14-05-18, 11:13 AM
| #471 | ||||
|  السلام عليكم ورحمة الله وبركاته ،،ابدعتي عزيزتي نوني وبارك الله في مجهودك وغفر الله لوالدتك ولجميع أمهات المسلمين .، الرواية غاية في الابداع والأروع انك ما تبالغي في وصف الشخصيات بالجمال والمثالية بالعكس وصفك لهم متواضع وكأنهم اشخاص واقعين فأحييكي مرة ثانية عزيزتي وننتظر ابداعك في جميع الاجزاء،، تقبلي مروري في أول تعليق لي في روايتك ولكني متابعة مستمرة لكل روايتك اختك من سلطنة عمان | ||||
|  |
|
15-05-18, 06:19 AM
| #472 | ||||||||
| مراقبة عامة ومشرفة منتدى الروايات المنقولة  
| اللهم اني استغفرك وأتوب إليك اللهم صل وسلم على محمد (صلو عليه) • • {29} • • ويالله اطلعي عنود تنظرش ومشت وهي تتمنى خطة اختها عنود تضبط وتخلي شدن ذي مسخره للكل ... شدن أول ماابتعدت عفاف رفعت الجوال وقالت بغصه: سمعت خلاص ارتحت الحين ياسر قفل عيونه بقهر وقال: بسرعه قولي لحور واطلعوا انتظركم برا قفلت من عنده وطالعت الدرج مالي نفس اطلع حتى انادي حور ولا بعد ابارك لعنود لبست عباتي وقفت متردده اطلع بدون حور بس والله مو قادره ..طالعت عفاف اللي قالت :توو مابدت السهره اجلسي وبعدين عنود تنتظرش شدن صديت عنها بدون مارد عليها وهي طنشتني وطلعت لفوق تركض مدري وش عندها عفاف دخلت الغرفه وهي متوتره قربت من عنود وهي تطالع حور وهمست لها :مقدرت وخربت الخطه راحت على الفاضي عنود بقهر همست لها: وش سويتي أكيد ماقدرتي تمسكي نفسك مسكت بيدها ومشتها معاها وهمست لها : بسرعه تصرفي قبل تطلع شدت على يدها فرصتك تأخذي حقش منها والله لوضاعت معاد بتكرررر عفاف طلعت وهي مقهوره ..من هالشدن وش تسوي معاها عشان تجلس مجامله حتى ماهي قادره دقت على سلمان تأكد عليه ..يشغل ياسر يطنش شدن لو دقت عليه وقالت له بتروح عنود معصبه ان خطتها فشلت : ليه ي حور ابيش تجلسين والحين عفاف تقول شدن لبست عبايتها وبتطلع حور بقهر: قلت لش ليتش ماعزمتيها عنود اللي ابيه شدن إلا انتِ مالي بش حاجه قالت بقهر: وش اسوي قلت كلهم صديقاتي المهم الحين دقي عليها وخليها ترجع حور بعصبيه: رقمها الجديد ماهو عندي عنود :تكفين حور سوي شيء خلي شدن ترجع وسكتت وهي تسمع رنة جوالها أخذته شافت رقم سلمان ...فتحت الخط وعينها من حور قالت بتوتر: هلا سلمان وهو متسند على الجدار والدخانه بيده أول ماسمع صوتها قال: بسرعه خلصيني ياسر رافض يجلس وشكل زوجته بتروح من غير ماننفذ الخطه المتفق عليها عنود بقهر عضت شفتها: عفاف خربت علينا سلمان بقهر: الحين دقت علي وتقولي اشغل ياسر المصيبه ان زوجته تدق ماعرفت اتصرف وعفاف هذي خربت علي الأرض والحين بعد البزر بنت المصريه بس الخطه هالمره راح تتم وانا سلمان قالت بمكر : انا بعرف كيف اخليها تثنبر والخطه بتم على قولك شوي بس واعطيك رنه وصرخت بخوف لاااااا يوم سمعت سلمان يقول ياسر افهم بعدها سمعت صراخ وصوت عالي ... وشكلهم مسكو في بعض طالعت حور ..بخوف بسرعه نادي عفاف ...بس مانتظرت تروح بسرعه طلعت وهي تصرخ باسم عفاف حصلتها قدامها جايه لها قالت بخوف وهي ماتبي حد يسمع :ياسر عرف بخطتنا اللحين سلمان دق علي وبعدها معاد سمعت إلا صراخ وصوت عالي شكلنا انكشفنا عفاف لطمت بوجهااا: قلت لش بنروح فيها آه ذي فيها دم والله فيها دم وعارفه ياسر وعقليته وابوي بعد والله ماغير يذبحنا ولا يذبح سلمان ليتني ماصغرت عقلي معش ومع سلمان كله منه والله هو السببب مدري وشلون دخل ذي الخطه براسش وانا طاوعتش وبسرعه طلعت الغرفه وعنود تركض وراها أخذت عباتها وهي تسمع حور تسأل وش فيه شدن طنشت ماقلت لحور طلعت من بيتهم ..للحوش ... بس انصدمت من اللي اشوفه ياسر طايح ضرب بالرجال ...