الغالي المزيون / للكاتبة معاني ، اماراتية مكتملة

[لامارا]

	بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته نقدم لكم رواية الغالي المزيون للكاتبة معاني قراءة ممتعة للجميع.....

[لامارا]

رابط لتحميل الرواية هنــــــــــــــــــا

بسم الله الرحمن الرحيم

الســــــــــلامـ عليكمـ ورحمة الله وبركاته
كيف حالكم إن شاء الله دائما بخير ؟

واليومـ جبت قصة جديدة للكاتبهـ المميزهـ معاني

بعنوان

الغالــــي المزيـــون...



المقدمـــــــــــــهـ

من جديد ...

التقى معكم ... و اطرح بين طيات صفحاتي .. و بين ايديكم المتواضعه ..

قصتي الجديده...و فاتمنى ان تنال اعجابــــــكم ....

معاني ...

[لامارا]

الجزء الاول ..

سيف يالس مع رفيجه محمد..في المطعم يتعشون..

سيف: و الله مب عارف شو اسوي حمود..؟ساعدني.

حمود: انت امسوي عمرك شهم اونك اتساعد الناس و بعدين تتوهق..

سيف: زين انت لو كنت مكاني بتخليها جي ع الشارع؟؟

حمود: باخذهـا دار العجزه..بقول لقيتها في الشارع.

سيف"يشرب ماي" و الله خذتها بس يلست اتصيح و تترجاني ..اصلا هي مب وايد عوده..كل علتها انها ما اتروم اتسير..مقعده ..عورت قلبي

حمود"يتطنز" عشان جي وديتها شقتك .. انت صاحي ولا شـووووو؟؟ زين رجعها لاهلهـا..؟

سيف: اتعرف بفرونها مره ثانيه"يتنهد" وين قلوبهم هييل حشى الحصى يحس..

حمود: ياما سمعنا و جفنا ناس اخس و اردى عن حالتها..انزين شو رايك اتيب لهاا خدامه تخدمهـا..

سيف: منو قالك اني ما قدمت ..بس رفضوا لاني عازب..

حمود: عيل ماشي حل غير انك اتردها من مكان ما يبتها او تاخذها دار العجزه ..ولا اتردهـا لاهلهـا.

سيف: حاولت أسوى هالأشياء الثلاثة..بس هي اتصيح و تترجاني..اتعرف احس انها خلاص صارت مسؤله من صوبي..

حمود"يضحك" ابويه انت توك ..ما عرست.. و تحمل مسؤليه ها العيوز...شرايك تزوجهـا..

سيف"منفعل" تطنز ويا ويهك..و الله انك فايج ..خلني اسير ادور لي حل انت ما منك فايده..

حمود: اقعد ..اسولف معاك..

سيف: و الله بتيلس تتمصخر بقوم عنك..

حمود"يضحك" خلاص ما بتمصخر ..زين هي رمستك عن اهلهـا..؟؟

سيف: هي قالت ان ولدهـا توفى و حرمته فرتها فـ الشارع.

حمود:"يهز راس" ما قالت ليش فرتها..؟

سيف: اتقول دوم اتعاملها مب زين بس بعد ما توفى ولدها فرتها.

حمود: لحووول ..زين ولدها ما عنده عيال..؟؟

سيف: "يحاول يتذكر" هي عندها ولدين واحد امسافر بالخارج يدرس..

و الثاني امعرس.. وبنتين وحده معرسه .. ووحده متخرجه من سنه جنها تتريا الوظيفه...

حمود: انزين ليش ما راحت عند حفيدها..؟؟

سيف: شدراني اتقول محد يحبها الا هـا الي مسـافر ..و البنيه اتعاملها اخس عن امها.امممم اظني قالت اسمها "شيماا". و الولد الثاني موليه ما اتجوفه.

حمود: يحليلها و الله تغمض ها العيوز..
سيف: اتصدق اني ارتحت لها اتسولف لي و تضحك امونستني.بس لازم ايب لهـاا وحده تقعد معاها .. و اتساعدهـا

حمود: بتخلص اجازتك باجي شهر ..شو بتسوي يوم بتروح الدوام بتخليها عند امنو..؟؟

سيف: هـا الي احاتيـه مب عارف وين اوديهـا ..اهلي اكيد مستحيل يستقبلونها و بيسون لي سالفه..؟

حمود: زين عرس و بعدين اطلب خدامه..

سيف : تستهبل..اتزوج منو ..؟و بعدين منو بتحملها دام اهلها ما تحملوهـا..

حمود" "يتنهد" و الله مب عارف ..شسوي لك..

سيف"واقف" يالله قوم انروح تأخرنا..
حمود"يضحك" شـووو بتسير للعيوز يالسه ابروحها.

سيف:"يبتسم" اسكت الحين بتيلس اتحاتيني..جني ولدها..

حمود: يا سلام نزلت من السما هـاي..

و في السياره..
حمود: سيفوووووووه

سيف:شفيك ..روعتني..

حمود: قلت ولدها الله يرحمه عنده بنيه..؟؟

سيف"مستغرب": هييييييه ليش؟
حمود: تزوجها و خلها هي تهتم بيدتها..

سيف: سير لااه انا اقول بتسوي شي ..شو هالافكار.

حمود: صج و الله ..اخطبها و تزوجها .. و لا تقولها عن يدتها.. بعد الزواج يبها اهني ..و طبعا انت اتروم اتأدبها ساعتها غصبن عليها بتهتم بيدتها..

سيف:"يفكر" شو ذنبها البنيه.

حمود: انت ما اتقول انها اتعاملها اقسى عن امها ادبهـا عشان اتعرف كيف تتعامل مع يدتها..ساعتها بتضرب عصفورين بحجر..بتأدب البنيه.. و بتلاقى الي يهتم بالعيوز..

سيف"يأشر بايده" لا لا احس السالفه فيها ينوووون ..ها زواج مب لعبان..

حمود: ابويه كيفك سوي الي بتسويه..انا قلتلك و ماشي حذالك غير هاي الطريقه ..اذا مب عايبنك تأخذها دار العجزه..

**
و في بيت بو سالم الله يرحمه..ام سالم اطالع التلفزيون..

شيما:"عنقود البيت"- امايه ابا بيزات بسير السوق ؟؟

ام سالم: شو اتسوين البارحه معطتنج خمسميه شسويتي فيها..

شيما" امايه تدرين شريت فيها بدله و لبستها ..الحين بسير بيت صديقتي أمل و ما يصير البس نفس البدله.

ام سالم: اخ ع دلعكم ..و انتي كل ما بتسيرين مكان بتاخذين بيزات عشان تشترين بدله..

شيما"اتبوس راس امها" حبيبتي انتــــــي هاي اخر مره لا تعطيني الا الشـهر الياي ..

ام سالم "تبتسم" يا الشيطانه تدرين ها اخر اسبوع من الشهر..جم تبين..؟؟

شيما"بدلع" اممممم بس الف درهم..

ام سالم: الفين احسن..؟؟

شيما: امايــــــه يا الغاليه..سالم الاسبوع الي طاف عطاني بيزات.. و عبدالله امسافر..منو بيعطيني غيرج؟؟

أم سالم: اختج مها..؟
شيما:"بدلع" ما آبا ..

ام سالم : خلاص بعطيج بس لا اتيين باجر و تطلبين غيرها..

شيما"تبتسم" :- من عيونـــــــي..

ام سالم:"بنبرة حزن" الله يرحم ابوج ..ما كان مقصر معاكم..

شيما:- يالله امايه الله يرحمه..تحمليني لي ما اعرس و اخذ واحد راهي ..تراني احب البيزات..

ام سالم: انتي اترومين اتيودين البيزات اصلا..

شيمـا:احب البيزات هي بحياتي كل شي ..لو ياني معرس شيبه بس عنده بيزات بوافق..؟

مها"داشه الصاله" عفـاني الله مب جايفه خير..اشحالج امايه..؟

شيما: حبيبتي يوم بتكون عندي البيزات بجوف الدنيا و بيكون كل شي عندي..الي اباه و الي احلام فيه مب شراتج ماخذ ريل فقير.ما ادري منو يصرف ع الثاني..؟؟

مها"اتبوس راس امها"المهم اني مرتاحه معاه ..

ام سالم: وينهم عيالج..؟

مها : عند ابوهم ...عبدالله اتصل بي..؟
ام سالم: اشحاله..متى بيرجع.. و ليش ما دق يسال عن امه؟

مها: اتصل بس لقى الخط مشغول .. و شيما ما ردت عليه..فاتصل يسال عني..

ام سالم:- ليش ما اتردين ع اخوج..

شيما"اتجذب" كنت راقده..ما انتبهت للموبايل..؟

مها: امايه اذا رجع عبدالله من السفر ..شو بتقوله عن يدووه..؟

ام سالم: شو بنقوله بعد في دار العجزه..
مها: حـــــرام الي سويته يمه..
شيما: ليش ماخذتيها عندج...؟؟

مها"منفعله":- تدرين انا ساكنه في بيت عمي و ما عندي مكان..؟

شيما: خلاص عيل لا تحتجين ..فكه من حشرتها..ما اعرف امايه كيف كانت متحملتنها..

ام سالم: شنسوي وجود ابوج الله يرحمه مصبرني..
مها"مقاطعه"لكن بعد ما توفى ما كمل شهور و مدري وين خذتوها..؟؟

شيما:هي تحمد ربهاا فرينها في الشارع ولا عقيناها في دار العجزه يلعوزونها..

ام سالم: اكيد الي لقاها خذها ..هناك..

مها"واقفه محرجه"مدري شو قلب عليكم ..
ام سالم: انتي ابروحج كنتي مضايجه من وجودها لي ما عرستي و افتكيتي منها..

مها: انا عمري ما تضايجت منها ..قلتلكم حطوا لها خدامه.. و خلاص..

شيما: جان حطيتي لها انتي..اصلا انا ما اباها في البيت..

مها: هـا مب بيتج ابروحج ها بيت ولدها..

ام سالم"اتصارخ ع مها" بس عاد لا يكون تطرين هالسالفه لحد .. و الحين يدتج صار لها اسبوع مب موجوده فـ البيت..جان تبانا تندل البيت ما احيدها امخرفه ..

شيما: و الله عقلها احس عني و عنكم ..

مها: امايه الله يهداج لا اتحرجين .. "اترمس شيما" بتروحين السوق ولا..

شيما: يالله امايه عطيني البيزات بسير السوق ..ماشي وقت ..


***

دش سيف شقته الساعه
11 فليل ..دش الحجره الي فيها ..العيوز ..جافها راقده..تم يطالعها ..حس ان هاي الحرمه..اتحسسه انها جريبه منه وايد..

فكر في البدايه ياخذها دار العجزة..بس الحين ما يقدر لانه اتعود ع وجودهـا ..
دش حط ايده ع راسه..رفعت راسها..
العيوز: منوووووو..؟؟
سيف: انا سيف يدوه..
العيوز حاولت تيلس بس سيف منعها..
سيف:خلج راقده يمه..اتعشيتي...؟؟

العيوز: هي يمه تعشيت ..تريتك بس انت تأخرت علي..سامحني يمه رقدت عنك..

سيف: افا عليج الغاليه..انتي الي اتسامحيني لاني اتاخرت عليج كنت برع ويـا الربع..

حس سيف ان العيوز فيها شي ..حتى صوتها شويه متغير..

سيف: امايه شفيج..؟؟

العيوز: وحشوني العيال و البيت و الديره و الفريج..؟
سيف:الله ع طيبتج ما يستاهلـــــوون ..

العيوز: شو اسوي ..الحمدلله الله عوضني فيك..
سيف :الله يخليج لي..يا الغاليه...تبين شي بسير ارقد..

العيوز"تمسك ايده وتصيح" اللــــه يخليك يمه لا تاخذني دار العجزه و اتفرني ف الشارع شرات ما سوا عيالي..اتحملني. شويه...

سيف"متاثر" و غلاتج ما اسويهـا..انتي صرتي وحده من اهلي..

العيوز: اهلك وينهم..
سيف: فـ الشارجه.. بس انا يالس هني عسب الدوام..

العيوز: عيل انت جريب من بيتي نحن في عيمان و انت الشارجه..

سيف: هيه بس نحن الحين في بوظبي..

العيوز"تضحك" ادري شو تتحراني امخرفه..؟
سيف: محشـــــــومه..

العيوز: عيل روح ارقد الله يحفظك يمه..
سيف"يبوسها فوق راسها" و يحفظج..

العيوز: "تضحك" انت الغريب اتبوسني و تحشمني ..شيما ما احيدها قد باستني كل اتصارخ علي.

سيف: منو شيما هاي الي معرسه؟

العيوز: لا مها الي معرسه شويه قلبها احن عن شيما لكن شيما حياتها كل سوق
و سوالف الدنيا شرات امها..
لكن عبدالله ما شاء الله عليه ريال و النعم فيه شراتك..

سيف"في قلبه مليون مره عادت هاي الرمسه شكلها وايد شيما معذبتنها..يبالها صج تأديب مثل ما قال حمود"

العيوز: اكيــــد أخرتك عن رقادك..

سيف: امايه شو رايج لو عرست ..
العيوز: الله يهنيك يمه تستاهل..

سيف:شو رايج ادورين لي عروس........؟؟
العيوز"تبتسم":وحليلي ما اعرف حد..اخطبك لهاا..

سيف: تضايجين لو خطبت شيمـاا.......؟

سكتت العيوز شويه..حس سيف انها صج تضايجت..
سيف: اذا تزوجتها..بيبها هني.. و اكيد بتعاملج زيـــــن لاني انا اعاملج زين.. و بعدين بتردين بيتج معززه امكرمه..

العيوز: الظاهر صرت ثجيله عليك..؟؟

سيف: و الله يا الغاليه ما قصدت جي بس انا صج ابا اعرس .. و بعد كم اسبوع بتخلص اجازتي..فبتكون عندج حرمه ترعاج ..

العيوز: شيما ترعانـي ..انت ما اتـعرفها زين يمه..؟

سيف: انتي ما علييييج انا كل الي اباه اردج بيتج امعززه امكرمه..

العيوز : و اهلك..؟؟

سيف:بعد كم يوم بنزل الشارجه و بخبرهم...

العيوز:"خايفه" انا بتم ابروحي هني..يمه لا اتودرني..

سيف: ما اتحاتين بتم عندج شغاله ربيعي ..حرمته ما تحتايها ها اليوم .. و ان شا الله ارتب اموري..و اوعدج ..بتتغير وايـــــد اشيـاء شو قلتي..

العيوز: انا صار لي زمان محد خذ رايي ..بس اذا تبا الصراحه..شيما ما انصحك تاخذهـا لكن اذا تباها الله يوفجك فيها..

سيف:- الله يسمع منج..انزين الغالية..تصبحين ع خير إذا تبين شي ازقريني

العيوز : ان شالله ..

طلع سيف من حجرته و سار الصاله..فتح التلفزيون.. يطالع فلم اجنبي..سار فكره بعيد.. انا شو سويت ..كيف خبرتها اني بخطب بنت ولدهـا ..

خسك الله حمود..يوم يبت هاي الفكره في بالي..بس الصراحه..يمكن اسوي خير لها الحرمه..انزين انا شو مصلحتي..واذا رفضتني..

لا لا ما اعتقد ترفضني الي عرفته انها اتحب البيزات و الحمدلله انا عندي الخير ..

و ليش ترفضني شو فيني انا ..تحمد ربها اني بخطبها..ولا وين بتحصل واحد شراتي..

**


سيف وفي بيت ابوه..يالس يقنع امه انها تخطب له ..شيمـا..

ام سيف: يا يمه خذ لك وحده انعرفهـا منا و فينـا..؟

سيف: اووه تبيني أخذ منو يعني..عاشووه الخديه ..ولا حلوم الي ما خلت دكان يوم اصغيره و سرقته..

ام سيف"تعاتبه" سيفووووه تأدب لا تطري بنات الناس جي.

سيف: امايه افهميني ..انا ابا هاي الانسانه..احس بغامر فـ حياتي الله لو اتعرفين اشكثر احب المغامرات ..

ام سيف: شو انت ناوي اتعرس ولا اتحارب.؟
سيف:الاثنين ..

ام سيف: شـووو؟؟
سيف: سلامتج امايه بس ما يخصني لا باكل ولا بشرب الا يوم بتزوجوني شيماا..؟

ام سيف: انت اتعرفهـا ..؟
سيف: لا اعرف اخوها رفيجي.. و باين عليهم عيال عرب و ناس..

بها اللحظه دش بو سيف..
ام سيف: تعال الحق ولدك ..خبل فيني..

بو سيف:هـا راعي المشاكـل شو تبـا؟؟
سيف: افـا انا راعي مشاكـــــل يا الشيبه..

بو سيف: جايفني اكبر عن امك اتقلي شيبه..

ام سيف: نعم لا يكون تتحرا عمرك ولد 14 سنه..
سيف: اووووه انتو بلاكم بتضاربون و بتنسون سالفتي..؟؟

بو سيف"يضحك" بلاك اليوم ..احيدك ثجيل شو صاير لك جنك خبله.

ام سيف : بسم الله ع ولدي..الله يسلمك ولدك يبا يعرس
بو سيف: ما شا ما شا الله..زين زين..

ام سيف: يبا وحده من عيمـان ..؟شو رايك ..؟
بو سيف: ليش شو بلاهم بنات الشارجه؟
سيف: ما بلاهن شي بس انا بخاطري وحده و ابـاها..؟

بو سيف: منوهاي اقصد بنت منو؟؟

ام سيف: اونه اخت رفيجه..
سيف: بنت أحمد علي..؟

بو سيف: احمد علي..ها الريال متوفي..؟
سيف:هيـــــــه اتعرفه.

بو سيف: ولده العود اسمه سالم..؟
سيف:هي هي يزقرونه بو سالم..

بو سيف: الله يرحمه ريال و النعم فيه ..الصراحة زين ما اخترت ..

ام سيف"متحمس": انت اتعرفه..؟

سيف: "يبوس راس ابوه" مشكوور ابصراحه انت الي تفهمني ..؟

ام سيف: صار ابوك الي يفهمك هـا..
بو سيف "يضحك" االله يرحمك يا بو سالم..من سنين قطعته بس كنا ويا بعض شرات الاخوان..

سيف: اتعرف امه..؟
بو سيف: بعدها عايشه..

سيف: هي بعدها..
ام سيف: شدراك انت ..

سيف"طفران": اقولكم ولده رفيجي..المهم متى بتخطبوها لي..؟
ام سيف: بلاك مستعيل خلني اجوف البنيه يمكن ما اتعيبني...

