آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
11-09-17, 08:58 AM
| #11 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  البارت الرابع - الجزء الثاني ناصر : وانا تحمست اقابل اللي علمهم الطبخ ( قال بتساؤل ) هو انت صح ؟ ابتسم سلطان : بشحمه ولحمه ، كيفك وش اخبارك ناصر : بخير انت وش مسوي ومبروك الشهادة سلطان : الله يبارك بعمرك ، سمعت انك تحب طلعات البر ناصر : عندك لنا طلعه وليد تنحنح عشان ينتبهوا لوجوده بينهم استغرب ناصر : وش تبي ؟ وليد : عبرنا شوي تراني بينكم قال ناصر يستهبل : تصدق نسيت وجودك وليد : احلف ماجد همس لفيصل وهو يناظر بجهة الشيبان : مين اللي جمب ابوي ؟ ابتسم فيصل : ماعرفته ؟ عقد ماجد حواجبه يحاول يتذكر : شكله مو غريب علي فيصل : هذا صاحبه ابو محمد انصدم ماجد : احلففف ! كيف تقابلوا فيصل : عمي يقول صدفة شافة بمسجد يصلي وعزمه اليوم ماجد : سبحان الله افترقوا عشر سنوات والمسجد جمعهم تذكر فيصل شي والتفت لماجد وابتسم : شفتها ؟ رفع ماجد حواجبه : مين ؟ غمز له فيصل : علينا مين فهم ماجد قصده وابتسم مايبي يبين له شي : لازم ترتيب مسبق فيصل : حلاتها بالصدفة ( وغمز له ) اسأل مجرب ابتسم ماجد : تجاربك خلها لك فيصل حب ينرفزه : تدري شاك فيك عقد ماجد حواجبه : الله يستر منك فيصل : مدري ليه عندي احساس يقول انك متزوج لك وحده من هناك سوى ماجد شكله متفاجأ : شلون عرفت ؟ انصدم فيصل توقع انه يتنرفز بس جابها صح : منجد ! ماجد : ايه والله متزوج تحمس فيصل : وش اسمها ؟ حب ماجد يلعب باعصابه : عيب اقول اسمي حرمتي فيصل : يعني الحين الغرب كلهم شافوها وعارفينها , وماتبي تقول لي اسمها ماجد كتم ضحكته : مصمم تعرف فيصل : لازم ماجد بهدوء وهو يحاول يتأمل ملامح فيصل بعد الصدمة اللي بيقولها : اسمها عبير ناظره فيصل وبعدها خزه : احسب عندك سالفة ماقدر ماجد يمسك نفسه وضحك التفت لهم فهد ببتسامة : وش سر هالضحكة ؟ ماجد ببتسامة : فيصل الله يهديه كان يبي ينرفزني قمت نرفزته فهد : انقلب السحر على الساحر ماجد : بالزبببببط ( وناظر ساعته ) يووه توها 8 ونص ابتسم فهد : مستعجل على شي ماجد بتعب : ودي انام والله فهد : اصبر كلها ساعتين ويجي العشا , تعشى وروح نام ماجد : باقي بصبر ساعتين ( وبعد تفكير ) اسمع انا بروح الخيمة اللي بالقسم انام لي شوي اذا جاء العشا لا تنسى تصحيني رحمه فهد : خلاص ابشر وقف ماجد : اذا سألك عني احد قول برى يتمشى وطلع من المجلس لف فيصل لفهد : وين راح ؟ فيصل كان يغازل زوجته بالجوال ابتسم فهد : انت اترك الجوال وخلك معنا فيصل : الله يبليك بحب يعذبك ابتسم له فهد يخفي حزنه وبخاطره " واللي فيني وشهو " : الله لا يقوله عند البنات , كانوا جالسين بمجلس لوحدهم بعيد عن نظرات الحريم دخلت لهم بسمه : يمممه بنات الحقوا خافوا البنات عليها غادة : وش فيك ؟ رهف : وش صار لك ؟ نوف : تكلمي مرام : طحتي قدام العيال زي نوف ؟ رمتها نوف بالمخدة : حللتوا طيحتي من كثر ماقلتوها فاتن اللي علموها بالموضوع : والله تنرحمين يانوف ابتسمت اسماء : بس والله طيحتك جامدة , غير الفشلة رهف بقهر : فاتتني الطيحة صراحة , نوف تكفين عيديها نوف : لا بالله , اقول اسري ناظرتهم بسمه بعد ماجلست : طيب وسالفتي ؟ غادة : قولي وش صار ؟ بسمه : شكلي انخطبت امل خزتها : بس هذي سالفتك ؟ مرام : والحقوني بعد في الاخير شكلي انخطبت مها : بالله لا عاد تقولين سوالف بعد كذا ناظرتهم بسمه بطرف عينها وطنشتهم ولفت تكلم البنات اللي متحمسين : تخيلوا رحت لامي اقولها هرجة المهم كانت جمبها حرمة , ملاحظتها من اول نظراتها لي مو مريحة رهف تحمست : طيب وبعدين ! بسمه : المهم انها قامت تمسكني وتسألني كم عمرك وش اسمك مخطوبة خلصتي الجامعة وزي كذا يعني فاتن : طيب ! بعدين بسمه : المهم ونادتني عمتي العنود وانا ماصدقت احد يفكني منها بغيت احب راس عمتي قدام الضيوف رهف بستهبال : عادي حبي راسي بدال امي , انا وامي واحد اصلا بسمه : يجيب الله مطر بوزت رهف فاتن : واه بنات مو مصدقة اني ارتحت من وجهه استاذة خلود بسمه : الحمدلله افتكينا من وجهها نوف : وكلامها اللي يفقع القلب فاتن : والله لما الحين لما اقوم الصبح اقول الحمدلله مابشوف وجهها بعد كذا وارجع اكمل نوم مرام : بنات مو منجدكم بسمه : حبيبتي انتي لو شفتيها تفلتي العافية غادة : شكلكم مره تبالغون رهف : لا والله مانبالغ ، انتي لو شفتي بس لبسها كان عرفتي اننا مانكذب نوف بقهر : تخيلي تجينا الجامعة ، تجي لصرح تعليمي محترم بفستان ضيق وفل ميك اب انصدمت مها : خير اختنا غلطانة بسمه : حتى احنا قلنا زي كذا بس المصيبة لما تتكلم ( وتقول وهي تقلدها وبدلع ماصخ ) i only speak English نوف : وكمان محاضره طول بعرض عشان تقول لنا كلمتين فاتن : والادهي والامر ان الكلمة الوحده تجلس تنطقها ربع ساعة امل بضحكة : خلاص بنات ماقصرتوا فيها حشيتوها كثير غادة : استغفر الله اخذتم ذنوبها نوف : ايه والله استغفر الله بس الحمدلله ارتحنا منها بسمه : ومن مادتها بعد رهف : ان شاء الله ماتدرسنا بعد كذا مرام بضحكة : تخيلوا تمسك بحث فاتن : الله لا يقوله بسمه : مستعدة ادرس عشر سنوات زيادة ولا اخذ معاها مره ثانية رهف : ان شاء الله مانقابلها خير شر غادة بتفكير : الحين مو تخصصاتكم مختلفة ؟ كيف اخذتم مادة مع بعض بسمه : الحين يابنت عمي العزيزه في مواد في الجامعة لازم كل التخصصات تاخذها اسمها مواد عامة فاتن تكمل معها : واحنا كنا نتكلم عن استاذة وحده من هذي المواد غادة : اهها قولوا كذا وتذكرت نوف شي : ايوه صح اسماء اسماء ابتسمت : هلا نوف ابتسامة : امانة وش صار بالشوفة الشرعية ؟ استحت اسماء , دقتها بسمه في جمبها : بنت عيب نوف : عادي هي بنت خالتي , هيييا اسماء وش صار ؟ , والله اقولك وش صار بشوفتي ( وبضحكة ) ان صارت اصلا فاتن : اقولها انا غادة : نوف خلاص احرجتي البنت نوف : طيب خلاص بسكت اسماء بخجل : لا عادي بقول انبسطت نوف : يالله قولي اسماء شافت الكل سكت وانحرجت زيادة : كان هو وامه بالمجلس وانا كنت بالغرفة اتجهز جات امي وقالت قدمي له العصير عشان يمديك تشوفيه لانها تعرفني مستحيل ارفع عيني واحنا جالسين مرام اندمجت : طيب وش صار ؟ رهف : لا تقولي انكب عليه مها : طيحتي الصحن ؟ فاتن ضحكت : اصبروا خلوها تكمل بسمه : هههههه طيب كملي يالله اسماء : اخذت العصير ورحت قدمته لهم عادي بس لما وقفت عنده قزيته صح ابتسمت نوف : صقره من يومك بسمه بلقافة : طيب كيف هو ؟ حلو تفشلت امل من اختها : بسممه ! بسمه بحرج : اسفه ابتسمت اسماء : لا عادي حبت بسمه تغير الموضوع : مافيه زي شوفة امل ابتسمت امل : وش جاب شوفتي بالموضوع بسمه وفيها الضحكة : امانة قولي لهم ولا بقولهم انا تفاجأت اسماء : فيصل طلب يشوفك ؟ ابتسمت امل بخجل : ايوه من حقه طبعا قهرني بالطلب بس رديتها له فاتن : كيف ؟ وش سويتي ؟ امل : لبست جلابية عادي وشعري رفعته كله ولميته وماحطيت بوجهي شي فاتن بضحكة : من جدك ؟ امل : والله , امي حاولت فيني احط كحل احط شي بس مارضيت محد قله يطلب يشوفني بسمه بضحكة : بغت تدخل عليه اصلا بالعباية شهقوا اسماء وفاتن اما البنات كانوا يضحكوا لانهم يعرفون بالسالفة اسماء : امانة كنتي بتدخلي بالعباية ؟ امل : والله بس فجأه اختفت قالتها وهي تخز بسمه اللي دست عنها العباية فاتن : وش قال فيصل بعدين امل بخجل : حبيت الجلابية اللي فوقك بالشوفة وقفت رهف : وين السماعات خلونا ننبسط راحت عند السماعات تبي تشغلها وجلست تدور : بنات شفتم اللابتوب غادة : لا رهف بخوف : ليكون محد جابه مها : انا مااخذته امل : ولا انا رهف : بالله محد جابه من هناك نوف : انا مااخذت معاي شي عبير بتفكير : ماشفت احد اخذه معاه اصلا انقهرت رهف : ياربي الحين مين يجيبه لنا بسمه : كلمي ناصر اتصلت رهف على ناصر ومارد عليها : شكله مشغول وقفت عبير وعدلت فستانها القصير : عادي انا اجيبه لك مرام وقفت معاها : وانا بجي معاك خالد يكلم راشد وهو يناظر سلطان : ماتحس انه سحب علينا وراح مع ناصر راشد : ولا كأنه خوينا ابد خالد بصوت عالي عشان يسمعه سلطان : الا صح ياراشد كلمت متعب راشد بصوت عالي زيه : لا والله ماكلمته , ودي اخذ اخباره وكذا خالد بنفس النبرة : سمعت انه في الشرقية , بس مدري بيطول ولا لف سلطان : انا كلمته قبل يومين ابتسم خالد : ما قال لك متى بيرجع ؟ سلطان : يقول احتمال يرجع بعد اربع ايام راشد : الا وش رايكم اذا جاء نخرج البر سلطان : والله قدام ( ولف لناصر اللي كان يسولف مع فهد ) شرايك ناصر تخاوينا ؟ عقد ناصر حواجبه : اخاويكم وين ؟ خالد : احتمال نهاية هذا الاسبوع نطلع البر ناصر : اظن مايمديني لان بسافر الشرقية سلطان : اجل نأجلها شوي فهد سمعهم : احسبوني معكم ابتسم ناصر : من زمان ماطلعت معنا البر فهد : والتخييم والقنص راشد : عوضها هالمره فهد : والله قدام خالد : حلو كل ماصار عددنا اكثر كل ماصارت الطلعة احلى راشد : الا وش رايك نكلم عيال اعمامي كلهم سلطان : انا ماعندي مانع راشد : بس اعمامي لا يدرون ولا قلبوها عوائل ناصر : لا ماعليك هذي خلها علي همس وليد لفيصل اللي مشغول بجواله: روح قابلها وارتاح وريحنا فيصل : ودي والله لكن الوالد متوعد فيني لو ماشافني بالمجلس بيخلينا نجلس هنا اسبوع وليد حب يستفزه : طيب حلو خلنا نجلس طلعت عيون فيصل : لا ياشيخ ، انا يومين وبالقوة مصبر نفسي ( وتذكر ) تدري كلمت اختك اننا نرجع الليلة بعد العشاء لكن رفضت وليد ضحك : اثقل يارجال اثقل تنهد فيصل : والحب خلى فيني ثقل ضحك عليه وليد : الله يهنيكم فيصل : الله يرزقك يارب عقد وليد حواجبه : فالك ماقبلناه ناظر وليد ساعته وقف وطلع برى الخيمة يكلم حق المطعم وجلس يوصف له المكان شافه فهد ولحقه برى الخيمة قال بعد ماقفل : العشا وصل لف له وليد : ربع ساعة ويوصل فهد : اجل بروح اصحي ماجد استغرب وليد وبعدها تذكر انه ماشافه بالمجلس : هو نايم ؟ فهد : ايوه بالخيمة بالقسم الثاني كان مرهق من السفر وراح يرتاح شوي مشى فهد رايح للخيمة وصلوا عبير ومرام الخيمة وحطوا طرحهم على كتوفهم مرام وهي تاخذ نفس : والله مشوار عبير تاخذ نفس زيها : ايه والله ، امشي ندور على اللابتوب ونرجع ماانتبهوا لماجد اللي نايم عند الباب على جمب ، كان نايم ومفسخ الشماغ ومغطى وجهه بيده ، من التعب والارهاق ماحس بوجودهم وهم يدورون ، شافت مرام ماجد وماعرفته لانه مغطي وجهه : عبير شوفي مو كأن هذا ناصر لفت عبير مكان ما تأشر مرام وحسبته ناصر : عشان كذا مارد علينا ، كان نايم وراحت له عشان تصحيه بس سمعت صوت فهد قريب من الخيمه ويصارخ : ماجد يالله قوم جمدت عبير مكانها ومرام نفس الشي ماعرفوا وش يسوون دخل فهد الخيمة وشاف عبير وتفاجأ : عبير وش تسوين هنا ؟ ولف للحرمة الثانية اللي كانت بعيده شوي طاحت عيونها بعيونه عيونه اللي اسرتها العيون اللي ياما حلمت فيها ياعيون الكون غضي بالنظر واتركينا اثنين عين تحكي لعين بيد ترجف من التوتر رفعت طرحتها وغطت وجهها حس فهد على نفسه وطلع برى الخيمة وقلبه يدق من الصدفة الجميلة طلعت مرام بسرعة من الخيمة وراحت للمطبخ حق الفيلا اما ماجد كان منسدح مكانه منصدم من اللي سمعه عبير هنا !! عبير بالخيمة معي ليه جات ؟ بس ماتحرك عشان ما يحرجها ولا يبي يشوفها طلعت عبير لفهد وهي تضحك عليه : يالله من قدك شفت خطيبتك ابتسم لها فهد يخفي ارتباكه : الا وش تسوين بالخيمة ؟ عبير : جينا ندور على غرض وشفنا ناصر نايم عقد حواجبه : ناصر ؟ ( يحاول يخفي ابتسامته عن اخته ) هذا ماجد انصدمت عبير : ماجد ! فهد : ايه ماجد بس دامك هنا روحي قوميه العشا الحين بيجي راح فهد وتركها مكانها منصدمة ، تركها لانه يبي يهدي دقات قلبه وقفت عبير مكانها ماتدري وش تسوي كيف ماعرفت زوجها وهو نايم كيف قلبها مادق لما شافته منسدح كيف ماحست بشي من وجوده حولها والحين المصيبه الاكبر لازم تقومه من النوم كيف تقومه وهم ما تقابلوا لما الحين كيف تقومه وهي لها سنة ماسمعت صوته " نعنبوا بليسك يافهد ورطتني ورحت " سمع ماجد كلام فهد لها وسوى نفسه نايم الفضول اكل قلبه يبي يعرف وش بتسوي الحين بتجي تصحيه ولا تخليه نايم معقوله تخليني نايم ؟ لا لا اكيد بتصحيني بس كيف تصحيني وانا سنة ماكلمتها اخترعت عبير من جوالها اللي دق ، شافت الاسم وردت : هلا رهف رهف كانت معصبه لانهم تاخروا : وينكم تاخرتم ؟ خطرت ببال عبير فكرة : جيتي وربي جابك استغربت رهف : وش فيه ؟ عبير : اولا اللابتوب مالقيناه ، ثانيا ابيك تدقين على اخوك وتصحينه عقدت رهف حواجبها مو فاهمه شي : اخوي ؟ عبير تنرفزت وهي تمشي رايحة للمطبخ : ايه اخوك ماجد ، دقي عليه وصحيه لانه نايم رهف برضو مو فاهمه شي : نايم ؟ عصبت عبير منها : اووف رهف فتحي عقلك شوي تنرفزت رهف : ياخي شسوي فيك ماتعرفين تفهمين الواحد اخذت عبير نفس : اخوك نايم بالخيمة هنا دقي عليه قوميه لان العشا بيوصل رهف : قوميه انتي عبير : رهف والله مو رايقة لك اقولك قوميه انتي خرج ماجد من الخيمة وهو يعدل شماغه وبهدوء وهيبه : مايحتاج احد يقومني انا صاحي انتهى البارت | ||||
|  |
|
14-09-17, 08:45 AM
| #12 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| \\ البارت الخامس - الجزء الاول اخترعت عبير من جوالها اللي دق ، شافت الاسم وردت : هلا رهف رهف كانت معصبه لانهم تاخروا : وينكم تاخرتم ؟ خطرت ببال عبير فكرة : جيتي وربي جابك استغربت رهف : وش فيه ؟ عبير : اولا اللابتوب مالقيناه ، ثانيا ابيك تدقين على اخوك وتصحينه عقدت رهف حواجبها مو فاهمه شي : اخوي ؟ عبير تنرفزت وهي تمشي رايحة للمطبخ : ايه اخوك ماجد ، دقي عليه وصحيه لانه نايم رهف برضو مو فاهمه شي : نايم ؟ عصبت عبير منها : اووف رهف فتحي عقلك شوي تنرفزت رهف : ياخي شسوي فيك ماتعرفين تفهمين الواحد اخذت عبير نفس : اخوك نايم بالخيمة هنا دقي عليه قوميه لان العشا بيوصل رهف : قوميه انتي عبير : رهف والله مو رايقة لك اقولك قوميه انتي خرج ماجد من الخيمة وهو يعدل شماغه وبهدوء وهيبه : مايحتاج احد يقومني انا صاحي جمدت عبير مكانها من الخرعة وماقدرت تنطق بحرف ورهف بالخط تكلمها وهي ماترد عليها ، عصبت منها وقفلت بوجهها فتحت مرام باب المطبخ بعد ماهدت شوي وراح توترها وشافت عبير واقفة مكانها وماتتحرك : عبوره وش فيك ؟ عبور !! عبور وصرخت بوجهها : عبييير شهقت عبير من الخرعة : ياكلبه خوفتيني مرام : لي ساعة اناديك وش فيك عبير : ولا شي ، امشي نرجع عند البنات استغربت مرام : واللابتوب ؟ عبير : مو لازم العشا وصل راحت مرام معاها وهي مستغربة من حال بنت عمها اللي تغير ١٨٠ درجة مر من جمبها ولا التفت لها مايدري ليه قلبه دق لها حس بانه مشتاق لها مشتاق لصوتها مشتاق لابتسامتها مشتاق للانسانة اللي حبها وطعنته طعنته !! تذكر طعنتها له وجرحها اللي باقي مابرى قسى قلبه عليها هو رجع الرياض وكان مقرر انه يجرحها زي ماجرحته يهينها زي مااهانته قدام الكل واول الاهانة لما مر من جمبها ولا عبرها ولا التفت لها " انتظري الجاي مني ياعبير " دخل للقسم الثاني وشاف ولد عمه يكلم هندي جمب سيارة المطعم اكيد العشا وصل راح لوليد : بشر وصل العشا كامل ؟ ركب الهندي سيارته ولف لماجد : هلا ماجد ، ايه وصل ( وناظر وراه ) وين فهد ؟ عقد ماجد حواجبه : مو بالمجلس داخل وليد : لا راح يناديك ولا رجع ، على العموم تتوقع ٦ صحون عند الحريم تكفي ؟ ماجد : اتوقع كثيره ، بس اتصل تاكد اتصل وليد على امل اللي ردت بعد خامس رنه : هلا وليد عقد حواجبه من صوت الازعاج اللي عندها : هلا امل ، اطلعي لمكان هادي عشان اعرف اكلمك وقفت امل : ثواني بس ( وبعد دقيقة كلمته ) ايوه هلا ناظر وليد صحون العشا : اقولك ٦ صحون تكفي عندكم ؟ ولا ازيد امل بتفكير : ٦ !! اتوقع تكفي وليد : متاكده ! امل وهي تعد : عند الحريم ٤ ، والبنات واحد وللخدامات واحد ايوه تكفي وليد : زين ، بنرسلكم السلطات عشان تجهزونها لنا وكمان فضوا لنا المطبخ عشان ندخل الصحون قفل من اخته واشر لعيال اعمامه عشان يجون يساعدونه بعد ماجاو كلهم ناظر فارس الصحون : وين بنحط عشا الرجال شمر وليد اكمامه : في الخيمة ، واحنا بنجلس برى ، العمال فرشوا البساط ، شيلوا ٦ صحون ودخلوها المطبخ للحريم بعد ماخلصوا البنات العشاء لفت بسمه لهم : شرايكم نطلع برى فاتن : والرجال ؟ بسمه : الرجال جالسين بعيد عنا وكمان بيننا سور فاصل فاتن : موافقة كمان نهضم اللي اكلناه قبل شوي لفت بسمه للباقين : تطلعون معانا برى مها : مافيني امشي غادة : الكعب عورني والله امل : انا بجلس مع البنات مرام : بسولف مع اسماء وقفت رهف : براحتكم طلعوا بسمه ونوف ورهف وفاتن وتركوا الباقين بالمجلس مرام : باقي ماحددتم الملكة ؟ اسماء : لا باقي بدري مرام : بس اعطينا خبر من بدري نطت لهم غادة اللي سمعت الهرجة : ايوه عشان يمدينا نشتري فساتين خطرت ببال مها فكرة : بنات وش رايكم نتفق يوم ونروح السوق منها نقضي لملكة اسماء ومنها نغير شوي امل بحزن : مااتوقع فيصل يوافق مرام : ماعليك احنا بنقنعه غادة : بس مانبي رجال , نبي نكون لوحدنا عشان ناخذ راحتنا اسماء بضحكة : ياخوفي نهاية هالتخطيط نجتمع ببيت مها : ان شاء الله لا نوف : الا صح فاتن لفت عليها فاتن بستغراب وكملت ببتسامة : رهف حبت خالد حمرت خدود رهف : يانصابه قلت اعجبني مو احبه غمزت لها بسمه : الاعجاب بداية الحب ناظرتها رهف ولا تكلمت ، جلسوا البنات على كراسي وبوسطهم طاولة حست فاتن انه صار شي وماقالوا لها عليه : علموني وش صار ؟ بسمه : الله يسلمك امس قررنا نقز الشباب من شباك غرفتنا ، وشافته رهف وقالت انه اعجبها رهف وخدودها حمرا من الخجل : بس صار وسيم بزيادة ، للامانة الحق ينقال نوف : والله حتى راشد صار وسيم فاتن ابتسمت : تحمست اشوفهم بسمه : يمكن تشوفينهم بالصدفة نوف : ان شاء الله ماتكون زي صدفتي ( وناظرت بسمه بطرف عينها ) مع اخوها رهف بضحكة : ولا صدفتي انا بعد تحمست فاتن : ماشاء الله صارت لكم مواقف ، علموني نوف : ماابي اعكر مزاجي يكفي الطيحة بسمه : والله اخوي حنون وطيوب نوف : شفته كيف خاصمني اليوم قالت بسمه تغني ببتسامة : يعذبني بخاصمه ولا ادري وش علامه ضحكت فاتن : امانة وش صار حبت نوف تغير الموضوع وغنت : وش صار وش اللي غيرني ماعدت اعرفني رهف ضحكت : بدأ بث اذاعة mbc fm فاتن : هواها خليجي بسمه : الله الله تذكرت فاتن : الا صح سويتم امس الحفلة ؟ نوف : سوينا بدل الوحده ثنتين فاتن تفاجأت : منجد !! رهف : ايوه امس سويناها لخالد وراشد واليوم لماجد عقدت عبير حواجبها : مين ماجد ! نوف : ولد عمي اللي يدرس برى ، قد قلت لك عليه حاولت فاتن تتذكره : مااتذكر ، المهم وش يدرس بسمه : دكتوراه فاتن : ماشاء الله ، دكتوراه في ايش ؟ ابتسمت لها رهف : انتبهي لا تحطين عينك عليه تراه متزوج تذكرته فاتن : عبير صح ! نوف ببتسامة : اخيرا تذكرتيه فاتن : ايه والله اخيرا ( بتساؤل ) الحين يعني كل اللي مسافرين رجعوا استقروا هنا بسمه : مو كلهم ، باقي فهد رهف : الضابط نوف : خطيب اختي ضحكت فاتن : اعرفه والله اعرفه شهقت بسمه تستهبل : كيف تعرفينه ؟ فاتن ببراءة : خطيب بنت خالتي الضابط ناظرتها بسمه بشك : بس كذا !! فاتن : بس كذا , الا صح بنات في سؤال في قلبي لازم اسأله استغربت رهف : اسألي فاتن : عمتكم شيخة وينها , ماشفتها هي وبنتها بسمه : ماجات من الشرقية , زوجها تعبان حزنت فاتن : الله يشفيه يارب ابتسم ناصر وهو يسلم على سلطان : فرصة سعيدة ياسلطان اننا شفناك رد له سلطان الابتسامة : وانا الاسعد والله , يالله نشوفك بالبر ناصر : ان شاء الله ركب سلطان سيارته وراح , رجع ناصر للخيمة اللي شبه فاضية من الضيوف وجلس جمب راشد راشد : ماشاء الله اشوف سلطان صار خويك ناصر : والله والنعم فيه , الا اقولك عنده اخوات ؟ تفاجئ راشد : بتتزوج ؟ ناصر : استهبل عليك ياخي , انا وين والزواج وين راشد : تزوج وعيش بالنعيم جاء فيصل لهم بعد ماودع صاحب ابوه : احد جاب طاري الزواج راشد : قاعد اقنع ناصر انه يتزوج جلس فيصل جمبهم وببتسامة : والله الزواج نعيم وراحه بال واستقرار ناصر بضحكة : اما راحة البال كثر منها , شفتك هاليومين كيف متضايق لانك بعيد عن زوجتك تفاجئ فيصل : لهذي الدرجة واضح راشد : حتى الاعمى شاف فيصل : احسن خلي اعمامي يحسون كود انهم يسوون لي جناح ناصر : يجيب الله مطر جلس فارس جمبهم وهو طفشان : متى ودهم يروحون ؟ ترى الساعة بتصير 12 راشد بضحكة : باقي تو الناس , قم خلنا نلعب ورقه بالخيمة فارس : توني راجع منها , لعبت لما طفشت ماجد ببتسامة : الله يبارك فيك ياعمي , والله فرحت لما قال لي الوالد انك بتجي ابتسم ابو محمد : تسلم ياولد الغالي , نشوفكم بالجايات ان شاء الله ماجد : ان شاء الله ( وسلم على ولده صالح ) هالله هالله بالزيارات كلي مازارنا الوالد تعال معه ابتسم له صالح : ان شاء الله على خير , يالله فمان الله ماجد : فمان الكريم ( ولف لابوه ) والله رجال والنعم فيه , غريبه غادة رفضته ابو ماجد بضيق وهو يمشي راجع للخيمة : والله اختك رفضت ناس كثيرين , معرف وش بسوي معها ماجد يمشي جمبه : الله يهديها ابتسم ابو ماجد : العشم فيك الحين ياولدي عقد ماجد حواجبه : شلون يبه ؟ ابو ماجد : الحين انت رجعت وكلها كم شهر وانت متزوج بنت عمك ابتسم ماجد يخفي المه : ان شاء الله قريب ( وقال يغير الموضوع ) الا صح فهد وينه ؟ ماشفته من العشا عن اذنك يبه وراح يدور عن ولد عمه اللي اختفى مره وحده , شافه جالس على كرسي بعيييد عنهم وشكله متضايق جلس ماجد جمبه : وينك فيه مختفي تنهد فهد : اصفي راسي شوي خاف ماجد من تنهيدته : فهد فيك شي ؟ فهد : الظاهر اني بقطع اجازتي انصدم ماجد : شلون !!!!!!!!! فهد بانكسار : محتاجيني هناك , يبوني استلم مكان واحد زواجه قريب ماجد : قلت لاحد ؟ فهد : لا انت اول واحد اقوله , مدري شلون بقول للوالده وانا ماجلست معاها اسبوع ماجد بتفكير : ماتقدر تاخذها معاك تفاجئ فهد ماخطرت بباله هالفكرة ابد وكمل ماجد : ايه خذها معاك غير كذا اظن اعمامي بيسافرون الشرقية عشان يزورون زوج عمتنا فهد بتفكير : مدري والله بكلمها عن موضوع سفري ان ماتقبلته بقنعها تسافر معي ماجد : ياخي والله غريبة سالفة نقلك هذي اللي لما الحين ماجات تنهد فهد بحزن : خلها على ربك ماجد : طيب ماحاولت تتبادل انت وواحد من هنا فهد : سويت كل شي ممكن يخطر ببالك بس ربك ماكتب نقلي للحين ماجد : ان شاء الله قريب يجيك النقل فهد : ان شاء الله ( وتذكر شي ) الا صح انت مين صحاك ؟ عبير !! ماجد بضحكة : قمت من ازعاجك طلعت عيون فهد : الحين انا ازعاج ماجد : يعني واحد نايم في امان الله تجي تسولف عند راسه ابتسم فهد : عشان تقوم , احمد ربك ما صارخت عليك زي ما صارخت على العيال اليوم عقد ماجد حواجبه : ليه وش سووا ؟ فهد : ابد بس عشان نقومهم من نومهم وابشرك نفضتهم نفض على قولة وليد ضحك ماجد : رحمتهم , الله لا يجعلك تصحيني ناظره فهد بنص عين : ومين اللي قال اذا جاء العشا صحيني ماجد : كنت في حالة اللاوعي من الارهاق نوف وهي تحضن فاتن اللي لابسه عبايتها : بتوحشيني يابنت خالتي فاتن تحضنها : وانتي اكثر والله اسماء : خلاص انتي وهي اللي يشوفكم يقول سنة مابيشوفون بعض نوف : الله لا يقوله فاتن : اول ماتوصلي الرياض تعالي عندي نوف : ابشري مرام بعد ماسلمت على خالتها : خاله خالد يبي يسلم عليك برى همست نوف لفاتن : يالله فرصتك قزيه الحين انبسطت فاتن : ايه والله فرصتي الحين , تعالي معاي طلعت عيون نوف : وين , ابوك برى اكيد معاه مقدر ( وسلمت على خالتها ) نشوفكم على خير ياخالتي ام اسماء : ان شاء الله , لازم تنامين عندنا انتي ومرام ابتسمت مرام : والله اذا الوالده موافقة انا ماعندي مانع ام فيصل : مالي رأي عقب رأي ابوك نوف : خلاص ياخالتي اعتبرينا اخذنا موافقته ضحكت ام اسماء : اجل ننتظركم ودعت خالتها والبنات ورجعت لبنات عمها مع اختها جلست مرام وفسخت كعبها : رجلي تقول ارحميني غادة : والله ماقصرنا اليوم بسمه : حتى امس والله ولا نسيتي الحفلة غادة : انا ماتعبني وهلكني غير الحفلات هذي بسمه : الا اقول غادة , شفتي الحرمة اللي لابسة ازرق عقدت غادة حواجبها : ياكثر اللي لابسين ازرق اليوم بسمه : اللي جالسة جمب عمتي العنود تذكرتها غادة وتغيرت ملامحها : ايوه وش فيها ؟ بسمه : ماشالت عينها عنك نوف : ايوه صح حتى انا لاحظت هالشي غمزت لها مرام : ليكون بتخطبك غادة : قد خطبتني ورفضت شهقت نوف : تمزحييين ! ابتسمت غادة : والله خطبتني ورفضت بسمه بحسره : ليييييه ؟ مبين انها طيبه غادة : ماارتحت له امل : طيب شفتيه ؟ غادة : لا تثاوبت رهف : الحين مين يرجعنا الفيلا عبير : يمكن نرجع مشي طلعت عيون رهف قدام : لا تقولي , مالي خلق امشي نوف : شوفوا لو رجعنا بالسيارة مستححححححيل اركب مع وليد يكفي طحت قدامه ( ولفت للبنات بتهديد ) ياويلكم لو علقتم ضحكت امل : خلاص بقوله خلي راشد يرجعنا ابتسمت نوف : اييوه راشد ممكن رجعوا الكل الفيلا وناموا من التعب والارهاق , فهد نسى صدفته مع مرام بسبب شغلة اللي نكد عليه ليلته | ||||
