آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
06-07-19, 10:22 PM
| #11 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  #اساور_الفضة #البارت_التاسع #الكاتبة_نهى هدى جنت بطرك الملابس الداخلية وفجاءة انفتح الباب ودخلت علية بيبي سليمة شافتني وشهكت وضربت على صدرها _ يمة دخيلك يا ربي هاي شنو ولج حجتها بصوت مفزوع بحيث كمزتني واجوي البنات شيماء وضحى يركضون على صوتها عبالهم صار شي حجيت بخوف واني بعدني بطرك الملابس الدخلية _ بيبي خوفتيني شنو شصايغ (شصاير) جنت احجي واباوع داير مدايري بالغرفة على الشي الغريب الي خلة بيبي تصرخ متفاجئة _ يمة عزا العزاج ياسليمة هاي شني الركعة السودة على جسمج جنها صخام اسود باوعت على المكان التحجي عليه جانت تقصد عالوحمة باوعت عليها جنت متعودة على وجودها شي طبيعي كانت وحمة سودة مثل الفحم محتلة منطقة الخصر الجانبية ونازلة على الفخذ والحقيقة بياض بشرتي زاد من برزها وهي تقريباً كان طولها ٦٠سم بس هي كانت شي عادي بالنسبة الي تعودت عليها استغربت صرختها من شافتها شيماء.. شنو السالفة بيبي لا تكولين انتي ماتعرفين بوحمة هدى من جابتها امي .. ولج اتذكر عليها من جابتها امج عندها وحمة سودة بس اشو هاي كبرانة وصايرة عبالك مبكعة تخوف عقدت حواجبي هاي شبيها شتحس اشو هاي كعدي بالكاع واتربعي وصارت تلطم على رجليها وتولول .. يمة صخام الصخمك يا اثير جنا بوحدة صرنا بثين ضحى.. استغفري ربج شنو هذا الحجي .. ولج عوبة شكاعد تحجين انا جنت شايلة هم شيماء العنست ونوب طلعتلنا وحدة مشوهة اويلي على حظك يمة اثير بناتك ولا وحدة بيهن براسها خير وحدة شردت والثانية عنست وهاي مشوهة جانت بيبي تحجي وانا واكفة صافنة عليها جانت تدردم وتهز براسها منا ومنا .. يمة اثير وين جانتلك هاي شيماء.. بيبي كافي ترة ما ينرادلها كل هذا الدك واللطم اسم الله على شنو تلطمين .. خايبة باجر عكبة من يردون يجوها خطابة شنو اكللهم بتنا مبكعة والسانها مكطم هدى .. لا بيبي موبس هيج والطامة الكبغى (الكبرى) اذا عغفو (عرفو) بيبتي سليمة كبل ينهزمون من الباب صفكت ايديها الثنين وغمتني .. من امداج ياعوبة بعد الله شيسوي بيج ما مبقي بيج اي شي صاحي .. هههههههه صاحي لو نايم ما حسيت الا نزعت نعالها وشمرته علية ابتعدت عن الهدف ووكع بصفي .. واااا خزياه بيبي طلعتي حولة صدك لو كال ابو المثل الي يشوف بلوى الناس تهون عليه مصيبته احمدك واشكغك (اشكرك) ياغب (يارب) كملت لبس ملابسي هي جانت معصبة واني احتاريت شلون العب باعصابها .. بنت الكلب منو الحولة خايبة القزمة ام نص لسان البكعه .. يمة فديتني اخبل هدت علية تغلط وتسب وشيماء لازمتها تهدي بيها وضحى تسكتني ضحى بصوت ناصي .. لج هدى ابوس ايدج كافي اتكفي الشر لا يجي بابا ويشوف الهوسة ويسمع بيج متجاوزة على بيبي والله يجنزج ماعنده مانع .. لج هديني عليها عجوز الناغ (النار) والله اطبكها واحطها بكونية واذبها بالشط واخلص الناس من شغها (شرها) والله اقدم خدمة انسانية لتاغيخ البشغية (تاريخ البشرية) ضحى كوة لازمة روحها ما تضحك .. لج كافي الله يلعن بليسج شيماء طلعت بيبي من الغرفة وكعدت تهدي بيها تهي بهي لا ونوب طلعت هي الزعلانة اشو هدت علية ومابقت حجاية ما ذبتها دخلت شيماء وسدت الباب وانتجت عليه وباعت علية .. لج هدى شلون بيج هاي بيبتج ما راح تسكت وراح تنتظر بابا يرجع وتوزه عليج .. خلي تطيغ (تطير) هي وابنها اشو هي الهدت وهي الحجت اني مو يمها .. هدى عيب شنو هالحجي .. عمي ياعيب جاية تحاسبيني عليه احلفج بالله ..يغضي (يرضي) منو هذا الحكم شابة عمغها١٧سنة تعغضت (تعرضت) لابشع الاهانات من مغية جبيغة اشكدها وشكبغها وعليها العتب منو بينا لازم يعغف العيب ويتحاسب على كلامه اني لو هي شيماء.. ميخالف ياحبيبتي هي مرة جبيرة مخرفة .. واني طفلة صغيغة (صغيرة) زعطوطة هم عندي عذغي (عذري) .. لج هدى شلون بيج اني دا احجي وياج هشكل لان انتي اختي الصغيرة وامون عليج وتسمعين كلامي ماعليج منها .. يالله هذا هو غاح اسد حلكي لخاطغج (لخاطرج) بس ها من هسة اكلكم اذا اجوني خطابة ما اوصيكم هاي بيبيتكم تاخذوها وتحطوها بالصندوق وتخلوها فوك السطح حتى تمشي سالفة خطوبتي على خيغ ماكو اذا حضغت (حضرت) عجوز الناغ للخطوبة والله يخغب (يخرب) كلشي وينهزم العغيس بليلة ظلمة شيماء وضحى كعدوا يضحكون على كلامي رحت اتوضيت وصليت وصبتلي شيماء غدة اسمع عجوز النار تحجي بينها وبين نفسها .. تطفحن سم ان شاء الله ؟؟ عبالها ما اسمعها صحت بصوت عالي ..سم ببطن اليكغهوني (اليكرهوني) حطيت الصينية وكعدت اكل كدامها على كيف واتدلع واباوع عليها صارت حمرة تريد تنفجر .. خايبة اكلي عدل لا اجي ادير فجج عود تتدلع يلوك لأم الحلوك الدلع ام نص لسان عدة اليوم واثير بكبره ما اجة صرت اكره كلمة بابا مرت الايام وكمت كل يوم اداوم وارجع واحاول ما التقي وية بيبي اتجنبها لان السانها ينقط عسل وبيوم من الايام جنت نازلة من سيارة رائد قريب عالمنطقة وجان تشوفني شيماء وصلنا للبيت وشيماء نزلت علية اكس ومربع تحقيق .. هدى هذا شنو الي شفته اكدر اعرف انتي شتسوين راكبة وية رائد بسيارته دنكت مستحية من اختي لان اني اتعلمت ما اضم عليها اي شي .. غائد من شافني غاكبة عبغية غفض (راكبه عبريه رفض) وكلي اني كل يوم اوصلج قغيب على منطقتكم صعبة تغكبين عبغية لوحدج .. بصفته شنو يجي ويوصلج على يا اساس تسمحين لنفسج تصعدين لوحدج وية رجال غريب .. هذا مو اي غجال هذا غائد ابن جواغينا والي كان من احنا صغغ (صغار) ويانا وانتي بالذات تعرفين اخلاقه .. اي نعم اعرف رائد خير المعرفة بس هذا الكلام روحي قنعي بي الناس اذا شافوج صاعدة لوحدج وياه منو بيهم راح يتفهم موقفج هدى ترة الناس عليها الظاهر والاصول تبقى اصول وانت كبرتي وتعرفين الصح من الغلط اسألج بالله لو وحدة من صديقاتج تشوفين واحد يومية يجي ياخذها من يم المدرسه وتصعد وياه بالسياره لوحدها وهو شخص مو قريبها ومن ورة اهلها شنو راح يكون حكمج عليها سكتت مجاوبتها كان كلامها صحيح .. احجي اشو سكتي طبعا ماعندج كلام تجاوبين بي ليش تنطين على روحج لزمة وتخلين اليسوة والمايسوى يبيع مثاليات براسج ويصير براسج واحد بالشرف محد يلحكه شوفي هدى اليوم الصار راح اعديه الج بس بعد انسي شي اسمه رائد يوصلني واذا جان همج الطريق وشايلة همه تخافين اني من باجر اجرلج خط حتى لو اعرف اجدي وادبرلج الكروة ولا بعد تركبين وية رائد دنكت .. شومة هذا هو صاغ بعد ما تنعاد ابد وعد .. عفية هدى الله يرضى عليج ويكملج بعقلج ترة احنا مالنا غير بس سمعتنا هي تاج راسنا الي مخليتنا نمشي بين الناس بفخر محد يكدر يتجريء يمسنا بحجاية لان شريفات الناس من تريد تحجي عالشريفة توزن كلمتها الف مرة قبل لا تحجيها رحت عليها وبستها من راسها .. شومة اطمني اني تغبيتج (تربيتج) مينخاف علية حظنتني .. هو اني هذا المبرد كبلي وجابر خاطري الله ماضيع تعبي بيكم يوم ثاني بالمدرسة اتفقت وية بنات عندهم خط يوصلهم وطلبت منهم يحجولي وية السايق مالتهم والحمدلله وافق يوصلني وية البنات بس قبلها انتظرت رائد حتى احجي وياه وانطي خبر بس جنت شايلة هم بعد وين اشوفه شوية واجة رائد وسلمت عليه .. يالله هدهد صعدي حتى اوصلج وكفت بمكاني متحركت وابتسمت بوجهه .. غائد شيماء اجغتلي (اجرتلي)خط وية البنات بعد ما اغجع وياك عاقد حواجبه .. ليش وين جانت عن السايق ببداية السنة هدى شنو صاير .. شيماء الباغحة شافتنا سوية من دتوصلني وظلت تحجي علية .. ليش انتي ما كايلة لخواتج عني .. لا غائد ما كلتلهم لان ادغي بيهم مرغاح يوافقون بوكتها رائد كلش ضاج وكال رائد .. هدى .. ها غائد .. اااااخ يابة يعني شنو بعد ما اكدر كل يوم اسمع نبرت صوتج الناعمة من تكولين غائد .. لتضوج عفية لخاطغي (لخاطري) .. هو صحيح اهلج منعوج عني بس ما يكدرون يمنعوني عنج راح ابقى كل يوم امر منا بوكت الحلة واشوفج حتى لو من بعيد ترة انا هم اخاف على سمعة ام جهالي تجيها حجاية من ورة ابو بيتها المستقبلي باوعت عليه ياربي شكد احبه كلامه هذا كان بالنسبة الي مثل الوعد يكلي هو باقي موجود بحياتي وهذا الشي يكفيني وصلت الكيا ورحت وية البنات ركبت بالطريق جنت كاعدة يم الجام بالاخير وعيوني عالشارع والسيارات وجان تمر من يمي سيارة عرس مزينة بشرايط ملونة وباقة ورد بالمقدمة وكاتبين بالجامة الورة الف مبروك بالرفاه والبنين جانت كاعدة عروس لابسة برنص ابيض وجهة ما مبين والعريس لابس قاط والضحكة شاكة حلكه وعيونه تلمع مديت راسي بفضول اريد اشوف العروسة وصرت اتخيل نفسي بمكانها ورائد بمكان العريس حسيت كلبي فوت نبضة وبعدها تاهت علية النبضات اول مرة بحياتي يطري على بالي هيج تفكير سحبت نفس عميق وتفكيري اخذني لبعيد جنت ساندة راسي عالجام وسرحانه وابتسامتي مرسومة على وجهي كمزت من مكاني على صوت هورن قوي انتبهت على سيارة دتمشي بموازة سيارتنا باوعت شفته رائد ابتسملي صرت اضحك وعيوني تلمع والتفتت اباوع خاف البنات يحسون بية رجعت اباوع عليه شلون يسوق ولابس نضارات شمسية تجنن عليه قربنا من التقاطع وافترقت الطرق رفع ايده بحركة وداع يمة من تروحلك فدوة بيبي سليمة وعشرتها وصلت للبيت وشفت شيماء بالمطبخ تسوي زلاطة وتدردم سلمت عليها وما ردت السلام ما انتبهت علية هاي شبيها دورت على ضحى ماكو لا هي ولا سليمة رحت دخلت بدلت ورجعت للمطبخ اليوم شيماء مبين عليها معصبة ونازلة عالجدورة تركع .. اكول شومة ضحى وبيبي وين شيماء.. راحوا للمضمد بيبي راسها يوجعها وتريد تقيس الضغط وكالت لضحى تعالي وياي دايخة ما بية حيل امشي لوحدي هدى.. خاف اكول شوغت (شورت)بيها وانتي تغزليني(ترزليني) فخلي اسكت احسن شيماء.. الحمدلله وهاي انتي ساكتة هشكل تحجين لعد لو تردين تحجين شنو تسوين .. شنو شبيج شومة اشو مو على بعضج .. سكتي هذا الاستاذ ليث اليوم طلعني عن طوري .. شنو شبي حجغ(حجر) افندي دارت وجهة علية زين والله حافظة الاسم .. مو كل مرة يمر علينا واحد اسمه حجغ هيج شخص صعب تنسينه اذا كان هذا الشخص شاغل تفكيغ اختي وهسة احجيلي شبي .. اني مو ذاك اليوم كلتلج على موقفه وياي .. اي بس ما كلتي شسوة بوكتها ضحى اجتي وقطعت علينا السالفة ........ .. ذاك اليوم من لزم ايدي حيل بيومها اني كمت كلني ارجف هو اني من غير كلشي دخلت عليه خايفة وحاطة كلبي بشيشة ونوب هو اخذني على غفلة لزم ايدي وسحبني عليه اجيت اموت بدمي من الخرعة مجنت متوقعة يسوي وياي هشكل قربني عليه بحيث الا شوية جان وكعت بحضنه انفاسه الحارة صارت تضرب على خدي همس بصوت خشن يرعد .. شنو حضرتج كاعدة تصرفيني صارت عيوني بعيونه حركته المفاجئة سحبت مني الكلام وصرت امتمت بالكلام .. ش ..ش . شتريد مني ما افتهمت قصدك بديت اتمالك نفسي واجمع شجاعتي حتى ما ابين اني متاثرة بي او خايفة منة .. اشو هد ايدي ما اسمحلك تتجاوز علية جنت احرك بأدي اريد اسحبها من بين ايده خاف احد يدخل علينا ويشوفنا وساعتها تصير سمعتي على كل السان نتر ايدي بقوة بحيث حيست بيها انخلعت دخيلك ربي مو ايد خزرني وحجة .. شوفي لج لا عبالج هاي سوالفج تعبر علية مال تسويلج فلم وتدزيلي كل يوم ممرضة شكل تسد عن مكانج حتى توحين للممرضات ان انا جاي اتعرض لحضرتج وانتي خطية تسوين نفسج مسكينة متضايقة من تصرفاتي وياج حتى تلفتين انتباه الكل يحجي واني فاتحة حلكي مصدومة من كلامه ..انت شدتقصد الفت الانتباه على شنو .. تبينين كدام الكل ان الضابط ليث يتحارش بيج وانتي المسكينة خايفة منه لا يسويلج شي لا عبالج الكلام ما يوصلني ترة كلشي اعرف ماكو شي ينضم كلامه خوفني هذا بس لا راح يسويلي مشاكل وية ادارة المستشفى .. منين جبت هذا الكلام ترة انت متوهم .. لعد شتفسرين تهربج مني .. لتنسى ترة انت البديت وصرت تسألني اسألة مستفزة بذاك اليوم واني اشوف من حقي اتجنبك كفاً للمشاكل لا اكثر ولا اقل مو مثل ماجنت حضرتك متصور اريد الفت انتباه ترة اني اعرف شغلي ما احتاج واحد يعلمني شنو اسوي واذا دزيت ممرضة بمكاني فهذا الشي راجعلي .. ترة انتي كلج خلك ممرضة غصباً ما عليج تجين تكملين واجبج بأتجاهي ..منو انطاك الحق تهيني جنت احجي وصوتي يرجف وصارت الدموع تلالي بعيوني باوع بعيوني وترك ايدي وحجة بعصبية .. ترة انتي جبتي الحجي لنفسج لو كايمة بواجبج جان ما اتجاوزت عليج يالله مسحي دموعج باوعت عليه وفكرت اني لازم اغير موقفي واهدي اللعب شوية وياه لان الي كاعد يصير مومن صالحي هو مريض وجوده هنا مؤقت كم يوم ويروح متسوة اسوي مشكلة واجيب لنفسي الحجاية .. خلاص هذا هو اوعدك هذا الشي ما راح يتكرر وراح اقوم بعملي وياك كممرضة هسة ممكن تتمدد عالجانب حتى اشوف شغلي لزمت لفة الشاش وكعدت اجهزها هي والكطن والديتول رفعت راسي واجتي عيني بعينه جانت نظراته تريد تاكلني استغفر الله ويكلك ليش تتهربين منه هو خلي يشوف نفسه شلون يكصني كص بعيونه دفعت العربة للجانب وهو اتمدد عالجانب بحيث صار وجهه على جهتي رفع التشيرت ونزعه كوة لزمت تفسي ما اشهك عززززة بعينه شلون جريء .. احم ميحتاج تنزع التيشيرت جان رفعتها من الجانب احجي وياه ووجهي صار طماطة .. لا هيج احسن حتى تاخذين راحتج ..... اتسعت عيوني متفاجئة عزة بعينه اخذ راحتي بشنو كمل جملته وكأنه قرة افكاري .. بالتضميد طبعاً جان يحجي ويباوع على وجهي قربت عليه ومديت ايدي وصرت اعقم منطقة الجرح كنت لابسة كفوف بلاسيك حسيت بي اتشنج من لمستي فتحت اللاصق وبديت اشتغل بكل سلاسة مثلما متعودة اتصرف وية المرضى بصورة عادية متناسية ان هذا المريض ليث الحجر ولازم اراعي حركاتي وياه خاف يفهم اهتمامي بيه غلط خلصت التضميد وشلت الشاش القديم وحطيته بالصينية مرفعت عيني استحي اباوع عليه وهو ملابس تشيرت ودرت وجهي اريد اطلع بس قبل لا اطلع كلت .. خلصت تضميد تحتاج بعد شي ثاني جلة صوته شكله حس علية متوترة .. اي نعم محتاج تساعديني البس التيشيرت بهتت من طلبه هذا شكله ما ناوي يسهل علية المهمة كعد بصعوبة واخذ وضعية الجلوس عالسرير اتقدمت منه وكفت مقابيله صار وجهه بمستوى وجهي اخذت التيشيرت ورفعته وقربته من على راسه دنك راسه حتى يسهل علية البسه بس حركته التلقائية قربت راسه علية بحيث اجة يطخ راسه بصدري كوة لزمت نفسي لا اعيط بيه حسيت بي يتعمد يسوي وياي هيج حركات جانت ايدية ترجف ماعولت بس اخلص ابتعد عنه بسرعة طلعت من يمه بسرعة عبالك النار تركض وراي اريد بس ابتعد عن تأثيره سحبت نفس عميق وانتبهت على روحي جنت حابسة انفاسي واني يمه من ضمدته ولبسته التيشيرت هو ما نطق بأي حرف بس عيونه وحركاته جانت تحجي كلشي اني مو صغيرة عمري ٢٨سنة صحيح ممتزوجة بس اعرف كلشي يخص المرة والرجال وشنو يدور بينهم من مشاعر وافكار خصوصا اذا كان هناك انجذاب بينهم اكيد يكون الجو بينهم مشحون ومتوتر اجذب لو كلت ما اتأثرت بتصرفات ليث اني مراءة عندي مشاعر بس ما عندي خبرة وهو كرجل خبير عرف شلون يتوغل لمشاعري ويتلاعب بيها خلصت اليوم كله بس اصفن وسرحانة افكر بيه وبنظراته هذا شيريد مني رباب.. هيييي شيمااااء انتبهت على رباب واكفة كدامي وتحرك بيدها كدام وجهي فزيت من صفنتي وجليت صوتي .. احم ها رباب جنتي تحجين وياي .. الماخذ عقلج يتهنا بي .. شنو ردتي .. لا سلامتج ما رايدة شي بس صار ساعة نقالج يدك وانتي كاعدة طاكتها صفنة فتحت الجنطة ولكيت مكالمة لم يرد عليها بابا .. هذا الوالد اكيد متصل علية علمود يسألني على الراتب رباب.. شنو انتي بعدج تسلمين راتبج بيد ابوج .. اي والله اتعودت اسلمه الراتب كل راس شهر .. هذا ابوج تحفة زين عاد يصرف عالبيت لو يخليكم تدعمون .. ينطينا مصرف للبيت بس شنو يقطرها علينا بقطارة يالله شكد شايفة بخل بالعالم بس مثل ابوية مشايفة اكول رباب صدك من استلم الراتب بعد ٣ايام اريدج تدخليني وياكم بالسلفة رباب.. زين شلون وابوج اخاف ما يقبل .. مو بكيفه احتاج اسوي سلفة خطية هدى وضحى صارلي كومة ممشتريتلهم ملابس وهسة جاي الشتا وملابسهن كصفت عليهم ولازم اكص من الراتب كل شهر كروة السايق مال هدى والحبل عالجرار مرت يومين وصادف اني بهاي اليومين مناوبتي بغير قاطع يعني ما يشملني قاطع ليث ما شفته بالرغم احس بشعور غريب يدفعني حتى اروح اشوفه واتطمن عليه بس خنقت هذا الشعور ودفنته بكلبي احسنلي ابتعد عن طريقه لان اعرف كلش زين شنو نتيجة هذا الاعجاب اي نعم ليث نار وتحرق كل من يقتربلها اذا ما اكون حذرة منه ساعتها ناره تاكلني باليوم الثالث داومت كالعادة سجلت حضوري ووقعت رحت استلمت شغلي وصادف اليوم النوبة على قاطع ليث كملت المرضى وخليته هو اخير شي لان حضرته ياخذ هواي وقت ويكعد يتشرط فتحت فايله وقريت جدوله جيد ميحتاج تبديل ضماد وعنده ضماد الجانبي شايله .هسة بس انطيه ابرة بالوريد واعاين الجرح الي بالكتف حضرت صينية الادوات واخذتهم وياي ودكيت الباب وفتحت الباب ودخلت عالغرفة بدون ما انتظر منه يسمحلي بالدخول شفت يمه ضابط كاعد يسولفون الظاهر هذا صديقه سلمت ورحت حطيت صينية الغراض عالميز القريب على سريره حسيت بنظراتهم اكلتني انخبصت وارتبكت من وراهم عركت كصتي حجة هو ضايج .. العفو ست شيماء تكدرين تطلعين منا وبعدين تعالي انطيني العلاج عندي زيارة جان يحجي بغضب من بين سنونه كان طلبه رحمة الي لان كلش اختنكت من نظراتهم .. ان شاء الله رحت فتحت الباب حتى اطلع سمعت صديقه ضحك بصوت عالب .. ههههههههه وانا اكول شعجب ليث باقي لحد هسة بالمستشفى اثاري الرجال كاعد هنا متونس ولك شنو هاي الممرضة الا بشدة سديت الباب واني ميتة قهر منهم بس ما اعرف ليش طليت جامدة بمكاني اريد اسمع جوابه كله .. دنجب واكل تبن ولا تظل تمسلت بالحجي عفتهم ورحت رحت كعدت يم رباب والممرضات جانت وقت الاستراحة مالتنة بس الاستاذ عنده زيارة والظاهر يطول رحت طلعت لفتي وكعدت اكل واسمع ممرضة كاعدة يم رباب تحجي على بنية حامل بشهر التاسع جايبها ابوها للمستشفى جانت تطلك جيبوها منا تكول بين ما اخذنا الطفل ورحنا غسلناه وكمطناه والممرضة الثنية كعدت تنظف البنية ونقلتها من صالة الولادة على قاعة الاسرة الخاصة بالامهات جبنا الطفل يمها حتى ترضعه كالت ما اكدر ارضعة اريد ارح للحمامات كلتلها راح صيحلج الفراشة تساعدج رجت صحتلها الفراشة ورحت التهيت عنها عندي كومة تكول اشو رحنا ورجعنا ما لكينا لا الاب ولا بنته والطفل عايفينه بسريره يابة عدلو بدلو رحنا سألنا الفراشة كالت ما قبلت ادخل وياها اغسللها ونوب صارتلج لخة وانكلبت الدنيا واجة مدير المستشفى ودز عالضابط وحجاية منا وحجاية مناك لحد ما تبين الموضوع ورة يومين لازمين البينة وابوها لان احنا ما ندخل وحدة عالولاد الا تفتح فايل وتمليه بالمعلومات وهذا ابوها غبي حاط معلوماته يمكن جان مخبوص المهم ما اطول عليكم بالسالفة تالي طلعت البنية حبلانة من ابوها الله يكفينا الشر رباب .. عززة شلون عرفتوا يكلج البنية اعترفت بعدين على ابوها اي لو تشوفيها صغيرة مو جبيرة يجي عمرها ١٦ سنة الله يستر على بناتنا رباب.. نعيش ونشوف التفتت علية وكالت .. خية شيماء لعد سلام الله على ابوج طلع سيد .. اي والله صدك الي يشوف بلوى الناس هانت عليه مصيبته عشر دقايق مرت وخلصت الاكل واجة الفراش ابو محمد كلي طلع اسمج عرفت عليه يقصد ليث دازه رحت دكيت الباب مرة لخ ودخلت داخل الغرفة ورفعت راسي بس اشو ما لكيته نايم بسريره وينه اتقدمت داخل بالغرفة سمعت صوت الباب انسد من وراي التفتت شفت ليث ساد الباب منتجي عليه حاط ايده ورة وسمعت تكة القفل اول ما سمعت صوت القفل واني شياطين العالم كلها تربعت براسي وصارت الافكار السودة تتسابق داخل راسي رجعت للخلف وحطيت ايدي الصينية ولزمت المشرط الحاد الي كان من ضمن العدة وحطيته وراي بدون ما ينتبه جنت واكفة مستعدة لأي هجوم جنت اخطط براسي بس يفكر يخطي خطوة بتجاهي كبل اعلم عليه بالمشرط وعلية وعلى اعدائي باوع علية وجانت عيونه مفضوحة تريد تاكلني حجة بصوت خشن .. شيماء شكد تردين وتسلميني نفسج حددي الرقم سؤاله الغريب اجة مثل الضربة عالراس اج سؤاله عكس توقعات افكاري لذلك جنت مامستعدة للجواب وعلى شنو اجاوب غير افتهم هو شنو يقصد .. شنو قصدك ما افتهمت .. لتسوين نفسج متعرفين انا عن شنو جاي احجي اعتقد جان سؤالي واضح انا اريدج من اول بوم شفتج بي وانتي ما طلعتي من راسي حاولت ابتعد عنج واسوي مشاكل وياج بس ما جابت نتيجة اشوف عقلي يقفل عليج اكثر ويطالب بيج تجين تطفين النار الي شعلتيها بدخولج من هذا الباب دك الجرس عندي وعرفت شنو يريد مني هزيت راسي بأستنكار ومتفاجئة بنفس الوقت على الجراءة اليملكها .. انت شلون تتجرئ وتطلب مني هيج طلب شنو بدر مني وخلاك تقلل احترامك وياي .. تحفظج اثار حفيظتي وزادت من عنادي واظن راح يرضي غرورج اذا كلت انا عمري ما واعدت ممرضة ورافض هاي الفكرة تماما بس انتي قاعدة استثناء .. لا لا مسحيل انت امرك عجيب جنت احجي وكلي ارجف .. ماكو شي عجيب حطيتج براسي .. انصحك تبتعد عن الباب وتخليني اطلع منا وراح اسوي نفسي ما سمعت كلامك وكلشي يرجع بمكانه .. راح اخليج تطلعين منا بس بالاول اريد اخذ منج الموافقة من اطلع من المستشفى تجين وياي لشقتي صدكيني ما راح اخليج تتندمين شهكت مصدومة من عرضه الفاسد حسيت انخطف لوني من الخوف يمكن لو يذبحوني بلحظتها ما يلكون قطرة دم اسمعني زين اني عمري ٢٨سنة مايوم واحد داسلي على طرف لان صاينة نفسي كضيت عمري محافظة على نفسي كفر يجي واحد مثلك يعرض علية فلوس حتى انطي نفسي ترة الشرف ما يتقيم بفلوس .. ماكو شي ما يجي بالفلوس لكل شي اله ثمنه حددي ثمنج وصيري حبابة وكولي شكد تردين وان شاء الله راح اكون وياج كريم .. خلاص راح اتنازل عن شرفي بس بشرط ابتسم بأنتصار .. كولي شنو شرطج .. انطيك شرفي بس يكون بسعر شرف اختك شوف انت شكد تقيم شرف اختك وانطي بكده فلوس اتسعت عيونه متفاجيء بكلامي كملت كلامي وخايفة بأي لحظة انهار .. حضرة الضابط المحترم اتمنى هذا الموقف الي حطيتني بي كون يصير بوحدة من خواتك ساعتها راح تعرف بشنو احس رحت بأتجاه الباب وهو جان واكف كدامه وساد الطريق علية جنت واكفة ورافعة راسي بكل شموخ رفع ايده ورجع شعره ومسح وجهه بيديه الثنين مثل الي صحة على نفسه اتحرك عن الباب وفتحلي الباب ومد ايده بأشارة اتفضلي طلعي ما حجة اي كلمة شخص مثلة صعبة يلكة نفسه بهيج موقف طلعت من غرفته واني جسمي كله يرجف رحت للحمامات وهنا اطلقت سراح دموعي الي جنت حابستهم لا يفضحوني كدامه واعلن ضعفي كدامه جنت ابجي من عرضه علية انطي نفسي ربي شمعنا انحط بهيج مواقف يعني هواي علية يعاملوني مثل اي بنية شريفة جنت احس بالقهر والخذلان من ليث شكد جنت اتمنى يكلي اريد اطلب ايدج من اهلج بس مع الاسف طلع يريد يشبع غريزته عندي ...... هدى.. عمة بعينه لج والله جسمي قشعر شومة ديري بالج من عنده والله من يمي خفت اجتي بيبي هي وضحى جان عندها ارتفاع بالضغط صار الليل اني اتأخرت بالنوم جنت ادرس امتحان فيزيا وشيماء متمددة بفراشها صافنة بغير عالم طبعا تصرف شيماء اليوم واعصابها المتوترة ثبتت ان هي واكعة بحب ليث بس ترفض تعترف بهذا الشي تكول اني مقهور من طلعته وياي فقط لا اكثر ولا اقل بس هي نست اني اختها وكاتمة اسرارها واكثر وحدة اعرفها دخلت علينا ضحى مخطوف لون وجها .. بناااات لحكو بابا اجة شارب شيماء.. استغفر الله ياربي شلون وتالي وياه تعالي فوتي دخلي جوة وسدي الباب خلي ننام وخلي بيبي هي وياه يتجازون .. لا كال صيحي اختج شيماء وخلي تجيب وياها الراتب كامت شيماء من الفراش ولمت شعرها وراحت للكنتور وطلعت الفلوس من جنطتها وراحت لبابا بين ما سديت الكتاب فجاءة سمعت صرخة شيماء طلعت اركض من الغرفة ورحت باتجاه الصوت جان بالمطبخ دخلت عليهم وجان الكة بابا لازم شيماء من ركبتها وديخنك بيها وضحى وبيبي يردون يبعدونه عنها يتبع..... | ||||
|  |
|
06-07-19, 10:24 PM
| #12 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #البارت_العاشر #الكاتبة_نهى هدى من جتي ضحى على شيماء وكلتلها ابوية يريدج ويريد الراتب كامت شيماء من الفراش ولمت شعرها وراحت للكنتور واخذت الفلوس من جنطتها وطلعت من الغرفة اني كعدت اكمل دراستي سمعت صوت صياح بابا العالي يفشر ويغلط ويكسر وصوت شيماء تصيح اني حطيت ايدي على اذاناتي لميت نفسي وكعدت مكنفصة اتذكر من كنت صغيرة جنت اموت من الخوف اذا بابا يرجع للبيت سكران ومن خوفي اشرد من البيت واكعد برة بالباب حتى لا يأذيني مثلما جان يأذي ماما ويضربها لكن من كبرنا شيماء علمتنا طريقة نتجنب بيها بابا اذا اجة سكران كبل ندخل للغرفة ونسد الباب علينا ومنطلع منها لو شمايصير الاصوات زادت حدتها والصياح صار اعلى وكل مرة اريد اكوم بس شجاعتي تخوني بس فجاءة سمعت صوت صرخة شيماء المفزوعة انتفض كلبي من مكانه ما اتحملت ابقى اكثر طلعت بسرعة من الغرفة اركض مثل المخبلة اتبعت صوتها وجان الصوت جاي من المطبخ دخلت وهناك اشوف بابا لازم شيماء من ركبتها وديخنك بيها وضحى وبيبي يردون يبعدونه عنها ضحى بصريخ .. بابا عوفها راح تموت بين ايديك .. لج بنت الكلب انا تكولين علية عالة والله اموتج وما يرفلي جفن شفت شيماء ترافس جوة ايده مثل الطير المذبوح وهو جان منطيني ظهره ومدنك عليها يخنك بيها اجيت اتخبل من المنظر بلحظتها صار جسمي كله يرجف من الغضب خوفي على اختي انطاني الشجاعة وصار يحركني ماحست الا واني هادة عليه مثل المخبلة وانطيته دفعة بكل ماعندي من قوة طلعت بيها حركة كلب و حقد وقهر مال سنين لدرجة حسيت بعظام صدري انخسفت من ورة الدفعة اختل توازنه وانضرب راسه بالكاونتر وكع ممدد على وجهه بالكاع بدون اي حركة ما درتله بال ولا اهتميت لصياح سليمة من كعدت تدك وتلطم على الصار جنت ما اشوف اي شي كبال عيني بس اختي كبل ركضت عليها وساعدتها حتى تكوم من الكاع كامت تكح وتشهك وكوة تاخذ انفاسها درتها علية و لزمت وجهها بين ايدية وصار وجهي كبال وجهها اريد بس اتطمن على امي شيماء كون ما بيها شي حجيت واني ارجف .. يمة شومة طمني كلبي وكليلي ما بيج شي باوعتلي وهي تهز راسها منهارة .. جانت تبجي بهستيريا وتباوع بأتجاه بابا ضحى وبيبي راحو عليه كلبوه على ظهره ضحى جست نبضه ضحى .. بيبي كافي صياح ترة ابنج ما بيه شي كومت شيماء من مكانها وطلعتها من المطبخ واسمع سليمة بالمطبخ تدعي علية وعلى خواتي رحت دخلت شيماء للغرفة وكعدتها بفراشها خطية هي اتمددت عالمخدة وكرفصت على نفسها بوضعية الجنين جانت تبجي وترجف لزمتها الباردة اباوع عليها سودة علية شمسوي بيها من الله لايرضى عليه مسوي وجهها خريطة جانت تبجي وتحجي بصوت مبحوح متقطع .. هدى .. شعري ... شعري انتبهت لشعرها جان مكوش ومخربط بصورة غريبة الظاهر ملخها من شعرها كون كسر لايده افتهمت منها شعرها مأذيها اقتربت منها وكعدت افتحه على كيف حتى ارتبه يايمة فتحته ويا ريتني ما فاتحته وشايفة هذا المنظر صرخت مفزوعة من المنظر .. لاااااااااا ياربي دخيلك شمسوي بشعرج جنت ابجي وافتح بشعرها جانت الخصل توكع بيدي حسيت على شيماء بدت تسكت عن البجي بالتدريج لحد ما غمضت عيونها وغفت نايمة من التعب والالم .. دخلت ضحى والعيون حمر وشافتني احجي وية روحي ولازمة خصل شومة بين ايدية باوعت عليها .. لج ضحى ليش سوى بيها هشكل ضحى.. الله لا يرضى عليه ما شفتيه شلون هجم عليها لان حسب الراتب ولكاه ناقص سألها وين الباقي هي كالت .. بابا منا ورايح سوي حسابك نص الراتب الك والنص الثاني النة اني وخواتي .. مو بكيفج هسة ترحين تجيبين الفلوس الاخذتيهم .. ترة اني من حقي اخذ من راتبي غير وحدة متنطي راتبها لاهلها لو تنكلب الدنيا هسة اني ما كلت راح اخذ الراتب كله ردت جزء منه اظن هذا من حقي نزل عليها فشاير وغلط وسب بس خطية شيماء سكتت مجاوبته بس من سمعته سب امي هي انقهرت وضلت تحجي عليه .. على يا اساس جايني تغلط وتسب امي الي ماتت بعز شبابها من ورة ظلمك وقهرك وهسه هم جاي تطالب ب فلوس انت اصلا ما تعبان بيها روح اشتغل و حلل خبزتك الى متى تظل عالة على غيرك بابا تعصب وكام عليها دك بوكسات وكوة كدرنا اني وبيبي نفكها من عنده وهي من حركة كلبها كالت .. مادام ضربتني علمود الراتب لعد خلاص هذا هو اني بعد ما اداوم وراح اكعدلك بالبيت وشوف منو يجيبلك فلوس اشو اني تعبانة وطايح حظي بالشغل وكلشي ممحلصة من راتبي عود انت روح اشتغل واصرف عالبيت هذا بالاصل واجبك مو واجبي يمة هي حجت هشكل وما اشوفلج الا وبابا هجم على شيماء مثل المخبل وراح جارها من شعرها وسحلها عالمطبخ ركضنا وراه اني وبيبي نريد نلحك عليها خفنا لايسوي بشيماء شي رحت عليه اريد بس اوخر ايده عن شعرها راح يتكطع بس هو كامشها حيل شيماء تعيط وهو يسب ويغلط فتح جرارة الكاونتر طلع منها مكص تقطيع الدجاج لج هدى شفته لزم المكص وجانت النية واضحة شيريد يسوي بيه يمة واني ظليت اكمز واصيح بخوف ردت بس اخلص شيماء من ايده بس هو ماكو فاقد دفعني بكوعه ووكعني بالكاع والتفت لشيماء ولزم خصل شعرها الحلوة وصار يكص بيها مثل واحد اتلبسه الشيطان هو يكص وشيماء تصرخ تتوسل عبالك ديذبحها بيبي جرت المكص من ايده بالكوة وشيماء ظلت تلم بخصل شعرها الوكعت بالكاع بهستيريا ممصدكة عيونها هذا شعرها كامت تصيح .. لج يمة شعري .. لاااا كلشي ولا شعري كامت تدعي عليه وتبجي .. كون الله يحرك كلبك انت عالة وراح تبقى طول عمرك عالة وهو رجع عليها لزمها من ركبتها وخنكها جانت كل كلمة تحجيها ضحى اني اموت الف مرة رجعت باوعت عليها شلون نايمة انمرد كلبي عليها .. وهسة هو وين العاغ (العار) .. سحبناه من رجليها سحل اني وبيبي ودخلناه بالحوش وخليت بيبي هي تبتلي بي انتبهت على شيماء كامت ترجف حيل وسمعت صوت اسنانها المصطكة رحت جبت ماي وصرت اسوي كمادات لجسمها وضحى جابتلها ملابس وكعدنا نغيرلها يمة سودة علية شمسوي بجسمها الترف ظليت الليل كله كاعدة خاف ترجع تصخن غمضت عيوني بتعب كلت بس اغمض عيوني شوية بس ما حسيت الا على ايد تنده بية كوة فتحت عيوني رمشت باوعت لكيتها شيماء كاعدة التفتت عالفراش .. ها شومة كعدتي محتاجة شي شيماء بصوت مبحوح.. كومي هم يالله تكعدين تراجعين امتحانج قبل لا يجي الخط فزيت باوعت للساعة عزة هاي شنو اني هالكد نمت كمت رحت امشي ورة شيماء اباوع عليها خطية شلون تمشي متأذية وشعرها مكرطف خصل قصيرة وخصل طويلة مبهذل جريت حسرة محجيت اي شي بخصوص الموضوع رحت غسلت وانتبهت للبيت هدوء سليمة وابنها نايمين نامت عليهم طابوكة ان شاء الله بدلت ملابس المدرسة ولكيت شيماء مسويتلي ريوك وضحى كاعدة كعدنا نتريك سوية وحدة تباوع بوجه الثانية جان وجه شيماء اليوم كله كدمات ازرق وبنفسجي شفتها مشكوكة وعينها مطفية ببوكس لونها ازرك على بنفسجي صايرة خلطة الوان ضحى.. شومة اليوم تداومين بالمستشفى ؟؟؟ .. لا ما اروح دشوفي شكلي بشرفج ينطلع بيه .. لا ما ينطلع بيه يخوف هدى .. شومة. تردين الصدك شكلج مال واحد هسة كون ياخذج ويجدي بيج بالتقاطعات وربي هواي يحصل فلوس من وراج بس كون بعد شوية تعوجين حلكج وايديج وتسوين روحج مثل المشلولة الله وتصيرين ١٠٠٪ مجدية شيماء كوة لامة حلكها متكدر تضحك من ورة شفتها .. هسة وكتج ياهدى والله ما اكدر اضحك شفتي توجعني ضحى فاطسة من الضحك .. لا لا بنات جاي اتخيل شكلكم اثنينكم هدى لازمة ايد شيماء وتجدي بيها وتكول يامحسنين لله انا مغة (مرة) محتاجة فقيغة ( فقيرة) اغيد (اريد) تنطوني من مال الله شيماء.. الله يلعن بليسكم سويتوني مجدية هدى .. اي والله حرامات نهدر العمل الفني الي سواه ابوج بوجهج لازم نستثمر هيج تحفة فنيه صرنا نضحك من كل كلبنا على اوجاعنا كنت اقرة مقولة (اننا نرقص على جراحنا ) بس ما جنت ادرك معناها بس بهاي اللحظة عرفت شنو معنى هاي الجملة شيماء .. ضحى جيبي المرايا كامت. ضحى وجابت المرايا وانطتها لشيماء ظلت تباوع على وجهها هدى.. يالله شومة لتضوجين تكبرين وتنسيها مثلما ابوج راح يكعد من النوم وهو ناسي ضربة راسه الي اكلها من عندي البارحة بس وداعتج اخوج هادي شلون انطاه دفعة احس بروحي صرت عبالك ثور هايج بس يريد ينطح شيماء .. اي صدك ذكرتيني شوفي هدى الشي الصار البارحة بعد ما اريدج تعيدينه البارحة الله ستر وعدت سلامات وهو جان سكران ومو بوعيه فما انتبه عليج والا جان انحجت احجايتنا .. ما اتحملت اشوفه يضربج واسكت موبيدي .. ليش هو منو يكدر يتحمل حتى اليهودي ما يسوي سواية ابونا بس خلي وحدة بينا تتأذة ولا كلنا رجعت تباوع بالمراية وتتلمس وجهها وشفتها وعينها المورمة .. صايرة فلم ينرادلي يومين بالميت يالله اكدر اطلع من البيت وارجع للدوام ضحى.. اكول شومة اي صدك اتذكرت انتي صدك راح تنفذين تهديدج لبابا و تبطلين من المستشفى وتكعدين بالبيت شيماء.. لا يابة ما ابطل من المستشفى حتى ما نموت من الجوع وصدك نطله نجدي بالشوارع بس كلت اكعد بالبيت فد يومين انفذ التهديد حتى يوافق على طلبي اني متأكدة بعدين راح يوافق ينطيني نص راتبي لان ما عنده مصدر ثاني ياخذ منه غيري كملت ريوكي وسلمت عالبنات واخذت جنطتي وطلعت مشيت لراس الفرع حتى انتظر الخط هناك مثل كل يوم لان الكيا ما تكدر تجي يم بيتنا لان الفرع كلش ضيق وصلت ولكيت السايق هالمرة منتظريني رحت صعدت وصلنا للمدرسة ومثل كل يوم روتين المدرسة المتكرر ما بي اي شي جديد اني اكعد وية فاطمة واحجيلها كلشي يصير وياي وهي بالمقابل هماتين تحجلي بس الشي الجديد الي صار بهذا اليوم اجتي طالبة جديدة نقل لصفنا جانت كلش حلو ومرتبة صدريتها لفتت انتباهي جانت حيل ضيكة صايرة عليها عبالك فستان وهي منا تملك جسم يخبل الابشدة اباوع وجريت حسرة .. اووووف بنت اللذين عليها جسم يهوس لو هيج جسم لو ماكو فاطمة.. لج عوبة هاي انتي ام جسم المرتب هشكل تحجين لعد اني شكول هدى.. لا انتي كارثة جنج هرقل بس واحد يحجي الصدك اني صحيح تقاسيم جسمي مثالية وكلشي بمكانه الصحيح بس قوامي قصير فاطمة .. ههههههه ذكرتيني عالقصر اليوم مشفتي شكلج من كلتلج المدرسة هدى كومي مسحي السبورة خربت من الضحك عليج بيوم كعدتي تمسحين ومن وصلتي للقسم العالي ظليتي تطفرين هدى.. عههههههههه خرب يعني شفتيني من كمت اكمز ياعيب الشوم لج حتى المدرسة جانت تباوع هليج وكوة لامة حلكها لا تضحك بس من درتي وجهج حتى ترجعين تكعدين برحلتج رجعت وجهها الجدي وكملت الدرس جنا نسولف واجتي البنية الي جنا نحجي بيها ووياها هالة اخت قاسم هالة .. تعالي ليان خلي اعرفج على هدى وفاطمة اتعارفنا وسلمنا على بعض هالة.. هدى تدرين بيت اهل ليان انتقلوا جديد عالمنطقة بس شوفي الصدفة انتقلو بالبيت الي جنتوا كاعدين بي .. مبروك ليان يارب يكون عليكم عتبة خير .. شكراً حياتي صحيح البيت صغير بس المنطقة كولش حلوة وخصوصاً الجواريين باوعت لهالة وطكتها ضحكة يمة هي كالت الجوارين واني اتخبلت كملت كلامها .. لج هالة اليوم شلون صبحت بوجه لوزة شفته الصبح من ردت اطلع للمدرسة هو صار بوجهي جان يريد يطلع سيارته من الكراج بس شلون لوز يخبل ياخذ العقل هالة تضحك .. يا هاي بس لا تقصدين على رائد ابن المختار تردين الصدك هو صدك لوزة يمة يمة هنة بحجن واني شميت ريحة شعواط صرت اتكلب كوة لازمة روحي لا اكلهن بسنوني حجيت .. اعووووع رائد ما غيره عبالي مدري شنو هذا رائد واحد ثقيل عالمعدة ما ينهضم هالة.. عوع بعينج يالحولة انطيج عيوني تشوفين بيها هذا الطول والجمال كله وتكولين عليه عوع ولا مو بس هشكل التفتت على ليان تعدد مواصفاته الحلوة .. لج يداوم هندسة نفط بالكلية وبس هو عند اهله وعنده اخت وحدة انفجرت بيها .. بعد بعد كليلها فد مرة جم شعرة براسه وعلى اي جهة من السرير الله يلعن بليسج فصختي الولد تفصيخ جنت احجي واتمنى املك الحق احجي اكثر لان احس بيهم اتعدوا على حدودي وراح ياخذون املاكي عااااااا درت وجهي على ليان .. تعالي حبيبتي ماعليج بيها اني اكلج رائد ما يفيدج لج دتعالي شوفي بقلاوات منطقتنا غير يموتون الا بشدة ليان.. حلفي والله لج اني ابجي طين عالبقلاوة هدى.. وروح بيبتي العزيزة سليمة الي ما احلف بيها جذب لج همة غير يموتون واحدهم تكولين عبالك بوراك التركي جنت احجي واني اتخيل ابن جوارينا عبوسي المطيرجي الي شعره نصه دهن والنص الثاني جل ولاطشه على كصته عبالك واحد تافل عليه وموكفه لا والاخ ما كاعد راحة يسوي بشعره حركات يوم مسويه مثل القنفد ويوم مسويه مثل الديج وباجر الله يعلم شيسوي كرصتني فاطمة وهي خربانة ضحك حتى يرتاح كلبي غيرت الموضوع ما اريدهن يحجن برائد .. اي ليان كم عمرج .. اني ١٨ تاركة سنة .. اشوفج اتعرفتي كبل على هالة اثاري الطيور على اشكالها تقع حتى الاخت اليمج اكبر منج بسنة .. وانتو شكد اعماركم .. اني وفاطمة ١٧سنة صرنا نسولف بكلشي جانت ليان بنية جديدة حبابة نوعا ما بعدنا منعرفها بس هواي تدلع صار وقت الحلة وطلعت مثل كل يوم اطلع اول وحدة بلهفة حتى اشوف رائد وفعلا خطية جان واكف ينتظرني سلم علية من بعيد واني ابتسمت منزل من سيارته جنا نكتفي بس بالسلام وتبادل النظر من بعيد حتى نتجنب الحجي اجة الخط ودعته وهو راح صحيح جنت اشوفه بس دقايق لكن جانت كفيلة بأسعاد يومي كله وصلت لمنطقتنا ونزلت من الكيا وكالعادة جهال المنطقة حاركين الجو بالصياح ويركضون حفاي جنت اعرف مجموعة اولاد صغار جان يرأسهم واحد اسمه علاوي هذا علاوي كلش وكح يذكرني بواحد ابن جوارينا اسمه قاسم ما اعرف ليش كلما اشوف علاوي يجي على بالي قاسم جنت امشي وشفت علاوي لازم بنية صغيرة من شعرها ويحجي عليها وهي تبجي ضحكت اتذكرت نفسي كبل غيرت اتجاهي ورحت عليهم .. هاي شنو علاوي ليش هشكل تضرب بالبنية الصغيرة علاوي اجلح املح .. خلي تولي تستاهل .. خطية ليش .. جنا نلعب وسيارة ابو الزبالة دترجع ليورة زين ما سحكتها ركضت انا وجريتها بسرعة حيل من ورة السيارة زين ما دعمتها السيارة عقدت حواجبي .. زين ليش هسة دتضربها .. احسن حتى بعد ما تعيدها وتفتح عينها عدل ومتصير فاهية رجعت باوعت على حال البنية شعرها منفوش والخدود حمر خربت من الضحك .. الله يلعن بليسك علاوي عمي لو تاركها مدعومة هواي احسنلها من هاي الذلة لاعب بخلقتها طوبة وتكول نقذتها زين كمل جميلك لو هي جينات الوكاحة تمشي بدمك حجة بأعتراض .. هدى لا تكولين علية وكح .. لا استغفر الله حشاك شيخ علاوي انا الوكحة .. انت مو وكح انت زعيم مافيا عالخفيف .. اي هو انا هذا الكلتي عليه انا كلش اضوج من يصيحون علية علاوي الوكح .. اهاا يعني تضوج من اسم علاوي الوكح ومتضوج من زعيم المافيا احجي وياه وكوة لازمة حلكي لا اضحك على منظره جان منظره وهو يحجي وياي عبالك واحد جبير انتبهت عليه يحب يكبر نفسه عاد اني استغليت هاي النقطة .. ماشاء الله تدري علاوي انت كبران نفخ صدره ورفع اجتافه ابن الاوادم مصدك روحه وهو كله خلك ولد بعمر ال٩سنوات .. ادري انا جبير وشوية واصير بطولج انفجرت من الضحك على كلامه ابن اللذين قصفني شوف حظي حتى هذا الفصمة يعيرني بطولي .. اي وبما ان انت كبرت تعال شيل جنطتي ووصلني للبيت اريد احجي وياك واحنا نمشي خطية ضرب ايده على صدره وكال .. صدك جذب دنطينياها خلي اشيلها عنج .. على كيفك ويانا طرزان اخذها مني ومشينا سوية وكعدت احجي وياه واوصيه ما يضرب البنات ويصير حباب وهي يكلي انا ما اضربهم اني اادبهم ابو لسان ما ينطي بروحه وصلت يم الباب واخذت الجنطة من علاوي وبنفس الوقت اخذت منه وعد بعد ما يضرب البنات ومن هذا اليوم بدت صداقتي وية علاوي وجهال المنطقة وصرت كلما انزل من الكيا الكاهم منتظريني براس الفرع ههههه بحيث من احل من المدرسة المنطقة كلها تعرف بهدى وصلت جان علاوي ياخذ الجنطة مني والبقية يمشون ويسولفون وياي حشة عبالك جاي يزفوني مو جاي بوصلوني واني مندمجة وياهم اسولف وهذا الينطيني جبس وهذا الي ينطيني نستلة بس اقوى واحد بيهم مهدي ما لكة شي ينطيه الي شال دعبلة خرزة وانطانياها .. هاي اغلى وحدة بالدعابل همة صحيح صغار بس جانت عندهم مصداقية ونقاوة بتصرفاتهم ما يمتلكها رجال مشورب الي هو بابا وصلت للبيت وسلمت عليهم دخلت شفت ضحى كاعدة وية صديقتها شهد الي جانت وياها بالمدرسة جاية تسلم عليها سلمت عليها وفتت للغرفة اليوم شيماء راحت تدام بالمستشفى بعد ما كعدت يومين بالبيت ما داومت بيهم عناد وية بابا الي كعد ثاني يوم المشكلة وجهه ما يكصه السيف ونوب فوكاه هو ابو الراهي شاف شيماء وما حجة شي وبيومها اجة عمو امجد لان بيبي دزت عليه سليمة .. شوف يمة امجد اريد اليوم تسويلي حل لأثير وبناته شنو ذبني مرجفني كل يوم بالليل هو وبناته يتعاركون وانا لا بيها ولا عليها ارتفع عندي السكر عمو كعد يحجي وية بابا .. يعني هسة افتهم ان انت ضربت شيماء علمود اتجاوزت عليك لو علمود اخذت من راتبها .. ضربتها علمود الراتب والتجاوز .. ما يصير تسوي هشكل وية البنية هي ما رادت غير بس حقها .. هي جاي تنطيني الراتب وانا جاي اصرف عليهم شنو الجديد الي وخلاها تغير رأيها شيماء.. عمو صحيح ينطينا مصرف من الراتب بس بطلاع الروح يالله يقطرهم علية تقطير ويكوم يتهرب من اجي اطلب منه فلوس للملابس او مستلزمات البيت فأني كلت انطيه نص واني اخذ النص الثاني الي ولخواتي ندبر بيها امورنا وهو خلي ياخذ الفلوس بس اله ما راح اطالبه بعد بأي شي امجد .. هذا خوش حجي ها شكلت بابا كله .. مستحيل تنطيني الراتب كله واني اقسمه شيماء.. لعد خلاص اني دوام بعد ما اداوم لو توافق على شرطي لو اكعد وانجب بالبيت وانت حالك حال اي اب تشتغل وتصرف علينا عمو امجد حجة وية بابا وكله انت ليش ما تحاول ترجع تدور على شغل بابا كام يبجي بوجه الله ويكله حاولت ودورت على شغل بس ما حصلت امجد.. لعد اذا هيج الحجي وبيك مجال تلتزم بشغل خلي ادورلك اني همين على وظيفة بلكي اشوف من جماعتي قرابتنا بابا ( هم طرار ويتشرط ) يعني ما لاكي شغل ويتشرط يريد كون يلكة وظيفة على مزاجه ما بيها اي تعب وعلى راحته يروح وشوكت ميعجبه يرجع وبعد ما خلص الكلام عمو امجد راح وما كدر يخلي بابا يتراجع عن قراره وظلت شيماء يومين ما داومت وبابا عرف وكام يحوم ساعة يغلط ويسب ويهد عليها وساعة يكللها ما غصباً عليج ترجعين للدوام شيماء.. شتريد تسوي بية سويه اني بعد ما اهتم كثر الدك فك اللحيم جانت تحجي وهي لازمة اطراف شعرها المكصوص وكأنما تذكره بسوايته وياها شيماء يوم ثاني المشكلة عدلت كصة شعرها بمساعدة ضحى وصار شعرها يوصل لحد ركبتها هدى.. تدرين يخبل عليج وانتي وجهج دائري بنت اللذين طالعة الا بشدة بعدها بابا استسلم ووافق على شروط شيماء وهي اليوم رجعت تداوم بالمستشفى وبهذني اليومين الي كعدت بيها بالبيت اتصلت على رباب صديقتها تاخذلها اجازة بدون علم بابا ورباب سألتها .. شنو شبيج ليش تاخذين اجازة شيماء كعدت تحجيلها عالصار بيها وشلون بابا ضربها رباب.. كون الله يكسر ايده المدها عليج اي تعاي كبل لا انسى تدرين صاحبنا الحجر اليوم كاعد يحوم وكل ساعة يسأل عنج شيماء سكتت مجاوبتها لان هي محجت لرباب عن موقف ليث وياها والبارحة. رباب اتصلت على شيماء حتى تأكد عليها ترجع تداوم لان خلصت الاجازة هنة بس يومين شيماء .. ان شاء الله باجر اداوم بس اندعيلي اليوم واح احاول وية الوالد اخر محاولة بلكي يوافق عالشرط وفعلا راحت شيماء وحجت وية بابا وهو بسرعة وافق لان الظاهر الاخ مزنوك ومحتاج الفلوس كضة طول عمره يحتاج الفلس .......... جنت انزع بملابس المدرسة ودخلت ضحى وجهها اصفر .. ها صديقتج شهد راحت لو بعدها .. اي راحت ستوها .. شنو شبي وجهج .. ما بية شي بعدين احجيلج مو هسة .. دحجي .. ما اكدر بيبي دتحوم فوك راسنا جنا نحجي وشيماء دخلت ووجها بعده بي علامات الضرب وعينها محوطة بلون بنفسجي مخضر سمعنا صوت بيبي سليمة صاحت على ضحى ضحى.. اهوو هسة بس لا تكعد تحجي وياي على موضوع شهد .. شنو شبيها شهد .. هسة خلي اروح لبيبي واحجيلكم شبيها شهد طلعت ضحى وشيما كعدت تبدل بملابسها بس جانت صافنة بغير عالم هدى.. الي ماخذ عقلج يتهنا بيه احجي شلونج اليوم بالمستشفى شسويتي وكليلي التقيتي بصاحبنا الحجر اليوم لو لا ؟؟ شيماء .. سكتي اليوم داومت وجنت شايلة هم الممرضات والدكاترة اذا شافوني شراح يخلصني من اسألتهم وصدك من اول ما دخلت لحد ما طلعت همة على فرد سؤال هاي شنو شصاير بيج واني اجاوبهم .. وكعت من الدرج هدى.. عفية درج شكد اتهمناه ظلم وشهدنا عليه بالزور ما اتفاجيء اذا بيوم اكعد الصبح ما الكاه .. منو هذا .. الدرج المكرود الي كل واحد بيكم عنده مصيبه ذبها براس الدرج .. اي شومة كملي ..وبعدما اتحمدولي عالسلامة كعدت اباشر بشغلي وكأن شيئاً لم يكن الامور طبيعية وكلشي تمام بس رباب صديقتي الوحيدة ما شفتها سألت الممرضات عليها كالو راحت للقاطع مالتها بي حالة طارئة رحت للمرضة الاقدم واخذت منها فايل قطاع اليوم وصادف نفسه قطاع ليث عفت الملفات كلها ورحت اقرة التقرير الصحي الخاص بليث شفت خاتمين عليه واليوم راح يكتبوله تسجيل خروج ويطلع من المستشفى ما اعرف شبية ضجت بالرغم موقفه وياي المروض ارتاح بخروجه اخذت الفايل ورحت لغرفته ودكيت الباب اخذت الفايل ورحت لغرفة ليث ودكيت الباب ودخلت سلمت عالدكتور وليث بس بدون ما احط عيني بعين ليث لان حلفت دين قسم ما انطيه مجال او فرصة يتواصل بيها وياي الدكتور.. لج شومة هاي شنو شبيها عينج دنكت وصار شعري القصير على عيني وحجيت بصوت ناصي.. دكتور وكعت من الدرج .. اهووو لج بابا غير تاخذين بالج زين ما راحت عينج يالله الحمدلله على سلامتج اخذ مني الفايل وكعد يتناقش وية ليث جنت منتظرة الدكتور يخلص حتى اشيل الكانونة من الوريد جان كل ساعة واحد من اقارب ليث يدخل علينا وهو يكللهم انتظروني برة وبعد لحد يدخل خلي الدكتور يشوف شغله سديت الباب ووكفت يم الدكتور الي كعد يفتح بالضماد ويحجي.. شوف استاذ ليث ترة جرحك بعده ما شفى ولازم الضماد بين فترة وفترة تبدله حتى تتجنب التهاب الجرح خصوصا عندك منطقة الكتف هذا اكثر جرح تعبنا وياه جانت اصابته كلش خطيرة خلص الدكتور الفحص وكعد يرجع الضماد ليث.. دكتور اذا تكدر خلي ست شيماء تبدلي الضمادة من جديد هاي ما مرتاح بيها احس بيها ضابة على زندي وكتفي التفت الدكتور .. يالله شومة عطفي عليه وبدلي الضمادة خطية قبل لايطلع من المستشفى .. صار دكتور طلع الدكتور واخذت الادوات وكعدت احضرهم حتى اعدل الضمادة اقتربت منه .. ممكن تنزع التشيرت ليث .. لحظة ترة ضمادي ما بي شي بس اتخذت من الضماد حجة حتى احجي وياج رفعت راسي بدون ما احجي ليث.. شيماء منو مسوي بيج هشكل .. مو شغلك هذا الشي ما يخصك .. تدرين من ما داومتي يوم ثاني بالمستشفى كلت هاي بس خافت وراح تبطل من وراي .. بس هسة من شفتج عرفت اكو سبب ورة غيابج بس كليلي منو سوة بيج هشكل درت وجهي عنه وشهك .. شيمااااااء شعرج ليش كاصته احجي رحمة على والديج اعصابي تلفت ما راح اعوفج ترحين الا تكليلي منو سوة بيج هشكل .. يالله ارتاح وكعت من الدرج يالله هسة اكدر اطلع درت وجهي واجيت اطلع ما حسيت الا هو لزمني من زندي وجرني حيل شهكت من الخوفة .. هد ايدي لا اصرخ .. احجي وياي عدل منو سوة بيج هشكل وليش كصيتي شعرج ترة لا عبالج تعبر علية سالفة وكعتي من الدرج ترة انا ضابط واعرف الضربة من الوكعة والاثر الموجود بعينج مال ضربة بوكس مو واكعة من الدرج .. اترك ايدي منو حضرتك وبصفتك شنو جاي تحقق وياي نترت ايدي واني كلي ارجف جانت عيونه تحجي بيهم شي غريب عكس نظراته بذاك اليوم .. شيماء انا لازم احجي وياج بس مو مال اكعد احجي وياج بالمستشفى تكدرين تنطيني رقم نقالج حتى اتواصل وياج لان الحجي الي اريد احجي وياج ضروري .. اسفة ما انطي رقمي .. ترةانا بأستطاعتي اجيب رقم نقالج واطلعه من جوة الكاع بس حبيت استأذن منج وتنطينياه برضاج جنا نحجي ودخلت علينا رباب جنت دايرة وجهي رباب.. شنو اشو اتأخرتي جنت ادور عليج كالو بغرفة استاذ ليث راح يطلع اليوم كلت اجي اسلم عليه قبل لا يطلع واشوف شيماء التفتت عليها وهي شافتني وشهكت بخوف عزة العزاني ولج هاي شنو مسوي بيج ابوج الشفية من الله يكسر ايده رفعت راسي حتى اتلاحك .. رباب كافي بعدين نحجي لا تدوخين الاستاذ ليث وتعطلينه بسوالف تعبانة وراه طلعة ليث.. اي رباب كملي شبي ابوها .. ما بي شي بس قبل يومين اتصلت علية شيماء وطلبت اجازة مرضية وكعدت رباب تحجيله المقتل كله لاستاذ ليث الي اشتغل براسنة تحقيق رباب التفتت علية .. بس ما ادري بيه مسوي بيج هشكل يمة شلون انطاه كلبه يكص شعرج الحلو حصرتني البجية .. رباب ابوس ايدج كافي كان ليث وية كل كلمة تنطقها رباب هو يرتفع صدره العريض ونخفض جمع ايده بقبضة بانت منها عروكه دنكت بأستسلام ما ينفع اسد حلك رباب حسيت بالذل كدامه .... هدى .. على شنو تحسين بالذل .. زحمة مرية عمري ٢٨سنة يعرف بية بابا ضربني علمود راتبي والله استحيت بس شكول عليها رباب طلعت طلعة بدون بريك اوووف رحتا كعدنا اتغدينا اني وشيماء وكعدت احجيلها عن البنية الجديدة الي صارلها تقريبا يومين من انتقلت لمدرستنا بس ما صارلي فرصة احجي لشيماء لان جانت بوكتها متأذية من الضرب شيماء.. تركي عنج هاي السوالف مالت الشقاوة وخليج بدراستج صار الليل واني غسلت قميص المدرسة وجنت اشره وشيماء يمي تحجي وية رباب بالنقال وترزل بيها عالصار اليوم بس فجاءة سمعنا صوت بيبي تغلط على ضحى جان صوتها عالي رحنا اني وشيماء نشوف شكو .. شفت ضحى كاعدة تتوسل لبيبي وهي تبجي شيماء .. بيبي شكو اجتي بيبي تجاوبها بس دك نقال بيبي وكان المتصل عمو امجد جاوبته .. هلا يمة شلونك شنو شلون هاي شوكت يمة صخام الصخمني يبوووووووووو يتبع.......... | ||||
|
| |
|
07-07-19, 10:04 PM
| #13 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #الكاتبة_نهى #البارت_الحادي_عشر هدى جنا كاعدين نضرب اخماس بأسداس بعدما عمو امجد اتصل على بيبي وحجة وياها بيبي ظلت تدك وتلطم شيماء._ بيبي شكو شنو شصاير _ ولكم ابوكم موقوف بالسجن من الظهر لحد هسة .. يا ليش شمسوي .. وانا شمدريني شمسوي سودة علية طلع من البيت دايخ من وراكم هم يالله يكدر يلحك عالعيشة هدى _ اسغفغ الله (اسنغفرالله)هسة هي غيغ (غير) تكعد غاحة(راحة) ام السلطان سليمان سليمة خانم _ سودة علية يمة اثير ابو طول الحلو يالترف يابو حجي الحلو يالحنين يمة السجن مو الك يمة ابني مو حمل تعب السجن وليدي روحه خصرة _ والله غاح (راح)يطكونا بعين من وغة (ورة) حجيها عن بابا شككتني بنفسي معقولة هي دتقصد على بابا نفسه اثير مو غيره بهذا كلامها لج شيماء اخاف بيبي طبكن وايغاتها (وايراتها) وصاغ (صار) عندها التباس ودتبجي عالمغحوم (المرحوم)جدي واكفة يم ضحى الي نسينا سالفتها والتهينة بابونا الغالي ابو دوالي اتصل عمو امجد على بيبي وكال طلعناه بكفالة وهسة احنا راجعين بالطريق سليمة_ يايمة راية الله بيضة ولكم كومو خلي وحدة تحضرله الحمام وحدة تحضرله العشا خطية هسة يجي تعبان هدى.. اكول بعد ما تغدين(تردين) نشيل سعف ونوكفله بالباب ننتظغه (ننتظره) وبس يجي نغني له (طلعة البدر علينا ) ما حسيت الا وهي نازعة نعالها وشمرته علية بالهوى لكفته بيدي ولبست فردة النعال برجلي صحت.. يالله بيبي وياج فد مغة الفغدة ( فد مرة الفردة)الثانية اغيد اغوح (اريد اروح) للحمام _ ولج شيماء توخرين هاي البكعة من وجهي لا اجي انتف شعرها _ هدى كافي مو وكتج ترة _ يالله سكتنا امغنا لله (امرنا لله) وحجيت بصوت ناصي تهي بهي تغيد)تريد) تنتف شعغي(شعري) مو على الاساس اني دجاجة وتنتفني ربع ساعة وجان يدخل عمو امجد ووياه حضرة الوالد المتهم دخل يعرج وعمو امجد متجيله دخل واحنة جمدنا بمكانا كلنا مصدومين _ هذا منو سليمة شافته وشهكت _ يمة صخام اثير يمة هذا ياهو مسوي بيك هشكل امجد _ هسة يمة مو كت اسألة خلي يفوت يسبح ويرتاح اني وشيماء وضحى واكفات فاتحات حلكنا من المنظر الكدامنا جان بابا او بالاحرى بقايا بابا جان عبارة لوحة فنية ملونة بس الوانها غامقه شوية ازرك على بنفسجي على احمر وعين مطفية شفة مشكوكة ملابس مكطعة فكه داير وعليهن كلهن مزينينه صفر ( اكرع) والله كان شكله يخوف عبالك طالع من جوة ايد زومبي صاحت علينا سليمة _ يالله اتحركوا لاتبقون هيج فاتحات الحلك خفت اقترب منه... شكله يخوف من كد الكدمات والدم الي بوجهه راحتله شيماء واخذته بدون متحجي اي كلمة ودته للحمام وضحى كامت تصبله عشا واني كعدت مكابلة سليمة بعد ساعتين كعد بابا يم سليمة وعمو امجد بعدما خلص عشاه وسبح امجد.. متكلي انت شنو سالفتك شوكت ضربت المرية وشعندك وياها سليمة.. عزة بعينك اثير كمت تضرب نسوان مو عيب عليك همست .. لعد شيماء من انضغبت (انضربت) كدامج شنو جانت صخلة لو شنو اكلكم هاي بيبيتكم يمكن بيها انفصام بالشخصية اثير _ لا يمة والله ما ماد ايدي عليها _ لعد شلون اخوك يكول هشكل عليك _ انا اكلج يمة شلون صارت السالفة جنت كاعد بالكهوة وية جماعتي الظهر وما اشوفلك الا مفرزة مال شرطة دخلت علينا ولموا شكو واحد بالكهوة واخذونا كلنا للمركز ما نفتهم ليش اخذونا كل ساعة اسأل الضابط اكله سيدي ليش اخذتونا بس محد يجاوبني هناك ودزو علينا للتحقيق اخذونا كلنا جان بينا ٧ اشخاص وكفنا كلنا مثل السطر واحد بصف الثاني جانوا ضباط ثنين واحد كاعد عالمكتب واللاخ كاعد يمه على جهة لحظات ودخل ضابط ثالث ضخم جانت ايده لافينها بحامل يد على ركبته ما اعرف شبي كام يباوع على واحد واحد بينا بغضب ونار وشرار احس يريد ياكلنة بسنونه شافوه الضباط ووكفوا مبين عليه هذا جبيرهم حجة وعينه علينا بخزرة .. دخلو المجني عليها والشهود شوية ودخلت علينا مرية سافرة يجي عمرها بال ٤٠سنة شكل المرية لفت انتباهي جان وجهها مضروب مبين عليها مكتولة وعينها زركة حجة الضابط .. اتفضلي اختي استريحي التفت علينا الضابط وكعد يسأل كل واحد بينا عن اسمه الثلاثي وصلني الدور وكلت اسمي ما اشوف الا الضابط الضخم المصوب اتقدم علية وجمع ايده بقبضة الضابط الاول كله .. لحظة سيدي خلي نكمل التحقيق لا تستعجل على رزقك ما افتهمت شيقصدون بهذا حجيهم وهذا شعنده وياي سحب نفس عميق بحيث صدره ارتفع عبالك يريد يطك ظليت ابلعم هذا شبي وياي رجع للخلف وحجة وية المرية اختي كومي شوفي منو بيهم اتعدة عليج وانتي مارة من يم الكهوة الي افتهمته ان المرية على الاساس جانت فايتة من يم الكهوة وواحد متعرضلها وضاربها وهي شافته دخل للكهوة كامت المرية من مكانها وصارت تباوع على واحد واحد بينا بس اشو هاي وكفت كدامي وصاحت سيدي هو هذا الي مد ايده وكعد يضربني الضابط.. تكدرين تعيدين كلامج مرة ثانية وتكولين شلون ضربج كدامه _ سيدي جان الوقت ظهر وجنت هسه طالعة من الدوام مثلما تعرف سيدي اني موظفة وصلت قريب عالكهوة اشو هذا اعترض طريقي وكام يذبلي حجي وصار يتحارش بية اني بوقتها خفت لان جنت لوحدي بالشارع والدنيا ظهر حجيت وياه ورزلته اشو هذا اتهجم علية وكعد يضرب بية بس ربك ما يعوف عبده طلع ولد شاب وهو وابوه شافونا من يم بيتهم وركضوا بأتجاهنا وكعدو يصيحون من بعيد هو شافهم وانهزم و راح يركض اني انتبهت عليه جان يركض و كبل دخل للكهوة اجاني ولد شاب وابوه يركضون اجوي يدخلون وراه للكهوة بس اني كلتلهم اروح للمركز واشتكي عليه هي تحجي وانا اصيح .. سيدي والله جذابة اصلا انا بحياتي ما شايفها زمخ بية هذا الضخم بصوت بلعني الساني ما ادري هذا ياهو مسلطه علية التفت الضابط الثاني للشرطي الي دخلنا وكال _ روح صيح الشهود شوية ودخلو علينا .. ولد شاب ورجال جبير يجي عمره بال٦٠سنة التفت عالشهود وسألهم وهو يأشر علينا كلنا .. بالله تعالوا شوفوا اي واحد بيهم من هذولي لحظات والولد اشر علية وكال سيدي هذا الرجال الي شفته من بعيد شلون يضرب بالمرية وانهزم وسألو الرجال الحبير هم نفس الاقوال الضابط.. هسة تكدرون تتفضلون تطلعون برة واحنا راح نسوي الاجراءات الي علينا ونشوف شغلنا وية الاستاذ جان يحجي ويباوع علية بتوعد ظليت اصيح .. يا ناس ياعالم والله ماضاربها وهذولي يتبلون علية سيدي بيمن ترديني الحلف لك .. كالو للحرامي احلف كال جاني الفرج انت تسكت وتاكل تبن بعدما طلعوا المشتبه بيهم والمرية والشهود ضليت بس اني وهذا الضابط الضابط الي يمه كله .. ها ليث شنو قررت بابا ذكر الاسم وشيماء شهكت وحطت ايدها على حلكها مصدومة باوعوا عليها وهي بسرعة اتلاحكت لنفسها شيماء.. اي بابا كمل وتالي شصار .. بعد شصار هذا الي اسمه ليث الله ياخذه كال اخذوه وضيفوه وكوموا بالواجب وياه دار عالضابط صديقه كله لوما ايدي جان علمته الله حق واخليه بعد يبطل يمد ايده على مرة جاوبه صديقه.. لا توصخ ايدك بيه خليه علينا احنة نضيفه همة يحجون وانا كلبي وكع بين رجلية اتذكرت ايام السجن والتعذيب اويلي يالله هاي وين جانتلي .. سيدي دخيل الله ودخيلك لا تاخذني للضيافة جاوبني وعيونه تجدح.. الظاهر هنا الاستاذ عنده خبرة بدار الضيافة جاوبه صاحبة .. هو مبين من شكله خريج سجون صاح للعريف الي واكف برة الغرفة وكله اخذه بوية همة اخذوني ودخلوني لغرفة ظلمة وانا ظل جسمي كله ينكت من البرد ظليت كاعد وحاط كلبي بشيشة دقايق ودخلو علية اربعة ملثمين ما يبين شي من وجههم واستلومني دك بالصوندة صرت ما اعرف الضربة منين تجيني كل ساعة اسمعهم يكولون .. بعد تمد ايدك على مرية انا من حلات روحي اصيح.. اتوبة سيدي والله بعد ما امد ايدي على مرية .. حتى لو جانت زوجتك .. حتى لو جانت مرتي ورجعوا يضربوني وصاح .. كول حتى لو جانت بنتي .. كلتله والله هاي هي توبة حرمت بعد ما امد ايدي على مرية حتى لو جانت بنتي سحب ايدي وصار يضرب عليها مثل الطالب هاي الايد الي تنمد على مرية ضعيفة تستحق تتكسر .. لا دخيلك سيدي ابوس ايدك بس همة وين حادين سنونهم علية وصاورا يضربوني ويعيدون علية نفس الكلام وانا اردد وراهم بخوف مفزوع اريد بس اخلص روحي منهم وبالاخير من كثر الدك اغمى علية ورة فترة جنت نايم وواحد دفرني وكال يالله كوم راح نفرج عنك اجة اخوك ودفع كفالة حتى يطلعك والمرية اتنازلت عن القضية اخذني ورحت دخلت عليهم بالغرفة وشفت امجد الي شاف شكلي وكام مفزوع من مكانه بس ماكدر يحجي اي كلمة ما لكيت ذاك الضابط الي اسمه ليث لكيت بس صاحبه رفعت ايدي اريد احك راسي وانصدمت .. هاي شنو مزينين شعري جاوبني الضابط.. اي زيناه عندك اعتراض جاوبته بخوف.. لا سيدي رحمة الله والديكم اصلا انا جنت ناوي ازينه حجيتها وانا ابلع بريكي اريد بس اطلع من يمهم اولاد الكلب موتوني كتل جان بابا يحجي وشيماء على نفس وضعها مصدومة خلتني اشك بالسالفة كمنا ورحنا ننام لان اتأخر الوقت نمت بحضنها مثلما اتعودت كل يوم وضحى نامت بفراشها على صفحة ما اعرف شبيها جنا كلنا مخبوصين بحضرت الوالد المتهم وهي جانت فاصلة بغير عالم مو يمنا درت وجهي على شومة وحجيت بصوت ناصي .. اكول شومة قبل شوية من جان بابا يحجي ليش شهكتي مصدومة شيماء.. لج هدى تدرين منو ورة دخول بابا للسجن .. منو .. لج هذا ليث نفسه الي جنت احجيلج عنه .. حلفي والله الحجغ (الحجر) ما غيغه (ماغيره) .. اي ولج هو نفسه .. والله عاشت ايديه والف غحمة ( رحمة)على بطن الحملته والله لو مو عيب من باجغ اغوح (باجر اروح) احني ايده واتشكغ (اتشكر)منه .. لا هدى اني عكسج ما اعرف ليش خفت من عرفت بليث هو ورة سالفة بابا تصرفه هذا حسسني بالتهديد وزاد خوفي منه .. خاب ما تطيغين (تطيرين)هي هاي الزلم الحوك شيماء اني لو منج اغاجع (اراجع)حساباتي بخصوص ليث واغجع افكغ (ارجع افكر) من جديد لان الغجال (الرجال) الي يدافع عن بنية مظلومة وياخذ بحقها مستحيل يطلب منها تبيع شغفها (شرفها) .. شنو قصدج يعني تردين تكليلي اني فهمت الموضوع غلط واتبليت عليه بذاك اليوم .. لا مو هيج الحجي بس يمكن هو ديختبغج (يختبرج) وعغض (عرض)عليج الفلوس مقابل تنطينه نفسج .. لا مستحيل ماكو هيج حجي وشنو راح يحصل من يختبرني .. شلون بيج لج شومة احتمال هو حبج وغاد يختبغ (راد يختبر) اخلاقج ويجغبج (يجربج ) قبل لا يتقدملج .. هاي شنو وين كاعدين خو يروح يسأل عني بالمستشفى وبمنطقتنا وهمة راح يكلوله منو شيماء وشنو اخلاقها المن هذا اللف والدوران .. اي بس هو حجغ (حجر) يختلف يغيد يختبغ ( يريد يختبر ) فيس تو فيس .. ما اعرف والله عالعموم الموضوع انسد واحتمال بعد ما نتشاوف و طرقنا متلتقي لان بعد طلع من المستشفى .. الله كغيم (كريم ) اني عندي حدس ليث يحبج .. دنامي الظاهر شكلج نعستي وكمتي تخبصين نمت واني ادعي بكلبي كون ربي يسعد شيماء اختي يوم ثاني الصبح كعدت مثل كل يوم صليت وجهزت روحي للمدرسة ولكيت حضرت الوالد كاعد من الصبح وشيماء دتسوي ريوك شاورت شيماء .. شعجب ابوج كاعد من الصبح شنو يريد يموت .. انجبي لتحجين هشكل البارحة عمو امجد لاكي شغل لبابا وكله باجر تعال من الصبح اخذك لصاحبي .. ما اصدك معقولة واخيغا قغغ (اخيرا قرر ) يشتغل .. الله يهديه .. بس شكل الضغبة (الضربة)جابت نتيجة وياه اكلج ما تنطيني غقم (رقم ) هذا ليث خزرتني .. ليش شتسوين برقمه .. احتاجه كلما ابونا يصيإ (يصير) وكح اهدده اتصل بليث واكله غاح اخابغ (راح اخابر) على شغطة ( شرطة )الاطفال تجي عليك وتاخذك اذا ما تصيغ (تصير)عاقل شيماء.. ههههه الله يلعن بليسج دروحي لا تتأخرين على الخط وصلت للمدرسة وجان اشوف ليان نزلت من سيارة عالية حديثة وجان وياها شاب كلش مرتب وحلو نزلت وسلمت عليه ودخلت للمدرسة دخلنا وراها والتهينا ندرس وبالدرس الرابع صادف عدنا شاغر لان مدرسة الاحياء مجازة جنا متجمعات ونسولف واجة على بالي اسأل ليان .. اكول ليان اليوم منو وصلج للمدغسة (للمدرسة) .. هذا اخوية لؤي وصلني كلتله وصلني بطريقك .. اخوج يشبهج هم حاتة .. يمة فديت اخوية الله يخليه الي هو الي يطعلني للمولات والمطاعم مبتلي بية هالة .. شكد حلو عكس اخوي قاسم ليان .. هاي شنو عندج اخو اسمه قاسم اني كمزت من مكاني ورحت كعدت بينها وبين هالة وحجيت .. اي ولج عندها اخو اسمه قاسم غير يموت لج لو تدرين بيه ساحل نص بنات المنطقة سحل بوكاحته اااا اقصد بجماله واقدملج نفسي اني وحدة من المسحولات بس حغامات (حرامات) شلنا من المنطقة وبعد ما اشوف جميل الطلة واكحل عيوني بشوفته جنت احجي واحضك بكلبي على الصبغ الصبغته لقاسم جنت اضحك واتخيل قاسم الوكح الاجلح الاملح هالة.. كولي ما شاء الله. لا تطكين اخوي بعين خمسة وخميسة بعين المايصلي عالنبي كون تسمعج امي جان راحت تركض تجيب حرمل وتطكطكه كدامج حتى لا تحسدينه انفجرت من الضحك ما كدرت اتحمل اسكت بعد شوف هاي مصدكة اخوها حلو هههههههه بس يالله خليها تحجي تخدم الخطة .. اي عمي حقها امج تخاف عليه من العين هو بس طوله يسوة عشغ (عشر) رجال هالة.. اي والله فديت طول اخوي ليان .. اكول هالة شوكت تعزميني ببيتكم عالغدة انتي مو كلتي ذاك اليوم راح اعزمج _ هههههه بدة الزحف خغب (خرب) هاي البنية ما تضيع اي فرصة هالة.. ان شاء الله اكول لأمي واعزمكم اكول ليان صدك اخوج يطلعج للمولات ويفتر وياج عادي _ اصلا ما احب الطلعة الا وياه عكس بابا وماما مالهم خلكي هالة.. هينيالج لعد انا شبي حظي اخوي قاسم جنة عتريس نبتلي على عمرنا من نكله تعال وصلنا لكذا مكان يكول اتخبل من طلعة النسوان ذبحوني كتلوني ولا تكلولي اطلع وية مرة .. ياا ليش يحجي هشكل .. ولا مرة طلعنا وية قاسم اذا ما سواله عركة شكدها وشكبرها وية العالم قبل سنتين جانت اخر طلعة النة وياه توبنا ولله اتذكر بوكتها جنا اني وكوثر اختي محتاجات شغلات لحفلة بنت عمي طلبنا من بابا ياخذنا للمول بس جان بوكتها تعبان وكال لقاسم ياخذنا بس يمة جانت ساعة السودة بيوم الي طلعنا بيها وياه اي غير خطية واحد داعية عليه امه حجة وية كوثر بالغلط عباله اخته وكللها اسف خيتي وربي حسبالي اختي واعتذر وكوثر الفطيرة ابتسمت كلتله .. عادي خوية مصار شي وقاسم لجحها يمة وهو اجة يركض عالولد ما اشوف بس الولد يطير بالهوى سواه كرة سلة وهو قاسم منا طويل وضخم وهذاك المكرود فصمة ناعم وبالف ياعلي كدروا يخلصون الولد من ايده ركبنا بالسيارة سب وغلط يمعود ابو الغيرة ترة صار التباس بالموضوع بس هو وين قاسم قافل بس حتى ما اظلم اخوي هو حيل حنين علينا يعني صحيح ما يطلعنا بس بالمقابل كلما يسافر او يطلع ما يرجع وايده فارغة كون يغركنا بالهداية ليان .. يبوووو فديته اموت عالرجال الحمش وبنفس الوكت حنين هدى.. شوفي هو من ناحية الحنية فهو كلش حنين اسألي المجغب (المجرب) اهووو ياما وياما سقاني من منبع حنانه والله تكولين قلب والدة الي بين ضلوعه جنت لازمة شعري واحجي واتذكر شلون جان يجرني مثل الخروف من كصايبي ويتوعدلي الله يلعنك يا لساني هسة غير اكعد واسكت ليان.. الله اتمنى اشوفه .. تدغين(تدرين) وانتي ما محلفتني اني بس شفتج كلت والله ما تلوك لقاسم وحدة غيغج (غيرج) انتي لايكين على بعض فعلا تشكلون ثنائي تحفة تكسغون (تكسرون) على ( شاكيغا وزوجها بيكيه ) بالتناسق ليان.. حلفي هدى صدك هو هشكل وسيم .. وغوح (روح) بيبي سليمة الي ما احلف بيها جذب ان شاء الله يصيإ (يصير) بيها شلل اذا اني مجذبة عليج احجي منطلقة وهالة تكرص بية بس انا سويت روحي ما اعرف على شنو تكرص بية هالة.. اكلج هدى انتي وين شايفة اخوي قاسم انتي موزذاك اليوم كلتي صارلي شكد ما شايفة قاسم من عهد جنت صغيرة عرك وجهي وحسيت انحشرت بزاوية عايز بس واحد يغنيلي (كل يوم صدمة اقوى من الكبلها ) بس فجاءة .. ا اي صدك نسيت اكلج انا من بعد ما كلتلج ورة فترة شفته عند بيت كغايبكم ام فغزدق (كرايبكم ام فرزدق) بالصدفة هالة صافنة تتذكر .. اي صدك هو مرات يروح لبيت ام فرزدق لان صهيب صديقه ودائما يطلع وياه يمة الحمدلله ربي زين ما انفضحت جذبتي جنت حابسة انفاسي بالحلة فاطمة خربانة ضحك .. والله انتي فلم ولج ما شايفة شكلج وانتي كاعدة تجذبين على ليان وهي مصدكة الفطيرة .. من كثرة الجذب احس كسرت حتى على مسليمة الكذاب. عمة حتى عمة كطعت كلبي لحد ما صرفت انتباهة عن غائد .. لج ما يفيد هاي مبين عليها متعددة الاتجاهات مستعدة تكبل وية عشرة عادي عندها مسمعتيها شلون تحجي بمغامراتها وية الكبل .. اي ولج سمعتها شكد جريئة بس مو صوجها صوج اهلها عايفينها على حل شعرها وبراحتها تطلع وتطب للبيت اجة الخط ورائد ما بين اليوم ظل بالي عنده وصلت للمنطقة واشوف علاوي منتظرني وكالعادة ياخذ جنطتي ويكعد يحجيلي موجز الاخبار عن اهل المنطقة بس اقوى خبر من كال هاي بنت ام احمد جابت ولد وراح تسميه على اسمي علاوي .. يا صلوات على النبي .. اي لعد شعبالج انا علاوي مو اي واحد .. اي انت علاوي البطل شوف انت اذا كبرت وصرت رجال حوك وصاحب غيرة على عرضك تكوم كل بنات المنطقة يركضن وراك هاي اذا ما تشوف نصهن كاعدات يم امك يخدمنها حتى تختار وحدة بيهن تزوجها الك اني احجي وانفخ بي وهو يرفع بياخته .. لا لا خلي يولن ما اريدهن حتى لو يتلوكون لأمي كوة لامة حلكي لا انفجر من الضحك .. يا خطية ليش يا قاهر قلوب العذارى .. انا احب بس وحدة. وهي الي بالكلب .. هلا هلة حركات هاي شنو تحب من وراي وانا ما اعرف صار وجهه احمر ابن الاوادم بكد الفصمة وماكاعد راحة. جنا نمشي ونحجي .. اي صدك شسمها سعيدة الحظ الي كدرت تاخذ كلب علاوي .. اسمها هدى اتسعت عيوني .. ولك منو هاي هدى .. انتي هو اكو غيرج اسمها هدى يمة هو كال انتي واني خربت من الضحك والله لو ما بالشارع جان كعدت بالكاع من الضحك يايابة اريد اسكت ما كدرت .. هههههههه اخ يمة بطني ولك علاوي انت متأكد انا هو شايل جنطتي ويباوع علية متعجب ليش اضحك .. اي شبيج ما مصدكة احبج ترة انتي كلش حلوة ههههههه لا وواثق من نفسه بعد مسوي براسي فضل وحابني .. ومو بس هشكل راح اكلج بعد خبر ثاني بس تسمعينه تطيرين من الفرح .. ههههه شنو كلي خليني اطير .. انا البارحة كلت لامي من اكبر اتزوج هدى وامي كامت تضحك وتكول يمة ساعة المباركة هدى تصير جنتي ها بعد شتريدين .. هلا هلة بعد ما اتحاجة منو بكدي علاوي وامه يحبوني .. شوفي من هسة اكلج حتى ابقى احبج وما اغير رأيي واتزوج غيرج اريدج تصيرين حبابة تسمعين كلامي هو يحجي وانا خربانة ضحك عقد حواجبه .. شنو شبيج ليش تضحكين .. ولك داضحك من الفرحة ما مصدكة انت تحبني وصلت للبيت ودعته وهو عايش اللحظة مصدك روحه الله يلعن ابو الثقة العنده دخلت للبيت واني فاطسة من الضحك وشفت خالة ام فرزدق عندنا بالبيت والبنات ضحى وشيماء وسليمة كاعدين يمها سلمت عليهم ام فرزدق.. دوم الضحكة خالة هدهد جنت اضحك واحجي شيماء..