سيف:لا لا بتعيبج يالله يبه باجر اخطبها لي..

بو سيف"يضحك" شفيك مستعيل..

سيف: انتو نسيتوا بتخلص اجازتي..؟

ام سيف: عن اتخلص اجازتك بس ..انت اجازه ولا غيره يالس هناك فـ بوظبي..

سيف :شو اسوي ..ربعي هناك..محد لي هني غيركم..

بو سيف: يالله ام سيف وين العشى..ترانا يعنا..

سيف: و الخطبه..
ام سيف: لحـــــوول..؟

بو سيف: ما يهمك يبه ان شا الله باجر نتوكل ع الله..

سيف"طاير من الوناسه" حيــــــهم الاهل..

**
يتبع ...>>>

[لامارا]

الجزء الثانـي..

شيما: ما يخصني ابا اعرس ع طول ما ابا ملجه..؟

ام سالم: بلاج انتي شو بيقولون عنا مب مصدقين لقينا لج معرس..؟

مها: انزين شو رايج تملجين الحيـن و العرس بعد ما ايي عبدالله..

شيما: لا و الله تدرين متى بيرجع عبدالله بعد 3 شهور..؟

مها: انزين شو فيها..؟
ام سالم :- انا اجوف كلام مها زين..الملجه الحين و العرس بعد 3 شهور..

سالم: الحين شو يالله اتفجوا ع راي واحـد ترا الريال مستعيل..؟

شيما: جفتـوا مستعيل..خلاص قوله الملجه و العرس في يوم واحد بعد اسبوع لي ما اتزهب..

ام سالم: يعني انتي ما يهمج راي امج.؟

شيما: اوووووه خلاص عيل ما ابا اعرس..

سالم: انا اقول شيما معاها حق..الريال باجي شهر ع اجازته..يعني بها الفتره ايرومون يسافرون ..بعدين ماشي مجال.

مها: نحن شو يخصنا باجازته..

شيما: خلاص خلاص شرات ما قلتلكم العرس بعد اسبوع..و مهري ميه و خمسين الف.

ام سالم: هي بنتي تستاهل بعد اكثر.

مها: شو ميه و خمسين الف ..تبين الريال يشرد..؟

سالم: جوفوا انا بقوله ميه و خمسين اذا ما رضى ميه و عشرين.. و اذا بعد ما عيبه بنقوله خلاص ماشي زواج..

شيما"مستانسه" تعيبنــــــــي..سلوم..اذا ما قدر ع ها المبلغ يعني هو مب راهي.. و لا شياته..

مها: حليله ها الريال ما يعرفج زين باجر بنصدم.

ام سالم: ع شو ينصدم و حليلها بنتي ..ما بيلاقي شراتها وين ما سار..

سالم: خلاص عيل اليوم بتصل بوالد المعرس و بخبره ..

شيما: رد علي خبر.

سالم: بلاج انتي ما تستحين ع ويهج..؟
مها: لا تلومها ع بالها بتاخذ مليونير..

شيما: حبيبتي هو مليونير اصلا كافي شغله و راتبه فوق العشرين الف..
و بعد بسكــــــن فـ بيت ابروحي مب شراتج خمس سنين معرسه و للحين يالسه فـ ملاحق و بعد في بيت عمها..

مها: المهم الراحه..

شيما: الاهــــــم الفلوس ..

ام سالم"تبتسم" الله يهنيج فـ حياتج يمه..؟

يرن موبايل ام سالم ..
ام سالم: هـلا يمه عبدالله شحالك..؟

عبدالله : الحمدلله ابخير شحالكم و اشحال خواني و يدوه..

ام سالم: كلنا ابخير يمه..متى بترجع ولهت عليك يمه..؟

عبدالله: الغاليه كل ما ادق تسالين ها السؤال و ارد اقولج بعد 3 شهور..

ام سالم: لا تلومني يمه من الوله..

عبدالله: "يضحك" حتى انا ولهان عليكم ..وينها يدوووه ابا ارمسها وحشتني؟

ام سالم"مرتبكه" يدتك محد الحين هاي شيما كلمها...

شيما: هلا عبود شحالك ..؟

عبدالله" ابخير شحالج و شو اخبارج..؟

شيما: ما دريت..؟
عبدالله شو؟

شيما: بعرس بعد اسبوع..
عبدالله:لا و الله و ما تقولوون..

شيما: تدري كل شي تم ابسرعه ابصراحه ما ابا اعرس الا بعد ما ترجع..بس اهل المعرس مستعيلين ..انت شو رايك..؟

عبدالله: لا توقفين نصيبج عشاني عرسي و ان شا الله يوم برجع بتسوين حفله صغيرونه عشان اخوج صح..

شيما: اذا تبا جي ع راحتك لاني كنت ناويه ارفض عشانك..

عبدالله: لا اتفكرين بهاي الطريجه..المهم عطيني يدووه..

شييماا:اممممم يدوووووه

وصكرت التلفون..
مها: ليش صكرتي ابا ارمسه..؟

شيما: طلب يدتي فصكرت اونه انقطع الخط ..

مها: انتي داهيه صج الله يعين ريلج..

ام سالم: يالله من باجر روحي تزهبي..ماشي وقت..

شيما: نيلس في دبي عشان اتزهب.

مها: ليش ماشي هني اسواق..

شيما"بدلع"امبلىىىى فـي بس انا ابا دبي..و كافي اني بسكن فـي بوظبي يا سلالالالام..

مها: مالـــــت.

شيما: عليج يا الغيرانه..

ام سالم: بسكم ضرابه ...روحي كل يوم دبي و ردي هاي هي ..جريبه منا ..

شيما: "واقفه" انزين بسير حجرتي..برمس صديقاتي ..يمكن يحترون شرات نـاس..

بعد ما طلعت شيما من الصاله..

مها: انتي وايد دلعتيهـا باجر بتعرس الشاي ما اتعرف اتسويه..

ام سالم: ما عليه الخدم بخدمونهـا بنتي ما ادش مطابخ..

مها: امايه شوووو بترمسين شرات شيماا.

ام سالم: شفيج مضايجه من اختج.

مها: الحمدلله ريلي مب مقصر معاي.

ام سالم: الحمدلله الله يسعدكم ..

مها: آآميــــــــن

**




و فـي بيت "بو سيف"
ام سيف"محرجه" شـوو هييل ما يشبعون طلبات مب كافي المهر ..

بو سيف: الله يرحمك يا بو سالم..

سيف: ابصراحه كنت متوقع ..بتكون جي طلباتهم.

ام سيف: الله يعينك يمه ..عليها ..

سيف: الحمدلله الخير موجود..

بو سيف: بس بحدود يا ولدي..الحين بعد كم يوم بتعرس ..جوف كم طلبوا منك بيزات غير المهر..فوق مية الف هاي مهر غيره..

سيف"يتنهد و يتمنى في قلبه انه ما يندم"
ام سيف: شو بتسوي الحين..

سيف: ماشي بعد ما اعرس بنسافر اسبوعين برع..بنسير فيينا..و بعدين برجع بوظبي عشان الدوام..

ام سيف: و العروس وين بتقعد.؟

سيف: معاي في الشقه ..

بو سيف: يلسها هني مع امك ابروحهـا..

سيف: لا انا محتاجنها هنـاك..(و في خاطره..وحده محتاجتنها اكثر عني و عن امايه..")

ام سيف: الله يهنيكم يمه..

بعد ما خلص سيف من السوق ..يلس يفكر و هو راد البيت..

كان متوقع ان شيما تطلب بيزات.. بس ما تصور لها الدرجه..معقوله ..يرتبط بانسانه جي مواصفاتها همها البيزات و الاسواق و غيره..

عرف ان صعب عليه يضغط عليها لان باين عليها مدلعه وايد..

بس اكيد بيقدر لو ان شخصيتها قويه..بس مستحيل اتكون اقوى من شخصيته..

بيحرمها من كل شي عشان اتذوق الي ذاقته..يدتها.. و تتعلم من الدنيـا ان مب كل شي بيزات..

فكر يتصل ..للعيوز يتطمن عليها ..شلته الشغاله..طلب العيوز..فقالته انها راقده..قالها ..اتخبرها ان بيعرس بعد كم يوم و بيسافر اسبوعين و بعدين بيرجع..

عاد ما درى بتفهم له هاي الاندنوسيه ولا لاء..المهم تطمن عليها و عرف انها ابخير ..

**







تم العرس..

كانت مفاجأة لكل واحد مفاجاه لـ سيف..يوم جاف شيما..ما توقعها بها الجمال كله ..

قال فـي خاطره من حقها تدلع.. و تطلب كل ما تتمناه دام..ها الويه بها الحلا..

حس ان في البدايه حظه حـلو انه ارتبط بأحلى انسانه جافته عيونها..بس شو الفايده ..لازم تتعلم دروس ..في الحياه عشان اتكون مكتمله..

و بالنسبه لشيما.. كانت أكيده ان بعيبها ريلها..بس ما توقعت لها الدرجه..استانست ..

و عرفت ان حظها دوم معاها..مال و جمال و شباب اكيد الحين البنات كلهن يطالعونها بحسد..

اكيد كل وحده تتمنى اتكون بمكانهـا ..لا بعد بتسافر فيينا..الله رحلة العمر..

حست شيما قلبها غاص في اعماقها يوم سمعت صوت سيف ..يقولها..

_شحالج شيما...؟

قالت في خاطرها "الله صوته وايد حلو .."

نزلت شيما راسها مستحية..

سيف"يبتسم" ليش المستحى خلاص انتي حرمتيه..

تمت شيما امنزله راسهـا.
سيف: "بصوت هادي" ما تبين ترمسين يعني..؟

شيما"بصوت خفيف" ما ادري.

سيف"يضحك" ما تدرين ..؟

شيما: "منزله راسها" شو اقـولك..؟

سيف: كلميني عن نفسج..بعدين ارفعي راسج عشان اجوف ويهج الحـلو..

صدت شيما الصوب الثاني مبتسمه و بنفس الوقت مستحيه..

حست بعمرها اول مره تستحي هـا الكثر يمكن لانها..عروس..

شويه ودشوا اهل شيما و سيف يباركون لهم .. و يهنوهم..و بنفس الوقت يودعونهم ..عشان شهر العسل..

كانت شيما طايره من الوناسه..و سيف بعد كان مستانس .ابصراحه ما كان متوقع انه بيكون جو العرس جـي ..حسب شي و بينتهى في أي لحظه..

لكن الي قاعد يصير عكس ما كان متخيل و متوقع.. و اول صدمه له ..شيما الي دشت خاطره من اول ما طاحت عيونه عليها..

بس خساره..كلها ..و تطلع طماعه اتحب البيزات و راعيه مشاكل..بس كان اكيد ان بيقدر يغيرهـا ..

**

في اليوم الثاني..فتحت شيما عيونها..في البدايه استغربت المكان بعدين تذكرت انها مع سيف في فيينا.. وصـلوا البارحه بوقت متاخر ..كانت مستانسه..

طالعت المكان ادور سيف جافته محد..فكرت اتروح تتغسل .. و تلبس لي ما ايي سيف ..

..كانت شيما واقفه عند المنظره..اطالع اخر لمسات المكياج الي حطتها في ويهاا

شويه ودش عليها سيف..قامت من مكانها اطالعه..

سيف: صباح الخير يا احلى عروس.

شيما"مبتسمه" صباح النور..

سيف"يتامل ويها" عمري ما جفت حلوه شراتج..دوم جي ترقدين وايد..

شيما: لا بس من التعب..وين كنت.؟
سيف: اتمشى برع..الجو رهيب..

شيما: حلال عليك و حرام علي..

سيف: يضحك" لا طبعا ..توني رجعت عشان اطلع معاج..ترا الطلعه من دونج ما تسوا.

شيما"تضحك" بعدك توك اتعرفني..

سيف: احس بعمري اعرفج من زمان..
شيما: بتصدقني لو قلتلك انا نفس الشي..يالله نطلع..

سيف: خلاص بتريق برع..

>>>

و اسبوع ع زواج سيف و شيما.. سيف يوميا يتصل يسال عن امه و ابوه و العيوز ..

بس شيما كانت العكس ما ادق تلفون الا اذا الح عليها سيف انها تتصل تنشد عن أهلها..

شيما اعجبت بسيف وايد.. و كانت خايفه انها تحسد عمرها.. سيف كان وايد حبوب و طيب معاها..

حتى اذا كان يبا منها شي باسلوبه الحلو ..يخليها تسمع كلامه من غير ما تعاند..

كان يشتري لها كل شي تبــــــاه و تتمناه..حتى اشياء اتشر عليها.. تتفاجأ ان شراه لها هديه..

كان يعيشها بجو رومانسي عمرها ما حلمت فيه.. بدأت اتعرف من معاشرتها لـ سيف ان شي في الدنيا اشياء حلوه غير البيزات..

حتى سيف.. كان موقع انه بيستانس . و يعيش بشهر عسل حقيقي ..ما حلم فيه او خطط له..كان يتوقع ان ..كل شي بيمر ابسرعه.. بس جاف بدايه خطوته وايد حلوه و اوكى..

عرف الاسلوب الي يتماشى مع شيما..حتى لو كان في اشياء ما تعيبها ..بس سيف يعرف يقنعها..

اتمنى سيف ان كل شي بينه و بين شيما..يتم جي ع طول و يدوم..

بس كان دوم يذكر نفسه ان اصلا زواجه من شيما عشان يدتها .. مب عشانه..

شيما و سيف يتمشون صوب بحيرة فيينـا..

شيما: سيف حبيبي ..شو رايك انمدد الاجازه..
سيف: اتمنى و الله عمري بس اتعرفين الاشغال..؟

شيما: ليش انت مب مستانس..
سيف"يطالعها" و الله يا شيما عمري ما استانست بحياتي كثر هالاسبوعين ..

شيما"بدلع" عيــــــل انمدد الاجازه بليز حبي..؟
سيف: "يتحايل عليها" اتخافين لو رجعنا البلاد ينتهي كل شي .

شيما"بسرعه اترد" اكيـد لا ..ما اقدر اعيش من دونك..

سيف: اتحبيني وايد..
شيما "مستحيه" لازم احبك مب انت ريلي ..

سيف: دام انه ما بيفرق شي ..خلاص نرجع البلاد بالوقت الي حددناه.

شيما"اتسير بعيد عنه" اتعرف انك وايد ممتاز في الاقناع.
سيف"يضحك" و اتعرفين انج عسل يوم تزعلين.

شيما: عيل خلاص اوعدني نرجع هالمكان..

سيف: اممممم

شيما" بعـــــــدك اتفكر.
سيف "يضحك" خلاص وعـد

شيما"تجرب منه" عيل الحين انا احبـــــــك..
سيف: شيطانه..

شيما: ما شريت لامايه و اختي شي ..؟

سيف"في خاطره كل ها الاغراض و ما شريتي": عندنا وقت باجر..

شيما: انزين خـلاص
سيف: بس حق امج و اختج......؟

شيما"اتفكر" هي ما عندي غيرهم..؟

سيف:"يستهبل" انا اذكر عندج يده وينها..؟
شيما"مرتبكه" يدتـي..؟؟

سيف: هي يدتج.؟
شيما: امممم ..ما تبا اتعيش معنا بعد ما توفى ابوي الله يرحمه..

سيف: وين سارت..؟

شيما: عيوني وايد تسأل ..
سيف: خلاص ابرايج لا اجاوبين الظاهر بعدج تعتبريني غريب عنج.

شيما: لالالا منو قال ..؟

سيف: طريقة كلامج ..؟

شيما: اتعرف اسلوبك في الكلام يذكرني فـ عبدالله اخوي..

سيف :- ليش يعني..
شيما: ما ادري .اممم يوعانه انــــــــــا ..

سيف: يضحك" اوكى تعالي شي مطعم جريب من هني..

و هم يالسين ياكلون..سيف يفكر كيف يفاجـأ شيماا بيتها بعد كم يوم..اكيد بينتهى كل شي حلو من بينهم..

شيما: ليش ما تاكل فـشو سرحان..؟
سيف: افكر فيج..؟

شيما: انــــــــا
سيف: كل ها الجمال و الدلال و اتبيني اكل و ما اطالعج..

شيما:"بدلع" سيـــــــــــف..

سيف: عيونه امريني..

شيما: عشاني تاكل الحينه و بعدين فكر في كل الي تباه..

سيف: أنتي أتأمريني يا الشيخه..

**

ركب سيف السياره و معاه شيما.. بعد ما نزلوا من مطار بوظبي..سايرين شقتهم..

سيف: توقعت بيسون لنا مفاجاه و بستقبلونا فـ المطار.

شيما: احسن شو تبا فيهم ..خليهم يخلونا ع راحتنـــــا..
سيف: حبيبي حتى و لو هييل اهلنا..

شيما: اووه سيف انت وايد اتبالغ..؟

طلع سيف موبايله..
شيما: بدق لمنـو اكيد امك ولا ابوك..

سيف: هم يدرون انا بنوصل اليوم ..بس بدق لربيعي..

سكتت شيما..تسمع كلام سيف شو يقول لربيعه..

سيف: هـلا حمود..
حمود: هـلا المعرس ها وصلت ما شا الله شالاخبار..

سيف: طيبه.. اقولك الخدامه..خذهـا انا راجع الشقه الحين..

حمود: خلاص ما تحتايهاا..
سيف: مشكور ولد الخاله..

حمود: عاد خبرني بالقنبله الي بتصير ..

سي"يضحك" فالك طيب..
بعد ما صكر التلفون ..
شيما: شو اتسوي الشغاله في شقتك..
سيف: ابرايج شو اتسوي..؟
شيما: اتنظف..؟

سيف: هي ..وبعد تيلس مع ناس ..
شيما"مستغربه" منو هالناس..

سيف: بتعرفينهم يوم بنوصل البيــــــــت..

شيما: انت قلتلي محد بسكن معانا ..

سيف: انتي وايد مهتمه اذا حد بشاركنا او لا ..

شيما : طبعا مهتمه..

سيف: خلاص يوم بنوصل بتعرفين كل شي ..

شيما: خوفتنـــــــي..

سيف"يضحك" لا تخافيـــــــن صدقيني ما في شي يخوف ولا شي بتغير من تزوجتج للحين..

شيما"تمسك ايد سيف" وعد.

سيف: انا اباج انتي الي توعديني ..

شيما: اوعــــــدك سيف..

سيف: احس اسمي حلو يوم تنطقه شفايفج..

شيما: "تضحك" عمري كل شي فيك حلو ..

