من متى والغصن يختار الطيور ؟ / للكاتبة شخصية خيالية ، مكتملة

[لامارا]

ـــــــــــــــــــــــــ ـ



الجزء الأخير..



ولأن قصص هالبشر لو بدأت ما تنتهي.. ولو انتهت ترجع تبدأ من جديد.
و لأن هالحياه عباره عن مسرح كبير ..وكل واحد مننا له نصيب من العرض فأحيان يؤدي فيها دور البطوله وأحيان يكون مجرد متفرج سلبي صامت ..
الحياه ليست مثاليه لأي أحدمنا مهما كانت ..*هي دنيا وليست جنّه* كما يقال،
كلنا نحزن مثلما نفرح.. نفارق مثلما نلتقي..
كثير ما ناخذ اللي نبيه.. واحيان نخسر اللي نحبه.. واحيان ننحرم من حبايبنا.. ويمكن مانختار شريكنا بإرادتنا لكنه بعد الله يكون هو الحبيب الاقرب وتنشأ علاقه اقوى من كل العلاقات.و برضو ممكن يصير العكس..في اماكن وازمنه تفرض الاختار عليك وتكون انت اداة تنفيذ لاختيارات غيرك .. تذكرنا ببيت للشاعر الانيق متعب التركي;
""من متى والغصن يختار الطيور؟!""

،

42))من متى والغصن يختار الطيور؟!!
،
.
الليل.. *
وقف عند بابها وقلبه يرجف مو مصدق انه الليله بيخطبها وبتصير له ..نسف شماغه ، استرجع نفسه وثبت وقفته الواثقه.. لأنه جاء لحاله ..ومشعل مب موجود وابوه مريض.. وهالفرصه اللي انتظرها سنين مستحيل يضيعها..
،
دخل بعدما رن الجرس وفتحوا له..
زياد بابتسامه/يا مرحبا بك يا عُمر..حياك الله
عُمر بابتسامه خجوله/الله يحييك..
زياد وهو يأشر للمجلس/تفضل اقلط..حياك
عمر دخل المجلس/زاد فضلك..
زياد بدأ بصب القهوه وتقديم الضيافه واقبل ابو زياد. وسلم على عُمر وجلسوا يتبادلون الاحاديث..
بعد ربع ساعه… مرّت وكأنها دهر.. قرر عُمر يفتح الموضوع اللي هو جاي علشانه..
،

في مكان ما…*
نزل سيجارته وهو ينثر رمادها في الطفايه، ونطق بحقد/اللي صار مابيه يمر بهالسهوله يا ناجي
ناجي/خالد انت وش تفكر فيه بالضبط؟
خالد وعيونه ترسل شرار/ابي حياتها..ودمار حياة اهلها..
ناجي/انهبلت انت.. اجل ليش تخلينا نقلب اهل القريه على مشعل و اهله..
خالد وبعيونه نظرة حقد دفين/ابيهم ينشغلون بانفسهم.. ابي اسرق راحتهم.. اجل تظن زينه اني بنسى اللي سوته فيني هي وصبيها معها..وبديت في عبدالرحمن زوج اخته المغفل.. وهذا هو بيطلقها
ناجي/طيب قوولي ..وش ناوي عليه انت
خالد بنظره كلها وعيد/راح تشوف..الناس سهل تلعب في عواطفها اذا الشي يمس شرفهم وعاداتهم
ناجي قام بعدما رن جواله وطلع يرد..
،
.
،
.
في نفس مجلس الرجال في بيت ابو زياد.. بعد صمت لدقيقه.. نزل بو زياد فنجانه..
عُمر صار على اعصابه بعد هالضيافه والترحيب ما يدري بيزوجونه بنتهم او لا…
ابو زياد/ماراح نطول عليك يا عمر.. قبلت ازوجك بنتي على سنة الله ورسوله.. مبروك
زياد بابتسامه عريضه/مبروك يا عمر
عُمر توه يستوعب وابتسم وواضح عليه المفاجأه/الله يبارك فيكم..مشكورين..
زياد/هاه متى تحب تكون الملكه
عُمر/ينفع هالاسبوع؟ وتكون بنفس يوم الزواج
ابو زياد/ههههههه ما يمدي هالاسبوع.. شفيك مستعجل كل هالقد..
زياد بمزح يحرق اعصابه/خلها بعد 6شهور احسن او سنه
عمر جاه احباط/هااه!!
زياد وابوه/هههههههه
عمر انحرج/اللي تشوفونه
ابو زياد/دام كذا… عطنا اسبوعين ..عالاقل يجهزون انفسهم..
عمر ابتسم بسعاده/ماعندي مشكله..
،
.
،

،

.
صباح يوم جديد..في دبي*
صحت من نومها وفتحت عيونها بكسل… تفاجأت فيه مسترخي جنبها ومتكي على يده اليمين ويناظر فيها بحب..
اكتسى وجهها اللون الوردي من الخجل وهي تغطي نفسها باللحاف وتتصدد عن نظراته اللي اكلتها..
مشعل بابتسامه دافيه/صباح الخير يا احلى عروس
لوجين وهي تبعد خصل شعرها خلف اذنها وتحاول تبعد عنه من الخجل/صباح النور
مشعل لاحظها تبعد ومسكها وسحبها له بابتسامه/لحظظه، ليش مستعجله على فرقاي
لوجين صدت عن عيونه وهي تثبت اللحاف عليها/مشعل بليز لا تناظر فيني كذا .ماااحب
مشعل وهو يقرب منها ويده تداعب خدها برومانسيه/من شاف اللي قاعد اشوفه فيك..اكيد بيدمن فيك النظر..
لوجين تبي تدور اي موضوع يشغله عنها/اولادي… مـ.. ما كلمتهم.. ابي اكلمهم واتطمن عليهم
مشعل عارف انها مستحيه وتصرفه/أنا كلمت خالتي هدى وتطمنت عليهم،لا تخافين و خلي لي شووي منك على الاقل،بعدين انا محتاج لك اكثر منهم ترى
لوجين ابتسمت/تغار من عيالك!!
مشعل قرّبها لصدره وضمها/اظن اني ماضايقتهم خلال خمس سنوات.. مافيه شي لو انفردت فيك يوم
لوجين بادلته الاحضان وهي تتبسم/على كذا بضيع أنا بينكم !
لحظة رومانسيه نادره….. عم السكوت واعتلت فيها اصوات الانفاس.. ولكن قطع هاللحظه..
"صوت رنين جوال"
مشعل وهو يحتضنها/اوووم الازعااج
لوجين ابعدته عنها بلطف/هذا اكيد احد من اهلي
مشعل بانزعاج/اقوولك توني مكلمهم ماظن يتصلوون
لوجين مدت يدها للكومدينه واخذت جوالها واستااانست/وااااااو
مشعل استغرب/من المتصل؟
لوجين وهي ترد بسعاده/روووبي
روبين بالجوال/السلام عليكم
لوجين/وعليكم السلام حبيييبتي كيفك وش اخبارك بشريني
روبين بحماسها المعهود/الحمدلله انا بخير ..وابشررك بجييكم في السعوديه السبوع الجااااي
لوجين/يا قلللبي اخييييررااا بشووفك..
.
مشعل شافها طولت وهي تكلم و تركها تكلم براحتها.. ونزل من السرير وراح يطلب لهم قهوه..
/
/
/
/
/
/
السعوديه^
في المستشفى.. *
بو علي بسعاده ومعه عيال علي جالسين جانبه.. كل واحد كاشخ بالثوب الابيض.. وبعد السؤال عن الاحوال..
بومشعل مبتسم باستغراب/محمد وانا اخوك من هالشباب اللي معك
بوعلي بابتسامه/ماراح تصدق يا فيصل ،هذول مؤيد ومازن عيال علي.. كان متزوج اخت زوجة جابر الله يرحمه.. ومخفي عننا هالسنين كلها
بو مشعل عصب على الماضي اللي كان فيه بيغصب زينه تتزوج علي وعلي كان اصلاً متزوج بالسر/الله يصلحهم.. ويخليهم لك وعساهم العوض الصالح
بوعلي براحه/اميين.. يلا انا استاذن وانا اخوك
عزيز دخل وهو راسم ابتسامه ومعه سلة قهوه وشاهي واشياء/وووين يا عمي تووني جايب القهوه من البيت.. اجلس تقهوى
بو علي/مره ثانيه يا رجل..
بومشعل وعينه ع/يا رجال تقهوى معنا .. فيه موضوع مهم ابيك تعرفه..
بوعلي باهتمام/وش العلم يا فيصل
عزيز طلع القهوه وبدأ يصب..
بومشعل/عزيز اقعد قبل تصب القهوه ابيك تنتبه لي
عزيز وهو مستغرب جلس/اسلم يا عمي ..وش العلم
بو مشعل/العلم سلامتكم.. نويت ازوج زينه باذن الله
عزيز قلبه رجف بقوه ونزل راسه بضيق/..
بوعلي استغرب/قصدك خطبها واحد وانت نويت تعطيه؟
بو مشعل بجديه/لا تستعجل يا محمد.. انا نويت اعطي زينه لولدي عزيز.. هااه وش قلت يا عزيز
بو علي وهو يبتسم/عزيز كفو ويستاهل بنتنا وش قلت يا عزيز؟
عزيز ماكان يسمع.. أو بالاحرى دخل في حالة عدم تصديق رفع راسه ووجهه ما ينتفسر/عمي انت وش تقول؟
بو مشعل وبو علي ضحكوا على ردة فعله..
مؤيد بابتسامه/يقوولك جدي هو بيخطب لك زينه.. ماتسمع انت؟
عزيز ابتسم على كلام الولد.. والتفت على عمه بسعاده/ما يبي لها راي يا عمي.. انت خطبت لولدك.. وولدك تحت شورك..
بومشعلكان متوقع هالشي/تراها جتك.. زينه باذن الله حلالك
بوعلي/مبروووك عليكم.. تستاهل يا عزيز
عزيز حس ريقه نشف من المفاجأه الغير متوقعه،مد يده لجيك الماء وصب له كاس،وبل ريقه.. وسذ ضحكات بو مشعل وبو علي..
بو مشعل/بكرا يا عزيز تجي البيت ومعك المأذون..
عزيز وده اللحين يتملك لكن/ومشعل؟ لازم ننتظره
بو مشعل/بكرا ملكتك ومستحيل أأجل هالشي ليوم ثاني.. ابي اذا جاء مشعل تكون حفلتكم وحده.
عزيز طبعاً هذا أحب ماعلى قلبه بس خاف/التحليل لازم ياخذ وقت وبعد… عمي اخاف زينه ماتبي الـ..
بو مشعل قاطعه بابتسامه/لا تخاف.. انا ما فتحت هالموضوع الا بعدما اخذت موافقتها.. انبسط ...
عزيز هنا ارتااااح… حلم حياته قرّب يتحقق خلاص.. زينه بتكون له…
بومشعل مد يده لجواله اللي على الطاوله/خلني اتصل على عُمر علشان يمرنا للملكه..بس يارب يكون موجود
/
/
/
/
طلعت من عيادتها وهي تحس بسعاده لأول مره تحس بنشوة الأمل ..اتجهت لقسم التنويم.. وبالتحديد غرفة "فاتن"
دخلت وهي ترسم ابتسامه عريضه/صباح الخير
فاتن كانت جالسه تقرأ في كتاب ووقفت لها/صباح النوور هلا والله بعروستنا
لمياء بمرح/قوولي هلا بـ ضرتي
فاتن/ههههههه
لمياء وهي تمازحها/لا تضحكين..انا شريره و راح اسووود عيشتك
فاتن بابتسامه هاديه/ياليت كل الناس نفس شرّك
لمياء وهي تربت على كتفها/فااتن بلاش دراما الله يخليك.. لا تخربين علي الخبر الحلو اللي جايبته لك
فاتن وقلبها يرجف/ادرري ..خطبتك الليله
لمياء عبست/لااا مو هذا الخبر اللي اقصده
فاتن بفضول/اجل اي خبر؟
لمياء وهي تجلس و تحط رجل على رجل/راح تطلعين بكرااا وراح تكملين علاجك بمواعيد اسبوعيه هنا.. اشرااايك
فاتن والسعاده تغمرها/يعني اخيراً برتاح شوي من جو المستشفى
لمياء/يب.. الدكتور مبسووط،جداً من تعاونك معه..واذا استمريتي بهالنفسيه الحلوه باذن الله راح تكون فيه نسبة استجابه كبيره للعلاج
فاتن نزلت دمعتها من الفرحه وهي تحمد ربها
،
.
،
.
.
/
/
يومين مروا عالاحداث السابقه..
طلعت من غرفتها وهي تفكر بحيله تخلي زينه تطلع معها.. وتوقعها بالمصيبه ..تفكيرها بينشل ومو قادره تلاقي أي حيله…
نزلت وهي مستغربه الوضع تحت.. بخور و روائح تفتح ال
نفس.. وكأن الوضع يوحي بمناسبه او وصول ضيوف (معقوله مشعل وزوجته راجعين… لا لا ماظن توووهم رايحين وباين بيطولون عساهم الطلاق الأبدي)..
جلست تنتظر بالصاله.. تبي احد يعبرها..!!
لحظات وانفتح باب الصاله ودخل ابو مشعل وهو ينادي/ي زيناااه..
مشاعل وقفت تحسب انه ما شافها/اهلين بو مشعل.. نوورت البيت
بو مشعل وهو يناظرها بقرف/اللهم اني اعوذ بك من الخبث والخبائث
مشاعل انصدمت من هالجمله/اللحين اناااا خبث وخبائث!!
بو مشعل/زين انك عرفتي نفسك
اقبلت زينه والابتسامه شاقه وجهها/مررحباا مليووون يالغاالي
بو مشعل استبشرت ملامحه بشوفتها/مرحبااابك انتي يالغاليه
زينه باست راسه ويده/ارتاح يبه..ليش واقف؟
بو مشعل همس باذنها وهو يتبسم.. و زينه خجلت وصار وجهها احمرر ..
زينه بصوت كله حياء/قد قلت لك ان ماعندي اعتراض على طلبك
بو مشعل براحه/ترى مافيني حيل اروح واجي.. خليك بالمقلط جانب المجلس اول مانخلص الملكه بيجيك الكتاب ووقعي فيه.. وروحي..
زينه هزت راسها بالإيجاب/امرك يبه..
بومشعل همس لها/ولا اوصيك عليه تراني اغليييه بالحييل يا زينه.. يلا غطي شعرك وتعالي وراي
زينه ماتقدر تخفي سعادتها وابوها يبدي سعادته بعزيز/ابشر يبه..
طلعوا وسكروا الباب… وسط،حيرة مشاعل/يا ررربي وش وراااهم سولفوا سااعه ثم طلعوا..!!..(المصيبه اللحين شلوون اخلي زينه تروح معي وابوها رجع البيت!!)
رن جوالها وخافت وهي تشوف اسم المتصل..
اقبلت ام مشعل وجلست مقابل التلفزيون وهي التفتت عليها باحتقار/ردي ع جوالك صدعنا بصوته.. صاير يرن وااجد هالايام
مشاعل فزت واقفه وراحت ترد عليه بغرفتها/خيييييررر
المتصل/الخير عنددك… وينك.. مو موعدنا الليله
مشاعل بخوف/صارت ظروف صدقني.. البيت صار مزحوم.. انت بس عطني اسبوع.. وراح تشوف
المتصل/اوووكي وش ورانا ..اسبوع بس مافي زياده..ويا ووويلك لو طلعتي تستهبلين علينا.. انتي عاااارفه وش ممكن يصير لك.. حبيت اذكرك ان فيديوهاتك ومكالماتك لنا مسجله.. اوووكي
مشاعل جلست من خوفها/لا لا والله ما استهبل عليكم انا فعلاً راح اجيبلكم الفلوس خلال هالاسبوع..
،
.
،
.
،
.
،
.
في مجلس الرجال.. *
بعدما انتهى المأذون من الكتابه.. التفت لعزيز/وقع هنا يا ابني..
عزيز اخذ القلم ووقع بسعااده/بسم الله
المأذون التفت للشاهدين بو علي و عمر/وانتم تشهدون بهالزواج
بو علي وعمر/نشهد..
المأذون/اجل وقعوا هنا..
وقعوا الشهود.. وضل توقيع العروس..
المأذون التفت على عزيز مره ثانيه/الف مبروك يا ولدي بموافقة الولي صارت زوجتك بس نبي توقيع الزوجه ع العقد لو سمحتوا..
بو مشعل ناظر في عزيز/اخذه ووده لها توقعه هي بالمقلط جنب المجلس..
عزيز تفاجأ بالطلب وبلع ريقه/أنا!!!
المأذون/روح يا ولدي.. صارت زوجتك.. ناقص توقيعها عالعقد بس
الكل يناظرون فيه ويتبسمون..
عمر نغزه/بلا تناحه يا ولد قوووم..
عزيز فز واقف واخذ الكتاب معه.. وطلع وكان حيييل مررتبك..
،.
.،
،.
بالمقلط..
كانت جالسه لابسه فستان نااعم لنص الساق واكمامه طويله.. و شعرها البني مسدول كالعاده، بلمسة كحل داخل العين وماسكار وروج وردي..وتناظر بالباب تنتظر ابوها يدخل عليها..
انفتح الباب ودخل بهاللحظات عزيز وبيده الكتاب كان مرتبك شوي..
هنا المفاجأه كانت بوجه زينه، ووقفت ماتدري وش تسوي غير انها تهرب..بس وين الباب؟!! نست اتجاهه و الربكه جمّدتها..!
عزيز عرف انه تورط وحب يوضح لها/زينه. ترى عمي هو اللي ارسلني، وظنيت ان عندك علم او قالك انه بيدخلني عليك كذا بكتاب الملكه علشان توقيعك..!!
زينه بدأت تحاول تنظم تنفسها وجلست وانتثر شعرها وهو يغطي نص وجهها عنه.. وهي حييل منحرجه لانها اول مره تنحط بهالموقف.. وقفت وهي تلعب في خاتمها من شدة التوتر..
اقبل عزيز عليها وهو يبلع ريقه من شوقه وربكته..
وحط الكتاب عندها ع الطاوله وهو مفتوح/وقعي هنا
زينه اخذت القلم ويدها ترجف ماقدرت تثبت اصابعها بالقلم.. لان وجود عزيز لحاله هنا مربكها..وتفاجأت بيد عزيز تثبت يدها ويهمس باذنها وشعرها يلامس وجهه/سمي بالله
زينه بسرعه وقعت تبيه يبعد عنها..لان قلبها صار ينبض بسرعة خياليه وسبب لها خفقان وكأنه بيطلع من مكانه..

