خريف الحب / للكاتبة خياله،،والخيل عشقي (مميزة)

[لامارا]

حسبي الله لا إله إلا هو..عليه توكلت وهو رب العرش العظيم
-----------------

الورقة العشرون

نعاني،نتألم من الداخل ونخفي الكثير من أحزاننا..من أجل أن نبرهن بأننا نتحمل.. ونحن عكس ذلك!!



(ياسمين)

أبا ورق عنب وتويكس.
ياسمين/طيب فهمت،هوا نفس الطلب كل يوم يارؤى.
رؤى/يمكن تنسي مع زحمة البنات.
سلوى/ياسمين دفي البنات وأزنقي نفسك بينهم ،خلصينا.
ياسمين بطفش/خدوا الفلوس وأطلعوا من رأسي.. بستناكم في مكانا.
سابتهم وراحت تحت الدرج وفرشت شرشفهم اللي حاطينه هناك..وأول ماقعدت جاتها بنت قاصه شعرها بوي ومشمرة أكمام قميصها ورافعه مريولها ورابطته عند الخصر وتحته جينز..طالعت فيها ياسمين بتوتر ولفت تشوف صحباتها،جلست البنت قدامها وهي تتأملها بإبتسامة وبصوت خشن/صباحك قشطة ياقشطة.
أرتبكت وحاولت تبين طبيعية/صباح النور.. هلا عبير.
كشرت عبير/عبووود.. عبود ياحلوةمالحقتي تنسي يا ياسمينتي.
ياسمين/أنا مو ياسمينة حد.
عبير/عازمك عالفطور..تعالي..
ياسمين بإبتسامة/شكراً،البنات جايين ومعاهم الفطور.
رؤي/هلا هلا عبير،اتفضلي معانا.
عبير/يالله صباح خير..قلنا عبووود.. أنتوا ماتفهموا .
سلوى/عبود حمود،براحتك روقينا بس وأقعدي أفطري.
كشرت بوجهها/لا شكراً..لينا فطور ياحلوة غمزت لياسمين وراحت..البنات طالعوا في ياسمين اللي لونها أنخطف،رؤى/ما عليكي منها ذي وحده فاصلة.
سلوى بقلق/لازم نتصرف..ماينفع نسيبها كذا.
ياسمين برجفة/بنات والله خايفة منها، شوفوا كيف تطل فيا،وربي مو طبيعية.
سلوى/المشكلة حاطتك في بالها الحيوانة.
رؤى بملل/ترى أديتوها أكبر من حجمها،أيش هتسوي يعني.
ياسمين بحدة/أقلك نظراتها ماتريح،وليها فترة تحاول تقرب مني وتقلي معجبة ومدري أيش شكله..
رؤى/ياهووو..تراها موضة وطالعين فيها.. قلك معجبة وأحبك والهبل دا..يعني هتخاويكي من جد.
سلوى بعصبية/وربي محد أهبل غيرك..أنتي فاكره إنها تمزح ،تراها من جد مسوية حبيبه وتعجب بالبنات وتخاويهم.
ياسمين بتفكير/كيف حبيبه وتخاويهم،أيش بيعملوا يعني.
عصبت منها سلوى/يعني مفكره نفسها ولد وتتعرف على بنات وتعاكسهم وحركات قلة أدب،فهمتي ياهبلا منك ليها.
ضحكت رؤى وشهقت ياسمين بخوف/أنتي من جدك ولاتمزحي..
رؤى/هههههههههه،يختي أنتي عليكي هرج، مدري من وين تجيبيه..أيش الهرج المفقع دا.
سلوى بتأفف/فقعوا دماغك ياشيخة..وربي مو هرج شفتها بعيني ورح أخليكم تشوفوا اليوم..
ياسمين برفض/مابا أشوف شيئ،خلوها تحل عني وبس..دي باين عليها مجنونة،أهلها كيف سايبينها كدا.
سلوى/أيش أقول بس،شكلهم مو دارين عن جدها.. المشكلة مو فيها بس،شفت غيرها كم وحدة بنفس الهرجة..أيش بجدهم البنات انهبلوا فجأة وقلبوا عيال كذا.
رؤى تأكل ولا على بالها/قلتلكم ماصدقتوني، ترى من جد موضة..كل يوم والتاني تجيني وحدة تقلي أنا بويا وأسمي مدري أيه..وربي عاهات.
ياسمين بقلق/بس كدا غلط،هما بنات كيف يتصرفوا زي الأولاد ،وأيش حكاية معجبة وأحبك وتخاويني دي..هما بيوصلوا لأية بالضبط..أيش يبغوا.
قاطعهم صوت الجرس اللي رن وأعلن نهاية الفسحة.. وقفت سلوى بتصميم/دحين أوريكم أيش يبغوا ،ورح تفهموا كلامي..
ياسمين بخوف/سلوى الله يسعدك مالنا وما لهم،بطريقتهم..
رؤى بحماس/لا لا خلينا نشوف،أبعرف أيش هرجتهم دول.
سلوى/أستنوا بس لما تفضى الساحة،وأول ماتشوفوا الأبلات دخلوا،جري عالحمامات بس بهدوء علشان ماينتبهوا علينا،دن..
رؤى وياسمين/دن.
وبعد دقائق فضيت الساحة ودخلوا المعلمات واتسحبوا البنات عالحمامات بهدوء..سحبتهم سلوى واتخبوا وراء جدار بحيث يكشفوا الحمامات ومايبانوا..وبعد لحظات شافوا عبير ومعاها كم بنت وكانوا ب-----------
غطت ياسمين فمها بصدمة من اللي شافته وطالعت في رؤى اللي ما كانت أقل صدمة منها،سحبتهم سلوى وطلعوا برا ومشيوا ناحية فصلهم بخطوات مهزوزة. سلوى بأسف/ياسمين وربي ماكنت أدري..أول مرة أشوفها معاهم..
هزت ياسمين رأسها بصمت ودخلوا الفصل وبالها مع اللي شافته.