سيف: و الله..
شيما : هـيي

سيف: وصلنا الشقه..

شيما"مستانسه" الله بها البنـايه..شكلها فخمه..

سيف:- عشان اتعرفين انج مب متزوجه أي حد..يالله حبي ننزل ..

يتبع >>

[لامارا]

الجزء الثالث ..

انتبهت شيما قبل لا تنزل من السياره ..ان سيف فتح السده و طلع بيزات..

شيما: شـو هـا حق منووووو؟؟

سيف: هاي 15 الف كنت ابا احطهم لج في البنك..يعني اسوي لج احساب باسمج يمكن تنفعج..؟

شيما"تفتح شنطتها ابسرعه خايفه لا سيف يغير رايه"

شيما:- ها خذ بطاقتي ترا عندي بطاقه فيها بيزات المهر..حط الفلوس بحسابي و عطني البطاقه..

سيف"ياخذ بطاقتها": زين سويتي ..وفرتي علي سالفه طويله..

شيما: امممم بس 15 الف ..؟؟

سيف: عمري كل شهر بحط لج بيزات..جي يرضيج..

شيمـا"تمسك ايده" اكيــــــــد وايد علي مشكور حبيبي..
سيف في خاطره" اسميج طماعه"

نزلوا من السياره..فتح سيف باب الشقه..شهقت شيما يوم جافت الشقه وايد عوده ما توقعت ..انها ..بتكون جي جنها فلة ..

سيف:حبي جدمي ريولج اليمين.. وسمي بالرحمن..

شيما"تضحك" بلاك ترمس شرات الشياب..

مسك سيف ايدهـا تعالي ابا اراويج شي ..ترا ها الشي هو الي مخلني مستانس و متعود ع وجوده في الشقه..

شيما: "مستغربه":- منووووووو؟؟

اجدم سيف و معاه شيما.. كانت شيما اتفكر و محتاره شو ها الشي ..يمكن نفس الشي الي كان يقصده يوم كان يرمس ربيعه في التلفون..؟

اتفاجات شيما يوم جافت ..سيف يدق الباب ..
سيف: اتريي برع يوم بزقرج دشي..

شيما: شو السالفة حبي..

سيف: ثواني و بتعرفين حبي ..

اتريت شويه ..اطالع الشقه فـ كل الجهات ..سمعت سيف يزقرها.

كلام سيف و تصرفاته خلها ترتبك شويه..فتحت الباب ..شويه شويه..

حست شيما ان ريولها ما قامت اتشلها .. ولا قادره ترمس ..شو اتسوي يدتها ..هني شو ها المقلب.. اصلا شو السالفه..

يالسه اطالع ملامح الحرمه اليالسه حذال سيف..
معقوله؟؟!!كانت تبا تنطق يدتـي بس مب قادره ..

سمعت يدتها تزقرها..

العيوز"اتمد ايدهـا":-تعالي يمه مبـــــرووك عليج
سيف: تعالي شيمـا ..

ردت شيما ورا ..اتهز راسها مب مصدقه الي يصير جدامها.. سيف لازم يفسر لها وايد اشيـاء ..طلعت برع الحجره..

يلست ع اجرب كنبه في الصاله..منهاره..حست بدوار خفيف بس تمالكت اعصابها يوم جافت سيف طالع من الحجرة..

تم سيف واقف جريب منهاا يترياها ترمس..

شيما: شو تسوي يدووه عندك..؟

سيف"بصوت بارد" يعني تعترفين انها يدتج.!

سكتت شيما ..شويه . ورجعت تتكلم..
شيما: شو اتسوي عندك......؟

سيف: يوم انها يدتج ما وحشتج كل ها الفتره ليش ما سلمتي عليها..

شيما"منفعله" ما ابــــــــــاا

سيف: ليش .....؟؟ ممكن اعرف ليش ..؟

شيما: انا الي اباه اعرف كيف وصلت يدتي عندك..؟
سيف: توقعي واحد مار بالشارع وجاف عيوز منسدحه ع الرصيف شو تتوقعين يسوي..

شيما مب مصدقه الي تسمعه ..يعني الحين سيف يعرف كل شي ..بس الي مب فاهمتنه كيف جي..؟

شيما:"مرتبكه" انا مالي ذنب؟
سيف: واضح ان مالج ذنب ..

شيما: شو قصدك..؟و بعدين لا تتوقع اني بستقبلها في الشقه..؟

سيف"منفعل" لا تنسين هي الي ساكنه هني قبلج.. وهي الي تحدد انتي تسكنين هني او لا..؟

وقفت شيما مصدومه من كلام سيف...

شيما: سيف شو بلاك ..ليش جي..؟

سيف: ماشي بس حبيت اصلح شي انكسر ..اباج اتعاملين يدتج زين ابا كرامتها اترد لها..

شيما: هــــــا ع بالك يدتي عندها بيزات ..؟

سيف" يبتسم" يدتج لو كان عندها بيزات جان جافت عمرها امعززه و امكرمه مب معقوقه فـ الشارع..

شيما"مرتبكه" قلتلك انا مالي خص..

سيف: روحي سلمي عليها.
شيما"معانده" ما ابــــــــاا..انا بسير بيت اهلي ..و يوم بتفضي الشقه ساعتها بفكر ارجع لك او لاء.

و تحركت صوب باب الشقه ناويه ترجع عيمان ..ان شا الله بتاكسي..

يلس سيف ع الكنبه متسند ..و سمعته يقول.
سيف: ما تبين بطاقة البنك..

وقفت شيما بمكانها ..مستحيل اتخلي بيزاتها عنده غبيه يوم عطته بطاقتها خدعها كان مخطط لكل شي ..حست ان دموعها بتزل من عيونها ..بس مسكت اعصابها..و التفت له..

شيما"تمد ايدها" عطني بطاقتي..

سيف: اســــــــف ابا احافظ ع بيزات حرمتيه..

شيما"اتصرخ عليه" انا مب حرمتك يا الجذاب..

حست شيما ان اعصابها بتنفجر يوم جافت سيف يبتسم..
شيما: انا بغير رقم بطاقتي..

سيف: ربيعي يشتغل بنفس البنك .. و اروم اغير كل شي و أخذ البطاقه شو رايج..؟؟

شيما: ما عندي بيزات وايد..خذها ما اتهمني..

سيف: ع بالج ما ادري ان بيزات المهر كلها في البنك و رجعتي تطلبين بيزات غيرها عشان تزهبين فيها..

ارتبكت شيما ..من كلام سيف من وين له ها المعلومات كلها.. كيف مخطط لكل شي ..اللوتي..
كان شخص ثاني قبل ساعات كيف انجلب جي ..و ابسرعه..فكرت انها توافق ع كلامه لي ما تاخذ بطاقتها و ترجع بيت اهلها..

سيف: لي متى بتمين اتفكرين..

اتحركت شيما.. صوب حجرة يدتها..دشت الحجره.. باست يدتها ع راسهاا ..حست بلوعت جبد..

العيوز: شحالج يمه و اشحال اهلج..
شيما"من طرف خشمها" كلنا بخير..

قامت من مكانها و جافت سيف واقف عند باب الحجره.. يطالع الموقف..
شيما: وين حجرتي..ووين الشغاله عشان اترتب اغراضي..؟

سيف"يبتسم": ما عليه عمري الشغاله بعدها ما وصلت خذي ثايبج و ثيابي و رتبييها الحجره الثانيه..

اضايجت شيما ..من اسلوب سيف في الكلام عرفت انها طاحت في مصيده.. صعب انها تطلع منها..لو كانت في الشارجه او عيمان كان اسهل عليها..

بس فـ بوظبي منو عندهـا هني ..اتنهدت و طلعت من الحجره..

تمت تمشي بحجرتها يمكن نـص ساعه تتريا سيف..بس الظاهر امطول اليلسه عند يدتها..؟

شويه و دش سيف الحجره..

شيما: ع بالي بترقد هناك......؟
سيف: لا حبي كنت اسولف لها عن السفر و الاجازه .. و اسمع اخبارها..

شيما:تصرخ" سيــــــــــف..

سيف: لا تصرخين ..

شيما: "شويه بتصيح" ليش سويت جي قصيت علي..

سيف: بشو قصيت عليج..هاي مب يدتج و مب لازم تهتمين فيها ..

شيما: طلقني انت قصيت علي..




...

سيف: انا ما تزوجتج عشان اطلقج .. و بعدين لا اتحسبين اني تزوجتج عشان شهر العسل و الكلام الفاضي الي صار من بينا..
انا كان زواجي منج ..بس عشان الشيخه الموجوده في الغرفه الثانيه..

شيما"محرجه تصرخ بصوت عالي" :- ال[محذوف][محذوف][محذوف][محذوف] انت صج ما تستحي ع ويهك..يا الغشاش..

ومسكت العطر الموجود ع التسريحه و فرته صوب سيف..

تحرك سيف شويه..فضرب العطر اليدار فطاح و انكسر..
يلست شيما اتصرخ و اتسب سيف و اتفره بكل شي موجود ع التسريحة..

حست شيما انها تعبت ..كل الي اتسويه ما منه فايده.. يلست ع الارض و اتصيح..

شيما"تصيح ":- ييييب بطاقتي يا الحرامي ..
اجدم منها سيف و يلس حذالها..كانت شيما بتقوم من مكانها بس سيف مسك ايدها و يلسها..

سيف: و الله ما توقعتج جـــــــي ..انتي الي كنتي قبل ساعات هاديه و راضيه ..وجفت الحب بعيونج اتسوين جي..

شيما"تصيح" طلقني..و عطني البطاقه.

سيف"واقف" نظفي الحجره.. و بالنسبه لطلاق ماشي و البطاقه بحول كل البيزات برصيدي..جان يرضيج..

وطلع برع الحجره..يلست شيما اتصيح بصووت عالي..كل السبب منها ..هي دوم مخربه حياتهم و الحين بعد صارت حجر في طريقها

..معقوله سوا كل ها عشان يدتها..شو مصلحته وشو بستفيد..

طلعت من حجرتها امحرجه.. مستحيل اييها نوم الا بعد ما اتبرد حرتها..

جافت سيف مب موجود في الصاله..دشت حجرة يدتها.. كانت يدتها راقده بس يوم سمعت صوت الباب ينفتح بهاي الطريقه ..يلست في مكانها..

العيوز: بسم الله الرحمن الرحيم شو صار فيج يمه..؟

شيما"اتصرخ عليها":-كل منج انتي السبب متى اتموتين ونفتك منج..
كانت شيما منفعله.. و ما حست بعمرها يوم يلست ادز يدتها
شيما: طلعي برع بيتي طلعــــــــي ان شا الله تموتين و افتك منج..

بها اللحظه دش سيف الحجرة ..

ما حست شيما بعمرها الا وهي واصله عند باب الحجره بدزه وحده من سيف..طاحت عند باب الحجره..

جافته كيف يلس يهوس ع ذراع يدتها .. و يسكتها .. و يحاول يطمنها بكلامه عشان ترتاح..

سمعت يدتها اتقول و كانت تصيح"_:انا قلتلك يا وليدي هاي البنيه ما تصلح لك..بس انت ما سمعت كلامي..

سيف"يطالع شيما" ما علييج امايه انا براويها..

سيف " يصرخ ع شيما" تعالي اعتــــــذري.؟
وقفت شيمـا تمسح دموعها بايدهــــــا و طلعت برع الحجره..

اضايج سيف من حركة شيما بس كان متوقع منها هاي الحركه..

وقف ع طول يلحق شيما..
العيوز: تعال يمه خلهــــــا هـاي عنيده و راسها يابس شرات امها..

بس سيف طلع برع الحجره ..لقى باب الحجرة مقفول.. سمعته يقول:افتحي الباب ابسرعه..

شيما"تصرخ عليه" ما بفتـــــــح روح ارقد بحضن يدتك ..
سيف"محرج" افتحي لاكسر الباب فوق راسج..

شيما: قلتلك ما بفتح..

سيف: "مغير نبرة صوته" شلي اغراضج يالله باخذج بيت اهلج..

شيما: بالاول عطني بطاقتي...
سيف: بعطيج بس انسي 15 الف..

مجرد ما شيما سمعت ان سيف بيعطيها البطاقه ركضت تفتح الباب بس اتفاجات ان سيف يدزها .. و يصكر باب الحجرة وراه..

شيما:-"مدت ايدها" عطني البطاقه..
سيف"يصك ع اسنانه":_ يا قوة عينج صج انتي ما عندج احساس..
اجدم منها بس شيما تمت واقفه بمكانهـا
سيف: روحي اعتذري ليدتج..
شيما: ما ابــــــــــا انا ما اشتغل عندك ولا عندها ..
سيف: للمرة الألف اقولج سيري اعتذري..

اول مره اتحس شيما بالخوف من نظرات سيف ..بس قالت في خاطرها.."ما يقدر يسوي فيها شي توها عروس "

شيما: عطني البطاقه .. و بسوي لك كل شي.
سيف: بتسوين كل شي و من دون ما ااعطيج البطاقه..

شيما"معانده" جـــــرب انزين..؟

يرها من ذراعهـا و خذها حجرة يدتها.. و شيما اتصرخ عليه..
شيما:- هدنــــــي مب ع كيفك..
بعد ما وصل عند يدتهااا..
العيوز:- خلوني ارقـد بسكم ضرابه..

سيف"يطالع شيما" بوسيهـا فوق راسها..

شيماصدت الصوب الثاني..سيف يمسكها من رقبتها و ينزلها ع راس يدتها..

العيوز"شويه و بتصيح": بس يا سيف لا تعذبني معاكم..
شيما: "اتصرخ" ما ابـا قلتلك ما ابا..

سيف: و الله ما اهدج الا يوم تبوسينها ..

حست شيما ان حيلها انهد خلاص مب رايمه تتحمل اكثر عن جي.. كل شي فـي حياتها تغير.. كل شي انجلب فوق و تحت..

اخيرا استسلمت و باستها..بس سيف تم منزل راسها ..
سيف: اعتذري..لها ابسرعه..

شيما"تصيح" انـــــــا اسفه..سامحيني..
العيوز: بس يمه خلها توها عروس لا تسوي فيها جي..

حست شيما ان الدم اجمع ابراسها بعد ما هدها سيف ..رفعت راسها تفرك رقبتها ..من الويـع ..و كانها تمسح لمسات سيف من ع رقبتها..

سيف: الحين انتي حرمه ..
طالعته شيما باحتقار و طلعت برع الحجرة..

سيف: السموحه يمه ع الازعـاج ..ارقدي الغاليه نوم العوافي..

العيوز: الله يهداكم ..

طلع سيف برع الحجرة.. انصدم يوم جاف شيما يالسه اتشقق ثيابه ثوب ورا ثوب..

فـي البدايه حس بغيض من تصرفات شيما الي كانت شرات اليهال بس بعدين يته ضحكه ..

انتبهت شيما ان سيف واقف يطالعها ..ففرت الثوب بويهه و سارت حجرتها.. لحقها سيف قبل لا تقفل باب حجرته..

شيما"محرجه": بخليك تندم ع الي سويته فينـي..

سيف: تبين الصراحه كنت مضايج بس الحين صج احس اني فـ مغامره .. و صج حياتي اتغيرت و صار فيها اكشن..

شيما: جذاب قلت انك تحبني ووعدتني انك بتم معاي و ما بتتغير علي بس انكشفت حقيقتك ..

سيف: لا تنسين انتي بعد وعدتيني ..
شيما: وعدتك لاني ظنيت انك صادق معاي ..

سيف: حتى انا توقعتج غير ..اعوذ بالله منج حتى ثيابي ما سلمت منج..باجر شو البس في الدوام..

شيما: احســــــن سير اشحت لك ثياب..
سيف:"يغايضها" هي بشحت بس لباجر ..بس عندي بطاقه بسحب منها و بفصل لي ثياب من ارقى المحلات..

شيما"معصبه" يا الحرامــــــي..

اجدمت منه عشان تضربه و تحاول تاخذ منه البطاقه..بس قوة سيف اكيـــــــد بتكون اقوى و أقوى..

مسك ايدها.. ولف ذراعها تمت شيما اتصرخ من الويع..
سيف حط ايده ع حلجهـا ...حست شيما انها بتختنق..

فسكتت ..
سيف: باجر بسير الدوام.. اباج ترعين يدتج . و تعاملينها احسن معامله تسمعين..؟؟

شيما ساكته اتحاول اتبطل ايد سيف من حلجهـا بس ما قدرت..

سيف: ما بهد ايدي الا اذا وافقتي ع كلامي..

شيما اتهزز راسهـا اتبين له انها موافقه..شل سيف ايده من حلجهـا يلست شيما تتنفس بصعوبه..

يوم حست انها ما تقدر ع سيف..يلست اتصيح بصوت عالي..

شيما"تصيح" لا تسوي فيني جي ..؟

حس سيف ان قلبه تقطع ع شيما..يوم جافها اتصيح شرات اليهال.. فجدم منها و لف ذراعه حوليها ..

سيف"يراضيها":- انــــــــا اســـــف حبيبي ..

يتبـع >>>

[لامارا]

الجزء الرابع..



وفي الدوام..
سيف: تصدق حمود ع بالي من السهل اسيطر ع شيما بس اتصدق صعب..

حمود: يالله عاد بتقص عليك حرمه..

سيف: شو اتقص عليه حرمه..بس اتصدق لو انها عنيده بس فيها تصرفات يهال.. "ويبتسم" يتذكر يوم يالسه اتشقق ثيابه..

و تذكر يوم اتصيح بصوت عالي شرات اليهال بعد ما تعبت من الضرابه....

حمود: الحين شو بتسوي..

سيف: ماشي..كل الي اباه ..احسسها ان الدنيـا مب بس بيزات..

حمود: صعب ها تعودت عليه من الصغر..

سيف: اكيد الحين كرهتني ..
حمود: هي اتحب بيزاتك ولا انت ما اعتقد فكرت فيك..

سيف"يتنهد" صدقك و اللــــــــه..

**

العيوز: شيمـا شيمـا.

شيما"طالعه من حجرتها" خيـــــــر..

العيوز: امايه ناوليني كلاس ماي.

شيما"اتشر ع المطبخ" هنـــــاك المطبخ.. وشي كل شي فيه..

العيوز: يمه انا تعبانه و يوعــــــانه ابا اكـل شي..؟

شيما: انتي الي حرضتي سيف يتزوجني عشان تنتقمين من امايه..

العيوز: خافي ربج يمه ..انا بروحي تفاجأت يوم قال انه يبا يخطبج..

