آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
29-09-16, 02:24 AM
| #11 | ||||||||
| مراقبة عامة ومشرفة منتدى الروايات المنقولة  
|  صيته الحقت البنات ولقتهن للحين واقفات على باب الشارع ينتظرنها والخوف ظاهر عليهن وبس شافنها طالعه من البيت المهجور راحن يركضن يمها ساره وعيونها مليانه دموع خوفتيني عليتس ليه ماطلعتي معنا شيخه من بين شهقاتها وهي تبكي حنا نحسبن الجن سرقوتس وراتس ابطيتي صيته :هههههها يالخوافات ترا الصوت مغير فهد يقرع الحديد بعصا مكنسه يبي يروعنا هه حتى شوفنه طلع من البيت شيخه الله ياخذه المروح روعنا ساره :يهبي تهبين في وجهتس لاتدعين على اخوي بس فهد وش دراه انا بنروح للبيت المهجور صيته :يقول سمعنا يوم نتفق في الحوش وسوى سواته يبي يختبرنا حنا خوافات والا ساره :بلعون انا خريش من دون اختبارات والاشي صيته :تعقبين انا ماني بخريش وانا بنت ابوي شيخه :انتي مرات احس انتس رجال من قو باستس ساره :وانا اشهد صيته ذيبه ماتهاب عند فهد طلع من البيت المهجور وشاف محمد ونمر يلعبون مصاقيل قدام البيوت وراح الهم وهو يضحك فاتتكم خرشت البنات ياعيال بغت تزوغ اعقولهن في البيت المهجور نمر :والبنات وش وداهن البيت المهجور فهد علمهم بالسالفه كلها محمد :بعدي اختي انا اشهد انها ذيبه نمر :ياعزي لختي شيخه عزالله انها تذل من ظلها فهد :وساره اردى من شيخه مير صيته طلعت شيختهن كلهن بعد الغرب البنات دخلن للبيوت وفهد ومحمد راجعين مع ابوانهم من صلات المغرب ابو فهد انا بتقهوا عندك يابو محمد لي يومين ماشفت اخيتي فهد سبق ابو محمد بالرد :اختك واخته مجتمعات على القهوه ابو محمد جمعتهن في بيتنا ولافي بيتكم فهد :في بيتنا ادخلو الرجال بيت ابو فهد ولقو الحريم باسطات الزل في الحوش ومضبطاتن الجلسه ويوم شافن ابو فهد وابو محمد دخلو عليهم ويفزن واقفات ويهلن ويرحبن وقمرا تسلم على راس ابو محمد وشلونك ياخوي عساك بخير ابومحمد :بخير من الله وغزيل تسلم على راس ابو فهد وتنشده عن الحال ثم جلسو يتقهوون ويسولفون غزيل :اليوم مجتمعين وش عندكم ابو فهد :لولا جمعتنا ماجتمعتن اذكر يوم اتفق انا وحمود انه كل واحد منا ياخذ اخت الثاني علشان نبقى مع بعض طول العمر مير حمود خونبي من تالي وجازتله قعدة البر مابغى ينزل الديره ابومحمد :لابالله مارخص قربك يابو فهد مير انت تخبر ابوي الله يرحمه ويغفرله مايداني الديره وبيوتها وانا ملزومن فيه وعلى رايه قمراء :على طاري ابوي الله يرحمه ماعرفتو وشنهي وصيته ابو محمد :وصيته عند ابو مرزوق كاتبها ولده مرزوق في ورقه وموقعن عليها ابو مرزوق واخوه عبد الله شهود ومن يومها وهي عنده في ظرف مسكر ويقول مايسلمها الى بحضوري وحضور اخوي ابو وليد بعد عشر سنين على وفات ابوي الله يرحمه وهذا على وصية الوالد ابوفهد :ابومرزوق ماعلمك وش فيها الوصيه ابو محمد :يقول الوصيه امانه ومايعلم وشهي عنه لين يجي وقتها ويسلمها لنا زي ماوصاه ابوي والعشر سنين ماراح منها غير ظ¤ باقي ظ¦سنين ان الله احيانا ابو فهد :ابووليد ماجاك عنه من بعد جيته في العيد ابو محمد :اكلمه ويكلمني ماعليه طيب والمواجه والله ماواجهته تخبر في الرياض وعسكريه وعياله يدرسون ولاعطلو وداهم عند خوالهم في الجنوب ومن توفي الوالد واهله ماعاد يجون معه اما خلاهم عند خالهم الي في الرياض والاراحو لجدهم في الجنوب ابو فهد :ايه هو ماله علينا خاطر من اول ويوم توفي عمي قصر رجله مرتن وحده حتى العزيمه مايعزم قمرا :الله يصلحه من يومه قلبه صاد وقاسي ماكنه اخونا ورابن معنا في يوم اخر من ايام الحاره جمعة الحريم في بيت ام فهد وكل الحريم موجودات ام نمر وام سعد وام محمد واكيد راعية البيت ام فهد الحريم جالسات في الصاله يتقهون ويسولفن ولجتهن واصله لاخر الشارع ام محمد :يام سعد العلم الي سمعناه صحيح ام سعد :وشهو علمتس يام محمد ام محمد :يقولون مساعد تجوز عليتس واخذ ورعه ام سعد :اي بالله صحيح اول الاسبوع جانا شايب يخطب نوير عساه تشيب عينه ويقلعه ربي ويوم ابوها عيا يعطيه قال بجوزك بنتي وتجوزني بنتك عاد خوينا ماصدق على الله سمع طاري عرس انسعر عساه بساعر الي يحرق تسبده قال اجل اليوم تملكلي على بنتك وسوي عشاء العرس في بيتك واخذها معي والاسبوع الجاي تجيني املكلك على بنتي ونسويلكم عشين لنا حنا وياكم وتاخذها وتسري لبيتك ام فهد :عوذه الله يردي نصيبه يوم اردى نصيب البنت ام نمر : مير هذي زيجتن باطله هذي بدلا والبدلا ماتجوز في الشرع كيف يتبادلون البنات كنها بيعه وشريه ام سعد :هذى الي صار ياوخياتي والله مادريت الاداخلن علي يقود في يده بنيتن والله ياخواتي انها كبر بنتي صالحه مهيب فود جواز قال هذي مرتي الجديده طلعي البنات في الصاله وحطيها محلهن والله مير اجمع اقشيش بنياتي وافظيلها الدواليب ويندعس هو وياها في الغرفه والله انا كل ليلة نتوحا في صياحها وتغويله الها ام محمد :ياعيشتن قشرا ابك هي تسم عمرها ام سعد :حول ظ،ظ،سنه وبنتي نوير هالسنه تتم ظ،ظ¥مير الشايب الي بياخذها صاكن الخمسين عساه مايتوفق ام فهد :ابك ابك كيف جت هاذي من مساعد وهو مدرس ومتعلم ويعرف الدين والشرع ام سعد : مافاده تعلومه معمي بصيره الله لايعمي لنا بصيره ولابصر وفي الحوش متجمعات البنات على راس نوير ويتكلمن في نفس الموضوع نوير :يويلي ويلاه يبنات وش اسوي بكره ابوي بجوزني الشايب صيته :عيي يامهبوله لاتخلينه يجوزتس عودٍ كبر جدتس نوير :عييت وعيت امي وتهاوش معها وضربها ومصمل انه يجوزني الشايب ابو الخلاقين ساره : الله ياخذه هالشايب عساه يشرق ويموت شيخه :خلي خوالتس يهرجون ابوتس يمكن يتوحى منهم نوير :خوالي يقولون مالنا لزوم بين البنت وابوها ومانا بمهرجينه صيته :اه يالقهر والله لوني متسانتس انه مايشوفني بعينه واني لاذبحه والاانحاش صيته قالت هالكلام من القهر وماكانت تعنيه لاكن الكلمه الي رمتها من غير قصد رنت في راس نوير نوير :يبنات انا برجع للبيت اخاف ابوي يرجع للبيت الحين ومايلقاني وقامت راحت لبيتهم وكلمت صيته كل مالها تكبر في راسها انحاش ايه انحاش والااتجوز هالشايب الي مابينه وبين الموت الى خطوه عساه يموت وافتك منه دخلت البيت وماكان فيه غير مرت ابوها الي كالعاده ملتويه على عمرها في زاوية غرفتها وتنوح ودموعها ماوقفت من دخلت بيتهم نوير فكرت ان مصيرها بيكون اردى من مصير مرت ابوها وشوفتها لها في هالحال وهالتوقيت زاد اصرارها على النحشه ادخلت غرفت امها وفتحت الدولاب واخذت ثوب من ثياب اخوها سعد واخذت معه سروال طويل وفنيله وشماغ ثم فتحت الدولاب الثاني واخذت لبستين كامله من ملابسها وحطتهن كلهن في كيس وحطت عباتها وطرحتها ونقابها معهن لانها قيدها تغطت وربطت الكيس زين وراحت لسيب الحريم الي يطلع على الشارع وكان فيه اسطوانات غاز عند دريشة المطبخ دست الكيس بينهن ونسفت من فوق الاسطوانات سفره علشان محد ينتبه للكيس في الشارع كانو العيال مجتمعين في البرحه ويسولفون في نفس الموضوع نمر :ياسعد ورى ماتنتخي بخوالك يردون هالزيجه المحقى عن اختك سعد :خوالي عيو يتدخلون يقولون سيلٍ مجنبن عنا ماننياه فهد :امحق خوال ابك كيف ماتحركت اشعرتهم لبنت اختهم سعد :امي منفقعتن تسبدها منهم ومن ابوي هم مافزعو لمي يوم ابوي تجوز عليها هالمره تباهم يفزعون لنوير محمد :ابوك غادن عقله ماعاد معه عقل دام هذي فعوله في بيت جديد وفي حاره جديده الوقت بعد العشاء شاب في العشرين من عمره واقف في حوش بيتهم الي مليان كراتين مسكره وشناط وبطاطين ومفارش مطواه يمه بقى شي من العفش داخل امه واقفه على الباب الداخلي للبيت لاياولدي مابقى شي متى بنمشي يامنصور منصور :هالحين باجدل العفش لصندوق السياره ولاخلصت جبت لنا عشاء ولاتعشينا بريحلي اشوي قبل نمشي ذبحني التعب من اليوم وحنا في جهاد يمكن نمشي حول ظ،ظ،&ظ،ظ¢حولها ام منصور :ليتك خليت ممشانا في الصبح ازين من مساري الليل منصور : انتي تعرفيني يمه منام الابعد صلاة الفجر وهذا احسن وقت لممشاي الصبح ويني ووين السواقه وانا ذابحني السهر والنوم في بيت مساعد الساعه ظ،ظ من الليل الكل راحو ينامون ماعدا نوير جالسه تتفرج على التلفزيون وام سعد تغسل المواعين في المطبخ ام سعد خلصت شغلها وراحت بتنام شافت نوير جالسه بلحالها ام سعد :قومي ارقدي يابنت نوير :مافيني نوم يمه تكفين خليني اسهر على التلفزون شوي ام سعد ارحمت نوير وحست انها شايلتن هم الملكه الي بتصير بكره فقررت تتركها على راحتها وراحت تنام نوير احترت امها تنام ويوم هجد البيت كله وتاكدت ان الجميع ارقدو تسللت لسيب حق الحريم وطلعت كيسها الي مخبيته بين الاسطوانات وهي تلفت وترجف من الخوف فتحت الكيس ونزلت الملابس الي عليها واخذت ملابس اخوها سعد ولبستها وتلثمت بشماغه واخذت ملابسها الي كانت عليها ودخلتها في الكيس وربطته واخذته معها نوير طويله شوي بنسبه للي في عمرها باقي مابلغت نحيفه مره وماظهرت لها معالم الانوثه بعد زياده على انها شينه فبتالي مع لبس الولد تبان كنها ولد فعلا خلصت لبس وراحت لباب الشارع فتحته وتهايقت معه بشويش ولاشافت احد برا والحاره ساكنه | ||||||||
