22-07-21, 12:02 AM
| #61 | ||||
|  رواية #مشاعر_مطرطشة الحلقة 55 بعد منتصف الليل حسّت خلود بصقع ناضت لقت روحها راقدة عالكرسي اللي قاعد قدام الغرفة بحتت يمين ويسار شافت العقرب راقد عالكرسي بعيد منها خذّت بطانية من واحد من السراير اللي مافش حد ومشت شور الكرسي اللي راقد عليه وغطّت بيه العقرب وقالت بينها وبين نفسها " ربي يحفضك ويرعاك ويجبر بخاطرك نفس ماجبرت بخاطري وساعدت باتي وقعدت جنبي " ’’’ العقرب رد كيف زمان وبدت شخصيته اترد زي قبل ممكن بعد موتة امه معش قعدت تفرق عنده ,,, اليووووم التالي ناضت خلود مالقتش العقرب قاعد مشت للحمام عشان تغسل وجها واتصقم روحها واتشوف شن صار في باتها ,,, العقرب وقتها قاعد قدام واحد من الكافيهات اللي قدام مستشفى الجلاء وكان يراقبو فيه جماعة الرائد إبراهيم لكن من بعيد البعيد كأفراد وليس مجموعات ,, واخذ مكياطة ويدخن عليها في سبسي وسرحان مع نفسه ,, كاين امسيب الدخان من زمان بعد موتت امه رد للدخان ورد امقصر حتى في صلاته ,, ,,, الممرض اللي شور كتيبة الهرهار حاط عينه عالغرفة اللي فيها بات خلود ويرجى في الوقت المناسب عشان يقتله حتى وهو قاعد في غيبوبته ,,,, الساعة 9 صباحا كانن هدى واريج قاعدات في المعهد علي جيّت الطالب احمد وعطاها اريج كرستها وبحت فيها بابتسامة خفيفة وقاللها | بارك الله فيك " اريج : فيك بارك الله ومشى احمد هدى : شكله الطير غاوي امس زرقت عليه يبحت فيك وتو واضح من اعيونة القلووب شكله امكبد اريج : تي امكبد شن معروف هذا لا امتاع بنات لاشي وديما في حاله تهيالك بس هدى بحتت فيها وتضحك اريج : عليش تضحكي هدى : عارفة في قلبك العقرب اريج : لا خلاص طلعته من عقلي يعامل فيا كاخته ليش انعيش الوهم ,,, الممرض استغل الوقت المناسب ولقى مافش حد عند الغرفة اللي قاعد فيها بات خلووود وخشلها ,, طلّع مووس تحته يبي يضربه بيه علي قلبه علي خشّة خلوووووووود انفجع الممرض وبحّت وراه خلود بصوت عالي : شن ادير انت الممرض جا يجري شوورها قبل ماتطلع من الغرفة لكن اطلعت من الغرفة وتجري اتعيط ياهووو ياهووو العقرب شفها من بعيد مشى شورها جري العقرب : كنك شن في خلود : يبو يقتلو باتي شفتهم توا ,, طلّع اسلاحه العقرب وخش جري لغرفة العمليات كان هارب الممرض وماصارش شي من قتلته لبات خلود ولانّ كان لابس كمامة ماعرفتش ملامحة اكويس خلود ,, كان خلود تبكي العقرب : هرب وبلط من بين الممرضين سامحيني انا معش حنقدر نحمي باتك اكثر من هكي باتك حيقتلوه حيقتلوه سواء توا او بعدين افتحي محظر في مركز الشرطة ولا ديري راي علي حالك دموعك مش حيديرن راي كان ادموع ينفعن راهُ ردّن حنين وامي خلود قعدت تبكي وتبكي العقرب قرّب من تلاها العقرب : سامحيني انا هذا حد الجهد امعاكي لازم نمشي وانشوف حالي " العقرب قعد متجرد من الانسانية تغير فجأة ,, ونسى حتى قصة الرائد إبراهيم انّ زبّل عليه بالأمس وغلط فيه ممكن من الصدمات اللي صارن في حياته وقعد يرد للاسوء ,,,, في نص المحاضرة كانت اريج اتبحت في كراستها لقت ورقة اصغيرة بين أوراق مكتوووب فيها " انا احمد اللي امعاك في المحاضرة الحق راني انحبك وانموت فيك ومعجب بيك من قبل درت سبلة كراستك عشان انقولك مشاعري اتجاهك ياريت الموضوع يكون بيناتنا ماتقولهش الحد تحياتي | اريج استكت ومعش فهمت شي وقعدت اتبحت فيه من بعيد بس هو كان منتبه للمحاضرة هدى بالصدفة شافت اريج وهي اتبحت في احمد قالت بينها وبين نفسها : شكلها حتى هيا معجبة الطّيرة " ,,,, العقرب بمجرد ماطلع من المستشفى مزال يراقبو فيه جماعة الرائد إبراهيم بعد دقائق درّسن عليه سيّارات شرطة واجد العقرب : عليك قصة قاعد ابروحي بعدك الشرطي : عطونا امر ,, كان ما اتسلمش روحك نضربوك بالسلاح عادي من الرائد إبراهيم العقرب يحكي بينه وبين نفسه " حتى انا شن دخلني فزعت مع هالبنت وينك يافارس وين جماعتي ازح شن صارلي انا كنّي قعد مش قادر انفكر " طلّع مسدسه العقرب العقرب بكرياء وشمووخ قال : مش بالساهل تمسكوني راهو حتى انا العقرب واسالو عليا بنغازي كلها جت طلقة علي اكراعة العقرب طاح ازقبو عليه وخذو منّا اسلاحة العقرب : اه اكراعي ,, اتّناصرو عليا استغليتو موقف ابروووحي واحد من الشرطيين ضربه بوني في نص وجه وقعد خشمة دم العقرب وكرووه وحطّوه في الشيلا ,,,,,, بعد مرور ساعتين مروان : كلمني لؤي وقالي امسكو العقرب مودة : تحكي جد انت مروان : قالي العقرب شكله اطرشق ولا شن صارله جي يبي يهد عليهم كلهم بمسدس بلجيكي ضربووو بطلقة في اكراعه مودة : شن حنديرو من راي مروان : كلمت فارس قالي عندي علم ومزال ماقلهش لزوجته مودة : باهي وين قاعد هو توا العقرب مروان : ماهو هذه المشكلة لو نعرفو في أي مركز ممسوك فارس حيطلع بجماعته كلهم ويحررو ,,,, فارس قعد حاير ومش عارف شن يدير مش متعود عالقيادة وياخذ قرارات مصيرية ابروحه فارس : غير لو نعرف وين شالوك بس حنطلعك فارس ركب سيارته ومشى شور مقر امتاع الرائد إبراهيم لان كان يرن عليه واجد ومايردّش ,,, وقتها كان العقرب قاعد في مقر امتاع الرائد ابراهيم ويعالجو في اكراعة في العيادة العسكرية امتاع المقر ,,,, نرمين : غريبة انرن علي فارس مايردش انشغلت عليه وانرن عالعقرب مايردش زعمك شن صاير نرمين رنّت علي فاطمة فاطمة : نعم نرمين : لؤي جنبك فاطمة : اها عليش نرمين : اسأليه ع فارس والعقرب وينهم فاطمة : تعرف وين مكان فارس والعقرب لؤي : مش تقريبا العقرب قاعد في الجلاء امس ومش عارف بعدها وفارس علمي علمك بعد قالو فوتو اللجنة الأمنية ما اتصلتش بي " لؤي مابش يحكي وداير روحه ماعندش علم عشان ماينشغلنش اكثر واكثر " فاطمة : باهي ديرلي أي راي شوف مروان بالك يعرف لؤي : تمام اشوية حنرن عليه نرمين : لو عرفتي أي حاجة علي فارس او عقرب قوليلي وكان روّح فارس او رن عليا تو نعطيك علم فاطمة : حاضر ,, الرائد إبراهيم : صار قتلي فارس برة خليه يخش عليا فارس : اهلين كنك ما اتردش علي نقالك الرائد : اول حاجة احكي امعايا اكويس وين الاحترام امتاعي فارس : حاضر , حقك عليا الرائد: كيف صار وين الفرسنة اللي امس في الجلاء فارس : وين حطيت العقرب الرائد : قاعد في الحفظ والصون ما اتخافش \ فارس : وين حطيت العقرب قتلك الرائد : وكنك تحكي هكي فارس وهو متعصب : ياراجل وين حطيت العقرب قتلك الرائد : بلاش اعياط راهُ نعزقك معاه حتى انت فارس : شن تبي منّا انت الرائد : نبي انوريه انّي انا مش ساهل والفرسنة عليها كلها الا عند الرائد تعطيني التحية فارس : باهي طلع العقرب واللي تبيها حاضر الرائد : من انت أصلا عشان اتسوامني ,, تعال طلّعو من هنا هذا فارس مسكو وطلعوه فارس : حتندم يا إبراهيم حتندم كان العقرب طلع طيب حيزلزل الأرض تحت اقدامك خايف عليك انا وخايف علي اهلك فارس بعصبية فارس : هذا حياكلك وانت حي الراجل انقلب فجأة تغير حتى نحنا رفاقتا حسّيناها فيه مش طبيعي كان في الجلاء مش بعقله الراجل خايف عليك وعلي اهلك كنك مزوج هذا رد عقرب زمان الرائد إبراهيم قعد يصفق يصفق يصفق الرائد إبراهيم : التمثيل امتاعك اكثر من رائع فكوني من وجه وطلعوه من هنا وإحمد ربك مادورتش انت وجماعتك علي عصيانكم ليا وعندك أسبوع لو ماجبتلش اسلاح امتاع اللجنة الأمنية من جماعتك اللي انسحبت حنحطكم في راسي ويصيرلكم زي العقرب امتاعكم ,,, وطلعو فارس من المقر امتاعهم بالقووة فارس صبّى قدام المقر وقال بصوت عالي " تي ويييييينك ازّح يالعقرب وين قاعد بس " ,,,,, بعد مرور ساعتين كان فارس حاكي للنرمين كل شي وكذالك لؤي حكى الفاطمة والعقرب دارولة عملية ع اكراعة بس قاعد مربوط بالكلبشات مايقدرش يتحرك ومزال قاعد في المبنى امتاع الرائد إبراهيم ,,,, نرمين : نعليا خويا وين قاعد ازعمك دير أي حاجة يافارس مش هذا صاحبك وخوك الكبير فارس : بعدين عالمغرب ماشي انا ومروان ولؤي لعند حوش الرائد إبراهيم نرمين: يارب يطلع طيّب ,,,, العقرب كان دوبك امصحص ونايض لكن مش قادر يتحرك من الم اكراعة وكان في نفس المكان غرفة عمليات يحساب روحه قاعد في عيادة خاصة ومسشتفى العقرب : وينك يافارس وينك يامروان مافش حد هنا علي خشّت الرائد إبراهيم العقرب وهو يحكي بشواش " فيش ادير هنا الرائد إبراهيم : قتلك ما اتصيعش عليا مش داير الروحك اتقول انا فوق القانون وانا وانا وانا واضرّط علينا عقرب : جيتني علي خيانة مش عارف كيف انسيتك ورخيت دفاعتي كنت لاهي بموضوع البنت وكان موحتك كيف يحكي العقرب ,,, هكي اشوية اسرّب الخبر عالنت انّ تم القبض علي العقرب من قبل اللجنة الأمنية ولفقوله تهمة انّ يحاول يدير انقلاب عاللجنة الأمنية ويحرضّ ضدهم ,, مايا شافت الخبر اتصلت بناصر اول حاجة ناصر : نعم مايا مايا : نبيك اتشوفلي العقرب وين قاعد شالو الكويفية ولا مزال في مراكز شرطة بنغازي ناصر : بس انا ليا فترة عالجماعة مايا : قتلك دبّر راسك بسرعة ناصر : حاضر ,,,, فاطمة : معقولة يتبلو علي خويا ويقولو عليه كلام زي هذا لؤي : لا ماتبلو ماقالو الا الصادقة فاطمة : شن قصدك انت امعاهم ولا امعانا لؤي : امعاكم لكن انقول في الحق العقرب يحساب روحه مافش حد يقدر يوقفة عند حد فاطمة : باهي باهي اسكت ياقول خير يا اسكت بالله عليك ,,,,, الساعة 3 عصرا اريج أهلها اسمعو بخبر العقرب اقعدوو مضايقيين بكل ومتنكدين في نفس الوقت اريج كانت تذكر في مسج احمد كل اشوية وهي زعلانة تسرح فيه كلامه بات اريج : صار قتيلي بات استاذتك خلود مات اريج : عليك نكد كل مرة حد ميّت ومغتالين مليت انا شن هالعيشة ام اريج : العقرب حتى هو انقلبو عليه اريج : وجعني الراجل زوجته توفت وبعدها امه وتوا ممسوووك الدنيا مايله عليه كلها بات اريج : سمعت يابنتي انّ كان يتاجر بالسلاح زمان اريج : ماهُو قالو سيّبه خلاص ,,,, مودة : عرفت وين قاعد العقرب مروان : وين قاعد مودة : قاعد في مقر امتاع الرائد إبراهيم بس قاعد في مكان نفس البدروم يستعملو فيه لجراحة الجرحى واسعافهم مروان : كيف عرفتيها مودة : انسيت انت انا من ولا شن بتليفونات الصحباتي كل مكان عندي وحدة تخدم فيه مروان صبّى من الصالة ومشى شور دار نوومهم ورفع السرير وطلع شنطة تحته وجابها للصالة وكانت الشنطة فيها اسلاحهم مودة : كيف صار ياحبيبي مروان : لازم انطلّعو ياقلبي مودة : بس عليه حماية واجد اكيدة مروان : مش شوري انا يطلع يطلع ياما صبّى امعانا مودة : مش قتلي تبو تمشوله للحوش علي أساس انت وفارس ولؤي مروان : لؤي فكيني منا مش تمام حسيته مشمت او فرحان مودة بستغراب : معقووولة نسيبه هذا مروان : رد فعله كانت غريبة برود اعصابة مودة : بس نحنا مش عارفين شي المبنى كيف حندورو هكي وخلاص مروان : راسي يبي ينفجر تي نبوو انطلعووووو ياهووووووووووو مودة قرّبت من تلا وحضناته وقعدت اطبطب عليه ,,,, أحمد كان امكسد قدام حوشهم في العشية ويحكي مع نفسه " أحمد زعمك بكرة ناخذ رقمها اريج زعمك قرتها ورقتي ولا لا بس مادرتش أي رد فعل " ,,,, الساعة 9 مساءا فارس ومروان ولؤي حاولو يمشو لحوش الرائد إبراهيم لكن مالقووش قاعد كان وقتها قاعد في المقر امتاعه فارس ومروان ولؤي كان الحزن والنكد علي وجووهم متعودين القيادة كلها شور مازن فارس بكسرة خاطر : الجماعة كلهم بكرة يبو يسلموو اسلاحهم للجنة الأمنية \ مروان : كيف صار معقولة امسكو العقرب قعدنا مشلولين مش قادرين انديرو شي لؤي : عليك امزاط اكيدة عابي علينا العقرب انطلّعووو ,,, خلووود كانت تبكي وتبكي في العزاء وتذكر في كلام العقرب خلود وهي اتعيط في خيمة العزاء " اذكرت كلام العقرب كله انّ سيوره ميّت " ,,, العقرب : فيش اندير هنا انا في هالمزرعة شاف امه وحنين يضبحلّه من بعديد العقرب فرح لما شافهن وقعد يجري شورهن كل مايحاول يطق فيهن يبعدن اكثر اكثر العقرب وهو يبكي في الحلم العقرب : فقدكتن واجد تعال نبيكن وقعد يحاول يجري شورهن هكي اشوية فتح اعيوونة عرف روحه يحلم العقرب : يبحّت في السقف قصدك هذي نهايتك يالعقرب واذكر كم شخص قتله زمان من الأشرار والاسلاح اللي كان يبيع فيه وعالم الظلام اللي كان عايشة قبل ما يزوج حنين ,,, هكي اشوية شاف واحد جي شووره الرائد إبراهيم : هيا صحصح مرات حنرحلووك شور الكويفية .. تمشي لجماعتك كلهم واصحابك غادي العقرب : عليش هذا كله , الرائد إبراهيم : هذا اللي يقول انا فوق القانون تعرف وحدة اسماها مايا انت العقرب : اها الرائد : كل مرة ران عليا واحد من طرفها ويبوني نطلقك او انهربك العقرب : وانت عاجبك الجو هذا يضحك ضحكة الم العقرب ضحكة فيها شر الرائد إبراهيم : كنك تضحك العقرب عض السانة وقاله " تي عارف غير نطلع بس كان ماحرقتك حرق اقتلني خيرلك ,, ولا تطلقني اتشيلني للكويفية حنعرف كيف انجيبك بتليفون بس حنخلي حياتك جحيم الرائد إبراهيم : فاتوك اصحابك مافش حد دورك وكلهم ردو للجنة الأمنية فارس مروان لؤي العقرب : انت تكذب عارفك الرائد إبراهيم : خلاص هانت ماهي الا أيام قليلة وتمشي للكويفية ,,, صباح اليوم التالي كانت اريج قاعدة في المعهد جاها احمد بدون أي مقدمات وهو مبستم اريج ردّت بابتسامة احمد : صباح الخير يومك طيب اريج : صباح النور تسلم احمد : هدية بسيطة مني لكي وعطاها شوكلاطة هدى بحتت باستغراب ونار الغيرة والعه في وسط قلبها حال السانها يقول " اتبحت في هالشكل اللي اسمه اريج وانا لا , فعلا الطيور علي اشكالها تقع " ومشى من تلاهم احمد هدى : وين وين علي أجواء الحب والرومانسية اريج : ههههههههههه ماقتلك القيته دازلي رسالة انّ يحبني ومعجب بيا هدى : تي فوتي شن تبي فيه شكله نفسية وديما مع نفسة وشكله حتى راقد ريح شوفي حد افلوس بسيارته يعني اتسيبي باقي الشباب وترضي بي هو اريج : ماقتلكش انا نبي اندير مع علاقة نحكيلك بس هدى : تسمعي نصيحتي فووتي بكل خيرلك اريج : زعمك هدى : اكيدة الرسالة ياما دزّهن للقبلك ,,, بعد مرور كم يوم الشرطي : الرائد إبراهيم فيه وحدة برة تبيك الرائد : من هذي الشرطي : قالت اسماها مايا الرائد خليها اتخش وخشّت مايا وناصر عليه في مكتبه كانت مايا في قمة الجمال زي المرحومة حنين الرائد إبراهيم شفاها بس زمط ريقه من جمالها وانوثتها واستايلها في الملابس مايا : اهلين الرائد إبراهيم : انت هو مايا اللي كل اشوية يرن عليا واحد يقول من طرفك ناصر بحّت في مايا وقاللها ناصر : مش قتلك كلهم سكنتلهم وقالو رنينا عليه مايا بحتت في ناصر وحركت يدها عمران سكت مايا : العقرب وين قاعد عندك ولا وين حطينا الرائد إبراهيم : بصفتك من تسالي مايا : يبقى راجل اختي الرائد إبراهيم: آآآآآآآآه ,, قاعد عندي ومتهم في اكثر من قضية وصعب حيطلع لين ينعرض عالنيابة قبل ويقولو شن حيصير فيه مايا طلعت شيك من شنطتها وحطّاته علي مكتب الرائد إبراهيم الرائد إبراهيم باستغراب بحّت فيها الرائد إبراهيم : تبي ترشيني مايا : اكتب الرقم اللي تبيه وحنحولة في احسابك غير اطلق العقرب كم مرتبك مثلا كم املاكك مثلا اكتب المبلغ اللي يغنيك طول عمرك وهي تحكي معا اتبحت في اعيونة ومرة فمة اتحاول تاثر عليه الرائد إبراهيم : بس حتى كان وافقت انّي نطلقة لكي مش حيخليني في حالي هددني بالقتل مايا : لا خليه شوووري العقرب شكله تاعب وصايرله اشوية الرائد إبراهيم : ليش لا ,, تمام ,,,, بشير : شن قصته اللي اسمه العقرب هذا هو نفسه الشخص المعروف قديم عمران : قالو وعنده خلاف مع للجنة الأمنية بشير : مش شورنا نحنا اهم شي مافش حد طق فينا ,,,, هكي اشوية انتشر فيديو مصور لخلود امصورة نفسها وتحكي " السلام عليكم انا اللي اغتالو باتها قبل أيام الناشط السياسي اسلام ربي يرحمه ويغفرله بابا بس موضوع في الشخص اللي شفت عالنت انهم اقبضو عليه وقالو عنده تهم واسمه العقرب الشخص هذا هو الوحيد اللي سعف بابا ويحاول ينقذه ونجاه حتى من الموت قبل جو يبو يقتلووووه اول مرة حبيت انقوللكم ان الشخص هذا شكله طيب واكويس وشكله ظالمين ظلم شفت عالفيس انّ تم القبض عليه حبيت نحكيلكم عالموقف الرجولي اللي داره ليا فقط لاغير سلام وفي امان الله ,, نرمين وفاطمة كانن مع بعضهن في شقة فاطمة لما شافن الفيديو اقعدن يتباكن ويدعن ربي يطلق سراحه ويلقوه وين قاعد ,,, لؤي : شفتو الفيديو اللي اغتالو باتها مروان : اها انتشر بسرعة ,, انا عارفة وين قاعد العقرب فارس : وين وليش ساكت لعند توا مروان : صعب حطلعه شن جو الأفلام الهندية زمان كان جنبك العقرب وكلها تسمع في كلامه وعنده هيبة توا من حيسمع كلامك فارس : وين قاعد مروان : في نفس المقر امتاع الرائد إبراهيم فارس : معقولة هكي منظرنا بايعيين صاحبنا وساكتين وراضيين بالذل , لؤي : الله غالب ماعندنا ما انديرووو ,,,, الساعة 5 عصرا العقرب فتح اعيونة شاف وحدين شايلينا وامرفعينا الشرطي : افطنو الكراعة بس راهو مزال تبي راحة كانت مايا برة ترجى برة بسيارة اسعاف ثانية العقرب : وين شايليين وهو طالع بالباريلّا شاف مايا امصبية وجنبه الرائد ابراهيم العقرب : حنين فيش اديري هنا مايا ابتسمت الرائد: كيف صار مش اسمك مايا يحسابك مراته ولاشن مايا : خلاص المبلغ حيتحول الى احسابك هاليومين وعد وعطيتك حتى ضمانات ركبّو في سيارة اسعاف ومشو بي شور عيادة الطارق العقرب مزال مش فاهم شي ومش عارف وين ماشي ,,, بعدها انشتر خبر بسرعة البرق علي مواقع التواصل الاجتماعي " بعد مشاهدة فيديو بنت المرحوم الناشط السياسي اسلام قررت النيابة بالافراج عن المتهم مازن او مايعرف بس العقرب وهو حاليا في مستشقى الطارق يتلقى العلاج ,,, ,,,, فارس سمع الخبر ولّع سيارته وطلع يجري شور الطارق كذالك مروان ومودة نرمين اتزرغت وتبكي وفرحانة وفاطمة قريب اطير من الفرحة كانت في السيارة مع لؤي ماشيين لنرمين عشان ياخذوها ويمشوو للطارق أصحاب العقرب كلهم مشوو شور الطار بات اريج ركب سيارته كذالك فارس كيف وصل اول واحد خش يجري يبحث عليه لقى قاعد كيف واعي وجنبه مايا وناصر وكانُ امرفعيله اكراعه فوووق دغري فارس لقى روووحه حاظن صاحبة ورفيق عمره فارس : سامحني سامحني والله ما انسيتك والله مسكوني من اليد اللي توجع فيا العقرب : يطبط علي فارس جو تمام المهم طلعت بعدين احكولي كل حاجة وشن صار في اغيابي في هالأيام اللي غبتهن فارس : قالو الفيديو اللي دارته البنت خلود هو اللي طلعك مايا اعرفت ان الرائد إبراهيم دار أي سبلة عشان مايطلعش منظرة بايخ قدام الناس فارس: حناخذو ابثارك وانفجروووها ع روسهم \ مايا : لا حكيت مع العقرب في كل حاجة انسو اللي صار فارس : ومن انتي معلش مايا : انا اخت زوجته فارس : استك ومعش فهم حاجة علي خشت مروان ومودة ونرمين وفاطمة ولؤي وكان بات اريج قاعد برة مع بعض الجيران نرمين وفاطمة يجّارن ويتباكن نرمين : حمد لله علي سلامتك ياغالينا فاطمة : شن صار فيك كنها اكراعك وقعدن يتباكن ويخفف عليهن العقرب العقرب : جو تمام خلاص عليش الاعياط واقعدو كلهم جنب بعضهم كانت مودة الدمعة علي خدها وكان المنظر مؤثر جدا مايا بحتت في ناصر هيا نمشو توا مايا بحتت في العقرب حنخطم عليك بكرة الصبح بدري دير بالك علي روحك نرمين ومودة وفاطمة وكلههم استغربووو لما طلعت نرمين : من هذه يالعقرب العقرب : اخت حنين ,, نرمين : شن تحكي فاطمة : بس ماعندهمش اخت كيف هذه العقرب : قصة طويلة حنحكيها لكن لما نطلع العقرب بحّت في فارس ومروان ولؤي ردبالك اديرو أي ردة فعل انسووو اللي صارلي فارس : بس مروان : بس لا شي يافارس ,,عنده حق خلينا انهدو الكارطة ,, فعلا نحنا بدون العقرب مانسوو شي العقرب هو الوقود امتاعنا والرايس امتاعنا لؤي : اللي تبيها انت حتمشي ياغالي فارس : تم شوف اللي اريحك ,, الساعة 11 الليل كانت نرمين امروحه مع فاطمة وبايته عندها وكان فارس قاعد جنب العقرب ويهدرزووو ومودة ومروان روحو لشقتهم اريج الليل كله اتفكر في كلام هدى زعمك صح كلامها ولا لا احمد يفكر في اريج وواخذه عقلة ,, اليوم التالي العقرب ناض الصبح بدري ولقى صاحبه فارس راقد جنبه عالارض ,, فلاش باك في الماضي العقرب اول ماوصل امس لعيادة الطارق كان مش فاهم ولا حاجة العقرب : شن صار بالزبط مايا : انا طلّعتك , المهم عطيته وعد انّك مش حتجي شوره لاهو ولا اهله العقرب : كيف طلعني هكي وخلاص مايا : المهم انت طيّب العقرب : قتلت راجلك وانعامل فيك معاملة بايخة ومزال اتحاولي اتساعديني مايا : حتى انا مش عارفة روحي ليش اندير هكي ,,, في الوقت الحاضر العقرب : كبرتي في عيني وزادت معزتك عندي يامايا لكن انت يالرائد إبراهيم مش ناسيك وبيناتنا الأيام العقرب : اه اكراعي العقرب بحّت في فارس : انت اووووي اوووووي فارس : صباح الخير نظت العقرب : تي نوض صبيني وين القِيلَا نبي انخش الحمام فارس : هيا تو انجيبها لكي ,, كانن اريج وهدى في المعهد اريج : مشيت بكلامك معش لا نبي نعطيه وجه لا شي هدى : هذا الصح شن تبي في انتي أحمد يحاول يبحت في اريج ويلفت انتباها لكن فايته ومش امعدله عليه لين هو استغرب حسها وكأن في حاجة ,,,,, انتهت المحاضرة واطلعووو رست مشى شورها احمد احمد : معلش اريج ممكن دقيقة من وقتك اريج : لا معلش ,, وياريت اتخليني في حالي وطلّع موضوعي من راسك هدى : قريب اطير من الفرحة أحمد : تمام براحتك ومشى احمد وهو مكسور الخاطر يتبع ,,, | ||||
|  |
|
22-07-21, 10:02 PM
| #62 | ||||
| رواية #مشاعر_مطرطشة الحلقة 56 انتهت المحاضرة واطلعووو رست مشى شورها احمد احمد : معلش اريج ممكن دقيقة من وقتك اريج : لا معلش ,, وياريت اتخليني في حالي وطلّع موضوعي من راسك هدى : قريب اطير من الفرحة أحمد : تمام براحتك ومشى احمد وهو مكسور الخاطر هدى : احسن حاجة درتي هكي اريج : اكيدة انتي ادرى بمصلحتي يا احلى صديقة عندي أحمد امقعمز في كافيه المعهد وغامّة عليه وحس الدنيا كأنها مخنوقة بي لدرجة مابش يخش للمحاضرة ,, " ,,, كان فارس يهدرز مع العقرب ويحكيلا بالتفصيل شن صار في اغيابة وحكاله قصة مايا العقرب العقرب : صار قبل اطرطش القروب امتاعي وجماعتي فارس : اها كلهم داروك مفقود او ميت مش متوقعين حتطلع العقرب : اهُو طلعنا توا اللي صار صار فارس : بس ليش دارت هكي مايا امعاك وعارفة انك قاتل راجلها العقرب : راجلها قتلته عشان قتل مراتي وهو أصلا كان عارف انّ زوجتي اخت مراته بس نكذبش عليك ,, قعدت انميل ليها الفترة اللي فاتت وانحس فيها زي المرحومة حنين نفس نقشة الوجه بس قعدت خايف فارس : خايف من شن العقرب : خايف نزوج مرة ثانية يقتلووها او انموووت انا وهي تقعد ارملة خايف بعد ربي يرزقني بمولود يقتلووو فارس : ليش اتقول هكي ,, مزال عندك أعداء انت العقرب : انا صعب نتحكم في نفسي حتى اللي اسمه الرائد إبراهيم مسألة وقت بس تطفى هالجمرة اللي والعة ويهدا الجو حتعرف شن انديرله المعيلة امتاعه مش حتمشي بالساهل ,,, علي خشّة مايا وناصر عليهم مايا : صباح الخير مازن العقرب : اهلين مايا صباح الورد ناصر بحّت في فارس ناصر : مرحب ياخونا فارس : اهلين ياباشا مايا : ها طمنّي علي صحتك اليوووم ,,,,, مودة : هيا نووض ,, بلاش تنبلة مروان : نبّش خليني راقد مودة قعدت تلعب واتكسد علي عشان ينووووض مروان : زعمك ربي شن داسلنا مستقبلا مودة : كل خير متخافش مروان صقّم روحه من عالسرير وحظن مودة وقعد يلعب علي شعرها مروان : المهم انتي قاعدة امعايا وجنبي احلى شي في حياتي انتي مودة مسكت يده وحبّتها مودة : حتى انت ياقلبي ياروح رووووحي انحبك موووووووووت مروان : وانا انموت فيك ,,,,, يفطرن نرمين وفاطمة مع بعضهن لانها باتت عندها نرمين: قالك هذكي اخت حنين فاطمة : معش تفهمي شي ,, المهم انّ خونا تمام وصحته اكويس نرمين : ماقلتي الا الصادقة شن رايك بعدين نمشوله زيارة القايلة فاطمة : اكيدة هذه اتفقت معاه لؤي امبدري هكي اشوية سمعت نقالها يرن نرمين طلعت رحاب نرمين : اهلين رحاب رحاب : حمد لله علي سلامة خوووك نرمين : الله يسلمك ديما تحرجي فينا بتواضعك رحاب : شن عندك العشية نرمين : ماعندي شي ماشيا شور خويا زيارة بعد الظهر بعدها رادّة لشقة فاطمة قاعدة امعاها لان فارس قاعد مع خويا غادي رحاب : تعالي هدرزي امعايا العشية انغيرو جونا وتطلعي من مود النكد اشوية نرمين : العشية اليوووم رحاب : اها شن رايك نرمين : تو لما نمشي زيارة لخويا انشوف فارس قبل رحاب : اتشوفي عينك تعالي نرجى فيك نرمين : يصير خير رحاب : تم انتلاقو بعدين وسكّرت رحاب الخط منها نرمين : شن رايك تمشي امعايا بعدين انكسدو مع رحاب فاطمة : هيا تبيك انتي كان هذا قتلك كلمي فاطمة هيا حسيتها صحبتك واجد امشي غيري جووك خيرلك نرمين : زعمك ,, تو انشوف بعدين فارس يشيلني ولا لا ,,,, كان ناصر وفارس قاعدين برّة في الممر وخلو مايا مع العقرب ابرووحهم كانت مايا اتهدرز واتغيرله في جوّا مايا : المهم داير روحه في البداية يتكبر انا ضد الرشوة بعدها طاب من غادي العقرب : قصدك خذا مبلغ كبير مايا : ما ادققش معاوية امعقبلي ملايين مش اخسارة فيك العقرب