16-04-11, 01:36 PM
| #1 | ||||
| كاتبة في قسم قصص من وحي الأعضاء
|  غــــــــــــــاليـــــــ ــــــــــــــه السلام عليكم ورحمة الله وبركاته مساكم الله بالخير حبايبي اشتقت لكم وعندي فكرة وان شاء الله تعجبكم وتحبونها واذا ما عجبتكم الشكوى لله  الجزء الاول تمشي وتطيح وتصيح بصووت تحاول ما يكون عالي يالله سترك يالله اني في ذراك عبد الله انت تشوف الي انا اشوف عبدالله .. تعالي سنعي القربة الي تخر والله اني اشوف زول يمشي ويتمايل والله ان به بلى اصبر اصبر خلني اتوكد منه راحت تمشي بسرعه بينها وبين الزول الي شافته عقم صغير تحاول ترقاه تشوف وش الي شافت بسم الله عليتس وش فيتس يمة طاحت سمعت كلمة يمة حست انها خلاص لقت غايتها جا عبدالله مسرع يشوف الي طاحت في يدين مرته عسى ماشر يا صيته وش ذا البنت حلقها جف انا داخله على الله ثم عليكم عبدالله .. زبنتي :::::: رفعه هاتي السحله وخلينا نغتبق مشاء الله عليتس يا رجحا تسنتس اميرة تومرين علينا رجحا .. وانا وش اسوي قاعدتن اجيب التمر رفعه .. وانا مانيب حالبتن الناقة احلبيها انتي البارح انا الي حالبتها رجحا .. امحق بنت عم شكلي بنادي ضيدان وذا ضيدان بنفسه جاكم رفعه .. مالت عليتس تخلينه يتفرح علينا ضيدان .. وش فيكن رجحا .. احلب لنا غبوق ضيدان : ياوالله التسواديات الحين عاجزات من حلب ناقة رفعه .. مهوب تسواده مير الحق حق ضيدان يقطع كلامهم الغير مهم في نظرة .. اسمعن بكرة تراني بروح للبلاد رجحا .. وش عندك ضيدان .. بروح ادور لي سيارة ابوي عطاني مصوته ناقة طيبة ببيعها وبشتري لي سيارة رفعه .. معطي خيرها مكفي شرها رجحا .. اقول يا ضيدان تسنك تبي تخلينا وتروح للبلاد رفعه .. ههههههه ذالتن عليه رجحا .. فرقت عيونتس الثنتين انا قصدي انه بيخلي الابل علينا ضيدانه وهو يشرب اخر قطرة في السحلة الي في يدة : يارب يسخر لنا الشايب ونبيع الابل تاليتنا في البلاد مانيب قاعد حارسها رفعه .. عجلوا خلونا نعود على اهلنا الليل بيجنا وحنا في محلنا :::::::::::::::::::::::::::::::::::::::::::::::::: :::::::::: يمه تكفين يمه علميني وين راحت والله ياعلي مدري وين وجهتها علي .. انا خابر انتس الي خليتها تنحاش مير علميني وين راحت خل فهد يهدا الحين يتلغف ايدور الشر دواره علي .. طيب تهقين فلوة بخير ان شاء الله ربي يحماها علي .. قلبي يغلي اختي ومقدر ادافع عنها وش انسوي يمك اذا به واحد مثل فهد وابوك مواعده منهو صغير فلوة له :::::::::::::::::::::::::::::::::::::::::::::::::: :::::::::: :::::::: جعلها ماتعود من راحت وانت ماذقت عيشة فهد .. تكفين يمة خليني النار الي في قلبي تشب وش تبي فيها الي مايبك وش تبي فيه فهد .. ليه غديت ضحكتن للجماعه كل من شافني نزل راسه وخشه وجه يبتسم جعلهم يضحكون من جنوبهم اهم شي يا ولدي صحتك المرة بدالها مرة لكن انت من لي غيرك والله لا زوجك وحدتن تسواها :::::::::::::::::::::::::::::::::::::::::::::::::: ::::: رجحا .. يالله بجيكم اتسمر معكم على الضو في الليل والحين بروح ببلي للوايت تشرب رفعه .. ضيدان بسبقك لهلي ضيدان .. تعالي بس حولي بيني وبين البل وخلينا انتعاون على طعامها رفعه : بتطعمها توها ماكلتن لين طلع مع مناخيرها ضيدان قلعتس لونه يسمعتس ابوي تنظلين ابله وبعدين تعلمي بكرة بروح وخليتس ترعينها بلحالتس رفعه .. شوف ابوي مقبل علينا تسنه اسمعك السلام عليكم لا تعبت ضيدان .. وعليكم السلام لا ندمت عبدالله (ابو ضيدان ) .. ترا قدامكم ضيفه روحي يارفعه بسنع البل مع ضيدان ضيدان .. منهي ذا الضيفه عبدالله .. وحدتن زابنه علينا ضيدان .. وش قومها عبدالله .. بدني اعلمك بسالفتها :::::::::::::::::::::::::::::::::::::::::::::::::: :::::: مسكم بالخير مسها بالرضى والعافيه رفعه .. وش لونكم طيبين طاب حالتس رفعه تعاين الضيفه بطرف عينها والضيفه الدموع ماخلتها تميز رفعه رفعه بصوت واطي لامها عسى ماشر صيته : ماشر ان شاء الله ركبي العشا لهلتس بيجي ضيدان بعد المغرب جويع رفعه .. بري حالي تسني بعد جايتن مثلة واكرف عند البل وهناه صيته : تسنتس تبيني اطبخ ابتسمت الضيفه وبان في فتحت برقعها وخلا ام ضيدان تبتسم بعد صيته .. بيض الله وجهتس يارفعه كانتس خليتي فلوه تبتسم | ||||
|
|
16-04-11, 02:10 PM
| #2 | ||||||||||
| إدارية ومشرفة سابقة وكاتبة وقاصة في قسم قصص من وحي قلم الأعضاء وأميرة الخيال وشاعرة متألقة بالقسم الأدبي  
|  وعليكم السلام ورحمة الله وبركاته ياهلا والله بغيوم الشوق ..  اكيد بتعجبنا مثل الغريبة وبيتنا الطين والحلم الغامض ..ان شاء الله ماراح تقل عنها روعه..  القهوة يابنات  | ||||||||||
|
|
|
17-04-11, 01:43 AM
| #3 | |||||
| روايتي مؤسس ومشرفة سابقة وقاصة في منتدى قصص من وحي الاعضاء  
| و عليكم السلام و رحمة الله و بركاته ... يا هلا بالحامل و المحمول ... هلا بغيوم الشوق و جديدها غالية ... إسمحى لى أن أعبر عن مدى إعجابى بكتاباتك الرائعة و إن شاء الله غالية لا تقل بروعتها عن شقيقاتها ... سعيدة لأنها ستكون المرة الأولى لى لأتابعك فيها بارت بارت فلوة ... هربت من زواج دون رضاها بموافقة أمها و أخوها و لكن المصيبة الآن بفهد و أبوها >>> ربى يستر لأن ما فعلته أتوقع له عقاب واحد فى مجتمعهم و هو القتل ... أليس كذلك ؟؟؟ غيوم الشوق متابعاكى و شكراً لك | |||||
|
|
|
02-05-11, 10:33 PM
| #7 | ||||
| كاتبة في قسم قصص من وحي الأعضاء
| الجزء الثاني شقومتس ما جيتينا امس تسمرين معنا عند الضو والله يارفعه ما حطيت جنبي بعد العشا الا وانا راقدة منهد حيلي رفعه .. يا سم الله على عيونتس الثنتين رجحا .. وش سالفة المرة الي عندكم رفعه .. بسم الله وش دراس عنها رجحا .. ابوي علمني رفعه .. عمي غريبة عمي طايرتن بوهته مع البل تسيف له قام يسولف معتس رجحا .. خبلس يارفعه هاقتن ابوي يسولف معي ابوي يحذرني اسوي سواتها رفعه .. هههههههههههههههههه اني والله استغربت تدرين يا رجحا وش قصتها رجحا .. وش