آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
25-01-20, 01:05 AM
| #492 | ||||
 
|  بارت 23 للحظه فكرت تسقط نفسها ولا يمن عليها بمساعدته لها ! ما يدري وش طلعها هنا وش سالفة هالبالون إلي بيدها ! تكلم وهو يمد يده بحرص : امسكي يدي ! تكلمت برفض : ما ابغى ! ما ترك لها فرصه مد يده مسك يدها بسرعه وهو يشوف الحديده ما هي ثابته باي لحظة تسقط ! مسك يدها وسحبها لداخل السطح بصعوبه ! اول ما استقرت على ارضية السطح ..كان كف يده مستقر على خدها وبغضب: انت متى تعقلين ! متى تجوزين عن حركاتك البزرانيه هذي ! تراك ما عدت صغيره ! صدق رح تبقين طول عمرك ما عندك احساس ولا مسؤولية !ّ رمقها بنظرات احتقار وقرف ! جالسه على الارض وتناظر الموقف بصدمة ...ما هي قادره تستوعب مد يده عليها ! بكل وقاحه يضربها ! وفوق كذا يناظرها وكأنها ما تسوى نعال ! ما تسمح له يناظرها كذا ابدا ! يكفي هالنظرات والكلام إلي يذبح الف مره ! للحين يعايرها بعدم المسؤوليه ! عملت المستحيل حتى ترضيه بالماضي وكله طار بمهب الريح ! ما يتذكر ولا شيء حلو من ماضيها معه ...ما يتذكر الا كل شيء سيء وما اكتفى شوه سمعتها بين أهلها ! ما يحس كل يوم بعد يوم تذبل لفراق بناتها ! ما هي قادرة تنسى ! بعكسه مبسوط وتجاوز الصدمه وتعوض بعياله من زوجته ! اما هي ! خسرت كل شيء ! قلبها يوجعها من فراق التوام ...تحس روحها تحترق ...كل يوم عيونها تبكي لفراقهم ...بداخلها صرخات ..ما تقدر تكتمهم اكثر من كذا ... وفوق هذا بعده للحين يقول ما عندها احساس! وقفت بهدوء عكس النيران المشتعلة بداخلها .. ناظرته لما هم بالمغادرة ...التفتت حولها بنظره سريعه ...ما في شيء يفي بالغرض ... نزلت نظرها للاسفل واستقرت عينها على ما يفي بالغرض .... _قرر يتركها قبل ما يتهور ويذبحها بيدنيه ...انسانه لا مباليه ..عديمة مسؤوليه ...ما في شيء يوصف مشاعره اتجاه الجازي ...تزيد نيران الحقد بداخله لما يشوف تصرفاتها هذه تذكره بشق التوام إلي فقدها للابد ! كله بسببها قطع افكاره لما حس شيء اصطدم بوسط بكتفه م ما كانت الضربه بذاك القوة ..ناظر الارض بعد ما وقع هذا الشيء على الارض ( نعال ) التفت للخلف والنيران تطلع من عيونه ..كيف تتمادى وتضربه بنعالها! حس انها اهانه له كبيره ما رح يتغاضى عنها ابدا ! _رجعت للخلف خطوة لما شافت نظراته الغاضبة ...رفعت يدها بتهديد وقلبها يدق بقوة : وقسم بالله اذا قربت الا اذبحك واشرب من دمك ! المره هذه بكتفك المره الجايه براسك ! ما اسمح لك تمد يدك علي ! وبصراخ : تفهم ! ما لك سلطان علي ...ايام إلي استعبدتوني فيها خلاص ولت ! ما احد يتدخل فيني ! لو اقفز عن الف طابق لا تتدخل تفهم ! قبل ما يرد او يتوجه لها التفت للخلف لما توجهت حنين بخوف نحو الجازي تتفقدها :،-انت بخير ! الجازي هزت رأسها بهدوء : بخير ! التفتت حنين لجواد الرغم انها ما تطيقه ..لكن موقفه و مساعده الجازي اجبرتها تنطق : مشكور ما رح انسى لك هالمعروف ! تنهدت الجازي بقلب ميت وما التفتت لكلام أمها مع جواد ...تحس بداخلها كبت كبير تبغى تفرغه ...لازم ترجع للبيت وتبكي براحتها لعل الضيق يزول ! تحركت بخطوات ميته تاركه جواد وامها إلي يتكلمون ...وجواد بدا يعيد ويزيد بموشح المسؤوليه ! ناظرت البالون بابتسامة متألمه ما زالت تمسكه بقوة ! كادت تفقد روحها بسبب تسرعها وحركاتها البزرانيه ....ابتسمت رغم الحزن الذي اعترش قلبها لفرح اختها الصغيره إلي واقفه بدايه الدرج وتبكي ....تقدمت منها ونطقت بمراره: انا بخير ليه الدموع ! رفعت نظرها على صوت جدتها المعاتب ما انتبهت على وجودها : يا ابنتي اتركي عنك هالحركات ما وصلك منها الا وجع الراس ! ناظرت جدتها بعيون دامعه : جدتي الجده بقلب حزين للحال إلي وصلت له حفيدتها العمر يتقدم فيها وما كسبت لا زوج ولا طفل يملي عليها حياتها ! قطار حياتها يمشي وهي ما زالت واقفه مكانها بمستنقع احزانها رافضه الخروج! متاكده ما رح تطلع من هالحزن الا اذا تزوجت وانجبت اطفال وقتها رح تنسى التوام ! بس من وين تتزوج وبعد طلاقها طلعت عليها اشاعات كثيره ما لها اول ولا تالي ! وحسب معلوماتها مااحد طرق بابهابالرغم انها موظفه والموظفات هالايام عليهم طلب ..لكن ما تدري ليه حظ حفيدتها كذا ...ما تهنت بحياتها ..استغفرت بسرها وهي تردد يا رب لا اعتراض على حكمك ! اخذت نفس عميق وناظرت الجازي وهي تحس الغصه بحلقها : عسى ربي يعوضك خير ! قبل ما ترد على جدتها ناظرت الطفلة دخلت المكان واثار الدموع بعيونها على بالونها ..اقتربت منها الجازي بتأمل ...جلست على مستواها ...بانت ابتسامتها من تحت النقاب ..ابتسامه تجمع كل مفردات الحزن والالم لتدل على كمية الالم إلي يحملها هالشخص من خلف قناع الابتسامه...مدت لها البالون وبصوت فيه غصه : هذه البالون لك ! ابتسمت مريم وهي تمسك البالون بفرح وناظرت ابوها إلي يقف خلف الجازي وبينهم مسافه : بابا هذا بالوني ! تنهدت الجازي وما التفتت للخلف ما تبغى تشوفه ..قبلت مريم بمحبه ..بعدها وقفت اخذت حقيبتها وغادرت بهدوء اوجع هالمشهد سوسن إلي كانت واقفه عند باب غرفة جدتها وتبكي بقوة ! تحس موقف صعب ما تقدر تتحمله...وش اصعب من انك تشوف ابنك قدام عيونك وانت ما تدري انه ابنك ! تبكي الدهر على فقده وهو قدام عيونك طول الوقت ! ياااااه ما اصعب هالشعور ما تقدر تتحمله ! صرخت بصوت عالي قبل ما توصل الباب اكثر من كذا ما تقدر تسكت: الجاااااازي ! انتظري توقفت الجازي للحظه بدون ما تلتفت للخلف ونطقت بصوت مهتز دليل على البكاء: اشوفك بعدين ! وما تركت لها فرصه وغادرت المكان باقصى سرعه ما لها خلق تسمع نصائح وإرشادات وعتاب من سوسن على طيشها ! خلاص ما عندها القوة تسمع اي شيء ! الى هنا يكفي ! خرجت من بيت جدها ودموعها ترفض الوقوف ....ما تدري وش سبب هالدموع ! مسكت جوالهاواتصلت بسعود يمرها بسرعه حتى يبعدها عن المكان إلي يجمعها بجواد لانها ما تتحمل تشوفه اكثر من كذا ! ** ** ** دخلت بيت عمتها بدون ما تنطق حرف واحد مع سعود..