27-03-18, 07:20 PM
| #271 | |||||
| كاتبة في منتدى الروايات والقصص المنقولة 
|  اقتباس:
مساء النور والسرور الله يسلمك يارب احيانا التأثير الذي يحدثونه الناس في حياتنا اعمق من مجرد بقأهم معنا بالنسبه لخزام اجتمع في قلبه محبه وخوف على مصير بروق فهو الي حد الان عنده هاجس هل نجت بروق وان نجت من الموت هل نجت من انتهاك العرض ؟! وحياك الله | |||||
|  |
|
28-03-18, 03:39 PM
| #272 | ||||
| نجم روايتي وفراشة الروايات المنقولة 
| تسلمين. نبض على البارت اعتقد يوسف راح يعطي بروق دافع اقوى انها ما تشوف فيه انستن قابل لصلاح لو هو حبها بكا احساسه ومشاعره. لانه عطته فرص لتغير وشاف عندها قابليه تتحمل انه ينعدل. ولكن هو ماعنده قابليه للانعدال قرفها منه واستنفارها موبس من شكل وجهه القريب لملاح الانوثه. خرب الدنيا بتصرفاته مع الوسخ والوث. بنات صايعات. والنتيجه الك ضرب قليل عليه وهي صدقت كذبه وانكشف بعد لحظات قليله اعتقد جواد عارف انه ما يستهالها يوسف وبدو يساعدها بجوز من غيره. من يوسف انه وسخ وصايع وحصل بنت جمال ونسب ومحترمه وشريفه جزام الله المستعان على بلاك يمكن هذا العشق الخيالي لانه سمع صوتها وشم شعرها فا عقله رسم خيال غير عن الواقع عشقها غيبا. وبنفس الوقت خوفا عليها وايش مصيرها. صار بنظره يفكر فيها. كيف ما قدر يساعدها | ||||
|
| |
|
28-03-18, 08:30 PM
| #273 | |||||
| كاتبة في منتدى الروايات والقصص المنقولة
| اقتباس:
ياهلا ومرحبا فيك الله يسلمك يارب البارت القادم ان شاء الله راح تبين فيه تفاصيل كثيره وانا اعتبره بارت مميز وان شاء الله يعجبكم استمري معانا لحد مانشوف وش اخرتها مع يوسف وبروق وهل خزام راح يكون له فرصه لمقابلت بروق وحياك الله | |||||
|
| |
|
29-03-18, 11:15 PM
| #275 | |||||
| كاتبة في منتدى الروايات والقصص المنقولة
| اقتباس:
ياهلا ومرحبا فيك الله يعافيك ان شاء الله يكون البارت القادم على قد الحماس ويعجبكم | |||||
|
| |
|
01-04-18, 12:21 AM
| #277 | ||||
| كاتبة في منتدى الروايات والقصص المنقولة
| البارت التاسع وجه نظراته لابوه مباشره وبصرخه غضب: وين بروق ؟ ابو نادر بجمود: مدري وين !! يوسف حس اعصابه تشتعل نار فز واقف واهو يرمي السجاره في الارض من غير اهتمام انه يطفيها وبصرخه غاضبه : وشلون ماتدري وانت الي وقفت بيني وبينها وقلت في وجهي وتحت حمايتي وينها هالحين وين زوجتي نادر فز بقهر من وقاحت اخوه : لاترفع صوتك على ابوي لاقص السانك القذر وثائر دعس على السجاره برجله يطفيها واهو يرفع راسه ليوسف : هيه تركد تراك تكلم ابوي يوسف سافه اخوانه مركز نظراته على ابوه منتظر رده ابو نادر اشر لنادر بمعنى اتركه : بروق استأذنت مني الفجر تقول بتطلع مع ابوي لمشوار وارفضت تعلمني لوين وسمحت لها دامها طالعه مع ابوي وجواد هو الي وداهم يوسف انقهر اكثر يوم عرف انها مع جواد شات الطاوله الي قدامه بالاكل الي عليها بقهر واهو يصرخ : جواد الكلب وشلون ياخذها والله اذبحه الحقير نادر تقدم ليوسف ودفه بعنف مماخلايوسف يطيح جالس على الكنبه الي وراه وبصرخه :وكسر رجل انثبر وراك ولاترفع صوتك يوسف يحاول يبعد نادر عنه بيدينه : فارق انت مالك دخل ابو نادر عصب من قلت ادب يوسف وعدم احترامه له فز واقف وصرخ عليه : الكلب انت واشكالك وجواد ماله دخل بروق هي الي اطلبت من ابوي يطلع معها مشوار وابوي قال لجواد يوصلهم يوسف فز واقف ولف من ورى الكنبه تاركها حاجز بينه وبينهم واهو مازال يصرخ بقهر : والسواقين الكلاب وين ليه ماخذ واحد منهم والابس يبلعون رواتب واهم متسدحين ابونادر بغضب : والله عاد ابوي يسوي الي يبي وماهو مستاذن منك والامني والبنت ماطلعت الابأذني وان تعرضتها ماهوب ازين لك يوسف اكتفى من الكلام رماهم بنظره غاضبه واهو يصر على اسنانه بحنق ولف ماشي من عندهم طلع من البيت حده مقهور تذكر انه مقفل جوالاته ركب سيارته وشغلها طلع الجوالات وشغل الجوال الخاص بممدوح واهو نفسه الي اعطى رقمه لبروق اول ماشغل الجوال جاه اتصال من ممدوح اقطعه يبي يدق على بروق يشوف وينها لاكن ممدوح دق مره ثانيه فتح الخط بعصبيه : يازفت سكر بادق على الحيوانه ذي اشوف وينها ممدوح تكلم بسرعه قبل يسكر : لحظه لاتسكر انت وش قايل لبروق عن الي صار البارح تراها اعرفت كل شي شهق يوسف بفجعه :ياحيوان بروق وش دراها عن الي صار البارح وانت وشلون عرفت انها درت ممدوح بضيق : ياخي انت الكلب الي مسكر الجوال وانت عارف اني ماراح ارتاح الا لمى اتطمن عليك يوسف بصرخه : اخلص وشلون اعرفت ممدوح : دقيت عليك لقيتك مسكر الجوال وجيت للبيت لقيت بروق وجواد يمشون في الحديقه ويوم نشدت عنك استلمني عمي تحقيق لحد ماقلتله كل الي صار يوسف نزل من السياره بسرعه وصار يتحرك بعصبيه رايح جاي : الله ياخذك زين ..... هالحين وين القاها الحماره ممدوح باستغراب : ليه وينها رايحه يوسف : مدري ابوي يقول استاذنت منه واطلعت مع جدي والزفت جواد من الفجر يعني من بعد ماحضرتك جبت العيد فيني وخربت الدنيا ممدوح : اسمع انا وصلت بيتكم اطلعلي عند البوابه يوسف قطع الخط بعصبيه وركب سيارته طفاها ثم نزل وقفلها ..... يروح مع ممدوح احسن ماهو قادر يركز في شي ولاله طاقه على سواقة السياره واهو بالحال ذا .....