08-09-18, 03:01 AM
| #11 | ||||||||
| مراقبة عامة ومشرفة منتدى الروايات المنقولة  
|  السـلام عليكم ... أعتذر عن موضوع التأخير كنت أتمنى أني أنزل جزء قبل ما أسافر ولكن للأسف انشغلت في السفر وسفرتي كانت طويله ورديت على الدوامات على طول فانشغلت ... إن شاء الله الجزء الجديد بينزل بعد ساعة وشكراً | ||||||||
|  |
|
08-09-18, 03:02 AM
| #12 | ||||||||
| مراقبة عامة ومشرفة منتدى الروايات المنقولة
| الجـزء الـ 9 . . . فـي السيـارة المتوجه إلى عروس الخليج جدة. عبدالرحمن كان مستلم السواقه بجانبه أحمد النائم وفي الخلف هزاع. هزاع كان متسغرق بمكالمته مع زوجته وما ينسمع منه غير همس. أحمد قام من النوم وفتح عيونه ولف على هزاع ورا وبعدين لف على عبدالرحمن وبتساؤل: هذا بعده يرمسها؟ عبدالرحمن: هيه أحمد: ماشاء الله في شو يتكلمون كل هذا؟ عبدالرحمن بضحكه: حماس أول خمس سنوات بعدين لو طرشلها مسج وهو مسافر وايد عليه أحمد: أنت أدرى! عبدالرحمن: طبعاً أنا أدرى. ألا أقولك أحمد: قول أعبدالرحمن: متى ناوي تعرس ؟ أحمد: أمي موصتنك شو؟ عبدالرحمن ضحك عليه بعدين رد: لا والله خالوه ما رمستني أبد بس شكله بدت تحن أحمد: أستويت أكره قعدة البيت يا ريال عبدالرحمن: بس صدقها كم عمرك أنت ألحين؟ متى بتلحق تيب عيال وتربيهم! أحمد: بلحق ليش ما بلحق بعدني صغير أنا عبدالرحمن: ترا لا تقول أنا ريال ما يعيبني شي ترا حتى الريال يعيبه عمره بعدين يوم بتصك الأربعين منو بيزوجك؟ أحمد: بيزوجني اللي عنده بنت قربت على الأربعين وما عرست هزاع بعد ما خلص مكالمته تقدم وحط راسه بين الكرسين الأمامين في السياره وسأل بفضول: عن شو تتكلم؟ أحمد: هو في غيره الموضوع اللي كل حد يشوفني لازم يتلكم فيه هزاع: العرس؟ عبدالرحمن: شفت كل حد يترياك هزاع: صدق شو تتريا؟ مافي وحده جيه دق قلبك حقها؟ عبدالرحمن: عبالك كل الناس ادق قلوبهم نفسك هزاع: أنا هذي قناعتي مستحيل اتزوج وحده أنا مب مقتنع فيها أو أمي منقتنها لاني انا اللي بعيش وياها مب أهلي عبدالرحمن: بدا فلسفه. أنزين يا أخ أحمد ما جاوبت على كثر ما تروح وترد ما قد قلبك دق لوحده على قولته أحمد: لا واذا دق مره ما يدق مره ثانيه هزاع: علينا !!! ما شفت لك من هالشقر والحمر أحمد بضحكه: هذيل ما يبون زواج عبدالرحمن: صدق أحمد لازم تخلص موضوعك هالسنه اللي أصغر عنك شادين حيلهم أحمد: منو هم اللي اصغر عني؟ هزاع: هيه والله استغربت من يومين نوير رايحة ملكة اربيعتها عبدالرحمن: ما اعرف كيف يزوجون بناتهم صغار هزاع: هيه الله أنا مستحيل اقبل نوره تعرس الا بعد الجامعه أحمد: أول شي هزاع لو سمعتك تزقرها نوير بتذحبك ثاني شي لانها أختكم تشوفونها صغيره عبدالرحمن بعصبيه يحاول ما يبينها: لا هي صدق صغيره توها 18 أحمد: مب صغيره أنت بروحك تقول اربيعتها يعرسن بعدين 18 خلاص السن القانوني هزاع: يهال مستعجلين على العرس، عبالهم العرس يقولها أحبج وهي تقول وأنا بعد أحمد في خاطره عيل لو تعرفون أمي شو تفكر فيه أظن بتفروني في هالصحرا . . . فـي أحـدى النـوادي الرياضية النسائـية بوجه أحمر من بعد الجهد الذي بذلته ونفس ثقيل توجهت لغرفة اللوكرات حتى تلبس عبايتها. خذت عبايتها ولبست ونزلت لسائق اللي كان بانتظارها مع أختها وابن أخيها. أول ما دخلت السيارة ألقت السلام على الموجودين ريم: وعليكم السلام والرحمه ما بغيتي تخلصين أنا قلت عندج بطولة رفع أثقال على هذا التدريب أحلام: بدال ما تين تلعبين رياضه وياي يالسه تعيبين علي ريم: ما عيبت بس كل هذا رياضه! أنا لعبت الولد وتعشينا وأنتي بعدج أحلام بعصبيه:قلت لج ردي البيت بس انتي اصريتي تتريني ريم: شوفيج أنتي من أسبوع محد يقولج شي الا وعصبتي. شو شاغل بالج؟ أحلام بتنهيده: بقولج يوم برد البيت ريم لفيت عليها بحماس: قوليلي ألحين! أحلام: ريم قلت لج بقولج يوم بنرد البيت ما فيج صبر ريم: افف تعرفين أن ما فيني صبر بعد وصولهم للمنزل توجهت أحلام للحمام لتستحم وتسترخي بحمام دافئ أما ريم فاتجهت إلى الصالة.. بعد السلام على الموجودين. أم على: ريم أخوج ما قالج متى بيوصل اليوم؟ ريم: قال ما يعرف يمكن على الفجر أو الظهر على حسب إذا وقفوا ريحوا ولا مسكوا الخط مره وحده أم على: الله يسلم دربه. هالولد يحب يشقي عمره ريم: ريال ما ينخاف عليه أم علي: بس حتى ولو سلمى نزلت من فوق وانضمت لجلسه. سلمى: مشكوره ريم أنج شليتي ناصر فكيتيني شوي من حشرته اليوم ريم: العفو ولو. بعدين ما صدقت ألاقي عذر عشان أطلع وأقول لا ! أم علي: يا حبج للهياته ريم: حرام عليه أمايه! نحن وين نروح ولا نرد ما تشوفين غيرنا كل يوم سينما ومطاعم وسوق وجمعات بنات. ونحن سينما بالحسره، وما يستوي اروح عند اربيعاتي غيره مره في الشهر ولا لازم يكون البيت قريب أم علي: وانتي شو لج في بنات الناس عليج من نفسج ما يخصنا في حد ريم: هذا أنتو على كيفكم وقت ما تبون دخلتونا في بنات الناس وقت ما تبون ما دخلتونا أم علي: لسانج يباله قص ريم: الحق يزعلكم أم علي: بنت ! ما تستحين أنتي ريم: وليش استحي يالسه اناقش أمي مب حد غريب ما بينا يا ام علاوي وقامت ريم حضنت أمها بعنف أم علي: قومي عني خنقتيني سلمى: ريموه قومي عن عموه صدقها خنقتيها ريم: ألحين أنا اخنقها! بعدين انا بنتها الصغيره لو أحمدوه على قلبها زي العسل وقامت شلت عبايتها وشنطتها متوجه لغرفتها ومن ثم غرفه أختها عشان تعرف سالفهتا . . . فـي غرفتها. قاعده على مكتبها ومستغرقه في عملها بما أنها أمها منعتها تشتغل وطلبت منها أنها تاخذ اجازه بدون راتب فأقل شي تقدر تسويه أنها تخلص شغلها من بيت حتى لا يتم فصلها بسبب عدم الكفاءه. سمعت صوت فتحت الباب رفعت راسها من شاشه الكمبيوتر لقت أمها اللي دخلت مريم: عاليه عاليه: هلا مريم: وين اللي بتلبسينه باجر عشان يكونه؟ عاليه: عطيته البشكاره خلاص مريم راحت عند بنتها: عاليه أنتي متأكده من هالقرار؟ عاليه تنهدت: متأكده مريم: الله يكتب لج اللي فيه الخير وإن شاء الله يكون الريال اللي بيعوضج عاليه تجمعت الدموع في عيونها وحاولت تقاوم. نفسها مثقله بالكثر. زعل أمها عليها، وعدم ذهابها للعمل، والاهم أقدامها علي هذه الخطوه مهاجمة ذكريات الماضي لرأسها. ردت بصوت بقدر الامكان تحاول تخليه طبيعي: ما أباها يعوضني عن شي بس أباه يرحمني ويحترمني راحت أمها وحضنتها، تمسكت فيها عاليه بقوه: ماما سامحيني لا تزعلين مني ولا ما اقدر على زعلج مريم: ما زعلت منج يا علايه زعلت عليج، أبا لج الراحه عاليه: الله يخليج لي مالي غيرج مريم بمزح تحاول تخفف ضيقة عاليه: كلها اربع وعشرين ساعة وبيكون لج غيري عاليه بصياح: محد يقدر ياخذ غلاج مريم: خلاص يا حبيبتي ما يستوي باجر خطبتج ويهج يكون منفخ من الصياح وقومتها عشان تروح تغسل ويها. عاليه بعد ما هدت وطلعت راحت قعدت على الكنبة اللي في طرف غرفتها. مريم: دقي على سعيد أبا أكلمه تأخر ما رد لين الحين عاليه باستغراب: ليش وين طالع؟ مريم: خطف عليه سيف وطلعوا ما قالي وين عاليه باتسغراب أكثر: غريبه هالفتره سيف وايد مع ابوه. من متى ! مريم: عاليه الله يهديج شو هالكلام أنتي قلتيها أبوه وبعدين سيف ما يقصر ويا ابوه دوم يسأل عنه صح هوتقريباً من سبع سنوات طلع من البيت سكن بروحه بس يسأل عن ابوه واي عنده عاليه: ما اختلفنا بس ما كان يقعد عنده هالكثر ولا يطلعون مع بعض الا نادر وغالباً يكون عرس ولا عزا. تلاقينه حس بتأنيب الضمير من بعد مرض عمي مريم: شو هالكلام عيب عليج! وبعدين أنتي ليش وايد شاله عليه الريال شو سوى لج هو عاليه: ولا شي وقامت متوجه لمكتبها تاخذ تلفونها عشان تتصل على عمها سعيد بعد ما انهت الاتصال ألتفت لأمها: يقول هو في مزرعة سيف بعدين في الرجعة خطف يسلم على بنات أخوه الله يرحمه مريم: يعني هو قريب البيت عاليه: هيه مريم: عيل أنا بقوم أزهب له العشا وطلعت من الغرفه. من بعد ما طلعت أمها شافت ان الساعه قريب التسع فقررت أنها تستعد للنوم. قعدت على شبريتها* *الشبرية=السرير . . . فـي غرفه أحلام قاعده على شبريتها مقابله ريم أحلام: الأسبوع اللي طاف كلمني دكتور بدر وعرض علي أني أكمل دراسة الماجستير والدكتوراه على حساب الجامعة في الخارج لان يشوف أن تخصصي مافيه وايد دكاتره مواطنين وأن معدلي الدراسي يسمح ريم: برا وين؟ أحلام: أمريكا أكيد ريم: أنتي تبين تدرسين برا ولا؟ وما يستوي تدرسين هني؟ أحلام: أنا أبا اكمل دراستي وكنت افكر أني بعد ما ابدا شغلي الجديد ادرس ماستر بس ما فكرت أني أدرس برا. وأنا صارلي أسبوع أصلي الاستخاره وما أعرف محتاره ريم: ما بتكلمين علي ولا أحمد؟ أحلام: بكلمهم باجر أو السبت ريم: ما ادري الصراحه الموضوع وايد كبير. تحسين بيخلونج؟ أحلام: ما اعرف ويستوي ترا يكون عندي مرافق يعطونه تفرغ ريم: منو بيكون وياج؟ علي اللي عنده حرمته وعياله، ولا احمد اللي يموت في شغله. وأمريكا وبروحج؟ أحس وايد صعب ولا ست سنوات أقل شي يبالج أحلام: افف ريموه ولا تزيديني. الصراحه أنا فجأه أحس أني وايد أبا اسوي هالشي. ليش أحكر عمري في شغل مكتبي روتيني ممل وأنا أقدر أسوي أكثر عن جيه ريم: أنا بالعكس مب ضدج، منو يعرف يمكن من بعد هالخطوه شوي يفجون عنا الخنقه اللي نحن فيها فجأه نطت ريم بحماس: الله لو يخلوني أكمل وياج في أمريكا بكالوريس وأقعد معاج لين ما تخلصين انتي ماستر أحلام: ريم ترا بضربج ريم: افف شوفيكم علي أحلام: ألحين شو أسوي؟ ريم: ولا شي صلاه وصليتي وأن شاء الله بتكلمين الشباب هالويكند وبنشوف رايهم أحلا: وأمي؟ ريم: الصراحه أحس أمي أصعب وحده تعرفين هي كيف تخاف علينا بس لو اقتنعوا أخوانج بيقنعونها أكيد أحلام: لازم أرد علي الدكتور الاسبوع الياي ريم: الا اقولج صدق ألحين هوطلق حرمته أحلاظ¬ باستغراب: منو هو؟ ريم: بدر أحلام: صدق!! ريم: أنتي اللي تشتغلين معاه ما تعرفين! والطالبات يعرفون أحلام: والله ما كنت أعرف أنا أصلا أتجنب السوالف الشخصيه معاه -وباستغراب- غريبه شو سبب الطلاق! ريم بحماس: الله يسلمج اربيعتي تعرف وحده تعرف أهل طليقته يقولون أن هي ما تباه ويقولون أن هي عافته من بعد ما ماتت بنتهم أحلام فجأه اضيقت ورفعت لحافها واندست تحته: ريم خلاص طلعي أبا أرقد ريم: بسم الله تونا نسولف أحلام: ريم قلت لج طلعي برا أبا ارقد ما تفهمين ريم وهي تقوم: زين زين فهمنا يالنفسية أحلام: سكري الليت وياج بعد ما طلعت ريم من الغرفه أحلام سرحت بعالم أفكارها " ألحين سبب مزاجه المتعدل من شهر الطلاق!! لهدرجة كانت خانقتنه صدق أنها ما تستاهله. استغفرلله أنا شو دراني شو مستوي بينهم يمكن بعد هو مضايقنها. يعني ألحين ممكن يكون في فرصه أني … أحلاااام شو هالافكار أنا لازم ارقد!! بس هو يوم كان معرس وقررت أشرد منه لدوام ثاني وألحين وهو مطلق أروح وأخلي له البلاد عشان يوم ارد ألاقيه متزوج مره ثانيه وأموت وقتها صدق! .. استغفرلله ياربي ا" ولفت على جهتها اليمين عشان تنام . . . يـوم الجـمعـة بعـد صـلاة المـغرب فـي مجلس الحـريم كانت عاليه متوسطة جدتها وأمها بفستانها الاحمر من الحرير المطفي وأكمامه الطويلة المنفوخة نفخة بسيطة عند المعصم وبربطه من عند الرقبة ويتوسط الفستان حزام قوتشي ضعيف مع حذاء بكعب عالي أسود من ysl. تعمدت البساطه في مظهرها وما لبست غير شغاب ألماس صغير وشعرها مفرود على طوله بنعومه ومكياج بسيط. تفكيرها بعيد كل البعد عن الموجودين فهي جالسه تعقد المقارانات بين خطبتها الأولى وخطبتها هذي اللي أصلا حتى ما كانت خطبه. قامت من سرحانها على صوت أم فيصل وهي تناديها لتجلس بالقرب منها مريم: عاليه قومي شوفيج خاله فيصل: ما عليه خلوها مستحيه قامت عاليه باستحياء وجلست عدالها أم فيصل: والله ولدي عرف يختار عاليه نزلت راسها ما عندها رد أم فيصل: متى تبون الملكة عاليه بلعت ريقها فهي ما تريد الموضوع يمشي بهالسرعه تحتاج تعرف طريقة تفكيره والقليل من شخصيته قبل ما تترتبط رسمي منه ما تبا تكرر الموضوع مره وثانيه ما تبا تكون مطلقه للمره الثانيه ! فجاه رجعت تفكره مره ثانيه هل أنا تسرعت! عاليه بأدب: أستئأذن بروح شوي وبرجع أم فيصل بتودد: خذي وقتج حبيبتي بس لا تتاخرين عاليه: أن شاء الله فـي مـجلـس الرجـال قـام وقف بعصبيه وصوت عالي: نعم؟؟ عيدوا شو قلتوا ما سمعت؟؟ قام الآخر بعصبيه مماثله: حشم عمرك صوتك ما تعليه علينا . . . انـتهـى رايكـم يهمـني | ||||||||
|
| |
|
22-09-18, 09:21 PM
| #13 | ||||||||
| مراقبة عامة ومشرفة منتدى الروايات المنقولة