وهو بنفس الوقت احترم حالتها وما سألها عن شيء وهو يلمحها تمسح دموعها بخفه ! لمحت عمتها بالصاله ردت السلام بدون ما تناظرها ما لها خلق لاسئلة عمتها وتحقيقها ! توجهت لغرفتها مباشره قفلتها بالمفتاح وسمحت لنفسها تفرغ احزانها على راحتها ! رفعت نظرها نجوى باستغراب ما امداها ترجع دوبها واصله ! ناظرت ولد اختها وقبل ما تتكلم دخل سعود وتكلم باستغراب : ولد خالتي هنا ! وش صاير بالدنيا وجاء يزورنا ! وقف يسلم عليه بابتسامه : والله اصابتني دوخه وانا ألف وادور حتى وصلت لبيتكم ! سعود رد بابتسامه : كان اتصلت فيني وانا ادلك جلس بعد ما عفس ملامحه : هذا حال إلي يعتمد على اخوك الغبي سويلم ! ما يعرف يوصف مثل خلق الله جاب لي الضغط ! نجوى ضحكت : حرام عليك يعني انت اول مره تدخل هالمنطقه اكيد رح تتغلب حتى توصل سعود بلقافه : الاهم وش جايبك هنا ! رفع حاجب بانتقاد : شوفوا قليل الادب ! بدل ما يقول حياك يقول وش جابك ! سعود مط شفته : يعني لاني مستغرب ما عمرك جيت هنا ! نجوى بابتسامه : تعرف انه جده مات ولما وزعوا الارث وتقاسموا بينهم طلعت لهم شركة هنا وجاء حتى يمسك امور الشركه ! سعود هز راسه : حلو يعني رح تعيش هنا ! هز راسه بالنفي : كنت مخطط كذا بس خالتي تقول انه بنت خالي وليد هنا قاطعه سعود : وش عليك منها تطلع من الصبح لشغلها وترجع لامها في بيت جدها وما ترجع الا وقت النوم سكت بحيره : انا رح انام بالمجلس الخارجي لوقت ما ادبر اموري هنا ! نجوى بمحبه : البيت بيتك والحين خليني اجهز لك لقمة تأكلها اكيد انك تحس بالجوع! وناظرت سعود باستفسار : وش فيها الجازي راجعه الحين ؟! لا تكون ضايقتها بكلامك التافه! رفع حواجبه باستنكار : والله ما قلت لها شيء،! من اول ما ركبت معي وهي تبكي ! ما ادري وش فيها! يمكن جدها ضايقها بالكلام ! نجوى بضيق : يا هالجد ما اثقل طينته ! ما علينا الحين اجهز لكم الاكل ! تركتهم وغادرت ...يسمعهم يتكلموا حسب معلوماته انه خاله عنده بنات بس وش وضعهم ما يدري ولا عنده فضول لسوالفهم ...مجرد ما طلعت عمته بدأ يتكلم مع سعود بأمور خارج امور العائليه ! ** ** ** ** في اليوم الثاني جهزت نفسها بنفسيه بالحضيض ...ما لها خلق لشيء ! ناظرت الساعه تأخرت عن دوامها ! اتصلت بياسمين إلي خبرتها انها داومت ! قفلت الخط بضجر ..رح تنزل وتشوف واحد من عيال عمتها ! نزلت بشويش لما شافت عمتها بالصالة جالسه تكلمت بهدوء : صباح الخير ! نجوى ناظرتها وابتسمت بحزن على حال هالجازي : صباح النور ! وش فيك متأخرة طقيت على باب غرفتك وما رديتي ! ردت بصوت اقرب للهمس : راحت علي نومه ! نجوى باستغراب : وش فيك قاطعتها الجازي : وين سعود تاخرت! التفتت للخلف لما تكلم : هذا انا ! شرفي دوم متاخره ! نجوى اجلت أسئلتها لوقت رجوع الجازي ما في وقت الحين ! طلعت مع سعود وهي تسمع سوالفه ونكته على هالصبح سعود بروقان اسمعي اخر نكته : يقولون انها سلحفاه دخلت مطعم فجاء صاحب المطعم وقالوا ارموها برا م نستقبل بالمطعم سلاحف ..فرموها الموظفين برا المطعم ..بعد سنين رجعت وقالت لهم :ترى فيه اسلوب ! ابتسمت بدون نفس على اخر نكته ! ما تدري وش سبب هالحزن إلي مخيم عليها ..ما هي عارفه تكمل حياتها وتعيش بسعاده مهما حاولت ترجع لنفس النقطه ! يمكن تانيب الضمير هو السبب ..دوم يراودها شعور انها السبب بفقدان التوام ! قطعت افكارها لما تكلم سعود : وصلتي! ناظرته ونزلت بهدوء بدون اي كلمه ....توجهت للداخل بخطوات هادية لمكتبها ...شافت البنات مجتمعات ويتكلمون بأمر وكأنه خطير ! ردت السلام بدون اهتمام وردت على جوالها إلي يرن بإلحاح : هلا يمه ! حنين بتفقد : وينك ما تردين ؟! جلست بعدها تكلمت بهدوء : كنت داخله للشركه حنين باهتمام : كيف وضعك الحين ..اتصلت فيك البارحه وما رديتي ! الجازي بهدوء: اسفه يمه الجوال كان صامت ونمت وحتى تاخرت على الدوام حنين رفعت حاجب : وش جبت شيء جديد ! دوم متأخرة ! المهم كيفك الحين ! تدرين للحين قلبي ضايق كلما اتذكر موقف البارحة ! بالله عليك يالجازي لا تكرري هالحركات ترى قلبي ما يتحمل يشوفك بخطر ! او يفقدك ! اذا انت بايعه الدنيا وما يهمك فيها احد ..حافظي على حياتك عشاني انا وأبوك ترى ما نصبر على فراقك ! سكت حنين بضيق تنهدت الجازي وردت بهدوء : ما بعت الدنيا بس قاطعتها حنين : اوعديني ما تكررينها هزت راسها بطاعه : ان شاء الله ! استأذنت من امها وقفلت الجوال بضيق ....لازم تغير من تصرفاتها وتحسس امها وابوها انهم شيء كثير بحياتها ! لازم تحاول حتى تنسى احزانها وتبدا من جديد! زفرت بضعف ما تتوقع تقدر تكمل ! رفعت راسها لنسرين إلي تكلمها : علامك متاخره ما تدرين عن الاخبار الجديدة ! الجازي ما لها خلق للسوالف : لا نسرين وهي تجلس على مكتب الجازي : صاحب الشركة الاصلي توفى وإلي تورثها ارسل ولده يقوم بادارة الشركه بعد ما تبين لهم فشل الشركه! عقدت حواجبها : والمدير ردت سحر وهي توقف قريب منها : فصلوه ! نسرين بابتسامه : حتى نائبه فصلوه وعينوا نائب ثاني اختاره المدير الجديد اليوم !. ضاق خلقها على المدير القديم كان رجال محترم كيف يفصلونه كذا ! ما عاد فيه ذمه ولا ضمير ! نسرين تتابع كلامها بابتسامة : ما كملت الاخبار ! ااااه يا الجازي لو تشوفين المدير الجديد جمال يوسفي اتوقع لو تشوفينه الا تقطعين اصابعك من جماله ! ضحكت الجازي بصوت مرتفع على كلامها ..هذا اخرها تقطع اصابعها عشان رجال ! ما تدري نسرين انها قفلت قلبها بقفل من حديد من بعد جواد وش تبغى بوجع الرأس ! نسرين باستغراب : اول مره أشوفك تضحكين ! سحر : الظاهر تضحك علينا ! هذا ما يليق فيه الا بنت مثلي طول ونحافه وبياض نسرين بغيره : خلاص عرفنا انك جميله ! ناظرت الجازي بفضول : نفسي اشوف وجهك مع هالنظارات ما هو باين منك شيء! سحر ناظرت الجازي بتقييم وبعدها نطقت : لا تزعلي مني اول ما داومت هنا ظنيتك عجوز ! نسرين خزت سحر إلي تبالغ بقوة : كانك تبالغين ! انا عكسك ظنيتها مخربطه تبغى مدرسه الاعداديه حجمها صغير وتبان انها ما زالت صغيره ! الجازي تنهدت وطالعتهم بدون خلق : انا شينه قصيره دبه عجوز على حفة قبرها وادرس بالمتوسط ...