[لامارا]

(خالد)
مرت كم سنة على زواجي والحمد لله مو حاس بأي ندم على قراري..معرفتي بندى وزواجي منها أحلى شيئ صار في حياتي. كل شيئ فيها يجذبني شكلها،دلعها،حبها ليا،أعتمادها عليا في كل شيئ،والأهم غيرتها..ومع إنه بتجمعها علاقة قوية مع جوري وصاروا زي، لا صاروا فعلا أخوات.. يحبوا بعض ويخافوا على بعض ،وكل اللي يشوفهم لايمكن يجي في باله إنهم ضراير.. حتى ذي الكلمة مايحبوها.. ورغم كل ذا إلا إنها بتغير بشكل مو طبيعي من شيئ أسمه جوري..أي شيئ يتعلق بيها بيوصلها لدرجة الجنون،مجرد إني أنادي جوري أو أجيب سيرتها يخلي عداد الغيرة عندها يوصل لآخر حد..رغم إن علاقتي بجوري جداً عادية بل وأكثر من عادية..يعني هيا معقدة ومو معقدة.. كيف أفهمكم..يعني صح أنا أعشق شيئ أسمه ندى،لكن في نفس الوقت جوري ليها وضع خاص،كنت متخيل إن حياتنا بتتعقد بعد زواجي لفترة معينة ،عالأقل لحد ماتتقبل وجود ندى بينا خاصة إنها كفشتني في مواقف محرجة،بس صدمتني بإنها عدت الموضوع بعد ماسمعتني كلمتين لا أكثر..تدروا أحلى شيئ فيها واللي يعجبني بقوة إنها دايماً عندها القدرة على الفصل بين اللي بيصير في حياتها وبين واجباتها تجاة غيرها ..سواءً مع أهلي أو معايا..أكيد فهمتوا قصدي..وأنا بصراحة مرتاح في وضعي معاها،يعني مهما كنت أحب ندى وأشوفها في عيني أحلى وحده..فجوري للأمانة أنثى جدا جميلة وزوجتي وأنا رجال ليا متطلبات واحتياجات..والحمد لله تقدروا تقولوا عن علاقتنا إنها صداقة أكثر منها زواج،هيا بالنسبة ليا زوجة وصديقة أقدر أعتمد عليها في أصعب الظروف وأنا واثق من قدرتها على حل الأمور بطريقة مثالية..أخت مافي منها سواءً ليا أولأخواني بنت بارة بأمي.. وفي نفس الوقت أم مثالية حنونة وحازمة..لما شفتها كيف تعامل الأولاد ولاتفرق بينهم وتربيهم وتعلمهم مع بعض بنفس الطريقة، وكيف صاروا على قلب واحد وماعندهم عقدة حرمة الأب ولا حكاية ذا أخويا وذا شقيقي.. فهمت اللي كانت تقصده بكلامها وقت ماشرطت عليا أسكن ندى معاها..بصراحة أوقات بخاف أحسد نفسي على حياتي ،كل اللي أعرفهم ومتزوجين أثنين طالعة عينهم وبسمع منهم هروج تشيب الرأس من مقالب الحريم وشغل الضراير..بس ربنا وفقني بحرمتين مافي منهم..ندى حب حياتي ونصي الثاني، وجوري رغم إني مو عارف المسمى اللي ممكن أطلقه عليها..إلا إني متأكد إنها شيئ مهم وثابت في حياتي زي ما قالت عليا مرة..يمكن أكون أناني في تفكيري وأكون ظالمها،بس مشاعري مو بيدي..كل اللي أقدر أعمله إني أعدل بينهم في الحقوق والواجبات.
والحمد لله حياتنا ماشية كأحسن مايكون.

[لامارا]

(سارة)
مسكت جوالها وأتصلت للمرة الثالثة ومازال الجوال مغلق ..رمت جوالها بقهر وهي تتوعد لسعد زوجها بأبشع عقاب.. صار له يومين برا البيت وماجاها أي خبر عنه،كل اللي قاله عنده مهمة ومارح يقدر يكلمها لحد مايخلصها ونفس الكلام اللي يقوله لها قبل كل مهمة يطلعها واللي مايريحها أبداً..راحت تشوف ولدها عبدالله اللي كمل السنتين ولقته نايم..رجعت تصحح دفاتر البنات وهيا تحاول تشغل نفسها وتنسى الضيقة اللي حاسه فيها،وبعد ثالث دفتر سابتها عالطاولة لإنها ماكانت شايفة اللي بتصححه..راحت أتوضت وصلت ركعتين وهي تدعي له وتستودعه الله.
------------------
(مازن)

