04-02-19, 01:45 AM
| #904 | ||||||||
| مراقبة عامة ومشرفة منتدى الروايات المنقولة  
|  اللهم إني أستغفرك وأتوب إليك سبحان الله والله أكبر والحمدلله اللهم صل وسلم على نبينا محمد ( صلو عليه ) @ @ @ (46) آسفه حبابي لو فيه أخطأ إملائيه لو فيه كذا حرف ناقص ولا حرف زايد والله نزلته بدون مراجعه توني كملت من كتابته وخفت أجلس اسوي مراجعه واتأخر عليكم زود واسهركم معاي @ @ @ طالعها بصدمه وقال : وأنا ولد أبوي وش تقولين يا بنت اصايل وعينها من مصعب الي يطالعها ببرود طالعت أبوها وهي حالفه لا تأخذ حقها كله وقالت :ايه يبه والله انه مرخصني وهذا هو قدامك مايقدر ينكر وطالعته بتحدي وبنفس الوقت خايفه من رد فعله تحس بنظرة البرود تحولت لمكر وخبث مصعب عض شفته بقهر ماتوقع أبد تقول كذا يكذب لو يقول مانصدم حاول يتصنع البرود وهو يطالع أبوها الي ينتظر منه الجواب وقال بخبث وهو يهز رأسه بحسره : ي عم بنتك ذلتني ليه اعطيتني هي عطيه وطالعها وهو يشوف الصدمه بعيونها وقال بخبث أكثر وهو يحاول يقلبها عليها كم مره قلت لك أبوك مارخصك وخلينا نعيش مثل اي زوجين وطالع ابوها وقال تصدق ي عم كم مره عرضت عليها مبلغ وقدره تعتبره مهر وارتاح من هاللأسطونه بس بنتك رافضه كل مره تعيد وتزيد بسالفة اعطتيني هي وكل مره تسمعني اني ماهو قد المهر وانك شفقت على حالي واعطيتني بنتك ماتدري وش الي بيني وبينك من معزه وكح أكثر من مره وهو يقول أنا انسان مريض بالربوو الله يبعده عنك مافيني على المشاكل بس خلاص صبري نفذ كل مره أقول عيب ومنقود لو رديتها لك وش بتظن فيني ماهو قد المسؤولية بس ارجع واقول أصبر الرجال وثق فيك واعطاك بنته هديه بعد ومنقود عليك لو تردها له بس هنا خلاص ياعم أقولك اسف مدام بنتك لهالدرجه كارهتني وقف وأشر عليها وهو يشوف الصدمه بعيونها وفاتحه فمها بطريقه غبيه طالع أبوها وقال والحين هذي بنتك مدام اختارت تبعد وماهي راضيه عن العيشه معي بسب شيء انا مالي ذنب فيه أنت بنفسك بهالمجلس قدام الرجاجيل اعطيتني هي تكون زوجه لي الحين بقولك يشهد علي الله قبلت هديتك وفرحان فيها بس مع الآسف مالي نصيب فيها وطالعها ورفع حاجب أبو محمد وقف وقال بحده : وقف يالسنافي وطالع بنته بعتب هذي سواتس بالرجال ماتحشمين اصايل من الصدمه الي هي فيها تحس عمرها انخرست بس طالعت أبوها يوم صرخ عليها وقف بطريق مصعب يمنعه يطلع وهو يطالعها بزعل صرخت بقهر : آه ي الكذوب وهي تحرك يدها والله يكذب يبه والله هو لي ذلني ومنزل قدري وكل ما .... ابومحمد قاطعها بصرخه : بعد وقدامي تقولي عنه كذوب تسذا تفشليني ي اصايل طالع مصعب وقال الحين تتجهز وتطلع معك وغصب عنها وطلع من المجلس وهو يقول يالله خذي اغراضتس والله يستر عليتس مع رجلتس وصرخ بعصبيه يالله مصعب ابتسم على جنب مر جنبها وهمس لها وقال : قلت لك ميه مره انا مصعب ومافي وحده مثلك ولا عشره يقدرون يهزموني فاهمه شافها مقهوره حدها ابتسم وقال وهو يقلد لهجة ابوها انتظرتس بالسياره ي حلوه وغمز لها اصايل حست الدنيا تدور فيها دخلت وهي ناويه عليه فجأة تبدلت الادور وشلون جلست على الكنبه وهي ماهي قادره تستوعب الموقف الي انحطت فيه طالعت المجلس حولها كان فاضي ..كان تبي بس تأخذ حقها منه ..وتعرفه قدره ..بس الي صار العكس ...طالعت أخوها محمد الي دخل وقرب منها وقال :حرام فشلتي مصعب وهو مايستاهل والله تعبان يقول يحبك وأنتِ ماهو معطيته وجهه حرام عليتس تراه ماقصر معي نقذني اصايل لا لا هنا صدق صدمه صرخت بقهر : مين الي كان بس يحش ويذم فيه الحين حلي بعينك وتذكرت دوره البطولي الي سواه معاك محمد بتوتر بلع ريقه : كنت ظالمه بس والله طلع صدق حبيب وطيب مره وطلع 1000 ريال من جيبه شوفي وش اعطاني أول ماشافني وأعتذر لانه ماجاب لي هديه ماهو مثل رجل شموس البخيل ماغير نافخ ريشه علي وعلى العيال اصايل قالت بقهر : آه يا الوسخ بعت أختك بسبة فلوس صدق مابك خير وانا الي أستبشرت فيك محمد عقد حواجبه وقال :وش فيتس عليه بالله والله انه يقطع القلب من شوي تعب قبل ينزل من السياره ويالله قدر يحصل نفسه بعد مااخذ من ذا الي كان تستعمله خالتي أم شمسه وش اسمه افف نسيت يالله ذكريني فيه اصايل وقفت ودفيته عنه طريقي وانا اقول : ابعد عن وجهي الحين محمد اعترض طريقها وقال : طيب وش اسم الي يأخذه اصايل حسيت ودي اولع فيه من القهر جالس على راسي بتفاهاته مشيت لصاله وانا ادور أبوي بعيوني ..