هسة شفتهمنا منج بس تضحكين كعدت اسولفلهم على علاوي وهمة هم خربوا من الضحك بس سليمة.. هي هاي تاليتج قزمة والزعاطيط تتقدملج ام فرزدق.. خالة من فدوة رحت الطولها هي حلات البنية تكون ناعمة هاي ما يسمونها قزمة هاي يكلولها نبعة ريحان لان ناعمة هدى.. احم احم اشكغج خالة ام فغزدق اي هذا الحجي الي يفتح النفس دخلت بدلت وكعدت يمهم وصرت اسألها عن عمو فرزدق وانتبهت على ضحى تحوم مثل عندها ولادة عرفت تريد تسألها على صهيب ومستحية ما تعرف شلون تفتح الموضوع خاف تلفت انتباه سليمة اني هادي ما يردعني شي .. اكول خالة صدك شخباغ (شخبار ) صهيب ابن عمو فغزدق (فرزدق) حتى تعرف بيبي على منو دا اسأل لان هي تراقبنا بالمرصاد واكفتلنا مثل العظمة بالبلعوم ام فرزدق .. والله خالة الحمدلله صهيب بخبر ودايدرس واولت البارحة اتصل على ابوه وكله بعد راح يبقى سنة ثانية انتبهت على ضحى حاصرتها البجية .. يا ليش خالة خطية غاح (راح) يبقى سنة ثانية .. والله خالة انا ما افتهم بهاي السوالف بس الي عرفته راح يتأخر علمود يدرس وياخذ شهادة اعلى خطية ضحى ما اتحملت كبل كامت من يمنا وصرنا نسولف احنا وام فرزدق لان هواي مشتاقين لها وسألتنا عن اخبار مروة شيماء .. والله خالة ذاك الاسبوع كلفت واحد من زملاء زوجها رافد دكتور وياه وكلتله اذا تكدر تدبرلي رقمه لان هو رجل اختي والله والبارحة جان يجيبلي الرقم بس هو رقم دولي وكلي تكدرين تتصلين عليه .. اي وهسة شنو اتصلتي لو بعد .. خالة بعدني لان المكالمة الدولية غالية وصديقتي رباب كالت اكو برناج اسمه فايبر هذا يشتغل عالانترنيت تكدرين تتصلين بيها مجاناً بدون ما ياخذ منج فلس احمر هدى.. اي صدك هذا البرنامج صديقاتي كله يحجون بي بس هذا يحتاج نقال حديث مو صرصور ام فرزدق.. شوفي يمة انطيني رقمها وانا اخلي فرزدق ابني يتصل عليها واني احجي وياها لان هو هم جاي يتصل على صهيب بالخارج شي اكيد يعرف هذا البرنامج الكلتي عليه .. اي والله خالة تسوين فضل احنا نحجي وسيلمة لامة شفايفها وتحرك بيهم منا ومنا وتهز بيدها ادري بيها كاعدة على نار ومنتظرة خالة ام فرزدق تطلع وتهد بينا لان نحجي بطاري مروة واخيرا طلعت عندها صفة زينة تستحي من الخطار رجع بابا بهذا اليوم فرحان وجايب وياه كباب شوي بمناسبة استلام الوظيفة كلنا فرحنا بلكي الله وهاي الوظيفة تغيير من حال بابا ضحى.. بابا شنو اتعينت .. اتعينت كاتب بالاستعلامات بمستشفى ال..... الي بالكرادة اتعشينا وجنت فرحانة بالكباب انطوني شيش كباب اكلت وياه كوصتين خبز من هاي الكبار شلون دبرتها ما ادري بس المهم الطعم مو الكمية انتبهت لسليمة تاكل وتباوع علية وتهز بيدها كام بابا يغسل ايده وهي انهدت علية سليمة.. شكد تاكلين بعد تعالي اكليني .. لا بيبي انا استحغم ( استحرم ) ما اكل لحم الخنزيغ (الخنزير) حجيتها لخواتي بصوت ناصي يمة اني حجيت هشكل وشيماء غصت بلكمتها وكعدت تكح وضحى كامت تضرب على ضهرها وهي خربانة ضحك سليمة.. ها شنو كلتي ترة مو عبالج ما اعرف دتحجين علية القزمة البكعة كمت سحبت نفسي من يمهم ورحت على غرفتي اخاف سليمة تروح توز ابنها علية وتطلع اكلة الكباب من خشمي الي هسه استمعت بيها اخيرا من جد ابنها الغالي رحت للغرفة وطلعت كتبي واتذكرت رائد اليوم ما اجاني للمدرسة شعجب مو من عوايده عسى المانع خير ياربي كعدت اكلب بالكتاب مبقة شي على امتحانات اخير السنة لازم اشد حيلي حتى بس اخلص السادس كبل ادورلي على شغل هسة ما اكدر لان محد راح يقبل اشتغل وخصوصا شيماء راح تكلي انتبهي لدراستج وما عليج طلعت اسويلي جاي رحت للمطبخ وفتت من يم سليمة وضحى وبابا جانوا كاعدين سوية وشيماء جانت تكتر بالمطبخ .. شكو شبيهم بابا وبيبي كارصين بضحى جنهم عندهم اجتماع شيماء التفتت علية .. صدك دتحجين شيريدون منها هاج بالله لزمي انطتني الجلافة ونشفت ايدها وراحت يمهم تشوف شنو جاي يصير رحت فتحت القوري ولكيت بي جاي حميته حضرت الكوب وجان اسمع صوت بابا صار عالي يتوعد ها خير يا طير اشتغلت رحمة الله رحت يمهم شفت شيماء حاضنة ضحى الي جاي تبجي .. بابا بعدني صغيرة ما اريد اتزوج سليمة .. شنو بعدج صغيرة الي بعمرج عندهن كومة جهال لا تكعدين تتعايرين يتبع..... | ||||
|
| |
|
07-07-19, 10:19 PM
| #14 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #الكاتبة_نهى #البارت_الثاني_عشر هدى دخلت عليهم وشفت ضحى دتبجي بحضن شيماء وبيبي سليمة تحجي وياها سليمة _ اثير احجيلك كلمة وية بنتك شبيك ترة العريس الي جايها من كرايبي وخوش ناس رجال مايتعيب اثير _ يمة منو هذولي كرايبج اشو انا الي اعرفهم كلهم تعبانين ما لاكين عشا يتعشون مو نوب يتزوجون _ شبيهم يمة كرايبي خوش ناس مستورين لاعندهم ابو سكير ولا عندهم بنية اتزوجت بدون علم اهلها جانت تقصد تبسمر بابا ضحى _حتى لو خوش ناس اني ما اريد اتزوج _ على شنو ترفضين ياحظي اشو مدرسة وما فلحتي بيها وكاعدة بالبيت لا شغل ولا مشغلة كل خير ما بيج دخانج يعمي كاعدة بس تاكلين وتنامين خلي نزوجج ونرتاح على الاقل يخف الحمل عن ابوج اثير.. يمة منو هذولي كرايبج مكلتيلي ووين يعرفون ضحى _ شنو السالفة يمة اثير تسوي روحك ما تعرفهم هذولي بيت ابو سعد بيت عمتي راسقية _ هاااا اي عرفتهم _ اي يمة يردون يزوجون أبنهم حسين وشافوا ضحى وياي ذاك اليوم من رحت للمضمد والمرة اتخبلت عليها وكالت ما تنطونها لابني اريد ازوجه وادورله على بنت الحلال كلتلها كبعي واخذي وين نلكة احسن منكم .. والله يمة ما اعرف شنو اكلج خلي اشوفهم واسأل عنهم همة صحيح كرايبج بس انا ما ملتقي وياهم .. من غير ما تسأل عنهم انا اكفلهم الك انطي وعلى مسؤليتي ضحى .. والله اموت روحي وما اتزوج شنو بعدني صغيرة عالزواج خطية جانت تحجي وتبجي بابا كال .. هسة انتي على شنو تبجين سطرتي راسنا ولج احنا بعدنا ما شفنا الناس ولا عرفنا عنهم شي انتي كبل كلبتيها مناحة كامت ضحى من يمهم وهي تدردم وتحجي بالغرفة راحت وراها شيماء.. لتبجين ضحاوي ما عليج محد يكدر يجبرج عالزواج اذا ما تردين تتزوجين .. شلون محد يجبرني وهاي بيبي كاعدة تحش براس بابا اخاف تقنعه يزوجني .. شنو وين كاعدين يزوجج غصب عنج انتي بس لا تكعدين تبجين وخليها علية اني احجي وية بابا ............... ورة يومين احنا ظلينا بالبيت نصبح ونام على نفس الموضوع وهو زواج ضحى او بالاحرى هو محد خابصنة بسالفة الزواج الا سليمة اكلت كلب ضحى علمود توافق على هذا كرايبها وبابا لحد الان ما معروف شنو موقفه بس مرة شفت شيماء دتحجي وياه بخصوص ضحى الي افتهمته ان شيماء تكول لبابا لا يضغط على ضحى كلشي بالاجبار الا الزواج هذا الشي خط احمر بطلتها من المدرسة لان هي كسولي وكلت حقك هذا هي ما اهتمت بدراستها بس مال تجبرها عالزواج لا ما اوافقك عالقرار ولا راح اكعد اراقبكم شلون تجبرونها عالزواج بساعتها لو اعرف يصير موتي على هالسالفة ما اخليكم تزوجنونها غصب عنها _ لا من هسة تكعدن تستبقين الاحداث اني بعدني ما وافقت عالناس اريد اسأل عنهم هذا زواج مو لعبة اريد اسأل عنهم واعرف شنو شغله وحالته المادية ما بية حيل ازوجها لرجال تعبان وحافي منتف وتالي تتطلك وترجع تكعد على كلبي وتعال يا اثير ابتلي بيها شيماء .. براحتك بس اني كلت انطيك خبر حتى لاتكول شيماء ماكالت طلعت من الدوام ولكيت سليمة مطلعة شغل البيت كله غسل فراشات وبردات ومسوية حملة شاملة وحاطته كله براس المكرودة ضحى ادري بيها هاي خطة منها حتى تضغط على ضحى بالزواج تكرها عيشتها _ ها ضحاوي الله يساعدج _ هلا هدى عفية روحي بدلي وتعالي ساعديني والله اكلت تبن بثنين ايدية من ورة بيبيتج .. انتظغيني (انتظريني )هسة ابدل واجي اساعدج بدلت ورحت بلشت اشتغل وية ضحى ونسولف .. والله زين بعدج مقاومة ما خنكتيها لسليمة خانم والله حابني عندي دوام وملتهية بي جان والله انفضحت فضيحة ابسط شي تلكيني اني وسليمة كل يوم مسيرات على مركز الشرطة يفكونا ياضارب يامضروب ضحى.. ههههه طبعا شي اكيد انتي الضاربة انتي هدى تعليميني بيج جنا نحجي ونغسل بالفراش بعدما خلصنا غسل الفراش ضحى.. هدى عفية كملي غسل الطارمة انا افوت اكمل الغدة هسة شيماء على وصول .. غوحي روحي )انا اكمل اغسل بالطارمة مندمجة وافكر ب رائد اليوم اجاني بنهاية الدوام بعد غياب يومين عني مشايفته بس شافني بالطلعة كبل اشرلي بعيونه عالمحل القريب عالمدرسة افتهمت قصده دخلت للمحل سويت نفسي اشتري ودخل رائد وراي ياربي شكد مشتاقتله وبنفس الوكت زعلانة منه رائد.. لج ما تدرين شكد مشتاق اسمع صوتج احس الشوف ما يروي عطشي الج .. اي مبين كلش مشتاقلي والدليل يومين ماكو متجي تشوفني الظاهغ (الظاهر) اكو من اخذ مكاني بكلبك .. ليش هو اني اكدر احب من بعدج اشو كلبي من حبج صار اعمى وكام كلشي ميشوف بس انتي .. صدك غائد تحبني .. كلمة احبج اشوفها تافهة بحقج لج انتي متعرفين هذا ويأشر على كلبه احس مخلوق بس الج ابتسمت وعيوني لمعت انتبهت على فكه بي لون ازرك مخضر .. غائد هاي شنو شبي وجهك منو ضاغبك (ضاربك) .. اهووو لج سكتي صار بية فلم اولت البارحة .. شنو شصاغ بيك .. اولت البارحة جنت كاعد بالكوفي لوحدي انتظر جماعتي وبعدين دخلو مجموعة ولد اعرفهم وياي بالشغل واحد منهم اسمه حيدر هذا الولد اني وياه مو على صلح وبينا اشكال لدرجة وصلت بي كام يبسمرني ويهدد لان مرة اتقدم لليلى اختي وانا رفضته المهم ما اطول عليج السالفة لان وراج خط جنت كاعد وهو شافني اجة علية هو و جماعته حيدر .. اكلك انت شلون البارحة حاجي علية يم المدير مال التدريب وتطعن بشغلي كدامه شنو عبالك الحجي ما يوصل .. انت متوهم انا ما حاجي يم المدير اي شي والي بعبه خروف يمعمع انت لو ما تشوف نفسك صدك مقصر بشغلك جان ما اجيت تحاسبني هنا جان رحت راسا هناك كدام ال مدير تدز علية وتحجي وياي بس الباطل لابد وان يجيه يوم ويظهر عليه الحق اشو هذا انا حجيت هشكل وما اشوف الا هذا زنكني من القميص وكعد يسب ويغلط على عرضي ما اتحملت اسكت بعد اكثر وصلت للعظم ..عززة بعينه وانت شسويت .. بعد شسويت بعدني ما رافع ايدي اريد اضرب ما حسيت الا هو وجماعته التمو علية وما عرفت الضربة كامت منين تجيني هذا الحجي همة يضربون وانا جلبت ب حيدر صار هو حصتي كعدت اضرب بيه بس همة هواي اباوع ولا واحد اخو خيته اجة وكال خلي افكهم وبأثناء ما جنا نتدافع وكعت بالكاع على ظهري وهذا حيدر صار فوكاي وصرنا تنضارب جماعته استلموني دفرات كلت هو لو بالهدف لو بالنجف اضل اتعارك لحد ما انسحل علية وعلى اعدائي بس اولاد الكلب نهوني من الضرب احس بروحي فطست بس رغم هذا كله ما هديت حيدر والله ولحظات وما احس الا عالجماعة كامو يتطايرون انتبهت على واحد اسمراني ضخم كام يلزم الواحد منهم يزنكه من قميصه وينطيه بوكسي يطشر دمة بوجهه واستلمهم اكس ومربع الله وانا شفته استلم الجماعة وانا اتفرغت لحيدوري الوردة اااااخ يابة احس هذا الرجال الله دزه الي ملاك من السما .. اي ملاك اسمر .. اسمر .. احمر اهم شي لحك علية قبل لا اتكطع وصل خلصت من حيدر وكمت من عنده وانا مكسر تكسر من الضرب درت وجهي ادور على صاحبنا وين اباوع لكيته جاي يصول ويجول بيهم عبالك عنده لعبة متونس يضرب بيهم وبعدما خلصت العركة ابو الكوفي الفاهي اجة يركض ستوة يتحزم مثل الاطرش بالزفة وكعد هو وكم واحد بالكوفي يحجون ويهدون بين الطرفين تالي هذا الاسمراني صاح بحيدر وبجماعته يتحلف بيهم .. خلي اشوف رجال بيكم معتب هنا قسماً بذات الله الا اكسر رجليه واحسب الله ما خلقه طلعوهم من الكوفي وانا رحت اتشكر من عنده على وكفته وياي لو ما عيب جان بسته من زنده على نخوته بس فاجئني قبل لا احجي ضحك بصوت عالي .. ولك رائد شنو سالفتك شوكت ما اجيك الكاك تحتاج للفزعة عقدت حواجبي متفاجيء اي انا هذا الصوت سامعه بس وين ياربي اتسعت عيوني مصدوم واني احجي .. قااااااااااسم !!!!! ضحك.. اي قاسم شنو ما عرفتني حقي ما اعرفه لان اخر مرة شفته قبل ليسافر للخارج يدرس صار سنين وماكو بينا اي تواصل ابن اللذين حيل متغير صاير كلش ضخم اخاف انا من توكفين يمي تكولين علية سارية علم احتمال قاسم من توكفين يمه تصيرين عبالك واكفة يم عملاق هدى.. عاااا على الاساس انا ناقصة خوف وانت كاعد تسولفلي فلم غعب(رعب) هسة بالله انا اليوم شغاح (شراح)ينومني هسة اكعد احلم بكوابس كلها من وغاك (وراك) ..هههههههه لج لا تخافين والله صاير حباب بس صدق او لا تصدق هدى تخاف .. اي هو لكل انسان عنده نقطة ضعف بالحياة اكو ناس تخاف من الجلاب واكو ناس تخاف من مشعل المخبل خاف يفشخهم اما اني اخاف من قاسم خاف يطلعلي بالشاغع يجرغني (بالشارع يجرني) من كصايبي الله يكفينا شغه (شره) ضحك وعض شفته .. بالله تعاي شو خلي اشوف اشو حليانة بنت اللذين على فراكي والغوغه زايده .. اسكت لا تخجلني .. اي صدك باركيلي صدك ثبتوني بالوظيقه .. الحمدلله ارتاحيت صار عندي اساس قبل جنت مهندس بعقد مابقى بس انتي تشدين حيلج وتخلصين السادس وادز اهلي يخطبوج ونتزوج .. احلف كول والله اااااااقصد عيب شنو هذا الحجي شكد ما تستحي .. اروح فدوة للخجلان اكلج ما تنطيني عضة من هاي الخدود والله صارت حصرة بكلبي اريد بس اضوكهم واضوك الشفايف الي تغوغ لزمت خدودي واني كلبي يدك حيل فزيت من تفكيري على صوت سليمة .. خير وين صافنة يالعوبة ... الباب صارله ساعة يدك جانت تحجي علية وهي تفتح الباب حجيت بصوت ناصي .. عمة والله حتى عمة شلون كمزتني دخلت اختي شيماء راجعة من المستشفى سلمت ودخلت للبيت حجيت وياها جاي اكللها على امتحاني بس اشو هاي دخلت وما انتبهتلي كملت غسل الطارمة ودخلت وراها رحت دخلت عليها بالغرفة جانت تبدل .. شنو شومة شبيج .. هدى طلعي وسدي الباب وراج ما بية شي .. شيماء والله بيج شي .. هدى كلتلج مابيه شي بس شوية تعبانة هدى بصوت واهن .. هذا هو بغاحتج (براحتج) بس اذا تشوفين نفسج محتاجة تحجين تعالي اني موجودة اسمعج طلعت وسديت الباب ورايه شيماء اباوع عالباب المسدود احس بي يشبه ابواب حياتي كلها مسدودة بوجهي خايفة ومحتارة اليوم ليث قلب حياتي خلاني كلامه بحيرة بالمسشتفى مثل ما اتعودت على روتين حياتي كلما اخلص شغلي اروح يم رباب اجة الفراش وكال .. شومة الدكتور فلاح يريدج بغرفة المراجعين الخاصة بي .. اي هسة جاية بس لحظة قبل لتروح .. اتفضلي .. ما تعرف شنو يريد مني .. لا والله ما اعرف شنو يريد بس كال صيحلي شيماء بطريقك .. اهااا شكرا هسة اروح كمت من يم رباب جانت ملتهية بالسوالف وية ام رحمان رحت لغرفة المراجعين ودكيت الباب ودخلت رفعت راسي ووكفت بمكاني مصدومة ليث !!! اني شفته وكلبي فقد انتظام نبضاته يارب رحمتك واني اكول الحمدلله نسيت شي اسمه ليث اثاري جنت اجذب على نفسي والدليل دكات كلبي ورجفة جسمي اتلاحكت لنفسي وجليت صوتي وسلمت عليهم .. شلونك استاذ ليث يارب تكون بخير جان يباوعلي وعيونه تحجي عكس كلامه .. بخير الحمدلله باوع على دكتور فلاح وكأنه انطاه اشارة فلاح .. شومة استاذ ليث يريد يحجيه وياج بموضع خاص وانا دزيت عليج هنا حتى تاخذون راحتكم بالكلام ظليت فاتحة حلكي شلون طريق ملتوي حتى يحجي وياي صحيح اني صديته اكثر من مرة وحتى من حاول يتصل بية بدلت الشريحة من وراه لان اكثر من مرة حضرت بس هو مصر يتصل اول مكالمة جوابته عرفته من صوته ما انطيته مجال يحجي كبل حجيت عليه وسديت النقال بس بعدها صرت بس اشوف رقم غريب كبل انطيه حضر ما بية حيل ابدل شريحة مرة ثانية جنت صافنة افكر شيريد مني فزيت على صوت باب الغرفة انفتح والدكتور فلاح .. يالله انا اترخص عندي واجب اكمله وارجعلكم راد يسد الباب حجيت تلقائيا .. دكتور عوف الباب مفتوح لا تسده اباوع لليث رفع حاجبه الظاهر ما عجبه الحجي اشر للدكتور بيده يعني روح وسد الباب وراك عبالك اني زعطوطة كدامه باوع علية .. شنو لهاي الدرجة ما عندج ثقة بنفسج تبقين لوحدج وياي ترة احنا كبار مو مراهقين المفروض تكون شخصيتج اقوى من ان يهزج باب مسدود .. مو شغلة باب مسدود انت تشوفها اني خايفة منك وما اريد ابقى لوحدي وياك بينما اني اشوف الباب عيب ينسد لان احنا بمكان عام واله احترامه والناس الهة الظاهر ما يكولون علية وعليك كبار لوحدهم ومحترمين راح يحتارون شلون يطلعون الحجي من جوة الكاع وانت مبين عليك ابن اصول مايحتاج اعلمك جنت احجي وهو سارح بوجهي سكتت انتظره يحجي بس اشو هذا بعده صافن بوجهي .. احم اتفضل شنو ردت من عندي رجعت خصلة من شعري وحطيتها ورة اذني انتبه على حركتي وعيونه ما طاحت من على شعري عبالك ديحجي وياه همس بصوت ناصي .. انتي كتلة انوثة متنقلة كفر مكانج هنا المفروض حق الله مكانج بين ايدية فتحت عيوني بس سويت روحي ما سمعته بدل كلامه .. شيماء شلونه ابوج وياكم سؤاله كان مثل الضربة عالخاصرة هيج اتألمت من سؤاله من اتذكرت موقفه وية بابا _ ليث افضل ما اتكلم بهذا الموضوع لان اذا انفتح الموضوع حق الله المفروض مني ما اكعد ولا احجي وياك عالسويته وية بابا اباوع عليه فتح حلكه مصدوم .. مجنت متوقع راح يكون هذا ردج الي .. شنو جنت تتوقع اخذك بالاحضان واكلك عاشت ايدك عالسويته وية بابا اسمعها زين اكلك ..استاذ انت اتعديت على واحد من اهلي .. شيماء مو هيج الحجي انا سويت هشكل ردت اخذ حقج .. لحظة ليث صحيح جانت نيتك تاخذ بحقي من ابوي بس غلطان اذا تعتقد ان بهاي طريقتك راح تكدر تكسبني خلي اصحح فكرتك عني ترة اني اتعديت مرحلة المراهقة من زمان هاي الحركة السويتها تكدر تملك بيها عقل وحدة مراهقة راح تشوفك بساعتها البطل الي اخذ بحقها من الظالم بس اني اشوفها قلة احترام اي لتباوع علية متعجب اني احترامي من احترام اهلي وانت هنت كرامتي بهذا تصرفك .. وين جانت كرامتج من ابوج شوه وجهج وكص شعرج .. هذا ابوي انت كلتها ابوي مني وبية ما بين البنت وابوها كرامة حتى لو كان اسوء الناس بس خلي اسألك بالعقل لو كانت الادوار مقلوبة واشوف ابوك او امك يضربونك ويهينون كرامتك كدامي تقبل اني اروح الزم امك او ابوك واكعد امثل بيهم بالضرب .. انا اختلف ابوي او امي حتى لو يمدون ايدهم علية افتخر على الاقل انا رجال واتحمل .. ما جاوبتني على سؤالي لتتهرب داكلك ترضاها ادز ناس عليهم يمثلون بيهم بالضرب جاوبني بغضب .. لا مستحيل واكسر ايده الي يفكر يمدها على واحد من اهلي .. شفت شلون انفعلت مجرد تخيلك للموضوع عصبك لعد ليش ترضاها علية شنو تتوقع تكون ردت فعلي من يدخل علية ابوية مطبر تطبر تطن راح افرح واكول شكرا ليث عالسويته بأبوية خلي ببالك لو مهما صار بيني وبين ابوية مستحيل اغضب عليه او اتمناله الاذية .. لو يرجع بية الزمن وينعاد الموقف ويمد ايده عليج هم ارجع امسح بيه الكاع ما اكدر اشوفه يمس شي يخصني ويأذيه ما اتحمل اشوف يمد ايده على شعرج الي ياما جنت اتحلم اتوسد عليه بتالي الليل يكصه بدون ما يوجعه كلبه .. ليث تعرف شنو مشكلتك انت عاقبت بابا لان شوه وخرب لعبة حلوة عندك او سيارة جديدة تخاف عليها لا تخرب وتضرر .. شيماء انتي غلطانة انا اجيت اليوم حتى احجي وياج بخصوص هذا الموضوع اني ما اشوفج كسلعة لو لعبة مثلما تكولين بالعكس انا من اول يوم دخلتي بيها لغرفتي بوكتها انتي مو بس دخلتي للغرفة لا انتي بداخلي جوة بكلبي بدون ما تستأذنين صرت مالي سلطة على مشاعري وتصرفاتي وياج حاولت املك السلطة على كلبي بحضورج واتصرف صح بس غصب عني تصرفاتي تخوني من كد اللهفة واستعجالي خلاج تبتعدين عني وتخافين مني .. حقي من اخاف منك وانت كل مواقفك وياي تحذرني منك انت نار .. بس يمج انطفي واصبح رماد شوفي شيماء انا رغم الحواجز والقيود الموجودة بحياتي اتحديت كلشي وضربت كل افكاري بعرض الحايط واجيت حتى احجي وياج .. بشنو تحجي وياي .. شيماء انا اريدج تصيرين زوجتي كمت من مكاني مثل المكروصة طار الحجي من عقلي كعدت بس ارمش بعيوني افتح حلكي وارجع اسده .. ما اريدج هسة ترجعيلي الجواب روحي للبيت واخذي راحتج وباجر انا اجي واريد اسمع منج الرد .. لاااا باجر شنو ما اكدر افكر هشكل انطيني مهلة افكر بيها براحتي جنت احجي وحيل خايفة ما اعرف شبية معدتي انعقدت وكلبي يريد يكمز من صدري .. ترة ما يحتاجلها تفكير هي كلمة وحدة لو اي لو موافقة اتسعت عيونها.. لا تجرب حظك وتكون واثق من نفسك هشكل ترة اني بعدني ماغيرت نظرتي عنك وهذا الشي بحد ذاته يخليني اطلب منك وكت افكر اباوع عليه بدة ياكلني .. والله لعبتي بأعصابي عمري ما عانيت وية مرة ولا كاعد بحياتي افكر بردة بفعل اي وحدة الا انتي خليتني امشي واحجي وية روحي عالعموم ننطيج فرصة تفكرين بس لا تتأخرين بالرد لان التأخير مو من صالحج .. ليش يابة .. لان اذا موافقة وتتأخرين بالجواب اطلع حيفي منج بالخطوبة واذا كان جوابج رفض ومتأخرة علية بالرد والله امج داعية عليج بساعة مغربية بيوم الوكعتي بيدي .. هم رجعنا للغة التهديد .. لا هذا مو تهديد هذا يسمونه تحذير رحت نمت عالفراش افكر بي وبهيبته وبكلامه وبغضبه وبكلشي حتى من اريد اعدد عيوبه تصير بعيني تافهة ويشفعله حبه الموجود بكلبي ويخليني اتغاضة عنها ........ ضحى.. اكول هدى انتي لاحظتي شومة اليوم كاعدة كله بالغرفة حتى ما طلعت اتغدت ويانة شنو شبيها مريضة .. والله علمي علمج بالله خلي اغوح اشوفها شبيها رحت فتحت الباب على كيف ودخلت على اطراف اصابيعي جانت الست متمددة على بطنها وسرحانة بغير عالم رحت ركض عليها وعطت بصوت عاااااالي .. بووووووووووووووووووو طفرت من مكانها مفزوعة .. شكو جنية كمزتيني .. اختي شيماء ما اعغف (اعرف) شبيها امانة متكليلي اختي شبيها ليش سغحانه (سرحانه) كامت من مكانها .. امشي منا اريد اطلع خلي اروح اكل جوعانة .. انا اصبلج اكل وانتي احجيلي ليش هشكل دايخة وغايحة بعالم ثاني .. والله انتي لزكة بعدين احجيلج بالليل مو هسة جانت شيماء تضحك وعيونها تلمع اول مرة اشوف اختي تضحك بفرحة .. يارب دوم الضحكة والله تلوكلج .. يالله امشي ما تقشمريني بهاي الكلمتين ما راح احجي هسة الا بالليل طلعنا وصبتلها غدة واني افتر وراها مثل ذيلها اتعودت اصلا مو جديدة علية كعدت تاكل واجة بابا راحت ضحى صبتله غدة وكعد ياكل وية شيماء ياكل ويحجيلنا عن يومه بالشغل وشيماء بحكم خبرتها بنظام المستشفيات كعدت تنطيه بعض المعلوامات جنة كاعدين على حب الله وجان تدخل علينا سليمة ام العلوم والمصائب كعدت يم بابا .. اكلك اليوم الناس اجوي يردون يعرفون شنو جوابك عن موضوع ضحى ضحى كمزت من مكانها .. بيبي ما اريد اتزوج .. انتي انجبي واكلي تبن وخلي ابوج يحجي جاوبها اثير.. يمة كليلهم ماعندي بنية للزواج .. ها يمة اثير كعدن يمك شوية واكلن راسك بالحجي وبدلوا رأيك على امك .. لا يمة البنات مالهم دخل برفضي للناس انا رحت سألت عن الولد طلع واحد حافي منتف يوم يشتغل وعشرة ماكو شغل مال شنو انطيه ضحى .. هسة الي يسمعك يكول بنته ست الحسن والجمال مو زين ولكيتلك واحد يدك بابك ويريد يخطب وحدة من بناتك اباوع لضحى شلون عيونها كامت تلمع من الفرحة مرت الايام وبدت امتحانات اخير السنة والتهيت براستي بحيث كمت ما اشوف احد ولا ادري شنو الوضع بالبيت بس الشي الي لفت انتباهي ضحى الي كثرة صفناتها ودخلت حالة اكتئاب مرة سمعتها تتعارك وية بيبي سليمة الي نشبة وياها من ذاك اليوم علمود رفضت ابن كرايبها وصارت تطلعلها الشغل من جوة الكاع البارحة خطية خلتها تغسل السطح واليوم كلتلها تنظف البنكات وهسة خطية طلعلتلها المواعين القديمة من عهد جدي كالت كلهم غسليهم بيت جوارينا عندهم عرس ويردون ياخذوهم خطية هي ضحى ساكتة متكول شي بس مرات هاي سليمة من نامت عليها سليمة تستفز الواحد الله لا يسلطها على احد تشرده بليلة ظلمة ضحى جانت تغسل بالمواعين وسليمة تحوم فوك. راسها سليمة .. امداج يالغمة تاليتج راح تعنسين مثل اختج الجبيرة. وتظلين بحصرة الرجال هسة لو موافقة على هذا ابن كرايبي جان هسة انت ملتهية تجهزين لعرسج وشحلاتج بس انتي مو وجه نعمة تبقين فكر بنت فكر بعد منو امج مشهودتلها بالفال الشين ضحى وصل حدها مسحت ايدها وشمرت الجدروة من ايدها بالكاع وصادف جانت اكو سجينة. عالسنك وية المواعين لزمتها وهي تكلب بيها بصورة عادية وحجت بصوت ناصي يعلن عن الانفجار .. شوفي انا كلشي اتحمل بس مال تغلطين على امي وهي ميتة لا لهنا وحدج جانت تحجي والسجينة بيدها وسليمة انخلست بمكانها تباوع عالسجينة وانا خربانة ضحك على شكلها سليمة.. ها ولج شنو تردين تذبحيني بالله شو عوفي السجين من ايدج ترة الشيطان شاطر .. والله مو اشطر. منج الشيطان يمج طفل بالروضة لى سوالفج عدة هذا اليوم وصارت الايام تجر وضحى صارت حالتها النفسية صفر كل يوم اسمعها تبجي بالليل جوة الغطى ادري بأختي دتعاني من الوحدة لان كلنا مشغولين عنها وهي كاعدة لوحدها بين اربع حيطان صرت ادعيلها بكلبي ربي كون يرجع صهيب للعراق ويخطبها بس هذا الثاني كلش انأخر ولا بعد هم اجل رجوعه سنة ثانية يوم ثاني وجان اخر يوم بالامتحانات بالمدرسة خلصنا الامتحانات وكالعادة اجتمعت وية البنات وصادف هالة عزمتنا ملنا على عرس اختها منى هالة .. هدى دعوى خاصة من امي كالت كولي لهدى خلي تجي هي وخواتها لعرس منى ازعل عليهم اذا ما اجوي فرحت وكلت من ارجع افرح ضحى حتى تحضر روحها علمود تغيير جو رجعت للبيت وشفت شهد صديقة ضحى عدنا بالبيت لاحظت هاي الفترة كثرة جيات شهد لضحى بالصدفة جنت مارة من يمهم سمعتها تحجي وية ضحى تكللها .. ولج والله مو لان اخوية اكلج وافقي عالزواج منه بس عاجبتج هاي العيشة الي انتي بيها لا طلعة ولا مشية وفوك هذا كله بيبتج ناشبة وياج ومطلعة عينج ضحى.. اي ميخالف اتحمل ما مستعدة للزواج هسة صدكيني شهد .. براحتج بس والله اخوي ما يتفوت حلو وكشخة وهو الجبير يعني الكل بالكل تدرين هو شايفج مرة وسألني عليج .. وين شايفني .. يكول شفتها من جانت بالمدرسة جانت تمشي هي واختها الجنية ام لسان هدى عمة حتى عمة هاي شتريد من ضحى ليش تحوم عليها وليش ضحى ما كالتلنا. عن موضوع اخوها يتبع.... | ||||
|
| |
|
07-07-19, 10:26 PM