| الجـزء الـ 10 . . فـي مـجـلـس الـرجال سعيد: والله يا بو فيصل نسبكم يشرفنا بس مثل ما تعرف البنت كان ولد عمها مالج عليها وهي صغيره وأطلقت بوفيصل: ما عندنا مشكله يا بو سيف حتى لو أنه دخل عليها هذا ما يعيبها سعيد: لا والله ما دخل بس ملجه وكانت صغيره وما حصل نصيب فيصل بعصبية: عيد شو قلت؟ سعيد باستغراب من أسلوب فيصل: نعم؟ سيف فهم فيصل: ما سمعت شو قال الوالد قاللك مطلقه قام وقف فيصل بعصبية وصوت عالي:نعم؟؟ عيدوا شو قلتوا ما سمعت؟؟ مطلقه!! وليش ما قلتوا من قبل ولا ما صدقتوا حد خطبها قام سيف بعصبيه مماثله: حشم عمرك، صوتك ما تعليه علينا، الحين مب عايبتنك! وانت صارلك اسبوعين تحفي عشانها بو فيصل استغرب من ولده: فيصل ! فيصل: بلا فيصل بلا زفت وأنا اقول ليش البنت أحاول أكلمها ما تتكلم غير برسميه وأمور الشغل طلعت مطلقه وما تباني أعرف -وابستهزاء- عبالي ذابحنها الاحترام! سيف راح مسك فيصل وعطاه بوكس على وجهه:محترمه غصبن عليك يالرخمه سعيد قام يفرق بينهم مع بوفيصل ما قدر غير على فيصل وطلعه برا المجلس بوفيصل بفشله:سامحني يابو سيف امسحها بوجهي تعرف شباب باجر بيبه يعتذر لك سعيد:مسموح بس ما اباه يعتذر ولا اباه يدخل بيتي ولا ايب طاري بنتي على لسانه بوفيصل: والله ما أعرف شو أقولك سعيد: حياك الله يو بو فيصل بوفيصل: الله يحيك مع السلامه نزلت عاليه استغربت الهدوء هي صح تأخرت 40 دقيقة بس هي متأكده أنهم معزومين على العشا. وصلت الصاله ما لقت حد لكن سمعت أصوات صوب مجلس الحريم راحت وسمعتهم يتكلمون. سمعت أمها تقول "بس سيف الله يهديه ليش يضرب فيصل". صدمه! ضرب فيصل ليش؟ سمعت صوت وراها ينبها بوجوده عشان تدخل بما أن إلى الآن واقفه بزينتها. لفت عليه بكل غضب ونست وضعها. عاليه: أكرهك، منو مسلطنك؟ كل شي تخربه علي، أصلا أنت ليش موجود اليوم أنت منو عشان تكون موجود سيف ببرود: أقول عن طول اللسان لا اقصه لج وروحي غطي عمرج ما تستحين أنتي عاليه:ما أستحي من أشكالك سيف باستهزاء: تحاولين تلفتين انتباهي بما أن واحد راح! مريم طلعت مستغربه: شو مستوي سيف: بنتج زعلانه لاني ضربت خطيبها مريم: عاليه روحي فوق ما تستحين أنتي جيه واقفه قدام الريال عاليه وهي تمشي داخل بصوت واطي: هذا لو كان ريال سيف سمعها بسرعه راح مسكها من زندها بقوه حسن أن عظامها تفتت ولفها عليه وبصريخ: والله لو أن أمج مب واقفه جان نمتي اليوم في المتسشفى وبرويج هالريال شو ممكن يسوي ودزها بقوه على الجدار حست أن كتفها انخلع من مكانه . . . اليـوم إلـي بـعـده بعصبيه حط كوب الشاي على الطاوله : نعم؟ سفر برا وأمريكا ست سنوات؟ وبروحج؟ انسي هذا اللي ناقص أحلام: أحمد ترا تقدر تي تقعد وياي خذ رحلات امريكا وبين كل كم يوم بتكون عندي أحمد: لا والله وانا ما عندي حياه! يوم بتعرسين شلي ريلج وسوي اللي تبينه إن شاء الله تدرسين في المريخ وأنت يا دكتور اشوفك ساكت علي: أحلام أنزين إذا أنتي وايد في خاطرج درسي هني ماستر والدكتوراه برا ووقتها أنا بروح وياج أحلام: اذا درست هني بدرس على حسابي والدكتوراه كذلك علي: وانا مستعد ادفع لج كل شي بس سفر بروحج سامحيني ما اقدر أخليج أنا هني وخايف عليكم كيف برا وآخر الدنيا وأنا ولد جربت الغربه صعبه علي عيل كيف عليج أنتي يا أحلام أحلام سكتت خنقتها العبره قام علي وراح قعد عدالها: صدقيني أحلام لو أني شايف أنج تقدرين تخوضين هالتجربه أنا أول واحد بوقف وياج أحلام: أنتوا كل واحد سوى اللي يباه محد منعكم أحمد: وانتي تحطين راسج من راس ريايل أحلام: والله أنا ما قلت بسوي شي غلط قلت بدرس برا أحمد: اقول بلا كثره كلام دراسه برا ماشي -قام وقف- بروح ارقد راد من السفر جسمي متكسر أحلام: علي الله يخليك علي: أنتي اللي الله يخليج وايد صعب اللي تطلبينه أحلام: يعني شو شايفني شخصيتي ضعيفة؟ علي: ما قلت شخصيتج ضعيفه بس شخصيتج ما تناسبها الغربه أحلام: لاني بنت وأنتو أولاد؟ علي: لا والله أبداً -وبمزح- قالولج المتخلف أحمد أنا أقصد أنج انسانه حساسه قلبج رهيف تحسين بالمسؤوليه اتجاه كل حد وكل شي يعني من الممكن أني أتقبل أن ريم تقدم على هالخطوه بس أنتي لا أحلام: يعني ريم اقوى مني علي بضحك: خلنا نقول أنها ماعندها احساس أكثر عنج. بعدين مب أنتي تبين الشهاده شو فرقت هناك ولا هني أحلام سكتت ما عرفت شو تقول علي: لا تزعلين مني أحلام تغصب الابتسامه: مب زعلانه منك مافي بنت تزعل من ابوها علي ابتسم لاخته وطلع من غرفتها لجناحه شاف زوجته قاعده على الكنبه مقابل التلفزيون وابنه راقد بحضنها تقدم وبصوت واطي عشان ما يقومه: السلام عليكم لفت على زوجها: وعليكم السلام توك توصل؟ راح تقدم منها وشل ولده بشويش من عليها: لا من زمان بس كنت أحلام وراح غرفه ولده وحطه في شبريته رد لها وقعد عدالها سلمى: أحط لك أكل؟ علي:لا مشكوره تعالي يلسي سلمى: خوله قالت لك شو فيها؟ علي: ليش هي فيها شي؟ سلمى: ما أعرف بس صارلها فتره أحس فيها شي، عن يكون حد مضايقنها وأنت تعرف أحلام كيف حساسه علي: محد مضايقنها بس تلاقين كان بالها مشغول بموضوع الدراسه برا سلمى: تبا تدرس برا؟ يا حيها والله جان تقدر علي: هي تبا تدرس برا بس انا ما واقفت سلمى: ليش؟ علي: بدون ليش ماشي دراسه برا سلمى -باستغراب-: من متى أنت جيه ما تناقش علي: ناقشتها منو قالج ما ناقشتها بس تعبت من هالموضوع، متى موعدج؟ سلمى: المغرب بس لو تعبان عادي بروح روحي وبشل ريم ولا أحلام علي: لا أنا بوديج ومره وحده نطلع نتعشا سلمى: خلاص عيل نخطف بيت أبوي نشل ناصر نوديه حقه يباه يبات عنده اليوم علي: عمي فيه شي؟ اليوم يوم دق لي عشان يقولي أنه يبا ناصر عنده في حسيت أن فيه شي سلمى: سالته وقالي مافيه شي بس شوي مصدع علي: تلاقين شي مضايقه برمس سيف يشوف ابوه سلمى: هيه زين تسوي علي: اقولج يا ام ناصر -وبغمزه- محلوه سلمى باحراج: متفيج علي: ليش متفيج شو بيشغلني عنج تعالي بس خلنا نسولف من زمان ما سولفنا عنا وتقرب منها وحاوطها بايده اليمين وسندها في حضنه يكلمها عن يومه في المستشفى . . . عاليـه في غرفتها من أمس ما طلعت ومب راضيه تكلم حد يالسه تكلم اربيعتها على التلفون .. ساره: انزين دقي له شرحي له الموضوع ومن هالحركات عاليه بتأفف: دقيت له أمس وكان مغلق ويوم قمت نفس الشي، ترا أنا عندي كرامه بعد ساره: والله غريب حتى لو سيف ضرباه أنتي شو يخصج وبعدين شو حركات اليهال هذي غالق تلفونه، محد من أهله كلم أمج؟ عاليه: ما اعرف من أمس ما شفت أمي ساره: عن يكون حضرتج ما تكلمينها ترا أمس أنتي الغلطانه عاليه: لا مب جيه متفشله منها ومن عمي مالي وجه بعد اللي قلته لزفت سيف وكيف كنت واقفه قدامه -حطت ايدها علي وجها- أصلاً أنا كل ما أتذكر كيف كنت واقفه قدامه يحترق ويهي ساره: عاد أنتي يا كافي يوم تعصبين ما تفكرين، بعد ما تحسين أن هو يمكن قال كلمه مثلا وتسبب بضربه عاليه: شو بيقول يعني ! ساره: والله ما أدري غريب، أنزين أنتي روحي كلمي أمج أكيد تعرف السبب عاليه: شو رايج أنتي تكلمينها ساره: لا والله ياهل أنتي؟ شو يخصني أنا عاليه: خلاص أنزين ببدل بيجامتي وبنزل ساره: يلا انزين انا بسكر عنج باي وخبريني شو مستوي وشو السالفه عاليه: باي وإن شاء الله قامت عاليه بدلت بيجامتها ولبست جلابيه بيضا فيها تطريز أخضر على الاكمام ومن تحت مع شيله خضرا نزلت تحت شافت أمها جالسه على أحدى الكنبات ماسكه بأيد الشاي تشربه وبالايد الاخرى تلفونها راحت لها وباست راسها: أنا أسفه مريم رفعت راسها لبنتها: لا تتأسفين لي تأسفي لسيف عاليه طنشت كلام أمها يا ويلست عدالها مريم: يابنتي مافي نصيب بينج وبين فيصل عاليه باستغراب: ليش؟ مريم: الرفض منهم مب منا عاليه: طبيعي بيرفضون ونحن ضاربين ولدهم مريم: يستاهل زود بعد عاليه بصدمه واستغراب: يستاهل زود! ليش شو مستوي مريم: سوالف بين الريايل ما يخصج عاليه بصوت عالي: لا يخصني لازم أعرف مريم: صوتج! عاليه لفت بجسمها كامل صوبها بترجي: ماما قولي لي شو استوى مريم بتهرب: لا تصدعين راسي خلاص ولبسي شيلتج الحين ياي سيف عاليه: دخيلج قوليلي مريم: بقولج بشرط عاليه بسرعه: تم باللي تآمرين فيه مريم: يوم بي سيف تعتذرين له عاليه: يخسي! مريم بعصبيه: عااااليه عاليه: والله ماما ما قصدت بعدين أنا منحرجه من سيف كيف تبيني بعد أعتذر له بطرش له مسج وخلاص مريم: سبحان الله ما تنحرجين يوم تسبين الريال بس تنحرجين تعتذرين له عاليه ردت ظهره على الكرسي وسكتت مريم: الحين بتيب البشكاره بلاليط وكرك حطي لج وكلي أكيد من أصبحتي ما كلتي شي أونج زعلانه عاليه: وبتم زعلانه لين ما تقولين لي مريم: بالطقاق عاليه: افا ! مريم: عاليه اذا بتمين تصدعين راسي روحي غرفتج صارلج فتره مستويه ياهل عاليه: ما بروح ابا آكل مريم: زين قومي توضي عشان تصلين بعدين تاكلين يالس يأذن عاليه وهي تقوم: إن شاء الله قامت تتوضا بعد ما خلصت سمعت صوت سيف برا قررت أنها ما تطلع لين ما يروح عشان ما تعتذر منه ومالها وجهه أصلا تشوفه سيف: مشكوره عموه وما قصرتي من متى أتحلم في بلاليطج مريم: لا تشكرني ولا شي كم سيف عندي تآمر أمر الود ودي اطرشلك أكل دام ما تبا ترد تسكن عند أبوك سيف: لا تعبين عمرج عندي طباخ في البيت شو فايدته بس نفس بلاليطج محد يسوي يلا أنا بستأذن قلت بنزل أسلم عليج وعلى ابوي على السريع قبل الصلاه بس شكلي ما بلحق عليها بروح أصلي في المجلس مريم: ما تقصر ابوك محد طالع والحين بخلي وحده من البشاكير اطلع لك طبقة البلاليط برا تحطها في سيارتك سيف: مع السلامه مريم: بحفظ الرحمن أول ما طلع طلعت عاليه من الحمام مريم: كل هذا وضوء عاليه: هيه مريم: أعرف أنج منخشه عشان ما تعتذرين روحي يلا تأسفي له عاليه: خلاص راح المره اليايه إن شاء الله مريم: بعده راح المجلس يصلي عاليه: انزين بصلي وبعتذر مريم: لو ما تأسفتي له اليوم ما بسامحج عاليه: مااامااا !! مريم طنشت بنتها وراحت غرفتها عاليه افف اروح له الحين واعتذر له ونحن بروحي على الاقل الاحراج اقل ولا قدام امي راحت المجلس شافته محد لفت بتطلع سمعت صوت باب الحمام ينفتح فكرت تشرد وتقول لامها ان هي راحت تعتذر له وهو كان محد سيف: لابسه ابيض عروس ماشاءالله عاليه تحس بعصبيه من تعليقه مع احراج على اللي استوى أمس وفي نفس الوقت مستثقله الاعتذار عاليه: عروس مب عروس ما يخصك سيف: شو تبين أنتي ألحين عاليه فجأه انحرجت وبدت تضغط على اصابع ايدها اليسار بكف ايدها اليمين: أحمم أابا أعتذر على الكلمه اللي قلتها أمس سيف: اعتذارج مب مقبول وانقلعي عاليه ضغطت على صبوعها زياده بس هالمره من العصبيه: انقلع! ها اسلوب تتكلم فيه وانا يايه اعتذر اصلا أنا أمي مطرشتني سيف: مبروك تفضلي -وبغياض- انقلعي عاليه بعصبيه: ما بنقلع على قولتك شو بتسوي؟ بقعد هني أنت مب عايبنك أطلع سيف قرب منها ومسك ايدها اليمين يبعدها عن ايدها اليسار:بتكسرين صبوعج وبعدين لهدرجه تحبين اليلسه وياي وما تبين تطلعين خلاص يلسي عاليه فجأه حست دقات قلبها زادن لدرجه أن تحس قلبها يدق في اذنها، سحبت ايدها من ايده بتوتر: أنت مب ويه اعتذار ووطلعت برا بسرعه . . . انتهـى | ||||||||
|
| |
|
08-10-18, 10:07 PM
| #14 | ||||||||
| مراقبة عامة ومشرفة منتدى الروايات المنقولة
| الـجزء الـ 11 . . بـدايـة أسبـوع جـديـد جالسه تفطر وفي نفس الوقت تشتغل على اللاب توب مالها، عندها اجتماع مهم الصبح ومتوتره جداً بسبب تأخرها في الشغل سعيد: كلي أول بعدين سوي اللي تسوينه … يا بنت … عاليه أكلمج عاليه توها تنتبه: هلا عمي كلمتني سعيد: أقولج افطري أول بعدين كملي شغلج عاليه وهي تقوم وتسكر اللاب توب وتحطه في الشنطه: خلاص أصلا خلصت الحمدلله، يلا مع السلامه سعيد: بحفظ الرحمن وطلعت ركبت سيارتها وتوجهت إلى مقر عملها. أول ما وصلت ودخلت مكتبها حست بسعادة، اشتاقت له تحب شغلها جداً ومحد طايع يفهم هالشي عبالهم حبها لشغلها حب مادي فقط ما يعرفون أن لشغلها فضل كبير عليها معنوياً كذلك. شوي و سمعت صوت حد داخل مكتبها رفعت راسها وبابتسامه: أهلاَ مهندس محمود م.محمود: أهلاً بست الكل، أزيك؟ الغيبة دي كُلها ليه؟ عاليه: بخير الحمدلله والله ظروف خارجة عن أيدي بس رجعتلكم م.محمود: الحمدلله أهم شي رجعتي بالسلامه نورتينا المكتب من غيرك مش حلو عاليه: مشكور ما تقصر مهندس م.محمود: يلا با يش مهندسه جاهزه للعرض عاليه وهي تقوم وتشل أوراقها: طبعاً جاهزه توجهت لغرفه الاجتماعات اليوم بيكون العرض الأخير لتصاميم أول مجمع سكني يكون بتنفيذ الشركة بالكامل يعني بيكون باسمها مع المهندسين المساعدين أول ما دخلت شافت فيصل موجود"شكله حاضر بدال أبوه"، توترت ويتها ضيقه في نفس الوقت ما كانت تبا تشوفه بعد موضوع الخطوبه في هالوقت ولا في هالمكان كانت تبا تتفاهم وياه بروحهم، وفي نفس الوقت معصبه ما تبا تشوفه بعد ما تجاهل اتصالاتها واكتشفت أنه مسوي لها بلوك حست بنظراته عليها رفعت عينها وشافته انصدمت بنظراته حقها نظرات مليئة بالاحتقار والدونيه "أنا شو سويت له؟" كان المفروض أعرف سبب الضرابه من أمي بس كله من حركة سيف السخيفه نستني السالفه كان متوقع دخولها وتوتر يوم شافها تأخرت بس أول ما دخلت رجع له الحقد من جديد، جميله وناجحة ما ينكر، بس انصدم فيها انها مطلقه وما قالت له. يمكن لو قالت له قبل ما يخطبها كان قدر يتفهم بس ليش تخش عليه شي نفس جيه. يكره الاستغفال ويكره ياخذ شي مستعمل. كان يباها زوجة له عشان تزيد مكانته الاجتماعيه هو رجل الاعمال وزوجته المهندسه. لكن للاسف ! طول ما هي كانت تعرض ما كانت واعيه هي شو يالسه تقول. كانت تقول اللي حافظتنه بدون تفكير. وإذا أي حد من مجلس الإدارة كان يسأل سؤال كان ترد باجابات مختصره مما خلى المهندس محمود يدخل في بعض الاجابات عشان ينقض الوضع وهو مستغرب الحاله اللي فيها عاليه واللي زاد استغرابه أن أول ما خلصت العرض على طول طلعت مما خلاه في موقف محرج وقرر أنه يعتذر لهم ويبرر تصرفاتها بأنها مريضه أول ما وصلت المكتب هاربه من الوضع اللي كانت فيه شافت ظهر ريال قاعد ينتظرها في مكتبها . . . بإحباط: يعني مافي أمل لو 1%؟ أحلام: لا للأسف، أصلاً ما كان الموضوع في بالي، يمكن خيره ما نعلم د. بدر: بس يا أحلام هذي فرصه لا تعوض. تعرفين هي وايد شروط للقبول بس لجنة القبول تغاضوا عن أشياء وايد عشاني أحلام بإحباط مماثل: عاد شو اسوي ان شاء الله تحصلون غيري د. بدر: ما اظن ما في نفسج أحلام توترت "يالغبيه شو فيج قصده على صعيد العملي والعلمي لا تتحمسين": لا إن شاء الله بتحصلون اللي أحسن عني د. بدر: أنزين شو اسباب رفض الوالد؟ ممكن أكلمه يمكن يقتنع مني أحلام: أحمم الوالد متوفي واللي رافضين أخواني وأمي د. بدر باحراج: السموحه ما كنت أعرف الله يرحمه ويرحم أموات المسلمين أحلام: أمين د. بدر: أنزين عادي أكلم واحد من اخوانج بخصوص هالموضوع أحلام: أخاف ينحرجون منك ويضطرون يوافقون بغير اقتناع لان حد كلمهم د. بدر: اللي أثار استغرابي في الموضوع أن يوم اطلعت على اوراقج وقريت الاسم اذكرت ان أحدى الاقارب درس وياي أول سنه لغة في الخارج وكنا على تواصل أول سنوات الدراسه حتى انتقل إلى منطقه أخرى لانه تخصصه غير أحلام باستغراب: أقارب! محد من اللي يقربون لي درس برا د.بدر: متأكده ما عندكم حد درس برا طب أحلام "ياربي يالفشله عن يكون يقصد علي": عندي أخوي درس برا طب علي د. بدر باستغراب: علي أخوج ؟؟؟ أحلام: هيه أخوي ما كنت أعرف أنكم درستوا أول شي مع بعض أو تعرفون بعض د. بدر بسعاده: والله حتى أنا ما توقعت ولا 1٪ أنه يكون أخوج. وشو أخباره عرس ولا بعده؟ أحلام: هيه تزوج أول ما رجع وعنده ولد د. بدر: ماشاء الله ، دام علي أخوج فصعب اقناعه جربت من قبل ما ضبطت أحلام: في شو جربت؟ د. بدر: جربت قبل اقنعه انه يتزوج وايب حرمته وياه بس ما طاع قال ما ابا اعذبها غربه وسالفه على قولته واحد يتمرمط ولا اثنين أحلام: هيه أذكر هذيج الفتره حتى الوالده كانت تقنعه أن تزوج وخلها تدرس وياك هناك ما رضى د. بدر: لو ما بيكون أحراج ممكن لو تعطيني رقمه حاب نرد نتواصل ويا بعضه أحلام: لا أحراج ولا شي د. بدر: خلاص طرشيلي الرقم على الواتس اب أحلام: إن شاء الله -وقامت- يلا دكتور عن أذنك ضيعت وقتك د. بدر: يفداج حس باحراج كيف جيه قال شو بتقول عني الحين ولا واخوها يعرفني أحلام انحرجت من كلمته ما عرفت شو تقول" يمكن من وناسته لان عرف ان علي اخوي" وطلعت . . . أول ما وصلت المكتب هاربه من الوضع اللي كانت فيه شافت ظهر ريال قاعد ينتظرها في مكتبها استغربت منو اول ما لف صوبها بصدمه: سالم؟ خالي فيه شي يدوه فيها شي ؟ سالم وقف: سلمي اول شي ومحد فيه شي عاليه راحت وقعدت في الكرسي اللي قدامه حسيت أنها بيكون الوضع شديد الرسميه لو قعدت خلف مكتبها عاليه: السلام عليكم شحالك؟ اسفه بس مب من عوايدك أول مره تيني المكتب سالم: وعليكم والسلام عاليه: تبا قهوه شاي عصير ؟ سالم: ما ابا شي انا ياي اكلمج في موضوع عاليه: لا ما يستوي لازم تشرب شي؟ قهوه على الاقل؟ سالم بنرفزه: تعرفين أني ما اشرب قهوه عاليه باحراج: سوري والله ما كنت اعرف سالم: هه ولا يهمج عاليه قامت راحت لزاويه فتحت الثلاجه وطلعت غرشه ماي وحطتها قدامها وردت قعدت المكان اللي كانت فيه سالم مسك الغرشه وشربها مره وحده من التوتر عاليه باستغراب من حاله سالم: سالم فيك شي ؟ سالم بضيق: عاليه انا خطبت ووافقوا علي عاليه باستغراب من ضيقته وفرحه: صدق على البركه ومنو سعيده الحظ سالم: وعادي عندج؟ عاليه استوعبت الحاله اللي فيها سالم ومالها خلق فقررت تستهبل وتستغبى يمكن يصحى عاليه: لا مب عادي عندي وايد استانست اخيراً بيستوي عندنا عرس سالم بعصبيه: عاليه انا خطبت كرده فعل يوم انخطبتي وما توقعت بيوافقون بس وافقوا علي عاليه وقفت متوتره بتروح تيب لها ماي ما تعرف شو تقوله يوم شافها قامت مسكها من ايدها: عاليه رفضي اللي خطبج وانا مستعد افركش الخطبه اصلا البنت مب من الاهل عادي ما بيسبب احراج عاليه مطت ايدها من ايده: سالم انت صاحي شو يالس تقول؟ عادي عندك تكسر خاطر بنت ما تخاف من حوبتها سالم بصدمه: هامتنج البنت؟ وانا ؟ عاليه: وأنت شو؟ سالم أفهم هذا مب حب هذا شفقه واللي يالس تسويه عيب وحرام سالم راح تقدم ووقف قدامهها ما يفصل بينهم غير سنتيمترات قليلة بعصبيه: مب على كيفج أنتي تحددين هالشي عاليه: سالم هالحب اللي انته تقوله ما ياك الا بعد الحاله اللي يتني ولاني كنت في بيتكم هذا شفقه، اللي يحب ما ينقد كل شي في محبوبه ويحاول يغيره اللي، يحب يحب اللي يحبه بعيوبه قبل حسناته سالم: عشان مصلحتج كنت ابا اغيرج اللي يحب يبا يشوف محبوبه باحسن صوره عاليه: عشان نفسك مب عشاني وهالصوره اللي تقول عنها احسن احسن بالنسبه لك مب بالنسبه لي عاليه ردت على ورا ورحت قعدت على مكتبها: ولو سمحت هذا مكان عمل مب مكان أمور شخصيه تقدر تتفضل سالم تم واقف لثواني وبعدها طلع اول ما طلع سندت راسها على الطاوله بتعب "اللي يالس يستوي وايد علي والله وايد علي حرام عليهم" قررت تقوم تتوضى وتصلي الضحى. تحتاج طاقه ودفعه معنويه عشان تكمل باقي يومها في الشغل تبا ترد البيت بس ما تقدر هذا اول يوم دوام بعد اجازه طويله . . . توه واصل مكتبه من بعد راوند طويله على مرضاه، شاف تلفونه لقى اتصال من رقم غريب طنش الرقم فتح المسجات لقى مسج من أحلام " علي مديري الدكتور بدر طلع يعرفك وطلب رقمك مني وعطيته إذا كلمك بخصوص موضوع الدراسه ما يخصني هو قال أنك كنت زميل دراسه في سنة اللغه حقكم" ضحك في خاطره على أخته وكيف تحب داري خواطر اللي حوله وما تحب حد يفهمها غلط. يخاف عليها أكثر عن الصغيره لأن نحن في الزمن الطيب والحياوي مأكول حقه رد يتصل على الرقم الغريب من الممكن يكون بدر . . . على نهايه الدوام قامت تشل أغراضها فهي ما صدقت أن يخلص دوامها تبا تشرد البيت تحتاج حضن شبريتها لكن تجري الرياح بما لا تشتهي السفن فهي رأت من زجاج مكتبها أن فيصل متوجه لمكتبها حاولت أن تلبس لباس الثقه وقفت ورفعت راسها أول ما دخل قبل ما يتكلم: تفضل أستاذ فيصل في شي الدوام على وشك الانتهاء فيصل بابتسامه على جنب: أستاذ فيصل! محترمه والله انصدمت: نعم؟ فيصل: الله ينعم عليج والمحترم يكذب على الناس ويخليهم يخطبون عمياني! عاليه: كذبت؟ في شو كذبت فيصل: بموضوع طلاقج ولا عبالج اني غشيم وما بعرف عاليه حست بهبوط: انا ما كنت اعرف انك ما تعرف ما اظن في شي يخفى عليك بعدين الطلاق مب عيب وانا اطلقت قبل العرس فيصل: وليش اطلقتي من ولد عمج في فتره الملجه؟ بعد ما شبع منج ليش فرج عاليه انلجمت من مفرداته ما عرفت شو ترد خنقتها العبره وما تبا تصيح قدامه وما تبا تصيح أصلاً خلاص تبعت نشفت دموعها فيصل: ولا قلتي تستغليني لان عارفه محد بيرضى فيج عاليه: استغلك ! أنتو منو مسلطنكم علي وشلت اغراضها وطلعت بسرعه من المكتبه هاربه لسياراتها للبيت اول ما ركبت السياره حست بدموعها تتجمع في عيونها " ما بصيح ما بصيح" شغلت الاف ام تسمعهم وتلهى ساقت بسرعه فائقة ما همتها الردارات أهم شي توصل البيت وتختلي بنفسها ما تبا تشوف اي حد لكن كما يقال المصائب لا تأتي فُراده ما انتبهت لسياره اللي طالعه من البيت بسبب تشكل الدموع في عيونها وسببت لها رؤيه ضبابيه مع صوت الاغاني الصداح من الاف الام ما سمعت الهرن حست بضربه في السياره غمضت عيونها ما تبا اعرف شو دعمت وما تبا تنزل من السياره نزل من سيارته بكل عصبيه هل تتعمد دعمه فواضح ان الدعمه متعمده لم تكن بتلك القوه طفوليتها اصبحت لا تطاق "شكلي صدق باخذها وبربيها" فتح الباب بكل عصبيه سمع مقطع من الاغنيه العاليه "ظالم ولكن في القلب لسى هواك" سيف بصريخ: سبحان هو الظالم وأنا اللي تدعمين سيارتي جان دعمتي سياره فيصل اللي هواه بعده في قلبج ما شاف منها أي رد انصدم، يمكن تضررت من الدعمه دقت راسها واغمها علىه!ا نزل عمرها شاف راسها على السكان وهي بدون حركة . . . انتـهـى | ||||||||
|
| |
|
22-10-18, 10:25 PM
| #15 | ||||||||
| مراقبة عامة ومشرفة منتدى الروايات المنقولة
| الجـزء الــ 12 . . نزل من سيارته بكل عصبيه هل تتعمد دعمه فواضح ان الدعمه متعمده لم تكن بتلك القوه طفوليتها اصبحت لا تطاق "شكلي صدق باخذها وبربيها" فتح الباب بكل عصبيه سمع مقطع من الاغنيه بصوتها العالي "ظالم ولكن في القلب لسى هواك" سيف بصريخ: سبحان الله! هو الظالم وأنا اللي تدعمين سيارتي جان دعمتي سياره فيصل اللي هواه بعده في قلبج ما شاف منها أي رد انصدم، يمكن تضررت من الدعمه دقت راسها واغمى عليها!ا نزل عمرها شاف راسها على السكان وهي بدون حركة حس بخوف اتجاها، بصوت شوي عالي: عاليه .. عاليه مسكها من كتفها وردها على ورا، شاف الدموع تارسه ويها ومحمر من البكاء سيف بخوف: بسم الله شو فيج؟ شو مستوي؟ عاليه أخيراً فتحت عينها فهي ما كنت تبا حد يشوفها بهذا المنظر: مافيني شي خلوني في حالي، شو تبون مني؟ تراني تعبت خافوا ربكم فيني أنا يتميه سيف بخوف متزايد وعصبيه: في حد مسوي لج شي؟ تلكمي؟ عاليه: حد؟ ليته شخص واحد سيف: لا انتي فيج شي بروح ازقر امج تشوف شو فيج عدل وقفته عشان يروح يزقر امها لكن حس بايدها تمسك ايده سيف لف عليها باستغراب وسكت عاليه بترجي: دخيلك لا تقول شي حق امي انا بدخل من ورا وبروح غرفتي سيف استغرب من حركتها لا هذي اكيد فيها شي سيف: انزين والسياره منو بيصلحها عاليه: اي سياره؟ سيف:سيارتي اللي دعمتيها عاليه: عدلها وطرشلي بكم بطرشلك الفلوس سيف: لا عادي مسامحنج هالمره عشان صياحج حشى قول حد ميت عندج عاليه سكتت ونزلت راسها سيف: بتصيحين مره ثانيه؟ بعده عندج دموع ماشاء الله عاليه: سيف بلا سخافه أنا بروح بيت يدوه سيف: من شو تشردين ؟ عاليه رفعت حاجبها: ما يخصك! ما تلاحظ أن صارلك فتره ماخذ علي سيف بمزح: انتي اللي عاقه عمرج علي عاليه تعرف انه يمزح حتى لو ما يمزح كلامه ما ياثر عليها لكن عورتها الكلمه وردت تتشكل الدموع في عينها يت بتسكر باب السياره عشان تروح وبصوت يبين انها بتصيح مره ثانيه: ممكن تروح خلاص سيف: ما بروح؟ شو مصيحنج ابا اعرف عاد الحين وتكتف ينتظر إجابتها سمعوا صوت ثالث وراهم : منو يصيح شو السالفه؟ سيف بعد عن السياره ولف صوب ابوه وببرود: عاليه تصيح ما ادري شو بلاها سعيد تقدم بسرعه صوبها بقلق: شوفيها بنتي؟ عاليه بعد ما سمعت صوت عمها سعيد ما قدرت تستحمل نزلت وعقت عمرها في حضنه استغرب سيف من عاليه هو صحيح ابوي مربنها بس هي تستحي شوي من ابوي سعيد تملكه الخوف هذي ثاني مره تعق عمره في حضنه وتصيح هالصياح عاليه من بين شهقاتها: ليش كلهم جيه يسون فيني انا شو سويت فيهم؟ ولا واحد فيهم انا اللي سعيت وراهم كلهم هم ايوني وبعد يجرحوني سعيد: اذكري ربج يا بنتي منو زعلج؟ عاليه: كلهم عمي كلهم سعيد استغرب من حاله عاليه، لف على سيف: انت ليش واقف هني مب كنت رايح تيب اهل امك من المطار سيف: ها! هيه صح بروح مع السلامه سعيد ابعد عاليه عنه: تعالي بنروح المجلس عن تشوفنا امج . . فـي الـمــطــار أول ما شاف حرمه تتقدم نوحه يأخذ من ملامحها القليل توجه ناحيتها مسرعاَ فأمه من بعد طلاقها من أبيه تزوجت واستقرت في الخـارج مع زوجها وأهل زوجها صحيح عاش عند والدته حتى سن الظ،ظ¤ سنه لكنه لم يأخذ من أطباعها شيئاً أسرع خطواته نحوها وأول ما وصل قبلها على رأسها كم يتمنى أن يأخذ ولدته بالاحضان لكن يخجل أن يفعلها أمام الناس سيف بترحيب: حيا الله أهل أمريكا توها نورت البلاد لو أن أسبوع زياره ما يكفي بس يلا أحسن من ولا شي أم سيف بسعادة: عاد نحن قصرنا ما زرناكم أنتو ما تيون! عنبوه أختك من عرست ما يتني أبد هناك وأنت بعد سيف: تعرفين أني ما أدانيها أم سيف: حتى ولو بس ألحين مب وقت عتب سيف باستغراب: ألا محمد وين؟ أم سيف: أخوك ما قدر يحجز نفس حجزنا، باجر إن شاء الله ياي لمح زول رجلين يتشابهون في الملامح ومن خلفهم أمراءه وخلفها فتاه وطفلتين أحداهم زوج والدته والآخر شقيق زوجها تقدم منهم وسلم بصوت عالي: السلام عليكم والحمدلله على السلامه بو محمد: الله يسلمك شحالك يابو سعيد سيف: بخير وسهاله وتقدم من الآخر وسلم عليه بو مها: وأخبار الوالد سمعت أنه مريض سيف: بخير الحمدلله صحته طيبه .. يلا تفضلوا بو مها: مشكور ما قصرت تعرف وياي الاهل وما تسد السياره وأن أصلا حاجز سياره من الفندق، اترخص عنك سيف: افا تروح فندق وبيتي موجود ترا بيتي يسدكم كلكم وانا بكون عند ابويه بومها: تسلم يابو سعيد لكن الاهل ما بيرتاحون يلا مع السلامه سيف: بقبلها منك بس ما تردني باجر عشاكم عندي بومها: ليش الكلافه؟ سيف: لا كلافه ولا شي نحن أهل وهذا أقل من واجبكم بومها: ما تقصر ياسيف وخذ عائلته الصغيره وتوجه لسيارته وكذلك سيف خذ أمه وزوجها في سيارته ليوصلهم لمنزله فهو يرفض رفض تام أن تقيم والدته في فندق ومنزله موجود . . أحلام بتأفف: في حد يسوي عزيمه عشا نص الاسبوع أم علي: يعني هم ياين ألحين متى تبينهم يسونها يوم يروحون؟ أحلام: انزين عندنا دوامات ريم: والله هم ما قالوا سهروا لين الفجر أحلام: هبله أنتي متى بنرد عشان نتلبس عشان نروح وبعدين نرد ونجهز لدوام ثاني يوم ريم: الله واكبر شاله هم ها كله تراها عزيمه عشا مب عرس بعدين أنا اللي عندي دراسه ما تأففت أم علي: طبعاً ما بتتأففيفن مب شي فيه هياته ريم: ألحين العزيمه هياته! بعدين أنا متحمسه لاني بشوف مها من زمان عنها أحلام: أنا باجر بعد الدوام بروح الصالون اسوي شعري ما فيني استشوره في البيت تبين تي لا تتاخرين وتسولفين ساعه قبل ما تطلعين من الجامعه ريم: طبعاً ابا أحلام: انزين أم علي: شوفوا حرمة أخوكم يمكن تبا تي وياكم ريم: بطرشلها أم علي: وقوليلها تشوف أخوها إذا محتاي مساعده في العزيمة عاد هو ريال شدراه في هالامور الله يهديه ما اعرف متى بيعرس هالولد ريم بهبل: ما يبالها حرمه هالامور بفلوسه يروم يسوي احسن عزيمه أم علي: انتي ياهل شدراج ريم: مب ياهل أنا ترا عمري 22 سنه أحلام باستهزاء: خفي علينا يا الكبيره نزل علي من فوق باستعجال علي: أنا مروح تأمرين على شي أمايه؟ أم علي: لا يا حبيبي ما ابا شي وين رايح؟ علي: رايح أشوف صديق قديم من زمان ما شفته من أيام الدراسة أم علي: هيه انزين يابوي انتبه على دربك علي: ان شاء الله مع السلامه ريم بلقافه: منو هالصديق علي: ما يخصج ريم بقفطه: افا يمكن أعرفه انزين علي باستغراب: نعم؟ ريم: اتمصخر وياك علي: بعد بقول لو أحلام تقول يمكن أعرفه بقبلها بس أنتي شو دخلج أحلام: باستغراب شودخلني أنا؟ علي: لاني رايح أقابل بدر على ما أظن اللي تشتغلين وياه أحلام بتوتر: هييه انزين، أنا بقوم اشوف شو بلبس باجر وقامت راحت غرفتها . . فـى أحـدى الـمـطاعـم جالس يتريا، مسك تلفونه يشوف الساعه لا إرادي دخل الواتس آب، بحث عن اسمها ولقاه وطرش لها "اليوم بقابل أخوج" استغرب من نفسه ليش يقولها قرر يمسحها لكنها قرت الرسااله "هيه قالي توه، ما كنت أعرف أن علاقتكم كانت قويه" رد عليها:"هي ما كانت بتلك القوه، يمكن كانت بتكون قويه لو ما حولت تخصصي في آخر لحظة" " ليش دكتور كنت بتدرس طب؟" رد عليها: " هيه والله كنت بدرس طب بس غيرت تخصصي للبايلوجي" "أها، يمكن خيره ما تعلم" رد عليها: "صحيح يمكن خيره، يعني لو درست طب ما كنت بدرسج ومن بعدها نشتغل ويا بعض" "صح بس حتى نكون منصفين أنا كنت أشتغل مع دكتور سلطان في بحوثه" رد عليها: "الحمدلله أنه أستغنى عنج عشان تشتغلين ويانا" استغرب من نفسه أنا شو يالس أقول أخاف أحرج البنت بمزح "بس لو تبين تشتغلين عند دكتور سلطان ماعندي مشكله نردج عنه" ردت عليه "على شو كلها شهر وبروح" ما أحب يطول الموضوع ولمح زول مب غريب عليه "الله يوفقج" وصل له الرد سريعاً "أجمعين" وقف عشان يسلم عليه وبعد السلام الطويل والسؤال عن الاخبار: عاش من شافك دكتور بدر بدر: عاشت أيامك دكتور علي لو أنها الدكتور مالتك غير عن مالتي علي: يا رجل عشان ما نتضارب شد حيلك وكون برفسور بدر: والله كنت مفكر أني أقدم على دكتوراه علي: حليلها أم شيخه تعبت من الغربه بدر: أحم أنا وأم شيخه انفصلنا علي: أفا ! بدر: تعرف يا علي أن نحن ما كنا على اتفاق وأن الانفصال كان بيستوي آجلاً أم عاجلاً علي: بس أنا قلت ممكن وفاه شيخه تحنن قلوبكم على بعض وتتمسكون زياده بدر: ما جمعتنا وهي موجوده بتجمعنا وهي محد علي: الله يعوضك بدر: أمين ، أنزين قولي بس عندك ناصر ؟ وين اللي قال يبا عشر علي بضحكه: بعدك تذكر! الثاني ان شاء الله في الطريق . . انتـهـى أشوفكم في الجزء القادم إن شاء الله بيكون هالويكند | ||||||||
|
| |
|
28-10-18, 01:53 AM
| #16 | ||||||||