شيما"معصبه" ليش قلتي له كل شي عنـا انتي الي زرعتي الفكره فـي باله.

العيوز: الله يسامحج يمه..

سارت شيما المطبخ..فتحت الثلاجه و طلعت الجبن.. سوت لها سندويج جبن.. و بيض. و كوب حليب..

طلعت من المطبخ و يلست تاكـل و اطالع التلفزيون..

فكرت شيما تتصل باهلها بس شو بتقولهم ..اتخبرهم عن سالفة يدتها..اكيد لا لان الكل بشمت فيها و خاصة اختها مها..

فكرت اتمشي السالفه لي ما تاخذ بيزاتها .. و بتم اتعاند سيف لي ما ابروحه يمل منها.. و يطفر..

العيوز: يمه انا ما تريقت..

شيما: اوووووه انتي ما تندلين المطبخ..
سندت شيما راسها وراا ..يوم طلعت اغنيه عيضه..غمضت عيونها..

يلست تذكر ايام فيينـــــا كيف كانت مستانسه و مرتاحه مع سيف..ما كانت اتعرف بنواياه..

تمت اطالع يدتها.. كل منها بس ما اروم اقولها شي..سيف يحبها اكثر عنها..حست بالغيره..لازم بتغار مب ريلها..

بس تذكرت ان سيف تزوجها عشان يدتها مب عشان عيونها و لانه يحبها مثل ما كان يقول..

بعد ما خلصت أكــــل شلت التلفون .. و سارت ترمس داخل حجرتها عشان يدتها ما تسمعها.. و هي تتكلم..

اتصلت بيتهم..ردت عليها امها..

ام سالم: هـلا يمه اشحالج..؟
شيما: الحمدلله ابخير..شحالكم انتوا..؟

ام سالم: الحمدلله ابخير ..وينكم ما شا الله..

شيما: البارحه وصلنا بو ظبي..
ام سالم: عيل ما ييتينـا ...

شيما: اتعرفين سيف دش دوام ع طول..
ام سالم: مرتاحه معاه..
شيما: شو اقولج يمه كل الي ابـاه ايبه لي..كل شي كل شي..حتى امس حط لي رصيد 15 الف..

ام سالم"مستانسه" اللـــــــــه يهنيكم يمه..عاد زورينـا لا تقطعين.

شيما: ان شا الله..

بمجرد ما شيما صكت التلفون انفتح باب حجرتها.. اتروعت شيما..

شيما: سيـف..؟
سيف"محرج" :- انتي من شــــــــو لحم و دم ولا شـو؟؟

شيما"واقفه" شو صايـــــــر..؟

سيف: جم الساعه الحين.
شيما"اطالع ساعتها" وحده الا ربع..

سيف: و انتي متى ناشه من الرقاد..
شيما: الساعه عشر شو هالاسئلـه..

سيف"يجدم منها".. انا كنت حاس انج ما بتسوين اعتبار ليدتج المسكينه..عنبوه ما اجوفينها يوعـانه ..حرمه عوده ما تتحمل اليوع..

شيما: محد قالك اتيبهـا عندك..دام انك مهتم فيها حط لها شغاله..

سيف: انتي الي بتشتغلين تحت اريولهـا..

شيما: انت شو تتحـرا عمرك مصلح اجتماعي..
سيف: انتي الظاهر ما ينفع معاج هـالاسلـوب..

شيما: " ايدها ع خصرها" شو بتسوي يعني..

فكر سيف ايرها من شعرهـا بس قال خساره..اخرب شعرهـا تراه وايد عذاب..فاجدم منها.. ويرها من ذراعها..

شيما: شو بعد بتخليني اعتذر منها غصب ولا اطبخ لها غصب..

بس سيف ما كان يسمعها..فتح باب الحمام الموجود في غرفتهم..

شيما"شهقت" شو تبـــــــا اتسوي الحين..؟!

سيف: شو حلال عليج و حرام عليهـا..

قبل لا ترمس شيما..دخل سيف صبعه داخلل حلج شيما.. و يلست شيما اترجع كل الي كلته..الصبح..

حست شيما انها فضت كل الي فـ بطنها..

سيف كان يعرف اذا طالع ويهها اكيد بشفق عليها و بسكت عنها عشان جي طلع ..من الحمام..

طلعت شيما من الحمام و اتحس بدوار خفيف.. كان يقولها انتي ما اتحسين ..الحين هو ما يجوف عمره يتصرف معها شرات الحيوان بكل قسوه..كل هـا عشان يدتها..

سارت صوب باب الحجرة تقفل عليها الباب ..بس اتفاجات ان مفتاح الحجرة..مب موجود يعني سيف خذه معاه..

يلست ع طرف الشبريه.. تتنفس بصعوبه..حاسه ان جسمها كله ميهود..

يلست تمسح ايدها ع حلجها..بلحظه ما دش عليها سيف..

يلست اطالعه بنظرات..ما بين العتب و اللوم و الاتهام..و الخوف..

سيف"بصوت يهدد" بطلع كل الي فـ بطنج اذا اشتكت يدتج منج ..اتسمعين..

شيما"شويه و بتصيح" انت مجـــــرم..

سيف: و انتي شو اتسمين عمرج..يوم تتعاملين مع يدتج جـي..؟

سكتت شيمـا ما لقت جواب..لسؤاله لانها ..عمرها ما سالت هـا السؤال..

شيما"بصوت خفيف جنها اترمس عمرها"
_انا اكرهــــك..

سيف"يبتسم" ما اظن قد كرهي لج..؟

رن موبايله طالع الرقم..ظنت شيما يبوه فـ الدوام..

سيف"امطنش الموبايل":- انا برجع العصر..اباج اتغـدين يدتج..تسمعين..

شيما: ما اعرف اطبخ..

سيف: هب مشكله خليها تعطيج الطريقه..و انتي اطبخي..و الله اذا اشتكت لج من شي ..بجوفين شي اخس عن الي جفتيه من ساعه..

كانت شيما بتقوله.. انت جبـان بس طلع .. وقفت عند باب حجرتها .. جافته يبوس يدتها .. ويطلع من الشقه..

طلعت شيما من حجرتها.. ووقفت جريب من يدتها..
شيما: انتي خذتيه مني يحبج اكثر عني..

العيوز: الله يصلحـكم ..و الله هالانسان ولد عرب و نـاس..يا يمه..شلني من الشارع .. و ستر علي..

شيما:"منحرجه":- انزين بـس بـس..

فكرت لو ما سوت غدا ..شو بسوي فيها سيف اكثر عن الي سواااه..

شيما:- كلـتي شي..؟

العيوز: سيف عطانـــــي سندويجه و عصير..

شيما"تحرك براطمها ":- انزين شـو تبين ع الغـداا.؟

العيوز: ما اشتهي شي يمه..
شيما: ما تشتهين شي و يوم بيي سـيف..اتشكي لي منه..

سكتت العيوز ...قامت شيما من مكانها..
شيما:- انا ما عندي سالفه اشاورج..

وسارت المطبخ.. فتحت الثلاجه و طلعت الخضرا.. و دورت مكان العيش.. و غسلته ...

بس هاي اول مره ادش المطبخ و اتسوي شي..الحين كيف تطبخه و جم ملح ما اتعرف شي..

فكرت انها تسحب العيوز ..و ادخلها المطبخ معاها.

شيما: باخذج المطبخ عشان اتقولين لي كيف اسوي غـدا ترا سيف يبا ياكـل من ايدي..؟

العيوز"مستانسه": يالله يمه..

يلست شيما تطبخ و بنفس الوقت تسمع كلام يدتها كيف اتسوي.. في البدايه كانت تتحرطم و مب عايبنها الوضع.. كانت اتحس ان يدتها تتأمر عليها..

بس طريقه يدتها ..و هي تعطيها التعليمات..كانت اتبين عكس كل شي..

كانت اتيبها باسلوب يضحك..و مرات شيما تنسى السالفه .. و تضحك ع تعليقات يدتها..

و احيانا اتصارخ يوم يطشر الزيت عليها.. تيلس اتصارخ.. و بعدين تضحك..بصوت عالي هي و يدتها..

بعد ما خلصت الغـدا..

العيوز: هـا يمه ..بنجوف شو بيقول سيف ع طباخج اليوم.

شيما: اكيد بيعيبه من صنع ايدي..

العيوز: اكيد انتي شيومه دلوعه ابوهـا..

شيما: انزين يالله ..تعالي انروح الصاله .. طالعي تلفزيون و انا بسير اتغسل و ابدل ثيابي..

**
>>>>

بعد الغـدا ..
سيف: تسلم ايدج حبيبي...

شيما"مستانسه" و ايدك حبي..

العيوز: جفت بنتي اول مره تطبخ و جي ..عيل بعدين يوم بتعرف شو بتاكل ايدك بعد..

شيما"معترضه" :- لا عيوني انا ابا شغاله..ما اروم انظف البيت و اشتغل لاني ما اعرف هـا السوالف..؟

العيوز: يا يمه لازم كل بنيه اتعرف ..هالسوالف.
شيما"مضايجه" انتـــــــي لا تدخليـن ..ما يخصج..

سيف"يعاتب شيما" شيـماا..

شيما"واقفه": شو الواحد ما يروم ياخذ راحته في بيته..شو ها العيشه الممله..

و سارت حجرتها.. اتفكر ليش سيف وايد متعلق جي بيدتها.. ما يرضى عليها بأي شي..

و يعيبه كل شي اتقوله..لا يكون مسويه له سحر..

شويه ودش عليها سيف..

سيف: شـو هالحركات..
شيما: يا ابن اناس انا ما تعودت ع هذي الحياة..فـابليز عيشني شرات اهلي ما كانوا معيشيني و احسن..

سيف: يعنـي شو المطلوب..؟

شيما: ابا خدامتين .. و ابا اكون ابروحي فـ البيت ..يدتي خذها بيت ابوي..؟

سيـف: الظاهر بتعب معاج لي ما تتعلمين ..؟
شيما"محرجه" انت شو ماخذني عشان اتعلمني كيف اعيش..؟

سيف:- و انتي ماخذتني عشان بيزاتي صح......؟

شيما:"مرتبكه" انا ما تهمني بيزااتك..؟

سيف: خـلاص عيل شو مصبرنج ..مب عايبتنج حياتي ردي بيت اهلج..

شيما"مب مصدقه" انت مستحيل اتكون سيف الي عرفته من اسبوعين..وايد تغيرت..

سيف"مب مهتم لكلامها" روحي يلسي عند يدتج ابا ارقد تعبان ..

شيمـا:- ما ابــــــــــا

سيف"يصرخ عليها" روحــــــــي مب فايج لضرابتج الحين..

شيما"وهي طالعه" انا اكــــــــــرهك..

سارت الصاله .. وكانت شويه و بتصيح..جافت يدتها يالسه..اطالع تلفزيون..

شيما: اطلعي من حياتنا سيف كان وايد زين معاي قبل لا اجوفج هني..

العيوز: يمه وين ارووح حرام عليج انا يدتج ليش اتسوين فيني جي..

شيما: روحي بيت ابوي..سيف يحبج اكثر عني..
العيوز: امج ما تبانـي وين اسير..و بعدين الله يهداج..اناا شرات يدته و انتي حرمته..

شيما"تصرخ عليها" انـــــــا ما احس انتي حرمته بسببج..

سكتت العيوز..عرفت شيما ان يدتها خافت منها..لا اتمد ايدها عليها شرات البارحه..

شيما:باخذج المطبخ عشان تنظفين المواعين انا تعبانه..

و قبل لا اترد يدتها..خذتها شيمـا المطبخ.. و كانت يدتها ابصعوبه..اتغسل المواعين ..

كانت شيما يالسه ع الطاوله تاكل تفاح.. و اتراقب يدتها..حست ان يدتها تعبانه..

شيما: يدوووه قولي لسيف اييب لج خدامه..عشان اتساعدج..

وقفت شيما..متفاجئه من صوت سيف..الي كان واقف عند باب المطبخ..

سيف: انا يايبنج انتي عشان تخدمينها مب هي تخدمج..
سار صوب يدتها.. وير عنها الصحن و فرها بالمغسله.. و تم يطالع شيما بنظرات .

.ما عرفت شيما شو كان يقصد فيها.. كل الي فهمته ان محرج وايد..

شويه ورجع المطبخ..عرفت ان خذ يدتها حجرتها..
شيما"بصوت خفيف" هـي ابروحها قالت بتغسل المواعين لاني انا طبخت..

سيف:بسج جذب عيب عليج..

شيما: انا ابوي و امايه عمرهم ما خلوني اشتغل في البيت..

سيف "يصرخ عليها" :_انا مب ابوج ولا امج افهمـــــي..

حطت شيما ايدهـا ع اذونها يوم حست ان سيف وايد صوته عالي

سيف: سوي شاي.. و غسلي المواعين و نظفي بيتج يا محترمه..

شيما"معانده ":- ما اعرف..
سيف: بخليج اتعرفين بطريقتي..تبين..

شيما كانت اتعرف شو بيسوي فوق ها كانت معانده معاه..

شيما"خايفه": ييب لي شغاله..ولا بسير بيت اهلي.

حرج عليها سيف.. يلسها ع الكرسي..

سيف: مليون مره قلتلج انا يبتج هنـي عشان يدتج..مب عشان شي ثاني..انتي ع بالج بتروحين حفلات و اسواق ودنيـا ..بس انا بحرمج من هـا كله..

شيما"شويه بتصيح"مـا تقدر..

سيف"يضربها ع كتفهها" لا اتقولين ما اقــــــدر تراني اعرف كيف اخليج عاقله شرات باجي الحريم..

حطت شيما ايدها مكان ما ضربها سيف..
شيما"تصيح" لا اتمد ايدك عـــــــلي..

مسكها سيف من شعرها و يلس يهزز راسها..

سيف: الحين الساعه 3 و نـص.. الساعه خمس ابا كل البيت يكون نظيف.. و قبل لا تسوين أي شي ..

سوي قهوه و شاي حق يدتج..خليني انش من الرقاد و اجوفج مب مسويه شي..شيما كانت اتصيح ابصوت عالي..

و بمجرد ما هدها سيف و كان بيطلع برع.. المطبخ.. شلت الصحن الي كان جريب منها .. و فرتها وياه ع كتفه و انكسر الصحن

كانت شيما بتمسك الصحن الثاني و بتفره ..بس سبقها سيف.. و خذ عنها الصحن و فره بالمغسله..

ومسك شيما و تم يضربها بايدهـا شرات اليهال..
سيف: هذي اخر مره اتمدين ايدج علي تفهمين ..

شيما تصيح بصوت عالي و اتحاول اتيره من شعره.. حس سيف ان هاي ما ينفع معها الكلام..الظاهر ايدها اطول عن لسانها..

عرف ان يعاملها بنفس الطريقه الي تعامله فيه..

فطيحها الارض و يلس يرفسها ..و هي اتصيح.. بصوت عالي و تزقر يدتها .. عشان تنقذها من سيف..

يوم قامت شيما تترجاه انه يهدهـا ..وقف سيف..
ونزل ع الارض يرمسهـــــا..
سيف"يتنفس بصعوبه" و الله ما كنت بوقف لو ما ترجيتيني.. بعد ساعه و نص ابا ج اتسوين كل الي قلته لج..

و طلع من المطبخ من غير ما يلتف صوب شيما..


***



يلست شيما اتصيح و تدعي عليه و على يدتها..فكرت لو مب البطاقه عنده جان من زمان ..شردت من ها السجن..

قامت ادور ع الدله عشان اتسوي شاي و قهوه..فكرت فـ البدايه اتحط سم.. في الشاي..بس اتراجعت عن الفكره..

كل السبب منها..كانت اتلوم يدتها في كل شي.. عرفت اتسوي الشاي بس القهوه.. ما كانت اتعرف كيف تضبطها..


سيف يحاول يرقد بس مب رايم ..يجلب يمين و شمال ..كان متردد يروح يراضي شيما..لانه ما هانت عليه ..وايد ضربهـا ..بس هي عنيده و ما قصرت فيه..

حط ايده ع كتفه..فحس بالم خفيف مكان ما يااه الصحن..

ابتسم..يوم تذكر الموقف..فكر لو راح يراضيهـا بيكون عند شيمـا عادي..

انها تنضرب و بعدين اتعرف انه بيرضونها..فقرر اخر شي انه يحكرها شويه..

بتحمل شويه عشان يدتها..لان ما يهون عليه زعل شيما..اتخيل اكيـــــد الحين شيمـا ..

يالسه اتنظف البيت..اظن ايدها بتتورم مب متعوده..تتحرا عمرهـا بنت شيخ..بنات اخر زمن..




يتبع >>>>

[لامارا]

الجزء الخامس..

شلت شيما صينيه الشاي و القهوه..كانت فـ داخلها اتحس بنـار تحرق صدرهـا..

بس اتنهدت شو اتسوي..حكم القوي ع الضعيف..عمرها ما اعتبرت نفسها ضعيفه..الا الحين..

كلها بسببها لانها عطت البطاقه حق سيف..بس اتكون ابيدها.. و كل شي ينتهي بينها و بين سيف..

اهم شي انها ربحت اللالااف من البيزات..واكيد سيف بيندم يوم بتحكره..و بيتم يتوسل لها عشان اترد له..

بس هي بدور واحد احسن عن سيف..قالت في خاطرها.."صعب الاقي شراتك سيفاني.."

دقت باب الحجره و دشت جافت يدتها..راقده..قالت في خاطرها "يعني هي ما تسمعني من ساعه يوم ازقرهـا سيف شويه و بجتلها كل ها عشانها بس.."

حطت الصينيه ع الطاوله..

شيما":-يدوووووه..قومي اشربي الشاي..بعدين كملي رقادج قومي..

شيما"اتهززها تتمصخر" قومي عشان سيف يرضى عني..قومي..

طالعت شيما يدتها جافتها ما تتحرك موليه..ردت لورا خايفه..
شيما:_يدوووه

اتيمعت الدموع فـ عيونها..من غير ما اتحس..اجدمت منها مره ثانيه..وحطت ايدها ع يبهتها حست ان يبهت يدتها بارده شرات الثلج...

يلست اتحرك صبعها صوب خشمها جافت انها ما تتنفس..

حاولت شيما اتقوم من مكانها عشان تزقر سيف..بس ريولها ما رامت اتشلها..فيلست اتصرخ..

شيما: سيـــــــف سيف..

شلت عمرها وركضت ..فتحت باب الحجره.. انصدمت بسيف الي كان ياي من حجرتها..

سيف: شو بلاج..؟؟

شيما اتصيح مب رايمه ترمس..