بس مع الأسف ماحصلته قدامي قربت مني أمي وهي مفزوعه :وش مسويه ي بنت أبوتس يتحلف فيتس والله يقول انتس غبنتيه وفشلتيه مع الرجال قولي وش الي صار وبعد محمد يقول رفعتي صوتس على الرجال قدام أبوتس اصايل عضيت شفتي وأنا امنع دموعي وقلت بحسره على حالي : الحين أنا الي غبنته والحق طلع علي طالعت شمسه وهي متسنده على باب المطبخ وبيدها ليمونه قالت ببرود :هذا أبوي وهذا عادته وهزت رأسها بحسره مايتغير ابدواشرت للدرج اختصريها على عمرتس والبسي عباتس والحقيه وربي يسهل عليتس وحقنا ضاع وأنا اختس خلاص ولو صدق مره تطلعي حقتس بنفستس وماعليتس بحد اصايل صادقه ي الشموس حقنا ضاع مدام ابونا تسذا طالعت أمي الي قالت :الله يأخذه قريب ويفكنا منه مثل حرق قلوبكم وقلبي قبلكم حسيت قلبي وجعني عليه يوم دعت عليه عشانا قلت بسرعه : لا يمه تكفين لا تدعين وبطلع حقي بنفسي مثل ماقالت شمسه ام اصايل وهي تصيح بقهر :كل مره وحده فيكم تطلع من هالبيت وقلبها محروق مافي حد طلع وهو راضي وش ذا الأب الله يجعلنا نبكيه اليوم اصايل قربت منها وضميتها وأنا اقول : يمه حرام أم اصايل بحرقه : من حرقة قلبي اصايل قويت نفسي شوي وقلت لها ولا يهمتس يمه بناتس يعرفن يأخذن حقهن ومسكت وجها وأنا امسح دموعها يجعلني بالسل مدام هالدموع نزلت بسبتي ام اصايل بفزع : بسم عليتس يمه لا تدعي تسذا على نفستس ماغير تحرقين قلبي زود اصايل ابتسمت بحزن وهمست لها : سلامة قلبتس وطلعت الدرج ورحت غرفتي وأخذت عباتي وجيت بطلع شفت شمسه بوجهي والدموع بعيونها قلت بغصه: تكفين لا تزيدينها علي شمسه قربت منها وضمتها وهمست لها : لو ضامتس ادبليه بسبده وهو بنفسه بيرجعك لنا بس لو راجع نفسه وتأدب وخاف الله فيتس وعزتس عزيه وحطيه على رأستس اصايل ابتسمت وانا اصيح على كلامها همست :أجل بدبل سبده لان مابه أمل به واعطيتها ظهري وطلعت من الغرفه مابي اضعف أكثر شفت أبوي قدامي وهو معصب ويهاوش أمي الي معترضه على طلوعي قربت من وسلمت فوق رأسه وقلت بغصه :ليتك نصفتي لو مره عشان يعرف أن وراي سند وطلعت بسرعه بدون ماعطيه مجال يرد علي حسيت قلبي وجعني على صياح أمي طلعت شفته قدامي بالسياره ومحمد معشلق بالباب يتكلم معه بس يوم شافني قال : ماوصيك على صاحبي طيب وطالع مصعب لو سوت لك شيء دق بس علي اجيك خطار يم بيتك واربيها عديمة التربيه فشلتنا فيك حسيت بقهر منه باعني سبة فلوس الخايس اخخ وصلت اني عديمة تربيه بقهر ضربته على ظهره وقلت بعصبيه : تقلع بس ذاكر يا الفاشل محمد وهو يتالم طالع مصعب بفشله : اخخ ياااالمتوحشه والله لو زوجك بس ماحلف علي كان مردغتس هنا وخليتس تعضين الأرض مصعب رفع حاحب وقال وهو يبتسم :متى حلفت أنا وأشر عليها خذ راحتك وطالعها شاف نظرة القهر بعيونها وراء النقاب توسعت ابتسامته محمد قرب منه وقال بهمس : تكفى احلف ترى والله ماهو قدها لا يغرك قصرها تنشب فيني نشبه الله وكيلك مافي حد يقدر يسحبني من يدها مصعب ضحك بصوت عالي وقال : ابشر تكفى يا محمد هالمره امسحها بوجهي هالقزمه مارضى عليها تمردغها قدامي محمد رفع نفسه وقال :عشانك بس والله وطالع اصايل وقال وهو يضخم صوته :يالله مع رجلتس يالي ماتستحين ويالله مع السلامه ياصاحبي اصايل عضيت شفتي بقهر من سخافتهم سحبت محمد من تشيرته ودفيته وأنا اقول تقلع ادخل ركبت وقفلت الباب بقوه طالعت مصعب بستفسار يوم قال : وش ذنبه بالله رفعت حاجب يوم فهمت عليه قلت بعصبيه : ليتني اسوي فيك مثل محمد مصعب بيرود : ماقصد أخوك اقصد باب السياره اصايل بقهر : آه صدق هنا ليت اسوي براسك كذا وكاد قلبي يبرد وصرخت بعصبيه ليه سويت كذا ماتخاف ربك مصعب حرك السياره وقال بحقد :يقال تنتقمي مني الحين يوم تستقوي في أبوك غبيه صدق اصايل صرخت منهاره : وش تبي مني لا تحاول تفهمني انك ميت علي لا نيتك تقهرني وتعذبني معك مصعب ابتسم على جنب وقال بسخريه : طيب ليه تظنين ظن سوء فيني يمكن فعلاً اكون ميت عليك اصايل طالعته وهي تدور الصدق بكلامه بس لا كل شيء يثبت لها انا يلعب معاها لعبه خبيثه وماتدري وش وراه من اصله جيته كلها ماهي مطمنه لها ..ماردت عليه صدت ..خلاص تحس بتعب وعارفه الكلام ماراح يفيدها ماغير يتعب اعصابها قال بقهر :أشوفك سكتي اصايل عضيت شفتي ومارديت عليه بس صعقت من كلامه يوم قال :أبوك ذا ي طيبة قلبه بسرعه يصدق اخخخ توقعت يطردني ولا يسوي فيها من نوعية الأبهات الي يفزعون مع بناتهم ويسوون النون ومايعلمون صغر عيونه وطالعها ولا يكون صدق يبي الفكه منكم ومايهمه مين الرجآجيل الي يعطيهن بناته وبسخريه لاذعه تسع بنات من حقه جالسين على كبده ودبل كبودنا معه الله يسامحه هالشايب إلا صدق طلق أم محمد والله محمد مايستاهل يتشرد بينهم اصايل حسيت بكمية قهر ليت أبوي يسمعه حاولت امسك نفسي واصير اخبث منه قلت :صادق في ذي أبوي الله يسامحه يعطي بناته للرجاجيل ماهوو كفوو الي متسلط والي مجنون .....بس ماقدرت أكمل من صرخته الي فجرت رأسي ومن يده الي تمدت ناحيتني بس بسرعه قال وهو ينزل يده قبل تنمد لي :المجنون الي ماهو عاجبك تراه متحملك على الأخر بس والله لا ينتقم منك ويخليك تبكين بدل الدموع دم وهذا الي انتي فيه وتشوفيه ظلم بقولك من الحين ولا شيء مقابل الي بيحصل لك والله لا اخليك فعلاً تفقدي عقلك وتعرفين مين المجنون وقتها اصايل نزلت رأسي وانا حاطه يدي على فمي أكتم صياحي عارفه انه مصيبه وجت على رأسي هالمصعب ...كنت اسمع هواشه وصراخه علي حسيت ان بطني بدت تقلب علي ..