وش تبغون مني ! مبارك عليك المدير الجديد لا تنسي تعزمينا على العرس ! يا سخف عقل البنات ! سحر حست بالفشيله ورجعت مكانها وهي تتوعد بالجازي ! نسرين تفشلت وبتدارك : براحتك ! زفرت بضجر الجازي من لقافة الناس ما تحب احد يتدخل بحياتها ! عدلت النظاره وبدات تنجز شغلها بصمت ! وعقلها يشتغل بسالفه الامس ! ما تبغى تزور امها اليوم وش يفكها من لسان جدها ! ما لها خلق له يرتفع ضغطها بسرعه بسببه ! تذكرت ابوها تشعر بالحنين له ...وقت البريك رح تتصل فيه ! *** *** *** ** بعد ايام جالسه مع امها وتشعر بالتعب من لما مسك المدير الجديد الشركه زاد عليهم الشغل والتدقيق ..كرهته قبل ما تشوفه ...ناظرت امها : ضغط العمل اضطر اكمل الشغل بالبيت حتى عمتي نجوى كم صار لي ما جلست معها ما في وقت ! حنين : وش لك بالتعب استقيلي واجلسي معي ابوك ما هو مقصر معك ! قبل ما ترد دخلت ام جواد ...عفست الجازي ملامحها ما لها خاطر تشوفها ...لانها بكل بساطه شريط الماضي ينعاد قدام عيونها ! سلمت ببرود واضح بدون ما توقف كثير احترمتها لكن الاحترام ما اثمر ! جلست ام جواد بصمت وخاصه العلاقه بينها وبين حنين زفت ومع طلاق الجازي صارت ازفت ! استبشرت ام جواد لما شافت ام أحمد داخله ! سلمت ام احمد ببرود وجلست بجانب ام جواد ...ام احمد ناظرت الجازي : ما احد خطبها ! غريبه متوظفه وللحين ما تزوجت ! حست الجازي بكلامها يضرب الوتر الحساس ...تبغى توصلها رساله انها مرفوضه بالمجتمع وما احد يبغاها ! لكن مستحيل تنولهاا مرادها وقبل ما ترد تكلمت حنين : والله لو بغت الجازي الزواج كان تزوجت من اول يوم انتهت فيه العده ! لكنها عافت الزواج وسنينه ! نحاول انا ووليد نقنعها لكنها رافضه بقوة ما اقول الا عساها تقتنع وتوافق ! ام جواد عفست ملامحها وما تكلمت ! ام احمد بعدم تصديق : بس ما سمعت احد من معارفنا خطبها حاولت تظهر حنين انه الوضع عادي وبداخلها نار منهم : وش رايك اعدهم لك بالاسم ! دخلت الجده بهدوء وهي تشم رائحة مشكله كبيره رح تغير الموضوع قبل ما تشب النار بينهم ! ام احمد باصرار : قولي أسماء بعض الخاطبين اكيد نعرفهم الجده ناظرتها وما عجبها كلامها : الحق عليك يا الجازي المفروض جبت هويه ودفتر عائلة كل خاطب ...وش هالسالفة هذي !- ترى انا ما احب التبجح فلان خطب ابنتنا ورفضناه .. عيب هالكلام ..خلاص يجيها عرسان ورفضتهم بدون تحديد أسماء ! ام احمد امالت شفتها من حماتها : ترى ما قلنا شيء سوالف عادية..انا كنت ابغى اتاكد سمعت زوج فوزية خطب الجازي قاطعتها حنين بانفعال :-تخسين هالشايب يخطبها ! ام احمد بهمس وصل لاسماع الجازي لانها قريبه منها :-مين رح يخطبها غير الشيبان ! حست بالدم يغلي بعروقها ما تدري وش تنطق ما تدري ليه هذا الموضوع بالذات تتبخر الإجابات من عقلها ! حنين وقفت بغضب : ما امداك تنسين نايفووووو ام جواد بقهر : كان بزر والله اعلم مين لعب بعقله ! الجازي ناظرتها بغضب: وش قصدك ! ام جواد بتراجع: مااقصد شيء الجده بضيق ظهر على ملامحها: لا حول ولا قوة الا بالله ! وناظرت الموجودين : وقسم بالله اذا ما تقفلت هالسيره الا قاطعها دخول الجد ...ناظر الموجودات وعفس ملامحه لما جاءت عينه بعين الجازي ...ينقهر من تصرفاتها الغير مباليه ! جلس جنب زوجته وهو يحس الوضع ما هو تمام : وش فيكم ! الجده بهدوء : ما في شيء ! وبدات تدخل بمواضيع حتى تضيع السالفه ....جالسه تقلب بجوالها وهي تسمع جدتها تتكلم باريحيه ! متى يرجع ابوها ويرجعون لبيتهم ! ملل هالحياة ! طالعت فرح إلي دخلت الصالة بابتسامه: انا جاهزه! وقفت الجازي وهي تناظرها : قدامي اشوف !، رفع الجد حاجب باعتراض : وين ؟! ما كلفت الجازي نفسها ترد عليه استمرت بتعديل النقاب ! حنين بتردد : فرح رح تروح مع الجازي تزور عمتها زمان ما راحت عليها ! وقف باعتراض : هذا الكلام ما يمشي معنا ! لا تنسين فرح مخطوبة لولدها كيف تزورهم بدونك او بدون ابوها ! الجازي ناظرته بقوة : بس انا معها ! الجد بنبره ساخره يكلم حنين : واضح انها قد المسؤولية كثير! حست الدم يغلي بعروقها من كلامه المسموم وبنبره عاليه : عندي مسؤوليه اكثر منكم كلكم ! و اختي ما احد يتدخل بطلعاتها دام أبونا اعطانا اوكي ما احد له دخل ! مسكت يد فرح وسحبتها للخارج بدون ما تعطي للجد فرصه يرد او يعترض ! حنين زفرت بضيق وهي تشوف ابوها الغاضب ! ام احمد بانتقاد : وش فيها ابنتك صايره متوحشه كذا ! الجده بقهر : ما هي متوحشه بس انتم إلي ما عندكم قلب ! جالسين تجرحون بالبنت وتبغونها تسكت !. تراها كبرت ما عادت صغيره ! خلاص كل واحد ينشغل بنفسه ولا يتدخل بالثاني ! الجد طالع زوجته بنظرات ما فهمتها وغادر المكان ! ام جواد ما تدري تضايقت على الجازي،: عسى ربي يعوضها بالافضل ! حنين ناظرتها بعتب كله بسببهم دمروا حياة الجازي بكل برودة اعصاب ! ** *** ** •••• ** فرح ناظرت الجازي بتساؤل : رح نروح لبيت عمتي مشي ! الجازي بدون نفس تكلمت: الحين الزفته ييجي يأخذنا ! فرح بحرج : سعود قصدك ! الجازي مطت شفتها بسخريه :سبحان الله عارفه انه خطيبك زفته ! قبل ما تتكلم فرح اشرت لها الجازي تسكت ما لها خلق تسمع كلمه وحده ...يقهرها كلام جدها المشكله انه جدها وما تقدر تفتح فمها بكلمه ...نفسها تخنقه وترتاح من كلامه إلي مثل السم ! وقفت الجازي لما شافت سيارة سعود ...ركبت السياره مع فرح وتكلمت بهدوء : وصلنا لمول «.....» سعود باعتراض : خيانه طالعين بدوني ! وش رايك يالجازي تروحين مع صديقتك وانا وفرح نلف لوحدنا ! طنشته الجازي وهي ترد على الجوال وتكلم صديقتها ! سعود ناظر فرح من المرايه : على وش شايفه حالها ! ابتسمت فرح باحراج وهزت كتوفها ما عندها اجابه ! قبل ما يوصلون قفلت الجازي الخط تاركه المجال لسعود يكلم فرح ..فترة الخطوبة تسمع بجمالها ولها طعم غير لكن للاسف ما عاشت ذيك اللحظات مثلها مثل باقي البنات ما رح تحرم فرح انها تعيش هاللحظات ! ناظرت سعود بامتنان دوم مغلبيته معها : لما نكمل رح ننتصل فيك ! سعود بابتسامة : حاضر عمتي ! ضحكت فرح ببراءه على لهجة سعود وطريقته بالكلام ...تنهدت الجازي تغبط اختها على ابتسامتها وفرحتها ...هي الوحيدة بين أخواتها ما فرحت !، ** ** ** ** اسند ظهره للكرسي وبابتسامه: مين يصدق اني اشوفك بعد مرورسنين طويلة! جواد بابتسامة : الدنيا تجمع وتفرق بين البشر ...