|  |
|
29-09-16, 02:25 AM
| #12 | ||||||||
| مراقبة عامة ومشرفة منتدى الروايات المنقولة
| نوير واقفه ورا باب بيتهم وتتهايق بشويش وقلبها يرجف من الخوف الحاره فاضيه والشوارع مظلمه ومافيها غير انوار البيوت الخارجيه مفتوحه وتنشر نور خفيف يشبه خفة وضعف الامل الي ينبض في داخلها ويحثها على الهروب يمكن تفتك من شبح الشايب المتصابي نوير تملكها الخوف وصارت تبكي وتشاهق وهي باقي عند الباب متردده تنحاش والاتعود داخل البيت بس رغم خوفها من الشارع والظلمى والمجهول كان خوفها من الشايب اكبر صوت مرت ابوها الورعه وهي تصيح وتبكي وتترجا نضرت الحزن والرعب الي يكتسي ملامحها كل ماشافت مساعد كل ذا صار يتزاحم في راس نوير صارت تسمع في عقلها صوت يصرخ انحاشي يانوير انحاشي استجمعت كل قوة الخوف الي بداخلها وطلعت من بيت ابوها وسكرت الباب وراها وراحت تركض من غير هدف من غير شعور الا الا بشعور بشعور القهر القهر والخوف القهر ماهو لطمة عدوك لاضربك القهر لاصُوب اسلاحك الي تحتِميبه ال نحرك اركضت واركضت اطلعت من الحاره وتعدت بيوت وهي ماتشوف شي من كل الي مرته لان نظرها كله متجه لمكان واحد لأعماقها لذكرياتها لقلبها الي ينزف وجع دموعها تصب من دون توقف كنها مطر في ليلة غضب صدرها ينتفض كانه صندوق بداخله وحش متمرد يحاول يكسر قيد الذل ويطلع لنور جسمها يبكي تعب وروحها تبكي قهر ورجولها ماعاد تشيلها ولو شفنا نوير من الخارج هي الحين طلعت من البيت وتركض على رصيف الشارع العام ماكنت تدري انها وصلت لشارع من قو المشاعر الي تتصارع داخلها لاكن حركه قريبه منها نبهتها سمعت صوت باب سياره يتسكر وشافت عمال اثنين واقفين عند السياره وتوهم نازلين منها العمال في البدايه ماهتمو لنوير لانهم يظنون انها ولد لاكن شهقت نوير ويدها الي رفعتها لثمتهاتتاكد انها تغطي ووجها زين ومادرت انها بهالحركه جنت على نفسها لان واحد من العمال لمح البناجر والخاتم الي في يد نوير وشك انها بنت وتاكد يوم شاف طرف جديلتها تتدلى على ظهرها من تحت الشماغ صاح على خويه ينبهه بنت نوير سمعت كلمته وصارت تركض بقوتها كلها وهم انطلقو يركضون وراها شافت لفه تدخل على حاره ودخلت معها بسرعه من غير ماتلتفت وراها من قوة الخوف والعمال مازالو يركضون وراها وقربو منها شافت قدامها شاب واقف عند سياره حوضها مليان عفش ومن فوق العفش شراع مربوط بحبل وزادت سرعتها عشان تحتميبه منصور كان واقف عند سيارته ويشد الحبل على الشراع ويربطه وفي لحظه سمع صوت مطارد من وراه ولتفت بسرعه شاف رجالين يطردون ولد صاح على الولد وهو يشر على باب بيتهم ادخل ادخل وفي نفس الوقت فتح باب سيارته الي وراء وسحب عجرا كانت طايحه بين المراتب العمال اول ماشافو منصور خافو انه يجمع عليهم اهل الحاره وهربو نوير ماصدقت تشوف باب البيت مفتوح ودخلت بسرعه وصكت الباب وراها ورصت ظهرها عليه وهي تشاهق تعب وخوف وزاد ابكاهابكى جسمها كله يتنافظ ارتاحت انها فتكت من العمال الي يطردونها وفي نفس الوقت خايفه من الشاب الي دخلت بيته منصور شاف العمال انحاشو وراح لبيته بيشوف الولد الي دخل عنده وش سالفته جاء بيدخل لقى الباب مسكر ويسمع الشهيق من وراه قال افتح ماعلاك راحو نوير سمعته وفتحت الباب منصور دخل وشاف ولد نحيف متلثم مامبين من لثمته الاعيونه الغرقانه دموع وهو يتنافظ وعيونه في الارض مارفعها ابد استغرب منه وقال انت علامك ياولد ومنهم الي يطردونك ووش يبون منك وفجأه شاف البناجر والخاتم الي في يد نوير ومسك ذراع نوير بقوه ورفع يدها قدام عيونها وهو ينفظها بقوه وعصبيه بنت بنت ومنحاشه في هاليول بلبس ولد والعمال يطاردونك فصباح يوم الهروب قامت ام سعد على اذان الفجر وهي تحس بضيقه وهم من حال بنتها نوير وملكتها الي بتصير اليوم سمت بالله وتعوذت من ابليس وراحت لصاله الي ينامون فيها بناتها من بعد ماخذ ابوهم غرفتهم دخلت الصاله وشافت صالحه طايحه من فراشها والحافها متجمع تحتها التفتت على فراش نوير واستغربت انها ماتحركت من مكانها ولحافها مغطيها من راسها لرجولها العاده نفس صالحه الحاف بجهه وهي بجهه ثانيه ارتخت عليها ترفع الحاف عنها نوير قومي صلي نوير وتسحب الحاف وجمدة يدها من الصدمه وش ذا وساده ممتده على الفراش ومجمع معها شراشف ونوير انوير وين انوير وين صابتها حاله هستيريه وصارت تنفض اللحف وتدور نوير تحتها ودور بين الغرف وتصيح وتبكي نوير يانوير مساعد نوير وين راحت يامساااااااااااااعد نوير وين صالحه نقزت مخترعه من صياح امها ومساعد جاء هو وحرمته يركضون من الغرفه وحتى سعد الي كان نايم في المقلط وصله الصياح والنياح وقام مفزوع مساعد جاء يركض وش فيتس يامره عويذالله من شرتس ام سعد وهي تبكي وتصرخ نوير مدري وينها انوير مالقيتها في فراشها مساعد حس كان سقف البيت طاح على راسه من قو الصدمه ركض لفراش نوير وشاف الحوسه الي عليه وقام يرفس الفرش واللحف برجوله بقهر وينها وين راحت هاه علميني وين بنتس وين طست سعد مرتاع وللحين مهوب مستوعب الي قاعد يصير يمه دورتوها في الحوش والسطح ام سعد انفرجت قدامها طاقة امل راحت تركض لسيب الحريم وسعد راح يركض انا بدورها في السطح صالحه انا بدورها في المشب والحوش مساعد ركض للمطبخ فجأه صرخت ام سعد ياويلي ويلاه ياويلي ويلاه بنتي انحاشت نوير انحاشت مساعد فار الدم في اعروقه وجاها يصيح انتي وش تقولين يامره ام سعد عان باب السيب لقيته مفتوح وانا قافلته بيدي قدم ارقد وفراشها مزهملتن فيه مخده وشراشف وملحفتهن علشان مانفطن الها والبيبان كلها مسكره وكل شين على حاله لو دخل احدن من برا درينا عنه وتذكرت شي وشهقت ابروح اتعين عباتها في الدولاب والا وراحت تركض لغرفتها وفتحت دولابها وصارت تنبشه نبش وكل مالها يزيد عويلها وصياحها ياويل حالي عباتها ماهيب فيه وكم لبسه من ملابسها وحتى الفلوس الي لافتتها في صندوق غريضاتي ماخوذه ومحد يعرف محلها الا نوير اهل الحاره قامو يتوافدون على المسجد لصلاة الفجر يوم فاضو من الصلاه ورجعو يم ابيوتهم لمير هذا ابو سعد يعدي بين البيوت مثل المجنون ويدور مايدرون وشهو فاقد ومير ويتجمعون عليه اهل الحاره وينشدونه عن علمه ومير ينتخيبهم ابو سعد يدورون معه بنته اهل الحاره انفجعو من الخبر وكلن فزع يدور من عنده الرياجيل على سياراتهم والعيال على رجلينهم ماخلو محل مادور فيه نوير ولالقو لها اثر وقبيل صلات الظهر تجمعو قدام بيت مساعد يتشاورون وش يسوون في هالمصيبه الي طاحت فوق روسهم مير وتوقف عندهم هاك السياره الشاص وينزل منها الشايب المنحوس يباالفيت جاين بيملك واهل الحاره حين شافوه وكلن يقوم يدعي عليه ويسبه من عنده لانهم تأكدو انه سبب منير نوير والشايب يوم عرف بسالفه تل بنته بيدها وقال انا جوزتك يامساعد شرط انك تجوزني بنتك ويومن بنتك السربوته انحاشت بنتي طلقها هالحين مير مساعد قيد كبده انفحست من القهر والغبنه قام طلقها بثلاث والشايب اخذ بنته وذلف اهل الحاره شارو على مساعد انه يبلغ الشرطه عن اختفاء بنته لاكن مساعد خلاص قيدها الظنون اخذتبه ماخذها قال انا اشهدكم ان بنتي نوير من هالساعه ماتت لامبلغن عنها ولاعادني مدورها وان شافتها عيني بعد ماشافتها ذكيتها ذكات شاه وانا برين عري منها ليوم الدين اهل الحاره يحاولون يصبرونه يابو سعد تعوذ من ابليس وبلغ عن بنتك عساء ربك يردها لك سالمه وماخلو عنه شي ماقالوه لاكنه ابد مصمل على رايه وجوفه يحترق قهر وغبنه على بنته الي مايدري وين ارضها من سماها ام سعد في صالة بيتها عاصبتن راسها وتون وتبتسي وحريم الحاره متجمعات عندها وبتسن معها ويواسنها وصلها خبر تبري مساعد من نوير وانه حلف مايبلغ عن فقدها ولايدورها وحست بشضية الم تجتاح قلبها وتنهي الامل والاحساس وحتى الحلم فقدت كل معنى لحياتها حست انها صارت مجرد تجويف خالي من كل شي واي شي حريم الحاره صارن يناظرن فيها وهي جالسه بسكون الاموات حاطه يدها على خدها وتاكيتها على ركبتها وعيونها مفتوحه على وسعها لاترمش لاتدمع والاتستوعب اي شي من الي تشوفه قدامها لانها تنظر الى الخواء | ||||||||
