19-01-14, 08:15 PM | #1 | ||||||||||||||||||||||||||||
نجم روايتي ومشرفة سابقة وفراشة متالقة بعالم الازياء
| حالنا افضل الكاتبة / قمر جنها | رواية كويتيه | مكتمله
التعديل الأخير تم بواسطة لامارا ; 23-01-14 الساعة 01:22 PM | ||||||||||||||||||||||||||||
19-01-14, 08:15 PM | #2 | |||||||||
نجم روايتي ومشرفة سابقة وفراشة متالقة بعالم الازياء
| مرحبا بنات شلونكم ، عساكم بخير ، وحشني تواصلكم ، و فرحت بتواصل بعضكم بعد قصتي الاخيره .. قصتي اليديده تدور احداثها حول عايله ، رب الاسره عندهم الولد الكبير محاوله بهالقصه اني احط شخصيات يديده و اتمنى اني انجح و تعجبكم روايتي اليديده اخليكم معاها و املي انكم تستمتعون فيها | |||||||||
19-01-14, 08:17 PM | #3 | |||||||||
نجم روايتي ومشرفة سابقة وفراشة متالقة بعالم الازياء
| الجزء الاول (في يوم خميس ،، ذهب عبدالله لزيارة قبر والده الشهيد ،، الذي استشهد امامه أثناء غزو العراق للكويت حين كان في العاشرة من عمره ،، صار يحدثه): يبا شلونك ؟ ابي اطمنك كل مالنا و حالنا يكون افضل(ابتسم) و ياي بعد بقولك أني ترقيت ، الحين أنا لواء بالجيش ،، و أبي أقولك أني بخير (ضحك) يبا أمي تبي تزوجني ، و معصبه علي لان يرفضوني ، لأني عصبي ( نهض) يالله يبا اخليك بخير (وضع يده على القبر و صار يقرأ سورة الفاتحة).... (عبدالله أكبر أشقاءه ، تصغره بسنه نور ، و هي جميله جداً و مغروره ، فهي تسخر من جميع من يتقدمون لخطبتها ، بعدها بسنتين بدر الذي يعتزل الجميع ولا يريد الاحتكاك بأي كان ، ثم الصغيرة حور).... ////////////// (استيقظت من نومها و صارت تنادي الخادمة): هارمين ، هارمين (لم تجب الخادمة) ، وين هالغبيه ، وينها الحيوانه (توجهت لغرفة الخادمة) أكيد نايمه الحماره ،( دفعت باب غرفة الخادمه بقوه و دخلت ) وينج حيوانه ( لم تجد الخادمه) وينها الهبله..{.(نداء): نووور ، نور يمه وينج؟} هايما انا بدار الغبيه ، يما وينها قايمه انا 6 إلا ربع اناديها ما تجاوب ،،، /////////////// ( جاءت امرأه جميله جداً رغم الشيب الذي يملأ شعرها قائله ): نور يمه ، جم مره أقول لج لا تحاجين الخدم جذي .... نور: أي يما ، دافعي عنها أكثر ، شوفي ماكوها و لا اكو أغراضها... حياة: ليش وينها؟! نور: يما يعني وينها ؟ أكيد واحد خمام نفسها منحشها ، مالت .... حياة: بس عمى ، تكمين !! انا اللي جدامج يا الغبره!! نور: يما ، لا تسوينها سالفه ، انتي تدرين أني أقصدها ، اقصد الهبله يعني .... حياة: لا تحقرينهم ، ترى لولا الحاجة ما هدت ديرتها و اهلها و عيالها ، صج انحاشت!! نور: مادري عنها ، مأكو اغراضها ، انحاشت .. حياة: أي صج ، انا حتى ما شريت لها كبت تحط أغراضها ... نور: شلون أداوم الحين ، منو يضرب هدومي ... حياة: ليش ما تضربين هدومج و تروحين ! عايبه؟! ///////////// (وصل عبدالله المنزل ، تفاجأ عندما وجد الباب مفتوحا ، صار ينادي غاضبا): يما ، يما ، من صجكم مخليين الباب مشرع ونايمين... (نزلت حياة من الطابق العلوي قائله): شفيك داش بشرك من صباح الله خير ... عبدالله: يما الباب مشرع ، شلون جذي تنامون و الباب مبطل ، طول ما انا بالدوام ماكو تشييك عالباب؟!! حياة: عبيد يوز ، ماكو عقل احنا !!! بنت ابليس منحاشه ، اكيد هي اللي طالعه مخليه الباب مبطل... (عبدالله متفاجئ): منو منحاشه!! حياة: منو يعني ؟ هارمين ، بنت ابليس ، اليوم الخميس ، خالاتك اييون يتغدون ، و البيت نطله ، مادري شبسوي بروحي ، الله يخس ابليسها ... عبدالله: ايا بنت الشقول (غاضبا) ، كلمي خالاتي ، قولي لهم اييون عشا مو غدا على ما اروح لهم ، هالمكاتب تلاقينهم اهما اللي قيلين لها انحاشي اذا مو عاجبج ... حياة: اي والله عبيد حط حيلك فيهم .... عبدالله: انا بروح لهم ، و اقصبهم يعطونا مؤقته ، يما .. حياة: ها حبيبي .. عبدالله: كل خالاتي بييون ؟ وله بس خالتي حوريه؟ حياة: خواتي 2 بس ، سويتها كل خالاتك ! من كثرهم! بتيي حوريه و سهيله .... عبدالله: انا اللي بعرفه ، منو اللي سماها سهيله ؟ يتبع | |||||||||
19-01-14, 08:18 PM | #4 | |||||||||
نجم روايتي ومشرفة سابقة وفراشة متالقة بعالم الازياء
