آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
26-06-19, 01:47 AM
| #1 | |||||||||||||||||
| مراقبة عامة ومشرفة منتدى الروايات المنقولة  
|  شيخ الشباب ، للكاتبة/ زهراء العراقية (مكتملة )
التعديل الأخير تم بواسطة فيتامين سي ; 28-08-19 الساعة 09:51 AM | |||||||||||||||||
|  |
|
26-06-19, 01:52 AM
| #2 | ||||||||
| مراقبة عامة ومشرفة منتدى الروايات المنقولة
|  رابط لتحميل الروايه هنـــــــــــــــــا شيخ الشباب من كتابات زهراء العراقية البارت الاول شيخ الشباب مساء المسك وأفِك للشَبگة مّن بعيد أغلّة شَراع .. وأشبگِك شبگة النسمِّات للنعـِٰاع .! - مظفر النواب هاي اهداء مني الكم لأن وحشتوني سكران ويتخبط بخطواته و يترنح خطوة للخلف وخطوة لگدام بمشيه ويغني بصوت كام - لكعدلج على الدرب اكعود بيضة يم اعيون السود ! يعيد ويزيد بنفس المقطع ، من طلعت راسي شفته واني الخوف ماكل من قلبي قطعة ، وشفت طريقة مشية دخلت راسي بس لمحته رفع راسه بداخلي انكسر خاطري عليه رغم كل الي السواه واتمنى يتلاحك نفسة قبل لا اهلي يصحون ، الحي صغير والفرع ضيق راح يسوي النا فضايح، يربي هذا يمكن سكران هيج ياسر تنزل من نفسك ليش ياربي ليش لك بهاي التصرفات مستحيل ابوية يرجعلك رقية تركت الحديقة ودخلت لجوة كلها نيام بغرفها همزين محد يسمعه ؛ صار دك على الباب قوي وبصياح يفتح طبلة الاذن - يا شيخ حسن ......حسن بيك انطيني بنتك لك أحسييييين اكعدلي انطيني بنتك وأروح منا؟؟؟ لطمت على خدي واني واكفه كدام غرفة امي وابوية،شفت ضواه يفتح للغرفه من جوه الباب وانفتح ، وبابا يلبس فوك ملابسه الداخليه سرواله الابيض وفانيلة بيضه ربع ردن گلبية سماوية نزلها عليه و مرتضى نزل يهرول من الدرج يصيح -ابن الكلب فضحنا بوية وين سلاحك طلعوا مقتدى ومرتضى ورة ابوية اله الزمت من ثوبي من خلف - شكو زينب ؟ لانها رقية تسأل وتفرك بعيونها توها كاعده هالمطفية و ياسر برة خابص الجو عليها جاينا نصاص الليالي سكران بنص النجف الاشرف بمنطقة ال*** وهاي تسأل بكل فطارية شكو -ماكو عيوني روحي نامي سمعنا المعايط مالته بس حسيتها انفزعت وراحت للحديقة واني وامي وياها شفنا الباب مفتوح دخلنا للكيلدورة رجعنا بس امي حاطه شيلتها البيضه وماده راسها واحنه وراها نصنت -روح منا ... بصوت جامح غضب الدنيا كلة بهاي اللحظه صدر من والدي امام الجامع المعروف بابه مفتوح نصاص الليالي وكدامه واحد سكران ! ما سمعنا الرد كلام لا كان غنية - غاب الگمر وثريته كلمن نام ويه مريته وانه الي مگابل عمي بلكي ينطيني ابنيته وما نحس الا على صوت مرتضى مديت راسي وشفت الموقف بابا يدخل بالولد لا يكتلوه ومرتضى يگول - بوية عوفني لخاطر الكعبة خل اشوفه النبي العربي مقتدى واكف كأنه ضايج على حالته مثلي اهنا طلع جارنا وصديق عمر بابا الشيخ قيس ابو عباس دخلنا روسنا لا يشوفنا اضاهر هي صارت فضيحه النا دخلت رقية كعدت على المده (زولية رفيعه ) ودموعها سبقت كلامها -خطية لا يضربوه امي كالت الها - يستاهل هالورطه الي اتورطنا بيها عضت اصبعها وكملت -اااااخ كله مني جان يوم اسود الي جبرت ابوج ينطيج اله جان يوم اسود باوعتلي وغمتني واسترسلت كلامها برزالة تأشر عليه - وأنت كل الطلايب من وراج كاعده بريئة مو ولج شوفي نتايج اعمالج المتهورة الولد حابجن اثنينجن واتخبل علينا غمتنا اثنينا وهي تتمشى لغرفتها -شحلات اخلاق هالولد جان خبلنا بنات حسن رقية كامت ترجف وهي تسمع اصياحه -ما اروح الا تنطوني مرتي بعدها سكن صوته و خيم علينا سكون الليل لكن من غير طمأنينة جان يخوف هدوئة حيل شنو قتلوه الي بالي ببال رقية كالت - شو سكت بس بلا قتلوه ! خل يصيح بس اطمن عليه ! رديت عليها - ما ادري شكولج بس هذا بعد من الف مستحيل مو سابع بابا يقبل بيه بعد سكرة هاهي بابا قتله من حياتنا -شنو مات !!! قتله بابا -ولج فطيرة گلبي لا قصدي طلعه من حياتنا ما يرجعج اله لو يأذن - قصدج اذا صار شيخ واذن مثل بابا ويتوب هم ما يرجعه الي ؟ ضربت جبيني وگمت وگلت -تعالي ننام وانسي يمعوده عفتها ودخلت و اشتعلت جروح ضميري عليه اني السبب بالي صار اغفرلي ياربي الصبح اجاني خبر قنبلة من كوثر لن ياسر مسوي حادث ،،، سألتها بخوووف - مات تلكأت ومن بين شهكاتها كالت اي من وراجن .......!!! ** العودة للماضي ....................... عقلي عبارة عن كنتور جبير بيه اهواي خانات و مجرات وتضم بداخلها اهواي من الذكريات خانات للغدر وخانات چثيرة على كولة حبوبتي للحزن والكدر و خانات للألم وبداخل الكنتور مجر واحد للفرح هذا ضام بيه فرحتي و اشوية ضماد للجروحي بيه .الذكرى الوحيد وية أنسانه ما اعرف قدرها وين وداها عني وغيبها وغابت ضحكتها ام عيون سود و بدنها قالب الثلج ، اوربي بدنها الابيض اتخيل گلبها متلون مثله بالابيض ، رقية وين ما رحت بأي ركن بهاي الحياة يبقى طرواج هو طاري المسرة للروح ما اشوفج ولا اتخيلج مرة عادية صادني العشك واني صغيرون عليه وما رحم بية انه ياسر عبد الله من قرية بمحافظة بالجنوب هليتي .... اذا تتسألون اشجابني للنجف ؟ اجيت لأمي خطار ابوي وصلني لحد حلالهم ورجع بنفس السيارة تاركني اتابع غبارة الي خلفته سيارته بعده ، الحنين اخذني اله وهو ما فاتت ثواني عوفته الي .شديت بلزمتي لجنطتي السودة و بيها علامة رياضية دكيتها مشي من الشارع لداخل البستنة ريحة تمن العنبر تفوووح حوالية انه داخل حقول الشلب العنبر ومنا وجاي مبين من الريحة الزكية موسم الحصاد ..... وصلت لبيت اجدادي من جهة امي وانه كلي ارادة ارجع لبوي نفسي مغموته واخافن اشوفنه لخالي فؤاد؟ درت وجهي راجع بخطواتي مبتعد عن بيتهم بعدني ما راجع صاحلي خالي الچبير شافني واخذني لبيت جدي جبير عشيرة امي اول ما دخلت الديوان . مدلي ايده حبيتها وحبيت راسه .و سلمت على بقية خوالي بعدين صاحو الي اروح ادخل جوه ، رحت واول ما شافتني امي اخذتني بحظنها الطري عكس جسمي مثل جذع النخل ثابت ما اتحرك جامد من المشاعر . اجني خواتي الصغار يبوسن بيه.. بلهفة خلت امي تصفن عليهن خاصه ديمة ، وتوبة ؟ بالله شهد من زمان اميل الها واحبها اكثر خواتي مدللها واتحبني ... اختي الوحيده من امي وابوي هي ،تزوج ابوي امي من جان دخيل على عشيرة امي وصارت بينهم مصالح والدي رجال فلاح ابن فلاح عنده أرض والله رازقه وامي بنت شيوخ من النجف ابوها يملك حقول شلب بالمشخاب يصدر منه لجميع المحافظات وهو شيخ عشيرته امي ارملة عدها ثلاث بنات جانت وتزوجت ابوي سفطوها سفط اله و خلفتني وانه صغير وهي حامل بختي شهد تطلقت لاجل شرط جدي ابوها بناتها يبقن يمه وابوي اخذها لغير محافظه و وافقت و بعدين گلبها جعل حياتها جحيم ويه ابوي بسبب حنينها لبناتها ما بينهم قسمه وطلكها بعد ما جابت اختي شهد وانه وشهد انحكم علينا القصاص ! انه اخذني ابوي ما قبل اروح يمها وحتى شهد كال تكبر واخليها يمي ماعنده خلفه هو بس انه وشهد مرته الاولى عاكر هي ربتني وشهد امي ما انطتها تمنيت بيوم تتمسك بيه واتحبني مثل حبها للبنات ! اجيها بالسنه مرة ومرات اعاند وما اروح الها هاي بعد سنتين الا قبلت اروح غصبا عني هم جابني ابوي ومن يرجع ياخذني ياخذ شهد ويانه تقضي وقت يمه مثل كل سنه .... كانت علاقته طيبه بجدي رغم الخلاف الي صار بينهم بسبب طلاق امي بس على خلاف ويه خوالي لهذا وصلني من بعيد لبعيد ابوي رغم ما يعرف يقرة ويكتب .. جان حافظ للقرأن بطريقة سمعية يحط الراديو ويسمع وحافظ كم سورة ويسمع محاضرات دينية للدكتور احمد الوائلي و حميد المهاجري بكاسيتات ومسجل جان يجيبهم جنت اعيش وياه بيتنا اهناك انه ومرته حياة طيبة تبدي المدرسة لازم اروح ببيت عمي بالولاية اقيم لان ماكو مدارس قريبه علينا بقريتنا واغلب الناس جانو ما يودون بناتهم ! بس ولدهم هذا الحجي من زمان مو هسة وهم اكو ما يدون لا ولد ولا بنات حلم ابوي اتعلم واثقف واشتغل وياه المهم امي اخذتنا ورة اسبوع ورحنا لبيت اخوها بالمدينة قريب على الامام علي بيتهم هي مستقرة يمه ما تحب اجواء البستنة كاعدات بالحديقة هي ومرت خالي طلعت يمهن ما شافني وراهن كعدت افكر اشوكت ارجع لبوي واسمع مرت خالي اتكول لامي -دسكتي فاطمة غير اجرو يمنا بيت مؤمن يمنا لج يكول للگمر گوم واكعد مكانك غير الله منطيه جمال والله استحي اباوع بوجه من جماله ضربتها على حظنها وكالت امي -اشعندج اتباوعين للرجال يخية وضحكت - لج هاي النسوان احظوظ مرته تلعب النفس والله جاوبتها امي -جا شفتي خية حظي الاغبر بس اظني شفته البارحه من رشيت الحديقه لمحت رجال حيل حلو دخل بالبيت الي بصفنا ما يريد مرة هالمومن - جا مو بس انه ابصبص وضحكن كرهت امي حيل وكرهت الرجال الي تحجي عنه من غير ما اعرفه اتعمدت اطلع لبرة اريد اشوفه بلكي يطلع اشوف الي عجب امي اكثر من ابوي منهو هذا . ساعة گاعد يم باب بيت خالي ، انفتح بابهم ....... طلع منها ولد من عمري باوعلي صفح وفات من يمي اشوية ورجع يلعب طوبة بالفرع الضيق ويه اثنين . وكعت عليه مرة غلست . مرة ثانية اجت براسي ، شلتها اجاني هو -جيبها -لا تلعب اهنا تضايگ الناس المارة والنسوان -طب بيتك مثل هاي النسوان ومعليك واشرلي بيده هالابن الحرام شلت الطوبة وشمرتها على راسه خليته يتوجع التمو ربعه علي ضربت واحد منهم على صفحته والثاني ضربني بخلفيتي جلاق لزمته وهم ضربته بوكس ادمه خشمه واجاني هو والي ضربته صفحته التمو علي اتضاربت وياهم والنهاية اثنين شردو وبقة بس ابو الطوبة يتلاوي وياي حاطه جواي واكتل بيه شبعته بوكسات مغمض اعيوني واضرب -ما ردت اضربك انت جبتها لنفسك انت ما تسمع الكلام ما تسمع الكلام ما تسمع الكلام واعيد بنفس العبارة لحد ما نسوان تدخلن وصاحن لابوه رفعني رفع عنه واني ازاكط برجليه -عوفني خل اعلمه يسمع الكلام ! دفعني عن ابنه ....بالبداية ما عرفته منو بس جان حيل حلو ابضاني ومن وجه يبث النور -مرتضى ابني رضاوي كومه وعرفته من كال اله وهو يبجي ابوه -بوية هذا كتلني يأشر عليه بزر ابوه المايع الخيخة عرفته هذا المؤمن من دشداشته البيضه و عرقجينته والصراحه لو واحد غيره جان موتني كتل ، بس هو سأل اني ابن منو والجيران جاوبوه راح دك باب بيت خالي وطلعت اله امي بشيله ما مسدوده حاطه اطرافها على. متنها وبس ،رحت الها ادفع بيها اريدها تدخل جو احاجيها وهي ادفع بديه دخلتني جوة وهي تتعذر منه و بالليل دزت خالي اخذ بخاطرهم واعتذر منهم ، مع رزالة معدله الي من امي وخالي ومرته ، الصبح طلعت مع العلم امي كالت لا تطلع بعد . عصافيرهم تغرد على نخلتهم مدري ليش لكيت نفسي اباوع ناحية بيتهم... بيت خالي ماكو جيره عدهم من جهة اليسار صاير ركن بيتهم بس من جهة اليمين بيت المؤمن .. اهنا انفتح باباهم طلعن اثنين بنات صغار يشترن مبين ريوك من البيص والاجبان ورجعن الصغيره كايده الجبيرة ! وتمشي كدامها اجت سيارة . مشت يم الحايط الصغيره جارة الكبيرة وياها .الكبيرة محجبة ولابسه عباية وهي ما يجاوز عمرها ال١٠ سنوات والصغيرة ما عرفت اميز عمرها بس من عمر اختي شهد الي عمرها ٨ بس ملبسيها حجاب وانه خواتي الكبار حجابهن نص ردن ! طلع الي كتلته البارحه صاح بيهن -ولجن ليش طالعات طببهن ادفع اجتني رغبة اروح اكتله داز خواته يجيبن ريوك هالعارية ، هو من شافني رجع دخل للبيت ، خاف المطي مني . ضحكت مستشعر الانتصار منه -ههههه انه ياسر صكار المخانيث طلع الي وشايل هاي الي يسموها قامة بالكوة مسيطر عليها بشيلته كال - تتقوة عليه ولك وكفت اله -لو بيك خير تستخدم ايدك استفزيته شمرها واجاني حاول يدفرني ببطني لزمت رجله قبل لا توصل الها دفعني برجله و رجعنا نتلاوة انه وياه ضربني على عيني طفاها الي، حريك قوي صدر منها ......... مع هذا ركبت عليه مثل الحصان او المطي (الحمار ) كاعد على خصرة وماد رجليه على جوانبه . وضربته على وجه نفس لكمه البارحه عايدها الها محد مر او طلع فاككنا لان نتعارك بلا صوت وصياح ... بس احس احد يمي يشمر عليه حصو .. على ضهري بالاول جان رمي خفيف ورة اشوية شفتها هاي الطفلة الي كايده اختها الجبيرة اشمر عليه شعرها نكروه ملولو شالت بجفها جيلة منه كوم الحصو و رشته على ضهري وجعتني بين ما انتبهت الها اخوها انتهز الفرصه وهو صار فوكي . على رمل الفرع مبعثرين . واخته تمعش بيه وياه وهو يصيح عليها -زينب ادخلي جوه وهي ولا يمها .... تاليها طلعت ام العباية مرة ثانية تتبجبج - مرتضى عوفه لا تصعد فوكاه كلبه يوكف !، حرام تأذي ......حرام مرتضى .....رضاوي حرام كال بابا نأذي مؤمن اهنا احنا نطاحن وهاي ضوجتني شنو تتوسل بيه كلامها حرضني على الانتصار و ضربته ببطنه خليته يوكع ويصيح منها تفلت عليه ودخلت لبيتنا ركض تارك خواته فوك راسه هاي جزء من مغامرات الطفولة عداوة ويه مرتضى هو واولاد عمه الي جان يلعب وياهم طوبة اكتشفتهم بالفرع الثاني ساكنين وصرت غريمهم و ياي خليل ابني خالي صار رفيجي انروح نتلاوة وياهم ومرة الحق ويانه ومرة الحق علينا مرة كتلو خليل شفتهم اهواي والله ما خفت من الطك بس خفت لا اوكع جدام هالعار مرتضى وشردت عايف خليل وحده مجطول ويكتلون بيه رجعت من رحلتي لابويا ويه شهد .... ومرت الايام وسنه دارت هم رحت لامي وهم معارك ضارية بيني وبين مرتضى. كره مالها مثيل ، الى أن صار عمري ٢٠ عام .اعتبره هذي السنة سنة الانتكاسة والتعاسة الابدية الي .اتوفى ابوية وعضيدي وسندي بالحياة ومات ضهري ... مات حسرة على الكاع الي عاش سنينة يحرث و يحرس ويرعى بيها وتاليها اخوته طالبوه بحقهم الي ناسيه وجان بس افلوس ياخذون وكت الحصاد على الجاهز ... من مات جدي طالبو بحصصهم وانباعت الكاع وحصل ابوي حصة ... جاب بيها بيت النا بدل بيتنا بوسط الكاع انباع وية الكاع وما عاش اهواي ادهورت حالته وهو يشتغل فلاح عد الناس بعد ما جان صاحب حلال ... اخوته باعو لاجل همه كلهم سكنو الولاية وتركو السلف ، الا ابوي مات حسرة وما طلع منه ... كرهت المحافظة وكرهت البيت انتكست وتركت الدراسة .عشت ببيت عمي مكتئب سنة كاملة الى ان صحيت على زماني من شفت عمي بدأ يضايق من كعدتي مدري خوف عليه مدري من كعدتي بلا عمل او فايده مع الحاح امي وافقت اروح يمها هارب من المدينة كلها بس ما بعت بيت ابوي . ومرت ابوي ردت اهلها اول ما اتوفى ابوي وما طالبت بشي المرة شاهد عليه ربي جانت ام الي واتوسلت بأهلها يخلوها يمي ما ترجع يمهم بس لا همه الي رضو ولا انه الي جنت ناوي اظل . ودعتها ورحت للنجف مشتاق لشهودة حيل والله لو ما هي ولا ارد للنجف اهج خارج العراق كله . اول ما رحت سألت عن بيت المؤمن جاوبت امي من زمان شالوه هم ماجرين كانو بس عديمين الاختلاط بالناس كلش بعدين عرفت من شفت مرتضى بالسوك همه بنفس الحي بس على بعد عنا انه ما كدرت انقل قيدي ورجعت ادوام ببغداد مثل قبل لا يتوفى ابوي بجامعة المستنصرية قسم علوم حاسبات بين روحتي لهلي بالنجف وبغداد بدت زيارتي لمسقط راسي تقل وتتلاشة اخر مرة زرت النجف صار بيني وبين مرتضى نقاش حاد قرب يتحول عركة هو شباب المنطقة يعرفوه الا انه غريب الدار لا ويلاد عم ولا عضيد ماعندي غير خواتي البنات الاربعة . جانت شهد عمرها ١٤ اخاف عليها حيل هواجزي تزداد كل ما اكبر واتذكر الي جرى النا وخالي فؤاد الي ما اروح لبيت اجدادي لأجل لا اكتله! صرت اشتغل ويه ابن خالي خليل بمحل ابيع مواد غذائية هو المحل لابو خليل ومشغل ابنه بيه مبطلة من الدراسة من زمان ، واشويه اشوية اختلطت ويه ويلاد اخوالي البقية لكن انه طالب بس وقت العطل اشتغل همه كلهم مبطلين واسباع يشتغلون كلهم بحلال اهلهلم .. بديت احبه لجدي من كثر اهتمامه بيه واشوف حنين رغم قساوته ! ما انسى جيته لبغداد بعكالة الهيبة وتأجيرة الي شقة ! ظل يصرف عليه وانه الي ما احبن احد ينطيني ..... بس الي واساني وقبلتها على نفسي وعد وعدته لروحي ارجع اله كل فلس ... حطيت دفتر صغير وصرت اسجل شنهو ينرسل الي بالشهر واجار الشقة واسجل اعلى روحي ديون ما زالت علاقتي بأمي محصورة بين السؤال منها والجواب الكصير مني وما اخطي بيت جدي ابد ! مدام ذاك محبوس بيه ! بفترة .... عطلت بيها كم يوم قبل الفاينل وانه جاي من بغداد نزلت من التكسي كدام المدرسة ادري بشهد تمتحن وهيج وقت تنزل ... خابرت توبة وكالت الي . طلعت شهد والشررر اطاير من اعيوني هاي ليش نازعه العباية ولابسة جبة اني اعلمها من شافتني انخطف لونها بالكوة تمشي بطيئة حيل وتتلفت عصرت ايدي اريد اموتها جريتها جر وكعدتها بالتكسي واني متحلف بيها .شفتها ترجف خايفه مني وكفت التكسي يم سوبر ماركت نزلتها ونزلت اشتري الها .دخلت وشفت ابنية تتعارك مبينه صوتها يزمخ بالصانع -انطيني الباقي وكلمه منك اصيح الك اخوية يوذرك باوعتله صفح مبين جاي يتحارش بيها من عمر اختي و وياها وحده هاي الوحده الي وياها مو غريبة عليه جني شايفها من كبل !؟ انطاها الباقي مبينه ملسنة اخذته منه وغمته ولفت عباتها ومشت وكفت كدام اختي غمت اختي ! وشهد عوجت حلكها عليها اشبيهن ذني ؟ انوب رجعت علينا .... جرت اختها الي بس تتفرج وما تحركت وطلعت الابنية من السوبر من طلعنا نسيت سالفه الجبة وسألت شهد ذني منو وليش غمتها ناكر اني عرفتهن كالت ذني اجنا نقل لمده شهرين بالابتدائية و شالو لمدرسة اقرب الهم ...بس جنت بس اتعارك وياها هاي زينب العرمه وحده لسان و وكحه حيل ما تنجرع وبصراحة بسببك هم انت عدو اخوهن واخوهن عدوك من جنا جيران -وهاي الثانية أختها ؟ و منهو اخوهن -اي بس ما اعرفها جانت بغير شعبة ومرحلة اشبيك خوات هذا الي تتعارك وياه هنه جانن جيرانه من زمان .....