 PM
| #17 | ||||||||
| مراقبة عامة ومشرفة منتدى الروايات المنقولة
| الفصل الخامس طرقت غاده الباب .. دخلت وعلى وجهها ابتسامه واسعه .. استقبلها الدكتور على بمثلها .. قام من على مكتبه وجلس أمامها .. الدكتور علي : حمدلله على سلامتك ياغاده غاده : الله يسلم حضرتك يادكتور الدكتور علي : انبسطي في الأجازه؟ غاده : اه الحمد لله .. الدكتور علي : وشريف عامل ايه؟ غاده : الحمد لله بخير .. شهر تمرينات يوميه وعلاج طبيعي ويرجع زي الاول الدكتور علي : الحمد لله .. سلميلي عليه كتير غاده : الله يسلم حضرتك .. انا كنت عايزه ارجع للرساله .. بقالي فتره كبيره سايباها .. خايفه اكون نسيت اللي فات الدكتور علي : خلاص هتراجعي الاول على اللي فات وبعدين بصي ياستي ثم التقطت ورقه وقم من على مكتبه .. دون بعض الكلمات الدكتور علي وهو يعطيها الورقه : دول أسماء الكتب اللي هتحتاجيها الفتره الجايه .. خلصي مراجعه الاول وبعدين هاتي المراجع دي عشان اقولك ايه اللي هيفيدك منها غاده وهي تنظر مليا الى اسماء الكتب ثم قالت في حماس : حاضر يادكتور أنهت غاده عملها ونزلت في المصعد .. وهي تخرج منه رأت لمياء تسير في اتجاه اخر .. ندهت عليها .. لم ترد .. ذهبت اليها بخطوات سريعه وأوقفتها غاده : لمياااااء .. ايه يبنتي مش سامعاني ؟ لمياء بوجوم : غاده !! غاده : لا مش غاده .. ايه مالك ؟ شكلك متغير ليه؟ لمياء : مفيش غاده وهي تنظر في ساعتها : طيب انا ماشيه دلوقتي ..بس انتي كده قلقتيني عليكي .. شكلك مش طبيعي .. رامي كويس طيب؟ لمياء وهي تفكر أن تخبرها بما يحيرها : انتي رايحه فين ؟ غاده : شريف زمانه واقف بره .. مش عايزه اتأخر عليه .. لمياء : طيب هبقى اكلمك بليل غاده وهي تقبلها : ضروري .. اوعي تنسي لمياء : سلام ذهبت غاده سريعا الى خارج المستشفى وبالفعل وجدت شريف جالس بسيارته منتظرها ركبت جواره : السلام عليكم ياحبيبي .. شريف : وعليكم السلام .. انطلق بسيراته غاده : واقف من بدري ؟ شريف : لا ياحبي لسه واصل .. غاده مداعبه: عملت ايه من غيري ؟ شريف وهو يرسم الاسى : عايش ومش عايش ضحكت غاده .. شريف : وحشتني ضحتك الكام ساعه دول غاده : وانت وحشتني اكتر ياحبي شريف : يلا نروح بقى أحسن انا هموت من الجوع غاده : ومكلتش ليه بس شريف : يرضيكي حد غيرك يفصصلي؟ ضحكت غاده : لا ودي تيجي .. ده انا افصصلك برموشي شريف : ايه مركبه رموش حديد غاده : بطل بقى .. ده انا بقولك كلام حب تقوم تتريأ عليا شريف : بناغشك ياروحي غاده : ياسلااام .. شريف : اه والله **************************** | ||||||||
|
| |
|
02-12-13, 06:56 PM
| #18 | ||||||||
| مراقبة عامة ومشرفة منتدى الروايات المنقولة
