إنتقام عاشق، للكاتبة/ zezo_a_saad " ليبيه " ( مكتملة )

[فيتامين سي]

#إنتقام_عاشق.
.
.
الحلقه الثامنه عشر.

"وقد يجعل الله نورا في نهايه طريق ظننت يوما أنه نفق مظلم لانهايه له".

.
.
بعد ماوصل سيف للموقع وتلاقي مع محمود وفرغ فيه غضب وألم وتعب سنين .

كان قاعد فوقه ويخنق فيه ومقاومه محمود بدت تضعف ويادوب يلقط ف نفسه .

وصل وسيم ووليد وبعد محاولات فكو محمود من بين ايدين سيف .

وليد :-
مجنون أنت كنت رح تضيع روحك عشان وسخ زي هذا.

سيف وهو يلهث :-
هذا شيطان وكان لازم يموت .

وسيم قرب من محمود وقعد يتحسس ف نبضه وبصدمه:-
ياولاد الراجل مايتنفسش ...نهار حرف شكله مات .

جي عليه وليد يجري :-
غير قول خير ياراجل...مات شني الله يهديك قول طيب.

وسيم :-
شوفه مايتنفس ونبضه منتهي .

سيف يشوفلهم من بعيد :-
خله يموت ليش خايفين عليه ..ان شاء الله ماعاد ينوض .

وسيم :-
ياغبي بتخش الحبس ف جرته ...وبتدمر حياتك كلها .

سيف:-
مش هامني شي...المهم شفيت غليلي منه.

وليد شاف لوسيم:-
هذا عقله طار ماعاد تكلمه ...قيم معاي المصيبه هذا نرفعوه للمستشفي بسرعه.
.
.
.
عند بسمه :-
كانت قاعده ع نار وتمشي وتجي ف المكتب ومش عارفه تتصرف ..واللي تتصل عليه مايرد علاها .

قربت منها ولاء:-
اهدي يابسمه مايصير الا الخير ..خيرك خايفه .

بسمه :-
سيف مجنون ياولاء ...رح يضيع روحه ..ياحليلي ياوخيتي ريتني مااتصلت بيه .

ولاء:-
تعوذي من الشيطان ...مش رح يصير كان الخير ان شاء الله .

بسمه :-
ياوخيتي غير زيدي عاوي ع وليد بلكي يرد.

ولاء:-
والله من بكرى نتصل يسكر عليا .

بسمه كيف كانت بتتكلم ...دخل علاها سيف وكان لبسه متبهذل وملطخ بالدم .

بسمه بخوف ودموعها نزلو :-
سيف ..سيف شن هذا ..سيف دم دم شني هذا.

قرب منها سيف بهدوء غريب وع فجأه حضنها بأقوى ماعنده .

ولاء؛-
احم...نستأذن انا توا ..وطلعت وسكرت الباب وراها.

بسمه :-
حبيبي لاتخوفني..فهمني هذا شني شن في وحياتك وكانت تحاول تبعد ع حضنه وتشوف بوجهه.

مسكها سيف بقوه اكثر وماخلاها تتحرك :-

ضربته بكل وجعي ..ضربته وانا قدام عيوني كيف كان يضرب فيك...ضربته وبعيوني صورة دموعك وانتي متحمله وساكته كل هالسنين ...ضربته وأنا بخيالي كيف......أنهار بالبكاء كيف لمسك وملكك بفراشه وهو ماليشي حق فيك...
اااااه يابسمه نارى صعب تنطفي ..عارفه كنت نضرب وكل مايتأذى وينزل منه دم نتلذذ أكثر وتبرد نار قلبي ..ضربته بنفس التوحش.والهمجيه اللي كان يستعمل فيها.معاك ذوقته من نفس وجعك.

بسمه وهيا ترتعش بين ذكريات الماضي وخوف الحاضر:-
سيف حبيبي أهدأ وفهمني وحياتك ..بس خليني نشوف بعيونك .

سيف بتملك :-
لا ..خليني حاضنك بسمه انا حاليا ضايع ومتشتت ونبي حضنك يلمني.

بسمه :-
طيب حبيبي ..بالله عليك قولي حاجه وحده بس...هو عايش.

بعد علاها سيف وشاف بعيونها:-
نعرفش...رفعوه مايتنفسش .

رجع حضنها من جديد وهو ساكت وصوت نفسه بس يطلع ويخش.
.
.
.
.
عند وليد :-
بعد ماوصل هوو ووسيم للمستشفي دخلو محمود ع الطوارئ.

وسيم :-
تو كيف بنديرو ف هالمصيبه ..رح يسألونا شن اللي صاير معاه كيف بنتصرفوا.

وليد وهو شاد شعره بصوابعه:-
مش عارف ياوسيم والله ماني عارف شن بنقول والا كيف بنتصرف.

وسيم :-
باهي كيف الراي توا...كيف بنتصرفو ..وينهار اسود طان يموت .

وليد :-
ماعاد تنق خيرك ياراجل بروحي ع أعصابي ..نقولك راي خلي نحكي مع بوي بلكي يلقانا راي.

مسك وليد 📲 واتصل ع بوه :-
ألو ..بوي كيف حالك.

منصور:-
اهلين ولدي الحمد الله.

وليد :-
بوي نبيك ضروري تجيني فالمستشفي المركزي.

منصور بخلعه:-
شن في ...خيرك وليد فيك شي صاير فيك شي ياوليدي طمني .

وليد :-
لا يابوي اطمن مافيا شي...بس سيف مداير مصيبه ونبيك تساعدني ماعرفت نتصرف.

منصور بخلعه:-
مصيبه شني فهمني بس.

وليد :-
غير تعالي يابوي ...تو نقولك.

منصور :-
هيا هيا اني جايك مسافه الطريق بس.
.
.
تسريع بالأحداث:-
مرو ساعاات وجي المغرب ... طبعا محمود كان عنده كسر بضلوعه وفي عظم أنفه وعينه متضرره شوي .

القضيه لفلفها اللواء منصور بمعرفته ...وقال ان محمود لقوه الشباب ملقى ف موقع الشغل وأسعفوه ولان محمود قال نفس الاقوال وماقدم شكوي ف سيف ...تسكرت القضيه وتسجلت ضد مجهول .

بالليل مشي اللواء منصور عند سيف ف حوشه.

منصور:-
السلام عليكم.

سيف:-
وعليكم السلام ياعمي تفضل.

منصور؛-
وصلت...واكيد عارفني علاش جايك

سيف بتنهيده :-
ايه عارف.

منصور:-
ممكن تفهمني كل اللي صار لاني جاي نسمع منك .

سيف :-
أستريح بس ...مابين حضرت فنجانين قهوه وجيت.

منصور :-
تمام نستني فيك.

مشي سيف وحضر قهوه وجي ..قعد مقابل منصور بعد ماضيفه.

منصور:-
ايه ..فهمني شن صار وليش صار اصلي ...احكيلي القصه كلها.

سيف:-
تمام ...القصه ان....وقعد يحكيله من حوالي 9 سنين فاتو شن صار لعند اليوم .

منصور:-
بس اللي درته غلط ..مش هكي تاخذ حقك ياسيف.

سيف :-
مافيش الا هكي عشان نارى تبرد.

منصور:-
عموما مازال مانتهت القصه...لأن محمود الباين ناوي ع الشر وبالدليل لما فاق مابلغ عليك بالعكس قال نفس اقوال وليد ووسيم.

سيف:-
وانا قاعدله بالمرصاد...زي الشوكه بحلقه.

منصور:-
أنا سألت عليه الرجل هذا زي.ماقلتلك .

سيف :-
باهي..وشن صار.

منصور:-
مشبوه فعلا...عنده قضايا تهريب ومخدرات مشتبه بيها...هذا غير طبعا الاماكن اللي فاتحها واللي تمارس فيها اعمال غير مشروعه من شرب وغيره

سيف:-
طيب ليش لعند توا ماحد مسكه.

منصور:-
اللي فهمته انه راجل واصل وعنده من ف ظهره...والجماعه تراقب فيه ويستنوله ف الزله وحسب ماوصلني ان هاليومين متوقعين يدخل شحنه وحاطينه تحت المراقبه .

سيف :-
ربي ياخذه طلع مش ساهل.

منصور:-
المهم اللي نبيه منك انك تخليك حريص هالأيام وتحاول تتباع
عليه وماتقربله ولا تجي شوره ..وانا رح نتابع اللي يصير معاه ..وأول مايجد جديد رح نبلغك.

سيف :-
تمام حاضر.

منصور:-
يلا عن أذنك توا امالا .

سيف:-
مازال بدري ...خليك ياعمي نتعشو مع بعض.

منصور؛-
ان شاء الله ف الافراح ..
عندي شغل مهم بنكمله قبل مانروح للحوش ...نشوفك ف ساعه طيبه.

سيف :-
تمام ..ف حفظ الله.
.
.
.
عند وليد :-
بعد ماروح للحوش ودوش ..مسك فونه وأتصل ع أمل ماردتش عليه ..اتصل مره تانيه سكرت عليه .

شوي ووصله مسج✉"أحكيني واتس نقدرش نرد عليك فون".

فتح واتس وبعتلها مسج.

وليد :-
حبي .

أمل :-
اهلين نبضي.

وليد :-
خيرك ماتردي ع فونك .

أمل :-
بابا قاعد بالصاله...ونخافه يطب عليا ويديرلي عرس.

وليد :-
سكري الباب باهي.

أمل :-
تبصر انت وليد ..هو واقفلي ع التكه والله يدير فيا الويل لو يشدني.

وليد :-
ماتخافي قريب ان شاء الله رح ننهي هالشي.

أمل :-
كيف مافهمت .

وليد :-
شن دخلك انتي.

أمل :-
معقول هكي وليد

وليد :-
نحبك ياعيون وليد .

أمل :-
-😍😍.

وليد:-
هذا اللي طلع بخاطرك😢.

أمل :-
شنو!!

وليد :-
نقولك نحبك تبعتيلي ايموجي..زعلت انا

أمل :-
انلا ماتزعل مني مانرضا فيك الزعل.

وليد :-
راضيني باهي.

أمل:-
نحبك ..نحبك ...نحبك ...نحبك ...نحبك.

وليد :-
ووووووه عليا قلبي تفترش.

أمل :-
هههههه مجنون.
.
...
.
عند بسمه:-
بعد روحت للحوش من الشغل ...كان وجهها مخطوف وحتي بعد عرفت أن محمود مازال حي كانت تحس بالخوف وخصوصا أنه تنازل ع القضيه بسهوله .

رن فونها وكان المتصل سهيله.

بسمه:-
ألو ...مساء الفل سهيله.

سهيله بإبتسامه:-
مساء النور حبيبتي ...كيف حالك .

بسمه :-
الحمد الله ...كيف حالك اناي وشن اخبارك

سهيله :-
ماشي الحال الحمد الله ...شن جوك انتي وحال امك وبوك.

بسمه:-
طيبين الله يبارك فيك.

سهيله:-
هذا ياستي اتصلت بيك...لان المجنون خوي كلمني وقالي احكي معاها عشان بنقدمو موعد الخطبه .

بسمه بتفاجئ:-
كيف ...امتي هذا وليش.

سهيله:-
قالي قوليلها بكرا ...ليش مانعرف بس الواضح انه مستعجل.لأن قالي حطي ببالك العرس رح يكون بعد أسبوعين

بسمه بصدمه:-
مستحيل هالشي...سهيله هكي مش رح نلحق.

سهيله:-
والله قتله حبيبتي ...بس هو مسكر راسه قالي اطلعو منها وكل شي يجي بوقته ومن أحسن مايكون .

بسمه:-
مجنون خوك اهو.

سهيله:-
هههههه يلا نخليك تبلغي اهلك وتشوفي شن بديري ونتلاقو بكرا بعد المغرب.

بسمه :-
تمام حبيبتي ...تصبحي ع خير .

سهيله :-
تلاقي الخير ...ربي يحفظك.

بعد مابسمه سكرت من سهيله اتصلت ع سيف.

سيف بصوت ناعس:-
الو حبيبي

بسمه:-
سيف حقه اللي قالاته سهيله.

سيف:-
حقه ونص.

بسمه :-
بس حبيبي مستحيل هكي مش رح نلحق.

سيف:؛
نحبك ونبيك حلالي بأسرع فرصه ...ومانبيكش توتي شي نبيك زي ماأنتي المهم يتسكر علينا باب والباقي كله يجي.

بسمه :-
سيف بالله عليك نحكي فيك جد.

سيف:-
نحبببك انا ...خليني بنغفي باي روحي.

بسمه:-
سييف.

سيف:-
سلام ...سلام ..وسكر.

مشت بسمه بلغت امها وبوها ...واتفقت معاهم انها تغيب من الشغل عشان تجهز نفسها ..وتطلع تاخذ شن ناقص من ضيافه .
...
تسريع بالاحداث:-
مر االنهار التالي بسرعه بين تجهيزات بسمه وأمها ومروه صاحبتها ورهف وأمل .

أما سيف فقرر يرفع معاه للخطبه حمزه زوج اخته واللواء منصور ووليد ووسيم ..وسهيله وولاء والحاجه فوزيه ام وليد .
.
.
جي المغرب وكانت بسمه لابسه فستان بسيط وناعم لعند الركبه لونه دمي ومن الأكتاف كله دانتيل ..حاطه ميك اب بسيط ومنزله شعرها ع أكتافها.

بسمه:-
مروه بخري الحوش اكيد قريب يوصلو

مروه:-
اهدي بس مازال الوقت خيرك .

بسمه ؛-
منظرى معدل بالله عليك قوليلي الحق.

مروه:-
والله تهبلي الصلاه ع النبي عليك.

بسمه :-
وين رهف امالا .

مروه:-
بالمطبخ مع امك تحضر ف السفر متع التقديم.

شوي ورن الجرس ..مشت مروه تفتح.

أمل :-
مساء الخير.

مروه:-
مساء النور ياهلا.

أمل مدت يدها:+
انا أمل .

مروه بإبتسامه:-
اها انتي صديقه بسمه مرحبتين بيك تفضلي.

أمل وهيا تسلب ف عبايتها:-
يزيد فضلك ..ان شاء الله بس ماجيت متأخره .

مروه خذت منها عبايتها بتعلقها:-
لالا ..ع الوقت مازال ماجو .

خشت أمل سلمت ع بسمه وباركتلها وسلمت ع نجيه ورهف وقعدو يحوسو ف الحوش ويجهزو.

الساعه 9:-
وصل سيف وأهله وكانو سيارتين ...أستقبلهم الحاج علي بفرحه ودخلو للصاله ...وخشو النساء لدار الضيافه ..
وبعد هدرزه وضيافه ...قرر الحاج منصور يتكلم .

منصور:-
ايه ياحاج علي ...طبعا انت عارف ان نحن جايين وطالبين القرب منك ف بنتك ...ويشرفنا هالنسب الطيب ...وولدي سيف الحمد الله راجل ونعم الاخلاق والتربيه ورايد بنتك بالحلال ..والمشوره مشورتك والراي رايك.

الحاج علي دمعته نزلت:-
هذه الساعه الطيبه...وأكيد نتشرف بيكم ياحاج ..وبنتي هيا بنتكم ودامهم رايدين بعض ماعندي مانقول كان الخير والبركه.

منصور:-
يازينك كلام ياحاج ...امالا خلي نتفاهمو ونتشارطو شن لينا وشن علينا.

الحاج علي:-
انتم ناس طيبه وتعرفو ف الأصول وانتم اهلها ونحن شاريين راجل واللي بتعطوه هو ليكم .

