10-05-19, 09:23 PM
| #11 | ||||
 
|  الـ﴿2﴾ـحلقة ذبُول الازهار ليسَ دَليلاً على قُبحها بل ان من حولها قبيح ولا يُجيد مهاره الاعتناء بها رفعت راسها ، فتحت عيونها متفاجئه حست بالموت قرب اذا اخوها سامعها يعني نهايتها دعت بسرها( ربي دخيلك ) :أزل شبيهم عيونج مورمة منو وياج أزل:مابيه شي بس من غسلت مواعين فركت عيني ونسيت بيهم زاهي، شنو تريد عامر: ليش كاعدة وحدج أزل:اي گلت خل ارزم كتبي وملابس المدرسة عامر: مامقتنع بعذرج بس رح اخليج براحتج المهم ابوي وامي طلعوا راحو لام سجاد مريضة.. وهج راحت وياهم وعافت حسوني ..نايم بالصالة روحي جيبي يمج ازل: شسالفة الظهر رايحين لهم رفع حاجب وكأن ماعاجبة انعزال اختة: يالفاهية هسة ب4 العصر مارديت عليه راحت للصالة شالت ابن اختها ورجعت للغرفة سدت الباب كأن الدنيا صارت تخنگها وحست بالظلام يحيطها، حطت الطفل على جربايتها وغطتة، نصت التبريد ونامت يمة، ضحكت على نفسها لان كل صفنة تصفنها تاخذ نص عمرها :يعني معقولة اني جنت صافنة ساعتين ههههههههه عجيب صفنت شوي وانا افكر يمتى تغمض عيوني براحة دون خوف ودموعx تبلل مخدتي، ياربي ماظليت اثق ببشر منو يصدكني اذا كلت بسبب اختي ادمرت صحتي ومستقلبي.زين انا ليش ذابة الصوج بيها هي صح سبب بس ماكلتلي تعالي حبي واتعذبي، كافي ياروحي تغالطين غيرج انتِ سبب عذابي مو اختي، والعجيب ماكدر اعترف اني غلطانة ولا اختي تعترف غلطت بحقي غمضت عيوني ورجعت الذكريات تحاربني اول مرة اسمع صوتة ديسمبر2014✴️ مثل كل ليلة اتابع برنامج على الراديو، غفيت والسماعات بذاني، فزيت من نومتي على صوت رجال :الووو الووو نايمة شنوو انفاسج دمرتني، بس احجي ليش ساكتة بس لا خرسة، تدرين دا اتنفس مثل انفاسج، عاد هسة يلا حسيت بالدفو كنت بردان توني داخل البيت وحصلت رقمج ، الووو شنو اظل احجي وحدي ، يلا ميخالف المهم اسمع هل النفس ، سمعتة يدندن بصووتة، خرررب هو من يحجي قلبي رجف من بحة صوتة الحلوة انوب يغني شسولف وانت سالفتي شكول غير احبنك اطش روحي بشواطيك غريك انا وما اضوكنك سديت الخط بسرعة وغطيت راسي بالبطانية وانا خايفة باوعت للرقم اسيا نهايتة 51 رجف جسمي وزادت نبضات قلبي حسيتة رح يوكف حسيت وجناتي اشتعلن نار حطيت ايدي على خدي صاير جم، مسحت حبات العرق من كصتي: يمةة منو هذا يحجي هج باوعت لوهج، الخاتون تتمضحك وي الحمار مالها شفت التلفون اتصل من جديد غلقته وكعدت مثل المفزوعة: وهج،x ولج لطم عوفي الجذاب مالج وتعالي لحكيلي عضتلي شفة :ولاتعضعضين شفة تعالي شوفي المصيبة الطاحت فوك راسي شفتها ترجع تحجي وياه ومامهتمة الي استفزتني كمت جريت التلفون منها وغلقتة: انا مو احاجيج باوعتلي بعصية: وعمة شسويتي هسة يزعل كوة اتصالحنا رديت عليها: عمة العماج وبالطكاك خل يزعل اوزع ثواب... شمرت عليها التلفون :هج شوفي هذا المصيبة شلون عرف رقمي وانا ما صارلي بس اسبوع من حطولي موبايل جاوبتني مبتسمة:رح ارسلة لحبيبي يشوفة منو قلدتها بصوت ناصي: ارسلة لحبيبي مالت عليج وعليه،x والله احس بيها سكرانةx شو كوة تحجي الله يعلم شيسويلها ويخليها هج عفتها ورجعت نمت على فراشي بس ماكدرت اغفى ظليت افكر شلون رقمي وصل له، باوعت لاختي القشمر تحاجي مصكوعها بدلع لعبت روحي والله مو عيشة هاي،x ماكدرت اتحمل التفكير كتلني كمت على حيلي وكفت كدامها متخوصرة: وهج انتِ منطية رقمي لمصكوعج شفتها انحرجت وتوترت :بصراحة امس ما كان عندي رصيد واتصلت من رقمج حسيت واحد بطابوكة طكني على راسي :ايييي وهج:وهو اتعارك وياي اليوم وموزع رقمي ورقمج فكيت حلكي مامصدكة :تحجين صدك... وباقية ويااه تتوسلين بيه جاوبتني وعيونها مدمعة:احبة مو بيدي صرخت بقهر:حبج برص ..ياحب هذا بابا ...ماكو حب ولا هاي الخرافات كلها بس بالروايات ...هو مو كلج بس تخلص سنوية ابوه يخطبج صارلها اربع اشهر مخلصة وينةةةةة ....تعرفين ليش ماخطبج لان رخصتي نفسج له صارلج سنة تنتظريه وتالي شنوووو ...