07-10-18, 10:42 AM | #1026 | ||||
| السلام عليكم كاتبتنا المبدعه نبض… ماشاءالله بارت جميل… وابتدأ الحماس للي جاي… يوسف وباسل ثنائي جميل بتعاونهم راح يكشفوون اللي تسببو في في هاذي المشكله… وبعد زين عشان يوسف مايفكر في ربعه القدامى ويلتهي بالشغل .. كنت اتساءل غريبه باسل مايغار من يوسف وان ابووه جابه وقربه منه… لان ابوه تقريبا شديد معاه… خزام اخاف انه ينصدم بالنهايه بالرفض من بروق .. واخيرا التقى بـ سياف وعرف وش قد له هيبه عند عايلته كلها… بروق وكلامها عن سياف احسها موصادقه مع نفسها في شي داخلها يحسسها بالانتماء حق سياف… بس الحق اهي انسانه قويه مايهزها شي… وتقدر تحل مشاكلها بنفسها .. يكفي ثقتها العاليه بنفسها… نـادر هل له نصيب عند ال ماجد .. ولا راح يفضلون البعد… ومشكووره نبض المبدعه على البارت الرائع وننتظر التكمله بكل شوووق… وربي يحفظك… | ||||
07-10-18, 06:07 PM | #1027 | ||||
| فيه شيء استغربت منه مادري هل الكاتبة مقتنعة به كفكرة ولا هو شيء منتشر ولا شيء غريب يعني مجرد فكرة بخصوص روحة بروق لبيت عمتها تشيلها في نفاسها مدري ليه سببت كل الضجة عند أهل أبوها ( صقر وسياف ) ولا وصقر داق على اخته زعلان ليش أخته طالبة بنت أخوها تجي تساعدها !!!!! الواقعية مطلوبة مستحيل يعني هالانتفاضة الحاصلة عشان وحدة راحت تخدم عمتها عندنا بعض العوايل الوحدة من تولد يجونها بنات أخوات زوجها يخدمونها ويشيلونها طول نفاسها وبالعكس هذا شي من طيب أصلهم ولا يبرر وجود بنت لعمتها (حلا ) لأن فعلا فيه بنات ما تقدر تسوي وتحط وتشتغل فخلاص يعتمدون على البقية بالنسبة لتوقعاتي في الزواج: يوسف وهاجر خزام وخلود يوسف وبروق | ||||
08-10-18, 09:47 PM | #1028 | ||||
كاتبة في منتدى الروايات والقصص المنقولة
| البارت الرابع والثلاثين تابع نادر التفت لبروق بعد ماطلع جاسر وسكر الباب وراه : هاه وش صار على الوعد والانسيتي موضوعي بروق : لا اكيد مانسيت بس البنت الي اخترتها ارفضت نادر توسعت عيونه بأستنكار : نعم نعم ومن هذي الي ترفض نادر العامر بروق ابتسمت على صدمتة : الريم بنت جاسر ناظرو في بعض وهذي هي الي حاطين عينهم عليها نادر فز واقف وبعصبيه : ياسلام وليه رافضه حضرتها جواد اسحبه بيده يجلسه واهو يضحك : هههه خلاص فهمنا انك ماتنرفض اجلس راشد التفت على بروق : وراها ارفضت بروق : اسباب كثيره الي قالتها كلها مرتبطه بيوسف عموما موب مشكله في بالي وحده ثانيه .. قاطعها نادر : بس انا ماابي الا الريم بنت جاسر وبعدين يوسف وش دخله في الموضوع بروق انحرجت : في اعتقادها دامك اخوه تاخذ من تصرفاته ابو جابر : يابوك انتي خابره نادر ماهو مثل يوسف بروق : عارفه ياجدي وقلت لها هالكلام بس موب راضيه تقتنع عموما انا اشوف من جت غرور واهي وياها صحبه نادر طلع جواله وقاطع بروق : انا بدق على غرور التفتو كلهم على نادر ينتظرون نتيجة مكالمته نادر كان من جد معصب لثاني مره ينرفض والسبب يوسف وحده ارفضت حبه لانها تحب يوسف وتفضله عليه والثانيه ارفضته لانها خايفه يطلع مثل يوسف وماخذ طبعه : الو : هلا : اسمعي ابي تعرفين المغروره الي عندك ليش رافضتني اذا عندها شي تواجهني فيه غرور : لحظه