وشاف لسيف:-
انا مانبي شي ف الدنيا كان راحه وسعاده بنتي ...بنتي تعذبت هلبا وياما شافت في حياتها وكله كان بسببي ونبي بس نشوفها متريحه وعايشه الفرحه اللي انحرمت منها من زمان.

سيف قرب عليه وباس ع راسه:-
وانا بعون الله قد هالامانه ...ونوعدك اني رح نسعدها ونعوضها عن كل اللي فات ومش رح انقص علاها حتي حاجه.

الحاج منصور:-
ع بركه الله ياحاج امالا دام تفاهمنا ...نحن نبو العرس بعد اسبوع كان سخر ربي .

الحاج علي بفرحه:-
البنت بنتك زي مالولد ولدكم ..انتم فصلو وانا نلبس .

الحاج منصور:-
متفاهمين امالا ...مبارك ياحاج وربي يتمم ع خير .

الحاج علي :-
الله يبارك فيك .

وقعدو يسلمو ع بعض ويباركو ..وعلت الزغاريط بالحوش كله والكل كان سعيد وفرحان ...وبعد تمت السهريه عند الساعه 11 بالليل وروحو اهل العريس.
.
.
وليد كان مشغول باله ع امل ..لان ولاء قالتله ان بوها اتصل بيها وروحت مع الساعه 10 ومعاها ..قعد يتصل علاها بس ماترد عليه .

وصل اهله للحوش ...ودور سيارته وطلع ..كان ماسك فونه ويتصل ع أمل وهيا ماترد

وليد بعصبيه:-
ردي ياأمل ردي ..وبهاللحظه انفتح الخط.

الو امل وينك خوفتيني عليك.

الصادق:-
أمل من يافاسد اللي تطلب فيها ... دير بالك مازال تتصل ع هالرقم فاهم وسكر بوجهه.

بهاللحظه وليد ركبه جن ...وقرر يمشيله لعنده ف الحوش .

بعد 13 دقيقه وصل لحوش أمل ونزل ضرب الجرس .

جي الصادق فتح الباب :-
تفضل ياشاب من تبي.

وليد:-
انت السيد صادق صح.

الصادق بإستغراب:-
انا هو تفضل.

وليد :-
ممكن نحكي معاك كلمتين لو سمحت.

الصادق:-
تي من معاي اصلا مش نعرف قبل ف من نكلم.

وليد :-
معاك وليد منصور ...الشخص اللي كان يحكي معاك من شوي وقلتله يافاسد.

الصادق بعصبيه :-
وجايني لعند حوشي اخرى...شن تبي .

وليد:-
الاصول تقول لما يجيك ضيف تستقبله مش تحكيه من الباب.

الصادق :-
عندك 10 دقايق تقول شن عندك وتطلع .

خش وليد مع الصادق للمربوعه ...وبعد قعمزو.

الصادق :-
احكي سامعك.

وليد بثقه:-
انا جايك ورايد بنتك بالحلال وناوي نتقدملها .

الصادق بعصبيه:-
انا ماعندي بنات اصلا عشان تتقدملهم.

وليد :-
وامل ...انظني بنتك صح.

الصادق:-
امل ماتبيش تتزوج.

وليد :-
عمي ممكن تقعد نتفاهمو ...ياعمي انت انسان مؤمن وعارف ان الحياة والموت بيد رب العالمين ..أنت مش اول أب يفقد ولده ..إذا كان رسولنا الكريم فقد ولاده الاتنين حيلته بهالدنيا إبراهيم وابوالقاسم بس كان ايمانه قوي رضي بنصيبه وكان يدعي ع طول ويقول "والله ان العين لتدمع وان القلب ليحزن وان لفراقك ياإبراهيم لمحزونين ولكن لانقول الا مايرضي الله ".

الصادق دمعته نزلت:-
هذاكا الرسول عليه افضل الصلوات مش انا ..انا بشر وماعندي عزم الله غالب.

وليد :-
بس هالشي غلط ياعمي ..خوذ معاي وحده وحده القرأن شن قال "أبناءكم لاتدرون ايهم أقرب نفعا" صح والا لا.

الصادق:-
صح .

وليد :-
والنبي شن وصي ف معامله النساء قال "رفقا بالقوارير فأنهم عوان عندكم " وقال "ماأكرمهم الا كريم وماأهانهم الا لئيم"

ياعمي تعرف ان الرسول كان يقول للصحابه ان من كان عنده بنت واحسن تربيتها ومعاملتها ادخلته الجنه .

الصادق:-
عليه افضل الصلوات.

وليد :-
ياعمي ربي وزع الاعمار وحط لكل.أجل كتاب ...مايصير ياعمي أن نعاقبو انسان ونعيشوه حياه مش ليه...طيب من قال ان لو ولدك امجد عايش كان رح يكون ابن صالح ...من قال ان ربي لما خذي امجد كان مقرر انه يعوضك بأمل ..فاكر قصه سيدنا الخضر مع نبي الله موسي ..لما لقي غلام وقتله قاله سيدنا موسي عليه السلام "أقتلت نفسا زكيه بغير نفس لقد جئت شيئا نكرا" شن كان رد الخضر "أما الغلام فكان أبواه مؤمنين فخشينا أن يرهقهما طغيانا وكفرا..فأردنا أن يبدلهما ربهما خيرا منه زكاة وأقرب رحما".صدق الله العظيم

الصادق وهو منزل راسه:-
صدق الله العظيم.

وليد :-
فكر ياعمي ...ارجع لربي وأستغفره وماادير دير الجاهليه لما كانو يقتلو ف البنات بالعكس خلك زي سيدنا عمر بن العاص كان لما يبشروه ان فلان رزقه ربي ببنت يبتسم ويقول "اخبروه ان الانبياء اباء البنات" ...بهالدنيا ماف حد ياخذ مكان حد ..كل نفس خلقها ربي وعندها عمره ومكانها وحياتها وبالعكس بدل ماتطمس شخصيه امل وتعاملها ع انها ولد ادعي ع طول ان تكون قرت عين ليك وباب يدخلك للجنه وأن ربي يعوضك بدل ولدك بولد بنتك يكون حفيد وذخر ليك.

الصادق كان بس ساكت ودموعه ينزلو ومش قادر يرد .

وليد وقف :-
ان شاء الله مانكون سيلت الدم لجرحك ونكون لملمته ...وسامحني ياعمي لو غلطت معاك وياريت تغكر بكلامي وانا نتمني بيوم نكون ولدك وزوج بنتك ..فكر بالله عليك بكلامي وربي يصلح رايك..عن أذنك .
.
.
.
تسريع بالأحداث:-
مرو يومين ع أبطالنا وكانت معظم اوقاتهم فرحة ....بسمه توتي لعرسها وسيف طاير من الفرحه...أمل كانت مستغربه من تصرفات بوها كان اغلب الوقت ساكت وقاعد بداره وكل صلاه بالجامع ...وليد كان زي اللي قاعد ع جمر لأن مش عارف شن رح يكون قرار والد أمل ... وسيم وولاء ع حالهم بس ف انسجام بيناتهم .

اليوم هو يوم الاحد ف الاسبوع ماقبل العرس:-
كانت سهيله طالعه مع بسمه يشرو ف حاجات للعرس ..خشو لكم محل وشرو أحذيه وميك اب ...وبعدها قررو يمشو لبوتيك الملابس الداخليه .

كانو يحكو ويهدرزو مع بعض وهما قاصيين الشارع وقع المحضور جت سياره بأسرع ماعندها وكانت متعمده تضربهم.

وبأقل من ثانيه سهيله بأعلي صوتها:-
بسمممممه ......
.
.
#يتبع.

برايكم شن رح يصير...ياتري هذه نهايه بسمه وشن رح يصير بسيف ...وأمل ووليد هل في أمل لعلاقتهم .

بإنتظار أرائكم وتفاعلكم ...وبالنسبه للي يتساؤلو ع امتي نهايه الروايه تقريبيا مازال حلقتين ...ف كومنتات تقول تماطلي بالاحداث بالعكس حاولت نعطي تفاصيل عن كل شخصيه بس رح نختصر الاحداث الجايه قدر الامكان .

تحياتي اختكم وصديقتكم.
#zezo_a_saad🌹❤

[فيتامين سي]

#إنتقام_عاشق.
.
.
.
الحلقه التاسعه عشر😢.

"وما كان لينفخ فيك من روحه ثم ينساك ... سبحانه ❤".

أصعب شعور لما فرحتك تنسرق منك .. وتحس نفسك ان املك ف أن ظلامك ينتهي بيوم كله وهم ..تضعف وتنسى أن ربي موجود.

كانت بسمه طالعه مع سهيله وفرحانين ويجهزو لفرح بسمه ...وبلحظه اللي كانو قاطعين الشارع وملتهيين بالحكي جت سياره تجري عليهم 🚘 .

سهيله بصوت عالي :-
بسمممممه ودفتها لعند طاحت .

وبهاللحظه طارت سهيله وطاحت ع الأرض وظلمت الدنيا بعيونها.

بسمه كانت تشوف مصدومه "كان جسم سهيله ينتفض ويرتعش والدم حاوط جسمها" .

تجمعت الناس بين من يحاول يقيمها ومن يطلب ف مساعده .

بهاللحظه قربت بسمه بخطوات ثقيله وجسم مش قادر يتوازن ..قعدت بجنب سهيله ع ركابها :-

سهيله ...سهيله انتي تسمعي فيا صح...سهيله كلميني .

قعدت تهز فيها وتعيط بهستيريا:-
سهيله نوضي ماديري فيا هكي...سهيله انتي تبصري معاي صح ...ياوخيتي كلميني مااديري فيا هكي ...ياريتك مادفيتيني ياريتك خليتيني نواجه قدري ...ياحليلي ياوخيتي ياحليلي باش بنقابل سيف ..وقعدت تخبط ف خدودها

بهاللحظه قرب شخص كبير بالعمر من بسمه وقعد يقيم فيها:-
مايصير يابنتي تعوذي من الشيطان ومااديري ف روحك هكي وادعي ربي يتلطف بيها ".

بهاللحظه قامو سهيله وحطوها بالسياره وركبت بسمه بجنبها وأنطلقو للمستشفي .

كانت بسمه تمسح ف الدم من وجه سهيله بوشاحها ومنهاره :-
يارب...يارب تلطف بيها يارب...يارب لا تحرم صغارها وزوجها منها يارب...يارب يارب عاقبني بس لا تحملني ذنب اللي صارلها يااارب".
.
.
.
عند فاتن :-
كانت قاعده بدارها وتمشط ف شعرها لعند رن فونها وكان حامد .

فاتن :-
ألو .

حامد بتوتر:-
الو فاتن ..انتي وين.

فاتن:-
ف الحوش ...شن في.

حامد:-
مصيبه يافاتن مصيبه.

فاتن وقفت وبخلعه:
شن في مصيبه شني .

حامد:-
كلمني الراجل اللي كلفته بالمهمه اللس طلبتاها مني .

فاتن بلعت ريقها:-
باهي

حامد:-
نفذ المهمه ...بس المصيبه اللي انضربت مش هيا ..ف وحده كانت معاها وهيا اللي انضربت بدالها .

فاتن بعياط :-
كيييف....نهار حرف شن قاعد تقول ياحامد .

حامد بخوف:-
هذا اللي صار توا كان يكلم فيا الراجل .

فاتن بخوف وأرتباك:-
كيف صار هكي ...وليش نفذ اليوم ...ياغبااره سوده ياحامد كيف بنديرو .

حامد:-
مش عارف والله ماني عارف كيف نتصرف.

فاتن:-
ماعرفتش من اللي خبطها الحيوان هذا.

حامد :-
لالا مازال ماعرفت .

فاتن:-
اسمع ماعاد ترد عليه ..واقطع اتصالاتك بيه نهائي خله يشيلها بروحه.

حامد بعصبيه:-
انتي واعيه شن قاعده تقولي . شن تخرفي هو يعرفني ويعرف شكلي ولو طاح هو معناتها طحنا حتي نحن.

فاتن :-
لا يابابا ..انت طحت ..انا مالياش علاقه بيك.

حامد بصدمه:-
كيف يعني مافهمت قصدك .

فاتن :-
يعني ع رقمي ماعاد تتصل ...وانا مانعرفك ولا نعرف اللي يعرفك ودير بالك تتصل عليا تاني.

حامد بشراسه:-
هههههه لا ياماما ...غيرك كان أشطر تحسابيني حمار عشان تضحك عليا وحده زيك ..يكون بعلمك أنا كل كلامي معاك مسجله من أول اتفاقنا لعند توا تحسابيني غبي عشان نأمن ف وحده زيك.

فاتن بخوف:-
انت تمزح صح...تبي تخوفني بس حامد .

حامد :-
لا ياماما ..ويكون بعلمك دامك هكي ف عليا وع أعدائي

فاتن :-
حامد ..حامد خلينا نتلاقو ونتفاهمو أرجوك.

حامد :-
تحلمي ياحلوه ..ياويلك مني يا....ياحاذقه تشاو.

.
.
عوده عند بسمه:-
بعد وصلت للمستشفي مع سهيله ..خذو منها سهيله وحطوها ع الباريلا ودخلوها للطوارئ .

قعدت بسمه ع الارض وكانت منهاره وملابسها كلهم دم ..بيد مرتعشه طلعت فونها من الشنطه .

"يارب يارب ساعدني ...يارب مستحيل نقدر نبلغ سيف باللي صار ..يارب ساعدني يارب ".

قررت تتصل ع وسيم بالأول 📲..رن الفون مره وتنين وبعدها رد.

بسمه بصوت مهزوز ودموع:-
ألو

وسيم :-
أهلا بمرت خوي كيف حالك

بسمه انهارت وبصوت كله دموع:-
وسيم انت وين.

وسيم بخلعه:-
شن في بسمه ..خيرك ليش تبكي .

بسمه :-
بس قولي انت وين بالأول .

وسيم:-
بمكتب سيف ..نستني فيه بجيب ملف من هبه وجاي .

بسمه :-
اطلع وسيم من جنبه بالله عليك...وماتخليه يحس ان انا اللي نحكي معاك .

وسيم طلع مستعجل :-
اهو طلعت شن في بس فهميني .

سيف:-
وسيم ..تي وين ماشي ياراجل .

بسمه بسرعه:-
دير بالك تقوله شي وسيم تربح.

وسيم بتوتر:-
احم .. عندي فون مهم ..شوي ونرجعلك عزيزي .

وطلع وسيم يجري لعند ابعد عن سيف .

وسيم بعصبيه:-
بسمه احكي شن في لان اعصابي ماعاد يتحملو بالله عليك.

بهاللحظه بسمه انهارت وقعدت تعيط بهستيريا:-
ياوخي ياوسيم تعالالي بنموت ....سهيله ياوسيم سهيله

وقف وسيم وبخوف:-
سهيله خيرها .

بسمه بصوت متقطع من البكاء:-
سهيله ..ضربتها سياره نحن كانا ..هيا كانت وسيم مفروض انا مش هيا .

وسيم بخوف:-
بسمه اهدي مش فاهم منك شي انا...غير قوليلي انتي وين.

بسمه :-
ف المستشفي المركزي .

وسيم:-.
تمام جايك .
.
.
عند وليد :-
كان قاعد بمكتبه ويشتغل لعند دخلت عليه أمل .

أمل بإبتسامه:-
امم مشغول باينتك هلبا اليوم.

وليد اول ماشافها أستند بظهره ع الكرسي :-
ااه ...ايه والله عندي عقد نشتغل عليه لازم نكمله قبل فرح سيف.

