قلوب تحت المجهر / الكاتبتان عاشقة الشمال + المزيوونه ، مكتملة

[لامارا]

احلام: ميووتي
مي من غير ما تلف ع احلام: هي هاي الزقره ..ها حلومتي آمري
احلام: لا قوليلي حلامي
مي: ههه لا حلومتي عسب الوزن ..
لفت مي صوب احلام ..
مي: ها شو عندج؟
احلام: عندي رمسه
مي: رمسه!!
احلام: عن ريم
مي: اختييه؟؟
احلام: عيل كم ريم عندنا ..هي اختج
مي بحماس: شو السالفه؟
احلام: ريم خطبها ولد عمتكن وشكلها ردته
مي بطلت عيونها ع الاخر
مي: شو تقولين؟
احلام: اللي سمعتيه ..
مي: منو خبرج؟
احلام: محد خبرني بس بقولج السالفه.. مديه مره سمعت عموه عليا ترمس امايه سلامه عن سالفة وذكرت اسم ريم وقالت امايه انا بقنعها وجي
مي: انزين
احلام: المهم ماعرفت السالفه بالضبط بس مره انا دشيت على عموه الحجره وهي تصيح وسمعتها ترمس عمرها.. يعني جي تشكي من رفض ريم لنايف وربطت عاد انا المواقف واكتمل النصف الثاني للصوره عندي
مي: ريم ترفض نايف!!!
احلام: هيي ..كانوا يرمسون عن خطبة ريم ونايف يوم سمعتهم مدوي.. ويوم انا سمعت عموه كان رد ريم ع الخطبه..
مي: بس ليش ترفضه نايف وايد اووكي
احلام: وانا شعرفني ..
مي: لا ابوي ما ينسكت عن ها السالفه .. يعني نايف يباها؟؟
احلام: هي .. عموه قالت يوم انه نايف شارنج ويباج ليش رفضتيه
مي: حرام عليها جان بترده والله انه ريال والنعم
احلام: عاد مادري .. انا امبوني مالي خص ما بخبرج لانه حسيت انه محد يدري بالسالفه ولا جان خبرتيني بس عقب قلت لازم ترمسنها انتن
مي: هي ترومين انتي ماتخبريني..
احلام: انزين وخليني اخبرج اللغز الثاني اللي قالته مدوي
مي: شو بعد شي ثاني
احلام: السالفه فيها عمي راشد وانتن
مي باستغراب: خالي!! .. ونحن.!
احلام: هيه
مي: ليش شو السالفه
احلام: مدوي قالتلي عقب مارمسوا عن ريم.. انه عموه عليا قالت اون راشد كمل على بناتي الباجيات
مي بطلت عيونها ..
احلام: فهمتي اللي فهتمه ولا شو
مي: حلفي حلاام
احلام: والله .. انا استوعبت ها الامر عقب ماتأكدت من سالفة ريم وخطبتها
مي: يعني خالي خطبنا نحن؟؟ بس منو نحن
احلام: اكيد انتي وساروه .. الكبير للكبيره والصغير للصغيره
مي: ماتخيل
احلام: ليش ماتخيلين ..
مي: انزين نقول يعني مروان لساره .. وانا شلي
احلام: وانتي بعد
مي: شو انا بعد
احلام: يعني متوقعين يكون ها الشي ..
مي: ماعرف يا حلاام .. انا وفاارس!!
احلام: ليش لا.. واصلا تنغيزات عموه ميره واضحه.. يعني من قبل وهي حاطه العين عليكن ..
مي: مادري مادري

احلام تمت تتطالع ميوه اللي وردن خدودها .. ضحكت عليها .. يعني ها الشي كان فالحسبان من قبل .. بس الرمسه أكدت لهم ها الشي .. مي انحرجت وايد.. من قبل وهي مبتعده عن فارس عشان تفتك من معايرة ساروه لان مي من صغيره وهي وايد ويا فارس.. فوق الخمس سنين الحين ومي ما تتخالط وايد ويا فارس.. والحين اتيها احلام وتقولها ها الرمسه .. ها الفتره اصلا كانت اطنش وجود ها الشخص وحتى انها نست وجوده .. ماكان يهمها.. بس الرمسه هاي حركت فداخلها شي ماتعرفه.. معقول شي مانعتنه من الظهور طول ها الفتره والحين قام ينغزها! بس هيه متأكده من مشاعرها .. مايا فبالها ها الشي .. سابق لأوانه..

احلام: ايي وين سرتي
مي: هاا ..
احلام: شو بلاج؟
مي: ماشي.. بس ساروه ومروان .. هههه تذكرين يوم نعلق عليها
احلام: هي هههه اسمينا كنا نقطعها
مي: والله ايام كانت.. عايشين مراهقتنا نألف قصص ع كيفنا ونربط فلانه ب فلان..
احلام: وعيشتني وياكن المراهقه ع صغر
مي: ههههههه محد قالج تتعلقين ببنات اكبر عنج ..
احلام: هيهيهي .. مايهم السن المهم التفكير ..
مي: بس تعرفين .. انا ادري انه مروان يباها
احلام: شدراج انتي
مي: اعرف .. احس بعيونه.. مروان اقرب واحد لي من عيال خوالي .. وياما فضيتلهم الجو ها الاثنينه من غير ما احسسهم بشي
احلام: ياويلي عليج
مي: قبل كنت اقول لساروه انتي تهمين مروان بس كانت اطنشني ..
احلام: خلها الحين يوم بتسمع ها الرمسه مستحيل اطنشج ههههه
مي: الهرمه هيه ماتصدق حدسي يعني .. بحرقصها مابقولها السالفه.. ولا اقولج كل يوم بخبرها حرف
احلام: هههههه والخيبه اسميها نذاااله عاد
مي: عادي .. وتذكرين يوم اقولج.. يوم كان فبيت خالي مانع انظفه
احلام: شو
مي: يوم اقولج قصة ساندريلا .. وحب من طرف ..
احلام: هييه
مي: خخخ كنت اقصد ساروه ومروان .. صح لين الحين مانشوف شي وااقع .. بس والله احساسي يقول .. انه مروان يحبها .. ولو انه ساره تكابر وايد.. بعد هيه تميل له ..
احلام: من كم سنه وانا ميال ميال
مي: هههه وبحبك انا مشغول البال ..
احلام: خخخخخ تكمل بعد هيه .. بس صدق سالفه

وتمن يتمصخرن ع ساروه ومي تحاول تتناسى الموضوع وتشله من مخها .. طلعتلهن ساروه وهي تسمع الضحك وبغتهن يخبرنها شو عندهن بس محد منهن رمس يبن يشوفن فضول ها البنيه لوين بيوصل..

****

فجر فغرفتها يالسه .. كانت تبى تدخل ع موقع الجامعه الامريكيه .. تبى تشوف التخصصات اللي عندهم وتبى تشوف صور الكليه تاخذ فكره عنها.. ظهرت من حجرتها ادور على عبير .. حصلت عليا وامها فالصاله.. سألتهم عن عبير بس مايعرفون وينها .. سارت حجرة البنات.. لقت الكمبيوتر فزاويه مركون .. فتحته وشغلت النت .. ويلست ادور على اللي تباه .. ودشلها المسن مال احلام ع طول بطلته واستغربت هي ما فتحت مالها .. وعرفت عقب انه لوحده من بنات عبير ومخليه الدخول تلقائي.. يلست تتطالع منو موجود فاللسته اون لاين ..
شافت كم شخص .. وطبعا شي طبيعي ماتعرف منو هاذيل .. تلقت رساله من شخص موجود اون لاين .. شافت الصوره وعرفت الشخص من الصوره ..

(M) says:
حلامي شو راايج بالصووره بسرعه

وينهم أحباب قلبي وينهم! says :
نعم!

(M) says:
شو رايج فصورتيه اليديده .. امسات تذمين الصور القبليه .. هاي الحين مب احلى؟

وينهم أحباب قلبي وينهم! says :
انا مو حلامي

(M) says:
عيل منو مدوي؟

وينهم أحباب قلبي وينهم! says :
لا فجر

(M) says:
اها .. خلاص عيل .. حيااج

وينهم أحباب قلبي وينهم! says :
ليش ع وين

(M) says:
نعم!


وينهم أحباب قلبي وينهم! says :
ليش تطلع؟ انا ملانه اقعد سولف معاي

(M) says:
لاولله! انا عندي أشغال مب فاضلج


بند عنها مروان وهو متغصص هاي شو تبى حتى فالنت مأذتنهم .. اما فجر تمت تتطالع الصوره .. واستفزتها الحركه وايد .. شو مفتكر نفسه هو .. مب اول مره يبين انه ما يطيقني .. منو تكون يعني انته عشان جي تسوي ..
ورد يدور فبالها سلطان.. ليش سلطان غير عنهم!
صح من ذاك اليوم ما شافته .. بس يعني ما تنيحس عليها مثل الباجين ..
سلطان كان كول وياها .. لكن مروان .. ماتدري ليش جي يتصرف.. تمت مقهوره من تصرفاته وياها .. وباجي شباب ها العايله .. نفس الحاله .. مايحبون يلسون فمكان هي موجوده فيه .. ماتعودت من نفور الناس منها جذه ..

ماستوعبت فجر الأمر..

نست انها فبيت غير بيتها.. نست انها فمكان غير مكانها .. نست انها تتعامل ويا اشخاص تحتم عليهم اعرافهم وعاداتهم معرفة الحدود .. الدين واحد.. ودرجات الالتزام مختلفه .. وعادات ها البيت وحده .. كيف هيه اتي وتبى كل التوازن يختل بتصرفاتها هاي..
بتظل تربية شباب ها العايله تلزمهم باحترام اهل البيت هذا .. وشي طبيعي انهم ما بيتعاملون وياها على هواها هيه .. بالأصل هم بنات عايلتهم الهن قدر وما يتطاولون وايد الا فحدود السوالف البسيطه .. ولو الواحد فيهم يبى يطلع الي فخاطره بيظل ملتزم بكل شي وبكل كلمه وبكل خطوه..
كيف ويا ها الانسانه الي يتهم غريبه .. مب متعودين عليها .. تبى تفرض وجودها وتجلب حياة ها البيت فوق تحت!
هي ماتنكر انه اهلها الي فالكويت .. فيه منهم الي له نفس التزامات ها البيت .. لكن هي ماتعودت على ها الشي.. وماتقدر تتعود عليه بسهوله ..

سكرت الكمبيوتر على طول وردت تيلس فالصاله ويا الموجودين.. وهي اطنش كل الافكار الي تتوارد عليها ..

****

بعد ما روحت احلام واختها من عند بنات عمتها.. كانت الساعه تسع تقريبا.. واللي كان ياينهن محمد.. طبعا هو مادش فالبيت لكن البنات كلهن ظهرن من الحوي يسلمن على خالهن وهن مستانسات بشوفته ..وبعد ماروحوا ردن البنات داخل .. ريم ع طول صعدت فوق من بعد حديثها ويا يدتها قامت حتى تتجنب اليلسه ويا اليده .. اللهم اتي تعطيها الدوا وتروح .. ها حالها طول اليوم .. اما الباجي التموا كلهم فالصاله وكان سيف ها المره راد من وقت البيت ..

ناعمه: ياي من وقت اليوم
سيف: هي ماسرت القهوه تراني
مهره: ابويه .. اليوم حرمتك ما خلتنا نتشرى باجي اغراضنا .. يبالنا سيره ثانيه
ناعمه: يا مسودة الويه انا ماخليتكن والا انتن مستعيلات ع الرده عسبة بنات خالكن
مها: نحن مستعيلييين .. انتي شو تقولين .. بنات خالي ما بيطيرن
ساره: ههههههه هيه عاد تصدق ابويه .. نعوم كانت عايفه عمرها وهي تحوط ويانا.. يوم انها ماتبى تودينا شحقه ماتعذرت من قبل
سيف تم يطالعهن وهو يبتسم .. وناعمه اطالعهن وهي محرجه
ناعمه: يا الجذابات .. عن يطيح السقف عاد
ساره: ابووويه اسمع اسمع باذنك .. شو انته ترضى ع بناتك يقولولهن الجذابات
مي كانت تسمع الحوار اللي يدور لكن بالها مب وياهم .. تبى تسير تلحق ريم اختها .. بس مب عارفه كيف تنسحب من اليلسه من غير ما تنتبلها ساروه .. ماتبى حد يلحقها ..
سيف: لا ما ارضى .. بس بعد ما ارضى ع ناعمه
ناعمه : واايعلني ما خلا ..
واطالع ساره اونها تبى تحرها ..
مها يلست حذال مهره وقامت تقلد ناعمه وهي تتصنع الدلع لسيف .. الكل تم يضحك .. وملتهيين بالتنكيت .. وفها الاجواء انسحبت مي من غير ما ينتبهلها حد .. ظهرت من الصاله تبى تسير عند ريم .. وهي تصعد الدري تلاقفت ويا مايد وجاسم اللي كانوا نازلين عقب ماتلبسوا جلابيات النوم ..

مايد: وين الجماعه؟
مي: كلهم فالصاله
جاسم: وانتي وين مروحه
مي: اا.. بسير اتسبح ..
جاسم وهو يقلد مي اللي كانت مرتبكه: اا..وانا بسير الصاله
مي: جسسوم
جاسم: ميووه
مايد: هههه تعال تعال ميوه شكلها مستعيله
مي: هي صدق .. يلا سيروا

وطبتهم وميوه وكملت صعود الدري وهي تركض .. ويوم وصلت قسمهم .. دشت ع طول حجرة ريم .. ما لقتها موجوده .. خاب ظنها .. يايه بتظهر بس سمعت صوت باب الحمام ينفتح وردت الحجره

مي: نعييما
ريم: الله ينعم عليج.. ها خير شو عندج يايه؟
مي: ماشي مليت.. ييت بسولف وياج ممنووع!
يلست ريم جدام التسريحه وهي تسحي شعرها ..
ريم: لا مب ممنوع ..

تجدمت منها مي .. تبى تفاتحها بالموضوع بس مب عارفه كيف ..
يلست ع الشبريه وحصلت روايه وتمت تجلبها .. ريم استنكرت حال مي اكيد فخاطرها شي .. قامت وسارت تيلس حذال مي ..

ريم: شو فخاطرج
مي رفعت نظرها لريم ..
ريم: ها شو بلاج
مي: لو قلتلج ما بتزعلين مني
ريم: ليش الموضوع يزعل يعني؟
مي: مايزعلني بس مادري عنج انتي
ريم: انزين شو رمسي ..
مي تمت تتطالعها بنظرات ريم مافهمت مغزاها .. ماعرفت مي تلف ودور فالموضوع.. وعلى طول رمست ..

مي: ليش رافضه نايف؟؟؟
ريم: شوو
مي: ليش ماتبين نايف
قامت ريم من الشبريه وهي منفعله ..
ريم:شو .. شدراكن انتن بعد ..
مي: شدراني انا بعد
ريم اطالعتها: حد يدري غيرج؟؟
مي: هيه
ريم: لاتقولين الحلج ساروه
مي: لا .. حلامي

ريم تمت تتنفس بصعوبه .. قامت تير نصخها بصوت مسموع .. حست مي انه ريم عصبت .. ما عرفت شو بتقول عشان تنقذ موقفها ..

مي: ريم بلاج
ريم: ميوه مابا ارمس فالسالفه .. ظهري برع خليني ارتاح .. خلاص صدعتوووبي من اميه لامايه عفرا والحين انتي .. خبروني منو مادرى يعني الحين..
مي: ريم بلاج ماخذه الموضوع بحساسيه.. السالفه مايبالها ها كله
ريم: ميوه مالج شغل فالسالفه
مي: ريم كيف مالي شغل .. انا اختج واتهمني مصلحتج .. عنبو شو ناويه تمين عانس طول عمرج يعني.. انتي الحين صغيره والكل يباج والا كل مره تردين حد .. عقب محد بييج..
ريم: وها المطلوب .. خلاص حلوا عن سماي مابا اعرس .. انا مابا خلاص عاد

مي قامت من على شبريه وهي تتطالع ريم اللي ويها مستوي احمر .. حست مي انه ريم خلاص معصبه .. وما ينفع وياها الرمسه اكثر .. روحت مي ويوم وصلت عند الباب..

مي: فكري عدل يا ريم .. شكل الريال يباج من كل خاطره واذا صليتي الاستخاره انتي مب خسرانه شي .. ع الاقل حزتها كلنا مانقدر نقولج خذيه ان صليتي ومارتحتي ...

سكرت مي الباب من غير ما تتفوه باي كلمه زياده .. وسارت الحجره وهي متغصصه من ريم .. اما ريم .. مالقت غير حضن السرير يواسيها.. انخرطت فصياح فضيع.. ماقدرت تهدي عمرها .. عليا وام سيف واحين مي والكل يأكد مصداقية نايف وجوهره الطيب ..
شو الحل يا ريم . شو بتسوين .. وكأنه الرب مكتب انه الكل ايي يبى يقنعج .. بس انتي ليش تعاندين .. ليش ما تبين ..
ام سيف بتزعل منها لو مارضت وريم ماتقدر ع زعل ام سيف .. ام سيف بعدها مريضه وتحت العلاج وماتتحمل الصدمات.. ماتعرف شو تسوي غير انها تفكر وتذرف من ها الدموع ..
وجمله مي الاخيره خوفتها .. لو قامت وصلت الاستخاره .. وظهرلها نايف من نصيبها هذيج الساعه مجبوره تاخذه .. فكرت انها تصلي وتتوكل ع ربها .. بس بنفس الوقت خافت من كون انه يطلع من نصيبها .. وتنجبر تاخذه ..


******************
(الجمعه) 13اغسطس 2004
******************

فحجرة ام سيف..مي يالسه ويا يدتها الظحى .. وترمسها عن سالفة ريم .. بالأمس كانت مي مخططه لشي تبى تسويه لكن ام سيف ما ساعدتها .. والحين مي الا تسوي ها السالفه وتحاول فاليده ..

مي: امايه لازم ترمسينها مره ثانيه بحزم
ام سيف: ياميوه تبيني اغصبها يعني
مي: امايه ها مب غصب .. اعتبريها خدمه انسانيه..
ام سيف: شو خدمته ما خدمه بعد هاا.. قومي عني ميوه..
مي: امايه .. ريم خلاص تراها مب وافقه .. ماعليها من حد هي ..
ام سيف: كيفها
مي:شو كيفها .. امايه ريم غشيم تراها ماعليج مسويه عمرها عوووده وهي ماتفهم شي .. لازم نخطط مستقبلها باجر محد بييها صدقيني
ام سيف: لاتفاولين ع اختج .. انا اباها لنايف تراه بعد ولدي لكن شو نسويبها
مي: انزين امايه حبيبتي .. انا بسير عند ريموه وبقولها انتي تبينها ظروري .. ويوم بتيج قوليلها انج من امس مب رايمه ترقدين وايد تفكرين في نايف وفيها
ام سيف: عنبوج اليوم الجمعه وتبيني اجذب
مي:هاي مب جذبه .. بالذمه يعني انتي ما فكرتي فيهم ..مب فخاطرج توافق
ام سيف: امبلا بس انا فليل وطيت راسي ورقدت ما فكرت فحد
مي: اماايه عاد . طوفيها انتي .. وعاد عقب قومي يري الرمسه من ريم خليها تلين وتوافق عشانج..
ام سيف: ونحن شو نستفيد يوم نيوزها بالغصب؟
مي: امايه هاي ريم خبيل ماتبى مول تعرس شو فايدة الندم عقب.. ولد عمتها ريال طيب ومتخرج من برع ومتوظف الحين فاحسن الشركات شو تبى اكثر هيه..
ام سيف: شدراني باختج
مي: سمعي الرمسه يا امايه وانا متأكده اللي بنسويه له فايده.. انا بسيرلها الحين وبطرشها صوبج وانتي رمسيها بحنيه بيلين قلبها ماعليج .. انا بعد مرمستنها تراني وبتلين ان شا الله
ام سيف: الله يعيني على زنتج هاي ياميوه انا بسوي احين هالسالفه وبزقرها برمسها اخر مره امبوني قايله مابرمس لكن ماعليه برمسها بعد مره بس مابغصبها وان ماطاعت لاتين تقوليلي ردي رمسيها مره ثانيه مابرمس بس
مي:انزين لاتهددين الله يهداج .. اضبطي كل شي بالتمام وهالله هالله بالحنيه مب تقومين تهازبين ترا تيج حالات انتي بعد امايه وان شاااء الله بتفرحين بريم

شردت مي وهي تظحك قبل ماتيها ظربه من يدتها وسارت حجره ريم اللي كانت يالسه تقرا قران .. قاطعتها مي وهي واقفه حذالها ..

مي: ريمان امايه تباج
ريم: شو تبى
مي: ماعرف ماقالت بس قالت ازقري ريم ضروري
ريم: اووف اكيد تبى ترمسني في السالفه
مي سوت عمرها ماكانها تعرف شي: اظن انها ماتدري وين دواها وماخذته
ريم: انا حاطتلها اياه شقى ما خذته
مي: ماعرف
ريم: بقوم بطالعها

نزلت ريم عند يدتها اللي كانت طايحه ع سريرها في غرفتها

ام سيف: ريم فديتج وين كنتي من الصبح
ريم: امايه شوفيج؟؟ ميوه تقولي تدورين دواج
ام سيف: هاه .. لا ميوه ماعرفتلي انا يا امايه قابظني صداع ادور دوا حق الراس
ريم: بسم الله عليج من شوو؟
ام سيف: مادري .. يمكن لاني مارقدت امس زين
ريم: امايه تراني راقده حذالج .. كل مره اقوم القاج راقده الحمدلله

صخت ام سيف وهي فخاطرها تضرب ميوه .. يلست تتامل ويه بنتها..
نست سالفة مي بالمره .. نست شو قالتلها مي تقول .. حكمت احاسيسها بروحها ويلست تفكر فريم وهي تشوفها .. ريم مب عارفه شو بلاها يدتها سرحانه وهي تطالعها ..

ام سيف: ريمان غناتي ابا افرح فيج قبل ماموت
ريم: بسم الله عليج امايه شو ها الرمسه لا تفاولين ع عمرج .. بتخرج ان شاء الله وبتفرحيبي
ام سيف: لا ريمان.. انا ماتفاول بس انتي تشوفين صحتيه.. هاي مب اول طيحه .. ومن طول الاسقام ماقام
ريم تمت ساكته ولا علقت وقبضت ايد يدتها وتمت تمسحها ..
ام سيف: يا ريم .. انتي الغاليه امبين الكل والله يا ريم اني اخاف عليج من نسمة الهوا.. البنت مردها لبيت ريلها وانتي يا امايه ماتبين ولد عمتج! ليش عاد
ريم بيأس: اماااايه
ام سيف: ريم الغاليه .. نايف انا مابمدحه لانه ولد بنتي قايلتلج ها الرمسه من قبل.. بس والله انه ريااال .. حتى مريم ربته احسن من تربيتي انا لسيف.. شو تبين اكثر من جي
ريم: ماعرف ماعرف يا امايه
ام سيف اطالعها وتبتسملها: وافقي وفرحي قلبي .. انا قلبي الا تعب من كثرة الهموم والغصه..

ريم وخت براسها .. خلاص مب قادره تتطالع عين يدتها اللي لو تمت اكثر وياها اكيد بتقنعها .. بتقنعها انها توافق .. طاحت دمعتها من عينها .. ام سيف رفعت ويه ريم بايدها .. ومسحت دمعتها ..

ام سيف: انا مابا ها الدموع .. ابا اسمع رايج
ريم: قلت من قبل
ام سيف: ما سمعتج من قبل .. الحين ابى رايج .. جان انا عزيزه عندج وغاليه بتسمعيني اللي يفرح قلبي مب يكدره.. يلا قولي رايج

قامت ريم من يلستها وتمت واقفه وهي تتطالع يدتها .. خلاص طاح الفاس فالراس ماتقدر غير انها تبرد خاطر يدتها وهي تشوفها تترجاها وهي بها الحال
ورجعت تذكرت نصيحه مي .. سوت نصيحتها وصلت الاستخاره عشان تقولهم انها مارتاحت .. لكنها تشوف عمرها ساكته وماحست بظيجها القبلي من كلام يدتها .. خصوصا هالموقف خلاها تحس انه خلاص هذي هي علامه ودليل استخارتها ..

قالت ريم وبتسرع : سوو اللي تبونه ..
ام سيف: اللي نباه فيه مصلحتج .. لكن انا ابا رايج انتي
ريم صخت .. وطلعت كلماتها بصعوبه قبل ما تظهر من عند يدتها ..
ريم: خلاص موافقه ..
ماتريت تشوف ردت فعل يدتها اللي انشقت الابتسامه فويها .. على طول ظهرت .. وسارت حجرتها اطلع المكبوت فصدرها .. اما اللي كانت واقفه عند الباب تتصنت اندست اول ما سمعت خطوات ريم يايه صوب الباب وعقب دخلت الحجره ع طوول..

مي: الله الله الله عليج يا سعاد حسني .. انتي بروحج يبتي مسرحيه غير عن اللي انا مألفتنها
ام سيف: خس الله بليسج ثرج انتي واقفه تتسمعين
مي: هي عيل شوو ..
ام سيف: فديتها والله يابت رمستج فايده ياميوه.. بردت فوادي .. ماعليه لو انها مب حابه ها الشي بس ويا الايام بتقول انه اختيارنا صح
مي: انا اقول جي بعد .. خل نرص عليها لين توافق ولا تضيع نايف من ايدها ..
وتجدمت مي ويلست حذال يدتها ع السرير ..
مي: يا امايه كثرن الحريم وقلو الرياييل فها الزمن.. الوحده من اييها الريال مب الا تقبضبه باديها الا تقبضه بظروسها والا خلاص ما بتعرس مول
ام سيف: هههههه شو ها الرمسه ميوه
مي: هي صدق.. اكبر مثل عندج بيتنا .. ماشالله ها نص درزن بنات وولدين
ام سيف: هههههههههه خس الله عدوج يا ميوه..
مي: انزين امايه الحين خلاص نعتمد الموافقه اسير ارمس امايه وابشرها
ام سيف: لا لا صبري .. انا برمس مريم اول شي ..
مي: كيف ترمسين عموه .. عساس محد يدري بالسالفه
ام سيف: عيل شوفي عليا .. وقوليلها ريم وافقت وخل تقول لمريم ايون يخطبونها من عندي ها المره وعقب انا لي رمسه ثانيه ويا مريووم
مي: شو يعني بتهزبينها لانها ماخطبت عندج على طووول
ام سيف: مالج شغل انتي
مي: ماعليه انزين يا العيوز .. الحين انا اللي انطبخ وانشوي من كم يوم بسبة السالفه وفالاخير تقوليلي مالي شغل
ام سيف: هيه هاي سوالف كبار.. يالله سيري رمسي امج وقوليلها انه ريم وافقت
مي: لاوالله.. عيل انتي رمسي امايه وقوليلها دام انها سوالف كبار
ام سيف: ميوه بضربج تراني.. يلا قومي لا تنقصين عليه فرحتي
مي: ههههههه خلاص بقوم كرماال موافقه ريمان مب عشان شي ثاني

وطلعت مي من الحجره وقبضت تيلفون الصاله تتصل بامها .. دقت على الموبايل ع طول .. ردت امها .. ومي عقب السلام والاخبار فتحت الموضوع عطول.. عليا استغربت كيف درت مي ودرت اليده.. اما مي خبرتها كيف اليده درت لانه ام سيف خبرتها كيف سمعت ريم وهي ترمس بس ما قالتلها كيف هي درت .. عليا حطت فبالها انه ام سيف يمكن زل لسانها ويا مي .. طنشت ماهمها .. لانها استانست ع موافقة ريم .. بس هي ردت على مريم .. كيف بترد ترمسها وتقولها ريم وافقت.. اكيد بيحطون فبالهم انه حد غصبها.. اخر شي رفضت عليا انها ترمس مريم .. وقالت حق مي تخلي يدتها ترمس مريم ..

ومي من عقب ما سكرت عن عليا ردت عند يدتها ..

ام سيف: ها رمستيها
مي: هيه رمستها .. استانست بس في نفس الوقت ماطاعت تتصل بعموه
ام سيف: ليش؟
مي: تقول هي تتلوم لانها اصلا رمستها قبل يومين وقالتلها انه ريم مب موافقه
ام سيف: وشعنه امج تستعيل وتقولها ريم ماتبا
مي: بعد امي شو بتسوي .. تدري بريم عنيده وكم بتيلس تتحجج حق عموه
ام سيف: لا حول ولا قوه .. واحين
مي: شو بعد احين ... بييبلج التلفون واتصلي بعموه رمسيها مالج الا جيه ..
ام سيف: قومي هاتيه ..
مي نشت يابت تلفون البيت صوب يدتها .. واتصلت ام سيف بمريم ..

مريم شافت رقم امها وشلته ع طول ..
ام سيف: السلام عليكم
مريم: وعليكم السلام والرحمه ..
ام سيف: شحاالكم
مريم: بخير وسهاله .. اشحالج انتي امايه؟
ام سيف: بخير الحمدالله ..
مريم: وبنات سيف اشحالهن؟
ام سيف: الحمدالله ..
مريم: تغديتوا؟
ام سيف: هيه الحمدالله .. نايف اشحاله ؟
مريم: نايف؟ بخير فديته
ام سيف: يالله مب ناويه تخطبيله وتيوزينه ؟ نبى نفرح به
مريم: هاه ؟ هيه ان شا الله
ام سيف: رمسيه انتي وانا بييبله الحرمه السنعه
مريم توترت : منو تطرين
ام سيف: ريم بنت خاله ..
مريم: لا
ام سيف: شو لا ؟
مريم: لا ماظن يبى حد من بنات خاله
ام سيف: ليش بلاهن بنات خاله ؟ مب انتوا اللي ربعتوا لامهم تخطبون ريم وانا ياغافلين لكم الله .. لا جني امج ويدته ويحتاي اعرف .. لكن شغلج كله سويتيه بالدس ..
مريم ارتبكت .. كيف امها عرفت .. خصوصا بعد ما انحسم الموضوع ..
ام سيف: يحتاي يا بنت مايد .. تين تخطبين البنت من ابوها
مريم: امايه فديتج .. انا خفت انه امها ماترضى او انها هي ماترضى وقلت بدال ماكبر الموضوع واخاف انه سيف يجبرها .. ارمس امها قبل وان طاعت بخبركم ..
ام سيف: درينا بدون ماترمسين
مريم: منو خبركم؟
ام سيف: مايحتاي تعرفين .. المهم متى بتون تخطبونها من ابوها عشان اقوله
مريم: نخطبها ؟ شقى بعد ني نرمس ابوها .. البنت تراها ماوافقت
ام سيف: خبرتوا نايف انه ريم مب موافقه ؟
مريم: ماخبرناه .. الكل يدري الا هو.. مب عارفين كيف نفاتحه
ام سيف: خلاص لاتخبرينه مايحتاي .. ريم وافقت
مريم عقدت بحياتها: من يومين تراها مب موافقه.. ليكون جبرتيها امايه
ام سيف: انا مب خبله اجبر البنت .. صح انه هذاك ولد بنتي وهي بنت ولدي وابا لهم الخير وانه الله يجمع بينهم بس ماتوصل لاني اجبرها .. انا رمستها واقنعتها ..
ريم تحاتي اخوانها .. وجسوم والبنات .. وانا طمنتها انهم بيتمون عندي وهي تروم تيهم كل يوم لين تتعود .. واقتنعت
مريم وهيه مستانسه: والله فرحتيني يا امايه .. بقوم ابشر البنات .. لا لا بقوم اخبر نايف .. ولا اقولج بقول لخلفان احسن وهو بيخبر نايف
ام سيف غصبن عنها رغم العتاب اللي في خاطرها على بنتها اظحكت
ام سيف: ماعرفنالج شو بتسوين ..
مريم: والله من وناستي .. نحن شارين ريم ونباها مب الا نايف يباها .. كلنا نباها حرمه لنايف ..
ام سيف: خلاص انا برمس سيف اليوم .. وبخبره .. وانتي خبري خلفان وهم بيتفاهمون ..
مريم: ان شا الله وقولي لريم أي شي تباه نحن حاظرين مابنقصر عليها بشي ..

ارتاحت ام سيف لها الكلام .. هي ماتعلم بالغيب لكن حست انه الله بيعوض ريم عن كل المسؤوليات اللي حملتها رغم صغر سنها ..
سكرت ام سيف عن بنتها والتفتت لمي اللي كانت ملزقه اذنها ع السماعه وتسمع كل شي رغم انه يدتها كل شوي اتدزها بس مي ترجع تسمع ..

ام سيف: غثيتيني مارمت اهزب مريوم زين
مي: تهازبي وياها عقب ع راحتج المهم انه اللي اباه انا استوى وبس ..
ام سيف: يالله انزين قومي عني بطيح شوي برتاح وخلاف يوم بينش ابوج برمسه ولاتخبرين خواتج بشي .. لين ارمس ابوكم وعقب انشروا الخبر ع راحتكم
مي: انزين ..

طلعت مي من الحجره وسارت فوق عند خواتها وتيلست وياهم يتابعن فيلم هندي بالفيديو.. وكل شوي تتطالع باب حجرة ريم.. خلاص ريم مزاجها تعكر ومستحيل تظهر وتيلس وياهم .. وفالاخير اندمجت فالفيلم وكل شوي تسأل ليش ها استوى وشو قالو وشو استوى فالبدايه .. وجاسم يرد يخبرها شو استوا والتوم يصححن له فهمه للفيلم .. وساره تطالعهن وتتحلفلهم وتتوعد اذ ما سكتوا ..



****

أما مريم .. قالت للطيفه الحوار اللي دار بينها وبين أمها .. لطيفه استانست واايد ومشتطه تبى هي تسير تخبر نايف..

مريم: قومي كلنا نسيرله .. وينه هو فحجرته؟
لطيفه: هي تغدى وسار حجرته ..


سارن ثنتيناتهم فوق عند نايف لقن باب حجرته مفتوح .. و اسما يالسه متربعه ع السرير ونايف مجابلنها على مسافه وهو يالس ع الكرسي و يقرى الجريده..اسما ترمس ونايف مب مستوعب اللي تقوله ويركز بنظره على الجريده ..

اسما: انزين انته بلاك ..
نايف: شو بلايه بعد .. خلاص ما تباني شو يعني تبيني اسوي
اسما: برايه اللي خلق ريم خلق مليون مثلها ..

نايف حزت فخاطره ها الرمسه اللي سمعها .. ليش ريم مب موافقه عليه .. ليش ما تباه .. رفع راسه وشاف امه ولطيفه عند الباب..
لطيفه سارت ع طول عند أسما ومطتها من شعرها ..

أسما: اي اي يعلج فجي .. عورتيني
لطيفه: قومي اشوفج ..
اسما: شو تبين ..
لطيفه: قومي وياي بسرعه ..
اسما: انزين بقوم بس فجي شعري
لطيفه: يا السوووسه بسرعه قومي ..

قامت اسما من على الشبريه وهي تتطالع لطيفه بنظرات .. لطيفه طنشتها وسحبتها من ايدها برع الحجره وقفلت عنها الباب .. اما مريم تجدمت صوب نايف ويلست ع الكرسي اللي حذاله وسحبت الجريده من ايده وحطتها ع الطاوله الصغيره اللي جدام الكرسيين.. ولطيفه يلست ع السرير وهي تتطالعهم ..

نايف: ليش ماخبرتوني من أول ماعرفتوا؟
مريم: ماله داعي نخبرك
نايف يطالع امه باستغراب: كيف ماله داعي .. مب أنا اللي بخطب وبعرس
لطيفه: ماله داعي لانه ها ماكان القرار النهائي
نايف: لطوف بعد ها الرمسه تتحمل قرار نهائي واولي.. خلاص ها رايها وحسم الموضوع ..
مريم: نايف ريم موافقه
نايف تم يطالعهن باستغراب .. كيف موافقه واسما توها تقوله ريم مب موافقه ..
نايف: شو اميه انتوا ماخذيني مهزله .. توها اسوم تقولي ريم مب موافقه وانتن تقولن موافقه.
مريم: انته تبى الصراحه؟
نايف: قولن اللي عندكن .. عنبو نشفتولي ريجي مره موافقه ومره لا
لطيفه: شوف نايف.. انا قايلتلك من قبل عن حالة ريم وانته بنفسك قلت ماعليك من ها الشي وريم عايبتنك وتباها وبتكسبها صح ولا
نايف: صح انزين وعقب
مريم: الله يسلمك .. ريم فالبدايه ماطاعت.. قالت اخوانها منو بيراعيهم وبيتم وياهم
نايف: انزين بيتنا هاذوه مب فالمريخ..
لطيفه: انزين .. وانا اعتقد حالتها هي اللي خلتها ما توافق .. لازم بتنصدم فالبدايه وتتفاجأ.. بس احمد ربك انته انه الكل اقنعها والحمدلله وافقت
نايف: وافقت مغصووبه قولي
مريم: والله يا وليدي محد غصبها .. توه يدتك قالتلي انها اليوم غيرت رايها ..ربك استخارت البنت وطمنت من صوبك
نايف: ماعرف والله
لطيفه: نايف حكم عقلك مب قلبك.. لاتاخذك عزت نفسك وانته تعرف انه ريم ما رفضتك انته.. هي رفضت فكرة العرس والابتعاد عن خوانها ..
نايف وخى براسه وتم شابك ايده الثنتين ببعض .. مب عارف شو يقول ..
مريم: أمايه تبانا نسير نخطبها من ابوها
لطيفه: ها شرايك ..
نايف: خلاص توكلوا وخطبوها..
وقام من مكانه وحب راس امه وهو يبتسملها .. ولطيفه قامت وحضت اخوها من الفرحه ..
نايف: هههه لطوف شياج.. هههههههه اول مره اشوف ها الحب كله
لطيفه: فديتك يا خويه .. والله اني احبك واموت فيك
كان نايف طويل نسبيا .. خازت عنه وتمت رافعه عينها تتطالعه وهي مبتسمه..
لطيفه: بخليك ويا عيوزك عيل .. أنا بسير أنشر الخبر فالبيت وبسير أأدب أسموه السوسه ..
نايف: ههههه حرام عليج .. هي خبرتني بزلة لسان ويلست تواسيني عقب أونها
لطيفه: الا أأدبها .. هاي مادري متى بتيود لسانها
نايف: ليش خلوها تخبرني ولا تم على عمايه
لطيفه: هههههههه يلا بسير عيل انا ..

[لامارا]

طلعت لطيفه من عندهم وسارت حجرت اسما وما حصلتها .. نزلت الصاله .. شافت اخوانها اسما وعمار ونواري ميلسين يشوفون التيلفزيون .. تقربت من اسما اللي كانت مطنشتنها .. لطيفه انقهرت وايد من اسما وقبضت كرتون الكلنكس وفرته على اسموه ..

أسما: ايييه شوو بلااج؟
لطيفه: الله بلاني بأخت لغايه ماتروم تحفظ السر
أسما: انزين انا زل لساني
لطيفه: يعله الحرق لسانج
عمار: شو مستوي ..؟؟
لطيفه وهي مبتسمه: اللي مستوي شي بيفرحكم كلهم
نوره: باباه بيودينا مكان؟
لطيفه: انتي حاتيتي المكان الا ..
اسما: شووو لاتقولين وافقت
لطيفه: هييه ..
اسما: والله..
لطيفه: اللي مستوي .. انه نايف بيعرس.. هاا شراايكم
عمار: بيعرس؟؟.. ومنو بياخذ؟
نوره: بابا نايف بيعرس .. ليش.... بعدين حرمته بتضربني
لطيفه وخت ويلست مجابله نواري وهي تبتسملها
لطيفه: عاده حرمته انتي تموتين فيها
عمار: منو هاااي!! يعني نعرفها؟
اسما: خبلتيبهم قوليلهم
لطيفه: ريم بنت خالي
عمار: قوولي والله . يا سلام صدق صوبتوا الاختيار
اسما: شو مرمى هو عشان نصوب
لطيفه: ههههههه هاي تعابير الشباب انتي بلاج
نوره: ريم اللي بيتهن عند قوم امايه عفرا؟؟؟؟
لطيفه: هيييه
نوره قامت ووقفت على الغنفه وهي تناقز وتصفق
نوره: الله .. عروستنا حلوه .... بترقدني عندهاااا.. الله
اسما: ههههههههه جي بتاخذج انتي ولا بتاخذ نايف
لطيفه: ههههه وحليلها الفقيره مستانسه ..