لحظه بالهداوه علي ماني فاهمه شي منك من تقصد : اقصد الريم قايل لبروق تخطبها لي وحضرتها ارفضت : خلاص اعتمد ماعليك من بروق دواها عندي بنت جاسر : كفو انتظرك علميني وش يصير معك على طول : طيب بشوفها وارسلك واتس اب سكر نادر واسئله راشد : وش قالت نادر : تزهلت بالموضوع عاد مدري وش يصير معها جواد : من عندي مبروك غرور لاحطت شي في راسها تسويه بروق اضحكت :هههه عمي يعني انا الي مامني فود جواد : هههه لامو كذا بس دام غرور اخت نادر بتقتنع منها اكثر لانها اخت الاثنين وعايشه معهم راشد : الله يكتب الي فيه الخير كان وافقت خطبناها الليله بروق قاطعته بسرعه :لا استغربو راشد : ليه بروق : بصراحه العائله كلها ماخذه موقف سيئ من يوسف وانا اقصد عمامي واعيالهم وحتى اخوي رعد ناظرو في بعظ وسئل ثائر : ليش هم يعرفون وش صار في هوشتكم الاخيره بروق بثقه : لا بس بعد ماعرفو وضع يوسف بذاك الوقت كلهم لامو ابوي ابو جابر : نادر غير عن يوسف مايجوز يحكمون عليه بس علشانه اخو يوسف بروق : ادري بس نصيحتي الكم اذا تبون هالخطبه تتم تكتمو عليها على قد ماتقدرون وحاولو تجون ابوي في وقت يكون الحاله مامعه احد من عمامي او اعيالهم واول ماتجيكم الموافقه من ابوي اصرو على ان الملكه تتم باسرع وقت عمامي وعيالهم ماراح يرضون ان الريم تطلع من العائله خاصه انكم سبق واخذتوني والريم لو احد من عمامي اعترض على هالزواج مستحيل توافق انتهت جلستهم وقامو راجعين للمجلس ...... قام معهم يسولف ويبتسم وقلبه من داخل يحترق على اولده (يوسف عندنا في الشركه وكل يوم يجي عندنا في البيت )(يوسف الكبير حقنا حنا )(مسمن عليه وحاطه على يمناه مايسمع فيه )(ابشرك انه بخير واموره من احسن مايكون يشتغل مع طارق في الشركه هو وولده باسل في نفس المكتب ويسوون نفس الشغل ويعاملهم نفس المعامله مايفرق بينهم بشي )(هو الي يشكرك يوسف شايلن عنه الشغل شيل )(سماه من غلا....غلااااا......غلااااا طول عمره متمرد عليه وعصي وهالحين يوم انصلح حاله صار لغيره ....ليه وش قدم له طارق وماقدرت انا اقدمه له ....وش السر الي في جاسر وطارق علشان يوسف يسلم لهم ويقبل ابوتهم ويتمرد على ابوته هو .....ويعاملهم نفس المعامله مايفرق بينهم بشي؟!......ماااذكر اني فرقت في المعامله بينه وبين اخوانه .....وليه يعامله طارق كذا هو موظف عنده وبس وحتى هالوظيفه ماهو محتاجها ؟!! __________________ دخلت غرفة البنات واهي تمسح الماء الي في يدينها في جنوب جلابيتها شافت هيفاء منسدحه على مخده فوقها منشفه عريضه وتماضر توزع على وجهها وارقبتها خليط ابيض قربت منهن باستنكار :هذا وشنهو الي تلطسينه على وجهها تماضر الي كانت جالسه على مركى ومدنقه (منحنيه ) على هيفاء توزع لها الخليط على وجهها ارفعت راسها تناظر في خلود : هذا قناع زبادي ومعه اشياء ثانيه مانا معلمينك عنها علشان ماتقلدينا خلود كشرت بقرف : يع الله يديم النعمه انتن ماتخافن من ربي تلعبن بالارزاق هيفاء فتحت عيونها بقهر : وجهي القمري ذا وشو روثة كلب ؟! تراه نعمه واكبر نعمه مالت عليك صدق تماضر تضحك على كلام هيفاء : ههههه يومنه قمري وراك تحطين عليه قناع ...