| دخلت لمياء معملها .. كانت مصدومه ولا تعلم اين الحقيقه .. ولماذا فعل هو ذلك .. رضا يؤكد انه هو .. وهو تكلم معها وكأنه لا يعلم شئ وتفاجأ بالموضوع مثلها .. والأكثر من ذلك أنه بدا غاضبا واربكها بنبرة صوته الصارمه .. قررت الا تحكم عليه .. تذكرت قول السلف .. التمس لاخيك سبعين عذرا ..لم تتابع عملها بتركيز فاستأذنت وعادت لمنزلها .. لم تغلق هاتفها بل فتحته وانتظرت منه ان يحادثها .. اتصل قرب ماعد انصرفها .. نظرت الى هاتفها .. ردت لمياء : السلام عليكم رامي : وعليكم السلام .. ها ياحبيبتي خلصتي لمياء باقتضاب : انت فين ؟ رامي : انا في الطريق جايلك اهو .. لمياء : ماتجيش على المستشفى .. انا روحت البيت رامي بدهشه : روحتي امتي؟ ده لسه على معادك ربع ساعه لمياء : انا هنا من الساعه خمسه رامي : ليه في ايه؟ لمياء : لو سمحت يارامي اتفضل هنا في البيت رامي : في ايه يالمياء انا مش فاهم حاجه .. انتي تعبتي وعشان كده روحتي ؟ لمياء وهي تحاول او تبدو متماسكه أكثر : من فضلك يارامي تعالى على البيت رامي بنفاذ صبر : حاضر .. جاي أغلق معها .. غير مساره الى حيث بيت أهلها وهو في حيرة من أمره .. *********************** جلست على مائدة الطعام .. ليس لتناول الطعام ولكنها افترشت المائده كلها بأوراق رسالتها.. وبعض الكتب الطبيه المنتشره في أنحاء المائده .. وفي الجهه الاخرى تجلس الهام وجوارها شريف يتابعان التلفزيون .. ينظر لها شريف كل فتره يجدها مشغوله ولا تشعر بما حولها .. بعد قليل وجد والدته يغلبها النعاس .. إقترب منها وقال بحنان : ماما .. ماما الهام : ايوه .. ياحبيبي شريف : قومي نامي في أوضتك تثاءبت وقامت من مكانها : طيب تصبحوا على خير شريف : وانتي من اهله ياست الكل اقتربت من غاده : مش عايزه حاجه ياغاده قبل ماانام وقفت غاده وقالت : لا ياماما سلامتك .. تصبحي على خير صعدت الهام الى حجرتها .. وعادت غاده الى اوراقها .. جلس جوارها وقلب بين الاوراق والكتب .. نظرت له غاده وابتسمت : ايه ؟ شريف : تعرفي ان خالد هو كمان قرب ياخد الدكتوراه غاده : خالد مين؟ شريف : ابن عمتو هدى .. اللي كانوا هنا من كام يوم غاده : يااه .. أصل انا ماشفتوش .. دكتوراه في ايه؟ شريف : مخ وأعصاب غاده بدهشه : يعني هو أصلا دكتور .. ماشاء الله ثم قالت بتنهيده وهي تنظر للورق أمامها : عقبالي لما أخلص انا كمان يارب نظر مره اخرى الى الورق وهو يرفع حاجبيه لاعلى : ولا فاهم اي حاجه من اللي مكتوب ده .. غاده بضحك : عايز تفهم ايه وانا اقولك وضع شريف الاوراق مكانها وقال : لا لا وعايز اعرف .. كفايه انك فاهمه ثم اقترب منها وقال : مش انتي فاهمه بردو ولا ايه؟ غاده : ايوه طبعا مانا اللي كاتبه الكلام ده كله .. اكيد فاهمه اقترب اكثر وقال بخبث : طيب ياترى فاهمه ايه اللي في دماغي دلوقتي؟ تصنعت عدم الفهم : لا مش واخده بالي ؟ ايه عايز تتعشى؟ شريف : عشا ايه ماحنا اتعشينا خلاص .. عايز احلي بقى وضعت يدها تحت دقنها وسندت كوعها على المائده : اعملك ايه؟ صينية بسبوسه مثلا ؟ شريف : لا صينية غاده بالمكسرات غاده مداعبه : لا ياراجل .. ودي بتتعمل ازاي دي ؟ مسك يدها وقال : تعالي اقولك فوق لم تعترض وتركت ما في يدها من أقلام وأوراق وكتب وصعدت معه الى حيث يريد قلبها وزوجها الحبيب ********************* | ||||||||
|
| |
|