|
| |
|
14-09-17, 08:46 AM
| #13 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| \\ البارت الخامس - الجزء الثاني اليوم الثالث اول من قام الاعمام وزوجاتهم كالعادة , افطروا الحريم بالصالة , والاعمام بالخيمة حقتهم قاموا البنات على اذان الظهر وبدأو ترتيب شنطهم واغراضهم والعيال نفس الشي لان بعد اذان العصر بيمشون كلهم على الرياض ويرجعون لروتين حياتهم الاول ماجد لما الحين ماشاف عبير ولا قرر يشوفها , وعبير متوتره من وجوده بنفس المكان فهد ماقال لاهله عن سالفة رجعته للشرقية , فضّل يقولهم اليوم اللي بعده اما فيصل كان طاير من الفرح اخيرا بيرجع لحياته القديمة مع امل حياته كانت عبير مع ناصر عند باب الفيلا والاغراض والشنط عند الباب عشان العيال يحطونها بالسيارات عبير وهي تأشر على الشنط : هذي لعيال عمي عبدالله ، وهذي لعيال عمي علي ، وهذي لعيال عمي صالح ناصر : اصبري اصبري حبه حبه طيب ، هذي لمين ؟ ضحكت عبير : وين بدر ؟ ناصر : برى ، اصبري اناديه لك ثواني وجاء بدر : هلا عبير : تعرف اغراضنا ؟ ناظر بدر الشنط والاغراض اللي بالارض : هذي الخضر ؟ عبير : تمام عليك ، شوف هذي اللي فيها شنطة حمرا لعيال عمي صالح بدر : تمام ، وهذي الزرقاء ؟ عبير : عمي علي بدر : والباقي لعمي عبدالله ، خلاص تمام ناصر : حفظتهم مزبوط ؟ بدر : تمام التمام ( والتفت لاخته اللي كانت بتدخل الصالة ) عجلوا بالغدا هزت عبير راسها ودخلت للصالة وبدا العيال شغلهم ام وليد : جهزتم اغراضكم يابنات ؟ عبير : ايوه ياعمه ، شوفي العيال قاعدين يدخلونها في السيارات ام فهد : متاكدين اخذتم كل شي ؟ مها : ان شاء الله ماينقص علينا شي عبير : امشوا نجهز لهم الغدا على بال مايخلصون العيال وراحوا البنات المطبخ بسمه بضحكة : احنا مانقدر نتحرك الا جماعة ، حتى الخدامات خافوا من هجومنا نوف : اوك انا بطلع مسكتها بسمه : لا لا امزح تعالي نقطع السلطة رهف : بنات ماابي ارجع البيت احس باقي ماشبعت من المزرعة امل : انا طفشت منها ابي ارجع بيتي نوف : انتي معروف ليه طفشتي منها غادة : الا وين فيصل عنك ، غريبة تاركك معانا امل بضحكة : كأني انطردت غادة : ماعاش من يطردك بس مستغربة جلستك معنا امل : مشغول مع العيال عبير : ان شاء الله دايم ينشغل معهم لا كنتي معانا بسمه : امييين مرام : متعقده الاخت ؟ بسمه : ممممره ، لو تشوفيني بالبيت بس اتضارب معاها اذا جات تزورنا ماتسهر معنا بس تتعشى وتروح غادة : ياخي خليهم ينبسطون امل : باقي بشوفك لا تزوجتي بتسهرين عند اهلي ولا لا بسمه : حبيبتي بتركه في بيت اهله وانام ببيت اهلي مرام بضحكة : ماصار هذا زواج بسمه : والله عاد يتحمل نوف : الا صح يابنات مافي وحده منكم انخطبت غير غادة ومرام نبي حماس بالاجازة رهف : عندنا زواج اسماء نوف : بس هو زواج واحد ، ابي زواجات كثير ابي حماس في الاجازة غمزت لها بسمه : عقبال ماتنخطبين وتنشغلين بزواجك نوف : ان شاء الله ليه لا ، دام فيه حماس بالموضوع عادي عندي رهف : الا صح بسمه وش صار على موضوع الحرمه حقت امس بسمه : اي حرمه ؟ مرام : حرمة ايش ؟ رهف : الحرمه اللي مسكتك تحقيق بسمه : اهها امي تقول انها سألتها اذا انا مخطوبة او لا غادة : وش قالت امك بسمه : بنتي باقي ماخلصت جامعتها وهمها شهادتها قبل الزواج نوف : يسعد عمتي سكتتها بسمه : ايه والله اصلا حبيت راسي امي لما رفضتها رهف : ليه ؟ مبين انها حبوبة امل : اتركوا عنكم السوالف وخلونا نجهز الغدا لا يعصبون علينا بعد ماقاموا الرجال من الغدا فيصل دخل الخيمة : يالله مشينا ضحك ابو فيصل على ولده : وش فيك مستعجل ؟ فيصل ببتسامه : خلاص يبه غدا وتغدينا وش نجلس عشانه قام ابو فيصل يروح ينام : خذ زوجتك وتوكل على الله احنا بعد العصر بنمشي انبسط فيصل وطلع برى يكلم زوجته تتجهز عشان يمشون انسدح بدر : الحمدلله يارب على نعمة الاكل انسدح راشد جمبه : الحين دور القيلولة ابتسم ابو ماجد لهم : قصدك غيبوبة راشد بضحكة : والله مااقول لا وقف ابو وليد : ارتاحوا لما العصر وراح الفيلا عشان ينام فارس : انا مقدر اسوق استغرب ماجد : ليه ؟ فارس : توني متغدي والبطن فل فهد : خلاص انا بسوق سيارة اهلي انبسط فارس : واخذ سيارتك ؟ فهد ضحك : توك تقول ماتقدر تسوق فارس ببتسامه : دام السالفة فيها الرنج خلاص احس ان الاكل انهضم ابو فهد ضحك على ولده : فارس انت بتسوق سيارتي ولا الجيب ماصار عاجبك فارس : لا يبه الجيب مانقدر نقول عنه شي كمل ابو فهد : اجل اترك سيارة اخوك له خالد : اجي معك يافهد ؟ فهد : لا انت معك سيارتك ، بشوف يمكن اخذ اختي معاي ناصر : اظن البنات بيجون معاي زي لما جينا هنا تفاجئ ماجد : اخذت البنات كلهم ؟ ابتسم ناصر : اخواتك بس ماجد : طيب الحين كيف ترتيبكم في السيارات ؟ استغرب وليد : كل واحد يروح مع عايلته ابتسم ماجد : مافي سيارة زايده منا ولا منا ، اخوكم مامعه سيارة ابتسم ابو ماجد : سوق سيارتي ياولدي تفاجأ ماجد : وانت يبه ابو ماجد وهو يوقف بيروح ينام : بجلس جمبك مرافق ابتسم ماجد : توكلنا على الله طلع ابو فهد مع ابو ماجد عشان يرتاحون التفت ماجد للشباب : طيب البنات كيف ؟ ناصر : عادي كل وحده تركب السيارة اللي جات فيها راشد : لا ناصر تكفى خذهم كلهم معك رفع ناصر حواجبه : كلهم !! خالد : مو كلهم كلهم , نص معك ونص مع فيصل دخل فيصل الخيمة وهو مستغرب حس فهد بشي بينهم : وش عندك انت ؟ راشد : ابد بس برجع مع خالد , وبدر وفارس معنا فهد : ناصر ترى سيارتي فاضية , باخذ اختي ومعها وحده عادي فيصل : خلاص انا باخذ زوجتي واخواتي معاي وليد : انت باقي مارحت ؟ فيصل بقهر : اختك رفضت نروح لوحدنا ، تقول لازم كلنا نمشي مع بعض ابتسم وليد : اصيلة ناصر : الا صح مين بيخاويني للشرقية عشان نزور زوج اختي وليد : انا بجي معاك عقد ماجد حواجبه : ليه عسى ماشر ؟ وش فيه زوج عمتي فيصل : ارتفع عنده السكر والضغط ونقلوه للمستشفى والحين صار له اسبوعين متنوم ماجد : لا حول ولا قوة الا بالله , والحين كيفه ؟ فهد : انا زرته قبل مااجي كان بخير وصحة وعافية ماجد : حتى انا بزوره معكم , الا متى بتسافرون ناصر بتفكير : احتمال بكره او بعده ماجد : لو تأخرون سفرتكم يومين او ثلاث بجي معكم ( قال يبرر ) تعرفون توني جاي من برى وماجلست مع الاهل ابتسم ناصر : اجل بعد ثلاث ايام نتحرك , وانت يافيصل بتخاوينا راشد بضحكة : فيصل انساه , مستحيل يسافر صحيح فيصل يحب زوجته ويقدر جلستهم سوى ودايم يشتاق لها لكن زيارة زوج عمته تعتبر واجبه ومن صلة الرحم قال فيصل يستهبل : عادي اسافر معكم لكن ارجع في نفس اليوم تفاجئ ناصر : مجنون ترجع بنفس اليوم , ترى بنروح بر مو جو فيصل ببتسامه : والله عادي اسويها , بس احسبوني معكم بعد العصر الكل كان جاهز للانطلاق . البنات والحريم بالصالة لابسين العبايات وجاهزين اما العيال برى عند السيارات والاعمام جالسين بالخيمة لما يخلصون الحريم سمعوا البنات صوت ناصر عند باب الفيلا يناديهم : يالله يابنات تغطوا البنات ومشوا ورى عماتهم رهف وهي تهمس لنوف وبسمه : باقي ماشبعت والله ماشبعت نوف : ماعليك بنعوضها بوقت ثاني بسمه : اقول اسمعوا وش رايكم بكره السهره عندي رهف : تم مرام : امشي انتي وهي واتركوا السوالف بعدين ناظرتها نوف بطرف عينها : تدرين انك هادمة اللذات مرام : ههههههه امشي فيصل ينتظرنا نوف مسكت اختها : اقول مرام شوفي الحبيب هناك فهد كان يسولف مع ماجد بعيد عن السيارات مع عيال عمهم خزتها مرام وكملت نوف : بالله ماودك تكونين بدل ماجد تركتها مرام وضحكت نوف عليها ضربتها امل اللي كانت وراها : اسكتي فضحتينا كانت عبير ماسكة يد غادة بقوة ماتبي تشوفه , حست غادة عليها ومسكت يدها تطمنها شافهم ناصر وراح لهم وقال بشك : عبير , ووووو غادة صح ابتسمت غادة : ايوه , وين نركب أي سيارة ناصر ببتسامه : غادة معاي هي ورهف ومها , اما عبير مع فهد ( وصرخ بصوت عالي ) فهههد لف فهد له وماجد لا اراديا لف معه , طاحت عينه بعينها وعلى طول صد عنها ضغطت عبير على يد غادة فهد : هلا ناصر : سيارتك مفتوحة فهد : لا ( لف لماجد ) يالله سلام وراح لسيارته عشان يفتحها لاخته اللي لحقته وقفت بسمه مكانها ماتعرف وين تروح , شافها وليد وراح لها وليد : بسمه ! شافته بسمه وهو جاي لها : هلا استغرب وليد : وش تسوين هنا ؟ ليه ماركبتي السيارة بسمه : معرف أي سيارة اركب وليد وهو مو فاهم شي : تعالي معاي في سيارة ابوي بسمه : وراشد ؟ وهم جايين الاستراحة كانت سيارتهم زحمة لان راشد جاء معهم غير وليد اللي يسوق وليد : راشد بيروح مع خالد في سيارته دخل فيصل سيارته : السلام عليكم امل ونوف ومرام : وعليكم السلام فيصل ببتسامه وهو يناظر المراية اللي بالوسط : ماشاء الله اخواتي معاي مرام ابتسمت : منورين السيارة صح فيصل حب ينرفزهم : منوره بوجود امل نوف : اوك انا بروح مع ناصر فيصل ضحك : لا لا امزح كلكم منورين سيارتي دق زجاج سيارته وفتحه : هلا ناصر ناصر وهو يشوف اللي معاه : مين معاك ؟ فيصل : امل ومرام ونوف ناصر : زين , وسيارة ابوك مين معه مرام : امي والخدامة بس ناصر : تمام , وسيارة علي فيصل : وليد وعمي وعمتي امل : والخدامة وبسمه استغرب فيصل : ليه تسأل ناصر : اتطمن مانسينا احد , يالله باقي وراي 3 سيارات اتطمن عليها قالت مرام بسرعه بدون ماتنتبه : ترى فهد معاه عبير ابتسم لها ناصر : ايوه ادري , يالله سلام فيصل : سلام ماجد وهو يكلم ابوه : يبه ليه ماقلت لي على زوج عمتي ؟ ابو ماجد : انشغلنا وانا ابوك مع الضيوف امس ماجد عذر ابوه : زين , انا ان شاء الله بعد ثلاث ايام بسافر مع ناصر والشباب عشان نزوره ام ماجد قالت بسرعه : وين يمه مابعد جلسنا معاك لف لها ماجد وابتسم : بجلس معاك يالغالية العمر كله , زوج عمتي حق علينا نزوره وهو بخير وشلون لو كان تعبان ابو ماجد : الله يعطيك العافية ماجد : الله يعافيك ولو حق وواجب ( وقال يغير الموضوع ) السيارة مالها حس بدون البنات ابتسمت ام ماجد : لو انك متزوج الحين كان عبير ملت علينا السيارة تضايق ماجد من الموضوع لكن ابتسم : ان شاء الله قريب ( شاف ناصر جاي له قام فتح له الزجاج ) هلا ناصر ناصر : انت واهلك كاملين ؟ استغرب ماجد : ايه كاملين , خير فيه شي ؟ ناصر ابتسم يطمنه : لا بس اتطمن في سيارة خالد قفل خالد من جواله والتفت لراشد : متعب يسلم عليك ( وناظر عيال عمه في المرايه ) ويسلم عليكم الشباب : الله يسلمه راشد : كيفه وش اخباره ؟ خالد : ماعليه مبسوط , تدري ان امس ملكته انصدم راشد : قل والله خالد ابتسم : والله العظيم راشد : كنت حاس ان سفرته لشرقية وراها سبب فارس : خويكم هذا هو اللي دايم تتكلمون عنه راشد : ايه بشحمه ولحمه فارس : الله يهنيه خالد : والله يا فارس ياعليه نفس بالطبخ , ماشاء الله عليه راشد بضحكة : بس 24 ساعة جوعان بدر : ههههههه ماقد شفت طباخ جوعان فارس وهو يناظر ناصر : وش فيه ناصر ؟ خالد : شكله مضيع شي فارس طلع جواله : اصبر اسأله يمكن محتاج شي ( ودق عليه ومارد وبضحكة ) الظاهر مضيع جواله في سيارة ناصر رهف : غادة حطي لنا شي نسمعه غادة كانت راكبة جمب السواق قدام : مو سيارتي رهف : ياربي منك ونطت رهف قدام تشغل الراديو ودق جوال ناصر اللي تركه بالسيارة بلقافة منها شافت مين المتصل وجمدت مكانها مها بانزعاج تحسبه جوال اختها : رهف ردي ولا حطيه صامت بلعت رهف ريقها : بس هذا جوال ناصر مو جوالي مها : طيب حطيه صامت كانت رهف تناظر اسم المتصل وماتعرف وش تسوي ودها ترد عليه وتسمع صوته بس مالها حق لانه مو جوالها فتح ناصر باب السيارة : ماشاء الله وش جابك مكاني ؟ تبين تسوقين ! رهف بارتباك : لا وين اسوق , بس كنت ابي اسمع شي ناصر : يالله قومي ارجعي مكانك وقفت رهف جمبه ومدت له جواله : جوالك دق ابتسم لها ناصر وهو ياخذ جواله منها : بعد اخذتي جوالي , كان رديتي رهف : مالحقت ولا كان سويتها وركبت ورى مكانها ودق ناصر على المتصل : هلا فارس , ههههه لا مو مضيعه كان بالسيارة ابد كنت اتطمن على الكل , طيب خلاص الحين نمشي , يالله سلام ابتسمت رهف وهي تسمع صوته , او جزء من صوته وقلبها كان يرقص من الفرحة انتهى البارت | ||||
|
| |
|
22-09-17, 03:02 AM
| #14 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| \\ ’ صباح الخير كيفكم ؟ وش اخباركم ؟ يالله نكمل الرواية مثل ماوعدتكم كل نهاية اسبوع انزل بارت جديد ونبدأ الحين في البارت السادس - الجزء الاول صحت من نومها وهي مرتاحة , تحس انها نامت حق سنة قدام اخذت جوالها تشوف الساعة وشهقت " يــــــوه الساعة 1 في الليل يمه نمت اكثر من 6 ساعات " ] بخلي الشخصية الحين تتكلم عن شعورها [ - رهف - تثاوبت بكسل ورحت الحمام وانتم بكرامه , وبعدها صليت وغيرت ملابسي وطلعت من الغرفة مريت من جمب غرفة غادة لقيت انوارها مقفلة استغربت معقولة نايمة !! بعدها تذكرت ان الساعة 1 بالليل اكيد بتكون نايمة , ضحكت على نفسي ومشيت شوي ومريت من جمب غرفة مها لقيت انوارها شغالة وسمعت صوتها , اكيد تتكلم بالجوال مع صديقتها ماشاء الله عليها حتى في الليل تتكلم مع صديقاتها طلعت من جناحنا ونزلت الدرج , لقيت انوار الصالة شغالة استغربت من صاحي هالوقت دخلت الصالة ولقيت ماجد مندمج مع التلفزيون , ناظرني ببتسامة : صباح الخير رديت له الابتسامة وانا اجلس جمبه : صباح النور , وش تتفرج ؟ رد علي وعيونه على التلفزيون واضح انه مره مندمج : فيلم ناظرت التلفزيون وعفست ملامحي وانا اشوف الدم والوحوش : مدري كيف تتفرج افلام رعب ؟ مايحتاج اقول انه رد علي وعيونه بالتلفزيون : عادي كله تمثيل وقفت بروح المطبخ وانا بموت جوع : تبي شي من المطبخ رد علي : مويه بس دخلت المطبخ وصبيت له مويه ورحت اعطيه الكاسه ورجعت للمطبخ فتحت الثلاجة مالقيت شي يعجبني , قمت اخذت لي تفاحه غسلتها وجلست اكلها بالمطبخ على كرسي الطاولة وانا اتذكر موقف صار لي قبل اربع سنوات كنت وقتها بالثانوي واتفقت مع بنات عمي اننا نتقابل بالسوق رحت عند كشك يبيع اكسسوارات جوال والبنات كانوا جالسين ينتظرون عبير اللي جايه بالطريق مع اخوها كان جمبي مجموعة شباب يحاولون يغازلوني , كنت خايفة منهم بس مااعطيتهم وجهه شجاعة من يومي الله يحفظني فجأة سمعت صوت جمبي حاد وواضح عليه العصبية : خلصتي ! انا اخترعت ولفيت ابي اشوف مين ذا ! بس انصدمت لما شفت فارس كانت عيونه على الشباب وده يقتلهم رديت عليه بصوت واطي : ايه رد علي بنفس النبرة : امشي نرجع للبنات مشيت وراه بدون مااقول شي , من الصدمة ماقدرت اقول شي وقتها كان فارس بالجامعة , وصلني عند البنات وراح طبعا البنات مسكوني تحقيق عن اللي صار وانا فضيحة قلت لهم كل شي من وقتها كبر فارس بعيوني كثير , وكبر حبه معاه وانبسطت اليوم لما سمعت صوته صح ماسمعته وش قال بس انبسطت وخالد ! للامانة شكله عجبني لما صار اسمر وعضل شوي بس فارس اخذ قلبي وعقلي قطع سرحاني صوت ماجد , ناظرته كان يطالع فيني : سرحانه في التفاحه كنت ماسكه التفاحه وكأني اتأملها ابتسمت له : هلا بغيت شي حط الكاسه قدامي وراح طالع من المطبخ : لا بس بنام , تصبحين على خير ناظرت ظهره : وانت من اهله دخلت على امها الصالة وببتسامة : صباح الخير لاجمل ام بالدنيا ام وليد ببتسامه : وش صحبه الحين الظهر حبت بسمه راس امها : ولا يهمك مساء الخير لاجمل ام بالدنيا ام وليد : مساء النور بسمه : وشلونك يالغالية ام وليد : بخير يمه , فطرتي ؟ بسمه : لا باقي , الا ابوي واخواني وينهم ؟ ام وليد : من الصبح وهم بالشركة بسمه : ماشاء الله , الله يوفقهم , الا صح يمه وش مخططاتنا لليوم استغربت ام وليد : وش مخططاته ؟ بسمه : يعني بنطلع بنروح لاحد احد بيجينا يعني زي كذا ام وليد : لا يمه مابنروح ولا بنطلع ولا شي ( وتذكرت ) خالتك لطيفه تسلم عليك ابتسمت بسمه : الله يسلمها وشلونها وشلون بناتها ام وليد : كلهم بخير , جميله بنتها حامل تفاجئت بسمه : حامل !! مو هي قبل 3 شهور ولدت استغربت ام وليد : الا بسمه : وش فيه زوجها مايرحمها شوي , حرام عليه مايكفي جابت طفلين ورى بعض عصبت ام وليد : انتي وش دخلك فيهم , وبعدين هي راضية والاطفال نعمه من ربي بسمه : والنعمة بالله يمه بس قاطعتها امها : مافي لا بس ولا شي , والله يرزق اختك زي مارزقها حزنت بسمه على اختها اللي لها سنتين متزوجه ولا حملت : امين يارب ام وليد : قومي شوفي الغدا خلص بسمه : باقي بدري يمه ام وليد : لا مو بدري الحين اهلك يرجعون من شغلهم ويبون الغدا جاهز ( وسمعت صوت الباب انفتح ) شوفيهم رجعوا دخل ابو وليد ووراه عياله : السلام عليكم ام وليد وبسمه : وعليكم السلام جلس راشد جمب امه بعد ماحب راسها : ماشاء الله بسمه صاحيه بسمه : توني صحيت راشد بقهر : غش والله غش انا من الصبح صاحي وحضرتك توك تصحين بسمه بضحكة : شسوي ماعندي شركة تشغلني وليد كان واقف عند الباب : الغدا جاهز ! ام وليد : جوعان يمه ؟ ابتسم لها وليد : بالحيل يالغالية ام وليد : الله يخس الجوع , روح يمه غير ملابسك وتعال بتلقى الاكل جاهز ابتسم وليد : تسلمين يالغالية راشد حب يتمصلح : يمه حتى انا جوعان وقف ابو وليد عشان يغير ملابسه : وانت سويت شي عشان تجوع تفشل راشد : يبه والله اشغلت ابو وليد : قم غير ملابسك الله يصلحك راشد : ابشر يبه ( والتفت لامه بعد ماراح ابوه ) يمه ابيك بموضوع في الليل خافت ام وليد : خير يمه وش موضوعه وقف راشد وابتسم يطمنها : كل خير يالغالية , بس لوحدنا يمه عشان بسمه ماتسمع انقهرت بسمه : هين ياراشدوه ضحك عليها وطلع يغير ملابسه , حب بس يقهرها بعد الغدا جلسوا في الصالة يشربون شاهي وفارس نام بعد الغدا اما بدر كان نايم فهد : كيف الشركة يبه ؟ ابو فهد : الحمدلله امورها ماشية فهد : يعني الفترة اللي غبتوا كلكم عنها مااثرت عليها ابو فهد : لا الحمدلله فهد : عندكم مشاريع هذي الفترة ؟ استغربت ام فهد : وش فيك يمه ؟ تبي تشتغل بالشركة فهد : لا يالغالية شغلي يكفيني عبير : الظاهر جلسة البيت طفشته فهد : والله تطفش عبير بضحكة : حس بشعوري لما اقولك يافهد طفشت من جلست البيت وانت تقول على الاقل اهون من الدوام فهد : ومازلت مصر على رأيي ( ولف لابوه اللي كان يقرأ الجريده ) يبه نزل ابو فهد الجريده : هلا يبه فهد : احتمال اسافر مع ناصر والعيال للشرقية ابو فهد : زين توصلون بالسلامه فهد بتردد : واحتمال ماارجع معهم استغرب ابو فهد : ليه ؟ عسى ماشر قال فهد بهدوء : الظاهر بقطع اجازتي انصدمت ام فهد : ليه يمه ؟ تونا ماجلسنا معك ابو فهد : اهدأي ياشريفه خلينا نفهم الموضوع ( والتفت لولده ) ليه تقطع اجازتك وانا ابوك ؟ فهد : يبه واحد من زملائي زواجه نهاية هذا الاسبوع ويبيني استلم مكانه وانا استحيت ارده وهو ياما وقف جمبي واستلم عني الشغل ابو فهد بعد تفكير : سووا اللي يريحك ياولدي فهد : تسلم يالغالي ( وناظر امه الحزينه وابتسم لها ) سامحيني يالغالية بس الرجال ماقصر معي واستحيت ارده ام فهد : ماشبعنا منك يمه فهد بحزن : ادري والله ادري حتى انا مابعد شبعت منكم بس شغلي كذا عبير : الله يعيينك على شغلك فهد : ايه والله الله يعيين ، الا يبه عندي اقتراح ابو فهد : قول اسمعك فهد : وش رايك تجون عندي الشرقية منها اكون قريب منكم ومنها تغيرون جو وكمان تزورون زوج عمتي ابو فهد : والشركة ؟ فهد : شفت غبت عنها ثلاث ايام وماشيه امورها مايخالف لو تركتها اربع ايام وكمان عيال عمي هنا مابيقصرون ابو فهد : خلني افكر بالموضوع شوي فهد : خذ راحتك يالغالي عبير : الا صح متى بتسافر ؟ فهد : بعد يومين مع ناصر والشباب ان شاء الله ام فهد رضخت للامر الواقع : توصل بالسلامه يمه فهد : الله يسلمك يالغالية في المغرب كانو بجناحهم يتفرجون على التلفزيون ، فيصل مايحب ينام العصر اما امل تجلس معاه وماتنام الا اذا نام لما خلص الفيلم لفت امل عليه : فيصل ناظرها بحب : عيون فيصل حمرت خدودها : تسلم عيونك حبيبي ، ابي اروح المستشفى استغرب وعقد حواجبه : خير عسى ماشر ، تعبانة !! ابتسمت تطمنه : لا حبيبي مو تعبانه بس ابي اسوي تحاليل زاد عقده لحواجبه : تحاليل وشو ؟ ترددت تقوله تخاف من زعله بس لازم تقوله : عشان اعرف سبب تأخر الحمل ( قالت تبي تقنعه ) انت لو شفت نظرات الحريم لي بالعزيمة كأنهم يقولون هذي لها سنتين ماحملت اكيد العيب منها , وطول الوقت وهم يسألوني ليه ماحملتي ؟ طيب رحتي سويتي تحليل رحتي مدري وشو , حبيبي الله يخليك خلينا نروح نسوي التحاليل ابي اتطمن بس اني سليمة مافيني الا العافية ابتسم لها بحنان : حبيبتي اذا ربي ماكتب علينا نجيب علينا انا راضي بقسمته ونصيبه وصدقيني عمري مازعلت من هذا الشي قالت بدلع : بس ابي اتاكد ابتسم لها : فديت اللي يتدلعون ، ابشري لما ارجع ان شاء الله من الشرقية نروح نسوي التحاليل بفرحه : ججد فصول ! خق عليها : وجد الجد ، امشي نرتب شنطتي وننزل لاهلي مشت معاه وهي ماتدري وشهي نيته ، بدل ماترتب شنطته خلاها تتروش وبعد ساعة نزلوا تحت عند اهله سمعت امل صوت خالد بالصالة مع اهله ولفت الطرحه على راسها : السلام عليكم الكل : وعليكم السلام حب راس ابوه وامه وجلس وجلست زوجته جمبه شاف خالد ومرام يتضاربون مو بعادتهم مرام بنرفزه : هييا ياخالد وافق خالد : قلت لك مو موافق مرام لفت لابوها : يبه شوف بيفشلني من البنات خالد : وش اللي افشلك ، قلت لك بكره معزوم عند اخوياي مرام : وبكره عندي زواج وقلت للبنات انا بمر اخذهم خالد : خلاص روحي مع السواق طلعت عيون مرام قدام : وش اروح مع السواق ! لا ماني رايحه معه وانا كاشخه اخاف على عمري انا فيصل بصوت حاد : خلاص انتي وياه ، عيب تتضاربون قدامي ابوي وامي خالد بحرج : سامحني يبه وانتي يمه ابو فيصل : خلصتم نقاشكم ؟ مرام بزعل : ايه يبه ، خلاص مو لازم احضر الزواج بكره ام فيصل حزنت على بنتها : لا يمه روحي الزواج وانبسطي فيصل : انا اوديك بكره انبسطت مرام : منجد فيصل !! ابتسم لها : منجد ابو فيصل يناظر خالد اللي حس براحه لما اخوه وافق يوصل اخته : انت اللي بترجع اختك وبنات عمك ، سامع !! خالد : حاضر يبه ( ووقف ) بروح الخيمة لناصر وطلع من الصالة ونزلت امل الطرحة فيصل : مين بنات عمي اللي بيجون معاك ؟ مرام : انا وعبير وغادة واسماء بس ، وامل اذا تبي التفت فيصل لزوجته : بتروحين معهم ؟ امل ابتسمت : ودي اروح , شرايك فيصل : طيب بس لا تتأخىين ، ونوف ؟ مرام : باقي ماقلت لها فيصل التفت يدور لاخته : الا هي وين ؟ ام فيصل : عند عمك بالخيمة وقف فيصل بضحكة : خليني الحق عليه قبل لا تجننه ارسلت مرام لغادة ان فيصل اللي بيوديهم وقالت لابوها : يبه فيصل اللي بيودينا بكره الزواج ابو ماجد : الله يعطيه العافيه ام ماجد : لا تطولين بالزواج يمه غادة : ابشري يالغالية نطت لها رهف : غادة زواج مين ؟ غادة : زواج صديقتي جواهر تفاجئت مها : انخطبت ماشاء الله ؟ ام ماجد : خلاص الحرمه حامل الحين رهف : ههههههههه لا يمه مو لهذي الدرجة ، غادة ودي اجي معاك الزواج غادة : حياك بتفرح جواهر اذا شافتك ( والتفتت لامها ) يمه تعالي معي بكره ام ماجد : لا يمه مقدر ، ظهري يعورني من الجلسة الطويلة غادة : والله جواهر ودها تشوفك ام ماجد ببتسامه : وانا ودي اشوفها ، ان شاء الله نزورها ببيت رجلها غادة : ان شاء الله تخل عليهم ماجد وهو لابس ثوب وشماغ : السلام عليكم ابو ماجد : هلا وعليكم السلام ، هاه رحت لعمك سعود جلس ماجد وهو مستغرب : لا يبه كنت عند وليد ابو ماجد وقف : على خير ان شاء الله ، يالله بروح المسجد اقرأ شوي قبل الاذان وطلع وتركهم ام ماجد ماصدقت ان زوجها طلع والتفتت لولدها : يمه ماتبي تشوف حرمتك ماجد بهدوء : الا يمه بس مو الحين اشرت غادة لاخواتها وطلعوا لجناحهم وتركوا امهم مع ماجد استغربت ام ماجد : وليه مو الحين ؟ ماجد : يمه عندي اشغال لازم اخلصها اول ام ماجد بستغراب : يعني الاشغال اهم من شوفة زوجتك ماجد : يالغالية يمه افهميني ، انا الحين توني راجع من برى وغير كذا ابي ادور لي وظيفة قبل مااسافر مع الشباب لشرقيه مااقتنعت امه بكلامه وابتسم لها : اوعدك اول ماارجع من الشرقيه اشوفها ام ماجد : يمه وش تبي عمك يقول عنك له اسبوع بالرياض ولا جاء يشوف بنتي ماجد : يمه عمي بكلمه وبقنعه بكلامي ، اصلا شلون اكمل مشواري معها - قصده الزواج - وانا بدون وظيفة اقتنعت امه : الله يهديك حب راسها وجلس جمبها وهو يفكر بعبير كيف يقابلها الحين له اكثر من اربع ايام من يوم جاء الرياض ولا قد شافها ولا يبي يشوفها والحين بخليها تنتظر شوفته اسبوع كامل واحتمال يخليها لنهاية الشهر وهو يبي يجرحها ، يبي يحسسها انه تاركها ومايبيها اتحملي جرحي يابنت عمي زي ماتحملت جرحك قفلت باب الجناح وراها وجلست على الكنبة جمب اخواتها وسوت مكالمة جماعية بين نوف وبسمه وفاتن : هلا بنات كيفكم فاتن : بخير بسمه : تمام نوف : طيبه رهف بضحكة : والله كأنكم في مدرسة , الا اسمعوا بكره البنات بيروحون زواج وش رايكم نروح معهم سمعتها غادة وضحكت : هي مو زواجك عشان تعزمين على كيفك رهف : والله بعزم بكيفي بعدين جواهر مابتقول شي ( ورجعت تكلم البنات ) هاه بنات وش رايكم ؟ بسمه : والله عادي اروح , الا زواج مين ؟ رهف : زواج جواهر صديقة غادة نوف : ومرام فاتن بضحكة : واسماء بسمه : ههههههههه ماشاء الله الكل يعرفها الا انا , خلاص عادي انا بروح نوف : ايوه صح ترى حتى امل بتجي تفاجئت بسمه : منجد !! ماقالت لي اجل خلاص بجي مع اختي رهف : تمام وانتي فاتن ؟ فاتن : اظن مايمديني اجي استغربت بسمه : ليه ؟! فاتن : تحددت ملكة اسماء وبكره بنروح السوق تفاجئت نوف : احلفيييييي !! فاتن : والله بسمه : وناسه اخيرا بدأ الحماس نوف : يالله نتفق يابنات ونتقابل بالسوق زي اول رهف : طيب والزواج حق بكره ؟ نوف : انا بجي ان شاء الله بسمه : وانا بعد , بس مع مين اروح !! رهف : غادة تقول ان فيصل بيوصلهم الزواج بسمه : مااظن سيارته تكفينا , خلاص بكلم وليد يوصلنا نوف : لااااا ! الا وليد , كل شي الا وليد فاتن ضحكت : باقي متعقده من ذاك اليوم نوف : وازود بعد المهم نكلم أي احد غيره بسمه : نشوف ناصر يمكن يوافق نوف : خلاص بخلي فيصل يكلمه رهف بتساؤل : ليه مو راشد ولا خالد يودونا نوف : خالد يقول انه مشغول مع اخوياه واكيد راشد معاه فاتن : يالله بنات سلام , امي تبيني البنات : سلام بسمه بخبث : بنات ليه مانخلي ماجد يودينا رهف : مااتوقع يوافق بس بحاول اكلمه , الا صح ليه تبينه يودينا ؟ بسمه : عشان عبير نوف ضحكت : يابخت من جمع راسين بالحلال رهف : ههههههه خلاص بكلمه واشوف وش يقول بس مااوعدكم يوافق بسمه : ان شاء الله يوافق دخلت عند اهلها الصالة بعد ماخلصت مكالمتها مع البنات كان ابوها ووليد يناقشون امور الشركة , وامها تكلم امل بالجوال وليد : فيه مستثمر بالشرقية ناصر رتب لقاء معه ابو وليد : بباله مشروع ؟ وليد : والله مدري عنه بس متفائل خير فيه كانت تناظر ابوها واخوها بملل : متى بتخلصون اجتماعكم ؟ رفع وليد حواجبه اما ابوها قال : تقريبا خلصنا , بغيتي شي بسمه ابتسمت : ايه يبه طلبتك استغرب ابوها : امري بسمه : بكره البنات بيروحون زواج وابي اروح معهم ام وليد بعد ماقفلت من بنتها : زواج مين يمه ؟ بسمه : صديقة مرام وغادة وعبير , وامل كمان بتروح ابو وليد : ضروري تروحي يمه ؟ بسمه تتمسكن : يبه الله يخليك ابي اروح معهم وانبسط ابو وليد : روحي لكن بشرط انبسطت بسمه : امر تدلل ابو وليد وهو يناظر ولده : تجيبين عروس لاخوك تفاجئ وليد اللي كان يراقبهم بصمت : عروس لي ؟ ابو وليد ببتسامة : ايه عروس لك ولا ماتبي تتزوج استغلت ام وليد الفرصة : ايه يمه تزوج شف اللي بعمرك كلهم متزوجين تورط وليد لكن ابتسم لهم : ابشروا ان شاء الله بتزوج لكن مو الحين ام وليد : متى يمه ؟ وليد : قريب يالغالية قريب بسمه لفت لابوها : يعني يبه اروح ابو وليد ضحك : مانقدر نغير السالفة يعني ابتسمت لابوها بخجل : لا ماتقدر الا لما تعطيني الجواب ابو وليد : روحي يمه وانبسطي معهم , بس مين يوديك بسمه : فيصل رفع وليد حواجبه : ليه يوديك وانا موجود ؟ بسمه : لانه بيودي البنات واكيد بيمر ياخذني وليد : لا انا اللي بوديك بسمه : بس يمكن تكون مشغول وليد : لا بكره فاضي وماعندي شي بسمه : طيب يمـ.. اعطاها وليد نظرة وسكتت ماقدرت تقول له لا توديني عشان نوف ماتبيك وليد بستغراب : راشد وين ؟ ام وليد : نايم تعبان من الشغل ابو وليد : هذا وهو مااشتغل شي وليد بضحكة : ولدك يمه مدلع ام وليد : خليه يتدلع بعد عيني ماصدقت يكون حولي | ||||
|
| |
|
22-09-17, 03:03 AM
| #15 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| ’ البارت السادس - الجزء الثاني قفل من الجوال وناظر ممر المستشفى وهو يتنفس بضيق , ابوه صار له اسبوعين وزيادة وهو متنوم بالمستشفى , ولما الحين ماسمحوا بخروجه مع ان حالته مستقره دخل الغرفة لقى ابوه منسدح وواضح عليه التعب وجهه كان كله هالات سودا غير وزنه اللي نقص ابتسم له : يبه ناصر يسلم عليك ابوه بتعب : الله يسلمه هو شلونه وش اخباره سحب ياسر كرسي وجلس جمبه : بخير ماعليه يقول بعد يومين بيجي يزورك ان شاء الله ابو ياسر : الله يعطيه العافيه ( وناظر ولده اللي له يومين مرافق معه بالمستشفى ) يبه روح البيت نام لك شوي ابتسم له ياسر يحاول يخفي ارهاقه : لا يبه بقعد معك الاب : انا بخير ومافيني الا العافية ياسر : مااقدر اتركك لوحدك يبه ارجوك الاب : مابقعد لحالي , الممرضات برى راح ينتبهون لي انت روح البيت وارتاح رضخ ياسر بالامر الواقع وهو وده يروح ينام شوي : طيب بكلمهم ينتبهون لك اكثر طلع من عند ابوه بعد ماتطمن عليه وكلم الممرضات بطريقه وراح لبيته وقف سيارته بالحوش ودخل البيت بهدوء وتوجهه للصالة شاف امه واخته : السلام عليكم ام ياسر وبنتها : وعليكم السلام حب راس امه وجلس جمبها : شلونك يمه ؟ ام ياسر – شيخة – بزعل : توك تفتكر ان لك ام ابتسم لها : حقك علينا ياام ياسر طنشته ام ياسر : وشلونه ابوك ؟ ياسر : الحمدلله كأنه طيب اليوم ام ياسر : لو انه يرضى ياكل كان الحين صار حصان يناقز بس هذا ابوك وهذا طبعه يحب يتدلع اذا مرض تضايق ياسر من كلامها , هذا ابوه مهما كان : يمه الله يهديك مو وقته هالكلام ام ياسر : ماعلينا , بكره بنروح السوق انا واختك فضي لنا نفسك تفاجئ ياسر : وابوي مابتزورونه ام ياسر : زرناه امس , ماله داعي كل يوم نزوره تنرفز ياسر منها وقال يغير الموضوع : طيب انا جوعان , ابي اكل شي وانام ام ياسر : الحين بكلم الخدامة تجهز لك اكل ريم بضحكة : يمه الخدامة نايمة ياسر : طيب قومي سوي لي شي اكله ريم بدلع : معليش انا ماادخل المطبخ ناظرها مصدوم مارحمت حال اخوها اللي له يومين ماشافته وبصوت حاد : قومي المطبخ سوي لي اكل ناظرت ريم في امها : يمممممه ! خافت من ام ياسر من ولدها لانه اذا عصب مايصير يشوف قدامه : معليه يمه قومي تنرفزت ريم وراحت للمطبخ وهي معصبه , دايم اخوها يصارخ عليها وامها ماتقول له شي لف لامه : يمه ترى دلعك لها ما راح يفيدها ماردت عليه امه وكمل هو : ترى ناصر بيزورنا بعد يومين مع العيال ام ياسر : زين تذكر ان له اخت تعوذ ياسر من الشيطان ووقف : انا بروح انام , واكل بنتك ماابيه طلع من الصالة وترك امه اللي نادت بنتها طلت ريم براسها من المطبخ : هلا يمه ام ياسر : تعالي يمه اخوك طلع ينام ريم وهي تمشي متنرفزه : كان من زمان راح نام وفكني من دخلة المطبخ ام ياسر ببتسامه : تعالي عندي لك خبر نطت لها ريم بحماس ونست نرفزتها : وشهو يمه امها : ناصر وعيال اخواني بيجون بعد يومين انبسطت ريم : صصصصدق !! امها ببتسامه خبث : ايه صدق ريم : وليد يمه بيجي ؟ امها : اتوقع يجي ريم برجاء : يمممه تكفين ضبطيني معاه , ابيه يتزوجني مو كفايه ضيعت فيصل من يدي امها : ماعليك بخليه يتزوجك ( وبشماته ) وفيصل ربي بلاه بزوجه عقيم تفاجئت ريم : جد يمه ! امل عقيم امها : ايه عقيم شوفيهم لهم اكثر من سنة متزوجين ولا جابت له عيال ريم : يستاهل لو انه تزوجني كان جبت له بدل الولد عشر بس خليه يستاهل ] العايلة الجديدة , عايلة ابو ياسر [ ابو ياسر – محمد – رجل طيب وعلى نياته بس ربي رزقه بزوجه عكسه ام ياسر – شيخة – اخت الاعمام الوحيده , سليطة اللسان وماتهتم ببيتها همها الوحيد تزوج بنتها واحد من عيال اخوانها ياسر – الاخ الكبير والوحيد عمره 30 موظف بالاتصالات يكره تصرفات امه واخته , حازم وشديد مع اخته ريم – البنت الوحيده عمرها 25 عاطلة وجالسة بالبيت , تحب تتميلح قدام عيال اخوالها وودها تتزوج واحد منهم قفلت التلفزيون وهي تتثاوب من الطفش , قفلت انوار الصالة وطلعت لجناحها هي واختها مريت من جمب غرفة اختها لقتها صاحيه : باقي صاحيه ؟ مرام وهي تناظر الفساتين : ايه , اسمعي تعالي اختاري لي لبس للزواج نوف : فيني نوم سحبتها مرام : تعالي اختاري لي وخلينا نسهر شوي ناظرت نوف الفساتين اللي فوق السرير : الاسود حلو مرام : حللت فلوسه لبسته 4 مرات نوف بتفكير : طيب الموف والله بطل مرام : محتاره بيني وبين التركواز ابتسمت نوف : شوفي انتي خذي التركواز وانا بلبس الموف تخصرت مرام : لا بالله نوف : والله جد ( وبرجاء ) هييييا بسوي شعرك كمان مرام : تسوينه كيرلي ؟ نوف ابتسمت : واسويه كيرلي بس باخذ الموف مرام : خلاص خذيه جلست نوف فوق السرير وهي تشوف مرام تعلق الفستانين : مروم مروم وهي مشغولة بالتعليق : هاه نوف : تعالي اجلسي ابيك بسالفة جلست مرام جمبها : هلا نوف وهي تناظر اختها : لك فترة حالك مو عاجبني استغربت مرام : انـا !! نوف : ايه انتي , من يوم العزيمة وانتي متغيره , وش صار لك ؟ حاولت مرام تبعد عينها من عين اختها لانها اذا كذبت تنكشف من عيونها : مافيني شي نوف : الا فيك , قولي هيا انا اختك ومابقول لاحد اوعدك مااقول لاحد كانت مرام تبي تفضفض لاحد وربي جاب اختها لها : قابلت فهد وجهه لوجهه انصدمت نوف : احلفففففففي ! حمرت خدود مرام : والله قابلته وشافني وشفته نوف تحمست : قولي بالتفصيل الحين الحين بعد ماقالت لها مرام اللي صار , انبسطت نوف : الله وناسه واخيرا شفتي الحب استحت مرام ولا علقت نوف : يارب انه يخطبك قريب , يوه صح نسيت انه خاطبك يارب تصير خطبه رسميه اندق الباب وخافوا البنات مرام بخوف ليكون احد سمعهم : مين !! امل وهي تطل براسها وابتسمت : صباح الخير مرام ونوف وجههم مخطوف منه اللون : هلا صباح النور نوف : غريبة مانمتي !! مرام : وين فيصل عنك امل وهي تدخل الغرفة : فيصل نام لما كنت ارتب شنطته لما خلصتها حسيت اني نشيطه قلت اسهر معكم شوي ارتاحت مرام لما حست ان امل ماسمعتهم واشرت على سريرها تجلس معاهم : حياك اسهري نوف ببتسامه : الليلة سهرتنا صباحي امل : لا واللي يسلمك , حدي لما الفجر وبروح انام ( وشافت الفساتين اللي فوق السرير ) الله مرام هذي فساتينك مرام ببتسامه : ايه , طلعتها عشان نوف تختار لي منها اللي بلبسه بكره امل : الا صح وش الوانكم عشان مانلبس نفس اللون نوف : انا موف ومرام تركواز امل بتفكير : حلو , انا بلبس الاحمر نوف ابتسمت : احلى يامولع ضحكت امل بخجل : اوص لا يسمعك فيصل ( وتذكرت ) الا صح بسمه تقول انها بتجي نوف : ايوه حتى رهف واظن مها بعد امل : باقي فاتن وتكمل العصابة ضحكت نوف : فاتن ماتقدر بتنزل السوق بكره مع العروس مرام : الا صح تحددت ملكة اسماء , عندك خبر ! تفاجئت امل : منجد ! ماشاء الله الله يتمم لها على خير ويهنيها ( وغمزت لهم ) وعقبالكم نوف : احس ان مرام قربت تصير خطوبتها رسميه دقتها مرام , استغربت امل وابتسمت : وش عرفك ؟ نوف ببتسامه : قلبي يقول لي امل : ياخوفي انتي تنخطبين رسمي مو هي نوف : يجيب الله مطر اليوم الثاني في العشا كان جالس على كرسي المدخل ينتظرها تنزل وهو معصب منها لها ساعة تقول له دقيقة وبنزل تأفف وهو يناظر ساعته متى ودها تنزل شافها نازله من الدرج وبيدها الكعب وانتم بكرامه وباليد الثانية عبايتها وشنطتها ابتسمت له باعتذار لما قربت منه وهي تعرف انه معصب : والله معليش والله مااعيدها ناظرها بطرف عينه ولا رد عليها , وقف وتوجهه للمرايه يعدل شماغه صفرت بسمه باعجاب وهي تقزه من فوق لتحت : ماشاء الله اخوي كاشخ اليوم , على وين ؟ وهو يناظر المرايه : معزوم على العشا جلست على الكرسي تلبس كعبها : والله صاير حلو بالشماغ والثوب مشى للباب : اخر مره اوديك مكان بسمه بحزن : لييييييه ؟! لف لها : نعنبو بليسك ساعة انتظرك تشرفين هذا وهو زواج مايقرب لك , اجل لو كان زواج يقرب لك ننتظرك يوم كامل كتمت بسمه ضحكتها وقالت بدلع : والله ماعيدها ولودي خزها : اصغر عيالك انا ولودي مشى رايح لسيارته وهي وراه ساكته ماتقدر تتكلم وهو واضح انه معصب من تأخيرها اول ماتحركت السيارة قال لها : كلمي بنات عمك ينتظرون عند الباب مابجلس ساعة انتظرهم زيك بسمه وهي تطلع جوالها : ابشر ( ودقت على رهف اللي ردت بعد رابع رنه ) هلا رهوف شلونك وليد وهو يسوق : شلونك وش اخبارك هذي بعدين , اعطيهم الزبده بسمه وهي تناظر اخوها : رهف اسمعي 5 دقايق واحنا عند الباب وليد : دقيقتين بسمه : دقيقتين واحنا عند الباب , انتظرونا عند الباب , ولو كان عند باب الشارع بعد مانقول لا ابتسم وليد على جمب وكمل سواقه بدون ولا كلمه , قفلت من بنت عمها اللي باقي مالبست فستانها وورطتها وقف عند الباب ودقيقة وهم طالعين من الباب لف وليد لاخته : ليتك لو كنتي زيهم , تخلصين بدري ولا تخليني انتظرك ساعة ماقدرت ترد لان البنات ركبوا السيارة غادة كانت فرحانه لانها بتشوف حبيبها , اما رهف منحرجه شوي بسمه بضحكة : راكبين مع يهود انتم , سلموا حاول وليد يكتم ضحكته وهو يمشي بالسيارة غادة ورهف : السلام عليكم وليد : وعليكم السلام , شلونكم يابنات العم غادة بصوت واطي : الحمدلله بخير , معليش وليد بنتعبك معنا اليوم ابتسم وليد : شدعوه يابنت العم بسمه لفت لهم بستغراب : وين مها ؟ رهف بصوت واطي وبعصبيه : الكلبه راحت عند صديقتها واخذت ساعتي الروليكس بس هين اوريك فيها اذا رجعت بسمه : الخاينه قالت بتجي الزواج غادة : صديقتها عزمتها وعزمت صديقاتها الباقيين بسمه : اهها بس برضو يارهف هزأيها بدالي ناظر وليد اخته على جمب وقال بصوت واطي : تعرفين الزواج وين ؟ عضت بسمه شفايفها من الفشلة : لا غادة سمعته : في قاعة ,,,,, هز وليد راسه واتصل بجواله : هلا فيصل فيصل كان عند بيت عمه : هلا وليد عفست نوف ملامحها لما سمعت اسمه وليد : اسمع انت وين ؟ فيصل : عند بيت عمي سعود انتظر بنت العم عقد وليد حواجبه : بيت عمي سعود !! حلو الحين جايك , اعطيني ربع ساعة بس فيصل : اوك انتظرك , سلام قفل فيصل منه وعينه على باب البيت اللي انفتح وطلع منه فهد نزل فيصل من السيارة يسلم على ولد عمه ويسولف معه لما تطلع عبير مرام كانت تتأمله وقلبها يدق من الفرح ابتسمت لا اراديا لما شافته يضحك ويبتسم مع اخوها تأملت شكله كان لابس بدلة كاجوال جينز وتيشيرت اخضر وشعره شبه ممشط ملامحه كانت حاده بحكم انه ضابط بس تختفي حدتها لما يضحك وسماره اللي ذبحها وخلاها تعشقه اكثر واكثر شافته جاي للسيارة مع اخوها وبلعت ريقها من الخوف , كانت هي راكبه ورى اخوها فتح فيصل باب السيارة : توصي على شي يالنسيب فهد ابتسم : انتبه لاختي فيصل بضحكة : بنتبه لزوجتي اكثر من اختك , سلام وركب السيارة وبعد فهد عنهم نوف دقت مرام كانت تنتبه ان عبير جات مرام كانت بعالم ثاني , عالم كله فهد وبس ابتسمت لها عبير وتركتها سرحانه امل وفيصل كانوا يسولفون وهم ينتظرون وليد ثواني ووصل وليد ومشي ورى فيصل اللي حرك سيارته لما شاف سيارة وليد بعد ماوصلوا القاعة وفسخوا عباياتهم لفت رهف لبسمه وبحماس : اخوووووك طالع وسيم بشكل بسمه : ايه محلو اليوم بزيادة غادة تتصنع البراءة : وش عنده ؟ امل بستهبال : يكشخ للعروس اللي بنختارها له اليوم انقبض قلب غادة اللي مالحقت تفرح بشوفته وهو كاشخ عبير مصدومه : قرر يتزوج بسمه بفرحه : اييه واخيرا غمزت عبير لمرام : عقبال فهد يارب ابتسمت لها مرام بخجل نوف : وناصر يارب ضبطوا البنات اشكالهم عند المرايه ودخلوا وهم مبتسمين من العيون اللي تناظرهم وتلاحقهم شافتهم ساره اخت العروس ( اصغر منها باربع سنوات ) وابتسمت لهم لما عرفتهم : هلا بنات بعد ماسلمت عليهم وتعرفت على الباقين مرام ببتسامه : مبروك لجواهر وعقبالك يارب رفعت ساره يدها اليمين ولمعت الدبلة بيدها وببتسامه : قولي عقبال زواجك ابتسمت لها غادة : ماشاء الله ملكتي ساره ابتسمت بخجل : ايه قبل خمس شهور امل : ماشاء الله الله يتمم لك على خير ابتسمت عبير وبخجل : سارونه عادي نشوف العروس ساره : ايه اكيد , تعالوا وطلعوا البنات للعروس وسلموا عليها , وحضنوها وسولفوا معها شوي ونزلوا يسلمون على الضيوف وجلسوا بطاولة وكل العيون عليهم رهف : يالله حسيت اني شخصية مشهوره نوف : وان كل حركاتك مراقبه رهف : ايييه والله مرام : ماشاء الله الكوشه حلوه غادة : ايه والله حلوه سمعت انها من تصميم ,,,,,, تذكرت امل هالاسم وببتسامه : نفس المصممه اللي صممت كوشتي بسمه : منجد نفسها ؟ امل : ايه نفسها مرام : ماشاء الله شغلها روعة قالت رهف بحسن نيه : عبير لازم تروحين لها عشان تسوي كوشتك ابتسمت لها عبير وقلبها ينزف , له اكثر من خمس ايام بالرياض ولا فكر يزورها او يشوفها مرام : يارب تكون المطربة " الدقاقة " صوتها حلو واغانيها حماس اخذت بسمه ثلاجة القهوة وصبت لها : احد يبي قهوه وصبت لبنات عمها معها نوف وهي تناظر الضيوف : مرام وين ام المعرس واخواته مرام : مااعرفهم نوف : طيب هي عندها اخوات غير ساره ابتسمت مرام : بس بنتين وخمس اخوان طلعت عيون رهف : ماشاء الله خمس اخوان , عادي يسلفونا اخو يصير اخو لماجد غمزت لها بسمه : يمكن تتزوجين واحد منهم ويصير نسيبكم رهف بخجل : لا ياحبيبتي , ان شاء الله مااتزوج من برى العايلة بسمه وهي تناظر الساعة : بنات متى العشا امل بضحكة : تونا وصلنا , اصبري بسمه : طفشت مرام : الحين تجي المطربة وقومي ارقصي في الليل تجمعوا الشباب كلهم في بيت ابو ماجد ولحقهم وليد بعد ماخلص من عزيمته ناصر : شباب متى بنتحرك بكره ؟ ماجد : انا اقول نصلي الفجر ونتوكل على الله وليد : والشركة ؟ لازم نداوم ابتسم ماجد : يووه نسيت ان عندكم دوام ابتسم فيصل : ايه وش عليه الاخ عاطل عن العمل فهد : والله جلست البيت تطفش اسأل مجرب ناصر بضحكة : تعودت على كرف الشغل فهد : ماتوقعت اني بقولها بس الله يذكر ايام الشغل بالخير ، بس يالله كلها ايام وبرجع للكرف استغرب وليد : ليه عسى ماشر ابتسم فهد يطمنه : الشر مايجيك بس بقطع اجازتي عشان بستلم مكان واحد زواجه قريب فيصل : قله يمسك عنك فترة زواجك فهد : افا عليك قلت له ناصر : طيب نرجع لموضوعنا ، متى بنتحرك ؟ وليد بتفكير : انا من رأيي نداوم لما الظهر ونرجع ننام شوي وبعدها نمشي فيصل : نداوم نص دوام ، عمي علي بيعذرنا العم علي اللي هو ابو وليد هو رئيس الشركة بحكم انه اكبر اخوانه وليد : خلاص انا بعطيه خبر بكره ماجد : طيب الحين مين بياخذ سيارته ؟ سيارتي باقي ماوديتها الورشة ومااضمنها بالسفر فهد : انا ضروري اخذ سيارتي عشان الدوام ناصر : خلاص ماجد بمر اخذه وليد : انا ماابغى اخذ سيارتي فيصل : تعال بكره عندي وحط سيارتك بالكراج وسافر معي ابتسم وليد : ابشر يالنسيب فهد : اجل نتقابل بكره في بيت عمي عبدالله الكل : تم ناظر ماجد ساعته ولقاها ٢ بالليل وقال : مين بياخذ البنات تثاوب فيصل : انا قاعد صاحي عشان اخذهم ، المفروض خالد ياخذهم لكن بيطول مع اخوياه ماجد : خلاص انا باخذهم وانت روح البيت نام بكره وراك دوام وسفر ( وناظر وليد وناصر ) واسمعي ياجارة ابتسموا لما فهموا قصده فهد : وانا باخذهم معك ، بحكم اني عاطل وما وراي دوام بكره وقف ناصر : هذا العشم بعيال اخواني يالله تصبحون على خير وقف وليد ومعه فيصل : نتقابل بكره على خير قال ماجد بعد ماراحوا الشباب ماباقي غير فهد : خلني ارسل لغادة لا تفضحني عند الشباب ( والتفت لفهد ) تتوقع زواجهم يخلص متى فهد : تقريبا ٣ الفجر طلعت عيون ماجد : الله يحلل زواجات بريطانيا اجل تفاجئ فهد : حضرت زواجات هناك ؟ ابتسم : ايه زواجات اخوياي الاجانب ، حضرت تقريبا ٤ زواجات فهد : كنت معهم في كنيستهم وكذا ؟ ماجد يحاول يتذكر : لا مااحضر حق لما يقولون نذورهم لبعض ، احضر اللي بعدين لما يطلعون الاكل كنت احضرها مجبور مع اخوياي العرب فهد : عشان تقولون للكفار ان احنا عندنا صلة رحم ؟ ابتسم ماجد : اييييوه عليك نور ، بغيت اتحمس مره واروح لهم بالثوب والشماغ بس اللي معي كانوا رخوم بعد ماانزفت جواهر وسلموا عليها البنات توجهوا للعشا نوف باعجاب : ماشاء الله اخوانها حلوين عبير : حتى المعرس حلو نوف ابتسمت : He's taken غادة : يالله بنات عجلوا عشان ماجد وفهد جايين في الطريق استغربت نوف : مو خالد اللي كان بيجي ياخذنا ؟ غادة : والله مدري بسمه: طيب الحين كيف ترتيبنا ؟ انا مع مين اروح امل : نفس تقسيمنا واحنا جايين قالت مرام بسرعه وخدودها حمرا : لا انا ابي ارجع مع غادة ابتسمت عبير : لا ياحبيبتي زي ماجيت معاك ارجعي معاي ترجتها مرام بس عبير كانت مصره على رأيها رهف : خلصتي انتي وهي ؟ استغربت نوف : ايه انا خلصت بسمه : وانا بعد وقفت رهف وهي تعدل فستانها : امشوا نروح نسولف مع ساره شوي وراحوا البنات مدت غادة جوالها لعبير : بروح اجيب لي كيك وخلي جوالي معاك اخذت عبير الجوال منها : طيب واذا احد دق عليك ابتسمت لها غادة : عادي ردي عليه تركتها قبل ماتعترض وهي مبسوطه على الانجاز اللي سوته هي عارفه انهم ماتكلموا من يوم جاء الرياض والحين بتخليهم يتكلموا يمكن جدار العناد اللي بينهم ينكسر دق جوال غادة واخترعت عبير ناظرت امل : وش اسوي امل تتصنع اللامبالاة : عادي ردي هو زوجك بلعت عبير ريقها وردت : الو ماجد : هلا غادة ارتبكت وقلبها دق : ااااااه هلا شك ماجد بالصوت وعقد حواجبه : غادة !!! توترت ماتدري وش تقول انتهينا + ابي اسمع توقعاتكم ؟! | ||||
|
| |
|
29-09-17, 03:06 PM
| #16 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| \\ البارت السابع وقف ماجد سيارته قريب من مدخل النساء ووقف فهد وراه واشر له انه بيتصل عليهم بعد سادس رنه ردت : الو عقد حواجبه يحاول يميز الصوت : هلا غادة ارتبكت وقلبها دق : اااااااا هلا شك ماجد بالصوت وقال بشك : غادة !! توترت ماتدري وش تقول : اااا لا ابتسم بسخرية لما عرفها وقال بقصد : اوه بسمه ، شلونك !! انصدمت لهذي الدرجة ماعرف صوتها : بخير ماجد " تحملي جرحي " : اسمعي بسمه انا برى حاولت تحبس دموعها لا تنزل مصدومه منه كيف ماعرف صوتها : طيب خمس دقايق ونطلع ماجد : لا تطولون وترى فهد معاي قفل منها وقلبه يعصره ، مايدري ليه سوى فيها كذا بس تستاهل هي اللي جرحتني بالبداية وهذا ثالث جرح اجرحها فيه وانتظري الجاي ياعبير قفلت عبير منه وهي باقي مصدومه وتحاول تحبس دموعها لا تنزل لهذي الدرجة صوتها تغير عليه لهذي الدرجة ماقدر يميز صوت زوجته ابتسمت امل لما شافتها ساكته كانت تحسب انها سرحانه بزوجها لانها كلمته ماحبت تقطع سرحانها جات لهم غادة وبيدها صحن مليان كيك وحلويات : هاي صبايا ابتسمت لها امل : هلا قالت غادة بعد ماجلست وشافت سرحان عبير : احد اتصل امل : ايه ( واشرت على عبير بعيونها ) شوفي الاخت كيف هيمانه بصوته ابتسمت غادة وبقلبها تدعي ان ربي يهديهم ويصلح بينهم قامت امل : انا بروح انادي البنات فضلت انها تروح وتترك غادة وعبير لوحدهم ناظرت غادة فيها وببتسامه : وش قال ماجد عبير بصدمة : اسمعي بسمه انا برى انصدمت غادة : ماعرفك !!!! دمعت عيون عبير : لا تنهدت غادة بحزن على حالها وقالت تبي تواسيها : يمكن مع الازعاج ماقدر يميز صوتك يالله امسحي دموعك قبل لا يجون البنات وامشي نجيب العبايات بعد دقايق تجمعوا البنات عند حقت العبايات ولبسوا عباياتهم وطلعوا كان ماجد مقرب سيارته " اخذ سيارة ابوه الجمس " عند الباب ووراه فهد بالرنج في سيارة فهد كان يناظرهم واعصابه على نار يبي يشوف مرام بتختار سيارته ولا سيارة ماجد وانبسط لما سمع صوتها بسيارته البنات اول ماركبوا : السلام عليكم رد فهد السلام ببتسامه وحرك سيارته لف لعبير وسألها : هاه كيف الزواج ! اخفت عبير حزنها : حلو ماشاء الله فهد : يعني انبسطتوا ؟ عبير : الحمدلله قالت عبير تبي تحرجه : فهد ترى بنات عمي عبدالله معنا يعني وقف عند بيتهم ابتسم فهد وهو فاهم قصدها , انه ترى خطيبتك معنا : حاضر عمتي نوف ماقدرت تمسك نفسها : فهد عادي اسأل سؤال استغرب فهد : تفضلي نوف بلقافة : ليه خالد ماجاء ياخذنا ابتسم فهد وبمزح : اففا يعني ماتبيني اوصلكم دقتها مرام على جمب وبهمس عشان مايسمعها : وقته هالسؤال نوف : فيني لقافة لازم اعرف ( وقالت تكلم فهد ) لا محشوم ياولد العم بس خالد وعدنا يجي ياخذنا واستغربت انه ماجاء فهد : خالد بيطول مع اخوياه امل بخجل : سامحنا بنتعبك معنا فهد : لا عادي تعبكم راح في سيارة ماجد ماجد : بشروا يابنات انبسطتوا في الزواج غادة : والله كان حلو والمطربة ماشاء الله بطله بسمه : والعشا كان لذيذ ماقدر ماجد يمسك ضحكته وضحك عليها وهي تفشلت من لسانها اللي ماتقدر تمسكه رهف : اصلا انتي ماحضرتي الزواج الا عشان الاكل قرصتها بسمه : خلاص فضحتيني ماجد : بالعافية ( وهمس لغادة ) اوصلها بيت عمي ولا بيتنا ؟ غادة : اصبر اسألها ، بسسمه ! بسمه : هلا غادة : شرايك تنامين عندنا ؟ رهف تحمست للفكرة : ايه بالله نامي عندنا بسمه : لا مااقدر انام مااخذت موافقة ابوي ( ولفت لرهف ) خليها بوقت ثاني بوزت رهف ولا حق الحماس اللي تحمسته قال ماجد يبي يتأكد : يعني نروح بيت عمي علي ؟ بسمه : اذا ماعليك امر ابتسم ماجد ووصلها بيت اهلها وراح بعد كذا لبيتهم ترفـق ع قلبي وخـذني بـروف ... ترى الليل طـايح في ايد الغـزال اول ماوصلت البيت على طول طلعت غرفتها وقفلت الباب وهي طايره من الفرح شافته وسمعت صوته وغير كذا وصلها للبيت صح كانت متوتره ومرتبكة وهي معاه بالسيارة بس فرحتها كانت اكبر كيف ماتفرح وخطيبها اللي موصلها للبيت خطيب !! حمرت خدودها لما تذكرت يوم خطبته لها كانوا اهلها كلهم مبسوطين لما خطبها غمضت عيونها وهي تتذكر شكله كيف كان يبتسم وهو يسولف مع اخته وصوته يتردد بداخل اذنها رمت نفسها فوق السرير وهي تبكي بحسره كل دموعها اللي حبستها سنة كاملة عشانه طلعتها اليوم بكت بحرقة قلب وحسره على حالها كيف ماعرف صوتها كيف ماقدر يميز صوت زوجته وناداها مرتين باسم شخص ثاني ما درى انه جرحها بدل الجرح جرحين جرحها لانه ماتذكر صوتها وجرحها لما ناداها باسم شخص ثاني جلست على سريرها وهي تمسح شلال الدموع وبيدين مرتجفه مسكت جوالها وارسلت له رسالة وقفلته ورجعت تكمل بكى لما نامت يكفيك انك شفتها ... دون ميعاد يكفيك شمك من بعيد ... لعطرها كان جالس بالصالة وهو ينتظر اذان الفجر سند راسه على الكنبة وغمض عيونه وهو يتذكر صوتها او همس صوتها صح انها ماتكلمت كثير بس حس بتوترها وارتباكها من وجوده وهالشي فرحه اكثر غير فرحته بوجودها معه وبسيارته كان يحاول يخفي توتره قدامها وقدر يخفي مشاعره بسهوله لانه رجال وحاول قدر المستطاع مايناظر المرايه ويشوف عيونها عيونها اللي اسرته وعذبته لايام وليالي اهه ياعيونها ياعيونها يا أول محطات ... الهلاك !! يعيونها ... يآخر متاهات الغرور .. اليوم الثاني .. كان واقف قدام المرايه يعدل شماغه , وابتسم برضا لما ضبط معاه لبس ساعته وتعطر , شاف جواله على التسريحة تذكر رسالتها اللي قرأها مرتين من الصدمة انت ذبحت الحب فيني ,, و انت تنكرت كل حنيني و إن بقى عندك جراح ,, كمل الناقص و هات ابتسم بستهزاء ولا فكر يرد عليها ودخل جواله بجيبه واخذ شنطته ونزل لاهله دخل الصالة وشاف امه لوحدها : وش فيها ام ماجد لوحدها ؟ امه : هلا بولدي حب راسها وجلس جمبها : ليه الغالية وحيده ام ماجد : خواتك نايمات وغادة بالمطبخ مدري وش تسوي عقد ماجد حواجبه : وابوي وينه ؟ ام ماجد : ابوك نايم ( ناظرت شنطته وبحزن ) خلاص يمه بتسافر ؟! عوره قلبه على امه يعرف انه ماجلس معها والحين بيسافر : ايه يالغالية ناصر الحين بيمرني وبنروح لبيت عمي عبدالله ومن هناك نمشي كلنا ام ماجد : انتبه لعمرك يمه ماجد : ان شاء الله ام ماجد : واول ماترجع تروح تشوف زوجتك ابتسم ماجد : ابشري ام ماجد : ولا تنسى تحدد زواجك ضحك ماجد : خلاص يالغالية ابشري طلعت غادة من المطبخ وشافته : اووه ماجد هنا , وانا اقول امي تسولف مع مين ابتسم لها ماجد : وش تسوين بالمطبخ ؟ قالت غادة تبي تقهره : اسوي حلى , واللي تحبه بعد تصنع ماجد القهر : لا كذا غش , يوم اني بسافر تدخلين المطبخ وتسوي حلى واللي احبه كمان قالت ام ماجد بزعل : محد قلك تسافر مسك ماجد يدها وقال بحنية : يمه لازم اسافر ازور زوج عمتي , وبكره ان شاء الله بكون عندك , ولو تبين اليوم ارجع رجعت ابشري كم ام ماجد عندي انا رضت ام ماجد بالامر الواقع , ماتقدر تمنع ولدها من صلة الرحم ام ماجد : انتبه لعمرك يمه ابتسم لها : ابشري قالت غادة اللي كانت واقفة عند باب المطبخ : ماجد سويت لكم فطاير تاكلونها بالطريق , لا تروح قبل ماتاخذها ابتسم لها : تسلم يدك ابتسمت له غادة وراحت تجهز له الفطاير دقايق واتصل ناصر على ماجد اللي وقف وحب راس امه وحضنها طلعت له غادة وبيدها سلة مليانة اكل : خلاص بتروح ؟ ماجد : ايه ناصر برى ( سلم عليها واخذ السلة منها ) الله يعطيك العافية على الاكل , وسلموا على ابوي واخواتي وانا مابطول يومين بالكثير وراجع لكم حبست ام ماجد دموعها : استودعتك الله يمه نزلت من الدرج تركض تفتح الباب لفاتن اللي قالت انها جايه بالطريق كانت لابسه برمودا جينز وبلوزه ليموني وشعرها تاركته على راحته فتحت الباب وببتسامه : ياهلا والله بفتنة قلبي ناظرت الشخص اللي قدامها وهي مصدومه رمشت بعينها مره ومرتين وثلاث تبيه يختفي كان واقف قدامها بثوب وشماغ ونظارته الشمسية بعيونه لحظة !! هذا مو فاتن !!! صحت من صدمتها لما سمعت صوته الحاد : باقي مطول على الباب تنرفزت منه وقفلت الباب على وجهه بدون ماترد عليه ورجعت بتدخل الصالة وهي معصبه شافتها امل اللي كانت نازلة تركض تفتح الباب لاخوها مرت من جمبها وقالت باستعجال : نوف الجرس دق ؟ نوف بنرفزه : ايه اخوك برى استغربت امل وش فيها معصبه , بس راحت تفتح لاخوها ابتسمت لما شافته : هلا والله بوليد ابتسم لها وليد غصب , كان متنرفز من حركة نوف : هلا امل اشرت له على المجلس : تعال حياك المجلس دخل وليد وبيده شنطته : زوجك وينه ؟ مطول !! حمرت خدود امل لانها هي سبب تأخيره : ثواني وينزل بس يلبس ثوبه جلس وليد بالمجلس , وراحت امل المطبخ تجهز له القهوة طلعت وبيدها صينية القهوة والدله شافت نوف جالسه وتهز رجلها : وش فيك معصبه ؟ نوف بنرفزه : سلامتك انتظر فاتن راحت المجلس وقهوت اخوها لما نزل لهم فيصل اما نوف طلعت فوق مع فاتن اللي وصلت بعد دقايق اول مادخلت الجناح قالت نوف بنرفزه : قال ايش قال باقي مطول وججججججججع طول طول جعل الشمس تحرق ابليسك وجعع ينرفز اخترعت فاتن وش فيها قلبت هذي : وش فيك ؟ ليه معصبه !! اما مرام طلعت من غرفتها مخترعة : وش فيك تصارخين نوف بعصبيه : وفيه احد يشوف وليد ومايعصب ( وبقهر ) تخيلي يقول لي باقي مطول على الباب الله يقلعه ابليسه , يقهههههر بس ماقصرت فيه قفلت الباب على وجهه ضحكت مرام عليها ودخلت الغرفة تكمل سوالفها مع عبير اما فاتن ناظرتها مو فاهمه شي , بعد ماهدت نوف شوي دخلت عليهم امل : سلام صبايا , اهلين فاتن وسلمت على فاتن , ناظرت نوف وحاولت ماتضحك : نوف انتي اللي فتحتي الباب لوليد ؟ نوف : ايييه امل : اهها طيب , على العموم حبيت اسلم عليكم واشوفكم على خير استغربت نوف : ليه ؟! رايحة مكان امل ببتسامه : بنام عند اهلي ابتسمت نوف : اخيرا اطلق فيصل سراحك امل : ايه والله مابغينا نوف : اسمعي اخوك باقي تحت , ماابي انزل والقاه بوجهي امل : طلعوا الخيمة ينتظرون الباقين وقفت نوف : حلو , فتون انتظريني هنا , البس عبايتي ونروح السوق فاتن : طيب بس عطشانه نوف : انزلي تحت البيت فاضي , ثواني والحقك نزلت فاتن تحت اما امل راحت لجناحها ترتب شنطتها دخلت المطبخ واخذت قارورة مويه وجلست تشرب وهي متعودة تأخذ راحتها ببيت خالتها نزلت نوف بعد مالبست عبايتها وتغطوا وطلعوا برى ينتظرون السواق يجي شافهم ناصر وراح لهم : هلا ببنات عبدالله ابتسمت نوف - الحمدلله ماعرف فاتن - : هلا ناصر ناصر : وش مطلعكم هنا ؟ فاتن كانت متخبية ورى نوف ومنزلة راسها عشان لا يعرفها وينحرج نوف : ننتظر السواق ( عقد حواجبه وكملت ) بنروح السوق , تبي شي ابتسم ناصر : لا امانع الهدايا ضحكت نوف وكمل وهو رايح للشباب : انتبهوا لنفسكم مسكتها فاتن من يدها بعد ماراح : هذا ناصر عمك !! نوف ببتسامه : ايه عمي ناظرته فاتن بصدمه : توقعته شايب بس طلع شباب ومزيون دفتها نوف : هييي لا تتغزلين بعمي فاتن : وانا ماقلت الا الصدق , طيب اسمعي اخر سؤال مين اللي لابس شماغ ناظرت نوف الشباب وبعدها لفت لفاتن وهي تضحك : كلهم لابسين شماغ فاتن وهي تفتح باب سيارة السواق : لا اللي لابس نظارة شمسية ركبت نوف جمبها وبقهر : هذا اللي هزأني فاتن باعجاب : ليته يهزأني انا خزتها نوف وقالت للسواق : فريد روح سوق ,,,, بعد اربع ساعات ونص وصلوا الشباب شقتهم اللي حجزها لهم خوي فهد رمى ناصر جسمه على السرير وبتعب : الحمدلله مابغينا نوصل فيصل : الحمدلله انا وصلنا بالسلامه , بروح اطمن اهلي انسدح وليد على السرير وبارهاق : وخلي امل تطمن اهلي معاك استغرب : طمنهم انت تثاوب : انا الظاهر بنام ناصر : انتظر الاكل طيب طلع ماجد وفهد يشترون لهم الاكل وليد : اذا وصل قومني ولف الجهة الثانية وغمض عيونه اما فيصل طلع من عندهم واتصل على زوجته اللي ردت بعد ثالث رنه وبلهفه : هلا فيصل , طمني !! ابتسم لها بحب : هلا بعيون فيصل . تطمني يالحبيبة احنا وصلنا بالسلامة دخلت امل المجلس وجلست في اخره عشان محد يسمعها من اهلها : الحمدلله على السلامة فيصل : الله يسلمك , وصلتي بيت اهلك ؟ امل : ايه دخلت عليهم المغرب , راشد جاء اخذني انسدح فيصل فوق الكنبة وتثاوب : الحمدلله , طمني اهلك على وليد استغربت امل : طيب حس فيصل انها قلقت على اخوها وحب يطمنها : وليد بخير وطيب بس مرهق من الطريق وقال بيرتاح شوي ( وبضحكة ) المفروض انا اللي ارهق لاني انا اللي سقت طول الطريق بس يمون ابو نسب ضحكت امل وقال بشوق : اشتقت لضحكتك حمرت خدود امل : وانا اشتقت لصوتك قال فيصل : اشهد ان المفارق من عظيم البلاوي اما ناصر قرر يتصل على ولد اخته بعد ماتروش وغير ملابسه رد ياسر بفرحة : هلا والله بناصر ابتسم له ناصر : هلا والله فيك , شلونك وشلون الوالد ياسر وهو يقفل باب غرفة ابوه : الحمدلله كلنا بخير , انت شلونك وشلون العيال ناصر وهو يناظر ظهر وليد النايم : والله كلنا بخير , ابشرك تونا وصلنا الشقة جلس ياسر على كرسي بالممر : الحمدلله على سلامتكم ناصر : الله يسلمك , متى نقدر نزور الوالد ؟ ياسر : والله ابوي عنده ضيوف الحين ومدري متى بيروحون ناصر : خلاص اجل نزوره بكره على خير , الزيارة مفتوحة له ولا لها موعد محدد ياسر : لا مفتوحة , بس هو يريح جسمه شوي بين الظهر والعصر ناصر : على خير ان شاء الله اجل بيننا اتصال بكره على خير ياسر : ان شاء الله , تعالوا تعشوا عندنا بالبيت اليوم ناصر : اعذرنا هالمره تعرف تونا واصلين ومرهقين خلها بوقت ثاني وقف ياسر : بكره لازم تتعشون عندنا ولا ترى بزعل ابتسم ناصر : مقدر اردك مرتين بعد ماقفلت امل من زوجها , رجعت الصالة لاهلها وشافت الكل موجود الا ابوها جلست امل جمب امها وبستغراب : ابوي وينه ؟ امها : راح ينام تفاجئت امل : باقي بدري بسمه : وين بدري الله يهديك , ابوي لازم ينام الساعة 10 لف راشد لامه : يمه ابيك بموضوع قالت امل بضحكة : يعني نطلع راشد ابتسم : لا انتي اجلسي ( وناظر بسمه يبي يستفزها ) وانتي اطلعي من غير مطرود انقهرت بسمه : لا والله بجلس وبسمع بعد قالت امه له : وشهو موضوعك يمه ؟! ابتسم لها راشد وجلس قريب منها : يمه تذكرين قبل يومين قلت لك ابيك بموضوع ضروري عقدت ام ماجد حواجبها وهي تحاول تتذكر بعدها قالت : ايه يمه تذكرت , محتاج فلوس يمه ؟! راشد : لا الله يسلمك عندي اللي مكفيني بس قررت اتزوج انصدموا امل وبسمه اما امه فرحت : وهذي الساعة المباركة يمه , من بكره ندور لك على عروس تناسبك ابتسم لها راشد بخجل : يمه لا تدورين ولا تعبين نفسك , انا ببالي وحده غمزت له امل : ماشاء الله اخوي بدا يحب راشد : لا مو حب بس البنت ماشاء الله اخلاق والكل يمدحها بسمه بلقافة : مين هي ؟ حب راشد ينرفزها : مابقول اسمها قدامك انقهرت منه بسمه : اخرتها بعرف مين هي راشد : اهم شي مو الحين خليني اقهرك شوي قالت ام ماجد : مين هي هالبنت يمه ابتسم لها راشد : مها بنت عمي صالح طلعت عيون امل وبسمه , اخر وحده توقعوا ان اخوهم يختارها هي مها امل : شلون تعرفها ؟! راشد يستهبل : لي فترة اكلمها ضربته امه على كتفه : استح على وجهك وشهو اكلمها , وين حنا عايشين ضحك راشد : امزح يمه والله امزح , والله ماكلمتها ولا اعرف صوتها ناظرته امه بشك : متأكد راشد : اففففا الغالية تشك فيني , والله يمه ماكلمتها والله , بس اسمع اخوانها يمدحونها دايم وماابيها تضيع مني امه : طيب خلني اخذ شور ابوك راشد : اخاف تضيع مني يالغالية ضحكت امه عليه : خلاص يمه قلت ناخذ شور ابوك قالت امل : بس راشد مو كأنه بدري عليك الزواج راشد : لا مو بدري امل : احسك باقي مو قد حمل مسئولية وبيت وزوجة اقتنعت امها بكلامه : ايه يمه باقي بدري عليك ناظر راشد في امه يحاول يقنعها : يمه ابيها , وماابيها تضيع مني امه : نحجزها لك بس امل : راشد البنت باقي توها اول سنة بالجامعة والزواج بهالمرحلة راح يشغلها عن دراستها , خلي البنت اول تخلص جامعتها بعدها نخطبها لك , ولا تخاف احنا بنلمح لعمتي العنود انك تبيها راشد : بس ابي اعرف رأيها فيني بالاول بسمه : شوف راشد هي البنت ماتجلس معنا كثير بس بحاول اتقرب منها واعرف رأيها بس مااوعدك راشد : طيب لفت امل لامها : يمه من جد وليد قرر يتزوج ابتسمت امها : ايه يمه امل : وما قال لك متى ؟ ابتسمت امها وهي تتذكر كلامه لها امس : يقول بعد مايرجع من الشرقية يعلمنا انبسطت بسمه : ججججد يمه !! وناسه واخيرا اخواني قرروا يتزوجون ابتسم لها راشد ووقف : انا بطلع مع اخوياي تامروني على شي امه : الله يحفظك يمه حب راس امه وقالت بسمه : راشد الله يخليك جيب شوكولاطات راشد : بجيب لك كرتون لو تبين انبسطت بسمه : جججد !! ابتسم راشد وهو طالع من باب الصالة : اذا جبتي لي موافقة البنت مرت الايام سريعة على ابطالنا ناصر وعيال اخوانه زارو ابو ياسر وتطمنوا عليه وطمنوا اهاليهم عليه وماطولوا بجلستهم في الشرقية ورجعوا للرياض فيصل اللي حس بشوق كبير لزوجته وانبسط لرجعته لها وقرروا يروحون المستشفى زي ماوعدها فهد استلم مكان خويه اللي تزوج وبعدها اخذ اجازة ثانية وهو متفائل خير بحركة النقل القريبة ماجد قرر واخيرا انه يزور عبير ويقابلها عبير خافت وتوترت من زياره ماجد لها لما علمها ابوها بزيارته اسماء كانت على اعصابها ومتوتره لان ملكتها قربت العمه شيخه وبنتها قرروا يقنعنون ياسر وابوه انهم يسافرون للرياض شوي بعد ماتتحسن صحة الاب راشد كان مبسوط لما عرف ان مها موافقة عليه وزادت سعادته لما حجزها ابوه له في العصر طلعت من المطبخ بعد ماجهزت كل شي تعرف تسويه اشغلت نفسها بالطبخ عشان تتناسى التوتر والخوف قررت تطلع غرفتها تستعد لزيارته لها صار لها اكثر من ٣ سنين مازارها ولا شافها غير صوته اللي حرمها منه وهي تعرف سبب تغيره عليها ولا تضايقت من تصرفاته وتعتبر هالشي من حقه واقل شي ممكن يسويه فيها قابل امه بطريقة وهو كان متوجهه لباب الفيلا : هلا بالغالية ناظرت ام ماجد في كشخته وابتسمت له : واخيرا قررت تزورها ابتسم لها ماجد : شلون عرفتي ام ماجد : سيماهم على وجوههم حب راس امه : دعواتك يالغالية ضحكت امه عليه : ليه رايح حرب انت ابتسم ماجد : يمكن ام ماجد ابتسمت : الله يوفقك يمه وبشويش على البنت ابتسم لها وطلع من الباب وقفت قدام المرايه وناظرت شكلها وبلبسها كانت لابسة جلابية سودا وبحزام ذهبي وشعرها الطويل تاركته بحرية [ عبيـر ] ابتسمت على شكلي باعجاب واخذت نفس عمييق احاول اخفي توتري ورجفة يديني فتحت باب غرفتي وطلعت ، نزلت من درج بيتنا الكبير وانا اسمع اصوات بالمجلس اكيد وصل !! بدأ قلبي يدق بقوه وعاد التوتر لي دخلت الصالة لقيت امي جالسة لوحدها حبيت راسها وجلست جمبها حست امي بتوتري وحاولت تهديني بس مافي فايده اكثر من ٣ سنوات ماشفته والحين هو بالمجلس مع ابوي واخواني وجاي عشان يشوفني واخيرا قرر يزورنا ويشوفني مدري وشلون بقابله وش بقول ؟ وش بسوي اسولف معه عادي ولا اكون ساكته ومستمعه له اعاتبه على هجره لي ولا مالي حق قطع تفكيري دخلة ابوي وبدر وفارس وراه : السلام عليكم رديت عليهم السلام مع امي جلس ابوي جمبها وقال ببتسامه : روحي يمه لرجلك تراه ينتظرك هزيت راسي له وبدأ توتري يزيد وقلبي يدق اكثر واكثر سمعت بدر يقول بضحكة : لا تنسين تروحين له بالشاهي دخلت المطبخ وسويت له شاهي على ذوق ابوي مااعرف هو يحب شاهي مر ولا حالي شاهي احمر ولا اخضر احط حبق ولا نعناع ولا بدون هالاشياء كلها مااعرفها عنه وهالاشياء تعتبر بسيطه وسهله بس لانه جاحدني ماعرفت عنها زينت صينية الشاهي ودقيت باب المجلس وسمعت صوت فهد الجهوري : تفضلي ياعبير دخلت بشويش وانا ماسكه صينية الشاهي بقوه يديني كانت ترتجف قال فهد بضحكة : انتبهي لطريقك انحرجت من كلمته بالذات لان عيني كانت بالارض ولا رفعتها رفعت عيني عشان اشوف طريقي على قولة فهد وياليتني مارفعتها جات بعينه على طول شفته جالس بكل شموخ على الكنب وواضح انه مسترخي بجلسته ابتسم لي بهدوء : واخيرا ناظرتيني وقفت مكاني ماعرفت وش اسوي والصينية بيدي قام فهد واخذها من يدي وحطها على الطاولة الصغيرة اللي قدامه : انا بطلع احس اني عذال ناظرته برجاء لا يطلع ويتركني لوحدي ابتسم لي وهمس قريب مني : تراه مايعض وطلع وتركني معه اخترعت لما وقف وقرب مني ومد يده ناظرت يده ليش مدها حسيت انه حس بغبائي ومسك يدي وصافحها يووووه كان يبيني اسلم عليه منجد كنت غبية قال لي بصوته المميز ببحته : شلونك عبير قلت بصوت واطي ومرتجف : بخير سحبني وجلسني على الكنب وانا مفتحه عيوني على كبرها اخترعت من حركته بس هو صادق طولت وانا واقفة بمكاني لمحت صينية الشاهي قلت بهمس : اصب لك شاهي رد علي وهو يجلس مكانه : مااقول لا صبيت له شاهي وقلت له لإبراء ذمتي فقط : تشربه مر ولا حالي قال : مر حمدت ربي ان ذوقه زي ذوق اهلي ومديت له الفنجان اخذ الفنجان وشرب منه شوي وبعدها حطه قدامه على الطاولة الصغيره وقال : شلون الدراسة معك ؟ تفاجئت من سؤاله : دراسة ! اي دراسة !! ابتسم وقال : مو انت تدرسين ؟ استغربت منه من جده هذا ولا يستهبل : تخرجت من الجامعة من زمان كمل بنفس ابتسامته : اهها مبروك ناظرته ابي افهمه من جده يسأل عن دراستي وهو يعرف ان لي اكثر من ثلاث سنوات متخرجة قال ببرود غريب : طيب متى تبين الزواج !! زواج !!! احد جاب طاري الزواج الحين !! وش جابه بباله !! كمل بنفس البرود : دام مافي شي يمنع الزواج زي اول ( وشدد على كلمة زي اول ) اتوقع ماله داعي نأخره زياده قلت بهدوء : اللي يريحك قال ببرود : شرايك نخليه بعد اسبوعين طلعت عيون قدام : مره قريب قال : اتوقع سبع سنين واحنا مملكين تكفي شلون بتزوجه وهو جاحدني شلون بتزوجه واحنا باقي مو فاهمين بعض مد فنجان الشاهي لي وصبيت له واحد ثاني ناظرته وهو يشربه بهدوء كان جالس مسترخي ولا تكلم بس يشرب الشاهي قطع الصمت دخلة فهد علينا وقال ببتسامه : عسى ماقاطعت شي انصدمت من تغير ملامحه وضحكته : ياشين العذال جلس فهد جمبي : هاه عضك ؟! حمرت خدودي لما شفت ابتسامة ماجد لف فهد نظرة له وقال بتهديد : وش سويت باختي ؟! قال بهدوء وابتسامة : عضيتها ناظرت بملامحه اللي تغيرت من دخل علينا فهد وانا حاسة بخدودي تشب ضو من نظرته وابتسامته لي ياربي وش فيه هالانسان اعترف !!!! انا مو قادرة افهمه ولا ابي افهمه اصلا وقفت ابي اطلع من عندهم وقفتني كلمته : انتظري اتصالي اليوم هزيت راسي وطلعت لغرفتي وانا مو فاهمه شي مو هذا اللقاء اللي كنت اخطط له ايام وشهور !!!!!!! كان جالس بالصالة ينتظرها تخلص : املي هيا بنتأخر سمع صراخها من غرفة النوم : حبيبي ثواني واخلص قال بضحكة : لك ساعة وانتي تقولين ثواني , الثانية عندك كم بالضبط طلعت من الغرفة وهي تضحك وبيدها عبايتها : خلاص خلصت وقف : يالله توكلنا على الله عدل شماغه ومشي وناظرها : متأكده تبين تسوينها ؟! ابتسمت له امل وهي خايفة من النتيجة : ايه متأكده فيصل بتساؤل : وماتزعلين مهما كانت النتيجة ؟! امل : وماازعل قال يبي يطمنها : حبيبتي صدقيني مهما كانت النتيجة مستحيل اتغير عليك وصدقيني موضوع الحمل عندي عادي انا راضي بحكمة ربي مسكت امل يده وهي تحاول تخفي خوفها : خلينا نتأكد بالاول مسك يدها بقوة ونزلوا لاهله تحت دخل الصالة لقى امه وخواته لابسين العبايات : السلام عليكم الكل : وعليكم السلام جلس جمب امه : اشوف الغالية بعبايتها ؟ على وين ؟! امه : بروح لخالتك تدري ملكة بنتها قريب وبشوف يمكن تحتاج شي ابتسم لها فيصل : الله يعطيك العافية هذا العشم بام فيصل الله يطول بعمرها امه : الله يخليك يمه ويحفظك لاخواتك فيصل : اللهم امين ( والتفت لاخواته ) وانتم بتروحون مع امي ؟ مرام : لا بنروح السوق كملت نوف : بنات اعمامي ينتظرونا هناك نشتري فساتين للملكة فيصل : مين بيوديكم ؟! نوف : السواق , صار له ساعة متصلين عليه ولما الحين ماجاء عقد فيصل حواجبه واتصل على السواق يشوف وينه قالت لهم امل : اذا لقيتم فستان حلو اشتروا لي مرام : عادي أي لون ؟! امل : اهم شي ابعدي عن الاسود , فساتين كلها سودا قفل فيصل من السواق وقال لاهله : السواق يقول سيارته تعطلت بالطريق انقهرت نوف : لا تقول !! والسوق !! وقف فيصل : قوموا انا اوصلكم ( والتفت لامه ) يالله يمه انا بوصلك لخالتي امه : اخاف اعطلك عن مشوارك ابتسم لها فيصل وقال : شدعوه ياام فيصل , انتي اهم من مشواري قالت امل : ايه ياعمتي قومي نوصلك معنا , البيت بطريقنا ( ولفت للبنات ) يالله بنات قوموا نوصلكم وطلعوا كلهم مع فيصل اللي مايعرفون وش مشواره مع زوجته بس قالوا يمكن يتمشون سوى بعد مانزلت امه في بيت خالته ناظر اخواته من المرايه لما امل تركب جمبه قدام : أي سوق بتروحونه ؟! مرام : سوق ,,,, عقد حواجبه : عكس مشواري ( ولف لزوجته ) عادي نتأخر ساعتين مايضر صح قالت امل : ايه عادي قالت نوف : اصبر نكلم بنات اعمامي يمكن احد منهم باقي بالبيت واتصلت نوف على رهف اللي كانت قريبة من السوق , قفلت منها واتصلت على بسمه ومن حسن حظها ان توها طلعت من البيت وقالت لها تنتظرهم بالطريق وصلهم فيصل عند سيارة السواق وركبوا معاه وراح وتركهم في بيت ابو وليد – الخيمة كان ناصر مع وليد يتناقشون عن مشروع ناصر الجديد قرى وليد الاوراق وحطها بالارض : الشروط جيدة بس تتوقع المستثمر راح يوافق عليها ؟ ناصر : مبدئيا وافق عليها بس ماحددنا نسبة الارباح وليد بتفكير : شوف احنا نحتاج 14 % لميزانية الشركة ناصر : بس 14 قليلة لنا , كمان هو راح ياخذ موقعنا وليد : 14 هذي ثابتة بناخذها منه , وانت لو تبي تزود من النسبة من عندك براحتك فكر ناصر شوي بعدها قال : الظاهر بنأخر توقيع العقد شوي لما اتناقش مع اخواني وليد : يستحسن جمع ناصر اوراقه ووقف : يالله نشوفك بكره وليد وقف معاه : وين باقي ماتعشينا ابتسم له ناصر : دايمه ان شاء الله , مواعد واحد مو اخوياي بروح عنده مشى وليد معه : سلم لي عليه ونشوفك بكره ناصر : يوصل ركب ناصر سيارته وراح , اما وليد رجع للفيلا حصل ابوه وامه جالسين وجلس معهم قال ابوه : خلصت موضوعك مع ناصر ؟! ابتسم لابوه : ايه يبه خلصنا ابوه : هو نفسه المشروع ؟! وليد : ايه نفس المشروع , يبه يمدينا بكره نسوي اجتماع بيننا استغرب ابوه : وراه ؟! وليد : ناصر باقي ماحدد نسبة الارباح حقت المشروع ويبي يناقشها معاكم ابوه : على خير ان شاء الله استغرب وليد هدوء البيت : وين بسمه ؟! امه : متفقة مع بنات اعمامك يتقابلون بالسوق عقد حواجبه : ليه ؟! يتقابلون بالبيوت ازين امه : يبون يشترون اغراض لملكة بنت عبدالكريم هز وليد راسه بتفهم وانتهزت امه الفرصة : وانت يمه متى تبي تفرحني ؟! ابتسم وليد : قريب يالغالية امه : ومتى قريبك ذا يجي ؟! حس انه خلاص زودها على امه وهو دايم يقولها قريب قريب تذكر كلامه لها قبل مايسافر " ان شاء الله يمه اذا رجعت الرياض بفرح قلبك وبخطب " خلاص هو اعطى امه كلمه ولازم ينفذها رفع راسه وقال لامه : خلاص يمه اللي تبينه بيصير فرحت امه : صدق يمه ابتسم لها : ايه صدق امه : من بكره نروح نخطب لك شيخة البنات كلهم عقد حواجبه وقال : ومن هي شيختهم يمه امه ببتسامة : غادة ابتسم لها وقال : لا يمه غادة الله يوفقها مع غيري استغرب ابوه اللي كان ساكت طول الوقت : ليه وش فيها غادة يوم انك ماتبيها قال بهدوء : انا ببالي وحده يبه وابيها ابتسم ابوه : ومين هي هالوحده ؟! ابتسم وقال : ,,,,,,,,,,,,, ] خلوني احرق اعصابكم شوي , البنت بالبارت الجاي بتعرفونها [ توقعاتكم ونشوفكم الاسبوع الجاي | ||||
|
| |
|
07-10-17, 11:20 AM
| #17 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| ’ السلام عليكم كيفكم وش اخباركم ؟ وكيف الدراسة معاكم ؟ لو تسألوني عن الدراسة احب اقولكم انها هه شوي تمام المهم مالنا بالطويلة نبدأ بالبارت زي ماوعدتكم البارت الثامن كانوا البنات في السوق وانقسموا لثلاث مجموعات بسمه ومها , نوف ورهف , غادة ومرام جلسوا على كوفي وهم ينتظرون الباقين , تعبوا من المشي حطوا اكياسهم بالكراسي اللي جمبهم يحجزونها للبنات مرام : غريبة عبير ماجات معنا ؟ ابتسمت لها غادة من تحت النقاب : بلاك ماتدرين مين قابلت اليوم تحمست مرام : مين !! غادة : ماجد تفاجئت مرام : احلفي ! واخيرا تقابلوا !! كل العايلة كانوا يعرفون ان ماجد لما كان يجي الرياض عشان يزور اهله يجلس بس يومين مع اهله ويسافر ولا يزور عبير ابتسمت غادة لصدمتها : والله جد اليوم اللقاء الموعود مرام : وش صار بينهم !! غادة : ماادري والله , لانه راح لهم العصر واحنا طلعنا للسوق وماقابلناه باقي مرام بتساؤل : تتوقعين اتفقوا على متى يكون الزواج ؟ غادة بضحكة : اقولك توهم تقابلوا على طول بيتكلمون عن الزواج , لا مستحيل ابتسمت مرام بغباء : ايه والله نسيت , الله يخلف على عقلي غادة : اسمعي ليه امل ماجات معكم مرام : نايمة بالعسل مع اخوي غادة : مثل عبير مع اخوي طلعوا من المحل بعد مااشترت نوف العطر الرجالي اللي عجبها رهف بضحكة : واخيرا حققتي امنيتك واشتريتيه نوف بفرحة وباعجاب : ياختي ريحته مره تجنن رهف بتساؤل : ماعرفتي حق مين ؟! نوف بحزن : لا بس اتوقع لناصر او فهد لانه يناسب شخصيتهم غمزت لها رهف : ويمكن يكون حق وليد قالت نوف بسرعه : لا ان شاء الله لا , وععع تخيلي اخذ نفس عطره لا يارب ضحكت رهف : ابي افهم ليه تكرهينه نوف : مو اكرهه بس ينرفزني , انسان من اشوفه اتنرفز غمزت لها رهف : حب من اول نرفزه خزتها نوف وقالت تغير الموضوع : الا اسمعي مو كأن بسمه ساحبه علينا هالايام وطول الوقت مع مها ابتسمت رهف : تدرين ليه ! ( كملت لما شافت حماسها ) لانها خطيبة اخوها شهقت نوف : اححححححلفي !! ضحكت رهف عليها لانها وقفت مكانها من الصدمة والناس يناظرونها لما سمعوا شهقتها وسحبتها معها وهي متفشلة : امشي فشلتينا نوف ولا اهتمت : بنت منجد مها انخطبت لوليد ضحكت رهف عليها : ياذا الوليد اللي شاغل عقلك تنرفزت نوف منها : تكلمي هيا رهف : لا انخطبت لراشد طلعت عيون نوف قدام : اممما راشد !! رهف : والله بس اسمعي لا تقولين لاحد لانها مو خطبة رسمية بس حجزها له زي مرام محجوزة لفهد هزت نوف راسها بتفهم وهي فرحانة لمها هي تستحق راشد وهو بعد يستحقها بسمه بتوتر : معليش عيد مره ثانية دخل المحاسب البطاقة مره ثانية وانرفضت توترت بسمه هذي ثالث مره يدخل بطاقتها وتنرفض والناس وراها يبون يحاسبون وهي عطلتهم شافت مها توترها وطلعت بطاقتها واعطتها المحاسب : معليش حاسب بهذي لفت لها بسمه : لا مابخليك تحاسبين لي مااعطتها مها مجال انها تعترض لانها حاسبت واخذت الكيس من عند الرجال طلعت بسمه معها وهي مستحية منها : الله يسعدك مره شكرا , تفشلت عند المحاسب ( وقالت بعصبية ) اما بطاقتي هذي بتصرف معها بالبيت ضحكت مها عليها : وش بتسوين مثلا ؟! تضربينها بسمه : بكسرها وبطلع بدل فاقد مها : قصدك بدل كسر , بس منجد غريبة انرفضت بطاقتك بسمه بنرفزه : مدري عنها , برجع فلوسك واليوم ( وقبل ماتعترض مها قالت ) والله لارجعها اليوم , خلاص انا حلفت استسلمت مها : طيب امشي نشرب شي بسمه : ونجلس كمان , رجلي مو قادره تشيلني من الفشلة قبل شوي مها : بس اهم شي اشتريتي فستان بسمه : انتي اللي اشتريتيه لي ياقلبي الله يخليك لي وماانحرم من فزعاتك ابتسمت لها مها واتصلت على غادة اللي ارسلت لها انهم جالسين عند الشباب كانوا جالسين بالجلسات الخارجية لكوفي متعب : بكره مقدر اطلع معاكم , خالي وعياله بيجونا من الشرقية ابتسم خالد : الاخ الحين معرس مانقدر نجبره زي اول ناصر : كيف الزواج يامتعب لان الظاهر بلحقك التفت له راشد : واخيرا قررت ناصر : لسى قاعد اشاور عمري متعب اللي كان مملك على بنت خاله : والله شوف لما الحين ماشفت بالزواج شي شين , يمكن لاني باقي ماتزوجت سلطان : والله الزواج هم عقد حواجبه راشد : ليه ! بالعكس احسه نعيم سلطان : لولا اختلاف الاذواق لبارت السلع خالد : طيب نرجع لموضوعنا , متى نطلع للبر ؟! ناصر : والله انا فاضي هاليومين بس بعدها بنشغل سلطان : انا فاضي بكل الاوقات اعطيني بس رنه وتلقاني عند باب بيتك متعب : انا مقدر راشد : انت قاضي متعب بستهبال : لا والله انا متعب ضحك عليه راشد ولف لخالد : انا تعرفني ياولد العم فاضي بكل وقت خالد : تمام اجل بعد بكره نروح ( ولف لمتعب ) يمديك تلحقنا ؟! ابتسم متعب : نقول ان شاء الله قرأ راشد الرسالة اللي جاته واستغرب " راشد تقدر تمر تاخذني من السوق وكمان ابي منك الفين " رد عليها برسالة " ليه الفين ؟! " " سالفة طويلة بس مختصرها ان مها دفعت قيمة فستاني من عندها وابي ارجعها لها " ابتسم " الحين احولها على حسابك " ثواني وجاه اتصال وقف وراح بعيد عن اصحابه يكلم اخته : هلا بسمه بسمه دخلت محل تكلم : هلا راشد , اسمع لا تحول الفلوس لحسابي لان بطاقتي رفضت تصرف لي رفع حواجبه بستغراب : رفضت ؟! بسمه وهي تتذكر وبقهر : ايه والله تخيل رفضت وتفشلت قدام المحاسب ابتسم لانه تخيل شكلها : خلاص بمر اخذك وبعطيك الفلوس قالت بسمه تبي تحرجه : ايه عشانها فلوس مها تبي ترجعها لها اليوم هاه ابتسم : ايه عشانها فلوسها اصلا كل فلوسي حلالها لو تبي بطاقتي تفداها بسمه : هي هي مابعدت صارت زوجتك عشان تتغزل فيها كذا قدامي قال يبي يصرفها لأنه تأخر على اصحابه : المهم اذا خلصتي من السوق دقي علي عشان اجي اخذك وشوفي اذا في احد يبي يرجع معانا بسمه : مها بترجع مع سواقهم راشد بضحكة : يا فاهمني يا قاريني من عيوني بسمه : يا سامعني يا واصل فكري وظنوني طلعت غرفتها وهي مبسوطة لان ابوها واخيرا وافق على سفرتهم لرياض واخيرا بتشوف حبيبها جلست فوق السرير وهي تتذكر لما جاهم بالبيت كان الوقت قرب المغرب وماكان في غير امها وهي بالبيت واخوها مع ابوها بالمستشفى تكشخت وضبطت عمرها واول مادق الجرس فتحته وقالت بتمثيل وببتسامه : هلا بامجاد تصنعت الصدمة وهي تناظر ناصر وعيال اخوالها وراه اللي نزلوا نظرهم للارض لما شافوها ابتسم ناصر : هلا ريم , وين اختي ؟! ريم وهي تحاول تقز وليد : داخل , حياكم بالمجلس الحين اناديها لكم بعدت عن الباب عشان يدخلون ودخلوا الشباب ورى عمهم راحت هي لغرفة امها ودخلت بدون استئذان : يمه ناصر والعيال وصلوا ابتسمت امها : هاه بشري جلست على السرير وببتسامة : يجنن يمه يجنن وقفت امها : زين , اسمعي غطي شعرك والحقيني بالقهوة وقفت ريم : ابشري دخلت امها المجلس : السلام عليكم وقفوا كلهم وسلموا عليها وبعد السلام العمة شيخة : عاش من شافكم ولا كأني عمتكم اشوفكم من السنة للسنة انحرجوا منها وقال ناصر : تعرفين الدنيا ومشاغلها وبعدين دايم نتصل عليك العمة شيخة : الاتصال مو زي الشوف وانا اختك قال ماجد يبي يغير الموضوع : الحمدلله على سلامة عمي مايشوف شر العمة شيخة : الله يسلمك هو بخير بس حب يتدلع ما تفاجئوا العيال من ردها وهم يعرفون طبع عمتهم ابتسم فيصل وهو يحاول يخفي قهره : يحق له ياعمه دلعيه شوي العمة شيخة : انا ماني مثل زوجتك ادلع زوجي كثير قبض فيصل يده بعصبية , ناظره وليد انه يهدي اعصابه دق باب المجلس ودخلت ريم وبيدها صينية القهوة والدلة وزعت لهم صحون التمر على الطاولات اللي قدامهم وصبت لكل واحد منهم قهوة لما وصلت عند وليد وقالت بدلع : تفضل اخذ وليد الفنجان بدون مايناظرها : زاد ( وبتعمد ) فضلكم وجلست جمب امها , العيال انصدموا شلون تجلس معهم وكاشفة بعد لاحظت العمة الصدمة بوجههم وقالت تبي تبرر : معليش مااقدر اضيفكم رجلي تعورني , ريم بتقوم بالواجب بدالي قال فهد : سلامتك ماتشوفين الشر , واحنا بنضيف نفسنا بنفسنا ياعمه وليد بهدوء : احنا ماشين على مبدأ اخدم نفسك بنفسك من يوم جينا الشرقية ناظرت العمة ببنتها واشرت لها تطلع وقفت وقالت بدلع : عن اذنكم وطلعت وتنفسوا العيال براحة رجعت لعالمها وهي مازالت متنرفزه من طردتهم الواضحة لها وقفت وطلعت شنطتها وبدأت ترتب ملابسها وهي تخطط كيف تقدر تخلي وليد لها وقف قدام السوق واتصل عليها : يالله انا برى بسمه : الحين جايتك ( بعد ماقفلت منه ) بنات يالله راشد برى ارتبكت مها ودق قلبها , يفز قلبي لا جابوا طاريك قدامي مرام : وسواقنا برى بعد غادة : سواقنا باقي بالطريق ماوصل بسمه : تعالوا انتظروه بالسيارة معنا مها بخجل : ننتظره هنا افضل نوف : مايهون علي اترككم واروح غادة : كلها دقايق ويجي دق جوال بسمه وردت : معليش راشد بس سواق عمي صالح باقي ماوصل ابتسم راشد : اذا باقي مطول خليهم يركبون معنا بسمه وعينها على مها : قلت لهم بس رفضوا راشد : ياليل يعني مافي امل اشوفها اليوم ضحكت بسمه : مااظن تنهد راشد : الله يصبر قلبي لما تتخرج , انتظري سواقهم معهم وانا بنتظرك بالسيارة قفلت بسمه منه ولفت للبنات : بنتظر معكم والله يعين قالت مرام باعتذار : مانقدر نطول احنا معليش غادة : لا عادي , الله يسهل عليكم بوزت نوف : ابي انتظر معهم سحبتها مرام : نسيتي ابوي وش قال , ماتجي الساعة 11 الا واحنا بالبيت بسمه : بكره بنشوفكم ان شاء الله نوف بغباء : بكره !! وش عندنا بكره !! بسمه : الجمعة عندنا ياحظي ضربت نوف راسها بغباء : ايه والله صح نسيت ,, يالله اشوفكم بكره ( وقالت لبسمه ) وانتي لازم توريني فستانك اللي تفشلتي عشانه بسمه حكتهم سالفة البطاقة : ابشري قالت مرام بطفش : باقي مطوله ؟ نوف : خلاص بمشي بمشي لفت بسمه لمها : وانتي مابتروحين البيت الا لما تاخذين فلوسك سامعة , شوفيها مع راشد هزت مها راسها وهي منحرجه قالت رهف تبي تحرجها : ياليت عندي خطيب يرجع لي فلوسي استحت مها واخذت العصير تشربه دق جوال غادة ’ السواق ’ وردت عليه : ايوه عصام , طيب الحين يجي ( وقفلت منه ) يالله بنات السواق جاء وقفوا كلهم وراحوا يمشون للبوابة اتصلت بسمه على اخوها تبي تعرف وين هو موقف , وقال انه بيقرب السيارة لها مو عشانها عشان يشوف خطيبته بس ناظر شكله بمرايه السيارة وعدل شعره بيدينه وتعطر بعطره ونزل لما شاف اخته وبنات عمه وراها وقف شوي بعيد عنهم : السلام عليكم البنات : وعليكم السلام راحت له بسمه واخذت منه الفلوس ورجعت واعطتها لمها اللي كانت متمسكة بغادة ورجعت له ومشت معاه لما سيارته , بعد ماركبوا بسمه بضحكة : حرام عليك وش سويت بالبنت راشد كان مبسوط : سحرتها بسمه : ماشفتها وشلون متمسكة في اختها راشد : ماانتبهت والله استغربت بسمه : منجد ! راشد : وش فيك ترى ماقزيتها , شفتها لما طلعتوا من السوق بس اما لما جيت عندكم مارفعت عيني لها بسمه : يقال انك محترم يعني غمز لها راشد : ايه عشان اكبر بعينها ضحكت بسمه : والله طحتي ومحد سمى عليك يامها في بيت ثاني كانت بغرفتها ومتوتره : وش اسوي كل الصالونات مشغولة ذاك اليوم قالت فاتن تبي تهديها : طيب خلينا نكلم القاعة يمكن يقدروا يدبروا لنا وحده تصلحك اسماء : افرضي طلع شغلها مو حلو او سعرها غالي فاتن : طيب انا بكره بروح ادور لك على صالون شغله حلو اسماء : دورت ومالقيت كلها مشغولة فكرت فاتن بعد ثواني قالت : بكلم البنات يمكن يعرفون وحده تجي القاعة اسماء : ايه الله يخليك كلمي كل اللي تعرفيهم فاتن : ابشري بكلمهم لك , الحين اغراضك كلها جاهزة اسماء : باقي الفستان بكره اخر بروفه اسويها وان شاء الله يضبط فاتن : تقدر تخلصه قبل الملكة اسماء بخوف من هالشي : نقول ان شاء الله وقفت فاتن : اجل انا بنزل تحت لامي اشوف اللي ناقصنا وطلعت من عند اختها وهي حاسه بخوفها وتوترها دخلت الصالة مالقت احد استغربت وين امها راحت لغرفتها ودقت الباب ومحد رد عليها استغربت اكثر ياربي وين راحت امها بعدها تذكرت انها مع اهلها بالخيمة برى اللي تجمعوا عندها عشان يساعدونها ويشوفون اذا ناقصها شي رجعت للصالة وشغلت التلفزيون وجلست تتفرج لما يروحون اخوالها ماتبي تروح عندهم وتقطع عليهم سوالفهم فضلت انها تجلس بالصالة تنتظر امها لما تخلص اما ابوها كان معزوم على العشا عند اخوياه بمناسبة خطوبة بنته ] نعرفكم بالعايلة الجديدة عبدالكريم , زوج الخالة عطوف حييل على بناته وهم اغلى حاجة عنده بالدنيا الخالة فاطمة , اخت ام فيصل حنونه على بناتها وماتقدر ترفض لهم طلب اسماء ,, 23 سنة اكبر وحده متخرجة من الجامعة وعاطلة , رفضت ناس كثير تقدموا لها لان ابوها ماشاف انهم يستحقونها فاتن , 22 سنة صديقة نوف وبسمه ورهف , مرجوجة زي البنات وتحب الوناسة [ قفل التلفزيون بملل ، ناظر ساعته واستغرب اخواته باقي مارجعوا لما الحين طلع الصالة بالدور الثاني ينتظرهم وهو يفكر باللي صار اليوم لما شافها صح اشتاق لها واشتاق لابتسامتها وقلبه دق لما شافها بس كل هالشي اخفاه تحت قناع البرود هي طعنته !! جرحته !! اهانته !! ولازم يرد لها مثلها كان يبي يقهرها وينرفزها بس ماشاف منها الا التوتر والارتباك ضحك بسخرية لما رفضت موعد الزواج وقال بنفسه " رفضتي اول لكن الحين ما باخذ موافقك " سمع صوت اخواتهم وهم طالعين من الدرج وقطعوا عليه تفكيره غادة وهي تشيل الاكياس وبعصبية : عاجبكم كذا تأخرنا عشان اكلكم رهف : قلت لك واحنا بالسوق خلينا نشتري عشا بس انتي رفضتي مها : وبعدين ماطولنا عند ماك كلها نص ساعة بس طلعت عيون غادة : وهالنص ساعة قليلة برايك ابتسمت رهف : خلاص غدو انظري للجانب الايجابي اشترينا فساتين وعشا وكسبنا ( وناظرت مها ) شوفة الحبيب حمرت خدود مها وضربت اختها على كتفها غادة : خذ اثنين والثالث مجانا ! رهف وهي تمسك مكان الضربة : بالضبط رفع ماجد حواجبه لانهم ماانتبهوا له : الحمدلله على السلامة لفوا البنات له وهم مخترعين غادة برتباك : اوه ماجد انت هنا ماجد : لا هناك ( وقال بعصبية ) وبعدين انتي وهي وهي خير ان شاء الله داخلين البيت هالوقت ، ماعندكم ساعة تناظرون الوقت اوه والله تاخرنا ابوي وامي راح يقلقون علينا ناظرتهم غادة : شفتم قلت لكم ماله داعي الاكل ناظرتها رهف بنص عين : ترى طلبتي معنا ماجد : وش فيكم تتساسرون ؟ غادة : معليش حقك علينا مها : كمان السواق تأخر علينا رفعت رهف اكياس العشا : ووقفنا عند ماك عشان نشتري عشا عقد حواجبه : تأخر عليكم ؟ ليه !! غادة : عشان الزحمة هز راسه بتفهم ورفع اصبعه بتهديد : هذي اخر مره تطولون برى لهذا الوقت مفهوم !! البنات : مفهوم قالت رهف بتردد لما شافته جالس وشكله بيسهر معهم : نسينا نشتري لك عشا مها : الحين نطلب لك ابتسم لهم : بالعافية على قلوبكم توني ماكل مع اهلي ( وبضحكة ) بس لو تعطوني بطاطس اكون لكم من الشاكرين رهف : تفداك بطاطستي مها : وحقتي بعد ولو تبي الكولا كمان ضحك عليهم وحطوا اكياس الاكل عنده وراحوا جناحهم يفسخوا ويغسلوا بعدها طلعوا له رهف بحماس : والله فاتك ياماجد السوق فيه فساتين كشخة استغرب وهو ياكل بطاطس : يعني اشتري لي واحد ؟ تفشلت رهف : لا اقصد يعني حدد زواجك بسرعة عشان نشتريها ماجد بهدوء : العروس تقول بدري تذكرت مها : ايه صح انت زرت عبور اليوم ؟ ماجد : ايه زرتها رهف برجاء : هييا اتفقوا على الزواج نبي نشتري الفساتين قبل لا تطير منا واذا على رفضها احنا بنقنعها ماجد : خلاص انا بقنعها ناظرت غادة اخوها اللي ياكل وواضح انه مبسوط معهم : من زمان ماسهرت معنا ماجد : خلاص الحين يوميا بسهر معكم ( وبضحكة ) بس احسبوني معكم بالاكل بعد كذا ولا مابسهر ضحكت مها : اخاف تسمن لما زواجك رهف : وبعدين مين يفكنا من لسان عبير ( وقالت تقلدها ) سمنتوا زوجي انتم مو حموات انتم مخربات ضحكوا كلهم عليها ماجد : خلاص بكنسل سهراتي معكم غادة : لا لا تكنسل بنسهر بدون اكل مها : ماتصير سهره كذا ماجد : اختاري ياسهرتي معكم او الاكل رهف : اسمعي مها ترى كلها فترة ويتزوج ونرجع لاكلنا في الليل خلينا نسهر معه هذي الفترة بس بدون الاكل ماجد بضحكة : احلفي !! ومين قال اني اذا تزوجت مابسهر معكم غادة : بنخلي عبير تسوي لك حظر تجول ماجد : اذا تقدر ناظر بساعة اللي بالجدار كانت قريب الفجر ، اكيد نامت الحين انتظرت اتصالي لما نامت اصلا ماكنت بتصل عليها وماراح اتصل عليها خليها تتعذب شوي مثل ماعذبتني فتحت عيونها بكسل وناظرت مكان زوجها الخالي وابتسمت بخجل امس بعد ماخلصوا من المستشفى تمشوا شوي وبعدها تعشوا بمطعم وانتهت ليلتهم رومانسية وهالشي اللي خلاها تنام لما الحين لانه سهرها الليلة اللي قبلها قامت وتروشت ولبست ملابسها وعدلت شكلها واخذت طرحتها ونزلت تحت دخلت الصالة لقت عمتها وببتسامة : صباح الخير ياعمه ابتسمت لها ام فيصل : هلا يمه صباح النور جلست جمبها بعد ماحبت راسها : شلونك اليوم ؟! ام فيصل : الحمدلله طيبة , اعذريني يابنتي افطرت من دونك ابتسمت لها امل كانت دايم تقوم بدري وتفطر مع عمتها : لا ياعمه عادي بالعافية على قلبك اعذريني انا اللي نمت لما هالوقت ام فيصل : على الاقل انتي تقومين بدري مو مثل بناتي الله يهديهم وقفت امل : الحين ازعجهم واقومهم لك ام فيصل : ماتبين تفطرين قبل ؟! امل : بفطر معهم طلعت وازعجتهم مثل ماقالت وقومتهم ونزلت معهم وكانت مبتسمة بانتصار حبوا راس امهم وجلسوا جمبهم ام فيصل بضحكة : كل يوم برسلكم امل تقومكم نوف : لا يمه تكفين , الخدامة اهون منها طلعت عيون امل : شوفوا قليلة الادب احترميني على الاقل انا زوجة اخوك نوف : معليش أي انسان يقومني من نومي يطلع من حياتي ام فيصل : الله يعيين زوجك نوف : زوجي بخليه ينام مثلي , بحط له حبوب منومة بالعشا حقه ام فيصل بضحكة : الله يهديك وانا امك , قوموا افطروا لان شوي بيجون الرجال ونحط لهم الغدا مرام : يمه تعرفيني ماافطر اول مااقوم من النوم ام فيصل : قومي شوفي زوجة اخوك ماافطرت لما الحين تنتظركم نوف : كان افطرت لوحدها وخلتنا ننام ضحكت امل : انتي حقدتي علي مره وحده نوف : لاني انسانه اقدس النوم سمعوا الحريم فتحت باب الفيلا وعلى طول امل لفت الطرحة على راسها دخل ابو فيصل وعياله وراه : السلام عليكم الكل : وعليكم السلام حب خالد راس امه وطلع لغرفته عشان زوجة اخوه ابتسم فيصل : ماشاء الله اخواتي صاحيات مو بالعادة نوف : ماقصرت زوجتك معنا ضحك فيصل : هي اللي قومتكم ؟! احسن بخليها كل يوم تقومكم مرام : امي قالته بتخلي امل تقومنا دايما ابو فيصل : اترك عنك الحكي وروح غير ملابسك خلنا نأكل ونرتاح شوي نوف : يبه وش رايك اداوم عنك بدل هالطفش ! ابو فيصل ببتسامة : ماعندي مانع , بس داومي في البيت نوف : لا يبه جد جد لو تسوون لنا فرع نسائي بالشركة صدقني انا اول وحده بعطيكم ملفي عشان اتوظف فيصل بضحكة : الحمدلله انا ماعندنا فرع نسائي لف له ابو فيصل وتصنع العصبية : وانت باقي ماغيرت ملابسك ؟! وقف فيصل : الحين بغيرها طلع ولحقته امل , وابو فيصل راح ولحقته زوجته قالت نوف بضحكة : كل وحده راحت ورى زوجها ابتسمت مرام : باقي بنشوفك لما تتزوجين وش بتسوين لزوجك قالت نوف وهي تتخيل : تخيلي اجيب له ملابسه لما عنده , يخسى وقفت مرام : نشوف , قومي الحين نطلع الغدا وراحوا للمطبخ يجهزون الغدا وهم يسولفون اتصل خالد على مرام واستغربت : هلا خالد خالد : هلا مرام , تقدرين تطلعين غداي عندي بالجناح استغربت : ليه ؟! خالد : عشان امل تاخذ راحتها معكم هزت راسها بتفهم : ابشر الحين اجهزه لك واطلعه قفلت من اخوها وسألتها نوف بلقافة : وش يبي خالد ؟! راحت مرام للدولاب تطلع صحون : يبي غداه بالجناح فوق تخصرت نوف : لا والله وش رايه بعد نأكله بيدنا خزتها مرام : عشان ماتعرفين سببه لو تعرفين ماقلتي هالكلام نوف : وش سببه ؟! مرام : عشان امل تأخذ راحتها وهي تاكل معنا ندمت نوف على كلامها : اوبس اسمعي خليني اطلعه له غداه واعتذر منه مرام : تبغين تطلعينه طلعيه لكن الاعتذار لا لانه مادرى عنك , ولسانك صونيه نوف : طيب والله مااعيدها طلعت من المطبخ والبخور بيدها تبخر البيت لان الجمعة عندهم اليوم حطت البخور على مراية الاستقبال ووقفت تعدل شعرها وهي تغني بروقان : يانا يانا يانا يانا في حبيبي اموت انا اموت انا في حبيبي , اموت انا بلهيبي ياعذابي وحبيبي وحبيبي مادارى بي : وعلشانه اموت انا التفت للصوت وهي مخترعة وبصدمة : وليــــد !! ابتسم لها : ايه وليد , وش فيك مصدومة ابتسمت : لا بس عشان من زمان ماسمعتك تغني وانصدمت بس ( وناظرت ثوبه اللي كله بقع وشهقت ) وش هذا اللي بثوبك وليد : تعطلت سيارة واحد من اخوياي ورحت اساعده , الا اسمعي احد جاء ؟! بسمه : لا باقي مر وليد من جمبها : حلو اجل يمديني اتروش وابدل بسمه : بس عجّل لانهم اكيد بالطريق اشر لها وليد بيده وهو طالع من الدرج ودخلت هي تبخر المجلس وتغني : يانا يانا ياتعبني يانا يانا يا سايبني دخل لها راشد : الله الله وش هالطرب ؟! لفت له بسمه : شرايك بصوتي العندليبي راشد : بطل , تعالي ابي بخور الحبيبة اكيد بتجي ابتسمت بسمه : لن تشوفها تنهد راشد بحزن : لازم تقلبين علي المواجع بسمه : عشان تدرك الواقع دق باب الفيلا , وحط راشد رجله للمطبخ ومن هناك طلع للخيمة اما بسمه ضحكت عليه وراحت تفتح الباب : ياهلا والله سلمت على عمتها وعبير طلعت لهم ام وليد من الصالة : ياهلا والله راحوا لها وسلموا عليها ودخلوا معها الصالة كانت قابلة البيت عليهم ومعندة تروح معهم غادة : يابنت تعالي معنا والله ماراح يدري عنك طلعت عيونها : كيف اروح بيتهم وهو حاجزني له وقفت ام ماجد : الله يهديك وانا امك ( وناظرت بناتها ) اقنعوها لما البس عبايتي تكتفت : مابروح يعني مابروح طفشت رهف منها : الا بتروحين وغصبن عنك بعد , قومي البسي عبايتك مها : وشلون اروح بيته لا ماابي احراج قالت غادة تبي تقنعها : مها حبيبتي ترى عادي مافيها شي شوفي مرام تروح بيت عمي سعود عادي ماقالت مابروح لان ولدهم حاجزني له وكمان عبير شوفيها دايم تجي عندنا البيت وماقالت لا زيك مها : بس احراج والله رهف : قومي محد بيدري عنك مها : وامه ؟! ابتسمت غادة : يازينها عمتي الجوهره مابتقول لك شي مها : واذا احرجتني رهف بطفش : اسمعي جلسة بالبيت لوحدك لا , وروحي تجهزي بسرعة قبل ماينزل ماجد ويعصب علينا طلعت للجناح وهي تتحلطم وشلون تروح بيته وهو فيه تحس نفسها بتموت من الحياء اذا قابلت اهله ووقفت مكانها " طيب اذا شفته بالصدفة , لا لا يارب ان شاء الله مااشوفه اليوم كله " اخترعت من صوت ماجد : انتي باقي مالبستي لفت عليه : الحين بلبس ماجد مر من جمبها ونزل من الدرج : بسرعة تتأخرين قابل ابوه بالطريق وحب يده ودخل معاه الصالة : السلام عليكم البنات : وعليكم السلام ابو ماجد : وينها مها ؟! ماجد : توني شفتها باقي مالبست ابو ماجد : ليه ؟! ماعندها خبر اننا بنروح لعمك علي قالت غادة تبي تبرر لاختها : انشغلت بالتلفزيون وراح عليها الوقت وماانتبهت ابو ماجد : الله يهديها الحين بتأخرنا عليهم وقفت رهف : بروح استعجلها نوف وهي تدف بسمه : قلت ابي الحين اشوفه بسمه وهي تطلع الدرج : مو وقته والله مو وقته نوف بعناد : الحين يعني الحين بسمه : طيب اصبري لما يجون البنات كلهم نوف : لا ابي اشوفه الحين وشهقت لفت لها بسمه بخوف : وش فيك مسكت نوف العطر اللي كان فوق الطاولة براس الدرج : عطري الحبيب وتروشت فيه مو تعطرت بسمه : حسبي الله عليك خوفتيني نوف بدلع : معليش بس اشتقت لعطري , بس والله راشد عنده ذوق بالعطور ابتسمت بسمه : بس هذا مو عطر راشد نوف : عطر ابوك ؟! ضحكت بسمه : وش يجيب عطر ابوي هنا بالله , هذا عطر وليد انصدمت نوف : تمزحين صح ؟! ( وبقرف ) وعععع كرهته خلاص بغير ملابسي طلعت عيون بسمه : مو منجدك تغيرينها نوف : ان شاء الله بغيرها , تبيني اترك ريحته بملابسي لا شكرا وراحت لجناح البنات ولحقتها بسمه فتح باب جناحه هو واخوه بعد ماسمع كلامها وابتسم بستهزاء " الايام بيننا يانوف " ونزل تحت بيروح للرجال بعد ماغير ملابسه عند الرجال بالخيمة , كانوا الشباب يضحكون على موقف صار لفيصل بدر : الله لا يحطني بموقفك خالد : ياليتني كنت موجود عشان اشمت فيك فيصل : الحمدلله اجل انك مو موجود راشد : امانة اختي وش قالت ؟! فيصل : تركتني وراحت ولا كأنها تعرفني فهد : معاها حق , اجل تصدم بزجاج المطعم وتبيها تكون جمبك فارس بضحكة : الحمدلله انها اذكى منك وانتبهت له خزه فيصل : وش قصدك ؟! ناصر : اللي على راسه بطحه يحسس عليها فيصل : كأنني تمصخرت فهد : شوي مو كثير دخل ابو ماجد وولده ومعاهم وليد اللي قابلهم بالحوش : السلام عليكم وبعد السلام جلسوا ماجد ووليد بين العيال لف ناصر لوليد : مو بالعادة تتأخر ( وابتسم ) المشكلة ماعندك مدام تأخرك وليد : خويي اخرني , تعطلت سيارته وكنت اصلحها معاه تذكر خالد : ايه صح على طاري سيارة خويه , بعد بكره بنطلع للبر مين يخاوينا ؟! المفروض الطلعة اليوم بس اجلناها عشان الجمعة ضحك فارس : الحين وش ربط السيارة بالبر ابتسم راشد : هذا رابطه العجيب خالد : طيب والبر ؟! فهد : انا معاكم بس بدون نوم ناصر : قلت لك رأي من اول راشد : طيب يعني بس اربعه اللي متاكدين انهم راح يجون عقد فهد حواجبه : مين الرابع ؟! خالد : سلطان خوينا تذكره فهد وابتسم : اووه من زمان عنه اخباره خالد : بخير عايش حياته , المهم لا تضيعون السالفة مين بيطلع ماجد : انا مااقدر عندي مقابلة عمل وليد : لقيت لك وظيفة ؟! ماجد : لقيت بس لازم المقابلة وفترة تدريب وليد : الله يسهلك ناصر : ترى مكانك بالشركة موجود ابتسم له ماجد : تسلم والله بس ابي اشتغل بمستشفى تعرف الطموح فيصل : الله يكتب لك اللي فيه الخير ناظرهم خالد بطفش : اوك شكرا على التطنيش ضحك وليد : يااخي مو وقت طلعتكم بس على العموم انا مشغول فارس : انا بجي بدري : وانا معه فيصل : انا قاطعه راشد : مااقدر ابعد عن زوجتي ابتسم فيصل : بالضبط عشان كذا مااقدر لف راشد لخالد : شرايك نكنسلها شوف اشكالهم يحطمون الواحد خالد : الظاهر كذا , خلنا على سهرات الكوفي ازين عند البنات كانوا جالسين بالمجلس لوحدهم رهف : الحمدلله انا اشتريت كل شي مرام : وانا بعد بسمه : اول مره نخلص اغراض الملكة بدري نوف : ايه والله صادقة لا وكمان مافي اي تعديلات ولا شي غادة : حقي باقي بغيره لانه ضيق امل : الحين منجد فيه فساتين حلوه بالسوق ؟ مها : اول مره بتاريخ البشرية تصير ، السوق مليان فساتين ( وتذكرت كلام اختها امس وبضحكة ) فاتكم امس رهف الغبية قالت لماجد لما رجعنا ان السوق مليان فساتين كشخة وهو استغرب وقال لها يعني اشتري لي واحد ضحكوا البنات على غباء رهف رهف بفشلة : قصدي انه يعجل بزواجه عشان نشتريها لا تروح علينا بسمه : ههههههههه تخيلي ماجد بفستان وماقدرت تمسك نفسها من الضحك ضربتها مها بالمخدة : وجعع اخوي لا تتريقين عليه عبير استغربت لانها كانت تنتظر اتصاله امس وتوقعته نام بدري : رجعتم بدري امس ؟! غادة : لا وين رجعنا متأخر وماجد يا قلبي عليه كان شايل همنا ليه تأخرنا رهف : بس والله اخذنا تهزيئة محترمة منه بعدها راضيناه بماك وسهر معانا انصدمت عبير " يعني سهر مع اخواته وجحدني مره ثانية " وبلعت غصتها تذكرت نوف : اييوه بنات صح ، عندكم ارقام صالونات شغلهم حلو اسماء لما الحين ماحصلت لها صالون حزنت بسمه عليها : يا عمري ملكتها قربت غادة : انا عندي رقم الصالون اللي تجهزت فيه جواهر شفتي مكياجها كيف كان بطل رهف : اههب عليك كيف اخذتي الرقم ؟! ابتسمت غادة : عادي كلمت العروس نفسها كمان تقول ان اسعارهم حلوه نوف : بالله ارسلي لي الرقم امل : غريبة ماحلصت لما الحين ؟! نوف : فاتن تقول ان اغلب الصالونات مشغولة يوم ملكتها امل : الله يعيينها ويتمم لها على خير فجأة سمعوا صوت زغاريط الحريم وراحوا البنات لهم بسمه : مين تزوج ؟ رهف : العروس جات ؟! نوف : احد خطب ؟! مرام : اسماء جات ؟! ضحكت ام فيصل : بشويش على اعماركم ( ولفت لعبير ) مبروك ياعبير وقاموا العمات يباركوا لعبير ويسلموا عليها وهي كانت مستغربة عبير مستغربة وابتسمت : الله يبارك فيكم بس على ايش ام ماجد بفرحة : ولدي حدد موعد الزواج ، بعد اسبوعين انصدمت عبير : ايــــــــــــــــــش ؟! انتهى البارت + اسعدوني بتوقعاتكم ؟! | ||||
|
| |
|
18-10-17, 08:15 AM
| #18 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| \\ ’ السلام عليكم كيفكم ؟ وش اخباركم ؟ ان شاء الله كلكم بخير بسم الله نبدأ بالبارت التاسع - الجزء الاول عند الرجال كانوا يباركون لماجد وهو مبسوط لانه كسر كلمة عبير فيصل : واخيرا راح تدخل القفص الذهبي ، صدقني ماراح تندم ابد خذها نصيحة من خبير ناصر ضحك : ماشاء الله صرت خبير فيصل : افا عليك خبرة سنتين زواج ابتسم ماجد : انا اخبر منك ، خبرة ٧ سنوات ملكة فارس : ماجد تكفى لا تصير مثله وتحبس اختي ترى هي وحيدتنا فيصل : صار ينضرب فيني المثل الحين وليد : انت مثال على حبس الزوجة فيصل بهيام : ياخي احبها وش اسوي ضحك وليد : طيب احترمني على الاقل ترى انا اخوها فيصل بضحكة : انت ابتلاء من رب العباد والله ماتشوفني مبسوط مع زوجتي الا تجي تنكد علينا همس ماجد لفهد : اتمنى ماتكونوا مثله وتنشبوا بحلقي فهد ببتسامة : والله مااوعدك خصوصا انك متزوج وحيدتنا ماجد : يـــــوه هذي هي النشبة بحق فهد : لا تقول بتهون ابتسم ماجد : مجنون اهون انا ماصدقت حددت الزواج فهد : الله يتمم لكم على خير ماجد : امين وعقبالك ان شاء الله انتهت السهرة على الكل وهم مبسوطين لعبير وماجد , اما عبير كانت باقي مصدومة من الخبر وشلون تتزوج بعد اسبوعين , باقي ما فاقت من صدمة زيارته وغير جحدته لها امس وهو قال لها تنتظر اتصاله , وفي الاخير يطلع سهران مع اخواته والحين تتزوجه وفي اسبوعين كيف !!!!!!!!!! اليوم الثاني بعد الغدا كانت تنتظر الوقت المناسب عشان تكلم ابوها على موضوع الزواج وشافته يقرأ الجريدة وواضح انه هادي ومروق عبير بتردد : يبه بعد ابوها الجريدة عنه : هلا يبه عبير : عادي نأخر الزواج شوي ( وقالت بتبرير لما شافت كلهم يناظرونها بتساؤل ) يبه مره قريب بعد اسبوعين مااقدر اجهز ولا شي في هالوقت وكمان باقي ماعنده وظيفة كيف بيصرف علي بعدين ابو فهد : لا مو قريب وقته مناسب فهد : اذا على الوظيفة بكره عنده مقابلة وبعدها راح يتوظف ، مااتوقع رجال بشهادة دكتوراه يرفضونه عبير برجاء شوي وتبكي : طيب قريب اسبوعين ، خلوها بعد ثلاث اسابيع ابو فهد بحده : انا اعطيت ولد اخوي كلمتي وانتهينا ، اول رفضتي الزواج واحرجتيني قدام الكل الحين مالك كلمة بلعت غصتها : حاضر يبه ( ووقفت وراسها بالارض ) عن اذنكم وطلعت وحس فهد عليها ولف لابوه : يبه مو كأنك قسيت عليها شوي ابو فهد : اللي صار اول ماابيه يتكرر ( ولف لزوجته اللي كانت ساكته طول الوقت ) وانتي يا العنود ابيك تقنعيها واذا على التجهيز بنات اخواني ماراح يقصرون معها فهد : وانا موجود بالخدمة لو تبيني انزلها السوق بسمه : هيا راشد قل تم راشد : وانا وش راح استفيد من الموضوع ؟! ابتسمت بسمه : ولا شي بس توديني البنك وتنتظرني لما اخلص راشد : اجل الغي مشروعك بسمه برجاء : هييييا الله يخليك راشد : شوفي لو بتشترين لي فطور موافق حتى لو فلافل , شفتي كيف اني انسان طلباتي بسيطة طلعت عيون بسمه : بعد اصرف عليك راشد : انت اللي تبيني مو انا بسمه لفت لوليد : ولودي ناظرها بطرف عينه : اصغر عيالك انا بسمه بدلع : احب ادلعك طيب وليد : زوجتي اللي لها الحق تدلعني بس ابو وليد كانه تذكر شي : يبه بسمه بسمه لفت لابوها : عيون بسمه ابتسم ابوها لها : الله يسلم عيونك روحي يبه جيبي جوالي راحت بسمه تجيب الجوال ابو وليد يكلم ولده : اليوم ان شاء الله بنروح لعمك نخطب لك بنته تو تذكرت لما قلت زوجتي استغرب راشد وانبسط بنفس الوقت : تخطبون لي مها ابو وليد : خلاص انت حجزنا لك البنت باقي اخوك يشوف عمره ابتسم وليد : خفت انك نسيتني يبه لما شفتك مطنش الموضوع ابتسم ابوه : ايه والله نسيتك وانا ابوك تعرف الكبر وش يسوي بالواحد وليد : الله يعطيك الصحة والعافية يارب ام وليد : اقول علي خليني اكلم امها اول نشوف رايها ابو وليد : لا بنخطبها من ابوها دخلت بسمه وبيدها الجوال : تخطبون مين ؟! ام وليد بفرحة : بنخطب لاخوك اعطت بسمه الجوال لابوها وجلست جمبه : بس راشد خلاص حجزتوا له مها ضحك وليد : الظاهر ان الكل ناسيني شهقت بسمه : احلفففففففففف ! انت اللي بيخطبوا لك هز راسه وببتسامة : واخيرا قررت اتزوج كانوا البنات يتناقشون بالصالة في العصر رهف : طيب مايمديك توسعيه شوي ؟! غادة : مافي مجال انه يتوسع لازم اغيره مها : روحي مع السواق طيب ؟ غادة : لا مابروح معه لوحدي دخل ماجد عليهم : تروحين وين ؟! غادة : جيت وربي جابك رهف تغني : جيت وش جابك حبيبي ( قالت مها معاها ) من بعد طول المغيبي من بعد طول المغيبي ابتسم ماجد : هالاغنية جديدة علي شهقت رهف : وين جديدة !! ترى مره غبار عليها ماجد : قديمة ؟! مها : مو بس قديمة تقريبا لها اكثر من 4 سنوات رهف : نزلت وانت ببريطانيا ماجد : عشان كذا هي جديدة علي ( ولف لاخته ) هلا وش بغيتي غادة : ابيك تنزلني السوق عقد حواجبه : وقبل امس وين كنتي ؟! غادة : بالسوق بس فستاني اللي اشتريته طلع ضيق وابي ابدله بمقاس اكبر ماجد : طيب روحي مع السواق مها : شفتي قلت لك روحي معه غادة : وشلون اروح معه لوحدي ؟ لا مستحيل لف لاخواته : وانتم ليه ماتروحون معها ؟! رهف : انا فستاني مضبوط علي وحق مها برضو ليه ننزل معاها مره ثانية ابتسم : الله يا القناعة ( وفكر ثواني وبعدها قال ) طيب جهزا نفسكم بنزلكم كلكم السوق ولا نسيتم زواجي شهقت رهف : والله نسيته ماجد يبي يقهرها : فستانك اللي اشتريتيه لملكة بنت عبدالكريم البسيه في زواجي عقاب لنسيانك رهف : لا والله ما البسه في زواجك , شوف حتى مها نسيت مو بس انا ماجد : حتى هي بتلبس فستانها في زواجي ( ولف لاخته ) يالله غدو جهزي نفسك عشان نبدل فستانك ( وقال يقهرهم ) واشتري لك فستان لزواجي مها تكتفت : والله ظلم وقف ماجد : محد قلكم انسوا زواجي وطلع يغير ملابسه رهف شوي وتصيح : ياربي الحين كيف البس فستان ملكة اسماء في زواج ماجد وش بيقولوا عني الناس حضرت زواج اخوها بفستان قديم مها : كله منك اصلا انتي اللي خليتيني انسى زواجه رهف : انا ضربتك على يدك وقلت لك انسيه مها : مين اللي قال اننا افتكينا من مشاوير السوق رهف : الله الحين حطيها على راسي غادة : خلاص انتي وهي لا تتضاربون بطلع اقنعه وانتم اعتذروا منه مها : لو يبيني احب راسه حبيته رهف تغني : احب راسك يازمن ضحكت غادة : اسمها ابوس مو احب رهف : تعددت المسميات والمعنى واحد وكما قال الشاعر كل الطرق تؤدي الى روما وقفت غادة وهي تضحك : الله يخلف على عقلك رهف : عقلي زين مافيه شي بسم الله عليه ( ولفت لمها بعد ماطلعت اختها ) تعالي نكمل الدويتو مها : والله انك رايقة , قبل شوي كنتي بتبكين لان ماجد عاقبك وتضاربتي معاي كمان رهف : ماعندك قلب متسامح وابيض , وين بسمه تجي تغني معاي قالت ام فيصل لزوجها بعد ماقفل من الجوال : خير ان شاء الله وش يبي اخوك ؟! ابتسم زوجها : كل خير ان شاء الله , يقول يبي يزورني مع ولده استغرب فيصل : خير يبه في شي ؟! الشركة فيها شي ابو فيصل : لا الشركة الحمدلله امورها تمام , وانت بعد صلاة العشاء ابيك بالبيت ( ولف لولده الثاني ) وانت بعد تسمع هز خالد راسه : ابشر يبه ( وهمس لاخته ) الظاهر فيه مصيبة مرام بنفس الهمس : حتى قلبي يقوله خافت ام فيصل : ياابو فيصل قلبي مو متطمن من زيارة اخوك ابو فيصل : نقول خير يارب ( وقال لبناته ) يبه مرام نوف ابيكم تجهزوا لنا القهوة والبخور نوف : ابشر يبه , البنات بيجون معه ؟! ابو فيصل : لا بس هو وولده ام فيصل : الله يستر من هالزيارة ابتسم زوجها يطمنها وهو خايف من زيارة اخوه اللي ما قال له شي : تطمني مافيه الا كل خير ( ووقف ) بروح ارتاح شوي لما المغرب وطلع ووقف فيصل : وانا بطلع لزوجتي ضحكت نوف : اترك الادمية ترتاح منك شوي تو مالها خمس دقايق من طلعت ابتسم فيصل : قصدك ساعة الا ربع من طلعت ضحك خالد : بعد حاسبها فيصل : ماشفتني كل شوي اناظر ساعتي مرام ضحكت : لاحظت هالشي والله ام فيصل ببتسامة : الله يهنيكم يمه وعقبال الباقين حب راس امه وطلع لزوجته نوف : باقي بدري علينا يمه خلينا نتخرج اول ومرام باقي تنتظر نقل الحبيب رمتها مرام بالمخدة وهي مستحية من امها واخوها خالد : وانا بعد بنتظر نقل حبيبتي لاني خلاص تخرجت ماعندي غير هالعذر فتح باب الجناح : امل قلبي طلعت له امل من الغرفة وهي مبسوطة : قلب امل قلبك ضحك وهو يتقدم لها : صار لغز مو غزل ضحكت له امل وحاوط خصرها بيدينه : تدرين مين بيجينا اليوم امل كانت توها مقفلة الجوال من امها : ابوي ووليد فتح عيونه : كيف عرفتي ؟! غمزت له : العصفوره قالت لي خق معها : يابنت لا تغمزين , تدرين فيني مااتحكم بنفسي ( وابتسم بخبث ) ولا هذا اللي تبينه ؟! حمرت خدودها وهي تلعب بازرار ثوبه : ماسويت شي ابتسم فيصل : سيماهم على وجوههم ركبت عبير السيارة معصبة : السلام عليكم استغرب فارس : وعليكم السلام ( وببتسامة ) وش فيها الحلوة زعلانة ؟! عبير : مافيني شي قال فارس يغني وهو يطلع من بوابة بيتهم : الحلوة زعلانة الحلوة زعلانة منهو يراضيها انا اراضيها وبروحي افديها ومدري وشهو الباقي ابتسمت عبير : اذا ماتعرفها ليه تغنيها لاحظ فارس ابتسامتها من عيونها : واخيرا ابتسمتي عبير : لا ماابتسمت فارس : عيونك ابتسمت , الحين قولي من ايش معصبة ؟ ( وبتساؤل ) عشان الزواج - فارس كان نايم لما عبير كلمت ابوها ولما قام من النوم شاف امه وقالت له الموضوع وقال انه بيوديها السوق عشان تتغير نفسيتها – عبير بقهر : فارس تخيل بعد اسبوعين والله مايمديني اسوي شي مره قريب فارس : انتي متى تبينه طيب ؟! عبير : يعني بعد ثلاث اسابيع كذا ابتسم لها فارس : مافرق اسبوعين عن ثلاث اسابيع عبير : الا فيه فرق 7 ايام قال بحنان يبي يقنعها : انتي صار لك 7 سنين مملكة وماجد الحين رجع واستقر مع اهله واذا على وظيفته شوفيه ضامنها وانتي خلاص تخرجتي مافي شي يمنع زواجكم مثل اول ماردت عليه وكمل بحنان : اعطيني سبب واحد مقنع وصدقيني راح اوقف بوجههم كلهم سكتت عبير تفكر , ماتقدر تقوله ان ماجد جاحدها لانها ماتبي تخرب علاقة اخوها بولد عمه قالت بعد تفكير : ماابي ابعد عنكم ابتسم لها فارس : مين قال انك راح تبتعدين عننا , انتي بتطلعين من بيت اهلك وبتروحين لبيت اهلك وانتي تعرفين وش كثر عمي صالح واهله يحبونك ويعزونك ( وبستهبال ) بس هاه ياويلك تستبدلين مكان اخوانك في قلبك باخواته كأن عبير اقتنعت بكلامه : مستحيل احد يغير معزتكم بقلبي فارس : الحين خلاص رضيتي ولا اغني الحلوة زعلانة عبير ضحكت : اذا ماتعرف كلماتها لا تغني فارس : يعني رضيتي ولا اغني ؟! عبير : عندك قدرة اقناع عجيبة فارس : ينفع اصير عالم نفساني مقنع ضحكت عليه عبير ابتسم فارس : اييوه هذي عبير اللي اعرفها , الحين قولي أي سوق نروح عبير : سوق ,,,, يقولوا البنات فيه اشياء حلوه فارس : الحمدلله انه بطريقنا طلع من المحل وبيده كيس كبير : فستانك وغيرناه , وش عندنا بعده ؟! شافت رهف محل وعجبها : نبي ندخل هذا المحل ماجد : ندخله وش ورانا كان محل عطور , طلع لهم البائع مجموعة عطور ماجد : عندك عطور للأزواج ؟! همست له مها : اخس بتشتري لعبير ابتسم ماجد : لا لابوي وامي غادة : ابوي وامي اشتري لهم طقم عود مو عطورات رهف : صدقوني انه راح يشتري لعبير طنشهم ماجد واختار كم مجموعة عجبته ولف لاخواته : تبون تشترون شي ولا احاسب ؟! مها بضحكة : بنشتري اذا قلت لنا لمين هالعطور كلها ؟! لف ماجد للبائع : خلاص حاسب على هذا بس بعد ما خلص حساب طلع مع اخواته رهف بزعل : كله منك ومن لقافتك ما اشترينا عطور ابتسم ماجد وتركهم يتضاربون : ماجـــد !! لف ماجد لمصدر الصوت وهو عاقد حواجبه مين يناديه وابتسم لما شافه : اوه اهلا فارس وسلم على ولد عمه , والبنات رجعوا ورى شوي رهف انصدمت لما شافته ماتوقعت ابدا انها ممكن تقابله هنا بس بنفس الوقت انبسطت وجلست تتأمله وهو يسولف ويضحك فارس ببتسامة : يامحاسن الصدف مين كان يتخيل اننا ممكن نقابلك هنا ماجد ببتسامة : الدنيا صغيرة وانا اخوك فارس : الا وش تسوي هنا ؟! ماجد : اقضي لزواجي وانت ؟! فارس بضحكة : اقضي لزواجك مع اختي شاف ماجد عبير وببتسامة : شلونك عبير مااستغربت عبير تغير شخصيته وبهمس : بخير لف ماجد يدور على اخواته شافهم بعيد شوي ورجع ناظر عبير ويأشر لها على اخواته : شوفي اخواتي هناك اذا تبين تروحين لهم قال لها فارس : خلاص روحي مع البنات واذا بغيتي شي اتصلي علي انا بكون مع ماجد هزت راسها وراحت للبنات بخطوات سريعة غادة بفرحة : الله الله شفتي الحبيب استحت عبير : خلاص اسكتي همست رهف لمها : بديت احب هالسوق تصدقين مها : اعترفي وش سرك مستحيل تحبينه كذا بدون سبب رهف : ماعندي سر ولا شي ( وقالت للبنات ) تعالوا نروح لهذاك المحل مبين ان اغراضه حلوه كانوا البنات ينتقلون من محل لمحل وماجد وفارس وراهم " مع الخيل ياشقرا " لانهم وزارة المالية بالنسبة للبنات وايديهم كلها اكياس بعد صلاة العشاء كل واحد راح مع اهله للبيت | ||||
|
| |
|
18-10-17, 08:19 AM
| #19 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| \\ ’ البارت التاسع - الجزء الثاني بعد صلاة العشاء جاء ابو وليد وولده في بيت اخوه وام فيصل وبناتها جالسين بالصالة خايفين من زيارته المفاجأة خصوصا ان امس كانت الجمعة ببيتهم نوف : يمه تتوقعين ليه جاء ؟ ام فيصل : والله مدري يمه بس ابوك متفائل خير بجيته مرام : الله يستر قلبي مو مطمن من زيارته شهقت نوف : ليكون زوج عمتي فيه شي ام فيصل بقوة : فالك ماقبلناه قولي خير يمه نوف : خير اللهم اجعله خير بس والله غريبة زيارته يعني امس كنا عندهم ليـ قاطعتها امها : خلاص يانوف قلنا خير همست لها مرام : اسكتي امي حاطة يدها على قلبها من الخوف مو لازم تزيدينها عليها نوف : طيب خلاص بسكت شوي ودخل ابو فيصل واولاده وراه وهم مبسوطين ارتاحت ام فيصل لما شافت الفرحة بوجههم بس قالت تبي تتطمن زيادة لما جلس زوجها : خير ياابو فيصل وش الموضوع ؟ ابتسم ابو فيصل وهو يناظر بنته : كل الخير يانوره , نوف يبه تعالي جمبي استغربت نوف : ابشر يبه جلست جمب ابوها وهي مستغربة من نظرات اخوانها لها وابتسامتهم ابو فيصل وهو يمسك يد بنته وببتسامة : اليوم خليتيني اسعد اب بالدنيا ابتسمت نوف بستغراب : ان شاء الله دايما يبه ام فيصل : وش فيه ياابو فيصل خوفتني فيصل بفرحة : اصبري يمه شوي , تعرفين ابوي يحب المقدمات ام فيصل فقدت اعصابها : ابوك حرق اعصابي ضحك ابو فيصل عليها وقال لها : اخوي علي خطب نوف لولده وليد صدمة !! صدمتين !!! فجأة اختفت التعبيرات بوجهها !! يارب انها بحلم مو علم ام فيصل بفرحة : والله !! وهذي الساعة المباركة مبروك يمه فيصل : ايه والله مبروك يانوف ماشاء الله وليد رجال وماينرد خالد بفرحة : ونعم الرجال والله مبروك يانوف مرام كانت ساكته مصدومة تعرف اختها وش كثر تكره وليد ابو فيصل ماانتبه لملامح بنته : هاه يبه وش رايك ؟ وليد رجال وماينرد لو تعرفين وش كثر فرحت لما خطبك كانت ساكته مازالت مصدومة وش تقول لهم وهي تشوف الفرحة واضحة بعيونهم فيصل ببتسامة : يبه الكتاب واضح من عنوانه " قصده ان السكوت علامة الرضا " وهي مابتلقى احسن من وليد ابو فيصل : لازم اسمع موافقتها بصوتها ارتبكت نوف ماتعرف وش تقول والكل ينتظر موافقتها اللي مستحيل تقولها بعد صمت ثواني : يبه اعطني كم يوم افكر ابو فيصل : حقك يبه بس لا تطولين على الجماعة هزت نوف راسها واستأذنت وطلعت لغرفتها دخلت فاتن على اختها الغرفة وهي شايلة اكياس ولابسة عبايتها : اسماء عندي لك بشارة اسماء كانت حاطة قناع على وجهها واخترعت من دخلة اختها : حسبي الله عليك خوفتيني فاتن وهي تحط الاكياس وتاخذ نفس : اسمعي عندي لك بشارة اسماء تتكلم بشويش عشان القناع : قولي فاتن وهي تفسخ عبايتها : لقيت لك صالون بطل وحجزت لك فيه اسماء بفرحة : قولي والله فاتن : والله نوف اعطتني رقمه من غادة اللي اخذته من جواهر ، المهم البنات مره يمدحون شغله وقالت حقت الصالون ان عندهم وحده تقدر تروح للقاعات تجهز عرايس المهم اخذتها لك اسماء : الله يسعد نوف وغادة وجواهر فاتن : وانا !! ترى انا اللي كلمتهم لك اسماء : والله يسعدك حتى انتي ، والله كنت شايل هم الصالون هذا بس الله يفرج همهم مثل مافرجوا همي فاتن : وهمي معهم يارب راحت اسماء تغسل وجهها بالحمام وانتم بكرامه ، اما فاتن فتحت واحد من الاكياس وطلعت فستان : اسماء ترى فستانك خلص تعالي البسيه ، ولا اقولك بلبس حقي اول وشوفيه اذا يحتاج له تعديل او شي بعد مالبسته طلعت اسماء وبيدها منشفة : لفي اشوف ( لفت اختها ) والله مضبوط الخياطة فنانة ماشاء الله مره ضبطته لك ابتسمت فاتن وهي تشوف نفسها بالمرايه : منجد مضبوط ؟ اسماء : طالع بيرفكت باقي حقي الله يستر فاتن : اسمعي ترى بكره اخوالي بيجون عشان يسلمون عليك اسماء وهي تلبس فستانها : وليه يجون ؟ خلاص ملكتي بعد بكره مايحتاج يجون فاتن وهي تقفل سحاب اختها : لازم يسلمون عليك ، لو نزلتي لهم اول لما جوا ذيك المره كان ارتحتي الحين اسماء : ياختي ماله داعي يجون ، شوفي اعمامي وش زينهم جوا مره وحده بس فاتن : عاد لازم يشوفونك ويباركون لك ويسلمون عليك اسماء : هذي كلها يقدرون يسوونها بالملكة ولا انا ممنوع الاقتراب مني يومها فاتن بضحكة : قابلة للانكسار ، لفي خليني اشوف الفستان شهقت بسمه : اححححلفي ابتسمت لها امل اللي حطها فيصل عند اهلها بعد المغرب : والله خطب نوف بسمه بصدمة : نوف نوف بنت عمي عبدالله امل : ايه هي بنت عمي عبدالله , تعرفي نوف غيرها بسمه : واه مو مصدقة انه خطبها توقعت يخطب غادة امل : الكل كان متوقع انه يخطبها حتى ابوي وامي بس امي تقول انه هو بنفسه اختار نوف بسمه : غريبة ، عاد انتي تعرفين نوف كيف تتنرفز منه امل : اتوقع حتى هو يعرف هالشي بس غريبة ليه اختارها غمزت لها بسمه : مامن محبة الا من بعد عداوة امل : مااتوقع يحبها المهم ياخبر اليوم بفلوس بكره ببلاش بسمه : على قولتك طيب اسمعي تتوقعي توافق عليه قلبي يقول انها راح ترفضه امل : الله يكتب اللي فيه الخير بسمه فجأة تذكرت : الا صح انتي ليه جيتي عندنا ؟ امل : طرده يعني ؟ بسمه : لا بس استغربت امل : فيصل قال بوديك لاهلك قلت طيب بس بسمه : تضاربتم امل : لا الله لا يقوله حبيبي يسوي اي شي عشان رضاي ناظرتها بسمه بنص عين : خلينا ننزل لامي وراشد اهون منك ومن زوجك عصبت امل : طيب شوفي مين يجيكم مره ثانية بسمه : الحين نوف بتجي تونسني بدالك ، تخيلي توافق عليه وناسه نسهر سوى ونتابع افلام ونسوي لنا اكل امل ضحكت : بس بس بس اول شي خليها توافق بعدها خططي وش بتسوين معها بسمه كانت مبسوطة : والله تحمست لفكرة زواجها من وليد ناصر كان في بيت اخوه في الخيمة ويكلم بالجوال : ابشر ولا يهمك , لا لاتعب ولا شي , ياسر الله يهديك ترى هي اختي , ههههههه لا بس اذكرك خلاص ابشر , بكره المغرب صح ! , ابشر ولا يهمك , فمان الكريم فهد سأل عمه بعد ماقفل : هذا ياسر ولد عمتي ؟! ناصر : ايه ياسر , يقول بكره اهله بيجون هنا ويبي احد يستقبلهم بالمطار استغرب فهد : عمتي بتجي الرياض ؟! ناصر : ايه تخيل هي وزوجها وريم فهد : وعمي محمد صحته تستحمل السفر ؟! ناصر : يقول انه بخير وبصحة وكمان اختي وبنتها نشبوا فيه الا يبون يسافرون وياسر مايقدر ياخذ اجازة من شغله عشان يسافر بهم تعرف لما كان مرافق مع ابوه بالمستشفى اخذ اجازة من شغله ومايقدر ياخذ الحين فهد : ايه الله يعطيه الصحة والعافية ومتى بيوصلون بكره ؟! ناصر : المغرب وصولهم لازم اكلم اخواني فهد : انا بكلم ابوي ماعليك ناصر : تمام وانا بعطي الشباب خبر عشان يكلمون اخواني اليوم الثاني في بيت ابو فيصل بعد الغدا الكل كان مجتمع ماعدا خالد اللي نام اول مارجع من الدوام ونوف اللي نايمة كمان ابو فيصل يناظر زوجته اللي تصب له فنجان قهوة : اليوم اختي بتوصل المغرب ان شاء الله مدت له الفنجان وهي عندها خبر بجية اخته من امس : الله يوصلها بالسلامة وجناح الضيوف انا نظفته لها ابو فيصل بحب : الله يعطيك العافية وجعل يد من ربتك الجنة استغربت مرام : يبه عمتي بتنام عندنا ؟ ابو فيصل : ايه وانا ابوك حلفت عليها تنام عندنا واخواني وعوايلهم راح يجون هنا عشان يستقبلونها ام فيصل : الله يحيهم والبيت بيتهم ابتسم لها بحب ووقف : بروح انام شوي لما العصر انتظرت مرام ابوها لما يروح ولفت لامها وبقهر : يمه ليه ابوي حلف عليها تنام عندنا امها : اخته ويبيها قريبه منه مرام : يمه العادة هي تنام بفندق اذا جات الرياض ليه هالمره لا استغرب فيصل : طيب وش فيها لو نامت عندنا مرام : ياخي ماابغى اجلس مع بنتها , كلامها مدلع ويجيب المرض تذكر فيصل لما عمته دخلت بنتها لهم : تدرين انها دخلت علينا لما كنا بالشرقية شهقت امل اللي كانت ساكتة : كيف دخلت عليكم ؟! مرام كانت مصدومة مثلها : جلست معكم يعني ؟! فيصل : ثاني يوم من وصولنا للشرقية زرنا عمتي في بيتها ودخلنا معها المجلس المهم شوي ودخلت بنتها وضيفتنا وجلست جمب امها امه كانت تعرف حركات اخت زوجها : الله يهديها وانا امك فيصل : الله يهدي الجميع يمه بس وشلون تخلي بنتها تجلس معنا امل بخوف ويدها على قلبها : شفتها ؟! ابتسم فيصل : تغارين ؟! مرام تنرفزت منه مو وقت غزله بزوجته وهي تبي تعرف فهد شافها او لا : مو وقته هالكلام جاوب استغرب فيصل وش فيها متنرفزه وناظرها بنص عين : كلنا لما شفناها دخلت علينا ناظرنا الارض ( وناظر زوجته ) ماجاوبتي علي ضحكت امه : فيصل يمه خذ زوجتك واطلعوا لجناحكم انبسط فيصل : ابشري يالغالية ( ولف لزوجته ) يالله ( وبهمس ) لعش حبنا شب وجهها ضو لما عرفت قصده في المغرب راح ناصر المطار يستقبل اخته وزوجها وبنتهم ريم كانت معصبة لان ناصر اللي جاء اخذهم مو وليد وعصبت اكثر لما عرفت انها راح تنام في بيت عمها عبدالله مو في بيت عمها علي المفروض ينامون في بيت عمها الكبير الحين كيف تقدر تشوف وليد وتكحل عيونها فيه ابتسم ناصر وهو يسوق : الحمدلله على سلامتكم تو مانورت الرياض ابتسم له ابو ياسر : الله يسلمك ومنوره باهلها ناصر : ترى عشاكم جاهز في بيت ابو فيصل ابو ياسر : ليه تكلفون على نفسكم ناصر : هذا حق وواجب وترى حتى اخواني ينتظرونكم هناك انبسطت ريم : حتى خالي علي ؟! ناصر ابتسم : هو اولهم همست ريم لامها : وناسة يمه يمديني اشوفه امها بهمس : هالله هالله بالدلع سحبت نوف بسمه معاها للمطبخ وهي معصبه منها : ياكلبه ليه ماقلتي لي عن الموضوع استغربت بسمه : اي موضوع نوف : لا تسوين نفسك ماتدرين قسم بالله كان ودي تكونين قدامي وقتها عشان اذبحك جلست بسمه ثواني تحاول تفهم الموضوع هذا اللي ماقالته لنوف وخلاها تعصب عليها بعدها تذكرت : اههها قصدك خطبة وليد لك نوف : الحمدلله على السلامة توك تعرفين ، المهم ليه ماقلتي لي بسمه : والله ماعرفت الا لما وصل بيتكم ( كملت لما حست انها ماصدقتها ) والله العظيم كنت احسبه راح يخطب غادة بس انصدمت لما قالت لي امل لما جات عندنا انه راح يخطبك نوف : على العموم انا زعلانة منك ، يعني بنت عمي وصديقتي الصدوقة ماتقول لي بموضوع مصيري زي كذا وكمان يخصني بسمه : قلت لك ماعرفت الا متأخر ( وابتسمت ) بعدين هاه وش رايك موافقة نوف بنفسها - اكيد رافضته - : باقي ماقررت بسمه : طيب امشي نطلع الصالة اكيد عمتي وصلت نوف : الله يعيينها عليها وعلى لسانها بسمه : وعلى بنتها بعد عند الرجال بالخيمة بعد ماوصل ابو ياسر وناصر ابو ماجد بفرحة : الحمدلله على سلامتك ياابو ياسر والله فرحنا بجيتكم ابو ياسر : الله يسلمك والله يديم عليكم الافراح ابو وليد : سامحنا ماقدرنا نزورك لما كنت بالمستشفى ابو ياسر : مسموحين والله والعيال ماقصروا الله يعطيهم العافية ابتسم ماجد : حق وواجب ياعمي لازم نزورك ونتطمن عليك ونطمن ابوي واعمامي همس خالد لبدر : ليه ياسر ماجاء معهم بدر : حتى انا استغربت انه ماجاء سمعهم فهد : مايقدر ياخذ اجازتين ورى بعض استغرب بدر : متى اخذ الاولى ؟ فهد : لما كان مرافق مع عمي بالمستشفى لف وليد لماجد بعد ماسمع كلمة مستشفى وكأنه تذكر شي : بشر كيف مقابلتك ؟ هي كانت اليوم صح !! فيصل تذكر : ايه كيف ؟ عدت على خير !! ابتسم ماجد : الحمدلله كل خير ، بعد يومين ببدأ تدريب عندهم استغرب راشد : بتتدرب وانت معاك دكتوراه !! ماجد : ايوه لازم التدريب بس تدريبي يختلف عن الباقين بحكم شهادتي كلها يومين او ثلاث واتوظف ان شاء الله عندهم فهد : اجل مبروك الوظيفة مقدما فارس : والزواج بعد خالد بضحكة : وشهر العسل راشد بتساؤل : يحتاج اقول والحمل ولا باقي بدري ضحك ماجد : الله يبارك فيكم كلكم وعقبالكم عند الحريم كانوا كلهم مجتمعين بالمجلس والبنات معاهم ام ياسر كانت جالسة بصدر المجلس : سمعت ان بنت اختك انخطبت يانوره ام فيصل بفرحة : ايه وبكره ملكتها الله يتمم لها على خير وترى انتي معزومه ام ياسر : ماشاء الله ومين اخذت ام فيصل : واحد من جماعة ابوها ام ياسر : ايه الله يوفقها وعقبال مانفرح بزواج ماجد ، الا يالعنود باقي ماحددتم الزواج ولا العروس باقي مصره على رفضها همست رهف لغادة : وجع ماتقدر تمسك لسانها هذا ام ماجد كانت مبسوطة لزواج ولدها اكثر من جرح ام ياسر لها وللعروس : بعد اسبوعين زواجه طلعت عيون ام ياسر : بعد اسبوعين ! زواج ولد اخوي بعد اسبوعين وانا ياعمته توني ادري ام فهد : السموحه منك تعرفين احنا ماعرفنا الا قبل امس ام ياسر كانت مقهوره ان الكل يدري الا هي : زين والعروس وافقت على زواجها ابتسمت عبير ابتسامة قهرت عمتها : لو مو موافقة ياعمه كان مانشرنا الخبر انقهرت عمتها منها : اييه زين قالت ريم بدلع وهي جالسة جمب البنات : ماشاء الله عبير كيف وافقتي مره قريب عبير - انجبرت الله يسلمك - وببتسامة : طولت وانا مملكة خلاص طفشت غمزت لها مرام : مستعجلة على رزقك وردت خدود عبير : لا مو مستعجلة بس خلاص ماقصرت ٧ سنين مملكة ريم : الله يتمم لك على خير , الا صح بكره عندكم ملكة ؟ مرام : ايوه بنت خالتي ريم بدلع : الظاهر بكره الظهر بنزل السوق ادور لي فستان عشان الملكة امل بطيبة : انا عندي واحد جديد اذا حابه تقدري تلبسيه ناظرتها ريم بحقد هي اخذت اللي المفروض تتزوجه وتصنعت الابتسامة وبدلع : ثانكس بس ابي اشوفه الحين تعرفين الحماس امل ماكانت تكرهه ريم عكس البنات : ايوه عادي تقدري تشوفيه ( ولفت للبنات ) شرايكم تطلعون معانا استحت غادة : لا صعبه نطلع شقتك اخاف فيصل يجي امل : لا ماراح يجي وكمان ريم بتطلع معاي عبير : لا خلاص احنا بنجلس هنا ننتظركم امل : هيا تعالوا خلونا ننقل جلستنا فوق مها بتساؤل : طيب واذا جاء فيصل بسمه : انا عادي عندي اذا جاء , زوج اختي وولد عمي تخصرت امل : احلفي ! لا ياحبيبتي معليش مو لاني اختك يعني عادي تكشفين على زوجي مها ببتسامة : الله الله بدت الغيرة نوف قالت تغني : تغار حتى من الهوى ياويل حالي ياهوى بسمه تكمل معها : خفف من الغيرة علي لي قلب غيرك ماهوى غمزت امل لنوف وهي خدودها حمرا : كلها فترة وتصيري تغارين مثلي ناظرتهم رهف بنص عين : كأني اشم ريحة سر هنا بسمه ابتسمت : اصبري فترة وتعرفين غادة حست بضيقة فجأة ماتدري وش سببها تغيرت ملامح نوف وقالت تبي تغير السالفة : كلمي زوجك لا يطلع علينا فوق وقفت امل : ايه والله صح نسيت , المهم بنات اسبقوني فوق وانا بلحقكم بسمه وقفت : يالله يابنات اختي باقي بتطول مع الحبيب ( ضربتها امل على كتفها ) اييي ماقلت الا الصدق يااختي ضحكت رهف : الله يهنيهم ويرزقني ابتسمت امل وهي تنتظر فيصل يرد عليها : امين يارب ورد عليها وطلعت برى تكلمه اما البنات طلعوا فوق مع ريم همس فارس لخالد : اسمع باقي عشاكم يتأخر ابتسم خالد : وانت دايم ماتفكر الا ببطنك فارس : الجوع كافر يااخي ناظر خالد ساعته : اتوقع بعد ساعة يطلع طلعت عيونه : ساعة !! مره كثير والله سمعهم راشد وقال يبي يرفع ضغط فارس : انا اقول لو تخلونها بعد ساعتين افضل تونا متقهوين ( وغمز لخالد ) ابتسم خالد لما فهم قصده : قولك كذا ! اجل خلني اكلم اخواتي يأخرونه كمان طلعت عيون فارس : لا تكفى لا تكلمهم ولا ترى انا بنفسي بدخل المطبخ واجيبه خالد : والله عادي مااقول لا بس المشكلة ان بنات اعمامي داخل ابتسم راشد : ينفع ادخل بداله ضحك خالد : لا ماينفع ولا ترى بعلم ماجد خالد كان عارف ان راشد حجز بنت عمه له سمعه ماجد وابتسم : كأني سمعت اسمي راشد يصرف : صدقني سمعت غلط خالد حب يورطه : راشد الله يسـ حط راشد يده على فم خالد وقال : قلت لهم انك وحشتني بس ناظره ماجد بشك بعدها ابتسم : بحاول اصدقك دخل فيصل الخيمة وابتسامته شاقه وجهه بعد ماقفل من زوجته وجلس جمب ماجد اللي ضحك لما شاف ابتسامته استغرب فيصل : وش فيك تضحك ماجد : يااخي انا المملك مااكلم زوجتي كثرك فيصل : انت حارم نفسك من متعة كبيرة عقد ماجد حواجبه وابتسم : وشلون ؟! فيصل : شف لما تكلمها بالجوال مو مثل لما تكلمها وهي قدامك , بالجوال تقدر تقولها كل شي تستحي تقوله وهي قدامك ( وابتسم ) تبيني اعطيك دروس خصوصية ؟! ابتسم ماجد : لا شكرا احتفظ بدورسك لك ( وقال بجدية يبي يغير الموضوع ) المهم نبي نسلم على عمتي فيصل : البيت فاضي استغرب ماجد : والبنات ؟! فيصل : كلهم بجناحي مجتمعين ( وابتسم ) الظاهر يعطون زوجتك دروس خصوصية ضحك ماجد : الله يخس عدوك , قم شف لنا الطريق بعد مادخلوا البنات جناح فيصل وامل , فضلوا انهم يجلسون بالصالة وريم معهم لما تخلص امل من مكالمتها وتجي لهم رهف وهي تسترخي بجسمها على الكنبة : الله الكنب مريح ينفع للنوم بسمه بضحكة : الظاهر فيصل اشتراه عشان اذا طردته امل يجي ينام هنا نوف ضحكت : اتوقع انه انطرد اكثر من مره بعد غادة : لا حرام مااتوقع امل تطرده ناظرت عبير المكان باعجاب : فيصل اللي أثث الجناح ؟! مرام : ايوه عبير : ماشاء الله ذوقه مره رايق قالت مها تبي تحرجها : حتى ذوق اخوي ترى حلو ابتسمت عبير وبخجل : لازم تحرجيني مها ضحكت : محد قلك امدحي شخص ثاني غير زوجك عبير : الله يعين عليك واضح انك راح تكوني اخت زوج غثيثة ابتسمت بسمه : لا حبوه مها يا ناسو عليها مدت مها لسانها لعبير تقهرها وعبير ضحكت دخلت امل عليهم بعد ماخلصت من مكالمتها وابتسمت : معليش تأخرت عليكم غادة : لا عادي خذي راحتك طلعت عيون بسمه : اكثر من كذا تاخذ راحتها " قصدها انها طولت وهي تكلمه " ابتسمت غادة : ماتعرفي شي اسمه مجاملة بسمه : للاسف مااحب اجامل مشكلتي اني انسانه صريحة ضحكت امل وقالت للبنات : بنات اعتبروا الجناح جناحكم وخذوا راحتكم فيه ( وقالت تكلم ريم ) تعالي ريم الغرفة عشان تشوفي الفستان نوف بلقافة : ابي اشوفه حتى انا ابتسمت امل : تعالي حياك واللي يبي يجي حياه دخلت امل ومعاها ريم ونوف الغرفة , اما البنات قرروا انهم يجلسون برى ريم اول مادخلت الغرفة اعجبت فيها وبديكوراتها بس مابينت لهم اما ضحكت نوف لما شافت الكنبة الصغيرة اللي قدام السرير : سواها فيصل واشتراها ابتسمت امل : ايه والله سوى اللي براسه جلست نوف فوق الكنبة الصغيرة مره : بس والله تجنن ريم قالت تبي تجرحها : حلوه لما نونو صغير يجلس عليها تغيرت ملامح امل اما نوف قالت : حتى لما تجلس عليها امل او فيصل بيكون شكلهم تحفه , الا صح امل فيصل جلس عليها ؟ ابتسمت امل رغم حزنها : صغيره عليه ما تكفيه وراحت للدولاب تطلع الفستان اما نوف حقدت على ريم اللي واضح انها تعمدت تجرح امل .. عند البنات برى .. قالت لهم مرام عن سالفة دخلت ريم للعيال لما كانوا بالشرقية وانصدموا مها بصدمة : اما دخلت عليهم ؟! بسمه بعصبية : اصلا هي قليلة ادب وماتستحي غادة : وعمتي الله يهديها ليه تسوي زي كذا مرام بتساؤل : يمكن حاطة عينها على واحد من العيال رهف : مين ياحسره ؟ ناصر ماتقدر وفيصل وماجد منتهي امرهم وفهد بعد مثلهم ( وشهقت ) ليكون وليد ؟! ابتسمت بسمه : لا وليد مستحيل عبير : ليه مستحيل ؟ بالعكس اتوقع انها حاطة عينها عليه وتبيه لبنتها بسمه بثقة : مافي امل اصلا اليوم الثاني الاعمام والعمات اتفقوا انهم يجتمعون في بيت ابو فيصل ويمشون بعد العشا للملكة اما البنات بعد مارجعوا من الصالون راحوا لبيت ابو فيصل يلبسوا ملابسهم اللي حطوها قبل مايروحون للصالون اما العيال كانوا ينتظرون البنات لما يخلصون عشان يوصلونهم للقاعة بعد مالبست فستانها , ناظرت نفسها بالمرايه واعجبت بشكلها رجعت ناظرت البنات كانوا كلهم مشغولين باللبس ومحد منتبه لها ابتسمت بخبث , هذي فرصتها تنزل تشوفه سحبت نفسها بشويش وطلعت من جناح البنات ونزلت بسرعة تحت قبل ماتحط رجلها على اخر درجة انفتح باب الفيلا اللي قدامها انتهى البارت + اعطوني توقعاتكم | ||||
|
| |
|
18-10-17, 08:20 AM
| #20 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| \\ ’ السلام عليكم كيفكم وش اخباركم ؟؟ وش رايكم اذا نزلت بارتين في الاسبوع ؟ حسيت كأني طولتها لما انزل كل اسبوع بارت فـ قلت احسن بارتين .. انتم وش رايكم ؟! بسوي اللي تبونه ونبدأ الحين بالبارت العاشر البارت العاشر - الجزء الاول عند الشباب بالخيمة فهد : الحين مين راح يوصل البنات ؟! بدر بتفكير : اتوقع 3 سيارات تكفيهم صح ؟ خالد : اجل نحتاج 3 سواقين وليد : انا عادي عندي اوصلهم ( وابتسم ) اذا ماوصلت البنات راح اوصل الشباب واتوقع البنات اهون منهم ابتسم ماجد : اجل انا بوصل الشباب فارس : لا انت معرس ومانبي نتعبك معنا ابتسم ماجد : يعني اوصل نفسي فيصل بعد ماقفل من جواله : متى بتروح ؟! ماجد : اذا كنت بروح لوحدي , بروح الحين فيصل : اجل خذني معك استغرب خالد : مابتوصل البنات ؟ فيصل : لا والله مااقدر , ابوي اتصل علي يقول ان خالي عبدالكريم يبي احد يساعده فارس : خلاص روح انت وخالد واحنا بنوصل البنات فيصل : لا بروح لوحدي وخالد يجلس هنا وليد : اذا خالكم يبيكم روحوا ساعدوه ( وابتسم ) ولا تخاف احنا اهل البيت اذا كنت مستحي تتركنا في بيتكم فهد : روح ولا تشيل هم شي هنا ابتسم فيصل : مشكورين والله ماتقصرون وهذا العشم فيكم ( وناظر اخوه ) خالد جاهز ؟! وقف خالد : لا باقي بغير ثوبي فيصل : بسرعة عشان نروح لخالي طلع خالد بسرعة للبيت ودخل من باب الفيلا الكبير وقف ثواني مكانه لما شافها قدامه نازلة من الدرج ومو منتبه له مين هذي !! بس شكلها ماخذه راحتها بالبيت ! رفعت ريم راسها للباب ووقفت مكانها وهي مبسوطة توقعته وليد بس كشرت لما شافت ملامحه " هذا اكيد خالد " هو لما شافها انتبهت له نزل راسه للارض ولف ظهره لها وهو يفكر مين هذي !! ابتسمت ريم وبدلع : شلونك خالد ! تفاجئ خالد من جراءتها وكمان تعرفه مارد عليها وهو وده يعرف مين هذي الجريئة كان يبي يسأل مين هي بس جات اخته وانقذته كانت نوف نازلة لغرفة امها تبي تاخذ منها شي وشافت ريم اللي واقفة باخر الدرج : اوه ريم وش تسوين هنا مشت ريم لجهة المطبخ : ابد بس كنت ابي اشرب مويه وراحت عنها هزت نوف راسها بتفهم وهي نازلة انتبهت لواحد عند الباب ومعطيها ظهره وتفاجئت لما عرفته : خالـد ! خالد كان وجهه للباب : هلا نوف بستغراب : ليه وجهك للباب ؟! خالد : راحت ؟! نوف : مين هي ؟! لف خالد وتنهد براحه لما ماشافها : بنت عمتك مين غيرها عرفها خالد انها ريم لما نادتها اخته انصدمت نوف : انت شفتها ؟! خالد : غصب عني مو بكيفي , دخلت البيت ابي اغير ملابسي وشفتها وهي نازلة من الدرج وعلى طول اعطيتها ظهري ابيها تروح للصالة او أي مكان بس تخيلي وش سوت نوف : ايش ؟! خالد بقرف : قالت وشلونك خالد تنرفزت نوف : وجع قليلة ادب خالد وهو رايح للدرج : المهم ماعلينا منها , انا بغير ملابسي وبروح مع فيصل القاعة طلعت عيون نوف : مين راح يوصلنا ؟! خالد : العيال برى باقي مااتفقوا , المهم ابيك تشوفين لي الطريق وانا نازل اخاف اقابلها مره ثانية نوف : الدرب امان الحين كل البنات مشغولين بس وانت نازل اعطيني خبر سوى خالد حركة بيده انه اوك وهو طالع من الدرج اما ريم كانت تقز الشباب من المطبخ وهي تتمنى تشوفه دارت مها حول نفسها : بنات وش رايكم ؟! ناظرها عبير باعجاب : روعة ماشاء الله انبسطت مها : والله !! رهف تقهرها : بس اكيد مو اروع مني مها : لا ياحبيبتي انا احلى منك شوفي كيف مكياجي انعم من مكياجك غادة : الله لا يفضح العدو لا تتضاربون قدام البنات ضحكت مرام : لا عادي عندنا وعندكم خير بسمه : اما نوف تتضارب معاك ؟! مرام : مو دايم استغربت عبير : الا صح نوف وين ؟ حتى ريم وامل وينهم ضحكت بسمه : امل مايحتاج تسألين وينها لان الاجابة معروفة اما نوف قبل شوي كانت هنا وين اختفت غادة : وريم بعد وينها ؟! بسمه : ماتهمني دخلت نوف عليهم وسمعت اخر كلمه وقالت تغني : اهمه لو كذب اني مااهمه غلاي يجول كملت معاها بسمه وببتسامة : في قلبه ودمه يبان الحب ناظرتها نوف وقالوا سوى : في نظرة عيونه يقول الصدق ولا ولد عمه رهف بضحكة : أي ولد عم فيهم ؟! ححدوا عندنا كثير ضحكت مرام : عليك مداخلة شنيعه ابتسمت رهف : يعني مااعيدها غادة : لا تفكرين تعيديها تذكرت نوف : بنات اسمعوا لاحد يطلع عشان خالد استغربت مرام : وش فيه خالد نوف : في غرفته قاعد يغير , تخيلي بيروح القاعة الحين مع فيصل انصدمت مرام : واحنا ؟! مين يودينا !! نوف : يقول العيال باقي ماقرروا عبير : طيب خلاص احنا خلصنا غادة : تقريبا خلصنا , لا تنسين باقي امل بسمه بضحكة : يوه امل باقي ليلها طويل في القاعة دخلت غرفة اختها بستعجال : هاه خلصتي ؟! لفت لها اسماء وابتسمت : وش رايك ناظرتها فاتن باعجاب واضح وابتسمت : ماشاء الله وش هالجمال وش هالزين كله ابتسمت اختها بخجل : منجد حلو فاتن وهي تناظرها : قسم طالعة تهبلين مع فستانك السماوي والمكياج الناعم اسماء كان فستانها منفوش زي حق سندريلا لونه سماوي وتوب من فوق وشعرها الطويل مسويته كيرلي وحاطة تاج فضي ومكياجها ناعم لونه وردي مع روج وردي ناظرت اسماء شكلها بالمراية : مو كأن الروج شاذ شوي ابتسمت فاتن : لا بالعكس لونه يجذب اسماء بتوتر : قسم مره خايفه ومتوتره فاتن : شعور طبيعي المهم انا جوعانه وين الاكل ضحكت اسماء : شوفي في فطاير على الطاولة ناظرت فاتن الطاولة اللي بالغرفة عندهم وابتسمت : زين الزين خليني اكل قبل مايجي احد جلست اسماء على كرسي مخصص للعرايس : وين مرام ونوف والبنات ؟ فاتن وهي تفتح الكرتون حق الفطاير : كلمت نوف تقول انهم بالطريق وواضح انها متنرفزه بس مدري من ايش اسماء : زين ، انتبهي لا تخربين روجك فاتن كانت تاكل وماهمها الروج : ماعلي من الروج اهم شي فستاني لا ينعدم كانت فاتن لابسه فستان سكري قصير ومكياجها بني وروج بني اما شعرها الطويل مسوية له تكسير وحاطته على جمب اسماء : انتبهي ترى لونه فاتح وراح يبان فيه كل شي ، اسمعي مين تحت ؟ فاتن : امي وخالتي وزوجات عمات مرام ، يوه نسيت اقولك ترى عمتهم شيخة جات شهقت اسماء : احلفي ! فاتن : والله جات الله يستر من لسانها اسماء : ان شاء الله ماتقول شي ماابي ليلتي تخرب غمزت لها فاتن : اخس يا ليلتي بعد مادخلوا البنات القاعة وفسخوا عباياتهم مسكت نوف بسمه وقرصتها وبعصبيه : ياويلك لو سويتي حركتك مره ثانية بسمه وهي تفرك مكان القرصة : وش سويت ؟ هذا جزاتي ابيك تشوفينه وهو كاشخ نوف بعصبية : مين قال لك اني ابي اشوفه وهو كاشخ بوزت بسمه : خلاص عمتي اخر مره اسويها بسمه كانت تحسب ان نوف معصبه لانها سحبتها معاها وركبوا مع وليد وهو خاطبها اما نوف كانت معصبه لانها مع وليد اللي عرفها اول مادخلت سيارته جات لهم رهف : ماتحسون ان شعري خرب ؟ رهف كانت مسوية ذيل حصان بشعرها الطويل ومع فستانها الاسود كانت طالعه بقمة الروعة بسمه : اصبري يبي له شوي تعديل ( عدلته لها وقالت ببتسامة ) كذا تمام التمام ابتسمت لها رهف : انا من دونك اضيع قالت بسمه وهي تغني : انا من بعدك اتوه وعالمي بعدك يضيع مرام : الله الله يالحماس عبير : وفروا حماسكم للسهره بسمه : مااقدر اذا مسكت خط بالاغاني مااقدر اوقف ضحكت لها امل وهي تسحبها تمشي : امشي نسلم على الحريم ومشوا كلهم واستقبلتهم ام اسماء بالزغاريط وهم بعد زغرطوا معها شوي بعدها سلموا عليها وعلى امهاتهم وعمتهم شيخة وطلعوا لفاتن والعروس دقت مرام الباب وقامت فاتن تفتحه وابتسمت لما شافته : ياهلا والله بسمه تغني : هلا بالطيب الغالي عزيز وشوفتك منوه ابتسمت فاتن : عاشو بعد ماسلموا على بعض قرروا انهم يجلسوا معاهم شوي غادة ابتسمت : اسماء ماشاء الله شكلك يهبل مرام : ايه والله ماشاء الله امل : حصني نفسك ياعمري حمرت خدود اسماء وابتسمت : حصنت الحمدلله نوف : وقعتي ولا باقي ؟ اسماء توترت : ليه تجيبين هالطاري ؟ بالقوه نسيت توتري امل : التوتر شعور طبيعي حاولي قد ماتقدري تنبسطي اليوم وانسي التوتر بسمه : شوفوا مين يتكلم بالله ، مين اللي بكت في ملكتها تفاجئت فاتن : اما امل بكيتي ؟ امل انحرجت : ايه بكيت بس جاء فيصل و هدأني شوي غمزت لها مرام : واجمل من هدأها وردت خدود امل : تبين الحق والله اني نسيت توتري لما تكلمت معه يعرف شلون يهدي الواحد ( وقالت لاسماء ) اسمعي لا تتوترين ابد ترى الرجال اذا شاف زوجته متوتره وخايفه يعرف وشلون يهديها بسمه : بضمه !! نوف : وقبله !! توترت اسماء زياده : نوف وبسمه بالله اسكتوا لا توتروني اللي فيني مكفيني بسمه قالت تغني : ضميني ضميني بالشمـ.. ماكملت كلمتها لان اسماء رمتها بالمخدة وضحكوا البنات عليها بسمه : ابي اغني ياخي اسماء : غني برى دق جوال مرام واخترعت اسماء قالت لها مرام وهي كاتمة ضحكتها : بسم الله عليك هذا خالد فاتن : ياقلبي على اختي كانت تحسبه ماهر ( ماهر اسم زوجها ) طلعت مرام تكلم اخوها برى بعيد عن الازعاج بعدها دخلت وقالت : اسماء تعالي عند الباب اللي عند الرجال شوي خافت اسماء : ليه ؟ ابتسمت لها مرام : عشان توقعي على عقد القران ، خالد راح يجيبه لما الباب دقت بسمه رهف : الحبيب راح يجيبه لها ناظرتها رهف : لا حول ولا قوة الا بالله قلت لك مااحبه بس يعجبني بسمه تغني : لا حول ولا قوة حبيبي ناوي ينساني وينسى وعد الحب وعهد الحب وماضيه ( لفت لنوف وبستغراب ) ليه ماتكملين معاي نوف : مااعرفها تفاجئت بسمه : تنكتب في التاريخ اول اغنية ماتعرفيها عبير : كأني سمعت فيها بسمه : هذي اغنية قديمة لاحمد حسين فاتن : يووه ياغبارك هذا حق ستار اكاديمي بسمه : ايييوا هو ، اسمعي مطربتكم متى تجي فيني رقص فاتن : الساعة ١٠ تقريبا تكون قد وصلت ريم كانت تناظرهم بستصغار بدون ماتعلق وفاتن ماحاولت ابد انها تحتك فيها دخلوا مرام واسماء ، واول ماشافوهم البنات زغرطوا لاسماء البنات : الف الصلاة والسلام عليك ياحبيب الله محمد كلللللللللوش دمعت عيون اسماء من الفرحة ممزوجة بخوف ، حضنوها البنات وباركوا لها وجلسوا معها شوي بعدها نزلوا تحت لان الضيوف بدأو يجون وتركوها مع اختها شوي في قاعة الرجال ،، وبالتحديد عند العيال فيصل : الله تذكرت ايام ملكتي ابتسم وليد : يومها كنت مرتبك ومختبص مره فيصل : والله كانت حالتي حاله يومها ووضعي مزري ( وبضحكة ) وجات اختك وكملت الباقي كأني كنت ناقص وليد يتذكر : لما بكت ؟ فيصل : ايه وجلست ساعة اهديها وبعدها خليه سر وليد : واضح المقصد وبعدين ليه ماتحترمني شوي ترى انا اخوها الكبير فيصل : انت ولد عمي وصديقي قبل ماتصير اخوها وان شاء الله قريب راح تصير زوج اختي ابتسم وليد : خلها توافق بالاول سمعهم فهد : مين هذي اللي توافق بالاول ؟! وليد قال بتصريفه مهما كان الموضوع باقي ماصار رسمي : صديقي خطب وباقي ينتظر الموافقة فيصل بضحكة : كأني اعرفه هالصديقك خزه وليد يعني اسكت اما فهد ناظرهم بشك : اهها الله يوفقه تثاوب ماجد من الطفش : والله زواجاتكم تجيب النوم فارس بضحكة : تعود تعود كلها اسبوعين وراح تصير مكانه ناظر ماجد في المعرس اللي واضح انه طفش من كثر مايسلم خالد بعد مارجع من قاعة الحريم : اتوقع المعرس ماصار يحس ببراطمه من كثر ماسلم بدر بضحكة : انت شفت وشلون كل شوي يمسكها الظاهر يسوي لها مساج راشد : انت ماعليك من براطمه شوف وجهه وشلون تصنم من كثر ماابتسم ناصر : ماتحسون انكم حشيتوه كثير خالد : احنا ماحشينا احنا قاعدين نقول تقرير واقع ناصر : الله الله يالتقرير الواقع ( ولف لماجد ) ماجد انتبه منهم يوم زواجك ترى راح يمسكونك حش ماجد : بس خلني اسمع شي منهم وهم راح يشوفون وش اسوي فيهم فهد : ترى اعرف رئيس مخفر هنا لو تبي يقدر يستضيفهم بالسجن كم يوم راشد : لا ماجد مايسويها انا ولد عمه وضعيف فارس : وانا اخو زوجته الضعيف المسيكين خالد : اما انا استاهل السجن والله ( ناظروه وكمل وهو كاتم ضحكته ) الحق ينقال ناصر : الله الله يالقناعة خالد : القناعة كنز لا يفنى جلسوا البنات بعد ماتعبوا من الرقص عبير وهي تاخذ نفسها : بنات والله تعب وش هذا غادة : احمدي ربك هذا وهو مو عرسنا وسوينا كذا رهف : كلها اسبوعين وننكرف بعرسها ( اشرت على عبير ) لما نطيح على وجهنا بسمه : والله اتوقع برجع من زواجها وعلى طول اروح المستشفى من رجلي من كثر مابرقص يومها ابتسمت عبير : خلاص بريحكم وبكنسل الزواج نوف بسرعه : لا لا تكنسليه خلينا نشوف الزين فرحت عبير : الله تبين تشوفيني انا , شوفيني وتأملي فيني الحين نوف كاتمة ضحكتها : انتي شبعت منك ابغى ماجد مها : لو سمحتي اخوي لعبير نوف : انا ماقلت باخذه قلت ابغى اشوفه همست لها بسمه : انتي حقك وليد خزتها نوف وماردت عليها , جات لهم فاتن وهي مبتسمة وجلست معهم مرام : ليه ماجلستي مع اختك تهديها شوي فاتن : مااقدر زوجها عندها عشان التصوير امل كانت شايلة همها : ياقلبي عليها الحين اكيد خايفة ومتوتره فاتن : كمان معاها اخواته يعني الخوف الف غادة : الا على طاري اخواته وينهم ؟ ابي اشوف اشكالهم مرام : اللي لابسه اسود واقفة عند الباب وحده منهم صح ؟ فاتن : اييوه هذيك الكبيره ، باقي ثلاث اصلا هم كلهم اربع اللي لابسة فستان اسود الكبيره والثنتين اللي بالوسط عند اسماء والاخيرة اصبري ( لفت تدور عليها وقالت لغادة ) شوفيها اللي على الكوشة لابسة اخضر ناظرتها مرام وبعدها لفت لفاتن : اللي معاها حلوه مين هي ؟ فاتن : اظن صديقتها ، الاخت الثالثه مره تشبهه المعرس مره نسخة الاثنين من بعض حتى اسماء تحسبهم توأم من كثر مايتشابهون بسمه بتساؤل : هي جميلة ؟! فاتن : مره تجنن بسمه بضحكة : ياحظ اختك اجل زوجها جميل غمزت لها فاتن : ترى عنده اخو روحي تميلحي عند امه رهف : لا وعع بعدها تصير نسخة هذيك ( واشرت على ريم اللي جالسة جمب عمتها الجوهره ) امل : لاحظت انها ملازمة امي مره وش عندها عبير : حاطة عينها على اخوك امل بستغراب : اي واحد منهم ؟ عبير : وليد لان راشد خلاص محجوز رهف : لو سمحتوا لا تتكلموا عن حاجز اختي نوف استغربت : حاجز ؟ رهف : ايوه يعني حاجزها له زي خاطب يعني خطيب وحده وكذا يعني المهم خلاص ولا شي بعد ساعتين من الرقص والوناسة انزفت اسماء على اغنية هادية مع زوجها وبعد مالبسها الشبكة طلع معاها لمجلس لوحدهم وتفضلوا الحريم للعشاء بعد ماتعشوا الرجال تجمعوا كلهم عند السيارات وكل شوي واحد يسحب نفسه ويروح البيت مع ابوه ماعدى فيصل وخالد وراشد وبدر ناظر فيصل ساعته : باقي الحريم مطولين ؟ بدر يتثاوب : الظاهر كذا بعدين ماتذكر يوم ملكتك جلسنا لما الفجر فيصل ببتسامة : كنت بعالم ثاني يومها راشد : لازم نتعود على الجلسة للفجر زواج ماجد بعد اسبوعين واحنا اللي بنتورط مع الحريم خالد : انا ماعندي مانع اجلس للصبح بس يااخي الدوام هم فيصل : سمعت ان عمي علي اعطانا اجازة بكره استغرب راشد : ابوي اعطانا اجازة ؟ فيصل : كأني سمعته يكلم ابوي ويقوله ماله داعي نضغط على العيال بكره خلهم يداوموا متى ماقاموا من النوم خالد : انا مو مداوم لاني اعرف نفسي اذا نمت الفحر راح اقوم الا العصر راشد : والظاهر انا مثلك بعد فيصل : اهم شي اعطوا ابوي وعمي خبر بدر : ياحظكم عندكم شي تشغلون نفسكم فيه مو مثلي راشد : تعال داوم بدالي والله مااقول لك لا خالد : وبدالي انا بعد دق جوال فيصل وراح يكلم بعيد عنهم راشد : اهم شي انوي انك تداوم عننا الاثنين ، ترى لازم النية بدر : بكره والله ماطرى لي اداوم عنكم اصلا تدرون بطلت لما تذكرت ان الموضوع فيه قومة من الصبح هونت رجع لهم فيصل : يالله ياعيال الفرج جاء ، الحريم يبونا نرجعهم للبيت خالد : واخيرا مابغوا ركبوا العيال سياراتهم وقربوا من مدخل النساء واتصلوا على الحريم اللي طلعوا لهم بعد ساعة | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