وتموا الاخوان رابشين ومستانسين على سالفة الخطبه .. الكل يحب ريم ويباها لاخوه.. صح أسما عصبت لان ريم رفضت فالبدايه.. لكن ها الشي طبيعي كونها تراعي مشاعر أخوها ..

****

العصر يلست ساره في الحجره ويا مي .. متملله تبى حد يسولف وياها ومي لابستنها ويالسه ع الكمبيوتر تصمم بطايق.. وبالها سرحان .. ياترى متى بيون قوم عمتها يخطبون رسمي .. وكيف موقف البيت بيكون.. وضحكت فخاطرها .. محد يدري من البنات غيرها وساروه ام الفضول ماتدري.. اسميها بتيها جلطه جان درت انه مي كانت تعرف ولا خبرتها ..
وتذكرت رمسة أحلام.. ها شي ثاني داساتنه عن ساره ولا خبرنها عنه. لو درت مايعرفن شو بتسوي .. الحين مب وقته نفتح ها السالفه لانه يكفي سالفة ريم حاليا..

ساره: ميوه عطيني ويه والله مليت من اليلسه بروحي.. ميوه ميوه ميوه ..افف ميوه ردي عليه انزين ..
مي: سميتي بدنا يا خي بها الزقره .. شو تبين انتي ..عن شو نسولف بالله عليج ..من وين عندج سوالف
ساره: اوف متى بتبدى الجامعه مليت
مي: لاتستعيلين مابجى وايد
ساره: ريمان شبلاها حابسه عمرها من أصبحت؟
مي ترد ع ساره وهي عاطتنها ظهرها ومجابله الكمبيوتر: مادري اساليها
ساره: اووف ياربي ملل .. بقوم بسير اطالع نعوم شو تسوي
مي: زين تسوين .. فكيني من حشرتج شويه

مدت ساروه ايدها ودقت مي ع راسها وطلعت بسرعه من الحجره اما مي صرخت عليها ولا قامت.. تدري انه ساروه تتحرشبها عسب تعطيها ويه حتى لو تضارب وياها..
سارت ساره جناح ناعمه لقتها يالسه ترمس في التلفون ويلست ع واحد من الكراسي وقبظت جهاز التلفزيون تجلب فيه لين خلصت ناعمه من تلفونها ..

ناعمه: هلا
ساره: هلوووين ام مايد
ناعمه : ها شعندج مؤدبه تزقريني ام مايد..
ساره: يالله دوم ازقرج جي بس انتي ما تسمعين الا الشي اللي مب زين.. بيني وبينج ملانه وقلت بيي اسولف وياج انقصر الدووب
ناعمه: خواتج وينهن ؟
ساره : كل وحده في صوب
ناعمه: انزين ..
ساره: مابتطلعين مكان
ناعمه: وين اسير بعد؟
ساره: أي مكان
ناعمه: لا مابسير

ساره سكتت .. تبى تطلع ملانه .. ومب عارفه شو تسوي ..
تمت تطالع ناعمه وتركز في شكلها .. ويت في بالها فكره ..

ناعمه: شو بلاج جيه مبحلقه فيني
ساره: شكلج شاحب
ناعمه: هاه
ساره: اول مره اركز على شعرج
ناعمه: شو بلاه شعري
ساره: لونه كئيب
ناعمه: شو يعني ؟
ساره نشت من مكانها وسارت يلست حذال ناعمه
ساره: يعني اللون الاسود كئيب
ناعمه: بالعكس اللون الاسود حلوو
ساره: شوفي خليني اقولج .. وحده في مثل عمرج يعني ومعرسه وجيه لازم تغير شكلها دوم .. شعرج الطويل الاسود هذا تخلينه يوم يصك عمرج الخمسين مب احين .. تعالي انتي كم عمرج ؟
ناعمه: 33 سنه
ساره: وامي عمرها 38 سنه .. لكنها تبين اصغر عنج تصدقين
ناعمه: لا والله ليش يعني
ساره: لانها تهتم بعمرها .. بالله عليج احين انتي اللي يشوفج يقول عمرج اكبر عن امي ..
ناعمه: شو اسوي يعني
ساره: لازم تهتمين بنفسج اكثر
ناعمه: انا اهتم بنفسي انزين
ساره بخبث: اعرف اصلا انتي فنانه وكشيخه .. بس شعرج مب حلووو .. شو رايج تقصينه الطويل مب حلوو عليج انتي بروحج طويله وتطولين شعرج .. يعني ينقص لين نص الظهر وعقب مدرج عطوله واصبغيه .. احسه بيطلع عليج فن وبتصغرين 10 سنين
ناعمه مسكت شعرها تطالعه وترد تطالع ساره: اقصه ؟ واصبغه ؟
ساره: هيه
ناعمه: بس ابوج يعيبه جيه
ساره: ابويه شو عرفه .. تفكيره مال اول .. يعني تبينه ييلس يطالع التلفزيون وهاذيل المذيعات ويتحسف عليج انج مب كشيخه شراتهن .. لاا بالعكس انتي كل مره لازم تطلعيله بشكل يديد وتعمينه عن الغير .. تراه لاتنسين اللي يعرس ع حرمته مره يعرس ع الثانيه مرتين ..
ناعمه: فال الله ولا فالج
ساره: وانا ماباج تتلعوزين .. نحن كبرنا خلاص مانحاتي اذ ابويه عرس مره ثانيه.. بس حرام انتي بعدج صغيره وعيالج صغار ..
ناعمه: اوف بس انزين فريتي مخي .. خلاص اليوم بشاور ابوج
ساره: اوووف انتي ليش جيه غبيه؟ شو تشاورينه ؟ اقولج سويله مفاجأه تقوليلي بشاوره
ناعمه: عن طواله اللسان ساروه بفرج بالتلفون ع راسج .. شو تبيني اسوي يعني احين
ساره: تقومين تلبسين عباتج وتشلين سويجج وتسيرين الصالون واقوم انا اسير وياج
ناعمه: انتي ليش تين
ساره كشخنت بتعابير ويها وهي فخاطرها "الله يغربلها من الصبح اقنعها عشان انا اطلع وماتباني اسير"
ساره: عشان اشوف وياج الصبغه الحلوه ونتشاور .. يعني بساعدج ..
ناعمه: هيه زين .. عيل تدرين قومي اتلبسي انا برمس ابوج بقوله بسير وياج مشوار وبرجع
ساره: اوكي تم ..

طلعت ساره من جناح ابوها وسارت جناحهم وهي تناقز مستانسه .. دخلت الغرفه ع مي وتلبست عباتها وهي تغني.. مي صدت وشافتها تلبس عباتها

مي: وين سايره
ساره: بطلع ويا نعمه الله
مي: وين ؟
ساره: مشوار
مي: وين انزين ؟
ساره: مايخصج محد قالج تلبسيني .. كملي كملي بطايقج .. لحد يتصلبي انا خارج نطاق الخدمه حاليا .. باااااي

وطلعت ساره من الغرفه ومي تطالع باستغراب وتبى تعرف وين بيسيرون مب الا ساروه فضوليه.. طلعت حتى هي تحترق من داخل من الفضول..

نزلت ساره وطلعت ويا ناعمه وتوجهوا للصالون .. اهناك كانت ساره وناعمه وايد يعترضون ع الوان الصبغات وساره تتنازع ويا ناعمه وهذيج تعصب مب هاين عليها شعرها .. لين اخر شي خضعت ناعمه لمحاولات الاقناعيه من قبل ساره وقصت شعرها الطويل وصبغته بني مع بعض الخصل الشقرا..
شكلها تغير 180 درجه .. ساره كانت تتمصخر بس صدق شكلها تغير وصغر وايد
اهنه ناعمه تشجعت واستانست من ساره وايد ..
لكن ساره بعد ماطوفت هالطلعه .. سوت اللي في خاطرها من زمان وقامت قصت هي شعرها بعد مدرج من الجتف لين طوله.. وصبغته خصل عسليه .. لانه شعرها اصلا كان بني وطويل..

وقبل مايرجعون البيت خطفوا على السوق وتسوقت ساره ويا ناعمه اللي استانست بالطلعه ويا ساره .. صح تتناجر وياها كل شوي بس تشجعت اكثر في انها تاخذ رايها باللي تشتريه عقب ماشافت نتيجه رايها الاول ..

رجعوا البيت ناعمه على طول سارت جناحها وساره دخلت جناحهم لقت خواتها يتابعن مسلسل الحقيقه والسراب ..

ساره: سلاااااام
البنات : وعليج السلام
مي: هاه شرفتي
ساره فتحت شيلتها وفتحت الانوار اللي كانوا مطفينها
ساره: شرايكن ؟
مي: قصيتيييييييييييييه
ساره وهي تدور بدلع: شو رايج
مهره: وصبغتيه بعد
ساره : هيه
مها: ياويلج من اميه عليا
ساره: ليش
مي: تدريبها كانت رافضه سالفه انج تقصين شعرج
ساره: شمعنى انتي عادي
مي: انا من استويت ماداني الشعر الطويل
ساره: وانا ابا اغير لوك الجامعه قربت ..
مي: ريمان فالحجره ماشافتج والا بتيج هزبه
ساره: عادي بيهزبن وخلاف بيسكتن المهم سويت اللي اباه
مي: ونعوم
ساره: هيهيهي طافكن خليتها تقص شعرها وتصبغه .. بس طلعت حلوه الطويله
مي: هههههههه سويره انتي ام المصايب ماتيوزين انا قلت اكيد وراج شي ..
ساره: عيل شو تتحرين
مي: بس انزين تعالي اطاعي المسلسل لاتاذينا ..
ساره: بقوم ببدل وبييكن .. متى بادين؟؟
مهره: قبل شويه ..
ساره: انزين تعالن منو بيينا الحين؟؟
مي: ليش منو بيي
ساره: وانا صاعده فوق اسمع امايه تهزب وتقول شرفتن الحين.. العرب بيون عقب شويه .
مي: عرب!! بقوم اشوف شو السالفه ..

نزلت مي تحت ويايه بتبطل باب الصاله بس سمعت صوت ريال .. وشافت نجمه يايه وشاله وياها صينية قهوه ..

مي: منو داخل نجمووه؟
نجمه: ماما مريم وبابا خلفان وولد مال هو
مي: نايف؟
نجمه: هي .. يلا قومي قومي ..
مي: ابويه هنه؟
نجمه: هي يجي قبل شويه

مي ابتسمت وردت فوق .. وطاحت تكمل المسلسل ويا خواتها ..

ساره: ميوه منو ياي ..
مي ابتسمت: ماعرف
ساره: كيف ماتعرفين وتوج نازله
مي: مانزلت وقفت فنص الدري ورديت .. تعايزت اكمل
ساره: مالت عليج ..

وتموا يطالعون المسلسل ويضحكون على تعليقات ساروه ومي وهن يشبهن تسلط ام رياض(ثريا بنت ابو الفضل) بيدتهن ويتخيلن ان مرت رياض هي امهن ورياض ابوهن وقامت ساره تأشر على بنات رياض التوم وتمسيهن بأسامي مها ومهره والولد جاسم والكل فاطس من الضحك ..

في هالوقت نشت مي ودخلت الغرفه على ريم .. كانت ريم تصلي .. يلست مي ع السرير تترياها لين خلصت .. اول ماسلمت رفعت ايدها تدعي .. وعقب التفتت لمي .. شكلها كان متغير وتحت عيونها هالات سودا ..
ريم: هاه مي
مي: انتي وينج مايلستي ويانا اليوم
ريم: تعبانه شوي
مي: شو فيج ؟
ريم: صداع
مي: اها .. انزين ماكلتي شي بعد
ريم: ماشتهي ..
مي: ريم ممكن ارمسج
ريم: مي تبين ترمسين عن نفس الموضوع ؟
مي: ريم انا تراني مب صغيره ولا تشوفيني كبر مها ومهره !!.. انا بيني وبينج سنتين بس .. ليش ماتحسين بها الشي .. لاتكبرين عمرج وايد اعرف انه مسؤوليتنا تخليج تحسين بها الشي بس بعد عطينا مجال نرمس وياج
ريم: وانا ماقبظتلكم عصا وقلتلكم لاترمسون .. انا بس اخاف عليكم .. اخاف يقولون عليا ماعرفت تربي . وهاللي بيجتلني لو سمعته عشان جيه اخاف عليكم من أي شي ومن أي كلمه . وماباكم تسوون شي يضركم واييبلكم الرمسه
مي: انا اعرف انج تخافين علينا والله العظيم .. ونحن وايد نحترمج .. لو انه مافي فرق بينا بس نحسج انتي امنا الثانيه ..
نزلت مي من السرير ويلست ع الارض ع السياده حذال ريم ..
ريم: انزين يالله بعطيج مجال رمسي شو بتقولين
مي: عموه وريلها ونايف تحت
ريم: هاه ؟ شو يبون ؟
مي: يخطبون رسمي من ابويه
ريم: عنبو ماصدقوا خبر
مي: شارينج يا ريم
ريم: ميوه انا وايد خايفه و وايد افكر والله العظيم
مي: ريم فديتج انتي تحاتين قوم جسوم ؟ هذيل ماعليهم شر وانتي حذالهم
ريم: انتوا محد لو انتي وساروه اهنه اهون عليه
مي: مهوه ومهروه هابات ريح لاتحاتين ..
ريم: هذيل روحهم يبون اللي يشوفهم
مي: ماعليج يشلن عمارهن ..
ريم: ظايجه يا مي ماتتصورين كيف .. ماعرف كيف ظعفت جدام امايه وقلتلها اني موافقه
مي: انتي صليتي الاستخاره مثل ماقلتلج
ريم: هذي توني مصلتنها ..
مي: يعني ماصليتي من قبل
ريم: تبين الصدق ؟ صليت امبلى لاني كنت ابا ارفض واقولكم مابا بس طلع العكس .. حسيت اني هديت شوي يعني مب الرفض القبلي ولو اني بعدني مابا ..وماعرف كيف وافقت بسرعه وعطيت امايه كلمه..
مي: وليش رديتي تصلين احين ؟
ريم: ابا اتاكد وارتاح انه اللي بيستوي خير
مي: ان شا الله خير ..
ريم وطت راسها ودمعت عينها ..
مي ارفعت ويه ريم وتجدمت باستها ع خدها .. لكنها ماتوقعت رده فعل ريم اللي حظنتها .. وتمت ريم تصيح .. الشي اللي خلا مي غصبن عنها تصيح وياها ..

مي: بسج عاد جلبتيها حزن
ريم ابتسمت لها .. ويلست تتطالعها
ريم: قوم ساروه عرفوا ؟
مي: لا يابوج ماعرفت والا مابتخليج في حالج .. يالسه برع تشوف التمثيليه وتقول انه ام رياض جنها امايه عفرا ..
ابتسمت ريم وهي تتطالع مي ..
مي: ريمان بقولج شي
ريم: قولي
مي: انتي لازم تظعفين شوي
ريم: هاه ؟
مي: هيه .. احين بتستوين عروس .. اظعفي شويه
ريم: ياويلي اسكتي لاتذكريني
مي: هههه انتي مايحتاي تسوين رجيم يبالج بس شد جسم.. يسدج هالدري ركبيه ساير راد..
ريم: هههه .. عاد حرام عليج هب دبه انا
مي: هب دبه انزين بس يبالج يعني ..

ارتاحت مي انها يلست ويا ريم وخذت وعطت معاها في السوالف .. ونفس الشي ريم .. حست اختها قريبه منها .. وارتاحت اكثر انها عقب ماطلعت عنها مي كلمت امها وسولفت وياها..و عليا وايد حاولت ترفع معنويات ريم المحبطه ..


أما فالصاله بعد ما روحوا خلفان ومريم ونايف.. تم سيف يالس و يا امه ويتشاور وياها.. قالتله ام سيف هو ماله خص فالسالفه.. هي بترمس ريم .. وبترد عليه خبر باجر.. طبعا أم سيف تدري براي ريم مسبقا .. لكن بترد ترمسها اليوم قبل ماترقد وتعرف انه ريم ما بتغير رايها وتفشل يدتها وأمها ..
******************
(السبت)14 اغسطس 2004
******************


الصبح فبيت بو راشد .. بعد الريوق فاتحت عليا الموجودين بخطبة ريم بنتها أمس.. كانت ميره مرت راشد يالسه وشيخه وعبير وام راشد ومديه وأحلام.. الكل تفاجأ الا ام راشد طبعا وأحلام اللي تعرف مسبقا بسالفة الخطبه وموافقة ريم اللي خبرتها عنها أمس ميوه..

ميره: ماشالله بالبركه ان شاء الله
شيخه: يالله عيل هي راده قبل خليفه والحين توافق ع ولد مريم اللي ماتعرفهم زين
ام راشد: شييخه شو ها الرمسه بعد
عليا: شيخه .. خليفه ترى ولدي مب الا ولدج بس شو بنسوي هاي قسمة ربج والولد ماقال يباها ولا لزم .. انتي اروحج يتي ترمسين فالسالفه وشاورت البنت ورفضت ..
شيخه: والله يا عليا انه ها الخطبه مب داشه راسي.. شي قايليلها هناك
ام راشد: شو بيقولون الها يعني ..
عليا: لاتسيؤون الظن .. واميه انتي تدرين انه اول ما استوت الخطبه انا اول وحده دريت .. وريم رفضت فالبادي.. لكن الحمدلله استخارت ربها وهدى سرها..
ميره: الله يطرح اللي فيه البركه ان شاء الله ..
عبير: يلا ان شاء الله نفرح بخليفه واخوانه يا شيخه ..
شيخه لو انه حاز فخاطرها .. لكن عليا الي كانت يالسه حذالها مدت ايدها وحطتها ع ايد اختها ورصت عليها وهي تطالعها ..
عليا: يا شيخه.. ريم بنتج وتبيلها الخير انتي ..
رفعت شيخه راسها واطالعت عليا اختها .. ابتسمت ..
شيخه: اكيد يا عليا .. نصيب نصيب ..
عليا: ونصيبها الحين ياها ..
شيخه: بالبركه ان شاء الله ..

مديه كانت تتطالعهم وترد تشوف احلام وكأنها استوعبت الرمسه اللي سمعتها قبل .. واحلام مطنشه مدوي ومركزه بسمعها ع النقاش الي صاير ..
بعد شي ثاني مايعرفنه.. خليفه قبل خاطبيله ريم وردته .. محد كان يدري بها الموضوع غير الحريم وخليفه وريم .. مانتشر الخبر واايد حزتها لان ريم ع طول رفضت ها الموضوع تبى تكمل دراستها وماتبى العرس .. وتعد خليفه حسبة اخوها بس حجه عسب ترفض.. محد لزم عليهم وخليفه بنفسه ما اشتط ع السالفه ..

تمت احلام اتمتم كلام بينها وبين نفسها..
"والله يحتاي دوم ايلس ويا الحريم .. كل وحده تحدد مصيرها بشوفهم انا ع منو بيعقوني ههههه والله ها الحريم .."


دخلت فجر ها الوقت الصاله وشافت التهاني والفرحه تعم المكان .. ماعرفت شو السالفه ويلست حذال اختها وتخبرتها عن الموضوع وقالتلها انه ريم انخطبت لولد عمتها .. فجر ما اهتمت ولا حتى عنت نفسها انها تبارك لعليا .. يلست ع الارض وقامت تفتح الحرارات تشوف شو مسوين للريوق .. وكلتلها شوي من الموجود وقامت تيلس حذال عبير ..

أحلام: أنا بسير أرمس ميوه.. من طلعت الرقم الحين نروم نرمسها براحتنا
عبير: ليش شو من الاسرار عندكن يعني عشان تاخذون كل الراحه فالرمسه
عليا: هاذيل من يومهن روسهن فبعض ويرمسن .. لازم بعد فالتيلفون مايبن حد يتسمعهن .. وهناك التيلفونات خط واحد اللي يشل السماعه تحت يسمع اللي فوق
احلام: ههههههه هيه شفتوا عاد المعاناه .. بس لا نعوم بروحها لها خطها ..
ام راشد: لازم بعد بيدلعها
عليا: يالله اميه شو تبينهم .. برايهم

قامت احلام وسحبت تيلفون الصاله لين حجرة عليا كونها الأقرب للنقطه .. ودشت الحجره ودقت ع رقم مي اللي طولت لين ردت ..
سمعت احلام صوت واطي ومخشن شوي ..

احلام: ايه الدبه راااقده!!
مي بضيج: مممم
احلام: شو ممم
مي: شو تبين
احلام: قومي بسج رقاد
مي: لا برقد

احلام ضحكت .. ميوه صدق راقده وراده ع التيلفون من غير ما تحس.. هاي حالة مي .. اللي يرمسها وهي راقده سواء بالتيلفون أو يكون حذالها بترد عليهم اذ تنبضت وبترمس عادي.. وبعد ماتنش وتصحصح تتذكر انها كلمت ها الشخص بس ماتعرف شو بالضبط قالت او شو رمست بالتفصيل!!

احلام: ميوتي حبيبي
مي: ممم هااا احلاموه
احلام: هههههه لا لا عرفتني .. انزين ميوتي متى راقده انتي
مي: مادري.. هي ويه الصبح
احلام: عنبوه شو تسوين لويه الصبح
مي: شو اسوي اغازل
احلام: هههههههههه يا مسودة الويه.. ماعليه بخبر عليج عمي يحيرج لولده وتخونينهم افاااا هاي مب تربية عليا
مي: وياراسج بسج عاد من متى مستلمتني .. حلام انا راقده انزين شووو تبين
احلام: هههههه انزين بسألج .. شخبار ريم خطيبة نايف
مي ابتسمت وهي راقده اصلا ومغمضه عيونها بس تسمع لأحلام ..
مي: زينه .. امس ربشنا فالبيت فليل.. عشان جي ما رقدنا
احلام: شو سويتوا؟
مي: ماشي عقب ماروحوا قوم عموه خبرنا ساروه والباجي.. شتطت عليه وهزبتني ليش ما خبرتها من قبل
احلام: ههههه عاد ساروه الله يعين منها .. انزين تعالي بخبرج
مي: شووو بعد
احلام: فارس ولد عمي.. سجل فكلية الاتصالات وبيبدى يداوم جريب
مي: والله
احلام: هييه .. امس شفته كان يايب ابويه من العزبه ونزل شويه عندنا ..
مي: وشو كان
احلام ميوده ضحكتها وتسوي عمرها ترمس جد وتكمل الموضوع
احلام: كيف شو كان .. قصدج كيف مستوي.. والله يا ميوه جمييل ماشالله عليه.. من يوم يومه وهو يجذب اللي يطالعه..
مي: حتى سلطان
احلام بطلت عيونها .. هاي شوترمس .. احين شو دخل سلطان الدامر فالسالفه
احلام: لا فارس احلى
مي: انزين حلو بس سلطان جذاب اكثر .. انزين حلام ليش ترمسيني عن فارس احين!
احلام: اشوفج تهتمين ولا .. (وقلدت مي) حتى سلطان.. الحين ها شو دخله
مي: ههههه ماعرف بس تحيدين يعني اقولج ها الدامر يجذب.. انزين فارس كعادته ماتغير .. ييلس شوي ويروح
احلام: بيتغير فيوم وليله.. ماشي دش وسلم ويلس شوي وطلع
مي: اهاا..
احلام: شو اها بعد ..
مي: ماشي
احلام: انزين يلا قوليلي يعيبج!
مي: حلاامي فكيني عن ها الرمسه ابا ارقد راسي يعورني ..
احلام وهي ميته من الضحك: انزين يعيبج
مي سكتت وماردت .. واحلام تزاقرها ..
احلام: لا يكون رقدتي انتي .. حوو ميووه الهبله
مي بضجر: حلوووم برقد فكيني
احلام: اوكي اوكي بفكج .. بس بذكرج شو قلتيلي عقب انزين ههههههه ..
مي: انزييييين باااي

سكرت احلام التيلفون وهي ميته من الضحك على ميوه .. تدري انها يوم بتنش بتتصل فيها وبتسألها "حلام رمستيني وانا راقده!"
حافظه ها الانسانه عن ظهر قلب .. تدري انها يوم ترقد ما تحس بعمرها شو تقول..
ومي بندت التيلفون وكملت رقادها ومب مهتمه ابدا للتيلفون اللي ياها قبل شويه والرمسه اللي انقالت .. شكلها بعدها ما ستوعبت الامر ..

طلعت احلام من حجرة عليا وردت تيلس ويا الحريم .. شافت عمها مانع يالس ويا الجماعه ها المره .. لكن مب من عوايده انه يتم ساكت .. تمت تتلفت في الاجواء .. عرفت السبب .. فجر يالسه امبينهم ..

"ماينلام عمي.. يشوف هاي جدامه وجي كشفه لازم بيتم متلوم .. "

خزت احلام خالتها بنظره عسب ع الاقل تعدل الوقايه وتستر بها عمرها بدل ما يكون نص الشعر ظاهر.. وتجدمت صوب عمها ووايهته ويلست حذاله ..

احلام: ماشالله يالس ويانا اليوم ..
مانع: متوله عليكم .. السفر قرب
احلام: حرام شو ها .. حتى الاجازه ماهنوك فيها .. اسبوع الا قبل السفر..
مانع: شو نسوي ..
احلام: تشريت حق السفر وجي
مانع: هي .. عاد صالتيه متروسه اكياس وثياب ومعفوسه ع الاخر.. من زمان شكلكن مارتبتنها
احلام: هههههه انا مادش بيتك بدون ميوه .. هاتها لي وبسويلك اللي تباه
مانع: مشكله بعد .. هن متى بيين؟
احلام: اظن اخر الاسبوع.. والله قهر ماين الا فالويكند
مانع: شو بيسون حليلهن .. تراهن فبيت ابوهن وما بيخليهن كل يوم اين ..انا سفري بالاربعا بيكون مادري جان بيين ..
احلام: رمس ابوهن انته .. قوله انك تباهن اين ها اليومين لين تسافر.. من الله الاسبوع الياي ميوه بتسير الجامعه وفالويكند ما بتفضالنا ..
مانع: ييها ميوه بتسير الجامعه.. وين تبى هاي بعدها ع الجامعه
احلام: انزين عمي شو رايك اتيبهن ..
مانع: ههههه يالله شقى مشتطه .. بنيبهن اليوم جان تبين بعد ..

عليا انتبهت لرمستهم وشاركتهم ..
عليا: منو هن؟
احلام: عموه .. نبى البنات ايين عندنا ها الاسبوع .. عمي بيسافر و الاسبوع الياي ميوه بتهاجرالعين هي الثانيه
عليا: هههههه بتهاجر مره وحده .. انزين يدتهن تعبانه ماظنتي بيين ..
احلام: عمووه ساد ها الويكند ماين .. ع الاقل اين ثلاث ايام ..
عليا: ريم ما بتطيع تخلي يدتها
احلام: انزين الباجيات .. انزين ميوه وساروه.. ولا بس ميوه ..
مانع: انتي قولي من قبل بس تبين ميوه اتي
احلام: لا والله اباهن كلهن .. بس الرضى بالقليل..
عليا: هههههههه والله انج انتي ..
مانع: انزين رمسي ميوه جان تبى اتي بخطف عليها فليل بييبها ..

احلام شقت الحلج وهي مستانسه .. وعليا تبتسم وهي تشوف احلام جي مستانسه.. ومانع ترخص منهم وطلع من البيت .. واحلام قبضت التيلفون واتصلت بمي تشطها عسب اتي عندها ها اليومين .. بعدها راقده مي .. واحلام تغصص فيها تباها تنش .. وقالتلها مي انها اول ما تنش بتتصل .. طيرت احلام النوم من عينها.. خلاص ما تروم ترد ترقد..
قامت مي وتغسلت .. واول ماظهرت ع طول دقت لاحلام ع البيت .. ردت احلام وهي تسابق الكلام .. ضحكت عليها مي وعلى حماستها ..
وخبرها احلام انها تباها اتي تبات عندها ها الكم يوم قبل ما تنشغل بامور الدراسه والجامعه.. مي تحمست للفكره وايد وع طول سكرت من احلام ودقت لابوها تشاوره اللي عطاها الموافقه وما خبرت حد من خواتها عسب ما يتحرطمن عليها..


****

في بيت راشد .. الكل يالس يشرب الجاهي بعد الغدى .. راشد ومراون وفارس يتكلمون عن دراسة فارس وشغل مروان .. ميره تسولف ويا بنتها .. وشوي يا اتصال لعزه وترخصت من الموجودين وطلعت ترمس ريلها ..

راشد: بدت عاد عزوه تتزهب
مروان: يالله يا ابويه تراها مأذتنا طول ها الاجازه .. مروان ودني ومروان ردني
ميره: ههههه حليلها منو بيتعبل منها يعني .. اول وحده فها البيت تعرس .. وبتلحقها بنت عمتها ان شاء الله
راشد فهم الموضوع ع طول .. اكيد انتشر الخبر وعليا خبرت الجميع من بعد ماقالتلي انها شاورت ريم .. يعني وافقت ريم .. زين الحمدلله ..تستاهل الخير..

مروان التفت لامه.. لا ارادي زاغ .. خايف ينطرى اسم ما يتمناه يكون لغيره .. خاف انه امه تقصد ساره .. ساره بنت عمته .. تم يطالع امه يباها تكمل رمسه .. تشرح بالتفصيل .. منو بنت العمه هاي اللي بتلحق اخته عزه فالعرس..!!

راشد: ماشالله خبرتكم عليا؟
فارس: منو ريم؟
مير: هي ريم .. خطبها ولد عمتها ..

ارتاحت اسارير مروان اللي محد كان منتبه لحالة الذعر اللي كان عايشنها لثواني..

ميره: جي وانته شدراك انه عليا مخبرتنا؟؟
راشد: ترا الموضوع محد كان يدريبه غيرنا انا وامايه وعليا
ميره: هيه..عاد عليا ماطرت السالفه جدامنا الا اليوم
راشد: تراها كانت تبى تشاور ريم اول .. ماتبى تسوي سالفه وعقب بنتها تردهم.. زين يوم الله سخرها ووافقت على ولد عمتها .. وايد زين ها الريال ..
ميره: هي... زين الحمدالله ع كل حال ..

وبدى مروان يندمج شوي ويا السالفه وتوغلوا أكثر للرمسه عن نايف ..

أما عزه اللي كانت طالعه من الصاله .. يلست على الدري وهي ترمس ريلها وتسولف وياه عن موعد العرس وكيف بتكون الترتيبات ..

فيصل: عزوه عرسنا ثالث يوم عيد .. موول ماحصلنا حجز
عزه: يالله موول
فيصل: زحمه كل يوم والثاني عرس
عزه: لا حوول ..
فيصل: يلا ماعليه زين انزين ثالث يوم ..
عزه: الناس مرتبشه ع العيد ونحن بنرتبش ع العرس.. ماشي عيد ها السنه عيل
فيصل: افا .. كيف ماشي عيد بتعيدين ويا ريلج ان شالله .. مب الا يوم ويومين كل ايامنا ان شاء الله بتكون أعياد
ابتسمت عزه ولمحة خجل باينه ع ويهها..
فيصل: فديتج والله يا عزوه .. ولهاان عليج ابا اشووفج
عزه: فيصل عااد ماشي باقي عن العرس احسن لاتشوفني احين عسب تتوله عليه اكثر
فيصل: ياويلي وين بصبر ثلاث شهور.. لا بوي كيفج حطي فمعلومج اني بييكم ان شالله خلال ها اليومين .. متوله انا
عزه: فديييت اللي يتولهون انا ..

"وابوييه .. تفدي فيها السالفه بعد .."

رفعت عزه راسها وشافت فارس فويها .. استحت وحمرن خدووودها .. فشله سمعها اخوها ترمس ..
يلس حذالها فارس .. مب لانه يبى يرمسها بس نحاسه فيها ..

عزه: لحظه فيصل ..
وصدت ع فارس وهي رافعه حواجبها ...

عزه: برمس ويا ريلي ممكن
فارس: رمسي انزين .. وانا يالس على لسانج؟
عزه: فااارس عاد ..
فارس: ههههه فدييت اللي يتولهون اناا هههههه
عزه: سكت سكت انته ما بنشوفك يوم بترمس حرمتك
فارس: ويين قولي عيال عيالج بيشوفوني ارمس حرمتي ان الله راد
عزه: هي امره مادري منو يباك انته لين هاذيج الايام شيبه مخرف
فارس: اللي يحبني يباني
عزه: يالله عاد الخقاق ..
فارس: مب خقاق .. قولي واثق
عزه: بس عليك ..
وردت عزه ترمس ريلها اللي كان يضحك على عزه وفارس وهم يرمسون..
فارس: عزوه دريتي عن خطبة ريم
صدت عزه عليه وكأنها تفاجأت بالخبر

فيصل: منو رييم؟
عزه: بنت عموه.. فارس ريم انخطبت؟؟
فارس قام من مكانه يبى يصعد حجرته ..
فارس: هي نايف ولد عمتها خطبها ..

وصعد فارس فوق .. اما عزه ردت تسولف لريلها وهي بالها عند ريم .. تبى تعرف من متى ها كله !
بعد ما سكرت عن فيصل ردت تيلس ويا اهلها وفتحت موضوع ريم وردوا من اول ويديد وخبروها السالفه ..

****

[لامارا]

فقسم البنات العصر كانن ساره ومي يالسات هن الثانيات ويرمسن عن سالفة ريم ..وكيف ممكن تتأقلم ع نايف وهي أصلا ما وافقت من نفسها.. كيف بيكون تعاملها ويا نايف وهي مول ماتقارب .. ما لقن اجوبه لأسئلتهن .. ريم فايدها كل شي ..تقدر تغير نفسها بنفسها .. والباجي ع نايف.. أسلوبه يا بيقربها له وبينجح زواجهم أو يبعدها ويفشل ها الزواج..
شافن ريم طالعه من حجرتها وسون عمارهن ما انتبهن وبدت ساره ترمس ..

ساره: الله يهنيهم ان شاء الله
مي: اميييييين ..
ساره: هو انا صح حرجت عليييكم ليش ما خبرتوني.. بس والله فرحتلها من خاطريه .. صدق صدق فخاطريه انه نايف يغير نظرتها عن الرياييل

لفت مي وشافت ريم واقفه عند باب القسم.. أكيد سمعت رمستهن .. كانت موخيه.. تتحراهن يرمسن وهن مب منتبهات لمرورها .. وطلعت ع طول وهي تحس بغبنه فحلجها..

مي: سمعتناا؟؟
ساره : اكييد .. رمسنا بصوت عالي .. بس الله يهديها ان شاء الله .. يالله حد اييه ريال شرا نايف ويرده .. والله انه فنان .. جان ماتباه انا اباه
مي اطالعتها بنظره: شو بتسرقينه عن اختج .. بسج عندج انتي
اطالعتها ساره بنظره جافه وغيرت الموضوع ع طول
ساره: متى مراجعة امايه فالمستشفى؟
مي: ايه بلاج.. انا ارمسج فشي وانتي دخلتي فشي ثاني
ساره: لان اللي ترمسين فيه سخيف شرات ويهج
مي: اونج عاد مب مهتمه موول .. وتقول ليش ماتخبروني بس خلج
ساره: مافي شي اهتمله ليش بالله اشغل بالي ..
مي: ممم .. زين زين شي طيب . بنشوف عقب ..

سكتت عنها ميوه .. هاي تتظاهر للجميع انه مايهمها مروان مول ولا هي من الداخل تحترق فخاطرها تعرف شو ممكن يصيرلهم .. وشو ممكن يصير لحبهم الصامت هذا .. مي كانت واثقه انه بين الطرفين شعور مخباي وبعده ما ظهر ..

قامت مي من مكانها وتوجهت حجرتها .. كانت مجهزه اغراضها وتتريا خالها ايي يشلها .. ويوم شافت تيلفونها لقت كم مكالمه لم يرد عليها وشافت انه خالها متصل .. وردت تتصل فيه ..

مانع: ليش ما تردين ع التيلفون انتي ..
مي: سووري كنت فالصاله يالسه ويا ساروه ..
مانع: انزين متى تبيني اييج؟
مي: ما دلك .. انا جاهزه
مانع: حد بيي وياج
مي: خخخ ما خبرت حد .. ابويه ويدوه بس يدرون ..
مانع: بياكلنج خواتج
مي: لا ماعليك اول ما تكون جدام الباب بخبرهن ..
مانع: خلاص انزين بصلي المغرب وبييج اوكي
مي: اوووكي..
مانع: يلا مع السلامه
مي : الله يحفظك ..

وبعد المغرب وصل مانع لبيت سيف .. وتم واقف برع فسيارته .. واتصل ع مي.. اللي نزلت ع طول وشافت مها ومهره فالصاله اللي تحت يالسات .. استغربن ليش مي لابسه عباتها ..
اتوجهت مي ليدتها وسلمت عليها وقالتلها انه خالها وصل .. ويوم طلعت شافت مها ومهره فويها ..

مها: على وين ..
مي: هيهيهيهي .. بشرد من البيت
مهره: ماحيد اللي يشردون يستأذنون من اليده
مي: شوفن انا بسير بيت قوم اميه.. مابا وحده منكن تحتج .. انا بسير الجامعه بالسبت وابا ايلس شويه هناك ..
مها: ياااسلااام ونحن انتم ميلسين فالبيت
مهره: مايخصنا حتى نحن نبى نسير
مي وهي تتوجه لباب الفله: ماعليه انا بسير اليوم لين الاربعا برد .. تعالو الاربعا عسب تسلمون ع خالي قبل ما يسافر .. يلا باي انا بسير خالي مانع برع يتريا .. خبرن ساروه وريم اني روحت ..
مها: خيير اسبووع كامل بتميين ..
مي: بااي باااي

وطلعت مي من البيت ومها ومهره يطالعن بعض وميتات من الغصه .. كيف ميوه تسير وهن لا .. وع طول ترابعن فوق عند خواتهن يخبرنهن ..



******************
(الأربعا)18 اغسطس 2004
******************


بطلت مي عينها الي كانت ثجيله بسبة قلة النوم .. لفت الصوب الثاني .. طاحت عينها على فجر راقده ع سريرها .. عفست مي بويها وهي تذكر المشادات الي صارت امبينهن خلال ها الأيام.. ورجعت لفت ع الطرف الثاني .. كانت احلام تتجلب وهي راقده مما يدل ع عدم راحتها ..
نقزتها مي تباها تنش .. وبعد ما ستوعبت احلام انه فيه حد يوعيها .. بطلت عينها.. وبدن يتهامسن ..

احلام: شوو!
مي: حلام يلا انش .. الساعه عشر الحين
احلام: وخير
مي: خواتي بين عقب شويه
احلام: ميوه راقدين الفير.. تعباانه
مي: انا بنش.. ابا ايلس ويا خالي مانع..
احلام: هييه بيسافر اليوم.. خل انش انا بعد عيل..
مي: يلا قومي انزين ..

قامت مي من شبريتها وتوجهت للحمام .. واحلام نشت هيه الثانيه وظهرت من الحجره تبى تسير قسمهم.. وايقت فالصاله تشوف الدرب امان ولا لا.. حصلت امها يالسه ويا عمتها عليا .. ومرت فالصاله بعد ما صبحت ع الموجودين من بعيد وتمت فدربها..