| الجزء الثاني حياة:عبيد!! وانت يا معصب ! يا طنازه ! (اتت نور من الطابق العلوي قائله): يما شلون الحين ... (عبدالله غاضبا): شعندج انتي شتبين؟؟ حياة: بس يمه عبدالله ، و اللي يسلمك روح المكتب ، شوف عنها ..... عبدالله: زين ، يما لا تنسين كلمي خالاتي ايون عشا (رمش عينه) وله اقول لج ،،، انا اييب غدا من بره و صحون بلاستك ... حياة: اي والله يمه ، الله يفرج عنك ، ويوفقك ببنت الحلال و تراوينا عيالك يا رب .... عبدالله: اميين ،( صار يتمتم ) اول مره ادمي بيتزوج مو عارف .. (خرج ، فقالت نور فور خروجه): وعليا عليها اللي بتوافق عليك ،، امها داعيه عليها ... //////////// (وصل عبدالله الى مكان المكتب ، كان المكان مزدحما بالسيارات ، فتوقف يترقب ان تخرج احدى هذه السيارات الراكنه ، رآى فتاة ركبت سيارتها ، فدق عبدالله لها البوق و اشار بيده لها بيده مستفسرا ما اذا كانت ستخرج ، ابتسمت له الفتاة و صارت تحييه ، فابتسم عبدالله متسائلا): اووو هذي مو بنت جيرانا قبل ؟! مو اخت يعقوبو؟! ( وقف يمينا و نزل يحييها عندما رآى والدتها برفقتها ، تقدم اليهما ، فانزلت والدتها النافذه قائله): هلا عبدالله ، هلا شلونكم ، امك و اخوك و خواتك شلونهم؟؟ عبدالله: الله يسلمج خالتي ؛ زينين والله الحمدلله ، انتو شلونكم ؟ يعقوبو شلونه؟ درس بره وله طاف؟ ام محمد: لا والله طاف على قولتك ، بس درس ، يشتغل الحين هو ، انت وين وصلت؟ شاطر انت قبل اسم الله عليك لولا اللي جرى عليك ... عبدالله: انا والله الحمدلله ، خلصت الثانويه و دشيت الجيش ... ام محمد: اي ميخالف يمه فيك البركه ... (مداخله من الفتاة): ما شالله ، اشوفك لابس البدله ... (قال عبدالله في قلبه مبتسما): وييي ، والله ايام ، (ثم اجابها) تسلمين والله ، اي والله طلعت من الدوام زرت قبر الوالد الله يرحمه ، رجعت البيت الخدامه منحاشه (ظلت الفتاة تنظر اليه بشوق) .... ////// ( في المنزل ، نزلت ذات شعر طويل و حريري و قبلت حياة على رأسها قائله): صباح الخير يما .... حياة: صباح النور حورا ، ما عندج شي اليوم؟ ما رحتي الجامعه!! حور: ما عندي شي يما ، عقب باجر عندي امتحان ، يما هارمين وينها عيزت اناديها ... حياة: وينها ،، انحاشت .. حور: اي عادي ، من اللي تسويه فيها نور اختي .... حياة: ايي ، فصل اخوج مساع ، اتصل عليها معصب ، قال لها ان الخادمه قايله للمكتب انها متضايقه من نور كله تصرخ ، بعد عيني وعليا عليها ، لو تفهم شلون قاعده تسبها ، جان ليله ما قعدت عندنا ، اشوه انها ما تعرف عربي ، وله جان علووم ، بدر اخوج قعد وله بعده؟ حور: قعد ، قلت له تريق معاي ، قال لي صعدي لي الريوق فوق ماكو فايده ، يما تكفون ، راضوه من و هو مراهق و هو معتزل البشر ، عمره 27 و لي الحين هذي زعلته .... ( تنهدت حياة بعمق قائله): اي والله ، ماله خلق يكلم احد غيرج !! حور: لا تتعجبين يما ، انا الوحيده اللي نصرته ، و قلت لكم يما ، جمانه بنت خالتي سهيله هي اللي صاعده داره و متحرشه فيه ، صج ما كان المفروض يعطيها ويه ، بس هي اساس الغلط ، يات خالتي و طقته طراق ، و انتي الله يسامحج يما هديتي عليه عبدالله عطاه فنقر ، كان يومها يما متضايق ، تم يبجي من غير صوت ، بس دموع منهده ، ما قدرت يما نمت عنده يومها ... (صارت حياة تدلل ابنتها قائله): واااي يا حلو بنتي ، شمعة البيت بنتي ، حنونه بنتي ، خوش بنيه ، بس لو تتحجب .... حور: يما والله بتحجب خلاص ، خل اخلص الجامعه و اتحجب ... حياة: والله حاله وياج ، زين لبسي لج شي خالاتج ايون الحين و انتي بالبجامه ... حور: يما (متذمره) ليش بنات خالتي حوريه بشاير و مناير ما ييون ، ماكو الا ريا و سكينه بنات خالتي سهيله .... (صارت حياة تتمتم): اسمهم جمانه و ليلى ، مادري شفيكم عيالي !! بطلو طنازه يا ماما حوره .... ( دق جرس جوال حور ، فقالت): امبي نسيت بدر ،(اجابت) هلا بدر يالله الحين اييب ريوقك سوري .... (جالسا على مكتبه ، يحاول حل مسأله حسابيه ، دخلت شقيقته حور غرفته حاملة له الافطار)..... حور: هاااي بدران سوري ، حطيت لي وياك.. بدر: ايي حياج الله ، بصراحه اليوع مو مخليني اركز ، صار لي ساعه على مسأله وحده ...... | |||||||||
19-01-14, 08:19 PM | #5 | |||||||||
نجم روايتي ومشرفة سابقة وفراشة متالقة بعالم الازياء
| الجزء الثالث (حور تأكل و تقول): سوري بدران ، امي تسولف ، طولت عليك (نظرت اليه عندما كان يأكل فتابعت) و بعدين اخوي ، جان نزلت ذكرتني ، جان تدلعت على امي ، منى عينها تسولف معاها ، تطلب منها طبخه .... (اخذ بدر نفسا عميقا ، ثم غير الموضوع): حور ، شكثر باقي و تتخرجين من الجامعه ... (صارت تقول في قلبها): ايي ضيع السالفه (ثم اجابته) السنه اليايه ان شالله ... بدر: ان شالله ، (رفع رأسه و نظر بعينيها) يا حبذا لو تستعيلين بالحجاب ، انتي اختي و كبرتي ، صايره حلوه ، فاغار على اختي انا... (ابتسمت حور كالطفله قائله): بدران !! صج نصاب ، كل هالخاتمه و المدح عشان اتحجب!! بدر: لا صج ، انا شاب و عارف ، عارف تفكيرنا شنو ... (حور تقول في نفسها): اقول له وله انجعم ، (سألته بعد تردد) يعني بدر ، ودي اسئلك سؤال ، بس اخاف تزعل ... (رفع حاجبيه و قال): انا ما ازعل منج! ما تدرين انتي؟! حور: بلا ، بس اخاف اضايقك و انا مو حاسه... بدر: لا سئلي ، وعد ، ما ازعل .... حور: حبيبي ، بدر ، انت تحتك بالناس بره؟ (رفع رأسه و ابتسم ثم لوح به يمينا و شمالا): شهالسؤال ، طبعا احتك ... حور: توقعتك نفسي ، انا بصراحه بس بالعايله اسولف و اضحك ، بره لا ، طلعت عكسي .... بدر: لا ، انا فيني شي غلط ، ودي اغيره و اسامح ، بس مو قادر ( سرح يتذكر ما حدث من ذي قبل ، كأنه عاد يعيش تلك اللحظات ، عندما كان في السادسة عشر ، و جلست بجانبه جمانه ابنة خالته لانها طلبت اليه ان يشرح لها احدى الدروس ، ففعل ، صار يفصل شرح الدروس التي تجهلها جمانه ، لتفوقه في الدراسه ، فجاءت والدته و دعته)... حياه: بدور ، بدور تعال يمه ابيك ... (ذهب لوالدته في الداخل قائلا): هلا يما ... حياة: بدير يمه ، شلك قاعد يم جمانه لازق فيها ... بدر: يما ، شكو ، قايلة لي افهمها شي مو فاهمته ... حياة: بدير بتينني انت ، شفيك مفهي !؟ هذي لا تبي تفهم وله شي ، ما تشوفها شلون تطالعك ، ودها لو هي تعلمك شلون تخبص وياها ، اصعد دارك ادرس انت مالك شغل تفهم ، لو صبي بعد ميخالف.... (شعر بدر بالسعاده ، و صار يقول): اوكي ، فهمت ، صح نظراتها مادري شلون... حياة ساخرة: زين فهمت يا الفطين ، الحين ابيك تستأذن من الكل ، تعتذر منهم بروح ادرس عندي امتحان.... بدر مبتسما: ان شالله ، بس جنه قصة ويه يا ابونا و امنا؟ حياة: لا عادي ، بس اصعد دارك.... (صعد بدر لغرفته قائلا): ليش عاد قطع الارزاق ام عبيد... (جلس وحده وضع السماعات و صار يتابع برنامجا ممتعا بالكمبيوتر ، دخلت شقيقته الطفله حور من خلفه وهي تقول في نفسها): اخاف اقول له يوديني الفرع ما يرضى... (جاءت جمانه ، و رأت حور ، فقالت لها): روحي يا حلوه ، عشان بدر يدرسني... حور: ابي اروح الفرع... جمانه: الحين اقول له يدرسج يا حلوه ، بس يدرسني و اوصيه يدرسج اوكي.. (فقبلتها حور على خدها مبتهجه): شكرا... (خرجت حور فأغلقت الباب ، فتسللت اليه ووقفت خلفه و اغمضت عينه بيدها).... (ابتسم بدر قائلا): جمانه ؟ (رفعت يدها و ادارت وجهه اليها): شدراك؟ بدر: من عطرج ، حلو الصراحه... (ضمت رأسه الى رقبتها): اي انا احبه هالعطر ، احط شويه على رقبتي ، يفوح ، ليش هديتني و صعدت ، تتغلى ، وله خالتي لما نادتك قالت لك؟ (كانت حور تسمعهم منتظرة جمانه ان تطلب اليه ان يأخذها الى البقاله ، اختفى صوت الاثنين ، فجاءت الخادمه ، و اشارت لحور قائله): يالله هور ، ماما قول diner ،(فتحت الباب قليلا لتتأكد ، ما اذا كان بدر نائما ام لا يزال مستيقظا ، لتخبره ان يأتي للعشاء ، فرأت بدر و جمانه ، يتبادلان القبل على السرير ، و يدعبان بعضهما البعض ، ففتحت عينها دهشة بما رأت ، و تركت الباب مفتوحا و نزلت لوالدة بدر قائله): ماما ، ماما... حياة: ها سيرما ... الخادمه: ماما ، هذا بدر جمانه ، اثنينه داكل دار ، سوي كربوت ... (ذهلت حياة و جرت الى الاعلى ، فرأتها شقيقتها سهيله فقفزت و ذهبت خلفها و قالت لحوريه): حوريه ، خنشوف شفيها... (دخلت حياة ، فلمحتها جمانه ، و صارت تكذب و تصرخ قائله): بدر وخر عني ، ليش تسوي جذي انت... (ابتعد بدر ، ينظر اليها متفاجئا): شفيج... (جاءت اليه خالته سهيله والدة جمانه و بصقت على وجهه و لطمته): ايا قليل الادب و التربيه ، (التفتت لحياة قائله) اي ، تتشيحطين علينا عيالج شطار ، عبالج اهم شي الدراسه،،، (فقاطعتها حوريه): بس سهيله ، سكتي عليج الله ، خلوهم شوي ، تعالو ننزل تحت... | |||||||||
19-01-14, 08:20 PM | #6 | |||||||||
نجم روايتي ومشرفة سابقة وفراشة متالقة بعالم الازياء
| الجزء الرابع (بعد ان روى بدر لشقيقته حور ما حدث بالتفاصيل , عقبت على كلامه قائله): بدر , كل هذا !! انا عبالي انه امي زافتك بس , طلعت انه امي بس وقفت تبجي .... بدر: طرشت علي عبدالله الوالده ما قصرت , و شوفي شلون خالتي دافعت عن بنتها , و امي خلتهم عادي ... حور: بدران , امي تكسر الخاطر , لا تنسى ربتنا بروحها , الله يكون بالعون هي الابو و هي الام , و الاوادم ما يساعدون , لا بالعكس , يهاجمونها و يهاجموننا , ف هي اللي كان بيدها توضح لولدها غلطه , لان ما راح تقدر تتكفل بعيال الناس , تراويهم ان انتو غلطتوا على ولدي (كان بدر يستمع لحور صامتا) , شخصية امي نفس خالتي حوريه , خالتي حوريه ميته تشوفك بدر .... بدر: حور ,,, امي اللي طالبه منج تكلميني ؟؟ (ظلت حور تنظر اليه لبرهه و اجابته): لا , اسوأ , امي ما تشتكي , بس حسيت بكلامها عتب عليك , فوق ال10 سنين و انت تتعامل معاها سطحي بدال لا تقط روحك بحضنها , تنجح من بعيد لي بعيد تطرشني اقول لها , بدر! ترى الجنه تحت ريولها , و اذا انت متضايق انك انظلمت , الدنيا ما فيها عدل , بس هي احن الناس عليك , حتى عبدالله , شرس حرصا علينا , وله غير جذي يسأل عنك .... بدر: حوره , ودي اني اسامح صدقيني , لكن الله كريم , يمكن من احساسي بالاهانه هو اللي مسوي فيني جذي , مع اني خضعت للشيطان , و اللي موتني , تمت خالتي تشيع و تذيع و كلهم صاروا يتكلمون عني بالسوء , لين ما صارت عندي صده للناس .... ///////////////// (في غرفة المعيشة عندما كانت حياة , تنظفها و تأنقها , دخل عبدالله معه الخادمه قائلا): هارمين , يالله صعدي فوق , (يحدثها و يشير) انتي مع ماما , اوكي .... هارمين: اوكي ... عبدالله: يالله البس يونيفورم تعالي حق ماما a gain (توجه لوالدته) ها يما .... حياة: هلا عبدالله , شسويت ؟؟ عبدالله: يبتها , قلت لها تلبس اليونيفورم و تنزل , (و صار يتوعد شقيقته نور) و خل اسمع نورو بعد تصارخ وله تسفل فيها , انا قلت لها , مو عاجبج , المصبغه ما تقصر .... حياة: زين يمه , يبت غدا وله لا ؟؟ عبدالله: لا يبت , يبت لكم مندي مرتب , يعجبج ام عبدالله .... حياة: الله يرضى عليك يا يمه ..... عبدالله: ايي يما ادعي لي , اي يما نسيت , سلمت عليج ام محمد جارتنا قبل و بنتها ساره ... حياة: وييي الله يذكرهم بالخير , وين شفتهم ... عبدالله: عند مجمع الخدم , توها واصله خدامتهم .... حياة: يا حلوها , والله كانت حبيبه , وينهم الحين وين بيتهم ... عبدالله: بالديره .... حياة: ايي حول بيت سهيله يعني .... ///////////////// (في منزل حوريه , دخل شاب شديد االوسامه قائلا): شلونج حوريه , شلونج يا فديتج .... حوريه: حسنوو !! (ابتسمت) ضاعت المقامات في هذا البلد , انا امك تناديني باسمي .... (ضحك حسن قائلا): لازم يما , مو كلكشي , ما راح تصدقين منو شفت امس .... حوريه: منو؟ (مبتسمة)... حسن: بدور ولد خالتي .... (فتحت عينها مذهوله): صج ؟ وين ؟ حسن: بالكليه الاستراليه .... حوريه: كلمته ؟ شعنده ؟ حسن: اي سلمت عليه , و سألته شتسوي , قال لي رسالة ماجستير , و شلع روحه بسرعه .... حوريه: نفسيه يعني ؟ حسن: لا , بس انه جد , نظام لا تكثر حجي مو فاضي .... حوريه: قال لك جذي؟ حسن: لا , ما قال , بس الاسلوب , فاهمتني حوريه (ضربته على يده) عاد هاد الصاحبه و رايح مسلم عليه الله يسامحه .... حوريه: حسنو !! خل التعنفص عنك يا الكلكشي , متى ناوي تعرس؟ (حسن ضاحكا): انا ابيج تقولين لي يا الكلكشي , ناطر والله يما , ناطر الصاحبه تعطيني الضوء الاخضر عشان اتقدم لها.... حوريه: و شلك فيها , خلني اخطب لك ... حسن: لا يما ابيها , خوش شي يما , مزيونه ترى(غمز بعينه) مو رايحه بيت خالتي اليوم ؟.... حوريه: بلى بروح , الحين ببدل و اروح , ليش بتوديني وليدي؟ حسن: ايي ليش لا ؟ انروح نسلم على حياة (ابتسم , فاخذت حوريه تقلب برأسها يمينا و شمالا)... (في غرفة الفتيات)... مناير: بشور .... بشاير: هلا .... مناير: بنان وينها ؟ بشاير: بنان ريلها رد ... مناير: ويييع , ما احبه .... بشاير: حتى انا , عيونه نيسه , تصدقين منور ... مناير: شنو ؟ بشاير: احس انه يخونها استغفر الله , وايد احلم فيه , الله يستر... مناير: وااااي بعد .... (طرق باب الغرفه): بنات , بودي امي بيت خالتي حياة , تبون تيون , لاني بوديها و برد , اذا تبون تيون .... بشاير: انا لا , قاعده ادرس , (سألت مناير) تروحين؟ مناير: ايي , لحظه حسن , انطرني عفيه ... حسن: اوكي منور , تعالي السياره .... بشاير: مسكين حسن اخوي , قام يميز بعد طول عناء... | |||||||||
19-01-14, 08:21 PM | #7 | |||||||||
نجم روايتي ومشرفة سابقة وفراشة متالقة بعالم الازياء
| الجزء الخامس (في منزل حياة , دخلت حوريه و القت التحيه): السلام عليكم , يا اهل البيت , ترى حسنو وياي .....مناير: يما وينهم , اتصلتي عليهم انتي .... حوريه: لا والله , العاده موجودين يوم الخميس ..... (نزلت حياة من الطابق العلوي مرحبة): هلاا حوريه .... حسن: هلا , هلا , هلا بالخاله .... (تقدم حسن و مناير لحياة و قبلوا رأسها فقالت): هلا حسن , هلا والله منوره , شلونكم , ما بغينا نشوفكم , عيل بشوره و بنان وين؟ حوريه: رد ريل بنان و راحت البيت امس , و بشوره كالعاده , بقعد ادرس .... حياة: ايي , يا حلو البنيات .... حسن: و الصبيان خالتي .... (ضحكت حياة): اي اكيد الصبيان , الصبيان غير .... (دخل عبدالله قائلا): السلام عليكم ... حوريه: هلا عبدالله , شلونك يمه ؟ عبدالله: تمام والله , الله يسلمج خالتي , هلا حسن .... حسن: هلا فيك (نهض و حياه) شلونك .... عبدالله: تمام , الحمدلله , يما !! , وين خالتي سهيله .... حياة: الحين تيي .... عبدالله: زين , هذي نزلت , وله ليلحين فوق .... حياة: لا فقيره , كاهي بالمطبخ .... حوريه: منو ! حياة: هارمين , شايله شلايلها امس و منحاشه , راح عبدالله لقاها بالمكتب .... حوريه: اكيد وازينها عيل .... حياة: لا من نورو بنتي , تأذيها , مادري ليش شايفه نفسها عالعالم , مادري بنت منو بالمجتمع تصدقين , حتى الاكباريه يعزون الخدم و يرزونهم عندنا بالنادي ..... (حوريه متفاجئه): داشه نادي !! حياة: ايي والله , عبدالله مدخلني نادي , يقول عشان السكر احسن لي اضعف .... (ضحكت حوريه): يا حلوج حيوت لياقه (صارت تهمس باذن حياة) مو تقولين حق سهيله ترى تحقد .... (استنكرت حياة ساخرة): ليش !!! وناسه السكر ؟؟؟ .... حوريه: بعد , ديري بالج .... (نزل بدر من الطابق العلوي , من خلفه حور و القيا التحيه)... (نهض الجميع فور رؤية بدر , فقالت حوريه): هلاااااا (ووقفت حياة بعين دامعة , تقدم بدر الى والدته و قبل رأسها , فبكت على صدره , فحضنها و أخذ يطبطب على ظهرها)... (تقدمت اليه حوريه): هلا بدران , شلونك حبيبي شالدنيا فيك... (تلعثم قبل ان يجيب): ااا , ام بخير عساج بخير خالتي الله يسلمج.... مناير: شلونك بدر؟ بدر: بخير الله يسلمج .... عبدالله: هلا بدير , شلونك .... (تنفس بدر نفسا عميقا): بخير والله ... (ازاحت حياة فحضنته حوريه): حبيبي انت , يا يمه ولهنا عليك , لا تطول علينا ... (سمع الجميع صوت سهيله فقالت حياة): هذي سهيله وصلت.... (فاستأذن بدر قبل دخول سهيله): يالله عن اذنكم .... (نظرت له حياة): وين يمه , انا ما صدقت تنزل .... بدر: انزل يما بعدين , يالله عن اذنكم .... حوريه: حياك الله يمه (صعد على الفور).... (دخلت سهيله): السلام ... الجميع: و عليكم السلام , (تقدم حسن الى خالته و قبل رأسها)... سهيله: هلا حسن , وخر حسنو كبرتني , توني صغيره , تحب راسي .... حوريه: يا حلوج والله , خالته و اكبر من امه , هذا اسمه احترام سهيله .... (فقالت حياة في قلبها): ما ينلام ولدي يوم صعد (فحيتها) ها سهيله شلونج .... سهيله: زينه .... (كانت مناير خلف حسن توشك على تقبيل رأسها فمدت يدها و صافحتها): شلونج خالتي .... سهيله: هلا مناير , تحجبتي؟!! مناير: ايي تحجبنا انا وبشور , صار لنا سنه و نص .... (انصرفت حياة و هي تنادي): هارمين .... هارمين: يس ... حياة: يالله مما غدا .... هارمين: اوكي .... (جلس الجميع يتناولون الغداء , فقالت حوريه): سهيله! , عيل البنات وينهم ... سهيله: رايحين مطعم , بيون عالشاي , انتي عيالج وينهم , واصلين , حتى ما تغدوا , و تقولين احترام!! .... حوريه: مناير تبي تسلم على خالتها و حور و تمشي , عندها امتحان .... (غضب عبدالله و صار ينظر لخالاته و يقول): بس يا جماعه , غدا!! , ما نتغدا يعني .... ////////////// (عندما انتهوا من تناول وجبة الغداء , جلسوا جميعا يشربون الشاي , فدخلت ليلى و جمانه): السلام .... (الجميع): و عليكم السلام .... (جمانه تتناول العلكه): ليش ما نطرتونا .... حياة: شنو بيطير الشاي , قعدي نصب لج , شاي , قهوه , خير الله !.... عبدالله: هارمين ... هارمين: يس .... عبدالله: ييبي الحلو .... (قام لوالدته قائلا): ياالله ام عبدالله يببي .... (ابتسمت): بشر .... عبدالله: رقوني , انا الحين لوا .... (اطلقت الهلاهل): مبروك حبيبي , تستاهل يمه .... (صار الجميع يباركون لعبدالله , فأجابهم): الله يبارك فيكم .... (في غرفة بدر , عندما كان يجلس وحيدا , يقرأ القرآن بوجه محمر , دخل عبدالله قائلا): ها بدر , ما راح تبارك لي (انتبه عبدالله بان بدر يبكي) افا شفيك .... بدر: ماكو شي , مبروك , على شنو .... عبدالله: عطوني رتبه , انا الحين لوا .... بدر: تستاهل .... عبدالله: شفيك ؟ تبي انادي لك حور .... /////////// (في منزل حوريه في غرفة الفتاتين).... مناير: طافج ... بشاير: شنو ؟؟ مناير: منو شفت ببيت خالتي حياة؟؟ بشاير: منو ؟؟ مناير: شخص ودج تشوفينه و تسلمين عليه .... (ابتسمت بشاير): بدر .... مناير: ايواا , عليج نور , صاير اينن .... بشاير: حلفي , وااي يا بختج , عاد ودي اشوفه , تخيلي , اخر مره شفته لما كان يطلعنا انا و حورو...... | |||||||||
19-01-14, 08:21 PM | #8 | |||||||||
نجم روايتي ومشرفة سابقة وفراشة متالقة بعالم الازياء