ابتعدت بخوف يوم شفت رجآل فازعين له ..بس يوم وقف وهو يهدد بصوته كله عرفته على طول هذا .. سلمان أخو عفاف اللي من اسبوع مسلم فوق رأسه .. بس تجمدت مكاني يوم قال ياسر : اقسم بالله روحك بتطلع بيدي وعليها عيلتك يال******** هذي المرجله ي ال******^ بسرعه رجعت دخلت الصاله شفت عفاف بوجهي جايه تركض وهي تلبس العبايه ...بس وقفت يوم شافتني وصرخت : كله منك الله يأخذش استغربت وش مسويه بعد كل شيء يحطونه علي ... حسيت بخوف يوم شفت حور جايه بعد تركض قربت مني وتقول: فيه مصيبه صايره بس مدري وش هي قلت بسرعه وانا متحمسه : ايه ياسر الحين دشدش اخو عفاف وصغرت عيونها وقالت بشك:الله يسود وجهش وش مسويه حور بقهر ضربتها على كتفها: انكتمي وخلينا نفهم وش فيه ولااقولش خلينا نروح لسيارة ياسر نتظره هناك ومسكت يدها تعالي وطلعوا وهم يشوفون عفاف واقفه جنب الممر شدن بفضول :وش فيه بالضبط عفاف صرخت بقهر: انقلعي عن وجهي وقتش الحين شدن كشرت وابتعدت شوي وهي تطالع حور قربت منها وهمست لها: خلينا ندخل البيت والله ياسر بيذبحنا صدقيني شوفي وشلون الرجال بالحوش متجمعين ماراح نقدر نمر حور وهي مرتبكه: تعالي تعالي شدن دخلنا وأنا مستغربه خوف حور وش مسويه الله يسود وجهاا همست لها : اللحين عجبش أخوش يمكن يروح فيها بسبب تهورش وش مسويه لو ادري كان مخليتش تجين معي قلت له خلي نور تجي معي رفض الحين خليه يتحمل الللي سويتيه فيه اخس عليش فشلتي اخوش حور بقهر : اقسم بالله كلمه زياده اذبحش مكانش الله يأخذش خلينا ننفك من ذي المشكله صايره مع ياسر وبعدها تكلمي وبرد عليش وقتها وبعرفش وشلون تثمني منطوقش شدن برد بس سكت يوم رن جوالي وكان ياسر فتحت الخط وقلت بفضول : ايش صار بس قفلت عيوني من صرخته المزلزله :اطلعوور بسرعه بسرعه قفلت وقلت بخوف: حور ياسر ينتظرنا وشكلنا بنروح فيها الله يستر حور وقلبها يدق بسرعه : الله يستر ليتني ماجيت شدن وهي تسوي نقابها : اي والله ليتش ماجيتي وسويتي لنا ذي المصايب حور عضت شفتها بقهر والله لا تطلع حقها كله منها بس توصل بالسلامة وتعرف كيف تربيها طلعت قبلها وهي معصبه أول ماطلعت شافت ياسر واقف قال بعصبيه وخوف بان بصوته: وين شدن حور بتتكلم بس سكتت يوم شفتها جايه يمنا أشرت بخوف عليها بسرعه راح يمها ومسكها بتملك استغربت حركته شدن كنت مصدومه وانا اسمعه يقول :ربي ستر عليش وانقذش من وساختهم وش يقصد ذا مشيت معاه فك الباب وركبت وقفله اخس صايره اميرة اليوم ..صراحه فرصتي اتدلع شوي طالعت جهة بيتهم قلت يمكن عفاف مندسه بزاويه وتشوفنا والرجال داري بها ويسوي كذا عشان يقهرها بس ماشفت رجال متجمعين .. قلت بفضول :ايش فيه ياسر زفر بقهر : اسكتي شدن الله يخليش وحرك السيارة بسرعه جنونيه وهو يتذكر وشلون طلع من المجلس ..بالعافيه نشب له واحد من اصحاب سلمان ..وهو كان كاره عمره من كلام عفاف ..بس جلس شوي مجامله بس معاد قدر يتحمل طلع من المجلس وكان سلمان معطيه ظهره ..ويكلم بالجوال طنش ومشى من غير مايسلم عليه بعد ..مايبي يزعجه بس لفته ..(يوم قال عفاف هذي خربت علي الأرض والحين بعد البزر بنت المصريه بس الخطه راح تتم وانا سلمان ) حس الدنيا لفت فيه بدون حس سحب الجوال من يده وطاح فيه ضرب ..ويحس قلبه مابرد كان بيسود وجههه ..وبعد عمته وش يقول لها بالله ..طالعها بحزن ماتدري وش يصير من وراها حس بكرهه لعفاف ..كأن شيء شلعها من قلبه ... أول ماوقف البيت وده يرجع يفضي الرشاش بصدره وكاد تبرد ناره ..