والحين خلاص استقريت هنا ! هز رأسه بعدم راحه : للحين ما تعودت هنا ...منطقه جديده وكذا ! جواد : ان شاء الله ربنا يوفقك ما قلت لي كيف اوضاع الشركه الحين ! زفر بضجر : وضعها عدم الظاهر انهم كانوا يجمعون اغبى الموظفين ويحطونهم بالشركة! لكن رح أحاول اعمل اعادة ضبط للموظفين ورح افصل إلي ما يعجبني خبرته ولا تاهيله العلمي ورح اوظف موظفين جدد بخبرات وتاهيل علمي افضل ! وانت وش صار على مشروعك ! مط شفته بضيق : مشروع فاشل ما تتصور كم دفعت فلوس فيه وبالاخير خسرته !- عقد حواجبه بضيق : بعين الله وش تشتغل الحين ؟ جواد ابتسم بضيق: رجعت اشتغل مع جدي واعمامي حتى اسدد القروض إلي تراكمت على ظهري ! رد بنخوة :ترى رقبتي سداده اذا قاطعه جواد بنظره شكر : ما تقصر! اقتربت منه مريم بطفوله: بابا نبغى مثلجات قاطعها عبود وهو يمسك يدها : تعالي طالعهم بابتسامه : ما شاء الله ذول عيالك ! جواد بابتسامه: وعندي ولد ثاني بس للحين صغير ! قرص خد مريم بدعابه: وش اسمك يا بطله! ناظرته بابتسامه طفوليه: مريم وناظر عبود : وانت يا بطل ! عبود ينفش ريشه : انا الشيخ عبود ضحك من قلبه وناظر جواد : شيخ واسمه عبود بعد ! جواد ابتسم : وش عليك منه هذا شيخ كل القبايل! جواد ناظر عبود : خذ اختك عند امك وانتبه عليها حط اصبعه عبود على أنفه : على هالخسم ضحك من قلبه على هالطفل إلي يلعب دور انه رجال كبير جواد رفع حاجب : مب ناوي تتزوج ويكون عندك عيال ابتسم بملامح مريحه :: هذا النصيب ما تدري وين رح يكون جواد بنصح : اهم شيء تكون عاقله ثقيله ما عندها حركات بزران عندها مسؤوليه تحفظ اسرار بيتها ما هو كل شوي تتصل بابوها! هز راسه بتفهم : ان شاء الله خير! ** ** ** مسكت البلوزه وناظرت ياسمين باستغراب: كيف يعني ! ياسمين سحبت البلوزه من يدها بضجر: وش إلي كيف يعني ! اقولك يبغى يخطبك ! رجعت سحبت البلوزه من يد ياسمين بقلب ميت ...يخطبها واحد بعمر 55 وهي بعدها 25والله صغيره ! ياسمين من نفس عمرها ومع ذلك تدلل وش تفرق عنها ! ياسمين تكمل السالفه : وقفت بعصبيه وقلت له ما تستحي تخطب وحده بعمر بناتك ! لو شفتي وجهه بعد ما مسحت فيه الارض الجازي تظهر عدم المبالاه :قلت لك انا ما افكر بالزواج نهائيا ياسمين وهي تمسك بلوزه ثانيه : رح تفكرين بالزواج غصب عنك لما ييجي الشخص المناسب! والفشل بالتجربه الأولى ما يعني خلاص ما ترجعي تجربين مره ثانيه ضحكت الجازي وهي تمشي وتقلب بالملابس بدون ما تناظر الملابس : إلي يسمعك يقول ملابس ارجع اجربهم! ورجعت تضحك على هالسالفه! ياسمين رفعت حاجب باستغراب: تراك مصختيها .......السالفة ما تضحك ! وبعدين جالسه تقلبين بالملابس الرجاليه وش تبغين فيهم ! ناظرتها الجازي: وش رايك اشتري واتنكر بزي رجال ياسمين مطت شفتها :يا حلوة تراك مخربطه قسم الاولاد هناك هذا قسم الرجالي اصغر قطعه نلفك فيها عشر مرات ! الجازي ناظرتها بقوةو همست : وقحة وتركتها متوجهه لجهة فرح ..ما انتبهت على الشخص القريب منهم إلي وضع الشماغ على فمه يحاول يكتم ضحكته عل كلامهن بدون ما يشوفهن ! بعدلحظات طلعت من المحل وهي تقرص بعيونها ياسمين المستمره بالضحكة ! ناظرت للامام وابتسمت بدون شعور وهي تشوف مريم تركض وتضحك بصوت مرتفع ! تمنت للحظات تركض باتجاهها وتحضنها بقوة ! سرعان ما عفست ملامحها لما مسك يدها جواد اخذها وابتعد عن المكان! ياسمين مسكت يد الجازي بقوة :ليه تعيشين على اطياف الماضي شوفيه عايش حياته وماتوقفت بموت البنات وانت كمان الحياه ماشية لا توقفينها عشان ماضي ما يرجع ! اثبتي للجميع انك قد المسؤولية ورح تكون ام ناجحه ! بس انت افتحي عقلك المصدي هذا ! وضربتها على راسها بخفة! وضعت الجازي يدها مكان الضربه وبضجر : يوجع ! وقفت فرح وناظرتهم وهم يتكلمون : متى نرجع الجازي طلعت جوالها واتصلت على سعود : الحين اخبر سعود يمرنا !، ناظرت ياسمين : ننزل نجلس برا ننتظره ياسمين بموافقه : تقضلوا ! جلست وخيم عليها السكون وهي تشوف جواد وزوجته واطفاله ....يحز بخاطرها هالموقف لما تتذكر انه طول زواجها منه منعها من انها تطلع نهائيا ..ليه زوجته يأخذها بنفسه ! حرمها من كل شيء جميل ! ما تدري ليه للحين اسيره للماضي متى تمر هالعقبه وتعيش حياتها الطبيعية ! تفكر لو تسافر عند ابوها يمكن تنسى كل شيء ..رح يكون مكان جديد حياه جديده ما هو مثل هنا كل شيءيذكرها بالماضي! رفعت نظرها للسماء وبداخلها تردد «لا اله الا انت سبحانك اني كنت من الظالمين» ** ** ** نزلت مع سعود بعد ما وصل ياسمين وفرح ... وهي تسمع ثرثرته فوق راسها ! وقف سعود لما شاف ولد خالته نزل من سيارته : هلا والله تقدمت الجازي للداخل وما التفتت للخلف ظنته واحد من ربع سعود ! ناظرت عمتها جالسه تقلب بالتي في : مساء الخير ! نجوى كتمت الصوت : مساء النور علامكم تاخرتم ! الجازي هزت كتوفها ببرود : اخذنا الوقت ! نجوى ناظرتها : امك اتصلت فيك ! الجازي رجف قلبها : صاير شيء ؟! نجوى : لا ما في شيء بس تأخرتم وجدك قالب البيت حريقة ! الجازي بدون اهتمام : هذا الجد عامل نفسه شيء كثير ويبغى كلمته تمشي على الكل ! يرفع الضغط ! نجوى بتفهم : اعرف بس حاولي احترميه عشان امك لا تنسين انه ابوها الجازي بضجر : وهذا إلي ذابحني ! انا طالعه انام احس جسمي مكسر ! نجوى بابتسامه : ربي يوفقك .. ** *• ** يتبع التعديل الأخير تم بواسطة لامارا ; 04-04-20 الساعة 01:28 AM | ||||
|  |
|
25-01-20, 01:22 AM
| #493 | ||||