| مراقبة عامة ومشرفة منتدى الروايات المنقولة
| الجـزء الـ 13 . . . اليـوم الثـانـي قاعدة أتابع آخر الأخبار في الصاله وتشرب الشاي الأحمر بالنعناع من بعد الغداء قطع عليها اندماجها سلام ابنتها عند دخولها للمنزل مريم: وعليكم السلام والرحمة، أحط لج غدا؟ عاليه: لا امايه ما أبا بس ببدل وبردلج، أباج في موضوع مريم: شو موضوعه؟ عالية: دقايق بس بصلي العصر وببدل وبنزل مريم: أنزين لا تتأخرين ذهبت عالية لغرفتها، علقت العبايه والشيله وتوجهت لغرفه الملابس واختارت بيجاما مريحه قررت تلبس بيجاما وتاخذ راحتها لأن سعيد غير متواجد في المنزل اليوم في العزبه بسبب اعتدال الجو وعلى ثقه تامه أن سيف لن يأتي للمنزل في اليوم لديه عزيمة هذا ما فهمته من سناب أخته سلمى أن أمهم متواجدة في الإمارات وستقام عزيمة العشاء على شرفها بعد ما انتهت نزلت تحت لصاله حتى تبدا تفاتح أمها بالموضوع الذي فكرت بتاخذه أمس كانت تفكر فيه من فتره وشجعها عمها سعيد بالأمس عندها حدثته بالذي حدث فجلسوا بعدها ساعة أخرى يتحدثون وعرضت عليه الفكرة ووافقها وعرض مساعدته كذلك رأت جالسه كما تركتها قبل قليل، توجهت إليها وجلست على الطاوله لتواجها مريم: ماشي كراسي تجلسين عليهم؟ عاليه: شي بس أباج قدامي وأنا أكلمج مريم: وابوي! تعالي يلسي عدالي أنزين قومي من على الطاولة عالية وهي تقوم وتجلس بجانبها: قمنا خذت أحدى المخدات ووضعتها في حضنها وتلعب بأطرافها مريم: يلا قولي شو عندج عالية بتوتر: ماما أنا أبا ورث أبويه أبا أكسر الوديعه مريم بصدمه لفت على ابنتها بكامل جسدها: نعم!! وليش إن شاء الله وحق شو، أنا مقصره في شي وياج؟ شي ناقصنج؟ عالية احتضنت أيدي أمها بين كفوفها: ماما أنا ما أباهم لأن شي ناقصني أباهم لأني أبا أفكر بمشروع مريم: شو مشروعه؟ عن يكون مطعم ولا كوفي شوب؟ عالية ضحكت: لا هذا ولا هذا مريم: عيل شو مشروعه عاليه: الله يسلمج افكر افتح لي مكتب استشارات وتصاميم هندسية مريم: وليش؟ إذا تبين تشغلين الفلوس أنا أقول اشتري xxxx أحسن لج بدال ما تخسرينهم عالية: ماما أنا ما أبا جيه أنا أبا أسوي لي هالشي مريم: يعني بتخلين شغلج عشانه؟ عاليه: أول شي لا بخليه يوم ما أحتاجه خلاص مريم: والله يا عاليه ما أعرف شو أقولج عاليه: قولي أنج موافقه مريم: الفلوس فلوسج مالي حق وأنتي كبيره بس تراهم مب شويه عشان تخسرينهم، أنزين شو رايج أنا أعطيج من عندي وإذا نجح المشروع ومشى تردينهم حقي عاليه: لا أنا أباهم بفلوسي أذا تبين تدخلين شريكه ماعندي مشكله مريم: والله يا عاليه عطيني وقت أفكر، أنزين سويتي هذا دراسه جدول ما اعرف شو اسمه عاليه: قصدج دراسة جدوى، لا بعدني ما سويت قلت أقولج أول مريم: خليني بفكر وبشاور بوسيف عاليه: أنا كلمته أمس ولو ما لقيت تشجيع من عنده جان ما فتحت الموضوع وياج مريم: والله يا عاليه رد أقولج الفلوس فلوسج بس هالمشروع مب هين عاليه: وأنا قدها مريم: خلاص سوي اللي قلتي عليه بعدين نرد نرمس في الموضوع عاليه بوناسه: إن شاء الله . . . فـي مـنـزل سيـف ذو الطابع العصري في أحدى المجمعات السكنية الفخمة سيف بشكر: مشكوره يا أم ناصر تعبانج ويانا سلمي وهي تمسك بأيد والدتها الجالسة بجانبها أكثر: ولو لأجل عين تكرم مدينه أم سيف: والله أنا ما أعرف ليش يا سيف مسوي هذا كله سيف: تستاهلين زود مب من قدركم أم سيف: بس محد غريب سلمى: أنا بقوم أتلبس قبل ما أي ناصر ويا عموه ويشغلني وانشغل بالناس أم سيف: يلا أنا شوي وبلحقج بس بكلم أخوج أشوفه ليش غير رايه ومب ياي الامارات سلمى: انزين سلمي عليه وقوليله أني زعلانه عليه آخر مرة مكلمني يوم كنت في لندن أم سيف: ما عليه يا حبيبتي أخوج هذا آخر سمستر حقه وبيتخرج عشان جيه مشغول دقي له أكيد بيرد عليج سيف: ولو نحن أكبر عنه المفروض هو اللي يسأل أم سيف: ما عليه عذروه أخوكم الصغير سلمى لتتجنب الحديث راحت لأحدى الغرف اللي حاطه فيها أغراضها عشان تتلبس سيف سكت لايريد إغضاب والدته بسبب أخيه الصغير انتبه لتلفونه يرن في مخباه طلعه طلع أبوه سيف: ألو السلام عليكم … بخير الحمدلله أنت شو صحتك؟ … الحمدلله آمرني …إن شاء الله بس اليوم مشغول باجر بمر عليك … مع السلامه أم سيف: أبوك؟ سيف: هيه أم سيف: في شو يباك ما يعرف أني عندك سيف: يباني في شغل وما يعرف أنج موجوده جان ما دق أصلا علي أم سيف: ولش ما قلت له أنه موجود سيف باستغراب: وليش أقوله -وببرود- ما أظن يهمه الخبر . . . وقـت العـزيـمـه فـي مـجـلـس الـرجال أحمد: إلا أقول سيف وينه أخوك؟ سيف: ما رد وياهم عنده دراسه يقولون أحمد: هيييه الله يوفقه سيف: أمين علي: إلا هو شو يدرس سيف: ولا أدري، أقول أحمد أحمد: نعم سيف: متى بتعرس؟ أحمد: نعم! أنت آخر واحد يسألني هالسؤال، يوم بتعرس أنت بعرس أنا سيف بضحكة: يا ريال شو فيك؟ القصد أن لقيت لك البنت المناسبه أحمد بغصب: خذها أنت لو عايبتنك سيف: ما ينفع آخذها وايد صغيره علي آحمد: يعني صغيرك عليك ما بتكون صغيره علي ترا ماشي وايد فرق بينا الا كم سنه علي بعد ما ضحك على آخوه: أنت شكلك مكتوب لك تاخذ صغيره سيف: ليش شو السالفه علي: الوالده تباه ياخذ بنت الخال سيف باستغراب: بنت خالك بنت خالك! أخت عبدالرحمن؟ أحمد بنرفزه: هيه هو في غيرها سيف: لا هذي مب صغيره وايد -سكت لفترة يفكر- على ما أظن قد ريم علي بفضول: أنزين منو هذي سيف وهو يأشر لرجل معطي باب المجلس ظهره لأنه يتكلم بالهاتف: بنته أحمد: وأنت شو دراك فيها سيف: شفتها وانا يايبنهم من المطار يا أنها حـ.. أحم حياويه خجوله أحمد رفع حاجبه: حـ.. حياويه! بعد ما تمقلت فيها وقيمتها تباني أخذها علي: بس خلاص سكتوا عيب عليكم عن حد يسمعنا سيف: وأنا شو قلت! علي: تراك مستوي مب صاحي هالفتره سيف: أنا! علي: هيه أنت وبعدين بدال ما تعزم على أحمد يعرس قول حق نفسك تراك في الثلاثين متى بتلحق تيب عيال أحمد: بسم الله! عن يكون روح أمي تلبستك سيف: هههههههه علي: أصلا أنا الغلطان اللي قاعد وياكم بروح أقعد ويا أبو حرمتك المستقبليه-وبغمزه حق أحمد- ونتناقل الأخبار بما ان نحن الاثنين دكاتره وعندنا عيال وانتو يالعزابيه قعدوا رواحكم أحمد: أصلا أنت غيران من عزوبيتنا لكنك ماتقدر تتلكم لأنها أخت الذيب اللي يالس علي وهو قايم ويضحك: الحمدلله والشكر . . . قاعدين على طاولة الطعام يتعشون مريم: ساره أحط لج سلطه زياده ساره: لا خالوه مشكوره مريم: تراج حامل شو فيج ما تاكلين عاليه: تقول ما تبا تمتن بسبب الحمل ما صدقت تضعف ضربتها ساره: محد طلب منج تردين عني مريم: نفس ما ضعفتي قبل بتضعفين بعدين أهم شي ألحين تغذيه الياهل اللي في بطنج ساره: لا تحاتين تراني آكل بس ما أقدر أكثر يضربني صاهر طول اليوم مريم: هييه أخس شي الصاهر وقت الحمل عاليه وهي تمد التلفون لساره: شوفي هالبنت اللي متصوره وياها ماشاء الله جميله ساره وهي تمسك التلفون عن عاليه: اللي على اليسار ولا اليمين عاليه: اللي على اليسار ساره: الثنتين حلوات بس ماشاء الله اللي عاليسار محلاها خليني أتوحم يمكن تطلع تشبها عاليه شلت التلفون من أيد ساره: أنتي حامل ببنت ولا قلتي لي !!! مريم: شو فيج عصبتي على البنت كأنج ريلها عاليه: لو سمحتي ماما أنا أهم من ريلها ساره: ههههه بسم الله شوفيج بعدني ما أعرف إن شاء الله أول ما أعرف أول وحده أنتي عاليه: قبل ريلح؟ ساره: قبله والله مريم: أنزين منو هذي عاليه: ما أدري شفتها كاتبه حي الله أهم أمريكا واللي فهمته من سناب سلمى مثل ما قلت لج أن طليقة عمي سعيد هني، هذي بنتها؟ مريم: لا ما أظن هي بس عندها ولد من زوجها تلاقينها بنت أخو ريلها عاليه: هيه ماشاء الله جميله ليش ما ياخذها أخو سيف ولا سيف دامها من أهلهم وحلوه مريم: والله عاد ما يخصنا، أنتي قلتي حق ساره في شو فكرتي ساره: هيه قالت لي خالوه، أنا من راي أن حد عنده خبره في هالمجال يساعدها عاليه: وأنا منو عندي في هالمجال يساعدني! بعدين محد طلع من بطن أمه يعرف كل حد تعلم وخذا خبرا سارة: بس أنتي نوعاً ما بديتي متأخر في هالمجال يعني المنافسه كبيره عاليه: أدري أن المنافسه كبيره وأنا ما قلت أبا أسوي شي كبير، على الاقل ثلاث إلى مشروعين في السنه يكفيني ويزيد وأول مشروع إن شاء الله بيكون بيتج ساره: أنتي حتى بعدج ما فكرتي جدياً في الموضوع، كم بتريا إن شاء الله لين ما أخلص بيتي بعدين حبيبتي أنا ما بدا مع شركة يديده ما تعرف عنها شي عاليه: أفا!! الأقربون أولى بالمعروف بعدين ما يخصج أنا قلت بسويه يعني بسويه مريم: عاليه لا تستبقين الأحداث وإذا أنتي وايد مأذنج شغلج استقيلي وقد راتبج بعطيج عاليه: لا ماما أنا أبا أسوي شي باسمي ساره: وييي على طاري اسمج نسيت أروج هالخبر في الجريده حاطين اسمج عاليه: اسمي!! ساره: هيه عشان ها اللي كنتي تشتغليت عليه فحاطين اسامي المهندسين مريم: وينه في أي جريده أبا أقراه ساره: ألحين بطرشله لج خالوه . . . أحمد: أنا بروح شوي وبرد علي: متى الله بيفكك من هالدواخه أحمد: الله يهدينا طلع برا عشان يدخن راح السياره يطلع مدواخه شاف وحده تتكلم بالتلفون، شعرها بتموجات البنيه واصل ظهرها بفستان ناعم أسود وكعب عالي أسود مرصع بكرستالات لفت صوبه لكن لم تنتبه لوجوده وكملت كلامها : sorry but I'm in vacation can you told him Maha will not be able to finish it before the the date he assigned … okay thank you أحمد: يعني هذي مها وصدق أنها مها سمع صوت يناديها يعرفه: مها مها مها: نوره أنا هني نوره: شو موقفنح هني جيه يمكن حد يشوفج من الريايل مها: لا عادي نوره استغربت من لا عادي بس طنشت يمكن مب محجبه: أنزين تعالي ما تبين تحلين مها: لا تعالي يلسي وياي برا حلو الجو تقدمت نوره كانت بتنورها الخضرا البلاسيه والقميص الابيض وجوتي قوتشي الابيض والاحمر والاخضر وشعرها الاسود الفاحم القصير نوره: أنزين تعالي هالصوب على الاقل لو حد طلع ما يشوفنا ظل أحمد يطالع نوره " طول شعرها، أصلا ليش قصته، وأنا ألحين شو دخلني بشعرها يالسه أفكر فيها بدال ما أفكر بالغزال اللي كان واقف توه" سيف: أحممد أحمد لف صوبه ورد يشوف لو نوره راحت بعيد خاف سيف يشوفها وهي جيه " افف ردينا لنوره بس نوره بنت خالي ما أرضى حد يشوفها جيه: أحمد: هاا !! سيف: تعال بو مها بيروح بيسلم عليك أحمد وهو يتقدم صوب سيف: إلا أقولك هو ما عنده غير بنت سيف: لا عنده ثلاث مها الكبيره بما أنه بو مها وثنتين توأم صغار ما أعرف شو اساميهم أحمد: هيه يعني بس بنات عنده الله يرزقه بالولد سيف بضحكه: تعرف أحمد على أنك أكثر واحد فينا رحت ورديت وشفت الدنيا إلا أن تفكيرك حتى أخس عن أبوي أحمد: عاد أنا شو قلت ألحين الله يرزقه بولد منو يكره يكون عنده ولد ومنو بيشل اسمه يوم بيكبر سيف: أقول أمش داخل وأنت ساكت عن يسمعونك حريم ألحين بياكلونك، وهذا أنا أباك تاخذ بنت أمريكا جيه تفكريك! أحمد بغرور: أصلا يحصل لها بنت أمريكا تاخذ الطيار أحمد سيف بمصخره: وأنا أشهد . . . أحلام قاعده في الزوايه مشغوله ومركزه على تلفونها سلمي: أحلام شو تسوين على تلفونج هالكثر منو تكلمين جيه؟ تعالي سولفي ويانا أحلام بتوتر: أحمم كنت أطرش ايميل ضروري ثواني وبلحقج سلمى: أيميل على الواتس آب؟ أحلام: أكلم الدكتور عشان يقولي شو أطرش في الايميل سلمى:أها، و أنتي عادي تكلمينه هالوقت ؟ أحلام بتوتر: شغل ضروري عشان جيه ولا هو ما بيكلمني سلمي: لا أقصد أن أوقات العمل خلصت وبعدج تشتغلين أحلام: هييه لا عادي إلا شغل بسيط سلمى: يا حيج أنا حتى أيميلي ما أشوفه إلا الصبح أحلام: هييه يلا نروح داخل . . . انتهـى | ||||||||
|
| |
|
12-11-18, 05:24 AM
| #17 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
| الجـزء الـ 13 . . . بعـد مـرور فتره من الزمن فـي غرفـتها مشغوله تجهز أغراضها لأنها بتروح تقعد لفتره في بيت جدتها بما أن أمها وزوجها بيسافرون لندن "اوفف أنا ليش ذابحه عمري جيه ترا أقدر أرد إذا نسيت شي" قطع اندماجها صوت تلفونها، لقت اتصال من بنت خالها نوال عاليه: يا هلا بالقطاعه نوال: أهلين بمهندستنا المشغوله عنا عاليه: والله أدري أني مقصره بس شو أسوي هالفتره مضغوطه لين طالعه عيني نوال: يعطيج العافيه حبيبتي أنا مب داقه أتشره أنا داقه أعزمج على ملجة سالم أنتي وعموه عاليه: ماشاء الله بالبركه الله يوفقهم ويتمم لهم على خير مره أول الحاضرين بس بدون ماما نوال باستغراب: ليش؟ عاليه: لانها مسافره لندن عمي عنده موعد مراجعه نوال: غريبه أبوي ما قال لنا ! إذا جيه الموضوع بنأجل الملجه عادي شو يضر تراها الا في البيت عاليه: لا لا لا لو ماما عرفت بتزعل بعدين الا ملجه إن شاء الله العرس تحدودنه على اللي يناسبنا ولا ترا بنزعل نوال: لا فديتج كله ولا زعلج يلا بسكر عنج عاليه: مع السلامه بحفظ الله أول ما خلصت المكالمه دقت على ساره عاليه: ساروووه تخيلي ساره: شو بسم الله مستوي عاليه: نوال دقت لي تعزمني على ملجه سالم ساره: أنزين! شو المشكله عاليه: ما ادري ساره: تراج أنتي ما بغيتيه الريال من يوم كنتي عندهم وهو يلحقج وانتي اللي صديتي والحين مب عايبنج عاليه: انا ما قالت مب عايبني وما عندي مشكله بس ما ادري ساره: صدق ما عرفنا لج شو تبين بالريال يوم قرر يخليج ويعرس ويشوف حياته الحين حلى في عينج عاليه: لا حلى ولا شي والله يوفقه ساره: انزين متى الملجه ؟ عاليه: تقريبا بعد عشر أيام ساره: انزين أمج محد؟ عاليه: هيه ما كانوا يعرفون، تصدقين خالي ما قال أن أمي بتسافر ساره: يمكن أمج ما خبرتهم ! عاليه: يمكن! بس ما أظن ساره: أنزين شو بتلبسين عاليه: ما أدري والله يصير خير لين وقتها يلا باي بسكر بكمل ترتيب ساره: بايات بعد ما خلصت تجهيز نزلت عاليه تدور أمها في البيت حصلتها في المطبخ الخارجي عاليه: ماما شو تسوين هني؟ صارلي نص ساعه أدورج مريم: أتأكد من كل شي قبل لا أسافر، عاليه لا تنسين شلي البشاكير وياج بيت أمايه وكل يومين مري على البيت شوفيه عاليه: إن شاء الله توصين كم مره توصين يوم تسافرين ترا حفظت كل شي من أول سفره مريم: أذكرج شو فيها عاليه: مافيها شي … إلا أقولج ماما نوال توها دقت لي ملجه سالم بعد عشر أيام وأنتي محد واستغربت ما كانت تعرف أنج محد مريم: هيه أنا ما قلت حق أخويه ما اباها يحاتي كلها سفره أسبوع عاليه: بس أنا قلت لهم وزعلت نوال أنج ما بتحضرين وكانت بتأجل الملجه مريم: لا تأجل ولا وإن شاء الله على العرس كلنا بنحضر بس الملجه برايها عاليه: بما أنها ملجة في البيت وبس أهل أفكر ألبس المغربيه اللي لبستها في عزيمه عمي سعيد فخمه وكاشخه وبسيطه مريم:والله لو أمني خاطري ما بتحضرين عاليه باستغراب: ليييششش؟ مريم: أنتي عارفه ليش عاليه: بالعكس لازم أحضر عشان يشوفون أن عادي عندي مريم: والله كيفج أنا هالفتره مب فاضيه . . . قاعده على مكتبها ثاني أسبوع حقها في وظيفتها الجديده وصل لها ستاند ورد قامت تشوف منو اللي مرسل لها واللي تذكرها أن كل معارفها رسلوا لها أول أسبوع لقت في البطاقه مكتوب: " مبروك الوظيفه الجديده وفقكِ الله" وفي النهايه مكتوب "د. بدر الـ " تسارعات دقات قلبها بعد ما قرت الاسم وهي غاضبه على نفسها لأنها أخذت عهد على نفسها أنه سيكون مجرد علاقه زماله وخصوصاً بعد ما رجعت علاقته مع أخيها "زماله يا أحلام وأنتوا كل يوم تسولفون في الواتس آب ! بس يعني عادي سوالف عاديه في أمور الحياه ! ما تكلمنا عن شي شخصي!" دخلت أحدى زميلاتها الجدد المكتب: الله منو مطرشلج هالورد الروعه ماشاء الله اللي يعزونح كثار أحلام: مديري السابق هدى: حليله فيه الخير أحلام: أكيد تعرفينه بما أن نحن كنا نفس التخصص في الجامعه هدي: منو؟ أحلام: الدكتور بدر هدى: الدكتور بدر!!!! اسميني ما أدانيييه كيف اشتغلتي وياها أنا درسني ما قدرت أتحمل أحلام ضحكت عليها: ليش؟ درسني أنا عادي هو بس شوي شديد هدى: شوي!! الا قولي وايد وبعد كان شايف عمره ما أدري على شو أحلام: يمكن على أيامكم بس على أيامي خفت هالشوفه هدى: دخيلج أي خف أخت اربيعتي تاخذ عنده تقول ذاك اليوم كان شوي وبيطرد بنت من الكلاس لأن تلفونها رن أحلام: هيه هو ما يحب حد يمسك تلفونه ويطلعه في الكلاس عادي معظم البنات جيه هدى: أنزين حليلها البنت أم وتحتاج تمطن على بنيتها أحلام: لو قالت له جان عذرته هدى: عاد مديرج الا بدافعين عنه أحلام: كان مديري! هدى: اللي هو أول ما طلعت هدى من مكتب أحلام مكست تلفونها، فتحت الواتس آب وطرشلت له رساله شكر على الورد رد عليها بـ" مب من قدرج تستاهلين زود وسمحيلنا على التأخير" أحلام:"ما تقصر دكتور" "صح دكتور يتشكون منك" بدر: "منو يتشكى؟" أحلام: "الطالبات" بدر:"ليش؟ شو سويت؟" أحلام:" على البنت اللي رن تلفونها في الكلاس" بدر:"عرفت منو تقصدين أنا محذر كذا مره بس استهتار بنات هالوقت" أحلام:" والله الشكاوي اللي عليك حتى من بنات زمان" بدر: " شو أسوي هم دلوعات يبون كل شي على الجاهز" أحلام:"حرام عليك!" بدر:" ليش أدافعين عن كل حد؟ دافعتي عني يوم يوم تشكوا مني؟" أحلام:" مب عن كل حد. وسامحني دكتور ما دافعت عنك" بدر:"ما هقيتها منج 😅" أحلام:" كنت أمزح وياك" بدر:"دوم أمزحي دخيلج" أحلام شافت الرساله ما عرفت شو ترد وفي خاطرها ياربي هل الدكتور من قبل جي ولا من بعد ما طلعت من عندهم . . . طلع من غرفته، اليوم إجازه ما عنده شغل ولا عنده رحلات ليومين وهو نازل من الدرج شاف ريم طالعه وماسكه كوب الكابتشينو بإيدها أحمد باستغراب: ريموه؟ أنتي ليش مب مداومه اليوم؟ ريم: بسم الله من وين طلعتي لي أحمد: من وين يعني. ليش مب مداومه؟ ريم: مالي خلق أحمد: لا والله، أقول قومي قومي تلبسي بوديج ريم: أحمد تراني مب ياهل في الجامعه أنا أحمد: وإذا في الجامعه ما داومين ؟ ريم: أنا الاسبوع اللي طاف وايد تعبت كان عندي تسليم بروجكتات فقلت أكافئ نفسي هالاسبوع وآخذ اليوم أوف أحمد: أونه أكافئ نفسي مصدقه نفسج ريم بتغير السالفه: أحمد شو رايك نطلع نتريق برا أحمد: أي ريوق ألحين الساعه 11 ريم: عادي brunch أحمد: مب فاضي لج أنا ريم: شو عندك؟ أحمد: ما يخصج ريم: لان ما عندك شي ، الله يخليك أنا أختك الصغيره بلييز حمودي أحمد: قولي حمود مره ثانيه وشوفي شو بيتسوي لج ريم: سووري يلا أنا بروح أتلبس ثواني وبنزل أحمد: على كيفج؟ أنزين يبي مفتاح السياره من الغرفه ريم وهي تركض تركب الدرج: أوكييييه وهو رايح الصاله يدوره أمه شاف البشكاره ماسكه المدخن وأدخن البيت أحمد: تشارلي وين ماما تشارلي: في روح مع درايفر أحمد: أها طلع تلفونه من مخباه واتصل على تلفون أمه، ماطول وهو ينتظر أحمد: السلام عليكم أم علي: وعليكم السلام أحمد:أمايه أنتي وين دورتج يوم قمت ماحصلتج في البيت؟ أم علي: بيت خالك تعال سلم عليه دامك في البيت أحمد: لين متى بتيلسين هناك؟ أم علي: اليوم بتغدا عندهم بما أن الكل مداوم اليوم ما كنت أعرف آنك مب مداوم أحمد: لا عادي مب مشكله أنا طالع ويا ريم أصلا أم علي: وين رايحين؟ وهي وين؟ أحمد: مب مداومه أم علي: شوفيها؟ مريضه؟ أحمد: لا مافيها شي بس جيه أونه أم علي: والله هالبنت عبالها الجامعه على كيفها أحمد: خلج منها كيفها، يلا مع السلامه أم علي: بحفظ الرحمن ريم بصريخ من عند باب البيت: أحمممد يلاااا أحمد وهو يمشي صوبها: هييي أنتي لا تصارخين في السياره … ريم: أحمد ممكن تخلي التلفون وتنتبه أحمد: ما يخصج أنتي ريم: تبا تقتلني وأنا في زهره شبابي! أييه بعدني ما تخرجت ولاعرست أحمد: وأنتي منو يباج أصلا ريم: وايد شودراك أنت أحمد: خير إن شاء الله أنتي من يسمعون حسج بيشردون ريم بزعل: أنا؟؟ حرام عليك أحمد: أنزين أقولج بعد ما نخلص بنمر بيت خالي أمايه هناك ريم: صدق عبالي في البيت أحمد بضيق: وأنتي طالعه جيه من البيت بدون ما تخبرين حد؟ ريم بعدم مبالاه: تراني طالعه وياك مب ويا غريب أحمد: ولو آخر مره تسوينها ريم: إن شاء الله . . . بعد ما خلصوا من الاكل، فجأه تلوم بريم وأحلام، خواته ما عنده غيرهم ودوم مشغول عنهم وعاق كل شي على راس علي. أحمد: تعالي ريموه بندخل كارتيه ريم: ليش بتاخذ لي هديه؟ أحمد: ماشي شغل شو توني مأكلنج بدخل آخذ بوك ريم: أنزين يلا بعد ما دخلوا كارتيه أحمد أحتار ما عرف شو يختار حق أحلام شاف ريم بعدت عنه راحت صوب الثاني تشوف أحمد: ريم تعالي ريم: هلا أحمد: أقولج أنتي عندج من هالاساواره اللي يلبسنها البنات ريم: أي وحده أحمد: الحديده ريم: أي حديده أحمد مسك أيدها ومشاها صوب أساور love أحمد: هذيل ريم بضحك: الله وأكبر هذا حديده دخيلك أحمد عن يسمعونك بيمنعونا ندخل محلات كارتييه بكل أنحاء العالم أحمد: أييه قصري صوتج ما تستحين تضحكين جيه أنتي ريم تحاول تسكت عمرها: أحم أسفه بس أنت ضحكتني أحمد بقله صبر: خلصيني ريم رفعت كم العبايه شوي: هيه عندي هذي -وباستهبال- دامك هني خذ لي المسمار الضعيف اليديده أحمد: أي لون ريم عبالها يمزح: الذهبي أحمد أشر حق واحد من اللي يشتغلون هناك وقاله يطلع له اللي قالت عليه أحمد: الحين هذا ب10 آلف وشي أنا بيبلج مسمار وبعويه حقج ريم بفشله من أحمد: أحمم أحمد خلاص يلا وين بوكك خلنا نطلع أحمد طنشها ولف عليه: خلاص بناخذها ريم فتحت عيونها منصدمه ما تذكر متى آخر مره أحمد يبالها هديه ويوم أيبلها فكر جيه ريم بإحراج: أحمد ترا كنت استهبل ما اباها أحمد: جذابه تبينها بعدين تستاهلين يا الريم كم ريم عندنا ريم استحت وعلى دفاشتها بس وايد تتأثريوم أخوانها جيه يكلمونها: ألحين بتصيحني أحمد ضحك عليها:. هبله أنتي شو يصيحج! ريم: أحم أنزين قوله يغلفها أحمد: توج مستحيه! ريم نزلت راسها متفشله منه أحمد بضحك: صدق أنج هبله طبعا أول ما ركبت السياره صورت الكيس في سناب شات وطرشت مسج حق أحلام " أحلام أحمد أحس فيه شي طلعني أتريق وخذالي من كارتييه! 😱😍 … يوم لتاريخ" . . . وصل بيت خاله بس قعد في السياره يتكلم بالتلفون وأخته ريم سبقته داخل أول ما نزل من السياره لقى سيارة بيت خاله داخله رفع ايده شاف الساعه 2 وشي "أكيد نوره راده من المدرسه" شافها نازله من السياره وعاقده حواجبها وشاله شنطتها ومركزه بتلفونها والبشكاره نزلت من الصوب الثاني نوره بدون ما تلف عليه: السلام عليكم أحمد: وعليكم السلام والرحمه أحمد وهو يمشي بمحاذاتها أحمد: شحالج نوير؟ نوره وقفت: نوير! يدتك أنا أحمد: تخسين تكونين يدتي نوره: أصلا أنا بموت لو حفيدي نفسك أحمد: الحمدلله والشكر أنزين ما رديتي نوره: بخير الحمدلله أحمد: وشو الدراسه نوره: زفت خلاص تعبت أبا تخرج حشى مب ثانويه هذي أحمد: شدي حيلج خلاص ما باقي شي نوره وهي تفتح الباب وتدخل وأحمد وراها: إن شاء الله أحمد: ما تستحين تتقدميني! نوره باستهبال: لا قصدي افتح لك الباب الله يهديك يا أحمد فهمتني غلط أحمد ضحك عليها: هيه ماشاء الله دخلوا مع بعض يوم شافته أمه وهو داخل وياها استانست أحمد لف على امه وشاف الوناسه كيف واضحه ضحك في خاطره "والله أمايه أنتي وين ونحن وين" دخل وسلم عليهم ونوره دخلت وسلمت وراحت فوق تبدل . . . عاليه توها طالعه من الدوام باجر الخميس ملجة سالم ونست تشل الكعب اللي يليق على فستانها من البيت وتبا طقم ذهب من خزنه أمها قررت تطلع من بعد الدوام تروح على طول البيت ومنها تشوف حال البيت كيف أول ما وصلت البيت شافت سياره بس ما عرفت مالت منو طنشت في خاطرها "يا كثر ما يغير عمي سيايره" أول ما دخلت البيت فتحت شيلتها وطلعت شعرها من تحت العبايه و ولعت ليتات الصالات تحت وراحت فوق على طول دخلت غرفتها حستها مكتومه صارلها اسبوع مقفله بطلت الدرايش وشغلت فواحه طلعت مفتاح غرفه أمها والخزنه من شنطتها وراحت الغرفه فتحت الخزنه وطلعت اللي تباه لفت بتطلع سمعت صوت ريال يقول : منو هني؟ خافت عاليه "ياربي منو هذا؟ ما أظن الطباخ ولا البيدار بيدخل البيت" أول ما فتحت باب الغرفه شافت اللي قدامها وصارخت: ماماااااه وسيدا حطت شيلتها على راسها عاليه: بسم الله أنت شو تسوي هني؟ ما رد عليها يوم شاف منو موجود لف وقرر ينزل يرد ينسدح في الغرفه تحت، جسمه يعوره ومب قادر حتى يتلكم مافيه صارله يومين هني لأن بيته شي بيب ماي مخترب ويباله تصليح فققرر يقعد في بيت أبوه بما أن محد موجود عاليه: أكلمك أنا؟ سيف ما رد عليه بس وقف معطنها ظهره عاليه حسيت في شي مب طبيعي توها بتتقدم تشوف شو فيه طاح سيف من طوله !! عاليه خافت وتسارعت دقات قلبها وتوترت ، ما عرفت شو تسوي، فجاه حست حواسها انشلت ما رانت تحرك ريلها أول مره حد يغمى عليه قدامها ولا بعد ريال " ياربي شو اسوي بسم الله" راحت عنده ويلست وتصارخ: سيف سيف قوم تسمعني ما يرد عليها عاليه قامت تركض صوب غرفتها أدور تلفونها " الله ياخذك وين رحت" حصلت التلفون دقت على سلمى "ردي بليز ردي! " ما ردت، كررت الاتصال نفس الشي عاليه" ياربي شو أسوي أزقر البيدار يشله؟ بس لازم حد من أهله وياه " عاليه راحت مره ثانيه عنده ومدت وبطرف صبعها تنغز كتفه: سيف تسمعني سيييف عاليه" صدق خافت وبدت الدموع تتجمع في عينها ما عرفت شو تسوي" أذكرت أن ريم عندها في السناب "ريم بليز خلى سلمى أدق علي ضروري ألحيين" ردت عليها ريم بسرعه " إن شاء الله" ثواني لكنها حستها عاليه دقايق طويله، أول ما رن التلفون سيدا ردت عاليه بنفس مقطوع وباستعجال: سلمى بليز تعالي البيت سيف هني ومغمي عليه ومب قادره أحركه سلمى: وين شو مستوي وشو دخل سيف عاليه: في بيت أبوج بليز أنا بروحي فجاه سمعت صوت ريال: ثواني أختي خلج وياه وحاول تصحينه مسحي وييه بماي بارد ولا شمميه عطر عاليه ما ركزت : إن شاء الله عاليه راحت المطبخ تحضيري اللي فوق خذت غرشه ماي صبت شوي بايدها وانصب على ملابسها والارض شوي ماي طنشت أول ما قربت تسمح وجهه بالماي انصدمت من حراراته "ياربي هذا نار كيف جيه مخلي عمره الغبي ما يعرف أنه ممكن يموت" عاليه : سيف سيف سيف بعد ما حس بشي بارد على وجهه وتضايق لم يبدر منه أي ردة فعل غير الهمهمه لكنها كانت كفيله أنها تريح عاليه عاليه: الحمدلله سمعت صوت ريال من تحت: يا أهل البيت أنتو وين ؟ عاليه قامت عدلت عبايتها وشيلتها عدل: فوق دخل علي ووراه الطباخ حاول يسنده وهو وطباخ عشان يوديه المستشفى لحقته عاليه لين ما دخل السياره علي لف عليها شاف دموعها: ما عليه يا أختيه لا تحاتين الحين بوديه المستشفى عاليه ما ردت عليه بس هزت راسها ما تعرف شو تقول أول ما تحركت السياره راحت داخل الفيلا، تحس حيلها مهدود، بدايةً من الزيغه اللي خذتها يوم طلع قدامها ونهايةً يوم طاح جدامها دخلت غرفتها وسكرت الدريشه وشغلت المكيف فصخت شيلتها وعبايتها ونست هي ليش كانت يايه انسدحت على شبريتها وما حست بعمرها إلا وهي في سابع نومه . . انتهى | ||||
|
| |
|
16-11-18, 11:08 PM
| #18 | ||||||||
| مراقبة عامة ومشرفة منتدى الروايات المنقولة
