الميراث *مميزة ومكتملة*

[جيهان سرور]

السلام عليكم ورحمة الله وبركاته

****الميراث****
















***الفصل الاول***
والده حسين :اهلا اهلا يا بنات اهلا يا سهام ايه المفاجآت الحلوه ده نورتوا.
ريهام:ازيك يا تيته وحشتينى والله بس هنعمل ايه الدراسه.
والده حسين: ربنا يوفقكم وتنجحوا وتحققوا كل احلامكم اللهم آمين يارب العالمين.
والده حسين:حماتك طول عمرها بتجبك يا سهام ده انا لسه عامله كيكه تحفه.من اللى انت بتحبيها.
ريهام:،خليك يا تيته احنا هنجيبها ونعمل الشاى.
والده حسين:قمراتى الحلوين كبرنا وبقينا عرايس خلاص اهو وبنقدر نعتمد عليهم.
يارب اشوفكم عرايس واجوزكم بايدى يا حبايبى.
مالك يا سهام مقولتيش كلمه من ساعه ما دخلت ومش عايزه اسالك ادام البنات.
حسين مزعلك يا بنتى.
سهام دمعت وفجاءه بكت ،مالك طمنينى.
والله لو زعلك لابهدله،هى بنات الناس لعبه ولا ايه.
بوجه حزين ردت سهام
سهام: الموضوع مش كده يا طنط .
والده حسين:طب طمنينى فى ايه؟
سهام:ابدا حضرتك عارفه انه باع المحل اللى اخواته اعطهوله من ميراث باباه.
والده حسين:تقصدى حصل على نصيبه اللى اتقدر له،لانه مش عايز يشتغل مع اخواته فى الوكاله وعايز يشتغل فى العقـارات.
سهام:اهى العقـارات وسنين العقـارات ياطنط.
والده حسين:ايه يا بنتى طمنينى.
سهام:حضرتك فكره المحل كان اتباع بكام.
والده حسين:ايوه مليون ونصف .
سكتت سهام،يعنى قال لمامته كل حاجه.
سهام:بالضبط يا طنط مليون ونصف واشترى بيهم ارض.
والده حسين:ايوه يا بنتى اشترى بمليون ومائتين واللى فضل رمى بيهم الاساس.
سهام:بالظبط كده يا طنط،كان متعشم يتباعوا برقم.
لكن انت يا طنط عارفه حسين وطيبته اشترى وبنى وشطب ولكن فى التسويق اضحك عليه ومفضلش من الفلوس غير مليون وخسر نصف مليون.
وطبعا مزاجه سئ ومحدش قادر يكلمه ،والبنات حاسين بالتغير وطبعا كل حاجه من الطلبات بالنصف.
والده حسين:لأ لأ، لا حول ولا قوة إلا بالله، طب ليه متكلمش فداه كل فلوس الدنيا المهم ميزعلش نفسه.
سهام:ازاى يا طنط وهنعيش ازاى.
والده حسين :هتعيشى يا بنتى ربنا كبير وكريم
انا هتكلم معاه.
سهام:اوعى يا طنط اصله هيطلقنى لو عرف انى حكيت.
والده حسين:طلاق ايه بعد الشر.
خلاص انا بكره هجى اتغدى عندكم واشوفه ولو حكى كان بيها.
سهام:خلاص يا طنط تنورى طبعا.
رجعت سهام من عند حماتها وهى مش عارفه اللى عملته صح ولا غلط.
لو حكى انه باع باربعه مليون هيعرفوا كذبى.
بس معقول حسين هيقولهم.
لأ هو مش اهبل ويحكى.
بس لو طنط سألته مش هيكذب ويقول.
ساعتها هقول والله ما اعرف. وانه قالى كده وكذب عليا.وهقلب التربيزه عليه،انه بيحرمنا ويكذب ومش واثق فينا.
رجعت سهام البيت وكانها لم تفعل شئ،دخل حسين ومعاه شنطه كبيره.
حسين:ازيك يا سوسو،عامله ايه وازى البنات هما فين؟
سهام:فى الغرفه هنده عليهم علشان نتغدى سوا.
بس ايه الشنطه ده انت مسافر ولا ايه؟
حسين:يا سوسو ان شاء الله السنه الجايه نسافر الحج انا وانت.
سهام:بس ده مش شنطه فاضيه
،باين عليك انها ثقيله ،
حسين:ايوه هغير وواصلى وارجعلك تكونى حطيتى الغذاء نتغدى واحكيلك.
سهام:ماشى يا سيدى.
حسين:طبخلنا ايه النهارده يا قمر؟
سهام:قمر ده انت مزاجك عنابى،خير؟
حسين:بصى يا سيتى رحت انهارده شفت حته ارض تحفه ومكانها مميز،وان شاء الله مكسبها مضمون.
علشان كده لحقت البنك قبل ما يقفل ورحت سحبت ثلاثه مليون جنيه من البنك.
علشان البايع ميعادى معاه الساعه ٩،مش هلحق
سهام:ومين كان معاك وانت بتدور
حسين:،مافيش السمسار بس.
الحمد لله كانت تبقى مصيبه لو معاه اخ من اخواته
طب بالله عليك ما تحكى لحد.
المهم ايه رايك فى الاكل؟
حسين:،تحفه تسلم ايدك يا قلبى.
سهام:قولى يا حبيبى مش ناوى تكتب الارض باسم البنات.


***الفصل التانى***
اعمل ايه دلوقتى يا ترى فعلا حسين خسر ولا بيدارى على مراته،انا مش حاسه انه عنده مشكله بس دائما حسين بيدارى، احسن حاجه أسأل اخواته جايز يعرفوا حاجه او سمعوا حاجه.

والده حسين الو:ايوه يا على ازيك يا حبيبى،شكلكم مشغولين اخوك معاك
على:ايوه يا ماما ازيك يا حبيبتى،لو مليون مشغول نفضى لحضرتك يا ست الكل.
والده حسين:يا واد طول عمر لسانك حلو.
المهم وحشنى قوى انت وحسن،هنتظركم بعد ما تقفلوا ضرورى.
على:من عنينا يا ست الكل.
حسن:ايوه يا على
على:ماما عايزانا بعد الشغل نروح لها.
حسن:تمام يا على حاضر.



***
حسين:تانى يا سهام ،كل مره مش هتكتب للبنات.
طب خلينا نتكلم بالعقل كده هى الارض اللى ناوى اشتريها هحتفظ بيها ولا هاخدها استثمار وابنى عليها وابيع.يعنى ايه فائده الكتابه اذا كنت هبيعها بعد سنه.
يا سهام كل واحد له حق هياخده فى ميعاده.
سهام:اه فعلا زى ما انت اخدت ربع حقك من اخواتك.
يعنى بعد ما كنت فى ايد ابوك وشايل كل حاجه مااخدش حقك ولا حتى نصفه.
حسين:مين اللى قالك كده.اذا كنت انا اللى مقسم لكل واحد نصيبه.
سهام:وهما ماحدش فيهم ولا حتى امك قالتلك لأ حقك كده موصلش.
ووافقوا ورضوا على نفسهم.
حسين:وافقوا ايه وهبل ايه اللى انت بتقوليه ده انت اكيد بتخرفى او حصل حاجه فى مخك.
ثم انت مالك شئ ميخصكيش ومن ناحيتى انا راضى وكلمه كمان هكتب شغلى شركه بينى وبين اخواتى علشان ترتاحى.
سهام:ما هما بكره من غير ما تكتب هيخدوا كل حاجه.
ما انت حته معرفتش تجيب ولد يشيل اسمك.
هقول ايه الواحد صابر وساكت.
حسين:لا حول ولا قوة إلا بالله، انت ست متتعاشرش ربنا يخرجنى منها سليم قبل ما اعمل فيك مصيبه يا شيخه.
سم بيجرى فى عروقك،ايه ده انت كنت مداريه كل ده ازاى.ومحوشه كل ده جواك.
حسبى الله ونعم الوكيل فيك.
سهام:اجرى اجرى على الاوضه وقول اه يا قلبى اه.
حاجه تقرف ،بكره اخواتك ياخدوا كل حاجه ويرموا ولادك فى الشارع.
شايفين ابوكم مستخسر فيكم يكتب حته ارض باسمكم.طبعا ماعندوش غير ماما واخواته وولادهم الصبيان اللى هيبلعوا كل حاجه فى بطنهم.