يعوفج مثل اي وحدة رخيصة وهج:لاتحجين هج امة مريضة ضحكت على غبائها :امس سنوية ابوه اليوم امة. مريضة باجر اختة اطلكت وتظل الاعذار ما لها نهاية وانت يالغبية ظلي ركضي وراه تدرين انت وحدة غبيةلان تصدكين بيه وماشية ورااه والعجيب ليش دخلتيني بهاي اللعبة القذرة مالتج وهج:ولج كااافي الخط مفتوح وجاي يسمعج أزل:صدك لعد خل يسمعني عدل عليت صوتي دون ماحس :شوف لك ...اختي تعوفها وتنساها لانك واحد جذاب..وتكول لصاحبك الحثالة مثلك يمسح رقمي ..لا قسماً بالله اكول لاهلي كل شي وما يهمني حتى اختي سمعتة يجاوبني ..لان صوت التلفون عالي :احترمي نفسج ..والله لا اكص السانج الطويل هذا اصبريلي ..وكولي لاختج كل شي انتهى بينة وهج: جهاد صدك تعوفني أزل:سبع حجارات وراك وبعد لاتتصل وامسح الارقام ...وماخوفتني بتهديدك جهاد:والله تندمين على الحجي أزل:خاب دطير لو بيك خير جان صرت رجال كد حجايتك جهاد:انا رجال وغصبن عليج بسيطة اذا ما افضح اختج أزل:الله الله وهاي رجولة ..خاب روح البس دشداشة وكابل اخيتك اخذت التلفون وغلقتة باوعتلها بعصبية جانت تكتم شهكاتها :وهج لاتخافين وهج: ليش هج ماكدر اعيش بدونة أزل:تكدرين خل يولي هذا قذر وحيوان...مو رجال والله يجذب عليج وهج:شلون انسااه أزل:رح تنسي بس لاتردي عليه بعد يلا كومي نامي ورانة دوام وهج:ماشي نمت على فراشي واسمعها تبجي اخذت نفس عميق الحيوان قهرني مادري شعاجبها بيه لا شكل ولا اخلاق الفجر الساعة ٤:٣٠ كعدت الفجر اريد اشيل راسي من المخدة ماكدر... باوعت لاختي بعدها كاعدة :صباح الخير ماردت علية اشوف عافتني وراحت للحمام دورت على ابني شغلتة لكيت واصلتني خمس رسائل: الله لا يوفقكx ماخليتني اتهنى بموبايلي قريت رسائلة كلهن تهديد عادي صارت عندي من كد ما الشفية يهدد باختي اخر سالة قريتها ضحكتني صدك يقول العلماء ان 99% من الحمير يفتحون الرسائل بالابهام كمت من فراشي ورتبتة ورتبت فراش الخاتون... بعدها رحت غسلت ونظفت سنوني ..توضيت وصليت كعدت اقرأ قران ...صارت الساعة ب6ونص باوعتلها رجعت نامت ..ماحاجيتها فوك ما هي غلطانة بعد تزعل علية لبست ملابس المدرسة واخذت جنطتي رحت للمطح شفت امي موجودة :صباح الخير ام عامر:صباح النور... وين وهج كعدت على الكرسي : وين ادري كعدت صلت ورجعت نامت ماما بس صبيلي حليب ام عامر:اتريكي مو ترحين هناك تدوخين أزل:ما ادوخ صبتلي الحليب شربته وكمت :ماما رايحة ام عامر:ديري بالج على روحج قفلت الباب رددت بهمس:اللهم عليك توكلت بعدها قرأت اية الكرسي للحفظ من اي شر ...مشيت بالشارع اباوع للطالبات والطلاب.. اكو بيهم ابتدائية ومتوسطة... شفت بنات وياي بالصف ابتسمت لهن... اتذكرت امي من تكلي "خل اناجر الج سيارة "بس انا مااريد احملهم فوگ طاقتهم ارد عليها دائما"احب اتمشى المدرسة مو بعيدة ..اعتبريها رياضة صباحية" وصلت الى رأس الشارع ..شفت سيارة بيضه عرفتها سيارة منو... هو اكو غيرة مصكوع اختي :هه البطران مايدري بيها نايمة سويت روحي ما اشوفة عبرت من يمه رافعة حاجبي بغرور سمعتة يگول بصوت ناصي: نشوف هل خشم ليمتى يظل مرفوع جهاد🍃 جنت واكف مثل كل يوم انتظر وهج ...شفت اختها الصغيرة تعبر الشارع من شافتني رفعت حاجبها... غاضتني كلش... اااخ لو اكدر اكسر خشمها اليابس... هي صح احلى من وهج من ناحية الشكل والجسم بس تستفز اعصابي بمشيتها الواثقة ونظراتها المشمئزة من تشوفني... شوفي ياازل اذا ما حطمتج على كل كلمة تتعمدين حجيتيها عليه بعد نص ساعة شفت وهج من بعيد ابتسمت بخبث... على الخطة السويتها... .