قلوب تحت المجهر / الكاتبتان عاشقة الشمال + المزيوونه ، مكتملة

[لامارا]

*****************
(الأحد) 18 يوليو 2004
*****************

اليوم المرتقب عند بنات سيف ..ساروا البنات وابوهم ومرته وعياله المطار من عقب مامروا على امهم الصبح وسلموا عليها ..
كلهم رغم انه عيونهم حمرا من كثر ماصاحوا ويا امهم .. الا انهن متحمسات حق السفره هاي..
كانوا جماعتنا طالعين بسيارتين .. سيف ويا حرمته ويسوقبهم الدريول فسيارة سيف الرنج مع الشنط.. اما العيال كلهم فسيارة نايف اللي طلب منه سيف انه يوصلهم المطار..
ريم فحاله مايعلمبها حد غيرها هيه..طول الدرب كانت متوتره وخواتها عادي يسولفن .. مايد وجاسم يالسين جدام ويسولفون ويا نايف..ريم ملتزمه الصمت ومن داخلها مقهووره من ابوها ومن ناعمه.. لانها بغت تركب ويا ابوها بس ناعمه ماطاعت .. والحين هيه طول الدرب متضايجه مب عايبنها ها الوضع اليديد عليها .. كيف تتقبل ها الريال اللي يسوقبهم!!
تبى الوقت بسرعه يمر عسب تبتعد عنه ..

وصلوا المطار وعقب ماخلصوا اوراقهم و دخلوا الشنط .. ساروا يتحوطون في السوق الحره .. مشن ريم و ساره ومي ومهره ومها .. وجاسم ومايد وياهم .. اما عفرا تمت ويا امها.. و ريم ردت تتصرف ع طبيعتها من غير توتر ويا خواتها من عقب ماروح نايف عنهم ..


ريم: تعالوا بشتري كاميرا
ساره: ليش انتي مايبتي كاميرتج؟؟
ريم: لا عند خالي مانع الكيمرا .. مارديت اخذها عنه ..
ساره:انزين انسير لاني باخذ هتفون بعد
مايد: هييه شي اشرطه قيم بوي اهناك
جاسم: قووول والله ؟
ريم: هييييييه بدينا عاد ويا القيم بوي والاشرطه احين ..
مايد: سووو طااااااف ع قوله جسوم
ريم: هههههه يالله نسير انزين
ساره: ميووه
مي: بلاج؟
ساره: عدلي شوي مشيتج
مي اطالعتها بنظره: ماااقوول غير الله يجازي اللي كان السبب
ساره : كح كح كح ..
مي: وياويهج .. قومي عني صدق قاهرتني
ساره: تعورج انزين
مي: الركبه اليمنى لا .. بس اليسرى واايد
ساره: الطيحه تركزت ع شجج اليسار شكلها هههه
مي: سخييفه ..
ساره: ميوه حبيبي انتي سامحيني.. عقب شوي بنركب الطياره وبطيربنا وبنتعلق بين السما والارض مايعلم فهاذيج الساعات شو بيصير غير ربج..
فاانا ها هنا اطلب منك السماح ودعي قلبك ابيض نظيف نظافة تايد للغسيل مافيش مستحيل نحو جميع من اذوك عمدا او سهوا ..
مي ترص باسنانها: تعرفين ساروه .. فقدتج وياها من فصحه .. وفقدتج وياها من سخافه .. وجلبي ويهج عني
ساره: ههههههه وياراسج .. ادري انه مالج غنى عني .. تعالي يلا اختاري ويايه هتفون اووكي ..


بعد ماخلصوا البنات مشاري ياهن ابوهم يحاسب وعقب توجهوا لقاعه الطيران المتجهه لـ Hong Kong
وقبل ما ينادون لرحلتهم .. زخت ريم الموبايل ودقت للطيفه وبعد ما سكرت عنها دقت لامها تطمنها ..
وماهي الا دقايق .. وتوجهوا لممر الطياره..ركبوا الطياره وكلهم استقروا في اماكنهم .. ريم كانت حذال ساره ومي .. مهره ومها وعفرا حذال بعض .. اما جاسم ومايد كان حذالهم واحد صيني
وابوهم ومرته كانوا حاجزين على الدرجه الاولى .. وعيالهم على السياحيه..
وعند البنات كانت ساروه تتحرطم من اول ما ركبت الطياره ومي تزيد وياها وريم تضحك عليهن ..

ساره: هذا ابوج شحقه حاجزلها على الدرجه الاولى ونحن اهنه ناطرينا
مي: هيه ماخذ راحته يتحرا عمره في شهر العسل عافدبها جدام ونحن عادي تتكسر ظهورنا من هالكراسي 9 ساعات
ريم: الا قولوا مافيه يخسر علينا.. 10 كراسي بيحجز على الاولى بيفتقر .. قال احجز 2 وافر الباجين ورا .. شعليه هو ومرته مرتاحين
ساره: اوووف يقهرون والله .. يارب اييبولهم اكل مب حلوو مايرومون ياكلونه
ريم: هههههه هذا اللي ايهمج الاكل
مي: ليتها يت على الاكل اهنه لو تزقرين المضيفات الف مره ماينج وجدام بدون ماتزقرينهن تلاقينهن فوق راسج .. ههههههه
ساره: يلعن ابو الفلوس كل شي تسوي .. هههههه
ضحكن بثلاثتهن .. لف عليهن جاسم يشوفهن .. وزقر ع ريم ..

جاسم صد على ريم يزقرها: ريمان
ريم: هاه
جاسم: شوتقولون
ريم: ماشي .. نقول انه ابوك وحرمته ميلسين جدام عنا ..
جاسم: هييه .. تعرفين انا عرفت ليش ابوج سار جدام ويا نعوم
ريم: ليش .؟
جاسم: ادريبهم يبون يوصلون قبلنا
ضحكت ريم ع تعليق اخوها ولفت ع ساره ومي تخبرهن .. اما جاسم رد يرمس مايد اخوه ..
جاسم: شو اسمه اللي حذالك ؟
مايد: شدراني انا باسمه
جاسم: متفيزر حذالنا لازم نتعرف عليه ..
مايد: الانجليزي يالله نقول كملتين بنرمسه صيني ونتعرف عليه!!
جاسم: ماعليك منه ها ربيع جنكيز خان وهولاكو
مايد: هههههه حافظ المسلسل انته ..
جاسم صد على الصيني : شينق شانق شونق
الصيني اطالع جاسم مستغرب وصد عنه
مايد: شدراك بها الرمسه انته
جاسم: ها افلام جاكي شان كله فيها شانق و شونق
مايد: والله انك .. مره جنكيز ومره جاكي شان.. مرابعنهم شكلك
جاسم: هيهي .. اعجبك ..

وها الوقت مرت المظيفه وعطتهم وجباتهم .. وبعد ماكلوا ..
تلحفن مها ومهره وعفرا وكل وحده رقدت.. ومايد يلس يلعب بالقيم بوي اما جاسم غلبه النعاس وتلحف ورقد ..
و ساره كانت محطيه المسجل وتسمع اغاني ومتغطيه .. مي وريم يتابعون فيلم وكل ما يلتفتن لساره يلقنها تدندن ويا الاغاني وهيه تطالع الورقه مالت اغاني الشريط .. ماحست الا بدقه من ريم ..خوزت السماعات من اذنها..

ساره: شو بلاااج؟
ريم: خفي من ها الاغاني سويره
ساره: ليش يعني .. تراني اتسلى
مي: يلسي شوفي الفيلم انزين.. بسج دومج طربانه وياها الاغاني
ساره: انزين انتن شو يعوركن ..

ولفت عنهن الصوب الثاني وردت السماعات فاذنها ..
مي وريم اضحكن عليها .. وردن يتابعن الفيلم واندمجن فيه ع الاخر ..

كان جاسم راقد حذال مايد فتح عينه فجأه وبدى يحرك ايده يحاول ينبه مايد له .. مايد التفت له وشافه مصفر ومب قادره يتنفس.. الزبد ينزل من ثمه وعيونه مفتوحه ويرمش بها ..

مايد: جسوووووم بلااااك جسوووووم
وصد لريم وحاول ياشرلها عشان تنتبه له
مايد: ريماااااان ريمااااان..
بس ما انتبهن له .. ورد يزاقر لين التفتت ريم ..
بطلت ع طول السماعه وصدتله: شووو؟؟
مايد: جسوووم مايرد عليه
قامت ريم من مكانها ولحقتها مي
ريم كانت واقفه وتضرب جاسم على ويهه بالخفيف : جااااسم حبيبي جاااااسم .. ميوووه هاتي ماي وشكر بسرعه.. ميووود سير ازقر ابوك..

سار مايد يزقر ابوووه ولما وصل سيف .. شاف ريم منزله الكرسي وتسقي جاسم ماي ..

سيف: بلاكم ؟؟ بلاه جاسم
ريم: اظن هبووط في السكر
سيف: وشو تعطينه احين
ريم: ماي ويا شكر .. دوم اسويله جيه لانه ساعات تيه هاي الحالات وهو راقد .. ويهبط عنده السكر .. صدت عن ابوها ورجعت تكلم جاسم وهي تمسح على ويهه
ريم: جاسم انته بخير؟
جاسم قالها بصوت تعبان: ريمان كنت بموت
حظنته ريم وعيونها تدمع : فديتك حبيبي بسم الله عليك ..
مي: ابويه بتخلي جاسم اهنه ؟؟ ماتشوفه تعبان .. قول حق حرمتك ترد تيلس اهنه و ودوا جاسم جدام يرتاح
سيف: ها .. هيه هيه احين بقولها

ودوا جاسم مكان ناعمه ويلس ابوه حذاله .. و ريم تمت عنده لين نام واطمنت عليه.. و ناعمه اللي ارجعت ورا كانت منقهره وايد .. ويلست حذال مايد وهي تتحرطم

ناعمه: اووف من اولها جيه .. كان لازم هذا اييبونه ويانا ..

مايد طنشها يدري لو رد عليها بتطيح فيه ..

بعد ساعات طوال فالطياره وصلوا هونج كونج.. وتوجهوا لفندق (ماركوبولو) اللي كان حاجزنه سيف لهم .. يبعد هذا الفندق عن الميناء حوالي 500 متر .. ويحيط بالفندق من الجهتين مركزين تجاريين .. مداخلهم من الفندق .. هذا غير المراكز التجاريه الموجوده بين سلسه الفنادق اللي حذالهم ..
بعد ماوصلوا غرفهم .. كلن دخل غرفته ينام ..

****



فبيت بونايف.. يلسن لطيفه واسما ويا امهن فالصاله والوقت عندهم العصر.. دخل نايف عليهم اللي كان راد من برع .. صبتله امه فنيان قهوه وقربت له الرطب .. حب يفاتحها بالموضوع اللي هو حاس انه مرتاااح خلاص منه وخصوصا من عقب ما استخار..

وقبل ما يرمس سبقته أسما..
أسما: ها المعرس.. شو الهبات اليوم؟
نايف: اوه اوه معرس مره وحده .. خلوني اخطب اول
مريم: وانته حد ميودنك ثرك .. ترا شغلتنا ها الاسبوع الا التريي
نايف: ههههه مشكله والله
لطيفه:انزين نايف ..
نايف: انزين لطوف..
اسما: يالله يا برودك .. يشوف امه كيف تنغلي من الحره وهو يضحك وعادي عنده
نايف: انزين امايه شو حارنها ..
مريم: لا محتره ولا شي.. كييفك هاي حياتك ماتبى بنت خالك كيفك
نايف: انزين انا ماقلت ماباها
اسما: ولا قلت تباها
لطيفه: يالله كلتن الريال ..
نايف وهو يطالع لطيفه: اصلا محد مآزرني كثرج
لطيفه: ههههههه حليلك انته ..

تموا ساكتين.. يلس نايف وتم يطالع امه ويضحك عليها .. يت لطيفه ويلست حذاله .. ورمسته بهمس ..

لطيفه: عاد مصختها نيوف.. امس رتبتلك موقف عسب تشوفها و خليت امايه تقول لخالي انك توصلهم المطار شو بعد اكثر عن جي

نايف: اللي يسمعج يقول تأملت فيها ..
لطيفه: تأمل فيها عقب
نايف: لطيفه البنت ماتقااارب موول ..
لطيفه: ماعليك.. هيه مستحيه .. انته حاول تتقرب منها اكثر..نحن بنخلي السالفه سكوتيه .. يعني محد بيدريبها غير امها
نايف: ماعرف والله
لطيفه: يالله فرح امك وقولها تخطبها لك
نايف: انا اصلا ياي عسب ها الموضوع
لطيفه: شو يعني
مريم: انتوا بلاااكم تصاصرووون
لطيفه: ها .. ماشي
نايف وطى فنيان القهوه من ايده.. واطالع امه وهو يبتسملها
نايف:امايه
مريم: خييير
نايف: بسم الله بلاج محمقه يا الوالده
مريم: بس جي .. ارمس خلصنا
نايف وهو يبتسم: امايه توكلي على الله وخطبيلي بنت خالي..
مريم وهيه مب مستوعبه: صدق .. صدق والله!!
نايف: يعني ها الموضوع يتحمل سوالف

مريم من وناستها قامت من محلها و حضنت ولدها وعينها تدمع .. والبنات قامن يناقزن وهن مستانسات..

اسما: اف واخيرا يعني حد من بيتنا بيعرس يالله ما بغيتوا ..
نايف: اسمعوا انتوا هاي..خلو البنت واهلها يوافقون قبل
لطيفه: ان شاء الله ما بيردونك .. منو بيحصل نسيب شراتك هاا

وعلى وناستهم هاي .. يلست مريم اتدور رقم عليا .. دقت بس يعطيها انه الرقم غير مستعمل ..

نايف: ها بلاج اميه ؟
مريم: ادق لعليا بس يقولي الرقم مب مستعمل
نايفه: يمكن مقطوع ولا طلعت رقم ثاني
مريم: ايجوز .. خلاص بتصلبها ع البيت .. لطووف انتي تعرفينه رقمهم هناك
لطيفه: هي اميه .. هاتي بدقلج..

دقت لطيفه الرقم وعطت امها السماعه .. كانت تسمع رنة التيلفون تتريا حد يرفع السماعه .. لكن محد رد ..

مريم: محد يرد بيتهم
لطيفه: انزين دقي المغرب ..
مريم: يالله شو يصبرني لين المغرب انا .. ابا ارمسها احين
نايف: ول امايه الا تبى الفكاك مني ..
مريم: يالله شو الفكاك بعد انا ما صدقتك اتيني وتقول خطبيلي بعدني تباني اتريا اكثر!
لطيفه: حليلج يا امايه .. زين صبري شوي ربع ساعه وردي عقب دقي ..
مريم: بنشوف ..

و قاموا الكل يتخيلون عرس نايف وكيف بيكون البيت وريم فيه .. وكيف بيعدلون قسم نايف وكيف الديكور اللي بيحطونه ونايف مستانس على الرمسه وحس بحماس اكثر عن قبل..

****

شيخه كانت يالسه ويا عليا اختها ها الوقت في الصاله ويسولفن ..كان باين من سوالف شيخه انه شي مضايجبها وعليا حست بضيجتها.. وحاولت تخليها تفضفضلها باللي معكر مزاجها .. وفالاخير

شيخه : ياعليا ماعرف شو اسوي ويا سلطان معذبني والله
عليا: ليش شو ياه بعد ..
شيخه: دومه مفشلني جدام الناس .. شو اسويبه
عليا: انزين شو سوى
شيخه: قولي شو ما سوى
عليا: شيخه ولدج ريال وادرى بمصلحته .. جنج تشكين من سوالفه ويا ها البنات ترا اغلب الشباب جي .. الله يهديهم بس .. ولدج عنيد..
شيخه: لله خوانه ما سووها
عليا: وانتي شدراج .. سلطان طبعه صريح مايزيغ من حد ..
شيخه: مب الا ها .. الدوام بعد ما يداومه .. وجان داوم سار ساعتين وظهر.. شو ها الحاله وياه .. والله اني عيزت خلاص مالي بارض له.. راشد ايي يخبرني عنه والله اني اتلوم ..
عليا: انزين مارمستي سلطان عن دوامه ليش ما يداومه؟!
شيخه: يبوج مايحشم حد ترمسينه يودرج ويسير عنج
عليا: وابوه ما يقوله شي؟
شيخه: تحيدينه ابوه غاسل اديه منه من يوم ودر المدرسه
عليا: لاحول ولا قوه الا بالله ..
شيخه: اتصليبه ياعليا وازقريه رمسيه يمكن يتلوم منج و يسمعلج
عليا: شو بقوله انا
شيخه: رمسيه انتي .. ربج بعد
عليا: الله يهديه ان شاء الله .. برمسه وبشوفه .. بس سلطان عنيد من يوم يومه
شيخه: ادرييبه .. والله انه طلع الشيب من راسي..انتي طالعيه
عليا: بشوف ان شالله..وشوفي يا شيخه.. ترا ربج محطنج فاختبار وانتي المفروض ماتيأسين من رحمة ربج..حاولي ويا ولدج مره مرتين ثلاث بس مول لاتيأسين .. الا ما ايي اليوم اللي فيه يعتدل حاله
شيخه اطالع اختها : الله يسمع منج
عليا: ماعليج انتي .. بس هدي اعصابج وياه.. ولا تمين جي ضايجه
سادت فترة صمت امبينهم .. وشوي قطعت شيخه ها الصمت بسالفة ثانيه..
شيخه: عيالج اتصلوا ؟
عليا: هيه رمسوني اول ماوصلوا والحمدلله كلهم بخير وسهاله ..
شيخه: الحمدالله..

وعقب شوي طلعن شيخه وعليا .. قالت شيخه بتسير تيلس ويا امها وابوها فالحوي .. اما عليا قبضتها احلام وخلتها تيلس وياها فالصاله .. ويلسن يطالعن التلفزيون ..
ياهم ها الوقت راشد وسلم عليهم ويلس ..

راشد: عيل ليش ماطلعتوا برع تيلسون ويا الشواب
عليا: توه كنت بظهر ويا شيخه اختك بس احلام ظايجه وميلستني وياها
راشد التفت لبنت اخوه: هيه عاد هي ماتصبر بلا البنات واحين مب عارفه وين تدق براسها ..
احلام: هيه والله عمي يالسه جني سياره بدون بترول
راشد: ههه مب الا بترول انتي المكينه بكبرها شلوها عنج
عليا: ياويلي ياراشد لاتذكرني .. قلبي يعورني
راشد: اخبارهم هم ؟
عليا: الحمدالله ..

في هاللحظه رن تلفون البيت اللي ردت عليه احلام .. سمعت صوت وحده يشابه وايد صوت عزه بنت عمها ..

مريم: الوه ..السلام عليكم
احلام: وعليج السلام
مريم: منو انتي ؟!

احلام بغت تتسخف على اللي كانت تتحراها بنت عمها
احلام:انا المستقبل الآتي انا طفل الاماراتي يحدثني لسان البحر عن ماضي اجدادي
مريم اطالعت عيالها بعين مستغربه وردت سالتها : منوو انتي ؟!
احلام مسكت ظحكتها وردت قالت: انا المستقبل الآتي انا طفل الاماراتي يحدثني لسان البحر عن ماضي اجدادي
مريم: عليا موجوده ؟!
احلام سكتت شوي ورجعت بحلقت في شاشه التلفون وشافت انه الرقم مب رقم بيت عمها .. وربعت بالتلفون عند عمتها وهي مفتشله وماتعرف منو اللي متصل
عليا استغربت: منو ؟!
احلام: ماعرف بس لاتقولين انه احلام اللي ردت
عليا: ليش ؟
احلام: عقب عقب بقولج ردي احين

احلام ردت داخل حجرتها تشوف مدوي اختها .. وراشد قبض الجريده يتصفحها .. اما عليا ردت على التلفون ويلست ترمس ويا مريم اللي قررت ترمس عليا عن موضوع نايف وريم .. قبل ماترمس سيف لانه اخوها وتدري انه مابيرفض..فحبت تاخذ راي الام اول..

عليا تفاجأت بالخبر .. ماتوقعت ها الشي مول .. ريم قبل خطبتها شيخه لولدها خليفه بس رفضته .. وعليا طبعا ماتبى تغصب بنتها على شي مع انه كان الود ودها تفرح ببنتها وبولد اختها ..
والحين .. مريم يايه تخطب ..
كانت مريم ترمس عليا اللي فكرها حاير وهي فبالها مشاهد عاشتها ويا ها العايله .. ممكن انه تتكرر لريم بنتها !! وها الشي أبدا ما تأمل انه يستوي ..
تعوذت من بليس .. ورجعت تركز فالكلام ويا مريم ..
صوت فداخلها ينبها .. ها نايف مب سيف.. لا تتسرعين فالرفض ..
هي تعرف مريم زين.. عاشرتها وتعرف اطباعها.. وترد تقنع عمرها .. كل الي صار من ورا سيف نفسه.. محد كان له دووور فالطلاق غير سيف بنفسه..
ماتقدر تتحامل على الكل..

مريم: والله يا عليا مادري شو رايج عاد..
عليا: ها
مريم: بغيت رايج انتي فالسالفه
عليا وتحس بدقات قلبها تتسارع..تحاول تضبطه ..
عليا: والله يا مريم .. شوفي الشور هب عندي..
مريم: بس انا ماخبرت أي حد عن ها السالفه .. قلت أشاورج انتي اول حد
عليا ابتسمت وهي تسمع ها الرمسه ..
مريم: ماسرت اشاور لا اميه ولا سيف.. قلت ايي عند عليا اول .. ربيتي البنات وكبرتيهن .. ورايج ع ها الشي يهمنا ..
عليا: تسملين فديتج.. بس انا ماروم اوافق ولا ارفض.. يعني الامر راجع لريم بس..
مريم: ادري يا عليا.. بس بعد انا بحط فالحسبان اني اخت سيف.. صح اني على اتصال وياج من فتره لفتره.. بس بعد بتم اخت سيف ..
عليا: يا مريم كون انج اخت سيف ما يأثر على شي أبدا ..انتي اخت عزيزه وغاليه.. عمرج ما ضريتيني فشي .. بس اطمني .. انا لو وافقت بنتي مابكون مطبه فدربها .. بفرحلها ومن خاطريه بعد ..
مريم: الحمدلله .. ها الشي يفرحني يا اختيه ..

بعد ما انهت عليا المكالمه .. سكرت وهي تفكر بالخبر المفاجئ هذا .. راشد الي كان قابض الجريده وطاها ع جنب وهو يشوف عليا ..

راشد: ماشالله خطبه اسمع
عليا: هي .. هاي مريم اخت سيف..
راشد: هي حرمة خلفان ..وناويه تخطب لنايف شكلها
عليا: هيه ماعندها ولد كبير غيره
راشد: ومنو خطبت ما يكون مي ولا ساره
عليا ابتسمت : بتخطب الكبيره ..
راشد: ريمان .. زين يتياوزون نايف وريم
عليا: كيف يعني
راشد: نايف ماشالله الواحد يعتمد عليه .. وريم هابة ريح ..
عليا: عاد نحن مالنا شور.. بنتريا ريم لين ترد وبنخبرها
راشد: يعني بترفض
عليا: ما بنغصبها على شي .. مريم قالت انها ماخبرت لا امها ولا اخوها.. يت تخطب اول شي عندي ..
راشد: يا حيها .. وانتي شو
عليا: شو انا شو
راشد: موافقه على ها الشي
عليا: راشد .. اذا كان ها الشي بيسعد ريم ما برفضه
راشد: انزين .. من قناعه ترمسين؟
عليا: همم .. ماخبي عليك اني متخوفه من الموضوع.. بس ترا البنات ردن بيت ابوهن .. وريم منهم وفيهم .. انا كنت غريبه عليهم ..
راشد: خلاص يا عليا انسي الماضي .. الحين نحن فريم
عليا: ونايف .. شو اطباعه؟
راشد: قلتلج راعي مسؤوليه.. ريال والنعم والله .. ماشفت عليه شي ..
عليا: تراك مرابع سيف ونفس الشي ماتشوف عليه شي .. يوزتني اياه وصار اللي صار.. انا مابا بنتي يصيرلها نفس الشي ..
راشد: يا عليا خلج من سيف.. كلن منكم راح فدربه.. وانتي بروحج بغيتي ها الشي..
عليا: ماكنت بقدر اكمل وياه.. وعمري ماندمت ع ها الطلاق
راشد: شقيتي وكبرتي بنات .. وتحملتي مسؤووليه بروحج .. يزاج الله خير يا عليا.. بس يا الوقت الي بينخطبن فيه بناتج .. ونايف من الحين اقولج ريال ما يتعوظ .. فكري زين .. نايف تراه ولد خلفان .. خلفان غير عن سيف وانتي تعرفين ها الشي .. كلن له شخصيته ..
عليا: صدقك يا خويه .. المهم انه محد يدري بها الموضوع الحين .. ويوم بتي ريم بشاورها فالموضوع ..
راشد: عاد هب الا تشاورينها وبس .. حبيبها فالريال .. لاتخسرونه ..
عليا: ان شاء الله خير ..عاد هب يزل لسانك جدام سيف جان شفته
راشد: وين تراه مسافر ..
عليا: حتى يوم بيردون .. مانباه يعرف لاهو ولا امه
راشد: بدق لخلفان وبشوف سالفة ها الخطبه ماخبروني عنها ههههه ..
عليا ابتسمتله ...
راشد: يا حافظ على بنياتنا كبرن والله وانخطبن .. عاد ساره ومي من احين اقولج اللي بيي يخطبهن ايي يشاورني انا اول..

اطالعته عليا وابتسمت .. وهي تحس بقلبها يرف .. تحس بالطمأنينه ع بناتها .. وراهن ناس يحاتونهن ويحبونهن غيرها ..واطمنت اكثر من ناحية خطبة ريم من بعد ها الحوار ويا اخوها ..

اما مريم من بعد ما سكرت عن عليا.. ردت تيلس وياعيالها .. وخبرتهم باللي استوى واللي انقال.. واستانس الكل انه عليا ما اعترضت على الخطبه.. لانهم توقعوا انه عليا تحسس شوي وممكن انها ماتوافق ..

مريم: والله انه ها الحرمه زينة العقل فيها ..
لطيفه: فنانه عليا .. ليتهم بس ماطلقوا هيه وخالي
مريم: ربج كان رايد يابنتي ..
اسما: بس زين الحين بعد البنات قراب منا اكثر عن قبل ..
مريم: حليلها عليا.. الله يصبرها ع فراقهن ..
نايف: اذكرها والله عليا .. كانت وايد طيبه ..
لطيفه: ايه شو عليا بعد .. قول عمووه
نايف: هههه مب متعود ..
مريم: عاد هيه قالت مالها أي شور .. يعني راي ريم هو الاول والاخير ..
نايف: زين بعد .. انا ماباها توافق عليه بالغصب
مريم: ماعليك انته .. بتوافق ان شالله
اسما: انزين امايه لو صار واستوى.. متى بتحددون الملجه والعرس
مريم: مادري والله .. كل شي يعتمد عليهم .. ريم ونايف
نايف: انزين هيه بعدها تدرس
لطيفه: انزين الا هنه.. يعني عادي بتكمل..وبعدين ها السنه وبتخلص ..
نايف: زين زين ..
مريم: الله يتمم على خير.. انا بقوم اصلي المغرب..
لطيفه: دعواتج يا حجه

صلوا العيال ورجعوا يسولفون عن الخطبه وتوغلوا اكثر للعرس ورمسوا عن عقب العرس.. وين بيسكنون .. وتمن يعلقن ع نايف اللي كان يضحك عليهن..
وشوي يا عمار ووراه نوره واللي هيه اخر العنقود فها البيت .. نواري يوم شافت نايف ربعت ونقزت فثبانه .. هيه مكمله أربع سنين ومتعلقه بنايف اكثر حتى من خواتها..وطبعا نايف مايقدر يتفجج منها يوديها وين تبى ولا يشوفها تصيح..
*****************
(الاثنين) 19 يوليو 2004
*****************

الساعه 3 الفير كان مروان توه نازل من سيارته .. تاخر وايد برع لانه كان سهران ويا ربعه اللي رجعوا في اجازه من دراستهم خارج البلاد .. وعلى السهر والسوالف كلن نسى وقته .. سكر سيارته وحاول يفتح باب البيت لكنه لقاه مقفول

مروان:اوهو هاذييل ليش قافلين الباب ؟ انا بروحي ناسي ما اشل ويايه المفتاح..

شل تلفونه ويلس يتصل على رقم البيت بس محد يرد عليه .. ورجع اتصل على رقم امه مغلق وأبوه مايرد ..
مروان: ليش مايردون هذيل اوف مب رقاد ها ..

رجع واتصل على رقم اخوه فارس .. رن التلفون وايد وبعد فارس مارد

مروان: هذا ديايه يرقد من وقت شو اباه انا اتصل به ..
رجع يتصل على رقم اخته لكن هالمره خانته بطاريه التلفون .. اللي فضت وهو بعده ماتصل ..
مروان: مقيوله النحس طول عمره نحس ..
التفت لسيارته وفتحها يدور فيها جراجه تلفون لكنه مالقى .. سكر باب السياره بغيض واتسند عليها يفكر شو يسوي احين ..
مروان وهو يفرك لحيته ويطالع البيت بتمعن: جرس البيت خربان .. والتلفون مافيه بطاريه .. والباب مقفول والحل احين يامروان ؟ ماشي طبعا حل الا حل واحد ..انك يا مروان تحووم الييدار..
ركب سيارته وشغلها .. وجدمها مجابل الييدار .. نزل من السياره وركب عليها من جدام ..
مروان: احين حصلت شي اركب عليه لكن الله يعين النزله ..

رفع اول ريل ولكن مثل ماقال النحس طول عمره نحس .. زامن تسلقه اليدار مرور دوريه الشرطه .. اللي تجدموا منه وسطعوا عليه نور السياره وظربوله هرن وهو اول ماشافهم نزل ريله و صفق الايد بالثانيه..

مروان: انا ليش من يوم يومي منحوس ياناس .. شو اسوي احين ..
نزل مروان من فوق سيارته و الشرطه كانوا واقفيه تحت
وقبل مايرمس على طول قبضوا عليه

مروان: لحظه الطيب هذا بيتنا لحظه
لكنهم ما سمعوله وتموا ماسكينه
مروان: يا الطيب اسمعني انزين..
الشرطي: هاه شوعندك ؟
مروان: الشيخ هذا بيتنا والله
الشرطي: بيتكم راكب فوق اليدار
مروان:توني راجع من برع وقفلوا عني الباب وين ادخل ماشي الا اركب اليدار
الشرطي: شو اللي يثبت
مروان: انزين بطل ايدي شوي..
الشرطي: ما بهدك .. يالله تعال ويانا القسم ..
مروان: والله ما سرت وياكم .. قلتلك ها بيتنا .. لو انا حرامي جان اول ماشفتكم شردت .. (ويرمس وهو صدق متضيج منهم ..) اسمع والله انه بيت ابويه يعني بيتي شو بقص عليكم يعني..
الشرطي: انزين شو اسمك ؟
مروان: مروان راشد سلطان بن مانع
الشرطي: بطاقتك موجوده ؟
مروان: الهويه في سدة السياره اللي فوق
الشرطي: حاليا ماعندنا مجال انهدك الا في حاله وحده .. انه يطلع صاحب البيت ويقول انك ولده مثل ماتقول
مروان: انزين اتصلوا بابويه ..

عطاهم مروان الرقم وهو ميت من الحر من الوقفه ومتغصص اكثر لانه توهق ..
بعد عده محاولات رد ابوه على التلفون وطلعلهم برع وهو زايغ ..شو مستوي الشرطه داقيله ويقولوله انهم يتريونه برع البيت ..
طلع راشد برع وشاف مروان واقف ويا الشرطه .. واستغرب الوضع ..

راشد: مروان شو فيك.. شو مستوي !!
الشرطي: هذا ولدك ؟
راشد: هيه ولدي بلاه شو مسوي ؟
مروان: ابويه انا ييت متاخر وانتوا قافلين عني الباب .. ييت بحوم اليدار والا والدوريه ماره.. يتحروني حرامي..
راشد رغم خوفه من اللي صاير الا انه ضحك على الموقف : لو ادري عيل جان ماظهرت وخليتهم يشلونك تبات عندهم عشان ماترد مره ثانيه متاخر ..

ضحك الشرطي وهو كان بعده ماسك ايد مروان ..
مروان: ها الشيخ بعدك ماسكني
الشرطي: هههه اسمحلي .. بس شو نسوي ترا ها واجبنا ..
راشد: لاوالله هابين ريح.. يزاكم الله خير ..
وترخص الشرطي منهم وروحت دورية الشرطه اما مروان دخل البيت ويا ابوه ..

راشد: ليش ماتصلت تلفون ؟
مروان: ابويه اتصلت لكن محد رد عليه وعقب خلاص مات التيلفون فظى..
راشد: وانته ليش متاخر مب عوايدك
مروان:ترا عيال سعيد محمد ردوا من السفر اجازه عندهم وتعرف عاد سوالف وظحك وطاف علينا الوقت
راشد: هيه زين يالله عاد قوم لاترقد تيدد وانزل بنسير المسيد ماباجي شي عن صلاه الفجر
مروان: ان شا الله ..(ويقول بصوت واطي) انا الا ما بصلي الفجر بس.. بصلي بعد ركعتين شكر لله ..

ويوم ركبوا فوق .. لقوا ام مروان يالسه تترياهم ووياها عزه
كانت الام زايغه عليها الدنيا ماتعرف شو مستوي ويوم شافت مروان ويا ابوه يايين .. زخت مروان تهازبه عبالها مسوي شي والشرطه يايبينه .. وتموا يضحكون عليها .. راشد خبر حرمته بالسالفه كلها وهلكوا من الضحك ع مروان فارس طلع من حجرته بيسير يصلي وسمع الربشه والضحك استغرب الحال وتنشدهم شو السالفه وردوا يعيدوله السالفه وهو ناقع من الضحك ع مروان اللي ينكت ع عمره كيف كان بيشقح الييدار..


****

في هونج كونج تزهبوا العيال وقرر ابوهم يوديهم يمشيهم في السفينه اللي قريبه شوي من فندقهم يعني بالمشي يقدرون يوصلونها .. منها ياكلون فيها لانهم ماتريقوا الصبح و منها يتفرجون لانه هاي السفينه تمشي مده ساعتين .. وتحوطهم على جبال هونج كونج المنحووت عليها تماثيل للمشاهير..

كانت اسماك القرش تحيط بالسفينه وهي تمشي والعيال يراقبون ويتصورون
استانسوا في رحلتهم هاي .. بس المشكله كانت لما رجعوا الفندق ..

جاسم تعب عليهم وايد .. والظاهر انه البحر واليلسه في السفينه سببوله دوار في راسه وغثيان.. وبدت حرارته ترتفع .. بمساعده الفندق يابولهم طبيب .. وكشف عليه و عطاه ابره وادويه .. وروح سيف يوصل الطبيب .. ويلست ريم وخواتها متحاوطين على جاسم.. ريم يلست تمسح على شعره وهي ميوده الكماده البارده بايدها الثانيه على يبهته ..

مي: فديته جسوم والله غامظني
ريم: ساروه سكري تيلفونج انا سكرته.. اخاف امايه تتصل و تحس انه في شي
ساره: ليش انزين جي بتحاتينا اكثر
ريم: لا لا انا مرمستنها قبل مانطلع عادي بتقول ردوا ارقدوا
رجع سيف بعد مادفع فلوس الدكتور ..
سيف: ماخفت حرارته ؟
ريم: احس جسمه بدى يعرق ..
سيف: خلاص لحفوه وايد عشان يعرق وتفج عنه الحمى .. وانتن يالله روحن غرفكن .. لاتسون حشره ..
روحن مهره ومها و عفراغرفتهم اللي كان بينها وبين غرفه ابوهم باب ..
اما ساره ومي في غرفه بينها وبين غرفه ريم وجاسم ومايد باب ..
سيف: ريم اذا تعب او شي دقي 9 وعقب رقم غرفتنا انزين
ريم: ان شاء الله
سيف: يالله تصبحون على خير
البنات: وانته من اهله

سارت ساره ومي الغرفه و تمن طايحات على السرير المشترك وهن يسولفن ..
ساره: باجر من انش بسير السنتر اللي حذالنا .. ابا اخلص اغراض الجامعه من اهنه عشان اكون مميزه ومحد شراتي ..
مي: اندوكم نحن في حال وانتي في حال .. ساروه انتي شو هالبرود اللي فيج .. دومج جيه عايشه تفكرين في نفسج وبس .. وهذاك اللي طايح اهناك
ساره: بسم الله ميوه بلاج انجلبتي عليه .. ان شاء جسوم بيخف لاتسونها مأساه
مي بندت الابجوره وعطت ساره ظهرها: الكلام وياج ضايع .. صدق قالب ثلج
ساره: وياراسج ..
مي ردت تلف ع ساره: ساروه قومي همزي ريولي.. تعورني
ساره: لا توني قالب ثلج ولفيتي تبين ترقدين
مي: تذكرت اني كنت اباج تهمزيني
ساره: يا العيوز
مي: عيوز هاا.. منج انتي ويا ها الراس كسرتيني
ساره: جب جب ..
مي: حرام عليج صدق تعورني ..
ساره: ماحطيتي من المرهم الي عطتج اياه امايه عفرا
مي: امبلا احط ..
ساره: بسج عيل مب لازم تهميز ها المرهم وايد زين ميوب من الهند خخخ
مي: ويا ها الراس..ماعليه بتحتايين
ساره: بس لااه
مي: انزين .. هين ..

هذا الحال ويا مي وساره .. رغم انهم يحبون بعض وايد .. ولا وحده تصبر عن الثانيه الا انهن دوم يتناقرن على اقل شي .. لفت مي الصوب الثاني عشان ترقد وساره ضحكت عليها وماهانت عليها اختها عفدت تبى توطاها ومي تحرطم عليها..

مي: عنبووج كسرتييني .. الوطاب هب جذه
ساره: اوووهوو مايووزلج شي
مي: قلتلج همزي هب توطيني
ساره: انزين ..

همزت شوي ساره عن خاطر مي وتضغط على ريل مي بقو ومي تصارخ عليها ..
اما ريم كانت يالسه هالوقت حذال جاسم اللي كان جسمه شوي بدى يبرد وغفت وهي مب حاسه به.. كان السرير مشترك يكفي ريم ومايد وجاسم .. بس مايد رقد ها المره على الغنفه عشان جاسم ياخذ راحته اكثر..

مهره ومها كانوا مب حابين سالفه انه عفرا تكون وياهم في نفس الغرفه ويلسوا شوي يتابعون فيلم .. لين يرقدون .. بس عفرا ماخلتهم في حالهم من سوالفها اللي كلها جذب ..
عفرا: تدرون انه انا عندي بلووره صغيره الماس فيها وحده محبوسه
مها: خيبه مهروه عن يطيح السقف علينا
عفرا: شو تقصدين
مهره: عفروه عن الخريط
عفرا: صدق .. فيها وحده محبوسه ماترمس الا ويايه انا .. صديقتي بس
مها: ومنو يايبلج هالبلوره
عفرا: هديه من امي .. وبالحظ حصلت فيها وحده .. تدرين هاي البلوره وايد غاليه ماشي منها عند حد .. الماااااس
مها: انزين راوينا اياها
عفرا: لا لا مايستوي اذا راويتها حد بتختفي البنت اللي فيها
مهره ملت من سوالف عفرا اللي حشرتهم فيها من يوم كانوا امس في الطياره .. وكلها جذب في جذب .. وقررت هي بعد تسايرها : تصدقين عيل احنا امنا عندها مكياج ذهب
عفرا: أي ماركه
مها اظحكت وكملت الجذبه ويا اختها: يقولج ذهب يعني ماله ماركه .. يايبينه من برع مخصوص حق اميه بس .. تصدقين حتى فيه كريمات خاصه عشان تخوزه .. مب أي شي يخوزه
عفرا تمت ساكته ماعرفت شو ترد عليهم .. وقررت ترقد .. اما مها ومهره تمن يتابعن الفيلم ..
مها: اسميها اكبر خراطه
مهره: ههههه حتى نحن خرطنا عليها
مها: خلها تتادب عشان تحس انه نحن نجذب عليها و تعرف انه نحن فاهمين انها تجذب
مهره: ههههه محد ساروه وميوه والا جان صدق ادبوها على جذبها
مها: ما يبخلنها فحالها هههه والله تضّحك .. بلوره اونه فيها وحده .. وين يالسه .. عمة سنووايت ..
مهره: هههههه .. شكلها تصدق الرسوم هاي
مها: هيه صدقج
مهره: يلا مهوه خلينا نرقد اكيد باجر بيوعونا من وقت
مها: يلا عيل رقااد
مهره: مهوه ؟
مها: هاه
مهره: تدرين بقولج شي
مها: قولي
مهره: اتعرفين انا كنت متشجعه اعيش عند ابويه مب لاني مظايجه من اميه او شي بس كنت ابا احس كيف الابو يتعامل ويا عياله ..بس احس مرات اتندم .. اقول ليتنا تمينا عند امايه ..
مها: كنت افكر مثلج بس لاتندمين لانه نحن مايينا بكيفنا .. لو يينا بكيفنا بنندم انه يينا بس يينا عنده مغصوبين
مهره: عندي العيشه عند اميه يوم .. احلى من اني الف بلاد العالم كلها
مها: مهره الكلام في هالموضوع مافي منه فايده خلاص .. نامي انتي احين وخلينا نعيش الحلو في ايامنا هاي .. بعدنا صغار ع الهم ..
مهره: هي والله صدقج ..

وتلحفن مهره ومها بلحاف واحد وعفرا حذالهن بلحافها .. وشوي ساد الهدووء ورقدن التوم .. كان شكلهن وهن راقدات حذال بعض وايد كيوت .. روسهن حذال بعض وطايحات نفس الطيحه بس كل وحده مجابله الثانيه..

[لامارا]

*****************
(الثلاثا) 20 يوليو 2004
*****************

الصبح قامت ريم وانتبهت انه حراره جاسم خفت .. بس يخافون يظهرون ويتعب خصوصا انهم اليوم بيكملون رحلتهم لاستراليا

دخل سيف على ناعمه يخبرها عن هالشي
سيف: انا كنسلت سيره الحديقه
ناعمه: ليـــــــش ؟؟ من الله مابنيلس فها البلاد وايد ..ماشفنا فيها شي..
سيف:شونسوي.. الجو مايساعد ونخاف ترجع الحمى لجاسم ..
ناعمه: اوووووف هذا وقته
سيف: ناعمه
ناعمه: اوكي اوكي
سيف: البنات نزلوا يتريقون .. بنسير السناتر اللي حذالنا اهنه .. لين العصر وعقب بنسير المطار ..
ناعمه: انزين ببدل وبلحقك .. اتجدمني ..
سيف: انزين لاتتاخرين ..
وصل سيف عند الباب ورجع صدلها: اقولج لاتيلسين تصبغين ويهج وايد
وطلع
ناعمه: اووووف .. صدق انك مال اول .. تصبغين اونه

وقامت ناعمه ولبستلها بنطلون وجاكيت بطولها مفصمتنه فوق بس..وتحجبت ونزلت عند ريلها..

سيف: كان لازم تلبسين ها اللبس
ناعمه: يااسلام وشوفيه.. هاكن بناتك يلبسن
سيف: بناتي صغار بعدهن..انتي حرمه ام عيال .. حشميني ع الاقل
ناعمه: سيف عاد لاتفتحلنا موال..اللبس مب فاضح وها الجاكيت جنه عباه بعد شو..حتى مكياج ماحطيت
سيف: انزين خلاص خلصينا من ها الحشره..
ناعمه: يالله يا سيف الحينه انا حشره..انا مادري بلاك منجلب عليه من ين بناتك
سيف: نااعمه شو منجلب بعد.. وانا اروم انجلب على غناتي
ناعمه: هيه قص عليه انته..خلاص انا زعلت
سيف: افا نعووم الغاليه تزعل مني
ناعمه وهيه تضحك بدلع: ولو زعلت بشو بتراضيني
سيف: باللي تطلبينه.. دشي ها المحلات كلها وشلي اللي تبينه
ناعمه: يعلني ان شالله مانحرم من طيبك يا بومايد..

ابتسملها سيف ..وقبضوا بايد بعض وقاموا يدشون المحلات..البنات كلهن ماعدا ريم اللي كانت يالسه وجسوم كانن يحوطن بعد عند السناتر.. مي وساره انتبهن لابوهن وحرمته وتمن يضحكن عليهم .. وقامن يلاحقنهم كل مكان يبن يشوفن ابوهن شو بيشتريلها..ناعمه لاحظتهن وانقهرت واايد .. وكل ماتبى تسير صوبهن تنازعهن يتشاردن عنها وماتلحق عليهن.. وعقب ما خلصوا مشاري ردوا غرفهم يرتبون الاغراض وتوجهوا للمطار يكملون رحلتهم لاستراليا ..

