28-09-18, 08:01 AM
| #11 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  #زوجتي_الريفية . ........... بقلمي #شمس البارت 9 ام حيدر .. ماما انتي بنيه حلوه وجسمج حلو .. وملابسج هم حلوه بس عراض وعلي شاب وشايف اشكال وهسا هو حيرجع يداوم بالجامعه والبنات داير مدايره هوايه .. لازم تلبسين وتعدلين . فرح .. ميخالف من اروح الاهلي اجيب قماش واخيطهن لو الي عندي اگصفهن .. ام حيدر .. ههههه لا حبيبتي .. العصر عمج گال روحوا للمول واشتروا ورسل عندها ذوق وبعمرج تختارلج .. فرح .. لا عمه مايصير .. ام حيدر .. لج بنتي شنو ميصير اعتبريه نيشانج .. لتخجلين انتي مسؤوله من عدنا شنو تحتاجين گولي .. علي .. وصلت للجامعه .. واني ادعي يارب كون جايه الموافقه ولو اذا هاي الططوه شفتها من الصبح شلون تجي بعد .. دخلت للعميد .. هلو علاوي هسا ردت اتصل عليك. علي .. بشرني دكتور .. العميد . مبروك اجت الموافقه وتگدر تدوام معيد بقسمك .. علي .. رحم الله والديك دكتور ماانسى فضلك .. حيدر .. اجيت اخذ رحاب الاهلها .. مستعجل ولگيت رحت الاكل بخشمي .. اها شعجب طابخين اليوم من وكت .. امي .. هي فروحه النادره من الصبح طبخت ونضفت .. نزلت رحاب .. هيج عمه هسا صارت فروحه النادره ورحاب الجايفه هي هاي جزاتها ست اشهر وياج مخليتج تگسين شي .. ام حيدر .. حبيبتي شبيج صايره حساسه اني مانكرت شي . بس لازم المقابل يرادله تشجيع وهي مكسوره خاطر وبعيده عن اهلها .. حيدر .. اوووه اشتغلت الغيره رحاب.. لا عليمن هالغيرة امشي ياعيني حنتأخر عيب ندخل الهم وقت الغدا .. حيدر .. دأوكفي واخذت ماعون وخليت بي تمن وفوگاه مرگه . هيج نفس بالاكل مشايف .. رحاب .. بالله مو عيب تاكل هنا وهناك تگلهم مااشتهي وثاني هي باميه وتمن مضايگهه قبل .. حيدر .. اي صحيح مضايگ هيج طعم .. تعاي الله عليج ضوگي .. رحاب .. درت وجهي .. مااريد .. فرح .. گعدت بالغرفه اگلب بكتب رسل البقيه .. گمت اتلافه وجود رحاب ادري بيها متحبني .. للضهر واخيرا اجو البنات اشتاقيتلهم عبالك سنين اعرفهم .. ركضت حضنتهم وعمتي تضحك علينا .. گالت ياله تغدوا وارتاحو شويه حتى العصر نطلع .. فرح .. وعمي مننتضره رسل .. لا بابا ياكل بالمحل ميجي .. بس اندزله غدا وي العامل الي عنده .. وصدوگ دگ الباب العامل ع الغدا وماما محضرته نطتهيا .. اتغدينا ونمنا والعصر گعدنا .. البنات لبسو بنطرون وقميص وفوكاه ستره طويله يكولن اسمه كوت ولبسن حجاب .. اني طلعت جبتي .. جرتها مني رسل .. رسل .. انسي تلبسين هاي هنايه . حنطيج مني اليوم اني البسج .. لبستها بنطرون وبلوزه طويله مني وهي جسمها حلو طلعت تخبل لفيت شعرها كبايه ولبستها الشال وخليتلها كحل خيفيف ولو هي متحتاج .. وهي طويله مقبل تلبس حذاء عالي نطيتها بوت قصير مني وفلات .. باوعت الروحها بالمرايه .. خليت ايديها ع وجهها .. ههههه هاي مو اني شلون حطلع هيج .. رفل .. فروحه اتعودي اذا تردين تكسبين علاوي لازم تغريه بالملابس وتلبسين . المستحه انسيها .. ام حيدر .. ياله بنات مخلصتوا .. احنا حنبقى ع العشا بالمول وابوكم يجينا لهناك يرجعنا .. لان حيدر ومرته ماهمه وعلي كالعاده وي اصدقائه .. علي .. اجيت تعبان من الجامعه .. ماتغديت مااشتهي صعدت گبل نمت گعدت العصر كولش .. لگيت ماما مخليتلي ملاحظه ع باب الثلاجه .. علاوي احنه طالعين من تطلع لتنسى تقفل الباب .. اني هم دخلت سبحت واكلت فاكهه .. وصعدت بدلت واتصلت ع احمد ومنتضر .. وطلعنا .. فرح .. دخلنا السوگ شكبره رسل تگول اسمه مول .. بي كلشي حتى مطعم .. والبنات شنو لبسهم بهذا البرد وهنا لابسات للركبه .. واني امشي واجر بالبلوزه مستحيه ممتعوده .. البنات اشترولي اتراكات وروب شتوي لان اني ماعندي ملابس شتويه هوايه اكثرهم صيفي جبت واشترولي احذيه وعطور وشامبو ومنشفه وملابس طلعه ستر وبناطير وقمصان وشالات واحذيه واني البس وانزع كل ساعه خبلني😂 اگلهم كافي وهمه يشترون .. شويه اجه عمو اخذ الغراض واحنه ساعدناه وصلناهن للسياره ورجعنا نتعشى .. البنات طلبوا اكل بيتزا وصاج وعمو وعمتي طلبوا گص وزلايط يسموها مقبلات واني گلتلهم مثل عمو وعمتي لان مااعرف شنو هاي البيتزا .. البنات يحاولن يعلمني كلشي وكل كلمه غريبه عليه يفسرنهه الي .. واني اسمع الهم واتعلم بسرعه .. خلصنا اكل ورحنا للحمامات نغسل .. علي طلعنا اني واصدقائي .. ودخلنا للمول .. نفتر وجان منتضر يگول ولك شوف ذني الصاكات اتباوعت هذي رسل ورفل ووياهم بنيه تخبل سبحان الخالق وطويله وشلون جسم عليها يموت .. ولبسها حلو مرتبه گلت اكيد هاي صديقتهم .. بس شعندهم هنا وحدهم .. اتباوعت المنتضر واحمد مشالوا عينهم .. عطت بيهم ولكم تنزلون عينكم لو 👊👊 ذولي اخواتي شلون هيج تتباوعون .. رسل التفت .. شفت علي واصدقائه وياه احمد هذا الولد عجبني بحفله التخرج مال علاوي شفته .. هو خزرنا .. گلتلهن اطفرن علي ورانا ويخوزر .. فرح هههه گامت تطبگ رجل برجل من الخوف بس تريد توصل يم. اهلي .. علي .. استأذنت من احمد ومنتضر وگلتلهم اهلي هنا اروح اشوفهم واجي .. احمد .. مرحبا اني صديق علاوي .. وخريج مثله بكلوريوس لغه انكليزيه . بس تخرجت بالدفعات مو مثل علي محضوظ .. ابويه عنده محل مال اجهزه كهربائيه يبيع واني اشتغل وياه الصبح اني والعصر هو يگعد .. عندي اثنين اخوات شفت اخت احمد رسل بالحفله مال تخرج وانعجبت بيها كولش .. حلوه وانيقه وبعد مشفتها بس بقت ببالي . واليوم شفتها بالمول .. واتباوعتلي اخذته الگلبي ونضراتها تموت .. بس وياي علاوي ونزلت عيني عيب منه .. گال اخواتي ومنتضر اثول عباله بنات غربه 😂😂 ناسيهن .. #شمس يتبع... | ||||
|  |
|
28-09-18, 08:03 AM