مسك يدّها وبحّت في اعيوونها العقرب : اتحبيني انتي مايا ثلّجت في مكانها والسانها ثقل وتحشمت واجد العقرب : كنك سكّتي مايا : نفس السؤال اللي سالته ليا اسألة الرّوحك ترا العقرب : نكذبش عليك ,, حب اعجاب نقص حنان مش عارف , بس ذكرتيني بالغالية حنين لكن اللي نعرفه انّي نبي نقعد امعاك مايا : تقعد امعايا ومش عارفة حب ولا اعجاب وينك الفترة اللي فاتت لا اترن لا تسال العقرب : موتت امي اثرت عليا واجد حسيت الدنيا خشت بعضها عندك علم صح مايا : علمتها متأخر واجد ,,, الله يرحمها العقرب: خاطري نستقر لكن انحس في الدنيا امصبية ضدي ,,, لما كانُ يهدرزو ناصر وفارس جت شورهم خلوووود خلود : السلام عليكم ,, سالت الريسشن قالو العقرب هنا صح فارس : اها صح قاعد جوا ,, مش انتي اللي درتي فيديو اللي باتك اغتالووه خلود : اها فارس : ربي يرحمه ,, اهو فارس قاعد جوا اللي قاعدة جنبه الولية وشيّر علي مايا خشت خلوود شورهم ناصر : تي وين صاحبك لا امعقب خظر لايابس سوقه واري فارس : ههههههههه رسمي عدّت شورهم خلوود لقت مازن ماسك يد مايا ويهدرز امعاها خلود : اهلين مايا : اهلا العقرب طلق يد مايا العقرب : اهلين خلود ,, اعظم الله اجرك في باتك مايا : اها انتي اللي باتها اغتالو اعظم الله اجر ك خلود : اجري واجرك على الله ,, جيت انحمدلك عالسلامة الفيس كله منقلب عليك انهم طلقوك وقاعد في الطارق العقرب : الله يسلمك مايا : شكرا , كله منك انتي الفيديو اللي درته خلاهم يطلقوه العقرب : انسيت انعرفك هذي مايا اخت زوجتي المرحومة خلود قالت بينها وبين نفسها " اختك زوجتك وماسك يدها اتقول مغرمين " بحّتت فيها خلود خلود : عاشت الاسامي وسررت بمعرفتك مايا : انا اكثر خلود : ما انعطلش عليكم , انخليكم تاخذو راحتكم مايا : لا خليك حتى انا اشوي طالعة خلود : لا مزال عندي كم مشوار حبيت بس انحمدلك عالسلامة ونشكرك عالوقفة امتاعك العقرب : بارك الله فيك ,, واحتجتي أي حاجة خوذي رقمي من فارس حنخدمك خلود : حاضر وطلعت خلوووود من تلاهم مايا بهزوة بحتت في العقرب واتقلد فيه " واحتجتي أي حاجة خوذي رقمي من فارس حنخدمك " العقرب : توا انا نحكي هكي هههههه مايا :تضحك ,,, كيف كانت دايرة امعاك المرحومة زمان لما تحكي مع الصبايا العقرب : هههه ممنوع نحكي امعاهن مايا : شكلي حتى انا حنمنعك من جو الصديقات هذا العقرب عرفها غارت واقتنع حتى هيا اتحبه ومعجبة بي ,,,,, الساعة 3 عصرا كان احمد ضارب النكد والحزن وكانت هدى تبحث عن ايميل احمد عالفيس خشت لقروب المعهد اتفتش في التعليقات بالك يطلع امعاها اتفتش في اللايكات اتفشفش في ايميلات الدفعة الشباب بالك يطلع هكي ولا هكي هدى : اووف زعمك يطلع من الجماعة اللي مايحطوش في صورهم عالفيس عليك قصة اريج كانت ماسكة الورقة اللي كتبها احمد واتبحت فيها وقالت بينها وبين نفسها " زعمك القرار اللي خذيته انا صح او غلط بس ما انشوفش فيه يحكي مع بنات شكله محترم ,, بس اكيدة هدى تبي مصلحتي وهي عندها حق ولقت هدى فاتحة ماسنجر فيس دزتلها مسج اريج : هايات يااعيووني هدى بحتت في الاشعار طلع عندها منبثق لكن مابتش تفتحه عشان مايبانش انّها قرت المحادثة وقالت هدى بينها وبين نفسها " حلّي علي وجي مش وقتك بكل ماهو الصبح كله امعاك عليك سكّانة كلّا هي " اريج : اكيدة مش فاضية الغالية كان هذا ردّت عليا وسكّرت النت بعدها اريج ومزالت هدى تبحث عن ايميل احمد عالفيس ,,,, كان لؤي جايب نرمين وفاطمة قاعدين في الطارق ويهدرزوو ويلعب ويضحكن ويشفطن عالعقرب وحكالهم العقرب قصة مايا بالتفصيل لكن طبعا بدون انّ هو اللي قتل زوجها ما ادققش بالتفاصيل واجد نرمين : رنت عليا ام اريج واريج يسالو عليك وفرحانين بيك العقرب : اها كلمني امبدري بات اريج بارك الله في كل شخص سال عليا وحمدلي علي سلامتي فاطمة : امتى تطلع ,, العقرب : هانت هانت يومين او ثلاثة بالكثير قالولي حتطلع نبي انبيع حوشنا وحتاخذو حقاتكن من الورث فاطمة : بس نحنا الحمد لله حالتنا اكويسة توا مش مستحقين نرمين : صح مش وقته هالكلام لؤي بحّت في فاطمة امتاع اسكتي خلي الراجل يبيع فارس : كيف صار يالعقرب العقرب : نبي انبيع ونعطيهن حقاتهن انا مش دايملكن مالكّن الا ازواجكن نرمين : شن هالكلام ربي يحفضك لنا لؤي : عيب الكلام هذا يالعقرب العقرب : نبي انبيع وناخذ شقة اصغيرة ليا ونستقر مع نفسي ونبي نبتعد عن الجو هذا كله ونبي انعيش حياتي طبيعية والشقة شقتكن في أي وقت نرمين وفاطمة جن جنب العقرب وقرّبن منّا اكثر واكثر وصبّا فارس ولؤي عطوهن المجال وحظنهن خوهن العقرب ,,,, الرائد إبراهيم امكثر الاستيقافات وداير خطة امنية لكن بدون جدوى لازالت الاغتيالات متواصلة لكل ماهو عسكري او خدم في مجال الجيش في عهد القذافي " احداث الراوية مابعد فبراير وماقبل عملية الكرامة " الرائد إبراهيم سمع نقال رن شاف رقم وزير الداخلية الرائد ابراهيم: نعم ياوزير وزير الداخلية : هذي سابع عملية اغتيال في خمس أيام الرائد إبراهيم : قاعدين انحاولوووو انسيطرو عالوضع وزير الداخلية : عندك هالفترة هذي كان ماسيطرتش عالوضع حنحطوو حد بالك واعذر من انذر الرائد إبراهيم : لاكون هاني نعجبك انا وسكّر الخط وزير الداخلية خش الشرطي علي مكتب الرائد إبراهيم الرائد إبراهيم : كنك شن تبي انت الآخر الشرطي : عملية اغتيال في الليثي لعقيد في الجيش منذ قليل الرائد إبراهيم : اوووووووووف راسي ,,,, نرمين امروحة هيا وفاطمة شور شقتها وعطت علم الفارس بمشيتها لرحاب وقاللها مع 5 العشية تو انجي انشيلك عندها ,,, هدى : أخيرا القيت احسابك عالفيس وامسمي الروحك حمادي مادي عرفاته بالصورة امتاعه كان حاطها خشّت عالماسنجر امتاعه ,,, كان احمد مضايق ويصفح عالفيس ويشوف في اخبار من صفحة وجك كل اشوية امنزلين خبر اغتيال عقيد وكان الجو مشحون في بنغازي اشوية هكي اشوية جا طلب مراسلة من ايميل اسمه زهرة البيلسان ومكتوب فيه " اهلين احمد اسفة عالازعاج انا وحدة نقرا امعاك في المعهد ممكن دقيقة من وقتك " فرح احمد يحسابها اريج احمد : اهلين مرحتين اريج توقعتك حدوريني والله انحبك وانموت فيك زهرة البيلسان : لا مش اريج انا ,, انا بنت وحدة ثانية اها قصدك انت داير علاقة مع اريج احمد : بنت ثانية كيف زهرة : انا وحدة من البنات امعاك في المجموعة معجبة بيك لكن مش حنقولك من ^^ أحمد : شكلك شاب وتجري بيا اتصلت بي ماسنجر هدى أحمد : الووو زهرة : اهلين ,, انا بنت تاكد هكي اني بنت " وكانت تحكي بدلع وجعونَة عالنقّال " لين هو صارله بحكم انّ شاب طبعا شاب ويرن عليك صوت حنون احمد : تأكدت اها زهرة : اممممم تريحت هكي ,, خلاص تعال نكتبو كتيبة احمد : خليك اشوية بس زهرة : لا عدّي شوف حبيبتك اريج واسفة عشان خشيتلك عالخاص احمد : ارجي بس لا مش حبيبتي وسكّرت الماسنجر وسكّرت النت بكل وقالت بينها وبين نفسها " حنخليك توا اتخش في عقل مش عقلك | أحمد : الووووو الوووووووووو وينك وقعد يكتبلها في الماسنجر لكن واضح انّها سكّرت النت احمد : تي من ازّح هذي بنات واجد في المحاضرة عندنا,, اكثر من الشباب وقعد يكتبلها اخرة : قوليلي من بس انتي الوووووووووو الوووووووو ردي عليا وقتها كانت هدى اتفرّج عالتلفزيوون وجوّها رايق ,,,,, حزب التضافر كان ادير في اعمال خيرية في بنغازي ويوزع في المال عالفقراء والمحتاجين ودار كتيبة خاصة بالحزب امتاعه وكان الظاهر امتاعها الاستقامة والصلاح وكانُ كلهم محسنين الظن بيها ويحبوها وبدت الناس تتداول علي خيرها ويذكرو فيها بالخير علي صفحات التواصل الاجتماعي الا صفحة وحدة عالفيس صفحة وجك كانت راكبه فيهم واتقول عليهم هذيما اخوان وإسلام سياسي مايبوش الخير لنّا وحتعرفو الشي هذا مستقبلا وكانُ كلهم يتهجمو عليه في التعليقات انت حسدي انت حقووودي وهكذا بشير : عرفتو صاحب صفحة وجك عمران : مزال ,, لكن قاعدين نبحثوو حنجيبو حنجيبو الادمن امتاعه بشير : لازم ياعمران ,, هذا قاعد يحرق في كرتي عالنت عمران : تي عادي فوتها أصلا التعليقات كلهن ضدّه وامعانا بشير : لالا لازم اتجيبولي الادمن هذا ضروري جدّا عمران : تمام حنحاولوو ,,,,, مايا قاعدة في شقتها واتفكر وماسكة صورتها هي ومعاوية وتحكي للصورة " زعمك حتسامحني يامعاوية لو خذيت اللي إقْتَلَك ولا لا ,, بس انت قتلت اختي هذا الانسان الوحيد اللي نقدر نطمن علي مالي وشركاتي وارزاقي معا شخصية وشجاع وبطل نفس الوقت مانكذبش عليك يامعاوية انحس في شعور غريب اتجاه واحضنت الصورة وحبّتها ,,,, العقرب كان ابروحه لان فارس مشى يشيل في نرمين الرحاب ومعش جا العقرب بين وبين نفسه " ياحنين سامحيني لازم نزوج عشان نستقر مش حناخذ وحدة برانية حناخذ اختك حسيتها هي الوحيدة اللي استايلها ماشي امعايا خاطي انّها صبت امعايا ونقذتني آآآآآآآآه ياحنين قديش فقدتك ياحب حياتي ,,,, يدردشن معا بعضهن هدى واريج اريج : وينك امبدري دزيتلك مارديتش هدى : كنت مع ماما النت كان مفتوح بس مش تلايا النقال اريج : حتى انا قلتها استحالة اتشوف كلامي وما اتردش عليا هدى : خيتي وصحبتي واجد انتي من أيام الثانوية اريج : ربي يدوووم صحبتنا ياصقع انفكر في احمد حسيت روحي قسيت علي اشوية \ هدى : كنك هبلة انت ,,, الشباب مايبّو الا هكي تستحقريهم يجو للطريق وانت تستاهلي واحد احسن من احمد بوااااجد اريج : انتي ماعمركش حبيتي هدى : انا ههههههههه ,, قولي كم ضحكتي علي شاب كم كذبتي علي شاب أيام الثانوية كان عندي فيها جو انكسد عليهم وانفك منهم في رصيد زمان أيام ضلالي اريج : لا ,, أيام ضلالك عارفتة انا ,, محد يحكيلي عليك احسن حاجة سيّبتي الجو هذا وعقلتي بس انا نحكش علي لما كنتي زمان تضحكي عليهم وتاخذي منهم في رصيد وهكي قصدي حب حب تكبيد هدى : لالا انا مش امتاع حب ,, اريج : لا غير القلب مزال مادقّش تو لما يدق معش تمسكي روحك حتلقي روحك طايحة بوجك هدى : زعمك ههههه ,, قاعدين امعانا في المعهد يفشكو عالابيض مافش حد لفت انتباهي حتى انا هدى صعبة المنال اريج : اوووووووووف يا هدى : ههههههههههه ,,,, كانت وقتها نرمين قاعدة مع رحاب وهدرازي وجو سمح في حوشها وتغييرت جو ونرمين حكتلها شن صار مع العقرب الفترة اللي فااتت وحكتلها ع مواقف وشجاعة العقرب وفارس مع بعضهم رحاب : ماشاء الله ربي رازقك بزوج زي فارس شجاع ومايخافش,, و الحمد لله المهم طلع طيّب خوك واكويس توا نرمين : اها الحمد لله ,, قتلك نبي الحمام ضروري وين رحاب : تعالي حبيبتي ,, مانكش برانية الحوش حووشك اهووووو الحمام خشت للحمام نرمين وسيّبت نقالها عالصالون بحتت فيه رحاب لقاته بدون رمز خشت علي سجل المكالمات لقت رقم مكتوب في فارس حبيبي عرفاته زوجها طلّعت نقالها وكتبت الرقم عالسريع وردّت الرقم عالصالون وشريني صبّت شالت السفرة للمطبخ طلعت نرمين من الحمام مالقتش رحاب عرفتها شالت السفرة قعمزت عالصالون وخذت نقالها جنبها علي طلعت رحاب وخاشة عليها بسفرة ثانية موالح وجو فايح نرمين : عليش هذا كله , انا مش برانية ماقلتي رحاب : تي اس اس باهي اللي حصلتك وجيتي انتي راك غلايا ومن اقرب الصحبات اللي عندي نرمين : نجّك ليا ياعسل وقعدن ياكلن ويهدرزن ويدردشن عادي ,,,, العقرب : كنك طوّلت هذا كله فارس : تي زحمة وامزاط بكل العقرب : تي وين مروان مابنش عليا اليوووم فارس : فعلا مارنش عليا حتى انا ترا رن عليه توا فارس طلّع نقاله يرن " الرقم المطلوب مقفل " العقرب : غريبة ان شاء الله خير ,,, كانو مروان ومودة امسكرين تليفوناتهم وقاعدين في شقتهم وعايشيين احلى جو رومنسي مابوش يطلعو بكل مروان : كان خلتيني خليت نقالي مفتوح خير مودة : انلا ,, حيرنو عليك وتمشيلهم اليوم نبيك تبقى ليا انا بس مروان : أصلا انا لكي وامتاعك انتي بس ,,,, احمد مزال حايس خش عالايميل يشوفه زهرة البيلسان وطلع الايميل مديور جديد المشكلة انّها بنت مش شاب وسمع صوتها دارلها متابعة ودزّلها طلب صداقة وكل اشوية يفتح النت يشوف فتحت او قبلت طلب الصداقة ,,,, فارس : اهو النقال اللي قتلي عليه جبته لكي وشفرتك طلعها لكي لؤي العقرب :تمام ركبّهن ليا فارس : بس الأسماء كلهن راحن راهو العقرب : اها عارف تمام اكتب رقمك انت ونرمين ومروان ولؤي والباقي تو ناخذهن منهم فارس : تم ,, حتى انا اشوية وطالع نبي انروح بنرمين العقرب: تمام ديريلي الشفرة وتوكل وتعال مش اتبات عندي فارس : اكيدة هذي حنشيلها عند فاطمة وانجيك ,,, بعد مرور نص ساعة