انا اعلمج اذا ما اكسر خشمج بأختج اقتربت مني وابتسمت :صباح الخير جاوبتها ببرود:صباح النور يلا ركبي شغلت السيارة ورسمت على شفتي ابتسامة استهزاء... متعمد امشي بنفس طريق ازل من وصلت يمها خففت السرعة وفتحت جامة: صعدي اوصلج ويانة دارت علية رادت تحجي بس انصدمت بوهج راكبة يمي شفتها اتحركت تريد تدور للصفحة الثانية حركت السيارة بسرعة... باوعتلها بالمراية تضرب رجلها الارض وجانت معصبة كلش درت السيارة ورجعت عليها عليت الراديو والجان يشمر بالسطح من صار الطگ فلشناه خايب كتلك بطل لاتلح خاب انا مو ياهو الجان اكعد راحة. وعوف الرفشة لا خليك تذب اللوان اليوم قررت اجلطها كمت اطك اصبعتين واحرك بحواجبي شفتها صارت زركة من العصبية... بس شو هاي ركضت باوعتلها راحت لشرطي توى طالع من بيتهم شفتها تأشر علية ظليت مصدوم ما متوقعها هج انوب هاي الثانية نزلت من السيارة ورجعت لطريق بيتهم... اشوي واجاني الشرطي يكلي ليش تتحرش ببنات الناس... واخذ مني مخالفة... باوعتلها تبتسم بحقارة هزيت راسي بمعنى بسيطة سمعتها تكول للشرطي: شكرا خوية والله يومية يلحكني واخاف اكول لاهلي خاف تصير مشكلة جبيرة عاد الشرطي ماقصر دار عليه: رقم سيارتك وصار عندي خل اشوفك اهنا جاي بعد ركبت سيارتي طاكة روحي مشيت بسرعة ولحكت وهج لكيتها بعدها ما عابرة الشارع صحت بيها: تعالي ركبي لا احركج اهنا شفتها خايفة خزرتها اجت تركض ركبت يمي وتبجي: الله يخليك عوفني... خليني ارجع البيت باوعتلها بعصبيه;:انا احصل اهانة بسبب وحدة س... مثل اختج بسيطة... تردين ترجعين للبيت من عيني وهج: جهاد فدوة وين موديني جهاد: اريد اراويج البيت مالتنا شهكت وهي تبجي: الله يخليك لا ..نزلني ..حباب انا شسويتلك ذنبي حبيتك الله يخليك... فدوة والله بعد ما اضايقك واطلع من حياتك جهاد: مو قبل ما انتقم لنفسي وهج: شنو تريد تسوي بس حباب لا تاخذني لبيتكم جهاد: اريد صور لاختج وبدون حجاب وبعد احسن اذا بملابس مو محتشمة... دزيهم الي وانا ما اسويلج شي باوعتلها سكتت بس متفاجئة بطلبي ابتسمت بحقارة وغمزت لها: لو عاجبج نروح البيت . . . . يتبع⬅ | ||||
|
|
10-05-19, 10:35 PM
| #12 | |||||||||
| عضو ذهبي
| رمضان مبارك 🌙🌙مبرووك الرواية الجديدة😍😍 ..يعني ازل الشاب الي بيطاردها كان مع اختها وهج وهي الي طلبت من اختها تتركه واختها وهج اتصلت من رقم اختها عشان كدة اخذ رقمها وبيلاحقها طيب ليش كل هالوقت ماتكلم اخوها عامر يشوف له صرفة معه ..الرواية مشوقة متابعاكي واتمنى لك التوفيق ودمتي بخير 💝💝 | |||||||||
|
|
|
10-05-19, 10:46 PM
| #13 | |||||||||
| عضو ذهبي
| الان قرات الفصل التاني ..يعني كل المصايب من وهج الحقيرة الي ورطت اختها الي كانت بتدافع عنها وعشان تخلص حالها اعطته الصور الي تذبح اختها وهي اتجوزت وارتاحت والمسكينة للان بتعاني ..كان من الاول تقول لاخوها يتصرف اما الان وهج مظكن تنكر وخصوصا صور ازل عند جهاد الحقير ..منتظرين الاحداث الجاية ودمتي بخير 💟 | |||||||||
|
|
|
11-05-19, 12:48 AM
| #14 | |||||
| اقتباس:
وهج اتصلت من رقم اختها وجهاد نشر رقمها لكل شخص يعرفة، والي يتصل بأزل شخص ثاني مو جهاد الحلقة الجاية رح تتوضح الصورة | |||||
|
|
|
11-05-19, 12:50 AM
| #15 | |||||
| اقتباس:
| |||||
|
|
|
11-05-19, 12:03 PM
| #17 | |||||||
| مشرفة وكاتبة في قسم قصص من وحي الأعضاء ومراسلة خاصة بأدب وأدباء في المنتدى الأدبي  
| بس لا الثوله وهج سويتهه معقوله لهذه الدرجه هي غبيه وتنطي صور اختهه السؤال هو ازل تقول انا حبت وتعذبت .. ياترى معقوله تكون حبت جهاد اذا هيج تطلع اغبى من اختهه واني اللي اعتقدت انها ذكيه وتلكفها وهي طايره | |||||||
|
|
|
11-05-19, 12:12 PM
| #18 | |||||
| اقتباس:
الكلمات الما فهمتيها اكتبيها بتعليق واني افهمج معناها حتى تتعلمين على اللهجة العراقية 😘 | |||||
|
|
|
11-05-19, 12:14 PM
| #19 | |||||
| اقتباس:
تعرفها كذاب | |||||
|
|
|
12-05-19, 01:16 AM
| #20 | ||||