| #12 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ............ بقلمي #شمس............... البارت 10 علي .. شفت اهلي وين گاعدين رحت يمهم .. لگيت امي وابويه ورسل ورفل والبنيه الحلوه .. سلمت عليهم البنيه خجلانه ومنصيه راسهه واني احجي وي اهلي وعيني عليها .. اووووف ياربي هاي البنات مو اني رحت تزوجت فرحه بنت الفلاح .. #بقلمي_شمس ام حيدر .. تعال يمه هنا اگعد يم مرتك .. علي .. 😮😮 مرتك شنو رسل & رفل 😂😂😂 ضيعت مرتك علاوي شبيك هاي فرح .. ابويه .. فرحه هاي شبيك ضيعتها .. علي .. 😡 اعرفها شبيه . يله اني رايح جماعتي منتضريني .. علي .. رجعت واني مصدوم معقوله هاي الجمال مرتي هي هاي فرحه واغم بوجهي .. ولك علاوي مرتك هيج حلوه ومگابل هل المطايه .. عجبتني بس كرامتي ماتسمح اضهر اعجابي وتبقى ثقافتها ومستواهه مو مثلي واكيد مانتفاهم .. #شمس شفتهم گبالي 😡 احمد& منتضر .. علي .. يله امشو نطلع منتضر .. لك علي هاي الحلوه هم اختك .. علي .. 😡😡 لك اتأدب وانت شعليك .. تمشي وياي وعينك ع عرضي .. علي .. اني مااحس شي اتجاهه بس ليش ضجت من حجى منتضر ماادري .. فرح .. رجعنا للبيت تعبانين .. وجان اشوف رحاب ووياهه بنيه گاعدات بالصاله .. البنيه گامت سلمت ع عمي وعمتي والبنات واجت عليه .. انتي فرح امممم وتباوعلي من فوگ لجوه .. مااعرف شبيها اني رضاب بنت عمهم. واخت رحاب .. سلمت عليها .. ودخلت للغرفه غيرنا ملابسنا اصرت رسل البس واحد من التراكات لبست واحد ماروني قديفه وبي سحاب من الصدر حلو كولش .. رفل نامت من وكت لان تعبانه .. واني ورسل .. طلعنا الغراض الي اشتريتهم .. ارتبهن بالكنتور .. #شمس دخلت رضاب .. امممم هاي الاشياء كولهه الفرح .. رسل. اي حلوات مو رضاب .. اي بس شنو مشايفه مشتريه السوگ كوله رسل .. حبيبتي نسيتي فرح عروس ولازم نشتريلها رضاب .. ههههه ضحكتيني عروس والعريس طافر مطايقها .. اي مو كلنا نعرف جبروه عليها .. رسل .. 😡😡 رضااااب فرح بداخلي .. هاي شلون خلصت من رحاب اجت رضاب رضاب .. اوي انام احسن لتخزرين .. فرح اني گاعده ع سرير ثالث همه مخلين بالغرفه ثلاث اسره .. اشو اجت ودفعتني رضاب .. گومي عيني هذا مكاني متعوده انام بي .. رسل .. بس هسا صار مكان فرح .. رضاب .. مو تگولين عروس خلي تروح تنام يم زوجها .. فرح .. عادي رسل اني افرش وانام بالگاع شبيها قابل متعوده ع الاسره .. #شمس رضاب بهمس.. اي والله زين عرفتي نفسج .. فرح صحيح يسمعوني كلام . بس مااضوج اذا اني ابويه ذبني هيج لان اندعمت وسواني معيوبه فشلون اعتب ع الناس الغربه .. لازم اتحمل واكسبهم مثل مگالت امي .. فرشت بالگاع نزعت القراصه وحليت شعري ع طوله مااعرف انام وشعري مضفور .. ونمت ورسل گومتني بسريرها بس مقبلت .. حلوه نومت الگاع تخبل .. نمت واني تعبانه محسيت ع روحي… گعدت بنص الليل عطشانه .. #شمس رحت للمطبخ واني فاتحه عين ومغمضه عين .. المطبخ اضلم .. شربت مي من الفلتر ودرت وجهي شفت واحد واگف يم الثلاجه رجليه وگفن مايتحركن .. گلت منو هو باقي بمكانه ومايحجي يمي المغرفه مال تشريب رفعتها وصرت قويه واريد اضربه هو لزم ايدي بسرعه وجرني اله وهمس بأذني .. اشششش اني علي لتفضحينا .. من جرني ع صدره وهمس بأذني وگلي اني علي .. انفاسي گام تصعد وتنزل ومااحس ع روحي .. فتح الضوه وصارت عيني بعينه .. اني بسرعه درت وجهي وركضت للغرفه .. ونمت بفراشي وغطيت وجهي وعيونه گبالي ومن جرني الصدره .. اوووف ياربي استغفر الله اول مره رجال يلزمني هيج حسيت مسويه ذنب . ومن جهه ثانيه حسيت بشعور حلو عود ليش ماادري ..تالي غفيت .. #شمس علي .. المطبخ گبال الغرفه مال البنات .. نزلت جوعان لان صار كم يوم مااتعشا بالبيت حتى مااشوف فرح .. شفتها طلعت من الغرفه لابسه تراك ماروني يخبل مطلع مفاتنها كولها .. والشعر نازل ع وجها والرجلها واصل عبالك ملاك ويمشي ع الگاع .. #شمس دخلت للمطبخ وشربت مي ومشافتني .. واني بس اتباوع تالي من التفتت شافتني خافت ورادت تضربني بالمغرفه عبالهه حرامي بسرعه لزمت ايدها وجريتها الصدري وهمست بأذنها وشعرها صار ع وجهي اوووف شنو من ريحه .. گلتلها لاتفضحينا وفتحت الضوه صارت عيني بعينها خجلت وركضت للغرفه .. بقيت متخبل بيها .. اصعد درجه والتفت بلكي تطلع .. صعدت الغرفتي ووافكر .. اووووف يعلاوي معقوله هاي نفسها بنت المعيدي محسن اتوقعتها مو حلوه ووسخه مثل الفلاحات الي انشوفهن .. معقوله هاي النعمه كلها الي ورفضتها وطيرتها مني .. للفجر افكر بيها .. نضرتها البريئه والخجوله اخذتلي عقلي .. #شمس الصبح كان يوم جمعه والبيت كوله نايم . وتدرون بيه مااعرف انام هواي من الفجر اگعد .. گمت عجنت عجينه كاهي .. وطلعت گيمر من الثلاجه وجاي مهيل وحار .. صارت 8 والكل بعده نايم گعدت رسل . رسل .. اووو هم جمعه ومنبقى نايمين فرح .. بالتسعه اكو نوم .. رضاب .. انتي ديج من الصبح گاعده ومتخلينا ننام .. من سمعت رسل كلامها عليه گامت عناد بيها .. وگالت… #شمس يتبع… . | ||||
|
| |
|
28-09-18, 08:05 AM
| #13 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ............... بقلمي #شمس.............. البارت 11 رسل گالت .. صباح الخير فروحه .. اممم اشم روايح طيبه شمسويه فرح .. سويت كاهي وي الگيمر ع طريقتي .. رسل .. امممم لعد يستاهل واحد يصحى عموده وحصحيلج البيت كوله ..😂 طلعت لگيت عمتي صاحيه .. امممم فروحه شنو هذا الابداع .. ماما مو گلنا لتعبين مو زين ع رجلج .. فرح .. لا عمه اني اتعب من الگعده مو من الشغل .. رسل سوت بوق بالبيت .. اگعدوا اليوم كاهي وگيمر الي ميگعد اكل حصته .. #شمس گعد عمو اممم فروحه اليوم بفضلج البيت كوله گاعد من الصبح 😂 حدخل اسبح واطلع مااتأخر عليكم لان اريد اطلع للمحلات.. وگعدوا حيدر وعلي هم يروح ويانه اليوم عطله شعنده بالبيت يبقى .. بين ماالكل يجهز .. حضرت الطاوله . بيت عيالي اهل خير تفتحين الثلاجه كولشي يعجبج تلگين مثل اهلي يعني يسوي واهس واحد يطبخ ويتفنن .. علي نزلت بعد ماصحتني رسل اوامر الوالد .. سبحت ونزلت بالاتراگ .. شفتهه تفتر گدامي تذكرت الليل .. وشعرها بس هسا مخليه الكلاو مال الاتراك ع راسهه يعني مشفت شعرها .. وجسمها اوووف بس لابسه الروب فوگ تراك .. عندها نشاط مو طبيعي تتحرك منا ومنا ولاتگول رجلها مكسورها ومصار هواي من فتحو الجبس . حتى عيوني حولت من وراهه .. #شمس اجه حيدر من ورايه .. طبطب ع ضهري .. ها لازم حلت بعينك علي 😉 حكيت براسي منو .. حيدر . هههه تغشم روحك لك شگد محضوظ .. ماردتها والله نطاك جمال ونداره والاهم تگعد من الصبح تسوي كاهي شلون خلگ عليها .. علي 😡 .. خلي عينك ع الي عندك لاتحط عينك ع غيرك .. حيدر .. 