***
ريهام: بابا
حسين:ايوه يا ريهام
ريهام:متزعلش من ماما هى غلطانه بس بتحبك والله
حسين:والله يا بنتى كل اللى بتقوله غلط.
ومش المفروض الكلام ده اقوله ليك او كنت تسمعيه.
بس انا اخدت حقى كامل من ورث بابا واخواتى متكلموش،واخدت حقى فى البيت واشتريت الشقه ده باسم امكم علشان تحس بالامان.
وكنت ناوى اشترى الارض ده ولما ابنيها مش هاخد مكسب فلوس هسيب ٣شقق واحده لينا نعيش فيها والاتنين التانين ليك انت واختك.
بس منتظر ان الدنيا تمشى والسوق يكون كويس وكنت هعملها مفاجأه لماما.
علشان تفضلوا معانا بعد جوازكم وقريبين مننا.
بس انت شايفه اللى قالته ده كله.
وبعدين انتم عندى اغلى من مائه ولد.
وبحب ولاد اعماكم لانهم كويسين مش علشان زعلان ولا حاجه.
وده امر ربنا. وبعدين ربنا قال ايه فى كتابه العزيز
بسم الله الرحمن الرحيم
هِ مُلْكُ السَّمَاوَاتِ وَالْأَرْضِ ۚ يَخْلُقُ مَا يَشَاءُ ۚ يَهَبُ لِمَن يَشَاءُ إِنَاثًا وَيَهَبُ لِمَن يَشَاءُ الذُّكُورَ (49)
يعنى ربنا سبق الاناث قبل الذكور.
وكمان رسولنا الكريم انجب ٤اناث ولم يعيش له الذكور.
يبقى نحمد ربنا،والحمد لله الخير كتير المهم الرضا يا بنتى.
بس سهام معندهاش رضا وانا خايف عليها وخايف عليكم تسمعوا ليها.يا بنتى ربنا واضع حكمه لكل حاجه ولو انا فى اى لحظه ربنا اخد امانته اخواتى عمامكم يشيلوكم وكانكم بناتهم،انا عارف اخواتى كويس جدا متصدقيش الكلام ده،انت الكبيره والواعيه خليكى فاكره الكلام ده كويس يا ريهام.
واخر حاجه هقولهالك اعرفى ان اللى بياخد حق مش حقه ربنا هينتقم منه ولن يبارك له ابدا،واللى اتاخد منه الحق ربنا هيرضيه ويعوضه.
روحى يا حبيبتى اوضك ذاكرى وواوعدينى بمجموع كبير فى الاعداديه،يفرحنى وسيبك من اللى حصل ده كله.
ريهام:بس انت وشك شاكله تعبان يا بابا،انت فى حاجه وجعاك
حسين:،لا يا حبيبتى ابدا
ريهام:، انا حاسه بيك يا بابا،
حسين:هات حضن بس لبابا وانا هكون زى الفل.


***الفصل الثالث***
فى المساء بعد انتهاء العمل فى الوكاله ذهبا على وحسن الى والدتهم كما اتفقوا معها.
سهام:تعالوا يا ولاد ازيكم،يعنى اذا متصلتش اقولكم تعالوا
متسألوش.
حسن:والله يا ماما كنت ناوى افوت على حضرتك انهارده. قبل ما على يقول كنت جاى بس حضرتك سبقتينا.
على:وبعدين يا ست الكل احنا نقدر نتاخر عليك،بس نعمل ايه الستات اللى اخترتيهم لينا هما اللى مغلبنا وشغلنا علطول بس مستحملنهم بس علشان شبهك يا ست الكل.
والده حسين:ايه ده اول مره اعرف ان راويه ولبنى حلوين كده زى ههههه.

على:هههه طبعا هما يجوا حاجه جنبك يا ست الكل

والده حسين:بس يا بكاش انت انتم تلاقوا فى ادبهم
واخلاقهم دول تربيه ايدى يا ولاد.

ربنا يسعدكم ويباركلكم فى ولادكم.
المهم مشفتوش حسين اخوكم.
حسن:لأ من اخر مره كنا هنا يوم الجمعه اللى فاتت
مشفنهوش.. ليه خير يا ماما،تعبان ولا حاجه.


والده حسين:لأ بعد الشر عليه، اصل انهارده سهام والبنات جم زارونى.
على:خير عايزه ايه ده كمان؟
حسن: اصبر يا على خلينا نفهم من ماما؟

والده حسين:يا ابنى انا عارفه ان سهام صعبه بس هى طيبه. وبتحافظ على اخوكم وام بناته والناس طباع. متقارنوهاش ب راويه ولبنى
على:والله يا ماما مش بنقارن،بس هى اللى واخده مننا موقف وفاكره ان خلفه الولد او البنت من شطاره حد،فى كل تجمع ترمى الكلمه ده لما الصراحه
احنا خلاص بقينا نخاف منها.
وكمان احنا عارفين ان السبب اللى خلى حسين يسيبه من الشراكه فى الوكاله انه عايز يبعد عننا علشان يترحم منها وحضرتك عارفه ان حسين كان زراع بابا اليمين وشارب الشغل اكتر مننا،ولما بنحتار مافيش غيره يلحقنا،حسين كان بالنسبه لينا هو ظهرنا بعد بابا الله يرحمه،لما قرر انه يخرج من الوكاله كان علشان يكسر جدار الزن بتاعها.فرقت بينا بسبب حقدها.
والده حسين:سيبت ايه لكلام الستات،وبعدين انا مش جيباكم علشان نحلل شخصيه سهام دلوقتى،المهم انت تعرفوا اخبار شغل اخوكم ايه.
حسن:لأ خالص انت عارفه اننا مش بنسأل يا ماما ليه بس فى ايه يا ست الكل طمنينى؟

والده حسين:مافيش يا حسن سهام بتقول ان اخوك خسر تلت فلوسه فى العماره اللى بناها ده وانه مزاجه وحش وتعبان وانا بصراحه خايفه عليه انتم عارفين صحته عامله ازاى والدكاتره محظرينه من الزعل والنكد بعد عمليه الدعامات الاخيره اللى عملها،خايفه عليه. الزعل يعمل فيه حاجه.
حسن:غريبه انا مشعرتش باى حاجه يوم الجمعه بالعكس كان كويس ومزاجه عادى،ولا ايه يا على انت شعرت بحاجه انت دائما اللى بتهزر وتتكلم معاه اكتر انت شعرت بحاجه؟

على:لا خالص يا حسن بالعكس ده مبسوط وكويس وبيقول ان الثلاثاء ريهام هتخلص امتحان عايز يسافر يغير جو ويفسحهم شويه ،علشان البنت اتشددت جامد فى الامتحانات.
والده حسين:عموما انا هروح اتغدى عنده بكره واشوف ايه الحال ما انت عارف حسين دائما يدارى زعله ووجعه لغايه مايقع ويارب يكون خير ومافيش حاجه.
حسن:ان شاء الله يا ماما واللى حضرتك شايفاه بعد كده نعمله من عنينا ده حسين اخونا الكبير وابونا كمان.
والده حسين:ربنا يخليكم على وش بعض يا ولاد.
حسن:اتفضلى قبل ما انسى يا ماما.
والده حسين:ايه ده يا حسن؟
حسن: ده حق ابتسام فى الربح بتاع الوكاله
علشان حضرتك تعطيه ليها،وده ظرف حضرتك يا ماما حقك يا ست الكل.
والده حسين:ربنا يباركلى فيكم يا رب ويعوضكم بالحلال دائما
على:بكره حضرتك هتروحى امتى علشان اجى اوصلك؟
والده حسين:ابعت السواق ومتشغلش نفسك
على: ،ازاى يا ست الكل .
والده حسين:على الساعه الثانيه هكون جاهزه يا على.
حسن:تصبحى على خير يا ماما تؤمرى بحاجه تانيه.؟
والده حسين:وانتم بالف خير يا ولاد ،لأ يا حبايبى متحرمش منكم ابدا
.
***فى المساء فى منزل حسين***
ريهام:ماما،هى رضوى هتيجى معايا بكره المدرسه علشان تخلص الاوراق بتاعتها وتجيب نتيجتها.

سهام:اه هتنزل معاك وترجع معاك برضوا معاك.

ريهام:تمام يا ماما تصبحى على خير.



***الفصل الرابع***
سهام:انت نمت خلاص؟

حسين:سهام انا تعبان وابعدى عنى خلى الليله تعدى بسلام.

سهام:هو انا قربتلك انا بس بسأل نمت ولا لسه، كنت هعملك كوبايه شاى ونتكلم شويه .
حسين:لأ شكرا مش عايز شاى او اى حاجه عايز انسى كل اللى اتقال بره وارتاح وانام.
سهام:اهو كل اللى اتقال بره ده بالذات لازم تفتكره دائما
يا راجل هو فى حد هيحب بناته زيك.
حسين:طب ما انت عارفه اهو ايه لازمه كل الكلام اللى اتقال. يا سهام ايه اللى حصلك من يوم ما الحاج توفى واتوزع الورث معدش فى على لسانك غير اكتب للبنات.
البنات ان شاء الله انا هجيب ليهم حته من السماء وهسعدهم اذا لى عمر متقلقيش عليهم
والله يا سهام مش الفلوس اللى بتسعد لكن الحياه الهاديه،الفلوس اهى موجوده فين السعاده بقالنا خمس ساعات بنتخانق ونزعل من بعض فين سعادتنا دلوقتى!!،اهدى يا سهام وخافى ربنا وخلينا نعيش حياتنا،هو انا خلاص هموت انهارده لسه ربنامأمرش والميعاد عند ربنا.

سهام:بعد الشر عليك با حبيبى، ربنا يطولنا فى عمرك احنا
نقدر نستغنى عنك،انا بس بقول لو كان عندنا ولد كنا ارتاحنا لكن انت خلفتك بنات ويا مخلف البنات ياشايل الهم للممات،يعنى لازم تأمنى انا والبنات.
حسين:مافيش فايده فيك ابدا يا سهام الخلفه لا منى ولا منك من اللى خلقنا وانا كاتب الشقه باسمك علشان ترتاحى غير كده كله بامر ربنا وسيبينى انام كفايه كلام يتعب اكتر من كده.

سهام:طيب نام براحتك وخليك فاكر انك ظالمنى انا والبنات.يا ابو البنات.