| ولا نخاف سوى ان نحارب كل هذا.. ونخسر في الجولة الاخيرة وهج🍃 بعد مشكلة ازل وي﴿مع﴾ جهاد غلقت التلفون انتظرتها تنام ورجعت حجيت ويااه واتفقنا يوصلني للجامعة،x اتاخرت بالطلعة حتى ماتشوفني ، من طلعت شفتة واكف يم﴿جنب﴾ سيارتة بس امبين عليه ضايج، من شافني ابتسم ركبت يمة ﴿جنبة﴾ سولفت ويااه و ما اشوف الا اختي كدامي وتباوعلي بعصبيه شفتها تريد تدور للجهة الثاني حتى تنزلني، بس هو حرك﴿شغل﴾ السيارة ورجع عليها وهو يركص﴿يرقص﴾، باوعتلها صافنة على الجهة الثانية ركضت عبالي﴿حسبت﴾ صار شي ، درت عليها شفتها تحاجي شرطي طالع من بيتهم خفت تصير مشكلة وانا موجودة بالسيارة ماعرفت غير انزل وارجع للبيت، وصلت للشارع العام دا اعبرة واسمعه يعيط ﴿يصارخ﴾ بيه خفت اروح له بس خزرني ما حسيت برجلية غير ودني﴿اقتربت﴾ للسيارة جان يغلط ويسب ، توسلت بيه لحد ما فاجئني بطلبة اجت بعيني اهتمامها بيه تحضر ملابسي الصبح وتريكني﴿وجبة الفطور﴾، وعينها علية لحد ما اركب السيارة يلا تكمل طريقها ومن ترجع الكاها مجهزة ملابسي وغداي وبليل تغسل ملابسي وتكتبلي مرات محاضراتي وساترة علية وادري ماراضية على علاقتيx وهذا كلة هي اختي شلون ادمرهاxx واذا ارفض انا ادمر ، قررت اجاريه ومن ارجع نشوف انا وياها شلون نوصل لحل باوعت له﴿ نظرت له ﴾ بحذر: ماشي رح ادزلك صور، بس تلفوني مابيه هسة اي صورة ضحك بحقارة ، دنكت وانا مستحقرة روحي وعدت نفسي اذا خلصت من عندة اتوب وابتعد عنه، حسيت السيارة وكفت باوعت للمكانx رجفه سرت بجسمي كلة، المكان مابيه احد غير عاملين بناء واكو محلات بس بعيدة اشوي وموكف﴿وقف السيارة﴾ السيارة بضهر بيت بحيث محد يشوفنا، شفت صورة اختي كدامي وهي تحارب علمود تنقذني يعني خلاص اني رح اضيع، وانا صافنة واباوع عليه اريد احجي ماكدر ﴿لا استطيع﴾ انطق﴿اتكلم﴾، ما وعيت الا وهو بايسني﴿قبلني﴾ دفعتة عني وانا اصرخ وابجي﴿بكاء﴾: حرام والله حرام عليك تسوي هج، الله لا يوفقني لان وثقت بيك الله لا يسامحني حاولت افتح الباب بس ماينفتح درت عليه :افتحلي الباب عفية خليني انزل الخوف بعينة ماعرف صدك خايف لو يمثل حتى اسكت، درت على الجامة شفت العاملين جايين جهتنا، حرك السيارة بسرعة وهو يسب ويغلط عليةx وعلى اهلي ومابقى احترام لا للعايش ولا للميت، وانا اكول بقلبي ميخالف بس خل اوصل اشوف ياغبية تحاجيك بعد، وانا صافنة وي روحي حسيت بوجع بفخذي كرصني باوعتلة وانا كارهة روحي صرخت بيه: تنزلني اهنا لا والله اذب روحي واخلص باوعلي بعصبية: سدي حلكج موديج للجامعة لاتخافين... هدئت اشوي درت وجهي للشباك وافكر بكل كلمة حجتها ازل، جنت اسكتها بالحجج والاعذار بس واضح اختي كانت اذكى مني وعرفتة يلعب عليه، دعيت الله في سري ان يخلصني من هذه الورطة باوعلتة وانا صافنة بشكلة هو مو طويل يعني وسط وجسمة ممتلئx يشبه المطرب حسين الغزال بس عندة شامة ابياض عينة اليمنى، وانا صافنة عليه التقط سيلفي :ليش هج حباب امسحها باوعلي بخبث: غير اشتاقلج وهج: جهاد لخاطري امسحها دار عليه بزعل: ماشي مسحها﴿حذفها ﴾ كدام عيوني ماي بارد طاح على گلبي، شفتة يبتسم ماارتاحيت له انوب ظل يدندن ياحمام الدوح واشمالك تون انت ربع الي اون ونيتة موش بس انت اليمر بيك الحزن انا حزني من الصغر ربيتة صار مثلي يعشك ويهوى ويحن ومثلي يكتب بالشعر خليتة.......... ******* ازل🎶 وصلت الى المدرسة وكفتني ﴿وقفتني﴾ بنيه :أزل حجيت بهمس: ناقصني بعد بنت المديرة رحتلها: صباح الخير الطالبة:صباح النور،x تكول منار شايفتج تتعاركين وي واحد شنو متحرش بيج رفعتلها حاجب: ميخصج حبيبة غيرت الموضوع بسرعة : تدرين اليوم منو رح يجينا ابتسمت بقلة صبر: توني دخلت للمدرسة، مادري منو رح يجي الطالبة: اليوم رح يجونة ولد اثنين يحجون وي البنات علمود يشاركون بنادي الشباب ازل:ويعني شنو الطالبة:البنات متخبلات عليهم لان حلوين ازل:شنو اول مرة يشوفن ولد شبيهن متعجبات الطالبة:ولج لو تشوفين جمالهم يبووو ...كاعدين يم امي ازل:اهاا ماكو داعي اشوف ما يهموني الطالبة:شدعوة يابة هذا التكبر والغرور ازل:هسة صارت الاخلاق تكبر وغرور .. عن اذنج الطالبة: انت ليش شايفة نفسج ..