😂😂😂 اشتغل الگلب بعلي .. رحاب .. شبيكم مشايفين والله خبصتونا وانت حيدر ترى زودتها.. حيدر .. يومه خلي اطفر احسن الي 🏃🏃 علي .. ههههه نزلت شافتني جمدت .. ماادري ليش تخاف مني . رحاب .. لعد وين رضاب ليش مگعدتوها ع الريوگ .. رسل .. متقبل بعدهي نعسانه .. رحاب .. اني حروح اصحيها .. #شمس گعدنا كلنا ع الريوگ .. وكلها تمدح بالكاهي وترتيب السفره .. وعلي كلما اشيل عيني الگيه يتباوع .. گعدت رضاب .. صباح الخير الكل .. صباح النور .. اتباوعت ع السفره .. اوووي هاي شنو كاهي وگيمر لا اني مااكل هيج اكلات مسويه دايت . عمتي .. هذا جبن واكلي اذا تردين .. رضاب .. هلو علاوي شلونك .. علي .. هلو بيج ماادري بيج هنا رضاب .. البارحه اجيت .. صدوگ سمعت رجعت للجامعه يعني راح نتشاوف هوايه .. علي .. بلي رجعت راح تملين من شوفتي😂 رضاب .. هههه ليش اكو واحد يمل منك ابن العم 😉 فرح .. اني اسمع كلامهم ومتعجبه هاي شبيها تحجي هيج احنا عدنا عيب نختلط بالولد حتى لو كان ابن عمي او ابن خالي .. رسل .. هههه انتي بس هاي السنه وتخلصين ونجي اني وفرح وراج ندوخه العلي .. علي .. من گالت رسل هيج رفعت راسي واستغربت شنو فرح تدخل جامعه. رضاب .. ههههه تلگيها ابتدائيه ممكمله .. حيدر .. لج انتي تلحگيها بالدفعات وصلتي للجامعه .. وهي مطلعه معدل عالي بالثالث .. والسنه الجايه انقدملها خارجي وتمتحن. وي رسل مبين الها طموح .. علي .. امممم بداخلي يعني واصله كل يوم اكتشف شي جديد بفرح يبهرني .. رحاب .. گرصت حيدر .. ليش هيج تخجلها الرضاب المهم وصلت لو لا .. حيدر .. اطلعي منها انتي احنا متعودين اني ورضاب ع هيج شقه .. رحاب .. اي بس مو يم الغربه .. عمي عصب .. كافي لهنا وكافي هاي كولكم تسمعون الغريب والقريب فرح وحده من هذا البيت ومرت علي سواء رضيتوا او لا والي يمسها بحجايه ميلوم الا نفسه .. والكلام موجه الك علي .. اليوم بيت عمامك وعماتك يجون يباركون .. اطلع انت ومرتك اشتروا حلقات والبسوهن مااريد حجي زايد .. علي .. اتفاجأت من كلام ابويه .. بس بداخلي فرحت مااعرف ليش .. رسل .. واني وياكم فرح .. فرحت من عمي دافعلي بس من گال اطلعوا اشتروا. الحلقات تخربطت احوالي وگلت الرسل گولي حتطلعين ويانا .. خفت اطلع وياه وحدي .. رضاب واني هم عندي غراض اشتريهن .. رسل البسي هذا الفستان البيج .. وفوگاه ستره جلد جوزي .. لبستهن وخلتلي كحل ولفتلي الشال مثلها .. طلعت حلوه .. رسل طلعت بقينا بس اني ورضاب .. رضاب .. انتي هي لاعبالج فرضتي نفسج ورخصتيها وابوج شمرج علي يحبج ويسويج مرته .. انسي لان اني وعلي نحب بعضنا وراح اثبتلج بس انتي اذا عندج كرامه ترجعين الاهلج .. فرح .. دمعت عيني من حجت هيج .. دخلت رسل هي طلعت .. رسل .. شبيج فروحه .. رضاب گلتلج شي ضوجتج .. گولي .. فرح .. ماكو شي رسل .. لا اكو شي .. بداعتي گولي .. فرح .. رسل صدوگ علي ورضاب واحد يحب الثاني .. يعني معقوله اني دخلت بينهم وفرقتهم .. رسل… انتي شدتحجين هاي تضحك عليج قصدها هي مخليه عينها ع علي وهو ممعبرها .. وهسا ميته حرگه لان تزوجج .. ليش اگلج البسي وعدلي واتقربي من علي .. هو زوجج وانتي احق وحده عليه .. علاوي اذا عرفج واتقربلج حيحبج صدگيني مثل مااحنه حبيناج .. ديله گومي علي گام يعيط اتأخرنا .. #شمس يتبع .. التعديل الأخير تم بواسطة لامارا ; 05-04-19 الساعة 03:10 PM | ||||
|
| |
|
28-09-18, 08:07 AM
| #14 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ............. بقلمي #شمس................ البارت 12 اخذنا علي بالسياره .. رادت تگعد رضاب بالمقدمه .. سحبتها رسل وگلتلها مرته تگعد يمه .. گعدت يم علي وايدي ترجف .. مااعرف شبيه .. علي .. انتبهت ع رضاب تحاول تغيض فرح .. وادري بيها تحبني من زمان بس اني مسوي نفسي ممنتبه .. لان هي مثل اختي ومو ببالي .. #شمس حتى اگطع املها .. گلت لازم اسوي نفسي مهتم بفرح .. اتباوعت الفرح اديها ترجف وهي ملاك وگاعد بصفي .. حتى من انمر من سيطره بودي اضمها ليش ماادري . شغلت الراديو .. طلعت اغنيه صدفه .. اليارا .. اتباوعت الفرح .. جامده من الخوف وايديها ترجف ضحكت ولزمت اديها . اشو هاي صارت قالب ثلج .. رضاب ضاجت گالت .. مو حلوه الاغنيه غيرها .. علي .. اتباوعتلها من المرايه .. قابل هو ام بي ثري واغير بكيفي هذا راديو .. وعجبتني الاغنيه .. اووووف صدوگ صدفه .. رسل .. علاوي علاوي اموااااااح😘 بعد اخيتك .. علي .. ههههه رضاب .. بداخلي 😡.. بسيطه علي فرح .. حرام كلشي ماافتهمت من السوالف .. حسيت نفسي قالب ثلج .. وخاصه من لزم ايدي علي .. گلبي گام يرجف .. #شمس وصلنا للسوگ مال صواغ .. ركن السياره علي نزلنا صار احمد صديقه گبالنه .. راح علي يسلم عليه رسل .. من شفته ذبت وهمست الفرح .. لج فرح بربج مو حلو .. فرح . منو علي رسل .. لج ياعلي .. احمد صديقه .. فرح .. اي حلو .. هههه لج رسوله طلعتي داهيه رسل .. يا ويني گاضيتها نضرات ماادري يحبني لو لا بس اكيد يخاف من علي غير يدفنه .. رضاب .. شتبسبسن .. متشاركنا رسل .. ماكو شي حبيبتي امشي گدامنا احمد .. من شفت رسل وي علي وبنات وياهم .. ماادري شصار بيه هي اتباوعلي وتسولف وي بنيه وياهه مااعرف منو بس حلوه خفت اسأل علي لايفهمني غلط .. اريد طريقه اوصل بيها الرسل ماكو .. علي خلصت من احمد .. واجيت لگيت رسل وفرح ايد بايد ويمشن سوه .. ورضاب تمشي وحدها من شافتني .. اجت علاوي تعال خلي ندخل الهذا المحل وهذا حلو وهذا هيج دمرتني .. فرح .. رسل هاي شگد لزگه .. مبين الولد مايريدها وهي لازگه بي #شمس رسل 😮😮 لج ياولد هذا زوجج روحي تعاركي وياهه الزمي ايديه ادلعي عليه .. مو گاعده وتتفرجين . فرح .. يعني شأسوي .. اني اگلج .. روحي هسا للمحل واسحبي من ايديه واطلعي .. فرح .. لا ما اخاف يصيح عليه .. وبعدين اني استحي .. رسل .. اهمداي 👐 لج اتحركي راح تموتيني .. دفعتها ووگفتها يم علي .. علي شفت رسل وكفت يمي .. او بالاحرى رسل دفعتها لان ادري بيها تخجل مو مثل بناتنه مصلفات .. حسيت ع ابو المحل يباوعلها وهي اتباوع ع الملابس والاكسسوارت .. ممنتبهه عليه .. ضجت .. جريتها من ايديها وطلعت من المحل وخلينا رضاب وحدها .. دخلنا للصايغ .. اختارينا حلقات .. وبعدين شفتهه عجبها تخم ناعم وحلو .. گالت الرسل حلو هذا برازيلي .. ههههههههه(إخًَْـُ بًًٌٍَُِطنٍَِّْيَِّ)ههههه� �ههههه ضحكتني بنت اللذين .. گلت للصايغ ينزله ويشوف سعره .. اشتريته الها وشفت الفرحه بعينها مثل فرحت طفل بملابس العيد .. بقيت اتباوع البرائتها .. ياربي معقوله بديت احبها .. صدگ الله الي يزرع بذره الحب بين كل اثنين متزوجين .. اخذته وفرحانه بي وعبالهه برازيلي مگلنالهه .. دخلت رضاب ضايجه لان تركناهه .. #شمس ومن شافت التخم ضاجت اكثر .. خلصنا وطلعنا رجعنا للبيت .. واني انسان ثاني من تقربتلها تحرك شي بداخلي اتجاهه .. دخلنا للبيت تلگتنا امي فرحانه وشوفناهه الحلقات .. وفرح شوفتها التخم . وتگلها باعي عمه هذا ذهب برازيلي بس حلو .. امي باوعتلي .. غمزتلها. اجت رحاب . اتباوع بالغراض واختها يمكن شكت الها گلتلي .. شدعوه علي هيج ذاب روحك .. وامنت عندكم رضاب تاركيهه وحدها.. علي .. رحاب الخاطر الله بطلن غيرة النسوان اني مالي خلگ اصعد الغرفتي ارتاح .. صعدت .. اتباوع للغرفه اول مره احسها بارده .. نمت ع السرير واتخيل فروحه .. هههه گمت ادلعها .. شسوت بيه بنت محسن .. مااتوقعتها هيج ممزوجه بالبرائه والجمال والفطاريه والذكاء .. بنيه مختلفه عن الكل .. #شمس نايم ع السرير وافكر بفرح .. واندگت الباب علي .. تفضل 😮😮 هاي فرح طفرت وكنت فاتح دگم القميص . شافتني نصت راسهه .. عمتي تگول الغدا جاهز .. علي .. اي جاي جاي .