وبدت تلوي صوتها تقلد هيفاء ... ابي وجهي يصير ابيض مثل نجافات حوشنا البيض يضوي هيفاء بتقرف : يع ياحماره سال على اذني امسحيه تماضر اخذت منديل وبدت تمسح اذنها :ههههه خلي اذانيك تصير بيض هي بعد لاتقعد مثل حلقان قدر الضيفه المحترق خلود :ههههههههه ابك لونتس هو هو مهوب محترتس (متغير ) مالتس الاتصبغينه بويه هيفاء بقهر : اقول اطلعي انتي وش عرفك اصلا بالسنع تكفين ياتماضر اهبديها بنعال والابشي اقهرتني ومقدر اقوم اخرب قناع وجهي وحده من البنات الي دوبها داخله عندهم : الاانتي علامك متمدده كنك ذبيحه قومي اعتدلي من قال ان الي تحط قناع ماتجلس تماضر فقعت ضحك : هههههههههه تقول مابي احطه وانا جالسه يسيل داخل سنتياني البنت :الله يخلف وانتي ليه ماثقلتي الخلطه علشان تجمد على وجهك وماتسيل على قولك ...وبالمنديل نظفي الزايد لاتكبرين الموضوع هيفاء خلاص انفقعت كل من طل عليها قام يتريق عليها فزت جالسه بعصبيه وخمت المنشفه الي كانت منسدحه عليها وقامت تمسح فيها الخلطه عن وجهها : الله ياخذني يوم ادور الزين عندكم هه ..وهه ..وهه تقوله واهي تمسح وجهها بعنف وعصبيه تماضر شهقت بقهر : يوه واتعبي ياحيوانه من اليوم وانا اليس خشتك..... ________________ متكي على مركاه ووجار النار قدامه ومنوخ جالس على الجنب الثاني من المركى ومزيد مقابل لهم بينه وبينهم الوجار وجنبه ناصر رفع راسه يبحر في مزيد بهم ثم استوى جالس : ولد عمك ماعاد جيته والاكلمته مزيد تنهد بضيق من بعد روحة ابوه وعمه لخزام والطريقه القذره الي تعامل فيها معهم ماعاد فكر يقرب منه كان يعذره على صدوده وجفاه بس توصل انه يتطاول على ابوه لحد هنا ويطيح من كل حساباته :لاجيته والاكلمته ولاني جايه ولاحتى مكلمه ولد عمي يومنه يدوركم ويبيكم تصددون عنه واخرتها تبريتو منه ويوم انه عافكم رحتو تراكضون وراه منوخ خزه بنضره حاره مايبيه يضيق صدر ابوه لكن مزيد تجاهله ماعنده استعداد يجامل احد دام القضيه صح وغلط او حلال وحرام ابو منوخ عورته الكلمه واهو في داخله معترف ان خزام وقبله عدي مالهم ذنب بس وش السواه في دم راجح الي احتل عروقهم غل وحقد عظيم يستوطن قلبه وروحه على هالراجح وكل مايعرق فيه ضاق صدره بالحيل وحس انه بدى يختنق راجح احرمه من اخوه تؤمه وحرمه من اولده وهذا هو يحرمه من حفيده ياعساك لنار الي تحرق جلدك مع لحمك ياجراح مثل ماحرقت قلبي ..... منوخ لاحظ ان ابوه ضاق وتغير وجهه اعتدل في جلسته واخذ يد ابوه يبوسها :يبه الله يرضى عليك لاتضيق خلقك ولاتشيل هم احد مشعان رفع راسه بجبروت : مابعد ظامي ضيقه ولالضيقتي على فرقاه نهايه ياحرق جوفي يوم ردوني عن ثاره ياليتني مت قدم يقولون راجح مات وانا ماذبحته جعل ذره كله لالذبح مزيد ماعاد معه صبر على هالثار الي جده حابسن نفسه فيه فز واقف :جدي طايل هو ابو ظامي واحق الناس بدمه وجدي اعتق راجح لوجه الله بتعترض امرٍ تم لوجه الله مشعان حس الدم يفور في عروقه وراسه قام يطبخ من الوجع الي صابه فيه :تقلع ...... نطقها وطاح مغشي عليه .... ___________________ تم البارت الرابع والثلاثين __________________ التعديل الأخير تم بواسطة فيتامين سي ; 08-10-18 الساعة 10:04 PM | ||||
أدوات الموضوع | |
انواع عرض الموضوع | |
|
|