***
ريهام:صباح الخير يا بابا....
رضوى: صباح الخير يا بابا
حسين:صباح النور يا ريهام...
صباح النور يا رضوى....
انتم خلاص نازلين ؟
ريهام:ايوه انا اخر امتحان وارتاح بقى يا بابا
ورضوى هتكمل الاوراق بتاعتها وتجيب النتيجه كمان.
حسين:بالسلامه يا بنات خلوا بالكم من نفسكم وركزى ياريهام،انا منتظر مجموع كبير .
ريهام:حاضر يا بابا مع السلامه. بس خلى بالك من نفسك يا حبيبى.

حسين:بالسلامه يا بنات .


سهام:احضر ليك الفطار يا ابو البنات،علشان تلحق ميعاد السمسار وتشترى الارض.

حسين:انا مش عايز افطر واتصلت بالسمسار اجلت الميعاد للساعه ١٢ بعد الظهر. لان قلبى وجعنى وعايز ارتاح شويه.
سهام:طول ما انا زعلانه عمر قلبك ما هيرتاح.صحيح نسيت اقولك ان طنط هتيجى تتغدى معانا ابقى ارجع بدرى علشان منأخرش عليها الغذاء.
حسين:ان شاء الله.

سهام:اروح انا اشوف هحضر ايه للغداء
،بس اعمل عزومه ولا على الضيق علشان تصدق الظروف،بس لحسين يزعل.احسن حاجه اعمل صنفين بس وامسك العصايه من النصف.

ايه ده هو نايم خالص كده ليه ده انا لسه سايباه من ربع ساعه ملحقش ينام قوى كده.يكون تعبان بجد.
حسين ،حسين،انت نايم قوى كده ليه...........
حسين رد عليا يا حسين قوم بقى بلاش هزار،اطلبك دكتور .
حسين رد حسين ....... ايه ده هو بارد قوى كده ليه. يا خبر مافيش نفس. .. حسين حسين
اعمل ايه دلوقتى اعمل ايه. ؟؟
سهام:الو :عصام.
عصام:ايوه يا سهام خير فى ايه على الصبح كده.
سهام:تعال عندى بسرعه ومتقولش لحد خالص انك جاى عندى لان فى عندى مصيبه.

عصام:خير حسين فى حاجه؟
سهام:لما تيجى هقولك بس بسرعه.

**وصل عصام الى بيت اخته سهام **

عصام:فى ايه يا سهام قلقتينى فى ايه؟
سهام:ادخل واقفل وراك وتعال بسرعه.
بص حسين مش بيرد وبارد جدا شوف كده.
عصام:ايه ده حسين حسين ... ان لله وان اليه راجعون ..
البقاء لله يا سهام. ربنا يرحمه
سهام بهلع:وبعدين هعمل ايه دلوقتى؟
عصام:هنتصل بحسن وعلى وبعدها نشوف الاجراءات المطلوبه.

سهام:انت هتعمل ايه ؟
عصام: هتصل ب حسن وزى ما قلتلك.
سهام:لأ انتظر يا عصام
......... .........

***الفصل الخامس***
نظر عصام الى سهام نظره بها ذهول من تماسكها !!
عصام:انتظر ايه! فى ايه فى دماغك يا سهام؟
سهام:فى حد يعرف انك جاى دلوقتى؟
عصام:لأ ده ميعاد نزولى الشغل عادى.
سهام:تمام فى مشوار لازم نروحه حالا مافيش وقت.
عصام:مشوار ايه لازم افهم؟
سهام:هنروح البنك حالا.
عصام:ليه هو حسين عامل توكيل ليك عايزه تسحبى فلوس قبل اعلان الوفاه.
سهام: الحقيقه حسين سهلها عليا جدا وسحبهم انا عايزه اودعهم فى البنك قبل ما البنات وامه ما يجوا.
عصام:باسم البنات طبعا.

سهام:ليه هو انا مت! باسمى طبعا،لما اموت يبقوا يورثوه.ثوانى وهكون جاهزه علشان ننزل بسرعه.
والحمد لله انا كنت فاتحه حساب من فتره قريبه عصام:منتظرك هنا يا سهام



بعد دقائق..................
سهام:عصام تعالى لوسمحت.
عصام : ايوه جهزت خلاص. جبت الفلوس.
سهام: شيل الشنطه ده يا عصام.
عصام: ايه ده يا سهام. ؟؟
سهام: الفلوس.
عصام: ايه!!كام دول يا سهام؟
سهام: هقولك فى الطريق يلا بسرعه مافيش وقت مش عايزه البواب ياخد باله انى نزلت .




موظف البنك: حضرتك عايزه تودعى مبلغ اد ايه؟
سهام: ثلاث ملايين جنيه.
عصام: كام!!!!!!!!!!
موظف البنك: تمام يا فندم ثوانى هحول حضرتك غرفه المدير لان هناك إجراءات مع المبالغ الكبيره.
سهام: اكيد ومعايا اثبات بيع لتاكيد على سلامه المبلغ.
موظف البنك: اتفضلى يافندم.
سهام: امضى بسرعه يا عصام.
عصام: امضى على ايه؟
سهام عقد شراء الشقه اللى عايشه فيها مقابل ٣مليون جنيه.
عصام: انت جهزت ده كله امتى؟
سهام: امضى يا عصام ده وقته.



***
بعد ساعتين......فى المنزل.
سهام: الان وقت الحزن وتوديع ابو بناتى وعشره سنينى ،واجهشت سهام فى البكاء
عصام اتصل بحسن واخبره على المصيبه ده......


بعد ساعه كان على وحسن وابتسام ووالده حسين فى البيت وصراخ وذهول بين الاخوه،ايه اللى حصل؟ وازاى وامتى ،وبكاء حار من سهام ولوعه على فقدان السند والظهر والكلمه الحنونه الطيبه.


مر اسبوع على الوفاه
ووالده حسين مقيمه مع سهام والبنات ،ولا يجف لها دمعه ولا ينطق لسانها كلمه.
وبعدها قررت الرجوع الى منزلها ولكن قبل الذهاب طبطبت على سهام بحنيه وقالت: لا تحملى هم البنات انا واعمامهم موجودين اى حاجه محتجاها بلغينى وتركت لها ظرف بيه مبلغ من المال وذهبت الى بيتها.

سهام: اخيرا خلص الحصار،الله يرحمك يا حسين،طول عمرك محترم لغايه اخر نفس.

انشغلت سهام طوال الاسبوع بين المعزيين ووالده حسين واتقان الحزن على زوجها ولم تنتبه الى ريهام ورضوى وما يدور داخل نفوسهم من مشاعر متضاربة، هل الخلاف الذى حدث بين ابيهم ووالدتهم كان سبب الوفاه؟ وماذا لو؟ كانت ريهام تتذكر كلام والدها وتتذكر انه لايرغب ان ينساقوا وراء اى شئ بيه حقد او حزن لذا كانت ريهام تنفى لنفسها باستمرار أن هناك سبب للوفاه سوى انها اراده الله وميعاد مقدر من الخالق.وكانت لا تريد ان تتاثر رضوى تجاه والدتها.
يكفى شعور ريهام المتضارب تجاه والدتها.
وبعد خلو المنزل من الجده والمعزيين.
ذهبت ريهام الى والدتها بعد نوم رضوى لتتحدث معها ............
ريهام: ماما ممكن اتكلم معاك شويه.
سهام: خير يا ريهام؟
ريهام: الشنطه اللى كانت مع بابا اللى كان فيها فلوس راحت فين؟
سهام: شنطه ايه؟ معرفش حاجه عن الشنطه ده،انا مشفتهاش؟ انت اكيد متهيالك الشنطه بتاعه السفر اللى كانت فى الغرفه؟
ريهام: ايوه يا ماما.
سهام: ايوه جوه فوق الدولاب، ده شنطه فاضيه كان بابا لسه شاريها علشان كان حاجز لينا اسبوع فى الساحل ومكنش فى شنطه كبيره، لكن فلوس ايه ياريت كان فى فلوس،بس ابوك خسر كتير فى الشغل ومش فاضل غير مبلغ صغير فى البنك ولسه جدتك واعمامك هيكوشوا عليه.
ريهام: طب لو كده منين بابا كان هيشترى الارض اللى حضرتك طلبتى انه يكتبها باسمنا.
سهام: من اللى فى البنك.
انت هتحاسبينى يا ريهام ولا ايه!!!


*لم تستطع ريهام تصديق والدتها فلم يكن مجرد كلام مسموع فى حوار بين ابيها ووالدتها،ولكن كان حديث دار بينها وبين ابيها فى غرفته بعد المشادات اللى بينه وبين امها،فقد كانت ريهام قريبه جدا من والدها وكان دائما يشاركها نجاحاته فى مجال عمله وبالاخص بعد ان ترك العمل فى وكاله والده والاستقلال فى عمل حديث عنه على الرغم انه كان مهندس الا انه منذ تخرجه من الجامعه عمل مع والده فى الوكاله الا ان خرج من الشراكه بعد وفاه جدها عند تقسيم الميراث.