سيف :شـووووووو...؟

شيما"بصوت يرتجف": يدتي ما تتحرك..مب راضيه اتنش من الرقاد..

اتحرك سيف ابسرعه ساير حجرة العيوز..لحقته شيما.. و كانت خايفه فمسكت ذراع سيف من غير ما اتحس بعمرهـا

سيف:يطالع شيما":- شو سويتـي فيهـا..

شيما: اتهزز راسها مب عارفه شو قصده..

سيف مسك شيما من ذراعهـا ":_ يا ويلج ان طلع فيها شي بجتلج اتعرفين شو يعني بجتلج..

شيما كانت اتصيح ابصوت عالي خايفه ..من كل شي..حاول سيف يشل العيوز بس مب رايم..

سيف"يصارخ ":-_روحـي يبيـــــي موبايلي ابسرعه..

ركضت شيما..ادور ع موبايل سيف..شويه ورجعت الغرفه..

عرفت ان سيف اتصل لربيعه عشان اييه الشقه..دقايق ووصل ربيع سيف الشقه..
شيما: انا وين اروح انا خايفه..

سيف:روحي البسي عبايتج و شيلتج و تعالي معاي ابسرعه..

مر كل شي ابسرعه..ما كانت شيما اتعرف ابشو اتحس..ولا شو اتفكر..شو صار ليدتهااكانت ابخير..

طالعت سيف..جافته متكي ع اليدار و منزل راسه..كانت تتمنى اتعرف بشو يفكر.. ما كانت متفاجئه..بحزن سيف ع يدتها..بس ان شا الله ما فيها شي..

وايد رددت كلمة ان شا الله تموتين و نفتك منج..بس الحين حست شو معنات كلامهـا ..حست ابرجفه..يوم طلع الدكتور من الغرفه..

تمت واقفه مكانها بعيد..ما تبا تسمع شو يقول الدكتور..
يلست اتراقب الموقف..

جافت سيف يمشي ابسرعه صوب الدكتور..يساله عن حالة يدتها..

عرفت الـرد..يوم سيف حط ايده ع راسه..و ربيعه يخفف عنها..

مر ع بالها كلام سيف ..بجتلج لو صار فيها شي..كانت هاي الكلمات ادور في راسها..ردت لورا يوم جافت سيف يجرب منها..

حست ان الدنيـا صارت سوده في عيونها..و سيف مجرد خيال او ظل يمشي صوبهـا..

**

حست شيما حد يضربها ع ويهها..و كانت تسمع صوت من بعيد...

عايشه: شيمـا قومـي شيمــــــاا..

شيما اطالع منو هـاي ادقق في ملامح ويهاا
شيما: منو انتي...

عايشه: بسم الله عليج قومي..ها شربي ماي..

يلست عايشه اتشربها ماي و اتغسل ويهها..شويه وضح لشيما ملامح ويه الحرمه الي كانت معاها..

شيما: وين سيف..
عايشه: الحيين بييج سيف..

شيما "اتصيح":- بجتلنـي ..انا ما سويت شي ليدتي..و الله ..

عايشه: خـلاص الغاليه سيف طرشني اتم معاج..خايف عليج وايد..

شيما اطالعها جافت الصدق بعيون الحرمه الي يالسه اترمسها..
يلست شيما..كانت اتحس بصداع ..

شيما: راسي يعـورنـي...؟

عايشه: الحين بييب لج ادول..لحظه شويه..

يلست شيما اطالع الحجره..مر ع بالها الساعات الي مرت من قبل..يدتها..وينها الحين..يلست اتصيح..ما بجوفها مره ثانيه..

كانت اتلومها انها السبب في كل شي ..بس هي الي جمعتها ابسيـف..سيف وينه بعد..

انفتح باب الحجره دشت عايشه ومعاها حبوب..شربت شيما الحبه و شربت الماي..

عايشه: انتي في شقه ربيع ريلج محمد و أنـا حرمته عايشه..ادري الوقت مب مناسب بس عشان اتعرفين وين انتي..؟

شيما: وين سيف..؟

عايشه: سيف و محمد في المستشفى يتريون اخوج سالم عشان يستلمون الجثه و بعدها بنزلون عيمان..

شيما"تصيح": و انــــــــا..وين بروح؟؟

عايشه: اختج مها وريلها يايين ياخذونج..

شيما: و سيف ليش ما ارووح معاه..

عايشه: ما ادري..

شيما"تمسك ايد عايشه" انـا ابا يدتي ابا اعتذر منها..!!

و يلست اتصيح..بصوت عالي.. اوول مره بحياتها اتحس شيما بالذنب..كان في قلبها كلام تبا اتقوله ليدتها بس هي الحيـن وين بعالم ثاني..

صج الانسان ما يحس بقيمة الغير الا اذا فقده..
بعد ساعات وصلت مها اختها..ونزلوا عيمان..

مر يومين ع العـزا اكيد الحين الكل بيسأل شو اتسوي يدتها عندها في بوظبي..كانت شيما حابسه عمرها في حجرتها..

وامها تقنعها انها تيلس في الصاله مع الحريم..بس ما كانت تبـاا..و كانت تسكت عن أي سؤال كيف يدتها وصلت هنااك بوظبي و في شقتها..

شيما كانت تبا سيف يكون موجود معاها يخفف من عذابها و حزنها..اتصلت به حوالي خمس مرات بس ماكان يرد عليها..

دشت عليها ام سيف..حضنتها شيما..يمكن هي اتخبرها شي عن سيفاني..

ام سيف: عظم الله اجرج يمه.."وباستها فوق راسها"
شيما:- الدوام لله..

يلست حذالها ام سيف..كانت اتسولف معاها اتحاول اتواسيهـا..حست شيما ابراحه لهاي الانسانـه ..

ام سيف: واعليه سيف وايد متأثر لا غدا ولا عشـا..

شيما: الله يعينا انا اعرف اشكثر سيف يحب يدتي..

ام سيف:حليله ولدي قلبه طيب بس لو جفتي حاله..ما اتقولين ها سيف..يمه انا ادري انتي محتايه حد يخفف عنج..

شيما"تتنهد" يدتي سارت عني من غير ما اتقول لي..
ام سيف: يمه الموت ما يعرف يستأذن ياخذ الامانه و خلاص..المهم ما اوصيج انج اتخففين عن ريلج..حتى انا طلبت منه انه يخفف عنج..هو ما اتصل فيج..

شيما"مرتبكه" هـا ..هيه اتصل..

ام سيف: الله يرزقكم الخير..عيل بخليج الحين..ووسعي صدرج و خلي بايمانج بالله قوي..

شيما: ان شا الله سلمي على عمي..

ام سيف"تبوسها فوق راسها" :_يوصــــــــل..

يلست شيما اتصيح..سيف ما يبا يكلمها ..هي مالها ذنب.. ولا لها علاقه بالي صار في يتدها..ابروحها مضايجه و زعلانه بس شتسوي..

اتصلت بسيف بس بعد ما ايرد عليها..فكرت اطرش له مسج.."سيف رد عليه اباك ضروري.."

بس اتفاجات ان الرساله قيد التسليم..عرفت انه غلق موبايله..

رقدت و غطت عمرها و يلست اتصيح لـ ما رقدت..
وفي آخر يوم من العـزا..وقت المغرب..رن موبايل شيما..استانست يوم جافت رقم سيف..

شيما:"اترد ابسرعه":_ سيــــــف..
سيف"ابرود": شحالج..؟

شيما: انت وينك ليش ما اترد ع مكالماتي.."بصوت ناعم" انا محتاجه لك وايد..

تم سيف ساكت..حسبت شيما انه صكر التلفون..
شيما: الـــــــوو سيف..؟

سيف: تعالي لي برع ابا ارمسج..
شيما: وين..
سيف: انا واقف عدال بيتكم تعالي لي..

شيما:"مستغربه"ليش ما تدخل البيت انت مب غريب..
سيف: مالي خلق يالله اتريـاج..

شيما: انزين..

لبست عبايتها و شيلتها..بها اللحظه دشت مها حجرتها..
مها: وين سايره..؟؟
شيما: سيف برع يباني...

مها:- ليش ما ايدش..
شيما: ما ادري بسير اجوفه شو يبـا..
مها:يمكن يباج ترجعين بيت اهله..

شيما: ما ادري و الله ..شي وايد ناس ولا..
مها: لا طلعـوا جم وحده اظني سلمتي عليهن..

شيما: زين بعـد..

و طلعت
فتح باب الحوي جافت سيف موقف سيارته ..بعيد عن بيتهم..سارت شيما..فتحت باب السياره..و يلست..

انصدمت يوم جافت ملامح سيف..باين عليه مول ما رقد من اول امس..يلست تتأمله..كانت اتحس مر دهر ع جوفتها لسيف..

سيف: كنتي راقده..؟
شيما: لا بس تعبانه وايد تعبـانه..كنت اباك اتكون جريب مني..بس الظاهر انت محتاج حد يواسيك..

سيف"مغير السالفه" قلتي اهلج كيف وصلت يدتج الله يرحمها عندي..

شيما: لا ..
حست شيما بالاحباط لان سيف وايد بارد معاها ما توقعت جي يستقبلها..

شيما"تترجاه": سيف انت مضايج مني..؟

سيف:- ليش اتضايج ..خلاص راحت الي كانت اتخليني اتضايج منج..

شيما: لا ترمس جي.."كانت اتحاول تمسك ايده"

بس سيف يير ايده بعيد عنها..
شيما"شويه بتصيح" لا تعاملني جي انا مالي ذنب بالي صار..

سيف"مطنش رمستها" فتح سدة سيارته و طلع بطاقة البنك..

سيف:خذي بطاقتج خلاص مالهاا حايه..

شيما اطالع بطاقتها قالت في خاطرهـا "اخيرا ردت لي البطاقه" مدت ايدها تاخذها بس بعدين شي فـ داخلها خلاها اتغير رايها..

سيف: خذيهــــــا..
شيما: خلها عندك انا بعد ما احتاجها الحين...
سيف"مستغربه" ما تبين بطاقتج..؟

شيما"مبتسمه" لا خلها عندك..

سيف ايير ايد شيما و يحط البطاقه فيها..
سيف: خلاص ما ابيها و انتي احسن لج لو اتمين فـ بيت اهلج..ايام و بييب لج اغراض..

شيما"مصدومه" ليش ليش كل ها انا برجع معاك بوظبي.
سيف: خـــــلاص انتهى كل شي بالنسبه قلتلج الي مخلني متحملنج راحت خلاص..

شيما"تنزل دموعها" انا ما ابا شي فـ الدنيا انت بس اتهمني..

سيف: شيمـــــــاا مافيني اتم وايد ..انزلي من السياره يالله..

شيما: "تترجاه"لا تسوي فيني جي..

سيف: انتي اصلا ما تبيني ..بس اتقولين هالرمسه عشان توج متأثره بوفاه يدتج "يتمصخر" هـا اذا صج كنتي متأثره.. و بطاقتج ع بالج لو تمت معاي بضيف لج رصيد ..صح..

شيما"تمسح دموعها" انت وايد تتخيل لك اشيا..انا ما ابا انفصل عنك..

سيف"بصوت خفيف" بس انا ابـــــا انت بالنسبه لي جرح في حياتي ..و انا ما ابا هالجرح يتم مفتوح..

شيما"اتذكره" انت وعدتني يوم كنا في فيـينـا

سيف"محرج" اوووووه انت بس ما تتعبين من هالرمسه بيزات و فيينا و سفر خلاص سوي الي تبينه ترا الي في البطاقه من حقج شو تبين اكثر..

بعد ما سمعت شيما رمست سيف ما كان عندها كلام..الظاهر انه متاثر بوفاة يدتها للحين اكيد بغير رايه..
فتحت باب السياره..وطالعته..بنظرات حزن ..نزل سيف راسه..

..>>>

[لامارا]

الجزء السـادس..

ما عرفت شيما كيف وصلت حجرتها..كانت تذكر كل كلمه يقولها سيف..نزلت راسها اطالع الارض و يلست اتصيح..

عرفت انه انفتح لها باب يديد في حياتها..باب عمرها ما كانت تتوقع تدشه..وصعب عليها تتحمله..

بلحظه حست كل شي انتهى من حياتها..راحت يدتها ..و معها راح سيف و اختفت من حياتها اجمل لحظات مرت عليها..من غير ما اتكون فيها بيزات ولا حفلات ولا فساتين..

دشت امها حجرتها..اتروعت يوم جافت شيما اتصيح ابصوت عالي..

ام سالم: شو بلاج يمه.."تحضن بنتها"

شيما مب رايمه ترمس..بس حست براحه و هي فـ حضن امها..يوم جافت ان بنتها مب راضيه ترمس زقرت ..مها..

دشت مها الحجره..
ام سالم: تعالي جوفي اختج مدري شو بلاها..
مها: شفيج شيماا..

حست شيما انها بموقف سخيف يلست تمسح دموعها..
شيما:_ماشي ..ما بلاني شي..

ام سالم: شو ما فيج شي و انتي مب راضيه تسكتين..
مها: سيف قالج شي..

شيما: لا ما قال شي بس تذكرت يدتي و الي سويناه فيها..

ام سالم"اتعاتبها" الله يرحمها ..هي ابروحها ما ردت البيت..
مها:- خلاص يمه لازم نفتح باب يديد..بعد كم يوم عبدالله بيوصل من السفر..

ام سالم: الله يرده بالسلامه..
مها: يالله انا بسير ريلي يترياني برع..

ام سالم: تمي الليله هني اختج بعدها يالسه..
مها: امايه بدر ما يصبر عني محتشر عليه لاني راقده يومين هني..

سلمت على امها و شيما و طلعت..
ام سالم"واقفه" بسير اسوي لج شي تاكلينه..

اتمددت شيما ع الشبريه..فكررت كانت تطنز لاختها مها و حياتها مع ريلها ..لكن الحين تتمنى اتكون شراتها..

اتمنت صج انها اتعيش بس لو يوم من الايام الي كانت فـ فيينا مع سيف..

صج مهاا عرفت تختار حياتها ما جذبت يوم قالت اهم شي الراحه..طالعت بطاقتها..اتنهدت الحين هاي البطاقه بترجع لها سيف ولا يدتها..مستحيـــــــــــل..

**

عرفت شيما ان سيف ما ياب طاري لاهله عنه ولا عن شيما..لان ام سيف كل يوم تتصل تتطمن عليها.. و اجوف احوالها و احيانا اتزورها..

شيما محتاره اتخبر اهلها بالسالفه ولا شو..بس اكيد بعرفون مب اليوم باجر..

اتنهدت اتمنت اتعرف الحين سيف شو يسوي.. ومع منو يالس..باجر برجع من الدوام..و هي مخبرتنهم انها باجر بترجع..

الحين شو اتسوي..لازم اتبين لسيف انها اتغيرت..صحيح مب منه فايده لانه يدتها خلاص راحت..بس عشان سيف..

لازم اترد بيتها و بيت ريلها..شرات مهاا اختها..عشان محد يشمت فيها حتى صديقتها ودرتهم بعد ما تزوجت..الحين لو يعرفون السالفه اكيد بضحكون عليها..

و الناس شو بتقول ما كملت شهرين من زواجي.. و الحين يالسه في بيت اهلي..

سيف ليش ما فكر بافكارها .. ليش ما خاف ع كلام الناس على حرمته..

ما تدري كيف صدقت سيف..يوم كان يتغزل فيها و يقولها كلام حلو..

خلاص بتشل لها كم ثوب و بتروح بيت عمها باجر الصبح.. و بتفاجا سيف في بيت اهله..

عاد هناك ما يقدر يقولها شي.. حذال عمها و عمتها..
و في اليوم الثاني..شيما اترتب اغراضها في الشنطه..
ام سالم: انزين تغدي و بعدين روحي..

شيما: امايه سيف بيرجع وقت العصر خليني اكون هناك..و بعدين كافي يلست هني ثلاث ايام..

ام سالم"مستغربه" شيما شو صار لج..
شيما"اطالع امها":_ شـوو..؟

ام سالم: متغيره ..كل شي متغير فيج..شو بلاج..

شيما"اتصكر شنطتها":_ لا تغيرت ولا شياته..بس انا مرتاحه مع ريلي ..حتى جوفي."وطلعت بطاقة البنك" سيفاني حبيبي كل شهر يضيف لي رصيد ..

ام سالم"مستانسه" اللــــــه يوفقج يمه..

شيما"تبتسم":- اميــــــن..وين الدريول..

ام سالم: يترياج برع..
سلمت شيما ع امها... وطلعت..
و في السياره اتصلت لعمتها..
ام سيف:- الـــــوو
شيما: هـلا عموه انا شيما ..شحالج..؟

ام سيف: الحمدلله ..شحالج انتي..؟
شيما: ابخير..عموه انا يايه الحين بيت عمي..ما اباج اتخبرين سيف انزين..

ام سيف: حياج الله يمه البيت بيتج..
شيما:- ما اتقصرين..

بعد ربع ساعه وصلت شيما بيت عمها.. و أول مره اجوفه دخلت البيت..جافته امرتب و عيبهـا..سلمت عليها عمتها.. و يوم سألت عن عمها عرفت انه بالدوام..

دخلتها عمتها حجرة سيف..ما توقعت اتكون جي مرتبه.. وحـلوه..

يلست ع الشبريه..فكرت الحين هني بتكون حياتها ..لي ما يرضى سيف ..بعدين بترجع معاه بوظبي..كانت تتطنز ع مها اختها..

و الحيـــــن صارت مثلها ع الاقل مها يحبهـا ريلها..لكن سيف خدعها..نزلت دموع من عيوها.. يوم تذكرت موقف سيف يقولهاا..خلاص انا ما اباج..

مسحت دموعها يوم انفتح باب الحجره..اضايجت ليش عمتها ما دقت الباب...بس طنشت ..عاد هاي ام سيف ما اتروم اتقلها شي ..صج سيف بذبحهـا..

ام سيف: شو بلاج يالسه..هني ابروحج..
شيما: اطالع الحجره..

ام سيف:- تعالي يمه الصاله..عمج الحين بيي تعالي سولفي معانا ..لي ما ايي سيف..الا هو متى بيي..؟؟

شيما"مب عارفه متى":- قال يمكن يتأخر اليوم..عنده شغل..

ام سيف: زين يمه نترياج ..
شيما:خلاص يايه وراج..

**
سيف و محمد يالسين في المارينـا..كل شويه يرن موبايل محمد..

محمد"يطالع الرقم و يحول التلفون صامت"
اوووووه هاي أذيه..حشرتني قلناها برد عقب شويه..