واهورايح لممدوح دق على بروق لقى جوالها مغلق .....طلع واحد من جوالاته الثانيه شغله ودق على جواد وعلى جده وكلهم جوالاتهم مغلقه ..... _________________ داخل البيت ابونادر واعياله انتقلو لجلسه ثانيه والخدم بدو ينظفون الأكل والحوسه الي سواها يوسف في الجلسه ثائر : يبه انت صدق ماتدري وين راحو ابو نادر : لامدري وجوالاتهم مسكره كلهم ثائر بقلق : اخاف صاير لهم شي نادر : لا ان شاء الله انهم بخير هم قايلين بيسكرون جوالاتهم ثائر : طيب وين تتوقعون راحو ابونادر : فيه مكان شبه متأكد انهم فيه نادر يلتفت على ابوه : الي هو ابو نادر : ماهو لازم تعرفون نادر : بصراحه انا ضد الي سويتوه مايجوز تطلعون زوجته من البيت من غير اذنه والابعد مع عمي جواد وانتم خابرينه هو وياه نار وبنزين ابو نادر : اولا بروق مع ابوي وجواد مجرد سواق لابوي ولوكان ابوي يسوق ماكان اخذه معه ثانيا بروق في بيتي وانا الوحيد المسؤل عنها وزوج الغفله دامه على هالحال ماله عليهاكلمه ثائر : خله يستاهل اجل كل ليله يخونها عيني عينك ويبيها تسكت له والله انهاقادحه اخ بس ليتني معهم ودي اعرف وش ناويه عليه من ورى هالطلعه ابونادر ابتسم : ماشاء الله عليها مابكت ولاولولت ولاحتى راحت تصحيه وتمشكل معه ومدري كيف طرا عليها تطلع وتترك البيت نادر بتفكير : السؤال وش المغزى من تركتها للبيت ولمتى بتقعد برا ابو نادر بثقه : ماطلعت الاوفي راسها طبخه تبي تطبخها ليوسف ثائر بتذكر : الاصدق ابوها جايك اليوم ابونادر : ايه جاني فيه واحدن متبرع وموصل لهم فضايح يوسف وجاء ينشدني الي سمعه صدق والا نادر تغير وجهه : ووش قلت ابو نادر : قلت الصدق علمته بكل شي ثائر بتعجب : معقوله بنته ماعلمته بشي يوم يقول جايه رجال يعلمه ابو نادر : لاماعلمته بشي وفي نفسه اه يالقهر بس لونها لواحدن منكم والايوسف مايستاهلها والاهي بقاعدتن معه نادر بقهر : ماكان له داعي تعلمه دام بنته ماقالت شي مانا ناقصين فضايح ابو نادر : ان ماعرف مني عرف من غيري واصلا العلم كله عنده انا ماعلمته الا بحيات بنته مع يوسف كيف صايره ومن حقه يعرف _______ داخل سيارة ممدوح وش قصدها من الحركه ذي ووين راحو ممدوح حاس بالذنب التفت على يوسف واهو يزفر بهم : اكيد ازعلت من الي صار يوسف بقهر : واذا ازعلت تهج كذا ومع جوادوه الزفت ممدوح يصحح المعلومه : رايحه مع جدي تعرف جدي مايسوق وكل مشاويره يقضيها اما مع جواد والامع نادر ماعمر جدي اعتمد على السواقين والاراح معهم يوسف بقهر : لو رايحين مع نادر اهون واجد ممدوح بثقه : نادر مستحيل يطلع حرمتك من البيت من غير اذنك يوسف يظرب باب السياره بقبضة يده : هذا الي قاهرني من حضرته حتى يطلع زوجتي من غير اذني ممدوح : شف هو مستحيل انها تعرف الي صار وتقعد تتفرج ومن كلامك عنها البنت ماهي حقت هواش واصراخ والاهي من الي تراكض لاهلها عند كل مشكله مثلا يوم اعرفت انك ماتصلي راحت لعمي واطلبت منه تقعد عنده في البيت وانه يفصل بينكم والحين اطلعت من البيت يعني البنت تفكر بعقلها وتخطط وتنفذ واكيد انها ناويتلك نيه من ورى هالسالفه يوسف : كله منك ياحيوان انا مرتبن وضعي معها ويوم بديت اقرب منها جيت انت وخربت كل شي ممدوح بندم : اسف والله ماجابني الاخوفي عليك يوسف يهز راسه بمعنى ادري :المهم السوال الحين وين راحو ممدوح بعد تفكير : يافي استراحت العائله يافي مزرعة الدرعيه يوسف فتح جواله وطلع رقم اتصل فيه تكلم معه شوي وسكر : حارس الاستراحه يقول محد جاه ممدوح : مابقى شي ونوصلها لازم نشوف بانفسنا يمكن يوصونه يقول ماجاء احد يوسف اتصل في حراس المزرعه وقالو له انه ماجاهم احد : وحقون المزرعه بعد يقولون ماجاهم احد كذا بيضيع الوقت بين المزرعه والاستراحه ممدوح : المزرعه مراقبه بكاميرات مايحتاج نروح لها ندخل على سجل المراقبه من الاب توب ونشوف اذا فيها احد او لا يوسف يحس انه من كثر ماهو مقهور ومتوتر مخه متوقف عن التفكير ماهو عارف وش يسوي والاكيف يوصل لها : ومن بيراجع الكاميرات وحنا هنا ممدوح :دق على نادر وقله واهم شي عمي لايدري علشان لايمنعه يوسف اتصل على نادر وجاه الرد : اذا انت عند ابوي اطلع عنه نادر : انا في جناحي وبطلع لشغل يوسف : انا كلمت المزرعه يقولون ماجانا احد ابيك تدخل على سجلات المراقبه وتتأكد نادر : طيب الحين اشوفها وترى ابوي مايدري وينهم فيه بس يقول فيه مكان متوقع انهم رايحين له يوسف عقد حواجبه : ووين هالمكان نادر : مدري عيا يعلمنا بس ان ماخاب ضني انهم في مزرعة جواد الجديده يوسف بأمل واستعجال : ووين مزرعة جواد هذي ومتى اشتراها اصلا نادر : الي اعرفه انها في العماريه بس وين بالضبط مدري ماجيتها والاعرف موقعها واهي جديده مالها شهر من اشتراها يوسف عصب : هالحين بتقنعني ان جواد اشترى مزرعه من غير ماتشوفها انت نادر عصب لمى يوسف رفع صوته عليه : انا الشرهه علي الي معطيك وجه وانت عديم اخلاق لاحترام والاتقدير لاحد .....