لؤي: مزالت امطولة اختك عندنا راه مليت معش خذيت راحتي انا فاطمة : عيب شن هالكلام اللي اتقول فيه هذي اختي مفروض اتقول الحوش حوشها مش قالب وجك لؤي : هانت سيورة طالع خوك واتروح الحوش راجلها نتحملو هالايام وخلاص راد الله علينا فاطمة : يعلم الله انّك تغيرت يالؤي مش زي لؤي زمان طبايعك قعدن شينات ولؤي الطيب الحنون اللي ديما امعايا في أي حاجة لؤي : تهيالك لاتغيرت لا شي مزال كيف ما انا اهُو باب الشقة يدق شكلها اختك جت فاطمة : فكنا من قلبة الوجه عشان خاطري لؤي : باهي ,,,, في اليوم التالي كانن اريج وهدى كالعادة في القاعة امتاع المعهد وكان احمد زي المعتوه يبّحت يمين ويسار وكل مرة ماسك نقاله يشوف فيه هدى : بحّتي كيف يبحت في البنات واتقولي مايبحتش اريج : تصرفاته غريبة اليوم هدى : فكك الله منّا وبدت المحاظرة طلّعت نقالها هدى من تحت وخلاته مش باين وفتحت ايمالها الوهمي جن رسائل واجد بكل من احمد وقبلت طلب صداقته وكتبتله مسج واحد عالماسنجر " شفتك عارفتك حايس تبي تعرف انا من بس كنك اليوم طالع سموح واتهبل لو تبيني انشوفك لما تنتهي المحاضرة صبّي قدام باب القاعة حنجيك وانعرفك بنفسي تم ياسموووح " وسكّرت النت وردت نقالها في شنطة هدى وكملت انتباه مع المحاضرة ,,,,, كان العقرب قاعد هو وفارس يفطرو في الطارق علي جيّت مايا شورهم فارس : معناها انخليك انا اشوية تو انجيك العقرب : تم مايا : صباح الخير مازن العقرب : صباح الورد انستي مايا : شن اتحس روحك توا العقرب : الحمد لله اكويس احتمال حنطلع في هاليومين مايا : الحمد لله تمام العقرب : تعرفي حد في الxxxxات شاطر نبي انبيع حوشنا لكن مانبش انبيعه بخسارة مايا : كنك عليش مستحق افلوس العقرب : لا نبي نعطيهن حقهن في الورثة لان الحوش باسم امي انا اللي شاري بفلوسي بس كتبته باسمها مايا : تمام حنكلمك ناصر وينهيلك موضوعك هاك رقمه العقرب : بعد كتب رقم ناصر هاتي رقمك حتى انتي مرات الواحد يرايف عليكم مايا : بصفتك من اترايف العقرب : كيف ما تحسبيها احسبيها مايا اضحكت وملّت علي رقمها واقعدو يهدرزو ويفضفضو مع بعضهم ,,,, كان فارس يشرب في القهوة برة شاف رقم غريب رن عليه فارس : الوو رحاب : اهلين امعايا فارس فارس : تفضلي من رحاب : انا الدكتورة رحاب امتاع التغذية فارس : اها تفضلي ليش رانة عليا من وين خذيتي رقمي ولا عطاته لكي نرمين رحاب : لا سرقته منها بدون علمها لانّ صايرلي موضوع قالت لي رحاب انت زي العقرب واتهني فارس : مافهمتش رحاب : في حد كان خاطبني وفصخت الخطبة امتاعي ويهدد فيا بالصور نبيك تدويله واتخوفة ماعندش حد ,, خايفة ينزل الصورة ويشهدر بيا وقعدت تبكي رحاب بالعاني فارس : عليش تبكي مرات يخوف فيك بس رحاب : لا يحكي من جدة انا متاكدة فارس :عطيني رقمه رحاب : ماهو غير ارقامه المشكلة فارس :معناها كيف حنجيبو رحاب :حنشوفلك ايميلة عالفيس بالك اتخوفة فارس : خلاص عادي حاضر رحاب : بس سالتك بالله ماتقولش النرمين اني كلمتك\ خليها سر بيني وبينك مانبهش تأخذ عليا فكرة مش تمام فارس بستغراب حاضر رحاب : ربي يحفضك خلاص حنشوف الايميل وانقولك مش حنرن عليك عشان ما انديرلكش مشاكل انت هكي بعد يومين تقعد برة الشقة رن عليا فارس : وعليش , ليش مانحكي نرمين عادي رحاب : لا حتفهمني غلط لاني خذيت رقمك بدون علمها فارس :خلاص يوم يومين حنرن عليك رحاب : تمام ربي يحفضك وبارك الله فيك وسكّرت رحاب منّا " وطبعا القصة كلها كذب في كذب من رحاب " فارس : هذه كنها طريقة كلامها غريب كنهن الصبايا شن صارلهن ,, رحاب : اآآآآه محلاه صوتك عالتليفون عليك رجوووووووولي يابختك يانرمين ربي رازقك بزوج زي فارس حندير المستحيل عشان نخطفك منها ,,, رقمها الاخر اللي قاعد في نقالها مافش حد عندها كلهم تعطي فيهم المدار رقم الليبيانا حتى هلها ماتعطش فيه دايرته للنت بس هذا هو اللي رنت بي علي فارس ,,,, بعد مرور بعض الوقت انتهت المحاضرة اطلعو كلهم من القاعة وقعد احمد يرجى عند الباب خطّمن من تلا اريج وهدى وهدى خطّمت من تلاها وبحّتت فيه بنظرة استحقار من لوطة الفووووووووق اريج : كنك بحّتي فيه هكي هدى : شوفي حاله قاعد امصبي اتقول يرجى في واحد اريج : ماكنش هكي في حاجة غلط اليوم " اطلعو كلهم من القاعة ومافش بنت جت شوره بكل مسك نقاله وخش عالدردشة امتاع زهرة البيلسان وكتبلها " عليش ضحكتي عليا راجيتك وماطلعتش " هو دز المسج من هنا هي افتحت كنت تمشي مع اريج وفاتحه النت تلاها زهرة :" كان منظرك يهبل وانت ترجى فيا " أحمد : ليش ماورتيني شكلك زهرة : اصبر ع رزقك سيورك حتشوفني بس غريبة مش اريج حبيبتك ماشفتكش اتبحت فيها احمد : لا ما حبيبتي صارحتها بس ماعدتلش عليا زهرة : باهي لو تبيني افتح مع الساعة 12 الليل تلقاني قاعدة ,,, وسكّرت النت هدى احمد : الوووو ارجي اشوية نبيك وينك ,,,, مايا اتهدرز هي والعقرب وجوهم سمح مايا : بحّت من جايك من غادي العقرب تغيرن ملامح وجه وقال : هذا كنّا شن يبي جي " وكان الرائد إبراهيم جي شووورهم يتبع ,,, | ||||
|
| |
|
22-04-22, 12:04 AM
| #63 | ||||
| رواية #مشاعر_مطرطشة الحلقة 57 مايا : بحّت من جايك غادي العقرب : تغيرن ملامح وجه وقال : هذا كنا شن يبّي جي " وكان الرائد ابراهيم جي شورهم العقرب صقّم التقعميزة امتاعه الرائد ابراهيم : السلام عليكم العقرب : ومن وين يبي ايجي السلام منّك بعد اللي درته ليا مايا : عليش جاي شن تبي منّا الرائد : غير ردّو السلام قبل مايا : وعليكم السلام العقرب : اطلع ع راس حاجتك الرائد ابراهيم : بدون لف ودوران انا مستحقلك ضروري يالعقرب العقرب : بعقلك انت ,, جي تبي تطلب مني يد العون مايا : مش خذيت افلوسك شن مزال تبي خلاص طلّع العقرب من راسك والعقرب سيّب الوجيج امتاع زمان خلاص الرائد ابراهيم : انت عارف في عمليات اغتيال واجد الايام هذينا في بنغازي بالذات العقرب : باهي تمام معروف الشي هذا حاليا وربي يفرج علينا الرائد ابراهيم : الاستخبارات العسكرية شاكين في حزب الهرهار في بنغازي مايا : بالعكس الحزب هذا عنده حاضنة شعبية كبيرة في بنغازي وداير حتى اعمال خيرية للفقراء الرائد ابراهيم : يتسترو باسم الاعمال الخيرية والكلام اللي كانت اتقول فيه صفحة وجك تقريبا هو اللي صاح العقرب : قصدي انا شن وضعي في الموضوع شن تبيني مثلا اندير الرائد ابراهيم : مرات حنفتح جبهة امعاهم مستقبلا لو صار وانفتحت نبيك اتصبي امعايا انت وجماعتك ماينهووها الا هلها وشباب المناطق العقرب : لا اسمحلي وفوتني وياريت تنساني واطلّعني حتى من راسك " والعقرب بينه وبين نفسه سيّوري قاتلك المسألة مسألة وقت ويهدا الوضع " الرائد ابراهيم : بس هذا واجب وطني حوّل الخلافات اللي بيناتنا لازم انصبو لبنغازي سمعت انّ عندهم مشروع اسلام سياسي في بنغازي العقرب : اسلام سياسي اسلام مش عارف شن انا مش شوري وطلّعني من راسك الرائد ابراهيم : ابراجتك ,, وطلع زعلان ومضايق ,,,, عمران : درت زي ماقتلي وفتحت باب التجنيد ودرت مقر ثاني للكتيبة عند قاريونس واغلب الشباب انضموو امعانا ودرنالهم مرتب اكويس بشير : هذا الصح ,,, صار ماصار نلقووو من نتقّوووو بيه المهم نزلهم مرتباتهم اول باول واكسبووهم واهتمو بجانب الخيري واجد لازم نكسبووو اكبر عدد من الشريحة في المجتمع '''' مايا : شفته كيف طلع زعلان ومضايق العقرب : هذا بعقله ,, بعد اللي داره ليا يبيني انحط يدي معا من جديد مايا : بس شكله حاصل بجديات هذا ليش جاك العقرب : يربح يفووتني بكل ,,,, الساعة 1 بعد منتصف الليل ومزال احمد يرجى في زهرة البيلسان تفتح من الساعة 12 فاتح ويرجى فيها هكّي اشوية شافها افتحت فرح احمد واجد ودغري زقبلها خاص احمد : مش علي اساس اتفقنا الساعة 12 كنّك طوّلتي ومافتحتي زهرة البيلسان :كنت انشوف فيك ترجاني ولا لا احمد : باهي تبي اتقوليلي انتي من ولا لا زهرة البيلسان : انا وحدة نعشقك وانموت فيك وانحبك وقريب ننكلب عليك سموح وعسل زيك انت مليون بنت تتمناه " كانت هدى تجري بي بلعاني " احمد : كان سمح وعسل زي ما اتقولي عليش رفضتني اريج زهرة البيلسان : شن رايك نتصل بيك ماسنجر ونحكوو صوت خير احمد : ياريت احسن من دردشة بواجد " بلعاني زهرة البيلسان تبي تحكي معاه صووت عشان تجعون وتدلع علية بالصوووت واتكسد عليه كيف ما تبي " ورنّت هدى عليه زهرة : اهلين ياسمووووح ماتوقعتكش ترجاني ياعسل احمد : نجك ليا ,,, نرجاك عادي لين نعرف انتي من زهرة : في وحدة ثانية معجب بيها انت في القروب مرات نطلع انا احمد : لا ,, اريج في البداية وبعدها فتتها زهرة : مش انت فتتها هي رفضاتك احمد : اللي هووو زهرة : باهي في بنت ماتقبلهش بكل في القاعة احمد : في وحدة تقريبا اسماها هدى صاحبة اريج وانتيمتها واخذة في روحها مقلب اتفشك عالطلبة وتحساب روحها سمحة وهي قبيحة وهي كلووطة ودمها ثقيل وكثرة المكياج داير جميل عليها زهرة : ههههه اها عرفتها البنت هذي باردة وثقيلة احمد : هذكي اليوم لما كنت نرجى فيك دايرة روحها اتبحت فيا بافشاكة تحسابني انبحت فيها تاخذ سو صحبتها اريج اسمح منها بواجد زهرة : بس في بنات اسمح من رايج امعناها احمد : اكيدة فيه اكثر من بنت وبالك تطلعي وحدة منهن زهرة : بالك ,,,, احمد : تبيني انقولك من اسامهين اللي اطروف امعانا في القروووب زهرة : لا مش داعي " وهي عارفة رووحه مش منهن " أحمد : وين عديتي الوووو زهرة : اشوية تووو انجيك انشووف خويا كيف روح شكله يبي عشاء احمد : يروح الساعة 1 ونص الليل زهرة : اها '' واخذ عليك انت ترقد بدري هيا خليني انشوف روحي انتقابلوو احمد :باهي تبي تفتحي ولا لا نرجاك ولا انسكّر " معدلتش عليه هدى وسكّرت النت وكانت تكذب لاجا خوها لاشي واضايقت من كلامه عليها وقالت هدى بينها وبين نفسها " صح اريج احلى مني بواجد وانا قبيحة وكلوووطة " " تي كان ما انشعفك وانخششك في عقل مش عقلك وانكسد ونلعب بيك وانخليك زي الكلب وخاتم في صعبي مانبقى هدى وبيناتنا الايام " " هُدى كانت في البداية واخذة الموضوع بتشفيط " تلقيح " يعني تبي اتكسد عليه اشوي واتفوته لكن بعد كلامه اللي امبدري حطّاته في راسها بالرسمي ''''' بعد مرور #أسبوعين ,,, كان العقرب طالع من المستشفى وناصر شبه تم في بيعة حوشه لكن مزال ما انباعش هدى كانت شبه يومي تحكي مع احمد في الليل صوت بالماسنجر " هدى ماشيا بسياسة تبي اتعودة علي صوتها ودلعها عشان اتكسد عليه زي ماتبي واتحسسه انها طايحة بوجه عليه وفعلا بعد اسبوعين من الدردشة والهدرزة بالصوت اتصال ماسنجر احمد شبه قعد طايب وماشي بجوهّا ''' رحاب استغربت انّ فارس مادوّرهش ولا رن عليها زي ما تفق امعاها أسبوعين كاملات مادققش ولا عاود عليها زي ما اتفقوو هو مش قاصدها نساها بكل بعفوية فارس صح فارس لكن طيّب ع نياته ومزال مش فاهم شي ع خبث النساء مودة ومروان : عايشيين احلى حياة مع بعضهم ومروان مزال يتواصل مع العقرب بس مش واجد بس شبه خلاص معش فيه اكشن والحياة مملة ''''' كان العقرب يهدرز مع مايا بالتليفون وكان قاعد في حوووشه العقرب وطبعا في هالاسبوعين اللي فاتن مشوها هدرزاي حب وعشق وغراميات شاف مكالمة انتظار من ناصر العقرب : ترا سكري الخط ناصر بالك الراجل وتالي افلووس مايا : تمام العقرب " انعم بشّرنا هيا ناصر : اليوم جايك الزبون يعطيك الفلووس مش اتفضيه الحوووش العقرب : فاضي الحووش اصلا اللي فيه اغلبه مانبّش ناصر : خلاص عالمغرب حنجووووك اليوووم ''' فارس كان يهدرز مع نرمين ويشرب في القهوة امعاها عالصبح شاف تيلفون رقم غريب رن فتح الخط فارس فارس : الو من امعايا رحاب : كيف من امعاك انسيتني انا رحاب فارس : اها غالطة معلش يا ابلة وسكّر الخط فارس مابش ادير شبهة قدام نرمين نرمين : من اللي اترن فارس: وحدة غالطة بس في الرقم ,,, رحاب : معقولة اتسكر في الخط في وجي هذا كنّا دارلي هكي زعمك قاعدة جنبه نرمين '''' كان احمد قاعد في المحاضرة وكان جوّا رايق زي اللي فرحان بزهرة البيلسان صوت حنون كل ليلة يهدرز معا لين قعد مش هامة يشوف شكلها لا شي مدام اتحبه فقال سيوري حنشووفها ''' اريج : كنك قعدي معش اتهدرزي امعانا الليل وانرن عليك مشغول عالماسنجر هدى : لا بس مرات امي تحكي مع خالاتي اعرفن الاتصال عالنت مايخذش في رصيد واجد اريج : اها عليك سريب كلّا هووو ,,,, بعد طلع فارس من شقته رن علي رحاب فارس :قبل ودرتيني ازح كانت جنبي نرمين رحاب : باهي كيف صار في موضوعي اللي