😥 فرح .. ماادري شنو صار بيه من شفته هيج .. جسمي كوله يرجف .. حلو شكله عجبني .. وتذكرت كلام رسل اووووف يافرح شبيج .. للعصر .. اجو عمامهم وعماتهم وصارت هوسه .. رسل لبستني التخم والحلقه وفستان حلو .. وشال .. كلهم انعجبوا بيه .. علي .. من شفت عماتي وعمامي شلون تتباوعلها فرحت وابويه يسولف ع ذكائها وگال حتكمل والا اريد معدل عالي من بنياتي يحجي ع رسل وفرح .. #شمس تالي عمي گال .. ميصير هيج يبقون خلي نسويلهم حفله بيناتنا وياخذها علي للفندق وتصير رسمي عيب من الناس شتگول علينا .. ابويه گال الجو هسا بارد مابقى شي للربيع ونزوجهم عمود نسويلهم حفله بالحديقه.. علي .. ماادري من گالوا تصير رسمي فرحت .. مع انه بالبدايه ماردتها بس كلشي قسمه ونصيب . فرح .. من گالوا نتزوج ويسوون حفله.. ضجت لان اهلي ماكو يمي .. رضاب راحت وي اهلها وارتاحيت بس بقت رحاب بالطالعه والنازله تجرحني وعلي تغيير وياي بهذي الفتره...... #شمس يتبع .. | ||||
|
| |
|
28-09-18, 08:09 AM
| #15 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ............. بقلمي #شمس............ البارت 13 مر شهر وعلي تغيير طبعه وياي وگام يطلب مني الي يريده غدا او عشا وحتى ملابسه ميقبل الا اني اغسلهم واكويهم .. عرفت شنو الحب ع ايده لان كنت مغمضه وهو فتح عيني صرت احسه كلش بحياتي .. رغم انه علي يحاول يتقربلي بس اني استحي واصده ورسل تگلي خليه يركض وراج .. اشلعي گلبه 😂 طبعا مااسولفلكم على عمو وعمتي .. حسسوني مثل اهلي واكثر .. #شمس بيوم اشتاقيت الاهلي وذكرتهم وابجي .. ثاني يوم گال عمو نروح كلنه للبستان هم نخبرهم ع الزواج وهم تشوفيهم فرحت حيل .. ثاني يوم كان جمعه اخذنا عمي وعمتي وعلي واني بس .. #شمس رحنا اووووف من دخلت السلف مالتنا . فتحت الشباك ومديت راسي واشتم .. اووووف ياريحة هلي .. علي يضحك عليه .. يگلي هم اصدگ فد يوم يجي وادخل القريتكم بعد الي صار .. 😂😂 ووگفنا بمكان الي دعمني بي 😂 ونضحك .. وصلنا وتلگاني ابويه وحضني فرحتي هاي شصايره ولاعرفتج .. وامي حضنتني وتبجي .. واخواتي هم هناك .. كلهه منتضرتني .. #شمس عمتي حبتهم لان متواضعه وعلي وعمي راحوا للديوانيه گعدوا .. اخواتي لزمني سولفيلنا .. وسولفتلهن وهن يندبن حظهن 😂 لو مدعومين مو احسن .. وتخبلن ع لبسي واني اشتريتلهم هدايا اني وعلي طلعنا للمول واشترينا .. فرحوا بيهن .. تذكرت مكينتي .. وشلون اخيط وامي گالت اخذيها وياج . ذكرى مني .. عزمناهم ع الزواج .. بس امي تجي ماگدرن اخواتي يجن .. تغدينا وخلصنا طلعنا للبستان اني وعلي .. انطيته دشداشه من بدر .. طلع حلو بيها😂 واني لبست لبسي مال قبل دشداشه وعصابه ولفيت العبايه ع خصري .. #شمس من شافني علي ضحك .. گال اي عوزنا بس خرفان ونسرح بيهن 😂😂 الجو حلو بدت اجواء الربيع .. والخضار والطبيعه حلوه ..اشتاقيت الديرتي والهوا النقي .. علي .. يعني متندمه لان عفتي القريه .. فرح .. لا .. علي بس لاتنسى هذا المكان الي ربيت بي صدگني اذا بقيت هنا ماتگدر تتركها .. شوف شوف علي الله هذا النومي كبر .. واني صغيره اصعد ع الشجره واگطع .. علي .. اي عادي تعاي اشيلج واصعدي .. فرح .. تحجي صدگ واذا وگعتني علي .. افه عليج .. ماتثقين بيه .. الصراحه هو اني بس اريد اتلمس جسمها حارمتني منا كتلني خجلها .. #شمس رفعتها لفوگ وسويت نفسي عثرت وسحبتها وحضنتها وبقيت اتشقلب بيها ع الحشيش الى ان صرت فوگهه انفاسهه تتسارع .. وعيونهه تباوعلي اتقربتلهه غمضت عيونهه ..بستها هاي جمدت جواي .. خررررب لعد بليله زواجنا شلون .. سحبت نفسي منها وبقيت نايم ع الحشيش وسحبتها ع ايدي ونباوع للسما والعصافير الجو كان شاعري صراحه .. وهي مغمضه بعدهي .. علي .. ههههه لج فرح فتحي عفتج وربي بس اريدج هيج ع ايدي .. #شمس فرح .. يمه احساس ماينوصف . جمدت من باسني هيج يسوي البوس .. التفتت عليه وگتله بس لا راح احبل علي .. من گالت هيح .. گمت ع حيلي وبس اضحك😂😂😂 اشتعلوا اهلج فرح فرح .. لاتغلط على اهلي ☹️ علي .. اتقربت عليها .. وطالعه خصله من شعرها .. اوووف هذا الشعر دمرني واتلمس بي . هي خجلت ونصت راسهه . #شمس رفعت حنكها بأصبعي . باعي حبيبتي .. ماكو من نتزوج بليله زواجنا اعلمج شلون المره تحمل ترى البوس والمس عادي مايأثرن وبستها براسهه .. لج هم اكو بفطاريتج .. الله يحبني لان خله محسن يجبرني اعقد عليج .. #شمس گضيت يوم وي فرح كلش حلو وكنت محتاج هيج يوم اقضيه وياهه وتعرفني اكثر .. فرح .. يابويه .. مااوصفلكم شگد احبه .. وحضنه حلو ودافي من نمت حسيت نفسي طفله بحظن ابوها .. خلص اليوم .. ورجعنا البغداد وامي راحت وياي عمود تجهيز العرس .. وكل بنيه تريد امها وياهه .. #شمس رسل .. من راحت فروحه ضجت گلت ويامن اسولف احسن شي خلي افتح فيس اتسلى .. من فتحته اجتني رساله .. مرحبا ممكن احجي وياج .. لاتعتبريه شي غير لائق .. ومااريد علي يعرف لان هو صاحبي واخوي ومو هين عليه .. بس بعد مااكدر اكتم مشاعري اكثر ونيتي جاده ..بس انطيني مجال.. احمد #شمس قرأت الرساله ثلاث مرات وممصدگه .. اتباوعت الصورته .. اي هذا احمد .. گمت اگمز . اي وربي احمد هلا هلا 💃💃 💃 دخلت رحاب .. اشو فرحانه متفرحينه وياج . هههه ليش هو اكو غير فرحه علي وفروحه .. رحاب 😡😡 لتخافين اجو بالطريق وجايبن وياهم امها عساس البيت مكفينه وترسوه بالمعدان .. دخلت رفل وسمعتها .. رفل .. عيب هذا الحجي .. رحاب .. لج انتي هذا طولج وتعلميني العيب خلي يجي اخوج #شمس رسل .. لا صدگ رحاب ماجنتي هيج .. اشو من اجت فرح تغيرتي .. رحاب .. عشتوا ع شنو تغيرت ..وطلعت رسل .. يابه دروحي .. خلوني بالحب مالتي شنو ارد عليه هسا غير تجي فروحه واحجي وياهه .. احمد .. بعد مااتحمل لازم اصارحها بقيت ادور بأصدقاء علي لگيت كاتبه بالانكليزي اسمها .. ومعلقه ع علي وكاتبتله اخويه الورده .. عرفتها هي .. اتجرأت و خلتلها خاص وراسلتها .. والصراحه بگلبي خايف لاتطلع ماتحبني وتگول الاخوها واخسر علي وميثق بيه .. #شمس يتبع… | ||||
|
| |
|
28-09-18, 08:13 AM