هي رفعه .. جاو بيملكونها على ولد عمها غصبن عليها وتقوم امها وتخليها تسري وتنحاش رجحا .. عزتي لعينها ما اخبل البدو الي مايبك وش ابي فيه رفعه تبي ترفع ضغط رجحا .. يمكن نزوجها لضيدان رجحا .. جعله سعيدن ومبارك هذا الساعة السفره رفعه .. فرقتس ماتبين اخوي رجحا .. انتس خابره ابيه ولا ما ابية مالي شور دام الشايب حي رفعه .. ماعليتس يوه الي شبت ضوتس دام ضيدان رجلس رجحا .. وضيدان اخوي قبل ليكون رجلي وجعل عيني ماتبكيه مالي في الدنيا غيرة هو الي ينصرني على جور الايام رفعه .. اممممممه جبتي لي العبرة قومي خلينا نرقى العرق واجر المنكوس رجحا .. عزتي لمن جريتي له المنكوس رفعه .. وش يدريس يا رجحا يسمعني واحدن ثمن يطير عقلة يقول هذي اهي ولا مهيب اياها يا ويل حالي ويلاه ثمن يطير بي رجحا .. يطير بتس عسى ما تطحين على رقبتس ثمن تنعفص وتجين تدورين الي يعدلها رفعه : فرقت عيونتس الثنتين كانتس حارمتني حتى اني اتخيل :::::::::::::::::::::::::::::::::::::::::::::::::: :::::::::::: يالله حي ضيدان ضيدان .. يامرحبا بسعد سعد .. شحالك شحال الي خلافك ضيدان بخير زان حالك شلونك انت سعد ..من الله بخير وش انتي جاي تدور ضيدان .. ابي ابيع لي ناقة وشتري لي سيارة وعود لهلي سعد .. ياضيدان بيروح عمرك وانت طردي ورى البل قدم لك على سوداني يرعى البل وتعال توظف ضيدان .. وانت وش تشتغل سعد .. والله يا خوك اشتري من ذا الاراضي وطقطق في الحديد وفي كل شغلة تعال معي انت رجالن حقاني ومن حضه الي بتخاشره ضيدان .. بستشير الشايب اذل يضيق علي ولا يجي في خاطرة سعد .. خلاص اذا صملت تراني دايم هناه تعال دونك وابشر :::::::::::::::::::::::::::::::::::::::::::::::::: :::::::::::::::::::: بروح ادور فلوه ام علي .. توكل على الله والله يقويك مع اني ابيك تصبر علي .. ماعاد به صبر ابي اشوف اعلومها واحوالها ولونتس خليتيها تعرس على فهد كان ابرك لها من ذا النحشه ام علي .. تحسبني مابيها تاخذ ولد عمها مير راسها يابس وقمت تدعي على نفسها ان كانها خذته ان تشعل في روحها علي .. حتى فهد ضايقن علي واشوفة جامعن ابله وعندها سوام يبي يبيعها ويروح للبلاد ام علي .. بتضيق علي وسمية تحسبني ودي ان فهد ما ياخذ فلوة ودام فهد بيروح للبلاد اذا لقيتها خله تعود علي .. والله ان كانها عودت لزوجها لفهد غصبن عليها ام علي .. تكفى ياولدي يتيمه تبي ربي يحافيك علي .. وهذا الي لاوي يدي :::::::::::::::::::::::::::::::::::::::::::::::::: :::::::::::::::::::: خلي عنتس ياخاله انا الي بكف الاغراض صيته .. ريحي عمرتس يابنتي وبتجي رفعه وبتساعدني فلوه .. الله يعين رفعه اذا جات انها تعبانه صيته .. من يسرح ببلكم يامتس فلوه .. اخوي علي صيته .. الله يخليه لكم يارب الا بنشدس يمه وان كانتس بتضيقين فسمحيلي فلوه .. كل شي منتس يمه زين صيته .. وش في ولد عمس يومتس عايفته فلوه بجزع .. مافيه شي مير النفس وماتهوى ولا فهد مابه اكرم منه ولا اسنف منه