آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
11-05-19, 01:28 PM
| #21 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب  
|  الحلقه ال 19 فاتن سيطرت عليها فكره واحده.. انها تخلص من ندي وبتدور علي طريقه تعمل بيها ده.... ندي نفذت وعدها ومع ادم في كل خطوه وهو اتعمد يخليها معاه في كل حاجه بحيث ما تغيبش لحظه عن عنيه.. طول النهار مع بعض واخر النهار بيبعدوا بالعافيه بيوصلها ويفضلوا في العربيه قدام الباب ساعه او اكتر... في اجتماع ادم: دلوقتي فاضلنا خطوه ان احنا نبدأ نشوف مين في الماركات العالميه اللي هيدخل معانا او هيأجر محلات.. بس حاليا اهم واحد عندي صاحب محلات بنده وده صاحب اكبر سلسله سوبر ماركت في المملكه وطبعا لو فتح فرع هنا هيكون شيئ كويس... سالم: بنده؟؟ ده زي هايبر ون وكارفور صح؟ ادم: بالظبط بس علي مستوي اعلي.. المهم ان احنا نقابله.. مريم عرفتي حاجه ؟؟ مريم: عرفت كل حاجه عنه وجبتلك عنوانه وكل حاجه عنه هو اسمه فهد محمد القرشي بس ايه اللي هيخليه يوافق يستثمر هنا؟؟ ندي: سيبولي انا موضوع اقناعه ادم والكل بصولها باستغراب ادم: اشمعني يعني؟؟ ندي: لان انا اعرفه معرفه شخصيه ادم بغيره: تعرفيه منين ان شاءالله؟ ندي: اعرفه من زمان... اتقابلنا في امريكا وكان مقرب جدا من العيله هناك وبالتالي معرفتي بيه قويه مش مجرد معرفه عابره... انا هقابله وهتكلم معاه ادم: انتي لا هتقابليه ولا هتتكلمي معاه؟ ندي: ليه بقي ان شاءالله؟ ادم: علشان انا قلت كده ندي بذهول: افندم؟؟ ادم: اللي سمعتيه الكل عارف ان خناقه جديده هتبدأ وهتستمر لحد ما حد فيهم يسيب المكان ندي: لا طبعا... ادم! ادم : افندم!! مقابله مش هتقابليه ندي وقفت وادم وقف قصادها ندي: انا بقولك اعرفه وهتكلم معاه انت ايه مشكلتك؟ ادم: مشكلتي اني مش عايزك تقابليه ولا عايزك تتكلمي معاه اقفلي بقي الموضوع ده ندي: لا مش هقفله ادم: وانا بقولك اقفليه ندي: مش هقفله يا ادم... انا سبق وسيبت الشغل هنا وانت جيتلي وقولتلي انك محتاجني يبقي سيبني اساعدك ادم: مش دي الطريقه اللي عايزك تساعديني بيها ندي بصدمه وكأنها استوعبت حاجه مهمه ندي: انت مش محتاجني اصلا هنا... انت بس كنت عايز تخليني قدام عنيك صح؟ هههه وانا صدقتك بعد اذنكم اخدت شنطتها ومشيت وادم بيناديها بس ما ردتش عليه.. كان هيولع.. الكل بيبصله ومستنيه يتكلم بس قام وقف مره واحده ومشي وري ندي من غير ولا كلمه لحقها بره واقفه مع كام موظف وسط المكاتب راحلها ومسكها من دراعها علشان ياخدها مكتبه يتكلموا بس شدت دراعها منه ووقفت قصاده بتحدي قدام الكل ندي: انا مش هتكلم معاك.. انا شغلي هنا انتهي ادم: ما تلويش دراعي انا مبحبش الاسلوب ده ندي: انا ما بلويش دراعك انا بس بقولك ايه اللي هيحصل طبعا صوتهم كان عالي فاللي جوه الاجتماع خرجوا سالم: اهدوا انتو الاتنين لا ده مكانه ولا وقته الاتنين بصوا لسالم ومع بعض الاتنين: حضرتك ما تتدخلش سالم رفع ايديه: قطعوا بعض ادم: باباكي عنده حق لمي الدور وتعالي نتكلم جوه ندي: انا مش عايزه اتكلم معاك اصلا... ادم: كل ده علشان قولتلك مش هتقابليه؟؟؟ ندي: كل ده علشان سيادتك ما بتثقش فيا... انت زي ما انت... انت عمرك ما وثقت فيا ولا هتثق؟؟ ادم: ايه دخل الثقه دلوقتي هاه؟؟ ليه ما تسميهاش حب او غيره مثلا؟ ؟ ندي: لان الغيره بتبقي غير كده يا ادم.. ساعت ما اتكلمت انا ومهندس وائل دي كانت غيره.. في الحفله كانت غيره لكن دلوقتي ده تملك.. لما تبقي خطوه كبيره في المشروع زي دي وانا اقدر اساعدك فيها وانت ترفض لمجرد الرفض يبقي ده مش منطقي ولا دي غيره ابدا ويبقي انت اصلا مش محتاجني هنا وانا هنا كصوره او براوز انت حاطو مش اكتر ادم: كلامك مش صح انتي مش هنا صوره ندي: يبقي اثبت كلامك ده... ثق فيا مره يا ادم ادم: الموضوع مالوش علاقه بالثقه يا ندي ندي: الموضوع كله ثقه يا ادم... يا اما انت مش واثق فيا وفي اخلاقي وعلشان كده رافض ان انا اقابله؟؟؟ يا اما مش واثق فيا ان انا ابقي مسؤله عن خطوه مهمه في مشروعك؟؟ في كلتا الحالتين الموضوع ثقه ادم: انا مفكرتش كده ابدا.. انا اولا لو عندي شك في اخلاقك او مش بثق فيكي مكنتش هطلب منك تتجوزيني ابدا ( الكل بيهمهم) وثانيا المشروع ده كله ما يهمنيش ده مجرد بيزنس وبعدين انا مستعد اسلمك عمري وحياتي فمشروع ايه ده اللي هخاف عليه.. مازلتي سطحيه يا ندي في امور كتير... مقابله مش هتقابلي الراجل ده واللي عندي قلته سابها ومشي بس هيا وقفته ندي: انا سطحيه اوك... انت رافض ليه؟ بتفكر ازاي؟ ادم: بفكر زي ما بفكر بعد اذنك راح لمكتبه ورزع الباب وراه وطبعا ندي وراه ورزعت الباب اكتر وصوتهم مازال عالي سالم: كل واحد علي مكتبه العرض المجاني خلص يالا ندي وادم كملوا خناقهم ادم: يا الله منك يا ندي... انتي عايزه ايه مني؟ ندي : افهم انت ليه رافض اقابله يا اما قسما بالله يا ادم لهخرج من المكتب ده ومن البلد كلها ادم: انتي بتهدديني ولا ايه؟ الاسلوب ده ما بينفعش معايا علي فكره ندي: انا ما بهددكش انا بس بقولك اللي هيحصل.. انا مش هقدر افضل في مكان انت فيه وما اشوفكش ومش هقدر ابعد عنك ولا انت هتسيبني ابعد يبقي الحل اني اسيب البلد كلها تاني ادم: انتي عايزه ايه دلوقتي؟ انا تعبت ندي: عايزه افهم... ايه اللي صعب في ده؟ ليه حاطط حواجز بينا؟؟ ادم: الحواجز سيادتك اللي حطاها... انتي اللي رافضه اننا نكون مع بعض وبسبب حجج ملهاش لازمه ندي: ممكن تكون بالنسبالك ملهاش لازمه لكن بالنسبالي مهمه ادم: وده نفس كلامي اسباب رفضي ممكن تكون ملهاش لازمه في نظرك لكن بالنسبالي انا مهمه ندي: هقابله ومش هتمنعني وهجيبلك موافقته علي المشروع ادم بنرفزه: مش عايزها.. عارفه انا غيرت رأيي اصلا انا مش هكلمه نهائي ريحي نفسك بقي ندي يدوب هترد الباب اتفتح ودخلت مريم مريم: لحظه وكملوا خناقكم( الاتنين بصولها) معلومه صغيره ما اديتونيش فرصه اقولها... ادم: انجزي يا مريم مريم: فهد القرشي اللي بتتخانقوا عليه مش هنا هو في السعوديه وتحديدا في الرياض بس حبيت اوضح النقطه دي خرجت مريم وسابتهم ادم: اعتقد كده الموضوع اتقفل ندي: هسافرله ادم: نعم؟؟ لااااا انتي كده بقي اتجننتي رسمي... انا معنديش استعداد اكمل معاكي الجنون ده بعد اذنك سابلها المكتب ومشي خالص ندي خرجت هيا كمان والكل بيبصلها والكل عايز يعرف خناقتهم خلصت علي ايه؟؟ تاني يوم ندي راحت لمريم: مريم هاتيلي كل حاجه عرفتيها عن فهد القرشي مريم: بس ادم ندي: سيبي ادم ليا.. هاتيلي بس اللي طلبته وجهزيلي نسخه من المشروع واحجزيلي علي اقرب طياره للرياض مريم فاتحه بوقها ومش عارفه ترد ندي: اقفلي بقوك ونفذي اللي قلتلك عليه.. واه صح احجزي تذكرتين مش تذكره واحده واحجزيلي فندق كويس علشان ننزل فيه مريم: تذكرتين لمين؟؟ سالم بيه هيسافر معاكي؟؟ ندي بابتسامه: ادم اللي هيسافر.. جهزيهم وقوليلي مريم: حاضر بس لعلمك ادم مش هنا النهارده ومش هيجي الشغل ندي: عارفه مريم جهزت المطلوب وعطته لندي وهيا بالليل راحت لادم ودي كانت اول مره تروحله شقته... خبطت وادم فتح كان بلبس البيت ودي اول مره تشوفه بلبس في البيت غير الجلابيه بصتله من فوق لتحت باعجاب ظاهر ادم: هتدخلي ولا هتفضلي تتفرجي من بره كتير دخل ادم وساب الباب مفتوح وراه وهيا دخلت وقفلته عجبتها الشقه اللي جوها كان هادي ورمانسي ادم قعد علي الانتريه قدام اللاب بتاعه وكان فيه موسيقي واطيه شغاله فندي راحت وعلت الصوت ولقت اغنيتها شغاله اللي غنتها في الحفله فبصت لادم اللي لقته باصصلها واتقابلت عنيهم وبعدها بص للاب بتاعه.. ندي وطت الصوت تاني وخليته هادي وراحت وقفت قصاد ادم وقفلت اللاب بتاعه ادم رجع لوري في قعدته وبصلها وطبق ايديه علي صدره ادم: افندم؟ ندي طلعت ظرف من شنطتها وحدفته قدامه علي اللاب بتاعه بصله ادم: ايه ده؟ ندي: افتحه وشوف ادم مد ايده وفتحه وقلب فيه ورماه تاني بغيظ ادم: عايزاني اقول ايه؟ ندي: عرفت ايه دول؟ ادم: تذكره سيادتك للرياض ندي: وتحتها تذكرتك انت ادم: وبعدين معاكي؟؟ هو انتي بتعارضيني ليه؟ من يوم ما عرفتك للنهارده بتعارضيني لمجرد المعارضه ندي: لا طبعا انت بس اللي ما بتحاولش تفهمني وما بتحاولش تعرفني اسبابك.. يجري ايه لو قولتلي ما تعمليش كذا علشان كذا؟؟ بلاش صيغه الامر معايا يا ادم ارجوك ادم: ويجري ايه لو انتي نفذتي اللي انا بطلبه وبعدها تسأليني ليه وانا ساعتها هقنعك؟؟ ندي: لاني ما اتعودتش اعمل حاجه انا مش مقتنعه بيها وبعدين الصح انك تفهمني الاول انت عايز ايه وبعدها تستني مني اعمله ولا ايه؟ انت نفسك ما بتعملش اي حاجه غير المقتنع بيه صح ولا بيتهيألي؟ ادم: ندي انا تعبت من الخناق ارجوكي كفايا.. انتي حجزتي التذاكر سافري انتي حره بس انا مش هسافر.. خدي باباكي معاكي انا لأ ندي: ليه يا ادم ارجوك بقي؟ ادم: لا يا ندي سافري انتي بس لعلمك ده هيكون النهايه لينا علشان بس تبقي الامور واضحه... انا قلتلك ابعدي عن الموضوع ده وانتي رفضتي فاسف مش هكمل مع واحده بترمي كلامي عرض الحائط ندي: هو انت مش واخد بالك ان احنا متطلقين اصلا ولا ايه؟ ادم: لا واخد بالي كويس بس عارف اننا بنحب بعض وعارف اننا هنرجع لبعض الموضوع وقت مش اكتر لكن كده احنا وصلنا لحيطه سد ندي: كل اللي طلباه منك ليه؟ ليه؟ ليه؟ ادم بنفاذ صبر: لاني خايف اوكي... خايف يا ندي.. ندي باستغراب: خايف؟؟ خايف من ايه؟ ادم: خايف انه يكون لك ماضي معاه هو كمان وخايف انك لما تروحي تقنعيه يفتكر ان ماضيه لسه عايش وخايف انك تضطري تعملي حاجه غصب عنك وخايف انه يوافق لمجرد انه يوصلك انتي... والاهم من كل ده مش عايز ابني مشروع علي اساسك انت وبعدين انتي ازاي عايزاني اقبل ان ادخل شريك معايا وافق انه يشاركني علشان كان علي علاقه سابقه بمراتي؟؟ ازاي؟ نقف قصاد بعض ازاي؟؟ بلاش ...انا اقف قصاد نفسي ازاي؟؟ انتي بتفكري ازاي؟؟ ندي واقفه مذهوله ومبسوطه من جواها وسابته يخلص كلامه وبعدها قربت منه وقفت قصاده وهو جه يبعد بس مسكته من وشه وقربت قوي ومره واحده ادم مسك ايديها وبعدها عن وشه بس لسه ما سابهمش من ايده ندي: انا بحبك قوي ادم: وانا عارف ده بس برضه مش موافق جه يبعد بس هيا ما سابتش ايديه فوقف مكانه وبصلها ادم: ومش هتغيري رأيي بده ندي ابتسمت: عارفه بس في نقطه مهمه انت ما عطتنيش فرصه اوضحهالك ادم: اتفضلي ندي: ان انا وهو مش بينا العلاقه دي... ده كان واحد من اللي امي اتجوزتهم.. الوحيد اللي انا احترمته وحبيته واعتبرته زي ابويا بس امي ملهاش في الجد والمحترم وبالتالي اتطلقت منه بس انا وهو فضلنا علي اتصال وفي اي وقت بحتاج لحاجه مش بيتأخر وبيعتبرني بنته.. عرفت ان رفضك مالوش اساس؟؟ ادم باستغراب: وما قولتيش ده ليه من الاول؟؟ ندي: انت اديتني فرصه؟؟ وبعدين انا كنت ناويه اقولك اول ما نبقي لوحدنا لاني محبتش اتكلم كده قدام بابا وقدام الموظفين بس انت اللي معطتنيش فرصه ادم: كان ممكن تقوليلي بعدين وخلاص بس انتي وقفتي قصادي ندي: لاني ما بحبكش تأمر وبس ومش عايزه ده ادم: ويجري ايه لو تنفذي اللي انا بقوله من غير خناق؟ ندي: ويجري ايه لو انت تطلب باسلوب كويس؟ ادم: انا كده وده اسلوبي ندي: وانا كمان كده ادم: وبعدين؟ ندي: قابلني في نص الطريق... حاول تفهمني انت عايز ايه وانا هحاول انفذه ادم: اتفقنا بس برضه انا معترض علي سفرك ندي: ليه بقي؟ وبعدين انا نفسي اعمل عمره يا ادم ممكن؟؟ ادم: عمره؟؟ دي ممكن طبعا.. طيب خلينا نتجوز قبل ما نسافر يا ندي وتسافري مراتي؟؟ ندي بعد تفكير: لا اسفه.. مش هقدر.. سيب فاتن وانا شبيك لبيك لكن وهيا موجوده لأ ادم: خلاص انتي حره انتي كده كده اصلا مراتي ندي بابتسامه: مراتك؟؟ لامتي؟؟ ادم: لاخر يوم في عمري انا اصلا كنت متخلف ساعت ما طلقتك ندي: كنت ومازلت ادم: ماشي مازلت مش عاجبك؟؟ ندي: ماهو المصيبه انه عاجبني والمصيبه اني بعشقك يا ادم قوي قربت منه وسندت راسها علي صدره ادم: والمصيبه الحاليه انك لو ما بعدتيش حالا مش هضمنلك ايه اللي ممكن يحصل ندي ضحكت وبعدت: هتنزل توصلني؟؟ ادم: هغير ثواني ادم دخل يغير هدومه واتصل بسالم ادم : ايوه يا عمي انا هوصل ندي عندك دلوقتي البيت ومحتاج منك خدمه سالم : طبعا قول علي طول ادم : محتاج منك ترفض سفرنا انا وهيا مع بعض وانه ما ينفعش نسافر كده من غير علاقه شرعيه تربطنا ولو هيا مصره علي السفر يبقي تسافر وهيا مراتي وبالتالي نكتب الكتاب سالم : ادم انت عايزني تاني اجبرها علي الجواز منك ؟؟ ادم : عمي انت عارف اننا بنحب بعض انت بس اعمل الخطوه دي والباقي سيبه عليا انا ارجوك يا عمي دي اول مره اطلب منك طلب وزي ما انا ساعدتك قبل كده بطلب منك تساعدني سالم : يا ابني انت عارف غلاوتك عندي بس خايف اخسرها ادم : ما تخافش وسيبها عليا اتفقنا سالم : اتفقنا وربنا يستر وصلوا البيت وادم وصلها وسالم خرجلهم سالم : استني يا ادم وادخلوا عايزكم انتو الاتنين دخلوا وقعدوا ندي : خير يا بابا ؟ سالم : دلوقتي سيادتك هتسافري مع ادم بصفته ايه ؟؟ يعني مسافرين مع بعض ازاي ؟؟ ندي : ده بزنس يا بابا سالم : ولا بزنس ولا غيره .. انتي الحمد لله اتغيرتي وبقيتي متدينه وبقيتي عارفه الحلال والحرام .. سفرك معاه حرام شرعا ندي : بابا اعتبرنا كل واحد مسافر لوحده سالم : سفرك لوحدك بدون محرم برضه حرام ندي : يووه يا بابا انت عايز توصل لايه ؟؟ وانت ساكت ليه ما تتكلم ادم : انا عندي حل بس اتمني تسمعيه وما تعارضيش وخلاص ندي : اتفضل قول ادم : نكتب كتابنا قبل ما نسافر وبكده هتسافري وانتي مراتي واعتبر محرم ليكي ندي : وده اللي انت عايزه .. بتلوي دراعي ادم : انا بحبك وانتي عارفه ده كويس .. بس حاليا لا مش بلوي دراعك احنا هنكتب الكتاب ولو عايزه تلغيه او تطلقي بعد ما نرجع حاجه ترجعلك انا عمري ما جبرتك علي اي شيء ولو عايزه تكملي معايا هكون اسعد راجل في الكون كله .. بس في نقطه مهمه لو انفصلنا تاني يبقي كده اتطلقنا مرتين هاه ؟ فاضلنا واحده كمان والموضوع يخلص ..القرار في ايديكي ندي : بابا اتكلم سالم : كلام ادم صح .. يا تسافري وانتي مراته يا تلغي فكره السفر تماما .. القرار في ايدك ندي حاولت تتكلم بس سكتت ومره واحده سابتهم وطلعت اوضتها ادم وسالم فضلوا شويه بيتكلموا ويدوب ادم هيمشي ندي نزلت ندي : انت لسه مكانك ؟؟ ادم : انتي عايزه ايه ؟؟ ندي : فين المأذون اللي جبته ؟؟ مش ورانا طياره الصبح ؟؟ ادم ابتسم : جاي في الطريق خرج اتصل بسعد وقاله يجيبله مأذون من تحت الارض ويجي واتصل بكريمه وبلغها باللي حصل بسرعه كريمه : تاني يا ادم جواز بالشكل ده ؟ ادم : اوعدك يا كراملتي هعمل فرح ما اتعملش قبل كده كريمه : واوعدني ان دخلتك تكون هنا ؟؟ في البيت ده ؟ ادم : بس كده انتي تشاوري جه المأذون مع سعد وكتبوا الكتاب وكان سالم وسعد شهود وندي من جواها فرحانه بس زعلانه في نفس الوقت كانت بتتمني تتجوز ادم بفرح كبير ومن غير ما يكون لها شريك الكل مشي وسابهم لوحدهم ادم : بقيتي مراتي تاني مسك ايديها وبيشدها يقربها منه وقرب منها جامد علشان يبوسها ومره واحده رفعت راسها و وشها في وشه وبتحدي ندي : اوعي تتخيل للحظه اني هبقي مراتك بجد وانك ليك حقوق والكلام الفاضي ده ؟ طول ما فاتن هانم علي ذمتك انا ابعد من نجوم السما .. علشان بس نبقي واضحين يا حبيبي ادم بعد : ولازمتها ايه حبيبي اللي في الاخر دي !!! تصبحي علي خير هجيلك بدري ونطلع علي المطار وفعلا جالها واخدها علي المطار و وصلوا الرياض ونزلوا في الفندق اللي مريم حجزتلهم فيه وندي كلمت فهد ورحب بيها جدا هيا وادم واتقابلوا ورفض يتكلم في الشغل نهائي الا لما يضايفهم بطريقه تليق بيهم وتليق بيه اولا.. اتجمعوا كلهم مع بعض علشان يتكلموا في الشغل وبدأ ادم وندي يشرحوا فكرتهم ومشروعهم ولاقي ترحاب كبير من فهد واستعد ورحب انه يمول المشروع كله من الالف للياء بس ادم رفض تماما الفكره واتفق انه بس يفتح فرع عنده في مشروعه... ادم مع ندي في الفندق بيتعشوا ندي: حاسه اني في سجن كده جوه الكابينه دي ادم: هما نظامهم كده.. كل المطعم كباين متقفله بحيث كل واحد مع عيلته براحتهم ومحدش يضايق حد ندي: ماشي يعملوا اماكن كده واماكن كده وكل واحد حر يقعد في المكان اللي يريحه ادم: ده نظام بلد هتغيره علي مزاجك؟؟ هما بيطبقوا الشريعه.. ممنوع الاختلاط فبالتالي مانعينو ندي: اهو دي خنقه المهم هنسافر من هنا امتي؟ ادم: بكره الصبح بدري هناخد الطياره لجده ومنها نشوف اي حاجه لمكه ندي: ما تتخيلش انا متحمسه قد ايه وفرحانه قد ايه؟ ما تخيلتش ابدا ان ممكن اعمل عمره او اجي مكان زي ده ابدا ابدا ادم: ربك لما يريد بقي.. ربنا يتقبلها منك ان شاءالله ..المهم قومي نامي علشان الفجر هنصلي ونطلع علي المطار يالا.... ايه بتبصيلي كده ليه؟ شكلك عايزه تقولي حاجه؟ ندي: انا؟؟ لا انا مش عايزه ادم: معني انك انتي مش عايزه وبتبصيلي كده يبقي مستنيه مني انا اقول حاجه!! في ايه المفروض اقوله؟ ندي: ايوه ايه بقي؟؟ ادم: ايه بقي؟ ندي: ادم بقي ادم: ماهو انا لو اعرف اقول علي طول... مش عارف ندي: انت مديونلي باعتذار ادم: انا؟؟ اشمعني بقي؟؟ ندي: علشان فهد ادم: ماله فهد مش فاهم؟؟ ندي: علشان اللي انت عملته قبل ما نيجي واتهامك ليا اني علي علاقه بيه وعدم ثقتك فيا ادم: انا امتي اتهمتك؟؟ ولا امتي قولت اني مش واثق فيكي؟؟ علي فكره انتي بتغيري الحقايق كده ندي: امال اتخانقت معايا خناقه كبيره ليه؟؟ ادم: انا قولتلك اسبابي واعتقد انك تقبلتيها وما اعتقدش برضه انه كان من ضمنها عدم ثقه او اتهامات ندي: ده فعلا صح ادم: طيب امال ايه بقي؟ ندي: برضه ده ما يمنعش اني مستنيه منك اعتذار ادم ضحك: قومي يالا علشان هنصحي بدري يالا ربنا يهديكي كمان وكمان يالا اخدها وطلعوا ووصلها لحد باب اوضتها وقبل ما تدخل مسكها من دراعها وهمس في ودنها من غير ما يلفها ليه ادم: حقك عليا يا ستي اني اتخانقت معاكي وفعلا كنت غلطان اني اتسرعت في الحكم سواء عليكي او علي فهد ومتشكر جدا انك اصريتي علي موقفك وجبتينا في الرحله الرائعه دي... كده مرضيه؟؟ ندي لفتله وبصتله بصه طويله وما ردتش بس قربت وباسته في خده ودخلت اوضتها وهو راح اوضته... الفجر طلعوا ندي استغربت ادم في لبس الاحرام بتاعو بس حست بهيبه.. وصلوا جده ومنها لمكه راحوا الفندق حطوا حاجتهم واتغدوا وطلعوا علي الحرم علي طول اول ما ندي شافت الكعبه دموعها نزلت وحست باحساس غريب جواها..، وكأن مفيش شيئ في الدنيا دي كلها له معني الا ده.. وكأن حياتها كلها ملهاش لازمه وانها اتولدت في اللحظه دي وبدئت من اللحظه دي.. ادم سابها واقفه تستمتع بلحظتها دي وتفكر في كل حياتها وتعيد حساباتها لحد ما بصتله ادم: يالا نبدأ ندي ابتسمت: يالا ادم طول الوقت بيدعي ان ربنا يقرب ندي منه وتكون ديما جنبه ومن نصيبه ويخلصه من فاتن علي خير او لو فضلت ما يظلمهاش معاه... ويلهمه ديما للصح... عملوا طوافهم وخلصوه وادم معاها لو معرفتش حاجه بيقولها خلصوا الطواف وصلوا الركعتين وراحوا للسعي ما بين الصفا والمروه ندي: ياه ده طويل قوي اروح شوط وارجع شوط صح لحد ما اكمل سبعه؟؟ ادم: اه يا قلبي انا.. تروحي شوط وترجعي دي شوط وهكذا لحد ما تكملي السبعه ندي: يا لهووي يا ادم ده كتير جدا ليه كل ده؟ ادم: لان ده اللي عملته ستنا هاجر لما كانت بتدور علي ميه لابنها.. كانت بتجري المسافه دي رايح جاي سبع مرات وعلشان كده اتعمل السعي بين الصفا والمروه وده علي حد علمي ندي: طيب اقول ايه؟ ادم: كل اللي نفسك فيه.. اتكلمي مع ربنا.. اشكيله! اطلبي منه؟؟ ادعي!؟ اللي يريحك قوليه.. مش شرط صيغه او دعاء محفوظ بس افتحيلو قلبك ندي شايفه ادم جديد عليها بتعشقه من الاول وجديد ندي: طيب يالا نبدأ ادم: يالا خلصوا السعي ندي: كده خلصنا صح؟ ادم: اه بس فاضل حاجه بسيطه ندي: ايه هيا؟ ادم: نتحلل ندي: ازاي؟ نعمل ايه يعني؟ ادم: تقصي شعرك ندي بخضه: ايه؟ اقص شعري؟ لا طبعا ادم: اسمعي للاخر... تقصي جزء بسيط من طوله سنتيمتر كده مش اكتر ندي: اه انا اتخضيت.. كده ماشي وانت؟؟ ادم: وانا كذلك.. السنه التقصير بس الحلاقه افضل ندي بخبث: وانت هتحلقه؟؟ خالص خالص؟ ادم: ايه رأيك انتي؟ ندي: لا وانا مالي انت حر روحوا علي الفندق وادم نزل يحلق واتفق يشوفها بالليل لما يتعشوا.. اول ما شافته بالليل شهقت من شكله وضحكت ادم: للدرجه دي وحش؟؟ ندي: شكلك غريب وانت بطاطسايه كده ادم: انا بطاطسايه ماشي يا ست ندي المهم يالا نتعشي ندي شافت شخصيه تانيه في ادم او بمعني تاني شافته علي حقيقته... خوفه عليها وتقديره ليها وحبه اللي بيبان في كل حاجه بيعملها كل ده قربها اكتر منه وفهمها اكتر لشخصيته، دلوقتي بس عرفت وفهمت هو ليه ارتبط بفاتن.. مكنتش مقتنعه ان احساسه بالمسؤليه يخليه يعمل كده بس دلوقتي فهمت وتصرفه زود تقديرها ليه قبل ما يمشوا ندي: تعرف؟ ادم: ايه؟ ندي: انا بحبك قوي ادم ساب اللي في ايده وبصلها باستغراب ندي: مستغرب ليه؟ ادم: يعني بقالنا فتره ما اتكلمناش في اي حاجه زي كده فاستغربتها دلوقتي مش اكتر ندي: لان انا حاسه نفسي قدام ادم جديد.. ادم مختلف عن اللي عرفته قبل كده ادم: حبيبت قلبي انا زي ما انا ما اتغيرتش من اول يوم شفتيني فيه.. بس انتي كل يوم بتفهميني اكتر.. وبتقربي اكتر بس كده ندي: فعلا انا حاسه اني قربت منك قوي بالسفريه دي واحساس انك انت مسؤل عني ده عاجبني.. ادم!! ادم: عيون ادم ندي: تتجوزني؟ ؟ ادم تنح: افندم؟ انتي بتهزري صح؟ انتي اصلا مراتي ندي: لا ابدا بتكلم جدوجد جدا كمان.. تتجوزني بجد ؟ ادم: وفاتن؟؟ ندي: لو قبلت الوضع ده خليها ما قبلتش براحتها ادم: ممكن اعرف ايه اللي خلاكي تغيري رأيك؟؟ ندي: لان في حاجات كتيره اتغيرت.. نظرتي للامور اتغيرت.. نظرتي ليك اتغيرت.. وبعدين انا عارفه انك بتحبني وهتراعي ربنا فيا وغير كده انت عندك المقدره سواء الماديه او غيرها انك تفتح بيتين فليه لأ؟؟ وبعدين مش هرضي اني افرح علي حساب حد.. وكفايه قوي انك بتحبني... ادم مسك ايدها وباسها: انتي ما تتخيليش انا شايفك ايه دلوقتي... انتي ملاكي الجميل.. اول ما ننزل نتجوز بإذن الله ندي: هو انا مش خلاص مراتك ؟ عايزه انزل وانا مراتك... ادم: ياريت بس انا بعتبر اننا كتبنا كتابنا بس لسه بقي الفرح وبعدين انا وعدت امي اني هعمل فرح كبير جدا وان ليله دخلتنا هتكون في البيت ندي: ما ليش دعوه اللي عرفاه اني عايزه افضل معاك علي طول ادم معرفش يرد لان قلبه بيدق بطريقه غريبه زي مراهق بيحب لاول مره ندي: ايه ساكت ليه؟ ادم: لا ابدا .. مش هعيد ارتباطي بيكي تاني بالطريقه دي.. ندي انا عايز اعمل فرح ما اتعملش قبل كده وعايز اشوفك عروسه بالفستان الابيض واعتقد ان انتي كمان زيي ولا ايه؟ ندي: زيك.. زيك طبعا بس ده ما يمنعش اني عايزه افضل علي طول معاك ادم: كلها بكره هنسافر واول ما نوصل مصر هنعمل فرح كبير جدا ايه رأيك ندي: تمام طيب تيجي نكلم بابا ومامتك نبلغهم يجهزولنا لاكبر فرح في الدنيا ادم: اوك يالا فعلا اتصلوا باهلهم وبلغوهم.. سالم فرح جدا وقالهم انه هينزل يتفق مع اكبر قاعه يعملوا فيها الفرح كريمه: طيب يا ادم وفاتن؟؟ هتسيبها خلاص؟؟ ادم: انتي ايه رأيك؟ كريمه: حبيبي دي حياتك وبعدين انا كنت معترضه من الاول علي ارتباطك بيها ادم: يالا اهو اللي حصل.. المهم لا مش هسيبها ندي مش معترضه علي وجودها اما هيا بقي حره عايزه تفضل خليها عايزه تطلق هيا حره فمعلش هسيبلك مهمه انك تبلغي عيلتها اني رجعت مراتي لذمتي كريمه: بتدبسني يعني؟؟ ادم: لا ابدا والله لو مش عايزه خلاص لما ارجع انا البلد اقولهم بس ما حبتش اني اعمل الموضوع ده في السر علشان محدش يفهمه غلط كريمه: عارفه حبيبي انا بس بهزر.. هروح النهارده وهبلغهم انت ما تقلقش وبكره هتلاقينا كلنا عندك وهبلغ اخواتك وهنعمل احتفال بيكم علي الضيق ادم: تسلميلي يا ست الكل كريمه: صح ادم طيب انت علي كده هتعملوا الفرح فين وامتي ولا هتعمل حاجه علي الضيق ؟؟ ادم: لا يا امي لأ طبعا.. انا المره دي عايز فرح ومش اي فرح كمان انا عايز فرح يليق بيا انتي فاهمه؟ عايزك تعملي كل اللي كنتي بتحلمي بيه كريمه بفرحه: بس كده من عيوني.. هعملك فرح الكل يحكي ويتحاكي بيه ادم: ربنا يخليكي ليا بس في نقطه مهمه كريمه: قول يا قلب امك ادم: الوقت مهم... عايز الفرح بسرعه كريمه بحذر: ليه؟ وليه الوقت مهم؟ ما تسيبونا نعمل فرح كبير ونجهزله كويس ؟؟ ادم: امي الوقت مهم لان خلاص انا وهيا جبنا اخرنا.. وعلي يدك احنا حياتنا كانت ازاي؟ الموضوع وما فيه اني مشتاقلها مش اكتر كريمه: ربنا يسعدكم ادم قفل وبص وراه كانت ندي واقفه ومستمتعه بالحوار اللي سمعاه ندي: هيا مامتك قالت ايه انت اعترضت عليه؟ وايه اللي انت ما تعملوش؟؟ ادم: كانت عايزانا نستني شويه تجهز لفرح كبير عايزه وقت يعني ندي: وانت قلتلها ايه ؟ ادم: اللي انتي سمعتيه ندي: وايه هو اللي انا سمعته ادم: ساعات بحس انك طفله كبيره ندي حطت ايديها حوالين رقبته واتعلقت فيها ندي: انا فعلا طفله عندك اعتراض؟ ادم: وانا اقدر اعترض اصلا؟؟ انا بحبك زي ما انتي ندي: هتعملي فرح كبير ؟ ادم: هعملك ندي: وهلبس فستان ابيض ادم: هتلبسي احلي فستان ندي: وايه كمان ؟؟ ادم: هعملك كل اللي تشاوري عليه ندي: كله كله ؟ مش هتقولي لأ؟ ادم :مش هقولك ندي : هتخليني اشتغل براحتي ؟ ادم : انا من امتي اتدخلت في شغلك ندي : ايه كمان ؟ هتعملي ايه كمان ادم: ندي بس... انا غلطان لاهلك.. بصي حبيبتي انا صرفت نظر عن الجوازه دي ندي ضحكت: اوك انا بس بضايقك ادم: واديكي ضايقتيني ندي: طب اصالحك ايه رأيك؟ ادم: صالحيني ........،،،،،،،،........،،،،،،،،، ،،..........،،،،،،،،،،،،، كريمه راحت لعيله فاتن وقالتلهم ان ادم رد مراته وطبعا ابوها لانه راجل صعيدي وفاهم الاصول تفهم الموضوع وما اعترضش ابدا لكن فاتن هيا اللي اعترضت فاتن: ادم اتجوز عليا؟؟ كريمه: والله يا حبيبتي الوضع معكوس انتي اللي اتجوزك عليها فاتن: دي كانت طليجته كريمه: واهو ربنا صلح ما بينهم فاتن: طيب وانا؟؟ كريمه: انتي معززه مكرمه فاتن: اه يتجوزها هناك ويفضل معاها وانا يجيلي مره في الشهر صح؟ انا لا يمكن اوافج ابدا كريمه: والله يا بنتي دي حياتك ودي حاجه ترجعلك انتي حره شوفي ايه اللي عناسبك؟؟ فاتن: انا مش موافجه انه يتجوز كريمه: لا يا حبيبتي انتي مش من حجك تجولي حاجه زي دي.. ادم مرته ردها ده موضوع منتهي.. انتي بجي شوفي ايه اللي يناسبك؟؟ فاتن: اه يعني اخبط دماغي في الحيط؟؟ انا ماليش كلمه صح؟ كريمه: بصي يا فاتن انتي ما تعمليش دراما.. انتي عارفه كويس ادم اتجوزك ليه اصلا فمش من حجك ابدا تعترضي فاتن: يعني احط جزمه في بوجي واسكت صح؟؟ لا مش انا دي ابدا.. ومش حته واحده اللي هتاخد ادم مني كريمه بصتلها باستغراب.. ايه اللي عجبها في دي؟ وليه عرفت ابنها عليها؟ كان عقلها فين؟ كريمه: علي العموم فكري واللي يناسبك اعمليه بعد اذنكم علشان الحج اجهز للسفر سابتهم ومشيت ندمانه انها ورطت ابنها الورطه دي... فاتن لنفسها : مش هتاخديه مني .. انا اللي هبجي مرت الكبير مش انتي يا امريكاويه ادم وندي نزلوا علي مصر وابوها وسعد كانوا في استقبالهم وروحوا كلهم علي اتفاق انهم خلال اسبوع هيكون الفرح لان حجز القاعه مفيش بدري عن كده .. كل واحد روح بيته وادم لقي اخواته وامه مستنينه وكانوا واحشينو وهو واحشهم.. ادم المرح بتاع زمان بالليل اجتمعوا كلهم وسهروا سهره للصبح ندي ما فارقتش حضن ادم ابدا... طول الليل بيرقصوا سلو مع بعض وبيعيدوا ذكرياتهم... رجعوا لاشغالهم والكل بيباركلهم في الشركه والكل بيساعد في تجهيز الفرح.... ادم سافر البلد يعزم اهلو علي الفرح ويعزم معارفو كلهم وفعلا عمل كل المطلوب وقبل ما يسافر القاهره بالليل كان نايم كريمه: ادم اصحي ادم ادم صحي: في ايه خير؟؟ ندي جرالها حاجه؟ كريمه: بعد الشر عليها ياقلبي لأ ادم: طيب ايه؟ بتصحيني ليه؟ كريمه: اختك بتولد وجوزها اخدها علي المستشفي قوم وديني عندها ادم قام بسرعه: لحظه وهجهز اخد ادم امه علي المستشفي وقضوا الليله مع اخته لحد ما ولدت وجابت بنوته زي القمر الصبح بدري ندي بتكلمه ندي: طلعت علي الطريق ولا لسه؟ ادم: لا يا قلبي ما طلعتش ندي: ليه؟ وحشتني بقي؟ يالا اطلع ادم: شكلك انتي اللي هتطلعي مش انا ندي: مش فاهمه ادم: ايتن ولدت ندي بفرحه: بجد؟ امتي اخص عليك ما قولتليش ادم: اهدي اهدي... لسه والده مكملتش ساعتين وما حبتش اصحيكي ندي: حمدالله علي سلامتها والبيبي اخباره ايه؟ ادم: الحمد لله الاتنين بخير ندي: طيب انا هجيب بابي ونجيي اوك بيبي ادم: في انتظارك ندي: ادم صح كده هنأجل الفرح؟؟ صح؟؟ ادم: والله ما عارف يا ندي شكلها كده.. ممكن نأجله اسبوع ولا اسبوعين لحد ما ايتن تتحسن.. علي العموم ده سابق لاوانه ندي: طيب نيجي الاول وبعدها نتكلم ندي بلغت ابوها واتحركوا الاتنين علي الطريق ووصلوا الاستراحه ندي: بابي نوقف شويه.. انا ميته من الجوع وبعدين بحب الاستراحه دي بالذات ياما انا وادم وقفنا فيها دخلوا الاتنين يريحوا شويه في الاستراحه ادم طول الوقت مستني ندي تيجي والوقت طول وتليفونها اتقفل وابوها ما بيردش وبدأ يقلق كريمه: ايه يا حبيبي مالك؟ لو عايز تريح روح انت ادم: لا ابدا بس قلقان.. ندي اتحركت هيا وابوها من بدري والمفروض يكونوا وصلوا من ساعه بس اتاخروا وتليفون ندي مغلق وابوها مش بيرد كريمه: ما تقلقش ان شاءالله خير.. الغايب حجته معاه وبعدين الاخبار الوحشه بتوصل.. فاطمن ان شاءالله خير وهيجوا دخل ادم وقعد جنب اخته بس القلق والخوف بيكبر في قلبه وعينه علي التليفون وكلهم ملاحظين ده ايتن: ما تقلقش ادم دلوقتي هتلاقيهم داخلين ادم: ان شاءالله المهم انتي تقومي بالسلامه ونخرج من هنا... وبعدين يا كنتي بدرتي يا اخرتي ايتن: ليه ان شاءالله؟ ادم: يعني جايه في توقيت!؟؟ اعمل فرح انا ولا اجلو ولا اعمل ايه؟ هاه؟ ايتن: امم كده.. اعملو في معادوا انا ان شاءالله خلال اسبوع هبقي كويسه ايوه كنت عايزه ارقص واتنطط بس ملحوقه في فرح امجد بقي حاولت ايتن تلطف الجو علشان تخرج اخوها من حاله القلق اللي مسيطره عليه اخيرا تليفونه رن ادم: ده ابو ندي.. الو ايوه انتو فين؟ سالم: الحقني يا ادم الحقني ادم وقف: في ايه؟ ايه اللي حصل؟ سالم: ندي... ندي يا ادم ادم: عمي اهدي وقولي ندي مالها في ايه؟ الكل وقف واتوتر سالم: الحقني يا ادم ندي مفيش وملهاش اثر.. مش لاقيها.. ندي اتخطفت سالم قال الكلمه وادم وقف جامد ولا قادر ينطق ولا قادر يتحرك ونكمل بكره توقعاتكم ShiMoOo | ||||||||||
|  |
|
11-05-19, 01:28 PM
| #22 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| الحلقه 20 والاخيره ادم: ده ابو ندي.. الو ايوه انتو فين؟ سالم: الحقني يا ادم الحقني ادم وقف: في ايه؟ ايه اللي حصل؟ سالم: ندي... ندي يا ادم ادم: عمي اهدي وقولي ندي مالها في ايه؟ الكل وقف واتوتر سالم: الحقني يا ادم ندي مفيش وملهاش اثر.. مش لاقيها.. ندي اتخطفت سالم قال الكلمه وادم وقف جامد ولا قادر ينطق ولا قادر يتحرك ادم: يعني ايه اتخطفت؟؟ انت فين؟؟ سالم: احنا دخلنا الكافتيريا اللي علي الطريق اللي انتو متعودين تريحوا فيها ودخلت الحمام حد خبطني علي راسي فقت ملقتهاش في اي مكان ومالهاش اثر وعربيتي اخدوها الحقني يا ادم ادم: طيب اديني نص ساعه مسافه الطريق هبقي عندك وهبلغ البوليس انا جايلك قفل التليفون وبص لعيلته كريمه: ان شاءالله خير يا ادم ما تقلقش ادم: ايتن انا لازم اروح ايتن: اه طبعا حبيبي ان شاءالله خير طيب خد جوزي معاك ادم: لا لا خليه معاكي انا هاخد سعد وفتحي ما تقلقوش كريمه: طمني بالله عليك يا ادم اول ما توصل لحاجه ادم: حاضر ادم خرج واخد فتحي معاه وبلغه باللي حصل واتصل بسعد يقابله علي الكافتيريا وخلاص نص ساعه كان هو والبوليس والكل هناك وقابل سالم وحكاله اللي حصل بالتفصيل قلبوا الدنيا عليها وملهاش اثر ولا حد شافها سعد: علي فكره الحوادث كترت قوي في المنطقه دي.. وبعدين فاكر لما طلعوا عليك في الطريق قبل كده؟ ماهو كان قريب من هنا ادم: وبعدين هنعمل ايه؟ انتو عارفين يعني ايه ان ندي تبقي مخطوفه؟؟ فتحي: انا بلغت رجالتنا ومعارفنا في كل البلاد اللي حوالين ولو اي حاجه ظهرت هيبلغوني ادم: وبعدين المفروض اني اعمل ايه؟ اقعد في البيت يعني ولا ايه؟ ظابط البوليس: احنا بلغنا كل الدوريات والاقسام وعملنا حواجز علي الطريق يعني اللي خطفها مش هيعرف يتحرك المطلوب منك حاليا تروح البيت ادم: افندم؟ ظابط البوليس: اسمعني بس 90% من حالات الخطف اللي في حالتك بيبقوا عايزين فديه ادم: يعني ايه حالتي؟؟ ظابط البوليس: يعني غني ومعروف وله وضعه المالي او الاجتماعي ..اللي خطف المدام عارف حضرتك او يعرف انك غني وهيتصل بيك وهيطلب فلوس فعايزين لما يتصل يلاقيك في البيت ممكن بقي؟ خد والدها واتفضل وسيب رجالتك لو تحب ادم اخد فعلا عم سالم وراح علي المستشفي اللي ايتن فيها والدكتور شافه وطمنهم عليه ادم اخد عيلته وروحوا كلهم وايتن اصرت تروح معاهم علشان محدش يضطر يقعد معاها في المستشفي حاله قلق وخوف سيطرت علي البيت ومحدش لاقي كلام يقوله يطمن بيه ادم او ابوه فاتن جت تطمن عليهم وتسلم علي ايتن واتفاجئت باللي حصل فاتن: ربنا يطمنك عليها يا ادم ادم بتريقه: وده بجد ولا ايه؟ فاتن: ايوه طبعا انا ايوه بكرهها ومش بحبها ابدا بس مش لدرجه اني افرح في خطفها انا مش وحشه للدرجه دي يا ادم ادم: انا اسف يا فاتن مش اقصد بس فاتن: عارفه ما تقولش حاجه.. يارب ترجعلك بخير.. ممكن افضل هنا معاكم علي الاقل اخلي بالي من ايتن؟ او لو تحب امشي همشي ادم: لا خليكي مع ايتن احسن.. متشكر يا فاتن فاتن: علي ايه؟ انا برضو مراتك بعد اذنك اغلب اللي يعرفوا ادم من اهل البلد راحوله يقفوا معاه وكل واحد طلع رجالته يلفوا عليها في المنطقه اللي حوالين الكافتيريا والبلاد اللي حواليها.. ابوفاتن كمان وامها راحوا بيت ادم الباب خبط ودخل ضيف غير متوقع نهائي وقابل ادم اللي استغرب وجوده في بيته .......#######.........#######......####... ندي كانت مع باباها وداخله الحمام واتفاجئت بحد حط منديل علي وشها وغابت تماما عن الوعي البنت: هنعمل ايه دلوقتي؟ شاب: ساعديني احطها في العربيه يالا البنت: وابوها؟؟ الشاب: عقبال ما يفوق نبقي مشينا يالا حطوها في العربيه البنت: انت عارف دي تبقي مين؟ وعارف جوزها يبقي مين؟؟ وبعدين دي معاها جنسيه امريكيه يعني الدنيا هتتقلب عليها الشاب: بقولك ايه احنا خطفناها وخلاص معدش ينفع نتراجع.. هنطلب قرشين من جوزها ونرميها في الشارع وهيا تروح ولا مين شاف ولا مين دري البنت: يا سلام بالبساطه دي؟؟ وبعدين انت عرفتها منين؟ الشاب: انا معرفهاش هيا انا اعرف جوزها بس بقولك ايه مش وقت رغي انتي كل المطلوب منك تحرسيها في الشقه وما تخليهاش تشوفك خلي وشها متغمي كده وبس يالا بينا اخدوها وطلعوها علي شقه البنت وربطوها في السرير وغمولها عنيها البنت: استني قبل ما تمشي الشاب: عايزه ايه؟ انا لازم ارجع شغلي علشان محدش يلاحظ حاجه البنت: لو فاقت وفضلت تصوت.. الجيران هيسمعوها اعمل ايه انا؟ طلع قزازه وعطاهالها الشاب: نقطتين علي منديل هتنام تاني يالا سلام خلي بالك.. الخبطه دي هتبقي خبطه العمر وهنرتاح انا وانتي بعدها ومش هنضطر للشغل ده ونعملنا اي مشروع نعيش منه انا وانتي... ان شاءالله ربنا هيوقف معانا البنت: نبقي خاطفين وتقول ربنا؟؟؟ الشاب: ايوه اقول احنا مش هنلمسها وبعدين هيا وجوزها مليونيرات يعني لو خدنا منهم جزء مش هيفرق معاهم لكن هيغير حياتنا احنا البنت: مش بالسرقه يا حبيبي... يالا اتكل علي الله بس يكون في علمك دي اخر مره هشاركك في حاجه زي كده ولو طلبت مني حاجه تانيه هقطع علاقتي بيك نهائي.. دي اخر مره يا عاصم عاصم: اوعدك يا انتصار ان دي اخر مره وبعدها انا وانتي وبس سابها ونزل وهيا بتحلم باليوم اللي تتجوز فيه حبيبها وتسيب الدنيا القرف اللي عايشه فيها #####..........########.................#### عند ادم: انت؟؟ انت ايه اللي جابك هنا وعايز ايه؟ جاسر: جاي اقابل ندي هانم بعد اذنك يعني؟ ادم ضحك بغلب: ندي؟؟ وعايز منها ايه؟ جاسر: عندي اخبار تهمها جدا فلو سمحت خليني اقابلها وبعدين حضرتك لازم تكون موجود وانا بكلمها لان الموضوع يخصك سالم اتدخل: جاسر!! ندي اتخطفت يا جاسر جاسر: ايه اتخطفت؟؟ امتي وازاي؟؟ وما بلغتونيش ليه؟ انا عارف مين اللي خطفها الكل بصولو وادم اول واحد نطق ادم: مين وعارفه منين وازاي انطق؟؟؟ جاسر: براحه وواحده واحده الاول.. تعرف الشخص اللي في الصوره ده؟ طلع صوره ووراهالو علي موبيله ادم: اعتقد شكله مش غريب مين ده؟ جاسر: فكر يا ادم وحاول تعرف مين ده لان تقريبا ده اللي خطف ندي ادم بيحاول يفتكر: اعتقد ان ده واحد من الشباب اللي طلعوا علينا انا وفاتن ايوه فعلا هو.. فاتن شوفي كده جاسر شد التليفون من ايد ادم مع استغرابه ادم: في ايه؟ هوريها الصوره جاسر: لا مالوش لازمه ادم: يعني ايه مالوش لازمه؟؟ جاسر: يعني هيا عارفاه كويس لان هيا اللي مأجراه الكلمه رنت والكل اتصدم.. الصدمات كتيره قوي اليوم ده.. ابوها كمان اتصدم وبص لبنته اللي مش عارفه تعمل ايه؟ ايو فاتن: ايه اللي حضرتك بتجولو ده؟ بنتي ماتعرفش تعمل اكده ولا ليها في الكلام ده؟؟ حضرتك بتجول ايه؟ ادم: فاتن ايه اللي هو بيقولو ده؟ فاتن: انا ماليش دعوه هو كداب هو وندي... مش ده اللي كانت معاه في الحفله؟؟ هما بيخططوا يخرجوني بره حياتك.. ندي عايزه تخلص مني ادم: اخرسي.. ندي وافقت علي ارتباطي بيكي وانك تفضلي علي ذمتي وبعدين ندي عمرها ابدا ما تتسبب باذيه حد فاهمه؟ ابدا فاتن: وانا اللي قتالت قتله يعني.. هو بيكدب جاسر: وانا عارف ان حضرتك هتقولي كده.. طيب انا كداب ممكن حضرتك تقوليلي الفيديو ده معناه ايه؟ ادم لو سمحت ممكن تشغل السي دي ده؟ ادم اخد السي دي ووصله علي الشاشه وشغله قدام الكل وكان فيه الحوار اللي ندي سجلته في الحفله وعطته لجاسر الكل بص لفاتن ادم: انتي عملتي ايه؟ جاسر: ندي صورت الفيديو ده يوم الحفله وعطتهولي وانا فضلت وري الراجل بس ماعرفتش اوصل لحاجه ففضلت وري فاتن مرات حضرتك وراقبتها لحد ما اتفاجئت بيها قابلته وعطتلو فلوس مكنتش عارف ليه فقلت اقابل ندي واخليها تدخلك جوه الموضوع بس حاليا هيا اتخطفت وانت اكدت ان الراجل ده هو اللي طلع عليكم ومعاه اصحابه فاعتقد كده الامور واضحه . ندي كانت شاكه فيها من اول مره شافتها فيها وهيا كلفتني اراقبها كنت ديما بكدبها واقولها انتي غيرانه منها لكن هيا فضلت مصره ادم: هيا دي ندي بتصر لحد ما بتوصل لغرضها.. ادم راح لفاتن وضربها قلم وقعها علي الارض ادم: كله الا ندي لو شعره منها اتلمست قسما بالله لادفنك هنا انتي فاهمه؟ فاتن: انا ماليش دعوه ضربها تاني: مين الراجل ده وعرفتيه ازاي؟ وندي فين؟ فاتن: انا ما اعرفش حاجه عنها اقسم بالله انا ما اعرفش هيا فين ضربها تاني ادم: مراتي فين؟ فاتن: ما اعرفش والله ما اعرف جاسر اتدخل: مش كده يا ادم.. طيب ما تعرفيش.. ازاي توصلي للراجل ده؟ فاتن: هو شغال في الكافتيريا هو وخطيبته انا ما اعرفهمش انا ساعتها كنت في الكافتيريا مع ادم واتكلمت مع البنت وهيا اقترحت انهم يساعدوني وقالولي الفكره دي وانا وافقت لان محدش هيتإذي لكن خطف لأ انا ماليش دعوه بيه انا ماليش دعوه بتعيط وادم اتمني لو يخنقها بايده فلاش باك دخلت فاتن الكافتيريا هيا وادم وهو دخل الحمام وطلع قعد علي تربيزه وهيا دخلت الحمام ووقفت قدام المرايه وعيطت بنت: انتي كويسه يا انسه؟ فاتن: انا كويسه ما تشغليش بالك متشكره علي اهتمامك البنت: شكلك مش كويس ساعات بيكون الكلام مع حد غريب سهل جربي وهترتاحي فاتن: عايزاني اقولك ايه؟ اني بحب واحد وهو في دنيا وانا في دنيا وعايش علي وهم مراته القديمه.. ولا اقولك انه مش شايفني خالص.. مهما اعمل ومهما اقرب مش حاسس بيا.. هو انسان محترم جدا وله وضعه وكيانه وقد المسؤليه ومستعد يضحي بحياته علشان خاطر حتي حد شغال عنده واستحاله يتخلي عن حد محتاجو لكن لحد عندي ومش شايفني اصلا عندك حل؟ البنت: طيب صارحيه بمشاعرك فاتن: هيعتذر بكل زوق وادب وبعدين قولتلك انه محترم جدا فهيعتذر وبس البنت: طيب اجبريه يشوفك فاتن: اجبره؟؟ ازاي؟؟ البنت: المشاكل ساعات بتقرب والازمات.. اصطنعي اي مشكله وخليه هو يحلها وساعتها يمكن يشوفك فاتن: تصدقي فعلا فكره... انا ممكن اخلي حد يقطع علينا الطريق مثلا وساعتها انا مسؤله منه قدام الكل فعمره ما هيتخلي عني وهيتحمل مسؤليتي.. بس ازاي اجيب حد؟؟ انا ما اعرفش حد انتي تعرفي؟ البنت: لا انا ما اعرفش حد وماليش حد في الدنيا دي غير خطيبي فاتن: ممكن خطيبك يعرف حد هو شاب وممكن يساعدني ارجوكي ساعديني وانا هساعدكم ادم غني وانا لو بقيت مراته هساعدكم اوعدك البنت: هقول لخطيبي بس ما اعتقدش انه يعرف حد فعلا البنت نادت علي خطيبها وهو عجبته الفكره واقنع خطيبته ونفذوا خطتهم فاتن حكت حكايتها كلها فاتن: صدقوني مكنتش اقصد حد وبعدين مفيش حد اتأذي ابدا ادم : محدش اتأذي؟؟ انتي شايفه ان محدش اتأذي؟؟بتدمري حياتي وتخليني ارتبط بيكي غصب وتقولي محدش اتأذي؟؟ جاسر: مش وقته يا ادم المهم دلوقتي.. انا عايزك تكلمي الراجل ده فاتن: لا انا ماليش دعوه بخطفه لندي والله ما ليا دعوه جاسر: وانا مصدقك بس انتي حاليا هتكفري عن غلطك بانك تساعدينا نرجعها.. هتتصلي بيه وتقوليله انك عرفتي انه خطف ندي وتقوليلو ان ادم ردها وهيسيبك وانه لازم يطلب منه مبلغ كبير وبالنص انتو الاتنين فهمتي؟ فاتن: بس برضه انا ماليش علاقه بخطفها ادم صدقني ادم: معدش يفرق اتصلي بيه انجزي جاسر: لازم تخليه يقتنع انك انتي معاه فاتن: اقوله يطلب قد ايه؟ جاسر: انتي كنتي متفقه معاه قبل كده علي ايه؟ فاتن: 100 الف ادم: وكنتي ناويه تدفعيهم منين ولا دفعتيهم خلاص فاتن: دفعت جزء بسيط والباقي اتفقنا انه بعدين ادم: بعد ما نتجوز صح؟ تاخدي فلوسي وتديها لبلطجي؟؟ انا ازاي كنت متخلف كده؟ كان لازم افهم انتي مكنتيش مهتمه بسمعتك فانا ليه ابقي غبي واهتم بيه؟ متخلف غبي كريمه: خلاص يا حبيبي المهم دلوقتي ندي جاسر: فعلا ده اللي يهم حاليا كلميه واطلبي منه انه يطلب..... نقول عشره مليون مثلا؟؟ فاتن: ايه؟ كل ده؟ وهو انت معاك مبلغ زي ده ادم بصلها باحتقار وما ردش عليها جاسر: لازم نغريه بمبلغ كبير لان واحد زي ده هيكون اخره فكر في مليون ده لو وصل للحد ده يالا اتصلي والمهم الاول تتاكدي انها معاه لاحسن ما يكونش هو ويكمل معاكي ويعطلنا عن الخاطف الحقيقي.. الاول لازم تتأكدي انهافعلا معاه وبعدها تأكدي عليه انه ما يلمسهاش ابدا خوفا من انتقام ادم وبعدها تعرضي عليه المبلغ ده فاهمه؟ فاتن اتصلت فعلا بيه وبدئت تتكلم والكل حواليها في صمت فاتن: الو ايوه.. انا عاصم: عايزه ايه دلوقتي؟ فاتن: انت ازاي تلعب من غيري؟ تصدق كده عيب عاصم: العب ايه وكلام فاضي ايه؟ انا مش فاهم انتي بتتكلمي عن ايه؟ فاتن: لا يا واد انت فاكرني عبيطه ولا ايه؟ عاصم: انتي عايزه ايه؟ فاتن: انت ناوي علي ايه؟ عاصم: مالكيش فيه.. فاتن: لا ليا ونص عاصم: لا مالكيش انا اهو فتحتلك الطريق لحبيب القلب وفضيتلك الطريق وانتي اهوه هتاخدي الجمل بما حمل فاتن: يعني انت فعلا اللي خطفت ندي مراته؟؟ عاصم: مالكيش فيه بقي فاتن: لا يا حلو ليا ونص.. النص بالنص في اللي هتطلبه عاصم: نعم يا اختي ليه يا حيلتها؟؟ فاتن: علشان ما اروحش ابلغ ادم عنك واخليه يبعت رجالته يجيبوك متعلق عاصم: ما تقدريش لاني ساعتها هقوله انك انتي اللي خليتينا نطلع عليه في الطريق وان سيادتك اللي قلتنلنا نبوظ عربيته ساعتها مش هيسمي عليكي فاتن: هههههه ضحكتني عاصم: قصدك ايه؟ فاتن: قصدي انها معدتش تفرق ادم اتجوز ندي وردها وانا عطاني استماره 6 يعني قولتله او ما قلتلوش معدتش تفرق لكن انت هتفرق معاك عاصم: انتي عايزه ايه دلوقتي؟ فاتن: يا بالنص يا هروح ابلغه عاصم: ماشي انا هطلب منه 200 الف انتي 100 وانا ميه فاتن: 100 ايه و 200 ايه؟ انت اهبل؟ عاصم: عايزه ايه دلوقتي؟ فاتن: انت عارف ندي دي تبقي ايه؟ ولا ادم نفسه ايه؟ عاصم: قصدك ايه؟ نطلب كام يعني؟ مليون؟ فاتن : مش بقولك اهبل؟؟ عاصم: قولي انتي يا حلوه نطلب كام؟؟ فاتن: عشره مليون.. انت خمسه وانا خمسه ولا انت تشوف وشي ولا انا اشوفك بعد كده.. تستلم الفلوس وتسيبها ولا مين شاف ولا مين دري بس اوعي حد يلمس شعره منها عاصم: ليه بقي ان شاءالله؟ فاتن: لان لو حد لمس شعره منها ادم مش هيسكت ومش هيرتاحله بال غير لما يجيبك من قفاك لكن لو هيا رجعتله سليمه مش هيهتم قوي وهيسيب الموضوع للبوليس.. المهم انت فين دلوقتي وندي فين؟ عاصم: انا في الشغل وندي في البيت مع انتصار فاتن: طيب تمام كلمه بقي وشوف هيقولك ايه وخليك زي ما انت علشان هو رجالته مراقبين الكافتيريا ما تخليش حد يشك في حاجه فهمت؟ اوعي تضيع الفرصه دي بغباءك دي فرصه العمر ولو ضاعت مش هترجع تاني قفلت فاتن وبصتلهم ادم وجاسر اتحركوا علي الكافتيريا وهما في الطريق عاصم اتصل بادم وهو مثل عليه انه موافق زي ما جاسر طلب منه ووافق علي كل طلباته واخيرا وصلوا الكافتيريا وبلغوا البوليس باللي وصلوله وحاطوا الكافتيريا كلها وجاسر مسك عاصم وادم طلع مع فرقه البوليس لمكان انتصار اللي اتفاجئت بالبوليس محاوط بيتها.. ادم دخل جاب ندي اللي كان مغمي عليها فاخدها وطلع بيها علي المستشفي واكدوا انها كويسه بس متخدره... اخيرا فاقت وادم جنبها واول ما فاقت صرخت بس شافت ادم فسكتت واخدها في حضنه يطمنها ندي: كابوس يا ادم كابوس ادم: والحمد لله فوقتي منه علي خير ندي: انت ازاي عرفت بيا؟؟ ادم :انتي كان عندك شك اني هعرف اوصلك؟؟ ندي: ابدا حبيبي بس خفت عليك ادم: عليا انا؟ يالا المهم انك كويسه ندي: مين اللي خطفني وليه؟؟ ادم: اتنين كانوا عايزين يتجوزا علي حسابنا فقالوا يخطفوكي ويطلبوا مني فلوس وانا ادفعها وهما يتجوزا ندي: وانت استخسرت تدفع الفلوس؟؟ ادم :افندم؟ انتي بتقولي ايه؟ انتي هبله؟ فلوس ايه اللي هستخسرها؟؟ ندي: طيب ما دفعتلهمش ليه؟ ادم: انا كنت هدفع بس عرفت اوصلك ندي وادم كملوا خناقهم المعتاد واخدها وخرجوا وراحوا علي البيت وهناك الكل كان متجمع وحكولها بالتفصيل كل اللي حصل... ادم طبعا طلق فاتن وعمها استغل الفرصه وطلبها لابنه رمضان وطبعا ابوها وافق بعد الفضيحه دي ندي: تعرف ان انا مبسوطه اني اتخطفت ادم: ليه بقي ان شاءالله؟ ندي: علشان لو مكنتش اتخطفت مكنتش هطلق فاتن ادم ابتسم: اول مره اعرف انك شريره كده ندي: انا شريره؟؟ انا اللي اتفقت مع رجاله يضربوك؟؟ ولا انا اللي اتسببت في خطف مراتك ولا ايه؟ ادم: اولا معلومه صغيره هما كانوا تلاته وانا واحد ( ضحكت جامد) وبعدين انا ضربتهم برضه ( بتضحك اكتر) انا عايز اعرف انتي بتضحكي ليه؟ ندي: اصلك مكسوف تقول انك اتضربت؟ ادم: ما اسمهاش اتضربت وبعدين قولتلك انهم تلاته ندي: برضه اتضربت ادم: كنت بايديا وهما معاهم سكاكين وعصيان ندي بترجع لوري وبتضحك وهو وراها ندي: برضه اتضربت ادم: اتضربت اتضربت عايزه ايه انتي؟؟ ندي: عايزه حبك ادم : وانا مش بس بحبك انا بعشقك يا جطتي البريه ... ضمها ادم في حضنه واخدها يسهروا بره.... ادم عمل لندي فرح خرافي وكان احسن من الاحلام.. ادم كان فتي احلام ندي اللي ياما حلمت بيه واتمنته وندي بشكلها الجديد كانت معشوقه ادم راحلها اخدها من الكوافير واول ما شافها كان احساسه غريب .. جديد عليه .. ضمها بحب ومسك ايدها وركبوا عربيتهم وسعد هو اللي سايق ندي : مبسوط ؟ ادم : متتخيليش قد ايه !! انا حلمت باليوم ده كتير قوي يا ندي ومش مصدق انه اخيرا جه ندي سندت علي كتفه بحب : انا بحبك قوي ياادم ادم : وانا بعشقك يا عيون ادم وسعد باصصلهم في المرايه ومبتسم وفرحان جدا ادم : بص قدامك يا سعد وحياه ابوك انا عايز ادخل دنيا هاه ! ركز في الطريق سعد : حاضر يا سي ادم بس حضرتك ما تتخيلش فرحتي بيكم جد ايه ؟ ندي : متشكره ليك قوي يا سعد لولاك كان ممكن اكون في امريكا ادم : واشمعني بقي سعد عمل ايه ؟؟ ندي ابتسمت : بعد ما انت مشيت من عندي لما رجعت من السفر جالي واقنعني اني افضل وحكالي ليه خطبت فاتن وشرحلي ظروفك كلها وساعتها قررت اني افضل واجرب حظي معاك ادم بص لسعد : كل ده عملته من ورايا ؟؟ سعد : اعمل ايه يا سعاده البيه ماهانش عليا حبكم يضيع اكده .. وبعدين انا مجرب الحب وناره ادم : والله يا سعد مش عارف اقولك ايه بس انت بجد صاحب واخ كمان دخلوا قاعتهم وبدؤا برقصه سلو هما الاتنين ورقصوا علي اغنيه ضميني وانسي الدنيا عنيهم كانت متعلقه ببعض وبس والحب ظاهر للكل ادم رقص مع اهل بلده رقصه صعيدي وندي افتكرت اول مره دخل بيها البلد وهو لابس جلبيه ورقص بالعصايه المره دي اهو بيرقص بس لابس بدله وهي بتابعه بحب ونفسها تقوم وتقول للدنيا كله ده حبيبي انا وبس .. ادم بصلها ولاحظ نظرتها ليه فقرب منها وشدها معاه تحت ايده .. كانت ليله حب والكل فرحان معاهم واهل البلد كلهم بيهنوهم وبيباركولهم ... خلص الفرح والعيله بتسلم علي ندي وادم وبيهنوهم كريمه: ربنا يسعدكم حبيبي ادم: تسلمي يا ست الكل كريمه: هتقضي الليله هنا والصبح تطلعوا علي شهر العسل بتاعكم؟ صح؟ ادم: اه ان شاءالله ندي: لا مين قال ان احنا هنقضي الليله في البلد؟؟ احنا هنسافر علي طول ادم: لا طبعا هنقضي الليله هنا ندي: لا هنسافر علي طول ادم: وانا قلت هنقضي الليله هنا ندي: ليه بقي ان شاءالله؟ ادم: علشان انا قلت كده ندي : يا سلام ايه انا قلت دي ادم : ندي اسمعي الكلام سالم: يا الله منكم انتو الاتنين انا مش عارف انتو هتتجوزوا ازاي كل واحد قعد في جنب وسابوهم يكملوا خناقهم المعتاد ندي: لا طبعا مش هسمع.. قلتلك بطل الاوامر دي ادم: وانا قلتلك نفذي كلامي وبعدها اتكلمي ندي: ده مش هيحصل ابدا كريمه لسالم: تفتكر هيعمروا مع بعض المره دي؟؟ سالم: هما بيحبوا بعض وده المهم وبعدين هما بيعشقوا خناقاتهم دي وطول ما بيحبوا بعض ديما هيلاقوا الطريق لبعض ما تخافيش عليهم كريمه: طيب نتدخل؟؟ سالم: لا سيبيهم هما لو محدش فيهم قتل التاني هيتصالحوا لوحدهم.. ادم: ندي اسمعي الكلام ندي: طيب ما تسمع الكلام انت ادم: طيب يالا نروح وبعدين نتفاهم ندي: لا انا مش هروح معاك انا رايحه لابويا ادم حط ايديه في وسطه: روحي لابوكي خليه ينفعك وانا هروح لفاتن اهو علي الاقل كانت بتسمع الكلام ندي شهقت وطلعت تجري وري ادم والكل بيضحك عليهم اخيرا وافقت انها تروح معاه وطول الطريق بتفتكر اول مره راحت معاه ودخولها البلد والكل بيستقبلهم بس اختلاف كبير بين احساسها الاول ودلوقتي وصلوا البيت ودخلوا الجنينه والكل بيزغهم ومره واحده ندي وقفت ادم : ايه ؟ وقفتي ليه يالا ؟ ندي : لا مش هدخل كده شيلني ادم بص للي حواليه : لما ندخل جوه ندي : لا هنا ادم : يا بنتي لما ندخل حتي من الباب ندي : لأ هنا ادم : يا ندي الناس بتتفرج علينا ادخلي ندي : يتفرجوا وانا مالي .. مش هدخل انا عايز تدخلني شيلني ادم : يا سلام هو امر ولا ايه مش شايل كريمه اتدخلت : ادم .. ابوس ايدك شيل مراتك وادخل واقفلوا عليكم بابكم واتخانقوا براحتكم بس احنا عايزين نروح ادم وندي بصوا للي حواليهم وحسوا فعلا ان الكل مستنيهم يدخلوا وبصوا لبعض ندي : انا عندي استعداد اقف للصبح ادم : وانا معنديش شالها والكل صفر وضحك وزغرط ودهل بيها البيت وقفل الباب وراه ... ادم : ياااااااه اخيرا يا ندي دخلتي الاوضه دي تاني ندي : اخيرا بس اوعي تسيبهالي تاني وتخرج ادم : انا مسبتهاش اولاني علشان اسيبها تاني ندي : اوعي تبعدني عنك تاني ادم : مش هيحصل ابدا .. انتي هتفضلي جوه قلبي وجوه عيوني .. عاشوا حياه جميله في مجملها وخناقهم كان بيحلي حياتهم اكتر واكتر وحبهم كان بيكبر كل يوم... امجد اتخرج واتجوز ومسك الشغل مع اخوه وبقي هو دراعه اليمين... سالم اكتشف انه معجب بمريم سكرتيره ادم وطلب يتجوزها وفعلا اتجوزوا... ندي فضلت تزن علي ادم انه يتنازل عن المحضر ضد عاصم وخطيبته لان مالهمش سوابق والدنيا لطشت معاهم وطلبت منه يساعدهم يتجوزا وخلي عاصم يشتغل عنده وتحت عينه... امجد اتجوز زميلته في الجامعه بعد ما اتخرجوا ومسك مع اخوه الشغل ... المهم في الحياه انك تفهمها صح وتعيشها صح وتخلي طريقك لربنا ديما عامر وهو هيفتحلك كل طرق الخير وهيبعتلك ديما اللي ياخد بإيدك وبعدين ديما فكروا ان اي شيئ بيحصل بيكون له حكمه حتي لو حسيت في وقتها انه ضايقك.. ربنا ديما له حكمه في كل شيئ.... وتوته توته خلصت الحدوته حلوه ولا ملتوته؟؟ اتمني تكون قصتي عجبتكم ShiMoOo | ||||||||||
|
| |
|
08-12-20, 08:51 PM
| #23 | ||||||||||||||
|  موفق بإذن الله ... لك مني أجمل تحية . اقتباس:
| ||||||||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
.png)
موفق بإذن الله ... لك مني أجمل تحية . 
العرض العادي