عبير: غريبه نشت من وقت
عليا: ههه شوفي بنتج انتي عن ادعم اليدران .. تمشي وهي نص راقده
عبير: لا لا وصلت بسلامه ..

بعد ما طلعت مي من الحمام .. سارت صوب الكبت وبطلته بشوي شوي عسب ما تصدر أي صوت .. ظهرت لها كندوره وشيله وطلعت بهم فالصاله..

مي: صبااااحكم ..
عبير: كمليها وقولي عسل ..
مي: هيهي..عسل يا أشطه..
عليا: شو عندكن ناشات من وقت
مي: بس جيه.. اميه وينها جيسي
عليا: فحجرتهم برع ..
مي: اباها تكويلي كندورتيه..
عليا: سيريلها
مي: افف شمس ماروم اظهر لين برع

طلعت مي من الباب الوراني للبيت وتمت واقفه عند الباب تزقر ع بشكارتهم .. بس محد توايبلها .. تغصصت .. ومشت ع الاندرلوك وهيه حافيه والارض تحتها تلبق من الحروره .. وركضت لين وصلت حجرة البشاكير..

مي: جيسي وسم .. عنبوه ما تسمعيني ازاقرج
جيسي: يس مي ..
مي: بس عليج يس مي .. اندوج كوي كندورتيه والوقايه وهاتيها داخل.. وهيه سويلي مدخن ..
جيسي: ان شاءالله
مي: هيه تقدمين كل الولاء والطاعه .. بس عسب تسكتيني وما احتشر عليج يلقعج مخلتني امشي فالرمضا حافيه ..

ضحكت البشكاره ع مي وهي تحرطم وشغلت الكوايه .. عيبت مي عليها وظهرت من الحجره .. شافت ريلها تبى أي شي يوصلها للبيت من غير ما تحترق ريولها.. بس ماحصلت شي .. غمضت عينها بالقو وركضت بسرعه ودشت البيت وهي تمشي ع اطراف اصابعها وتولول..

عليا: بسم الله بلااااج
مي: واااي وااي..لحقيني بالفازلين يا امييه
ويلست مي حذال امها ع الارض وهيه ماغطه ريولها
عبير: شصااير؟
مي: هيهي مشيت ع الارض وانا حافيه.. واحترقت ريولي ..
عليا: حسبي الله ع بليسج. شو ياهل انتي
مي: ما حصلت نعول عند الباب الوراني ..

وطلعت احلام من قسمهم وشافت مي فالصاله يالسه وهي ماغطه ريولها

احلام: بلاج العيوز
مي: خخخ عيوز فعينج .. ماشي مشيت فالرمضا
احلام وهي تيلس حذالهم: هيه عبالي شي قوي.. عادي متعودين ..

دقايق ويت البشكاره وهي شاله كندورة مي والمدخن فايدها .. وقالتلها مي تحطه في حجرة امها ..

عليا: يلا قومن بدلن عن ايون الرياييل وانتن ببجايمكن
احلام: خلونا نتريق اول ..
عليا: يا مكركن ضاريات ما تريقن ..
مي: لا عاد اليوم داق فروسنا الريوق ..

وبطلت مي الحرارات اللي ع السماط وغرفلهن هي واحلام ويلسن ياكلن ..
عليا وعبير التهن بالسوالف .. وام راشد دشت البيت من بعد ما ردت من مركز تحفيظ القران ويلست فالصاله ويا البنات ..

ام راشد: ماشالله يتريقن البنيات.. احيد ريوقهن وغداهن واحد
احلام: ههههههه ميوه خل انش احسن قطعونا
مي: لا لا ماعليج امايه ماتقصد .. صح امايه
ام راشد: هي ما اقصد .. كلن كلن ..ترسن ضلوعكن
عليا: غريبه البنات لين الحين ماين
مي: اميه ما دقيتيلهن
عليا: الصبح مرمسه ريم كانت توها ناشه ..
مي: بيطبن عليج الحين عيل..

وبعد ما خلصن مي واحلام من ريوقهن كل وحده سارت تبدل ثيابها .. طلعت مي الدخون من كبت امها وتمت تدخن وادخن شعرها وهي مستانسه .. سمعت حشره فالصاله وتيقنت انه خواتها وصلن .. وطلعت برع تسلم عليهن .. اول مره تبعد عنهن اسبوع بطوله .. حست انها متولهه عليهن .. ماتدري كيف بتتصرف ويا ها الشعور وهي بعيده عنهن فالسكن..


****

نايف كان راد من دوامه ع الساعه 2.. صعد حجرته ع طول وخذله حمام ع السريع ونزل عقب تحت عند اهله .. أول ما دش الصاله عليهم ..

لطيفه: هلاااا والله بالمعرس
نايف: ههههه معرس مره وحده ..
مريم: خلاص معرس .. البنت ووافقت واهلها وافقوا .. بعد شو اكثر ..
تجدم نايف ويلس حذالهم .. ومريم رفعت السماعه تبى تتطمن على امها .. ردت عليها نجمه اللي كانت تحط الغدى لام سيف .. وناولت ام سيف التلفون..

مريم: مرحباا الوالده
ام سيف: مرحبتين.. هلا اميه شحالج
مريم: بخير الحمدلله.. اشحالج انتي .. وشو صحتج
ام سيف: الحمدلله بخير .. الا اني مستهمه بنياتي محد
مريم: ليش .. سارن هن عنج اليوم؟؟
ام سيف: هيه خالهن بيسافر.. سارن يسلمن عليه
مريم: هيه حليله..
ام سيف: شحال عيالج.. كلهم بخير
مريم: الحمدلله بخير.. هاذم كلهم ميلسين ..
ام سيف: ياحيهم.. ومعرسنا شهباته
مريم: الحمدلله بخير .. تونا نقوله معرس يقولنا معرس مره وحده!
ام سيف: هههه هيه خلاص معرس قوليله
مريم: تراه نقوله البنت واهلها موافقين.. خلاص معرس
ام سيف: فدييتهم .. لو الله حياني وحظرت العرس بفصل لعرسهم هذاك الثووب.. وبتم واقفه طول العرس اسلم ع المعازيم عند الباب
مريم: ههههه الله يعينج عيل يا امايه .. ما تغديتي؟
ام سيف: نيموه توها يايبه الغدى.. الا مالي خاطر اكل والبنات محد
مريم: لا لا شو ماتاكلين .. كلي عسب الدوا.. وسيف وحرمته وين عيل
ام سيف: سيف فدوامه .. ومرته تترياه ما تغدى قبله
مريم: هييه.. زين عيل يلسي تغدي انتي .. ما بلهيج
ام سيف: خلاص فديتج.. سلمي ع خلفان و عيالج
مريم: يوصل ان شاء الله

سكرت مريم التلفون عن امها وبلغتهم السلام ..

نايف:الله يسلمها من الشر.. شحالها
مريم: الحمدلله بخير..
نايف: راسي يعورني .. اسوم صبيلي جاهي
مريم: الحين بيحطون الغدى
نايف: برايه ابا افجج راسي شوي .. مصدع من الدوام
عمار: انزين نايف متى بتبني انته
نايف اطالع اخوه ورد يطالع امه ..
نايف: تعالي اميه الحين القسم مالي متى بنبدى نعدل فيه؟
مريم: اول ما تحددون متى الملجه والعرس ابدى الشغل فيه
نايف: ومتى هزرج يبون الملجه هم؟
لطيفه: نايف بعدها البنت باجلها سنه
نايف: يالله سنه واايد
اسما: انته احمد ربك يوم وافقت بعد بتسوي ع سالفة العرس

نايف سكت .. وتم قابض استكانة الشاي وكأنه موافقة ريم مايت بالساهل ..
ليش بعني ينحط بمثل ها المواقف..هو صح يبى ريم لكن مايبى حد يعايره بها الموافقه..
مريم: سكتي سكتي انتي.. شو ها الرمسه
اسما: شو قلت ثرني.. قلتله يتحمد ربه فيها شي
لطيفه: مافيها شي بس مفهومه نغزتج يا انسه
اسما: اووهو عاد انتوا كل شي تفسرونه ع كيفكم ..
قامت اسما من مكانها وصعدت حجرتها وهي محرجه منهم ..
نايف: زعييل هاي شحقه تتسببولها
لطيفه: خلها بتزعل وبترضى
مريم: انزين وليدي ردنا لسالفتك.. كيف الحين انته ماتبى تتريا سنه
نايف: ممم بيني وبينج اميه .. انا ابا اعرس قريب مب عقب سنه.. والتقنيه الا هاذي ما بيضرها شي تكمل عقب العرس..
لطيفه: انزين وانته متى تبى العرس
نايف: اقله شي الربييع
لطيفه: حلو انزين بيبقالها كورس بس عن تخلص
مريم: بنطالعهم يا وليدي ..

دش خلفان ها الوقت البيت وكان توه راد من ميلس ربيعه ومتغدي عنده ..

مريم: هاكوه ابوكم يا .. قومي لطيفه خلي البشاكير يحطن الغدى
لطيفه: ان شاء الله ..
خلفان: انا بسير ارقد
مريم: جي والغدى؟
خلفان: تغديت عند بوسالم ..
مريم: يالله وجي ما تخبرنا ونحن نترياك اتي ..
خلفان: نسييت الا توي وانا واصل متذكر
نايف: هيي يا الوالده قام ينسااج ريلج .. جان ماحط عليج الثانيه وقام يسير يتغدى عندها
مريم: برايه انزين .. كيفه..
خلفان: هههه تبلى عليه انته..شوف امك كيف انتطبت
مريم: اصلا انته لو تلف ع كل الحريم بتردلي فالاخير
نايف: ههه هييه عاد ام العيال انتي لازم بيردلج وترمسين بكل ها الثقه
خلفان: هههههههه حشى عليه ماروم يبوج انا احط عليج وحده بتناقبينها طول الوقت .. شو حادني ع صدعة الراس ثرني
عمار اللي كان ملتهي ويا نوره اخته وهو يراوشها ويلاعبها دش ع الخط ..
عمار: تعرف ابويه لو عرست بنسوي بحرمتك شرا ما يسوون عيال خالي بناعمه مخبليبها .. عاد نحن مب الا بنخبلبها بنيب اسوم الها .. ع طول بوكس ع خشمها
نايف: هههههه اسوم ماعندها واحد ثنين حاره وتعصب بسرعه
خلفان: طالعه ع يدتكم تراها .. شرانيه ومرديه شوي .. الا هي وينها
مريم: محرجه علينا وسارت فوق .. بالله عليك مر عليها دامك بتسير ترقد وخلها تنزل تتغدى ..
دشت لطيفه الصاله تزقر الكل ع الغدى .. وقاموا كلهم لغرفة الطعام .. وسار خلفان لحجرته يرقد لكنه مر ع اسما وطلبها انها تنزل وتتغدى وتودر عنها الزعل..
نزلت اسما عشان خاطر ابوها .. ومن شافت لطيفه قامت تعيب عليها وتتلاسن وياها شوي تبى تبرد فوادها ..

****

مانع كان يالس ع الغنفه في بيته ويشرب كوب الكابتشينو اللي مسوتنه له مي.. كان يطالع مي واحلام وساره وهن يرتبن اخر شنطه .. كانن يسولفن ويطنزن ع بعض.. كل شي فيهن عفوي .. يتأملهن .. اطالعته مي وهو سرحان ..
تقربت منه وصفقت بايدها ..

مي: هييه بو الشباب .. ليش ساكت..
مانع: يسقم بليسج.. زين ما نصب الكبتشينو
لصقت مي فمانع وهي شابكه ايدها بايده وتسوي عمرها تصيح وتصرخ..
مي: ما تسبنييش ياا خالوو .. ازاي هكمل الست شهور دوول من دونك .. ازااي
مانع: هههههه خيبه تخيب بليسج.. حرمتيه وانا مادري
مي: لأ لأ مستحييل.. دول ما بيخافوش ربهم .. هياخزووك مننا ..
ساره: ايه فاتن حمامه.. وين تبين
احلام: ههههههههههههه اطاعيها كيف متقبضه بعمي..
مانع: انا اخاف ميوه مسوتلي شي فها الحليب محطيه عمل شي عسب ما اسافر عنها.. عادي تسويها معيشه عمرها ففلم مصري ..
مي: هههههههه اخص عليك يا خالو..
ساره: خاالي الطمها هااي المايعه ..
مانع وهو يطالع مي اللي رافعه راسها وترمش بعيونها حقه ..
مانع: ههههههه ويا ها الويه.. المشكله ماتهون عليه الطمها..
احلام:عمي ترسنالك ها الشنطه كل مستزلمات الأكل
مانع: هههه ما بيجتلونا من اليوع هم
احلام: لا ماعليك ..
ساره: خالي هاي شنطة الثياب ترسناها لك ..
مانع: سدت عاد
مي: هيه انا مرتبه الثياب ..
مانع: زين بارك الله فيكن.. عاد ظهرن الشنط برع البيت وقفلنه .. بدق لسلطان بشوفه وين ..
ساره: ليش سلطان بيوديك؟
مانع: هي بيسير هو دبي وبالمره بسير وياه
احلام: الله يعينك عيل على غلاسته
مانع: هههههه عيب احلام..

قبض مانع تيلفونه واتصل فسلطان يشوفه وين.. لانه بعد صلاة المغرب بيطلعون ..
واول ما اذن المغرب.. سار مانع يصلي.. والبنات طلعن شنط خالهن وقفلن الباب .. وسارن يصلن والتمن عقب فالصاله يترين مانع ايي ..
يتهن عليا وام راشد .. وشوي يت عبير .. طلعت فجر من وكرها ويلست فالصاله ..

ساره وهي تصاصر مي: يت هاااي .. لازم يعني تظهر .. خالي الحين بيي
مي: صخي الله يقفعج .. مانبى نسوي سوالف وياها
ساره: هي تعالي .. شو وياج هيه طول ها الاسبوع
مي: ساروه ها وقته
ساره: انزين قوولي
مي: ماشي .. عرفت اسلوبها كيف .. تحاول تفرض سيطرتها ويوم بتحتجين عليها بتمشكلج بحشرتها.. لكن يوم بطبينها وما بتسوين اللي تقول عليه واتمين صاخه عنها تموت من القهر ..
ساره: ماداني الطاف عيل..
مي: هي هذا هو ..
احلام: ايه خفن حسوسكن .. عن تسمعكن
مي: هاي ساروه ام الفضول الا تبى تعرف..

وقطع عليهن مصاصرهن دخول مانع البيت .. وكان وراه سلطان .. ع طول البنات لفن على فجر .. كانت الشيله ع جتفها .. ما كلفت عمرها انها تلبس الشيله ..
مانع تم واقف .. وهو يشوف عليا وامه والبنات .. وسلطان تجدم عسب يسلم يدته وخالته..

مي: اقرب خالي ليش واقف
مانع وهو يتحنحن: ها .. هي بيي..
ساره لفت ع احلام وهي ترمس وراصه بضروسها
ساره: سيري خلي خالتج تحشم عمرها عن اييها الحين واعلمها الحشمه

احلام لفت على امها .. زقرتها .. انتبهت الها عبير.. سوتلها احلام حركه وهي تدور بسبابتها حذال ويها وحايسه بوزها .. ع طول عبير فهمت القصد ولفت ع فجر تحثها تتحجب .. رفعت فجر شيلتها بتذمر وتحجبت..

يلس سلطان حذال عليا .. ومانع حذال امه .. ساره ومي واحلام تقربن من مانع ويلست مي حذاله واحلام واقفه مجابلتنهم وساره يالسه ع حد الغنفه المرتفع..
لف سلطان الصوب الثاني وطاحت عينه بعين فجر .. محد انتبه لها النظره السريعه .. الا فجر .. لكنها طنشت .. وسلطان لف ع طول يكلم خالته ..

عليا: واشحالك سلطاان ..
سلطان: الحمدلله بخير..
ام راشد: ها شو البحرين
سلطان: يالله يا امايه لا تخبرين.. طرشوولكم الحلواه
عليا: هيه فديتك..
مانع: يلا قوموا سلمو عليّه .. خلاص بنروح
ام راشد: يويلي يا وليدي .. خلاص فنش من الجيش بلاها ها السفره
مانع: ههههه الحين تقوليلي فنش.. يوم اقولكم قبل ابا اتقاعد اخواني يهزبوني
ساره: شو تتقاااعد خالي .. بعدك انته ..

طالع مانع ساعته .. ورفع راسه يشوف اللي حواليه ..

مانع: يلا حانة ساعة الودااعي
مي وهي تحس بنغزات فقلبها: يالله يا خالي لا تقول الوداعي..
مانع وهو يوقف: وين البنات .. يلا بسلم عليكم بروح..
سلطان: يلا عيل انا بسير اشغل السياره .. خل ايبون الشنط
مانع: ماعليه .. بييك الحين
مي وهي تحرطم من سلطان وهو ظاهر
مي: شنط خالي جدام بيته .. شو بيستوي عليييه هو لو شلاهن
وقف سلطان ولف ع اليالسين
سلطان: هاا؟؟!!
مانع: هههههههه ماشي ماشي .. سر شغل موترك يبوك .. بروحي بسير اشل الشنط
سلطان: هيه تحريت حد قالي شي ..
وطلع سلطان من البيت .. اما مي تمت معفسه بويها وتتطالع خالها..
مي: بس عيل.. هيييه انا قلت .. فيها شي ..
مانع: ههههه جان قلتي وهو يالس عيل
ساره: يالله الا جبانه هاي ..


سارت احلام تزقر اختها والتوم وريم عسب يسلمن ع مانع وعقب سارت صوب البشاكير تقولهن يودن شنط مانع للسياره..
وفجر .. طلعت من الصاله وسارت حجرتها .. سلمن البنات ع مانع .. وسلمت عليه عبير .. واخته عليا .. ويوم حان دور الام .. تمت حاظنتنه وهيه تصيح .. مايهون عليها ولدها يتغرب .. قلبها يعورها عليه ..
مي تمت مستغبنه .. مب قادره على وداع خالها .. تحبه وايد وماتروم تصبر عنه كل ها المده ..
طلع الفوج كله برع البيت يودع مانع .. ركب مانع السياره ويا سلطان وهو كل شوي يلتفت ع ورا .. ام راشد ما وقفن دموعها .. وعليا حذالها اطبب عليها ..
مي اللي كانت اكثر البنات تأثرا .. انسحبت من اللمه وسارت حجرت امها واطلقت العنان لدموعها اللي كابتنهن فعيونها ..


************************
(السبت) 21 اغسطس 2004
************************

أو ممكن نقول قبل دقيقتين من ها اليوم ..
مي كانت شاله في ايدها كيكه عليها شموع .. وجاسم ومايد ماسكين في ايدهم الأنابيب اللي ينقعونها ويطلعن اللماعي والشرايط .. وريم وساره جدامهم وواقفات عند باب غرفة مها ومهره وكل وحده تتطالع ساعتها يترقبن الدقايق تضبط ع الساعه 12 صباحا من يوم السبت ..

مي: يالله عاد افتحوا الباب الكيكه ثجيله ..
ريم: انزين باجي ثواني.. جسوم وميود اتحملوا تنقعون ها على الكيكه
جاسم: انزين انزين ..
ساره: يلا ندخل .. 12 بالضبط ..

دخلوا الجماعه على مها ومهره اللي كانن يالسات ع السرير وكل وحده منهن منشغله بشي ..

قالوا كلهم بصوت عالي :
Happy birthday


مهره ومها التفتوا للداخلين عليهم و تفاجأوا.. وطت مها المجله اللي فايدها ومهره وقفت وهي تطالعهم.. والكل تجدم عند التوم وهم يغنولهن (سنه حلوه يا جميل) ويوم خلصوا الاغنيه تقربت مي منهن اكثر عسب ينفخن ع الشموع.. نفخوا الكل ومها ومهره مستانساات وايد .. وطت مي الكيكه ع الكيميدونو وسلمت ع خواتها وساره وريم لحقنها ..وتوسطتهن ريم وهي محطيه اديهنا ورا ظهورهن..
.. جاسم ومايد بدوا ينقعون الانبوبات اللي في ايدهم على البنات ..

مي: جسووم لا تي حذال الكيكه وتخيسها
مايد: اوه نحن ماسلمنا
سلم مايد ع خواته بالويه وباركلهن وتم جاسم يطالعه وهو مستغرب
جاسم: ايه الغبي الرياييل يسلمون بالخشوم
وتجدم جاسم وخاشم خواته ..
مايد: انزين عادي مب شرط
مها: جسوم المهم سلام ..
مهره: والله نحن كنا ناسين التاريخ ..
ريم: ههههه لا ماعليج نحن ما ننسى..
مهره: جااان نستاانس.. مشكووورين ع البارتي
ساره: افا عليج انتي كم مهره عندنا
وغمزت لاختها ..
مها: ياااسلااام وانـــــــــــا
مي: لا لا انتي عاد شي ثاني .. انتي حبيبتي انا..
والكل تم يضحك ع البنات.. اما جاسم.
جاسم: يالله انزين ناكل الكيكه ..
ريم: هههه جسوم من الصبح عينه ع الكيكه ..

قاموا و شلوا الكيكه وطلعوا يلسوا في الصاله .. كانوا هناك محطين الصحون والعصاير .. قطعن التوم الكيكه وكلوا كلهم منها ويلسوا يسولفون .. مي تمت تطالعهم وهي ضاربتنها غبنه .. ماتتخيل كيف هي فها اليوم بتروح عنهم الجامعه..
حست بغبنه وغصه فحلجها .. تمت ساكته وهي تحاول انه دموعها الي ملن عينها ما يخوننها وينزلن ..

ريم: ميوه بلاج ؟
مي: ماشي
ريم: والله تقولين .. بلاج جي ويمتي مره وحده
مي سكتت .. ورفعت راسها وهي تطالعهم ..
مي: مم بس افكر كيف باجر بسير عنكم وبفتقد هاللمه وجي..
ساره: يالله يا ميوه لازم تسوين فيلم هندي يعني ..
مي:يالله يا انتي .. اصلا ماتفرق عندج من استويتي ماعندج احساس ..
ساره: انا ام الاحساس ..
ريم: ههه يالله بسكن عاد .. قومن ودن كيك حق ابويه ونعمه الله
ساره: وين نعمه الله احين راقده
مايد: لا امي واعيه يالسه ترمس في التلفون
مي بغت تفرفرش شوي وتغير من مزاجها
مي: انا عيل بزقرها ..
قامت مي وشلت تلفونهم الموجود في الصاله ودقت ع تيلفون جناح ناعمه .. ردت عليها ناعمه من عقب ماخلت ربيعتها ع الخط ..

مي: حرم الوالد المصون
ناعمه: وعثره
مي: تعثرج
ناعمه:ليش داقه زيغتيني ماعرفت منو بيدق ها الوقت ع تيلفون البيت .. وبعدين شو هالحشره اللي مسوينها
مي: خيبه خيبه سؤال سؤال انزين ..
ناعمه:انزين شو ها الحشره
مي: عيد ميلاد التوم وسوينالهن حفله
ناعمه: هييه.. وذاك اليوم كلتوني يوم سويت حفله لعفاري
مي: انزين نحن ماسوينا حفله قد حفلتج انتي وبنتج. اللهم يبنا كيك وباركنالهن .. ذكرناهن بشي بسيط هب انتي متعنيه وحالتج لله ..
ناعمه: افف .. انزين فكينا.. شو تبون مني الحين ..ربيعتي ع الخط
مي: انزين اعرف انه عندج حد ع الخط .. قومي تعالي بناكل وياج كيك بعدنا ماقطعناها ..
ناعمه: مب متفيجه
مي: اييه احين نحن نعزمج وتقولين مب متفيجه .. استوي ذويقه شوي واقبلي الدعوه ..
ناعمه: من يومي ذويقه
مي: انزين تعالي وخلصينا .. بنروح عنج باجر ما بتلقينا
ناعمه حست بوخزه فقلبها ماتدري ليش بس تجاهلتها
ناعمه: انزين ع الاقل بنفتك من لسانكن انتي وساروه شوي
مي: صدق انه ماعندي سالفه يوم عزمتج .. يلا باي ولا تين بنخلص كل الكيك عنج
ناعمه: اييه بي بي بشوف شو مسوين ..
مي: جلبي ويهج يلا باي

سكرت مي الخط وهي صدق حازه فخاطرها الرمسه ..

ريم: يالسوسه نحن كلنا وخلصنا وتقوليلها ماقطعنا الكيكه
مي: شو اسويبها مب طايعه تي .. وابا شوي استعبط عليها قبل ماسير.. الماصخه يوم قلتلها بنروح عنج قالت بنفتك منكن .. خل اتي احين ان ماغصصت ابها
ساره: قولي والله ..
مي: والله
ساره: هين هي ماعليه ..

اما ناعمه ردت ترمس ربيعتها أمل وخبرتها عن المتصل وشو قالتلها ميوه ..
امل: حرام وايد طيبات
ناعمه: ماعليج منهن .. بس تدرين ميوه اطيب وحده ... لا لا بعد ساروه طيبه لو انه لسانها طويل ..
امل: هههه حتى ريم وايد هاديه..والتوم مؤدبات
ناعمه: ريم وغده بس ماتتحرش فيني وتطول لسانها مثل هذيلاك والتوم من تحت لتحت.. باجر بيسيرن الجامعه البنات.. وحليلهن..
امل: تراج تبينها من الله
ناعمه : لا وين .. هذاك قبل ماتنخطب ريم.. احين بتسير وبتفر الباجين عليه ..
امل: متى بتعرس هي ؟
ناعمه: مادري بس خلال هالسنه
امل: زين ..
ناعمه:يالله عيل امول انا بسير اشوفهن اوكي
امل: اوكي .. اشوفج باجر في الدوام
ناعمه: تصبحين على خير
امل : وانتي من اهله ..

سكرت ناعمه عن ربيعتها وسارت جناح البنات شافتهن يالسات يسولفن وماكلين مخلصين ..
ناعمه وقفت متفاجأه : هاذيل اللي يتريوني عشان يقصون الكيكه
مي: تريناج وتاخرتي وايد
ناعمه: جذابه ماتاخرت
مهره : تعالي تعالي انزين..حشى بدال ماتقوليلنا كل سنه وانتن بخير يايه تفاتنين
تجدمت ناعمه وهي منقهره: كل سنه وانتوا بخير ..

يلست ناعمه وياهم وحطولها كيكه ويلسوا يسولفون كلهم لين وصلت الساعه 3 ..
مي وساره راحوا يكملون اغراضهم .. وناعمه سارت عنهم لانه وراها دوام الصبح .. والباجين تموا محلهم يسولفون ..

****

الصبح الساعه 8 .. طلعت بدريه من بيت اهل ريلها اللي سافر قبل اسبوع لشغل .. وطلعت بحجه انها بتروح السوق مع احد ربيعاتها وبعدين بتم عندها لين فليل وبتروح تبات عند اهلها .. وقفت بسيارتها عند احد مواقف عماره بعيده نسبيا عن المدينه وتجمع السكان .. نزلت من سيارتها بعد ماقفلتها وشاله بديها شنطه يد كبيره شوي..
وتوجهت للعماره .. دخلتها من المدخل الخلفي .. وتوجهت للمدخل الامامي.. وتلفتت يمين وشمال لين طاحت عينها على ستيشن لؤلؤيه .. ابتسمت وتوجهت الها .. فتحت باب السياره الامامي ودخلت ..

بدريه : السلام عليكم ..
سلطان: هلااا وغلا.. وعليكم السلام والرحمه
بدريه اطالعته وبطلت الغشوه .. تم هو مركز بكل حواسه عليها ..
وبدريه وطت راسها من المستحى ..
بدريه: بنتم موقفين هنه!
سلطان: ها .. لا افا عليج ..

حرك سلطان سيارته متوجه لخارج حدود الاماره .. شغل المسجل ..
والتفت لبدريه يشوفها ويبتسم ..
وبعد مرور اقل من نص ساعه تقريبا وصل لشالهيات مطله ع الخليج ..
دخل سلطان بسيارته لطريق طويل قبل الشاليهات .. وقف عند الاستقبال ونزل من سيارته وهو يبتسم لبدريه ..
سلطان: قفلي على عمرج الباب لين ارجع
بدريه: وين ساير ؟
سلطان: باخذ المفاتيح بلاج زايغه .
بدريه: انته اقفل عليه من برع
سلطان: يالجبانه .. ههه اوكي
نزل سلطان الاستقبال .. دفعلهم لقضاء يوم واحد وخذ المفاتيح ..
رجع ركب السياره وتوجه للشاليه المحجوز لهم .. ركن سيارته ونزلوا
دخلوا الشاليه .. وقفل سلطان الباب ..
بدريه حطت شنطتها ع السرير وتوجهت للبلكونه المطله ع البحر ..
وقف سلطان وراها وهو يبتسم .. ويحاول يتقرب منها ..

سلطان: شرايج؟
بدريه: المكان وايد حلوو ..
سلطان: عيل شو عبالج .. ليش ريلج المحروس مب معودنج على ها الطلعات!
بدريه سكتت .. وتحركت من مكانها ويلست ع الغنفه .. سلطان تبعها ويلس حذالها..
بدريه: ريلي لاهي بشغله .. ومب مفتكر فيني
سلطان: عشان جي تقبلتيني بسرعه؟!
بدريه اطالعته: سلطان مش مسألة تقبل.. سلطان أنا حبيتك حتى قبل ما اشوفك او اشوف صورتك وحتى قبل ما اسمع صوتك..
سلطان: صدق تحبيني!
بدريه: عيل لو كنت ما احبك بخاطر وبيي ويااك
سلطان ابتسملها بكل عذوبه ..
سلطان: انسير البحر!
بدريه: الحين! مب حاره الشمس ..
سلطان: بغطيج عن الشمس عادي
بدريه ابتسمت ووخت براسها ..
سلطان مسح على راسها: يلا قومي نسير .. دام محد ع الشاطي الحين الكل مرقدين

[لامارا]

وطلعوا متجهين للشاطي اللي كان صدق فاضي .. كان الجو دافي وحلو ها الوقت والماي كان دافي بعد .. وتهب نسايم لطيفه وبارده ..
بطلت بدريه نعالها ومشت حافيه ع الرمل .. ولحقها سلطان اللي كان يدندن اغنيه كاظم الساهر (فرشت رمل البحر) ويطالعها .. ووصل لمقطع
طيورك يابحر تغازلها وتشرب من ايديها
وامواجك تركض فرحانه وتبوس رجليها
والرمل يدوب من الغيره بحضنها يغطيها
وانا مثلك يابحر واكثر معجب جدا بيها

كانت حركاتها كلها دلع ورقه .. سلطان تجدم منها أكثر .. وقربها له ..
سلطان: اغطج فالبحر!
بدريه: وانت وياي
سلطان: تبيني اكون وياج
بدريه: وها سؤال! بس ما بنزل البحر وانا بها اللبس
سلطان: ليش شو مفكره بتلبسين .. لا حبيبتي تشوفين الجو صح هادي الحين لكن في حد ممكن يطل علينا من شاليهم
بدريه: ممم خلاص مب لازم عيل
يلسوا على الشاطي وبدت بدريه تكتب ع الرمل .. وكتبت لسلطان "احبك"
سلطان: تحققين حلمي يعني ؟
بدريه: مب هذا الحلم اللي بغيته يستوي واقع ؟
سلطان: اكيد
بدريه: خلاص وانا سويته لك واقع ..
سلطان: فديتج انتي منو يسواج .. مب جنه الجو شوي حار ؟
بدريه: هيه شوي
سلطان: عيل يلا نرد الشاليه ..
بدريه: خلاص اوكي ..

وردوا للشاليه .... محد كان يقدر يوصف سلطان فها اليوم .. كان مستانس .. مستانس على اللي وصل له واللي بيوصل له..

****

الساعه تسع الا ربع.. نشت مي اللي أصلا ماكانت راقده زين .. قبضت تلفونها اتشوف الساعه ومن شافتها نقزت على طول ..

مي: سااروه قوومي .. ساره قومي الساعه تسع ..

دخلت مي الحمام تتغسل ويوم طلعت شافت ساره بعدها راقده ..

مي وهي تير اللحاف عن ساره: ساروووه قومي بتأخرينا تراج .. سيارة ابوج بتفزعبنا عقب
ساره: شوو
مي: قومي الباصات تتحرك الساعه عشر ماعندنا وقت
ساره: اففف صح نسينا .. يلا بقوم احين .. دقي حق اسوم طاعيها جان وعت والا
مي: يلا انزين قومي ..

وقامت ساره بتثاقل من على الشبريه .. ودخلت الحمام ..
أما مي .. وقفت جدام التسريحه ويلست تسحي شعرها ..
وهي تشوف صورتها فالمنظره .. يا ترى .. شو اللي متخبلها من عقب ها اليوم ..
ها اليوم هو مرحله انتقاليه الها .. من جو المدرسه لجو الجامعه والسكن .. بتقدر تتأقلم ! بتقدر للدراسه فالجامعه! أو بالأحرى بتقدر تكون من طالبات الامتياز مثل ماهي حابه تكون!
ابتسمت وهي تحس بدافع لخوض هاي التجربه اليديده ..
قامت تتلبس .. واتصلت حق اسما بنت عمتها .. واطمنت انها قامت ومستعده

وبعد ما لبسن البنات نزلن تحت سلمن على يدتهن وريم اختهن.. وترخصن منهم وركبن السياره وخطفن على اسما .. وتوجهن لموقف الباصات ..
نزلن من السياره ونزلن شنطهن وياهن .. كانن اربع باصات بيض من باصات جامعة الامارات العربيه المتحده موقفه وكلهن مزحومات من المستجدات ..
ركبن واحد من الباصات وحصللهن مكان فاضي وحذال بعض جدام ..

مي: اف ضكه وحر مووت.. مايكون كل السيرات جيه
اسما: لا ميووه ها الفوضى كلها ما بتشوفينها الا اسبوع المستجدات والا الصيفي
مي: يالله حتى ماروم اير نصخيه ..
ساره: زين يوم حصلنا مكان جدام ..
مي: عاد ورا الدريول
اسما: احسن يا غناتي بتشوفين الجتله كيف بتستوي ورا يوم بنوصل.. اغراضنا حذالنا وبنفتك من الصدعه عقب

مي كانت تطالعهن ومبين العبوس من ويها.. ساره واسما يلسن يدقن لربعهن اللي متفقات وياهن ايين ها الأسبوع المخصص بس للمستجدات ..
عسب يدورولهن ع جناح يلتمن فيه كلهن ..

****

العصر يلست ام سيف في البلكونه جدام الفله .. تتقهوي .. وها الوقت كانوا مايد وجاسم طالعين من البيت وقابضين بايدهم جزء عم وسايرين صوب المطوع يحفظهم قرآن .. حصلوا يدتهم يالسه وسارولها ..

مايد: امايه شو ميلسنج هنه
جاسم: شو انتي عايبنج ها الحر ..
ام سيف: برايه حلوه اليلسه خاري
مايد: انزين اماايه انتي تعبانه كيف تيلسين برع
ام سيف: بس بس طب ثمك .. انا هب تعبانه .. بخير ومافيني شي
مايد: امايه فديتج سيري داخل البيت
ام سيف: سيروا انتو المطوع يترياكم .. سيروا يالله
جاسم: تعال ميود هاي يدتك عيووز راسها ياابس
ام سيف: عيوز حرمتك اللي بتاخذها يا الهرم
مايد: بس جسوم .. امايه الله يخليج دشي داخل ..
ام سيف: سيروا انتو للمطوع بيقريكم وفكوني من الزنه .. عقب شويه بدخل ..

مشوا مايد وجاسم سايرين صوب المطوع .. في هالوقت قبض مايد تلفونه واتصل بريم يقولها انه يدتهم يالسه برع في الحر .. نزلت ريم ولقت يدتها يالسه تحت ..
ريم: امايه شو ميلسنج خاري ؟
ام سيف: طفرتوبي تراكم .. خلوني انا استانس ع اليلسه خاري
ريم: انزين ماعليه ع راحتج .. بس امايه انا اشوف ويهج تعبان شوي .. بدق المستشفى بجدم موعدج
ام سيف: انا بخير فديتج ماعليج ها الا من تأثير العمليه ..
ريم: والله امايه شوفي ويهج كيف يزرق فجأه
ام سيف: شقى يزرق بعد
ريم: ما تآنسين شي انتي عقب العمليه.. يعني ماتحسين بالعوق القبلاني
ام سيف: لا لا الحمدلله .. ايدي اشوى عن قبل والشجات ماتيني الحين
ريم: ماعليه عشان انا اطمن أكثر ..
ام سيف: سوي اللي تبينه يا امايه .. مادقيتي لخواتج
ريم: لا ..
ام سيف: دقي دقي بنشوفهن شو سون ..
ريم: ان شاء الله

وقبضت ريم تيلفونها واتصلت لمـي..

ريم: ها ميووه.. اخبااركم
مي: الحمدلله تماام..
ريم: وشو النفسيه
مي: همم مادل .. بس يلا زوينه
ريم: يلا ماعليه بتعودين على ها الاجواء.. شو تسوون عاد ..
مي: والله ماشي.. اول ما وصلنا يابتنا ساروه ها الجناح عند ربعها.. انا وطيت شنطتيه وطحت رقدت ..
ريم: اسمييج
مي: هي والله تعبت.. تحديني هب ويه دروب
ريم: شو بتسوين عيل .. ها الجامعه الي بغيتيها.. ومتى نشيتي
مي: جيه ع اذان العصر .. والحين مخليه ساروه تكويلي بيجامتي هيهي
ريم: احسن شغليها .. مب الا سايره وياج
مي: لا اوني اسوي عمري مستحيه
ريم: زيين .. يحيكن والله..وشو السكن
مي: همم ماعرف جي حجرهم غير اثاثها غير مب متعودين جي .. اربع شباري فالحجره ولا ثلاث شو ها .. وين عايشين
ريم: شو بتسوين يعني .. تحملي ..
مي: الله كريم ..
ريم: خلاص عيل سلمي ع اختج وبنت عمتج.. بدقلج عقب اطمن عليكم
مي: اوكي .. سلمي ع الكل وع اماايه عفرا
ريم:يوصل .. فمان الله ..

وسكرت ريم التيلفون وطمنت يدتها على خواتها .. في هاللحظه شافوا سياره تدخل البيت .. من شافتها ريم وكأن غيمه سودا غشت نظرها .. كانت سياره نايف اللي داخله .. في هاللحظه قامت ريم من مكانها تبى ترد داخل..

ام سيف: يلسي ريم وين سايره
ريم: بسير داخل
ام سيف: يلسي اقولج
ريم بتوتر خصوصا انه السياره قربت منهم: امايه بسير
ام سيف: والله تيلسين ..

ريم اتظايجت من حلاف يدتها .. عدلت كندورتها اللي كانت لابستنها ودخلت اللي كان ظاهر من شعرها شوي .. وتمت واقفه وتحاول تتدارى ورا العمود ..
نزلت مريم ولطيفه ونواري .. ومعاهم نايف ..
نواري اول ماشافت ريم ركضتلها وهي تصارخ
نوره: العروسه العروسه

ريم في هاللحظه كان ودها الارض تنشق وتبلعها .. لوت نوره على ريم ووختلها ريم وحبتها ع خدها..قامت وسلمت على عمتها ولطيفه من بعد ما سلموا ع اليده .. و وراهم كان نايف اللي لابس شورت ابيض وتي شيرت ازرق ولابس نظارته الشمسيه ..
ريم قلبها كان يدق بقوو .. تقرب نايف من ريم عقب ماسلم على يدته .. والتفت لريم

نايف: هلا ريم ..
ريم: اهلين..

مد ايده بيسلم لكن كانت نواري قابضه ايد ريم اليمين ..ريم افتشلت وتمت تتطالع نوره وتحاول تسحب ايدها من نوره بس نوره محكمه القبض على ايد ريم..ابتسم نايف وهو ينزل ايده .. هوى ع الارض قريب من نوره.. سحبها صوبه بس بعدها ماتبى تهد ايد ريم اللي احمرن خدودها بسبة قرب نايف منها ..