بس تذكر الفضحيه اللي بتصير والناس راح تحكي تعوذ من ابليس ومسك يد شدن وطالع حور وقال: حور انزلي حور نزلت بسرعه وهي خايفه .. شدن طالعت يدها وهو ماسكها سحبت يدها وقالت : خلاص مهمتي انتهت صح وكسترني قدامها بروح لامي مثل ماوعدتني ياسر مارد عليها حرك السياره .... وهو يسمع اعتراضها .... صرخ بعصبيه: شدن خلاص شدن بقهر:هالمره ماراح ارضى تبعدني مثل كل مره ياسر قفل عيونه بصبر وقال : ماودي ارجع البيت ي شدن بذات الليله الله يخليش اهدي وصدقيني مقهور من نفسي اني خليتش تروحين لها ولا تدخلين بيتهم ناس مايخافون الله بس والله هالسالفه ماتمر كذا وانا ولد أبوي شدن حسيت بفرحه غمرت قلبي يوم سمعت كلامه قلت بدون حس: الحين تقول كذا عشان مقهور من الرجال اللي خطبها ياسر تذكر يوم قال سلمان عفاف خربت عليهم يعني ماهي متفقه معاهم بدون حس قال : صدق مخطوبه مين خطبها شدن كشرت الله يأخذك وياخذها قلت بقهر: مدري عنها ودي اعرف وش عجب الرجال فيها عشان يكون حظها كذا ياسر وهو مقهور من نفسه وشلون فكر يسأل بعد اللي سواه بس والله يخاف يظلمها بس مايدري ليه ماهو طايقها ولا طايق شيء من صوبها قال بسرعه: قلعتها هي واخوها اللي بدون نخوه ******* شدن فتحت عيني بصدمه من السبه القويه اللي اعطاهم هي لا لا لا السالفه فيها ( إن) سكت شوي وقالت : ياسر طالعها بدون مايتكلم شدن قالت بسرعه وهي خايفه ماتبي تروح مكان معاه لحالها : الله يخليك ودني بيتكم خلاص مابي اروح بيت أمي بس رجعني بيتكم ياسر هز رأسه بدون مايتكلم ياسر لف للجهة بيتهم أول ماوصلوا نزلوا وتحركت معاه وهي عندها فضول تعرف وش صار دخلت ودخل بعدها شاف امه وحور جالسين بالصاله على طول قالت حور : والله هي اللي خربت عليك ي ياسر قالت كلام خلت عفاف تموت بقهرها وقررت توافق على ولد جيرانهم شدن حسيت بقهر يوم حطت علي الخايسه ذي ليتني خليت ياسر يبعدني بذات الليله عن ذا البيت قلت وانا ابررر: وش دخلني بالله وطالعت ياسر سمعتها بنفسك تقول ماتبيك ام ياسر بعصبيه: انتم راحين تحضرون ولا تسوون مصايب وفتن وطالعت ولدها وهي ناقده عليه وشلون تخلي شدن تروح غصب عنها ترى قالت لي نور البنت ماتبي تروح بس مغصوبه منك شدن يوم سمعت كلام أمه أول مره تقوم معي بسرعة طرت لها وضميتها وحبيتها أكثر من مره وقلت وانا اشر عليه: اي والله غصبني اروح يرضيش ي خاله ام ياسر طالعتها مصدومه وهي بحضنها هزت رأسها بدون ماتكلم شدن فيني ضحكه المره متخرعه مني وجهاا قلب أحمر ابتعدت شوي وقلت : رخصني ولدش قدام عفاف ي هي ذلتني ذل بس هين كله عند أمي نوفه ياسر بضيق : انكتمي شدن الحين وطالع امه تكفين يمه مو ناقص ادري اني غلطان حدي بس لا تزيدينها علي و بقهر سحب شدن من عندها ودخلها الغرفه قدامه وقال بحزن عليها : شدن شدن حست بخوف وش عنده ذا اليوم ولا خلاص بعد ماعافته عفاف صار يتودد لي ابتعدت عنه وقلت بسرعه : الحين بعد ماسويت المطلوب مني وعافتك عفاف وطبعاً انخطبت لولد جيران... سكتت من الصرخه اللي جتها : خلاص عرفت انها عافتني وانها مخطوبه جلس على السرير وقال : الله يبارك لي بش وبحريقه عفاف شدن لا لا لا هذا اللي ماتبيه قلت معترضه : لا لا اتفاقنا اسوي الي تبيه وبعدها ارجع لأمي أنا ماصلح اكون زوجه وأم ووراعية بيت من الحين اقولك واحذرك ياسر بسخريه: ماهو تحبيني خلاص الحين انا اطلب منش نكمل ذا الزواج بحياة مستقره وقف وهو مخنوق شدن بسرعه: لا والله ماحبك لا تصدق ترى والله أكذب عليك ياسر رفع حاجب وطالعها وقال: وانا عاجبني ذا الكذب نزل رأسه بين يدينه وهو يحس بصداع ومقهور من نفسه. وللي وصل له الحين عفاف تسوي ..كذا وتخطط مع أخوها القذر ..اي خدعه كنت مخدوع فيها ولا بعد مظلومه مثل مافهمه من كلام سلمان بس مهما كان مفروض تحذره لو برساله لو فعلاً هي خايفه عليه وعلى سمعته فيه شيء مخليه يكرها وشيء مخليه يترددد ويخاف يظلمها ...بس بعد هي ماقصرت ذلته بردها .. رفع راسه وطالع شدن اللي تطالعه بدون ماتتكلم قال بوجع : حرقت قلبي مصيري احرق قلبها أكثر ماهو محروق ...حتى لو هي ماهي في السالفه كلامها الليله مايشفع لها عندي أبد وطلع برا الغرفه واتجههه لبيت الشعر يفكر اشلون ..يأدب سلمان السالفه ذي ماراح تمر كذا لو روحه تروح .. | ||||||||
