العسل المسموم / للكاتب طارق اللبيب ، سودانية مكتملة

لامارا · 16-12-16, 12:42 PM


	بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته نقدم لكم رواية العسل المسموم للكاتب طارق اللبيب قراءة ممتعة للجميع.....

لامارا · 31-07-17, 10:33 PM

بسم الله الرحمن الرحيم

السلام عليكم ورحمة الله وبركاته

رابط لتحميل الرواية

https://www.rewity.com/forum/t386724.html

لامارا · 31-07-17, 10:34 PM

الحلقة 1

الكلام ده كان .. اغسطس 2001
كنت في البيت في الدروشاب جنوب .. الواطة كانت صباح .. بعد شربت الشاي ..الوقت داك كنت شغال في الدروشاب قبل ان انتقل الى بحري .
اها في زول دق الباب .. قلت للولد افتح الباب .. دخل شاب في ال32 تقريبا .. سلم على .. وفي وشو هم وغم.. مايعلم به الا الله ..
اسمر شعره سبيبي .. ملامحو نوبية اصلية .. شكله من اقصى شمال السودان .. كانما كتب على وجهه حضارة (كوش) .. قلت ليهو اتفضل اشرب الشاي .. قال لي جدا .. حاضر بس ان شاء الله تكون فاضي .. لاني انا عايز احكي ليك قبل ما تزدحم بالناس .. قلت ليهو اتفضل .. قال لي اختصر ليك الموضوع.. ولا احكي ليك بالتفاصيل ؟؟
قلت ليهو انت رايك شنو؟ .. قال لي والله انا نفسي احكي ليك بالتفاصيل .. وما اخلي كبيرة وصغيرة .. احتمال تقدر تساعدني .. لمن تعرف الحاصل .. واحتمال قصتي ماتنهي الليلة .. لكن ما ح ابدا معاك علاج قبل ما اخلص منها .. لو الليلة ما خلصنا بتم ليك بكرة ..
قلت ليهو جدا هسي ابدا ..انا ماوراي حاجة .. احكي بي راحتك .. انا اساسا مواعيدي مع الناس الساعة عشرة .. عندك شنو؟..
قال لي انا اسمي عارف . انا اهلي ساكنين الديوم الشرقية .. واتولدنا هناك انا وابوي وجدي .. امي من منطقة جنوب النيل الازرق .. وعندي تلات اخوات بنات .. اصغر مني .. وماعندي اخو .. وابوي شغال في المنطقة الصناعية .. وحالتنا مستورة .. بس انا اتقطعت بي السبل .. واتخرجت ومالقيت اي شغل ..
وكنت زهجان وقافلة معاي .. ونفسي اشتغل شغل كويس اجيب قروش زي الناس.. واريح ابوي واعيش اهلي في حالة احسن من الحالة دي .. نحن صاح بيتنا ملك وارثو ابوي من جدي .. وبيت كبير لكن معيشتنا كفاف .. يعني قدرو قدرو .. مافي زيادة ولانقصان .. عندي اصحابي في الحلة عواطلية زي حالتي واحد .. بس بداقشو جاي جاي .. وبشتغلو الاشغال الوضيعة المابتعمل ليك حاجة .. وقريشاتها اخير منهن الفلس .. انا ما مواظب على الصلاة .. بقطعها مرات اصلي ومرات اخلي .. وحتى لو صليت .. بأخر وقت وادخل وقت في وقت .. وقصتي بايظة كلو كلو .. والجامع ده بشوفو من الجمعة لا الجمعة.. ومرات الجمعة ذاتو بكون طافش ..يا في البحر يا لافي الحدايق .. وفلسان قرش احمر في جيبي مافي ..
يوم مشيت لاصحابي في امدرمان .. وكنا بنتكلم بالفلس .. قلت ليهم والله انا نفسي اكون رجل اعمال.. وعندي قروش .. وابني العمارت واركب الموديلات .. واحد من الجماعة اسمو شدو .. قال لي دي اسمها امنيات .. والاماني عمرها مابتقدم ليها زول لي قدام ..
قلت ليهو ياخي في ناس بين يومو وليلة بجيبو قروش .. وفجأة كدا تلقى الواحد بقى قدر الليلة وباكر.. وقروشو النار ماتاكلا ..قال لي ديل حرامية .. وبتاعين غسيل اموال وبتاعين سلفقة وو ..
واحد تاني من اصحابي ديل .. قال لينا والله في زول انا بعرفو.. الزول ده كان عاطل بشحت حق الصعوط .. هسي والله بقى البلزو مابرميهو .. اشترى ليهو قطعة في شارع عبيد ختم.. وهسي شغال ببنى فيها مسلح .. مؤسسة على ستة طوابق .. انا طبعا" اتخلعت من القصة .. قلت ليهو انت كضاب .. والله ده الا يبقى حرامي .. قال لي حرامي ولا غيرو ..نحن لاقين بالحلال ولا بالحرام؟؟ .. انت هسي خلاص لقيت الحرام وابيتو؟ ..
المهم الونسة جرت والمواضيع اتغيرت .. لكن انا طبعا بس بقى فكري كلو ..في الزول الكان مفلس.. وبين يوم وليلة بقى من الاغنياء ده.. لازم امشي اشوفو عمل شنو ؟ يعني هو احسن مني في شنو؟ نحن لامتين نبقى عواطلية ومفلسين كدا .؟
اها صاحبي البحكي لي ده اسمو امجد .. انتظرت لامن اصحابي كلهم مشو .. وكل واحد من صحباني قال ماشي بيتو ..وبقينا انا وامجد برانا .. قلت ليهو يا امجد انا عايز اسألك سؤال .. انت الزول القلت بتعرفو.. وكان مفلس وبقى رجل اعمال ده.. بتعرفو معرفة حقيقية ؟
قال لي اي والله بعرفو .. قلت ليهو اها ماعرفتو شغال شنو؟ قال لي والله ماعرفتو .. لكن الزول ده بسافر وين ماعارف.. بس بقول انا مسافر.. بعدي ليهو شهر شهر ونص ويجي.. راجع وضعو مختلف ..وشوية شوية امورو ماشة واضحة.. وقروشو ماشة كتيرة ..
قلت ليهو طيب يا امجد .. بتعرف بيتو؟ قال لي ايوة بعرف بيتو .. هو ساكن في القوز .. في الحتة الفلانية كيت كيت.. المهم وصف لي .. وعرفت البيت كويس .. انا الحتات ديك بعرفها معرفة شديدة.. ولافيها بي كراع كلب .. واخدت من امجد كل المعلومات اللازمة في موضوع الراجل.. اسمو وعمرو وشكلو وسكنو وكل حاجة ..
يعني امجد قال لي الزول ده اسمو عصمت .. وزول قمحي طويل وبتلقاهو دايما لابس جلابية نضيفة ومكوية ولابس طاقية وجادع ليهو شال فوق كتفو .. زول لبيس كدا ووجيه ..
قلت ليهو لازم يكون كدا ..
المهم يازول رجعت البيت وانا فكري كلو في عصمت وفي نجاحاتو في الحياة .. وخلاص بنيت امال كبيرة في الموضوع .. لازم اعرف الزول ده شغال شنو واشتغل زيو ..
بالليل كدا في بيتنا غالبني النوم وانا بفكر في مستقبلي وفي حياتي وجواي امل كبير انو بكرة امشي لي عصمت.. وافكر في طريقة ادخل عليهو بيها .. واصاحبو واشوفو بعمل في شنو .. وكدا يعني .. دي كلها التفاكير الجواي ..
بفكر لامن عطشت .. دخلت جوة عشان اجيب لي موية من التلاجة..
لاني حاسي بي سخانة في جوفي .. بيتنا فاتح في شارع فرعي .. وفيهو تلات غرف وهول ومطبخ وحمامين ..
والغرفة الخارجية البنوم فيها انا دي .. كبيرة ومعمولة اصلا في شكل مضيفة .. وقدامها في زي برندة بي اعمدة ..
البنيان قديم زي بنيان الانجليز .. لكن قوي جدا".. وابوي مهتمي بيهو .. كل مرة بعمل صيانة للبيت.. وبوماستك وبوهية للابواب والشبابيك .. يعني تشوف البيت تقول مبني السنة الفاتت ..
اها الغرفة الكبيرة دي فاتحة شرق وفي زقاق منها بودي للبيت جوة كويس .. وانا راقد وبعاين للمروحة دي فوق شغالة كحك كحك كحك .. النوع القديم العبيط داك .. قلبها عامل زي طاسة العمود البشيلو فيهو الاكل للمستشفى ..
اها زي ماقلت ليك.. قمت من الحتة دي .. ودخلت جوة عشان اشرب ..لقيت امي قاعدة على حيلها في كرسي في الهول الجوة .. ومانايمة .. ابوي نايم .. في غرفتو .. واخواتي التلاتة نايمات في غرفتهن ..
سألت امي .. قلت ليها مالك يا امي مساهرة .. وقاعدة سارحة كدا؟ .. قالت لي والله ياعارف .. ماجايني نوم .. ومقلقة قلق غريب .. وانت عارف ياعارف .. انا كل ماتجيني الحالة دي .. بعدها بتحصل مصيبة .. ودي الشي المخوفني ومقلقني ..
قلت ليها يا امي عليك سيبي الوهمات بتاعتك دي.. وقومي نومي .. انتي زولة قارية وتعلمة ..شنو حكاية التشاوم والسبر دي؟؟ انتي مع الحكايات دي من زمان شايف الاوهام دي عندك .. قالت لي طيب شوف انت في وانافي .. لو ما حصلت حاجة تاني ما تصدقني .. قلت ليها طيب الحاجة الحاسة انها ح تحصل دي.. بتحصل في غضون كم يوم؟ عشان احسب ليك .. قالت لي تلاتة او اربعة يوم بالكتير ..
قلت ليها طيب .. نشوف ..
قالت لي انا بي سببي .. انت المسهرك شنو؟ . قلت ليها والله في موضوع كدا.. بفكر فيهو.. لو ظبط انا تاني ناس الشارع ده كلهم يقيفو لي لمن اجي ماشي .. وح اكون من الناس الهاي هاي .. قالت لي اها .....
وريني ..ح تعمل شنو يعني .. جاياك ليلة القدر ؟؟ قلت ليها لالا ياحجة مابقول ليك .. قالو اقضو حوائجكم بالكتمان ..
قالت لي كتمان علي انا يا عارف؟؟ انا امك يا شاطر .. اقضو حوائجكم بالكتمان دي .. قالوها عشان مايصيبك الحسد فاهم؟ لكن امك بتحسدك؟
قلت ليها شنو ياحجة.. انتي مقرطاها كدا ؟ ماتعصري علي شديد كدا يا امي .. قالت لي لازم تحكي لي .. قمت حكيت ليها الكلام القالو لي امجد .. عن عصمت ..
قالت لي اسمع يا عارف.. الناس الزي ديل بكونو شغالين في حاجات ماكويسة .. اما عملة او مخدرات او بتاجرو في الاسلحة والتهريب والحاجات دي .. ودي كلها حاجات خطرة على حياتك ياولدي ..
وقالو العجلة على الغنى فقر ..
دحين ياولدي انا بنصحك.. ابعد من الدرب الماشي فيهو ده .. قلت ليها ليه انتي يا امي دايما بتتشاءمي بالامور ... ؟؟ يمكن الزول ده ماشي عدل .. وربنا فاتح عليهو بالحلال .. ليه نحن بس تفكيرنا طوالي بقول الزول البغنى سريع ده معناها ماشي غلط؟؟ .. موش ربنا كريم؟
قالت لي استغفر الله العظيم من حقو.. لكن ده الحاصل ياعارف .. المهم ياعارف انا امك وعايزة اوصيك .لو الزول ده شكيت في اي حاجة من نشاطاته .. ابعد نفسك .. لانو الدخول في الوحل صعب المروق منو..
قلت ليها اطمئني يا حجة.. ولدك تفتيحة وشايل مفاتيحا .. وانا اصلا مابدقس .. قالت لي انت عارف انا هسي حسيت بشنو؟
قلت ليها اها احكي..
قالت لي انا حسيت انو سبب قلقي.. الطريق الانت ماشي فيهو ده .. وح تحصل ليك مصيبة .. قلت ليها يا امي عليك الله اتفاءلي بالخير .. ياخي عليك الله مالك انتي كدا .. والله ندمتيني اني حكيت ليك ..
لكن طبعا" زي مامعروف ..
قلب الام بحس .. بي كل سمحة وشينه ..
بسهر .لو تكون روحك دقيقة حزينه ..
قلب الام مجس .. احساسو دايما" بينا ..
يتلافى الخطر .. ينشر جنود حولينا ..
.المهم اتضايقت من كلامها .. وقمت من جمبها متضايق .. ورجعت تاني بقكر في الخطة البدخل بيها على عصمت.. لغاية مانمت وانا باكر ماشي القوز
عشان ابدا حياة النجاج ..
وماكنت عارف انو راجيني القدر الاسود .. والشر الكامن ..