نايف: هههههه نواري شو بلاج قابضتنها جي
نوره: انا احبها ..

ريم ابتسمت وهي تشوف نوره ونايف قابضنها.. سحبت ايدها بهدوء من ايد نوره اللي متشبصه بها.. وابتعدت عنهم شوي وسارت تيلس حذال يدتها..

ام سيف: تعال فديتك تعال ايلس

يلس نايف عقب مافصخ نظارته.. وغصبن عنه نظراته تطيح ع ريم كل شوي .. مايقدر ما يشوفها دامها مجابلتنه .. حست ريم بحراره تسري فجسمها .. وقامت تشل غسول الفنايين..
ريم: انا بقوم ببدل الغسول ..
شلت الغسول ولحقتها نوره ..
مريم: متعلقتنها نواري
ام سيف: اشوفها من يت تباغم العروسه العروسه ومتقبضه بايدها..
لطيفه: ههه عيل ماسمعتيها امايه يوم قلنالها نايف بياخذ ريم عفدت تصارخ اونه بترقد ويا ريم ..
ام سيف: هههههه .. بلاك ابويه نايف ساكت ؟
نايف: ابدا امايه مابلايه شي ..

وصلت ريم في هالوقت .. حطت الغسول ويلست وهي منخشه نوعا ما ورا يدتها ..
كانت وايد مستحيه وتحس بتوتر .. وخوف من الصداع اللي بييها من بعد ها الموقف اللي صار..

مريم: شو ميلسنكم خاري ؟
ام سيف: يلسه خاري غاويه
مريم: عيل وين البنات؟
ام سيف: فديتهن ميوه وساروه روحن تراهن ويا بنتج والتوم مادريبهن (والتفتت لريم) وينهم خواتج؟
ريم بصوت واطي : يطالعن التلفزيون
ام سيف: والاولاد ساروا عند المطوع يقريهم ونعوم ظهرت
لطيفه ماحبت تشوف ريم جيه غمظتها انها متلومه وايد .. واقترحت عليها تقوم
لطيفه: ريمان شو رايج نسير فوق
ريم ابتسمت للطيفه وشجعت الاقتراح واايد ..
ريم: يالله .. اسمحيلي عموه
مريم: مسموحه فديتج
نشت ريم وصعدت غرفتها ويا لطيفه ونوره اختها الصغيره ..

ام سيف: وحليلها ريمان متلومه
مريم: مب بس ريمان اللي متلومه
نايف انتبه انه الكلام عنه وظحك..
ام سيف: والله كبروا العيال .. تحيدين ذيج السنه يوم هم صغار يلعبون رباعه ويضاربون البنات .. كانوا شر
نايف: ههههههه يالله عنج يا امايه .. الحين نحن شر
مريم: عاد ماتذكرون عمركم قبل كيف كنتوا
نايف: انزين ماعليه ها قبل .. الحينه محد اعقل عنا
ام سيف: هي فهاي صدقت .. الا انته متى تبى العرس؟
نايف: انتو شاوروها وخبروني
ام سيف: لو على شور ريم الله يعين متى بتعرس
نايف: ليش ماتبى ؟
مريم: لا لا يدتك تقصد انه ريم تستحي تقول وجيه
ام سيف: انته متى مستعد
نايف: والله عادي امايه أي وقت لو من باجر
ام سيف: هههه عادي أي وقت ولو من باجر.. اسميك انته
نايف ابتسم ليدته وهو يشوفها تظحك هي وامه
مريم: عليا قالتلي انه ريم هالكورس بس عليها دراسه والثاني الا تدريب هو يقول لو على نص السنه احسن
ام سيف: زين
نايف: والملجه ؟
مريم: تبى تملج قبل بوقت؟
نايف: امم هيه احسن يعني
مريم: عيل املجوا عقب العيد
ام سيف: لا لا شو يملجون عقب العيد هب زين مكروه عقد القران بين العيدين
مريم: وين مكروه يا اميه .. ها الا خراريف الاول
ام سيف: لله نحن من استوينا وها الشي عندنا مكروه.. هب زين
مريم: والله ما دلكم يا اميه .. بس تراه عادي ..
نايف: مب مشكله نملج قبل العيد والحفله بنسويها عقب العيد عادي ..
ام سيف: لا لا مساعه ريم تخبرني تقول بنت راشد بتعرس ثالث العيد بيرتبشون ما بيعرفون ملجه ولا عرس
نايف: والله مادريبكم تشاوروا وخبروني ..
ام سيف: انتوا احين بتيلسونها في حجره نايف؟
نايف: بسوي صيانه لحجرتي وحجرة عمار وبسكر الصاله اللي حذال حجرنا وعمار ياخذ الحجره اللي حذال حجرة اميه وحجر البنات ..
ام سيف: هي زين زين ..
وطى نايف فنيان القهوه وقام وهو يحط النظاره ع عيونه ..
نايف: يالله برخصتكم
ام سيف: ويين تبى !
نايف: بهرول..
ام سيف: شوي شوي ع عمرك .. تراك معرس احين عن تتكسر
نايف : ههه لاتحاتين ..

روح نايف ويلسن ام سيف ومريم يسولفن عن سالفة الملجه يحددن اليوم بالضبط عسب ام سيف تخبر ريم وتشوف رايها بالموضوع ..

****

في الشاليهات .. كانت بدريه واقفه تنتظر سلطان يقفل باب الشاليه .. وبعد ماقفله التفت لبدريه وكملوا طريقهم للسياره .. لكن وقف في نص الدرب وهي منتبه لشي..

بدريه: شو فيك
تقرب سلطان من سيارته : الله يلعنهم ان شاء الله
بدريه: شو مستوي ؟
سلطان: شوفي التاير مفسد
بدريه حطت ايدها على شفايفها: اوويه
سلطان ظرب ايده اليمنى باليسرى
بدريه: شو الحل
سلطان : شو بعد الحل خذي المفاتيح وارجعي ايلسي في الشاليه لين اشوف شو بسوي .. الله يلعنهم اكيد حد من اهنه فشاه عشان نيلس زياده
بدريه خذت المفاتيح ورجعت الشاليه وسكرت الباب وهي خايفه وايد .. كانت تراقب سلطان من عدسه الباب الموجوده .. ومتوتره وكل شوي تشوف ساعتها .. تخاف الوقت يتاخر وتظلم الدنيا ..

رجع سلطان عند الشاليه ودق الباب ..
بدريه: هاه ركبته ؟
سلطان: تاير سيكل هو يتركب في دقايق
بدريه: ياربي والحين ؟
سلطان: ماروم اغيره بروحي ولو يلست اغيره بروحي يبالي وقت طويل
بدريه: والحل ؟
سلطان مشى عنها وهو متوتر : ماعرف
بدريه تقربت منه : شو ماتعرف سلطان انا ماقدر اتاخر ..
سلطان: سكتي انزين تراج توتريني وماقدر افكر في شي
بدريه: انزين
سكتت بدريه وتمت تلف في الشاليه وسلطان يالس ع الغنفه ..
سلطان: بتصل حق واحد من ربعي
بدريه التفتت مستغربه: شو بتقوله ؟
سلطان: بقوله ايني اهنه يا يركب ويايه التاير او اشل موتره واوديج وارجعله
بدريه: بيعرف انك في الشاليه ويا بنت
سلطان: ماشي الا هالحل وعادي هذا ربيعي وايد ويايه وكاتم اسراري لاتحاتين
بدريه: عيل خلاص رمسه بنرد بسيارته مب سيارتك
سلطان: ليش ؟
بدريه: اخاف ماتركبونه زين ولاسمح الله نسوي حادث وتستوي المصيبه مصيبتين
سلطان: ياربي ليش جيه انتي تتفاولين
بدريه تقربت من سلطان وهي تترجاه: الله يخليك سلطان لاتوترني خله ايي ووصلني بسيارته وارجع له
سلطان: انزين انزين ..
اتصل سلطان بربيعه وطلب منه اييه الشاليهات .. ورجع يلس ويا بدريه اللي كانت حركاتها موترتنه اكثر من اللي هو فيه ..

بدريه: ياربي ياربي شو ها اللي يستوي
سلطان: بسج عاد بيي الحين وبوصلج
رن تلفون بدريه في هالوقت وكان زوجها اللي متصل ..
بدريه: ياويلي مكالمه .. اكيد عدنان اللي متصل
سلطان: ردي عليه عادي لاتحسسينه بشي
بدريه شلت تلفونها وردت عليه وهي خايفه وتطالع سلطان
بدريه: الوه
عدنان: الوه .. هلا بدور اشحالج؟
بدريه: بخير وانته ؟
عدنان: الحمدالله .. وينج اتصلت البيت قالتلي امايه انج ظاهره
بدريه: هاه .. هيه سايره عند ربيعتي وبرجع عقب شوي بيت اهلي..
عدنان: لاتتاخرين تدرين انا ماحب تسوقين فليل اخاف عليج
بدريه: ان شا الله ااول ماوصل البيت بطرشلك مسج
عدنان: خلاص على خير يالله عيل فمان الله
بدريه: مع السلامه ..
سكرت تلفونها وهي تحط ايدها على قلبها .. وسلطان يطالعها بغيظ
تقربت منه ويلست حذاله .. تحسه زعلان وتبى تراضيه ..
بدريه: حبيبي سلطان لاتزعل انته قلتلي ردي عليه
سلطان: الود ودي هذا ماترمسينه مول .. لكني اخاف عليج اخاف يتم يتصل ويسال عنج انتي وين.. وتعرفين انتي ماتهونين عليله افظحج او اسويلج مشاكل
بدريه: فديتك ياسلطان والله احبك ...

في هالوقت رن تلفون سلطان وكان ربيعه المتصل يقوله انه وصل .. عطاه سلطان مفتاح سيارته وخلاه ييلس فيها لين يروح يوصل بدريه بسياره ربيعه ويرجع ..
ركب سلطان ويا بدريه سياره ربيعه وكان يسوق بسرعه جنونيه

بدريه: سلطان شوي شوي تبى تجتلني انته
سلطان: تراج انتي ماذتني تبين توصلين بسرعه
بدريه: ابا اوصل بخير مب ميته
سلطان: انزين انزين ..
بدريه: سلطـــــــــــان خف خف
سلطان تدارك الشاحنه اللي كانت جدامه وطلع من الشارع لكنه رجعله وهو مسيطر ع الوضع قد مايقدر ..
سلطان: اسكتي وترتيني
بدريه: احين انا اللي وترتك والا انته تسوق بخبال .. كنت بتجتلنا

سلطان سكت عنها وكمل طريقه لكن هالمره بسرعه اخف لين وصلها عند سيارتها .. وبعد ماركبتها واطمن انها راحت .. مر على واحد من عمال الكراجات وخذاه وياه وسار مره ثانيه للشاليهات .. صلح موتره ورجعوا هو وربيعه كل واحد بيتهم..

****

لطيفه ها الوقت يالسه ويا ريم فغرفتها عقب ماصلوا المغرب .. كان ودها انها تفاتح ريم بموضوع خطبتها من نايف بس كانت تخاف انه ريم تعصب عليها او انها تتظايج ..

ريم نفسها مب لاقيه شي ترمسه ويا لطيفه.. تفكر فموقفها المساعي ويا نايف.. الغريب ما حست بالصداع للحين.. معقول تعودت على مواقفها هاي وياه.. والا لانه الله كاتبلها اياه بدت بقدرة الرب انها تتقبله .. كانت ومازالت تدعي انه الله يهون عليها اللي فيها من الم وصداع وخوف .. وتقدر تتاقلم على نايف دامه من نصيبها للحين تحس بالصداع والخوف ولكن كانت تحاول بقدر استطاعتها انها تجمل صوره نايف في عينها عشان تتحاشى الالم ومومنه انه الله بيرزقها على قد نيتها الطيبه .. ومدامها اتحاول بتقدر بقدره الرب انها تتاقلم ..

وقفت لطيفه عند دريشه غرفه ريم وفتحتها وهي تحاول تشوف بيتهم منها .. وابتسمت يوم شافت انه دريشه نايف هي اللي اتطل على غرفه ريم من بعيد ..

لطيفه بحماس: ريمان تعالي
ريم تقربت من لطيفه: شوو؟
لطيفه: تشوفين بيتنا من غرفتج
ريم: هيه لانه فاضيه الارض بين بيتنا وبيتكم محد باني اهنه
لطيفه: هي هاذي اراضي عمار ونايف
ريم سكتت .. ماعرفت شو تقول .. اما لطيفه ابتسمت
لطيفه: تشوفين هذيج الدريشه اللي ليتها مفتوح ؟
ريم: هيه
لطيفه: هاي غرفه نايف .. ههههه يوم تبين تعرفين هو في البيت والا شوفي اذا الليت مفتوح والا لا .. اكيد احين رجع من الركض وسار يتسبح
ريم سكتت حاولت تبتسم ابتسامه مصطنعه وروحت عنها ويلست ع السرير
لطيفه: بعدج تقرين روايات؟
ريم: من استويت وانا اقراهن .. ماعرف..احس استانس عليهن..
لطيفه: رومنسيه الاخت
ريم: هههه وين يتني الرومنسيه
لطيفه غمزت لها : ماعليه بنسال وبنتاكد عقب
ريم ارتبكت: منو بتسالين ؟
لطيفه: ههه نايف
ريم ارتبكت اكثر وتمت تجلب صفحات الروايه اللي في ايدها ..
لطيفه: ريمان انا اعرف صعوبه تقبلج للموضوع بس صدقيني انتي لازم تحاولين تتاقلمين على هذا الشي ومدام هذي البدايه الله بيوفقكم ان شاء الله ..
ريم بين الحزن على ويها وتنهدت بصوت مسموع ..
لطيفه: نايف وايد طيب والكل يشهدله بها الشي .. هومب عصبي ..يعني يوم بيعصب تكون عصبيته ع الشديد القوي .. وايد هادي ويحب اليهال وايد .. ماتشوفين نواري شقى متعلقتنه .. كل يوم يركبها في الموتر ويحوطبها .. الله يعين هذا شو بيسوي يوم بييه خلفان الصغيرون

ريم ماعرفت شو تفسر احساسها بذاك الوقت هل هو مستحى او انزعاج من هالطاري..سرحت بمخيلتها لدقيقه .. لطيفه ماردت ترمس عن الموضوع كأنها تتريا رد من ريم .. لكن ريم طنشت وغيرت الموضوع..

ريم: بقوم بطالع نواري خليتها عند التوم .. بتين ؟
لطيفه: يالله بنطالعها وبننزل تحت عند قوم امايه ..
ريم: يالله ..

تجدمت ريم لطيفه اللي تمت تطالع ريم وتحس بيأس .. مايفيد وياها ها الانسانه الرمسه.. يعني هي موافقه وكل شي بيتحدد قريب .. بس مب راضيه اتطلع اللي فخاطرها لأي شخص.. معقول تكون عايفه نايف .. معقول ما يتوالمون عقب العرس.. هاذيج الساعه المصيبه بتغدي مصيبتين .. وبيرد جرح امها الجديم ..
لكن من يدري شو بيصير بريم ..

طلعن ريم ولطيفه من الحجره .. كانت لطيفه ترمس ريم وتسولف لكن يبين انه ريم مالها مزاج .. يلسوا فالصاله ويا التوم ونواري وياهم ..
كانت فايد نوره غرشة بيبسي وتحاول تبطلها بس مب رايمه ..

نوره: العرووسه.. بطليلي هذا
ريم وهي تطالع نوره: ليش شو تبين فهذا
نوره: ابا اشربه..
ريم: منو عطاج اياه
لفت نوره ع التوم واشرت عليهن ..
ريم: مها ومهره.. هاي ياهل ليش تعطنها بيبسي
مها: يعني نحن نشرب ونخليها تطالعنا
ريم: ليش ماتعطنها عصير او أي شي .. ما تفهمن
لطيفه: بلاج شبيتي ريمان.. عادي نواري متعوده ع هاالسوالف
ريم: شو تعودونها عليه .. مب زين .. هاذيل التوم مدمنات عليه ومادري شو اسويلهن عسب يودرنه
مهره: ريمان وين مدمنات.. غرشه فاليوم
ريم: وانزييين
مها: غيرنا خمس غرش فاليوم
ريم: كم مره قلتلكن لا تقارنن نفسكن بالغير ..

مها ومهره اطالعن بعض وسكتن عن ريم الي مزاجها من انخطبت وهو كل شوي يجلب عليهن .. لطيفه ما قدرت ترمس .. ماتعرف ليش حال ريم جذي صاير اطالعت ريم ووقفت ..

ريم: وين تبين؟
لطيفه: قومي نسير عند قوم اميه
ريم: همم اوكي

نشت ريم ويا لطيفه والتوم مطنشات الوضع .. وبعد ما طلعت ريم ..

مها: بطلولج اياه نواري
نوره: لاا..
مهره: ماعليج ماعليج .. هاتي الغرشه ببطله انا
نوره: كيف بتبطلينه
مها: بنحيس الغطاه وبيتبطل ..
نوره: زيين.. كيف بعدين اشربه
مهره: ههههههه شربي جيه شراتنا.. يم يم ..


وبطلن الغرشه لنواري وعطنها اياه وتمن يستعبطن على نواري وكعادتها كل شوي تسأل وهن يجاوبن وعلى ها المنوال..

[لامارا]

وقف محمد السياره فالكراج ونزلت منها فجر و وراها البنات كل وحده شاله اغراضها في ايدها ..
كانوا سايرين الشارجه عشان فجر تشوف باقي نتايج الاختبارات اللي قدمتها وتشوف تسجيلها للمواد والسكن .. ومروا بعدها سنتر خذوا الاغراض اللي بتحتاجها للسكن من فرش وادوات غرفه وغيرها .. وبالمره البنات كانن يحوطن ويتسوقن .. ولانه هم مايتوافقون مع فجر .. اضطروا انه فجر تتمشى ويا عبير بروحهم اما محمد ويا بناته بروحهم .. وبعد ما خلصوا من التسوق رجعوا البيت..

وبعد ما نزلو محمد وعبير تموا يمشون لين داخل البيت وهم يسولفون ..

محمد: فجر ماشلت اغراضها
عبير: بتطرش الشغاله تيبهم من السياره
محمد: اندوج السويج عيل عطيه البشكاره يوم بتيب اغراض فجر
عبير: ان شالله ..
محمد:اليوم وايد زحمه .. احس شديت على عمري وايد.. غير مره بخلي الدريول يودينا
عبير: قلتلك انا بس ما رضيت انت
محمد: شدراني ..
مديه وقفت في نص الدرب ورجعت لامها وابوها
مديه: ابويه لاتنسى نحن بنتسبح وبنترياك في الحجره لاتتاخر ترا فينا رقاد
محمد: ههه ان شاء الله
سارت مديه تركض للفله والتفتت عبير لمحمد
عبير: شعندك معاهم
محمد ابتسم: ماشي تعرفينهن بناتج ماعندهن شغله الا تعالوا وسولفوا ويانا
عبير: انته معطنهن ويه زياده عن اللزوم

ضحك محمد وهو يحط ايده ورا خصر عبير اللي كانت واقفه عند باب الفله تفصخ نعالها..
محمد: محد يستاهل اعطيه ويه و وقت كثر حرمتيه وبناتي ..

عبير ابتسمت لمحمد وحست انه يتهرب من الجواب.. وفي نفسها فضول تبى تعرف شو سالفه البنات ويا ابوهن .. دوم هاي يلستهم فليل ويوم تروحلهم تشوف الباب مقفول او يسولفون بسوالف عاديه ..

دخلت عبير الغرفه ويا ريلها وشوي سمعت دق على الباب ..

عبير: منو ؟
فجر: انا فجر
قامت عبير فتحت لها الباب وطلعت : شفيج
فجر: اممم ابا احاجيج تعالي غرفتي
عبير: شنو صاير ؟
فجر: ماكو بس تعالي
عبير: احين!
فجر: اييه
عبير: خليه عقب
فجر: لا عبير ابي احاجيج الحين الحين
عبير: انزين انزين .. سبقيني انتي ..
فجر: اوكي.. مو تتأخرين
عبير: اوكي.. كاني يايتنج ..

رجعت فجر لغرفتها وعبير ترخصت من ريلها ولحقت اختها .. دخلت الغرفه وحصلتها يالسه تبرد اظافرها وسرحانه ..
عبير: فجر..
فجر لفت ع عبير بسرعه : اووه خرعتيني ..
عبير تجدمت ويلست حذال اختها: خير شو عندج.. شو ها الامر المهم اللي ما يتأجل؟!
فجر: اوكي بقولج السالفه.. انتي شفتي المسافه بين السكن والكليه ..صح!
عبير: ايه
فجر: وايده صح
عبير: ايه صح .. انزين والمطلوب
فجر: انزين والجو وايد حار ..
عبير: فجر هاتي من الاخر ..
فجر: اوكي ابي سياره.
عبير: شووو!
فجر: ابي سيارتي اللي بالكويت .. انا ماتحمل الجو والمشي وايد ..
عبير: فجر انتي كل شي تبينه بالساهل
فجر: هو.. اتعب عمري ليش يوم انه كل شي متوفر عندي بس اللي ناقص الليسن.. ابي ليسن الامارات وقولي لبشار اخوي يدزلي سيارتي.. وخلاص انحلت المشكله
عبير: بس انتي مو محتاجه هالكثر لسياره وبعدين اكيد محمد مابيرضى انج تروحين فيها الاربعا والجمعه للشارجه .. الدرب طويل
فجر: بخليها في الجامعه وانتوا خذوني اخر الاسبوع لكن اهناك انا بالفعل احتاج للسياره..
عبير: والله ماعرف بشاور محمد
فجر: وليش تشاورينه بالله عليج ؟ انا قلتلج كلمي بشار وبس ..
عبير: وليش ماتكلمينه انتي؟
فجر: مالي خلقه .. كلميه انتي وشوفي شنو راح يقولج .. وخليه يدزلي اياها خلال هالايام ابيها بسرعه توصل قبل الدوام ..
عبير: خلاص يصير خير .. تبين شي ثاني يا ليدي ديانا
فجر: لا مشكوره .. بس انا الليدي فجر

عبير اطالعت اختها ورفعت حايب .. طلعت من عندها وردت غرفتها.. بس مالقت محمد فيها .. خمنت ع طول انه سار يصلي العشا في المسيد ..
************************
(الاثنين) 23 اغسطس 2004
************************


الظهر فبيت بوراشد .. بعد الغدى الكل سار حجرته ياخذله قيلوله الا بنات محمد اللي تمن يالسات فالصاله يشوفن التيلفزيون .. يتهن فجر اللي كانت متملله ويلست وياهن .. طبعا احلام ومديه ما ابدن ليسلت خالتهن وياهن أي أهميه .. متعودات عليها .. وقت ماتبى تتضارب يت عندهن ..

فجر: أحلام بدلي شوي من ها القناه
احلام: مب سادنج تلفزيوني الي ماخذتنه سيري شوفي فيه اللي تبينه
فجر: قلت اطلع اقعد معاكم .. يلا بدلي ..
احلام: تشوفينا نتابع مسلسل..
فجر: شو ها المسلسلات البايخه اللي اتابعونها
مديه: اوهو عاد .. ها المسلسلات الباخيه عااد تعيبنا نحن .. جان مب من مستواج لا تطالعينها ..
فجر: بل بل .. شنو ماكله انتي ع الغدى لايكون فلفل هههههه
احلام لفت ع مديه : مدويه انا بسير الحجره

قامت احلام من غير حتى ما تلف على فجر اللي انقهرت من تطنيش احلام الها ..حست بتغير في تعامل احلام وياها خصوصا من يت مي البيت الاسبوع اللي طاف .. مي عرفت انه التطنيش هو الي يفيد ويا فجر.. ولزمت على احلام انه تتجنب أي مشاكل ويا فجر عسب ما تزعل امها .. والتجنب ما ايي الا بالتطنيش.. وها الي قاهر فجر ها الايام ..

قبل ما توصل احلام لقسمهم انتبهت لدخول سياره للبيت .. ردت للصاله ووايقت من الدريشه وابتسمت ..

مديه: منو ياي؟
احلام: ها مروااان .. السبال من متى ماشفناه ..
مديه لفت ع فجر: تحجبي ولد عمي شكله ملان وياي يسولف ويانا

فجر كانت حاطه الوقايه ع جتفها ولبستها وهي مول مالها خلق.. أما احلام ركضت لين الباب وطلعت برع .. كان مروان توه ياي بينزل .. دخل البيت ويا احلام ويلس ويا البنات فالصاله .. فجر كانت ساكته طول الوقت ويالسه بعيد شوي عن مروان والبنات وتجلب فقنوات التيلفزيون ..
مروان طنش وجود فجر لأنه كان بالفعل مفتقد لمة بنات عمه وضرابتهن وكله بسبب وجود فجر فالبيت .. هاذيل حسبة خواته الصغار تعود عليهن وايد ويعاملهن بالفعل جنه اخوهن العود .. واليوم ولانه متوله ع اليلسه وياهن تجاهل أي شي ممكن انه يخرب عليه ..

احلام: تعرف مروان .. فخاطريه ايسكريم
مروان: انزين دقي الدكان ما يقصر حمزه
احلام: لا لا انته ودنا
مروان عقد حياته واطالع احلام: وين اوديج؟
مديه: هي حوطنا بالسياره شويه
احلام: الله يخليك مروان.. مانبى بعيد يعني الا صوب الشيشه شويه ولفتين ع الفريج وبنرد
مروان: لا مافينا ع الحشره
احلام: من الله سيارتك عاكس يلا عاد
مديه: الله يخليك مروان .. والله شو ها ماعندنا حد ييلس ويانا ولا حد يحوطنا بالسياره .. قم عن الهيازه
احلام: يلاااا مرواان
مروان: ههههههه خيبه بنات عمي تشحتن انتن .. حرام غمظتني .. بس ها ان حد احتشر ترا انا مايخصني
احلام: خلاص كله عليه انا ولايهمك ..

فجر كانت تسمع حوراهم ومنقهره منهم .. يسولفون ولا كأنها موجوده .. ناسين وجودها بالمره .. واللي زادها قهر .. انهم قاموا كلهم مرتبشين ولا حتى عزموها ع السيره ..
طلع مروان من البيت وشغل السياره ولحقنه مديه واحلام اللي كانت لابسه شيلة بيضا مالت البيت ..
فجر ردت غرفتها من كثر الضيج اللي صابها.. هاي مب المره الاولى الي تنحط فيه بنفس ها الموقف .. شوفيهم جازين التعامل وياها .. هي اخت عبير يعني ع الاقل يتعودون عليها كفرد من العايله ..
محد من الشباب قرب صوبها وكلمها .. غير شخص واحد تجرأ .. وردت بفكرها لذاك اليوم ويا سلطان ..

أما البنات بعد ما طلعن ويا مروان من البيت ركبن السياره .. يلست مديه جدام واحلام ركبت ورا وتمت يالسه فالنص ووهي خاشه راسها فالفتحه بين الكرسيين

مروان: ايه انتي ليش ما لبستي عباتج .. شو ها لابستلي ها الوقايه
احلام: برايه سوق سوق انته .. محد بيشوفني
مروان: وين ما بيشوفون وانتي ناطتلنا جدام ..
احلام: عادي عادي بيقولون مودي البشكاره
مديه: ههههههه زين يوم قلتي عن عمرج.. انا عادي بيقولون اخته الصغيره مودنها الدكان ..
مروان: ههههههه والله انكن ..
مديه: انزين وين بتودينا؟
مروان: وين بوديكن .. بنزل الشيشه باخذلكن الاسكريم وبردكن ع طول
احلام: لاااا عاااد
مروان: حلام مافينا ع تسنديرة الراس
مديه: محد بيسندرلك راسك .. قلنالك كل شي علينا ..

مروان زود من سرعة السياره والبنات شاقات حلوجهن .. وصلوا للشيشه ونزل مروان وخذلهن اللي يبنه .. وتم يحوطهن شوي بالسياره وعقب ردوا البيت ونزلن البنات وهن مستانسات .. ردن داخل ومروان روح عنهم..


****

العصر كانوا مايد وجاسم يالسين في الصاله اللي فوق يلعبون بلاي ستيشن ومندمجين ع الاخر وناسين الوقت انه دخل ع العصر.. دخلت عليهم ريم وعقدت حياتها وهي تشوفهم يالسين .. سارت لين عندهم وتمت واقفه ع روسهم وهي محطيه اديها ع خصرها ..

ريم: ياسلام عليكم ميلسين تلعبون وما تبووون الصلاه؟؟
مايد: اذن العصر!!
ريم: هيه واحين بيقيمون الصلاه يالله بسرعه سيروا المسيد
جاسم: صبري انزين خل نخزن هالمرحله
ريم تجدمت من اللعبه وحطت ايدها على نقطة الكهربا
ريم: بتقومون والا ابندها واضيّع عليكم كل شي
مايد: لاااااااا ايه ريمان شو بلاج بنسير بنسير
ريم: يالله بسرعه تيددوا في المسيد ماشي وقت

قاموا جاسم ومايد ونزلوا تحت.. طلعوا من الفله وجاسم يتحرطم ومسندر براس مايد .. متغصص من ريم ليش ماخلته يكمل لعب شوي وزاده اكثر انها تعصب عليه كل مره .. تضاايج منها وايد .. وصلوا عند باب الحوي عشان يطلعون مايد تجدم وجاسم كان وراه وهم يسمعون صوت المؤذن يقيم الصلاه..

مايد: يالله بسرعه جسوم
جاسم: انا مب ساير عناد ..
مايد: قوم بسرعه ماشي وقت
جاسم: سير انته انا بيلس اهنه
مايد اشر له بمعنى "كيفك" وروح عنه بسرعه يركض صوب المسيد ..
جاسم يلس يتعبل بالزرع اللي جدام البيت ..
اما ريم كانت واقفه عند بلكونه الصاله تراقبهم مثل كل مره.. انتبهت انه مايد سار بروحه للمسيد .. ماشافت جاسم وياه .. يوم ركزت أكثر شافت راس شخص جدام البيت .. وعرفت انه جاسم يوم دخل البيت يشغل الفوز من داخل عسب يقضي وقته وهو يسقي الزرع اللي جدام البيت .. عصبت على حركته هاي ويابتلها كرسي ويلست بتشوف شو اخرتها ويا جاسم ..
ووقت ماخلصت الصلاه رد مايد البيت وانتبه لجاسم انه يعابل فالزرع وزقر عليه وودر جاسم اللي فايده وقام يا اخوه ودشوا البيت ..

مايد: ماعليه ان ما خبرت عليك ريمان
جاسم: خبرها وشوف شو بيستويلك انزين
مايد: شو يعني اونك بتأدبها..
جاسم : اووه سو طاااااف ..
مايد: ها اللي فالح فيه كل مانقوله شي قالنا طاف طاف طاف

جاسم خز مايد بنظره وسكت عنه مايد وكملوا طريجهم ..وقف جاسم عند النافوره ومسح على راسه بالماي اللي فيها على اساس انه ماي الوضوء ومسح ع ريوله شوي ..دخلوا الصاله وتلاقفوا ويا ريم اللي كانت توها نازله من الدري ..

ريم: ها صليتوا؟
مايد: هيه الحمدلله..
ريم: وانته جاسم سرت تصلي
جاسم بارتباك: ترا انا ويا ميود
ريم: انا اسالك سرت تصلي
جاسم: هيه عيل شو .. حتى شوفي شعري ممسوح ..
ريم: ماشا الله .. زين ..

كمل جاسم دربه يبى يصعد فوق و ريم كملت دربها نازله ومايد واقف في النص بينهم ..
ريم وهي عاطيه جاسم ظهرها: لاتروح تدور البلاي ستيشن لاني شليتها
جاسم التفت لها وصرخ: ليــــش؟
ريم التفتت وراها : عشان تعرف تغسل راسك بما النافوره وتيلس تلعب فالزراعه لين يرد ميود ..
جاسم التفت لمايد على طول ونظراته كلها تهديد ..
ريم: مايد مالحق يقول شي لانه جدامك هاكوه ما نطق لكن انا شفت كل شي من البلكونه وانتوا الاثنين محرومين من البلاي ستيشن لانك انته يا جاسم ماسرت تصلي وفوق هذا تجذب .. وانته يامايد تداري على خطا اخوك .. وتحملوا عاد انتوا نتايج تصرفاتكم هذي البايخه ..

عطتهم ريم ظهرها وهي معصبه منهم وايد .. وروحت تشوف يدتها ..
لقتها يالسه في حجرتها ويا مها ومهره وشكلهن مرتبشات يتريون يدتهن اللي كانت توها مخلصه صلاه ويالسه تسبح وتستغفر ربها..

ريم: ماشا الله انتن اهنه
مهره: هيه .. زين يوم ظهرتي من حجرتج
ريم: مايخصج فيني ..
مها: خيبه انزين ماقالت شي هي
ريم: مب نازله لسواد عيونكن .. بس بعطي امايه دواها وبروح فوق
مها: بس هاي حياتج انتي روايات وافلام عربيه جديمه ابيض واسود
ريم: هيه هذي حياتي

التفت اليده صوب البنات .. قامت من ع الارض وفصخت وقاية الصلاه وقطبتها ويا السياده وحطتها ع جنب ويلست ع السرير .. شافت مها ومهره وابتسمتلهن
ام سيف : فديتكن سيرن الصاله بلحقكن.. بيلس شوي ويا ريم
مهره: امايـــــــه نحن نترياج عشان نسير نشوف الصخله
ام سيف: بييكن انزين تجدمني انتن
ريم: أي صخله؟
مها: عنزه امايه يابت صخله صغيرونه حلووه بنسير نطالعها
ريم: وين تروم امايه تسير صوب الزرب
ام سيف: لا لا بسير وياهن مساعه يايه من اهناك ماعليه شر..انتن سيرن قبلي وبلحقكن.. حطوا حليب حق الصخله في مرضعه عند نجموه لين اوصل
مهره: اوكي

طلعن التوم ويلست ريم تجهز دوا يدتها ..وعطتها اياه وناولتها كوب الماي..
ام سيف خذت دواها ووطت الكوب ع الطاوله .. اما ريم قامت تبى ترد فوق..

ام سيف: تعالي ايلسي اباج
ريم اطالعت يدتها باستغراب .. ورجعت يلست حذالها..
ام سيف: ريمان شو فيج انتي كله حابسه عمرج فوق .. وحاره ويا اخوانج وايد
ريم: امايه هم يقهرون مللوبي .. مايسمعون الرمسه ويلاسنون
ام سيف: احين تسمينه لسان يوم انه مهره تقولج زين ظهرتي من حجرتج
ريم: لازم ماترمسني جيه وانا ع كيفي وين ما ايلس عساني ماظهر من حجرتيه اسبوع ..
ام سيف: احين هاي ريم اللي عرفناها ؟ ريم الحنونه اللي تداري خوانها ؟ ومابغت العرس عشانهم
ريم: وانا شو سويت غير جيه
ام سيف: هذيل اللي تدارينهم تراج قاهرتنهم احين باسلوبج وياهم
ريم: امايه قلتلج هم مايسمعون الرمسه
ام سيف: الا انتي مستويه تحرجين بسرعه
ريم: ماعرف يمكن
ام سيف: يا ريم شو ياج
ريم: امايه انا بروحي متوتره ماعرف شو ياني بس احسني مستويه عصبيه
ام سيف: عشان خطبتج من نايف!!

ريم وطت راسها تحاول تتهرب من سؤال يدتها.. لكن اليده مانزلت راسها عنها تبى تشوف شو بتقول ريم .. تبى تعرف ليش هيه جذه مستويه ..
ام سيف: شو بلاج ريموه ..

ريم رفعت راسها وشافت نظرات يدتها اللي كلها تسائل وحيره..مابغتها اتم جي تحاتي وردت ع سؤالها..

ريم: امايه انا وايد افكر واحاتي وخايفه وايد ومارقد كل يوم الا بحبوب صداع
ام سيف: ريم فديتج حطي الرحمن في صدرج ولاتمين توسوسين.. واخوانج ترا صغار ويبالهم اللي يراويهم الصح والغلط .. علميهم فديتج
ريم: ان شاء الله ..
ام سيف: بقوم بسير اطالع الصخله قومي تعالي ويانا
ريم: لا امايه ماروم
ام سيف: قومي فديتج عشان خاطري

ريم اطالعت امها وابتسمت غصبن عنها..
نشت ام سيف وقامت وياها ريم .. ساروا صوب الزرب يشوفون الصخله .. كانت مها يالسه ع باب الزريبه ومحطيه الصخله عند ريولها وتعطيها الحليب من المرضعه ومهره ميودتنها وتمسحها ..

ام سيف: هاه عيبتكم
مهره: هيييييه امايه وايد حلوه شوفيها
ريم تقربت من مهره وحطت ايدها ع شعرها ومسحت عليه ..
ريم: مستانسه مهروه
مهره ارفعت راسها وابتسمت حق ريم .. ضميرها انبها كيف جي تعاملت ويا خواتها بجفا وهن ع الرغم من ها مب محطيات شي فخواطرهن .. وخت ريم وهي تشوف الصخله وعناية خواتها بها ..

ام سيف: امها وينها عيل ؟
مها: داخل ياالسه تسولف ويا باجي ربعها
ام سيف: ههههههه وعليه عنهن ..

دخلت ام سيف تشوف المعز وحطتلهن اكلهن ..ورجعت طلعت عند الباب كانت الصخله الصغيره مخلصه رضاعه ..

مها: امايه هاي بتحطينها داخل ؟
ام سيف: هيه بس يلسنها ع طرف بعيد عن الباجيات
مهره: حرااام امايه
ام سيف: ويدي شقى بعد حرام يلسنها ع طرف امها بتيها اهناك بترضعها..
مها: عطيتها تراني توه
ام سيف: لا لا مايسدها حطنها اهناك
مهره: امايه هاي خلاص من اليوم صخلتنا نحن بنربيها
ريم: هههه ليكون تتحرين عمرج هايدي ..
ام سيف: زين ربنها ..
مها: لازم نسميها قبل
ريم: ههههههه لاعبات الدور خواتي ..
ام سيف ضحكت ع البنات..وعقب وجهت كلامها للتوم ..
ام سيف: حطنها انتن داخل احين عن الحر وخلاف فكرن باسم
ريم: يالله امايه انتي بعد قومي دخلي عن الحر
ام سيف: انزين ..

دخلن البنات الصخله ولحقن يدتهن وريم اللي كانن رادات البيت مشي كون انه الزرب ورا البيت وقريب .. دخلوا البيت من الباب الصغير الوراني .. وسارن صوب الزراعه ..
ريم حاولت تاخذ بخاطر خواتها تحس انها زعلتهم .. وسولفت وياهن وخبرتهن عن سالفه جسوم وتموا كلهم يظحكون عليه ..
وفي نص مشيهم بين الزراعه لقوا جاسم يالس في عربانه الزرع اللي تكون بعجله وحده ومايد شالنها من ورا يدور فيه .. وخطفوا جدام خواتهم ..

جاسم: فووم فوووم قوموا قوموا ياكم الفراري
ام سيف: ويدييه ميود عن تجلب اخووك ..
مايد: لامااعليج ميودنه زين ..
جاسم: قوووومي يالعيوز عن ادعمج عقب ماروم اادي عنج ديه ..
ام سيف: يا الهرم كم مره قايلتلك هب تقولي العيوز

البنات كانن مقاومات الضحكه .. ومن شافن نظرات يدتهن ماقدرن ايودن عمارهن اضحكن كلهن على الموقف و اللي يشوفنه .. اليده بادلتهن الضحك وقامت تتحرطم على جسوم وعلى حركاته .. دوومه جاسم حاط راسه براس يدته ويتناقر وياها ويزقرها العيوز وهي تعصب عليه ..
ريم دمعت عينها من كثر الضحك ويلست ع طرف وتمت تتطالعهم .. حست انه طلعتها ويلستها وياهم تنسيها افكارها اللي تغزيها في وحدتها وخلوتها .. ضحكاتها صارلها مده مكبوته .. واليوم قدرت شوي تظهر من قوقعتها وتفرج من اساريرها شوي ..