02-12-13, 06:58 PM
| #19 | ||||||||
| مراقبة عامة ومشرفة منتدى الروايات المنقولة
| دخلت والدة لمياء عليها الحجره وقالت : رامي جه وقاعد بره .. يلا هو مستنيكي لمياء : حاضر ياماما جايه حالا بعد قليل دخلت عليه حجرة الصالون وقف وسلم عليها .. قابلته بوجه صامت رامي : في ايه يالمياء قلقتيني عليكي .. ايه رجعك بدري وليه ماقولتليش نظرت له لمياء حاولت ان تقرأ مابداخله .. احتارت في أمره .. جلست قالت في هدوء : رامي .. انا مابحبش اللف والدوران وعشان كده هقولك على اللي عايزه اعرفه على طول بس ياريت انت كمان تخليك دوغري وتقولي على السبب قال في حيره : سبب ايه انا مش فاهم التفتت له بكل جسدها وقالت بحسم : انت ايه علاقتك بالعلبه اللي اتبعتتلي ؟ ارتبك لوهله ولكن تماسك مره اخرى : علبة ايه؟ لمياء : انا قولتلك خليك صريح معايا .. الهديه اللي كان فيها الفازه .. واللي انت زعقتلي في التليفون عشانها وقبل أن يراوغ أو ينكر قالت هي بصوت أكثر ثقه : انت تبعتها وبعدين تتعامل معايا ازاي كأنك ماتعرفش عنها حاجه ؟؟ صمت رامي ونظر الى الارض ولم يرد قالت : رد عليا .. رامي : عرفتي منين ؟ لمياء : جاوب على سؤالي الاول من فضلك .. فسرلي اللي حصل وايه سببه رامي باستسلام : ايوه انا اللي بعتها .. لمياء بدهشه غاضبه : تقوم كاتبلي عليها "معجب" ايه غرضك من كده؟ رامي : والله يالميا انا كتبت كده وكنت فاكر انك هتفهمي لوحدك اني انا اللي بعتها واني كده بهزر معاكي .. يعني قلت اكيد هتقرا كلمة معجب دي هتستغربي بس لما تشوفي الفازه هتعرفي ان أنا لمياء : وهعرف انك انت اللي بعتها لما أشوف الفازه إزاي؟ رامي : مش إنتي قلتي إنك نفسك في فازة كريستال تحطيها على التربيزه الصغيره اللي هتتحط في الركنه؟ لمياء : ياسلااااام ؟؟ وانا مخي هيلف اللفه دي كلها وهعرف من الهوا انك انت اللي بعتها ؟ طب واديني ماعرفتش لوحدي .. لما قولتلك ليه أنكرت ان ليك صله بالموضوع؟ رامي بحرج : د غلطتي .. بس انا .. انا .. يعني كنت عايز .. لمياء بحده : كنت ايه؟ وقف رامي ومرر يده على شعره الى الخلف .. جلس على مقعد أقرب لها قال : اسمعيني لحد الاخر .. وصدقي كل كلمه هقولها أرجعت ظهرها الى الخلف وعقدت ذراعها أمام صدرها وقالت : اتفضل .. رامي : أنا ماقولتلكيش على حاجه في حياتي حصلت قبل كده .. هي حاجه مالهاش اي تلاتين لازمه بس للأسف اللي حصل مابيتمحيش من ذاكرة الواحد والحاجه دي كأنها نقطه سودا في حياتي .. أراح جسده أكثر في المقعد واسترسل في الكلام : من كام سنه لما كنت في الكليه .. كنت بحب بنت معايا أًصغر مني بسنتين .. تشوفيها تقولي ماعليهاش غبار .. لو اتعاملتي معاها مده هتكتشفي فيها بعض التصرفات البسيطه اللي تحسسك انها عندها سنة طمع وأنانيه .. بس الحب اللي كنت بحبه ليها كان مغمي عيني او بالاصح كنت بقول دي غيرة بنات من بنات لما مثلا تلاقي بنت راكبه عربيه هي ماتعرفش تجيبها او تلاقي بنت اتخطبت لواحد جابلها شقه في مكان راقي .. الاقيها زعلانه ومقهوره وكنت اقعد