انا هسة مو بنت المديرة مامتكبرة مثلج درت عليها وقررت اطلع حركة گلبي بيها: والله خبصتينا واذا بنت المديرة... لو جنتي بنت رئيس شسويتي والله يا الله باوعتلي مصدومة وراحت للادارة، جريت نفس لان ادري رح تروح تجذب: هو انا اليوم صبحت بوجه هذا الفگر شلون بعد يصير براسي حظ ورى اشوي طلعت واشرتلي : هسة انا شسوي الله لا يوفقك يا جهاد ما كو سايق سكران ويدعمك طبعا امشي وادردم ﴿تتحلطم﴾ والبنات يباوعلي مستغربات لان احجي وي روحي واغم نفسي،x دخلت للادارة هادة على المديرة: صباح الخير ست، قبل لاتحجين انا ما اسأت لشهد، هي عصبتني توني دخلت المدرسة وتلكتني، تعالي رح يجونة ولد حلوين كلتلها ما يهموني. انتبهت للمديرة مبتسمة بأحراج باوعت على يمنتي شفت اثنين كاعدين والمعاونة وياهم بس انا وكأن واحد دايس دكمة ﴿زر تشغيل﴾ما اشوف شي: بعدين ست وينهم بلة هذول الحلوين، هم هذول شو يخرعون باوعتلهم وجهم صوفر وواحد ظل يباوع للثاني، واحد منهم ضحك وكأن عمرة كلة ما ضاحكx ، اباوع للمديرة عاضة صبع وما حس الا شمرت عليه كتاب جان كدامها: ولج ام لسان بعدني ماحجيت شي وانت انهديتي، طلعي وبعدين احاسبج هسة مشغولة وبعد ما اتورطت حاولت اصلح الوضع ولو ادري بروحي خربت: ست اعتذر منج ومن الاخوان بس شهد نرفزتني، والله ست واحد ضايقني بالشارع ورحت اشتكيت للشرطي عليه، لهذا جنت معصبة باوعتلي المديرة بنص عين: عود هسة انت ردتي تصلحين الوضع، سلمي على روحج وروحي للصف انطيتهم نظرة اشمئزاز انتبهت لواحد منهم رافع حاجبة سويت بوجهة حركة بمعنى: وووع وطلعت ادور على صديقتي رحت للصف مالكيتها، رحت للساحة الصغيرة بعدين طلعت للساحة الكبيرة لكيتها كاعدة يم بنية ما شايفتها رحتلهن: السلام عليكم ..حنان صارلي ساعة ادور عليج باوعتلي: ساعة، خاف صارلج ساعة تتعاركين شبيج من الصبح سولفتلهن الصار وياي بس ماذكرت اختي بشي لحد ما وصلت من طلعت من يمهم اشوفهن فاطسات من الضحك حنان: ولج من ورى السانج ماعرفتجx ، هاي سجى طالبة خامس اعدادي، سجى ما حاجة اعرفج عليها ههههه سجى: لا حبي ماحاجة ابتسمت لها :اتشرفت بمعرفتج حنان :تدرين ازل تحب الشعر اهوااي، وهي حافظة اهواي اشعار مرات اخذ منها .. سجى:تكتبين لو بس تحفظين أزل:مرات قليلة جربت اكتب حنان:حبابة اريد قصيدة ...يلا كولي أزل:ولج مالي خلك حنان:فدوة لاتكسرين بخاطري أزل :ماشي باوعت كدامي وعيوني دمعت من ذكرت اختي حجيت بصوت حاولت يكون طبيعي بس صوتي عبر عن البداخلي من حزن والم وقهر يا غريب اذكر هلك - والكَالها ابحجية ايتنكّت هيّج اجروح الكَلب .. والعين كت مهضوم .. كتت ذكروّها .. واعادة اليذكر يحن .. والروح .. لاهل الروح حنّت ونتّ .. و ماظن مثل ونها .. الصخر خنساء ونّت صبّرتها وكابرت عالظيم .. والكابر يظل بسكوت .. ينهت طاحت وفوك الفشل .. بمصابها الشامت تشمت شلون ذلت .... ؟ اخ ياروحي .. الكّبل جانت عزيزة شلون ذلت .. ؟. ملت من ونينها ..و عذّالها من اللوم ملّت بعد ما خلصت باوعت لسجى تمسح دموعها :ليش بجيتي سجى:صوتج حلو بالشعر نزلت دموعي بسرعة حنان:بعد سوي قصيدة باوعت للوقت:رح يدك الجرص خل ندخل للصف سحبتني : وين اكو دروس اليوم... الصاكين يدرسونة ضحكت سجى وهزت ايدها اترخصت منهن، سجى:تخبل هاي الابنية ..وجسمها يخبل عبالك تمارس رياضة ..مبين عليها خوش ابنية بس صوتها حزين خاف تحب حنان:ولج هاي قافلة محد يكدر يفتح قفلها ...كلها تصاحب بس أزل لا سجى:ماكو وحدة ما تحب حنان:هي معقدة وتكره الولد.. سجى:هههه امبين بس جنها ماتعرف واحد من الولد ابن عمي يصير... حجت براحتها حنان:طبعا ماتعرف مو توني معرفتجن على بعض سجى:هم صدك هههههه حنان:ترى هي صح عصبيه وعدها عقد من ناحية الذكور بس اطيب واشطر منها ماشفت سجى: الله يوفقها ويستر عليها ****** الادارة جانت المديرة محرجة منهم خاصة بعد حركتها الاخيرة: انا اعتذر منكم... رح احاسبها على تصرفكم... اسفة استاذ هادي هادي: لا ست سهى لا تعاقبيها عادي ..المهم انتي ماقبلتي ندخل الا كتاب مصدق من التربيه وهذا الكتاب ست سهى: هذا هو اتفضلو وياي نبدي من السادس حتى نخلص منهم بسرعة... ست بان اخذيهم للصفوف هادي⌚ جنت احاجي المديرة واقنعها علمود ادعو البنات للنادي محتاجين كادر نسائي... وهي عندت الا كتاب من التربيه وديت صديقي عاد بالواسطة بسرعة مشووه توى كعد واشوف دخل علينا اعصار... بس شلون اعصار يخبل ظليت صافن بس على حركاتها وعصبيتها ..