Mazin..you have to take the request table 8
(مازن عليك أن تأخذ طلب طاولة 8)
مازن/ok Marc.
راح لحد الطاولة وبإبتسامة/ Hello, I Mazen and I'm in charge of the service tonight
(مرحباً،أنا مازن وأنا المسؤل عن خدمتكم الليلة)
أخذ طلب أفراد الطاولة الأربعة بأدب وسهر على راحتهم لحد ماخلصت سهرتهم ودفعوا الحساب وبقشيش كبير لمازن وطلعوا..
أتوجه لمارك بتعب/ This was the last table for me tonight
(كانت هذة أخر طاولة لي لهذة الليلة)
حط مارك يده على كتف مازن بإبتسامة وبعربية مكسرة/.ياتيك افيه هبيبي ..
مازن بضحكة/الله يعافيك، ههههههههههه..يجي منك.. I'm going to sleep.. good night
(سأذهب لأنام.. تصبح على خير)
مارك/good night
سلمه حساب الليلة وراح غير ملابسة في غرفة الموظفين وقفل خزانتة وطلع..
ركب السيارة وهو يتثأب.. شاف ساعته 2بعد نص الليل ،اليوم الشغل كان كثير يادوب ذاكر 3ساعات قبل مايجي المطعم ومن وقتها وهو يلف على الطاولات لحد ذحين ..مسك جوالة وأتصل على كذا رقم ومحد رد..أتصل لأخر رقم وبعد كم رنة يأس وكان بيقفل قبل مايجيه صوت كله نوم/السلام عليكم..هلا مازن.
مازن بإحراج/وعليكم السلام والرحمة..معليش جوجو.. أزعجتك.
جوري/لا حبيبي عادي..فيك شيئ،ليه متصل ؟
مازن يتمغط/دوبي مخلص دوام..وخفت أنام وأنا أسوق..قلت أكلمكم ،بس خالد ومؤيد الكلاب محد فيهم عبرني ورد..قلت أجرب وأكلمك..قروشتك؟
ضحكت جوري/وربي إنك طيب تبغى مؤيد وخالد يصحو من رنة جوال..خير إن شاء الله..ولا ماقروشتني خلاص صرنا قرب الفجر..يعني كسبت أجر وصحيتني.. بعدين كيف تكلمني وأنت تسوق،بتأخذ مخالفة.
مازن/حاط إسبيكر،خلاص أتعودت على نظام البلد.
جوري/أحسن علشان تركز عالطريق..أنت كيف صحتك ودراستك..طمني.
مازن/الحمد لله دراستي كويسة وببيض وجهكم إن شاء الله..بس وحشتني كبستك.
ضحكت جوري/الله يفتح عليك ويسهل دربك،ولاحق عالكبسة إن شاء الله يادكتور.
أتنهد مازن/يارب الله يسمع منك..
جوري/الله كريم ياأخي..أنت حافظ عالصلاة ،وأنتبه على نفسك من عيال الحرام ،حلفتك بالله يامازن حاول تلقى شقة بأسرع وقت إن شاء الله خرابه.. المهم أبعد عنهم ذول ماوراهم خير.
مازن/أنا مالي و مالهم،يادوب بجي أنام،بس برضه بحاول أطلع منهم.
جوري بهدوء/أدري إن وقتك يادوب مابين الجامعة وشغلك،بس لاتنسى إنك بتقروشهم عالطالعه والنازله ،يعني ماهيرتاحوا غير لما يسحبوك لدائرتهم وتصير زيهم ومافي أحد أحسن من أحد .
هز رأسة بموافقة/إن شاء الله،خلاص لاتشيلي هم..يلا خسرتيني،بقشيش الليلة هيروح في الفاتورة بسببك.
شهقت بقوة/والله أسفة.. خلاص أستودعتك الله ،السلام عليكم.
قفلت بسرعة وهو يضحك عليها..هز رأسه بهم وهو طالع الشقة اللي متشاركها مع ثلاثة عرب.. أول ماجاء لندن كان ساكن مع عائلة أنجليزية يأجروا غرف في بيتهم للطلاب وكان مرتاح لإن الإيجار كان معقول والبيت قريب من الجامعة،لكن قبل سنتين توفى صاحب البيت وقامت زوجتة ببيع البيت وأضطر إنه يدور سكن ثاني ،وللأسف مالقي غير سكنه الحالي ،ومن أول يوم سكن معاهم وهو يشوف أنواع المسخرة ،شرب وبنات ورقص،في البداية سكت عنهم وحاول ينصحهم وبعدها أتخاصم معاهم وأتفقوا تكون الشقة للسكن وأي تخبيص يخلوه برا وصار يتجنبهم ويادوب يقابلهم في الدخله والخرجه..هانت باقي له سنة وكم شهر ويتخرج ويرجع المملكة الحبيبة..

[لامارا]