****

في السكن الداخلي للبنات فمنطقة المقام .. كانت ساره واقفه مجابله الكبت محتاره اي لبس بتلبسه اليوم.. طلعت بنطلون جينز فاتح شارلستون وبدي هاي كت لونه اصفر ومركبه عليه بدي اخضر مكتوب عليه بالاصفر.. طلعت الجناح تبى تكوي ثيابها .. حطت الثياب ع طاولة الكوي وقبضت تيلفونها واتصلت بمي تطالعها وين سارن هي واسما ..وقاللها تستعيل شوي لانها وايد تأخرت عليهن .. بندت عنهن وبدت تكوي ثيابها.. ها الوقت رن تيلفونها وقبضته من غير ماتشوف الرقم ..
ساره: قلتكن بيييي صبرن انزين تحت المبنى
استغرب المتصل رمستها وضحك ع الخفيف .. ساره استغربت الصوت واطالعت الرقم وبطلت عيونها .. ها شو يبا!!!
ساره: الوه
مروان: السلام عليكم
ساره: وعليكم السلام والرحمه
مروان: تتحرطمين ع منووو
ساره: هههه لا ترا ماشفت الرقم وعبالي ميوه المتصله
مروان: هيي وانا اقول .. المهم اشحالج ؟
ساره: بخير الحمدلله .. انته شحالك؟!
مروان : الحمدالله .. اامم وين انتوا في الجامعه ؟
ساره: هيه ..
مروان: هيه صح بالبركه عليكم خطبه ريم
ساره: الله يبارك فيك ..
مروان: عقبالج ان شاء الله
ساره استحت وتمت ساكته اما مروان ابتسم وكمل كلامه ..
مروان: اسمحيلي اتصلت واذيتج بس ترا عموه عليا مطرشتني اييب لها ثياب من الخياط وابا اعرف باسم منو ماعرفت ماخليت اسم وحده فيكن ماقلته ماعرف الخياط .. واتصلت بيت يدوه مايردون .. عاد بغيت رقمها من عندج اذا ماعليج امر
ساره فخاطرها "احين هالسالفه كلها عشان تبى رقم امايه"
ساره: ههه وحليلك معذبتنك امايه وياها
مروان: لا افا عمتيه عليا في عيوني ..
ساره: تسلم .. بس غريبه ماتعرف رقمها
مروان: ترا غيرت التيلفون وضاعن الارقام اللي فيه
ساره فخاطرها تضحك ع أعذاره بس سكتت ..
ساره: انزين ماعليه بس ترا امايه دوم تسجل الفواتير باسم جسوم اخويه قوله جاسم سيف
مروان: اهاااااا..وانا هذا الوحيد اللي ماخطر ببالي
ساره: كيف وهو ريالنا ..
مروان: لحظه انزين بطالع الهندي
ساره: اوكي
مروان: اقولك رفيق هذا كندوره باسم جاسم سيف
الخياط: جاسم سيــــــــف انته ليش مايقول قبل
مروان: وانا شدراني فيك بعد انته
ساره اظحكت.. خذ مروان الكنادير عن الخياط بعد مايابهم ..
مروان: كم حسابك؟
الخياط: خلاص هذا حساب
مروان: يالله عيل
وروح عنه وبعدها ساره ع الخط .. ركب سيارته ورجع يرد عليها
مروان: خلاص تمام خذنا كنادير امج
ساره: زين عيل
مروان: امم شو الدراسه وياج؟
ساره: بعدنا عن الدراسه عقب اسبوعين ..ها الاسبوع الا اسبوع مستجدات وانا يايه ويا ميوه اختيه ..
مروان: اهاا.. زين زين عيل سلمي عليها وايد ..
ساره رفعت حايب : الله يسلمك ..
مروان: يلا فمان الله..
ساره: مع السلامه

سكر مروان وهو مستانس انه كلم ساره وسمع صوتها .. اما ساره من بعد ما سكرت التلفون تمت واقفه محلها وهي تشوف التيلفون ابتسمت ع الخفيف ووطت التيلفون وكملت كوي .. وبعد ماخلصت شلت ثيابها وردت الحجره ..لبست وكشخت وتمت تطالع عمرها بالمنظره ..فلت شعرها المدرج ورتبته وجحلت عينها بجحال اخضر من تحت وتعطرت بعطرها المفضل.. وكل شي كان بالحركه البطيئه .. دقتلها ميوه اللي ملت من التريي بس ساروه طنشتها .. لبست جوتيها ونزلت عند البنات .. اسما ومي كانن لابسات بجايم وواقفات عند باب المبنى يترينها تنزل .. ويوم شافتها مي بطلت عيونها ..

مي: والله انج نذله
ساره: شووو بلااج
مي: شحقه ماتقوليلنا انج بتكشخين اليوم
ساره: لاتقولين ماقلت .. اسوم شاهده
اسما: هي ميوه حرام هي قالت بس انا قلتلها امس متبنطلين وانا ماروم اليوم
مي: انا اروم شحقه ماتقولولي
ساره: اوف ميوه لاتسويلنا سالفه احين .. بجامتج حلوه وبعدين انا مب يايبه غير بجامه ولبستها السبت اول يوم..
مي اطالعت عمرها من الباب الزجاجي اللي عاكس صورتها .. كانت لابسه برمودا بيضا مورد باللون الوردي وبدي وردي ايده قصيره وسليبر وردي.. اللبس وايد مرتب عليها واقتنعت بها الشي ولفت ع ساره واسما ..

مي: مب مهم اتبنطل .. كل شي عليه حلو ..
اسما: ههههههه اونها تقنع عمرها
ساره: والله انج خقاقه كل شي عليها حلو اونه..
مي: براااايني..
ساره: يلا انزين نسير نتمم وعقب بنسير عند الشله..
مي: اي شله بعد .. كل يوم عند شله انتن تسيرن
اسما: من كثر الربع اللي عندنا ..
مي: ايه انا استحي شو ها .. ربعكن بهدلني كل شوي وحده تمطني من شعري
ساره: خخخخ خلاص انزين بنقولهن يتأدبن وياج .. اختنا بريئه مب مال ها السوالف
اسما: ماعليج منها بتعيبها ها السوالف عقب
مي: بس عااد انتن .. يايات تدرسن هب تلعبن وتتعرفن ع كل البني
اسما: ييها عاد ميوه بتفتحلنا موالها
ساره: ماعليج منها ..

مي انقهرت منهن ولحقتهن وهي ساكته .. باين العبوس ع ويها .. وصلن عند المبنى اللي فيه تمام سكنهم.. طلعن البنات بطايقهن الجامعيه وتممتلهن المدام .. وظهرن .. فالدرب تلاقفن ويا وحده من ربع ساره واسما سلمن عليها ومي كانت واقفه ع طرف مستحيه وتتلعب بتيلفونها ..

فاطمه: ساروه هاي اختج!!
لفت مي صوبهم وطاحت عينها بعين البنت اللي ابتسمت الها ..
ساره: هي اختيه مستجده .. ميوه هاي فطوم ..
سلمت مي عليها وابتسمت ولفت ع ساره ..
مي: هاي اللي اتضاربتي وياها وعقب ستويتوا ربع!!
فاطمه: ههههههه ول عليج يا ساروه كل شي شاخلتنه
ساره: ههههههه حرام عليج بس دوم مأذيه ميوه بسوالفنا فالجامعه وتعرف كل ربعي .. كل ما اسلم ع حد اقولها هاي فلانه وتعرفها ع طول ..
مي وطت ساره ع ريولها تباها تسكت .. ماتحب حد يفشلها جدام اشخاص مايعرفونها ..
فاطمه: ماشالله ساروه اختج تشبهج واايد
مي اطالعت ساره وهي رافعه حايب ..
ساره: لا عاااد حرام عليج شياب لياااب
اسما: ساروه انتن تاخذن ملامح بس من كثر ما مجابلات بعض ما تشوفن الشبه
مي: لا انا غير عنها
فاطمه: لا امبلاا تشبهينها ..
ساره: انزين انا احلى
فاطمه: يالله عاد انتي .. شوفي الصراحه تنقال .. انا اشوف ميوه احلى عنج هههه
ميوه قفط ويها واستحت.. اطالعت ساروه وسوت حركه بمعنى تتطنز عليها.. فاطمه ضحكت ع حركة ميوه اما ساره..
ساره وهي ترمس فاطمه: هي انتي ماعليه .. حركاتج معروفه
اسما: تسترزق بعد فطووم .. ابوي بنتنا ماتفيس تراها

مي تمت تطالعهن ومب عارفه شو تقول .. تحس ها الكلام غريب عنها بالرغم من انها تسمع سوالف اسما وساره عن الجامعه والبنات وحركاتهن و يوم يبن يتعرف ع وحده .. وفي مدرستهم ما كانت تتعرض لها المواقف وايد .. قبضت تيلفونها واتصلت بريم .. تبى تنقذ عمرها من الموقف .. سكرت قبل ما ترد ريم عسب ترد تتصللها ويكون لها عذر انها تبعد شوي .. ردت تتصل ريم وكلمتها مي وابتعدت شوي عن البنات ..

ساره: حوو وين سايره
مي: برمس رييموه ..
اسما: طلعت عمرها اسميها هههههه
فاطمه: ساروه فنانه اختج
ساره: هي فنانه بس ماتدق عود هاهااي
فاطمه: يا السخيييفه .. انزين خبرج عندها حد.. عندها ربيعه قو؟
اسما: اوه اوه قامت تتسأل ..
فاطمه: هههههه
ساره: ميوه توها يايه وماتعرف لسوالف المسابر .. يعني فالمدرسه كانت وياشلتها والكل ربعها واللي يبون يتقربولها تلبسهم لكن يوم تبى تتعرف ع حد وحياتج توصللهم لكن مب حركات وجي..
اسما: قو ميوه والله..
فاطمه: اونها ما بتسويلي سالفه يعني
ساره: مادري والله ..

فاطمه اطالعت مي من بعيد وهي ترمس اختها .. ماتعرف ليش تحس ها الانسانه دشت خاطرها .. تبى تتقرب منها وتتعرف عليها اكثر وتكون ربيعتها .. بس من كلام اختها شكلها المسأله تحتاج وقت ..

فاطمه: مممم خلاص عيل انا بسير الجناح .. اشووفكم عقب اوكي.. وسلموا ع مي
ساره: ههههههههه يوصل ان شاء الله .. بنشوف اخرتها
فاطمه: شوفي ساروه ما بقولج بييب راس اختج لاني ماحب ها الاسلوب .. بس سلموا عليها هههههه
اسما: يااواد انته .. ماعليه الايام جدامج من الله انتي بنت مقامنا ..
فاطمه: قلتييها ههههه يلا بااي
ساره: باي

روحت عنهن فاطمه .. ويلسن اسما وساره ع طرف الشارع ويرمسن عن الموقف اللي استوا .. مي انتبهت انه ربيعت اختها روحت وردت للبنات ..

ساره: يسلمون عليج
مي: منو؟
اسما: اللي كانت ويانا ..
مي يلست حذالهن وهي مب مهتمه ..
ساره: سبت وأحد واثنين وميوه اونها ماتهتم للبنات .. بنشوفج عقب
مي اطالعت ساره بنظره: انتن ليش جي .. احس انا عادي بتعرف ع البنات بس في بنات نواياهن مب اوكي..
اسما: شو مب اوكي بعد .. ميوه لازم يعني البنات بيسون حركات وجي .. يعني اوكي بيسابرن فالبدايه وعقب عادي بتكونون ربع..
ساره: انتي شو فبالج يعني نحن نلعب ع البنات والا البنات يلعبن علينا!!
مي: ترا متعارف عن بنات الجامعه وسوالفهن
ساره: ميوه فكل مكان الزين والشين والواحد ما بيعيش بدون ربع.. ماقولج مافي بنات ماصخات.. الجامعه متروسه منهن بس الحمدلله نحن مبتعدين عنهن
اسما: والحركات هاي والسلام ها عادي ميوه لا تحسسين او تضايجين.. يوم ما بتعطين البنات ويه يعني بمصطلح الجامعه "تفيسين" البنات بيقولون عنج خقاقه
مي: حرام عليكن انا مب خقاقه بس طبعي جي ..
ساره: ماعليه ها اول اسبوع لج بتشوفين بعينج كل شي عقب
اسما: جان ماتستوي ميوه اكبر لعابه ومابتخلي حد ماتعرفه
مي: شو لعااابه بعد .. بتعرف عادي لكن مابقص ع البنات وبقولهن ها الخرابيط احبج وما احبج
ساره: جي يعني ثرنا قلنا نحن ..عادي نسابر ونتسابر بس كل شخص وعنده تعامله واسلوبه.. وكل وحده الها مكانتها فقلبي مب شرط يعني اجاملها بشعوري..
مي: اوكي اوكي .. قومن خلنا نخمس شويه .. ابا الف ع بنات مدرستيه بشوفهن شو مسويات
اسما: يلا قومن..

قامن الثلاثي وتمشن شوي واستهبلن ع البنات وعقب سارت ميوه عند ربعها ويلست وياهم تتخبرهن عن امتحانات تحديد المستوى وشو مستوياتهن ..

[لامارا]

******************
(الاربعا) 25 اغسطس 2004
******************

الساعه 8 الصبح دخلت لطيفه على نايف ولقته واقف عند التسريحه يتسفر .. وشكله رااايق ع الاخر .. ومزاجه عال العال .. شاف لطيفه من المنظره وحب يغلس عليها شوي..

لطيفه: صباح الخير
نايف: اطلعي برع ودقي الباب
لطيفه: نايف عن المصاخه
نايف: لطووف اطلعي برع ودقي الباب ..
لطيفه طلعت من الغرفه ودقت الباب ..
نايف: منوو ؟
لطيفه: عن المصاخه ناااايف..
نايف: انزيين شو تبين؟
لطيفه: بدخل بعد شو ابا
نايف: صبري بفكر
لطيفه: ناااااااااايف
نايف: هههههههه ادخلي
لطيفه: والله انك قاص عليه
نايف: عشان تتادبين وتدقين الباب قبل ماتدخلين شو تتحرين وكاله من غير بواب .. باجر انا بعرس بتدفشين جيه وبتدخلين علينا
لطيفه: ويـــــــه مايسوى علينا يابوك يوم بتعرس يصير خير .. انا يايه بوعيك اشوفك مااشاء الله نشيط ..
نايف شل العطر يتعطر به : عيل شوو تتحرين ..وبعدين انا من زمان نشيط
لطيفه: هيه ماشا الله نكسر عليك باب الحجره عشان تقوم حق الدوام صدق وايد نشيط
نايف وطى العطر والتفت للطيفه : انتي شو تبين تقولين هاتي من الآخر !
لطيفه: ابا اقولك انه عشان ريمان بتي ويانا انته ناش من الصبح والا موعد امايه عفرا مايهمك ذاك الزود
نايف: وانا بختصرلج اياها .. موعد امايه عفرا يهمني اكيد وابا اتطمن على صحتها وفي نفس الوقت وجود ريمان في السيره هذي يهمني بعد
لطيفه: هيه جيه اباك خلك قوي وقولها على طول
نايف شل سويجه ومحفظته والتفت للطيفه اللي تسندت على التسريحه
نايف: لطوف ريمان ماترمسج عني؟
لطيفه: ولا نطقت
نايف: ولا سالتج ولا شي
لطيفه: ابدا
نايف: وانتي مارمستيها عني ؟
لطيفه: امبلى
نايف: شو قالت ؟
لطيفه: ماردت
نايف: اووف ليش انزين .. انتي متاكده هي موافقه والا مغصوبه ؟
لطيفه: لا مب مغصوبه بس هي وايد خجوله واحس بعدها تستحي ترمس عنك
نايف: انا اشوفني اجدم الملجه احسن يالله تتعود عليه لين العرس
لطيفه: مادريبك بس انته اصبر شوي ليش مستعيل جيه
نايف: مادري والله ..

ابتعد نايف عن لطيفه شوي ويلس ع طرف الشبريه .. شكله يفكر جد فالموضوع .. لطيفه تمت تطالعه وهو محتار .. رفع راسه وسألها..

نايف: انزين لطوف قوليلي ريمان شو تحب
لطيفه: كيف يعني.. كيف شو تحب ؟
نايف: يعني هواياتها شو .. شو تحب تسوي
لطيفه: اهااا .. شوف هي هواياتها تغصص على عمرها وتحاتي دوم .. ههههه بس تحب تقرا وايد
نايف: تقرا شو ؟
لطيفه: امم الصراحه ريمان مدمنه روايات .. وايد تقراهن بشكل ماتتصوره في اليوم الواحد عادي تخلصلك روايتين ..
نايف: روايات عاد لو شي ثاني اوكي
لطيفه: شي ثاني مثل شو يعني
نايف: مادري .. لطوف
لطيفه: يا نعم
نايف: شو رايج اشتري مجموعه كتب تعطينها اياها تقراها
لطيفه: كتب ؟ مثل شو يعني
نايف: امم تحفه العروس .. الرجال من المريخ والنساء من الزهره .. من هذيل الكتب اللي بتنفعها حق مستقبلنا
لطيفه: اونه .. يعني انته الحين تبى تتقرب اكثر عشان توافق ع الملجه هيه هاااا
نايف: لا مافكرت فالملجه . يعني انا اباها تاخذ وتعطي ويايه .. ماباها اتم كله مستحيه مني .. انزين قوليلي شو رايج بالفكره
لطيفه: حلووه.. بس اقولها انه الكتب منك يعني ؟
نايف: بتقبلهن ؟
لطيفه: الصراحه ماعرف .. بس خلنا نشتري مجموعه هالكتب ونغلفها بشكل حلو وعقب بنشوف شو بنقولها اوكيك
نايف: اوكي يالله قومي تاخرنا عليهم موعد امايه الساعه 12 ..
لطيفه: يالله انا جاهزه ..

طلعوا نايف واخته لطيفه من البيت ومروا على يدتهم اللي كانت عندها مراجعه في بوظبي .. واضطرت طبعا ريم انها تسير وياهم لانها هي اللي أكثر شي تعرف بأدوية أم سيف وصحتها ..


****

كان محمد في مقر الجريده اللي يشتغل فيها .. يالس مع رئيس التحرير ويناقشه في مقاله اليديد .. وبعد ماخلص حواره معاه ومقابلته .. اتوجه لمكتبه ولقى في تلفونه مكالمه لم يتم يرد عليها .. وكانت اللي متصله عبير ..
رجع عاد الرقم واتصل بها مره ثانيه ..

محمد: الوه
عبير: الوه هلا محمد
محمد: اهلين ..
عبير: شلونك ؟
محمد: اجلح واملح
عبير: هههه
محمد: شو لوني بعد ؟ من زود البرد اللي عندنا عشان يطلع لونا حلو .. ماشي الا ركضه بسياره الجريده من دبي لين اهنه في هالحر ..
عبير: الله يعطيك العافيه ..
محمد: الله يعافيج
عبير: محمد بغيت اذكرك
محمد: بشو ؟
عبير: عشان سالفه شحن سياره فجر
محمد: لا خلاص انا رمست بشار البارحه وهو قال بتوصل عقب 10 ايام اظن
عبير: زين ماتقصر رحت معاها اليوم وفتحنا ملف لليسن وبتقدم ان شاء الله وبتاخذ ليسن الامارات .. بس بعد في شي..
محمد: امري
عبير: ما يامر عليك عدو .. بس فجر تبي رقم تلفون حقها في البلاد
محمد: هيــــه ماعليه ان شا الله بييبلها شو تبى خط والا واصل ؟
عبير: لا واصل
محمد: خلاص ان شاء الله ..
عبير: اسمحلنا يامحمد كثرنا عليك بالطلبات
محمد: لا افا شو هالرمسه ..
عبير: خاطرك بشي معين على الغدى؟
محمد: يمكن مارجع ع الغدى اليوم اذا ماخلصت شغلي
عبير: شدعوه ماكو غيرك بها الجريده كل يوم ماترجع تتغدى عندنا
محمد: لا شي غيري بس مافي حد بمثل كفائتي وقدراتي
عبير: لا والله زين قلتلي عشان ابخرك عن العين
محمد: هههههه .. يالله عن الطنازه ان شاء الله بحاول اخلص واتغدى عندكم وكل شي من ايدج حلو ..
عبير: زين الله يوفقك مع السلامه
محمد: فمان الله ..

سكر محمد التلفون وفكر كيف ممكن يروح ياخذ لفجر بطاقه وهو مب ملحق حتى يرجع يتغدى مع اهله .. اتصل بمروان عشان يطرشه بداله

محمد: الوه السلام عليك
مروان: وعليك السلام هلا والله
محمد: اهلين هاه شو الاخبار ؟
مروان: الحمدالله ..
محمد: وين انته ؟ اسمعك في السياره
مروان: هيه مبتلش ببنت اخوك وامها .. ساير اوديهن العين
محمد: هههه يالهرم وبنت اخويه وامها مب اختك وامك
مروان: كل الطرق تؤدي الى روما
محمد: شو يسون في العين؟
مروان: هاي عنزوه جنه محد بيعرس الا هي .. عافده بخياييط العين تفصل ثياب..يمدحون مخاويرهم اونه ..
محمد: هههههه لا زين زين تستاهل عزه ..
مروان: ياخي والله جني ماخذ هالاجازه الا حق حواطتها ..
محمد: ماعليه تراك اخوها العود .. انا كنت اباك تسير الاتصالات بس برايك بتصل بخليفه بطالعه
مروان: حق شو؟
محمد: بغيت رقم حق اخت عبير .. خلاص برايك بتصل بخليفه بشوفه
مروان: انزين عيل
محمد: فمان الله
مروان: مع السلامه

سكر محمد واتصل لخليفه لكنه كان في العزبه ويا العمال ..
وفي الاخير قرر محمد يتصل بسلطان رغم انه كان شاك انه سلطان واعي هالحزه لكنه استغرب يوم لقاه راد عليه ..

محمد: الوه هلا سلطان
سلطان: هلا خالي اشحالك ؟
محمد: بخير وانته ؟
سلطان: الحمدالله
محمد: وينك انته ؟
سلطان: انا عند خالي راشد في الشغل
محمد: ماشا الله .. انزين تروم تترخص من راشد شوي بغيتك في شغله
سلطان: آمر
محمد: مايامر عليك ظالم .. اباك تسير الاتصالات وتطلعلي رقم واصل
سلطان: حقك ؟
محمد: لا ..
سلطان: عيل لمنو
محمد: لواحد .. بتسير ولا
سلطان: بسير بس منو ها الواحد اللي مايروم يظهرله رقم بروحه!
محمد: بتسويلي تحقيق انته
سلطان: لا بس يعني استفسر
محمد: ماتيوز انته ..
سلطان: انزين قول لمنووه؟
محمد تغصص من سلطان وقاله: لاخت عبير
سلطان خفت ملامح الحده فويهه وابتسم شوي اول ماتذكر اخت عبير .. فجر ..
سلطان: اهاا جان قلت من اول يعني لازم تشغل الفضول فينا .. خلاص ان شاء الله بسير ..
محمد: زين بتسوي والله بتريحني لانه انا مول ماعندي وقت
سلطان: لا لا بسير افا عليك
محمد: اعتمد يعني ؟
سلطان: اعتمد
محمد: خلاص اول ماتيبه اتصلبي خبرني
سلطان: ان شاء الله .. مع السلامه
محمد: مع السلامه ..

سكر سلطان عن خاله وهو سرحان فتفكيره .. شكل نواياه ها المره مب سهله بس محد يعرف للي يفكر فيه سلطان وشو ممكن يسويه ..
زقره خاله راشد وانتبه له .. كمل الشغل اللي فايده وترخص عقب من خاله وقاله انه محمد مطرشنه يسويله شغله .. وطلع للاتصالات وظهر الرقم .. لــفجر..


****

في طريق بوظبي كانن ام سيف وريم يالسات ورا .. ولطيفه يالسه جدام حذال نايف .. ريم اول مابغت تركب السياره حاولت تيلس ورا لطيفه عسب تتجنب اللي ممكن يصير عقب وهي يالسه ورا نايف.. لكن كان ها الباب اقرب ليدتها الشي اللي خلا ريم تضطر تيلس ورا نايف ..
كانت ريم مستاءه من الوضع وايد خصوصا لما عرفت انه نايف اللي بيوديهم من بعد ماتعذر ابوها .. وفوق هذا زادها استياء يلستها ورا نايف..تحسبه قريب منها وايد .. تمت مرتبكه طول الوقت .. بغت تتهرب من ها الجو وفتحت شنطتها وطلعت روايتها تتسلابها .. نايف شافها من الجامه وتذكر كلام لطيفه عن حب ريم للقرايه.. كل شوي كان يطالعها ويوم يحس انها بترفع راسها ينزل عيونه ع طول ..لكن جكته ريم وهو يختلس النظر عليها حست بحراره فضيعه فويها .. حتى الروايه ماقدرت تيودها عدل وكل شوي تبدل فالصفحات بس عسب تتهرب..
نايف ماحب احساسها بعدم الراحه والربكه.. وتم يلوم نفسه وايد لانها انتبهت عليه وهو يطالعها ..مد ايده ورفع الجامه شوي ع فوق عسب ترتاح ريم وتعرف انه ما بيقدر يشوفها خلاص..
لطيفه انتبهت لحركة نايف وسألته باستغراب: ليش رفعت الجامه ؟ كيف بتشوف الحين الشارع ورا ..

نايف سكت ومارد عليها لكن ريم انتبهت لسؤال لطيفه ولما رفعت راسها هالمره شافت انه نايف رفع الجامه وانه مايقدر يشوفها احين ..
استغربت من حركته هاي .. بشو ممكن تفسرها
هل نايف يحترم رغبتها في انها ماتباه يتم يطالعها ؟
او انه حس باستياءها وهالشي ضايقه وخلاه يتصرف هالتصرف؟
تمت تفكر وايد في هالشي لكنها قطعت تفكيرها ورجعت لروايتها اللي فايدها تكملها ..
بعد ساعتين ونص وصلوا بوظبي .. وعلى طول توجهوا للمستشفى عشان موعد ام سيف .. بعد الفحوصات طلعت نتايج ام سيف سليمه الحمدالله وصحتها في تحسن..
طلعوا من المستشفى وكانت الساعه 2 الظهر ..
نايف: هاه امايه نسير نتغدى ؟
ام سيف: وين نتغدى بعد
نايف: فمطعم
ام سيف: لا لا مابا ردني البيت
لطيفه: حشى يا امايه طالعين من الساعه 8 ماكلنا شي .. يعنا
ام سيف: لا انا ابا اروح .. فديتهن بناتي بيوصلن اليوم
لطيفه: يـــيــه ذليتينا عاد انا يوم سرت الجامعه محد سوالي سالفه جيه حتى يوم نايف سافر .. شمعنى يت على ساروه وميوه
ريم نست وجود نايف وردت عشان تغايظ لطيفه: نحن وياها في البيت مجابلتنا 24 ساعه انتن بعيد عنها ..
لطيفه: يالله وين بعيد عنها بعد
ام سيف: يالله اسكتي يالطوف .. سارت عني ساروه وميوه وبتلحقهن ريمان .. مادري شو بسوي بعمري انا
ريم اسكتت كلام يدتها احرجها والاكثر وجود نايف ..
نايف: برايه امايه بنعيش عندج
ام سيف: صدق؟ جان زين
لطيفه: ههه لا مايستوي بنات عندكم في البيت
ام سيف: مايخصج انتي انا بخليهم في الحجره اللي حذالي محد فيها
ريم ماعرفت شو تسوي حزتها كانت وايد منزعجه من هالطاري ومب عارفه شو تسوي عشان يسكتون عنه ..
لطيفه اللي التفتت لها بها الوقت وهي تبتسم لاحظت الاستياء على ملامح ريم وماحبت انها تتظايج زياده .. وحاولت تغير الموضوع
لطيفه: مب لازم نسير نتغدى عيل مربنا أي مكان بناخذلنا سندويشات او أي شي خفيف ..
نايف: هاه ام سيف شو رايج ؟
ام سيف: زين احسن عشان نوصل من وقت .. ريم امايه اتصلي اطاعي خواتج جان ظهرن
ريم اتصلت بمي وعطت السماعه يدتها ترمسها ..
ام سيف: الووه
مي: فدييييييت هالحس انا يعلني ماخلى منه
ام سيف: هههه فديتج الغاليه اشحالج؟
مي: بخير انتي اشحالج شو نتايجج؟
ام سيف: الحمدالله كلها زينه
مي: الحمدالله
ام سيف: ظهرتوا والا بعدكم ؟
مي: بعدنا امايه ماطلعنا غربلونا يعلهم ان شاء الله
ام سيف: جي بعد
مي: لعوزوني اوني مب مسويه تصريح ورديت الاداره عسب يسوولي والحين راكبين الباص.. ثنتين ونص بيحرك
ام سيف: واعليه عنكم .. يوم قلتلج شو تبينها الجامعه الا سقم.. درسي ويا ريمان ماطعتي.. تبعتي شور ها الرغيد ساروه
ضحكت ميوه ع رمسة يدتها: هي والله صدقج يا امايه انها رغيد.. مب مخليه بنت ماعرفتها فالجامعه ..
ام سيف: سايره تلعب الهرمه هي .. بس ماعليه دواها عندي
ساره انتبهت لرمسة مي وبغت تمط التيلفون من مي بس مارامت الها ..
مي: انزين امايه.. انتوا بعدكم ماوصلتوا ؟
ام سيف: احين ظاهرين
مي: زين بتوصلون قبلنا
ام سيف: هيه اظن
مي: زين امايه انا ميته من اليوع
ام سيف: فديتج ليش ما ياكلونكم اهناك
مي: والله اكلهم سقم يا امايه .. ناكله غصبن عنا
ام سيف: وعليه عنكن انزين امري شو تبين ع العشا
مي: كل شي ابى .. سولوي معكرونه بالباشميل اهم شي .. وبيتزا وورق عنب.. وشو بعد .. هي قرص مدقوق ويا اللبن بعد والله مشتهتنه
ام سيف: يالله يالله هذا كله تبينه
مي: هيه والله امايه في خاطريه
ام سيف: ههه فالج طيب بنت سيف ولا يهمج .. بس عاد القرص دقي لامج خلها تسويه شغلة البداو هاي
مي: هههههههه ماعليه يوم بنسيرلها بخليها تسويلي.. اقول امايه منو بيي ياخذنا؟
ام سيف: ابوج والا الدريول
مي: زين يوم بنكون قراب بنتصلبكم عشان يظهرون
ام سيف: زين تسوين .. يالله عيل فداعه الرحمن
مي: فمان الله ..

ام سيف: هههههه فديتها ميوه ميته من اليوع ماخلت شي ماقالت تبى تاكله
ريم: وشو اللي بتسويه الها اميه
ام سيف: فخاطرها قرص ويا اللبن ..
لطيفه: ههههههه ها كورن فليكس البدو
ريم: هي انتي اطنزي يا الهرمه ..
نايف ابتسم ووجه الكلام لام سيف: عيل العشا عندج اليوم ام سيف
ريم اطالعت يدتها بنظرة يأس وكأنها تقول .. وأنا ناااقصه!!
ام سيف: حياك الله .. يالله انته سوق سوق خلنا نوصل ونسوي عشى بنت سيف.. ريموه اتصلي البيت برمس نجموه عن العشا..

ريم رغم توترها الا انه اهتمام يدتها وفرحتها بخواتها ورجعتهن البيت حسستها بفرحه وعرفت شكثر يدتها تعلقت فيهم خلال ها الفتره القصيره .. وهالشي يخليها بعض الاحيان ترتاح من ناحيه محاتات اخوانها..


****

الساعه 4 العصر احلام كعادتها ..ملانه وما تعرف شو تسوي .. اخر شي قررت تفتح درجها وتطلع اوراق ابوها .. وتطبعله الروايه اللي كاتبنها بخط ايده على الكمبيوتر عشان تكون جاهزه مطبوعه اول مايخلصها .. وتفاجأه بهذا الشي ..
قفلت باب الغرفه ويلست ع الكمبيوتر تطبع ..
في هالوقت اندق الباب وركضت احلام تدس الاوراق وتخزن اللي كتبته بسرعه وتفتح الباب
عبير: ساعه لين تفتحين الباب
احلام: اسفه
عبير: شو كنتي قاعده تسوين ؟
احلام: اقرا قصه ع الكمبيوتر
عبير : بلا هالقصص والخرابيط اللي تقرونها وتشحن مخكم بالافكار الغلط
يلست احلام على السرير بلامبالاه: اذا افكار القصص غلط ترا تربيتكم انتوا صح
عبير ماعرفت ترد على احلام خصوصا انه ردها سكتها ..
يلست عبير حذالها: احلام شو رايج نتمشى برع
احلام: وين ؟
عبير: في الفريج .. احس اني صايره كسوله وقليله حركه
احلام: فجر بتروح ويانا ؟
عبير: ماقلتلها
احلام: اذا بتروح انا مب رايحه
عبير: اظن انها نايمه للحين ماقعدت
احلام: اوكي بسير وياج .. عموه عليا بتي ويانا ؟
عبير: لا عليا وعمتي وشيخه بيروحون عزا
احلام ابتسمت: اوكي ثواني وبكون جاهزه ..
عبير: يالله انا بروح البس

سكرت احلام الكمبيوتر وسارت تلبست وطلعت لقت امها يالسه في الصاله تترياها
وطلعن يتمشن في الفريج .. كانت سوالفهم في البدايه عاديه .. وبعدها ساد الهدوء لين قطعته احلام بسؤالها: اميه
عبير: نعم
احلام: ابويه كيف حبج
عبير التفتت لاحلام مستغربه هذا السؤال: شنو هالسؤال بعد!! مو منكم من اللي تقرونه
احلام: اميه جد ارمسج يعني كيف شافج كيف خذج
عبير: ابوج كان رفيج بشار اخوي بالكليه يدرسون مع بعض
احلام: انزين وعزمه خالي عندكم في البيت وانتي كنتي تفازعين امج وسرتي تودين الاكل الميلس وشافج
عبير: صج حجي قصص
احلام: ههههه انزين خلاص قوليلي كيف
عبير: شوفي ايامها انا كنت يمكن في عمر ريم بنت عليا .. وكنت مو متحجبه تعرفين امي اجنبيه ولو انها اسلمت لكنها ماتحجبت وانا كنت مثلها ..
احلام: ويه عيل ما تنلام فجر!
عبير: فجر عندها اللي يصححلها افكارها او يقولها الصح من الغلط..لكن انا ايامها امي كانت لو انها مسلمه بس ماتعرف لامور الدين وايد.. يعني كنت شراتها وماتحجبت ..
احلام: فديتها ببوشكا
عبير: هههه من علمج ببوشكا
احلام: هههههه مب صح ببوشكا يعني يدوه بالروسي؟
عبير: ايه صح من قالج ؟
احلام: هييه عيل تتحرين انا سهله .. انا اشبه يدوه لازم ارمس روسي شراتها
عبير: هههه
احلام: انزين كملي
عبير: المهم انه ابوج كان رفيج بشار يروح ويرجع معاه .. وعادي يدخل البيت يسلم على ابوي وامي وانا كنت اقعد معاهم
احلام: ومشتغلين انتي وابوي كلام بالعيون
عبير: هههه لا يالطفسه بس ابوج على طول كلم بشار انه يبي يخطبني
احلام: وانتي ماجذبتي خبر
عبير ظربت احلام على جتفها: احلاموه بتسكتين والا ماكمل !!
احلام: هههه خلاص بسكت
عبير: امم طبعا لمن قال بشار انا اوكي وافقت بس امي مارضت
احلام: ويه شحقه !
عبير: تعرف اني بروح بعيد عنها
احلام: هيه صح .. انزين
عبير: ابوي كان وايد معجب بمحمد وباخلاقه عشان جي ماعارض ها الزواج.. بالعكس شجعني وتزوجت ابوج على اساس اقعد بالكويت لين يخلص دراسه بعدين ارجع معاه الامارات ..
احلام: وانتي عادي كان عندج تين الامارات
عبير: كنت متردده بس انا شريت ابوج
احلام: انزين وابويه عاش عندكم؟
عبير: ابوج مارضى يسكن معانا بنفس البيت .. عشان مايقولون انه قاط نفسه عليهم ومحملنهم مصاريف كل شي
احلام: والنعم بابويه
عبير: اجرنا بيت يم بيت ابوي كان صغير صاله وغرفه ومطبخ وحمام
احلام: بسج بعد شو تبين اكثر عن جيه
عبير: احلاموه سكتي عاد
احلام: انزين انزين
عبير: سكنا فيه لين يبتج وصرت كل يوم اوديج عند امي واروح الجامعه مع محمد واحيانا يكون عندي امتحان العصر محمد يوديني الجامعه ويقعد يحوطج بالسياره لين تنامين واخلص انا
احلام: هههه وحليلي كنت ماذتنكم .. انزين اميه كيف تحجبتي عقب
عبير: من خذت ابوج بديت اتحجب لان هو طلب ها الشي .. تعرفين وايد اشيا فأمور الدين علمني اياها ابوج ماكنت اعرف عنها وايد .. والحمدلله ويا العشره وياه صرت ملتزمه بديني ولله الحمد ..
احلام ابتسمت لامها : انزين وعقب ..
عبير: المهم..ومشت الايام لين الغزو والمأساه اللي صارت .. طلعنا من الكويت .. توفت امي في الطريق قبل مانوصل السعوديه لانها كانت مريضه واسروا ابوي..رجعنا الامارات تقريبا تمينا لين هدت الاوضاع فالكويت وصار التحرير.. وعقب رجعنا الكويت عشان يكمل ابوج دراسته.. ولما خلص واستلم شهادته رجعنا بلاده.. اللي هي بلادي الثانيه..
احلام: فديت الامارات والله .. انزين اميه انتي ليش ماكملتي دراستج دام ابويه رد يكمل ..
عبير: ماعرف .. كانت حالتي النفسيه هاذيج الفتره ماتسمح .. تخيلي يعني أزمة البلاد ووفاة امي وأسر ابوي وانتي كنت اربيج منو بيهتم فيج وانا اسير الجامعه.. كانت امي تساعدني لكن عقب منو بيمد لي ايد العون!!
احلام: فديتج والله يا امايه .. انزين احين مب في خاطرج تكملين؟
عبير: اكيد
احلام: ليش ماتكملين عيل ؟
عبير: انا ماكملت قبل بكمل الحين
احلام: هيه ليش لا .. مافيها شي
عبير: وانتوا وين اخليكم؟
احلام: احنا مب صغار احين كبرنا ومن حقج تكملين دراستج وبعدين بتحققين حلمج وفي نفس الوقت بتعاونين ابويه
عبير: وين اكمل ؟
احلام: كملي في كليه الخليج الطبيه في عجمان وروحي كل يوم وارجعي
عبير: ومصاريف دراستي؟
احلام: ابويه مابيقصر فيج لين تخلصين
عبير: لا ويه احلام انتي تعرفين الطب كم سنه ؟ وبعدين كم بيصير عمري لين اخلص
احلام: اوكي مب مشكله درسي شي ثاني في جامعه عجمان
عبير: مثل شنو؟
احلام: علاقات عامه مادري شو أي شي
عبير: امم ماعرف
احلام: اميه كملي دراستج حلو انج تكملين وحتى لو ماتشتغلين شهاتج تكون عندج
عبير: ان شا الله بفكر في الموضوع
احلام: زين ..