|
| |
|
15-05-18, 06:22 AM
| #473 | ||||||||
| مراقبة عامة ومشرفة منتدى الروايات المنقولة
| حست بجوع ذبحها ...طلعت من الغرفه شافته نايم على الكنبه ...متى رجع ليه يومين ماتدري عنه..وهي هنا محبوسه ...مشت باقل من مهلها ماتبيه يصحى ويسمعها كلام يسد نفسها يكفي جسمها تعبان من قلة الأكل .. دخلت المطبخ ..فتحت الثلاجه عضت شفتها محتاره وش تأكل .. سحبت زجاجة كولا ..واحد توكس هذا عشقها الكل ينتقدها يوم تأكل التوكس مع الكولا بس تحبه ... جلست على الكرسي ...وهي تطالع بالمطبخ ..بعدم رضى ...تحسه صغير عكس مطبخ امها ...كل شيء بذا الشقه متواضع ...ولا هو ذوقها ...أبد وش سوت بعمرها عشان يصير كذا حظها ..تذكرت مصعب انسدت نفسها ...وتموت وتعرف ليه سوى فيها كذا ..قالت بقهر : وش الذنب اللي سويته ي ولد عمي عشان ترميني كذا ليتح بررت قبل وكاد القى لك عذر :عرف يلحق نفسه ومايتدبس في وحده ماتخاف ربها وتسوي الحرام مثل شرب المويه وبدون ضمير بعد فزت مفزوعه كيف سمعها ..آه وشلون نست وجوده ..وكلمت حالها بصوت عالي وقفت وقالت بسخريه: عزتي عليك مالحقت حالك مثله وتدبست عناد ابتسم بقهر :اي والله تدبست بس والله قادر ارد حقي كله ومن بين عيونك وحلفت بعد اني ماخلي لك من اسمك نصيب واخليك مذلوله وسحبها من شعرها بعنف ونزل رأسها للارض بقوه طالعي وين مكانك رفعها له وطالعها بحقد وكرهه شفتن وين مكانك ي ال****** الشموخ بخوف من قربه ومن عيونه بعد تخوف وهو معصب كذا قالت بضعف لأول مره تحسه : ارحمني تكفى وأنا مستعده اعترف لك بكل شيء عناد هز رأسه: ارحمك مع الأسف عناد اللي قلبه كان كله رحمه غيرتيه بيدك ي الشموخ وبعدين اي اعتراف وش فيه بعد مخبيته ..من حقارتك ي الحثاله الشموخ حطت يدها على يده عشان يرخي يده عن شعرها شوي وقالت وهي تصيح :والله الي سويته تمثيل والله ليتك تهدا وتفهمني تكفى اعطني فرصه افهمك عناد ضحك بقوه : الحين صار تمثيل بعد ماطلبت رقمه منك صار تمثيل غبيه لو تفتكري مقدر اجيبه بجيبه من غير ماتعطيني ترى قليل المرجله سهل تحصليهم ... دفها عنه وطلع الشموخ جلست على الكرسي ..ونزلت رأسها على الطاوله وصاحت من قلب تستاهل اللي يصير فيها..الرجال طيب معاها ..وكان تقدر تقنعه بطريقه أفضل من كذا ...وقفت وهي معزمه تقوله كل شيء حتى لو ماصدقها بتسوي الي عليها ..ومستعده بعد تعيش معاه خلاص بس يفكها من ذي المعامله ماتحمل حاسه روحها بتروح بيده لو سكتت أكثر من كذا ..عناد انقلب فعلاً يوم قال غيرته فعلاً تغير ...وهي اللي تسبب بذا الشي دورته بعيونها ماحصلته .. جلست على الكنبه وهي تصيح بصوت عالي ... ودها تقول له كل شيء وترتاح ..تعبت معاد فيها ..ماهي قادره تعيش مذلوله بذي الطريقه وخايفه ترجع لابوها ويفضحها مثل ماقال ... @ @ @ @ صدت يوم دخل عليها ..الغرفه قالت بسخريه: ليه اليوم الجوهرة ماعطتك وجهه طلعت بدري اذكر الحين تبدأ سهرتكم مصعب بقهر طالعها :اصايل ترى أبد ماهو فايق لك وسكت وهو مقهور له يومين يحاول يخليها شوي ترتاح له بس أبد الغبيه ذي خربت عليه وخلتها تعرف نواياه طالعها بحقد :تصدقين حتى لو ماتزوجت عبير والله لا اتزوج غيرها حطي هالشيء برأسك اصايل عضت شفتها بقهر :يعني ماهو قصدك انتقام ومن هالكلام السالفه تبي تتزوج وبس مصعب طالعها بوقاحه وقال: ايه ومن حقي على الأقل على ذوقي هالمرة اصايل بدون حس سحبت الريموت ورمته بقهر وهي تصرخ : الله يأخذ حقي منك مصعب بدون حس وقف وهو معصب قرب منها وقال : للمره الثانيه تمدي يدك ي اصايل اصايل بسرعه ابتعدت بخوف وأشرت على بطنها تذكره لا يضرها مصعب قفل عيونه وهو يستغفر بصوت عالي جلس على السرير وقال بتحذير : صدقيني ماضمن لك وش رد فعلي لو عدتي هالحركه اصايل بقهر: ي شيخ خلني اخذ حقي لو شوي منك يكفي التكفخ الي أخذته منك أنت للموت وصلتني والحين جاي تقول تبي تتزوج بعد وش بقي تسويه فيني مصعب ابتسم على جنب :وش اسوي مع الاسف مواصفاتك أبد ماهي على ذوقي وأنا مستحيل اجير على نفسي أكثر من كذا ورفع حاجب حقي ولا ماهو حقي ي بنت أبوك اصايل آه ي قلبي وشلون بيتحمل اللي يسمعه مصعب فعلاً القرب من صعب والبعد بعد اصعب ..اعطته ظهرها وراحت لجهة الثانيه من السرير وتمددت وسحبت المفرش وقبل تغطي نفسها قالت :لا تجير على نفسك الله يوفقك مع الي تبي تجيبها على ذوقك ماهو بليه ابتليت فيها انقهرت يوم طالعها وابتسم مدت يدها وقالت : اعطني جوالك بدق على أبوي وكاد ذي المره يحن قلبه علي ويرحم اللي تبقى من كرامتي مصعب بكل برود أخذ جواله وناولها هوو :تفضلي اصايل عضت شفتها تمنع دموعها مدت يدها وأخذته ...منه دقت رقمه بيد ترجف ..عارفه رده عليها ..بس الجوال انسحب من يدها ..طالعته بصدمه ماتوقعت ...أبد قال بسرعه : ماراح يجي عارف ومايهون علي تتفشلي قدامي حست بكلمته طعنتها أكثر وأكثر.. اه قد ايش صعب عليها ..انه حاس قد ايش ابوها يبي الفكه منها .. قالت بغصه وهي تمد يدها تبي تأخذه : يمكن هالمره يرفع قدري ويستوعب لمين معطي بنته مصعب بحده قرب منها وقال : معطي بنته رجال ولد رجال بس بنته ماهي كفوو له اصايل ابتعدت شوي وقالت:اعطني طيب مصعب وقف وقال بقهر:لااااا وقومي قدامي يالله لازم اقلعك من البيت عشان الزفته هذيك تتطمن اصايل رفعت رأسها وطالعته وابتسمت بسخريه: مصعب مصدق انه مصدقتك هييي اصحى هذي قادره تلعب عليكم جيمع ولا تعجز صدقني وانتقامك غبي والله غبي مصعب ابتسم بخبث : غبي بنظرك عشان بتزوج عليك اصايل بقهر وقفت وقالت : صدقني مافي حد غيرك بيخسررررر وقول اصايل ماقالت اخذت عبايتها ولبستها وقالت يالله جاهزة ودني لا أي مصيبه وأنت وهي ولعوو في بعض ونشوف مين الكسبان مصعب طالع الغرفة وقال : خذي أي أثر لك هنا خلي الغرفه ترجع لي وحدي عشان تتطمن انك ماراح ترجعين اصايل أخذت نفس طويل وأنا ادعي الله يصبرني ..بسرعه فكيت عباتي وجمعت الكم لبس معي وعطوري ومكياجي واغراض ثانيه بسيطه بعد ..طالعته وانا مخنوقه من الدخان اللي يبلع فيه ..قلت بصبر: فضيت الغرفه وتأكد بنفسك بعد مصعب طالع الغرفه بنظرة تأكيد وأشر لها تتحرك قدامه بدون مايتكلم اصايل نزلت نفسي باأحمل شنطتي بس على طول سحبها من يدي وقال :ناسيه انك حامل فتحت عيني بصدمه ..يمه على الأب الحنون اللي خايف على ولده طالعته يوم تحرك قدامي واعطاني ظهره طالعت الابجوره ودي اسحبها واصفقه وكاد قلبي يبرد ..بس هونت يوم طالعني بنظره حاده كأنه حاس باللي ودي فيه قال بحده : يالله اخلصي علي.. | ||||||||
|
| |
|
15-05-18, 06:24 AM
| #474 | ||||||||
| مراقبة عامة ومشرفة منتدى الروايات المنقولة