قتلك عليه فارس: قتلك قوليلي شن ايميله عالفيس قبل رحاب : ماهو قتلك بعد يومين رن عليا عشان انقولك انا نقدرش انرن عليك فارس : ما نكذبش عليك انسيتك بكل رحاب : باهي شن عندك بعد المغرب فارس : ماشي شور العقرب ,, مازن رحاب :تقدر اتجيني في العيادة فارس : شن نرمين عندها اليوووم رحاب : لا نبيك انت ابروحك تعال كأنك تبي ادير رجيم فارس : بس انا مش مستحق رجيم جسمي اكووويس رحاب : غير تعال بس فارس : عليش تبيني انجيك احكي بالتليفووون رحاب : نبي نحكيلك ع موضوع مانقدرش نحكي لكي عالتليفون وقعدت تجعون وتدلع بصووتها عشان اتحرك مشاعر فارس ويذووووب رحاب بصوت دلع : هاااااااااا شن قلت فارس :باهي بس ما انطولش امعاك نعرف شن تبي مني رحاب : نجك ليا يافرّووسي " وكانت اول مرة اتقوله له " فارس : هذي كنها شن تبي زعمك ومزال فارس مش فاهم شي ولا حس باي شعور اتجاها قال في باله اكيدة تبيني في موضوع تهديد خطيبها ''''' العقرب ابروحه في الحوش ويهدرز مع نفسه " زعمك نتوكل على الله ونزوجها مايا بعد انبيع الحوش ولا اندير فرح لا شي هي اتحبني وانا انحبها ليش انماطلووو فيها اليوم بعد ننهي موضوع البيعة لازم نشقو بموضوعها " خلاص قرر العقرب يزوج مايا ويكمل عمره كله معاها ويبتعد عن الحروب والاشتباكات " ,,,, كانُ يتغدووو فارس ونرمين وكان سرحان فارس ومش خاشة راسة موضوع رحاب نرمين : فيش اتفكر كووول فارس : شن جوها الدكتورة رحاب امعاك نرمين : كيف مافهمتش فارس : قصدي لاحظتي حاجة غريبة امعاها نرمين : لا ,, عليش بس , فارس: رنّت عليا قبل أيام وقالت لي انها اسرقت الرقم منّك نرمين : فيش تحكي انت فارس : هذا اللي صار وقالت في واحد كان خطيبي زمان لما فصخت الخطبة يهدد فيا وزي هالكلام وقعد فارس يحكيلها بالتفصيل ,,,, لؤي : يتغدا مع زوجته فاطمة : صار قتلي كتيبة الهرهار فتحين باب التجنيد وينزللهم مرتباتهم في قاريونس لؤي : اها نبي انخشلها مشكورة الكتيبة هذه وكلهم ناس خيرة فيها فاطمة : ربي يوفقك حبيبي لؤي : عارفة حبيبك ماخشلها الا عشان الفلوووس بس فاطمة : عارفتك اماله غيرية عالوطن واقعدو يتغدوو مع بعضهم \ ,,, مودة ومروان قررو رسمي يسافرو مصر ويعيشو غادي بما انّ عندهم مال واجد خاطرهم يجرّبو تجربة جديدة في حياتهم بما انّ العقرب رد حياته طبيعية وقبل ردّو في سفريتهم يحسابو في شغل جديد مع عقرب لكن طلع العقرب اعتزل بالرسمي الأجواء هذينا وقاعد مروان يعاود من جديد في الإجراءات التأِشيرة وشايليين امعاهم امهاتهم ,,,, نرمين : صار قالتلك تعالي للعيادة فارس : نكذبش عليك , انا خويط عيت حنة نفهمش فيه انتي عارفتيني حتى في الرومانسية مانفهمش بكل نرمين : شي غريب ,, مستغربة ليش خذت رقمك من ورايا كان كملتني راهُ خدمناها عادي فارس : حتى انا نفس الجو مش عارف شن اللي في راسها قالت خايفة يقعد منظرها بايخ قدامك كلامها مش منطقي نرمين : شن رايك نمشي امعاك بعدين للعيادة فارس : بس مش حننزل حنقعد في السيارة وخشي انتي بدالي وقوليلها قالي فارس كل شي نرمين : انا عندي عادي تخدمها واتصبي امعاها هذي احسن وحدة من صحباتي بس لقطة غريبة تأخذ رقمك من ورايا فارس : نبي انوريك انّي وفيّ لكي حتى من وراك ,,, بعد اذان المغرب بساعة كان العقرب تم في بيعة حوشة وخذا افلووسه وكان ناصر قاعد امعاهم ,,,\ كان وقتها فارس قاعد قدام العيادة الممرضة : في وحدة برة قالت تبيك رحاب : من الممرضة : قالت نرمين رحاب : هذه كنها شن جابها راهُ يطلع هذا حكالها حاجة " استكت رحاب ولسانه ثقل " رحاب : خليها اتخش نرمين : اهلين رحاب رحاب : مرحب نرمين نرمين : معقولة تدوي لفارس وانا لا كان صبيتي عليا راهُ ساعدتك كيف خيتك انا بس لقطة بايخة منّك تاخذي رقمه بدون علمة رحاب حسّتها بكلامها زي العبيطة " كان نرمين امصغرة بروحها قدام رحاب ودايرتها حاجة كبيرة " رحاب : سامحيني خذيت الرقم بدون علمك خفت تضايقي مني ونفس الوقت كنت مانبيكش تعرفي انّ في حد يهدنني بصوري نرمين : فارس مايدس عليا في شي رحاب : اها ربي يخليه لكي رحاب استغربت من عباطة وطيابة نرمين واحسنت الظن بيها نرمين : باهي توا اللي صار صار ياغلايا احكيلي انا شن صار امعاك وحنخلي فارس ينهيلك موضوعة رحاب استكت لانها كذبت ومعش عرفت شن ادير مع هالبنت العبيطة والراجل اللي ماصدق قال كل حاجة لنرمين رحاب : لا مزال مالقيتش ايميله , تو لما نلقى ايميله حنقولك نستاذنك غير عندي حالات واجد يرجن برة نرمين : تمام خوذي راحتك نرمين زي الهبلة والعبيطة طالعة رحاب قالت بينها وبين نفسها مدام انتي عبيطة وعلي نياتك عليش انلف واندور ليش ما انجي لعندك غادي وانفكة منّ زوجك بعين قوية علي طلعت نرمين خشن باقي الحالات بعدها ركبت نرمين للسيارة نرمين : لا تمام ,, قالت ماتبش تنفضح بس قدامي وكانت ع أساس تبيه سر قتلها اللي صار صار جو حنساعدك وهي انا وفارس قالت أصلا مزال ماحصلتش ايميله لما انحصلة حنقولك فارس : باهي اللي حكيتلك كان هذا دفتلي طاجين عالفاضي وقالت ماحصلتش الايميل نرمين : بس لو صبّت عليك اخدمها ما إدْرِتَّهش عشان خاطري فارس : اكيدة هذه مش انتيمتك نرمين : نجك ليا " مسكينة نرمين علي نياتها قاعدة مش عارفة انّ رحاب تلعبلها عالثقيل قاعدة " ,,,, كانت زهرة البيلسان وقتها تحكي صووت مع احمد وكان زي المطيع امعاها ومنسج وذايب في صوتها ويهز في راسه وخلاص زهرة البيلسان : قتلك ماعندش رصيد عالمدار نبي كرت رصيد باهي حبيبي احمد : كم تبي زهرة البيلسان بدلع : انت وذوقك , وانت كريم ونحنا نستاهلو يا حبي الوحيد أحمد : هيا تو نطلع توا انجيبلك وانجي زهرة البيلسان : تم نرجى فيك اعويناتي ,,,, بشير كان متعقد وملامح الغضب علي وجه كانت صفحة وجك مزال اتنزل عليه في مناشير وفعلا طلعت اكثر من صفحة تأيد في مناشير صفحة وجك وكلهم يقلبو في الراي العام ضدك وكان بشير وعمران علي اعصابة بشير : شن الراي ياعمران معقولة ماعرفتوش من الادمن هذا عمران : قلب الراي العام علينا لان ,, الله غالب حالات اغتيالات واجد بشير : شن دخلني بيهم انا محد قاللهم خشو للجيش وللشرطة عمران : بس في بعض الصفحات يتهمو فينا نحنا بشير : معقولة نغتالو من هما في الشرطة نحنا انطربقوو كل من يصبي ضدنا بس عمران : بس ردة فعلك مافش أي حزن عالموضوع مع انّ بنغازي كلها اغتيالات بشير : زعلان حتى انا , لكن نوعيتي مانعرفش انعبر " طبعا عمران حس انّ بشير جوا رايق وماعلقش عالاغتيالات وكأنّ بشير كان يعرف من وراهن ويتستر عليهم " ,,,, وقتها احمد جابلها كرت 40 مدار والراجل قعد ذايب ومطيع هذا كله مزال علاقتهم ماسكّرتش شهر ممكن أسبوعين بالكثير لكن في هالاسبوعين تحكي مع 24 ساعة صووت لين هووو قعد ذايب في عالم ثاني زهرة البيلسان : متاكد انت اتحبني احمد : انحبك وانموت فيك زهرة البيلسان : بس انت لاشفت شكلي لا شي احمد : مهما كان شكلك انحبك موووت زهرة البيلسان : متاكد مهما كان شكلي ومهما كنت انا من احمد : اها انا قد كلامي زهرة البيلسان : معناها بكرة تعال بدري بكل للمعهد حتعرفني انا من احمد : وين انتقابلو زهرة البيلسان : غير انت تعال وخش للكفتيريا حتلقاني نرجى فيك احمد : المرة هذي اكيدة زهرة البيلسان : اكيدة وعد احمد : خلاص بكرة حنجي للمعهد وانخش للكفتيريا اول حاجة زهرة البيلسان : حتلقاني نرجى فيك بس عندي شرط احمد : شن زهرة البيلسان : لما تعرفني من ما اتجشش شوري واتقعمز في أي طاولة وتحكي امعايا دردشة من بعيد لا اتجي شوري لا اتسلم عليا احمد : خلاص وانا اموافق خاطري انشوف شكلها اللي منكلب عليها ومجنوون بيها زهرة البيلسان : تم معناها متفقين ,,,,, بعد مرور ساعة كان وقتها العقرب قاعد عالكرنيش علي جيّة مروان شورة العقرب : تي باهي اللي شفناك مروان : العقرب ياغالي العقرب : تي وينك انت ,,, من طلعتي من الطارق معش شفتك بكل مشيناها تليفونات ,, ولَّا الزواج فيه جو طلع مروان : انقانة مش غير فيه جو العقرب : كنّك اصرّيت انّك اتشوفني اليووم مروان : قبل جايك في حوشكم ,, قتلي تميت فيه قتلك تعال للكورنيش خير ,, تغيير جو العقرب : اها ان شاء الله خير ,, هدرازي ولا صايرلك موضوع مروان : الحق نبي انسافر انا ومودة وحناخذو امعانا امي وعمتي ام مودة ونبي نستقر في مصر العقرب : تستقر كيف مروان : نبي نبدا حياة جديدة انا ومودة العقرب : المهم كان مالك امخلط بي اشوية حرام افطن الرووحك مروان : كيف العقرب : انت قلت تبي تبدا حياة جديدة ياريت تبدا بمال حلال خير وماطيحش في المطب امتاعي مروان : أي مطب العقرب : انا خذيت حنين بفلوس فيهن بنّة حرام سواء بيع اسلاح او ذخيرة او أي شي من الممنوعات وداير روحي أعلنت توبتي وقعدت نصدق للفقراء والمساكين لكن كان وقتها مزال عندي مبلغ كبير القيت روحي فاتح المحل امتاع المواد الغذائية وشفته شن صارله كل مرة حد ضاربة بقذيفة طلعت فرحي قلت حنتريح ماتريحتش بالعكس زادت حياتي ظلام في ظلام الخلاصة ابدا حياتك من جديد لكن بمال حلال كان تبي ربي يباركلك مروان : ان شاء الله حاضر ,, مروان حظن العقرب واضبطوو بعضهم مروان : حنرايف عليك يالعقرب العقرب : انا اكثر ياولد عمتي ومشى مروان ركب سيارته "وكان زي الزعلان عشان اذكر الأيام الحلوة بيناتهم " طلّع نقال عشان يرن علي نرمين وفاطمة ويعطيهن حقهن من الورثة بكرة ,,,, هدى راقدة علي ظهرها واتبحت في فوووق وتلعب بخصلة شعرها و اتفكر وتحكي بينها وبين نفسها " انا شبه سيطرت عليه بالكامل ليش ما انوري وجي ويعرف انا من لان صعب حيفوتني ونكسبه اكثر واكثر ويقعد تابع ليا ومطيع حتى في حياتي العادية ومزالت تعلب بخصلة شعرها واتفكر اتوري روحها ولا لا ,,, ام اريج خشت علي اريج في دارها ام اريج : رقدتي ولامزال اريج : واعية يا ماما ام اريج : قالك باتك جايينك بكرة خطّاب وعلي قولته شاب سلفي اريج : بس انتي ياماما عارفة السلفيين كل حاجة عندهم حرام وممنوع ام اريج : انتي ما اتلطّهش واتسكريها ,, ديري المقابلة وبعدها احكمي ابروحك اريج : تم حتى هذا راي ,,, كانت نرمين وفارس فرحانين وكذالك فاطمة ولؤي قريب يطيرو من الفرحة عشان مازن رن عالبنات وقاللهن بكرة تو انجيبلكن قرعتكن من الورث نرمين : حنشري طواقم ذهب اشكال وأنواع فارس " لا انغيرو سيارتنا خير فاطمة : حنشرو فرش وصالون وستائر لؤي : لا لا خلينا انزوقوو الشقة وانصينو المطبع والحمام قبل وكل واحد فيهم يحلم بالفلوووس , كان سرحان العقرب عالكرنيش شاف الرقم مايا | طبعا الفترة اللي فاتت كانت شبه يومي تتصل بي ويهدرزو مع بعضهم وارواحهم كانن منسجمات جو غراميات وعشق لكن عالخفيف مايا : مبروك البيعة كلمني ناصر وقالي العقرب : اها الله يبارك فيك ,, بكرة نبي نعطي البنات حقاتهن من الورث وانا نبي نشري شقة مايا : تشري عينك خليهن الفلوس عندك تعال عيش امعايا ,, مش قلت غير ننهو موضوع بيعة حوشي حناخذك ,, خلاص نهيته الموضوع انت العقرب : اكيدة ومازلت عند كلامي ياحنين مايا : قتلك قوولي مايا العقرب : وانا انشوف في قدامي حنين فرق بينك وبينها هذكي ملتزمة وانتي مايا : وانتي شن قولها قولها صايعة العقرب : هههههههه لا قصدي عامية عادية مايا : ربي يدوم ضحكتك انهي مواضيعك ونرجى في اليوم نبقى مراتك العقرب : انقاني صقعت وبدت اتبشبش عالخفيف وانا قاعد عند الكورنيش خليني نمشي توا خيرلي مايا : دير بالك ع روحك وكانت تمطر في مطر خفيفة وكان العقرب لابس جاكة أمريكية سودة ويجري شور سيارته تحت المطر بدت تقوى المطر ركب لسيارته ولّع سيارته ولّع التدفئة امتاع السيارة العقرب ابتسم وقال بينه وبين نفسه : حتى لو خذيت اختك مايا حتبقي انتي احلى قصة حب عشتها في حياتي : وقعد يسوق بشواش تحت المطر ,,,,, كان اريج مزال واعية واتفجر عالروشن والمطر قوية وتحكي بينها وبين نفسها " زعمك يا احمد كنت اتحبني صح ولا لا مش قادرة انطلع المسج امتاعك من راسي مش خاشة راسي نزوج شخص بدون قصة حب لاشي " ,,,, كانت مايا ماسكة في يدها طاسة سحلب دافية وكان الجو صقع واتفرج عالتلفزيون ولابسة توتا ثقيلة صوووفة اكمام اطوال وقالت بينها وبين نفسها " خلاص حتضحكلك من جديد الدنيا يامايا وتاخذي راجل بمعنى الكلمة يحبك واتحبيه واتعوضي رحيل معاوية " ,,, صباح اليوم التالي احمد كان لابس القيافة السمحة وكانت بنغازي شبه غارقة بالمطر وهذكي العطر اللي باخّه كان فرحان قريب يطير من الفرحة عشان يشوووف الكبيدة امتاعه جا بدري خش للكافيه شاف بنت معطيّتاَ بظهرها ولابسة بالطوو صوف لونه حمر عرفها هي مشى شووورها صب قدّامها رفّعت راسها هدى استغرب احمد لما شاف هدى وحطت هدى عينها في عين أحمد مع ابتسامة منها أحمد وهو مصدوم : قصدك انتي زهرة البيلسان ؟؟؟ يتبع ''' | ||||