| الجزء السادس بشاير: حلفي , وااي يا بختج , عاد ودي اشوفه , تخيلي , اخر مره شفته , لما ودانا بقاله انا و حورو و احنا صغار , لعنت خيره حور لانه يرضى ... مناير: ايي بس بشور الحين ما تشوفينه , وايد اروح هناك انا , اشوفهم , بس بدر !! سلامتج ما يبين , امي تقول حاق خالتي حياة وينه ولهانه عليه , تقول لها شسوي , و تقعد تتشكى حق امي و تقول ما يرضى ينزل .... بشاير: يعني حتى لو اروح ما ينزل ... مناير: يمكن , اليوم , زلزل البيت , كلنا وقفنا نبي نسلم عليه , جنه مسافر بشور تخيلي جنه مسافر , وااي بس اينن .... بشاير: سكتي بس , ترى تحمصت و تحبطت , تقولين اينن , بعدين تقولين ما ينزل و ما يسلم .... مناير: بعد هذا الصج , لو يايه اليوم جان شفتيه .... ///////////////// (في منزل حياة ليلا بعد رحيل الجميع , صارت حياة تنادي): حووور , حوووور .... (نزلت حور من الطابق العلوي , ووقفت على السلم): هلا يما... (اخفضت صوتها): وينه بدر ؟ نام ؟؟ حور: لا ,, توني خليته عشان ينام (صارت تلوح برأسها)... حياة: شفيج !! حور: يما ,, بدر متعقد من الموقف ,, يقول لي مابي انزل , احس انهم يتذكرون اللي صار , يضحكون علي , و يحشون فيني ... حياة: ليش عاد !! والله انه نزل , جنه ملاك نازل علينا من السما ,, كلنا وقفنا على ريلنا ... حور: قلت له , مو مقتنع , يقول اكره جمانه , اكرههم خالاتي اكرههم , مابي التقي فيهم ... حياة: ليش !! حوريه مسكينه هي اللي ما رضت عليه , هي اللي كانت تقول لا تضايقونه , ترى جمانه شيطانه , حوريه مالها ذنب !! حور: شسوي يما , نفسيته تعبانه , تقولين الموقف توه مو من 10 سنين , بس , بعد ما راح اقنعه ينزل عقب اليوم ... (في غرفة بدر , كان مستلقيا يحاول النوم , لكنه عاد يعيش كابوس ما حدث بينه و بين جمانه .... (في اليوم التالي , في الصباح الباكر , نزلت نور مرتدية ملابسها لتذهب للعمل , فرأت عبدالله يجلس على طاولة الطعام , فجلست دون ان تلقي التحيه).... (صار عبدالله بنور قائلا): و عليكم السلام ... (نور بترفع): السلام ... عبدالله: الله يسلمج , يالله صباح خير .... نور: ويع ويع عبدالله , حتى لو ابي اقول حق امي تاخذ لك وحده من رفيجاتي , اهون ... عبدالله: غلطانه , انتي و قاعده بجبدي , اخذ رفيجتج ,, لا بالله كديت خير , الله يلوع جبدج .... (نزل بدر من الطابق العلوي و القى التحيه): السلام ... عبدالله: و عليكم السلام ... نور: و عليكم .... (خرج بدر مباشرة كعادته).... (اتت حياة من المطبخ): ها نور يمه , متى قعدتي؟؟ (نور تأكل و تجيب , و عبدالله يشرب الشاي و ينظر اليها): توني يما , بس متأخره فلبست قبل لا انزل .... عبدالله: سمعيني (موجها الكلام لنور) , المره تعاملينها بالحسنى , وله غير جذي ما يصير لج طيب , ما نقعد نودي و نييب فيهم عشان حضرتج , امي مريضه , لازم ايد تساعدها تسمعين).... (لم تجب نور فقال): طبعا تسمعين , بس ما تردين , عادي اذا سلام ما تسلمين .... حياة: بس عبدالله ماما , حور ما نزلت ؟؟ عبدالله: يمكن شوي تقعد , امتحانها 9 و نص , نزل بدير , سلم و طلع كالعاده ... (حياة تتمتم): يا ربي شسوي بهالولد , يقول ادري اني غلطان ,, بس انذليت , مادري شسوي معاه ؟؟؟ (جلست حياة , ثم اتصلت على شقيقتها حوريه): الو , شلونج حوريه ... حوريه: الحمدالله , تمام , يا حلو بدران امس , شحلوه , فقدناه.... حياة: يا حلوه , ظيم , حوره امس صعدت له , تقول جنه الموقف توه صاير .... حوريه: شدعوه !! حياة: والله , اخوه صعد له , يقول منهد و يقرا قرآن , بعدين حور !! , والله مادري حوريه شالدبره , تعقد ولدي و قعد , الله يسامحج يا سهيله , و شوفي جمانه , شوفي شلون ويهها عريض , شفتيها امس ليش ما نطرتونا !!! ///////////// (في الساعه العاشره و النصف عندما كانت نور في العمل , دخلت زميلتها)... سالي: صباح الخير ... نور: تو الناس , صباح النور ، جان ييتي 11... سالي: انا يومي اليوم بياخد العقل , رحت للدكتور طلع بيجنن , وصلت هون , لقيت شاب , نقل جديد عندنا , التفت لإلي و ابتسم و رد عليي صباح النور , يا الله على عيونو ما احلاها... نور: اييي , عبالي يايت لج ترقية , انا احلى من الكل , محد يهمني ... سالي: اوكي , ما يهمك , انا بيهمني .. (دخل الموظف الذي تعنيه , فابتسمت) اهلا و سهلا ... الموظف: هلا فيج ... ما ان سمعت نور صوته حتى فتحت عينها بشدة متفاجئه): حسن ... | |||||||||
19-01-14, 08:22 PM | #9 | |||||||||
نجم روايتي ومشرفة سابقة وفراشة متالقة بعالم الازياء