خرب والصوت يذبح عبالك دا تعزف مو تحجي... ضحكتني من فضحت صديقتها والاحلى شكل المديرة.. ردت اكوم ابوسها ريحت گلبي بالمديرة... اويلي يابة من دارت علينة وشفت العيون حسيت روحي رجفت من جمالهن... ماسمعت شنو كالت بس صديقي حجالي بصوت ناصي: اكلك هاي مااتحترم تكول علينة نخرع.. بلا عليك من الصبح امبدل وكاشخ... ضجت منها وانا شلون اتحمل روحي بطرف خشمي بس سكتت ..بعدها حاولت تصلح الموضوع... فاجئتني بوقتها من كالت اشتكيت عند الشرطي عجبني موقفها... بعدني ما مدحت بيها بداخلي شو هاي دارت عليه وسوت حركه بوجها لو شايفة صرصر هم ما باوعتلة هج.. ردت اكوم اجرها من شعرها واعلمها الادب شلون يصير... اختنكت ردت اكوم واطلع من المدرسة بكبرها بس صديقي لزم ايدي وغمزلي ****** وكف السيارة كدام الجامعة انتظرها تنزل التفتت عليه: انت ليش كصيتلي صورة بدون علمي باوعلها بزعل: كلتلج اشتاق اشوفج وحبيت تبقى يمي بس انت ماتثقين بيه وهج: مثل ما وثقت بيك ووزعت رقمي ورقم اختي جهاد:كنت عصبي وانطيت رقمج وهج:وشنو يضمن الي ...ماتوزع صوري خلاص الصار صار وانت مسحت الصورة جهاد:هه اي...اكلج اخوي يريد وحدة يتعرف عليها ..ليش ما تخلين اختج تحاجيه وهج:طبعا لا ..بعدها صغيرة...وبعدين هي قافلة على هذا الموضوع جهاد:نشوف وهج:ابتعد عن اختي جهاد:ترى انا اخاف عليها ..اكول خطية بعدها صغيرة ليش تروح لغريب وهج:عوفها بحالها جهاد🍃 كنت فعلا اريد اخذها لبيتنا ...بس تذكرت اختي موجودة ولهذا اجلت الموضوع ....الغبية عبالها اتزوجها هه..ماكو واحد يتزوج وحدة هج تقبل على نفسها تطلع وي شاب ومكالمات ...البنية عبالها بهاي التصرفات الشاب رح يتمسك بيها ..بس هو بالعكس رح ياخذها تسلية لبعض الوقت ...واكو بيهم صدك يلكون البنية التحافظ على روحها ويجربها بهواي اشياء تكون وفيه له وحدة ...الغبية عبالها مسحت الصورة... ماتدري نسختها ****** انتبهت لصوت بجي طفل باوعت لابن اختها:ياحبيبي اسفة نسيتك... ممم جوعان امشي اوكلك جرت حسرة اكثر شي يتعبها اختها جانت تحجيلها كل شي يصير بينهم حتى مكالماتهم جانت تسمعهم راحت للمطبخ وكعدتة بالارض سوتلة اكل وكعدت توكلة دخل عامر: انا رايح اجيبهم تعالي قفلي الباب ازل: ماشي طلعت وراه وانا شايلة ابن اختي... قفلت الباب ورجعت للمطبخ اوكله وانا اغني سميني شتريد الالم نسيتة واجرحني كل يوم راضي بأذيتة ليش انت بالذات اقبل بعذابة يمكن لان عاش كلبي ع نيتة في الحياة انواع من البشرx مو غريبة الاخت تغدر...لكن الصعب في الامر خيبة الامل في شخص كنت تثقx فيه ثقة عمياء حقا لاتثق بكل شخص ..ليس كل الاشخاص كأمك ******** ياسطور احتوي وجعي، كما تحتوي الام طفلها، خذي مني احزاني واعطني ابتسامة، اريد ان اغمض عيني حتى ينتهي هذا الكابوس، وكأن كل شئ اصبح جميل، واللون الاسود تغير الى اللوان زاهية، ياسطور وجعي خذي هذا الالم مني، انه يمزقني ويضعفني اكثر،هل تعلمي ما اريد، اريد الكثير ولكن هل سيأتي يوم يتحقق كل هذا . . . . لا اظن ..انه مستحيل مهلا!! وكم مستحيل اصبح ممكن وكم دموع تحولت لابتسامة بريئة وكم من نظرات حزينة تحولت لسعادة وكم وكم . لابد للظلام ان ينجلي ويحل محلهُ النور مااتوب من عيني اغفى وتبجيني ارمش وبيك احلم ادري انت ماجاي بس انت موضوعي ياعاشر ادموعي تتلفت اشموعي على الباب وياك گلبي طفل دك الرجل يابوية مشتاگ بخيمة جمر اكضي العمر ولا لوعة فراگ حست بأختها تحضنها :اذا تحبي ليش ما تنطي فرصة مو دا يكلج رايدج بالحلال، لا تحكمين عليه ترى مو كلهم مثل جهاد مسحت دموعها :انت متوهمة ما احب احد، ابنج وكلتة وتوى نام، يكلي خالة صوتج احلى من صوت امي وهج: لا والله، ليش غيرتي الموضوع درت عليها :لان مو مهم، ولاتفتحين الموضوع وياي ولاتنسين احنا بالمطبخ وهج: لا تخافين ما افضحج مثل ما سويتي وياي ازل: السويتة لمصلحتج واظن لو زعلانة مني، جان ما باوعتي بوجهي مو هسة كاعدة وحاضنتني عبالج ذكول الناس خلت التلفون كدام وجهة: اذا الموضوع مغلق لعد شنو