أمل قعدت ع الكرسي قدامه:-
ربي يعاونك حبيبي

وليد قرب منها وطبس علاها وشاف بعيونها:-
عقبالنا ياقلبي

أمل بتنهيده:-
برايك بابا رح يوافق وليد.

وليد:-
وانا شن خدمتي غير اني نقنعه ...وراه وراه ..بعدين انتي مش قلتي انه متغير معاك هالايام

أمل :-.
ايه صح ...تعرفي تصرفاته انقلبت 180 درجه...امنيتي نعرف شن قلتله بس

وليد غمزلها :-
سر ياقلبي .

أمل بدلع:-.
وحياتك قولي مش انا حبيبتك .

وليد كيف بيرد رن فونه📱وكان وسيم .

وليد رد:-
ع طول اوقاتك غلط يابرو.

وسيم بتوتر وهو يسوق ف السياره:-
وليد بسرعه الحقني للمستشفي المركزي ..

وليد بخوف:-
شن في ياوسيم ..من اللي ف المستشفي وشن صاير

وسيم :-
تعالي رح تفهم ...وليد دير بالك تتصل بسيف او تخبره .

وليد بٱستعجال :-
تمام جاي جاي .وسكر .

تلفت ع مكتبه وخذي مفاتيح السياره ..أمل جت عليه شن في ياوليد ومن اللي ف المستشفي

وليد بإستعجال:-
مش عارف ماقاليش وسيم..بس الباين حد يخص سيف لان قالي ماتقوله

أمل شدت ف يده:-
نهار حرف كما تطلع بسمه...انا بنمشي معاك

وليد :-
تمام ..تمام هيا .
.
.
عند وسيم :-
وصل للمستشفي بعد حوالي 10 دقايق ...دخل يجري ويتلفت يمين يسار يدور ع بسمه لعند لقاها قاعده ع الارض قدام غرفه الطوارئ ومتكمشه ع نفسها .

جي يجري علاها ...وقعد قدامها وقع
يهز فيها:-
بسمه بسمه شن في فهميني .

بسمه بغير وعي:-
وسيم انا كان المفروض ..هيا دفتني وجت علاها السياره طيرتها ...وقعدت تشوف ليديها اللي كلهم دم وترتعش "هيا كانت طايحه ..وجسمها بسرعه قعد كله دم وماعاش ...ماعاش تتحرك "

وبلحظه انهارت وقعدت تخبط ف وجهها زي المجنونه وتعيط بأعلي صوتها :-
ياحليلي ياوسيم ..ياحليلي شن بيصير فيها وشن بيصير ف سيف بعد يعلم ..ياحليلي ذنبها ف رقبتي انا المفروض كنت بمكانها ووووه عليا ووووه .

وسيم قعد يمسك في ايديها ويحاول يهديها :-.
مااديري هكي يابسمه اهدي اهدي وادعيلها مايصير الا اللي ربي كاتبه انتي انسانه مسلمه اهدي .

ع خشت وليد وأمل جو يجرو عليهم

وليد :-
ف من ..فهموني شن في بسمه خيرك شن هالدم .

وسيم شاف لوليد :-
سهيله ياوليد ضربتها سياره .

بهاللحظه وليد وخر خطوتين وكان مصدوم وخصوصا لأنه شاف حاله بسمه كيف ومن بكاها توقع ان سهيله ماتت:-
ماتت ...سهيله ماتت

بهاللحظه وقفت بسمه وقربت منه زي المجنونه وقعدت تخبط فيه بإيديها:-

لالالا سهيله حيه سهيله مش رح تموت لو ف حد بيموت هو انا فاهم .

وليد بهاللحظه شد ايدين بسمه وطاحت بين ايديه ضمها بعفويه :-
اهدي طيب اهدي انا اسف مش قصدي اهدي .

وقربت علاها امل وخذتها منه وحضنتها وقعدت هيا وياها ع الكراسي قدام غرفه الملاحظه.

وبهاللحظه طلع الدكتور المشرف ...قربو عليه كلهم .

وسيم:-
طمني يادكتور ...سهيله كيف حالها .

د.خالد:-
شن تقربلك المريضه.

وليد بتدخل :-
نحن خوتها ...طمنا يادكتور شن في.

د.خالد:-
بصراحه الوضع مايطمن...نزيف داخلي وكسر ف الضلوع ومع الاسم نبلغكم هالشي المريضه فقدت الجنين ولأنها نزفت هلبا محتاجين ندخلوها للعمليات بسرعه.

بسمه اول ماسمعت هالكلام طاحت طول وأغمي علاها ...قامها وسيم ودخلها حطها ع السرير وجوها الممرضات .

وليد :-
طيب يادكتور تقدر ادير اللي تشوفه مناسب وبأسرع وقت .

د.خالد:-
تمام ...رجاءا يمشي واحد منكم يوقع ع ملفها بالاول...وتاني شي ضروري تأمنونا دم لأن زي ماقتلك المريضه نزفت هلبا ورح تحتاج لنقل دم..عن أذنك .

رجع وسيم لعند وليد ؛-
ها ياوليد شن صار شن قالك الدكتور.

وليد دموعه نزلو وحط يده بشعره:-
الوضع مايطمن ياوسيم...نحن لازم نبلغو حمزه وسيف.
.
.
.
عند محمود:-
كان قاعد بداره بعد ماطلع من المستشفي من يومين..شوى ودخل الشارف صاحبه القديم واللي يعرف كل أسراره.

الشارف:-
قعدتك بروحك مش لله يامحمود .. اكيد أبليس قاعد معاك.

محمود بخبث:-
وأمتى قعدت لله أصلا...ماهو ع طول قعادى مع الشياطين.

الشارف :-
معناتها صح...شن المصيبة اللي تفكر فيها.

محمود ؛-
بنصفي حساباتي كلها ...حسيت روحي رقدت ع حقي هلبا وتماهيت عليه.

الشارف:-
امم معناتها تقصد ع عادل والسي بسمه وجماعتها.

محمود وقف وبشرود:-
ايووه صحه ليك... بس بالأول نبدأ بعادل قبل .

الشارف:-
علي شن ناوي يامحمود.

محمود:-
نستغفله زي مايستغفل فيا ..ونعطيهاله بالقاضيه.

الشارف :-
كيف مافهمت .

محمود:-
معقوله ياشارف نعرفك فاطن كويس...واضحه هو ضربنى بضهرى ومن غير مانشوفه...وانا رح نعطيهاله بين عيونه وف كبيدته.

الشارف وقف بصدمه -
ماتقولش اللي نفكر فيه صح يامحمود.

محمود بخبث:-
لو فكرت بمريم فأنت صح.

الشارف بخوف:-
لا يامحمود ماتلعب هاللعبه وتخلى الشيطان يتحكم فيك انت بتودر روحك.

محمود بٱصرار:-
أنا بعمرى ماخفت ياشارف وماعاش من يستغفلني ويضحك عليا ونقعد ساكتله وعادل تمادى وصار لازم يتأدب.

الشارف:-
أدبه ماقلنا شي بس مش بهالطريقه.

محمود:-
أنا نعرف دواه ياشارف اطلع منها أنت...وبعدها رح نتفضى للي حرقت قلبي كل هالسنين ورح نوراها هيا والصرصري اللي خاطبها النجوم ف عز الظهر ..نبقاش راجل لو ماأنتقمت منهم كلهم.

الشارف؛-
انت اكيد انجنيت ...خلاص ماعاد فيك عقل ..اقعدى فيها انت وأفكارك...سلامتك.

محمود بهستيريا:-
ههههههههه..هههه جبان يالشارف وتقعد طول عمرك جبان.
.
.
عوده للمستشفي:-
أتصل وليد بحمزه وخبره باللي صار ع سهيله زوجته .. شوي ووصل حمزه .

دخل وكان وجهه مايتفسر ودموعه مغرقه وجهه واول ماوصل عليهم وقفو كلهم.

حمزه بدموع:-
وينها..سهيله وين ياوليد.

وليد قرب عليه ومسكه من كتافه:-
اهدى ياحمزه ياخوى..اهدى وأدعيلها ربي يكون معاها.

حمزه :-
هيا وين باهى ..شن صار علاها .

وليد بإرتباك :-
سهيله ..احم سهيله ياحمزه بالعمليات.

حمزه بخوف:-
عمليات عشان أيش ..سهيله شن اللي صارلها خبرني ياوليد تربح راني ماعاد نقدر نتحمل.

وليد نزل عيونه بالأرض:-
مع الأسف نزيف داخلي وكسور بجسمها و...

حمزه شافله ودموعه مش راضيه توقف:-
وشني كمل .

وليد بلع ريقه:-
الجنين سلامة راسك وربي يعوضك خير ياحمزه يااوخي.

عند هالكلمه قعد حمزه ع الأرض وأنهار بالبكاء وقعد يعيط زي المرأه

"وووه عليا ياسهيله ..ياحليلي ياسهيله من ليا بعدك ..ياحليلي ياعشيرتي ياكل من عندي ف الدنيا وين تبي تمشي وتخليني ... اااه ياربي لاتختبرني فيها ...ياربي خوذ من عمري وعطيها " وقعد يخبط ف وجهه.

قرب من وليد ووسيم وقعدو يقيمو فيه .

وسيم :-
مايصير ياخوي ياحمزه ماادير ف روحك هكي تعوذ من الشيطان هذا غلط راهو ديرك .

حمزه:-
اطلقوني تربحو نار فيا راهو ...ووو عليا وووه .

بهاللحظه خضه وليد بقوه وضربه كف:-
شد روحك ياراجل وخلي عزمك عزم تريس ..بدل ماتنوح زي الوليه وتفاول عليها أدعيلها ربي ينجاها ويتلطف بيها .

حمزه بدموع:-
راهى سهيله مش زوجتي بس...سهيله عشيرتي وأم صغارى ورفيقتي بهالدنيا ياوليد نار فيا ياوخي.

كيف بيرد وليد طلع الدكتور المساعد يجري

د.فتحي:-
من فيكم قريب المريضه اللي بالعمليات.

حمزه قرب.منه:-
انا...انا.زوجها يادكتور شن في.

د.فتحي:-
محتاجين دم بسرعه وبأسرع مايمكن ..النزيف مازال مش راضي يوقف وكل الأكياس اللي تبرعتو بيهم أستخدمناهم .

حمزه بصدمه:-
انا.وياها مش نفس الفصيله.

وليد وهو يدور وشاد شعره:-
وانا.ووسيم الزوز عطينا ...كيف الراي.

حمزه:-
سيف خوها وين هو زي فصيلتها.

وليد:-
سيف مازال مايدري ع شي.ياحمزه ..المصيبه كلها وين يعرف سيف.

حمزه:-
باهي شن الحل ..مافيش الا تتصلو بيه تخبروه .

د.فتحي:-
ماف وقت ياخونا ..المريضه ماتتحمل انتظار قلبها درناله انعاش مرتين راهو.

بهاللحظه تكلمت بسمه من وراهم :-
انا رح نعطي يادكتور.

وليد جي علاها :-
بسمه انتي بروحك مش تمام ...وتو كانو معلقينك تغذيه ..اساسا شن نوضك من فراشك.

بسمه بعصبيه:-
مش وقت فراشي توا ..انا لازم نساعد سهيله زي ما ساعدتني ودموعها نزلو .

د.فتحي:-
تمام ياأختي ...لو تحسي روحك كويسه تعالي معانا بسرعه.

بسمه :-
اوك ...تمام .
.
.
عند فاتن:-
كانت أدور زي المجنونه بدارها من وقت ماكلمها حامد وهيا مش عارفه شن تتصرف

مسكت فونها واتصلت ع حامد بالاول مارضي يرد علاها بس بعدها رد.

حامد بعصبيه :-
خيرك يامصيبه شن تبي.

فاتن بخوف'-
حامد ..حامد شن صار طمني عرفت شي .

حامد:-
الاخبار كلها سيئه اعوذ بالله منك ومن معرفتك السوده.

فاتن بصدمه:-
كيف يعني شن صار.

حامد بتكشيخ:-
يافالحه اللي انضربت أخت سيف وهيا ف العمليات ف لطف الله .

فاتن وهيا تخبط ف وجهها:-
يانهاار حرف ياحليلي .

حامد بعصبيه:-
مازال ياماما ماعرفتي الطامه الاكبر من هكي.

فاتن بخوف:-
شن قصدك شن في.

حامد :-
اتصلت بواحد من معارفي ف الشرطه ..ومن هني لهني قصقصته ع القضيه قالي ف حد من الشهود اللي حاضرين الحادث بلغ ع لوحه السياره اللي ضربت المراه.

فاتن وقفت مصدومه:-
كيف يعني !!

حامد:-
يعني يابومه ..هكي الشرطه رح توصل لصاحبنا ورجلينا رح تكون ف الفلقه جميع .
وسكر ف وجهها.
.
.
.
عوده للمستشفي:-
بعد ماعطت بسمه الدم ودخلوه لسهيله .

رجعت قعدت مع امل ..شوي وجت ولاء وفوزيه واللواء منصور بعد ماقاللهم وسيم كل شي .

قعدو بجنب بسمه وقو يواسو فيها ...ومسك بسمه فونها واتصلت ع امها وبلغتها اللي صار وقالتلها انها جايه هيا وبوها.

عند الرجااله كان حمزه ووسيم ووليد ومنصور قاعدين مع بعض.

منصور :-
شن سهيله توا ..ماخبروكم علاها شي.

حمزه :-
ف العمليات قعده ترجى ف لطف الله.

منصور حط يده ع كتف حمزه:-
وحد الله ياولدي مايصير كان الخير.

حمزه بدموع:-
والنعم بالله.

منصور شاف لوليد :-
ماعرفتوش كيف صار الحادث ووين.

وليد :-
ماقدرنا نفهمو شي من بسمه ..من وقت ماجت وهيا منهاره وشاده غير كلمه انا المفروض نكون مكانها.

اللواء منصور:-
خير ان شاء الله...عموما انا جاي ف الطريق اتصلت بالمقدم جلال اللي بالمركز واستفسرت منه قالي "ع الاغلب يكون الحادث متعمد ع حسب شهاده الشهود...وف واحد من الشهود عطاهم رقم الطارقه متع السياره اللي ضربت سهيله وقالي رح يتصل بيا ويبلغني بالتطورات .

وسيم:-
يستر الله وخلاص ..المهم توا سهيله تنوض بخير والباقي كله ساهل.

منصور:-
هو هذا فعلا....ماتقولوليش امالا سيف وين.

وليد:-
سيف مازال مايندري ع شي يابوي .

منصور:-
كيف مايندري ع شي ..مايصير هالشي اخته من حقه يعرف عنها مش غافل لعند توا.

وسيم:-
انا مستحيل نقدر نبلغه ...شوفو غيري لهالشي.

منصور؛-
وليد انت تقدرر تتفاهم معاه وتحكيله بهدوء ..امشي توا وجييه.

وليد :-
يابوي مافيش غيري بالله كيف بنقابله ماتحطني بهالموقف ارجوك.

منصور بأصرار:-
قتلك امشي...امالا ليش خوه لو ماواسيته بهالظرف

وليد بإستسلام:-
حاضر يابوي ..عن أذنكم.

منصور:-
أذنك معاك ربي حافظك.
.
.
.
عند سيف:-
كان قاعد بمكتبه بعد ماخلص أجتماعه وماسك فونه ويتصل ببسمه وهيا ماترد عليه ...شوي وبعتلها مسج✉
"أستاحشتك حبيبي..معقوله هذا كله مشغوله بالسوق وناسيتني استاحشتك انا...بعد تروحي رح نوريد انتي وسهيله اللي خاطفاتك مني ...انحبك انا 😙".