الى اللقاء .

لامارا · 31-07-17, 10:43 PM

الحلقة 2

المهم يازول صبحت الواطة وانا حاسي بي احساس جميل .. وامي الصباح قامت مدبرسة .. وصارة وشها وماكويسة .. قلت ليها انتي شكلك مانمتي .. قالت لي انا عايزة ارسلك جبل اوليا .. لي خالتك .. قلت ليها لالالا .. الليلة مافي اي مرسال الا بكرة .. اجلي اي حاجة لي بكرة .. لاني الليلة عندي مشوار مصيري .. عاينت لي عين غريبة كدا..
فهمت منها انها اصلا ماعندها مرسال .. لكن دايرة تمنعني من المشوار .. بس ماعندها حجة تناقشني بيها ..
المهم استحميت ولبست وركبت مشيت القوز .. وعلى حسب الوصف.. وصلت شارع البيت بتاع عصمت .. في بقالة في ناصية الشارع سألت سيد البقالة .. سلامات .. ياخي بسأل من بيت ناس عصمت ..
قال لي شايف البيت السطوح الفاتح جنوب ده ؟ هناك.. القدامو الشجرة ده .. بس ده ياهو البيت ..
قلت ليهو تسلم ياخي .. ومشيت على البيت .. كنت لابس بنطلون وقميص وشبشب .. قرب ينسهك من كترة المشي والورنيش .. وخجلان منو .. لكن طبعا الواحد يستحي.. انا في الحالة دي اطلب من ابوي يشتري لي شبشب؟؟ ..
مشيت دقيت الباب .. طلعت لي بت صغيرة كدا في عمر 11 سنة .. قلت ليها السلام عليكم .. قالت لي اهلا .. قلت ليها عصمت موجود؟ قالت لي ايوة موجود بس هسي مافي .. طلع .. دقيقة اسأل بابا طلع وين ؟
طيب معناها عصمت ما ابوها .. كدي النشوف..
بعد البت دخلت.. وانا واقف برة شوية كدا جاني راجل كبير.. صاري وشو .. ومتضايق مني .. وسلم علي سلام قبيح خلاص .. قال لي اها في شنو؟ انت منو كمان ؟
قلت ليهو .. شنو ياعمي؟ مالك الحاصل شنو؟ انا جيت داير عصمت ..وجاي اسلم عليهو ..وجايهو في خير والله ..
قال لي طيب اتفضل.. عصمت طلع وبجي ..
المهم دخلت يازول .. وقلبي اكلني شديد .. ياربي في شنو بالضبط كدا؟ .. الراجل ده االظاهر ابوهو لانو .. راجل شايب ما اقل من سبعين سنة .. وشكيت في حاجات كتيرة لكن اصراري على المواصلة كان اقوى.. وكنت بقنع في نفسي انو مافي شي ..
المهم قعدت جابو لي موية عادية .. جابتها البت .. وشوية كدا والزول جاء .. عصمت بتاعنا بي نفس الوصف الوصفو لي امجد ..
وشكلو مازول كبير يعني بكون اكبر مني بي سنتين تلاتة .. لكن شكله زول ذكي ونظراتو حادة .. سلم علي .. وعاين للراجل الكبير وقال ليهو .. كيف يابوي .. ايواااا معناها ده ابوهو ..
الراجل قال ليهو كويس .. انت طلعت الساعة كم ؟ قال ليهو بعد الصبح طوالي .. قال ليهو الزول ده راجيك شوف خبرو شنو؟
قال ليهو راجيني انا؟ انا هنا قلت ليهو نعم ..
قال لي احكي ان شاء الله خير .. انا والله ماعارف ذاتو اتصرف اقول شنو.. المهم جيت زي الاهبل .. وراسي فاضي من اي افكار ادخل بيها على الزول ده.. وحاسي بالجو متوتر في بيت الناس ديل ..
.. وسكتا مسافة ماعرفت اتكلم اقول شنو؟ الراجل الكبير قام دخل شكلو عايزني اخد راحتي في الكلام ..
عصمت قعد وكان فوق وشو في ملامح غريبة .. خايف ياربي.. ولا متوتر او شي كدا .. المهم مامرتاح لي .. لانو ماعارفني انا جاي لشنو؟
جاء قعد في الكنية المقابلاني . وقال لي مرحب حبابك .. نجيب ليك شنو؟ قلت ليهو جابو لي جزاك الله خير ..
قال لي احكي حبابك ..
قلت ليهو والله مافي اي حاجة .. كنت بتكلم البارح مع (امجد طلقة) .. وحكينا عنك وقال لي عنك كل خير .. وقال لي الزول ده امشي ليهو بقدر يساعدك ..
عصمت قال لي اساعدك في شنو يعني؟ .. قلت ليهو والله انا بفتش لي لي شغل .. لي سنين مالاقي شغل يرضي طموحي .. وامجد حكى لي عن نجاحاتك .. وانا صراحة اعجبت بي شخصيتك .. قبل ما اشوفك وجيتك وانت تاني مابتقصر .. وهسي لمن شفتك واتعرفت على الوالد .. حسيت بانك انت الممكن تاخد بي يدي لي بر الامان ..
المهم يازول قريت ليهو قراية بي فهم ..
وبعد سمع كلامي شكلو ارتاح شديد وقعد يتبسم .. واعجب بي نفسو شديد.. لامن صلح قعدتو وقرررب يقول .. احم احم ..
قال لي يازول ما في عوجة.. والله مادام انت ظنيت فيني الظن الحسن.. ان شاء الله توصل لي هدفك في اقرب وقت .. قلت لي اسمك منو؟؟ قلت ليهو اسمي عارف ..
قال لي تعرف ياعارف .. البلد دي بلد فاتحة .. والشغل فيها والله على قفا من يشيل .. بس عايزة زول ذكي وشاطر ومفتح .. اصلا ما بنفع زول مسكين وطيرة ونوع الغنماية تاكل عشاهو .. وانت يازول لو وثقت فيني انا عندي معاك شروط تلزم بيها التزام .. وتاني اٍسألني من النتيجة ..
قلت ليهو انت شغلك شنو ياعصمت ؟ قال لي انت من هسي عايز تسأل؟ .. دي بجاوبك عليها .. لكن تاني ماعايزين اسئلة واذا الكلام ماعجبك .. نحن لسع في البر .. زيارتك مقبولة وتمشي مشكور ..
قلت ليهو جدا ما بٍسألك .. بس كنت عايز اعرف طبيعة الشغل ..
قال لي انا ياسيدي شغال تجارة . وعشان ماتسألني تجارة شنو تجارة عامة .. بشتري وببيع اي حاجة .. لو لقيت لي زول ببيعوا فيهو ..وحسيت اني بربح فيهو ..بشتريهو وببيعو .. فهمت يا غالي؟ قلت ليهو ايوا فهمت ..
وبدأ يسأل فيني من اهلي وسكني واتونسنا كتير .. وهو بستدرج فيني بالكلام .. عشان يعرف مدى صدقي معاهو .. اها وكت اطمأن شديد ..
قال لي اها انت دايرني انورك واوريك الطريق .. ولا عايز تكون معاي .. ونكون شركاء في الربح والخسارة ..
قلت ليهو انا والله لو بتقبل اشتغل معاك ماعندي مانع .. يازول في اللحظة انا حسيت الزول ده ارتاح شديد .. كانه كان بتمنى اني اشتغل معاهو .. وبدا يتكلم ..
قال لي والله سبحان الله ياعارف .. انا من شفتك حسيت كاني بعرفك من زمن .. انت زول شكلك مريح وعيونك صادقة .. وهسي من خلال كلامك.. عرفتك اكتر انت زول مكسب .. وبتستحق انك تكسب وتربح .. ياعارف البلد دي فيها قروش بالهبل .. بس الناس لابتحمد الله ولابتشكر .. امشي على الشركات والمؤسسات شوف العقود والبيوع بتم بي كم .. اقل بيعة تلقاها بي مليارات .. والتجار ديل دنيا قايمة بي ذاتها .. ياخي السوق ده دنيا دنيا .. زي البحر العميق .. ومافي زول بعيش بي كرامة الا يكون تمساح عشاري .. وسمكة قرش مفترسة ..
اها انا لمن بقيت اعاين ليهو منطط عيوني كدا .. قال لي لكن طبعا" اهم حاجة الحلال .. يعني الحرام ده لو لقيتو في الشارع.. ماتدنقر عليهو ..
انا صراحة كدا اطمأنيت .. مادام عصمت بخاف من الحرام معناها الزول ماشي دغري .. وماشكيت ابدا انو ممكن الزول ده يكون غير كدا ..
اها يازول قال لي يازول ان شاء الله انت في فترة وجيزة ح تكون من اصحاب الملايين .. واصحابك ديل .. حيجو بعدين يشحتو منك حق المواصلات .. وح تكون انت رجل البر والاحسان .. وبراك ح تشوف كلامي ده ..
هسي اشرب الشاي وقوماك معاي نشوف الترتيبات .. وح تشوف انو الشغل كلو في السليم بس عبارة عن ذكاء وتصرف ..
قلت ليهو انا شارب الشاي اشرب انت انا بنتظرك .. قال لي انا بشرب قهوة في السوق .. قوم ارح ..
طلعت معاهو ركبنا في عربيتو واقفة برة .. كورلا بيضاء .. قلت ليهو .. انا المطلوب مني اعمل شنو؟
قال لي انا موش قلت ليك ماتسأل كتير ياعارف؟ .. بعدين في حاجة مهمة داير اوصيك عليها.. اي امر من الامور في شغلنا.. لازم يكون في سرية تامة .. قالو اقضو حوائجكم بالكتمان.. والحسد كتير.. بس لو يوم اتكلمت لاي زول بي تفاصيل الشغل .. معناها انت غلطت معاي .. قلت ليهو اطمئن يا عصمت والله اعتبرني ماعندي اي فكرة ..
لمن وصلنا السوق العربي .. قعد ليهو مع جماعة في شارع الحرية .. عندهم دكان بتاع اكترونات واتونس معاهم ونسة كتيرة .. وكلامهم نصو انا مافاهمو.. وعندهم مصطلحات شكلها كلها جديدة على .. البطل قتلوهو .. والحلة لسع مانجضت .. والحمار مالقوهو
والبحر طمح وحاجات كدا .. شكلها كلها رموز.. وكلهم فاهمنها الا انا ..
قام عصمت ناداني قال لي يا عارف انت عندك اثبات شخصية .. قلت ليهو ايوة .. قال لي طيب هاك امشي البنك ده .. افتح حساب بي اسمك .. وخت فيهو القروش دي ليك انت .. وجيب الدفتر وتعال .. ومدا لي مية جنيه .. قلت ليهو لشنو انا القروش دي في البنك؟ .. احسن تكون معاي ..
قال لي عارف ... نحن اتفقنا على شنو؟
قلت ليهو حاضر .. جدا شلت منو القروش ومشيت فتحت بيهن حساب في البنك.. حساب جاري واستلمت الدفتر بتاع الشيكات وجيتو راجع .. قال لي خلاص الدفتر ده .. اول خطوة في طريق الحنفلة .. بس مافي زول من ناس البيت يشوفو ؟
انا طبعا" مستغرب من الزول ده مالو مع السرية دي.. حيرني ذاتو
مع انو لحدي اللحظة دي مافي شي غلط ..