أبد ماهو وقته الحين دورت فاين بعيوني ماحصلت ...بس هو مثل الي فهم علي بسرعه مد يده لوراء وسحبه وناولني وقال : تطمني لسى على وعدي و بطلقك وراح تنسين ذا كله حصلك معي اصايل أخذت منه وانا مصدومه من كلامه يالله توه يبي ينتقم والحين يقول بيطلق حطيت الفاين على شفتي معقول ضميره عذبه وبيردني لأهلي يارب يسويها فعلاً لأني خلاص كرهت عمري معاه توقعت يلف ويرجع بس مع الآسف باقي مكمل الطريق للرياض قلت بغصه :ليتك الحين فعلاً تطلقني وتردني لأهلي ويارب انسى فعلاً الي حصلي منك لأنه كثير والله علي ومعاد فيني مصعب طالعها بدون مايتكلم ورجع طالع الطريق وقال :ماهو الحين وتأكدي انه راح يجي وقته اصايل بهمس : متى طيب مصعب بحده : وقت ماانا اقرر افهمي الكلام وخلاص اسكتي مابي اسمع صوتك يكفي الي صار منك للحين حاقد عليك وطالعها ماراح اسامحك اصايل على سويتيه قدام أبوك أفتكرتك أعقل من كذا بس طلعتي مع الأسف كل يوم ثقتي تخيب فيك اصايل صديت وانا ادعي الله يصبر قلبي على المصيبه هذي احس فعلاً انه مجنون وأبد ماهو طبيعي ...على الأخر هالمره اثبت لي بعد صمت وقف قدام محطه نزل واخذ اغراض معه ..رجع ركب وطلع عصير ناوليني هووو صديت ماأخذته منه قال ببرود مستفز :اوك على هواك وطلع كودرد وفتحه وشربه احسه يغيضني لاني دايم كنت امنعه يشربه واهاوشه لو شربه قدامي وازعل منه ...بس طنشت ولا قلت شيء خلاص مصعب اصايل الي تعرفها وكانت تخاف عليك من كل شيء خلاص تغيرت ..كسرتها على الآخر ... مصعب طول ماهو يشرب يقول الحين تقول شيء الحين تحاول تمنعه مثل العاده ..بس لا أبد ماسألت فيه ..جلس يتذكر وش الي يستفزها كان يسويه ايه الدخان بسرعه فتح الدرج وطلع البكت ورمى وحده بين شفته وشغلها وأخذ نفس وبدأ يكح ..فتح الدريشه وهو يحاول يأخذ نفس ...يبيها تتتكلم تعترض تسحبها من يده مثل العاده ..تهدده انها تسوي وتسوي بس ابد طناش على الأخر حتى مالتفت صوبه ..لا لا كذا كثير ..حس بصدره وجعه ونفسه بيرجع يضيق عليه طفاها وهو يتنهد بعصبيه صرخ بقهر : والنهايه طيب سكت يوم طالعته رفع كتوفه بعباطه وابتسم اصايل فزيت من صرخته المفأجاة طالعته بس ابتسم حسيت بقهر ودي ارمي بعلبة العصير هذي قدامي ..اهدي اصايل لا يتسفزك ..أخذت نفس وأنا ادعي بطولة البال رجعت صديت وأنا عارفه كل حركاته ذي بس يوم سمعته يكح بزياده طالعته ..بخوف وقلق شافت وجههه بدأ يزرق وعيونه حمراء قالت بخوف : مصعب وقف السياره ماراح تقدر تسوق وأنت كذا هز رأسه بعناد صرخت بخوف : مصعب وقف لا نروح فيها هالأمور مافيها مزح مصعب فعلاً يحس بضيق تنفس وماهو قادر يتحكم بالسيارة وقف على جنب وهو يدعي حالة امس ماترجع له ...أشر للمويه وهو يكح بستمرار اصايل بسرعه فتحت القاروره وناولته وهي مرتبكه وخايفه حدها قالت بقهر :دايم تذبح نفسك وتضرها ليه ليه كذا تسوي بحالك وفيني سكتت تحسه أبد ماهو معاها ولا هو وقت كلامها الحين بتزيده كذا أفضل شيء تساعده او تسكت سند رأسه على المقعده ونفسه طالع نازله بسرعه رهيبه ويالله بالعافيه يقدر يأخذه حست بخوف طالعت حولها المكان فاضي مابه سيارات تقدر تساعدهم حتى قالت بتوتر وهي تطلع جوالها من الشنطه : بدق على ابوي مدام باقي قربين من الديره مصعب مد يده وأخذ الجوال من يدها وقال بتعب : لااااااا لا تخافين مافيني شيء اصايل وهي تصيح بخوف : مصعب حالتك أبد ماتطمن جيب الجوال وخلني ادق مصعب وهو يتعتدل بجلسته قال ببحه بصوته من التعب : الحين احسن خلاص تطمني واعتدل بجلسته ومد يده بيشغل السياره طالعها يوم مسكت يده تمنعه : لا لا مصعب انتظر شوي حتى صدرك يهدا عليك وبقهر كله من هالدخان شربته ليه شربته الحين مصعب طالعها وقال وهو يتبسم بتعب : لو منعتيني كان ماصار فيني كذا بس شوفي بسبة عنادك شوفي مجنونك وش صار فيه خليك أعقل مني هالمره وامنعيني اصايل هزت رأسها بعض مرات تحسه طفل ويسوي الشيء الغلط عشان يلفت الي حوله قالت بغيض منه :مجنوني يبي له تأديب والله عشان يعرف وشلون يثمن حركاته ابتسم وشغل السياره وقال :هذي تربيتك ادفعي ثمنها أجل اصايل أكيد بفقد عقلي شوفووو كيف انقلب لشيء وديع يالله على كمية اللطافه الي هو فيها الحين أول ماحرك السياره قلت : مصعب لو تعبان عادي نتظر شوي لا تهور مصعب قال بمكابره : مافيني شيء الحمدلله الحين احسن بكثير اصايل سكت طول الطريق وانا عيني منه ..والله ماهو طبيعي طول الوقت وهو يبخ من بخاخ الربوو ويرجع يسوق قلت بقلق : مصعب كثرته ماهي زينه مفروض جرعات بس افهم بيتعبك أكثر ماينفعك كذا مصعب بتعب : وش اسوي احس بضيق بصدري ومابي الحاله تزيد علي اطر أخذه بكثره اصايل بخوف وقلق :أول مستشفى على طريقنا ننزل فيه شافته بيعترض قالت تكفى مصعب بعيد عن اللي بينا هذي صحتك مفروض تنتبهه لها عشان نفسك بس مصعب طالعها وقال بهمس : عشان نفسي بس اصايل مارديت عليه وصديت مابيه يحس بخوفي ...... | ||||||||
|  |
|