قاله وقطع الاتصال يوسف حذف الجوال تحت ارجوله واهو يلتفت على ممدوح الي بدى يهدي من سرعة السياره علشان يوقف قدام الاستراحه : قطع الخط في وجهي ممدوح بتعقل : بعذره تنافخ عليه وتبيه يخدمك انت اصلا تحمد ربك انه رضى يساعدك متاكد لوعمي درا بيهاوشه انزلو من السياره وفتح لهم الحارس الباب تجولو في الاستراحه الواسعه بكل اقسامها ولالقو احد يوسف : والحل الحين ممدوح : مالك الانادر محد مساعدك غيره دق عليه وشف اذا فتح سجل المراقبه بس تكلم معه بهدوء تراك انت الي في حاجته يوسف جلس على كنب المجلس الي هم فيه وحط راسه بين ايدينه واهو متكي على اركبه : مايمديه شافه بانتظر اشوي وادق عليه ممدوح : المزرعه الي يقولها وين مكانها يوسف واهو على نفس وضعه : يقول في العماريه بس مايدري وين بالضبط ___________________ واقف في نص مجلسه في مواجهة عائلته كلهم واحد من اعياله عن يمينه والثاني عن يساره يجاهد حتى يسيطر على الوضع من اعرفو عن فساد يوسف واهم في حالت هيجان وبعد ماكانو متفقين على زواج يوسف وبروق صار متهم انه مقصر في حق بروق ولاسئل عن يوسف قبل يزوجها له والحقيقه انه هو نفسه انفجع لمى عرف ان يوسف مايصلي ولايحل حلال ولايحرم حرام اضطر انه يطلع من الجامعه بعد ماخلص اول محاضره له وراح لابو نادر يسئله عن صحة الكلام الي اوصله وانصعق من الكلام الي اسمعه منه الكذبه الي كذبها يوسف عليهم علشان يزوجونه بروق تركه لصلاه كل شي خبره فيه بالتفصيل حتى السبب الي خلا بنته تغلق جوالها وتطلع مع الجد وولده من البيت حقائق مؤلمه وموجعه حيل لاكن ماهي اكثر وجع من ان بروق ترجع له مهتوك عرضها حسنة يوسف انه صان بروق وردها له مصيونه محشومه وهذا لوحده كافي انه يعتبر يوسف واحد من اعياله والأب مجبور يتقبل اولده وشلون ماكان ويبذل كل جهده انه يحتويه ويصحح مساره ......كانت هذي افكار جاسر واهو واقف بكل شموخ يدافع عن اولده المنحل اخلاقيا بأستماته وكأنه ابوه الفعلي ابومنيف ( عضو مجلس الشورى ) : الواطي ذا لازم يطلق بروق وش يقولون الناس عنا اذا عرفو انا مزوجين بنتنا لواحد بالمستوى ذا جاسر بعصبيه : يوم زوجتها له كنتم كلكم موافقين ابو راكان ( دكتور جراح ) : وش تبينا نسوي واهو جايب لنا بنتنا بعد مافقدنا الامل انا نلقاها نحسبنه رجال كفو ويستاهل مير الغلط منك انت مانشدت عنه جاسر يلتفت عليه بعصبيه : غلطتي والاغلطت غيري ماتفرق البنت هالحين على ذمته وماراح تطلع من بيته الابأختيارها هي راكان : تبينا نخليها عند الهايت ذا واهي عرضنا مشاري بعصبيه : بروق في حمايت ابو زوجها ومحد يقدر يمس اشعره من راسها والي يجرب بس انه يقرب منها موته على يدي جاسر : بروق اعرفت من اول يوم معه انه مايصلي وتصرفت من غير ماتقول لنا ومن غير ماترجع لحد منا ( قيده علمهم بسالفه كلها بس ماخبرهم بكذبة يوسف يوم قال انه مغتصبها وعرف انه متهجم عليها في البر وبروق ماقالت لهم هالكلام وعرف بخياناته لها ابو نادر علمه بكل شي بالتفصيل واهو خبا كل ذا عنهم وماعلمهم الا بالي هم اعرفوه من رجال يعرف ال عامر زين ونقل لهم فضايح يوسف كلها ) وانا اشوف ان تصرفها صحيح وفي محله وانا اعرف بروق من البدايه قد المواجه وتعرف تاخذ حقها بيدها ودامها ماشيه معه صح وعازه نفسها هي الوحيده الي راح تقرر مصيرها معه وماراح اسمح لاحد يتدخل في حياتها سيف اخو سياف بقهر : قايلكم من البدايه بروق محد يستاهلها الاسياف ماطعتوني وليتكم عطيتوها واحدن يسوى جاسر بثوران : هالي مايسوى على كل اعيوبه صان بنتي وجابها لي محشومه مصيونه لونه مغتصبها بياخذها سياف وبصرخه اعلى رد بياخذها سياف واهي مغتصبه بتقولون هذي اخير بناتنا ومانعطيها واحد دون والابتقولون ارموها على الكلب الي لعب فيها والله لايردها هي وياه قاله والتفت على اولده مشاري واسحبه بعضده ينفضه بدون شعور من قو القهر الي بقلبه شايفين مشاري شايفينه يوسف عندي هو ومشاري واحد والي يغلط عليه غلطان على اولدي مشاري واعرف وشلون اوقفه عند حده سيف الي كان واقف في وجه عمه بعصبيه ارتد خطوه ورى بفعل اصطدامه بالحقيقه الموجعه لوكانت بروق ارجعت لهم مغتصبه مستحيل يقبل ان اخوه ياخذها سياف يستاهل افضل الافضل سياف مايخذ الاالاميز على الاطلاق مشاري يربت على كتف ابوه يهديه : وانا مع ابوي يوسف مثل اخوي على ماهو عليه والي يفكر يغلط عليه يواجهني قبل رعد : وانا مع ابوي ومشاري ويوسف منا وفينا وجميله دين في ارقابنا لين نموت ابو سياف كبير العايله وصاحب الكلمه المسموعه قام واقف ووقفو كلهم لوقوفه : اخر الكلام يوسف له في ارقابنا معروف بيبقى دين في ارقبة كل واحد منا دامه حي ودامنا حيين ومن ساعاتكم هذي اعرفو ان الرجال محسوب علينا له مثل مالنا ولانقول عليه مثل ماعلينا انتحمل عنه ومانحمله من جهتنا شي مجالسنا مفتوحه له وان احتاجنا واجب علينا ناقف معه وقفت رجالن واحد وبروق بنتنا ومانا بمتخلين عنها الي تبيه تبشر به والبنت ماقصرت عازتن نفسها ورافعتن روسنا عند ال عامر كلهم ادخلت عليهم عزيزه وبتطلع من عندهم اعز انا متأكد ان بروق ماهيب مطوله عند يوسف وهذي اعلومه لاكن حنا مانطلعها من عنده لين هي تطلع من كيفها ....... في داخل البيت الريم تجلس عند ارجول امها بقهر واهي تحاول تستحوذ على انتباها بالكامل لانها جالسه تقراء كتاب : يمه انتي مستوعبه ان زوجها مايصلي ياعالم ياهوه مايصلي وش تبون سبب اكبر من كذا علشان تطلقونها منه ام مشاري تنزل الكتاب من يدها وبمحاولت اقناع : بروق مدركه هذا الشي واتخذت الإجرآت المناسبه الريم تضرب الكنب بيدها من القهر : يمه الاجراء الوحيد الصح انها تتطلق منه ام مشاري بطولة بال : راح اجلس معها وافهم اسبابها اكيد عندها هدف مخليها تنتظر معه لهالوقت ولاتنسين حمولتها مسوين لها حفله يوم الخميس مايصير تفشلهم في اضيوفهم وتمشي قبل الحفله وش يقولون الناس عنهم الريم بانفعال : قلعة الناس اهم شي سلامة اختي ام مشاري : اختك مرتبه وضعها وانا واثقه فيها تعاملها مع المشكله الي طاحت فيها يخليني امنحها كامل ثقتي واتركلها حرية التصرف في حياتها الريم : يمه انتي اكثر وحده كانت معارضه هالزواج ووقتها كنا نضنه شهم وراعي مراجل والحين يوم طلع على حقيقته سكتي ام مشاري : كنت معارضه ساعة كان لمعارضتي فايده ولاحد سمع اعتراضي الحين بروق زوجة يوسف فعليا واهي الوحيده الي تقرر مصيرها معه الريم يأست من امها وقبلها ابوها ماهي عارفه اهلها كيف يقدرون يحطون كل هالثقه في بروق ويتركونها تواجه مصيرها الحالها ماهي قادره ترتاح بعد كل الي اعرفته عن يوسف وتتصل ببروق من الصبح جوالها مقفل وابوها يقول انه هو الي طلب منها تقفل جوالها علشان العائله مايزعجونها بأتصالاتهم قامت من عند امها والقلق ياكل قلبها ماهي قادره تتطمن زيهم يارب تحفظ بروق يارب تحميها ____________________ باسطهين فرشه تحت عريش من سعف النخل مبني بشكل انيق وبمهاره عاليه ابوجابر متكي على المركى وجواد متكي على الجهه الثانيه من المركى وبروق جالسه قدامهم تصب القهوه ابوجابر : انا مدري وش المغزى من النحشه هذي ولمتى تبينا نقعد هنيا بروق اضحكت : هههههههه جدي تكفى لاتقول نحشه حسستني انا مسوين مصيبه جواد بابتسامه : المشكله ان رجلتس المروح هو الي سوى المصيبه وانتي الي هجيتي بروق بجديه : انا ماني خايفه علشان اهج وتقدر تقول هذي صدمه عصبيه صغيره تحضر مخ يوسف للي بعده جواد : وين الصدمه في الموضوع تراه في اي لحظه بيطب علينا بروق : الصدمه في احساس الفقد الي راح يحس فيه فجأه وهذا الي راح يجبره يتعامل مع الامور بجديه وراح يراجع حساباته من جديد ابوجابر : ترا من يوم اخذتيه وحنا نقول اليوم بتروح وتتركه يعني حتى هو اكيد انه عارف انك اخرتك بتتركينه بروق : حتى لوكان عارف هذا الشئ راح يحاول يمنعه جواد استوى في جلسته : اليوم قلتيلي بتعلميني ليه اخذتي يوسف وليه جالسه عنده لهالحين وانا ابي اعرف الحين وقبل يوصل يوسف لمكانا بروق اخذت نفس عميق وازفرته : هذي سالفه طويله وعلشان تفهمونها صح لازم قبل كل شي اخبركم عن ولد عمي سياف ابو جابر : وش دخل ولد عمك بروق : اصبرو واسمعو السالفه من اولها سياف ذا يعتبر مفخرة ال ماجد انا وياه تربينا على يد جدي ماجد وكنا الاحفاد الأميز عنده وبما ان سياف ولد كان جدي يبنيله مكانه في العائله واهو اكبر مني بعشر اسنين وبما انا اغلب الوقت مع جدي وفي المكان الي يتواجد فيه كنا اغلب وقتنا في بيت جدي وكان سياف المسؤل عني كان يتسلط علي ويتدخل في كل شي اسويه لاتلعبين مع العيال لاتطلعين لشارع لاتفكين شعرك لاتلبسين قصير لاتسوين لاتفعلين كان بنسبه لي كابوس ماصدق اتخلص منه كبرنا واستمر سياف على تحكمه والي ساعده ان جدي خلى كلمته مسموعه في العائله كلها لدرجة ان ابوي وعمامي لاقالو لنا كلمه ممكن يغيرونها بسهوله لو اقنعناهم بالعقل والمنطق الا سياف كلمته وحده مهما كانت حتى لوتعارضت مع المنطق حتى لوكانت غلط في نظر الجميع تمشي تمشي ومن غير نقاش الكبار كلهم يحبونه ويقدرونه من محبة جدي له ويبرون جدي فيه واخر قرارات سياف انه منعني اكمل دراستي برا رغم ان ابوي واخواني موافقين وكنت مرتبه كل اموري على اني راح اكمل دراستي برا لاكن سياف بمجرد ماعرف السالفه جنت جنونه وحلف ماطلع