شويه ودخلت هبه وبيدها فنجان قهوه..

هبه :-
حضرتلك فنجان قهوه ...اكيد مصدع بعد الاجتماع .

سيف:-
إي والله جي ف وقته ...يسلمو ايدياتك ياهبه .

هبه بإبتسامه:-
الله يسلمك ...صحه وعافيه ع قلبك.

سيف وهو ماسك الفنجان بيده ويشرب منه:-
ماتقوليليش القرد وسيم وين مشي...من وقت ماقالي شوي عندي فون وراجعلك ماعاد جي.

هبه :-
والله مانعلم...هو حتي وليد مفروض اليوم بيجيك عشان مشروع السيد أشرف فاكره.

سيف كيف بيرد انفتح الباب ودخل وليد .

سيف ضحك:-
اهو ولد الحلال عند ذكره يبان...وحق ربي بتموت شيباني ياويدو.

وليد كان حاط عيونه بالأرض ووجهه مايتفسرش ...وكل خطوه يمشيها يحسها مشيه دهر .

وقف سيف بأستغراب وقرب عليه :-
خيرك وليد ..وجهك هكي.وساكت شن في.

وليد قام عيونه وأول ماجت بعيون سيف دمعته نزلت :-
سيف ..سيف انا نبي نقولك شي.

سيف مسكه من كتافه وشافله:-
شن ف ياوليد احكي شغلتني .

وليد خذي نفس وبلع ريقه :-
سيف ...احم سهيله .

سيف بعصبيه :-
سهيله خيرها ياوليد احكي مااطلعلي خلوقي .

وليد غمض عيونه ودموعه مازال ينزلو :-
سهيله من ساعه ضربتها سياره و...

سيف بصدمه:-
.....
.
.
#يتبع.

برايكم شن رح يصير ...شن رح تكو ردت فعل سيف...سهيله رح تعيش والا خلاص هذه النهايه...وفاتن بتطلع منها والا حفرت قبرها بيدها...وشن قصه عادل مع محمود .

بإنتظار تفاعلكم وتعليقاتكم .

ملاحظه/نعتذر ع حلقه امبارح والسبب ظروف مرضيه وعائليه ماقدرت نكتب حلقه ويادوبني كتبت اليوم عشانكم .

ملاحظه 2/الشكر كل الشكر والاحترام والحب موصول لكل من اطمن عليا سواء ف الانبوكس او اتصل بيا والله ماقصرتو ومن جد نحبكم هلباااا وشكرا خاص لدندونتي ربي يسعدك ياعمري
@Dina Arafa .

تحياتي وأحترامي أختكم وصديقتكم.

#zezo_a_saad😙❤

[فيتامين سي]

#إنتقام_عاشق.
.
.
.
الحلقه عشرون.

"أصعب شعور يمكن يحس بيه اي أنسان بهالدنيا هو شعور الخوف من فقدان أحب الناس ع قلبه 💔😢".

كان وليد داخل ع سيف وبعيونه الخوف والوجع من اللي رح يقوله قدم من سيف بخطوات ثقيله وبكل خطوة يحس ان حمل جبال علي كتافه .

وقف قدام سيف وكانت دموع عيونه تحكي من قبل حتي ماينطق:-
احم ..سيف في شي صار لازم تعرفه

سيف مسكه من كتافه وشافله :-
احكي ياوليد شن في شغلتني.

وليد خذي نفس وبلع ريقه:-
سيف...احم سهيله.

سيف بعصبيه:-
سهيله خيرها ياوليد احكي مااطلعلي خلوقي.

وليد غمض عيونه ودموعه مازال ينزلو:-
سهيله من ساعه ضربتها سياره و....

سيف بصدمه:-
سهيله من ...انت شن قاعد تخرف ..سهيله مع بسمه ماشيين يجهزو لفرحي شن تقول انت.

وليد قرب منه وحضنه:-
اهدى ياسيف أرجوك شد حيلك وأدعيلها.

سيف دفه بقوه:-
ندعيلها شن ..خيرك تخرف انت وليد ماتلعبش معاي ايوا.

وليد بهدوء :-
ياسيف ركز معاي أرجوك وأستوعب سهيله بالمستشفي وتستني ف لطف ربي ودعاءك ليها.

سيف شافله ورمش مره وأتنين ..وبعدها طلع يجري ..طلع ف جرته وليد .

كان يجري من غير وعي من غير تركيز تعثر مره واتنين بالدروج وطاح وكل مايحاول يمسكه وليد يدفه ويهرب منه .

سيف بهستيريا ولا وعي:-
"لالا ..سهيله اختي كويسه ..اصلا كذب سهيله مستحيل تخليني ..هيا زمان وعدت امي وبوي تقعد معاي .. لا وليد يكذب كلهم يكذبو انا متأكد سهيله وعدتني ومستحيل ماتوفي بوعدها" .

طلع سيف من الشركه للشارع وهو بحال مش واعي حتي بخطواته ...ضياع تشتت ألم مش قادر يحس بشي غير ان الطريق صارت طويله عليه وكأن المستشفي ببلاد تانيه .

كان وليد يجري وراه ويحاول يمسكه وهو يفلت منه وبلحظه مسكه بقوه لعند طاح هو وياه ..قيد حركته ومسك ايديه .

وليد بدموع:-
سيف اصحي .

سيف شوف بعيوني ..قتلك شوف بعيوني.

سيف يحاول يفك روحه:-
اطلقني ياكذاب ...اطلقني ياكلب تفوو عليك تكذب عليا تقولي سهيله بتموت هذه اختك ياحيوان اختك.

بهاللحظه وليد حضنه بأقوي ماعنده وقعد يبكي بأعلي صوته:-
اااه ياسيف ياوخي والله حاس بيك ونارنا وحده ...أبكي عيط ماتقعد كامد ف صدرك بس أدعي لربي أن يتلطف بيها بس .

بهاللحظه بركان سيف تفجر ...عيط صرخ ريش حوايجه كان بحاله من الصدمه والهستيريا .

بعد فتره هدي وكانو بس دموعه ينزلو وكأنه مغيب عن الدنيا لا كلام لاصوت لا حتي نفس دموع ينزلو بس حتي عيونه مايرمشو.

قامه وليد من يده وركبه للسياره ومشي بيه للمستشفي .
.
.
.
عند فاتن :-
بعد ماحكي معاها حامد وعرفت باللي صار ...كانت زي المجنونه مش عارفه شن تتصرف .

نزلت تجري من دارها ومشت عند بوها بالجنان .

فاتن بإرتباك:-
دادي .

خليل شال نظارات النظر من ع عيونه وشافلها:-
شن في يافاتن خيرك.

فاتن وهيا تفرك ف ايديها ببعضهم:-
دادي انت لازم أدبرلي رحله ع أقرب طياره واليوم قبل بكره.

خليل وقف :-
شن في ليش مستعجله ..شن هالتغيير المفاجئ مش كنتي معنده وماتبي تسافري.

فاتن بخوف وارتباك:-
ماصارليش غيرت رأي ..نبي نسافر بأقرب وقت.

خليل قرب منها ومسكها من يدها:-
قصه سفرك المستعجل مش لله..قوليلي شن مدايره من عمله يابنت أعترفي

فاتن فكت منه يدها وعطاته ظهرها:-
ما..مما مامدايره شي ...شن بنكون مدايره يعني نبي نسافر بس مش أكثر .

خليل :-
خلاص امالا اصبري رحلتك بعد يومين في ماعندك علاش مستعجله .

فاتن بعصبيه:-
قتلك نبي نسافر ..بشنو تفهم انت .

خليل بنفس العصبيه:-
وانا قتلك رحلتك بعد يومين وهذا أخر كلام عندي فاهمه وخش سيبها.
.
.
.
عند اللواء منصور:-
جاه اتصال من المركز بخصوص القضيه ومشي لعندهم وأول ماوصل ..دخل لمكتب المقدم جلال.

منصور:-
السلام عليكم ولدنا .

المقدم جلال وقف ولف ع مكتبه:-
اهلا اهلا بالسيد منصور...نورتنا والله.

منصور:-
منور بوجودك اكيد ...وبعدين بلاش القاب وسيد ومش عارف شني انت بمقام ولدي وبعدين نحن زملاء مهنه والا لا.

جلال:-
نتشرف والله اكيد ..بس لكل مقام مقام ..وانت تاج راسنا .

منصور :-
ربي يحفظك ياغالي...اتصلت بيا ان شاء الله خير.

جلال:-
ايه والله ...ف تطورات بخصوص قضيه حادث السير اللي سألتني عنه الصبح وقلت ان أقرباءك فقلت نبلغك بيه.

منصور بإهتمام :-
ان شاء الله خير .

جلال :-
خير ان شاء الله...تبعنا لوحه السياره اللي عطوهالنا احد الشهود ومن حوالي نص ساعه بلغتني احد الدوريات ان السياره انوجدت بقرب شط البحر وكانت فاضيه مافيها حد.

منصور:-
هكي معناتها رجعنا لنقطه الصفر.

جلال :-
حتي انا هكي قلت...بس بعد التفتيش وتمشيط المكان انوجدت محفظه جيب طايحه بمكان مش بعيد عن السياره ..الظاهر والله اعلم ان المجرم لما نزل كان مرتبك وماانتبه ع محفظته لما طاحت .

منصور بتفاؤل:-
الحمد الله هذه اخبار تفرح ...سبحان الله ربي فضحه بسرعه.

جلال:-
تمام طبعا اسم هالشخص تعمم ع كل الدوريات وحتي بالحدود والمطار وجاري البحث عليه والاتصال بالجهات الامنيه بكل الوحدات وف أسرع وقت ان شاء الله رح يتم القبض عليه.

منصور:-
الحمد الله ..ربي يبارك فيك ويحفظك جلال ومشكور ع مجهوداتك الجباره .

بعد وقف منصور وقف معاه جلال :-
ولو ياسيد منصور هذا واجبنا ...وانا ان شاء الله رح نوافيك بالتفاصيل أول بأول ورح نقعد ع تواصل معاك.

منصور سلم عليه:-
تحياتي ليك وربي يحفظك .
.
.
.
عوده للمستشفي :-
وصل وليد مع سيف وكان سيف علي حاله صمت مرعب وهدوء مخيف .. دخل وليد وكان ماسك يد سيف وهو بغير عالم

أول ماشافه وسيم جي يجري عليه وحضنه وبعدها قربت منه ولاء وحضناته .

ولاء شافت لوليد بخوف وهمستله :-
وليد خيره سيف هكي .

وليد :-
داخل ف حاله صدمه بس مافيه شي.

ولاء دموعها نزلو:-
وليد انا خايفه...سيف مش طبيعي بكل.

حضنها وليد ولف يده ع كتفها:-
ماتخافي حبيبتي مافيه شي هو بس ف حاله صدمه .

بهاللحظه وقفت بسمه وقربت منهم بخطواتها كانت تمشي ببطئ والشي الوحيد اللي سابقها دموعها .

وقفت قدام سيف وشافت بعيونه وكأنها تحاول تفهم هو بشن يفكر ..ومن غير سابق أنذار حضنها بأقوي شي عنده ودخل ف نوبه بكاء مخيفه .

بسمه وهيا تبوس ع راسه من خلف وتبكي:-
أنا اسفه حبيبي ..ارجوك سامحني ..سيف والله ماكان بقصدي هيا دفتني كان المفروض نكون انا والله بحياتك سامحني.

سيف حط يده ع فمها وقعد يضغط عليه وهو بحالة لا وعي:-
اشششت اششت ماتحكي هكي ...سهيله رح تكون كويسه انا متأكد هيا وعدتني أصلا راهو ...وانتي رح تكوني ليا ومش رح يفرقنا شي عن بعض ورح نعيشو كلنا لبعض ومع بعض ..ماعاد تحكي هالكلام فاهمه فاهمه قولي فاهمه.

كانت بسمه تهز في راسها ويده مازال ضاغطه ع فمها ودموعها ينزلو .

قام يده وحضنها من جديد ...لعند طلع الدكتور من غرفه العمليات .

قربو الكل يجرو عليه وناض حمزه اللي قاعد ع الارض .

حمزه :-
طمني يادكتور شن صار ع زوجتي .

د.خالد :-
بصراحه مانخبيش عليكم...وضع المريضه مش مستقر والنزيف الداخلي مايطمن حطينالها جهاز شفط ف الرئه عشان يطلع الدم اللي داخل ...ورح نحطوها بوحده I.C.U وان شاء الله ربي يتلطف بيها .

حمزه :-
يعني مازال في خطر ع حياتها يادكتور.

د.خالد:-
نحن درنا اللي علينا ...والباقي ع ربي..عن أذنكم.
.
.
.
تسريع بالأحداث:-
مرت الساعه المتبقيه من النهار ع الكل ببطئ وترقب ...الكل يستنى ومش عارف شن رح يصير ...سهيله مازالت بالعناية ومازاد شي علاها.

بالليل الساعه 10:-

بسمه:-
ماما ...نوضي روحي انتي وبابا وكان صار شي رح نحكيكم.

نجيه :-
انتي قاعده مش مروحه.

بسمه :-
لا ياماما مانقدر نروح ونخلي سيف بروحه.

نجيه :-
باهي يابنيتي ديري اللي يريحك.

ناضت نجية وقربت من كرسي الحاج علي وقالتله:-
هيا ياحاج بنتوكلو للحوش تعب عليك من الصبح وانت ع كرسيك .

الحاج علي:-
وبسمه بتروح معانا.

نجيه:-
لالا قالت بتقعد ماتقدرش تخليهم بروحهم.

الحاج علي:-
خيرت مادارت...امالا ياحاجه شوفي صغيويرت المراه وين حطوهم كان هذا ناخذوهم معانا بوهم يعلم الله بحالته مسكين.

نجيه :-
حاضر ياحاج خلي نسألهم ونجى.

مشت نجية وسألت بسمه ع صغار سهيله وقالتلها انهم عند فوزية أم وليد ..وبعدها طلبت من وسيم يوصلهم للحوش وروحو.
.
.
ومرو يومين والكل ع نفس الوضع...الشي الوحيد اللي تغير أن سهيله وضعها أستقر ولو قعدت ع هالحال رح يطلعوها من العنايه .

سيف كانت بسمه معاه بكل لحظه وماسيباته بكل .

امها وبوها يمشو ويجو ع المستشفي وكذلك وليد واهله ووسيم اللي بوه وصل من السفر أمس بعد مابلغه وسيم باللي صار.

صغار سهيله كانو عند فوزيه وكان حمزه يمشيلهم عشان مايحسسهم باللي صار وكل مايسألوه ع أمهم يقوللهم مشغوله تحضر لعرس خالهم سيف
.
.
.
.
العصر الساعه 5:38 دقيقه:-
كانت فاتن تجهز ف شنطتها وتستعد بتسافر لأن طيارتها بعد ساعتين وبهاللحظه انفتح باب دارها ودخل بوها وهو معصب.

خليل بعصبيه:-
كنت عارف انك مدايره مصيبه يافاتن .

فاتن بخوف:-
شن في يابوي شن اللي صاير.

خليل :-
اللي في ان الشرطه تحت يدورو فيك...معاهم امر بالقبض عليك.

فاتن بخوف وأرتباك:-
ليش انا شن درت..انا مادرت شي.

خليل عيط بوجهها:-
كيف مامدايره شي ..امالا جايين يتبلو عليك ...يانهارك الاحرف شن مدايره من مصيبه قولي .