04-02-19, 01:47 AM
| #905 | ||||||||
| مراقبة عامة ومشرفة منتدى الروايات المنقولة
| الشموخ قالت وهي تضحك :الحين بتذلني ي خال عشان وصلتني اف منك بس ابتسم لها :الحين رجلك بيفرح بالمفأجاة ولا بيقول وش ردك بدري وأنتِ قايله له بعد اسبوع عضيت شفتي بحزن : اممممم مدري تتوقع يفرح ولا يقول ردها معك طالعها وقال بحده: والله لو يقول كذا ماغير اسحبك معي ولو يموت معاد يوصلك بس لو دفع مهر من جديد وكاد أقدر اوصل لبنت فهود الشموخ ضحكت بصوت عالي على خالها بدر : الحين تبي تأخذ مهري وتتزوج به وش دخلني بك أنت وبنت فهود عشان تأخذ رضوتي بدر طالعها ورجع طالع الطريق وهو يتنهد بقهر : وش اسوي بنت فهود مهرها غالي وخالك مثل ماهو عارفه موظف بشركه حافي منتف والي يحصله زين يمشي مصروفه فيه الشموخ قالت بمكر :شوف غيرها يا خال ماغير كسروا ظهرك بمطاليبهم وليت بنتهم قمر بدر طالعها بعصبيه :والله لا انزلك بهالطريق المقطعه وقتها تعرفي تثمني كلامك الشموخ ضحكت وهي ترفع يدها : لا لا لا اعصابك خلاص توبه بدر ابتسم :طيب قولي قمر وأحسن مني بعد الشموخ فتحت عينها بصدمه : وشهوو تبيني أقولك ازين تبطي والله بدر طالعها بقهر وهو يوقف السياره على جنب : الشموخ بسرعه انزلي الشموخ بضحكه : لا لا خال ماتسويها بدر نزل وفتح لها الباب : بسرعه انزلي الشموخ بصدمه وهي تشوفه واقف قدام الباب ويأشر لها تنزل : خال تعوذ من إبليس بدر مد يده وسحبها وقال بقهر : انزلي الشموخ وهي تطالع المكان قدامها : خال حرام عليك شوف وشلون الدنيا حولك بدر :عشان ثاني مره تتأدبين تحكين عن بنت فهود الشموخ :خلاص والله معاد بجيب سيرتها أبد بدر رفع حاجب وقال : لا جيبي سيرتها بالزينه الشموخ عضت شفتها بقهر : ابشر بدر رفع حاجب وسند على الباب وقال: يالله امدحيها أجل الشموخ صغرت عيونها بقهر خالها انهبل قالت بسخريه: مره قمر الله يخليها لك بدر ابتسم وقال:الحين مهاوي قمر جيبي شيء ثاني عشان اصدقك واقبل اعتذارك الشموخ ماقدرت تمسك نفسها ضحكت من قلب وقالت :مدام عارف ان خطيبتك شينه ليه مغربلني معك من الأول بدر صغر عيونه وقال:لا شكلك حالفه تنزلي اليوم الشموخ مسكت ضحكتها وقالت: لا لا اسفه والله قمر وازين مني بعد بدر ركب وقال بثقه :ثاني مره فكري قبل تغلطين عن مهاوي ... الشموخ هزت رأسها وقالت بقهر : ابشر طال عمرك وسرحت بعناد فعلاً وش بتكون رد فعله يوم يشوفها قدامه ..مايدري بجيتها ...ولا حبت تقوله فرحت يوم خالها تبرع يوصلها ..والله لو ماهي الجامعه كان مارجعت هالفتره ارتاحت نفسيتها شوي عند جدتها أول ماوصلوو الرياض ... طالعت خالها وقالت : مشتاقه لأهلي حيل واحس بغربه وهم ماهو بالرياض طالعها وقال :رجعة ابوك لجدة مالها داعي والله مخلي أهله كلهم هنا وأمي تقول عشان مشكله بينه وبين ولد اخوه هذا الولد ودي اصفقه والله يكفي الي سواه مع أختي الله يرحمها والحين لعب بحسبة أمك وأهلك كلهم ومدام الكل ساكت عن تصرفاته كذا بيزيد معقول مافي أحد يقدر عليه الشموخ صدت تطالع الطريق تكرهههه سيرة مصعب تحس كل مصيبه هي فيها بسبته .... سكتت ماتبي تتكلم زود خايفه يجرها بالكلام وتقول الي بقلبها كله ... أول ماوصلوو وقف قدام العماره ..طالعها وقال :الحمدلله على السلامة طالعته وابتسمت : الله يسلمك جت عينها على عناد وهو نازل من سيارته طالعت خالها يوم قال :ريحيني من شيل الشنطه هذا رجلك وصل طالعها وقال بشك لا يكون مرسله له انك جايه والحبيب مسوي يستقبلك وجالسه تستغفليني وتقولين مايدري الشموخ طالعته وقالت بصدق : والله مايدري والموقف ذا صدفه بدر صغر عيونه وقال بسخريه : سبحان الله صدفه بسوي نفسي مصدقك وفتح الدريشه وصرخ باسمه التفت عناد حست قلبها فز يوم طالعهم وهو يرفع النظاره الشمسيه ابتسمت لا شعورياً يوم شافته مقبل يمهم وهو مبتسم عناد ماهو مصدق الي يشوفه جيتها كانت مفأجاة له أبد ماكانت على باله ..يذكر آخر اتصال بينهم قالت بتجلس باقي هالاسبوع بعد قرب منهم بدون حس فتح الباب الأمامي وهو يقول :حياالله شموخي نورت الرياض الشموخ بلعت ريقها وطالعت خالها بخجل يوم قال : افاا الحين رجال طول بعرض ماحشمتني وجالس ترحب بمرتك على طول عناد قال وهي تحس الفرحه واضحه بصوته :اسف بنت أختك خذت عقلي والله تفضل تفضل تشيلك عيوني قبل المكان انصدمت من رده ماتوقعته أبد أبد ..بس فكرت يقول كذا عشان وجود خالي بس صدمني خالي يوم قال : لو خذت عقلك مثل ماتقول كان ماجبت غيرها وطالعني وقال بنت أختي ماتستاهل تجيب فوقها مره الشموخ تستاهل الي يدللها ويعزها ويزيد الشموخ الي فيها وطالعها بس مدام هي راضيه عاد هذي كسرة الظهر مانقدر نتكلم عناد طالعها وقال بضيق وهو يبتعد عن الباب : تفضل حياك بدر هز راسه : لا خلاص وصلت الأمانه وبرجع وطالع الشموخ تبين شي ياروح خالك الشموخ هزت رأسها بلاااا : سلامتك يا بعد حيي ونزلت وفتحت الباب الخلفي وأخذت الشنطه بس عناد اخذها عنها وهو يقول :بدر انزل وريح شوي وبعدها الله يستر عليك بدر قال بجمود : وراي اشغال ماهو فاضي وهالله هالله في الشموخ تراها غاليه علينا ولا تجرب زعلنا عليها الشموخ حسيت عناد تضايق من اسلوب خالي معاه ..