سكتت احلام عشان تعطي امها تفكر في كلامها .. حلو انه امها تكمل دراستها خصوصا انه بناتها كبار احين وبعدين ع الاقل بتسلي وقتها بدال ماتيلس فاظيه طول اليوم .. لكن سرعان ما شلت عبير ها الفكره من بالها.. ماتقدر تثجل على محمد ..

****

الساعه 5 العصر كانوا جاسم وعمار ومايد سايرين مع السايق عند مواقف الباصات اييبون خواتهم .. ومعاهم مها ومهرهاللي ركبن بالدس عن الاولاد لانهم ماكانوا طايعين يسيرن وياهم .. يوم وصلوا الموقف طلعن التوم من الدبه وهن يضحكن .. لف عليهن عمار اللي انصدم بوجودهن ..

عمار: انتن شو ياابكن؟
مهره: ينيات نحن طرنا ووصلنا هنه
جاسم: يا الخااايسات مب قايليلكن ماتن ويانا
مها: يا سلام ع كيفك هوو ..
مايد: عاد تمن يالسات ورا .. ماشي مكان
مهره: ماعليه عادي المهم يينا وياكم..

طنشوا الجماعه السالفه وعفد جاسم ع المسجل وشغل الاف ام .. يت اغنيه انطرب عليها جاسم وقام يسوي حركات وايبس براسه .. ومايد يطالعه ويضحك عليه

مايد: ايه انته حد ايوول فالسيااره
مهره: هههههه طلع فيه عرج البداو
عمار: علمني شقى ايول
مها: لا لا مانعلم .. الحظر ما ايولون بس البدو
عمار: عدال عاد انتي .. من الله احظريه ترااج
مها: لا انا بدويه
عمار: ابوج حظري
مها: شعليه انا من ابويه اميه بدويه
عمار: الواحد لاصل ابوه
مهره: عاد نحن لاصل امنا رابين هناك واتطبعنا بطبايعهم
جاسم: بس اسكتوووا حشره.. اففف
مايد:انزين جسوم يوم بنسير البيت تعلمني
جاسم: انزين فكنا احين انته

تموا مرتبشين في السياره لين وصل باص البنات.. انتبهت ساره لسيارتهم ودقت لمايد تقولهم انه ها الباص هو باصهم .. نزلوا مايد وعمار والدريول يشلون شنط البنات .. وركبن البنات السياره وارتبشن هن الثانيات ويا خوانهن فالسياره ..

عمار: هاه اقول حق الدريول يوديكن البيت سيده
مي: لا لا لا ودوني حوطوني ابا اشم هوا راس الخيمه يعلني ماخلى منها
اسما: هههه حليلها اول مره تسير حوطوها شوي

حاطوا شوي العيال بالسياره ع الكورنيش وطلبوا عصاير ويلسوا يشربون ويتمشون لين اتصلتبهم ام سيف تهزبهم ليش تاخروا .. وصلوا عيال مريم وعقب ردوا البيت ..
ام سيف اول ماشافت مي وساره استااانست وايد .. ساره كانت تبى ترقد لانها مواصله وتعبانه اما مي تمت لاصقه بيدتها وحاضنتنها.. ترخصت منهم ساره وسارت حجرتها ووطت رااسها ورقدت .. اما مي من بعد ماعطت يدتها تفصيل اسبوعها كيف كان وخبرتها عن امتحاناتها وشو سوت فيهن ..

ام سيف: انزين سهلات عاد امتحاناتج؟
مي: يعني نص نص .. المهم طحت فمستوى اول عربي وثاني فالرياضيات والكمبيوتر ..
ام سيف: يالله جيه عاد اول بس فالعربي.. ثرج مب شاطره فالرياضيات وها ربيعكن الجامبيوتر..
مي ضحكت على يدتها.. اما ريم صححت مفهوم يدتها للمستويات ..
ريم: امايه .. فالجامعه مستوى اول يعني اساس ماعدت فالامتحان لكن ثاني حلت زين فالامتحان وعدت المستويات الاولى
ام سيف: كيف ها بعد
مي: هههههه والله امايه سوتلنا سالفة ابو وحده من ربعنا .. طاحت كله فمستويات اولى ويوم خبرته عن مستوياتها قالها عاد زينه ها المستويات قالتلته امره فوق الزين بعد ههههههه والله هلكتنا من الضحك ..
ريم: وحليله ابوها قاصه عليه .. يلا عاد بنشوف الانجليزي فاي مستوى يحطونج..
مي: واخيبتيه اخاف اول .. اسميني بكون ميح فالعربي والانجليزي..
ام سيف: لا ان شاء الله يطلع مستواج زين
مي غمزت لريم: امااايه ترا لو اول يعني انا توووب فالانجليزي
ام سيف: لا عاد عن تقصين عليه جي تتحريني هب فطين تراج تقولين اول يعني اخر شي اسااس الا ..
مي: هههههههه فديييت عيوووزي انا .. ذكيه ..

ريم ابتسمت وهي تشوف ميوه كيف لاصقه بيدتها وكل شوي تنغزها وتغصصبها .. تحرج عليها ام سيف وتهزبها لكن شوي تلقاهن يضحكن .. قامت ريم من عندهم وسارت المطبخ تشوف نجمه شو خبصت ع العشا .. وقالت بتساعدها شوي.. الفقيره أمرت عليها ام سيف تطبخ من كل أصناف الاكل ويدوبها تلحق تسوي كم أكله .. زقرت مها ومهره وسارن كلهن المطبخ يساعدن نجمه

[لامارا]

هذي تكملة الروايه




******************
(السبت) 4 سبتمبر 2004
******************

الساعه 7 الصبح نشت فجر على صوت المنبه .. فتحت عيونها بكسل واعتدلت في طيحتها .. وهي متملله وتحس راسها بينفجر ..
كانت هاي ليلتها الاولى في السكن .. وماياها رقاد موول .. طول الليل تتجلب
و نشت وهي متظايجه .. هذا اول يوم دوام جيه بتروحه وهي مسطله ..
تغسلت ولبست ثيابها .. كانت لابسه بنطلون جينز ازرق مع قميص اخضر فاتح ايده قصيره .. فتحت شعرها ولبست نظارتها الشمسيه وطلعت وهي شاله شنطتها
نزلت من المبنى وركبت سيارتها الحمرا اللي طرشولها اياها من الكويت .. وتوجهت للكليه ..
كانت ماسكه ورقه الجدول في ايدها وتحاول تعرف اول محاظره لها وين .. عرفت المبنى وتوجهت له .. لكن ماعرفت موقع القاعه ظلت تمشي لحد مالقتها ..
ودخلت .. كانت المحاظره باديه من 10 دقايق ..
يلست على واحد من الكراسي الفاظيات اللي حصلتهم في وسط القاعه .. بعدها بخمس دقايق دخل شاب.. على طول توجه للكرسي الفاظي حذال فجر ويلس ..

احمد: ممكن اقعد
فجر: قعدت خلصت
احمد: اوكي اقوم؟
فجر: خلاص it's ok

سكتت فجر وهي تحاول تسمع الدكتور شو يقولهم عن تعليمات الكورس ..
وطلب منهم يكتبون شي ..
فجر ارتبكت لانه ماكان معاها ورقه.. والتفتت للي يالس حذالها كان عنده

فجر: ممكن تعطيني ورقه ؟
احمد خذ ورقته وعطاها : تفضلي
فجر: مشكور
احمد: it's ok

فجر حاست بوزها وبدت تكتب اللي طلبه منهم الدكتور .. وبعد المحاظره قام احمد من مكانه وتمت فجر يالسه..

احمد: خلصت المحاظره
فجر: اعرف بس ابي اشوف المحاظره الثانيه وين باي قاعه
فتحت فجر جدولها .. وتمت تقرا فيه
احمد: ممكن اشوفه ؟
فجر عطته الجدول ..
احمد: محاظرتج بعد ساعه في المبنى الثاني اللي مجابل هذا المبنى
فجر: مشكور
احمد: العفو ..
قامت فجر من مكانها واحمد مشى قبلها
فجر: لو سمحت ؟
احمد: نعم
فجر: وين الكافتيريا ابي اتريق لين المحاظره الثانيه
احمد: انا ساير الكافتيريا احين اذا تبين امشي ورايه بتعرفين وينه
فجر: خلاص اوكي

مشت فجر وراه لكنه عقب بدت توازيه في المشي عشان ماتظيع
فجر: انت من الامارات؟
احمد: هيه
فجر: انا من الكويت
احمد: عرفت
فجر: شلون ؟
احمد: لا بس حسيت يعني
فجر: ايه
احمد: وصلنا هذا الكافتيريا .. تامرين بشي؟
فجر: مشكور ماقصرت
احمد: مع السلامه
فجر: باي

ابتعد احمد عن فجر ولا رد يلف عليها .. وهي الثانيه توجهت للكافيتريا تطلبلها شي تاكله لانها بتموت من اليوع .. يلست بروحها ع طرف وسلت عمرها بالاكل اللي جدمها ..

****

الساعه 2 الا ربع الظهر .. كانت مي طالعه من السكن الداخلي للطالبات وسايره صوب مبنى 63 والمتعارف عليه عند بنات الجامعه باسم "اللابات" كان اول كلاس عندها لغه عربيه .. تمت تمشي ومب عارفه الدرب اللي بيوصلها لها المبنى..ساروه مارضت تطلع وياها لانها كانت سهرانه طول الليل ورقدت الصبح وماطاعت تنش.. اما اسما ولطيفه فتلومت انها تطلب منهن يوصلنها ويراونها المباني.. ربعها مال المدرسه تقريبا ماتعرف عنهم شي .. يعني ماعندها حد .. تمت تمشي فالممر اللي مجابل بوابة السكن .. شافت مجابلنها مبنى تعرف شكله او تحيد انها داخلتنه فامتحانات تحديد المستوى واللي تذكره كان يتسمى" الونقات" وساروه قايلتلها انه اللابات حذال الونقات واللي مجابل الونقات هي مكاتب الاساتذه.. تمت واقفه مب عارفه وين تسير .. شافت مجموعه كبيره من البنات كل وحده قابضه جدولها وتقرى فيه واللي ترمس بالتيلفون وتسأل عن مكان المبنى اللي بتدرس فيه .. ماعرفت تتصرف .. سمعت صوت وحده تستأذنها بطلب .. لفت عليها مي..

مي: نعم؟
البنت: لو سمحتي وين مبنى 63
مي حست بحراره فويها ماعرفت شو ترد على البنت ..
البنت: تعرفينه وين؟
مي: انا بروحي ابا اسيرله .. ماعرف اي مبنى من هاذيلا ..
البنت: انزين انا قالولي هذا المبنى الونقات ..
ولفت البنت يمين وأشرت ..
البنت: وسمعت يقولون المبنى الأبيض هو الزدات..
مي شافت المبنى الأبيض وتحس بقلبها ارتاح .. شافت البنت وابتسمت الها ..
مي: عيل خلاص هذاك المبنى هو اللابات.. خلينا نسير وبنشوف

مشن الثنتين وبدت اطراف الحديث امبينهن .. وصلن المبنى المقصود وكل وحده بطلت جدولها تبى تعرف رقم الكلاس .. مي طلع كلاسها 16 اما البنت 15 .. وثنيناتهم عندهن اول كلاس عربي ..

مي: يالله لو طحنا فنفس الكلاس صدق بتكون صدفه عجيبه
البنت: ههههه يلا ماعليه كلاساتنا حذال بعض بنتشاوف مرتين فالاسبوع
مي: اتمنى .. يلا اخليج الحين بدخل الكلاس
البنت: اوكي ..

دخلت مي كلاسها وكانن تقريبا فوق العشر بنات يالسات وكل وحده ساكته .. سلمت مي ويلست ع طرف .. تشوف الويوه اللي فالكلاس .. ولا وحده تعرفها.. تأففت وجتفت ايدها وهي تنقل نظرها فالكلاس.. ها اول كلاس وتحس نفسها مب مرتاحه كيف بتكمل ها اليوم .. لكنها تعوذت من بليس وتمت تفكر فالشي الايجابي من ورا ها الدوام ..

****

الساعه خمس العصر يلست ريم ويا يدتها فالصاله تحت من بعد رقاد طول الظهر بسبة الدوام والتعب اليوم ..
دخلن مها ومهره الصاله وكل وحده شاله شنطتها اللي ممزوره من الكتب والدفاتر.. ويلسن ع الارض وطلعن كل كتبهن عسب يجلدنها .. نزلت ريم ويلست حذالهن عسب تساعدهن فها الشغله اللي مب متعودات التوم عليها .. وزقرت ريم على مايد وجاسم عسب اييبون كتبهم واتجلدهن الهم بالمره..

ريم: يالله جسووم بسرعه ..
جاسم: انا ماروم اييبهن .. ميود قوم هات كتبك وكتبي
مايد: جي مكلف عنك انا
ناعمه: انتي تجلدين كتبهم ؟
ريم: اميه كانت تجلدلنا كتبنا ونحن نفازعها انا وساروه وميوه
ناعمه: انا كل سنه اودي كتب عفاري وميود المكتبه يجلدونهم
ريم: يالله بالستر حتى التجليد ماتروميله.. هاتي كتب عيالج انا بجلدهم..
ناعمه: انا ماعرف اجلد اصلا.. خلاص زين ماتقصرين .. بخلي عفاري اتيب كتبها..
مايد: يلا جسوم قم بسرعه
جاسم: اووهو
ريم: يلاا جااسم .. سيروا هاتوا كتبكم بسرعه ..
ام سيف: بيلس حذالكن بفازعكن
ريم: تمي محلج اميه وين بتيلسين ع الارض ..
ام سيف: ماعليه شر ..بفازعكم
قامت اليده من الغنفه وقبل ما تيلس يابتلها مها مخده تيلس عليها عسب ما تتعب من الارضيه الصلبه..
مهره: ريموه اميه عليا قالتلنا مساعه فالمدرسه انطرش كتبنا عندها وهي بتجلدهن..
مها: قلنالها نحن بنجلدهن عادي ..
ريم: زين سويتن .. مافينا نعبل عليها ..
ام سيف: ياحليلها امكن تحاتيكن
ريم: هي فديتها والله اميه ..
بدت ريم تجلد لمايد وجاسم وعفرا .. اما مها ومهره يلسن يجلدن رواحهن من بعد ماعلمتهن ريم كيف يجلدن صح..
وام سيف كانت بعد مايخلصون تجليد الكتب يعطونها اياهن تقصص الزوايد
كان شعور ام سيف غريب اول مره تحسبه بها البيت .. اول مره تحس ببدايه الدراسه او بالدراسه نفسها .. كانوا عندها مايد وعفرا بس ماحست بهاي الاجواء من قبل .. و مايد كان شعوره من نفس شعور يدته ومتحمس وايد على غير أي سنه ثانيه مظت ..


****************
(الثلاثا) 7 سبتمبر 2004
****************

في احد مطاعم الجامعه الامريكيه كانت فجر يالسه مع بنتين كويتيات تعرفت عليهم من السكن الجامعي وتمت تيلس وياهن لانها ماتعرفت على غيرهن .. كانوا البنات اكبر منها بسنه .. وممكن تستفيد منهم بحكم انهم قدامى بالجامعه ..

لولوه: فجر شرايج نطلع اليوم ؟
فجر: نطلع .. وين نروح ؟
دلال: نروح السينما والا سنتر
فجر: ماعرف
دلال: شنو ماتعرفين .. راح نطلع يميع بسيارتج عشان تدلين المنطقه بالمره
فجر: اوكي مو مشكله
لولوه: ويه طالعوا مو هذا احمد ؟
دلال: ايه اهوو
فجر ارفعت نظرها وانتبهت انه هو نفسه الشاب اللي كلمها في اول يوم دراسه
فجر: تعرفونه ؟
لولوه: منو مايعرفه !
فجر: ليش يعني ؟
دلال: وايد وسيم لكنه مايعطي البنات ويه
فجر: ليش ؟
لولوه: مغرور وايد .. ومايتكلم مع احد من البنات مع انهم يموتون ويلتفت صوبهم
فجر تمت ساكته واستغربت .. هو كلمها و ساعدها .. ليش يعني ؟!
دلال: شفيج فجر
فجر: ماكو
لولوه: يالله خلونا نروح نبدل هدومنا ونطلع
فجر: يالله ..

طلعن البنات من عقب مابلدوا ثيابهم.. اتوجهوا لاحد سناتر الشارجه ويلسوا يتحوطون فيها .. دخلوا السينما وتغدوا وبعدها رجعوا السكن ..
فجر كانت تحس انها مستانسه مع البنات وبدت تتاقلم معاهم .. وشوي شوي بتقدر تحفظ المنطقه وتقدر عقبها حتى تطلع بروحها ..

****

الساعه 2 الظهر طلعت ناعمه من دوامها مروحه بيتها .. كانت تسوق وترمس في التلفون مع صديقتها امل .. كانت نبرة صوتها حاده وعاليه وتدل على غيظ كبييير وقهر ..

امل: انا قلتلج من قبل انه الموظف هذا مب هين
ناعمه: الحيين انا يقوم يشتكي عليه عند المدير على شو
امل: ناعمه انتي ماتعرفين تسكتين عنه دومج محطيه راسج براسه
ناعمه: يخسي الا هو اسكت عنه.. انا براويه شغله الخايس
امل: ماتوبين انتي شو بتسوين بعد ؟!
ناعمه: بخبر عليه سيف بخليه يتصرف وياه
امل: ياربي اسميه هذا سيف مبتلي من وراج
ناعمه: اموووول
امل: هي والله صدق
ناعمه: امل انا مب ناقصتنج انتي الثانيه
امل: خلاص انزيين بنسكت ما بنعلق..
ناعمه: يكووون احسن ..

وفها الوقت وقفت ناعمه عند الاشارات .. وخذت اخر جهه من الشارع عشان تلف يسار .. انشغلت ناعمه بالتيلفون والهذره ويا ربيعتها ..و لما صارت الاشاره خضرا انتبهت ناعمه الها وبدل ماتاخذ الناحيه اليسار مشت على طول ودعمت السياره اللي كانت حذالها وبتلف يسار ..
وقفت السياره بسرعه وتمت يالسه مكانها من الخوف .. تلفونها ماتدريبه وين طاح ونزلت من السياره على طول تشوف اذا اللي في السياره الثانيه صابه شي خصوصا انه الظربه يت عند باب السايق .. مشت وهي خايفه وتوجهت للسياره الثانيه .. كان فيها شاب دقت عليه الدريشه و اصابعها ترجف..
ناعمه: انته بخير !!
لكنها ماسمعت شي كان يشوفها ويحاول يفتح الباب لكن ماقدر .. وحاول انه يتحرك ونزل من الباب الثاني
ناعمه: انا اسفه ماكنت اقصد
سلطان: عميا انتي ماتشوفين ؟ واقفه عشان تلفين يسار شو اللي خلاج تمشين سيده ؟!!
ناعمه وهي خايفه: كنت ارمس بالتلفون
سلطان: ياسلاااااااام عليج ارمسي وسولفي وادعمي خلق الله
ناعمه: انته ليش تصارخ عليه
سلطان: احمدي ربج انا مامديت ايدي عليج .. خس الله هالويه .. انطبي خليني بتصل حق الدوريه

اتصل سلطان وسارت ناعمه صوب سيارتها تدور تلفونها واتصلت حق زوجها ..
وصلت الدوريه وخططوا الحادث وطبعا الغلط كان راكب ناعمه وفوق هذا خذت مخالفه بسبب كلامها بالتلفون ..
في هالوقت وصل سيف لمكان الحادث .. واول ماشاف سلطان تم واقف وكانه مشبه عليه .. سار صوبه بيرمسه ..

سيف: السلام عليك
سلطان: وعليكم السلام
سيف: اسمحلنا ياولدي وان شاء الله السياره بنصلحها لك..
سلطان تم يطالعها وكأنه هو الثاني مشبه عليه ..
سلطان: ماعليه .. بس قولها لاتم ترمس في التلفونات وهي تسوق بتجتل خلق الله
سيف: ان شا الله .. منو اسمك انته ؟
سلطان: سلطان
سيف: عاشت الاسامي
سلطان: عاشت ايامك ..
سيف لف صوب السياره بيشوفها .. ورد لا ارادي لسلطان وتم مركز فيه ..
سيف: سلطان انته ولد منو؟!
سلطان عقد حياته
سيف: شو اسمك بالكامل؟
سلطان بدون تردد: سلطان سالم بن مانع
سيف: يدك سلطان بن مانع؟؟
سلطان وكأنه بدى يشك بمعرفته لها الشخص بس ماعرف منو ها بالضبط..
سلطان: هيه .. ابو الوالده ..
سيف: هممم يعني راشد خاالك ؟
سلطان: هيه خالي ..
سيف ابتسم وهو يشوف سلطان .. ماشالله كبروا الشباب .. يذكرهم يوم هم صغار..كان متعلقنهم واايد خصوصا عيال راشد .. ماكان الله رازقنه بأولاد هاذيج الايام ويشوف عيال راشد وشيخه بمثابة عياله ويحن عليهم وايد .. غمض عينه وخذ نفس على هاذيج الذكريات الحلوه ورد فتحها بسرعه وهو يشوف سلطان جدامه بنظرة تساؤل منو ها الشخص! جاوبه سيف من غير ما يسأله..
سيف: انا سيف بن مايد
سلطان اطالعه وقال بلا مبالاه: اهاا .. طليق خالتيه..
سيف سكت ولا رد عليه ..
سلطان: و انا اشوف شكلك مب غريب عليه
سيف: انا بعد اول ماشفتك حسيت بان شكلك مألوف.. اكيد انا شايفنك في الشغل ويا خالك ..
سلطان: يمكن .. لان انا اشتغل وياه
سيف: ماشاء الله .. اسمحلنا عيل ياسلطان وباجر ان شاء الله بتستلم ورقه التصليح وتراها علينا
سلطان: ماعليه ماتقصر
سيف: سلم على ابوك
سلطان: الله يسلمك .. يلا فمان الله..
سيف: الله يحفظك..

رد سيف عند حرمته اللي كانت يالسه فسيارتها .. فتحتله الدريشه ..
ناعمه: شو اتسوي ها الكثر ..
سيف: ماشي .. يلا ردي البيت بلحقج ..
ناعمه: اوكي
ركب سيف سيارته ولحق حرمته .. واول ماوصلوا البيت يلست ناعمه تتحرطم وتسب فسلطان .. سيف قال بيخبرها ها الشخص منو بيشوف ردت فعلها..
سيف: انتي عرفتي ها منو؟
ناعمه: وكيف بعرفه بعد !!
سيف: هذا ولد خالة البنات
ناعمه: بناتك
سيف: هي .. ولد اخت عليا ..
ناعمه: هييه .. انزييين الا طالع ملسون مثلهن
سيف: هههههه احين انتي صدق سالفه .. انتي اللي داعمه وتتحرطمين بعد
ناعمه: اصلا هذا قليل ادب مايحترم وتم يزاعج عليه
سيف: لاترمسين غير المره بالتلفون وانتي تسوقين
ناعمه: اوف بس لاه بروحي متغصصه من الدوام
سيف: محد ظربج على ايدج وقالج داومي انتي مب محتاجتنه
ناعمه: بس انته الثاني مب متفيجه لك

ودخلت غرفتها وسكرت الباب وراها .. اما سيف قام ونزل تحت .. اليوم بسبة ناعمه أخر الكل عن الغدى وهم يتريونهم .. دق لناعمه يقولها عن الغدى بس من غصتها مابغت تاكل شي .. ويلسوا الكل ع طاولة الاكل وخبرهم سيف بالحادث اللي استوى .. وبنات عليا استغربن الصدفه العجيبه هاي اللي خلت سلطان يطيح فلسان ناعمه وبتم طول اليوم تهذي بالسالفه هاي..

****

ع الساعه 10 فليل .. في سكن الطالبات في العين .. طلعت مي برع الجناح وفايدها اللاب توب ويلست في الصاله .. فتحت المسن بتشوف احلام شو تباها .. اول مادخللها المسن على طوول استقبلت رساله من احلام ..

احلام: واخيرا دخلتي من متى اترياج
مي: فديتج كنت اتسبح وعقب يلست اتلبس واتكشخ وجيي .. فما قريت المسج الا قبل شويه
احلام: وحق منووو تتكشخين هااا
مي: حق ريلي .. حق منو بعد بتكشخ !!!
احلام: وياراسج .. عفنت من كثر ما اترياج
مي: فديتج والله .. يلا ماعليه .. انزين شو الموضوع المهم اللي تبيني فيه ع المسن وما يستوي تتصليلي وتخبريني به؟؟
احلام: هههههههههه تبين تعرفين
مي: يلا قولي
احلام: ماشي كنت بعطيج ها الصورتين واحتفظي فيهن
مي: اي صورتين
احلام: صورتين بتشوفينهن عقب شويه .. بس امانه ماتحذفيهن من عندج .. والله يوم طاحن فايدي ها الصور ماتعرفين كيف ارتبشت ..
مي: انزين طرشي يلا بنشوف
طرشت احلام الصورتين .. ويوم وصلن لمي فتحتهن .. ماعطت الصوره الاولى اهميه تذكر لانها ماعرفت منو ها الياهل .. بس يوم شافت الصوره الثانيه بهتت ..
وردت ترمس احلام ..
مي: من وييين لج ها الصور؟؟؟
احلام: الاولى تراها يوم هو ياهل
مي: حسيت ..
احلام: شرايج بها الانجاز
مي: صدق انج ..
احلام: شو صدق اني ..
مي: وايد متفيجه احلااموه .. تخيلي حد جكج شو بتسوين وشو بتقولين حزتها
احلام: ماشي بقولهم بيود صوره لخطيبته فيها شي
مي: حلاااامي شو ها الرمسه البايخه
احلام: جب انتي البايخه
مي: انا مادري ليش انتي معوره راسج بها السالفه .. كل يوم والثاني ناطلتلي اتيبيلي خبر عنه ..
احلام حزت فخاطرها ها الرمسه وماردت على مي ..
مي: حلامي وينج؟
احلام: شو تبين!
مي: والخييبه زعلت .. فديتج ما اقصد شي .. لاتزعلين مني
احلام: ما بزعل .. بس انتي مب ويه حد يسويلها خدمه انسانيه
مي: ههههههههههه فديت الانسانيه انا ..
احلام: جب يلا .. اصلا انتي ها الاسبوعين مول مب عايبتني شو يعني الجامعه غيرتج
مي: يالله مالحقت الجامعه تغير شي فيني .. احلام انا مثل ما انا لا الجامعه ولا غيرها بيغيروني عليج ..
احلام: اشك الصراحه
مي: افااا والله ماكان العشم بنت الخال..
احلام: ميوه صدق ارمس

مي صخت دقيقه .. بدى الموضوع جدي وحست انه لهجة بنت خالها بدت ترق اكثر من خلال الكتابه.. مي فشو قصرت ها الاسبوعين من سارت الجامعه ؟! ممكن خفت الاتصالات امبينهن .. لكن مب لدرجه انها تتغير عليها ..

مي: حلامي تعوذي من بليس.. انا مستحيل اتغير ع بنت خالي.. ليش شو تكون الجامعه عسب تغيرني .. ومنو يكونن البنات اللي فيها عسب يعوضني عنج؟! حلامي لاتحطين ها الافكار فراسج ..بتمين غير الناس عندي..

احلام وهي تقرى الرمسه حست بغصه فحلجها .. تولهت وايد على مي .. صح مي من شهرين انتقلت عنها لبيت ثاني .. لكن كانت تحس بتواجدها الدايم وياها اما الحين وهي فالعين تحس فعلا انها تفتقدها واايد .. وغيرت من العتب اللي كان وااضح فرمستها وجلبت الحوار امبينهن الى سوالف وتنكيت .. وفالاخير مي ترخصت من احلام لان ساره لزمت عليها تظهر وياها وتشوف الاجواء كيف بالسكن يوم الثلاثا .. قبل ما تبند مي اللاب .. نقلت الصور اللي عطتها ايايهن احلام من الملفات المتلقاه لفولدر خاص بمي .. تمت تتأمل الصوره وارتسمت بسمة رضا على ويها وهي تشوف صورة فارس حاليا وهو متغتر وباينه ملامحه عدل اللي كانت مي ناسيه تفاصيلها .. لكن بعدها ما ابدت اهتمام لها الموضوع .. مجرد كلام كبار ماوصلها شخصيا ولا رسميا ماتقدر تبني عليه آمال ..

ودت اللابتوب الحجره ونزلت عند ساره اللي كانت تترياها .. قالن بيسيرن عند بنات عمتهن فالسكن اللي حذالهم .. تمشن وهن يسولفن عن دواماتهن .. شافت مي مجموعه كبيره من البنات يمشن ساير راد .. طول الاسبوع ماكانت راضيه انها تنزل وتشوف المكان .. تكتفي باليلسه جدام المبنى .. والحينه تشوف ها الكم من البنات .. لفت ع ساره اللي كان عايبنها المنظر..

مي: ساروه شو ها الزحمه .. وين تبيبنا؟
ساره: يااسلاام شاارع
مي: شو شاارع؟
ساره: ميوه كم بنفهمج .. ها اللي مستوي الحين يسمونه شارع .. شوفي كيف يستهبلن البنات .. والله وناسه ..
مي: ها شارع الحب !!
ساره: هههههههه اي شارع حب يا الهبله
مي: شدراني انا .. يقولون فالجامعه هاي السوالف
ساره: وايد عيل يرمسون عن الجامعه وفيه الشي الغلط وفيه الصح
مي: ساروه كيف جي البنات ..شو ها الحركات..اخيه طفاسه..
ساره: بتشوفين الطفاسه وبتشوفين الهبل وبتشوفين كل شي صبري على عمرج .. والله يوم نكون شله شو نقطعهن هاذيل البنات ..
مي اطالعت ساره بنظرة كئيبه ..
ساره: شو بلاج؟
مي: احس يوم الواحد يكون غريب ما يخترش
ساره: كيف جي بعد
مي: يعني انا بعدني مول ماعرف حد .. وايد رسميه فتعامليه
ساره: ميوه بعدج الا اول اسبوع ها.. يوم بتندمجين ويا البنات وبتكونيلج ربع وشله بتخترشون وبتخرشون اللي وياكم ..
مي: ممم الله كريم ..
حطت ساره ايدها ع جتف ميوه تحثها ع المشي ..
ساره: يلا ميوه.. ماشي الا ها الطريق اللي يودي لمقام واحد .. يعني لازم ندخل الشارع
مي: ساروه شوفي هاذيل مخبل يمططن شعور البنات ..
ساره: ماعليج ..
مي: والله بتضارب وياهن اذ صكني
ساره: بل عليج .. صدق انج مستجده
مي: يلا عاد .. لا تطنزين
ساره: انزين طوفي طوفي .. محد بيقرب صوبج من الله اغلبهم ربعي ..

ومرن مي وساره امبين البنات .. ووصلن الصوب الثاني بالسلامه .. وساره اطالعت مي وضحكت .. اختها اول مره تشوف ها الاجواء لازم بتم خايفه وماتعرف تتعامل ويا ها الاوضاع .. قبضتها من ايدها وكملن دربهن لمبنى بنات عمتهن .. وهن فدربهن اتصلت ساره بأسما تتخبرها عن مكانها ونزلت هي واللي كانت وياها و لاقفن ساره ومي ..
مي ماااكاااانت تأمل أبدا انها تشوف ها الانسانه .. ولكن اليوم شافتها ويا بنت عمتها .. سلمت فاطمه على ساره .. ولفت صوب مي وسلمت عليها بحراره وتمت ماسكتنها من ايدها ..

فاطمه: يالله وين متخبيات انتن طول الاسبوع ..
ساره: هههه انا عني ما اظهر من المبنى ..
مي حاولت تخلص عمرها من مسكت ايد فاطمه .. فاطمه لاحظت ها الشي وبطلت ايدها .. اما مي دارت الصوب الثاني حذال اسما بنت عمتها ..
اسما: زين منكن عيل ظهرتن اليوم .. عنبووج ساروه اختج مستجده المفروض كل يوم تظهرين وياها ..
ساره: هي تظهر بروحها ويا بنات الجناح .. ماشالله تعرفت ع بنات الجناح وتأقلمت وياهن بسرعه ..
مي: انزين ما نظهر بس نيلس تحت المبنى ..
اسما: ماعليه المهم ارتحتي لبنات الجناح
مي: كلهن طيباات .. ووناسه اليلسه وياهن ..وبعدين اعرفهن من قبل ما ايي الجامعه ودوم ساروه تعطيني وحده منهن ارمسها..
مي ماقدرت انها تكمل كلامها من شافت نظرات فاطمه .. ماتعرف ليش ها الانسانه جي وياها .. ها ثاني لقاء وياها ونظراتها جي .. احمرن خدود مي وارتبكت .. ماعرفت تكمل الكلام وآثرت الصمت .. وردن هن الاربع فوق لانه ساره ومي متفقات ييلسن شوي عند لطيفه .. وبعد نص ساعه نزلن من عندها وسارن وين يمعة البنات ويلسن هن الاربع ع طرف يشوفن ربشة البنات ويعلقن ع الساير والراد .. ومي يالسه حذال اسما وبعيد عن فاطمه وكانت شوي مرتاحه لانها بعيد عن ها الانسانه ..

[لامارا]

الجـــــــــــزء الخامس عشر

*****************
(الجمعه) 10 سبتمبر 2004
******************

الساعه 11 نش نايف من نومه .. تسبح وطلع من غرفته .. توجه لغرفه خواته لقاها مفتوحه.. اسما كانت تحط ثيابهم في الشنط عشان يسيرون الجامعه .. اما لطيفه كانت يالسه ترمس في التلفون ..

نايف: هلا صباح الخير
اسما: صباح النور
نايف: هاي منو ترمس؟
اسما: ساروه بنت خالي
نايف: لطوووف
لطيفه: هاه
نايف: سكري شوي وتعالي الحجره اباج
لطيفه: اوكي
اسما: شو عندكم؟
نايف: ماشي ..
رجع نايف حجرته يتريا اخته تي .. دقايق واندق الباب ودخلت لطيفه ..
لطيفه: ها نايف بلاك ؟
نايف كان يالس ع كرسي الكمبيوتر: مابلايه شي .. اخبارهم بنات خالي
لطيفه ابتسمت ويلست على كرسي التسريحه: بنات خالك والا بنت خالك
نايف: لا بنات خالي
لطيفه: بخييير
نايف: انزين لطوف .. ريم أي لون تحب؟
لطيفه: بنفسجي ليش؟
نايف: عشان يوم اغير الغرف اعرف أي لون اسوي .. بيلس ادور ديكورات من احين
لطيفه: لا لاتسويلها بنفسجي
نايف: ليش؟
لطيفه: لانه غرفتها في بيت ابوها بنفسجي .. احسن لو تغير اللون
نايف: امم عيل شو رايج بعنابي وزيتي ؟
لطيفه: حلووو ..
نايف: انزين شاوريها ؟
لطيفه: مب احين .. بعده وقت وعقب الملجه شاورها انته ع راحتك ..
نايف: مارمستج هي متى تبى الملجه؟
لطيفه: لا .. بس انته متى تباها ؟
نايف: مادري ذاك اليوم نرمس ويا امايه عفرا وقالو نملج قبل العيد بيومين لان تعرفين مكروه عقد القران بين العيدين
لطيفه: هي
ماف: والحفله عقب العيد ؟
لطيفه: والله مادريبك ..
نايف: انزين لطوف ترا انا اشتريت الكتب لريم
لطيفه: والله ؟ متى سرت ؟
نايف: يعني خلال هالاسبوعين .. اشيا اشتريتها من اهنه واشيا من دبي
لطيفه: زين راوني اياهن
نايف: غلفتهن خلاص
لطيفه: منو غلفلك اياهن؟
نايف: وديتهن محل يغلف الهدايا
لطيفه: وينها احين؟
نايف: لحظه ..
قام نايف من مكانه وفتح الكبت .. طلع منه هديه مغلفه بلون ذهبي وملفوف بشريطه كبيره من فووق .. كان نازل من هاي الشريطه .. شرايط رفيعه مربوط طرفها باشرطه كاسيت .. كان شكل الهديه حلوو وفكرته غريبه ..
لطيفه: الـــله وايد حلوه
نايف: صدق؟
لطيفه: هيه .. شو هاي اشرطه ؟
نايف: هيه .. اشرط منوعه مال البيوت السعيده وفهم النفسيات وفن احتواء المشاكل الزوجيه .. يعني شغلات جاسم المطوع
لطيفه: روووعه الحركه وايد .. كم كتاب داخل؟
نايف: تقريبا 5 كتب ..
لطيفه: حلوو
نايف: انزين لطوف احين كيف بتودينها ؟
لطيفه: انا اوديها؟
نايف: هيه عيل انا
لطيفه: امم انزين انا اليوم بسير كيف بوديهن
نايف: شوفي انتي طريشها ويا امايه يوم بتسير العصر وقوليلها هاي منج لريم
لطيفه: انزين
نايف: وبس عاد .. ريم بتبطل الهديه وبتشوف
لطيفه: بتتحراها مني انا
نايف: لا .. انا كاتب داخل انها مني
لطيفه: شو كاتب؟
نايف: كاتب ورا كل كتاب كلمات وموقع تحتها
لطيفه: حركاااااات
نايف: حركات في عينج .. يالله بتعطينها امايه والا ؟ خلصيني ورايه صلاه الجمعه
لطيفه: انزين امايه بتقول متى سرت اشتريتها وغلفتها .. تحيد انه ماطلع الا وياها
نايف: تراني امس مودنج السوق .. قوليلها امس خذتها وبس
لطيفه: انزين انزين .. خلاص عطني اياها وبوديها لامايه
نايف: تعالي خذيها عقب بدون ماتشوفج اسموه
لطيفه: اوكي .. يالله بنزل انا تحت
نايف: ماباجي شي ع الصلاه بتلبس وبنزل ..
لطيفه: اوكي
وطلعت لطيفه من الغرفه اما نايف دخل الهديه الكبت وبدل ملابسه ونزل ساير المسيد ..

****

فالباص كانت ساره يالسه حذال الدريشه وحذالها مي .. ساره كانت سرحانه اما مي ترمس احلام بالتيلفون ويسولفن..

مي: بعدنا توناا ظاهرين من راس الخيمه .. درب ورانا
احلام: الله يعينكم .. ها الخطوط مادانيها انا
مي: انا درب العييين مول ما احبه .. بس شو بنسوي حكم القوي ع الضعيف
احلام: ماعليه بتتعودين عليه ..
مي: الله كريم ..

لفت ساره صوب مي ..

ساره: يلا بسكن من الرمسه .. انا ملانه
مي: ادقلج معلايه يعني ؟!
ساره: خايسه
مي: خاااايسه انتي .. يا ترمسوني ولا بتضارب وياكم
ساره: افف بس بس سكتي وجلبي ويهج
مي: اوكي .. بس على اي صفحه
ساره : سخيييفه
احلام: ايييه انتن فضحتنا شو تضااربن فالباص
مي: هاي ساروه اللي تضارب ..

طلعت ساره الهتفون من شنطتها وحطت السماعات فاذنها وسوت حركه لمي انها زعلت .. ميوه ضحكت عليها .. دايما هاي حركاتهن وعبطهن ..
ردت ساره لسرحانها وهي ادندن ويا الاغنيه اللي تسمعها .. رن مسج تيلفونها هي مااسمعته لكن تذبذب صوت الاغنيه وحست بالمسج .. فتحته وتمت تقراه مره .. مرتين.. ثلاث .. مافهمت المقصود .. أو ليش ها الحركه يعني ! ..

بالأول اتصال .. والحين مسج ..

مي لاحظت ع ساره ارتباكها .. واطالعتها ..