ورجالن مشكل احم احم السلام عليكم صيته .. يامرحبا والله ضيدان .. وشلونكم صيته .. طيبين طاب حالك تعال تقهو ضيدان وهو يقعد في مكان ما يكشف فلوه ابوي وينه صيته .. راح مع عمك يعس ضيدان .. ووينهم بعد بيشدون صيته .. ياولدي البل يسرن في الليل تسن ماصلح لهن وانت اشوفك ما شريت لك سيارة ضيدان شريت بس خليتها في البلاد صيته .. ليه ضيدان .. بعود عليها صيته .. يمك تقوم تروح وتجي مع ذا الخطوط ضيدان .. يالله بروح للبنات صيته .. قدهن بيجن ولا شاري لهن شي ضيدان وهو يبتسم .. اي بالله شاري لهن تبينهن يا كلني كان الوقت العصر والعروق بكل مكان صاير لونها غريب هي حمرا بس وقت العصر طالع غامق شوي بسبب ان بعض العروض تضل بعضها يكون لها ضل وفيه اعشاب بس مو كثيرة وصوت طيور شكلها ترجع لبيوتها كان معه عصاته وكيسه ماليانه قريض وحلاو وكيسه مليان حجر بطارية عشان اراديو كان يسرع بخطواته يحب رجحا لكن عارف انها تحبه مثل اخوها لكن ما يقدر يبين انه ميت عليها يدللها على انها اخت وبس وعارف انها قابلة فيه بسبب ابوها وده يرفض لكن قلبه عجز انه يقول لا رفعه كانت تجمع تالي البل عشان تروح مع مقدمها كانت راكبة الحدوج وهو الي يقود البل ويوضع عليه الزاد كان معها عصى وتصقع ركبه بالخفيف عشان يمشي ويجمع لها ابلهم الابل كانت كثيرة مرة وماتقدر عليها بلحالها ضيدان كان يساعدها دايم واليوم يالله يالله تقدر عليها تطالع رجحا الي سبقتها لكن تقدر تشوف طرف ابلها رفعه .. عسى رجحا ماتروح وتخليني وش بسوي لا يغدي شين من ذا البل كان منظر الابل يسلب القلب من مكانه فيها البيض العفر وفيها المجاهيم السود وفيها الحمر اقبل عليها يالله حي رجحا رجحا .. الله يبقيك بشر ياربك شريت لك سيارة ضيدان .. ابشرس ماتشوفيني ماحمل رجحا .. جعل ربي يغنيك بغناته عطني اياه خلني اشيله منك ضيدان .. تبين رفعه تلبلبني بعصاتها رجحا وهي تضحك .. الله يرحم حالها انطر عليها وتجيها ام الركب بمحلها ضيدان .. لا والله ما انطر عليها رجحا .. دامك تحبها عيانها بلحالها تطارد ذا البل ضيدان .. خلها تعود بروح للبلاد ومن الي بيساعدها رجحا .. تقوله جاد ضيدان .. أي والله تسان الشايب وافق مشيت ذا الاسبوع رجحا .. ومن تخلينا له يا ضيدان ضيدان عارف انها ماتقصد الي هو يتمنى .. ماعليكم ان شاء الله اذا زانت الامور خذيتكم معي كان ود رجحا تروح معه تبي تنحاش من قسوة ابوها | ||||
|
|
|
02-05-11, 10:34 PM
| #8 | ||||
| كاتبة في قسم قصص من وحي الأعضاء
| الجزء الثالث يمه تكفين لاتحديني على قصاي فهد يا ولدي البلاد تجيب لي ضيقة صدر فهد .. اسمعي يمه بشتري لتس مزرعه وبحط لتس فيها خيمة عشان ما يضيق صدرتس وبشتري لتس ذود وش تبين بعد ام فهد .. الله يسامحك تعرفني ما اداني شوفت المدن والمباني فهد .. انا يمه بشتغل وماعاد نيب رايح للبر مرة ثانية وتكفين يمه ارضي علي عشان ربي يوفقني ام فهد .. الله يوفقك يمه وخلاص حتى قسمي من الحلال الله عطاك اياه فهد .. قسمتس بشتري