بعدما وقعت جلس عزيز جانبها ومد يده لذقنها ولف وجهها تجاه وجهه وهو يناظرها بحب ويبعد شعرها عن وجهها بابتسامه ساحره ويتأمل ملامحها اللي يعشق تفاصيله ونطق/زينه؟!! هذا حلم والا علم؟
زينه حست ببروده في اطرافها وهي بين يديه ،حاولت تسحب نفسها وتهرب ونجحت، لكنها تفاجأت بيد عزيز تمسك يدها.. بس ما التفتت عليه كانت صاده عنه ووجهها صاير احمر من الخجل..
عزيز سحره خجلها اكثر واكثر ..ظل يناظر مقفاها وشعرها المسدول لنصف الظهر..ويدها المليانه اساور وسلاسل واصابعها الابهام فيه خاتم اسود عجبه..
… رحم حالها وهي خجلانه.. وقرر يتركها..
قام وطلع للمجلس.. وقلبه راح معها
.
.
.

بغرفتها ..
دخلت وهي مستعجله وسكرت الباب.. وجلست على طرف السرير وهي تلتقط انفاسها بصعوبه وتلهث وكأنها كانت تركض ..
ابعدت شعرها على وراء وبانت ابتسامتها الخفيفه اللي اتسعت وبانت اسنانها، غمضت عيونها واستلقت على سريرها وهي تتنفس بنشوة فرح..!
تمنت لو خواتها حولها بهاللحظه السعيده وهالخطوه الهامه في حياتها وحياة كل بنت.. لكن للأسف كل وحده من اخواتها راحت بيت زوجها ..
،
.
،
.
،
.
صباح اليوم الثاني *
كان جالس ويناظر فيها وهي واقفه عند الطاوله وتجهز اوراقها بملفها وتحطها بالشنطه.. لاحظته يتابعها بنظراته وابتسمت/لين متى بتقعد تراقبني كذا…ماعندك شغل؟
مشعل كان سرحان فيها وما انتبه لكلامه/هااه.. انتي قلتي شي؟!
لوجين جمعت باقي الاوراق وخلصتهم وهي تضحك على رده/…
مشعل سحرته ضحكتها، قام واتجه لها واخذ الشنطه منها وحطها على جنب و قربها له بدون سابق انذار/تقدرين تأجلين شغلك شوي؟
لوجين ابعدته عنها بلطف ولكنه ضل متمسك فيها وعينه بعينها/هههه حركاتك هذي تذكرني بنايف ولدنا.. دووم اذا جيت اطلع يسوي هالحركه
مشعل اعجبه التشبيه/قصدك اني طفل..
لوجين ابتسمت وعينها تغزو عينه وببحة صوت يعشقها/انت طفلي اللي اعشقه..
مشعل ما مسك نفسه وباسها بقوة شوقه لها.. .
لوجين وهي تنهي كل شي وتبعده عنها/مشعل بليز راح اتأخر خلينا نترك كل شي لبعد اشغالنا..بعدين روح شغلك انت بعد ..والا نسيت انك جاي علشان مؤسستك اللي هنا!!
مشعل وهو يحك حاجبه الايسر بابتسامه/كانت تصريفه بس..انا ماعندي فروع خارجيه..
لوجين تخصرت وهي تتبسم/فهمت..كانت حيله لحرق اعصابي وبس!!
مشعل اكتفى بالابتسامه ورفع يديه فوق وسوى نفسه مستسلم/..
لوجين رفعت حاجب ونزلت الثاني بابتسامة خبث/لاتظن اني بمررها لك مرور الكرام.. راح أرده لك..اوعدك
مشعل مب مصدقها/هههههه
لوجين شافته مب مصدقها وخزته/هييه انصحك لا تستهين بي.
مشعل اتجه لها وشدها من خصرها ولصقها فيه وعينه بعينها/قوولي وش بتسوين هااه؟
لوجين شافته حييل واثق من نفسه، قربت شفايفها من شفايفه وتكلمت بهمس/احبك
مشعل سكتها بقبله
لوجين ابعدته عنها/حبييبي قلتلك خلاص ،يلا مشينا وصلني ما عاد فيه وقت..
مشعل اخذ منها شنطتها ومشوا/يلا ..اهم شي شغلك يا مدام
لوجين وهي تناظره بابتسامه/طبعا شغلي شيء مهم.. ووريني كيف بتغار من شغلي بعد
مشعل/ههههههه

،
.
،
.
،
..

على طاولة الفطور.. *
هي وأمها وابوها ومعهم الصغيره "ساره"جالسين يفطرون كعادتهم بهدوء..
بو زياد وكأنه تذكر شيء مهم/لمياء يا بنتي
لمياء رفعت راسها له/ايوه
ابو زياد/متى يخلص تحليلك تبع الزواج
لمياء بحياء وضح بصوتها/انا سويت تحليل امس بعدما قالي زياد اسويه.. لكن مادري عن عُمر اذا سواه أو لا
ابو زياد/اكيد سواه لان زياد قاله بعد… بالتوفيق ان شاء الله..
الكل/امين
ام زياد بسعاده غامره/اخيراً بفرح فيك يا بنتي
ابو زياد/الود ودي تقعد بنتي عندي بالبيت طول العمر..انا ما رزقني ربي عيال وبنات واجد… لكن املي بالله يكونون احفادي واجد..
لمياء باست يده بحب/حبيب قلبي ابوي
ام زياد دمعت عينها من فرحتها/عسى الله يتمم لك على خير يا بنتي..
/
/
/
/
/
/
/
/
زينه وهي متمسكه بالجوال و باين متفاجأه من اللي سمعته/كادي.. وش هالكلام.. قولي انك تمزحين..
الكادي بالجوال والعبره تخنقها/زينه هالشي ما ينمزح فيه. اول ما اوصل راح اقولك كل شي بالتفصيل.. وين مشعل؟
زينه/مسافر مع لوجين لـ دبي
الكادي بضيق/الله يسعدهم..
زينه/امين..
الكادي/يلا سلام.. ابي اخلص قبل يجي عبدالرحمن.
زينه سكرت الجوال بضيق وضح بملامحها/وش هالمصيبه ..ماحسبنا لها حساب.. معقوله؟!
دخلت بدون استإذان بعدما شافت الباب مفتوح/السلام عليكم
زينه تضايقت اكثر من شوفتها/وعليكم السلام
مشاعل وقفت قبالها وهي تمثل الندم الاحترام/ادري انك شايله بخاطرك مني.. معك حق أنا زودتها شوي بحق خطيبك.. ماكنت اظن ان بينكم ..
زينه قاطعتها/لا تكملين.. مافي اي شي من اللي بتفكيرك المريض
مشاعل فاهمتها/زينه انا ماقصدت هالشيء.. انا قصدت ما ظنيت انه بيخطبك وكذا بس
زينه ما ردت عليها صدت عنها وحاولت تلهي نفسها بدرج اكسسواراتها/..
مشاعل/حبيبتي زينه والله مو قصدي.. انا جايه اللحين اصلح غلطتي.. جايه اعتذر منك وافتح صفحه جديده.. ممكن؟
زينه/مشاعل اخلصي وش تبين؟
مشاعل/مابي اي شي.. بس سامحيني
زينه التفتت عليها مستغربه إلحالها/اوكي حصل خير
مشاعل ابتسمت/يعني صافي لبن؟
زينه بتملل/اوهووو قلتلك حصل خير..
مشاعل/اوكي اخذيني معك للسوق.
زينه/شدراك اني رايحه
مشاعل/حفلتك قريبه اكيد بتروحين السوق.. مايبي لها ذكاء.. هااه وش قلتي
زينه بحسن نيه/يمكن اروح بكرا.. مادري ع حسب وجود سايق المؤسسه
مشاعل بابتسامة خبث/اوكي .تجين نشرب قهوه؟
زينه/مافي مشكله..
مشاعل طلعت من الغرفه وهي منتشيه باقتراب تحقيق هدفها.. (انهاء زينه)
/
/
/
/
/
/
/
/
/

دبي… **
بالتحديد في الفندق المقام فيه المؤتمر… العديد من الشخصيات الطبيه المهمه.. الكثير من الندوات والمحاضربن.. يومها كان جداً مزحوم… ألقت اوراق مشاركتها في الندوه واعجبت الكل بطرحها.. رغم صغر سنها في مهنه تطلب الكثير من الدقه..
كان من ضمن الجمهور الحاضر ..شخص يعشقها.. بكل مافيها.. تابعها بكل لحظه.. بدون ملل..
نزلت من منبر الندوه ..واتجه لها اكثر من مذيع ومذيعه.. ويطلبون منها لقاء..
الاعلاميين/دكتوره لوجين لو سمحتي؟..
لوجين كانت عيونها تدور على مشعل ..اللي فجأه اختفى عن انظارها!!
الاعلاميين بإلحالح/دكتوره لوجين حابين نسألك..
لوجي مازالت تتلفت وتدوره.. ضاق صدرها وألتفتت على الاعلاميين/اعذروني ما اقدر..
مشت بسرعه مع اسئلتهم وملاحقتهم لها…
احدهم لحقها..
،
.
طلعت من قاعة المؤتمر و ورش العمل.. ودخلت دورة مياه علشان تفتك من ملاحقة الفضوليين.
طلعت جوالها بسرعه واتصلت في مشعل وانتظرته يرد…
رن كثير و بكل مره يطلع مغلق. بلعة ريقها بخوف (كيف اختفى؟ وين راح فجأه؟) ..
،
.
،
.
،
.

ضغط على راسه لا ينفجر من الضغط.. وفتح جواله واتجه للرسائل الوارده و قرأ للمره الثانيه الرساله اللي وصلته وهو بالقاعه.. حس بضيق وقهر ما قدر يتحمله..
رفع جواله واتصل ..وانتظر الرد ولكن ما في رد... انقهر اكثر..
رجع واتصل بالشخص اللي أرسل له الرساله وانتظره يرد/
بعد كذا رنه رد الشخص وهو خايف/الوه..هلا بالشيخ مشعل
مشعل وهو يحاول يكبت صرخته ويضبط ردة فعله/ودامك تعرف اني شيخ.. شلون يا راشد ترسل هالكلام الفاضي لي..
راشد بعد تردد/مشعل الوضع ما ينسكت عنه.. انا ماتحملت كلام الرجال عنك بالديره انت ولد عم وافتخر فيك ولا تنسى ان بيننا نسب واخوي متزوج اختك
مشعل بقلّة صبر/قوول وش صاير
راشد/الديره مالها سيره غير رجعتك للوجين.. ويعتبرون انه هالرجوع خطيئه لا تغتفر وشي يمس شرفهم.. ولازم تتركها باسرع وقت..
مشعل بانفلات اعصاب/اوكي وان ما تركتها وش بيسوون؟ لو في واااحد منهم فيه خير خليه يتكلم وانا موجود.. ليه هذاك اليوم عندي محد تكلم!!
راشد/مشعل وانا اخوك انا ضدهم.. لكن حبيت احطك بالصوره.. ابيك تتصرف.. مليت من كلامهم وبهتانهم عنك.. خصوصا انهم عارفين انها رايحه مؤتمر دبي.. وصورتها بالجرايد متصدره الوفد السعودي
مشعل انصدم/صورتها بالجريده؟!!
راشد استغرب/توقعتك تعرف.. المهم اذا حاب تعرف شوف جرايد امس.. اللي صدرت امس..
مشعل بانهيار/راشد مع السلامه
راشد وهو يشدد عليه/مشعل لا تسوي شي تندم عليه خلك حكييم ولا تخسر زوجتك ولا تخسر اهلك..
مشعل بهدوء مصطنع/مع السلامه..
،
مشعل سكر الخط منه وفتح جواله.. ومباشرتاً اتجه للويب سايت تبع الصحيفه.. وتصفح.. وكتب اسمها بالبحث اسهل له.. وبحث.. كان يتمنى ما يشوف لها صوره.. لأنها ماقالت له انها بتسوي لقاء صحفي.. ولا جابت طاري صحافه واعلام!!
تفاجأ بصورتها على منبر المؤتمر صحيح متحجبه وبكامل حشمتها لكن عقول اهل قريته صغيره..واصلاً ضاق صدره لأنها ما قالت له عن هالموضوع..
جلس متضايق ومكتئب..
/
/
/
/
ع الجهه الثانيه كانت جالسه باللوبي تنتظره يجي.. وتتصل فيه لكن لا حياة لمن تنادي… !!
لمحة جرايد قدامها وقررت تاخذها تتصفحها وتضيع وقت علبال ما يجي..ولمحة جريده سعوديه من ضمن الجرايد واخذت تقراها… وبعد صفحتين انصدمت باللي شافته..خافت ان هالشيء هو سبب غياب مشعل المفاجئ..!!
.

.

[لامارا]

.
،

جلس عندها وهو يبتسم لها بحنان/اخيراً بتطلعين،الحمدلله ع السلامه
فاتن بادلته الابتسامه وهي تجلس على طرف السرير وباين صحتها احسن من قبل/الله يسلمك
عمر وهو يبوس عبود اللي بحضنه/شايف عبود، أمك صارت بخير وبتطلع معنا
فاتن وهي تخفي وجع قلبها/ع الاقل اشيل عنك بعض المسؤليه.. احس اني ازعجتك باهتمامك بعبود
عمر وهو يحتضن عبود/عيب عليك.. هذا ولدي انااا ومحد يحبه كثري انا.. ولا احد بيهتم فيه وبيخاف عليه كثري انا.. فاتن لا تصيرين حساسه من هالناحيه
فاتن ودها تصرح له بحبها له.. بس ما يصير بهالوقت.. هي لازم تدفع ثمن طيشها طوول عمرها.. نزلت دمعتها بدون تحس عليها..
عمر رحمها وصرّف عبود/حبيبي عبود اخذ جوالي العب فيه لعبه..
عبود اخذ الجوال والتهى فيه….
عمر قام واتجه لها وجلس جنبها ولفها تجاهه/فاتن
فاتن منزله راسها غصب عنها لأنها منهاره من داخلها، وزواجه قرب وهي بنفسها اللي خطبت له،ماقدرت تتكلم لان العبره خنقتها/…
عمر مد يده لدقنها ورفع راسها/ناظريني وقوليلي ليه هالدموع
فاتن حاولت تبتسم وسط،دموعها/مافيني شي بس حاسده نفسي عليك..
عمر ابتسم وقربها لصدره لأول مره وضمها وهو يرحم حالها.. اللي شافته يكفي ..
فاتن ما صدقت انه يضمها زادت شهقاتها ومدت يدها وشدته لصدرها اكثر.. وكأنها خايفه لا يتركها.. بعدما يتزوج لمياء..
عمر رحمها اكثر وهو يشوفها تضمه بهالقوه.. سنين الحرمان صعبه وهي بنت تحملت فووق طاقتها سنين..
/
/
/
/
/
/
/
/
رجع للفندق.. يبي ياخذها.. دورها في اللوبي.. توقع يشوفها ولكنها ما لقاها.. اساساً الوقت تأخر والكل راح.. هنا صحصح مشعل وانتبه للخطأ الكبير اللي سواه من دون ما يحس.. دورها بالكافي والقاعه لقاها مغلقه..
تذكر الجوال وطلعه واتصل فيها ..ولكنها ماترد..!! توتر حيل.. واتجه للريسبشن ..
مشعل/لو سمحت… حاب أسألك عن احد حضور المؤتمر..
الموظف/تفضل
مشعل/الدكتوره لوجين العاصم
الموظف وهو يتذكر/كانت تنتظر باللوبي.. وبعدها طلبت ليموزين.. وجبنا لها ليموزين وراحت..
مشعل وكأنه عرف وين راحت/شكراً..
طلع مستعجل وركب سيارته وراح..
لحقته سيارة دورية المرور ..وهي تحثه على الوقوف..
مشعل ارتبك و انتبه انه كان مسرع.. مو ناقص شوشره وكلام مع اي احد..
اضطر يوقف لشرطة المرور..
/
/
/
/
/
/
/
رن الجرس آخر الليل..
الكل فزع وطلع من غرفته..
ام مشعل بخوف/الله يستر.. من اللي جاينا هالوقت
زينه طلعت وهي تتحجب بجلال الصلاة/انا رايحه اشوف
نزلت مستعجله..
ام مشعل سمعت صوت عصى ابو مشعل ودخلت غرفتها بسرعه..
طلع بهاللحظات ابو مشعل.. ونزل بخطوات ثقيله..
،
.
،
عزيز اتجه للباب وفتحه تفاجأ وهو يشوف وحده لابسه عبايه ومتغطيه و واقفه على الباب بنص الليل وما معها احد.وواضح انها حامل.!!/بسم الله ..من انتي
بسرعه ضمته وهي تبكي/انا اختك يا عزيز
عزيز عقد حواجبه وضمها وكأنها يحميها/كاااادي!! وش جابك تالي الليل.. ووين بنتك وزوجك؟!!
الكادي وهي تتنهد ماقدرت تتكلم كلمتين على بعض/ممادري اخ ذوها ممني
عزيز اخذها معه للداخل وشاف زينه واقفه عند الباب الداخلي و ومتلثمه،خايفه من هاللي جايه هالوقت وباين انها حامل ومنهاره/عبدالعزيز من هذي؟
عزيز وقلبه شايل حقد على زوج اخته/زينه تعالي اخذي الكادي ووديها بغرفه هاديه.
زينه نزلت دموعها وهي تكشف وجه الكادي/كااادي وش اللي حصل لك
الكادي/اللي ما يخاف الله طردني مثل الكلبه وارسلني مع التاكسي ..يقول ماتشرف بوحده اخوها ماله شرف ولا كرامه.. لأنه عرف برجوع مشعل للوجين… حسبي الله عليه
بو مشعل اللي كان جاي من وراهم ويسمع القنبله/وشوو؟!!
عزيز/علي الحرام ما اخليه ولد ..
بو مشعل قاطعه/تعوذ من الشيطان.. لا تضيع نفسك على ناس ما تسوى
عزيز بعصبيه والنار تشتعل بداخله/اللي صار لاختي والله وانا ولد ابوي ما يعدي بسهوله…
بومشعل/زينه اخذي اختك للداخل بسرعه..
دخلوا البنات داخل.. وظل بو مشعل واقف برا وعزيز معه..
بو مشعل بجديّه/عزيز.. ابيك من بكرا.. تتصل في مشعل وتصر عليه يجي..
عزيز/ليش؟ وزوجته عندها…
بو مشعل قاطعه بحزم/من غير لييش؟..ماراح اضل اتفرج.. وانا اشوف موضوع لوجين يهدم عايلتي ويهز صورتي عند ربعي
عزيز/يعني وش بتسوي.. عمي خلني اتصررف انا
بو مشعل وهو يدخل/لااا اذا جاء مشعل.. راح تعرف وش بسوي.
عزيز كتم غيضه وجلس بحسرته برا.. ونيران الغضب تتقد بداخله…

[lalouva]

مشكورة و بانتظار التكملة

[zahra.h]

الرواية مثل ايامنا سبحان الله كل ما نقول اتيسرت و رجعت الامور لنصابها العادي يجد جديد ياكد على انو ما دام اصحاب النية الفاسدة موجودين فيها اكيد لازم ندفع الثمن، واصلي على امتاعنا أختي الفاضلة دمت راقية.

[لامارا]

43))من متى والغصن يختار الطيور؟!
.
،
خلص من شرطة المرور.. اللي ماتركوه الا بعدما حرروا له مخالفة سرعه..!
ركب سيارته وكمل طريقه.. وبهالأثناء رن جواله واستغررب من بيكلمه هالوقت و من الامارات! ..ولكنه رد بحذر/الوه
المتصل بصوت خافت/مرحبااا مشعل
مشعل ما ارتاح من نبرته/من معي؟
المتصل/مو مهم.. لكن حبيت اعطيك خبر ان الدكتوره الحلوه وصلت الفندق من ساعتين ونص وتنتظرك
مشعل غلي دمه/وانت وش دخلك.. من اااانت
المتصل بضحكه مستفزه/اعصااابك ما سوينا لها شي.. لكن لو بغينا ماتقدر تمنعنا هههه
مشعل سكر الخط.. وزاد سرعته…
،
دخل الفندق بسرعه وهو يتجه لجناحهم.. وفتحه.. وهو مستعجل.. وراح يدورها بالجناح مالقاها.. واجته للغرفه ولقاها متكوره على نفسها بلبسها اللي اليوم لكن بدون الجاكيت الرسمي و بوضعية الجنين و نايمه في نص السرير و ودموعها على خدها..واضح انها بكت كثير..
جلس عندها مشعل وهو متردد..
مسح على كتفها بحنان وهو ساكت.. تذكر صورتها بالجريده سحب يده وفز واقف.. واتجه للباب بيطلع ويتركها..
هي حست عليه وفتحت عيونها وهي على وضعيتها وتكلمت بصوت مبحوح من كثر البكي/صدقني انا تفاجأت مثلك بعدما شفت الجريده..
استقعدت وكملت حديثها وهي تمسح دموعها اللي تنهمر بغزاره/وربي ما سويت لقاء مع احد ولا كان عندي خبر انهم بيسوون كذا.. هذي مجرد اجتهادات صحفيه..
مشعل ألتفت عليها وهي تبكي وتنزل راسها بعدما خزها!!
اتجه لها وجلس جانبها و لف وجهها بقوة قبصة يده وتألمت هي من مسكته وضل يناظر فيها وركز على عيونها اللي ورمت من كثر البكي مسح دموعها باصابعه.. وهمس لها/لعاد اشوفك تبكين
لوجين بشفايف ترجف تكلمت وهي تبكي/خفت كثيرر.. مليون فكره بشعه جاءت ببالي، كيف ماتبغاني ابكي وانا اشوفك وكأنك بتعاملني زي قبل ليه تتركني فجأه و..
مشعل سحره شكلها وهي تتكلم بخوف عن هجره لها وتبكي، قرّبها له بسرعه وسكّتها بقُبله خلتها ترتاح من عناها وتوقف بكاها..
بعدما خلص همس لها وعينه بعينها/هاه وصلك الجواب والا مابعد تأكدتي؟..لوجين مستحيل يفرقني عنك اي شي الا الموت.. فاهمه.. يعني لو اجتمعوا اهلي وقالوا اتركها ولا تبرينا منك.. تركتهم وضليت معك انتي وبس ابيك ترتاحين من هالناحيه ، وانا اسف على اللي سويت اليوم جاني مسج مزعج وطلعت اصلح الامور..و بس
لوجين اكيد فرحت بهالكلام لكنها مابينت هالشي وهي تتذكر "قصّه" مهمه ومستحيل تنساها.. وبما أن الفرصه سنحت لها لازم تريح قلبها..
مشعل شافها تبعد عنه فجأه واستغرب/لوجين وش صاير بعد
لوجين ألتفتت عليه وهي تخزه/اعترف لي..
مشعل/وش اعترف لك فيه
لوجين اشرت له بايدها السبابه وتهدد/اعترف لي ولا تحاول تكذب لأن مافي اي شي يبرر فعلتك..هالشي اكيد وراه بنت
مشعل استغرب/انتي وش تتكلمين عنه
لوجين بنص عين/شوف مشعل اللف والدوران وخبث الرجال لا تستخدمه معي اوكي.. ماله داعي تنكر
مشعل مافهمها/يعني انتي للحين تشكين فيني مع كل هذا
لوجين/طيب اعتبرني ماني فاهمه واشرحلي كيف وصل الرووج لثووبك ..لا تحسب اني نسيييت.. يلا اعتررف قوول وش هو دفاعك
مشعل بلع ريقه من الخوف وصد.. وهو يفكر.. لو قال لها يمكن ماراح تصدقه، بس مضطر يبري ساحته عند زوجته.. وهالمشاعل ماخافت ربها ولا تابت من ملاحقته و هو مو مستعد يخسر زوجته مره ثانيه علشانها..
لوجين وهي تستعجله/لا تصد بوجهك عني ، انت بتقول والا ناوي تنام في صالة الجناح؟
مشعل ألتفت عليها وباين متردد ومسستحي/بالاول لازم تتأكدين اني ما عرفت بعدك اي بنت ولا ابي غيرك بنت
لوجين وهي تكتف يديها/ايوه اللي بعده..
مشعل/لازم تصدقيني
لوجين بنفاد صبر/انت تكلم بالاول ..نشفت دمي.
مشعل جلس و بدأ يحكي لها..
……………
/
/
/
/
/

،
.
،
.

صباح يوم جديد في مدينة جده.. *
قامت من بدري.. اتجهت لغرفة زينه وتطمنت على "الكادي وتأكدت انها نايمه.. لأنها البارحه سوت مناحه علشان بنتها اللي اخذها منها زوجها..!
طلعت ام مشعل واخذت معها خدامه.. واتجهوا لغرفة مشعل ناويه تنظفها وترتبها وتغير اللي تقدر تغيره… لأن هالمره اكيد بيجيب لوجين معه.. ولازم تصير غرفة معاريس مو غرفة عزوبي…
بدأت بنفض السرير وتغيير مفارشه واغطيته.. والتفتت للخادمه/شووفي انتي روحي للحمام ونظفيه ززين والدلاب هذا طلعي كل اللي فيه انا بحط شامبوهات واغراض جديده مفهوم
الخادمه فهمت عليها/اوكي مدام
ام مشعل/يلا شوفي شغلك ..اما الغرفه انا بزينها..
الخادمه راحت تبدأ شغلها وام مشعل اتجهت لشغلها…
،
.
نزلت بهالأثناء زينه وراحت للمطبخ.. شربت مويه واتجهت لدولاب الصيدليه واخذت ادوية ابوها كالعاده وطلعت ..وتفاجأت بصوت طفل يناديها/عمتي ذذذيينااه
زينه التفتت صوب الصوت بابتسامه/هلا بروووح زينه.. هلا بنيووفي تعااال ضمني بسرعه تعال
نايف اتسعت ابتسامته و اتجه لها يركض وضمها/
زينه وهي تحوس شعره الناعم/وييينك من زمان ما شفتك
نايف ببرائه/حتى انا من ذمان ما شفتك
زينه/من اللي جابك ووين اخوانك
نايف/جيت مع جدي.. اخواني نايمين انا قمت بدري عشان اروح معه ههه
زينه/فدددديت هالوجه الحلو.. تعال نروح نشوف جدي ونعطيه دواه.. يلا
نايف/يلا
صعدوا فوق مع بعض وهم يسولفون ويضحكون..
اتجهوا صوب غرفة ابوها.. وطقت الباب..
لحظات وطلعت مشاعل وضاق صدرها بشوفت ولد لوجين/هلا زينه..
زينه/صباح الخير. ابي اعطي ابوي دواه
مشاعل وهي تبعد عن الباب/ تفضلي..
ناظرت في نايف بابتسامه زائفه/تعال هات بوسه حبيبي
نايف تخبئ وراء زينه وهو خايف منها/
زينه اعجبها رده وماعلقت اكتفت بالابتسامه/.
مشاعل ابتسمت ماتبي تبين شيء وطلعت تبي تفطر وهي تمتم (عسى ربي يعجل بفراقك انت وامك مع بعض قل امين)
.
،
.
،
.
،
الصباح الباكر ..
نزلت من السرير وهي تلف الروب الطويل حوالينها وتربطه من خصرها… اتجهت لدورة المياه وغسلت وجهها وهي تبتسم لنفسها بالمرايه .. سمعت صوت مشعل.. وباين يكلم احد بالجوال..
طلعت له في صالة الجناح شافته واقف ومعطيها ظهره ومازال يكلم بالجوال.. اتجهت له وضمته من وراه بنعومتها من بعد اللي سمعته منه البارح زادت مكانته ورغبتها فيه..
مشعل ابتسم وهو ينهي المكالمه ويلفها لقدامه/صح النوم
لوجين وهي ترمش بدلع/صباح الخير حبيبي
مشعل وهو يداعب شعرها المنثور ويضمها/صباح الانوار
لوجين ضلت بحضنه وهي للحين مو مصدقه انها بين احضانه،وتحسد نفسها عليه/..
مشعل لاحظ سكوتها طووول/تبين فطور
لوجين بابتسامه طفوليه/ياليت.. بالمره جوعانه..
مشعل/اجل خلصي لبسك واغراضك علشان نطلع نفطر ونتمشى شوي..
لوجين/ليش شوي انا حابه اقضي اليوم كله معك
مشعل/بس حبيبتي.. مضطر ارجع للسعوديه بسرعه
لوجين خافت/ليش بسرعه؟وش صاير..
مشعل/ما ادري بالضبط.. بس عزيز يقول ان الموضوع مهم وما يحتمل تأجيله،ابوي طلبني
لوجين انقبض قلبها/طيب حجزت؟
مشعل وهو خايف ترفض/ايوه.. بتروحين معي او بتقعدين؟عشان شغلك
لوجين ناظرت بعيونه بحنيه/ما يبي لها راي.. اكيد معك لآخر العمر.
مشعل/والشغل اللي جيتي عشانه؟
لوجين/اصلا انا ألقيت اوراق مشاركتي وعقدت ندوه وألقيتع فيها محاضره.. ما ضل شي.. وان شاء الله بقيت الوفد يكفون ويوفون .
مشعل ابتسم برضا/تغيرتي..اشوف صرتي دايم توافقيني
لوجين بحالميه/قصدك صرت عاشقه مدمنه قربك ماتقدر فراقك..
مشعل بحب/مابي شي يفرقنا، مهما كان يا لوجين مفهوم
لوجين وهي تقرب منه وعيونها لها بريق/مثلما قلت انت.. ماراح يفرقنا الا الموت.. من اللحين انا معك مثل ظلك عشان محد يتجرأ يقرب منك غيري
مشعل باسها على راسها/نسسسيت اقوولك الخبر الاااهم عزيز واختي زينه تملكوا
لوجين انبسطت بهالخبر/ربي يوفقهم، بس ليش بغيابنا!!.. هذي خيانه
مشعل/هههههههههه ماعليه مجرد ملكه بدون حفله الحفله بتكون بحضورنا.. لا يكون ببالك
لوجين/انا مابي حفلات.. يكفيني وجودك مره ثانيه بحياتي عسى الله لا يفرقنا
مشعل/اميين.
/
/
/
/
/

اتصلت فيه وهي بالمطبخ.. بعدما جهزت الفطور ..كانت متردده.. ولكن داخلها شي يلّح عليها ويقول سوي هالشي لعيونه…
رد بصوته وتوه صاحي من النوم/هلا
زينه بعد تردد/صباح الخير
تعدل صوته وتحنحن وصحصح/زينه!! يا صباح الورد ،هلا والله
زينه بخجل/انا قمت بدري وقلت اسوي لك فطور وقهوه قبل تطلع ..انت موجود والا طلعت
عزيز مو مصدق/لا لا ما طلعت.. انا موجود
زينه/طيب برسل لك الفطور مع الشغاله
عزيز جاه احباط/خلاص مابيه.. اذا الشغاله هي اللي بتجيبه
زينه/والله انا اللي سويته مو هيه
عزيز بإصرار/اذا انتي بتجيبينه راح افطر.. او خليه عندك وانا خليني اموت من جوعي
زينه/اوكي بجيبه.
عزيز انبسط/يلا انتظرك.. لاني بطلع للمؤسسه بعد شوي..
،
.
عند عزيز قام وغسل وجهه وفرش اسنانه و عدل نفسه شوي وراح ينتظرها بالمجلس.. جالس وهو متأمل بفطور رومانسي ..كلام شاعري ..هو وهي وبس..
لحظات ودخلت زينه ..ومعها "نايف" اللي يتبسم/عذيذذذ
عزيز وكأنه انكب عليه مويه بارده/هلا ولد النسيب هلا
نايف عقد حاجبه ببراءه/انا ولد مشعل مو ولد النثيييب
زينه وعزيز/ههههه
زينه كانت تثبت الطرحه اللي على راسها وتصد عنه/تبي قهوه
عزيز وهو يسرق عليها النظرات/لا مابي.. الشاهي يكفي.. اجلسي ليش واقفه
زينه جلست وهي مرتبكه ووقفت مره ثانيه/تبي شي اجيبه
عزيز كتم ضحكته على حركاتها/ايه.. تعالي اجلسي جنبي هنا.. تراني زوجك اللحين
نايف ببراءه مسك يد زينه/لا خلها جنبي أنا.. انت افطر لحالك اثلن كلنا افطرنا من ذمان
عزيز وهو يشق الضحكه/تدري انك ناشب بحلقي يا ولد مشعل
زينه زاد احراجها..
نايف مافهم عليه ..والتهى بالأيباد بيده..
عزيز التفت لزينه وبصوت فيه بحه/تسلم هاليدين..
زينه بصوت يدوب ينسمع/الله يسلمك
عزيز وهو يتأمل تفاصيلها بعيون عاشق/توقعتك حلوه..
زينه رفعت راسها وبنظرات حاده استفهاميه ناريه/..
عزيز كمل بابتسامه هاديه/انتي احلى واجمل من توقعي..تغيرتي عن وحنا صغار
زينه نزلت راسها بخجل ونزلت خصلات شعرها تغطي بينه وبينها
عزيز بجرأه وهو يطالع نايف/اخخ لو ان بعض العرب ماهو موجود كان صارت علووم
زينه بعد هالكلام ماقدرت تقعد، قامت بسرعه وهربت داخل
وانفجر عزيز من الضحك..
نايف رفع راسه له وشافه يضحك لحاله/ثفيييك
عزيز قام واتجه لنايف وحمله فووق وصار يدور فيه/احببكك يا هالوولد احببك
نايف مواصل ضحك ومبسووط من اللعب/..

/
/
/

المستشفى.. *
تووها تدخل عيادتها بنشاطها وحيويتها/السلام عليكم
الدكتور الخمسيني هشام المصري كان واقف ويجهز شنطته بيطلع/وعليكم السلام يا بنتي..
لمياء/اسسفه تأخرت عليك يا عم
الدكتور هشام بابتسامه/لا عادي.. عندي يومين off وبعد شوي خارج مع خالتك اسمهان واسامه للمول
لمياء/من زماان عنها.. بليز سلملي عليها
الدكتور هشام وهو طالع/هوصله.. سلام
الدكتور هشام وكأنه تذكر شي ألتفت عليها/دكتوره لمياء
لمياء رفعت راسها تناظره/ايوه
الدكتور هشام وهو يأشر على الكبت الابيض في زاوية الغرفه/جالك هديه من شخص اسمه "عُمر"حطيتها هناك.. روحي شوفيها
لمياء ابتسمت/شكراً ..دكتور هشام
الدكتور استغرب انها نادته/فيه حاجه تانيه
لمياء ماحبت انه يفهم شي غلط/عُمر يبقى خطيبي.. وراح نتزوج قريب
الدكتور هشام انبسط لانها طلعت مثلما يظن/الف مبروك يا بنتي.. ابقي اعزمينا في الفرح
لمياء/باذن الله.. انت اول الحاضرين..
الدكتور هشام طلع..
وراحت لمياء للكبت واخذت الصندوق و جلست وهي تناظره قدامها بحماس،تبي تعرف كيف تفتحه وبعد لحظات عرفت كيف تفتحها وتفاجأت بموسيقى هاديه وقصيده من بيتين بصوت حمد جارالله السهلي
[ جيتك بدون شعور وادراك و وعي
مدمن وأبي من حالة ادمانك علاج ،
مابي من الدنيا سوى تبقى معي
محتاج لك والحب فـ الاصل احتياج !"]
بدأت القصيده أول مافتحت الصندوق مع ريحة العطر الساحره.. وبوسطه طقم ألماس نااعم ..ومعه كارت مكتوب عليه "من قلب عُمر.. الى أجمل بنت'لمياء'"
نزلت دموعها من سعادتها مو مصدقه انه بيوم من الايام توصلها هديه بهالرومانسيه هذي..ابتسامه مع دموع فرح وهي تحط يدها على فمها دليل المفاجأه..

،
عُمر واقف بسيارته في مواقف السيارات في المستشفى، كان بيدخل ولكنه تراجع وراح.. ماقدر يدخل حس انه ماله داعي يدخل اللحين.. راح ينتظر للزواج افضل..

/
/
/
عند زينه*
ام مشعل بإلحاح/يا بنتي روحي وخلصي شغلك.. مانبي نتأخر.. بكرا بيوصل اخوك وزوجته و بننشغل علشان الحفله
زينه بضيق/يمه ماقدر اجهز لشيء واختي متضايقه من زوجها.. افهميني
ام مشعل/والله فاهمتك.. بس
الكادي دخلت بهاللحظات وهي أقوى من امس وكأنه ماصار لها شيء/ماهقيتها منك يا زينه.. شلون تبيني أرضى انك تأجلين فرحتك انتي واخوي اللي انتظرتوها سنين ،علشان واحد ما يسوى تراب قدم اخواني
ام مشعل استغربت قوتها/كادي؟!!
الكادي كملت/اللي رماني تالي الليل ما كان قصده الا انه يهين اخواني وابوي.. لكن ورب البيت ان يندم على فعلته وهالحفله بتتم و لا كأن شي صار..
زينه/بس كاادي.. وبنتك؟
الكادي بشموخ وعزة نفس تدوس على قلبها المدمي/البنت لي ومهما اخذها وابعدها عني بضل أنا أمها وهي بنتي..وما راح يتحمل ولا احد من اهله فاضي يربيها.. مرده يجي يترجاني، هذا زوجي وانا اعرفه زين هالأمّعه
زينه باعجاب/والله انك كفو يا بنت..
ام مشعل/لا تخلينه يكسرك اللي سواه اهانه لك يا بنتي والله مافي رجال محترم وعنده ناموس يترك وحده حامل ترجع بيت اهلها بهالطريقه تالي الليل
زينه وهي تغمز لأمها/يمه خليك محضر خير.
الكادي ابتسمت تخفي وجعها/وهي صادقه.. ويلا قومي روحي السوق لا تتعذرين فيني
نايف دخل وهو يسمعهم يتكلمون عن الطلعه والسوق وانبسسط،/وانا بعد بروح معكم الثوق
زينه نزلت لمستواه وحضنته وهي تبوس فيه/يا نااس احبببه وش اسوي به هالولد
نايف تألم منها/اااه وجعتيني يا عمه ذينه
كلهم ضحكوا على زينه وكلام نايف المحبوب من الكل وحيل ملقوف..
زينه حملته معها/والله ماروح للسوق من دونك يلا مشينا..
ام مشعل/لا يا بنتي خليه اخاف أمه ما ترضى
زينه/ان شاء الله ماتزعل ..ابيه يروح معي وننبسط سوا هذا ولد اخوي حبيبي
الكادي بابتسامه/اجل انتبهي عليه باااين عليه شقي هالنايف هذا
نايف يناظرهم ببرائه/يلا عمتي ذينه مشينا
زينه بابتسامتها/يلا روح عمتك.
طلعوا من الغرفه تجهزت و طلعت للسياره ومعها نايف..
،
تحت عند الباب كانت ماسكه الجوال وتكلم برسميه/الوه مركز الشرطه..
.
اقبلت زينه وشافت مشاعل تكلم بالجوال وباين مهتمه للمكالمه.. وتفاجأت انها سكرت الجوال او ما لمحت زينه/مشاعل على وين النيه
مشاعل بابتسامه تخفي خبث نوايا/مو اتفقنا نروح انا وانتي السوق سوا
زينه ترددت وضاق صدرها بس ما تقدر تمنعها/ترى بنروح مدينة الألعاب انا وعدت نايف
مشاعل وهي تناظر نايف بابتسامه مزيفه/ماعندي مانع اصلاً ودي اروح مدينة الملاهي مع نايف
نايف انبسط وراح يركب السياره قبلهم..
زينه طفشت لانها ما قدرت تفتك منها.. وركبوا السياره ومشوا..
/
/
/
/
/
في بيت هنادي. *
راجعين من المحكمه.. وجالسين ..هنادي حالتها حاله من الحياء.. وفارس كل شوي يناظر ساعته يبي هالحفله الصغيره تنتهي على خير وياخذ زوجته معه و خايف عمله يتصلون عليه بأي وقت. .
الحديث كله لأبو عهود خال هنادي/كان ودي اننا نفرح فيكم بعرس وحفله كبيره.. بس كلكم عارفين الظروف.. عسى الله يوفقكم ويجمع بينكم في خير..
فارس/امين
ابو عهود وهو حاس انه حاجز بينهم، فز واقف/يلا انا اترككم هنا شوي.. بروح اشوف ليش تأخروا داخل..
راح ابو عهود.. وضلوا لوحدهم..
هنادي ضلت تفرك يدينها ببعض وحيل مرتبكه،قررت تقوم وتروح.. وهي تشوف فارس ساكت..!
فارس قام ومسكها من كف يدها اليمين/ووين ووين.. للحين ماشبعت منك
هنادي من الخوف ما تدري وش تقول صارت غبيه/فك يدي
فارس رفع حاجبه الايسر بابتسامه وسحبها لصدره ومسكها من خصرها ولف فيها لف بعد..
هنادي فتحت فمها بتصرخ من المفاجأه اللي ماتوقعتها بدري كذا.. ولكنها تفاجأت بيد فارس تسكر فمها/اشش ترى بطلع اللحين وباخذك معي واتركهم مستغربين
هنادي سكتت وعينها بعينه هي تدري انه مستحيل يسوي شي يضايقها..
فارس بجرئه غريبه عليه/يلا عطيني بوسه وحده وافكك
هنادي خزته وصدت وهي ساكته اصلا مستحيه/..
فارس/من البدايه تغلي!!
هنادي وهي تتفكك منه/ابعد عني لا يجي خالي اللحين
سمعوا صوت خطوات..
فارس تركها وهو يمثل الزعل/على فكره انتي قاسيه
دخل ابو عهود ومعه شخص مب غريب على هنادي/السلام عليكم
فارس استغرب بس قال اكيد قريبها/وعليكم السلام
هنادي ابتسمت وهي خايفه واتجهت له وسلمت/هلا ومرحبا بعمي محمد
ابو علي بابتسامه باس راسها ومد عليها علبه كبيره غلافها مخمل لونه ازرق ملكي واطارها ذهبي/تفضلي يا بنتي هذي هدية زواجك.. مع انك ما قلتي لي عليه والف مبروك يا بنتي
هنادي دمعت عينها وضمته وبكت بصمت/..
فارس مستغرب من هالشخص..!!
ابو عهود/انا قلت له عن زواجك يا بنتي
بوعلي تأثر/اجل ظنيتي اني بزعل ..شكلك ماتعرفين غلاتك عندي.. يعلم الله لو عندي بنت ما قامت بواجبي مثلما قمتي به.. عسى ربي يوفقك بزواجك من فارس وتشوفين الذريه الصالحه
هنادي/تسلم يا عمي.. الله لا يحرمني منك..
ابو علي اتجه لفارس وسلم عليه بابتسامه/مبروك يا ولدي.. وبوصيك على هنادي حطها بعينك واحفظ ودها زين.. مابي اشوف بعيونها غير السعاده.. ترى لها ابو بيذبحك لو زعلتها
الكل ضحك..
فارس ابتسم له/لا تخاف يا عمي ..هنادي بعيووني بس ماتعرفنا عليك ياعمي
هنادي وهي تتجه لفارس/اعرفك عليه هذا ابو زوجي السابق
فارس تضايق ولكنه اخفى هالشي بنفسه لان زوجها ميت من سنين..
بو علي ابتسم لفارس/انا ابوها.. وبس ماعدت ابو زوجها.. زوجها انت وعسى ربي يوفقكم
فارس ارتاح وحبه على راسه/مشكور يا عمي
رن جوال فارس بهالأثناء وتضايق وهو يطلع جواله ويشوف من المتصل/هذول العمل..
ابو عهود/ هالوقت؟ انت مو تقول ماعندك دوام اليوم
فارس/خلني ارد واشوف..
طلع فارس وهو يكلم وباين انزعج من المكالمه سكر تلفونه واتجه لهم/معليش يا جماعه مضطر اطلع.. في مهمه ضروريه وطارئه و لازم اكون متواجد معهم
هنادي انقبض قلبها/اللحين
فارس/ايه..
ابو عهود/روح الله معك..
بو علي/استودعناك الله
طلع فارس وهو مستعجل..
هنادي ضل بالها معه ومنشغل فيه (اللهم اني استودعك زوجي فاحفظه لي)..
/
/
/

في شقّة عمر ..
بكل حيويه ونشاط من زمان ماحست فيه.. كانت تمشي وتبخر البيت بعدما انتهت من ترتيبه.
انتهت من حملة التنظيف.. و نومت عبود.. وراحت غرفتها اخذت روب الاستحمام الموڤ و دخلت تستحم وتنعش نفسها.. معنوياتها مرتفعه وهي تشوف السعاده على وجه "عُمر" وهي السبب فيها..
انتهت من الحمام وطلعت..وقفت قدام تسريحتها وفكت الفوطه من شعرها وضلت تمسحه ولمحت بين عطورها علبه زرقاء صغيره وفوقها كارت صغير اخذت الكارت وقرأته مكتوب "الحمدلله على سلامتك يا حلوتي" واتسعت ابتسامتها اخذت العلبه وفتحتها ولمعت عينها وهي تشوف سلسال نعووم بأسمها بالانجليزي..
نزلته على التسريحه ولفت تبي تلبس ملابسها وتفاجأت بـ"عُمر" بوجهها احمرّت خجل وهي واقفه قدامه بهالروب القصير وتفاجأت بوجوده بغرفتها/عُمر!!
عُمر واقف ويناظرها بابتسامه بنظره بانوراميه،شعرها اللي طاح نصه من الكيماوي ومابقى الا القليل.. وجسمها اللي نحف من شدة المرض هو شي جميل بنظره،،
قرّب منها و خلاها ترجع على وراها ووقفت بسبب التسريحه. ومد يده للعلبه واخذ السلسال وقرب منها وهو يهمس لها/حاب اشوفك لابسته
فاتن بلعة ريقها من الخوف/خلاص بعدين بلبسه
عمر طبع قبله على خدها وهمس عند اذنها/أنا بلبسك
فاتن استسلمت له تبيه يخلص ويطلع بسرعه ماتبيه يتمادى معها اكثر..
ولكن عمر لبسها السلسال و طبع قبله على صدرها.. و مد يده على طرف الربطه اللي عند خصرها. وفتحها..
فاتن نزلت دمعتها وهي خايفه/عُمر لا.. انت بـ..
عُمر سكتها بقبله ..
فاتن مع كل هذا ما انبسطت هالشي يزيد من غيرتها وتعلقها فيه مع اقتراب زواجه من لمياء… دعت ربها انه ما يتمادى اكثر ..لأن رجل بطهارة عُمر لازم يتزوج وحده حافظت على نفسها له وبس..
رن جوال عُمر ودخل عبود بهاللحظات وهو يبكي/بابااااا
عمر تركها لوجود عبود وهو يبتسم لها/كملي لبسك
اخذ عبود معه وطلع..
ابتسمت وكأنها اشاره من الله ان علاقتهم ماتتم بشكل طبيعي( اكيد نيتك صالحه يا لمياء و الله سبحانه راضي عنك)
/
/
/
/
/
في مركز مكافحة المخدرات.. *
العقيد حمزه وهو يكلم مجموعته اللي راح تنفذ المهمه/شباب راح ننطلق اللحين وبرفقتنا قوه من الشرطه بقيادة الرائد فارس..
اقبلت سيارات قوّة الشرطه و نزل فارس بالزي الرسمي للشرطه/القوه جاهزه طال عمرك
العقيد حمزه/يلا اجل.. توكلنا على الله..
وتحركت القوه باتجاه وكر المروجين..



/
/
بمكان ثاني من مدينة جده*
على طاوله بالكوفي شوب بعدما افتروا بالسوق وتعبواا ..
زينه وهي تناظر نايف/شايف كيف تعبنا
نايف بابتسامه كلها نشاط ويشرب عصيره/انا ماتعبت
زينه/ههههه فددديت هالغمازه
مشاعل كانت تناظر الساعه كل شوي..
زينه/يا ربي متى بيجي هالسايق
مشاعل/السايق يقول انه بيرسل سايق ثاني من المؤسسه لانه خلص دوامه..
زينه استغربت/مو بكيفه يتركنا كذا ..ليش ما قال لنا قبل ينزلنا
مشاعل/عادي هذا هو اتصل وقال لنا
زينه سكتت وهي ماتحس براحه،قلبها قارصها، ..
مشاعل وهي تقوم/تذكررت لي غرض بروح اخذه قبل يجي السايق..
زينه/طيب لا تتأخرين علينا يمكن يجي
مشاعل/اذا جاء بعرف لانه بيتصل علي وبقولك تطلعين اوكي
زينه/اووكي..
.
،
.
،
.
انهوا اجراءات صعود الطائره ..وربطوا الاحزمه وكل واحد متمسك بيد الثاني ويدعون الله ما يجيب طاري فراق..
اوجست لوجين بشي مثل اللي جثم على صدرها وحطت يدها على صدرها وهي تمتم/بسم الله.. اعوذ بالله من الشيطان الرجيم
مشعل ألتفت عليها بابتسامه/افاا جرّاحة قلوب و تخافين من الطياره؟! هههه
لوجين عقدت حواجبها/لا طبعا ما اخاف منها.. بس
مشعل استعجلها بالكلام/وش فيك؟ باين انك متوتره او مزعوجه من شي
لوجين وهي تتخيل اولادها/مدري فجأه حسيت بضيق.. توقع في شي حاصل وماندري عنه
مشعل/لا تتفاولين بالشر. ان شاء الله مافيه شي..
طلع جواله وفتح عالاستوديو ويطلع صور اولادهم وهو يتبسم/انا اعرف اللي راح يوسع صدرك.. شووفي هالحلوين وبتنسين همك
لوجين ضلت تتأمل الصور وهي تتبسم بدموع/حباايب ماما و رب الكون وحشووني..
مشعل تحمس/شووفي هذا الفيديو ارسلته لي زينه قبل شوي بالواتساب..توقعي من معها بالسوق.. ؟
لوجين بابتسامه دامعه/مافيه غيره اكييد حبيبي نايف هالولد الشقي
فتحوا الفيديو وضلو يشوفون استهبال نايف وزينه ..نايف سوا حبتين وهو يقول"بابا قول لماما انا رحت الثووق مع عمتي ذينه.. حتى شووف"واطلق ضحكاته البريئه..
لوجين ومشعل ضلوا منسجمين ونسوا كل شي..
.
،
.
،
.
،
مشاعل واقفه بعيد وهي تراقب زينه وتكلم اللي راح تخلي زينه تواجههم بدالها/الوه.. هااه وصلتم ..طيب اللحين اجيكم..روحوا بوابه رقم 3 الفلوس بشنطتي
صادق بالجوال/طيب كيف نعرفك ؟
مشاعل وهي تتذكر/معايه ولد صغير لابس تيشرت احمر وشورت ابيض..
.
.
،
.
فيلا مشعل بـ جده*
الضابط واقف عند الباب ويكلم عزيز/لو سمحت يا اخ معنا امر بتفتيش البيت واعتقال المدعو مشعل فيصل العاصم
عزيز استنكر كلامه/نعم!! ..وليش ان شاء الله
الضابط/لو سمحت اخوي خلنا نشوف شغلنا..
عزيز باستسلام/خلني اقول للاهل يتسترون
.دخلوا العسكر.. وفتشوا البيت ..واتجهوا لغرفة مشعل وفتشوها ركن ركن..
واتجهوا بعدها للحمام وفتشوه..


،
عند البوابه رقم 3"
نايف التفت وشاف الدكتور هشام وابتسم له وأشر بيده يعني"باي" لأنه يعرفه
الدكتور هشام بادله الابتسامه والتفت على زوجته/شايفه الولد الشقي ده
زوجته بابتسامه/ايوه.. القمر ده
الدكتور/ابن دكتوره لوجين بتاعت جراحة القلب اللي قلتلك عنها
زوجته/بسم الله ما شاء الله..
،
بهالأثناء وقفت سياره فان مضلله وباين قديمه..
زينه رن جوالها وردت/ايوه يا مشاعل.. وينك؟
مشاعل بالجوال/انا بالسياره اللي قدامك يالذكيه اركبي
زينه استغربت/هذي؟!!
مشاعل/ايه ايه يلا اركبي
زينه وبيدها ماسه نايف.. وباليد الثانيه اكياس.. فتحت الباب وركبت.. وتفاجأت بالرجال.. وصررخت..
السياره تحركت وهي مابعد تركب نايف نايف كان متعلق ويبكي
زينه مستحيل تفكه لأنه اذا طاح اكيد بيموت من السرعه
صادق ضربها على مفصل ذراعها وانفكت يد نايف من يدها غصب..
وراحت السياره.. وهي تصرخ بجنووون وتبكي بهستيريا.. وتناظر وراها وتنادي باسمه/نااااااايف ناااااايف
صادق ضربها على راسها واغمي عليها..
،
.
مشاعل اخذت نفسها وركبت مع سايقهم وراحت تبي ترجع للبيت.. ولا كأنه صار شي..
.
،
.
تجمهروا الموجودين حوالين نايف اللي مرمي على الارض مثل الجثه ورأسه ينزف ..
وكل واحد يقول للثاني لا تلمسه ..
وما تسمع الا كلمة"الله يصبر اهله".."شكله مات".."إنا لله وانا اليه راجعون"..
اقبل رجل خمسيني يركض من بين المتجمهرين، وهو يصرخ بلهجته المصريه/وسعوا يا جماعه وسعوا
الكل/!!!
الدكتور هشام جثى على ركبتيه على الارض عند نايف وشافه وهو جثه.. وتذكر ابتسامته له قبل كم دقيقه بس،نزلت دمعته وهو قلمه اللي في طرفه كشاف وكشف على عيون نايف ونطق/لا يا نايف.. لا
احد الموجودين/اتركه ..الاسعاف جاي بالطريق
الدكتور هشام صرخ بوجهه/اخرسووا.. انا طبيب طوارئ وعارف بعمل إيه..
نزل العسكري من سيارته وهو من ضمن المراقبين للمجرمين.. اتجه للمتجمهرين وهو يبعدهم/يلا لو سمحتوا اللي ماله شغل يروح…
الكل سكت والقليل فقط مشي.!!
الدكتور هشام صار يتفقد جسم نايف ورفع البلوزه وشاف جانبه كله صاير احمر على بنفسجي.. شهق والتفت حواليه/عاوووز مشرط.. بسررعه ارجووكم عاايز مشررط دالوقت حالاً..
العسكري اخذ جهازه/يا عمليااات ووين سيارة الاسعااف.. الحاله خطره
واحد طلع من كيسة اغراض القرطاسيه مشرط ورق ومده للدكتور/هذا ينفع؟
الدكتور هشام بدون تردد اخذه ونبههم يبعدون عنه.. وسحب المشرط بشكل سطحي على جلد نايف.. وانطلق الدم اللي كان ينزف داخليا..
الكل/!!!
الدكتور هشام رفع جواله واتصل في الدكتوره لمياء/الووه. لمياء بسسسررعه بلغيهم يجهزون غرفة العمليات انا جاي في الطريق ومعاي حاله حرجه جداً
لمياء استغربت انه ماعطاها فرصه تتكلم وتسمع صوت الاسعاف عنده/دكتور انت مو برا مع المدام ايش..
الدكتور هشام قاطعها وهو متأثر/هتعرفي بعد شويه،سلام
.
،
.
،
.
في طريقهم لوكر المجرمين.. أحاطوا المكان من كل اتجاه.. الكل على اهبة الاستعداد وعناصر الامن منتشره في كل المكان..وبانتظار شارة الهجوم من القائد..
فارس وهو يكلم باللاسلكي اللي بيده/عقيد حمزه، المكان هادي ومافي احد داخل وطالع
صوت العقيد حمزه من الجهاز/نحن مراقبينهم وحاليا في طريقهم للمكان ومعهم ضحيه مخطوفه ماندري وش الهدف من اخذها… خلووكم حذرين،الوضع الآن فيه ضحيه ويمكن يستخدمونها رهينه، للآن ما اتضح شي
فارس تفاجأ وعقد حاجبه/هذا اللي ماحسبنا حسابه..
.
،
.
،
.
لحظات ووصلت سيارة الاسعاف للمستشفى ..نزلّوا نايف بسرعه ونقلوه للطوارئ
الدكتور هشام وهو ينادي/فين الـ defibrillator
لمياء كانت بالتعقيم وسمعت صوت الدكتور هشام وطلعت من الفضول بسبب مكالمته وشافته يطلب يستخدم جهاز الصعق الكهربائي.. وعرفت ان الحاله حررجه جداً..
الدكتور هشام كان يحاول/جهزوا لي الابره بسرعه
جات لمياء مستعجله بالابره وصرخت وطاحت من يدها الابره/نااااااييف
الدكتور هشام ما التفت لها اخذ الابره وضربها في نايف بسرعه.. وصرخ بالممرضات/طلعوها برا..شكلها نسيت انها دكتوره
لمياء ضلت غصب وحاولت تسكت/لااا ماني طالعه اتركووووني
والكل حاول جاااهد انه ينقذ هالطفل…

،
.
،
.
،
عند عزيز.. *
كان بعاالم ثاااني.. الفرحه مو سايعته.. حلم حياته تحقق خلاص مشعل بيجي و حفلته قربت ،اتجه لاسواق الذهب بيشتري لعروسه اجمل شبكه.. كل شي يشوفه ما يعجبه يبي شي احلى، شيء يليق بغلاها في قلبه شي يستحق تلبسه حبيبته اللي مالها مثيل بنظره وبقلبه..
شاف سلسال نااعم وفخم بنفس الوقت هذا يليق بعنقها الطويل،قرر يشتري هالسلسال. بس لازم ياخذ معه طقم كبير ..وده ياخذ كل شي حلو لها..
تخيل شكلها بالسلسال.. اللي يتمنى يلبسه لها بنفسه.. حسد نفسه من مجرد خيال..
.
،
.
،

يتبع

[لامارا]

44))من متى والغصن يختار الطيور؟!
.
،
في بيت مشعل ..الجو مضطرب..
تأخرت زينه حييل واللي زاد الطين بله ان مشاعل رجعت وهي لا..!!
ام مشعل بصراخ/شلووون ماتدرين وين راحت.. وش قصدك
مشاعل كانت واقفه بعباتها توها راجعه وتخزها بنص عين/بنتكم وانتم ادرى بها..مادري وين راحت
الكادي بعصبيه مكبووته/وش معناة هالحكي هااه.. رحتوا سوى ومعكم ناايف… وين تركتيهم وجيتي؟!!!!
مشاعل وهي تتمسخر عليهم/اوووهه انا تعبت من تحقيقاتكم العقيمه.. اتصلوا في بنتكم وشوفوا وين هايته..
راحت وتركتهم وراها متجمدين..!!
عزيز اللي كان يسمع وهو ساكت ويغلي من داخله/..
ام مشعل وهي تمسك راسها من الصداع/حسبي الله عليها من حرمه.. تقول عن بنتي هايته.. الله لا يوفقها ان كانها ظلمت بنتي
رن جرس الباب.. وراح عزيز يفتح وتفاجأ بماجد/هلا عمي ماجد
ماجد بابتسامه ومعه مشعل الصغير وإيمي/السلام عليكم
عزيز خاايف لا يسأله عن نايف/وعليكم السلام تفضل عمي
ماجد/لا لا ما يمديني.. انا جاي اخذ نايف بنروح انا وياه واخوانه للمطار علشان نستقبل امهم وابوهم
عزيز صد بوجهه وهو ما يدري وش يقول/..
لحظات ورن جوال ماجد وهو مستغرب تصرفات عزيز/عزيز بسرعه روح جيب عزيز مانبي نتأخر
ماجد وهو يشوف جواله ومستغرب اتصالها ورد بسرعه لأنها ماتتصل فيه الا لشيء ضروري/هلا بنتي لمياء
لمياء كانت تبكي وصوتها حيل مبحوح ضعفت ماقدرت تتكلم/..
ماجد خاف من شهقاتها وألح عليها/لمييااء وش فيك يا بنتي.. تكلمي وش صاير لاهلك
لمياء زاد بكاها/نايف صار له حادث ونقلوه عندي بالمستشفى.. و حالته كثير صععبه
ماجد غرقت عيونه دموع وهو يلتفت لعزيز/لمياء انتي اكيد غلطانه انا تركت نايف في بيت ابوه وجده ..ماتركته بالشارع..
عزيز باهتمام وكأنه عرف انه صار شي بشع/بأي مستشفى؟
لمياء بإلحاح/عمي تعال بسرعه.. حالته صعبه ومافي احد منكم حوله.. لو أمه موجوده ماتركته <<<بكت
ماجد سكر الجوال والتفت لعيال بنته وباسهم/حبايب قلبي ادخلوا روحوا شوفوا جدكم وجدتكم.. انا بروح شغل وبجي طييب
ايمي تشبثت فيه/جدي ابغى اروح اشوف ماامااا
مشعل/وانا بعد
ماجد استصعب الامر/عزيز.. دخلهم بسرعه انا طالع للمستشفى
عزيز /عمي وش صاير تككفى قوولي..
ماجد بصراخ/عزززيززز دخل هالصغاار جووى بسررعه
عزيز دخلهم بسرعه.. ورجع مالقى احد!!
اخذ جواله واتصل في ماجد/الوو عمي وين رحت
ماجد رد وهو متأثر/ليه ماقلت لي انكم مضيعين ناايف.. ليييه،
عزيز استغرب وتغيرت ملامح وجهه/ما ضيعناه يا عمي.. اصلاً هو رايح مع زينه و زوجة عمي للسوق.. وزينه للحين ما رجعت
ماجد/ صاير له حادث وناقلينه للمستشفى الحقني هناك لازم نلاقي زينه اكيد هي هناك
عزيز اتجه لسيارته وطلع مستعجل.. كل اللي في باله انه بيشوف زينه بالمستشفى واصاباتها خفيفه.. ما جاء بباله اي شي اسوأ غير انها تكون مصابه في الحادث. او هو كذا يتمنى.!!
/
/
/
/
/
/
كلها ساعات…
وصلت الطياره ..ونزلوا ..اتجهوا لجمارك المطار علشان يختمون جوازاتهم..
لوجين كانت تتلفت تدور ابوها لأنها قالتله عن موعد الوصول..
مشعل وقف عند ومد الجوازات للعسكري علشان يختمها/السلام عليكم
العسكري وهو ياخذ الجواز منه/وعليكم السلام..
ناظر بالجواز و قارنه بوجه مشعل/مشعل فيصل العاصم..
مشعل بابتسامه/مثلما هو مكتوب عندك
العسكري رفع السماعه وهو يكلم خويه/المطلوب وصل.. وجواز معي تعال اخذوه
مشعل استغرب/وش المشكله يا خوي..
لوجين تمسكت بيده وهي خايفه/..
العسكري الثاني اقبل واخذ جواز مشعل واعطى لوجين جوازها/انت مطلوب.. وعندنا امر بإلقاء القبض عليك تعال معنا
لوجين وهي تشد على يده وتهمس لمشعل/وين بياخذونك عني
مشعل انقهر لان زوجته معه ومحد موجود ياخذها،التفت للعسكري/ياخوي انت شايف زوجتي معي محد لها غيري بهالمطار.. مقدر اتركها قدر وضعي
العسكري/اسمحلي مقدر اخليك تروح
لوجين ضلت متمسكه بيده وترفض انهم ياخذونه/
مشعل وهو يكلم العسكري/طيب بالاول خلنا نوديها البيت بعدين اخذوني معكم
العسكري سكت يفكر وتكلم/اتصل بأحد من اهلك يجي ياخذها هذي مب مشكله
لوجين طلعت جوالها وشغلته وهي تكلم مشعل/انا راح اكلم ابوي ويجي يتصرف حبيبي.. اكيد هو جاي يستقبلنا ..ما راح اخليهم ياخذونك
مشعل/اي والله اتصلي فيه.. ع الاقل اروح وانا متطمن عليك
لوجين انتظرت ابوها يرد ..وانتظرته ولكنه ما رد/غريبه ما يرد…. لكن برجع اتصل مره ثانيه يمكن ما سمع
مشعل/يمكن
لوجين حاولت وما رد عليها وبدأت تخاف.. وراحت تتصل بأمها ونفس الشي ماترد.. !!!
بدأت تقلق.. وريقها ينشف.. حولت مكالمتها للمياء وانتظرتها ترد واخيراً ردت/الووه السلام عليكم
لمياء بصوت مبحوح وباين كانت تبكي/وعليكم السلام
لوجين بلعة ريقها من الخوف،وحبت تجس النبض/كيف الحال؟
لمياء خنقتها العبره وماقدرت ترد/… .
لوجين بثبات واصرار/لمياء تسمعيني؟.. لميااء ردي علي!
لمياء وهي تبكي/اسمعك يا لوجين اسمعك
لوجين وكأن قلبها انقبض/اتصلت بامي وابوي كثييرر و ما يردون علي..وش صاير قوولي
مشعل جانب لوجين اتجه لها ومسكها/لوجين وش فيه
لمياء انهارت وصارت تبكي بصوت مسموع وفجأه راح صوتها ورد واحد غيرها/الوه اختي.. الدكتوره صاحبة الجوال اغمي عليها واخذوها..انا بروح اسلم الجوال للريسبشن وانتم اخذوه من هناك
لوجين بردت اطرافها تخيلت اهلها صار فيهم شي كايد دام لمياء ماتحملت تقولها.. افترت الدنيا حولها واغمي عليها..
مشعل اللي كان واقف جنبها مسكها وحاول يثبت وقفتها/لووجين وش فييك
لوجين لا حياة لمن تنادي..
/
/
/
/
/
/
/
/
/
في مكان وكر المشتبه بهم..
اقبلت سيارتهم مسرعه ودخلت المكان.. نزلوا وهم يتخفون.. ودخلوا "زينه"معهم…
وكل هذا تحت مراقبة الشرطه..
فارس وهو يشوفهم يسحبونها معهم ركب سيارته ناوي يتجه لهم واللي فيها فيها
خويه العسكري/يا رائد فارس لا تتهور.. انت خبره وعارف مصير اللي ما ينفذ الأوامر العسكريه
فارس وهو يعقد حواجبه/هذا وااجبي قبل وظيفتي..
فارس اخذ اللاسلكي وعمل نداء/عقيد حمزه انا قررت احرر البنت من الانذال..
العقيد حمزه بحزم/يا رائد فارس.. انت منت قدهم لحالك.. لا تاخذك الحميه وتخرب المخطط بأكمله.. البنت مجرد خيط لشبكه كبيره
فارس والنار تشتعل بصدره/ان ما حررت هالبنت منهم فيحق لكم تاخذون بدلتي مني..عطني الاشاره طال عمرك والا حاكموني
العقيد حمزه حس باصراره ونبرة الثقه/فارس لا تخيب ظني وارجع لنا بخير ..السعوديه تبي امثالك.. رووح وجيب لنا البنت
فارس انبسط/امرررك سيدي..
،
.

قبل دقايق ..دخلوا رجال ملثمين وكأنهم من ضمن المجموعه ضربوا الكل.. واخذوا زينه معهم وطلعوا.. زينه بدأت تستعيد وعيها ولكنها ما تصدق اللي يصير فيها..
صارت في وسط معركه من الرجال ..تبي تهرب ووين..
لحظات ومسكها واحد من يدها بقووه وسحبها معه لبرا ولحقوه مجموعته بعدما تخلصوا من اللي كانوا يحرسون مكان زينه..
بهاللحظات اقبل بسيارة الدوريه وشافهم يطلعونها من الوكر نفسه ناس غير اللي دخلوها.. واستغررب.. لكنه نسك مكرفون الدوريه وصرخ فيهم/استسلم انت وياه واتركوا البنت
الشباب بسرعه دخلوها السياره واسرعوا..
فارس ضل يلاحقهم وهو منقهر ع الوقت اللي ضاع بدون ما يحررها.. لحقهم باسرع ماعنده..
،
.
،
.
،
.
،
.
،
بالمستشفى *
كان الهدوء يعم غرفة الطوارئ..!
بصحبة العسكري ..دخل مشعل ومعه لوجين اللي يدوب قلبها ينبض.. اتجهت للريسبشن وكلمت الموظفه بدون مقدمات/وين دكتوره لمياء بسررعه
الموظفه حزنت اول ما شافتها/دكتوره لوجين!!
لوجين وهي تستعجلها/ايوه.. فيين لميااء؟
الموظفه/عند غرفة الانعاش رايحه تطمن عليه
لوجين مافهمت عليها.. بس راحت باتجاه غرفة الانعاش وهي تبحث عنها وشافتها واقف عند الحاجز الزجاجي ويدها على فمها دليل صدمه..!!
اتجهت لها وهي تصطنع الهدوء وقفت وراها وهي تكلمها/انتي هنا بعملك وانا بغى قلبي يوقف من خوفه عليك..
لمياء تجمدت،وهي تسمعها تقول قلبها بغى يتوقف من خوفها عليها.. اجل كيف لو عرفت اللي صار لولدها..!!
مشعل واقف بعيد شوي عنهم..
لوجين اتجهت لها ولفتها وتفاجأت بوجهها المخضب بالدموع وتغيرت ملامحها للذهول/ايش صاير قوولي
لمياء حاولت تتحاى بالشجاعه وتكلمت/نايف اصيب في حادث عرضي اليوم و…
لوجين مو مستوعبه قاطعتها/وين نايف؟
لمياء حاولت تهديها/صار عنده نزيف داخلي ولكن اسعفوه ..سوا له الدكتور عمليه لوقف نزيف الدماغ وقدر يوقفه.. لكن
لوجين/ماات؟!
مشعل جاء بعدما سمع صوت لوجين بدأ يرتفع وحاول يهدي لوجين اللي بدأت تنهار/لوجين هدي
لوجين مسكته من ياقته وشدته بقوه/نايف يا مشعل نااايف
مشعل بخوف التفت على لمياء/وين نايف يا لمياء
لمياء/وراي بهالغرفه المعزوله..لاتخافون تعدى مرحلة الخطر بس حاليا هو تحت الملاحظه.. صدقووني سووا الدكاتره اللازم.. ادعوا له انتم والدينه
لوجين قاطعتها/كلميني أنا.. أنا أمه وابوه أنا كل حياته ابعدي بدخل لولدي
لمياء بكت معها/انتي عارفه انه ممنوع
مشعل عاذرها حاول يهديها/يا لوجين اهدي
لوجين ألتفتت عليه وعيونها حمر من كثر البكي/افهمني اللي مرمي هناك على السرير هذاك مو قطعه مني هذا كل قلبي
مشعل ماتركها ثبتها/انا ابوه.. وقلبي محروق عليه مثلك
لوجين وهي مو بوعيها/انا بدخل عنده ليه نايم بهالشكل
لمياء اتجهت لها وابعدتها عن باب الغرفه/مشعل تصرف
مشعل مسكها وسكر فمها ودخلها غرفة الانتظار/لووجييين اذكري الله و توضي وصلي ركعتين لله.. احمدي ربك انه للحين عايش وادعيله ربي يقومه لنا بالسلامه.. اعرف انك انتي أمه وانتي اكثر واحد يحس بألمه لكن لا تعذبيني اكثر من كذا يا بنت الناس
لوجين هدأت وهي تذكر ربها في سرها.. وارتخت يدها..
مشعل باسها على راسها/أنا رايح مع العسكري اشوف وش يبون فيني.. انتي خليك عند ولدنا وانتبهي له مايحتاج اوصيك
لوجين ضمته بكل قوتها/الله يحفظك وترجعلي ولعيالك وراسك عالي
تركها مشعل بابتسامه تخفي ألمه واتجه للعسكري بسكات/..
لوجين شافته رايح وتنهدت وجلست و ضلت تبكي بصمت…
لمياء دخلت عليها بعدما شافت مشعل طلع/..
/
/
/
/
/
/
/
ببيت مشعل الوضع كان مكركب..
ام لوجين وهي تاخذ عيال بنتها/ماقصرتي يام مشعل اتعبناكم بالصغار
ام مشعل وهي تمسح دمعاتها/ما اعز من الولد الا ولد الولد يام لوجين… لولا الوضع مزري بهالبيت والا كان خليتهم عندي ويحوسون بكيفهم بعد
ام لوجين/ان شاء الله الشرطه يقدرون يرجعون زينه ونفرح فيها كلنا وبسلامة حبيبي نايف بعد
ام مشعل/ااامييين..
ام لوجين اخذت الصغار وطلعت/هيا فمان الله
ام مشعل/فمان الكريم…
طلعت ام لوجين وام مشعل طلعت لغرفتها.. لأن شوفت مشاعل تجيب لها الغثيان..
،
مشاعل كانت جالسه وحاطه رجل على رجل وتتفرج مبسوووطه باللي حاصل( خللك يامشعل تدفع ثمن اهانتي. و زوينه بعد خلها تموت حسره بعدما تخسر شرفها .. والله ونلت اللي تمنيته ههه)
دخل ابو مشعل وهو ينادي/يا عرب
اتجهت له مشاعل/ااامرر حبيبي
بومشعل اعتفس وجهه ما يبيها/مابي منك شي..
مشاعل بنظرة سخريه/ايه بس اللحين زينه الله يعلم وينها وانت مطلق ام مشعل..مافيه غيري بينفعك
الكادي اقبلت/هلا يبه.. امرني يالغالي
بو مشعل استبشر وجهه بشوفتها واتجه لها/تعالي وانا ابوك ابي لي اوراق وانتي اللي بتجهزينها لي
مشاعل انقهرت ولفت وتركتهم..
الكادي/من عيوووني بس ليش؟
بومشعل/مشعل اخذوه الشرطه.. وطلبت من محامي الشركه يروح.. وهو طلب مني بعض الاوراق.. وتهمتهم لولدي باطله.. باذن الله نطلعه..
مشاعل استغربت/شلون باطله يعني
ابو مشعل يدري انها تحبه وهالشي يطعن في صدره.. ويدر ان ولده ماله ذنب اذا كانت هي رديه/الحمدلله مالقوا مخدرات ببيته.يعني مافيه دليل وهالشي كافي انهم يطلقون سراحه
مشاعل ضاق صدرها من هالخطه اللي فشلت.. انقهرت..
الكادي التفتت لأبوها/قصدك انهم مسكووه!!
بو مشعل/ايه مسكوه بالمطار او ما وصلوا.. ولوجين اللحين عند نايف الله يشفيه
الكادي/المسكينه اللحين صدمتها صدمتين.. بالاول اخذوا زوجها للتوقيف وهم بالمطار والثانيه ولدها..
/
/

[لامارا]

/
/
/
/
الليل..
في طريق زراعي واضح انه يؤدي لمنطقة الاستراحات..
عند "زينه" كان وضعها مزري.. خفقان ورجفه.. مع شدة تركيز كانت تضم يدينها لصدرها وكأنها تحمي نفسها..
ماتدري ليش،قاعد يصير معها هالشيء.. وش سوت بحياتها يمكن هذي دعوة مظلوم.. لكن هي ماقد ظلمت احد ..بالعكس كانت تكرس حياتها لرضا ربها و والديها.. كان عندها امنيه طفوليه انها تكون مع عزيز طول العمر لأن اللحظه اللي تغطت منه كانت من اصعب اللحظات عليها لأنه يمثل طفولتها ومغامراتها عزيز مثّل اجمل مرحله بحياتها.. هالامنيه تحققت و تم عقد قرانها بـ عزيز.. ولكن قبل الزواج انخطفت لسبب هي تجهله ..وبهاللحظه تذكرت مكالمة مشاعل يارب كانت متعمده والا مجرد صدفه!
صحت على كف من اللي جالس جانبها/تفكرين بمن يا زينه
انذهلت.. شلون يعرف اسمها،اكيد دامه عرف اسمها معناته مشاعل لها صله بالموضوع، ما ردت عليه وهي تحاول تحافظ على نفسها لدرجة وكأنها فقدت الشعور بحواسها وهي تركز على الباب.. تبي تفتحه بس تبي هاللي جانبها يلتهي شوي عنها..
السايق بخوف/يا خاالد هالشرطي ورانا ورانا..
خالد نزل اللثام من وجهه و بصراخ/تصرف يا غبي..حاول تضيعه.. واتجه للعزبه بسررعه
السايق/وش هالبلوه اللي بليتني فيها يا خالد
زينه وكأنها تذكرت هالوجه "خالد" اللي خطبها قبل خمس سنوات وانطرد شر طرده من بيتهم.. التفتت عليه مو مصدقه.. كيف واحد ماعنده مروءه يخطف بنت من قرايبه،بحجة الثأر؟!!
خالد عصب وهو يتصل وما يلاقي رد/وين راح هالناجي هذا
خالد شافها تسترق النظرات عليه/عرفتيني هااه..
زينه بدون رد…
خالد عصب من تطنيشها ولفها عليه بقوه/عررفتيني والا لا؟
زينه بقوّة ماتدري شلون جتها/انا ماعرف الحثاله
خالد ماتحمل هالاهانه ورفع يده بسرعه وضربها/
زينه ابتسمت وهي تشوفه يضربها معناته عارف نفسه حثاله، تبي تركز على ادنى حركه/..
فارس كان يلاحقهم.. ويخليه يبتعد عنهم بعض السيارات.. انقهر وهو خايف يضيعهم.. مايقدر يرميهم بالمسدس لأن معهم بنت بريئه..

بنفس السياره
زينه تبي توترهم وتمد يدها للباب/الشرطي اللحين بيوقفكم .وراح تندمون
خالد وهو ينتبه لوراء وقدام وتاركها/اسسسكتي انتي
زينه/بنت الشيوخ مايسكتها واحد قليل مروءه مثلك
خالد/بسسس اسكتي
زينه وهي تزيد ضغطها بكلام هي ماتوقعت تجيبه/تحسب ان افلام الخطف اللي تشوفها بالتلفزيون حقيقيه.. وان الشرطه ما راح تقدر عليك هااه غبي.. معفن ماعندك ذرة رجوله
خالد ضربها والتفت على صويلح يحثه على السرعه/انت اسرع وماعليك منها
بهاللحظات المناسبه تخيلت نايف وهو ينفلت غصب عنها من يدها وفتحت الباب وهي تهددهم/يلا وقفوا
خالد صاح مقهور/مجنوووونه سكري الباب بتودينا بداهيه
صالح اللي هو يسوق بلع ريقه من الخوف/خالد تصرف بسرعه
زينه على طرف الباب وهي تصرخ فيهم/وووقفوووواا احسن لكم
خالد وعينه ترسل شرار حقده،طلع المسدس بسرعة البرق وصوبه تجاهها/سكريه والا فرغته فيك
زينه ابتسمت تغيضه وتستفزه/منت كفوو
خالد بدون تفكير ضغط على الزناد واطلق رصاصتين
وسقطت زينه على الفور وهي تطلق صرختها..
صالح صب عرقه وهو مرعوب/وش سووويت يالخبل..
خالد ببرود رجع مسدسه في جيبه/انت وااصل طريقك.. اكيد ماتت و الشرطه بتوقف عندها.. ماعلينا منها..
صالح بهستيريا/قتلتها؟!
خالد بابتسامة نصر/وسمعت بنفسي صرخة موتها وش ابي اكثر من كذا.. ارتاح قلبي اللحين..
صالح/بنزوح فيها
خالد/اقوول اسكت لا اخليك تلحقها اللحين.
/
/

عند فارس..
هدأ سرعته ووقف وهو مصدوم من اللي شافه.. شلون يسوون فيها كذا ويرمونها من السياره وهي تمشي بسرعه..!!
...؟!!
وقف فارس الدوريه ونزل وهو يركض باتجاهها..وهاله منظرها.. كل شي مرمي عنها.. لابسه بنطلون جينز وقميص ابيض تحول للاحمر كمه ربع ،ودمها مغرق المكان حولها..
اخذ جهاز اللاسلكي/انتهت المطارده.. ارسلوا سيارة اسعاف للمكان اللي يظهر عندكم في الجهاز..
سكر اللاسلكي وجلس عندها وغطاها بعبايتها .. وانهار بالبكاء مثل الاطفال.. شلون يصير معه كذا..كان متأمل ينجح بمهمته مثل كل مره.. وفاة البنت في مهمته وعدم قدرته على انقاذها نكسه بحياته..
.
،
.
،
.
،
.
،
.
حزة الفجر.. في المستشفى*
ارتاحت وهي تشوف جهاز الضغط يشير لتحسن حالة ولدها.. ونسبة الاكسجين رجعت طبيعيه ،شالت كمامة الاكسجين منه وهي تمسح على جبينه بحنان و تهمس له/سلامتك يا رووح الماما..ناايف حبيبي انا عندك انا ماما يا حبيبي.. وعد مني ما اخليكم لحالكم مرّه ثانيه.. حتى لو تطلب الامر اترك عملي واقابلكم.. انت واخوانك روحي
بهاللحظات انفتح الباب ..
لوجين التفتت صوبه وهي متفاجأه/مشعل!!
مشعل وهو يتقدم خطوات/مثلما انتي شايفه
لوجين ماصدقت اتجهت له وضمته/الحمدلله اللي تركوك تطلع كنت عارفه انهم غلطانين
مشعل وعينه على نايف/شلون حبيب ابوه اليوم
لوجين وهي تبتعد عن حضنه وتمسك يده/في تحسن الحمدلله.. الدكتور هشام كان قريب من مكان الحادث و ماقصر اسعفه بالوقت المحدد.. وهذا اللي ساعده بعد الله في تجاوزه الخطر بسرعه.. يعني لو انتظروا الاسعاف كان يمكن ولدنا راح فيها
مشعل وقف قريب منه وقلبه ينازعه عليه رحمه من هالابر اللي مزروعه بجسمه/متى بتشيلون هذي منه
لوجين/متى ما صحى من غيبوبته لا تنسى انه نزف من راسه بعد.. غيبوبته شي طبيعي وباذن الله ما تطول
مشعل بحرقة قلب أب/شكله تألم واجد ناظري جسمه كله كدمات
لوجين لاحظته حيل تأثر وهو يبوس يد نايف/مشعل خلاص لا تخليني ابكي من جديد
مشعل التفت عليها/لوجين انتي أم قويه.. انا لو مكانك ماقدرت اعطيه أبر او اغير
لجرحه.. وانتي عنده تعطينه الأبر بنفسك
لوجين بابتسامه دامعه/في بالي اذا انا اعطيته الأبره فما راح اخليه يتألم.. راح اسوي كل شي علشان يرجع لي نايف مثل قبل.
مشعل سكت وعينه على نايف ويحمد ربه على سلامة ولده..
لوجين/بتجلس والا تروح
مشعل/انا من اول ناجيت مارتحت ابي اروح البيت وارتاح
لوجين قلبها نغزها لأن مشاعل هناك،اتجهت له ومسكت يده/شرايك تروح لبيت اهلي احسن
مشعل مافهم قصدها/صعبه اترك بيتي واروح بيت اهلك ههه بعدين امي مابعد شفتها..
لوجين ضغطت على يده وعينها تلمع/دام كذا بكيفك
مشعل شاف لمعان عيونها ومد يده وهو يلامس خدها الناعم/يلا سلام حبيبتي
لوجين اخذت كفه من خدها لشفايفها وباستها وهمست له/استودعتك الله
مشعل باس راسها وطلع…
لوجين ناظرته وهو مقفي ورايح للبيت… مو قادره ترتاح بعد اللي عرفته عن حب مشاعل له..
جلست وحاولت تهدي نفسها…
،
طلع مشعل من عندها وتفاجأ باتصال من ابوه/مشعل ويينكك
مشعل خاف/انا عند نايف توني طالع من عند لوجين
بو مشعل والعبره تخنقه/تعال.. بسررعه قسم الطوارئ
مشعل/خير يبه
بو مشعل/اختك زينه جابوها واتصلوا فيني
مشعل راح مستعجل ..وقطع كل الممرات وهو خايف..
،
الطوارئ*
كان جالس على الارض مثل الاطفال،عند باب الغرفه ويديه على راسه ويبكي بكاء مرير ..ماقدر يمنع نفسه
مشعل شافه بهالحاله وحاول يفهم،اتجه لأبوه/يبه كيف حالتها لا يكون صعبه حيل
بو مشعل كان متلثم بالشماغ بشكل مهمل ويبكي بصمت..
مشعل وكأنه متبلد/ياجماعه خوفتوني،شوي ويطلعون يطمنونا عليها
طلعوا الممرضات ..واتجه مشعل لهم/لو سمحتوا وين الدكاتره ليه مافيه عند اختي احد
الممرضه هزت راسها بيأس/الدكاتره كانوا هنا من دقيقتين بس خرجوا.. شد حيلك
مشعل/مافهمت! لييش تاركين اختي لحاالهااا
الممرضه/توفت.. الله يرحمها ويصبركم
مشعل علق وهو واقف وكأن الصدمه ألجمته!!
عزيز شاف الكل طلع من عندها وضلت لحالها على متمدده على السرير الابيض تقدم لسريرها بخطوات مثقله بالحزن.. وقف عندها ومد يده المرتجفه للحاف اللي يغطيها ورفعه عن وجهها الشاحب ولمس خدها بنعومه وكأنه خايف لا يخدشه وباسها على راسها ونزل لخدها وضل راسه على صدرها وكأنه طفل فقد أمه..
دخل بهاللحظات مشعل وناظر وجهها وهو يتذكر ضحكها وسوالفها وكلمة "لبيه وهلا يالغالي"اللي دوم تقولها له..تذكر لهفتها وخوفها عليه لو تأخر على البيت..بدأ هو يبكي وتتفجر احزانه وطاح من طوله وجلس منهار ويبكي..
بو مشعل اللي كان جالس برا ويحس باختناق وهو يتذكر جلساته معها ما كانت تفارقه.. وقبل لا يناديها تكون عنده..تذكر اخر مره كان بالمستشفى وهي معه دار بينهم احاديث حلوه وضحكوا تذكرها وهالذك.
[راحت تصب له كاس ماء ومدته له وتشربه بنفسها/قل بسم الله يا حبيب زينه
ابو مشعل وهو يشرب من يدها/فديت البنات..
زينه/ههههههه اللحين عرفت قيمة البنات يبه
بومشعل بعدما شرب ابتسم لها بحنان الأب/الواحد من يكبر او يمرض يعرف قيمة بناته،هذا انتي دااايم حوولي لدرجة ما ودي ازوجك وافقدك]
دمعت عينه وهو يحس انه خسر اجمل شي بحياته..!!
/
طلع الرائد فارس من ادارة المستشفى واتجه للطوارئ لعايلة زينه يبي يسألهم بعض الأسئله وشافهم متأثرين ،حس انه مو وقته.. ألتفت على العسكري/اسمعني بعد بكرا راح نستدعيهم.
العسكري/امرك
فارس طلع مستعجل وهو متضايق.. قرر يلاحق في هالقضيه ويجيب قاتلها،مستحيل يوم يخسر مهمته..
/
/
/
/
في البيت.. *
ام مشعل وكادي جالسات على اعصابهم لأن ابو مشعل طلع ووجهه ما ينتفسر بعدما جاله اتصال ..
مشاعل جابت قهوه وجلست/تتقهوون ؟
ام مشعل خزتها وصدت وهي مخنوقه ومتضايقه على غياب بنتها/..
الكادي/لا شكرا مشاعل
شوي وسمعوا صوت الباب ينفتح ودخل مشعل بخطوات متثاقله.. وقف بنص البيت ثوبه مفتوح من فوق وشماغه بيده والحزن مرسوم على ملامحه وقف وهو يحس الدنيا تصرخ صمت وصدى صوت اخته يرن بأذنه "..
اقبلت الكادي ومعها ام مشعل بعدما سمعوا صوت الباب ولا شافوا احد دخل.. و انصدموا من هيئته،
ام مشعل اتجهت له وقلبها يقول لها فيه كارثه حصلت، همست له وهي تربت على كتفه/حبيبي مشعل، وش صار
الكادي تقدمت له/مشعل وين ابوي وعزيز؟ فيه شي جديد عن زينه؟
مشعل نزلت دمعته عند هالاسم اللي معاد لصاحبته وجود،تحركت شفايفه بصوت مبحوح من كثر البكي/زينه تطلبكم الحل
ام مشعل ضربته على كتفه/لا تفاااول على اختك
الكادي انهارت وجلست وهي تضغط على بطنها
مشعل التفت لأمه وضمها وبكى وكأنه طفل صغير..
ام مشعل تيقنت انه الخبر الحزين حقيقه وضمت ولدها وهي تبكي بحرقه وتتخيل وجه زينه/يمااه ززينه يممااااه حبيبتي.. ماكانت تبي تروح السوق بس انا اللي غصبتها تروح انااا ..انا وديتها لمذبحها
مشعل حاول يسكتها/لا يمّه لااا.. هذا قدرها انتي مالك ذنب تكفين اذكري الله
ام مشعل/ابي اشوفها يا عمري ابي اشوفها الله يخليك بشوفها

،
مشاعل كانت واقفه بعيد ومصدومه.. ماتوقعت توصل لهالمرحله.. توقعت الموضوع تشويه سمعه ورعب وبعدها ترجع.. ماكانت تتوقع الامور بتنتهي بموت زينه..!!
،
.
،
.
،
.
اليوم الثاني*
،.،

خذني معك لا اصير جسمٍ بلا روح
حيث انها تقفى الا اقفيت روحي

ارحم خفوقٍ بين الاضلاع له نوح
عقبك يعلّم ساجع الورق نوحي

سري بحبك دايم الدوم مفضوح
لو مانطقت دموع عيني تبوحي..
.،.
في المقبره..
نزلوها قبرها.. وكان عزيز لأنه زوجها آخر من جلس عندها علشان يكشف عن وجهها .مسح على خدها بطرف اصبعه وطلع السلسال اللي شراه لها هديه مع الشبكه وحطه جنبها، وانهار بالبكاء..
نزل مشعل له وطلعه غصب وكملوا مراسم الدفن..
عزيز ضل عند قبرها جالس.. بثوبه المبهذل وشعره الاشعث كان صامت ولكن دموع عينه ماجفت، شلون تروح بعدما تحقق الحلم.. وكأنه عايش كابوس جاثم على صدره.. دفنها بنفسه لكن مو مصدق انها خلاص ماتت وانتهت معها احلى قصص العشق العفيف..
رفع عيونه للسماء وغمض.. وحس بيد تهبط على كتفه والتفت تمنى هالكابوس انتهى..
مشعل وهو مصدوم من حالة عزيز وقومه لين وقف معه/قوم يا عزيز ادع لها بالرحمه
عزيز بكى مثل طفل وكأنه ما يفهم اي شي/زينه هنا مقدر اروح واخليها يا مشعل
مشعل بكى/ولا انا حاب اخليها بس لازم نروح.. بيقفلون المقبره..
عزيز/سكروا المقبره خلوني عندها ماراح ازعج احد.. بس خلوني عندها
مشعل آشر لـ عُمر يجي يساعده.. وبالغصب طلعوه..
.
،
.
،
.

في مجلس العزاء..
الحزن مخيم على الوجوه.. والجو العام كئيب..طلعوا كل المعزين.. ام مشعل ماتحملت تجلس اكثر وهي عارفه انهم دفنوا زينه الصباح، قامت وراحت..
مشاعل جالسه بالطرف المقابل ماتقدر تفكر بأي شي ما كانت تتمنى هالنهايه لزينه.. خصوصا انهم عرفوا انها مقتوله..
لوجين اتجهت للكادي اللي باين تعبانه/كادي فيك شي
الكادي تكلمت بعد سكوت والعبره تخنقها/احس اني مخنوقه ماني قادره اتنفس
لوجين وهي تسايرها/شي طبيعي مع الشهور الاخيره من الحمل لا تخافين.
الكادي حاولت تقوم واستصعبت الوقوف..
لوجين قامت تساعدها لين وقفت/احسن شي اوديك ترتاحين بالسرير اليوم تعبتي كثير
الكادي/لا بروح لحالي، انتي خليك هنا، يمكن يجي مشعل ويطلب حاجه
مشاعل/خليها تروح معك مو مشكله انا موجوده لمشعل
لوجين ناظرتها باشمئزاز،لأي مرحله وصلتها حقارتها بتستغل حتى وقت العزاء/يلا كادي مشينا خليني اساعدك
الكادي اعرف بنوايا مشاعل من تلميحات زينه والايام اللي راحت/لا ماعليه انا اقدر اروح لحالي.. لوجين اقعدي
لوجين/طيب على راحتك.
راحت الكادي وجلست لوجين..
مشاعل وهي متضايقه من وجودها/انتي وش مجلسك هنا وولدك بالمستشفى؟
لوجين التفتت عليها مستغربه هالسؤال اللي مب بمحله/نعم؟!
مشاعل/اقصد من اللي جلس عنده. حرام يعني يفةقعد لحاله
لوجين وهي مو طايقتها بس تسايرها/لا تشيلين همه.. انا اشتغل بنفس المستشفى والكادر الطبي كلهم زملاء وكلهم يبون يهتمون فيه لا تخافين.
مشاعل بخاطرها (ليتك رحتي مع زينه كان يرتاح قلبي مره وحده)
.،
بعد شوي دخل ابو مشعل واستقبلته لوجين/عظّم الله اجرك يا عمي واحسن الله عزاك
بو مشعل بانكسار واضح بنظرته وبنبرته/اجرنا واجرك، يا بنتي جزاك الله خير
بو مشعل بضيق/اعذريني يا بنتي بروح لغرفتي ارتاح
لوجين/خذ راحتك يا عمي
دخل مشعل و شماغه على كتفه، واتجه للصاله وشاف لوجين ومشاعل/السلام عليكم
الكل/وعليكم السلام
لوجين اتجهت له وسلمت عليه بالخد وهي تشوف عيونه وهيئته/البقى براسك يا بونايف واحسن الله عزاك
مشعل وهو يصد من الحزن/جزاك الله خير
مشاعل/عظم الله اجرك يا مشعل
مشعل/مشكوره..
لوجين استغرربت انها ما عزت ابو مشعل واللحين تعزي مشعل/
مشعل راح وجلس وارخى راسه ورا…
لوجين صبت له كاس مويه ومدته له/تفضل مشعل
مشعل اخذ منها الماء وشربه كله ورجع الكاس وتنهد/..
لوجين/شلون عزيز اللحين
مشعل وهو يبلع عبرته/حالته صعبه.. بالقوه طلعناه من المقبره.. وجالس بعالم غير ..انا خايف عليه يستخف
لوجين/بسم الله عليه.. انت لا تتركه ابداً لحاله.. خلك معه وحوله
مشعل/انا جبته ودخلته بعدما اخذت له مهدئ علشان ينام وهذا هو نام اخيرا وجيتك هنا.
مشاعل قامت بضيق وراحت… ماتحملت تشوفه جنبها..
مشعل شاف مشاعل راحت والجو فاضي ومسك يد لوجين وشد عليها بسكات.
لوجين همست له/قوم انت بعد ارتاح، ورانا ولد يبي له علاج
مشعل التفت عليها بلهفه وضيق لانه انشغل عن ولده/وش صار عليه نايف..انا حيل قصرت معه
لوجين طبعت بوسه على يده اللي تضم يدها/حبيبي انت كنت معذور وماتركته بمزاجك..الايام اللي فاتت بدأ يصحي بشكل متقذع يعني دقايق ويرجع ينام.. المشكله مو هنا
مشعل استغرب/وش فيه؟
لوجين/نايف احتمال اصابته بصدمه وارده.. وفيه رضوض وكدمات قويه بجسمه.. يبي لها فتره علشان تطيب
مشعل تذكر اللي صار لولده ولأخته وضاقت به الوسيعه/يا رب رحمتك
لوجين قامت ومسكت بيده/يلا قوم بوديك غرفتك وبروح اشوف امك ،اللحين الله اعلم بوجعها وتلوم نفسها ،تظن انها هي السبب
مشعل صدره/ايه هذا اللي مزعلني..
،
.
،
.
،
.
،
اليوم الثاني ..*
في بيته المتواجد في جده..
كان يكلم بالجوال وباين التوتر في صوته/يا غبي وينك فيه.. انا جاالس اتصل فيه من كم يوم و ماترد علي غبي انت ماتفهم
ناجي بالتلفون/انا اسف انشغبت بظروف طارئه عندي.. هاه ايش صار
خالد/انا قتلت البنت وهالشي ماكنت ناوي اسويه بالبدليه بس هذا اللي صار
ناجي رفع صوته/قتلت زينه بنت الشيخ مشعل؟
خالد توتر اكثر/ايييه قتلتها.. لا ترفع صوتك واسمعني زين.. انا ابي اسافر خلال هالاسبوع.. جوازي عندك بسيارتك جيبه والا ارسله علي
ناجي/شلون اجيبه وانا في الجنوب
خالد/حيوان غبي.. ليش تروح بالسياره بدون ما تنزل اغراضي منها.. انا ابي اساافر بدون اي شوشره،كفايه السلك الدبلوماسي طردوني من العمل في السفاره..
ناجي/اهااا.. طيب من كان معك
خالد/كان معي صالح.. ليتني ماخذيته كمخه
ناحي/طيب طيب انا كلها شغلة يوم او يومين واكون عندك بالجواز...
،
.
،
.
،
.
،
.
من جهته..
فارس بعد تفكير طويل ومكثف توصل لطرف خيط ممكن يوصله للجاني..اخذ نفسه واتجه لمكافحة المخدرات وبالتحديد الضابط حمزه، استاذن ودخل/عقيد حمزه السلام عليكم
عقيد حمزه/وعليكم السلام هلابك رائد فارس
فارس بحماس وبدون مقدمات/عقيد حمزه انا فكرت واستنتجت اني محتاج احقق مع المجموعه اللي قبضتوا عليهم في خلية ترويج المخدرات.. انا حاسس انهم هم بالبدايه خطفوا زينه.. يعني يمكن يفيدوني.
عقيد حمزه/تحت امرك.. المتهمين للآن في التوقيف عندي.. وتقدر تحقق معهم قبل نحيلهم لهيئة التحقيق والادعاء العام…
فارس قام مبسوط وهو يحس انه مسك بطرف الخيط/مشكور لتعاونك عقيد حمزه
.
اتجه فارس للتوقيف وطلب الخاطفين ..وكلهم اتفقوا ان "صادق" هو اللي اتصل على البنت..وهو اللي خطط لخطفها.. وفعلاً استدعاه فارس.. وجلس معه..
فارس بحواجب معقوده/اسمك؟
صادق بيأس/صادق محمد امين
فارس/صادق ،حسب بياناتك اللي عرفتها انك منت سعودي.. ممكن اعرف جنسيتك
صادق صد عنه/انا سعودي
فارس/بدون كذب.. انت منت سعودي.. قولي وش جنسيتك
صادق وهو خايف من الترحيل/انا مولود هنا و ماعرف غير السعوديه،ومالكم حق تبعدوني عنها
فارس/اذا انت تعتبرها ارضك وماتبي احد يبعدك عنها،ليش تسوي فيها كذا؟!!.
صادق سكت وهو خايف..
فارس/وش تعرف عن المقتوله زينه فيصل ال عاصم؟
صادق رفع راسه مستغرب الاسم/انا ماعرف وخده بهالاسم!!
فارس عصب وقام وهو يضرب بيده على الطاوله/لا تنكر انا كنت مع الجموعه.. وشفتك تخطفها قبل مجموعه ثانيه تاخذها منكم…لا تلف ولا تدور
صادق وهو يبلع ريقه من الخوف/انا اللي كلمتها وحدها اسمها مشاعل.. وسبق واتفقت معي انها تاخذ مخدرات بمبلغ وقدره.. وحتى كل شي عندي مثبت وحبيبت اني ابتزها وطلبت منها فلوس وكنت مبيت النيه اني اخذها من السوق
فارس باهتمام/وبعدها وش صار
صادق كمل/طلبتها توصف نفسها.. قالت انها بتروح بوابه 3 وقالت لي ان معها ولد صغير و انا اخذتها.. حتى هي بنفسها جات للسياره.
فارس استغرب و زادت حيرته/قلت لي اسمها مشاعل؟!!
صادق/ايوه هذا اسمها..
فارس/طيب انت وين وديت المخدرات اللي طلبتها.. يعني وين سلمتها لها
صادق/سلمتها في بيتها في الليل..
فارس/تعرف الفيلا وين فيه
صادق/ايوه اعرفها.. ولو حاب اوصفها لك حاضر بس لي طلب
فارس باحتقار/وش تبي بعد سواياك..
صادق/الله يخليك ويطول بعمرك.. لا يرحلوني ..
فارس استغرب الحاحه وماعلق/..
صادق قرب يبكي شاف اسمه على البدله/انت ماتعرف كيف الحياه في بلدي انا من النيجر لكن ماقد شفتها ابو هاجر هنا ومات هنا..
فارس بغضب/ان عشت هنا بتضل بالسجون لا تحسب انك بتطلع
صادق وهو يبكي/اعيش مسجون هنا ولا حُر هناك، انا حاب اقضي محكوميتي هنا..
فارس هز راسه وكأنه يطمنه/اذا تعاونت معي حاولت في ملفك..
صادق وكأنه لمح بصيص أمل/ان شاء الله انا تحت امرك.
فارس جلس وامره يجلس…
.
،
.
،

[لامارا]

يتبع44
.
،

مع الايام الصعبه.. عُمر استحى انه يسوي ملكه وخويه بحالة حزن.. صعب عليه يتركه.. ويترك عزيز..
زياد كان جالس قبال عُمر في المقهى/ايوه يالنسيب ايش بغيت.. لك عشر دقايق تبي تقول موضوع
عُمر بعد تردد/بصراحه انا مدري وش اقول..
زياد بابتسامه/قول اللي في خاطرك
عمر/انت عارف الظروف اللي مر فيها خويي وعارف ان…
زياد قاطعه/عارف والله عارف يا عمر وعااذرك.. يعني بالله شفتنا ماصلين عليك مستعجلين والا حاجه؟!..اخذ وقتك.
عمر/انا اقول لو نسوي ملكه في المحكمه وخلاص
زياد ماعجبه هالحل وسكت/..
عمر خاف/زياد انت ليش سكتت؟
زياد /عمر انا ماعندي غير اخت وحده.. اهلي ماجابوا غيري واختي.. تتوقع انهم بيقبلون يزوجونها بهالطريقه؟!! استحاله
عمر/بس كذا بناخذ وقت..
زياد/لازم تصبر..
عمر بابتسامه/تستاهل لمياء حفله تشهدها جده كلها
زياد عقد حاجبه ويمثل العصبيه/لا تجيب اسم اختي على لسانك
عمر/ههههههه
.
،
.
،
.
،
.
،
.
،
في المستشفى*
من اول ما فتح عيونه وهو يبكي.. وما يتكلم..
مشعل جالس عنده ويهديه/بابا خلاص حبيبي
نايف بس يصرخ وهو يتخيل الخاطفين يضربون زينه علشان تتركه وتخيل بكاها عليه ولحظة سقوطه.. بكى بهستيريا.. لدرجة ان لوجين بكت من قهرها على حاله و ماقدرت تتصرف معه..
الدكتور ألتفت على لوجين/انا مضطر اعطيه منوم
لوجين بصرامه/لااا.. كفايه وراح اطلعه اليوم
الدكتور/على حسابك
لوجين/مو مشكله..
طلع الدكتور ومعه الممرضه..
مشعل ضم نايف لحضنه بقوه وثبته وهو يقرأ عليه ايات من القرآن.. وبعد ثواني هدأ وبدأت حركته تقل واستجاب لأبوه ومد يده وبادله الاحضان وهو يبكي بصمت..
مشعل حس باناهيده على صدره.. وحمله وهو يتمشى بالغرفه ويهديه ..
لوجين ناظرتهم بابتسامة رضا/الله لا يحرمني منكم.
مشعل وهو يقصر صوته علشان ما يزعج نايف/يلا نطلع اللحين
لوجين/ايه ياقلبي اللحين..خلني اروح اضبط ادويته ومن بعدها نطلع.

،
.
،
.
،
.
،
رجع من دوامه متأخر.. بعد عدة مشاوير وتحقيقات.. قرر بكرا يكمل شغله ..
اول ما دخل حس بشي غريب ومتغير في البيت..!!
شم ريحة عطر فواح وابتسم..
طلعت من الغرفه الجانبيه وهي تبتسم بخجل.
حس بها والتفت تجاهها وابتسم لها/هنادي!! ماني مصدق
هنادي اتجهت له بابتسامه/قلت انك بتجي تاخذني ولا جيت!!
فارس تذكر انه قال هالكلام لابو عهود وانشغل بالقضيه/انا اسف انشغلت واجد
هنادي بنفس ابتسامتها الخجوله/واضح انك مشغول ..صار لي ثلاث ايام بالبيت
فارس/ثلاث ايام!!
هنادي/ماحبيت احرك قدام خالي.. وجيت بنفسي.. طبعا هو ظن انك رجعت البيت تاخذني بنفسك لان هذا الكلام اللي قلت له.
فارس اتجه لها وهو مبهور باطلالتها الساحره رغم بساطتها فستا اوف وايت ناعم وقصير فتحت صدره واسعه وله قصه من الخصر وشعرها مسدول وكحل وما سكارا و روج احمر..
هنادي شافته قرب منها و حاولت تشتت انتباهه/انا جهزت الحمام لك ة، روح واتحمم بالاول وانزل بيكون العشاء جاهز
فارس كان محتاج احد ينتظره بالبيت واحد يهتم فيه من بعد أمه،وتفاجأ بوجود هالبنت اللي اختارتها له أمه قبل سنوات هي اللي تنتظره طبع قبله على جبينها/مشكوره
هنادي استغربت/على ايش؟
فارس ابتسم بامتنان/على كل شي..مشكوره على وجودك هنا وانتظارك لي بدون ملل..
هنادي سكتت وعينها على شفايفه وهو يتكلم وعيونه اللامعه/..
فارس لاحظ انه يتكلم بدون فايده تقدم لها اكثر وقرب لخدها وباسها وهمس لها/احبك من زمان
هنادي مدت يدها وتعلقت برقبته وحضنته
فارس بادلها الاحضان ورفعها عن الارض وصعد بها فوق..
.
،
.
،
.
،
.
،
.