صح خالي معاه كان شوي اسلوبه جاف بس مدري ليه انبسطت حسيت اني وراي عزوه وعشان يفهم عناد ان وراي رجاجيل ويقدرون يدافعون عني ...طالعته يوم همس لي :خالك ذا حاقد علي ليه كذا مشيت وأنا اقول :أساله وطالعت خالي الي حرك سيارته دعيت له ومشيت قبل عناد وقفت قدام باب الشقه انتظر عناد ..قرب وفتح الباب وطالعني حسيت بعيونه كلام وبعد حسيته متوتر بذات يوم قال :وش رأيك تروحي للسيارة وانا بحط الشنطه وجاي وراك حسيته بيمنعني من دخول الشقه عرفت مقصده على طول قلت : عارفه بوجودها هنا وماتفرق معي وخلك قد قراراتك أنت من أول ناوي تسكنها بنفس الشقه الحين لا تمثل علي وتسوي فيها وابعد خلني ادخل ارتاح تعبانه حدي عناد عض ..شفته بضيق وشلون يقولها أخذت حتى غرفتها وده كان يروح مكان غير الشقه ويفهمها بالوضع على رواق بعيد عن جوو الشقه وبذات وجود عبيرر بيضيق عليه زود ... قال بمحاوله أخيره :خلينا نتكلم بعيد عن الشقه الشموخ هزت رأسها بلااا وأخذت المفتاح من يده وفتحت الباب ..ودخلت قبله شافت الصاله فاضيه قدامها استبشرت خير يارب ماهي موجوده ....بالشقه كلها بس انصدمت يوم شافتها طالعه من غرفتها وهي ترتب شعرها وتقول بصوت نعسان : حبيبي عناد وصلت وسكتتتت تطالع الشموخ ..عضت شفتها بقهر دخلت الغرفه وضربت الباب من غير ماتكلم الشموخ تحس عمرها مصدومه جالسه بعد بغرفتها طالعت عناد الي عصب وقال : هذي الي ناويه على عمرها قالت بغصه :حتى غرفتي أعطيتها ماعمري شفت خبث وحقد مثل كذا عناد قال بضيق وهو يأشر على الغرفه الثانيه : هذي غرفتك ماصار شيء كل مافي في الموضوع غرفة النوم الي حصلتها هديه من عند أمها طلعت كبيره الشموخ كرهته وكرهت تبريره المستفز دخلت الغرفه وقفلت الباب عليها وجلست على السرير وهي ودها تصرخ من القهر الي هي فيه نزلت دمعه مسحتها بقهر وهي تطالع أغراضها كانت مرتبه ..بس وشلون تأخذ غرفتها ويرضى كذا ..لهالدرجه رخيصه عنده عناد دخل الغرفه وهو معصب صرخ بقهر : عبير هالاسلوب مايمشي معي على الأقل احترميني قدامها طالعته بعصبيه : ليه تكذب علي من توو داقه عليك اقولك وينك قلت لي طالع من الدوام اتاريك مسافر لمرتك كان قلت طيب ليه خايف مني كذا عناد بقهر قرب منها ومسكها من كتفها وقال بعصبيه :خايف من مين عبير وهي مصدومه حدها ماتتوقعت يسوي كذا قالت بخوف وهي تتألم : عناد جالس توجعني عناد بعصبيه صرخ : لو ماتبيني اوجعك ثمني حركاتك معي فاهمه وهالاسلوب حاولي تغيرينه ودفها عنه وطلع من الغرفه معصب اتجهه لغرفة الشموخ بس وقف بتردد مايدري وش يقول لها هالمره يحس فعلاً من حقها تزعل .. اتجهه لمكتبه ودخل وقفل الباب وهو معصب حده ... وهو يسمع تهديديها وصراخها عليه (والله لا اعلم ماما ) صرخ بقهر حريقه تحرقك أنتِ وأمك ضرب الباب بقوه وهو متحسر وش الي سواه بنفسه دايم قراراته غلط وفيها تهور تضره وتضر الي حوله عبير للحين ماهي مصدقه الي صار ..رفعت جوالها ودقت على أمها وهي تصيح : ماما شوي ويمد يده علي وأنا ماسويت له شيء ماما ليتك بالرياض خليتني وسافرتي كانت تسمع بنتها منهاره قالت بعصبيه : الكلب بيمد يده عليك وين حنا فيه وطالعت صقر الي طلع على صوتها قالت بقهر : خلاص انا الحين بتصرف وبيثمن حركته ال******* أنتِ الحين اهدي وأنا بشوف أمه الحين وكلها ويومين وراجعه تطمني وبأخذك وقتها اشوف يقدر يسوي شيء قفلت من عند بنتها وطالعت صقر بعصبيه : المتخلف ذا بيمد يده على بنتي وهي توها عروس أبو مصعب بصدمه : معقول عناد يسويها ماظنتي وكاد بنتك كبرت السالفة تعرفينها دلوعه شوي سوسو بقهر طالعته : ايه بدينا بالمدافعه على ولد الجوهرة حبيبة القلب .. أبو مصعب بضيق : سوسو ليه ماهو ناسيه وجود الجوهرة بحياتنا سوسو بحقد وكرهه دقت رقمها وهي تقول : الحين بربيها هي ولدها المتخلف أول ماسمعت صوتها صرخت بعصبيه :وشلون يتجرأ يمد يده ولا استغل عدم وجودي ومسوي فيها بدل مايحمد ربه ان بنتي وافقت عليه الجوهرة أبد ماهو وقتهم الحين هي في مشكله ثانيه قالت بعصبيه : بدون غلط لو سمحتي سوسو بعصبيه صرخت : مين الي غلط الحين الجوهرة قفلت عيونها بصبر وهي حدها معصبه قالت وهي تبي تنهي السالفه الي فيه أكبر من مشاكل سوسو وبنتها الهايفه :خلاص هدي الحين وحق بنتك بتأخذه سوسو بحده: الحين تروحين لهم وأنا بكلمك من هناك وابيك تطمنيني على بنتي ولا كلمت ولد أختي زيد يروح يأخذها ويربي ولدك قفلت عيونها بقهر آه من هالزيد مافي أحد بيجيب نهايتها غيره ...تخيلت بس لو يعلق مع عناد وينجر بالكلام يوم يعصب ويفضحها ..أفضل شيء تروح وتتفاهم بنفسهم معاهم قبل مايجيبون خبرها ..تحس بندم ليتها مازوجت ولدها لبنتها هي ناقصه هالمشاكل يكفي مشاكلها مع مصعب الزفت .... قالت وهي ودها تتفل بوجها : حبيبي سوسو اشفيك كذا معصبه لا يكون بس السفريه هذي ماجت على مزاجك وضحكت بتمثيل احسن تستاهلي ماخذتيني معك سوسو طالعت صقر بقهر وقالت : شوفي ولدك الحين وطمنيني على بنتي وقفلت بوجهاا وهي معصبه .... | ||||||||