هاي، لاتخافين ما اراقبج او ادور وراج بالصدفة شفت اخذت التلفون بعصبيه: منو سمحلج ادورين وراي وهج: وغلاة ابني مادورت وراج، اخذته حتى اتصل على تلفوني، بس الفاجئني ماعرف حتى شنو اكلج، قريت رسائلكم ازل: تردين تعرفين وهج: اي طبعا ازل: ماكدر احجي شي هسة لان نفسيتي تعبانة فوگ ماتتصورين، انطيني مجال رح يجي يوم واحجيلج وهج: تحجين صدك، لج انت مخبلة لج شوفي يكلج صحتي مدمرة ومحتاجج، لج هو يشكيلج همومة يريدج توكفين وياااه وانت تطردين بيه ازل: لج صوتج تردين اليوم انگتل ماكدر احجي شي. وهج: انا رايحة لبيتي محمد رح يجي تعالي وياي ازل: لا ماكدر دخل عامر للمطبخ: يلا وهج ابو حيدر بالديوانية وهج: اي حبيبي بس اللبس عبايتي... اخذ حيدوري لابوه من طلع :بعدين اخابرج هزت راسها بمعنى اي بس تريد تتخلص من ملحتها كامت من الارض وهي مختنكة من اختها :ازل دارت عليها: نعم غمزت لها : لاتنسين وكفتة ويانة، ترى هو خوش ولد ضحكت بدون نفس: هه ودعت اختها وزوجها وبوست حيدوري، رجعت للصالة كعدت يم اهلها تسمع سوالفهم دارت عليها امها: يلا ازولة اليوم ما ناوية تعشينة ازل: شنو اسوي عشة ابو عامر: اريد فطائر بالجبن والزعتر 😁 ازل: ياعيني بس ما اللحك اسوي باجر ان شاء الله ام عامر: حبيبتي ابوج جابلنا عشة جاهز بس حضريه ازل: صار من عيوني راحت للمطبخ تحضر العشاء... ازل🎶 جنت ادندن واوكل حيدوري ، بعدين كلالي غنيلي ، عمرة سنتين حبيبي فديتة عاقل، وانا مندمجة حسيت بوهج تحصني ، يعني شفت ايدين مرة اكيد مو امي هههههههه ست الحبايب بوس ما تخليني ابوسها ما اصدك تحضني، المهم طبعا عرفت وراها شي بس ما اتخيلت توصل لصورتة الضامتهة، فجأة صارت عيني بعينه وكأن هو كدامي خنكتني العبرة وانا اشوف صورتة اكبالي ، سمعتها تبرر الي بس ماصدكتها لان اعرف شنو هي وشنو سوالفها، لمت روحي شلون نسيت الرام بالتلفون ، صح تلفوني من هذا العادي بس يصيرلة رام يعني مايكنك نت وهاي الصورة بعيد ميلادي دزها رسالة وسائط بوقتها فرحت حيل، وظليت للصبح ما نايمة، اليوم هاجت جروحي وحبيت اشوفة حطيت الرام ونقلتها للتلفون، اما محادثاتنا جنت ناسختهم بملاحظات الاخت خوش امفتش، احساسي لو اريد اوصفة ، مثل واحد ماباقي بجسمة مكان ما مجروح بيه، ويجي واحد ثاني بكل برود يذب عليه ملح، هج حالي حاولت ابجي ماكو دموع يبست عيوني شسوي، اختنكت والله مااتحمل بعدx مشاعري قادتني كضيت التلفون كتبت الرقم اريد اتصل بيه واكولة ماكدر اتحمل بعدك ومسامحتك، اترددت اااخ ربي هذا الما عندة واحد يشكيلة بس ياربي ما اكول غير الك المشتكى. حسيت اكو شخص واكف وراي درت لكيتة عامر يباوعلي بشك: شبيك تباوعلي هج عامر: حالج ماعاجبني... ديري بالج على روحج ازل: شبيك تحاجيني هج شمسوية هسة انا عامر: عبالج ماعرف شنو ضامة... كل شي اعرف بس ساكت انخطف لوني وگلبي وگف، هواء ربي شكثرة اريد اخذلي نفس ماكدر كضتني الرجفة من رجلية، والله باد حيلي اي شنو هل عيشة الكلها خوف بخوف كعدت على الكرسي وايدي عاصرة على التلفون من قوة عصرتي يمكن طكت الشاشة، شفتة خاف علية :ولج خبلة شبيج خوضرتي... اشاقة يمعودة اقصد على قوطي البيبسي... هو كال هج وانا رجليني نملن ووجسمي كزبر مثل واحد حرارتة مرتفعة ويذبون عليه ماي ثلج، باوعت على الطاولة اكو خاشوكة شمرتها علية: حرام عليك... جلطتني والله ابتسم :عندي موضوع وياج ازل: مممم اشم ريحة بنات بالسالفة عامر: هههههههههه صديقتج رانيا (ناقصني بعد تذكرني بيها):مادري عنها شي من نص السنة بطلت وتلفونها مغلق دنك راسة خجلان :زين انت شتشوفيها، خوش ابنية ازل: تريد تخطبها عامر: بصراحة اي بس كلتلي لازم تشتغل فتحت عيوني: بعدكم تتحاجون عامر: اي ليش كمت من يمة خايب ضني بيه :بعد انت مقرر ليش تسألني روح لامي وابوي يخطبولك كملت شغلي وحضرت العشة ..صحتلهم يتعشون :بالعافية انا ما اشتهي امي قلقت علية :ازولة ليش ماتتعشين... بيج شي ازل: لا مابية شي... من اجوع اجي اكل عاتبتني لان كاطعة الاكل: ليش ماماتي كاطعة الاكل شوفي روحج شلون ضعفتي ما جاوبتها رحت لغرفتي، وياريتني ما دخلت... الغرفة مخبوصة خبص ملابسي كلها بالارض وغراضي ..