فاتن قربت عليه ومسكت يده:-
ارجوك ماتسلمني ليهم...ارجوك تصرف مانبي نمشي معاهم.

خليل :-
نتصرف كيف قوليلي نتصرف كيف معاهم امر قبض رسمي وتقوليلي تصرف

فاتن بعصبيه ولا وعي:-
نعرفش دبر راسك ...مش انت رجل اعمال وعندك معارفك بكل مكان دير راي حلها بأي طريقه.

خليل :-
ودرتي روحك وتقوليلي حلها ...غير انزلي خليني نحكي مع المحامي ونشوف حل لهالمصيبه السوده .

وبالفعل نزلت فاتن ورفضت تمشي معاهم بحجه انها بريئه ومادارت شي لعند خذوها بالقوة وسط نوبة صراخ هستيريه.
.
.
.
بالمركز وتحديدا عند المقدم جلال اللي كان قاعد مع منصور خبط الباب ودخل خليل ومعاه المحامي بعد ماخذي أذن الدخول.

خليل:-
مساء الخير سياده المقدم...معاك خليل النافع والد فاتن اللي جبتوها من شوي وهذا المحامي أحمد رزق الله اللي رح يترافع عليها.

المقدم جلال:-
اهلا بيك سيد خليل ...معاك المقدم جلال وهذا اللواء منصور تفضل أستريح.

خليل :-
شكرا .

المحامي أحمد :-
ماقتلي ياسيادة المقدم ممكن نعرف تهمت موكلتي وملابسات القضيه ودلائلها.

المقدم جلال:-
سيد أحمد موكلتك متهمه بالتحريض عن القتل وتأجير شخص لتنفيذ جريمه قتل مقابل مبلغ مالي كبير.

خليل وقف بصدمه:-
مستحيل هالشي ...بنتي مادير هالشي كذب هالكلام..

مقدم جلال:-
سيد خليل تحفظ ع الفاظك واحترم الجهه الامنيه اللي قاعد فيها لو سمحت والا رح نطلعك بره.

وقف احمد ومسك يد خليل :-
سيد خليل اقعد واهدي خلينا نفهمو بالاول ارجوك.

بعد ماقعد خليل ..شاف احمد للمقدم جلال :-
انا اسف ع تصرف السيد خليل وهو ماكان بقصده من اثر الصدمه مش اكثر .

المقدم جلال:-.
حصل خير ...وعموما ياسيد خليل نحن عندنا الادله الكافيه اللي ادين بنتك.

محاني أحمد:-
وشن هالادله سيادة المقدم ..ممكن تطلعني عليها.

جلال شاف لمنصور وبعدها قال:-
تسجيلات صوتيه ومكالمات مع المدعو حامد ...بالاضافه لأعتراف المجرم اللي تم القبض عليه بأن تم التحريض من قبل موكلتك السيده فاتن وكان تحريض مباشر..عموما هذا ملف القضيه تقدر تراجعه قبل ماتبدأ ترافع عليها بالمحكمه .

احمد أستلم الملف ووقف وكان خليل ف حاله صدمه كامله'-
شكرا سيد جلال ع تعاونك ...وربي يعاونك عن أذنك.
.
.
.

عند أمل :-
بعد روحت من زيارة المستشفي ...دخلت لحوشهم سلمت علي أمها وبعدها دخلت غيرت لبسها وبعتت لوليد مسج عشان اطمنه أنها وصلت وبعدها طلعت عند أمها بالمطبخ.

أمل:-
شن أديري حبيبتي.

حليمه:-
نحضر ف العشي ...ع أمل بوك يرضى يتعشى.

أمل:-
خيره بابا ياماما عنده أيام وهو منطوى ع حاله.

حليمه:-
والله يابنيتي ماني عارفه...طول الوقت بين دار المرحوم ودارنا ..وكان طلع يمشي للجامع بوقت الصلاة..حتي الشغل ليه وقت هامله مانعرفش خيره .

أمل :-
خلاص ياماما انا رح نمشي نحكي معاه ونشوفه مابين حضرتي العشي.

مشت أمل وخبطت ع دار بوها وبعدها خشت.

أمل:-
السلام عليكم بابا

الصادق رفع فيها عيونه وبعدها نزلهم:-
وعليكم السلام.

قربت منه امل بتردد وقعدت بجنبه :-
أحم .. بابا يمكن نسألك سؤال.

الصادق.شافلها وهو ساكت..ومارد علاها.

قربت منه أمل اكثر وشافتله:-
بابا خيرك ليك أيام وانت مش أنت..شن اللي قلب حالك وغيرك هكي...بابا والله الحوش مايسوى بلا حسك ..تصدق لو قتلك أستاحشت كل شي فيك حتي بوقت تهزبني وتناديلي أمجد بدل أمل .

بهاللحظه دموعها نزلو مسحتهم بسرعه وكملت كلامها بغصه:-
حتي بوقت تضربني وتشدني من شعري ..بابا شوف شعري بدي يطول وبنرجع أمل من جديد .

قعدت عند رجله وحطت راسها بحضنه وكملت كلامها بدموع:-
ماتفكر أني نكرهك أو زعلانه منك ..بالعكس بابا ع طول نحاول نعذرك ونرضيك نحاول نحط نفسي مكانك ونستوعب صدمه الواحد لما يفقد أغلي شي عنده ..عارف بابا أحيانا نتمني أني جيت ولد ع الأقل كنت رح نشوف الفرحة بعيونك بدل الحزن كل ماتشوفي..نتمني رضاك بابا والله بعمرى ماحقدت عليك حتي بوقت تضربني ولا بيوم تجرأت ندعي عليك بالعكس كنت ع طول بوقت تشد عليا نقعد نستغفر ونحاول مانقول شي يمكن يغضب ربي عليا.

بهاللحظه الصادق حط يده ع راسها وقعد يمسح عليه ويحكي :-
أنا طول عمرى عشت يتيم يابنتي ...لا نعرف لابوي ولاأمي...تخبطت.ف هالدنيا وتعبت وشقيت ونجرت الصخر بظوافرى لعند كونت روحي.

تزوجت أمك وعشت معاها ع الحلوه والمره ..وأحلوت الدنيا بعيوني لما ربي رزقني بأمجد ربي يرحمه وبعدها رزقني بيك ...كنت نشوف فيكم عوض ربي ليا أن صح بديت حياتي يتيم ولحالي بس بعدها عوضني ربي بمرأه صبوره وصغار.

مرو الايام وكبرتو وكل يوم تكبرو فيه نحمد ربي ونشكره ع هالنعمه ...لعند ودموعه نزلو وانهار بالبكي
"لعند فرحتي بين يوم وليله أنسرقت مني ...لما جو قالولي ولدك غرق ف البحر ومات ..حسيت الدنيا ماتت بعيوني ..بكرى وحيلتي اللي طلعت بيها من هالدنيا طارت...السند اللي كنت بكل يوم نقول بكرا رح يكبر ويشيل عن أكتافي المسؤوليه مات...عارفه ياأمل بديت حتي انا خايف من الموت.

أمل مسكت يده وباست علاها:-
بعيد الشر عنك...ربي يمد بعمرك وياخذ من عمري ويعطيك .

الصادق كمل:-
عارفه ليش خايف...عشان ماعنديش السند خايف نموت ونخليكم وتتمرمطو من بعدي وتعيشي نفس اللي عشته انا وصغير...ع طول نقول انا صح تمرمدت ف صغري بس بالاخر انا راجل ..بس أمل بنت ماتقدر تواجه الدنيا ..تفكيري الجاهل خلاني نغضب ربي كل هالسنين ونعاملك معاملت الرجل فكري اني هكي نبني ف شخصيه قويه ليك وبالمره ننسي حزني ع ولدي ونشوفه فيك .

مسكها من كتافها وقامها قعدت بجنبه وحضنها بقوه:-
سامحيني يابنتي ..سامحيني ع كل يوم مديت يددي فيه عليك ..سامحيني ع الالم والوجع النفسي كل هالسنين ..انا كنت أب مش صالح بس نتمني ربي يعوضك العوض الجميل.

امل وهيا تبوس في ايديه وراسه :-
ماتحكي هكي بابا ... أنت تاج راسي ورضاك جنتي وانا لو مهما درت مانوفيك حقك وقتلك انا بعمري مازعلت منك عشان نسامحك.

مسحت دموعه بيدها:-
الله لايجيب يوم نكون فيه انا سبب دمعتك ...بابا خلينا ننسو كل اللي فات ونبدأو من جديد ...من الليله أب وبنته أستاحشت تفتخر بيا زي زمان وتقول هذه بنتي أستاحشت نشوف الفرحة بعيونك وقت نجيك فرحانه ونقولك نجحت بابا..أستاحشت لهفتك عليا بوقت نمرض وسهرك جنبي طول الليل .

الصادق مسح دموعها:-
وعد مني رح نعوضك عن كل اللي فات وبعمرى مارح نكون سبب لدموعك من جديد ورح نرجع كيف زمان الرجل اللي يحب طفلته ويفتخر بيها.

أمل حضناته بفرحه وضحكه:-
نحبك بابا نحبك والله نحبك ياكل دنيتي.

الصادق حضنها وناض هو وياها:-
وانا نحبك ياروح بابا ...يلا خلي نمشو للحاجه حليمه أستاحشت قعدتي معاكم والله زي زمان.

أمل وهيا ماسكه يده اللي ع كتفها:-

رح ندير كيكه الزمنيه اللي يحبها قلبك ونقعدو بالجنان ونشربو قهوتنا قدام النخله زي زمان .

الصادق:-
ايه والله استاحشت هالقعدة اللي غابت عني سنين.

"الله يرحمك بابا ..كنت ومازلت سندي الاول اللي كل ماكتبت ع الأب دموعي ينزلو وبراسي تتعاود كل ذكرياتي معاك .. يارب تكون مسامحني وراضي عني زي ماكنت تقولي أنتي الرضيه ياباهيه البنات وسكاتتهم " .

❤الأب هو السند والنعمه اللي ع طول أحمدو ربي علاها وتأكدو أن أكبر باب للسعاده رح يتسكر يوم اللي يفارقوكم ربي يمد بأعمار أباءكم ويرحم بابا واب كل من فارقه💔 .
.
.
.
وهكي مرو 3 ايام تانيات ع أبطالنا :-
الكل عرف ان فاتن هيا السبب ف اللي صار....ومشت بسمه قدمت شهادتها بالمحكمه .

-سهيله وضعها أستقر رغم الانتكاسات اللي صارتلها ..وطلعوها أمس لغرفه عاديه وفرحت الكل كانت ماتنوصف وخصوصا سيف اللي كان زي البيبي مش قادر يفارق أمه ومعاها بكل دقيقه حتي بوقت النوم يغفى بجنبها.

-فاتن كان بوها مداير جهده عشان يطلعها من القضيه بس ماف فايده لأن كل الأدله ضدها ولابستها التهمه.

_أمل كانت عايشه بسعاده وسط امها وبوها وفرحتها أكثر مع وليد اللي وعدها أن اول ماتترتب الامور وتطلع سهيله من المستشفي رح يتقدملها .

_محمود كان مختفي وماحد داري بشنو قاعد يخطط او علي شن ناوي وياساتر من اللي جاي منه.
.
.
.
يوم الثلاثاء الساعه 10 الصبح :-
كان الكل قاعد بقاعه المحكمه بأنتظار النطق بالحكم بخصوص قضيه فاتن .

سيف وليد وسيم بسمه وحمزه مع بعض ..بالمقابل بوها خليل اللي كان ف حالة أنهيار والمحامي أحمد .

محكمه🔨:-
وقفو الكل ...ودخل القاضي والمستشارين اللي معاه.

القاضي:-
بعد الاطلاع علي ملابسات القضيه ...والاستماع لشهاده الشهود والاستناد علي الأدله .

حكمت المحكمه حضوريا علي المتهمه "فاتن خليل " بالسجن 12 سنه بتهمه التحريض المباشر علي القتل مع سبق الأصرار والترصد ...كما وحكمت المحكمه علي المدعو "حامد الناجح" والمدعو "فيصل شويقي" بالسجن 14 سنه رفعت الجلسه.

بهاللحظه خليل طب ساكت بمكانه ...أما فاتن دخلت بحاله أنهيار تام وتصرخ بأعلي صوتها وبهستيريا :-
لا اااا لااااا كلكم كلاب ...كلكم ظلام ...انا مادرت شي ...ربي يلعنكم

وكان الشرطه ماسكينها ويسحبو فيها من قاعه المحكمه.

"وهكي سقطت ورقه أول ظالم بقصتنا ... فاتن أنسجنت وخذت عقابها ...وبوها كانت نهايته الموت بسكته قلبيه ماامهلاته حتي يوصل للمستشفي ويسعفوه ..ويمكن هو يتحمل جزء من المسؤوليه لأنه ماعطاها حقها ف تربيته ليها".

.
.
بالليل الساعه 10:-
كان الكل سهرانين بحوش سهيله بعد ماطلعوها ..ومتعشيين وفرحانين مع بعض .

وليد واهله...وأمل واهلها اللي عزموهم عشان تتعرف العائلات ع بعضها..بسمه واهلها..رهف وجدتها.. وسيم وبوه .

الكل عايش الفرحة والسعاده حتي حمزه اللي رغم الخبر اللي تلقاه الصبح من الدكتور .

فلاش باك:-

مشي حمزه لمكتب الدكتور خالد وخبط ع الباب وبعد ماسمع الأذن دخل.

حمزه:-
السلام عليكم دكتور.

د.خالد سلب نظاراته وشافله:-
وعليكم السلام...اهلين ميتر تفضل .

حمزه:-
شكرا ...قالي الدكتور فتحي أنك طلبتني ان شاء الله خير.

د.خالد :-
ايه والله ف موضوع مهم لازم نحكيه معاك.

حمزه:-
خير ان شاء الله يادكتور خوفتني

د.خالد :-
بصراحة مانخبيش عليك...ان عارف ان المدام كانت حامل وأجهضت وبالاجهاض نزفت هلبا وأضطرينا ندخلوها للعمليات

حمزه بترقب:-
إيه .

د.خالد:-
هالشي أثر بشكل كبير ع الرحم ..وسبب تضرر فيه وف أحتمال بنسبه 65 % أن المدام للأسفل ماعاد تقدر تجيب ولاد.

حمزه حط يده ع راسه:-
الله المستعان ...لاحول ولاقوه الا بالله العلي العظيم.

د.خالد:-.
خلي املك بالله كبير ..وهو لو ناوي يعطيك مش رح ينساك وبعدين الطب تطور واللي عند ربي مش بعيد.

حمزه:-
والنعم بالله...بس ارجوك يادكتور ياريت ماتبلغ حد غيري بهالشي ..ياريت يقعد الموضوع بيناتنا.

د.خالد:-
ولايهمك وكون مطمن من هالشي .

حمزه وقف وسلم عليه:-
مشكور دكتور بارك الله فيك ع تعبك معانا وربي يباركلك ف علمك.

د.خالد:-
مافي داعي للشكر ...هذا واجبنا والف الحمد الله علي سلامه المدام.

فاق حمزه من شروده علي يد سهيله .

سهيله:-
في شي حبيبي .

حمزه باس يدها:-
لا ياعمري سلامتك ماف شي.

وقعدو الكل سهرانين وفرحانين مع بعض وبهاللحظه رن فون منصور أستأذن وطلع رد عليه .

وبعد 10 دقايق رجع لوين الكل قاعدين.

منصور:-
احم ..سيف

سيف :-
نعم ياعمي.

منصور :-
ممكن تجي شوي نبيك ف كلمتين .

سيف بأستغراب:-
تمام حاضر .