*** الفصل السادس***

بعد اربعين يوم من الوفاه واستمرار تردد المعزيين على بيت حسين وسهام
واستمرار وجود ابتسام اخت حسين، ولبنى ،وراويه زوجات على وحسن ووالده حسين.
فى نهايه هذا اليوم اجتمعوا الاخوه ووالدتهم مع سهام لمناقشه اجراءات الاعلام الشرعى وكيف سيستمر الحال بعد هذا التغير الذى طرأ عليهم.
وكانت ريهام تستمع الى الحديث ولاحظت حده والدتها فى الكلام مع اعمامها وجدتها ،ورفضت سهام وصايه حسن على ابنتى اخوه وهنا انهت الجده النقاش بالموافقه على كل ما تطلبه سهام بدون اى جدال .
وانتهت الجلسه بسلام وكل منهم دار فى حياته تاركا سهام وريهام ورضوى فى حياتهم دون تدخل منهم الا للسؤال والاطمئنان،وترك المزيد من المال لاستمرار الحياه.



******************************************
فى منزل الاسره اجتمع الاخوات حسن وعلى وابتسام مع والدتهم .
والده حسين: ايه يا ولاد هنعمل ايه مع البنات

حسن: قولى رايك ايه يا ماما.
والده حسين:بعد الاعلام الشرعى انا هتنازل للبنات عن اى نصيب لى وهكتبه باسمهم شهادات واسجلها فى المجلس الحسبى .
على: اللى حضرتك تقوليه هو الصح يا امى،واذا هناك نصيب لى سيرفق بنصيب حضرتك يا امى.
حسن:وانا ايضا.
ابتسام: وانا ايضا اذا لى حق فلابنتيه، فهما اولى منى به.
والده حسين: سنتسلم حقوقنا كامله بالاول ثم بعد وضعها فى شهادات بنكيه نسلمها فى المجلس ***************
مر شهر اخر وذهبوا الورثه لاستلام حقوقهم كما احق لهم بموجب الاعلام الشرعى
************
وبعدها ظلت سهام تردد ان اعمامهم وجدتها اخذوا اموال ابيهم و لم يراعوا وفاته وهو تارك فتيات مازالت صغيره تحتاج الكثير من المال .ولكن ما الجديد فقد ظلموه من قبل وهو عايش فهل سيعطوا بناته حقهم.

وظلت ريهام لاتقتنع فهى مازالت واثقه بان هناك اموال فى حقيبه تركها ابيها واخفتها والدتها ولكن لا تملك المواجهه مع والدتها ،ولكنها لاحظت استياء رضوى من اعمامها وجدتها ومقابلتهم مقابله جافه فى كل مره يأتين للزياره محملين الكثير من الخيرات بجانب مصروف شهرى من الجده اليهم.

**واخيرا تاكدت ريهام من مخاوفها ،بعد ما طلبت الام من ابنتبها الذهاب الى النوم فى وقت مبكر جدا،وبعد ان دخلوا الى غرفتهم رن جرس الباب وكان خالهم عصام.



سهام:اهلا يا عصام اتفضل.
عصام : ازيك يا سهام وازى البنات .
سهام: بقالك شهرين مجتش البيت ولا لازم اتصل بيك
عصام: ابدا والله بس انشغلت شويه.المهم اخباركم ايه
سهام: الحمد لله خلصنا إجراءات الميراث والمجلس الحسبى.
عصام: هو كان لسه فى ميراث
سهام : اه مبلغ صغير فى البنك وطبعا امه واخواته قسمونا فيه.
عصام: مقلتليش يا سهام المبلغ اللى كان فى البيت ده حسين كان ناوى يعمل بيه ايه؟
سهام: كان بيقول شايف ارض حلوه ومكسبها مضمون كان مخلص فيها وكان هيشتريها تانى يوم،بس القدر ماامهلهوش.
عصام:طب ما تيجى نلحقها احنا !
سهام:مش فاهمه؟
عصام:ما تيجى نشترى الارض ونشتغل احنا فى المشروع ده لحسابنا.
سهام: لحسابنا ازاى؟
عصام: ايه اللى ازاى،نشتريها انا وانت.
سهام:وانت هتشترى؟
عصام: تقصدى الفلوس؟اه معايا مبلغ هشارك فيه
وكمان متنسيش انك متقدريش تشتغلى باسمك اخواته هيعرفوا وساعتها هيعرفوا الفلوس ده دخلت البنك امتى وازاى وتاريخ الوفاه وساعه الوفاه وموال انت متقدريش عليه.
سهام: خلاص خليهم زى ما هما.
عصام: حرام ده القرش المركون حرام.
سهام: وانت هتدخل بكام؟
عصام: مليون.
سهام:مليون وانت من امتى معاك فلوس كده؟
عصام: انت ليك فيه!اتصرفت المهم موافقه!

سهام: ماشى ندور على ارض.
عصام : ندور ليه ما حسين كان دور ولاقى.
شوفى رقم السمسار على الموبايل وانا اكلمه.
سهام: ماشى انتظر كده.
عصام:هو حسين كان خلص على كام؟
سهام بسرعه بديه:٢مليون ونصف.
عصام: ماشى وعلى وشه ابتسامه كشف كذب سهام.


***************
سهام: خلصت يا عصام؟
عصام:اه بس بالعافيه على ٣مليون
سهام:خلاص ماشى منتظراك بليل.
**وفى المساء ذهب عصام الى سهام**
عصام: اخيرا خلصت الشراء
سهام: طب فين عقود الشراكه؟
عصام: هنعمل عقود ليه مع احنا مع بعض.
والكل عارف انى ده شغلى اللى كنت شغال فيه بره،وعارفين انى راجع ومعايا فلوس ،ايه لزمه العقود والشوشره.
سهام: بس كده انا مش معايا اللى يثبت حقى
عصام: وانا هكلك ده انا اخوكى انت مش مأمنه لى يا سهام ولا ايه؟
سهام: لا ابدا يا عصام.

****************
سهام انهت شهور الحداد وبدات بالخروج من المنزل
والذهاب الى والدتها بحجه الاطمئنان عليها نظرا لانها جليسه الفراش ولا تستطيع الحركه نهائى .
تستمر الزياره كل يوم بعد خروج البنات للمدرسه وترجع البيت قبل وصول البنات بقليل ولم يعلق احدا على هذا سوا والدتها.
والده سهام: ايه يا سهام كل يوم جايه ده انت مكنتيش بتعمليها وحسين موجود ،لازم تراعى ظروفك الان، انت ارمله وفى عز شبابك ومعاك بنات وكلام الناس كتير.
سهام: هو انا لما اجى ليك يا ماما يبقى كلام الناس، وبعدين ما انت لسه قايله فى عز شبابى يعنى مش لازم أدفن جنب حسين.
والده سهام: حسين.. الله يرحمه، كان بيجى لى كل اسبوع مرتين وكان دائما حنون عليا اكتر منكم انتم يا ولادى.
انا فقدت حسين وحزنت عليه زى حزنى يوم وفاه ابوكى.رحمه الله عليهم هما الاتنين.
سهام انا امك وعارفاك كويس،وعارفه ان ده حنيه مزيفه غرضها احمد جارنا،خطيبك الاولانى،اللى سيبتيه علشان فلوس حسين،وانت كنت عارفه انه مريض قلب وقالك كده فى الاول،وقبلت بفرق السن والظروف الصحيه علشان الفلوس.
ودلوقتى جايه ترجعى الحبيب،راعى بناتك وعيب عليك الراجل اللى شلتى اسمه.
الراجل اللى بعد شهر من زواجك جه عندى زياره وسألنى اذا كنت مرتبطه بشخص قبل زواجك منه ولا لأ.
وطبعا سالته ليه بتقول كده؟ صدمنى وقالى سهام مش معايا يا ماما سهام بتبقى جانبى وشاعر انها مع حد غيرى،ونكرت وقلتله ابدا ده اوهام وانا عارفه انه صح. وعارفه انك عمرك ما حبيت حسين.
ظلمتى نفسك وظلمتى حسين معاك.
سهام: ايه ده كله يا ماما،جايه تحكى لى كلام مر عليه ١٥ سنه
وبعدين انا لسه ٣٥سنه عايزه منى ايه افضل عايشه على ذكرى راجل لا حبيته ولا فرحت بيه .
انا ست يا ماما ليا مشاعر ومن حقى اتجوز تانى.
والده سهام: وهدخلى راجل غريب على بناتك؟
سهام:لا هتجوز بره!!
ثم،انت يعنى شفتينى اتجوزت خلاص.
والده سهام:والكلام اللى على السلم ده ايه كل يوم.
سهام: هو اللى بيوقفنى هو اللى نفسه.
والده سهام: اه يا ربى ارحمنى يارب.يا بنتى احمد لسه متجوزش وامه مش هترضى وهتخسرى اهل حسين.
سهام: كل الناس مش مهم.المهم اعيش.
************
وفى المساء، فى منزل والده سهام
والده احمد: ازيك يا ام سهام
والده سهام: منوره يا ام احمد شرفتينى.
والده احمد:مش عايزاك تزعلى منى يا ام سهام من اللى هقوله.،بس من ١٥ سنه لما سهام فسخت خطوبتها على احمد علشان ظروفه يومها قلت حقها،سهام صغيره وحلوه ولها حق فى اللى تتمناه،وفضلت ازورك ومافيش حاجه بعدتنا عن بعض.
والده سهام: فعلا يا ام احمد ده من اخلاقك ووسع تفكيرك.ايه اللى اتغير؟
والده احمد:اللى اتغير ان احمد نزل من الشغل ورجع تانى عايز يتجوز سهام بعد ما هى سمحتله وفتحت الباب،ومتزعليش منى ابنى متجوزش قبل كده ومن حقه يتزوج..
قاطعتها ام سهام:حقك وحقه يا ام احمد وانسى الكلام فى الموضوع ده خالص.
********************

والده سهام:الو سهام!
سهام: ايوه يا ماما
والده سهام: ام احمد كانت هنا ورافضه الموضوع انسى الموضوع ده يا سهام ومتجيش الايام ده لغايه ما احمد يسافر فاهمه.!
سهام: خلاص يا ماما.