من السعوديه ويااكمل تعليمي هنا يااجلس في البيت وعمري لاكملت ابوي كعادة الجميع مشى كلمت سياف من غير نقاش وسحب اوراقي من البعثه كنت اكره سياف من صغري بسبب تسلطه علي لاكن هالموضوع بالذات خلى كرهي له يتضاعف .... هنا توقفت عن السرد وارفعت راسها تنقل نظرها بين جواد والجد بحرج : انا اسفه على الكلام الي راح اقوله الحين ادري اني كنت انانيه واستغليت يوسف وهذا كان تصرف حقير مني بجد انا اسفه جواد تقريبا فهم القصه : اذا كان زواجك من يوسف هو الي معتبرته استغلال تراها كثيره عليه ولايحصله ياخذ مثلك الجد هز راسه بتفهم : كملي ماعليتس بروق : لوكان ابوي اخذ رائيي في يوسف بشكل عادي كان رفضته من غير تردد وابوي مستحيل يغصبني على يوسف لاكن ممكن يسويها مع سياف ابوي قالي اختاري يايوسف ياسياف ونصحني اخذ سياف وانه ممكن يراضي يسوف باي طريقه ثانيه حتى لو يزوجه اختي انا هنا ماصدقت اني حصلت فرصه افتك فيها من سياف قلتله اني موافقه على يوسف وانه مايصير نرفضه بعد الي سواه علشاني في الواقع كنت عارفه ان يوسف داشر بس ماتوقعت انه بالشكل ذا فكانت خطتي اني اتزوج يوسف استغل اول زله منه واطلب الطلاق وبكذا اتخلص من الاثنين يوسف الي كنت معتبرته من اول لحظه انه مايستحقني وسياف الي كارهته من صغري جواد ابتسم بسخريه : ويوسف ارتكب جرايم مهوب بس زلات ولهالحين انتي عنده بروق : صحيح والي خلاني اقعد اني بمجرد ماحققت هدفي وانعقد عقدي انا ويوسف اكتشفت اني متزوجه زواج بنية الطلاق انبني ضميري وخفت من الذنب فقررت اني اعطي يوسف فرصه انه يصلح وضعه وقررت اني اتعامل معه كزوجه فعليه لاكن الواقع ان نيتي كانت هي الي تسيرني وتتحكم في تصرفاتي ابو جابر : وان كان ولدعمك رجع يخطبك لاتطلقتي بروق بثقه : مستحيل سياف نفسه عزيزه حيل لوابوي يقلط عليه في مجلسه ويقول عطيتك بنتي ماراح يقبل يتزوجني بعد مافضلت عليه غيره ابوجابر : الله العالم انتس ظيعتي من يدك رجالٍ بتندمين انك خسرتيه في يوم من الايام بروق باندفاع : انا مستعده اعيش مع يوسف عمري كله والااتزوج سياف ساعه وحده جواد بضحكه : ههههه تحمست اشوف هالسياف بروق بفخر : انصحك تتعرف عليه بتكسب رجال عن قبيله ابوجابر عقد حواجبه : انا مدري انتي تمدحينه والاتذمينه تقولين رجال عن قبيله وتقدمين عليه واحدن لادين والااخلاق بروق : وانا صادقه هذا ولد عمي تاج على راسي وساعة الفخر اعتز فيه وافتخربه واذخره لاوقات الشدايد لاكن يقولون في المراجل حط على يمناك فارس وفي امور النساء قد يجيد القهوجي مالايجيد عمه :ههههههههههههههههه ضحكه صاخبه من الجد وولده ابوجابر واهو يحاول يسيطر على ضحكته : هذي المشكله يجيك الرجال يدير جيش من الرياجيل من قو عقله وفهمه ومرجلته ولاجاء عند الحرمه لاماغير يامر وينهي كنها واحد من صبيانه جواد بعد ماسكت عن الضحك مد فنجاله لبروق وبدى يرجع للموضوع الاساسي : تزوجتي يوسف علشان تخلصين من ولد عمك ثم استمريتي معه رغم كل الي سواه علشان تكفرين عن ذنبك في الزواج بنية الطلاق هذي سببين وش السبب الثالث الي قلتي بيخليك تقعدين كم يوم زياده بروق صبت لجواد قهوه ومدة عليه الفنجال ثم صبت لنفسها فنجال وارفعت راسها لجواد : بصراحه مهما كانت علاقتي بيوسف بيبقى له دين في رقبتي وفضل لايمكن انساه مادمت حيه يوسف اسرف على نفسه كثير وجاء الوقت الي لازم يصحى فيه على نفسه ويتوب الجد : ماخلينا عنه قلبه ميت الله لايبلانا بمابلاه بروق بجديه : مانقدر نحكم ان قلبه ميت حنا اهله ولازم نوقف معه ونساعده جواد : وشلون نساعده اذا هو مايبي بروق : الهدايه اولا من الله واحنا لازم نتكاتف علشان ننقذه من الحال الي هو فيه لوكل واحد منا اجتهد انه يدعيله بالهدايه في كل صلاه خاصه امه وابوه دعواتنا ان اشاء الله راح تكون نور هدايه في طريقه المظلم ثم هو غرقان في الذنوب وهالذنوب جدار صد بينه وبين الهدايه مانقدر نجبره يتصدق بس حنا نقدر نتصدق باسمه نيتي ونيتك ونيت اب وام وجد واخوان كل واحد منا يمد له يده من ناحيه واذا ماوصلتله يد توصل الثانيه اذا مانقبلت نيه اودعوه تنقبل الثانيه اذا واحد فينا ماكانت نيته خالصه واحد غيره ممكن تكون نيته صادقه لحد القبول الصدقه بالذات فضلها عضيم وتطفي غضب الرب وهذا المطلوب انا ننقذ يوسف من غضب الله وساعتها ان شاء الله راح يمنحه الهدايه جواد : وتتوقعين دعواتنا له وصدقتنا عنه كافيه لهدايته واهو اصلا مايبذل جهد للهدايه بروق بحماس : انا ماقلت راح نكتفي بالدعاء والصدقه رغم انها اعظم ماقد نقدمه له لاكن لازم يكون عندنا خطه علشان نحطه على الطريق الصحيح وجيتنا هنا هي البدايه الجد باهتمام : كيف بروق على نفس الحماس : انا اقولك ....... ____________ جالسين في صالة شقتهم يتقهوون شاهي وياكلون مكسرات اليوم ارجعو من موقع المشروع بدري صقر يناظر في سياف لاحظ انه تحسن عن قبل