| طالعتهم بسخريه يوم شافته نازل وبيده شنطه واصايل تمشي وراه ابتسمت بخبث: اف ي مصعب بسرعه لفت رأسك وخلتك بعد حمال لها آه يمكر الحريم اصايل رفعت حاجب وطالعت مصعب يوم قال : لا فديتك لاهي ولا مية مثلهايقدرن يلفن رأسي إلا قولي بقلعها من حياتي كلها وبتفضى للعروس الجديده الجوهره وقفت وقربت منهم وقالت بمكر وهي تحط يدها على كتف اصايل : تعوذ من ابليس مهمها كان ضعيفه ولو تبي تتزوج عليها اصايل دفت يدها بقهر ... الجوهره طالعتها وابتسمت وكملت بخبث وهي تطالعها من فوق لتحت: من حقك والله صراحه بدون زعل ي اصايل لا جمال ولا كشخه ومصعب كله وسامه وجمال الله يحرسه ودي اعرف لمين طالع بقول لصقور بس حرام الكذب وضحكت بصوت عالي بس صقور بنظري ملك جمال الله يحفظه لي وحدي بدون مشاركه وقربت منها وهمست الله يعينك على الشريكه الي بتجي على رأسك وطالعت مصعب وقالت ولا ناوي بعد تطلقها وتكون العروس الجديده لحالها على ذمتك حرام مصعب قلبي وجعني عليها مصعب عض شفته بقهر وقال : ماعليه عارف طيبة قلبك بس مافي نصيب بيني وبين اصايل اصايل حسيت بقهر وغبنه بنفس الوقت بذات يوم مصعب تكلم غبي والله غبي جالس يضحك على حاله انه مصدقته أبد ماهو طبيعي هذا الانسان تحركت وطلعت من البيت وانا اسمعه يقولها خلي بس العروس تجهز وذي بقلعة ودرين مصعب طالع اصايل يوم طلعت عض شفته بقهر ..وده يسطرها على كل كلمه قالتها لها بس الصبر زين أبد ماهو وقت تهوره مسك نفسه بالقوه . ابتسم بتمثيل وقال : بحفظ الله وطلع وراها شافها قدامه واقفه وهي معصبه ابتسم بستفزاز :امشي ي الشينه اصايل طالعته وقلبها محروق :والله اني ازين منك ومنها العجيزز مصعب بسخريه:ايه كثري منها امشي بس ساكته ولسانك ذا قدامها مقصوص وقدامي وش طوله بقهر صك على سنونه ليه ماتعرفي تتكلمي قدامها وتأخذي حقك غبيه اصايل بعصبيه: ايه عشان تفشلني قدامها لو قلت كلمه وتزيد قهري أكثر وتحط اللوم علي بعد اني انا سبب فشل خطتك لا والله اتحمل كلامها ولا كلامك السم مصعب مسكها من يدها وقال بهمس :والله لا أخذ حقك كله اصبري علي بس ويالله خلينا نروح اصايل عضيت شفتي وأنا ماسكه دموعي تعبت والله من شخصيته المتقلبه معاد مافيني عقل .... أول ماركبت السياره قلت بسرعه : مابيك توديني للبيت المهجور خايفه اجلس به لوحدي مصعب حرك السياره وقال :لا لا أخذت شقه مفروشه تجلسين فيها فتره بس لما اشوف الوضع وش يصير عليه اصايل تطمنت شوي ..يوم قال تسذا مابي ارجع لهذاك البيت صح تعودت عليه هذيك الفتره ..بس كل شيء فيه معدوم ويبي له تصليح ...وبعض مرات احس فيه بخوف بذات مصعب أكثر وقته برا البيت ..والحين مع خططه الفاشله طبعاً شكله بيجحدني بالشهور زفرت بضيق مصعب طالعها وقال : متضايقه من كلامها قلت لك بأخذ حقك طالعته وقلت : مايهمني كلامها والحمدلله واثقه من جمالي ومن كشختي مصعي ابتسم : افف ثقتك ذي هالمره زدات عن حدها اي جمال يرحم أمك من يوم عرفتك وانتِ معك دراعتين ماغير تبدلين فيهن اصايل حسيت بصدمه من كلامه ... فعلاً أنا مهمله حالي بس السبب هوو ماعمره وداني السوق ويوم اطلبه يطنش ماتوقعت انه بيأخذ باله ان ملابسي كلها عاديه وهو طول وقته يفكر وشلون ينتقم من الجوهره ومصايبها قلت بقهر : كذاب والله ماهو دراعتين اللي عندي البسه ومن كذبك ماعندي دراعه ويالله بعد فك جيبك ودني اتقضى وشوف الكشخه على اصولها مصعب ابتسم وهويقلد صوتها : كذاب ماعندي دراعه يقال تبرري الحين اصايل صديت بزعل ..والله كلامه وجعني حيل احسه طلع الي بخاطره .. الله يسامحك يبه كان يرفض يودينا للسوق ويخلي أمي تأخذ لنا على قدها والي يتوفر قريب منها ..إلا انا وشمسه ياما حلمنا بااااغراض مثل البنات ... بس كنا نتصبر باللي تأخذه لنا سميره لو رجلها وداها السوق وفضي لها ... أول ماوقف السياره جنب عماره على الطريق العام قال : بنزل اشوف لو به شقه فاضيه وبعد وشلون وضعها وارجع لك هزيت رأسي بدون مااتكلم ... سندت رأسي على الدريشه وأنا افكر بكلامه مصعب جرحني حيل ...زفرت بضيق الله يسامحك يبه..زوجتني على واحد مايرحم وبعد قلبي مارحمني اللي مدري كيف دق لواحد مثله ... تذكرت كلام الجوهره على انه موجع بس والله مأثر فيني مثل كلام مصعب ..ي شينها لو جت من رجلك حسيت بنغزه وبحركه في بطني ..