****

سلطــــــان فها الوقت ..ومثل كل وقت .. وكعادته .. قابض تيلفون البيت ويرمس بدريه اللي ماوقفت من اتصالاتها له لين رد عليها .. دق موبايله اللي كان بعيد شوي عنه شاف الرقم بس مارد ..

بدريه: منو متصل
سلطان: ماعرف .. مارديت
بدريه: زين بعد مقدر مني ما رديت
سلطان: لا بس مب فايج ارد
بدريه: بلاك انته جاف جي
سلطان: ودنيني فماي عيل
بدريه: سلطاان لا تعاملني جي.. انا شو ذنبي .. ها وريلي موجود اخاطر وادقلك بعد شو تبى اكثر من جي اسويلك اياه
سلطان: بس ذليتينا بها الريل عاد ..
بدريه: فديتك لا تعصب انزين ..
ورد تيلفونه يرن ..
سلطان: اوهوووووو منو ها اللي يتصل..اقولج لحظه شوي برد ..

عليا: الوه
سلطان: الوه
عليا: هلا سلطان اشحالك ؟
سلطان: بخير منوو ؟؟
عليا: انا عليا خالتك
سلطان: هلا هلا خالتيه اسمحيلي ماعرفتج
عليا: مسموح انته وين ؟
سلطان: في البيت ..
عليا: انزين مر عليه البيت ابا اسلم عليك من زمان ماشفتك
سلطان: احين ؟؟
عليا: هيه اذا تروم
سلطان: اا.. اوكي ..ان شاء الله
عليا: يالله عيل اترياك .. مع السلامه
سلطان: مع السلامه ..
ورد على تلفون البيت : الوووه ..
بدريه: هلا منو متصل
سلطان: خالتيه متصله تباني اسيرلها ..
بدريه: شو تبى منك ؟
سلطان: والله العلم عند الله اول مره تطلبني .. مادري شو عندها ..بقوم اسير بيت يدي بطالعها ..
بدريه: بيت يدتك كله بنات صح .سلطان لا تتطالعهن..والله اخاف يتحرشبك
سلطان فخاطره"جي بنات اهلي شراتج تتحرين..اكرمن عنج.."
سلطان: يالله انزين باي ..
بدريه: انزين قول كلمه حلوه
سلطان: يوم بيي وقته
بدريه: اووهوو والله ذليتني والله ..
سلطان: باااي

وسكر سلطان التيلفون قبل ما يسمع أي رد من بدريه .. وقام يبدل ثيابه وسار بيت يده يشوف خالته شو تبى منه ..

****

في بيت مريم .. البيت كله طبعا مرتبش على سالفة خطبة نايف لريم على الرغم انهم مالقوا الرد من ريم بعدهم ولا خبروا ابوها ..بس موافقه عليا فاتحة خير الهم .. نايف كان يالس في غرفه خواته ويسولفون .. قامت اسما وطلعت البوم صور جديم ..

اسما: نايف يبتلك شي عجيب
نايف: شو ها
اسما: شوف بروحك
فتح نايف البوم الصور وبدى يشوف صورهم وهم صغار و التعليقات وكلهم يضحكون على اشكالهم .. بس بين الصور كانت صور ثانيه لبنات غير خواته
كانن بنات خاله ..
نايف: هذيل بنات خالي سيف
اسما : علييييك نور .. بس مب هذا اللي ابا اراويك اياه .. في صوره معينه عجيبه صدق
نايف: شوهي؟
اسما طلعتله صوره كانت اخر الالبوم .. كانت صوره نايف لابس بشت وغتره وعقال .. و واقفه حذاله ريم بنت خاله لابسه كندوره بيج مخوره بذهبي...
نايف من شاف الصور تم ماسكنها ويشوفها وهو ساكت ..
اسما: ههههه بلاك ؟ عجيبه صح
نايف: انتي عليج علوم وين لقيتيها هاي؟
اسما: امس كنت اجلب في الصور ولقيتها .. شو رايك نايف يوم تعرس ان شاء الله انته وهي تكبرون هاي الصوره وتحطونها في غرفتكم
نايف: خلها تواافق قبل
اسما: ان شاء الله بتوافق
نايف: ان وافقت بسوي بطايق العرس من هاي الصوره ..
اسما: احلف
نايف: صدق .. حد سواها من قبل ؟
اسما: لااا.. يا سلاام عجييب..
نايف: خلاص عيل انا بسويها .. وصوره صدقيه لا مركبه ولا شي
اسما: اما انته عليك افكار .. الصراحه اخويه انته رومنسي وايد
نايف: ههههههه ويا راسج انزين يالله انا بسير ورايه دوام برقد
قام نايف وشل الصوره وياه
اسما: تعال تعال وين مودنها ردها

نايف اشرلها بلامبالاه وشل الصوره وياه .. وهو يفكر
معقوله هاي الصوره اللي مصورينها وهم يهال ولا يحسون بشي تتحول واقع وهم كـــــــــــبار؟؟!!

****

سلطان نازل من الدري وهو يفصم عقب كندورته ويصفر ع لحن اغنيه.. مانتبه لخوانه اللي يالسين فالصاله لين زقروه ..

خليفه: بوو ميوود وين سااير
رد سلطان ع ورا ووقف عند باب الصاله
سلطان: خالتك تباني
منصور: ليش شو تبى فيك!
سلطان: مادري داقتلي مساعه والحين سايرلها
خليفه: هييه .. عاد هب تغلط فالبيت سلطان
منصور: بيتهم ع اليمين .. مب اول واحد الثاني
خليفه: هي الدروازه نحاسيه .. انتبه
سلطان كتف ايده واطالع خوانه وهو مكشر بويهه ..
سلطان: والله! زين خبرتوني انا عبالي البيت اللي مجابلنا
منصور: هههه لا لا ها بيت ام جمال هب تغلط
سلطان وصل حده ودش الصاله وقبض منصور من كندورته
منصور: ايه وين تبى خوز ايدك
سلطان: علموك تتطنز هاا..

قام خليفه وقبض سلطان من ورى وشله وعقه ع الغنفه الثانيه
خليفه: شو تخبلت انته زين ما خنقت اخووك
منصور: خس الله ها الويه
سلطان: ما عورته الا قابضنه من كندورته
منصور: هي ماتحس تراك
خليفه: سلطان سير ابوي وفكنا من صدعتك الواحد مول ما يروم يسولف وياك
سلطان اطالعهم بنظره ووقف وطلع من البيت وهو يلاعن ويشاتم ..
دشت شيخه الصاله ع طلعة سلطان ..

شيخه: بلاكم؟ شو مستوي
منصور: ها ولدج منو غيره
شيخه: بلاااه بعد
خليفه: ادافنو منصور وسلطان ..
شيخه: لاحوووول ولا قوه .. يا بويه كم مره قايلتلك لا تحرش به
منصور: امايه مب الا انا .. ترا خليفه بعد ويايه كان
خليفه: يهبي يمد ايده عليه
شيخه: منصور غناتي انته اصغر عنه بيموتك جان اتضاربتوا ما يخصك فيه
خليفه: اونه يعني محشم مني ها ولدج لا يحشم لا كبير ولاصغير الا انه مايروم يمد ايده عليه خشمه ها بكسره له
منصور: مساعدنكم انتو ها النادي اللي اتسيروله .. ودني وياك خلوف ابوي ابا جسمي يغدي شراتك
شيخه: يالله شو تباه .. بروحك انته يابس وين تروم تشل ها الاثقال
منصور: ماعليه ما اعول ..
خليفه: امايه خاليته شو تبى فسلطان
شيخه: عليا!
خليفه: هيه
شيخه: اا ماادري .. ليش هو سايرلها احين
خليفه: هيه يقول
شيخه: برمسها خلاف بشوفها شو تباه ..

وطلعت شيخه من عند عيالها وهي تفكر فسلطان وعليا وشو بتقوله.. بيسمعلها ولا لا.. بتروم عليه ولا لا!!

اما سلطان فتوجه بيت يده .. دخل الحوي وها الوقت كانت ام راشد طالعه من البيت .. يوم شافته استغربت سلمت عليه وقالها انه عليا تباه .. وقف جدام باب البيت وتم يطالع يمين شمال .. ها البيت من متى ما دشه.. كان يكتفي باليلسه فالحوي .. والحين بيدش ها البيت.. دق ع الباب ..
احلام كانت فالصاله ويا مدوي اختها ويوم حسن بصوت ريال دشت احلام داخل ومديه قامت تفتح الباب .. استغربت هيه الثانيه انه ها الشخص واقف جدام باب البيت ! شو يبى !!

قالها انه يبى عليا .. ودخل يلس فالصاله .. ومديه سارت تزقر عليا .. وفضولهم الجو فالصاله ..
عليا سولفت وياه شويه .. ماعرفت كيف تفاتحه فالموضوع ولا حبت تقوله انه شيخه شكتلها من سلطان .. تمت تسولف وياه وتاخذ اخباره ..

عليا: يالله يا سلطان من متى ما يلسنا وياك ..
سلطان: اشغال شو نسوي
عليا: يبوك سوالفك ماتنمل يوم لك بارض..اتذكر يوم صغير شقى كنت شيطان كل يوم تصيح وحده من بناتي
سلطان: ههههه حليلهم .. عاد احين روحن عنج
عليا: هيه فديتهن .. مسافرات بعد
سلطان: والله .. وين ومن متى
عليا: من يومين مسافرين احين هم فهونج كونج.. اليوم بيسيرون استراليا
سلطان: يحيهم .. زين زين
وتم سلطان يطالع خالته يباها تدش فصلب الموضوع .. يبى يروح وهي الا تسولف وياه .. حستبه عليا انه تملل ويبى يعرف هيه شو تبى منه .. يعني غريبه تزقره بس عسب تسولف وياه ..
تحنحنت عليا وبدت ترمس .. رمسته عن شغله وليش هو مهملنه .. سلطان تم ساكت وما رد عليها .. حاولت وياه انه يطلعلها اللي فخاطره .. او هو ليش جي يسوي!
بس هو ماعنده جواب .. يوم يطنش الدوام يكون راقد بس هذا هوو!
وفالاخير .. حست عليا انها وايد رمست وسلطان ما عنده أي رمسه ..

عليا: سلطان .. شو قلت
سلطان: شو بقول يعني .. خالي يتشكى وامايه تتشكى.. شو يعني بسوي غير اني اداوم
عليا: سلطان هم ما يبولك الا الخير .. وترا كله ها لمصلحتك
سلطان: ماعليه اذ هي ع سالفة الدوام خلاص من باجر ببدى اداوم زين .. وافتك من ها الصدعه
عليا: سلطااان
سلطان: اوكي اوكي ..
عليا: الحين نحن يوم نبى مصلحتك قلت عنا صدعه
سلطان: اسمحيلي خالتيه ما اقصد
عليا: تراك تسوي الغلط وتقول ما اقصد .. من صغرك جي
سلطان: خلاص خالتيه انا بسير الحين .. مواعد الشباب فالقهوه ..
عليا اطالعته ووقفت : الله يحفظك ..
قام سلطان من محله ووصلته خالته لين باب البيت
سلطان: مع السلامه
عليا: لا تنسى وعدك
سلطان: ان شاء الله .. فمان الله

وطلع سلطان من عند عليا وهو متضجر ركب سيارته وروح .. اما عليا ردت الصاله يلست تفكر فسلطان وفالحال الي هو وصل عمره له .. رفعت السماعه واتصلت فشيخه اختها اطمنها ع مجريات الاحداث
لكن شيخه ماقدرت تركز .. سكرت عن عليا التيلفون وسارت لاختها البيت .. ويلست عليا تخبرها بالي صار وبالرمسه الي دارت امبينهم .. وشيخه .. مالها غير دموعها اللي تواسيها ..


******************
(الجمعه) 23 يوليو 2004
******************

الساعه تسع الصبح بتوقيت استراليا.. نشت ريم من نومها .. و تغسلت و دخلت على خواتها توعيهم .. كانوا ساكنين في منطقة الساحل الذهبي .. وحاجزين شقتين في فندق
“Suncity”
شقه فيها 3 غرف نوم للبنات وصاله .. والشقه الثانيه فيها غرفه وصاله لسيف وحرمته..
وعتهم ريم كلهم .. و سارت المطبخ تسويلهم سندويشات الكاكاو ..ويلسوا ياكلون فالبلكونه ويشوفون الدنيا برع ..
كانوا مخططين انهم يزورون حديقة “movieworld”من بعد ماساروا الحديقه المائيه بالأمس واستانسوا فيها ..
تلبسوا البنات ونزلوا اللوبي يتريون ابوهم و حرمته ينزلون ..

ساره: ريمان ابا ايس كريم ..
ريم: حشى في هالبرد تبين ايس كريم
ساره: هيه والله في خاطري
ريم:هاكم يبيعون اهنه اسير اخذلج ؟
ساره: بسير وياج

مشن البنتين لين ثلاجه الايس كريم في طرف اللوبي .. و كانوا اهناك ثلاث شباب واقفين وشكلهم خليجيين .. ريم ما نتبهتلهم لكن ساره استغربت منهم .. كانوا يطالعون عايلة سيف ويبتسمون ما بينهم.. طنشتهم ساره وردت ويا ريم صوب اهلهم .. وساروا عقب الحديقه..
وفي الحديقه .. دخلوا العيال وايد عروض .. منها عرض باتمان .. و عروض ثانيه ويلسوا في واحد من المطاعم يتغدون ..

مهره: ابويه ابا فلوس
ناعمه: حق شوو؟
مهره:قلت ابويه انتي ابويه ؟!
سيف: مهره خلاص .. شو تبيبها الفلوس
مهره: بنسير محل اهنه حذال المطعم ايبيع اكسسوارات الشخصيات اللي في الحديقه
ناعمه: هيه انزين خذوا عفاري وياكم خل تاخذلها هي بعد
مها: اووووف مانسوي شي الا لحقتنا هاي
ناعمه: ان ماخذتنها ماشي سيره
مهره: انزين بناخذها عطونا يالله
سيف: ماما هاي اختكم الصغيره لازم تعاملونها زين ..
مها: ان شاء الله
سيف: اندوكم .. خذوا اللي تبونه يالله سيروا
مهره: مشكور ابويه .. يالله عفروه طوفي ..

ساره ومي وريم طلعن بعد وتمن يتمشن حذال المحلات وتوغلو بينها ..

ساره: الله ميووه شوفي هالمحل
مي: هذا مال التصوير القديم
ريم: حلوو طوفن نتصور ..
مي: ومهروه ومهوه ؟
ساره : يالله بنزقرهن وبندخل و بزقر ميود و جسوم بعد
ريم:وهاتن عفروه بعد..

تيمعوا العيال .. و لبسوا كلهم اللبس الفكتوري القديم .. و وقفن البنات ال 6 يتصورن ويا بعض .. و الولدين ويا بعض .. وصوره ثالثه جماعيه ..
ريم: بنتصور رواحنا بدون مايد وعفرا
مايد: ليش؟
ريم: حبيبي بنتصور هالصوره حق امايه .. ترانا تصورنا وياكم جماعيه
مايد: انزين

وتصوروا عيال عليا كلهم عشان يعطون امهم الصوره ..
وروحوا من الحديقه الساعه 5 العصر بعد ماخلصت جميع العروض وتصوروا العيال مع شخصيات الحديقه .. واستانسوا ..
في السياره وهم راجعين ..

عفرا: اميه وين شنطتي ؟
ناعمه: ماعرف وين يلستيها انتي ؟
عفرا: حطيتها عندج يوم سرت ويا مها ومهره المحل
ناعمه: ماشفتها
عفرا وبدت تصيح: اووف يعني انا خليتها عندج شقى ماشفتيها
ناعمه:اوووه عفروه انا شدراني انتي ماقلتي بتخلينها سرنا انا وابوج نتمشى
سيف: خلاص انزين لاتيلسين تصيحين .. الا شنطه هيه مب محطيه فيها كنز علي باباا.. باخذلج غيرها ..
عفرا تمت تصيح وخواتها مها ومهره يشوفنها وشمتانات فيها .. وهي كل ماشافتهن تصيح زياده ..
وصلوا الفندق و بعد ماتسبحوا وبدلوا ثيابهم .. يلسوا في الصاله مع ابوهم وحرمته ..

ساره: اوووف ملل خلونا نسير "البردايز"
مي: ساروه انتي ماتتعبين من الطلعه
ساره: انزين طلعنا ويينا استرحنا واحين شو نسوي
ناعمه: انزين سيروا
سيف: وين تبينهم يسيرون ؟
ناعمه: خل يسيرون البردايز شوي بيسيرون الجمعيه ياخذون اشيا حق المطبخ
سيف: ليش ناويه تسويلنا العشا
ناعمه: انا اسوي العشا !!
سيف: هيه .. البنات بييبن لج اللي تبينه
ناعمه: اا ماعرف انزين شو تبون
سيف: اطاعي انتي شو بتسوين
ناعمه: امم بسوي معكرونه
مي: بس عليج اسهل شي بتسويه .. زين ماقالت بسوي بيض وطماط
ناعمه: ميووووه
ساره:بس لاه .. المهم انا ابا اطلع ..يلا نسير ناخذ للعشا ..منو بيسير ويايه
مي: كلنا بنسير
عفرا: انا مابا اسير
جاسم: احسن
ريم: جسوم اسكت عنها .. يالله قومن اتلبسن .. انا مب سايره وياكن
مهره: ليش؟
ريم: عندي ثيابكن بيلس اكويها
مها: تعالي ويانا وخلاف كلنا بنكوي وياج
ريم: لا ماروم.. سيروا انتو ولا تتأخرون

طلعن البنات ومايد وجاسم وياهم للبردايز .. اللي كانت عباره عن ساحه فقط للجلوس ويمنع فيها مرور السيارات او الدراجات .. كانت بين مركزين تجاريين وفوقهم فنادق .. تبعد عن الفندق اللي ساكنين فيه حوالي 10 دقايق بالمشي ..
مشوا للساحه من ناحيه البحر لحد ماوصلوا و نزلوا للسنتر عشان يدخلون الجمعيه وياخذون اللي يبونه ..

مهره: ميووه ميووه
مي: بسم الله عادتج ساروه
مهره: ههههه اقولج شقى شكله البقدونس
مي: اممم هو واحد من هذيل الخضر اللي اهنه...يا ها ولا ها .. يبوج بقدونسهم غير بعد ..
مهره: انزين ماتعرفين ريحته
مي:جيه شو قالولج جلبه!
التفتت حرمه الهم شكلها خليجيه وقالت وهي تبتسم وتاشر على ثلاجه الخضره
الحرمه:هذا هوو
مهره التفتت لها مبتسمه : مشكوووره
الحرمه: العفو .. اا انتوا من الامارات
مي: هيه وانتي ؟
الحرمه: انا بعد ..
وفي هالوقت وصل ولد صغير ورا امه يناديها : اميه يالله بنسير
التفتت الحرمه لولدها ورجعت صدتلهم : اسمحولي بنسيرالحين
مي: لا عادي .. مسموحه
الحرمه: فرصه سعيده
مهره: ونحن اسعد ..

مشت عنهم الحرمه ويتهم ساره ..
ساره: منو هاي؟
مي: هيه عاااااد يالفضووول
ساره: جب لاه ميوه .. مهروه منو هاي
مهره: وحده من البلاد ..
ساره: شو قالتلكم ؟؟
مهره: ساروه خلاف بنقولج احين خلينا نلحق على مرت ابوج والا ماشي عشا اليوم
ساره: اوووف انزين .. بس في الدرب تخبروني
مي: اللهم طولج ياروح .. ان شاء الله ساره بس طوفي احين

وردن البنات للفندق وعطن ناعمه الاغراض وردن شقتهن .. بدلن لبسهن وعقب سارن يشوفن ناعمه شو سوت فالمطبخ..

****

الساعه 3 الظهر بتوقيت الامارات كانت عزه بنت راشد طايحه على سريرها .. للحين ماقامت من النوم .. كانت تتويع من ظرسها يعورها وايد .. وتحس بصداع
رن تلفونها في هالوقت .. تعرف هالرنه .. مميزه .. اغنيه يحبها المتصل وايد ..
شلت التلفون وردت عليه وهي بعدها مغمظه عيونها ..
عزه: الووو
فيصل: هلا السلام عليج
عزه: وعليكم السلام
فيصل: اشحالج حياتي ؟ بعدج مانشيتي
عزه: تعبانه
فيصل: شو فيج ؟
عزه: ماروم افج عيوني من عووق ضروسي
فيصل: من شوو تعورج ؟ امس مسكر عنج فليل مافيج شي
عزه: عقب ماسكرت عنك سهرت لين 4 مارمت ارقد من عووق ضرسي .. اسمحلي ماوعيتك للدوام مارمت انش
فيصل: لا ماعليج نشيت ..
عزه: ويهي وارم
فيصل: هههه
عزه: على شو تظحك ؟
فيصل: اتخيلج مثل جودي ابوت يوم ورم ويها
عزه: يزاك الله خير تطنز عليه هاه ؟!
فيصل: ههه لا فديتج اسولف وياج اباج تظحكين مب هاينه عليه
عزه بوزت: ماروم اظحك ويهي وارم
فيصل: انزين ليش محد وداج المستشفى
عزه: مارمت انش من الصداع الصبح واحين بعده الظهر وين شي عياده فاتحه احين
فيصل: خليهم يودونج والا انا بيي اوديج
عزه: ياسلام وايد واثق
في هاللحظه دق مروان اخوها الباب وفتحه لقاها طايحه ع السرير ترمس ..
مروان: صباح الليل
وعلى طول شغل الليتات .. وتجدم منها
عزه: مروااااااااااااااان حرام عيوني
مروان تجدم وفرها بمخده كانت ع طرف السرير .. يت ع ويها وتأوهت .. نزلت المخده.. و مروان انتبه لويها انه ورام..

مروان: بسم الله ظربتج بمخده انا مب طابوقه بلاه ويهج ورم جيه
عزه: يبوك وارم من امس
مروان: ههههههههههه جنه فيج خاز باز
عزه: مشكورين طايحين تطنزون عليه كلكم وانا حليلي ظرسي يعورني
مروان: منو ترمسين ؟
عزه: اغازل ..
مروان: منو اسود العين هذا اللي تغازلينه ؟
عزه: مزيون عيونه عسليات مب سود
وعطته سماعه التلفون ..
مروان: هلاااااا والله اشحالك ؟
فيصل: بخير اشحالكم انتوا ؟
مروان: تمام والله وينك ماشفناك في عزيمه عيال سعيد محمد
فيصل: كنت في بوظبي مارمت ايي.. هههه ولا قبضوك الدوريه هاا
مروان: ههههههه زين ما شلوني وياهم يبوك
فيصل: ههههه هلكت من الضحك يوم خبرتني عزوه
مروان: هيه الا اطنزوا عليه انتوا الهروم .. عيل تستاهل ها العوق اللي فيها
فيصل: حرااام عليك خاف ربك.. كله ولا عزه عااد..انته جيه دووم مغصص بها جيه.. حرام عليك بروحها ميهوده الحين..
مروان: منو عنزه ؟ هيه وحليلها ويها وارم .. لو تشوفها احين بتغير رايك فيها
فيصل: لا لا ماغير رايي فيها وانته ريال طيب وبتقوم تودي اختك العياده العصر
مروان: ياهل انا يالس تقص عليه بكلمتين
فيصل: لا افا بس ماعليه عشان خاطري ترا ان ماوديتها انا بيي اوديها
مروان: شبر عند الباب وشوف شو بسويبك .. لا لا ماعليك بوديها كله ولا عنزتنا .. ماصدقنا حصلنالها تيس يشلها عنا بعد نخليها جيه ويوم يشوفها يبدل رايه .. لا لا مافينا ..
فيصل: صدق انك ماتستحي احين انا تيس
مروان: انا مايخصني انته بتاخذ العنزه والعنزه منو تاخذ حصان ؟ اكيد تيس
فيصل: هههههههه الله يقطع سوالفك يالله عاد ودها حرام تكسر الخاطر
مروان: ان شا الله افا عليك .. كم عنزه عندنا ..
فيصل: وينها عيل ماسمع حسها ؟
مروان: سارت تتغسل
فيصل: زين سلم عليها عيل .. بتصلبها خلاف انا ..
مروان:عاد انته ماصدقت وافق ابويه ترمسها وقامت البنت كله يالسه في حجرتها ترمس في التلفون ..
فيصل: عادي ريلها حلال عليها
مروان: عقب العرس مب احين ياشاطر .. يادوبك ماملجت من شهرين وجيه خف ع البنت اثقل الثقل زين يمدحونه
فيصل: بنشوفك انته يوم بتملج .. اخاف تقول هاتوها بشلها من احين ..
مروان: يستوي ليش لا
فيصل: هههههههه ويا راسك .. يالله عيل بخليك .. فمان الله
مروان: مع السلامه

طلعت عزه من الحمام مغسله ويها وقابضه فوطتها في ايدها ..
عزه: سكر فيصل ؟
مروان: هيه سكر .. تعالي متى حددتوا العرس احين
عزه: بعده يتريا يحصل حجز مناسب
مروان: انزين عزوه ويهج وارم شو بلاج
عزه: ضرس العقل ملعوزني ابا اجلعه
مروان: انزين بوديج انا العياده العصر .. بس قومي اكلي شي احين
عزه: مالي خاطر مروان .. ماروم اكل عليه
مروان: انزلي انزين بيسولج شوربه
عزه: اوكي قولهم الله يخليك بصلي وبنزل
مروان: اوكي ..

ونزل مروان وقال للبشكاره تسوي لعزه شوربه .. رد الصاله شاف فارس طايح ع الغنفه وشكله سرحان ..

مروان: حوو بو الشباب فشو ساارح الفكر
فارس انتبهله ولف عليه ..
فارس: ها بلاك
مروان: شو بلاك
فارس: ماشي.. افكر
مروان: فالعيال..
فارس: سخيف والله انك .. افكر فالدراسه .. شو تشوف انته .. اتوكل واسجل فكلية اتصالات الشارجه؟
مروان: فيك هبه للدراسه؟
فارس: اذ عزمت ان شاء الله بتي الهبه
مروان: عزم عيل.. انته ولد مصريه ما ينخاف عليك
فارس: هب هباك الله..
مروان: ههههههه شو تباني اقول يعني
فارس: لا تقول شي.. خلني ارد لافكاري احسلي
مروان: الله يعطيك..

طنشه فارس .. ومروان كان بيظهر من البيت بس عزه ها الوقت كانت نازله وزخته..تدريبه ان ظهر ما بيرد وعقب محد بيوديها العياده .. وتيلسوا فالصاله كلهم يسولفون..

****

فاستراليا .. من عقب ما طبخوا جماعتنا عشاهم وتعشوا .. يلسوا يشربون لبن ويطالعون التلفزيون ..
سيف: تسلمين على هذا الاكل يا ام مايد
مي: اصلا هي ماسوت شي .. ريمان تعطيها وهي تخلط
ناعمه: جب ميوه .. انا اعرف اطبخ وريمان بس كانت تساعد
مي: نعم نعم .. لو مب شافتنج بعيني كنت بصدق .. بس المشكله جدامي .. حتى نسيتي انه المعكرونه يحطون فيها ملح لو مب مهوه الياهل ذكرتج
ناعمه: اووووه سيف شوف بناتك
سيف: ميوه عيب بس عاد لاتمين تراددين مرت ابوج
مي: انزين انزين خلاص
سيف يطالع مي وابتسامه خفيفه ع ويهه وقال: يالله باجر وين بتسيرون ؟
مايد: ابويه بنسير هذاك الباص اللي يمشي من البردايز و يدخل بالبحر ..
سيف: اوكي انا بنزل اتاكد من الرسبشن الساعه كم ينطلق الباص وبرجع
ناعمه: انا بسير شقتنا .. برقد..
سيف: انزين .. بطالعهم وبرجعلكم..

وبعد ماطلعوا التمن البنات مع بعض ويلسن يسولفن عن احداثهن ها اليوم..ساره شلت بعمرها عنهن وسارت تيلست فالبلكونه اللي كان فيها كرسيين وطاوله صغيره ومن غير كرسي طويل يطيحن عليه ..طاحت ساره عليه وفاذنها سماعة الهتفون وتدندن ويا الاغاني ..
ميوه لحقتها ويلست مجابلتنها .. وخوزت السماعات من اذن ساروه

ساره: اييه شو بلاج؟
مي: عنبوج فليل وها الاغاني فاذنج
ساره: ملل شو اسوي؟
مي: يالله مب مخليه مكان ما سرتيله وتصيحين الملل صدق انج
ساره: انزين ها الوقت ملل .. ليش ما نسير نسهر برع
مي: والله انتي عايشه حيااتج ليكون كنتي قبل تسهرين في الشانزلزيه وتصبحين في مادري وين
ساره: بس عااد ميوه
وها الوقت سمعن حركه من فوق .. ميوه وقفت تطالع شو السالفه .. وسمعت تصفير ..
مي: بسم الله شوها..
ساره تستخف دمها: ها يقولج ينون استراليين
مي: وعلموهم التصفير!!
ساره:هب هباهم ..
مي: ايه مافينا يلبسنا يني استرالي.. قومي ندش
ساره: لا شو يلبسنا .. اميه ..
وسمعن ضحك .. وكل وحده اطالعت الثانيه ودشن ع طول ..
مي: بسم الله .. والله زغت ساروه
ساره: لا لا .. ماعليج ميوه يمكن حد ظاهر من البلكونه وضحك
مي:ليش يضحكون
ساره: علينا ..
مي: يعني عرب.. فهمونا شو نقول!
ساره: خخ الله يخس بليسج.. يبوج عرب ولا ينون استراليا ..

وردن للمة خواتهن بس ما خبرن حد عن اللي استوى.. ويلسوا يلعبون ورقه والضجه ماليه المكان ..

****

الساعه 7 المغرب دخل محمد غرفه بناته يشوفهم شو يسوون .. لقى مديه يالسه تجلب في مجله واحلام طايحه على الارض محطيه ريل على ريل وتتامل السقف ..
ضحك محمد على شكل احلام.. انتبهت احلام على ابوها ولفت عليه..

احلام: ابويه بلاك تضحك ؟
تجدم محمد ويلس على الكرسي
محمد: والله خوفاتي تتخبلين يا احلام
احلام: شوف ابويه انا بقولك الصدق .. انا كنت اتحرى عمري خبله يوم كانوا قوم ميوه اهنه .. بس اتاكدت الف بالاميه اني كنت عاقله واحين تخبلت ..
محمد: ههههههههه ..
اعتدلت احلام في يلستها واتربعت مجابله ابوها وحطت المخده جدامها ..
احلام: ابويه عطني شي اسوييه بتخبل .. ترا من كثر ماجابل الصقف بحول
محمد: ههه بروحج محد قالج ..
مديه فرت المجله ودخلت في الموضوع
مديه: ابويه شو بروحها .. انا هالمجله هاي المره الالف اللي اقراها .. ملينا ابويه ليش مانسافر ؟
محمد: وين نسافر يابنات ؟ قالتلكم امكم بتروحون الكويت مارضيتن ..
مديه: انا عندي ايلس في البيت وماشوف حتى السكه ولا اروح الكويت
محمد: انتوا ليش ماتحبون تروحون شو السبب ابا اعرف
احلام:ابويه انا وايد استانس يوم اروح قبل .. واحب خالي بشار وحرمته وكلهم زينين بس محد يعيفنا في الكويت الا فجر .. عشان جيه لو هي يت الامارات انا بروح الكويت ..
مديه: صدق ابويه اميه ماطيع يوم نقولها انه فجر ماتعاملنا زين .. بس صدق هي وايد شايفه نفسها علينا على شو مادري ..
احلام: يوم ترمسنا ترمس من طرف خشمها وتحسسنا انه نحن اقل مستوى عنها وياويلها اللي منا تزخ شي من اغراضها .. مادري شو تشوفنا نحن نقدر نشتري اللي نباه واحسن عنها بعد..
محمد: اولا .. شي طبيعي امكن مابترضى على اختها مهما كان هاي اختها .. وثانيا مثل ماقلتي يا احلام انتوا مب قاصرنكن شي خلها تسوي اللي تباه اذا انتوا تشوفنها انها تتخقق عليكن .. لكن الواجب واجب .. كونها خالتكم من واجبكم تعاملونها زين .. ولو مب عشان شي عشان امكم وعشاني انا بعد
مديه: الله يعين احين يوم بتي ..
محمد: ماعليه ان شا الله خير لاتتشائمن ..
احلام: انزين ابويه احين مب ها المشكله
محمد: شو المشكله
احلام: بتخبل من الملل
محمد: ههههههههههههه .. شوفي انتي من زمان خبله لاتتعلثين بالملل
مديه ضحكت ع احلام..
احلام: ابويه دخيلك شوفلي شي اسويه ماعرف ايلس جيه
محمد: انزييين .. شو رايكم اقولكم سر ماتقولونه لامكم ؟
مديه نطت حذال ابوها : قول قول
احلام: لا صبر بتاكد من خلوو الجو برع
فتحت احلام باب الحجره ومالقت حد في الممر ورجعت يلست حذال ابوها
احلام: يلا الدار امان.. قول ..
محمد: ههههه والله انكن
مديه: يالله قول ابويه بطني يعورني
محمد: ليش يعورج ؟
مديه: فضوول جتل عيووز
محمد: هههههه
احلام: قول ابويه
محمد: وعد ماتقولولها ؟
البنات: وعد
محمد: انا يالس اكتب روايه عن قصتيه ويا اهل امكن في الكويت وشو استوالنا بالضبط لين عرسنا .. ويينا االامارات .. واول ماخلصها بقدمها حق رئيس التحرير في الجريده وبساله عن رايه واذا كانت وايد اوكي .. بنشرها كروايه ..وبتكون هديه لامكن..
احلام: اللـــــــه ونااااااسه
مديه: ابويه بتحط يعني انكم عرستوا ويبتونا وجي
محمد: هههههه ع حسب نهاية الروايه
احلام: حلوه الفكره والله..
محمد: وعشان نغيرلكن الجو شويه فالبيت شو رايكن اقرالكن اللي كتبته ؟
مديه: هييييييييييه هييييييه
احلام: هيه ابويه والله وناسه
محمد: اوكي خلاص صبرن بسير اييب الاوراق وبرد الكن
احلام: ابويه انته وين حاط الاوراق ؟
محمد: في الغرفه
احلام: ياذكي بتشوفهن اميه
محمد: نعم ؟
احلام: اوبس اسفه ماقصد .. بس يعني هاتهن عندنا نحن بنحطهن في الدرج وبندسهن عنها ..
محمد: ماشا الله عليكن .. زين بخليها عندكن ..
مديه: يالله باباه سير هاتها بنترياك

محمد قام وهو يبتسم لبناته اللي شجعنه على اللي يسويه .. وسار اييب الاوراق .. ورد وقرالهن الجزئيه اللي كتبها.. وشاف بناته وايد متحمسات لمعرفة التكمله.. وها اللي شجعه اكثر انه يكمل الكتابه.. ووعدهن كل يوم يقرالهن جزئيه من اللي كتبه ..وهن مستانسات على ها الشي .. غير انه يقضي وقتهن فهو يعرفهن لماضي ابوهن وامهن وكيف كان تعارفهم وعيشتهم قبل وكيف محمد انصاب برصاص العدو واللي تسبب له لين احين بألم فالرجل المصابه وكيف ردتهم للبلاد ..كلها حوادث فباله يكتب عنها ويقصها على بناته ..

****

[لامارا]

ام سيف عقب ماصلت العشا .. يلست فالصاله ويابتلها نجمه عشاها.. بعد ما تعشت صدت صوب نجمه اللي كانت يالسه حذالها ..

ام سيف: نجموه قومي هاتي الورقه اللي فوق التلفزيون .. اتصليبي على رقم البنات ابا ارمسهن
نجمه: ماماه احين وقت في اخر مناك
ام سيف: لا انتي الا ماتعرفين امسات مرمسيني العصر
نجمه: ماماه احين فليل مناك هم في نوم
ام سيف: نيموه انتي مالج سنع هاتي الرقم واتصليبي على رقم ساروه
نجمه: اوهو ماما انتي مايسمع كلام .. انا بيسوي تلفون بس انتي مسؤول
ام سيف: سالت دموعج ان شا الله .. اوص يالله وهاتي الرقم اتصليلي
نجمه: جين جين

يابت نجمه الرقم واتصلت عليه .. كانوا البنات كاتبين ارقامهن لليده عشان تتصلبهن في أي وقت ..
اتصلت اليده .. وتم يرن التلفون .. ساره ماردت عليه كانت راقده بما انه الوقت عندهم 3 الفجر .. اتصلت مره ثانيه على رقم ريم وردت ع التلفون ..

ريم: الوه
ام سيف: ها امايه ريم اشحالكم ؟
ريم: هلا امايه شو فيكم ؟
ام سيف: مافيني شي انتوا رقود ؟
ريم: هيه امايه احين قريب الفجر عندنا
ام سيف: وييييه عيل وعيتكن ؟ وانا نجموه تقولي بس انا معاشتنها
ريم: فيج شي امايه ؟
ام سيف: لا فديتج مافيني شي .. الا ولهانه عليكن
ريم: فديتج امايه .. اخبارها عموه ؟
ام سيف: كلهم بخير انتي شحالج وخواتج شحالهم ؟ تولهت ع ضرايب ساروه ومي ريم: لاتحاتين هب مقصرات اهنه
ام سيف: مايكون يتنازعن ويا نعوم ؟
ريم: ع حالهن.. يتناقرن وياها تقول دياجه في كيسه
ام سيف: هههههه لاحوول ماعليه ضرن ع ها الشي..
ريم: شو بيسون ..
ام سيف: عيل انا غير الوديه متى اروم ادقلكم ؟
ريم: امايه لو تتصلين الظهر عندكم زين
ام سيف:هيه ان شا الله .. سلمي على خواتج امايه ولاتقولين حق قوم نعوم اني اتصلتبكم ..
ريم: ان شا الله امايه .. مع السلامه
ام سيف: فمان الله
وسكرت السماعه ..
نجمه: انا يقول هذا وقت اخر مناك
ام سيف: مايخصج هاكن رمسني وبردن فوادي .. فديتهن ونسن عليه وحدتي بدال مجابل ويهج .. الله يردهن بالسلامه ..

وتمت نجمه تهز الراس . شو بتسوي بام سيف.. عنيده ماتروم عليها .. بس موول ما تستغني عنها ولا ام سيف تقدر تستغني عن نجمه ..
****************
(الأحد)25 يوليو 2004
****************

الساعه 12 بتوقيت استراليا .. كانوا بناتنا يحوطن في حديقه
"Dream World"
لعبوا في الالعاب .. وعقب ساروا استيديو يتصورون فيه مع الكوالا..كل حد تصور وهو شال الكوالا فايده والصور اشكال وانواع اللي يضحك واللي يطالع الكوالا وخايف واللي مغمض عينه والي شاق الحلج..
.. تصورن البنات كلهن وابوهم ومرته .. واحين يا دور عفرا..

ناعمه: يالله عفاري قومي تصوري
عفرا: وع ماباه ريحته خايسه
جاسم: يعني انتي من زين ريحتج
ناعمه: جسوم اسكت انته مالك خص
سيف: يالله عفرا قومي بسرعه
عفرا: مابا مابا ..
ريم: خلاص يوم ماتبى لاتوقفونا خلونا نسير

تجدمت ريم وخواتها ودخلوا محميه الكنغر .. البنات يلسن يتصورن لكن جاسم ماخلاهم في حالهم كل مايشوف كنغر واقف يقوم يركض وراه .. واخر شي قام يناقز ورا الكنغر مثله .. ويقلده ..

ريم: هههههه ساروه صوريه بالفيديو بسرعه بنراويه امايه

ساره فتحت الكاميرا وقاموا يصورونه
ومايد يربع ورا جسوم يقلده .. كان المطر بادي يطيح هالوقت ..

ريم: يالله مايد وجاسم طوفوا مافينا نتوصخ

مشوا وركبوا التلفريك لين وصلوا الجهه الثانيه من الحديقه ..
لكن زاد عليهم المطر ويلسوا تحت المظله يتريونه يخف عشان يكملون جولتهم ...
بعد ماخف المطر كملوا العيال لعب الا مي .. يلست على واحد من الكراسي وقالتلهم بتترياهم .. في هالوقت يت ناعمه يلست وياها ..

ناعمه: ميوه ليش ماتلعبين وياهن ؟
مي: اولا اسمي مي .. واذا تحبين اقولج نعوم قوليلي ميوه
ناعمه: ياسلام يعني كلهم يقولولج ميوه ليش يعني انا غير
مي: مادري والله ليش انتي غير مخلوق فضائي والا شو بالضبط ماعرف.. بس المهم انتي غير..
ناعمه: انا غلطانه يالسه وياج
مي: يعني كنتي وين بتسيرين
ناعمه: اووف لاه بس اسكتي
مي يلست وتطالع ريولها : ريولي تعورني
ناعمه: من شو ؟
مي: ركبيه يعورني وايد .. احس وايد راكضت ومشيت اليوم وردلي العووق
ناعمه: مال شو انزين ؟
مي: اووف ماتفهمين .. ترا يوم طحت ذاك اليوم في البيت
ناعمه: يالله عاد اونه احين يعورج من ذاك اليوم لين احين
مي صدت صوب ناعمه بقهر: يعلج ان شا الله تطيحين نفس الطيحه عشان تحسين بالعوق
ناعمه: ويه شحقه تدعين عليه مالت على ويهج
مي: عليج انتي .. قومي قومي من اهنه فكيني

ناعمه نشت معصبه وهي تمشي بغت تخرطف بقوطي معقوق ع الارض بس اداركت الوضع ولفت على مي..

ناعمه: منج حسبي الله عليج

مي مارامت ترد عليها من الظحك .. اول مره تكتشف ان عينها قويه .. يمكن السر انه ناعمه اطنزت عليها وهي صدق ركبها يعورنها .. بس الله فوق ..
خطف عليهم الوقت وقارب عندهم الوقت ع العصر ..

****

الساعه 10 بتوقيت الامارات .. دخلت عبير الغرفه على بناتها .. فتحت الستاير وشغلت النوور .. مديه طلعت صوت انها منزعجه اما احلام نشت لامها

احلام: اميييه ليش؟
عبير: قوموا بسكم نوم
احلام : امايه حرام اجاااازه
عبير: اوكي ناموا انا بروح دبي مع ابوكم وانتوا تموا نايمين
احلام نطت من فراشها : صدق اميه ؟
مديه تتطالع امها وهيه تفرك عيونها
مديه: الحين بنسير؟
عبير: لا مو الحين ..
احلام: المهم نطلع .. بس كيف دقت فراسكم اليوم!
عبير: ايه مو توه فجر متصله وقالت بتي عقب يومين .. فقلت بروح اخذ اغراض لها وفراشات واشيا تحتاجها
احلام: اوهو شو اييبها من احين ؟
عبير: احلاااااام .. قايلتلج من قبل انها في غضون اسبوع اسبوعين بتكون امبينا!
احلام: ترااه سجلتلوها انتوا ؟ ليش ما تأخر ييتها!
عبير: بتي لان زادت هوشتها مع زوجه بشار ولانها بتقدم امتحانات القبول
احلام:ويايه تكمل هوشتها علينا .. الله يعيينا بس
عبير: المهم اذا تبون تسيرون معانا قوموا بعد الصلاه بنطلع
احلام: وين بتسيرون بالضبط ؟

لكن عبير كانت معصبه من احلام وطلعت بدون ماترد عليها ..وسارت عند محمد..

محمد: قامن البنات..
عبير: ايه ..
محمد: بلاج!
عبير: بنتك ما بتعديها ع خير
محمد: منووو
عبير: احلام .. وايد تتذمر من فجر .. خلاص تعبت يا محمد
محمد: بعدها ردت ترمس عن السالفه
عبير: ايه . قلتلها انه فجر بتوصل بعد يومين وحشرت الدنيا
محمد: ههههه والله احلام سالفه ..
عبير: ماكو شي يضحك فالسالفه
محمد: عبير غناتي لاتعصبين.. عاد انتي تعرفينها احلام اللي فقلبها ع لسانها.. معودينهن ع الصراحه من هن يهال .. ما بيين يجاملنج فشي ما يطيقنه
عبير: محمد بس احلام بنتي الكبيره اللي لازم تراعيني ع الاقل.. اختي فمحنه وانا لازم ما اخليها بروحها..يعني عايشه ويا مرت بشار اللي ما تواطنها.

محمد تقرب من عبير اللي كانت عينها تدمع وايدها ترجف وهيه كانت ترمس بانفعال.. قبض ايدها وتم ضاغط عليها .. يحاول يخفف من انفعالها هذا ..