| #16 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ............. بقلمي #شمس............ البارت 14 وصلنا المغرب للبيت ..وامي حبيبتي وياي .. اشتاقيت الها هواي .. البنات رحبوا بينا بس رحاب تسلم من ورى خشمها .. #شمس تعشينا وخلصنا .. وفرشنا اني وماما بالاستقبال .. وعلي كل ساع داگ الباب .. اشو رجع من السلف متخبل عليه مااعرف شبي .. بعدين اجت رسوله يمي .. بعد ما امي نامت تعبانه خطيه .. رسل .. لج فروحه راح اموت اذا مااسولف .. فرح .. من اجيت لاحظت ع وجهج اكو شي .. رسل .. تعرفين احمد صديق علي .. فرح .. اي هذا الي شفناه بالسوگ رسل .. اي هو البارحه راسلني يحبني ويگول نيتي جاده بس اريد احجي وياج .. #شمس شتگولين اراسله لو لا .. فرح .. والله مااعرف شاكلج رسوله .. لان اني هاي الشغلات هسا يله بديت احسها .. بس الي اعرفه اذا دگ الگلب الشخص ماتگدرين تقاومين وتحسين نفسج بعالم ثاني .. رسل .. لج عيني فرح هاي المشاعر كولهه وتگولين مااعرف هنياله علاوي . شوفي راح اتجرأ هسا واراسله ومن اخلص تسولفيلي شسويتوا هناك ورجعتي فرح ثاني لج حتى علي الفرحه ماليه وجهه.. #شمس فرح .. ديله راسلي قبل لينام. رسل .. متردده اراسل او لا تالي تجرأت وكتبت مرحبا .. بقيت منتضره بالربع ساعه .. وفرح تضحك عليه تگلي مو گتلج نام .. تالي رد.. هلو رسوله .. اني 😮😮 رسوله فرح .. هلا هلا بدايتها دلع رسل .. بقيت ساكته احمد .. وين رحتي مو گلبي اشتعل رسل .. هههه هنا مرحت احمد .. شلونج .. رسل .. تمام احمد .. رسل اني احبج رسل ..😌😌 احمد .. فديت الخجلان رسل .. احمد انت گلت نيتي جاده يله وافقت احجي وياك .. لان بحياتي ماعشت هيج شعور فلا تصدمني ارجوك احمد .. اوووووويلي يابه .. يعني اعتبر هذا اعتراف بحبج الي . #شمس رسل .. هههه احمد .. وداعتج رسوله لاخليج اسعد انسانه .. ومايفصلني عنج الا الموت .. لج اني حاط عيني عليج من حفلة التخرج وماصدگت .. هسا دا احجي وياج وترديني اعوفج وربي مااعوفج . رسل .. ههههه احمد .. راح تگضيها بس ضحك يمعوده مو شلعتي الگلبي .. ممكن اتصل عليج .. اريد اسمع صوتج .. رسل .. اوك لحظه وارجعلك خبر لان الكل نايم وخايف يگعدون .. #شمس فرح .. ها شيگول رسل .. يريد يتصل فرح .. لعد روحي بالغرفه هناك رفل نايمه ولو تدگين طبول متگعد .. اختلي جوه البطانيه واتصلي 😉.. رسل .. ههههه اوك .. بس مو عبالج فلتي .. باجر تسولفيلي كولشي فرح .. ماشي هههه . بس روحي الولد منتضر خطيه .. رسل .. رجعت الغرفتنا .. واتصلت بأحمد وبقينا نسولف للصبح همزين باجر سبت .. اووووف شگد رومانسي .. اني طبعا محجيت من الخجل هو الي يسولف واني اضحك .. #شمس ثاني يوم گعدنا من الصبح .. الجو حلو بدا يدفى يعني مو بارد كولش .. لبست گلبيه بهاري يعني لاشتويه ولاصيفيه .. اشترتلياهه عمتي . وبيهه فتحات من جوه وبيهه شغل .. كان حيدر طالع فنزعت الحجاب ومنزله شعري ولابسه طوق .. واني اريد اصحي رسل من النوم .. حسيت بعلي نزل .. التفتت وابتسمت اله .. #شمس هو يبتسم واشو گام يقرالي شعر .. #طويله ويا محلى طولج😍 #شعرج واصل حجولج🌿 # #اذا_شافج_كمر_يخجل😘 #ي أم عيون حراگات😌 #ي لخدج گمر ضاوي😉 احبج فروحتي ونطاني بوسه هوائيه .. خجلت حيل وبعدين عمي صار گبالي خجلت بالزايد .. عمي .. ههههه لك صاير شاعر علاوي .. تعالي عمو لتخجلين علي زوجج ومابقى كم يوم وتجمعكم غرفه وحده تونسو وضحكوا ربي يسعدكم .. اني ضحكت وركضت الغرفه البنات .. اوووف ياعلي شسويت بيه .. #شمس صحيت رسوله ورفل .. بالگوه گعدن .. رسل .. حبابه فروحه خليني انام للصبح منايمه .. فرح .. ههههه يمه الحب يمه .. دگومي عمتي تريدج رسل .. اي روحي واجي وراج .. تريگنا وخلصنا ريوگ .. طبعا رحاب متريگت تلعب نفسها من امي . گالت اكول وي البنات .. امي حست عليها .. بس خطيه سكتت مجت وعمي وعمتي انحرجوا .. گال عمو.. علي اخذ فروحه وامك وام بدر ورحوا اختار الغرفه واحتياجاتكم خلصوها .. اني اتفقت وي العمال يطلعون باجر يغيرون ديكور الغرفه .. #شمس عمتي .. فروحه حبيبتي اتركي المواعين البنات يكملون الباقي روحي جهزي نفسج .. رحت گعدت رسوله لسا ماصحت .. گلتلها حروح للسوگ شنو البس .. حبيبتي رغم مانعسانه .. طفرت عمودي .. لبستني كيلوت ابيض وحذاء وردي فلات ماالبس عالي .. وقميص ابيض وستره فوكاه وردي وشال بي ابيض ووردي .. طلعت اخبل .. لبست وخلصت وطلعت اشوف ماما .. اول مشافتني .. اللهم صل ع محمد وال محمد . يمه فروحه اتخبلين عبالك وحده من ذني بالتلفزيون .. فرح . هههههه طبعا حلوه اذا شايله جمال امي شلون مااطلع حلوه .. وحضنتها وبوستها وجودها يمي فرحني .. #شمس لان البنيه بهيج ايام تحتاج الامها بنصائحها بحنانها بكولشي .. شويه وسمعت علي يعيط .. فرح فرح تعالي بسرعه اجيت اتباوعتله .. نعم علي لگيته بالفانيلا .. گمت اتئتئ بالحجي .. فهيت علي .. اشو القمصان كولها ممكويه .. شلون اطلع هسا فرح .. استغربت .. اني متأكده كاويتهم .. صعدت للغرفه حتى اشوفهم .. واول مادخلت للغرفه دخل ورايه وقفل الباب . #بقلمي_شمس يتبع… | ||||
|
| |
|
28-09-18, 08:21 AM
| #17 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ............. بقلمي #شمس........... البارت 15 اتفاجأت من قفل الباب التفتت اله .. علي ليش قفلت الباب .. بدا يتقرب بخطواته الي واني ارجع لورى .. علي حباب لتجي .. واتباوع الصدره واحس نفسي جمدت علي حباب تدري بيه مااتحمل. . علي .. لج اشتعلوا اهلج فرح . شطالعه راح تموتيني والصبح تفترين يمي بگلبيتج ام الفتحات ومطلعه رجليج الجبن .. وحاله شعرج . خبلتيني بالگوه تريگت . لج اني الي گلت محد تهزني .. خليتيني مثل الطفل الي ميگدر يعوف امه .. #شمس فرح .. هههه يعني اني امك .. حباب خليني اطلع اشو هذا دفعني ع السرير وبقى يتلمس جسمي واني مغمضه وجامده مااريد اتباوعله لان انتهي هو اني هيج وميته وعرفت ماكو مهرب من علي .. شسوي ياربي اعيط مااگدر هو مخلي شفايفه ع شفايفي ومسيطر عليه مااگدر اتحرك .. تالي تكسرت الباب .. هو سحب نفسه واني ركضت للباب فتحتها شفتها رسوله .. يله الكل منتضركم .. هسا ماتصبرون كم يوم حبكت هسا وكت الطلعه . علي .. دروحي منا لا افلشه الوجهج👊 وكتها تجين .. حضنتها الرسوله .. لج نقذتيني من اخوج شويه وجان ميته جواه .. رسل .. هههه حلوه هاي جواه #شمس علي .. اوووف والله بعد مااتحمل غير يزوجونا ويفضوها طلعنا للسوگ واختارينا غرفه تركي ضخمه كولش وحلوه .. واختارينا تيبلام بلونهه وتحفيات وفرشات واشياء هوايه ومرينا ع محل احمد .. اشترينا من عنده كهربائيات .. ثلاجه وبلازمه وسبلت .. خلصنا شغلنا ورجعنا تعبانين .. فرح .. علاوي اشترالي اشياء كولش حلوه .. احساس حلو البنيه تجهز نفسها وغرفتها .. واخيرا حتصير عندي غرفه خاصه بيه اني وحبيبي علاوي .. فديته 😍 شگد كنت اخاف من عيونه هسا احسه احن انسان بالنسبه الي .. التهينا هذا الاسبوع بالبيت طلعوا العمال رتبوا الغرفه مالتنا وسوو سقف ثانوي وديكورات حلوه .. واني وي البنات اساعدهم لان رحاب راحت الاهلها. مريضه وحيدر ماهو بتركيا يجيب بضاعه ووعدني بدله الزواج يجيبها الي من تركيا .. #شمس خلص الاسبوع بالشغل .. وعلاوي هم ويانه يشتغل ويتغزل ويبوس .. اگله عيب منا امي وامك .. يروح يگللهن .. تستحي منج روحن اگعدن بالاستقبال اريد اخذ راحتي وي مرتي .. شايفين هيح .