(جوري)
خرجت من الحمام (أكرمكم الله)لابسة الروب ولافة شعرها بمنشفة جلست قدام التسريحة تنشف شعرها على خصلة خصلة..دق الباب وراحت تفتح لقت خالد في وجهها،أرتبكت لما إبتسم لها وبعدت عن الباب علشان يدخل وقفل الباب بالمفتاح،جلست بتوتر ورجعت تنشف شعرها،وبهدوء/تبغى شيئ!!
عقد حواجبه وبإستغراب/لازم أبغى شيئ علشان أجيكي الغرفة..
جوري بإبتسامة/بلا إستهبال،قصدي محتاج شيئ ،تبا أسويلك شيئ.
ضحك/أنتي تبي تخربي جسمي الرشيق، مافي غير أكل وحلا طول اليوم..
جوري/عليك بالعافية،بعدين أنت بتتعب دوامين في الشركة غير السوبر ماركت اللي لازم تشيك عليه.
أتنهد وبهدوء/عاد السوبر ماركت من ريحة الغالي لازم أنتبه له،ولاتنسي ذي أمانة ولازم أحافظ عليه..وكويس فكرتيني علشان أحول لمازن نصيبه..
أعطاها جوالها/معاذ أتصل وأنتي تتروشي.
حطته عالتسريحة ورجعت تنشف شعرها بإهتمام.
مسك خصلة في يده،وبإستغراب/أنا مو عارف ليه متعبة نفسك وسايبته يطول كذا..مو مضايقك طوله..ما يتعبك لما تتروشي وتمشطيه..ليه ماترجعي تقصيه زي زمان.
سحبت شعرها من يده بشويش وشافت إنعكاسه في المرايه وبصدق/أنا حابته كذا، كنت قبل الزواج أمشطه أكثر من عشر مرات في اليوم بس كذا حتى لوكان مرتب.. وماكنت متخيلة في يوم أني هقصه،بس قصيته علشانك، بس ذحين عندك ندى شعرها قصير زي ما تحب.. خليني أطول شعري زي ما أنا أحب.
خالد بنظرة/قصدك خلاص.. منتي ملزومة تسوي الشيئ اللي أحبه علشان ندى بتسويه ولا علشان أنا أخترتها فخلاص أنتي برا الحسبة،مو فاهم .
غمضت عيونها للحظه/لا مو قصدي كذا..بس مدام ندى قاصه شعرها،خلاص ليه لازم أقص كمان..كذا يصير فيه تنوع علشان ماتمل.. يصير عندك الطويلة والقصيرة الشقراء والسمراء.. زي كذا.
ما أقتنع وكان بيرد بس قاطعه رنة جوالها اللي مسكته على طول بإمتنان/السلام عليكم..هلا بعزوتي وتاج رأسي..هلا معاذ.
معاذ/وعليكم السلام ورحمة الله وبركاته.. هلا بش يا أميرتنا..كيفش ياقلبي وحشتيني.
ألتفتت للباب لما سمعة صوت ولقت خالد خرج وقفله،راحت قفلت بالمفتاح.
وبضحكة/الحمد لله من الله منيحه وموناقصني غير شوفة الغاليين.. ومالك كافش في الشين..
معاذ/والله كنت مع موكل جاي من القرية وتعرفي كلامهم..كويس جات عالشين بس.
جوري بحماس/وإن شاء الله تقدر تساعده يامتر..
معاذ/الله يقدرني وأساعده..المهم أخبارك والعيال..
جوري/كلنا بخير ياقلبي لاتشيل هم ،أتطمن وطمن أمي معاك..أنتوا سايبين سبع بعون الله.
معاذ بضيق/والله مو كاسرني غير كلامك الفاضي ذا..تحسبي إنك بتضحكي علينا بذي الكلمتين..لكن ما بيدنا شيئ مادام ذا قرارك وأختيارك..وما أقول غير الله يصلح حالك ويعينك..لكن اتأكدي إنك في اللحظة اللي تقرير تنهي كل شيئ هتلقينا كلنا معاكي، يعني لاتخافي أنتي مش لوحدك فاهمة ياشيخة الجابر وأميرتهم .
ضحكت بغصة وهيا تسمع شيخة الجوري زي ماكان أبوها يناديها،أخذت نفس عميق وحبست دموعها،وبصوت هادي/الله يديمكم على رأسي ولا يحرمني منكم..أنتوا بس أرتاحوا وأطمنوا أنا بخير وموناقصني غير وجودكم.
معاذ بتصريف/الله يريح بالك ويطمنا عليكي،عالعموم أنا أرسلت لك نصيبك من إيراد المزرعة..وسامحينا عالتقصير.
جوري بزعل/حبيبي ليه أرسلت،قلت لك مو محتاجة ،كان خليته وأستفدت بيه في تجديد المزرعة،أنا عارفة إن الشغل فيها ماصار زي قبل،وأنت لازلت بترسل نفس المبلغ.. يعني بتزود من حسابك الخاص ،صح.
معاذ بحدة/حسابي الخاص ولا العام ،أعتقد إنك لسا مسؤلة مني، وزيك زي باقي أخواتك ولا عندك كلام ثاني..
إبتسمت وبضحكة/أووووووه..مسرع ماقلبت،دوبك كنت يالزيز يارايق..تخوف والله.
معاذ بتهديد/يصير خير لما نتقابل،ساعتها أطلع اللزازه والروقان من خشمك يامغبره..أنا مستغرب منك كيف متذكرة الحاجات ذي ياجدتي.
جوري بصدق/أي شيئ يتعلق بيكم مستحيل أنساه،وإن شاء الله ما أنساه أبداً..يلا حبيبي طولت عليك..سلم على حبيبتك..وعلى صلوحي قلبي وباقي كتاكيتك.
معاذ/يوصل حبيبتي، أنتبهي لنفسك وبوسي عيالك.والله يجمعنا على خير ،السلام عليكم.
جوري/آمييييين ياقلبي..أستودعتك الله..وعليكم السلام وال----،قفلت الجوال ماقدرت تكمل رمت نفسها عالسرير وسمحت أخيرا لدموعها بالنزول بحرية..بكت بحرقة وهي تلوم نفسها"للدرجة ذي أنا مكشوفة،معقولة محد مصدقني منهم..يعني مهما سويت بيظلوا خايفين وقلقانين عليا،لا أرتاحوا وأنا معاهم ولا أرتاحوا وأنا بعيدة عنهم..ماجاهم مني غير الهم"طلعت ألبوم صور وقلبت فيه وهي تمرر أصابعها بشوق على وجوه اللي فيها كإنها بحركتها ذي بتحس إنهم معاها وبتلمسهم.. طلعت صورة بتجمعها مع أبوها وكانت في الحرم،باست صورته بقوة وبهمس/سامحني يبه،أنا السبب،سامحني.
أتذكرت كيف بعد زواج خالد وندى بسنة مرض أبوها بالسكر.. وكان واضح للكل إنه بسبب خوفه وقلقه الدائم عليها،لإنه ماعاد أستئمن خالد عليها ولا حاب حياتها معاه بعد اللي صار.. كثرت إتصالاته بيهاوكان كل مرة يكلمها يحاول يقنعها بالرجوع بدون فايدة.