| الجـزء الـ 14 . . . دقت باب الغرفه، انتظرت شوي ما سمعت إجابة، ردت أدق الباب مره ثانيه، نفس الشي قررت أنها تدخل تتأكد إذا كانت موجوده أو راحت أول ما فتحت الباب ضربتها موجة الهواء البارده، دخلت داخل شافتها منسدحه على الشبريه بدون غطاء راحت بسرعه عندها خافت عليها "لا تمرض الثانيه" سلمى وهي تهز كتف: عاليه عاليه عالية قامت مفزوعه، ضايعه، مب قادره تركز، ليش سلمى هني وليش أنا هني سلمى: بسم الله عليج عالية فيج شي عالية عدلت شعرها: أحم الساعه كم؟ سلمى: توه أذن العشاء عالية قامت بسرعه فزت: شو !؟؟ شت شت وين تلفوني أكيد يدوه تحاتي سلمى: ما عليه كلميها عاليه وهي تقوم تلبس عبايتها وشيلتها وتعدل شعرها بسرعه: لا لازم أروح بدق لها في الدرب وصلت عند باب الغرفه ردت مستعجله: سوري سلمى ما سلمت عليج سلمى باستغراب وفيها ضحكة: لا عادي عالية راحت غرفة الملابس طلعت الكعب اللي كانت تباه وتمت أدور الطقم اللي كانت مطلعتنه من غرفة أمها سلمى: عاليه شو أدورين تبين أساعدج؟ عالية وهي مشغوله: في علبه طقم شليته من خزنة أمي بس يوم طاح سيف ما اعرف وين حطيته فجأه توقفت عن اللي كانت تسويه ولفت على سلمى: هيه صح أخبار سيف شو طلع فيه ؟ سلمى: بخير الحمدلله يقولون أنه كان مريض فيه فايروس بس هو الله يهديه أهمل عمره وكان يدخن بزياده عالية: اووه سلامته مايشوف شر سلمى: الشر ما أيج عالية ردت أدور : شكلي نسيته في غرفة أمي سلمى: ولا شوفيه برا أنا ما انتبهت على شي فوق كنت تحت عند سيف عاليه وهي تطلع سلمى تصارخ من الغرفه: ما بتقفلين غرفتج؟ عاليه: آوه بليز سلمى قفليها وأنتي طالعه ثواني بس بسكر غرفة أمي سلمى سكرت المكيف والليتات وشلت شنطه عاليه، طلعت من غرفه وقفلتها بالمفتاح وحطت المفتاح في شنطتها سلمى تمشي صوب غرفه أبوها، سمعت صوت رنين تلفون عالية من الشنطه سلمى: عالية تلفونج يرن عالية: افف الحمدلله لقيته شكراً سلمى تعبتج وياي شلت من عندها الشنطه وفتحتها وطلعت تلفونها لقت يدتها تتصل وهي تنزل من الدرج ووراها سلمى: ألو... هلا يدوه ... بخير الحمدلله ما فيني شي ... لا خلصت من زمان بس رحت البيت أحم كنت أنظف غرفتي لاني نسيت الدريشه مفتوحه وانترست غبار... لا لا الحين يايه ... اسفه يدوه من الصدمه نسيت أني أدق أطمنج … مع السلامه … إن شاء الله وصلت نهاية الدرج حطت تلفونها داخل بتلف على سلمى تسلم عليها قبل ما تروح سمعت صوت مبحوح: مب حرام الجذب؟ ولا على يدتج؟ لفت صوبه شافته قاعد لابس بنطلون رياضه قطني sweatpants اسود من نايك وهودي رصاصي غامق من نايك وقاعد يشتغل على اللابتوب عالية: سلامات ما تشوف شر سيف: الشر ما أيج يالجذوب عاليه: انا مب جذابه سيف: وألي توج سويتيه عالية: حرمه عوده أخليها تحاتي ليش ؟ سيف: يا طيبه قلبج عالية: طيبة قلبي هي اللي أنقذتك سيف: عاد الل يسمع شو سوت، بتذلني عاد عاليه : هيه بذلك -وبتطنيش لسيف لفت على سلمى- يلا سلمى مع السلامه بوسيلي ناصر سلمى: مع السلامه إن شاء الله سلمى على يدتج عالية: يوصل وطلعت عالية من البيت راحت سلمى وقعدت في كنبه شوي بعيده من سيف مافيها تنعدى منه وهي حامل سيف: أنتي شو مقعدنج سلمى: قاعدة عشانك سيف: ما فيني شي أنا سلمى: وين ما فيك شي وأنت لابس هودي ومسكر المكيف ودرجة الحرارة برا خمسين سيف: أحمم الدكتور قالي تدفى، يلا روحي بيتج سلمى: لا بقعد عندك ناصر عنده أبوه وعماته سيف: وأبو ناصر منو عنده؟ سلمى انحرجت "سيف صدق خرف من المرض": مب ياهل سيف: ولا أنا ياهل سلمى: ما برتاح بتم أحاتيك سيف: قلت لج لا تحاتين ما فيني شي بعدين أنا مب قاعد هني باجر برد بيتي توه دق لي العامل وقالي خلصوا شغل بس باقي يردون يركبون السراميك في الحمام الي انفجر فيه بيب الماي سلمى: وشو يردك هناك وحشره عمال وأنت مريض سيف: وين مريض الا زجام خليتوه مرض سلمى: الله وأكبر خليت اللي فيك زجام! صدق ولد أبوك سيف: على طاري أبوي يا ويلج لو خبرتيه سلمى: ما بقوله بس يمكن عاليه قالت حق أمها سيف: ما اظن لو قالت جان دقت لي سلمى: هي حليلها ما تقصر سيف: اهمم -وكمل شغله على اللابتوب- سلمى اللي كانت تكلمها أحلام وخبرتها بمرض سيف سلمى: أحلام تتحمد لك بالسلامه وتسلم عليك سيف: ردي السلام عليها سلمى: أحمم سيف سيف: نعم سلمى: أدري الموضوع مب وقته بس صدق سيف متى بتعرس خلاص لين متى سيف نزل لابتوبه: عندج عروس؟ سلمى استانست: هيه عندي سيف: يلا منو بشوف يمكن عرضج أحسن عرض أبوي سلمى: عرض!! سيف: اللي هو سلمى: ما علينا مريض ما بركز في كلامك سيف: منو؟ سلمى: طبعاً ماشي غيرها أحلام سكت ما رد عليها وهي تترياه يرد عليه استغربت من سكوته سيف رد فتح لابتوبه يكمل شغله سلمى: سييف ما رديت علي سيف: أنا لو أبا أحلام جان من زمان خذتها ما ترييتج سلمى: عيل منو تبا سيف: ريم سلمى: شوووو ؟؟؟ سيف ما قدر يمسك ضحكته على ردة فعل سلمى: ههههههههه سلمى: سيف أنت صادق؟ سيف: هبله أنتي وين آخذ ريم اتمصخر وياج سلمى بلقافة: أنزين ما قلتي شو عرض أبوي على قولتك سيف: ما يخصج سلمى بتودد: سيف دخيلك أختك الوحيده أنا قولي سيف: يوم بيستوي الموضوع بتعرفين منو العرض سلمى بصدمه: صددققق!!! والله يا سيف ما يهمني منو أهم شي تعرس سيف: بنشوف بعدين شو بيستوي سلمى: دخيلك سيف لا تمزح وياي بموت من الوناسه لاتخرب فرحتي سيف: أعصاب أنا قلت لج ألحين بعرس سلمى: متى سيف بدا يعصب: بتمين تقرقرين فوق راسي ردي بيتج سلمى: لا خلاص بسكت . . . قاعده متملله منسدحه ببيجامتها على الكنبه وسط الصاله وتلعب بتلفونها وتفتح سنابات بصوت عالي أحلام: ريم صدعتينا حطي سماعات ريم: أفف تلفوني وكيفي أحلام: لا والله عن قلة الادب مب قاعده بروحج ريم: هذي الصاله حق للجميع أحلام: بقوم أضربج ترا ريم باستهزاء: هه هه هه هه خفت منج أحلام عصبت منها شلت المخده اللي وراها وفرتها على ريم ريم قامت مفزوعه من اللي ضرب وياها بصراخ: ليش تفرينها علي ويهي ألحين لو دخلت في عيوني أحلام علت صوتها: لا تصارخين علي أنا مب أصغر عيالج ريم تصارخ زياده: لا بصارخ مب على كيفج أحلام : والله بقوم أمط كشتج ريم عدلت قعدتها وبتحدي : يلا أشوف قامت أحلام سمعت صوت : هييه وأنتي وهي شو قلة الادب هذي من متى أنتو جيه أحلام لفت شافت أخوها علي انحرجت وعصبت زياده على ريم ريم يوم شافت على أنحرجت لانها قاعده ببيجاما وعصبت " أكيد بيهزبني عشانها لانها أكبر": والله علي هي اللي بدت أحلام: لاولله أنا شو قلت لج علي: ريم عيب عليج تراني من بديتوا وأنا أسمع ومطنش، لسانج ما أطولينه على أختج شو تقولج تسمعين كلامها، وأنتي يا العاقل تحطين عقلج بعقلها ما تعرفين أطنشين، فشلتوني بصوتكم عند الريال ريم: ألحين شو دخلنا بربعك نحن يالسين نضارب في صاله بيتنا علي: باب البيت مفتوح وطلع صوت صريخكم برا وآخر مره تقعدون في هالصاله، قعدوا في الصاله اللي داخل أحلام: إن شاء الله علي: الله يهديكم ريم بعصبيه: مينونه أنا ؟ علي بدا يعصب عليها مب ناقصنها: ريم شو فيج أنتي اليوم ريم بعصبيه قامت شلت تلفونها: مافيني شي بروح أرقد أحسن لي أحلام: أونه يالجذب بترقدين من الحين ريم: ما يخصج فيني علي باستغراب من خواته: شف أنا شو قلت أحلام قامت نفس الشي وشلت تلفونها وطلعت فوق علي باستغراب: الحمدلله والشكر ألحين فهمت أمي يوم تتشكى منهم شاف أخوه واقف يكلم عمره ومب مركز تقدم ووقف وراه بضبط وصرخ بأذنه: بوووو علي خاف ولف على أخوه: شو هالحركات ياهل أنت توني هازب ريم وطلعت أخيس عنها أنت أحمد: ههههههههههههه ليتني صورتك علي ضحك من ضحك أخوه: الحمدلله على السلامة أحمد: الله يسلمك شوفيك تلكم عمرك بعدك صغير ههههه علي: ماشاء الله خفة الدم اليوم زايده أحمد: ما قلت شو فيك علي: ماشي على البنات أحمد باستغراب: شوفيهم؟ علي: صراخهم واصل الدنيا أحمد: أكيد هذي ريم عصبت بأحلام علي تنهد: شوفيكم أنتو كل شي تعقونه على ريم تراها ياهل أحمد: لو تسمعك ريم كيف أدافع وما ترضى عليها محد صدق بيقدر عليها علي: لا أنا أتكلم صدق لا تمون تهزبونها على كل شي أنتو الكبار طنشوها أحمد: فهمنا فهمنا ما ترضى على دلوعتك علي: ههههههه لا والله حتى أحلام ما أرضى عليها أحمد بغياض: صدقنا صدقنا يلا أنا بروح أشوفهم راح فوق شاف ريم توها طالعه من غرفتها ريم: أحمد الله يخليك خلني أصورك بلبس الطيار أحمد: لا تصورين بعدين تعالي سلمي ريم قربت منه سلمت عليه أحمد: ليش متضاربين ريم: افف اشتكت الحساسه أحلام أحمد: ههههههه لا ما شفتها علي قالي ريم: والله ما سويتلها شي قاعده أشوف سنابات فجأه عصبت أحمد: هيه صدقتج يلا بروح أبدل ملابسي روحي حطي لي عشا ريم: ماشي عشا أحمد: سويلي مب صعب ريم: ما أعرف أسوي أحمد: نعم؟ ياهل أنتي ما تعرفين ريم: والله صدق ما أعرف قول حق أحلام أحمد: روحي قولي لها ريم: ما أبا ما أكلمها أنا أحمد: شو هالحركات بعد أقول روحي قوليلها لا أكفخج ريم بنرفزه. افففف أنزيين أهم شي كرشته أحمد: ترا صدق بضربج ريم شردت خايفه راحت غرفه أحلام أحمد: الحمدلله والشكر ما تكبر هذي . . . يـوم ملكـة سالـم يالسه تحط اللمسات الأخيره باستعجال لانها تأخرت الساعه قاربت على الثامنة والنصف وهي ما طلعت من البيت وقفت أمام المرآه بفستانها الاخضر اللف من سلك ستان من كارولينا هيريرا وشعرها رافعتنه بوني تيل والشعر نازل ويفي لبست كعب ضعيف أسود، من ناحية المجوهرات زينت رقبتها وأيدها بصف من الألماسات وأذنها بفص ألماس خفيف لبست خواتمها وشلت الclutch الاسود من الysl وطلعت جدتها سبقتها بيت خالها من العصر عشان جيه خذت راحتها وبيت أهل العروس ملاصق لبيت خالها فهم جيرانهم فبالتالي بيت جدتها قريب يبعد خمس دقايق وصلت شافت زحمه مب طبيعيه حاولت تلاقي مكان، شافها خالها تقرب منها أول ما لمحت خالها نزلت من السياره حبته علي راسه: شحالك خالي أبو سالم: بخير ربي يسلمج شحالج أنتي يابوج سامحيني أنشغلت عنج آخر فتره ما سألت عنج عاليه بتأثر: والله يا خالي أنا اللي لازم أسأل عنك وأنا ألي أطلب السماح منك أبو سالم: يابوج أعرف أنكم مشغولين أنتو جيل هالوقت مكثر مشغالكم عاليه تحب خالها كثيراً خصوصاً أنه أول من وقف معاها في قصتها قديماَ، طيب جداً ومرات طيبته هذي سبب مشاكله لان كلمه توديه وكلمه تجيبه أبو سالم: خلاص دخلي داخل عاليه: وأخلي السياره هني؟ أبو سالم: هيه عادي عاليه: أخاف أني سكرت على سياره حد أبو سالم: لا برايه هذي سياره سالم عاليه ما تعرف ليش توترت: أها أبو سالم: يلا دخلي عاليه: إن شاء الله دخلت الحوش البيت لقته مزين بالأضواء والورد، كان ثيم المكان أخضر وذهبي ،أبيض شافت جدتها توجهت لطاولتها أول ما وصلت الطاوله اللي كانت جدتها قاعده عليها الجده: شو اللي أخرج هالكثر عاليه: شعري سويته مرتين الجده: أنزين يلا فصخي عبايتج وروحي هناك سلمي على حرمه خالج والبنات عاليه وهي تفصخ عبايتها وتاخذ الكلتش: إن شاء الله سمعت صوت من وراها: يه شو هالكشخه ومطقمه مع ثيم الملجة لفت ورها: فطيييم من زمان ما شفتج فطيم قربت وحضنتها: أنتي كله مشغوله عنا عالية: أنا! حرام عليج لو تكلميني بيج طيران فطيم: لازم لازم نتجمع من زمان عنكم كلكم عاليه: والله أنتي تزوجتي آخر الدنيا فطيم بتمثيل: الحب شو بيزل عالية ضحكت عليها: الله يسعدكم دوم فطيم: آمين عقبالج عالية: لا دخيلج ما أبا فطيم بجدية: عالية عالية ضحكت على جديتها المفاجأه: لا أعرف بشو تفكرين، تجربة وانتهت من حياتي بس ما أحس أن هذا وقتي فطيم: يوم بيج النصيب ما بتقولين هذا وقتي ولا عالية تنهدت: الله يكتب اللي فيه الخير فطيم سحبت عاليه: تعالي نرقص عاليه: وين أرقص خليني أسلم أول فطيم: أوك يلا بروح وياج بعدين نرقص عاليه: يصير خير راحت عاليه وسلمت على الموجودين اللي تعرفهم وسلمت على أهل العروس فطيم: يلا عالية عالية: ألحين؟ نوال: مب وقتج فطيم تعشوا وبعدين رقصوا فطيم: ما أقدر أرقص إذا كلت عاليه: وين أرقص ناس ما أعرفهم لو بينا عادي أستحي فطيم: مالت أنا برقص ما علي منكم فيني طاقه بموت لو ما رقصت من عرس وأنا أمثل الثقل عند أهل الريل تعبت نوال وعالية ضحكوا عليها بعد العشا كان وقت زفة العروس بدأت الزفة واشتغلت أول ما دخلت العروس عالية لا إرادياً قامت تعقد مقارنات بينها وبين العروس تضايقت من نفسها هي ليش جيه يالسه تسوي لفت على جدتها لقتها تطالعها ابتسمت لها بعد ما دخلت العروس راحوا البنات يسلمون عليها وشلوا عاليه وياهم نوال وهي تعرف العروس على عالية: جواهر هذي بنت عمتي عالية تذكرينها جواهر: أكيد عالية تقدمت تسلم عليها: الله يتمم لكم على خير حبيبتي ويسعدكم جواهر: أمين عقبالج عالية سكتت ما ردت راحت عاليه وقعدت مكانها والبنات تموا يرقصون وهي تصفق جدتها: قومي ويا البنات عاليه: لا استحي جدتها: مستحيه ولا ندمانه عاليه: على شو؟ يدوه الله يهديج مب وقته هالكلام جدتها: المهم زين ما تسوين خلهم يشوفونج عاقل عاليه طنشت كلام جدتها لان هي مب ناقصه كانت مقرره أنها أول ما تدخل العروس تروح بس غيرت رأيها "إذا أنا ما قمت أرقص وجيه قالت عيل لو رحت مافيني ما بخلص من الكلام" أعلنوا دخول المعرس قامت لبست عبايتها، كانت بتتغشى، نزلت الغشوه واكتفت بالعبايه والشيلة، ما تعرف ليش تباه يشوفها وما تباه يشوفها في نفس الوقت دخل على طول عند العروس حبها على راسها من ثم تجمعوا محارم العروسين عشان يلبسها الشبكة وما إلى آخره أول ما وقفوا عشان يدخلون داخل يتصورون طاحت عينها في عينه وتموا يطالعون بعض فجأه حست عمرها مخنوقه تبا تنزل عيونها بس مب قادره في شي يشدها ولكن أول ما حست بعيون جواهر صوبها نزلت عينها استحت لكن هو ما قدر ! عالية تضايقت من نفسها ومن اللي سوته: أحمم يدوه ما تبينا نروح الجده وهي تقوم: أتريني بروح أسلم عليهم وبنروح يتها فطيم: عاليه وين يدوه؟ عاليه: راحت تسلم عليهم فطيم: أوك بروح لها عاليه: ممكن تقولين لها أني أترياها في السياره بروح أقدم السيارة عشانها راحت فطيم داخل عندهم فطيم: سامحونا معارسينا أدري طفرنابكم بس بغيت أقول حق يدوه شي الجده: شو؟ فطيم: تقولج عالية تترياج في السياره عند الباب الجده: يلا طالعه سالم: يدوه خلج أنا بوصلج وين ترومين تركبين سيارتها مرتفعة الجده: لا وين يا ولديه عادي ترا سيارة الدريول وجيه بعدين أنت خلك ويا عروسك جواهر ساكته مستحيه وفي نفس الوقت مستغربه نظرات سالم وعالية لبعض سالم وهو يمسك أيدها: أفا ألحين ما تبيني أوصلج الجده: ومن يكره توصيلتك يا حبيبي بس ما بخلي البنت في البيت بروحها في الليل سالم بأهتمام بان على صوته: ليش هي عندج؟ الجده: عمتك مسافره سالم: أها صح ما شفتها الجده: يلا مع السلامه تقدم سالم وجواهر كذلك وحبوها على راسها . . . انتهـى | ||||||||
|
| |
|
13-12-18, 11:05 PM
| #19 | ||||||||
| مراقبة عامة ومشرفة منتدى الروايات المنقولة