بس شالو عن بيتنا بغير بيت ملك بنهاية منطقتنا ابوهن حيل متشدد مجانن يطلعن برة ابد بس نلمحهن وامهن ما تطلع للجيران ولا لسوك وموبشة ومدري ليش نقلوهن عنا عرفتهن خوات مرتضى دوم صرت اشوفها لرقية ... الاصح اتعمد اشوفها كمت امر على طريق مدرستهم كان وقت امتحانات .. همه مدرستهم تختلف عن مدرسة شهد اعجبت بيها حيل كشكل وكترتيب و كعفة .... مرتبة حيل هالابنية .. العيون سود والوجه ابيض و الخشم مصقول مثل المصقول والشفة ممتلية و الحاجب متقوس متشعب بالشعر الاسود الناعم رغم عبثه بوجه الا ما ناقص جمال لو تكبر واتشذبه مثل النسوان اصير گمرهن . حيل تشبه . والدها .....المؤمن ....ابوها اكتشفته شيخ بجامع بعيد عنا مسافة يم بيتهم .... ومؤمن مأذون ....... عليه علامات الحكمة و الوقار ........... و زوج بنته هم شيخ .....احنه انه وخواتي جدي اشترى النا البيت الي جان مأجر المؤمن ورممة النا بس اكيد بأسمه . وظلينا اهنا بالمدينة حسب مزاج امي حيل مدللها جدي عزلنا عن خالي حتى شهد تاخذ راحتها وبنات خالي لان انه و خليل واخوته كبرنا توبة عمرها ٣٠ وتزوجت قبل ٥ سنوات و ديمة ٢٨ هم متزوجة و كوثر عمرها ٢٤ مخطوبة لابن خالي .... و انه ٢٠ و شهد ١٤ سنة ..... شهد بس من امي وابوية والباقيات من امي بس علاقتي بيهن كلهن طيبة .....بس لشهد معزة خاصة جنت متحكم بيها وبامورها جني ابوها موش اخوها ....انه لهجتي الريفية تغيرت ودخلت الها كلمات دخيلة صرت مخلط بسبب كعده بغداد دراستي ...والنجف ...صرت احجي مخلط صوتي خشن على كولة شهد يخوف .. شكلي ابيضاني بشرتي تتخلها الحمرة من اقل عصبيه ...لون اعيوني لون خيوط الشمس الباهته ... صفر و تتحول مرات على خضار خاصه اذا لابس اخضر . لحيتي خفيفه حيل وشاربي كذلك . رشيق مبتعد عن النحف والنحول ما دخلت بيوم نادي رياضي بس العب طوبة دوم ويه ويلاد خالي وطويل خشمي مدبب صغير وشفافي رفيعه ...... جان بيه شبه قوي من جدي ابو امي .....حتى هو يكول محد من احفاد ولدي طلع يشبهني غير سبطي .... انه سبطة الولد الوحيد لانه ماعنده بنات غير امي (السبط ابن البنت ) جنت اعانده دوم طلب اترك دراسة بغداد واصريت اعليها .... طلب اتزوج او احجز بت ابنه ورفضت الزواج بهذا العمر .... يكول يمنة اكول يسرة ! بيته ما اعتبة لان ابنه المخبل بيه محبوس (عندي خال مختل عن كبر!) و هو دوم يكول على كد ما تشبهني تعاندتي ليش يا جدي ما تترك الدراسة شلك بيها مثل ويلاد خوالك نشغلك وحتى اذا تريد ننطيك بكشة تبني بيها(قطعة ارض باحد بساتينهم كم دونم يسموها بكشة) اروح عصريات .....احوم يم بيتها لهلحمامه الوديعه .....واشوف ابوها الي حبيته ...... وهي ما اشوفها اشوف اخوها الي ما اطيقة وهي ماكو. صرت اتقرب لبوها بالجامع .... لو عندي سؤال شيخنا لو اساعدك شيخنا اذا شفته بالسوك اشيل عنه ما بغايتي شي بس لانه ابوها ........ بيوم طالع بسيارة خليل كالعاده اخذها منها افرفر بيها شفته للشيخ يتمشى وياه ثلاث نساء وحده منهن مبوشة والي احبها وراه تمشي بوجها القمري .عرضت عليه اوصله لراس الشارع اذا جان هذا واجهته و وافق الرجال ...... صار يعرفني ابن الحي وعدو ابنه بس ما حاطها ببباله عقله حيل كبير وحتى حاجاني وكال الي انتم بيه طيش شباب حامي لا تخلون العدوات تدوم ولا تجني لصاحبها غير المشقة والنفاق الله يهديكم جمعني مع ابنه بالهداية من غير ما ينحاز لواحد منا ! بت خالي اهلها دخلو براسها هي الي .. و ومضوجتني من تيجنا بنظراتها وتلميحات امي كدامها ..... بس مغلس هو الي يشوف بت المؤمن تحلى بعينه بنت ... ... اروح وارجع للنجف وماكو اجازة اجي بيها اذا ما اني ومرتضى توصل بينا نريد نضرب بعض السوك ضاق بينا هو يشتغل بدكان يبيع منظفات وانه ويه ابن خالي . وبمرة اتلاوينا واصحاب المحال فاككونا ! وبمرة ضربته بوكس ورمت شفته ودخلو الكبار وخالي وابوه وحلوها واخذو منا عهد لا سلام ولا عداء واحد يتحاشى الثاني انه ومرتضى ... شاركت بموكب خوالي .... على طريق نجف كربلاء موكب يتنصب ايام زيارة الاربعين بحيث الناس تتعنى مشي من النجف الاشرف الى الامام الحسين ع . واحنه نخدم الزوار .. بأخر عشرة ايام اكتظت الزيارة انه اهنا عمري ٢١ صار .. و جنت افرك برجلين رجال جبير بالعمر مفركسة وحطيت اله دهن و اجري على الله .... جنت اخدم بحركة من كل كلبي اتمنى ابا عبد الله يتقبل خدمتي لزوارة ....انه لقبي بين الربع شيخ الجنوب وجدي يندهني شيخ الشباب . بسبب طبعي الحامي وايثاري .. الناس اتروح وتجي ... عدنا طبابه بالوكب كاعده تقدم مساعداتها للناس طلعت يم اهل الجاي ... شفت الاجواء ورجعت دخلت من صاحو الي ..... تارك صديقي خليل وابن خالي وشريكي بالشغل برة هو اكبر مني بسنة ... سمعت صوت يسلم مو غريب عليه التفتت شفته مرتضى .. ظل واكف يم الرجال الي عقمت جرح جعب رجله ودهنته اله وما رديت عليه ... كام الرجال .. وهو كعد كدامي -رجلي مفركسة ادهنها الي بروح ابوووك هذا الكلب شسوي كاعد كدامي ...انه اخدم هاي الخدمه بس الزلم الكبار بالعمر مطي مثله شعندي داهن رجله بيده كركري ما يدهنه هووو اضاهر خليل حس بالقنبلة الي اجتني دخل للخيمة وشافني اشلون صاك اسنوني واباوع لمرتضى المستفز -كوم ياسر خالي يصيحك ...طلعني لبرة خليل وعفته يم هذا الدون لو لا ابا عبد الله ومصابة جان ذبحته قربان لوجه الله للعشا شفت ابوه الشيخ يشرب جاي من يمنا سلم اعليه ودعى الي بالثبات وحسيت بنبرة كلامه حسرة من كال الله يثبتك على طريق اهل البيت ، ما اتأخرو واشوفهم اخذو نسوانهم بخيمة النسوان ..... طريق المحافظات هذا شارع طويل والناس تمشي بيه ...على طولة متروس مواكب ترس ........... عد عمي موكب على طريق *** كربلاء بس ما رحت الهم تألفت ويه خوالي اكثر .....حبيت كعداتهم وديوانهم .... واحب اسمع جدي وهو يحجي ويضرب امثال ....... كعدته كنز .......... اجواء عاشوراء لا تعوض الكل لابس اسود صغار كبار ويمشي بنية خالصة والي يخدم بموكب يشوف اشكال .... لهنا انه لمحت اجمل ما خلق ربي اضيگ بعيوني حتى بس اميزها هي لو مو هي المسافة بينا مو قليلة ... وخرت من كدام الميز تارك خليل يكول بده التسخيت تركت الموكب و اتقدمت بخطواتي الها بوسط الزوار تمشي گمر مگبع (لابسة عباية) بليل تلالي مثل النجمة بحجابها الاسود و عبايتها ...وجها مدور ،دور اعيوني وياها وتلألأ العشك بيهن... جانت طفلة وضايعة ،هيلة وذايبة واعيونها سبيل عذب يندي ماي ...... حبيت دموعها قبل لا اعرف سببها ..... تتلفت منا ومنا اظنها تايهة...اي تايهة قبل اشوية مشو من يمنا وكعد بالموكب اخوها الغثيث يمي وعبالة يذلني الغبي ما يدري خدمة ابا عبد الله شرف الي ولهلي حكه فرخ نستلة هو شمعرفه ، ماكو شفيع لتحملي اله غير هالاخت الطيبة .. لحد لان ما شايفتني تتلفت ادور اهلها طيرة حرة تايهه عن سربها ....مكدرت اعوفها هيج ضايعه بنية ترفة هاي اجيتها من يمنتها حاجيتها - خيتي ضاغط الكلمة بلساني بالعسرات الا طلعت مني الگلب يكول(محبوبتي) -تايهه انت ؟ عن هلج التفتت عليه و ظمت نص وجهه بعباتها جنيت يا اللهي من جرت عباتها على وجه اتخصرت على متنها و برزت ما ابدع وصب ربي دنكت عنها بودي اكول الها عدلي عباتج - خيتي عرفتيني انه جاركم ياسر . خير تايهه عن هلج ؟ عافتني ومشت ، اظنها خايفه مني انتظري بين الزوار تمشي راجعه وانه وراها -خيتي جاي اترجعين ... انت وين تيهتي اهلج ارجعي لنفس المكان هسة يحومون حوله وكفت والتفتت عليه اويلي يابة ما جنت مدنك جن اصد متنها باغتتني من صادت عيوني تصد لعيونها ، سوادهم سواد ابيض !احسه صااافي و بريئ مو اسود ! اشرت هي لكدام ورجعت تتقدم وانه وراها مشيت مبتعد عن موكبنا .... وصلنا يم موكب ثاني خيمه رمادية ويمها علم اخضر كبير اظنه دليلها صار اظاهر اهنا تاهت وكفت على صفحه مبتعد عنها لا اسبب الها احراج بس ما تركتها ، منا من يجون الها اهلها اني اهنا ، من خرب ابليسه لهذا اخوها الخنثة انه عندي هالاخت واتيها لا والله اتيه الروح ولا اخليها توكف بين الخلك هيج ، اعيونها مغيمة ورجعت مطرت متحملت ورجعت ليها -ها اختي اكلج هاج هذا التليفون خابري انه هم راحت عن بالي ..... باوعت للتليفون ورجفت شفتها -ما اعرف ارقامهم استغربت ليش محافظه اي رقم منهم اشعجب مسألت -زين وهسة اشلون خيتي انت ليش ما شايلة تليفون الدنيا راح تليل ومحد رجع لحد الان بجت البنية ورجفت انه لصتها لوص كامت تشاهك -اني ضعت ....... تبجي لفتت النظر انه خيمت عليها ساد النظر عنها قدر المستطاع واحد حجي شافنه وهو يمر من يمنا لفتت نظره خزرته -خيتي اسكتي منا وادم -ضعت ضعت انهدرت دموعها هدر -حباب وديني الهم ......وديني ماما وينج ياربي هاي هيج البنات المدللات صخم الله وجهك ياسر اتورطت احلى ورطة بحياتك ! -خيتي تعالي وياي لموكبنا نرد. ... يم النسوان اكعدي -ماما ما تقبل امشي ويه غريب كبسة من طراز الاول مسحت كصتي وانه اتلفت والغضب من نفسي شعل اعيوني -خيتي ترة مو قصدي شي لا والله انه لانج بت حينا ردت اساعدج اكعدج واروح ادبر رقم اخوج من ربعي بالموكب -اي اي صدكتني ابسرعة وقبلت ترجع وياي ! ما اعرف امنين جابت الثقة ومشت .. تمشي وراي انه خفت اتيها بين حشد الناس تبطئت ومشيت وياها تارك مسافه قليله يعني مبينه هي تخصني وامشي وياها اااخ يا ريحة عبيرها كخفت ريتي خلتني امشي مخدر هالبت ، تمنيت ماله نهاية هالطريق مشينا راجعين لموكب النساء حاجيتها -تعبانه -اي اي حيل رفعت نظري عنها محتار بيها واشوفلك مرتضى كدامنا يمشي ياكل الخطو بخمسة و وصل كدامي رافع صدره حامك يتبع قدمت الموعد ٥ ايام لأجل حسابات عندي موعد النشر غير سوي حسب وقت الفراغ باجر اكو بارت اعيد وقت الفراغ يعني معندي التزام وياكم وولا عندكم حق يمي لأن من هسة بلغتكم وقت الفراغ ماكو وقت محدد ولازمن 😁 بس انشالله انتم المستفيدين لأن عطلة بس اذا فد يوم أتمرض لو يصير عندي شي واختفي لا تنزلون عليه بالنازل🤐 زهرتكم ❤❤❤❤ التعديل الأخير تم بواسطة فيتامين سي ; 28-08-19 الساعة 10:06 AM | ||||||||
|
| |
|
28-06-19, 01:05 AM
| #3 | ||||||||
| مراقبة عامة ومشرفة منتدى الروايات المنقولة
| مساء الورد #شيخ الشباب #من كتابات زهراء العراقية #البارت2 لا نشرب الخمر فنحن نسكر من مشاكلنا -مظفر النواب ▪︎رقية شفت اخوية گدامنا طفل وشاف اهلة گدامه ، عفت الي يمشي وياي و رحتله بعيون تدمع وگلب يرجف فرح بشوفة اهلة -عبالي بعد ما الكاكم ... - يا خيي دربالكم على اهلكم كالها الي امشي وياه جنت لاخوية الي مشنجه كل عضلات صدرة مدري ليش احسه ضايج ،لزم كفي وجرني صوبه واتقابلنا ويه الشاب وسأل مرتضى -شعندك اهنا - عفة اعليك اشوف بت منطقتي تايهه وما اخذها لموكب النسوان على العموم اجيت اخذ رقمك وتجي تاخذها بزمخ ! - ماقصرت - دربالك عليها اكثر يحجون كانهم يردون يتعاركون مو واحد يشكر واحد ! واثنينهم خازرين بعض اعتقد من خوفه عليه رضاوي حبيبي اخذني وطار بيه يمشي على السريع - ها ولج تهيتي عرفتج مو مال مشي - خفت اظل ضايعه گلتها واني العبرة خنگتني -واني اخليج احفر الكاع واطلعج خفف من لزمته لكفي العصبية و شال ايده حطها متني وابتسم الي . خابر بابا كال اله لكيتها تعال ارجع يم امي ... وصلنا لامي واخواتي زينب و مقداد كال مرتضى وهو يكعد على كرسي نايلون من الي مسطريها قريب على فد موكب -لا تبرطمين جنج طفل تايه بركتنا انت بوية اضيع زينب وطوايفها ولا اضيعج تروحلج زينب فدوات زينب غمت وجهه وكالت - هذا حظي هم اهم مداني اجة ابوية وبعيونه انرسمت اني ما شاف مرتضى اتعداه وجثى وركبة كدامي بكعدته واديه على ركبتي وهو شيخ معمم ! هذا حبيبي - صارلج شي خو ما بجيتي اهواي جاوب مرتضى وهو يضحك -ابد بس غركتنا دموع وصلت الماي لكربلاء وعبر للحلة(بابل) منه ... ماما بوستني و رحنا كملنا المسير لأباعبدلله بالرجعه رجع مرتضى فتح موضوع تيهتي وكال اشلون امشي ويه ياهو الكان - مو ياهو الكان بابا كال عليه خوش ولد من وصلنا بسيارته ! اني اثق بكلام بابا اخذه سيف وظلت زينب من رجعنا للبيت تسالني شكالي وشنو حجى -اشبيج زينب هههه زينب اشبيج ولد و وصلني ......اني جنت عبالي مو خوش ولد لان يوكف بباب المدرسة للبنات - ثولة يوكف الج وكم مره نبهتج - شو ما يحجي وياي من يوكف ولا يكول الج -ترديه يفضحج .....لج كافي نظراته بعدين مو جنتي اتكولين عليه مو حباب اشلون تأمنين وتمشين وياه هاااا - اي بس بابا كال هو خوش ولد وبابا ما يكذب ههههههه ما يكذب ▪︎زينب هذي رقية اختي لقبها بالبيت حبة البركة لانها من اهل الله على البركة حلكها. دوم مبتسم. وطيبة الى ابعد الحدود وعلى نيتها ملاك بجسم بشر ... خطية تعاني بالمدرسة ويصيحن عليها الهبلة البنات ويضحكن عليها ويبوكنها وانواع الاستغلال عبر مراحلها الدراسية بسبب انها على البركة واسمي متعاركه على مودها ، حيل نحبها ونخاف عليها واني اختها الصغيرة اصغر منها ب ٢ سنوات انسى مرات اظن اني الكبيرة ..... خاصه هسة هي رسبت سنتين ولحكت بيها بالمدرسة رغم.التعب والتدريس من جهة بابا و حتى جيرانه معلمة تجينا ادرسها خصوصي من الابتدائية لهسة .....عدها بطئ أستعياب ، مرتضى نقلنا بغير مدرسة لان خوات ياسر بيها ! يتخبل منه ودوم يغلط عليه ما يدري بهاي الفترة دوم المحه يباوع وعينه على رقية بأيام الإمتحانات يوكف النا كدام المدرسة وهاي فطيرة ما تدري حتى صديقاتي حسن وهي لا ! رقية الها معاملة خاصه من قبل اهلي هاي لو اني التايهه وامشي ويه ياسر جان كطعني كطع مرتضى وزعني ثواب لوجه الله ! ▪︎رقية ما ادري زينب نبهتني اكو شاب يوكفلي ، وما اهتميت عبالي ما يوكف الي غلست عنه بفترة امتحاناتي ،انوب من وصلنا اني وبابا عرفته خوش ولد لان بابا كال هيج ...بس سألت نفسي ليش يوكف هيج كنت اظنه مو خوش ولد لو لا بابا ! من شفته بالزيارة و وداني لاخوية ثقيت بيه خوش اوليد ....حتى من خوفه عليه ما سلم على مرتضى كبل سلمني اله وجان خايف عليه فعصب على مرتضى و وصاه عليه ...خوش اوليد .....وشاب معدل هيج بابا كال من مرتضى كال اله ! السنة الدراسية الجديدة ..كمت اشوفه نوبات يوكفلي ونوبات يغيب مرة غاب اهواي كمت اسال بزينب .. زينب كالت ولج شعندج حابته خجلت .... الى ان رجع .... واجتني رسالة مرة بيد اوليد صغير ...اني ما اخذتها خليت و شردت زينب رجعت ورايه وطلعت ماخذتها وكعدت تقراها اني بس خلصت حركتها ظل دوم يرسل رسايل بذاك الاسبوع وبيهن سولف الي عن نفسه اهواي ...ما بيهن كلام حرام وغزل بس هم حرام يعرفني بروحه واني ما اقرب اله وجنت احس بذنب لان زينب تاخذهن وكلت الها لا تاخذهن ...كالت الذنب عليه معليج بعدين احنه لا اختلطنا بيه ولا سمعنا صوتنا من ايد جهال ناخذ اوراق الشاب حلو ومرتب وانت فاشلة بالدراسة عاد اخذيلج واحد يحبج . وبمرة دافع عنا . بالدروبنه نمشي وشلة شباب ورانه تذب كلام ... وزينب ما تسكت كبت بيهم واجه هو صاح ..بيهم هو اكبر منهم همه صغار من عمرنا . كال هاي الجماعه يخصوني وعت واحد بيهم دفعه وكعه بالكاع خلو وشردو بالبايسكلات مالتهم . لو زينب تخبلت بس تمدح بيه الطريق كله و هم اني مبهورة بيه وظل بالايام الي يظهر بيها يحرسنا من بعيد لبعيد . بس اني حزينه هم ذنب وهم خاف بس يزوجني يضحك عليه مثل بنات المدرسة لو يصيحن الي غبيه لو المدرسة تهيني لان اضحك دوم وجهي يضحك مو بيدي ، الله يسامحهم وينطيني ذكاء ! ماما تكول مرات اسمعها لفاطمه عدها نص عقل فكمت دوم اكعد ادعي بعد كل صلاة الله يكمله الي ! مشت الايام وراحت الايام وتعلقت برسايله حيل يحجي وياي ككبيرة مو طفلة حيل حبيتهم .. بالمدة الي يغيب روحي اتروح وابهت و واضوج من المدرسة .. واعيش الواقع مالتي .ماعندي صديقات ... ويضحكن علية البنات وعلى افكاري مدري ليش ما اعرف ليش اني احبهن وشنو يطلبن مني اسوي والله ! المهم .... بيوم طلعت مدنكه وكارهه اليوم الدراسي لان راسبة بالشهريات . زنيب -لج ارفعي راسج هذا روميووو زمانه اني رفعت راسي وشفته ....قميصة اسود وبنطرون بلونه ... جان حلو لدرجة حسيت ملك شمالي يسجل ذنوب عليه وخفت خفت حيل ..دنكت و درعمت لكدام زينب امشي سريع ،وبخوف ارجف بعدها هم اختفى من ما اخذنا الرسالة منا خفنا البنات يلاحظن هو يوكف على صفحة ويرسل ولد ابن صاحب الدكان ...طفل غاب وغابت لمعة اعيوني .. طلعت هالمرة اني ادورة كالعاده هليام لان طول حيل بغيابة شفته واكف زينب كالت -عزة ايده مكسورة دمعت يكلك واحد من عائلتي ...البنات يدفعن بيه بالحلة ديفوتن واتقدمنا للامام واني ركبتي ملوية ع يميني اباوع اله ومشينا ..... نحس واحد ورانه من دخلنا بدربونه ... - انتظري .....رقية جمدت عروقي و گلبي دكاته ازاحمت وكفت بوجه حامي وزينب كبل التفتت همست هذا هو كلت امشي ما مشت وهو وكف گدامنا -اشلونج ..... من زمان اعرف اسمج ترة لا تستغربين ...رقية ..... انت اتعرفيني اكيد قريتي رسايلي.......اني احبج ! انسطرت سطر وهجت اخدودي - واريد اكلج شغلة .....بعد ما اوكف اهناك اشوفج من بعيد من غير ما اتحسين واروح اخاف عليج والله ... زينب -تخاف عليها وموكفنا بالطريق ؟ -اسف والله غصبا عني ....بس اريد وعد منها انتظريني انت بعدج صغيره واني طالب جامعي بعدني راح مشى خطوتين وكال اوعديني اشرلي بأديه على گلبه مفهمت شقصد يأشر عليه و انوب على صدره ؟! -ليش ايدك مكسورة ! سألت بصووت يرجف رجيف بس بالي كله يمها حتى من يحجي جان وياي رهبة بيه وقلق عليه واكول يتوجع هسة لو لا - حادث ...باجر اكتبلج رسالة واشرح الج الصار ولو ما اكدر اكتب باليمنى انه يسراوي راح واحنه ركضنا الدرب نهرولة تهرول .. زينب -اشبيه انحصرت بولة خرب هو يحجي واني اكول طلع بابا من صلاة الضهر ولكفنا يمه - هههه اني هم هههه اني هم زينب ليش ايده مكسورة .. ليش زينب ايده مكسورة -باجر يفهمنا ؛اليس بباجر قريب ... حسيته واحد من الاهل مو عادي ... بس الخوف جان قريني اخاف لا اوكع بالحرام واباوع اله من غير ما استغفر دعيت واني بحرام الصلاة ....