***الفصل السابع***
بدأت حياه سهام تاخد شكل مختلف من طريقه لبس ومصاريف وعدم اهتمام كافى للبنات وخروج وفسح
وبدأت ريهام تستاء من تصرفات والدتها
على عكس رضوى اللى شعرت ان تغير والدتها اتاح لها فرصه للحريه اكتر وعدم الالتزام بالدراسه مثل قبل.

وظل يتردد عصام على بيت اخته سهام واعطاؤها جزء من الارباح كل فتره،وظلت ريهام تستمع الى خالها ووالدتها وتتذكر كلام والدها (من اخذ حق احد لن يبارك الله له).


وفى نهار احد الايام خرجت سهام من المنزل فى الصباح وكانت ريهام فى المنزل فى هذا اليوم.
ورن جرس الباب وكان هناك جواب باسم سهام جاء من البنك.
لم تستطيع ريهام ان تسيطر على نفسها ففتحت الجواب وكان بيه تفاصيل الحساب السنوى منذ يوم
فتح الحساب.
فقد كان فتح الحساب قبل وفاه والدها بشهرين
وتم ايداع مبلغ ٣مليون جنيه فى نفس تاريخ وفاه الاب. ثم سحب مبلغ ٢مليون جنيه بعد تلاته اشهر تقريبا فى نفس فتره الزيارات الغير معتاده من خالها ليلا بعد نومهم.ثم سحب مبلغ نصف مليون اخر بعد شهر أخر،ولم يتبقى فى حساب الام سوى نصف مليون جنيه فقط لاغير.
اذن والدتها تعمل بمال ابيها مع خالها عصام. وهو اكيد يعلم من اين المال؟وكيف حصلت عليه.
وازداد حقد ريهام على خالها عصام.

قررت ريهام الاحتفاظ بالجواب دون علم والدتها .
وايقنت بسرقه والدتها لهم ولأعمامها وجدتها واكثر ما اثر بها
كيف تركت والدها وذهبت الى البنك وهو فى هذه الحاله؟.
وهل كان توفى ام حدث شجار بينهم وسرقته وهو مازال على قيد الحياه؟
هل كان بالامكان انقاذ حياته وتركته حبا فى المال .؟
ماذا تفعل؟
تواجهه والدتها! ام تذهب لاعمامها وتقاضى والدتها؟لايمكن ان تفضح والدتها فهى امها مهما حدث.

ولكنها قررت الاندماج مع جدتها واعمامها كى تشعر بالامان معهم وتسترجع حنيه والدها بينهم.
وقررت انها سوف تقضى كل نهايه اسبوع عند جدتها،وطلبت من رضوى ان تاتى معها ولكنها كانت اندمجت مع والدتها وفى افكار والدتها التى غرستها بداخلها.
وعندما تسأل ريهام والدتها عن كيفيه حصولها على كل هذه الاموال كانت الاجابه:
سهام:خالكم عصام ربنا بخليه هو اللى بيسأل فينا
ومعوضنا امال ايه؟هما دول الاخوات اللى بحق.


وفعلا اصبحت راحه ريهام فى يومى الخميس والجمعه الكلمه الحلوه والحنيه والاكله الحلوه بس فى بيت جدتها،وكانوا اعمامها فرحين بيها وبوجودها وكانوا دائمى السؤال عن رضوى ورغبتهم فى اندماجها معهم ولكن لا امل فى تحقيق املهم.
كانت ريهام جميله الشكل والقلب فقد كانت حق الابنه العاقله والمهذبه كما تمنى ابيها واستمر الحال هكذا.
الى ان فوجئت ريهام ورضوى يوما بدخول والدتهم عليهم لاخبارهم بانها قررت الزواج.

ذعرت رضوى واستنكرت كيف؟
ولكن لم تستغرب ريهام بل انتظرت هذا اليوم فقد علمت ان والدتها لم تحب والدها يوما ولم تراعيه يوما .
سالت ريهام ببرود : اين ستقيمين بعد زواجك؟
سهام:هنا
ريهام : ماما ممكن تاجرى شقه تانيه بلاش هنا يا ماما.
سهام: لأ مينفعش انا مش حمل مصاريف تانيه
ريهام: وانا هسيب البيت يا امى ،انا هعيش عند تيته
سهام: لأ هتفضلى هنا
ريهام:لن اعيش مع زوجك فى ببت واحد ،قرار نهائى.

تركتها سهام باقى اليوم وهى تفكر وتتحدث مع شخص اخر بالتليفون.
واخيرا فى الصباح ندهت على ابنتيها. ..
سهام: ريهام ،رضوى
ريهام: نعم
رضوى: نعم
سهام: انا هتجوز فى شقه تانيه هجيلكم كل يوم شويه.
بكت رضوى بكاء شديد.
على عكس ريهام الذى اشارت اليها برأسها فقط ورجعت الى غرفتها فى صمت تام.

ولكن حدث ما لم يتوقعه احد ابدا....
****************

****الفصل الثامن****

عندما قررت سهام وعصام العمل فى نفس نشاط حسين.
تواصل عصام مع السمسار واشترى الارض ودفعت سهام فى تلك الفتره ٢مليون جنيه وعصام مليون ثم تقاسموا فى البناء بنفس النسبه الثلث لعصام والثلثى لسهام.
لكن كل الاتفاق ودى.
وكانت زوجه عصام وابناءه يعلمون ان هذا عمل والدهم من مدخرات الذى وفرها من سفره للخارج سنوات ولم يعلم احد بان له شريك.
واخيرا انهى عصام البناء المكون من اثنى عشر دور .
**وفى هذا الصباح كان فى المبنى مع المشرفين على البناء لمتابعه العمل واذا به فجاءه يقع من الطابق الاخير ليلفظ آخر أنفاسه فى الحال.


**استيقظت سهام على هذا الخبر وهى مصدومه وفى حاله هلع كيف ؟ امتى؟ قال حاجه؟لأ لأ ازاى مش ممكن.
انهارت سهام اكتر من انهيارها يوم وفاه زوجها حسين.
اليوم بكت ريهام على والدها بكاء حار لم تبكيه من قبل فتذكرت قوله(خليك فاكره اللى بياخد حق مش حقه ربنا هينتقم منه ولن يبارك له ابدا،واللى اتاخد منه حق ربنا هيراضيه ويعوضه)
الحمد لله،الحمدلله،صدقت يا بابا.


وانتقم الله من خالى عصام ومن امى ولم تاخذ شيئا.
ويشاء الله ان خالى انجب ذكور وجدتى تركت حقها .

بعد ثلاثه ايام من الوفاه ذهبت امى لبيت خالى لتواجهه زوجته انها شريكه .
فقالت لها قدمى ما يثبت حقك.

انهارت امى ولم تستطيع فعل اى شئ، فكيف ستخبرهم انها شريكه ومن اين جاء المال؟

والذى زاد اكتر عليها ان من اراد الزواج بها تركها بعد ان علم انها لم تملك شيئا الان فهو كان يعلم انها شريكه مع خالى عصام




***********
ومر عام اخر وجاءت نتيجه الثانويه العامه
وكانت ريهام من اوائل المحافظه فى الثانويه العامه
فرح اعمامها جدا وجدتها وعمتها ابتسام
واقاموا حفل كبير لها ،لم تحضره سهام ورضوى
وفى نهايه اليوم،سالها اعمامها.
حسن: ناويه على ايه يا حبيتى اكيد طب.
على:طب ايه حرام خليكى صيدله.
ابتسام:لأ اسنان برضوا حلوه للبنات.
حسن:لأ طب مع محمد ابنى وهو هيساعدها فى اى حاجه ما هو اكبر بثلاث سنوات.
ام حسين:ايه ده هو مين اللى ذاكر واتفوق انتم ولا هى،سيبوها تختار اللى هى عايزاه.
ريهام:جايز لو سالتونى هتدخلى ايه من سنه كنت قلت طب فعلا،والحقيقه محمد شجعنى كتير.
بس اسمحولى بدون زعل انا قررت ادخل حقوق.
جميعهم ،،،،حقوق!!!!!!!
ريهام:عايزه اشتغل فى النيابه واحكم بين الناس بالعدل.
حسن:بس ده شغل رجاله
ام حسين: سيبوها تختار اللى ترتاح له،بس يا ريهام هقولك نصيحه صلى صلاه استخاره قبل القرار.