| #15 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #الكاتبة_نهى #البارت_الثالث_عشر في الليل حين تنام اعين الناس اجمعها هناك عيون لم يغمض لها جفن ساهرة ليلها تخاطب الغد بأمل اياغد اما آنَ. الاوان لكي ينجلي ليلك ويذهب ظلامه الدامس وتأتي شمسك بنورها الساطع فتشرق بالفرح على حياتنا هدى نايمة بحضن شومة الدافي العب بشعرها .. اكول شومة .. اممم .. انتي ملاحظة ضحى بأخغ (اخر) ايام شكد متغيغة (متغيرة) .. اي منتبهة عليها صايرة هواي تشتكي من الوحدة والضوجة .. خطية الله يساعدها هي اكثإ (اكثر) وحدة بينا انحبست بالبيت عالاقل اني اداوم مدغسة (مدرسة) اشوف ناس انتي وكذلك بس هي خطية .. شبيدي عليها انا العلية سويته وجنت اركض وراها حتى تدرس كله من ايدها هي هملت دراستها وخلت الحق عليها حقه بابا يبطلها تتذكرين راد يبطل مروة ومن حجيت وياه ماكدر يعترض لان مروة شاطرة .. اي صحيح .. اتذكر على امي الله يرحمها شكد جانت. حريصة على دراستنا والله حجايتها لحد هسة ترن بأذني تكول هالله هلله بدراستكم العلم تاج راس المراءة من بعد الشرف .. اي والله صدك كلامها هسة هاي مغوة (مروة). غغم الصاغ (رغم الصار) بيها بس كدغت (كدرت) تنفذ بجلدها وتعيش بعيد عنا عن طغيق (طريق)شهادتها. ما احتاجت مساعدة من احد .. اااااااخ سالفة مروة راح تظل غصة بكلبي ما يهلي ارتاح وهي بعيد عنا زعلانة ما انسى شكلها بيوم حلفتني بأمي اوكف وياها ما تدرين شلون ينمرد كلبي عليها من اتذكرها تدرين البارحة خالة ام فرزدق اجتي وكالت اتصلت على رجل مروة رافد وحاجي وياه عمو فرزدق ومسلم عليه وكايله احنة جوارينهم بيت ام فرزدق هي تعرفنا خواتها يردون يتطمنون عليها فزوجها منطيه رقم مروة وكله انا حاليا بالشغل هذا رقمها الخاص تكدرون تتواصلون وياها .ماخذه ومتصل عليها والحمدلله تكول ام فرزدق سمعت صوتها مبين عليها بخير وتكول هسة هي حامل بشهر الثالث ودتدرس وتشغتل بقسم الطواري تكول الوظيفة مو اختصاصي بس احسن من ماكو بعدين من تكمل دراستها تتعين على اختصاصها .. اااوي سودة علية مروة شلون مدبغتها (مدبرتها) .. اسأل الله ما يضيع تعبها .. امين ياغبي (ياربي) اي صدك اتذكعت (تذكرت)شهد صديقة ضحى شعندها تحوم علينا هاي الايام .. دعوفيها الله هاديها لضحى خطية مداتشوفيها شلون مخنوكة من كعدة البيت يمكن الله دزها لهاي صديقتها حتى تغير عليها جو .. لا شومة هاي شهد مو حباً لله دتجي على ضحى .. لعد شعندها وية ضحى من مصلحة حجيت لشيماء عن كلام شهد وية ضحى .. يا هاي شنو اشو ضحى ما كالت .. اني هم مستغغبة (مستغربة) حتى الي ما اجتي كلتلي مثل كل مغة (مرة) متعودة تسولفلي كلشي .. والله احس بروحي هواي مقصرة وية ضحى اريد بس افرغ ويكون عندي اوف اخذكم اطلعكم .. اي عفية شومة طلعينا باجع (باجر) حتى نشتغي (نشتري) ملابس على حفلة منى بنت ام قاسم .. اني احتمال ما اكدر اروح وياكم للعرس .. لا لا عفية شومة خالة ام قاسم طلبتنا بالاسم تكول امانة تجي شيماء وخواتها .. الا تحرجيني هسة تعالي يا شيماء اشتري ملابس للعرس علمود كم ساعة والله مصرف زايد ما مسوية حسابه .. شوفي شومة اني عني لا تشتغيلي (تشتريلي) ما عليج بية غاح اخذ من فاطمة صديقتي عندها هواي فساتين ما تكول شي .. اي صدك ذكرتيني برباب بالله خلي اتصل عليها واشوف شعندها من بدلات بلكي عندها حتى توفرلي .. تبقى عندج بس ضحى ناخذها نشتغيلها (تشتريلها) جنا نحجي ودك نقال شيماء باوعت عليها ارتبكت من شافت رقم للمتصل باوعت عالرقم كان غريب ما مسجل سكت النقال وراها وصلتها رسالة ما لحكت اشوف بس كلمتين .. ليش التأخير ........ الله يحفظها بعدتها عن مساحة نظري وصرت حولة من الفضول قرت الرسالة وضحكت انا هي ضحكت وانا الفضول عندي صار يقرة الف حجيت بصوت بيه لحن اللواكة اجر بالكلمات جر ..اكوووووووول شووووووومة حبيتبي ونوغ (نور) عيوني .. كولي فضيها شنو تردين لتضلين تلوكين صرت اعرف هذا الصوت تستخدمينه من تردين شي من شوووووووومة حبيبتي .. ياعمغي (ياعمري) محد يعغفني غيغج (يعرفني غيرج) الله عليج كليلي شنو ضامة علية هاي الايام احس بيج عندج شي جديد بحياتج وخايفة تكولين عنه .. شكلج حافظة شومة اكثر من نفسها .. هو اني شعندي غيغها (غيرها) اذا هي امي وهي كل عالمي الي تدوغ (تدور) حوله كل حياتي .. تعالي مستر فضول خلي احجيلج تعرفين صاحبنا الحجر .. وهل يخفى القمع (القمر) شلون ما اعغفه (مااعرفه) .. اتقدملي يريد يتزوجني كمت من مكاني مصروعة .. عاااااااااا حجغ .. حجغ (حجر) طلبج للزواج وانتي كاعدة وساكتة يمي .. هههههههههههه شنو ترديني اسوي .. لج غوحي شمغي غوحج (روحي شمري روحج) من فوك السطح لان مو كل مغة (مرة) الوحدة يجيها واحد مثل صاحبنا الحجغ (الحجر) .. هوووب هووب على كيفج سويتيه علية بس هو وبس لج هدى انتي بعدج صغيرة عبالج العرس بس بدلة بيضة وموسيقى وطربكة .. عمي دغوحي يا صغيغة (دروحي يا صغيرة ) وانا غاح ادخل ب ١٨سنة زين متشوفين معالم جسمي بغبج (بربج) اخبل لتكولين لا بس شوية قزمة عدا كوني قزمة اكو شي بية يوحي بالطفولة .. هههههههههه الله يلعن بليسج اكلتيني بكشوري عمي اني الطفلة مو انتي يا شيخة هدى بس كفينا السانج هسة تخليني احجي لو اكوم واعوفج .. لا لا يالله احجي هذا هو سكتت .. اجة وحجة وياي بموضوع الزواج وكلي اريد اسمع ردج واني طلبت منه ينطيني فترة افكر وارد له الجواب بس هو ديضغط علية بالاتصال والرسائل وهذا الحاحه يخوفني .. عمي ما تطيغين ( تطيرين) هو احنة بالف ياعلي محصلين غجال (رجال) وانتي كاعد تبيعين ثكل بغاسي( براسي) يابة اني اكلج وافقي وبهالغكبة. (الركبة) .. شنو حبيبة صرتي ام احمد الخطابة وكاعدة تتوسطين .. لا ولج ما اعغف (مااعرف) هذا الولد الله زغع (زرع) محبته بكلبي بغوح (بروح) سليمة وانتي ما محلفتني ضربتني بالمخدة .. انجبي ولج اشو عينك عينك تكولين احبه .. لا ولج احبه مثل اخوي طبعا انا ما احب اخذ حجاغ (حجار) اني افضل ( البقلاوات) غااااائد اغووووووح ( اروح) سبع فدوات لأسمه تدغين (تدرين) هو ذاك اليوم ثبتوه بالوظيفة وكال بس تخلصين السادس ادز اهلي يخطبونج من ابوج .. ها هدى تلتقين بيه من وراي رجعنا .. لا والله بس من بعيد نتشاوف وبالسنة حسنة يصدف اني اشتغي (اشتري) من المحل الي بصف المدغسة (المدرسة) ونلتقي .. اهااااا انتي متأكدة بالصدفة لو فعل فاعل .. هااا لا مو فعل فاعل ولا مفعول به بس تكدرين تكولين جاغ ومجغوغ ( جار ومجرور) والصفة تتبع الموصوف تمشي وراه مثل الاعمى شنو شومة كلبتيها علية قواعد لغة عغبية (عربية) .. ههههههه عمة بعينج .. هسة ما كلتي ليش متأخغة (متأخرة) عليه بالجواب شنو منتظغة (منتظرة) .. ما منتظرة شي بس عندي مخاوف تعيقني راح تكولين علية هاي والله بطرانة ومتعافية دترفس النعمة برجليها .. منين خايفة .. اول شي خايفة من ليث .. ليش خايفة من حجغ .. لان مصارلي هواي من اتعرفت عليه كلشي ما اعرف عنه غير بس هو ضابط وبعض المعلومات القليلة الي متساعد حتى اتخذ القرار .. اهووو هاي الاموغ (الامور) عادية تغة (ترة) كل بنية تفكغ (تفكر) هيج مثلج وتتخوف .. لا اني اختلف لان موقف ليث وية بابا صارت هواي حواجز بيني وبينه .. لج شيماء اشك هدومي لو اخنكج انتي شكاعد تحجين ليش تشوفين بسالفة بابا حاجز بينج وبينه .. هدى ترة هذا زواج مو لعبة اني خايفة من هذا الموقف بالذات لان عليه راح تنبني حياتي .. ما افتهمت عليج .. اني اكلج يعني اشوفها صعبة ليث الي ذاك اليوم عاقب بابا يجي يتزوجني ما فكرتي باجر عكبة لو صار بيني وبينه مشاكل منو راح يوكف بوجهه لو مهما كان البنية تظل تحتاج سند من اهلها بالذات ابوها الاهل بالنسبة للبنية مثل بطاقة الائتمان تنفعها بوقت الشدة زين اذا بابا بكبره انهان وانضرب على ايد رجلي زين بذاك الوكت لو جار علية الزمن لا سامح الله وليث انقلب علية اني بمنو احتمي وبيا ظهر اتجي اذا هو بهاي سوايته كسر ظهري بعد شلون يسوي حساب وزن لخاطر ابوي وهو هانه شيماء جانت تحجي واني فاتحة حلكي متعجبة على تفكير شيماء هواي تتحسب للبعيد وماعندها شي اسمه احبك وتحبني وكلشي يهون لاجل حبنا شيما تفكر بعقلها .. ما اعغف(مااعرف) شنو اكلج حيغتيني (حيرتيني) بكلامج وصغت (صرت) اعيد حساباتي .. هدى انتي جنتي صغيرة ومتتذكرين عن حياة بابا وماما بس اني كبرت وشفت شلون ابوي يتعامل وية امي بظلم لان ما عندها سند يوكفه عند حده انا هذا الي مخوفني .. يعني شنو غاح تغفضينه ( راح ترفضينه ) .. لا اني ما كلت راح ارفضه اني كلت خايفة منه اخاف اوافق واتندم .. والله حيغتيني (حيرتيني ) وياج هسة شنو اي لو لا .. لج طبعا اوافق لان اني احبه لليث وحبه يدفعني اوافق .. يمة الله يطمنج وكعتي كلبي الله يساعد ليث عليج شلون متحملج هو هسة اني اختج لعبتي باعصابي لعب شحاله هو الله يساعده كاعد ينتظغ (ينتظر) منج خبغ (خير) .. ههههههههه لج حتى هو يكولي لعبتي بأعصابي لعب الله يلعنج هدى شوف بيش الساعة صارت واحنا ما نايمين ..عدنا عطلة خلينا نسهغ (نسهر) شعدنا .. لج نامي باجر وراي كعدة حتى اخذكم واشتريلي لضحى ملابس وانتي اشوف شنو اشتريلج طفيت الضوة ورجعت اتمددت يم شومة حطيت راسي عالمخدة واني جاي اتخيل روحي اروح لحفلة. العرس اول مرة بحياتي راح احضر عرس بقاعة اعراس مال بنات اتمنى اشوف البنات شنو يسون وشراح يلبسون جنت من اسمع البنات يحجون عن حفلاتهم اظل اتحسر بيني وبين نفسي اتمنى بس اشوف هاي الاجواء الي يسولفون بيها جنت سرحانة بالاعراس والبدلات والبنات فجاءة اتذكرت اذا شيماء عرست شلون بية وجان يوكع كلبي بين رجلية كمزت من مكاني مفزوعة ..يبووووو كمزت شيماء وياي ونزلت الغطا من على راسها وكعدت .. عمة حتى عمة شبيج .. ولج شومة انتي صاغلج (صارلج) ساعة تتنعوصين فوك غاسي (راسي) حايغة ( حايرة) بنص الدغب محتاغة (الدري محتارة) متعغفين (متعرفين ) هذا العشك واسغاغه (اسراره) ومتغددة (مترددة) اوافق على ليث لو لا بس انتي نسيتي اهم نقطة .. شنو هي .. ولج وابووووووووووج شلون بيج .. شلون يوافق شماء سكتت سنطة جانت الغرفة ظلمة ما كدرت اشوف وجها حتى اعرف بشنو تفكر .. خرب يومج هدى منين طلعتيلي على الاساس اني ناقصة وانتي جملتيني دنامي نامي والله كريم ربج يحلها .......................... مرت الايام وما بقة شي على عرس اخت هالة وحضرنا الفساتين بس خلال هاي الفترة اتقدموا ثنين عرسان لضحى وهي رفضتهم كالعادة وبابا يكول ما بيهم خير خلي يولون وبيبي سليمة طلعت اشاعة على ضحى وكامت تحجي يم راس بابا تكله.. شعندها بنتك ترفض العرسان بس لا عاشكتلها واحد شيماء .. بيبي عيب شلج بهذا الحجي المكرودة لا طالعة ولا ماشية وين تلكاه وتحبه هذا الواحد بابا كال.. يمة عوفج منها وخليها علية اني اعرف بمصلحتهم دار وجهه على شيماء.. اكول شيماء ماعندج جوة ايدج كم فلس تداينيني منا علما اقبض راتبي انطيج .. بابا بس اريد اعرف انت وين تودي راتبك اشو متصرف عالبيت .. اهوووو كعدت تحقق وياي هسة كولي عندج جوة ايدج فلوس اي لولا ؟؟ .. لا ما عندي خلصت بقة بس شوية يادوب يوصلوني لنهاية الشهر مصرف للبيت .. شوكت ما اجيج تبجين بوجه الله هدى اما هاي شهد صديقة ضحى كلش صدك مصختها صارت تجي من الصبح تطلع بالليل كله وية ضحى سوالف وضحك ونوب عندها نقال حديث ما بي دكم ما اعرف شلون تتحكم بي وضحى دايخة بالاشياء الي تراويها شهد ومرة الفضول الهداوي خلاني اباوع شنو يباوعون والله ولجحتها تراويها صور اخوها وفديوهات هو للامانة كلش حلو ومبين عمره بال٣٧هشكل جبيرة على ضحى وهي هسة عمرها يالله ١٩سنة واختي ضحى تباوع عليه بصفنة وكلتلها الله يحفظه الكم شهد.. امين يارب اي صدك هو هسة مسافر لتركيا بشغل كلي سأليها شنو تريد اجيبلها وياي هدية باوعت لضحى ارتبكت .. لا شكرا مال شنو يجيبلي هدية .. لج شبيج هو متعود كلما يسافر يجيبلنا هدايا اني وخواتي دخلت عليهم. واني ضايجة من شهد ما اعرف ليش ما احبها .. ضحى بيبي تغيدج تكول عدنا شغل هم يالله تكوم والظاهر شهد تبادلني نفس الشعور هم تضوج مني باوعتلي بنظرة وحده ضايجة ونفخت وكالت لضحى _ يله حبيبتي ضحاوي اني رايحة .. باي يوم ثاني الصبح اليوم نروح للعرس كعدت من النوم والشعر منكوش اتثاوبت واتمغطت وحكيت راسي و باوعت على خواتي شفتهم نايمات كمت من مكاني ولميت شعري واني كلي نشاط متحمسة رحت غسلت واتوضيت و صليت دخلت عالمطبخ وشبيك يامطبخ طلعت القوري وحطيته عالنار وسويت ريوك انتبهت لبابا ما موجود بالبيت وسليمة كالعادة تكعد من الغبشة تسير على المكرودات صاحباتها رحت للغرفة وفتحت الباب بقوة وحجيت بصوت عالي .. يالله بنات كعدوا اتغيكوا ( تريكوا) هم يالله تكعدون وغانا عغس (ورانا عرس) وكعدت اطبل عالباب عبالك ابوي معرس .. يمة كغصتني عكغربة (يمة كرصتني عكربة ) يايمة لو شفتيها سبحان المسووووووويها اااااااخ اجتني مخدة طايرة من ضحى لكفتها قبل لا تضربني .. كومي العوبة. ما تنلام بيج سليمة خانم من تكول عليج اكل ونوم ضحى بصوت خشن من اثر النوم .. شكو من الصبح مكعدتنا شعندج شيماء تضحك.. وراها عرس المخبلة .. هلا وهلا وهلا اليوم اغكص (اركص ) بالعغس (بالعرس) تلكوني بالنص اذب لحم من الغكص واخلي الناس كلها مصفصفة محتاغين (محتارين) يكولون هاي منو شتصيع للعغوس (شتصير للعروس) تالي الفضول يكتلهم ويجون يسألوني واني اغكص اهز بكتافي وغاسي مندمجة .. يابة انتي بنت عم العغيس ( العريس)؟؟.. لا عيني لا بنت عم العغوس؟؟ .. لا عيني لا واني اصيح .. دوك عيني .. دووووووك تالي اطلع بنت عم الخياط الي خيط بدلة العغس (العرس) ضحى .. ههههههههههه الله يلعنج اخ بطني خرب يومج والله دا اتخيل شكلج يلعن ابو شكلج قزمة وتطفر بين النسوان وتغوغوين فوكاها ههههههه شيماء.. والله اشك حلكها اذا اشوفها تركص .. شومة عود هاي اذا كدرغتي (كدرتي) تلزميني .. هدى انجبي والله اطيح حظج اذا اسمع بيج راكصة مو عبالج بعرس وما اكدر اصيح عليج ضحى.. هههههههه شيماء تتذكرين بيوم عرسوا بيت جوارينا بيت ابو قتيبة بالمنطقة وحطو كراسي بالشارع وجابو مطرب .. اي شلون ما اتذكر حتى بيومها امي جانت رايحة عندهم وبعدها خطية اجتي مفزوعة تدور على هدى تكول اختكم ضاعت .. هههههههه خرب خلتنا كلنا نطلع ندور عليها ياناس ياعالم اختنا هدى ظاعت اتذكر خلينا الكل يدور ويانا خطية مروة لزمت واحد من الجهال وكعدت توصفله شكل هدى تكله .. ما شايف بنية صغيرة قزومة جنها فلم اللعبة عههههههه خرعت الولد الولد.. هاي الي عيونها سود كبار وفاتحة شعرها طويل اطول منها مروة.. عمة بعينه هذا كاص هديوة كص كلتله .. اي عفية هي كال.. روحي تلكيها هناك دتركص بالنص واشر على مكان العرس راحت مروة ركض لامي وشيماء .. ها بشرو لكيتوها مروة.. يمة لحكي بتج انكلبت فيفي عبدة وراح تجيبلنا العار وجان امي تروح تدخل يم الناس بنص العرس تدور عليها وما نشوف الا ناس متجمهرين وخربانين ضحك على شنو ما نعرف امي كلتلي روحي دخلي استحي افوت بين الرياجيل رحت اتوغلت بينهم وانحشرت بالازدحام اريد اشوف شكو والله ووصلت وما اشوفلكم الا واختي هدى محتلة الساحة وكاعدة تركص (رقصني ياگدع ) عمة بعينها مو عبالك هاي الفصمة بحيث الحلوك كلها مفتحة عليها شلون وحدة بهيج عمر تعرف تركص هشكل جان عمرج تقريبا خمس سنوات لو اربعة وانا من شفتها تركص فد. فرحت بس ها فرحتي مو لان عثرت على اختي الضايعة لا فرحتي جانت علمود اختي صارت صايعة رحت ركضت عليها بنص الساحة وانا مفتخرة واكللهم هاي اختي وانا اختها ههههههههههههههه لزمتها من ايدها اجرها اريد اخذها لامي اشو هاي ذبي روحج بالكاع تريد تكمل ركص ما تقبل تجي وياي والله وتالي طلعتها بالكوة جريتها سحل من نص العرس ووديتها لامي واسمع الناس تكلي عوفيها خطية وانا اجاوبهم خلي تولي اخت المطية جنت بوكتها حافظة هاي الكلمتين مال ياخطية واخت المطية بوكتها ما ادري بروحي جنت اغلط على نفسي طلعت انا المطية والله جنت على نيتي وهدى الخطية وكع منها طوقها مال شعرها من كدما نافحة بشعرها بنت اللذين مصدكة روحها الراقصة ملايين بيومها وديتج لامي وكامت تحجي عليج ومن عهدها امي تخاف عليج من العين لان جنتي متميزة بخصلتين تلفت الانتباه شعرج اطول منج والبؤبؤ مال عيونج كلش جبير يلفت الانتباه هدى.. يمة فديتني اخبل ضحى.. شوف هاي مصدكة روحها ترة الشاذي بعين امه غزال صحيح جان شعرج اطول منج بس اشو هسة كبرتي صار حتى لسانج اطول منج ينرادله حش جانت ضحى تحجي واني وشيماء خربانات من الضحك ... الظهر راجعين من السوك شيماء.. عفية هدى جيبلي دولكة ماي فرت روحي من العطش يمة شنو هذا السوك ولا يندخله حارة ضحى.. اي حتى اني نطت روحي هدى .. هو اباوع لخدودج صارو حمر شيماء.. يالله بنات خفوا ايدكم حتى هم يالله نتغدة وترتبون نفسكم للعرس هدى.. عفية شومة حبابة خلي ضحى تاخذلي خيط لحواجبي بس تنظيف .. انجبي اشو صايرة كلش صلفة جاية عينك عينك ولج هو اني بكبري ذاك اليوم يالله اتجراءت حفيت وجهي وحواجبي مو انتي الفصمة سمعتهم سليمة ودخلت للمطبخ سليمة .. هايمة ترديلج رجل .. بيبي غحمة (رحمة)على والديج شنو الغبط (الربط) بين الحفافة والغجال بس افتهم ترة هاي بزمنكم انتو اذا الوحدة حفت معناها تغيد (تريد) تتزوج مو احنة تعالي شوفي بنات مدغستنا (مدرستنا) شلون كالبات دقلة حتى تاتو يسوون .. يا يا يمة منج القزمة اكلتيني بكشوري هدى عفست خشمها وتهفي على وجهها بيدها .. اييييييييع شيماء.. شنو شبيج لعبانة نفسج .. مو اكلت سليمة هي وكشوغها (كشورها) غاح اتقيء تسممت ضحى كاتمة ضحكتها .. ههه الله يلعنج ستري علينا خلينا نروح للعرس للعصر كعدنا نبدل ونعدل ونسوي شعرنا اني نزلته لان هو جماله بطوله وشيماء سويتلها شعرها بالمقص الناري نحطه عالطباخ يحمى وابرم الخصل صار شعرها كيرلي كلش حلو وضحى نزلته على طوله. وبرمت بس الاطراف بعدما اخذت من فاطمة فستان قصير يصير لونه وردي وشيماء لبست فستان طويل بسيط مخصر عالجسم لونه اسود وضحى فستان ذهبي بحيث لون عيونها صاروا عسلي طلعنا بعد ما شيماء اتصلت على رباب تدز اخوها لان هو سايق تكسي يجي علينا للباب ياخذنا وصلنا للقاعة وجان اسمع صوت الديجي العالي من باب القاعة يمة.. يمة .. كلبي يريد يطك رحنا لغرفة التبديل نزعنا العبي وحطيناهم بعلاكة هو احنا مو محجبات بس شيخلصنا من سليمة اذا طلعنا هيج .. شيماء كلهم معلكين عبيهم عيب ناخذهم ويانة .. ماعليج بيهم همة اذا ضاعت عبيهم عندهم الف عباية بمكانها .. بس انتي اذا ضاعت عباتج اسويج عباية يالله امشي كدامي ما اوصيج ثكلي حجيت بهمس.. خية شيثكلني وية هاي اغاني الديجي تركص حتى بيبي سليمة بكبرها دخلنا للقاعة عاااااااااااااااا عبالك داخلين بعالم المشاهير بساط احمر واضوية وكراسي وطبلات على طول جانبين البساط رفعت روحي وراسي وفردت اكتافي وقدمت صدري واخرت المؤخرة حتى ابين طويلة ههههه عايشة الدور اباوع لطول خواتي خرب شلون حلو الا اني كملت مشيتي وعيوني تدور على صديقاتي او هالة اريد بس اشوف وحدة منهم احس بروحي مصلخة ما عرفت ولا وحدة من المعازيم عبالي راح الكة نسوان منطقتنا كلها مثلما جنت متخيلة دك الديجي بأغنية راقصة هزازة رجاجة حسيت بروحي راح اركص غصباً عني حجيت وية ضحى .. لج ضحى لزميني لا اروح اركص وافضحكم ترة انا ما علية ضحى فاتحة حلكها وتباوع بعيونها بدون ما ترمش ورايحة بغير عالم عبالك مدخلينها لقصر الملك سليمان اما شيماء عادية ما مبين على وجها اي شي بس توزع ابتسامات وكأنما متعودة تحضر هيج اعراس سمعت وحدة تصيح بأسمي التفتت اجتي وحدة لابسة بدلة مشخلعة .. واخيراً وصلتي جنت منتظرتكم تجون انتي وخواتج جاوبتها مصدومة .. ولج هاي انتي هالة خرب ولا عرفتج شطالعة تخبلين عمي صدك لو كالو المكياج لا دين له هالة.. عابتلج ترة اني حلوة من كاعي ما احتاج ميك اب .. اي واضح والشاهد عليج صدرية المدرسة والشال الابيض تطلعين بيهم جنج مرة عجوز حاجة بيت الله عشر مرات .. ديالله بس بيج تعيبين لو بيج خير لبسي الشال الابيض وخلي اشوفه عليج ترة صورتي بالمدرسة لا تمثلني اطلاقاً انا غير مسؤلة عنها لزمتني من ايدي واخذتنا اني وخواتي يم امها جانت واكفة اسلم على نسوان كاعدات على ميز طعام يصير بالمقدمة قريب عالكوشة جانو. كلش متميزين بلبسهم هالة حجت وية امها والتفتت علينا كالت .. وينهم صيحيهم والله مشتاقتلهن هالة.. هذني كدامج شيماء اتقدمت وسلمت عليها وبعدها ضحى واني بعدها هالة لازمة ايدي ام قاسم .. لا تكولين انتي هدى هالة.. اي ماما هاي هدى شفتي شلون كبرانة ومتغيرة رحت سلمت عليها واني خجلانة ام قاسم.. هالة ماكلة راسي بس تسولف بيج هدى حجت هدى سوت هدى كالت بس ما شاء الله صايرة عروسة حجيت بصوت ناصي مدنكة .. اشكغج خالة هالة ضربتني بكوعها.. هههه شوف منو يستحي ويخجل والله حتى ما لايكتلج عضيت شفتي .. انا الج عوبة بعدين اني اعلمج بالمدرسة انتبهت على وحدة كامت من يم هذولي الناس الي جانت تسلم عليهم ام قاسم واجتي يمنا .. اوي لا هلة ولا مرحبا اجتي الحامضة شكد اكرها ثقيلة على كلبي احس بيها بمنزلة بيبي سليمة على قلبي هالة.. لج عيب لتسمعج .. شتقربلكم .. بنت جوارينا بيت ام. سيف اها انتبهت على شهد سحبت ضحى من ايدها واخذتها يم ميز اهلها وكعدت تعرفها عليهم باوعت لامها يمة .. يمة .. عبالك مفخخة لبسها وشكلها مبين مرسوم على ختم دولار . من الفخفخة البقية كاموا يسلمون على ضحى كلبي ابد ما مرتاح التفوا على اختي اخذتني هالة اني وشومة وهناك شفنا خالة ام فرزدق وسلمنا عليها وعلى جنتها وام صهيب زوجة عمو فرزدق ومجموعة بنات ام فرزدق .. شنو وين ضحاوي اشو ما شفتها شيماء.. دتسلم على اهل صديقتها .. خلي تجي اسلم عليها تعاي خالة شومة لتبقين واكفة جبنا كراسي وكعدنا يمهم وعيني على اختي اشو هاي ست شهودة كعدت ضحى يمهم عالميز وام سيف كعدت تبيتسم وتحجي وية ضحى اني كلبي ضل يحوم على ضحى ما اعرف شبية هسة قابل راح ياكلونها اهووو بعد ما اتحمل كمت من مكاني شيماء.. ها على وين .. غايحة (رايحة) اصيح لضحى تجي تسلم على خالة ام فغزدق .. يالله بسرعة صيحيها وتجين تكعدين بمكانج جنت امشي وشفت فطومة صديقتي وامها بدلت اتجاهي ورحت يمهم وسلمت على ام فاطمة واخذتني لحضنها ام فاطمة.. هلا بهدوشة. حبيبتي مشتاقتلج ليش طولتي الغيبة علينا .. خالة حقج علية بس التهيت وية دغاستي (دراستي) وبعدت المسافة علية بس صدكي انتي دائما على بالي و كلما اصلي اتذكغج (اتذكرج) .. عفية بالسباعية .. خالة اكدغ (اكدر) اخذ فاطمة وياي ؟؟ .. اي حبيبتي اخذيها اني هنا كاعدة يم جارتي اخذت فطومة ورحت على ضحى وسلمت على ام سيف وشهد سلام عابر ودنكت شاورت ضحى كلتلها خالة ام فرزدق وام صهيب يغيدون (يريدون) يسلمون عليج هي طفرت وكفت من مكانها بكل لهفة عبالك كلتلها صهيب اجة خطية ضحى عايشة على الاطلال راحت يمهم والعيون تلمع واني غلست ما رجعت للميز ادري بشيماء راح تحبسني ما تخليني اتحرك من مكاني تخاف اجيبلها مصيبة شغلو الاغاني وكلبي كام يركص وية الاغاني اباوع عالبنات نزلو عالستيج يركصون .. لج فاطمة باوعي وياي خلي نلطم سوياً خغب (خرب)حظي ولا وحدة بيهم تعغف تغكص (تعرف تركص) تكولين عبالك بيهم كساح شلون اغيد اغكص .. انجبي ترة والله افتن عليج عندج شيماء كعدي وسكتي صرت افتر بالقاعة واباوع ورحت يم كوشة العروسة بعدها ما واصلة مبقة شي ويوصلون شغلو غنيتي المفضلة واني اجيت ابجي اخذت فاطمة ورحت لميزنا .. شومة عفية خلي اغكص .. انجي والله اطيح حظج .. اي ليش كليلي ليش هسة مو هذني البنات كلهم ديغكصون اشمعنا اني .. لان انتي جنية واعرف راح تكلبين عاليها واطيها وتخلين النسوان تفتح حلكها عليج وشوفي النقالات شلون كل وحدة لازمة نقالها وتصور كعدي وستري علينا .. كعدت ضايجة واني اتحركص على البنات الي ما يعرفون يركصون _ هسة شدعوة ياشومة هي بس غكصاية صغيغونة (ركصاية صغيرونه) شيماء حاصرتها الضحة.. ماكو ولا ركصاية على الاساس من تصغر الكلمة يتغير المضمون ضليت كاعدة اباوع بعيوني وضحى سرحانة عيونها على ميز بيت اهل شهد .. شوكت يصبون العشا جعت .. لج نصي صوتج فضحتينا شوية وشفت ام رائد مرت المختار اجتي سلمت على ام فرزدق واني كمت اتلحلح يمها ام العزيز الغالي هاي عمتي الحبابة سلمت علينا وراحت كعدت يم ميزها هي وليلى الي اصلا ما كلفت نفسها واجتي تسلم علينا اجتي هالة يمنا .. واخيراً لكيتج تعالي كلش محتاجتج جرتني من ايدي وكومتني .. شكو خيغ شتغيدين (خير شتريدين) .. هالة تعالي هدى انتي شوية سباعية اريدج بس تجين وياي نسأل ذيج البنية عن مو الديها امي الله يحفظها تريد تخطب لقاسم وكل ساعة دازتني على وحدة واني استحي ما اعرف شلون اخذ منها المعلومات الي تريدها امي وكلت ما راح تدبرها غير بس هدى .. عفو عليج من هاي العين كبل هاي العين محسوبتج ام احمد الخطابة بغسم (برسم)الخدمة انتي بس اشغيلي (اشريلي)عليها واني اجيبلج اسم سابع جد الها رحنا ندور عالبنية وهالة خربانة ضحك وصرنا اني وهالة نشتغل خطابات كل شوية امها دازتنا على وحدة حاتة واحنا نروح نسألها شنو اسمج شكد عمرج .. اكلج هالة لازم نسألها بطريقة ذكية كون ما توحيلها احنا نريد نخطبها حتى تتصرف ويانا على طبيعتها وتنطينا المعلومات الصحيحة .. اي والله عفية عليج وصلنا يم البنية جانت صدك حلوة همست لهالة .. انا احجي وانتي سجلي عندج المعلومات .. تمام .. العفوا بلا زحمة ممكن سؤال درات علينا .. اتفضلي حبيبتي .. انتي اسمج هدى .. لا اني اسمي سلر اها اني ما ادري وين شايفتج انتي تدامين بمدرسة ال...... .. لا اني بالكلية .. مبين عليج صغيرة ماشاء الله شكد مواليدج ..مواليد ٨٩ .. اها لعد يمكن هاي اختح واني مشبهة عليها .. لا اني ما عندي اخت درت وجهي على هالة بصوت ناصي .. سجلي عندج وحيدة عند اهلها .. ليش انتي بيتكم مو يم المنطقة .. لا احنا بيتنا بالكرادة .. اسفة حبيبتي لعد شبهت عليج عبالي صديقتي جنا اني وياها صغار ابتسمت .. لا عادي حبيبتي مصار شي هالة.. ههههههه اخ يمة بطني خرب يومج هدى رحنا يم خالة ام قاسم وحجتلها هالة عن الصار وخالة ام قاسم باوعتلي .. والله كون عندي منج اثنين جان انا بخير دارت وجهها على هالة .. شوفي يا حظي واتعلمي شوية وين ما اوديج ما فالحة رجعت تباوع علية ام قاسم اشو هاي صفنت بوجهي .. اكول خالة هدى اشو والله حليانة انتي يا مواليد فتحت عيوني على وسعهن مصدومة. اشو هاي دارت علية احس بروحي مثل الي وقعت بالفخ عزة بعيني لايكون تفكر تخطبني ضحكت ضحكة صفرة مال وحدة عركت بهدومها وتريد تتهرب .. خالة اني مواليد ٩١ التفتت وليكت وحدة شايلة صينية بطالة ماي مفتوحة جامعتهم من على الطبلات جانت قريبة علية درت وجهي ودعمت بيها ووكعت الماي وخربطت الامة العربية وخليت عياط البنات بفلس خليت ام قاسم تكلي لا ارادياً..يا شبيج خالة ما تشوفين .. اي خالة اني عندي بعد ممزوج وياه قصر نظر عمياوي خليت المرية وكفت صافنة جنها راح تعيد التفكير بالموضوع هههههههه ... ههههههههه اجتي العروسة ودخلت على الموسيقى الافتتاحية وجانت الغنية المختاريها كلش حلوة خلص الوكت وما حسينا بي لان جان العرس كلش حلو واحلى فقرة من كامت منى هي وزوجها يركصون على موسيقى هادئة اولي يابة غير ضحى ساحت روحها من الغومانسية شكل الاخت دتتخيل روحها هي وصهيب ديركصون سلو خلص العرس وفرغت القاعة واتأخر الوقت وام فرزدق راحت ببداية العرس لان مرة جبيرة مو حمل هوسة العرس وشيماء اتصلت على رباب حتى تدز اخوها يجي ياخذنا للبيت بس طلع عنده شغل وماخذ كروة للنجف اباوع على شيماء وجهها فهة انتبهت علينا ام قاسم .. ها خالة شنو تنتظرون شيماء.. خالة دكيت عالسايق بس طلع مسافر ومااعرف غيره وبابا عنده خفارة .. يا خالة صدك جذب هسة اخابرلج على قاسم يجي يوصلكم هسة هو بالطريق جاي حتى ياخذني اني وخواته اتصلت عليه وكللها البنات راح يجيهم رائد صاحبي هو كال يندل بيتهم واني راح اجي عليكم جهزوا نفسكم مو تخلوني انتظر ساعة .. شومة خالة جهزوا نفسكم رائد ابن المختار جاركم القديم جاي عليكم هو صديق قاسم .. اشكرج خالة تسلمين ايارب تفرحين بقسومي وهالة .. امين يارب اشو هاي تأمن وتباوع علية يمة دخيلك كش كش فالة الله ولا فالكم عايزة خلصوا رجال العراق وما بقى بس قاسم ............ شيماء اليوم متوجهة نحو اتخاذ القرار ليث ..شيماء ليث دزلي رسالة كاتب ( اليوم راح اجي للمستشفى حتى اسمع جوابج لان وصل حدها وصبرت عليج هواي ) الظاهر الاستاذ طفح بيه الكيل داومت بالمستشفى والتهيت بالعمل لان عالم المستشفى عالم المفاجئات والقصص الغريبة والسعيدة والمحزنة عالم واسع مسحت كصتي من العرك جنت كلش تعبان صحيح جنت مشغولة وهلكت نفسي بالشغل بس هذا كله ما كدر يشغلني عن ليث جنت اشتغل وكل ساعة اباوع اخاف يجي ليث واني ما ادري وابن الحلال بذكره على طاريه اجت رباب كالت شومة الدكتور فلاح يريدج بغرفة الكشف رحت للغرفة واني اقوي كلبي اتخذت القرار وان شاء الله اكون على حق بقراري دخلت وصارت عيني بعيون ليث الي جان عاقد الحواجب ومعصب الدكتور بس شافني اترخص من عدنا وطلع رجلية ترجف ما اعرف ليش خايفة باوع علية من فوك ليجوة وكأنما راح يسويلي استنساخ مسح على لحيته وغمض عيونه بنفاذ صبر وحجة بصوته الخشن .. سمعينا صوتج .. ااااااااا ليث انت انسان ..... .. بدون لف ودوران شنو الرد .. بس لحظة اريد افهمك .. شيماء الجواب احس بي نار يريد يكوم علية ياكلني بلعت ريكي وسحبت نفس عميق ودنكت ما اكدر احط عيني بعينه وحجيت .. ليث اني موافقة ما حسيت الا على ليث كام من مكانه بخفة ووكف كدامي ارتديت ليورة من المفاجئة ما لحكت ارجع كبل سحبني عليه ارتبكت وانخبصت عبالك هبت علية عاصفة ما حسيت على نفسي الا واني بين ايديه وشفته قريبة على شفايفي وحجة بصوت هامس حار .. شيماء من احتركت عشيرتج دمرتي اعصابي خمط شفايفي على غفلة واني مثل الي دخلو عليها سلابة ليث بحركته هاي سلب مني ارادتي وصرت بين ايديه مثل الماي حسيت على عضة بشفتي التحتية دفعته خايفة حجيت مصدومة .. ل .. ل.. يث على كيفك انطيني فرصة احجي ابتعد عني ورفع شعره بيده وعدل شعري وخلة الخصلة ورة اذني ولزم وجهي بين ايديه الخشنة الكبيرة .. على فكرة هذا الصار قبل شوية جان نذر علية اذا وافقتي كون اكطع هذني لزمني من شفايفي بس كلت خطية شفتج كمتي ترجفين من الخوف طلعت شيماء القوية تخبي جواها امراءة رقيقة هشة ومثيرة وبسرعة تذوب بين ايدية صاروا خدودي حمر ابتعدت عنه وخليت بينا مسافة وحجيت .. هوب هوب ترة هذا الكاعد يصير كلش هواي علية عفية ليث انت دتربكني على كيف وياي وحدة وحدة ابتسم .. لج شيماء ما تعرفين هذا شنو كاعد يصير بي وياشر على عقلة وربي لوتعرفين بشنو جاي افكر جان بسرعة شردتي وما اشوف بس غبارج فحمدي ربج انا لحد هسة صابر ومحافظ على خطواتي وياج .. حضري روحج باجر جايكم خطابة يتبع..... | ||||
|
| |
|
07-07-19, 10:33 PM