| الجزء السابع (ما ان سمعت نور صوته حتى التفتت اليه و فتحت عينها بشدة , فقالت متفاجئه): حسن !!... (كان هذا الموظف حسن ابن خالتها حوريه)... (فابتسم حسن الا انه يجهلها , قال): هلا والله , انتي تعرفيني... نور: اكيد (استدارت , اعطته ظهرها و صارت تتابع عملها) انا نور ... حسن: بنت خالتي حياة ... (التفتت نور اليه و ناظرته بغرور): اكيد ... حسن: هلا والله , هلا و غلا , ما عندي دم الصراحه , شلون ما اعرف قمر العايله , سوري , بس شهالزين شهالحلات , الصراحه , صايره عوار قلب فديتج والله .... (كانت نور سعيده لتغول حسن بها , الا انها ابتسمت مترفعه و قالت): الحمدلله و الشكر .... حسن: افا ,,, الحمدلله و الشكر !! بس مالي شغل فيج ,, انا عيني ما تجذب علي , فعلا صج والله عوار قلب ... (همست سالي باذن نور): يا الله , ابن خالتك , يعني الغزل كلو الك , ان شالله بتمنى ما تخذليه ... نور: واي سالي خيولي .... سالي: اسمك حسن ؟ حسن: ايي نعم , حسن بو علي ... (ضحكت سالي): عاشت الاسامي , اهلا و سهلا فيك بيناتنا بوعلي .... حسن: الله يحييج , تسلميين .... ////////////////// (في منزل حياة , وصلت حور و صارت تنادي والدتها): يما ,, يما حياة ... (اجابتها والدتها): كاني يمه فوق , تعالي .... حور: يما ,, ما تبيني اوديج النادي ؟!.... حياة: لا , مرتني بشوره , و ردتني .... حور: الله يما , عليج مخالفه , ليش ما قلتي لي بتشوفينها , والله نسيت شكلها , من زمان عنها ... حياة: شكل القمر شكلها .... (في الجامعه .. كان بدر قد انتهى من اعادة احدى المحاضرات و خرج يسير لمكتبه)... (صارت احدى الفتيات تناديه): دكتور بدر , دكتور ... (التفت بدر اليها مبتسما): انا , تناديني انا ... الفتاة: ايي , كنت ابي اسألك ... (وقف و أجابها مبتسما): اولا ... انا مو دكتور , حتى توني قاعد اخذ الماستر , تقدرين , تفضلي سألي ... الفتاة: بصراحه , انا ما كنت ادري ان المحاضرات تنعاد , تقدر تعيد لي اياها ... بدر: اكيد اقدر , بس حاليا انا عندي شغل , ففي المحاضره القادمه تعالي مبجر شويه , و اعيدها لج ان شالله , اسمج بالخير ؟(مكتفا يده و منحنيا قليلا)... الفتاة: مريم فيصل ... بدر: حياج الله يا مريم , عاشت الاسامي , خلاص اتفقنا ... الفتاة: الله يسلمك , مشكور دك ,, اقصد استاذ ... بدر: ايوا استاذ , حياج الله ... الفتاة: الله يحييك (و انصرفت من امامه)... (مشت مريم قليلا , فظهرت لها مناير قائله): ها شفتيه ؟؟ مريم: وااااااي اينن , جريب ابجي ... مناير: شلونه ؟ ثقيل ؟ وله رقله ؟ مريم: لبق ,, جدا لبق , ما يرفع عينه , و مو نفسيه ... ////////////// (انتهى عبدالله من عمله فجرا , فتوجه مباشرة الى البيت , ما ان وصل , حتى دخل و غير ملابسه , و رحل فورا قائدا مركبته الى الممشى , لكن ليس بهدف المشي , فما كان منه الا ان اخرج حامل لوحات , و الوان زيتيه , وضع الحامل على العشب خلف الشجره ,, معتقدا انه ليس هناك من احد , و بدأ باستكمال لوحته , كان عبدالله يرسم بسريه تامه , فالرسم يهدئ من مزاجه البغيض , فهو يفرغ ما يحتويه من جمال في رسوماته , لكنه لم يعلم عن الفتاة الجميله الانيقه التي تراقبه , كلما وقف يرسم لوحه)... (تقول الفتاة في نفسها): هذا الانسان , مبدع , و رسوماته تحسسني بنظافة قلبه و شفافيته , بشكل مو طبيعي ... ///////////////// (في اليوم التالي , في منزل حوريه , دق جرس الهاتف , فأجاب زوج حوريه): الوو .. (كانت المتصله فتاة): الو السلام , حسن ؟ ... زوج حوريه: لا بو حسن ... الفتاة: شلونك عمي .. بوحسن: هلا جمانه وله ليلى ؟ الفتاة: جمانه عمي ... (تجهم وجهه): ايي هلا جمانه ... جمانه: هلا عمي , انا ابي بشاير , هني؟؟ بوحسن: موجوده , لحظه , بشاير , بشاير , وينج يبه ؟ ... (اتت من المطبخ): هلا يبا , تناديني ... بوحسن: كلمي بنت خالتج ... بشاير: حور؟ بوحسن: جمانه ... (عقدت حاجبيها استغرابا , تقدمت و اجابت الهاتف): الو , هلا جمانه ... جمانه: هلا بشورة , شلونج حبيبتي ... بشاير: بخير عساج بخير الله يسلمج ... جمانه: بشور , بسألج , جاوبي اي او لأ , عندكم دكتور اسمه طلال ؟؟ بشاير: ايي , استاذ , معيد يعني .... جمانه: بشور يا الفضيحه شفيج ؟! بس جاوبي ايي او لأ , عنده حركات يرقم بنات , يتحرش , يغازل... بشاير: ليش يعني ؟؟ جمانه: خاطب وحده , و يبون يسألون عنه ... بشاير: والله مادري جمانه , بس الاكيد انه على حسب الوحده , في بنات يسوون حركات , في بنات عكس (سكتت جمانه) تبين تعرفين شي بعد ؟؟... جمانه: لا خلاص مشكوره حبيبتي بشوره ... بشاير: العفو , لا شكر على واجب .... بوحسن: بشاير يبه , انتي معوده تحاجينها جمانه ؟ | |||||||||
19-01-14, 08:28 PM | #10 | |||||||||
نجم روايتي ومشرفة سابقة وفراشة متالقة بعالم الازياء