**فى المساء وهى فى حضن جدتها قالت لها جدتها.
ام حسين:انا عارفه يا ريهام انك عايزه تدخلى حقوق علشان تعطى لكل ذى حق حقه.
فاكره تانى مره جيتى تباتى عندى وحكيتى لى موضوع والدتك والفلوس.
ريهام:ايوه يا تيته
والده حسين:يومها انت ارتاحتى شويه وانا قلت ليك اوعى تقولى لحد.
وفضلت انا من يومها ادعوا ربنا يرجع الحقوق لأصحابها.
ولما والدتك خسرت الفلوس بعد وفاه خالك.
جيت فى حضنى وقلت انهارده بابا ارتاح يا تيته.
اتاكدت يومها ان ربنا ورثنى من حسين حته منه .انت يا ريهام.
ودعيت ربنا يوفقك ويرضيك.
بس انت قلت وحكيت حاجه وسالتك يومها بابا قالك ايه قلتى(ان اللى بياخد حق مش حقه ربنا بينتقم منه )وساعتها سالتك وايه كمان؟(كملت وقلتى واللى اتاخد منه حق ربنا بيعوضه )
قلتلك صح وسكت.
لكن من تلات سنوات بعد وفاه حسين.
اجتمعت مع اعمامك وعمتك وسالتهم هنعمل ايه واتفقنا اننا هنسيب حقنا ليكم .
لكن واحنا فى البنك بنستلم المبالغ المخصصه لكل واحد ،وكنا متفقين اننا فى نفس اللحظه هنشترى بيهم شهادات ليكم.
فوجئت بحسن بيقول يلا يا ماما واخد الفلوس ورفض شراء الشهادات.
نظرنا اليه جميعا باستغراب.
ورجعنا البيت.
حسن: الفلوس اهى يا ماما
ام حسين: ليه مشيت قبل ما نكتبهم باسم البنات.
حسن:لأ يا ماما انا مش مرتاح.
وكمان انا امامى انا وعلى مشروع كبير هندخل بيه وهندخل فلوس البنات فيه.
الفلوس فى البنك قيمتها بتقل والبنات بكره يكبروا وبحتاجوا فلوس كتير.
وفعلا عمل عقود ومن شهر فقط خلص المشروع واصبح حقكم فى مال ابوكم ٣مليون جنيه.
وبالامس اشترى اعمامك ارض ليك انت واختك بقيمه الفلوس وده العقد.
عرفتى ازاى ربنا بيعوض الى اتاخد منه حق.
**بكت ريهام فى حضن جدتها **
وقالت لها بابا كان صح دائما يا تيته.
انا بحبكم قوى.
والده حسين:،ريهام صلى سيبى امرك على ربنا وادخلى الكليه اللى نفسك فيها بحق.
ماتشيليش هموم الدنيا على راسك وتمنعى نفسك من حلمك اللى كنت دائما تقوليه .


************************
فى مكتب التنسيق قدمت ريهام اوراقها فى كليه الطب وكان محمد ابن عمها يرافقها فى كل خطوه .
فقد نشاء ببنهما شعور لم يصارح بيه احد منهم،ظل كل منهما يشعر بمشاعر داخله دون محاوله التلميح للاخر.
*************************
وكانت والده حسين تشعر بذلك الشعور
وفى يوم طلبت محمد ابن حسن : محمد منتظراك.
محمد: حاضر يا تيته ساعه واكون عند حضرتك.
والده حسين:كبرت يا محمد فاضل سنه وتتخرج وتبقى دكتور اد الدنيا.
محمد: ان شاء الله يا تيته
والده حسين:يبقى لازم تخطب اول ما تتخرج ان شاء الله
محمد: مش عارف يا تيته
والده حسين: لو مش عايز بلاش بس الصراحه عندى عروسه حلوه
محمد:مين يا تيته
والده حسين: ليه انت عايز تخطب.
محمد : بصراحه انا عايز. .....اه
والده حسين: عايز ايه انطق.
محمد : عايز اخطب ريهام.
والده حسين: طب ما انا عارفه ما انت باين عليك من سنه،هو حد قالك انى جاهله.
محمد :بجد يا تيته.
والده حسين: ما هى ده العروسه.
عموما خلص السنه ده وان شاء الله اخطبها ليك.
محمد:حبيبتى يا تيته وحضنها حضن قوى جدا.
والده حسين: كفايه بوس واحضان هموت،فكرتنى بابوك.ههههههه
**********************


***الفصل التاسع ***
مر عام اخر ونجحت رضوى فى الثانويه بمجموع يسمح لها بدخول كليه الهندسه.
وحاولت الجده والاعمام باقامه حفله لها مماثله باختها ولكنها رفضت .
فما كان منهم الا ان باركوا لها بمبلغ مالى مجمع منهم جميعا .

******************
وكان كل ما يشغل سهام كيف ترجع المال من ابناء اخوها
فلم تجد سوى ان تشجع رضوى على الارتباط ب حسام ابن خالها عصام.
لانه ورث مبلغ مالى محترم من ابيه.
ومع الايام اقتنعت رضوى براى والدتها.
وقررت دخول نفس الجامعه اللى فيها حسام.
*******************************؟؟؟*؟*



ريهام: يا رضوى ادخلى الكليه لنفسك وبلاش تمشى ورا دماغ ماما.
رضوى: والنبى يا ريهام كفايه مثاليه،اخدت ايه من المثاليه.
ريهام: فين المثاليه فى اللى قلته،انا بقولك حبى نفسك اذا سمعت كلام ماما وحاولت تقربى من حسام علشان تتجوزيه واصلا انت مش بتحبيه يبقى بتكرهى نفسك وبتتعاملى وكانك سلعه للشراء.
ماتبيعيش نفسك يا رضوى،بكره تبقى مهندسه وليك مركز كويس وده اللى هيكبرك ولو على الفلوس شغلك بكره يجيب فلوس كويسه .
رضوى: يا هنا من يعيش.
انت عارفه نصيب حسام كام ؟
ريهام: معرفش ومش عايزه اعرف.
رضوى: مش بقولك مش عايشه فى الدنيا.




*دخلت رضوى كليه هندسه
حسام: ايه ده ازيك يارضوى انت هنا ليه
رضوى: الاسم ولاد خال ومافيش سؤال خالص.
يا ابنى انا دخلت كليه هندسه واهو ده اول اسبوع ليا فيها.
حسام: كويس ربنا يوفقك انا كنت عند تيته الاسبوع اللى فات ومقلتليش انك دخلت معايا هنا فى الكليه
رضوى: اصلى مشفتش تيته بقالى ٥شهور.
حسام: وزعلانه انى معرفش اذا كنت اصلا مرحتيش لتيته تسالى عليها ولا كمان عمتى راحت على فكره،لان تيته اشتكت لى منك انت وعمتى.
انا دائما بقابل ريهام هناك.
رضوى: ريهام بتروح لتيته؟
حسام: ريهام هى اللى ملتزمه مع تيته علطول.
وهى اللى بتابع علاجها وهى جابت لها واحده مقيمه
علشان انت عارفه ظروف تيته.
رضوى: انا اول مره اعرف،وانت بتقابل ريهام هناك من زمان.
حسام: بقالنا اكتر من سنه تقريبا بس مش كل مره بنصادف مره او اتنين فى الاسبوع.
رضوى: طنط الهام مامتك بتكون معاك.
حسام: ماما بتروح يوم اه ويوم لأ، وانا بروح اليوم اللى ماما مش بتروحه.
رضوى: طب تمام انت رايح امتى وانا اقابلك هناك.
حسام: رايح بكره.
رضوى: امتى؟
حسام: بعد الكليه على الساعه ٢ تقريبا.
رضوى: خلاص هروح معاك.
حسام: اتفقنا.

****************************************

رضوى: بصوت حاد ريهام
ريهام: ايوه يا رضوى ازيك
رضوى:كويسه قوى!!
طب كنت قلتى،كنت مفكرتش حتى لكن طريقه المثاليه الكذابه ده مش لايقه عليك.
ريهام: اقول ايه وفى ايه وبتتكلمى كده ليه اصلا.
رضوى: انت من امتى وانت بتروحى لتيته ام سهام؟
ريهام:من اكتر من سنه ،ليه السؤال؟
رضوى : عمرك ما قلتى كنت جيت معاك.
ريهام:طب انا راحه بكره تعالى.
رضوى:لأ انا اللى راحه بكره خليكى مرتاحه.
ريهام:رضوى اتكلمى كويس،مين اصلا اللى قالك انى بروح.
رضوى: الحبيب المنتظر.
ريهام:ايه مش فاهمه
رضوى: اللى بتحومى عليه وخفتى اخطفه منك
ريهام: انت قليله الادب فعلا.
وارتفعت الاصوات.