ربي ان كنت أذنب ابعده عني وابعدني عن طريق الضلال ...... اي ربي ابعدني ...... اي ربي بعدني اذا كان ذنب ابعده عني يارب حباب بعدهاابتسمت ، بس ربي وبابا من بعده يتحملون اعادتي للكلمات ....هي مو بيدي ولا ابتسامة او ضحكة وجهي بيدي اني طبعي هيج .....ماما دوم اتوصي بيه ابطل اعيد العبارات وزينب هم ما تتحمل اتكوم هي اتعيدها عني واسكتني بصيحة منها ...... فطومة اختي هم تتحمل كلامي وما اتعيب عليه انه الي يعيبون اضحك وياهم ما عرف شكول اضوج حيل بداخلي بس شسوي اخاف اذا ما ضحكت يضوجن مني فما زعلهن ! بنات عماتي او خالاتي بس زينب مدري ليش تتعارك وياهن وتقلد هم عليهن مع هنه مو نص عقل مثلي !؟ اطلع بيههن عيوب و تتعارك مع انو حرام العرك ! بيوم طلعت من المدرسة ابچي بحركة وزينب تسألني اشبيه ما كلت الها لا تروح تتعارك وزعهلن مني اني ضحكت الهن حتى لا يكرهني وطلعت ابجي -رقية كولي ولج اشبيج طكيتها بجية قوية وكدام باب المدرسة كلت - سجى كالت عليه منغولية وخلت البنات يضحكن واستمريت ابجي - ايا كلبة الحقيرة نفسها هاي الي تغار منج لج ثولة انت اتخبلين -هي كالت انت حلوة بعقل منغولية عقلج مخربج ....... زينب همه ذولة المغول الي غزو بغداد مووو قصدهة اني جاهلة عضت شفتها وكالت زينب -امشي خبلتيني انت امشي باجر اني الها ........ شافتها بالطريق كدامنا تمشي كالت اللع رحم مرارتي جان طكت منا لباجر اتقدمت زينب مسافة عني وراحت الها - سجى ريحة ابطج جيفتنا حطي شب عزة خلتها توكف مصدومه واتباوع على صديقاتها الي صفنن ، اني وكفت يم زينب اريد اجرها عبالي تتعارك سدت خشمها زينب وكملت -جنت وراج وريحة اصنان اتفوح منج اسبحي اووك اتفحم وجه سجى دخلت وسط اهدومها ومشت زينب ساحبتني وياها تضحك -هههههههه الجلبة - هييي ليش ما تسبح خطية خاف ماعدهم ماي هليام ينكطع -انجبي رقية سكتت -زينب شو صارلة ايام ما اجه مو كال افهمج .. مو كال افهمج . ههههه كال افهمج -اوي عيني مو كولتي دعيت يروح طار الحلو حريمة ، انت دعاويج ما تنزل الكاع ما اشوفين بابا يصيحج بركة لو حبة بركة - دعيت ذنب يعني هو ذنب ....هو ذنب ذنب ؟ ها ها -اششش دخت . لعد شنو هو بس اعيونه اثم و رجسم لج حلو زياده -ما يجي ههههه بعد ها ما يجي هههههه صاحت بيه اسكت التفتت عليه -يبوووو هسة انت اشكد اتلحين اتخليني اصيح عليج وضميري يأنبني يا اختي كولي كلمه ولا تعيديها حوصلتي بكد الدودة واني جوعانه دخلنا بدربونه ثانية وصار هو بوجهنا اثنينا ضحكنا بغباء هو ابتسم..اني -هههههه اجه زينب اندس بيها اظنه سمعني ،خجلت دنكت -فدوات اروح للينتظرني ..... سمعني !! هو جان منتكأ على الحايط .واحنه وكفنا مسافة عنه . ضهرية وقليل الناس تمشي والطالبات تفرقن من يم الباب . هالمرة اتقرب الي ومدلي الرسالة واعيونا تلاكت ونسيت اني منو وبت منو وبگلبي كلت مو ذنب ورجع الي لان ربي دوم يستجاب ابسرعة دعائي وحتى يلقبوني حبة بركة ففرحت حيل أريد اخذ الرسالة ايدي ترجف أعيونه سحرني ما رأفت بقلب المراهقة - اتأخرت اشوية توعكت صحيا وهم بصعوبة كتبتها باليمنى ... ابتسم وهو يوجهه مرة ثانية الي -هاي اخر مرة احجي وياج بيها اخاف اعليج اقصد عليج زينب همست لا تاخذيها خل نمشي اتماده هذا باوعت بعيونه خفت ما اخذها يزعلن اعيونه اني ما ازعل احد ينكسر خاطري اخذتها ويه اخذتي الها كالت زينب -عزة مرتضى - لك دون كلب شسوووي التفتنا اني و هو على مرتضى الي صار كدامنا يركض ... -ياسر الناقص الدون زينب اخذت الرسالة مني و الكفي جنطتج واشردي .بس اني أطرافي جمدت من الخوف بدني انهز هز مثل غصن النبكة بيده الجهال و تهزة توكع ثماره الرهبة قوية واشوف اخوية مخونگه ويكول كلام ما افمهة او استوعبة واتماطلو سوية بالشارع .و اوكع اخوية عليه ودك بوكسات اني بس دموعي تتحرك الباقي جامد بيه دفعه عنه بس ياسر ايده مكسورة ... فضربه عليها اخوي ون ونه قوية ومرتضى مستمر يركل بيه برجلة على ايده . مع هذا وكف ياسر وهو يون راد يتحرك .. اني واكفه ورة ياسر بخطوة مرتضى كدامه ضربة بوكس على وجه خله راسي يميل على يسرته اني جنت قريب خلفه تقريبا اريد اصير ابصفه وفوكع عليه منه بلغم دم على صدري ....لمسته حار وصلب بيه شي صلب لكفته بأيدي . ضربه على خاصرته مرتضى و جرني ابسرعه مرتضى رحنا و واني اتلمس بالي وكع عليه واباوع للخلف و بوكعه ياسر الي يباوع عليه بعيون تتألم ... ركض بيه مرتضى للبيت ساكت دخلني للحديقه وكال شصاير شنو جان يسولف وياجن !؟ اني ركضت للصالة وصامه ايدي لازمه الي وكع عليه وايدي صارت دم اجه هز متني -ولج رقية شنو جان ينطيج ومتقرب عليج احجي صيحته مرعبة حيل دخلت امي علينا . ورجل اختي واختي طلعو من الاستقبال اضاهر جاي يوصل فاطمة الزهراء النا وبابا ماكو جان طلع ونقذني .يربي انقذني والله واعدك ما اعيدها ياربي حتى الدعاء القلبي راح بعد ما صاح بيه و اعيونه تخوف اتبولت على روحي من الخوف بس منزل شي بالارض ملابسي ثكيلة وعباية . بهاي اللحظة من رفع ايده اجيت اعترف بالاول والتالي دخلت زينب تركض بعدها بملابس المدرسة . وكفت كدامي اني شفتي ترجف اجه حلكي ينعوج احسه ،صارت هي كدامي وكالت اني جنت احجي وياه مو هي صاح هو -عرفت والله مو سوالف رقية من اهل الله و سحلها من شعرها من فوك الحجاب خله الحجاب ينزاح يطلع نص شعرها ومطلها بالارض وحيل برجلة على ضهرها ... اجته امي توخرة و رجل اختي شفته دخل بالاستقبال اول ما طلعت هي بصدريتها من غير عباية . اني كلت اختي ماتت من الكتل لا امي ولا فاطمه كدرن يطلعنها من بين اديه. غير ادين خشنه لزمته من متنه وجرته. هذا السيد محمد زوج اختي رجع جرة دخل من سمع صوت امي ينجده حتى ينقذها هي مالها حس ولا حركة بمكانها كلبناها على ضهرها اعيونها مفتوحه ما ترمش وامي نحبت -ماتت البت .. ولج فاطمة اختج ماتت كتلت اختك يرضاوي ! اني كعدت على الارض ما مستوعبة شي ابوي دخل وهنه يحاولن يشيلنها .او بالاحرى فاطمه اتحاول اشيلها لان ماما بس تبجي واني صافنه .. والسيد لازم مرتضى . من غير ما يفهم بخوف اب شالها. وهو مخترع من منظر الدم من حلكها دخلها لغرفته واحنه وراهم حطها على فراش مفروش يم الشباك معدهم سرير ضربها بخدها حركت رموشها وغمضت . ارتاح من حس نبضها طبيعي طلعت دموعها من انتهت صدمتها حسب ما كالت هي الي جانت مصدومه من الضرب الي اكلته فجأة .. وطلع بابا يشوف ليش مرتضى هيج سوة امي هم طلعت وكالت لفاطمه اخذيها غسلي الها ... اخذناها غسلت وجها بس تمشي سودة علي محنية ضهر اتكول سنسولي يوجعني ما اكدر ارفع ضهري تمشي وتون من عظامها مكسرات اني رجعت ع المغسلة اغسل ايدي عدل احس بعد بيها ريحة دم ..... خايفه لا احد يكشف الي احتفظت بيه منه ! فاطمة بس تسال بينا بحركة شجرى وصار هيج يسوي مرتضى . اني اجيت احجي - من ورة واحد ينطينا رس سكتتني زينب ببجيها وخزرها الي فاطمه خزرت زينب وكالت بحده - لا اسكتيها ، ا حجي رقية - واحد يحبني .....ينطيني رسايل -شنو ولج - مو مو زينب كالت عادي مغامرة مثل البنات ههه مثل البنات والله هي كالت عادي هههه مو حرام ما سمعناه صوتنا بس اليوم هههههه بس اليوم ضحكتي برهبة ما فهمت شي فاطمه وزينب توسلت الها بعدين اسولف بس اتروح تسمع شكال مرتضى -فاطمه الله يخليج بعدين اكولج بس روحي لمرتضى فضحني يم زوجج لو لا راحت واني وياها نشوف شصار لكينا امي كاعد يم نسيبنا و وبابا من شافها زوجها كال حضري روحج نروح بعدين نجي بوقت غير بس ابوي ما قبل الي فهمنا مرتضى مكايل شي غير ربو زينب وطالع هاج من البيت من كلت الها هيج كال مرتضى كالت انفضحت والله وظلت تبجي و اجتنا امي و فاطمه امي لزمتها من اذنها ورادت ترضبها بس فاطمه مخلتها ، و تحت التهديد رادن يقررنها بصراحه جانن غير مو ذني امي وفاطمه الهاديات الحنينات لا بقسوة يحجن وياها ويهزنها ويغلطن عليها وهددنها هنه يكتلنها زينب تشهك واني دموعي اسرسحت كلت راح انكتل مثلها كلت -والله والله كلت اتوب صفنن عليه امي وفاطمه ما فاهمات زينب وهي تبجي سكتتني - هو شاب هذا الي يكرهه مرتضى وكف يمنا وراد ينطينا رسالة احنه منعرفه ابد واني كلت اخذها و اشككها اخاف منه اذا ما اخذها يتعده علينا كلت اني -بس مو هيج هو ...... ما درات بال الي زينب وكملت وتعلي بصوتها حتى تغطي على صوتي من كلت مو هيج السالفه لانها كالتها غلط هي مو رسالة وحده ونعرفه احنه لان هي كالت منعرفه ما انتبهن الي واني احاول اصحح الها لأنها نست بس ما اطتني مجال وهنه بالهن وياها . كالت ما انعرفه وهو تحرش وانطه رسالة ومرتضى شافنه وفهم غلط احنه اخذناها لان خفنه من الشاب لان وحدنا ابسرعه صدكنها لان احنه معروف عنا ما نجذب وهمين من عائلة متدينة طلعن -مطية رقية لا تكولين الصدك أنموت اثنينا والله -ها يعني يعني يعني يعني صدري يعلى ويهبط واني اسولف خايفه -يعني انت جذبتي -اييي ولج تردين اموت اذا عرفو هو حبيبج -حبيبي حبيبي حبيبي؟ -اي مطية واني شلت الليلة وحدي ▪︎زينب اصعب ايام مرت عليه بحياتي واكلت كتل بعمري ما اكلت مثله ، بس شسوي من شفت رقية واكفه انكسر كلبي عليها وحسيت الذنب ذنبي واني وحدي اتملعب رحت واكلت الي بيه النصيب بس طلع فوق ما اتصور ردة فعلة صدمتني شبعت دك على ضهري .بيومها اجني امي واختي قررني وجذبت وصدكن واني الخوف وتأنيب الضمير اكلني اكل ، و دخل بابا عليه و هذا جان مثل يوم الحساب عليه -الي صار ما يكرر بعد ..... احنه نوصلكم ونرجعكم ..... حتى لا يتعرضون الكم اولاد الحرام ام فاطمه ام فاطمه صاح امي اجتي .... -اليوم اطلعين تشترين بوشيات( نقاب للوجه) الهن بناتج كبرن وكف شعر راسي اني اتبوش ؟! امي هزت راسها موافقه .... من طلع بابا رقية كالت -اي احسن البوشية ستر رجعت انطرحت والدمعة بعيني ... رحنا لغرفتنا ..... جريت اني من النضيده فراش و فرشته على الارض و انطرحت دخلت علينا فاطمه متخوصره النا -لا عبالج صدكت ست زينب ....احجي رقية شكلتي الضهر ؟ قررتنا واعترفت سولفت كلشي مكذبت هالمرة ..... كالت وين الرسالة ...اخذتها من غير ما تقرها شككتها -اسمعن انتن .....بعدجن صغار ومراهقات هاي السالفه لا تنعاد تنهدت استغفر الله .... يا بنيات هاي السوالف بس البنات الي ما متربايات يسونها راح احجي الجن سالفه صارت من كنت بعمركم .....سولفت النا عن وحده وياهم بالمعهد من كانت طالبة فاطمه وشصار بيها من اتعرفت على ولد ابن حرام واشلون سمعتها تلوثت والبنات صارن يجنبنها مثل الي بيها مرض معدي حذرتنا اهواي ... طلعت .. ▪︎رقية دخل مرتضى وراها زينب خطية كامت ترعش -ما كلتي هيج لعد ..... هااااا ليش ما كلتي هو اتعرض النا ........اني ما سولفت شي عود لأبوي........ ولا كلت اله هو نفسة ياسر الكلب حتى لا عباله لان اكره ....زينب الثولة ردي ..... كالت الي امي هو متعرض الجن .....ليش شردتي لعد اول ما شفتيني -خفت .... -خفتي ام خشم وين الرسالة - شككتها فاطمه -راح أسالها ويا ويلج لو اعرف ما اخذتها فاطمه اتقرب عليها ودنك لزمها من اذنها -قسم بالله لو اعرف انت اجذبين يا زينب امحيج والي خلق السبع سموات امحيج وامحيه ..... اني وابوج صدكنا بيجن صيرن كد الثقة دنكت ترعش هي قضت اليوم ارهاب اني سكتت مكلت الحقيقة خايفه لا يكتلونا خلاص مثل مكالت فاطمه اسكتن ولا تكولن لأحد ...... ▪︎ياسر رجعت للنجف بعد ما فهمت الكل كسر ايدي حادث عرضي ...الا هو عركة اني وصديقي و انه انكسرت ذراعي و لكمات بجبيني وهو هم اكسر لانهم اتكاثرو اعلينا اولاد الحرام بس تحلفت بيهم واحد واحد .... بس شهد تعرف عدها محد يعرف ....اما رقية بيوم كتابتي الها اخر رسالة لأن بدت العيون تفتح علينا ....هاجمنا اخوها. اقسى شعور الدنيا مغوشة بعيني بس الظلام يجول بيها والرمل خنك خشمي هو والدم .. حسيت واحد يكلب وجهي المدمى وراح ورجع ويه همسات ناس وتحريك لجذعي ..... الالم وصلني لشبه الاغماء .... اعادو تجبير ايدي ويا حيل تحمل الوجع وخالي واكف يعاين اعليه بعين مكسوره خاطر .... غمضت متحاشيه. مرتين انكتل بنفس الشهر ! لا مو هذا الي زارف گلبي وناخر عظمي ، غير شي انه ما اهتميم بكتلته بغداد جي اتكاثرو اعليه ومتحلف بيهم وبينا صارت شغلة ، بس الي دمة گلبي وكسر مهجتي هو گدامها ، گدامها اتبعثر مثل جيس التمن المسوس واندفر گدامها اترب ، گدامها ونيت .گدامها وگعت يا ياسر ريتك ميت. وما مفتح اعيون? واحس احساسي هسة ، اعتصرت نبضاتي داخلةگلبي المجروح بكره وغضب اتجاه مرتضى اجتني رغبة اكتله بچيلة ....... رجعني خالي ، للبيت وسط بواجي شهد و شهكاتها ، امي سألتني واكفه -شنو مسوي و هيج مضروب ، خالي كال مو وكتها شافني غمضت بألم ، ريحني ..... - غير نعرف .... شنو مسوي ولك ياسر ريحني - باكوني سلابة -سلابة حتى خالي صفن عليه غمضت -اريد انام .... بروح امواتكم عوفوني برحاتي مرت ايام وبين المستوعبين وبين اللا خالي يعرف كلش زين مو سلابة لأن تليفوني و محفظتي ما ناقص منها شي ......سولفت لخليل اتخبل كال اروح اكطع رجليه .. -لا ....انتظر من اكوم على رجلي ،، ظليت اتمنى يوم تشفى ايدي حتى بس اخذ حيفي منه ....... كسرلي رحايتي قلعها الي من الجذر ....وترك اثرها فراااغ كبير انه الك لا رقية ولا ابوها يشفعون الك يا مرتضى ........ مرت ايامي بطيئة حيل و أجلت السنة..وانتظرت الاشهر تمر و تزول الى ان تعافيت..بهاي الفترة خليل ما يشوفه بالسوك. فالت الكلب وهو هم طالب . انه وربعي و خليل خمسة انفار ..... راقبوه الي وثالث يوم مر وانه شايل الجبيرة متوعد اموته بيه .... منتظر اتصال من خليل ،،، بس رن علية طلعت ، وكف هو تكسي .... صعدنا احنه وراه باوع النا بتهجم والتفتت ركبته اجت تنكسر احنه ورة وهو يم السايق اتقفلت الابواب و انطلقت التكسي الي هي مال ابن عم خليل ، بمعنى ابن خالي الثاني بس انه مو هلكد علاقتي بيهم ويلاد خوالي الي بالمشخاب ... انطلقنا بيه وهو يحلف و يقسم ما يعديها النا على خير -بيك خير يا عربي تجيني وحدك - ابن العرب راح يشوفك الويل يا دون ظلينا نتبادل الشتايم والكل عدانا ساكت ... نزلنا بمكان صحراوي ... نزلنا وسحله خليل نزله وهو يكول - ايدك لا اكسرها الك يغلط و حامك ، عود هو سبع ..الحقيقة اكو لمعة داخلي. اتجاهة ، يعجبني خصمي مو مرة يبجي ! يمكن لو يتوسل بيه هسة اعوفه ، يستفزني اكثر واكتله لأن اتقوى عليه وانه مكسور واكول مابيه حظ بس هسة نافش صدره و مشغل حلكه يشتم بالي يدفعه لكدامي ولا هامه كثرتنا وصل كدامي رافلعي وجه خشمه وخشمي بينهم بس النفس وكال - لو رجال تواجهني وحدك واصلا لو رجال وابن رجال ما تتعدا على عرضي بس انت زگط حاربتني بعرضي وانه اكدر اسوي مثلك يا اخو البنات ضربته بوكس على خشمة. حامي الانفاس من جاب طاري عرضي وكفلي بعد ما ترنح للخلف ورجع وكف كدامي حاول يردها اتفاديتها و ولد خالي ما ادخلو .مثل ما اتفقت وياهم انه وخصمي وحدنا ...... هو يلكم واني اردها .اخرها الحقد تغلب على قوته واني فوكه اطلع غلي و اولاد خوالي يضحكون عليه احنه ما بينا واحد واصل لل٢٥ عمرة احديثين على الحياة وماخذيها بلهو ، وكفت سيارة يمنا و نزل منها الشيخ الي شوفته خلتني احيد عنه و ترخى عضلتي نزلت من فوكه وانه اباوع شاهك البال بوكفت جدي خزعل -جدي ! اولاد خالي هم مستغربين ...... - رجال ....يا ياسر رجال تتكاثر وتتگوى اعليه هيج ......رجال -جدي انه . سكتني و امر السايق مالته الي نزل وراه يكوم مرتضى الي واكع على الارض ياخذ انفاسة ببطئ من تحت ابطه مشاه وصعده سيارة جدي كال ارجع للدار الكاكم كلكم بالديوان وراح وعافنا وكفت اتخازر وياهم واحد واحد كلهم حلفو ما كالو لاجدي .....بس واحد منهم كال اخوي رسول يعرف بس ما يسويها ... بالطريق تأكدنا هو كايل علينا لجدي وصلنا للمشخاب وقرابة الساعتين واحنه ننتظر جدي ماكو. دخل جدي للديوان دخلت الاسد على الغزلان يرجفون وجوهم اتكلبت بس انه رافع صدري مثل نمر متكابر اعليهم ..... بصوت ثابت صاح اطلعووووو برة ... طلعو يهرولون وانه وكفت و اريدن امشي كال -كف كف عن مشيك ......بهوادك وين رايح اجلس ..... كعدت على الديوان وكف هو مقابيلي ... ونزع عكالة....رمز الهيبة ..... و فتحه ! ....... وجه صوبي وطكني بيه انه توسعت اعيوني ... -اطكني جدي ؟ -واكسر اجدامك يا قليل الغيرة كررها مرة واثنين ....يضرب على صدري و على مناطق جسمي وانه ما اتحركت .....ثابت واباوعله بعتب -هذا العكال خليته بتوسل بديوان خالك .....بولد احديث لك هاااك وضربني -عبالنا ابن ولاية. ومتعلم طلعت مثل الركية الماصخة عبالك لانك ما شايل اسمي ما اربيك .....لا والله اربيك وعلى كبر هذا العكال صاد اولاد خوالك وراح اعلمه على بدنك لزمت عكالة صادة واني معترض -جدي كافي ........ كافي لا اطكني انه اخذت حكي صاح -شنهو حكك اهنا مدت راسها فاطمة بت خالي صاح بيها وراح قفل الباب الثاني للديوان .....بيه اثنين مداخل اجاني لزمني من ياخة قميصي -گم گف ل? گم گف (كوم اوكف ) لك يا حگ.....اخافن ابن المومن جذب اعليه وانت ما مجاوز على عرضة دنكت .....بس برگت (برقت) صورة رقية كدامي -جاوب ابن المومن يجذب ........ شايفك متعرض لخواته وطاكك ......وانت هسة متعرض اله ترده اله ....احجي يا ابن الاجاويد احجي يا ابن العرب النشامة هيجي ابوك علماك ......هيجي لك سكتت مدنك وكلمات جدي توجر بيه -أسالك سؤال يأبن ابوك. لو هو جه (اجه ) صوب اخيتك ....ابن المومن جه صوب شهد لمعة اعيوني بشرر حار واني اكول فاقد الذهن -جتالة وحراك بيت هلة خل يطخ طرف عبايتها دفعني جدي مكعدني - يا ابن الاصول انت من حنية راسك الي معناها طاخ صوب اخته ومحگوك (محقوق) اله رجعت دنكت -شوف ما تكدر اتحط عينك بعيني -جدي انه فكري حلال ...... وهو حقير ..... جان متحلف بيه مو بحال الموقف انتهز الفرصة رادها من الله مكسور الايد وتگوة اعليه سكتني جدي - محكوك اله لو شما تكول بن ابوك التعليم بالجامعات نساك تربات ابوك عبالي ازلمه ينشد بيك الضهر .... الحسرة اعتلت صدري وانه احس بحساس الخيبة والم جدي خاب ظنه بيه ........ - جدامك اثنين ما بيهن ثالث ...... تجي ويه امك لهنا ..... اتعيش بين خوالك وجدك واتبيع بيت ابوك وابيعلك حلال اهنا من أرضاينا ..... وتعوف الولاية والسوك .... لو ترجع لديرتك يم عمامك -شنوووو جدي انه طالب .....لا تغضب اعليه ...... انه مسويت شي غلط طول ما نيتي خير - دراستك اكملها .... بس تنسى حي ال** تستقر يمنا بالمشخاب اعلمك المرجلة كل كلمه منه اهانه مكدرت اردها. حتى بداخلي عرفت انه غلط وراكبني من ساسي بس ما اعترفت كدامه ! مشيتها على النية -شكلت ؟ -جدي انه نيتي جانت...... -اسكت كافي بسك عاد انت غلط واحمد ربك لفلفتها والشاب الي ضاربة ما يريد فضايح بس اتعهدت اله انت تطلع من المنطقة ....اتريد بت المومن الي متعرض الها تنشهر بين اهل عشيرتها وعشيرتنا ..عاندني مثل كل مرة ......اتريد ما ينطوها لنيتك السو !؟ - ما ينطوها !!! -نيتك خربت اعليك ! ها هسة تعترف انت غلطت عرفت يا جدي عرفت صحت بداخلي استعجالي خرب كلشي يجدي وانت صح جاوبته بعيون ثابته -لا اخوها حقير -استغفر الله العلي العظيم طوب وجدامي مو بشر فلا والله انت بشر عنده عقل ؟ لك اشوكت تعترف انت غلط كعد تعبان مني وكال هاي.ط اخر كلام الي وياك تكسر كلمتي وترجع للحي لا انه جدك ولا اعرفنك وتنسى امك وخواتك !! ها شختاريت ▪︎مرتضى كنت ادرس بالمطبخ وكدامي كوب زجاجي من غير يده جاي مهيل وامي كدامي تلف كبة تمن. واني كتابي على الطاولة ومقابلها ادرس ..... جنت ناسي شغلة ابوية نزلها بيدها وكف كدامي ....... -هاي شنو .... متمتت وشفت رقية واكفه وراه وكالت -هاي شنو مرتضى نظفتها الك ! كالتها ببساطة وهي مفتخرة ....غيتار جان جوة السرير -منو طلعها ...لج رقية ! -نظفتها هههههه نظفتها كلت بگلبي وفرحانه شخلصني من ابوج الي مخنزر عليه واحواجبه صاعده لشعر راسه - شسوي هاي بغرفتك ! زجر بيه -بوية ..هاي ....لج رقية وين طلعتيها ؟ خرب حظج -نزلتها جوة تنظفها الله يراويني. فجورك ...لك ....انتبه لدراستك ...صلاتك الي فرض تأدي والثاني تغلس عليه امي وكفت يمه وبعيونها رجاء لا يشد بالكلام وياي ..... -بوية هاي مو مالتي ....مال صاحبي والله ..... - شسوي ضامها جوة لا اجذب - مو مالتي واعتبرها حتى لو مالتي مو من حقك اتحاسبني خزرني واني ما نزلت نظري. اتحديته ابتسم ساخر و بالحايط ضربها اكثر من مرة ......كسرها !! كدام انظارنا ظلم الشوف بعيوني واتحولت الدنيا معتمه والشر طافح اسود منها وكفت كدامه بعقوق صحت -أنت ما تتعاشر. ما ينعاش وياااك نفضت ملابسي وبوسط ذهولة صحت -عايفها الك مخضرة هاج منك -اطلع برة ......اطلع برة عاق تعلي صوتك يا جاحد .....تشتري من افلوسي هاي الملهيات يا دنيويي اطلع طلعت وامي تتوسل بيه .. جنت مناوي اطلع ...... اخذت تكسي وصار الي صار ......اخذني جده اني بس ببالي لا اظل اهنا بالصحراء ما اندل ....... اخذوني للمشخاب و كعدت بديوان و الجد كعد وياي كعدة زلم ويه ابنه .... وسولفت الهم ليش ضربني ... وببغل وبكرامة مجروحة كلت الهم ابنكم اتعرض متحارش برضيعاتي واني دمغته ... وهسة اتكاثر عليه .... ظل جده يتوسل نحلها ودي ولا ندخل ناس ما يريد فضايح النا والهم انه هم مناوي اجيب مشاكل لهلي اخاف ابوي يخنك البنات اكثر ويبطلهن من مدارسهن و يدفنهن بالحياة سديت السالفه بشرط ينطي كلمة ابنهم يترك الحي ما يخطي بيه ! وافقوا ....... من طلعت لبرة شفت ولد اخواله يكولن هذا الكلب رسول كايل لجدي مال ذبح راح يذبحون واحد ! مفهمت منو رسول بس اضاهر هو نجدتي ونلت من الكلب ومراح يعتب هاي اقوى ضربه اله واستني على اللكمات الي اخذتها منه وصلني احد رجالهم لحد بيت صديقي ..... ما رجعت لبيتنا ظليت بحجه زعلان ..... خايف لا يشوف اللكمات ابوي مرن اكثر من ١٠ واني اتلطلط كل يوم ببيت الا ابوية خابر يريدني ....رحت للبيت اول ما دخلت لكيتهم بالصاله . كانما ينتظروني .....دنكت ابسرعه لايد ابوية بستها وبست راسه -سامحني بوية حقك على راسي ...... اعتذرت لاني عليت صوتي ..... - شوف مرتضى اني لا اغصب احد ولا اضغط عليك تسير على خطاي عفتك تختار دراستك و طريق مشوارك بس اتجاه لغير طرق مرفوض طول ما انت ابني ...... كلمتين مرتضى لو تنسى طريق الغنا والشيطان .....لو اتبرة منك ليوم الدين وانت اختار !!! يتبع لا يوجد وقت محدد متى ما سمح لي وقت فراغي اكتب باجر في بارت هذي لان اول بارتات مطولة حتى تفهمون الشخوص لا تتعودون اقصرها بس تتعرفون على الشخصيات زهرتكم التعديل الأخير تم بواسطة فيتامين سي ; 29-06-19 الساعة 03:18 AM | ||||||||
|
| |
|
29-06-19, 03:19 AM
| #4 | ||||||||
| مراقبة عامة ومشرفة منتدى الروايات المنقولة
| #شيخ الشباب #من_كتابات زهراء العراقية #البارت3 جفنك جنح فراشة غض وحجارة جفني وما غمض يل تمشي بيا ويا النبض روحي على روحك تنسحن حن .. بويه حن -مظفر النواب بعد ٧ سنوات ▪︎زينب سوينه كعده بالغرفة مالتنا ... الاصدق اني الي ارشد رقية وهي شكول الها اسوي منادر( فراشات ) اثنين حطيناهم بالمسافة الفارغه مربعة وحطيت مخاد تچيتهم على الحايط و المندر الثاني صايرة وراه الكنتور ام اربع ابواب اثنين الي و اثنين لرقية ، حضرنا كلشي دزيت بيد قداوي اخوية كرزات و نساتل وحطيت المشروبات الغازية بالفريز ، للعصر الصغير اجني بنات عمي غادة و عهود سوينه كعدة بنات هاي ونستنا احنه وبنات عمنا ، لا طلعه ولا طبة وحده تشكي همها للثانية ،كل وحده بينا عدها احلام اهواي صعبة تحقيقها ويه اهل عدهم رضا الرب القتل الحي .. لا دراسة لا وجه يطلع لا مكياج يوخر صفرة اللون لا تطور لا تليفون لا نت ! ، طلعت دفترها عهود وراوتنا قصتها القصيرة نقرة و نبتسم كلنا عدا رقية ما تقرة احنه نقرة الها وهي بس فاتحه الحلك شبرين ،من وصلنا لعبارة وقبلها شهكت رقية -عزة حرام ههههه هيج اكتبين عهود هههه حرام غميتها وكلت لعهود -معليج بيها هاي درويشه روحي يم ابوي ولي من يمنا خل نقرة كاطعنا الجفاف وهاي حبة الغيث لحكتينا عليها خلصت القصة ثلاث صفحات واحنه رايحات بعالم ثاني سألتها امنين اجيب هاي الافكار -اوي ولجن بنات افكاري جاوبتها -اي بس المخيلة هم يراد الها تطلع للتطور زاغت اعيونها بينا مثل الي مسوي عمله ومبتسمة -تردن الصدك اقرة بالخفية روايات وشعر دكيت على صدري وكلت ولج ما تبتي لأنها ابوها لكفها وحركهن مرة كالت لا و عماد يساعدني ويجيبهم بالسر الي من جابت طاري عماد سحت بهدومي باوعتلي بنظرات ضاحكه - صدك ع طاريه رسل سلامات الج اهواي ضحك گلبي غديتله عشر فدوات .عماد ابن عمي الحنون المتعلم عهود -اشبيج ولج صفنني مثل بطلات قصصي ها جاوبتها - ههههه ليش عيني ما يعجب لو ما يعجب اكون بطلة لقصصج ضحكت وكالت شو بالله خل اوصفج كبطلة هسة رفعت اجتافي - زينب بنت الربيع الثاني والعشرون الحالمة ، عيونها كحبات البندق الغامقة كبن يغلي عند غضبها، تأسر وتخطف نياط قلب عماد اهنا اني تختخت وخدرت على وصفها اعيوني البنية حاطه اديه جوة راسي واسمع الها ورقية و غادة يضحكن . عهود وخرت الضحكه ورجعت كملت كلامها -ذات الشفاه الممتلئة بالنميمة -انجبي عهود - هههههه اقصد ذات الشفاه الممتلئة والمكتنزة تثيره برحيقها اذا تحدثت -احم هو منو يحسرة اخوج على بعد ٢٥ الف كيلو متر يسلم عليه صوتي ما يوصله ههههههه - ههههه .....اش اخل اكمل ....مثيرة بيضاء البشره بشعر مترول عكش بين قوسين متموج بالسواد والشقرة المقبلة على الانقراض وبطولها المتوسط و بجسدها الممشوق كالساعه الرملية فتنة بصدرها كحبات الليمون وخصرها المنحوت وتبدأ المحندرات تعلو اسفل خصرها -عزة ولج خزيتيني بوصفج واني اكول ابوية ليش ما يخليني اسلم على اخوتج الا بعباية يستحي الشيخ يكول عندج تضاريس يختصرها بالستر حلو ههههههي ههههي ضحكن كلهن واني وياهن وصفت شكلي بطريقتها مال القصص بس ركيكة الصراحة ، وذكرتني تالي الليل بعمري ٢٢ سنة وحلمي كل ما يدور عام يبتعد عني هنه نامن واني صاحية والحسرة رفيقتي من عمري ١٩ لليوم اكول يجي يوم واقنع ابوي وادخل كلية اووف كبرت و أخاف حتى بعد ما اكدر ادخل كلية وهو ما اقتنع . خلاني اخلص سادس وكعدني بعبارة ماعدي بنات تختلط برجال واخاف عليجن . يربي والله مليت مدفونه بالحياة ... انوب اخر امر منه اتبوش ...... من يومها كمت ما اطلع حتى اجنب البوشية (النقاب) رقية لبسته من زمان وكعدت بطلت بالسنة الي اختفى بيها ياسر كان ثالث متوسط و هي بنجرت بيه بس اني شاطرة ما بطلت ولا لبست بوشية عاندت وهو ما جبرني بس هسة جبرا البس ، رقية تختلف عني راضية وعدها حياتها جنة ، حافظة للقرأن و صوتها يسر الگلب عاد عدها هواية الا اني احلامي اكبر من هذا البيت بهواي . اشوكت هالعماد يخلص تكوين نفسة ياربي اوووف رحت طلعت كتاب هو راسلة بيد غاده وعهود ، يتكلم عن لغات العشق بست مغلفه واتذكرت وعده الي رسلة شفهيا بلسان غادة ، بيوم الي بجيت دم من بابا ما خلاني اقدم وكال بس نزوج اني ادخلج بيدي كلية . اشوكت اشوكت يا عماد تطلعني من سجني لو لا الكتب الي ترسلهم اموت مخنوكه . كعدنا الصبح . البنات كله بغرفتنا ياكلن وكعدتهن مدام واخوتنا بالبيت . سالني شنو متابعه غميت نفسي وكلت -ولجن ابوية شفر القنوات خله بس العراقية و الدينيات عهود -خرب عمي اضرب من بابا بالله اشلون هيج ضوجه عاد احنه مسموح - كون ذاك الرجال يتلحلح ويبني فوك سطحكم -ولج اخوية ما مقصر غير ماكو تعينات وجاي يدك عماله - اوووف دخلت علينا رقية نزعت جادرها (اسدال الصلاة) هاي من تخلص ريوك تكعد تحفظ كم أية لان عدها طاقة الصبح غاده -ها روقة شكم جزء حفظتي لحد الان -هههههه حفظت الجزء سابع السابع حفظته هههههه السابع -مبروك عليج حبي حتى وجهج منور -ههههه شكرا هههه شكرا رح رحم رحم الله والديج غاده ... والديج كلت -ديالا عاد طلعو الولد تعالن نحاول نطلع شكم قناة طلعنا للصالة .. بحثت عهود وطلعت باقة الmdc .... امي كالت شسون طفينا ابسرعه ... اخذت نظارتها ورجعت لغرفتها وكمت دوم هيج اسوي اتعلمت من عهود ابحثهن وقبل لا يجي ابوي الغيهم ! ابوي مدرس حوزوي ....ومدرس اكاديمي دارس علوم أسلامية ... على وشك التقاعد من تعيين الحكومة احنه ثلاث بنات و اربع ولد واحد متوفي قبل خمس سنوات كان اسمه علي فاطمة الزهراء أختنا الكبيرة وعدها ولد بالمتوسطة ... و اخوي الي اتوفى علي وراها ومرتضى ورقية واني وراها واخر العنقود مقتدى بابا شيخ ومؤمن يعقد عنده مكتب ومعروف بالاستشارات الدينية واستاذ ،و سيد محمد زوج فاطمة مثلة دارس مثل بابا حوزات و دين ، وهم معمم بس سيد ، احنه عامية مو ساده نحبه كلنا ونعتبرة مثل فاطمه الزهراء اخونا الكبير وحته بشغلتي وسطته وحجى ويه بابا اقدم معهد معلمات مثل اختي فاطمه بس على عيني سدوه وما رحت ....مدري ليش احسة ماخذ موقف مني حتى بسلامه وحتى من طلبت من فاطمه تحجي وياه يكلم بابا ما اعتقد سوة مجهود عكس ويه البقية .مرتضى رغم بعض اغلاطه ومواقفه ويه بابا دوم يصير بينهم واسطه خير ، ويحنن گلب بابا على مرتضى ، مرتضى خريج وتعين حسب أختصاصة ! تعينه حصلة بواسطة السيد محمد القوية !. و عنده قناة باليوتيوب وينشد بس ممعروف ابد هو هاوي متشتت يحب كلشي اله علاقة بالفن لوحاته ما ماخذه حقها نوعا ما و بالتدريج صارت هواية لقمة عيشة يرسم تصاميم هندسية حسب اختصاصة ونسى لوحات الطبيعة ونصف اوجوه البنات الي كان يرسمها بالسابق ..... . بيوم كاعده بالغرفة اقرة بكتاب عماد وصاحوني اتعشة ضميته ورحت الهم بالصالة ناكل رقية سوت العشة و ماما ساعدتها وزوج اختي اهنا لهذا جبب مو عبي لانه يختلف مقامه عن اولاد عمامي عند بابا حاسبه منا وبينا ! ما نتكلف كدامه صواني اثنين كبار وحده للزلم والثانية النا مرتضى -شعندج بالغرفة ما اساعدين اختج هاااا خجلني كدامهم خنست -عجوزية من يوم يومج ابوية اشرله يسكت اهنا طفر ابن اختي عمره ٨ سنوات كال اريد افلام كارتون وعلكه ملحك ابوي يعترض لان ما يحب يشتغل واحنه ناكل التلفزيون اشتغل . وعلى قناة نيل دراما بالتحديد سماسم (سهير مرشدي) بمسلسل ليالي الحلمية تغني وحمدية (لوسي الراقصة ) ترقص أئطعني حتتت انا ملك اديك وائطعني حتتت دنا ملك اديك اه يا ولاه اه يا ولاه الخبزه جرحت بلعومي والانظار كلها عليه بابا واخوتي وامي ورقية وحتى فاطمه وهاي اجوعر انوب ناسيته عالي الشيطان نساني احذفهم وابن اختي يضحك اشرله ابوه يطفية طفاه واني وجهي دخل بنص الصينية اجيت اغص ، ادري شنو بس اني مشبوهه بينهم يكلك عليه فيش وتشبيه بالمغفر بس ما كمت من يمهم جنت جوعانه ،كملت اكلي واني مدنكة هم عوزي اعوف الكباب ، غلسو محد حجى بعد العشا على جنب بابا انطاني المقسوم برزالة معدلة ▪︎ياسر الجو مغبر بشهر نيسان والالم بدأ يتقدم مني خطوات ، بس يلا هاي اخر جلسة وتم الزرع وخلصت اشكد تحملت اوجاع بس مثل وجع الاسنان ما شفت يجي من بعد وجع الگلب ولو يمكن لان صارلي اهواي مفارق الم البدن نسيته ! ....... اجاني خليل -ها فضت شيخ جنوبنا هزيت برأسي وطلعنا من مركز الاسنان بعد ما زرعت ناب بدل الي راح وبعد ما خلصت الجلسات .. انه رجعت للبيت بين ما خليل راح لاهل خطيبته الجو هذا اكرهه ولا اطيق اطلع بيه لو لا موعدي الاخير حاولت انام ما كدرت ، زارني طيفها . ابتسمت لهيئتها ونمت ظل وفي وياي الطيف و كمل وياي بنمامي الشعر اسود بلون عباة امي الخام اتكول جورجيت مسرح على المتن طبقات ، الخد طري والعين ندية تلمع بسوادها الغائم اشوف وجهه مثل قبل غائم منفرج ( مثل الي ضاحك بعد نوبة بجي العيون بيها حزن لمع بفرحة گلب و ضحكة ثغر[فم] ) الثوب ابيض و عدها جناحات خلف الضهر ترفرف بيها مثل الملاك النازك -رقية .......رقية ......... انت ملاك لو بشر اجه من يمي خفاش اسود وضربني على حلگي مسبب وجع قوي .......صحت اااه رقية .......رقية ....... بدت تختفي انهز جذعي .صحيت على كفشة منثورة ?دام وجهي .... خليل وشعرة السرح الطويل على وجهي لان مدنك عليه - ياسر ......صحيت -اااه وجع حلكي قوي ...... -دخذ مسكن يمعود ونام حباب خرعتني وانت تبغج (اصيح ) برقية - اشمالك علي انه من الوجع حلكي يون وهذا يصنف اشوكت اجيت ؟ كلتها واني ابلع كبسولة . وجع حلكي داهرني بحلمي و عطلة علية . السهرة اليوم صباحي مالها جارة وانه عاشك الليل ومولود الگمر فتحت الشباك اجاني تراب (العجة ) سديته وكعدت بالارض وكدامي خليل نايم وملفلف هذا بات يمنا اليوم ما لحك يروح هلة مدري اشوكت جاي ... انه نمت المغرب حتى ما تعشيت وامي ما سألت عني اكل لا .... تسألت ليش هلمرة عدها جناحات ؟ ويا ترى شعرها لونه هذا ؟ ليت اكدر اسحبنج من احلامي واحطج بواقعي ولو يوم لا نهار حتى لو سويعة وراضي بيها اعيش ذليل مشكور لربي طول العمر . تعب دماغي من هالذكريات..كلها ناعسة حلوة مثل رقية اسرح بيها لعالم لا مغثة وفجأة يطلع الي بيها مرتضى يسود عليه بضبابه ذكرياتي كلها هو بنهايتها يحولها كابوس بس اليوم خفاش يمكنه هم مرتضى ! وجع اسناني خف،كلت احاول ارجع انام باجر وراية روحه لبغداد جدي ذاب حمولة عليه تعبني حيل لقب شيخ الشباب وانه مو من عشيرته حتى ! معتمد عليه ولا جني شاب بعمر ال٢٨ حاسبني تعويض عن خالي الجبير الله يرحمه ! رحت بعدها لبغداد بشغل بأمر من جدي ٤ ايام ورجعت للديرة ، دخلت لبيتنا الواسع ، اتلكوني رقية -خالووو اجه ماما بيبي خالو رجع بوستهم وانطيتهم صوغتهم وراحو بغرفة امهم يلعبون ..... اجتني امهم اتلكتني بوجه العبس -كوثر جبت الج شغلة حلوة من بغداد -ما معتازة مجايبك مطت بشفتها وراحت للمطبخ تاركتني واكف بالصالة استغفر اجتني شهد تغني -مين حبيبي انا رد عليا وقووووول اشرت عليها على گلبي ومن غير ما الحن حجيت كلام -انت الي بحبو انا باست متني و راحت العلاليك اخذتها كلها على صدرها تجتها (سندتها) وبديها ضابتها لا توكع وهي اتكول - شكرا على ما جبت -لج مو كلها الج .... اكو لامي و لهاي كوثر المعبسة -هههههه معليك بيها هاي نفسية الارملة النفسية -عيب شهد كتمت ضحكتي بصعوبة لا انطيها وجه تتجاوز على اختها الجبيرة وبكلبي اكول ما جذبتي تورطت رفضت عريس اصغر منها بخمس سنوات وما مزوج ومبين صايع ظاله كالبه وجه عليه ما فاهمة طمع بيها وبورث ابوها الي حصلته متأكد طلعت اسلم على جدي انه بيتي كدام بيت جدي بنينا هو ساعدنا من بعنا بيتنا الي بالولاية وجينا اهنا قبل ٧ سنوات انه شريت بقجة(ارض زراعية )نص دونم بفلوس بيت ابوي وهو هم راعاني بالسعر ..وحاليا صار دونم اول ما دخلت للبيت سمعت صوت فؤاد خالي المخبل محبوس بغرفة - الزينه اتموت وانت معمر موت يا اخي وريح ابوك ... وانه كاعد يمه خابر ، خليل رديت شو هذا صوتها خاوي ! كمت على صفحه وعرفت ابوه صايبه شي رحت الهم طياري .... ااااه يا هوى ريحة الاحباب هذا مكانهم مكان الي بالگلب سكنو وما طلعو ، ٧ اسنين يا رقية ومن دخلت منطقتكم رديت شاب أحديث بالعشك . بعده مجانج(مكانج) دافي جنج مفاركتني امس وطاريج اخضر ما يبس بروحي . دخلت لبيت خالي لكيتهم مخبوصين وكالبيها عزة جدام خالي وهو يواسي بيهم ! يابة اشبيكم طلع برجلة دنار (بقع لونها احمر اول متطلع وتكبر وتتحول جوزية ) وراييحن للطبيب ما مبشرهم بخير كالو هذا نفس مرض خالي الجبير الله يرحمه .. بعد المناحه نص الليل الا طلعت من يمهم سقت عجلات سيارتي ، بفرعهم واباوع للبيت وناسه .... يا رقة الگلب جيتج .... بعدج اهنا ببيت ابوج لو انسد اعليج باب ويه غريب ! اتوسد شعرج الغريب و ضاك لحم خدج الطري ..... جاوبيني ولو بأشارة يرويحتي يا عشگي الترف .....