| بعد الدوام ناظرت عمتها باستغراب وهي تجهز الغداء ما احد خبرها : غريبه سعود ما قال ! نجوى وهي منشغله بالتحضير : صادقه غريبه هالملقوف م خبرك ! دخل سعد بابتسامه :-سلاااام ابتسمت الجازي له تحسهم بعدهم اطفال : هلا ! نجوى : خليك قريب حتى تاخذ الاكل لولد خالتك! سعد بدون قصد : والله اشوف بيتنا صار ملاجئ ! نزلت الجازي الملعقه من يدها وهي تفرغ السلطه .... كلام سعد ضرب الوتر الحساس اكيد بجلستها مضايقه عليهم كيف ما انتبهت لهذه النقطه...التفتت لعمتها نجوى إلي تكلم سعد:يا زينك وانت ساكت ! نطقت الجازي بهدوء : وهو صادق اثقلت عليكم بجلس قاطعها سعد بتبرير :والله امزح علامك صايره حساسه يرحم ايام زمان نطردك من الباب تدخلين من الشباك ! فتحت عيونها وسرعان مانطقت بقهر : سخيف! نجوى بضحكه : سبحان الله إلي جاء اليوم إلي صارت فيه الجازي هاديه رجعت تكمل تفريغ السلطه : انا طول عمري هاديه بس انتم ما عندكم نظر ! سعد ناظر الجازي بدون نقاب وهي منشغله بالسلطه ....الجازي لها معزه كبيره بقلبه يعتبرها اخته الكبيره ..وما هو مرتاح لوضعها هذا ...طول ما هي جالسه بدون زواج رح تبقى داخل دوامة حزنها..لازم يدبر لها عريس يعوضها عن الايام المره إلي ضاقتها ...من اليوم رح يبدا بعمليه البحث رفعت راسها واستغربت من سعد مركز نظره عليها! من بعد نايف ما عندها ثقه بالبزران ! نجوى تكلم سعد : تعال خذ سعد : طيب ليه ما يدخل ويتناول الاكل معنا ما في احد غريب ! الجازي ترتب السفرة : خلاص خلي الاكل هنا انا طالعه للغرفه اكلت بالشغل نجوى باعتراض: لا قاطعتها الجازي بعقلانية: حرام بما انه اهله ما هم موجودين فاكيد يحس بالغربه لما يجلس يأكل لوحده لكن لما يجلس معك ومع العيال يحس وكأنه في بيته! وما تركت لعمتها فرصه تعترض اخذت منها الاكل ورتبته على سفرة الاكل ! قبل ما تطلع تكلمت : لما تكملون ناديني انظف المطبخ ! سعد ناظرها بهدوء وعقله جاري البحث عن عريس ! ** ** ** دخل سعود وهم على سفرة الاكل ..رد السلام بهدوء وما ناظر جهة ولد خالته بعد ما احتد النقاش بينهم البارحة ! نجوى إلي عندها علم بالسالفه ناظرت سعود: للحين ما طاح الحطب من راسك! سعودناظر فياض بزعل : بس كلامه يمه ثقيل ! فياض بهدوء : كلامي ما هو ثقيل لكن كلام الناس اثقل ! ادري انك تعتبرها اختك ومن هذا الكلام لكن الناس والجيران يعرفون انك ما عندك اخوات وانها غريبه عنك ! انا ما اتدخل لكن لمصلحة سمعة البنت طلعات الليل معك لوحدكم ما لها داعي ! نجوى بتبرير: يا فياض تراها اكبر منه وهو خاطب اختها ! يعني هي بمثابة اخته الكبيره ويعزونها ! رد بصراحه : بس ما هي اخته ! حتى لو جينا للصحيح جلستها هنا ابدا ما هي منطقية ما أدري كيف خالي تاركها على كيفها ..المفروض مكان امها تجلس وانتهينا ! نجوى تنهي السالفه : اترك المركب ساير لو جلستها فيها شيء ما تركها خالك هنا ! فياض مط شفته ما عجبه تساهل بيت خاله وخالته بعكس بيته واهله عندهم تشدد كثير من هذه الناحية ! قرر يسكت وما يفتح السالفة هو نصحهم وهم احراربتقبل النصيحة ! ** ** *** بالحديقة العامة جالسين ونسمات الهواء الخفيفه تلاعب الاشجار ..هز راسه بأسف وهو يسمع حياته من زواجه الاول نطق بضيق لصديقه : هذه المشكله تتزوج تبغى تستقر تتفاجئ بوحده تقلب حياتك وتحولها لملعب كرة قدم ! جواد بضيق : صادق ! انا من البدايه كنت ابغى اطلقها لكن المشكله انها من لحمي ودمي والناس رح تتكلم عليها فاضطريت تاخير الطلاق ! هز راسه باستغراب من عائلة جواد ما يتزوجون الا من نفس العائله ما حب يتدخل بتفاصيل اهل زوجته إلي طلقها ...رد بانصاف : مهما عملت ما يطلع لك تحرمها من ابنتها ! ادري انها تصرفاتها طائشه وما تنطاق وانك من الصابرين تحملتها سنوات بس بنفس الوقت اقولك انها ام والمفروض تعرف بوجود ابنتها ! اكيد انها الحين عقلت وتركت تصرفاتها الغبيه ! مط جواد شفته بقرف : تعقل ! مستحيل الا اذا حجت البقر على قرونها ! واخبره بسالفة السطح ! تنهد فياض وحك حاجبه : والله وضعك صعب ! متاكد انها البنت طبيعيه وما في عقلها شيء ! جواد مط شفته : ما فيها شيء بس عندها لا مبالاه مبالغ فيها المسؤوليه عندها معدومه كل همها تعيش حياتها على كيفها ما احد يقولها من وين طالعه والا نازله ! وهذا إلي لقته عند اهلها ابوها يفقع ما عنده دم ! فياض : مسكين يا صديقي كنت تعاني بذيك الايام ! جواد هز راسه : ربي عوضني بزوجة ربي يحفظها ! اهم شيء العقل بالمرأة ! فياض بابتسامة : صادق المهم وش قلت على البنت ! جواد برفض : حاليا لا وخاصه بعد اخر موقف انا تضربني بنعالها وقسم بالله على كل ذنب الا تتعاقب وما تعرف ابنتها عقاب لها ! فياض وهو ناوي مع الايام يقنعه ويرجع البنت لامها من باب الانسانيه مع انه ما يعرف لا الام ولا اهلها لكن عنده بداخله شيء يحفزة انها تقر عين الام برؤية ابنتها ! مهما عملت تبقى ام ! ** ** ** جالسه بمكتبها ابتسمت بدون نفس على حركات نسرين نايمه على مكتبها بتمثيل بعد ما دخلت : قلبي لا يحتمل الجمال اليوسفي !، الجازي رفعت حاجب : وضعك صعب ! الحين هالخسف يعمل فيك كذا ! نسرين كشت عليها:تقولين كذا لانك ما شفتيه ! اخخخخ لو تشوفينه كان واقف ويبتسم مع واحد من الموظفين ! انسان راقي متفاهم متواضع يعامل الموظفين باحترام ! ما هو مثل النائب الحمد لله انهم فصلوه ! الجازي بملل من هالسيره: اروح أرسل الملفات لابو محمد افضل لي ! اخذت الملفات وتوجهت خارج المكتب وهي تستغفر ربها من فكر البنات ما عاش الرجال إلي ينبض قلبها له ...كلهم كذابين منافقين مخادعين تكرههم بشده! شدت على اسنانها وضغطت بقوة على زر المصعد ...الحمد لله الواحد كلما كبر عقله يكبر ويترفع عن تفاهات الحب ! دخلت المصعد وهي ترسم لمستقبلها بعد ما حزمت امرها لازم تسافر عند ابوها وبندر ...لكن الغريب تحس ابوها لما خبرته البارحه يتهرب من هالسالفه وكأنه ما يبغاها تروح لعنده ! معقول يكون متزوج على امها ! ما تثق بالرجال يعملها ويعمل ابوها ! لكن لو كان هالكلام صحيح ما رح تسكت له ! هذه أمها وما تسمح لاحد يجرح شعورها ! تنهدت وهي تتوعد اذا كان هالامر صحيح ! خرجت من المصعد لما توقف عند الطابق إلي تبغاه بدون ما تنتبه او تناظر إلي كان معها بالمصعد ! دخلت مكتب ابو محمد بعد ما طرقت الباب ..ردت السلام بهدوء ..ناولته الملفات : تفضل ! ابو محمد سحب الملفات : يعطيك العافيه ! وناولهاملفات ثانية : يا ليت خلال يومين يكونوا جاهزين المدير يبغاهم ضروري :! تناولتهم الجازي بضجر : يا ثقل دم هالمدير الجديد ! شغل استعراض بالشركة ! ابو محمد اشر لها بعيونه انها تسكت ! تابعت كلامها بلا مبالاه : لا تناظرني كذا ! ترى هذا الصدق ...