|
| |
|
04-02-19, 01:57 AM
| #906 | ||||||||
| مراقبة عامة ومشرفة منتدى الروايات المنقولة
| ( الجنوب ) طالعت ياسر الي جاء وهو لابس ملابس الدوام تحس عمرها ثقيله عليه صح مايقصر معاها وقف جنبها للأخر بس بعد شايل هم أبوه ومهما حاول يوضح قدامها انه مبسوط بس مايقدر يخبي وهي فيها خوف بذات بعد سالفة زواج أمها كان عندها أمل ترجع لها بس الحين خايفه حدها لو زوجها مايقبل وجودها معاها تعبت من كثر التفكير وخايفه أكثر من ياسر لو يجي وقت ويقولها معاد فيني خلاص ...اقدر اساعدش وقتها فعلاً بتضيع رد السلام وجلس قدامها قالت بغصه : بيجي يوم تطفش مني ياسر أخذ نفس وقال بضيق : شدون وش قايل لش شدن قاطعته : ياسر عارفة ومقدره وضعك ومن حقك تخاف من زعل أبوك منك بس انا مدري وش مصيري خايفه وتعبت من التفكير ياسر عض شفته وقال :ماعليه مدام للحين مادري بوجودش معي وسكت وش يقول لها ان الليله غاصبه يروح يخطب له وقف وقال بتعب : شدون تعبان الحين بروح اريح شوي وبعدها بجلس معك ونتكلم وخربط شعرها بيده وقال لا تشيلي هم ربك كريم شدن هزت رأسها بدون صوت ..بس انصدمت توقعت يروح بيتهم ينام بس لا اتجهه لغرفتها وقف وطالعها وقال وهو عاقد حواجبه : كيف يدش اليوم عساها احسن والوجع خف مع المسكن شدن هزت رأسها وقالت : الحمدلله احسن شوي ابتسم لها ودخل الغرفة ..شافت جواله الي على الطاولة مرمي ...وقفت بتأخذه عشان تعطيه ..بس انصدمت من اشعارات الواتس الي على الشاشه وكانت من أخته حور ( ياسر وينك فيه تقولك أمي تعال بسرعه اللليله لا تتأخر عن موعد الخطبه ) (أبوي كلم الرجال وعده اليوم تروحون له تخطبون لا تفشله هي بوجهك ياياسر تقولك ) ( وتقولك بعد لا تتأخر تمام عشان مايعصب عليك وتصير مشاكل بينكم ) ( ياسر رد بسرعه أمي جالسه على رأسي تكفى وأنا أختك طمنها ) شدن كنت أقرأ المحادثه وانا مصدومه ياسر بيخطب الليله ماتوقعت أبد تحركت لجهة الغرفة عشان اعطيه الجوال بس انصدمت من طلوعه وهو يقول : نسيت جوالي ناولته وماقدرت اتكلم للحين تحت تأثير الصدمه ...وش مصيرها معاه لو فعلاً خطب امها تزوجت ..وهو أكيد راح ابوه ..يغصبه عشان يتزوج عارف خالها مبارك وتسلطه ...أفضل شيء تروح لأمها أكيد ماراح تطردها ..والحين أكيد خالها مبارك مدام تزوجت ماعليه كلمه عليها وراح تخليها تجلس معاها أفضل لها من هالخوف وبعده مدرستها الي ماتدري وش ياسر مقرر لها عشان خواته بنفس المدرسه تحس رأسها خلاص تعب من القلق والتفكير شافته رجع طلع من الغرفه وهو ينشف شعره رمى نفسه على الكنبه جنبها وهو يقول:ميت من التعب بس ماقدرت انام بسولف معش شوي وبروح البيت عضت شفتها وهي ودها تقول له رايح عشان تخطب صح .قالت بتردد : ياسر طالعها وقال : هلا شدن بلعت ريقها وقالت : دراستي وشلون مثل مانت عارف هالاسبوع تبدأ اعتدل بجلسته ورمى المنشفه وقال بحيره :لازم انقلش من المدرسه اللي فيها حور ونور شدن مثل ماتوقعت قاطعته بغصه : عشان ماينكشف وجودي معك ياسر عقد حواجبه : ماهمني هالشي وانتِ أكثر وحده عارفه بس مابي اسبب لش مشاكل وفي الآخير راح تتعبي أنتِ شدن نزلت رأسها وقالت : مقدره الوضع بس وشلون تنقلني ياسر : ماعليه هذي محلوله .. شدن رفعت رأسها وطالعته وقالت :طيب ممكن اطلب منك طلب ياسر ابتسم من غير مايرد شدن فركت يدها بتوتر :بروح لأمي بس بسلم عليها ياسر انصدم من طلبها قال بخوف : لا مستحيل بذات هالفتره شدن عضت شفتها وهي تمسح دموعها الي نزلت : وحشتني ومافيني اتحمل أكثر غيابها ياسر حط يده على كتفها وقال بهمس : شدون اصبري شوي وأنا بنفسي بجيبها هنا وبتشوفيها بس انتِ تروحي صعبه اخاف عليش والله شدن بقهر قالت : لهالدرجة أبوك مايخاف الله فيني وحشتني امي ليه مايحس الظالم ياسر بضيق : شدن هدي شوي وتأكدي كل شيء اسويه لمصلحتش هالفتره ومهما كان هذا أبوي ليتش هالمره تثمني كل كلمة تقوليها شدن بجنون وقفت وهي تصرخ : أثمن كلامي وماتبيني أغلط فيه وهو ظلمني وحرمني أغلى شيء عندي إلا بغلط ... ياسر قاطعها بحده : شدن شدن وهي منهاره : بروح لها وخليه يسوي الي يبي تعبت حيل بدونها والله مايقدر يمنعني منها أكثر من كذا ياسر مستغرب حالتها وش الي قلبها فجأة كذا قال وهو يحاول يذكرها : شدن تذكري وضعش كان كيف والحين كيف صدقيني اي تصرف في تهور منش بيجي على رأسش تذكري موقف أبوي من ناحيتش شدن بعصبيه : ليه ادفع ثمن خوفك من أبوك مايقدر يمنعني عن أمي ولو قدر بحاول بكل الي أقدر عليه وأنت خلي خوفك منه ينفعك ياسر انصدم ماتوقع تقول له كذا بذات وهي بهالضعف والحاجه له قال بحده: شدن وش تقولين تذكري انه أبوي والي اسويه ماهو خوف قد ماهو أحترام واجب علي أنفذ الي يطلبه مني شدن بصرخه : ماتذكر كنت تسمع كلامه يوم يهاوشك عن عفاف بالعكس تسوي الي براسك ياسر بعصبيه وهو يعدل نظارته :ي بنت لا تعصبيني والله ماهو في صالحش شدن قاطعته بعصبيه وهي تصيح منهاره : وشلون ماهو بصالحي وأنا ابي اشوف أمي فاهم هذي أمي ابيها افهم عاد تكفى ياسر بعصبيه صرخ : ماهي أمش افهمي هالشيء بس أنا ابوي واجب علي اسمع كلامه ولا اعصيه فاهمه وهدي الحين وارجعي لعقلش وخلينا حلوين مابي ازعل منش شدن جلست تصيح بقهر مافي أحد فاهمها فاقده امها ..