😂 اجت غرفه الاخشاب .. ونصبوها بالغرفه وفرشناهه وخلو الاجهزه هم طلعت تخبل .. عبالك غرفه اميرات .. رسوله تباوعلها وتگول يوم الي. طبعا هي تشتغل شويه وتروح تحجي وي احمد شويه .. ماگلتلكم احمد ومنتضر اجو ساعدوا علاوي بالغرفه ونصب الاجهزه .. ورسل كل ساعه تگلي .. صيحي علي وتروح هي بحجه تاخذلهم مي لو عصير وتحجي وي احمد لان منتضر يعرف بعلاقتهم .. #شمس خلصنا كولشي وبقت الملابس .. وصلنا علي للمجمع وراح .. عمتي ورسل اختارولي ملابس نوم كولها مشلحات .. بله شلون حلبسهم استحي .. وملابس داخليه واتراكات صيفيه وفساتين واحذيه وجنط ومكياجات .. #شمس وطلعنا رحاب ويانا لان گلت عيب الخاطر حيدر زين وياي وحباب ومشتريلي هوايه اشيااء من تركيا من غير مااكله بس هي بس تأفأف وكافي مشايفين هو السوگ طاير عود من تحتاج شي تشتريه .. وساعه تگول تعبت حتى امي .. گالت الله يساعدج عليها .. گولتلها لا يوم هي حبابه بس خاف صدگ تعبت .. اجه حيدر من تركيا .. وجابلي بدله مال اميرات تخبل وبيها ردان وكوله شغل لان اني ماردتها مشلحه استحي والزواج حيصير بالقاعه ومختلط .. وحذاء وتاج وكل شغلاتها حلوه كولش .. رحاب .. لعد ماجبتلي هيج بزواجنا . حيدر .. لج حبيبتي مانسيتج .جبتلج فستان احلى من بدله العروسه ويغمزلي😉 وصدوگ حلو فستانهه .. حيدر انسان رائع ويحبها بس اكيد مرته وتحب تدلل عليه .. احمد ربي الي نطاني هيج عائله تحبني وتخاف عليه واني الي لمت ابويه لان شمرني وجبرني .. خلصنا تجهيز ورتبت ملابس بالغرفه وملابس علاوي هم اشترينا اله .. والاخ كل يوم يتفحصهن ويگلي هذا الثوب حلو وهذا تلبسيه وهذا هيج ميجوز من سوالفه علاوي بعد ماخلصنا كولشي رحنا عقدنا محكمه .. وراد علي يغير الحاظر والغايب ويخلي بمكانهن فلوس بس اني ماقبلت .. واجه يوم الحنه .. طبعا سويناه بالقاعه رحت للصالون .. سويت وجهي وعدلت حواجبي وماصبغت شعري لان هو اشقر .. ام الصالون بقت هيج 😲 من شافته .. ورسل تگلهه صلي ع النبي شبيج فكيتي حلگج .. سوتلي تسريحه نازله وحلوه .. ولبست فستان صحراوي وبي ذهبي كولش حلو .. #شمس حفله الحنه كولش حلوه ولبست خمس بدلات وحده احلى من الخ والناس كولها تباوعلي .. وهاي الي تگول لعابه .. وهاي تلي تگول منين جايبيه تخبل .. رضاب تگولهم من الريف جايبيهه من ورى الغنم .. ضجت بالبدايه .. بس بعدين عادي ماكو واحد ينكر اصله ومو عيب جايه من وره الغنم من وره الخرفان .. الي الفخر اني بنتهم لان ربوني وتعبوا عليه .. وعمتي وامي بس يقرن المعوذات وينفخن .. رسوله ردحت ردح لان ام احمد تباوعلها ههههه يمكن احمد مسولفلها عليها .. لان كل ساعه صايحتها وتسولف وياهه ودور گوموني ارگص واني مااعرف بس افتر 😂 ورضاب كل ساعه ودافعتني اخر شي گعدت لان لابسه عالي ولاتروح هاي توگعني وتكسرني ويخرب عرسي .. خلصت الحنه .. ورجعنا البيت عمهم رافد ابو رضاب ورحاب .. لان گالوا ميصير تبقين وي العريس ببيت واحد .. وعلاوي تخبل يعني اليوم مااشوفج اموت .. لج تعالي باجر وشوفي اشسوي بيج اطلع القهر كوله هههه من التعب نمنا كولنا من وكت وامي الليل كوله گاعده تخاف شو شيسولي لان حست عليهن مو راحه .. #بقلمي_شمس يتبع... | ||||
|
| |
|
28-09-18, 08:25 AM
| #18 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية .............. بقلمي#شمس............. البارت 16 گعدنا الصبح سبحت وطلعت ولگيت رضاب واكفه يله ندري عروس بس هم گولي احنا نريد نسبح .. وهمه عندهم حمامين .. امها ماقبلت عليها حبابه المره .. بس رحاب ورضاب .. يافتاح وبدا الحجي وحده تصد ووحده ترد وبس اني وامي .. ماكو وحده من البنات تحجي لان رسل ورفل بقن يم عمتي بالبيت .. بس بنات عمهم حبابات باتن يمنا وضحك وسوالف .. رضاب خبلتني تگلي خطافه الزلم .. وماتتهنين بي ان شاء الله .. دخلت امي هي سكتت .. گلتلها ياله يوم راح يجي حيدر ورسل ياخذوني للصالون وانتي روحي يم بيت عمو هناك .. .. لميت غراضي واجت رسوله . وحيدر ورحاب گعدت بالمقدمه ترجع البيت عمو .. نزلنا اني ورسوله يم المركز التجميلي هم هيج يسموه اني اگول صالون .. ورسوله جايبه البدله وملحقاتهه وكولشي .. رفعت شعري كوله لان مختلط وعلي ماقبل البس حجاب بس طلبت من ام الصالون تحاول تغطيه بالغشاوه وخلتلي تاج والبدله تخبل .. فديته الحدوري نعم الاخو .. طلعت اخبل بدون مبالغه .. حتى رسوله تخبلت من خلصت .. وهي هم طالعه حلوه وعدلت حواجبها وخلت مكياج خفيف ولفت الشال ولابسه فستان يخبل كله الحمدي لان راح يجي .. وكل ساعه تگلي اني حلوه ..😂 ورسوله الخبيثه اخذتلي صوره من غير ماادري .. ودازتها العلي بسرعه اتصل علي .. لج هاي شطالعه شيصبرني لليل ياربي .. ويتغزل ويشعر .. خبلني واني بس اضحك .. يگلي اشبعي ضحك لان بالليل حتبجين .. واني مفهمت شي گوتله ليش ابجي .. علي .. لابربج متعرفين .. فرح .. والله مااعرف دگول ليش ابجي بالليل .. علي .. لج اسكتي فضحتينا .. ياربي اني اخذت بزونه مغمضه كولشي متعرف احمدك ياالهي .. خلص حبيبي وليهمج .. اني اعلمج .. غلقت الموبايل ورحت الرسل .. رسل عود شيصير بالليل وليش حبجي .. رسل... ههههههههه(إخًَْـُ بًًٌٍَُِطنٍَِّْيَِّ)ههههه� �ههههه لعد امج مگالتلج شي .. ليش اكو وحده بهذا الزمن متعرف شگد فطيره .. فرح .. لا مگالت شي بس گلتلي اسمعي كلام زوجج وانطيه نفسج ولاتشلعين گلبه .. رسل .. هاهي مثل مگالت الوالده .. بالمختصر المفيد فرح .. اي يعني شنو .. رسل .. يله حيدر يرمش معناهه واگف بالباب .. امشي وبالليل علاوي يعلمج ..😂 طلعنا واخذنا حيدر للقاعه لگينا الناس هوسه اني دخلت وگعدت بغرفه الانتضار ارتاح .. وامي اجت يمي وعمتي واشتغلت المعوذات ..