سيف"يضحك":- يالله روح عن تضربك..

محمد: اتخسي الا هـي والله اسفرها بيت اهلهاا..

سيف"يضحك بصوت عالي" مينون اتسويهاا

محمد: عاد انت افتكيت وريحت عمرك..و انا بسير اجابل الياهل و البيت و المدام اوووف..

سيف:-أي فتكيت يا ريال...ما اعرف انا ظلمتها ولا..
محمد: انت ادرى ..

سيف: كل شي انتهى ابسرعه ما وحى انعيش مع يدتها.."يتنهد"الله يرحمـها..افتقدها ..

محمد: وحرمتك..

سيف:- ما ادري و الله بس هي حياتها غير .. و انا ما اتعيبني البنيه الي اتكون جي..

محمد: ما ااتحبها..

سيف: ابا انساها..
محمد:شو بطلقهـا..؟؟

سيف: مب الحـــــين اصلا ابروحها بتطلب الطلاق..بس خل يمر كم شهر..عشان كلام الناس..

محمد:شفيك اطالع هناك..

سيف: حمود جوف هالبنيه.يالسه اطالع من ساعه..ياخي انا استحيت .. وهي لا..

محمد: وين وين..يمكن عايبنها ظهري..
سيف"يضحك" تستهبل ويـا راسك..

رن موبايل محمد..
محمد: الله يغربل الي اخترع الموبايلات..لعنة الله عليه..
سيف"ميت ضحك"

محمد: اضحك اشعليك..

سيف:خلني اضحك احس صار لي زمان ما ضحكت..
محمد:وين زمان ثلاث تيام..

سيف: "يرفع حواجبه" ويا راسك..الحزن فـ القلب.. و انت يالس تحسب لي..اووووو محمد قوم يالله انروح..

محمد:شو بلاك..ما ابا اسير البيت..

سيف: ابرايك انا بنزل الشارجه.."يطالع ساعته"الوقت متأخر متى بوصل..
محمد: ايلس شويه..
سيف: مب رايم هالبنيه كيف اطالعني يا اخي استحي..

محمد: طـاع منو يستحي..

محمد يطالع وراه..

محمد:سيفووه..حلاتها..رقمها و عطني رقمها..

سيف بخاطره" مب احلى عن شيما":..ياخي استح ع ويهك..شو خليت للشباب.

محمد: جي منو خبرك اني في الخمسين ولا الاربعين..

سيف:"يضحك" يالله قوم ..ترا عيون البنيه بتنجلع ههههههههههه

محمد: يالله سرينــــــــاا

**

شيما اطالع ساعتها.."وايد تاخر سيف..اخاف ما ينزل ..فيني رقـاد.."
كانت متردده تتصل به ولا..تتريـا ..بعد..شغلت التلفزيون.. و يلست اطالع عرض أزياء..

ابتسمت..حست جنه مرت سنين..يوم كانت متولعه بكل شي .بيزات وحفلات و اسواق مراكز...

ما تدري ان زواجها من سيف ..بس اشهر بغير كل الي فيها..يمكن وفاة يدتها..ساعدها اكثر..سمعت صوت المفتاح يتحرك في قفل الباب ..

ومعاه دق قلبها..وحست ابرجفه..الساعه وحده ..فليل..وين كان فتره ما طلع من الدوام..من الظهر..

وقفت شيما..بمكانها..فتح سيف باب الحجره..كانت شيما بتضحك..على ردت فعله..يوم جافها..يالسه في حجرته..

سيف"امبطل عيونه" انتي شو تسوين هني..؟؟

شيما:- شو انت نسيت اني حرمتك..

سيف: ليش انا شو قلتلج من جم يوم..
شيما"تيلس ع الكنبه"مب ع كيفك..انت ما تباني انا اباك..ها بيت ريلي ..بيلس فيه وقت ما ابا..

سيف"مصكر باب الحجره" تبيـن تاخذين السالفه عنــــــاد يا العنيده..

شيما: انت امسوي روحك بطل و..
سيف: جب لا تكملين..مالي خاطر ارمس بسالفه يدتج..اوكى..

شيما: خلاص روح ارقد..شكلك تعبان ..ارتاح و باجر يصير خير..

سيف: انت شو يالسه تعلميني شو اسوي..؟

شيما"تجرب منه" حبيبي انت ليش ماخذ السالفه جي..

سيف: يبدل ملابسه" انا مب حبيبج انا ما احبج.. و انتي حبج الوحيد البيزات..

شيما"تهمس" سيف..
سيف"من غير ما يطالعها" لا ترمسين جي..مليون مره اقولج الي بينا انتهى..

شيما"شويه بتصيح" انت ما يهمك كلام اهلي و اهلك و الناس..

سيف:- ما يهمني شي..الي كانت اتهمني راحت..و هي سبب وجودج حمدي ربج..

شيما:- تحاول تنرفزني..

سيف: مب مهم..

شيما: انت وايد تغيرت وايد..
سيف: ما تغيرت بس انا كنت امثل عليج..شو ادورين شي اتفرينه فيه بعد..

شيما: انا احبــــــك..

سيف: يتطنز" منو اكثر انا ولا بيزاتي..

شيما"تصرخ عليه" انت ما تفهم..

سيف: روحي ارقدي قبل لا يصير شي ما يعيبج زين..

ودش الحمام يتغسل..
اتنهدت شيما من الضيج..حست انها مخنوقه..وندمت لانها ردت له..قاومت انها ما تصيح..بس ما قدرت..

يلست اتصيح لي ما رقدت..و ما حست بوجود سيف موليه..

يتبع >>

[لامارا]

الجزء السابع..

فتحت شيما عيونها جافت الساعه 11 الصبح..طالعت الغرفه..جافت سيف محد..قامت اتغسلت.. ولبست ثيابها..

طالعت تلفونها جافت اختها مها متصله لها مرتين..
ما عرفت ليش جي أتاخرت في الرقاد..

طلعت برع..جافت محد في البيت..سارت المطبخ..جافت عمتها اتسوي غدا..

ام سيف:صباح الخير يمه..
شيما: هلا عموه صباح النور..وين سيف..؟

ام سيف:- اول مره اجوف حرمه ما تدري وين ريلها سار عنها..

شيما:- كنت راقده ما حسيت فيه..

ام سيف:- سيف طلع من وقت مع ابوه..
شيما: ويـن..؟

ام سيف:- ما ادري..
كانت شيما بتسالها عن دله الحليب..بس يوم جافت اسلوبها جي..غيرت رايها..سارت حجرتها..اتصلت باختها مهااا..

شيما: هلا مهايه بلاج حاشره الدنياا..؟
مها: وينج عيزت من ادق لج..؟

شيما: كنت راقـده..البارحه كنت سهرانه اتريا سيف..
مها: ترا عبدالله باجر بيوصل من السفر..

شيما: زين شو اسوي له..انا ابروحي تعبانه..
مها:- ليش شو بلاج انتي بعد..جي عبدالله شو بسوي لج..

شيما:- انتي الحين ليش داقه شو تبين..؟
مها: انتي عفانا الله ما تتغيرين جي اسلوبج دوم دفش..

شيما: اووووه انا ابروحي مضايجه كافي الي فيني..
مها:- زين خلاص حشرتيني..؟

شيما:- منو حشر الثاني الحينه..؟شو تبغين..؟؟

مها: شو رايج انروح بيت حنان
شيما: شعندج..؟

مها:عازمتنا ع العشـا..

شيما: لا و الله محد عزمني..
مها: تراني اقولج..الحينه ..؟

شيما: امممم مالي نفس..ولا اقولج بسير خليني اغير جـو تراني اشتقت لطلعات قبل..

مها: خلاص بمر عليج بعد صلاة العشى..
شيما: انزين يالله باي..

مها: وين سايره..بعدني ابا اسولف لج..
شيما: بطالع روزليندا وقته الحين يالله باي..
مها: امبونج ما تستحين ع ويهج باي ختيه..
شيما"تضحك" ههههههه فديتج باي..

**
سيف:- يا بويه صدعت ابراسي ..جم محل سرنا الحين و انت مب عايبنك شي..

بو سيف: ما اقتنعت بشيء
سيف: الحين الساعه 12 ونص خلاص صكروا..يالله انروح البيت..

بوسيف: وين 12 ونص ساعتك امخرفه..
سيف:- لحـوووووول لو تم راقد احسن لي..

بوسيف:- شفيك انت تو الناس..
سيف: أي تو الناس الله يهداك..الحينه الوالده بتسوي لك حفله..

بوسيف: بقولها انت الي ماخرني اوكي ولدي..
سيف: جي انا بعد حرمتيه تترياني..

بو سيف: يالله عـاد ها اخر محل نوقف عنده..و خلاص..
فتح بوسيف باب السياره..بس سيف قبل لا ينزل رن موبايله..استغرب سيف من الرقم..ما ايعرفه..

بوسيف: يالله انزل...؟

سيف: روح انت برمس شويه بالتلفون..
بوسيف: ما ايخالف..
رد سيف ع المكالمه سمع صوت ناعم..يقوله..
البنيه: سيـف..؟؟!!
سيف"مستغرب" منووو.معاي.؟
البنيه: وحده من دارك........؟؟

سيف: لا و الله...!
البنيه: شحالك..
سيف: الحمدلله شحالج انتي...؟

البنيه: ابخير..اتصدق صوتك حلو شرات ويهك..
سيف: لاااااا ..وين جايفتني الاخت..

البنيه: لا لا انا مب اختك..
سيف"يضحك"ولا تزعلين مب ختيه..ها ما بتقولين منو انتي..؟

البنيه: وحده كانت اطالعك بالمارينا بس انت طنشتها وحليلها..

سيف"يتذكرها" انتـي من وين لج رقمي..؟و كيف عرفتي اسمي..؟
البنيه"تضحك بدلع":- الي يسال ما يتوه..
سيف: ما فهمت ..؟
البنيه:اسمي نوف..

سيف:- هلا بنوف..ممكن اعرف من وين لج الرقم..؟
نوف: بس عرفت رقم سيارتك وطلعت كل شي عنك..

سيف:افهم من كلامج انج تشتغلين في المرور..؟
نوف:-لاااا مب انا وحده من معارفي..؟

و تم سيف يسولف مع نوف لي ما يااه بو سيف.. وركب السياره..فصكر عنهاا التلفون..

سيف يفكر..شو تبا منه نوف..معقوله اتعلقت بي من اول نظره...لا لا ما اصدق..لو درت شيما شو بتسوي ..وتم يتخيل الموقف و يبتسم..

بوسيف:بسم الله شو بلاك تخبلت يالس تضحك ابروحك..؟
سيف:هـا لا متى ضحكت..

بوسيف:- هــــــا ..انت صاحي..
سيف:"يضحك" ههههههههه الحمدلله..

**
احتارت شيما شو تلبس يوم بتروح العزيمه..عاد هي عروس..و لازم تلبس لبس يديد ..وكاشخ..بتخلي سيف ياخذها السوق وقت العصر..

حست بطنها يقرصها من اليوع..طالعت الساعه جافتها وحده ونص..اترمس عمرها"هييل متى يتغدون.."

شلت موبايلها عشان ادق لسيف..اتجوفه وين..وقبل لا تضغط ع الاتصال دش سيف الحجره..

شيما"تبتسم له" توني كنت بدق لك..؟
سيف"ابرود": ليش..؟

شيما"محبطه" عشان اجوفك وين..وبعدين انا ميته يوع..
سيف: شو طبختي..؟

شيما: عموه طبخت..؟
سيف"محرج": و انتي شو يالسه اتسوين اطالعين تلفزيون بس..ليش ما تعاونيهاا

شيما"ادافع عن عمرها" سرت لها المطبخ بس كانت امخلصه..

سيف:- ليش متى ناشه من الرقاد حبيبي..
شيما ساكته..عارفه ان سيف يحاول يستفزها..سمعته يكمل كلامه..

سيف: ع بالج امايه تشتغل عندج..

شيما: الله يخليك سيف انروح نتغدى و بعدين كمل كلامك تراني ميته يوع..احس بعمري صايمه..

سيف"معاند" ماشي غداا تمي هني..يوم بطبخين ابروحج ولا بتساعدين امايه بعدين تعالي كلي..

شيما:- اقولك يوعانه..
سيف: قلتلج ماشي اكل مب عايبنج روحي بيت اهلج..

وطلع من الحجره..فكرت شيما اطنشه و تطلع تتغدى معاهم بس حست ان هالشي يمس كرامتها..

كانت تعرف ان سيف يتعمد يغثها عشان اتمل و ترجع بيت اهلها..

بس ع قولتهم حلم ابليس في الجنه..يلست ع الكنبه..اطالع التلفزيون اتحاول تنسى اليوع ..

بس ما قدرت..شو صار فيها كانت قويه..و اتواجه كل شي..ما اتعرف يمكن حبها لسيف غير فيها وايد اشيا..اتنهدت..
راحت صوب الشبريه..حاولت ترقد عشان تنسى يوعها..غفلت شويه..فتحت عيونها..جافت سيف راقد طالعت الساعه معقوله ..مرت ساعه ونص

لبست شيلتها وطلعت من الحجره.. وسارت صوب المطبخ..حمدت ربها ان شي باجي عيش في الجدر..

يلست تاكل ابسرعه قبل لاحد يجوفها..كانت بتغص يوم سمعت صوت سيف..

سيف:- عن تاكلين الصحن بس..
حست شيما بالاحراج..و ما عرفت شو اتسوي..وقفت عن الاكل..بس ما قدرت اطالع سيف..

سيف:_ ما توقعتج هالكثر يوعانه..و بعد ما توقعتج بتسوين هالتصرف..ع بالي وحده راقيه اتعرف المذهب بس طلعتي شرات القطاو تسرقين الاكل حتى لو كان فـ الزباله....

حطت شيما الصحن ع الطاوله..كانت بترد عليه..بس سيف تجدم فخافت..وقالت لو تسكت احسن..

سيف"يهمس":- تذكرين يوم خليتج اترجعين كل الاكـل الي فـ بطنج..تبين اكرر هالشي الحينه..

كانت شيما امنزله راسهاا ..سيف رفع ويهها..
سيف: يوم ارمسج اطالعـ........

بس ما كمل كلامه يوم جاف شيما..يالسه اتصيح..من غير صوت..اتمنى سيف لو تنشق الارض و تبلعه...ولا يجوف الانسانه الي حبها جي منذله حتى ولو كان هـو..

كان بيعتذر لها و بيبوس راسها..بس تراجع باخر لحظه.. وطلع من المطبخ..

مسحت شيما دموعها..سارت حجرتها...جافت سيف محد..حمدت ربها..مب عارفه شو مصبرنها...

وقت العصر طلعت تيلس مع عمتها..في الصاله..استغربت شيما ليش عمتها ساكته و ما اترمسهاا..ففكرت انها تبدأ الكلام..

شيما: عيل ما اجوف عمي وينه..؟
ام سيف:- ليش شو تبين فيه..
شيما: ما يلست معاه اليوم..

ام سيف: ع الغدا كان موجود وينج انتي..؟
شيما"مرتبكه" ما كنت مشتهيه..
ام سيف: لا عيل منو الي ماكل من ساعه..لا بعد مخليه الصحون تبين انظفه لج..عيزانه تغسلين صحن

سكتت شيما..كانت اتعرف ان عمتها معاها حق..بس هي كانت بموقف خلاها تنسى سالفة انها تغسل الصحن..

شيما:- اسمحيلي كنت مستعيله..
ام سيف: بنات اخر زمن..

بها اللحظه دش سيـف..تم يطالع شيما..صدت شيما اطالع التلفزيون..هي لازم اتخبر سيف انها بتسير معاه بوظبي..ترا الظاهر هي و عمتها ما يتصافون.

ام سيف:- هـلا يمه..
سيف:شحالج"يبوس راس امه"..

ام سيف: هدنـي شغل البيت..
سيف"يطالع شيما" ليش عندج شيومه بتساعدج..

ام سيف: اتساعدنـي هي الصحن الي ماكله منه عيزانه اتغسله تترياني اغسله لها..قلتلك يمه ترا ها البنيه ما اتناسبك من قبل..بس انت الله يهداك ما تسمع الرمسه..

قامت شيما امحرجه من مكانها..لو سيف مب موجود كانت اتعرف كيف اترد عليها..سارت حجرتها..حست انها ع اعصابها..

دش سيف الحجره..
شيما: عايبنك الكلام الي اتقوله امك..

سيف:"يستهبل"- ليش هي شو قالت..
شيما:- انا بسير معاك بوظبي ..

سيف: و الله شو تبين بعد..
شيما: امك وايد اتحط علي..

سيف:- اكيد سويتي فيها شي..
شيما"ادافع عن عمرها":- و الله ما قلتلها شي..

سيف:- ع بالج ما اعرف كيف اسلوبج..و كيف كنتي اتعاملين يدتج..
شيما:- انا تغيرت..
سيف ضحك بصوت عالي هههههههههههاي هههههااااي
سيف"يتطنز" سبحان الي يغير ولا يتغير حبي..

قامت شيما و فرته برموت التلفزيون..فمسكه..بايده..
سيـف:- اشتقتي للضرب..؟
شيما:- لو شو اتسوي انا ما بطلع من هني..؟
سيف:ليش شو تبين عندج بطاقه البنك..
كانت شيما بتقوله اباك انت..بس ما قدرت خاصه بها الموقف الي مايسمح انها اتقوله..رن موبايل شيما..جافت المتصله..اختها مها..فطنشتها.

سيف:ردي..
شيما: هذي مهـا..تباني اسير معاها العزيمه اليوم..بيت ربيعتيه حنان

سيف:-لا و اللـــه يدتج توها اتكمل اسبوع و انتي تبين اتروحين عزايم..

شيما: كنت اباك تاخذني السوق بشتري لي بدله..لانهم ما جوفوني بعد العـرس..

كان سيف برد ع شيما بس رن موبايله..و كان المتصل نوف..
سيف:- اووف القلب..
شيما: شـوو منو القلب ..؟

سيف"محول التلفون صامت" المهــــم استحي ع ويهج و يلسي فـ البيت..ماشي عزايم ولا اسواق..

شيما: اقولك عازمتني..
سيف:- قلتلج جب ماشي مب عايبنج روحي بيت اهلج..

رن موبايله مره ثانيه..اجدمت شيما عشان اجوف الرقم..بس سيف منعها..
شيما:- انت اتغازل صـــــح عشان جي ما تباني..

سيف"يبتسم" :- اسمحيلي ما اروم ارمسج ..عندي تلفون ضروري..