حيل وبعد نقلها من المدرسه الي متعوده عليها وبعد بتنحرم من وجود نور معاها مأثر عليها والي ذابحها أكثر سالفة خطبته هذي متأكده لو مارجعت لأمها بتضيع ويمكن ترجع لعمها قالت وهي منهاره : ماراح اكمل دراستي بمدرسة ثانية يافي نفس المدرسة ياماراح أكمل ياسر انصدم : مجنونه صدق وشلون ماتكملين دراستش وش دخل سالفة المدرسة الحين شدن بعناد : ماراح اكمل اوك وأمي بروح لها فاهم وأبوك ماعلي فيه ماراح يمنعني عنها بسبة شيء أنا مظلومه فيه وأنت الي ظلمتني فيه ودخلت الغرفة وقفلت الباب بقوه ياسر للحين ماهو مصدق الي يسمعه منها هذي وش قلبها كذا هوو جالس يسوي المستحيل ..عشان يحميها وفي الأخير يكون كذا تصرفاتها ... وهذا جزاه أبد أبد ماتوقعها كذا بتقلب عليه ... فتح عينه بصدمه وهو يشوفها طالعه من الغرفه وترمي الأغراض الي جابها لها بيدها اليسار وهي تصرخ : خذها مابيها ومابيك بعد ويالله روح لأبوك واحبسني هنا بعيده عن أمي الله ينتقم منك ومنه يارب مثل ماحرمتوني منها وجلست بالأرض منهاره تصيح بحرقه كل ماتذكر رسالة حور تحس خلاص الامان الي حسته من فتره بيروح كله وبتفقده والحين لازم تسوي المستحيل عشان ترجع لأمها قبل ماترجع للعذاب الي شافته هالفترة في بيت عمها صرخ بعصبيه وهو خايف على يدها : ي مجنونه يدش شدن زادت بصياحها ... قرب منها وجلس على ركبه حاول يمسك يدها بس دفت يده وهي تصرخ قال بحده : شدن ليه ذا كله الحين ليه قلت لش انتظري شوي عشان تشوفين أمش وبعدين انتبهي شوي يدش مكسوره وخطر كذا تحركينها شدن صرخت بقهر وهي فعلاً تحس بالم فيها قوي حيل : الحين تقول أمي ومن شوي تقول ماهي امش كل مره تذكرني وتجرحني ماتدري أني انذبح يوم حد يذكرني أنها ماهي أمي ياسر وقف وقال وهو معصب : يوم تهدين لي كلام ثاني معش ....واعطاه ظهره وطلع ..طالع الجوال يوم رن بيده شاف رقم أبوه اكيد بيرجع يذكره بالخطبه ..فتح الخط وقال بصبر : هلا يبه قال بحده : وينك فيه تنهد بضيق وقال : قريب من البيت أبو ياسر بجمود : يالله لا تتأخر عشان يمديك تجهز ونروح للجماعه ياسر بضيق : يبه تكفى الليله اعتذرهم أبد ماهو فاضي أبو ياسر بعصبيه : وش اعتذرهم الجماعه ينتظرونا وصرخ بعصبيه يالله انتظرك لا تبطي وقفل بوجهه ياسر حس بقهر مايدري وش يسوي ضرب الدركسون بقوه وقهر أبو جالس يضغط عليه بزياده ..وبعد حالة شدن الي قلبت فجأة كذا معصبته زود ..مايدري وش يسوي | ||||||||
|
| |
|
04-02-19, 02:05 AM
| #907 | ||||||||
| مراقبة عامة ومشرفة منتدى الروايات المنقولة
| أول مادخلوا البيت ...شافوو الجوهره قدامهم بالصاله وهي تصرخ على الخدم معصبه ..قال مصعب بحده :خير صوتك واصل لنهاية الشارع اقصريه قبل اقصره لك طالعته بقهر بذات يوم شافت اصايل جنبه أبد ماهي ناقصه يكفي المصيبه الي وصلتها توها من الزفت زيد وبعد مصايب سوسو وبنتها الي ماتنتهي كشرت بوجهاا وقالت : الله لا جاب الغلا ابعد عني الحين أبد ماهو فاضيه لك ولا تسترجل علي لو أبوك مسافر تراي انا بمية رجال اصايل طالعت مصعب الي عض شفته بقهر وتلفت يمين ويسار عرفت انه ناوي عليها ..طنشتهم وطلعت ليتهم يحرقوو في بعض وتفتك ..خلاص روحي طقت من مشاكلهم ...بس الي استغربته طلوعه وراي وهو يقول بسخريه قهرتني :افاا وين الي تفزع دوم معي اشوفك هالمر سحبتي علي طنشته ودخلت غرفتي جيت بسكر الباب بوجهه بس صده بيده وقال بهمس خبيث :لا شكلي هالمرة بصورك لأبوك فديوو وشلون تعامليني عشان يصدقني اصايل رفعت حاجب وقلت بغيض :تطمن مصدقك والدليل وجودي معك الحين مصعب ابتسم بستفزاز: مايضر اخاف يجي يوم وتقدري عليه وبسخريه وانحرم منك بس لما يكون عندي دليل قوي مثل كذا لا اضمن وجودك جنبي اصايل فتحت الباب كله وأنا ودي اصفقه بوجههه واعطيته ظهري وانا مطنشه وجوده ..لو جلست أخذ واعطي معاه ماراح أخلص ..طالعته يوم تمدد على كنبتي وقفل عيونه ..يالله تعبان وهذي تصرفاته فكيت عباتي وعيني منه ودي اعرف بس وين انام ...مدام هذا مستحل غرفتي ...سحبت خداديه كانت وراه فتح عينه وطالعني قلت بقهر :ابعد شوي بأخذ مفرشي ابتعد شوي سحبت المفرش ورحت للزوايه ...رميت الخداديه بالأرض وانا اسب فيه بصوت واطي ..جلست بتعب سندت ظهري للجدار وأنا أفكر ...قفلت عيوني وأنا اتهند بتعب وش النهايه معاه ..خلاص مليت وطفشت معاد فيني حتى الصبر مل مني ...حسيت ظهري وجعني من جلسة الأرض وهذا جبله مايحس ..