مي: شو بلاج؟؟؟
ساره: ماشي ..
مي: لا في شي ..
لفت ساره على مي ..
ساره: سكري وبخبرج ..
شوي وسكرت مي التيلفون .. ولفت صوب ساره ..
ساره: ميوه
مي: ها بلاج؟
ساره: ماعرف ها شو يبى؟
مي: مسود الويه منوووو هووو؟؟
ساره: سود ويهج .. ايي سمعي السالفه اول
مي: شو السالفه انزين ؟؟؟
ساره: اندوج اقري ها المسج ..
خذت مي وفتحت المسج من غير ماتنتبه للمرسل
مي وهي تقرى المسج : مركون بين البحر والبيت وحداني..ابني لروحي امل وجروحي تهده..وأمر قبل الغروب أرتب أحزاني..أطوي شراع الهوى وأمده..ألا يابحر منهو اللي ناسي الثاني..أنا أو اللي هجر شاطيك ومده..

ورجعت مي تقرى فيه مره ثانيه بصمت وساره تتطالعها تباها تعلق او تقول أي شي .. أما مي تمت تردد آخر المسج ..
مي: أنا أو اللي هجر شاطيك ومده .. ساروه وايد عيبني بطرشه لي ..
ساره : اندووكم انا اتريااها تعلق ترمس وتقولي ابا اطرشه .. اييه شووفي منو مطرشنه ..
مي رصت بعيونها وفجأه بطلتها ع الاخر .. شو يعني !
مرواااان مطرش ها المسج ؟ كيف وليش ومن متى!

مي: ساروه .. من متى امبينكم مسجات؟
ساره: والله ها اول مسج ..
مي: اول مسج وجي عنيف عن الغياب ..
ساره : وانا شدراني
مي: بس خطير .. يمكن لان ماسرنالهم ها الاسبوع افتقدج؟
ساره: يالله عاد انتي ..
مي: بس غريبه جي فجأه يطرشلج مسج
ساره: ممم ميوه .. هو رمسني مره بالتيلفون
مي: متـــــى!
ساره: اسبوع المستجدات .. اذكره يوم الاثنين.. كان داق يتخبر عن رقم اميه ..
مي: يالله ومارام يسأل حد عن الرقم الا انتي
ساره: وانا شدراني عنه
مي: اوب اوب شكله طاح في الغرام ولد الخال ..
ساره: جب ميوه .. اخر شي افكر فيه ..
مي: بس لاه من الله مرموس عنا
ساره: كيف؟
مي: ممم شوفي ها الرمسه قايلتلي اياها حلامي..
ساره : أي رمسه؟!
مي:اونه خالي محيرنا لعياله على حد علمي
ساره: كيــف!
مي: شو كيف بعد .. يعني انا وانتي استوينا محظورين ع الغير..
ساره: شو ها مب ع كيفهم
مي: ليش ساروه .. ماتبين مروان؟!
ساره: ليش يعني ع طول قلتي مروان
مي: ساره لا تستعبطين من كثرهم عيال خالي تراهم .. اكيد خالي يباج لمروان .. وكمل العدد وقال يباني لفارس ..
ساره: من متى هاا؟
مي: من فتره .. ماعرف متى بالضبط.. بس حلام اول ما درت على طول خبرتني ..
ساره: منو يعرف بعد؟
مي: حلام ومدوي .. والحين انا وانتي ..
ساره: مروان يدري؟
مي: مادري والله .. شكله يدري..
ساره: كيف؟
مي: ساروه لا تمين هبله ها الكثر.. يعني من الله توج مراوتني مسج هو مطرشنه.. احس هو مرمس ابوه عشان يخطبونج ..
ساره: ماادري.. واذ كان خالي بروحه رامس؟
مي: انزين فشو الاشكال يعني بيكون .. دام خالي رمس هم ما بيعارضونه .. وبعدين فديتنا أي شخص يتمنى قربنا بعد شوو
ساره: يالله يا انتي .. مادري منو الأميره ديانا..
مي: لا مي بنت سيف ..
ساره: بس عيل ..
مي: جب جب ..
ساره: انزين فكينا الحين من ها السالفه .. الحين شو اسوي
مي: فشو؟
ساره: مروااان؟؟؟
مي: ممم مادري والله .. ردي عليه بمسج عادي
ساره: لا مافيني
مي: انزين .. ممم .. مادري والله .. ردي عليه شوفي شو فخاطره.. سايريه يعني
ساره: هزرج؟!
مي: مادري والله .. بس يعني مب غريب من الله ولد خالج ..
ساره: انزين انتي لو فارس قام يطرشلج وجي .. شو بتكون ردت فعلج؟

مي صخت فجأه .. ما تتخيل فيوم تكون علاقتها بفارس بها الجديه .. بدى خافقها يعزف سيمفونيته.. نزلت عينها وتمت تفكر فها السؤال الصعب .. ما لقتله جواب .. لانها مب مستوعبه السؤال ولا حطته فالحسبان..
بس شي وحيد طلع منها ..

مي: فاارس غير!
ساره عقدت الحيات: كيف غير بعد ..
مي: فارس مب نفس طبع مروان ..
ساره: يعني
مي: يعني ما ظن فيوم انه بياخذ رقمي .. ولا بيطرشلي .. ولا بيدقلي..
ساره: انزين يا العبيطه انا قلتلج تخيلي .. تخيلي انه مطرش انتي شو بتسوين
مي: ساروه ماعرف.. بس اللي ابا اقولج اياه .. تمي ويا مروان جي لين ما تأكدين من مشاعره وعقب لكل حادث حديث ..


سكتت ساره وردت تشوف المسج .. شو بتسوي الحين .. اطنشه ولا ترد بمسج عادي ولا تتبع نصيحة مي ولا شو بالضبط ماتعرف..
اما مي ردت الافكار تغزيها .. أحلام مازالت كل ماترمسها اتيبلها طاري فارس.. والحين ساره درت وما بترحمها من التعليق .. غصبا عنها بتفكر فيه.. أو بالأحرى بالسالفه بكبرها .. اللي يدور فبالها ومحيرنها واايد .. هو يدري ولا.!
هي تحس انه لا .. مب مبين شي .. مروان ممكن تقدر تحكم ع تصرفاته لصالح ساره.. بس هيه ما شي لصالحها ..


****

العصر يلست ريم ويا ناعمه في الصاله يطالعن التلفزيون وناعمه ترمس في التلفون ويا امها .. اما ام سيف كانت سايره صوب الزرب ويا جاسم ومايد..

استملت ريم من اليلسه وقالت بتتصل لأمها .. سولفت شويه ويا امها عليا واطمنت على احوالها وسكرت عنها ..

و في هالوقت نزلت عفرا من فوق وشاله في ايدها كتاب وكراس ..
تقربت من امها ويلست حذالها

عفرا: اميه .. اميه
ناعمه يلست ترمس في التلفون ومطنشتنها
عفرا: امييه
ريم: بلاج ؟ تشوفينها ترمس في التلفون اكيد مابتسمعج اصبري لين تخلص
عفرا: ابا اقولها اني مب فاهمه الرياضيات وماعرف احل الواجب والابله قالت اذا ماحلينا الواجب بتظربنا وبتنقص من علاماتنا
ريم: هاتي بشوفه لج
شلت عفرا كتابها وسارت يلست حذال ريم .. اللي خذته ويلست تقرا وتشوف شو ياخذون ..
ريم: هذا سهل عفروه ليش ماعرفتي تحلينه؟
عفرا: ماعرف
ريم: انزين هاتي ورقه فاظيه بشرحلج
عفرا ابتسمت وامسحت دموع الخوف اللي كانت نازله وعطت ريم ورقه وقلم وبدت ريم تشرحلها المسائل وكيف تحلها ..
في هالاثناء دخلت مريم عمتها وبنتها نواري..
مريم: السلام عليكم
ريم استحت لانها كانت لابسه بجامه .. وقامت تسلم على عمتها وهي تحاول ترتب من ثيابها ..
سلمت مريم على ريم وناعمه ويلست نواري كعادتها حذال ريم ..
مريم: امايه ريم اهناك عند الباب اغراض يايبتلج اياهن لطيفه
ريم: اغراض شو عموه؟
مريم: مادري امايه . جيه مغلف .. يلسته حذال الباب
ريم: برايه بشوفه عقب شوي
مريم: عيل وين امايه ؟
ريم: سارت صوب الزرب
مريم: وانتوا شو تسوون؟
ريم: اشرح حق عفروه مب فاهمه
مريم: هيه .. زين .. اخبارها امج؟
ريم: الحمدالله يتخبرون عنكم
مريم: حليلها من زمان والله مارمستها .. برايج كملي لعفاري اشرحيلها انا هب غريبه
رجعت ريم تيلس على الارض عطت نواري ورقه وقلم تلعب وتشخبط .. ويلست هي تشرح لعفرا اللي استانست انها بدت تستوعب وحلت واجبها بروحها وصححته لها ريم ..
بعد ماوصلت يدتها .. قامت ريم عشان تبدل ثيابها .. لكنها خطفت عند الباب تشوف لطيفه شو مطرشه .. لقت هديه شكلها وايد ملفت .. خذتها وروحت غرفتها ..
دخلت الغرفه وحطت الهديه ع السرير ويلست تشوفها .. بدت تشوف الاشرطه اللي كانت مثبته فيها .. لقتها اشرطه تخص الحياه الزوجيه ..
فتحت الهديه ولقتها مجموعه كتب فوق بعضها .. بدت تشلهم كتاب كتاب وتقرا عناوينهم ..
عقدت حياتها وهي مستغربه من عناوين الكتب .. فتحت واحد منهم تجلب صفحاته وتقرا المقدمه .. لكن في نهايه الكتاب لفتهاا شي مكتوب بخط اليد .. فتحت الصفحه تقرا اللي مكتوب ..
بدت دقات قلبها تتسارع وايدها تنتفظ لدرجه انها عجزت عن حمل الكتاب و وطته ع السرير ..
معقوله؟ تكون الهديه هاي من نايف ؟! .. عيل ليش عموه قالت من لطيفه ؟ يمكن انها ماتبى تبين جدام نعوم .. او انه عموه نفسها ماتدري وقالولها من لطيفه ؟
يعني لطيفه تعرف بها الشي؟ والا كان من تدبير نايف بروحه ؟!

رجعت فتحت كل الكتب تدور في نهايه كل كتاب كلمات .. كتبها نايف بخطه لها..

ماعرفت ريم كيف تتصرف حزتها .. لكنها نشت تتوضا لصلاه المغرب ..
بعد ماصلت قامت من على سيادتها وتوجهت بشكل لا ارادي لدريشه غرفتها وفتحت الستاره .. كانت تشوف دريشه نايف اللي راوتها اياها لطيفه من بعيد
ابتسمت يوم شافت ليت الغرفه المقصوده مفتوح ..
سكرت ستارتها ورجعت على سريرها تجلب في الكتب اللي وصلتها وماتعرف شو ممكن تكون ردت فعلها وهي ترمس لطيفه..

****

كان طايح ع سريره وهو يناظر السقف وسرحاان .. خواطر تغزي افكاره..اغلبها عتب على نفسه .. كيف تجرأ وطرش المسج لساره ..الحين شو ردت فعلها شو قالت عنه! ماردت عليه ولا بمسج بسيط .. شو ها الانسانه ليش ماتحس ..

قبض تيلفونه وبغى يكتب مسج لكنه تراجع .. مايعرف شو يسوي وكيف يتصرف..
قام من سريره وخذ سفرته اللي موطايه ع التسريحه وطلع من الحجره .. توجه لحجرة اخته عزه .. دق عليها الباب ودش على طول ..

مروان: عزوووه
عزه: شوو عندك غازي مره وحده
مروان: ماشي ملان ابا اسولف وياج
عزه: انزين حياك ..

تجدم مروان ويلس حذال عزه اللي كانت يالسه ع غنفه وتشوف التلفزيون ..خذ عنها الريموت وبند التلفزيون..
عزه: شحقه
مروان: بس ما مليتي منه؟ يا تيلفون يا تلفزيون يا سوق ..
عزه: شو اسوي انزين ..
مروان: استغلي آخر شهرين لج فالبيت..
عزه:هههههه وليش آخر شهرين ..ثرني يوم بعرس ما بيي ابات هنه مووول!!
مروان: هي خلاص لاتين .. بس تعالي سلمي وروحي
عزه: ع كيفك هوه
مروان: وينه هو ريلج؟
عزه: مادري..مارمسته من أمس
مروان: غريييبه
عزه: هي خلاص ما نرمس وايد .. وحليله الفقير والله قاصه عليه .. لا واقوله مابرمسك لين العرس خلاص
مروان: لا عاد بالغتي .. بعده العرس شهرين وزياده بعد
عزه: ههههههه انزين انا بروحي ماروم اصبر عنه..
مروان: يحيج والله..

وسكت مروان وهو مركز بنظره على مجموعة المجلات اللي مجابلتنه ع الطاوله..وعزه قبضت الريموت تجلب في القنوات.. وردت تطالع مروان ..

عزه: شو بلاك سكت مره وحده؟
مروان: هاا
عزه: شو سرحان؟
مروان: لا عادي
عزه: شكله شاااغلنك موضوع جايد
مروان: والله؟!
عزه: هي صدق
مروان: ماعرف والله .. عادي ماشي شاغلني
عزه: تقص ع بتاني انته.. عاد انته الوحيد اللي عيونك تفضحك..ماتروم تخلي شي فخاطرك .
مروان عقد بحياته وهو يطالعها .. ابتسم وقام ..
عزه: وين ساير .. تعال خبرني باللي مكدر بالك
مروان: لاماشي مكدرني.. بس كنت ملان
عزه: خل عنك
مروان: يمكن عشان بنفتقدج يوم بتعرسين
عزه: يالله يالله من وين ظهر كل ها الحب
مروان: هههههههه ماعليج يظهر مره وحده هو.. يلا انا بسير بيت ابويه سلطان بسلم عليهم ..مابلحق امر عليهم قبل ما اسير الدوام
عزه: خلاص اوكي .. الله يحفظك ..

طلع مروان من عند عزه وهو حاس بشوية ضيجه ..
صدق عيوني تفضحني! معقول مابروم اتحكم بنفسي وقت ما اشوف ساره!
لا .. يمكن اليوم بس لان ها البدايه ..


******************
(الثلاثاء) 14 سبتمبر 2004
******************

"لاحول ولا قوه الا بالله .. إنا لله وانا إليه لراجعون"

فرك محمد يبهته وهو يتكلم بالتلفون مع بشار اخو زوجته .. وهو يستقبل ها الخبر الي أكيد وبلا شك بيكدر عليهم جوهم ..

محمد: متاكدين انزين انتوا؟
بشار: فحص الـdna اكدلنا ..
محمد: لا حول ولا قوه الا بالله .. عظم الله اجرك ياخويه
بشار: اجرنا واجرك .. والله كان عندنا امل بسيط انه ابونا يرجع لكن شو نقول حسبي الله ونعم الوكيل.. الله يرحمه ان شاء الله
محمد: الله يرحمه برحمته
بشار: المهم محمد انا ماقدر اطول عليك العزا بيكون عندي في بيتي وبروح الحين دير بالك على عبير وعلى فجر ..
محمد: انا احين شقى اقولها
بشار: والله ماعرف يامحمد انا اتصلت فيك عشان تقولها .. ولاتفكرون تيون الكويت خلاص مافي فايده .. اقعدوا مع بناتكم واشغالكم
محمد: مايصير يابشار لازم نكون موجودين
بشار: يا اخوي صدقني ماله داعي تيون قعدوا مكانكم وانا ان صار مجال احتمال اييكم الامارات اشوف عبير وفجر ..
محمد: على خير ان شاء الله .. شد حيلك يا بشار
بشار: ان شاء الله مع السلامه
محمد: مع السلامه

سكر محمد التلفون وهو متظايج .. عمه بوبشار اللي كان احد الاسرى الكويتين وصلت جثته وتاكدوا من الفحص والبطاقه اللي كانت مع الجثه انه هو نفسه .. الخبر ياه فجأه ومحد كان عامل حساب لها الخبر.. كيف يتصرف احين وكيف يقدر يخبر عبير وغير عبير اختها فجر اللي في الشارجه .. مايا في باله غير عليا اخته
رفع سماعه التلفون واتصل فيها .. تاخرت لين ردت عليه ..

عليا: السلام عليكم
محمد: وعليكم السلام .. عليا وين انتي؟
عليا: في المدرسه شوفيك محمد شي صاير ؟
محمد: اباج في خدمه
عليا: آمر
محمد: استاذني من المديره وبمر بخذج لان ابو عبير رجعوه الكويت وكان متوفي من فتره
عليا: لاحول ولاقوه الا بالله متى صار هالشي ؟
محمد: مادري يا عليا.. توه اخوها اتصلبي وقالي
عليا: وعبير فديتها شو حالها ؟
محمد: عبير ماتعرف شي عشان جيه ابا اشلج ويايه البيت بخبرها ع الاقل تكونين انتي ويانا فالبيت ..
عليا: انزين ماعليه انا عندي حصه وحده بس بعطيها أي معلمه ثانيه اصبر علي بكلم الاداره وبرجع اتصلبك
محمد: يالله بترياج
عليا: انزين مديه وايمان بنت راشد اردهن ويايه تراهن لو روحت عنهن بيتروعن
محمد: مري ع مدوي وقوليلها عندج موعد أي شي وبيردهن الدريول رواحهن
عليا: ان شاء الله يالله عيل برد ارمسك
محمد: مع السلامه

اتوجه محمد للمدرسه ومر على عليا وروحت وياه ..
دخلوا البيت وكانت ام راشد يالسه مع شيخه بنتها وميره حرمة راشد يسولفون..

عليا: السلام عليكم
ام راشد: عليا ؟ شو يايبنج فيج شي امايه
عليا تجدمت ودخل وراها محمد
شيخه: شوفيكم؟ شو مستوي
عليا: مافي شي مستوي .. بلاكم
ام راشد: عليا طيرتوا حمامة فوادي شوبلاااكم
محمد: عبير وين؟
ميره: في حجرتها قالت بتسير تصلي الظحى ..
توجه محمد لغرفته بينما عليا يلست ويا قوم امها تخبرهم عن وفاه ابو عبير ..
دخل محمد غرفته ولقى عبير تصلي الظحى ..
يلس وراها على الكرسي .. لين سلمت من صلاتها والتفتت تشوف منو داخل عليها الغرفه ..
عبير: محمد ..
محمد: هلا عبير
قامت من مكانها: شوفيك ؟ شي يعورك؟
محمد: لا مافيني شي خلصت شغل وطلعت ..
عبير: ايه زين ..
محمد: خلصتي صلاتج؟
عبير: لا بعدني ركعتين
محمد محتار يفاتحها احين بالموضوع والا يخليها تصلي وعقب يقولها ..
محمد: عبير
عبير: نعم
محمد: تعالي ايلسي برمسج
يلست عبير حذال محمد وهي بعدها لابسه شيله صلاتها
عبير: خير
محمد: عبير انتي عارفه انه الانسان مايصيبه الا اللي الله كاتبنه وانتي انسانه مؤمنه بقضاء الله وقدره
عبير: محمد شصاير وقفت قلبي
محمد: بشار اخوج اتصل فيني ويقول انه جثة ابوج وصلت الكويت
عبير وهي مجدمه ويها ناحيه محمد: شوو شو تقول ؟ جثه ابوي ؟ ابوي رجع من الاسر ميت .. اهم متاكدين؟
محمد: تأكدوا من بطاقته وفحص الـdna
عبير وطت راسها وظمت ايديها الثنتين لبعض وهي ترتجف ومازالت ساكته
محمد مسح بايده على ظهرها : عبير هذا امر الله ادعيله واحتسبي الاجر عند رب العالمين
عبير بدت دموعها اللي تيمعت في عينها تنزل بس بهدوء
عبير: نطرته كل هالسنين وانا على امل يرجعلنا ولو كان امل بسيط .. ابوي عشت انطره 14 سنه يرجع لنا لكن رجع متوفي ..

وبدت تصيح وهي مازالت محافظه على هدوئها اما محمد بدت دموعه هو بعد تنزل ماقدر يتمالك نفسه .. بوبشار ماقصر فيه وكانت له مكانه في قلبه وفوق هذا زوجته مب هاينه عليه.. يعرف شكثر كانت تحب ابوها وكانت على امل تشوفه بيوم او تعرف عنه خصوصا انه لفترات مب قريبه وايد كانت توصلهم اخبار عنه

محمد: قومي بارك الله فيج صلي اللي باجي من صلاتج وادعيله ماشي بيخفف عنج الا هالشي قومي عبير
هزت عبير راسها وقامت تكمل صلاتها وطلع محمد من الغرفه .. حب يخليها بروحها شوي تناجي ربها بينها وبين نفسها ..

طلع وراح الصاله عند خواته
ام راشد: احسن الله عزااكم يا وليدي
محمد: الدوام لله يا اميه..
يلس على كرسي في الزاويه
عليا: خبرت عبير ؟
محمد: هيه خبرتها وقامت تصلي احين
شيخه: الله يصبرها ان شاء الله
محمد: امين يارب والله انها كاسره خاطريه
ام راشد: حتى انا يامحمد عاد خصه عبير فقيره وايد وماتهون عليه
ميره: انزين احين هي بتسير الكويت والا كيف ؟
محمد: لا لا خلاص اخوها يقول بييهم اهنه زياره ان سمحت الظروف
ميره: هي صح ترا اختها بعد تدرس اهنه
محمد: انا نسيت سالفتها فجر .. احين منو بيخبرها وهي هناك
عليا: لاتقولولها شي لين توصل باجر مب زين بعد
محمد: والله مادري بسأل عبير
شيخه: انزين انته قوم سيرلها لاتخليها بروحها
محمد: لا لا خلوها شوي بروحها وعقب انتوا سيرولها رمسوها شوي هدوها
شيخه: انته وين بتسير عيل ؟
محمد: ماعرف بس سيرولها انتوا ايلسوا شوي وياها وهدوها انا بطلع شوي وبرد خلاف..
عليا: ان شاء الله

طلع محمد من البيت وهو متضايج ومب عارف وين بيسير .. توجه للمسيد مشي .. دخل يتوضى وبعدين دخل داخل المسيد قبضله مصحف وتوجه لزوايه ويلس فيها يقرى كلام الله .. يبا الهموم اللي شايلنها من المسؤووليه ومن الأحداث اللي صايرتلهم تنزاح عن حمله شويه ..

****

في كليه التقنيه للطالبات .. كانت ريم يالسه ويا مجموعه من البنات اللي وياها في الكلاس ..
معظمهم تعرفهم بس ماحتكت فيهم وايد ..
يلست ريم تجلب الورقه اللي في ايدها .. كان مشروع كلفهم فيه الاستاذ كل بنتين مع بعض .. والمشكله انه كلفها بالمشروع مع وحده ماتعرفها زين .. مجرد زماله كلاس بينهم .. يلست هذي البنت حذال ريم يناقشون كيف بيكون البروجيكت في هالوقت البنت هذي رن تلفونها وردت عليه .. ويلست ترمس وريم تلعب في تلفونها وتسمعها ..

سميه: الوه .. هاه .. في الكليه ؟ شو تبين ؟ مادري ... لا ماعندي انزين خلاص شو تبين احين انا مشغوله ؟ بس عاد فكينا احين من هالسالفه .. يالله باي ..

ريم استغربت من الاسلوب اللي ترمس فيه البنت..وايد جافه ويا الطرف الثاني اللي بالخط .. حركت حواجبها باستنكار وقبضت اوراق البروجيكت وتقول فخاطرها مالها شغل ..

سميه: اسمحيلي ريم
ريم: لا عادي افا عليج .. بس لحظه شوي بتصل البيت
سميه: اوكي
ريم شلت تلفونها واتصلت بيدتها ترمسهاا ..
ريم: السلام عليكم
نجمه: وعليكم سلام منو هادا ؟
ريم: انا ريمان
نجمه: هااااا ريمان شنو يريد ؟
ريم: امايه وين؟
نجمه: سوي كلام ويا هذا حرمه مني
ريم: أي حرمه؟ عمو مريم؟
نجمه: لا لا
ريم:انزين.. عطيني اياها
ودت نجمه التلفون عند ام سيف: الوووه
ريم: هلا امايه اشحالج ؟
ام سيف: بخير امايه
ريم: شو صحتج؟
ام سيف: بخير فديتج
ريم: منو عندج ماشا الله ؟
ام سيف: هذي يارتنا ام خالد اللي كانت مسافره تتعالج وراده من اسبوع
ريم: هييه حليلها .. عاد ما جد شفناها هاي ..
ام سيف: لا هاي ما تقطع مول.. بتشوفنها
ريم: هيه زين .. شو طبختيلنا ع الغدى اليوم ؟

كانت هالمره سميه تشوف ريم ويخالجها شعور غريب ..
كانت تحس انه علاقه ريم بامها حلوه وايد .. وفرحانه وهي تشوفها تسولف وياها

ام سيف: سوينالكم صالونه .. نجمه سوتها انا مارمت ادخل المطبخ لانه ام خالد عندي ..انتي متى بتين ؟
ريم: البنات عقب مايطلعن بيمرن عليه
ام سيف: انزين عيل امايه برايج
ريم: اوكي مع السلامه
ام سيف: مع السلامه ..

سكرت ريم وهي تبتسم لسميه .. اللي كانت سرحانه فيها ..
ريم: اتطمن على غدانا
سميه: ههه .. اخبارها امج
ريم: الحمدالله بخير .. هاي يدتيه بس نزقرها امايه
سميه: اهاا ..وليش ما دقيتي لامج عيل
ريم: اميه مدرسه .. عندها حصصها مب فايجتلي ههههه
سميه: يا حليلها ..



بدت ريم تتكلم عن البروجيكت ويا سميه اللي بالها ماكان وياها ..
تحس انه مكالمه ريم ويا امها وايد اثرت فيها .. تمنت لو انها مكانها.. أو انها تقدر تغير مجرى الأمور أو تبدل الأدوار

[لامارا]

في الجامعه الامريكيه كانت فجر يالسه على واحد من كراسي الكافتيريا بروحها تتريا ربيعاتها يوصلن .. وتجلب في واحد من كتبها .. سمعت صوت شخص يناديها..

احمد: فجر
التفتت فجر وسكرت كتابها اللي في ايدها ووقفت: نعم
احمد: بعد اذنج بغيت الاوراق اللي عطاكم اياها الدكتور امس لاني كنت مب حاضر
فجر: أيه صج .. انزين انا ابي ادرس منهم باجر عندنا كوز
احمد: لا انا بصورهن وبرجعلج اياهن مابتاخر
فجر: خلاص جيه تمام ..
فتحت فجر ملفها وطلعت الاوراق لاحمد وعطته اياهن ..
احمد: وين بلقاج عشان اعطيج اياهن
فجر: ماعرف انا عندي محاظرات بعد نص ساعه ..
احمد: انزين ماعليه تعطيني رقمج عشان اعرف انتي وين ؟ اخاف مالقاج واكون سبب انج مادرستي للكوز باجر

فجر سكتت شوي تفكر .. كانت منحرجه ومب عارفه كيف تتصرف وغير هالشي مستغربه انه احمد اللي كلموها عنه مايعطي حد ويه هو اللي طالب رقمها .. بس ماتبى تعشم عمرها وايد .. هو ماخذ الرقم الا عشان مصلحته الشخصيه ..

احمد: اسف يمكن احرجتج
فجر: لا عادي ..
قبضت فجر ورقه وكتبت رقمها ع طرف ونزعت الورقه وعطته وهي تحس بايدها ترجف.. ماعرفت أصلا شو تسوي .. خذ أحمد الورقه من ايدها وهو يبتسم.. ما حب يحرجها ويقولها مليني الرقم لانه شافها مرتبكه..
احمد: خلاص ان شا الله بصورهم وبتصل عشان اعرفج انتي وين وبعطيج اياهن
فجر: صار
احمد: مع السلامه

ابتسملها وروح عنها ويلست فجر في مكانها تفكر .. وتذكرت انها ما خذت رقمه من الربكه اللي سرت فيها..
الحين شلون بعرف رقمه!!..
.. شي طبيعي يعني أول رقم غريب بيوصلني بيكون منه هو.. بس احسن ما سألته عن رقمه عشان مايفتكر اني ماصدقت يطلب رقمي واني قاطه نفسي عليه ..
ابيه فجر اشفيج مو مركزه ..انسي انسي خلاص..

****

الظهر طلعن مديه وايمان بنت راشد من المدرسه ومروا على مدرسة احلام اللي استفسرت عن عدم وجود عمتها وياهم .. وبعد ما وصلوا ايمان بيتهم .. نزلن احلام ومديه من السياره ودخلن الفله وهن يسولفن وينكتن على ابلواتهم والمواقف اللي صارت اليوم..

احلام: والله مدوي ماشفتي الابله شقى استوى ويها من القفطه بس احسن تستاهل افتشلت جدام الموجه عسب يعرف انها ماتشرح زين ..
مديه: هههه والله انكن ..

دخلن الصاله وشافوا عمتهم شيخه ويدهم ويدتهم يالسين
سلموا عليهم ويلسن واحلام على طول يلست ع الارض تصبلها جاهي

بوراشد: احلام توج يايه وبطنج خالي وبتشربين جاهي .. تغدي قبل
احلام: ماعليه ابويه مايعول فيني .. ههه
سكتت شوي احلام وهي تشوف يدتها لاول مره ساكته عنها ونفس الشي عمتها شيخه
مديه: هي صح عموه عليا وين ؟
ام راشد: شو تبينها ؟
مديه: شحقه روحت عني؟ يوم سرنا الصبح ماقالت انها بتطلع
سكتوا عنها ماعرفوا شو يقولون كيف يخبرونهم..
احلام: اميه وين؟
ام راشد: ويدي احلام بلاج قومي سيري غرفه امج والا عمتج بتلقينهن اهناك يوم انهن مب في الصاله
احلام: انزين
نشت احلام و شلت شنطتها .. مديه راحت غرفتها على طول .. اما احلام مرت غرفه امها ولقت الباب ملايم ..
دقته ودخلت .. وطت شنطتها عند الباب وتجدمت شافت امها يالسه على السرير ومجابلتنها عليا عمتها ..
تقربت منهم احلام كانت تتحراهم يسولفون وكعادتها استهبلت ..
احلام : سلاااام مربع
تجدمت اكثر وشافت ويه امها احمر وايد ودموعها ع خدها .. اما عمتها ارتبكت اول ماشافتها احلام
احلام: اميه شو فيج؟ شي يعورج ؟
عبير استمرت دموعها بالنزول اما احلام تمت تمسح لها اياهن
احلام: اميه شو فيج (والتفتت لعمتها) عموه شو فيها امايه ؟
عليا: مافيها شي احلام روحي غرفتج
احلام: لا مابروح اول قولولي شو فيها اميه ؟
عليا تمت شوي ساكته ماتعرف كيف تقولها الخبر الي تلقوه اليوم ... وتشجعت وقالتلها
عليا: احلام يدج توفى
عبير اهنه اشهقت ويلست تصيح بصوت مسموع شوي
عليا: عبير اذكري الله ماصدقتج تسكتين يابنت الحلال آمني واحتسبي الاجر عند الله
احلام تمت واقفه تشوف امها وعيونها تحرقها .. صح ماتعرف يدها بس كانت تبى تعرفه تبى تشوفه وتتعامل وياه .. امها دوم تسولفلها عنه وعن مواقفه وياها
كان هو اللي مسمنها هو اللي طلب يكون اسمها احلام ..
سماها احلام لين اصبح هو احد احلامها هذي ..
ماعرفت كيف تتصرف .. لكنها بحركه لا اراديه تجدمت ولوت على امها .. ويلست اتصيح وياها
عليا: احلام يا اميه هذا بدال ماتهدين امج
احلام تمت لاويه على امها وعقب قامت عنها حبتها على راسها وطلعت من الغرفه بدون ماتنطق ولاتقول شي ..
دخلت غرفتهم ويلست على السرير تصيح
مديه كانت توها طالعه من الحمام وتمسح ايدها بالفوطه
مديه: بسم الله احلام شو فيج؟
تجدمت مديه منها ويلست حذالها تحاول ترفع راسها
مديه: حلامي بلاج؟
احلام: يدي توفى
مديه خافت: ابويه توه ويانا فالصاااله!!!
احلام: لاااا مدووي ..يدي عبدالله
مديه تمت ساكته مب مستوعبه الفكره .. ماتعرف يدها فكيف تصيح عليه
مديه: الله يرحمه بس مب هو كان في العراق؟
احلام: هيه
مديه: عيل كيف عرفوا انه توفى؟
احلام: مادري بس اميه تصيح وايد وعموه عليا قالتلي انه توفى
مديه: الله يرحمه.. انزين احلام ليش تصيحين؟
احلام: ماعرف بس اميه غامظتني وايد تصيح

مديه وخت وتمت ساكته وبشكل لا ارادي فكرت بفقدان ابوها وحطت نفسها مكان امها .. هالشي خلى دموعها هي بعد تنزل ..
يلسن في غرفتهن وماطاعن يسيرن يتغدن .. وبعد مايلست كل وحده فتره على سريرها تفكر .. استسلمن للنوم ورقدن ..

****

كانت فجر في محاظرتها وقت ما رن تلفونها وكان الرقم غريب وعلى طول حست انه اكيد هذا رقم احمد .. لكنها ماقدرت ترد عليه ..
بعدها وصلتها رساله انه بيترياها في "ستاربكس" عشان يعطيها اوراقها
اما فجر قرت المسج وماردت عليه ..
بعد المحاظره مرت صوب ستاربكس وقفت تدور بعينها ولقته ياشرلها
توجهت صوبه ..

فجر: قوه
احمد: الله يقويج .. تفضلي ايلسي
فجر: لا شكرا انا تعبانه بروح ارتاح
احمد: انزين ايلسي اشربيلج شي وبعدين روحي
فجر: ماتقصر بس صدق انا تعبانه ابي اروح انام عشان اقعد وادرس
احمد: اوكي تفظلي هاي الاوراق ومشكوره ماقصرتي
فجر مدت ايدها وخذت الاوراق: العفو .. يالله انا رايحه مع السلامه
احمد: مع السلامه ..

روحت فجر وهي محتاره ومستغربه من تصرفات أحمد.. اللي لها تفسير من اثنين يا إما الكلام اللي وصلها من ربيعاتها مب صح وماينطبق ع الكل
يا إما احمد يعاملها هي معامله خاصه ..
حاولت تشل أحمد من تفكيرها لكنها مب قادره
زادت من سرعة مشيتها تحاول تقاوم ها الأفكار.. لكنها سمعت حد يناديها .. لفت على ورى..

دلال: فجر اشفيج تمشين بسرعه
فجر: ها
دلال: وين رايحه
فجر: راجعه السكن
دلال: ليش.. قعدي ويانا
فجر: انتو وين قاعدين؟
دلال: فالكافيتريا.. تعالي ويانا
فجر: لا دلول ما بي .. راسي يعورني
دلال: من شنو
فجر: والله ماعرف.. من شوي طالعه من المحاظره ومالي خلق أي شي .. ابي اروح انام وارتاح
دلال: خلاص ع راحتج..
فجر: يلا باي
دلال: باي

ركبت فجر سيارتها وتوجهت للسكن .. تبى تطرد من بالها أي فكره مينونه ممكن تصير..


******************
(الاربعا) 15 سبتمبر 2004
******************

فكلية تقنية الطالبات .. كانت ريم طالعه من كلاسها وبتسير المكتبه وين متواعده ويا سميه .. دخلت المكتبه وهي تتلفت وشافت سميه يالسه على واحد من الكمبيوترات .. وسارت عندها وتمت واقفه ..

ريم: مرحبا
سميه رفعت راسها وابتسمت يوم شافت ريم..
سميه: مرحبتيين .. تعالي يلسي..
ريم: الصراحه انا يوعانه خلينا نسير الكانتين ناكللنا شي
سميه: خلاص اوكي ..

شلت سميه شنطتها وقامت ويا ريم وتوجهوا للكانتين .. خذولهم طاوله ع طرف وسارت ريم تطلب الهم اكل .. ويوم ردت شافت سميه تعابل بتيلفونها

ريم: منو تمسجين!
سميه: لا محد .. بس توه حد داق من البيت وبند
ريم: بيردون يدقولج جان يبونج فشي

رد تيلفون سميه يرن وردت عليه .. كان باين عليها الضجر من المتصل.. ريم لاحظت ها الشي بس ما علقت .. هاي ثاني مره تشوفها جي .. لكن ماتحب تقحم عمرها فمشاكل غيرها دام هم من نفسهم ما خبروها ..

ويوم سكرت سميه .. تأففت .. رفعت راسها وشافت ريم .. بادرتها ريم بابتسامه ..
ريم: يلا الاكل بيبرد ..

بدن ياكلن البنات ويتبادلن اطراف أحاديث مختلفه .. لين ما سألت سميه سؤالها..

سميه: ريم انتي مخطوبه!
ريم اطالعتها: ليش يعني ها السؤال؟؟
سميه: لا . بس يعني انتي ماشاء الله قمر وماظني مافي حد بالأجواء
وضحكتلها سميه وغمزت بعينها يوم شافت ريم توردن خدودها ..
سميه: ها يلا اعترفي..
ريم: مم مخطوبه لولد عمتيه
سميه: هي ما شالله .. الله يتمم عليكم بالخير
ريم وخت براسها : امين

امين.. قالتها من خاطرها ..

ابتسمت ريم وهي تتذكر هدية نايف الها ها الاسبوع ..اول هديه توصلها منه .. اسبوع كامل وهي تحاول تقنع عمرها انه خلاص المفروض تتقبل أي شي من نايف.. قريب بيصير حلالها .. ومن الحين لازم تتأقلم على ها الشي .. وها الايام اقتنعت ريم بانه العشره ويا نايف بتخليها تنسى مخاوفها وتنسى آلامها وتواجه العالم من يديد وتتجاهل الماضي اللي ابعدهم وخلاهم يعيشون فها الدنيا أغراب ..

سميه: هاا ريم وين سرحتي .. مايكوون؟!
ورفعت ريم راسها وابتسمت بخجل..

ريم: لا لا مب جي ..
سميه: خل عنج .. امبين على ويهج .. طاعي طاعي كيف محمره..
ريم: اييه سمووي ..
سميه: اويه استحت البنت .. خلاص انزين .. وشخبار البروجيكت ريم.؟

ضحكت ريم على اسلوب سميه وهي تحاول تجلب موجة الحديث .. وسميه بادلتها الضحكه.. وبالفعل .. انجلبت موجة الحديث وبدن يتكلمن عن حياتهن العائليه وكان فالكلام شوي من التحفظ من قبل ريم .. وكثير منه في كلام سميه ..
شو السبب !! ريم بروحها مب عارفه ..


****

الساعه 1 الظهر طلع محمد من داومه وسار ويا عبير زوجته الشارجه اييبون فجر .. كان محمد طول الدرب يرمس عبير ويباها تتماسك وماتبين شي جدام اختها.. ع الاقل لين يوصلون البيت .. وصلوا عند فجر وخذوها وطول الدرب في السياره كان الصمت هو السائد ..
محمد كان متعمد يحط شريط ااسمه (وبشر الصابرين)..
كانت فجر تسمع قصص عن الصبر وتحمل الفراق والاجر والثواب من ورا هالشي.
قلبها قبظها على اللي تسمعه لكنها ماستغربت لانه محمد دايما يسمع الخطب والمحاظرات ..
اما عبير كانت دموعها تنزل وفي نفس الوقت تحس انه الكلام اللي ينقال يخفف من حدت ألمها ..
وصلوا البيت الظهر ودخلت فجر غرفتها .. اما عبير دخلت هي الثانيه غرفتها بدون ماترمسها ..
بعد مابدلت ثيابها طلعت وسارت غرفه فجر لقتها مشغله التلفزيون على قناه الاغاني ويالسه تفرغ شنطتها من الثياب اللي تحتاج غسيل ..
عبير بندت التلفزيون ويلست على الكرسي ..