وفي يوم من الأيام ناداها خالد وقلها تجي المجلس، دخلت واتفاجأت بأبوها قدامها، رمشت بعدم أستيعاب وهي متخيلته سراب أتشكل لها من كثر شوقها وتفكيرها فيه..ماصدقت وجودة غير لما ضمها لصدرة حست بدفاه..شمت ريحته اللي ماتبدلها بأي ريحة في الكون يومها بكت وبكت اللي في البيت معاها،فقدت القدرة على كبح دموعها اللي أتمردوا عليها وعصوها لأول مرة،يومها نامت في حضن أبوها براحة أنحرمت منها لوقت طويل..وبعدها فاجأها برحلة معاه ومع ياسمين وقصي،ورفض عرض خالد في إنه يوصلهم... هما بس ولأسبوعين جلسوا في مكة خمس أيام ،أعتمروا وصلوا ولفوا الأسواق القريبة من الحرم،وبعدها طلعوا الطايف أتمشوا وإنبسطوا وماتركوا زاوية ماتصوروا فيها..و بعدها راحوا المدينة لفوها شبر شبر.. زاروا الروضة الشريفة.. جبل أحد وجبل الرماة ومسجد قباء ومقبرة البقيع.. عاشت معاه أجمل أسبوعين وحسن إنها رجعت جوري القديمة أم ظفيرة ،رجعت لعادتها الفجرية لشرب القهوة معاه،بس كالمعتاد الأوقات الحلوة تنتهي دائماً بسرعة..خلصت الأسبوعين ورجعوا لجدة وبعدها بيومين ودعها بس ذي المرة كان هو اللي ذرف الدموع وبحرقة،وبدون ماتحس لقيت نفسها بتضمة في صالة المطار غير مبالية بنظرات الناس اللي أستغربوا منظر أبوها الباكي،سحبهم خالد وجلسهم على كراسي الإنتظار، ضمته بقلبها قبل أيديها وبرجاء/ياجعلني فداك ياتاج رأسي ،ليه البكاء بس..يبه والله دموعك تذبحني.
مسح أبو معاذ دموعه/هفقدك يابنتي وهفقد عيالك،الظاهر إني كبرت وخرفت وصرت مثل أمك دموعي جاهزة تصب.
جوري بضيق/أنا فداكم يبه ،خلاص أجلس معايا وبخلي خالد يحجز لي وبسافر معاك..خلاص مالي قعدة هنا وأنت بذي الحالة.
إبتسم لها وباس رأسها/خليكي عند زوجك وعيالك هم أحق بك منا.
باست يده ورأسه وضمته/محد له حق غيرك،خالد معاه زوجتة مو صاير له شيئ، وعيالي بأخذهم معايا مو تاركتهم،مو مهم مدرسة ياسمين توقف ذي السنة.
بعدها من حضنه ومسك أيديها بقوة/خلاص ياشيخة الجوري والجابر كلهم رجعتي للدلع ..شفتك وأطمنت عليكي وعلى عيالك.أيش باقي ..وإن كان لنا نصيب ،الله بيجمعنا على خير..
جوري ببكاء/باقي أطمن عليك،أنتا تعبان أنا حاسه فيك،مارح تضحك عليا.
نادى خالد اللي واقف بعيد عنهم علشان يأخذوا راحتهم،وبحزم/جوري أمانتك وبسألك وأخاصمك فيها يوم القيامة، لاتضيعها يابن محمد.
أتبادل مع خالد كم كلمة ماأستوعبتها وهي مشغولة بإبرة الإنسولين اللي أعطتها ليه، وودعها وضمها للمرة الأخيرة قبل مايسافر ويأخذ قلبها معاه.
بعد شهر اتفاجأت بخالد اللي رجع من دوامة المسائي بدري على غير العادة..ومؤيد ولبنى، حتى أم ندى وأبوها كانوا عندهم،وسارة وفاطمة وحنان..الكل كان موجود بشكل أستغربته وبتريقه/يوم الأحباب العالمي ..خير اللهم أجعله خير.
بس اللي رعبها كان خالد اللي دخلها غرفتها مع أمة اللي تبكي،وبخوف/يمه ليه تبكي،حبيبتي أنتي تعبانه.
صدمتها لما ضمتها بدون كلام،ولما سحبها خالد لحضنه وهو يردد"إنا لله وإنا إليه راجعون" دفته بقوة وطالعت فيه بتردد، أنصدمت من نظرتة اللي أول مرة تشوفها.. نظرة خوفتها لإنها مافهمت معناها..حاول يضمها لصدره مرة تانية بس منعته بأصرار وبرجفة/أهل..أهلي فيهم. شيئ..ليه.. ساكت قول..أمي؟..أبويا؟
إنهارت عالأرض لما شافت وجهه اللي أتغير لما قالت أسم أبوها،حاولت تتماسك وطلع صوتها بارد ومافيه حياة/في المستشفى..
هز خالد رأسه بنفي وقرب منها وجلس جنبها ،حاول يمسك يدها بس هي لما أيديها في حضنها وسندت ظهرها عالدولاب،وببرود/ مين كان معاه.
طالع خالد فيها وفي أمه بإرتباك/أخوانك كانوا معاه..صلوا العشاء في المسجد وبعدها قلهم تعبان بيرتاح..ولما.. دخلوا يصحوه للعشاء.
هزت رأسها بهدوء/الحمد لله صلى العشاء.
وقفت وفتحت دولابها،طلعت جوازها وأعطته لخالد ونزلت شنطة من فوق الدولاب ورمتها عالسرير وصارت تحط فيها ملابسها بدون كلام.
مسكها خالد بقوة/حبيبتي أنتي بخير..تبي المستشفى.
هزت رأسها بنفي وبأمر/أحجز لي ذحين، بشوفه قبل مايروح.
ضمتها أم خالد/عظم الله أجرك يا بنتي، لاحول ولاقوة إلا بالله.
ماردت عليها،حست لسانها أتربط،ظلت تردد داخلها إنا لله وإنا إليه راجعون..
إنا لله وإنا إليه راجعون..
ماحست بالبنات اللي أخذوها في أحضانهم وعزوها بخوف من حالتها..كان وجهها شاحب ونظراتها زايغة وتطالع في الفراغ..وماردت على أحد منهم.. أكتفت بهز رأسها والدعاء لأبوها في داخلها بدون صوت ظلت يومين عالحال ذا،ما ترد على أحد حتى إتصالات أخوانها اللي بيطمنوا عليها ماردت عليها،سمعت صوت عبدالرحمن بعد أصراره على خالد يحط الجوال عالإسبيكر وأول ماسمعت صوته مسكت الجوال ورمته عالجدار بعنف وصار مائة قطعة..كانت تقوم تسوي مهامها اليومية بصمت وترجع تصلي وتقرأ قرأن، الكل كان خايف عليها،والبنات فكروا يعرضوها على دكتور نفسي، بس خالد قال أنها هتتحسن لما تروح لأهلها،وبعد يومين لقي لها خالد حجز وسافروا.. بس للأسف أستمرت على نفس الحال ،ورغم حالة الحزن الجديدة اللي كانت محاصرة بيتهم واللي فيه إلا إنه مانزلت دمعة وحده منها.. جاب معاذ الدكتورة بشرى اللي برضه ما عرفت تطلعها من حالتها،والكل أستنتج إنها في حالة صدمة وخرس زي اللي جاتها قبل..ماكان أحد يدري عن خروجها للحوش وجريها فيه بعد نص الليل لحد ما ينقطع نفسها،ولايدري عن بكاها ولومها لنفسها ،كانت محمله نفسها اللوم على مرض أبوها بالسكر ،كيف لا وهو مرض من كثر ما زعل عليها وشال همها،كان إبليس يوسوس لها إنها السبب في موته وإنها لو رجعت معاه ماكات صار له شيئ..كانت تستعيذ بالله وترجع تستغفر وتصلي وتدعي له،بس لما تشوفهم لسانها ينربط ودموعها تجف ويتهيأ لها إن الكل بيلومها ويتهمها ..خالد أعتذر وأضطر يرجع بعد أسبوع لجدة وهي ظلت لمدة شهر عند أهلها عالحال ذا،رغم محاولات الكل علشان يطلعوها من حالتها بدون فايدة،حتى أحلام وعبدالرحمن فشلوا في ذا الشيئ وماسمعوا صوتها غير قبل سفرها بيوم علشان تطمنهم عليها.