بيوم وليله يبغى الشركة توقف على رجلينها كأنه ما عندنا اشغال الا هو وشركته الفاشله ! اخذتهم وطلعت بدون ما تناظر الشخص إلي كان واقف عند باب مكتب ابو محمد ومكتف يدينه ظنته موظف عادي ما اكترثت لأمره! ابو محمد وقف باحراج: اهلا يا سعادة المدير! فياض رفع حاجب من الكلام إلي سمعه : وش اسم هالموظفه ابو محمد بمراوغه: اعذرها طال عمرك تراها تمر بمشاكل عائليه واثرت على نفسيتها وما تدري وش تقول ! سكت فياض ما اصر يعرف اسمها حتى ما تسول له نفسه انه يفصلها ! يمكن عندها ظروف لكن يصير خير ! غيرمجرى الحديث وبدا يتكلم عن الشغل والاوضاع ! ** •• ** •• عدلت النقاب ودخلت البيت بعد ما لوحت بيدها لياسمين ...تحس بالاجهاد اليوم كان متعب لها ومع الغداء بالمطعم برفقه ياسمين تحس اصابتها تخمه ...شافت عمتها جالسه بالحوش مع عيالها ! تقدمت بهدوء : السلام عليكم! نجوى بابتسامة : هلا وينك تاخرت ! سعود باعتراض: يا حظك يا ياسمين اما انا طول وقتي اشتغل سواق عندك ولا مره قلت خليني اعزم هالمسكين على وجبه ضربته الجازي بشنطتها بخفه: انكتم ! بنفس اللحظة حست بتسارع بدقات قلبها وهي تلمح رجال طالع من المجلس الخارجي شعرت بارتباك وحمدت ربها انها للحين متغطيه استأذنت ودخلت بسرعه! ما تدري ليه مرتبكه كذا وخايفه ! يا دوب لمحته لانه متلثم ! يمكن نظراته الناريه لها وكأنها عامله جريمه اخافتها ! بس هي ما تعرفه ليه يناظرها كذا ! لحظه هذا ولد خالتي ! اكيد ما في غيره ! حطت يدها على قلبها يدق بقوة للحين ! ** •• ** فياض ماعجبه الانفتاح بين ابنة خاله وعيال خالته ! ليه حنا وين عايشين ؟! وتضربه بحقيبتها بمزح بعد! ذول وين عايشين ! لا حول ولا قوة الا بالله! سعد بابتسامه: كذا خوفت البنت اول ما شافتك انحاشت ! فياض طالعه وهو يجلس جنب خالته و يفك اللثام : وين القهوة ؟ نجوى بتكاسل : قوم يا سعد قول للجازي تجهز القهوة ناظر خالته وعيونه طايره كيف ترسل ولدها لعند البنت والبيت فاضي ..اكيد خالته خرفنت ...معقول هو عنده تشدد بزياده والوضع كذا طبيعي ؟! سعود بلعانه تكلم : اجلس الحين اكلمها ! طلع الجوال واتصل بالجازي حتى يرفع ضغط فياض لانه مثل ما سمع من امه عندهم تحفظ من هذه الأمور : الو .....وينك اختفيتي .....هههههه...الله يسامحك يا الغلا ....اسمعي جاي على بالي اشرب قهوة من يدينك ههههه ...اهون عليك ....لا اتكلم جد ...اي شغل هذا !...قولي دايره من مطعم لمطعم مع ام كشه ! ....يعني ما في قهوة !...وين تنامين ما بقى وقت على المغرب ....نذله ....امي تبغى قهوة ما هو انا ...بلاه تصدقي...سلام! قفل الخط وناظر امه : الحين تجهز القهوة ! رفع عيونه وناظر فياض إلي يناظره باستصغار وما تكلم ! قاطعهم دخول سالم ومن خلفه سميه وعيالهم ! سلم عليهم بحراره وبعدها ناظر امه : وين القزم ما اشوفها معكم ! سميه من خلفه : حدك اختي ! سلمت على نجوى وبعدها ناظرت فياض بأدب : عساك بخير فياض باستغراب من زوجة سالم كاشفه الوجه: الله يسلمك ! سميه ناظرت عمتها : وين أختي ! نجوى بهدوء : بغرفتها ! تركتهم سميه ودخلت للداخل ! سالم ابتسم لفياض : عساك مرتاح هنا ! هز راسه برضى : الحمد لله خالتي ما قصرت ! سعود وسعد ما اندمجوا مع فياض لفارق العمر بينهم ! نجوى بابتسامة وهي تحمل حفيدها : لو تدري بسعادتي لشوفة فياض وان شاء الله ربنا يفرحني بشوفة امه !، سالم بابتسامه: اروح اسلم على القزم وارجعلكم ! فياض رفع حاجب وما علق على الموضوع ** ** ** منشغله تجهز بالقهوة ....سرعان ما ابتسمت لما شافت سميه ...سلمت عليها بمحبه : اخبارك ! سميه بفرحه : الحمد لله تدرين انا بغيت انزل من الاسبوع الماضي بس سلوم الدب رفض استأذن قبل ما يدخل وهو يتكلم : دب بعينك يالبرميل! سميه فتحت عيونها باستنكار : انا برميل جازي بذمتك مين انحف انا والا سلوم الدب ! ناظرتهم الجازي وابتسمت بروح ميته ّ: انتبهوا لا يعرف صائد الدببه بمكانكم ! سالم فتح عيونه وما توقع اجابتها : يا النذله ! على كل حال اكون دب والناس تشوفني افضل من الاقزام السبعه ههههههه رفعت حاجب الجازي : ما أعتب على عيالكم دامك ابوهم ! سالم استند على الثلاجه :الحين انا جاي اسلم عليك واتفقدك يكون سلامك كذا ! الجازي رجعت تجهز القهوة ببرود:ترى سجلك مليان بحركات النذالة اكيد خلفك مصلحة ! تنحنح سالم وناظر سميه : سمعتي اختك وش تقول ؟! هذا وانا متعني وجاي اعزمك على مطعم مع مدامتي الحلوه ! واشر على سميه ! هزت الجازي وردت وهي تجهز القهوة : ترى الفلوس سبقك سعود واخذهم مني سالم بانفعال: هالبزر وش يبغى بالفلوس ! ما تقدري تدبريني ترى اختك هذه ما ترحم وقسم بالله طفرتني من كثر طلباتها إلي ما تخلص ! سميه تخصرت : والله ! تبغاني احرم نفسي من كل شيء اتمناه عشان حضرتك تجمع فلوس ! تزوجت كون قد المسؤوليه والا لا تتزوج من الاصل ! تنهدت الجازي وتكلمت والغصة بحلقها : كم تبي ؟! سالم بفرح : ربي يفرجها عليك ! انت كريمه وحنا نستاهل ووعد مني اول ما اكمل سداد البنك رح ارجعلك الفلوس ! هزت راسها بتفهم ...خرج سالم ومعه القهوة وخلفه سميه لما نادت عليهم نجوى ! تتذكر ايامها مع جواد ما كانت مثل سميه تحمله فوق طاقته ...ما كانت تطلب منه شيء ! السوق انشطب من قاموسها ومع ذلك سكتت ورضيت ! رضيت بامور كثيره حتى تستمر الحياه ! فعلا الزوجه الهنيه الرضيه ما تعجب الرجال يحبون إلي تثقل عليهم بالطلبات ! مطت شفتها بالم دنيا مقلوبه ! التفتت على ابنة سميه تبغى مويه ....كثير يغزوها شعور الامومه ...تبغى بناتها تضمهم باقوى ما عندها ما تقدر تتحمل اكثر من كذا ! تشعر بالحنين لهم وخاصه لما تشوف عيال اخواتها! جلست على مستوى ابنة سميه ناظرتها بتأمل للحظات ..سرعان ما حضنتها بقوةوكانها تبغى تدخلها باضلاعها ! ذبحها الحنين لهم ! ما تقدر تتحمل اكثر من كذا ! شوقها لهم مزق وجدانها ! تحس نفسها رح تنجن ..سنوات تنتظر على امل تلقاهم! لكن الامل تبخر وطار ! ما تبغى تواجه الحقيقه المره ..إنها انتهى بها المطاف وحيدة .. ورجوع التوأم مستحيل ! ما تبغى تقتنع انهم ماتوا ! ما ماتوا قلبها للحين ينبض ! بس الكل يقول انهم ماتووووا ...فقدت كل شيء كل شيء فقدت السعادة فقدت الفرح فقدت روحها المرحه! فقدت توامها قرة عينها! والاهم فقدت نفسها ! ما عادت تجد نفسها ! تحس نفسها ضايعة تائهة ! هو عايش ومرتاح وهي تنغرس بقلبها الف سكينه لما تشوفه مع زوجته وعياله ! يوجعها هذا الشعور ما تقدر تتحمله اكثر ...