| الـسـلام عـلـيـكـم قررت أني أنزل جزء اليوم لأن ببدا امتحانات الأسبوع القادم وبسافر بعدها على طول فعشان ما أطول عليكم أكثـر . . . الــجــزء الــ 15 . . . طالعه من الحمام لافه الروب عليها بعد شاور طويل، توجهت لكبتها طلعت بيجامه مريحه بس تذكرت أنها في بيت يدتها، وما يخلى من الخطار ردت البيجاما وطلعت لها جلابية باللون البنفسجي الفاتح وفيها تطريز أبيض وشيله بيضا تلبسبت ونشفت شعرها وتعطرت وحطت كريماتها اللي تعودت عليهم. بعد ما خلصت راحت تدور تلفونها، لقت مسج مكتوب فيه "صلحت اليوم السياره وعليج ترا 3000 درهم" استغربت أي سيارة، احتارت تدق ولا وترد على المسج بمسج ما عرفت الرقم. قررت تتصل أفضل، اتصلت لكن محد رد، طنشت. أول ما طلعت من الغرفه اللي قاعده فيها في بيت جدتها سمعت صوته برا في الصاله مع يدته يسولف قررت تدخل مره الثانيه الغرفه بتحاول تتجنب اللقى بينهم بقدر الإمكان أول ما دخلت الغرفه رن تلفونها بنفس الرقم انتظرت يرن كم رنه بعدين ردت عاليه: آلو ..: السلام عليكم يوم سمعت صوت ريال قررت تختصر الموضوع بسرعه عالية: وعليكم السلام والرحمه، أخوي أنت مطرش لي مسج وأظن أنك غلطان سيف ضحك: لا مب غلطان وصوتج أنتي جدية في التلفون عالية ما قدرت تميز الصوت لأنه مريض: نعم؟ نفس ما قلت شكلك غلطان ومع السلامه سيف: لا مب غلطان مب أنتي دعمتي سيارتي عالية بصدمه: أنا ؟؟؟ ومنو أنت؟؟ سيف: هيه أنتي يوم كنتي تصيحين وحطيتي حرتج في سيارتي عالية سكتت لثواني بعدين استوعبت الموضوع عاليه: سيف؟؟ مغير رقمك؟ سيف: صباح الخير هيه سيف وبعدين مب مغيرنه أنتي شكلج مب مسيفتنه عالية: ما أحتاج أسيفه سيف: ما تعرفين شو ممكن يستوي يلا ألحين سيفيه وكتبي الشيخ سيف عالية: هاللي ناقص شو رايك اكتب طويل العمر بعد؟ سيف: مش بطال عالية: المزاج رايق! سيف: الحمدلله دوم رايق بس شو أسوي في ناس يعكرون مزاجي ويخنقوني عاليه: هيه انزين عشان ما اخنقك زياده طرشلي رقم حسابك ويلا باي سيف: ليش زعلتي عالية-باستغراب-: ما زعلت! سيف: عيل ليش فجأه تبين تسكرين عاليه: ليش اطول السالفه وهي قصيره! طرشلي رقم الحساب اطرشلك فلوس تعديل السياره سيف: ما كنت أعرف أنج عملية في تعاملج بزياده عالية: شكراً اعتبر هالشي مدحه سيف: المهم سمعي أنا أصلا كنت أمزح بموضوع السيارة عالية: عيل شو تبا؟ سيف بجديه: أبا مكاتب تصميم داخلي ثقه تعرفينهم عالية بتأفف: لو طرشت مسج كنت بطرش لك أسامي ماله داعي هذا كله سيف عصب من تأففها: أول شي لو الشي حقي جان ما شاورتج ولا سألتج عالية: عيل حق منو؟ سيف: حق ابوي، اشترى مزرعه ويبا يبني فيها وما أعرف شو ذوق أمج في الديكور عاليه بعدم أهتمام: أها أوكي خلاص بطرشلك مسج سيف: لا تتأخرين عالية: أوك… أحم سيف سيف: شو؟ عاليه: خلاص ماشي سيف عصب: شو تبين ما أحب هالحركة عاليه بعصبيه: ما أبا شي خلاص مع السلامه وسكرت بدون ما تنتظر رده . . . الوقت متأخر قرب الساعه الثالثة فجراً، دخل البيت مِن بعد المناوبة شاف ليت ياي من غرفة الطعام، توجه للغرفه عشان يسكر الليت شاف الطاولة متروسه أوراق ولابتوب، أكواب من القهوة والشاي وهي راقده حاطه راسها على الطاوله راح لعندها على طول تقرب منها ومسكها من كتفها علي: ريم، ريم ريم نشت بخوف علي وهو يمسح على راسها: بِسْم الله عليج شو مرقدنج هني؟ ريم: خوفتني! كنت يالسه أخلص بحوثي ومشاريعي علي: ألحين؟ ريم: لا من أمس بس رقدت بالغلط علي: قومي رقدي في غرفتج يلا ريم: لا لا بعدني ما خلصت زين انك قومتني علي عَصّب عليها: اقول اسمعي الكلام ما بيفيدج الشغل متأخر وفيج رقاد يلا نشي ريم: اصلا خلاص مخي قفل قامت تلقط أوراقها، وعلي واقف ينتظرها حاولت تشل كل شي بوقت واحد عشان ما تروح وترد شافها علي وراح شل عنها اللابتوب علي: يلا سيري انا ببند الليتات وبيبه حقج ريم: اوك مشكور هو وياها يركبون الدرج علي: مره ثانيه ابدي دراستج من وقت لا تمين تلعبين طول اليوم وآخره تذكرين شغل الجامعه ريم تفشلت ما تكلمت لان هذا بضبط اللي تسويه تبدا تدرس الساعه تسع وهي سنة تخرج وزايد عليها الضغط علي دخل غرفتها وحط اللابتوب على الطاوله : يوم عندج مكتب في الغرفه ليش تدرسين تحت! ريم: لان اوسع علي: اها، يلا تصبحين على خير ريم : وانت من اهله طلع من عند ريم راح قسمه، أول ما دخل فسخ نعاله عشان الصوت ما يسبب ازعاج لراقدين دخل الحمام تسبح ولبس الملابس اللي جهزتهم سلمى حقه قبل ما يرقد توجه لشبريه شافها كيف مستغرقه في النوم تقرب منها زياده وسحبها لحضنه وحاوطها بأيده، حست سلمى وتحركت واستوى وجها مقابل وجهه: ييت! علي هز راْسه بدون ما يتكلم من التعب: اشش ردي رقدي . . في صباح يومٍ آخر وهي يالسه تركض مستعجله في أنحاء البيت تلقط أغراضها وكل مره تنسى شي عالية باستعجال: يدوه متاكده ما تبيني اوديج الموعد عادي بطلع من الدوام الجده: لا ما يحتاج قلت لج سالم بيوديني عالية: اوك خلاص انا طالعه راحت عندها حبتها على راسها وطلعت على الساعة العاشرة صباحاً دخل عليها الصاله ووراه جواهر سالم: صبحج الله بالخير يدوه الجده: هلا ابوي صباح النور تقدمت منها وحبتها على راسها جواهر: شحالج يدوه؟ الجده: بخير الحمدلله انتي شو مسويه يابنتي جواهر: بخير دامج بخير سالم: يلا يدوه عشان ما نتأخر على الدوام الجده وهي تقوم: يلا وهم في السياره رن تلفون الجده طلعت التلفون وردت: مرحبا … الدريول فاضي دقي له … انا محد منو بيطلع له الأغراض …. الله يهديج يا عاليه ياهل انتي ما تعرفين ترتبين أغراضج قبل ما ترقدين زين جيه اليوم متأخرة وبعد ناسيه شي … يلا زين سالم توتر وحاول يتجاهل موضوعها بما ان جواهر موجوده ما تستاهل جواهر بس شو يسوي غصباً عنه الجده تتحرطم بصوت منخفض سالم: يدوه تبين شي ؟ الجده: لا يابوك ما ابا شي بس هالبنت الله يهديها جواهر: عالية ؟ الجده: هيه عالية جواهر: شو بلاها؟ الجده: ما بلاها بس شايله همها سالم: الله يهديج يدوه حق شو شاله همها وهي ما تشل هم حد بس تفكر بنفسها الجده: وفكرت في غيرها شو استفادت جواهر بدت تحس بتوتر في الجو وحاولت تغير السالفه وتسأل الجده عن طفولة سالم . . . قاعدين في غرفه أحلام وكل وحده قاعده في زاوية مشغوله في شي بأيدها أحلام بتأفف: ملل شو يالسين تسون؟ أنتو ما عندكم دراسة؟ ريم وهي مركزه بتلفونها: أنا خلاص ما عندي شي لازم أبدا أذاكر حق الفاينلز نوره: حظج ياخي أنا بعدهم امتحاناتي مطولين لاعت جبدي أبا أفتك من الثانويه أحلام: نوره شو بتدخلين في الجامعه نوره: طب ريم بصدمه: صدق!! نوره: طبعاً لا اتمصخر أحلام بجديه: ليش لا نسبتج بدخلج إن شاء الله نوره بصدق: صدق ما أعرف شو أبا ريم: يعني وين تشوفين نفسج أكثر خلج من الثانويه ترا الجامعه أبداً ما يخصها بدراستج في الثانويه نوره: مرات أقول أبا سهل أبا أتخرج أبا أفتك لاني تعبت في الثانويه ومرات أقول جيه ولا جيه تراني دارسه خلني أدرس شي له مستقبل كبير نوره: مافي شي ماله مستقبل، يعني ليش بيفتحون تخصصات في الجامعه مالها مستقبل ريم: صح كلام أحلام ، as long as عندج واسطه لا تحاتين شي أحلام: ماشاء الله شو هالنصايح ريم: أحم أحم عشان تعرفين بس أحلام: ليتج ساكته نوره: خلاص عندي حقكم أسايمنت حق هالاسبوع تلاقون لي تخصص يليق علي أحلام: ماشاء الله نحن اللي بندرس ولا أنتي نوره: كلنا واحد ما بينا ريم: ترا جوكم بيض خلنا ننزل تحت ناكل أحلام: مافيني أنا نوره: صدقج أحتاج تغذيه أنا طالبه ثانويه عامه ريم: ماشاء الله كل هذا وتبين تغذيه بعد نوره: قولي ماشاء الله تحسديني ريم: ماشاء الله ماشاء الله نزلوا تحت أول ما نزلت فجأه تذكرت شي ومسكت أيد ريم ريم: شو فيج؟ نوره: أحمد وين؟ ريم: ليش؟ نوره: جاوبي أول ريم: محد مداوم نوره بارتياح: الحمدلله ريم: ليش؟ نوره: لاني أنا اللي يايبه أمي ريم: كيف يعني نوره بتأفف: أنا اللي سايقه ريم: أها ومن متى يهمج كلام أحمد؟ نوره: مب أنا اللي يهمني أمي فجأه تذكر أنه ما يستوي وتعصب علي وأنا الصراحه ما أبا أمي تعصب علي ألحين ريم: ليش؟ نوره: أبا أروح حفله ربيعتي في بيتهم وأنتي عارفه يعني ريم: أهاا نوره: إلا سلمى وين؟ ريم: راحت بيت عمي تسلم عليه راد من السفر نوره: أها ريم بتساؤل: إلا أقول نوره شو تبين هدية تخرج؟ أحلام قالت لي أحاول أسحب منج الكلام بس أنا ما فيني حق هالحركات نوره: لو تعرف أحلام ياويلج منها ريم: يلا قولي نوره: ولا ما أعرف مافي شي في بالي حتى بنات خالاتي سألوني ما عندي فكره أبد ريم: فكري وقولي نوره: مافي هديه تنجحني بدون ما أدرس؟ ريم: والله لو شي أول المشترين أنا . . . بعد ما وصلوا من السفر وتغدوا، وريحوا قاعدين في الصاله تحت حاطين فوالة العصر سعيد: أحلام وين أخوج؟ دقي له أباه أحلام: توني مكلمتنه وقالي أن هو قريب البيت سعيد: وليش ما تغدا ويانا؟ أحلام: كان عنده شغل سعيد: دوم عنده شغل أبا أعرف في شو مشغول وهو حتى دوام عسكري من سنين ما يداوم أحلام: أبوي أنزين شغله يباله مقابل سعيد: أنتي كلمتيه عن الموضوع اللي قلت لج عنه أحلام: أنا لمحت له عن الموضوع وقال يوم يعرف متى الوقت المناسب سيعد يحاول ما يعصب: هيه الوقت المناسب عند أخوج يوم يستوي عمره خمسين عاليه حست أن ماله داعي تقعد وياهم وهم يتكلمون بأشياء من وجهة نظرها خصوصية توها بتقوم سمعت صوت سيف وهو داخل سيف: السلام عليكم وراح عند أبوه يحبه على راسه وقامت أحلام تسلم على أخوها سيف بتساؤل: إلا وين عمتي مريم؟ سعيد: في المطبخ، عاليه روحي زقريها عالية: إن شاء الله وراحت المطبخ تزقرها عشان تي الصاله لأن سعيد بيسلم عليها دخلت هي وأمها الصالة وقام هو يسلم عليها وقعدوا سيف طلع تلفونه يروي أبوه: أبوي هذي التصاميم اللي وصيت عليها سعيد طلع نظارته ولبسها: وين أقدر أشوف من التلفون ما عندك أوراق مطبوعة سيف: عندي في السياره سعيد: قوم يبهم شو تتريا؟ سيف وهو يقوم: إن شاء الله عالية أطرش مسجات لساره عشان أدق عليها وتلاقي عذر أنها تقوم بس ساره للأسف ما ترد عليها "أوف أنتي ورقادج" دخل سيف ومعاه الأوراق وحطهم قدام أبوه وقعد يشرح له اللي قال عنه المهندس وعاليه تسمع شو يقولون وخاطرها وايد تدخل بس ماسكه عمرها أن ما يخصها سعيد: أنزين مافي غيره هالتصميم سيف: ما عيبك؟ سعيد: عيبني بس أحسه غالي على اللي أنا أباه، يعني أنا ما بسكن هناك سيف: والله إذا تبا بشوف لك مكتب ثاني سعيد: عاليه أنتي شو راج عاليه رفعت عينها من التلفون وخلت عمرها أنها ما تعرف شو السالفه عاليه: رايي في شو أحلام: في اللي يايبنه سيف عالية شافتها بنظره اللي مب فاهمه سعيد: تعالي يلسي عدالي وأنت سيف قوم من هني سيف قام بنرفزه وقعد عدال أحلام راحت عاليه ويلست عداله وخذت وقت تشوف المخطط عالية بدون ما تشوفه: هذي النسخه الأصليه سيف طنشها عالية بتأفف: رفعت راسها: سيف هالنسخ الأصليه؟ سيف: لا هذي كوبي عاليه: أوك ثواني بس راحت يابت قلم وردت وقعدت تعدل على التصميم وتشرح له ليش جيه سوت وما إلى ذلك وعاليه: وبس جيه تقدر تسألهم كم بيكون التكلفه من بعد التعديل، في أشياء ما تحتاج أن نستخدم فيها مواد بناء غاليه وبتوفر عليك سعيد: سمعت يا سيف شو قالت باجر روح وخلص الموضوع سيف بتأفف: أوك أوك عالية عرفت أنه هو مب عايبنه أن هي تدخل في الموضوع سيف: يوم أنتي جيه وايد فاهمه سويه أنتي وفكينا عاليه: طبعاً بكون فاهمه لأنها دراستي ومشتغله في المجال أربع سنوات سيف: حسستيني أربعين سنه أحلام استغربت من ردود أخوها اللي تشوفها نوعاً طفوليه "ها شوفيه بسم الله يقولون أن الرجل يوصل مرحله يرجع مراهق بس أخوي شكله وصلها من وقت" مريم: عاليه روحي زقري البشكاره خلها تيب ماي بارد عاليه عرفت أن أمها ما تباها ترد عليه زياده، فقامت وهي ساكته سعيد بضحكة بعد ما طلعت عاليه: عن يكون بس تغار منها سيف انصدم من كلام أبوه "شكله بدا يخرف": أغار؟ من شو إن شاء الله؟ سعيد: أنا قلت بعد البنت ما غارت، يغار الولد؟ سيف قام بيروح مافيه على رفعة الضغط سعيد: وين رايح؟ سيف: بيتي سعيد: أي بيت ؟ يوم بتكون عندك حرمه في البيت قول بيتي سيف عرف مقصد أبوه وخلاص يبا يفك عمره: أنا لقيت حرمه وقلت لا؟ أحلام انصدمت من أخوها من كم يوم رافض الفكره جملةً وتصيلاً مريم: ندورلك حرمه أفا عليك من اليوم بعد وأحلام بعد ما بتقصر سعيد بابتسامه: ما يحتاي ندور موجوده قريب عاليه دخلت وشاله صينيه فيها أغراش ماي صغيره سعيد وهو يأشر عليها: لو طارين مليون ولو أن مافي شي يسواج عاليه ما فهمت: شو السالفه مريم وأحلام في حالة صدمه وسيف كان متوقع وما أنصدم وهذا اللي زاد صدمه مريم وأحلام مريم عصبت وما عيبها: مافي شي وروحي فوق غرفتج عاليه أستغربت عصبيه أمها وصدمة أحلام والابتسامة الغير مريحه في وجه زوج أمها عاليه: السالفه فيها أنا؟ ليش أروح فوق؟ مريم بعصبيه زياده: ما تسمعين شو قلت لج عاليه تفشلت أنها عصبت عليها قدامهم سعيد: شوفيج على البنت؟ مريم: مب وقته ألحين مريم مستغربه صمت سيف أنه ما علق وما تبا تنرفض بنتها، ما ترضى فهي اللي بترفض قبل مايتكلم لكن وجود عاليه خرب عليها أول ما طلعت عاليه فوق وتأكدت أنها في غرفتها بعد ما سمعت صوت تسكيرة الباب القوي مريم: أنا أمها والمفروض تشاورني قبلها أحلام متوتره وما تعرف شو تسوي سعيد: وهي بنتي لا تنسين وما بلاقي أحسن من سيف حقها، سمعنا شورج قبلها شو استفدنا مريم: والله قبلها كنت خايفه ياخذون البنت عني غصباً علي سعيد بعصبيه: وخذوها بموافقتج وشفتي شو أستوى لها سيف رد قعد ببرود: يا جماعة ذكروا الله أحلام عصبت من برود أخوها مريم: أنا بنتي ما تاخذ واحد ما يباها خلاص رحموها تراها في النهايه بنت سيف: ومنو قال ما أباها؟ مريم بصدمه: نعم؟؟ أحلام: سيف! . . . كانت في النادي تلعب رياضة كالعادة خلاص خلصت بس يالسه تمشي على آلة المشي لين ما يوصل الدريول ولعت شاشتها بنتوفكيشن وصلت رساله من أخوها علي "أحلام يوم تخلصين دقي لي" قررت أدق عليه ألحين علي: ألو مرحبا أحلام: مرحبتين، آمرني علي: أنتي وين؟ أحلام: في النادي علي: زين يعني بعدج ما رديتي، أقولج أنا عزمت ربعي اليوم على العشا عندنا في البيت وشي أشياء ناقصه أحلام: وشو هم؟ علي: ألحين بطرش لج المسج االي طرشته حقي سلمى بس دخيلج بسرعه أحلام: إن شاء الله من يوصل الدريول على طول بعدين شو بلاك متروع علي: أول شي نسيت أني عازم ربعي اليوم وبعدين نسيت أيب الاغراض أحلام ضحكت عليه: الله يعينك علي: يلا أنزين ربعي ألحين ياين أحلام: لا توصي علي: مع السلامة أول ما سكرت من عنده لقت missed call من الدريول عرفت أنه برا. راحت لبست عبايتها وطلعت ومن النادي على طول على أقرب جمعية وبعدها على البيت على طول أول ما دخلت السياره البيت شافت سياره وعدالها أخوها وواحد يسلمون على بعض قالت حق الدريول يوقف ما يروح داخل وايد لين ما يدخل الريال ودقت على البشكاره تي تشل الاغراض بسرعه علي بعد ما سلم على بدر علي: تفضل حياك الميلس الشباب كلهم داخل بدر: الله يحيك علي شاف البشكاره تربع صوب سياره البيت علي: أيه شو بلاج جيه تركضين البشكاره: مدام أحلام كولد مي يجي بسرعه سياره يشل أغراض علي: هيه روحي بسرعه بدر يوم سمع اسمها حس يبا يلف صوبها بس ما قدر لأن علي موجود وحس فجأه بتوتر ودقات قلبه تزيد طلع تلفون من مخباه يبا يطرش لها شي بس تراجع مب عارف شو يكتب لها علي استغرب حالة بدر: فيك شي؟ بدر: لا مافيني شي -وبكذب- بس توني انتبه أن الوالده دقت لي وما رديت عليها علي: لا ما يتفع رد دقلها -وأشر على باب المجلس الخارجي- ونحن هني نترياك بدر: إن شاء الله راح صوب سيارته وفتح الباب وقعد داخله لكنه ماسكر الباب وما عرف شو يسوي ودق على سلطان أحلام تأففت تتريا اللي في السياره ينزل لان شافت ليتات السياره مفتوحه وأخوها راح المجلس بروحه. قررت أنها تتغشى وتنزل وقفت السياره عدال السياره، وين هي قاعده كان عدال باب سياره بدر رفعت راسه وشافت انعكاس نص وجه على المرآه الجانبيه وشهقت لا إرادي وتوترت مب متعوده تشوفه بمكان نفس جيه يعني في الجامعه مثلا ولا مكان عام أهون عليها سحبت عمرها لصوب الثاني ونزلت بسرعه وهي متغشيه وما ألتفتت وراها بعد ما شاف شبح أسود ينطلق صوب باب البيت عرف أنها هي كان يحاول يصنع الفرص والصدف لكن ما استوت وحس بخيبة أمل وفي نفس الوقت مستغرب من اللي قاعد يسويه أنهى المكالمه سريعاً وراح المجلس داخل وصلت غرفتها على طول حتى ما مرت على حرمة أخوها وأمها تسألهم إذا يبون مساعده راحت الحمام تاخذ لها شاور بارد "ياربي لازم أستوعب صداقه علي ود. بدر عشان ما أنصدم كل مره" بعد ما خلصت الشاور سوت روتينها اليوم بعد الشاور ولبست ونزلت تحت شافت محد تحت راحت المطبخ الخارجي وهي طالعه من الباب اللي ورا للفيلا ورايحه للمطبخ أذكر د.بدر ولفت تشوف إذا بعده في سيارته طبعاً لأنه هو آخر واحد واصل فاظطر يوقف قريب من الفيلا من داخل راحت مشت شوي وانخشت ورا الجدار وشافت أن محد وردت المطبخ أول ما دخلت المطبخ سملت عليهم أحلام: تبون مساعده؟ أم علي: هيه تعالي سوي عن حرمة أخوج خلها ترتاح سلمى: لا عادي عموه أصلا كل شي جاهز بس أعدله في صحون أحلام: لا خلاص أنا بسوي عنج أم علي: دام وصلت أحلام أنا بروح داخل أصلي العشا سلمى: برايج عموه وطلعت أم علي راحت أحلام وبدت تساعد سلمى أحلام بمزح: يقولون معصبه على أبو العيال سلمى: أكيد بعصب يعني الصراحه أيبها من أخوج ولا من أخوي أحلام: شو فيه سيف؟ سلمى تنهدت ما تعرف شو تقول: مافيه شي أحلام: وابوي سلمى قولي ما بينا سلمى: أحلام أعرف أن الكلام ما بيطلع منج بس الحرص واجب حلفتج ما تخبرين حد أحلام خافت: لا توصين سلمى: تخيلي اليوم شو أستوى في بيت أبوي أحلام: بتساؤل شو؟ سلمى: أبوي تم يلمح لسيف عن العرس جان هو يقوله كلام بما معناه أني جاهز ودورولي عروس أحلام: أنزين شو اللي يعصب في الموضوع مب كلكم بتموتون عشان يعرس سلمى: السالفه مب هني السالفه أنه أبوي يباه ياخذ منو أحلام بتساؤل: منو؟ سلمى: عاليه أحلام: عاليه عاليه ! سلمى: هي عاليه ما غيرها أحلام: أنزين ؟ سلمى: شو أنزين أول شي في حياتي ما توقعت يعني أحسها نفس أختنا ما أدري ثاني شي أمها عصبت أن كيف أبوي ما شاورها قبل أحلام: وبعدين شو أستوى؟ سلمى: أول مره أشوف حرمه أبوي وأبوي يضاربون أحلام: خيبه ليش وسيف وينه من هالموضوع كله؟ سلمى: ها اللي يقهر أنه كاان بروووود ومن يقوله أبوي شي قاله حاضر وتآمر أحلام: طبيعي يسمع كلام أبوي سلمى: لا مب طبيعي دوم أبوي وسيف ضرابه كل واحد يبا يمشي رايه على الثاني نفس يوم راح يعيش عند أمي كم سنه عناد في أبوي أحلام: والله في حياتي ما فهمت ولا بفهم عقليه سيف وأنزين ليش أحس عندج أعتراض على عاليه؟ سلمى راحت تغسل أيدها من بعد ما خلصت خلاص وقعدت على كرسي طاولة الطعام اللي في المطبخ سلمى: ما أعرف يعني أول شي هالاثنين ما أعرف كيف وبعدين يعني ها أخوي والوحيد وأكيد أبا له وحده مب نفس عاليه أحلام: ليش شو فيها عاليه، صح علاقتي سطحيه وياها بس خلوقه ومحترمه وهاديه ومهندسه ماشاء الله وجميله سلمى: بس كانت مالجه على ولد عمها وطلقت وبعد ما طلقت اللي فهمته أن يوم كانت عايشه عند عمها ما أعرف شو كانوا يسون فيها ما رضت ترد عند أمها وقعدت عند خالها فتره أحلام: يقولون أنها خلعته؟ صدق؟ سلمى: مب خلع بس هي اللي رفعت قضيه الطلاق أحلام: أها، وبعدين إذا هو يباها كيفه سلمى: ما يباها متأكده أحلام: والله أنا مب شايفه مشكله في الموضوع بس تعرفين وين بتستوي المشكله يوم أمج بتعرف سلمى: هيييه والله، تعرفين لو تم الموضوع هالفتره، شكلي بربي قبل موعدي أحلام ضحكت عليها: لا بسم الله عليج، خلاص خلصتي؟ سلمى: هيه بس من يرمسني أنه يبون العشا بنطرش البشاكير أحلام: تمام وطلعوا من المطبخ وراحوا داخل راحت أحلام فوق تيب تلفونها من غرفته لأنه حطته في الجرج ولقت مسج منور الشاشه وأول ماقرت المسج شهقت وحطت أيدها على حلجها من الصدمه . . . انـتـهـى رأيـكم وتـوقعـاتـكم تهمنـي | ||||||||
|
| |
|
16-01-19, 11:39 PM
| #20 | ||||||||
| مراقبة عامة ومشرفة منتدى الروايات المنقولة
| الـجـزء الـ 16 . . . ولعلَّ ما أنت ساعٍ إليه هو ساعٍ إليك، ولعلّها مسألةُ وقت. . . . من بعد المطبخ راحت أحلام فوق تيب تلفونها من غرفتها لأنه حطته في الجرج ولقت مسج منور الشاشه وأول ماقرت المسج شهقت وحطت أيدها على حلجها من الصدمه ردت تقرا المسج مره ثانيه عشان تتأكد من اللي قرته "ما كنت أعرف أن صوت صرختج حاد يوم تعصبين وما كنت أعرف أن مشيتج سريعه وايد" ما عرفت شو ترد عليه ولا شو تسوي فقررت أنها تخلي عمرها ما قرت شي ، قعدت على شبريتها وتفكر متى هو سمع صرختها! عن يكون يوم علي عصب علي أنا وريم ليش نصارخ واربيعه في الحوش وشكله هو اللي كان في السياره اللي قرب الفيلا !! استغفرلله الله يستر من هالعلاقه اللي ردت بين د.بدر وأخوي نست هي ليش كانت يايه فوق فقعدت على تلفونها ما بين توتير والانستقرام والسناب مرت ساعه بدون ما تحس، قطع عليها أندماجها اتصال من أختها ريم عشان تنزل تحت شلت تلفونها وياها ونزلت تحت أول ما نزلت شافت أمها وريم وأخوها مع ولده قاعدين تحت بس بدون حرمة أخوها أحلام: السلام عليكم جميعهم بأصوات متفرقه: وعليكم السلام والرحمه أم علي: تعالي أحلام كلي أحلام وهو تتوجه للكنبه وتقعد فوقها أحلام: لا شكراً ما أبا رفعت ريولها فوق وطلعت تلفونها من مخباها ترد على رسايل أربيعاتها في الواتس آب بينما الباقين يسولفون وتسمع أطراف الحديث لين ما جذب انتباها ذكر اسم بدر في السوالف نزلت تلفونها ولفت صوبهم تسمع شو السالفه ريم: ماشاء الله رساله دكتوراه ثانيه ما يعيزون علي: بدر من يوم ما عرفته وهو إنسان طموح وواحد يطمح من لقب دكتور لبروفيسور مب غلط، بعدين ألحين هو ما عنده لا حرمه ولا حد فما في مانع أنه يرد يسافر مره ثانيه عشان الدكتوراه أم علي: ودوامه؟ علي: طلب تفرغ واللي فهمته أنه بيدرس بعض الكلاسات هناك أم علي: الله يوفقه ولا هو ما بغى يعرس مره ثانيه؟ علي: لا والله يقول توه الناس وبعدين قال هالمره يباها عن قناعه تامه ريم بتساؤل: وين سلمى قالت بتنزل ما نزلت لين الحين! أم علي: عن يكون تعبانه؟ روحي شوفيها علي قام: لا أنا بروح أشوفها، يلا تصبحون على خير راح باس أمه على راسه وطلع فوق يشوفها أحلام سمعت الكلام اللي دار بينهم بس ما علقت بشي كانت مصدومه وضيقت وضاقت زياده أنها ضايقت من هالشي وفي خاطرها أن هي كانت موجوده وما فكر فيها كيف يوم بيبعد عنها !! لا إرادي فتحت المسج اللي طرشلها إياها سابقهاً وردت عليه "وأنا ما كنت أعرف أنك بتقدم رسالة دكتوراه ثانيه" ردت لها حاسيتها بعد ما طرشت المسج ولامت نفسها كيف جيه أطرش له مسج جنها تعاتبه فاتبعت المسج اللي طرشته بمسج آخر "عن يكون تخاف من الحسد! 😂، الله يوفقك دكتور" رد عليها بسرعه استغربتها كأنه كان يتريا رد منها "من ناحية الحسد لا تحاتين محصن نفسي وموضوع الرساله لين الحين ما تأكد، أتريا الرد على موضوع التدريس أول من وين عرفتي؟" ردت عليه بكلمة وحده بس "علي" ورده كان بالمثل "أها" . . . بعـد مـرور فتـره مـن الـزمن قبـل رمضـان بأسبوعين مريم بتساؤل لزوجها سعيد: بنروح هالسنه العمرة؟ سعيد: إن شاء الله بس بتكون في أول عشر، وهالسنه بشل بنات أخوي الله يرحمه مريم: الله يرحمه بس اللي أعرفه وحده منهم في الجامعة أسأل متى تخلص امتحانات سعيد: إن شاء الله بسألها وأنتي شوفي عالية بعد خلها تجهز تقدم اجازه من ألحين مب تسوي نفس السنه اللي طافت تقول ما أقدر مريم: إن شاء الله توها نزلت تحت تقعد عند أمها وزوجها آخر شهر كانت صدق مشغوله لأن كان تسليم مشاريع قبل إجازة الصيف عاليه: السلام عليكم سعيد ومريم: وعليكم السلام والرحمه مريم: كلتي؟ عاليه: هيه في الدوام سعيد: يابنتي شوفي كيف ضعفتي ليش ماتاكلين عالية بوناسه: صدق ضعفت؟ سعيد: والله أنتو يا البنات مخبل في فرق بين الصحه وضعف المرض مريم: لا تعب عمرك وياها ما تسمع الكلام عاليه: أنزين مب بكيفي تعرفون ويوم أكون مضغوطه أنسى آكل سعيد: وألحين ذكرناج يلا كلي عالية: إن شاء الله من عيوني سعيد: تسلم عيونج قطع كلامهم دخلت ولد سلمى يركض باتجاه جده سعيد ينزل عمره ويشله ويحطه في حضنه: يا مرحبا بشيخ الريايل وتبعته في الدخول سلمى وسلمت على الكل بعدين يلست بتعب على الكنبه سلمى بتذمر: أستغفرالله طلع عيني في هالحمل أكثر عن أول واحد سعيد: عيل كنت أبا أشلج العمرة وياي؟ سلمى: أي عمره وين علي أنا أتحرك من بيتنا لبيتكم حتى دوامي خذت اجازه بدون راتب لين ما أربي سعيد لف على عاليه: عاليه ثالث يوم رمضان بنروح العمره لمدة أربع أيام جهزي عمرج عالية: إن شاء الله سعيد: وأنتي سلمى خبري بنات عمج تراني بشلهم وياي وإذا الريم عندها امتحانات قولي عشان أأخرها العمرة سلمى: بخبرهم، والله كان خاطري أروح العمره وياكم من يعوف يعتمر في رمضان عاليه: أنزين تعالي على كرسي مب مشكله سلمى: لا ما ينفع عمتي في رمضان لازم حد وياها وعلي دوامه غير شكل بعد في رمضان محد في البيت وياها سعيد: زين تسوين يزاج الله خير . . . في أطهر بقاع الأرض وفي أجمل أيام السنه رمضان وصلوا الفندق سعيد وزوجته مريم مع بنات أخوه أحلام وريم وأخيراً عالية توجهوا لآداء مناسك العمره وبعدها من التعب كلهم ناموا بدون حتى ما يتسحرون. وقاموا صلوا صلاة الفجر في الحرم ورجعوا ناموا بعد صلاه الظهر وهم رادين الغرفه عاليه لفت على أمها بصوت واطي: ماما أنا بعد صلاه العصر بقعد في الحرم لين بعد التروايح مريم: وين تقعدين هالكثر في الحرم وأنتي صايمه عاليه: ترا يحطون فطور مريم: إلا قهوه وتمر تعالي بعد صلاه المغرب عاليه: ما بلحق أصلي العشا في الحرم مريم: صلي ويانا في مصلى الفندق تراه مطل على الحرم أحسن لج عاليه: ماما بليز مريم: خلاص ياهل شو انتبه عليهم سعيد سعيد: شوفيكم؟ مريم: عاليه تبا تيلس في الحرم من بعد صلاه العصر لين بعد التروايح سعيد: خليها تيلس مب ياهل هي وشوفي إذا البنات بيلسون وياها -ولف على أحلام وريم يسألهم- ها بنات ؟ ريم: أنا الصراحه ما أقدر بموت من اليوع وتعبانه من أمس أحلام: أممم ماعندي مشكله بروح وياج عاليه عاليه بوناسه: خلاص اوك سعيد: بس شلوا وياكم على الاقل موز شي عاليه: إن شاء الله وصلوا الفندق راحوا مريم وسعيد غرفتهم والبنات في غرفتين بينهم باب أحلام وريم في غرفه وعاليه لأنها مب وايد وياهم وتستحي منهم في غرفه روحها أول ما وصلوا عاليه من باب المجامله وتحاول تلطف الجو لأن حرفياً من المطار إلى الآن ما دار بينهم حوار عاليه: بترقدون؟ أحلام: لا خلاص بسنا رقاد عشان نرقد في الليل ريم: على كيفج! أنا أبا أرقد أحلام: ماشي رقاد ريم بتأفف: أنزين أنا فيني عاليه: تعالوا عندي الغرفه بنقعد نسولف عشان ما ترقدين ريم أحلام لفت على ريم بعدين لفت على عاليه: أوك دخلوا غرفه عاليه وفصخوا عبايتهم وشيلهم وعلقتهم حقهم عاليه غرفة عاليه كانت عباره عن سرير وقعده مكونه من كنبه لفردين وكرسي منفرد، فكل وحده خذت لها مكان طبعا ريم وأحلام جلسوا عدال بعض ريم بتأفف: ياخي الواي فاي بطيء أحلام: أحسن عشان تسوين أشياء تنفعج ريم لفت على عاليه: in case if you didn’t know ترا أحلام نكديه عاليه ضحكت عليها: حرام عليج بس صدقها ريم: ترا عندي خدمه دوليه بس ما ابا أخلص الداتا أحلام: عيل ليش حاشرتنا؟ ريم: تبينا نضارب قدام البنت! عاليه: عادي خذوا راحتكم. تعرفون وايد كان خاطري يكون عندي أخت ونكون قراب من بعض جيه. صح عندي وحده من اربيعاتي اعتبرها اخت الدنيا بس الأخت اللي وياج غير ريم: شو تبين يكون عندج اخت ناشبة لج في كل شي حمدي ربج بروحج الدلع كله لج عاليه: ترا فاهمه الموضوع غلط بالعكس يوم تكونين بروحج يكون التركيز عليج أكثر أحلام: ماعليج منها ترا وايد مدلعينها بس هي ماتحمد ربها عاليه: الصراحه ريم صدقها أحلام يعني أخوكم كل ما يكلم عمي يسأل ويوصي عن ريم أكثر شي ريم: يعلني فدا بوناصر بس أحلام: على طاري أخواني أحمد ما أدري به إذا وصلوا واعتمروا ولا ما دق لي ودقيت له قبل ما نطلع نصلي ما رد علي ريم: جان دقيتي على سيف أحلام: لا استحي عالية بتساؤل: أخوج ياي؟ أحلام: هيه هو وسيف عاليه: أها أحلام كانت أدور ردة فعل عاليه بعد ما طرت سيف لان هي تعرف سالفه الخطبه عاليه طنشت موضوع سيف وقالت ما بتعور راسها وياها وبتحاول تتجنبه بسبب تصرفاته الغريبه من وجهة نظرها آخر فتره وأصلا ما بتكون فاضيه له هني وفِي خاطرها" يارب ما يطول يكون ياي يعتمر ويرد" أحلام مسكت تلفونها ترد على الناس في السناب. شافت نوتفكيشن من الواتساب باسم Dr. Bader خافت أن ريم اللي جالسه عدالها تنتبه بما أنها حاطه راسها على كتف أحلام فقررت أنها ترد عليه بعدين دق تلفون ريم وكان المتصل أحمد يسأل هم وين فتسأذنوا من عاليه أنهم بيروحون يسلمون على أخوهم من بعد ما طلعوا راحت عاليه انسدحت شوي تريح قبل ما يطلعون يصلون العصر . . . في غرفة أبوه المتفاجأ أنه موجود سعيد: والله لو طلبت منك مايتت سيف: قد طلبت مني شي وما سويته؟ سعيد: وايد طلبت وماسويت سيف: أظن آخر طلب طلبته مني ووافقت عليه عن كل الطلبات اللي طلبتهم مني قبل ورفضتهم سعيد: ماعلينا وينه ولد عمك؟ سيف: راح يسلم على خواته سعيد: قوله هم يايات وياي ما يخصه فيهم شورهم عندي سيف: إن شاء الله. إلا وين عمتي مريم؟ سعيد: راحت تتشرى قطع ما ادري شو سيف: وهي وينها عندكم ولا عند يدتها؟ سعيد: موجوده سيف: كلمتها؟ سعيد: بعدني سيف: يعني أبوي أنت كنت حاشرتني من متى يوم وافقت يالس أطول الموضوع خلصوني. تراها مب قضيه سعيد: مافيك صبر! سيف: لا سعيد: ومتى بتروح؟ سيف باجر في الليل سعيد: خلاص باجر برمسها سيف: وليش تتريا أروح؟ سعيد: عشان تفكر على راحتها وماتكون موجود وتشكل مصدر ضغط عليها سيف: مصدر ضغط! ماشاء الله وبعدين مب أنت قلت لي بكل الأحوال بتوافق سعيد بثقة: بتوافق بس لازم تحس أن منها الموافقة سيف: والله ما فهمت شي على العموم أنا رايح غرفتي مع السلامه وقام طلع من الغرفه . . . انتهى أنتظر أرائكم وأعتذر عن قصر الجزء ولكن كنت مسافره طول الاجازه ورجعت على الدوام على طول | ||||||||
|
| |
 |
| أدوات الموضوع | |
| انواع عرض الموضوع | |
|
|
1Likes
.png)
العرض العادي