| الجزء الثامن (في منزل سهيله , في غرفة , عند جلوس جمانه على سريرها و هي تراسل احدهم عبر الجوال بوجه متجهم , دخلت ليلى قائله): بسج بسج , ما تتعبين من التلفون........... (قالت جمانه متذمره): اوووه ليول , ترى مال خلق , حدي لايعه جبدي....... ليلى: ليش بعد ؟؟ طلال مسكين ؟؟ جمانه: مسكين !! انا اللي مسكينه ... (ليلى تحدق بجمانه): جمانو !! , انتي مسكينه! , ايي مبين , مبين من سالفة بدور ولد خالتي حياة , تحطم بسبتج .... جمانه: ليلى (نظرت لها متضايقه) , مالي خلق اتحجى بالموضوع ... ليلى: والله نونو حرام تعقد , طاح من عين الكل بسبتج انتي و امي و عبدالله , يعني اول شي , تقولين حق عبدالله احبك , لا و تخطبينه بعد , لما ما عطاج ريج حلو , رحتي تتلزقين ببدر عشان تحرينه (صارت جمانه تومئ بإيماءات الملل و التذمر و اللا مبالاة) , والله كيفج جمانه , انتي ما استفدتي شي , طيحتي روحج من عين عبدالله اكثر , يعني لو خالتي حبت تزوجكم , ما راح تقدر تقنعه , على حركتج باخوه لأنج تبين تشدينه , الحمدلله و الشكر , لا تعليق ..... جمانه: منو اللي عينج محامي عن بدر ؟؟ (تتساءل ساخرة) بدر ؟! وله عبدالله !؟ وله خالتي ؟! انتي تحاسبين و تتحلطمين , ما تفكرين شكثر اني انجرحت ولا زلت مجروحه , حتى انتي تحبين واحد متزوج و مو خايفه من علاقتج فيه .... ليلى: مجروحه و جرحتي , بالنسبه لي انا , المجتمع ماقصر , ملجت , ما صدقو تطلقت , عشان ياكلوني بلسانهم , من غير ما اغلط , عشان جذي محد يهمني الحين .... جمانه: الناس ,(ابتسمت بحسره)الناس يسوون جذي محترين من اللي تسويه امي , تزوجت ابوج و تطلقت , و بعدين تزوجت ابوي , تطلقت فتره , بعدين ردت , بعدين طلبت الطلاق.... /////////////// (في منزل حوريه , في غرفة بشاير و مناير , وصلت بشاير للتو قائله): هاااي (صارت تخلع حجابها)... مناير: شسالفتج مع ابوي اليوم ؟ كنت مستعيله و ما عرفت اسألج ؟ بشاير: شسالفتي انا!! , معصب!! , جمانه بنت خالتي داقه تسألني عن معيد عندنا اذا يغازل وله لا , الغريب بالموضوع !! انه ما زف ليش تسأل عنه , معصب , لانها متصله علي , و اذا لها عاده تتصل علي دايما , استغربت!!.... مناير: هما بيت خالتي سهيله / انا حاطه عليهم x من زمان... بشاير: اي حتى انا , بس ابوي شدراه !!! يعني احنا لان مسولفه جدامنا سوالف سخيفه , بس ابوي شفيه ... مناير: من خالتي حبيبتي , ما قلت لج ,,, بشاير: شنو (باستفهام و استغراب)... مناير: بدر , معيد بالكليه اللي فيها مريوم ..... بشاير: حلفي , منوووور(غاضبة) , شفتيه بعد يا النحيسه ؟؟ مناير: اي حره شفته , راحت مريوم حاجته , و يات و مدحته , قالت محترم لبق , و ما يرفع عيونه ... بشاير: اهمه عيال خالتي حياة جذي , يهبلون , شفتي عبدالله انتي , عبدالله يزوغ القلب , جان زين بما ان هو يبي يتزوج ياخذني , بس ما يطل بويهي , تلاقين عنده ياهله... مناير: لا والله , عبدالله عصبي , مصرقع , الله يعينه على نفسه , اي صح تذكرت , شفت حسون اخوي بجامعة مريوم بعد (ابتسمت) مواعد رفيجته هناك تدرس .... بشاير: الله يفشله , جدام مريمو؟ تتوقعين تدري؟؟ مناير: اي , تدري ... (نداء من حوريه): يا بنات.... بشاير: هلا يا حلوه .... (قالت حوريه غاضبة و متذمره): ايي قصي علي , ساحليني , ما تنزلون انتي و منور تشربون الشاي معانا , نبي نشوفكم , كله قاعدين بالمعتقل !!!... (ضحكت بشاير قائله): يالله يما الحين يايين ... (في غرفة المعيشه , كانت حوريه تجهز الاكواب لتضع بها الشاي , فقال حسن): حوريه !! ابي كوب كبير , كيفكم انتي ويا نون النسوه اللي بينزلون الحين / مالي شغل فيكم !! عيل هذا كوب !! حوريه: ايي خنشوف خنقول حق بلسم , تعالي يا نون النسوه معانا , حسن يقول ماله شغل فينا .... حسن: لا حوريه لا , لا تربطين عصاعص , انا قلت انتي و اللي بينزلون الحين , ما قلت بلسم ... (ضربت حوريه حسن على كتفه): عمى بعين الشيطان , والله اذا هذا اولها بينعرف تاليها .... حسن: لا شدعوه , كلج خير و بركه ام حسون .... حوريه: ول زين انا مو ام احد .... (صار حسن يضحك): يما يالله عاد لا تزعلين , اطفرج والله قشمره .... (نزلت الفتاتين , فجلست بشاير مباشرة , و القت مناير التحيه): هاااي .... حوريه: و عليكم الهاي و رحمة الله .... (مداخله من حسن): تعالو !! ما قلت لكم منو لقيت بالمكان اليديد اللي انتقلت له .... بشاير: منو ؟ حبيبة القلب .... حسن: تقريبا , بس اللي بلاعبين الاحتياط .... مناير: حمدالله و الشكر .... حسن: مقبوله منج , المهم , نور بنت خالتي حياة , قمر العايله معاي .... مناير: تكفى حسنو , لا تقول لها جذي , ترى مو ناقصه هي , بروحها شايفه حالها (صارت تتمتم) على قولة بشور , يا حلو عيال خالتي حياة , الا هي , بروحها يايه من الفضاء .... حوريه: بسكم حش ... ////////////// (مضت سنتان , حيث تخرجت بشاير و حور , و صارت مناير تعمل , ولا يزال عبدالله يود الزواج و يتم رفضه لانه عصبي المزاج , و يشترط بان يعيش في بيت والدته , و بدر نال شهادة الماجستير , اما نور فصارت تزداد رغبتها بارضاء حسن دائما)..... | |||||||||
الكلمات الدلالية (Tags) |
مكتمله, الكاتبة, افضل, حالنا, جنها, رواية, كويتيه |
أدوات الموضوع | |
انواع عرض الموضوع | |
|
|