ولحق منصور اللي كان مستنيه بالجنان .

سيف:-
شن في ياعمي شغلتني.

منصور :-
توا جاني أتصال من معارفي بخصوص محمود.

سيف بغضب :-
خيره.

منصور:-
......
.
.
#يتبع.

شن رايكم بالأحداث ...وبرايكم شن قصه محمود وهل نهايته قربت خلاص.

بأنتظار أرائكم وتفاعلكم.

تحياتي أختكم وصديقتكم .

#zezo_a_saad❤🌹

[فيتامين سي]

#إنتقام_عاشق.
.
.
..
الحلقه الأخيره "الجزء الأول".

صحيح أن شعور الظلم صاعب ومؤلم...بس أحيانا لو حبينا نفكرو بإيجابيه ونشوفو للجانب المظيئ من كل العتمه اللي مرينا بيها ...رح نحمد ربي ع حاجتين.

الأولى:-
أن كنا بهالحياة مظلومين ومش ظالمين وهكي شعور الراحة والرضا النفسي رح يخلينا نبتسمو بعز وجعنا لأن كنا الضحيه مش المجرمين.

والثانيه :-
الثقه العمياء بأن لو مهما أمتدت طريق الظلم وطالت وتفرعت رح تنتهي بهاية تبلع الظالم ورح تزرق فيها شمس العداله ع المظلوم .

بوقت اللي كان الكل ملتمين وقاعدين فرحانين مع بعض ويتعشو ..رن فون 📱اللواء منصور أستأذن منهم وطلع للجنان عشان يرد.

اللواء منصور:-
ألو السلام عليكم.

المقدم جلال:-
وعليكم السلام ورحمه الله...تحياتي سيدي وأسف لو أتصلت بوقت مش مناسب.

اللواء منصور:-
وعليكم السلام ورحمه الله ..مرحبتين بيك وأستغفر الله لاأزعاج ولاشي.

المقدم جلال:-
الله يبارك فيك...بصراحة أنا أتصلت بيك بخصوص معلومات وردتني ف القسم من شوي ع شخص كنت انت سألت عنه من قبل .

منصور بإستغراب:-
من هالشخص !!.

المقدم جلال:-
محمود الهاشم.

منصور بتركيز:-
إيه خيره .

المقدم جلال :-
الأخبار انه أنوجد مقتول بأحدى المزارع ومعاه شخصين مش معروف شن وضعهم .

اللواء منصور:-
كيف وأمتي صار هالشي.

المقدم جلال :-
والله مازال ماتأكدت ياسيد منصور ...أنا جاني الخبر من شوي من الأمن الجنائي وقلت نبلغك قبل مانطلع لساحة الجريمه ونعاين الوضع.

منصور:-
لا حول ولا قوة الا بالله...طيب ممكن تعطيني المكان لو سمحت.

جلال:-
تمام ...رح نبعتهولك بمسج أول مانوصل..تحياتي سيدي .

منصور:-
بارك الله فيك...ف حفظ الله.
.
..
.
بعد ماعلم منصور بالخبر دخل لوين الكل قاعدين كانت ملامح وجهه ماتتفسر ...قرب من سيف .

منصور:-
سيف...ممكن نحكي معاك كلمتين.

سيف تلفت عليهم:-
حاضر ياعمي جايك هيا .

طلع منصور للدار التانيه ولحقه سيف

سيف:-
شن في ياعمي ان شاء الله خير .

منصور :-
من شوي حكي معاي المقدم جلال .

سيف:-
باهي...بخصوص شنو.

منصور:-
قالي وصلاته أخباريه أن محمود أنقتل.

سيف بصدمه:-
كيييف...امتي صار هالشي ووين وليش .

منصور:-
مازال مش معروف شي ...بس اللي بلغ جلال الأمن الجنائي وقالو لقوه مقتول هو أتنين معاه ..شن ملابسات القضيه مانعرفش...رح نمشي توا ونشوف.

سيف:-
تمام انا نبي نمشي معاك .

منصور:-
ماف داعي لهالشي انت خليك مع أهلك ونساباتك وانا رح نبلغك أول بأول.

سيف بإصرار:-
لا ياعمي انا ضروري نمشي معاك .

دخل عليهم وليد:-
شن في ياجماعه خيركم قاعدين هنا .

ألتفت عليه سيف:-
جيت بوقتك وليد ...انا وعمي منصور بنطلعو وغطي علينا لعند نرجعو تمام.

وليد:-
ليش شن في ...شن صار بالضبط.

سيف:-
الكلب محمود لقوه مقتول من ساعات وبنمشو نفهمو شن القصه.

وليد:-
جديات تحكي مستحيل.

سيف:-
والله بجد...المهم غطي علينا تمام مابين مشينا وجينا .

وليد :-
تمام ..شن يصير بلغوني اوك.

سيف وهو طالع مع منصور:-
تمام ياغالي ...سلام.
.
.
.
بالصاله كان الكل قاعدين ويحكو .

فوزيه قربت من حليمه أم أمل وقعدت بجنبها :-
ماقلتليش ياحليمه ...بنيتك أمل معطيه لحد والا قاعده مش مرتبطه .

ولاء اتمتم لبسمه:-
أمي ادير ف الطروح..ع أساس مش زابطه ولدها طابس ف أمل وبيهبل علاها.

حليمه أبتسمت:-
لا والله...بنيتي أمل قاعده تراجي ف المكتوب.

فوزيه :-
ايه ايه...وباهي مافيش حد مسميتله يعني والا حاجه.

حليمه شافت لأمل وأبتسمت:-
لا ياحاجه مافيش حد.

فوزيه زادت قربت منها:-
شوفي ياحاجه حليمه...من غير لف ولا دوران ..ومن غير تطويل حبل ...انا بنيتك من وقت ماشفتها راهي خشت خاطري والكذب ع ربي حرام زهت حتي ف عيني ..أدب وجمال وأخلاق..وتبي الحاق أنا رايدتها كنينه ليا لوليدي الوحيد اللي طلعت بيه من هالدنيا..ووليد هيا تعرفه وماينقصه شي الحمد الله ..ونحن نشرو ف النسب الطيب والناس الخيره شن قولك ياحاجه.

حليمه بفرحة بس ماحبت توضحها قدامهم:-
والله ياحاجه كلامك مافيش ماينعاب ...ويثقل بالذهب وانا ماعندي مانقول فيكم ولا ف ولدكم...لكن راهو الشور والراي النهائي لبوها واللي شن قولك ياحاجه.

فوزيه:-
لا عندك الحق ياوخيتي ...هذا الكلام اللي بالأصول واللي ماشيه عليه الناس كلهم ..وانا هذا اللي ناويه انديره انا والحاج منصور ..بس قلت يعني ناخذ رايك ونجس نبضك قبل موافقين والا لا ..وزي ماتعرفي المراه صندوق زوجها وتعرفه من قبل مايقول ع الشي وانتي اكيد تعرفي راي الحاج الصادق من قبل حتي مانسألوه فقل ننشدك باش نعرفو نقدمو والا نوخرو.

أبتسمت حليمه وشافتلها:-
ربي يقدم اللي فيه الخير ..والخيره يجيبها ربي.

فوزيه :-
امالا ياحاجة مدامنا نحن النسيوينات متفاهمين ف بعض...جري الكلام ع الحاج هاليومين وردينا خبر باش نحددو موعد ونتقدمو رسمي وزي مايقولو سن الموس وهيا حاميه .

حليمه:-
ان شاء الله مايصير بخاطرك الا طيب...تو نشوف الحاج بكرا كان حيانا ربي ونردلك خبر...وتأنسونا بأي وقت ان شاء الله.

ناضت امل وبسمه وولاء للمطبخ ..واول مادخلو حضنو أمل الزوز.

بسمه بفرحه:-
مبروووك أموله ...ربي يكملك ع خير يارب حبيبتي.

أمل بطير من الفرحه:-
الله يبارك فيك ..ربي مايحرمني منك يابسمه.

ولاء:-
مبروووك ياكنتنا ...مع أن المعفن وليد مايستاهل بس وحق ربي عسل خوي وراكبين ع بعض ربي.يهنيكم ياقلبي .

أمل بأبتسامه:-
لله يبارك فيك ...وتسلميلي ياويلو الفال عندك.

ولاء حطت يدها ع صدرها :-
انا .....ابدا مستحيله انا مش متع زواج ياكبدي ومايمشيش معاي .

بسمه غمزتلها:-
ايه واضح...بالدليل عيون الصقر اللي.ليها قداش تترقب فيك.

ولاء بخجل :-
أحم شن قصدك.

غمزتلها بسمه :-
مش قصدي شي ...تعالو خلي نديرو قهوه وشاي...سهيله قرب تنوض تقتلنا من بدري وهيا تهمز فيا.

أمل :-
ههههه ايوه انا حماتي واعره خايفه منها.

بسمه :-
ف عينك ...سهيله مافي منها...ريت حماة كل حبيب.
.
.
.
.
عند سيف:-
وصل هو واللواء منصور للمكان اللي بعتهولهم المقدم جلال ...كان المكان زحمه ومعبي برجال الامن .

بالاول منعوهم يدخلو ...بس بعد ورالهم اللواء منصور تعريفه العسكري دخلوه ...وأول ماشافه المقدم جلال جي عليهم.

وقف قدامه وضربله التحيه:-
أحترامي.سيدي.

منصور:-
تسلم ياجلال ...شن صار عاينتو مسرح الجريمه.

جلال:-
ايه ..جريمه قتل شنيعه عدت طعنات بالسكين ف جسم المدعو محمود وقطع ف الرأس من طريقه القتل الواضح ماكانش ف مقاومه وع الأغلب يكون مخمور بوقت أنقتل .

منصور:-
الله المستعان :-
والأتنين التانين منو!!

جلال:-
الجثه الأولي لأمرأه...وللأسف كانت شبه عاريه ومن الواضح كانت ف وضع مخل بالأخلاق.الأسلاميه وحتي هيا.منحوره برقبتها بالسكين وطعنه بالصدر ...بس من الواضح كان ف مقاومه وتخبط لجثه المراه لأن في كدمات ع الجسم واثار أصابع وبصمات يد ع الحائط ...ومبدئيا حسب تقرير الطبيب الشرعي وتحديده لساعه الوفاة ماماتت ع طول بعكس محمود اللي طبيعي خرجت روحه بمجرد ماتم فصل رأسه ع جثته.

منصور:-
يالطيف يارب ...طيب ماأنعرف السبب أو من اللي قتلهم أصلا.

جلال:-
الواضح قضيه شرف والله أعلم...لان تم القبض ع الجاني ف ساحة الجريمه وأنمسك متلبس وأداة الجريمه بيده وماحاول لا يقاوم ولا شي ..بالعكس داخل ف هستيريا ونوبه لاوعي من وقت القبض عليه ويقول ف كلام مش مفهوم.

سيف :-
كلام زي شني لو سمحت.

جلال :-
لسه مش واضح وماتم أستجوابه ...بس يعني زي انا قتلتها ..خذيت بشرف بوي ..محمود شيطان وكان لازم يموت وحاجات زي هكي .

منصور:-
تمام صحيت سيد جلال وربي يعاونك وانا أكيد رح نتابع معاك مجريات القضيه وتطوراتها ان شاء الله .

جلال :-
حاضر سيدي..عن أذنك .
.
.
.
عند حوش أمل:-
بعد ماكملت السهريه وروحو لحوشهم...دخلت حليمه لدارها ولقت الصادق كيف بيتكي ع السرير.

حليمه بتوتر:-
أحم..صادق.

صادق شافلها:-
نعم ..شن في ياحليمه.

حليمه قربت منه وقعدت بجنبه ع السرير:-
بصراحه احم بصراحه نبي نحكيك ف موضوع مهم.

الصادق بتركيز:-
خير ان شاء الله شن في ياحليمه شغلتيني

حليمه بإرتباك:-
نقولك...بس ماتعصب عليا .

صادق:-
قولي ياحليمه شن في شغلتيني راك.

حليمه :-
تبي الصراحه ...بكري خذتني فوزيه ع جنب مرت اللواء منصور وقالتلي كليمتين.

صادق:-
باهي بخصوص شني هالكليمتين.

حليمه بلعت ريقها وشافتله:-
بخصوص..اا بخصوص أمل بنتك.

صادق :-
خيرها أمل .

حليمه بأندفاع:-
من الاخر ياحاج امل عاجبه الحاجه فوزيه وتبي تخطبها لولدها وقالتلي ناخذ رايك.

أبتسم الصادق؛-
وخيرك تقولي فيها وانتي خايفه ...وشن يمنع ولد الحاج منصور نعم التربيه واهله ناس ماتنرد ولا تنعاب.

حليمه مسكت يده بفرحه:-
بالحقه ياحاج ...يعني انت عادي موافق تعطي أمل

الصادق خبط ع كتفها بهدوء:-
ماتخافي ياحليمه وأفرحي ببنيتك...وأدعي ربي يكتبلها الوقت الطيب وكان خيرتها ف هالولد ربي يكملها معاه ع خير ..وأنسي الصادق متع زمان وكوني هانيه.

حليمه بفرحه:-
الله يبشرك بالخير ياحاج...ربي يجبر بخاطرك ويفرحك زي مابتفرحني وتفرح هالبنيه.

الصادق ضحك وتمدد ع سريره:-
بري كملي ميعادك مع بنتك ..واطفي الضي خلي بنرقد باش انوض نلحق ع الفجر.

حليمه :-
ليلتك طيبه مباركه ان شاء الله.
.
.
.
ومرو الايام ع أبطالنا ...وبفرحة غابت سنين عنهم.

-فرحة سيف بأن أخيرا رح يجمعه ربي بالبنت اللي حبها كل هالسنين واللي عافر وعافرت الدنيا عشانه .

-فرحه بسمه اللي أخيرا شمس السعاده زرقت بحياتها وخبت غيوم الدمع من سماءها ..صح عانت وتعبت وتمرمدت بحياتها بس ربي عوضها بأحلي عوض والاهم خذالها حقها.

-فرحة وليد اللي بعمره مافكر أن بيوم البنت اللي كان يتهزى علاها وع طريقة لبسها وكلامها رح يكون هو المرسال اللي حطه ربي بطريقها واللي معاه المفتاح اللي فتح بيه زنزانه أنحبست فيها سنين طويله .

-فرحه أمل اللي كانت طول عمرها تحلم تعيش حياة طبيعيه ..وتحب وتنحب وتعيش زي أي بنت واللي بلحظه ربي جازاها مقابل طاعتها وبرها ببوها طول هالسنوات بأنه منحها فرحتين بمره ..فرحة تغير بوها ورضاه وفرحة خطبتها من شريك حياتها اللي تمناته بينها وبين ربي.

-فرحة حمزه ودعاءه بسجوده ان ربي تلطف بيه وصح امتحنه ف أغلي شي عنده مرته وأم صغاره وكان قد هالأمتحان وجزاته ان ربي جبر بخاطره وماحرمه منها يقولو أن "قضاء أخف من قضاء" صحيح رغم وجع حمزه ان زوجته يمكن ماعاد تجيب أطفال بس ع طول فرحته بانها مازال معاه وبجنبه تغلب كل الوجع اللي فيه.
.
.
.
اليوم الرابع من مقتل محمود:-
بعد ماهدي وأستقر الوضع النفسي لعادل كان قاعد بغرفه التحقيق مع المحقق وكاتب الإدلاء .

محقق علاء:-
أسمك...وعمرك ...ووظيفتك.

عادل بهدوء مرعب:-
عادل الصايغ...العمر 35 سنه..الوظيفه مهندس.