الى اللقاء

لامارا · 31-07-17, 10:44 PM

الحلقة 3

قلت ليهو طيب يا عصمت.. الدفتر ده انا اعمل بيهو شنو .. والمرحلة الجاية شنو يعني .. ؟ قال لي بس انت ساعدني بالصبر هسي انت امشي البيت و تعال لي يوم التلاتاء بتلقاني في الدكان ده زي الوقت ده .. جهزت ليك الشغل واعتبرها ضربة البداية ..
اها في واحد من الناس القاعدين في الدكان .. ماعارفو كان من ناس المحل ولا زول جاي ساي المهم هو فاهم الشغل .
قال لي عصمت انت ياعصمت الزول ده ماتخليهو مسطح فهمو الشغل ياخي .. عشان بعدين مايعمل ليك مشكلة .. قال ليهو ياخي عارف ده زول اصلي ماعندو مانع بعدين .. عصمت قال لي طيب نحن بنلقى حاجة صاحبها بايعها .. وبتكون بي سعر مغري شديد .. وسيدها بكون محتاج للقروش .. بنقوم نشتريها منو .. وبنديهو جزء من القروش كاش وجزء متأخر وبنكتب ليهو شيك .. بي شهر بي شهرين ..
في الفترة بتاعة الشهرين دي .. نبيع السلعة بي سعرنا العايزنو ونشتري ونبيع بي القروش .. في فترة المهلة .. لمن تجي مواعيد الشيك بنكون ربحنا ربح ماتتخيلو .. نقوم نسدد باقي القروش ونشتغل بالباقي .. اها كل مرة بنعمل العملية دي .. لامن الحمد لله القروش جرت في يدينا .. انا قبيل موش قلت ليك السوق داير شطارة ..؟؟
انا قلت ليهو نعم والله كلامك صح .. قال لي يلا ازيدك من الشعر بيت .. السوق داير فراسة ورجالة اي زول خواف في السوق مابتقدم .. يبقى زي ست الشاي .. وبياع الاكياس .. تلاقيهو بعد عشرة سنة في نفس حالتو .. فاهم ولا اوضح ليك ؟؟ قلت ليهو فاهم .. قال لي وشغلنا ده قايم على السرية لانو لو الواحد عرف انك بتأخر ليهو عشان تكسب من الوقت .. بتغاتت عليك .. فهمت الوترة؟
قلت ليهو لالا واضح جدا ..
المهم يازول مشيت البيت ودفتر الشيكات داك صبنتو ليك في نص كتب في الدولاب .. مافي اي زول ح يعرف محله الا زول اساسا" عندو فكرة .. وبقيت منتظر التلاتا ..
اها لمن مشيت قعدت مع اصحابي اولاد الحلة بقيت اقول ليهم كلها كم يوم وتاني اعاين ليكم من فوق لي تحت .. ولا بقعد معاكم .. كلكم عطالة ومفلسين اصلو ماعندكم طموح تتقدمو وتبنو مستقبل زي الناس ..
واحد من اصحابي قال لي ياعارف عليك الله ما تحرق دمنا بالفشخرة المزعومة دي .. نحن الناس العاملين قروش جد جد ما قعدين يأثرو معانا .. تاثر معانا انت؟؟ اللي هسي ماعرفنا مصيرك شنو؟
انت اصبر لمن تغنى وتسوي ليك قروش زي الرجال بعدداك لو اتفشخرت بي حقك .. ولاشنو ياشباب؟؟ .. قالو ليهو كلامك صح يانيزو . اسمو نزار ..ــ ..
شوفتا تصدق دي كانت تصرفاتي مع اصحابي وكنت جادي في كلامي يعني ماحاسي اني قاعد اهظر .. كويس ..
مع انو انا اكتر حاجه بكرها في حياتي الزول البكون عندو قروش ومغرور وشايف روحو .. ويسلم على الناس مقبل كدا .. ومايقعد الا مع طبقة معينة من البشر .. ويتخلى عن اصحابو واحبابو واهلو .. ويكون علاقات جديدة مبنية على البرجوازية والغندله.. المهم مرت الايام وانا منتظر التلاتا .. وامي لمن سألتني من عصمت قلت ليها راجل نزيه وعملو شريف بس انتي ظنيتي الظن السئ من الاول ..
قالت لي بعد كدي ان شاء الله ربنا يستر ..
على كل حال يازول .. انا بحاول بختصر ليك الموضوع .. التلاتاء جات وانا من الصباح مشيت شارع الحرية .. ولقيت الدكان بتاع ناس بشير كنجاك لسع مافتح .. اللهو مواعدني فيهو عصمت قبل خمسة يوم .. مشيت شربت شاي .. واشتريت لي جريدة .. وقعدت في ضل لبخة كدا بقرا .. لغاية ما الدكان فتح زي الساعة 9 صباحا .. وجيت قعدت منتظر عصمت .. الدكان ده شغالين فيهو تلات شباب
محمد بشير ده ولد سيد الدكان .. واحمد سالم . وسموءل ديل شغالين معاهو فيهم واحد ود خالتو .. وكلهم يتخيلي عندهم نشاطات كدا مشبوهة ماعارف غايتو استغفر الله .. لكن الزول مابطمن ليهم المهم ..
الحاجة المتأكد منها ببيعو وبشترو في العملة ..
احمد ده شغال مع محمد بشير وهو تقريبا ود خالتو .. وشكلو مختلف عن الباقين .. طلع من الدكان ماشي ليهو مشوار غمز لي بي عينو وقال لي تعال مرقت وراهو من الدكان ومشينا كدا على جيهة دكاكين الدهب المقابلات الجامع الكبير .. وبقى يتكلم معاي في الشارع .. قال لي انا عرفت انك لاول مرة تتعامل مع عصمت .. قلت ليهو نعم ..
قال لي عندك بيهو سابق معرفة ؟ قلت ليهو ابدا والله بس وجهني ليهو زول صاحبي شديد .. قال لي والله ياعارف صاحبك ده ما سوى فيك خير ياخي عصمت ده زول حقير شديد وانا بنصحك تبعد منو..
قلت ليهو طيب وكت هو زول حقير انتو بتتعاملو معاهو ليه؟ انت ماعايزني اضايقكم في الشغل يعني قول لي عديل ببعد .. قال لي ايوااا ده فهمك .. ما مشكلة لو مافهمت قصدي انسى الموضوع واعتبرني ما اتكلمت معاك ..
ايوة صح انا حسيت انو احمد سالم حسدني من قولة تيت .. ومافكرت ابدا انو ممكن يكون صادق معاي في كلامو ده .. لكن بصراحة كلامو عمل لي وسوسة في قلبي ضد عصمت .. ياربي الزول ده قال عصمت حقير احتمال يكون فعلا عصمت حقير ومحمد بشير حقير ..واحمد سالم وسموءل كلهم نفس الطينة .. وانا الوحيد الداقس في الشلة .. موش احتمال برضو ..
المهم يازول احمد سالم لمن شافني ماقبلت كلامو سكت وغير الموضوع .. وبقى يتونس معاي عادي .. عندهم قروش عند زول في دكاكين الدهب ديل مشى جاب القروش وجا وانا معاهو .. لمن رجعنا لقينا عصمت وصل ..
وقاعد يشرب في قهوة .. سلمت عليهو .. قال لي يازول جيت في وقتك .. دفتر الشيكات معاك .. قلت يلهو نعم قال لي يلا ارح عندنا بيعة ليها راس وقعر .. وان شاء الله دي ح تكون نقطة التحول ليك من الفلس الى النغنغة ..
محمد بشير يعاين ويتبسم ومامعروفة الابتسامة دي معناها شنو .. لي قدام انا بعرف انها ابتسامة سخرية وضحك على عقول الناس ..
ركبت مع عصمت ومشيت شارع الجموهرية في بدايتو كدا في محل تجاري كبير ومعروف .. قال لي الراجل ده عندو جنريتر للبيع .. قلت ليهو ده سيد المحل ؟ قال لي لالا ده نسيبو متزوج اخته .. عندو جنريتر كبير 500 kw .. زي البشغلو بيهو العمارات والمجمعات التجارية والشركات الضخمة .. وداير فيهو منا خشمو 7مليون .. ونحن ح ندفع ليهو 3 ونكتب ليهو شيك بي اربعة ..
وفي زول داير الجنريتر واحتمال نبيعو ليهو بي 10 .. قلت ليهو مولد كهرباء بي سبعة مليون؟ ياخي ده سعر بوكسي .. قال لي انت لمن تشوفو بتقتنع .. قلت ليهو يازول اتوكلنا على الله البسويهو يمشي .. قال لي انت نفذ معاهو البيع واكتب ليهو الشيك بي اسمك وخلي الباقي علي ..
انا قلت ليهو يعني انت ياعصمت ماعندك دفتر شيكات؟ قال لي انا متشربك في بيعات كتير وخايف الناس يلاخظو لي خلينا نوزع الجهود بيني وبينك .. ولو سمحت تاني ماتسأل اسئلة غبية .. قلت ليهو حاضر ..
انتظرنا شوية في الدكان لمن جاء اسمو (فتحي) او فتح الرحمن على حسب الاوراق الرسمية .. فتح الرحمن عبدالله الماحي .. زول ظاهر عليهو الصدق والاخلاص .. وعلامة الصلاة ظاهرة فوق وشو .. مما تشوفو تطمن ليهو وتنوم في بيتو وانت قرير العين ..
قعدنا معاهو وبدأ عصمت يتكلم معاهو قال ليهو ده ودخالتنا .. الكلمتك عنو عايز الجنريتر . هو طبعا اسمو (عارف محمد الحسن) .. بتعرف محمد الحسن الغالي .. التاجر المشهور في امدرمان ؟؟ قال ليهو ايوة بعرفو .. قال ليهو بس ده ولدو الكبير .. فعلا انا عارف محمد الحسن بس ابوي ماياهو التاجر القله ليهو ده..
انا لمن نططت عيوني لكن سكت ساي قلت خليهو لمن يمرق بره واسأله كضب كدا ليه ..
اها يازول الراجل سيد الجنريتر .. قال بس انتظروني دقيقة اجيب ليكم الفواتير .. وعمل مكاتبة عديلة ودفع ليهو 3 مليون كاش .. كنت شايلهن انا في كيس وهن طبعا" حقات عصمت انا ماعندي فيهن قرش .. وقال لي اكتب ليهو شيك بي اربعة مليون ياعارف .. انا طلعت الدفتر وكتبت ليهو اربعة مليون ..
ماعارف في اللحظة ديك منت مالي .. زي الكأني مسلوب الارادة .. وواثق ثقة عجيبة في عصمت .. ومطمئن ليهو زي اخوي او ابوي .. وماعندي اي احتمال انو يخذلني او يدخلني في مشكلة ..
المهم كتبت الشيك وسلمتو لي فتح الرحمن . وانا لغاية الان ماشفت الجنريتر بي عيني ..