|
| |
|
22-04-22, 12:05 AM
| #64 | ||||
| رواية #مشاعر_مطرطشة الحلقة 58 لمّا رفّعت هدى راسها استغرب أحمد لما شاف هدى وحطت هدى عينها في عين احمد مع ابتسامة منها أحمد وهو مصدوم : قصدك انتي زهرة البيلسان ؟؟؟ طلّعت نقالها هدى وفتحت الماسنجر وهو مزال امصبي مصدوم هدى :شن اتفقنا نحنا شوف أي طاولة قعمز عليها مادريلش شُبهة احمد سمع صوت الماسنجر طلع نقاله ومزال امصبي قدامها شاف الرسالة بعّد منها وقعمز في مكان ثاني امقابلين بعضهم ومزال اثار الصدمة علي وجه هدى : مفاجئة صح اتصدق اللي قلت عليها شينة وقبيحة هي نفسها اللي اتحبك وتعشقك واتموت فيك أحمد استك وقعد يحك في راسها " طبعا هدى تلعب ع وتر الحب والعشق تجري بي فقط لاغير " أحمد : صار هو انتي زهرة البيلسان متوقعتش انّ الشخص اللي نتعلق بيه وانحبه تطلع انتي هدى : وهذا اللي صار ,, شن تبي اتوخر واتفوت العلاقة بس انا انحبك بجديات ونبيك حلالي أحمد : توا خليني وقت عالمحاظرة هدى : أي محاضرة مزال بدري احمد : المهم عرفتك انتي من وصبى احمد من تلا الطاولة وسكّر النت هدى : كيف صار مش كان امكبد وطايح بوجه ساهلة اتصال بصوت مع اشوية دلع حنخليه ذايب ,,, أحمد وهو ماشي للقاعة قابل اريج جت عينه في عين اريج اقعدوو اقريبيين من بعضهم واجد امقابلين بعضهم أحمد : اخسارة كنت انحبك بجديات دوا ابسرعة احمد لما دوبك وصل فيها سمعتها اريج صبّت بحتت وراها احمد مابش بحّت وراه اريج : شن يقصد باخسارة كنت انحبك زعمك مزال يبيني بعد هذا كله وكمّلت طريقها شور قاعتها ,,,,\ العقرب كان امتوي حقّات نرمين وفاطمة وماشي اشوية اخرة يبي يعطيهن الخواته العقرب سمع نقاله رن مايا : انت بعد خطرها وين بتت مدام بعت حووشك امس العقرب : جيراني واجد واصحابي واجد سلّكت اموري مايا : فطرت , العقرب : اها شربت مكياطة وكليت كيكة مايا : هانت هانت حيجي اليوم انفطرك بايدية انا العقرب : مش غير هانت مايا : خواتك حكيتلهن ع موضوع زيزتك ولا حكيتلهن عليا العقرب : ماقتلك اشوية اخرة ماشيلهن ونبي نحكيلهن ورايهن مايفرقش عندي هِنَّا عارفات قصتك وحكيتلهن انا من قبل لكن اللي حيكون جديد عليهن انّي نبي نزوجك وناخذك مايا : ربي يسهلنا يا اعيوني ,,,, رحاب قعد رقيلها ومتمزطة وحسّت روحها صغرت روحها ابرووحها وتبي اتحاول اطلّع موضوع فارس من راسها وقالت بينها وبين نفسها " معقولة انا دكتورة اندير هكي حسّت بتأنيب الضمير ,,,,, بعد مرور ساعتين كان في رست في المعهد وكانت اريج وهدى مع بعضهن في كافيه المعهد هدى : صار قتيلي جيّينك خطّاب اريج : اها ماما قالت سلفي وانا انخاف منهم السلفية هدى : خلّك منهم لو تاخذي نصيحتي خوذي واحد متفتح وافري اتعيشي حياتك مش نكد ونقاب وكل شي حرام اريج : مش عارفة شن اندير ماما قالت انتي مش خاسرة شي ديرو المقابلة وبعدها ساهل هدى : قصدي اول حاجة حيفرض عليك النقاب اريج : وعادي شن فيها جت عالنقاب ساهل المهم مايطلعش من جماعة المتشددين وكل شي حرام هدى : غير اسمعي كلامي بس قولي الامك مانبش اريج بعصبية : انقولك ماما قالت ديري مقابلة وبعدها ساهل يعني انفوت كلام ماما ونسمع كلامك هدى : باهي كنّك عصبتي اريج : لا نحكي عادي فاتك امبدري وانا كيف خاشة للمعهد قابلني احمد وجت عيني في عينه هدى : باهي اريج : لما قريب يوصل فيها قالي اخسارة المشكلة اني كنت انحبك او قال اخسارة انحبك مانذكرش لكن زي هكي لانها قالها وهو ماشي هدى : امتى صار الكلام هذا اريج : امبدري لما جيت الصبح المعهد وكنت اندور فيك اللي بعدها القيتك في الكافيه قاعدة هدى قالت بينها وبين نفسها حنحرقلها دمّها عشان حكت امعاها بعصبية هدى : عارفة شن صار امبدري وانا قاعدة في الكافية اريج : شن صار هدى : جاني احمد اريج : جاكي كيف هدى : قالي نبي دقيقة وقعمز تلايا اشوية قالي انا انحبك ومعجب بيك اريج باستغراب : أحمد هدى : اها كنك مستغربة اريج : بس كيف قالي اخسارة انحبك هدى : وانا شن دراني اريج : خلّك منا مش قتيلي مش اكويس وحذرتيني منا تخيلي جاني انا وبعدها جاك انتي شكله يلعب هدى : الحق سالت عليه قالو اكويس ومحترم وانا اسأت الظن بي اريج : يعني هدى : يعني ليش مانعطيه فرصة اريج وهي الدمعة علي خدّها " اتصدقي انّك وحدة تافهة وقحة وحقيرة | هدى : كنك عليش هالكلام هذا كله عشان نبي انجرب علاقة حب اريج : اتحذريني منّا واديري انتي معا علاقة هدى : ماقتلكش نبي اندير , قتلك نبي نعطية فرصة اريج صبّت من عالطاولة امتاع كافيه المعهد اريج : وتبيني نسمع كلامك وانفوت المقابلة امتاع السلفي انتي حقودة حسدية انانية وجدات زيّك هكي في هالدنيا نادمة علي كل دقيقة كنت فيها امعاك هدى تحكي امعاها ببرود هدى : ريت هالشخصية المهمة اللي خسرتها اريج الدمعة علي خدها وطلعت من الكافيه وقتها احمد لما عرفها انّ هدى هي زهرة البيلسان طلع من المعهد وكان حاليا قاعد جنينة تبيستي وكان الجو صقع وريح قووووية " زعمك اتحبيني صح ياهدى كيف اتقول انحبك بعد رفضتني صحبتها فيه حاجة غلط في الموضوع " ,,,, هدى فاتحة ايميل زهرة بيلسان وترجى في احمد يفتح فيس ,,,, لؤي كان قاعد في الكتيبة الجديدة وكان اغلبها كلهم ملتزمين واشيووووخ وكانُ ينصحو فيه علي رفع الايزار والاستقامة وطلق اللحية ومعش يلبس افرنجي وهكذا ,, وقتها العقرب قاعد في حوش نرمين وعطاها حقها من الورث وحكالها ع موضوع زواج مايا العقرب : ماقتيلش رايك نرمين: انت ادرى بروحك لو انت لاقيها مناسبة لكي دير اللي اريحك قبل نبولك اريج لكن شكلها اريج مش ماشيا ع مودك العقرب : ممكن بعد أسبوع نبي ننهي موضوع ونزوجها بدون لافرح لاشي تو بعدها حتجني انتن غادي واتعرفن عليها اكثر واكثر نرمين قعدت تبكي فارس : شاف نرمين تبكي نرمين : كنك تبكي وانتي حياتك كلها دمووع نرمين : اذكرت ماما يافارس العقرب : الله يرحمك يا امي نرمين : كانت ترجى فيها واتشوف مازن مزوج بعد موتت حنين العقرب : آآآآآآه يا امي فقدتك واعرة عليا فاقدك واجد وحسيت بفراغ في حياتي حزنت عليك اكثر حتى من حنين اللي ماتت بين ايديه فارس : خلاص ازح تو اتبكوني حتى انا ادعوولها بالرحمة نرمين : مسحت دمعتها ,, وبعبرتها قالت ربي يهنيك يامازن العقرب / طالع من شقة نرمين وكان زعلان ومضايق عشان اخطرت في باله امه ,,, بشير : كان في المقر امتاعه خش عليها عمران في واحد يبيك قال اسمه أبو عُرْوة الليبي بشير كانت الابتسامة علي وجه وفرح بشير : خليه يخش بسرعة خش أبو عروة وكان الوقار والالتزام والنور علي وجه واحضنووو بعضهم أبو عروة : رفيق القلب وصديقي الغالي بشير : اوووو ياصاحبي فقدتك واجد أبو عروة كان يقاتل في العراق و سوريا ومالي مع الجماعات المتشددة بشير : امتى روحت وامتى جيت أبو عروة : ديما ليا اسبوووع بشير : حمد لله علي سلامتك أبو عروة : الله يسلمك ,, بنغازي هذا وقتها ومستحقتنّه بشير : خطّرت عليا أيام زمان أبو عروة : أيام الجهاد في العراق 2002 بشير : خلاص فتنا موضوع السلاح تو جهادنا في المال والسياسة وانتم شوركم السلاح أبو عروة : ربي يتقبل منّك , بس ماشاء الله يجن الاخبار اول بأول قالو الاخوة دايريين شغل كبير في بنغازي ويغتالو في أعداء الله واعداء الدين بشير : اها الحمد لله ,, أبو عروة : توا وقتي جا عندنا مشروع إسلامي لازم يندار في بنغازي لازم من تحكيم شرع الله لازم انفعلو المحاكم الإسلامية والشرطة الإسلامية بشير : عندي كتيبة دايرها جديدة مقرها في قاريونس قريبة من جامعة قاريونس اغلبهم اللي خشو فيها شباب شاركت في 17 فبراير وفي حتى اللي كانُ امعانا زمان في العراق أبو عروة : لا مانبش نقعد لاقائد كتيبة لا شي نبي نبقى جندي عادي مش ناخذ راحتي وانفّذ ونتقرب الى الله بقتل المرتدين اللي منطويين حتى الجيش والشرطة بشير : لا عارف ,, قصدي حيمشي جوك امعاهم ,,,, الساعة 3:00 عصرا كانت تتغدى فاطمة مع لؤي فاطمة : بس طولت واجد اليووم لؤي : اها كنت في الكتيبة وخذاني الوقت فاطمة : المهم انسجمت لؤي : احلى انسجام .. تاريتني كنت مش فاهم شي في الدين بكل فاطمة : كيف لؤي : قصدي ناس غادي اتخاف الله وينصحو فينا فاطمة : المهم انت منسجم لؤي : الحمد لله فاطمة : اليوم جاني مازن وجابلي حقي من الورث لؤي : باهي ماشاء الله فاطمة : وقال يبي يزوج اللي اسماها مايا لؤي : اللي قال اخت حنين فاطمة : اها ,, لؤي : غريبة ,,, مش كنتُ ساكنيّلا علي اريج فاطمة : طلعها من راسه بكل ,, لؤي : ابجوّه ربي يباركله فاطمة : امين ,, جوك مش عاجبني فيه حاجة لؤي : لا ,,, جو تمام ,,, ,,, الرائد إبراهيم حولوو من منصبة لكثرة الاغتيالات من فترة وحاليا يخدم ابروحه مع كم شخص عندة غيرية علي بنغازي من الجيش والشرطة ويتعامل مع الاستخبارات العسكرية الرائد إبراهيم كان مضايق عشان شاف تقرير من الاستخبارات العسكرية جماعات المتشددة اللي كانو في سوريا اغلبهم ردّو لبنغازي والأكثرية قاعدين في كتيبة الهرهار ودز التقرير لاكثر من عقيد في الجيش عشان يشوف ردت فعلهم .... فتحت هدى فيس لقت احمد فاتح هدى : اهلين حبيبي احمد : مرحبتين هدى : كنك كرهتني عشان شفت شكلي ضحكت عليا تبي اتسيبني داير روحك اتخاف الله " في نوعية من الشباب لما ادير علاقة مع بنت حتى لو شاف شكلها شين صعب يفوتها لان يحس كأن ضحك عليها والنوعية هذي من الشباب قليلة جدا بس تلقاهم اغلبهم علاقتهم مع الله اكويسة يعني تلقى نص التزام ونص اهياجة " هدى : نحكي انا كنك ساكت احمد : امعاك ,,, ومش حنفتوتك , قتلك انحبك معناها انحبك وقتلك مهما كان شكلك حنبقى زي ما انا هدى : باهي هاك رقمي ليبيانا والمدار خليه امعاك وحندزلك طلب صداقة بايميلي الأصلي ,,,,, اريج : مزال مصدومة من صحبتها مش زعلانة واجد علي احمد لانها ماتربطهمش أي علاقة او تواصل لكن خيانة صحبتها وكذبها زي المووس اللي خش القلبها ,,,, بعد مرور ثلاث اشهر العقرب كان قاعد في شحات امهيج مع مايا وجو رومنسي وسمح وكان حتى الطقس رائع جدا واريج انخطبت بالرسمي من الشاب السلفي وكان اسمه مصطفى وكان تاجر مواد غذائية واحمد مزال قاعد مع هدى وعايش معاها قصة حب وهدى اللي كانت تلعب عليه واتكسد عليه حسّت بالأمان معا وتغيرن مشاعرها اتجاها وقعدت اتحبه ,,, رحاب انقطعت علاقتها مع نرمين بكل وسكّرت عليها مرة وحدة حتى نرمين معش عدلتها لان كل ماتمشيلها اتوزع فيها ,, فاطمة ولؤي حياتهم قعدن مشاكل لؤي رفّع ايزارة وطلق لحيته وقعد ديما جلابية " الالتزام والاستقامة مش عيب ولا حرام بالعكس احسن حاجة في هالدنيا الاستقامة لكن اتكون استقامة علي حق مش علي باطل ولان مابتش تلبس نقاب اقعدو مشاكل وعرايك 24 ساعة ولأنها حامل ومش عارفة شن ادير ولا وين تمشي صابرة وخلاص كتيبة الهرهار دارو اكثر من كتيبة في بنغازي هرهار 1 هرهار 2 هرهار 3 ودارو حتى استيقافات واقعدو امسيطرين علي قاريونس والقوارشة والهواري وقنفودة والمناطق المحيطة منهن ,,, صفحة وجك لاتمل ولا تكل من التحريض الناس علي كتيبة الهرهار لكن بدون جدوى مرات يطلعوا شوية ومرات لا اطلعو اكثر من مرة جمعة انقاذ بنغازي وغيرهن بالعكس كانُ يموتو متضاهرين الناس ملّت ورضت بالواقع ,,,, مايا : تاريتها سمحه شحات العقرب : اها الجو فيها خيالي بكل مايا : متريح امعايا انت العقرب : اكيدة ياقلبي ياحب حياتي امبدري كلمني مروان واتس قاعد امهيج الطحان في مصر مايا : اها , قتلي يبي يستقر غادي خلاص صح العقرب : اها ,, بس عارفة مايا انحس في حاجة غلط في حياتي مايا : كيف العقرب : اتصدقي مش متعود عالحياة الطبيعية هذي متعود علي جو الاكشن ومواقف والطحنات اني نبقى انسان طبيعي مش خاشة راسي ههههه مايا : فكنا الله من الاكشن اللي تحكي عليه العقرب : هيا خلينا انروحووو بدري احسن ما اظلم علينا في الطريق ,,,, فاطمة : طلقني طلقني انا معش هامني حتى لو كنت حامل وماعندش وين نقعد لؤي : عشان قتلك البسي نقاب هذا كله عشان خايف عليك ونبي نسترك ولا تبيني نبقى كيف الديوث خوك مازن فاطمة : احترم نفسك ما اتقولش علي مازن هكي مازن راجل وارجل منّك لؤي : مش حنمد يدي عليك ,, قالت راجل في راجل يخلّي زوجته تطلع بمكياج