ويبدو انه بدى يتقبل خسارته لبروق جاه فضول يعرف وش السبب الي خلاه يصد عن طاري بروق ويقفل سيرتها بالمره ماقدر يكبح فضوله اكثر من كذا : ماكلموك اهل الرياض سياف ببساطه : سيف توه كلمني قبل ساعه صقر : وش يبي سيف سياف يرفع اكتافه بمعنى مدري : كان بيتكلم عن بروق ومنعته قالها بشكل اعتيادي لاكن الحقيقه ان الموضوع شاغله وندم انه ماسمع سيف وش يبي مازالت ماخذه قلبه وتفكيره لاكنه يبذل كل جهده علشان يتخلص من غلاها او على الاقل يدفنه داخله وماخيلي احد يحسبه ابد صقر يدري وش كان بيقوله سيف وحمد ربه ان سياف سكته وماسمع منه يحس بقهر فضيع من الي صار يعني فوق انهم اجرمو في حق سياف وزوجو البنت الي يبيها من غيره طلعو مزوجينها عمياني من غير ماينشدون عن الرجال الي اكتشفو انه واحد منتهي لادين والادنيا كبت مشاعره حتى مايحس سياف بشي وتكلم عادي : انا ودي اعرف شي واحد جاسر يوم كلمته ذاك اليوم وش قال لك وخلاك تقفل كل المحطات مره وحده سياف كشر يبي ينسى هالموضوع والكل يذكرونه فيه تكلم بجمود : قال انه خيرها بينه وبيني واهي اختارته صقر جنت جنونه : وشهو مخيرها السلقه وشلون تختار السربوت المهستر ذا عليك اخ بس لو امسكها سياف يناظره بابتسامة سخريه وبمراره : لاتمسكها والاشي من باعنا بعناه حتى لوكان غالي عليها بالعافيه الي اختارته هي الخسرانه صقر حذف الكاسه الي في يده على الجدار بقهر وراحت حطام : خسرانه وماكله تبن الحماره سياف ماحاول يفسر كلامه يبي يريح راسه منها يبي ينساها حتى ولونها تجري في عروقه مجرى الدم اخذ الريموت وحط على فلم امريكي وقعد يتابع _______________ اطلعو من الاستراحه متجهين لسيارتهم اركبو ومشو يوسف فتح جواله بيتصل بنادر وتفاجأ بنادر يسبقه بالاتصال فتح الخط بسرعه وبلهفه : وش صار نادر : المزرعه مافيها احد بس عرفت مزرعة جواد وين لقيت عقد الشراء في اوراقه وقدرت اطلع موقعها الحين ارسلك الوكيشن بس اذا وصلت لاتعتمد على الاسم كثير احتمال عمي يكون نزل لوحت المزرعه القديمه وركب غيرها اوحتى تركها بدون لوحه انتهت المكالمه وبعده بدقيقه وصل ليوسف رسالة واتس اب تحمل لوكيشن مزرعة جواد ناظر في الساعه ثمان ونصف ماستغرقو وقت طويل في البحث بفضل تعاون نادر معهم والاكان يحفون قبل يوصلون لهم التفت على ممدوح : بسرعه للعماريه ........ في المزرعه وفي المشب تحديدا ملتفين حوالين شبة النار يشربون حليب بالزنجبيل وياكلون تميس بالسمن جايبه لهم جواد من المخبز بروق : عمي دق على نادر شف وش الاخبار عندهم جواد طلع جواله افتحه وانتظر لحد ماشتغل تجاهل كم الاتصالات الفائته والرسايل الي وصله ودق على نادر : هلا نادر نادر : هلابك جواد : وش الاخبار عندكم نادر : زفت يوسف قالب الدنيا يدور بروق جواد : اها يبطي يلقاها نادر : كلها ساعه وتلقاه عندك وياويلك ياجواد لوتطلع من المزرعه قبل يوصلك جواد يبتسم يدري ان يوسف مستحيل يوصل لهم الاعن طريق نادر : ايه ووين حنا يوم حكمت انها ساعه ويكون عندي نادر بثقه : في مزرعتك الجديده جواد اتسعت ابتسامته : وانت تعرف موقع مزرعتي نادر : اذا بغيت شي جبته جواد بفضول : لا من جد كيف جبته نادر بضحكه : ههههههههه عقد الملكيه في الخزنه المشتركه بيني وبينك جواد ضحك : هههههه اشوى نبهتني اشتريلي خزنه لي الحالي انتهت مكالمة جواد مع نادر ورجع يقفل جواله واهو يلتفت على بروق : جاك الموت ياتارك الصلاه نادر يقول كلها ساعه او اقل ويكون يوسف عندكم بروق بضحكه : ههههه انت الي جاك الموت بيطلع حرته كلها فيك جواد يرفع يده ويثنيها مبرز عضلاتها واهو يربت عليها بيده الثانيه بحركة تهديد :خليه يجي انا في انتظاره ابوجابر خاف على يوسف من جواد يعرف الفرق بينهم شاسع زودن على ان يوسف توه البارح مظروب لين تفل العافيه تكلم بعصبيه واهو يضن ان جواد ماراح يضيع الفرصه وبيكسر يوسف : ترفق بالولد تراك لاعصبت يضيع عقلك وتصير ثورٍ هايج مير العصا قريب جواد التفت على ابوه بصدمه : يبه من جدك بتفزع ليوسف علي انا اولدك وبعدين متى ضيعت عقلي انا وصرت ثور الجد خايف على يوسف بالفعل لسع جواد بالخيزارنه على فخذه لسعه قويه واهو معصب : جاك العلم ياويلك تعوره جواد زحف وراه واهو يفرك فخذه من قو السعه الي اكلها من خيزرانت ابوه : اح يبه ماسويت شي وش فيك علي بروق تضحك على جواد : هههههه ترا حتى انا بفزع مع رجلي جواد يناظرها بحقد : هين انتي بس خلي يوسف يوصل اهل العماريه كلهم بيسمعون اصياحك وهذا وجهي ان فزعت لك بروق بثقه : لاتستهين بخبرة الخبير اياً كان مجال خبرته ويوسف خبره في عالم حواء ابوجابر باهتمام : اقفلي الغرفه عليك خلي السوالف يوسف لاعصب طار عقله بروق : ماعليك جدي بيبرد حرته في جواد وانا في السليم جواد : ابوي صادق قفلي الغرفه عليك انا لو زوجتي تسوي فيني كذا كسرت اعظامها بروق : هذا انت قلتلك يوسف خبير والخبير يعرف كيف يتعامل مع اشيائه الثمينه جواد : ههههههه انتي شي بروق ترد بسرعه : طبعاً لا انا اعطيك مثال ....