| #16 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| أساور_الفضة #الكاتبة_نهى_الحسون #البارت_الرابع_عشر هدى كعدت من النوم متكسرة رفعت راسي ملكيت شيماء اكيد اليوم داومت بالمستشفى كمت من الفراش اخ يمة جسمي كله متكسر عزة عبالك جنت اكنس بالعرس طلعت من الغرفة ادور على ضحى لكيتها دتغسل مواعين وصافنه كدام تباوع على لاشيء مبين عليها غركانة بأحلام اليقضة .. اااخ يمة ظهغي (ظهري) صحت من شرودها .. شنو شبيج .. ما اعغف (مااعرف) شبية .. اتوقع ظهرج من ورة العرس لان كضيتيها كله فرة ولا كعدتي .. اي غير شيماء سوت علية حصاغ (حصار) ومخلتني اغكص (اركص) طلعت حركتي افتر ادور على مرة لقاسم اخو هالة .. هههههه والله انتي فلم غسلت وجهي ورحت حميت الجاي ضحى.. اكول هدى شفتي البارحة البنات الي بالعرس شلابسات .. اي شفتهم حلوات .. اوووف وشفتي بيت اهل شهد شلون جانوا مرتبين ومميزين .. اي بس ما عجبوني ما اعغف (مااعرف) ليش كلبي ما اغتاح (ماارتاح) الهم _هو انتي شعرفتي منهم حتى كبل حكمتي عليهم .. ما عغفت منهم شي بس سيماهم في وجوههم مبينين من شكلهم اكو ناس بس تشوفيهم متغتاحين (مترتاحين) لهم وبيت اهل شهد من ضمن هالناس مثل الي راكب بسيارة ولازم يربط حزام الامان ولازم يكون على اهبة الاستعداد .. اووف لج هدى لو تسمعين حجيهم تكولين احنا هم محسوبين عايشين .. مو شرط منو يكلج همة مغتاحين (مرتاحين)بحياتهم .. لج شلون تصير الراحة بعد لج لو تسمعين البارحة زوجة اخو شهد شتحجي جان غميتي روحج .. اي بالله احجيلي خليني اغم غوحي .. اجتي للحفلة متأخرة ام سيف سألتها ابتهال ليش اتأخرتي جاوبتها ابتهال .. والله باجي شوفت عينج البارحة بالليل يالله وصلنا من تركيا واليوم الصبح كعدت تعبانة وللظهر يالله قررت احظر العرس وسلوان اخذني للصالون وهاي جيتي جابني ركض حتى فستاني ما اعرف شلون لبسته جنت اباوع عليها شلون تحجي بغنج ودلع الله لج هدى سفر وصالون ولبس وسيارة زوجها يوصلها شكد حلو طبعا الحلو بيت اهل شهد بيهم طبع كل عطلة يسافرون للخارج يتونسون .. بالعافية عليهم الله يهنيهم .. تدرين شهد خطبتني لأخوها الجبير سيف .. اي وانتي شنو غأيج (رايج) بالموضوع .. كلبي بعده يهوى صهيب مجرد يمر طاريه اني كلبي يخفق صرت اعد الايام يوم يوم انتظر رجوعه ..صبغي (صبري ) حبيبتي لتستعجلين على غزقج (رزقج) .. يالله دكومي وراج شغل كومة بعد انتي عندج عطلة خلي استفاد منج .. لا ياحلوة ما حزرتي اني راح ابدي من هسة اكعد ادرس للسادس هم يالله الحك وشيماء كالت اليوم اخذج لبيت ام فرزدق .. اروح وياكم ورجلي على رجلكم بس كليلي شتسوين رايحين لبيتهم .. مو البارحة شيماء بالصدفة جانت تحجي عني بموضوع السادس فأخت صهيب هالسنة نجحت من السادس كالت اذا تردين اني عندي كومة ملازم وكتب تفيدج تدرسين بيهم للسادس وشبماء كالت جهزي روحج اخذج ونجيب الكتب .. يالله لعد خلي نخلص شغلنا بالعجل ونروح صار وقت الظهر جنت كل شوية اباوع عالساعة واكفة ورة الباب اروح وارجع انتظر جية شيماء على احر من الجمر اريد اعرف شنو سوت وية ليث اليوم راح تردله الجواب .. انتي شبيج مخبوصة دوختيني من الفرة فوك راسي .. بعدين تعرفين شنو سبب دوختي سمعت صوت الباب انفتح باوعت شفتها شيماء دخلت للمطبخ وسلمت والوجه احمر اخذت منها جنطتها راحت للغرفة واني وراها مثل ظلها .. ها شومة بشغي (بشري )شنو سويتي ضحكت.. انطيني مجال اجر نفس ستوني رجعت حتى بعدني ما بدلت ملابسي .. اهووو شومة احجي وانتي تبدلين والله جنت كاعدة انتظغج (انتظرج) على اعصابي كعدت تبدل ملابسها وتحجي .. حجيت وية ليث وبلغته بموافقتي وكلتله على شرطي .. اي وشنو كال .. اعترض وظل يلف ويدور بس اني حطيته امام خيارين اما يوافق او كلمن يروح بطريقه دخلت علينا ضحى.. هاي شنو خيانة من وراي شروط وليث وموافقة شكو .. شيماء اتقدملها واحد .. والله زعلتوني منكم عود ليش اني اخر من يعلم بيهج شي وهاي الجنية تعرف بكلشي .. انجبي جنية بعينج غير انتي ملتهية بعوحج (بروحج)وما تدغين (ماتدرين) بالدنيا طشت لو غشت (رشت) .. ما علية والله تحجولي شنو صاير شيماء .. ولا يهمج نحجيلج حجت شيماء لضحى الملخص عن ليث .. واليوم انطيته موافقتي وكلتله قبل كلشي عندي شروط ارجو ان توافق عليها وهو ظل يباوع علية مضيك عيونه بحذر .. ما اترك وضيفتي بعد الزواج ليث.. شتسوين بالوظيفة وانا موجود والله شايل حمالتي وان شاء الله ما راح اخليج تحتاجين شي .. لا وظيفتي احتاجها بس مو الي لخواتي خواتي يعتمدون على راتبي وبابا يادوب يكدر يصرف على نفسه لان هو مريض وبسرعة يتعب بالشغل لذلك اهلي معتمدين على راتبي ما اكدر ادور وجهي عنهم واتركهم يعانون لوحدهم .. بس انا ما يصرفلي مكان شغلج تدرين من جنت اشوفج تحجين وية الدكاترة وصرت اتخيلج شلون تتعاملين وية المرضى هذيج الايام عيشتيني بيها بجحيم وكوة على اعصابي جنت اساير الامور اكول مالي حق احجي بس اذا صرتي مرتي مستحيل اخليج تستمرين بشغلج .. لعد اسحب موافقتي واعتبرني كلشي ما حجيت وكلمن يروح بطريقه اني هذا شرطي وموافقتي تعتمد عليه .. اوك اذا كانت غايتج من الشغل علمود الراتب فا اني راح انطيج راتب كل شهر تكدرين تنطينه لاهلج .. مستحيل ليث ما اكدر صعبة .. وين الصعوبة بالموضوع وهو حلالي وحلالج راح يكون واحد يعني ماكو فرق بيني وبينج .. حلالك وحلالي واحد اذا جنت تصرفه بس علية بس اذا صرفت من حلالك على اهلي هذا اسميه استغلال .. انتي شلج غرض حلالي وانا حر بيه انا اريدج تستغليني انتي ليش ضايجة .. ليث مستحيل اقبل اهلي يعيشون عالة عليك صعبة حسيت بيه عصب .. يعني هذا اخر كلام الج .. نعم .. لعد خلاص انا هم انطيني مهلة افكر واردلج الجواب ظليت فاتحة حلكي هذا شيقصد .. مفتمهت عليك شنو قصدك .. انا هم احتاج اراجع حساباتي افكر بموضوع شغلج مثلما تعرفين انا ضابط بمعروف اشوفها صعبة مرتي تشتغل ممرضة كلبي نهض من مكانه من اتوجه عالباب وقبل لا يطلع كال شوفي شيماء انا راح اسافر عندي دورة لمدة ٨اشهر اخلصها ومن ارجع ابلغج بالجواب ... ضحى.. و تالي شنو صفيتوا شيماء.. تالي تركته يفكر بالموضوع وراح انتظر منه يردلي خبر هو من حقه يفكر لان جان متوقع ان من يخطبني ويطلبني للزواج راح اترك وظيفتي بكل سهولة ومجان مسوي حساب شروطي هدى بقهر .. شيماء انتي ما مجبورة بينا شوفي حياتج وماعليج بينا اصلا اني قبل لتحجين بموضوع ليث جنت افكر اشتغل .. هدى مو بكيفج تتصرفين هذا الشي راجعلي واني الي اقرر لتاخذين على نفسج .. لا بكيفي اني ما اسمحلج تكسرين روحج علمودنا شيماء ترة احنا كبرنا وكلمن مسؤل عن نفسه شيماء بصوت عالي .. هدى اشو انتي متحترمين واذا كبرتي شنو يعني على نفسج مو علية تكبرين سامعة .. شيماء انتي امي شلون ما احترمج بس انتي هواي بالغتي بحرصج علينا لتخلينا احنا عائق ترة احنا مدايمين بحياتج خلي ببالج ترة ضحى اول وتالي مبقالها شي وتتزوج واني بس اخلص السادس رائد يتقدملي ونتزوج وتبقين بس انتي لوحدج فلتخسرين مثل هيج فرصة علمود سبب تافه اسمه خواتي .. هدى انتي طلعي منها بعدج زعطوطة ومتفتهمين اي شي انتي عليج تتفرغين لدراستج ترة موضوع ليث نقطة ببحر بالنسبة للي مر علية بحياتي ترة اني الدنيا راوتني اشكال والوان من يوم وفاة امي اني كبرت ومن عهدها اخذت قسم على نفسي احافظ عليكم وعرفت اذا اريد استمر محافظة على خواتي لازم اتنازل عن هواي اشياء ووحدة منها موضوع زواجي ترة ليث مو اول واحد يتقدملي هواي قبله اتقدمولي ورفضتهم على نفس السبب انتوا مو ذنبكم هذا كان اختياري وبرضاتي محد جبرني ولا راح افكر بيوم احملكم ذنب تضحيتي فالله يخليج هدى لتحجين كلام انتي ما تعرفين معناه وتخليني اندم على كلشي سويته جانت شيماء تحجي واني ميتة قهر واكل بكلبي ومن يومها صار شغلي الشاغل وكل همي افكر شلون اثبت لشيماء احنا كبرنا ونكدر نتحمل مسؤليتنا بس بالاول لازم الكة شغل اي شي من دون ماتحس علية وكام يزيد اصراري يوم عن يوم خصوصا من طال سكوت ليث وما سمعنا عنه اي خبر وبعدما طالت المدة اباوع لشيماء شلون صارت تذبل كدام عيوني احس بيها دتعاني بس بدون ما احد يحس عليها عزلت فراشي عنها هاي اول رسالة لشيماء حبيت اكللها عن طريقها اني كبرت خلصت العطلة وبدة الدوام شيماء.. حضري روحج حتى اخذج اشتريلج ملابس للمدرسة .. ميحتاج تشتريلي عندي ملابس محجت شي دارت وجهها وطلعت لوحدها للعصر جنت نايمة كعدت من النوم لكيت علاكة يم راسي فتحتها لكيت بيها ملابس مدرسة غمضت عيوني بدة الدوام ودفنت روحي بالدراسة ما اريد احجي وية شيماء اصعب شي من تشوف واحد عزيز على كلبك ديعاني ويتلوع كدام عينك والاصعب منها من تعرف نفسك انت حجر العثرة الي واكف بطريق تحقيق حلمه وسعادته اجتي ام فرزدق تطمن علينا وحاولت المح الهة علمود اشتغل عندها مثل ما كانت شيماء تروح عندها وتنطيها راتب بس مع الاسف شيماء عارضت وكالت لام فرزدق .. خالة ما عليج بيها هاي عندها سادس وطبكن وايراتها تريد تشتغل الظاهر السادس اثر على عقلها حيل ضجت منها احس بيها تتعمد تكسر جناحاتي حتى ابقى احتاجها وواكون عالة عليها يعني لا انطيك ولا اخلي رحمة الله تنزل عليك بوكتها اتعاركت وية شيماء .. انتي ليش دتسوين هشكل .. هدى انسي سالفة الشغل وفرغي لدراستج بعدج صغيرة عالشغل .. ليش انتي مو اشتغلتي وانتي اصغر مني .. اني اختلف جنت مجبورة بس انتي ما مجبورة الحمدلله الله شايل حمالتنا .. واذا اكلج اني ما ديكفيني المصرف الي تنطينياه .. كولي شكد تردين واني انطيج تركتها ودرت وجهي وطلعت من يمها يوم ثاني بالمدرسة سمعت صوت صياح بنات شفتهم متجمعات على ليان وهالة شكلهم بينهم عركة وبوكتها معرفت شنو سبب العركة بس من غضب هالة ووجها الاحمر عرفت هي صاحبة الحق والمشكلة حتى ليان دتبجي ووجها احمر شنو السالفة واحد يفهمنا شنو الصاير اجتي المعاونة واحنا بالدرس وصاحت لهالة كلتلها اخوج اجة عليج حتى ياخذج كامت هالة من رحلتها واخذت جنطتها وغراضها وطلعت اسمع المعاونة تحجي وياها تكللها هذا اخوج مو طبيعي كعد يهدد يحرك المدرسة على روسنا ......... وبعدها ما كدرت اسمع الباقي ................. قاسم يسب ويلعن بالسيارة وهالة تبجي .. انتي غبية وصوجج انتي انا كم مرة منبه عليج ما ترافقيها لهاي العار هالة.. والله هي تفرض نفسها وتمشي وية نفس صديقاتي الي امشي وياهم وصعبة اكللها لتمشين ويانا .. اشششش ما اسمع منج ولا كلمة الي صار خليه بيني وبينج ما اريد اي مخلوق يعرف بالصار وهي واخوها عوفيهم علية حسابهم يمي عسير ونقالج تنطينياه بعد ماكو شي اسمه نعال بكصتج زمخ بيها بصوت عالي .. سااااااامعة كمزت من مكانها وهي تهز راسها .. اي اي هذا هو ما اريد اي نقال وصلو للبيت وقاسم عاقد الحواجب ووجهه ما يكصه السيف وهالة عيونها حمر مبين عليها جانت تبجي ابو قاسم .. خير شبيها اختك وليش انت مرجعها .. جنت مار بطريقي والمديرة اتصلت علية كالت اختك اتخربطت تعال عليها .. وليش ما اتصلت علية شمعنا انت هالة.. بابا اني محافظة ارقامكم وصادف جنت حافظة بس رقم قاسم لان سهل وكله مكرر قاسم كام من مكانه .. يالله يمة انا طالع تحتاجين شي ابو قاسم .. من ترجع عندي حجي وياك لان وصل حدها دك نقال قاسم .. الو هلا رائد .. اي انا موجود بالبيت لحظة طالعلك سد النقال وباوع لابوه .. صار يابة تدلل ارجع ويصير خير ام قاسم.. على كيفك وية ابنك ترة هو كبر مو مال تكعد تتحكم بي ما تشوف المشاكل كثرت من رجع من الخارج هو يعاند وانت تلح عليه منى كاعدة تكشر برتقال .. اي بابا اني ما علية بقاسم بس انت هواي تضغط على وما يوم انطيته الحق واذا عمو محمد يحجي وياك ويوزك عليه كبل تروح تهجم عليه وهو يكوم يتصرف بالعناد وياك لان انت باخر مرة ظلمته لقاسم وراح يجي اليوم الي يخليك تعرف بقاسم انظلم وانت اول من ظلمه ........ هدى بهاي الفترة ليان صارت تحاول تقوي علاقتها بية من بعدما سمعت بية يتيمة وفاطمة حجتلها عن حياتي صارت هواي قريبة علية مرات تظلم هواي ناس بالحكم على منظرهم وهالة صديقتي هاي السنة ابتعدت عن شلتنا و التهت وية بنت عمها محمد الي اجتي لمدرستنا نقل هاي السنة وانشغلت بيها عنا وخصوصا البنية تصير بنت عمها كلش شاطرة ومميزة والي عرفته عمها محمد مسؤل بوزارة الدفاع كانت البنبة اسمها رهف ومرت الايام وقربت امتحانات اخير السنة جنت كاعدة ادرس للسادس بعد اسبوعين ونعطل ونكعد ندرس بشهر المراجعة طول هاي الفترة الفاتت سليمة. ما بطلت حرب على ضحى خصوصاً من رجعوا كرايبها طلبوا ضحى يكولون ابنا اتعين بحراسة المنشاءات النفطية بالجنوب لعد ماكو حجة ترفضون وضحى كالعادة عاندت ضحى.. والله زهكتني بعيشتي والله مرات افكر انتحر من وراها يا اختي خنكتني شيماء.. ماعليج بيها خليها تحجي لوحدها ما بيدها اي شي تسويه بس الحجي .. اي مو نعلت ابو حظي بالنكة مالتها وهذا استاذ صهيب الله يحفظه ضارب السكتة ما اعرف ليش عندي احساس اني مو على باله اصلاً ولا يفكر بية والله طلعت روحي من الانتظار حقها تشتكي لان طال الانتظار ولحظات الانتظار الصامتة اصعب لحضات يكون بيها الانسان يعيش على اعصابه بترقب ينتظر شي مواثق منه مجرد كلمات تبادلوها صعبة تبني عليها امال جنا كاعدين اني وشيماء وضحى وسليمة كالعادة تحوم على راسنا دخل عمو امجد وراه بابا عافس الوجه سلمنا عليهم وكال كومي شيماء سوي جاي امجد.. لا شيماء ضلي كاعدة عندي موضوع وياج اريد احجيه اثير.. ها امجد هم ردينا على السالفة كلتلك انسى روح كللهم ما عندنا مرة للزواج .. لا هالمرة مو بكيفك ترفض لان لو تعرف المتقدملها منو جان سكتت وما فتحت حلكك جنا وحدة تباوع عالثانية نريد نعرف شنو السالفة دار عمو امجد على شيماء .. عمو شومة اليوم اجة واحد طلبج من عندي ومو اي واحد هذا الضابط ليث ابوج يعرفه اتعرفت عليه بالمركزمن اجيت اطلع ابوج والله يرضى عليه هواي وكف ويانا بذاك اليوم ولوما هو جان ابوج لليوم خايس بالسجن بابا نهض من مكانه مفزوع .. شنو!!!! الضابط ليث اباوع عليه بلع ريكه ..هو وين يعرف شيماء واجة خطبها .. يكول شايفها بالمستشفى من جان مصاب وانعجب بأخلاقها ومن عرف انت ابوها اجة علية وطلبها مني موخوفا منك ما طلبها من عندك بس لان انت ما يتشرف الواحد يحط ايده بأيدك ويجي يناسبك بس هو اتغاضة انت ابوها وكال انا البنية شاريها واخلاقها تشهدلها في غض النظر منو ابوها فلا تكعد تتفلسف وترفض اباوع على بابا وجهه كام ينطي الوان عمو امجد لزمه من ايده التوجعه بزواية وصار يباوع على شيماء بنظرات يتمنى ترفض بس وين شيماء طايرة من الفرح والكاع ما شايلتها موقف ليث من اتقدم وخطب شيماء من عمو امجد كانت رسالة لشيماء تبلغها موافقته على شرطها بلحظتها اتأكدت ان ليث شكد يحب شيماء رغم الحواجز كدر يجتازها ويوصل لكلبها .. عمو باجر جهزي نفسج وحظري اموركم باجر راح يجيب اهله وناسه ويخطبج مني يعني باجر بببتي الكعدة احسن جبير ويكفي كامت شيماء مثل المكروصة وراحت بالغرفة تحوم رحنا وراها وحضناها اني وضحى وصرنا نضحك ونبجي ممصدكات وهي انخبصت .. بنات عوفكم من البجي لاحكين عليه كلولي شلون راح الحك اجهز روحي عفية احجو احس رجعتلي الحياة من شفت فرحة شومة وشلون وجهها نور يوم ثاني كعدنا من الصبح وحدة تدعم بالثانية شيماء.. هدى انتي تبقين بالبيت واني ضحى راح نطلع للسوك لازم اشتريلي كم شغلة وما الحك طنكرت لان ما اخذوني وياهم بس تباً للمستحيل حان عند سيلمة راديو شغلته وكعدت انظف البيت واركص مثل المخبلة لوحدي ممصدكة احس اكو حمل جان كاعد على كلبي وانزاح بس بعدني على نفس تصميمي اريد بأي طريقة احصل على شغل او وظيفة للعصر خلصو البنات كلشي وجهزنا نفسنا واجة عمو امجد اخذنا لبيتهم كعدنا بالصالة وشفت مريم اختي بس هالمرة ضعفانة هالمرة حتى سلامة كامت تسلم من بعيد وكأنما كل يوم تشوفنا ومتعودة علينا جنا كاعدين اني وشيماء وضحى وحدة بصف الثانية لاحظتها تباوع علينا من جوة لجوة بحقد مريم.. ها شيماء راح تتزوجين وتتركين خواتج شيماء..اي راح اتزوج بس لا ما راح اترك خواتي فردت ايديها وحاوطتنا اني وضحى بثنين ايديها اباوع لمريم انتبهت لحركتها هزت ايدها وكالت .. الله يخليلج خواتج ودارت وجهها وراحت هاي شبيها والله امرها عجيب لحظات وسمعنا اصوات الرياجيل دخل عمو امجد كال حظروا صواني التقديم وصلو الشيوخ والرياجيل وليث وياهم اباوع على شيماء تفرك بأيدها مرتبكة ومتوترة من الارتباك وسليمة كل شوية كالت ليش ما حطين على وجهها هذا الاخضر والازرك والاحمر اشو ما جنها عروس استغفر الله ويكلك ليش تحجي عود اني حلفت بعد ما احجي عليها بس هي تنطق الحجر بسوالفها هسة هي غير تكعد راحة (سليمة بولند ) اليسمعها يكول جويل خبيرة التجميل الله يلعنك يا لساني ويكلك ليش تحجي جانت شيماء لابسة بدلة بسيطة مخصرة عالجسم بيها دلعة من كدام مبين منها الصدر وواكتفت بتنزيل شعرها الي شوية طولان عن قبل واصل لتحت كتفها واكتفت بمكياج بسيط رباب هي الي سوت وجهه شومة لان الست رباب بهاي السوالف مالت الميك اب استاذة طلعت شيماء عبالك لعابة اجتي خالة ام فرزدق هي وام صهيب وكعدت تصلي وتهلي على شومة وصارت تقرة عليها ايات سلمنا عليهم وام صهيب تباوع لضحى وتبتسم وضحى تتنقل مثل الفراشة خطية الكاع ما شالتها من كلتلها ام صهيب طالعة عروس سمعت صوت جنان مرت عمي تصيح على مريم جانت كل شوية تصيح على مريم وهي مثل الربورت تمشي وراها كمت وردت اساعدهم بالتقديم بس هي بسرعة رفضت وكالت لا حبيبتي شكرا اخذي راحتج ما احتاج مساعدة طلعت من المطبخ واني اهز ايدي طلع عمو امجد وكال الحمدلله قرينا الفاتحة سمعونا الهلال البنات صديقات شومة والبقية صارو يهلهلون وشغلو الديجي وشيماء الضحكة تلوكلها مثل الوردة مفتحة بابا رفض يعقدون سيد الا يعقد محكمة يالله جان هذا شرطه شغلوا البنات الديجي وانا كمت اركص واباوع لشيماء كل ساعة تعض لي شفة تريدني اكعد واني نطيتها الاذن الطرشة سويت نفسي ما اشوفها صاحتني ورحت يمها وشاورتني .. هدى لخاطري بطلي ركص شوفي النسوان شلون فتحت عيونها عليج .. يالله هاي لخاطرج اكعد واسكت شوية وطلعوا الرياجيل وخفوا الخطار وعمو امجد صاح لشيماء وكللها ليث بالاستقبال يريد يشوفج ويسلم كامت شيماء من مكانها وباوعت علية وعلى ضحى وكالت تعالو وياي اريدكم تسلمون على ليث واعرفكم عليه وصاحت لمريم حتى تجي تسلم عليه وتعرفه بس عمة جنان صاحت على مريم وكلتلها بعدين لاحكة تتعرفين عليه اباوع لشيماء سكتت محجت شي بس نظرت عيونها حجت الماكدرت تكوله لجنان اخذتنا ودخلنا للاستقبال جان محد بيها بس ليث وعمو امجد وبابا شافونا دخلنا بابا كال انا طالع عندي شغلة هنا قريبة وعمو امجد كال.. اعوفكم لوحدكم تاخذون راحتكم وباوع لليث.. عمي انتي مو غريب ان شاء الله مثل ابنا هذا الحجي همة يسولفون واني اباوع على زوج اختي المستقبلي جان كلش مرتب يمة شكله جدي هذا ياكلها لأختي وما يبقي شي صاحي بيها جان يباوع لشيماء وعيونه كصتها كص نسى روحه ونسى وجودنا يمهم جلى صوته الخشن .. الف مبروك عليج انا ابتسمت وكالت .. الله يبارك بيك ودنكت ووجها صار احمر .. يابة رفعي وجهج خلينا نشوف رحمة الله رفعت راسها وباوعت علينا وكالت .. ليث اريد تتعرف على خواتي عندي اخت اصغر مني اسمها مروة دكتورة متزوجة ومسافرة للخارج وية زوجها تدرس جنت اتمنى هي حاضرة واعرفك عليها واشرت على ضحى وهاذي اختي ضحى الاصغر منها سلم على ضحى جان مبين عليه شخصيته قوية واشرت علية وكالت وهاذي اختي الصغيرة هدى سلم علية وكلي واني سلمت عليها مبتسمة وشاكة الحلك عبالك ممصدكة اختي راح تتزوج كرصتني ضحى حتى نكوم وانا صرت حبابة وكمت وصلت للباب وكلت.. شيماء اذا تحتاجيني اني ورة باب بس صيحيني تلكيني كدامج شيماء جنت كاعدة بصف ليث وعيني عالباب خربانة من الضحك على كلام هدى المخبلة وهو يباوع ويبتسم على كلامها اباوع عليها طلعت وسدت الباب هو انسد الباب وما حسيت الا على روحي متمددة على ظهري وليث يعتليني اتسعت عيوني من المفاجئة ادري هذا شنو قصته حجيت مرتبكة وادفع بليث من صدره .. اوكف لحظة ليث يمعود اني احجي وهو هجم علية مثل العطشان ويريد يرتوي .. اششششش ولا كلمة ما اريد اسمع صوتج دمرتيني وكلبتي حياتي كلاب وصار المايصير واستسلمت وانا ادعي عليج كون حركة كلبي تطلع بيج وتالي ارجع اكول شلون واحد يدعي على روحه جان يحجي كلامه بهمس كدر بكلامه الحلو يخليني اتنازل عن حذري وخوفي وكلشي بالعالم وصرت ما اشوف بس هو اخذ شفايفي بكل لهفة وصار يتفنن شلون يلثمهم بين شفايفه ورجع رفع راسه يباوع علية كأنما يريد يصدك عيونه ويتأكد انا ملكه جنت دايخة ورايحة بغير عالم بس حسيت عليه اتوقف وابتعد عني وعدل ملابسه وفرك وجهه واني مثل المسطورة شنو شصار وليش اني جسمي كب نار ليث.. عدلي ملابسج كعدت مثل المخدرة عدلت ملابسي وخدودي حمر وحطيت شعري ورة اذني ليث.. شيماء سوي حسابج بنهاية الشهر نتزوج ترة كوة لازم روحي عنج ولوما عيب وماعاقد عليج جان ما اطلع من بيتكم الا وانتي مرتي شهكت مستحية .. لا لا روح لبيتكم احسن .. بيمن ادعي على ابوج بيوم اجل عقد الشيخ وية عقد المحكمة بس يالله كلشي بوكته حلو اندك الباب وصوت عمو امجد همس بصوت ناصي يم اذني .. يالله روحي كبل لا ارتكب جريمة بواحد من اهلج طلعولي علة حتى هاي القزومة اختج ناشبة وياي ما حسنا الا على صوت هدى تصيح من ورة الباب .. تغة (ترة) سمعتك طكها ضحكة .. ههههههههههههه لج شيماء هاي شنو اختج فلم .. اهووو انت بعد ما شفت شي من هدى دخل عمو ووراه هدى تخزر بليث ................. مرت الايام وما ظل على شهر المراجهة بس اسبوع ونكعد من الدوام نراجع بالفرصة كاعدة اني وفاطمة وليان جنت احجيلهم عن الشغل الي حصلته عن طريق فراشة المدرسة ام شاكر فاطمة.. زين شلون راح تدبريها تشتغلين وتدرسين وانتي وراج شهر مراجة وامتحانات وشلون بأختج شيماء شنو تكليلها .. هسة هو اني خلي استلم الشغل بالله شيماء مكدور عليها سهلة اكللها طالعة اروح لبيت فاطمة ادرس وياها متكول شي .. اكلج انتي ليش ما تركين عنج هاي السوالف مالت الشغل وتتفرغين لدراستج احسنلج وسمعي كلام اختج هي اعرف منج ..لا مستحيل انا اخذت عهد على نفسي اثبت لشيماء انا كدها وكدود واكدر اعتمد على نفسي بدونها .. هسة. ها شنو رأيكم على بشغل ام شاكر اروح وياها بدوام المدرسة الابتدائية ابيع وياها بالحانوت هي كالت انطيج يومية هالقاسمه الله ليان.. اكول هدى ليش متجين تشتغلين بالكوفي مال بابا اني مو ذاك اليوم كلتلج تعالي اشتغلي بالكوفي احسنلج من ام شاكر .. مو لان شغل ام شاكر كلة صباحي ما يأثر على دراستي وما اريد اختي شيماء تدري بية باوعت لليان صفنت وبعدها حجت شوفي انتي ليش ما تجيني كل يوم من العصر وارجعج لبيتكم الساعة ب٨ اني بيدي ارجع بسيارة اخوية وكولي لشيماء اختج ادرس عند ليان عندها مدرسين واخر محاضرة عالساعة ب٨ فاطمة اعترضت.. لا ليان لا تاكلين عقلها بهذا الكلام هو اني صارلي ساعة اقنعها تبطل من ام شاكر ونوب اجيتي انتي واقتراحج راح تفرين عقلها فاطمة جانت تحجي واني كاعدة ادرس اقتراح ليان ليان.. شبيج فاطمة ترة عادي الواحد يشتغل ويدرس ترة حتى اني مرات اروح وية بابا للكوفي اساعده عالحسابات وهي راح بس تبقى بالمطبخ تسوي شغل المطبخ تغسل مواعين هشكل ما راح يأثر على دراستها رجعت للبيت بيومها وصرت كلما اتعمق بالفكرة كلما اقتنع اكثر وخصوصاً شيماء مخبوصة وملتهية عني هاي الايام تريد تجهزلعرسها الي حددوه بنهاية الشهر كلت لشيماء عن سالفة مدرسين ليان وهي صفنت بوجهي وكالت ليان صديقتج اشو مسامعة بيها شنو السالفة شومة البنية الي مرة حجيتلج عنها كلتلج الناس الي كعدوا ببيتنا القديم .. هااااا اي اتذكرت انتي ويامن ترحين تدرسين ببيتها ارتبكت .. اني وفطومة .. ها مادام فاطمة وياج تمام بس اريدج تشدين حيلج لا عبالج اني انشغلت عنج بتجهيز عرسي ترة خلي ببالج عيوني عليج .. لتخافين علية مرت الايام وصرت كل يوم اروح وية ليان تاخذني للكوفي جنت كبل ادخل بوجهي للمطبخ اكعد اغسل صحون وما التقي بأي شخص غير المرية الي تسوي الكوفي بأنواعه وشباب اثنين صغار يعمرون نركلية للشباب ومرات اشوف كم بنية من اليشتغلون هنا بالكوفي يقدمون الطلبات جانوا بنات كلش حلوات نفس عمري تقريبا واكبر لابسات نفس الزي مالتي تيشريت احمر نص ردن وبنطرون اسود بديت انعلم عالشغل وما اكو اي ازعاج ومر تقريبا اسبوع كل يوم ارجع الساعة ب٨ هلكانة من الشغل بس بنفس الوقت طايرة من الفرح باليومية الي تنطينياها ليان جنت ارجع اضم الفلوس جوة بالكنتور بنص ملابسي الداخلية واروح اسبح واصلي واكعد ادرس لحد ما الكة روحي نايمة عالكتاب شيماء ما لاحظت اي شي والحمدلله بس اليوم قبل لا اطلع وية ليان كالت شيماء .. فاطمة صديقتج اتصلت عليج تريد تحجي وياج ضروري واني جنت بالدوام كلتلها من ارجع اخليها تحجي وياج هدى.. يالله شومة مع السلامة هو هسة اني رايحة لبيت ليان واحجي وياها وصلت وشفت ليان وجانت حيل ضايجة سألتني .. هدى شنو علاقتج برائد ابتسمت مرتبكة لان محاجية لاي وحدة من صديقاتي عن رائد احس هذا شي خاص بيني وبينه .. ليش تسألني عن رائد .. لان صادف اليوم شفتج من حليتي من المدرسة انتبهت على سيارة رائد وكفت يم المحل الي انتي دخلتي له .. بالحقيقة هو مو سر واضمه عنج بس جنت انتظر اخلص السادس واعلن عنه اني ورائد متفقين عالزواج بس اخلص السادس اتسعت عيونها وانكلب وجها بعدها ورجعت بدلت كلامها وابتسمت بوجهي .. يالله ترة اتأخرنا عالكوفي اليوم ينتظرنا هواي شغل وصلت ورحت مثل كل يوم استلمت شغلي مثلما اتعودت وبقيت اشتغل بس اليوم الشغل جان هواي واتأخر الوقت وعبر الساعة ٨ بس اشو هذولي ما عزلو وصحت ليان اسألها شوكت نرجع جانت واكفة يم رجال جبير غريب شافني وكصني من فوك ليجوة وكأنما يعاين بضاعة ارتبكت من نظراته وسأل ليان.. هاي شنو عدنا تشتغل وانا ما ادري ضحكت وكالت.. خطية بعدها جديدة كال وعيونه بعدها علية.. لعد خلاص اليوم خليها تفوت للساحة مفتهمت عليهم كلتله.. مو اليوم بعدها ما مستعدة اخاف تفشلنا كال.. هسة جربيها اليوم لان الكادر بيدنقصد وعندي ثنين بنات غايبات خليها تساعدهم بالتقديم واضاعف يوميتها دارت وجهها علية .. ها شنو كلتي ترة انتي بعد اتأخرتي وراح عليج الوكت عالاقل استفادي من الوقت الضائع هي تحجي واني شياطين العالم كلها اتربعت براسي ..لا ما اريد يومية مضاعفة عفية رجعيني للبيت الوقت كلش اتأخر باوع الرجال لليان وشاورها وراح وهي راحت وراه وتركتني لوحدي ادعم حسيت صارت حركة غريبة بالكوفي مديت راسي اباوع بفضول اشو الشكول بدت تتغير من شباب عاديين يجون عالكوفي علمود يلعبون طاولي ودومنة ونركلية الى. رياجيل شكولهم توب مو مال جايين عالكوفي ووياهم بنات لبسهم استغفر الله. ما ينوصف صحت ليان .. ليان اني ما مرتاحة للجاي يصير عفية اتأخرت انتي موكلتي ارجعج عالساعة ٨ اشو هسة الساعة صارت١١ وانتي ترفضين توصليني والله هسة شيماء اختي تتخبل جنت احجي واباوع لنظرات ليان ما اعرف ليش حسيت بالتهديد ليان .. اذا تردين اوصلج وياي فتنتظرين هواي لان بابا عنده ضيوف اليوم وشغل كومة اذا تردين روحي شوفي شغلج وية البنات وشوفي طلبات الزباين احسنلج من الكعدة باوعت للبنات عاديات نفس زيهم كل شوية ياخذون صينية بيها طلبات ويرجعون كأن شي طبيعي دخلت وحدة من البنات وكالت هاج لزمي اخذي هاي الصينية ووديها لليان كاعدة هناك اشرتلي على مكان لليان جانت كاعدة وية نفس الرجال هاي مو عبالك ليان صديقتي عبالك وحدة ثانية ما اعرفها بس كون اطلع اليوم منا بعد تحلم ارجع اشتغل وياها موقفها البايخ اليوم السوته بية واخرتني وهي تدري بية شيماء تنتظرني وملتزمة وياها بموعد صدك انقهرت منها جانت تضحك وية الرجال اخذتلها الصينية يمة شنو هاي الشكول ايعععع عمة حتى عمة هذا شلون يباوعلي جنت امشي واتلفت ورجلية وحدة تطك بالثانية وصلت لمزيهم وانطيتها الصينية لليان وشاورتها .. يالله ليان عفية لو مو الا انتي توصليني حتى لو اخوج ضحكت كالت صار تدللين من هاي العين قبل هاي العين اشرت عالميز شيلي وياج هذني الكلاصات شلتهم وجان بيهم سائل اصفر على برتقالي وماي والثالث عصير خطيتهم بالصينية واني كلبي كام يدك حيل من اصوات ضحك البنات الماصخة وساعتها عرفت هذا المكان حاليا مو يمت بأي صلة للكوفي احس جسمي كله عرك وصرت ادعي بكلبي ان تفوت الليل على خير نذر علية بعد ما ارجع اشوف ركعة وجه ليان اصلا واحذر البنات منها الادبسز جنت غركانة بأفكاري ما حسيت الا على واحد من هذولي الكاعدين اتعرضلي واتحارش بية تحرش جسدي هو مد ايده ولمسني واني اتخلبت وكلبت عليه الصينية هي والكلاصات على راسه وصرت اصرخ بهستيريا وجسمي كله يرجف .. ايا نكس يا قذر ياحيوان ياحقير يمة هو كام علية وعيونه تطفر شرار يريد يلزمني وكعد يسبني ويغلط .. لج بنت الكلب تكلبين على صينية الشرب اليوم ابوج احركه ركضت مثل المخبلة وهو اجة وراي شفت الحمامات صارت كدامي كبل رحت دخلت بيها وقفلت الباب على روحي واني اتوسل لرب العالمين يخلصني من هاي الشدة جنت ابجي واندعي كام يدك عالباب يريد يفلشه وصار .. اليوم احرك الملهى على راسج لج تعرفين انا منو اليوم اخليج تعضين ايديج الثنين من الندم ودفر الباب بكل قوة واني اصرخ وية مل ضربة للباب جنت مفزوعة ولو يذبحوني ما يلكون قطرة دم بية .. لج فتحي الباب ساقطة اجة يغمى علية من الخوف ربي سترك ربي دخيلك واكعة بشدة كرفصت على روحي وحطيت ايدية على اذاناتي بخوف همست بصوت واهن يمة لحكيلي بنتج واكعة بشدة لحظات واسمع صوت خشن يحجي وية الرجال الهد علية .. يكله راح احسبلك لتلاثة اذا ما وخرت من الباب راح تطلع منا زحف وصارت حجاية من هذا وحجاية من ذاك وما احس الا صار صياح مال رياجيل صارت هوسة واني ابجي واسمع ليان تكلي .. لج حيوانة غبية طلعي من الحمام من ساعة السودة الي جبتج بيها تشتغلين هنا شوية وخفت الهوسة وسمعت نفس الصوت الخشن الي بيه غضب الدنيا كلها حجة وية ليان .. شوفي ولج ليان هسة تاخذين هاي البنية وترجعينها منين ما جبتيها واذا اسمع بيج مجرد سمع جايبة هاي البنية بالذات عالملهى ابوج احركه زمخ بيها بصوت عالي .. ساااااااااامعة يتبع.... | ||||
|
| |
|
07-07-19, 10:38 PM