الى اللقاء

لامارا · 31-07-17, 11:29 PM

الحلقة 4

لمن طلعنا من دكان ناس فتحي .. عصمت قال لي هسي انت خسرت حاجة؟ قلت ليهو ابدا ماخسرت ولاقرش..
قال لي لاحظ اي ربح ح يكون بيني وبينك.. يعني البيعة دي انا وانت فيها سواء .. قلت ليهو بس انت ليه قلت ليهو انو ابوي التاجر الفي ام درمان . ؟ قال لي الناس ديل.. لو ما وثقوا فيك ..وعرفو انك عندك الزول الممكن يسدد ليك لو عجزت .. مابدوك .. يهدي الشطارة البقولها ليك ..
قلت ليهو طيب طيب.. هسي الجنريتر وين؟ ..
قال لي ونحن مالنا ومال الجنريتر .. نحن عايزين نشغلو؟ نحن بس علينا نوجه عليهو المشتري.. لو وافق نديهو نفس الفواتير وخلاص ..
نحن هسي المفروض نكسب الزمن.. ونشوف لينا بيعة تاني.. قلت ليهو قبل مانستلم دي؟؟ قال لي انت اصبر يازول ..
طلع تلفونو.. واتصل على واحد اسمو جمال .. قال ليهو ياجمال انا خلاص بقيت على الهايس ..
لو وافقت لي بالخمسطاشر انا جايب ليك زول هسي .. وسكت داك بتكلم معاهو .. قال ليهو .. مابقبل ليك الا بي 17 .. قال ليهو يازول 17 موافقين.. بس تديهو فرصة وتستلم منو الشيك .. يازول هسي نحن جايين عليك ..
وركبنا ماشين عليهو في سوق بحري .. انا قعدت اتكلم مع عصمت ..حقيقة كمية القروش البتكلمو عنها دي .. خوفتني ..
قلت ليهو يا عصمت ..نحن المفروض هسي نخلص من الجنريتر ..عشان يكون عندنا كاش ..نقدر نشتغل بيهو .. قال لي ياخي قروش الجنريتر مابتشغلك ولا شي.. انت اصبر .. ولو الشغل ماعاجبك خليني في حالي ..
انا طبعا اتخلعت.. قلت ليهو لالا كيف يعني اخليك؟؟ .. نحن بقى مصيرنا واحد .. قال لي طيب خلاص ..ساعدني بالسكات والصبر الله يخليك ..
انا الليلة داير ارمي ليك شبكتك.. وان شاء الله كلها يومين تلاتة وتلقى فيها الكنوز الما خمج ..
وصلنا بحري ..وانا طبعا ماعندي طريقة اخالف الزول ده.. وهو حسة بالنقطة دي ..وبقى ماسكني ليك من يدي البتوجعني ..ومشينا كتبت شيك للزول بتاع الهايس بي فترة 45 يوم.. يعني بعد حلول الشيك الاول بي اسبوعين .. واشترينا منو الهاايس..ورسل لي زول جا ساقها وداها دلالة الصحافة .. في نفس يوم الجنريتر ..
معتصم قال لي خلاص يازول.. انت بعد كدي دربك مرق.. امشي على اهلك ..واعمل حسابك على الدفتر ده شديد.. انا في الايام الجايات دي لو لقيت ليك بيعة سمحة وبتعشيك.. بضرب ليك تلفون .. طبعا اديتو تلفون ابوي.. انا براي ماعندي تلفون .. ولا عندي ليهو قروش ..
والكلام ده كلو حصل في يوم واحد.. لاحظ للحتة دي كويس ..
والله مارجعت البيت الا الساعة 5 مساء .. وانا فوقي دين 21 مليون..
مبلغ من الله خلقني ماشفتو بي عيوني ..
رجعت البيت ولافي اي زول من ناس البيت عارف الانا عملتو .. لاني الثقة الواثقها انا فيهو.. لو حكيت لاي زول ..ح يقول لي انت اهبل ومغفل .. عشان كدا فضلت ساكت ..
وبقيت منتظر عصمت ..يبيع الجنريتر والهايس.. ويجيب القروش.. عشان اشوف الشغل ..واشوفو عايز يشتري بيهن شنو؟ ..ومرت الايام .. وعصمت ضرب لي في تلفون ابوي ..
بعد اسبوع تقريبا .. وقال لي الجنريتر اتباع تعال لينا في محطة الغالي ..
مشيت ليهو قال لي اسمع الجنريتر اتباع بي 9 مليون .. يعني ربحان 2 مليون .. انت عندك في حسابك الان مليون عدا نقدا .. يلا انا عايز اتشاور معاك.. نحن عايزين ندخل القروش دي في بيعة تاني.. بدل نقعد نعاين ليها.. ويجي الشهر نسددها .. صاح ولالا ؟؟
قلت ليهو صحيح ..
قال لي يلا في قطعة بتاعة دكان في السوق المحلي.. سيدها عايز فيها 50 فقط .. رايك شنو نمشي نغسلو ؟؟
قلت ليهو يلا ارح والله نغسل ابوهو .. انا طبعا ماعندي حل .. اصلا لو انا ورطان ورطان.. ولو الله مارقني الزول ده ح يقيف معاي في للنهاية ..
مشينا للزول في السوق المحلي ..قعدنا معاهو .. اسمو حسين مصطفى ..
اها نحن قاعدين معاهو كدا نشرب في الجبنة .. وانا شايل معاي دفتري وجاهز للكتابة .. عندو اخوهو اسمو احمد مصطفى .. هم من اولاد النيل الابيض .. احمد ده ..من جاء وشاف عصمت ..قام وانفصم .. وقال ليهو ياعصمت الجابك هنا شنو؟ انت ياحرامي؟
داير تعمل ليهو شنو؟ تاني .. قوم اتخارج.. ماعندنا بيع ..نحن قبل ما ارتكب فيك جريمة .. حسين قال لاخوهو في شنو يا احمد؟؟
قال ليهو انت ياحسين بتثق فيني ولا في ناس الشارع؟؟ ..
قال ليهو بسم الله.. ده انا اخوك وابيع الدنيا كلها عشانك.. قول لي في شنو؟
قال ليهو الزول ده زول حرامي ومرتاد سجون .. ومضيع البلد دي كلها .. ابعد منو وماتبيع ليهو ابرة ..
قال ليهو انا مالي ومالو .. هو جاي يشتري بالكاش؟ ولا شنو يا عصمت؟ عصمت قال ليهو انا اساسا" القطعة ماعايزها انا .. عايزها عارف ده .. وانا واسطة خير .. لو موافق ده زول مضمون
ولو ما وافقت مافي مشكلة بنمشي محل ماجينا ..
احمد قال ليهو زول جاي بواسطتك انت.. ومن طرفك ..نحن ماعندنا ليهو شي ..
عصمت قال ليهو انت رايك شنو ياحسين؟ انت صاحب الحق .. قال ليهو انا واخوي واحد .. حقي حقو وحقو حقي .. والبقول عليهو يمشي .. اعفوني من الموضوع ده ..
عصمت قال لي قوم يا عارف ارح.. الله اكرم وابوابه ما اتقفلت ياخوي ..
قمنا اتحركنا وانا نفسي اسأل عصمت ..اقول ليهو الزول ده شايف عليك شنو هاج فيك كدا؟؟
لكن مبكم طبعا" وخايف منو عديل يشهد الله ..
اها في الشارع عصمت قال لي مافي مشكلة يا عار..ف انا بتصرف والسوق فاتح يامعلم .. لكن انا كنت داير اقلب ليك قلبة بي فهم .. بس الله ما اراد .. وماسلمني قرش طبعا"
انا رجعت البيت والايام بقت ماشة .. وعصمت ما اتصل علي ..
ومواعيد الشيك الاول قربت .. ومرت عشرين يوم في اسرع من البرق ..وانا كل يوم بتوقع تلفون من عصمت ..
وبقيت هامي وكل يوم خوفي زايد ..انو سيد الشيك الاول.. بتاع الجنريتر يمشي يقدم الشيك ويلقى مافي رصيد ..وانا ادخل في حتة ضيقة ..
في الفترة دي حصلت حكاية اغرب من الخيال .. عندنا ناس خالنا مقيمين في السعودية .. وجو اجازة ونزلو في الشقيلاب ..عندهم بيتهم هناك .. جونا زيارة في البيت ..وقالو دايرين عارف يمشي معانا . خالي الوحيد اخو امي ..اسمو التهامي ..
خالي قال لي ..الاولاد ديل بي امهم بخافو .. وانا عندي حوامة كتيرة ..ماشي الجزيرة وماشي الشمالية .. وعندي كم سفرية كدا.. في الاجازة دي .. عايزك تمشي تعدي معانا اسبوع .. لمن اكون مافيش تقعد مع الاولاد في البيت .. عندو بتين وولدين .. البت الكبيرة اسمها امنيه .. والاصغر منها اسمها ليالي .. وابراهيم 10 سنة .. وفادي تلات سنوات ..
مشيت معاهم البيت .. خالي كان مؤجر ليهو عربية .. لاند كروزر .. المهم الحكاية انو البت الاسمها امنية دي.. لفتت نظري لفتة ماطبيعية ..
لانها اكتملت .. وبقت حكاية لاتوصف .. وهي ذاتها حسيت ليك بي نظراتها لي ماطبيعية ..
واتحمستا جدا لي مشيتي ليهم .. وانا خايف من مواعيد الشيك ..
في الشارع .. خالي التهامي بقى يعاين لي بتو .. ولاحظ لي نظراتها لي ..والخجل والامور بتاعة البنات دي .. وخالي زول تفتيحة شكلو فهم انو بتو .. سقطت في حبالي ..
المهم في الشارع ..خالي بقى يتكلم معاي عن الزواج .. وانو انا لسع ما اشتغلت ليه؟ ..
قلت ليهو والله بديت لي شغل بتاع تجارة كدا.. واسأل الله التوفيق .. قال لي يازول لو ما اتوفقت ..انا بحاول اشوف ليك سفرية للسعودية .. وان شاء الله هناك امورك تمشي تمام التمام .. قلت ليهو مافي مشكلة بس النشوف تجارتي دي بتجيب شنو ..
مشيت معاهم في البيت في الشقيلاب .. وقعدوني في الصالون بتاع المضيفة النهار كلو راقد زي الحراس ..
بعد يومين خالي سافر سنار .. وخلاني البيت .. البت بقت تجيب لي الاكل والشاي وكدا .. وبدأت العلاقة والكلام بيني وبينها .. وانا ماقادر اركز معاها.. والخوف من مواعيد الشيك قاطع قلبي ..
بس المتأكد منه انو قلت ليها _مناي في الدنيا تكون زوجتي هي بت خالي امنية التهامي ..
اتاريها البت بتحكي لي امها اي كلام يدور بيني وبينها .. والام بتضرب تكلم راجلها .. والكلام دخل الحوش.. وانا ماعارف انو الموضوع اتطور ودخل حيز الجدية ..
اها لمن جاء خالي من السفر.. قال لي اسمع يا عارف .. انا ماعندي مانع .. انك تكون زوج بتي ..
في النهاية انت ود اختي ولحمي ودمي .. بس عايز منك حاجة .. طلع جوازك وصورو ..اديني صورة الجواز .. وانا بسافر اشتري ليك اقامة . وارسل ليك ..انت ما مسؤول من اي شي.. حق التذكرة برسلو ليك تاني ف يحاجة.؟؟
طبعا انا دي كانت امنيتي في الدنيا ..انو الفى لي طريقة مخارجة من البلد دي .. لكن بعد شنو؟
بعد انا اتشربكت مع عصمت ..واحتمال اترمي في السجن بعد اسبوع بس .. لانو الشيك باقي ليهو ستة يوم ..ولاغايت اللحظة عصمت ما اداني خبر ..
اها وكت خالي قال الكلام ده اصلا مافرحت.. ولا حسيت بي اني مبسوط .. بس بقيت افكر في خوازيقي العملتها بي يدي ..
ولو خالي عرف حاجة زي دي ..ح يغير رايو مني .. والتفاحة دي تاني بي عيوني ما بشوفها ..
اها يازول اغتنمت الفرصة وقلت لي خالي انا بكرة الصباح عندي مشوار وبجيكم المساء .. مشيت طوالي القوز لي عصمت .. في البيت قالو .. ليهو اسبوع مافيش وماعارفنو سافر وين ..؟
ومشيت دكان ناس كنجاك في شارع الحرية.. عشان اسأل منو قالو لي الزول ده مافي .. ليهو كم يوم ماجانا بي جاي ..
وبقيت لافي زي الحمار القارصاهو عقرب .. مافاهم شي وماعارف امشي وين .. عصمت لا رجع لي وراني عمل شنو بالقروش .. ولاحتى هو ذاتو انا لامي فيهو عشان اٍسأله .. وقول ربنا يستر ..

الى اللقاء ..