هههههه اجه عمي بوسني من راسي وگال يوجه الخير صدگ من گال ابوج انطيتكم كنز .. من اجيتينا لسا المحلات ماشاء الله .. علي دخل وراه .. گاله وجهه خير عليه من اول يوم . من شغله الجامعه گضت بسرعه.. وباسني هم براسي وگال هنيالي عليج .. عمي .. يله استعجلوا الناس منتضره اتحضروا بس تسمعون الموسيقى تدخلون .. لزم ايدي علي ويبوس .. بيهن يگلي يربي اليوم الناس كلهه تحسدني ع الگمر الي وياي .. دخلنا للقاعه وكانوا مشغلين اغنيه .. ملحم زين ( عرس الغوالي) تخبل الاغنيه وبيها دبكه .. وعلاوي اول مادخل يرگص ويرگصني عليها .. واني مااعرف استحيت . تالي اجو اصدقائه يرگصون وياه .. هو وصلني للكوشه ورجع يدبك وياهم .. منضر حلو .. اتباوعله واگول سبحان المغير الاحوال علاوي اول ماعقدنا .. كنت ماطايقني وهسا الفرحه والحب مبينات بعيونك .. الحمد لله تالي گومونا نرگص اغنيه هادئه .. وهو حاظني والناس كلهه تباوعلنا ميته خجل .. وجابوا الكيكه وگصيناهه واحد اكل اللاخ .. وبعدين شغلو اغنيه .. وگامت كولهه تركص واني وعلاوي بنص .. بالگوه ارگص بس سويت نفسي مغمضه عن الناس وبس علي گبالي ونرگص .. كانت حفله وليله كولش حلوه حسيت نفسي اميره .. ورسوله واحمد نسوا نفسهم يرگصون ونضراتهم فاضحتهم .. بينما علي خطيه هلك من گد الرگص وحيدر وعمو هم .. اوووووف ليله متتعوض .. واخذلنا المصور صور بلقطات حلوه وصور عائليه .. وصوره هاي عجبتني اني وعلي گاعدين وعمو وعمتي ورسل ورفل حولنا بس رحاب تحججت مابيها حيل ومااجت .. تالي جابوا العشا للمعازيم .. وبعد ماتعشوا وخلصوا زفونا للفندق والسيارات ورانا .. علي هو الي يسوق واني بالمقدمه يمه .. وايد يسوق بيها وايد لازم اديه وكل ساعه يبوس بيها .. هذا الحجي هو نازع الستره والرباط .. من گد مارگص .. وصلنا للفندق .. ورجعوا البقيه .. گتله علاوي اي همزين وصلنا ميته تعب بس اريد اسبح وانام .. علي 😂😂 تحجين صدوگ شنو تنامين لج اني منتضر هذي اللحظه من زمان .. وانتي تنامين فرح .. ياللحظه .. علي .. تعالي حبيبتي .. راح انزعج البدله وترحين تسبحين وتصحصحين واني اگولج يالحظه .. اشو هذا فتح البدله وشهگ خررررب شنو هذا گيمر ويبوس بضهري .. وتگلي تعبانه واريد انام .. لج حتى السبح عوفيه وتعالي يمي .. نزعت البدله واني مستحيه .. وفل التسريحه نزل شعري كله ويشم بي وتالي نيمني ع السرير اني احس جسمي خدر وذبت بين ايديه وماحسيت ع شي الا ذيج... .... ذايبه ودموعي تنزل من الالم .. وهسا عرفت شيقصدن ماما ورسل .. عشت لحظه حلوه وغريبه ممزوجه بالراحه والالم شعور ماينوصف .. تالي خلصنا وبوسني بگصتي وگالي مبروك حبيبتي .. واني لسا منتهيه ومااگدر اگوم خربت بين ايديه احس جسمي راخي ومااگدر اگوم .. شالني للحمام وفتح مي دافي بالبانيو وخلاني وسبحني بأديه الى ان صرت احسن وعيت ع روحي كلشي ملابسه استحيت .. وگتلنه انطيني المنشف واطلع .. علي .. هههههه هسا يله وعيتي خوفتيني عليج .. خليت المنشفه عليها وطلعتها .. ودخلت اسبح .. كملت وطلعت لگيتها لابسه سيت يخبل وشعرها رطب وع طول المخده .. اجيت حصنتها ونمت ع شعرها واشم بي نوم 💤 منايمه قبل .. هيج النوم يم ملاك مثل فروحه غير شي..... تبيع | ||||
|
| |
|
28-09-18, 08:26 AM
| #19 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ........... بقلمي #شمس............. البارت 17 سأ جلس الى جانبك في دجى الليل سأ سامرك مع نجوم الليل وعلى طلعة القمر وسوف أ نظم شعرا من دمعي أشكو حر الجوى وهداء البحر و سكنت الامواج وتقاربت النجوم الى البحر ساطعه مستغربه صمت البحر وسكونه و أذا القمر توسط قلب السماء واضفى على البحر انوارة المدججه بروائع الرومانسيه والجمال نمنا ماحسينا ع روحنا الا ابويه يتصل .. لك علي وين صرتوا الساعه 10. هسا والناس منتضره .. علي .. اي يابه جايين .. اتباوعت الحبيبتي .. نايمه شلون الطفل .. گولتلها .. فروحه اليوم شعجب للعشره باقيه مو متعود ع المنبه مالتج من الصبح .. فتحت عيونها .. وابتسمت .. صدگ هسا بالعشره .. اتباوعتلها وابتسم واديه تلعب بشعرها وبأصبعي امرر ع وجهه وشفايفها .. ( مااجمل ان ابدا صباحي وانا الى جانبكي بين يديك بين حظنكي الدافي تلك هية اجمل لحظة سعادة لنا ) #شمس فرح .. امممم صاير شاعر حبيبي .. علي .. هو الي يشوف هيج جمال .. شلون ميصير شاعر فرح .. يله علاوي عيب هسا الناس كلهه تنتضرنا .. علي .. اي والله ابويه خبصني . فرح .. تدري شنو هسا امنيتي علي .. گولي حبيبي شنو فرح .. امنيتي هسا ازور الامام الكاظم .. صارهوايه مزايرته .. علي .. صار حبيبي بس يمر كم يوم .. اخذج ونشبع زياره لحضرته الطاهره .. #شمس فرح .. ان شاء الله بدلت فستان وسويت شعري ولبست شال وخليت مكياج خفيف .. ولمينه غراضنا وقبل لنطلع .. گلي علي .. فروحه شلونهه ليلة البارحه .. فرح .. يووووه علي لتخجلني علي .. هههههه. فديت اليخجل انطيني بوسه قبل لنطلع .. وصلنا للبيت ذبحوا جوايه طلي وهلاهل ورگص .. والناس تباركلنا .. كان يوم رغم مامتعب بس حلو .. وماما سألتني .. گولتهه الحمد لله خلصنا .. هالمره فهمت قصدها😉 ورسوله هم حصرتني الا تسولفين متستحي😮 خلصوا غدا وصعدنا اني وعلاوي بس مسوالي شي بس يحظن ويبوس وكاتل روحه ع شعري الا يفرشه ع المخده ياله ينام .. #شمس نمنا وگعدنا العصر بدلنا ونزلنا لان ناس تروح وترجع بقينا ع هذي الحاله اسبوع .. بعد الاسبوع راحت ماما البيتنا رجعها حيدر بوستها وابجي لان تعودت عليها بس مناك اخواني وبابا خطيه وحدهم .. ورحنا اني وعلي للامام الكاظم .. اووووف ياريحة الامام تخبل عبالك داخل للجنه ريحتهم مميزه وحلوه . دخلت اني من جهة النساء وعلي راح من جهة الرجال .. واتفقنا بهذا المكان نلتقي من نطلع .. دخلت هوسه .. وردت اصول للشباك .. بالگوه وصلت لزمته وطلبت منه يتمملي سعادتي وي علي ويحفضليا وطلبت من ربي بحق الامام الكاظم عندك تترسلي البيت اولاد من علي ونصير عائله كبيره... خلصت ردت اطلع مااگدر .. بالگوه طلعت العبايه بجهه والحجاب اعوج .. خرررب عليه ضحك علي من شافني گال .. هاي شمسويات بيج .. ههههههه بقينا بالصحن بره قرينا الزياره وصلينا وطلعنا .. افترينا بسوگ الكاظم .. واني ممحتاجه شي بس اصر علي يشترلي ويركض ع ملابس النوم .. ممصدگ 😂 تالي دخلنا للمطعم اتغدينا وطلعنا ومناك اخذني للزوراء تونسنا ولعبنا .. كان يوم حلو ومميز .. وبعدين رجعنا المغرب للبيت .. اشترينا هدايا للبيت كوله وشفت گلبيه حلوه الرحاب جبتها .. انطيتهيا .. اشو رجعتها عليه .. من غير متشوفهه . #شمس شكرا مااريد ذوقج ماينسبني .. اني وين وانتي وين .. ضجت بداخلي بي مابينت .. علي شافها هيج سوت .. گالهه. رحاب ترى فرح صارت زوجتي رسمي اذا كنت اسكت قبل هسا مااسكت .. اشو هي گامت تعيط .. وگالت هي البقت ترزل مرت اخوك وبنت عمك الكبيره عمود وحده معيديه مامعروف اصلها .. علي تخبل گام يعيط،عليها دخل حيدر سمع علي يعيط ع مرته .. تعاركوا واجه عمي رزلهم اثنينهم . گمت ابجي واجر بعلي .. لان هاي اول مره يتعاركون .. خوتهم حلوه .. ورحاب تعيط وتگلي خليتي الاخوه يتعاركون ارتاحي .. رسل .. گلتلهه بسببج