محقق علاء:-
شن تهمتك ياعادل

عادل:-
جريمه قتل مع سبق الأصرار والترصد .

محقق علاء:-
يعني انت معترف بجريمتك.

عادل:-
نعم وبكامل قواي العقليه.

علاء:-
ومن المجني عليهم.

عادل:-
المدعو محمود الهاشم ..والمدعوه مريم الصايغ

علاء:-
اختك يعني

عادل:-
نعم سيدي .

علاء:-
وشن سبب اقدامك ع هالجريمه سيد عادل.

بهاللحظه شرد عادل بخياله وقعد يذكر ف اللي صار.
كنت خاش للحوش ..كيف مروح من الشغل جاني أتصال من رقم غريب ..رديت .

عادل:-
ألو .

مجهول:-
عادل الصايغ.

عادل:-
أنعم انا هو تفضل من معاي.

مجهول:-
مش مهم انا من ...المهم علاش متصل

عادل:-
طيب علاش متصل ياخونا تفضل.

مجهول:-
حبيت انبهك ونوقضك أن الميه تجري من تحتك وأنك غافل من أهل بيتك.

عادل بعصبيه:-
شن قصدك وضح كلامك.

المجهول:-
قصدي هو مريم أختك ...اما توضيح كلامي ف رح تفهمه بوقت تمشي لمزرعه الهاشم اللي بشرق لمدينه.

عادل بعياط:-
يافاسد ياحيوان هالكلام يطيح فيه راسك راهو.

مجهول:-
انا بلغتك وانت حر...سلام يا....ياسيد الرجاله.

فاق عادل من شروده وكانت ملامح وجهه تخوف كلها أستنكار وعصبيه .

المحقق علاء:-
وبعدين شن صار كمل ياعادل.

عادل بغضب:-
مشيت للمكان ووصلت لقيت البوابه مفتوحه ...وكان حتي باب الحوش مفتوح ..أستغربت شن الباب مفتوح بهالوقت بالاول خفت ان يمكن يكون صاير شي وحد يبي يلبسلي تهمه ...بس بعدها تجرأت ودخلت كان لازم نتأكد.

دخلت وكنت كل مانقدم خطوة نسمع صوت جاي جهة دار النوم .

وصلت ومن غير مقدمات فتحت الباب وكانت ...كانت .

المحقق علاء:-
كانت شن ياعادل كمل .

عادل بدي ينفعل وتتغير تصرفاته وتعابير وجهه:-
كانت الواطيه اختي هيا والشيطان ف السرير و..... وانهار بالبكاء.

محقق علاء:-
طيب ياعادل بعد ماشفتهم بهالوضع شن اللي صار

شرد عادل ورجعت ذاكرته للي صار.

عادل بعصبيه:-
ياواطيه يافاسده انتي شن اديري .

مريم قعدت تلف ف روحها بغطاء السرير:-
عادل ..عادل انت شن ادير هنا ارجوك خليني نفهمك

عادل بعياط'-
شن تفهميني ياكلبه يافاسده اليوم نشرب من دمك.

محمود قعد ع السرير وحط رجل ع رجل وبعدم توازن:-
اهلا اهلا سيد عادل ..تصدق عندي زمان نستني فيك.

عادل هجم عليه وضربه بوكس:-
أسكت ياواطي ياحقير ...هذه أصول الصحبه والعشره .

محمود يمسح ف الدم من فمه ويضحك:-
ههههههه اللفعه ماتتصاحب ياعدول ...اللفعه تاكل بس.

عادل بأنهيار:-
ليش ...ليش درت هكي انا شن درتلك طول عمري حاسبك خوي وصاحبي ادير فيا هكي .

محمود وقف وهو مش متوازن:-
عادل عادل عادل...بلاش جو دراما وماترد روحك بريئ امم خلي نقولك ليش.

قرب منه وكان الشيطان متلبسه :-
فاكر سناء الهاشم ياعدول والا حاب نذكرك ...امم خلي نذكرك سناء اللي هربت وخلت صغارها لما لف علاها بوك وهتهتها وهجت من البلاد وسيبتها.

عادل بإنهيار:-
بوي ماغصبها ع شي ...هيا اللي مشت معاه برضاها وبعدين بوي خذاها بالحلال ماطلع غلط اختك ف أختي.

محمود بعصبيه:-
لا أنتم السبب...بوك السبب بسببه سناء خلت صغارها اليتامي وهربت ...بسببه أمي انجلطت وماتت بسببه صغار اختي ضاعو وتشتتوا.

عادل:-
شن ذنبي انا ...شن ذنب أختي ادير فينا هكي.

محمود بشر:-
ذنبكم انكم ولاده ..واللي صار علي اختي صار ع أختك ..وكان اختي بالحلال فأختك بالحرام نبي نطفي نار أمي ف قبرها ..ماادير روحك بريئ عادل حتي انت خاين.

عادل دفه طيحه ع السرير:-
ف شن خنتك تكلم قول.

محمود:-
فاكرني ماندريش أن انت اللي ضربتني ع راسي لما حاولت نعتدي ع بسمه ..لا ياشاطر انا شفت تسجيلات الكاميرا اليوم اللي بعده وعرفت ان انت اللي خبطتني ع راسي.

عادل بعصبيه:-
ايه انا اللي درتها...خلصت البنيه من ايديك الوسخه ..انقذتها من شرك ومش نادم ع هالشي.

محمود:-
معناتها نحن متصافيين ياعدول...وتوا خوذ الزباله أختك واطلع من بيتي .

عادل تلفت يمين ويسار وكانت ف سكين محطوطه بجنب صحن الفاكهه وشيشه الخمره ع الطاوله .

مشي علاها ومسكها ف يده "مش عادل اللي ينضحك عليه ف شرفه ويسكت ..انا نغسل عاري بايدي ".
وهجم عليه.

بهاللحظه قعد عادل يعيط وطلع عن طبيعته بغرفه التحقيق'-
طعنته ...ف بطنه ف جنبه ف صدره ذبحته لعند قطعت راسه ...كان يشوف لإيديه اللي يرتعشو ويحكي.
"وهيا الكلبه كانت تترجى فيا وتبكي ههههههههه تبكي وقعد يبكي حتي هو ويمسح ف خشمه زي المجنون طعنتها ههههه كانت تتخبط ع الحيط ودمها معبي الدنيا وقفت وراها وحطيت الموس ع رقبتها ونحرتها هههههه غسلت عاري ياناس غسلت عاري هههههه.

محقق علاء:-
سكر المحضر ياولدي ....ونادي ع العساكر يرفعوه لزنزانته.

عادل:-
سناء موتي يافاسده موتي انتي والشيطان اللي معاك هههههههه
.
.
.
#يتبع.

هكي وصلت قصتنا لنهايتها ..أستنوني بالحلقه الاخيره ونتمني نكون ماقصرت معاك وعطيت للأحداث حقها.

تحياتي أختكم وصديقتكم

#zezo_a_saad❤🌹

[فيتامين سي]

#إنتقام_عاشق.
.
.
.
الحلقه الأخيره "الجزء الثاني".

أجمل ﺍﻷﺭﻭﺍﺡ ﻣﻦ ﺇﺫﺍ ﻣﻠﻜﺘك ،،ﻣﻸﺗﻚ💞

ﻭﺇﺫﺍ ﺁﻭﺗﻚ ﺩﺍﻭﺗﻚ ،، ﻭﺇﺫﺍ ﺃﺣﺒﺘﻚ أحيتك💞".

بحوش اللواء منصور :-
كان في زحمه الرجاله ...وكان موعد قرايه الفاتحه لسيف ..وطبعا سيف أختار يكون وكيله اللواء منصور "

الشيخ:-
حاج علي تقبل تزوج بنتك بسمه لسيف محمد السلماني علي سنه الله ورسوله وعلي الصداق المتفق عليه ".

الحاج علي ودموعه نزلو.
نقبل .

الشيخ :-
عطينا أيدك ياحاج وعطينه ايدك ياسيد منصور ...ونتوكلو ع الله ونقرو الفاتحه .

وبعد ماكملو قرايه الفاتحه "بارك الله لهما وعليهم ورزقهما الذريه الصالحه وجمع بينهما بالخير " .

ناض منصور وحضن الحاج علي اللي قاعد ع كرسيه:-
مبروك ياحاج وربي يجمع بينهم بسنه رسوله وبالخير يارب .

علي بفرحه:-
الله يبارك فيك ..الله يبارك فيك .

وكيف وقف الشيخ تلفت عليه منصور وقاله :-
أستني ياشيخ عندنا فاتحه تانيه بنقراها راهو .

الكل كان متفاجأ ومستغرب ...
قرب الحاج منصور من الصادق وحط ايده علي كتفه .

"أنا يشرفني نقرأ فاتحه ولدي علي بنت الحاج الصادق المصونه وزي مايقولو الفرحة تعميم وتلميم" والا شن رايك ياحاج الصادق.

الصادق:-
خيرت ماقلت والبنت بنتكم وأمتي ماتبو هيا ليكم .

الشيخ ع بركه الله ....وأنقرت فاتحه وليد اللي كان بيطير من الفرحة وتحدد موعد الفرح بعد شهرين هذا كله وأمل ماتندري ع شي .

وبعد قرو الفاتحه ...وبوسط فرحة الكل وتهنئتهم لبعض ..وقف صالح والد وسيم اللي من أسبوعين روح من أمريكا .

صالح:-
ياودي راكم حمستوني ومادام الفرحه تعميم وتلميم امالا حتي انا نبي نَفرح ونْفرح.

الحاج علي بأستغراب:-
شن قصدك ياخوي صالح فهمنا.

صالح شاف لمنصور:-
قصدي ياحاج علي أن الناس لولى قالت "لما تقعمز ف وسط العرب أنسب لولدك ودور خال لصغاره " ..وانا راني عاجبني السيد منصور وعاجبني حسبه ونسبه وبهالدنيا طلعت بوسيم بس ودامنا ف هالمجمع الطيب وبحضور الوجوه الطيبه فأنا حاب نطلب النسب من اللواء منصور في بنته لولدي .

الحاج علي بفرحه:-
ماشاء الله تبارك الله...زين ماأخترت ياصالح ياخوي ربي يبارك .

صالح:-
ماسمعني رايك ياسيد منصور

منصور بإبتسامه:-
وشن بنقول بمجمع التريس وبعد كلام العقال ...ماعندي مانقول الا والنعم فيك وبنسبك ونتشرف أكيد بولدك وبيك ياسيد صالح.

صالح بفرحة:-
أمالا قدام هالجمع الطيب ...والميعاد المبروك نعلن قدام الكل راني ناسبت السيد منصور وخذيت بنته لولدي .

وبدو الناس يهنو فيهم ويباركولهم وسط فرحة الكل .
.
.
ف حوش بسمه كانت لابسه البودري ومعاها أمل ومروه ورهف يعولو ...وطبعا سهيله كانت معاهم لان دارو عرس وحد بأعتبار ماعندهم كثر ناس .

بهاللحظه رن فون بسمه 📲 وكان المتصل سيف ...ناضت من جنب البنات وردت.

بسمه:-
ألو .

سيف بفرحة:-
مبروووك ياحلالي مبروك عليا أنتي ومبروك حياتي اللي رح نعيشها معاك والعمر اللي رح نبداه بيك.

بسمه دموعها نزلو من الفرحه:-
قريتو الفاتحه.

سيف غلبه البكاء:-
ايه ياروحي ...وبديتي حرم سيف محمد السلماني خلاص بديتي مرتي قدام ربي قبل لعباد الله يابسمه ع هالفرحة نستني مرار 9 سنين فاتوا.

بسمه ماعاد قدرت وتعالي صوت بكاها:-
مبروك عليا النور اللي رح يضوي حياتي...مبروك عليا انت يادعاء عشت سنين وانا نطلب فيه من ربي وأخيرا أستجاب لدعائي .

سيف:-
نحبك ياروح وقلب وعمر سيف ومش مصدق أمتي نشوفك ويتسكر علينا حوشنا ونغمرك غمرة الحلال .

بسمه وهيا تمسح ف دموعها وتبتسم:-
قريب روحي ان شاء الله فاضل بس يومين.

سيف:-
الله مطولهم عليا يابسمتي...نحس اللي صبرته 9 سنين كوم وهاليومين كوم تاني .

بسمه :-
غمض عين وافتح عين تلقاهم فاتو ان شاء الله.

سيف:-
يارب ...بسمه بنقولك خبر رح يفرحك أكثر حقه.

بسمه بلهفه:-
شنو قول .

سيف:-
ترا قولي فاتحه من انقرت ثاني .

بسمه :-
من من قول بسرعه.

سيف بضحكه:-
وليد وأمل .

بسمه بتفاجئ:-
أحلف قول والله .

سيف:-
والله العظيم ...ديري بالك تقوليلها الدراه وليد يقتلني يبي يقوللها هو .

بسمه :-
تمام حاضر ..الحمد الله يارب..نحس في فرحتي زادت أضعاف.

سيف:-
امم ولو قتلك ف خبر تالت رح يفرحك أكثر .

بسمه :-
لا عاد هلبه عليا شن في .

سيف:-
اللي في أن عمي صالح خطب الفرخه ولاء من بوها لوسيم .

بسمه بدت تنقز من الفرحه :-
وراس سهيله قول الحق جديات تحكي .

سيف:-
اقسم بالله حق ...وعمي منصور وافق ورح يجو يخطبوها رسمي الأسبوع الجاي.

بسمه :-
ياحليلي بنطير من الفرحه اقسم بالله ياسيف .

سيف:-
سيف يحبك ويموت فيك ومش مصدق انك مراته وحلاله .

بسمه :-
وحتي انا نحبك وقريب نطير بالفرحه من فرحتي ان اخيرا حلمي تحقق وبديت مرتك قدام ربي والناس .
.
.
.
طبعا كل هالاحداث صارت خلال الأسبوع الماضي بعد سهريه العشي اللي ف حوش سهيله ..واللي تفاهمو فيها أن فرح سيف وبسمه مايتأجل .

وبعدها بيومين مشت عيله وليد مع عيلة سيف لأهل أمل وخطبوها رسمي لوليد .

ومرو الاربعه الأيام الباقيات جري ..بين تجهيز باقي الحاجات الناقصه لفرح بسمه وبين خطوبه أمل وهكي وصلنا لأسبوع الفرح.
.
.
بالنسبه لقضيه محمود لعند توا بسمه ماتندري عنها وكان سيف حريص انها ماتعلم عشان مايتعكر مزاجها ..بعد يومين عادل أنوجد مشنوق بزنزانته من قبل حتي ماينحكم عليه وهكي كانت نهايته لأنه ماقدر يتحمل صدمه اللي صار كله وتسكرت قضية محمود وبدأ نسيا منسيا .

.
.
نرجعو لفرح بسمه طبعا :-
بعد مابسمه سكرت االمكالمه مع سيف ...طلعت وخبرتهم ان الفاتحه انقرت

نجيه بدموع وفرحه:-
روروروروري مبروك مبروك يابنيتي .

ناضت فوزيه ومسكت الدربوكه وقعدت تزغرط وتغني :-
يامبروك علي غالينا ...هذا وين أسمت لينا .

سهيله بدموع :-
يامبروك علي غالينا ...جاب غزاله من وادينا .

ردت عليهم حليمه :-
هذا وين البال تهني ...درنا بيت ارواقه منا .

ومر باقي اليوم ع الكل بفرحة وسعاده ...وبالليل كانو يحنو في بسمه ويغنولها .

لعند رن فون أمل ..ناضت من جنبهم ومشت ترد.