| #17 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| أساور_الفضة #الكاتبة_نهى_الحسون #البارت_الخامس_عشر كلمة خوف شوية علية بالنسبة للي اشعر بي بهاي اللحظة جنت دأمر بأصعب لحظات بحياتي عمري كله مشايفة هيج رهبة وخوف جنت وية كل نفس اخذه احس عبالك اسلت شعرة من بين اشواك ولازم احافظ عليها متنكطع جنت كاعدة بسيارة اخو ليان وليان كاعدة بصفه واني من كثر خوفي ما احس بشي بس دموعي احسها حفرت بخدي هلكد وجرحته اسمعها تغلط وتسب علية بس اني بغير عالم ما اريد اردها هسه اخاف تدك وياية دكة ناقصة ثانية وتعوفني بنص الشارع والدنيا ليل بس جنت اعظ ايدي واكول حل بية واستاهل لؤي.. اريد اعرف انتي منين جبتي هاي الكروة التعبانة طاح حظج ليان على هالسواية ادري غير تتفقين وياها احنا مو كلنا من تجيبين البنية تكونين واثقة منها ترة مالنا حيل المشاكل .. اهووو لتضل تحجي براسي ترة البية يكفيني .. لعد هسة احسن لج وكعتينا بيد هذا هسة شيخلصنا منة واحنا ذاك اليوم يالله كدرنا نفلت بروحنا العزيزة ليان.. شوف هذا مصدك روحه فلت من بين ايده .. الله يستر من الجاي اااااخ ما اعرف هذا منين طلعلي دارت وجهها علية .. وانتي ياغبية شبيج كلبتي الدنيا عيارة شنو شدعوة اسم الله مشايفة رجال يتغزل هسة انتي تردين تقنعيني ان كلش لهاي الدرجة عفيفة وما لامسج احد لو حضرتج ملاك طاهر نازل من السما هي جانت تحجي واني وكف شعر راسي من وراها هاي شدتحجي معقولة اني شورطني وشلون وصل بيا الحال اوكع بين ايدين ليان والله لو وحدة تسولفلي عن الصار بية وتكلي هذا موقفي كبل اتهمها بالغباء واكلها حل وابو زايد الكاعد يصير بيج .. شنو حضرتج صرتي خرسة وين هذا صوتج الي رج اركان الملهى رج مستحيل بعد احجي وياها واخلي الساني يطخ على السانها جان جسمي كله يرجف بس اريد توصلني للبيت ما اعرف شلون الله نجاني وطلعني من هاي الشدة يمكن هذا الرجال الله دزه الي رحمة احمدك واشكرك يارب على فضلك وحفظك الي جنت اتمنى اشوف هذا الانسان الي نقذني واتشكر منه عمري كله ماانسى فضله من بعد فضل رب العالمين الي سخره الي بس اني من طلعت من الحمام ورة فترة بعدما اتطمنت واتأكد ان محد واكفلي ورة الباب مشفته ولا شفت اي احد بعدين اجتني ليان الحقيرة وجهها اصفر تحجي وياي بصوت ناصي .. شوفي لج هسة ترحين تجيبين غراضج وهسة وتنكلعين نوديج لبيتكم حجيت واني اشهك احس صدري شكل بيه الهوى وصرت الفظ الكلام متقطع .. ما ممممم اااا عندي شي بس طلعيني منا ابوس ايدج كلشي ما اغيد منكم صادف طلعتني من باب ثاني مو نفس الباب الي اتعودنا عليه ندخل للكوفي منه امدة حظي بعدني غبية بعد كل الي شفته اسميه كوفي كلما اتذكر الموقف احس جسمي يقشعر من رهبة الموقف وصلتني ليان يم راس الفرع مال منطقتنا وصادف الساعة جانت ١٢ بالليل نزلت وسديت الباب حجت .. شوفي وسمعيني زين وركزي وياي اياني وياج اسمع طالع صوتج او حاجية بحرف عن الي صار صدكيني اشوه وجهج الحلو الي سلبتي بي عقول الرياجيل واخليج طول عمرج مشوهة جنت ابلع بريكي من ورة تهديدها هي ظلت بس تشوهين وجهي وتكمل السبحة على اساس اني ناقصة تشوه رحت مشيت. بالمنطقة واني ميتة قهر شلون استهانيت بحرص شيماء علية وخليت وحدة مثل ليان تستغلني وتضحك علية وصلت للبيت ودكيت الباب على كيف بأيدين ترجف بعدني دكيت اول دكة وبسرعة انفتح الباب مثل العصفة واول مشفت شيماء كدامي كبل صحت بصوت مكتوم رج اظلاع صدري رج احس حنجرتي اتجرحت من الصرخة وشمرت روحي بحضنها شيماء مفزوعة فوك ما هي جانت عايشة بخوف ونوب شافت هدى بهذا المنظر تصرخ وتبجي لمتها لصدرها وهي ترجف على رجفت اختها والافكارالسودة. قضت على اخر ذرة عقل عندها دخلتها الغرفة وكوة لازمة نفسها لا تصرخ اول ما دخلنا للغرفة فزت ضحى من النوم مصدومة تباوع بعيونها وحلكها مفتوح وعلامة السؤال والتعجب مرسومة على وجهها انتبهت لشيماء وهي تبلع بريكها وخايفة تسأل السؤال لزمتني من اكتافي هزتني وحجت بصوت حاد عصبي بس ناصي تخاف من سليمة لا تكعد من النوم .. لج احجي لي كولي شبيج شصاير بيج ليش تأخرتي ببيت ليان وليش دتبجين جنت ابجي واحجي صرت احجي لشيماء عن كلشي سويته من وراها .. جانت لازمتني من اكتافي بس بيوم سمعت بسالفتي دفعتني بعيد عنها مستنكرة وممصدكة الي كاعد احجي الهة وكعتني على ورة حجت بكل قهر .. عزة بعيني كون الله ماخذ عمري ولا شايفة هذا اليوم ولج ليش تكسرين ظهري بيج بيمن قصرت وياج جنت ابجي واتوسل.. لا عفية شومة لتدعين على نفسج اني سويت هشكل علمود اشتغل واكلج خية غوحي (روحي)واتزوجي وشوفي حياتج ولتخافين علينا احنا كبغنا ونكدغ (كبرنا ونكدر)نعتمد على نفسنا بس مع الاسف فشلت ما ادغي (ماادري) بالذياب كاعدة متغبصتلي (متربصتلي)بنص الطغيق (الطريق) منتضغة (منتضرة)اطلع حتى تنهش بلحمي سمعنا صوت سليمة تصيح على شيماء راحت عليها شيماء اسمعها تكول سليمة.. شنو شبيكم اصواتكم انتي وخواتج واصلة للشارع بتالي الليل شيماء.. ماكو شي بيبي بس هاي هدى اتخربطت علينا بطنها دتوجعها وتصيح من عندها .. هاي من كثر متاكل صار هشكل بيها مخروعة رجعت شيماء للغرفة تحجي وية نفسها مثل المخبلة سدت الباب تباوع علية بدها تاكلني بسنونها من القهر جرت حسرة وحجت .. والله حيرتني بزماني بهاي سوايتج كليلي هسة بالله من بعد الصار شلون افكر بعد اتزوج وادور وجهي واعوف وراي اخت رعنة غير مسؤلة عن تصرفاتها جانت تحجي وتحوم بالغرفة مثل الطير المذبوح متعرف شلون تبرد كلبها والله منظرشيماء خلاني اكره روحي الف مرة عالسويته بيها وصرت كل ساعة اعظ ايدي من الندم رجعت كملت كلامها .. بس تدرين شنو هو مو صوجج صوجي اني وثقت بيج وكلت هدى حزام ظهري وتربيتي وما ينخاف عليها بس مع الاسف طلعتي مو كفو ياخسارة تربيتي بيج وتعب عمري وياج ضيعته .. شومة والله بعد ما تنعاد التوبة والله صاغلي دغس من الصاغ (صارلي درس من الصار) .. ليش هو منو راح يخليج بعد تعتبين عتبة الباب دمعت عيونها .. لج ليش .. ليش... سويتي بية هشكل لج والله بعدني لحد هسة مكسورة من ورة ضربة مروة ليش تجين انتي وتجمليني فوك ضيمي قهر اريد اعرف منو بينا الغلط لطمت على حلكها وبقوة وكعدت تبجي منهارة كمزت من مكاني ورحت لزمت ايدها ابوسها .. لج شومة ابوس ايدج لتسوين هشكل بنفسج من الله ياخذني كون هذا كله صار وضحى بس تباوع بعيونها من شافت شيماء تبجي راحت يمها وحضنتها تسكتها وتباوع علية متعجبة عبالك دتباوع لمخلوق غريب عليها ورة فترة عم الهدوء المكان ضحى.. ما اعرف شحجي وياج وانتي البيج كافيج كومي دخلي سبحي شوفي شصاير بوجهج كله خراميش اتذكرت من جنت حابسة نفسي بالحمام بالكوفي جنت اخرط واضرب على وجهي من الخوف دخلت للحمام وسبحت وبعدها طلعت لكيت البيت سنطة دخلت للغرفة لكيتها ظلمة لكيت فراشي معزول بأخر الغرفة وصلتني الرسالة خواتي اخذوا مني موقف والصار اليوم كسر الثقة البيني وبين خواتي مستحيل يرجع يتصلح رحت حطيت راسي عالمخدة وقريت اية الكرسي واني احمد الله على لطفه بية ودفع المكروه عني محسيت على روحي من نمت لكن شوية وفزيت من نومي على صوت هوسة وصياح وسمعت نفس الصوت الخشن الي نقذني شمرت الغطة وكمت باوعت بالغرفة ملكيت شيماء وضحى رحت ركض طلعت من الغرفة اريد اشوف شصاير صارت بوجهي ليان باوعت عليها بكل حقد ودرت وجهي وحلفت دين قسم ما احجي وياها بعد عالسوته بية التفتت اريد اصيح لشيماء بس فجاءة اندعمت بصدر رجال منتبهت على شكله بس من صوته الخشن عرفته هذا نفسه الي خلصني منهم رجف جسمي انتبهت عليه رفع حبل مربوط من طرفه بيده وربط الطرف الثاني بيدي على معصمي وصار يمشي واني امشي وراه مجبورة لان مقيدني بالحبل وكل شوية التفت اشوف ليان والرجال الي تحارش بية يمشون وراي ويتختلون بالزواية جان الوضع غريب بس فجاءة صرخت مفزوعة من شفت الرجال الي اتحارش بية اجة بتجاهي الرجال الخشن لزمني من كتفي يهزني بقوة ويكلي .. هدى شبيج.. هدى لتخافين اني يمج. لحظات وانكلب صوت الرجال الخشن لصوت شيماء غمضت عيوني بخوف ورجعت فتحتهم لكيت نفسي نايمة بفراشي وشيماء فوك راسي وتكعد بية بخوف وتكول .. اسم الله الرحمن هدى شبيج .. هدى لتخافين اني يمج وهي تهز بية حتى تصحيني من نومي والكابوس الي اني بي وضحى تهمس يم راسي وتقرة ايات واني دموعي مغركة وجهي والمخدة شيماء .. هدى كعدي هذا كابوس لتخافين بعدما شربت كلاص الماي وهديت شوية رجعت نمت تعبانة من الخوف والقلق وظليت اتحرك بفراشي فترة وبعدها سمعت صوت اذان الفجر كمت من فراشي ورحت اتوضيت وصليت الفجر واني اشكر ربي نجاني من المصيبة .................................................. .............. ((مناجاة هدى ياربي اغفرلي ذنبي فأنني الوذ برحمتك مما قد بدر مني مالي الا دعائي ورجائي فتقبله اله الكون واعفو عني قد ظن اهلي بي خيرا وانني اردئ الناس ان لم ترض عني في هدوء فجر هذا اليوم ياربي اناجيك والناس نيام دموع الندم تغسل وجهي فهل ستغسل ذنبي عندك يالهي كيف ياربي تكون هكذا رحيما بنا ونحن جاحدين بنعمك ندعوك في شدائدنا ونحن نرتع في وكر الخطايا فتستجيب لدعائنا وتمد لنا يدك الكريمة بالعون والخلاص كيف للانسان ان يكون بهذا الجحود كله وانت الهنا ملكنا ومالكنا بهذه الرحمة كلها الشكر لك الهي مولاي وتقبل توبتي والعهد مني ياربي بانني منذ اليوم سأغطي شعري الاسود الذي كانوا به يتغزلوا واغطي الساق بثوب طويل للكعبين ينزل فضفاضا لايظهر محاسني ولا خصري الاهزل فتقبل مني واهديني بهديك يا رحمن يا ازل)) المناجاة بقلم #Hoda @ houda_s♥♥♥ .................................................. ........................... كمت شلت سجادتي ورحت للكنتو مال شيماء جانت حاطة بي الشالات الي اشترتهم سحبت واحد منهم وحطيته على راسي وصرت اباوع عليه بتمعن وهنا بهاي اللحظة قررت البس الحجاب كعدت يوم الصبح متأخرة ولكيت شيماء وضحى ديشتغلون اليوم جمعة والكل بالبيت بس بابا ماكو من البارحة ما رجع للبيت عادي متعودين صبحت على البنات جاوبتني بس ضحى وشيماء حتى مكلفت روحها تباوع بوجهي مر اليوم وكعدت اجمع بكتبي وملازمي وارتبهم من جديد حتى اكمل دراستي الي هملتها بذاك الاسبوع اثاري الكول مو مثل الفعل وشكد سهل بس من يصير وقت الجد والتنفيذ تبدي تظهر الامور على حقيقتها مرت الايام والتهيت بالدوام وشيماء بعدها زعلانة متحجي وياي كمت احبس نفسي بالغرفة وما اطلع منها الا علمود شي ضروري بالمدرسة دخلت للمدرسة والبنات يباوعون علية مسغربات شكلي اليوم داومت لابسة الشال الابيض اجتي فاطمة وشافتني واخذتني لحظنها فرحانة .. اليوم راح اكول لماما هدى اتحجبت والله راح تفرح .. عمة حتى عمة شبيكم هشكل تباوعون علية حسستوني عبالك يهودي اعتنق الدين الاسلامي درت وجهي دامشي .. يا .. يا.. شوف هذيج العوبة شلون تأشغ (تاشر) علية وتحجي وية صديقاتها فاطمة.. اي غير فرحانات بيج لابسة الحجاب .. اي مو اني هيفاء وهبي وانستغت (انسترت) على غفلة بالحجاب والله خجلتوني شبيكم سحقاً لكم .. خههههههه دمشي ام لسان لبستي الحجاب واللسان زي ما هو اخذت فاطمة على صفحة جنت مخبوصة على متندمة احجي لفاطمة صديقتي عالصار وعن دكة ليان وياي هي كعدت تحجي علية .. خرب يومج واني اكول ليان وين اشو مكامت تجي توكف يمنا متحاشيتنا اثاري هيج الحجي صايرة مصيبة بس دخيل الله انتي شكد عنودية ومتاخذين الحجي شكد حجيت وياج حتى نبح صوتي حتى اقنعج .. سكتي بعد ما يفيد العتب بعد صاغت (صارت) واخذتلي كغصة (كرصة) اذن معدلة .. تدرين بيومها اني اتصلت على اختج شيماء حتى احذرج من ليان لان جنت احجي وية صديقتنا هالة وبأثناء الحجي سألتني عليج وكالت هدى شعندها وية ليان اشو هواي تمشي وياها هاي الايام .. خلي تدير بالها منها ترة ليان وحدة مو راحة كلتلها عادي صديقتها مجبت سيرة الشغل والكوفي لان ادري بيج متردين احد يعرف بالموضوع خاف توصل السالفة لأختج شيماء وتبطلج .. اي عفية زين تسوين .. وبنفس الوكت كلت اتصل بيج احذرج بس جنت متطمنة عليج لان انتي جنتي كل يوم تداومين بالكوفي وترجعين بالوقت المحدد للبيت وماكو شي يستدعي للخوف مجنت اتخيل ان ليان تسوي بيج دكة ناقصة .. لج هو اذا اني الغبية صاحبة الشأن عبرت علية هم ما انتبهت ولا شكيت بليان او بالكوفي مكان مو زين لان اني عمري وحياتي مشايفة ولا سامعة شلون يصير شكل الملهى لذلك كدرت ليان تستغل جهلي بعدم معرفتي بنوع المكان الي اشتغل بي وضحكت علية جنا نحجي واجتي هالة سلمت علينا وكعدت يمنا غيرنا الموضوع اني وفاطمة وكعدنا نسولف بغير امور وهالة الي جانت مبتعدة عنا طول السنة ورجعت تحجي ويانا عن حياتها طول هاي المدة هالة.. تدرون بنات اني ليش انسحبت منكم هدى.. اي اعرف لان اجتي بنت عمج رهف واخذتج والتهيتي بيها .. لا مو علمود رهف اني ابتعدت هاي مو سبب كافي يخليني ابتعد عن صديقاتي .. لعد شكو .. تتذكرون من اتعاركت اني وليان ببداية الدوام .. اي نتذكر وداعتج لحد هذا يومي الفضول ماكلني ردت اعرف شصاير بالرغم ليان جانت صديقتنا بس ولا يوم ذكرت الموضوع او جابت سيرة عنه .. طبعا شي اكيد متحجيلكم وعلى ياصخام وجه تسولف على دكتها الناقصة بية لو على طياح حظ اخوها النكس وكعدت تحجيلنا هالة عن المشكلة الصارت كان سببها .. ليان اخذت كل صوري من نقالي وناطتها لاخوها الشفية والاستاذ كعد يهددني بصوري .. عزة بعينهم الله ياخذهم .. طلبوا مني فلوس لان يعرفون بأبوي معروف وعنده خير من الله اني جنت كلش خايفة واجيت اموت من الخوف بوكتها بس جان خوفي على صوري مو اكبر من خوفي امد ايدي على فلوس اهلي وانطي لليان واخواها حتى يسكتون كعدت افكر بحل ثاني صادف جان قاسم اخوي راجع من الخارج بهاي الفترة وشفت نفسي ماعندي غير الجيء لقاسم علية وعلى اعدائي اني قررت راح احجيله موقفي واني وحظي وشيريد يصير خلي يصير اهم شي يخلصني من ليان واخوها صار لازم اختار بين نارين بس نار قاسم اهون علية بهواي عالاقل ابقى اخته ومستحيل يأذيني وراح يكدر يساعدني منهم لكن نار ليان ما بيها رحمة تاكل الاخضر واليابس اليوم طلبوا مني فلوس باجر الله العالم شنو يطلبون مني مو بعيد عليهم يطلبون انطيهم نفسي وامكنهم على اهلي وبيومها رحت حجيت لقاسم هالة تحجي واني فاتحة حلكي وعيوني على وسعهم هدى.. ياااااااا عزة والله عبالك داشاهد فلم اكشن (بطولة قاسموف واخته البقة) كملي .. كملي اتحفينا .. لج جان كاعد بالغرفة ودخلت عليه بدون مقدمات كبل كلتله كلشي وانطيته البلوة مرة وحدة بوجهه هدى .. ولكم كلبي غاح يطلع من مكانه اي احجي .. وشسوة .. ولكم انا كملت كلامي منا يمة وهو كام على حيله وجهه صار مثل الوحشي الي كتل الحمزة من ورة الدخنة ظلم وجهه ما ينحزر بشنو كاعد يفكر جرني من زندي وسحب من ايدي نقالي وعاط بية بصوت عالي وحجة من بين سنونه كال.. الج دقيقتين ترحين تلبسين عباتج وتنزلين كدامي تنتظريني بالباب بدون ما اهلي يحسون عليج هدى.. يمة عزة العزاج شي اكيد غاح يذبج وتموتين هالة .. عمة حتى عمة لعد شلون اني كاعدة كدامج جاي احجي المقتل رمشت بوجهها من زود الخوف .. تفضلي كملي حضغة المغحومة (حضرة المرحومة) هالة عود بعدين ذكغيني اقغة على غوحج سوغة الفاتحة (ذكريني اقرة على روحج سورة الفاتحة) ابتسمت هالة وكملت كلامها .. رحت اركض اجيب عباتي ووجهي مابي قطرة دم من الخوف وصرت اتخيل روحي شلون راح يدفني واني عايشة او شلون راح يذبحني وصرت اخطط بعقلي الصغير الفطير اكتب رسالة لأهلي اكللهم بيها اني والله شريفة من زود الثول عقلي زومل وفكرت شلون منين اجيب ورقة وقلم واكتلهم كلت اي اكتب عالكاع بدمي من يذبحني اخوي اكتب (اني شريفة ) قبل لا اموت .. اي بعد وياج بطغيقج غسمي(بطريقج رسمي) قلب الحب المكسوغ (المكسور)وحطي بي سهم .. امداج عوبة ناصبة علية .. متكليلي انتي شتحسين انتي وهاي افكاغج (افكارج) .. ترة والله حقي اسوي هشكل لان متعرفين شنو معنى يكون عندج اخو مثل قاسم قافل وعنده الحياة لو ابيض لو اسود يمة هو اني صعدت وياه بالسيارة وجان ياخذني لمكان مثل الهيمه بس السماء والطارق كلشي ما بيها ولو يذبحني ويدفني هناك محد راح يعرف قاسم زمخ بية بصوت خشن .. نزلي من السيارة اتوسلت بي واني ابجي .. عفية قاسم شراح تسوي بية الله يخليك صدكني والله مظلومة بصوت عالي .. كلت نزلي نزلت من السيارة واني اتعثر والدموع عشرة عشرة هو هم نزل وكف كدامي انطاني راشدي فر راسي فر انتبهت على ترجيتي وكعت بالكاع من الخوف منطقت ولاحرف بس احس خدي كام يطلع منه نار كال بصوت يرعد .. هذا حتى تتذكرين مرة الثانية ما تستهانين بشرفج وبسترج جنت لازمة خدي واباوع عليه بخوف ومنتظرة الضربة الثانية .. زين ليش اخذج لهذا المكان حتى يحجي وياي ويزفني براحته بعيد عن امي وابوي ما يريد احد من اهلي يعرف بالموضوع مد نقالي وحجة .. هاج لزمي هسة تتصلين عالوحل بنت العار ليان وتكليلها دبرت الفلوس وتنطينها هذا العنوان ال........ تروح مناك تاخذه واذا سألتج شمعنا هذا المكان جاوبيها ما اكدر علمود اهلي ما يحسون علية ويشكون بية اتصلت بيها وسويت كل الي كل عليه قاسم لحظات ودك نقال قاسم وحجة وية المتصل .. كللهم اخروهم علما اجي لحظات وانا يمكم باوعلي وبدون ميحجي اشرلي اصعد بالسيارة وانا رحت ركض بدون نفس صعدت حابسة انفاسي من الخوف والترقب والمشكلة ما اعرف اخوي بشنو يفكر عشر دقايق وجان بابا يدك يسأل قاسم عني كله اخذتها وياي اشتريها شغلات من السوبر ماركت سمعت ابوي يكله شعجب تريد تموت وهو كوة على اعصابه يجاوبه سد النقال من ابوي ووصلنا على مكان مثل الكراج بي سكراب مال سيارات كلي ابقي بالسيارة متنزلين سد السيارة وقفلها علية ساعة انا محبوسة بالسيارة حارة سبحت بالعرك من الخوف والحر والترقب يعني لو كاتلني وماسح الكاع بية وماخذني سحل للبيت ولا هاي الحبسة الي عشتها بخوف قاسم دمر اعصابي بسوايته اجاني قاسم فتح باب السيارة وايديه كلها دم اتسعت عيوني وشهكت وحطيت ايدي على حلكي من الخوف سحب كلينكس من العلبة وكعد يمسح بيده بدون ميحجي اي كلمة شغل السيارة ومشينا شوية ووكفنا يوم سوبر ماركت نزل جاب حلويات وجباسة وصابون وشامبو مسويها هوسة ههههههه ولكم خطية حتى حفاظات اولويز جايب بالعلاكة مبين عليه جايبهم كفيان شر حتى ابوي ميعرف بالموضوع بس يوم ثاني من داومت ليان هجمت علية واتعاركت وياي لان لكو اخوها مكسر تكسر وشامرينه بالزبل الي قريبة على بيتهم تكلي اليوم الا احرك بيتكم على راسكم اليوم الا افضحج وكعدنا تنعارك ووصلت السالفة للمديرة بس ليان محجت بالموصوع نفسه كالت للمديرة .. ست هاي هالة تحجي علية وتطعني بشرفي وصدك اني من دخلت للادارة جنت اسب واغلط على ليان المديرة دارت وجهها علية وكالت انطينا رقم اهلج خلي نتصل عليهم ويجون يسون الكم حل حتى ليان اخذت من عندها رقم امها ترة هي صايرة تخوف صرنا نخاف نعاقب طالبة منكم اذا ما تطلع النة عشيرتها كلها هدادة هاي اذا ما حركو المدرسة على روسنا وعلى طاري الحرك اجة قاسم اخوي يتوعد لليان وكللهم اذا اسمع بليان متعرضة لاختي ورب الكعبة احرك المدرسة على روسكم هدى .. ههههههههههههههههههههههههه ههه هههههه اخ يمة بطني هالة وفاطمة يباوعون مستغربات .. شكو شبيج .. هههه والله انتي اخوج قاسم فلم ذكغني (ذكرني)هذا موقفه بيج هالة .. بية اني !؟؟ ..هههه تتذكرين من جنا صفار حان يجي يهددني لان ما العبج وياي ههههه ويتحلف بية ويكلي اذا متلعبيها اسوي ظفايرج حبل مال خروف هالة .. ههههههههههههههه لج اي اتذكر وانتي من الخوف تكعدين تتلوكين لقاسم بيك فاطمة.. هذولي شنو ماخذين الناس بالصياح .. اي احسن زين يسوون بليان خلي تستاهل بس اني خطية جنت طفلة بريئة ما استاهل هالة.. تدرون قاسم شنو يكول على ابو ليان .. شبي ابوها .. يكول ابوها الزين عنده ملهى بس الشريف طول اليوم كدام الناس يكول عليه كوفي بس بذاك اليوم عرفت بالصدفة بتالي الليل تنكلب الموازين اثاري مسوين الكوفي علمود واجهة يغطون بيها على الملهى حتى ما يلفتون الانتباه هالة تحجي واني كلبي انقبض اتذكرت مصيبتي حجيت بكلبي وين جنتي ياهالة ستوج جايتني تحجين فاطمة.. هو احنا كطعنا علاقتنا بيها لان سمعنا هيج شي .. احسن زين تسوون طلعنا من المدرسة ونزلت من الخط براس الفرع واجاني علاوي يركض يباوع علية لابسة حجاب ضحك وطلعت سنونه العراض جنه ارتب .. همزين لبستي حجاب وضميتي شعرج الحلو بس غيري لون الشال لان صرتي تشبهين حجية فطيمة .. عزة بعنيك علاوي انت كاعد تمدحني لو تذمني رفعت راسي وشفت سيارة ليث واكفة يم بابنا شيماء بالمستشفى جنت شايلة هم ضحى الي دتذبل كدام عيوني احس بيها مثل المحبوسة بسجن وتدور عالحرية جنت افكر بيها شلون بيها اذا اتزوجت وبقت لوحدها بالبيت وية سليمة منو يردع سليمة عنها وجان هذا اكبر همي الى ان اجتني هدى بمصيبة شيبت راسي وخلتني ليلي ما انامه افكربالمصيبة بحيث كعدت يوم ثاني الصبح راسي هالكبرة من الالم وجهزت نفسي حتى اطلع من المستشفى ليث ينتظرني برة ليث من ثاني يوم خطوبتنا صار كل يوم يجي هو يوصلني ميقبل اركب عبرية يكلي انسي جنت اعدل بشعري واتذكرت هدى اليوم الصبح اتفاجئت بيها طلعت للخط لابسة شال ابيض وهذا اول تغيير الاحظه بشخصية هدى طلعت من المستشفى ورفعت راسي ادور على ليث شفته نزل من سيارته واجة علية يمة كلبي كمز من مكانه جان لابس زي رسمي ونظارات شمسية عليه كشخة تهوس اباوع علية اجة بتجاهي وهو يبتسم ياربي معقولة هذا الانسان ملكي صرت حتى اخاف عليه من العين ليث.. انا مو كلت تنتظريني متطلعين ضربت كصتي بكف ايدي .. يبووو والله نسيت من ورة مصيبة هدى نسيت حتى اسمي رجع وجهي انبهت لونه من اتذكرت الصار مشيت وياه لسيارته وبالطريق التفت يباوع علية .. شيماء جهزتي نفسج؟؟ جاوبته.. اممم دار وجهه وعيونه على شفايفي .. ترة مو وكتج تدلعين على ليث الله وكيلج واصلة حدها ابتسمت .. شكو هسة اني شنو كلت .. هو انتي من غير متكولين كلج على بعضج خطر على سلامة عقلي كلما توكع عيني عليج يظل عقلي يفكر بتجاه واحد اريد اخذج كبل بين ايديه واتفنن ب.... قطع كلامه وماكمل صرت بنص هدومي من الخجل عزة هذا شنو ياربي .. اهوووو اسكت احسنلي لان لو اكمل كلامي تلكيني داير السيارة وماخذج لشقتنا اشوف شغلي وياج صرت اهفي على وجهي من الحرارة .. الله عليك كافي ارحمني ترة مو تشوف عمري28 سنة ترة والله بعدني جديدة على هذا الكلام .. هو انا شنو المخبلني بس لتخافين مبقى شي وادخلج دورة واعلمج كلشي بيدي فتحت عيوني من كلامه وحطيت ايدي على حلكي وانا اضحك على سوالفه .. والله انت مو معقول .. اي صدك شيماء اتذكرت جهزي نفسج العصر حتى اجي اخذج نكمل اثاث الشقة .. بس اريد اعرف المن هاي العجلة يعني انت تريد زواجنا بنهاية الشهر ومبقى شي ويخلص الشهر واني بعدني ممجهزة نفسي .. هاي الامور كلها سهلة تكدرين تكملين جهازج بعد الزواج مو الا تكملينه هسة كله متدرين شكد منتظر هذا اليوم حتى انجمع بيج بيمن احلفلج عمري كله ما ملكت كلبي مرة ولا اتمنيت مرية تصير من نصيبي الا من شفتج ابتسمت وكلبي بنبض وية كل كلمة يكولها احمدك واشكرك يارب على نعمة وجود ليث بحياتي وصلنا للبيت وطلبت منه ينزل وكلي عندي شغل مستعجل اجيت بس اوصلج جنا نحجي وصلت هدى ستوها واصلة من المدرسة باوع عليها وحجة.. هاي اختج ام السان شو لابسة حجاب عكس اختها الجبيرة .. اي اليوم اول يوم الها للحجاب باوعت علينا وابتسمت مترددة تسلم علينا لان اني بعدني زعلانة عليها صاح عليها ليث .. هدهد تعالي اجتي وسلمت علية طلع من جيبه فلوس ومد ايده .. هاج عمو اخذي هذني مني وروحي اشتريلج جبس وحلويات كوة لزمت روحي لا اضحك على شكل هدى الي لمت شفايفها وعكدت الحواجب وحجت .. خلي فلوسك عندك ما اغيدهم ( اريدهم ) انعم الله عليك مال شنو تنطيني فلوس وتكلي عمو شنو حضغتك هاز كاغوكي (كاروكي) تغة(ترة) اني عمغي ١٨سنة غمزت لليث اتسعت عيونه وهو يضحك على لسانها ليث .. حلفي والله ممبين عليج عبالي بصف الاول ابتدائي شهكت ولطمت على صدرها .. عمي جيب جيب فلوسك لو باقية على عمو وجبس وحلويات هواي احسنلي اخذت الفلوس منه ودخلت للبيت تدردم .. صف اول بعينك ابو عيون ليث بصوت عالي .. ترة سمعتج خطية كمزت من مكانها وطكتها ركضة لداخل البيت .. هههه خرب يومك ليث والله لعب بأعصابها شكلك عرفت نقطة ضعف هدى سلمت عليه ودخلت للبيت واكيت ضحى تبجي وسليمة تحجي عليها بس اتفاجئت بضحى من صاحت بصوت عالي بوجه سليمة ضحى.. والله العظيم ما ابقالج بالبيت بعد لحظة وحدة وهسة اجتي شيماء وراح اخليها تتصل على عمو امجد شيماء.. شكو شبيج سليمة.. ما عليج بيها اتخبلت .. لا ما اتخبلت دارت وجهها على شيماء وكملت كلامها .. شيماء اليوم بيبيتج دزت عالولد كرايبها استاذ حسن ودخلته للبيت وهو كعد يمها يسولف ويحجي وعيونه النكسة علية سألها يكللها شتنظرون ما تنطونياها اسمعها تكله .. لتخاف هي الك بس هاي عيارة نسوان وتتدلع وتبيع ثكل براسك وهو الاحول يكللها اموت عالثكيل اريد افتهم وين تريد توصل من دخلته للبيت سليمة.. ولج بنت الكلب تتبلين علية سمعي ولج هذا بيني وادخل الي يعجبي عسى ما اجيب كرايبي كلهم واكعدهم بالبيت انتوا ما لكم حق تفتحون حلكم وتحجون شيماء.. هذا الحجي يصير اذا جنتي لوحدج عايشة بالبيت مو وياج بنية شابة وتدخلين رجال عليها ترة السالفة ما ينسكت عنها دخلت ضحى للغرفة بس تبجي رحت وراها ابدل ملابسي ضحى.. والله مليت من هالعيشة شوكت الله ياخذ عمري وارتاح .. استغفري ربج شنو هذا الحجي شبيج ضحى انا مو كلت راح اتصل على عمو امجد وهو راح يسويلها حل لتنقهرين .. شيماء انتو متدرون هي شتسوي بغيابكم .. لج اكعد من النوم اتفاجيء الكاه بوجهي اروح اسألها هذا شعنده بالبيت من الصبح تكلي دزيت عليه حتى يسويلي السطح قبل لا تمطر الدنيا والحيوان عيونه نكسة لج صرت حتى ما اامن على نفسي من ادخل للحمام شيماء جاوبتها بقهر بلا حول ولا قوة ..حسبي الله ونعم الوكيل شبيدي عليج هي مرة متخاف الله شلون اروح اموتها يعني ضحى دنكت راسها بخذلان .. لا ما اريدج تموتينها انتي الي عليج سويتيه خلاص لهنا وكافي بدت عطلة المراجعة ومبقى بس كم يوم على الزواج وشيماء غركت بالتجهيزات اخذت اجازة من المستشفى حتى تتفرغ تكمل شغلاتها صار كل يوم يجي العاشق الولهان استاذ ليث يكعدها من الصبح احس ان ليث اجانة هدية من رب العالمين جان كلما يجينا للبيت لازم يكون محمل بالغراض لشيماء وكل مرة يجيب غرض لشيماء لازم يجيب الي ولضحى مثله جنا نطير من الفرح مو عملود الهدية لا بس صرت احس شنو معنا يصير عندج اخ وجان كلما يشوفني .. يكلي اريدج انتي تربين جهالي اتني المسؤلة عنهم اريدهم مثلج رفعت ياختي .. احم احم تسلم والله خجلتني .. ما اوصيج اريدهم مثلج وكح وجنانوة بس يمشكلون فتحت حلكي مصدومة ويغوغون .. اكول ابو الشباب انت تمدحني لو دتقصفني مو طيغتها للجبهة بهذا كلامك عمي خلي جهالك على كلبك خليهم يطلعون على ابوهم الحباب طبعاً هذا الصار كله وشيماء بعدها زعلانة علية جنت دائما احاول اروح اعتذرلها وهي تتهرب مني بحجة الشغل ما انطتني فرصة حتى اعتذرلها صرت احبس نفسي بالغرفة بحجة الدراسة اباوع لحياتي اني وخواتي كل وحدة. بينا صارت بوادي اني دفنت روحي بالامتحانات وشيماء التهت بعرسها وبعد كم يوم راح تعقد بالمحكمة اما ضحى اااااااخ يا ضحى جانت شهد مثل كل مرة متعودة تجي تزور ضحى وما بطلت من النك مالتها اتعودت عليها وعلى افلامها وحجيها بس الي صدمني وصدم الكل كلام اختي ضحى كالت لشهد .. شهد اني فكرت بموضوع اخوج واتخذت قراري شهد سكتت جامدة تباوع على ضحى وعلية وسألتها بترقب.. وشنو جوابج ضحى.. بلغي اخوج وكليله ضحى وافقت عالزواج منك شهكت مصدومة .. لج ضحى انتي شكاعد تحجين شهد بفرحة.. كللللللوووووش خلي اتصل على سيف وابشره واتصل على اهلي افرحهم بالخبر الحلو احس اتفرهدت من سمعت كلام شهد .. هوووب اوكفي انتي لحظة لاتتصلين ترة ضحى مو بعقلها شهد.. شنو مو بعقلها قابل اتخبلت اصلا اكبر مخبلة اذا ترفض واحد مثل اخوي حلال ومال وشكل وخير من الله شنو عاجبتج عيشتها بهذا الوضع التعبان جانت تحجي وتأشر عالبيت وتبقى تخدمكم ظليت فاتحة حلكي شحجي وشكول وشهد عسكرت ببيتنا بحيث ما كدرت استفرد بضحى واحجي وياها شلون تتخذ هيج قرار وتنسى وعدها لصهيب جنت مشغولة ادرس الامتحان للمغرب وطلعت شهد وجريت نفس بس اخلص هاي الملزمة اروح لست ضحاوي جان البيت هوسة ناس داخلة . وناس طالعة من شهد ورباب وام فرزدق هم اجتي علمود تشوف شيماء شنو تحتاج لعرسها كعدت شوية وية البنات بعدها والكل رجع لبيته الله يا لحظات من الصمت الهادي ء صار البيت سكون بقت بس شيماء وضحى بالمطبخ اسمع اصواتهم وسليمة وابوي طالعين سمعت صوت الباب اندك سنعت شيماء تكول لضحى اني راح افتح رجعت اكمل قراءة بملل وكعدت احسب بعد كم يوم باقي على الامتحانات امتحان باقيلي واخلص وبهاي الاثناء كمزت من مكاني على صوت صرخة شيماء المفزوعة شيماء.. لااااااااااااا يالله دخيلك مستحيل يتبع | ||||
|
| |
|
07-07-19, 10:40 PM
| #18 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #البارت_السادس_عشر #الكاتبة_نهى حياتنا كالسفينة في البحر تتلاعب بنا الامواج فتارة ترمينا على شواطيء الامل وتارة اخرى تسحبنا الى اعماق البحر لكي نخوض الصعاب و نحيا من جديد ونعود من جديد نرسو بسفينتنا على ميناء الامان ♥🍀♥🍀♥🍀♥🍀 شيماء اخذت اجازة من الشغل لان ماظل شي على زواجي وليث الله يحفظه مستعجل عالزواج دخول ليث لحياتي قلبلي كل موازيني وغير كلشي احس بحياتي قبله كانت مثل الصحراء وبوجوده صرت مثل بستان يزهر جنني بكلام الشوق والغزل اتعلمت على حبه انام واصبح على صوته الدافي بالنقال احس بحبه بعيونه من ينظر لي اشكد يسعدني حرصه علية من يحميني شعور مفتقدته لكيته وياه جنت اتمنى علاقته وية بابا تتحسن بس مع الاسف بابا يتخبل من ليث وليث يضوج من بابا يكول .. ميستاهل يكون عنده هيج بنات .. ليش تحجي هيج عليه .. لان العنده بنات مثلكم جواهر لازم يكون اب كفو ويحرص عليهن مو يتركهن ويخليهن عرضة للمصايب والله انتوا لوما حفظ الله واخلاقكم كان الله يعلم شنو مصيركم من ورة ابوكم وتصرفاته جنت اسكت ما اكدر احجي لان مواقف ابوي تفشل مخجلة اخر مرة اجاني ليث شايط من القهر يكلي .. جابوا ابوج وية مجموعة رياجيل ونسوان مشبوهات القوا عليهم القبض ببيت دعارة بيومها اتذكرصرت بنص هدومي من الفشلة والاحراج .. هاي شوكت .. البارحة والله العظيم من يمي استحيت اكول عنه هذا عمي ابو مرتي جان هذا الموقف اول حجرة عثرة تعكر صفوة حياتنا اني وليث بس الحلو بليث اي اشكال يصير بيني وبينه يوم ثاني يفتح صفحة جديدة وما يرجع مرة ثانية يذكره ويحجي وياي كأن شيئا لم يكن وهذا الشي الي خلاني اتغاضى عن موضوع بابا واكدر اتجاوزه بديت اجهز بهاي الفترة بشغلات بيتي وحدة وحدة جنت اهتم بأدق التفاصيل جانت احلى ايام اعيشها بحياتي من نطلع اني وليث ونجهز لبيتنا كل قطعة اشتريناها اني وليث جانت النا بيها ذكرى وموقف انتبهت اعلى شي .. اني وليث نشترك بنفس الاذواق وشخصيتنا بيها هواي اشياء مشتركة فعلاً ليث نصفي الثاني الي يكملني صرت يوم عن يوم اتعلق بيه وبكلامه وشخصيته وعذوبة غزله المتلهف لحضني .... اليوم ليث اجة علية من الصبح وخلصنا اليوم كله نشتري اغراض للجهاز بس انتبهت على ليث باله مشغول وكل شوية يدك نقاله وهو يتنرفز انتبهت من صفنتي على صوته ليث .. الي ماخذ عقلج يتهنى بي شنو وين صافن الحلو باوعت عليه وابتسمت .. بالعافية عليك لان انت شاغل الفكر شفت شلون مدوخني صرت حتى وانت يمي افكر بيك جنا كاعدين بالسيارة .. هنيالي والله لزم ايدي .. اليوم الحمدلله خلصنا كلشي وبعد ماظل ناقص شي ان شاءالله .. اي بس والله هلكت احس برجلية خيوط صارو من ورة الفرة والدوارة بالمحلات .. يالله هانت ماضل شي واجيبج ببيتي وانا بيدي ادلك رجليج واعوضج عالتعب الشفتيه انتي بس انطينياها لرجلج الحلوة ومعليج اويلي شنو متحسرعليهن واريد افركهم بيدي ابتسمت خجلانه وبس اريده يسكت ميكمل.. اهووو انفتح علينا ليث .. هسة انا شحجيت وانتي انكلبتي كلوب احمر لعد لو اطبق الحجي بالفعل شتسوين .. ههههههه لا عفية كافي الله يخليك خليها بوكتها انصدم احسن .. لا انا يمج ما اخليج تنصدمين جنا نحجي ودك نقاله انخبص من شاف رقم المتصل بس شكله مضطر لازم يجاوب رد على الاتصال وظل يسب ويغلط بحيث ماانطه مجال للمتصل يحجي وسده باوعت عليه معصب وحجيت واني مستغربة حالته .. حبيبي شبيك ضايج التفت علية وعيونه بيهم كلام هواي بس ماكال منه اي كلمة لزم ايدي رفعها لشفايفه وباس بطن ايدي بحنية .. لج شومة تصدكين همي كله ينزاح من اسمع صوتج الدافي والله مرات احسد خواتج وابوج من اشوف حرصج عليهم توصل بية حتى اغار منهم لان ماخذين مساحة من كلبج ومشاركيني بيج ابتسم على كلامه ليث طفل بجسد رجل كبير غير الموضوع وكلي .. انا هسة راح ارجعج للبيت عندي شغل مهم .. براحتك احنا تقريباً خلصنا كلشي وصلني للبيت دخل وياي بالطارمة الصغيرة مال بيت جدي باوع منا ومنا حتى يتأكد احنا لوحدنا سحبني لحضنه لمني بين ايديه حضني حيل وعصرني بحيث حسيت عبالك يريد يدخلني جوة ظلوعه شمني من ركبتي .. اااااااخ شوكت ادفن روحي بهذا الحضن همست واني دايخة _ ماظل شي وننجمع _ ان شاء الله.. اتنهد بصوت مسموع وباوع علية _ يالله انا رايح سلم علية وراح دخلت للبيت لكيت شهد وضحى ديسولفون بينهم اتعودت على وجود صديقة ضحى ببيتنا انعم الله عليها من تجي وتغير جو على ضحاوي دورت بعيوني ادور على بنتي الجنية المختفية دخلت للغرفة لكيتها دتدرس بس شافتني رفعت راسها وسلمت علية بكل لهفة بس اني جاوبتها ببرود من غير ما اباوع عليها وصرت ما اسألها وين وصلت بدراستها ادري بيها تتخبل من اعاملها بهاي الطريقة من جانت صغير وتسوي الخطأ وازعل عليها تكوم تكتل روحها من البجي حتى اسامحها ومتنام ولا يهدالها بال الا من تنام بحضني وهسة نفس الحالة بس بدون متبجي بس دموعها بينت من خلال تصرفاتها ونظراتها طلعت من الغرفة وانشغلت اجتي رباب صديقتي وام فرزدق يساعدوني وراويتهم جهازي كل قطعة بجهازي اني الي اختاريتها ونسقتها وحضرت كلشي يخص بيتي الله شكد حلوة كلمة بيتي من الفظها احس شي يدغدغ كلبي وصرت متلهفة اكثر من ليث لزواجنا خلص يومي بين التجهيز والبنات صار وقت المغرب والكل راحوا وبقيت بس اني وضحى وهدى لوحدنا جنت واكفة بالمطبخ يم ضحى داشرب جاي وهي جانت تغسل مواعين وتحجيلي عن موضوع شهد صديقتها واخوها .. ضحى معقولة انتي انطيتي موافقتج بدون ما تسأليني زين على الاقل انطينا فرصة نسأل عن الولد مو كبل رحتي وافقتي عليه على شنو مستعجلة وانتي بعدج صغيرة .. شيماء انتي راح تتزوجين واني ما اكدر اتخيل نفسي ابقى لوحدي وية سليمة والله طكت روحي من خنكة البيت بعدين اني مو كلش صغيرة عمري 20 سنه يعني وقت زواج عادي وبيت اهل شهد ما قاصرين والف وحدة تتمنى تصير جنتهم واني اشوف حرمات اضيع من بين ايدية هيج فرصة شعندي وليش ارفض والحمدلله جتني هيج قسمة احسن ماابقى وسليمة تزوجني واحد من كرايبها التحف .. اي بس......... قطع كلامنا صوت الباب يندك ضحى نشفت ايديها تريد تطلع .. اوكفي لحظة اني رايحة افتح الباب حطيت كوب الجاي عالسنك رحت فتحت الباب وصارت بوجهي شابة حلوة ووياهة ثلاثة جهال ولدين وبنية جانت لابسة جبة اسلامية وحجاب ابتسمت من شافتني .. العفو شيماء موجودة .. اي نعم اني شيماء اتفضلي باوعت علية من فوك ليجوة اكلتني اكل بعيونها .. اكدر ادخل احجي وياج لان الموضوع الي اريد احجي كلش مهم مو مال اوكف عالباب فتحت الباب على وسعه ومديت ايدي كدام حتى تدخل .. اتفضلي حبيبتي .. اتفضلي .. اشكرج ويزيد فضلج جانت تحجي وياي مرتبكة ومتوترة جهالها يخبلون واحد مبين عليه عمر اول ابتدائي والبنية مبين عليها خمسة او اربعة اما الولد الثاني مبين عليه سنتين جانوا كلش حلوين دخلتها للمطبخ وكعدت هي والجهال عالكرويتة الخشب الطويلة الي حاطتها بيبي بالمطبخ ضحى تباوع عليهم وعلى شيماء وبعيونها سؤال منو هذولي كلبت شفتي بحركة ما اعرفهم جان مبين عليها كلش محرجة وتريد تحجي ابتسمت البنية ابتسامه مبهوتة .. احم اني والله ما اعرف منين ابدي .. اتفضلي احجي حبيبتي ام ... .. ام محمد .. والنعم بيج ام محمد اتفضلي اسمعج بشنو اكدر اساعدج ما اعرف ليش كسرت خاطري هاي البنية هي وجهالها شكلها مبين تحتاج مساعدة بس مو مساعدة مالية