****

في استراليا .. كانوا مايد وجاسم ومهره قابضين اوراق وقلامه ويلعبون فالبلكونه .. وساره متيلسه حذال جاسم وتعاونه ..

مايد: يالله حرف الميم
بدوا العيال يكتبون بسرعه
مهره: ستووووووووب
ساره: بسم الله مهروه بلاج تباغمين .. خفي حسج
مايد: جسوم غشاش مايستوي
ساره: لا لا جسوم مب غشاش .. انا يالسه اكتبله
مايد: انزين لانج انتي تكتبيله انتي اتعرفين اكثر عنا و النقاط تسير حقه هو
مهره: بسس اسكتوا يالله شوفوا النقاط
ساره: ويو انا الفايزه . يالله جسوم اختار حرف
جاسم: حرف .. حرف .. حرف الغين
مايد: مالت عليك ماتعرف تختار حروف سهله
جاسم: احسن عشان ماتعرف تلعب ..
ساره: اووووف شو بلد تبدى بحرف الغين
سمعوا صوت ياينهم من فوق : غينيا ..
ساره: هيه صح غينـــــ
والتفتت لاخوانها : منو قال غينيا؟

مهره اشرت على البلكونه اللي فوق وهي ساكته ..
ساره اطالعت فوق وبطلت عيونها ع الاخر وشهقت .. وردت داخل وزقرت خوانها وريم اللي كانت يالسه تقرا روايه انتبهت لليضه اللي مستويه ..

ريم: بلاكم شو مستوي!!
مهره: ريال فالبلكونه اللي فوق رد على ساروه
ريم: شووووو؟ ساروه شو قلتيله ؟
ساره: مارمسته والله ولا قلتله شي.. انا يالسه العب وياهم .. وقلت شو بلاد بحرف الغين
مهره: رد هو عليها وقالها غينيا
ريم: شفتوا الرياال؟
ساره: هيه هم فوق الشقه اللي حذالنا.. بلكونتهم تكشفنا
ريم: حسبي الله ع العدو ونحن اربعه وعشرين ساعه نجره وصريخ ولعب.. اكيد يسمعون حشرتنا.. ابوي من اليوم ورايح محد ييلس فالبلكوونه
ساره: ريمان عاد شو بتحبسينا
ريم: بس سكتي.. اللي اقوله يتنفذ فاهمه
جاسم: نحن ماعلينا بنيلس .. رياييل حالنا حالهم
ريم: انا اوجه الرمسه للبنات
مهره: ريموه نحن عادي بعد نيلس
ساره: هي يت علينا انا وميوه يعني

دشت مي الصاله ..
مي: ايه شو ها الحشره ..الواحد يبى يغفل شويه ما يروم من زعيجكن.. شومستوي
مهره: ميوه خلاص البلكونه محرمه عليكن انتي وساروه
مي مستغربه: ليش شو السالفه
ريم: هكم رياييل يطالعونا من بلكونتهم..مانبى رمسه والله لو درى ابويه بزوالنا
مي: ريم بلاج معصبه.. نحن ما سوينا منكر..يوم نظهر انا وساروه من البلكونه وقينا ع روسنا.. واللي فوق ما جد حتى حسينابهم
سكتت شوي مي وطالعت ساره وكأنها تتذكر شي .. فهمتها ساروه وضحكن ع طوول ..
مي: ساااارووه
ساره: الينون الاسترالين
مي: هههههههههههههه وانا اقوول بعد
ريم: شو السالفه
ساره: ماشي ماشي ..
ريم طنشتهن ..وكملت: المهم لو سمحتوا مانبى مشاكل ولا فضايح .. اللي يبى يلعب ويصرخ ييلس فالصاله .. حسوسكن انتن ماباها تعلى والبلكونه مفتوحه تفهمن..
مي: يصير خير

وسحبت مي ساروه اللي كانت يايه بتبطل حلجها وتتحرطم وودتها الحجره ..
ومهره سارت عند مها اللي كانت راقده ووعتها وخبرتها بالسالفه.. وريم ردت لروايتها والاولاد كل واحد قبضله القيم بوي مالته ويلسوا يلعبون بها..


****************
(الثلاثا) 27 يوليو 2004
****************

الصبح فمطار دبي .. كانت عبير سايره ويا محمد اييبون فجر من المطار ..وقفوا فوق وتموا يشوفون الواصلين من ورا الزجاج.. وما بين الناس قدرت عبير انها تميز اختها .. كانت واقفه اتدور ع شنطتها ..
وبعد ربع ساعه .. طلعت فجر فالصوره واضحه .. سلمت عليها عبير بحراره وفجر حست صدق انها متولهه على اختها ..
كانت فجر متحجبه ولابسه بنطلون جينز وبدي اخضر عليه قميص جنز يوصل لركبتها .. ملامحها نفس عبير بس هيه ابيض من اختها بواايد ..

ويوم ركبوا السياره .

محمد: فجر ما تبين شي ما شيات ..
فجر: مشكور محمد.. ما بي شي غير النوم .. من امس مو نايمه
عبير: ولييش عااد
فجر: مادري .. ميبي متحمسه للييه
محمد: هههههه زين والله .. حياج
فجر: عيل بناتكم وينهم ..
عبير: طلعنا من وقت وهن نايمات ..
محمد: الا المطار شو نبى نوديهن
فجر: اهاا .. وانا ها الشهر وين بقعده!
عبير: شدعوه وين بتقعدين .. فبيتنا بعد وين
فجر: جهزتولي غرفه بروحي
محمد اطالع عبير ..
محمد: جهزنالج غرفه لكن غير سريرج فيها سريرين زياده
فجر: كييف
عبير: فجر حبيبتي تعرفين انه البيت مو نحن بس اللي نسكنه .. بيكونن وياج فالغرفه مي وساره
فجر: مو عساس انهم ردوا بيت ابوهم؟
محمد: بس فالويكند البنات يكونن موجودات .. نحن شلنا الاسره اللي كانن فالغرفه وخذنا اثاث يديد الكم ..
عبير: محمد .. مها ومهره وين بينامون؟
محمد: ترا عليا خذت سرير وحطته فحجرتها بوطابقين عادي ماياخذ وسع فالحجره وايد..
عبير: والسرير الثاني
محمد: حطوه فالستور برع ..
عبير: متى هذا صار
محمد: امس يوم رقدتي يابو الاثاث ورتبت عليا الحجره
عبير: اهاا .. وحليلها عليا تعبناها

فجر تمت ساكته وهي تسمع الحوار الداير بين اختها وريلها .. ومتاففه من احين ومب عايبنها الوضع .. غير هالشي كان مظايجنها حجابها اللي اظطرت تلبسه عشان اختها بس ..

****

الدامر كما هو متعارف عليه عند مي واحلام ..
ها الوقت كان فسيارته متوجه للسينما .. قبض تيلفونه واتصل ع رقمها .. ردت عليه بكل رقه ..

سلطان: صبااااح العسل كله
بدريه: صبااح الورد كله
سلطان: ها بداري طلعتي من البيت
بدريه: هيه انا فالسياره الحين ..
سلطان: زين انا بنزل المنار احين ..
بدريه: انا احين بعد بوصل ..
سلطان: اخيرا بشوفج..الهرمه ريلج مروح من ست ايام وغطيتي غطه ولارديتي تتصلين
بدريه: اول شي ..بغيتك توله علي اكثر وبشوف بتسأل علي ولا لا .. وثانيا انا والله ما اقوى ع زعلك وشكله التغلي ما ينفع وياك فطرشتلك المسج اللي قلتلك فيه اني بشوفك اليوم..
سلطان: اهاا.. زين يوم ماتقوين ع زعليه .. بس تعالي بدريه كيف بعرفج؟
بدريه: ههههه انا بعرفك
سلطان: شايفه صوري تراج .. بس انتي شو لابسه كيف بعرفج
بدريه: يوم بتشوف وحده تضحلك ترا هاي انا
سلطان: اووه وايداات اللي يضحكلي
بدريه: شوو شوو
سلطان: هههههههه هي عيل شو عبالج
بدريه: والله يا سلطان ان شفتك تتلفت يمين يسار برد البيت ع طول
سلطان: انزين انزين يبوج ما بتلفت خلاص.. بس شوفي انا الحين بوصل السينما ما بدش قبلج بترياج وبندخل رباعه اوكي
بدريه: اووكي صار
سلطان: يلا باي حياتي
بدريه: باي حبيبي

ودقايق وصلت بدريه الموول .. ونزلت هي الثانيه سايره صوب السينما ..
شافته من بعيد وعرفته .. هو كان محطي ايده فجيبه ويطالع الساير والراد اختار عرض الساعه 11 وفي نص الاسبوع عشان الناس هالوقت يا مداومين او نايمين
قلبها تم يرف .. تشوف ها الشخص اللي خذ قلبها ونساها حتى وجود ريلها .. طول وعرض .. جذااااب لابعد حد .. وخصوصا حركاته تخلي الواحد غصبا عنه يشوفه..
مرت حذاله .. رمقته بنظره وهو انتبه لنظرتها وعرفها .. غير ها عرفها من ريحة العطر .. تستعمل نفس عطره ..
ابتسملها بكل جااذبيه .. عيبته بدريه .. دشت مزاجه .. حتى ماكان متخيلنها جذه .. دخلت السينما ودخل هو على طول وراها ..

****

وصلت فجــر البيت ..
كانن بنات اختها وعمتهن ويدتهن و شيخه وميره حرمت راشد يالسين فالصاله يتريون وصول اخت عبير اللي راسمه فويوهم علامة استفهام كبيره من كثر ما يتذمرن البنات منها.. واول ما وصلوا استقبلوهم و يلسوا فالصاله .. وهي ملتزمه الصمت .. كانت بس تنقل نظرها من زاويه لزاوية فها البيت الصغير.. وكل ملامحها تنم عن الاستياء..
احلام ومديه كانن يشوفنها ويتهامسن فيما بينهن .. فجأه قامت فجر وهي تشوفهن .. خافن البنتين وسكتن على طول ..

فجر: من رخصتكم .. ابي ارتاح شوي ..
عليا: مرخوصه الغاليه ..
عبير: تعالي بدلج على غرفتج..
وتجدمتها عبير .. ووصلوا القسم الثاني من البيت اللي كان مجابل قسم محمد وزوجته ..
فجر: اي غرفه من هاذولا؟
عبير أشرتلها على غرفة مي وساره ..
عبير: تعالي حياج .. وياج ساره ومي بيكونن فالغرفه .. بنات عليا اللي شفتيها توه فالصاله يالسه حذال عمتي..
فجر: ايه .. اذكر مورتني صورهم قبل ..
عبير: اللــه حلو الأثاث اليديد .. ماشفته البارحه يوم حطوه
فجر: الغرفه ظيقه وايد وبعد محطين ثلاث اسره ويم بعض ملزقينهم
عبير: قلتي الغرفه صغيره وبتكفيكم ان شا الله
فجر: عبيير ! انا ماعرفهم ها البنات كيف برتاح بالنوم وياهم
عبير: يا فجر هم فبيت ابوهم وما راح ايوون الا فالويكند ..
فجر: لما ايون بروح انام غرفة احلام ومديه
عبير: البنات طيوبات وبتستانسين معاهم

فجر سكتت .. راسها يعورها من السفره .. ومالها خلق ترمس أكثر ..
قالت لعبير انها بترقد شوي ..عبير طلعت من عندها وسارت هي الثانيه غرفتها ..

أما فالصاله ..

احلام: فجر ما بتعديلنا ايامنا على خير .. وبتشوفون
عليا: وابويه .. احلااام هاي خالتج
مديه: تخلخلت ظلوعها
ام راشد: بسم الله الرحمن .. بلاكن على خالتكن؟
احلام: انتوا ماتعرفونها .. والله انها عووفه

عليا تطالع احلام وهي رافعه حياتها .. والحريم مستغربات من رمسة البنات ..

شيخه: احلام من كثر ما تقرضين فخالتج تخيلت شكلها يخوف
ميره: حليلها ماشالله عليها حلووه
احلام: الحلاه مب بالشكل .. بتشوفون انتوا ويا الايام
عليا: احلام حبيبتي حتى لو الواحد اطباعه وايد سيئه .. نقدر نحن نغيره .. صح ولا
شيخه: لالا مب صح
عليا اطالعت اختها مستنكره الجواب
عليا: شو لا
شيخه: هي لا .. ولا جان تغيرت اطباع ولديه
مديه: عموه انتي ولدج غير شكل
احلام: هههه هيه والله عموه .. هذا نتريا معجزه تستوي عشان يتغير
عليا: مديه واحلام عيب
شيخه: خليهن يرمسن ماقالن غير الصح ..
عليا: شيخه بعد مب عدله طول الوقت تتشكين منه ها الولد .. الرمسه ورمستها وياه لكن ولدج يسوي اللي فراسه .. طبيه خليه على هواه
ميره: الله يعينج يا شيخه .. لكنه كلام عليا صح ..
شيخه: شو يعني ما انصحه ولا امره يسوي الخير لعمره
عليا: شوفي شيخه انتي ما قصرتي .. والرسول صلى الله عليه وسلم قال " من رأى منكم منكرا فليغيره بيده فان لم يستطع فبلسانه فان لم يستطع فبقلبه وهذا اضعف الايمان" .. قاطعيه وخليه يحس بغلطه .. كوني بارده وياه بيحترق اكثر
شيخه: الله يعيني .. بس ولديه ماصبر عنه لو يطوف يوم مارمسه فيه..
كيف اقاطعه
عليا: خليه يحس بالغلط اللي يسويه
ام راشد: تمي ادعيله بالهدايه .. يا امايه مالج غير ربج تراج
شيخه: الله كريم..

وغيرن الحريم من موضوع فجر وموضوع سلطان وقامن يرمسن عن السياسه اللي هي الثانيه تسد النفس خصوصا ها الايام

******************
(الخميس) 29 يوليو 2004
******************

فالامارات ها الوقت.. نشت ام سيف الساعه 6 من نومها متاخر .. شافت الوقت ولقت انه الصلاه طافتها وهي ماحستبها .. حاولت تقوم لكن ايدها اليسرى كانت تعورها وايد ومب قادره تحركها ..
تحركت تدور الجهاز اللي تظغط عليه عشان تيها نجمه .. ابطت نجمه لين وصلت وتمت ام سيف طايحه..

نجمه : نعم ماما
ام سيف: نجمه ليش ماوعيتيني حق الصلاه ؟
نجمه: انا يجي ماماه انتي مافي قوم
ام سيف: انزين تعالي اطاعيلي اديه تعورني وايد وآانس شجات في صدري

يت نجمه وبدت تهوس على ايد ام سيف لكن الالم كل شوي يزيد ..
تمت ام سيف طايحه ومب رايمه تنش ..

ام سيف: هاتيلي مااي في طااسه بتيدد مب رايمه انش ابا اصلي

تيددت ام سيف وصلت فرضها اللي طافها وتمت طايحه .. تحاول تتحرك لكن ايدها اليسرى تعورها وايد.. طبت سالفة ايدها ورقدت شوي لين يتها نجمه توعيها حق الريوق.. وعقب قامت ام سيف تاكللها كم لقمه بس ما قدرت تاكل زين .. حاولت ام سيف انها تقوم وتنشط عمرها عشان تنسى عوق ايدها .. نشت من فراشها وهي متاكيه بايدها اليمين وسارت يلست في الحوي.. سارتلها نجمه اللي كانت زايغه عليها..

نجمه: ماما انتي في تعبان ليش يجلس برع؟
ام سيف: فكيني نيموه .. يلسة برع اخيرلي من الطيحه
نجمه: راس مال انتي ياابس
ام سيف: صه ولا كلمه

وردت نجمه البيت وهيه تحاتي ام سيف.. ومافكرت الا بمريم .. قبضت تيلفون البيت ودقت لبيت مريم .. اللي من شافت رقم بيت امها استغربت.. امها ما تتصل ضاريه مريم اللي اتدق بس مب ها الوقت ..
ردت ع التيلفون وسمعت صوت نجمه فالطرف الثاني..

مريم: ها نجمه شو مستوي
نجمه: ماما مريم .. ها ماما كبير تعبااانه
مريم: بسم الله جي شو فيهااا؟
نجمه: ايد مال هو في وجع
مريم: ايدها .. هيه زيغتيني عبالي شي جايد
نجمه: ماما ايد في وجع وفي الم قول داخل صدر.. انا مافي معلوم شو ها
مريم: شو عوق فصدرها! اول مره تتشكى من ها الشي .. قبل الا تقولي ايدها تعن وتعورها يوم ترقد وتأجب عليها..
نجمه: مافي معلوم.. حتى ريوق ما في ياكل شي
مريم: عطيني اياها انتي
نجمه: ها مااما راس مال هو يابس.. الحين في برع يجلس انا قول حق هو مافي زين حر موت برع
مريم: عنيده من يومها امايه.. انزين سمعي انا بدقلها ع موبايلها وديلها اياه انزين
نجمه: جين ماما ..

وسكرت نجمه التيلفون وردت داخل حجرة ام سيف.. حصلت الموبايل مفرور فالسده.. العيوز ماتشله الا جان سارت مكان .. وها الوقت كانت مريم تتصل وردت عليها نجمه وودته عند ام سيف..


نجمه: ماما.. ها ماما مريم يريد كلام انتي
ام سيف: جي داقه احين
نجمه عطت ام سيف التيلفون .. وردت على بنتها بصوت باين عليه التعب
ام سيف: الوو
مريم: السلام عليج امايه
ام سيف: وعليكم السلام والرحمه
مريم: ها امايه شو يعورج؟
ام سيف: مااشي يعورني انا بخير وسهاله
مريم: امايه نجمه متصله وخبرتني عنج
ام سيف تتطالع نجمه: غربلها الله من سودا .. لله مافيني شي .. الا هاي ايدي عانه نفس كل مره..
مريم: امايه ابوي ها ما ينسكت عنه .. لا تعاشينا المستشفى اليوم الا نوديج اياه
ام سيف: لله مافيني شي ما بسير الدختر ولا شي
مريم: امااايه نجموه تقول تآنسين بعوق فصدرج
ام سيف: لا لا جذب
مريم: سمعي امايه مب عكيفج .. بتسيرين بتسيرين.. والحينه انا وخلفان يايينج تزهبي ..
ام سيف: لاا حوول ولا قوه
مريم: يلا فمان الله .
ام سيف: فمان الله..

وردت العيوز داخل البيت ويابتلها نجمه عباتها .. وماهي الا دقايق ومريم واصله بيت امها .. وساروا صوب المستشفى..

****

الساعه اربع فاستراليا .. ساروا ناعمه وسيف يرقدون شوي .. وريم طاحت بعد تبى ترقد من بعد طلعتهم الصبح لمتحف الشمع .. مي وساره تيلسن فالصاله يلعبن اونو ومها ومهره وعفرا يطالعنهن.. اما مايد وجاسم نزلوا تحت ..

مها ملت من اليلسه وطلعت البلكونه .. وتمت واقفه ع الحد تشوف .. وجذبها منظر الناس تحت وتمت توايق وهي موخيه براسها .. وما سمعت الا حد يزاقر

" أيـــــه .. عن اطيييحييين"

لفت مها ع فوق تلقائي وشافت واحد واقف يضحكلها .. من شكله يبين انه شاب صغير.. ينعطى من سن مها ومهره ..

مها: عنبووه انتو لازم تراقبونا شو نسوي يعني؟
سعيد: هههه شو نسوي متمللين وييتوا انتوا ونستونا بصريخكم
مها: لا والله وشحقه ما تنزلوون تحوطون
سعيد: ننزل ونرد .. جيه طول الوقت بنتم برع؟؟
مها: ياخي اذيتونا .. حتى خواتي الكبار حرمتوهن من الطلعه فالبلكونه ماقامن يظهرن.. فجوا عنا
سعيد: بل بل بل .. شوي شوي علينا انزين .. انزين خبريني انتي مها ولا مهره
مها: بعد حافظ اسامينا!!
سعيد: ههههه انتوا مسويلنا مسلسل خيماوي فاستراليا.. لازم بنحفظكم
مها: وشدراك انه نحن من راس الخيمه؟
سعيد: يبوج من الرمسه تنعرفون .. وغير ها سوالفكم كلها عن راس الخيمه
مها: يعلكم كل شي تسمعونه
سعيد: ههههه ترا ان ماكنت انا يالس يكون حمود ولا عبود.. ويخبرونا سوالفكم
مها مدت لسانها وهيه تعيب عليه ..
سعيد: ها اللي علموج اياه .. تعيبين ع الرياييل عن تخليني انطلج واضربج
مها: تهبي الا انته
سعيد: عنلاتج وياها رمسه.. عيب حشمي
مها: جان حشمتونا انتوا عيل.. كله تصنتون علينا
سعيد: نحن ما تصنتنا .. حسوسكم انتوا عاليه

دشت ها اللحظه مهره البلكونه وهيه تشوف اختها تتحرطم شو ينت البنت ترمس بروحها .. لكنها عقب انتبهت للي يالس يرمسها فوق ..

مهره: مهوه ها سعود!!
سعيد: ههههههه انتي مهره يعني واللي كانت ترمسني مها
مها: وانتي شدراج به بعد
مهره: امس كانوا ثنينه فالبلكونه يرمسون مايد وجاسم.. ها ماكان امبينهم.. وقالوا انه ربيعهم الثالث سعود
سعيد: زين زين فرصه سعيده
مها: أيه ابا من هالجبس اللي ع طاولتكم
سعيد: اسمي سعييد
مها: انزين سعود هاتلي جبس .. البارحه خلصنا كل الكاكاو اللي عندنا
سعيد: اسمي سعييد
مها: اففف انزين سعيد
سار سعيد وياب وياه كيسه كاكاو متروسه و حط داخله الجبس اللي كان ع الطاوله وفره عليهن وقبضته مها
مها: قلتلك جبس واحد مب كييس
سعيد: بالعافيه عليكم ..
مهره: انتوا من متى هنه
سعيد: قبلكم باسبوع
مها: ومتى بتروحون؟
سعيد: ماعرف بالكثير ع الاسبوع الياي.. وانتوا؟
مهره: ماندري بس بعدنا تونا مكملين اسبوع من يينا ..
سعيد: والله ونستونا ع اخر ايامنا فاستراليا ههههه
مها: شو قالولك طاش ما طاش
سعيد: يبوج اقوى من طاش ماطاش انتوا .. كم تسوى سوالف جسوم وينه هوو
مهره: نزلوا هو مايد تحت ..
سعيد: عيل بنزللهم .. محمد وعبيد تأخروا ماردوا وانا ملاان ..
مها: انزين يلا باي بنرد داخل نحن وبنطلق سراح السجناء عقب مغادرتك الكريمه
سعيد: هههههه زين

ونزل سعيد تحت .. اما مها ومهره ردن الشقه ولقن ساروه وميوه مندمجات فاللعبه .. ويوم شافن الكيس فايد مها استغربن .. وخبرتهن مها عن السالفه وضحكن البنات لكن مي هزبتهن شوي واتفقن انهن ما يخبرن ريم لانها بتسويلهن سالفه.. وعقب ماشافوا سعيد روح طلعن يتيلسن في البلكونه

****

[لامارا]

فطواري المستشفى كانت ام سيف يالسه ويا مريم بنتها .. اما خلفان كان يكلم الدكتور اللي قاله انه يشك في انه ام سيف تحتاج لعملية قسطره شرايين .. لكنه مب اكيد وبيتريون النتايج لين ما تظهر يوم السبت .. ومخافة من انه يصير شي بحكم انه ام سيف حرمه كبيره بينومونها فالمستشفى ..
خلفان رد للحريم وخبر مريم باللي قاله الدكتور ..

مريم: قسطرة!!
خلفان: هيه .. بس بعده مب اكيد
مريم: وشله ينومونها
خلفان: يعني يخافون تتويع ولا شي.. خصوصا انه اليوم الخميس وباجر الجمعه واجازه ومحد اهنه بيسوي شي لين السبت .. تعرفين انتي هالمستشفيات
مريم: مادري والله .. بقولها بس ها ان طاعت

ورمسوا ام سيف انه بينومونها لكنها ماطاعت والا ترد البيت .. وماراموا يقنعونها.. خصوصا انه مابيسولها شي لين السبت
وفالاخير مشت ام سيف رايها .. وردت البيت .. ومريم شلتلها اغراض من البيت وقالت بتبات عند امها ..

وع الغدى خلفان خبر عياله بسالفة يدتهم ..

نايف: ومن متى هي تعبااانه!!
خلفان: امك تقول من فتره ايدها تعورها لكن اليوم زادبها العوق.. ويدتكم عنيده مب طايعه تتنوم ف المستشفى
نايف: شو بيسوولها هاذيل .. ابويه بننقلها مستشفى خليفه احسن
لطيفه: هيه ابويه.. هنه حتى نتايج الفحوصات تكون مرات مب اكيده
خلفان: تشوفون جي يعني؟
نايف: هي امره حتى لاتتريون نتايج هذيل شلوها سيده اهناك ويفحصون عليها من اول ويديد يمكن ماتحتاج وهذيل يخربطون
اسما: حليلج يا امايه .. انزين ابويه ان طلع صدق تحتاج قسطره خطره هالعمليه؟
خلفان: ع حسب .. الحين نحن مانعرف شو فيها بالضبط انسداد شريان ولا شو..
نايف: ان شاء الله خير.. وقوم خالي ما بتخبرونهم؟
لطيفه: تراهم فسفر شو بيسوون
نايف: يقطعون سفرتهم بعد شو .. امايه تعبانه وخالي يتم برع عنها
خلفان: عيل تدرون انا برمس امكم وباجر ان شا الله عقب صلاه الجمعه بنطلعبها بوظبي .. وسيده بنوديها الطواري اهناك وان طلعت نتايجها وكل شي وكان شي مايطمن الله لاقدربتصل بسيف وبخبره
نايف: انا بسير وياكم
خلفان: لا لا تم انته اهنه محد ويا خواتك واذا في شي خلاف بتون كلكم بوظبي
نايف: على خير ان شا الله

العصر سار نايف صوب بيت خاله سيف يبى يطمن على يدته .. كانت ام سيف ومريم يالسات فالصاله .. ودش عليهن نايف .. سلم ويلس حذال يدته .. مريم ها الوقت دشت المطبخ بتسوي قهوه ..

ام سيف: ابويه عطني التيلفون ودقلي لبنات سيف
نايف: ليش؟
ام سيف: يابويه متولهه عليهن من ثلاثت ايام ما رمستهن
نايف: مايعرفن عن عوقج
ام سيف: له ما قلتلهم ماباهن يحاتني وهن فسفر .. انا بخير الحمدلله مافيني شي
نايف:ماعلينا من رمستج ترا بنوديج مستشفى خليفه في بوظبي
ام سيف: يالله شله بعد تفزعوبي لين هناك .. قالكم الدختور انا بخير مافيني شي
نايف: ماعليه عشان نطمن اكثر ..
ام سيف: الا انتوا تكبرون السالفه .. قم قم هاتلي التيلفون بتحصل حذاله ورقه في ارقام البنات هاتها وياك ..

وقام نايف وياب التيلفون لين عند ام سيف والورقه فايده ..

نايف: ها امايه تفضلي
ام سيف: انزين دقلي ع واحد من ها الارقام.. دق على اللي فوق ها مال ريم
نايف تم يطالع الرقم ويطالع يدته ..
نايف: والثاني؟
ام سيف: مال الخبله
نايف: هاه ؟ منو الخبله
ام سيف: ساروه
نايف: ههههه (وسكت شوي يبى يجس نبظ يدته) شحقه ريم زقرتيها باسمها وهاي سميتيها الخبله
ام سيف: تراها صدق خبله خريش يالله ماتيلس والا ريم فديتها عاقل ماتقول بينهن الا سنه .. دق دق انته ع الرقم احين
نايف رجع يطالع الورقه: ورقم خالي عيل وين ولا ما دقيله؟
ام سيف: رقم خالك حافظتنه نيموه ادقلي عليه هيه
نايف: اهاا .. والحين ادقلج لريم؟
ام سيف: هيه ان ماردت بتصل بالخبله .. بس كم الوقت احين عندهم
نايف: ممم متأخر شوي ..الساعه 11 بتي عندهم احين
ام سيف: ماعليه دق ما يرقدن هن ..

وقبض نايف التيلفون واتصل ع رقم ريم .. خلى السماعه على اذنه ..
مايعرف هو ليش جي سوى بس اللي يعرفه انه كان يبى يسمع حسها ..
اول ما سمعها تقول " هلا وغلا بطويلة العمر.." عطى يدته السماعه ..

نايف: ها امايه ردت هاذي
ام سيف: السلام عليكم
ريم : وعليكم السلام والرحمه .. شحااالج اامايه؟
ام سيف: بخير وسهاله انتي اشحالج؟ واشحال خوانج؟
ريم: الحمدلله كلنا بخير .. تولهنا عليج يا امايه
ام سيف: فديتكم والله انا الي متولهه عليكم.. البيت تام فاضي عليه
ريم: فديتج والله .. ها امايه هاذن ساروه وميوه يبن يرمسنج كلني
ام سيف: ههههه هاتيهن انزين

ام سيف رمست مي وساره... ونايف يشوف يدته اللي كانت وايد مستانسه وهي ترمس عيالها .. طمنتهم عليها واطمنت عليهم .. ونايف ها الوقت يشوف الورقه وغصبن عنه خزن رقم ريم في ذاكرته وصوتها يتردد فاذنه..



********************
(السبت)31 يوليو 2004
********************

فاسترليا كان الوقت 12 فليل ..والجو بطبيعته بااارد خصوصا هالوقت .. طلعن مها ومهره البلكونه وياهن جسوم ومايد .. وتموا يسولفون ويصرخون .. بس عسب يسمعونهم اللي فوق ! صارلهم يومين ماشافوهم

بس محد ظهرلهم ..

وماهي الا دقايق وبطلعة سعيد فالبلكونه اللي كان قابض جدر فايده .. يوم شاف العيال فالبلكونه ضحكلهم ..

مايد: شو ها فاييدك؟
سعيد: شوفوا شو بسوي الحين

كان يطالع تحت بلكونتهم ضحك ضحكه خبيثه وماهي الا ثواني و انجب الماي البارد اللي في الجدر ..
اما نظرات العيال اللي كانت بين سعيد والجدر الي فايده اتوجهت للمكان اللي انصب فيه الماي وسمعوا صرييخ من تحت شال الدنيا..
كانوا ربع سعيد محمد وعبيد نازلين تحت بشورتات وتيشيرتات بلا كم فها الجو الباارد اما سعيد رفض ينزل وياهم عشان يسوي فيهم هالمقلب ..
العيال تموا يظحكون عليهم وهذيلاك محتشرين ويسبون سعيد عقب ماتجمدوا من البرد..
واللي زاد ظحكهم السيكيورتي اللي طلع من الفندق يزيد ربع سعيد فوق البرد هزاااب ..
مايد: زين سويت فيهم
جاسم: هههه احين تلاحق عمرك دورلك طاسه انخش فيهااا بيونك
سعيد: عادي اطب بلكونتكم ؟
مهره: هاللي قاصر بعد .. حط ريولك انته ان ماحشيتها لك
سعيد: خيبه خيبه انتي ليش جيه
مهره: احسن
سعيد: الحين عبود اخويه وحمود ربيعه بييووون وبيكفخووني
جاسم: ههههه عيل تصب عليهم ما بارد وماتباهم يكفخونك

سعيد كان ياي بيرد عليهم لكن سمع صوب الباب ينفتح وبدى الزعيج عندهم وعفدوا الشباب على سعيد فالبلكونه يضربونه وهو يضحك عليهم ..

كانت الاصوات فها البلكونتين واايد عاليه .. ظهرت ريم من حجرتها تشوف شو السالفه وحصلت خوانها فالبلكونه ووقفت عند الباب ..

ريم: شوو مستوي عندكم؟؟
مها: هههههه هاذيل سواالف
وشافت ريم مايد وجاسم وهم يطالعون الشباب ويرمسونهم وهاذيلاك يتمصخرون ع بعض
ريم: اللي فوووق؟
مهره: هيه سعيد جب ما بارد ع ربعه واحين يتضاربون داخل ويطلعون البلكونه ..
ريم: وانتن شو موقفنكن وياهم ؟
مها: شو نسوي ملل.. نتسمع ضرابتهم ونشوفهم يوم يظهرون البلكونه
ريم: وخواتكن وين؟
مها: داخل حجرتهن اظن

ردت ريم وسكرت باب البلكونه .. وسارت عند خواتها فالحجره .. ولقتهن منسدحات يسولفن ..

ريم: اسميييهم رابشين ها الشباب ..
ساره: جيه بلاهم
ريم: احسهم وايد يتمصخروون توه واحد منهم صاب ع ربعه ماي بارد من فوق
مي: اويه فها الجو .. اسميهم هلكوا
ساره:ههههههه مهابيل هاذيلا بس سواالف.. ميود يقول بيسافرون عقب كم يوم
ريم: زين يبوكن بنروم نظهر البلكونه ع راحتنا عقب
مي: حلييلهم
ريم: انا بسير اوطي راسي.. طالعن ع خوانكن ولااااتظهرن البلكونه
ساره: انزين انزين .. يلا تصبحين ع خير
ريم: وانتو من اهله

وسارت عنهن ريم عسب ترقد .. طاحت ع السرير وافكار توديها وتيبها .. اليوم يدتها ما تصلتلهم .. تحس انها افتقدت صوتها اليوم .. قبضت كتيب الاذكار اللي تحت مخدتها وقرته وغمضت عينها تبى ترقد..

****

بعد وصول فجر للبيت .. قامت عبير تسوي اي شي بس عسب ترضي اختها الوحيده .. ما ودها تتذمر من المعيشه هنه او انها تحس بالقصور ..
احلام ومديه كانن وايد ينقهرن .. خصوصا لما عبير تنازعهن والسبه فجر ..
كانن بس يتمنن اليوم اللي تبدى فيها الدوامات .. مب فرحانات بالدراسه لا.. بس عسب يفتكن من فجر .. ومن تسلطها ..

كانت احلام يالسه في حجرتها بسلام وماتبى تظهر الصاله لانها تحيد فجر يالسه هناك.. سمعت دق ع الباب .. ودشت البشكاره على طول صوب التلفزيون ..
قامت تمجع الوايرات وشلته واحلام تطالعها ..

احلام: اييه وين تبيبه ..
البشكاره: مدام يريد ودي حجرة مال هي اوختي
احلام: نععععم .. شو يعني ...
وخوزت احلام اللحاف عنها وطلعت حتى قبل ما تظهر البشكاره على طوول للصاله..
احلام كانت تتطالع فجر اللي محطيه ريل ع ريل وتلعب باظافرها .. واطالعت امها اللي تسولف ويا عليا .. انتبهت عبير لاحلام وهي واقفه ومكتفه باديها وتطالع بغيظ..
عبير: احلام يمه شفيج
احلام: مافيني شي .. بكامل صحتيه ولله الحمد ..
عبير: عيل شفيج معصبه..
ولفت احلام على ورا والبشكاره تشل التيلفزيون بتثاقل .. عبير فهمت السالفه .. اما فجر قامت من مكانها وقالت للبشكاره تلحقها ..
عبير: احلام حبيبتي تعالي ..
احلام: هي يايه عندنا ضيفه مب يايه تنقص علينا حياتنا ..
عليا: احلام غناتي بتم خالتج واكبر عنج .. ماعليه لو ضحينا بوناستنا شوي لغيرنا
احلام: لا علييه .. عنبوه .. من يت واميه كله دايره فصفها..
عبير: احلام شو ها الكلام
احلام: هاذي رمستيه .. والتلفزيون احين سايره اخذه
عبير قامت : احلام روحي غرفتج
احلام: امييه .. تلفزيونا ونباه .. نحن ويا التلفزيون بنموت من الملل بعد بتاخذونه عنا ..
عبير: احلام .. خالتج كله تقعد فالحجره .. انتي ع الاقل تظهرين وتردين من بيت عمج لبيت عمتج ..
احلام: امييه .. هاي ظهره تسمينها .. خل تاخذلها بروحها تلفزيون ..
عبير: احلام يوم تبين التلفزيون موجود فالصاله .. عادي ..
احلام: ابا فحجرتيه ..
عليا: احلام حبيبتي كلنا ماعندنا تيلفزيون فحجرنا ..
احلام: بس غير يوم يكون عندج ويشلونه غصب عنج
احلام حست بغصه فحلجها .. استغبنت وانقهرت .. طلعت من الصاله وسارت ع طول حجرتها وقفلت الباب .. وشوي حد دق عليها الباب ويوم فتحته ..

البشكاره: فجر يريد رسيفر مال دوش
احلام: اوووهوووو .. خذيه هاكوه وذلفي عن ويهي

وعقب رضت بالباب بالقو وطاحت ع شبريتها .. وهي بتموووت من القهر ..
لا وبكل بروود مطرشه البشكاره بعد تبى الرسيفر ..

ومن سمعت حد داش الحجره مشت دموعها ع طول وتمت ع طيحتها ..

مديه: شو بلاج ..؟
احلام لفت ع مديه.. وقامت من مكانها تبى تسير الحمام تغسل ويها ..
مديه: اكيد السالفه فيها فجر
احلام: منو غيرها هاي محراث النار.. انتي وين كنتي
مديه: بيت عمي ويا ايمانوه ..
احلام: مروان هناك؟
مديه: توه ظاهر .. ليش شو تبينه
احلام: بس اسال ..

ودشت احلام الحمام تغسل ويها .. ومديه يلست ع شبريتها وقبضت ريموت التلفزيون اللي نسوا يشلونه.. ويوم رفعت راسها ماشافت التلفزيون .. وعقب ما ظهرت احلام قالتلها انه فجر خذته حجرتها ..
مديه انقهرت أكثر .. وطلعت ع طول للصاله وتعالى حسها بعد هي وعبير هزبتها ..
اما احلام يوم شافت الريموت .. قهقهت بسخريه .. وطلعت من الحجره متوجهه لحجرة فجر .. دقت الباب ودشت ..

فجر: نعم .. شتبين!
احلام: نسيتي هاا الشي ..
فرته ع فجر من بعيد .. وطاح الريموت ع السرير ..
احلام: سهرات ممتعه ان شاء الله ويا.. تلفزيووني ..

وطلعت احلام من الحجره وهي تدعي ربها انه يخترب ها التيلفزيون .. اليوم قبل باجر ولا تتهنابه فجر ..

****

نزل سلطان من حجرته بعد صلاة العشى.. كان يتلفت فالبيت مب محصل حد .. وشكله يبين عليه انه معصب .. تم يزاقر على امه بس محد توايب له .. سمع حس ابوه فالصاله ودخل عنده يسأله عن امه وقاله انها في بيت بوراشد ..
طلع من الصاله وتم يزقر ع البشكاره وهو متنرفز ..
من سمعت البشكاره حس سلطان تبريدت وركضت الفله .. شافته واقف عند الباب

البشكاره: نعم .. شو يريد ..
سلطان وهو محرج : انا كم مره قايللج الغتره يوم بتكوينها حطيلها ماريتوو ها مال نشاا .. شوو ها انتي ماافي معلووم غبييه ..
البشكاره: بابا سلطان والله انا في حطي ..
سلطان: وين حطيتي .. مب واقفه هنه هاا تشوووفيين مب يابسه .. كيف تبيني اتغتر بها
البشكاره: زين بابا مافي جنجال.. انا بيسوي الحين ..
سلطان: يباالج ضرب انتي
البشكاره: بابا كله جنجال كله جنجال
سلطان: جب ولااااكلمه .. عنبو كل ما نسير الاسواق انييبلج واحد مستبخله على الغتره وراشه شويه شوو دوا عن الموت هو ..

وعلى ها الضجه اللي مسونها سلطان دخلت شيخه البيت .. ومن سمعت ها الحشره زاغت .. تمت تمشي فالحوي وهي عينها على سلطان .. ويوم وصلت عنده ..

شيخه: يالله يا سلطان زعيجك واصل اخر الفريج
سلطان: كله من بشكارتج الغبيه
شيخه: ليش شو سوتلك
سلطان: مالت على ها البشاكير ما يفهمن بقر ..
شيخه تشوف البشكاره وهي قابضه الغتره فايدها وشكلها كان وايد خايف ..
شيخه وهي ترمس البشكاره: سيري سوي اللي قالج اياه سلطان.. وانته ادخل داخل فضحتنا عنبووك .. ما تحشم حد .. حليلها الفقيره يزاتها تشتغللكم وانته جي تعاملها..
سلطان: هي تسبب لعمرها ..

فها اللحظه رن تيلفون سلطان اللي كان بايده .. شاف الرقم .. ورد يطالع امه .. روح عنها يبى يرد ع الاتصال .. وشيخه تطالعه وهي مستعجبه منه .. كان بركاااان مشتعل والحين كتلة جليد .. يمشي ويرمس بالتلفون ..

سلطان: ها شو مسويه اليوم ..
بدريه: والله ماشي .. ملل ..
سلطان: اها .. عيل يبالنا طلعه ثانيه وياج
بدريه: لا لا شووو تخبلت.. يكفي المره اللي طافت .. والله قلبي كان فبطني من كثر الخوف .. ماتعرف يعني حد يمر يعرفني ولا يعرفك ويشوفنا ..
سلطان: يالله عااد .. من الله كنا فالسينما .. منو بينتبه علينا..
بدريه: ربك بعد .. الصراحه خووف ..
سلطان: عدت على خير المهم ..
بدريه: انزين انته اخبارك .. ولهت عليك اليوم ماسمعت حسك
سلطان: ان شاءالله دووم تولهين عليه
بدريه: يالله عاد اللي يسمعك يقول امره مول ما اوله عليك وانته اللي مقطع عمرك
سلطان: عندج شك اني ما اوله عليج
بدريه: ماعرف
سلطان: لو كنت ما اوله عليج جان ما قلتلج ابا اشوفج

سكتت بدريه وهي تتأمل فكلامه اللي يمر جدام عينها وهي مغمضتنها .. ها الانسان ياخذها بكل احاسيسها ويوديها لعالم ثاني .. عالم ما درت عنه من قبل .. او يمكن ما قدرته .. تتناسى كل شخص فحياتها وهي تكلم سلطان.. كلامه حلو ع قلبها .. تستانس عليه وايد ..

وسلطان.. من بعد حالة الهياج والضجه اللي كان مسونها فالبيت .. روق على الاخر وهو يكلم بدريه .. وتم يسولف وياها لين ما يته البشكاره وهي يايبتله الغتره .. خذها عنها وهو يطالعها بنص عين .. كمل كشخته وظهر عند ربعه القهوه ..




*******************
(الأحد)1 اغسطس 2004
*******************

ام سيف في مستشفى خليفه رقدوها ونتايجها بالأمس اكدت انه عندها 3 شرايين منسده منها اللي توصل لايدها عشان جيه تحس بالم .. وقرروا اليوم يسولها القسطره خصوصا انه حالتها بدت تستاء وتحس بالام زياده .. في هالوقت كان نايف شال خواته ومتوجهين لبوظبي عشان يكونون موجودين مع يدتهم وقت القسطره..
اما خلفان بالأمس كان متصل بسيف يخبره .. اللي احتشر عليهم عشان ماخبروه اول ماتعبت واتريوا لين يزيد عوقها .. لكن مابيده يسوي شي الوقت كان عنده متاخر ومابيقدر يروح ايجدم الحجز لكن اليوم الصبح طلع من وقت صوب السفاره عسب يجدم الحجز .. تكتم على الموضوع وماخبر حد من عياله ولا حتى ناعمه .. لين رد من السفاره وخبر الجماعه بانه حاليا يدتهم فغرفة العمليات يسوولها عملية قسطره ..