سهام: ايه ايه فى ايه يا بنات بتتخانقوا ليه ده اول مره تحصل.
رضوى: تعالى يا ماما شوفى بنتك الكبيره المحترمه
بتكذب علينا وتتدعى المثاليه وهى عماله تحوم حوالين حسام.
علشان كده لاقيتها بتقولى بلاش حسام وبلاش تبيعى نفسك.
اتريها خلاص لفته.
سهام: بجد؟
كويس يعنى هيجى يتجوزك يا ريهام،ايوه كده طمنتينى.
رضوى: وانا يا ماما !!!
سهام:انت او اهى اللى توصل
ريهام: ايه القرف ده ،انا عمرى ما فكرت فى حسام.
ولا هو اصلا فكر،
سهام: طب ايه معنى الكلام ده؟
رضوى: يا ماما انا قابلت حسام انهارده وعرفت منه انه بيقابل ريهام مرتين تلاته فى الاسبوع عند تيته وانها بتابع حالتها الصحيه واستغرب انى مش بروح عندها.وانى مقصره،قلتله هروح معاه من بكره.
ولما جيت اسال ريهام، برضوا قالت راحه بكره ،يبقى ايه غير انها متفقه معاه.
ريهام: انا دائما بروح فى ايام اللى بخلص فيها بدرى وده جدول محضراتى والسكاشن بتاعى،ماليش علاقه بحسام خالص.
عمرى ما فكرت فيه ولا هفكر اصلا،ثم عايزه اسالك سؤال يا رضوى اذا كنت مرتبطه بيه كان عندك استعداد تاخديه علشان فلوس حتى لو انا بحبه.
رضوى: هو انت بتحبيه؟
ريهام : افرضى!!
رضوى: لأ مش هفرض بتحبيه ولا لأ.
ريهام: اه بحبه.
رضوى: ليه كذبت عليا وانت عارفه انى دخلت الجامعه علشان اقابله.
ريهام: انت بتحبيه يا رضوى
رضوى: كنت هيات نفسى
ريهام: انا عمرى ما حبيت حسام ولا ارتبطت بيه.
واذا فى يوم حبيت واحد انت كنت بتحبيه عمرى ما هرتبط بيه يا رضوى علشان نفضل مع بعض طول عمرنا اخوات .
مافيش حاجه تعوض الاخوات.
سهام: افهم بقى مين فيكم اللى هتتجوز حسام.
نظرت رضوى ل ريهام وضحكوا ضحكه حسره على والدتهم.
وفى نفس واحد: مافيش حد.
سهام: نهاركم اسود.
****الفصل العاشر****
بعد كلام ريهام لرضوى اتحولت رضوى مره اخرى فى اتجاه ريهام.
واستنكرت كلام مامتها.
وبدأت رضوى حياه جديده بنظره ريهام.


واستمرت ريهام ورضوى يتناوبوا على زياره جدتهم.
ويتلاقوا مع حسام بالصدفه .

بعد الكلام اللى دار بين رضوى وريهام تحولت رضوى ١٨٠ درجه واصبحت رضوى بتاعه زمان ،قبل ما سهام تحاول شحنها فى اتجاه المال واكتنازه.
ومر عامين على هذا الحال

ولم تيأس سهام من رضوى وحثها على وقوع حسام فى شباكها،لكن للاسف كانت رضوى حبت حسام فعلا
لكنها خايفه تصارح ريهام بشعورها تجاه حسام خوفا انها تفتكرها مازلت على مبدا والدتها.



حسام: ماما عايز اكلمك فى حاجه.
الهام(والده حسام): ايوه يا حسام
حسام: انا بحب يا ماما
الهام: وياترى مين اللى حركت قلبك يا حبيبى
حسام: رضوى بنت عمتى سهام.
الهام: لأ
حسام: ليه بس يا ماما
الهام: اكفى القدره على فومها تطلع البنت لامها.
حسام: يا ماما رضوى وريهام غير عمتى خالص
الهام: لأ يعنى لأ مافيش كلام.
حسام: يا ماما انا بحبها ومعرفش اصلا هى هتوافق ولا لأ وخايف اسألها وتوافق والاقى رفضك ده يا امى،ارجوكى وافقى يا امى.
الهام: واذا هى رفضت؟
حسام: خلاص يبقى حقها لكن الرفض منك هفضل طول عمرى اشعر انك رفضتى سعادتى.
الهام: طب هى فيها ايه خلاك تحبها.
حسام: رضوى انسانه مهذبه وشاطره ومتنسيش هى وريهام تعبوا ازاى بعد وفاه عمو حسين علشان يكملوا ويتفوقوا على الرغم من اهمال عمتى عنهم.
الهام: عمتك انسانه وحشه
حسام: لنفسها واذا عن الكلام اللى قالته ايام وفاه بابا
بلاش نتكلم فيه يا ماما.

***الفصل الحادى عشر***
لم ييأس حسام من والدته كى توافق على ارتباطه من رضوى .
الهام واخيرا جاء الوقت المناسب كى ارتاح من هذه المسؤليه.

الهام: حسام عايزاك فى موضوع.
حسام: اؤمرى يا ماما.
الهام: حسام فى حاجه انا عرفتها بعد وفاه والدك وانتظرت انك تكبر وتفهم واقولك عليها.
والحاجه ده هى سبب كرهى فى عمتك.
حسام: خير يا امى
الهام: لما رجعنا من السفر زمان كان كل اللى بابا حوشه مليون جنيه.
وكنا عايشين انا وهو على راتبنا فقط وادخرنا الفلوس ده علشانك انت واختك لما تكبروا.
وفى يوم عمتك اتصلت بابوك بدرى جدا بصيت على التليفون لاقيت رقمها اعطيت التليفون لابوك يرد عليها،طلبت منه انه يروح ليها بسرعه وانه ميقولش حاجه لحد،بس انا سمعت لان التليفون كان صوته عالى.المهم بابا راح وبعد خمس ساعات بلغونا بوفاه عمك حسين.
حسام: ايوه انا افتكرت اليوم ده.
الهام: لغايه هنا عادى، الغريب انهم قالوا انه كان نايم ولسه شعرين حالا وابلغوهم حالا.
بس الحقيقه استغربت طب ازاى عصام راح عند سهام ومشعروش.المهم بعدها عرفت ان عصام قرر انه يشترى قطعه ارض ويبنى عليها xxxx.
طب منين المليون مش هيقضوا ،سألته قالى معايا شريك.مين مرضاش يقول ابدا.
وقبل ما يموت بشهرين وشفت ان المشروع ده تكلفته كبيره غضبت وقلتله انى هجيب العائله واقولهم انى شاكه فيه.
ساعتها قالى الحقيقه كلها وعرفت ان سهام دخلت بنسبه التلتين وعصام التلت.
قلتله طب ليه اخفيت على الكل.
مرضاش يقول وفضل يراوغ واخيرا عرفت ان سهام لما نادت ابوك كان عمك حسين لسه ميت حالا،
وقررت فى لحظه انها تاخد شنطه الفلوس وتحطها فى البنك باسمها قبل اعلان الوفاه.
وابوك اتحط فى الموقف ووافقها دون الخوف من ربنا او انه يوجهها للصح او للخطأ.
المهم اتخانقت انا وابوك وقلتله ازاى تقبل تشارك فى حاجه حرام واتفقنا انه هيخلص الشراكه ويرجع الفلوس بارباحها لاصحابها البنات وسهام واهل حسين.
بس القدر ما امهلش ابوك للاسف.
ومات فجاءه بس كتب ورقه اثبات حق انه له التلت فقط والباقى نصيب حسين وينتقل للورثه.
بعد الوفاه روحت لجدتك ام سهام وقلتلها اللى حصل اتنزلت عن حقها فى نصيب ابوك كامل وقالت يا بنتى رجعى الحق زى ما اتفقت مع عصام خليه يرتاح فى نومته.
بس للاسف انتم كنتم لسه تحت السن واخيرا اختك كملت ال٢١ سنه وانت كملت قبلها
علشان كده رفضت انك تاخد حاجه من فلوسك نهائى لغايه ما ارجع الحسابات تانى.
عرفت ليه كرهت سهام ولما طلبت فلوسها، سالتها عندك اثبات.
كان نفسى تتكلم وتقول ايوه كنت قدرت اطلع ورقه ابوك واقدمها فى المجلس الحسبى.
بس هى خافت،واللى هى كده اكيد علمت بناتها كده
وخلت رضوى تحوم عليك علشان تاخد حقها.
حسام: رضوى وريهام غير يا ماما.
دول تربيه عمو حسين.
بس بعد الكلام ده ما فيش اى كلام لغايه ما كل واحد يرجعله حقه.
*****الفصل الثانى عشر*******
استلم حسام واخته ميراثهم بعد تحريره من المجلس الحسبى.
وتوجهت الهام مع حسام الى بيت والده حسين بعد تحديد ميعاد.
والده حسين: اهلا اهلا يا الهام يا بنتى مشفتكيش من زمان.
الهام: اهلا بحضرتك يا طنط ده حسام ابنى
والده حسين: عارفاه طبعا
ازيك يا حسام.
حسام: الحمد لله يا تيته.
الهام: انا عايزه اكلم حضرتك فى حاجه المفروض كنت جيت من سنين بس اللى اخرنى ان مكنش معايا حاجه انفذ بيها كلامى.
الهام: قبل وفاه المهندس حسين الله يرحمه كان اتفق مع عصام على شراكه فى مشروع ومكنش فى اوراق ولما حصل الوفاه مقدرش يرجع الفلوس ولا يعمل حاجه .
بس عصام كان كاتب ورقه باحقيه المهندس حسين بتلتين المشروع. وده الورقه اللى تثبت.
واحنا انهارده حررنا التركه واصبح واجب التقسيم الآن.
ممكن نحدد ميعاد بكره للتقسيم.
والده حسين: كان ممكن متقوليش حاجه خالص يا الهام بس امانتك ومعدنك الطيب جعلك ترجعى الحقوق لاصحابها.
وكمان تربيتك لولادك اللى ممكن يعترضوا تخلينى اقدرك اكتر يا بنتى.
ان شاء الله بكره هنكون فى انتظارك انت وحسام الساعه ١٢ ظهرا مع المحامى .
ممكن نكون فى البنك لانهاء كافه الإجراءات سريعا.
حاضر يا بنتى.

******النهايه*****

فى منزل الاسره ،تجتمعت والده حسين مع ابنائها
وأخبرتهم بما عرفته من ريهام منذ سنوات.
وانها لم تكن تنوى اخبارهم بيه .
حسن: وليه قلتى انهارده يا امى.
على: ازاى متقوليش احنا لازم نرجع للبنات حقها
حتى اذا لزم الامر بحبس سهام.
ده حقوق يا امى.
والده حسين: اللى وقفنى كلمه اخوكم حسين قالها لريهام قبل وفاته.
قال لها ان ربنا لن يبارك لاحد اخذ حق ليس له.
وسيعوض من فقد حقه من عنده.
واتاكدت بعد ما جيت انت وحسن تقولوا ان المشروع كسب واصبح نصيب رضوى وريهام ٣مليون جنيه.
لكن ربنا الحق ما يروحش ابدا من عنده،انهارده حصل مالم اتوقعه.
وسردت والده حسين ما قالته الهام اليوم .
وانهت الكلام ان يجوز الهام لاتعلم حقيقه سهام.
ويجوز انها لا تريد الاساءه الى عصام.
ولكن الاكيد انها فوقت عصام قبل وفاته علشان كده ترك ورقه تفيد بان تلتى المشروع ملك حسين .
وطلبت مننا نتقابل بكره فى البنك لنقل الاموال لحساب كل وريث.
علشان كده بطلب منكم اغلاق اى كلمه عن هذا الامر حفاظا على مشاعر رضوى وريهام.
وللعلم رضوى لا تعلم شيئا.
*****
بعد ايام ذهبت ام حسين الى منزل سهام.
سهام:طنط اهلا وسهلا شرفتى
ام حسين: اهلا يا سهام
انا مجتش من زمان هنا
سهام: ايوه يا طنط وحشتينا والله.
ام حسين: فين البنات.
سهام: حالا جايين،يا رضوى .. يا ريهام تعالوا تيته هنا.
ريهام مسرعه: تيته انت كويسه ازيك وحشتينى خير.
رضوى: اهلا يا تيته نورتى
والده حسين:ازيكم يا بنات وحشتونى.
***يا سهام فاكره زيارتك لى من خمس سنوات قبل وفاه حسين !
سهام: طبعا يا طنط.
والده حسين: يومها انت قلت ان حسين خسر فلوسه ومش فاضل غير مليون جنيه فقط فاكره.
سهام: ايوه يا طنط وهما اللى اتوزعوا بعدها علينا.
والده حسين: اصل حسين مكنش خسر ولا حاجه لأ بالعكس ده كسب واصبح معاه ٣مليون جنيه غير المليون اللى فى البنك.
سهام: وشها جاب الوان.
ريهام: خافت ان جدتها تقول السر.
سكتت سهام خالص بس الجده لاحظت خوفها.
وكملت حسين اعطى الفلوس ل عصام اخوك يشاركه فيها وعصام كان آمين ،بس مكنش قالك اكيد المهم ربنا قدره وكتب الحقوق فى ورقه وسلمها لزوجته وامبارح كنا فى البنك جميعا ورجعت لحسين حقه كامل .
ودخل فى نصيب كل وارث من حسين حقه.
مش كده وبس لأ كمان النصيب اللى اخدناه من حسين اعمام البنات كبروه واشتروا قطعه ارض باسم البنتين تمنها ٣مليون جنيه .
وكده اتوزع الحق لأصحابه وربنا اعطى لكل انسان على اد نيته.
مبروك عليكم رجوع حقكم يا بنات .
اسيبكم بقى يا بنات علشان ورايا حاجات كتير اخر الاسبوع .

******************************************صحيح قبل ما انسى يا ريهام انت ورضوى انزلوا بكره اشتروا احلى فساتين خطوبه لاحلى عروستين
شبكتكم يوم الخميس عندى فى البيت ريهام على محمد ابن عمك.
ورضوى على حسام ابن خالك.
نسيت اقولك انه طلب ايدك منى انا واعمامك.
مش قلتلكم انا اللى هجوزكم.
ولا فى اعتراض يا سهام.
سكتت سهام نهائى عن الكلام.
وفهمت ريهام ان جدتها فضلت عدم فضح والدتها امام اى فرض ولا حتى رضوى.
وقبل ما الجده تخرج من البيت التفت الى البنات وقالت لهم.
افتكروا يا بنات ان الميراث مش بس فلوس الميراث هى الأخلاق والصفات .
اختاروا ورثكم من اهلكم اورثوا الدين والاخلاق متورثوش الفلوس بس.
*************************************** اندمجت الدموع مع الفرح على وجوه رضوى وريهام.



بعد سته أشهر
احتفلت الجده والاعمام والعمه والهام وام سهام باحلى فرح تم واحلى ليله زفاف لاحلى اختين




**********تم***********

[قصص من وحي الاعضاء]

اهلاً وسهلاً بك بيننا في منتدى قصص من وحي الأعضاء ان شاء الله تجدين مايرضيك موفقة بإذن الله تعالى ...

للضرورة ارجو منكِ التفضل هنا لمعرفة قوانين المنتدى والتقيد بها
https://www.rewity.com/forum/t285382.html

كما ارجو منك التنبيه عندما تقومين بتنزيل الفصول على هذا الرابط
https://www.rewity.com/forum/t313401.html

رابط لطرح اي استفسار او ملاحظات لديك
https://www.rewity.com/forum/t6466.html



واي موضوع له علاقة بروايتك يمكنك ارسال رسالة خاصة لاحدى المشرفات ...
(rontii ، um soso ، كاردينيا73, rola2065 ، رغيدا ، **منى لطيفي (نصر الدين )** ، ebti )



اشراف وحي الاعضاء

[um soso]

الف مبروك اول خطواتك معنا

كنت اتمنى ان تنزلي على شكل فصول يتابعها معك القراء بدل ان تنزليها كامله

الروايه جميله ولها عبره ورساله

وان الله لاينسى عباده الصالحون

ان شاء الله نترقب قريبا لك جديد

بالتوفيق

[جيهان سرور]

اشكرك على رأيك فى الروايه.
والحقيقه هى اول تجربه لى فى المنتدى وفى الكتابه بوجه عام.
واعتقدت انها تشكل قصه قصيره وليست روايه ولذلك نزلتها مكتمله..
واذا هناك اى نصيحه ارجو ارسالها لى فى اى وقت،سوا فى الاسلوب او السياق اى توجيه،وشكرا لاهتمامكم

[um soso]

المشاركة الأصلية كتبت بواسطة جيهان سرور

اشكرك على رأيك فى الروايه.
والحقيقه هى اول تجربه لى فى المنتدى وفى الكتابه بوجه عام.
واعتقدت انها تشكل قصه قصيره وليست روايه ولذلك نزلتها مكتمله..
واذا هناك اى نصيحه ارجو ارسالها لى فى اى وقت،سوا فى الاسلوب او السياق اى توجيه،وشكرا لاهتمامكم

بما انها فصول اقل من 10 سنعتبرها نوفيلا

لكن بالمستقبل انتبهي على طول الفصل لان يوجد قانون خاص به

اسلوبك جميل وسلس فقط انتبهي للاغلاط المطبعيه



درس تعليمي مني هديه لجدد

عندما تردي على تعليق اضغطي




حتى يطلع لك التعليق فوق وبعدها اكتبي ردك

مثل ردي هذا

بالتوفيق وبانتظار جديدك

[جيهان سرور]

مش عارفه انا كده ضغطت على رد باقتباس ولا لأ، اعذرينى.
ممكن اعرف قانون الفصول ايه؟
واذا كنت رديت برد واقتباس صح،ممكن توضيحلى اذا صح ام خطأ.

[um soso]

المشاركة الأصلية كتبت بواسطة جيهان سرور

مش عارفه انا كده ضغطت على رد باقتباس ولا لأ، اعذرينى.
ممكن اعرف قانون الفصول ايه؟
واذا كنت رديت برد واقتباس صح،ممكن توضيحلى اذا صح ام خطأ.

جواب اولا : لا ما ضغطي على رد باقتباس
عندما تضغطي ستتغير الصفحه وتظهر لك صفحه فيها صندوق الرسائل موجود فيه تعليقي ... تكتبي نحته الرد مثل هذا الشكل


نظام الفصول عادي خذي لفه على روايات القسم

عندك روايه تفتحي موضوع وتنزلي بالقدمه والفصل الاول ثم تقرري

اما فصل يوميا او بين يوم ويوم او فصل اسبوعي او مرتين بالاسبوع

براحتك انتي حسب الوقت اللي يناسبك

اهم شي الفصل يكون بطول مناسب حسب القوانين

عندك رابط القوانين اطلعي عليها ستفيدك

[قصص من وحي الاعضاء]

السلام عليكم ورحمة الله وبركاته

تم تمييز الرواية القصيرة (النوفيلا) وتثبيتها بتميز اسلوب كاتبتها اسلوبا وطرحاً

الف مبروك ونتمنى لك دوام التميز ونرجو أن يعجبك الغلاف الاهداء من احدى مصممات فريق وحي الاعضاء




اشراف وحي الاعضاء

[hanaa85]

السلام عليكم ورحمة الله وبركاته بسم الله الرحمن الرحيم شـكــ وبارك الله فيك ـــرا لك ... لك مني أجمل تحية . الحمدلله والصلاة والسلام على رسول الله وعلى آله وصحبه أجمعين موفق بإذن الله ... لك مني أجمل تحية .

[hanaa85]

السلام عليكم ورحمة الله وبركاته بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين شـكــ وبارك الله فيك ـــرا لك ... لك مني أجمل تحية . موفق بإذن الله ... لك مني أجمل تحية . ألف مبروك .. لقد سعدت بهذا الخبر