لا الظاهر مساعدة معنوية ام محمد .. خية اني اجيتج وكلي امل ان تساعديني لان مشكلتي حلها يمج وبيدج واني سألت عنج بالمستشفى وكلها تحمد بيج وبأخلاقج .. تسلمين حبيبتي ان شاء الله اذا اكدر ما راح اقصر .. اي انتي تكدرين خلي احجيلج سالفتي وانتي من بعدها قرري تساعديني لولا .. احجي اسمعج .. اني ام وعندي تلاث جهال اهلي ببغداد بس متزوجة بالبصرة وكاعدة وية عيالي الحمدلله ورجلي ما مقصر علية بأي شي هو يداوم ببغداد بس مع الاسف بأخر فترة ابو بيتي اتغير علية وعلى جهاله يعني من يجينا بالاجازات احسه متغير يعني كأي زوجة اني جان عندي احساس ان زوجي عنده شي ضامه عني وما يريدني اعرفه قبل اسبوع بالصدفة عرفت هو عنده علاقة وية ممرضة ومتخبل عليها اتخبلت من عرفت بي عنده علاقة من وراي فاتحته بالموضوع اتهرب مني ومجاوبني ولابرد كلبي بكلمة الي عرفته بعدين من امه هو قبل 3 اشهر اجة للبصرة وطلب من اهله يخطبوله وبوكتها صارت عركة شكدها وشكبرها بيومها عاف البيت وطلع وابوه واخوانه لعبو بيه طوبة انا هذا الحجي كله صار وماعندي علم بالموضوع شفتهم تعاركوا سالتهم ليش شنو السبب محد جاوبني وراها رجع اتصالح وية ابوه واخوانه وهمة وافقوا يخطبوله البنية بس امه وخواته رفضوا يحضرون وياه خطوبة وكالوله احنا ما نتشرف بيها وكلها تعرف بالسالفة الا اني مثل الاطرش بالزفة ليش ما ذاك اليوم بالصدفة نزل يمنا مجاز وترك نقاله بيد محمد ابني يلعب بيه اجاني حمودي وانطاني النقال حتى اشحنه اخذته منه. وصرت مثل كل مرة استغل الفرصة النقال مفتوح اضل ادور بالبرامج وافتش بيه بدون ما يحس لان هو متعود يحط رمز سري للنقال وما اكدر ادخل بسهولة وافتش دخلت عالرسايل وجان اقرة المسجات الي راسلهم للبنية وجان يلح عليها حتى توافق بالزواج منه بيومها اجيت اتخبل وكوة كدرت اتمالك نفسي وما اهجم عليه عمي وحمويني مسافرين لبغداد وخاطبيله البنية الي يريد يتزوجها من وراي رحت على امه سالتها وهي تحبني كلتلها خاله دخيلج هيج شفت بتلفونه شنو خاطبيله انتو كالت ابوه واخوانه راحو خطبوله بس احنا مارحنا شنو تتوقعين من عرفت بي يحب وحدة غيري ويريد يتزوج علية شيماء بتردد على حذر واني احاول اطرد الافكار الي جتي على بالي واكذبها .. ما اتحمل تجي وحدة تشاركني بزوجي يمكن اموته بساعتها .. اني مثلج اني هم ما اتحملت واتخبلت وشمرت ملابسه وطردته من الغرفة ودخلنوني للمستشفى بوكتها هذا كل الي كدرت اسويه بس مع الاسف هذا كله ما هز شعره منه ولا غير من قراره بعدها جربت اسحب جهالي منه واخليهم يزاعلونه بس ما نجحت خطتي لان همة جهال وشمعرفهم بالكاعد يصير بين امهم وابوهم اخير شي قررت بيني وبين نفسي التقي وية البنية الي راح يتزوجها هذا اخر امل الي طلبت منه يوديني لأهلي زيارة لبغداد كلتله امي مريضه واني اتفقت ويه امه اجي لبغداد يم اهلي وهي انطتني اسم المستشفى كلت اروح اشوفها منو هاي الي جننت زوجي وافهمها واكوللها ماتعرفين شلون انكلبت حياتنا اني وجهالي صارت جحيم جانت هي تحجي واني عيوني جامده على حلكها ورافضة اصدك عقلي الي يزن علية بالافكار واكول لنفسي اني شدخلني هاي يمكن جاية تطلب مساعدتي علمود بنيه ويايه ممرضة ماخذة زوجها حجيت .. زين اني وين من هذا كله يعني مفتهمت اني يشنو راح اكدر اساعدج بجت بحركة قلب وكالت .. لا انتي الاساس بكل الكاعد يصير لان زوجي يصير نفسه هو خطيبج الضابط ليث اني هي حجت هاي الكلمتين واني كمت مفزوعة من مكاني صارت مو افكار بعقلي ... صارت حقيقه ضربتني على راسي .. لحظة انتي شكاعد تحجين صيحت بدون شعور .. لاااااا مستحيل انتي شتكولين مستحيل مو ليث ام محمد.. اني جنت متأكدة راح ترفضين تصدكين كلامي فتحت جنطتها وطلعت نقالها فتحته ومدته الي اخذت النقال منها بيد ترجف احس كلبي راح يوكف عبالك دا اعيش كابوس واريد اصحى باوعت عالشاشة جانت صورة ليث هو وجهاله ومرته سوية والضحكة مالية وجهه وجهاله واحد صاعد على ظهره والثاني بحظنه وبنته شابكته من ركبته وزوجته كاعدة بصفه والصورة الثانية هو وزوجته محوط خصرها بذراعه جنت اباوع عالصور واهز راسي برفض صرخت بصوت مكسور .. لا يالله دخيلك مستحيل الكاعد يصير وياي مستحل ليش ليش ليث يسوي بية هشكل هدى الي صار بشيماء هدم كل عالمها وكل حياتها اول مرة بحياتي اشوف شيماء منهارة وترجف والله مردت كلبي بعدما راحت البنية او بالاحرى زوجة ليث بقت شيماء كاعدة بمكانها بس تباوع بعيونها وتتنفس بغضب كلنا اتفاجئنا بخبر زواج ليث جانت مرته جاية لشيماء حتى تساعدها وتترك ليث يرجع لبيته واولاده وزوجته وقبل لا تطلع حلفتها ان ما تكول لليث عن جيتها وما تجيب سيرتها بالموضوع تحلف تكول والله يطلكني اذا درة بية جاية وحاجية وياج شيماء كلتلها .. لتخافين اخذي اولادج ورجعي لبيتج وانتي مطمنة ما راح اجيب سيرتج بالموضوع جانت البنية تبجي وتكول .. الله يعوضج برجال احسن منه انتي بنية حلوة والعمر كدامج اذا رفضتي تتزوجين ليث تكدرين تلكين غيره بس اني ما اكدر هذا ابو بيتي وابو جهالي اذا هو راح اني انكسر وجهالي يضيعون .. لتخافين بعد الي عرفته مستحيل بعد اقبل اربط نفسي بيه لو كان اخر رجال بالعالم مو بس لان هو متزوج وعلمود اولاده الي ماريدلهم اب لاهي عنهم لا .... اني علمود نفسي راح ارفضه لان ما مستعدة ابدي حياتي وية رجال بدة حياته وياي بكذبة وخذلني واني بعدني مابادية وياه مشوار حياتي بعدها راحت البنية هي وجهالها واني وضحى وحدة تباوع بوجه الثانية خايفين من ردة فعل شيماء اباوع عليها رفعت نقالها واتصلت على عمو امجد شيماء بصوت مهزوز .. عمو ضروري تجي لعدنا للبيت وتتصل على ليث يجي وياك .. من تجون اني افهمكم بالسالفة سدت النقال كامت من مكانها وجسمها يرجف ردت اروح وراها بس هي استدارت علينا اني وضحى ورفعت ايدها .. بنات اترجاكم تعوفوني لوحدي دخلت للغرفة وسدت الباب باوعت لضحى ضحى.. هاي شلون مصيبة ما جاي اكدر اصدك ليث طلع متزوج وعنده عائلة هدى.. زين اريد افتهم عمو امجد وبابا شعجب ما سألو عنه من اجة اتقدم لشيماء يعني معقولة ما عرغفو (ماعرفو) بليث متزوج .. اخاف لان اهله بالبصرة وزوجته وجهاله هم بالبصرة فما كدروا يعرفون هدى.. هاي اذا همة مكلفين نفسهم وسائلين على ليث جنت اذكر اسمه واموت قهر اتذكر عليه شلون طيب ويانا هاي الفترة اتعلقت بي واعتبرته مثل اخوي الله يساعد كلب شيماء شلون بحالها الي بنت كل امالها عليه مرت ساعة وشيماء بعدها بالغرفة اسمع صوت حركة بالغرفة ضحى.. الله لا يوفقه علقها لااختي المسكينه بيه وكسر كلبها جنا نحجي وسمعنا صوت صرخة شيماء المنهارة ركضنا لغرفتها فتحت الباب وشهكت واكفة بمكاني مصدومة من المنظر الكدامي جانت شيماء مطلعة جهازها كله ومطشرته بالغرفة بصورة مخيفة عبالك مفجرين بيها عبوة جانت تبجي وتحجي وية نفسها .. ليش يالله شمعنا اني ليش اني من دون البنات مكتوبلي اتجرع الموت واني عايشة جانت تصيح .. الله لا يوفقك ياليث سمعنا صوت الباب يندك كامت من مكانها .. هدى روحي فتحي الباب ودخليهم واني جاية وراكم اباوع عليها مسحت دموعها وحطت شعرها ورة اذنها خشمها وعيونها حمر من كد البجي طلعت فتحت الباب ودخل عمو امجد وكال .. اتصلت على ليث وهسة هو جاي بالطريق بس فهموني شنو شصاير اجتي شيماء وسألت عمو امجد .. عمو ليث من اتقدملي انت وبابا سألتوا عنه وعن اهله لو اكتفيتوا بس بكلامه .. لا شومة انا بنفسي رحت لمكان دوامه وسألت كم واحد من جماعته كلها حمدت بأخلاقه والي عرفته هو من اهل البصرة ليش تسأليني شكو سامعة شي عن ليث .. اليوم عرفت ليث طلع متزوج وعنده جهال جاوبها بصدمة .. شنوو !!! مستحيل انا سألت عنه محد جاب سيرة زواج دخل بابا وسليمة جانوا طالعين باوعوا عالوجوه وسألوا .. شكو شبيكم ليش ووجوهكم مكلوبة امجد.. ما ادري شنو الصاير شيماء تكول ليث طلع متزوج وعنده جهال اثير وبنظرة فرح وكان حمل وانزاح من على جتفه .. والله عرفته مو راحة من الاول انا جان كلبي ناغزني منه ولا ارتاحيتله ليش انت مو كلت سألت عنه وطلع خوش ولد .. شمدريني ما تسأل روحك مو انت ابوها شبيك ما سألت عن الولد جاي تذب الصوج براسي _اني من الاول مارايده وليش اسال عنه سليمة.. اي وشنو يعني واذا متزوج وين المشكلة ترة الرجال ما يعيبه الا جيبه اثير كمز من مكانه وصاح .. شنو وين كاعدين على يا اساس ازوج بنتي لواحد متزوج وعنده جهال .. اهووووعاد هي شلونها هي كلها خلك عانس ومحد مكلبها لاتكعد تسويها بس هي وبس يمعود ترة الف من تتمنى مكانها شيماء .. بيبي رجاءاً انتي لا تتدخلين هذا الشي يخصني واني الي اقرر دارت وجهها على بابا وحجت .. بابا راح يجي ليث اريدك تنطيه فلوسه والجهاز وكلشي يخصه وتكله ماعندك يمنا مرة اثير .. خلاص هذا هو عوفي هذا العار علية جنا نحجي واندك الباب ودخل ليث وبقينا احنا وشيماء بالغرفة ما طلعنا دقايق وسمعنا صياح ليث وبابا وعمو امجد جانت شيماء كاعدة وساكتة متحجي اي شي سمعت صوت ليث يكللهم .. صيحولي شيماء بس احجي وياها بابا كله.. اخذ غراضك واطلع منا تحلم اخليك تحجي وية شيماء صاح.. شيماء طلعي .. شيماء اريد احجي وياج لا تخليني اسوي شي اتندم عليه صار صياح وعياط وعمو امجد متدافع وية ليث وصارت عركة بالباب والجوارين فكوهم وليث راح وهو يتحلف ويتوعد دخل عمو امجد وصاح لشيماء .. شوفي عمو اخذيلج اجازة فد يومين من المستشفى علما يهديء الوضع لان هذا ليث ما ناوي يجيبها لبر ولا راح خلي السالفة تعدي على خير واكيد يروح عليج بالمستشفى حتى يحجي وياج .. هذا هو عمو الي تشوفه جانت تحجي وتبجي بقهر مرت الايام وبدت الامتحانات وشيماء اخذت اجازة نقالها ما بطل من المكالمات وكلها من ليث شكرت النقال بزاوية الغرفة واني كمت وشلته من الكاع وضميته عنها حتى ما تشوف وتنقهر جان يدزلها رسايل يتوسللها حتى تسمعه وحدة من هاي الرسايل كانت ((انا جنت ناوي اكلج عن موضوع زواجي بس ردت بالاول نتزوج يالله اكول لان ادري بيج راح ترفضيني اذا عرفتي بية متزوج قبلج )) كلمة ضياع جانت تعبرعن وضع شيماء جنت عين عالكتاب وعين على شومة اخاف يصير بيها شي صرت اروح للامتحان من ورة خشمي امتحن جنت التقي وية البنات هالة وفاطمة شوية ارتاح من احجي للينات عن حياتي صرت احجيلهم عن شيماء ووضع فاطمة .. يا خطية شومة والله ما تستاهل الصار هدى.. ولكم اريد اموت من القهر على اختي لو تشوفونها شلون ذبلانة هالة.. الله يساعد كلبج والله حقج تنقهرين على اختج احس بيج جرت حسرة باوعت عليها فاطمة .. ها هالة مشكلتكم انحلت لو بعدها هالة.. لا وين تنحل اذا ابوي قافل بس سودة علية اخوي قاسم الي وكع بيها .. الله يهدي النفوس .. اي عفية فطومة انعديلهم لان امي تريد تموت من الخوف على قاسم هالة حليت من المدرسة ودخلت للبيت ولكيت خواتي منى وكوثر جايات من بيت عيالهم خطار سلمت عليهم جانوا واكفات يم امي بالمطبخ هالة .. ها يمة قاسم رجع للبيت لو بعده ام قاسم بحسرة .. اي رجع بعدما وكعت وصلة من الساني يالله قبل يرجع منى .. ليش ماما شنو صاير هالة.. قاسم من سافر للخاج يدرس عمو محمد اقترح على بابا ان يفتح فرع من شركته هناك يم قاسم حتى هو يديرها من يمه وبابا مله هاي خوش فكرة ما دام ابن اخوي منير هناك يمه هم عينه عليه منى.. اهوووو يعني بابا ميتوب من هاي السالفة هالة.. بعد متعرفينه عنده الناس كلها احسن من قاسم يعني اتخيلي قاسم لزم المشروع هناك واشتغل عليه وانشك حلكة بالتعب تالي يجي بابا يكله لوما منتظر جان المشروع فشل وقاسم من سمع ابوي يحجي هشكل حلف ما بعد ما يمد ايده على الشغل كله.. مادام تشوف منتظر هو سبب نجاح المشروع خلاص هذا هو انا طالع وعايف الشغل وخلي منتظر هو يدير الشغل لان انا راح ابقى بكل الحالات ماكول مذموم كوثر .. هذا المشروع صارله قرن شنو الي استجد هالة .. مو بابا سافر وراح يشرف عالشغل لكة الشركة مستفلسة وغركانة بالديون .. يا عزة ماكو غير هذا القندرة منتظر هو الي كسرها .. اي بس تعالي قنعي ابوج بهذا الحجي صار قاسم بخيرهم ما خيروني بشرهم عمو علية اشو هو اجة هد على قاسم وكله ابو قاسم .. عمري ما اعتمدت عليك بشي لان ادري بيك مو حمل مسؤلية وتبقى طول عمرك تتهرب من المسؤلية جنت اتمنى تكون بكد المسؤلية وارفع راسي بيك بين اخواني واصدقائي بس شنو الي جنيته منك غير بس شلعان الكلب ام قاسم .. على كيفك وياه ياعيني كلشي بالتفاهم ينحل .. عن يا تفاهم دتحجين ابنج خسرني مشروع بالملايين منتظر يكول قاسم صار يسحب الفلوس بدون حساب وكاضيها كلها على اللعب والنسوان والعربدة جان قاسم كاعد ويباوع على بابا وعيونه نار حجة وياه بكل هدوء .. ما راح احجي واتعب نفسي وياك ما دامك مقتنع بحجي منتظر خلاص هذا هو ابقى انت على رأيك وانا راح ابقى على عنادي وما راح اتنازل عن حقي منتظر هوحصتي اذا ما اسويه وصلت مسح ما اكون قاسم ابو قاسم..شوف قاسم قسماً بالله اذا اسمع بيك لامس شعرة من منتظر صدكني اتبرة منك لا انت ابني ولا انا اعرفك فاهم قاسم.. اسف يابة هذا الشي يخصني الي ومنتظر اتعداني اذا حضرتك قافل على قاسم هو سبب الخراب فهذا الشي راجعلك ما اكدر اخليك تغير رأيك بية بس اما عن منتظر فهذا الولد محد راح يشفعله لو مو انت تتبرة مني لو هسة العشيرة كلها تتبرة مني ما اعتقه من العقاب بأخر يوم الامتحانات هدى بعدما ودعت صديقاتي بهذا اليوم انطيت رقم شيماء لهالة حتى نبقى على تواصل اني وياها وفاطمة بعدها طلعت من المدرسة قبل لا يوصل الخط رحت بكل لهفة للمحل حتى اشوف رائد لان واعدني يجي يشوفني بأخر يوم الامتحانات لكيته متظرني دخلت باوعلي واتقدم وكف كبالي وعيونه تلمع بلهفة رائد.. نكول مبروك عليك رائد لو بعد وراج دور ثاني هدى.. لا اسم الله علية من الدوغ الثاني رائد .. عفية ببنيتي السباعية لعد حضري روحج بعد كم يوم اجيب اهلي واروح لابوج خطابة اكله بنتك الجنية صوبت كلبي واريدها منك لا تردني هو يحجي وانا الحلك مشكوك اريد الم. حلكي وامثل دور الخجلان ما دبرت .. الله يبشرك اااااقصد احلى خبر ااا اقصد هلا بيكم بأي وقت .. لج ياهدى كلبي مشعوط من وراج وربي من اشوفج تمشين بالشارع حس خطواتج تمشي على كلبي اتمنى. اأشر عليج اصيح بعالي صوتي واكللهم يانااااس يا عااالم هاي الجنية مالتي مو احد يحط عينه عليها جنا نحجي ونضحك ونسينا نفسنا والوقت لحد ما رائد ضربت كصته وصفر متعجب .. يا يااااابة شوف شلون اخذنا الوقت ونسينا السايق طلعت من المحل مخبوصة من ورة التاخير وشفت الخط يريد يتحرك صرنا اني ورائد نركض ورة الكيا حتى نلحك عليها اني ااشر ورائد يصيح لحد ما وكفت السيارة يمة الحمدلله من وكفت سلم علية وراح واني صعدت بالسيارة والسايق يدردم رجعت للبيت واتفاجئت بشهد وامها جايين لبيتنا جانت شيماء وبيبي سليمة كاعدين يمهم رحت على ضحى بالمطبخ .. ضحى ليش تسوين هشكل .. ممسوية شي غلط .. زين وصهيب ولج مو انتي وياه تواعدتوا بالزواج شنو الي اتغير ضحى.. هدى عفية سكتي اني وصهيب ثنينا وعدنا بعضنا بس محد من عدنا وفى بوعده اني وعدته بالنجاح وهاي اني فشلت بدراستي وكاعدة بالبيت وهو وعدني سنة وكال ارجع وهذا هو صارت السنة الثانية وهو ما بين اني مو ملاك تعبت من الصبر اني هم اريد اعيش حالي حال البنات البس واطلع واتونس محد اله حق يعتب عليه يتبع..... | ||||
|
| |
|
07-07-19, 10:57 PM
| #19 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #الكاتبة_نهى_الحسون فكم من حبيب لم يكن لحبيبهُ ناصف وكم مجروح الفؤائدِ يلعق بجراحه لكي يشفى سلك طريق النسيان مجبراً شيماء من بعد موقف ليث فسخت خطوبتي منه واخذت اجازة من المستشفى بطلب من عمو امجد بليلتها نقالي ما بطل من ورة اتصالات ليث كان يتصل ويرسل رسائل يريدني اجاوبه كنت احس بالضياع صرت مثل الجسد بلا روح رغم الكسرة بس مع الاسف بعدني كلما اشوفه متصل علية كلبي يحنله ويضل ينبض غصب عني بوقتها اشكد كرهت ضعفي اتجاه ليث شمرت النقال من القهر واجتي هدى اخذته من يمي باول ايام من بعد الصار انطويت على نفسي وصرت ما احجي وية اي واحد بالبيت وانشغلت عن خواتي التهيت بروحي و كعدت اندب حظي وغركت بحزني لكن لفت انتباهي منظر خواتي الي كانوا يحومون علية بخوف خطية هدى عندها امتحانات اشوفها تروح وترجع حتى تطمن علية جانت تراقبني من بعيد خوفها علية واضح بعيونها اما ضحى فكانت مثل الدرع تحميني وانكلبت الاية صارت هي الي تردع عني لسان سليمة من بعد ما جنت اني الي احميها منها وبيوم اجتي ام فرزدق بعدما سمعت بالخبر كعدت تواسيني وتصبر علية ام فرزدق.. الله يعوضج بالاحسن منه والحمدلله كدرتي تعرفينه على حقيقته هسة احسن ما تعرفينه بعد الزواج سليمة .. خلي تولي هي تتعاير غبرة طيرت الرجال من ايدها ام فرزدق.. شلون ياعيني ترديها تتزوج رجال متزوج وعنده جهال وين صايرة هي شناقصها حتى ترضى بهيج قسمة ..لا ناقصها هواي معنسة ومحد ملكلبها غير وحدة تجلب بي بيدها وسنونها بس هي غبرة ما بيها خير جانت تحجي وانا اطحن بكلبي كوة لازمة نفسي ما انفجر كدام خالة ام فرزدق عيب منها نتعارك كدامها بس ضحى ما صبرت .. بيبي ترة ماله داعي هذا الحجي الي يسمعج يكول شيماء دخلت بالعمرين عود هاي انتي بيبتنا هشكل تحجين عليها لعد بعد ما اعتب عالناس من يحجون علينا سليمة.. الناس ما تحجي منا للدرب سواية خواتج تنطق الصخر اشو ذيج اختج تزوجت بسكوت وسافرت بدون علم احد مثل المسوية مكسورة وهاي اختج انفسخت خطوبتها والنا س عليها بالظاهر ميكولون هي فسخت لا راح يكولون الله العالم شنو شاف عليها وفسخ الخطوبة وعافها حجت ضحى بصوت عالي .. بيبي ترة لهنا وحدج خافي ربج بينا شنو شفتي علينا حتى تحجين هشكل بس اريد اعرف احنا مو بنات ابنج من دمج ولحمج ليش تسوين بينا هيج ولو هو الحجي وياج ضايع بس ما اكول غير حسبي الله ونعم الوكيل بيج لزمت النعال وشمرته على ضحى .. ولج بنت الفكر تتحسبين علية اليوم اذا ما اخلي ابوج يأدبج ما اكون اني سليمة ام فرزدق..خالة ضحى كافي وفوتي دخلي للغرفة عيب تراددين بيبتج ودارت وجهها على سليمة .. حجية عوفج منها خطية مقهورة على اختها وحجت هشكل ساعة عصبية .. لا والله انا الهة بس خلي يجي ابوها الشفية وانا اخلي يعلمها وكعدت ام فرزدق تهدي بسليمة وطلعت من البيت وهي توصي بيها علينا وتكللها على كيفج وياهن خطية بس وين هيهات لا حياة لمن تنادي هاي سليمة اجة بابا طافرة روحه ما اعرف شبي ونوب اتلكته سليمة انطته المقسوم ووزته على ضحى المكرودة .. هاي العار بتك شوفلها صرفة كعدت تصيح علية كدام جارتهم ام فرزدق وعوزها بس تلزمني وتكتلني اذا اليوم ما ربيتها لبنتك مالكم كعدة ببيتي اجتي نكة سليمة بالتوقيت الخاطيء لأبوي وكبل راح على ضحى وضربها وصبغ خدها احمر جان يسب ويغلط .. ما تكلولي انتوا شنو الله ذبكم على راسي انتقام ضحى.. والله مسويتلها شي هي كامت تحجي على شيماء .. عسى ما تغط شيماء بالجهنم انتي مالج دخل فاهمة ونوب خلي اسمع وحدة بيكم متجاوزة على امي والله اذبحها وما يرفلي جفن باوعت لضحى شلون لازمة خدها وتبجي وهدى كالعادة لبدت بمكان بعيد عنا تخاف من بابا يضرب وحدة بينا وبيومها وعيت على روحي وصحيت من حزني اني شكاعد اسوي معقولة مصيبة ليث تخليني انسى امانة امي والتهي بنفسي اني شلون تركت خواتي يتعرضون للضرب والاذية من وراي مستحيل كمت من مكاني وسحبت ضحى من ايده وحطيتها وراي وصحت بصوت عالي .. لهنا. وكافي والله اذا بعد تضرب وحدة من خواتي صدكني ما ابقالك بالبيت اخذهم واطلع وما تسمعولنا اي خبر سليمة.. هي بقت بس هاي وتكمل السبحة حتى يكولون علينا بناتهم انهزموا انتبهت على ابوي لزم راسه وصاح بصوت عالي مثل المجنون .. كاااااااافي راح تخبلوني .. يمة والله حقك الله يساعدك على بناتك كعد بالكاع ولزم راسه .. يمة ابوس ايدج كافي والله راسي راح ينفجر عوفيني بحالي لا والله احطهن واموتهن حتى ترتاحين .. يا نوب درت علية اخذت خواتي ودخلت بيهم للغرفة ومن بعد هذا الموقف صار لازم انهض من جديد خواتي يحتاجوني مو مال اعوفهم جوة ايد سليمة وابوي قررت ارجع لحياتي خلصت اجازتي وداومت بالمستشفى جنت كلش خايفة من ليث خاف يتعرضلي هناك بالمستشفى ويسويلي مشاكل بس من خلال كلام رباب كالت اجة هنا وسأل عليج ومن عرف بيج مجازة راح وبعد ما رجع انشغلت بأمتحانات هدى وبعدها التهيت بسالفة ضحى وخطوبتها لان اجوي بيت اهل شهد صديقتها يردون يأكدون على موعد الخطوبة حتى يجون يخطبونها بس اني كلتلهم خلي تخلص امتحانات هدى وبعدها احجي وية بابا واكله عن موضوع ضحى اتفقنا نردلهم الخبر بعد الامتحانات والتهيت بدوام المستشفى وبمسؤليات البيت هذا كله وعيني على هدى ودراستها خطية كل المشاكل صارت وية امتحاناتها اليوم كعدت الصبح وجنت دا اطلع ملابسي من الكنتور وانتبهت على سوارات امي الفضة سحبتهم وبين ايدي وضمتهم لصدري احس اشتاقيت لأمي من شفتهم صرت اكلب بيهم وباوعت عالرقم ٢ نغزني كلبي على مروة دخيل الله شكد اشتاقيتلها سحب السوار الي جان منقوش عليه الرقم واحد ولبسته واني اتأمل ان تكون الفضة فال خير على حياتي اباوع عالسوار بيدي احس هذا قطعة من امي واجتي هدى تريد تبدل ملابسها تجهز نفسها للامتحان وشافت السوارت بيدي اقتربت مني وسألت هاي سوارات امي .. اي .. ليش لابسة بس سوار .. لان هذا مالتي اما البقية فلكل وحدة بيكم الهة سوارها امي صاغتهم النة .. اكدر اخذ سواري والبسه .. اي عادي تكدرين تاخذينه بس كون تحافظين عليه هذا من ريحة امنا اخذته ولبسته بيدها وعيونها تلمع عليه وبعدها ما اعرف ليش حسيت بالراحة النفسية رحت للمستشفى ومثل كل يوم اتعودت اول ما اوصل للمستشفى اسجل حضوري واروح اشوف شغلي كانت وضيفتي رحمة من الله عن طريقها نسيت كل همومي خصوصا المرضى ومعاناتهم من اشوفهم يصارعون المرض احمد الله الف مرة على نعمة الصحة الماحاسة بيها فعلا الي يشوف مصائب الناس تهون عليه مصيبته جنت مشغولة واجتي زميلتي تطلب مني اروح فوراً لقسم الطوارئ اسد النقص الحاصل بكادر الممرضات بقسم الطوارئ وصلتنا حالة طارئة غريبة للمستشفى كانت نوع الحالة بنية صف سادس علمي شاربة حبوب منومة بكثرة ومتسممة يعني بين قوسين محاولة انتحار اجيت اتخبل من شفت البنية شلون الزباد يطلع من حلكها اني متعودة على هيج مناظر بس الي فاجئني هاي البنية شايفتها اي هاي مو ليان صديقة هدى اي هي نفسها بس هاي شصاير بيها فجاءة اتذكرت دكتها الناقصة وية هدى بذاك اليوم يالله شكد كرهتها وجنت متحلفة بيها بس اشوفها امسح بيها الكاع واجة اليوم الي التقيت بليان عجيب امر الدنيا صار الي ردته والتقيت بيها وهسة هي بين ايدية بس لا اكدر اعاتبها ولا اكدر ااعاقبها باوعت على ووجها الشاحب الاصفر وانتبهت عالممرضات والدكاترة شلون يتراكضون حتى يسعفونها قبل لتموت جنت بس واكفة اباوع عليهم سمعت صوت الممرضة تكول ..دكتور ضغط المريضة راح يصفر محسيت على روحي من ركضت انفذ اوامر الدكتور لانقاذها جبت الابرة وزرقتها و حضرنا اني والممرضات صالة العمليات لان راح يسولها غسيل معدة بقيت وياها ما اعرف ليش ما انطاني كلبي اعوفها وادور وجهي عنها ما اعرف وين راحت عدالة الحياة شمعنا اني انحط بهيج موقف لو هو حظي بهاي الايام صار يخليني كدام خيارات وحدة امر من الثانية ورة ساعة كدرنا ننقذها بس المشكلة بعدها دخلت بغيبوبة ونقلناها للانعاش نحطها تحت المراقبة بهاي الاثناء دخلو ٣اشخاص كانوا مرية يجي عمرها بالاربعين ورجال جبير وشاب جنت دا ارتب الاجهزة واشكل جهاز النبض الي عرفته من خلال كلامهم هذولي امها وابوها واخوها الام مبين من شكلها طالعة عن الطريق والاب ممبين عليه اي شي واخوها من التاتو التارس جسمه عرفت هذا زبالة امها جانت تسألني بخوف واني اجاوبها من انقذنا ليان لاحضنا اكو شي ثاني بيها جسمها كان كله اثار ضرب ماله علاقة بالحبوب الي اخذتهم ومبين هاي الاثار مو جديدة لونها البنفسجي يأكد هذا الشي اهووو هسة اني شكو مدوخة روحي بيهم كملت توصيل الاسلاك بالاجهزة وشكلهم نسوا وجودي يمهم وكعدوا يحجون ..والله ثم والله ما راح اخلي الموضوع يفوت بسلام .. اششش نصي صوتج لا احد يسمعج وننفضح .. ما انصي صوتي اصلا اني راح اخلي الدكتور يسويلها تقرير بحالتها واقدمة للشرطة بجت وكامت تحجي بحركة كلب .. الله لا يوفقه كون انكسرت ايده شهكت مصدومة عزة هذولي شنو والله يخوفون .. اشششش ولا كلمة ديري بالج تفتحين حلكج بحرف والله اذا وصل هذا الحجي للباشا نروح كلنا بالرجلين .. ما يهمني الباشا مالتك يهمني بنتي الي قشمرها ولعب عليها وكسر حياتها ابنهم انتبه علية وكعد يحم حم ويأشرلهم يسكتون لان انتبهوا على وجودي وكف شعر جسمي من كلامهم طلعت من يمهم وانا مصدومة معقولة اكو هيج بشر يمة هذولي والله يخوفون واتذكرت هدى اختي ومشكلتها وياهم ارتعد جسمي ياربي رحمتك يعني شلون هدى كدرت تنفذ بجلدها من عندهم يعني صدك معجزة جنت امشي واحجي وية روحي اتعوذت من ابليس وسحبت نفس ورفعت راسي وجان اشوف ليث من بعيد ديمشي وية صديقة الدكتور فلاح بس شفته انخبصت وكع كلبي بين رجلية كبل بدون مقدمات رحت ختلت بغرفة الاستراحة ومطلعت منها ورة فترة اجتي رباب تكلي .. لج شيماء ليث هنا يريد يحجي وياج وهسة مريت من يمهم بالصدفة وصاحني الدكتور فلاح وكلي صيحي شيماء كمت من مكاني متعصبة .. ترة الدكتور فلاح ماله حق يحرجني ويخليني بموقف محرج وياه هذا اسميه تدخل بحياتي الخاصة حتى لو كان ليث صديقه ترة ماله حق يضغط علية بشغلي ويضايقني رباب.. شوفي شيماء ميحتاج تعصبين نفسج انتي ما مجبورة تشوفين ليث اذا معاجبج عوفيهم علية اني اتصرف وياهم راحت رباب وتركتني لوحدي اعصابي كلها ترجف ليش اني من دون الناس من اوكع كلها تصير ضدي بيومها كدرت رباب تصرف ليث بس مؤقتا لان ليث راسه يابس كام كل يوم يجي علية بالمستشفى واني اتهرب هاي من غيرالاتصالات والرسايل بس اليوم ليث حارك الدنيا ومصمم وراسه والف سيف ميطلع منا الا يشوفني ويحجي وياي عاط برباب وسوالها مشكلة بالمستشفى خطية وهي كامت تبجي من وراه وبساعتها وصلتني رسالة من عنده كان كاتب بيها ( شوفي شيماء انا واكف بباب المستشفى اذا متطلعين هسة وحق الكعبة اجي اندمج عاليوم الي عرفتيني بيه) سديت النقال بغضب .. لا لهنا وكافي هذا كلش مصخها رحت وبكل غضب الدنيا طلعت من المستشفى وشفته كدامي راكن سيارته بالباب مشيت والتصميم مرسوم على وجهي فتحت باب السيارة وصعدت ودرت وجهي عليه باوعت لوجهه وعيونه شلون ذبلانة رجف كلبي وحجيت بغضب .. اريد اعرف انت شنو تريد مني بعد اي مو كافي الي صار بية من وراك يا اخي اطلع من حياتي جنت احجي وهو يباوع علية مثل العطشان .. كلة من وراج هاي الهوسة الصارت لو من الاول موافقة تنطيني فرصة احجي وياج وافهمج موقفي .. ما يحتاج تفهمني اني اتخذت قراري ..انتظري مو من حقج تفسخين الخطوبة وتدورين وجهج وترحين .. ليث انت شكاعد تحجي لك انت طلعت متزوج وعندك عائلة وحتىً مكلفت نفسك تكلي .. ترة انا ما ارتكبت جريمة بيوم حبيتج وردتج بالحلال يعني لو كلتلج بوكتها انا متزوج وعندي عائلة راح توافقين تتزوجيني ؟؟ .. لا طبعا مستحيل اوافق .. لعد خلاص انا لهذا السبب خبيت عنج موضوع زواجي لان ادري بيج كلش زين راح ترفضين تتزوجيني .. بس اريد اسألك مرتك شنو ناقصها وتريد تتزوج عليها كلي شبيها محلوة لو متخلف كلي شنو العيب البيها شنو حتى تريد تتزوج عليها .. ما بيها اي عيب كلشي ما ناقصها كان زواجنا زواج تقليدي اهلي خطبوها اني شفتها حبابة وحلوة ووافقت بوقتها جنت بعدني ببداية شبابي بس من شفتج كلبي تعلك بيج غصب عني وربي شاهد علية حبيتج والحب امره مو بيدي ترة انا ما اجرمت بيوم حبيت واريد اتزوج محد يملك علية الحق ما دام ممقصر وية زوحتي واطفالي عايشين معززين ومكرمين وانتي راح يكون بيتج لوحدج وكلشي يجرالج والله حلل اربعة وانا ما ردت من الاربعة بس انتي .. ليث انت حجيت واني سمعتك للاخير .. هسة اريدك تسمعني بالحقيقة اني ما اكدر امنعك تتزوج على مرتك لان هذا الشي راجعلك انت وقناعتك بس اني عني مستحيل اربط نفسي بيك تعرف ليش ارفضك لان اكتشفت بهذا موقفك وية عائلتك انت وبابا ثنينكم نفس الطينة اثنينكم انانينيين وتحبون بس نفسكم بابا خذل امي وخذلنا اني وخواتي وتركنا نعاني لوحدنا وانت همين خذلت زوجتك واولادك علمود نفسك فاحسنلك لتتعب حالك وياي اني مستحيل اقبل بيك اباوع عليه شلون جدحت عيونه يغضب .. شيماء انتي شكاعد تحجين ولج انا حاربت الكل وانحديت اهلي وضربت مسؤلياتي كلها بعرض الحايط واختاريتج انتي لان هذا يأشر على كلبه .. لج هذا حبج واتعلك بهواج شلون تتجرأين بكل بساطة وتهدمين كل البنيته والسويته علمودج وتفسخين الخطوبة بكل بساطة لج هذا عشم بليس بالجنة اخليج تنسحبين باوعت عليه.. ليث عفية ترة الزواج مو بالكوة لزمني من زندي .. شوفي شيماء اذا ما توافقين عالزواج صدكيني احطمج .. انسى مستحيل اتزوجك لو جنت اخر رجال بالعالم .. لعد خلاص هاي هي انتي الي جبتيها لنفسج انتبهت عليه شغل السيارة وحركها وبلحظتها عرفت ليث راح ينفذ تهديده ما اعرف منين وشلون اجتني الجراءة وفتحت باب السيارة وشمرت روحي منها بدون تفكير بعده ملحك يمشي بية هواي وكعت بالشارع قريب على المستشفى اجتي الوكعة على ايدي ورجلي انلوت صارت الحركة برمشة عين بحيث ليث بسرعة لزم بريك وانخطف وجهه ممتوقع مني اعرض نفسي للاذية لهاي الدرجة اجوي حرس البوابة يركضون بأتجاهي وهو نزل من السيارة .. الله .. الله خيتي خو ما بيج شي اتأذيتي نزلت دموعي غصب عني وكعدت بالشارع وايدي توجعني ورجلي انسحتت جانت وكعتي موقوية كلش لان هوة جان ستوه محرك سيارته ليث بخوف على غضب.. لج انتي مخبلة مو عاقلة شلون تسوين هشكل درت وجهي ما اعرف وين انطي وجهي من الفشلة وكعتي كدام الحرس بالشارع اهون علية من اوكع بين ايدين ليث الي ما اعرف شنو جان ناوي علية واحد منهم.. خيتي تكدرين تكومين لو اجيبلج عربانة هزيت راسي .. اي اكدر اكوم بس لحظة باوعت لليث مد ايده علية حتى يكومني نترتها بدون ما احجي ما اريد الفت انتباه الحرس اكثر من هيج كلش كافي الي صار لحد الان والله اليعلم باجر شراح يطلع علية من حجي بس ميخالف هاي ولا غير شي لحظات واجتي رباب والفراشة وياهم عربانة الضاهر ليث متصل على دكتور فلاح اخذوني ورباب تحوم على راسي ومتكدر تحجي لان الطبيب ديعاين رجلي خاف بيها كسر رفعت ايدي حتى اعدل شعري باوعت لسوار امي معووج نزلت دموعي بدون شعور حيل انقهرت واباوع لليث بالباب يحوم مثل الاسد المحبوس بالقفص وميكدر يوصل فريسته درت وجهي وحجيت وية رباب بصوت ناصي .. عفية رباب اريد ارجع للبيت ما اريد التقي بليث .. سهلة هاي عوفيها علية وفعلا بيومها رحعت للبيت وخواتي دخلو بالانذار خايفات عبالهم اندعمت بسيارة وهدى بيومها فرت صارت مثل الطير المذبوح اجتي ونامت بحظني وجانت هاي اول مرة تنام يمي من بعد الي صار بيني وبينها مرت الايام بينا وضحى انخطبت و بنفس اليوم تم العقد جانت كلش فرحانة بخطوبتها واجتي ام فرزدق حضرت الخطوبة بس جانت كلش ضايجة ما اعرف شبيها هدى .. اكول شومة انتبهتي على ام فغزدق .. لج اي انتبهت وسألتها كالت صهيب خطية اتخربطت صحته وابوه راح يسافر وراه .. ياعزة بس لا عرف بخبغ (بخبر) خطوبة ضحى .. واذا عرف وشنو يعني وين جان عنها اذا هيج هو رايدها .. شيماء الغايب عذغه وياه .. عالعموم سدي الموضوع وديري بالج تحجين لضحى .. صاغ ما اجيب سيغة (سيرة) اكول شومة شفتي اهل شهد شلون شايفين نفسهم .. ما علينا بيهم اهم شي اختنا فرحانة ومرتاحة شوفي اللمعة الي بعيونها وسكتي .. ما اعغف (مااعرف)ما حبيتهم حتى خطيبها ما حبيته بس يبصبص بعيونه عكس ليث جان كلش حباب انتبهت لشيماء اختفت ابتسامتها وسكتت .. بطلي حشرية بعدج صغيرة متعرفين بمعدن الناس وبيومها بابا صدمنا من طالب عليهم مقدم ومؤخر يكسر الظهر وضحى بيومها اتعاركت وية بابا و ضلت تحجي عليه تكله فشلتني كدام بيت عيالي هسة شيكولون علينا .. انا سويت هيج لمصلحتج .. وين مصلحتي بالموضوع