كتبي مطشرات اجت ابالي شغلة وحدة... ماكو غيرها وهج مسوية هج... كعدت بالكاع بجيت ..لحد ما انكطع النفس... طخت بعقلي الرام ماموجود فتحت التلفون لكيتة موجود ..دورت على الصور البيه مالكيتهن بس صورة وحدة.. رحت للمحادثات ممسوحة... اقسم بالله حسيت واحد كضني من رگبتي وخنكني ظليت افرگ بيها بلكت ارتاح... شهكت بعلو صوتي مااسمعت غير همسة الم ووجع طلعت مني... ليش هج تسوي بيه... حاولت اليوم افتح صفحة جديدة وياها بس الظاهر الناس كلها مو محل ثقة طكيت التلفون بالارض من قهري صار طشار الشاشة بصفحة والغلاف بصفحة رحت لاهلي كوة امشي وانا افرگ بركبتي وصلت لباب المطبخ اريد اصيح امي مايطلع صوت انتبهلي عامر اجاني يركض: ازل شبيج حاجيني ماكدر اجاوب بس دموعي تنزل ركضو علية اهلي انخبصو بيه خبص ابوي ركض لجهاز الضغط...طلع ضغطي معلك... سوتلي امي عصير ليمون من شربتة حسيت براحة وانفك ثگل لساني حجيتلهم الصار وياي ..راحو للغرفة اتاكدوو وجان ابوية يخابر عليها يرزلها رزالة التشفي الگلب... وعامر وعدني يجيبلي تلفون احسن من العندي :ههههههه لو ادري من زمان كاسرة تلفوني حتى اخسرك فلوس عامر: طماعة عود ردت اسويلج مفاجئة واجيبلج هدية نجاحج موبايل ازل: الله نسيت روحي ناجحة.. وبعدين احب اسميه تلفون... هههههههههه موبايل ثگيل على گلبي عامر: يلا عيوني ام گلب الرچيچ حو رح اجيبلج تلفون... ساعديني بموضوعي ام عامر: شنو موضوعك ازل: اروح وياه حفلة التخرج مالت الجامعة الي بعد شهرين ام عامر: اهااا اي عادي كولنا نروح وياك عامر: هو خل احضرها انا بالاول يلة ترحون انتوا ازل: انا رح اروح ارتب الغرفة... امي الحبيبة رح اخذ تلفونج عامر: لا تاخذينة رح اطلع اجيبلج تلفون.. كم ازل عدنا ازل: فدوة حبيبي باوعلي بنص عين: يدلل الحلو عامر☘ بعد ما شفت حالة ازل ركضت عليها.. خفت عليها اشوفها تحجي مايطلع صوت... دمعت عيوني شسويلها هسة.. قاس ابوي ضغطها مرتفع حيل بس سوتلها امي عصير ليمون استقرت ..جبتلها بطل مي حتى ينزل ضغطها... من حجت شنو صاير وياها انقهرت من وهج... انا اعرف ازل املاكها عزيزة عدها وجانت دوم تاذيها بهاي السالفة لو تمسح صورها لو تخرب شي تحبة... بس هل مرة تعدت كل الحدود يعني غرفة مرتبة وشحلاتها رحت لكيتها حشاكم مزبلة صايرة حتى سلة الزبالة ناثرتها بالغرفة شنو هل الخباثة مااعرف... عبالي انعدلت من ازوجت بس الظاهر الاعوج يظل اعوج... قهرتني كلش من كلتلي من قهري كسرت تلفوني... انا صارلي كم يوم اشتغل وي صديقي بمحل وجمعت فلوس خيرات الله ..كلت افرحها بتلفون حالها حال البنيات الي بكدها وهي رح تدخل جامعة خو تظل على تلفونها العاوي... شفتها فرحت من كلتلها رحت بدلت وطلعت وانا امشي شفت سيارة صديقي طابكة براس الفرع :ها ولك شعندك اهنا شفتة صاير نار وشرار دخيلك ربي شبيها الناس اليوم جان لازم تلفونة ويتصل :تعال اجيت عليك خل نطلع انغير جو جاوبتة وانا اركب السيارة: لا ماكدر اتاخر اريد اشتري تلفون لاختي... تلفونها انكسر سمعتة يجر نفس وضرب الاستيرن :شبيك ولك جاوبني وهو يمسح على وجهة: مختنك اريد اطلع امشينا نشتري التلفون. وبعدين نروح نفتر سكتت ماحجيت لان حالة مو طبيعي ..كلتلة على الابنية الرايدها شفتة اتغير لونة :عامر ماتفيدك هاي الابنية... مو خوش ابنية صارت بوجهي علامات استفهام: انت شتحجي صارلي اربع سنوات وياها شمر علية تلفونة الثاني :هك شوف بعينك،تذكر من كلتلي جربها,انا نسيت الموضوع بس هي ماخذة رقمي من النادي اخذت تلفونة واقرأ محادثاتهم وحتى صور مودية له... ضحكت من گلبي التفت عليه بسرعة: شبيك ولك اتخبلت درت عليه وانا اضحك بصوت عالي: خوية كلمة حبيبي تكلي حرام اكولها الك يمكن خلصنا الطريق نضحك... بس ضحكنا مو مال ناس فايخين لا والله كل واحد يضحك من ضيم گلبة . . . . يتبع⬅ | ||||
|
|
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