لامارا · 01-08-17, 12:19 AM

الحلقة 5

كل يوم بدت الفرصة تضيق .. والزمن كابسني مكابسة شديدة .. اولا قلبي قال لي امشي للزول الباع لينا الجنريتر واقول ليهو عصمت مالامي فيهو.. وانا ماعندي قروش هسي .. لكن طبعا ما ح يصدقني.. لانو فاهم انو انا ود التاجر الفي ام درمان ..
يعني معقول اكون ماعندي قروش؟؟ .. المهم بعد تفكير شديد .. غيرت راي ومامشيت .وانا بتلولح وبتحاوم زي المجنون ..
من السوق العربي شارع الحرية للقوز ومالامي في عصمت .. قام احمد الشغال في دكان ناس كنجاك .. قال لي تتذكر كلامي القلتو ليك قبل كدا ؟؟ وانت قلت لي شنو؟ انت متذكر؟
قلت ليهو ايوة والله متذكر.. لكن بعد كدا مافي فايدة الحصل حصل ..قلت ليهو يا احمد عايزك في كلمتين برانا..
طلعنا مشينا على ست الشاي.. وسألته اسألة محددة .. قلت ليهو انا عايزك تحكي لي عن عصمت ده .. بي كل صغيرة وكبيرة.. ودي امانة في ذمتك .. انا بٍسألك منها امام الله .. لاني انا ماشي في درك.. وبعد يومين ح يحل شيك بي اربعة مليون.. وانا اربعة جنيه ماعندي .. وهسي ماعارف عصمت وين ..
قال لي جدا انا بحكي ليك .. بس الكلام ده يفضل بيني وبينك.. انا عايز انورك ماتعمل لي مشكلة مع الزول ده.. زول مابخاف الله .. وحتى محمد ود خالتي نفس الطينة اصلهم اصحاب .. بس محمد بلعبها صاح ..
المهم عصمت يا عارف زول بشتغل بالكسر .. بشتري الحاجة غالية بالشيك .. وببيعها بالرخيص بي سرعة . ولمن مواعيد الشيك تجي بزوغ .. ويرسل عصابتو يمشو يقنعو الزول بتاع الشيك .. ويعملو معاهو تسوية.. ويدوهو جزء بسيط من قروشو وكدا.. يعني عشان يتنازل .. اقتنع اقتنع ما اقتنع بدخل السجن.. ومن هناك يشتغل شغلو ..
انا طبعا" بسمع في الكلام وراسي ده بقى قدر الضربه .. وحسيت بي ريقي نشف وشلاليفي ورمن ..
قلت ليهو طيب هسي هو بكون مشى وين؟ .. قال لي واحد في الاتنين.. يا اما في السجن .. او زايغ من شيك ..
قلت ليهو طيب.. انا هسي اعمل شنو؟ .. قال لي شيل شيلتك.. الصقر ان وقع كترة البتابت عيب .. اصلا انت اتورطت يا معلم .. بعد كدي فكر في المخارجة .. واحسن حاجة انا بقترحها ليك .. خلي اهلك في الصورة .. عشان بعدين ما ينصدمو..
قلت ليهو لالالا .. انا اهلي ديل وحدهم مابقدر اكلمهم.. امي بتصدم .. وابوي بجيهو سكري . ووو سكتا كدا مسافة .. اتذكرت خالي التهامي .. لو عرف الموضوع انا .. انا امشي وين تاني؟ .. المهم ..
قلت ليهو انا بحاول اكون في السوق .. من بكرة عشان لو دايرين يقبضوني يقبضوني .. بغير علم اهلي .. بس المشكلة المبيت .. لانو مرات امر القبض بجيك بالليل.. على حسب حرص الزول .. المرشد ..
غايتو يازول بي اختصار انابقيت ببيت في بيت ناس خالي التهامي .. والنهار بمشي السوق .. ده لمن التهامي يكون موجود .. ولما يكون مسافر .. طول اليوم بكون حارس المراة واولادها..
وبيني وبين امنية .. اتبنت عمارات من الثقة والتفاهم والحب العفيف .. وكل يوم بكتشف انو البت دي درة نادرة .. اخلاقها وفهمها وكلامها .. بس عيبها خوافة زي امها .. ممكن تصرخ بطول حسها لو شافت ليها صرصور.. او ضفدعة .. اما الضب فده بالنسبة ليها كانه كتيبة من تنظيم القاعدة ارهاب تقيل ..
يوم قالت لي يا عارف انا والله اتعلقت بيك شديد .. ولو حصل انك اتخليت عني .. انا احتمال اموت .. لاني شايفة فيك الانسان الهادي الطيب المتدين .. قلت ليها انا اصلا مابتخلا عنك .. الا انتي وابوك ترفضوني .. قالت لي ما ممكن نرفضك.. الا تظهر لينا مفاجأت في شخصيتك ..
ولو ظهرت لينا مفاجأت .. انت كنت خافيها علي.. انا ياعارف ماعافية ليك ..
اها طبعا لمن قالت لي كدي.. انا قلبي قال وححح من الخوفة.. واتوترت لمن لوني قلب .. هي عاينت لي كدا وقالت لي .. انت ياعارف مالك ؟؟ خايف من شنو؟ متوتر من شنو؟ عليك الله احكي لي .. انا موش حياتك زي ما انت بتقول .؟ قلت ليها اي والله ..
وفعلا" قررت احكي ليها .. بس خايف من ردة الفعل .. وخايف من المفاجأت القالتها دي ..
والله البت دي امنية حقيقة .. كنت بتمناها في حياتي .. والله من اشوفها بحس بي انو الدنيا دي جميلة .. بس المشكلة انو انا جواي ماقادر احس باحساس الجمال ده.. بي سبب عصمت .. الله يجازيهو بما يستحق ..
المهم اتوكلت على الله وحكيت ليها .. بالتفصيل الشي الحصل لي .. بس طبعا حكيت ليها موضوع الجنريتر ..
وماجيت ليها سيرة الهايس قلت لو اتقبلت دي بكمل ليها الباقي ..
والله بعد كملت ليها الكلام.. البت دي بكت بكا .. جنسو ساي براهو.. لغاية امها جات من بي غادي.. وبقت تسأل فيني عملت ليها شنو؟.. قلت ليها كنت بحكي ليها في قصة صاحبي حصلت ليهو مشكلة ..
المهم امنية بعد هدأت من البكاء.. وغسلت وشها.. جاتني وقالت لي انت عارف انا بكيت ليه ؟ .. لاني متأكدة لو ابوي عرف الموضوع ده .. تاني انا وانت مابنتلم .. لكن انا مالايماك .. لانك وثقت في الناس والناس خذلوك .. ودي حاجة ما بيدك .. حكايتك الحكيتها لي دي .. انت لسع ما اكلت قروش زول بالحرام .. لكن بصراحة انت ورطان .. بس اوعك اوعك تحكي لابوي .. لانو خلاص ح يغير رايو فيك .. وتاني انا وانت ما بنجتمع لامن تقوم الساعة ..
قلت ليها يا زولة الامر بيد الله .. لو ربنا جاعل لينا قسمة بتحصل .. ولو مافي لينا قسمة .. نحن مابنقدر نسوي شي ..
في يومي الحكيت ليها ده.. الشيك بتاع الاربعة مليون كان حلا ليهو يومين.. انا متوقع في اي لحظة يجيني امر قبض .. بس ما حصل ..
وخالي كان مسافر في الشمالية .. عدا ليهو يومين وجا .. لمن جاء انا اتخارجت من البيت طوالي .. وقلت ليهو انا عندي مشاغل كتيرة .. اديني الاذن ومشيت ..
لامن مشيت البيت .. ابوي قال لي اتصل عليك الزول الاسمو عصمت ده.. وقال لك تجيهو في شارع الحرية بكرة الصباح ..
اها بكرة لمن وصلت شارع الحرية .. قلت لي محمد عصمت قال بلاقيني هنا .. قال لي عصمت وين هو .؟؟ يازول انتظر ان شاء الله يجي .. قام اتصل تلفون واتكلم براحة .. بس انا الشي الاتأكدت منه .. انو التلفون ده بتعلق بي انا شخصيا .. الكلام ده بعد اربعة خمسة يوم من حلول الشيك ..
بعد المكالمة بي ربع ساعة .. جات عربية بوكسي وفيها عساكر اتنين .. ومعاهم الزول بتاع الجنريتر .. ومسكوني .. سلموني نسخة من حكم المحكمة الغيابي .. بالسجن الى حين السداد ..
المهم بي اختصار انا انسجنت .. واهلي ماعارفين انا وين .. ولا اي زول ..
وح افضل في السجن الى حين السداد .. ودخلت السجن بي بنطلون وقميص ..
واهلي بقو يفتشو لي .. وماخلو حتة .. ومافي زول عارفني انا وين الا امنية .. وامنية كانت خايفة انها تقول .. وخايفة تسكت ..
واهلي قلبو البلد ورا وقدام وبلغو ناس الشرطة .. وناس الشرطة اتحصلو على تلفون عصمت من ابوي.. باعتبار انو عصمت اخر زول اتصل علي .. وانا مشيت ليهو وتاني مارجعت البيت ..
وخالي خلا الورا وقدام .. وبقى يفتش لي بالعربية المستأجرة وماخلو حتة .. المهم يازول بواسطة ناس المباحث .. ابوي عرف انو انا في السجن .. لكن ابوي كان عيان وماقدر يمرق البيت في اليوم داك.. لي حكمة يعلمها الله ..
اها يوم من الايام انا في السجن جاني زول زيارة ..
قال لي انا من طرف عصمت .. قلت ليهو هو وين عصمت؟؟ وليه خوزقني كدا؟؟ .. ودخلني في حتة ضيقة .. قال لي مافي خوازيق ولا حاجة .. ده اصلا الشغل بمشي كدا يا معلم .. انت عندك في السجن ده 17 يوم وبتتخارج ..
انا هسي عصمت رسلني ليك.. وقال ليك ماتقلق .. امورك كلها مظبطة .. وانا وصيت ليك اصحابي .. غايتو الزول ده طمني .. اني ما اقعد في السجن كتير.. لكن هل اصدقو ولالا .. وانا فعلا صدقتو .. بي كل سذاجة .. زي كل مرة ..
المهم كم يوم كدا ابوي ملك الصحة والعافية ..
في السجن ام درمان .. عشان يتاكد مني ده انا ولالا .. ابوي لمن شافني في السجن قعد يبكي زي الشافع ..
وانا حكيت ليهو .. الحصل معاي من طقطق للسلام عليكم .. واكتر شي زعلو مني.. اني ما كلمتو بي تفاصيل الموضوع قبل مايتطور .. وزهج مني وتفة لي وشي .. وقال لي ح تقعد في السجن لمن تعفن.. ياكلب لانو انا ماعندي ليك قروش ادفعهن ليك .. قلت ليهو ماتدفع لي .. اصبر ربنا بفرجها .. بس يا ابوي طالب منك طلب.. امي ماتعرف .. وخالي التهامي مايعرف ..
ابوي قال لي اكلمهم؟؟ اقول ليهم شنو؟ اكلمهم بي خيبتي .؟؟ هسي لو في زول من اهلك عرف الكلام ده.. تاني نحن نودي وشنا وين؟؟ .. غايتو انتقمت مني ياعارف.. قلت ليهو بس حاول جيب لي هدوم.. وانا ما متجرس من السجن .. السجن حق الرجال؟..
وطبعا اساسا .. ناس الحق الخاص ديل بتاعين الشيكات والحاجات دي .. وضعهم في السجن مختلف عن المساجين الجنائيين وكدا ..
بس الكارثة العجيبة الانت ما ختيت بالك ليها .. انت عارف الزول المرسل من عصمت قال عندك في السجن 17 يوم ليه ؟؟.. وال17 يوم دي شنو؟
تعال احكي ليك ..

الى اللقاء ..