من امس وانا احس فيها من فتره لفتره ..تذكرت كلام امي ..عن يوم يبدا يتحرك الطفل ومن متى ..ابتسمت بحزن وحطيت يدي على بطني وهمست اركد فديتك ماتدري وشلون مصيرك وكاد مثل أمك مع أب مجنون وجد يبي يتخلص منا باي مصيبه اهم شيء ينفك ..... طالعته يوم طلع وقرب فتح الباب وركب وقال : انزلي ان شاءالله تعجبك ولو ماعجبتك ادور غيرها طالعته بسخريه: وش تفرق يالله بس خلنا ننزل تعبت من الجلسه ... بعدها نزلنا واتجهنا للشقه أول مادخلت طالعت الصاله والمطبخ المفتوح عليها جلست على أول كنبه صادفتني وقلت : خلاص تفضل كمل خططك وانتقامك الله يستر عليك مصعب جلس بالارض على ركبه ومسك يدها الثنتين وقال : صدقيني مقدر اجيب حقي وحق اللي في بطنك غير بذي الطريقه أبوي غسلت مخه وسلمها كل شيء وبصرخه كل شيء فاهمه اصايل حسيت بخوف لا يفصل عليها ويرجع لجنونه قالت بتوتروهي تحاول تسحب يدها منه : طيب طيب خلاص روح سوي الي يريحك وتطمن ماعلي خلاف مصعب وقف :بروح السوبر بأخذ اغراض عشان ماينقصك شيء وأنا مو موجود مثل ماهو أنتِ عارفه لازم اطمنها انك ماعاد لك وجود بحياتي اصايل رفعت يدي مابيه يكمل ..تعبت من هالاسطوانه ومن الانتقام ومنه بعد مصعب بقهر :مستحيل تفهميني أبد اعطاها ظهره وطلع ... أول ماطلع وقفت ..وراحت جهة الغرفه فتحتها طالعت السرير والدولاب المكان نظيف ومرتب احسن من بيت امه المجهور ...وبعد مكان العماره امان على الشارع ..بدل الحاره جلست على السرير ..افكر بحياتي وشلون بتكون بذا الوضع | ||||||||
|
| |
|
15-05-18, 06:27 AM
| #475 | ||||||||
| مراقبة عامة ومشرفة منتدى الروايات المنقولة
| صحت من النوم ..تلفت يمين ويسار ماحصلت له أثر بالغرفه معقول مارجع من البارح ..لما الحين تفكر بكلامه ..معقول نسي عفاف ماهي مصدقه ...وتذكر حالته كيف كانت ..يالله ايش صار ..بالضبط فيها فضول تعرف ...ابعدت المفرش وجلست..راحت غسلت وصلت وطلعت وهي تسمع صوته برا بالصاله وشكل الكل متجمع..أول ماطلعت من الغرفه جت عينها بعينه .. شمقت فيه ..وجلست جنب نور وهمست لها: ان شاءالله عرفتي من حور وش صار نور همست لها وهي تطالع اخوها بخوف :فارقي عني ماهو ناقصه بلاوي تجيني من وراش يكفي امس تكفخت لما عضيت الأرض ... ضربتها بقهر وقلت: قلعتش وطالعت أم ياسر اللي مدت فنجان قهوه لياسر بس رفضه قالت وهي تحط الفنجان :ماهو بحاله ذي يمه الحين وش مكدر خاطرك بذي الطريقه قولي ياسر بضيق: يمه تكفين قلتي اجلس معي شوي وجلست وانا والله ضايق وحالتي حاله ام ياسر طالعت شدن وقالت : لا تغصب نفسك على شيء ماتبيه ونوفه ماراح تفيدك صدقني بتزعل شوي وبترضى طلقها وانا بنفسي بروح لعفاف وشدن أكيد ماراح ترضى تعيش مع واحد مايبيها شدن حسيت بقهر بس في نفس الوقت انصدمت من صرخة ياسر: عفاف لا لا مابيها وطالع الكل مابيها لاحد يجيب سيرتها لا هي ولا أهلها فاهمين لاحد يجيب سيرتها وقرب من شدن وقال : تعالي شافها تطالعه بخوف نزل نفسه ومسكها وهمس لها يوم حس برجفتها بين يدينه : لا تخافين ماراح اسوي لش شيء وبحرقهم جميع واخليهم يفكرون الف مره قبل يمسوو شيء لياسر شدن كنت خايفه وبعد مصدومه وش صار وتغير كذا معي ياسر من أمس وهو ماهو طبيعي معي قلت بتوتر: ياسر بروح لأمي تكفى ياسر جلس وسحبها تجلس وقال بغصه : تكفين ماهو الحين والله ماقدر اواجها لو صارلش شيء وصرخ بقهر آه على خستهم صدق كنت مخدوع فيهم والله شدن طالعته وأنا احاول افهم شيء من كلامه:بسم الله ايش صار فيني وأنا مدري وبعد مخدوع في مين ياسر بخوف وقلك سألها: متأكده مافي أحد صورش سكت وهو متوتر يحس سؤاله غبي وش يعرفها بخبثهم شدن بصدمه : ايشش صورني مين ياسر بسرعه قال وهو