وطلع برع الحجره..

>>>>>
شيما مستحيـــــــل سيفاني يسويها معقوله..يعرف وحده غيرها..لا لا ما اظن..يمكن عشان يغايضني..

يلست الافكار ادور فـي بالها..رن موبايلهاا..
شيما:هـا مهـايه..؟
مها:- شو بتلبسين في العزيمه..
شيما:-هونت ما بسير سيفاني يباني اطلع معاه..
مها:- خساره.
شيما:- سلمي عليهم..و قوليلهم ان شا الله مره ثانيه..
مها:- اوكى باي ..
شيما:فمان الله.
يلست شيما اتعاتب عمرها..كيف سمحت لنفسها ترضى بالذل الي هي عايشه فيه..كانت مضايجه..ومنفعله..
تتصل لتلفون سيف و اجوفه مشغول..كانت النار تاكل قلبها..خاطرها اتعرف يرمس منو..؟
انفتح باب حجرتها فجأه جافت عمتها واقفه عند باب الحجره..
شيما"محرجه":_ لو سمحتي ممكن ادقين الباب مره ثانيه قبل لا ادشين..
ام سيف:- تبيني استأذن يوم ادش غرف بيتي..
شيما"منفعله" عندج البيت كله لج..الا هاي الغرفه..مب حلوه انج تدشين غرفه غيرج من غير استأذان..
ام سيف:-ماشا الله طلع اللسان الحين..
حاولت شيما تسكت عنها بس لسانها ياكلها ما تقدر تسكت اكثر عن جي..
شيما:- ابا ابدل ملابسي شو بغيتي...؟
ام سيف"محرجه" :-سلامتج..ما بغيت شي..
وصكت باب الحجرة بقوه..

حطت شيما ايدها ع يبهتها و يلست ع الكنبه..شو سوت الحين..سيف اكيد بجتلها..بس عمتها صج ما اتعرف السنع..
بعد ربع ساعه وصلها مسج من سيف.."اذا رجعت البيت و مب معتذره لامايه..يا ويلج.."

شيما"مضايجه":- اوووووووف شو هالحاله يا ربي كل اللوم عليه..
بعد شويه وصلها مسج غيره..من سيف"سوي لي عشا..دسم ما ابا بيض وطماط.."

شيما"محرجه" همه بـــــس بطنه اووف..سوي و سوي و يوم اقوله ودني هني و هناك ما يطيع..
طلعت شيما من حجرتها..جافت عمتها يالسه ترمس بالتلفون..تمت يالسه..لي ما خلصت ..
شيماا"تبوسها فوق راسها":_ سامحيني عموه..كنت معصبه من ولدج..
ام سيف:- الله يعيـنه و الله..
كانت شيما بترد عليها بس مسكت اعصابها..
شيما:- عمتيه سيف يباني اسوي له عشاا ..شو اسوي..؟
ام سيف:- "من غير نفس":- ها مطبخي من سكنت في هالبيت ما احب حد يشاركني فيه.

شيما:- زين ولدج يبا عشى وين اسوي له..
ام سيف:- دبري عمرج.."وطلعت من الصاله"
شيما:- شو ها الله بلاني بهاي بعد..شو سويت لها انا عشان اتعاملني جي..
سارت حجرتها تبا ادق لـسيف عشان اتقوله امه مب راضيه ادخلها المطبخ..بس كل تلفونه مشغول..
عصبت شيما..عرفت الحين و اتاكدت ان سيف يرمس وحده..كانت بتصيح.بس قالت ..مب الحين لي ما اعرف شو سالفته بالضبط..

طلعت شيما من الحمام..جافت سيف يالس يطالع التلفزيون..
سيف"من غير ما يطالعها": حطي لي عشـا..
شيما:- ما سويـت..؟
وقف سيف يجابلها..حست شيما دقات قلبها ادق..ابسرعه..وبروده خفيفه بجسمها..بس حاولت اطنش..
سيف:- انا مب قايلنج اتسوين عشـاا
شيما:- تـراعمـتي..
سيف"مقاطعنها":- شو امايه ما خلتيج ادشين المطبخ..
شيما:- هـــــي وين اسوي لك مكان غيره.
سيف"حرج" شيمـا ع بالج امايه شرات يدتج..الله يرحمها..بتتحكمين فيها و اطولين صوتج عليها..
شيما"اتهز راسها" انـا ما قلتها شي هي مدري ليش زعلانه..امك حاطه دوبها من دوبي ..جنها اتـغار..
سيف"محذرنها" :_شيمــــــــــاا..
بس شيما معانده سيف..
شيما:- عيل ليش اتعاملين جـي..
سيف:- هاي اخر مره ترمسين عنها جي و اذا مره ثانيه اتصلت بي تشكي منج يا ويلج..
شيما"مضايجه":- انت ليش ما اتصدقنـي اقولك هي تورم من غير سبب..
سيف يطالع شيما..وبعدين يعطيها ظهره امطنشهاا..ناوي يطلع برع الحجره..
شيما"تتطنز" شو ما بتعشى بعد ..؟
سيف"من غير ما يطالعها" لااااااا
كانت شيما بترد عليه..بس رن موبايله..ركضت شيما صوب الطاوله عشان اتجوف الرقم..بس سيف كان اجرب منها ..فشل الموبايل..
سيف يطالعها مستغرب..
سيف:- شو عندج..؟
شيما"شويه وبتصيح" انت اتخونـي ابا اعـرف اترمس منـو ..؟
سيف"يبتسم":- و اذا ما عرفتي شو بتسوين..
شيما:- انا بـعد بسوي شرات ما اتسوي فيني..
سيف: انتي ما تعني لي شي..و ما يهمني شو بتسوين..
شيما:- حـرام عليــك ها يزاتي لاني بغيت احافظ عليك تركت اهلي و ييت اسكن هني متحمله حركاتك و حركات امك..
سيف"يصرخ عليها" :- محد قالـج ترجعين انا ما طلبت منج..
شيما"اترد عليه بنفس الاسلوب":- عيل ليش تزوجتني عشان ادمر حياتـي..
سيف: انتي عارفه ليش..و لا ترفعين حسج علي اوكى..
شيما:- انا بخليك تندم على كل شي سويته فيني..
سيف"يضحك" لاااااااااااا راويني شو بتسوين..اتصدقين انا ما عندي سالفه يالس ارمس معاج اسير اتعشى احسن لي..
شيما:انا بعد بسير اتعشى و بعدين بتفاهم معاك..
سيف: ماشي عشى..بعد ما انخلص روحي كلي شرات القطاووووه..
شيما"تنزل دموعها" :- انت حيـــــوان..
سيف"قلبه يتقطع من داخل" :- و انتــــي شو تطلعيـن..
....
اتنهدت ...شو اتسوي اترد بيت اهلها .. ولا شو. الظاهر سيف ما يحبها يعني ماشي فايده..سمعت صوت عمها من ورا باب حجرتها..
بو سيف:- شيمـاا..
فتحت شيما باب الحجره..
شيما:- هـلا عمي اتفضل..
بو سيف:- انتي اتفضلي ع العشاا..شو بلاج زعلانه من شي..
شيما:-لا ..
بو سيف:- عيل بلاج لا غدا ولا عشـاا..لازم الحين تتعشين معانا..

شيما:- سيف ما يباني اتعشى معاكم..
بو سيف:- افـا ليش يبه..
شيما:- اساله..
بو سيف يمسك ايد شيما..ماخذنها الصاله.
بوسيف:- ما عليج منه تعالي تعشي انا عازمنج..
حست شيما..بالاحراج يوم جافت سيف.. و امه يالسين ع الصفره..كانت اتعرف انها ما يبونها..تاكل معاهم..
شيما"تيلس بين عمها و سيف" :- اخاف اغص عمي..
بو سيف يضحك"- ما عليج دقه خفيفه ع ظهرج..و تنبلع اللقمه..
طالعت شيما ..سيف جافته يطالع امه..و الام بعد اطالعه فعيبتها السالفه..
شيما:- عمـي..اظن مب زين عليك الاكـل وايد الي اعرفه فيك ضغط و الاكل شويه مالح..
بوسيف"مستانس":_ يا بوج تعودنا ع طباخ ام سيف فيها البركه..
حست شيما ان ام سيف تضايجت و تمت اطالع سيف بنظرات فهمتها "سكت حرمتك"..
شيما"تضحك":_ عيل لو ذقت طباخي شو بتسوي...الضغط و كل شي بيخوز عنك..
حست شي بقرصه سيف..كانت بتقول"أي" بس يودت عمرها..
بو سيف"ياكل لقمته":_ تراج حرمة ولدي شي اكيد طباخج زين..
سيف: وين يبا كلاس شاي ما اتعرف اتسويه..
ام سيف:- ترا بنات هالزمان..ما يعرفون بعد يغسلون الصحون الي ياكلون منها..

فهمت شيما ان ام سيف تقصدها..خافت اترد عليها ما فيها اتحط راسها براس ام سيف ترا سيف وراها و هي محد عندها..فسكتت..
بو سيف:"يكلم سيف" شو صار بسالفه النقل..
سيف:- جريب ان شا الله كم اسبوع بس..
شيما:- وين..؟
سيف:- تراني طلبت نقل من بوظبي لشارجه..
شيما:- ليش هناك وايد اوكى..
ام سيف: نبا ولدنا يعيش معنا حياته كل في بوظبي..
شيما :-بس انا ابا اسكن هنـاك..عايبتني الشقه..
بوسيف:- ما عليج كل ما بتكون عندكم فرصه يلسو هناك..
سيف:- لا خلاص انا و ربيعي طلبنا نقل بستقر في الشارجه..
شيما"معانده" مب ع كيفك سيف انا ابا اسـكن هناك..
سيف"متنرفز" جــــــب لااه..
حست شيما بالاحراج من موقف سيف صح هي مصختها بس مافي داعي يرد عليها جي و بها الاسلوب..
بوسيف"يعاتب ولده":_لا اترمس البنيه جي شويه شويه عليها.
سيف"معصب": ما اتجوفها يالسه تشرط ..مب هامنها الا راحتها..ما اتفكر ان هاشي تعب لي..
عرفت شيما ان سيف يتحرا انها تبا تسكن في بوظبي عشان الشقه و حبها لها السوالف بس كانت تبا تسكن معاه..
عشان تاخذ راحتها معاه يمكن تقدر تكسبه بعيد عن امه بس هو فهمها غلط..
بو سيف:البنيه ما قالت شي..
شيما"شويه بتصيح" عمي ترا سيف دوم جي يعاملني..
سيف"محرج"الحين اذا ما سكتي بدوسج في بطنج جدامهم انطبي اخير لج..
ام سيف:_ هالبنيه لسانها طويل..
قام سيف من مكانه محرج.. وطلع برع الصاله..
ام سيف: يمه تعال كمل اكلك..
حست شيما بالاحراج..فقامت من مكانها وسارت حجرتها..مخليه عمها و عمتها يقولون الي يقولونه..كل ما حاولت اتقلل المشاكل الي بينها و بين ريلهاا ..
تطلع سالفه يديده و غيرها..

باجر سيف بيروح بو ظبي..اكيد بتشتاق له..بس بتحاول انها ما ادق له ولا تعطيه سالفه..يمكن يعبرهـا و يهتم فيها شويه شرات قبل..

يلست اترمس امها بالتلفون..عرفت ان عبدالله اخوها بيي الاسبوع الياي ..تخيلت يوم بعرف ان يدته اتوفت..شو بسوي..

اتنهدت يوم تذكرت يدتها.. كل الي هي فيه..كان بسبب يدتها.. و لو عاشت يدتها كانت بتستانس..بس هي غبيه..خربت كل شي بيدهـا..

طالعت الساعه جافتهاا وحده ..قامت ترقد..فتحت عيونها يوم انفتح ليت الحجره..جافت سيف ..بدل ثيابه ودش الحمام..قامت من مكانها ابسرعه..
شلت موبايله قبل لا يطلع من الحمام..فتحت المكالمات المستلمه جافت رقم..

بعدها فتحت مدة آخر مكالمه جافتها ساعه و نص..بطلت عيونها مستغربه..معقوله بيرمس ربيعه ساعه ونص..
فتحت الرسايل الوارده جافت رساله " حبيبي دق لي اشتقت لسوالفك..خاطري اقولك شي مهم.."
جافت الرقم نفسه

يلست ع الشبريه مصدومه يعني سيف يرمس غيرها..سيف يخونها..معقوله ها الانسان الي سوا كل هـا عشان يساعد يدتها يطلع بها الصفات..خاين..

**

يلست شيما ع الشبريه مصدومه يعني سيف يرمس غيرها..سيف يخونها..معقوله ها الانسان الي سوا كل هـا عشان يساعد يدتها يطلع بها الصفات..خاين..

فتحت الرسايل المرسله..جافت رد سيف عليها"بعد دقايق حبيبي تراني مشغول يله فديتج" الحين اتاكدت انها بنوته..

بس منو هـاي..ابسرعه ابسرعه رجعت التلفون مكانه..بعد ما خزنت رقم البنيه..

اتفاجأ سيف يوم جافها يالسه ع الشبريه...وكانت شبه سرحانه..

سيف:- عايبتنج المشكله الي سويتها ع العشىى

شيما"من غير نفس " :- انا و الا انــــــــت...؟
سيف"يطالعها" بلاج محرجه ..

شيما:- منوه هاي الي اترمسها..
سيف"معاند" ما يخصج..ما بينا شي عشان اقولج..

شيما"تهمس" سيف اتخونـي.
سيف: ليش منو انتي عشان اخونج ..؟
شيما"اتصرخ عليه" :- انا زوجتــــــــك..
سيف: انا ما يكون ليالشرف ارتبط بوحده جي صفاتها و اخلاقها..

شيما:-ليش ما اتجوف عمرك..يالس اترمس وحده من وراي.
سيف:-لا اتصارخين.. و بعدين منو امرج اتشيكين ع الموبايل..
شيما:- كيفي..
سيف:- دام انه كيفج حق شو تسالين..
شيما"شويه بتصيح" ليش اتسوي فيني جي عشان تنتقم..

سيف:- انتهت سالفه الانتقام..كنت ابا ارجع كرامت المرحومه..بس انتهى كل شي..وقلتلج روحي بيت اهلج..
شيما:_ منو قالك ما بسير ..خلاص دام شي وحده غريبه في قلبك مالي حايه اعيش معاك..

سيف"يبتسم":_ زين ما اتسوين..
استفزتها شيما ابتسامه سيف..ففرته بالمخده
شيما:- يا الخـــــــاين..

اجدم منها سيف انا من البارحه مضايج منج بس ماسك اعصابي ما ابا امد ايدي عليج..
شيما:-لانك مب ريـــــ,,,"وسكتت"..

سيف: ليش سكتي كمليهـا..جان تبين تباتين في القبر اليوم..
شيما"صاحت":_ بخبر عليك عبدالله..بجوف..
سيف:-ليش مب سالم العود ليش ما اتخبرينه..ولا مب ريال..
شيما"معصبه":_ ما يخصك باهلي اتزوجتني عشان تعلمني السنع ..جوف امك قبل.ما ادري ابوك كيف متحملنها..

سكتت شيما يوم حست بصفعه سيف ع ويها..يلست ع الشبريه..حست ويها اتكهرب من قوة الصفعه..

سيف"من بين اسنانه":- باجر بسير بوظبي الاسبوع الياي ما ابا اجوفج يالسه في البيت..و اذا جفتج بييرج من شعرج بوديج بيت اهلج..

كانت شيما ما تسمع كل كلام سيف لانها حست ان اذونها اتعورها من قوة الصفعه..
فطالعت موبايله فشلته قبل لا يشله سيف..حاول ياخذه من عنها بس فرته باليدار و اتكسر..

سيف"محرج" يا الحيوانه..

ورفسها ..بعد ما انكسر موبايل سيف حست شيما براحه فيلست اتصيح ..دموع خوف و الم وجرح من سيف..
طالعت شيما سيف وهو يشل موبايله قطعه قطعه..

سيف"يرمسها":_ شو هـا..؟
شيما"تمسح دموعها":_ عشان تتأدب و اتحرم اتغازل.
سيف: اطلعي برع حجرتي..
شيما:- انت الي تطلع برع ..
سيف:- يا قوة عينج..ولا جنج مسويه شي..وين موبايلج..
شيما "تركض عشان اتشل موبايلها":_ ما يخصك فـ موبايلي..
و يلسوا يصارعون ع الموبايل شيما ماسكتنه بايدها و سيف يحاول ياخذه عنها..
قوة عضلات سيف خلته يغلب شيما و ياخذ عنها الموبايل..
شيما"تيلس ع الارض تصيح بصوت عالي":_ ييب موبايلي ييبه يا الحرامي..
سيف"يتنفس بصعوبه":_ جب ليش تكسرين موبايلي الحين باخذ موبايلج و برمس فيه حبيبتي..

شيما"اتصيح":_ بجتلك يييييييبه..
ركب سيف بطاقته في موبايل شيما و كسر بطاقتها.. وطلع برع الحجره..

يلست شيما اتصيح ورقدت ع الارض تعبانه من كثر الصياح..

**
طلع سيف يدور بسيارته ..كان محرج..اتصل بـ نوف بس ما اترد عليه..يلس يفكر بالي صار قبل شويه..كان وايد مضايج ما ايروم يروح البيت الا يطلع منه محرج..

تم يلعن هالعيشه..سند راسه ع سيت السياره..مغمض عيونه.."شو هالحاله وين ارقد الحينه اووووووف لا بعد طلبت نقل شو هالحاله.."

تم يتذكر شيما يوم تصارع معاه عشان الموبايل ابتسم..رجع عصب يوم تذكر موبايله انكسر...

بعدين تذكر يوم خذ الموبايل عن شيما ويلست بالارض اتصيح تبا موبايلها شرات اليهال..يلس يضحك ابصوت عالي..و قال"هاي صج ياهل و انا حاط راسي براسهاولا حد يصيح جي لا بعد اترافس بريولها..و الله حاله.."

و هو يفكر بشيما اتصلت له نوف..رد عليها و يلس يسولف معاها

**
فتحت شيما عيونها ونور الشمس بعيونها..جافت الدنيا صبــــــــااح..اتذكرت شو صار البارحه..بس شو يابها ع الشبريه هي راقده تحت..

تذكرت يوم سيف شلها من ع الارض و حطها ع الشبريه..حضنت المخده مبتسمه..كان يقولها شي بس ما تذكر شو..