المهم انا بقوم اركب العشاء اذا جاء يوسف انت شيك عليه لحد مايخلص لانه مبين وراي محاكمه طويلة جواد بروقان : يعتمد على نتيجة المضاربه ابوجابر : انت تدور القشر جواد التفت على ابوه : هذا انا قاعد وبتشوف من الي يدور القشر بروق راحت للمطبخ افتحت الثلاجه الي ترسها جواد من كل شي على الرغم انهم ماراح يطولون طلعت الدجاج المبرد وخضروات الايدام بتسوي صينية خضروات بالدجاج ورز ابيض وسلطة خيار بالزبادي نزلت الخضروات والدجاجه على طاولة المطبخ واخذت علبه بلاستيك من دولاب المطبخ وانقعت فيها الرز وارجعت تشتغل على صينية الخضروات المطبخ مجهز باداوات المطبخ بالكامل وكل شي جديد ونظيف شكل المالك القديم ماكان يجي للمزرعه كثير جواد يقول انه اول مره يدخلها كمالك شافها مع صاحبها الي اشتراها منه قبل يشتريها بس المفتاح مااستلمه الاامس الصباح جاء في وقته دخلت الصينية داخل الفرن واركبت قدر الرز على النار وبدت تصلح سلطة الخيار بالزبادي بعد ماخلصت منها دخلتها في الثلاجه شيكت على صينية الخضروات وقدر الرز قصرت عليهم النار واطلعت للغرفه الي حطت فيها اغراضها افتحت الباب وادخلت كان واضح انها غرفة بنت فيها سرير واحد فردي ودولاب صغير الوانها عباره عن تدرجات الموف من الافتح على الجدران للاغمق في براويز الوحات والدرجه المتوسطه من نصيب السرير والدولاب ماحبتها بروق لاكن هذا المتوفر سبق وشافت الغرف الباقيه فيه غرفة جلوس واسعه مؤثثه بكنب كلاسيكي وغرفة جلوس متوسطه مؤثثه بمجلس عربي وغرفتين نوم غير هذي وحده رئسيه فيها سرير مزدوج ووحده واضح انها غرفة اعيال فيها ثلاثه اسره مفرده ويغلب عليها اللون الرمادي والاسود عند يوسف وممدوح اوصلو للمزرعه وفتح لهم البواب مباشره على حسب اوامر جواد اماجواد وابوه جالسين يسولفون وفجأه اقتحم يوسف المشب وتوجه لجواد مباشره الي كان مستعد له يوسف هجم على جواد من غير تردد : ياحقير ياواطي وشلون تاخذ حرمتي من البيت وتطلع فيها جواد كان يصد ظرباته من غير مايهاجمه : انا مالي دخل في حرمتك ابوي قال ودني انا وبروق وجبته الجد صاح يأكد على كلام جواد : بروق انا الي اخذتها وانا الي قلتله يجبني هنيا يوسف ماهمه الكلام الي سمعه كمل يسب ويشتم في جواد ويضربه بكل قوته وجواد مكتفي بصد الظربات ومطنش السب بعد كلام بروق عن يوسف وكيف ان العائله كلها لازم تتكاتف في سبيل اصلاحه صار يشوف يوسف من زاويه مختلفه ممدوح واقف على الباب من غير مايتدخل دام جواد مكتفي بالصد ماراح يتدخل خل يوسف يفرغ شحنة الغظب الي داخله قبل يوصل لبروق يوسف شاف ان عمه يتلقى منه الظرب من غير مايرد فقدحماسه صرخ : وين بروق جواد رد ببرود : في غرفتها تلقاها اخر الممر الي يمين الصاله بروق عرفت ان يوسف وصل شافته مع شباك المطبخ لمى راحت تشيك على العشا ارجعت لغرفتها سكرت الباب من غير ماتقفله نزلت عبايتها وطرحتها ونقابها وعلقتهن في الدوالا وراحت لسرير واجلست فوقه متربعه واخذت ايبادها من على الدرج الي جنب السرير وشغلت لعبه لودو ستار وفتحت الصوت على اعلى شي وبدت تلعب انتهت جوله وبدت في الثانيه وادخلت اجواء اللعبه وبدت تتحمس وفجأه انفتح الباب بسرعه وتسكر بعنف ارفعت راسها بتسأل وقيدها نست مخططها شافت يوسف يقفل الباب بالمفتاح وقفت اللعبه ونزلت الايباد على السرير وانزلت هي من السرير واوقفت جنبه تنتظر يوسف يوصل عندها يوسف انقهر لمى شافها مبسوطه وتلعب والاهامها شي قفل الباب واندفع يمشي لها ملابسه مبهذله ووجهه مبين فيه التعب والارهاق وينطق غضب وصل عندها بخطوات سريعه ودون مقدمات خمها بنحر بلوزتها ونفضها بعنف واهو يقربها له : انتي وشلون تطلعين من غير اذني بروق رفعت نظرها له يرتسم على وجهها علامات الاستنكار الشديد ارفعت يدها اليمين تمسك فيها يده الي ماسكه نحر بلوزتها وبدت تحاول تبعدها عنها واهي تعقد حواجبها وتتكلم بغضب مكبوت : شنو هذا بعد ايدك الضرب غير مدون على لوائح العقاب عندنا ال جاسر يوسف تنح للحظه مستغرب الكلام الي قالته وفي نفس الوقت حس بنوع من التسليه ارخى يده عن بلوزتها ومازال واقف في وجهها مباشره : اها وايش العقوبات المدونه على لائحة ال جاسر علشان اعاقبك عقاب نظامي بروق ترفع راسها له بدلع وتتكلم بحماس : شف اولا لازم المخطئ يعترف بخطئه علشان يتعاقب قالته واهي تضيق عيونها الساحره بطريقه ذات مغزى يوسف ابتسم بتسليه واهو فاهمها وماشي معها بمزاجه همس لها واهو يفتعل الحماس : وثانياً بروق ميلت راسها بدلع واهي تبرم خصله من شعرها القصير على اصبعها :ثانيا المخطئ هو نفسه الوحيد الي يقدر يقيس حجم خطئه وبكذا اهو الي يختار العقاب لنفسه وينفذه بكامل ارادته ورضاه بشرط اذا خطئه يتعلق بشخص ثاني لازم هالشخص يوافق على العقاب الي اختاره المخطئ لنفسه حط ذقنها بين اصابعه الابهام والسبابه ورفع وجهها مقربه له واهو مركز نظره على عمق عيونها وبهمس خادر بسب قربها الشديد منه : واذا ماعترف حدت نظراتها له واهي تجاوب ببطء واثق : يكون جبان .........