لتس به ذود وحطة في طرف المزرعه عشان ما يضيق صدرتس ام فهد .. الله يوسع خاطرك بذكره يارب والحين وش ناوي تشتغل فهد .. ازهليها يمه انا من زمان ما احب مطارد البل الحين بشتري وببيع بالاراضي والبيوت والله يوفقني يارب ترددت بغت تقول وبنت عمك بتخليها تروح لكنها تعرف فهد زين ما يحب يبين الي في خاطرة تدري انه يبي يشغل وقته عشان ما يفكر بفلوة وكيف انها راحت وخلت الناس تشمت فيه :::::::::::::::::::::::::::::::::::::::::::::::::: ::::::::::::::: كان بيت الشعر مفتوح وفي اخره النار مشبوبه وحولها دلال القهوة ( بيت الشعر معروف انه اسود ومن غزل الغنم يصنع ) عجلن علي بالسمن رفعه روحي لخالتي بالسمن وانا بقطع البصل رفعه .. يمه اصبري بنحط السمن على البصل ونجيبه مرتن وحده كانت صافيه تزين جمرية وهي قرص على الجمر وتمرده بالسمن والبصل فقط وطريقته يعجنون عجينه ويحطونه في تاوه على الفحم لين تنشف ثمن يدفنونها في الرماده وقبل لا يدفنونها يحطون جمر عليها من فوق عشان تنشف رفعه .. هاتس يمه صافيه .. روحي ودي لبوتس القهوة كانوا فارشين فرشة برى بعد المغرب باقي نور خفيف مابعد اظلم الوقت كان جالس ابوها وعمها وضيدان وكان في الوسط سطل صغير فيه الفناجيل وماء وقدوع في علبه حديد عشان ما يجيه التراب خذى ضيدان دلة القهوة منها وجلس يصب لهم قهوة وهي رجعت لمها عشان تجهز معها العشا عشان يتسمرون على الراديو كان يجي البادية على إذاعة الكويت السلام عليكم رفعه .. يامرحبا برجحا رجحا .. والبقا هذا عشاي حطوه مع عشاكم رفعه .. وش زينتي رجحا .. ابوي صايد ارانب يوم راح يعس وطبختها صيته .. جعل خيرة يكثر رفعه .. ياوك ودي بفخذها رجحا .. اصبري بعد الشيبان الي يبقا اكلي منه رفعه .. والله العظيم ان اخذ قبلهم نعنبو دارتس حنا من اصبحنا وحنا ورى البل وهم يتمشون ويسعسون ويصيدون صيته .. جعلتس امحق من حتسى ذا ابوتس وعمتس رفعه .. يمه وش انا قايله احذري تقوليني شين ما قلته فلوه .. هههههههههههه ما قصرتي ماخليتي فيهم شي صيته ..عجلو بالعشا خلهم يتعشون يبه ابو ضيدان .. سم سم الله عدوك يبه تعرف سعد ال .. ابو ضيدان .. أي بالله اعرفه وين جيته ضيدان .. يوم رحت ابيع الناقة عينته ابو رجحا .. وانت ليه تبيع الناقة ضيدان .. ابي اشتري لي سيارة ابو رجحا .. سيارتي وسيارة ابوك ما تسدك ضيدان وعارف طبع عمه الشديد الحين لو افاتح ابوي في المراح للبلاد وعمي موجود والله ان يخرب علي ابو ضيدان .. ماعلمتني وش بلا سعد ضيدان .. يبيني اشتغل معه في البلاد ابو ضيدان وعقد حاجبة .. وحنا من تخلينا له ضيدان .. النات موجودات وكانهن ما قدرن على البل جبت لكم راعي ابو رجحا .. وش انت تبي في البلاد ضيدان.. ياعم مانيب قاعد طول عمري هناه ابي اشتغل ابو ضيدان .. منتب معرس ضيدان .. الا بعرس كان عمي وافق اجعها قلبها معجبها ضيدان ابو رجحا .. رجحا مهيب رايحة للبلاد ضيدان .. بس المره مع رجلها ابو رجحا .. كلامن يجيك ويتعداك بنتي معي هناه في