ومش لابسة لا نقاب لاشي , خاطي لبسها الكاجول يأخذ سو حنين كانت ملتزمة فاطمة : بطل كذب شفتها برة مكياج خفيف وعادي ولبسها واسع وساتر لؤي : دخنش بيهم وما اتقارني بيا حد انا فاهمة فاطمة : اهو فارس شوف كيف يعامل في زوجته لؤي : تي فارس لا صلاة لا اعبادة بصيرة اتهز في راسها وخلاص شن ينفع اتعامل في زوجتك افضل معاملة وانت حتى الصلاة ما اتصلي فاطمة : ياربي خوووذني يارب انموووت معش نبي انعيش معا هذا ياربي شن هذاااااااااااااااا وقعدت تبكي فاطمة كالعادة ,,,,, هدى : صباح الورد يا روووحي احمد : صباح اللوتس وينك امس شكلك نووووم هدى : اها رقدت بدري " وفعلا رقدت بدري ماكنتش تجري بيه ^^ حتى هيا توا امكبدة الطحّانة وطايحة بوجها " احمد : بكرة دازلك امي والبنات هدى : عليش دازهن احمد : يعني عليش دازهن مثلا نبي نعطي فيك كلمة بعدها نخطبك هدى : تحكي جد ولا اتبصر احمد : نحكي جد اكيدة اهويدة هدى : تي انحببببببببببببببك موووووووووت ياروووووحي احمد : وانا انحبك ياحياتي ,, اريج كانت شبه متريحة مع مصطفى وانقطعت علاقتها مع هدى معش فيه لاتواصل لاشي وكان مصطفى خطيبها عكس لؤي بكل صح ملتزم لكن كان متفاهم وكل شي بالنقاش عندة مش بالعياط والعرايك حتى لما قالت اريج مانبش نلبس نقاب قاللها " ابراحتك لكن بعد تطلعي امعايا ما اتحطي شي ع وجك وافقت هيا وافرحت انّ كان متفاهم لابعد الحدوووود " وكان مصطفى مايحكش امعاها واجد بالتليفون ,,,,, كلا فارس ونرمين وخذينها اهياجة ودنفقي وعايشيين احلى حياة طبعا نرمين استايلها في الدبش كاجول وادير في جو المكياج الخفيف وبعد دارت رجيم اقعدتت سمووحة واجد وكان فارس جسمعه جسم واحد رياضي جسم الله يبارك لدرجة أي مكان يمشوله كلهم يبحتو فيهم اتقول حاسدينهم علي بعضهم ,,,, كانت نرمين سرحانة فارس : وين عقلك وين ماشي يزر نرمين : مضايقة عشان اختي فاطمة فارس: مزال امتعبها في عيشتها نرمين : اها نادمة عاليوم اللي وافقت عليه قالت تغير واجد بعد خش للكتيبة هذي فارس : أصلا الكتيبة هذي علي قولت خوك العقرب عليها العين وعليها دواوي وواجد كان يفوتها خير نرمين : بالك تقدر تنصحة وتدويله فارس : قصدي ننصحة انقوله عادي شن فيها كان مراتك مالبستش نقاب نرمين : تي لا ',,, تعبلها حتى نفسيتها وكل شي عندة حرام فارس : نكذبش عليك مرات يقول يشي كلمة ماتعجبنش نلقى روحي امطربقة ,, نسى روحه هو ولا شن نرمين : زعمك نحكي العقرب فارس : مفروض فاطمة تحكيله وتشكيله العقرب هو خوها ويعرف كيف يجيب حقّه نرمين : خايفة من لؤي هي كان حكت لانها تحكي امعايا من وراه شوف كم ليها مع جتنا ولا مشيتلها فارس بهزوة : عليك وقت اللي قعد لؤي ينخاف منّا ,,,, اليووم التالي جابو خبر عاجل عالقنوات الليبية والعربية والأجنبية انطلاق عملية الكرامة بقيادة المشير خليفة حفتر وأول من انظم مع في بنغازي القوات الخاصة-الصاعقة وقاعدة بنينة-السلاح الجوي مجموعات وأفراد من القوات المسلحة وطبعا كان امعاهم الرائد إبراهيم ومن شاركو في حرب فبراير كتيبة الهرهار بقيادة بشير اعلنو النفير التام في المناطق اللي امسيطرين عليهن في بنغازي ,,,, كانت فاطمة من كثرة البكاء والدموووع وجه تاعب اتقولة وردة ذبلانة وكانت اضم في حوسة الشقة سمعت باب الشقة يدق مشت للباب من العقرب : حلي انا مازن فاطمة فتحت الباب بسرعة فاطمة : اهلين اهلين انستونا وكان العقرب مع زوجته مايا فاطمة : شن هالطلة السمحة اللي جتنا مايا : اهلين افطووومة فاطمة : اهلين مايا وسلّمن علي بعضهن وخش العقرب للصالة العقرب : كيف حالك وحال لؤي فاطمة : كانت خنقتها العبرة والدمعة علي خدّها تبي اتحاول تمسك دمعتها العقرب بحّت في اعيونها حسّهن يبي يرقرن بالدموع وقعدت تبكي فاطمة وقعمزت ماوقفتش ابكاء مشت مايا شوورها اتصبي فيها مايا : شن في افطووومة كنّك العقرب انقلب وجه وتعصب وبحّت فيها بتفنيص العقرب : شن فيه كنك , احكيلي بس فاطمة : لؤي يامازن مازن : كنّا لؤي شن صارله فاطمة : تعبلي نفسيتي وتعبت امعا معش نبيه نبيه يطلقني مايا : شن هالكلام فاطمة بحّت في مايا ومسكتها من اكتوفها فاطمة : اها معش نبي انعيش معا تعبلي نفسيتي عذبني نفسيّا عنبوها الزيزة اللي هكي مايا : تبي افلوس ناقصتك حاجة العقرب :كنك مافش افلوس امفلسة عندكم الحكاية فاطمة صبّت : مش كل حاجة افلوس يامازن انا نبي الحنية نبي الأمان نبي راجل انحس بالراحة معا لؤي من يوم خش للكتيبة تغيرن وقعد مش تمام كل شي حرام وممنوع اطلوع منعني حتى نمشي الاختي معش نطلع بكل خاطي الحرب النفسية اللي دايرها ليا وكل شي حرام عنده علي فتحت الباب امتاع الشقة كان خاش لؤي عليهن عشان يأخذ ساكُو الدبش امتاعه ويقعد طوارئ في الكتيبة مايا سّقمت الإيشرب امتاعها وغطت شعرها وفاطمة شافت لؤي خافت وجت عين العقرب في عين لؤي لؤي : السلام عليكم ورحمة الله وبركاته العقرب اعيونة اقعدن حمر والغضب علي وجه خشّن مايا وفاطمة لوحدة من الديار جا لؤي شور العقرب لؤي : قلت السلام عليكم العقرب يبحّت فيه من لوطة الفووووق وعليكم السلام لؤي : شن رنت تشكيلك عشان قتلها البسي نقاب العقرب : اول حاجة الكتيبة اللي خاش فيها غير صحيحة بالكامل وعليها علامات استفهام واجد لؤي : انا ادرى بمصحلتي انت مش شورك العقرب بحّت فيه بضحكة خفيفة العقرب : صار منك يالؤي وقعدت تحكي ,,, لا ماتشكيلي فاطمة جينا بالحظ عليها نسالو بس وقعدت تبكي وتشكي منّك لؤي بصوت عالي : بس انت مش شورك مراتي وانا حر فيها ياريت تطلع انت وهلك برّة العقرب بدون أي مقدمات هَدْ عليه وامسكه من رقبته ولصّقة في الساس العقرب : احكي امعايا بأسلوب انا مانندري علي شي ومانش عارف شن دايرلها كنت مُغيّب '' هذا وين عرفت كل حاجة لؤي : حوّل يدّك راك تقتلني نبي انتفس العقرب اطلقة وخش شور الدار اللي قاعدة فيها مايا وفاطمة العقرب حكا بصوت عالي : امي ماتت وانت امانة عندي كان هالفاسد اللي برة امتعبلك عيشتك ونفسيتك وتبي تطلقي وخايفة وين تقعدي خوك مازن مش حيسيبك وحيبقى امعاك والقرار قرارك وبحّت في مايا هيا اطلعي العقرب وهو طالع بحّت في لؤي " إحْمد ربّك انّ راجل اختي كان هذا راهو نفيتك علي وجه الأرض وانت عارف العقرب زين ,, انا قتلك مش فاهم شي ومش عارف شن صاير وشن دايرلها لكن الواضح انّك مش تمام امعاها ,, الله يلعن الالتزام اللي هكي كرهتو الناس في الدين " لؤي : استغفر ربك شن هالدوة العقرب : تي ازّح مانبش انتهور واندير حاجة ونندم عليها لاني مزال مش فاهم شي ,,, مايا : هيا يامازن خلينا نمشو خير مازن وهو طالع فاطمة اتبحت فيه وكأنها في اعيووونه اتقول خليك ما اتسيّبنش معا ولما طلع العقرب ومايا لؤي بحّت في فاطمة بنظرة استحقار وخش يلم في الدبش امتاعه لؤي : ماشي للكتيبة فيه طوارئ بايت غادي فاطمة : اتخليني ابروحي لؤي : لا حنحاول نزرق عليك كل يوم ,, مش جت فترة قندلت عندنا نرمين وباتت امشي باتي عند اختك ,,, ومشى شور الكتيبة امتاعه وفاطمة ابروحها في الشقة قعدت تبكي وقالت بينها وبين نفسها " معقولة هذا راجل يخاف الله " ,,,, مصطفى اتصل ب اريج اريج : اهلين مصطفى : اهلا ,, القيتك رانّة عليا اريج : اها عندي فرح بنت خالتي نمشي عادي مصطفى : امشي عادي اريج : عارف سبحان الله في البداية كنت خايفة منّك قلت اكيدة سلفي معقد وكل شي حرام عنده مصطفى : الإسلام دين يسر مش عسر انا عندي اهم شي اتحافظي علي صلاتك وتطلعي بدبش محتشم وساتر واتخافي الله ,,, الباقيات يتغيرن مع الوقت اريج : انحبك وانمووت فيك مصطفى : ربي يخليك ليا ,,, هانت مزال سنة وحنطلعو فرحنا ,,, ,,,, هدى كانت فرحانة وقريب اطير من الفرحة عشان جو اهل احمد وعطو فيها كلمة هدى اتصلت باحمد احمد : ها تريحتي هكي ,, مش ديما اتقولي خايفة ياخذوك مني هدى : تريحت اكيدة ياحبيبي انا ,, ياعمري كله احمد : ربي يسرلنا الخطوبة وننسترُو امعاك ,,,, كان العقرب زعلان عشان اخته فاطمة وكان قاعد عند فارس في شقته وكانن نرمين ومايا ابروحهن يحكن علي فاطمة العقرب : تغير لؤي ,, من قال يقعد هكي فارس : شن حدير من راي العقرب: نبي نعطيها يومين ونبي نمشيلها اخرة في شقتها انشوف حالها واحوالها مش حنسيبها بكل اختي ,,, مايا : كان شفتيها كيف تبكي نرمين : خيتي ياناري عليها ,, ليا واجد معش شفتها ولا حكيت امعا نت ,, سكّر عليها حتى النت مايا : لا حول ولا قوة الا بالله ,,, وقتها كان مزال اغلب كتائب في شرق ليبيا مانظمّتش لعملية الكرامة عشان يرجو في الأوامر من المشير ,, كان معسكر الصاعقة مزال ماطاحش وكان اغلب التحشيد في الرجمة ,, ,, وكانُ الصاعقة في جميع معسكراتهم ومكانهم في بنغازي واعلنُو النفير حتى همّا بجميع مسمياتهم ومكواناتهم ,,, والرائد إبراهيم إبراهيم كان داير مجموعة خاصة بيه واديرو في عمليات نوعية في بنغازي تستهدف المليشيات وجماعة الرائد إبراهيم كانُ خليط عبارة عن اشوية من الصاعقة والنجدة والدعم والشرطة يخدموو بمجهوداتهم لانفسهم حبّا لبنغازي واديرو في عمليات نوعية ,, عليه ماينزل الجيش من الرجمة ,,,,, واحد من جماعة الرائد إبراهيم كان من الصاعقة أصلا اسمه صالح ,,شاف الرائد إبراهيم شارد التفكير وسرحان صالح : فيش اتفكر الرائد إبراهيم : في واحد لو نكسبو في صفنا حنكسبو نص اسود مناطق بنغازي ومعارفة واجد صالح : من الواحد هذا الرائد إبراهيم : واحد فارس شجاع اسد مايخاف بكل ,, صبيت عليه من قبل وردّني وفاتني , صالح : شن اسمه ومن يطلع الرائد إبراهيم : اسمه مازن ولقبة العقرب ,,,, ,,, كانت بنغازي في هذكي الوقت في الصبح اتقول إيطاليا كل حد ماشي في حاله وفي الليل تنقلب كولوميا بوم في كل مكان وصواريخ يطّايحن فووق الحواشين ,,, صواريخ طالعات من الليثي وطالعات من بوعطني وطالعات من الهواري وطالعات القوارشة وطالعات من سي فرج هكذا كانت تنام بنغازي في هذه الأيام على أصوات الرصاص والبوم بوم قبل نزول الجيش وقبل سقوط معسكر الصاعقة ,,, يتبع ,,, | ||||
|
| |
|
22-04-22, 12:06 AM
| #65 | ||||
| رواية #مشاعر_مطرطشة الحلقة 59 "الأخيرة " كانت بنغازي في هذكي الوقت في الصبح اتقول إيطاليا كل حد ماشي في حاله وفي الليل تنقلب كولوميا بوم في كل مكان وصواريخ يطّايحن فووق الحواشين ,,, صواريخ طالعات من الليثي وطالعات من بوعطني وطالعات من الهواري وطالعات القوارشة وطالعات من سي فرج هكذا كانت تنام بنغازي في هذه الأيام على أصوات الرصاص والبوم بوم قبل نزول الجيش وقبل سقوط معسكر الصاعقة ,,, ,,,, كان العقرب امرّوح وهو مايا لشقتهم مايا بحتت في العقرب مايا : عارفتك زعلان ومضايق علي فاطمة العقرب : هذي اختي ومن ليا غيرها وهذينا امانة في رقبتي بكرة نبي نمشيلها ونطمن عليها اخرة مايا : مرات يلزك راجلها العقرب : أي يلزني تي ننحره بعده اختي لازم انصبو امعاها مايا : يعلم الله شفت ملامح وجها نكد وهم وغم وانت قاعد برة في الصالة مع لؤي تحكيلي شن داير امعاها امعيّشة في عذاب ياحبيبي العقرب : اووووووف معش اتزيدي تحرقي اعصابي ,,, يوم التالي كان أبو عروة مجتمع بجماعته في كتيبة الهرهار وبشير قاعد في طرابلس وسلّم كل حاجة لعمران أبو عروة قاعد هو ماسك الحرب في الميدان أبو عروة : هذا وقتكم يا اخوة مش حنخلووو بنغازي اطيح في يد هالمتردين هذيما مايحكموش بشرع الله سمعونا تكبيراتكم الله اكبر الله اكبر الله اكبر وقعدت كلها اتكبر وكان قاعد امعاهم لؤي يكبر كانُ اغلب القادة المتشددين يرجو في أبو عروة في المكتب امتاعه ,,, عشان يحطو خطة لاقتحام جميع المعسكرات في بنغازي ,,,,, كانت راقدة فاطمة ومابتش اتحرك من سريرها سمعت باب يدق طلعت مستغربة قالت من ورا الباب من العقرب : حلي انا خوك حلّت فاطمة وخش العقرب جوّا ,,,, كان فارس قاعد تحت العمارة درّست علي سيارة امظلمة فتح الروشن طلع الرائد إبراهيم الرائد إبراهيم : اركب نبووك ضروري فارس : مش قالو استقلت وحولووك الرائد إبراهيم : اركب بسرعة يدوروو فيا جماعة الهرهار ركب امعاهم فارس ,,,, العقرب : لمّي الدبش امتاعك وتعالي اقعدي امعانا مؤقت فاطمة : بس مرات يتعقد لؤي العقرب : مش قتيلي قالك عنده طوارئ عطيني رقمة فاطمة : هاك رقمة ,,, كان يكبر ويهلل لؤي اتقول يبو اديرو فتح إسلامي جديد سمع نقاله يرن شاف الرقم العقرب لؤي : ايوى ,,, العقرب : فاطمة قالت مرات حتقعد طوارئ وتمسك في الكتيبة لؤي : اها صح العقرب : خلاص تو ناخذها تقعد امعايا احسن من الوحدة واتكسد حتى مع زوجتي لؤي : باهي احسن ما درت ,, اقل شي معش نطلع من الكتيبة وانجيها العقرب كان يسمع في تكبيرات وهو يحكي امعاه العقرب : شن التكبير هذا لؤي : الاخوة فرحانين قالوو حاول يتقدمو المرتدين من ناحية الهواري لكن تم الدعس عليهم العقرب : المرتدين ؟؟؟؟؟ بعقلك انت لؤي : المهم توا خوذ فاطمة درت فيا جميل ,, سلام توا " وفعلا كانت بعض قوات الصاعقة دارت عملية نوعية عند احدى كتائب الهرهار في الهواري وانسحبووو " فاطمة : ها شن قالك العقرب :تم تم لمّي دبشك , راجلك قعد يخوف فاطمة : شن في العقرب : حنهدرزلك ,,, غير لمي دبشك وطفي الضوايا وسكري شقتك اكويس فاطمة : حاضر هيا هيا ,, فارس : الرائد إبراهيم شن فية الرائد إبراهيم : نبو العقرب ضروري ضروري فارس : قاعد تو نعطيك رقمة شن فيه الرائد إبراهيم : حنقولك كلام نبيك اتقولَ له ضروري فارس : شن في شغلتني ,,,, لازالت صفحة وجك اتنزل في مناشير " هذا وقتكم اطلعو علي مليشيات الهرهار ليش الخووووووف اكسرووووو حاجز الخوف هيا اطلعووووووووو كلكم لازم اطيح الكتيبة اللي مقرّها في قاريونس وفعلا قعد التجمع كلّه في ساحة الكيش وكلها اتشجع في بعضها ,,,, مودة : كنك فيش اتفكر مروان : بنغازي جوها مش تمام ويخوووف قعد مودة : فووت اهم حاجة نحنا متريحين هنا مروان : يفرّج الله عليها وخلاص بنغازي ,,,,, فارس : صار هكي الرائد إبراهيم : لازم تحكيلا ضروري هذا وقتكم يافارس بنغازي تبينا فارس : تم وانا اعتبرني من توا امعاك الرائد إبراهيم : حضن فارس وسلم علّيه وشالوو لعند الشقة امتاعه ,,,, كانت فاطمة كيف واصلة لشقة مايا حطها العقرب وطلع منهم مايا : هيا تعالي سيّبي الشناطي وتعالي كولي قبل وفكيني من جو النكد ,,, اضحكي والعبي ومايا كانت في شقتها كل حاجة متوفرة ,,,, تقابلو فارس مع العقرب تحت العمارة اللي يسكن فيها فارس العقرب : كنك سكنتلي نبيك ضروري ضروري شن فيه وصلت اختي للحوش وجيتك جري فارس : قابلني الرائد إبراهيم العقرب بستغراب : هذا كنا شن يبي فارس : موضوع كبير يا عقرب العقرب : شن فيه احكيلي ,,,,, المتظاهرين اللي كانُ في ساحة الكيش اطرطشو وروّحو لحواشينهم عشان اطلعن صواريخ طاحن عليهم في الساحة ,,,, وحكى فارس بالتفصيل للعقرب العقرب : صار يبوها زي افغنستنان وسوريا فارس : اها ',, قالك الاسلاح عندي والرجالة عندي يبيك انت أتكلم اقرووب امتاعك العقرب : هذا وقتنا يافارس ,, مش امرايف عالدم والقتل والتجييف فارس : تي قالك ,, العيشة هذي مش لنّا العقرب : حنمشي لبوهديمة والوحيشي والسرتي والسلماني وباقي المناطق اللي عندي فيهم جماعتي فارس : فرحان يانصي , امرايف عالاهبال حتى انا ,,,, بعد مرور كم شهر وبالتحديد في سنة 2014 كان معسكر الصاعقة طايح واغلب المعسكرات في مدينة بنغازي طاحن تحت سيطرة كتيبة الهرهار وحتى أبو عروة صوّر قدام باب الصاعقة فم الأسد وفرحانين قريب اطيرو من الفرحة جماعة الهرهار وقاعدين ع مشارف بنينا وقتها كان العقرب وجماعتة والرائد إبراهيم وجماعتة والصاعقة وجماعتهم اديرو في عمليات نوعية ,,,, العقرب كان لابس صعقاوي العقرب : صح قالو بنينا طاحت يالرائد إبراهيم ولا إشاعة الرائد : كلمتهم قالو نشتبكو امعاهم غادي مزال ماخشوهاش بنينا ,, صعبة عليهم بنينا قاعدين يقاوموووو فارس : شن رايكم ننزلولهم من لاورة وانحاربو امعاهم الرائد إبراهيم : اغلب مخارج ومداخل بنغازي امسيطرين عليهن كتيبة الهرهار فارس : شن الحل العقرب ابتسم : ساهلة القيت فكرة سمحة حنخلوو جماعة كتيبة الهرهار تنسحب البنغازي اجباري الرائد إبراهيم : كيف العقرب : معروفين من اللي يخدموو مع الهرهار في بنغازي الرائد إبراهيم : باهي العقرب : حنخشو علي حواشينهم ونحرقوووهن واندمرو منازلهم صدقني حيردوو عشان يدافعو ع ارزقاهم الرائد إبراهيم : فكرة حتى هيا \ ,,,,, فاطمة انقطعن اخبار لؤي ومعش سمعت عليه شي وكانت ديما في الشهر التاسع واتعاني فيها مايا ونرمين كانت في الشهر الثامن وحتى هيا قاعدة في شقة مايا يساعدن في بعضهن مايا : من يوم بدت هالحرب في بنغازي ونحنا معش تريحنا بكل نرمين :الله غالب رجالتنا جو يحبو القتال والاشتباكات فاطمة : احمدن ربي اقل شي انتن عارفات ازواجكن وين قاعديين ويرنو عليكن انا معش نعلم شي علي لؤي بكل مايا : افتكيتي منّا مش كان امخلي عيشتك سودة نودة فاطمة : نكذبش عليك امرايفة عليه مزال في نوع من الحن عليه اشوية نرمين: بالك ربي يهديه ويفوت عالجماعة اللي قاعد امعاهم فاطمة : تي انا مش هامني مع من هو توا اللي هامني هل هو حي او لا حاليا ,,, ,,,, اريج مضايقة وزعلانة عشان مصطفى انظم لكتيبة التوحيد امتاع السلفية وقاعد في الرجمة يرجو في الأوامر عشان ينزلو لتحرير بنغازي اريج : يارب احفظلي زوجي وردّة ليا طيّب ,, العقرب : اجتمع بجميع الروس الاكبار في بنغازي من جميع مناطق بنغازي واجتمعوو في بوهديمة كلهم العقرب : كل حد فيكم يعرف الروس الاكبار من جماعة الهرهار خشو علي حواشينهم واحرقوووهن لازم انديرولهم زوبعة عشان ينسحبو من بنينا وينزلو لشوارع بنغازي من جديد ولد بوهديمة : بس مرات عددهم واجد نحنا اشوية لو نبو انحاربوهم والجيش مزال مانزلش العقرب: بالعكس لما كل منطقة تطلع حيشجعو باقي الشباب ويطلعو امعاكم وتقعد الكفّا لنا " ,,,\ وفلا كيف ما اتفقووو بدو يخشو علي حواشينهم في السلماني الليثي بوهديمة الوحيشي ارض زواوة السرتي ارض الصلابي ارض الحراسة وباقي المناطق في بنغازي كلهن اطلعن مرة وحدة ,, اللي هما جماعة كتيبة الهرهار اطلقو عليهم اسم الصحوات ,,,, بعد يومين أبو عروة وجماعته كانُ في بنينا انسحبوووو فعلا كلهم لبنغازي عشان يحمو ارزاقهم واهلهم ,, القيادة العامة بعد شافت الشباب اطلعووو وانكسر حاجز الصمت في بنغازي جاء الامر بالتحرك نحو بنغازي وتحريرها نزل الجيش من الرجمة من جميع المحاور وجن الأوامر انّ يخشن جميع الكتائب من شرق ليبيا وفعلا من جميع مدن برقة خشن ارتال ارتال من جميع الاطياف والتركيبات اول رتل خش من طريق امشرق والتحموو مع الجيش الناس العقرب وجماعته فارحين ويكبرووووو وبدت حرب الشوارع في مدينة بنغازي حرب دامت لمدة سنتين الليثي والصابري والهواري البوعطني القوارشة قارينوس قنفودة ارض بعيرة العمارات الصينية وغيرة من المناطق اللي كانت تحت سيطرة كتيبة الهرهار اشتباكات دامية وطيران ودبابات حرب وتفجيرات ومفخخات الشباب المساندة للجيش ومع قوات الجيش القادمة من جميع مدن برقة سطّرو أروع الملاحم التاريخية ,,,,, بعد مرور سنتين تحديدا في سنة 2016 تحررت بنغازي بالكامل وقعد معش فيه ميليشيات وهرب عمران شور طرابلس ماشي لبشير وأبو عروة انقتل في قنفوودة لؤي انقتل في الليثي العقرب زادت عليه بنت سماها حنين وفارس زاد عليه ولد وفاطمة زادت عليها بنت ومصطفى واريج مزال ربي ماسخرلّهمش بمولود لكن عايشيين حياة سعيدة واحمد وهدى كانُ امحددين فرحهم بعد كم شهر ,,,, كانت فاطمة اتلعب في بنتها عمرها سنتين وكانت تسكن في شقه ابرووحها مرة مرة تبرم عليها نرمين واتجيها ومرات يجيها العقرب ياما بكت علي لؤي حتى بعد اللي داره كله " سيبتني ابروحي وعديت يالؤي الله لايسامح من ضحك عليك وغسل مخّك " وقعدت هي تلعب مع بنتها واضّم في شقتها ,,,, فارس والعقرب وبعض الشباب المساندين للجيش دارولهم ارقام عسكرية واقعدوو مع الجيش مروان اختفى هو مودة وانقطعن اخبارهم ومعش روحووو لبنغازي ومعش تواصل لا مع العقرب لا فارس ,,, ,,,, بشير وعمران كانُ يبو يركبو الطيّارة وماشيين شور تركيا ويطلعوو من طرابلس بكل لان كرتهم انحق في ليبيا بشكل كامل حتى جماعة كارة في طرابلس كانُ يصيّدو فيهم جماعة الهرهار بالواحد واغلب اللي اعيالهم في كتيبة الهرهار انزحوو واطلعو من بنغازي وحاليا مابين طرابلس ومصراته مقيمين ,,,, كان العقرب ومايا وبنتهم حنين قاعدين في المقبرة قدام قبر حنين العقرب : وهذا هو قبر اختك مايا : الله يرحمك ويغفرلك يارب وقعدت تمطر في مطرة خفيفة مشى العقرب ومايا وبنته شور سيارته بسرعة ونزل العقرب من سيارته مايا : وين ماشي العقرب :عالسريع تو انجيكم ,,,, فارس يفطر هو ونرمين وولدهم يلعب تلاهم وقعدتهم حالتهم المادية ممتازة فارس : من قال تبقى هكي حياتنا نرمين : كيف فارس : من المخدرات والقتل للمحاور حاليا جندي في الجيش الليبي نرمين : كله بفضل الله الحمد لله ربي هداك باهي اللي مامتت ع ماضيك الأسود فارس : فعلا سبحان الله نرمين : المهم خلاص انسوها الحرب معش نبو حرب مانبش يصيرلك حتى انت كيف لؤي فارس : خليها ع الله ,,, ,,, مصطفى راجل اريج قعد يخدم قيّم في احد المساجد ولايمل ولا يكل بالدعاء ان يرزقه بمولود واريج فرحانة في شقتها ترجى فيه مصطفى يروح عشان بانن عليها بوادر واعراض الحمل وحاسة بشعور غريب وبالفرحة تبي ادير تحليل حمل ,,, أحمد فرحان كان يجهز في تجهيزات الفرح هدى تغيرت وقعدت انسانة اكويسة ,,, العقرب وقتها كان قاعد امام قبر امّه وكانت المطر قوية لين تعبى امية العقرب امقعمز جنب القبر " امرايف عليك يا امي هو توا مزوج وعندي بنوووته ري يرحمك ويجعل قبرك روضة من رياض الجنة " وصبى مشى شور سيارته يجري من قوة المطر مايا : حي عليك شن هذا كله امية العقرب وهو مبتسم : عادي عقاب امية انسيتي انّي العقرب مايا : ههههه لا مش ناسية ,, ,, بعد مرور بعض الوقت كان مصطفى واريج في معمل التحليل يرجو في النتيجة امتاع الحمل مصطفى من الخوف ركب في السيارة لان كل مرة اديرو تحليل ومايصي رشي شاف اريج طالع وتبكي من المعمل تحليل ودايرة علامة لايك من بعيد مصطفى : ماتقولهش قصدك حامل اريج ركبت للسيارة اريج وهي تبكي : مش امصدقة انا حامل حامل يامصطفى الله عشته هالشعوووووور مصطفى : الله اكبر الله اكبر الله اكبر واقعدو فرحانين بالسيارة " , ,, وهما في الطريق العقرب ومايا امروحين شور حووشهم مايا : خطرها تذكر ناصر اللي كان وكيل اعمالي العقرب : كنّا مايا : هو زوجته توفت ليها فترة وعندة طفلين العقرب : باهي مايا : انا اقترحت عليه اختك فاطمة العقرب : هذا اسألي فاطمة عليه قبل ,,, مش انا مايا : هدرزت انا وفاطمة قالت عادي المهم مش اكبار اعياله واجد العقرب : متفقين من ورايا في كل حاجة مايا : فاطمة قعدتها ابروحها في الشقة حتى لو كنا نمشولها ديما ,,, مايصيرشي لازم من سند يكون امعاها وجنبها وناصر اكويس ما انزكش لكي نعرف حتى خواته وامه العقرب : خلاص توكلوو على الله مايا : خلاص حنكلم اخته عشان يرن عليك ناصر وتتفق انت وياه ,,, كان وقتها الرائد إبراهيم قاعد في مقر القيادة مع احد قادة الجيش الليبي العقيد : انت الرائد إبراهيم اثبت جدارتك الفترة اللي فاتت الرائد إبراهيم : هذا واجبي هذا اقل شي انقدمو لبنغازي العقيد : حاليا القيادة قاعدة تدرس في موضوع بعد ثلاث سنوات ممكن مع سنة 2019 حنخشو لطرابلس لتحريرها من المليشيات وحنسمووها عملية الفتح المبين الرائد إبراهيم : باهي ,,, العقيد : الكلام هذا سّر جدا مافش حد عارفة الا انت والاستخبارات العسكرية وبعض القادة الرائد : كون هاني واطمن العقيد : المهم قالولي كان عندك قروووب سطّر أروع الملاح الرائد : اها صح ,, كلهم دارو اللي عليهم العقيد : لا في اثنين قالو كان ديما اول وحدين في المحاور امعاك قدام وديما جنب بعضهم يقاتلو الرائد : اها تحكي علي مازن وفارس العقيد : نعم ,,, بعد ثلاث سنوات نبيك اتجهز نفسك انت والقروب امتاعك حتمشو لطرابلس الرائد : حاضر العقيد : تقدر تمشي توا الرائد إبراهيم طلع من المكتب كان يمشي في مقر القيادة والابتسامة علي وجه يمشي بشوواش وصل لعند الباب مقر القيادة وطلع لما طلع بحّت في معسكر الرجمة وقال بينه وبين نفسه " حنقاتلو جنب بعضنا اخرة يالعقرب وفارس مسقبلا لكن المرة هذي في طرابلس مش في بنغازي " ,,,, النهاية " " تحياتي خوكم أحمد الوحيشي ,, طبعا الرواية في البداية كانت عبارة عن 38 حلقة فقط يعني بعد ماتت حنين كانت هذي نهاية الرواية لكن المتابعين اصرّو عليا انديرلها موسم آخر عشان تعلقو بشخصيات فزدت عليها 21 حلقة عشان خاطركم وصلت بيها لعند الحلقة 59 عشان ارضاكم وحاولت انلم فيها اكثر من موضوع ,,, تحياتي لكم ولنا لقاء مع رواية جديدة واحداث جديدة وقصة جديدة يارب اتكون الرواية نالت اعجابكم في امان الله ,, | ||||
|
| |
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