ريم: ونحن شو ايلسنا هنه .. ابووويه خلنا نرد
سيف: انا سرت وجدمت الحجز.. اليوم المغرب تزهبوا بنرد البلاد.. طيارتنا الساعه 11 فليل
ناعمه: انزين ليش جي مستعيل .. امك ان شالله بتقوم بالسلامه وهناك مريم وريلها وياها والقسطره مايبالها شي
ساره: انزين نحن عادي عندنا جان بتمين بروحج هنه.. ولا اقول بنخلي عفروه وياج حرام اتمين بروحج..
مي: هي حلو الاقتراح.. اما عنا نحن نبى نشوف يدتنا ..
ساره ها المره رمست جد: عنبوج عمتج تعبانه وانتي تبين تستانسين هنه
مي اطالع خواتها ولافه بويها عن ناعمه: شعليها هيه عمرها ما حاتت امايه..اللهم نفسي ..
ناعمه وهي اطالع سيف: هيي بناتك محتشرات عليه وانته ساكت عنهن
سيف يطالع البنات وهو بدى عليه الضجر ..
سيف: بس عاد..مب وقته النجره
ريم: اووه فكونا من الصدعه الحين .. امايه متى بتظهر من غرفة العمليات.. انا لازم ادق لعموه .. ابا اطمن والله قلبي ناغزني ..
سيف: ان شا الله مامن شر انا كلمت الدكتور .. وطمني انها بسيطه لاتخافين
ريم بتعجب: كيف ماخاف ونحن بعيد عنها ..
ساره: كله من هالسوسه نعوم مابغتها تسير ويانا .. وخليناها بروحها

سيف يأس من عياله وتم ساكت ماله خلق نجرتهم .. اما ناعمه تمت تطالع ساره بغيض وساره من غيظها طلعتلها لسانها وصدت الصوب الثاني عنها ..
قامت ريم من مكانها وتمت تمشي بتوتر وهي مجتفه ايدها .. جنها واقفه جدام باب غرفة العمليات .. وساره ومي يطالعنها ويحسن هن بعد توترن وياها
وكل وحده يدور في ذهنها افكار وايده .. كيف هالانسانه اللي كان لها جبروووت على الكل ..اللي شتتت عيال ولدها وطالما فرقت فمعاملتها قبل .. طايحه في غرفه العمليات الحين لاحول لها ولا قوه !!
كيف الانسانه اللي يوم رجعوا البيت كانوا مب حابينها ويراددونها ويحملونها ذنب كل شي استوالهم الحين تاخذ نصيب كبير من قلوبهم ومرضها يشغل تفكيرهم! .. شو اللي يخليهم جيه ؟ اكيد تربيه امهم اللي علمتهم يسامحون ويتحابون .. فوق كل اللي استوى كانت تذكر ام سيف بالخير جدامهم وتأكد الهم انه يديتهم ع الرغم من انها يوزت ابوهم بس ماكان الها دور فالطلاق
ومادام صاحبه المشكله الاساسيه وهي امهم مسامحه الكل .. كيف هم!
في الاخير كانت محاولات ام سيف لتصليح الماضي تشفعلها عندهم وتقربهم منها..

ها اللحظات كان سيف متوتر بس يحاول يبين انه هادي جدام بناته ..
تم ساكت وكل شوي يدق لمريم يطمن على امه ظهرت من غرفة العمليات ولا لا ..
اما ناعمه سارت حجرتها ولبست تبى تظهر تغير جو بما انه اخر يوم الهم اهنه ..

ويوم نشوا باقي اخوانهم خبروهم عن يدتهم .. تم الكل مويم وزعلان ع اليده .. والكل ماتوقع ردت فعل جاسم اللي تم يصيح اول ماقالوله عن عملية يدته .. الكل استغبن وهو يشوف جاسم يصيح وريم حاظنتنه ..

ريم: جاسم حبيبي امايه بتكون بخير ان شاء الله خلاص لا تصيح
جاسم: ريمان ها العيوز انا احبها..ماباها تموت عنا
ابتسمت ريم وهزت براسها .. ها جسوم ما يوز عن سوالفه ع الرغم من انه يصيح..
ريم: بعيد الشر يا جاسم.. ان شاء الله امايه بتقوم وبتغدي بخير
مايد: جسوم بس لاتصيح .. قلبي عورني
جاسم ابتعد شوي من حظن ريم ودمعته ماجفت وهو يطالع مايد ..
جاسم: شو بلاه بعد قلبك .. لاتقول جيه الحين بيسولك قسطره نفس امايه
مايد: جان سوولي انته السبب .. خلاص لا تصيح
ريم: بسم الله عليك يا مايد .. لاترمسون جي الله يمن عليكم بالصحه دوم ان شاء الله ..
مي: ابويه رد دق لعموه شوفها طلعوها ولا والله بطني عورني من التفكير
ساره: ليش انتي عقلج في بطنج ؟
مي: سخيفه ياربي مول مب وقته

سيف واللي كان سرحان بالحوار اللي يدور بين عياله مانتبه لمي وهي ترمس.. بس تقربت منه ودقته ع جتفه وردت تقوله يدق لعمتها ..
وقبض التيلفون وعاد الرقم .. وها المره طمنتهم مريم انه ام سيف طلعوها من غرفة العمليات.. والعمليه الحمدلله كانت ناجحه .. وام سيف طبعا راقده بسبة المخدر..ومايعرفون بالضبط متى بتقوم..وحاليا هي في غرفه العنايه لين تقوم وبعدين بينقلونها لغرفه عاديه..


****

عليا كانت يالسه ومحطيه ايدها على خدها .. وام راشد تطالع بنتها اللي ذهنها كان شارد ومب مركزه وياها فالرمسه ..

ام راشد: عليا امايه شو بلاج؟

عليا وسط افكارها غرقانه ولا سمعت سؤال امها..

ام راشد: انزين بناتج متى بيوصلن.؟.. عليا بسج تفكير .. ردي عليه عنبوه شو ارمس الييدار انا
عليا: هاا اماايه .. شوو؟
ام راشد: سألتج متى بيوصلن بناتج؟
عليا: بيوصلون الصبح ان شاء الله
ام راشد: اتصلي لريم انزين اسأليها شو عفرا احين ؟
عليا: امايه مسكرات تلفوناتهن مادري جان سارن المطار.. ماقالتلي متى طيارتهم بالضبط بس قالت فليل
ام راشد: هييه .. انزين دقي لراشد تنشديه عن عفرا شخبارها احين.. يمكن رمس خلفان نسيبهم ..
عليا: انا بروحي احاتيها .. ما بدقله بسيرله بيته وبشوفه جان عنده خبر..
ام راشد: زين قومي عيل بسير وياج ..

وطلعن عليا وامها من البيت .. وسارن للبيت اللي حذالهم .. بيت راشد .. ويوم دخلن البيت .. زقرن على ام مروان .. بس محد توايبلهن ..

ام راشد: اندووج ميره يمكن سايره الشارجه قالت بتسير السوق..
عليا: جنه الا جيه.. عنبو الدار خلا ..

ويوم دشن الصاله شافن مروان منسدح ع الغنفه ومحطي الجريده فوق راسه .. شكله كان غافل .. تقربت منه عليا .. ويلست ع نفس الغنفه ع الطرف .. وقبضت الجريده وضربته بها ع راسه.. فز مروان وشاف عمته فويهه ..
تخيلها شخص ثاني كان زايرنه فالحلم.. ولأول مره يحس بالشبه الكبير بين اللي فالحلم والشخص اللي جدامه .. ابتسم وهو يتمنى يكون بالفعل ها الشخص مجابلنه حاليا ..

عليا: بلاك تبتسم
مروان: لا ماشي.. من متى انتي هنه عموه؟
عليا: توي ها داشه وشفتك راقد قلت بغصصبك
مروان قام من طيحته ويلس وهو حاط ايده ع ويهه وكان شعره منسدل ع يبهته
عليا: تعبان !
مروان: جسمي منهد ..
ام راشد: بسم الله وليدي بلاك؟
مروان: مضارب ..
ام راشد: ياكافي الشر .. ويا منوو؟
مروان: سلطان ولد عموه شيخه
عليا وهي مبطله عيونها : ليش شو استوا ؟
مروان: تحيدين عموه دوم تجات ويا بعض .. اليوم ماقهرته رفعلي الضغط
ام راشد: وشو سويتبه؟
مروان: هههه قولي شو سوابي
عليا: قول انزين شو استوى
مروان: ماشي .. ماذكر بالضبط شو الرمسه اللي خلتني اعصب .. وتسابيت وتفاتنت وياه وعاد هو شري دزني بكل قوته ع الييدار ..هههه ظهري راح
عليا: لا حووول ولا قوه .. شو تباه انته سلطان .. تحيده من يوم يومه مشكلجي
ام راشد: اخيه عليه من ولد .. اسميكم يا سالم وشيخه ماعرفتوا تربون
عليا: امايه هم شو ذنبهم .. طالعي تربية اخوانه .. ولا سلطان الله يهديه بروحه دمر اللي علموه اياه اهله
مروان: هذا اصلا خساره وياه الرمسه
عليا: الله يهديه ان شاء الله
ام راشد: يالله يا شيخه والله انها دومها تصيح منه وتتشكى .. لكن الواحد شو بايده
مروان: ماعليه .. بس الله يخليكم لا تخبرون حد باللي استوى .. بعد بيقول ها سار وشخل ..
عليا: لا ماعليك ..
مروان: الا انتوا غريبه يايين القايله
ام راشد: يالله حتى نسينا شله يايين
عليا: ابوك وين؟
مروان: مادله .. البيت كله فاضي امايه وبناتها سايرين الشارجه وفارس فالعزبه ..
ام راشد: هي قلت انا بعد .. انزين الغالي دق لابوك وتخبره عن ام سيف
مروان: يدت البنااات؟
عليا: هيي
مروان: ليش بلاها؟
عليا: ريم تقولنا انه تعبت وبيسوولها قسطره
مروان: حليلها .. بطالع ابويه

ودق مروان لابوه .. اللي خبرهم انه اللي يعرفه من خلفان ريل مريم انه ام سيف سوولها القسطره ونجحت العمليه بحمد الله وسيف راجع ويا العيال .. وبعد ما سكر مروان التيلفون طمن عمته ويدته انه ام سيف بخير ..

عليا: الحمدلله .. ربي يعافييهاا .. بدق لمريم عيل اتشكرلها سلامة امها
ام راشد: هي صدقج ..
عليا: يلا امايه قومي نرد البيت عيل
مروان: تموا ويايه انزين
عليا: هههه شو خايف اتم بروحك
مروان: ههههههههههه لا مب جي .. بس الدنيا صخه ماداني
ام راشد: تعال تغدنا عندنا انته وابوك .. امك وخواتك بيقلين فالشارجه شكلهن
عليا: بدق لراشد اقوله ..
مروان: خلاص عيل ..

وعقب طلعن عليا وامها من بيت راشد متوجهات لبيتهم ..
اما مروان رد يتسدح .. وهو يفكر بسالفته ويا سلطان .. نرفزه اليوم وايد فالمكتب.. ماقدر يتحمله ويتحمل غلاسته لا ويغلط على ابوه اللي صابر عليه ومشغلنه عنده ..

"الخايس كسرلي ظهري .. انته مب ولد عمه .. عنبو الشر بكبره فيك .. متبري منك ومن الدم اللي بينا يا سلطان .. لاعرفك ولاتعرفني ولساني حتى ما بيطيح فلسانك يا الخايس..
أعوذ بالله منك يا بليس .. ربي يهديه ان شاء الله .."

تمتم مروان بآخر جملتين كم مره .. وحاول انه ينسى سالفته ويا سلطان لأنها مب أول مره تستوي .. بس يأمل انها تكون آخر مره .. لأنه سلطان يباله اللي يطنشه ومايرد عليه

****

فالمستشفى .. من بعد ماطلعوا ام سيف من غرفة العمليات حطوها فغرفة العنايه .. كانت مريم يالسه فواحد من الكراسي اللي برع الغرفه وياها لطيفه واسما بناتها.. ونايف وخلفان يراكضون فالمستشفى يدورون غرفه خاصه لام سيف ..
ومن بعد ماحصلولها .. قالهم الدكتور انه مالهم لزمه يتمون لانه ام سيف فغرفة العنايه ومحد بيتم عندها .. رجعوا كلهم الفندق اللي كانوا حاجزين فيه شقه لهم .. و مريم رجعت وياهم عسب ترتاح ساعتين وبتاخذ اغراضها وبتسيرمره ثانيه للمستشفى .. بتيلس في غرفه امها اللي حجزوها لين اييبونها ..
في طريقهم للفندق كان خلفان يكلم زوجته مريم

خلفان: الحين سيف ع طول بيي هنه؟
مريم: هي سيف وعياله بيون
نايف: عيل يبالنا نحجزلهم شقه ويانا
لطيفه: انزين هم متى بيوصلون؟
مريم: هم اليوم طيارتهم لكن اكيد باجر الصبح بيوصلون
نايف: اسميهم بيهلكون
مريم: ماعليهم شر بيسلمون ع امايه اول مايوصلون وعقب بيردون الفندق يرتاحون
لطيفه: عاد امايه تحب اللمه حولها وفوق هذا متعلقتنهن وايد يعني حتى عادي يلزمن يتمن فالمستشفى ولا يرتاحن
اسما: يالله بيموتن من التعب .. بيسلمن وبيروحن يرتاحن
نايف: انزين انتن شحقى مشتطات..يوم بيين هن بيسون اللي يبنه
مريم: هههههه عاد خواتك الا يحللن الموقف..

وصلوا الفندق ونزل نايف يحجز لقوم خاله .. واهله ساروا شقتهم .. ومريم انعزلت عن عيالها تيددت ويلست ع سيادتها رافعه ايدها لربها تدعي انه يقوم امها بالسلامه..

****

اما في استراليا كانوا العيال يالسين في كافتيريا المطار ياكلولهم شي قبل موعد الطياره اللي كان قريب .. واهناك

جاسم: ميووود .. شووف منو هنااك
مايد: وين؟
جاسم: هاكم ع الطاوله هاذيج
مايد شهق ورد يشوف جاسم: قووم سعوود
انتبهن البنات لخوانهم وهم يتراكضون عنهن صوب الشباب ..
ساره: اندووكن هاذيل مب جنهم ربعنا
مي: هيي هم
مها: اكيييد فطيااارتنا
مهره: صح هم قايلين بيسافرون ها الاسبوع
ساره: سبحان الله.. الله رايد انكون وياهم يوم يردون ههههه
ريم: هي انتن هب اطالعن صوبهم ..
ساره: ريموه حليلهم حشام واظن انهم مب كبار يعني حد منهم يمكن اصغر عني .. وبعدين مب امبينين نحن لهم ..
مي: ريم غناتي اهم شي لا تعصبين انتي ..
ريم: من تصرفاتكن انتن الواحد لازم بيعصب..
مي: انزين ماسوينا شي نحن ريييم
ساره: ماعليج منها .. ريموه دايما تكبر السوالف
ريم: انا اكبر السواالف!! ساروه انتن ماتحاسبن تراكن .. تسون الشي وعقب يطيح ع راسي انا ..
ساره: ريم عاااد .. الحين نحن ماسرنا ودقينا سوالف وياهم .. من الله نشوفهم بس يوم اخوانا وياهم لاتمين تسويلنا سالفه ترا مب من كبرج عشان تتفلسفين عليه الا سنه بيني وبينج لاتنسين
مي: خلاص ساروه عن التحرطيم.. ريم هم ما يشوفنا ولا جان انتبهوا انه نحن يالسين هنه
ريم: كيفكن .. مايخصني لو ابويه يا وشافكن بها المنظر انا غاسله ايدي منكن
ساره حطت ايدها ع راسها: استغفر الله العلي العظيم أي منظر ها اللي بيشوفنا فيه ابويه ..يوم انتي مادانين الجنس الذكري نحن شو ذنبنا .. من الله يالسين بعيد ومايشوفونا .. شو نسوي يعني يوم عيونا تفتر صوبهم .. ياخي يضحكونا.. نبى نضحك بسنا هم وصياح من اصبحنا ..

ريم سكتت عنهن وقامت من الطاوله وسارت يلست بعيد عنهم وهي عاطتنهم الظهر .. تحسست من رمسه ساره .. لكن ما هتمت لانه ها الكلام صح ..اما مي سحبت ساره من ايدها ويلسن ع الكراسي بحيث يعطن الشباب ظهورهن . ماتبى حشره اكثر لا من ريم ولا من ساره ..
والتوم تمن يطالعن شو يستوي بين الشباب وقوم ميود وخاطرهن يعرفن شو يسولفون...

[لامارا]

******************
(الاثنين)2 اغسطس 2004
******************

وصلت الطياره الصبح .. وع طول من طلعوا من المطار كان الدريول يترياهم وسارت وياه ناعمه وبنتها عفرا وشلوا كل الشنط ورجعوا البيت ماعدا شنطه كانن البنات عاملات حسابهن ومجهزاتنها لسيرة بوظبي وشنطه صغيره لسيف ومايد وجاسم.. اما سيف وعياله فكان ياينهم راشد خال البنات ومروان ولده .. سيف ومها ومهره ومايد ركبوا ويا راشد .. اما مروان شل مي وساره وريم وجاسم فسيارته وتوجهوا ع طول لبوظبي ..

فسيارة راشد ..

راشد: عيل حرمك شله ردت؟ ماتبى تسلم على امك؟
سيف: تعبانه اونها .. بييبها اخوها باجر اتسلم على امايه
راشد: هييه .. ولا بنياتك امره هلكانات
سيف: بعد لو بقولهن ردن راس الخيمه ما بيطيعن..قلت خلهن ع هواهن
راشد: عاد تعلقن بامك هن .. لازم بيحاتنها
سيف: حتى امايه والله متعلقتهن ..
راشد: ها الشهر وجي استوو .. عيل لو رابيات عندها شو بتسوي امك
سيف: ربك عاد ماراد
راشد: اسميها امك كانت متسلطه مابغتهن فالبدايه الا تيوزك عسب الولد
سيف: الله يهداك يا راشد.. خلاص لاتنبش فالماضي .. نحن عيال اليوم..
راشد: الله كريم يا خوك ..
سيف: الحمدلله العيال يحبون يدتهم .. ولو اني احسهم ما ينجذبون لي بس ان شاء الله ويا الايام يتعودون عليه
راشد: ان شاء الله يا سيف.. بس انته يوز
سيف: راشد واللي يسلمك لا تيب ها الطاري
راشد: والله لولا الربعه اللي امبينا جان من زمان انا متبري منك
سيف: رااشد الله يهداك العيال هنه لاتنسى ..
راشد وهو يطالع ع ورا : هههه حليلهم رقود ..

في سيارة مروان .. كان جاسم يالس جدام ومتاكي ع الكرسي وراقد .. مي وساره وريم يالسات ورا والكل باين عليه التعب من عقب اكثر من 14 ساعه بالطياره .. ساره كانت غافله اما ريم كانت متاكيه ع الباب وتظغط ع راسها اللي كان يعورها .. مي الي يالسه فالنص كانت واعيه ومتجدمه شوي عشان خواتها ياخذن راحتهن في اليلسه وتشوف مروان من المنظره الصغيره .. ومروان يبادلها النظرات ويسويلها حركات بعيونه ..

مي: سخيف مروان
مروان: ههههه بلاج!
مي: ليش جي تطالعني
مروان: هههه ابا ازيغج
مي: بسم الله .. انا عادي عندي ما ازيغ من ها النظرات .. زيّغ ابها غيري
مروان: الا ايي يوم وازيغج بشي ماعليه
ريم التفتت لمي : يالله يا ميوه انتي مب تعبانه
مي: امبلا
ريم: عيل ليش ماطبين حلجج .. من ركبتي وانتي تهذربين .. تعب منج مروان
مروان: ههههههه لا والله عادي.. انتوا امره كلكم مطيحين ابا حد يونسني بعد فالدرب
ريم: هي جان جي عيل برايج ميوه .. انا خفت تصدع من الهذربه وياها

ويوم وصلوا اول بوظبي .. قامت ساره وتمت تتمغط وتنقع مفاصل ايدها بتعب .. الكل صاخ وهي تتلفت عليهم .. كانت يالسه ورا جاسم.. ولفت صوب اللي يسوق .. جدمت راسها وحطته ع السيت الجدامي .. وعينها بعدها تتأمل مروان ..
مروان اصلا كان منتبه لساره اول مانشت .. ويحس بنظراتها .. يبى يلف لكن استحى .. يمكن هي صح تطالعه لكن يمكن تركيزها مب عليه .. بس تجرأ شوي ولف .. شافها وهي محطيه راسها ع السيت .. ابتسملها ..

مروان: نشيتي؟
ساره استحت ونزلت عينها: هيي نشيت
مروان: وليش جيه يالسه؟
ساره: ظهري يعورني
مروان: يلا ماعليه الحين بنوصل
ساره وهي تتطالع اللي حذالها باليسار : من متى رقود هاذيل؟
مروان: مادريبهم والله .. يرقدون شوي ويقومون.. بس ميوه قبل شوي غافله ولا امبونها مونستني فالدرب
ساره: اونه.. يـــالـله والله تعب ..
مروان: بتسلمون ع يدتكم وبنردكم الفندق
ساره: اي فندق؟
مروان: ابويه يقول نايف ولد عمتكن حجزلكن وياهم ففندق .. بتمون هنه لين تظهر يدتكن
ساره: اونــه
مروان ابتسم: انتي منو معلمنج ها الاونه
ساره: هاا..محد بروحي..
مروان: يا حيج ..

ورد الهدووء يسود السياره .. وساره ردت تتاكى ع ورا وتطالع الشارع من برع وهي متلومه من عمرها .. اكيد انتبه لنظراتها .. ولا ماكان بيلف ..
اما مروان حب يكسر ها الهدوء .. هو بروحه متملل من رقدت عنه مي..

مروان: انزين ..وشو السفره كانت؟
ساره رفعت راسها: ممم.. ونااسه.. وايد حلوه استراليا
مروان: هي .. زين زين
ساره:الحين انته بتوطينا الفندق وبترد راس الخيمه ع طول
مروان: هييه .. ليش شي بغيتي؟
ساره: لا لا .. بس مب تعب عليك قابضلك درب ساير راد
مروان:هههه عادي متعودين
ساره: بتوطينا المستشفى وبتم تتريانا
مروان: ليش ماتبيني اترياكم؟
ساره: لا ماقلت جي.. بس يعني كم بتتريانا انته!
مروان: ماعليه انا بيلس فالكافتيريا.. واول ماتبن تردن دقلي.. ولا قولن لابويه يدقلي لانه بيصعد هو بعد يسلم ع يدتكن وشكله بيتم ويا سيف..
ساره: لا اتلوم من ابوك .. وبعدين ماعندي رقمك انزين
مروان لف على ساره وابتسملها .. مسك تيلفونه
مروان:عطيني رقمج

ملته ساره الرقم وعطاها مروان رنه عسب تعرف رقمه وسيفته عندها.. وهو الثاني بعد خزن الرقم عنده ..
وشوي انتبهت ريم اللي رقادها كان متقطع.. وعقب قومت اللي فالسياره لانه ماشي باقي عن يوصلون المستشفى..


****

فالمستشفى الظهر من بعد ماردوا العيال الفندق ويا ولد خالهم تمت ريم ويا عمتها مريم .. وسيف نزل ويا راشد ياكلولهم شي .. وام سيف كانت راقده تحت تاثير المسكن..
ريم يالسه ع الكرسي وشكلها كان وايد تعبان .. من يوم قالولها عن يدتها وهي تحاتيها وايد وماترقد زين ..

مريم: امايه ريم انتي وايد تعبانه جي مارديتي ويا خوانج الفندق ترقدين؟
ريم: لا عموه مافيني شي .. بيلس وياج .. ابا اشوف امايه يوم بتوعى
مريم: اليوم قبل ماتوصلون نشت رمسناها الحمدلله بخير هيه ..بس ردوا عطوها ابرة مسكن..
ريم: فديتج يا امايه..صدق ماياها خير
مريم: قومي انزين طيحي ع الغنفه ريحي جسمج من عقب ها السفر ..
ريم: خلاص عيل عموه .. بطيح بس اذ حد يا وعيني فشله اتم طايحه
مريم: ماعليج طيحي محد بيي الحين..عيالي واخوهم فالفندق..وخلفان رد راس الخيمه..

وقامت ريم من على الكرسي وطاحت ع الغنفه وماهي الا دقايق وغطت فالنوم من كثر التعب اللي فيها .. مريم كانت تتطالعها وتبتسم .. عايبتنها ريم واايد وماتبى ولدها ياخذ غير ها البنت ..

سيف من عقب ما ودع راشد اللي كان بيرد بيته صعد غرفة امه .. انتبه لريم طايحه راقده ومريم يالسه ع الكرسي تشوف التيلفزيون ..

سيف: رقدت ريمان؟
مريم: هيه فديتها باين عليها وايد تعبانه
سيف: اظني حتى فالطياره ما رقدت .. تحاتي امايه وتحاتي جاسم تخاف عليه يتعب نفس يوم سرنا..
مريم: ليش شو ياه جاسم ؟
سيف: هبط السكر عنده وتم تعبان علينا لو كان ويايه بروحي مابعرف شو اسوي لكن هي ماشا الله عليها عرفتله
مريم: حليلها والله هاي من غيرها مادري شو بتسوون
سيف: شاله اخوانها شل عكس ساره مول ماتحب المسؤوليه..ولا ميوه ماخذه من ريم ومن ساروه ههههه
مريم: حليلهن.. ها الشهر خلاك تعرف اطباعهن
سيف: شفتي عاد كيف

ريم انتبهت على حسهم وبطلت عينها لقت ابوها يالس حذال عمتها .. قامت على الرغم من انه مريم قالتلها ترقد .. بس سارت الحمام تغسل ويها .. ويلست ع الكرسي بتعب .. يتريون امهم تقوم لكن بعدها ماقامت وقرر سيف انه يسير يرقد شوي ولين تقوم يتصلون يوعونه .. اما ريم رفضت انها تسير وياه وعاندت وتمت ورجعت تطيح ع الغنفه لين تنش يدتها بس عسب تريح جسمها ولا هي مب يايينها نوم ..

وعقب مامرت ساعه انتبهت ريم لحركه يدتها ونشت على طول صوبها .. وتمت ماسكه ايدها تحبها
ريم: الحمدالله ع سلامتج امايه شو تانسين ؟
ام سيف بتعب: فديتكم متى ييتوا
مريم: وصلوا قبل الظهر ..
ريم: شو انتي احين امايه؟
ام سيف: اهون امايه الحمدالله .. ليش قطعتوا وناستكم وييتوا انا ماعليه شر
ريم: وناستنا يوم نشوفج جدامنا صاحيه وبخير
ام سيف: فديتكم يالغاليين .. الا خواتج وينهم ؟
ريم: يوج وكنتي راقده وردوا الفندق يرتاحون عقب السفر .. بيون خلاف ان شاء الله..
ام سيف:وانتي امايه بلاه ويهج جيه غادي اصفر
مريم: امايه بنتج تراها مب راقده من امس .. وغير ها هلكانه من الطياره وما طاعت ترد الفندق ترقد
ام سيف: جي امايه
ريم: ابا اطمن عليج
ام سيف: انا بخير مافيني شي ..

وها الوقت سمعوا دق ع الباب .. ودخل نايف .. ريم عدلت تحجيبتها وقامت من ع سرير يدتها ووقفت .. سلم على يدته .. وشاف ريم اللي كانت موخيه ومد ايده يسلم ريم ماعرفت كيف تتصرف ولا ارادي غطت ايدها بكم عباتها وسلمت عليه من غير ماترفع راسها .. وابتعدت عنهم .. اما نايف شاف امه باستغراب ..ليش يعني تبتعد عنهم اول مادخل! هذا وهي ماتعرف اللي مستوي وجي تصرفها!
سكت ويلس حذال يدته .. اما امه حاولت ماتعطي المووضوع اهميه جدامه احين ..

مريم: جي ما يبت خواتك؟؟
نايف: فالفندق ويا بنات خالي ..
مريم: جي ما رقدواا؟
نايف: ماعرف الصغار كلهم راقدين .. بس سمعت اسوم تقول بتسير لمي وساره اون واعيات ..
مريم وهي تطالع ريم اللي يالسه بعيد وموطيه براسها تلعب بطرف شيلتها
مريم: بغينا ريم ترد بس ماطاعت ..
ريم لفت ع عمتها
ام سيف: نايف ابويه رد ريم عند خواتها .. وايد تعبانه
ريم ردت لفت ع طول ليدتها وهي متوتره
نايف: حاضرين ..
ريم قالت باندفاع : لا مابا
ام سيف: فديتج ريم عشان خاطريه ردي ارتاحي
ريم: انا مرتاحه هنه
ام سيف: والله تردين .. انا حلفت يلا قومي الغاليه دام نايف هنه بيردج
نايف قام ع طول عشان ما يسمع اعتراضات من ريم وقالها ..
نايف: انا بتريا عند اللفتات برع
طلع عنهم وماكان لريم أي حجه انها تيلس وغير ها يدتها حلفت ومابيدها تسوي شي .. اما مريم كان هالشي مونسنها وفي صالحهم ..
قامت ريم بضيج .. سلمت ع يدتها وطلعت ..

****

في الفندق.. ساره ومي ولطيفه واسما كانن متيمعات في الصاله .. ساره طايحه ومحطيه راسها ع ريل اسما وميوه متسلقيه ع بطنها ولطيفه يالسه ..

مي: جسمي متكسر خاطريه بحد يناقزعلى ظهري
لطيفه: ما طلبتي
مي: وين وين استريحي انتي.. قصدت حد ضعيف مب تريلا..
لطيفه: يا الخايسه التريلا محد غيرج .. ها يزاتي بسويلج خدمه
ساره: لطوف عيل يبالها حد يأدبها قومي انا وانتي بناقز ع ظهرها
أسما: اسمييج بتروحين يا مي
مي: تريلا وحده بتحطمني وين ثنتين بستوي عيين.. بقوم اسنفر بحياتي ع قولتهم
وضحك الكل ..
مي بيأس: بس والله متكسره
لطيفه: من هالدرب يبوكن لازم بتهلكن
ساره: اغلب الوقت انا كنت راقده .. ههه ماتشوفوني مصحصحه
لطيفه: ريموه فديتها يبين عليها انها مول مب راقده
مي: مووول مارقدت انزين هيه .. والحينه فالمستشفى ماتعايا انقولها نحن بنتم وانتي ردي ارتاحي ماطاعت
لطيفه: حليلها.. الدنيا صخه خوانكم كلهم مرقدين
مي: هي من روح مروان عنا طاحوا يرقدوون .. انا بعد رقدت ونشيت لانه الاخت ساره وايد هاديه وتخلي الواحد ياخذ راحته بالنوم .. خصوصا اذا كانت هي شبعانه
لطيفه تطالع ساروه وتضحك
اسما: عاد ساروه اللهم نفسي
ساره: جب جب جي قالولج نعوم ..
لطيفه: تعاالو ناعمه ليش ما يت
مي: اونها تعبانه عاد وردت البيت .. الا اقول اخوانكم وينهم عيل
لطيفه :عمار يالس ويانواري في السويت يشوفون التلفزيون
اسما: حليلهم اخواني مستوحدين.. ياخي ملل .. لو حد ايي يودينا المستشفى
ساره: ابويه راقد واخوج محد..منو عندنا بيودينا يعني
لطيفه: بدق لنايف بشوفه وين ..
اسما: ما بيطيع ايي توه مروح عنا ..
لطيفه: لا ماعليج ..

دقت لطيفه لنايف لكن شافته مغلق .. وتمت حايسه بوزها وهي متملله ..
ساره: اقوول بنات .. ماتشريتن للجامعه؟
لطيفه: امبلا شوي ..
اسما: باجي شهر .. بعده وقت
مي: انتوا باجلكم شهر .. انا 21 من الشهر بسير عنكم العين
ساره: ليش اسبوع المستجدات يوم 21
مي: هيي .. عاد طبعا ساره الحلوه بتسير ويايه
ساره: بفكر
اسما: يالله ساروه ما يبالها تفكير .. بنسير يبوج نقزر وقت ويا المستجدات
ساره: هزرج .. ممم بس لا بعد يبالها تفكير ..
وتطالع مي وتعيب عليها
مي: ترومين انتي ما تسيرين .. الخايسه انا وين اعرف الا بلطم بعمري هناااك
لطيفه: ميوه غناتي لازم تعتمدين ع عمرج هنااك
مي: انزين بعتمد بس بعد اول اسبوع غير..العام انتي سرتي وياهن عيل
لطيفه: انزين انا الفقيره بروحي سايره محد ويايه ..
مي: عاد شو نسويبج
اسما: لا ماعليج ميوه انا وساروه بنسير وياج .. هههه بنلعب ع المستجدات
مي: يالله يا نتن عاد يا القدامى .. دواهي تراكن ..

وبدن يتناقشن عن المشاري لانه مي وساره خذن نص اغراضهن تقريبا من استراليا .. وباجلهن شوي .. وفكرن يستغلن يلستهن هنه.. طبعا من بعد ماتقوم يدتهن بالسلامه و يسيرن يتسوقن..

وبعد ما عم الهدووء امبينهم .. كلن سرح فتفكيره .. وانتبهوا بعدين لضحك .. كان مصدره ساره ..اطالعنها البنات مستغربات ..

مي: سكنهم في مساكنهم شو بلاج ساروه
ساره: اتذكرت قوم سعيد..ههههه سبحان الله ردوا ويانا وبنفس الطياره
مي: هيه حليلهم .. يلسوا يسولفون ويا ابويه فالمطار وجسوم وميود متعلقينهم .. ساره: الا جسوم من شافهم فالكافتيريا شقت الابتسامه حلجه.. وميود ماقصر خذ ارقامهم..
اسما: يااا حاافظ .. ومنو هاذيلا
مي: هاذيل شباب عرفناهم فاستراليا
لطيفه: شقى عرفتوهم بعد
ساره:ههههه كانوا فالشقه اللي فوق ..

وبدن مي وساره يحكن للبنات قصة ها الشباب وتوغلوا اكثر لسوالفهم فالسفر ومواقفهم اللي تضحك .. لطيفه واسما يضحكن على سوالفهن ويتمنن لو كانن وياهن فها السفره ..

****

احلام كانت فبيت عمها راشد ويالسه ويا خالتها ميره وعزه بنتها.. اما مدوي كانت ويا ايمان يالسات ع ينب يرمسن .. نص ساعه من سوالفهم .. ودخل مروان البيت وهو محطي سفرته ع جتفه .. وشكله مرهق من الدرب ..

ميره: وصلت وليدي .. الحمدلله ع السلامه ..
مروان تجدم ويلس ع الغنفه: الله يسلمج امايه
ميره: عزوه قومي هاتي ماي لاخوج
مروان: لا لا مابا .. بقوم اتسبح انا
احلام: مروااان شحاالهن بنات عموه وشخبار يدتهن؟
مروان اطالعها وابتسملها بتعب: الحمدلله كلهم بخير .. وصلتهم عند يدتهم ورديتهم الفندق عسب يرتاحون..
ميره: وابوك وينه؟
مروان: فالدرب ياي
احلام: بسير عيل اطمن عموه
مروان: اكيد رمسنها بناتها .. بس صبري بتسبح وبسير وياج بالمره بشوف عموه..
احلام: خلاص يلا بسرعه
مروان: اوكي ..

وطلع عنهم مروان وصعد حجرته .. دش يتسبح يبى يعق كل التعب .. والتفكير .. طول اليوم يفكر .. ياترى تحس باللي يحسه ولا !
مايبى يتوهم باشياء .. او يتخيل النهايه السعيده .. لكن يبى يتحرك ويبوح للي بخاطره .. مب لاي انسان .. بس الها .. ويشوف ردت فعلها ..
كل شي سهل بالنسبه له .. متعودين ع بعض .. ويقدر يوصللها و يصارح فأي وقت .. لكن مايعرف متى الوقت المناسب!!

بعد ما خلص مروان سبوح .. نزل تحت وهو يحاول يفصم عقم كندورته .. ودش الصاله ..

مروان: عزوووه تعالي فصميهن
عزه: يووهو مروان متى بتروم تفصمهن انته..
مروان: مب لازم اروم انتي بتفصميلي
عزه: جي بتم عندك دوم انا
مروان: برايج عقب حرمتيه بتفصمهن
ميره: هههههه الله يسمع منك يا مروان واشوفك معرس
مروان: اااميين
احلام:ههههه ها يعرس .. ماتخيله معرس
مروان: بسم الله جي ياااهل تشوفيني
احلام: لا بس خبيل
مروان: طالعوا هاي انتو
عزه: ههههه صدقها
ميره: الله يسعدكم كلكم ان شاء الله واشوفكم ويا عيالكم
مروان: الا تعالي عزيكه
عزه: عزيكه فعينك
مروان: انزين عنزووه
عزه: اماايه شوفيه .. ماعليه انته والله لخبر عليك فيصل
مروان: بس عيل بخاف تراني .. انزيين متى حددتوا العرس؟
عزه: عقب رمضان ان شا الله
مروان: اها.. زين زين .. بالبركه ان شاء الله .. يلا احلام خلنا نسير عند عموه ..

وقامت احلام وركبت السياره ويا مروان لانه ناوي يسير العزبه عقب ما يطلع من عند عمته ولحقتهم مدوي وركبت ورا .. طلعوا من بيت راشد ودخلوا بيت محمد ..
ويوم نزلوا .. دخلوا الصاله ع طول مثل مامتعودين لانه مرت خالهم دوم تيلس بشيلتها في البيت .. كانت هناك فجر يالسه ببجامتها ويا اختها ..
عبير خزتها بعين عساس تدخل داخل .. وقامت فجر بتثاقل .. اما مروان من اول ماشاف فجر يالسه ع طول وطى راسه .. قفط جدام عبير انه يشوف اختها جيه.. وحس بالغلط انه ماتريى شوي قبل ما يدخل.. البيت ماعاد مثل قبل ..
احلام اطالعته .. ورمست بصوت واطي..

احلام: مروان هاي دوم جي .. لاتستحي
مروان: ها
احلام: ما اتحجب عادي عندها
مروان: فشله ..
احلام: دش تعال .. بزقر عموه عليا ..

ودخل مروان ويلس ويا عبير وآثار القفطه بعدها باينه ع ويهه .. وشوي يت عليا ويلست ويا مروان اللي حكالها كل شي من اول ما شل البنات لين وطاهن المستشفى وتفارق عنهن عقب ما ظهر من شقتهم فالفندق..

****

بعد ماطلعت ريم من عند يدتها مشت بضيجتها لين وصلت اللفتات لقت نايف واقف اهناك .. ماعرفها لانها متغشيه بس يوم تقربت عرفها .. ابتسملها .. لكن ماشاف أي تعبير بسبب الغشايه وكانت موطيه راسها ..

نايف: يالله روحنا
مشى قبلها وهي تلحقه .. وصل سيارته وفتح الباب الجدامي.. كان يفتكر انه ريم بتيلس جدام لكنه تفاجأ يوم شافها وراه تفتح الباب الخلفي .. ركب وهو ساكت اما هي كانت تحس انه قلبها بيطلع من صدرها من الخوف لكن تعوذت من الشيطان وركبت السياره ..

نايف: ريم الباب مب مسكر زين ..
فتحت الباب ورجعت سكرته مره ثانيه ..

نايف كان يسوق بهدوووء وببطء بنفس الوقت .. وده ما تمر ها اللحظات بسرعه ..كان يحاول يشوفها من الجامه جدامه لكن شكلها ماكان يساعد .. كانت لافه صوب الجامه ومتاكيه براسها عليها .. وانتبه نايف لصوت تأويه من ريم .. وشافها من الجامه ..

نايف: ريم شي فيج؟
ريم حطت ايدها ع راسها .. وتأوهت اكثر ..
ريم: لاا .. ياربي مب الحين ايي ها الويع .. اخ..
نايف: ريم شوو بلااج؟

غمضت ريم عينها .. ورجعت تخيلت الايد اللي تخنقهااا.. حطت اديها ع ويها ماتبى تشوف اكثر من ها اللي تشوفه وصرخت ..
نايف زاغ ماعرف شو يسوي ووقف عند محطه بترول لقاها ع دربه ..
نزل اشترى ماي .. وفتح الباب اللي من الجهه الثانيه عشان ريم كانت متسنده ع بابها .. عطاها الماي لكن ايدها كانت بعدها ع ويها وتصيح ..
.. نايف ماعرف شو يسويلها
نايف: ريم ؟ ريم شو فييج ؟ بطلي ايديج انزين اندوج اشربي الماي

لكنها ماترد عليه .. اضطر انه يمسك ايدها .. قبض ايدها وخوزها من ويها .. كانت محمره واايد .. فتح غطاة الدبه وعطاها الماي تشرب

نايف: ريم شو فيج.. خوفتيني عليج .. ريم .. انزين ردي عليه شو فيج؟

ريم بعد ما استوعبت انه ايدها فايده .. اطالعته .. وردت تشوف ايدها وسحبتها ع طول ..
نايف: اردج المستشفى ؟ تعبانه شي يعورج ؟؟
ريم: ردني وين بتردني .. المهم انت بعيد
نايف عقد بحياته شو بلاها هاي ..
نايف عدل بيلسته: اانا اسف .. بس والله شوفي شكلج كيف .. والله خفت انه صايرلج شي
ريم وخت براسها .. ورجعت تطيح دموعها وهيه تتنفس بسرعه ..
ماتدري ليش ها الوقت بالذات تذكرت الايد ..
ريم: ماشي .. بس راسي يعورني واايد
نايف: يبين عليج وايد تعبانه
ريم: ابا اروح ارتاح
نايف: خلاص انزين مسحي دموعج ..
ريم: ردني الفندق بسرعه
نايف : ان شاء الله ..

نزل من السياره وركب يسوق مره ثانيه وهو خايف ومستغرب في نفس الوقت .. تم يسوق وكل شوي يشوف ويها من الجامه ويسمع صوتها كل شوي وهي تصيح
الشي اللي خلاه يتوتر وايد وفي نفس الوقت قلبه عوره ع شكلها ...

وصلوا الفندق وريم نزلت قبله لكن تلاقى وياها عند اللفت لين فتح وركبوا وبعد كانت واقفه بخووف ومتسنده لين وصلوا .. ودموعها بعدها ماوقفت ..

دقت باب جناحهم اللي كان حذال جناح قوم نايف .. وفتحت لها الباب ساره ..
دخلت ريم وشافوا ويها احمر من الصياح .. ونايف وراها

ساره: بسم الله ريموه شو بلاج ؟
دخلت ريم الغرفه عنهم وهي تصيح
مي شهقت : لايكون امايه فيها شي ؟
ساره بطلت عيونها وهي تشوف البنات: لاااا ..لااا ..
لطيفه تجدمت لأخوها تبى تعرف شو صاير .. أما البنات ترابعن صوب حجره ريم وهن خايفات من اللي بتقوله ريم .. خايفات انه شكوكهن تكون صايبه وتقولهن انه يدتهن عطتهن عمرها ..
لكن حمدن ربهن انها بخير وكل وحده حاطه ايدها ع قلبها من كثر الزيغه ..

وبرع فالصاله .. بعد ما طمنت لطيفه على يدتها..

لطيفه : شو مستوي نايف ؟ دام امايه مافيها الا كل خير شحقه ريم جيه؟
نايف: مااشي
لطيفه: يلا عاد نايفه ها كله وماشي
نايف بتردد : ممم تعالي جناحنا بخبرج .. اسوم وين ؟
لطيفه: توها سايره اهناك تطالع نواري
نايف: طوفي انزين

ريم كانت طايحه ع السرير بعباتها وشيلتها ومتاكيه ع المخده ..وخوتها يالسات حذالها ومب عارفات شو فيها ..
ساره: انزين خبرينا شوووفيج
ريم بتعب: ماشي
مي: قولي ريم والله تقولين دام امايه بخير ليش شكلج جي.؟
ساره: مايكون تقصون علينا وفيها شي امايه!!!
ريم: والله مافيها شي نشت رمستني عادي
ساره: عيل ليش تصيحين ؟
ريم: لاني تعبانه ومصدعه
مي: قولي والله عشان هالشي بس وامايه مافيها شي
ريم: اوووف قلتلكم والله مافيها شي والله.. فكوني عاد
ساره: وليش يايه ويا نايف
ريم اهنه حست بالم مره ثانيه في راسها ورجعت تصيح
مي تقربت منها وشلت عنها وقايتها وساره يابتلها ماي وهم مايعرفون شو فيها
شربت ريم الماي وفصخت عباتها وطاحت .. لحفوها وعطتها مي مسكن وسكروا عنها الليتات عشان ترقد وترتاح


دخل نايف جناحهم ويلس ويا خواته في الصاله

لطيفه: انته يايب ريم ؟؟
نايف: هيه
اسما: ايواا يا وااد
لطيفه: اسوم سكتي ويا راسج خوانج بيسمعون
نايف: اسموه سيري هاتيلي كوب ماي
اسما: قولي اسموه روحي.. ادريبك تبى ترمس لطوف
نايف اطالعها وابتسم: انزين روحي وهاتيلي ماي بعد
وقامت اسما من عندهم ورد نايف يشوف لطيفه اخته وفعينه اسئله .. ورمسوا بصوت واطي ..
لطيفه: شو بلاك نايف .. وليش انته رادنها شو السالفه بلاها تصيح
نايف: ماشي .. امايه قالتلي اردها لانها كانت تعبانه .. بس
لطيفه: بس شوو
نايف: لطيفه .. ونحن فالسياره ..
لطيفه: شووو سويت
نايف: بسم الله شو بسوي يعني .. ماشي .. ريم ياها صداع احمر ويها وصرخت زغت عليها مادري شياها

يت اسما وهي فايدها كوب الماي عطته اخوها وردت الحجره والانظار عليها لين اختفت وبعدين لطيفه لفت ع نايف ..