خايف تورطه عند عمته وتصير سالفه والكل يسمع وينفضح: لا فهمتي غلط اقصد خليش حذره دايم شدن مدري وش يقوله ذا يخربط على رأسي سألت بفضول وهي تبي تموت لو ماعرفت السالفه : ليه ضربت سلمان وأنت قبلها حاب رأسه طالعها بعصبيه:اسمه ماتجيبيه على لسانش وقف واعطاها ظهره ورجع طالعها وقال وهو مصغر عيونه : وش عرفش اني ضربته شدن بلعت ريقها بخوف .. ياسر صرخ بعصبيه: وش عرفش شدن بسرعه قالت : يوم قلت لي اطلعي طلعت بس يوم شفت الهوشه رجعت بسرعه سكتتت وهي تشوفه متجههه للدولاب وطلع الرشاش صرخت بخوف : والله شفتكم يوم طلعت والله مدري بشي أنت قلت لي اطلعي ياسر بسرعه اعطاها ظهره وهو مطنشها وطلع وهو يتحلف ويتوعد اقسم برب البيت مافي شيء بيبرد قلبي غير يوم اشوف دمه قدامي النذل ام ياسر يوم شافت ياسر بيده الرشاش صرخت بخوف: تعوذ من ابليس وش بلاك مطلعه ياسر صرخ يوم وقفت بوجههه: والله مافي حد يقدر يردني عنه اليوم وبسرعه طلع طالعت شدن الي طلعت من الغرفه وتناظرهم من عند الباب قالت بعصبيه: وش مسويه وخليتي ولدي يعصب ويأخذ رشاشه شدن بخوف وهي ترجف : والله مالي دخل والله ام ياسر بسرعه طلعت وهي تصرخ اتجهت للباب الخلفي ودخلت وهي تصرخ : نوفه الحقي ياسر بيضيع عمره نوفه طلعت من الصاله مفزوعه طالعتهم بخوف طالعت شدن اللي جت تركض وتصيح ضمتها بسرعه وقالت وهي تطالع ام ياسر : وش فيه ام ياسر جلست على ركبه : ولدي ضاع والله ضاع ومدري وش فيه اسالي بنتش طلع من غرفتها مأخذ رشاشه آه ومبارك مسافر مين بيرده لي والله ضاع ولدي ضاع شدن صرخت بقهر: انا مالي دخل هو الي عصب ومدري وش بينه وبين أهل عفاف طالعت امها اللي تطالعها بشك حتى يمه طق البارح اخوها وهزت رأسها يمه انا مالي دخل والله مالي دخل لا تصدقينها أول ماشافت حور جايه تركض أشرت عليها وقالت :حور عارفه ايش اللي حصل ام ياسر طالعت بنتها وهي معصبه :عارفه وساكته لما اخوش روحه بتروح @ @ @ عند ياسر وصل الحي حقهم دق جوال يبيه يطلع مايرد عليه ارسل له( يالرخمه اطلع ) نزل من سيارته والرشاش بيده دق الباب بقوه ..طلع جابر ابو عفاف طالع الرشاش بيده قال بعصبيه : ماهو كل مره ي ياسر ترا الدنيا ماهي فوضه صابت معك مره هالمره بترجع بين عيونك ياسر عض شفته بقهر وطالع وراه : وينه ولدك الخسيس وصرخ بصوته كله وينهههه جابره بعصبيه: وش تبي منه تقلع انت وشرك ياسر بعصبيه أكثر وهو يوجههه الرشاش على وجههه: بصفي حسابي معه وابعد ولا جت براسك : خيرر خيرر متهجم على الناس بهالمصيبه بيدك ياسر طالع ابو مسعود جارهم : لا تدخل بينا وخلك بعيد ابو مسعود : تعوذ من ابليس ولا تضيع حالك جابر طالع ابو مسعود: دق على الشرطه خلوهم يعرفونه قدره ولدي ماتقدر تصله ياسر صرخ بعصبيه: خليه الجبان يطلع ولا دخلت وفضيت الرشاش بالعايله كلهم جابر دفه من صدره : ماتقدر والله ان تدخل على محارمي ماتطلع غير على نقاله ياسر بعصبيه رفع الرشاش وضغط على الزناااااااد واطلق رصاصه ...... ابو مسعود صرخ : يارب لطفك ........ • • كتتتتتت خفيف لعيونكم وعشان يصبركم المده اللي بغيبها عنكم ههههه (باذن الله نلتقي بعد رمضان وشهر مبارك على الجميع ويعلم الله انكم راح توحشوني كثير واستودعتكم الله الذي لا تضيع ودائعه ) سبحان الله وبحمده سبحان الله العظيم " الله يرحمك يامن أوجعني فراقك " | ||||||||
|
| |
|
15-05-18, 06:28 AM
| #476 | ||||||||
| مراقبة عامة ومشرفة منتدى الروايات المنقولة
| اسفه حبايبي البارت نزل بدون مراجعه والله من ضيق وقتي لو فيه أخطاء إملائية طنشوا ههههههه ولا تحرموني ردودكم يسعدكم يارب | ||||||||
|
| |
 |
| أدوات الموضوع | |
| انواع عرض الموضوع | |
|
|
20Likes
.png)
العرض العادي