اروحيتي عايفتني ويمج يا مرض مزمن و عشعش بالبدن ظليت ايام اروحن لخالي والأمة انكلبت عليه عربنا(اقاربنا) عرفو وبيتهم انفتح للخطار . وجدي القلق تارس بالة سرعان ما انتشر برجلة اتحولت سودة وامر الطبيب يكصوها مثل خالي كاصد . ما قبل وطلع رجع لبيتهم خالي وجدي اجاه يواسيه ويقنعه خليل اختنك شفته كدامهم كام حضن ابوه وكام يبجي بصوت -لك بوووووووية ........ وبجي قوي جدام خواته جريته طلعته ما رايد رفيجي اتشوفه النساوين هيجي اضعيف اخذته بسيارتي وهو ما زال يبجي .... -وين ماخذني اااااه بوية رجعني ويه كل كلمة يوكلها يبجي بصوت انه اخذته للساحه ورة بيتهم واشويه سكت . طلع من السيارة وكف يم الحديقه بس ما دشينا (دخلنا بيها ) ▪︎رقية خطية زينب تحب اتسوي شغلات حرام الله يهديها ويهديني اني هم عندي ذنوب , واكثر ذنب متعبني مدا اكدر اتخلص منه هو ياسر اني ادري ما يصير افكر برجال مو زوجي بس شسوي غصبا عني ,مرات بالليل يخطر ب بالي اكوم اتوضى واطرده من بالي بقرأة سورة البقرة الى ان اغفي وانام هم حتى انساه وهم حتى لا انسى السورة اني رقية عمري ٢٤ من النجف الاشرف ابا عن جد , ابوي شيخ ابن شيخ ديني بس بابا ضايج دومه من ورة مرتضى ما مشى بنفس الطريق , درس اكاديمي واتخرج واتعين فبابا دخلني انه ادرس حوزة وفشلت بس صرت يعني زينة بالقراءة القران بس كال يرادلي بعد صقل وممارسة وصوتي زين ما كدرت ادرس دين لان صعب الفقه والنحو وغيره كلشي مفتهم منه مثل صعوبة كتب المدرسة عليه فبابا شافني احفظ زين كام خلاني احفظ اجزاء من الكتاب الكريم وعلمني بصعوبة على اللفظ الصحيح لمخارج الحروف والحركات والعلامات وغيرها، حفظ مو فهم لان تعبته اني احب الكل ، احب اهلي وبيتنا وجيرانه ،احب العصفاير و اكره سجنه ! احب الورد و زرعه عندي سنادين خاصه بيه . بس ما ادري ليش محد يتقدم الي مثل البنيات ، كله على زينب يجون كرابتنا وامي ترفض اتكول ميصير الصغيره قبل الكبيرة صحيح أسال نفسي هذا السؤال ليش هي اهواي يجون عليها مو اني اكبر منها ، بس ارجع واكول مرتاحة ، اني گلبي ويه واحد ثاني اووف زينب الي كالت الي كلبج ويه ياسر هي كالت اي من شافتني اصفن بيه، افكر دوم بيه واتذكرة ، مادري يجي غصبا عني يجيني شوك غريب بداخلي مثل ما اشتاق لبابا من يروح بغير محافظة ! كأنما عزيز ومسافر ! دخلت لغرفتنا ... غرفتنا صغيره ما تكفي اسرة . بيها بوفية العائلة عليها نضدة كبيرة مشرشفها ، شرشفها اذا تخربط ، امي تضوج تهدها كلها وتعيدها من جديد اسويها ، و فرشنا اني و زينب فوكها بس خارج الشرشف وجوة بالخانات مالاتها فرفوري اثري والنا اني وزينب كنتور ٣ ابواب اثنين لزينب ، و وحده الي ، الوان برداتي حليبي بورد ماروني ... رحت فتحت كنتوري ، طلعت منه علبة جكليت ، فتحتها طلعت منها صندوك خشب صغير حيل ، فتحته بمفتاحة وطلعت منه شي ملفلف بقماش ، فتحته ،ناب ابيض يسطع ضامته ومرات احطه بكلاص ماي يوم كامل .هذا عظمه لياسر ،رحايته الي انقلعت من ورايه تأكدت منه بعده موجود . وضميته ، رحنا لبيت عمي ابو وداد همه وعمي ابو عماد مجاورين همه واحنه بنفس الحي بس بنهايتة ومن رجعنا وجهي ما فارك البجي زينب وامي عجزن يردن يعرفن السبب ما كلت خفت لا زينب تتعارك بس حيل مختنكة واحس نفسي مغثة بطريق زينب محطوطة صارلي ثلاث ايام وثالث يوم زينب طكت جابت حنه وتحارشت بيه تصبغ اظافر رجلي مقبلت بس هي جرتهن و واني مديتهن -شسوي ابوج محرم علينا صبغ الاظافر - لا ادمرين الفراش زينب ... اشوية واشوفها خطأت بالصبغ طلعت خارج اظفر رجلي جابت بكفها كومه وحطت بباطن رجلي كلها كالت -هههه بعد خرب خل نلطش احسن . لطشت رجليه وحطت علاليك و راحت لأديه -لا حبابه انت متعرفين ضحكت وكالت حكج هههههه حكج ههههه حكج هههه قلدتني بوزت واجيت ابجي ما ضحكت تذكرت بت عمي وامها ، باوعتلي بنظرة مفهمتها وكالت -والله وراج سالفه انت دشاقه ردتي تبجين اوووف الله اليعلم بيت عمي شنو سمو بدنج ......... اني كلت الج لا ترحين بس انت متعرفين اتكولين لامي لا ..... اني مرحت .....دينا و فرح ما يحبنا بس بيت عمي ابو عماد ارتاح الهم واحب غادة و اختها... كامت زينب تغسل وهي صحيح كلامها .من رحنا اني وامي من الصبح للعصر تسيارة مرت عمي وكفت يمي من جنت كاعده بالطارمة (جزء من الحديقة غير مزروع ) وبتها يمي على المرجوحه ... رشت الزرع و وكفت يمي اني جنت مبتسمة وفرحانه بالزرع الاهواي الي عدهم وحديقتهم حلوة حيل بتها بكدي وحاطه طفلها بحظنها ، مرت عمي - رقية ما اجوج ناس - هههه ناس شنو مفهمت هههه مفهمت -ناس يخطبوج صفنت بالسؤال يعني قصدها زلم اهواي تخطبني حيل شدعوة ليش هو اني ازوج واحد بس -لا لا ما مزوجه -ادري ههههه عمة اثكلي لا تضحكين للرايح والجاي يسموج هبلة تدرين .... و صيري نادرة خطية امج -اني اني اني اسساعدها والله بشغل البيت - قصدي نادرة مو بالشغل بالتصرفات كدام الناس حتى تخطبج دينا بت عمي شاركت بالحديث -ماما شيخطبون هي سمعتها طشت وسوت حركه بأيدها يم راسها ما فهمته (حركة تدل على الجنون) فضحكت بوجهه مفهمت عوجت حلكها دينا وكالت -مو كلت الج ماما ما تفهم الكلام ماما هاي بنص جوزة شتحجين هسة ولا فاهمه شنكول هههههههه ما اشوفيها توزع ضحكات سكتت ودنكت مرت عمي كالت -خطية زينب راح تعنس اذا هيج ما ينطوها والله شنو رقية اول ....اذا بتكم الجبيرة على البركة هبلة اووف الواحد يشوف هموم الناس ينسى همة رفعت راسي شفت مرت عمي اتباوعلي بغضب ابتسمت الها لا اضوجها مني راحت دينا - اشبيج اضحكين صدك لا كالو مخبلة عمي اكبري اني بكدج صرت ام وانت ظالة بتي افهم منج يا ليش اضحكين يربي هي عبالها احجي نكته ما تفهم لج ما كايلة شي يضحك يالمخبلة ......شو اكوم من يمج احسنلي ...... غابت ضحكتي من راحت وكمت اشاهك اني اضحك لا ازعلهم خاف عبالهم ازعل من كلامهم غير احبهم ليش اتكول عليه خبلة اني نظيفه و ملابسي معدلة ونادرة اساعد ماما ! بعدها بيوم بعد ما حنتني زينب ورجلي صارت حمرة والحمار طالع من حواف رجلي بغرفتي اطلع ظليت اشتغل و ضحكتي باهته بس ممفاركه وجهي اجتنا فاطمه ومن رادت اتروح اصرت عليه تعرف اشبيه قبل لا اتروح وسولفت الها .... من طلعت اسمع امي اتكول بصوت مسموع قوي - لج زينب معليج دخلت عليه زينب ما اشوف الي كدامها ، للكنتور جري حجاب وامي تحجي ولا تسمعها حطت حجاب لفته و كعدت تلبس جواريب امي -يووم اكعدي راحه اكعدي ولج لا تلبسين لبست و جرت العباة -زينب يمة احجي وياج جرتها امي فلتت من بين اديها وكالت -اشعل يوم دينا ام رجل شعل زعلانه صارلها قرن يم اهلها تجي تعير اختي وتغلط امي -لج لا لزمتها زينب -يوووم عوفيني مشت مثل الريح هابه وعباتها اطير كدامها -عزة فاطمه سولفت الها ماما -لج ماما حطي على راسج شي وروحي جيبيها روحي امي تلهث لهث خطية -راح اموت يمه روحي رجعي اختج لا يجون ابوج واخوتج وهاي طالعه ما مبوشة (منقبة )وحدها كمت ارجف من فكرة اطلع وحدي ... سمعت كلام ماما وكمت اكلب بشالي واعدله -ولج رقية بارده انت ثلج حطي اشلون ما جان لج رقية يمه لا اثوليني كمت ارعش اريد البسه بالكوة ويه صياح امي حطيت العباية -اتبوشي يمه حطيت البوشية وطلعت من باب البيت وطلعت، زينب وينج عفية معرف امشي وحدي ما هي وينها خلصت الفرع (دربونه) و لفت لفرع لاخ . يودين للساحه بيت عمي مطل عليها . اهنا شفت زينب كدامي مخلصه الدربونه طلعت ع الساحه واني وراها . خايفه هذا وقت جية بابا فاتت من سيارة كحلية ويمها شباب زينب مشافت احد فاتت واتعدتهم لبيت عمي . واني التفتت على يميني اشوفها اشلون تدخل ومنو يفتح الها الباب واشوف واحد كدامي صار غصبا عني كدام نظري واكف وهو رفع نظرة عليه همست بصوت ممسوع -ياسر ! باوعت لايده اخر مرة شفتة بيها مكسورة هسة زينه وحاطها بجيوبه وبحاجبة طبرة ، هذا هو هو نسيت عندي رجلين والحياة وكفت بعيوني ، واعيوني ما نزلت عنه حثتني اعيوني اوخرة الغواش عني . اريد افتح طبقات البوشيه طبقتين اريد اشيل بس طبقه وحده اطلع عيوني واشوفه اجت بايدي الطبقتين وشلتهن طالع قرص وجهي .بينما هو عاكد حواجبه وهز راسه بمعنى شكو جنه هيج يكول لان صفنتي جانت محدده عليه والي وياه دخل للسيارة .... انشالت البوشية عن وجهي وهو ازدادت عكده حواجبه وصار وجه احمر ديرم (اعتقد عصا مال عشبه جانن جداتنا يتحمرن بيها و ينضفن بيها اسنانهم ) حط ايده على حلكه عصر شفايفه عصر نازل كفه على لحيته . . انفتحت عكد جبينه وبوجه ابتسامه و اعيونه تلمع حسيته راح يبجي مثلي ! اعيونه نزلت مو بس على وجهي نزلت وظل مدنك يباوع لرجليه ويرجف مدري اشبيه حتى شفت شي بزردومه ينزل ويصعد من كثر ما سرعت انفاسة (تفاحة ادم)... حتى تخيلي گلبة راح يطلع من صدره من كثر ما يهتز من خلف قميصه اهنا انجريت من زندي اباوع لانها زينب صايره نار موجرة (مشتعلة) وتلهث ومدري شتكول بهمس تغلط اعتقد من رحت من يمه الا وعيت على نفسي نزلت البوشية وصلنا لفرعنا واشوف سيارة بابا . -عزة زينب بابا ..... بابا زينب بابا هي بس صافنه بعدين سحبت انفاسها وكالت -خل ندخل ..... دنكت زينب وتمسح بكصتها كالت -لج رقية مطيه طالعه بلا جواريب بحنتج هاي !!!!! كمت ابجي دموعي اسرسحت -هسة انت شطلعج وراي هااا خرب .. تعالي وكفنا بين السيارة وبين باب بيتنا نزعت وهي حذرة لا احد يشوفها .. ترفع رجليها بس خلفها مو كدامها ترفعهن من غير ما دنك وحطت بايدي وكالت البسي .. وانطتني الثاني لبسته ... دخلتنا .. بس وصلنا الصالة بابا بوسطها يباوع النا بتعجب ، وصفن على زينب وجه طالع باوع رجليها بلا جواريب حد اعيونه عليها مثل السيف وكأنها وحده طالعه اني مو وياها وحدها متهمه ....... واتقرب عليها لكدام وهي ترجع لورة ! اهنا دخل مرتضى -ها ولجن وين رايحات لا تكولن وصلنا دخلت امي على صوت مرتضى حاطه ايدها على حلكها بخوف بابا -وين جنتي ؟ صاح -زينب ! ▪︎ياسر واكف يم خليل وهذا رجع تأثر وبجى بس بالكاتم .. وكفت كدامي مرة مبوشة واصد ليه .... ! اتعجبت اريدها اتنزل عينها حتى شكيت لا بيه شي . عدلت قميصي باوعت لبنطروني ، عدلت هندامي واجيت اسالها اشبيها خرستني من رفعت البوشية وطلع كدامي كمر سافر والليل واكف وراه بعبايتها .... همست رق رقية من اخمص اجدامي لراسي بعثرتني اتخربطت احوالي والشوگ مجاي يشبع تغيرت حيل مرة كاملة جدامي عدها انوثة متفجرة توجع الضمير حيل غصبا عني عاينت كل شبر بيها مامنها طالع بس سواد العباية والجسم يتهز ....نزلت لجدامها يا بووووية جدمها يا جدمها (قدمها) لك بيضة تلمع لمع تنكرط كرط محناية بحمار صارخ انتفض گلبي مرتطم بأضلعي عاينت ع الرايح والجاي وهي بعدها اتصد لية بودي افتح صدري واضمنها لا احد يلمح جدمها بمداسها الابيض لج شكالج كلبج وهيجي طلعتي الي نحرتي دليلي و جوعتيني زيادة ، صايم و اللبن گدامي محرم اعليه شوفتها ردتلي روحي وشفتلي جروحي ونستني انه منهو وشنهو والناس والساحة وخليل وابوه ...... نسمة باردة رطبتلي گلبي الجاف بس رجليها ااااخ يالمبوشة الوجه شكالج ضميرج وطلعتيهن خطفت دليلي وراحت ويه وحده ....عايفتني جامد بمكاني اعاين وراها ..... رجعت لبيت خالي مدوده ... وانه اكول اجتك الاشارة .....اجتك الاشارة يا ياسر شوفتك وجهه وتكلك بعدني ! واخوها يا ياسر ....؟ يموت بجهنم ينسى اتغضى عنه تعبت انه حتى لو اصالحه بخطبتي الها ! بس أتأكد منها موش ملك احد واخذها وانسى الراح تعبني وانه محرمه اعليه منطقتها بطريق رجعتي ويه جدي راجعين لبيتونا وانه اتذكرت وكفتها واخ يا جعب اجدامها لكيت نفسي احاجي جدي وهو بيا حال - جدي انه اريد اكلك الموضوع الي تلح عليه بيه فكرت بيه يتبع اتغاضو عن عدم امكانيتي في ضبط لهجة ياسر حيل صعبة عليه ريفية بس هو مخلط بحكم هو ترك الريف وسكن المدينة ودرس هم خارجها معندي وقت محدد بالنشر ...باجر مافي بارت زهرتكم | ||||||||
|
| |
|
02-07-19, 04:02 AM
| #5 | ||||||||
| مراقبة عامة ومشرفة منتدى الروايات المنقولة
| #مساء الورد #شيخ الشباب #من كتابات زهراء العراقية #البارت الرابع قصتي تتكلم عن مرضى التوحد فبلا تجريح لانها مو مجنونه ! والقصة حلوة واحداثها جديدة متابعة هانئة من كثرة ما جربتني الليالي وجربتها قتلتني عناقا . -مظفر النواب ▪︎رقية اشوف بابا بأصعب حالاته العصبية و زينب واكفه ساكته واني گلبي يدك بالثانية الف دكة من الخوف ، مرتضى من سمع بابا هيج هم سأل وين كنا بس سألني الي - چنا چنا ب بيت عمي مرتضى -!! وحدجن ؟ بابا - اتعانديني زينب تدخلت امي تهديه وجرت زينب من كدامه جرها من ايد امي لازم زينب من عچسها (مرفقها ) -تعالي وين ماخذه اختج وطالعه من وحدكم من غير اذني هااا جاوبتهم اني - ماما تدري بابا ماما تدري والله والله مرتضى بصوته الهادئ -زينب احجي شكو شصاير طالعه هيج مبهذلة واخيرا نطقت - جنت بيت عمي وطردوني باوعلها بابا بتعجب مفاهم -بيت اخوك و دينا وامها طلعني ادفع ! وكرار اجه يم ايده عليه كالت اخر جملة وباوعت لمرتضى . الي جمد بمكانه وخزرها سأل بابا بعصبيه - ليش رحتي الهم وليش هيج صار راحت من كدامه خايفه كعدت على الزولية وكالت - دينا وامها يمشن ويحجن علينا مسوين رقية مخبلة ..... و حتى كدامها يكولن خبلة مخلياتها ايام تبجي و كاسرات خاطرها ابوية ظل يباوع لامي وبعيونه حجي - اي حجي صحيح والله و توها الا حجت رقية والله ما ادري ، من حجت رقية زينب هاجت علينا وطلعت تركض واشرت على زينب -دزيت اختها اجيبها بابا - و ليش اتخليهن يطلعن ، وانت احجي شكلتي وهيج طردوج جاوبت - ما ادري !! - زينب احجي شصار - اتعاركت وياهن بس مذكر شكلت ! كالتها بحقد - وكرار تدخل و راد يضربني لو لا امه توكف حاجوز بينا .... و طلعني هنه ادفع ابسرعه مرتضى - ايا مرية الكلب طلع مرتضى ابسرعه وبابا ما فهمت ليش خاف وركض وراه اني كلت بكگلبي اشكد شرير كرار يحاول يضربها و هو قبل لا يزوج رادها زوجه بس بابا ما قبل كال صغيرة جان عمرها ١٨ ... زينب حيل ضايجه وامي تحجي فوك راسها -ولج ليش كلتي على كرار راح تعلك ولج حركتي الدنيا حرك يالثولة ▪︎مرتضى طلعت والنار صعدت لحواجبي ابوية صاحلي ما رديت عليه لا يقنعني ويرجعني وصلت للساحه . وابوي مترجل وراية اني اسرع منه نار الي بية تريد تطلع تحرك الي حولها دكيت الباب اكسر - افتح كرار يا عار اصيح ما هامني افضحه بالمنطقة وصلني ابوية -ابني اتعوذ من ابليس طلع من بيته عماد ابصفهم همه كال خير مرتضى .....عمي شصاير ......اهدأ اهنا انفتح الباب امهم -وين كرار .....صيحي هالكلب طلع عمي ابو عماد وعماد و ابوية جروني جر دخلوني الجيران بدت تطلع اشوف مصدر الصياح دخلوني لبيت عمي ابو عماد ابوي ما حاول يفهمهم بس يحجي وياي يحاول يطفي ناري - بوية انت طفل ، مهندس واشكبررك هيج تحل الامور -بوية عوفني لخاطر الله -ولك ابني اني اعرف شغلي ويه ابوه الي ما عرف يربيه انت اسكت معليك -استغفر الله بوية اني اربي الهم الكلب عركة نسوان ليش يدخل ليش بصياح احجي لام ابناء عمي ابو عماد ابوية كال - مرتضى من يجي ابوهم من بغداد اني كلامي وياه ..... اهدأ وارجع وياي -لا والله ولا ارجع الا اربي هالمرة المشوربة وينه ليش ما طلع الي ... هااا ليش ما طلع قابل ما سمع صياحي طلع الي امه الس.... ال....... ابن -اش سكتني ابوية - مرتضى تريد تشتم عمك اهنا كلهم لازميني عمي و عماد واخوه و ابوية كدامي واكف يقنع بيه حجيت بحركه -لعد خليني اروح اربي بوية عمي -هو شسوة الك مرتضى كول يا الله - رفع ايده على زينب واتريدني اسكتله هاااا عماد -ايا حقير الس........... الدون هدني عماد وهو يطلع كال - مقتله على ايدي اليوم ! ابوية راح جرة من ياخة قميصه و لزم زنده جارة - انت الثاني ارجع لا اضخمون السالفة ولكم مو هيج تنحل الامور لا اتكبروها سدو علينا باب استقبال عمي وبالقوة كعدونا اني وعماد وبيومها ما خلونا نهد اخذنا ابوية لبيتنا و كعده لنص الليل تحولت لسمر وسهر بات عماد يمنا بس ابوه راح لبيته و وعدنا مجبرين ابهاتنا ما نتعرض لكرار همه يصرفون لخاطرهم بس حتى لا يخسرون اخوهم سكتنا ولا خسارتهم ربح الي همه وابنهم .... عماد و كرار جنا بالسابق اصحاب بس من انرفض كرار ما انطينا زينب اتغير علينا حتى الي وياه مغامرات وسوالف جنت اخذه واهد وياهم على ياسر الحقنة .. جان لقبة بالمطنقة ، ايام الطيش بعد الصبح كعدت على صوت بابا يحجي طلعت من الاسقبال تارك عماد نايم واشوف زينب كاعده بعبايتها ( يلبسهن ابوية عبي طول ما واحد يمنا من الولد) رحت كعدت يمهم افرك بعيوني اشوف هالخبلة شسوت البارحه حتى خلت هذا الحقير يحاول يضربها بعد ما كتل نفسه حتى ابوية ينطيها اله بس والدي يعرف امهم صعبه وابوهم شخصية ضعيفه هو وابنه ،خاف عليها تعاني وهي جانت صغيره ما انطاهم متحجج بعمرها...... سألتها -ها ولج عليمن طالعه خبلة اتركضين اتعاركين ضحكت وكالت -عليك غير - ههههه انجبي ، و الحمدلله ما عرتينا وطلعتي بكفشتج ابوية سكتنا -اضحكون انتم ..... وانت اذا انعادت يا زينب والله لكص رجليج اثنينهن زينب - صار كالتها وهي كابته ضحكها ابوية وهو يلعب بلحيته المتدلية من ذقنه ... - بجت اهواي رقية ؟! -اي بابا وصدك خابرت البارحه ام عماد وكالت لامي على الحجي الي اطلعه مرت عمي هي وبتها دينا علينا سوتنا عدنا بالوراثه امراض عقلية رقية خبلة واني هم سوتني وياها خبلة ... مرتضى -غير من وره هجماتج المرتدة - لا من زمان هي اطلع حجي على رقية مسويتها كلش ابوية كال يصير خير يجي رجلها و يصير خير ..... كامت زينب اتروح وكفها ابوية بكلامه -اوكفي ....خلي بمعلومج مراح ترحين وياهم للحلة التفت صفنت عليه وبوجها انرسم البؤس كنت اعرف اشكد هي حابة الطلعه خارج المحافظه وهي الي خططت الها اني اخذهم هي و امي و رقية و بيت فاطمه هي كالت الهم ويانه رحلة لأثار بابل بعد اسبوع .... -هاي لأن اتعاركت ؟ لو لأن خالفت امرك وطلعت بلا نقاب !؟ جاوبتها اني - احجي عدل ويه ابوج بنفعال ملحوظ -عدليج مرتضى هو وينه العدل ؟ ابوية كال -لا اصرخين -اصرخ بوية ؟ هذا الي هامك .... لا اصرخ لا احجي لا اسمع لا اتكلم طرشة خرسة اني ؟! اختنكت بدموعها ..... -نصي صوتج -نصي صوتج نزلي اعيونج كلها اوامر ........ زين اني وين حقوقي ؟؟ اني سكتت شفتها تبجي كامت و ابوية عصب يحجي بلا ما يعلي صوته - روحي من وجهي - مراح اروح للحلة ولا اطلع ولا البس البوشية مرة لخ ما تجبرني بوية ما تجبرني -منو جابرج ؟ -هه منو جابرني ؟ مو انت كلت ماكو طلعه لو تتبوش ! هذا مو جبر .. مو سجن ... مو ظلم ... والله ظلم ظلم من دينا تعيرني بجهلي !؟ مفتخرة البارحه بشهادتها واني ......اني بوية الي جنت اكعد بالساعات افهمها وهي اكبر مني ! اني الي جنت ادرسها ...دخلت كلية وصارت اعلى مني .... ؟اي ليش هيج تنزل بيه وتكص اجناحاتي ليش تحجي بنهيار خلت والدي يجفل من مدى عصبيتها ترجف وتحجي ..... - ظلم لو مو ظلم معدلي ٨٨ واكعد الكط(ألقط) خضرة وية امي ...انام واكل واكعد حالي حال الحيو..... سكتت وهي تمسح دموعها وتشهك طلعت بوية رجع يحرك خرز سبحته وهو يرحك شفافه يسبح بنفعال .. -بوية ليش ما اقدم الها السنة الجاية على كلية مسائي ..... ما كو جواب منه -المسائي بوية قليل من عمرها يتواجد كبار وناضجين الطلبة ما ينخاف عليها زينب مو هشة ينضحك عليه بسهولة سباعية .....بوية تسمعني ؟ بوية دائما يتبع وياي أسلوب تجاهل الرأي وكأني عدم او طفل، ياخذ برأي محمد ابو مصطفى (زوج أختي ) أحسه يعتبر ارائي هوائية ما تنوخذ بالاعتبار -بكيفك بوية بس من تتخبل صدك او اسوي شي ونفقد السيطرة عليها خل يفيد الندم الكبت يولد الاحتسار بوية وخوفك من النتائج ! ما تريد تتبوش لا تجبرها نطق وعرفت كان يسمعني مو وحدي مثل المعتوه أنطق - ما جبرتها ابد بس اخر طلعه مو على داريتك صار موقف طالعه ويه امها و اختها وتعرضت لمضايقه رقية وامك محد قرب صوبهن بس هي نشاز وحدها مفرعه الوجه والله منطيهن الجمال هسة صار صوجي اريد احافظ عليهن هاي الجامعات الي تحجي هي عليهن شحصلت دينا منهن مو جابتلها واحد منهن و جبرت اهلها تاخذه.... من اخذته شصار ؟ طلع عاطل وهسة شامرها على اهلها وبحظنها طفلة اسكت بوية اسكت هذا الزمن ينخاف منه ▪︎زينب ضوجني حيل ابوية وزعلته مني لا وانوب عماد كان يمنا اكيد سمع عياطي واني احجي وابجي اووف هسة ثبتت الرؤية بس لا صار يشوفني وكحة، بس لا تغيرت صورتي كدامه واهتزت ! اجتني امي بيدها تليفونها صرصور هندي ..... كالت بت عمج عهود على الخط هاي ماخذه همين تليفون امها وتتصل على امي ، اخذته منها وهي طلعت -ها عهود -السلام عليكم امج طلعت -وعليكم اي طلعت انت اشلونج - اني زينه بس اكو ناس كاعدين يمي مو زينين يسألون عنج قلقانين .... -ها اشلونهم الناس -يسلمون عليج ويبوسون خدج - انجبي ولج ثولة -لج فاتحه سبيكر سمعوج خجلت حيل عزة الصمت سمعته يضحك ويكول لعهود تستاهلين ليش اتخجليها ....... -اسمعي يا بت عمي ....انت عرضي و حاميج مثلي مثل مرتضى .... اقسم بالله اجيت اكتله خلاص لكرار على عملته ....بس يالله الكبار يأدبوه مو احنه ...... زينب الو ويانه طبعا حاشرة التليفون حشر على اذني واسمعه لان صوته مو قريب ، اضاهر بيد عهود التليفون ...... عهود - الووو زنيبة ويانه ع الخط؟ - الو وياكم - زينب ..... بلكت تطلع اسمائنا على عينج وعلى عين السنة الجديده ولو ما متفائل الموازنه ما قروها لهسة ...وهاي جراذ داعش جاي تنتشر الاوضاع مو تمام ... هاي خريج من سنة ٢٠١٠ وهاي الي السنة الرابعة من تخرجت كلشي ماكو ، واهلي هم احوالهم تحتاج مساعده مني فما جاي الحك اكون نفسي ... الو زينب سكتي - وياكم على الخط دسمع اهنا اليأس توغل داخلي - اريدج بس نتنظريني ....اريد وعد منج تنتظرين وانطيج كلمتي اني رايدج وبكل جدية مو لعب جهال - الله كريم ....انشالله -الله يستر عليج .... لا اتضوجين وتأيسين ....دموعج غاليه عرفته سامع حديثي ويه بابا و سامع بواجيي (بكائي) .... بس بمخابرته هاي أيسني كلش سالفته اطول ، اطول فوق تحملي ،يمكني طاخه ال٢٦ وين اكدر احقق احلامي ، ياخذني ويه اهله بغرفة فوك ، يا دوب اخلف اله طفل ويحتار بيه لا عنده امكانية اكمل ولا اني يمكن بذاك الوكت عندي طاقه حتى هسة مجاب طاري دراستي اني اريد اطلع من بيت ابوية واخلص من الضغط اهناك يكعدني يم ابوه ما يفرق عن ابوية بشي ....اعتقد عماد مو مثل اخوه ايمن ..ايمن مزوج طالبة وهسة هي مرحلة ثالثه .. ايمن عسكري وانشط من عماد رغم عماد الاكبر ! اووف الواحد يصفن بمستقبله يتكأب اروح اشتغل وياهن وابطل زعل احسن الي ... مر الاسبوع ، و راحوا للحلة ! واني لا .. من اجوي .... ورة ايام همين بابا اخذهن لكربلاء امي ورقية وهم بعد أيام واحنه نتريك مرتضى لابس وكاعد ياكل وبعدها يروح لدوامه . كال - يوم دوري الي على مرة بت حلال امي كالت - ها شعجب مو جنت مأجل السالفه - اجلتها حتى احط جوة ايدي المهر ...تقريبا هسة صار عندي احنه مسألة كم شهر ونشيل منا لبيتنا الكبير ... هذا عارضيها للبيع .. وذاك واصل بيه بابا للهكيل وتوقف الى ان نبيع هذا و نكمل بناء بيتنا الكبير بفلوسه.. هذا بيتنا مو كبير استقبال و غرفتين نوم النا ولماما وبابا غرفة وصالة صغيره حيل مفتوحه . ماعدنا هول وحديقة بس كراج صغير بيه براميل النفط وحاوية و سنادين ورد الصباح فوك الستارة مالات رقية تعلن عن وجود بنية حساسة تحب الورد بهذا البيت و اكو تواليت خارجي و المغسلة والمساحه الباقية ماتكفي بابا يدخل سيارته للداخل ..والولد غرفة فوك السطح. بعد الحديث فهمنا من مرتضى يريد العروس خريجة لأن امي عرضت عليه عهود او اختها كال - لا يوم اريدها خريجه ..على الاقل واذا موظفه بعد احسن ! ثار حفيظه ابوية واخيرا ادخل بعد ما اخذ شربة من استكانه - مو الاحسن ربة بيت شلك بدوخه الموظفه -اتعيني بدخلها ونأسس حياتنا عدل بسرعة وهم اريدها من مستواي الثقافي بابا -بكيفك -هيج تزوج يمه واشوف خلفتك .... اتمنى اول طفل الك ولد واسميه علي على اسم اخوك الله يرحمه رقية نبزت -لا ماما اني من ازوج اسمي علي عليه حبابه بابا اهتز استكانه وهو يباوع عليها و قطر الشاي على ثوبة الابيض (دشداشة والدي يلبس ) امي -رجلك ابو علي خو ما تأذت كامت رقية اجيب وصلة تمسح بيها ثوب بابا واحنه كلنا انظارنا مصوبة علية امي بس راحت رقية كالت -ها شفت البنية ما بيها شي وتفكر حالها حال البنيات تتزوج . لا عبالك حالتها انتكست لان مرت عمك كالت مخبلة لا انت كلت ما ازوجها رقية ذاك اليوم ترة سمعتك سكتت امي بس رجعت رقية وابوي صارت نظراته حانية وعطوفه وهي ترش ماي اشوية بايدها و تمسح ثوبه اله وهو متربع على الارض مد ايدة على مؤخرة راسها يمسد عليه بعطف وحسرة ابوية ما ناوية يزوجها يكول حالتها خاصة وما تتحمل عبأ الزواج وقبل اجاها عريس مطلق ورفضه العرسان دوم يجون جانو من اقاربنا عليه و ابوي يرفض وامي تشيع ما نزوج الصغيره قبل الكبيرة حتى توصل فكرة للناس رقية قابلة للزواج ومابيها شي ، بس بالحقيقة بابا جان يرفض لان كنت صغيره وهسة من كبرت ... قلو وانقرضو الخطاب من اقاربنا عرفو اهلي ما ينطوني ، اما الغرب يجون وبس يعرفون بوضع رقية يحولون عليه وامي من قهرها ترفض من غير ما تكول لأبوية اني اخر همي منتظرة عماد رجال شاريني ، اجاني مقتدى يكول مرتضى يصيحلج تعالي ابسرعه صعدت الدرج واني ادردم اوووف خدامه اني فلبينية ما ينزل يكول شنو يريد الله رسوله يرضوها حابسيني وفوكها كاربيني بالشغل رفعت اديه ادعي وينك ياربي ما تعطل لساني واتخليني اعيد وازيد حتى يطلعوني مثل ست رقية ذاك اليوم جانت بكربلاء وهسة ماخذها عيني للامام علي ازور فتحت الباب -ها شرايد جان واكف يم الشاشه مالته - بس طلبات كول شتريد حضرتك -ام السان ادخلي وسدي الباب وخر عنها وشفته ديربط الشاشه بجهاز -هذا شنو -هذا مشغلdvd تعالي جبت فلم -شنوو تحجي صدك حنشوف فلم سوة - اي مبين حلو ....سدي الباب عدل وتعالي كعدت واني اعيوني تلألأت ،واخيرا حودعك للملل فلم اجنبي ما اعرف اسماء ابطاله بس الشي الي سعدني فهمي لبعض الكلمات من غير ما احتاج ترجمة وبعدين ضجت كانه رش ملح على جرحي واني اتذكر اني اشلون كنت شاطرة والي واهس بالدراسة عندي قاموس جنت احفظ على كد ما اكدر معاني حتى خارج المنهج اووف يا تعبي الراح لا مدرس خصوصي ولا معين يدرسني دخلت بالسادس وجبت معدل ٨٨ دخل مقتدى جايب علاكه حلويات والسهرة الزينه نستني همومي ويه الفلم الرومانسي الممزوجه بأكشن كوميدي خلص و مرتضى ملص الوايرات و كال يراد اشتري حاسبه وانزل بيها افلام احسن اووف لو ابوج يقبل لشدلكم نت اشكد توسلت اله ما قبل ابوج تعبني طلعت من غرفة مرتضى واني رايحه بعالم ثاني .واردد جمل البطل للبطلة اوي عيني همزين بالنهاية رجعت اله ثاني يوم الضهر من اجه من الدوام مرتضى هم شفنا فلم التايتنك هو قديم من زمان شفت بنات خالاتي يلزكن صورة على الكناتير. ويحجن بيه ههه قبل لا يزوجن هنه اكبر مني وخلفن هسة اني توني الا وصلني الفلم ! اويلي خلصتها بجي خليت مرتضى يلعن الساعه الي صاحلي بيها خلص الفلم وطردني يريد ينام داخ مني نزلت لجوة واني مسحورة ههه اكو مشهد حميمي متأكده راد يصير و مرتضى مشى الفلم اف يراد اطلع الdvd من كنتورة واشوفه وحدي بس من يروح للدوام ! امي بس نزلت اتلكتني اليوم يجون اختي ورجلها على العشا شنسوي عشا كلت بعد وكت ورحت انام العصرية وما كعدت غير على ادين رقية - لج زوبة اكعدي بابا يكول خل تجي تتعشة كافي نوم خل تاكل واصلي يووه مبيه جسمي مكسر بس هاي تلح ولزكت اتعيد بالكلمات كلت بصبر نافذ كولي اله مريضه راحت ...اشوية ورجعت اتكول يكول بابا اشبيج مريضه ؟ لا حول ولا قوة الا بالله هسة جسمي مكسر وعليه الشهرية مبيه اكوم شعليه بيه عني لا اكلت - مريضه -اي اشبيج مريضه شكوله مرضج -كولي اله مريضة بالجفاف العاطفي وصرخت بوجها توخر عني انام راحت وبعد ما رجعت كطيعه . ▪︎ رقية رحت كعدت كدام السفرة امي -ها اختج اشبيها لا ساعدتني لا كامت بس نايمه ....شنو علتها بابا -اشبيها اختج بابا شنو مرضها خل اخوج يجيبه بعد العشا - اتكول مريضة البجفاف العاطفي العاطفي .....مريضة ابوية غص باللكمه وكح ومرتضى الماي اجه يطلع من خشمه وبعدها ضحك ضحكه قوية رنانه والسيد محمد سوة نفسة ياكل ما سمع هذا غير ضحك امي وفاطمه فاطمه دمعت من الضحك مدري اشبيها بابا لمحت شبه ابتسامه زيرت شفته وغابت ابسرعه مكمل اكل ▪︎ياسر رجعت من المخازن تعبان صحت شهد اصبلي عشة اجتني جايبه بيض متروس دهن صفنت على الميز والصينية عليه -هاي شنو عشاكم بيض ؟ ماكو مسواك بالثلاجه بس البارحه اسوكت اشعجب ؟ -عدنا بس بس مدري وين راح عشاك واني هذا الي اكدر عليه وهزت متنها بقلة حيلة هالشهد -طولج بكد البغل و ما اتعرفين اسوين الا هالبيض ضحكت -بصراحه كلت لكوثر اسوي الك عشا صيحت عليه مقبلت ويمكن هي متقصده ما تخلي الك عشا -كم مرة كلت الج لا تحجين عليها هيج هاي بدل ما اساعديها انت وامج ذابات الشغل كله عليه امج حايرة بطلعاتها وانت بس اسختين - مممم اني ويني وين الشغل ياسر اني دراستي بالكوة مدبرتها -دروحي ولي امش ولي . طردتها وهي طلعت تضحك ... اكلت بيضها وبطني وجعتني من الدهن و اجاني النوم وياه اطياف ذيج ام اجدام محناية اريد اغفي طيرت النعاس من اعيوني ، اخ يا گلبي اشوكت ترتاح ، جدي بس رد عليه يصير خير بس تعدي هالايام الصعبة وخلي امك تخطب الك شمة اووف ما جادلته وكلت اله مريدها ، اخت خليل تشبه خليل شسوي بيها الله يستر عليها ويه غيري انه عاشك واشوف معشوكتي بعيوني كل النسوان واحلاهن ...... يا زينهن ابنيات خوالي الحلا ما متوقف على رقيتي بس العشك غزلها غزل بعيوني وجملها الي .. عشك الها اتحدى كرهي و السوالف القديمه ويه اخوها ... كلبي الي دست عليه سابقا وقررت انساها و حلفت ما احط ايدي بايد مرتضى ....بس شوفتها شرحت الي حالتي وعزوفي عن الزواج كل هاي الفترة ما شفت عيوني انجذبت الا الها وانه تعبت وكبرت رايد زواج وما اريدن اوكع بالحرام فمن اجت جدامي التلاع صبري انه عاشكها يولد ريح گلبك ولو بشي واحد، عشت دوم معلول وتمشي ورة الدنيا خل هي تمشي وراك بيوم و حقق رغبتك متحدي الظروف مرت فترة انتظار طويلة استقرت حالة خالي بعد البتر و بدأ التعود يخيم على صبر جدي .... وكلم امي تخطب الي اجتني للغرفة فرحانه حيل - ياسر هيج ياسر اسولف لجدك واني اخر من يعلم على العموم فرحت والله جنت كاعد على الارض ادخن و اسمع لسعدون جابر يوم الماشوفك ما اريد اعيوني نصيته للتليفون وجاوبتها - ها جدي واخيرا اذكرني ! بعدين انه وين اشوفج حتى اعلمج؟ احتقن وجهه وهي تعايني - قصدك على طلعاتي !؟ تقلد -يوم بيتج اولى بيج من صديقات السلف و النك والكال والكيل (القال والقيل) - عوفك مني هسة ليش اضوجني واضوجك ....اني حاجيت ام حيدر على ريسان نفثت الجكارة بغضب -منهو كلج اتحاجين أمها للبنت ريسان بت خالي الجبير الله يرحمه . وعايشه بيت جدي .. اخت فاطمه الي على اساس انه اخذها و ما خذيتها واتزوجت و راها اثنين خواتها تزوجن وراها، عدنا صغار ويتزوجن بقت ريسان غارت من شهد و ظلت تدرس رغم الرفض من كل الجهات بس انه ساعدتها وقنعت جدي وهو هم حيل يحبها صغيره عمرها ١٩ شخصيتها عنيده حيل، -يمة .....سدي الموضوع مثل ما فتحتيه -ها جا انت تمشي على راي جدك وتاخذ شمة عبن اخت صديقك -اولا هي هم بت اخوج ... والخلاف القديم بينج وبين ابو خليل اضاهر حتى بعد الصلح بعدج مو صافية اتجاهه -لا مو هيج هم احبها لشمة بس ريسان اني ربيتها - خلاص اعتبريها بنتج واختي وانسي اخذها لا هي ولا شمة .... انه رايد برة سلفكم -شنو غريبة تاخذ غريبة يمه ليش -حلات يمة من حلكج ؟ ارتبكت وانه هايم بوجهه اتحسس الامومه منها و اراقبها بملامحها همست -ليش غريبة ...... -هاويها ! - يا هاي اكيد ما مرباي....... قاطعتها -لا يايمه ....هويتها لأنها مرباية ...شايفها وعاجبتني ما بينا سوالف وعلاقات -واشلون عرفت اصلها وفصلها -اتركيها اعليه يمه - ما هويتها ولا رايدة ابني الوحيد ياخذ هيج حجتها بعصبيه وكامت بالديوان حاجيت جدي بالسالفه - انه رايدلك شمة وامك ريسان وانت شاطح وطلعت الك غير رايده تاخذ غريبة يبعد جدك -انه هم غريب ! . موش من نسلك .. حتى تفرض اعليه وحده من بنيات خوالي - اااااه منك يالعنيد ولا تتجادل لك اتكولها هيج بوجهي استحي عاد انه مربيك ضحكت. وهو كمل -انه رحمت ريسان لأن مدللها ما ردتها تاخذ مزاجي مثلك كالها وهو يضحك -گوية حيل وانت گوي ترحون اكتلون بعض -جدي لا ريسان ولا غيرها انه شايف غير شوفه -منهي بت منو - بت المومن ... اخت ابن المومن اذا تتذكرة يجدي الي كعد بديوان خالي صفن صفنه طويله واخذته الحسبات الا نطق - انت عاشكها لهاي الي اتحرشت بيها ؟ عكدت احواجبي رافض وصفة الي - اشلون نطلبها الك وانت بينك وبين اخوها ثارات .... اكول زين اخذ شمة صدك هي تشبه خليل .. بس خليل شعره سرح ! -جدي! هم ردينا اخذ خليل لابس ربطه شلي بيه جدي انه اسعى الها وانشالله اخذها وما يمنعني اخيها . - ما اعتقد ينطيك همس -اخذ شمه يبعد جدك - جدي جديات ....احنه كبرنا ....حتى لو اصالح وياه .... خل اخطبها بالاول يجدي - اخافن صعب وما ينطيك .... ترة شمه فرعه و نبهه - اني سألت عنهم ... البنية عمرها ببداية العشرين ...ما مخلصه متوسطه والولد خوش ولد الله شاهد هذا مرتضى كلها تمدح بيه مهندس والثاني صغير مراهق حافظ للقرأن خوش تربية تربية الشيخ و الناس تحلف بشرفها بعد شيخ يخاف الله بالعكس اضرب من بناتنا تربيتهم صعبة حيل خيالهن محد شايفه ابتسم وكلت بگلبي بس انه شفته ! واحتركت ليلي ما انامه وانه اتخيلها بحضيني واتلمس رجلها المحناية ! . ما اهتميت للأحراجات الي صارت لأمي بسبب استعجالها وانه انتظر رد جدي كال الا انشد عنهم الا انطيك موافقتي دز عليه بعد كم يوم كال ناس نشرف بنسبهم ، دزيت الهم خبر بديت مرت خالك (ام خليل ) لانها بنفس المنطقة وبينهن النسوان يسون النا طريق ورة ايام نسوانه وصلن خبر لنسوانهم اكو خطابة من طرف بيت ابو خليل يردون بتهم ... رحت لهلي لريفنا جبت عمتي مرة جبيرة داكه ال٦٠ واكثر ... مشيله و وجها مدگگ طبعا امي قابلتهم بوجه ثكيل بس هنه ولا يمها اخذن راحتهن بالبيت وثاني يوم ويه كوثر و خالتي راحن امي ما راحت زعلانه اشد الزعل عليه وهذا شي مخوفني لا يرفضوني من راحو نسواني متعنايات لأهل المحروسة انه كعدت بالسيارة مبتعد عن باب بيتهم ناااار متوجرة بضلوعي مترقب ورة ساعه زمن طلعن .. نزلت اخذت عكازة جدتي و كعدتها يمي بالصدر .. اريدهن يحجن كلهن ساكتات ... متحملت التشويق - ها بشرن جدتي -كالو انطونا وكت ننشد ونشاور ابوها -اشلونها البنية ككوثر -عادية مثلينا شكلها خالتي ردت - لك كمر اتخبل .واحلى شي بيهن حشمتهن حرام طالعه النه بثوب كشمير مرتب بلا زواكه (مكياج) وشعرها ضفيرتها عاكبها وركها تخبل يخاله هاي بت المومن وين شفتها وهيج اصريت عليها -ما شفتها ....على سمعة اهلها ردتها -هااا بس هنه مبوشات وحيل متشددين حجتها بخوف -وانه يخاله رجال صايم مصلي ما بيه قصور ديني يمنع ... - مو قصدي يخاله ارتاحيت حيل من الوضع .. امهم اتكول خالتي مرة حبابه . و بيبتها هم خوش مرة ، والبنية حلوة وخجولة كعدت اشويه وكامت ، بس كالت همه اشبيهم لحو حيل لحت بيبتها على اختها الصغيره واحنه اصرينا اختها الجبيرة جايني عليها ... ! تذكرت انه زينب الوكحه وضحكت هاي مصيبة بس اكيدكبرت وعقلت خوش بنيات هنه الله يحرسهن ..! مرن يومين .. و ام رقية اتصلت بكوثر همه تبادلو بالارقام ، وكالت انريد نشوفكم ضروري انه خفت لان ما انطو لا رفض ولا قبول شنو يردون ! راحت كوثر وديتها لمرت خالي يروحن سوة الهم للعصر خالي اتخربط مدري قدري خربطة و راحت مرته ويه خليل للطبيب ، فوصلت كوثر وحدها الهم طلعت من يمهم كوثر واني مثل الطفل اللحوح الج شصار وشنو هاي المقابلة ابتسمت ببهوت وكالت سألو عنا و موافقين يا ربي ، معقول مرتضى اتغاضى عن الماضي يارب ما ارحمك ، رحت للبيت صليت ركعتين شكر شهد اجتني باركت -عيني مبروك و اخ ينار كلبي زينب ام غمه راح اصير خالة جهالك اااخ -ههههه الله يبارك بيج حبيبي شهود - اكولك عود ليش ما اتصلو وكالو موافقين ليش الا وحده تروح منا ها - اضاهر هيج من اهل قبل والاصول تواصلهم بالاشياء المهمه الا بمقابلات .. -هاا اني مذكر رقية مجانت بصفي بس زينب حتى من انتقلو اشوفني بالمكتبة او العطار اتغمني وتمشي هههههه ... الصدمة اجتني من ردنا نمشي كالو ابنا طالع ايفاد خارج المحافظه مو هذا الاسبوع الاسبوع الجاي يجي خلي مشية الزلم وكل الهلا بيكم وعرفت لا هو الي سأل عني ولا يمكن يعرفني منهو والقلق اكل گلبي ونهشني نهش لا يرجع ويخرب اعلية اااخ اذا رفض اشلون بيه انه !؟ غلسو عنا ايام الا اتصلت ام خليل وكالت رجع ابنهم الكبير ويعتذرون منا ؟!! يتبع | ||||||||