ما تتحمل الفقد اكثر من كذا ... ارخت ابنة سميه وحطت يدها على قلبها يوجعها ما تقدر تتحمل الالم ....ماهي قادرة تتنفس ! في شيء كاتم على صدرها ! غمضت عيونها للحظات وبعدهافقدت الوعي ! ** ** ** سالم زفر بضيق وهو يناظر حنين جالسه وتبكي : يا خالتي ما فيها الا العافيه ! حنين تمسح دموعها : متاكد ما احد قال لها شيء ! سميه وهي تبكي:والله ما قلنا لها شيء ! كنا نتكلم ونضحك وطلعنا بالقهوة حنين رح تنجن تخاف تفقدها : طيب وش إلي نكس حالتها كذا ! نجوى بهدوء : تراها للحين ما طلعت من صدمتها الاولى ! لازم الجازي تتزوج وتنسى ! طول ما هي جالسه وما في شيء يشغلها رح تبقى بنفس الدوامه تلف و ترجع لها ! ويمكن زادت حالتها لما صارت تزورك في بيت جدها وتلتقي بجواد وتشوف عياله .......اكيد تقارن حياتها بحياته ! انا من رايي لا تخليها تزورك قاطعتها حنين : انا راجعه لبيتي ما ابغى افقد الجازي لو كنت ادري رح يصير فيها كذا ما رحت ! هزت نجوى رأسها :هذا عين الصواب ! لازم تبعد الجازي عن الماضي ! سالم بضيق على حالها : والله يعز علي اشوفها بذي الحاله تراها مثل اختي ولها معزة عندي ! بس وش يطلع بيدي اعمل ! حنين بضيق : ربك رح يفرجها ! بس ما احد يخبر وليد ما ابغى يقلق عليها ! ** ** ** ناظرت امها بتعب وكأنها بعالم ثاني ....تمنت لو كانت نومتها الاخيره وترتاح ! حنين تمسح على يدها بحنان : يوجعك شيء ؟! احد ضايقك بالكلام !- ناظرت من حولها بنظره تائهة ..وبشحوب نطقت : وش صاير !- سميه انفجرت بالبكاء وطلعت وهي تشوف اختها وكأنها بعالم اخر ما هي معهم ! حنين تمسح دموعها : الجازي ركزي معي ! يوجعك شيء ؟! ناظرت امها بنظرات تائهة: انا ما فيني شيء بس تعبانه! نجوى مسحت على راسها والدموع بعيونها : ربي يشفيك ويعافيك ! حنين تنهدت وجلست على السرير ووضعت يدها على قلب الجازي وبدات تقرأ قران عليها بصوت هادي ! ** ** ** ناظر خالته : يعني اخذ راحتي بالبيت متاكده انها رجعت لبيتها ! نجوى بتحفظ ما تبغى تتكلم وش صار ومن هذه الاشياء تعتبرها خصوصيه للجازي :،متأكده خذ راحتك ! هز راسه بتفهم بدون تعليق ! ابتسمت نجوى باعجاب باخلاقه ما عنده عرق الفضول ! ما عنده اسئله زايده ! واذا ما عجبه شيء يعترض باسلوب هادي قطع افكارها دخول سعد وهو يستفسر : يمة متى تطلع من المستشفى ! نجوى بهدوء: يمكن اليوم ! ناظر خالته :عسى ما شر! احدمن الاهل بالمستشفى! نجوى بتكتم: ابنة خالك وليد تعبت واخذناها للمستشفى رد بهدوء : سلامتها ما تشوف شر ! سعد ناظر امه : انا طالع ازورها نجوى : اتوقع رح يخرجونها قبل شوي اتصل فيني سالم وخبرني ! اصلا كانوا يبغون يخرجوها بنفس اليوم لك حنين رفضت حتى تتأكد من وضعها إنه تمام ! بعد ما طلع سعد ناظر خالته : اذا تبغين اوصلك لبيت خالي ! نجوى بنظره شكر : ليتك سالم ! ما ابغى اروح الحين احس جسمي مكسر من الجلوس بالمستشفى ابغى ارتاح وبعدها يصير خير ! اكتفى بالسكوت وهو يفكر وش مرض هالبنت حتى يدخلونها ! وجلوس خالته لوقت طويل بالمستشفى بالرغم انه امها واختها معها ! هز راسه ينفض الافكار وش عليه منها ! الاهم رح يأخذ راحته هنا بدون حرج ! ** ** ** ابو ناصر ناظر الجازي وهي جالسه معهم بالصاله بذبول : وش هالكلام يا حنين ! انا قلت لك من قبل مستحيل اقبل تجلسين بالبيت وحدك بدون رجال ! حنين بضيق : يا يبه ! قاطعها بحزم : ترى الموضوع منتهي وما فيه نقاش ! اصلا وش إلي غير رايك حتى ترجعين لبيتك ! الجازي بانزعاج من الجد ما لها خلق تسمع صوته ....تحس بقشعريره بجسمها : يمه ارجعي لبيت جدي انا بخير ابو ناصر مط شفته بسخريه :الحين لانها معها الرشح عامله طوارئ وحالتك حالة ! ترى كل الناس تصيبها إنفلونزا يعني شيء عادي ! ماادري ليه تبالغين كذا ! وانت يا جازي ما عدت صغيره تدلعين ومشغله امك عليك ! تبغين تجلسين مع امك في بيتي حياك ما تبغين براحتك واجلسي عند عمتك ! اما انكم تجلسون هنا ما رح اقبل ابدا ! تنهدت بضيق الجازي من هالجد العنيد إلي طالع لهم مثل الشوكة بالحلق ما تقدر تجبر امها على شيء ..واختصار للمشاكل لانها متاكده لو عاندت وجلست في بيت ابوها رح كل دقيقه يطلع بوجهها جدها ويسمعها كلام يسد النفس وهي بشر لها حدود للتحمل ! نطقت بهدوء : خلاص انا راجعه لبيت عمتي ! وقبل ما تعترض أمها ناظرتها برجاء ما تبغى احديعرف بتعبها ...ما تبغى احد يتشمت فيها ! حنين باستسلام هزت رأسها وهي ناويه تكلم وليد يضبط اموره ما تبغى عيالها يتشردون كل واحد بجهة ! *** *** *** *** دخلت بيت عمتها بهدوء بعد ما اصر جدها يوصلها برفقه امها ...نزلت وامها توصي فيها تنتبه على نفسها ! ناظرت المكان هادي يمكن عمتها نايمة ! قررت تاخذ قسط من الراحة وهي تحس جسمها مكسر بفعل الأنفلونزا ! بعد العشاء جالسه نجوى مع فياض وعقلها يدور بالسالفه ...الجازي مارح تلقى احسن من فياض هادي وانسان متفهم ! لازم تفاتحه بالموضوع بس كيف ! اخذت نفس وناظرته : مب ناوي تتزوج وتفرح امك ؟! رفع حاجب بابتسامه : خلينا بالاول نلقى العروس ! ردت بتردد: والعروس عندي ! ضحك على رد خالته : حلو ومين هالعروس ! نجوى بحذر : بالاول اخبرك بمواصفاتها ان عجبتك اقولك مين تكون ! هز راسه بتسليه : قولي! نجوى تنهدت : البنت مهندسة ومتوظفه ! رد بمقاطعه : الدراسه والوظيفة ما تهمني ! هزت راسها : طيب ! البنت خلوقه ومؤدبه وما عندها حركات ما هي مضبوطه !