نايم ولا يدري فيني وقفت ورحت لغرفته ..حصلت الباب مقفل ..عضيت شفتي بقهر ...رجعت للغرفه قربت منه ونزلت نفسي شوي وأخذت المفتاح من جيبه طالعني وعيونه حمراء .قلت بقهر : اعتدل كذا بأخذ المفتاح ظهري وجعني ..وأنت حضرتك ماتحس ..اعطاني ظهره وقال : لا لا انا رايح غرفتي اجلس هنا بغرفتك اعتدلت بوقفتي انتظره يقوم بس وين رجع قفل عيونه وطنشني قلت بقهر : مصعب فتح عينه وقال بصوت نعسان : امممم اسكتي شوي بس اصايل صرخت بقهر : وش اسكت اقولك ظهري يوجعني حسيت بقهر يوم اعطاني ظهري وطنشني قلت بقهر : بروح أخذ شور بس ارجع ماحصلك فاهم وطلعت من الغرفه وأنا معصبه ..حسيت بدوخه ..غيرت رأي بدل مااخذ شور أول شيء أكل شيء نزلت ..شفت ميري قدامي أول ماشافتني سلمت علي وقالت بهمس :ماما أنت لا تخلي مصعب طيب لحاله طيب ماما جوهره بتسوي شيء خايفه انا على مصعب انا يسمع تكلم بجوال اصايل عقدت حواجبي وانا قلقانه من كلامها بس بعدها قلت بمكابره : لا تحطي في بالك من يومهم مصعب والجوهرة يهددون في بعض وماشفنا شيء وخفت قبلك مليون مره وانا الي شوي واموت من قهري منهم وهم كل واحد اصح من الثاني واتجهت للمطبخ حضرت لي أكل وجلست أكلت شوي بس كلام ميري رجع يرن بعقلي عضيت شفتي بقلق وانا أتذكر سوات الجوهرة فيني عشان تنتقم من مصعب ..أكيد هالمره بتسوي شيء أكبر ...رجعت طالعت الصحن وجيت بكمل أكلي ماقدرت انسدت نفسي الله يسامحك ياميري أنا ناقصه قلق هزيت رأسي وقفت و طلعت من المطبخ شفت الجوهرة طالعه من غرفتها ..وهي لابسه عبايتها وتمشي بسرعه وهي حدها معصبه ..وتحشر شيء بالشنطه بس فيه شيء وقع منها ...بعد ماطلعت قربت شوي ونزلت نفسي ..أخذت الظرف الي طاح منها ..فكرت أفتحه ولا أخليه ..ومأخذه رفعت نفسي ومشيت شوي ورجعت طالعته ..وكاد شيء يخليها تبعد شرها عني وعن مصعب رجعت بسرعه أخذته وأنا التلفت خايفه لو وحده من الخدم تشوفني وتقولها ..بسرعه طلعت للغرفه ..فتحت الباب شفته باقي موجود بغرفتي حضرته ولا الأخ نايم ولا هو حاس فيني ...طالعت الظرف بيدي فرصتي مدام نايم ..فتحته عقدت حواجبي يوم شفت الي داخله سيدي ..تذكرت سالفة السيدي هذي الي انسجن فيها مصعب معقول هذا هوو عضيت شفتي ...وأنا اتخيل وش فيه ..وشلون اعرف اممممم ماعندي إلا اروح غرفته ..وأخذ جهازه واعرف وش داخل هالسيدي الي كان بيتذابحون عليه ..بس ان شاءالله يطلع هوو ..ماهو غيره قربت من مصعب وأنا اتسحب بشويش نزلت نفسي شوي ومديت يدي لجيب ثوبه وطلعت المفتاح بشويش عضيت شفتي وقفلت عيوني بخوف يوم تحرك ...يوم هدت حركته تحركت بشويش وأنا اتحسب طلعت من الغرفة وبسرعة فتحت غرفته كشرت يوم شفتها حوسه هزيت رأسي يالله خليته كم يوم قلب الدنيا كذا ..اوووه اصايل وقته الحين دورت بعيوني للجهاز وبعد جهد من الحوسه الي قدامي حصلته مرمي بالدرج ...بسرعة طلعته وفتحته بس رفض ينفتح معي مسوي رمز الخايس جلست احاول واحط ارقام تجي في بالي بس مع الأسف ماقدرت أوصل ..لرقمه ..معقول حاط تاريخ ميلاده ..جربت مانفع ..حسيت بقهر ..الفضول بيقتلني ..وبعد لو فيه شيء قوي ضد الجوهرة ابيه يكون سلاح بيدي قوي ضدها ...عشان تعرف وشلون تثمن حركاتها ...حسيت بيأس ..يوم جربت كل الارقام ومافتحت ...جيت بقوم خايفه منه يصحى ويحلصني ادور بجهازه ...بس رجعت جلست وأنا اقول بسخريه لا يكون حاط تاريخ ميلادي..جربت وأنا اضحك على نفسي ..بس صعقت يوم فتح قدامي ..حسيت بصدمه جلست شوي اطالع في الجهاز معقول حاط تاريخ ميلادي بدون شعور ابتسامتي توسعت .وأنا اقول والله ماهو مصدقه حطيته كذا ..صدفه ..ضحكت بجنون مدري احس اني فرحانه غصب عني ...هزيت رأسي آه ي الخبله الحين فرحانه لانه حاط رقمه السري بتاريخ ميلادك وناسيه وش جايه عشانه ..مديت يدي وأخذت السيدي ..وحطيته بالجهاز حسيت بمغص وخوف ببطني ..وبعد ناقده على حالي وشلون اشوف شيء مالي فيه ..بس وكاد اقدر احمي نفسي منها ..رجع وسوس لي الشيطان وكملت الي ابيه ...كلها دقايق واشتغل السيدي بالشاشه صعقت من الي اشوفه قدامي ........ كتتتتتتتت نونــي بنت الجنوب سبحان الله وبحمده سبحان الله العظيم استودعتكم الله الذي لا تضيع ودائعه (الوتر أحبتي ) (الله يرحمك يامن وجعني فرقاك ) | ||||||||
|
| |
|
04-02-19, 08:00 AM
| #910 | ||||
 
| السلام عليكم ورحمة الله وبركاته كيفك يالغلا وربي يكرمك دووووم وان شاء الله تكوني بخير يا نوني البارت حلوووو وجميل ابدعتي فيه وابدعتي بتحريك مشاعرنا ولهفتنا لمعرفة شو راح يصير مع ابطال الروايةبالنسبة لشدن وياسر وكمان الشموخ وعناد ومصعب واصايل وخصوصا مع هالقفلة ...اتمنى لك دوام الصحة وان شاء الله ما تطولي علينا ناطرينك ان شاء الله دوووم تظلي بخير وبحفظ المولى عز وجل فيتامين سي شكر خاص الك لمجهودك النبيل وربي يكرمك ودمتي بخير | ||||
|
| |
 |
| أدوات الموضوع | |
| انواع عرض الموضوع | |
|
|
20Likes
.png)
العرض العادي