لامارا · 01-08-17, 12:20 AM

الحلقة 6

طبعا ابوي فات مني.. ورسل واحد من اصحابي المقربين.. يجيني في السجن ويجيب لي الهدوم .. ووصاهو انو مايتكلم .. صاحبي ده اسمو انور .. وزول اصلي لدرجة ماتتخيلها .. انا لمن شفتو جاني.. بصراحة فرحت جدا .. ده من نفس الناس الكنت بقرق عليهم في الحلة .. وبقول ليهم انا تاني بعاين ليكم من فوق لي تحت .. اها يازول وكت انور جاني.. قال لي ابوك محبط احباط شديد .. وشايل هم زي الكاتل ليهو رقبة .. ده شنو يازول الوقعت فيهو ده ؟؟..
انت قلت ح تكون من رجال الاعمال .. اجي القاك في السجن ؟
قلت ليهو انا يا انور.. حصلت علي خوازيق شديدة .. وحكيت ليهو الحصل قال لي .. والله دي بلادة منك .. انت زول ذكي ولماح.. العماك شنو كده؟ .. قلت ليهو اسمع يا انور.. انا ماندمان على دخول السجن.. بس انا خايف من حاجة واحدة .. وحكيت ليهو قصة بت خالي امنية ..
وخايف من خالي يسمع ويغير رايو مني .. بعد ماوعدني بيها .. انور قال لي والله صراحة انت في موقف حساس .. طيب انا اقدر اساعدك بشنو ياعارف ؟ قلت ليهو بس تفتش لي عصمت.. تشوفو لي وين ؟
قال لي ياخي عصمت عايز بيهو شنو؟؟ افرض انو عصمت ماظهر .. ح تعمل شنو؟ .. انا في راي .. انت لازم تتخارج من السجن ده قبل خالك مايعرف .. وسيرتك تكون وسخانة في دفاترو ..
انا ممكن اتصرف اجيب ليك الاربعة مليون ؟ لفترة معينة لغاية ماخالك يسافر .. لكن المشكلة الشيك التاني .. تاني ح يحشروك في السجن .. قلت ليهو بس انت امشي شوفو لي وين؟ .. وانا بوصف ليك بيتو .. ومحل بكون قاعد في شارع الحرية .. عليك الله اول ماتلم فيهو كلمو.. قول لييهو قال ليك عارف.. حاول اتصرف لي سريع.. لانو والله انا اطلع من السجن .. اكوس لك واطلعك من الارض السابعة.. واطعنك .. واخش بيك جهنم ..
انور قال لي انت اهبل ؟؟ انت هسي السجن الفي اربعو مليون ماقادر عليهو .. تجي ترتكب جريمة وكمان 130 .. (القتل العمد) ..
وبصراحة انا في اللحظة ديك كنت حاسي بالحقارة.. وبقيت حاقد على عصمت حقد ماطبيعي ..
طبعا اكتر حاجة كان مستغرب فيها انور.. انو انا في السجن مرتاح .. بي طبيعة الناس المسجونين في حقوق خاصة زي .. وكلامو كلو بقول لي والله انت حالتك في السجن احسن من الحلة .. ياخي خليك قبلك .. ونحن ذاتنا دايرني نشوف لينا طريقة نجيك هنا ..
قلت ليهو يازول الحرية دي مافي زيها.. ما تكضب ساي ..
المهم انور مشى مني .. ونفسو يخدمني لكن الله غالب ..
انا يومي داك عديتو مدبرس.. وماعندي موضوع اصلا.. ماعندي اخلاق اتكلم مع زول .. بس من من اليوم داك حاولت اخش في واحد كدا اسمو عبدالحميد ..
عبدالحميد ده من الناس المسجونين في الشيكات برضو .. وحصلت بينا صداقة طيبة .. وعلاقتنا في يومين اتوطدت.. زي البنعرف بعض لينا سنين .. وحكيت ليهو القصة الحصلت علي من عصمت .. وهو يضحك لامن يرقد على قفاهو .. قلت ليهو انت بتعرف عصمت .؟؟ قال لي كمل كمل بحكي ليك ..
اها يازول بعد كملت ليهو .. الزول ده بدا يحكي لي حكايات اغرب من الخيال ..
اول حاجة قال لي عصمت ده زول معروف لدينا.. من زمان وزول بتاع .. قراية .. قلت ليهو قراية كيف ؟؟؟.. قال لي قراية يعني اقناع بالمنطق .. اقول ليك كيف ...
في ناس ياعارف بجو بنسجنو في مبالغ كبيرة شديد هنا .. 250مليون .. 300 وكدا يعني .. تقول لي 4 مليون؟؟ .. عليك الله قوم لف .. اها ياصاحبي .. عصمت بكون طرف في المعاملات دي ..وواحد من الشلة الداخلة في الشغلانة .. اها هو ومعاهو شلة بمشي يقرا للزول سيد الشيك الطالب حقو .. ويحاول يقنعه بي تسوية ..
والزول يقبل بي اقل من حقو ..عشان مايضيع عليهو.. انا ذاتي قبل كدا اشتغلت في الوظيفة دي .. وموضوع ناجح نجاح شديد .. بس لو عصمت اشتغل معاك بي نية واحدة بريحك .. ولو داير يتغاتت عليك .. ده زول عندو دكتوراة في الغتاتة .. الله يكون في عونك ..
انا احكي ليك حكاية يا عارف اخوي ..نحن كنا زي 5 انفار .. وعصمت ده معانا.. الكلام ده قبل سنتين تلاتة.. يعني الزول ده كان من الفريق القومي بتاعنا .. لكن اعتزل وكون فريق براهو .. اها في واحد مننا اسمو الضحية والباقين قرايين .. الضحية ده بشتري بضاعة بي شيكات كبيرة .. يعني ميات الملايين .. من نفر واحد ولا من كم نفر مافرقت .. وهو البكتب الشيكات .. المهم يلا بمشو هو والشلة .. يبعو البضاعة بي سعر الكاش..
وبشغلو القروش لامن تجي فترة حل الشيك .. والشيك يرجع والضحية يدخل السجن عادي .. ويكون فرحان .. والله لمن الزول يكونو مدخلنو السجن.. نعمل ليهو كرامة .. شدة مابنكون فرحانين بالانجاز ..
اول ما يدخل بي اسبوع او خمسة يوم.. القرايين يلبسو جلاليب نضيفة.. وعمم وشالات .. ويمشو للزول سيد الحق الطالب القروش .. وانا كنت من ضمنهم ..
كانت مرة في ضربة بي 150 مليون.. والله دي ريحتنا راحة .. واحد كان عنده شاحنات.. وعايزي بيعهن .. ومضطر للبيع شديد .. اشتريناهن كلهن منو.. تقريبا ستة شاحنات ..بي 300 ودفعنا ليهو خمسين مليون فقط .. والضحية كان صاحبنا اسمو يوسف . طبعا" الضحية بكون ليهو اكتر نسبة من الارباح في الشغلانة .. اها يازول مشينا بعنا الشاحنات .. والاشتراها مننا واحد من اصحابنا .. اصلا بشتري البضاعة المكسورة .. وشلنا القروش دخلناها في اسمنت وبعنا واشترينا ,, وارباح ماتتخيلها .. اها وقت جات مواعيد الشيك.. كاتبين ليهو 250 مليون .. طوالي يوسف اتقبض ودخل السجن بي اراتو ويتبسم .. والزول سيد الشيك فرحان
وقال لي يوسف . والله ماتطلع لو ما دفعت لي كل القروش .. انت قايل الشغلانة لعب .. ؟؟
اها يازول نحن لبسنا وقشرنا وركبنا لاندكروزر.. ومشينا ليهو في البيت .. وهو طبعا" اول مرة يشوفنا.. قلنا ليهو نحن اهل يوسف ..
ويوسف ده عليهو قروش كتيرة .. من ضمنها قروشك .. وشكلو ما ح يمرق من السجن بي اخوي واخوك .. ونحن حاولنا نعمل تسوية مع اصحاب الشيكات الراجعة .. والحمد لله كتير منهم قبلو .. ودفعنا ليهم من جيوبنا .. على اساس نحن اهلو .. والزول ده خرب سمعتنا .. كل مرة قابضنو في شيك .. فنحن عايزين ندفع ليك جزء من المبلغ .. وتتنازل عشان نخارج الزول ده .. لو قبلت نحن بنديك .. وتكتب تنازل .. ولو ما قبلت نحن ماخسرانين حاجة .. بنكون عملنا العلينا ..وانت بتخسر كل القروش ..
وقلنا ليهو نحن الفضلت معانا كلها مية مليون .. قبلت بيها الحمد لله ماقبلت بنمشي نديها لزول تاني .. اها يازول في النهاية قال لينا .. اعمل شنو؟ .. احسن من تضيع علي كلها .. (المال تلتو ولاكتلتو) ودفعنا ليهو مية مليون .. واتنازل عن المية وخمسين الباقية .. ومشينا فرحانين فرحة شديدة .. واتقسمنا المية وخمسين .. لكن يوسف طلعت ليهو خمسين براهو.. لانو كان ضحية اللعبة ..
وتاني مشى كتب شيك لزول ..وعملنا معاهو نفس العملية.. واستمرينا شغالين كدا فترة .. بس يوسف حصل ليهو حادث اتوفى في طريق بورتسودان.. قبل تلاتة شهور الله يرحمو ..وهسي بقيت الضحية انا .. وعصمت فات مننا براهو.. اختلف مع السلطان ..
قلت ليهو السلطان ده منو ؟؟ قال لي ده البوس الكبير عندنا.. البدفع الكاش في البداية ..
انا طبعا" سألت عبدالحميد ده البحكي لي ده ..قلت ليهو ماحصل يوم زول قال ليكم انا ما بتنازل عن قرش من حقوقي ورفض التسوية ؟ ..
قال لي كتير في ناس بعصلجو كدا .. لكن نحن عندنا ليهم تصرف تاني .. نخلي زولنا في السجن.. ونحن بنكون شغالين برة بالقروش ..سنة سنتين مافرقت.. لغاية ماالقروش تجيب اضعافها .. وزي ما انت عارف.. البلد دي كل يوم قروشها ماشة نازلة لاتحت.. زي عمر الزول .. والضحية يكون قاعد في السجن مرتاح.. وماعندو اي هم ..شغله برة على قدم وساق .. المهم بعد سنتين ولا كدا .. نشيل قروش الزول البقت ماعندها قيمة نوديها ليهو.. ونقول ليهو ده حقك على داير المليم .. وطلع لينا زولنا من السجن.. ندفع ليهو ونطلع زولنا .. يعني متى مازهج الضحية من السجن بنخارجو .. والموضوع في يدنا .. فهمت الحاصل ياعارف .؟؟
قلت ليهو والله فهمت وياريتني مافهمت .. ياخي دي قمة الاجرام واللعب بي حقوق الناس .. والتحايل على القوانين ..
قالي ياهو ده الحاصل .. لكن وريني الجريمة وين؟؟ .. ده الزول بتنازل عن حقو بي محض ارادتو .. وفي النهاية لو ما اتنازل ..بنرجع ليهو حقو كامل ..
المشكلة وين ؟
قلت ليهو المشكلة في الظلم .. المشكلة في انو الزول ده.. اتنازل غصبا عنه ..ومضطر ينتنازل ..عشان مايفقد باقي قروشو .. بعدين بتمشو وين من الله؟؟ ..
المهم والله انا كنت متضايق من العمليات الحكاها لي دي ضيق ماتتخيلو.. وعرفت اانها قمة الحقارة والاجرام.. واكل الحرام بالحيلة والمكر ..
والله غايتو عبدالحميد ده.. حكى لي حنس مصايب ومحن.. بعملوها ناس السوق ديل.. اصلو ماتتخيلها ..والناس بقت بالجد مابتتورع من الحرام ..
اها انا على حسب كلام عبدالحميد.. بقيت قاعد في السجن ..ومتخيل انو عصمت يجيني في اي لحظة ..ويقول لي اطلع نحن .. عملنا تسوية .. اطلع ..
واطلع قبل خالي مايسمع .. لكن الحصل غير كدا خالص ..
الحصل انو عصمت ماظهر .. وانور مارجع لي .. وابوي ماقدر يسكت ..لانو امي بقت تبكي الليل والنهار ..وهي ماعارفاني انا وين .. قام ابوي حكى لامي .. وامي حكت لي خالي التهامي .. وتعال اتفرج شوف الحصل بالتفصيل ..

الى اللقاء ..