ولباسها محتشم! اعرفها مثل مااعرف اصابع يدي ! هز راسه باندماج : حلو وهذا المطلوب ! كملي ! تشجعت نجوى لما شافت منه قبول : البنت مزيونه بس قصيره شوي ! هز راسه بتفهم : ما هو مهم الشكل المهم الأخلاق والدين والعقل ! وركزي على اخر وحده ! سكتت نجوى بتفكير الجازي لو وجدت زوج يحتويها ما كان حالها كذا ! رح تكون عاقله وهاديه بس الله يسامحهم طيروا عقلها بافعالهم وتصرفاتهم ! ناظر خالته لما سرحت: علامك سكتي ؟! نجوى ابتسمت بمجامله : ولا شيء! المهم البنت ما شاء الله عليها هنيه رضيه وتقبل بالقليل حتى تستمر الحياه! ما عندها طلبات زايده ومحافظة على فلوسها بدون إسراف زائد ! هز رأسه :حلو! كم عمرها ؟! نجوى وهي تناظره : عمرها تقريبا يمكن 25 سنة ! مناسبه لك بينكم 5 سنوات هز راسه وباستغراب : غريبه للحين ما تزوجت ! وشباب اليوم يبحثون عن الموظفه والمؤدبة تنهدت نجوى وتكلمت بنبره بطيئه وهي تتابع رد فعله بدقه : هي بس مطلقه! عقد حواجبه : مطلقه ! يعني تطلقت من الخطوبة ! نجوى هزت راسها بالرفض : لا تطلقت بعد ما تزوجت!!! بالجانب الثاني كانت نازله تجلس مع عمتها لكن استوقفها الكلام وهي تعرض عليه عروس ! تسمع الاوصاف بهدوء ! فتحت عيونها بصدمه ! عمرها25 مطلقه من زواج ! هذه مواصفتها ! ما هي قادرة تستوعب عمتها تعرضها على ولد خالتها ! ليه تعمل كذا ! غمضت عيونها وهي تسمع عمتها تسأله : علامك سكتت ! ناظر خالته بهدوء: وش سبب الطلاق ؟! نجوى بضيق ظهر على ملامحها : ما صار بينهم تفاهم ! وش قلت ! اتمنى توافق عليها وتعوض هالبنت عن كل الانكسارات إلي شافتها بحياتها ! تراها انظلمت بهذا الزواج وانحرمت الفرح عن باقي جيلها ! اتمنى لا تردني وتقبل بهذا الزواج ! ختمت كلامها بنبره راجيه ...لانها تعرف ولد اختها قلبه طيب ويحب يساعد الناس متأكده ما رح يردها! ناظرها بصمت خيم لعدة ثواني : خالتي انا اتنازل بامور كثيرة عن مواصفات زوجة المستقبل وما يهمني شيء ! لكن اني اتزوج وحده وسبق لها الزواج من غيري هذه مرفوضة بالنسبة لي انا شاب من حقي اتزوج البنت إلي اكون اول رجال في حياتها ! سامحيني يا خالتي وان شاء الله ربنا يعوض هالبنت الزوج إلي يعوضها ! انتهى البارت ...انتظروني يوم الثلاثاء بإذن الله ..دمتم بخير التعديل الأخير تم بواسطة لامارا ; 04-04-20 الساعة 01:29 AM | ||||
|
| |
|
25-01-20, 09:46 PM
| #494 | ||||
| السلام عليكم هي أول مره بقدر اعلق بصرررراحة روايتك رووووعةةةةة ومتشوقه كتيررر للبارت الجاي قريت كل روايات كلهن حلوااات وقمة بـ الإبداع والروعة وأيصال المشاعر لقلب القارئه مبسسسوطه كتيررر انو قدرت اعلق كنت الي كم شهر عم احاول وما بيزبط معي 😂💔 بتـوفيق يا غاليه💛😍 | ||||
|
| |
|
25-01-20, 09:49 PM
| #495 | ||||
| [quote=أختي فقيدة قلبـي;14739456]السلام عليكم هي أول مره بقدر اعلق بصرررراحة روايتك رووووعةةةةة ومتشوقه كتيررر للبارت الجاي قريت كل رواياتك كلهن حلوااات وقمة بـ الإبداع والروعة وأيصال المشاعر لقلب القارئه مبسسسوطه كتيررر انو قدرت اعلق كنت الي كم شهر عم احاول وما بيزبط معي 😂💔 بتـوفيق يا غاليه💛😍 وربي يسسسعدك وان شاءالله الجازي تتزوج فياض وجواد بيحترق بنار الغيره🤕 | ||||
|
| |
|
26-01-20, 04:24 PM
| #497 | ||||
| بارت موجع وصف حال الجازي كثير صعب إلي مرت فيه خلال ثمان سنوات ثلاث منها بتهميش وتحقير وسخربة وظلم شديد وخمس بحسرة فقدها الموجع لبناتها. جواد أي وصف اوصفه لك لن يوفيك.لكن هناك امور بالبارت أعلق عليها ضربك للجازي بأي حق تملكه وكلامك لصديقك بعيوب تهول بوصفها مع اعتراضاك الشديد على تصرفات الجازي لماذا لم تحدثه عن ضربك لها قبل وبعد الزواج مثلا.ثم الكف هل هو ردة فعل على خوف مبطن بقلبك عليها ووصفك للزوجة التي تنصح بها فياض اراه قريب جدا من الجازي ووصف ابوها لها فعجيب فعلا حالك. الوليد فعلا حياته كلها اسفار وأسرار ولكن لن اتعجل بإطلاق الأحكام. فياض شبيه جواد ولكن لاحظت اتزان أفكاره وعدم ميله للظلم واتمنى ان تصل إليه الحقائق كاملة ولايكون من اصحاب الظاهر فقط. غريبة أن نرفض فياض للجازي كونه لم يسبق له زواج وكأن المطلقة قد رضيت وسعت لحمل هذا اللقب وفي حالة الجازي رأينا كم تحملت وصبرت على حقارة جواد وأهله وقبلت بأبسط الأمور فمن حق كل وحدة كحالها أن تعيش وتتعوض ونبينا كان أول زواجه بثيب فمايعيب من بعده بالسير على نهجه إلا أعراف بالية من بشر لو وضعوا موقع الجازي لتمنوا الأفضل . شخصية الجازي لاتناسبها شخصية ضعيفة وهزلية كنواف بل الأنسب للجازي شخصية كجواد وفياض لكن شخصية حقيقة قلبا وقالبا وليس كحال خائب الرجاء جواد قول بلاعمل وطبلة فارغة ليس معها شيء إلا دوي الصوت ورأينا كيف من غير احتواء اوتوجيه او محبة تغيرت الجازي خلال سنة فكيف ان وجدت شخصية عاقلة ومتزنة تحبها وتعينها لتكون خير زوجة وأم .منتظرينك أبرار بشوق ولهفة وربي يكتب لك الخير والسعادة. | ||||
|
| |
|
27-01-20, 02:47 AM
| #498 | ||||
| مشكورة على البارت الرائع كنت دائما اعتقد ان جواد له مشاعر نحو الجازي و مازال عندي احساس انه يحبها لكن لا يعترف بهذه المشاعر خاصة انها فرضت عليه و أيضا قلبه كان متعلق بابنه عمه و التي خيبت كل توقعاتنا على أن تكون شريرة فيبدو العكس ظهور فياض في حياة الجازي ممكن سيكون دواء لجروجها و ربنا سيظهر سبب أمامه و يقبل ان يتزوجها كان عرف انها طليقة صديقه و أيضا هي نفس الفتاة التي سمعها في المول و موقفه معها في الشركة لكن ان حدث الزواج كيف سيكون موقف جواد و الذي يبدو غيور جدا على ممتلكاته ان كان يعتبر ان الجازي من ممتلكاته و لا يجب أن تكون لشخص آخر | ||||
|
| |
|
28-01-20, 03:22 PM
| #499 | ||||
| السلام عليكم البارت حلو كثير مازالت الجازي تعيش حياة صعبة رغم الظروف الي مرت فيها مازال الجد وجواد بينظرولها نظرة انها طائشةلا تتحمل اي مسؤولية بينما هي انسانة مدمرة يكفي فقدها لبناتها هذا شيء بحد ذاتة يفوق اي قدرة للتحمل وتكاد الام ان تفقد عقلها اتوقع ان فياض يتعلق بالجازي من خلال عملها في الشركةمن غير ما يعرف انها بنت عمته او انها مطلقة في بارت سابق ورد فيه ان في شقةوفيها رجل بخبر زوجته ان ترضع البنت مشان يكون الها محرم وهاي.النقطة ما بينتها ابرار ووضحتها النا ممكن اني بستبق الاحداث لكن اظن انها البنت الثانية البارت رائع ومميز بكل تفاصيله اتمنى لك التوفيق | ||||
|
| |
|
28-01-20, 07:07 PM
| #500 | ||||
| يعني جواد بدو لطشة على راسو بلكي هالراس المشقلب بس من جهة الجازي بيتعدل وبيصير يحكم صح ع تصرفاتا بالنسبة لفياض بعتقد حكيو فيو وجهة نظر وواقعي جدا من حقو يكون اول رجل بحياة المراة الي بيختارها لانو هو ما سبقلو وتزوج | ||||
|
| |
|
| أدوات الموضوع | |
| انواع عرض الموضوع | |
|
|
15Likes
العرض العادي