اديها امل في بكره وان طول ماحنا مع بعض هنقدر واحده نجيب كل حاجه .. طبعا كانت بتستهر بكلامي وانا كنت بلتمس ليها العذر .. كنت مكرس كل وقتي وجهدي عشانها هي .. كل زمايلنا كانوا بيحسدونا على العلاقه دي .. بعد التخرج اتقدمت ليها وخطبتها وكنا اسعد اتنين في العالم .. ده كان الظاهر منها بس .. كنت بلاحظ اوقات ان اصحابها بيبعدوا عنها ويتغيروا معاها .. وانا أسألها في ايه .. تقولي بيغيروا منها عشان اتخطبت ليا .. وكنت بستغرب هما بيغيروا منها ليه بس في الاخرانا أصدق .. لمياء : وبعدين ؟ رامي : بالصدفه البحته .. وبعد ما اتخرجنا .. عرفت من ناس كانوا معانا في الجامعه حاجات كانت سالي عملتها وانا معرفش عنها حاجه لمياء : هي كان اسمها سالي؟ رامي : ايوه .. وعشان أتأكد من صحة الكلام رحت لصحابنا بتوع الكليه عشان اسمع منهم الحقيقه .. عرفت ليه صحابها بعدوا عنها واتغيروا من ناحيتها .. انا نفسي كنت شايف ان البنات دول بنات محترمين وولاد ناس ويمكن مستواهم احسن من مستوى سالي .. بس اكتشتفت انها كانت بتعرف عنهم كل حاجه في حياتهم وهي اللي بتغير منهم وتبوظلهم حياتهم بالمعلومات اللي عرفتها عنهم .. يعني مثلا كان في بنت معانا كانت على وشك انها تتخطب لمعيد في الكليه .. ومحدش كان عارف القصه دي .. لما هي عرفتها اتقربت للبنت دي وحسستها انها بتحبها وتخاف عليها .. وبدأت انها توقع بينهم وهي واخده دور الصديقه المصلحه بينهم وهي بتوقع بينهم وتنقل كلام عكس الحقيقه .. المهم فشكلت علاقتهم من قبل ما تبتدي واللي جنني ساعتها انها مش هتستفيد حاجه .. يعني مثلا هي مش هتتخطب ليه مكان صاحبتها .. لا . كان هدفها ان حياة صحبتها تبوظ وخلاص .. لمياء : ده مرض نفسي ده ولا ايه؟ رامي : ايوه فعلا .. بعدها اكتشفت انها عملت كده في اكتر من واحده صحبتها .. لدرجة انها خطفت وظيفه من واحده تعرفها بردو بأسلوبها القذر .. وانا للاسف مكنتش اعرف حاجه عن كل اللي هي بتعمله .. انا كنت واثق فيها لأبعد حد .. لدرجة اني كنت اشوفها ساعه او اتنين في اليوم ولا بسأل عنها طول الوقت بعد كده .. لمياء : وطالما هي مش عاجبها حالك ساعتها .. ليه فضلت مستمره معاك .. رامي :كنت هفهمك النقطه دي في الاخر .. بس هقولها دلوقتي .. بعد اكتر من موقف معاها رحت لدكتور نفسي استشيره في حالتها ... قالي انها مش لاقيه حد يحبها زيي .. وانها عايزه تملك كل الخيوط في ايدها عشان تحس بالاشباع من كل الاتجاهات ماهو زي ماقلتي مرض نفسي .. وانا كنت موهوم انها بتحبني وعشان كده جابره نفسها على ظروفي ثم تابع :المهم لما عرفت واتأكدت بنفسي من صحابها وصدقوا على الكلام اللي وصلني عنها كنت قعدت كام يوم من غير مااكلمها .. مكنتش عايز اواجهها بأي حاجه الا لما اعرف الحقيقه ومن مصدرها .. كانت بتحاول توصلي وتعرف انا ليه مش بسأل عليها .. روحتلها بعد كده وواجتها بكل اللي عرفته .. اللي فاجأني انها انهارت واعترفت بكل حاجه واترجتني اني ماسيبهاش .. وحلفت انها بتحبني وندمت انها آذت البنات