أمل :-
ألو .

وليد :-
حبيبي.

أمل:-
عيون حبيبك .

وليد:-
مبروك علينا ياروحي.

أمل :-
عشان ايش مافهمت .

وليد:-
أمم عشان بقيتي حلالي ..اليوم قرينا فاتحتنا مع سيف وبسمه.

أمل بصدمه:-
تبصر

وليد :-
أقسم بالله رسمي ...من بدري قرينا الفاتحه بعد فاتحه سيف وبسمه...وبوي حدد الفرح بعد شهرين .

أمل بفرحه:-
ياحليلي بنطير بنطير من الفرحه الحمد الله الحمد الله

وليد:-
مبروك عليك انا ياقلبي

أمل بخجل:-
مغرور وحق ربي.

وليد:-
بس بوي عذا ربي يهديه ..معقول ينطر الفرح بعد شهرين...شن بصبرني الهم .

أمل'-
ماصحك...شهرين يادوب نقدر نجهز فيهم نفسي .

وليد:-
لا تجهزي نفسك لاشي ... ماتجيبي شي معاك نبيك أنتي بس بطولك وعرضك و....

أمل بخجل:-
وليييييد ياسخيف خلاص امشي يلا باي باي.

وليد:-
ههههه انحبك لما تخجلي ..باي .
.
.
ومر اليوم اللي بعده وجي يوم الخميس .

كانت بسمه واقفه قدام المرايا بعد روحت من المزين ومتوتره .

دخلت علاها أمل وفي يدها البخاره :-
ماشاء الله ماشاء الله اللهم صلي وبارك ع رسولنا الكريم تهبلي تهبلي

لفت علاها بسمه :-
بالحقه امل ...حلوة طالعه يعني .

امل وعيونها دمعو:-
والله قمر وتهبلي عيني ماتضرك.

شويه ودخلت رهف :-
روروروروري ماشاء الله ماشاء الله ع عروستنا اللي تهبل .

بسمه بإبتسامه:-
تسلميلي يارهوفه والله انتي اللي عسل .

جت مروه :-
هيا بسمه استعجلي اطلعي الناس تستني وتو شوي وراجلك يوصل من بكري وهو يتصل بسهيله وهيا تقوله مازال .

بسمه :-
تمام اوك هيا ...وطلعت بسمه وكان الفرح طبعا ف جنان بوها لأنها رفضت اديره في صاله وقالت انها تفضل تطلع من حوش بوها .

كانت زي القمر ببساطتها وطيبه قلبها عاكسه ع ملامح وجهها ومحليتها بعين كل من يشوفها .

وفعلا علي نياتكم ترزقون ...مش بس بالفلوس الرزق بالناس الحلوه والنصيب الطيب والحياة الهنيه .

بسمه بهاللحظه كانت تشوف ف الفرحة بعيون مش بس أمها بعيون صديقتها مروه اللي طول الوقت ماوقفتش ولا لحظه وهيا تعبر عن فرحتها وتساند ف صاحبتها وكأنها اختها ...بعيون أمل وفوزيه وولاء اللي كانت فرحتهم وكان بسمه بنتهم ويعرفوها من سنين ومافارقوها ولا لحظه من أول الاسبوع...بعيون رهف وجدتها اللي قايمه الفرح فوق راسها بالغناء والزغاريت ..بعيون سهيلة اللي كانت كانها تزف ف أختها مش مرت خوها .

ومر الوقت وبوسط الفرحه والسعاده من الكل وجت اللحظه اللي دخل فيها سيف اللي كان زي القمر المنور واللي محليه أكثر الفرحه اللي بطير من عيونه.

أول ماشاف بسمه وقف تأملها بعمق ودموعه نزلو .
"لحظات الحلم لما يكون واقع...نهاية طريق مشالها من سنين وجاهد عشان يوصل لأخرها .. لحظات شفاء من وجع وألم وجرح سنين مرو زي العلقم".

قرب منها ونسي الناس وكل الموجودين باس ع راسها وحضنها بقوة وبكي بكل مافيه من فرحه.

كان الكل يشوفلهم ودموعه غالباته من الموقف .

"فرحه أخيرا تجمعنا... ولا حد هيقدر يمنعنا...وأخيرا بقيت..مقفول علينا بيت.. وصبرنا لوه معني❤...قدام العالم أنتتي مراتي ..ودا كل اللي انا عايزو ف حياتي ...

وخذي سيف بسمه وروح بيها لحوشه ..
أول مادخل بيها للحوش حضنها من الخلف وقعد ساكت .

بسمه بإبتسامه:-
شنو حبيبي

سيف وهو مغمض عيونه:-
اشششت خليني بس نحس بحضنك عشان نصدق ان اللي عايشه الحين واقع مش حلم .

بسمه لفت عليه وحطت ايديها ع خدوده:-
وحياتك واقع ياروحي ونحن مع بعض وبعون الله ماف شي يفرقنا.

سيف :-
عارفه علي قد مامتلهف عليك الحين ..بس معاهد نفسي قدام ربي مانلمسك الا بعد مانحمد ربي ونشكره ع عطاءه ليا ...خشي غيري وألبسي ملاية الصلاه وتعالي تلقيني نستني فيك.

بسمه بٱبتسامه:-
حاضر حبيبي .

وفعلا خشت بسمه لدارها ...وغيرت وتوضت ولبست ملايتها وطلعت ..لقت سيف لابس شورت وتيشرت ويستني فيها أول ماشافها وقف.

قرب منها وباس ع جبينها ومسك يدها وقفها ووقف قدامها وأقام الصلاه .

كان يصلي ودموعه ينزلو يقرأ ف السور القرأن ومش قادر يتماسك وبعد ماسلم ألتفت علاها ومازال دموعه ينزلو .

حط يده ع راسها :-
"اللهم اني أسألك خيرها ..وخير ماجبلتها عليه..وأعوذ بك من شرها وشر ماجبلتها عليه...بسم الله اللهم جنبنا الشيطان وجنب الشيطان مارزقتنا".

بعد ماكمل الدعاء حضنها بقوووه وقامها بحضنه ودخل بيها لدارهم وبتدو حياة جديده مع بعض .
.
.
.
بعد مرور 3 سنوات:-
سيف كان عايش أحلي حياة مع بسمه هدوء ع رومانسيه ع تفاهم ...كان بكل اوقاته وبوقت يبي يهرب من الدنيا يجي ع حضنها مستحيل يقدر يزعلها ولو زعلت مايطيق زعلها ويسعي وراء رضاها...وهيا نفس الشي ماتتحمل فيه دقه الشوكه لو مرض تقلب الدنيا من خوفها عليه .

اليوم بسمه وسيف عندهم ولد اختاروله أسم "محمد" علي اسم والد سيف وعايشين التلاته احلي عيشه

أما أمل ووليد تزوجو بعد شهرين من زواج بسمه وامل تأخرت بالحمل ومن سنه سافرت مع وليد لامريكا بسبب ظروف شغله وطبعا أول ماوصلت عالجت وحملت وعندها بنوته عمرها شهرين واسمها "هميز" .

وسيم وولاء زي الفار والقطوسه رغم انهم متزوجين بس من 9 شهور ..صحيح شخصياتهم متناقضه بس مكملين لبعض وحاليا ولاء مطلعه عيون وسيم بسبب الوحم لأنها حامل من شهر بس وكلتله كبده.

حمزه مع الحاح سهيله ع الحمل خبرها باللي قاله عليه الدكتور بالاول بكت وعارضت بس بالأخر رضت بنصيبها وخلتها ع ربي وهو مش رح ينساها.

فاتن ماقدرت تتحمل السجن وعذابه وخصوصا بعد ماتوفي بوها ومن هالصدمه انجنت وحاليا متواجده ف مصح للامراض العقليه والنفسيه وربي يتلطف بحالها .

.
.
اليوم هو يوم جمعه كات سيف قاعد مع بسمه بالجنان .

سيف :-
حمودي تعالي بابا افطر قبل .

بسمه :-
خليه ياسيف ع راحته كل يوم انت وياه نفس الحال ..هو اول مايجوع رح يجي .

سيف قرب منها وباس ع خدها :-
حبيبي الحنون انا .

بسمه :-
سيف عيب الولد بدي يفهم.

سيف حضنها:-
وخله يفهم ويعرف قداشني نمووت ف مامته .

بسمه كيف بتحكي رن فون سيف :-
ألو مرحبتين رهوفه كيف حالك.

رهف :-
الحمد الله...كيف حالك انت وحال بسبوستي وحمودي.

سيف:-
الحمد الله تسلم عليك هلبا .

رهف :-
سلملي عليها أمانه .

سيف:-
يوصل ان شاء الله.

رهف:-
قتلك سيف ...اميمه سالمه قالتلي نحكيك تبيك تجيها ضروري قالت تبيك ف موضوع مهم .

سيف:-
ان شاء الله خير ...خلاص عطيني ساعه ونمر عليكم

رهف :-
اوك ...بوسلي حمودي وبسمه ..سلام.

سيف :-
ف حفظ الله.

بسمه :-
خير ان شاء الله شن في ...خيرها رهف.

سيف:-
نعرفش قالت حناها تبيني...خلي حبيبي ندوش ونمشي نشوفهم ونجي اوك.

بسمه :-
اوك حبيبي دير بالك ع حالك .

سيف باسها :-
ان شاء الله ياروحي .

وبعد نص ساعه طلع سيف من حوشه ومشي لعند رهف وبعد ماوصل نزل وخش.

سلم ع رهف وبعدها قرب من الحاجه سالمه وباس ع يدها وقعد جنبها .

سيف؛-
خير ان شاء الله ياأمي قالتلي رهف طلبتيني .

سالمه شافت لرهف:-
رهوفه بنيتي عندي كليمتين بنقولهم لسيف ..ديريلنا شاي مابين ماكملت كلامي معاه .

رهف ناضت :-
حاضر اميمه ..عن اذنكم.

بعد مامشت رهف قرب سيف من سالمه :-
خير ان شاء الله ياحاجه شن في .

سالمه :-
شوف ياوليدي انت بمقام ولدي ورهف بمقام أختك...وانت عارف ان رهف يتيمه وماعندها حد ...وانا مش دايمتلها وصحتي بدت ع قدها.

سيف:-
ربي يمد بعمرك ياأمي.

سالمه:-
ياوليدي العمر يعلمه ربي ...اللي نبي نقولهولك ان رهف كبرت وتوا تقرأ ف الجامعه وانا من أسبوع كلمني علاها ولد جيراننا دز امه وقال يبي يتقدملها .

سيف :-
باهي تمام .

سالمه:-
اللي نبي نقوله ياوليدي أن انا نبيك تسأل علي الولد ولو يناسب البنت وولد كويس خلي نهني علاها قبل ماتغمض عيني وانت عارف أني موكلاتك علاها .

سيف باس ع راسها:-
خلاص حاضر ...زي ماتبي عطيني اسم الولد ومن بكرا رح نقصقص عليه ونردلك خبر بعون الله.

سالمه:-
ربي يحفظك ياوليدي ويحميك ويقر عيونك بوليدك .
.
.
بعد مرور شهرين :-
روحت أمل مع وليد ..لانها تبي تشوف أمها وبوها ويشوفو البنوته وبالليل كانو مدايرين عشي وملتمين كلهم عند وليد .

بسمه وسيف وولدهم...ام بسمه وبوها...ولاء ووسيم...سهيله وحمزه وعبدو و ماريا..فوزيه ومنصور...رهف وسالمه ومعاهم أكرم اللي قري فاتحه رهف واتفقو يتزوجو بعد التخرج..مروه وزوجها وولدها .

وكانت أحلي جمعه والكل فرحان وسعيد ودارو عقيقه لبنت أمل "هميز" رغم انها جت متأخره .
.
.
وهذه هيا قصه أبطالنا وهذه حياتهم .
.
.
#تمت_بحمد_الله.

نهدي سطور روايتي لكل حد لامس أحساسه قصه واحد من أبطالنا وعاش نفس ظروفهم .

-لكل بنت ضحت وأنظلمت أن ربي رح يجبر بخاطرها ويعوضها أحلي عوض.

-لكل شاب كان ضحيه لأخطاء غيره نتمني ينصف نفسه ويغير طريقه عشان مايكون ضحيه زي عادل .

-لكل شاب تجبر وتعنت وظلم بنت ذنبها بس انها انسانه ضعيفه انه يراجع نفسه ويستغفر دام ربي مازال عاطيه فرصه عشان ماتكون نهايته بشعه زي محمود .

-لكل أب وأم "جنتنا بهالدنيا " حبيت نقول لماما شكرا لانك ماما لأنك سندي الاول لانك بعمرك ماقصرتي معاي ووقفتي بظهري بكل الظروف ربي مايحرمني منك وياخذ من عمري ويعطيك.

-لبابا حبيبي ...صحيح مانشوف فيك وصحيح مانقدر نقولك هالشي ...بس بعمرك مافارقتني بلحظه بكل مكان عندي معاك ذكري ..بكل موقف يجي كلامك اول شي بعقلي ...بكل غمضه عين نشوفك قدامي ... نتمني تكون بخير وانا متأكده انك بخير طالما انت بضيافه ربنا صحيح ملتقانا بالدنيا انتهي بس أملي كبير بربي انه يجمعني بيك بالأخره وتباهي بيا قدام اهل الجنه...ع طول ندعيلك بابا ويارب يوصلك دعائي ويكون نور ليك ويفرحك بقبرك.
.
.
.

الحياة رحله طويلة ...وخلال هالرحله رح نمرو بكل الفصول رح نمرو بفصل الشتاء اللي رح تمطر فيه عيوننا بدموع الألم والحزن والوجع ..بس رح نضطرو نتحركو بخطواتنا ونمشو للقدام ونمرو بأرض الصيف اللي رح تلفحنا فيها حرارة الظروف والمشاكل وتعصف بينا حرارة القهر والحيره ... ونكملو رغم يأسنا ونمشي بخطواتنا اللي رح ترفعنا لأرض الخريف اللي رح نجاهدو عشان رياح اليأس مااطيح أوراق إيماننا بالجاي وبالعوض الجميل من ربي ...وبوقت اللي نحسو رواحنا خلاص ماعاد قادرين نقدمو بخطواتنا أكثر وأن هذه النهايه وننهارو ...رح نلقو أن ازهار الربيع بدت تفتح تحت قدامنا ويتفتح معاها ربيع قلبنا وتنمحي كل ملامح التعب من وجوهنا كل هذا نتيجه شي واحد بس مؤمن بيه قلبنا إيمان قاطع
"❤وبشر الصابرين❤" وان "الظلم هو ظلمات يوم القيامه" أما ظلم الدنيا فليه ربي بالمرصاد.
.
.
.
نتمني تكون النهايه عند حسن ظن الجميع ...نتمني حروفي لامست قلوبكم ...نتمني مانكون نزلت دمعه من عيونكم الا دمعه فرح...شكري موصول لكل واحد فيكم انتم متابعيني وسبب نجاحي وتألقي وأبداع قلمي ...شكرا لأنكم معاي...شكرا لكل كلمه حلوة قلتاها بحقي...شكرا لتشجيعي ولصبركم معاي .

انا بيكم ومعاكم ومنكم نبدع ونتألق .

نحبكم ف الله كلكم ...ونتمني تجمعنا سطور قادمه ولهذاك الوقت نلتقي علي خير وأستودعكم ودائع عند الله .

تحياتي اختكم وصديقتكم دائما
#zezo_a_saad🌹❤

[لامارا]

[ندى تدى]

شكرا حبيبتي على الرواية الرائعه