لطيفه: ردلها ها الصداع؟؟!
نايف: ليش هي شو بلاها؟
لطيفه: ماعرف يا نايف.. مادري مرات ونادر ها الشي اتم ريم جي يعني اييها صداع هي بروحها ماتعرف من اشو ..
نايف: لطييفه كان شكلها غيير .. مثل وحده مرعوبه وتصيح ومحطيه ايدها ع ويها
لطيفه: اكيد لانها كانت بروحها وياك
نايف: وهذا شو يخصه ؟
لطيفه: ريم ماتقارب الرياييل وساعات تخاف منهم.. الا اللي تعودت عليهم
نايف: كيف يعني ؟!
لطيفه: اممم ريم من هي صغيره .. وخص من خالي وامها اطلقوا .. تكره الرياييل .. يعني ماتحب تقااربهم مووول
نايف: عشان جي يعني اييها ها الصداع؟
لطيفه: والله مادري يا نايف .. ماطاعت تخبرني ليش ها الصداع اييها ..
نايف: عيل كيف بتوافق عليه يوم هي ماتقاااارب موول
لطيفه: عاد انته وشطارتك .. اتقرب منها وبتكسبها .. ريم قلبها رهيف وايد .. بالطيبه صدقني بتكسبها
نايف: مادري والله .. بس لطوف بيني وبينج
لطيفه: شوو
نايف: ريم عايبتني ..
لطيفه ابتسمت: قلتلك بتعيبك
نايف: بس غامظني حالها .. والله خالي ما سوى خير فيهم .. انا اتذكره يوم طلق امهم .. احس ظلمهم وايد
لطيفه: وانا وريم بعد نتذكر ها السوالف .. عشان جي تلقاها هي متأثره وايد .. بس فديتها ع كل اللي شافته من ابوها .. الحين عادي وجنه شي ما ستوى.. صح ما ترمسه وايد .. بس احس قلبها مب حااقد
نايف: يوم ريم جي عيل مابالج بامهم ..
لطيفه: طالعه على امها هيه ..
نايف: حليلهم .. خلاص عيل انا بقوم ارد المستشفى .. محد هناك عندهم .. وخلوا ريم ترتاح وعقب يوم خالي بيي المستشفى تعالن انتن وياه
لطيفه: خلاص اوكي ..
نايف: طمنيني عليها انزين
لطيفه: خلاص صار..

وطلع نايف من الشقه .. ولطيفه ردت للبنات .. بس شافتهن في الصاله يالسات لانه ريم طاحت بترقد ..

********************
(الثلاثاء) 3 أغسطس 2004
********************

الساعه 12 الظهر دخلت عبير ويا بناتها الصاله .. القت التحيه على ام راشد وعليا اللي كانن يالسات فالصاله يسولفن ..
يلست عبير وحطت الاغراض حذالها.. احلام بعد فرت الاكياس وع طول طاحت ع الغنفه ومدوي تربعت تحت تبطل الجوتي..

ام راشد: ماشا الله شو متشرين هالكثر ؟
عبير: رحت خذت قطع المدارس للبنات وجواتي..
احلام:اففف يا الحر .. هلاك برع ..
عليا: هههه اشوفج منبطحه تحت ضربة المكيف..
احلام: سكتي يا عموووه هلكت من هالوقايه والعباه
عبير: وان شاء الله تبين تفصخين العباه
احلام: لا ماقلت انا امبوني من لبستها ميوه وأعزر عليكم تفصلولي عباه
عليا: هههه قنوعه حلامي.. فديتها والله..مها ومهره اباهن يلبسن الوقايه ومب طايعات..
عبير: انزين التوم بعدهن صغار
عليا: يالله وين صغار .. سايرات ثالث اعدادي بس دلعتهن وايد ..
عبير: هههههه فديتهن والله احجامهن صغيره اللي يشوفهن يقول انهن اصغر عن مدوي ..
عليا: ترا عشان جي يشوفن الناس معتبرينهن صغار .. بس انا شارطه عليهن خلاص من عقب ها الصيف يبدن يتعودن ع الشيل
احلام: مدوي والتوم مدلعات انا متحجبه من اول مادخلت ثاني اعدادي
عبير: انتي بروحج عزرتي تبين وقايه وعباه نفس ميوه
احلام: ههههههه حليلي ..

ونقزت احلام من بعد ما تبردت وشلت اكياسها ويلست حذال عمتها عليا عسب تراويها شو خذت ..
عليا: زين والله خلصتوا شي ع الاقل.. مها ومهره ماخذتلهن شي..
مديه: عموه يوم بيون بنسير نتشرى بعد كلنا .. اباهم ياخذون مثلي
عليا: ههههه لازم يعني
مديه: هي كل سنه نطقم نحن وعاد هاي اخر سنه الهن فمدرستنا عقب بيسيرن ثانويه ويا احلاموه..
احلام: هي بين عندي عقب.. يالله يا الدنيا انا كنت اطقم ويا ميوه حتى لو كنا مب نفس المدرسه.. عاد تخرجت محد عندي اطقم وياه
عبير: طقمي ويا اختج ومها ومهره
احلام: لا حشى عليه ماطقم ويا يهال
ام راشد: يالله مها ومهره اصغر منج بسنه .. وين يوا يهال
عبير: هيه الا هاي احلام تكبر عمرها
احلام: ههههه والله مب من شي .. اللي مرابعتنهن اكبر بثلاث واربع سنين عني ..
عليا: ههههه عاد منو مرابعه مي وساره المخبل
ام راشد: حليلهن تولهنا ع خراشتهن..
عليا: بيون ان شاء الله جريب..
ام راشد: زين زين ..عليا صبيلي فنيان قهوه .. بشربلي فنيان وبقوم اتيدد
عليا: ان شاء الله اميه ..
وعبير ها الوقت سألت عليا..
عبير: فجر مايت الصاله عندكم ؟
مديه: ليش تي ؟ تلفزيون وثلاجه في الحجره شو تبى تطلع منها بعد ..
عبير التفتت صوب مديه واطالعتها بنظره ومديه طنشت وقامت ترجع الاغراض اللي طلعتها من الاكياس ..
عليا: لا مول ماظهرت
عبير:اها.. انزين احلام قومي ودي هذا الكيس لفجر
ام راشد: ماشا الله شو شاريلها ؟
احلام: ستر
ام راشد: هاه ؟
عبير: عمتي هذي دراريع لفجر ..

عليا ابتسمت لاحلام.. عرفت شو تقصد بالستر .. تقصد شي طويل وواسع وساتر تلبسه فجر في البيت .. شلت احلام الكيس وسارت توديه وهي قاصده انها تنرفز فجر ..
دقت باب الحجره ودخلت لقت فجر واعيه وتوها طالعه من السبوح يالسه تنشف شعرها ..

احلام: سلملم
فجر: خير
احلام يلست ع الغنفه وشلت جهاز التلفزيون وشغلته
فجر التفت لها معصبه : خير اشعندج .. وليش قاعده ماقلتلج قعدي
احلام: اعرف .. بس الغرفه غرفه بنات عمتي والتلفزيون تلفزيوني
فجر: احلاموه توني قاعده من النوم مالي خلقج
احلام: وانا بعد يايه من السوق حرانه والشمس ظاربه في خمرت راسي ومب فاضتلج ..
فجر وطت السشوار من ايدها وتجدمت من احلام ..
فجر: شعندج في هذا الكيس ؟
احلام: هذي هديه شارينها لج لكن شكلج ماتبينها فاقوم اشلها واروح احسن
قامت احلام وفي ايدها اكياسها
فجر: شو فيج احلاموه زعلتي ؟ انا اتغشمر معاج
احلام: والله ؟ تعرفين اتغشمرين انتي ؟
فجر: احلامووه
احلام: خلاص خلاص طالعه ولا ايمهج
لحقتها فجر : خلاص عاد بلا ملاقه .. شنو بالكيس
احلام وهي تطالعها : هذا طال عمرج اسمه ستـــر
فجر: شنو؟ شنو هذا بعد ؟
احلام: انا بعد قلت اكيد انتي ماتعرفينه .. بس لازم تعرفينه مدام انج موجوده اهنه
فجر: انزين شنو هذا اكل اماراتي والا شنو بالضبط
احلام: تعالي يلسي بخبرج .. هذا طال عمرج مب بس في الامارات هذا منتشر في كل مكان للي يبى .. لكن يوم تين الامارات وخصوصا هالبيت تكونين غصبن عنج تبينه مب بكيفج
فجر يرت الكيس من ايد احلام اللي كانت تبين ملامحها عاديه وفي داخلها بتموت من الظحك ..
فتحت فجر الكيس ولقت فيه كنادير و شيل بيت
فجر: هذي دراريع ؟
احلام: وهذيج شيل بيت نفس لون الكنادير .. عشان تكشخين وتطقمين يا خالتي العزيزه
فجر: نعم ؟ هذي لي انا ؟
احلام: هيه نعم هذا الستر اللي الله امرنا فيه .. تستري مب بكيفج غصبن عنج مدامج انتي في هالبيت.. ويوم بتزولين بيتكم والا أي مكان سوي اللي تبينه نحن عندنا ريايل في البيت وحشام مب على اخر عمرهم تي وحده مثلج تفتنهم ويستاثمون من وراها .. واولهم ابويه ..
فجر من غيظها فرت احلام بالكيس اللي في ايدها و نشعتنها من شعرها وهيه تصارخ عليها
فجر: اذا اهلج ماعرفوا يربونج انا بربيج ياقليله الادب .. هذا الحجي تقولينه لغيري مو لي انا تسمعين
احلام: جب يالخااايسه فجي شعري الله ياخذج
وبدن فجر واحلام يتظاربن لين تعالت حسوسهن ووصلت للصاله
عبير: يمه شنو هذا الصوت ؟
عليا: تلاحقي بنتج مايكون تظاربت ويا خالتها

ركضن مديه وعليا وعبير صوب الغرفه وشافوا احلام تضرب فجر والعكس..
عبير حاولت تحايز بينهم ودزت احلام على عليا

عبير: شو فيكم شو صاير
فجر: هذي بنتج قليله ادب وماعرفتوا تربونها
عبير: فجر بنتي انا مربيتها زين لاتقولين هالكلام شنو سوت لج؟
فجر: خليها تقولج هاي اللي يبيلها قص لسان
عليا: استهدوا بالله ياجماعه الخير لاتمون جيه .. فجر فديتج شو مستوي شو مسويه احلام
فجر: مو شغلج ..

عليا اطالعت فجر وهي معقده حياتها من كثر ما هي مستغربه من رد فعلها.. ماحبت انها تقول اي كلمه لانها مب عوايدها تسب او تشتم

عليا: يزاج الله خير ..

[لامارا]

وخذت بنت اخوها احلام اللي كانت تصيح في حظنها وودتها وياها الحجره وسارت وياهم مديه .. اما عبير تمت ويا اختها
وفجر سارت طلعتلها ماي من ثلاجتها وشربت تبى تبرد على عمرها .. وتمت يالسه على الكرسي

عبير : هذا رد تردينه على عليا يا فجر ؟
فجر: انا ماقلت شي غلط صج اهي مالها شغل تتدخل بينا ان شا الله اكسر راس بنتج اهي مالها دخل
عبير: لا ماتكسرين راس بنتي ..اهي شنو مسويتلج .. يا فجر انا تعبت خلاص .. دايما احاول اسوي اللي يرضيج واهملت بناتي بس عشانج ليش ماتحسين عاد وتخلينهم في حالهم ..
فجر: وليش اهما مايخلوني في حالي .. ليش يايبيلي هالدراريع والشيل اللي معاهم وتقولي بنتج والله نحن شرينالج ستر .. هذا كلام تقوله
عبير: فجر مابي ازيد في الكلام لاني صدعت لكن هذي الملابس لازم تلبسينها مدام انتي في هذا البيت لكن برع البيت سوي اللي تبينه والله يهديج

طلعت عبير ومافكرت حتى تمر تشوف احلام سارت غرفتها وتمت تصيح اللي كانت تخاف منه.. يستوي جدامها وماتعرف تتصرف فيه .. شلت تلفونها واتصلت بمحمد

محمد: الوووه ؟
عبير: وين انت ؟
محمد: انا في الدوام شو فيكم
عبير: تعال شوفلك صرفه انا تعبت وانته مشغول عنا ومالك شغل بشي
محمد: شو مستوي ؟
عبير: فجر واحلام متهاوشات
محمد: مب شي يديد
عبير: هالمره فيها طق يا محمد واحلام اللي انطقت
محمد: نعم ؟؟ وفجر ليش تضرب احلام ؟
عبير: لانه بنتك ماتسكت تتحرش فيها
محمد وهو مغيض: انا بنتي ما مديت عليها ايدي يوم صغيره.. ايي حد ايمد ايده عليها احين يوم كبرت!!
عبير: انا مو عارفه شسوي هذيج اختي وهذي بنتي وانا بنتي ماحب انه يصير فيها هالشي وفي نفس الوقت ماحبها تطول لسانها ع اللي اكبر منها
محمد: عبير حلي هالمشكله بعيد عني الله يخليج لاني والله ان تدخلت مابيصير خير وانا من احين اقولج .. الدنيا كلها في صوووب وبناتي في صوووب ثاني ..

وسكر التلفون ورجعت عبير تصيح
بغته عون صارلها فرعون .. محمد طيب فوق الحدود لكن طيبته توصل حدها اذا كانت ضد بناته .. كله ولا ها البنتين .. ما بغى يتدخل فالموضوع لانه مايبى يجرح عبير بأي فعل أو بأي قول بسبب اختها فجر ..

أما احلام من بعد ما طلعتها عليا من عنج خالتها يلستها عندها فحجرتها .. يتهم ام راشد الي كانت خايفه ومب عارفه شو مستوي .. طمنتها عليا انه مافي شي .. وسارت ام راشد تصلي فرضها .. وتمت عليا تربت على ظهر احلام اللي كانت تناهي من صياحها ..

عليا: بسج احلام قطعتي فوادي
احلام: يعلني بلاها ها الخايسه
عليا: احلام لاتمين تسوين جيه خبريني شو استوى
احلام : وديت لها الثياب اللي اشتريناها لها وقلتلها مدام انتي في البيت لازم تحترمين اللي فيه وتحتشمين بلبسج غصبن عنج
عليا: يعني انتي تحرشتي فيها
احلام: انا ماتحرشت فيها بس انا استحي من اهلي والسبه هي .. هاي فظيحه مروان والشباب كلهم قطعوا ييه البيت اهنه والسبه انها تيلس متكشفه تتحراها وكاله من غير بواب .. حتى عمي مانع اللي نترياه اربعا وخميس أيي عسب نشوفه وييلس ويانا خفف من يلساته ف البيت.. ايسير بيته ع طول ولا ييلس هنه ويانا.. شو تبى تحرمهم من اليلسه ويا اهلهم هيي..
عليا: مديه قومي هاتي لاختج ماي
مديه: ان شا الله
نشت مديه يابت ماي لاحلام وعطتها اياه .. رشفته احلام مره وحده من كثر عطشها ..
عليا: بس خلاص يا احلام .. هدي ..
احلام: شو بس عموه.. هاي اليوم مدت ايدها وظربتني .. باجر مادري شو بتسوي
عليا: احلام لو في خاطرج شي قولي لامج تقولها ولاتسيرين انتي الها ولا تسببيلها
احلام: اميه ؟ وين ثرها اميه تسمعلنا احين ؟ كله لفجر ولاتقولون لفجر وسوو لفجر..والله عفنا السالفه .. هذا وهي بعدها من اسبوع يايه ..
عليا: شو بنسوي .. ترا امج لازم تعتنيبها اهنه.. محد وياها..
احلام: و بعدين اميه قالت اوديلها الكيس
عليا: احلام هي قالت ودي الكيس ماقالت تحرشيبها
احلام: الله يغربلها الخايسه قطعت شعري ... بس وين بتسير والله لاراويها
عليا: احلاااام بس عاد
احلام: والله ياعموه هاي شو بتسوي يوم بيون بناتج بتفظحنا يعلها ان شا الله
عليا: تبين الصدق احلام انا بناتي ممكن اضمن انهن يطنشنها ومايردن عليها لكن الخوف من ساروه وميوه اللي بييلسن وياها في الحجره .. ادريبهن مايسكتن عن حد يوم يدتهم ما سلمت منهم اول ما نتقلوا عندهم .. ومرت ابوهم مب سالمه منهن.. وين فجر ..
مديه: احسن خل يروانها
عليا: هذا بدال ماتقولن بننصحهن مايخصن بها تقولن جيه انا هالحجره ماعاد فيها مكان من الاسره والا كنت بييبهم اهنه .. بس انتوا ادرى البيت صغير ومايكفي
مديه: لاتيبنهن ولا شي هذيج غرفتهن من طلعنا نحن ع الدنيا مابتي احين هاي تاخذها عنهن ع البراد
عليا: اخ يابنات محمد عنيدات ماينقدرلكن .. قومن تعوذن من بليس وتيددن للصلاه احين اذن الظهر .. ولاتقولن لابوكن شي من احين اقولكن.. مافينا يتم معصب ويعق حرته على امكن هالفقيره كم بتتحمل ..

سكتن البنات ونشن سارن غرفتهن وكملت احلام مناحتها اهناك من كثر ماهي مقهوره .. وقررت تلبس ثيابها وتسير بيت عمها راشد تيلس عندهم لانها عايفه يلست البيت ..

****

هالوقت كانوا الكل يالسين في المستشفى عند يدتهم .. ناموا البنات طول الليل لين الظحى وعوضوا التعب اللي ياهم من عقب اليلسه فالطياره .. واول ماقاموا كلهم يوا المستشفى عند يدتهم .. سيف ودى بناته ونايف لحقهم بخواته..


في غرفه اليده كانوا كلهم يالسين وياها ما عدى مهره ومها وجاسم ومايد اللي كانوا يالسين في الصاله يسولفون ويا عمار لانهم امس ما يلسوا وايد مع بعض ..

ساره يلست على سرير يدتها والباجين كانوا ع الكراسي ..
ساره: هاه امايه شو انتي احين ؟
ام سيف: مادامني اشوفكم انا بخير
لطيفه: يـيه يالدنيا .. اليديد حبه شديد .. ولينا نحن .. ولى زمن عيال مريم الغالين
ساره: لو سمحتي انسه لطيفه .. نحن عيال الولد .. في فرق .. خصوصا عند امايه عفرا .. الولد عندها اهم لو تنهد بلد ..
ريم: ساروه مب وقته هالرمسات احين ..
ساره صدت على يدتها وهي تظحك : امايه امايه ... امايه
ام سيف: ياويلي انا هالزقره مادانيها
ساره: انزين امايه .. ههه .. بسالج .. انتي فيج عرج من ايام الجاهليه ؟
مريم: هههه بس ساروه يوزي عنها حرام عليج
ساره ردت تشوف يدتها اللي كانت تظحك عليها : زعلتي العيوز ؟
مي: فقتج يا ساروه .. بالله عليكم قوموها .. عنبو من يينا وانتي موازره امايه .. خوزي خلينا نيلس نحن شوي نسولف وياها..

ام سيف ومريم يظحكون عليهم .. مريم ماتعرف طبايع بنات اخوها زين وكل يوم تكتشف فيهم الاشيا اللي خلت امها تتعلق بهم .. شفافات واللي في قلبهم على لسانهم .. وطيبات وايد .. هي نفسها تعلقت فيهم..
نشت ريم وسارت المطبخ اتييب الهم عصير .. ولحقتها على طول لطيفه ..

لطيفه: شو تسوين ؟
ريم: بودي عصير حقهم .. الثلاجه ممزوره عصاير
لطيفه : منو يايبنها ؟
ريم: المستشفى بروحهم ..
لطيفه: هيه ماشا الله .. انزين شو انتي احين؟.. اهون عنج الصداع الامسي ..

ريم كانت موخيه تطلع العصاير من الثلاجه وتحطهم في الصينيه .. لكن وقفت يوم سالتها لطيفه وعقدت حواجبها كأنها تذكرت شي ..
ريم: بخير
لطيفه: انزين ليش رجعلج الصداع
ريم: كنت تعبانه
لطيفه: بس عشان تعبانه !
ريم نشت وشلت الصينيه وحطتها ع الطاوله : هيه بس ..

وطلعت على طول من المطبخ وسارت تودي العصاير حق اخوانها اللي كانوا فالصاله ويسولفون .. وعقب ودت الباقي ليدتها وعمتها والبنات.. وفي نفس الوقت دخلت النيرس وهي يايبه غدى ام سيف ووجبتين زياده.. ويلست حذالها ريم ..

ام سيف: بسني امايه ريم شليه انا ماداني الدياي وايد ..
ساره: شو بسج امايه الله يهداج عاد من زود اللي يايبينه .. لقمه صغيره وقطعه ديايه .. قااصين عليج بها .. شو رايج انا اسير اييبلج مجبووس سمج من برع تاكلين صبوعج وراه
مي: من ويين بتيبينه ؟
ساره: من المطعم
ام سيف: لا لا اذا انتي بتطبخينه انا اباه والا غير جيه مابا
ساره: هاه ؟ اسوي مجبوس سمج .. تدرين امايه يقولون العيش والدياي هذا احسن لصحتج ..
مريم: هههه انتي لمنو طالعه جيه
اسما: مب بروحها هاي جيه .. (وتطالع مي ) هذيج لاحقتنها بس شكلها مسطله احين
مي اللي كانت متربعه ع الكرسي انتبهت انه الرمسه عنها وضحكت
مي: يبووج انا مب مسطله.. بس تبون الصدق يوعانه
لطيفه: ييتي ع العوق انا توني بقول ميته يوع
مريم: انزين سيروا تغدوا
اسما: وين نتغدى بعد
هالوقت دخل جااسم الغرفه على يدته وشافها تتغدى
جاسم: ايييه
ريم: بلاك ؟
جاسم: ليش تاكلون عني انا يوعان
ساره: هكوه ياكم هذا بعد
ريم: قوم سير كل فطاير بتلقاها في المطبخ صبر عمرك لين تسير الفندق وهناك بتاكل
جاسم: انزين نسيت اقولكم .. نايف برع بيدخل
مريم: خل يدخل محد اهنه ..

طلع جاسم يزقر نايف .. وكل الانظار من اسما ولطيفه ومريم كانت متوجهه على ريم .. اللي تمت عاطيه الباب ظهرها وتعطي يدتها الاكل .. بهدوء ..

نايف: السلام عليكم ..
تقرب من يدته بيسلم عليها.. بالعمد وقف حذال ريم وهوى على يدته وحبها ع راسها الشي اللي خلا ريم ترتبك وايد بسبب قرب نايف منها ..من توترها طاحت الشوكه من ايديها ..
نايف ماحاول يوخي واييب الشوكه بس قالها " سلمتي "
وابتعد عنها عشان تيبها بروحها وصد للبنات
نايف: اشحالكن بنات خالي ؟
مي: بخير الله يسلمك ..
ريم قامت تغسل الشوكه ورجعت تعطي يدتها الاكل وهي بعدها ملتزمه هدوءها
مريم: من وين ياي انته ؟
نايف: سرت شوي الاقي واحد من الشباب ..
اسما: عيل ابويه وين؟
نايف: ويا خالي سيف .. مادريبهم وين ..
مريم: انزين زين يوم انك ييت قوم شل خواتك وعيال خالك ودهم يتغدون يواعى
نايف: جان قلتولي انزين بييبلكم غدى
اسما: لا لا مانبى .. نبى نتغدى برع ..
نايف: هيه عاد انتي تبينها من الله..
مريم: قوم ودهم فديتك .. ماكلوا من اصبحوا حليلهم ..
نايف: انزين بتضمهم السياره ؟
مريم: هيه ماعليه بيرتصوون .. سيارتك عوده ..
نايف: وين اوديهم انزين ؟
لطيفه: نبى نسير قصر الهند
نايف: تتشرطين بعد ؟ لا ماشي بوديكم الفندق وبييبلكم انا غدى
ام سيف: ودهم شوي بيتفرجون عن خاطرهم ..
لطيفه: هيه حليلنا نحن ماسرنا مكان هالاجازه ..
بنات سيف كانن ملتزمات الصمت .. مستحيات من ولد عمتهم وما جد تعاملوا وياه على عكس عيال اهل امهم ..
نايف: انزين قوموا يالله .. يلا نواري تعالي
وربعت نواري لنايف ويلسها ع ريوله وتمت متعلقه برقبته وترمسه..
مريم: قومن ساره ومي وريم يالله قولوا لاخوانكم وسيروا كلكم..
ريم: انا مابا اسير بيلس اهنه
نايف اهنه رفع نظره لها .. وهي ماصدت صوبهم ابدن ..
مريم: بزعل منج ياريم ان ماسرتي
ريم: انا مب يوعانه خواتي بس خل يسيرن
لطيفه: شو كلتي بعد عشان تشبعين .. ماشي يالله قومي ويانا
ريم: مابا اسير انا مب يوعانه ..
مريم: ماعليه يعني انا ازعل ؟
ريم: عموه ماباج تزعلين بس والله مابا اسير
لطيفه: ان مانشيتي تسيرين ويانا نحن كلنا مب سايرين

ريم شلت الصينيه من عند يدتها عقب ماخلصت اكل وسارت توديها المطبخ وهي متضايجه .. لحقنها مي ولطيفه..

لطيفه: ريم تعالي ويانا ليش ماتين
ريم: انا مابا اسير هاكم يايبين اهنه وجبتين زياده لي ولعموه ..
مي: قومي عاد ريم ما بنتاخر بنتغدى وبنرجع لامايه ..وهي بخير الحمدلله ماعليها شر ..
دخلت مريم عليهم المطبخ هاللحظه: يالله قوموا هاكم طلعوا الباجين وانتي يالله وياهم يا ريم والا صدقيني بزعل منج ..
سكتت ريم وماقدرت تجادل اكثر .. طلعت من المطبخ قبلهم ولبست عباتها..لحقنها لطيفه ومي ولبسن هن بعد عبيهن ولحقوا الباجين اللي كانوا عند اللفتات يتريون..
و ركبوا كلهم في سياره نايف .. وتوجهوا للمطعم..
اسما: نايف طول .. طول على هاي الاغنيه احبها ..
نايف قام وقصر على الصوت ..
اسما: نااايف عاد
وغير نايف الاذاعه وطلعت اغنيه ثانيه ..
اسما: اووف بدل عنها هاي لوعه جبد
قام نايف وطول على الصوت زياده .. وتظاحكوا كل اللي في السياره على نايف وحركاته ويا اخته .. الا ريم اكتفت بابتسامه وهاي كانت بشاره خير بالنسبه للطيفه اللي كانت تراقبها بوجود نايف ..

****

هالوقت كانت احلام يالسه بيت عمها راشد .. فالصاله كانت ميره يالسه ويا عيالها.. مروان يقرى الجريده وفارس طايح ويلعب بتيلفونه.. كانوا يتريون ابوهم ايي عسب يحطون الغدى..
اما احلام فكانت فحجرة عزه .. وتشكي الحال لعزه عن السبب اللي خلاها تطفر من البيت..
عزه: انزين انتي شو تبين تحطين راسج براسها
احلام: ياربي شو احط راسي براسها حد يروم يحط راسه براس هاي .. والله انها تقهر..
عزه: مادري والله.. بس اتعرفين انا ماسرت بيتكم من يت هيه الا مرتين واشوفها عادي ساكته ماترمس.. اصلا ماتي تيلس ويانا!
احلام: ماعليج منها والله انها عقرب بس صدق انا ماتهمني هيه كثر ماهامتني اميه .. ماتعرفين كيف اميه مستويه .. نحن اللي دوم غلطانات .. نحن اللي لسانا طويل ونحن اللي مانحترم اللي اكبر منا.. لدرجه انها قامت تشوفني انظرب وماتقول شي ..
عزه: وعمي محمد مايدري بشي؟
احلام: اميه بتزعل منا اذ قلناله شي .. تدري انه ابويه مابيسكت عن الوضع
عزه: بس بعد عبير لازم ماتسوي جيه ..
احلام: شو بتسوي يعني.. ابسط شي اليوم كفختني فجر ولا قالت شي .. انا والله لو بنات عموه اهنه جان انا مافتكرت فيها مووول لكن شو اسوي يوم انهن محد
عزه: انزين انتي تعالي ايلسي عندنا ها اليومين لين اين بنات عموه.. وباتي عندنا
احلام: ماعرف.. اصلا هي ماترقد ويانا فالحجره عادي يعني .. بس انه وجودها في البيت يقهرني .. واللي يقهر اكثر انها تطلع جدام ابويه لا شيله ولا شي .. انا اغااار عليه ..
عزه: هههههه.. شو بعد تغارين على ابوج.. المفروض عبير اللي تغار
احلام: انا اغار على ابويه وعمامي وحتى على اخوانج وعيال عموه شيخه..هاي غيره اخويه
عزه: هههه عاشت والله احلام
احلام: هي والله صدق .. مابا هاي على اخر العمر تي تخرب شي في هالبيت
عزه: احلام شو هاي الافكار بعد..انتي شو فبالج بالضبط!
كانت احلام ناويه ترمس .. بس سكتت وتراجعت ..
احلام: ماشي انا من غيظي بروحي اخربط ..تعرفين يبالي ابات عندج اليوم عادي؟؟ ابا احسس اميه بالذنب شوي عالاقل..
عزه: هيه اكيد تعالي حياج الله انا بروحي تراني اتيلس ..
احلام رمست بخبث وهي تضحك: عاد يبالي اييب سدادات اذن ويايه
عزه: ليش بعد ؟
احلام:ههههه اكيد تهذربين طول الليل ويا ريلج..يعني اسد اذني وافتك من الصدعه احسلي ..
عزه: هههههه يا الهرمه .. اويه ذكرتيني الريال مرقد لين الحين وقايللي اوعيه حق الصلاه ونسيييت
احلام: ويين الحين بتي الساعه وحده .. الا هو شو مرقدنه ماعنده دوام ؟
عزه: لا اجازه كان قابض زام البارحه ..
احلام: تلاحقي عمرج عيل

وقامت عزه ادق لفيصل تشوفه وعى ولا .. ولقته واعي ومسوي عمره زعلان منها .. واحلام تشوف بنت عمها وهي ترمس ريلها وتضحك عليها .. مستوي لونها احمر من القفطه كيف انها نست ماتوعيه ومتلومه منه وايد ..
وردت فبالها سالفتها ويا فجر وردت ضيجتها اللي تحرتها بتفارقها وهي بعيد عن بيتهم .. وظهرت عن عزه وسارت الصاله .. ويلست ويا الموجودين..

مروان: انتن شله متخبيات داخل
احلام: حرام يعني نسولف
ميره: شتبابهن انته
مروان: هههه ماشي بس احب اغصص على احلاموه
احلام: هي ناقصتنك انا
ميره: جي بلاج
احلام: لا ماشي .. عمي مايا لين احين
مروان: بعده

ورد الهدوء فالصاله .. بس انفتح موضوع .. واللي فتحه ها المره فارس.. رمس فارس لكنه كلامه كان موجه لامه يرمسها عن سالفة الدراسه وانه الاسبوع الياي بيسير ويا خليفه يسجل فكلية الاتصالات..احلام كانت تسمع مناقشه فارس وامه ومداخلات مروان وهي ساكته ..
يلست تنقل نظرها من مروان لفارس .. ملامحهم مايخصها فبعض.. شخصياتهم بعد .. مروان اجتماعي وحبوب .. فارس مايخصه بالناس.. خجول .. حتى اليلسه ويا بنات اهله ما يلسها الا نادر ..
وردتلها الذاكره ليوم هم الصغار.. ماتذكر زين .. لكن اللي تذكره انه كانوا وايد يلعبون ويا فارس ومنصور ..
وتذكرت مروان كيف كان.. مايحب البنات يلعبن وياهم .. ودايما يتزعم الاولاد ..
يت فبالها مي .. متى تعلقت هيه فمي! من دشت مي الاعدادي ماقامت وايد تيلس ويا فارس ومنصور .. ها الفتره تمت فيها احلام متعلقه مي ..
ابتسمت على ها الذكريات اللي يت فبالها .. وتزامن رجوعها لارض الواقع ييت عمها راشد ..

****

في المطعم كانوا العيال في غرفه فيها طاوله دائريه كبيره تظم عدد كبير من الكراسي .. طلبوا الاكل وييلسوا ياكلون المقبلات لين توصل طلبيتهم .. ولطيفه في هالوقت كانت يالسه حذال نايف .. وتنغزه عشان يبدى يسولف ويا بنات خاله عشان ياخذون عليه ومنها يحاول يجذب ريم شوي ع الاقل بس عشان ترفع راسها صوبهم .. من يلست ونظرها كان بس ينتقل على اخونها وعلى الصحن اللي جدامها .. نايف رمس اخته بصوت واطي .. يقولها صبري عليه لين ما افتح سالفه ارمسهم فيها.. ماعرف شو يقول لكن دارت فباله كم نكته ..

نايف: جاسم
جاسم: هاه
نايف: بقولك .. واحد ميت ميت من اليوع شو سوى ؟
جاسم: شووو ؟
نايف: كلى ..
جاسم : ها ها ها بايخه ..
نايف: انزين انزين بقولكم نكته لين يوصل الاكل..
مايد: يالله قول ..
وارتبشن البنات ..
نايف: في مره واحد كان يالس ويا ابوه وهو يحتضر .. وصاه وعطاه ورقه وقاله لاتقراها الا يوم تحس نفسك بتموت ..
جاسم: انزين
نايف: المهم الولد وعد ابوه .. ومات ابوه .. وروح الولد عند حرمته ..
اسما: وعقب
نايف: قالها ابويه توفى وعطاني هالوصيه وقالي ماتقراها الا يوم تحس نفسك بتموت وانا وعدته لكن انا فيني فظول ابا اعرف شو فيها ..
قالتله زوجته انا بقراها وبقولك شو فيها .. وانته بجي تكون صدق ماقريتها
عمار: اوكي وعقب
وكمل نايف وهو يبتسم ويشوف انه شاد انتباه البنات كلهم حتى ريم ولو انها ماتشوفه لكن ترفع نظرها ع الاقل شوي صوبه ..
نايف: قرت حرمته الوصيه بروحها وعقب ماخلصت قالتله احين احين تطلقني
قالها ريلها شو فيها الوصيه قالت مايخصني اقولك الحين تطلقني ..
لطيفه: ليش شو السالفه
نايف: المهم يا اخو حرمته .. وقرا الورقه .. وقاله الحين الحين تطلق اختي اقولك بسرعه .. وطلق حرمته وروحت ..
مهره: شوفيها الورقه ؟
نايف وهو يبتسم بمكر: نزل الريال حزين عند راعي البقاله .. ساله قاله شو فيك ؟ قاله ابويه توفى وعطاني وصيه قالي لاتقراها الا يوم تحس نفسك بتموت .. وانا عطيتها زوجتي تقراها وطلبت الطلاق .. ابا اعرف شو في الورقه لكني وعدت ابويه ماقراها ..
عمار: انزين
نايف: قاله راعي البقاله .. انا صديقك من سنين واعرفك زين وبحفظ سرك .. عطني اقراها وبخبرك شو فيها .. عطاه الريال الورقه .. واول ماقراها راعي البقاله قاله الحين الحين تعطيني الفلوس اللي على حساب الدكان بسرعه
قاله الريال شو فيها قاله راعي البقاله مايخصني احين تعطيني الفلوس اقولك والا ببلغ عليك الشرطه ..
لطيفه بانفعال: خبلتبنا شو فيها الورقه ؟
نايف: صبري انزين .. المهم يا الشرطي وسلم الريال الفلوس اللي عليه حق راعي الدكان وساله الشرطي شو السالفه ؟ قاله ابويه توفى وعطاني وصيه قالي لاتقراها الا يوم تحس نفسك بتموت .. وانا عطيتها زوجتي تقراها وطلبت الطلاق وعطيتها راعي البقاله وطلب حسابه واشتكى عليه .. ابا اعرف شو في الورقه لكني وعدت ابويه ماقراها ..
مهره: اوووف انزين وعقب
نايف: قاله الشرطي انا بقرالك شو في الورقه وبخبرك .. اول ماقرا الشرطي شو في الورقه .. قاله انته ماتيلس دقيقه وحده اهنه .. لازم تتحول للنيابه الحين
اسما: ليــش ؟
نايف كان يظحك وكمل : حولوا الريال للنيابه .. وساله الضابط انته شو سالفتك ؟
مي وهي متغصصه: قاله انا ابويه توفى وعطاني وصيه قالي لاتقراها الا يوم تحس انك بتموت .. وعطيتها حرمتي تقراها وطلبت الطلاق وعطيتها راعي البقاله وطلب حسابه وعطيتها الشرطي وحولني النيابه وانا ابا اعرف شو في الورقه لكن وعدت ابويه ماقراها ..
نايف: هههههههههههه .. زين زين ماشا الله حفظتوا ..
اسما: يالله نايف عاد كمل
يابوا الاكل في هالوقت وحطوه .. وبدوا العيال ياكلون لكن بعدهم يتريون نايف يكمل .. كمل نايف في هالوقت ورفعت ريم راسها تطالع وكانها بدت تنشد اكثر للكلام لكنه ماحاول يلتفت لها ابدا عشان ماترجع تنزل راسها .. او ماتحس بشي
نايف: كلوا..بعدين بكمل
ساره: لااا حرام والله شبعت قبل ماكل بس ابا اعرف شو السالفه
مي: عاد هاي ام الفظوول ..يلا نايف كمل
ساره: جب انتي .. يلا كمل .. نبى نعرف شو استوى
نايف: ان شا الله .. المهم الظابط خذ الورقه وقراها .. واول ماقراها قال انته الحين الحين تتحول المحكمه ماتبات الليله اهنه ..
مايد: حشى مب نكته هاي لغز .. شو فيها الورقه
نايف وهو ميت من الظحك عليهم: حولوه المحكمه قاله القاضي انته شو سالفتك ؟ قاله انا ابويه توفى وقبل مايموت عطاني ورقه و وصاني اني ماقراها لين احس عمري بموت وانا عطيتها زوجتي تقراها واتطلقت مني .. وعطيتها راعي البقاله واشتكى عليه وخذ حسابه مني .. وعطيتها الشرطي حولني النيابه وعطيتها الضابط حولني المحكمه .. خلاص تعبت ابا اعرف شو في الورقه ؟
ساره: حتى انا تعبت ابا اعرف شو فيها
نايف: هههههه المهم خذها القاضي وقراها .. قال هذا الشخص ماييلس لحظه وحده في البلاد لازم الحين يتسفر ويبعدونه عن البلاد خلاص ..
شلوا الريال مسكين وابعدوه عن البلاد بمركب .. وتم يائس فقير ومظايج مب عارف شو يسوي .. وشو سر هالورقه .. ساله قبطان المركب وقاله شو فيك
مي: قاله انا ابويه مات وعطاني وصيه وكلهم رفضوه لين راغوه من البلاد المهم عقب ؟
نايف: هههههه انزين ماعليه هالمره سماح بطوفها لج.. لانه الاكل برد .. قاله قبطان السفينه هاتها انا بقراها لك وبقولك شو فيها .. خذها القبطان واول ماقراها قاله انته ماتم دقيقه على سطح السفينه هاي .. قاله شو قريت انزين قاله احين لازم تنزل قاله الريال وين انزل ونحن في نص البحر .. المهم فروه في الماي
اسما: وحليله وعقب ..
نايف: حصل لوح خشب صغير وتعلق فيه وركب عليه وتم في وسط البحر .. واحين خلاص حس انه بين الحياه والموت وبما انه ماعنده حد وفي عرض البحر يعني هالمرحله اللي يقدر يقرا شو في الورقه لانه قرب من الموت ..
(كان يقول هالكلام وانتبه انه ريم انشدت اكثر ويالسه تشوفه عشان تعرف شو في الورقه وهو يتحاشى يحط عينه بعينها)
جاسم: وشو طلع في الورقه ؟؟
نايف: فتح الريال الورقه عشان يقراها لكن يت رياااح وشلت الورقه وطارت عنه .. وخلاص ..
ريم كان انفعالها اسرع انفعااال على طول اظحكت بصوت عالي اما الباجين اللي شل السجين واللي شل الشوكه بيظربوبها نايف وهو يظحك عليهم .. اما ريم اللي ظحكها انفعالات اخوانها ويا النكته وتركيزهم وخيبه املهم اخر شي .. خصوصا ساره الفظوليه ..
مي: يالله عنبو مايسوى علينا برد الاكل ونحن نتريا شو في الورقه ولا عرفنا
لطيفه: هههههه كله صوب ونواري اختي صوب اطاعوها
التفتوا لنوره اختهم الصغيره ولقوها راقده ع الكرسي .. وظحكوا عليها ..
ريم رجعت استحت من نفسها ومن رده فعلها بس ماقاومت شكل خواتها اللي يلسن يتحرطمن .. خصوصا ساره اللي ماسكتت يلست بعدها تفكر شو ممكن يكون مكتوب في الورقه !! ..
****

المغرب عقب ماصلت عليا يلست ويا امها في الصاله .. البيت كان هادي من عقب ضرابه الظهر .. احلام سارت بيت عمها ومارجعت لين احين .. وفجر ماطلعت من غرفتها ولا حتى عبير .. اما محمد عشان يتحاشى المشاكل مارجع البيت طلع من الدوام على طول وسار العزبه ..

يلست عليا في الصاله وهي تفكر في ريم .. ومب عارفه كيف تفاتح امها بالموضوع .. لكن الوقت مناسب .. محد موجود عندهم احين ..

عليا: امايه
ام راشد: ها امايه
عليا: امايه ابا اخذ رايج في شي ..
ام راشد: سمي !
عليا:سم الله عدوينج.. شوفي امايه انا مب عارفه كيف اقولج.. بس ترا ريمان بنتي خطبها ولد عمتها
ام راشد: ولد مريم؟
عليا: هيه نايف
ام راشد: عنبو امهم مسويه عمليه وطايحه وهم يخطبون
عليا: لا امايه .. هم خطبوا يوم البنات سافرن قبل ماتتعب ام سيف
ام راشد: وليش ماقلتيلي ؟
عليا: قلت بتريا وبرمس ريم يوم بترجع وبشوف رايها .. ماقدر استعيل وارمس والبنت ما عرف رايها..
ام راشد: انا ماعرفهم عيال مريم لكنج انتي تعرفينهم زين
عليا: نايف ماعليه كلام يا امايه وهاللي خلاني اقتنع بالموضوع واتريا راي ريم ورايكم بعد
ام راشد: ماكفاج اللي ياج من هالعايله بعدج بتعقين بنتج عندهم
عليا: امايه ترا بناتي عندهم احين .. هذيل اهلهم مالهم بد منهم .. وعيال مريم غير .. مريم نفسها غير وتحيدينها انتي ..
ام راشد: ليش نسيتي يوم وقفت ويا امها وسارت تخطب لسيف
عليا: امايه مريم ماتقدر تقول لا لامها وحاولت تقنعها لكن ماتروملها وبعد ماتروم تعصي امرها وطلبها ان قالتلها سيري ويايه او سوي شي .. ام سيف تعرفينها وتعرفين تسلطها عليها ..
ام سيف: ويوم طلاقج مول ما دخلت فالموضوع
عليا: اماااايه .. اتحيدين اني انا اللي طالبه الطلاق..ومريم منو قالج ما حاولت تردني.. بس انا اللي تميت ع موقفي..ومريم مايخصها.. السالفه بيني وبين سيف وانا اللي طفرت من البيت..حتى حرمته الثانيه ما يخصها ولا ام سيف حتى لو كانوا هم السبب الاساسي لكن الطلاق سببه شي ثاني..
ام راشد: وها السبب الثاني لين احين مب رايمين لج تقولينه
عليا: اميه عااد .. مب حالفين انكم ماتحنون عليه اقولكم السبب!! خلاص ماضي وراح
ام راشد: خلاص انزين يا بنتي.. ع كيفج .. ماشي فايده اصلا نعرف الحين السبب


سرحت عليا بطلاقها وماضيها ويا سيف ورجعتبها ذاكرتها لليوم اللي طلعت فيه من بيت ريلها .. تذكرت كيف طلعت من البيت ويا عيالها ووقفت التاكسي وركبته وردت بيت اهلها ودموعها ماتوقف من كثر التعب والعنا اللي شافته ..تذكرت ردت فعل اهلها كيف كانت.. وتذكرت صباح اليوم اللي عقبه وييت سيف بيت اهلها عشان يتفاهم وياها ..