|
| |
|
29-09-16, 02:26 AM
| #13 | ||||||||
| مراقبة عامة ومشرفة منتدى الروايات المنقولة
| الكل كان متأثر بهروب نوير لاكن صيته تأثرها كان اشد من الجميع لانها تذكرة كلامها لنوير يوم علمتهم بخبر خطبة الشايب الها وحست انها هي السبب في نحشة نوير كانت حزينه حيل ومرات تقعد تبكي وتستغفر وخايفه من ربها انها يمكن تشيل ذنب نوير لانها هي الي قالت لو انا مكانك انحاش والااتجوزه بس هالكلام قالته حزة غضب وماكانت تعنيه بس حتى ولو لو ماقلته كان نوير مانحاشت كل هالكلام كان يدور في راس صيته وهي جالسه على عتبة بيتهم حزينه ووجهها متنفخ من البكى وعينها على بيت نوير لعل وعسى نوير ترجع شيخه وساره كانو جالسات جنبها ومحزنات على فرقى نوير بس حالهن احسن من صيته بكثير نمر طلع من بيتهم وشاف البنات محزنات ولاحظ وجه صيته واثر الدموع فيه راح عندهن نمر :وش فيتس ياصيته صيته صمت مطبق شيخه :صيته زعلانه علشانها هي قالت لنوير لو انا مكانتس انحشت والاتجوزت الشايب نمرخاف اهل الحاره يسمعون هالكلام ويحطون الوم على صيته نمر :اسمعني زين ياويل الي تعلم احد بالهرجه هذي والله يالي يجيني علم انها علمت لارجد فيها بسلك لين تسف خيبه ساره وشيخه خافن من نمر وكتمن الموضوع بينهن نمر التفت على صيته وقال ياصيته انتي مالتس دخل في الي صار وترى مساعد هو السبب الوحيد في نحشة بنته هو الي بغى يجوزها الشايب وهذا هو الي خلاها تنحاش وبعدين انتي كنتي تكلمين عن نفستس ماقلتي لها يانوير انحاشي صيته رفعت راسها لنمر وحست كلامه ريحها ابتسمت من بين دموعها وهي تمسحها وقامت دخلت داخل ونمر راح للعيال مر اسبوع على نحشة نوير وابوها رغم كل الي قاله كان كل يوم يطلع من بيته من الفجر لتالي الليل يدور بنته من غير محد يدري ماخلى مكان مادورها فيه لين فقد الأمل في انه يلقاها فكر اكثر من مره انه يبلغ الشرطه لاكنه تراجع لو بلغ الشرطه بينتشر الخبر في الجرايد وبينفظح في السعوديه كلها وهو يكفيه فظيحته في الدوادمي الي الكل صار يهرجبه هو وبنته هذا غير ان الشرطه يمكن تواجهه بخبر مايقدر على سماعه رغم انه الحين صار شبه متاكد منه لاكن بعض الحقائق غض الطرف عنها ارحم من مواجهتها لان سماعهااوجع من الموت احتراقا من الداخل والخارج مساعد قرر يترك الدوادمي وينتقل لمكان محد يعرفه فيه وخلال شهر كان مساعد قد باع بيته وشد من الحاره لوجهه محد يعرفها ابد نرجع لوقت سابق وبتحديد ليلةالهروب نرجع لوقت سابق وبتحديد ليلةالهروب منصور مسك ذراع نوير بقوه ورفع يدها قدام عيونها وهو ينفظها بقوه وعصبيه بنت بنت ومنحاشه في هاليول بلبس ولد والعمال يطاردونك نوير ماتدري وش تسوي وش تقول والخوف شق صدرها شق وهي مغير تنتفض وتبكي منصور رفع يده الثمتها وسحبها بعنف وشاف وجها شاحب ومتنفخ من البكى والاهم شين منصور ابتسم على جنب بسخريه وقال هذا لاقالو فوق شينه قوات عينه اعترفي وش انتي مسويه يالسربوته يالوصخه نوير انتفضت من قو الكلمه وحست بحريقه تشتعل في جسمها كله وفي داخلها تقول سامحني يابوي والله مادريت ان هذا الي بيقولونه الناس عني والله لوني داريه اني لانحشت بحط راسك في التراب اني لحط رقبتي تحت رجلك وخليك تدوسها كان تجوزت الشايب من غير ولاكلمه اه يالقهر انا ينقال عني هالكلام الوصخ كل هالكلام لمع في راس نوير لحظه مثل البرق وبكل الغضب الي فيها رفعت يدهافوق وصفعت منصور كف على وجهه وصاحت عليه تخسي يالخسيس مهوب انا الي تقول عنه هالكلام منصور في نفس اللحظه الي صفقته فيها رفع يده ورد الكف باقوى منه تخسين انتي ماتقولين وش جابتس انصاف الليالي بهاالشكل يالمتربيه نوير من قو الكف الي جاها ومع التعب والارهاق طاحت في الارض ام منصور كانت فارشتن لها مطرحه في صالة البيت ومنسدحتن عليها بتاخذلها غفوه قبل يسرون وفزت من فراشها على صوت الهواش وطلعت تشوف وش السالف وعلى طلعتها شافت منصور يصفق الولد والولد طاح في الارض ام منصور :خير يامنصور وش علمك انت والورع الي معك منصور :بنت يمه مهوب ورع ام منصور :شهقت ابك انت وش تقول بنت والبنت ويش يجيبها عندنا هالوقت وبهالبس منصور :مدري يمه جتني تعدي من يم الشارع العام يطردونها عمال وانا احسبنها ولد قلت ادخل في البيت والعمال يوم شافوني انحاشو ويوم جيت اشوف وش السالفه لقيتها بنت ام منصور قربت من نوير شافتها جالسه على الارض بعد طيحتها وظامه ارجولها لصدرها ومرخيتن راسها علي ركبها وتبكي وبجنبها طايحن الكيس حقها ام منصورقربت من الكيس واخذته وفتحته تشوف وش فيه وشافت عباه ملفوفه ومعها ملابس رجعت الكيس مكانه وجلست قدام نوير ومسكت راسها بيديها الثنتين ترفعه لها نوير رفعت راسها وناظرتها من بين دموعها بخوف وترقب ام منصور ركزت نظرها في عيون نوير لابستن ثوب ولد واخذتن عباتس وثيابتس معتس وش انتي منحاشتن منه ومن من منحاشه علميني هالحين وش انتي مسويه من مصيبه نوير ماجاء في بالها لو لحظه ان هذي هي الفكره الي بياخذونها الناس عنها توها تحس بحجم المصيبه الي طاحت فيها ولانها ماتدري وش بيكون مصيرها عند هالناس قررت انها ماتعلم باسمها والاسم ابوها والااي شي عنها لعلها تنقذ لو جزء يسير من كرامتها وكرامت ابوها واهلها الي تمرغت في التراب ماكان في راسها والا كذبه تصرفبها عمرها فلاذت بصمت مانطقت والاكلمه منصور ردسها برجله ردي تكلمي ليش ساكته ام منصور :بس يامنصور اتركها علميني يابنت علامتس حنا بنمشي لرياض ولزوم نردتس لهلتس نوير :صمت ولاشي غير الدموع والصمت ام منصور حاولت تعرف منها اي شي بس مافاد معها قامت تشاور منصور هالحين وش نسوي بهالمصيبه الي طاحت فوق روسنا منصور:مافيه الاانا ناخذها معنا لرياض وهناك نشوف لنا دبره ام منصور :مافيه الاهالحل لو خالك في الرياض كان دبرنا منصور :يمه خالي عند انسباه ومهوب راجع لبيته غير بعد اسبوعين كان كلمتس والاشي اسكتي عنه لين يرجع ونعلمه مانبي شوشره واخاف نبتلش مع هالبنت ام منصور :قومي يابنت البسي ثيابتس وعباتس بنمشي نوير طاعتها بصمت واخذة كيسها ودخلت معها داخل البيت تغير | ||||||||
|
| |
|
29-09-16, 02:27 AM
| #14 | ||||||||
| مراقبة عامة ومشرفة منتدى الروايات المنقولة
| في يوم جديد في مجلس ابو فهد ابو فهد :عطنا علومك ياحمود وش سويت في روحتك لرياض حمود :ابشرك علومي تسرك هاماني رحت اطلع ترخيص بناء لارضي الكبيره ابو فهد :تقصد الي جتك منحه حمود :لا بالله اقصد الي شريتها معك يوم نشتري انا وياك ارضين متلاصقه في المخطط الي هاك الحين جديد واراضيه رخص التراب ابو فهد :ايه اخبره زين واذكر انك رجعت واخذت ارضين ثانيات متلازمات الي نهيتك انا وابو وليد عنها وقلنالك مالها لزوم لو في المخطط خير مابيع بهالرخص حمود :وصلت خير الارضين هذي هي الي اقصدها رحت بطلعلها ترخيص بناء وردتني البلديه يقولون ارضك عليها تخطيط حكومي بيبنون عليها مجمع مدارس واخذتها الحكومه ب ظ¤ ملايين مليونين لكل ارض والله ياهاك المخطط انه قايمن حظه وعماره قايم مهوب على خبرك يوم نشتري فيه ارضن جردا ابو فهد :ماشاء الله الله يباركلك فيما رزقك حمود :اللهم امين وتراني طلعت ترخيص بناء على ارضي الملاصقه لارضك ووصيت اخوي ابو وليد يدورلي مقاولن زين يبنيها اما ارض المنحه حطيتها عند مكتب xxxx يبيعها وبشتريلي ارض حول البيت الي ببنيه وبابنيها مجمع شقق وتحت محلات ابوفهد : هذا الشغل العدل اجل دامك ناون تروح يم الرياض انا معك بابني ارضي الي ملازمتن ارضك وننزل سواء ومحلاتي الي هنيا بخليها لين نستقر ثم بابيعها هي وبيتي هذا وانقل شغلي كله هناك حمود :ونعم الراي في يوم جديد من ايام الحاره ابو محمد وابو فهد وابو نمر قررو يكشتون بأهاليهم للبر لمدة اسبوعين الجو ربيع ومطر والجو جو تخييم ووناسه الرياجيل سبق وطلعو عساسه واختارو المكان الي بيخيمون فيه ونصبو خيامهم وخلو عندها حارس من رعيان حمود مع مؤنته والحين الزهاب مربط فوق السيارات والكل جاهز عشان يمشون يم الخيام طلع حمود وفي يده ترمس ماء وحطه على تندة وقال للعيال الترمس هذا خلوه هنيا لين نركب السياره ونحطه عندنا في الغماره للي بيشرب ثم استدار ودخل داخل البيت صيته هنا قدحت في راسها فكره واخذت حصاه في يدها وقالت ياعيال تحدوني اصوب الترمس فهد صاح لا لاكن صيته سبقته وحذفت الترمس بالحصاه ووقعت في قزاز السياره وشلخ القزاز شلوخٍ قويه على شكل دائره ثم يمتدد منها شلوخ مشل اشعة الشمس ومع ذالك بقت متماسكه وماطاحت فهد يفكر وهو متنرفزاف كنت بقول لاتحدفين تجي في القزاز بس هالمطفوقه تشق وترقع من راسها ماتوحي العلم هالحين خالي بيدبغها ممدا الفكره تكتمل في راس فهد الا وهذا حمود طالع واول ماشاف القزاز شب في مخه حريقه وصاح باعلى صوته من الحيوان الي كسر القزازه صيته كانت بتقول انا ماكنت اقصد بس فهد سبقها ومن قبل لاتفتح فمها حتى فهد :انا الي كسرته كنت بصوب الترمس وجت في القزاز العيال والبنات كلهم انصدمو لانهم موجودين ويعرفون انه صيته الي كسرتها بس دام فهد قال انا معناته الي بيفتح فمه بغير هالكلام بيلعن جدفه فهد عشان كذا كلهم سكتو حمود : من غير تفكير سحب الخيزرانه من غمارة الددسن وجلد فهد جلد ينوخ البعير مير فهد عزومه قويه وتصبر وكتم نفسه مايبي يبكي والايتوجع خاصه قدام صيته طلع ابو فهد وشاف حمود يضرب اولده ابوفهد :خير ياحمود علامك على فهد حمود ترك فهد وقال كاسرن قزاز السياره ابو فهد التفت على السياره وشاف الكسر ولقط اعقاله من فوق راسه ومحطبه فهد محطتين وفهد قام يتلوى من الوجع الرياجيل اركبو السيارات وشغلوها والحريم يقفلن بيبان بيوتهن بيطلعن راح محمد لفهد وقال تستاهل احد قالك تستر على صيته فهد :من جدك انت تبي صيته تاكل الجلد الي انا اكلته والله ماعندك نخوه لاختك محمد :اختي باسها قوي والي يطق في راسها تسويه خلها تاخذ جزاها علشان تعقل قال هالكلام وراح يركب السياره قبل يسمع رد فهد نمر شاف وسمع كل شي ومن داخله يشتعل قهر يوم شاف فهد كيف يتفدى صيته بس شالها في نفسه وسكت مهما كان هم قرايب وهو يادوب جارهم عطى فهد نظره اخيره وراح ركب السياره بصمت صيته يوم شافت مابقى عند فهد احد راحت له صيته :هيه انت ياقوي مره ثانيه لاتليقف وتسوي فيها فزعه انا اعرف وشلون ادافع عن نفسي واقدر اشيل خطاي الحالي لاتلقف انت ثم افشلك قدامهم كلهم فهد ماتوقع ردة فعل صيته وانقهر منها فهد :الشرهه على الي يفزعلتس والاانتي حقتس من جلدتس لين تسفين من تراب الشارع صيته :ماعليك مني اسف اتراب الشارع واشرب وراه ماء ولاانك تسويلي فيها بطل وتفزعلي كلن ركب سيارته ومشو وفي الطريق وبعد ماقربو من الخيام في سيارة حمود حمود يناظر قزاز سيارته وبتنهيده والله الي راحت قزازة السياره عدام صيته نقزت ودحشت عمرها من بين المراتب وصارت تطل على وجه ابوها وهو يسوق وهي في الغماره الي وراء صيته :ياجعل السياره وقزازتها فدى يد الي كسرتها حمود كنه فهم انها هي الي كسرت القزاز ويبي يتاكد حمود :فدى يد الي كسرها والا الي كسرتها صيته :بثقه لابالله يد الي كسرتها انا الي كسرت القزازه كنت بصوب الترمس وباستظراف السموحه يابوحميد ماهقيت يدي تخوني وتكسر قزازتك حمود قيده روق وتندم على ضربه لفهد زودن على حبه لصيته الي مايماثلها في قلبه احد علشان كذا استظرف رد صيته وظحك عليه افاياصيته خليتيني اضرب فهد وهو ماله ذنب غزيل :عسى يدتس للكسر تسببتي على فهد حمود :فال الله والافالتس صيته :والله عاد انا جيت باعلم ابوي بصدق بس ولد اخوتس ملقوف نقز في نحري وماخلاني اهرج هايستاهل ماجاه محمد :الشرهه على الي يفزع معتس صيته :مابيله فزعه حمود :هذا بدال ماتشكرين ولد خالتس الي اكل الضرب عنتس تقولين مابيله فزعه صيته :يبه انا ماني خوافه ولاسويت شي اقول باعلى صوتي تراني سويت وسويت والاعلي من احد | ||||||||
|
| |
|
29-09-16, 02:28 AM
| #15 | ||||||||
| مراقبة عامة ومشرفة منتدى الروايات المنقولة
| غزيل :بلاه من الشياطين الي متعقدتن في شوشتس صيته :بسم الله علي من الشياطين يمه يعني تبيني اصير رخمه علشان اعجبتس غزيل :محد قال صيري رخمه بس كفي بلاتس عن الناس صيته :ماتبليت احد ولد اخوتس هو الي يدور البلا لنفسه انا كسرت قزازة ابوي وانا وابوي نخلص بينا وش خلاه يتليقف ويقول انا كسرتها هايستاهل ثم يستاهل الي جاه وازود في سيارة ابوفهد كان الحوار يدور عن نفس الموضوع ابوفهد :وش علمك على سيارة خالك يافهد تركي سبق فهد بالكلام صيته الي كسرتها بس فهد قال لخالي انا كسرتها علشان مايضرب صيته فهد :انكتم انت مالك دخل ابو فهد :هاه اشوف فزعاتك لصيته تساثره وش العلم فهد :ماهنا علم انت شفت وشلون ضربني بالخيزرانه تبي صيته تنظرب الضرب ذا كله وهي بنت قمرا :خلها تنظرب ياكودها تعقل هالبنت العوبا ياردي حظه الي بياخذها فهد :محد ماخذها غير ولدتس ابو فهد :هههههههههههه اني والله داري ان الفزعه هذي ماهي بخاليه قمرا :غدينا وانت من هالحين تفكر بلعرس وانت ولد البارح فهد :انتساني هالحين ولد البارح بكره اصير ولد السنه الي طافت وبعد وقت ليس بطويل وصل الجميع للمخيم والي كان عباره عن ثلاث خيام وحده لرياجيل ووحده للحريم ووحده مطبخ اما الراعي الي معهم خيمته مطرفتن عن خيامهم وعنده شبك فيه شلقت حلال من حلال حمود يذبحون منها ون مرهم شراي باعوه منها ويحتلبونها وهي ترعى في الربيع والامسى الليل ردها لشبكها وسكر عليها الرياجيل نزلو الزهاب من السيارات والحريم يرتبن في الخيام حمود نزل اخر كرتون في سيارته والتفت على ابو فهد قال انا بروح اذبح الذبيحه عند الشبك واجيبها للحريم يطبخنها صح على العيال يروحون معي اعلمهم الذبح ابو نمر :كلنا بنروح معك انعاونك وندرب العيال على الذبح ابو فهد :صاح باعلى صوته ياعيال تعالو بنروح لشبك نذبح الذبيحه تعالو معنا نعلمكم الذبح صيته سمعت خالها ينادي وجت تعدي انا بروح معكم وعلموني الذبح الرياجيل ضحكو على كلامها ابونمر :العيال نعلمهم علشان يذبحون لضيفانهم ويتمرجلون انتي وش حاجتس في الذبح صيته :بتعلم الذبح ياكودني لاكبرت اتجوز ارخمه اذبح الذبايح واكرم الضيوف الرياجيل عجبهم رد صيته وفكوها ضحك عليه حمود :بعدي بنتي الشقرديه ياعسى الرخوم كلهم فداتس العيال وصلو عند الرياجيل على كلام صيته وكلهم سمعوها وش قالت فهد ابتسم وقال لاتشيلين هم بتاخذين اطلق رجال يقصد نفسه والكل فهم قصده لانهم يعرفون ان فهد حاط عينه على صيته تذكير فهد دارس على وقته وهو الحين في ثالث متوسط ونمر اكبر منه بسنه وفي اول ثانوي محمد اصغر من فهد بسنه المفروض يكون في ثاني متوسط لاكنه متاخر في الدراسه وهو وصيته وسالم درسو في نفس السنه وكلهم الحين في رابع ابتدائي البنات كلهن متأخرات في الدراسه لانه في وقتهم ماكانو مهتمين بدراسة البنات وكلهن سجلن مع صيته في نفس السنه ماعدا بنات ابو سعد دارسات في وقتهن لان ابوهم مدرس فدرس عياله كلهم في السن المناسب ابو نمر ضحك وقال انا اشهد ان راعي الفزعات رجالن كفو يقصد فهد لانه دايم يفزع لصيته نمر انقهر من كلام ابوه صحيح ان فهد اعز اخوياه وكلام ابوه عنه صحيح بس مايبي احد يمدحه عند صيته ومع ذالك سكت مايبي يقول اي شي يزعل خويه حمود وابو فهد تجاهلو الموضوع لانهم مايبون يسبقون الاحداث ويتكلمون في مواضيع باقي عليها عمر صيته فهمت تلميح فهد وماعجبها بس استحت ترد وركبت مع ابوها في السياره تضيع السالفه راحو الرياجيل كلهم يم الشبك هم وعيالهم واكيد صيته اولهم حمود سدح الذبيحه في الارض وجهها للقبله وسمى بالله وقال انتبهو زين ياعيال وشوف وش اسوي اليوم ابوريكم كيف تذبحون ومن بكره كل يوم بخلي واحد يذبح ويصلخ ويقطع الذبيحه بعد قدامي وحنا معكم ونعلمكم صيته :يبه تكفى حتى انا ابيك تخليني اذبح حمود :ابشري وانا ابوتس ان قاله الله لدقين خشوم الرخوم انتي بخليتس اخر وحده تذبح وكل يوم تفرجي على الذبح واحفظيه زين علشان يوم يجي دورتس وانتي خابرتن كل شي صيته :ابشر يبه وبعد ابيك تعلمني الرمايه محمد :الله العالم انتس حاطتن عينتس على رخمه اوليا بتعلمين الذبح وهالحين بتعلمين الرمايه بعد حمود :يخسى الرخمه انه ياخذ ام الصيت وابشري ياصيته اني لاعلمتس الرمايه بالرشاش والمسدس وحتى الساكتون صيته : انا بتعلم علشان معتاز احد يحماني وانا بنت حمود ابو فهد :والله ياحمود بنتك هذي لويحصلها شيخه تمشيخت على روس العربان حمود :وهو يشوف في بنته همه وحماس ماشافها في عياله كلهم تستاهل الشيخه بنت ابوها ابو نمر :هالبنت حرتسه ماشاء الله عليها نمر مستانس على المدح الي يسمعه عن صيته وساكت والاكنه مهتم لشي فهد ماعجبه ان صيته تعلم الذبح والرمايه بس سكت علشان صيته ماتشيل في خاطرها عليه محمد وسالم مستانسين ان اختهم تحب تتعلم كل شي جديد عليها ومفتخرين فيها ويحسون انها اذا كبرت بتكون بنت ترفع الراس بعد ماذبحو الذبيحه والحريم طبخن الغدا وتغدو دخل وقت صلاة العصر وابو نمر رفع الاذان والإقامه وصلو وعينو من الله خير وكلن قام يتمشى على هواه شيخه وصيته وساره مجتمعات يلعبن بين الخيام مر من قدمهن فهد وصار يقز صيته وصيته لاحظته ووكزت ساره بكوعها في الجنب وقالت شوفي اخوتس ياحر عينه مغير يقزني ساره :تبي ترقع لاخوها عادي يسبرنا كلنا ماقزتس والاشي صيته تبي تثبت لساره كلامها قامت من عند البنات وراحت تمشى الحالها لحقها فهد وشافها جلست وسط النواوير وقامت تقطف منهن وكان مقابلها شجره راح يم الشجره واركى ظهره عليها ورفع وحده من رجوله على جذع الشجره وهو واقف ويحدق في صيته صيته شافته وقامت واقفه وقالت انت وش تبحلق فيه فهد :اجمع تفاصيل ظبي النفود في عيني قبل تغيب عني علشان منسى منها شي وهو يقصد انها قريب بتتحجب عنه نمر كان يتمشى وشاف فهد وصيته الحالهم وطقته الغيره وراح يمهم صيته بعد ماسمعت كلام فهد دنقت على الارض والقطت منها حصاه وحطت عينها في عين فهد قالت اجل الظبي بتعطيك الي يخليك تذكرها كل ماشفت وجهك في المرايه وتحمت له باقوى ماعندها وصكته بلحصاه على جبهته فهد حس بوجع الضربه وخم جبهته بيده لهي تصب دم عقد حواجبه بألم وهو يظغط على الجرح بيده وصاح على صيته انتي وش سويتي ليه حذفتيني بلحصاه وش سويتلتس انا صيته : ابد ماسويت شي بس علشان مره ثانيه لامنى اعطيت درب تلزم الدرب الثاني نمر قيده وصل عند فهد وصيته على فلقت صيته لفهد والاول مره يستانس هالكثر بس بما ان فهد خويه مايقدر يبين شي راح لفهد وقال ورني الجرح كبير شاف الفلقه وماكانت كبيره قال امش خلنا نرجع للخيام لازم تلف على الجرح رقعه علشان النزيف يوقف راحو كلهم يم الخيام وقمرا شافت ثوب فهد مليان دم وجته تركض وش فيك ورني راسك وتخم يده وتشوف الفلقه هذا وشهو منه من الي فالقك نمر :انا ياخاله بحذف الطير الي في الشيره وراه وجت في فهد والله ماقصدتها فيه السموحه ياخاله فهد التفت بسرعه على صيته بيشوف ردة فعلها على فزعة نمر وهو يعرف صيته وش كثر تكره الفزعات وتهاوش معه كل مافزعلها صيته لاول مره تستانس ان احد فزعلها دايم تحس ان الي يفزعلها يعتبرها ضعيفه ومحتاجه حمايته وهي قويه وشجاعه وتقدر تدافع عن نفسها بس ماتدري ليه حست فزعت نمر غير ناظرت فيه بحيا وابتسمت ابتسامه واسعه ونزلت راسها فهد صدمته الحركه موت هذا بظبط الي كان يتمنى يشوفه كل مافزع لصيته وهي تقوم تهاوشه وتشتمه نمر شاف ابتسامت صيته وعرف اخيرا ان الورقه الرابحه في يده ومافاته التفاتت فهد علشان كذا استدار بسرعه ولقاه ظهره ومشى قبل يصحى من صدمته ويشوف حجم السعاده الي في وجهه فهد صحى اخيرا من الصدمه والتفت بيشوف ردت فعل نمر بس نمر قيده استدار وماقدر يشوف وجهه قمرا جرت فهد معها داخل الخيمه وجابت عويدي مطحون وفنيله من فنايل فهد شقتها نصين نظفت الجرح بقطعه وذرت عليه عويدي ثم اربطته برقعه الي شقتها من الفنيله وعطت فهد ثياب يبدل ملابسه الملطخه بدم في هالوقت اذن ابوفهد اذان المغرب والكل صلى ثم شبو نارهم نار في مقدمة خيمة الرجال ونار ثانيه في مقدمة خيمة الحريم وتجمعو على الضو على قهوه وشاهي وسوالف وسعة بال وبعيد صلاة العشاء جهزن الحريم عشاهن مرقوق وتعشو الجميع ومن ثم كلن بسط فراشه ونام | ||||||||
|
| |
|
29-09-16, 02:29 AM
| #16 | ||||||||
| مراقبة عامة ومشرفة منتدى الروايات المنقولة
| في صباح اليوم الثاني كان الجو غيم والمطر حروت هطول قامو الرجال والحريم يذرون خيامهم ويسنعونها وماكان عندهم غير مسحاتين مسحاه عند الحريم والثانيه عند الرياجيل حمود :انا بجيب الشرع البلاستيك نغطيبها ظهور الخيام لايغرقنا المطر وانت يابو فهد تناوب انت وابو نمر على حفر العقم دار مادار الخيمه والاتنسون تدفنون طراف الخيمه من تحت وتشدونها زين لاتطير مع الهبايب اليوم الله العالم ان المطر ديم عند الحريم قيدهن دفنن اسفل خيمتهن ويتناوبن على نثل العقم حمود جاب الشرع وقام يغطيبها ضهور الخيام ويشدها عليها زين من الصبح والجميع يشتغلون من غير توقف من الفجر لين جت الساعه عشر الصبح وبدا المطر يرش حمدو الله انهم قيدهم خلصو من شغلهم ابو نمر:يانمر ناد الراعي يجي معنا في خيمتنا امن من خيمته وشف الغنم عندها طعام وماء والا وبعد تعين في الشراع الي نصبه الراعي على شبكها جويد والا نمر :ابشر يبه وراح يسوي الي قاله ابوه ابو فهد :اسمعن ياحريم امسكن بناتسن عندتسن واحنا بنمسك العيال عندنا اينتسن اطلعن احد من الخيمه ترا هالمطر بين من مواريه انه ديم ويمكن يجي معه هبوب قويه حمود :اعجنن النا عجين وجيبن النا صاج وغظارتن نعفك القرص فيها وهاتن السمن لاتنسنه حنا بنسوي عيشتنا عندنا وانتن سون عيشتسن عندتسن والاندورتسن والاتدورنا كلن يصك خيمته ويقضب ارضه لين المطر ينقطع والجو يزين ام محمد جابت لحمود كل الي يبيه واجترت لها جركل ماء دخلته معها للخيمه ام نمر اشتالت من المطبخ قدرن كبير فيه كل مايحتاجنه من اكل يكفيهن لبكره ام فهد قامت على خيمة المطبخ تسكرها وتجودها زين والمطر يصب فوق راسها ماتسودة على الله انها تصكها ثم تغانمت خيمة الحريم دخلت عند ربايعها وسكرن باب الخيمه بلحبل الخاصه بربطه ام فهد :ياوجه الله ياقو المطر قواه اوليا يدوب يرش ثم صب صبةٍ وحده تسن السماء قربه ونفتح فمها على الارض ام محمد :اللهم اجعله صيبا نافعا المطر كان يظرب في الشراع البلاستيك على ظهر الخيمه مصدر ظجيج مزعج زياده على صوت الرعد الي كان يظرب بقوه مرعبه خلت الجميع يخشعون لله الواحد الاحد وماعاد على السنتهم الادعاء او استغفار اوتهليل وتسبيح ورغم انا دائما على يقين انه لا ملجأ ولا منجا من الله الا اليه وانه كل شي يفقد قيمته وتزول اهميته الا العمل الصالح فهو الذخيره الباقيه والغنيمه الدائمه الا انه في مثل هالأجواء يكون اليقين اعمق لدرجة الألتحام بالأنفاس والأنغراس كنصل السيف الحاد في صميم قلوبنا فلاعجب والحال كذالك ان يتنفس الانسان استغفارا ويزفر ابتهالا المطر مازال مستمر بتدفق وحشي والجميع في الخيام حان وقت صلاة الظهر وكلن صلا في خيمته وبدو يسوون لهم شي ياكلونه اما الحريم عندهن القز والاسطوانه واركبن عليه عصيده سوتها ام نمر واما الرجال عندهم دافور وسوولهم عليه قرص معفوك سواه حمود تغدو وعينو من الله خير والمطر مازال مستمر بنفس الغزاره بعد صلات العصر في خيمة الحريم صيته :يمه ابي اروح للخلا (الله يكرم القراء) ام محمد :طيب تعالي بطلع معتس صيته :لايمه تكفين ابي اروح بعدها لابوي في خيمة الرجال ام محمد :الرياجيل منبهين محد يجيهم صيته :يمه انا غير انا ام الصيت من الي مايبيني اجي عنده والله انهم ليستانسون بشوفتي ام محمد تدري ان حمود يفرح بشوفت صيته بزود علشان كذا سمحت لها تروح عنده صيته طلعت تحت المطر وهو يصب صب ومبسوطه حيل بلجو الي اول مره تتعايش مع مثله فكرة بينها وبين نفسها وقالت خلوني اشوف الغنم عسى ماصابه شي في خيمة الرجال قام نمر بيطلع من الخيمه ووقفه صوت ابوه وين بتروح ياولد نمر التفت على ابوه ابروح اشوف الغنم وش صار عليه وبامر خيمة الحريم اشوف معتازاتن شي والا ابو نمر : هارح ولاتبطي نمر :ابشر يبه فهد ومحمد وقفو بيروحون معه وحلف عليهم ابو نمر والله ماواحد يسير غير نمر ان رحتو كلكم عزالله ماعاد رجعتو نمر طلع من عندهم وراح يشوف الحلال ولقاه متجمع حول بعضه وكل شاه راصتن جنبها على خويتها يتدفن ببعض يوم استدار بيرجع شاف صيته تتمشى تحت المطر قريب الشبك وراح الها نمر :وش جابتس هنا صيته :قلت لامي باروح لخيمة الرياجيل وجيت اشوف المطر وارفع راسها لسماء وغمضت عيونها والمطر يصب على راسها وملابسها غرقانه ماء قالت انا احب اعيش الحياه زي ماهي يمكن اخاف ويمكن اتوجع بس ماراح يصيبني الاالي ربي كاتبه لي ظللت عيونهاعن المطر بيدها وصارت تشر لسماء بيدها الثانيه شف البرق رمح طعن كبد السماء وجع واسمع صوت الرعد السماء تنتحب فزع وشف الهتان السماء تبكي مطر نمر ماستغرب كلام صيته لانه يعرف انها مجنونة قرايه والسنه ذي من بدت العطله تركت مجلات الاطفال وكتبهم واشترت مجلات الشعر فواصل والمختلف وغيرها وحتى الكتب صارت تشتري كتب الكبار نمر :تفكيرتس يشبه تفكيري حتى انا احب اعيش الحياه بكل اوقاتها كل وقت وكل جو له متعته صيته مستانسه بنمر والسوالف معه ناظرت فيه وابتسمت وارجعت ترفع راسها لسماء وتسكر عيونها من جديد وهي تستمتع بزخات المطر على وجهها يقولون الأماني لانبتت تحت المطر تتحقق وانا اتمنى اني ماكون صفحه في كتاب مطبوع يقراه الجميع وتتكرر الاف المرات انا اتمنى اكون نسخه وحيده لكتاب نادر مكتوب بخط اليد محد يقراه الى الي انا اسمحله انه يقراني نمر انصدم يدري انها تاكل الكتب قراءه بس ماتوقع ان افكارها وصلت لهاالعمق ولانه حس انه تاخر قال روحي انتي لخيمة الرياجيل وانا بروح لخيمة الحريم انشدهن كان يبن شي وان انشدتني امتس عنتس قلت في خيمتنا امسى الليل على اهل البر والمطر ماتوقف وهم مازالو مسكرين خيامهم عليهم ولايطلعون منها الالضروره المطر استمر بالهطول لمنتصف الليل ثم توقف في اليوم الثاني الصبح كان من اروع الصباحات الي عاشوها من يوم كشتو الارض مرتويه والغدران من يمينهم ويسارهم والشعبان تسيل والبنات والعيال من اسعد مايكون انطلقو يلعبون بالطين شوي يتحاذفون وشوي يبنون بيوت واشوي يحفرون الارض ويدفنون ارجولهم فيها الرياجيل راحو لشبك الغنم وفكوه عنها وخلوها تطلع لالشمس عشان تدفى بعد معاناتها امس من البرد والمطر وبعد مافكوها ركبو سياره من سياراتهم واخذو العيال معهم وراحو يصيدون ضبان الحريم راحن يتمشن هن وبناتهن حول الخيام رجليه ويتفرجن على السيل والغدران ويسولفن ويتمازحن ومستانسات فجأه ام محمد فقدة صيته ام محمد :يامن عين صيته من اولا ماشفتها البنات بصوت واحد راحت مع الرياجيل وعند الرياجيل انزلو عند جحر ضب وسيلو عليه ماء لين طلع لهم ومسكوه حمود :ياليت صيته معنا بتستانس على الصيد فهد :خلها تقعد عند البنات ياخالي تراك خربتها وصارت كنها ولد الكل ضحكو على تعليق فهد لانهم عارفين نواياه محمد :اما املك عليها واخذها لبيت ابوك تربيها امك على ماتبى والا لاتدخل في تربية بنتنا حمود :لابالله ماعاش من يربيها على مايبي صيته انا الي اربيها على مابي ثم لاكبرت وصارت في حروت جواز عزالله لااخليها تختار الي تبي وتنقى وتشرط بعد فهد عصب من كلام خاله وقرب منه لين جاء قدامه وعينه في عين خاله وقال صيته الي ياخالي من غير لاراي والامشاور (على فكره عيال البدو السنتهم طلقه وغالبا شخصياتهم قويه ومتعودين على علوم الرياجيل من صغر ويردون ويراددون ومايهابون احد حتى لو كانت اعمارهم صغيره ) حمود :لابالله ماهيب لاالك ولالغيرك ولاياخذها الى الي هي تختاره وتوافق عليه برضاها ابوفهد زجر اولده فهد انت وصيته توكم صغار وهالعلوم ماجاء وقتها ومتى ماجاء وقتها يحلها الف حلال نمر على قد مانقهر من كلام فهد على قد مانبسط على كلام حمود بس لان فهد يصير ولد عمة صيته وولد خالها في نفس الوقت زودن على ان فهد خويه صد وكالعاده كتم في نفسه وسكت هم في النهايه اقارب بس هو يادوبه جارهم كملو الرياجيل صيد وهم يظنون ان صيته عند الحريم وكملن الحريم تمشيه وسوالف وهن يظنن ان صيته مع الرياجيل نرجع لوقت سابق يوم الرياجيل نادو العيال وركبو السياره علشان يروحون لصيد كانت صيته تلعب بطين مع البنات ويوم سمعتهم يتنادون لصيد فزت من عند البنات وغسلت يدها في الغدير بسرعه وقالت انا بروح مع الرياجيل علمن امي وانطلقت من عندهن تعدي يم سيارت الرياجيل والبنات رجعن يلعبن وماشافنها وهي تركب اما الرياجيل اركبو السياره وحركو قبل صيته تاصلهم ولاشافوها وهي تعدي يمهم صيته انقهرت انهم ماخذوها معهم وراحت تمشى الحالها ومع الوقت سهت في الغدران والمناظر الي تفتح النفس صارت شوي تركض وشوي تحفر وشوي تلعب في السيل ونست نفسها يوم اشبعت مراكض ولعب استدارت بترجع لهلها لياعلم الندم الخيام ماعاد تشوفها والدرب ضيعته حاولت تقص جرتها بس المشكله انها كانت تعدي وتلعب في كل مكان ومضارب رجلينها املا الارض ولاتدري من وين جت عند الرياجيل صادو شلقت ضبان ورجعو للخيام ومن حين شافن البنات سيارتهم تناوشنها يعدن يبن صيته مير ووقفت السياره ونزلو الرياجيل والعيال ونزلو الضبان معهم قيدهم ذكوها وخلصو مير والبنات يجنهم يتعادن وين صيته صيته وين حمود انمزع قلبه من الراعه ابك انتن وش تقولن صيته ماراحت معنا مخلينها عندتسن البنات ارتاعن والله مهيب عندنا هي شافتكم يوم ركبتو السياره وجتكم تعدي تقول باروح معهم لصيد ومن يوم راحت لكم ماعاد شفناها | ||||||||
|
| |
|
29-09-16, 02:31 AM
| #17 | ||||||||
| مراقبة عامة ومشرفة منتدى الروايات المنقولة
| القراءه توسع الادراك وتزيد الثقه بالنفس وتطلق خيول الفكر من معاقلها وتزيل سقف الخيال ليمتد الى مالانهايه وصيته قارئه من النوع الذي يبحر في اعماق الكتب الى حد الغرق وهذا ماجعل ردت فعل صيته مختلفه كما هي دائماً نرجع لصيته صيته قامت تلفت حولها وتفكر وش تسوي وتقراء المعوذات والاذكار وتستودع الله نفسها اللهم اني استودعتك نفسي اللهم ردني الى اهلي سالمه فكرة انه لازم يكون معها عصاء قويه يمكن تحتاج تدافع عن نفسها الفكره هزتها من داخل ودخلها خوف سال معه دمعها على خدها لاكنها تذكرة انها استودعت الله نفسها وقالت بصوت تسمع اشباح الخوف في داخلها وديعة الله ماتضيع والبتساء ماينفعني بشي مسحت دموعها بذراعها بقوه وراحت تدور عصاء لقت غصن شجره يابس وطويل اخذته في يدها وقامت تدير بصرها في المكان حولها كم شجره متفرقه هنا جاء في بالها فكره وبدت بتنفيذ فورا عند اهل المخيم حمود بغى ينهبل من الخوف وماهو الوحيد الكل كانو مرعوبين من فكرة ضياع صيته حمود قام يصيح ينادي غزيل ياغزيل يامال الوجع وين صيته غزيل جت تركض وهي ملتفه بجلالها ابك انت وش تقول ياويلي ويلاه البنت مهيب معك البنات يقولن انها معك حمود مهيب معي مهيب معي وراح يركض مثل المجنون يدور صيته ويناديها باعلى صوته غزيل طاحت مغشي عليها وعيالها احتارو يقومونها والايدورون صيته بس ماطالت حيرتهم وتجمعو عليها يقومونها الحريم خمن غزيل من حين طاحت وصارن يخبطن وجها بكفوفهن اذنها تقوم ابو فهد وفهد وابو نمر ونمر انطلقو يم المكان الي حركو السياره منه يوم مشو يصيدون اذنهم يلقون اثر لصيته حمود من الفجعه ماعاد يجمع يفتش في كل مكان ويركض في كل اتجاه حتى نعوله طاحت من رجله والاحس فيها يوم تطيح صيته شعرها مربوط بربطه طويله حول الذراع وعرضها حول الشبر لونها ازرق وفيها ورودن حمر ماتخطيها العين ابد وشعرها مجدول واسفله مربوط ببكله صغيره قامت اخذت الربطه الي في شعرها ودورت ابرز اشيره من الشجر الي حولها وربطت طرف ربطتها في غصن الشيره ثم دورت غصن من الاغصان المتكسره في الارض وربطته في الطرف الثاني من ربطت شعرها بحيث ان الربطه تنشد يم الارض والغصن يتدلى منها ثم اخذت الغصن الي خلته عصاء الها وكتبت على الارض انا صيته ضيعت اهلي وبادورهم في اتجاه السهم وخطت على الارض سهم وحرصت انها تحفره في الارض بوضوح علشان ماينمسح بسرعه والي ساعدها ان الارض رويانه ماء ولينه يوم رسمت السهم في الارض حطت عصاها على راس السهم ثم جرته وراها بحيث الغصن يترك اثر على شكل خط على طول ممشاها وفكرت انه لو اهلها مرو من هنا وهم يدورنها بيشوفون الربطه ويستدلون عليها عند اهل الخيام غزيل قامت من الاغماء واعيالها اول ماشافوها استفاقت الحقو الباقين يركضون الحريم والبنات كلهن يتباتسن وغزيل قامت بتروح تدور معهم وقضبنها الحريم بالقوه وقالن اقعدي هنيا حنا بنحتريها هنيا اذنها ترجع الرياجيل لقو اثر صيته وصارو يتبعونه ونادو احمود او وروه الاثر وصار يعدي مع جرتها وفهد ونمر ومحمدوتركي وسالم يعدون معه ابو فهد وابو نمر قالو بنجيب سياره نخاف انها مبعتن كثير وصارو يتبعون الي يقصون الاثر كل واحد بسيارته خوف انهم يحتاجون السيارتين ولاتغرس وحده من السيارات للاخرى معهم صيته ابطت تمشي والاشافت حولها شي جلست تستريح لهذي عينها تطيح على الكرميش الي في اسفل ثوبها وتقوم وتشقه وطلع معها وصلتين وحده في الثوب من قدام ووحده في الثوب من ورا اخذت وحده منهن واربطتها في غصن شيره وربطت في اسفلها غصن يثقلها وكتبت تحت الشيره انا صيته ادور اهلي والاشفت حولي احد وبمشي في اتجاه السهم ورسمت سهم على الارض وحطت عصاها على راس السهم وخطت في الارض نرجع للي يقصون الاثر مازالو مستمرين يتبعون اثرها لين فهد لمح ربطة صيته وعرفها وصاح باعلى صوته عانو رباط شعرها تعالو كلهم راحو يتسابقون يم الشيره ووصل فهد اول واحد وقراء المكتوب اسمعو صيته كاتبتن ضيعت اهلي وبادورهم في اتجاه السهم شافو السهم وين يودي وراحو يتبعون خط عصاها الي تسحبها وراها في الارض ابو فهد قال انا بسبقكم على السياره في نفس الاتجاه وانت يابو نمر خلك موازنهم ان لقيت شي قدم ادق لكم بوري وتشتالهم وتجيني حمود مهوب يم احد وكل حواسه مركزه على هالخط الي خطته بنته في الارض وكله امل انه يلقاها ويدعي ربه انه يحفظها من كل مكروه صيته مشت قدام مده وشافت بيت شعر امسكت وصلة الكرميش الي بقت معها وسوتبها مثل ماسوت بلي قبلها وكتب تحت الشيره انا صيته شفت قدمي بيت شعر وباروحله ياكود يدورن اهلي معي ابو فهد شاف الرقعه الي ربطتها صيته على الشيره الثانيه وعلق البوري لاخوياه الي وخره ابو نمر سمع البوري وصاح ابشر ياحمود ابو فهد لقى شي اركبو خلونا نلحقه اركبو كلهم السياره وراحو لبو فهد عارضهم بعد ماقرى الي كتبته تقول مالقيت احد وبدور اتجاه السهم خلونا نمشي على السيارات واكيد انا بنلقى اشارتن اخرى سياراتهم دساتن غمارتين ولها حوض فالعيال اركبو في حوض السياره علشان يشوفون اوضح من الي داخل السياره العيال شافو الاشاره الاخيره وصارو يخبطون التنده بيدينهم وقفو وقفو نمر وفهد مامعهم صبر لين يوقفون نقزو من حوض السياره وهي تمشي في نفس الوقت وراحو يعدون لشيره وقرو المكتوب وشافو بيت الشعر الي تقوله راحو يركضون لسيارات راحت لبيت الشعر بسرعه نلحقها قبل يصير فيها شي | ||||||||
|
| |
|
29-09-16, 08:52 AM
| #18 | ||||||||
| مراقبة عامة ومشرفة منتدى الروايات المنقولة
| صيته راحت تمشي يم بيت الشعر بحذر شديد وهي تلفت حولها وتحاول تجمع كل التفاصل في ذهنها لعلها تستنتج اي فكره واضحه عن اهل البيت قبل توصلهم ياالله البيت ذا وش فيه مايل كذا كملت مشي وكل مالها تقرب اكثر وتتضح الصوره امامها اكثر البيت طايحن نصه ومافيه غير جهه وحده منتصبه ومن جنب البيت بظبط سيل كبير شوي وال هالحين ماه يجري ومن ورى السيل سياره شاص حمرا يعني السيل جاين بين السياره والبيت وواضح ان السيل هو الي جارفن اطناب البيت وطارحن العمود الوسيط اصلا البيت كله في الارض ماباقن منه غير جهه وحده ماسكتها عمدان التيزار الاخير لاتطيح وجايتن مايله بشكل زاويه صيته ماشافت حول البيت احد قربت منه يوم جت بتدخل الجهه القايمه منه شافت زول حرمةٍ طايحتن بالارض وسناح البيت فوقها صيته شهقت ياوجه الله الحرمه ميته والا وش علمها مشت يمها بسرعه ورفعت عنها السناح بصعوبه لقت عمود الوسيط ظاربن راسها من وراء ودمها مغرقن الارض من حولها وقيد التراب اشربه ماتشوف الاحمار مغطن الارض هزتها بيدها وهي ترجف ياحرمه قومي انتي توحيني هيه ياحرمه الحرمه ماتحركت ابد والافيها ريح الحياه صيته تأكدت انها ميته قامت عنها بسرعه وتناوشت البيت تعين فيه احد والا شافت كراتين معيشه وجركل ماء جنبه رشاش مسنودن على الكرتون وشهقت بروعه يالله دخيلك يارب خمت الرضيع الي شافته ممهود ومحطوطن على فراش صغير من حقات المواليد وجنبه قوطي حليب فاضي ورضاعةٍ مصبوبن فيها ماء وباقي مفتوحه وجنبه شنطه قماش واضح انها الشنطه الي فيها اغراضه مفتوحه ومحطوطن جنبه حفاظه نظيفه الله يعز القراء وكيس الحفايظ الباقيه جنب الشنطه صيته جلست متربعه وحطت الرضيع في حظنها شافت وجهه شاحب وفمه فاتح وهو يدوب يتنفس لمست خده باصبعها ومررته على فمه وشافت كيف صار يتخطف اصبعها بفمه دلالت شدة جوعه نزلته في الارض وقامت لكرتون الاغراض طلعت منه طاسه كبيره وصبت فيها ماء من الجركل وغسلت ايدينها زين ثم طلعت طاستن اخرى صغيره غسلتها وصبت فيها ماء ثم دورت في الكرتون الثاني الي كان مخصص للاكل وطلعت منه كيس تمر طلعت من الكيس املا يدها تمر وامرسته في الماء الي صبته في الطاسه الصغيره افركته بيدها لين انمرس زين ثم ارجعت جنب الرضيع وتربعت وحطته في حظنها كانت ريحته مره شينه بس تجاهلتها وصارت تغط اصابعها في المريسه ثم تمررها على شفاه الرضيع وتقطر في فمه كم نقطه وهو يلحس الي تقطره على فمه بنهم شديد من قو جوعه استمرت تنقط في فمه وتسولف عليه صيته يوم لقت الرضيع انشغلت فيه ونست كل شي غيره حتى انها نست انها ضايعه اه ياغلي عنك غلاه الله العالم ان امك يوم جت تسويلك رضاعه لقت حليبك مخلص والظاهر ان السياره بها زود حليب واكيد ان ابوك فزع يجيبلك حليب من السياره مير السيل غدابه وامك ياانها واقفتن تحتريه والاانها تباطته وراحت تعين وينه بس الي غدا بزوجها غدربها وجرف اطناب البيت واقتلعها من الارض وهذا الي خلا وسيط البيت يطيح على امك ويذبحها الرضيع بدا يحس بالحياه تسري في عروقه وفتح عيونه صيته ناظرت فيها وقالت وازين العيون وزين راعيها اسمع عاد تراك اخنزت بثيابي خلني اغيرلك وكاد انك زهقان من الوصخ ونزلته على فراشه وفكت امهاده وبدت تغير ملابسه والصغير قام يرافس ويبكي صيته اسمعني عاد كانك تبتسي جوع ابشر بالخير بس خلني اخلص من تلبيسك وارجع امهدك وانتسانك تبتسي على امك وابوك ابتس زود ابتس لين تطيب تسبدك علشان ماعاد تبستي عليهم مرتن ثانيه وابشرك ان الله رزقك بدال ابوك بابو مامثله ابو ايه من قدك بتصير ولد حمود وغزيل ياسعد عينك يوم تصير ولدهم صيته خلصت من تنظيف الرضيع ولبسته ملابس نظيفه من شنطته ومهدته بمهاد نظيف وهو مازال يبتسي حطته على فراشه وقامت اخذت رضاعته وغسلتها واخذت المشخال من الكرتون واغسلته ثم اشخلت المريسه في الرضاعه وسكرتها ورجعت تحط الصغير في حظنها وترضعه لين شبع ونام فجأه سمعت صوت سيارات تقرب من البيت ثم وقفت حطت الصغير على فراشه وانقزت واقفه خمت الرشاش وراحت تشوف من يالله اني استودعتك نفسي وهالصغير الي معي يالله تحمانا من كل شر ابو نمر وابو فهد وقفو سياراتهم قدم البيت المهدوم ونزلو كلهم ينادون باعلى اصواتهم صيته صيته شافتهم وطارت من الفرحه وراحت تعدي لبوها حمود ماصدق عيونه وهو يشوف صيته هلا بروحي انا هلا بصيته ويظمها لصدره بكل قوته وعيونه تدامع الحمد لله انا لقيناتس بخير ابو فهد وابو نمر واخوانها وكل العيال فرحانين بشوفتها ويتحمدون لها بسلامه ويهنون حمود على سلامتها واخيرا انتبهو للبيت المهدوم ابو نمر وش العلم ياصيته البيت فيه احد صيته :ايه لقيت فيه رضيع جايه الموت من الجوع يالله انه يرد النفس وقمت مرستله مريسه وقطرتها في حليقه لين رجعتله الحياه ثم نظفته ولبسته وزليت باقي المريسه في رضاعته وارضعته ونام ابو فهد :وانتي وش عرفتس هذا كله صيته :ياخالي انا بنت واجلس مع الحريم واسمع سوالفهن واشوف سنعهن لعيالهن واتعلم وبعد قيد قريت في الكتب ان الانسان لاصار عطشان بلحيل ومبطن ماشرب ماء لازم يسقى بشويش جغمه جغمه علشان مايذبحه كثرة الماء بعد طول الجفاف حمود :بعدي بنتي الظفره ابونمر تقدم للبيت وشاف الحرمه الميته وتعين فيها لهي خصره من مبطي شكلها ميته من الليل ابو نمر :فيه حرمتن ميته جوه الباقين ابو فهد :الله العالم ان الوسيط طايحن عليها انتي محركتها ياصيته صيته :انا لقيت السناح طايحن فوقها والوسيط ناشبن في راسها ووخرتهن عنها الظاهر انها جت بترضع ورعها ومالقت في القوطي حليب وراح الابو بيجيب الحليب من السياره وجرفه السيل انا لاقيتن رضاعة الورع مصبوبن فيها ماء وقوطي الحليب مفتوحن جنبها ومافيه شي حمود تهايق في البيت وشاف الصغير نايم دخل واشتاله يازين الزين الله يحفظك من كل شر الرياجيل كلهم دخلو وشافو كل شي على ماقالت صيته ورفعو جهت البيت الطايحه ومالقو تحتها شي ابونمر :يانمر رح انت والعيال امشو على جال السيل تعينو تشوفون احد وان لقيتو احد نادونا وانتبهو لاحد يدخل السيل ابد نمر :ابشر يبه وراح هو وكل العيال يمشون على جال السيل لين شافو رجالن ناشبن في جذع شجره معترضتن في وسط السيل نرجع للي في البيت ابوفهد لقى عباة المره ولحفها ابها ومالقو في البيت شي يستاهل يادوب كم ماعون والاكل والرشاش وشنطة ملابس غير شنطة الورع فيها ملابس رجال وحرمه مما يدل على ان اهل البيت ماغير اثنين رجال وحرمته وولدهم صيته :يبه انا سميت الرضيع اعناد حمود :وليه عناد بذات صيته :يبه ابيه يعاند الوجع ويصير رجال قوي ومايهاب حمود :الله لايجيبله وجع وانا ابوتس ابو نمر :وش هالفال الاقشر ابو فهد :ماتدرين يمكن يكتبله ربي السعاده صيته :مافيه احد يموت امه وابوه ولايتوجع وانا ابيه لاحس بلوجع يصبر ويبتسم بدل مايبتسي هذا ولدي انا بربيه وخليه فارس مامثله احد حمود خاف ان صيته تعلق بصغير ويطلع له اهل قال ياصيته عناد وماقلتيله وكاد ان وراه اهل مهوب بس امه وبوه واهله مانهم مخلين ولدهم اكيد بياخذونه صيته ضاق صدرها من طاري اهله وقالت لاان شاء الله انه يقعد عندنا ويصير ولدنا حمود :الله يكتبله الي فيه الخير ان كان عندنا والاعند اهله تركي جاء يركض يبه لقينا رجال ناشب في السيل ونمر شافه ويقول انه ميت الرياجيل راحو يشوفون الرجال ولقوه ميت وطلعوه من السيل ابو نمر :وهالحين وش السوات حمود ماعاد ابها سوات انا باخذ الجثث لاقرب مستشفى وانتم اجمعو القش وارجعو لديره ابو فهد مالنا الاتسذا ابو نمر :هالحين خلونا نصف العمدان على مجرى السيل ونطبق السناح ونبسطه من فوقها علشان نظهر السياره من فوقه جاي ابو فهد رايك في محله يالله ياعيال اجدلو عمدان التيازير هنيا الرياجيل سوو مثل ماقال ابو نمر واظهرو السياره يمهم وفتشوها ولقو في الغماره عند الرجلين قوطيين حليب مافكن وتاكدو ان تحليل صيته صحيح افتحو درج السياره ولقو فيه قديمي وبوك فيه بطاقة الرجال واوراقه الرسميه وسبحه وقلم صيته اخذة القديمي والسبحه والقلم ومعهن ساعة الرجال الي في يده واخذة اشماغه الي كان على مرتبت السياره واجمعت اغراظ الابو فيها وربطتها ولقت في البيت شنطه يدويه للمره فيها عطر ومشط وكحله واسوارتين ذهب وسلسال وقيدها طلعت الساعه والخواتم الي في يد المره وحطتهن في نفس الشنطه وخلتهن على جنب احمود فطن لبنته وقال ياصيته مايجوز تاخذين شي من حلال الناس كل هالاغراض لازم نسلمها لشرطه صيته :يبه من قال اني باخذهن الي هذي اغراض ابو عناد وامه واكيد اعناد لاكبر يبي يستانس لاشاف اي شي يخص امه وابوه اصلا انا افكر انه كل مانجح من المدرسه اعطيه حاجه من حاجات امه وابوه هديه وكاد انه بيفرحبهن بلحيل الرياجيل اضحكو هههههههههه ابو نمر :ماشاء الله عليتس كل شي مخططتن له من هالحين فهد يحس ان هالصغير بياخذ عقل صيته وتمنى ان الشرطه يلقون اهله نمر يفكر الله عليتس ياصيته دبرتها دبرت مرتن سنعه هذا وهي لهالحين بزر اجل لاكبرت تسيف بتصير ياحظ الي تكتبله يارب تجعلها من نصيبي الرياجيل فرشو بطانيه في حوض الشاص ولفو الرجال في بطانيه والحرمه في بطانيه ثانيه وحطوهم في صندوق الشاص حمود ساق الشاص وفي جنبه صيته وفي حظنها عناد والباقين اركبو في سياراتهم واتجهو يم الخيام حمود اخذ غزيل معه وراح على الشاص يم المستشفى يسلمون الجثث ويكشفون على عناد والباقين قعدو يشيلون الزهاب والخيام بيتركونها متسانها علشان مايتاخرون بسببها حمود وغزيل في المستشفى ومعهم صيته وعناد طبعا المستشفى بلغو الشرطه وجاء ظابط يحقق مع احمود والدكاتره قالو ان الحرمه ماتت بسبب ظربه قويه على راسها اما الرجال مات بسبب جلطه في القلب وانه قعد في السيل مده طويله يمكن ذا هو الي جابله الجلطه حمود :غزيل ادخلي عند الدكتوره تكشف عليتس لاتنسين انه اغمي عليتس اليوم غزيل :صادق انا احس بدوخه لهالحين ابروح اسوي تحاليل واشوف الدكتوره وش تقول تهقى شغلتنا مطوله هنا حمود :اكيد لازم يحققون في الموضوع والصغير بيخلونه في حظانت المستشفى لين يلقون اهله وان سجلت عندهم طلب تسان مالقو اهله يسلمونه لي اربيه غزيل سوت تحاليل شامله وطلعت حامل في شهرها الاول غزيل وحمود وحتى صيته فرحو بلخبر وحسو ان هالحمل رزقه لعناد علشان يرضعونه مع الولد والاالبنت الي بتجي ويصير ولدهم بحق وحقيقه الشرطه حققت مع احمود وابو فهد وابو نمر ومن اوراق الرجال الرسميه قدرو يعرفون مكان بيته وهو من اهل الدوادمي ساكن في حاره ماله فيها غير ثلاثة اشهر ومستاجر دكان في الحاره وحاطه بقاله له يبيع فيها وبيته اجار واهل الحاره كلهم اتفقو انه من يوم سكن عندهم ماشافو احد يزوره وهم معرفتهم له محدوده ماتتعدى حدود البقاله والي يعرفونه انه كاشت هو وامرته بعد ماطلعت من الاربعين بسبوع طبعا المحكمه سوت اعلان في الجريده باسم المتوفى ولاحد جاء يستلم عناد فسلموه حمود طبعا بعد مااخذو عليه التعهدات والمعتاده وطلعو لعناد شهادة ميلاد باسم ابوه الحقيقي وصار اسمه عناد بن عبدالله بن عبد الرحمن بن عقاب | ||||||||
|
| |
|
29-09-16, 08:59 AM
| #19 | ||||||||
| مراقبة عامة ومشرفة منتدى الروايات المنقولة
| ننتقل لمكان اول مره نروح له في اسكان الحرس الوطني خشم العان الرياض وفي بيت ابو وليد محمد اخو حمود ابوصيته زوجته سلمى من اهل الجنوب اخت خويه الي هوبعد عسكري في الحرس الوطني ام وليد مديرة مدرسة البنات الي في جنبهم انسانه تحب تلبس اعيالها على الموضه بغض النظر عن اذا ماكانت هذي الموضه تناسب مجتمعنا اولا تخاف على عيالها من الطلعه في الشارع ودايم باب الشارع مقفول بمفتاح عشان مايطلعون بلمقابل تارسه البيت لهم العاب الكترونيه اتاري على سوني على سيارات بريموت على عرايس ودباديب للبنات اي جهاز جديد ينزل السوق هي اول من يشتريه مدلعه اعيالها وماتعترف بثوب السعودي اعيالها ماتلبسهم الابناطيل وبدلات على الرغم من انه بذاك الوقت ماكانت حمى الماركه والستايل الغربي منتشره في المجتمع الا ان سلمى اول من تمسك بهالموضه واتبعها بناتها تلبسهم جنوزات تنانير قصيره فساتين قصيره وحتى شورتات عيال ابو وليد هيا مخلصه الجامعه وتوها متزوجه هيفا تدرس ثاني جامعه وليد توه تخرج من الثانوي والسنه الجديده يدخل الجامعه عمره ظ،ظ§سنه طويل ونحيف نوعا ما قاص شعره قصه غربيه نفس الاعبين الاجانب يلبس بدل تميل لنعومه في اقمشتها وستايلها ويلبس اساور جلد في يده منظره لايكاد يتكرر في المجتمع الي هو عايش فيه ساعاته فخمه وكبكاته وعطوراته كل شي عنده مميز لانه المفظل عند امه وطلباته اوامر ماعدا الطلعه من البيت بلموت يطلع عنده اصدقاء في المدرسه فقط يحاولون يقلدونه بلبس لاكن اهاليهم لهم بلمرصاد لان ستايله ابدا ماكان مقبول في ذاك الوقت خاصه في مجتمعه البدوي والي لبسهم مقتصر على الثوب وفي حدود ضيقه ملابس الرياضه وليد ماله اصدقاء خارج المدرسه الاابراهيم ولد خاله (اذا شفتوني متعمقه في وصف شخصيه معناتها الشخصيه لها دور اساسي في الروايه) هلا تدرس اولى ثانوي راكان ثاني متوسط حلا سادس ابتدائي في بيت ابو وليد وليد نازل من الدرج كاشخ ومتعطر وريحته واصله اخر الشارع يمه ابي اطلع مع ابراهيم ام وليد :مافيه طلعه وليد :يمه لمتى بتحبسيني في البيت كني بنت ترا السنه الجايه بدخل الجامعه يعني كبرت على هالسوالف ام وليد :قلت مافيه طلعه يعني مافيه طلعه تبيني اخليك تسعسع مع السرابيت وحقون المخدرات وليد :لاحول والاقوة الابالله وانا وش يوديني السرابيت وحقون المخدرات بطلع مع ابراهيم ولد خالي بنروح نتمشى شوي ونرجع ام وليد :قلت مافيه خل ولد خالك يجي عندك هنا دخل ابو وليد خير وش عندكم اصواتكم واصله لاخر الشارع وليد :يبه شفها حاكرتني في البيت كني بنت ابو وليد :ايه ابراهيم موقف برا يحتريك رحله ام وليد :لا لاتروح ابو وليد :انا قلت رح ودامي موجود الكلمه الاولى والاخيره لي وليد خم راس ابوه وباسه ياعسى عمرك طويل وطلع لابراهيم ركض ابراهيم التفت على وليد اول ماركب معه السياره هلا ابو محمد حياك يالغالي وليد هلابك زود ابراهيم حرك سيارته طالعين من الحرس ياخي انت وش سالفت امك صارلي ساعه احتريك وليد :يعني ماتعرف عمتك وسوالفها حبس موب بيت ابراهيم :الله يعينك ياخي والله انك صبور لوانا مكانك يمديني طقيت وليد :ومن قال اني ماطقيت وطلعت روحي بعد انا قررت ادرس الجامعه خارج المملكه عشان افتك من هالسجن ابراهيم تدري قدام خلنا نحط يدينا في يدين بعظ ونظغط على الاهل سواء علشان يخلونا ندرس برا انا وياك وليد :صار بس اصبر الحين لين نرتب الموضوع سوا | ||||||||
|
| |
|
29-09-16, 09:01 AM
| #20 | ||||||||
| مراقبة عامة ومشرفة منتدى الروايات المنقولة
| نرجع لدوادمي وتحديدا اهل الحاره في بيت حمود تعودو على وجود عناد بينهم وصار الصغير المحبوب عند الكل حتى فهد الي كان يتمنى ان الشرطه يلقون اهله علشان صيته ماتتعلق فيه ماقدر الاانه يحبه وبلعكس صار هو الشخص المفضل عند عناد بعد صيته لانه دايم يشيله ويلعبه ويشريله حلاو مصاص فهد دخل بيت خاله ولقاهم متجمعين عند التلفزون في الصاله وعناد يلعب بقرقيشه جنب صيته فهد :السلام عليكم الجميع بتفاوت وعليكم السلام غزيل :وين اهلك بنحط قهوتنها فهد :جايين وراي ابو فهد وام فهد وتركي وساره دخلو عندهم في الصاله وطرحو السلام وردو عليهم الجلوس وجلسو كلهم يتقهوون ويسولفون والتلفزيون شغال ومقصور عليه اشوي فهد تقرب عناد وقام يناغيله عناد استانس وقام يرافس ويظحك يبيه يشيله اخذه فهد وجلسه في حظنه وطلع من مخباه مصاصه فك قرطاسها وحطها في يد عناد صيته شافته وخمت المصاصه من يد عناد قبل يحطها في فمه ياحول منك يافهد كم مره اقولك لاتجيبله مصاص يوصخ ملابسه توني ملبسته ومنظفته عناد بكى يبي المصاصه فهد اشتاله وقام وجلس بين ابوه وبين حمود وطلع مصاصه ثانيه وفكها وحطها في يد عناد وقال تراه صار دخيلكم صيته تنرفزت ياخي انت ماتفهم لاتعطيه مصاص يعني لاتعطيه فهد ابعطيه الي ابي ولاني مشاورتس ولاتوصخت ثيابه بتقومين تنظفينه وغصب حمود خلاص يصيته سمحيله هالمره شوفيه مستانس صيته ترا انت الي بتنضفه يافهد والله مالمسه وانت الي موصخه فهد الله يخليلي اميمتي تنظفه بدالي قمرا مدة يدها اتجاه ابو فهد عطني المزيون الي عندك ابو فهد جاء بيشيل عناد وفهد مسك يده وحطها على عضده هو تقولك المزيون يعني انا كلهم ضحكو حتى صيته | ||||||||
|
| |
|
| أدوات الموضوع | |
| انواع عرض الموضوع | |
|
|
415Likes
.png)
العرض العادي