البر الي يبيها وبياخذها يقعد معي اما تبي تاخذها وتروح بها للبر مالك لوا ابو ضيدان .. يابو رجحا استهدي بالله وهذا ولدك ضيدان وهو عصب وداري بنفس الوقت ان رجحا ماتبي تاخذه الا عشان تفتك من جور ابوها .. ياعم رجحا لي من و أنا صغير ابو رجحا .. تبيها ارعس ولا تروح للبلاد ابو ضيدان .. ومراح للبلاد ومامعك مره ماله لزوم حم يا ولد كان الصراع محتد بينهم لكن يوم سمعوا صوت الرجال كلهم فزوا اقلط ودخلن الحريم للخيمة بسرعه السلام عليكم وعليكم السلام يالله حيه الله يبقيك ولله ثم والله ما تذبحون لي شين ذذا الليل لليل وهدا ابو ضيدان .. ها والله ان تذبح لك بكرة يا ضيدان احلب الناقة وهات التمر | ||||
|
|
|
02-05-11, 10:35 PM
| #9 | ||||
| كاتبة في قسم قصص من وحي الأعضاء
| الجزء الرابع رفعه .. ابشر وكانن الحريم حاطين لهم فرشة برى الخيمة ومجتمعات فلوه ورجحا وام ضيدان الراديو عند البنات لكن ما يبن يشغلنه والضيف موجود جات رفعه وجلست عطيته بطانيتس يا فلوه خلاص ما عاد عندنا لتس بطانية صيته .. تقولينه صادقة ترا ما ينقال عليتس فلوه وهي تضحك .. ماعلي منتس كانتس عطيتيه البطانيه مرقادي اليوم بوزانتس كلمة بوزانتس تعني جوارتس .. غيوم رفعه .. لا بالله ما اداني احدن يرقد جنبي رجحا .. خلني اشوفتس لا عرستي ما قمتي تخمين الي جنبتس فلو رفعه .. شفتي يمه ويلها على العرس صيته .. تشر وتبشر رجحا وهي تضحك .. ليتني ما تكلمت قطعهم صوت ضيدان الي جاهم وجلس .. شكلكن تبن تسهرن من الي بيسرح مع البل بكرة رفعه .. والضيف هما ابوي عزمه للغدا ضيدان .. وياربتس تبيني اسرح انا رجحا .. عينوا خير انا الي بسرح بها التفت ضيدان عليها .. طيب البل مهيب واجد عليتس رجحا .. ازهلها يا ضيدان قم بواجب ضيفكم وخل رفعه تساعد عمتي تكلمت فلوه بحرج من ضيدان .. يا رفعه تراني بقوم بمحلتس وروحي مع رجحا رفعه .. بكيت عدوس يا فلوه تراني افرح ما جاني يوم جانا ضيف ابي ارتاح يوم من المسراح ضحكو كلهم صيته .. روحي مع خويتس يا رفعه فلوه عندي تسد محلتس صيته تلتفت لولدها .. شقومكم ارتفع صوتكم قبل يجيكم الضيف ضيدان .. انتي خابرتن عمي وابوي اذا ما عجبهم امر يالله تمسو على خير برقد رجحا .. وانا بعد بسري تمسو على خير التفت لها ضيدان .. تلاقين خير تبيني اوصلتس ابتسمت له رجحا .. مهوب من بعد البيت ضيدان .. ابي اقولتس كلمة :::::::::::::::::::::::::::::::::::::::::::::::::: :::::::::::::::: مشاء الله الله يبارك لك فيها يا ولدي والله يعينك من بيعاونك عليها فهد وهو يبتسم .. وش اسوي يمه بتس تبين تحطين لتس ذود (ذود هم الابل النياق النوق غيوم فهد .. ها يمه وين تبين تحطين البل عشان نزين لها حوش اني وسمية .. تبي تحوش على البل فهد .. ههههههههههههههه يمه لو اخليها بتاكل الزرع وسمية .. خلها تاكل جعله مهابيط العافية فهد .. ابشري لتس الي تبين وسمية .. وانت وش سويت فهد ابشرتس اموري متيسرة ان شاء الله والله يغنينا بغناه وسمية .. ماتبيني