كانت عليا يالسه في غرفتها وشاله مهره اللي كانت مكمله سنه وتصيح ومب رايمتلها تسكت ..
دخل عليها راشد ولقاها واقفه وهي شاله بنتها تباها تسكت.. وشيخه اختها يالسه وياها ..
راشد: ها عليا
عليا: هلا راشد
راشد بانفعال: ليش شاله بنتج ؟ وين تروميلها بروحج انتي حامل .. عطيها شيخه تيودها عنج ..
عليا:تسمع صياحها كيف ..تعزيرتها غير شكل لازم تنشل عسب تسكت
راشد: ماعليه الثانيه ساكته وطيها عنج شيخه وشلي اللي تصيح
عليا:يالله ماتعرف هاي من هاي
شيخه: بالله عليج يوم انا ماعرف اميز امبينهن وين راشد
راشد:هههههه تعاتبيني انا عيل.. ماعليه يوم بيكبرن بنميز امبينهن..يلا انزين عليا الغاليه تعالي يلسي وخلي بالج عندي مب عند صياح بنتج
عليا عطت شيخه اختها البنت .. ويلست
راشد: ترا سيف برع ..
وقفت عليا من مكانها وصرخت : شو يبى ؟
راشد بكل هداوه: يبى حرمته وعياله
عليا: وحرمته وعياله مايبونه
راشد: عليا قومي شوفي ريلج يبى يرمسج
عليا: وانا ماباه .. مابا ارمسه
شيخه: اسمعيه انزين شو بيقولج يعني انتي لاطايعه تخبرينا شو بلاكم ولا طايعه ترمسينه!! ماصارت هاي يا عليا!
راشد بتوسل: عشان خاطريه يا عليا عشان هاليهال قومي شوفيه شو يبى

سكتت عليا..ماحبت انه اخوها يترجاها ويطلبها اكثر .. لبست شيلتها وطلعت الميلس اللي برع ..وقفت عند الباب.. لقته يالس وصاد ع الباب كأنه يترقب وصولها..دخلت الميلس وكانت تعابيرها حاده وجافه ..
تجدمت واول ماشافها سيف وقف لها .. مد ايده بالسلام لكنها طنشته ويلست على كرسي بعيد منه ..

عليا وهي تطالعه بكل قوه: خير ؟
سيف: عليا شو فيج !
عليا: مافيني شي .. عندك شي ياي تبى تقوله قوله وخلص
سيف: اباج تردين البيت ويايه
عليا: وانا مب راده هذاك البيت
سيف: ياعليا خلاص لاتكبرين الموضوع
عليا: سيف .. قلتلك مابا منك الا ورقه الطلاق وتخليني في حالي .. حتى المؤخر ماباه خله لك .. اباك تطلقني وتخليني انا وعيالي في حالنا
سيف: عليا انا ماطلقت قبل احين ياي بطلق! .. مابفرط فيج انتي حرمتي ..
عليا: اللي مايعرف يحترم حرمته وعياله .. مايستاهل ينعاش وياه دقيقه وحده
سيف: عليا تعوذي من ابليس لاتخلين الشيطان يدخل بينا
عليا: عاد انا اليوم بكون هذا الشيطان وقلتلك مابا شي الا الطلاق ..
سيف: وعيالنا ؟ عندنا 5 وياي في الدرب واحد مادري اثنين ..
عليا اطالعته بنظره تكسر الحجر من كثر حدتها: انا بربيهم .. انا وعيالي مب فلزمتك .. بسدهم ومابقصر عليهم بشي.. مانتريا ابدا منك شي..
سيف: يا بنت الحلال شو هالرمسه
عليا وقفت وهي معصبه : شوف سيف عشان تحافظ على سمعتك وتحافظ على ناعمه وولدها .. طلقني بهدوء لانه لو عاندت مابيحصلك خير ومب بس بتخسرني انا .. بتخسر حتى عايلتك الثانيه .. وانا اقولك اياها من احين ..
ورقتي اباها توصلني عقب ماربي ومب بس الطلاق .. ورقه التنازل عن تربيه العيال .. والا برفع عليك قضيه وانا اللي بكسبها اكيد ..
سيف: يا عليا تعوذي من بليس
عليا: عوذ بالله منك .. خلاص ماعندي رمسه ثانيه
سيف وهو كله يأسان: على هواج .. العيال بيتربون عندج من غير ورقة التنازل..
عليا: امبونك مب قد المسؤوليه
سيف: راجعي نفسج لين ما تربين .. يمكن تغيرين رايج
عليا: لين اندفن تحت التراب ما بغيره رايي ..


ام راشد: عليا عليا
عليا ردت على طول لارض الواقع .. امها لاحظت شرودها وماحبت تزعج ذكرياتها الأليمه من المرور فها الدقايق .. رفعت عليا راسها صوب امها وتوايبت الها ..

[لامارا]

ام راشد: بلاج امايه؟
عليا: ولاشي افكر فريم .. المهم ردينا ع السالفه الاساسيه.. شو رايج بنايف الحين!
ام راشد: والله مادريبج يا عليا.. لكن ريم بنتنا مب بنتج بروحج ومانبى نعقها على أي حد
عليا: امايه انا ييتج اباج توقفين ويايه وقفتي ضدي .. انا اقولج انا اعرف عيال مريم زين..نايف ماشا الله عليه ريال وراشد اخويه يشهدله باخلاقه وتربيته ..
ام راشد: ياخوفي الا يطلع على خاله
عليا: امايه نايف ومريم غير صدقيني .. والا جان انا لزمت ع الرفض أول ما يو يخطبون ..
ام راشد: مادري والله .. بس الله يجدم اللي فيه الخير
عليا: اميـــن .. المهم امايه انا مب عارفه شقى ارمس ريم في السالفه
ام راشد: ليش؟
سكتت عليا شوي .. المشكله محد يعرف باللي يستوي حق ريم غيرها ..
عليا: امايه تدريبها ريم اول رفضت ولد خالتها واحين اخافها ترد نايف وكلهم زينين وماينعابون
ام راشد: ولد خالتها وقالت مثل اخويه وماعرف شو ؟ نايف وين تعرفه عشان تتعلث انها ماتباه
عليا: ترا لانها ماتعرفه بترفض
ام راشد: عيل شو تبى تتعرف عليه وخلاف تشوف جان تباه والا
عليا: مب جيه السالفه امايه .. بس ريم تدريبها ماتقارب الرياييل خوالها يالله تيلس وياهم وتخالطهم وهي متعقده من اهل ابوها من يوم صغرها واحين شوي لانت ويا يدتها ولو انها بعدها مب لين اهناك ويا ابوها .. شقى احين اقولها ياينج ولد عمتج

ام راشد: والله مادري شو بقولج ياعليا لكن اذا الولد مثل ماتقولين انه زين وماينعاب رمسيها حتى لو تجبرينها ترا هالشي الا في مصلحتها هي كم بتيلس ترد الريايل الزينين .. عقب بتم ومابييها حد زين الا جان بيون هذيل المطلقين والمعرسين..

عليا سكتت .. امها صعب تفهم شو اللي تقصده عليا وصعب تفهم طبيعه ريم وصعوبه اقناعها والتعامل وياها .. وها الوقت طلعت مديه من غرفتها وهي ناويه تلحق احلام اختها بيت عمها .. طلعت من الجناح ولقت عمتها وام راشد يسولفن ومب منتبهات لوجودها .. تمت واقفه مكانها تسمعهم ..

عليا: على خير ان شاء الله بس انتي لاترمسين حد ترا محد يعرف وانا يوم بتي ريم برمسها في السالفه
ام راشد: جان مابتخبرينها انتي طرشيها عندي انا بقنعها
عليا: لا امايه دخيلج انا بروحي برمسها وبتفاهم وياها..
ام راشد: زين ع كيفج
وتذكرت عليا شي ثاني واطالعت امها وهي مبتسمه..
عليا: وراشد كمل بعد على بناتي الباجيات
اطالعتها امها: المخابيل!!
عليا:هههه حرام عليج امايه.. والله انهن يبردن الفواد لاتقولون جي عنهن
ام راشد: ههههه الا نسوي سوالف انزين .. فديتهم كلنا مانرضى عليهن اصلا
مديه: عليهم بس ماترضووون ها اماايه
التفت عليا لورا وشافت مديه محطيه اديها ع خواصرها واطالعهم
عليا: مدوووي!! من متى انتي هنه؟ ليش انتي مب فبيت عمج؟
مديه: عموه سؤال سؤال انزين.. انا توي طالعه من الحجره.. والحين بسير بيت عمي..
ام راشد: هي زين .. سيري عيل
مديه اطالعتهم وابتسمت وروحت .. ماستوعبت شو كانوا يرمسون بس حطت فبالها تسأل احلام عن قصد عمتها بها الرمسه ..

عليا: ياخوفي سمعت
ام راشد: يالله يا عليا هاي ياهل ماتعرف بشو نرمس
عليا: الله يستر بس.
ام راشد: لا لا ماعليج ..انزين .. حرمه اخوج وينها عيل ؟
عليا: منو ؟
ام راشد: عبير بعد منو عندج انتي حرمة اخو فالبيت غيرها
عليا: هيه ..مادري من الظهر مالها شوفه
ام راشد: واحلام ماردت من بيت راشد ؟
عليا: لاااا ..
ام راشد: ولا حتى محمد رد البيت
عليا: هيه طرشتله الغدى العزبه قال بييلس اهناك
ام راشد: طفروبه يا امايه حتى البيت ماقام ييلس فيه
عليا: الله يعينه ..

قامت عليا من مكانها وتوجهت قسم محمد .. دقت باب حجرة عبير .. ودخلت .. يلست ترمس وياها ليش منعزله فالحجره طول اليوم .. خففت عنها شوي وحاولت تغير من مزاجها المتعكر .. وعقب طلعت من عندها وخذت تيلفونها واتصلت لمحمد تلومه ع اللي سواه.. كيف حرمته وام بناته فامس الحاجه له وهو البيت ماطاحه موول.. محمد تعذر انه ما كان يبى يرد لين يهدون الامور.. لانه مايبى يدخل فالسالفه والشي اللي سوته فجر مول ما يرضيه.. لكن بعد اقناع من عليا قرر محمد انه يرد البيت وييلس ويا حرمته يتفاهمون ..

****

سلطان توه انتبه وقام من نومه .. سار الصبح يداوم عشان خاطر امه اللي ماقامت ترمسه مثل اول وتبين له زعلها وعدم اهتمامها .. هالشي خلاه يظايج لو انه حشرتها كانت تظايجه بس اهون عن حقرانها له .. وبرودها تجاهه .. رجع من دوامه ورقد لين هالوقت .. فتح ليت الابجوره اللي حذاله وانتبه للساعه انها صارت 8 فليل ..
مسك تلفونه وشاف بدريه متصله فيه قبل 10 دقايق .. وابتسم وهو يتذكر شكلها
وايد اللي عرفهن حلوات واحلى منها بوايد .. بس هاي جذبته .. يمكن مب شكلها اللي يجذب وايد لكن حركاتها ودلعها .. وفوق هذا اللي تسويه عشان تسعى لرضاه
..حقق مراده وشافها .. لكن بعده في باله شي ثاني ولازم يوصله ومايضيع هالبنت من ايده ..
رجع عاد على رقمها واتصل فيها طولت لين ردت عليه ..
بدريه: الووه
سلطان: هلا بداري
بدريه: اهلين ..
سلطان: ليش طولتي لين رديتي ع التلفون؟
بدريه: كان عندي خط ثاني
سلطان: منوو ؟
بدريه: امم ريلي
سلطان: افف .. يلا ماعلينا ..المهم اشحالها البدر اليوم ؟
بدريه: الحمدالله.. حياتي انته وين اتصلتبك مارديت ليكون توك ناش ؟
سلطان: هيه توني ناش راسي يعورني سرت اداوم اليوم وتميت وايد يالس ع الكمبيوتر ..
بدريه: قوم انزين تعشى وارتاح ..
سلطان: انا مرتاح يوم اسمع صوتج ..
بدريه: تسلم الغالي
سلطان: بدريه تدرين توه حلمت فيج ؟
بدريه: صدق والله ؟ شو حلمت
سلطان(خلصت الاحلام احلم فيج): حلمت اني وياج يالسين ع البحر وانتي كنتي محلوووه وايد .. يالسه حذالي وتكتبيلي ع الرمل احبك .. وكنا بروحنا انا وانتي والمكان حلووو والهواء يطير شعرج ..
بدريه: ههههه .. حلووو وبعدين ؟
سلطان: بعدين قمت من النوم وقلت لازم الحلم يكون واقع
بدريه: ههههه
سلطان: شو فيج تظحكين ؟
بدريه: كيف بتسوي الحلم واقع
سلطان: يعني صعب تحقيقه ؟
بدريه: اممم شو تقصد ؟
سلطان: ولا شي .. ايلس انا وياج ع البحر في مكان هادي بروحنا
بدريه: وين هذا عاد ؟
سلطان: هذا خليه عليه انا
بدريه: كيف يعني ؟
سلطان(اووف اغبى وحده عرفتها .. افهميها ع الطاير وفكيني): يعني ابا اشوفج
بدريه: تراك شفتني
سلطان: لا لا ابا اشوفج نفس يوم كنتي في الحلم ..ابا اطلع وياج نسير نيلس ع البحر..
بدريه: سلطان وين تطلع ويايه ونيلس ع البحر
سلطان: في هاواي .. وين يعني اهنه
بدريه: لا سلطان شو انته تخبلت
سلطان عصب: هيه تخبلت خبله انا خبله ..
بدريه: سلطان ماقصد صدقني
سلطان يرجع يلين ..همه يسوي اللي في باله احين : لا انا خبله اصلا ..من يوم شفتج وانا تخبلت .. ماشوف جدامي الا انتي ..
بدريه: ياويلي ياسلطان لو ادري جان من زمان خليتك تشوفني عشان تقولي شي حلو ..
سلطان: ولو شفتج اكثر واكثر بتشوفين الاحلى من هذا كله .. بعيشج في عالم خاص.. عالم مافيه الا انا وانتي بس ..
بدريه: ياريــــــت
سلطان: سوي اللي اباه وبتحصلين اللي تبينه
بدريه: وانته شو تبى ؟
سلطان: اباج تطلعين ويايه
بدريه: سرت وياك السينما انزين
سلطان: لا لا ابا اكون وياج بروحنا .. نحوط في سيارتي .. تركبين حذالي واحس اني انا سلطان اللي اسوق وحذالي حرمتي ان شا الله مستقبلا عقب ماتفتكين من هذا اللي عندج
بدريه: ان شا الله اليوم قبل باجر
سلطان: هاه شو قلتي ؟
بدريه: ماعرف خلني افكر
سلطان: افا وهذي يبالها تفكير .. انا لو يقولون تشوف بدريه احين اسيرلج ازحف لين اوصلج واشوفج وانتي ماتبين تشوفيني!!!
بدريه لانت وايد .. والكلام وايد اثر فيها .. اعماها .. وخلاها تصدق .. تفتكر انه صدق شوفتها غيرته وهاللي لاحظته انه صار اوكي وياها عقب ماشافها الشي اللي خلاها تفكر انه لو شافته اكثر هالشي بيخليه يحبها اكثر ويتعلق فيها وبجيه بتكون وصلت لهدفها اللي هو "قلب سلطان" ..

سلطان حس من نبره صوتها انها بدت تخضع لكنه مازاد عليها بالكلام .. سكر عنها وخلاها تفكر .. وبيرجع يرمسها باحسن عن جيه وشوي شوي لازم بتقتنع ..

****

البنات ها الوقت يالسات ويا يدتهن .. يسولفون وياخذون مابخاطرها .. اما نايف نزلهم وروح عنهم ..
مريم: استانستوا في السفر ؟
مي: الحمدالله استانسنا ..
ام سيف: ونعوم شو مسويه وياكن ؟ انا ريمان خبرتني انكن ماقصرتن فيها
ساره: ههههه ماخبرناكم .. هذاك اليوم توهقت قالها ابويه قومي سوي العشا وقالت بسوي معكرونه .. والله يا امايه لوشفتيها ماتعرف شو تسوي .. ريمان تعطيها تقولها سوي جيه وسوي جيه ..
مريم: ههههه من استوت مرت ابوكن ماتدل المطبخ وماتعرف شكله بعد
ام سيف: وانتن شحقه ماتطبخن لعماركن تامات على تجلاها
مي: نحن نسوي امايه لكن يوم هي تروح نحن نطبخ عشان ماتاكل ويانا
لطيفه: حشى شريرات
مي: هيه عيل نحن نطبخ وهي تاكل ع البراد هي وريلها ..
اسما: ويه ويه ريلها تراه ابوج
مي: كله واحد ..
ضحك الكل ع مي اللي بكل ثقه بعد ترمس!
ام سيف: وينها عيل هي مايت وياكن اهنه ؟
ساره: اونها تعبانه بترتاح وبتي اليوم .. لكن شكلها مابتي لين تطلعين اعرفها هاي جذابه ..
ام سيف: مب لازم تي .. انتن تسدن ..
ريم: ساره اتصلي حق ابويه خل ايي يشلكم الفندق لانه خلاص الوقت تاخر وامايه لازم ترقد ترتاح ..
ام سيف: خليهم يا ريم انا ارتاح يوم اشوفهم
ريم: لا لا امايه شوفي انتي كيف من الصبح يالسات يسولفن وياج وانتي مب رايمه ترتاحين .. بييونج باجر ان شاء الله
ساره: وانتي مب سايره ويانا ؟
ريم: انا مسويه حسابي ويايبتلي ثياب ببات اهنه عند امايه وعموه بترجع وياكن
مريم: لا لا انا مب راجعه .. وانتي سيري ويا خواتج وتعالي باجر الصبح انا برجع
ريم: لا عموه انا اللي بيلس اهنه
مريم: ماعليه باجر تعالي انتي سيري ويا خواتج اليوم و انا اوعدج اخليج باجر تباتين ..
ريم سكتت .. مدام انه عمتها وعدتها اكيد بتخليها اتم عند يدتها باجر ..
مر عليهم ابوهم وروحوا وياه ونايف خذ خواته وتيمعوا كلهم في جناح سيف وعياله يتعشووون ..
ريم كانت طول الوقت نواري بنت عمتها يالسه ع ريولها وتلاعبها وتسولف وياها.. من ردوا من طلعتهم للغدى ونوره تفججت من نايف وقبضت بريم..

لطيفه: ماشا الله نواري تعلقت فيج
ريم: فديتها امووره .. سوالف
اسما: عاد احين هاي شو بيففجها من عندج .. من تلزق بحد ماتهده ..
ريم: ماعليه خلوها .. نواري بتباتين عندي اليوم ؟
نوره: اممم بقول حق ماماه
ريم: لا لا ماماه مابتقول شي .. انتي تمي عندي فليل انا بيلس اقولج قصه وبنسولف
نوره: قصه شووو ؟ انا ابا قصه حسن والسمكه
ريم: منو حسن والسمكه ؟
نوره: اوف انتي ماتعرفين هذي باباه نايف كله يقولي اياها
ريم: باباه نايف؟
اسما: تسمي نايف باباه
ريم: ليش ؟
اسما: بروحها متعلقتنه وايد وهو مدلعنها ..
ريم: اها .. انزين نواري انا ماعرف هالقصه
نوره: خلاص انا بقولج اياها
مي: ناويه ترقدج وتشرد عنج
ريم: ههههه شكلها جيه بتسوي .. يالله قومي نواري البسي بجامتج انا بسير افرش اسناني.. عاد برقد قبلكم اسمحولي تعبانه
لطيفه: مسموحه .. نحن بعد بنقوم نرقد.. ناشين اليوم من وقت..
ساره : لا لطوف مب ع كيفج انتي .. نحن نبى نسهر
لطيفه: شو عندكن ؟
مي: بنطالع التلفزيون وبنسولف، عن المصاخه لاترقدن لاحقات ع الرقاد ..
ريم: كيفكن انتن انا بقوم ارقد .. ساروه شوفي جسوم يوم بيي من عند عمار وعطيه الابره انزين ..
ساره: انزين ..

قامت ريم وشلت بنت عمتها الصغيره وياها .. ويلست تسولف وياها وتقص لها القصص .. حبتها وايد .. في بيت يدها ماكان عندهم يهال صغار .. اصغر وحده كانن ايمان ومديه بنات خوالها ..
واخر شي نامت نوره بحظن ريم ويلست ريم تتامل ملامحها .. تبى تعرف نواري منو تشبه ؟ اسما ولا لطيفه؟ والا نايف ؟
ورجع نايف لذاكرتها .. لكن عشان تتحاشى الصداع والتفكير .. قرت اذاكر النوم ورقدت ..


******************
(الجمعه) 6 اغسطس 2004
******************

الساعه 8 الصبح قاموا البنات عشان يرجعون راس الخيمه .. قرر سيف يرجع بعياله وخلفان بعد .. اما مريم ونايف بيتمون عند اليده اللي قالهم الدكتور انه
ان شاء الله بيرخصونها باجر ..

ريم: ساروه قومي الله يخليج ماشي وقت ..
ساره: انزين دقيقه دقيقه
ريم: ساره عن المصاخه حد يرقد دقيقه
ساره: اووف ريمان الله يخليج صبري شوووي احين بيخلص
ريم: شوهووو ؟
ساره سكتت وماردت على ريم ..
ريم طنشتها وسارت توعي مي

ريم: ميووه
مي: همم
ريم: مي قومي يالله بنسير
مي: مابا ريوق
ريم: بنسير راس الخيمه مب الريوق قومي
مي: اوكي قوليلهم
ريم: اقووول شووو ميووووه قووومي لاتخرفييين عليه
مي: هاه هاه
ريم مطت اللحاف عن ويها: ميوه قومي عاد غصصتوبي ..
مي: وعي ساروه قبل
ريم: ميوه قوومي بسكن كملن رقاد في الدرب ابويه يترياا
مي : ساروه الاكبر وعيها هي قبل ..
ريم ردت لساره توعيها : ساروووه قومي عاااد
ساره اعتدلت في يلستها وهي معصبه : اوف منج قلتلج صبري شوي بكمله وبقوم
ريم: شو تكملين ؟
ساره: الحلم
ريم وقفت مستغربه: عنبو فيلم هووو توقفينه وتكملينه
ساره: هي عادي انا انش وارد اكمل الحلم
ريم: وماشا لله شو عاد هالحلم اللي كنتي حلمانتنه
ساره: كنت حلمانه .. شدراني نسيت
ريم: احسن .. قومي يالله ابويه يتريا كلهم نشوا وحتى بنات عموه..يلا بنظهر رباعه
ساره: وبنتج نشت ؟
ريم: منو.. هي نواري .. فديتها من الصبح يالسه برع
ساره: شو رايج تتبنينها .. ترا انا وميوه بنسير عنج وبينقص العدد عندج..
ريم: انزين قومي .. قومي وعن ها الرمسات ..

طلعت ريم من عند البنات ..اما ساره نشت من الفراش وشلت المخده فرتها على مي وسارت الحمام تتغسل ..
ريم توجهت لخوانها اللي كانوا يالسين يتريقون..

ريم: ليش تريقتوا قبل عيال عموه
مايد: عمار يا توه وقال ما يبى
جاسم: ونحن يوعانين مانروم نترياكن
ريم: ماعليه انزين نحن مانبى.. يلا كلوا وتغسلو ونزلو عند ابويه..نواري وين
مهره: توها هنه
مها: لا روحت .. يوم يا عمار سارت وياه اونه تبى بابا نايف

ريم ابتسمت.. قبضت تيلفونها واتصلت بلطيفه تسألها اذ نوره عندهم واذ يبن ياكلن شي .. وماهي الا نص ساعه ونزل الجميع للسيارات وتوجهوا لبيوتهم..

****

عليا كانت ناشه من الصبح مستانسه انه عيالها بيونها اليوم .. معدله غرفتها ومدخنتها .. وتتريا فجر تقوم عشان تنظف الغرفه هذيج بعد ..
اما اللي كانت مرتبشه اكثر احلام .. اللي اصلا مارقدت من امس .. يالسه ويا عمتها وتساعدها ..

عليا: احلام قومي ارقدي شوووي قبل ما ايون بعدهم عن يوصلون
احلام: مافيني رقاااد عموووه فرحاااانه اخيرا بيون
عليا: هههه اليوم بتستوي الحشره في البيت
ام راشد: نباها الحشره يوم انها بتي من بناتج .. يالله مغلاهم اسميه البيت مايسوى بدونهن
احلام: مابزعل من هالرمسه ترا صدق البيت مايسوى بدونهم وبوجود بعض الناس غيرهم بعد ..
ام راشد: احلام يوزي عن النجره
احلام: انا بسير اوعيها بسها رقاد نبى انظف الغرفه
عليا: بعده وقت
احلام: لا ماشي وقت ساعتين والا ثلاث وبيوصلن .. يالله يمدينا
عليا: مادري عن تعصب عليج تريي امج توعيها
احلام: خل تولي ..

وسارت صوب غرفه فجر ودقت الباب ..
تمت واقفه احلام وادق دق متواصل.. بس محد يرد .. سكتت ودقت ع الخفيف.. تريت فتره لين قامت فجر وفتحت الباب..

فجر: نعم
احلام بابتسامه مصطنعه: صباح الخير خالتيه

فجر مستغربه من طلة احلام عليها .. من صارت الضرابه وهي ما ترمسها..شو عندا اليوم يايتنها من الصبح.. معقول يايه تتأسف!
حاست فجر بوزها وردت ع احلام

فجر: صباح النور
احلام: عندج خبر انه بنات عموه بيون اليوم ؟
فجر: لا .. ومايهمني اعرف .. شنو بسوي يعني بزفهم انا
احلام: لا بس بتقومين احين عشان عموه عليا تبى تنظف حجرتهم لانهم ساعتين وبيوصلون
فجر: اوووف .. اوكي بروح انام بغرفتكم
احلام: لا لانه غرفتنا توني منظفتنها ..
فجر: مو بكيفج ..

وطلعت على طول وسارت غرفه قوم احلام لقت مديه راقده .. وكملت هي رقادها على سرير احلام .. اما احلام طنشت .. مايهمها انه فجر سارت غرفتهم لانها اصلا ماتيلس بغرفتهم وايد .. بس يهمها هالغرفه تفظى وترجع تلتم فيها ويا بنات عمتها .. من ظهرت فجر من الحجره .. استولن عليها احلام وعمتها والشغاله .. وتموا ينظفون الغرفه ويعدلونها ويدخنونها ..
دخلت عليهم عبير وشافتهم ..

عبير: صباح الخير
عليا: صباح النور

اما احلام تمت ملتزمه الصمت .. امها بعد من بعد الضرابه ماقامت احلام تكلمها وايد .. او تسولف وايد.. كانت شايله بخاطرها بس ما بغت تعكر مزاج امها أكثر..
عبير: ماشا الله بيون البنات ؟
عليا: هيه بيون ..
عبير: اشوفها احلام مرتبشه معاكم من الصبح قاعده
عليا: اصلا بنتج مارقدت من امس
عبير: ليش

احلام تمت ساكته ورغم محاولات امها في انها ترمس وياها الا انها مب راضيه تصد صوبها او ترد عليها .. عليا كانت تحاول تدارك الموضوع عشان مايكبر اكثر من جيه ..

عليا: مرتبشه اكثر من عمتها ..

عبير يأست من احلام من كم يوم وهي تحاول تتقرب منها او ترمسها بس احلام تتجنبها .. والي صار قبل شوي كان من ضمن محاولات عبير لارضاء بنتها واخذ ما بخاطرها .. لكنها عقب قررت انها تسكت لين ايون بنات عليا يمكن يتغير مزاجها وترجع وياها عادي واذا لا .. بتكلم مي اكيد بتقنعها وبتتفاهم وياها..
ماتبى تفاتح محمد في الموضوع مره ثانيه .. لانه بينجلب كل شي ضدها ..
وفالاخير انسحبت بهدوء وسارت المطبخ تسوي الكيك الي يحبونه البنات..

****

وصلوا الجماعه من بوظبي وكل سياره اتجهت لبيتها .. نزلوا عيال سيف من السياره وكل واحد منهم يمغط عمره وينقع مفاصله دليل على كثرة التعب من الجلوس .. صعدن البنات غرفهن ويلسن يرتبن اغراضهن ع السرير وخذوا الي يحتاجونه ورتبت ريم اغراض جاسم ..وخذوا بعد الهدايا اللي اشتروها لاهلهم اهناك ..
وتريوا ابوهم لين يرجع من الصلاه ويوديهم .. اما ناعمه كانت في البيت موجوده وتوها ناشه من النوم وسارت للبنات جناحهن ..

ناعمه: هاه ييتوا ؟
مهره: لا روحنا
ساره: هاي اللي بتي اليوم الثاني تسلم على عمتها
ناعمه يلست ع اول كرسي حصلته بدربها
ناعمه: قالولي انها بتطلع باجر
مي: وشعنه ماييتي قبل
ناعمه: مرضت وماقدرت اسير
ساره: وعليه عنج واحين خفيتي ؟
ناعمه: هيه احسن شوي
مي: ليش شو ياج ؟
ناعمه: احس بدوووخه وراسي كله يعورني
ساره تطالع ناعمه بنظره مكاره: اويه عن تكونين حامل؟
ناعمه اهنه تنرفزت: لااا مب حامل . فال الله ولا فالج
مي: ليش عاد ؟؟
ناعمه: بس انا عندي ميود وعفروه ومتغصصه وانتوا فوقهم .. بعد اييني ياهل
ساره: تحملي عاد عن تكونين مفتكره في هذيل الاثنين
ناعمه: ساره بس والله راسي يعورني
ساره: انزين بس بسكت ..

تسدحت ناعمه على الكرسي وتمت طايحه .. والبنات فاتحات الشنط في الصاله ويطلعون الاغراض اللي اشتروها لامهم وبنات خوالهم ..
طلعت ريم من غرفتها عقب مارتبت اغراضها واغراض جاسم ..

ريم: بلاها ناعمه ؟
مهره: تقول راسها يعورها
ريم تقربت منها ولقتها مغمظه عيونها
ريم: ناعمه ؟ ناعمه ؟
ناعمه فتحت عيونها وصدت صوب ريم
ناعمه: هاه
ريم: بلاج شو يعورج ؟
ناعمه: راسي يعورني .
ريم: انزين خذتيلج مسكن ؟
ناعمه: لااا
مي: اسير اييبلها ؟
ريم: مادري.. جنها مب ماكله شي .. ناعمه تريقتي ؟
ناعمه: لااا ماكلت شي
ريم: انزين عيل صبري بننزل نطالع جان نجمه خلصت الغدى بتاكليلج شي وعقب بتاخذين المسكن ..
ساره: ووويه هاي احين تعبانه ونحن بنسير عنها
ريم: ماعليه الصلاه بعدها شووي عن تخلص لين ايي ابويه بيوصلنا وبيرد يتم عندها..
تبرعت مي تسير تحت تسال نجمه عن الغدى اذا جهز ..
مي دخلت المطبخ بشكل سريع وقطعت على نجمه اندماجها
مي: سلامووو عليكووو
نجمه: مي انتي ليش صرخ
مي: حرام نجمه انا احين من متى محد عنج ماتولهتي على حشرتيه ؟
نجمه: مي مايسوي جيه مره ثانيه بعدين انا قلبي عورني انا يسوي مريض سيم سيم ماما كبير
مي: انزين انزين فكينا .. اقولج نجمه هذا كيس داخله هديتج اللي يبناها لج
نجمه : الله مشكوور واجد مي
فتحت نجمه الكيس ولقت البنات يايبات لها قميص صووف احمر للشتاء ..
نجمه: اووه مي قولي حق بنات مشكور واجد
مي: افا عليج .. يبتلج لون احمر عشان يوم تلبسينه تغدين جنج قوطي مالبورو ..ولا اقول احسن بابا نويل سيلاني ههههه
نجمه: شو يقوول؟
مي: ماشي .. انزين اقولج نجمه خلص الغدى؟
نجمه: ليش انتوا في سوي غدى منيه ؟
مي: لا بس حق ناعمه وحليلها شوي تعبانه .. تبى تتغدى عشان تاخذ دوا
نجمه: هي هذا مدام ناعمه مسكين من ثلاث يوم تعبان..
مي: اونه .. زين خلصتي الغدى انتي؟
نجمه: هيه انا في خلاص صبري انا يحطي داخل صحن ..

حطولها الغدى بصحن وشلت مي الصينيه وودتها فووق ..

مي: واحد عيش برياني وصلحووو
ريم: برياني مسوين ؟
مي: هيه .. وعيها بتاكل
ريم: ناعمه ايلسي عشان تاكلين
ناعمه: شوو ؟ ماروم ايلس خلوني طايحه
ساره: قومي تغدي عشان تاخذيلج دوا
ناعمه: مابا اكل
ساره: قومي عن الدلع نعووم .. كليلج شوي عشان تاخذين الدوا .. مافينا بعد انتي تموتين علينا تخربين وناستنا
ناعمه: اووف مابا
ساره: نعمة الله الغاليه اسولف وياج انا .. انتي مرت ابونا الغالي .. قومي اكلي يالله عاد

ناعمه فتحت عيونها شوي شوي ويلست وحطولها الصينيه وعطوها تاكل وسارن يتلبسن ويصلن لين تخلص غداها .. ورجعتلها مي تيلس عندها ..

مي: اييبلج عصير ؟
ناعمه: لا بس ابا ماي ..
سارت مي يابت ماي من ثلاجه الصاله وعطتها اياه ..

ناعمه: مشكوره ..

كلت ناعمه شوي من الغدى وردت يلست وهي متسنده ع الكرسي .. وشلت عنها مي الصينيه .. في هالوقت دخلوا مايد وجاسم الجناح واصلين من المسيد

جاسم: يالله ابويه يترياكم تحت ..
مايد: اميه بلاج ؟
مي: امك تعبانه
مايد تقرب من امه ويلس حذالها: شو فيج ؟
مي: راسها يعورها .. اقولج ناعمه قومي سيري طيحي في حجرتج وبييلج المسكن اهناك لانه نحن بنسير احين .. مايد وصل امك

نشت ناعمه ووصلها مايد لغرفتها .. والبنات كلهم نزلوا تحت الا مي سارت تودي المسكن حق مرت ابوها قبل ماتنزل .. دخلت الغرفه عندهم وسارت مكان ماطايحه ناعمه

مي: قومي ناعمه يبتلج الدوا
عطتها اياه وناولتها الماي .. شربت منه..
مي: اقولج ناعمه تلفونج وينه ؟
ناعمه: ماعرف ليش
مي: خليه حذالج عشان نتصلبج عقب
ناعمه: ليش
مي: نسال عنج.. مب تعبانه ؟
ناعمه: هيه .. انزين شوفيه يمكن في الشنطه فوق الطاوله هاتيه هالصوب
سارت مي طلعت التلفون وحطته حذال ناعمه
مي: انزين اقولج نحن مانعرف رقمج
ناعمه: خذوه عن ابوكم
مي: اوكيك بسجل ارقام خواتي في تلفونج .. ورقم بيتنا هناك بسجله باسمي.. يمكن ادقلج من البيت
ناعمه: انزين
سجلت مي ارقام خواتها ورقم البيت في تلفون مرت ابوهم .. وحطته حذالها ..
مي: سجلت رقم ريمان وساره اوكي
ناعمه: خلاص اوكي
مي: تبين شي ؟
ناعمه: لا مشكوره
مايد: ميوه .. انا قلت لجسوم اني بسير وياكم.. بس قوليله هونت خلاص
ناعمه: ليش!
مايد: اميه انتي تعبانه كيف تبيني اخليج

اطالعته مي ومسحت ع شعره وابتسمتله .. و بشكل لا ارادي وبدون تفكير .. تجدمت من مرت ابوها وحبتها على راسها وطلعت عنها وسكرت الباب ..
وقفت جدام الباب للحظه تفكر ..
انا ليش سويت جيه ؟؟ انا احب نعوم ؟ لا ماظن حب .. ولا اظن انه احترام .. هاي انسانيه .. مهما كان لو انها وغده بس نحن لازم نعاملها بالعكس عشان نكون احسن عنها و نكسبها في صفنا .. بس ليش نحتاج انها تكون في صفنا ؟ في شو بتنفع يعني ؟
ماعليه ع الاقل نفتك من المشاكل والصدعه .. ياترى ممكن انها تتغير ؟ مب لازم خلاص انا سويت اللي يملي عليه ضميري وهي كيفها ... ياخوفي تنش بخير وتطلع لسانها علينا .. الله يستر ..

اما ناعمه بعد يلست تفكر .. ليش هم جيه سووا وياها ؟ صح انه الكلام بينهم جاف ولازم يتخلله ظرابه .. بس بعد مافي شي يجبرهم انهم يوقفون وياها ..
صح خلوها وراحوا .. بس اهتموا لامرها ماطنشوها .. اقل شي خذوا رقمها عشان يسالون عنها .. ماقدرت تفكر زياده لانها تعبانه وطاحت رقدت ..

ومايد لحف امه زين وظهر من الحجره يحس بجدران البيت بتصح عليهم من كثر الصمت .. ويلس بروحه فغرفته يتأمل كل شي حواليه .. من الحين ظيجان كيف بيتحمل لين باجر..

****

[لامارا]

ردوا محمد ومانع من الصلاه دخلوا البيت ماحصلوا حد فالصاله ويلسوا.. وشوي دش راشد عليهم الصاله ووياه نجليه مروان وفارس .. طلعت ام راشد من عقب ماصلت الجمعه وشافت عيالها فالصاله.. يلست وياهم وشوي شوي اكتملت العايله الكريمه .. يت ميره وبناتها عزه وايمان .. وخليفه ومنصور ويا امهم شيخه .. طلعت عبير وبناتها .. اما فجر كانت يالسه فحجرتها .. دخلت عليها عليا من بعد ما دقت الباب ..

عليا: شو فجر ماتبين تظهرين!!
فجر: شنو ها الصدعه كلها اللي برع؟
عليا ابتسمت: هاي عادة كل جمعه فبيتنا..العايله كلها تلتم فها الصاله الصغيره وتتعالى عاد الحسوس .
فجر: وانا كيف اطلعلهم .. ماعرفهم
عليا: بتعرفينهم ..
فجر: في شباب بعد برع!
عليا: هي مروان وفارس عيال راشد اخويه..وخليفه ومنصور عيال شيخه اختيه..ومانع اخويه ..
فجر: كيف بطلع جذي .. عبير بتزفني
عليا: ترا عبير مب يايبتلج كنادير!
فجر: ايه
عليا: انزين لبسي وحده ويلا تعالي
فجر: افف ماحب البس دراعه
عليا: ماعليه .. فها الاجواء حاولي تحبين

اطالعتها فجر وهي حايسه بوزها .. مب عايبنها الوضع بتاتا ..
حاولت تلطف من معاملتها شوي ويا عليا لانه محد افتكر ابها طول ها النهار غير عليا كل شوي يتها.. صح تنظف الحجره للبنات .. بس بعد يلست وياها شوي ..

فجر: خلاص ببدل الحين .. بس تعاليلي بعد شوي.. ماعرف اطلع بروحي
عليا: خلاص تم.. انا بسير احط الغدى للرياييل .. وبيي ان شاء الله
فجر: تقعدون وياهم ع الغدى؟
عليا: لا .. الرياييل بروحهم يتغدون..
فجر: وانتوا وين تقعدون؟
عليا: نيلس فحجرة اميه لانها تقريبا فاضيه.. ولين ما يخلصون الغدى وعقب نبدل الوضع نحن نتغدى وهم يشربون الجاي فغرفة اميه
فجر: اها .. عاداتكم غير عنا
عليا ابتسمت: لا ماعليج .. في وايد كويتيين نفسنا .. وفي وايد عايلات اماراتيه نفسكم.. يلا انزين انا بسير الحين
فجر: اوكي ..

طلعت عليا من الحجره .. توجهت للصاله وشافت العدد مكتمل .. بس ناقصات بناتها ليش تأخروا لين احين! .. سارت المطبخ ..
وتزامن الوقت اللي سارت فيه المطبخ يية البنات .. دخلن البيت ولقنه كعادته كل جمعه .. استحن صارلهم شهر ما شافوا ها الناس.. وطن اغراضهن وسلمن ع الجميع .. الكل استانس وهو يشوف البنات .. ودخلن داخل يعقن عبيهن وسارت وياهن احلام ومديه .. مي وساره فتحن باب حجرتهن لكن ماتبطل الباب وشافن احلام..

احلام: تعالن بدلن فحجرة عموه.. فجر شكلها قافله الحجره..
مي وساره اطالعن بعض ..
ساره: ييها من اولها عاد
احلام: يلا ساروه مافينا ع المشاكل

وتيمعن كلهن حجرة امهن .. ووصل خبر لعليا انه بناتها وصلن .. وطت اللي فايدها فالمطبخ وخلت شيخه وميره وعبير وردت البيت.. يوم ماحصلت البنات فالصاله خمنت انهن فالحجر .. وسارت ع طول حجرتها .. لقتهن كلهن يالسات .. غصبن عنها دمعت عينها .. وقامن بناتها يسلمن عليها .. ميوه من ولها ع امها تمت حاظنتنها وماتبى تتفجج وعليا تمسح ع شعرها وتحبها ع راسها..ومها ومهره كل وحده ميوده امها من صوب ويقوللها شكثر هن متولهات عليها.. ساره تمت مجتفه ايدها مب عايبنها الوضع وتنغز ميوه تباها تقوم .. وريم اطالعهن وتضحك عليهن.. دايما دورها ايي اخر الناس لكن تحصل الوقت الاكثر عشان جيه تمت هاديه..
اما احلام ومديه يطالعنهم وهن مستغبنات .. مب من شي .. الموقف كان صدق مؤثر وايد .. كيف الانسان يبعد عن امه مده ومايكون حاله جيه!!
احلام طلعت عطول من الحجره.. وهي تلوم نفسها .. كيف قدرت تكمل ها الايام وهي ماترمس امها .. ولو هاي بتظل امها .. ع الاقل بقولها كلمه .. كلمتين .. مابحرم عمري منها وانا اشوفها ليل نهار وغيرها مايتهنى بأمه الا كم يوم بالاسبوع..



العصر يلسن احلام ومي يسولفن في طرف الصاله عن كل شي استوى في هذي الفتره .. احلام رمست عن امها وفجر وبدت تطلع لمي اللي في خاطرها .. ومن الرمسه اللي سمعتها من احلام عن فجر قامت مي تقارن بين فجر وناعمه .. وتوازن بين الشخصيات وطلع ف الأخير لمعادلتها أنه ناعمه أرحم بوايد عن ها الفجر .. وفجأه شهقت مي وكأنها تذكرت شي ..

مي: ووووويه نسيت
احلام: شووو
مي: ماتصلت بنعوم
احلام: نعمه الله ..هههه
مي: هيه ترا قبل مانطلع كانت ميهوده ونسيت اسال عنها
احلام: تهمج يعني
مي: تبين الصدق ماعرف اذا تهمني والا مساعه كنت افكر في هالشي المهم قومي نشي خليني اتصلبها
نشن مي واحلام وسارن وين ماكانوا الحريم يالسين وشلت مي تلفون البيت..
عليا : منو بترمسين ؟
اشرت مي لامها بمعنى انها تصبر شوي واتصلت حق مرت ابوها
مي: الوووه
ناعمه: الوه
مي: هلا اشحالج ؟
ناعمه: الحمدلله
مي: شو تآنسين احين احسن عن مساعه ؟

ريم عرفت منو ترمس مي .. والتفتت تخبر امها ..
ريم: هاي ناعمه مرت ابويه
ام راشد: بلاها !
ريم: قبل مانظهر عنها كانت ميهوده ..
عليا: شو ياها ؟
ريم: مادري تقول راسها يعوورها تعبانه من كم يوم ..
مي كملت كلامها ويا مرت ابوها
مي: انزين ليش ماسرتي المستشفى
ناعمه: مايحتاي احس اني احسن شوي .. انتوا متى بتون ؟
مي: ليش تولهتي علينا .. ههه باجر بني اذا يت امايه عفرا
ناعمه: لا عادي البيت هادي وانا احتاج الهدوء
مي: بس عيل .. مب منج انتي من اللي يسأل
ناعمه: اووه بلاج ماتقهرين السوالف
مي: سوالفج ماصخه
ناعمه: حطيلها ملح عيل
مي: هههههههه والله عرفتي تنكتين بعد .. علمناج استخفاف الدم
ناعمه تقاوم ضحكتها: بس عيل علمتوني الفايده..
مي: والله ها الانسانه مادري شو يترس عينها من صوبنا ..
ناعمه: يالله عاد الواحد مايروم يسولف وياكن لازم يعني تعكرن عليه..خلاص ميوه لاترديلي عوقي
مي: هههههه بل عليج اذ انتي تسولفين ترا نحن اجداد السوالف .. انزين..يالله عيل بخليج اذا في شي دقيلنا اوكي
ناعمه: اوكي مع السلامه
مي: مع السلامه

الاغلب كان يسمع حس مي وهي ترمس لانه مرتفع نسبيا..وبعد ما سكرت مي التلفون .. يلست حذالها ريم اللي تبى تسأل عن الاتصال لكن بدون ماتسمع امهم الرمسه ..

ريم: هاه شو تقول احسن ؟
مي: هيه تقول احسن
ريم: عيل ليش قلتيلها تولهتي علينا وعقب تناقرتي وياها
مي: هههه تسالنا متى بتون والهرمه عقب قالت اونه البيت هادي زين حقها الهدوء.. وياراسها نسوي خير فيها ونطمن عليها وهي جي ههههههه
ريم: نعوم الا تعق رمسه جيه ..
مي: ادريبها.. ماتشوفين ما احرق دمي عليها..عيل ساروه وين ..
احلام: في الحجره
مي: خالتج اهناك ؟
احلام: اظن
مي : قومي قومي نطالعها اخاف يتناشبن..

نشن مي واحلام وسارن الحجره .. لقن فجر طايحه ع سريرها تجلب كتاب .. وساره منسدحه ع الغنفه ومحطيه التلفزيون ع قناه الاغاني وتدندن
يلسن وياهن مي واحلام ويوهم مديه ومهره ومها ..

اما ريم يلست ويا باجي اهلها يسولفون .. وبعد ماصلوا كلهم المغرب ريم يلست في الصاله كانت ترمس في التلفون ويتها امها يلست حذالها ..

وطت ريم سماعة التيلفون من بعد مارمست عمتها واطمنت ع يدتها .. ولفت ع صوب امها وويها منور ..

عليا: ها شخبارها ؟
ريم: الحمدلله .. تقول عموه باجر بيرخصونها
عليا: زين زين الحمدلله
ريم: على جيه لازم نقوم الصبح نسير اهناك
عليا: يالله بعدني ماشبعت من شوفكم توكم اليوم ياين
ريم: شو انسوي امايه عفرا تعبانه منو بيتم وياها .. بنسير ويوم بنشوفها استوت اوكي بنرجع اهنه
عليا : ع خير

سمعوا ضجه .. مصدرها كان من حجرة البنات .. حجرة مي وساره و..فجر..

عيا: بسم الله شو ها
ريم: يالله يا امايه ماتعرفينهن انتي بناتج دوم حشره
عليا: خس الله بليسهن بيأذن فجر
ريم: هههه صبري انتي عليهن هاذيل بيطفرنها من الحجره.. من ين يابن ربشتهن..
عليا: هههه فجيبهن ربشتهن هن ..
ريم: هههه عيل شو تتحرينهن.. بس تعرفين اميه نظرات فجر مول ماتطمن..شكلها قويه ما بيروملها خواتي .. ضاريات ع تسكيت نعوم الله يعين الحين جان ماتسكتهن ها الفجر..
عليا: يبوج يوم عبير ما تروملها .. واخوها مايروملها.. مافينا نحن ..
ريم: بسير اشوفهن وبيي
عليا: تسوين خير ..

قامت ريم من عند امها .. وتوجهت لغرفة البنات .. بطلت الباب بشوي شوي .. ودخلت بس راسها تشوف شو مستوي ..

شافت البنات اللي ع الشبريه واقف واللي فوق الكرسي واللي منسدحه تحت ويتفاررن بالخداديات.. دخلت الحجره وصرخت ..

ريم: شوووومستوي هنه.. الحرب العاالميه
ومن سكتت ريم ما شافت الا بخداديه مفروره صوبها وع طول دارت بويها ورا الباب ..
ريم: اييييييه انتن .. يعلكن ان شاااء الله
مها: هههههه ريموه فري فري المخده .. بسرعه
احلام: لا ريموه .. تعالي شوفيهن بيضربني ها التووم ومدوي

ريم تلفتت فالحجره وشافت فجر يالسه ع الغنفه اللي ع طرف ومن شكلها كاان امبين انها محرجه من اللي يستوي .. ومي وساره كانن متسلقيات ع الشبريه يتصفحن مجله كلها عن الازياء والميكاب ..
صرخت ريم وهدن البنات اللعب ..

ساره: بلاج ريموه؟
ريم: شو ها الصدعه؟
مي: تحيدينا دوم جيه
ها الوقت قامت فجر .. وتقربت من الشبريه.. واطالعت البنات بنظرات ..
فجر: كنتوا جي .. بس لازم تغيرون طبعكم وانتوا فغرفتي..احلام انا بروح عند عبير ولما برجع ابي اشوف الغرفه مرتبه ..

وطلعت فجر من عندهن وهي بتموت من الغصه .. ما قدرت من الاول تحتشر عليهم لانه توهن بنات عليا يايات يعني ما وحالها من يومين تقدر انها تاخذ وتعطي وياهن .. استغلت يية ريم وطلعت حرتها ولو شوي ..

اما البنات اتضايجن كلهن من رمسة فجر .. واحلام قالتلهن يطبنها لانهم وايد بيشوفن منها .. ماله داعي يحسسن من وحده شراتها .. بس مي وساره انقهرن أكثر.. هاي غرفتهن قبل ما تكون غرفتها .. كيف تتملكها بكل سهوله !!

وريم عقب طلعت من عندهن من بعد ماخففت على خواتها وسارت عند امها وخبرتها باللي استوى ..

عليا: هن قاللها شي
ريم: لا .. تمن ساكتات..
عليا: زين بعد .. ولا انه مب من عوايدهن يسكتن مي وساره
ريم: لا حليلهن كانن مصدومات هههه لو تشوفين ساروه كيف مطرطره بعيونها.. جنها تشوف جريمه جدامها..
عليا:هههههههه حليلهن..

وغيرن عقب الموضوع لانهن ما يبن يكبرن السالفه او انه عبير تدري عسب ما تضايج .. وطلعن عقب البنات من بعد مارتبن الغرفه .. ويلسن كلهن فالصاله ويا عليا .. ومي وساره امبين من شكلهن انهن امبوزات .. بس عليا طنشت .. ماتبى صدعة راس ويا فجر

وبما انه البنات باجر بيرجعن .. كان لازم عليا تفتح الموضوع ويا ريم خصوصا بعد ما تماثلت ام سيف للشفاء والحمدلله ..
قامت عليا من مكانها .. وزقرت ريم وقالتلها تباها فالحجره .. شوي وانسحبت ريم من اللمه ولحقت امها .. محد مستنكر الحركه لانه عليا دايما تحب تنفرد ويا ريم ..

و فحجرة عليا.. دشت ريم على امها ويلست حذالها وهي تطالعها..
ريم: ها امييه شو بغيتي
عليا: ماشي ابى اسولف وياج مثل كل مره
ريم: لاا بس احس ها المره ملامحج كانت غير يوم زقرتيني
عليا: لاا عادي
ريم: انزين عادي .. سولفي
عليا تمت ساكته .. ماعرفت شو بتقول .. مب مجهزه مقدمه للموضوع..
ريم: امييه
عليا: شوفي ريم .. بكل بساطه ومن غير لا لف ولا دوران ترا يايينج معرس
ريم:هاه
عليا: من قال هاه فقد سمع
ريم: اوكي سمعت .. بس عيدي
عليا: ريم يااينج معرس
لفت ريم بويها الصوب الثاني .. حست بحراره فضيعه تسري فجسمها

عليا: ريم
ريم: تعرفين رايي فها السالفه من قبل
عليا: بس رييم
ريم: اميه مابا اعرس .. ماابا .. مااابا .. تعرفين شو يعني ماابا
عليا: ريم عن المكر.. خلاص عاد دلعناج واايد .. ماله داعي عنادج هاا .. يا ريم الريال ستر للحرمه .. كم بتمين انتي اتردين اللي يخطبونج!
ريم اطالعت امها وعيونها تلامع من الدموع ورمست بصعوبه
ريم: امييه .. الله يخليج ماابا اعرس..
عليا: ليييش؟
ريم: بس ماابا
عليا: يا ريم خلي عنج ها العزله .. ادري انج ماتقاربين الرياييل .. لكن مب كل الريايل واحد .. اصابع ايدج مب وحده
ريم بحزم: بس الوصخ اللي تحتهن واحد
عليا: ريييم وغلااتي عندج يا ريم
ريم قامت من مكانها وحظنت عمرها بايدها .. ماتطيق ها السالفه .. امها ليش مصره على ها الشي يعني ..
ريم: ومنو ها اللي ياي احين!
عليا قامت من محلها ووقفت ورا بنتها ..
عليا: نايف
لفت ريم ع طول .. شافت امها .. وبدت دموعها تسيل
ريم: ولد عموه!
عليا: منو غيره يعني
ريم: رديييهم امييه .. ماباه مااباااه
عليا: الريال زين يا ريم
ريم: ادري .. بس انا مابا .. خلاص افهموني
عليا: فااهمينج يا ريم
ريم: حد يدري بالسالفه؟
عليا: لا .. امايه وامه بس
ريم:ولا تخبرون حد .. خلااص مابا ردييهم
عليا: يعني مالي خاطر عندج
ريم: اميييه.. لاتقولين جي.. الله يخليج سكري السالفه..
عليا: يا ريم
ريم: اميه مافي مجال لاتحاولين ..

وطلعت ريم من الحجره قبل ما تتفوه امها باي كلمه .. سارت ع طول الحمام عسب تغسل ويها .. تمت تشوف عمرها بالمنظره اللي ع المغسله ..
نايف.. يبوني لنايف.. ليش يا لطيفه ما قلتيلي لييش .. انتي تدرين!
اميه قالت محد يدري .. احسن لحد يدري .. مابا حد يصدعلي براسي ..
ياربي يا نايف .. اسبوع قضيته وياك ولا حسستني بها الشي.. ليش جي.. كنت تستغل وجودنا رباعه عسب تتقرب يعني .. عسب اوافق علييك ..
اناامابا اعرس .. مب بايدي .. انا ماطيق الطاري ها ..
مابا مصيري يكون نفس اميه .. ماابا ..
وردن دموعها ينهمرن ع ها التفكير .. وهي بس تتخيل انه ممكن يصيرلها اللي
صار لامها..

******************
(السبت) 7 اغسطس 2004
******************

الساعه ثمان الصبح .. كان فارس واقف مجابل المنظره الطويله اللي حذال باب الفله وهو يرتب تعصيمته .. رن تيلفونه وع طول رد " ها الحين بطلع.." سكر التيلفون .. ونادته امه ..

ميره: فارس ها اندوك الفلوس ..
فارس توجه لامه وخذ الفلوس..
فارس: مشكوره اميه .. ادعيلي بس انتي يقبلوني وادرس واخلص واكد على عمري
ميره: ان شاء الله يا وليدي.. الله ايسرلك امرك ..
فارس: يلا فمان الله .. خليفه واقف عند الباب
ميره: الله يحفظك الغالي.. وطمنا انزين
فارس: ان شاء الله ..
وطلع فارس من البيت بمشي سريع.. وبرع البيت حصل خليفه ولد عمته شيخه يترياه .. ركب وياه وتوجهوا للشارجه ..

خليفه: يبت كل اوراقك؟
فارس: هي هاذن ..
خليفه:زين عيل .. يلا ان شاء يطلع قبولك ..
فارس: الوظيفه مضمونه عاد؟
خليفه: شوف انا الحمدلله من تخرجت توظفت ع طول فالاتصالات .. الشهاده قويه .. ان شالله ما بيظيع تعبك ..
فارس: والدراسه شو؟
خليفه: يبالها يعني واحد يشد حيله.. لكن ماشالله عليك انته شاطر وبتمشي ..
فارس: ان شاء الله..

وعلى سوالفهم انقضى الوقت وهم فالدرب ووصلوا الكليه.. قدم فارس كل اوراقه وبيتريون المقابله وامتحانات تحديد المستوى ..

وبعد ماخلصوا كل شي .. نزلوا فارس وخليفه صحارى مول بما انه عندهم وقت .. وقالوا بياكللوهم شي.. ساروا فوق لمطعم وطلبولهم شي خفيف ياكلونه ع الصبح .. يلسوا ع وحده من الطاولات برع .. وقاموا يسولفون عن الدراسه أكثر والصعوبات اللي بيواجهها فارس .. وخليفه قام يخبره مواقف عنه وعن دراسته عل وعسى ياخذها فارس بعين الاعتبار .. يابولهم الطلبيه ويلسوا ياكلون ..

فارس: الا اقول .. ترا المقابله ورا باجر .. انته بتيبني ولا
خليفه: بييبك عادي شو ورايه من شغل
فارس: بعبل عليك عاد
خليفه: ما من عباله ..
فارس: يلا ان شاء الله بقدم لليسن الاسبوع الياي
خليفه: يحيك والله .. زين.. هاكم يابو الغدى .. بنتغدى وبندش السينما شو رايك
فارس: زين قلت تراك شو ورانا من شغل
خليفه: ههههه زين عيل ..

وعقب ما خلصوا أكل.. قرروا يدشون السينما يقضون وقت شوي قبل ما يردون راس الخيمه..


****


الظحى.. نشن بنات سيف ها الوقت عسب يردن البيت .. ريم كانت اول وحده ناشه ومن نشت وهي تتحاشى نظرات امها .. ماتبى حتى ترمس او تعطي نفسها فرصه انها تنفرد بها عشان ماترجع تكلمها بالموضوع .. كافي الصداع اللي رجعلها امس أما مي وساره من قامن من النوم وهن بعدهن مانشن من سرايرهن
طايحات متجابلات ..
فجر نايمه ع سريرها .. والبنات يسولفن بصوت واطي ..ساره قالت شي ضحك مي بصوت عالي ..

ساره : ميوووه اسكتي عن تنش احين هاي
مي: تولي .. هاللي قاصر .. امس اول مره نرقد بهدوء .. طلعنا ع الدنيا مارقدنا في هالحجره جيه الا جان حد فينا مريض .. عنبو حكم قرقوش .. سكرت عنا التلفزيون والليتات وطاحت ترقد لا وشو ماتبى صدعه ..
ساره: يعلني بلاها ..
مي: قومي قومي انتي عن نتأخر خلينا نتلبس ونسير برع .. تعرفين والله اني ماشبعت من اليلسه اهنه خاطريه اتم لكن حرام امايه عفرا بتي العصر
ساره: حليلها العيوز.. (وكأنها تذكرت شي) ويه تعالي نعوم اشحالها .. تدرين اول مره تكسر خاطريه امس
مي: حتى انا والله عقب ماعطيتها الدوا مادري شو ياني حبيتها ع راسها وظهرت
ساره: ههههه قوولي والله .. ومتى ها ؟
مي: والله تخاديت اظني من زود ما انا ولهانه ع امايه
ساره: عاد تشبهين نعوم بامايه
مي: لا بس حرام بعد تغمظني ساعات لو انها وغده وماتيوز عن لعانتها لكنها هبلى
ساره: وانا شو يعيبني فيها الا هالهبل
مي: هههه خسج الله ..قومي انزين انا بدش اتغسل وانتي طلعي الثياب
ساره: انزين ..

دخلت مي تتسبح لكن ساره كانت متعمده ترد الحركه لفجر بطريقه غير مباشره .. قاهرتنها من امس .. قامت تفتح الكبتات بصوت وتسكرنهن وتفتح الادراج كأنها تدور شي .. فجر بدت تتحرك وهي منزعجه من الصوت

فجر: اييه شنو ها الازعاااج
ساره: اسمحيلي ادور اغراضي لانه احين بنطلع بنروح بيت ابونا
فجر: زين لاتسوين صوت
ساره: ان شا الله فديتج .. اسمحيلي كلها نص ساعه او ساعه بالكثير وبنطلع
فجر تاففت وصدت الصوب الثاني ..
ساره في هالوقت يتها الظحكه ورجعت تكمل وتدور باجي اغراضها وهي تغني
فجر مارامت تتحمل ونشت من السرير طفرانه وتتحرطم بس ساره مب فاهمه عليها شو تقول وطلعت من الغرفه .. وسارت غرفه احلام ومديه ولقت احلام بعدها راقده ووعتها ..
فجر: هيه انتي قومي
احلام: شوووووو
فجر: قومي ابا انام
احلام: انا بعد ابا ارقد
فجر: قومي روحي اهناك انتي تعرفين تنامين بوجود بنات عمتج اما انا ماقدر وايد مزعجاااااات ..
احلام فتحت عيونها بتكاسل ونشت ماتبى تسويلها صدعه وياها خصوصا انه بنات عمتها اهنه .. نشت وسارت غرفه البنات ولقت ساره يالسه تجلب في قنوات التلفزيون ومي تنشف شعرها
ساره: اوه احلاموه نشيتي
احلام طاحت ع سرير مي وتلحفت: فجر وعتني شو مسويات بها
مي: هاي ساروه انا مايخصني كنت اتسبح
ساره: ههههههه ليش شو قالتلج
احلام: وعتني ورقدت بشبريتيه .. وقالت انكن مزعجات
ساره: ههههههههه تستاهل الازعاج الهرمه
احلام: انا بكمل رقادي اهنه ..
مي: قومي يالله ماشي رقاد .. نشي تريقي ويانا وعندج باقي اليوم رقدي فيه ع راحتج
احلام: اوف ليش بتروحون ماشبعنا منكم
مي: نحن 12 سنه ماشبعتي منا بتشبعين في يوم واحد
ساره: ياويلي ع الخقه ياربي
مي: الا اقولج حلامي
احلام: هاه
مي: ليش ماتين بيتنا ؟
احلام: بالمشمش
ساره: ليش؟
احلام : منو بيخليني ؟
مي: رمسي ابوج ما بيقولج شي .. ومنها تشوفين نعمه الله وامايه عفرا
ساره: هيه والله فكره
احلام: ماعرف والله.. بشوفه .. بس مب اليوم.. بشوف جي يوم يعم السلام فيه فالبيت وبرمسه ههههه
مي: المهم اتين وتشوفين كل شي فهاذاك البيت بعينج هههههه
احلام: يحتاي والله

عقب طلعن البنات من الحجره ويلسن ويا الحريم فالصاله.. وعقب البنات طلبن من امهن توصلهم البيت الحين لانه اليده بتي العصر ويبن يسيرن يجهزن البيت من ناحية التنظيف والاكل لان اكيد الناس بيون يتحمدولها بالسلامه.. طبعا وصلتهم عليا البيت .. ونزلن البنات الاغراض وسلمن ع امهم ودشن داخل .. وطن اغراضهن فالغرف ونزلن .. وقامت ريم تنظف غرفه يدتها وتدخنها وتعدلها .. وترتب البيت ويا الشغاله اليديده ونجمه .. وسارت عقب وياهن المطبخ ولحقتهن ساروه والتوم.. اما مي سارت عند نعوم فحجرتها واللي كانت صحتها شوي احسن اليوم..

ناعمه: ها ييتوا!
مي: لا مايينا مطرشيلج قرين كل واحد منا
ناعمه تأففت بس ماردت على ميوه: مابقولج شي لانج اكثر وحده اهتمت فيني
مي يلست حذالها ع الشبريه
مي: ومنو قالج انه اهتمام
ناعمه اطالعتها بنظره: عيل ليش اتيني؟
مي: بدافع الانسانيه
ناعمه: اوه خل عنج عاد يا ام الانسانيه
قامت ناعمه من الشبريه ويلست جدام التسريحه ..
ناعمه: يالله شقى غادي شكلي .. ميوه شوفي ويهي مب ضعفان ولونه باهت؟
مي: لا مب ضعفان غزوزج شكبرهن ..
ناعمه: سمي بالرحمن يا الهرمه
مي: يالله الحين انا عيني حاره
صدت ناعمه صوب مي وكأنها تذكرت شي
ناعمه: هي انتي عيونج حاره مب يايزلج.. ماتذكرين ذاك اليوم فاستراليا يوم كنا فالحديقه كنتي تقوليلي ركبج يعورنج ودعيتي عليه وتخرطفت!!!
هنه نقعت مي من الضحك تذكرت هاك الموقف ومارامت تيود عمرها وتمت تنكت ع ناعمه ..
ناعمه: هي اطنزي عليه
مي: والله شكلج شو كان قافط .. هو انتي صح ما طحتي بس يعني بغييتي اطيحيين هههههههههه ..
ناعمه: مالت عليج يا الماصخه
مي قامت من الشبريه ووقفت حذال ناعمه ومسويه عمرها محرجه
مي: اييه انتي بدال ماتقوليلي مشكوره طايحه فيني سب من ييت
ناعمه: بسم الله شو بلاج لبقتي
مي: هي لبقت .. جبريت تراني .. ان قلتيلي مالت عليج مره الثانيه ترا والله
ناعمه: شو والله .. بتظربيني يعني
مي تجدمت من نعوم وحطت ايدها ع جتفها..وكشرت بويها
مي: بشرب من دمج مب الا بظربج

صرخت ناعمه وبعدت مي عنها اللي يلست ع الارض وهي تضحك ع شكل ناعمه الغبي ويبين عليها الاحتراس من مي وكأنها كانت ترمس جد وخذت الرمسه بجديه وعقب ما هدت الحجره تمت مي متربعه فمكانها وهي تتحسس ركبها .. ذكرتها ناعمه بويع ركبها الي من خفت عنهن رضوض الطيحه خاز الالم عنها .. وسرحت وهي تذكر ذاك اليوم اللي طاحت فيه عليها ساروه وكسرتها تمت كم يوم تعري وابتسمت .. ناعمه كانت تشوفها وهي يالسه هاديه وسرحانه .. وتمت تتأمل ملامحها .. أول مره تحس انها تنجذب لوحده من بنات سيف .. غصبن عنها تمت تتطالع ميوه ويوم ابتسمت مي ع ذكرياتها ابتسمت نعوم ..

ناعمه: ها بلاج تتبسمين ..
مي انتبهت لناعمه
مي: شو؟
ناعمه: اشوفج تتبسمين
مي: لا ماشي .. انا بقوم الحين بسير افازع خواتي فالمطبخ
ناعمه: هيه .. زين سيري بلحقكم المطبخ
مي اطالعتها وهي رافعه حايب
مي: هه ماصدق نعمة الله بشحمها ولحمها تفكر تدخل المطبخ ..
ناعمه: ميووه عاد
مي: اوكي اوكي .. يلا انا بسير ونتريااج عاد

طلعت مي من عند ناعمه وهي تضحك عليها .. الحين نعوم بدش المطبخ لا ها الخبر لا يصدق .. ربعت عند خواتها تخبرهن .. لكن ناعمه أبطت عليهن ولا يت .. والكل تمصخر على ميوه يوم انها صدقت ناعمه .. وعقب ما رتبن الاكل سارن البنات حجرهن يتسبحن ..
اما ريم كانت طول الوقت تفكر في الموضوع اللي قالتلها اياه امها ووايد كانت مظايجه منه .. يلست تفكر وتفكر .. راسها عورها بس ما تتحمل اكثر ومالقت شي تفج حرتها وقهرها فيه غير التنظيف .. ونجلت حجرتها وتمت ترتبها وتنظفها..

****

[لامارا]

ردت احلام لعزلتها من بعد ما روحن بنات عمتها .. ها الوقت من كل يوم اتم احلام ملانه بكل ما للكلمة من معنى .. ماتعرف شو تسوي الظهر.. الكل راقد .. ومدوي مجابله تيلفزيون الصاله .. وفجر مستحيل تسيرلها وتيلس وياها .. ماتعرف شو تسوي بالضبط.. يلست فحجرتها .. تذكرت اوراق ابوها .. من يت فجر وهو مول مايابلهم اوراق يديده ولا كمل الروايه الهم .. طلعت مفتاح الدرج من كبتها وخذت الاوراق وردت تقراها من اول ويديد ..

احلام: غريبه ابويه فها الاوراق ما ذكر فجر مول .. هين يا فجروه ان ماخليت ابويه يكتب عنج .. لا شوو ابويه .. انا بكتب الجزء الثاني من ها الروايه وبوصف شقى يوم نحن كبرنا وبنات عموه ويانا ويتنا ها الساحره فجر .. لازم اقول لابويه يكتب عنها .. يبين الجانب الشرير فيها ..

دشت مديه الحجره وهي تسمع احلام ترمس عمرها بكل قهر وتجلب فالاوراق .. ضحكت عليها ..

مديه: شو تخبلتي؟
احلام لفت ع مديه ورجفت ايدها ..
احلام: الله يغربلج زيغتيني قفلي الباب عن تنش امايه وتشوف سر ابويه
مديه ع طول قفلت الباب.. ويلست حذال اختها
مديه: تعالي ابويه من زمان ماقرالنا شي
احلام: ترا من يت ها البومه البيت طفر ابويه وماقام ييلس ويانا وايد.. يتحرانا بنيلس وياها ..
مديه: فديت ابويه صدق متولهه عليه ..
احلام: يوم بيقوم العصر بنذكره عن سالفة الروايه .. بس عاد هب ترمسين جدام اميه
مديه: انزين ادري شو قالولج غبيه..
احلام: يمكن ليش لا ..
مديه: جب غبيه انتي مب انا

طاحت احلام ع السرير والاوراق فايدها .. وتمت تقرى بسرها .. اما مديه طلعت بوكس العابها وتمت ادور شي تلعبه .. طلعت لعبة الثعبان والسلم ..

مديه: احلااام ماشفتي الزهر وين
احلام: اي زهر بعد
مديه: ها مال اللعبه اللي يفرونه
احلام: مادري .. دوريه فكرتونج

مديه تمت ادور بعدها لين حصلت وحده .. وسارت عند احلام
مديه: ماحصلت غير زهره وحده .. عادي .. يلا نلعب
اطالعتها احلام وردت تتطالع الاوراق المأساويه اللي فايدها ..
احلام: انزين صبري برد الاوراق فالدرج.. ماروم اقرى اكثر .. ها الجزئيه كلها فيها عن الحرب .. قلبي عورني ..
مديه: يلا انزين ..

وفرشت مديه اللعبه ع سرير احلام وتمت يالسه ع الارض واحلام طاحت ع بطنها فوق السرير وبدن يلعبن ويسولفن .. وهنه تذكرت مديه شي سامعتنه قبل كم يوم ..
مديه وهيه تفر الزهره: تعرفين احلام مره سمعت عموه عليا ترمس عن شي بس مافهمته زين
احلام: شو هو
مديه: ماعرف كانت ترمس امايه سلامه .. تقولها اون هي بتخبر ريم بروحها ومحد يعرف وامايه قالتلها خل اتي عندي بقنعها
احلام كان دور اللعب عندها .. وطت الزهره وتمت تشوف مديه بتركيز
احلام: انزين وعقب
مديه: ماشي عقب .. ماعرفت شو يرمسون
احلام: ماقالو شي بعد
مديه: امبلا.. بس ما عرف شو بالضبط لكن عموه عليا قالت انه عمي راشد شي سوا فبناتها الباجيات
احلام: شو بيسوي يعني؟؟؟؟
مديه: ماعرف والله .. هي قالت راشد كمل ع بناتي
احلام قامت من طيحتها ويلست ع السرير متربعه..
احلام: شو يعني؟
مديه: ماعرف
احلام عقدت حياتها .. وتمت تفكر ..
احلام: انزين يبون يقنعون ريم .. وعمي راشد بيكمل ع البنات .. شو لغز هوو
مديه: شدراني .. يلا انتي لعبي

قبضت احلام الزهر وفرته وحركت ع العدد اللي طلع فالزهر وبالها مب عندها .. تفكر فالرمسه اللي قالتها مديه .. شو ممكن تكون .. مديه صغيره مابتستوعب كل كلمه قالوها .. اكيد جزء من النص مفقود من بين اللي وصلته لاحلام .. بس احلام تبى تعرف شو ها المفقود .. وشو السالفه بالضبط ..

****

ع الساعه 5 العصر وصلت ام سيف البيت و اللي كان يايبنها نايف وامه ..
كل البنات طلعوا يستقبلونها الا ريم .. اللي اول ماشافت سياره نايف داخله ركبت على طول وسارت غرفتها .. تمت يالسه في الغرفه واقفه عند الدريشه وتشوف بيت عمتها .. اللي كانت غرفتها تطل عليه .. صح البيت بعيد نسبيا بالنسبه للي بيروحله مشي لكن البيت ينشاف لانه مافي بيوت تخبي الرؤيه ما بين البيتين اللهم ند مرتفع ومن بعده هيّل وهو مكان نازل شوي من الند يقطعه شارع ومن بعده بيت مريم .. تمت ريم تتطالع البيت ودموعها تطيح لا ارادي لمجرد فكره الخطبه بس ..
وطت عيونها ولقت تحت في الحوي سيارة نايف واقفة .. وأهنه بدت دموعها في التزايد ..

دخلت ام سيف البيت وطاحت في غرفتها والتمن البنات حواليها .. كان نايف واقف بعيد ويشوفهن وهن يسولفن وياها .. نزلت ناعمة هالوقت ودخلت عليها الغرفة تسلم ..
ناعمة: هلا والله عمتي اجر وعافيه ماتشوفين شر
ام سيف: الشر ماييج
كان ويه ام سيف وهي ترد على ناعمه زعلان .. عتبانه عليها انها ماسالت عنها ولافكرت فيها .. لكن في نفس الوقت ماتلومها .. مرت ولدها من استوت وهي جيه عيالها ماتسال عنهم بتسال عن عمتها!! ..
مريم: اشحالج ام مايد قالولي البنات انج تعبانه
ناعمة: هي والله يا مريم تعبانه من ييت كله احس بدووخه
مريم:يبين اصلا ويهج مصفر
ناعمة: هو اليوم انا شوي احسن الحمدلله بس من ييت وانا تعبانه
ام سيف: الله يعافيج ان شا الله .. عيل وين ريم ماشوفها؟
مهره: اكيد سارت تتسبح لانها من الصبح فالمطبخ وعقب يلست تنظف وتعابل في البيت وحجرتها ..
ام سيف: فديتها الغالية
ابتسم نايف ع طاريها وهالمره مي لاحظته .. بس ماعرفت تفسر هالشي ..
مريم: انزين نايف قوم سير البيت انته انا بيلس ويا امك
ام سيف: لا لا قومي سيري انتي وياه بس موازرتني فالدختر.. انا ماعليه شر ان شاء الله ..بناتي عندي
مريم: لا امايه مايستوي لازم اتم عندج
ام سيف: و بناتج مابيون ؟
مريم: لا لا انتي يايه بترتاحين باجر ان شا الله بيونج ..
ام سيف: عيل قومي انتي سيري ويا ولدج ولاتحاتيني
مريم: بس يا امايه
ساره: عموووه لاتحاتين خلاص .. انا بيلس عند راسها مابخليها تحتاج شي
مي: الا انتي بتيلسين عند راسها تصدعيبها من الرمسه

اضحكت مريم ع بنات سيف .. وضحكت اليده .. اما نايف ماكان منتبه للحوار كان يلعب بتيلفونه وذهنه شارد ..

ساره: امايه عفرا تحبني اصلا وماعورها قلبها ذاك اليوم الا لانها مارمستني
مي: يالله عاد انتي ..
مريم: هههه خلاص اطمنت عيل امايه .. بناتج بيونسنج اكثر مني ..خلاص عيل بقوم اسير ..
ام سيف ابتسمت: سيري بيتج وتوكلي على الله
مريم: يالله عيل نايف .. ان شا الله باجر بييج امايه
ام سيف: ع خير ان شا الله
مريم: يالله عيل في امان الله ..

طلع نايف يشغل السياره .. وطلعت مريم ووياها مي توصلها عند الباب ..
مريم: مي فديتج ردوا ع تلفون البيت يوم بتصل لاتخلونه يدق ومحد يرد عليه بتم احاتي
مي: ان شا الله عموه لاتحاتين ويوم محد بيرد خلي البنات يدقلج ع تيلفون وحده من خواتي
مريم: خلاص عيل ..
مي: عموه سلمي ع البنات
مريم: الله يسلمج .. فمان الله
مي: الله يحفظكم

طلعت سيارة نايف من البيت ويا الافراج لريم اللي بعد ماتاكدت انهم روحوا دشت تتسبح ع السريع ولبست ونزلت ع طول عند يدتها تسلم عليها وتتحمدلها بالسلامه وتمن البنات ملتمات ع يدتهن ويسولفلها وناعمه ها المره مشاركتنهن اليلسه .. ويا سيف قبل المغرب وكمل وياهم اليلسه والسوالف..

****

كان يتجول بسيارته فالحاره .. مب طايق ها الروتين اللي فحياته .. قبض التيلفون واتصل على شركة الطيران يشوف الحجوزات عندهم .. فكر فسفره للبحرين ويا ربعه يقضون فيها كم يوم دام عندهم كلهم اجازات ..
من غير ما يحس بعمره شاف انه بركن السياره فكراج البيت .. دش البيت ويلس شوي ويا امه وابوه .. مل من سوالفهم .. وقال بالمره بيمر على يده ويدته يسلم عليهم لانه حدد السفره بالثلاثا وما بيتفيج يخطف عليهم ..

سار بيت بوراشد .. مالقى حد فالحوي..اطالع ساعته اللي كانت تشير لثمان فليل .. طبيعي الكل داخل البيت .. وتجدم بخطوات رزينه وهاديه .. ويوم ياي بيركب الدري اللي جدام البيت .. انتبه لشخص عاطنه ظهره ..

تحنحن يبى يلفت نظر ها الشخص .. ولما التفتت .. رفع سلطان حياته ..

سطان: هيلوو
فجر اطالعته ومعقده بحياتها .. كانت يالسه ببجامتها وفاتحه شعرها الاشقر اللي يوصل لين جتوفها ..
سلطان تم اكثر مركز بعيونه: هاي
فجر ها المره رفعت حياتها باستغراب
سلطان: heah you..do u know speak arabic
فجر ابتسمت .. ودار فبالها شي يمكن يغير من مزاجها المتعكر شوي ..
فجر: ooh..no sir I don’t
سلطان قام يمسح ع يبهته : ولييه هاي شقى بفهمها .. انا بروحي يالله يالله اطلعلي كم جمله بالانجليزي .. شو بقولها الحين
فجر: sir can I help u?
سلطان يرمس عمره" وين لقوها هاي قوم خالي .. اسميها حلوه .. "
سلطان:I want my uncle
فجر: whose ur uncle?
سلطان: محمد .. ها محمد brother ماما
فجر:..so you are sheikha`s son
سلطان: مادري شو تخربطين .. بس قلتي اسم اميه .. yes yes شيخه my mother ..
فجر فطست من الضحك .. وسلطان يطالعها وهو مستغرب ..
سلطان: الله يغربلها قامت تضحك عليه .. قومي قومي عن ويهي .. سيري قوليلهم اني برع
فجر: هيي انت ليش تسب
سلطان تلفت على ورا ..
فجر: ايه شوفني لما اكلمك
سلطان رد يشوف فجر
سلطان: هاا
فجر: ليش تسب؟
سلطان: وانتي منوووو
فجر: موو شغلك
سلطان: وليش قاصه عليه؟
فجر: بس حبيت اغير جو شوي
سلطان: لاوالله .. انتي منوو.؟ شو تشتغلين عند قوم خالي ولا شو بالضبط؟
فجر ضحكت
سلطان: ما بتقولين؟
فجر: هههه اوكي انا فجر اخت عبير زوجة محمد ..
سلطان تم يطالعها من فوق لتحت .. مستغرب من حالها .. هي وين وعبير وين !
صح فيه شبه .. بس هاي انسانه كشفه لييش!!
فجر: شفييك اطالعني جذيه
سلطان: لاا ماشي ..
فجر: انت منو؟
سلطان: انا سلطان بن سالم
فجر: انزين وشعرفني بسالم
سلطان: هي صح .. سالم ابويه
فجر اطالعته وهي رافعه حايب: شو تستعبط
سلطان: هههه لا ..
فجر: الي فهمته منك انك ولد شيخه ..
سلطان: هيييه عليج نور .. ها سالم ريل شيخه .. ابويه وامايه .. تشرفنا ..
فجر بتملل: دمك خفيف ..
سلطان: ماعليه .. لزوم ترطيب الجو ..
فجر: شدعوه ..
سلطان: ماعليه .. ماتنلامين .. ماتعرفيني ..
فجر استغربت من جرأته ..
سلطان: انتي من متى هنه؟
فجر: يعني صارلي مده ..
ماعرفت فجر ليش حدسها نبهها من انها ما اطول أكثر ..
اطالعته وابتسمت: تشرفت بمعرفتك .. الحين بروح .. عن اذنك
سلطان تم يطالعها وهي مروحه : اذنج معااج ..
وردت توقف واطالعته: لا تقول لحد انك كلمتني
سلطان تم ساكت ..
فجر: اشفيييك!
سلطان: لا ماشي .. اوكي ما بقول لحد ..

وروحت عنه فجر .. وهو تم واقف عند الباب .. ورد يتشاور يدش ولا لا ..
لا .. ما بدش .. كافي اللي شفته اليوم .. قبل السفر بييهم ..
وطلع سلطان من البيت .. وركب سيارته وسار القهوه عند ربعه ..


******************
(الثلاثا) 10اغسطس 2004
******************

العيال كانوا كلهم ملتمين عند يدتهم يتريقون وياها.. تعودوا ينشون من وقت لانه خلال ها الايام العرب كانوا اييونهم حد الظحى وحد العصر وحد فليل فعشان جي ما كانن يطولن فرقادهن وراحتهن..حتى ناعمه قامت تشاركهم ها الايام فاليلسه بس عشان تستعطف اللي كانت طالعه من العمليه وراده البيت وهي شاله فخاطرها من ناعمه..صح عادي عند ناعمه بس شافت انه المديح كله يسير لبنات عليا وهي مالها شي مول.. فلازم كان تبين دورها خلال ها الايام لين ماتخف ييت الناس ..

ومن بين سوالفهم ..

جاسم: ريييموه انتي متى بتردين ترقدين فوق
ريم اطالعته: لييش؟
جاسم: بس انتي قولي
ريم: ماعرف .. يوم بتصح امايه
ام سيف: انزين ريم انا بخير الحين الحمدلله .. ردي رقدي ويا خوانج يبوج.. ونجمه بترد ترقد عندي ..
ريم: لا لا ماعليه خلها نجمه انا ابا اتم وياج ..
مايد: جسوم انته شو تباها ريمان .. تراك ترقد عندي
جاسم: انته تعفن رقاد وماتنش اذ انا عورني شي
ريم وهي زايغه: ليش شي عورك !!
ساره: جسوم ترانا نحن كنا وياك ..
ريم: ساروه شو بلاه جسوم
مي: ماشي بلاج جي منطره عيونج.. ياه هبوط سكر خفيف فليل ..يانا الحجره وعطيناه الدوا..
ريم حطت ايدها ع قلبها وهي متوتره .
مايد: متى ها
جاسم: قلتلك كنت منخمد
ام سيف: ريمان امايه ردي رقدي عند اخوج هو يحتاجلج اكثر عني
جاسم كان مطنش الرمسه ويلس ياكل ويسولف ويا مايد ويخبره كيف تعب وتم يوعيه وميود ما كان حتى يحس بأنه جاسم كان تعبان..
ام سيف: خلاص ريمان ردي رقدي عند خوانج
ريم: لا امايه.. برقد عندج .. لكن جاسم من اليوم بيرقد فالحجره وبترقد وياه ساره
ساره: هي امايه عادي عندي .. انتي بعد فحاية ريم
ناعمه: انزين عموه انا برقد وياج عادي
ام سيف: لا لا لا خل عنج .. انتي الا اشد من ولدج .. نجمه ابركلي منج
حاست ناعمه بوزها وهي منقهره .. وطنشوا الكل السالفه وتموا يسولفون فامور ثانيه..
ساره: الا اقول نعوم .. عفروه بنتج وين مالها شوف من امس
ناعمه: سارت تيلس عند بنات خالتها كبرها وتتونس وياهن
مايد: فكه
ناعمه: ميووود
ساره: بس بس انزين خلاص ..
ام سيف صدت ع مي اللي كانت قابضه بيضه بايدها وتقشرها
ام سيف: ميوه انتي متى بتسيرين الجامعه ؟
مي: ليش دار عبالج ها السؤال يعني
ام سيف: سمعت ابوج مساعه الصبح يقول انج طالبتنه فلوس تبين تتشرين للجامعه..
مي: هييه نسيت.. خلالي فلوس عاد؟
ام سيف: هي بتلقينهن فالسده هناك فحجرتيه
مي: هي زين يوم مانسانا.. امس فليل يلست وياه ويالله يالله رمت اطلبه فلوس
ام سيف: وشحقه بعد ماترومين .. مب ابوج هو والمفروض يكد عليكن
ساره: هيه والله .. المفرووض .. الا ميوه اونها تتلوم تطلبه.. انا كنت بقوله عادي بس انا مخلصه اغراضي ..
ريم: انتي ماتنسين عمرج تراج مول
مهره: عيل نحن بعد بنقوله يودينا نتشرى للمدرسه
ام سيف: زين قولن له ما بيردكن هو .. انزين ميوه ما رديتي متى بتروحين الجامعه؟
مي:عقب اسبوعين امايه
ساره: امايه ترا انا بسير وياها
ام سيف: ليش بعد تسيرين
ساره: بس جيه وحليلها ماتدل بسير وياها حرام اختيه الصغيره اخليها بروحها
ام سيف: يالله يا انتي .. ماعليها شر هيه بتيلس ويا ربايعها انتي يلسي هنه
طنشتها ساروه وتمت تطالع مي وتقولها بسير ماعليج.. بالنظرات طبعا..
ام سيف: انزين ميوه انتي شو بتدرسين
مي: انا باخذ اداره نفس ساروه
ام سيف: هيه زين الله يوفجكن
ساره: انا سنتين بالكثير وبخلص.. و ريمان بتفتك هالسنه اخر سنه وبتخلص..صدق الايام تربع
ناعمه اطالعت ريم: اقول ريم بتشتغلين عقب ؟
ريم: ماعرف بس انا كنت اتريا اللحظه اللي اخلص فيها عشان اشتغل واعاون امايه واردلها شي من اللي عطتنا اياه
ناعمه: وامج بتتقاعد ؟
مي: اميه بعدها ماوصلت سن التقاعد
ام سيف: هي في أي مدرسه تدرس
مهره: اللي انا ومها فيها ..
ام سيف: زين زين عيل بتلقنها كل يوم
مي: هي والله يا حظهن

حست ام سيف بنغزه ففوادها وهي تتطالع مي اللي كانت صدق ترمس من خاطرها.. ويبين من ويها شكثر هم يشتاقون لامهم.. اللي هي ام سيف حرمتهم منها .. ما تبى تحس بتأنيب الضمير لانه هي يدتهم ومن حقها بعد تحظابهم على اخر عمرها .. قامت من السفره تبى تسير حجرتها وريم قامت وياها تعاونها ع المشي .. اما البنات حد سار يشوف التيلفزيون وحد تم يالس يغصص بنعوم..

ومي .. ماعرفت ليش ها الوقت حست انه في داخلها شي .. اشتياق رهيب لامها ولاحلام .. كل ما تيها ها الاحاسيس تحب تنعزل بروحها .. سارت عنهم فوق ودخلت حجرتها ويلست ع السرير .. اطالعت الكوميدينو .. طلعت منه النوته مالتها .. تمت تجلب فيها وتقرى خواطرها اللي تكتبهن من فتره لفتره ..
قبضت القلم وطلعت شي فخاطرها..

في لحظة
بدت من ظلام وليل
بـ ريحة عطر وفوعة هيل
وهدوءٍ مسكنه في الطير
غرقت بين بحر وسيل

في لحظة
تناظر عيني القمره
سما ونجوم في السهره
وصوت أعيش على ذكره
وسود عيون فدى نظره

في لحظة
بدت سهرة أحلامي
من بقايا ذكرى أيامي
بديت أغمض أجفاني
تغطيني رموش العين
أراجع ذكريات أمسي

في لحظة
بين ذكريات ليلي واحزاني
بين دمع بلل أعياني واجفاني
ودمع سال من عيني على هـ الخد
وبين ذكرى مرّت على بالي ولمسة يد
وبين دمعة حسبت "في لحظة"
إنها ...... إنها .. حد*

ختمت مي خاطرتها بتنهيده .. في ها اللحظات ما فارقتها امها من بالها ولا احلام .. تمنت الأيام تردها لورى .. عاشت احلى الذكريات بين أهل أمها ..
لكن الحين .. فبيت ابوها .. ماتعرف شو المجهول يترياهم .. تمنت من الله انها تستانس فها البيت أكثر .. ع الاقل تقدر تتناسى ايامها القبليه ومرحها الدايم ويا أحلام ..اللي مالها غنى عنها ..


****

فجر كانت يالسه فحجرتها .. وطايحه ع السرير وتجلب فايدها مجله .. ويدور فبالها الموقف اللي كان ويا سلطان من ثلاث ايام.. شكله رايقلها وايد.. طبيعته وهيئته حلوه .. بس شخصيته كيف ! ..
الكل اهنه يشوفها بعدها غريبه .. وما يرمسون وياها .. شبابهم حتى من يشوفونها يروحون .. بس ها خذ وعطى وياها ..
يا ترى انته منو ..
غير انك سلطان .. انت منوووو!!
من ذاك اليوم ماطبيت ها البيت .. ليش انته بعد تتجنب اتي هنه مثل الباجين نفس ماتقول احلام!

وطت المجله اللي كانت بايدها .. ووقفت جدام التسريحه ترتب نفسها ولبسها .. وشعرها .. وطلعت من الحجره .. توجهت للصاله وشافت عبير اختها ويا عليا .. يلست وياهم ..

عبير: فجر محمد بعد شوي بيي
فجر: اوكي.. شنو اسوي
عبير: روحي لبسي حجابج وغيري ها اللبس..خلاص عاد..
فجر: عبير انتي تعرفين اني مو متحجبه .. ولزمتي علي البس الحجاب وانا فالمطار ولبسته .. خلاص خليني ع راحتي بلبسي ..
عليا: فجر حبيبتي .. نحن بعد نبغي نصونج ..

فجر اطالعت عليا بنص عين وقامت من مكانها وردت غرفتها ومبين ع شكلها انها معصبه.. اما عليا تلومت وعبير موطيه راسها ..

عليا: عبير .. انا ماقصدت شي .. شبالاها اختج ماتتحمل..مره زينه ويايه وعشره لا..
عبير: ماعليج منها يا عليا .. فجر غلطانه .. وانا خلاص مو قادره اتحمل اكثر
عليا: الصبر يا عبير مالج غير الصبر.. سيري طالعيها
عبير: لا .. خليها .. مو كل شي تبيه بتسويه ..
عليا: هي جي من صغرها! ها طبعها
عبير: اييه .. مشوبتلنا روسنا ها الفجر من هي ياهل
عليا: الله يعينكم ..
عبير: شو بنسوي .. بتظل اختنا الصغيره .. هي الحين عايشه ويانا وانا مابا اقصر عليها فشي .. والله حتى ابديها على بناتي بس عشان ماتحس بالتقصير
عليا: عبير بس بعد بناتج يبن اهتمامج .. لا تصرفينه كله لراحة فجر.. بناتج اشوف حالهن مايسر .. متمللات من الوضع .. وانتي جي بتكرهينهن خالتهن
عبير: زين انا شسوي .. فجر ماقدرلها .. واحلام الله يهديها ماتقدر اللي انا اسويه..
عليا: ترا يشوفن قمتي تفضلينها بكل شي وهي بعد ماتقصر فيهن ..
عبير: الله يعيني على ما بلاني .. ماعليه .. كلهن كم اسبوع وتروح الجامعه.. بس واللي يسلمج يا عليا رمسي احلام ومدوي .. قوليلهن لا يتحرشن بخالتهن .. هي يوم الواحد يطنشها يفتك من شرها.. طفروني والله من كثر مناجرهم من اسبوعين وانا اكبت فصدري .. بس خلاص ماقدر اتحمل..
عليا: ماعليج يا عبير.. لو اني دوم ارمسهن بس ها المره بحاول وياهن بشوفهن
عبير: مشكوره الغاليه
عليا: ولو .. هاذيل بناتي بعد

ابتسمت عبير لعليا .. ودها حد يشاركها الهم اللي هي فيه ويشل عنها شوي من الحمل .. ماتقدر توفق بين بناتها واختها .. كلهن متمردات عليها ومب عارفه شو تسوي ..يمكن عليا الها تأثير ع البنات .. وتقدر تخليهن يهدن شوي ..


****

سلطان راد البيت من العصر.. صعد ع طول حجرته .. السفره الساعه عشر وهو بعده ماجهز شنطته .. طلع شنطة السفر من الكبت وحطها ع الشبريه .. طلع كم كندوره وطلعله بناطلين وقمصان .. طلع من الحجره وسار يزاقر على امه

شيخه كانت فالصاله تحت وتسمع مزاقر حد من عيالها .. ووقت ماهي كانت بتقوم دش عليها سلطان الصاله

سلطان: يالله ماتسمعيني ازاقر
شيخه: امبلا وييت بقوم انته دشيت
سلطان: المهم اميه انا بسافر اليوم تراني
شيخه: بتسااافر!!
سلطان: هي بسير البحرين
شيخه: كم يوم
سلطان: اسبوع بالكثير .. المهم امايه.. بتلقين ثيابي محطوطه ع الشبريه.. رتبيلي الشنطه وحطيلي الاغراض اللي بحتايهن فالسفر
شيخه: خلاص وليدي ما يهمك.. متى طيارتك
سلطان: الساعه عشر
شيخه: والحين وين بتسير
سلطان: بسير اسلم على شوابج وعقب بسير عند ربيعي

شيخه ابتسمتله .. طلع سلطان من البيت .. اما شيخه صعدت فوق وهي مستانسه ع الاقل بدى سلطان شوي يفتكر بأهله ويخبرهم عن سفره ويسلم بعد .. شي طيب والله ..
اما سلطان ركب سيارته ووقف جدام بيت بو راشد .. نزل يشوف منو فالبيت .. حصل يدته وعليا يالسات فالحوي يتقهوين.. سلم عليهن وسأل عن يده بس مايدروبه وين .. وصى يسلمون على يده لانه بيسافر وشربله فنيان قهوه وطلع من البيت وركب سياته مره ثانيه ..
قبض تيلفونه واتصل ع رقم بدريه ..

بدريه: هلا والله
سلطان: اهلين عمري .. شخبارج
بدريه بصوت واطي: الحمدلله تمام .. انت شخبارك
سلطان: الحمدلله .. بلاج تصاصرين جي
بدريه:ممم ترا ريلي فالحمام
سلطان: ويوم ريلج عندج شله رديتي ع التيلفون
بدريه: ولهانه عليك كيف ماتباني ارد.. وبعدين هو داش يتسبح يعني مطول
سلطان: تخاطرين واايد تراج
بدريه: كل شي لاجلك يهون
سلطان: والله
بدريه: عندك شك ..
سلطان: ههههه لا ماعندي.. بس ريلج متى يا؟
بدريه بضجر: امس ياي ..
سلطان: اها.. الا نسيت اقولج اليوم تراني مسافر
بدريه: بتسااافر .. من متى ها الكلام؟
سلطان: من كم يوم
بدريه: والحين ياي تقولي
سلطان: يعني لو قلتلج من قبل شو بتسوين .. بتين تسلمين عليه
بدريه : هي ليش لا
سلطان: والله!
بدريه بتردد: مادري مادري
سلطان: ماعليه عقب اسبوعين برد من السفر وبشوفج عاد بتين تسلمين عليه ولا
بدريه: هاا..
سلطان: اللي سمعتيه
سمعت بدريه انه صوت الرشاش وقف .. واداركت عمرها

بدريه: حبيبي شكله عدنان خلص سبوح يلا بخليك
سلطان: خلاص يلا باي

سكر سلطان التيلفون وفره حذاله سار القهوه عند ربعه اللي كان متواعد وياهم ويلسوا شوي يسولفون .. وعقب رد البيت يلس شوي ويا امه ..

****

[لامارا]

فليل في بيت بو راشد .. عليا كانت يالسه فحجرتها من بعد ما سكرت عن ساره ومي..

يلست تشوف صور عيالها .. وهي تبتسم .. وبعدين يلست تشوف الصوره اللي كانوا متصورينها جماعيه في استراليا وتمت تضحك ع حركاتهم فالصوره ..
وركزت على الكبيره امبينهم ..
ريم ها اليومين ماترمس امها وايد .. اللهم السلام وتسكر وتتعلث بيدتها والشغل..تتهرب من الرمسه ويا امها ..
عليا هامتنها وايد ها البنت وخصوصا عقب ما رفضت ولد عمتها .. ماقدرت عليا تقنعها .. ولا حد يقدر يقنعها الا هي نفسها تقدر تقنع عمرها بنايف .. للحين ما ردت خبر ع مريم .. والسالفه كملت شهر .. وعليا مستحيه وايد من مريم.. اللي ردت تتصللها وقالتها عليا انها ماحصلت الوقت المناسب تقول لبنتها..

تمت تفكر شو موقف مريم يوم بتقولها انه ماشي نصيب..شكلها شاريه بنتها وولدها يباها.. بس ريم ..
ليش يا ريم يا بنتي تقطعين نصيبج .. خليفه ولد اختيه رفضتيه من قبل وقلتي حسبة اخوج ومشيناها لج .. بس نايف ليش !
نايف مايخصه فسيف وانتي تدرين بها الشي ..
يالله يا رب تصلح حالها وترزقها الريل الصالح.. يالله يا رب..

طاحت دمعه محرووقه من عينها .. فيها كل اليأس والضيج على الحال اللي وصلتله ريم .. ريم بنتها البجر .. اللي عندها فالدنيا ..

" يا ريم نايف شارنج ويباج .. ليش مب مقتنعه به .. ولا اصلا العرس بكبره شايلتنه من بالها ها البنت .. يا ربي شو اسوي .. "

كانت كلمات عليا هاي تجول بينها وبين نفسها .. لكنها كانت بصوت مسموع .. بصوت سمعته أحلام الي كانت واقفه عند الباب ..

أحلام: عموووه ..
عليا بسرعه التفتت لاحلام ومشت دمعتها ..
قربت منها أحلام ويلست حذالها ..
أحلام: اوه هاذي صورة النساء الصغيرات ويا اخوهن المصون
عليا: ههههه هيه .. ها فاستراليا
أحلام: الخايسات ما راوني صورهن
عليا: حليلهن ردن ع طول للمستشفيات .. زين منهن ينا الجمعه اللي طافت..
أحلام: هي حليلهن .. بس زين يوم الله سلم عيوزهن ..
عليا: هيه حليلها ..
أحلام: عموه شو فيج مكتأبه؟
عليا: ها .. لا ماشي ..
أحلام: عموه ايبين ع شكلج
عليا: لا غناتي مافيني شي .. بس كنت احاتي ميوه
احلام: ليش بلاها ميووه؟
عليا: لا ماشي .. بس توها تقولي انه عقب اسبوعين بتسير الجامعه..مب اسبوعين بعد 11 يوم بالضبط
احلام: فديت ميوه .. بس ماعليج ساروه واسما بنت عمتهن وياها ..
عليا: هي .. ها اللي مريحني شوي
احلام: لا ماعليج هاي ميوه والاجر على الله .. بتمشي عمرها هناك حتى بدون ساروه
عليا: هههه فديتهن.. بس صدق زايغه عليهن من ها البني الخايسات..وايد نسمع رمسه عن بنات الجامعه ..
احلام: عموه الجامعه فيها الزين والشين .. فيها من امثال بناتج وفيها من امثال غيرهن .. لاتشلين هم انتي .. وشرا ما يقولون الطيور على اشكالها تقع ..

عليا اطالعت احلام ومسحت ع شعرها وضمتها الها بحنان .. واحلام وهي فحضن عمتها يتردد فبالها كلام عمتها أول ما دشت الحجره ..

السالفه مثل ما شكت فيها من اول ماقالتلها مدوي عن اللي سمعته .. وتأكدلها الخبر .. نايف ولد مريم يبى ريم .. واللي ماكانت تعرفه احلام انه ريم رافضه ها الخطبه ..
من متى ها السالفه ! والبنات يدرن والا؟ لا ماعتقد يدرن كانت مي ع الاقل لمحت او قالتلي شي ..! اسأل ميوه ولا ؟
بس ليش ريم مب طايعه .. من رمسة البنات عن ولد عمتهن .. الريال شكله وايد طيب واوكي ..
انا مابروم اسوي اي شي .. خواتها بيقدرن يقنعنها ! هاي ريم محد يقدر يأثر عليها.. بس لازم اخبر مي قبل ما عموه تردهم .. عموه شاله الهم بروحها.. لازم نريحها شوي ..

قطع عليها حبل ها الافكار صوت عليا ..

عليا: احلام قومي بنسير عند امايه
احلام: مم عموه صبري .. بغيت اقولج شي
عليا: شو الغاليه
احلام: عموه هدية ميوه خاست عندنا .. من متى شارينها وما وديناها
عليا: ههههه انزين يوم كانن هنه ليش ما عطيتيها
احلام: لا عموه انا حسبتها صح .. ميوه اقترحت عليه اسير عندهم .. وانا قلت ابويه يمكن ما بيخليني .. وتذكرت سالفة الهديه .. وجي بقول لابويه يوديني عند ميوه عسب الهديه
عليا: زين حلوه الفكره
احلام: هزرج بيطييع؟
عليا: متى ابوج ردكن فشي يعني
احلام:هههه عاد انا قلت يمكن ما يخليا نسير بيت سيف عسب جي
عليا: لا ماعليج وان ماطاع انا برمسه
احلام: اوووكي .. يلا عيل خلنا نقوم نسير عند امج
عليا: يا الشيطانه مب امج يعني
احلام: خخخ فديتها عيوزنا .. بناتج الحين عندهن عيوز غير عيوزنا .. يلا نسير

ضحكت عليا ع رمسة احلام وطلعن من الحجره وسارن عند ام راشد وتيلسن وياها..

****

مي وساره يالسات فالصاله تحت يلعبن ورقه.. يتهن ريم اللي كانت طالعه من حجرة يدتها من بعد ما عطتها ادويتها ولحفتها عسب ترقد ..
يلست شوي ويا خواتها وتمت تضحك عليهن وهن يجادلن بسبب الورقه .. يتهم نعوم وشافتهن يلعبن ويلست تشوفهن ..

مي: ها ناعمه ماتبين تلعبين؟
ناعمه: لااااحشى عليه .. مره لعبت وتبت من عقبها
ساره: جي قمار ثرج لعبتي عسب اتوبين
مي: هههههههه شكلها جي
ناعمه: لله مب قمار .. لعبتني غش والغش شرا القمار
ساره: الله واكبر ..
ريم: ياالله دوري نعوم بنلعب وياهن
ناعمه: مافيها حكم
ساره: لا مافيها تعالي.. نلعب كريزي..
ناعمه: شو ها كريزي بعد
ريم: الكرت العادي نعوم .. له عدت تسميات
مي: ههههه وحليلج يا ناعمه ..
ناعمه: حلج حلول.. يلا يلا انزين وزعن ..

ويلسن ثنينتهم ع الارض ووسعن مي وساره الدايره وقامن يلعبن .. نزلن مها ومهره وشافن البنات يلعبن ويلسن حذالهن مها يلست ورا نعوم تشوف اوراقها ومهره حذال مي .. تقوم مها وتخبر خواتها عن الاوراق اللي عند نعوم وبجي تعاونن ثلاثتهن وكله يغلبن ناعمه لانه ورقتها مكشوفه الهن ..

وعقب حطوا العشى ويلسوا البنات ع السفره يتعشون .. ريم شبعت بسرعه وترخصت من اليالسين وسارت حجرة يدتها .. يلست ع طرف الشبريه وهي تشوف يدتها .. ولهت على امها من متى مارمستها وايد .. قبضت تيلفونها وقالت بتتصل فيها واذ فتحت الموضوع ما بترمس عنه .. بس تبى تسمع سوالف امها ع الاقل ..

عليا: هلا والله بريمان..
ريم: اهلين اميه .. شحالج
عليا: الحمدلله بخير غناتي
ريم: شو مسوييين
عليا: والله ماشي .. يالسين.. انتوا اخباركم واخبار اخوانج ويدتج
ريم: الحمدلله كلنا بخير ..

ريم ماعرفت شو تسولف ويا امها .. بيظل الموضوع عالق امبينهن وغصبن عنها لازم تفتحه ويا امها .. ام سيف انتبهت وهي تسمع حس ريم .. لفت ع ينبها اليسار .. وردت تلف ع ينبها اليمين .. ريم كل شوي تطالع يدتها .. لكن ام سيف تمت هاديه وماصدرت اي صوت .. اللي خلى ريم تظن انها راقده ..

عليا: ليش ساكته ريمان؟
ريم: ها .. ماشي .. ولهانه عليج
عليا: وانا بعد فديتج..
ريم: انتي ليش ماتسولفين مثل عادتج!
عليا بتردد: مم ماعرف.. بيظل بينا موضوع
ريم: اميه
عليا: يا ريم يومين امهلتج فيهن تفكرين ع راحتج.. لازم ننهي الموضوع..
ريم: وانا نهيته وقلتلج مب موافقه
عليا: يا ريم .. الريال ما يعيبه شي
ريم: اميه خلاص الله يخليج ريحيني ..مابا الصداع يردلي..
عليا: شو يعني بتمين كل مره تتحججين بالصداع.. انتي لازم ارد اسويلج موعد ويا دكتورج ..
ريم: يوم تيبون طاري العرس اييني الصداع والا يوم تفكوني من ها السوالف ترا انا بخير
عليا: ريم.. حطي الرحمن بصدرج وانا مابا الا مصلحتج.. ولد عمتج شارنج.. وعمتج ماتبى غيرج حرمه لولدها.. ليش تضيعينهم؟؟
ريم: اميه الله يخليج خلاص قولي لعموه اني مابا ولدها لاتعشمينهم بموافقتيه..انا مابا العرس.. انا احاتي جسوم .. منو بيرعاه لو انا عرست .. وبعدين خواتي هنه انا مسؤوله عنهن.. خلاص لاترمسوني فالسالفه
عليا: الله يهديج يا ريم ..
ريم: خلاص اميه .. بخليج انا الحين.. ويليت مره ثانيه يوم برمسج ماتفتحيلي ها السالفه
عليا: كيفج .. يلا فمان الله
ريم: مع السلامه ..

سكرت ريم التيلفون .. وطاحت حذال يدتها اللي لين احين ماصدرت اي صوت يدل على انها مب راقده .. تمت تفكر فامها وفالسالفه .. طاحن دموعها .. خلاص مب قادره تتحمل اصرار امها .. هي ماتبى .. ماتبى تعذب نايف وياها ليش جي امها مصره .. ام سيف ما علقت بس هي الثانيه ادور فبالها رمسة ريم وشكلها فهمت الموضوع بكبره ..

الحين السالفه تستوي ومحد يعرف عنها.. ولا يعرفون وداسين .. افا يا ريم ماتخبرين يدتج .. ومريم .. سارت تخطب من غير ما تشاورني .. البنت شكلها مضايجه .. باجر برمسها .. ومن اصبح افلح ..


******************
(الأربعا) 11اغسطس 2004
******************

الصبح قامت عليا من نومها متكدره ..طول الوقت كانت يالسه مكتأبه.. مب عارفه كيف تتصرف ويا سالفه ريم لكن خلاص الظاهر ماشي فايده ولازم تحسم الموضوع .. كم بتخلي مريم تتريا وتعشمها .. شلت تلفونها ودخلت غرفتها .. ماتبى حد يسمعها ..
اتصلت ع رقم مريم .. وردت عليها نواري..

عليا: الووه
نوره: الووه منووو
عليا: منو انتي نوره ؟
نوره: هيه
عليا: اشحالج حبيبتي
نوره: زينه
عليا: وين ماماتج ؟
نوره: انتي منو
عليا: انا خالوه عليا
نوره: خالوه عليا منوو
عليا: ام جاسم .. تعرفينه
نوره: انزين منو جاسم
عليا ابتسمت على أسئلة ها الطفله ..
عليا: تعرفين ريمان
نوره وهي تضحك: عرفيييتهاا ريمان
عليا: انا مامات ريمان
نوره: انا احب ريمان..
عليا: فدييتج انا.. ريمان بعد تحبج.. يلا انزين وين ماماه مريم..
نوره: ممم صبري شوي ..
سارت نوره تزقر امها .. في هالوقت اسما شافت سماعه التلفون طايحه وشلتها
اسما: الوه
عليا: الوه منو؟
اسما: انا اسما
عليا: هلا امايه اشحالج ؟
اسما: بخير الحمدالله
عليا: امج وينها ؟ ردت عليه نواري وقالت بتزقرها
اسما: ان شا الله بسير اطالعها منو اقولها ؟
عليا: ماعرفتيني ؟ انا عليا ام بنات خالج
اسما: هلا والله خالوه اسمحيلي ماعرفتج ..
عليا: مسموحه فديتج
اسما: اكيه امي يت لحظه
يت مريم وشلت السماعه من عند اسما
اسما: هذي خالوه عليا
مريم ابتسمت حست انه اكيد عليا متصله ترد عليهم خبر ..
ونفس الشي كان احساس اسما عشان جيه تمت يالسه حذال امها ..
مريم: مرحبا
عليا: مرحبتين حيا الله ام نايف اشحالج ؟
مريم: بخير ربي يسلمج اشحالج انتي واشحال البنات؟
عليا: البنات انا اسالكم عن حالهم تراهم عندكم
مريم: هيه ههه فديتهم والله ياعليا بناتج حبوبات .. سوالف ولا ساره ومي فديتهن يونسن اليلسه ويقصرن الدوب وياك ..
عليا: وفي هالبيت منو يفتقدون الا هالثنتين ..
مريم: الله يخليهم لج ان شاء الله وتفرحين فيهم
عليا حست بنغزه في قلبها .. خصه من اسمعتها تقول تفرحين فيهم .. حست انه مريم تتريا الرد .. وعليا مب هاين عليها تردهم بس شو تسوي
مريم: عليا
عليا: آمري
مريم: مارمستي ريمان ؟
اسما تقربت من امها تبى تعرف الرد .. وفي هالوقت كانت لطيفه يايه ويا اختها نوره ويسولفون .. لكن اسما سكتتها وقالتلها انه امها ترمس ام ريم ..
عليا: والله يامريم رمستها .. لكن البنت ماطاعت
مريم: ليش ؟
عليا: تعرفين مريم .. ريمان تراعي خواتها وتخاف وايد ع جاسم .. وتحس انهم بيضيعون بلاها خصه انهم مب عندي انا احين ..
مريم: انزين ماعليهم شر والبيت الا هذوه حذال البيت .. متى ماتبى بتسير لو كل يوم عادي..
عليا: والله يا مريم ترا ريم عنيده وكل مارمستها طافت عني وروحت .. هي عندكم ورمسوها لو بتقدرون تقنعونها .. واخطبوها من ابوها اما عني انا تراني اتمنى القرب منكم والله اني ادعي ليل نهار انه الله يسخرها وترضى ..
مريم: يالله ان شا الله خير
عليا: رمسي يدتها انتي وهي بترمسها بتطمنها انه هي عند خواتها وماعليهم شر
مريم: اخاف تجبرها وانا مابا البنت تنغصب خصه اني رمستج انتي قبل
عليا: ماعرف يا مريم والله اني متلومه منج لكنج ادرى بالحال
مريم: لا تتلومين اختي افا عليج
عليا: خلاص عيل انا بخليج احين .. واسمحيلي الغاليه
مريم: مسموحه فديتج .. فمان الله
سكرت مريم تلفونها وصدت حذال اسما
اسما: شووو ؟
مريم: ماطاعت
اسما: ليــــــش ؟
مريم : تقول امها انها ماطاعت عشان اخوانها محد عندهم وجسوم مريض محد بيرعاه ..
اسما: علثه الا
لطيفه: حرام لاتخلين في ذمتج .. انتوا بروحكم تشوفون بعيونكم كيف ريم ويا اخوانها .. تخاف عليهم من الهوا.. وشي طبيعي ماتقدر تطمن اذا هم بعيد عنها وبعيد عن امها .. خصوصا انه ساره ومي بيسيرن الجامعه ومابيتمون الا الصغار .. مها ومهره ماعليه بيمشون امورهم لكن جاسم مريض ..

مريم سكتت .. كان الشك يسري بدمها من كلام عليا لكن كلام لطيفه اكدلها صدق نيه ريم .. هي تراها تشوفها بعينها شو تسوي يعني مب جذب ..

اسما: واخر شي شو قالتلج سمعتج ترمسينها زياده ؟
مريم: تقول انا موافقه واباكم لكن خطبوها من ابوها جان يدتها بتروم تقنعها
اسما: يوم امها مارامت لها امايه عفرا بتروم ؟
لطيفه: امايه عفرا بتقنع ريم انه اخوانها بيكونون في امان عندها
مريم: صح نفس الكلام اللي قالته عليا
لطيفه: امي صح نحن ابتعدنا عنهم وماربينا وياهم بس انا تمت علاقتي بريم اوكي وانتي تعرفين هالشي .. وكانت ويايه بالمدرسه واعرف كيف تفكيرهم .. انا مابا افرط في ريم ولازم نسوي أي شي نقنعها
اسما: لا فديتج اخونا مابنعقه ع وحده ماتباه
لطيفه: ريم ماتبى أي حد .. ماخصت اخوج .. لانها اصلا كانت رافضه ولد خالتها من قبل
مريم: منو قالج هالكلام
لطيفه سكتت .. حست انه لسانها زل .. ريم كانت مخبرتنها بس قايلتلها لاتقولين لحد ..
لطيفه: ريمان .. بس قالتلي ماقول لحد وانا زل لساني وقلتلكم .. بليز لاتسيرون ترمسون
اسما: يوم اقولج اميه هاي كاتم اسرار ريم ..
مريم: بس انتي عن التعليقات.. انزين لطوف وليش رفضته ؟
لطيفه: قلتلج امايه هي ماتبى حد شكلها ماتبى العرس امره .. تحاتي اخوانها
مريم: وحليلها ..
اسما: هاه الوالده اشوفج لنتي ؟؟ لاتنسين ولدج بعد
لطيفه: اسوووم لاتيلسين تخربين افكار امي .. قومي من اهنه خليني اتفاهم وياها ع راحتي
اسما: شو بتقوليلها سيري قولي لامايه عفرا عشان تجبرها ع اخونا ؟ ليش طايح حظه هوو ؟ نايف الف من يتمناه ولو بياشر لوحده من بنات عمي بتيه ركض
لطيفه: بس انتي تعرفين تربيه بنات عمي وتعرفين تربيه بنات خالي ؟ تبين اخوج ياخذ أي حد ؟
مريم: بسكم عاد راسي عورني منكم انا في حاله وانتوا في حاله
نشت عنهم مريم ودخلت غرفتها .. ولطيفه صدت صوب اسما بعصبيه
لطيفه: كله منج يالسوسه .. انا بدخل عند امي ارمسها لكن انتي ان تدخلتي في الموضوع او نايف وصله شي من هالكلام مابتلومين الا نفسج

ونشت لطيفه دخلت عند امها ترمسها .. اذا الله كاتب نصيب فها الزواج ان شاء الله بيصير ولو انهد بلد .. واذا مافي نصيب ترا حكمه من الله ..
حست مريم انه كلام بنتها لطيفه عين الصواب.. ودعت من الله انه ايسر السالفه ويكتب ها النصيب بين ولدها وبنت اخوها..

****
الظحى يلست ام سيف ويا البنات اللي كانن لابسات عبيهن ويالسات في الصاله يتريون ناعمه اللي تبرعت توديهن السوق .. الا ريم ماطاعت تسير لانه محد بيتم ويا يدتها .. وقالت انها باجر بتطلع تكمل اغراضها وبتخلي حد من البنات ييلس ويا يدتها ..

ريم: اقولج ساروه خذوا قياس عباتي وسولي عباه ساده وياكم
ساره: شليت عباه قياس حقج
ريم: زين سويتي ..
مي: ياربي هاي نعمه الله اخرتنا متى بنسير نحن ..انا وايد عندي شغل وابا ارجع عشان حلامي بتي
مها: قلتلج خل نقول حق اميه تودينا
ام سيف: نعوم بتوديكم شو غادي عليها .. وبترجعن قبل ماتي بنت خالكن .. وان يت قبلكن بتيلس ويا ريمان ..
ناعمه نزلت من فوق : يالله قومن
مي: مابغيتي
ناعمه: شو مابغيت بعد
ساره: ماشي ماشي يالله قومن ..
نشن البنات وطلعن ويا مرت ابوهن وتموا في البيت جاسم ومايد يلعبون بها السوني .. وريم ويدتها ..
يلست ام سيف تتامل ريم .. تبى تفاتحها بالموضوع اللي سمعته امس .. قبل ماترمس مريم .. جدمت ام سيف صينيه القهوه والجاهي منها .. وانتبهت لها ريم

ريم: امايه لاتسحبينها ماتروميلها شو تبين انا بصبلج
ام سيف: ابا قهوه
ريم: ان شا الله
صبت ريم القهوه ليدتها وعطتها اياها ورجعت اتسندت وشلت الروايه اللي يالسه تقراها ..
ام سيف: انتي شو ها اللي تقرينه هالكثر ؟ من ييتي هالبيت وانتي الا كله موازره هالورق .. وين ماتسيرين خاشه هالكتب في مخباج شو هاي
ريم: امايه هذي قصص
ام سيف: خرابيط الا .. لو تقريلج قران بدالها جان كل يومين ختمتي
ريم: امايه اقرا القران انا .. بس بعد اقرا هالقصص .. تعيبني
ام سيف: انزين ودري عنج هالخرابيط وتعالي ابا ارمسج
ريم سكرت روايتها وركزت نظرها في يدتها .. تبى تعرف شو تبى تقولها ..
ام سيف: ريم انتي ليش ماتبين نايف ؟
ريم: هاه ؟ كيف
ام سيف: سمعتج البارحه يوم كنتي تكلمين امج .. ماكنت متعمده اتسمعج بس انا نشيت ع صوتج .. وسمعتج وانتي ترمسينها وتقوليلها عن نايف وانج ماتبينه
ريم تمت مرتبكه مب عارفه شو تقول
ام سيف: ريم ترا عمتج ماخبرتني عن أي شي من هالموضوع .. وها الشي الثاني اللي زعلني .. لكن الشي الاول اللي زعلت منه انتي .. انا وايد احبج وانتي قريبه مني وتحريتج بتين تقوليلي وتشاوريني .. لكنج تدارين ع الموضوع وفوق هذا ترفضين ؟ ليش ؟ نايف مامدحه عشانه ولد بنتي لكن نايف فديته ريال والنعم فيه

ريم: امايه انا امي عليا فاتحتني بالموضوع عقب ماييت من السفر يوم رجعنا بيتنا يوم الجمعه وانا مابا اعرس .. وتميت مارمس اميه عليا والسبه انها تبى تجبرني ع هالسالفه .. وامي سمعتي كل شي يوم اني رمستها ورفضت ..
ام سيف: وانتي ليش رفضتي ؟!
ريم التفتت الصوب الثاني : مابا اعرس وخلاص
ام سيف: سمعت ساروه تقول باجتلج سنه وبتخلصين دراستج شو بعد تبين
ريم: اخواني يبوني
ام سيف: انتي مابتسيرين تسكنين بعيد انتي اهنه قريبه تراج ومتى ماتبين تعاليلهم وانا تراني عندهم ومابقصر..
ريم: امايه سمعتي انتي بعد يوم قالوا انه جاسم تعب واحين ساروه وميوه بيسيرن الجامعه .. منو بيتم عنده ؟
ام سيف: مرت ابوه اهنه وانا موجوده .. وبخليه ايي يبات عندي ..
ريم: امايه مابا اعرس مابا نايف والله يرزقه ببنت الحلال اللي تناسبه
ام سيف: نايف مابياخذ غيرج يا ريم
ريم: امايه لاتجبريني انا مابا اعرس
ام سيف: ريم يا امايه .. الخيره في ما اختاره الله .. انتي قومي احين تيددي وصليلج ركعتين واستخيري ربج
ريم: مابا
ام سيف: عشاني يا ريم .. قومي استخيري وماخاب من استخار .. انتي استخيري ربج لاتعاندين .. ولاتقطعين نصيبج

ريم سكتت وقامت من عند يدتها وهي تصيح ..

ياربي ليش يجبروني ليش ؟ انا شو اللي خلاني ارمس وهي موجوده زين جيه احين سمعت كل شي واعرف انه امايه عفرا مابتسكت عني .. ياربي شو هالحاله .. مابا العرس.. ومحد بيجبرني لا اليده ولا الوالده..

****

فبيت بوراشد.. بعد مالبسن احلام ومديه وتجهزن عسب يسيرن بيت سيف.. طلعت احلام من حجرتها وتوجهت للصاله وفايدها كيس كبير مصنوع من القش القوي وحاطه داخله الاغراض اللي ماخذتنهن لمي ومرتبتنهن بشكل حلو ..
لقت عماتها فالصاله وامها وخالتها فجر .. وطت الكيس عن باب البيت وردت تيلس وياهم ..

فجر: شنو ها اللي كان بايدج؟
احلام اطالعتها بنظره: هذي هدية شيخة البنات كلهن
عليا: هههههه يالله شيختي بنتيه..
فجر اطالعتهم وطلعت صوت استهزاء وسكتت عن السالفه اما احلام طنشتها ولفت صوب امها ..
احلام: امييه وينه ابويه تأخر علينا
عبير: توه مكلمني يقول فالدرب
احلام: يلا عاد ماشي وقت الحين الساعه 12 الا ربع
شيخه: مستعيله ها الكثر انتي
احلام: هي عيل شو.. ابا اتم وياهن واايد
ميره: هاكوه فارس فالبيت بدقله بخليه ايوديكن
عبير: لا لا محمد ياي مافي داعي اتعبينه
ميره: لا تعب ولا شي عادي
احلام: هي عموه دقيله خل ايي .. ابويه يقول فالدرب وبيوصل عقب ساعه
عليا: خلاص عيل ميره اتصليله طالعيه جان بيوديهن..

عبير اطالعت بنتها وضحكت عليها .. احلام ماتريت امها توافق.. عطول ركضت الحجره تزقر مديه .. ودقايق سمعوا هرن فالحوي.. طلعن احلام ومديه وهن شالات الكيس وتلاقفن ويا فارس عند باب البيت.. كان يبى يدش يسلم على عماته ويدته ..
لفت احلام ع طول صوب الحريم..

احلام: فجر سيري داخل فارس ولد عمي بيدش
فجر انتبهت لاحلام واطالعت الحريم .. بس تمت يالسه ولا قامت .. اما فارس من سمع رمسة احلام رد ع ورى على طول ..

مديه: تعال بترد داخل هيه
فارس: لا برايه .. هاتن الكيس ماترومله

وخذ عنهن الكيس وحطه جدام .. ورد يركب السياره .. ويحس بويهه حاار من كثر الاحراج .. مايحب ها المواقف ابدا ..

ركبن البنات ورا .. وهن مستانسات انهن بيسيرن عند بنات عمتهن .. وتمن يقرضن ففجر كيف كان تصرفها بايخ وقت ماكان فارس يبى يدش .. كان بامكانها تروح من الصاله لين يسلم ويظهر .. بس فجر شو مشكلتها .. شو يعني تبى تجبر الكل يشوفها كشفه !
فارس كان ملتزم الصمت طول الدرب .. لكن يوم كان بيدش المنطقه اللي فيها بيت سيف ضيّع فدخلات الشوارع .. ماعرف وين بالضبط بيتهم .. اتصل بأبوه يتخبره عن الدرب لين دلاه ووصل البنات ..
احلام يوم شافت البيت تمت تتأمله وهم بعدهم برع مادخلوا .. تشوف السور وعايبنها تصميم البوابه ..

فارس: عادي ادخل السياره؟!
احلام: ماعرف والله .. ممم اقولك عطني تيلفونك شوي بتصل بساروه اسالها

فارس عطاها التيلفون .. ودقت احلام ع الرقم واتصلت بساره.. ساره استغربت من الرقم الغريب وماردت .. لكن احلام عاودت الاتصال .. ها المره ردت ساره لكن تمت ساكته
احلام: ساروه انا حلااام .. اقولج وصلنا البيت ندش بالسياره داخل ولا شووو
ساره نقعت من الضحك مول ماعطتها احلام فرصه انها ترمس..
ساره: هي دشو .. هرنوا وبيفتحولكم الباب .. المسافه بعيده عليكن من الدروازه لباب الفله ..
احلام: خلاص اوكي . فارس هرن وبيفتحون الباب
ساره: فارس يايبنكن
مي اطالعتها .. لكن ماعلقت ..
ساره: نحن فالسياره عقب شوي بنرد من السوق .. بتلقن ريم داخل اوكي
احلام: خسكن الله انا يايتنكن وانتن شاردات يا الطفسات
ساره: الحين بني ..
احلام: خلاص انزين اتصلي بريم وقوليلها انه نحن عند الباب
ساره: اوكي بس دشوا انتوا عادي .. محد فالبيت
احلام: خلاص يلا باي .. هاذو فتحوا الباب
انفتح باب الدروازه .. ودخل فارس بالسياره داخل .. احلام ومديه تمن الا يطالعن البيت وعايبنهن واايد .. وفارس بعد ..
نزلن البنات من السياره وكانت ريم واقفه عند باب الفله تترياهن من بعد ما اتصلتلها ساره .. فتحت احلام الباب الجدامي وسحبت الكيس .. وساعدتها مديه ..

مديه: انزين ليش ماتشل وياانا
فارس: ماروم انزل .. يلا ماتعولن شلنه ثنتيناتكن
احلام: يالله مافيك خير
فارس تم يطالعها وميود ابتسامته ..
احلام: لو قلنا لمروان اييبنا احسن .. بس ماعليه .. المهم وصلنا عند بنات عموه مشكور..

وعقب ما سكرت احلام الباب طلع فارس ضحكته المكبوته .. وحرك سيارته وظهر من البيت .. اما البنات ركبن دري الفله وشافن ريم سلمن عليها ودخلوا كلهم البيت..

****

من بعد ما طلعن احلام ومديه من البيت .. وصل ابوهن .. دخل البيت وشاف لمة خواته تفرقت.. محد كان فالصاله غير حرمته تترياه ..

محمد: وين البنات يلا بوصلهن
عبير: راحن
محمد : منو وداااهن!!
عبير: فارس ولد راشد..
محمد: ليش .. تراني قاييلكم ياي
عبير: يالله يا محمد نحن مكلمينك من ساعه وتقول ياي فالدرب .. تعبن البنات من كثر ما يترين
محمد: والله شو اسوي راد من دبي ولازم بنتأخر فالزحمه والدريول بعد ما يسرع
عبير: ماعليه مو مشكله ..
محمد: بدش اتسبح
عبير: الحين؟
محمد: هي تعبان باخذلي دش ههه..ابا مااا بارد يصب عليه
عبير: تكفى عاد .. بتفتح الرشاش بيطلعلك نار مو ماي
محمد: هههههه يبوج ها الشمس تثور الما فالخزانات
عبير: هههههه ايه والله ..
محمد: باخذلي دبه ما بارده من الثلاجه بتبرد عليه ماعليج
عبير: نعيما مقدما
محمد: الله ينعم عليج غناتي ..
ابتسملها محمد وروح عنها الحجره .. اما عبير .. سارت بتسوي مدخن لريلها كعادتها كل صلاة ظهر.. وبعد ماخلصته .. لفت ع فجر .. دقت الباب ودخلت ..
عبير: شو تسوين
فجر: شو تشوفين .. اقرى مجله
عبير: بدال ماتروحين تتوضين وتستعدين للصلاه
فجر طنشت عبير وماسوت للموضوع اهميه ..
عبير: ما كان له داعي اليوم اطنشين احلام وهي تقولج انه ولد عمها بيدخل يسلم..فشلتيني فميره يا فجر.. خلاص يووزي ..
فجر: محد قاله ما يدخل

عبير اطالعت فجر بنظره وقلبها يدق بقو ماتعرف ليش بس اللي تعرفه انه مقهوووره وايد من فجر.. طلعت من الحجره وهي تضرب كفها اليمين بالشمال.. ماشي فايده ميأوس من ها البنت ..
تعوذت من بليس وردت ادخن ريلها فالحجره وبعد ماطلع صوب المسيد تمت بروحها فالغرفه والمدخن فايدها خوزت العود وحطت دخون للحجره وتمت ادخنها وهي بالها مب وياها .. ملعوزتنها فجر ومب عارفه شو بيصير فالايام اليايه

****

العصر فبيت سيف.. فقسم البنات بالتحديد .. وكعادتهن البنات يوم يتيمعن .. رابشات وسوالف وضحك .. احلام مستانسه ع اليلسه وياهن وايد .. وتوصفلهن كيف شعورها اول ما شافت ام سيف وناعمه ونجمه وكلهن يتضاحكن عليها

ريم: يالله حلامي الحين يتج الضحكه يوم شفتي نعوم
احلام: هي والله تذكرت الآنسه مينشن ع طول
ساره: ههههههههه الآنسه مينشن عصبيه نعوم هبلى
ريم: ساروه خس الله بليسج سكتي عن تسمعج
مي: هههههه وشعليها ساروه من نعوم.. ساروه بتسويلها سالفه ثرها
ساره: هي والله ما عليه منها
ريم: الله يعين منكن انتن
احلام: بس يدتكن وحليلها يبين عليها انها طيبه .. يعني مب شرات ماقلتن متسلطه
مي: يبوج يدوه غدابها الدهر وخلى تسلطها يخف شرا مايقولون اكل عليها الدهر وشرب ..
احلام: وحليلها ويها شكله تعبان
ريم: هي من عقب العمليه ضعفت وذبل ويها
مي: عندالله يا الدنيا يا عيوزنا .. انا بروحي ماتحمل اشوفها ضعيفه.. جبروتها غير كان قبل والحين طايحه فالسرير لاحول ولاقوه
ريم: ترا ها الدنيا شو بنسوي .. انتي وساروا الحين مخبل ويوم بتعيزن بيقولون عيالكن يالله يا الدنيا يداتنا كانن مخابيل والحين مطيحات فالشبريه لاحول ولاقوه
احلام: ههههههههههه ماتخيل
ساره: ايه عاد عن الغلط علينا ..
مي: ماعليج منهن ساروه متغايضات.. اصلن اللي ماخذ حياته سهله ما يعيز بسرعه لكن ها يدوه ع كثر ماكانت تعصب شوفوا حتى قلبها انسد
ريم: ميووه ههههه شو ها الرمسه بعد..
احلام: ماعليج هاي شوي من خراريف ميوه
ساره: وين البنات سارن؟
احلام: مدوي والتوم عند عفرا يغصصن عليها
ريم: ويه تحاسبن شو يبنها مافينا ع حلجها هاي بتربع ع طول عند نعوم
مي: مها ومهروه سحبن مدوي وقاللها تعالي بنوديج عند صخلة البيت اللي دوم فاجه حلجها ههههههه
ساره: صدقهن خواتي ما جذبن.. لا وبعد يسمنها مسيلمه الكذاب
احلام: هههههه ها كله عفرا ؟
مي: هيييه.. والله يوم نقولها مسيلمه الكذاب اتم تصرخ .. هي ماتعرف منو ها بس تعرف انه فيه سالفة جذب..
ريم: انزين وماشالله عليها ع طول عند امها تخبرها كل شي .. ذاك اليوم نعوم هزبت التوم بسبة ها التعيوره الي مظهراتنها ع عفرا
مي: هههههههه شو بيسوبها حليلهن كل ما تسولفلهن عن شي جذبت!!


وضحكن كلهن ع السوالف الي تسويها عفرا .. ريم قامت من عندهن لانها بتسير عند يدتها تحت .. وساروه سارت الحجره تبى ترتب اغراضها اللي خذتهن اليوم ع الرغم من انها مخلصه مشاري للجامعه ..

وهنه التفتت احلام لمي .. وفعينها كلام وايد .. مي كانت تشوف التيلفزيون ومب منتبه لنظرات احلام.. كيف بتبدى احلام موضوعها .. قالت بتمهد شوي ..

احلام: يااا ميه
مي التفت لاحلام وهي تزقرها بها الاسم اللي ينرفزها وتمت ساكته ولا ردت على احلام..
احلام: ميّـــه ..
مي: ويعه تقولج ميه ..
احلام: ههههههههه بلاج
مي: كم مره متضاربه وياج بسبة ها الميه ..
احلام: ادري ادري .. لان الميّه صغير القرد هههههه خلاص اسفين
لفت مي على احلام اللي كانت حذالها ع الغنفه وتقربت منها اكثر وقبضت احلام من شعرها ..
مي: يعني لازم تشرحين اكثر بعد
احلام:هههههههه فجي خسج الله بطلي شعري
مي: هههههههه يا الهرمه من زمان ما تضاربت وياج

فجت مي شعرها وهي تضحك عليها .. وتمت تتطالع ايدها وتسوي حركه انها تنزع بقايا شعر احلام من ايدها واحلام تطالعها وتضحك على ها الحركه..

احلام: انزين ميوه والله نسيتيني شو كنت بسألج
مي اطالعتها: شو عندج
احلام: ماشي .. متى بيظهرولج الرقم؟؟
مي: الرقم ! هيييه ماعرف التهينا يبوج ولا قلت لابويه
احلام: انزين متى بتقوليله؟
احلام: ماعرف والله .. مب محتايتنه احين قبل ما اسير الجامعه بقول لابويه يطلعلي رقم وياخذلي التيلفون
اطالعتها احلام وابتسمت وفخاطرها يا الهرمه ناسيه اني قايلتلج باخذلج التيلفون
مي: بلاج تتبسمين!
احلام: ماشي ..
سكتن مره ثانيه وهن يشوفن التيلفزيون..احلام للحين مب قادره كيف بتفاتحها..تمن ساكتات فتره لين بدت احلام ترمس ..