دول وبوظت حياتهم .. واقسمت انها هتتغير ومش هتبص لحد احسن منها تاني ... وفضلت تعيط بالدموع عشان ماسيبهاش .. كنت محتار .. اصدق دموعها زي ماكنت بصدق طيبتها قبل كده ولا اسيبها على طول احسن .. قلت اديها فرصه تانيه .. وده من غبائي .. كملت معاها وقلت هتتغير وهتخاف .. المهم .. بعد فترة بدأت بتتغير معايا .. يعني تأجل زيارتي ليها بحجج واهيه .. مثلا تقول انها مسافره عند أهلها في بلدهم وهي لسه في بيتها .. ولما جيت عايز أأكد معاد الفرح او العقد .. تقولي لا مش دلوقتي لما اقدر اجيب شقه أكبر وكمان تميلك زي فلانه وعلانه .. بقى كل كلامنا عن الماديات وكتير كانت بتعاييرني اني مش هعرف اجيب عريبه فخمه او شقه في مكان راقي لمياء : بس انت فعلا عندك عربيه كويسه وشقتك في مكان كويس رامي : ده حقيقي .. بس ده من جهدي وتعبي .. لما بعدت عنها ربنا فتح عليا ودفنت نفسي في الشغل عشان انساها وأثبت لنفسي اني أحسن من غيرهافي حياتي .. لمياء : وبعدين رامي : اللي حصل في الاخر وخلى الموضوع يوصل للنهايه .. جات لجوز أختي فرصة شغل في الإمارات .. واتفق هو ومضى العقد .. وعرف يجيبلي أنا كمان عقد هناك .. أنا بصراحه مارضيتش إزاي أسيب أمي لوحدها بعد ماأختي كمان تسيبها هي وجوزها .. سالي بقى اتجننت وازاي اتخلى عن حاجه زي كده .. والفلوس هناك بالهبل .. وهنبقى اغنيا .. رفضت وقولتلها أمي قبل أي شئ .. زعلت مني فترة كبيره .. وبعدين فضلت تدور ورا الموضوع ده لحد ما بوظت سفرية جوز أختي وفسخ عقده من الشركه هناك .. لمياء : ازاي ؟ رامي : عرفت توصل لأختي معلومات غلط عن جوزها انه بيعرف واحده هناك وهو مسافر عشان كده .. وحلفتها انها ماتجيبش سيره ليا انها هي اللي قالتلها الكلام ده عشان انا مازعلش منها .. وطبعا اختي قومت الدنيا ومقعدتهاش .. وأصرت انه مايروحش الشغل هناك .. وهو يعيني كان في دوامه .. عايز ياخدها معاه وهي مش راضيه لحد ما الموضوع وصل انها هتطلب الطلاق لو سافر .. اضطر يفسخ العقد بينه وبين الشركه ورفض الوظيفه .. انا مكنتش ساكت لاني كنت شايف حياة اختي وجوزها محتاجه للوظيفه دي عشان ترفع من مستواهم .. فضلت ورا الموضوع لحد ماخليت اختي تقول ان سالي هي اللي قالتلها على علاقة جوزها بواحده هناك .. طبعا نط في دماغي افعالها السودا اللي كانت بتعملها في صحابها قبل كده .. وكون انها تحاول تأذي حد من أهلي .. ده اللي انا ماسمحش بيه .. وهي كان مبدأها طالما الخير مش جاي ليا انا كمان يبقى " عليا وعلى أعدائي".. رحت بيت اهلها عشان اكشفها على حقيقتها وانا في نيتي اني ارميلها دبلتها .. سبقت هي ودافعت عن نفسها جامد ورمت هي دبلتي وتقريبا كده طردتني من بيتها .. وانا خارج من بيتهم قابلني واحد من سكان عمارتهم ووقفني وقالي انه كان نفسه يتكلم معايا من زمان .. قالي ايه اللي جابرك على ناس زي دول .. قلتله فهمني اكتر .. قالي في واحد خليجي كان بيتردد على بيتهم بقاله مده .. داخل بهدايا اد كده وخارج من غيرها ..