ادور لك مره فهد وتضايق .. وين تدورين لي يمه انتي تعرفين حد من هناه وسمية .. بدور لك من بناتنا من ربعنا فهد .. كلهن علي حرام والله ولا اخذ منهن احد قبل لا تحلفين تبيني اعرس زوجيني من بنات البلاد وسمية وتكدر خاطرها ولا تبي تضيق على فهد زود .. والله انها حظها الي بتاخذك والله مهوب عشانك ولدي ربي يحبها الي بتجي من نصيبك عزتي لحالي وين بلقى لك مره فهد وهو يضحك ... سيري على جيرانتس ويمكن تلقين لتس بنتن تعجبتس وسمية .. ليه تعجبني وانت ماتبيها تعجبك فهد وعلامات الحزن في عيونه .. اذا اعجبتس اعجبتني ضيدان .. اسمعي يا رجحا انا بروح للبلاد وطلبت من ابوي انتس تروحين معي وعترض عمي يبيتس في البر رجحا .. قبل لاتكمل يا ضيدان هذا ابوي ومقدر اخالف شوره ودامه قال لك الي قاله فـ انا امشي على قولة ضيدان انصدم .. طيب انا بروح للبلاد وحياتي بتبدا هناك رجحا .. مثل ماقلت لك يا ضيدان مقدر اخالف راي ابوي ضيدان في خاطره لونتس تغليني ولو شوي كان رحتي معي .. خلاص بصرتس يا رجحا ومشى وخلاها مشت رجحا لخميتهم وهي تمسح دموعها .. تدري يا ضيدان ان كل حياتي تمشي مهوب على كيفي وحكم القوي دايم يمشي على الضعيف اصبح الصبح وتو الشمس ما بعد طلعت بالكامل بس نور بسيط اصوات البل تتعالى رغاها ورفعه تاخذ لها من الفطور عشان تسرح بلبل مع رجحا البست برقعها وخذت أجلالها الطويل وحطته على راسها ومسكت عصاها .. يالله يمه انا بسرح تبين شي صيته .. الله يحفضتس مشت بعض البل باركه والي تشرب من الماء والي تاكل من العشب ركبت رفعه الحدوج الي كان منوخ ومشت وطبعا البل في طبعها اذا شافت الحدوج مشت وراها وكانت عصى رفعه تامر البل تقدمها والي تبطي ما تجي ترجع عليها رفعه بحدوجها وتقيمها وتناظر من بعيد رجحا مثلها تمشي ورى ابلها او تقدمها ومشت تتبعها وخلى المكان من البل وبدت الشمس ترتفع فوق وفلوه تساعد صيته في لم الأغراض وفي تزيين العشا صيته .. ضيدان يمك وش فيك تمشي وانت منتب طيب ضيدان .. خليها على ربي صيته .. علمني يمه وش بلاك ضيدان .. تراني بروح للبلاد العصر صيته .. وافق ابوك ضيدان .. مالتس لولا صيته .. ها وينك رايح وابوك مهوب موافق ضيدان .. ابوي يبيني أعرس وعمي يبي رجحا عنده هناه ها عرفتي وش بلاني صيته .. ما عليك اخذها والمره تتبع رجلها وين ما راح ضيدان .. تسنتس ما تعرفين عمي صيته .. الا عشاني اعرفه بيقعد ماسكن ذا الضعيفه لو امها حيه ما سوى بها ذا السواه ضيدان .. والله مدري يمه هذا شورتس صيته .. أي بالله .. والله يا عمي ان مكانا يشبع الحاشي عبدالله .. توني عاس يا دافع البلا دهر .. يمكنك رايح جنوب عبدالله .. والله يا ولدي اني احب الجنوب الشمال اغلبها غنم وانت عارف الغنم تحصد المكان الي اهي فيه .. شد صوبنا وابشر بلي يسرك ضيدان يضحك .. وش انت ياعلي تحد ابوي عليه علي .. ابيه يجي بوزانا ضيدان .. تسنك تبي ابوي يبعد علي .. خله يبعد الربيع قدامكم ضيدان .. بصرهم انا تسني بروح للبلاد عبدالله .. الظاهر ان الكلام البارح ما اقنعك في عادة البدو اذا جاهم ضيف ما ينشدونه في الايام الاولى وش يدور او وش يبي علي .. يا الوجيه الطيبه انا رجالن وراي ابلي واهلي وعجل وعشان كذا ودي انشدكم عن ذهيبة لنا ذهيبة .. يعني شي غالي فاقدينه عبدالله تحفز .. وش هي يا ولدي علي ..