ثم اكملت بسرعه واهي تبعد نفسها عنه وكأنها تنفي عن نفسها هذي الصفه : انا بروق اعترف اني غلطت غلطه مركبه من عدت اخطاء طلعت من البيت من غير اذنك تسببت في توتر بينك وبين اهلك ودفع جواد ثمن غلطه ماله علاقه فيها بسببي اتسعت عيون يوسف بدهشه واهو بدى يقلق من المغزى الي تبي توصله وشبه متاكد منه بس موب عارف باي طريقه راح تسويها ولانه من البدايه سايرها راح يستمر في مسايرتها لحد مايوصل معها للي هي تبيه : اها دامك عارفه غلطتك ومعترفه فيها ياترى ايش العقاب المناسب الي تقترحينه بروق ابتسمت بحماس : شفت وانت داخل للبيت هذا موكان على الممر من يمين ومن يسار صفين اشجار زينه صغار مشعثه تقريبا عددها اذا ماخاب ظني اربعين شجره على كل جهه عشرين يوسف يهز راسه يستعجلها : اها بروق تكمل بنفس الحماس : بس هذي هي انا راح اشذبهم واوعدك يطلعون مرتبين ومقصوصه بحرفيه عاليه ...ها موافق يوسف سكت لحظه يفكر وبعدها ابتسم : اوكي ولونه الاشجار مايهموني والاحتى المزرعه بكبرها بس بامشيها لك موافق بروق تقفز : يس يعني طاح الحطب يوسف اتسعت ابتسامته اكثر شكله ظلمها وماعندها نوايا خبيثه : طاح الحطب وكأن كلمته هذي صفعه ماهي اعلان صلح لانه بمجرد ماأنهاها انقلب حال الي قدامه مئيه وثمانين درجه واكتسى وجهها بالغظب فجأه واحتدت ملامحها بشراسه !! ________________ منسدحه على السرير وجهها متنفخ وعيونها حمر ممايدل على كونها باكيه تتأمل السقف اوكذا يظن الي يشوفها لأنها سرحانه في الي حصل اليوم فزة جالسه مع فتحت الباب ثم اشهقت وانهمرت ادموعها قامت واركضت لعروب الي ادخلت عليها وسكرت الباب وراها مقفلته :خير وش فيك وش صاير سحر واهي تتسمك في عضود عروب وتهزها بقهر : تخيلي ابوي راح لخزام وقاله سحر دايم واهي في بيتكم مير بازوجكيها عن كلام الناس عروب تقاطعها : وشهو وسالم وشلون يسوي كذا سحر واهي تشاهق وتبكي : ابوي يقول انا قلته مزحه مع جس نبض باشوف وش يقول وهب في وجهي يقول بنتك محد ضربها على يدها علشان تجي لبيتي وتراها ناشبه في حلقي مادخل الابنحنحه ولاطلع الابنحنحه كني داخل لبيت الجيران واذا ماتبي كلام الناس امسك بنتك عندك وفكني من شرها عروب اشهقت بفجعه : اما عاد معقوله خزام تكلم بوقاحه كذا سحر واهي باقي تبكي : المصيبه ان ابوي رجع للبيت وحط حرته فيني ظربني بالعقال وقال فظحتيني حاشره الرجال في بيته لين تعوذ منك وحلف علي ماعاد ادخل بيت خزام الامع امي عروب جنت جنونها ارفعت يدها الي ماسكه فيها الجوال ودقت رقم خزام واول مارد اصرخت عليه : انت وش قلت الحياء الي سويتها وش الوقاحه الي رديت فيها على سالم ماتستحي على وجهك هذا جزا خوالك الي لموك من الشارع الي رماك فيه جدك ياوقح خزام كان مقهور من نفسه وعلى الطريقه الزباله الي رد فيها على خاله بعمره ماكان وقح مع اي احد وشلون عاد مع خاله الكبير بس المصيبه انه جاه واهو في حالة يأس جاه واهو حده معصب ومقهور من الوضع الي وصله وعملية البحث الي ماوصلته لاي نتيجه يحس انه راح يجن اذا مالقى بروق وذا جاي يكلمه عن سحر اكثر مخلوقه غاثته في حياته من صغرهم .......طاريها الكريه فجر كل الضغوط النفسيه المكبوته داخله وخلاه يرد على خاله بهستريا وبدون تعقل والاتفكير دق جواله ورد من غير مايطالع الرقم وانفجع من كم الشتايم الحقيره الي صبتها عروب في اذنه صدمة حياته بعمره ماتخيل ان عروب ممكن في يوم ترفع صوتها عليه وشلون عاد لاسبته وماهو اي سب رد عليها بصراخ مماثل وبقهر اكبر : تشب والاكلمه انا طول عمري عايش في خير ابوي وجدتي ولالحد علي منه ومهوب انا الي ينلم من الشوارع وجدي والله ان جبتي سيرته بردى بعد ماجبتيها السانك اقصه وارميه للكلاب عروب بردح : والله وطلع لك السان ياولد عذبه جاها اصراخه : انكتمي عذبه امك الي ربتك ياجاحده ياقليلة الادب عروب حمياها لسحر اعمت قلبها وماعاد حست على عمرها من تكلم ووش تقول اندفعت بغضب اعمى : انا بنت شي طبيعي تربيني حرمه زيي بس الرجال لاصار ربوت حرمه الله يخلف خزام حس كل عرق في جسمه يشتعل نار من الغضب والدنيا تدور فيه لايعروب مهوب انتي الي يقول مثل هالكلمه مهوب انتي الي يذبحني : عروووووب !! _____________________ تم البارت التاسع بحمد الله تفاعلكم مع احداث البارت وتحليلكم لمعطياته تدفعني للمزيد من العطاء وحياكم الله * * * التعديل الأخير تم بواسطة فيتامين سي ; 01-04-18 الساعة 08:28 AM | ||||
|
| |
 |
| أدوات الموضوع | |
| انواع عرض الموضوع | |
|
|
51Likes
شكرا على الرواية في انتظار التتمة بكل شوق بالتوفيق 
العرض العادي