حاولت تذكر سيف شو كان يقولها بس ماشي فايده..حتى هي كانت اترد عليه..وتم يضحك بس شو ما تذكر..
طالعت الساعه 11 ..قامت اتغسلت..جافت كبت سيف مفتوح عرفت انه سار بوظبي..بس ليش طلع من وقت..
يلست تذكر ضرابتهم البارحه..

اتأكدت انه سيف خلاص مستحيل يرد مثل قبل..عشان جي بتروح بيت اهلها احسن لها.. وخليها اتعيش حياتها .. و سيف يعيش حياته..
خلاص طفح الكيل ما يهمها الحين مها شو بتقول ولا صديقتها خلهم يتطنزون عليها..ما عاد يهمها..

المهم حست ان حياتها حلوه من غير حفلات و اسواق و بيزات ودنيا..جافت حياة الحب احلى بوايد ولها طعم غير..اتنهدت بس وين الي علمها ها الشي خلاص ما يباها..

وفضل عليها وحده ما تعرف منو هـاي..l

شلت ثيابها و اتصلت بدريول امها..بعد نص ساعه يااه و خذها..حتى ما فكرت اتسلم ع عمتها ولا عمها مع ان عمها ما يخصه بشي..

حست الايام الي مرت عليها وايد ثجيله..كانت اتجوف مها و ريلها يوم اتزورهم في بيت امها..

احيانا كانت اتحس بغيره من مها..بس مها عرفت تختار حياتها لكن هي لا..

للحين ما قالت اهلها انها خلاص ما بترجع لـ سيف..لانها مب عارفه كيف اتخبرهم..
كانت سوالف مها و امها كيف يدتها وصلت عندها الشقه بس شيما..كانت ترفض اتقولهم أي شيء..

فكرت باجر سيف بيرجع من بوظبي و ما بيجوفها في البيت اكيد بستانس..دشت مها عليها الحجره..

مها:- شيما ابا اشتري ثياب حق ولدي تعالي معاي السوق..

شيما:- مالي نفس.
مها:- اونج ما احيدج..
شيما:- و الله مالي خاطر بشي موليه..

مها:- لا يـكون حامـل..
شيما"تبتسم"لا مب حـامل..
مها :- هـا عيل..
شيما:- اوووووه قلتلج مالي نفس.
مها:- من بعد ما عرستي صرتي ما اتحبين الطلعه موليه ليش.
شيما:- ما ادري..و الله ابا سيف بس..
مها:-باجر بيي انزين..الا اقول منو بياخذج المطار ..
شيما: ليش..؟
مها:- ورا باجر عبدالله بيي,,
شيما: و الله امايه ما قالته عن يدوووووه..
مها:- قالته ..
شيما:و الله شو سوا..
مها:صكر التلفون بويه امايه و الحينه اتحاتيه..
شيما:- اللــــــه يستر لو عرف شو سوينا فيها..

مها:- انا مالي خص.. و الله انتي و امايه و سلوم..
شيما:- اووووووه اطلعي برع حجرتي مب ناقصتنج..
مها:- تغيرتي بعد العرس الا في الدفاشه و قلة الادب..

وطلعت برع الحجره..اضايجت شيما من كلام مها بس طنشتها.. وفرت التلفزيون جافت برنامج البيوت السعيده.. اعتدلت بيلستها و يلست تسمع محاضرة جاسم المطوع..بعد ما خلص البرنامج..

قامت شيما ابسرعه و زهبت ثيابها عشان اتروح باجر بيت عمها.."مب ع كيفه سيف..بتتحمل و بتصبر عشانه و عشانها..ما بتخلي حد يخرب حياتهم لا هاي الي يرمسها و لا امه.."

حمدت ربها انها ما سارت ويا مها السوق ولا جان ضاعت عليها حلقة البيوت السعيده..قالت في خاطرها انا أحبه ما اروم اتخلى عنه..بتحمل كل شي عشانه..

ابتسمت اكيد بضايج يوم بيجوفها بس ما عليه ..خله يتحمل شرات مب هي تتحمـــــــل..ضيمه و عذابه..و كل شي سواه في دنيتهم..


يتبع .>>

[لامارا]

الجزء الثامــــن...

فكرت شيما تجرب من عمتها عشان يمكن تقدر ترد سيف بس عمتها ما كانت تعطيها فرصه...

اتغدت و خلصت..سارت حجرتها ..اتنظفها..فكرت تشتري لها موبايل و اطلع بدل فاقد لبطاقتها بعد ما كسرها سيف..

كانت اتمشط شعرها يوم دش سيف الحجره..
حست شيما بشي يتحرك بداخلها..يوم طاحت عيونها ع سيف..
شيما"مستانسه":_ سيـفاني..
سيف:- انا مب قايلنج تمي بيت اهلج..
شيما"حست بويها يحترق":_ اشتقت لك..

سيف: لاو اللـــــــــــه..
حط اغراضه..و دش الحمام يتغسل.بعد ما طلع..
شيما: سيف ابا اشتري لي موبايل..
سيف: سيري اشتري.

شيما:"بدلع" ابا ع ذوقك.
سيف: ما اعـرف اشتري..
رن موبايله..طالع الرقم وطلع من الحجره من غير ما يقول شي..يلست شيما ع الشبريه متأففه..ومضايجه..بس وعدت عمرها تصبر و تتحمل..

حست شيما بالملل..طلعت من حجرتها ..جافت عمتها محد ولا عمها موجود..
سارت المطبخ جافت عمتها اتسوي العشىى
شيما:- عموه اساعدج..
ام سيف:-لا
يلست شيما ع الكرسي ..حست ان عمتها مضايجه من وجودهـا..بس طنشت و يلست اطالعها شو اتسوي..

قامت شيما اتغني..و ادندن اتسلي عمرها..
شيما:- عموه شو اتسوين عشى..
ام سيف:-لا حـول انا متعوده اطبخ ع راحتي و بهدوء ما احب حد يسالنـي شو اسوي ..

شيما:-بس اسأل كلتيني..؟
ام سيف"محرجه":_ طلعي برع المطبخ..
شيما:عموه انتي ليش اتعامليني جي انا شو سويت ولا شو غلطت بحقج..انا اعتبرج شرات امايه..

ام سيف:- ويه بسم الله عليه من امج..
شيما"وقفت محرجه":_ليش شو بلاها امايه..
ام سيف:-ما بلاها شي بس ما احب اتقارنيني فيها..

حست شيما ان ام سيف تبا تستفزهـا وايـــــــد..حاولت تمسك اعصابها ردت يلست..بس سمعت ام سيف اتقول.

ام سيف:- انا لو عندي ولد واحد بس تعالي جوفي تربيته محد من خواتج ولا انتي اييون صوبه..

شيما:-لا و الله..ما عليه ريلي احسن عنا و لي الشرف ها ريلي و بو عيالي..لكن انتي جوفي عمرج كيف اتعاملين بنات الناس امانه عندج..ع الاقل أمايه حاشمه حرمة اخويه..و تعاملها شرات عيالها ..مب شراتج..قلبج اسود..

وطلعت من المطبخ..فرت شيما الكلام بويه عمتها من غير ما اتحاسب ع الكلمه..
كل منها ليش سارت تيلس معاها الظاهر عمتها طباعها جي..خايسـه ..

لا وبعد سيف انتقل هني..يعني بجابلها 24 ساعه..
طالعت التلفزيون حست انها تبا ترقـد اتمددت ع الشبريه..

اتروعت شيما يوم حست يتها ضربه قويه قامت من رقادها اتصرخ..جافت سيف..ضربها ضربه بالعقال الي فـي ايده..

اتغطت شيما بلحاف زين ما زين عشان يحميها من عقال سيف..

بس الظاهر سيف سدته ضربه وحده..وقف بعيد عنها و فر العقال..
سيف:- و اللــــــــه يا شيموووه هاي اخر مره تشتكي امايه منج ولا اتعرفين بسوي شي ما يعيبج..

اضايجت شيما مب من حقه يمد ايده عليها هي ما غلطت هاي عمتها تستفزها بالرمسه..ليش يضربها و هي راقده..
يلس ع الكنبه يطالع التلفزيون..شلت شيما ساعه المنبه الجريبه منها..وفرته..ويت ع راسه..

عرفت شيما ان سيف عورته الضربه..سمعته يقول"آآآآآي"
اتيمدت بمكانها..يوم سيف شل العقال مره ثانيه..وسار صوبها..

يير عنها اللحـاف وضربها ثلاث ضربات..تمت شيما تجلب ع الشبريه شرات السمجه يوم تطلع من الماي اتصيح..و اتقول "يعورنـــــــــــي"


طلع سيف برع الحجره وقف عند الباب يسمع صوت شيمـا اتصيح و اتقول كلام مب مفهوم..
طالع ايده ..وقال في خاطره"عساج تنشلين لو انمديتي عليها مره ثانيه"..

ونزلت دمعه من عيونه ..ما هانت عليه شيموه بس هي لسانها طول و ايدها اطول عنها..حشى مب حرمه شرات الريال ما ترتاح الا اذا خذت حقها..

فكر يدش يراضيها و يتعذر منها..مع انها الغلطانه بحقه و بحق امه..بس اتراجع باخر لحظه..

ما يبا يدلعها خل اتجوف حياة غير عن الحياة الي عرفتها و تربت عليها..

حس بويع براسه..حط ايده جاف شرات الليمونه طلعت له براسه..قال بخاطره"حسبي الله ع ابليسج..لو تميت معاج اكثر عن سنة اظني بتكسر"..

مسح الدمعه الي طاحت من عيونه..وسار الصاله يطالع التلفزيون..
ام سيف:-تعال اتعشى..
سيف:ما اشتهي..
رن موبايله..رد عليه..
ام سالم:شحالك يمه..
سيف:- هلا هلا عمتي الحمدلله الله يعافيج..شحالج و شحال الاهل..؟؟
ام سالم:-الحمدلله الا شيما وينها اتصل بموبايلها كل مغلق..
سيف: شيما تسبح..موبايلها مخترب.
ام سالم:-هي و الله نسيت..
سيف:امري الغاليه شو بغيتي..
ام سالم:-ابا اذكر شيما باجر عبدالله بيي من السفر ..ما ادري اذا بتاخذها المطار..
سيف:- أي مطار...؟
ام سالم:-مطار دبي..ترا انا بسير مع مها و ريلها و سالم بروحه بيي..فقلت اجوف شيما منو بياخذهـا

سيف:-خلاص ما يهمج ان شا الله باجر انا باخذها المطار..ما قلتي الوقت..؟
ام سالم:- العصر بتوصل الطياره..
سيف:-ع خير ..
ام سالم:-الله يحفظك يمه و سلم ع اهلك..
سيف:يوصـــــل..فمان الله

ام سيف:منو هاي امها..؟
سيف:هـي تبا اترمس بنتها ..
ام سيف: هاي العايله ما ينبلعون ..
سيف:شسوي ها النصيب..

وطلع من الصاله وسار حجرته..جاف شيمو رجعت رقدت..تم يطالعها و يتأملها..اجرب منها بس هي اتحركت..فرد لـورا..ويلس يطالع قناة أي ار تي يجوف مصارعه..

ابتسم و قال في خاطره"عن اجوف شيما المصارعه تتعلم حركات اتسويها لي.."

**





شيما و مها و امها يالسين في الانتظار يتريون طيارة عبدالله..و سيف و سالم و ريل مها عادل..واقفين يسولفون..

كانت شيما بعالم غير..طالعت ايدها حست انها ما اتروم اتحركها من قوة الضربه..طالعت سيف جافته يطالعها..نزلت راسها..

مالها نفس ترمس موليه..حتى في السياره يوم سيف يايبنها المطار..كانت ساكته..و كاره حياتها..كان سيف يرمسهـا و يحاول يضحكها بس هي ..ما عطته فرصه..

اتفاجىء سيف يوم جاف نوف واقفه الصوب الثاني..ومعاها اخوها و امها..قال في خاطره شو اتسوي هني..
انتبهت نوف لوجود سيف فابتسمت..بس سيف طالع شيما..

جافها سرحانه..كان يبا يرمس نوف بس هني مستحيل..
سالم:- بلاك سيف جنك مضيع ..؟
سيف:-لا و الله ماشي..
عادل:- ما يلام صار لنا ساعه واقفين..
سالم:- اسكتوا وصلت الطياره..

وقفوا كلهم يتريون عبدالله..خاطره سيف يعرف منو ها عبدالله...يحس انه الوحيد غير عن خواته ..حتى يدتهم الله يرحمها كانت وايد اتحبه و ترمس عنه..

دشوا المسافرين كل واحد يسلم ع اهله..اخر اثنين كانوا عبدالله و ربيعه..عرف سيف ان ها عبدالله...يوم سالم سار صوبه..يسلم عليه و يحضنه..

طالع رفيجه جافه سار صوب نوف و اهلها..الحين عرف سيف ان رفيج عبدالله اخو شيما..هو اخـو نوف..شو هالصدف..

الكل تقريبا سلم ع عبدالله..بس شيما..اجدمت منه شيما..حضنته حست شيما بشعور غريب..

مع انها ما كانت وايد ويا عبدالله..الا هالمره..حست انه تباه يكون معاها في كل وقت..يلست اتصيح..وتحضنه..عبدالله حاول يهديها..ويسكتها..الكل كان مستغرب و مب متوقع استقبال شيما لاخوهـا..

حتى عبدالله نفسه..حس انه اخته صارت غريبه..حاولت شيما تهدي شويه..وعرفته بسيف زوجها فـ سلمو ع بعض بالخشوم..
قبل لا يظهرون من المطار..سمع عبدالله رفيجه غانم يزقره..
غانم:عبـووووود يود مفتاح سيارتك..
عبدالله:- مشكور..
طالع عبدالله البنيه الواقفه حذال غانم..دشت خاطره..نزلت عيونها مستحيه وسارت بعيد..عيبه عبدالله يوم جافها مستحيه..
بس حس الوقت مب مناسب..الكل كان يترياه..
عبدالله:- يالله غنوم حياك..

وطلع من المطار و كل واحد سار ابدربه..

اتحركوا كل واحد ركب سيارته..و عبدالله ركب مع سيف بعد ما الحت له شيما..

سيف:- اتصدق كان في خاطري اتعرف عليك..من كثر ما يرمسون عنك..
عبدالله"نبرة حزن":- مشكور الله يخليك..شيما شحالج الغاليه..؟

شيما"بصوت خفيف:- الحمدلله ..
عبدالله:-بلاج ضعفتي جي..وايد متغير شكلج..
رفعت شيما راسها فطاحت عيونها بعيون سيف..
شيما:_سلامتك اخوي اتعرف الظروف الي صارت لنا..

عبدالله:-ما توقعت ارد البلاد من غير ما اجوف يدتي فديتها الغاليه.

سيف في خاطره.."ها انا اجوف شيما يلست اتصيح تبا تثبت لاخوها انها وايد متحسره ع فراق يدتها..اتخاف لافتن عليها.."

سيف:- هاي الدنيا يا اخوك..ما في شي يتم على حاله..
عبدالله:-"يتنهد" :-اللـــــه يرحمها.."دمعه عيونه"

تموا ساكتين لي ما وصلوا بيت ام سالم..حست شيما ابراحه لان الكل متيمع في بيت ابوها..حتى سيف اول مره ييلس معاهم..

يلست حذال عبدالله اخوها..و مسكت ذراعه..
ام سالم:- لا بالله ها البنيه شي بلاها اليوم..
شيما:- شو حرام اشتاق لاخوي..

سالم:- احيدج اتحبيني موت..شو غيرج..

كانت شيما اتحس بنظرات سيف عليها بطول اليلسه..بس اتعمدت اطنشه..

شيما"اطالع اخوها":_ وحشتـــــــني موت..
مها: يالله يالله صج بغـار الحينه.
ام سالم"تضحك" لا اتخافين اكيد يابلج صوغه..
شيما:- اموال الدنيا ما تغنيني عن عبدالله..

سيف في خاطره"تعالوا عطوني مليون طراق جان ترمس صج.."

عبدالله "يطالع سيف"..جفت حظك الحلو في بنوته شرات شيمووو..

سيف:الحمدلله صج حظي حلو..
عادل: حتى انا حظي حلو بمهايه..

يلسوا يسولفون و يضحكون لي ما عبدالله قرر يدش حجرته..يرتاح..بعد نص ساعه..قام سيف..وخذ معاه شيما ..رايحين الشارجه بيتهم..

**
و في الطريج..
سيف:- وايد بالغتي في استقبالج لاخوج..؟
شيما:-انا ابروحي ماكنت متوقعه اني جي بجابله..صج طلع كل شي بعد ما جفت ويهه

سيف:-ليش..؟
شيما:-ما ادري..
سيف:-منوها الي معاه..
شيما:- ما ادري..ليش.؟
سيف:-ولا شي اسال..
شيما:- سيف...؟
سيف:لبيـــــــــــــــه..
شيما: عبدالله ما ايعرف ان يدتي كانت معانا في الشقه.
سيف: خايفه لاقوله شي.
شيما:-ما اباه ينصدم فينا.
سيف: ليش انتوا طبعكم جي ما ادري ها طلع غير عنكم ليش..؟
حست شيما بالاحراج من كلامه..بس سكتت ما حبت تفتح مواضيع مالها داعي..

شيما:-ما اباك اتقوله.
سيف: طلب ولا أمر..
شيما"تهمس":-انا اترجـــــــــاك..
سيف: أحــــــاااااول..
شيما:وايد اتحب اتسوي مشاكل..
سيف:- انتي علمتيني..

وصلوا البيت...ارتاحت شيما يوم جافت عمها و عمتها محد في البيت..مافيها ع الصدعه وكلام ماله داعي..

تغسلت و بدلت ثيابها ورقدت..بعد ما سيف طلع..عرفت انه يرمس بالتلفون..بس ليتها اتعرف يرمس منو...؟؟

**
ووقت الغدا...
بو سيف: عيل لازم نعزم اخو شيما..ع الغـدا
شيما: يستاهل عبدالله اخوي..
سيف: لازم يستاهل سويتي لنا فلم هندي في المطار..
بو سيف"يضحك" فاتنا عيل..
اام سيف: انا ما اروم اطبخ..
بو سيف: عزيمه ع قدنـا..
شيما: خلاص عمي اذا عموه ما اتروم تطبخ..ابرايه..
سيف: انا بييب من المطعم ع حسابي..
شيما: من صوبي بعزم امايه و مها و ريلها و سلوم وحرمته..
سيف: و انا بعزم حمود ربيعي..
ام سيف: و اللــــــه زين اقترح لكم سالفه العزيمه..
يلسوا يضحكون..

يتبع>