تعاركوا مو بسبب فرح .. عموا گال شنو الي صار .. رسل وعمتي گلتلهم ع كل الي صار .. حيدر استحى وصعد .. ورحاب نكرت وتگول طبعا هنه صنف واحد .. #شمس تالي عاط بيهه حيدر وصعدت وبدا عياطهم فوگ .. اني بدلت ونزلت وراضاني علي گللي لتهتميلها .. اني واهلي نحبج .. گوتله هسا تروح منا توگع ع حيدر مااريد اشوفكم تتعاركون .. وبعد مااريدك تدافعلي .. خليها تحجي تعودت عليها .. باسني براسه وگلي .. كون الله ينطي عقل للبنات كلهن مثل عقلج .. نزلت سوينا عشا وكملته وي البنات وسوالف وضحك .. وراح علي راضه حيدر ونزله للعشا بس رحاب مرضت تنزل بس عزلنا عشاهه خاف تنزل بالليل جوعانه .. كملنا العشا وغسلت المواعين وصعدت لفوگ لبست ثوب قصير ماروني واني بيضه وبي فتحه من الصدر .. من شافني علي متحمل . اني الي جبتها الروحي 😂😂 مر شهر ع زواجنا .. والبنات بدت امتحاناتهم واني شلت الشغل عنهم خليتهم بس يدرسون .. ورحاب متحاجيني وكلامهه مستمر عليه .. والي مضوجني تغار ع حيدر مني لان صيف وحاره والبس تراكات ربع ردن او نص تگلي تغرين بزوجي تطلعيله زنودج وانتي بيضه واني والله هاي الملابس البسها بس من حيدر بالمحل اذا اجه البس گلبيه لو دشداشه .. يتبع..... | ||||
|
| |
|
28-09-18, 08:29 AM
| #20 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #زوجتي_الريفية ............ بقلمي #شمس............ البارت 18 خلصت امتحانات البنات واثنينهم نجحوا .. رفل نحجت للثالث ورسل نجحت للسادس .. وصار لازم نبدي دورات اني وياهم لان حقدم خارجي وامتحن سادس .. يعني السنه الجايه كولنا بكلوريا .. بس قبل الدراسه والدورات .. اخذنا عمو سفره الاربيل وللمصايف .. تونسنا واني وعلاوي تركناهم ورحنا وحدنا لان هم يتعبون احنا بعدنا عرسان😉 وركبنا بايسكلات ونتسابق ههههه تصدگون سبقته العلاوي .. وعلاوي صفن العالم علينا كل ساعه خاتل بيه بمكان عبالك حبيبته مو زوجته .. واني اتغيرت مو ذيج فرحه الي متعرف تلبس او تحجي او تكسب زوجها .. لا وبتدريس من رسل ههههه صرت انسانه واثقه وگمت اتغزل بعلاوي وهو ممصدگ يگلي بيج شي خاف مريضه لو شاربه شي .. هناك كل ساعه يريد يتعارك وي واحد والزمه .. لان يتباوعولي 😂 خلصت اجازتنا ورجعنا .. وبدينا بالدراسه والدورات ياخذنا علي ويجيبنا بس ماخليت. دراستي تأثر ع شغلي واهتمامي بعلي .. رغم ما عمتي متقبل . بس هي خطيه شنو ذنبها تشيل الشغل عنا .. وحتى اخلص من كلام. رحاب لان تبقى تحجي اذا مااشتغل .. حتى علي من يجي اعوف دراستي واگعد يمه ابد محسسته اني مشغوله عنه .. #شمس اني كنت ذكيه يعني بسرعه افتهم الماده حتى رسل كنت اعيد شرح الاشياء الي مفاهمتها الها .. بهذي الفتره مقررين احنه منسوي طفل الى ان اخلص سادس .. رحاب كل يوم تگولي .. اشو لسا ماكو حمل .. اخاف اخذنا اخوه عقيمين وماندري .. لان هي مصار عندها لسا .. #شمس صدگ ضجت مااسمح اتقلل من شأن زوجي ورجولته .. رغم هي حتى ع رجلها اتهمته بالعقم .. فقررت مااخذ احتياطي واحمل حتى اثبتلها انه زوجي مو عاقر .. خلصت العطله وبدت الدوامات واني بقيت اروح للدوره وارجع .. ويمتحنونه بالمعهد ودرجاتي عاليه حتى الاساتذه يمدحون بيه .. #شمس اقل درجه اخذتها 90 بالانگليزي .. تالي گلت العلي يدرسني .. لان هو شاطر وذكي وافهم عليه بس طلب من كروه ع كل حصه ..😂😂 ميفوتله فايته فديته 😘😘 وصدوگ تحسن مستواي .. وعمي تخبل گال معقوله انتي مو بالمدرسه وهيج درجاتج .. وگمت ادرس رسوله وزينه گام تفهم عليه .وتحسن مستواهه وبيوم .. #شمس گاعدين واندگت الباب واجو خطابه الرسل .. ناس ماشاء الله .. ولد بالمعهد ويانا شافهه وانعجب بيها .. عمي شبه اقتنع .. رسل اتصلت ع احمد وتبجي .. احمد من سمع تخبل .. احمد .. من گلتلي رسل اجو ناس يخطبوها خفت تروح مني .. اتصلت ع علي وگتله هسا اريد اشوفك .. #شمس علي .. لك شبيك خبلتني تعال وتعال شكو خيرك .. احمد.. علي انت اخويه وتعرفني من زمان وحالتي زينه .. لهذا اريد اطلب منك اختك رسل .. من زمان معجب بيها واريدها .. علي .. بس اجوها ناس رسل وابويه مقتنع .. احمد .. يعني سألتوا البنيه مقتنعه .. علي .. وانت ليش واثق متوافق .. اكو شي بيناتكم .. احمد . .. شكو يعني كولشي ماكو .. #شمس علي .. حسيت اكو شي تخبلت لزمته من قميصه .. احمد گولي معقوله تخوني وتخون ثقتي وعندك شي وي اختي احمد .. لك شبيك والله ماخاين ثقتك .. اني حبيتها وانعجبت بيها من يوم التخرج .. وكم مره شفتها وياك وبزواجك وكانت بينا نضرات اعجاب .. وحسيتها تبادلني نفس المشاعر بس اثنينه نخاف نتجرأ نحجي لان انت اخويه واخوها .. ولهذا اجيت خطبتها منك لان ردت ادخل من الباب وتصير حلالي .. انت روح واسأل البنيه واذا موافقت اني انسحب .. بس المهم علاقتنا وخوتنا ماتروح .. علي .. اذا هيج فماالگي احسن منك .. اني اشوف رسل واذا موافقه احجي وي الوالد انت احسن من الغريب اخويه واعرفك من زمان .. وحضنته #شمس رجعت للبيت گلت الرسل .. گالت الولد مايتعب وصديقك .. خلينا نشوف رسل .. صحنا رسل الغرفتنا وحجى وياهه علي وخجلت نصت راسهه .. گتله علي السكوت علامه الرضا .. علي .. ههههه لعد اروح احجي وي الوالد .. طلع علي .. ورسل حضنتني .. يومه فدوه فروحتي وين الگي اخت مثلج .. فرح .. ههههه ليش مطلع صوتج هذا قبل شويه .. رسل .. ههههههه علي حجى وي عمي وعمي ماعارض ووافق تعذروا من الي خطبوهه .. واجوا اهل احمد وحددو الخطوبه .. بس الزواج من تكمل سادس .. بيوم الخطوبه هوسه والاهل كولها ملتمه بنات عمهم وبنات عماتهم .. اني رحت وي رسوله للصالون .. طلعت تخبل لبست فستان مخصر ومنفوش من جوه ابيض وذهبي .. من خلصنا ردنا نتصل ع علي .. ذكرت جهازي نسيته ع الطاوله بالمطبخ من طلعنا .. اتصلت ع علي من رسل وگتله تعال اخذنا وبطريقك شوف موبايلي نسيته بالمطبخ .. #شمس رجعنا للبيت واجو اهل العريس وعقدوا سيد ولبسوا الذهب طبعا احمد هم طلع مثل علي يحبون الوكاحه .. تال النسوان طردن احمد يم الزلم .. اني صعدت لبست نفنوف قصير فوگ الركبه ومفتوح الضهر .. وحليت شعري ع طوله .. نزلت كلها هيج اهل العريس واهلنا😲 ههههه دخلت للمطبخ شافني علي .. لج اشتعلوا اهلج هاي شلابسه .. شلون هسا اعوف العالم واصعدج للغرفه ياربي شأسوي واجه يحضن ويبوس واني ادفع بي اگله عيب مايقبل .. تالي دخلت رضاب ماتت من شافتنا .. هو استحى وطلع . .وهي تخزر بيه وتگلي شبعي حب وحنان مبقى شي وترجعين للزباله الي اجيتي منها .. مااهتميت عفتها ودخلت گعدت يم رسوله .. يتبع... | ||||
|
| |
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
1Likes
العرض العادي