تفشلني كدام عيالي .. انتي مالج دخل.. لتتدخلين انا ابوج واعرف شنو اتصرف همة عندهم كومة فلوس كاعدة على كلبهم لتخافين عليهم مراح تخلص فلوسهم مع الاسف بابا تفكيره تعبان وما راح يتغير بيومها جان الجو متوتر بالبيت من وراهم حتى نسيت باجر النتائج مالتي يوم ثاني كعدت من الصبح انتظر النتائج لكيت شيماء وضحى كاعدات قبلي ينتظرون .. هاي شنو لا تكولون كاعدات علمودي ضحى تحط طاوة البيض بالصينية .. اي والله كاعدات علمودج حتى اشوف يشكد واكعة لا عبالج انسى سوالفج بيوم وكعت بخمسة شسويتي بية .. خغب(خرب) والله بطني كامت توجعني جنا نحجي ودك نقال شيماء فاطمة صديقتي متصلة .. شومة كولي لهدى تروح للمدرسة هناك راح تستلم التنائج لان ما علنوها بالنت صديقة ماما مدرسة بالمدرسة كالت خلي يجون البنات يستلمونها لان النتائج وصلتهم قبل لا ينزلوها بالنت باوعتلي شيماء وكالت .. جهزي نفسج خلي اخذج وياي بطريقي عالمدرسة ومناك اروح للمستشفى وبالرجعة رجعي وية فاطمة اباوع لشيماء بعدها ما تأمن بية وصلتني للمدرسة ودخلت لكيت البنات كلهم متجمعات يم باب غرفة المديرة شفت فاطمة وهالة ورهف وليان يبوووو هاي شصاير بيها سلمت عالبنات هالة وفاطمة فاطمة.. تعالو بنات خلي نشوف ردود افعال الطلاب في هذه اللحظات وسوت ايدها بحركة السماعة الوهمية واخذت دور المراسل الصحفي وكعدت تسأل الطالبات عن شنو شعورهم وصل الدور لهالة هالة تفرك بأيدها .. والله ما اريد بس النجاح وافرح امي وابوي لان وراي شماتة يفرحون برسوبي جنت واكفة يم هالة واسوي بأدي علامة النصر كدام الكامرة الوهمية والسماعة عود عايشة الدور واجتي لعندي لزمت ايدها وحطيتها كدام حلكي .. والله شعوغي كأي مواطن صالح احب اهدي فغحة نجاحي الغيغ معغوف (فرحة نجاحي الغير معروف)الى الان الى اختي الكبيغة شيماء واحب اوصل سلامي الى عمي علي الي بهولندا واسلم على ابوي اثيغ الما يدغي (المايدري) بالدنيا طشت لوغشت (رشت) وسلام حاغ بحغاغة التنوغ (حار بحرارة التنور) خاص لبيبي سليمة حبيبت كلبي واتمنى توصلون حغاغة السلام (حرارة السلام) لجدتي سليمة بولند اني احجي والبنات خربانات من الضحك علي شوية وصار وقت الجد وبدت النتائج تتوزع وجان اطلع ناجحة والمعدل ٧٠ وهالة٦٨ اما فاطمة فكان معدلها ٨٧ رحت عليها وحضنتها فرحانة على فاطمة ورفعت حواجبي .. ايا ملعونة ( هو انت بتزاكر من ورانا ياوااااد ) حجيتها بصوت عادل امام اجتي هالة تركض فحطانة .. ولكم سكتوا وانطوني ماي خلي اشرب جانت حاطة ايدها على صدرها .. شكو شبيج شصاير .. ولكم رهف بنت عمو محمد .. شبيها ناجحة لو راسبة .. شوف هاي العوبة شتكول شي اكيد ناجحة .. بعد شبيج .. ولج طلع معدلها 97 ومدري كم اعشار ولكم مو هنا القهر .. لعد شبيج .. ولكم لو تشوفوها شلون اخذت النتيجة بكل هدوء ورزانة امدة حظي والله فشلت من يمي .. ههههههههه حقج تفشلين ما شفتي نفسج شلون كلبتي دقلة من عغفتي انتي ناجحة هههههههههه الي يشوف فغحتج يكول مبين عليها مطلعة معدل عالي امداج هالة .. بنت الذين والله عمي سباعية وطلعت المعدل راحت عليك ياقاسم فاطمة.. ليش شبي قاسم .. اي مو حضرة المحترم اخوي قاسم ذاك اليوم اجوي بيت عمو محمد لبيتنا هو وعائلته علمود يصالحون منتظر ابن عمو منير وقاسم وصادف رهف وخواتها اجوي وية ابوهم والتهيت بيهم ورهف والبنات متعودات يصعدون وياي فوك نكعد بغرفتي حتى ناخذ راحتنة بالتحشيش والسوالف ليش ما رهف كالت اريد انزل اروح للحمام كلتلها روحي لحمام قاسم بغرفته محد بيها وهي راحت وبعدها اجتي البنية وجها ينطي الوان سألتها .. شكو شبيج مخبوصة جاوبتني .. عمة حتى عمة ياثولة شلون تكليلي اخذي راحتج قاسم ما راح يصعد واني اول ما دخلت للحمام ما احس الا واحد دك علية الباب وبصوت خشن سألني منو بالحمام والله اتمنيت الكاع تنشك وتبلعني من ورة الفشلة طلعت من الحمام ووجهي صار اشارة مرور من الاحراج _والله حقها بس صارغت اشاغة مغوغ ( اشارة مرور) اني بمكانها جان صغت سياغة اسعاف اشعل واطفي احمغ و اونون _عابتلج هدى بس تدرين قاسم هواي متغير المهم وصارت رهف كل شوية تسألني على قاسم بس مو هنا المصيبة المصيبة قاسم اخوية من طلعوا بيت عمو سألني.. اكول هالة هاي رهف بنت عمي محمد بيا صف جاوبته.. بصف السادس علمي وياي واشوفلكم الاخ طكها صفنة هدى.. زين وين الاشكال بهذا كله .. انا اكلج عمو محمد اولاده وبناته كلهم متفوقين وما تقبل غلط رهف على هذا المعدل اكيد راح تدخل طبية فاطمة.. واكيد ابوها ما راح يقبل يزوجها لواحد مثل قاسم ماخذ شهادة ادارة واعمال وماضيه الدراسي تعبان هالة.. انجبي لاتحجين على اخوي اصلا هي تحلم قاسم يفكر بيها صحيح همة اصحاب شهادات بس اخوي صاحب ما انطيتها مجال تكمل .. اخوج صاحب عظلات والشاهد كصايبي .. امداكم والله مو لان اخوي وجاي احمد بي بس صدك من يلزم التراب يتحول بيده ذهب بس الحظ ما كاعد وياه شاغول وذكي جنا نحجي ودك نقال هالة ردت عالمتصل وبعدها التفتت علينا .. يالله بنات مع السلامة مو تنسون خلونا نبقى على تواصل اتبادلنا الوداع وراحت تركض واني وفاطمة طلعنا ننتظر اخوها يجي ورحنا نشتري ماي لحظات وجان تصير سيارة رائد كدامي نزل من السيارة وهو يضحك .. الف الف مبروك جاوبته والفرحة ناطه من عيوني تريد تحضنه بنظراتها .. شلون عغفت (عرفت) .. لج انا منتظر النتيجة اكثر منج فاطمة.. هدى اني راح ادخل للمحل اشتري ماي دخلت وخلتنا اني ورائد واكفين يم الباب واحد يباوع عالثاني .. عفية ببنيتي والله رفعتي راسي جان يحجي واني الحلك مشكوك من الفرحة ياربي اذا بس مجرد شوفته انا احس بروحي طايرة من الفرح لو يصير زوجي اني يمكن اموت من الفرحة .. ياغب دوم غاسك مغفوع (يارب دوم راسك مرفوع) .. يالله ياحلوة بعد اسبوع واهلي يجونكم لان البارحة حجيت وية الوالدة واتفقت وياها عالاسبوع الجاي تجيكم هي واختي ليلى حتى تتفق وية شيماء وبيبتج على امور الخطوبة حجيت بصوت رقيق ناصي غريب على اذني اول مرة اسمعه .. هلا بيها بأي وقت تنوغنا (تنورنا) ضحك .. شنو كلتي ما سمعتج علي صوتج .. ما اعيد كلامي حجايتي وحدة متصيغ (متصير) اثنين .. ياربي شوكت يجي اليوم الي اصبح على صوت الغوغي واتونس بحضنه يمة . يمة ابجي تيزاب على كلامه رائد.. هدهد. اريد منج اذا اجوي امي واختي ليلى وحجوا كلام زايد اريدج تغلسين عليه وتتصلين علية من شيماء وتكليلي واني اتصرف .. لحظة شنو غائد ردت احجي اجتي فاطمة وقطعت كلامنا وملحكت اكمل كلامي .. يالله هدى اخوية وصل ينتظرنا يم باب المدرسة ركبت بسيارة اخو فاطمة وجانت ام فاطمة جاية وياه وباركولنا عالنجاح جاوبتهم واني بالي مشدوه والافكار بدت تتراكم على راسي رائد ليش حجة هشكل وحذرني من امه وكلامها يعني شنو افتهم من كلام رائد اهله معارضين على زواجنا اتمنيت ابقى اسأله بس مع الاسف الوقت ضيق وصلت لبيتنا من بعدما ام فاطمة اشترتلنا حلويات وقطع كيك وبقلاوة وكالت هاي حلاوة نجاحكم اخذت الحلويات واتشكرت منها دخلت للبيت وسمعت صوت عمو امجد يحجي وية سليمة ويصيح وضحى واكفة يم باب المطبخ تتسمع الهم شافتني واجتي .. ها بشري شنو طلعتي .. الحمدلله ناجحة حضنتني .. والله عفية عليج سباعية انطيتها علاكة الحلويات .. شكو شبي عمو امجد .. ما ادري اشو دخل يصيح ويسب ويغلط ويكول لسليمة هذا ابنج تاليته راح يموتني ناقص عمر سليمة.. يمة كول يالله خلي نفتهم ليش ماخذينه للسجن امجد.. يمة ابنج لازمنه وية مجموعة تعبانة جاية من المنزول يتبع | ||||
|
| |
|
07-07-19, 10:59 PM
| #20 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #اساور_الفضة #الكاتبه_نهى_الحسون #البارت_الثامن_عشر عمو امجد حرك البيت بصياحه بعدما عرفنا شنو سبب الصياح عذرناه فعلا عمو امجد كضة عمره يركض ورة بابا ويصلح بأخطاءه للظهر طلعت شيماء من المستشفى دخلت وشافتني واتجهت علية وحظتني .. عفية ببنيتي السباعية رفعتي راسي عكب باجر بس استلم راتبي اطلعكم انتي وضحى اعشيكم بمطعم شنو رأيكم هدى نسيت سالفة ابوي وانشغلت بفرحة شيماء والمطعم .. عاااا كولي والله نطلع مطعم ونكعد مثل البتلفزيون ونصفك ويجينا واحد يخدمنا ضحى.. على كيفج شهرزاد تصفكين وتجيج صنية مليانة لحم وين كاعدين دخل عمو امجد للمطبخ وشافته شيماء وسلمت عليه وكلتله على نجاحي رغم شكله جان ضايج بس باركلي .. مبروك عمو هدى سباعية كلة من ورة ابوج حتى فرحة النجاح سلبها منا دومه هشكل مو جديدة عليه شيماء عقدت حواجبها .. ليش عمو شبي بابا .. ابوكم لزموه متلبس ببيت دعارة وموبس هشكل لكو بالبيت اطفال ثنين مخطوفين وهسة لو يجي الحر ابوج ميطلع ضربت على وجهها متفاجئة .. عزة العزاني جانت عايزة والتمت شلون بينا وضحى وعيالها ومضل شي على زواجها ياربي ابوي بشنو يفكر بس اريد افتهم هو ليش يروح دائما على هاي الاماكن .. والله ياعمو مااعرف شنو اكلج بس كل الي اكدر اكوله ابوج من ايام زمان مرافق شلة تعبانة ناس منحطين بشكل جنت دائما اكله عوفهم ولا ترافقهم لان رفقتهم ما تجيب بس المشاكل همة بزمن قبل وما كاعدين راحة مو هسة النظام حلل وسابية ومالهم جبير يحكمهم سليمة.. مكرود يايمة اثير تجيك التهايم وانت نايم امجد.. هو شخرب اثير غير بس هذا كلامج كلة منج انتي هواي مدللته من قبل شيريد وشيطلب يجراله يسوي الغلط كدامج وتسكتين عنه ومن يوكع بالمصيبة تصيحين سودة علية ومن يسوي المكسورة تكولين عايلين بي هو مظلوم ما يوم وكفتي كدامه وكلتليه ليش يمة تسوي هيج بحالك ولا مرة سمعتج تنصحينه وتكليله يمة عندك بنات وبطل شرب ومنكر اسمع صوتج بس من يضوجج .. يا شبيك شو درتها علية وذبيت الصوج بية اباوع على شومة همة يحجون وهي صارت تضرب اخماس باسداس والتفكير واضح عليها .. اني فايتة ابدل عن اذنك عمو .. اخذي راحتج عمو انا هم طالع اروح اشوفلي جارة حل لمصبية ابوكم طلع عمو وسليمة دخلت تدردم ضحى .. شلون ياربي باجر يجي سيف وشهد ياخذوني علمود يشترولي ذهب شلون راح اطلع وياهم وبابا بالسجن شكللهم والله صعبة .. لج وانا همين غائد كلي الاسبوع الجاي غاح يدز امه واخته حتى يتفقون وية شيماء .. صدك والله تحجين .. اي والله .. لج عوبة والله فرحتلج بس كون الله يتممها علينا جنا نحجي وسمعت شيماء تحجي بعصبية رحنا اني وضحى نشوف شبيها شيماء دخلنا وشفت شيماء لازمة النقال وتباوع عالشاشة وتحجي وتبجي .. الله يلعنك يا ليث والله هالرجال راح يطلعني عن طوري اقتربت عليها وجانت كلها ترجف .. شنو شيماء شبيج شصاغ وكعتي كلبنا .. بعد شيصير بية اكثر من الصار والله بعد ما بية حيل وخلص صبري رفعت راسها ياربي دخيلك يا الهي عبادك طغوا وجاروا علية واني لاحول ولاقوة وما اكدر احمي نفسي منهم ربي اردعهم عني .. عفية شومة كولي شبيج .. لج ليث اتصل علية ويكلي (( ليث .. شومة اليوم ابوج نازل ضيف عندي .. ليث لا تكول انت ورة سالفة سجن بابا .. مو انا فارغلج انتي وبابا وماعندي شغل وعمل غيركم وانتي ليش مستغربة شنو قابل جديدة على ابوج ينسجن بس هالمرة اجة والله جابه فعلا واجتي الفرصة لحد عندي .. شتريد من عندي .. كلشي ما اريد سلامتج هالمرة انتي الي تردين مني وحاجتج عندي .. والمطلوب .. عليج نور احبج لان تفتهميني المطلوب ياحلوة حرية ابوج مقابل تجين برجليج الي بشقتي اعقد عليج واخذج الي مرة .. ليث تدري بهاي افعالك قضيت على اخر ذرة حب جنت ضامتها بكلبي الك .. شيماء اريد الجواب يوصلني وكدامج اربع ساعات حتى تقررين بعدها اذا ما اجاني الرد اقري على ابوج السلام )) سد الخط وما انطاني مجال احجي وياه ضحى.. يعني شنو قصده بهذا كلامه هدى.. مبينة ميحتاجلها علم ليث كعد يساوم شيماء يطلع ابوية من السجن مقابل تغوح (تروح) يعقد عليها كعدت شيماء بالكاع وكرفصت على نفسها .. فهموني شنو الحل والله احتاريت معقولة اروح اتزوج ليث بهيج طريقة .. لا مستحيل لتفكرين بيها زواج وبالتهديد. مينراد يعني شنو تتوقعين الحياة الي راح تعيشيها وياه اباوع عليها شلون كامت تبجي بلا حول صدك قهرتني .. اي صدك شيماء احنا ليش ما نطلب من خالة ام فغزدق تساعدنا بلكي توكف ويانا اباوع عليها شلون عقدت حواجبها ومسحت دموعها وكامت من مكانها اي صدك اروح لخالة ام فرزدق هي اقاربها معروفين وعندهم واسطات راحت تبدل ملابسها كالت .. هدى بدلي حتى تجين وياي بدلت رحنا لبيت خالة ام فرزدق هناك شيماء حجت كلشي الهة وهي تبجي ام فرزدق.. خالة شومة لتبجين وما يجرالج الا طيب جنا كاعدين ودخلت اخت صهيب بتول وبيدها صينية كيك وعصير ام فرزدق.. جدة بتول حطي الصينية وروحي صيحي ابوج كليله بيبي تريدك طلعت بيتول ودارت علينا .. يمة مدوا ايدكم واكلو وبردوا كلبكم ولا تشيلون هم .. خالة الله يخليج النا .. لحظات ودخل علينا عمو فرزدق وسلم علينا وهو يباوع لامه .. خير يمة طلبتيني وحجت ام فرزدق سالفة شيماء كلها من اول ما خطبيها ليث لحد الصار اليوم باوع عليها وبعيونه نفس النظرة كلما يباوع علينا بيها حسرة بيها غصة ما ليش احس هشكل فرزدق.. لتخافين مسحي دموعج واطمني خلي موضوع ليث وابوج علية لتشيلين همهم وبيومها دخلت ام صهيب سلمت علينا وكعدت تسألنا على ضحى وعلى اخبارها وهاي هم مو من عوايدها هشكل تسأل جنت متأكدة ان ورة سؤالها شي بس ماكدرت المسه واوكع عليه بعدها طلعنا من يمهم واحنا نتأمل خير رجعنا للبيت ومرت الساعات الاربعة المهلة الحددها ليث لشيماء جنا كل ساعة اباوع عالنقال اخاف يتصل عليها مرت خمس ساعات وليث ماكو وكلما يمر بينا الوكت ترتفع المعنويات ويهدء الخوف بكلوبنا لليل وجان يجي عمو امجد ووياه بابا وبلحظتها عرفنا عمو فرزدق نفذ وعده شيماء.. الف الحمدلله والشكر راحت للغرفة واتصلت على ام فرزدق حتى تتشكرها واني دخلت وراها وهي تحجي وية ام فرزدق شوية وخلصت المكالمة .. ها شكالت ام فرزدق على سالفة ليث شلون حلوها .. تكول فرزدق كلف ابن عمه محمد يصير مسؤل بوزارة الدفاع .. اي اعرفه هذا يصير عم هالة صديقتي وابو رهف .. تكول فرزدق كلفه بسالفة ابوج وليث وهسة هو اتصل على فرزدق وكله ابوها طلع من من السجن وليث وقع كتابه وبعد فترة راح ينتقل للبصرة .. يارحمتك ياربي صدك لكل عالي اكو الاعلى منه اباوع لشيماء رجع اللون بوجها على كدما الحب حلو بس عذابه اضعاف حلاته لدرجة تضوك العلقم طلعت شيماء _عمو امجد لازم تشوفلنه صرفة وية ابونا ميصير هيج اليوم اني رحت لخاله ام فرزدق وابنها الله ينطي راح لابن عمه مسؤول بوزارة الدفاع هو الي طلعة والا مجان راح يطلع لان وكع بيد ليث والله كان متحلف بي يخيسه بالسجن لو يتزوجني غصب يصير هيج اب يسوي ببناته دنك ابوية متأثر همزين اول مرة اشوفه متأثر ومن بعد الصار بدة بابا يرجع لدوامه ولشغله ولحياته الطبيعية وجماعته ظلوا بالحبس عساهم لا طلعوا هو من يبتعد عن جماعته تخف المشاكل صحيح هو ما يكطع الشرب بس على الاقل تقل المصايب وماكو سجن وبلاوي ومثل كل مرة بابا بعد كل مصيبة يرجع يكعد ويانا وكلتله شيماء عن نجاحي كانت ردة فعله عادية سمعت كلمة عفية سباعية وغيرها ما سمعت شكد اتمنيت ياخذني لحظنه مثل اي اب يحسس بناته بالحنية .. اريد اعرف اذا ابوي يموت انا هم راح احزن عليه مثل البنات شيماء.. انجبي اسم الله عليه .. انتي تحجين صدك ؟؟ .. مهما كان يبقى ابونا ونبقى عايشين تحت جناحه بعدها كلمن رجع لحياته شيماء التهت بالدوام وضحى انشغلت كل يوم تطلع وية خطيبها وشهد يجهزون واني ظليت مكابلة سليمة وكاعدة هي مو هنا المصيبة المصيبة سليمة عبالها انا ضحى وتكدر علية بالبداية نزلت علية بالشغل كلت عادي هدى اتحملي ترة الشغل ما يموت لخاطر شيماء اتحملي وسكتي ومن الشغل للشغل كامت تطلع الشغل من جوة الكاع احس بيها عريف مال سجن معينها علينا حتى تطلع عينا بالكراب ومرة اجتي ام احمد كرايبها كعدوا بالمطبخ يسولفون اسمعها تكللها .. اكول ام احمد صدك اتذكرت انتي خطبتي لأبنج لو بعدج جاوبتها المرة .. لا والله لحد هسة ما لاكية مرة لابني بعدني جاي ادور سلمية بدت شغل الزحف .. والله انتي بنت حلال والله جابج ستوني جنت احجي وية بنت ابني واندعيلها اكللها كون الله يرزق بأبن الحلال الي يسترج اني احجي واباوع عليها واكول هاي البنية ما تلوك الا لحمودي ابنج .. والله ياريت شفايتلي اخذ من بنات ابنج كلها تحلف بأخلاقهم بس عفية كون كصيرة لان مثلما تعرفين ابني حمودي مو كلش طويل واريدله وحدة على طوله .. حبيبة عندي الج وحدة نص اخمس تفيد ابنج وكل اصبع مرة نادرة وام بيت اسمعها تحجي وية كرايبها اشرت على روحي هاي تقصد علية اني لا هاي اكيد انضربت بعقلها شوف هاي عبالها انا مثل ضحى العوبة وتدلل بية والله عاد انا ما جذبت خبر كول وفعل رحت كبل طلعت من الكنتور عندي دشداشة تعبانة ما اريدها ضامتها كلت من احتاجها اخليها للتنظيف جانت مسحوته وجلحة محلة مسحوكة لبست الدشداشة وفتحت شعري وكوشته ورحت اخذت ملابس من السلة بعدني مغاسلتهم وصعدت فوك للسطح جان مترب اخذت ماي من التانكي وسويت خلطة من تراب وماي ولثكت ملابسي بالطين وشوية من وجهي وتلفت عباية سليمة بالتراب هي قبل شوية كالت غسليها ونزلت اركض ودخلت عليهم مداهمة يكول عبالك طنطل داخل عليهم جنت شايلة سلة الملابس بيدي حطيتها بالكاع وحجيت وية سلمية وانا احك براسي والكفشة منفوشة عبالك وحدة بيها قمل اباوع عليهن شلون فاتحات الحلك من الصدمة بكلبي فاطسة عليهم من الضحك والله شكلهم مال صورة .. بيبي سليمة خلصت غسل الملابس وين اغوح ( اروح ) اشغهم ( اشرهم) اباوع لسليمة انخرست من الصدمة وقريبتها ام احمد لمت شفايفها وصارت تحركهم منا ومنا وانا كوة لازمة روحي لا اضحك .. بيبي الله عليج شوفي شلون غسلتهم الج غسلة معدلة رجعتهم جدد عبالك بالباكيت رفعت اول قطعة من الملابس واسمع صوت سليمة المنجلطة .. صخام الصخمج هاي عباتي شمسوية بيها ..بيبي انتي مو كلتي غسليهم .. ولج العوبة انا كلتلج غسليهم مو تسويهم وصل مسح ..اباوع عالعباية بيدي مستغربة ورجعت حكيت راسي بغباء هههه .. ليش بيبي شبيها والله خوش فغك ( فرك) فغكتها ( فركتها) الج ما خليت كلمة بيها راء تعتب علية بالحجي جنت احجي ورجعت العباية نص بلسلة ونصها بالكاع واخذت السلة والعباية ظلت تخط وراي مسحت الكاع بيها مسح جنت امشي واغني ( غوح غوح غوحي ياعايش جواة جغوحي ) ( روح. روح روحي ياعايش جواة جروحي ) ههههههه ما اسمع بس عياط سليمة وريحة شعواط يمكن واحد احترك ههههههه .. لج ام السان المكطم يا بكعه العباية مسحتي بيها الكاع من مسحوج ان شاء الله اسمع ام احمد تكللها ام احمد .. صخام هاي منو الجربة الرتلة وفوكاها بكعه اسمع سلمية تحجي بصوت ناصي فشلانة .. هاي بنت ابني سمعت المرية شلون بدلت كلامها ..ياخطية شنو شبيها خبلة .. لا منينلها خبلة هاي اعقل مني ومنج وبعدها المرية لبست عبايتها وسلمت على سليمة وكلتلها.. يالله حبيبة انا اترخص منج عندي كومة شغل بالبيت ينتظرني وصلت للباب سلمت على سليمة وكالت .. هاااا اي اتذكرت ترة اني لكيت لابني حمودي مرية وراح اخطبله سمعت سليمة كامت تحمحم .. ااااح مو قبل شوية كلتي بعدني ما شفتله مرة شنو التغير هسة ام احمد مبين عليها تريد تشرد بروحها العزيزة .. هههههه اي بالله عليج ما اعرف شجاني صايرة هواي انسى طلعت المرية بدون ما تلتفت يمة وما اشوف الا سليمة هدت علية ونعالها بيدها تركض وراي بالبيت وانا فاطسة من ضحك بحيث من كد الضحك حصرتني بالغرفة وما كدرت افلت منها كعدت جوة ايدها ونزلت علية ضرب بالنعال سليمة.. ولج البكعة طيرتي علينا العريس من ورة لسانج المكطم هي تكتل بية بالنعال واني جوة ايدها فاطسة من الضحك .. بيبي غحمة (رحمة) على والديج ضغبي (ضربي) بأي مكان بس وجهي لا ههههه وغاي ( وراي) حفلة فشلة من سوادي اغوح مزوركة .. انعل ابوج لابو الحفلة ام حلك الاعوج انا اربيج ههههه يمة ما انسى شكلها وربي سينما شيماء من بعد الصار انقطع عني اخر حلقة وصل بيني وبين ليث احذب لو كلت ما تحبه بالعكس كلبي مايوم نسى حبه اصبح وامسي كل يوم وكلبي ما بطل يعيد طاريه بس الي صار هو عين العقل وان جان اخليها ورة كلبي راح اتعذب اضعاف هذا الالم الي كاعدة احس بي صحيت من صفنتي على صرخة مصاب جابوه جانت رجله مكسورة بمنطقة عظمة الفخذ اثر حادث دراجة جانت امه يمه تمسح بوجهه وهو يصرخ من الالم باوعتلي وكالت .. عفية دختورة انطيه دوة يسكت وجعه ما تشوفينه شلون مفرفح ابتسمت بوجها .. لتخافين خالة ستوني انطيته ابرة مسكنة الالام بعده مفعول الابرة شوية ويرتاح .. الله يحفظج لشباب خالة ويستر عليج .. اشكرج خالة شلت علبة الادوية وانتقلت للقاطع الثاني واترخصت منها هذا شغلي واتعلمت عليه والمفروض اكون راضية بس ليش احس بروحي فارغة اجتي وحدة من الممرضات .. هلا شيومة حبيبتي اريدج بشغلة مهمة .. شنو .. تعالي واني اكلج سحبتني من ايدي ودخلتني على غرفة الطواريء جانت بيها سدية ومكتب الطبيب جانت الغرفة فارغة كالت .. بس شوية اجيبلج ابن اخوي تخيطين جرح ايده ايده طلعت من الغرفة وظليت انتظرها واتجهت ادور بالغراض على الاودات فتحت بطل ديتول جانت اكو مغسلة بصف السدية لبست جفوف و عقمت الادوات سمعت صوت الباب انتفتح ورجع انسد التفتت مبتسمة اريد احجي بس فجاءة انبلع الكلام وبهت وجهي وما طلعت مني غير بس كلمة .. ليث!!! جان وجهه اسود من الغضب وعيونه بيهن حزن هيج رجال نادراً ما يبين عليه الانكسار للحظة حسيت بكلبي انتفض من شفت نظرات عيونه اتمنيت اخذه لحظني وامسح عن وجهه هاي النظرة ابتسم بتعب .. اي ليث ليش مستغربة شوفتي لو شكلج نسيتيني .. مستحيل انسى الصار مو بهاي السهولة .. شيماء ليش سويتي هشكل شلون انطاج كلبج تبعديني عنج بهاي الطريقة معقولة حبي الج خلاج تلجئين للغريب حتى يحميج مني ويدفعني بعيد عنج .. انت جبرتني اسوي هشكل تصرفك وياي خلاني اخاف منك ليث لتنسى ترة انت هددتني اذا ما اتزوجك تأذي بابا اباوع عليه سحب نفس عميق ومسح على وجهه .. لج شيماء انا سويت هشكل لان ادري بيج تحبني وهذا كلامج وياي مو من كل كلبج وشفت لازم واحد بينا يخلي الثاني امام الامر الواقع وياخذه من ايده ويشوفه الي رافض يشوفه ادري بيج تحبيني وهذا الشي يأكده نظرة عيونج ورجفة ايديج نزلت دموعي غصب عني .. ليث صعبة اخليك تجبرني اسلك طريق مسدود واني وياك ما ينفع نكمل سوة انت تشوف ان بس حبنا لبعض كافي حتى نبني عليه حياتنا بس الحب لوحده مو كافي لازم يكون بينا اساس عميق الاحترام الاهل العائلة هاي كلها تكمل طريقنا .. شيماء انتي خذلتيني اكتشفت بموقفج هذا وياي انتي البايعة وانا المشتري الظاهر هواي رخصت نفسي بس لهنا وكافي والنفس عزيزة اتمنى لوعة كلبي بكلبج تصير وبساعتها راح تعرفين بشنو كاعد احس بهاي اللحظة هو جان يحجي واني احس بكلبي ينعصر وية كل كلمة الف مرة اقترب علية وعيونه تريدني وابتعدت عنه بحذر غمض عيونه وجر حسرة .. ااااااخ يا وكت هذا الي يخلي شيماء تخاف من قربي منها اندك الباب وانقطع كلامنا باوع علية مثل الي يريد يطبع صورتي بذاكرته غمض عيونه وطلع من الغرفة ومن حياتي للابد وجانت هاي اخر مرة اشوف بيها ليث حلم عمري وغصة كلبي هو راح وانظليت مثل الصخرة بالطريق تترجى الي يدفعها غمضت عيني واتلمست سوار امي واندعيت ربي يشفي كلبي من حبه حتى ارتاح وبعدها رجعت كملت شغلي وانا افكاري تنسخ صورته بذاكرتي رجعت للبيت ولكيت هدى خابصة البيت خبص وسليمة شادة رسها معصبته وتدردم الظاهر هدى رافعة ضغطها ابتسمت على شكلها .. شكو شبيج خابصة البيت وهاي شنو وين رايحة بهاي ملابسج .. شبيج شومة انا مو كلتلج قبل لا تغحين. ( ترحين) للمستشفى صديقتنا غهف ( رهف) سوت حفلة علمود نجاحها وعزمتنا اني والبنات البقية .. اهووو والله نسيت يالله خلصتي خلي اروح اوصلج وارجع .. لا ميحتاج فاطمة غاح ( راح) تجي علية هو واخوها بدلت وعدلت نفسي وخطية ضحى انطتني من ملابسها الحلوات فستان مال محجبات جان كلش حلو ونازك طبعا ضحى اتحجبت سيف حجبها لبست وعدلت روحي اتمنيت شيماء تخليني احط شوية كحل وحمرة بس مع الاسف راسها يابس صعبة تقتنع اني كبرت بس يالله مو مهم اتصلت فاطمة على شيماء وكالت خلي تطلع طلعت اركض متلهفة للحفلة اسمع شيماء تصيح وراي .. هدى الله عليج ما تركصين هناك عفست وجهي وبرطمت واني طالعة من الباب .. صاغ ما غاح اغكص (صار ما راح اركص) ووصلنا اني وفاطمة لبيت. رهف جان بيتهم كلش فخم نزلنا من السيارة جانوا اكو حماية يم بابهم اتصلت فاطمة على هالة وطلعتلنا بالباب دخلنا وهالة اخذتنا بالاحضان هالة.. ولكم اشو كبرانات وانتي قزومة اشو طولانة .. حقي اطول من كثر ما اصد نعولة من سليمة اكول هالة وين صاحبة الحفلة هالة تحجي بصوت ناصي وتضحك .. ولكم تعالوا شوفوا عمو محمد شمسويلها تكولون عبالك بنته معرسة مو ناجحة ذبح خرفان وعزم الاقارب وهسة سوالها الحفلة مو مثل حظي ابوي يكلي مصدكة روحج ناجحة لايكون تردين اذبحلج خروف علمود هذا معدلج هدى.. اي والله حقه ابوج شنو ذنب الخروف ينذبح علمود وحدة حمارة مثلج ضربتي على راسي .. امداج عوبة والله اني شاطرة بس انتو مكسرين جناحاتي دخلتنا لصالة مزينيها بالورد والاضوية جانت كلش حلوة وباوعت للمعازيم جانوا اغلبهم صديقاتنا احنا بالحقيقة علاقتنا وية رهف مو قوية بس هيج اجينا لطلطة هالة حلفتنا كالت الله عليكم تجون خلونا نتونس هالة.. همزين اجيتوا حتى شوية احس بروحي بشر لان الست رهف عازمة كل صديقاتها المتفوقات واقاربها كلهم واصلات بالشهادات حسيت بروحي حمار بين الغزلان مكاني غلط .. خرب هذولي شنو مبين عليهم عائلة انشتاينية جانت رهف لابسة فستان اميرات موديل روماني ولابسة طوق نحاسي على شكل اغصان الزيتون حاطته مثل التاج اما البقية لو اكعد اوصف فخامتهم ونزاكتهم للصبح ما اخلص اني وفاطمة وهالة شكلنا فريق بس نبصبص ونكص انتبهت عليهم حاطين ميز طعام كلش كبير وجان مليان اكل ما لذة وطاب مثل البوفيه المفتوح حلويات كرازات بانواعها وبقلاوة فطائر صاج كلش وكلاشي احس عيوني كامت تلمع وبطني كامت تصيح يالله هدى وكلينا متت من الجوع رحت اقتربت من الميز لا اراديا اخذتني رجلية عالاكل وباوعت منا ومنا اشوف كون محد منتبهلي اسمع فاطمة تحذرني فاطمة .. لج جوعية فضحتينا هسة شنو يكولون علينا مشايفات .. اي صدك وين شايفة هيج مائدة مديت ايدي عالبقلاوة واجيت اكلها بس فجاءة اتذكرت خواتي يحبون الحلويات اتنغصتلهم باوعت عالمعازيم اشو محد مهتم للاكل يمرون من يم الميز ولا يباوعون عليه عبالك مموجود فاطمة جرتني من ايدي .. لج تعالي خلي نكعد عيب اخذتني وكعدنا عالكراسي وظلينا نباوع للبنات شلون كاموا يركصون على الاغاني جانت اكوا وحدة منظمة ديجي كل شوية ينطوها الاغنية وهي تنزلها الهم اجتي هالة ومها وسلمت علينا وامها تباوعلي بنظرات مثل الي جاي تدرسني ام قاسم.. هلا خالة هدوشة اشو كلما جالج تزيدين بالجمال هالة.. شنو يمة منين اجاها الجمال لا تكبريها علينا ترة هاي بسرعة تنغر .. انجبي ولج لتحجين عليها والله هاي البنية كلبي حبها ما شكلها بسرعة تدخل للكلب .. اشكرج خالة حتى اني احبكم .. اشو كاعدات ليش ما تكومون تركصون وية البنات هالة تكول عليج خوش تركصين هالة.. اي يمة تركص ركص تكولين عبالك صفيناز امانة يمة خلينا بعرس قاسم نأجرها تركصلنا ضربتها بكوعي بخصرها من الاحراج صرت بنص هدومي .. عمة بعينج سويتيني راقصة التفتت لخالة ام قاسم .. ما عليج منها خالة ترة هي يادوب هزة كتف سوتني راقصة هالة.. اي طردي عيون هزة كتفة وهزة خصر وهزة ركبة حجيت من بين سنوني .. هزة تسكتين لو شلون مو فضحتيني والله لو مسوية دعاية واعلان هم ما راح اشتهر مثل هسة ام قاسم .. ياربي شكد تونس هاي البنية يالله خالة اعوفكم تاخذون راحتكم اني رايحة التفتت على هالة قبل لا تروح وسألتها اكول هالة وين حطيتي هدية ابوج وهدية قاسم هالة.. العلب موجودات بجنطتي من تردين تقدميهم لرهف كليلي واني انطيج اياها لعد حوش راحت امها وفاطمة حجت .. عزة لج يا هدايا اني اجيت وكلشي مجبت وياي .. حتى اني مجبتلها هدية هالة.. ما عليكم ترة مو الكل جايبين هدايا بس بابا كال لماما تشتريلها كلادة ذهب وتهديها بمناسبة نجاجها وقاسم كال انا هديتي خاصة صاغلها سوار ذهب بي اول حرف من اسمه واول حرف من اسمها فاطمة.. هاي شنو اخوج صاير رومانسي وحركات وكذا هالة.. ولج نصي صوتج ترة محد يدري بعلاقة قاسم ورهف الكل عبالهم بس علاقة اولاد عم امي وابوي واهل رهف ميعرفون وبس اني الوحيدة اعرف بقاسم اخوي يحب رهف ورهف مجنونة بقاسم خطية اباوع لأمي هاي الايام تدورله على عروسة وتركض ورة قاسم وتكله يمة كبرت اريد ازوجك وافرح بيك بس هو يتهرب منها ويكللها بعد وكت مالي خلك اشيل مسؤلية جهال وبيت من هسة هدى.. لعد هو مو يحب رهف ليش ما يتقدملها .. اي هو رفضه هذا كله علمود رهف بس احنة نعرف قانون عمو محمد برفض يزوج اي واحد من اولاد الا متخرجين من الكلية وخصوصا هي راح تقدم على كلية طب فهي وقاسم اتفقوا ينتظرها تتخرج ويتقدملها ويتزوجها هدى.. الله يتمم عليهم .. امين يا رب مر الوكت وما حسينا بي من الونسة والاجواء تجنن بدي ما تخلص الحفلة والناس كلها مشغولة واني كل ساعة اروح اخمطلي كرزات واكل وهمة ولا يمهم بعدين قدموا العشا بعلب سفري ظليت فاتحة حلكي .. لج هالة لعد هذا الاكل الي عالميز شنو هالة.. هاي مقبلات خفايف تصبيرة .. هاااا ضميت السفري وباوعتلي فاطمة وحجت وياي .. لج متاكلين ليش ضميتيه ضحكت.. ههه مسوية دايت استحيت اكللها اريد اكله وية خواتي رحت ظليت احوص شلون الاكل هواي زادو حرامات هاي الحلويات والكيك يبقى هشكل تالي ما استحملت اخذت حافظة فاطمة الفارغة وكمت للبوفيه وصرت اخذ من كل نوع شوية حتى اوديه لخواتي خلصت الحفلة واجة اخو فاطمة علينا ووصلنوني بطريقهم لبيتنا دخلت للبيت وبيدي العلاكة هههههههه شكلي جان يذكرني بالفراشة ام شاكر بعيد المعلم من تجمع الكيك وتاخذه لبيتها هههههه وبيومها بسطنا اني وخواتي وفرشنا السفرة وحطينا الاكل ونزلنا عليه اكس ومربع اباوع لضحى تاكل وتغمض عيونها مستلذة بالاكل ضحى.. اممممم غير اخرب عالبقلاوة شيماء.. لعد اكلي هاي ما اعرف شنو اسمها اصلاً غير تموت هدى.. هاي يسمونها كنافة حسب كلام هالة وكعدت احجيلهم على اجواء الحفلة ضحى.. لج هذولي هم عيالي هشكل بس سيف شكله كلش ملتزم وهواي حطلي قواعد وقوانين ببيت اهله وكلي ان شاء الله من نتزوج راح تتعلمين علية وتعرفين اطباعي شيماء.. هذا مو زود حرصه عليج حلو الرجال من يكون حريص على زوجته .. اي هو اني هم كلت هشكل هدى.. اي صدك ضحى شعجب سيف ما اشترالج نقال حتى تتواصلون بي وتحجون سوية .. يكول ما احب المرية يكون عندها نقال يكلي انا اريدج تتفرغين بس الي اي شيماء مو تنسين سيف كال جهز نفسج انتي وشيماء حتى باجر اخذكم تختارين غرفة على ذوقج شيماء.. ان شاء الله بس كون ورة المغرب حتى اكون راجعة من الدوام ومرتاحة شوية من ركضة المستشفى وهاي غرفة يحتاجلها فرة هدى.. عود ليش ما تاخذوني وياكم شمعنا يوم ثاني الصبح كعدت على صوت سليمة تدردم كعدت افرك بعيوني ودخلت للمطبخ شفت ضحى تحجي وية سليمة .. خيغ ( خير) شبيها فيغوز (فيروز ) كاعدة من الصبح تغغد ( تغرد) علينا ضحى بصوت ناصي.. هههههه سكتي شافت مخلفات السهرة بالزبل وكامت تعد وتصف تكول كون تاكولون سم ليش محد كالت هاي خطية لبيبتي فستقاية حباية لوزاية ههههه هدى.. هي منينلها اسنون حتى تاكلهم ويكلك ليش تحجي وانا حالفة ما احجي بعد للظهر حلت شيماء من المستشفى ودخلت للغرفة وصاحتني .. ها شومة .. رائد اتصل علية وكال اليوم الوالدة واختي يردون يجونكم .. حلفي .. وروح بيبي سليمة الما تحلفين بيها جذب اليوم راح يجون حتى يتفقون ويانة على موعد الخطوبة ومن هاي السوالف جانت شيماء تحجي اتسعت عيوني بفرحة وخدودي صاروا كلوب احمر من الخجل .. فديت الي يخجلون ترة اني اختج شيماء مو رائد يالله روحي بالعجل كلي لضحى خلي تصب الغدة بالعجل حتى تجهزج يتبع.... | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
1Likes
العرض العادي