عبير: شلون الدراسه ؟
فجر: تمام .. عبير شفيه ويهج ؟
عبير: ويهي ؟ ليش
فجر: امم ماعرف احس صايرتلج هالات تحت عيونج انتي ماتنامين زين !
عبير: صارلي كم يوم اسهر عشان جيه
فجر: اوكي حطي كريمات احسن
عبير: فجر ماتحاجين بشار؟
فجر: اتصلت فيه من اسبوعين يمكن
عبير: ايه .. انزين فجر تعالي قعدي بحاجيج
فجر: شنو صاير ؟ ماسالتي عن بشار الا في شي
عبير: تعالي قعدي يمي
يلست فجر حذال عبير وتمت تطالع ملامحها : فجر ابوي توفى
فجر تمت تطالع عبير وهي مب مستوعبه عدل شو قالتلها
فجر: شنوو؟
عبير: كلمني بشار وقال انه ابوي توفى
فجر: شلون عرف؟
عبير وطت راسها: وصلت جثته ومعاها هويته واوراقه ..

سكتت فجر ونزلت راسها وهي تلعب باظافرها .. ومب قادره تستوعب عدل اللي انقال لها .. مصدومه ومب عارفه كيف تتصرف ..
حست بايد تمسح على شعرها ونزلت لين ظهرها ..
التفتت لها فجر وعلى طول طاحت في حظنها .. واطلقت العنان لدموعها تنزل وهي في حظن اختها ..
وعبير كذلك .. يلست تصيح ويا اختها ويظهرن مابخواطرهن ..

****

فالمنامه كانت مها يالسه ويايدتها وتسولفلها عن المدرسه وشو سوت اليوم .. يتهم مهره وهي شاله فايدها صينيه وفيها ثلاث اكواب عصير.. ويلسوا يشربون ..

ام سيف: ماجنهن خواتكن تأخرن فالييه؟
مهره: قبل شويه سايرين ايبونهن ماوحالهم..
ام سيف: كم الساعه الحينه؟
مها: خمس ونص
ام سيف: ها الوقت ضاريات يوصلن ..
مهره: ياالله امره حاسبتلهن بالدقايق
ام سيف: صه صه انتي ..
مها وهي تطالع صوب الباب: ها ما جنه عمااار؟!
مهره: هيه هو
ام سيف: جي ماسار اييب خواته هو بعد !

تجدم عمار لين المنامه وسلم ع يدته ..

ام سيف: جي ابويه ماسرت اتيب خواتك؟
عمار: سرت ويبتهن وخليتهم يخطفوني هنه .. ليش ما يوا الفروخ
ام سيف: لا يابويه ابطوا اليوم ..
مهره: ماعليه بيوصلون الحين
ام سيف: هيه.. يلس انزين ..انا بقوم اسير اشوف نجموه شو بتسوي ع العشى بناتي اكيد يايات يواعى..
مها: اسميج ما ادجينهن ها البنات .. بسهن بيستون دحابل
ام سيف: عنبوووج جي بياكلن من جيستج هن ..

قبل ما تقوم ام سيف قرصت مها من اذنها ع الخفيف .. وقامت تسير تشوف نجمه..تموا عمار ومهره يضحكون ع مها اللي قابضه اذنها تحكها..

عمار: اسميها امايه عفرا سوالف
مها: خخخخ حليلها .. الا تقرصنا يوم تتعب منا
مهره: تستاهلين انتي .. مستوتلنا ساروه الثانيه ..

وشوي سمعوا صوت سياره داخله البيت .. ويوم وقفت السياره جدام الفله قاموا كلهم وساروا صوب السياره .. وبعد ماسلموا دخلوا كلهم الفله ..

مي: ويينها عيووووزنا
مها: عيوزكن عيزت من كثر ما تترياكن .. وآخر شي سارت المطبخ
مي: بسير اسلم عليهاااا
ساره: انا بسير بعد .. بسلم عليها وبسير انطبن راسي بينفجر

وسارن البنات يسلمن على يدتهن .. ميوه تمت يالسه وياها شوي اما ساروه على طول سلمت وحبتها ع راسها وترخصت منها لانها تبى ترقد ..
سارت حجرتها وبدلت ولبست بجامتها .. شافت الوقت قريب المغرب وقالت بتتريا صلاة المغرب ..
طلعت من حجرتها فالوقت اللي كانت توها مي يايه بتدخل ..
مي: وين سايره ؟ مب قايله بترقدين؟
ساره: الحين بيأذن مافيني ارقد عن الصلاه
مي: اها ..
ساره: بسير اسلم ع ريموه ..

دقت باب حجرة ريم ودخلت .. ماشافت ريم موجوده .. زقرت عليها وماتوايبت .. تجدمت من الشبريه وطاحت .. حست بشي تحت ظهرها .. قامت شوي وبطلت اللحاف .. شافت كتاب شلته وتمت تتصفحه وهيه طايحه ..

ساره:فن التعامل بين الزوجين! وحليلج يا ريموه..

تمت تجلب الكتاب وانتبهت لآخر صفحه .. خط ايد ..
قرت المكتوب وضحكت ..
طلعت ريم من الحمام وهي قابضة فوطه صغيره تمش بها ويها .. ابتسمت لساروه اللي قامت وسلمت على اختها .. ويلسن ثنتيناهن ع السرير

ساره: خييبه شكلج مصفع
ريم: مب من شي توي واعيه
ساره: يحضج رقدتي .. انا بموت من الرقاااااد ..
ريم: هاي سالفتكن انتن اتن مواصلات وترقدن من المغرب لباجر.. عنبوكن ماتولهن علينا .. يلسن ويانا بدال ها الرقاد
ساره: شو نسوي مانرقد هناك ..
ريم: ترا باجر العصر بنسير عند اميه
ساره: ليش مب الصبح؟
ريم: ساره عن الهبل .. امايه عفرا مايلست وياكن بعد .. شو ماتولهين عليها انتي وحليلها هي تهاذيبكن طول الاسبوع ويوم اتن تبن تروحن
ساره: ياويلي انا .. فديتها والله العيوز ..
ريم: تعاالي ..ماخبرناكن عن ابو عبير؟
ساره: بلاه؟ لقوووه
ريم: لا ..هيه..
ساره: شو لا هيه
ريم: حصلو جثته ..
ساره: ماااات؟!!
ريم بأسى: هيه .. استشهد ..الله يرحمه ..
ساره: الله يرحمه..بس كان اغلب الظن انه متوفي من زمان ..
ريم: انزين ساره ولو ..عبير من متى تتريا اليوم اللي بيرد فيه
ساره: بعد ها الظلاّم وين بيردون حد حي.. الله ياخذهم.. انزين والبنات شو حالهن؟
ريم: يعني ..ماعرف يوم ارمسهن مب مصدومات كثر امهن لانهن بالاساس مايعرفنه..
ساره: ومتى ياي الخبر؟
ريم: امس الصبح
ساره: اهااا

وسادت دقايق صمت .. ساره قبضت الكتاب اللي حذالها .. وريم ماكانت منتبهه ..

ساره: احم احم
لفت عليها ريم وطاحت عينها على الكتاب اللي بايد ساره ..

ساره: عادي عادي لاتستحين عرفت انه من نايف
ريم: قريتي؟؟؟
ساره: هيه .. بس يايبلج ها؟
ريم: لا مجموعة كتب
ساره: يحيه .. اظن كلهن نفس ها الموضوع .. عن الحياة الزوجيه
ريم ابتسمت: هيه
ساره: يلا عاااد اونها .. اييبولها هدايا ..

وقامت ساره وتوجهت لمكتبة ريم ودورت ع الكتب وتمت تصفحهن وريم كانت واقفه مجابله التسريحه وتعدل شعرها ..

ساره: يالله يا ريموه .. خطيبج شكله يعاني من تعاملج وياه ههههه
ريم: شوو
ساره: شوفي كله كتب عن التعامل بين الزوجين .. وعن كيف تكسبين الريال .. خخخخ شكلها نغزه ها الكتب ..
ريم: شو قصدج ..
ساره: قصده يباج تعدلين اسلوبج وياه

ريم وطت المشط من ايدها ولفت ع ساره وتحس بحرقه فصدرها .. اما ساره وطت الكتب من ايدها ..

ساره: شكله اذن الاذان .. بسير اصلي وارقد .. والله تعباااانه

طلعت من الحجره وهي تثاوب وتتمغط .. بكل برود .. من عقب ما عقت الرمسه وماعملتلها حساب .. او ممكن كانت تسولف ..
لكن ريم من بيقنعها !
حزت فخاطرها ها الرمسه .. وتمت توسوس وتفكر .. معقوله نايف يبى يوصللها ها المفهوم .. حست بغصه فحلجها .. وقبضت كل الكتب وردتهم مثل ما كانو..
وعلى طول قبضت التيلفون واتصلت بلطيفه وقالتلها الدريول بييبلها اغراض خلها تنزل تاخذهم ..
دقت ريم للدريول ونزلتله وعطته الكيس .. تبى تتصرف بسرعه وماتبى تأجل شي . الكلام وايد كان حارقنها .. ومافكرت فاللي قاعده تسويه .. كل اللي فبالها مستحيل تخلي ها الكتب عندها خلاص..
رجعت حجرتها وخواتها مها ومهره ومي اللي كانن فالصاله يشوفنها باستغراب ..

مي: شو بلاها .. حتى ما خطفت علينا نسلم عليها
مها: شي عكر مزاجها ..
مي: الله يعينها .. من انخطبت وهي معتفسه
مهره: يالله انتي ما لحقتي عليها وهي مستجلبه علينا .. ع كل شي كانت تنازعنا
مي: والله
مها: هي والله .. بس ها الاسبوع الحمدلله خفت علينا شوي .. ورد حالها
مهره: هاي ريموه مريضه نفسيا..
مي: مهره عيب.. اختج الكبيره لاتقولين جي عنها
مها: بس صدق ميوه .. ريم حالها غريب.. ماتعرفيلها مره تضحك وياج ومره تعصب.. من اييها الصداع لاتقربون صوبها..كل شي عيب لاتسونه..
مي: ماعليه تحيدنها انتن ريموه من اول مايت هنه وهي مب طايقه ها البيت ..لكن الحمدلله تبدل حالها شوي وتقبلت امايه عفرا ..
مهره: الله يعين ..
مي: نعوم ويين؟
مها: ماندريبها طالعه من العصر ولا ردت ..
مي: بقوم ادقلها ..

قامت مي وقبضت تيلفون البيت ودقت لناعمه وتمت تتغيلس عليها وتقولها ترد بسرعه البيت .

أما ريم اللي ردت حجرتها .. تمت طايحه ع السرير.. تفكر فاللي سوته .. صح ولا غلط .. ليش الحينه جي سوت من عقب ماتقبلت الهديه .. شو ممكن يقول نايف.. شو بيكون انطباعه ..
صح هي طول الاسبوع مارمست لطيفه وكانت كله تتهرب لانها ماتعرف كيف كانت بتقولها رايها بالهديه .. لكن الحين شو بتقولها وهي ردت الهديه ؟!

خمس دقايق وقطع تفكيرها رنة التيلفون .. شافت المتصله لطيفه .. ردت عليها بكل هدوء .. ماكملت وايد .. وتحججت انها بتنزل عند ام سيف تباها .. سكرت عنها لطيفه ..

لطيفه من بعد ماسكرت عن ريم تمت ع يلستها فحجرتها و تشوف الكيس اللي ردته ريم.. مب عارفه ليش موقف ريم كان بها السلبيه .. ماله داعي ترد الهديه .. حجتها مب مقنعه .. وهي مب عارفه شو بتقول لنايف .. من اسبوع وهو يتريا يعرف شو انطباع ريم من الهديه .. وآخر صبره يشوف الهديه مردوده!

قبضت التيلفون واتصلت بنايف ..

نايف: هلا لطوف ..
لطيفه: اهلين .. انته وين؟
نايف: الحين ببركن السياره وبنزل القهوه .. شي تبين؟
لطيفه: لا بس كنت بسولف وياك.. متى بترد البيت؟
نايف: ماعرف على حسب ..
لطيفه: خلاص اوكي ..
نايف: فمان الله ..
لطيفه: مع السلامه..

سكرت لطيفه من اخوها وتمت تحاتي .. تقوله والا لا ! ماتعرف كيف بتصرف .. قامت من محلها ونزلت عند امها ..


****

سلطان كان يتحوط في الفريج ويرمس ويا بدريه وهو يتصنع الرمسه .. لكن بينه وبين نفسه مل .. طفر.. خلاص ماعاد له خاطر يرمس بدريه..

سلطان: بلاج انتي ؟ شو فيه حسج ؟
بدريه: ماشي راسي بس يعورني شوي ..
سلطان: هيي بسم الله عليج ماتشوفين شر
بدريه: الشر ما اييك فديتك .. وين ساير انته احين ؟
سلطان: البيت بعد وين بسير.. ببدل ثيابي ويمكن ارقد ..انتي ريلج متى بيي؟؟
بدريه: ماعرف يمكن عقب 10 ايام
سلطان: هي ..

خطف في هالوقت صوب بيتهم ولقى مجموعه سياير عند بيت يده .. التفت لهن ومانتبه لبدريه شو كانت تقول ..
بدريه: سلطاني وينك ارمسك انا
سلطان: لحظه لحظه.. سياير وايد عند بيت يدي
بدريه: يمكن عزيمه عندهم
سلطان: هزرج؟
بدريه: هيه يمكن لانه لو شي مب زين لاقدر الله بيقولولك ..
سلطان: برايج انتي برمسج عقب .. بنزل احين البيت
بدريه: اوكي اذا مارديت عليك يمكن اكون رقدت راسي وايد يعورني
سلطان: اوكي.. يالله مع السلامه
سكر سلطان ونزل من سيارته ودخل الفله .. عند باب البيت لقى امه توها لابسه عباتها بتطلع ..
سلطان: السلام عليكم
شيخه: وعليكم السلام
سلطان: وين سايره امايه ؟ وشو مستوي فبيت ابويه سلطان..عزيمه شو؟
شيخه: ابو حرمه خالك محمد متوفى وعاد هذيل ربعها واللي يعرفونها ياين يتخلفولها ..
سلطان: ليش هو اصلا كان عايش؟
شيخه: كان في الاسر مسكين ..
سلطان: كان في الاسر وبعدها عندها امل يرد حي
شيخه: لا حول ولاقوه.. قول انا لله وانا اليه راجعون وترحم عليه بدال هالرمسه
سلطان: الله يرحمه ويرحمنا كلنا ..
شيخه اطالعته بنظره: يالله بسيرلهم انا فمان الله
سلطان: الله وياج
تم يطالع امه وهي طالعه..
سلطان: ها النظره هاي ما بسلم منها انا .. خلني اسير اوطي راسي وارقد اخيرلي..

توجه سلطان لحجرته.. عق الكاب من راسه وفصخ الكندوره .. يت فباله الرمسه اللي قالتها امه.. وعلى طول تخيل فجر..
هذا سبب يا لين عنده ولازم يستغله .. يا الوقت اللي بيبدل فيه اللعبه اللي فايده..

****

ساره.. أسبوع كامل وهي من فتره لفتره تجيك على مسج مروان .. تقراه .. تقرى كل حرف .. تحاول تتخيل انها طرشت له مسج واستقبله مروان.. شو بيستوي بعدين .. ادور مسج .. تحاول اطرشه .. وفالأخير تهون ..

ومروان طول الاسبوع يحاتي .. يمكن ما وصلها المسج .. يمكن ما قرته .. يمكن حد مسحه عنها .. يقول بيرد يطرشلها .. لكن عزة نفسه تمنعه .. ويرد يقول الغايب عذره معه ..

من بعد ما قامت ساره من النوم .. تمت طايحه تفكر فالحلم اللي ياها .. اطالعت الساعه لقتها وصلت 11 .. لفت ع شبرية مي وما حصلتها .. دقايق شافتها ظاهره من الحمام وهي تمسح ويها بفوطه صغيره ..

مي: زين يوم قمتي بروحج .. يلا قومي صلي العشى
ساره: انتي رقدتي؟
مي: لا .. ابا ارقد مره وحده .. امس الا سهر وسوالف تعبت والله من قلة الرقاد وصوتي انبح من كثر الزعيج

ساره وهي تثاوب وتتمتح ..

ساره: ميوه حلمت انه مروان زعلان!
مي وهي تطالعها: هاا
ساره: هي والله .. ميوه يمكن عشان لبسته ما رديت عليه بمسج؟!
مي: مادريبج والله .. انزين طرشيله الحين أي مسج عااادي
ساره: شو يعني .. مثل شو ..

مي تجدمت عند ساره ويلست ع طرف الشبريه .. وهي تحاول تفكر شو ممكن ساره اطرش لمروان ..
وولعت اللمبه فوق راسها وع طول قبضت تيلفون ساره وكتبت ها المسج ..

" ويا نسمات المسا .. احملك احلى سلام.. يالله عساك بهنا..وتشوف احلى احلام"

وراوته ساره ..
ساره: شو خص احلام ..
مي: ههه أي احلام .. فقدتج .. يعني الحين المسى وانتي مطرشتله سلام وفنفس الوقت تقوليله احلام سعيده .. افهمي ..
ساره: هيه .. وين يبتيه المسج .. حافظتنه
مي: لا فديتج توني ارتجلته خخخخ ..
ساره: بس عليج اللي يقول امره مكسر مسكت..
مي: يلا طرشيه وقومي صلي ..
ساره: انزين .. بنشوف نحن اخرتها .. ان صار شي ترا كله من ورا راااسج يا ميوه
مي: شو بيصير يعني .. الحياه عندكم .. حبوا بعض وعيشوا حكايه من حكايات الف ليله وليله خخخ .. وخلج من برودج وبرود ها المشاعر اللي فداخلج واهتمي بالطرف الاخر مثل ما تهتمين بعمرج ..
ساره: شوو قصدج يعني هااا
مي وهي تضحك: لا ماااشي ..

وقامت مي من محلها وطلعت من الحجره قبل ما تفتح لساره باب للسوالف .. اما ساره قرت المسج اللي كاتبتنه مي .. وتوكلت على الله وطرشته .. وتمت قابضه التيلفون تتريى التقرير لين ما يوصل .. واول ما وصل ابتسمت وقامت من الشبريه عسب تتيدد واتصلي ..

اما مروان .. وهو يقرى المسج .. مب مستوعب .. تشقق من الوناسه .. بس اللي فباله ليش يعني تأخرت عليه ها الكثر!
تباه يتعذب يعني ..والا تتغلى عليه .. وتم يضحك على عمره وهو يفكر ها التفكير.. انشرح صدره للسوالف ورجع له مزاجه المرح اللي افتقده طول ها الاسبوع .. ويتمنى باجر بسرعه ايي بس عسب يشوفها .. النظرات هي نفسها البارده ولا ممكن تتغير !
وايد متحمس لها اللقاء اللي بيجمعهم ..ويفكر كيف ممكن بيكلمها عادي وبيتعامل ويااها عادي..هي ما تدري باللي فخاطره .. وهو على امل انه اللي فخاطرها يكون مروان..مروان وبس..

[لامارا]

******************
(الجمعه) 17 سبتمبر 2004
******************

كان واقف مصدوم من ردة فعلها .. حركته كانت وايد بسيطه ومعناها حلو .. لكن هي ليش ما قدرت ها الشي!

"انزين لييش هيه سوت جيي ؟؟"

تمتم بها الكلمات بكل يأس يبى حد يجاوبه ..يفهمه ..

لطيفه: ماعرف يا نايف.. يوم الاربعا ردت الهديه .. ويوم رمستها قالت ماتقدر تقبل الهديه .. مافي شي رسمي يجمعكم اونه
نايف: كيف جي بعد .. من الله مخطوبين
لطيفه: شدراني عنها
نايف: وليش ما قلتيلي من قبل
لطيفه: ماعرف .. ماتشجعت
نايف: لطوف مب حاله هاي .. الرمسه ماروم ارمسها وياها .. والشوفه ماروم اشوفها .. حتى هداياي ماتباهن .. البنت مغصوبه عليه عيل ..الا هديه هيه شحقه تردها ماتعرف انه ها الشي مب زين!!
لطيفه: نايف قصر حسك ولاتكبر المسأله دخيلك ..
نايف: دقيلها برمسها
لطيفه: شو تخبلت انته .. تقولك ماشي شي رسمي وتبى ترمسها
نايف : عوقها الرسمي هيه يعني..
لطيفه مب عارفه شو بتقول وكيف بتخفف على اخوها.. اول مره تشوفه متنرفز بها الشكل ..
نايف: اوكي انا بتصرف ..
لطيفه بحيره: شو بتسوي؟!

طلع نايف من حجرة لطيفه وهو معصب .. لحقته لطيفه تزقر عليه بس طنشها .. نزل تحت ولطيفه وراه وتم يزاقر على امه اللي ماردت عليه ..

نايف: اميييييييه ..
لطيفه: نايف شو بتقوللها
نايف: امااااااايه انتي وين ؟؟!!

دخل الصاله وشاف عمار يلعب بلاي ستيشن ..
نايف: عمار وينها امايه؟
عمار: اظن سارت عند البشاكير تقولهن شو يسون غدى
لطيفه: نايف هد عمرك شوي .. بتزيغ عليها الدنيا امايه وهي تشوفك جي.. عمار قم زقر امايه .. قولها نايف يباج فالصاله
عمار: مااروم..يالس العب
نايف: عمااااار قوم ..

لف عمار على نايف .. حس بجدية الموضوع من أشكالهم وقام على طول ..زقر امه ورد وياها .. يلسوا كلهم فالصاله .. بس نايف طلب منهم يخلونه بروحه ويا أمه .. طلعوا الكل من الصاله .. ولطيفه فخاطرها تيلس وتسمع شو اللي بيدور .. بس نظرة نايف كانت صارمه .. خلتها تروح من غير ولا كلمه ..

مريم: ها ابويه بلاك حاشر البقعه ..
نايف: اميه .. ابا املج
مريم: ويدي ها الحشره كلها عشان تبى تملج
نايف: اميه ارمس جد انا .. عطيهم علم الاسبوع الياي بملج
مريم: مسرع .. وشو اللي خلاك تعيل امبونه عادي عندك
نايف: خلاني اللي خلاني .. رمسيهم وقوليلهم اني مستعيل .. ابا املج الاسبوع الياي..كيفهم يدبرون عمارهم
مريم: بعد وين يمدينا نجهز فاسبوع .. وبعدين ريم ع الخطبه ذلتنا لين وافقت .. تباني اقولهم عن الملجه .. ابوي انا مايخصني .. بروحك انته سير عند يدتك ورمسها .. شور ريم عند امايه ومتى ماقالت كلمتها ريم ماتردلها طلب .. تبى ها الشي عليك بامايه تقنعها ..
نايف: يعني انتي مابتقولين
مريم: انا مالي شغل .. سير انته وقولها
نايف قام من مكانه : خلاص بصلي الجمعه وعلى طول بسيرلها

طلع من الصاله من غير مايتكلم أي كلمه زياده .. استغربت امه من حاله ..من وين يته ها الجرأه مره وحده .. زين ها اللي تباه من قبل هي .. تباه هو اللي يتحرك ويرمس .. خله يعتمد على قراره ها المره..


****

فحجرة أحلام .. كانت مي يالسه تسولف وياها .. وتخبرها أحلام عن حالة أمها من تلقت خبر وفاة أبوها لين اليوم .. الكل كان زعلان لزعل عبير.. لكن هذا قضاء الله وقدره ومحد يعترض عليه ..

أحلام: البيت يوم الثلاثا والاربعا كان واايد كئيب.. زين انكم ييتوا .. خففتوا عليه شويه .. اميه تصيح من صوب وفجر من صوب ..
مي: الله يعينهن .. ها اللي مكتوب ولازم بيصير.. والله يصبرهن
احلام: امين ان شاء الله
مي وهي تطالع الساعه فتيلفونها : بتي الساعه 11 .. لازم نروح احين
احلام: لاااا صبروا .. بعدهن الباصات ثنتين ونص
مي: انزين بنسير نجهز الشنط وشوي بنيلس ويا امايه عفرا
احلام: لاحقه ع امج عفرا.. حرام عليج من اسبوعين مايلست وياج
مي: فديتج والله .. بيلس وياج نص ساعه زياده ولايهمج.. بس قومي خلنا نيلس فالصاله .. عن يقولنا كله منخشات داخل ..
احلام: خلاص اوكي ..

قامن ثنتيناتهن وتوجهن للصاله .. حصلن ام راشد وشيخه يالسات ..

مي: اماايه وين اميه وخواتي؟
ام راشد: امج اظني عند عبير.. وخواتج مادريبهن وين .. توهن هنه وقامن كلهن مره وحده
شيخه: طالعيهن عند فجر
احلام: هاي تروغ كل اللي يدش عندها .. ماظنتي سارلها
مي: بدق لريموه بشوفهن وين

اتصلت بريم ..

مي: ريموه انتوا وين؟
ريم: عند عبير
مي: واميه وياكم
ريم: هيه
مي: والبقيه؟
ريم: ماعرف .. نحن بس هنه
مي: اها .. انزين ريم دقي للدريول خليه ايي بنروح نجهز ثيابنا
ريم: منو بيروح؟
مي: كلنا بعد منو
ريم: لا انا مابسير الحينه .. فليل بخلي حد ايينا
مي: ونحن
ريم: دقن للدريول خلنه اييكن انتي وساروه .. الصراحه بعدنا ماجنعنا من اليلسه
مي حاست بوزها بتملل: خلاص اوكي..باي

سكرت مي التلفون ويلست حذال يدتها واتصلت بالدريول.. واحلام يلست عدال عمتها شيخه .. وتموا شوي يسولفون وياهم ..

ام راشد: ليش تروحون اميه؟
مي: بنسير نرتب اغراضنا .. مافينا نتأخر
شيخه: الله يعينكن يا بنياتي ..
مي: انا بقوم ازقر ساروه ..

قامت مي من مكانها وتمت احلام يالسه تترياها ..

ام راشد: يييه يا ميوه غدت حرمه

لفت شيخه على ورا .. بس ميوه اختفت من الانظار.. وشيخه ابتسمت ابتسامة رضا ولفت على امها .. كانت بتقول شي بس شافت احلام يالسه فسكتت ..
احلام كعادتها لمحت ها الشي .. ورفعت حايب..

احلام: شو بتقولون اسرار
شيخه: شو اسراره بعد
احلام: شدراني عنكم ..

سكتوا الكل .. وقامت احلام من مكانها لحقت ميوه .. اللي كانت ويا ساروه فحجرة امهم يرتبن اغراضهن ويلبسن عبيهن ..

احلام: ايه لاتروحون
ساره: شو بنسوي .. ها ميوه اقولها من امس لو مرتبين اغراضنا وشالين قشنا
مي: اييه حرام وامايه عفراا
ساره: هيي صح عيوزنا ..
احلام لفت ع الدريشه وهي تسمع هرن ..
احلام: هاكو يا ويه النحس دريولكم
مي: خخخخ خس الله بليسج .. يلا قومي ساروه .. يدوبنا نسلم ونروح
ساره: يلا انزين

طلعوا البنات من الحجره وساروا سلمن على امهن وعبير وخواتهم .. وع اللي يالسين فالصاله .. ووصلتهم احلام لين السياره ..

احلام: يلا ركبن يا الخايسات ..
مي وهي تركب السياره: خاست ريحتج يا الهرمه
احلام: ههههههه وياويهج
ساره: يلاا باي
احلام وهي تسكر باب السياره ..
احلام: باااي ..

طلعوا البنات من البيت .. فوقت صادف انه مروان ووياه وحده ظاهرين من باب بيتهم ..

مي: احم احم ..
ساره: منو وياه؟
مي: احس عزوه .. وقف شوي بشير ..
بشير: ليس ؟
مي: انته وقف شووي.. وقف عند ها ريال
بشير: منو هزا ريال ؟!
ساره: هههههههه انته شو خصك ..
وقف مروان ووياه عزه يشوفون السياره اللي بتوقف جدام باب البيت .. نزلت ميوه الجامه ..
مي: سلاموو عليكو ..
مراون: هلااا والله وعليكو السلااام
عزه: اندوكم انا اقول منو هاي .. عبالي ام الخير طلعت ميوه
مي: احم ام الخير هاا .. يلا جدمي بسرعه بنسلم عليج .. بنروح
تجدمت عزه وسلمت ع مي ووايقت فالسياره وشافت ساره وسلمت عليها ساره ..
عزه: شحالكن؟
ساره: الحمدلله تمام
عزه: يالله ما شفناكن امس مول والحين بتروحن!
مروان: ليش مروحين ؟ وبس انتن؟
مي: هيه .. يدوبنا نلملم اغراضنا ..وبعدين يا انسه عزه ادلينه بيت ابويه سلطان ..
عزه: ههههه والله امس ماكنت متفجيه اظهر .. كله فالحجره ..
مي: مشكله بعد اللي كله فالحجره ..

ضحكوا هم الثلاثه .. وفها الوقت رفع مروان من نظرته عسب يشوف ساره .. شافها وهي موخيه تلعب بتيلفونها .. ماقدر يقولها شي .. يبين عليها متجاهله وجودهم .. او ما همها .. وها اللي مروان ما يبى يحسه .. ضربته غصه شوي .. ويوم طاحت عينه بعين مي ابتسملها ع الخفيف.. مي ما بينت انها تدري بأي شي .. وابتسمت لمروان وعزه ..
مروان: يلا بالسلامه ..
مي: الله يسلمك .. فمان الله ..

تحركت السياره ورفعت مي الجامه ولفت ساره ع ورا تشوف .. كانوا مروان واخته مروحين بيت يدهم ..

بشير: مي
مي: خير
بشير: هزا منو ريال؟
مي: هذا ولد خال مال انا
بشير: هييه .. انا قول هذا فيه يشبه انتي شوي
مي: يالله يالله يشبهني
ساره: ولا يخصه
مي: خخخخخخخ خلاص ساروه بشيروه قال يشبهني
ساره: بس عيل .. شوفي انا اول مابوصل بدخل اتسبح .. وانتي قولي لنجموه خليها تسوي مدخن ودخني الثياب
مي: يالله كيف تغير السالفه ..
ساره: جب
مي: يجبج .. انزين المهم ليش مب العكس يعني .. انا بتسبح وانتي دخني
ساره: يلا مناك ..
مي: انزين بنشووف ..

وصخن البنات وهم فالسياره .. وكمل بشير الدرب لبيت سيف ..


****

بعد صلاة الظهر .. توجه نايف لبيت يدته .. مب عارف كيف يجمع الكلمات والجمل.. شو بيقوللها .. وكيف بتقتنع ريم بها الشي .. يلس ويا يدته فالصاله .. محد كان وياهم .. مع ذلك ماقدر يفتح السالفه.. شويه يا سيف من المسيد ووياه ولده مايد ..

سيف: ماشالله نايف هنه
نايف: هي قبل شويه ياي
سيف: يحيك .. زين عيل غداك عندنا اليوم
نايف: لا لا .. بسير البيت بتغدى عند عيوزنا
ام سيف: خل عنك عيوزك اليوم .. غداك عندنا تراه ..
ابتسم نايف ليدته وماحب يعارضها ..
سيف: البنات ماين ؟
ام سيف: بين فليل .. الا ساروه وميوه يايات مساعه
سيف: هيه حليلهن عاد وراهن جامعه هاذيل
ام سيف: ميوود فديتك سر زقرهن خلهن ينقفضن ما بيمديهن الوقت عقب عسب يتغدن
نايف: باصاتهم تتحرك ثنتين ونص .. بعدها الساعه وحده الحين
ام سيف: انزين نباهن شويه يلسن ويانا بعد
مايد: بسيرلهن بشوفهن ..

طلع مايد من الصاله وسار فوق عند خواته .. دخل صالتهم وما حصل حد وعلى طول توجه لغرفة مي وساره ودخل ..

مايد: ميوه
مي: هااه
مايد: امايه عفرا تباكن تحت
مي: انا بنزل الحين .. الا هاي ساروه توها داخله الحمام تتسبح
مايد: ترا نايف ولد عموه هنه
مي: غرييبه شو يدور
مايد: ليش يعني
مي: اول مره ايي بروحه ..
مايد: عاد خلاص نسيبنا خخخخ لازم بيزيد زياراته
مي: اندووكم انتو .. ايه لاترمس ها الرمسه جدام ريموه بتهزأك
مايد: لا لا الا جدامكن انتن ..
مي: خس الله بليسك .. يالله انزين خلنا ننزل ..

طلعوا مي ومايد من الحجره وتوجهوا للصاله تحت .. شافوا الكل يالس .. يلسوا وياهم ونظرات مي تتنقل من نايف ليدتها لأبوها .. ماحست فيه موضوع مفتوح فها اليلسه ..

ام سيف: ميووه
مي: هلا امايه
ام سيف: ساروه وينها
مي: بعدها ساروه الحينه لاحقنها الصايح تتسبح
ام سيف: ويديي .. وجي الغدى ماتباه .. ماشي وقت عقب
مي: ماعليه بتزط أي شي فالباص
ام سيف: شو ها الاي شي بعد .. خلها تاكل من ها الغدى وابويه عليها انا.

مي تنهدت واطالعت يدتها وهي مبتسمه بالغصب ..

مي: بسير اعيلها ..
ام سيف: لا انتي يلسي بتسيرين ومابتردين .. ميود قوم ابويه زقر اختك
سيف: انتي بلاج حارقه اعصابج يا امايه!
ناعمه:عاد عمووه لازم تسوي ها الحفله عشان البنات ياكلن .. انا بسير اخلي البشاكير يحطن الغدى عيل احسن
ام سيف: زين تسوين ..
مايد: بسير ازقر ساروه ..
ام سيف: ركض يلا

وبعد الغدى .. قامن مي وساره وسلمن على يدتهن وابوهن وناعمه وركبن السياره ومايد وياهن .. وتوجهوا لموقف الباصات..

اما ناعمه وريلها صعدوا فوق ..

مابقى فالصاله غير ام سيف ونايف.. اللي معزم ها الوقت يرمس بالسالفه ومايقدر أبدا انه يأجلها .. هدى الجو واليده شكلها رايقه من بعد الجاهي..

نايف: امايه..
ام سيف وهي تتعبل بالدلال اللي جدامها : عونك ابويه ..
نايف: ابا ارمسج فسالفه
ام سيف: ها ابويه شو عندك!
نايف: انزين وطي ها الدلال من ايدج وشوفيني
ام سيف: الله يغربل عدو نجموه كم مره قايلتلها تفرك الغطي من داخل .. شوف كيف مستوي لونها ..
نايف رفع حوايبه وبدى يعض على شفايفه ..
نايف: امايه عاد من مساعه انا هنه ومارمست فاللي اباه خلي عنج الدلال وانتبهيلي
ام سيف وطت الدله وشافته ..
نايف: ااماايه تراني ابى املج
ام سيف: شووو؟
نايف: هي ابى املج
ام سيف : ابركها من ساااااااعه
نايف خف توتره .. وتم يطالع فيدته اللي الابتسامه شاقه حلجها
ام سيف: انزين ابويه شو عزم بك .. امبونك ماتبى الحين
نايف: هاا.. والله ماشي .. فكرت فالوضع وشفت انه الملجه اصلحلنا .. انتي بروحج تشوفينها ريم كيف
ام سيف: عاد ريموه شو نسويبها .. تستحي
نايف: ماعليه انزين .. بنملج وبنشوف المستحى عقب.. انا ماروم اتريا وايد لين تتعود عليه .. من الله العرس شهر واحد .. شو يعني تبونا نملج قبل العرس باسبوع..
ام سيف: شوف اللي بتسويه وانا وياك .. وماعليك من ريم
نايف: خلاص نحدد الملجه قبل رمضان ..
ام سيف: خلاص وليدي .. بس عاد منو يدري بهاي السالفه
نايف: محد .. بس انا وانتي
ام سيف: زين .. ريم رضاها على ايدي بيكون ماعليك

نايف ابتسم ابتسامه عريضه ليدته .. وقام وحبها ع راسها ..

نايف: الله يطوللنا بعمرج يا امايه
ام سيف: فديتك يا وليدي يعلني ما اخلى منكم .. انا شو ابى من الدنيا غير ان عيالي يكونون مرتاحين ..

وتم يالس وياها نايف لين حست انها تبى تغفي وخلاها .. ركب سيارته ومن وناسته مب عارف وين يتوجه ولاي مكان يسير .. الحين بيقدر يشوف ريم بيقدر يرمسها من غير أي موانع .. وما بتقدر تحجج بأي شي .. وبيحاول قد ما يقدر انها تاخذ وتعطي وياه فها المده ..

****

الساعه 7 المغرب .. بعد ماوصلوا محمد وعبير فجر للجامعه .. رجعوا عنها .. وهي شاله اغراضها اهتز تلفونها في شنطتها اللي كان يدل انه وصلها مسج .. لكنها مافتحته لين وصلت غرفتها ووطت الاغراض .. فتحت شنطتها وطلعت التيلفون ..

شافت مسج واصلنها ..

"عظم الله اجرج وجبر خاطرج"

استغربت .. الرقم ماتعرفه .. منو بيكون المرسل!

"اجرنا واجركم .. منو ؟"

تم تسليم المسج وهي تطالع فالرقم .. ممكن مار عليها ومب قادره تذكره .. دقيقتين وياها اتصال من نفس الرقم .. زاد استغرابها وردت بحيره..

فجر: الوووه
سلطان: الوه السلام عليكم
فجر: وعليكم السلام .. منو وياي ؟
سلطان: انا سلطان بن سالم ..
فجر صخت.. سلطان ! هو نفسه ولا غيره!
فجر: ولد شيخه
سلطان: هههه تذكرتي ..
فجر ابتسمت: أيه ..
سلطان: من مده ماشفناج
فجر: ماكو غير ها الجامعه شاغلتنا ..
سلطان: اها. عاد انا خبرتني امايه عن ابوج وقلت اقوم بالواجب..
سكتت فجر شوي وبعدين ردت عليه
فجر: ماقصرت فيك الخير .. بس شلون عرفت رقمي ؟
سلطان: انا مطلعلج الرقم
فجر: كيف..ااقصد ليش انت؟
سلطان: خالي محمد كان مشغول ذاك اليوم وطرشني انا ..
فجر: ماشالله وحفظته
سلطان: ترتيب الرقم ينحفظ بسرعه
فجر: ايه .. زين
سلطان: انتي روحتي صح ؟ كنت ياي بيت يدي وقالوا انه مرت خالي سارت توديج
فجر: ايه انا في الشارجه الحين
سلطان: صوتج تعبان ؟
فجر: ماكو .. بس ضايقه وعندي اسايمنت لازم اسلمه خلال هالاسبوع وانا ماسويت شي ابدا ومالي خلق لشي
سلطان: تبين اساعدج ؟
فجر: لا لا عادي
سلطان: صدق والله انا ماعندي شغل وماعليج مني لو مب دارس بس شاطر واعرف اسوي كل شي ..
فجر: امم والله مادري
سلطان: يلا خل عنج .. بسويلج عادي
فجر بوناسه وثجل بنفس الوقت: انزين انا بطرش لك الاسايمنت عن شنو في مسج وانته شوف اذا تقدر تسويه لي والا لا .. او عطني فكره كيف اسويه اذا ماتقدر
سلطان:لا ان شاء الله بقدر طرشيه بتريا
فجر: اوكي .. امم سلطان مابي حد يعرف عن ...
سلطان: لاتحاتين .. يالله مع السلامه
فجر: مع السلامه ..

سكر سلطان وهو يبتسم .. فريسه يديده هاي .. بس عايبتنه من اول ماشافها وما وده تروح عليه ..


اما فجر ماكان لها خاطر تفكر اذا اللي تسويه زين والا لا .. كتبت له الاسايمنت واستسلمت للنوم بدون ماتبدل حتى ملابسها من التعب