لامارا · 03-08-17, 04:18 PM

الحلقة 7

طبعا في مابعد انا عرفت انو امي بقت تشوف ابوي هامي ومدبرس ..وتقعد تبكي والليل كله تتكلم .. كرعلي ياولدي .. هسي ياربي عارف يكون حي ولا ميت؟ .. انا بس كان عرفتو حي ولاميت برتاح .. المجنني انا ماعارفاهو الحاصل عليهو شنو؟ انا تعبانة يامحمد .. انا حاسة باني ح امرض من الهم والغم والحزن على ولدي .. اها يازول ابوي شافها انها ماشة في خطر .. واحتمال فعلا تمرض .. قام يوم بالليل فااجأها .. قال ليها اسمعي ..عارف طيب وكويس وانا شفتو .. بس يازول امي قامت عليهو .. اها شفتو وين؟ تشوف الليس انت وولدك .. ما دايرين تكلموني .. قول لي سريع.. قال ليها مابقول ليك بي حالتك دي ..لانو الموضوع سري شديد .. لو بتوعديني انك تسكتي .. انا بقول ليك لو ما بتوعديني .. اتخمدي نومي.. لو موتي مابقول ليك .. قالت ليهو طيب بوعدك اها قول لي .. حكى ليها قال ليها عارف في السجن بي سبب قروش .. لكن هسي هو كويس ومرتاح .. وقاعد في اوضة وسرير وتلفزيون واكلهم مختلف عن اكل المساجين .. قاعدين مرتاحين ويقرو في الجرايد ومتابعين المسلسلات والافلام .
التقول بالله لاكوندا ما سجن ..
قالت ليهو ده كلام مابدخل في راسي.. هو كان فيهو راحة سموهو سجن ؟ والقروش كم؟ وليه مادفعتها ليهو؟ عشان تطلعو من السجن؟ قال ليها مابطلعو ولا بدفع ليهوّّ.. انا دخلتو السجن؟ انا شلت القروش؟؟ ..
ده زول راجل وراشد .. اتصرف تصرف يتحمل نتيجتو.. واطلعو عشان يعمل شنو؟؟ عشان يقعد يطمش ويتحاوم ..ده احسن ليهو حاجة السجن .. السجن مصنع الرجال .. قالت ليهو انت ياراجل اظنك ماك طيب ؟ مصنع الرجال السجن ولا الجيش؟ مصنع الرجال الجيش.. السجن مابطلعك الا حاقد ومهزوم . طلع ولدك ودخلو في الجيش كان دايرو يطلع راجل .. انا تاني مابسكت ليك ولا عندي معاك عهد .. ولو ماعايز تطلع لي ولدي من السجن انا بكلم التهامي اخوي يتصرف .. قال ليها التهامي داير يدفع ليهو القروش ؟ يطلعو كيف؟
بس قالو تاني يوم التهامي جاهم في البيت من الصباح .. وامي حكت ليهو وابوي كان قاعد .. قام ابوي قال ليهو يا التهامي انا بحترمك وبعزك زي اخوي .. لو انت داير معزتي ليك تستمر .. وتقديرك يكون في مكانه .. خليك بعيد من الموضوع ده .. زي الكانك ماعرفت حاجة ولاتدفع ليهو ولاقرش ولاتحاول تطلعو من السجن خليهو يقعد شوية عشان يفهم الحياة .. لانو لو طلعناهو بعتبر القصة لعبة وكل مرة يمشي يعمل ليهو كفوة ويخت في راسه انو نحن ح نطلعه في النهاية ..
التهامي قال لي امي راجلك كلامو صح وماتفتحي خشمك ده تاني .. لكن والله انا ماكنت بتصور انو عارف يكون بالطريقة .. سبحان الله اصلا مابظهر على شكله انو ممكن يتصرف بالطريقة .. لكن ياحاج بس انا طالب منك طلب .. خليني امشي ليهو زيارة عندي كلمتين داير اقولن ليهو ماينساهن لمن يموت .. قال ليهو امشي بس ما تحاول تساعدو ولا بي قرش .. انا مصاريف ما اديتهن ليهو .. وماعارفو بتصرف من وين .. ده كلو الكلام ده عرفتو بعدين ..
اها يازول غايتو خالي التهامي جاني في السجن .. وطلب الزيارة وطلعت ليهو اول حاجة ما اتكلم معاي بس قعد يعاين لي في وشي
وصاري وشو صرة انا قلت الزول ده يكشني بي مصيبة زمان ..
قال لي والله خيبت ظني وانتهيت من كل ثقتي الجواي يا عارف
والله ماتستاهل تكون انت ود اختي نحن طول عمرنا ناس نزيهين وشرفاء وماحصل يوم دخلنا السجون ولا زغنا بقروش الناس .. لكن انت عملت وصمة عار في جبين الاسرة .. دي ما ح تتغفر ليك طول عمرك .. دي سابقة ما بتتنسى ياعارف ..
انت زول منحوس .. والله انا ظبطت ليك امورك واتصلت مدير الشركة الح تشغلك ..وشغل عمرك ماكنت بتحلم بيهو .. انت كنت في سنة ح تكون فوق فوق شديد .. لكن زول فقر وماعندك حظ وانا لايمكن اجازف اقدمك لي ناس كزول ثقة .. لانك حطمت ثقتي .. وانا جيت اقول ليك .. امنية بتي ربنا بحبها لاننا كشفناك قبل ما نتدبس فيك .. لاننا كنا ح نندم ندامة السنين .. وبتي كانت ح تعيش حياة المأسي والحرامية .. وتربي اولادها بي قروش الناس المساكين وراجلها نص عمرو في السجون بي حق الحرام ,, وانا هسي جيت اقول ليك انت ماعندك عندي عهد وبتي تاني ما بشوفها .. ولو بقيت اخر راجل في الدنيا .. طبعا خالي التهامي قال كلامو ده كلو وما خلاني رديت بي كلمة ولا اداني فرصة ادافع عن نفسي بس قال كلامو ده ومشى .. انا في لحظة افتكرت انو بي جيتو دي جاي يحلني من السجن لكن اتاريهو جاي يوريني وقفة الاهل شكلها شنو في الزمن ده ..
المهم انا والله حزنت على امنية حزن .. وحسيت بي انو قلبي ده انشق نصين .. بدون مبالغة لمن خالي التهامي مشة مني انا قعدت ابكي زي الشافع الامو خلتو عند الجيران ومشت البكا ..
انا طيلة ايامي الفي السجن امنية مابارحت بالي ولاغابت عن خيالي والله اجي انوم اتذكرها النوم يطير من عيني .. وكنت مقلق قلق ماطبيعي اني اتحرم منها .. لكن الحمد غايتو الشر التخافو تقع فيهو .. بس اقول ليك حاجة انا فقداني لي امنية .. قلب شخصيتي فوق تحت بقيت زول حاقد وماعندي حاجة لي زول وماعندي مانع اقعد في السجن .. ولا اكل حرام ولاغيرو .. وقلت في نفسي .. بس اليجي عصمت ده وانا بوريهو الانتقام .. ياخي العملها فيني عصمت.. النجار في الخشب ماعملا .. بس معقول عصمت يجي ؟
اها يازول تاني يوم بعد خالي التهامي فات .. جاني واحد طلب زيارة وقال لي انا جاييك من طرف عصمت .. وعصمت قال ليك سيب الجراسة واصبر الشغل ماشي تمام .. ورسلي معاهو مصاريف وتلفون وشريحة .. انا اساسا قاعد والله قعدة مريحة التلفزيون والجرايد والشاي بالترمسة والأكل الماخمج ووضع تقول فندق ماتقول سجن.. اها قلت للراجل عليك الله كلم عصمت يجيني انا خلاص قرفت من الحبسة دي قال لي الشيك التاني بحل بعد خمسة يوم تطلع لشنو؟ انت اصبر وخليك قبلك وعلى الاقل خليك واثق في صاحبك .. عصمت ده بعزك شديد وشغال معاك بي قلب واحد .. قلت ليهو يعني ما ناسيني ؟؟ قال لي ناسيك كيف يعني انت قايل وحدك الضحية .. عصمت جه عندو تقريبا تلات ضحايا .. . .. قلت ليهو جدا مافي مشكلة انا بصبر واشوفو موديني وين ..
المهم بعد المدة تمت والخمسة يوم فاتت والاسبوع فاتت واسبوعين .. وانا قلقت جدا وماعارف الحاصل برة شنو؟
واصلا الشيك التاني حلا .. وقدموهو والزول عرف انو انا في السجن .. والقصة بقت متراكمة علي . وبقيت مطالب 21 مليون وانا كان باعوني مابجيبهن ..
المهم يازول انا بقيت منتظر وماعارف القدر موديني وين وابوي تاني ماجاني زيارة .. وامي ماجات .. قالو ابوي قال ليها لو مشيتي ليهو تاني ماتجي راجعة البيت ده يعني باختصار طلقانة .. انا ذاتي ماعايزها تجي وتشوفني انا مسجون ..
اها يوم جاني صاحبي انور الكان وصيتو لي عصمت .. قال لي والله انا تعبت تعب عشان الم في زولك ده .. وبلغتو بي كلامك .. بس ماجبت ليهو سيرة القتل دي ..
وعصمت قال لي .. انا عارف ده صاحبي ومابفرط فيهو وما بخذله .. عارف جاني في البيت ..وطلب مني اقيف معاهو .. ماممكن اخذله امشي كلمو قول ليهو اصبر الشغل ماشي تمام.. وح نطلعك الاسبوع الجاي .. اها طبعا ياعارف انا مشيت كلمت امك قلت ليها عارف ح يطلع الاسبوع الجاي ..
وموضوعك خلاص مرق ياعارف بس الله يخليك تاني ما تتورط في شغلة زي دي .. قلت ليهو والله انا يادوب بديت .. انا تاني عندو شنو خايف عليهو .. امنية وضاعت مني .. وحكيت ليهو قصة خالي وكلامو القالو لي .. والله بحكي ليهو وببكي .. و انور ده اتأثر تأثير شديد خلاص ..وقال لي يازول لو ربنا جاعل ليك فيها قسمة بعد كدي بترجع ليك .. قلت ليهو هي القسمة دي على كيفنا .. ده موضوع بقى مستحيل الحمد لله غايتو لكن حياة الدنيا مسخت علي .. ياربي هسي حال امنية يكون كيف بعد ابوها يفاجئها بالحقيقة وانو عرف الحاصل ..
المهم انور قال لي انا بكون مواصل معاك لمن تطلع .. في حاجة مهمة جدا .. انا دخلت في ضغوطات نفسية شديدة .. اول حاجة دخلت في لعبة خطيرة وانا ماكنت عارف النتيجة .. نمرة اتنين عصمت خدعني انو في شغل وما كلمني قال لي شغل بتاع شيكات كاشفة .. الشي التالت كونو عصمت يغيب مني من دون ما يفهمني .. الشي الرابع عدم المصاريف في السجن .. الشي الخامس موقف ابوي معاي كان موقف سلبي جدا وما وقف معاي لاماديا" لامعنويا"
الشي السادس انهيار امي .. والمشكلة السببها ليها ابوي ومنعها انها تزورني في السجن .. والحالة الحاصلة عليها ..
الشي السابع الثقة الانهدت في نفسيات خالي وانو ظنو خاب فيني .. الشي التامن ضياع امنية اغلى امنية في حياتي .. الشي التاسع .. الموقف السلبي الوقفو معاي خالي التهامي .. انو ماحاول يسألني عن ظروفي .. لكن في النهاية عرفت انو كلو بي سبب كلام ابوي ..
المهم يازول انا كانت علي ضغوطات نفسية خلتني انا انسان متغير من جوة ..
يعني لغاية اللحظه دي كنت متباعد من الحرام ..ومن هنا كانت نقطة التحول ويادوب فكرت في الاجرام .. وبقيت ماعندي مانع من الحرام اي كان وتعال شوف..

الى اللقاء ..