[لامارا]

رجعها من الماضي صوت الباب اللي يندق بهدوء،مسحت دموعها ودخلت غسلت وجهها من أثار البكاء ،عدلت شعرها ورشت عطر علشان تهدأ وغمضت عينها للحظات قبل تضرب وجهها بكفوفها بخفه وتفتح الباب بإبتسامة/الواحد مايقدر يرتاح شوية إلا والكل فوق رأسه.
ندى بملل/طيب أيش أسوي،نونو طفشني ومو راضي يذاكر يقول يبغى ماما جوري.
جوري/ألبس وجاية وراكي.
رجعت أخذت دش ولبست برمودا أبيض لتحت الركبة وتيشيرت أصفر بكم طويل وماسك عالجسم،صلت ركعتين وطلعت للصالة اللي كلها كتب ودفاتر وأقلام.. أم خالد جالسة عالكنب وتقرأ كتاب (لاتحزن)وياسمين وقصي ونادر عالأرض ويذاكروا. طالعت في الأرض وبهدوء/ذي أغراض مين؟
رفعوا عيونهم عن اللي في يدهم والثلاثة رفعوا يدعم بشويش وهم مبتسمين بشقاوة.
طالعت فيهم بنظرة فهموها وقام كل واحد يلم اللي يخصه ويحطه جنبه،.عضت ندى أصابعها بغيض/دحين أنا من أول أقول لكم لموا أغراضكم لاتجي نادين وتقطعها ومحد أهتم..وفي ثانية أختفت كذا..
نقلت جوري نظراتها بينها وبين الأولاد وبزعل/يعني كلمتيهم وطنشوا؟
هزت ندى رأسها بأيوة وهي عاقده أيديها على صدرها، وتطالع في الأولاد بإببتسامة.
جلست جوري عالأرض جنب نادر وأخذت كتاب الرياضيات، وبهدوء/مرة ثانية خذي كتبهم وأرميها برا عند الباب من غير كلام..
صاحت ياسمين وقصي بإعتراض وسكتتهم بنظرة/أنتوا أيش تذاكروا؟
ياسمين بهمس/إنجليزي.
قصي/علوم.
هزت رأسها بتفكير وهي تردد/إنجليزي وعلوم.. ومطلعين اللي في الشنطة كلها ليه.. مو قلنا قبل كذا الكتب تطلع حسب المادة اللي نذاكرها ولما نخلص نرجع الكتاب ونطلع اللي بعده؟ ولا نرمي الكتب في الأرض و نجلس كإنا في زريبة..وبعدها نبكي لما تجي أختكم تشخمطها وتقطعها..
ياسمين بتبرير/نادر هوا اللي بدأ،أنا جيت وكتبه ف-------
سكتتها جوري بأشارة من يدها،وبحده/لا ياشيخة،ذحين صرتي تتعلمي من أخوكي الصغير بدل ما يصير العكس..ليه ما خليتيه يلم كتبه بدل ماترمي كتبك زيه..ولما كلمتكم ماما ندى ليه طنشتوها..هاا؟
سكتوا وعيونهم عالأرض،تابعت بهدوء/طيب خلصوا مذاكرتكم وبعدها يصير خير.
التفتت لنادر بإبتسامة/هاا حبيبي،أيش اللي مو فاهمه.
أشر لها على مسألة/ذي مرة صعبة.
ضحكت وطلعت ريالات من جيبها وصارت تشرح له/ذحين معاك عشرين ريال ورحت البقالة،أشتريت ليك ولكل واحد من أخوانك بريالين، بكم أشتريت،وكم يبقى معك؟
أخذ العشرين وصار يحسب بسرعة/6 لاا 7..
مسكت يده تهديه/لحظه لحظه..أحسب بشويش ليه مستعجل.
نادر بعصبية/هوا يحاسب بسرعة كذا.
طالعت فيه بإستغراب/مين هوا!
نادر بضيق/موني صاحب البقالة.
فلتت منها ضحكه/ههههههههههه،طيب أنت ذحين في البيت خلي موني في حاله ، أحسب بشويش، والريال اللي تعده تحطه على جنب يعني قول 1وحط الريال من يدك،2وحط الثاني وكذا..فهمت..على مهلك.
هز رأسه وعمل زي ما قاله له،وبإبتسامة/10
طالعت فيه /كيف 10.
عد لها الفلوس/ريالين ،وريالين، وريالين، وريالين ،وريالين.
فلتت من ياسمين ضحكة وعصب منها نادر/ياسين أسكتي.
ياسمين بحدة/ياسين في عينك..
طالعت فيها جوري/وبعدين معاكي ،مو وقتك.
رجعت لنادر بهدوء/كيف طلعت 10..مو قلت أشتري لك أنت وأخوانك.
نادر /أيووه ،أشتريت .
جوري بإبتسامة/شاطر حبيبي..طيب كم أشتريت وكم بقي من العشرين.
نادر/ أشتريت بعشرة وباقي عشرة.
جوري/ليه عشرة ،عد الباقي مزبوط وبشويش.
نادر بتأكيد/عشرة.
مسكت ندى الفلوس اللي موزعها وبعصبية/ نادر ،قصي، ياسمين،نادين..8ريال مو 10،ذي الريالين ليه ماعديتها.
أخذها منها وحطها في جيبه وبملل/ذي حق عمو مؤيد..يعني باقي عشرة.. التفت لجوري /صح ماما.
طالعت فيه وضغطت جبينها وهي ماسكة ضحكتها/ذحين أيش دخل مؤيد ،أنا قلت أنت وأخوانك ؟
نادر ببرائة/هوا لما يشوفني في البقالة يقول أشتري لي معاك أنا أخوك.
ضربت كف بكف وهي تضحك/حسبي الله على إبليسك يامؤيد.. يمه ولدك قاعد ينصب عالولد بأسم الأخوة، ولخبط شجرة العيلة ودماغ الولد.
ضحكوا على نادر اللي زعل وبالعافية رجع يذاكر..
رن جوالها وطالعت في ندى الواقفة/ ندو بالله جيبي الجوال من الشاحن..رح أبوس المتصل اللي أنقذني من الصداع ذي.
ضحكت ورمت لها الجوال وبتريقة/واوووووو،هتبوسي عمو مساعد..العجوز راح فيها..
مسكت الجوال وبحلقت فيها بخجل/قليلة أدب.