وانا لحد اللحظه دي دافعت عنها وقولتله احترم نفسك دي واحده محترمه وعموما انا فسخت خطوبتي معاها .. انا فعلا كنت فاكر انها اخرها الخبث وتدمير حياة الناس .. انما الخيانه كنت فاكر انها مش هتوصلها .. وبعدين سمعت بعدها بفتره قليله انها اتخطبت لواحد سعودي .. الحمد لله اني بعدت عنها وماتجوزتهاش .. ورجعت لاختي وجوزها وفهمتهم على الحقيقه .. طبعا جوزها كان متضايق مني لان الوظيفه راحت بسببي .. زائد المشكله اللي حصلت بينه وبين مراته .. انا حاولت اني ارجعله الوظيفه واتكلمت مع صاحب الشركه هناك واتحايلت عليه لحد مارجعتله وظيفته وسافر هو واختي هناك بقالهم مده الحمد لله . انتهى رامي من كلامه .. نظرت له في صمت قليلا شعرت بالشفقه عليه .. ولكن .. قالت في هدوء : وده علاقته ايه باللي انت عملته معايا ؟ رامي : أأ .. عارف اني ماليش عذر بس لمياء : يعني انت بعت الهديه دي كأمتحان منك اني هقبل حاجه من حد غريب طالما الحاجه دي كان نفسي فيها ؟؟؟ مش كده؟ رامي : لا لا والله مش كده خالص .. انا فعلا كنت باعتها وكتبت معجب كنوع من الهزار يعني وكنت فاكر انك هتفهمي اني انا اللي باعتها زي ماقلتلك .. حتى انتي قبلها بيوم كنتي بتقولي عليها .. كان الموضوع طازه يعني مكنتيش هتلحقي تنسي .. اللي خلاني اسكت بس ان .. يعني .. لقيتك ماتصلتيش ولا جيبتي سيره عنها ولما كلمتك بردو ماقلتيش حاجه .. حاولت اجيب الكلام منك بالعافيه لحد ماقلتيلي .. بصراحه استحليت اني اكمل كأني معرفش حاجه ودي كانت غلطتي .. وكنت عايز اشوف رد فعلك .. وعجبني اللي قولتيه وعملتيه .. انا غلطان .. بعترف بكده .. بس الموقف جه بسرعه وانكرت معرفتي بالفازه جه بسرعه في المكالمه معاكي .. شيطان والله .. شيطان واتمكن مني وقتها لمياء : مجرد انك تفكر انك تشوف رد فعلي .. ده معناه ان ثقتك فيا مش كامله .. ومجرد انك حطيتني في الموقف ده يبقى انت بتقارن بيني وبين خطيبتك الاولى .. وده بقى اللي بيعني اكتر ان هي لسه في بالك وبتفكر فيها وفي اللي عملته فيك .. رامي مدافعا عن نفسه : لا يالميا ماتظلمنيش .. اقسملك بالله اني مكنش قصدي حاجه لما بعتلك العلبه .. وبكرر .. لما كلمتك ولقيتك ماجيبتيش سيره ولما ضغطت عليكي واتكلمتي .. لقيت نفسي بتكلم كأني معرفش حاجه .. وفعلا قارنتك بيها وعرفت اد ايه انتي انسانه برئيه ومحترمه وأحسن منها مليون مره وقفت غاضبه : لو سمحت يارامي ماتقارنش بيني وبين حد .. لو عملت كده دلوقتي واعتبرت ده عادي .. هتفضل تقارن بيني وبينها طول حياتنا مع بعض وده شئ يخوف .. ومايطمنيش وقف رامي بدوره وقال : يعني ايه؟ لمياء : يعني انا كده اللي بقيت مش مطمنه .. حسيت ان احنا اتسرعنا .. باقي أربع ايام على فرحنا .. وانا قلبي مش متطمن .. ده انا حتى اول مره اعرف انك كنت خاطب قبلي رامي : هو انا كنت متجوز وخبيت عليكي لمياء : لا .. بس المفروض كنت اعرف عنك كل حاجه .. وبعدين تعالى هنا .. لو فرضا انا ماقولتلكش على الفازه خااااالص وانا كنت رميتها ونسيت الموضوع خالص .. انت كنت هتفكر فيا ايه؟؟ كنت هتفتكر اني قبلت هديه من حد غريب وسكت؟؟ ثم وضعت يدها على فمها وقالت في ألم : كنت هتتهمني في شرفي يارامي؟ رامي برجاء : لميا .. ماتصعبيهاش عليا وعليكي .. انا شفت في حياتي قبلك حاجات كتير تعبتني .. وارتحت لما عرفتك وحبيتك .. لمياء : وانا ايه اللي يضمنلي انك مش هتعملي اختبارات تانيه تمتحن بيها أخلاقي قال رامي بهدوء : خلاص يالميا .. انا غلطت .. المفروض بعد اللي حكيته تعذريني او حتى أصعب عليكي لمياء : واللي عملته فيا مخلنيش اصعب عليك ؟؟ انت حسستني اني غلطانه وبقيت مرعوبه لتزعل مني .. وبعد ماكلمتني نزلت للأمن وزعقلته جامد انه ازاي ياخد حاجه من واحد مايعرفوش .. بوظتلي أعصابي يومها و.. قاطعها رامي وقال وهو يقترب ويمسكها من ذراعيها .. قربها منه وقال بصوت قوي وهو يحاول أن يسطير على انفعالها : لمياء .. أنا اسف .. انتي اكبر بكتير من اني امتحنك في أخلاقك .. انا بحبك وماصدقت لقيتك ومش هسمحلك تزعلي مني او تبعدي عني أفلتت لمياء نفسها منه وقالت وهي تحاول ان تسيطر على تأثرها بكلامه: سيبني افكر شويه يارامي .. رامي : تفكري في ايه ؟ لمياء بحسم : احنا اتسرعنا في توقيت الجواز .. وانا كده مش مستعده رامي باستنكار :توقيت الجواز؟؟؟؟ هتأجلي الفرح عشان الموقف ده؟ لمياء : الفرح يا إما هيتأجل يا إما هيتلغي .. الله أعلم رامي بصدمه : يـ .. يتلغي ؟ صمتت لمياء ولم ترد .. ظل ينظر لها .. ثم وقف وقال : براحتك يالميا .. انا غلطت واستاهل انك تعاقبيني بطريقتك .. هسيبك تفكري وتقرري .. بس .. حكمي قلبك قبل عقلك .. وانا من ناحيتي .. مش هسيبك أبدا .. تركها وغادر منزلها .. غادر وهو يشعر بجرح غائر في قلبه جراء كلاماتها وحديثها حول الغاء فرحهما .. هي غلطته لا شك في ذلك ولكنه كان يأمل أن يجد في قلبها طريق ليغفر له .. ******************************* | ||||||||
|
| |
|
02-12-13, 06:59 PM
| #20 | ||||||||
| مراقبة عامة ومشرفة منتدى الروايات المنقولة
| بعد أن ذهب في نوم عميق .. نظرت غاده الى ساعتها وجدتها الواحده والربع بعد منتصف الليل ..قامت من جواره و دخلت الحمام واغتسلت .. صلت ركعتين ودعت ربها كثيرا كعادتها في كل سجده أن يحفظ لها زوجها ويديم الموده والحب بينهم .. أختتمتهم بالشفع والوتر .. نزلت مره اخرى الى المائده التي تركتها بأوراقها .. أكملت مراجعه رسالتها .. ظلت هكذا لم يغمض لها جفن .. آذن لصلاة الفجر .. أدتها .. أيقظت زوجها ووالدته .. صلوها وعادوا الى النوم ولم يلاحظوا أنها مازالت مستيقظه من ليلة أمس .. جاء الصباح .. أستيقظ شريف ولم يجدها بجواره .. نزل اليها وجدها منكبه على أوراقها .. شريف وهو يقبل رأسها : انتي ايه اللي مصحيكي بدري كده؟ نظرت له وهي تحاول أن ترفع رأسها اليه : انا منمتش من امبارح أصلا نظر الى أكواب القهوه المرصوصه اماها وقال بدهشه : ايه؟؟؟ ازاي يعني؟ مطبقه من امبارح فركت عينها بتعب : اه لما خلاص عيني بتحرقني من كتر البص في الورق شريف : ايه اللي جبرك على كده يعني مش فاهم؟ غاده : لازم اراجع اللي كتبته .. تقريبا كنت قربت انساه .. عشان لسه مشوار طويل عشان الرساله تكمل . شريف : طيب قومي نامي كفايه اوي اوي كده .. غاده : لا انام ايه !! انا لسه هروح الجامعه .. اجيب الكتب اللي الدكتور طالبها مني شريف : جامعة ايه ؟ يابنتي انتي مش شايفه عنيكي عامله ازاي ؟ دي مفتوح نصها بالعافيه ولونها زي الدم .. هو انتي متحددلك وقت معين لازم تخلصيها فيه؟ غاده : لا .. بس انا عايزه انجز بقى عشان اخدها .. دكتوراه جملي مش عايزه تستوي حاول ان يعدل عن رأيها ولكنها أصرت على موقفها .. بعدها استيقظت الهام .. جهزت لهم الفطار .. تناولوه سويا .. وبعدها أوصلها الى الجامعه وأحضرت الكتب التي أوصاها الدكتور علي بها .. ثم ذهبت الى المستشفى وعاد هو لمنزله ذهبت غاده مباشرة الى مكتب الدكتور علي .. دخلت عليه وهي تحمل الكتب وضعتها على مكتبه وجلست في تعب واضح نظر الدكتور علي الى الكتب وقال : ايه ده ؟ غاده : الكتب اللي حضرتك قلت عليها الدكتور علي : انا مش قلتلك لما تخلصي مراجعه تبقي تجيبيهم .. كده هتتلخبطي وهتبوظي الترتيب اللي المفروض تكوني ماشيه عليه غاده : لا ماتقلقش انا سهرت على اللي كنت كتبته قبل كده وماخرجتش من البيت الا لما خلصته وحفظته صم .. ممكن أسمعلك كل كلمه دلوقتي .. نظر لها الدكتور علي نظرة طويله ثم قال في هدوء : انتي مانمتيش من امبارح عشان تخلصي المراجعه غاده : ايوه رفع منظاره الطبي ووضع على المكتب الدكتور علي : غاده .. الدنيا مش هتطير يابنتي غاده : عارفه يادكتور .. بس انا عايزه اخلصها في اقرب وقت الدكتور علي : جميل .. بس خدي بالك انتي وضعك مش زي الاول غاده : ازاي ؟ الدكتور علي بهدوء : انتي دلوقتي متجوزه يابنتي .. يعني وقتك لبيتك وجوزك هيشارك وقت الرساله .. لازم تعدلي بينهم عشان ماتضيعيش حاجه منهم من ايدك غاده : لا يادكتور حضرتك مش عارف شريف .. شريف مش متضايق خالص .. بالعكس .. النهارده حتى جه معايا الصبح الجامعه وجاب معايا الكتب ووصلني لحد هنا .. انا مش مقصره في حقه .. الحمد لله الدكتور علي : طمنتيني عليكي.. انتي عارفه انا بخاف عليكي واتمنى اشوفك في احسن حال غاده بامتنان : ربنا عوضني بحضرتك بعد وفاة بابا وعمي .. ربنا يبارك في حضرتك الدكتور علي : من الافضل تروحي تنامي شويه .. مش هتقدري تكملي اليوم غاده : لا بس النهارده عياده .. لازم احضرها في ناس حاجزه هخلصهم وامشي ومش هعمل مرور.. فعلا مش هقدر الدكتور علي : زي ماتشوفي .. اتفضلي على العياده دلوقتي غاده وهي تحمل كتبها مره اخرى : شكرا .. بعد اذنك .. غادرت حجرته ونصائحه تتردد في أذنيها .. ولكنها نفضت عن رأسها هذه الافكار .. فحياتها مع شريف مستقره بفضل الله .. وأكملت عملها رغم تعبها .. ************** | ||||||||
|
| |
|
| مواقع النشر (المفضلة) |
| الكلمات الدلالية (Tags) |
| (الجزء, للكاتبة, مكتملة, الثاني, الجميل, الوجه, yasminaa |
| أدوات الموضوع | |
| انواع عرض الموضوع | |
|
|
.png)
العرض العادي