في بيت مشعل*
في صالة البيت..
ابو مشعل التفت على مشعل وكأنه يهمس له بموضوع مهم.
مشعل كان ساكت مجرد يسمع.. لأن باله مشغول باللي اتهمه بحيازة المخدرات،من هذا وليش يسوي بي كذا..!!
مشاعل اقبلت ومعها الشاهي/تشربون شاهي؟
بو مشعل ناظرها بقرف/لا.. انا رايح اشوف عزيز قبل اطلع لغرفتي
مشاعل/براحتك..
طلع ابو مشعل وتركهم..
مشاعل وهي تقوم وتجلس قريب منه على يساره مستغله عدم وجود احد/قلبي اصب لك كاسة شاهي
مشعل كان يطالع جواله و رفع ناظره لها وهو رافع حاجب ومنزل الثاني/انتي استحاله يكون فيك دم وقلب نفس الاوادم.
مشاعل مدت بوزها نفس الاطفال/الله يسامحك.. هذا القلب يعشق روحك.. وانت تجرحه!!
،
نزلت لوجين من عند ولدها بعدما تأكدت انه نام براحه.. شافت هالسوسه جالسه جنبه ونزلت تمثل البرود ووقفت بعيد شوي وكأنها رايحه المطبخ/السلام عليكم
مشعل قام واتجه لها/وعليكم السلام.. هاه نام نايف
لوجين وهي متجاهله وجود مشاعل/ايوه نام حبيبي..والبقيه نامو بعد ..
مشعل مسك يدها/الحمدلله
لوجين بنبره وضح فيها الغيره/ليش جالس جنبها؟هااه
مشعل استغل هالفرصه وقاطعها ببوسه نص على خدها ونص على الشفه وهمس لها/خلينا نروح نسوي لنا قهوه ونطلع غرفتنا.. راسي محتاج قهوه
لوجين ابتسمت لانها عرفت قصده من البوسه،مسكت يده/يلا حبيبي مثلما تبي..
،
راحوا امام نظرات مشاعل اللي تغلي من الغيره والحقد( من بكرا بطلب من فيصل يرجعني للديره ..ماراح اقعد لهم ثانيه، لكن ماني رايحه قبل اخرب بيتهم)
.
،
.
،
.
،
.
الصباح الباكر ..
قاموا على رنة جرس الباب....
طلع عزيز اللي له كم يوم ماطلع ولا قابل احد.. واتجه للباب استغرب ان السايق مب موجود!! فتح الباب وشاف العسكري!!
فارس/السلام عليكم
عزيز/وعليكم السلام..
فارس/منزل مشعل فيصل العاصم
عزيز/ايوه ..ايش المشكله
فارس/انت مشعل
عزيز/لا.. لحظه اناديه
لحظات واقبل مشعل وهو مستبشر خير،شاف وجه فارس ومشبه عليه بس مو متأكد../السلام عليكم
فارس استحاله ينسى الوجوه اللي يتعرف عليها وهذا بعمله اللي يتطلب تركيز/مشعل العاصم.. قد تقابلنا قبل كذا صح؟
مشعل حاول يتذكر/وجهك مو غريب علي
فارس/يومها كنت متضارب مع شخص وجيتوا عندي بالمركز… انا مستحيل انسى اللي اعرفهم
مشعل بابتسامه/فااارس!! يا هلا.. اقلط تفضل
فارس/لا.. في الحقيقه انا جاي في مهمة عمل ويااليت تساعدوني فيها
مشعل وعزيز استغربوا/نساعدك
فارس/ممكن نجلس نتكلم بالموضوع..
مشعل/اكيييد تفضل
فارس التفت للعسكري/خلوكم مع صادق وانتبهوا عليه
العسكري/امرررك

.،

.
.
.،
.
**
وقف راشد سيارته عند مركز الشرطه واتجه لخويه اللي معه و شافه متردد/هااه يا ناجي لا يكون هونت..
ناجي وهو يتذكر حال خالد وبلاويه ومشاكله..كل شي بيتقبله من خالد الا انه يقتل نفس بريئه.
التفت على راشد بحزم/لا ما هونت.. قدام خلنا ننهي اللي جايين علشانه
راشد بابتسامه/كفوو
،.
،
.
هناك في بيت مشعل..
عزيز بحالة غضب وهو يتوعد ويحاول يتفكك من يد مشعل ويروح يقتل اللي خطف حبيبته/فكني علييييه فكككننني
مشعل ثبته بقوه/عزيز اذكر الله
فارس وهو يطالبه بالهدوء/عزيز انا عارف وجعك ومتفهم ..خل التحقيق ياخذ مجراه بالاول نبي نعرف من هو القاتل هذا بس خطفها خلك هادي
عزيز وكأنه هدأ..
فارس/واللحين مشعل لو سمحت ممكن تنادي السيده مشاعل
مشعل/اللحين اروح اجيبها لك
.،
.
جالس بو مشعل ومعه لوجين اللي جالسه وتتقهوى معه ومعهك مشاعل..
بو مشعل/وين مشعل يا بنتي؟
لوجين وهي تصب له فنجان قهوه/من ساعه جات الشرطه وراح استقبلهم بالمجلس ولهم حوالي ساعه
مشاعل خااافت(الله يستر)
بو مشعل/ماقال ليش جايين..يعني غريبه
لوجين/علمي علمك
مشاعل قررت تقوم وتروح
وبهاللحظات دخل مشعل و هو يرفع صوته/وقفي مكاانك يا مشااعل
الكل ألتفت صوبه/؟!!!
مشاعل حست وكأن رجلها ماتشيلها ماتدري ليه انرعبت،لفت صوبه ووجهها اصفر/خير مشعل
مشعل تقدم لها وهو منغبن منها/ما شفت الخير من اول ما شفتك..
ابو مشعل وقف وهو مستغرب هالكلام يطلع من مشعل/وش اللي صاير
مشعل تقدم لها اكثر ووقف قبالها/حبيبك صادق برا ينتظرك
مشاعل بدأت تفقد/انا ماعرف احد وش تخربط انت
مشعل/للاسف كل شي مثبت ضدك..كنت اتساءل شلون دخل اكياس الهيروين اللي لقته أمي وهي ترتب غرفتي تحت مغسلة اليدين وظنتها بودره للنمل..اخذتها وطلعتها
مشاعل بدأت اطرافها تبرد وريقها ينشف/..
بو مشعل بحقد دفين اتجه لها وضربها كف/سوود الله وجهك
لوجين حاولت تبعدهم عنها/عمي خلاص
بو مشعل/ماعليك منها يالوجين هالاشكال ماتستاهل الرحمه ولا المغفره...حسبي الله عليك يا مشاعل كان المفروض ماتركتك بهالبيت وانا اعرف حجم خبثك وقذارتك..
مشاعل بدأت تبعد وتبكي/انتم كلكم ضدي لاني لحالي ومالي احد،لكن لو عرف ابوي ياويلكم
بو مشعل وهو يناظرها بازدراء/ابووك لو عرف سواياك دفنك بارضك يالرديه ،،مشعل خذها للشرطه
مشاعل نزلت لرجل بو مشعل تترجاه/لا يا فيصل طلبتك انا دخيلتك
بو مشعل/انتي متهمه بقضايا شرف ومخدرات وتسببتي بقتل زينه وتبيني اقبلك دخيله!! مششعل اخذها واقلعها عني
ام مشعل نزلت على الصراخ اللي سمعته/وش العلم يا جماعه
مشعل اخذ مشاعل غصب وبقوه والتفت على لوجين/هاتي عبايتها بسرعه
.،
.،
،.
،.

وصلوا مركز الشرطه..
تم تسليم مشاعل لسجن النساء..
دخلت بعالم عمرها ماظنت انها بتدخله،.ظنت ان فعلتها بتعدي و ظنت ان محد بيشوف يدها الملوثه
فارس سكر التلفون بابتسامه وهو يكلم مشعل اللي جالس قدامه/فيه لك خبر بيفرحك
مشعل ناظره باستفهام لان مخه معاد يستوعب وهو للحين يتساءل شلوون مشاعل تعاملت مع مروجين مخدرات!!
فارس استغرب سرحانه/مششعل
عزيز ربت على كتف مشعل/مششعل الضابط يكلمك
مشعل انتبه له/سم
فراس/تو الضابط المناوب مكلمني.. جاته خبريه عن القاتل واحضره وهو بالطريق جاي ومعه القاتل
عزيز وقف وهو يمسك اصابعه في قبضة يده وعروق رقبته تنشد وهو يشوف مقتله بعيونه..
مشعل مسك عزيز وجلّسه غصب والتفت على الضابط/ممكن اعرف من هاللي اخبر عنه
فارس/اللحين بيدخل يا عسكري دخلهم..
التفت عزيز ومشعل للباب ووقفوا وهم مستغربين/راشد!!!
راشد/لا مب أنا...خوي القاتل هو اللي طلب يبلغ عنه وجاب الادله ومن ضمنها مكالمه يعترف فيها انه هو اللي قتل زينه
عزيز خنفته العبره وزادت رغبته في الانتقام/من هوووو
دخل ناجي وهو يقول /خالد.. اللي كان بيوم من الايام خاطب لزينه..
مشعل حس بالغبينه لأن اللي حاولوا يدمرون عايلته هم ناس من قريته من قرايبه "زوجة ابوه وابن خالته"!!!..هنا القهر بحد ذاته..
عزيز تذكر ليلة اللي انقذ زينه من يد خالد..وقتها طلع خالد وهو مغمى عليه من شدة الضرب..تذكر كلام زينه بعدها.. وخنقته العبره، وطلع بسرعه وهو يحاول يهرب من العالم ويختلي بنفسه..يبي يرتاح اتجه لها وماغيرها يبي ..
،
وقف سيارته خارج المقبره ودخل وهو يناظر قبرها من بعيد ويتجه له بلهفه وجلس عندها وهو يلامس تربة القبر بيده ويكلمها وكأنها تسمعه/زينه… تسمعيني؟ انا ابيك ارجعي لي، انتظرت اللحظه اللي تكونين حلالي واحكي لك عن اشواقي وحبي لك.. لكن ما اسعفني الوقت،وانتي رحتي بسرعه… تذكرين هذاك اليوم بالمستشفى وقت ما صرخت عليك ،شفت الخوف بعيونك وكرهت نفسي.. انا اسف حبيبتي ارجعي لي، ضاقت بي رحابة هالدنيا بدونك.. كل شي بارد وماله قيمه.. كنت اعيش على امل انتظارك واللحين وش اعيش له؟..لولا العقل والدين مانتظرت ساعه وراك.. اوعدك مانساك وما تركك من دعواتي.. ..
رن جواله و تنهد شوي ودموعه تخضب وجهه ومسحها وابتسم للقبر/ها حبيبتي تبين مني شي؟..اخوك يتصل فيني لازم اروح.. ودعتك رحمة الله وغفرانه..
نزل راسه قبل تربة القبر وطلع..
.
،
.،
.
،
.
،
.

مرت الايام وتم قصاص خالد ..ومحاكمة مشاعل والحكم عليها بالسجن 12سنه لحيازة المخدرات و محاولة قتل زينه
..
وبعد هالاعتراف اللي جاء من خالد وناجي.. وبمساعدة راشد اللي اخوه نسيب لمشعل.. وضح لكل اهالي القريه نوايا خالد وخبثه ..بعدما كان يتهم مشعل بقلة الشرف طلع هو اللي ماعنده اصلا شرف....
الكل في الجنوب جاء ورحب بالشيخ وعائلته وقدموا الذبايح عربون اعتذار..
،،
.
،
في غرفتها عند اخوها في النماص ويترجاها له ساعه..
مشعل وهو يمسك يدها/يمه طلبتك ارجعي لابوي تراه بيرسل لك وجيه العشيره علشان ترجعين
ام مشعل باصرار/ماقدر ارجع له يا مشعل.. كنت ابي ارجع له علشان روح زينه الله يرحمها اللي كان حارمني منها ماشوفها الا بالزور لكنها اللحين راحت… انا ماعندي استعداد ارجع له يا ولدي..
مشعل حس باحباط.. رن جواله ورد/هلا لوجين.. وشووو؟ احلفي
ام مشعل التفتت عليه/وش صااير
مشعل/عن اذنك يمه عزيز ولوجين توهم وصلوا الكادي للمستشفى بتولد بروح لهم
ام مشعل خافت/يا قلبي عليها… مشعل بروح معك
مشعل انبسط/تعالي
،
.
،
.
،
بالليل..
الكل كان حو الكادي ..مشعل وعزيز واخوات مشعل ساره ومنيره ..ومبسوطين بسلامتها والمولوده الجديده..
ام مشعل وعيال مشعل كانوا حول سرير البنوته ويناظرون فيها بسعاده
لوجين طلعت جوالها وصورتهم ونغزت مشعل/شووف هههه
مشعل ابتسم/امي هذا شكلها اذا شافت بزر توه مولود..
ساره/هههه اذكرها ماخلتني المس ولدي
ام مشعل شالت البنوته وهي تتبسم/ماشاء الله.. وش ناويه تسمينها يا بنتي
الكادي ابتسمت تمنع دمعتها/زينه
الكل تذكرها و خيّم الحزن..
ام مشعل ناظرت فيها وهي تتخيل زينه اول ما انولدت وضمتها لصدرها وهي تشمها..
عزيز قرب منها بابتسامه وناداها/زينه حبيبة خالك
البنوته ابتسمت له واخذها وباسها وهو يحط وجهها الصغير جنب وجهه/بالله صوره يا جماعه..
لوجين ومشعل كل واحد اخذ له صوره..
مشعل ارتاح ان عزيز تجاوز حزنه الطاغي وقدر يتأقلم..
ابو مشعل دخل وهو يتبسم/ما شاء الله مبرووك يا بنتي والحمدلله ع السلامه
الكادي/الله يسلمك يبه..
بو مشعل/يا عزيز عطني البنت
عزيز بابتسامه/لو سمحت البنت صار لها اسم.. اسمها زينه
بو مشعل ابتسم بحنان وهو يطالعها/مرحبا بك يا زينه
ام مشعل طلعت من ضيقها..
بو مشعل حس فيها لكن ما بيده شي.. والتفت للكادي/بنتي يالكادي.. انا جايك بموضوع وماني حاب اضغط عليك انا مجرد مرسول والقرار لك..
الكادي وكأنها عرفت الموضوع ولكن ماتبي تقاطعه/اسلم يا يبه
بو مشعل/عبدالرحمن جاس ومع وجيه الربع يبي يرجعك ويعتذر لك
الكادي بعد سكوت لبرهه/اما الاعتذار ..فما على السفيه عذر.. اما الرجوع فمن سابع المستحيلات ارجع له.. ومن لا حشم نفسه محدن يحشمه..
مشعل وعزيز فرحوا بردها ..
بو مشعل/اللي تشوفينه..
لوجين نغزت مشعل وسحبته على جنب/تعاال
مشعل وهو مستغرب/خيير وش فيك
لوجين/متى ناوي نسافر علشان نحضر زواج لمياء وعُمر
مشعل بابتسامه/لا تخافين.. طيارتنا الصباح… نحضر الزواج واول ما نخلص نرجع اليوم الثاني
لوجين طبعت قبله على خده/يسلم لي
مشعل حمر وجهه وهو يتلفت/
لوجين وهي تكتم ضحكتها بابتسامه/تطمن ماراح ابوسك قدام احد هههههه
مشعل يتصنع الجديّه/لا تسوين هالحركات
لوجين وهي تسايره وتتبسم/طيب يالشايب
مشعل طلع جواله يبي يشوف من المتصل وتفاجأ انها باسته وهربت ..وهو يبتسم على حركتها الطفوليه..

،.

،
.
،
.
،
.
،
.
يوم زواج لمياء وعمر ..
وصلت ارض المطار وهي مستعجله مع زوجها رمبوا ليموزين وتحركوا باتجاه فندق الهيلتون.. لان زواج صديقتها هناك كانت تمشي وتناظر بالوجيه وبالاماكن.. نزلت دموعها بدون تحس وهي تشوف مدينتها وبلدها اللي من زماااان عنه
ألتفت عليها مراد وهو يتبسم/ازعجتينا من زمان وانتي تقولي وديني للسعوديه اشتقت لها واليوم بعدما شفتيها بكيتي!!
روبين بصوت باكي/اشتقت لها ..ماني مصدقه اني هنا وبشوف ستي وصحباتي وبيت اهلي
مراد مد يده ليدها ومسكها/الحمدلله اننا جينا في الموعد..
روبين/الحمدلله.
،
.
،
.
،
.
،
.
.
في قاعة الهيلتون.. *
كان كل شي قمة الترتيب.. والحضور بدأوا بالوصول..
.
في احد غرف الفندق ..كانت واقف قدام المرايه تحط اللمسات الاخيره لزينتها وهو حلق.. وانتهت.. وهي تشوف مشعل بالمرايه واقف هناك يراقبها باعجاب راحت فيها من الخجل حتى لو حاولت ما تبين/خلصت لبسك حبيبي؟
مشعل وهو يتقدم لها/شوفت عينك.. شرايك فيني كعريس؟
لوجين ناظرته بنص عين وبابتسامه ساحره وهي تعدل شماغه/راحت عليك يا حبيبي
مشعل مسك يدها وعينه بعينه/وش اللي راح علي.. انا
لوجين قاطعته/انت للوجين ..فااهم؟..وكلمة تنازل حذفتها من قاموسي.. مثلما انت حذفتها
مشعل رفع يدها وباسها/
لوجين قربت وضمته وهي مغمضه/الله لا يفرقنا
مشعل/امين.
لوجين وهي تحاول تبعد عنه بابتسامه/شرايك بلبسي؟
مشعل وهو يعفس وجهه/يعني مو بطال
لوجين شهقت وهي تناظر فستانها التيفاني الطويل/كيف؟ يعني ماعجبك مو حلو
مشعل كتم ضحكته ولكن ماقدر/امززح والله امزززح.. يلا مشينا يا بنت تأخرنا
لوجين وهي تمد بوزها مثل الاطفال/سخييف خوفتني
مشعل ضحك على شكلها وهي تحلطم وتلبس عبايتها وتطلع معه..
.
،
.
،
.
القاعه.. *
دخلت بمرحها وشياكتها مع فستانها الابيض القصير وتتلفت.. اكيد بتشوفها ..سمعت وحده تناديها وراها وابتسمت
ام زياد/روووبييين!!! يا هلا ومرحبا
روبين اتجهت لها وسلمت/هلابك خالتي كيف حالك مبرووك زواج لمووش
ام زياد/الله يبارك فيك حبيبتي..
روبين/خالتي في لوجين ولمياء
ام زياد/لوجين هناك عند لمياء دحين الزفه..
روبين ابتسمت بدمعه وهي تشوف الاضواء تخفت معلنه دخول العروسه.. وقفت من بعيد وهي تشوفها تصعد للكوشه و بصحبتها لوجين.
اتجهت لهم بعدما ولعت الاضاء ووقفت قبالهم/مبرووك يا حبيبتي
لمياء نست انها عروس وقفزت واتجهت لها وهي تنادي/روووبي
لوجين ضمتهم وبكوا كلهم..
ام زياد جات ومعها كلينكس وتتبسم/زين كذا خربتوا بنتي
الكل ضحك و رجعتها للكوشه..
روبين وهي شاقه الابتسامه وماسكه الجوال قدامها وتجلس جنب لمياء ولوجين جانبها/سيلفي مع العروووسسس
ام زياد تناظر فيهم وتضحك/رجعت روبين ورجعت الشقاوه معها.
بعد شوي دخل عمر وكانت اسعد لحظات لمياء وهي تشوف عُمر يضمها قدام الحضور.. انحرجت ولكنها كانت تحس انها اسعد انسانه..بعد صبر السنين ..مكتوب نتلاقى.. ونكون لبعض..
عمر كان ماسك بيدها طوول الحفل لحتى ما طلعوا..
.
،
.
،
.
،
.


تمت بحمدالله..
اشكر كل من تابعني وانتظرني..
هالروايه اهداء لكل من قرأها..
لو اعجبكم ماكتبت أناملي لا تبخلوا بالتقييم.. والنقد الهادف
...
ان اصبت فهو بتوفيق الله.. وان اخطأت فمن نفسي والشيطان

نلتقي في روايات قادمه.. لكن لن انزل روايه بعد ذلك الا مكتمله.. باذن الله

كونوا دائماً بخير♥

[salwa shazly]

موفق بإذن الله ... لك مني أجمل تحية .

[أمل الحياه]

ربي يعطيك العافيه