اختي يابو ضيدان عبدالله .. عندنا يا ولد الاجواد لكن مهيب متعديه محلها علي .. خلني اكلمها يا عمي الامور ماعاد بها على الي خابرتها والي طاقتن منه شد وراح للبلاد عبدالله .. قدها بنتي يا علي علي .. ياعم امها وراها تصب من عين في عين عبدالله يا صيته ياصيته كانت صيته ورى الذرى تسمع (الذرى الحاجز الي بينهم يفصل قسم الرجال عن قسم الحريم ) صيته من ورى الذرى .. سم يابو ضيدان عبدالله .. نادي فلوه دخلت فلوه عليهم وطاحت عينها على الي قاعد وبكت فز واقف يوم شاف اخته وقف بينهم عبدالله .. خلك محلك فلوه .. لا تكفى ياعمي هذا اخوي الوحيد عبدالله .. اشور شورتس تبين تروحين معه تبين تقعدين عندنا فلوه تناظر اخوها وتكلم علي .. فهد شد وراح للبلاد ماعاد يقدر يتعرضتس فلوه .. بروح معه ياعمي لمي عبدالله .. الله معتس يابوتس وترا خلاص لتس ابو ومتى ما احتجتيه بتلقينه فلوه .. جعل عمرك طويل ضيدان .. اصبروا لين يجي العصر وامشو ذا الحين قايله دخلت فلوه يعجبها ضيدان تحس فيه الرجل الي ودها تقضي معه حياتها بس كل ما تذكر انه يبي بنت عمه تحاول ما تمني نفسها رجحا كبي على قلتي ماء من الشمس (قلتي راسي ) .. غيوم رجحا .. دونتس القربه صبي انتي رفعه .. فرقتس كانتس ما تنفعين جعل اسقى لمن تلفت ولقيت كل الي حولي جدران ولا عاد شفت البل بعين رجحا ..هههههههههههههههه وش يدريس تاخذين لتس واحدن ثمن يخليتس ترعين ابله رفعه .. جعلني اخذ احضري ولا اطب البر حتى لو مسيرة :::::::::::::::::::::::::::::::::::::::::::::::::: :::::::::::::::::::: عمي انا موافقة اخذ رجحا حتى لونها في البر وانا في البلاد عبدالله .. وتروح ما معك مره للبلاد والفتن قدامك ارتاح مابه مراح ضيدان .. لا اله الا الله يبه تراني رجال مصلي وخايف من ربي يعني المره الي بتحماني ابو رجحا .. تبيها هناه ابشر لو من ذليل ملكتك عبدالله .. والله منتب صاحي خله ياخذ مرته معه ابو رجحا .. مالك لوا عندك رفعه تقوم ببلك وانا من يقوم ببلي عبدالله .. يالله اني في ذراك سوو الي تبون ضيدان .. خلاص بروح وامي تروح معي تجيب لرجحا الي تحتاج من البلاد عبدالله .. اجل انا الي بسرح بلبل عشان رفعه تقعد تشوف البيت | ||||
|
|
|
03-05-11, 01:34 AM
| #10 | |||||
| روايتي مؤسس ومشرفة سابقة وقاصة في منتدى قصص من وحي الاعضاء
| تسلمى غيوم على الفصول ... هل إنتهت مشكلة فلوة هكذا برحيل فهد و عودتها لوالدتها ؟؟؟ رجحا ... مشكلتها مشكلة >>> و شو فيها لو تزوجت و سافرت و أبوها هو اللى رعى الإبل ... غيوم متابعاكى و شكراً لك | |||||
|
|
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
.png)
العرض العادي