أنتهى البارت

في إنتظاركم، ودمتم بخير



(لا إله إلا الله وحده لا شريك له..له الملك وله الحمد يحيي ويميت وهو حيً لا يموت..بيده الخير كله،وهو على كل شيئً قدير)

[لامارا]

السلام عليكم ورحمة الله وبركاته كيف حالك إن شاء الله دائما بخير ؟


هلا وغلا خيالة

تدرين اليوم من حوار خالد مع نفسة ومع جوري بعدين حوار جوري وذكرياتها مع نفسها ما عرفت لا حق ولا باطل هل علاقتهم طبيعية ؟؟

محد يقول عن زوجته مثل اختي إلا اذا ما كان بينهم علاقة

و جوري تقفل الباب على روحها في أكثر من موقف غير انها تحمله سبب موت ابوها

تدري كلام خالد قمة الانانية ومو بس خالد كل الرجال كتلة أنانية صافية اهم شيء راحتهم وطز بخلق الله


تدرين خيالة

وش إللي مخلي خالد سعيد ومو نادم على زواجه

عن جوري وفرته سبل الراحة التامة بدون وجع راس

لو تاركته فقط لندى

وندى من نوع الاتكالية حتى في تدريس عيالها فاشلة

جوري عطت وما خذت على حساب نفسها مثل الشمعة إللي تحترق عشان تنير الظلام للآخرين

وهذي الاشخاص للأسف نهايتها بمرض ينتج من أثر الكبت والقهر الداخلي

بالنسبة لياسمين

أعتقد غنها شافت مع بير عبود بنت من قرايبها

يمكن من بنات لطيفة او ليلى

سارة و زوجها

هل هي خيانة ولا بالفعل مجرد أداء واجب ؟؟

ننتظر ونشوف



المهم ننتظر القادم بكل حب وشوق

بالتوفيق لك

دمت بود

ممكن سؤال إذا ما في احراج

هو انت من اليمن الشقيق ولا سعودية ؟؟

[nz111]

شكرااا على الفصل الرائع والجميل وانتظار الفصل القادم

[شموخي ثمن صمتي]

شـكــ وبارك الله فيك ـــرا لك ... لك مني أجمل تحية .

[لامارا]

ياحي ياقيوم،ياذا الجلال والإكرام.. برحمتك أستغيث..أصلح لي شأني كله،ولاتكلني إلا نفسي أو غيري طرفة عين ياأرحم الراحمين.
----------------
الورقة الحادية والعشرين

الحياة لوحة فنية،ألوانها أقوالك،أشكالها أعمالك،والرسام هو أنت..فأبدع في رسم لوحتك،فما زالت الفرشاة في يدك...

(جوري)
نشفت أيديها بمنشفة صغيرة وطلعت من المطبخ وهي شايله صينية القهوة ،شافت ساعتها الجلدية من سواتش تشير للعاشرة صباحاً،صار لازم تصحي خالد والأولاد. اليوم جمعة ومتعودين يرجعوا يناموا بعد صلاة الفجر لذا الوقت وبعدها يصحوا يفطروا وخالد والأولاد يتجهزوا لصلاة الجمعة،راحت لأمها ولقتها تسبح وتستغفر فوق سجادتها بعد ماصلت الضحى،باست رأسها وبإبتسامة/صباح الخير يمه..تقبل الله.
أم خالد/صباح الورد والجوري..منا ومنك حبيبتي..صحيواا الناس.
ساعدتها توقف وطلعوا عالصالة وبتريقة/لسا ماتشوفي الهدوء،دقايق والحراج يشتغل..
أم خالد/ليه ماصحيتي ندى تساعدك،الكل بيتغدوا هنا اليوم والشغل كثير عليكي.
صبت لها القهوة وقربت لكيكة الدخن وبضحكة/خالد عندها وماحبيت أزعجهم..ولا كان سمعتي صوتها لباب الشارع..بعدين مؤيد موصيني من أمس عالأكل ،تعرفي مايحب طبخ ندى.
طالعت فيها أم خالد بحب وفي نفسها"إن شاء الله ماكون ظلمتك،والله يعوض صبرك خير".
شربت جوري قهوتها وهي تتصل بجوالها وبعد رنتين جاها صوت أمها الحنون/يا صباح الورد والجوري..اتأخرتي.
بحلقت عيونها بشوق في شاشة الجوال وهي تشوف وجه أمها الحنون اللي بدأت التجاعيد تظهر عليه بشكل واضح وحست بدفئ يسري بعروقها لما سمعت صوتها، وبفرح/ يا صباح النور والسرور ياجنتي أنتي،سامحيني يمه أستنيتي كثير..
أم معاذ تتأملها بحب ولهفة/لا ياأمي وقلبي أنتي،بس أنا قمت من النوم و ما عرفت أتصل لك بالجني هذا.
ضحكت جوري/تانقو يمه تانقو مو جني، بعدين كثر الله خير اللي أخترعه رحمنا من البعد وأختصر المسافة.
أم معاذ/أي والله،المهم أنتي كيفك وكيف العيال..وحشتيني.
عدلت شعرها وإبتسمت إبتسامة من قلب وهي تقرب الجوال من وجهها/وأنتي وحشتيني قد البحر والسماء والدنيا كلها.. شوفيني هااا طالعي.. أنا بخير وعافية ياقلبي لاتقلقي عليا، يمه ليه تبكي وتقهريني بدموعك ..
مسحت دموعها،وإبتسمت/خلاص مافي دموع،ذي علشان فقدتك بس واليوم جمعة أخواتك وأخوانك كلهم هنا وأنتي اللي ناقصة،شوفيهم..
دارت بالجوال في الغرفة وشافت أخواتها وأخوانها وحريمهم وعيالهم ،أصواتهم طلعت وصجتهم زادت وكل واحد يسلم ويسأل، ضحكت بمرح وسعادة لشوفتهم وشوق لجمعتهم وأبتدأ مسلسل السلامات والحش معاهم.
----------------
(لبنى)
عائلة لبنى:رائد 37سنة،لوجين6سنوات،رافي3سنوا ت

رن جوالهابأسم (حلم عمري)فكت الخط وبشوق/أهلين حبيبي.
رائد/هلا حبي..أنا برا..لاتتأخري.
لبنى/ثواني حبيبي.
حطت جوالها في شنطتها وعدلت عبايتها على رأسهاوبإبتسامة/سعاد أنا ماشية..قفلي الحساب ولاأوصيكي شيكي على كل شيئ قبل ماتروحي..تصبحي على خير.
سعاد/من عيوني لاتشغلي بالك..وأنتي بخير.
خرجت من المشغل وشافت سيارة رائد قدام الباب،ركبت بهدوء/السلام عليكم.
مسك يدها وباسها/وعليكم السلام والرحمة.. يعطيكي العافية حبيبتي.
لبنى بدلع/ الله يعافيك حبيبي..وحشتني مووووت.
رائد/وأنتي أكثر ياقلبي،أنتي اللي متأخرة اليوم.
لبنى بطفش/وووي ياقلبي،حريم جدة كلهم في المشغل اليوم.. ماشاء الله ماأرتحت دقيقة..
رائد/لولو حبيبتي أنتي اللي مقروشه نفسك..يعني الثلاثة الآف اللي بتاخذيها بتسوي لك شيئ..مو بحق الصداع والدوام .
لبنى بهدوء/رورو حبيبي قلت لك أنا في البداية أشتغلت خدمة لأم أحمد،طلبتني أدير المشغل وقت ماسافرت تعالج ولدها وكان لازم أساعدها..بس بعد فترة أتعودت عالشغل وحبيته..وأنت وافقت فلا تجي دحين وتقلي لا ،الله يخليك حبيبي.
رائد/يا عمري أنا ماقلت شيئ،أنا قلبي عليكي من التعب بس،بعدين بتوحشيني وبتوحشي الأولاد.
رفعت غطاها عن وجهها وقربت منه بسرعة وباست خده/وربي أنت كمان بتوحشني، بس كدا أحسن علشان تشتاق لي وماتمل مني..والأولاد بكون معاهم للعصر ،غير يوم الجمعة.
رائد بضحكة/كلي بعقلي حلاوة يابت ببوستك ذي.. تراها ماتمشي،بس نوصل البيت ويصير خير.
تأملته بحب وهي تدعي الله يحفظه لها.

[لامارا]

(خوله)
(أم رشيد 45،خوله18،رشيد ورحمه تؤام 14سنة،رواد10سنين)
دخلت وقت أذان الظهر وفسخت عبايتها بتعب/السلام عليكم.
أم رشيد/وعليكم السلام ورحمة الله وبركاته، إن شاء الله أتوفقتي..
خوله بغصة/حسبي الله ونعم الوكيل..والله اللي ماعنده واسطة الأيام دي يروح في الرجلين..مرمطوني من مكتب لمكتب وكل واحد يرميني على التاني كإنهم بيدفعوا شيئ من جيوبهم.
أم رشيد/الله لنا يا بنتي..خلاص أنا سلمت أمري لله وأنتي كمان أرضي بنصيبك يا بنتي.
طالعت فيها بقهرومن بين دموعها/الله مايرضى بالظلم يا أمي..وأحنا مظلومين ،من متى وأنا أراجع وزارة الصحة والمستشفى علشان تتعالجي على نفقة الدولة ومحد فيهم معبرني..صار لي من الساعة 6 وأنا ملطوعة برا مكتب المدير،وهوا من إجتماع للثاني وفي الاخير يقولوا مشي..الله لايوفقهم.
ضمتها أمهاوهي تحاول تخفف عنها وتقويها خوله أكبر أولادها وأول فرحتها،الدنيا كبرتها وعجنتها عالهم والديون من بدري ،سعود زوجها كان في ديرته مرتاح ومن أصحاب الأملاك أتقدم لها ووافقوا أهلها عليه بفرح بسبب سمعته الطيبة وأخلاقة وبسبب أصله وعيلته الي كانت من أكبر العائلات في تبوك، عاشت معاه أربع سنوات كلها سعادة وحب وربي رزقهم بخوله اللي كملت فرحتهم،لكن بعد فترة تعب أبو سعود وأتوفى وأستلم ولده سطام الحلال والأملاك ووقع أخوه سعود على بيع كل ورثه بدون مايدري لإن سعود كان يثق في أخوه سطام ثقة عمياء
وماتوقع إنه بينصب عليه..وبعد ست شهور لقي سعود نفسه في الشارع مع زوجة وبنت ماتعدت السنتين من عمرها..حاول في أخوه سطام يرجع لو جزء من حقوقه،لكن سطام كان شيطانه أقوى منه لدرجة إنه هدد سعود بالقتل وطرده برا ديرتهم..راح سعود وأهله للطايف لفترة وبعدها قابل شخص كان له دين عنده وأقترح عليه يستقر في جدة، وقف معاه وساعده في وظيفة وأجر له بيت لحد ما وقف على رجله وفتح له محل بسيط يترزق منه وبعد فترة أتحسنت أحوالهم وأشترى لهم بيت بسيط وعاشوا مرتاحين ومرت بهم السنين وصار معاهم رشيد ورحمه ورواد،ونسي سعود سطام ونسي فلوسه..وقبل خمس سنين بدأ شغله يتدهور بسبب أوضاع اقتصادية مرت فيها البلد وزاد تعبه وبعدها أتوفى بجلطة..ومن يومها وأم رشيد صارت لهم الأب وحاولت توقف محل زوجها وتباشر شغله بس للأسف كانت الديون محاصرتهم وخسروا محلهم،أشتغلت خياطة وصارت تتطبخ للناس علشان توفر لقمة عيش لها ولعيالها،تعبت وأتبهذلت خاصةً إنها مالها أهل وسند وعلاقتها بأهلها أنقطعت من وقت تركوا ديرتهم..بعدها مرضت بالكلى وأضطرت خوله تترك مدرستها وهي في صف ثاني ثانوي وصارت تخيط مع أمها وتحاول تدبر مصاريف حياتهم بدون مايلجؤا لأحد.