لامارا · 03-08-17, 04:48 PM

الحلقة 8

قبل ما اقول ليك المستوى الانحداري الاخلاقي .. الانا انزلقت فيهو .. اوريك بعض الملامح العجيبة من الحاجات في السجن ده .. مرة صاحبي النزيل عبدالحميد .. قال لي شايف قمرالدين ده ..عاين ليهو كويس .. احكي ليك قصتو .. قمر الدين ده.. واحد من المساجين في الشيكات .. الزول ده ياعارف .. هو واخوه اسمو حاتم .. وعندهم اخت واحدة ماعارف اسمها منو ؟ كانو جيرانا في الحلة نشأوا ايتام .. ابوهم اتوفى وهم صغار .. وربتهم امهم بي الشغل في البيوت ..
والمجتمع اذاهم اذية ماتتخيلا .. وامهم اتعرضت للتحرش اكتر من ستة مرات .. وهم اتعرضو للاذى .. وحاتم هو صغير حصلت عليهو مشاكل من الناس .. واعمامهم اتخلو عنهم .. وقرايبهم ماوقفو معاهم .. اي زول بقى مشغول في حالو ومسؤولياتو.. وناسين انو ربنا امر بالاحسان الى اليتيم .. المهم في النهاية حاتم لمن كبر شوية منع امو من الشغل في البيوت..
وبقى يمشي السوق لي ناس الدكاكين .. يحكي ليهم حالة الاسرة .. كان صغير برضو ما اكتر 12 سنة .. يعني كان بيشحد بالواضح كدا.. المهم كان بلاقي معاملة سيئة شديد من الاغنياء .. واي زول يقعد ينهر فيهو .. ياولد امشي اشتغل بيع الاكياس .. ياولد امشي بيع موية .. واحدين يقولو والله ده تلقاهو عندو قروش اكتر منكم .. وكلامات جارحة شديد .. وهو كان مضطر .. خصوصا اختو كانت مريضة بالازمة .. ومحتاجة لعلاج دائم .. المهم .. في النهاية البت ماتت.. والام جاتها حالة نفسية من الظروف ومعاملة المجتمع القاسية .. ورقدت في المستشفى 8 شهور مع الولدين وبرضو اتوفت ..
الولدين ديل الاتنين ديل .. انحرفو انحراف ماتتخيلو .. المهم بقو شغالين .. مرة كماسرة .. ومرة ورنيش.. ومرة شنو وشنو .. لغاية ماكبرو .. وفجأة لقيناهم ليك بشتغلو اشغال خطرة وقوية جدا .. وجرايم ماتتخيلا .. وده كلو بي سبب تعامل المجتمع مع الطفل الفقير .. يربي فيهو النفسية الحاقدة .. -(عبد الحميد بحكي لي وانا حاسي بانو الحالة دي حصلت على انا بالضبط) -..
اها عبد الحميد قال لي .. هسي قمر الدين ده .. شغال ضحية.. وحاتم البوس الماسك الاعمال بره .. الحاصل كالاتي.. انو قمرالدين بكتب شيكات بي ميات الملايين .. وبدخل السجن.. واخوهو بكون شغال برة بالقروش .. وبنو البيوت .. وركبو العربات .. من امتصاص
دماء المجتمع القبيل ما احتضنهم .. وعاملهم المعاملة القاسية عديمة الرحمة .. شفت ياعارف المنظومة دي عاملة كيف؟..
هسي حاتم متزوج.. وساكن بيت طوابق في الكلاكلة .. وقاعد يجهز لاخوهو ده واخوهو للزواج .. واخوهو قاعد مرتاح في السجن.. والشغل برة فل في الفل .. انا من جيت هنا لقيتو قاعد .. وسيد الحق المسكين مبسوط انو قمر الدين في السجن .. وقمر الدين مبسوط انو شغال بي قروش جاياهو بالبارد ..
غايتو بياختصار عبدالحميد ده حكى لي قصص .. وانا براي شفت بي عيني حاجات تجيب الخلعة .
طيب في السجن انا بقيت خلاص ماقادر انتظر اكتر من كدا .. وركبت شريحتي في التلفون الجابوهو لي.. وبقيت بس بضرب لي عصمت .. عشان اتكلم معاهو .. بلقى تلفونو مقفول ..
ضربت لابوي .. فتح لي الخط .. قلت ليهو الو انا عارف .. كيفك يابوي .. مارد لي السلام.. ولا اتكلم معاي ..
قفل لي الخط في وشي .. انا اساسا كنت عايز يديني اتكلم مع امي واطمنها .. ما اكتر من كدا .. لكن تصرف ابوي ده معاي .. زادني اصرار على الناوي عليهو ..
على كل حال .. بعد يومين كدا .. بعد ماخلاص زهجت ودمي فار .. جاني العسكري .. قال لي عندك زيارة .. طلعت لقيتو ليك ده عصمت الملعون .. لابس جلابية نضيفة وبيضاااااء.. وطاقية ونظارات بيرسون ماركة .. وشايل تلفونو .. وريحة السجاير المخلوطة بالعطر الباريسي دي ماشة قدامو ..
اول ماشافني قعد يتبسم وقال لي .. منور منور ياعريس ..
ياخي انت اول يوم اظهرت انك زول جبل.. ومابهزك ريح.. مالك ياخي اتجرست من السجن؟؟ انت ماعارف انو هنا في ناس قاعدين في السجن بالسنين وبي محض ارادتهم ؟؟
اها يازول جيتك رايك شنو؟ وباكر اجراءاتك بكتمل .. وح تطلع من السجن عزيز مكرم.. وتمشي تشوف في رصيدك في البنك.. بقى كم .. انت قايل انا بغش عليك؟؟ .. قلت ليهو ياعصمت ياخي انت زول غريب .. كيف انت تفاجئني بي حكاية زي دي؟؟ انت واعدني بالغنى .. اجي اتفاجأ باني مقبوض علي.. والقى نفسي في السجن؟؟ .. وانت تغيب لا القاك شرق لا القاك غرب؟؟ .. معقولة ياخي ؟؟
قال لي ياعارف.. اولا" انا عايز امتحنك .. وعايز اشوف ردة فعلك في ثقتك فيني .. وعايز اشوف صبرك على السجن ..
ثم ثانيا انا لو قلت ليك.. انت ح تتسجن . ماكنت بتقبل لي الموضوع.. لانو كل الناس فاهمين السجن ده عذاب .. انا فضلت انك تخش السجن.. وتشوف مساجين الشيكات .. اوضاعهم في السجون شنو؟؟ عشان اخلق علاقة بينك وبينك السجن . وتاني ماتخاف من حاجة اسمها سجن .. وتتنشط للشغل الجاي .. رايك شنو يابطل .. ياخي معقول.. انا اتخلا منك .. واخذلك واخليك في السجن .. وازوغ؟؟ والله لكن ظلمتني ياعارف .. انا جعلتك صديق بالجد .. وعاهدت نفسي اني اساعدك .. لكن انت طوالي بس شكيت فيني .. واعتبرتني داير ارميك وازوغ .. انا ماعارف الناس ديل دايما بظلموني كدا ليه.؟
انا قلت ليهو انت ياعصمت.. المفروض تعذرني ياخي .. اولا انا اول مرة اواجه حياة السجن .. وانت ماظهرت لي عشان تطمني على الاقل .. وانا ياعصمت حصلت علي كوارث بسبب المجازفة دي.. انت ما تتخيلا .. وفقدت ابوي وخالي .. وفقدت الانسانة الوحيدة الحبيتها وبنيت عليها امال حياتي ..
قال لي يازول ابوك برجع ليك .. وخالك برجع ليك .. وبي قروشك بتشتري بت الوزير.. سيبني بالله عليك الله من الحب والكلام الفاضي ده .. ده مازمن حب .. ده زمن قروش ..
اها يابطل.. انت نستعد لبداية حياتك الجديدة؟؟ ولاغيرت رايك؟؟ .. لو غيرت رايك .. قروشك موجودة في البنك ..
ولو عايز تواصل معانا .. انت اساسا بقيت من الكوكبة المباركة ..
قلت ليهو طيب كويس.. لي بكرة اشوف البحصل شنو.. ان شاء الله ..
بي اختصار بكرة عملو لي اجراءاتي.. للطلوع من السجن.. وودعت اصحابي.. وقلت لي عبد الحميد.. احتمال كبير اجيك راجع .. قال لي يازول في انتظارك .. والبيت بلاك مسيخ ههه .. شفت بالله المحن دي ..
المهم يازول طلعت مع عصمت.. ومشيت البنك .. لقيت في حسابي في خمسة مليون .. وماصدقت .. اول مرة في حياتي امتلك المبلغ ده .. ماكنت بحلم بيهو .. عصمت قال لي دي قروشك.. وحقك من العملية الفاتت بس.. كان ليك نصيب الاسد ليه يا حلزون ..؟؟ حلزون دي برضو بقولوها للضحية .. وطبعا ده كلو عشان انا اضوق طعم القروش.. واواصل في الشغلانة ..وفعلا ده الحصل ..
اها يازول شلت جزء من قريشاتي ديك.. ومشيت البيت .. لقيت امي سلمت علي بالاحضان.. وهي تبكي .. وتضرب فيني بي يديها.. في عملية هسترية كدا.. دلالة على الشوق المخلوط بالغضب .. سلمت علي غايتو اطمنت . الساعة كانت زي 12 ظهر.. وابوي بالطبع ماموجود.. في المنطقة شغال .. المسكين بي شقاهو وعرق جبينو .. وانا اشهد انو ابوي ماحصل دخل لينا لقمة حرام في البيت ..
امي طبعا" حكت لي.. كيف هي عرفت اني في السجن .. وطريقة كلام ابوي ليها .. وهي كيف كلمت خالي التهامي .. وحكت لي الانهيار الحصل على امنية بت خالي ..طبعا امي ماكانت عارفة اساسا انو في اتفاق بيني وبين خالي على اساس انو يديني امنية ..
عرفت بعد خالي اتبرأ مني .. اها ماحكيت ليك ..
طبعا" لسع ناس خالي ماسافرو السعودية.. لكن ماباقي ليهم كتير .. وانا مشتاق اشوف امنية .. وماعندي وش بوديني بيتهم تاني .. بعد الذلة الذلاني ليها ابوها .. المهم قعدت اتونست مع امي .. وانتظرت شوية لغاية ماجن اخواتي الصغار من المدرسة .. سلمت عليهن .. واتخارجت سريع من البيت .. وشلت شنطتي معاي .. امي حاولت توقفني .. قلت ليها والله تاني دقيقة مابقعد في البيت ده .. وماعايز اشوف الزول ده تاني (بتكلم عن ابوي)
وطلعت خليت امي دمعتها في عيونها .. التقول هسي بعاين لي دموعها .. اها يازول من دربي داك .. اتصلت على عصمت وحدد لي مكانه .. ومشيت ليهو ..
قلت ليهو يا عصمت.. انت البارح سألتني.. قلت لي لو عايز تواصل معانا في الشغلانة ولالا؟؟ صح؟؟ .. قال لي ايوه صح.. اها قررت شنو يا استاذعارف؟؟ ..
قلت ليهو انا مستعد ياعصمت اواصل.. اصلا ماعندي حاجة تاني خايف عليها .. انا ودعت ناس البيت.. وتاني ماراجع اساسا" وابوي ماعايز اقابلو .. ومابرجع ليهو الا وانا واقف علي حيلي ..
قال لي اها انت هسي يامعلم ملك وسلطان .. عايز تكون من الاجنحة ولا حلزون؟ قلت ليهو البتشوفو انت .. طبعا زي ماحكيت ليك .. الجناح ده القراي .. والحلزون يعني ضحية مسجون كويس؟؟ اها انا قلت ليهو خليني في العملية دي اكون بره .. اتعلم الشغلانة البرة وبعدين تاني التضحية هينة والسجن عرفتو ياصاحبي .. قال لي اسمع واجعلني ليك من الناصحين ارجع السجن .. اساسا" انت قاطعت البيت .. وماعندك حتة تمشي عليها .. ولمن تكون في السجن نصيبك من العملية بكون اكبر .. قلت ليهو الله يجعل البركة
قال لي خلاص بكرة جيب دفترك وجيب معاك تلاتة مليون وتعال لي في دكان كنجاك .. لكن في اللحظة في حاجة حصلت بي وراي في البيت ..انا عرفتها فيما بعد بعد فوات الاوان ..
الحصل انو امنية وامها جو بيتنا .. بعد ما انا طلعت .. وامي قالت ليهم عارف طلع براءة .. وكان في السجن مظلوم .. وامنية طبعا" مشت كلمت ابوها .. وابوها اتأسف على الكلام القالو لي .. وقرر يجيني في البيت عشان يعتذر لي ..
لكن انا مارجعت البيت تاني .. انا قررت ارجع السجن .... وامي ماعارفة رقمي عشان تكلمني .. شفت الخوازيق دي؟؟..

الى اللقاء ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري