بــقــيــنــا عــيــلــه / للكاتبة دينا عماد ، مصرية مكتملة

[لامارا]

" ( #الــحــلــقــة_19) "
===========================

كريم داخل البيت... ماسك ضحى ف ايده وبيسندها
ضحى ماشية معاه بتنعس
"ضحى... ادخلى نامى...شكلهم ناموا"
دخلت ضحى تجرى على اوضتها
شذى وهى ف البلكونة سمعت صوت الباب
كانت هتدخل...ورجعت ف كلامها
فكرت تستنى لما كريم يدخل اوضته علشان ميتقابلوش
كريم قبل مايدخل رن تليفونه...وشاف انها دعاء
رد وهو قاعد فى الانتريه...اقرب مكان للبلكونة
"الو...نعم"
"وصلت"
"اه وصلت"
"ممكن اعرف فيه ايه؟"
"انتى بتستعبطى يادعاء... انتى مش عارفة فيه ايه؟؟ ما انا قلتلك الف مرة ف ايه"
"بص بقى ياكريم.... انت اوفر كده ف كل حاجة... عروسة وفرحانة ماتسيبنى افرح"
"تانى هتقولى افرح... هو اللى يفرح يعمل اللى عملتيه انا بقيت مكسوف من بابا وعيلتى واصحابى... مش قادر الاقى مبرر للى عملتيه ده"
"خلاص بقى اللى حصل حصل"
"يعنى كمان بتقاوحى ومش معترفة انك غلطتى"
"غلطت ولا مغلطتش هنعيد الفرح تانى"
"طريقة استهتارك دى بتستفزنى...وبعدين تعالى هنا فهمينى لما زياد قال للدى جى يشغل اغانى هادية ... ايه اللى حصل وقمتى تانى ترقصى ازاى"
"عادى يعنى...ماهو انت مش هتمشى رأيك وخلاص..انت بعت ابن عمتك وانا بعت بابا"
"ده تحدى بقى"
"مش تحدى بس انت اللى بدأت"
"والله العظيم ماعارف اقولك على ايه ولا ايه... حتى باباكى بيشجعك مش كفاية موقف الشبكة اللى احرجتونى بيه"
"دى فيها ايه كمان...بابا وجاب لى هدية ...اعترض بقى"
"وليه تفاجئينى وليه مع الشبكة يجيبلك طقم شكله اغلى من اللى انا جايبه"
"انت غيران علشان بابا جابلى هدية اغلى من هديتك وبتطلعها فى الفستان والرقص"
وبمنتهى الضيق والغيظ والنرفزة
"انتى غبية اوى يادعاء...معندكيش اى تمييز"
"وانت نكدى اوى ياكريم... زهقتنى"
"وعلى ايه لاازهقك ولا تزهقينى...سلام"
وقفل قبل ماسمع ردها...
شذى فى البلكونة... اتحبست بالمكالمة اللى بدأت ومقدرتش تطلع
وفكرت انها تستنى لما كريم يخلص المكالمة ويدخل ينام تبقى تروح اوضتها
كريم بعد ماقفل مع دعاء...كان مستغربها اوى
"انا ايه اللى عملته ف نفسى ده...كان مالى ومال الخطوبة والجواز والكلام ده...هى مالها اتقلبت كده ليه"
حس بخنقة... راح يفتح البلكونة يقف فيها شوية
فتح البلكونة فجأة
قامت شذى متفاجئة من وجوده
لحظات الاتنين واقفين فيها متفاجئين بوجود بعض
"انتى بتعملى ايه هنا؟"
"انا قاعدة هنا من بدرى"
"يعنى سمعتينى وانا بتكلم"
"انا مقصدتش اسمعك"
"متهيألى عيب اوى انك تقعدى مستخبية ف الضلمة وتسمحى لنفسك انك تسمعى مكالمتى مع خطيبتى"
شذى مش ملاحقة على الاتهامات اللى بيوجهالها كل مايشوفها
جت تتكلم...اتخنق صوتها جواها... جريت وسابته وهى بتعيط
xxxxxxxxxxxxxxxxxxxxxxxxxxxxxxxx
تانى يوم مديحة وابراهيم وضحى بيفطروا
ابراهيم"فين شذى وكريم"
مديحة"نايمين"
جه كريم وهما بيفطروا قعد معاهم
كريم"صباح الخير"
ابراهيم"صباح النور....مبروك عليك ياعريس"
كريم باحراج"والله يابابا انا اتفاجئت بكل اللى حصل امبارح"
ابراهيم"دعاء زودتها اوى وانت ان معملتش وقفة م الاول يبقى عمرك ماهيكون لك كلمة عليها... احنا متعودناش على الجرأة دى ياكريم"
كريم"معاك حق يابابا... زودتها اوى فعلا"
مديحة وهى بتحاول تغير الموضوع
"ابراهيم...هخلص البيت وانزل اجيب شوية حاجات للبيت"
ابراهيم وهو قايم
"ابقى عدى عليا ف الصيدلية نروح بالعربية بدل ماتروحى لوحدك ونبقى نرجع مع بعض ع الغدا"
مديحة"حاضر"
قامت مديحة مع ابراهيم
كريم قاعد قدام الاكل ومبياكلش...ضحى خلصت وقامت
قام كريم من ع الاكل
xxxxxxxxxxxxxxxxxxxxxxxxxxxxxxxxxxxx
مديحة وهى لابسة دخلت اوضة شذى
"شذى قومى...انتى ليه نايمة لحد دلوقتى"
"مفيش ياماما ...نمت متأخر بس"
"مال عينيكى انتى معيطة؟"
"شوية كده بس"
"شوية ايه؟؟مالك يا شذى"
"خالد ضايقنى شوية امبارح"
"ايه اللى حصل"
"كلام عادى وقَلب ...انتى نازلة"
"اه...كنت عايزاكى تقومى تكملى الاكل علشان ابراهيم هيرجع معايا ع الغدا...بس لو مش قادرة خليكى"
"لا هقوم اهو... روحى انتى"
xxxxxxxxxxxxxxxxxxxxxxxxxxxxxxxxxxxxxxxx
شذى داخلة المطبخ...شافت كريم وضحى بيلعبوا ع الكمبيوتر
تجاهلتهم ودخلت المطبخ تكمل اللى مديحة بدأته قبل ما تنزل
رن موبايل شذى...سمعته ضحى وجابتهولها
"الو... شيمو وحشتينى اوى.. كويسة.. جاية بجد؟؟ اه طبعا لازم اشوفك... انا محتاجة اقعد اتكلم معاكى كتير..لا مش ف التليفون لازم نقعد مع بعض... هتيجى امتى؟ اكيد ماما مش هتقول لأ... لما توصلى عرفينى... متقلقيش هتبقى تعرفى...
كريم وهو قاعد مع ضحى
"دودو انا زهقت لعب...ماتتفرجى انتى على اى حاجة"
"طيب"
"هدخل اعمل كوباية شاى واقعد اقرا ف اوضتى شوية لو عايزانى ابقى تعاليلى"
"ماشى"
كريم داخل المطبخ... وشذى بتتكلم بصوت واطى وضهرها للباب
"لا مش جوز ماما...ابنه يا شيماء بيعاملنى معاملة صعبة اوى... كرهت حياتى بسببه.. اللى مصبرنى ان خالد بيخلص الشقة وكلها شهرين تلاتة وامشى من هنا خالص... لما ابقى اشوفك هحيلك... مع السلامة"
بِعد كريم عن المطبخ قبل ما شذى تشوفه
راح قعد وهو بيفكر ف كلام شذى
واترددت كلمة
"كرهت حياتى بسببه"
حس بالذنب ...وف نفس الوقت افتكر كلام زياد عنها
دخل كريم المطبخ... اتفاجئ بشذى انها قاعدة تعيط
لما شافته مسحت دموعها بسرعة
"فى ايه مالك"
"مفيش...عايز حاجة؟"
"اه كنت هعمل كوباية شاى"
"طب اتفضل انت وانا هعملهولك"
"لا شكرا...هعمله انا"
"براحتك"
شذى هتخرج من المطبخ
"لو بتعيطى بسبب كلامى امبارح بالليل... انا اسف"
"انا مكنتش قاصدة انى اتصنت عليك ولا اسمع كلامك مع خطيبتك... انا كنت قاعدة من قبل ما انت تيجى ولما رجعت وجتلك المكالمة اتكسفت اطلع ...انا عارفة انك مش هتقبل اعتذارى زى ما مقبلتوش قبل كده"
"انا يومها كنت بدافع عنك وانتى مقدرتيش ده"
"وانا يومها كنت خايفة"
"بس مشيتى معاه...انا كنت فاكره بيخطفك طلعتى تعرفيه"
"هو فعلا كان عايزنى اركب معاه بالعافية ... اللى عمله معاك ربكنى...وخوفنى ويومها كمان هددنى ... انا لحد دلوقتى مش عارفة اتصرفت صح ولا غلط بس مكنش عندى وقت للتفكير...انا خفت اوى ساعتها...انا افتكرتك لاقدر الله يعنى... ولما شفتك هنا حمدت ربنا انك كويس"
"الحمدلله"
رن موبايل شذى تانى... ردت
"الو... ايوه ياخالد"
وخرجت م المطبخ تكمل كلامها
xxxxxxxxxxxxxxxxxxxxxxxxxxxxxxxxxxxxxxxx
دعاء بتقوم م النوم...شافت مامتها فى الاوضة
"ماما الساعة كام"
"2"
"يااااه انا محستش"
"من التعب يا حبيبتى انتى تعبتى اوى امبارح"
"ونمت متأخر كمان من كريم وعكننته"
"ليه ايه اللى حصل...ده بوزه كان شبرين طول الفرح"
"انا عارفة... شوية يقولى الفستان وشوية يقولى الرقص وشوية يقولى باباكى جابلط طقم غالى"
"ياسلاااام هو ماله"
"اهو بيدور على اى نكد وخلاص"
"وبعدين"
"ولا قبلين...قفل ف وشى...انا بقى هسيبه الكام يوم اللى اخدينهم اجازة دول مكلموش علشان يعرف قيمتى"
"ايه الجوازة اللى كلها نكد من اولها دى"
"خليه ينكد على نفسه...انا هقوم البس واروح النادى اقابل اصحابى واقضى اليوم هناك... فرصة وهو مقموص اشوف لى يومين حرية"
"انتى بتتكلمى كأنك فرحتى انكم متخاصمين"
"لا طبعا متضايقة اننا متخاصمين... بس هفرح نفسى"
"ياريتنا ماكنا عملنا خطوبة ولا زفت ...بدل مش فرحانة يبقى ايه لازمتها"
"لا بالعكس...انا فرحانة انى ارتبطت باللى حبيته من زمان وفرحانة اكتر ان كل اللى خططت له حصل... انى اشتغل معاه واقرب منه ويحبنى زى مابحبه...علشان كده هخليه يتطبع بطبعى واحدة واحدة مع الوقت"
"ربنا يهديهولك ياحبيبتى"
"يارب يامامتى... لو اتصل بيكى اعملى نفسك متعرفيش حاجة"
xxxxxxxxxxxxxxxxxxxxxxxxxxxxxxxxxxxx*
زياد نازل
"انا نازل ياماما مش عايزة حاجة"
"لا ياحبيبى ترجع بالسلامة... ربنا يرزقكويسعدك يارب
"ادعيلى ربنا يرزقنى ببنت الحلال"
"يارب ياحبيبى يرزقك ببنت الحلال...ايه عينك على حد؟"
"هو انا نفسى اتفتحت على الخطوبة...بس لسه"
راح وهو بيفتح الباب
"هعدى على كريم وبعدين اروح الشغل"
xxxxxxxxxxxxxxxxxxxxxxxxxxxxxxxxxxxxxxxx*
شذى بتفتح الباب
"ازيك يا شذى"
"اهلا يازياد...اتفضل"
دخل زياد
"ايه عاملين ايه"
شذى "الحمدلله"
دخل وسلم على مديحة...
"خالى وكريم مش هنا ولا ايه"
مديحة"ابراهيم نزل الصيدلية من شوية وكريم جوه...ادخله"
زياد دخل لكريم...وبعد ماسلموا على بعض
"مفتاح العربية اهو وركنتها تحت"
"انت واقف ليه ماتقعد شوية"
"لا مستعجل عندى شغل وهتأخر"
"طيب ماشى... لو فضيت ابقى تعالى نقعد مع بعض شوية"
رد ووهو خارج"ان شاءالله"
كريم ماشى مع زياد بيوصله لحد الباب
وصلوا عند الباب... شذى خرجت من المطبخ اللى قريب من الباب
"زياد استنى لما تشرب العصير اللى عملته"
زياد"معلش يا شذى والله متأخر ع الشغل... يبقى لى عندك كوباية عصير"
كريم بيبص لشذى وزياد وهما بيتكلموا مع بعض...وشذى بتضحك
"ماشى...بس انت الخسران"
"وعلى ايه...هاتى اما اشربه ع السريع"
كريم مستغرب الحميمية اللى ف كلامهم
ولاول مرة بيشوف شذى مبتسمة من مكشرة ولا معيطة
شذى رجعت بكوباية العصير ...بتقدمه لزياد
اخده منها زياد... وشربه بسرعة
كريم بيخطف نظرات ليها...شافها بتبص لزياد
خلص زياد العصير
"احلى كوباية عصير شربتها...تسلم ايدك"
شذى بفرحة"ربنا يخليك"
زياد لكريم"ماشى ياكيمو...انا نازل"
رد كريم"مع السلامة"
قفل الباب وراه
شذى خرجت من المطبخ وراحت قعدت مع مديحة
كريم قبل ما يدخل اوضته...راح على المكتبة
قعد يدور ف وسط الكتب... حس انه متلخبط
"ضحااااا"
جت له ضحى تجرى
"نعم"
"انتى لعبتى ف المكتبة؟"
"لا والله مجتش جنبها... بس شفت شذى كانت بتنضفها"
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_20) "
===========================

كريم قبل ما يدخل اوضته...راح على المكتبة
قعد يدور ف وسط الكتب... حس انه متلخبط
"ضحااااا"
جت له ضحى تجرى
"نعم"
"انتى لعبتى ف المكتبة؟"
"لا والله مجتش جنبها... بس شفت شذى كانت بتنضفها"
سكت كريم لحظات
ضحى راحت لشذى
مديحة"كريم كان عايزك ليه"
ضحى"بيقولى لعبت ف الكتب فقلتله لآ"
شذى"اه صحيح انا رتبتها ...روحى قوليله عايز كتاب ايه"
مديحة"روحى جيبيله اللى هو عايزه يا شذى..كان المفروض تسأليه قبل ما تيجى جنب حاجته"
شذى راحت لكريم وهو واقف قدام المكتبة وبيدور
"انا رتبت الكتب... انا اسفة انى مقلتلكش بس انا استأذنت عمو ابراهيم قبل ما اعملها... انا رتبتها حسب الحروف الابجدية لاسم الكاتب... وكل رف حطيت عليه ملصق صغير كده اهو... كتبت فيه الرف فيه من حرف ايه لايه"
قرب كريم يبص على الملصق الصغير
"يعنى لو عايز كتاب لمصطفى محمود مثلا"
"حرف الميم"
قربت تدور ف الملصقات
"هنا اهو"
شاورت على مكان حرف الميم ورجعت لبعيد...قرب كريم على الرف...بص على الكتب... بسهولة طلع الكتاب اللى عايزه
"شكرا"
على غير المتوقع...شكرها
شذى كانت مستنية رد تانى يضايقها وكالعادة مكنتش هترد
بس انه يشكرها...دى حاجة غريبة فعلا
"العفو"
قالتها وهتمشى...سمعته بيكلمها
"انتى مبتحبيش القراية"
"بحبها... بس مخدتش اى كتاب من كتبك"
"ليه؟"
"كتبى معايا"
"طيب لو عايزة اى كتاب ابقى خديه اقريه "
"شكرا"
جت تمشى...
"وانتى لو عندك كتب مش موجودة ممكن ابقى اشوفها؟"
"اه طبعا ممكن"
راحت شذى قعدت جنب مامتها تانى
وهى مستغربة طريقة كريم معاها
"مالك ياشذى"
"مفيش ياماما"
"لسه زعلانة مع خالد"
"لا كلمنى النهاردة عادى"
"ربنا يهدى سرك يابنتى"
"ماما...شيماء جاية تحضر فرح بنت عمها هنا وهتقعد يومين...عايزة انزل معاها يوم"
"تنزلى فين...ما الدراسة هتبدأ الاسبوع الجاى"
"ياماما انا مبروحش ف حتة خالص ولا بخرج الا قليل اوى وهى وحشتنى"
"هى جاية امتى"
"بعد بكرة"
"ماشى يا شذى"
xxxxxxxxxxxxxxxxxxxxxxxxxxxxxxxx
كريم داخل مكتبه فى الشركة...شاف دعاء
دخل قعد على مكتبه..وهو متجاهلها تماما
قربت دعاء منه... وسندت على المكتب وهى على يمينه
"هتفضل مخاصمنى"
"دعاء اتعدلى مينفعش الوقفة دى"
"مش خطيبى حبيبى"
"انتى ايه اللى جرالك"
قام كريم وقف وبعد عنها
"ايه ياكريم ...انا غلطانة علشان بصالحك"
"لو كنتى خايفة على زعلى مكنتيش زعلتينى من الاصل"
"اسفة ياحبيبى مش هزعلك تانى"
"لو كنتى مش عايزة تزعلينى صحيح كنتى كلمتينى تانى يوم مش بعد مارجعنا م الاجازة"
"عمالة اصالحك وادلعك واراضيك وانت مفيش فايدة...اعمل ايه تانى"
"ولا حاجة روحى شوفى شغلك وانا اروح اشوف شغلى"
"طب عملت ايه من غيرى اليومين اللى فاتوا"
"ولا حاجة كنت قاعد ف البيت"
"قاعد ف البيت مع المحتلين"
"مين المحتلين"
"الفلاحين"
"عيب كده يا دعاء متتكلميش عنهم بالطريقة دى"
"لا والله... وانت مكنتش بتتكلم عنهم كده"
"كنت ظالمهم ...حكمت عليهم من غير ما اعرفهم"
"وده من امتى"
"ايه هو؟"
"الندم على سوء الفهم"
"لما اتعاملت معاهم لقيتهم غير ماكنت فاكر"
"كلهم؟"
بصت له دعاء بشك...وجاوب كريم بحسن نية
"اه كلهم"
xxxxxxxxxxxxxxxxxxxxxxxxxxxxxxxxxxxxxxxx
كريم راجع من الشغل... داخل العمارة
شاف شذى قدامه...استغرب
"فيه حاجة؟"
"لأ مفيش"
"اومال نازلة ليه؟"
"نازلة عادى...خارجة"
"رايحة فين"
استغربت شذى... مردتش... حس بغباءالسؤال
"قصدى يعنى هتعرفى تخرجى لوحدك ولا انتى خارجة مع خطيبك"
"لا مش مع خطيبى...وهعرف اخرج لوحدى"
"طيب خلى بالك اوعى تتوهى"
اخدت دعاء الكلمة بانها سخرية منها وتريقة عليها
قالت فى سرها
"رجع تانى لتلقيح الكلام"
"سلامو عليكو"
انهت وقفتها معاه...ومشيت
xxxxxxxxxxxxxxxxxxxxxxxxxxxxxxxx*
شذى وشيماء قاعدين مع بعض
"يعنى انا مش فاهمة بيعاملك وحش ولا بيعاملك حلو؟"
"يابنتى ما انا بقولك اهو من يوم ما شافنى وافتكرنى وهو بيدينى كل كلمة والتانية اقوى من ضرب النار وانا ساكتة ومستحملة علشان بيعامل ماما وضحى كويس وبيحبهم... بس من يومين وهو بقى لطيف وودود وبيعاملنى زيهم"
"وده من ايه يعنى"
"انتى بتسألينى...اومال انا بحكيلك ليه مش علشان تلاقى لى تفسير"
"بقولك ايه شكله عقله تعبان... الكلام عنه اخد القعدة كلها وبرضه مفهمناش حاجة...سيبك منه...اخبار خالد ايه هتتجوزوا امتى"
واتنهدت شذى بحزن
"خالد"
"اه خالد...مالك يابت قلبتى كده ليه"
"خالد ياستى بقى واحد تانى خالص غير اللى حبيته... كلامه قليل اوى معايا...مش بييجى غير كل فين وفين وبالعافية... مامته حاشرة نفسها ف كل حاجة...اسلوبه وحش اوى ف الكلام معايا"
"اييييييييييه كل ده"
"مش بقولك الحقيقة"
"وايه اللى هيرميكى ع المر"
"اللى أمر منه... مش مرتاحة ف البيت بسبب كريم وكلامه ومعاملته"
"مش بقى لطيف وودود"
"ورجع تانى رخم لما قابلنى وانا جاية لك.. تصدقى بيقولى اوعى تتوهى"
"عادى يعنى يا شذى ما انا بيت عمى كله عمالين يوصونى ويدونى تعليمات خايفين انى اتوه"
"تفرق...هما خايفين عليكى بجد انما هو بيتريق عليا"
"يوووه رجعنا لكريم تانى... خلينا ف خالد... لو قلقانة بلاش تكملى يا شذى..ده جواز مش هزار"
"اللى مصبرنى انى عارفة انه بيحبنى"
"وانتى؟؟ مش بتحبيه"
"من يوم ما اتكلم هو ومامته وحش على ماما ورصيد حبه ف قلبى بقى يقل مع كل موقف منه"
بصت شيماء فى ساعتها
"شوشو احنا اتأخرنا... يالا ونبقى نكمل كلام ف التليفون...والحمدلله ان الدراسة قربت وهنرجع نشوف بعض كل يوم"
قاموا مع بعض... خرجوا من الكافيه
ووقفوا يستنوا يركبوا تاكسى
وقف قدامهم تاكسى... ونزل منه...
شذى"زياد!!"
زياد"ازيك يا شذى...واقفة كده ليه"
شذى"كنت مع صاحبتى ومروحة...آه شيماء صاحبتى ...زياد ابن اخت جوز ماما"
زياد"اهلا وسهلا"
شيماء"اهلا بيك"
زياد"انا شغلى فى الشارع الجاى ده"
شذى"والله.. طيب روح انت علشان متتأخرش"
زياد"هتعرفى تروحى يا شذى"
بصت شذى وشيماء لبعض وضحكوا
زياد"ايييه بتضحكوا على ايه"
شذى"اصل الكلمة دى سمعناها كتير احنا الاتنين"
زياد"انتوا الاتنين؟؟ هى شيماء كمان مش من هنا"
شذى"لا مش من هنا... جاية زيارة"
زياد"لا كده بقى يبقى مضطر اوقفلكم تاكسى وأأكد عليه يوصل كل واحدة فيكم مكان ماهيا رايحة"
شذى"مفيش داعى يازياد... هتتأخر على شغلك"
زياد" الواجب اهم م الشغل"
xxxxxxxxxxxxxxxxxxxxxxxxxxxxxxxxxxxx*
كان كريم قاعد مع مديحة وضحى
هو ماسك كتاب شوية يقرا وشوية يتابع التليفزيون المفتوح وشوية يرد على اسئلة ضحى ...وشوية يبص ف الساعة
رن جرس الباب
قامت ضحى تجرى تفتح
دخلت شذى وقعدت معاهم
"سلامو عليكو"
ردوا كلهم
مديحة"عملتى ايه...روحتى فين"
شذى"قعدنا شوية مع بعض ولما خلصنا قابلنا زياد.."
كريم"قابلتوا زياد؟؟ فين؟؟"
شذى"كان رايح شغله ولما شافنى نزل م التاكسى...وممشيش الا لما وقف تاكسى وقاله ع العنوان"
رن موبايل مديحة... مسكته
"دى حماتك يا شذى"
شذى"حماتى؟؟"
كريم بيتابع كلامهم وهو ساكت ووشه ف الكتاب من غير ما يقرا حاجة
ردت مديحة على ام خالد
"الو...اهلا ياحاجة ازيك... الحمدلله بخير وازى خالد وخلود وولادها... خير ان شاءالله... والله بجد؟؟ الف مبروك... ربنا يتمملهم بخير يارب... طيب هشوف بس ظروفى واقولك جايين امتى"
نظرات شذى كلها تساؤل
تعبيرات وش مديحة كلها فرحة
كريم بيخطف نظرات سريعة بين مديحة وشذى
"ان شاءالله الاسبوع ده حاضر...هقولك قبلها بيوم طبعا... ان شاءالله مع السلامة"
اول ماقفلت
"فى ايه ياماما"
"بتقولى ان شقتك خلصت وعايزانا نروح نشوف مقاسات الستاير والسجاد علشان ع الشهر الجاى نجيب العفش ونفرش"
مديحة بتتكلم بفرحة... سكتت شذى
لما حست بقرب جوازها ...خافت
سرحت... بترفع عينيها ...اتقابلت مع نظرات كريم
كريم اول ما سمع كلام مديحة... بص لشذى من غير ما يعرف ليه
وعلى عكس المتوقع حس بيها حزينة
اللحظات الخاطفة اللى مرت على تلاقى نظراتهم قبل ماكل واحد يتجاهل وقع الكلمات عليه... ملحقتش مديحة تلاحظها
كملت مديحة
"لما ييجى ابراهيم هقوله ونشوف هنروح امتى"
قامت شذى بلامبالاة
"ماشى...هقوم اغير هدومى"
قامت شذى دخلت اوضتها
كريم"هتبقى مشغولة مع شذى ياطنط ربنا يعينك"
مديحة"يالا انوى انت بس وانت تلاقينى ف اى حاجة تعوزها"
كريم"قريب... قريب اوى"
قام كريم ودخل اوضته...واتصل بدعاء
"الو...انتى نايمة...لا خلاص... بس كنت هقولك عايزين نبدأ نوضب الشقة... شقة مين يعنى ايه؟؟ لما تفوقى نبقى نتكلم..مع السلامة"
xxxxxxxxxxxxxxxxxxxxxxxxxxxxxxxxxxxx*
كريم ودعاء فى العربية راجعين م الشغل
"هتيجوا تتفرجوا على الشقة امتى؟"
"ماتيجى انت تتفرج ع الشقة بتاعتى"
"ليه"
"علشان نسكن فيها"
"وليه منسكنش ف شقتى"
"بصراحة ياحبيبى شقتى اقرب من شقتك لماما"
"العربية موجودة وقت ماتحبى تزورى مامتك زوريها... هتفرق ف ايه بعيدة ولا قريبة"
"انا اصل اتفقت مع ام سعد انها هتبقى تجيلى كل يوم شوية وبعدين تروح على ماما"
"ام سعد مين"
"الشغالة اللى عندنا"
"انتى اتفقتى مع الشغالة من قبل ما نوضب الشقة"
"اه طبعا...اومال هتجوز ازاى من غير ما اظبط امور البيت"
"مش فاهم"
"يعنى علشان الشغل لازم اللى هتيجى تشتغل تكون امينة وانا عارفاها كويس"
"لازم شغالة يعنى"
"متقلقش بابا اللى هيحاسبها مش انت"
"مش بقول على كده...انا مستغرب ان اول حاجة فكرتى فيها الشغالة"
"لا فكرت ف حاجات كتير طبعا"
"فكرتى لوحدك؟"
"فكرت لوحدى انما هنقرر مع بعض طبعا"
"طيب هتيجوا تشوف الشقة امتى"
"تعالى انت بس شوف الشقة الاول يمكن تعجبك"
"مش موضوع تعجبنى او لأ... انا عندى شقتى اسكن ليه ف شقة جايبها باباكى وانا مش محتاجلها...وشغالة يدفع فلوسها باباكى... اومال انا لازمتى ايه"
"انت العريس ياحبيبى"
"علشان انا العريس... يبقى انا اللى اجيب الشقة وتسكنى فيها"
"ماشى ياحبيبى...شوف بس الشقة بتاعتى وانا اشوف الشقة بتاعتك واللى نلاقيها احلى نسكن فيها...ماشى"
xxxxxxxxxxxxxxxxxxxxxxxxxxxxxxxx
خالد بيفتح باب الشقة... ووراه شذى ومامته ومديحة
خالد"اتفضلوا"
ام خالد"برجلكم اليمين"
شذى وهى داخلة لمحت وصل نور واقع ع الارض
وطت شالته
شذى"خد يا خالد تقريبا الوصل ده كان ف الباب"
اخده خالد منها...ودخلوا كلهم يتفرجوا ع الشقة
ام خالد"هاااا ايه رأيكم؟؟"
مديحة"بسم الله ماشاءالله ربنا يباركلهم فيها"
شذى بصت لخالد شذرا
خالد تجاهلها
خالد"ايه رأيك ياطنط... التوضيب والله اخد مننا كتير"
مديحة"حلو اوى... متكلف بصراحة...ربنا يسعدكم يارب"
ام خالد"مالك يا شذى ساكتة ليه؟"
شذى وهى بتبص لخالد ومكشرة
"مفيش"
رن موبايل مديحة...بتقول قبل ما تطلعه
"تلاقيها ضحى..اصلى سايباها عند خالتها"
ردت مديحة قبل ماتشوف الاسم
"الو... جليلة!!ازيك ...خير؟؟؟ اييييييه.... ابراهيييييييم"
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_21) "
===========================

رن موبايل مديحة...بتقول قبل ما تطلعه
"تلاقيها ضحى..اصلى سايباها عند خالتها"
ردت مديحة قبل ماتشوف الاسم
"الو... جليلة!!ازيك ...خير؟؟؟ اييييييه.... ابراهيييييييم"
شذى مخضوضة
"فى ايه ياماما"
مديحة بفزع
"جليلة بتقول ابراهيم فى المستشفى وتعبان...انا خايفة ليكون جراله حاجة"
ام خالد"ربنا يطمنك عليه"
وكتمت ضحكة وهى بتغمز لخالد على مديحة
مديحة"معلش يا حاجة انا لازم امشى حالا...هنيجى تانى ناخد المقاسات"
شذى"مش مهم اى حاجة ياماما...المهم نطمن عليه...يالا"
خالد"شذذذذى"
كان بيناديها وهى ماسكة فى دراع مامتها ورايحة ع الباب
شذى"هنبقى نتكلم فى التليفون ياخالد...لازم نمشى حالا"
xxxxxxxxxxxxxxxxxxxxxxxxxxxxxxxxxxxxxxxx*
شذى ومديحة وجليلة وماجدة وضحى ودعاء قاعدين جنب بعض على كراسى فى طرقة المستشفى
دعاء قاعدة قصادهم... وكل شوية نظرات لشذى من فوق تحت بكل غرور
كريم وزياد خرجوا من اوضة الدكتور
قاموا كلهم
جليلة ومديحة"الدكتور قال ايه"
قامت دعاء حطت ايدها ف ايده
بعد كريم عنهم كلهم وهو بيتصل بالموبايل
دعاء راحت معاه ...رغم انه بِعد خطوات...هى معاه
زياد بيرد على مامته ومديحة
"الدكتور بيقول لازم يعمل عملية تغيير شرايين ف اسرع وقت"
مديحة"فجأة كده...ده كان كويس"
زياد"معرفش ازاى كان تعبان وسايب نفسه كده"
جليلة"هو كريم بيكلم مين"
زياد"دكتور قلب صاحب خالى بس مش هنا"
جليلة"مش هنا؟؟اومال فين"
زياد"ثوانى ياماما...مش عارف"
كريم بيتكلم...ودعاء جنبه
"ماشى يادكتور... هخلص كل حاجة واكلمك...مع السلامة"
"مين ياكريم"
"انا مش عارف اتكلم منك يادعاء..مسكانى كده ليه"
"انت متضايق علشان انا واقفة جنبك"
"انتى مش واقفة جنبى...انتى مكتفانى"
سحب نفسه منها وراح لجليلة ومديحة
مديحة"ايه ياكريم باباك كويس؟"
كريم"ان شاءالله هيبقى كويس... بس لازم يسافر يعمل العملية ف تركيا"
جليلة"ليه حالته خطيرة؟"
كريم"هناك احسن... انا هروح اعمل اجراءات السفر"
جليلة"مين هيروح معاه"
كريم"انا"
مديحة"انا مقدرش اسيبه ياكريم...انا لازم اروح معاه"
xxxxxxxxxxxxxxxxxxxxxxxxxxxxxxxxxxxxxxxx*
دعاء نازلة مع كريم خارجين من المستشفى
"ازاى يعنى اللى هيحصل ده"
"ازاى ايه"
"انت هتقعد مع ولاد الست دى فى البيت"
"ما احنا قاعدين مع بعض فعلا"
"باباك مسافر وهى هتسافر معاه...ولادها يغوروا ف اى حتة"
كانوا وصلوا للعربية وبيركبوا مع بعض
بعد ما قعدوا وكريم بيسوق
"دعاء لو سمحتى انا مفييش دماغ خالص لتفاهاتك دى... بابا تعبان ومسافر يعمل عملية وبحضر له كل حاجته ...وانا هكون مكانه هنا...وهاخد اجازة من الشغل علشان اراعى الصيدلية وطلب منى مقفلهاش...يعنى دماغى فيها 100 حاجة وانتى شاغلة نفسك بولاد مرات بابا... هما جايين يقعدوا عندك؟"
"انا مبقبلش البت الفلاحة دى"
"متقبليهاش خليكى ف حالك"
"ايه الطريقة دى ياكريم"
"ارحمينى بقى"
"خلاص ماشى... بس متكلمهاش"
"حاضر...اوامر تانية"
"احلف"
"والله العظيم لو فضلتى ترغى كده كتير ف الهيافات دى لانزل واسيبك قاعدة كده"
سكتت دعاء... ووصل كريم عند بيتها
وهى نازلة
"هبقى اكلمك"
"لما اخلص خالص واطمن على بابا هبقى اكلمك"
xxxxxxxxxxxxxxxxxxxxxxxxxxxxxxxx*
مديحة بتحضر شنطة هدوم ليها ولابراهيم وشذى بتساعدها
"ماما هتقعدوا قد ايه"
"مش عارفة يا شذى... ربنا يشفيه بس اهم حاجة"
"يارب"
قعدت مديحة وسابت اللى ف ايديها
"انا مش عارفة لو جراله حاجة هنعمل ايه ولا نروح فين... الدنيا لطشت معانا اوى من بعد ابوكى ومفيش حد وقف جنبنا الا ابراهيم... يارب اشفيه "
"متخافيش ياماما ان شاءالله هيبقى كويس"
"يارب... بقولك ايه يا شذى...معلش ياحبيبتى انى هسيبكم هنا...لو كان ينفع تروحوا عند خالتكم بس انتى شايفة ان اخت محمود عندها هى وعيالها ومفيش مكان لحد والبيت ضيق وميستحملش"
"متقلقيش علينا ياماما"
"انا عارفة انك وكريم مبتكلموش بعض... بس علشان خاطر ابوه خلى بالك من طلباته متخليهوش يحس ان مالوش حد...ده غلبان وطيب يا حبيبى"
"حاضر ياماما..كأنك هنا بالظبط"
"وخلى بالك من نفسك انتى واختك...متخرجوش لوحدكم مش عايزة ابقى قلقانة وانا هناك"
"متخافيش ياماما...اطمنى"
xxxxxxxxxxxxxxxxxxxxxxxxxxxxxxxxxxxxxxxx*
كريم فى المطار مع ابراهيم ومديحة
كريم كان ماسك ابراهيم بيسنده
اخدته منه مديحة
كريم"طنط انا معاكى بالتليفون ف اى حاجة...د. عبد المجيد هتلاقيه ف المستشفى وهو هيتعامل...الورقة اللى فيها عنوان المستشفى معاكى؟"
مديحة"اه معايا"
كريم"تمام... لو فيه اى حاجة كلمينى...انا كنت عايز اجى معاكم بس بابا هو اللى عايزنى افضل هنا"
ابراهيم"خليك انت هنا مكانى"
كريم"حاضر...يالا علشان متتأخروش...مع السلامة"
سلم على باباه وحضنه
"تيجى بالسلامة ان شاءالله"
سلم على مديحة
"كريم خلى بالك من البنات...مالهمش غيرك"
"متقلقيش ياطنط ف عنيا...خلى بالك من بابا"
xxxxxxxxxxxxxxxxxxxxxxxxxxxxxxxxxxxxxxxx
شذى فى البيت قاعدة... كل شوية تليفونها يرن ومتردش
ضحى قاعدة ع الكمبيوتر
"مين اللى بيتصل بيكى يا شذى كل ده ...دماغى وجعتنى"
"خليكى ف اللى انتى فيه ياضحى مش ناقصاكى"
رن الموبايل تانى...قامت دخلت الاوضة وردت
"الو...نعم ياخالد"
"طول اليوم مبترديش عليا ليه... انتى سايبانى اهاتى لوحدى كده"
"وبعدين"
"وبعدين ايه؟؟"
"خلص كل اللى عايز تقوله"
"انتى ازاى بتردى عليا كده"
"نعم يا خالد... عايز تقول حاجة"
"جوز امك مات ولا ايه...جريتوا كده ليه"
"تعبان شوية...ربنا هيشفيه ان شاءالله"
"ومكنتيش بتردى ليه طول اليوم...لسه فاكرة تردى عليا بالليل"
"ومكنتش عايزة ارد خالص"
"ايه اللهجة الجديدة دى"
"علشان جبت اخرى منك ياخالد"
"انتى اتجننتى تقولى كده..مالك طالعة فيها على ايه مش تحمدى ربنا ان..."
"الحمدلله انى فقت لنفسى ف الوقت مناسب...انت كذاب"
"انتى قليلة الادب"
"شكرا"
وقفلت ف وشه ...اتصل بيها تانى...ردت
"عايز ايه من واحدة قليلة الادب"
"انا كذبت عليكى ف ايه"
"هو ده السيراميك اللى اختارناه مع بعض؟"
"ملقيتش عندنا شبهه بالظبط جبت قريب منه"
"قريب ايه دى الوان تانية خالص انت فاكرنى عبيطة"
"بصى بلاش قلة عقل وهيافة سيراميك ومش سيراميك...عيب اعقلى"
"ماشى...هعقل...الشقة باسم مين"
"شقتى"
"باسم مين"
"انتى مالك...ليكى تعيشى ف شقة وخلاص"
"خالد... انا قلت لك جبت اخرى معاك خلاص"
"يعنى ايه"
"يعنى خلاص...مفيش نصيب"
"مش اول مشكلة تحصل بيننا وبنتصالح"
"بس انا خلاص لا هتصالح ولا هكمل معاك...روح خلى مامتك تعيش فى الشقة اللى باسمها واللى اختارت توضيبها على ذوقها"
"انتى حاطة ماما ف دماغك ليه"
"مفيش حاجة تربطنى بيها علشان احطها ف دماغى...كل شئ نصيب"
"طب انا عايز الدهب اللى جبتهولك"
"حاضر.. هيجيلك"
"انتى صدقتى انا بهزر معاكى... انا مستغناش عنك"
"بس انا مبهزرش... حكايتنا خلصت"
" بالسهولة دى"
"لا مش بسهولة...بتصرفاتك"
"انتى فاكرانى هتحايل عليكى"
"متتحايلش يا خالد... مع السلامة وحاجتك هتوصلك قريب...متتصلش بيا تانى علشان مش هرد عليك"
قفلت بسرعة قبل ما يرد عليها... وخرجت قعدت مع ضحى
xxxxxxxxxxxxxxxxxxxxxxxxxxxxxxxxxxxx*
كريم طالع السلم وبيتكلم ف الموبايل
"خلاص وصلتهم...اه وصلت البيت...هطلع انام يادعاء... لا مش قادر اقعد ...انا م الصبح واقف على رجلى... اخدت الاجازة بالتليفون وهبقى امضى عليها لما ارجع... هنزل على 10 كده ..مش عارف هعمل ايه...هبقى اكلمك الصبح...مع السلامة"
xxxxxxxxxxxxxxxxxxxxxxxxxxxxxxxx*
كريم بيفتح الباب بالمفتاح
دخل ...قعد... قدام شذى
وكانت ضحى على الكمبيوتر جنبهم
شذى عايزة تسأله ومترددة
سبق هو واتكلم
"وصلتهم وأكدت عليهم يطمنونا لما يوصلوا"
"ربنا يرجعهم بالسلامة"
"يارب... انا تعبت م الوقفة طول اليوم..تصبحوا على خير"
ضحى"انا مستنياك تلعب معايا"
كريم"مش قادر يا ضحى"
شذى"هحضرلك العشا"
قامت شذى دخلت المطبخ
وقام كريم دخل يغير هدومه
xxxxxxxxxxxxxxxxxxxxxxxxxxxxxxxxxxxx
قاعدين ال3 على السفرة
وقدامهم بيتزا...وكل واحد قدامه طبق وحاجة ساقعة
كريم"انتوا جبتوا ديلفرى؟"
ضحى"دى شذى اللى عملتها"
كريم بص لها باستغراب
"شبه الجاهزة بالظبط"
شذى"يعنى اول مرة نجحت الحمدلله"
كريم"دى اول مرة؟"
شذى"اه .. ما انا قاعدة فاضية وضحى سايبانى وقاعدة تلعب ...قيمتها بالعافية اخدت الطريقة من ع النت وقلت اجرب"
كريم"لا بجد تسلم ايدك"
كريم كان خلص طبقه...اخدته شذى من قدامه وحطت له حتة تانية
ابتسم لها ابتسامة شكر واخد منها الطبق
xxxxxxxxxxxxxxxxxxxxxxxxxxxxxxxxxxxxxxxx
كريم نايم فى اوضته
ضحى نايمة ...وشذى قاعدة ف اوضتهم صاحية وبتفكر
"انا اتصرفت صح ولا غلط مع خالد... انا استحملت وعديت مواقف كتير تبين ان مامته هى اللى ممشياه... بس هعمل ايه...هستحمل اعيش هنا ازاى...كريم مبقاش بيعاملنى وحش زى الاول... بس ممكن يرجع تانى يغلس عليا... حتى لو رجع تانى مسيرى هتجوز وامشى... طب نفرض عمو ابراهيم حصل له حاجة وماما وضحى مبقالهمش حد ولا مكان ..هبقى حمل تقيل عليهم... لا نبقى كلنا مع بعض واحنا ونصيبنا ربنا مبينساش حد"
رن جرس تليفون البيت... اتخضت شذى... الفجر قرَب
"مين هيتصل على البيت دلوقتى؟؟"
قامت فتحت اوضتها...فى نفس الوقت كريم خارج من اوضته
راحوا الاتنين على التليفون... ورد كريم
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_22) "
===========================

رن جرس تليفون البيت... اتخضت شذى... الفجر قرَب
"مين هيتصل على البيت دلوقتى؟؟"
قامت فتحت اوضتها...فى نفس الوقت كريم خارج من اوضته
راحوا الاتنين على التليفون... ورد كريم
"الو"
شذى واقفة قصاده بتبص له بتساؤل
"ايه ياكريم مالكم قلقتونى عليكم"
"حمدالله ع السلامة ياطنط...احنا كويسين ...طمنينى على بابا"
"الحمدلله على كل حال ...زى ماهو لسه...انتوا تليفوناتكم مالها"
"انا كنت عامل تليفونى سايلنت ونايم وصحيت على جرس التليفون"
"وشذى...تليفونها مقفول ليه؟"
"مش عارف"
"هى وضحى كويسين"
"الحمدلله...اهى معاكى"
ناولها السماعة ..اخدتها شذى...وهو واقف جنبها
"ازيك ياماما... الحمدلله كويسين... لا انا اللى قافلاه... مش هفتحه انتى ابقى كلمينى على تليفون البيت...متقلقيش مفيش حاجة... اه علشان خالد...لا خلاص قرار اخير... مش وقته ياماما متشغليش نفسك بحاجة كفاية اللى انتى فيه... لا مش هفتحه خالص... سلمى على عمو ابراهيم...مع السلامة"
قفلت شذى التليفون...كان كريم لسه واقف
"تصبح على خير"
ودخلت شذى وقفلت عليها الاوضة
xxxxxxxxxxxxxxxxxxxxxxxxxxxxxxxxxxxxxxxx
كريم خارج من اوضته الصبح
لابس هدوم الخروج... شاف شذى بتنضف
لما شافته شذى
"الفطار ع السفرة"
"هى ضحى فين"
"نايمة"
"انتى فطرتى"
"اه الحمدلله"
قعد كريم يفطر... ودخلت شذى المطبخ
بعد ما خلص فطار...راح ع الباب وقبل ما يفتح
"محتاجين حاجة للبيت"
"لا شكرا"
"ممكن لو احتاجتوا حاجة محدش فيكم ينزل"
"لا مش هننزل خالص ماما مأكدة علينا"
"معاكى رقم الصيدلية"
"اه"
"لو فيه اى حاجة كلمونى...سلامو عليكو"
وفتح الباب ونزل
xxxxxxxxxxxxxxxxxxxxxxxxxxxxxxxxxxxx
كريم فى الصيدلية...بالليل
ودعاء قاعدة معاه
كريم"اميرة اتفضلى انتى وانا هقفل وامشى"
اميرة"حاضر يادكتور"
دعاء"هنروح فين؟"
كريم"هنروح"
دعاء"هتروح بدرى كده؟"
كريم"بدرى؟؟ انا هنا م الصبح...انتى مزهقتيش وعايزة تروحى"
"لا ياحبيبى مش بزهق من القعدة معاك علشان كده خلصت الشغل وجيت على هنا على طول"
"طيب...انا بقى تعبت وهروح انام"
قالها وقام يقفل الانوار... ودعاء وراه
خرجوا من الصيدلية...وركبت عربيتها وهو ركب عربيته ومشيوا
xxxxxxxxxxxxxxxxxxxxxxxxxxxxxxxxxxxx*
شذى قاعدة فى الاوضة...بتقرا كتاب
صحيت ضحى من النوم
"مالك يا ضحى"
"عايزة اشرب"
"حاضر"
قامت شذى تجيب لها تشرب...روجعت
بعد ماشربت
"بطنى بتوجعنى"
"من ايه ياحبيبتى...ده انتى تقريبا متعشتيش...يمكن جعانة"
"لا مش جعانة بس بطنى بتوجعنى"
"هقوم اعملك نعناع تشربيه وهتبقى زى الفل ان شاءالله"
بعد ساعة... كانت الساعة 2 بالليل
ضحى بتعيط وتصرخ
"بطنى...آآآآآآآه بطنى بتوجعنى"
شذى"اهدى بس يا ضحى علشان متوجعكيش اكتر هعملك نعناع تانى"
كريم نايم فى اوضته...سمع صوت ضحى بتعيط
فى البداية شك انه بيحلم...ركز ف الصوت...اتأكد انه حقيقى
قام بعد ما بص فى الساعة ...خرج من اوضته
اتقابل مع شذى خارجة من الاوضة
"فى ايه؟"
"ضحى تعبانة شوية"
راحت المطبخ تعمل النعناع
بص كريم على ضحى...شافها بتعيط وماسكة بطنها
متردد يدخل الاوضة ولا يفضل واقف ع الباب
صعبت عليه...دخلها...كانت بتصرخ من العياط
شذى راجعة من المطبخ بالنعناع
"هى تعبانة كده من امتى"
"من ساعة تقريبا"
"اديتيها حاجة"
"اه قرص مسكن وعملت نعناع مرتين والمغص بيزيد"
"مصحتينيش ليه"
سكتت ومعرفتش ترد
"ادخلى لبسيها والبسى لحد ما البس...لازم نوديها مستشفى"
"ليه؟"
"ما هو المغص بدل بيزيد كده مينفعش نسيبها"
"انت شاكك ف حاجة"
"ايوه... يا مغص كلوى يا زايدة ولازم دكتور يشوفها"
خافت شذى... بدأت عينيها تدمع
"يعنى ممكن تحتاج عملية... اعمل ايه وانا لوحدى كده؟"
"لوحدك!!... انا معاكم متخافيش"
xxxxxxxxxxxxxxxxxxxxxxxxxxxxxxxxxxxx
ضحى بتعيط وتصرخ من الالم... كريم شايلها وداخل المستشفى
شذى ماشية معاهم بتعيط على عياط اختها
بعد الكشف...عليها... خرج كريم مع الدكتور
وراحت شذى تساعد ضحى فى اللبس
رجع لهم كريم
"قال ايه؟"
"الحمدلله مش زايدة...مغص كلوى هتاخد علاج وهتبقى كويسة...خلصتوا؟"
"اه"
شذى ماشية مسندة ضحى اللى لسه بتعيط...راح كريم صيدلية المستشفى جاب العلاج
كريم"دودو هتاخدى حقنة حالا علشان المغص يروح"
ضحى"بلاش حقنة بتوجعنى"
كريم"الحقنة وجعها اقل من المغص...لازم الحقنة ..ماشى"
xxxxxxxxxxxxxxxxxxxxxxxxxxxxxxxxxxxx
بعد ما رجعوا البيت... دخلت شذى وضحى اوضتهم
كان المغص بدأ يخف تدريجيا
قعدت شذى جنب ضحى لحد ما نامت
كريم بعد ما دخلوا البنات اوضتهم
دخل اوضته غير هدومه... وحس انه مش عايز ينام فاخد كتاب وطلع قعد ف البلكونة
شذى بعد ضحى مانامت... قامت
بصت على اوضة كريم...شافت النور مطفى
عرفت انه نام... خرجت تقعد فى البلكونة
شذى داخلة البلكونة... اتخضت
"انتى كل ماتشوفينى تتخضى كده"
"انا افتكرتك نايم والنور هنا مطفى فاتفاجئت"
"لا مش جايلى نوم... قلت اقعد اقرا شوية لقيت مليش نفس قعدت ف الهدوء شوية... ضحى نامت"
"اه نامت...شكرا"
"على ايه...اقعدى"
قعدت شذى معاه وكملت
"على انك قمت من عز النوم واهتميت بضحى ..انا كنت خايفة عليها ومكنتش عارفة اتصرف"
"ده واجب عليا...مامتك موصيانى عليكم وانا مقدرش اشوف حد محتاج مساعدة ومساعدوش"
"زى ماكنت هتساعدنى قبل كده وانت متعرفنيش... واتسببت لك فى اذى"
"مش انتى قلتى كويس انها جت بسيطة"
"انا اه قلت كده... كنت بحاول اعتذر وانا عارفة انى كنت السبب"
"خلاص بقى اللى حصل حصل... بس اللى مجننى من يومها... هو عمل كده ليه وكان عايز منك ايه"
واتنهدت شذى وهى بتفتكر من بعد وفاة باباها...وبدأت تحكى لكريم
بعد ما وصلت شذى وحكت عن يوم الحادثة وعن تهديده ليها واللى حصل بعد كده لحد ماجم هنا
"لو كنتى بلغتى عنه يمكن كان خاف"
"خفنا...انا وماما خفنا اوى...كل حاجة كانت ف ايدين عمى وخفنا منه زائد اننا كمان خفنا من تهديد مجدى ليا"
"انا اسف اوى يا شذى"
شذى... اتردد اسمها على سمعهم هما الاتنين
اول مرة يناديها باسمها بعد الشهور دى اللى عايشينها ف بيت واحد
كريم استغرب الكلمة على لسانه وعلى سمعه
نفس استغراب شذى... قطعت شذى تفكيرها وسألته
"اسف على ايه"
"على المعاملة الجافة اللى كنت بعاملهالك... فعلا صعب الواحد يحكم على حد من موقف او من غير ما يعرفه...انا مكسوف من نفسى"
ردت عليه بايتسامة سماحة
"حصل خير"
سألها بتردد
"ممكن اسألك سؤال...بس لو هيضايقك متجاوبيش"
"اتفضل"
"انتى امبارح قلتى لطنط انك قافلة التليفون ومش هتفتحيه...انتى متخانقة مع خطيبك"
سكتت لحظات مترددة تحكى له ولا لأ
"مش خناقة...انا فسخت الخطوبة"
ورفعت ايديها قصاده...توريله انها قلعت الدبلة وهى بتضحك
"ليه كده؟"
"مواقف كتير مش هصدعك بيها...بس اللى عرفته واتأكدت منه انى مش هقدر اكمل حياتى معاه ابدا"
"وقفلتى تليفونك ليه؟ ماهو ممكن يكلمك هنا"
"قفلت تليفونى علشان ميتصلش بيا ويحاول يأثر على قرارى... اما حكاية يتصل هنا فالحمدلله لامعاه تليفون البيت هنا ولا تليفون البيت عند خالتى"
"والحب اللى بينكم"
"الحب زى الورد... حساس...لو اهتمينا بيه هيزيد لو اهملناه هيموت"
"ونهتم بيه ازاى"
"الاهتمام...ومقصدش بالاهتمام الكم..لأ الكيف... يعنى مش مهم كتر الكلام المهم الافعال اللى تعبر عن الحب ده..يعنى اللى يحبك يقدر ظروفك مثلا... يكون صادق معاك ميكذبش عليك... يفهمك من غير ماتتكلم ... وبعدين انت بتسألنى بتختبرنى مثلا..انت مش بتحب وعارف"
كريم كان سرحان فى كلامها..بياخد الكلام منها وبيقارن الكلام مع علاقته بدعاء... حس ان فيه حاجة مفقودة...وهو مش عارف ايه هى... لما سألته شذى انت مش بتحب وعارف
"اه..انا بسألك علشان بس اعرف البنات بتفكر ازاى"
"كل واحد تفكيره بيختلف عن التانى...مش كل البنات زى بعض ولا كل الشباب زى بعض"
"معاكى حق"
قطع كلامهم صوت اذان الفجر
استغرب كريم
"ايد ده... الفجر بسرعة كده"
"انا رغيت كتير وصدعتك...معلش بقى بقالى كتير قاعدة ساكتة فجت فيك"
"لا بالعكس مصدعتنيش خالص...انا محستش بالوقت علشان كده استغربت"
"احنا صحيناك من عز نومك وملحقتش ترتاح... انا هقوم اصلى الفجر وانام"
"انتى بتصلى؟"
"اه..انت مستغرب؟"
"اصل مشفتكيش يعنى"
"هههه علشان انت مش قاعد معانا طول الوقت...انا كمان مشفتكش بتصلى بس مش معنى كده انك مبتصليش"
"اه طبعا... طب نصلى الفجر قبل ماننام"
"ماشى"
دخل كريم اتوضا... ودخلت شذى بعده
وقف كل واحد فيهم على باب اوضته "تصبحى على خير" "وانت من اهله"
صلوا الفجر فى نفس الوقت ومن غير اتفاق... اتوحدت دعواتهم فى السجود
"يارب اكتب لى الخير وابعد عنى الشر"

تنويه: الحلقة مش قصيرة وهى نفس حجم الحلقات السابقة وردى على قِصر الحلقات عامة من وجهه نظركم "لانها مش قصيرة فى الحقيقة يعنى" ان دى طاقتى فى الكتابة اليومية ياريت تعذرونى
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_23) "
===========================

كريم خارج من الحمام...شاف ضحى خارجة من الاوضة
"ازيك يادودو دلوقتى"
"الحمدلله"
"والمغص"
"خف"
دخلت ضحى الحمام ودخل كريم يلبس
بعد ماخلص لبس...خرج من الاوضة شاف شذى بتحضر الفطار
"صباح الخير"
"صباح النور...انا صحيت ضحى وحضرت الفطار علشان نفطر مع بعض كلنا بدل ماكل واحد يفطر لوحده"
"احسن كده"
xxxxxxxxxxxxxxxxxxxxxxxxxxxxxxxx*
كريم قاعد فى الصيدلية...سرحان
قطع تفكيره صوت الموبايل
"الو...ازيك يادعاء... انا كويس الحمدلله... مفيش حاجة انا محبتش اتصل بيكى علشان عارفة انك ف الشغل... ايوه ف الصيدلية... من امتى ايه من الصبح...اه روحت نمت امبارح بدرى... لا متجيش متتعبيش نفسك... مش حكاية مش عايزك بس هتبقى من الشغل للصيدلية كده...خلاص براحتك...هتيجى امتى..5\6 طيب... ماشى مع السلامة"
قفل معاها وقعد يشخبط على ورق قدامه من غير تركيز
رفع سماعة التليفون واتصل بالبيت
"الو.. ازيك يادودو...عاملة ايه دلوقتى... المغص جه تانى...طيب الحمدلله... انتى بتعملى ايه؟؟ بقولك ايه ...هى شذى فين.. هاتيها كده"
شذى كانت فى اوضة كريم..فاتحة الشباك بتهويها بعد ما مسحتها وروقتها... دخلت لها ضحى
"كريم عايزك"
"كريم!! هو جه؟"
"لا ع التليفون"
مشيت ضحى وراحت شذى ترد على التليفون
"الو"
"ازيك يا شذى"
"الحمدلله"
"انا قلت اطمن على ضحى خفت تكون تعبت تانى"
"لا الحمدلله هى كويسة"
"طب مش عايزة حاجة"
"لا شكرا"
"كنتى بتطبخى ولابتعملى ايه"
"لا كنت بعمل اوضتك"
"شكرا"
"على ايه بس"
"قوليلى هتعملى ايه ع الغدا النهاردة...بفكر اجى اتغدا معاكم وارجع تانى الصيدلية...اصل فيه حقنة لضحى لازم تاخدها علشان المغص ميرجعش تانى"
ردت شذى بفرحة
"عايز تاكل حاجة معينة"
"لا كل اللى تعمليه حلو"
"ماشى...هنستناك"
"تمام...مع السلامة"
"كريييم"
كريم كان هيقفل...سمع اسمه لاول مرة من شذى وهى بتلحقه قبل مايقفل... حس قلبه ارتجف فجأة... وحس ان صوته وهو بيرد عليها مكنش صوته الطبيعى
"نعم"
"هتيجى الساعة كام؟"
"على 2ونص 3 كده ان شاءالله"
"ان شاءالله...مع السلامة"
قفل معاها كريم وهو مبتسم وبيبص فى الساعة يشوف فاضل وقت قد ايه لحد ما يروَح للغدا
شذى بعد ماقفلت...بدل ماتمشى تكمل اللى وراها...قعدت
"مالك يا شذى"
"مفيش"
"بتضحكى على ايه"
"انا بضحك؟"
"اه والله"
قامت شذى واكتشفت انها فعلا كانت مبتسمة وهى بتفتكر كلام كريم معاها
دخلت المطبخ وهى بتفكر
"ياترى ايه اكتر حاجة بيحبها"
xxxxxxxxxxxxxxxxxxxxxxxxxxxxxxxxxxxx
شذى واقفة تبص على السفرة... بعد ما حضرتها
بصت ف الساعة...3 الا ربع
"ضحى...قومى كده اتصلى بكريم شوفيه اتأخر ليه"
"مش حافظة الرقم"
"هتصلك واتكلمى انتى"
قامت ضحى وقبل ماترفع السماعة...كان كريم بيفتح الباب
"اهو جه... اتأخرت ليه كنا لسه هنتصل بيك"
كريم"متأخرتش يادودو ولا حاجة... ولا انتى جُعتى"
ضحى"لا مجوعتش بس شذى محضرة الغدا وعمالة تستناك"
شذى"خفت الاكل يبرد...مكنش المفروض احضر السفرة الا لما تيجى"
كريم"هغسل ايدى واجى نتغدا"
وهما قاعدين ع الغدا
"كريم...مكلمتش ماما؟"
"اه كلمتهم وانا جاى... بابا هيعمل العملية النهاردة ان شاءالله"
"بالسلامة يارب"
"يارب"
"مقالتش هييجوا امتى"
"هى لسه مش عارفة بس الدكتور قالها يمكن اسبوع"
"معنى كده اننا هندخل ف الدراسة قبل ماما ماتيجى"
"اه"
"وهنعمل ايه؟"
"شايلة هم ايه... هى ضحى لسه محولتش؟"
"لا ماما حولتلها المدرسة من اسبوعين كده"
"خلاص ضحى تروح المدرسة عادى...بس رأيي خليكى انتى حتى الاسبوع الاولانى"
"اخلينى ليه"
"عايزة تروحى؟"
"عادى... بتكلم معاك عادى"
"انتى لسه معلقة موضوع خطيبك صح"
"لا غلط... ده قرار واخدته خلاص"
"بس هو ممكن يجيلك الجامعة"
"معرفش"
"معلش استنى شوية علشان لو حاول يروح لك فى بداية الدراسة ميلاقكيش "
"بس انا مش خايفة منه... وهو انتهى بالنسبة لى ومش هيأثر عليا"
"لو عايزة تروحى انتى حرة"
"لا خلاص خلينى لما يبقوا يرجعوا... حتى علشان ابقى اطمن على ضحى انها تعرف تروح وتيجى م المدرسة"
"اه صحيح هى مدرسة ايه"
"ابن سينا"
"اه...دى قريبة اوى تحفظ بس الطريق كويس وهتعرف تروح وتيجى لوحدها"
"هبقى اوديها واجيبها الاسبوع الاولانى لحد ما اطمن"
كريم وهو قايم
"ماشى... على فكرة"
"ها"
"كان نفسى ف المكرونة البشاميل ازاى عملتيها من غير ما اطلبها"
"مش عارفة...جت كده صدفة...يارب تكون عجبتك"
"اقولك سر"
"ف بيييييير"
"مكنتش مقتنع ان فيه اكل احلى من اكل امى الله يرحمها... بس النهاردة اكتشفت ان فيه زيه"
"بس انا مجيش حاجة جنب ماما بصراحة يعنى"
"معرفش ...انا قلتلك اللى حسيته وخلاص"
راح يغسل ايديه وشذى بتلم السفرة
خلص وراح ع الباب
"ايه ده انت نازل؟"
"اه يدوب ألحق"
"انت نسيت الحقنة اللى قلت عليها لضحى"
وافتكر كريم ان مفيش حقنة اصلا وانه اتكسف يقول انه عايز يتغدا معاهم ف البيت
"انا نسيت اجيبها معايا من الصيدلية... بدل المغص خف خلاص"
"ماشى... احتمال انزل انا وضحى نجيب حاجات ناقصاها للمدرسة علشان لو اتصلت متقلقش"
"لا يا شذى متنزليش... استنوا لما اكون معاكم احسن... ومتنسيش انك قافلة موبايلك يعنى مش هعرف اطمن عليكم"
"خلاص حاضر"
xxxxxxxxxxxxxxxxxxxxxxxxxxxxxxxxxxxx
كريم قاعد مع دعاء فى الصيدلية
"كيمو"
"نعم"
"هنروح نشوف الشقة بتاعتى النهاردة بعد ماتقفل"
"النهاردة؟"
"اه انا خلاص اتفقت مع ماما وهتقابلنا هناك"
"لا مش هينفع النهاردة"
"ليه بقى ان شاءالله...احنا لازم نشوف الشقة علشان نلحق نعمل الديكورات ..وبعدين ليه انا حاسة انك مش مهتم اننا نتجوز..احنا ايه اللى ناقصنا"
"انتى شايفة ان ده وقت مناسب لكلامك ده"
"ومش وقت مناسب ليه"
"شكلك نسيتى ان بابا دلوقتى ف اوضة عمليات وبيعمل عملية ...ع الاقل ذوقيا منك متتكلميش ف جواز وتسألى عليه"
"ما احنا هنعرف لما يخلص ...وبعدين ايه اللى يمنع وهو هناك اننا نشوف شقتنا ونعيش عادى...مش هنوقف حياتنا يعنى"
بص لها كريم وهو مش لاقى كلام يرد بيه عليها
كل اللى جه ف باله كلام شذى
" يعنى اللى يحبك يقدر ظروفك مثلا... يكون صادق معاك ميكذبش عليك... يفهمك من غير ماتتكلم"
كانت دعاء بتتكلم وهو مش سامعها...هو مع كلام شذى
وفهم ايه الحلقة المفقودة اللى حسها امبارح ف كلامها
"مبتردش عليا ليه"
"كنتى بتقولى ايه"
"كنت بقولك ان بابا جاب مهندس ديكور وهيبدأوا ف ديكورات الشقة بعد مانشوفها"
"وبالنسبة لى وجودى ديكور برضه من الديكورات"
"قصدك ايه"
"قصدى اننا اتكلمنا اننا نعيش ف شقتى ومع ذلك ولا كأنى قلت حاجة راحة تجيبى مهندس ديكور وكأنى خلاص وافقت"
"هتوافق ياحبيبى اكيد علشان متزعلنيش صح"
"لا مش صح...ما تسمعى انتى كلامى علشان بتحبينى"
"بحبك اه انما محبش اسلوب سى السيد ده"
"هههههه والله ضحكتينى... كل ده واسلوب سى السيد... بامارة فستان الخطوبة ولا القرارات اللى بتاخديها ولا طريقة المستفزة دى"
"انا طريقتى مستفزة ولا انت اللى نكدى"
"مش اول مرة تقوليها يا دعاء وانا بحذرك انك تقوليها تانى"
"هتعملى ايه هتضربنى"
"انا مش همجى يادكتورة"
"خلاص متزعلش... بس علشان خاطرى نروح نشوف الشقة...انا اتفقت مع ماما"
"والله ما انا رايح...مش اتفقتى...روحى انتى...ويالا انا همشى ولا هتفضلى قاعدة؟"
xxxxxxxxxxxxxxxxxxxxxxxxxxxxxxxxxxxx*
كريم ماشى بالعربية ...بص ف الساعة
"كويس انى مشيت بدرى...نلحق ننزل نشترى الحاجات اللى ضحى عايزاها.. اتصل بيهم يجهزوا ولا اروح على طول"
اتصل كريم بالبيت...التليفون مشغول...مكررش الاتصال
وصل البيت... وهو بيفتح الباب
سامع صوت دوشة جوه
xxxxxxxxxxxxxxxxxxxxxxxxxxxxxxxxxxxxxxxxxxxx
شذى وضحى قاعدين مع جليلة وماجدة
ماجدة"بجد يا ضحى انتى كويسة النهاردة"
ضحى"اه والله ياخالتو الحمدلله"
جليلة"هو كريم بييجى امتى"
شذى"بييجى بعد ما بيقفل الصيدلية يعنى على 10\11 كده"
جليلة"بصى ياشذى لو احتاجتوا اى حاجة كلمونى"
شذى"شكرا ياطنط"
ماجدة"والله لولا الضيوف اللى عندى ماكنت سبتكم...انا استغليت انهم نزلوا وسط البلد شوية قلت اجى اطمن عليكم"
شذى"متشيليش هم ياخالتو احنا كويسين والله ومش محتاجين حاجة"
وفتح كريم الباب... اتفاجئ بوجود جليلة وماجدة
سلم عليهم وقعد معاهم... وبعد شوية من الكلام ف مواضيع عامة
ماجدة"وبعدين يا شذى... ارد اقول ايه"
شذى"زى ماقلتلك ياخالتو... لما يجيلك تانى اديله الدهب بتاعه وقوليله خلاص انتهينا"
ماجدة"ماتفكرى تانى...ولا اقولك استنى لما مديحة تيجى"
كريم متابع ردود شذى بترقب
شذى"ماما عرفت وهى مش هتغصب عليا ...زى ما انا تمسكت بيه ف الاول دلوقتى انا متمسكة بقرارى"
رن جرس الباب...قامت ضحى تفتح
دخل زياد... سلم عليهم وقعد معاهم
لاول مرة كريم يحس بالتوتر من وجود زياد
احساس داخلى رافض وجوده ...عقله مش مقتنع بيه
قامت شذى تلم كاسات الحاجة الساقعة ودخلتهم المطبخ
زياد"انا قايم اشرب"
كريم"اقوم اجيبلك"
قام زياد بسرعة
"لا ياكيمو متتعبش نفسك"
سكت كريم.... جليلة وماجدة بيتكلموا مع بعض
كريم حس ان زياد طَوِل ف المطبخ
اتضايق ... قام يشوف كل التأخير ده ليه
كريم بيقرب من المطبخ ببطء
سمع زياد وهو بيكلم شذى بصوت واطى الى حد ما
"انا عايز رد يا شذى"
"اصبر يا زياد شوية"
"اصبر ايه انا عايز كلمة بس مش اكتر"
"الحاجات دى متجيش خبط لزق كده"
"انتى ليه مش حاسة بيا"
"حاسة والله... اصبر بس عليا..واتفضل من هنا عيب نسيبهم ونفضل هنا"
بِعد كريم عن مكان ما سمعهم...خرج زياد من المطبخ
ووراه شذى... وقعدوا كلهم مع بعض
طول ماهما قاعدين...وكريم نظراته بتراقب شذى وزياد
واحساس بالضيق بيسيطر عليه
________________________________________________

يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_24) "
===========================

كريم وشذى واقفين ع الباب بيسلموا على ماجدة وجليلة
زياد بعد ما سلم على كريم...بيسلم على شذى
كريم بيراقب نظراتهم لبعض
نزلوا ... وقفل كريم الباب وراهم
دخل قعد وهو سرحان فى كلام زياد
"كريم احضر العشا دلوقتى ولا كمان شوية"
"لا مليش نفس...اتعشوا انتوا"
مسك ريموت التليفزيون...فتحه
قعد يقلب ف القنوات بملل
شذى قاعدة مستغربة معاملته الجافة ليها تانى بعد ماكان بيعاملها كويس
"كريم"
"ها"
"عمو ابراهيم عمل العملية؟"
"لسه..كان فيه عملية قبله طولت وزمانه ف العمليات"
"علشان كده انت زعلان"
"ومين قالك انى زعلان"
قفل التليفزيون وقام وسابها قاعدة وخرج قعد ف البلكونة
قعدت شذى مكانها مستغربة...وقالت ف نفسها
"ده اللى كنت متوقعاه..انه يرجع يعاملنى زى الاول"
ضحى"شذى انا جعانة"
شذى"انا مليش نفس اتعشا وكريم مش هيتعشا... اعملك سندويتشات"
ضحى"ماشى..بسرعة عايزة انام"
xxxxxxxxxxxxxxxxxxxxxxxxxxxxxxxxxxxx
شذى بعد ما اتعشت ضحى ودخلت تنام
دخلت المطبخ عملت سندويتشات لكريم
دخلت البلكونة بالطبق... حطته على الترابيزة
"ده العشا بتاعك...لو عايز حاجة ابقى نادى عليا انا صاحية ف الاوضة"
"انتى سبتى خطيبك ليه"
استغربت شذى السؤال المفاجئ لانه بدون مناسبة
"انا حكيت لك انه اتغير بعد الخطوبة او يمكن انا اللى مكنتش شايفة كويس"
"بس كده"
"هو مش سبب مقنع؟"
"واقفة ليه..اقعدى"
قعدت شذى وهى مازالت مستغربة التقلبات اللى ف معاملة كريم
"انتى فيه حد تانى اتقدملك بعد خطيبك"
"انا لحقت..لا مفيش"
"مش عايزة تقوليلى؟"
"مفيش حاجة تتقال"
"وزياد؟"
"ماله؟"
"انا شفته دخلك المطبخ وقعدتوا تتكلموا كتير"
"ايه علاقة زياد بكلامك عن خطيبى"
سكت كريم لحظات متردد...بعدها حسم قراره
"صارحينى بالحقيقة... فيه حاجة بينك وبين زياد"
"لا مفيش"
وقامت شذى متضايقة من اتهامه ليها انها على علاقة بزياد
قام كريم وراها
"زعلتى ليه؟"
اتكلمت بعصبية
"علشان معنى كلامك انى سايبة خالد علشان زياد...يعنى كنت مخطوبة لواحد وفكرت ف واحد تانى...وانا مش كده"
"بس انا سمعته وهو بيقولك انتى مش حاسة بيه وانتى قلتيله انك حاسة بيه "
"انت سمعتنا؟"
"ايوه"
"بس زياد مكنش يقصدنى انا بكلامه ده"
"اومال كان يقصد مين؟"
"واحدة صاحبتى"
"وهو يعرف صاحبتك منين"
"كريم... انت بتسألنى كل الاسئلة دى ليه...مكنش المفروض انى اقولك لانها حاجة متخصناش"
"تليفونك فين؟"
"ليه؟"
"هاتيه بس"
"انا قافلاه"
"ماانا عارف..هاتى التليفون"
"مش معقول تكون هتفتش فيه... مش هسمح لك بكده...انت زودتها اوى على فكرة"
سابته شذى وهى داخلة اوضتها
"انا عايزُه علشان احطلك الخط اللى جبتهولك...مش قصدى ازعلك"
وقفت شذى بعد ما حست بالندم انها اتسرعت ف فهمها
التفتت له
"بتقول ايه؟"
"بقولك عايز التليفون علشان احط لك الخط اللى جبتهولك..وبقولك متزعليش منى"
"ثوانى اجيب التليفون"
دخلت شذى وهى حاسة بفرحة وبتستعيد نبرة صوت كريم وهو بيقولها
"متزعليش منى"
اخدت تليفونها وخرجت بسرعة م الاوضة
راحت لكريم لقيته فى البلكونة...راحت قعدت معاه
"اتفضل"
اخد التليفون... حط فيه الشريحة...فتحه وسجل رقمه
"سجلت لك رقمى واخدت الرقم"
"شكرا"
"على ايه... مكنش ينفع تفضلى من غير تليفون"
ابتسمت له ابتسامة شكر وقامت
"مقلتليش"
"ايه؟"
"زعلانة منى"
"لا"
"تعرفى انى كنت جاى بدرى علشان اخدكم وننزل نكمل حاجة ضحى"
"انا اتفاجئت بخالتو ماجدة وطنط جليلة"
"يالا مش مشكلة... ايه رأيك ننزل بكرة الضهر"
"اللى يعجبك"
"خلاص ع الساعة 1 كده تكونوا جاهزين... وبالمرة نتغدا بره"
هزت شذى راسها موافقة...ف نفس اللحظة اللى رن فيها موبايل كريم...رد بسرعة
"الو... ايه الاخبار طمنينى... الحمدلله"
شذى بتسأله
"ماما؟؟"
كريم هز راسه بالايجاب
"وهتيجوا امتى... تيجوا بالسلامة... كويسن الحمدلله..شذى معاكى"
xxxxxxxxxxxxxxxxxxxxxxxxxxxxxxxxxxxx
كريم قاعد فى الصيدلية ...اتصل بزياد
"الو...ازيك يازياد...انا كويس الحمدلله...امبارح؟؟ مالى امبارح كنت كويس... بقولك ماتبقى تعدى عليا فى الصيدلية... لما تفضى طيب ابقى تعالى... مفيش بس من زمان مقعدناش مع بعض نتكلم انا وانت لوحدنا... ماشى اى وقت...مع السلامة"
قفل مع زياد... وبص ف الساعة...12ونص...اتصل بشذى
"الو... ايه لبستوا ولا لسه؟؟ طيب اجهزوا ..نص ساعة واكون عندكم"
قفل مع شذى واتصل بدعاء
"ازيك يادعاء...اخبار الشغل ايه..الحمدلله...بقولك خلصى الشغل وروحى على البيت... هتفضلى تيجى كل يوم كده...خلاص انتى حرة... مع السلامة"
xxxxxxxxxxxxxxxxxxxxxxxxxxxxxxxxxxxxxxxx*
كريم قاعد ف العربية...مستنى البنات ينزلوا
اول ماشافهم نزل من العربية...فتح الباب اللى ورا
"اركبى يادودو"
فتح الباب اللى قدام لشذى
"اتفضلى"
بعد ماركبوا البنات...ركب كريم
كريم وهو سايق
"قوليلى هى محتاجة ايه بالظبط"
شذى"قميصين رمادى وجزمة وشنطة للمدرسة ...ولوازم الكتابة كشاكيل واقلام وكده"
كريم"تمام"
xxxxxxxxxxxxxxxxxxxxxxxxxxxxxxxxxxxx*
كريم ماسك ايد ضحى وشذى ماسكاها من الناحية التانية
واقفين قدام محل احذية..ضحى اختارت... دخلوا المحل
شذى قاعدة جنب ضحى بتقيسها... كريم واقف بره
كريم بيبص عليهم...شافهم خلصوا وشذى رايحة للكاشير
دخل كريم وسأل الكاشير
"كام لو سمحت؟"
شذى"معايا.."
قاطعها كريم"هسس"
دفع كريم الفلوس وخرجوا من المحل... وهما ماشيين
كريم"مبروك عليكى يادودو"
ضحى"الله يبارك فيك"
شذى"كريم ليه حاسبت؟؟ انا معايا فلوس ماما سايبالى"
كريم"عيب نتكلم ف فلوس"
شذى"بس انت ذنبك ايه تجيب لها حاجة المدرسة"
كريم"هى ضحى مش اختى ولا ايه... وبعدين بابا سايبلى فلوس وقال اى حاجة تحتاجوها اجيبها... ممكن متتكلميش ف فلوس تانى علشان بتحرج بجد"
سكتت شذى وهما ماشيين يتفرجوا على المحلات
xxxxxxxxxxxxxxxxxxxxxxxxxxxxxxxxxxxx*
دعاء قاعدة مع كريم بتاكل ساندويتش
"اممم تحفة ياكيمو... مش عايز تاكل برضه؟"
"اتغديت والله مش قادر"
"روحت البيت؟"
"لا مروحتش... كان ورايا كام مشوار واكلت بره وجيت"
دعاء خلصت...بتمسح ايديها وبؤها بمنديل
"انا بكرة اجازة من الشغل...تعالى اتغدا معانا"
"اجليها يادعاء انا مشغول بالصيدلية"
"ما انت بتروح مشاوير وساعات بتروح البيت...جت عليا ووقفت"
"موقفتش ولا حاجة... بس خليها بعدين دماغى مش رايقة"
طلعت دعاء موبايلها من الشنطة من غير ماترد عليه
"الو... ايوه ياماما... كريم مش عايز ييجى يتغدا معانا بكرة... اتفضلى قوليله انتى يمكن يسمع كلامك"
ناولته الموبايل... اخده منها وهو متضايق من سياسة الامر الواقع
"الو..ازيك ياطنط... لا ابدا بس حضرتك عارفة انى ماسك الصيدلية هنا فمفيش وقت...خلاص حاضر... جاى ان شاءالله مع السلامة"
قفل معاها... بص لدعاء...شافها مبتسمة ابتسامة انتصار
"حركة بايخة جدا"
"هى ايه"
"بتحرجينى مع مامتك"
"مش بحرجك بس انت مسمعتش كلامى م الاول فقلت ادبسك"
ضحكت دعاء وكريم بيبص لها بغيظ
"دعاء...قومى روحى انتى دلوقتى"
"بتطردنى"
"لا بس مش كل يوم تيجى تقعدى معايا لحد بالليل ...منظرنا مش حلو الناس يقولوا ايه؟"
"طظ فيهم...اللى يقول يقول انا مبيهمنيش حد"
xxxxxxxxxxxxxxxxxxxxxxxxxxxxxxxxxxxx*
كريم راجع البيت ... اول ما فتح الباب ودخل
كانت شذى قاعدة بتتفرج على التليفزيون... ونايمة وهى قاعدة
قرب منها ببطء...وبصوت هامس
"شذى ...شذى"
قامت شذى وهو بتتاوب
"كريم...جيت امتى"
"لسه واصل...مالك؟"
"مفيش ...نعست وانا قاعدة"
"طيب قومى نامى"
"انت اتأخرت ليه...هقوم احضرلك العشا؟"
قامت شذى... رد عليها كريم بصوت واطى
"انا اتعشيت بره"
وقفت شذى لحظات مكانها...وتصنعت اللا مبالاة وهى بتسأل
"مع خطيبتك؟"
"ايوه... ومتعمليش حسابى ع الغدا بكرة"
قالها كريم وهو بيتجنب النظر ليها
سألته تتأكد
"معزوم هناك"
رد وهو داخل اوضته
"ايوه... تصبحى على خير"
دخل كريم اوضته... ودخلت شذى اوضتها
كريم فى اوضته...اول مادخل قعد على السرير
"انا ليه مكسوف اقول انى رايح لدعاء... ليه مش مبسوط وانا مع دعاء... ليه بتخنق طول ما انا مع دعاء ... عكس وجودى مع شذى... دعاء هى اللى خطيبتى... مينفعش اللى انا فيه ده... شذى وجودى معاها تعود بس...احتياج لاخت ...بحبها زى ما بحب ضحى وطنط مديحة... ايه اللخبطة اللى انا فيها دى"

شذى فى اوضتها...قاعدة على السرير..وضحى نايمة جنبها
متضايقة... حاسة بغليان ودموع محبوسة
"انا متضايقة من ايه... يروح يتعشا ولا يتغدا عندها انا مالى... ان شالله حتى يبات هناك انا مضايقة نفسى ليه... معاملته معايا هى اللى ضايقتنى... بس هو معملش حاجة تضايقنى... انا احمد ربنا انه بقى بيكلمنى كويس وخلاص... مش عايزة منه اكتر من كده"
xxxxxxxxxxxxxxxxxxxxxxxxxxxxxxxxxxxx
الصبح...كريم دخل يغسل وشه وخرج
مش سامع صوت ف المطبخ كالعادة
دخل يلبس وهو بيعمل صوت بالباب...وبالدولاب... وصوت لخطواته وهو ماشى
خلص لبس... بص على السفرة...فاضية
بص على المطبخ... مفيش حد
راح فتح الباب...
شذى صاحية... وسامعة صوت كريم وهو داخل وخارج من الحمام وبعد مالبس وخرج من اوضته
قررت انها تقلل اهتمامها بيه شوية... فكرت ليه... من غير ليه... زى ماهو بيعاملها هتعامله
زى ماكانت مستنياه ع العشا ومجاش واتفق على الغدا مع خطيبته...يبقى مش لازم تشيل هم فطاره ولا تبدأ بأى اهتمام غير اللى يطلبه منها
سمعت صوت الباب اتفتح واتقفل... قامت تخرج من الاوضة
كريم بعد مافتح الباب علشان ينزل
حس ان ممكن تكون شذى تعبانة مثلا
رجع تانى وقرر انه يطمن عليها قبل ماينزل
كريم رايح ناحية الاوضة... وقف قدام الباب لسه هيخبط
نفس اللحظة اللى شذى بتفتح فيها باب الاوضة
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_25) "
===========================

كريم بعد مافتح الباب علشان ينزل
حس ان ممكن تكون شذى تعبانة مثلا
رجع تانى وقرر انه يطمن عليها قبل ماينزل
كريم رايح ناحية الاوضة... وقف قدام الباب لسه هيخبط
نفس اللحظة اللى شذى بتفتح فيها باب الاوضة
شذى اتخضت...شقهت ...رجعت شدت ايشارب من على طرف السرير ولبسته
كريم لف وشه بعيد لما شافها رجعت تلبس ايشارب...لما شافها واقفة ع الباب وبتلف الايشارب
"مش معقول كل ماتشوفينى تتخضى كده"
"مش انت نزلت؟"
"انا منزلتش"
"انا سمعت صوت الباب"
"ماانا رجعت اطمن عليكى الاول...مش عوايدك تنامى لمتأخر فقلقت"
ردت وهى خارجة من الاوضة وبتقفل الباب على ضحى
"هدخل الحمام وارجع احضر لك الفطار"
راحت شذى ع الحمام
وطلع كريم يستناها فى الانتريه
xxxxxxxxxxxxxxxxxxxxxxxxxxxxxxxxxxxx
شذى رايحة المطبخ
"شذى"
ردت من غير ماتقف ولا تلتفت له
"مش هأخرك...حالا هتلاقى الفطار"
قام وراها دخل المطبخ
"انا مرجعتش علشان عايز آكل...انا رجعت علشان اطمن عليكى بس"
ردت وهى بتتجنب النظر ليه... وبتفتح التلاجة تطلع الاكل
"انا كويسة الحمدلله"
رد بانكسار
"طيب الحمدلله... انا نازل"
خرج من المطبخ... فتح الباب ونزل وشذى بتتابعه بعينيها
xxxxxxxxxxxxxxxxxxxxxxxxxxxxxxxx
كريم قاعد مع دعاء وحماه وحماته ع الغدا
كريم ساكت وهما بيتكلموا... بيشارك بكلمات بسيطة
خلصوا الغدا...راحوا قعدوا كلهم مع بعض فى الصالون
جت الشغالة قدمت لهم شاى
حماه"اخبار بابا ايه ياكريم"
كريم"الحمدلله...عمل العملية واحتمال ييجى خلال كام يوم ان شاءالله"
حماته"ييجى بالسلامة...وان شاءالله هنبقى نيجى نزوره"
كريم"تنوروا"
كريم خلص الشاى... وقام
"معلش هستأذن انا لازم ارجع الصيدلية"
حماته وحماه بيبصوا لبعض
حماه"معلش دقايق بس هنتكلم شوية"
كريم"خير"
حماه"دلوقتى ياكريم انا مش شايف حاجة تعطلكم انكم تبتدوا تعملوا الديكورات وتتجوزوا...كان فيه معاد مع مهندس الديكور وانت رفضت ...ليه؟"
كريم"لان دعاء كانت بتقول انكم جايبينه علشان شقتها..وانا مش عايز اتجوز ف شقة مراتى"
بص لدعاء اللى حس فيها بشماتة انتصار رأيها عليه
حماه"بس ده ميعيبكش ف حاجة"
كريم"معلش ياعمى...مش حابب اتجوز غير ف شقتى"
دعاء"بس دى بعيدة اوى عن هنا"
كريم"معاكى عربية وقت ماتحبى تيجى هتيجى"
حماته"انت محبكها اوى ياكريم"
حماه"خلاص ياولاد.. ميجراش حاجة يادعاء اتجوزوا هناك... كده تبقى مرتاح ياكريم؟"
رد كريم وهو بيكذب"اه"
دعاء بتقلب شفايفها وتكشر ...مامتها بتغمز لها تعدى الموقف
حماه"طب كده يبقى اتفقنا...الديكورات هدية جوازكم منى...تروحوا بكرة تاخدوا مهندس الديكور وتشوفوا هيخلص ف وقت قد ايه وتحددوا الجواز"
كريم"ليه الاستعجال"
بصوا له كلهم باستغراب... اتحرج كريم
ردت حماته"وليه التأجيل"
سكت كريم...سألته دعاء تانى
"ليه التأجيل ياكريم... فيه مشكلة ولا حاجة؟"
"لا مفيش مشكلة... بس مستنى لما اطمن على بابا"
حماه"مش باباك عمل العملية وبقى كويس... وكام يوم وهيرجع بالسلامة... فيه ايه تانى"
رد كريم باستسلام
"مفيش حاجة"
xxxxxxxxxxxxxxxxxxxxxxxxxxxxxxxx*
كريم داخل البيت... ضحى قاعدة ع الكمبيوتر
التليفزيون مفتوح... بيدور بعنيه على شذى
مش ف المطبخ...مش قاعدة مع ضحى...خرج البلكونة..مش فيها
قعد مع ضحى وسألها
"هى شذى فين"
"فى الاوضة...بتقولك عملت لك سندوتشات للعشا هتلاقيهم ف المطبخ"
حس انها بتتجنبه تماما...فكر وسأل نفسه...ليه؟
وليه متضايق من تجاهلها ليه
وليه متضايق ومقبوض كده من قرب الجواز رغم ان كل حاجة ماشية كويس
قعد ساكت شوية... بيفكر
قام يدخل اوضته... وصل عند باب اوضة البنات
سامع صوت التليفزيون مفتوح... والنور... خبط
فتحت شذى الباب...واقفة ساكتة مستنياه يتكلم
"انتى متأكدة انك كويسة"
"ايوه الحمدلله"
"بس انا حاسس انك متغيرة...مالك؟"
"مفيش حاجة... انت عايز حاجة؟"
"لا انا كنت بطمن عليكى واقولك ان بابا جاى بعد بكرة ان شاءالله وفيه دكتور هيتابعه هنا"
"ييجوا بالسلامة ان شاءالله"
"شذى انتى زعلانة منى"
شذى بتحاول تبتسم عكس احساسها
"لا طبعا...ربنا مايجيب زعل"
"طيب قاعدة لوحدك ليه؟"
"مفيش ... حابة اقعد لوحدى بس"
"ماشى براحتك"
"عن اذنك"
"اتفضلى"
وقفلت الباب وهو واقف مش فاهم ايه اللى حصل بينهم ورجعت المعاملة جافة تانى
شذى بعد ماقفلت الباب...دخلت قعدت على سريرها
"كده احسن... المعاملة ف اضيق الحدود احسن من انى اقرب منه"
xxxxxxxxxxxxxxxxxxxxxxxxxxxxxxxx*
فى اوضة ابراهيم... ابراهيم على السرير
جليلة وماجدة قاعدين على كراسى جنب السرير
مديحة قاعدة عند اخر السرير وضحى قاعدة ف حضنها
كريم وزياد واقفين ومديحة بتطمنهم على ان العملية نجحت
كريم بيميل على زياد
"ماتيجى نقعد بره...الاوضة زحمة هنا اوى"
يخرجوا الاتنين من الاوضة
شذى داخلة بصينية تقديم... بتقدم حاجة ساقعة
مديحة"قدمى يا شذى لزياد وكريم"
شذى"هما فين...مشفتهمش"
مديحة"تلاقيهم ف البلكونة"
xxxxxxxxxxxxxxxxxxxxxxxxxxxx
شذى داخلة البلكونة...بتحط الصينية على الترابيزة الصغيرة
"اتفضلوا"
كريم"شكرا"
زياد"سيبك من ده...عملتى ايه"
شذى"ف ايه"
زياد"مش قلتلك مش حاسة بيا"
شذى"الدراسة هتبدأ بكرة... وانا هروح الجامعة وهشوفها هناك واعرف اتكلم معاها"
زياد"والموبايلات دى بتعمل ايه"
شذى"دايما بيكون جنبها حد ومش بعرف اتكلم معاها... اصبر كلها يوم ولا اتنين"
كريم"انتى هتروحى الاسبوع ده"
شذى من غير ماتبص له"اه"
كريم"مش اتفقنا هتستنى شوية"
شذى"كنت فاكرة ماما هتتأخر اكتر من كده"
كريم"استنى شوية مش لازم مع بداية الدراسة كده"
زياد"ايه ياعم...انت قطاع ارزاق ليه...روحى يابنتى شوفى دراستك وشوفى لى موضوع شيماء الله يخليكى...الواحد عايز يستقر ويعقل بقى"
كريم"متستعجلش يا زياد... بلاش تتسرع فى الارتباط... ادى نفسك وقت تفكر"
زياد"ايوه يااخويا ..ماهو اللى ايده ف الميه مش زى اللى ايده ف النار...انت حبيت وخطبت ومش حاسس باللى زى حالاتى"
اتضايقت شذى... وقامت
زياد"رايحة فين...هتعملى ايه"
شذى"هروح بعد بكرة ان شاءالله... عايزنى اقولها ايه بالظبط؟"
xxxxxxxxxxxxxxxxxxxxxxxxxxxxxxxx*
كريم وابراهيم ومديحة وشذى وضحى قاعدين ع الغدا
ابراهيم"عملتى ايه ف المدرسة الجديدة يا ضحى"
ضحى"الحمدلله...حلوة اوى"
كريم"بابا ...دعاء واهلها جايين يزوروا حضرتك النهاردة"
ابراهيم"اهلا بيهم"
مديحة"ينوروا... يا الف مرحب"
شذى مجرد ما سمعت سيرة دعاء
افتكرت يوم العزومة وهى بتقول عليها فلاحة
اتضايقت...وسكتت
كريم بص لشذى... شافها سرحانة ... بعد نظره عنها وكمل اكل
xxxxxxxxxxxxxxxxxxxxxxxxxxxxxxxxxxxxxxxx
مديحة مع شذى فى المطبخ
"بصى يا شذى انا هدخل بصينية الجاتوه وانتى ورايا بصينية الحاجة الساقعة"
"حاضر...هحط الصينية وامشى... هروح اقعد ف البلكونة لو عايزة حاجة ابقى نادى عليا"
"طيب"
مشيت مديحة بالصينية...ووراها شذى
دخلوا الاوضة...وهما بيتكلموا
ابراهيم"والله مفاجئة حلوة"
دعاء لما شافت شذى اتكلمت بطريقة غيظ
"احنا خلاص مجرد ما المهندس يقولنا هيخلص امتى بعدها على طول نحجز القاعة ونتجوز..صح يا كيمو"
ارتبك كريم من طريقتها...اتحرج من انها تدلعه ف وجود اهله واهلها...واول ما عينيه اترفعت جت ف عين شذى
شذى من ارتباكها اتهزت بالصينية
اخدها منها كريم بسرعة.... وانسحبت شذى
xxxxxxxxxxxxxxxxxxxxxxxxxxxxxxxx
شذى قاعدة ف البلكونة... حاسة انها مخنوقة
بتفكر... هى ليه متضايقة كده
"كريم هيتجوز... ما يتجوز..مش هو خاطب وطبيعى انه يتجوز...ايه اللى مضايقنى بقى... احساسى دى غلط... انا اتعلقت بيه كده ليه زى المراهقة اللى بتتعلق بواحد من كلمة حلوة... اكيد علشان خارجة من تجربة فاشلة ...فوقى يا شذى انتى كده بتحبى من طرف واحد...وده عذاب مش حب"
سمعت الضيوف خارجين... حست ان وجودها لوحدها ممكن يثير الشك... ابتسمت باصطناع وطلعت تسلم على الناس
مديحة واقفة ...ابو دعاء ومامتها سلموا على شذى ومديحة وخرجوا ومديحة خرجت وراهم توصلهم لحد السلم كنوع من الترحاب الشديد
دعاء كانت واقفة ملاصقة لكريم ومتأخرين شوية بعيد عن الباب ...وقبل ماتسلم
شاورت لشذى
"بسس..انتى يا ...اسمها ايه؟؟ هاتيلى الموبايل لنسيته جوه"
كريم رد بسرعة من احراجه
"هجيبهولك انا"
بصت شذى لكريم بعتاب والدموع بتلمع ف عينيها
وقبل مادموعها تنزل... دخلت اوضتها بسرعة
كريم بيبص لدعاء وهو بيبرق لها
"انتى ايه اللى عملتيه ده"
دعاء بلامبالاة
"عملت ايه"
"انتى بتحرجيها ليه"
"وايه اللى يحرج ف كده...طلبت منها الموبايل"
"انتى متعمدة تتكلمى باسلوب وحش"
"متكبرش الموضوع اوى كده... ايش فهمها بالاسلوب الحلو والوحش...يالا ياحبيبى هات الموبايل علشان ماما وبابا ميفضلوش يستنونى تحت كتير"
دخلت مديحة من بره.... سكت كريم
دخل جاب لها الموبايل ورجع...اخدته منه
"باى ياكيمو"
خرجت دعاء بسرعة... وقفل كريم وراها الباب
جت ضحى تجرى بموبايل مديحة
"ماما تليفونك بيرن"
بصت مديحة فى التليفون
"ده خالد...ناديلى اختك بسرعة"
راحت ضحى
"شذذذذذذى كلمى ماما"
كريم قعد متصنع اللامبالاة..وهو بيتابع باهتمام
جت شذى واتجنبت النظر لكريم
"خالد بيتصل بيا"
"مترديش"
سكت الاتصال...واتكرر
"بيتصل تانى"
"خلاص ردى"
ردت مديحة... وكريم متابع باهتمام متخفى كل كلمة
"الو..ازيك ياخالد...الحمدلله كويسة... اه معلش كنت مسافرة وتليفونى كان مقفول... عايز شذى"
بصت لشذى... وكريم بص لشذى... شذى بتشاور لمديحة انها مش عايزة تتكلم...ارتاح كريم
"بص يا ابنى كل شئ نصيب... هى مش عايزة تتكلم... اقولها ايه؟ هاا....هاا... حاضر هقولها وارد عليك...مع السلامة"
قفلت مديحة وكان ترقب كريم اكتر من شذى لمعرفة المكالمة
شذى"عايز ايه ده؟"
مديحة"بصى يا شذى... الراجل شاريكى... اسمعيه وفكرى وبعدين قولى قرارك"
شذى"انا قررت خلاص"
مديحة"بس اسمعى قال ايه"
شذى"قال ايه؟"
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_26) "
===========================

قفلت مديحة وكان ترقب كريم اكتر من شذى لمعرفة المكالمة
شذى"عايز ايه ده؟"
مديحة"بصى يا شذى... الراجل شاريكى... اسمعيه وفكرى وبعدين قولى قرارك"
شذى"انا قررت خلاص"
مديحة"بس اسمعى قال ايه"
شذى"قال ايه؟"
مديحة"بيقول انه مستعد يعمل اللى يرضيكى ومامته هتكتب الشقة باسمه لو ده اللى مضايقك..ولو على التوضيب اعتبرى انكم اشترتوها كده لانه هيخسر لو باعها...وهو جاهز يعملك فرح زى ماكان نفسك وتتجوزوا... هو بيحبك ومتمسك بيكى"
كريم حس باضطراب وخوف من موافقة شذى
شذى"هو انا مشكلتى معاه الشقة بس... والكدب اللى كدبه عليا وتدخل مامته"
مديحة"مفيش حد كامل يا شذى وانا عارفة انكم بتحبوا بعض... فكرى تانى"
كريم مقدرش يمنع نفسه من الكلام
"بس يا طنط الاسباب اللى قالتها شذى تقلق فعلا"
مديحة"تديله فرصة وتشوف"
كريم بيسأل شذى برجاء وتوسل انها ترفض
"ايه رايك يا شذى"
شذى وهى بتدخل اوضتها من غير ماتبص له
"مش عارفة"
xxxxxxxxxxxxxxxxxxxxxxxxxxxxxxxx*
مديحة وابراهيم وكريم وضحى ع العشا
كريم"هى شذى مش هتتعشا"
مديحة"بتقول مالهاش نفس"
كريم يسكت وهو قلقان...يحاول ياكل..ميقدرش فيقوم
مديحة"مكلتش ليه ياكريم"
كريم"اصلى اكلت من شوية وشبعان"
مديحة"يالا يا ضحى خلصى بسرعة علشان تنامى بدرى"
xxxxxxxxxxxxxxxxxxxxxxxxxxxxxxxxxxxx
بعد البيت كله مانام
كريم صاحى ف اوضته وكل خوفه ان شذى ترجع لخالد
وكل مايفتكر اسلوب دعاء مع شذى واحراجها ليها يتضايق اكتر
شذى ف اوضتها صاحية واحساسها بالاهانة هو اللى مضايقها وخصوصا انها اتهانت قدام كريم
كريم قاعد محتار... قرر انه لازم يتكلم مع شذى
فكر يروح يخبط عليها
"ولو حد صحا وسألنى بخبط عليها ليه اقول ايه؟"
اخد موبايله واتصل بشذى
شذى اول ما تليفونها رن...بصت شافت اسم كريم... استغربت
ردت "الو... فيه حاجة"
"مالك قافلة عليكى ليه ومطلعتيش من اوضتك"
"مفيش حاجة"
"صوتك مش نايمة"
"ايوه مكنتش نايمة"
"بتفكرى ف خالد"
سؤاله ربكها... هى مبتفكرش ف خالد ...بس بأى حق يسألها
"بتسأل ليه"
"شذى اطلعى عايز اتكلم معاكى"
"قول فيه ايه"
"اطلعى بس عايز اتكلم معاكى ومش هينفع ف التليفون"
"قول اللى انت عايزه"
"مينفعش نبقى ف بيت واحد ونتكلم ف التليفون...ارجوكى اطلعى البلكونة اتكلم معاكى شوية"
لحظات سكوت شذى بتفكر
"طيب"
xxxxxxxxxxxxxxxxxxxxxxxxxxxxxxxxxxxxxxxx
شذى داخلة البلكونة... شافت كريم قاعد مستنيها...قعدت
"نعم؟"
"مالك...بقالك كايم يوم متغيرة خالص...ايه اللى حصل"
"محصلش حاجة"
"بلاش ترجعى لخالد"
"ليه"
"مش هترتاحى معاه"
"وانا يعنى هنا مرتاحة"
"حد مضايقك هنا...محدش يقدر يضايقك"
ضحكت بسخرية ودموع محبوسة
"بأمارة خطيبتك اللى عاملتنى كأنى شغالة عندها"
"اكيد متقصدش"
"انت نفسك حسيت ان اسلوبها وحش...اهانتنى واحرجتنى وانا ساكتة ومقدرتش ارد... ولسه لما تتجوزوا اكيد هقابلها كتير...تفتكر معاملتها هتتغير... انا متعودتش ان حد يهيننى ...انا بس سكتت علشان معملش مشاكل"
"انا اسف يا شذى...متزعليش"
كلام شذى عن احساسها بالاهانة...خلى الدموع تنزل منها غصب عنها
"انا لو رجعت لخالد هيبقى بسبب انى عايزة ابعد عن هنا خالص"
قامت شذى تدخل اوضتها
"استنى يا شذى"
موقفتش شذى وجريت على اوضتها وقفلت عليها
xxxxxxxxxxxxxxxxxxxxxxxxxxxxxxxxxxxx
كريم خارج من الحمام...بيبص على اوضة البنات
شافها مفتوحة والشباك مفتوح ومديحة خارجة منها
"هعملك الشاى حالا يا كريم لحد ماتلبس"
"شكرا"
دخل كريم يلبس..خرج من الاوضة
شاف فطار له لوحده
"انتم فطرتم؟"
"اه فطرنا من بدرى مع شذى وضحى قبل ماينزلوا"
"شذى راحت فين؟"
"راحت الكلية"
"وهتعمل ايه مع خطيبها؟"
"والله ما عارفة ياكريم...اديها بتفكر وهى حرة ف قرارها"
صوت ابراهيم من الاوضة
"ياكريم"
دخل كريم لباباه
"صباح الخير يابابا...كنت جاى لك قبل ماانزل"
"صباح النور... كنت عايز اعرف فكرت ف الموضوع اللى كلمتك فيه"
"ايوه... وقبل ماحضرتك تقول انا كنت بفكر ف كده... انا هروح الشركة قبل ما اروح الصيدلية"
"ربنا يكرمك ياكريم ويوقفلك ولاد الحلال"
وطا كريم على ايد باباه باسها وهو بيطبطب عليه
"ربنا يخليك يا بابا...سلامو عليكو"
خرج م الاوضة ع الباب
مديحة من المطبخ
"مش هتفطر"
"اتأخرت ياطنط...سلامو عليكو"
xxxxxxxxxxxxxxxxxxxxxxxxxxxxxxxxxxxx
كريم داخل مكتبه ف الشركة... بيلم اوراقه المهمة
دعاء معجية بالصدفة ف الطرقة شافت كريم...اتفاجئت
"كيمو حبيبى ايه المفاجئة الحلوة دى"
مردش عليها... كان بيلم ف حاجته
"بتعمل ايه؟"
"لو فاضية عايزك شوية ننزل مع بعض"
"ولو مش فاضية افضى...انت بتعمل ايه؟"
xxxxxxxxxxxxxxxxxxxxxxxxxxxxxxxxxxxx*
كريم ودعاء ف العربية
دعاء بعصبية
"ايييه...استقالت يعنى ايه؟ وجاى تقولى دلوقتى بعد ماقدمتها خلاص"
كريم بيرد عليها ببرود
"اقول او مقولش متفرقش معاكى ف حاجة...انتى سألتينى جيت الشركة ليه جاوبتك"
"يعنى ايه ميفرقش معايا...بتستقيل ليه"
"علشان بابا معدش يقدر على شغل الصيدلية وانا اللى همسكها"
"وانت مالك تسيب الشركة ليه"
"انا حر...وبعدين انا عايزك مش علشان كده خالص"
"هو فيه اهم من كده"
"اهم مليون مرة... ايه اللى عملتيه مع شذى امبارح ده"
"شذى دى ايه اللى هتعملها اعتبار"
"اتكلمى كويس يا دعاء... واضح من كلامك انك فعلا قصدتى تهينيها"
"كل ده علشان قلتلها تجيب الموبايل...تحمد ربنا انى مقلتلهاش تلبسنى الجزمة..يابنى دى مستعنيهاش اشغلها عندى"
واتكلم كريم بعصبية
"اللى بتتكلمى عنها دى احسن منك...انتى ايه...مفيش دم"
"مين دى اللى احسن...ايه الفلاحة الزبالة دى اللى بتشتمنى علشانها"
ومع عصبية كريم...خبط واحد ماشى قدامه بعجلة
فرمل بسرعة... نزل يشوف الراجل اللى وقع
دعاء قاعدة مكانها بتغلى... شافت موبايل كريم فى العربية
كريم واقف مع الناس... بيساعد الراجل يقوم
"انا اسف ...اتفضل معانا نروح مستشفى"
"خلاص يابنى محصلش حاجة...انا كويس"
"انا والله كنت شايف كويس..انت اللى جيت يمين فجأة"
"يابنى خلاص محصلش حاجة...انا اللى وقعت عليك مش ذنبك"
رجع كريم العربية شاف دعاء ماسكة الموبايل وبتصرخ ف وشه
"متصل بيها الساعة 2 بالليل ياكريم... بتتكلموا ف ايه ف الوقت ده ..ده انت معملتهاش معايا"
"انتى غلطانة وليكى عين تتكلمى"
"فيه ايه بينك وبينها ياكريم"
"مفيش حاجة"
"كذاب"
"انتى هتشتمينى...لا يادعاء من انا الراجل اللى اتشتم وغرورك ده مينفعش معايا"
"علشان تروح للفلاحة بتاعتك...مش انا اللى يتقالى كده ياكريم"
"متعيشيش ف اوهام تحللك تصرفاتك الغريبة دى...مفيش حاجة بينى وبينها"
"مش مصدقاك"
"مش مشكلتى"
"لو عايزنى اصدقك...اتصل بيها وهزأها قدامى"
"ده انتى اللى المفروض تتصلى بيها وتعتذرى لها قدامى"
"ده بعدك وبعدها...انا اعتذر للزبالة دى"
"ايوه هتعتذرى لها وتتكلمى عنها كويس بعد كده"
"مش معتذرة لحد...نزلنى هنا"
وقف كريم...ونزلت دعاء ورزعت الباب وراها
xxxxxxxxxxxxxxxxxxxxxxxxxxxxxxxxxxxx*
كريم قاعد ف الصيدلية... ماسك الموبايل
دخل عليه زياد
"ازيك ياكيمو"
"اهلا يازياد...جيت ف وقتك"
"ايه مالك...بتتصل بمين كده"
كريم بصوت واطى
"بتصل بشذى ومبتردش عليا"
استغرب زياد
"بتتصل بيها ليه"
"وفيها حاجة لما اتصل بيها"
"مفيهاش...بس لازم يكون فيه سبب"
"شكلها بتفكر ترجع لخطيبها"
"ربنا يهنيها"
وزعق له كريم
"ترجعله ليه وهو مش بيقدرها ولا هتكون مرتاحة معاه"
زياد مستغرب اكتر
"طب وانت مهتم اوى كده ليه"
كريم بيحاول يخبى
"وليه تتجوزه وتعيش تعيسة"
"اختيارها واكيد هى شايفة انها هتكون مبسوطة"
"لا مش هتكون مبسوطة...هى قالت انها لو رجعت هيكون علشان تبعد عن البيت"
"هو فيه حاجة انا مش فاهمها ولا انا فاهم ومش مصدق ولا ايه"
"ايه الالغاز دى"
"انت اللى ايه الاهتمام ده... انا حسيت يوم ما كنا عندكم نظراتك ليها شككتنى بس قلت مش معقول... انت بتحبها ياكريم؟"
سكت كريم... متردد... ورد بحسم
"ايوه يا زياد بحبها"
"ودعاء؟"
"غيرى خالص... طريقتها ..اسلوبها... تربيتها...غيرى خالص"
"وشذى؟"
"مبحسش بالراحة غير معاها... ولما عرفت ان خطيبها عايز يرجع لها كنت هتجنن وهى متغيرة معايا خالص مش عارف ليه"
"متغيرة؟؟ هو انتم صارحتم بعض؟"
"لا...بس حاسس انها بتتجنبنى خالص"
"طبيعى ...شايفاك خاطب وقربت تتجوز عايزها تعمل ايه يعنى...ده لو هى بتحبك"
"لو؟؟"
"ايوه...مافيه احتمال يكون بيتهيألك"
"اتصرف ازاى"
"انت فكرت كويس"
"احساسى اكبر من اى تفكير.... انا عايز افضل معاها هى ومبستحملش دعاء شوية صغيرين"
"يبقى لازم تحسم موضوعك يامعلم مع دعاء قبل ماتتكلم مع شذى"
"وده اللى هيحصل فعلا... انا لازم افسخ الخطوبة الاول"
مسك كريم الموبايل وكرر الاتصال تانى
"مبتردش برضه"
"هتقولها ايه؟"
"مش عارف... المهم اطمن انها مقررتش"
"اصبر ياكريم لما تخلص من الخطوبة الاول... اتصل انا بيها بقى يمكن ترد عليا"
بص كريم لزياد بغيظ
زياد بيضحك
"بهزر والله...معاييش رقمها اصلا ...ههههه ياحلاوتك ياكيمو ياحبييييييييب"
وضحك كريم مع زياد... وهو لسه قلقان من قرار شذى
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_27) "
===========================

شذى نازلة مع شيماء بعد المحاضرة
فتحت شنطتها تعدل صوت رنين الموبايل
"كريم اتصل بيا"
"وبعدين"
"كتير اوى"
"ما تتصلى بيه تشوفى عايز ايه"
"لو فيه حاجة مهمة كانت ماما كلمتنى...الاحسن متصلش"
نزلوا قعدوا مع بعض ف الكافتيريا
"يا شذى انتى ليه مش عايزة تعرفى حتى عايزك ف ايه"
"وهيفيد بايه...افرضى كلمنى كويس زى ماكان بيعمل...اتعلق بيه اكتر وهو مش ف دماغه"
"عندك حق...طب وخالد"
"انا مبقتش احب خالد... كل ما افتكر مواقف كتير كان بيعملها معايا اقول انا ازاى كنت ساكتة ومستحملة ومفوقتش من بدرى"
"يعنى مش هترجعى لخالد"
"بجد مش عارفة...حاجة جوايا رافضاه... وحاجة تانية بتقولى ابعدى خالص عنهم ..كريم وخطيبته ومصر كلها واجى اعيش هنا... وبكده لا هشوف كريم تانى ولا هيشوفنى ومع الوقت هتأقلم مع خالد وحياتى وخلاص"
"وافرضى مقدرتيش تتأقلمى...هتعملى ايه"
"مش عارفة يا شيماء...بجد مش عارفة..انا محتارة اوى"
"فكرى كويس يا شذى... اوعى تتسرعى وترجعى تندمى"
"سيبك منى...ارد على زياد اقوله ايه"
"مش عارفة يا شذى"
"والله يا شيماء زياد طيب ومؤدب ودمه خفيف.. جربى اقعدى معاه واتكلموا يمكن تُعجبى بيه"
"اصل يعنى من اول مرة شافنى كده عجبته..معقول؟"
"اهو ده اللى حصل...ها قلتى ايه"
سكتت تفكر...ردت
"ماشى.. تليفونات وكلام وحاجات من دى لأ... خليه ييجى هنا ونتكلم بس لو قبول يتقدم ..انا اصلا رافضة الارتباط والكلام والمقابلات ...انا مش عايزة وجع قلب"
"هو عايز يتقدم بس لما تتكلموا مع بعض الاول...انتوا مشفتوش بعض الا مرة واحدة"
"ماشى...ولو حد شافنى هقول قريبك مليش دعوة"
"ماشى يا ستى...يا عينى ده هيفرح اوى"
"ما تتصلى بيه تقوليله"
ضحكت شذى على اهتمام شيماء اللى بتنكره
"رقمه مش عندى... لما اروح هتصل بيه م البيت"
xxxxxxxxxxxxxxxxxxxxxxxxxxxxxxxx
كريم راجع من الصيدلية ع الغدا... شذى لسه مرجعتش
اتغدا وهو بيستناها على امل تيجى وهو ف البيت
استنى ...ولما جه وقت نزوله...كان قلقان وبيفكر يسأل عليها
راح ع الباب...كانت مديحة وضحى قاعدين ع السفرة بيذاكروا
"طنط هى شذى لسه مرجعتش؟"
"اه لسه"
"اتأخرت؟"
"لأ.. زمانها جاية"
"يعنى اتصلتى بيها؟"
مديحة تسيب الكتاب من ايدها وتلتفت لكريم
"انت عايزها ف حاجة"
"لا ..بس بطمن يعنى علشان السفر والطريق "
"ربنا يستر يا كريم... اهى هانت اخر سنة وتخلص ونرتاح"
"ان شاءالله.... مش عايزين حاجة"
"لا شكرا...مع السلامة"
ينزل كريم ع السلم وهو بيدعى انه يقابل شذى صدفة وهى راجعة وساعتها اكيد هتكلمه... مش هتتجاهله زى ما بتتجاهل اتصاله
xxxxxxxxxxxxxxxxxxxxxxxxxxxxxxxx*
شذى بتفتح الباب بالمفتاح... تدخل وتقعد
مديحة"حمدالله ع السلامة...اتأخرتى ليه"
"الله يسلمك...مشيت من الجامعة متأخر"
"اسخن لك"
"لا مش جعانة اكلت مع شيماء"
سكتت مترددة وكملت
"حد هنا؟"
"ابراهيم نايم وكريم ف الصيدلية"
"هقوم اغير هدومى... اه صحيح معاكى رقم زياد"
"الموبايل؟"
"اه"
"لا معايا رقم البيت...عايزاه ليه؟"
"هغير واجى احكيلك"
xxxxxxxxxxxxxxxxxxxxxxxxxxxxxxxx*
كريم داخل البيت بعد ما رجع م الصيدلية
الساعة 11 بالليل... البيت كله هادى والنور مطفى
راح ناحية اوضته... بص على اوضة البنات
النور مطفى...دخل اوضته
قاعد ف اوضته متضايق...عينيه جت على الدبلة ف ايده ..قلعها
بيقاوم انه يتصل بشذى... مسك الموبايل واتصل بيها
سمع صوت رنة الموبايل واصل لاوضته... سكت الصوت والجرس لسه بيرن فى الاتصال
شذى نايمة صاحية...وكل شوية تبص ف الساعة
لما سمعت صوت الباب... وصوت خطوات كريم
اطمنت انه رجع البيت... غمضت عينيها تحاول تنام
سمعت موبايلها بيرن... قفلت صوت الرنين العالى
كريم لما سمع الصوت اختفى والاتصال متقطعش
فهم انها عملت الاتصال صامت... اتأكد انها صاحية
كتب لها رسالة
"مبترديش عليا ليه؟؟ ليه متجنبانى كده؟؟ لو زعلانة منى ف حاجة قوليلى... لازم نتكلم يا شذى... هستناكى ف البلكونة"
شافت شذى الرسالة... احتارت
"اجمدى يا شذى... قربك منه مش هيتعب حد غيرك... يا ترى عايز ايه؟؟ مش مهم..المهم انك تفضلى على قرارك"
كريم بعد ما بعت الرسالة... طلع قعد ف البلكونة يستناها
xxxxxxxxxxxxxxxxxxxxxxxxxxxxxxxx
"كريم....كريييييم"
كريم فتح عينيه...شاف مديحة
"ايه اللى مقعدك كده...نايم ف البلكونة!!"
بص كريم حواليه
"انا كنت قاعد سهران...شكلى نعست..احنا الساعة كام"
"3... قوم ياحبيبى كده تبرد الجو بدأ يبرد بالليل"
"تصبحى على خير"
xxxxxxxxxxxxxxxxxxxxxxxxxxxxxxxxxxxxxxxx
كريم ف الصيدلية... بيكح
بيتصل بالتليفون
"سلامو عليكو...ازيك ياعمى... كنت عايز حضرتك ف موضوع كده... ياريت اقابلك... بره البيت افضل... اه فاضى ....طيب جاى لك حالا... مسافة السكة...مع السلامة"
قفل مع ابو دعاء... وهو بيفكر ف شذى
" تكون قررت ترجع لخالد علشان كده مبتكلمنيش... عايشين ف بيت واحد ومش عارف اشوفها ولا اكلمها... هانت... اخلص مشوارى واتكلم معاها واقولها كل حاجة"
xxxxxxxxxxxxxxxxxxxxxxxxxxxxxxxxxxxxxxxx
كريم قاعد فى المصنع مع حماه
"انت من اول مشكلة بينكم جاى تقول نفسخ الخطوبة"
"مش اول مشكلة ولا كانت هتبقى اخر... انا ودعاء مش متفقين مع بعض خالص"
"سبحان الله اللى يشوفكم يقول بتموتوا ف بعض"
"انا اسف... انا زى ما خطبتها من حضرتك جيت برضه اعتذر لحضرتك"
"بعد كلامك ده مش هقولك لا والنبى فكر تانى...انا بنتى 1000 واحد يتمناها بس هى مراية الحب عميا"
حس كريم ان حماه بيتكلم من احساسه بالاهانة...اخد كريم الكلام بهدوء من غير رد... قام واستأذن
"ابقى عدى عليا بكرة خد شبكتك... كده كده دعاء مبتلبسهاش"
"هبقى اتصل بحضرتك قبل ما اجى...بعد اذنك"
خرج كريم وهو بيتنفس بحرية وفرحة انه اخيرا بقى حر ويقدر يصارح شذى بكل اللى جواه
فكر الاحسن يتصل بيها ولا يروح على البيت يستناها ويشوفها وهى راجعة من الكلية
xxxxxxxxxxxxxxxxxxxxxxxxxxxx*
كريم داخل البيت... ومديحة ف المطبخ
"سلامو عليكو"
"وعليكو السلام...اتأخرت عن كل يوم...اتغدينا من غيرك"
"معلش كان ورايا مشوار مهم اوى والحمدلله تم بنجاح"
"شكلك فرحان...خير"
"هقولكم بس بالليل...لما نكون كلنا مع بعض"
"احضرلك الغدا"
"بس مش عايز اتغدا لوحدى..هدخل انام شوية وابقى صحينى اتغدا مع شذى"
"ماشى... بقولك ياكريم باباك عنده معاد مع الدكتور ف المستشفى علشان هيعمل اشعة الساعة 9 الصبح"
"ناخده ونروح ان شاءالله"
xxxxxxxxxxxxxxxxxxxxxxxxxxxxxxxx*
شذى داخلة البيت... مديحة بتذاكر مع ضحى
"سلامو عليكو"
"وعليكم السلام.. ايه شيماء عملت ايه"
"مش النهاردة ياماما انتى نسيتى"
"اه صحيح قالك بكرة؟"
"اه... ماما انا جعانة اوى هغير هدومى وسخنيلى بسرعة الله يخليكى"
"حالا... قومى يا ضحى لمى كتبك وروحى صحى كريم"
استغربت شذى على وجوده فى المعاد ده
"هو كريم هنا"
"اه... نايم ومتغداش ...مستنيكى"
"طب متعمليش حسابى دلوقتى"
دخلت شذى اوضتها... ودخلت وراها مديحة وقفلت الباب
"فيه ايه؟"
"على ايه ياماما"
"انتى وكريم... شوية كويسين مع بعض وشوية مبتكلموش بعض...فى ايه؟"
"مفيش حاجة"
"من امتى بتخبى على امك"
عيطت شذى وهى بتقعد على السرير
"يا مصيبتى... عملك حاجة واحنا مسافرين؟"
شذى بتنكر بقوة
"لا والله يا ماما حرام...كريم مؤدب جدا ومشفتش منه حاجة وحشة"
مديحة بعد ما اطمنت
"طب فيه ايه"
"هحكيلك... يوم ما خطيبته واهلها كانت هنا"
xxxxxxxxxxxxxxxxxxxxxxxxxxxxxxxxxxxx*
مديحة بتلبس... وابراهيم لابس
"هو كريم لسه نايم من امبارح"
"امبارح دخلت له بالليل اصحيه... قالى محتاج انام شوية...ده لا اتغدا ولا اتعشا"
"انا هروح اشوف ماله... ده مبينامش كده"
ابراهيم بيقعد على طرف سرير كريم
"كريم... كريم"
"ايوه يابابا"
"مالك؟"
ابراهيم بيمسك ايد كريم يصحيه
"ايه ده...انت مولع يا ابنى... مخدتش حاجة للحرارة"
"لا مخدتش بالى ان فيه حرارة... انا جسمى واجعنى من امبارح ومش قادر اقوم"
دخلت مديحة الاوضة من غير ماتسمع
"يالا ياكريم الساعة بقى 8 وربع"
ابراهيم"كريم سُخن... هاتيله حاجة للبرد من هنا لحد ما اجيبله مضاد حيوى واحنا راجعين"
مديحة"الف سلامة يا كريم... تلاقيك بردت من نومة البلكونة"
ابراهيم"نومة البلكونة؟؟!! ايه اللى ينيمه ف البلكونة"
كريم"كنت قاعد ونعست غصب عنى"
مديحة راحت ورجعت بدوا وكوباية مياه
مديحة"نام واتغطى كويس وان شاءالله هتبقى كويس... يالا يا ابراهيم هنتأخر"
xxxxxxxxxxxxxxxxxxxxxxxxxxxxxxxx*
شذى وصلت الموقف... ركبت ميكروباص اللى رايح طنطا
بتفتح الشنطة تحضر الفلوس... وافتكرت انها مخدتش مصروفها اللى حطته مديحة جنب التليفزيون فى الاوضة قبل ماتنزل
نزلت من الميكروباص... مضطرة ترجع تاخد الفلوس
xxxxxxxxxxxxxxxxxxxxxxxxxxxxxxxx
كريم سمع جرس الباب بيرن
قام وهو تعبان يشوف مين لما افتكر ان مفيش حد ف البيت
كريم بيفتح الباب...شاف دعاء قدامه
"دعاء!!"
دخاء وهى داخلة البيت
"كده اهون عليك يا حبيبى"
كريم بجدية بيحذرها
"دعاء مفيش حد ف البيت"
ردت وهى بتقفل الباب
"وايه يعنى... مش مهم انا عايزة اتكلم معاك وافهم ايه اللى قلته لبابا ده"
"مش محتاجة كلام... احنا خلاص اللى بيننا انتهى"
دعاء بتعيط وتقرب منه
"انا بحبك يا كريم... ليه بتعمل معايا كده"
بتعيط ف حضنه... استغرب واتخض... بيبعد عنها
فى اللحظة اللى فتحت شذى الباب بالمفتاح
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت

[لامارا]

" ( #الــحــلــقــة_28) "
===========================

كريم بيفتح الباب...شاف دعاء قدامه
"دعاء!!"
دخاء وهى داخلة البيت
"كده اهون عليك يا حبيبى"
كريم بجدية بيحذرها
"دعاء مفيش حد ف البيت"
ردت وهى بتقفل الباب
"وايه يعنى... مش مهم انا عايزة اتكلم معاك وافهم ايه اللى قلته لبابا ده"
"مش محتاجة كلام... احنا خلاص اللى بيننا انتهى"
دعاء بتعيط وتقرب منه
"انا بحبك يا كريم... ليه بتعمل معايا كده"
بتعيط ف حضنه... استغرب واتخض... بيبعد عنها
فى اللحظة اللى فتحت شذى الباب بالمفتاح
شذى اول ما شافت ارتباك كريم ودعاء وهما قريبين من بعض
وقفت مصدومة لحظات من المفاجئة
كريم اول ما شاف شذى ارتبك ووقف يبص لها
دعاء لما شافت شذى ونظرات الصدمة ف عينيها
وكريم ونظرات الدفاع عن نفسه ف عينيه
اتغاظت اكتر وقبل ما تتكلم
جريت شذى على اوضتها من غير ما تنطق ولا كلمة
كريم بشدة لدعاء
"انا مش فاهم انتى ازاى كده... انتى كل مرة بتأكدى لى ان كلامى صح"
دعاء ببرود"مالك... لما شفتها خفت كده ليه"
"ملكيش دعوة بيها يا دعاء...واتفضلى من هنا لو سمحتى... كلامى مع باباكى ومعدش بينى وبينك اى كلام"
ضربته دعاء ف صدره وهى خارجة وكلها حقد
"اشبع بيها الفلاحة البيئة بتاعتك..جتك الارف انت وهى"
خرجت دعاء وهى بترزع الباب وراها
دخل كريم يشوف شذى
xxxxxxxxxxxxxxxxxxxxxxxxxxxxxxxxxxxx
شذى بعد ما شافت كريم ودعاء... اتصدمت
مقدرتش تواجه الموقف من اى ناحية ولا حتى تتصنع اللامبالاة
دخلت الاوضة بسرعة وقفلت عليها بالترباس
قعدت على السرير تعيط
"هو ده كريم اللى فاكراه مؤدب ومحترم... كان رايح مع ماما المستشفى ايه اللى قعده...ولا وصلهم ورجع يقابلها هنا...هنا فى البيت!! ليه...للدرجة دى بيحبها ...انا اللى غلطانة لما سبت نفسى احبه... ميستاهلش اى احساس حلو حسيته"
الباب بيخبط
"شذى.. اطلعى اكلمك اوعى تفهمى غلط"
شذى ساكتة وبتعيط بصمت...خايفة يسمع صوت عياطها
"شذى ردى عليا "
شذى بتتصنع القوة
"نعم"
"اطلعى عايز افهمك"
"وتفهمنى ليه.... انت حر ف حياتك مليش دعوة بيك"
دموعها خانتها وهى بتتكلم...سمعها كريم
"يا شذى اسمعينى وافهمينى"
شذى بتعيط بصوت عالى
"مش عايزة اسمع منك حاجة"
اتنرفز كريم... حاول يفتح الباب...مفتحش
"افتحى يا شذى وكلمينى... افتحى لا والله اكسر الباب اللى بينى وبينك ده"
قبل ما يكمل كلامه...فتحت شذى الباب
لحظات متواجهين وهما ع الباب
شذى معيطة وكريم متنرفز
"ليه بتعملى معايا كده"
"انا معملتش حاجة"
رجعت اخدت الفلوس وشنطتها وعدت من جنبه
"انا نسيت الفلوس رجعت اخدها ونازلة على طول...اسفة انى جيت ف وقت مش مناسب"
عدت من جنبه خارجة من الاوضة ماشية ف الطرقة
شدها من ايدها لحد الانتريه
"مفيش نزول...تعالى اقعدى هنا ...دوختينى"
سابها وهو بيزقها برفق على الكنبة وقعد قصادها
شذى بتبص له مستغربة انه مسكها كده وطريقة كلامه اللى مش قادرة تحدد نوعها... كريم بيبص لها بحب
"انتى ايه اللى عملتيه فيا ده"
"انا؟؟"
"لخبطتينى وجننتينى وحيرتينى"
"انا!!!"
"ايوه انتى... ازاى مش حاسة بيا لحد دلوقتى"
شذى متلخبطة... مش فاهمة كلامه... او مش مصدقة اللى فهمته
افتكرت دعاء... والمنظر اللى شافته...قامت وقفت
"كريم انت حر ف حياتك ومش محتاج تبرر لى حاجة"
"مش ببرر.. انا لازم اقولك الحقيقة...انى اتفاجئت بدعاء جاية علشان ارجع فى كلامى ومفسخش الخطوبة"
شذى بفرحة داخلية وهى بتقعد
"فسخ الخطوبة!! ليه؟"
كريم بكل حب
"علشان بحبك انتى"
مشاعر كتير حست بيها شذى
فرحة... استغراب... مفاجئة... دموع فرح بتنزل وهى بتضحك
كريم بيبص لها بحب
"مكنتيش مديانى فرصة اتكلم معاكى... استنيتك اول امبارح طول الليل ف البلكونة لحد مانمت وانا قاعد... استنيتك امبارح وكنت ناوى تكونى اول واحدة تعرف انى سبت دعاء ...انما نمت ومقدرتش اقوم...اخدت برد بسببك"
"سلامتك"
"الله يسلمك.. دلوقتى ممكن اسألك قرارك ايه بالنسبة لخالد"
"انا عايزة افهم لما انت فسخت الخطوبة ايه المنظر اللى شفته ده"
"والله اتفاجئت بيها... انا روحت لباباها امبارح وقلتله...معرفش ايه اللى جابها دلوقتى...ممكن نسيبنا منها ونخلينا ف نفسنا"
بفرحة"نفسنا؟"
"اه...قوليلى انتى كمان حاسة بيا ولا وطمنينى لسه بتفكرى ف خالد"
"تفتكر ياكريم انا كنت ببعد عنك اوى كده ليه"
"ليه"
"علشان كنت خايفة من احساسى بيك يكبر اكتر واكتر"
كريم بفرحة
"بجد يا شذى... بتحبينى زى ما بحبك"
قام كريم يقعد جنبها... قامت من مكانها
"انا لازم انزل...اتأخرت"
"يعنى يوم ما اعرف اتكلم معاكى تنزلى وتسيبينى... خليكى قاعدة معايا"
"مش هينفع ...زياد جاى لنا الجامعة النهاردة وشيماء مش هترضى تقابله لوحدها"
"طيب... خلى بالك من نفسك"
"وانت خلى بالك من نفسك وارتاح ف السرير... شكلك باين انك تعبان واتكلمنا كتير"
"انا خفيت لما اتكلمت معاكى"
راحت ع الباب...فتحته وهو بيوصلها
"هتيجى الساعة كام"
"مش قبل 6"
"هستناكى ع الغدا"
"ماشى...سلام"
xxxxxxxxxxxxxxxxxxxxxxxxxxxxxxxxxxxx
دعاء فى اوضتها...عمالة تصرخ وتكسر فى المرايات
تدخل عليها مامتها
"ايه يادعاء... ايه اللى رجعك من الشغل...كسرتى الاوضة كده ليه"
"شفتى كريم سابنى ليه"
"انتى قابلتيه؟"
"ايوه.... بيسيبنى علشان الفلاحة بنت الفلاحة اللى ف بيتهم"
"بنت مرات ابوه!!"
"اه ياماماا...هموت م الغيظ... يسيبنى انا علشان البيئة دى"
"مش معقول...كريم يبص لها ازاى...انتى عرفت منين"
"شفتهم.. انا كنت حاسة"
"البت وامها لفت الواد وابوه ... قادرين"
"انا مش مصدقة عنيا... امها كانت شغالة عند ابوه واتجوزها..البت كمان اللى مكنش طايقها يحبها...هتجنن يامامااااا"
"سلامتك من الجنان ولا تضايقى نفسك...كريم اقل منك بكتير وكويس اننا وافقنا عليه"
وبنظرة حقد وشر
"مش انا اللى حد ياخد منى حاجة بتاعتى...انا ارمى مترميش"
xxxxxxxxxxxxxxxxxxxxxxxxxxxxxxxxxxxx*
كريم بيلبس فى اوضته...سمع الباب
طلع قابل باباه بره
"حمدالله ع السلامة...طمنى الدكتور قالك ايه"
ابراهيم"الحمدلله...العملية تمام"
مديحة"انت لابس ونازل؟؟ انت مش تعبان يا كريم...خليك مرتاح"
كريم"اصل عندى مشوار مهم...لازم اروحه"
ابراهيم"مشوار ايه"
ابراهيم داخل اوضته... مديحة مسنداه
كريم دخل وراهم
ابراهيم قاعد على طرف السرير...مديحة بتجيب له الهدوم من ع الشماعة...كريم واقف ع الباب
"انا رايح لابو دعاء اخد الشبكة"
مديحة وابراهيم بصوا لبعض
ابراهيم"ايه اللى حصل"
كريم"دعاء متناسبنيش خالص يابابا...كل حاجة بيننا مختلفة... جريئة جدا...اسلوبها وحش... عايزانى امشى بدماغها هى"
ابراهيم"والله انت اللى اختارتها وانت حر ف اللى تشوفه"
مديحة بتساؤل
"كريم... اوعى يكون حد مننا السبب"
ابراهيم"واحنا هنبقى السبب ازاى؟"
مديحة بتبص لكريم
لحقها كريم
"محدش السبب يا طنط...السبب انى اتسرعت ف خطوبتى لدعاء"
لف كريم يخرج..وقف لحظات متردد...التفت لهم تانى
"انا عايز اتجوز شذى"
مديحة اتفاجئت... بصت على ابراهيم شافته مكشر
كريم بعد ما قال جملته... خرج م الاوضة
"سلامو عليكو"
خرج كريم وسمعوا الباب بيتقفل
مديحة مستنية ابراهيم يعلق على كلام كريم
"مالك يا ابراهيم... مقلتش حاجة يعنى"
"عايز بس انام شوية...بعدين نتكلم"
xxxxxxxxxxxxxxxxxxxxxxxxxxxxxxxxxxxxxxxx*
شذى قاعدة مع شيماء فى الكلية
شيماء متوترة
"والله ما انا عارفة انا ازاى رضيت...انا مكسوفة جدا"
"يا بنتى عادى... انتو هتتكلموا مع بعض ...اعتبريه واحد زميلنا عادى"
"طب هو هييجى فين"
"انا اديته رقمى...لما يوصل هنطلع نقابله بره ونروح نقعد ف اى مكان"
دقايق ورن موبايل شذى
"اهو..بيتصل"
ردت"الو... وصلت...طب احنا طالعين لك حالا"
قامت شذى ومعاها شيماء
"يالا مستنينا بره"
شذى وشيماء خارجين من باب الجامعة
بيدوروا بعنيهم على زياد
اتفاجئت شذى بزياد وكريم واقفين جنب عربية كريم
فرحت شذى بالمفاجئة
حست انها عايزة تجرى لحد كريم
شيماء شافت ابتسامتها
"مين اللى معاه ده"
وبتنهيدة"كرييييم"
xxxxxxxxxxxxxxxxxxxxxxxxxxxxxxxxxxxxxxxx*
كريم وشذى قاعدين مع بعض على ترابيزة لوحدهم
شيماء وزياد قاعدين على ترابيزة تانية
"ليه مقلتليش انك جاى"
"حبيت اعملهالك مفاجئة..اتضايقتى؟"
"بالعكس فرحت جدا"
"تعرفى انى حاسس انى بشوفك بعين تانية"
"ازاى يعنى"
"فرق كبير لما كنت بحبك بينى وبين نفسى ومش عارف احساسك ناحيتى ايه... وانى دلوقتى قاعد اتكلم معاكى وانا عارف انك بتحبينى زى مابحبك"
ابتسمت شذى بكسوف
"انا فرحان اوى يا شذى... مكنتش حاسس ان الحب حلو اوى كده"
بصت له بشك
"ايه مش مصدقانى؟"
"ودعاء كانت ايه؟"
"محستش معاها باللى حسيته معاكى... انتى بقى قوليلى لسه بتفكرى ف خالد"
سكتت شذى تفكر...
"ايه يا شذى... انتى بتفكرى فيه لسه"
"حب لآ... انتهى بالنسبة لى وعلى مراحل مش مرة واحدة...بس انا كنت بفكر ارجع له"
"ترجعى له...ليه"
"علشان كنت عايزة ابعد عنك خالص... انا لما عرفت انك قربت تتجوز كنت هموت"
"من ساعتها وانا بحاول اتكلم معاكى"
"كنت هتقول ايه يا كريم... مكنش فيه كلام يتقال"
"لا كان فيه...عمر كلامنا ما هيخلص"
ابتسمت شذى بفرحة وكسوف
"على فكرة ...قبل ما انزل قلت لبابا انى عايز اتجوزك"
مسكت شذى قلبها
"بالراحة عليا ياكريم... كل الحاجات الحلوة دى مع بعض"
"انسى اى حاجة وحشة...كل اللى جاى هيبقى احلى واحلى... طول ما احنا مع بعض مفيش اى حاجة هتضايقنا"
جه زياد وشيماء
زياد"احم احم... انتوا قاعدين ولا ايه... فيه بيت ممكن تكملوا كلامكم فيه"
كريم وشذى قاموا
شذى سبقت مع شيماء... وكريم وزياد بيحاسبوا
"قوليلى يا شيماء...ايه رايك"
شيماء بتضحك"هنبقى نكمل كلامنا ف التليفون"
شذى"الله الله ما كنا رافضين التليفونات"
شيماء"معرفتش اقوله لآ... حسيت انى عايزة اتكلم معاه تانى كتيييييير...انتوا عملتوا ايه"
"مش مصدقة الفرحة اللى انا فيها"
"انتى تعبتى كتير وتستاهلى ...ربنا يسعدكم يارب"
xxxxxxxxxxxxxxxxxxxxxxxxxxxxxxxxxxxxxxxx
مديحة وهى قاعدة جنب ضحى وهى بتذاكر...بتفكر
"ليه رد الفعل الغريب ده من ابراهيم لما كريم قال عايز يتجوز شذى... ليه طول اليوم مفتحش معاها سيرة الموضوع ده... لا سألها عن رأيها ولا فرح ولا حتى اعترض... ايه السبب"
وهى بتفكر...سمع الباب بيتفتح وكريم وشذى داخلين مع بعض
شافت الفرحة اللى عينيهم وفهمت انهم كانوا مع بعض
فيه حاجات محتاجة تفهمها...حبوا بعض امتى وازاى
مديحة"انتوا كنتوا مع بعض"
قربت منها شذى وحضنتها بفرحة
"كريم جه مع زياد عملهالى مفاجئة"
مديحة بتبص لنظرات الحب بينهم
حست بوجع ف قلبها من القلق من اللى جاى
كريم"هو بابا فين"
مديحة"نايم"
سمعوا صوت كحة ابراهيم
كريم"بابا صحا... انا داخل له"
ابتسمت مديحة غصب عنها
شذى بتبوس مديحة
"انا فرحانة اوى ياماما"
قالتها ودخلت تغير هدومها
كريم دخل لابراهيم الاوضة
"صاحى يابابا"
"كنت مستنيك"
كريم بيقعد على طرف السرير
"مستنينى... خير فيه حاجة"
"اقفل الباب وتعالى اقعد جنبى... عايز اقولك كلمتين"
________________________________________________
يا ريت اعرف #رايكم ..
وانتظرونااااااااااااااااا ا فى الحلقه الجاااايه
لااااااااااااايك وشيييييييييير
يهمنااا رايك فى كومنت