|
| |
|
03-07-19, 01:14 AM
| #6 | ||||||||
| مراقبة عامة ومشرفة منتدى الروايات المنقولة
| #شيخ_الشباب #من_كتابات_زهراء_العراقية #البارت_الخامس بنوتات بالبداية ترة الي رسل قصته الي زينب بس بيها احداث قوية لرقية لانها طرف بيها . بس اني طلبت من زينب اكتب قصة رقية وقصة زينب واسلط اكثر شي الضوء على رقية لان موضوعها محد مطرق اله فالقصة بيها اكثر من بطل والي يرسلوها الي مو بس زينب اكو طرفين وياها . تدري عيونك مثل امريكا واعذرني على هالتشبيه تقوم الدنيا وماتقعدها والكون تموته وتحييه !! مثل امريكا .. مثل امريكا .. واحياناً مثل اسرائيل !! تضرب هذا ، تبهدل هذا وتعيل ، وتحلف ماعيل !! وحنا العرب الله يسلمنه إنموت بأمريكا حيل !! واحياناً حتى اسرائيل !!! -مظفر النواب تمثل حال ياسر من عشك اعيون رقية ▪︎زينب زهكت من الافلام المعادة اوف شلون بيه ، دحمل افلام اكثر شجاك مرتضى اشوكت يرجع ضوجة امنين طلعت النا هالدورة خارج المحافظة حطيت اديه جوة راسي واني نايمه على سرير مرتضى ، التفتت على مقتدى نايم وغاط بالنوم . اعتقد تأخر الوقت خل اضم الحاسبة واروح انام ، مرتضى تركلي مفتاح كنتوره من طلع بعمل ضمن عملة خارج المحافظة وكل ليله من يدخل بابا غرفته اصعد اشوفلي فلم بحاسبة مرتضى الجديده علمني عليها واستغنى عن Dvd ، محملي كم فلم ، ما رحت نمت ظليت اقلب بالملفات متمللة بلكت حاطلي فلم بشي ملف طبيت على ملف مكتوب عليه Music مممم بلكت بيها شي مو فارغة .. دخلت على اغنية عنوانها بعد الحب اخذتني كلماتها لمرسى ثاني وكأني ببيت مو بيتنا واني لأول مرة اسمع اغنية لكاظم الساهر ! اسمع عنه وكنت اشوف صورة بتلفونات بنات خالتي بعد الحب وبعد العشره نلتقي مثل الأغراب واحدنا ما يعرف الثاني ولا كأنا كنا أحباب ماتت لهفتنا المجنونة ما أقساه وما أقساني أتسأل وحدي وأتألم يا ترى من فينا الجاني مممم عايزة نكد يا كاظم صوتك يأسر الروح للحزن من كثر شجنه الافضل اطلع منها دخلت على وحده ثانية معرف مطربها بس شو بنص الاغنية المطرب انقلب بزونة وكام يبسبس ضحكت هاي شنو ؟ طلعت من غرفة مرتضى والنوم فارك جفني وادندن گلب گلب وين وين عايف حبيبك يومين ..... ثاني يوم العصر اخذوني لبيت فطومة رجلها مسافر ، وهي كالت تعبانه حيل وامتحانات اولادها فرحت الهم اااه بيتهم يفلج الگلب يمكن بس الحديقة ٦٠ متر ، سياج عالي و دخلنا للكراج والحديقة على يميني وعلى يساري وبالوسط مرمر مدري كونكريت شعرفني بيهن ،على صفحه سيارته عايفها ،و ابصفها قفص طيور الحب يمكن يحوي ٢٠ او اكثر بعدين احسبهن . اول ما دخلت بالصالة وقداوي وياي هو الي وصلني اجاني قفض معلك بالسكف بزنجيل فضي حلو ويدندن وبيه تاج فضي للقفص كانه ملكي وبيه ببغاء اشكد احب الجية الهم اتلكاني صوفي يحشش وياي صوفي اشويه اصغر من مقتدى هم مراهق و قاسم ٨ و بتول ٥ و صديق و تقي توم ٣ سنوات ... سيد محمد مسؤول كبير بالعتبة رحت الها بغرفتها كالت مو وكتها الانفلونزا هدت حيلي واني وحدي محمد ماهو حتى يساعدني ويقري ذولة طبعا مقتدى بقى ويانه كرجال ويه صوفي ، ظليت كم يوم خلص صوفي امتحانات و وانهلكت ويه صوفي بالله همزين طلع مخلص قاسم ، وقداوي هم وكع براسي لا افرح حيل واحد اسمك من الثاني دماغة اخر يوم الصبح علموني على لعبة طوبة و كلنا نلعب سوة بال بلي و دوريات اني مو كلش غسلوني اثنينهن فاطمه صارت زينه كلساع تجي اتهز ايدها واتروح اني اصلا محبيتها للعبة بس ضوجه وين اروح ، العصر طلعت روحي كلساع تندك الباب على صوفي وهو نايم ، واحد كيكي من عمر صوفي هو خبصني كل عشر دقايق يدك الباب بزعني كعدت بالحديقه بزعانه اتمرجح وهم دك الجرس -خرب قبل ١٠ دقايق كتله نايم وما يصحى ميت عمه بيعنه فتحت الباب وبنتر كلت - يا ضايع يا صايع مو شفت نفسك كيكي كلساع جاي ووو ....... شو هذا مو يم الباب ؟ اتقرب شاب وصرنا وجه بوجه ،كبالي ودنك اول ما لمحني بس شال حاطه على راسي حطيت الشال على حلكي ابلع الفشلة والباب قللت من فتحته وصرت وراه وبس جبيني مطلعته غمضت بفشله وفتحت ، لمحته مبتسم وماد علاليك -اتفضلي عمي عمه الي يعميك انت شاب من جيلي اتقدم اشويه لحد خاصرته مدنك يحط الغراض للداخل يمي يعني نصفه داخل ونص طالع واني انباك الساني - انت اخت ام محمد كالها وما زال راسه ممدود ومدنك عني بهمس -اي - اني اخو سيد ابو مصطفى اهنا واحد صغير صوته كيكي -عمو مصطفى اهنا اهنا عينه صارت بعيني وسأل - مصطفى اهنا .؟ دنكت خجلانه لانه مبتسم - هزيت راسي باي اهنا - خوش اني اروح واذا احتاجت شي ام مصطفى خل تخابرني ولو ابو مصطفى مبقى شي على جيته هزيت راسي باي واني بجفلتي عطرة ترس خشتي (خشمي) وراح واتقدم الولد -تعال اوكف حارة عليك اتقدم يمي صديق صوفي الي هم رجع لزمته من اذنه وبعثرت شعره -ااايي ايي اشبيج - وجبح والله لزكت ولك رحت دخلت واباوع لروحي الحمدلله لبسي مستور ذبيت ماي على صوفي طفرته -لج زينب اشبيج -مطي صديقك برة ثولني وها طبب الغراض الي جابهن عمك وعمه العماك رحت بغرفة فاطمه واضحك وعلى روحي مواقفي طلعت خارج بيتنا للبيوت المجاورة محلاتني والله واني العلع ( اصيح) كدام حماها احسن شي ما اكول الها هههه ابلع فشلتي ثاني يوم الصبح طفرت لبيتنا رجلها يوصل باجر وهو ما يطيقني رجعت لبيتنا و لكيت بيبي ام بابا يمنا سلمت وصعدت رحت لغرفة مرتضى واسمع كاظم مشتاقة اله حيل ولكفتني رقيه ونزلت محجت شي نزلت وراها شو وجها اصفر شفتها كاعده بالهول وصافنه سألتها عن امي وبيبي كالت بغرفة ماما صفنت على رقية اهواي تتصفن وما تحجي اهواي و ها بس ويانه ترد من نسألها او هي من اتريد شي ، ويه غيرنا ما تفهم ابسرعه الكلام و اتظل ترد وتضحك لان تتوتر -اشلونج ولج تعالي نباوع فلم فوك .. -ما ما مريد -اشبيج مبوزة - انت انت اسمعين اغاني حرام حرام -حرام حرام قلدت عليها وهزيت ايدي - بابا يكول ذولة الي يغنون يشترون اللهوة -انت اتعرفين شنو لهو؟ -ها ها لهوة ما ادري يمكن شي يسوه الكفار هو شي غلط ضحكت بعصبيه يربي بابا حتى ما تفهمك واطيعك عمياوي - قصدج اني كافرة هااا شوفي لعد وكفت و جريت مشمرها(شال ابيض يشبه الشيلة مال رقية ) وشديته على تحت خصري وبشعري الغجري المرول احركه ويه حركة رقبتي و طقطقت بأصبيعي واني اغني -ويام المطاهر طاهر سبع مطاهر والبيت ده طاهر طاهر البيت ده طاهر واهز بتحت وسطي و صدري واغمز لرقية الي وجهة احتقن احمر -بابا قاطعتها كارهه جملتها الي دوم اكررها بابا ميقبل بصوتي الي عليته واني اكول والبيت ده طاهر طاهر طاهر واركع (اطخ) بجسم خلفي التفتت مثل الفارة على خلفي شفته واريه بعمامته الي راسمة هالة بيضة هالة علم و وقار وزهد تحيط راسه ،شفت بابا وراية مكتف اديه تلقائيا راسي اجه يمسح الكاع بنحنائي الخجول يلا يا كاع انفتحي وابلعيني كال بعد تنهيدة طويلة -وتالي وياج زينب......ترديني اتموتيني قهر .....بويةاحتشمي.......زنوبة احتشمي بوية وعف نفسج بصوتج وحركاتج راح بابا وطلع مقتدى راسه من الاستقبال يغني والبيت ده طاهر طاهر عزة صوتي واصل لخوتي يلا مرتضى مو اهنا يضحك على صوتي المزنجر كلهم اصواتهم بالوراثه ماخذيها من ابوية قوية وحلوة رقية مرتضى . مقتدى اصواتهم حلوة حيل الا اني يحظي اذا اغني للصخر يتفتت ! اندكت الباب راح مقتدى يفتحها ورجع النا يكول اكو نسوان يردن امي اطلعي دخليهن ! رحت الهن حاطه فوطه رقية على راسي و رقية كمزت للغرفة شاردة من الناس اضاهر من نهد سالفه مرت عمي رجعت تتحاشى الاختلاط فتحت الباب الي معيوف مردود وصارت بوجهي مرة كبيرة -السلام عليكم رديت عليها وطلبت اشوف امي كالت ضيوف عليكم جينا عدنا موعد لهجتها غريبة ابتعدت عن الباب وفتحتها الهن واني وراها واكفه دخلت العجوز وراها مرة هم عجوز و راها شابه ثلاثينية و بعدها اثنين نسوان من عمر امي (ام خليل و خالة ياسر) دخلن وهنه يسلمن عليه وارد مثل الحرس بجمود واني اكول ذني منو ؟،لكن دخلت جارتنا ام عصام عرفتها مرات تجي لأمي احنه ما نختلط بجار دخلتهن للأستقبال ولكفت مسامعي سؤال همهماتهن -هاي هي البنية - لا هاي الصغيره عقلي ابسرعه لكفها ذني خطابة وهلا وهلا اكو عريس كالعاده حيجي وامي اطفرهن رحت صحت الها طلعت الهن اثاري امي عدها علم واني بس اخر من يعلم المهم طلعت و وكفت وره الحايط اسمع بعد الأحاديث الجانبية والي من ضمنها وضع الموصل والانبار والخطر الي بيهن .. بعدها دخلن بالمهم من كالت وحده منهن -امه مريضه اتعذرونا الي فهمته اخته و خالته وعمته وبيبيته جايات امه مريضه ظلن ينفخن بيه بس اضاهر اموره عدلة هالعريس ، بس ضجت من عرفت يسكن بمكان بعيد عنه ، انوب اتخيلته لابس دشداشه وصخه ويحش يبوو هو التمن هم ينحش ، مدري بس هو عندهم حقول رز عنبر يلا ناكل تمن المشخاب ليش ظالين ع الياسمين كامت امي من يمهم ،ورحت وراها حجت ويه ابوية كاعد بغرفته، كالت ذولة جايين على رقية وهي فرحانه - مو حجينا بهاي السالفه كولي الهم على اختها وطلعيها هي الهم .. كالها بحزم ردت امي تحجي بأمل - ترة ام خليل لحت عليه الجبيرة قبل لا يجون اهلة جيه رسمية يا رجال ليش تكطع بقسمه الابنية -ام خليل ما تعرفنا الا عن طريق جارتج وجارتج وما تدري بدواخلنا هلا هلا الشغله من زمان واني اطرش بالزفه جانو كالو الي اعدل الهم رقية ليش هي احنه عدم ولو وصلت متأخرة رحت لرقية واني اشكي الها كالت بكل فهاوة البارحه امي كالت كالت هههه غميتها - وجع ليش مكلتي الي -جنتي يم فاطمه اجتنا امي وكالت -لج رقية كومي قدمي شي للناس وانت يالمفجوعة اكو كلاصات وصينية محضرات طلعي عصائر من الثلاجه .. وانطيهن لاختج وبسج فضول حضرت الضيافه الها وهي ترجف واتكول ما ما اخاف ما اريد ضربتها على جتفها واني اكول لا اصيرين كلش عاد قدمي وبابا لا تخافين ما ينطيج ، دخلت عليهم اشوية وطلعت خجلانه فاهية هاي لو اني اكعد كدامهم احلل شخصيات اهل العريس ! راحو وبعد ما راح مقتدى يوصل بيبي لبيتها ،بابا وماما صارت مشاده كلامية بينهم -يا مرة كلت الج ما ننطي رقية ليش طلعتيها صياح قوي اتحول كلامهم من امي كالت ما انطي زينب ،والناس خوش ناس لا اضيعهم خل نسأل عنهم همه اصروا على الجبيرة كبت بينهن وهاي نادرا ما اصيروامي تعلي صوتها - يا مرة انت عندج فهم كلت الج بتج حالة خاصه اهنا سمعنا صوت اتكسر بالمطبخ بابا سكت وصفن عليه - عزة بابا رقية بالمطبخ ركضنا الها موكعه الصينية والكلاصات كدامها وكاعده مقرفصه تبجي ابوية راح كعد يمها على الارض -بوية تأذيتي اجانه صوت نشيجها - بابا اني اني اني ليش ما ازوج !؟ وشهكت تبجي ! مثل الهاون الي طرق راس بابا سؤالها تنعم صوته وبملامه ملتاعة - ليش يبنيتي هالسؤال - دينا بكدي .....و زهراء بكدي تزوجن عددت الي ازوجن ااااخ متحملت خليت و طلعت واني ابجي شنو ذنبها ياربي لا هي الي كلش فاقده بالدنيا وتظل يمنا ونراعيها ولا هي الي عدها امكانيات قوة عقلية تحميهاو تكدر تواجه هالحياة حقة بابا يخليها يمة معاملتها خاصة بأسلوب خاص رجعت الهم من امي صاحت الي كومتها وهي ربتت على متنها وهي اتكول -لا يمه تتزوجين حالج حال هالابنيات ابتسمت وهي اتكول -واصير ماما امي دمعت وهي تباوع لابوية -اي اصيرين ماما يا ماما ،يلا تعاي تبدلين واكع على ثيابج عصير وانت كنسي الكزاز بابا ظل على وكفته يمي بالمطبخ واني اكنس - اني ظالمكم ؟ سؤاله جفلني ، باوعتله بستغراب الي هذا السؤال لو مو الي كان يباوع للمنور - اظلمها لاختج اذا خفت عليها ؟خوفي عليها احسبه من صالحها - مدري بابا احتاريت هي اتريد حالها حال البنات اتصير عدها غرفة وابن ترعاه !؟ وهي تحتاج من يرعاها -وانت اتحسبيني ظلمتج هزني هز سؤاله محبيت صفة الظالم تنسب اله ابد نسحت جبيني وبلعت ريكي وكلت بكلمات تتقطع - لا بابا عساك سالم فوك راسنا .... بليلتها ولاول مرة امي نسرين زوجة بابا حسن اتعوفه واتنام يمنا عبالي لخاطر رقية ولو رقية نست السالفه ام كلب فطير ورجعت وجها ضاحك وامي ظلت يمنا بوسطنا فراشها لساعه ١٠ اندكت بابانه -منو -بوية امج يمكم شي هبدت عليها البيت كله ماكو هلا الحجي فكد الحجية امي مغمضه بس لمحت ابتسامه بحلكها -اي بابا نايمه -شنو نايمة ؟ شسوي -مدري -ادخل زينب ؟ - اي بابا اتفضل فتح الباب وفتح الضوة وماما ورقية نايمات .بس شاكه بأمي - يمرة كومي شعندج اهنا ماكو رد - نسرين كومي روحي لغرفتج عيب كدام اولادج - مرتاحه يم بناتي واخيرا ردت عليه وانطته ضهرها وشدت الغطى عليها وصلته لراسها . ضل واكف اشويه واسمع شجن تنهيداته الرجولية . طلع وسد الباب وركعه مطلع صوت يبين غيضه الصبحية لكيت امي ماكو ، صليت قضى و رحت للصاله شفت بابا يسبح بوجه ضايج انوب امي بالمطبخ هم كالبه وجهه ، البيت صار لا يطاق من الحجية خاصمت الحجي ظل عصبي ما يعجبه العجب وامي حاطتني بوجه المدفع اشوف طلباته واتبات يمنا كعدنا على الغدة بعد ما مرن يومين خصام... ابوية كال بزجر -ليش زينب الاكل ماصخ باوعت مستغربة يدريني مو اني الي اطبخ سألت امي بعدني مضايكه اني - ماما الاكل ماصخ !؟ جاوبت امي - اشبيج زينب ما عاجبج ما تدرين عندج ضغط على مودج اطبخ جدرين اذا كلش قليل الملح رشي المن حاطين ممالح - عيب عيب يا زينب اسويه كلش ماصخ حيل احفظي مقايسج لو متعمدة ؟ لو اطبخين من ورة خشمج ردت عليه - هو انت شكلتي زينب رقية -ماما زينب ما حجت اني اضحكت و بديت اكل ، مقتدى هم بعد الغدا كال بزعنا اشوكت يصالحون اهنا صاحلة ابوية يقريه قرأن وبس اصياح بابا الي غير معهود ابد ما يصيح هو ، حتى من يرزل طلع مقتدى من الاستقبال دموعه بعينه وراح لغرقة ماما من ، شفته هيج رحت وراه مقتدى -يوم شوفي الج حل شبعت رزايل اني كلت -اي ماما فدوى لروحج اصالحو والله مو متنا احنه الواكعين بيها هي تحب حيل مقتدى المدلل مالتها بالليل صاحتلي امي جان بابا بعده بالاستقبال يتعبد . كالت تعالي شسوري شعري لجوة ، سويته الها وطلعت واني اتحمد ربي راح يصالحون اف متنا .. الصبح وجه بابا يضحك للهوى وطبيعي والعصر كال جهزن نفسجن نروح لطبيب حجزت مفتهمت ليش هسة ياخذها ؟ لبسنا واني كالعاده عاندت طلعت محجبة تحنيك وحتى احواجبي ما ابرزهم بس ما تبوشت مو واجب غلس عني الحمدلله ما اخذ امي ، امي مرة عمرها ٤٧ سنة بجسم متروس حنطاوية ببشرة دهنية تلمع لمع وبعيون وسيعه بيهن لون ممزوج بين الصفار والجوزي خبط بالضوة حيل يبرزن ، بس رجليها بيهن روماتيزم مابيها حيل كعده السيارة اني كايده(لازمه ايدها) رقية من نزلنا للعياده لا تعثر واتضل تبجي من الاحراج ، وبابا ابصفها دخلنا انتظرنا وقت الا اجه سرانه للطبيب المختص بابا دخل قبلنا كال من اصيحكم الا تدخلون ، فهمت يريد يشرح اله بدون ما تسمع رقية حالتها من كانت طفلة قليله الفهم بابا اخذها هم لأن تأخرت بالنطق لعمر ال٧ سنوات بالمدرسة تعاني ، اسئلة عادي مثلا ابوكم شنو يشتغل ما تفهمه صعبه عليها جانت ،فرها لدكاترة بغداد ، كربلاء ، يمنا، و حتى طبيب لبناني قبل السقوط بالبغداد ، ما انطو علاج الها مشفي غير التعب ، فما كان منه غير يحط الها معلمه ويه امي تساعدها لان تتعب و سجلها معهد نطق لغوي للطفل بس كانت ما تعيد هيج الكلام لحد ما وصلت للمراهقة واستقرت حالتها مع المجهود المكثف صارت تبين طبيعية بس بطيبة قوية وفهم بطيئة وبسبب التنمر الي تتعرض اله بالعالم الخارجي المدرسة صارت ثقتها بروحها قليله وهم غلط منا منتحمل بطئ فهمها مرات نعوفها ما نشرح فكامت تعيد الكلام تخاف لا نقلد عليها او ونزعل منها طبعا بابا كان هو الوحيد الي يتحمل من غير كلل او ملل ويعرف لكل طفل عنده توحد موهبة ، حاول يكتشفها ، اكتشف عدها الصوت الحزين جدا بنبرته وتعب عليها ، طبعا بصغرها كان عدها بطئ فهم قوي بس بتعب الا وصلت لهمواصيل والحمدلله بالمناسبة مقتدى جان عده طيف توحد بس خفيف جان عنده فرط حركه بعنف وابوية احتوى حالته اجاوز هالمرحلة لهلسبب دوم اقاربنا يكولون عدكم وراثة انوب بت فاطمه بتول عندها طيف توحد اووف حتى حاليا مدرسة اهلية بس الحمدلله مو مثل رقية عاد بس اشوية صعبة و و معتزلة ما تحجي بالمثاقيل طلع والدي وصاح النا دخلنا الدكتور - عمو ارفعي النقاب بابا كال ارفعي بويه اضاهر وجه مهم يريد يشوف بيه اختلاف ولو كان بسيط عنا ... كعد يسالها جاوبت لحد ما وصل لسؤال اختج كم طفل ، ظلت تحسب وتغلط وتعيد اني همست الها - ستة ستة -ها مسمعت -ست ... مكلمت الطبيب قاطعني بضحكته وكال - هاي الي تغششج اختج اضاهر تحبج استحيت حيل شفت ابوية مبتسم علينا الطبيب - رقية شسمها اختج رقية -زينب هههه زينب تلهث يكلك بسباق خطية تخاف تغلط ومجاوب يكلك امتحان الطبيب - اتحبين زينب رقية -اي اي - ليش ؟ صفنت بوجه متعرف شكول المفروض اتكول لانها اختي اقل اجابة مختصرة ما كالتها شفتها خافت يكول يسجل عليها شي اجت تبجي همست -لاني اختج رقية -لاني اختج ابتسم وكال -رقية زينب تغششج بالامتحانات صفنت عليه - اي هههه اي دوم خزتني دنكت خجلانه من بابا حيل لمحته يهز بايده ظل يسأل بيها ويحجي وياها وعرتنا ما كو شي ما كالته بكل شفافيه وخاصه عني رابطتني بسوالفها ، السؤال الي متعرفه تباوعلي تطلب مساعده بس اني بطلت ارد لان بابا اشرلي لا ارد اخر شي سالها - نسيت اشكد كلتي عمرج صفنت ناسية اني مكدر ارد حطيت ايدي سويت رقم ٢ وحاولت اسوي اربعه بكفي الثاني صار كانه هم ٢ وكالت ٢٢ سنه -متفانيه يا زينب كالها الطبيب خجلني كمل -رقية شفتي البلابل الي بالعياده برة هزت براسها باي -شنو رأيج اطلعين برة اشوفيهن هزت راسها موافقه وهذا طبعها شينطلب منها اسوي راحت وجه الكلام الي الطبيب - هم اتعوفيها ايام اقصد تتفرقن - لا بس مرة يمكن عفتها وبتت وحدي ببيت اختي -متعلقه بيج اختج هزيت راسي باي كال سولفي الي عن ايام مدرستها ، ظل يسالني واجاوبه بعدين بابا سأله عن موضوع الزواج من كال الطبيب حالتها غير قابله لتحسن بس اعاده الكلمات هاي حالة طارئة اتروح حسب تغير الاجواء للأحسن .. -دكتور وحياتها تكدر تمارسها ، مثلا عبأة الزواج ومسؤليتة.....لو شي بعيد عنها.....هليام تفكر هي بهذا الموضوع وتتمنى تصير ام صفن الطبيب الا جاوب -الزواج مبدئيا مايضرها لأن حالتها غير قأبلة للأنتكاس ماعدها مرض نفسي عدها نقص *** بالدماغ مما يؤدي لحالتها المرضية المستقرة حاليا لكن لازم عناية الها مثل عناية حضرتك واشر على والدي -انت واضح معتني بحالتها لهلواصله لدرجة متفوقة وجيده وهي اخر مرحلة ما بعدها تحسن او انتكاس اصلا اذا توفر الها زوج مراعي الها ، افضل الها تمارس امومتها وحياتها بصورة طبيعية . اتكلم النه بالخارج اشلون يعتنون بهيج حالات واصلا يزوجون ويعيشون حياتهم بمساعده المقربين حتى اكو نفس الشي هم اثنينهم نفس الحالة يزوجون . كلام الطبيب كان كانه سهم بحشاء بابا من ايد فكرة الزواج لكن بشروط معينه الها و توافق ويه طلب ماما كانه يريده يكول العكس ، وعرفت زيارتنا للطبيب ما هي الا تأثير ماما على بابا .. اخذنا طلعنا للسوك اشتريت كم حاجه ،حطيت عيني على سيت بيت حسيت بابا وراية كال - ترديه ...اخذه الج ... ابتسمت مكيفه كمل -بس بغرفتج يلبس مو كدام اخوتج ابتسمت موافقه لان اصلا استحي كدامهم البس برموده واخذ لرقية مثلي رقية ما تختار اني من اريد شي متطلب بابا ياخذ النا اثنين لهذا لبسها و غراضها اتصير تشبه ذوقي خطية دخل هو لمكتبة واحنه برة ننتظرة، اشترة كتاب كبير وانطاه الي -هاج هذا شامل قصص الانبياء شي يفيد اكثر من لغة العشق مدري الخربطه الي تقريها .. بلعت ريكي وشكرته واخذته منه عزة طلع يدري اووف ولا شي يخفي عنه ورحنه للزيارة زرنا ورجعنا طرشت رقية امي سولفت الها عن الطبيب ، ابوية راح سأل عن الولد وعرف بيت ابو بخليل طلع يصلون وراه بالجامع ناس يعرفهم طيبين واجاويد ، وسأل عن الولد بمكان عمله. حتى طلع بابا عنده عرف يعرفوهم همه دكو صدرهم كالو انطيهم وعلى ضمانتنا احنه نضمن الولد هذا ابن خير صاحب غيرة جنوبية و نخوة كوفية ، اجانه والدي يضحك كنا بالصالة وكال -لقبه هذا بالسوك شيخ الشباب وها جده ابو امه طلع شيخ عشيرته .. وافق بابارقية تنخطب بشرط نبلغ اهل الولد .. اجتنا اخته الثلاثينية ام خليل زوجها خطية متخربط عليها وما اجت كعدنا اني وامي اشوف امي حزينة وهي اتكول هيج عن بتها من رحمها ، بس شنو نسوي -شوفي حبيبتي كوثر .انت ام شنو نسيت - ام رقية -رقية ؟ بتج الكبيرة رقية ؟ الله يخليها بنبرة مو خالية كوثر جاوبت -خالها ياسر سماها ... رقية انخطف لوني عزة هذا عاشكها بعده ولج زينب هذا ياسر .... ياسرنا ابو الرسايل عزة عزة ضليت فاتحه حلكي مثل المخبلة وللتاكد سألت من غير داريه - عندج اخت اسمها شهد ؟ -اي تذكرتيها اتكول جنتي وياها بالمدرسة ... اهتزت اوصالي ... اني شنو من غبرة نسيت بيت ام خليل صدك قرابة ياسر اي والله نسيت هالنسوة...كمت اضحك بخفوت وحتى دمعت .... اشكد نيتج صافية يا رقية .... لج الله اشكد يحبج تجيج رغباتج من غير سعي منج حتى دعوة ما دعيتي بيوم بلسانج يقربه منج بس الله من غير ما يلج السانج يعرف صفى گللج وشنو يريد ، يا حبة البركة هسة كلش خفت لا يرفض جنت ما مهتمه حيل اني -شوفي ام رقية .... من اجيتم اتخطبون انتم عرفتم بابمن دكيتو ..بيت الشيخ حسن الكل يشهد بأخلاقه كوثر -ونعم منكم خالة امي - ما نعرف للجذب عنوان يمة ، من اجيتو انت واهلج .....صعبة عليه اكول هالكلام عن بنيتي كدامهم كلهم واول دخلة الكم يمنا .... و اليوم وردت امج .....بس يلا الله ينطيها الصحة والعافية انشالله -خالة شنو رفضتم ..؟ - لا ما كلت رفضنا بس رقية بنيتي ... فقيره حيل ....يعني على البركة يا يمة هذا كلام الطبيب من صغرها ... فهمها بطيئ وتركيزها هم ...بس هي شاطرة و ربت بيت معلمتها رغم بطئها وطيبة حيل ملاك يا يمة الله رزقنا بيها والله ابوها ما يقبل ينطيها وهي حالتها الصحية عال العال و ما بيها اسم الله مرض عقلي لو شي بس بطيئة الاستعياب و ما انريد نظلم بختها ... بعد يا يمة بلغي اهلج و ردينا خبر راحت من يمنا كوثر ومنتظرين منها خبر قرار ياسر من يعرف بحالة الحبيبة رقية ما كلت ابد لرقية ما اريد اصعدها لفوك وارجع انزلها اذا اتراجع ، امي خلت القرار بيدهم هسة صار ورة يوم ردت النا خبر ، كالت الولد موافق وماعنده مانع طول ماهي كادر تصير زوجه وطبيعية على فهمها بسيطه يراعيها والله يحطها بعيونه اهنا رحت ركض الها بالغرفة هم ماخذتلها صفنه -لج رقرق ولج مبروك تمت الموافقه -صدك العريس قبل بيه ! ههههه قبل هههه قبل عزة هاي سامعه عود كلنا منكول الها عن سالفه نكول العريس عن وضعها وهو القرار اله ، اضاهر سامعتهم - يعني ....البس بدلة مثل دينا ها هههههه ويصير عندي كنتور بس الي هههه كنتور مو مو مو مو زينب - ولج ااااخ يكلبي تعرفين منو العريس - منو منو ياسر ياسر مو هو مو -اييييي ولج اشمدريج هاااا اشمدريج -ههه هههه ههه تضحك وتلهث حاطه ايدها على صدرها - محد محد يجي يخطبني كسرتلي ضلع ونبتته ب گلبي من كالت هيج محد يجي يخطبها - هههه بس بس هو اني من شفته من شفته بالساحةاجه اجه ،هو ابن ابن ابن خال خليل -هلا هلا والله اني الفقيرة طلعت لج وين شفتي - من من طردوج بيت عمي -خرب عقلج صدك تحجين اني انسحلت ذيج السحلة وانت بالساحه تبصبصين خرب لج صدك اني الفقيره -اي اي ظل صافن عليه هههه -واشلون عرفج يالفهيمة من رجليج الطالعه ههههههه - رفعت البوشي صفنت عليها هاي منيه الي تحجي وياي؟ -بس بس والله والله والله ردت اطلع بس اعيوني ، والله والله انشالت كلها كلها انشالت - ولج من هيج الولد رجع عليج عباله انت متقصده اويلي اويلي انطيتي اشارة امان وماتدرين بروحج هلا بالعكش لج هذا يحبج مووت مسمي بت اخته رقية ونسى عراكه ويه اخوج واجه هلا عيني اهنا الناس الفالحه مو اني مكضيتها اشلونك خوية ويه عماد لا والقسمه اني اعارك ببيت عمها وطلعت هي تعيش الحب بعد الفراق ضحكت وكملت اني -لج اني بيومها غلطت على كرار من ادخل وكلت اله ناقص رجولة و ضربت دينا راشدي و طردوني طرده ما منها طرده وعلكت وابوج هسة ما يتحاجه ويه عمج وتدرين يردون يجون يعتذرون منا ها تدرين لأن عملة كرار جبيرة واني راشدي ممحسوب عادي هههه هههههه بس. ابوج كلش ماخذه باخطره وعالن غضبه على كرار ظلت رقية بس توزع ضحكات ، طلبو منا يسون موعد لمشية الرجال اجلناها الى ان يجي مرتضى تأخر حضرة جنابة ، بعد ما اجه مرتضى العصر امي فاتحته وهم مثل بابا صعبها بعدين سولفت اله على الطبيب وعلى العريس الي كيف لانها من اهل الله فكال خل اني هم أسأل عنه بعد العشا واخيرا مرتضى و بابا اتقابلو الصراحه خابصنا بابا عليه اشوكت يجي اخوكم ما أشوكت يجي والغريبه ليش ما يتصل هو عليه اذا قلقان ! ومن عرف بجيته اليوم راح اسوك وجاب لحم وطلب نسوي كباب على المنقله وجاب فحم لانه يحبه مرتضى ..هذا الحجي قبل لا يجي مرتضى بساعه وراح بابا للدرس مالته عنده محاضرة دينية وما رجع الا وقت العشة بس الغريب من سلم عليه ببرود! بعد العشا ويه شرب الجاي كال مرتضى -بوية يعني سألت عنه زين . شسمه ومنين اصله وفصله يخوفون الغرب - انت تعرفة جان من ربعك كالها متقصد بابا وكمل -ياسر ابن خال خليل الي عنده محلات بالسوك ......خليل ما زال عند شغل بالسوك اكيد تذكره -شنو حط الاستكان بالصينية -هذا ......بوية هذا شنو شذكره بينا مو اخذه جده مفهم والدي مغزى كلام مرتضى احنه كلنا ندري هو خصم مرتضى بس من زمان هسة كبرو -بوية كبرتو بعد والولد خوش ولد الله شاهد واحنه هم ما مستعجلين اهواي بالتأني نمشي ونكعد وياه اني وياك اكثر من مرة ونشوفه ولو ما يحتاج سيد محمد اتكفله كال هذا تاجر شاطر و يعرفه معرفه قوية لأن نسيب محمد. يعرفه وصديقه عرف مرتضى ماطول السالفه بيها سيد محمد يعني كلامه سيف وبابا ياخذ كلامه سكت وحسيته ضايج حيل بس كال لا تنطون خبر للمشية الا اسال بنفسي سأل عنه ... واجانه لغرفتنا احنه البنات جانت رقية مطروحه ومغطى راسها عبالي نامت و مرتضى فتح الضوه وكعد يمي يسولف وياي - سمعته طيبة بس ولا ارتاح اله اكلج هي رقية استغفر الله قابل يعرفها اشعجب عرف بوضعها وقبل -ما ادري ... بس مدام وافق وهو خوش ولد فرصه الها ما تتعوض لا تنسى اولاد عمك منك وبيك محد خطبها و الي صار قبل كان صغير ترة كبرنا ....... - هسة الا تتزوج والله خايف عليها و ما ترتاح ... -اعتقد حالها حالنا ...رقية مو خارج العالم عايشه اشوف واتريد اتخلف و تستقل .. دوم تكولي اريد بيت ارتبه و بنت البسها انرفع غطاها وكالت -لا مو بنية اريد ولد واسميه علي صفنا اني ومرتضى ضحكت و مرتضى ضاج بعد اكثر من شاف لهفتها ، خابرت ام خليل وعبالها صرفنا نضر اني يمها اصنت و اودي اخبار لرقية - نعتذر منكم ام خليل والله مستحية منج .... اعذرينا انتظرنا اخوها يجي ..وهم اخيها اعذريه راح سأل مرة ثانية ......اكلج خية بلغيهم اعتذارنا عن التأخير والوقت الي يناسبهم يحطوه ازلامكم ▪︎ياسر بلغني خليل اعتذارهم عن التأخير وبلغني نحدد موعد وياهم ....والاكثر تعجب مرتضى سأل عني الربع بمكان شغلي .....موافقته كانت هي الي مأخرة ردهم ،اله كلمه هذا اضاهر وافق عليه بعد الصار ااااخ ريح گلبي الف رحمة على والديه ما كسرلي واهس وخرب عليه . اخذنا كم يوم نرتب امورنا وانه اصريت الا اجيب عمومتي و هليتي من عشيرتي لرقية تستاهل ام اجدام محناية تتعنى الها اجدام عشيرتي وعشيرة امي ، ورحنا مشية ازلام الهم ماخذ الهم عمامي وافراد عشيرتي الجنوبية و عشيرة جدي ماخذ الكبار وخوالي ديوانهم انترس ازلام واكو بيهم واكفين وهي ازلامهم نصهم معممين شيخ و مومن فلان نسب يشرف حتى ساده كاعدين نسابتهم سادة معممة انه عاينت مرتضى الملتحي واكف وهو واخوه وابن عمه ضايفونا متغير شكله مثلي .. شكله هادي ولابس قاط من غير رباط بنطرونه جينز صفنت عليه والسان حالي يكول هذا نسيبي !؟ انطونا وطلعنا منهم واني بگلبي رهبة من نظرات مرتضى ...موش صافية واجذب اذا كلت انه گلبي صافي اثنينا بعيونا حقد ! ركلة اجدامه و دحسهن بحلكي بذاك اليوم ما انساها موش طفل جان عمري ٢١ ظلت بروحي تحز مثل السجين مضيعه فرحتي رجعت لشهد ضايج وسولفت الها عن حقدي لمرتضى لا يخرب عليه زواجتي - يوه اكل وشرب عليها الدهر يا حبيبي بعدين انت كلت اتعاركنا لأن جنت الله يسلمك اتسولف ويه اخته الصراحه حقه - اعرف حكة واعرف انه غلطان بس انه جنت موش مثل اليوم مستعجل و طايش بس ضربته الي ...جانت نابعة عن واحد يريد يذل موش يريد يحمي ما اكدر انساها -وانت مو اخذت حقك - هنه بوكسيين واجاني جدج ضحكت شهد - لا جديات شهد خايف الحقد ما يروح بينا وهذا راح يصير خال جهالي - الله يحلها ولا تفكر بيه وتخرب فرحتك حبيبي انشاء الله ما يخرب عليك انت بس لا تخليه ببالك ،، قبل العقد بنص ساعه ابوها طلب يحجي وياي وصديقه الي يعقد النا على جية مرتضى ماهو الحمدلله ابوها الي بديت احبنه شايله بته نفس اعيونه السود ملامحه تشبها ، طالعه بيه شبه منه ، كال الي -اذا بيوم تراجعت او هي تراجعت ما بيها احراجات ابني -انشالله ماكو اختلاف عمي - وشغلة ثانية ابني ، خطبتكم اطول ماكو زواج سريع -ليش عمي خير البر عاجلة ماعدها شي البنية دراسة او شي يمنع ولا اني - ميخالف ابني ورضيعتك اكيد كالت الك عن شخصية رقية تراها بركة اطيب خلق الله تعرفها بمرور الوقت والايام يجوز رايك يتغير استغربت - عمي واذا طيبة اني هذا الي اريده بنت اصول طيبة وفقيرة -الله يجبر بخاطرك لمحت الانحراج بعيونه انه اعرفها فقيره من رضت تمشي وياي من تاهت هذا شي حببني بيها اكثر المهم اتكون شخصيتها فاهمه ، و واعية واعتقدها گوية بس ابوها ما عارفها مثلي الي تشيل بوشيتها وهي كلها شرف وعفه ماكو بغرضها غير تعلمني هي بعدها تريدني وانه جيتها ملبي النداء ! وحبيت جرأتها الي ! سمعت كلمة السلام عليكم رفعت راسي امها موبشة .. و هي وارها مخلعيها البوشية يا محلاها -السلام عليكم .. -اكعدي ام علي اكعدي بوية رقية هذا الي راح يكون زوجج وسندج اشر الها عليه اعاين اعليها وارسمها من جديد وهي اتباوع الي ولأبوها وانحنى راسها اجه صديق ابوها برفقه زوج اختها الكبيرة وتم العقد وهي كدامي يا محلى رجفتها من صديق ابوها سالها وكالت نعم موافقه وكلت ابوها وكيلها ..... دخلت امي تهلهل من طلع الشيخ .امي الي اجت واخيرا ما هنت عليها واجت هوسة ناس وهي بالعباية اااخ اشكد تمنيت لو بس تخلع الحجاب واشوفن شعرها ،سواد ليل مثل احلامي لو لا طوله صدك مثل ما كالت خالتي لو لا ظلت حسرة .. راح السيد محمد و الشيخ العقد ، وابوها طلع وكال اخذ راحتك اوليدي . بقت امي و خواتي منطلقات بالهلاهل .. كعدوها يمي توبة اختي نبزت بقفلة -حبها ولك حبها لا تخاف من امها امها ضحكت وكالت - من رخصتكم بس اشوية .. كومتها واخذنها امها واختها الكبيرة بقت شهد لمحتها اسولف ويه اختها زينب ،كبرانه هالزينب كلت لامي خل نرفع الزحمة كالت اصبر اشبيك ما اتريد اشوف خطيبتك .. رجعن النا امها واختها و بينهن تمشي حورية سماوية نازلة على الارض ،تتبرك الارض بجدامها الفرفوري ، مكدرت اتماسك نفسي ،من حذائها الابيض الى ثوبها البصلي ،ثوبها مثل السمجه عليها مخصر من فوك وعلى خصرها و وركها مزير ازير يعذب گلبي العذري! و بيه نزلة مثل السمجه من جوة والردن مزرف شفاف (تول) مطلع الي ايدها بالاقصاد ! والشعر ماكو لكدام بس من رادت تكعد يمي شفته شلال متلون اسود بليل بلاية گمر ونازل على ضهرها كعدت يمي هالحورية واني اطلب من الله الثبات اضعف الايمان عندي ابوس ايدها احسن من العدم المهم قطعه منها اخذتها وبستها -اوعدنج يبت الناس احطج تاج اعلى راسي اتقدمت امي و بيدها العلبة الكبيرة نيشانها لبستها الحلقة وانطيتها حلقتي ايدها الصغير جاست( لزمت) ايدي الخشنه .ناعمه مثل الكطن (قطن) دولبت (خربطت) حالي خلتن اوصالي ترتعد وترجف و هيجت فيض رجولتي حسيت نفسي فقدت السيطرة على حالي ومحتالي اعتقد ظنوني خجلان من النسوان ولمتهن وخرن رجعتهن امي للخلف بس انه يا خجل انه اريدن اخذها واريح هالروح واترسها بشواكي ترس و اشم ريحتها هالوردة كملت بكل بطئة تتفهى بيه وانه المنفجر واحترك يمها بين الهلاهل امها اخذت تلبسها الباقي و رحمن حالي امي اشويه ذبت كلام يسم البدن بس امها ما واخذتها عليه جانت فرحانه ببتها رجعنا للبيت وانه كبل رحت اخذت حمام بارد جوة الدوش اعيد ترتيب صورتها كدامي ، طلعت من الحمام واخذت من شهد صوري وياها والليل كله اتخيل بيها يمي اطفي نيراني بيها وهذا ابيها يكلي اطول الخطبة !؟ ورة ايام رجعت ادخل منطقتهم ودخلت للكهوة متعمد لأن بيها العصاري يكعد مرتضى متعمد اشوفه اشلونه وياي هسة سلامه جان ابرد من الثلج بالمشية ونظراته احر من الجمر الي ، شفته هو عماد وكم واحد انه خليل واخوه وياي كعدنا اهنا اكو واحد بيهم يعرفنا مشترك بينا كام سلم وباركلي رديت عليه بصوت مسموع للطاولة الي كدامنا كاعد بيها مرتضى الي صفن على الطاولي رحت اله اسلم جا انه الي داخل . -اشلونك ابو نسب ماد ايدي اله رفع نظرة عليه ومن غير ما يوكف مدلي ايده برخاوة رد السلام و ما عزمني وياه ابن عمه عزمني على الطاولي كعدت ما كلت لا وتارك ربعي يجرون كراسي ويجون يمنا دايس على نفسي اتگرب منه بلكن نكدر ننجاوز الي الصار - خربطو لعبتهم وانه كاعد كدامه ما باوع الي لعبنا وخليته متعمد يفوز عليه لا هم ياخذها بتحسس ابتسم وكال -مو كد اللعب انت هههههه المشخاب نستك كعده القهاوي غاضني .... - لا موش قصة المشخاب بس انه مو عواطلي ماعندي وظيفه احل منها الضهر يومي كله شغل رفعلي حواجبه - مو قصة شغل اضاهر اهناك ماكو قهاوي تتعلمون بيها اصلا زين من تعرف ما ناسي اصول اللعب اكلك هم عدكم كعدات للدونمة - عدنا يخوي كعدات اتعلم الزلم تحجي و اشلون تتكاوم بالدواوين لهجتنا صارت حادة وذيج وينها انعرفت وين ماشين بيها فخليل وعماد لفوها عماد كومه بحجه عازمك على عشا اخذ تليفونه من جدامي وانه حطيت رجل على رجل جدامه والعب بحلقتي وهو خزني وخز ايدي وكال -اشوفك على خير ابو نسب حيل شد بكلمة ابو نسب وراح ضحكت هاز راسي ما يعرف يحجي كلمتين وجاي يتحداني بالحجي لك انه بالدواوين ارافج جدي ، عبالي ابوه ياخذ بكلامه مبين ذاك وينه گلبه مصافي و ابوه ما سامع اله مبين ذاك وينه حتى ما اعتبرة و كعده بالعقد ياخذ شور رجل اخته مبينه ذيج وينها وهذا ما يكدر يهز بيه طرف ! ، ثاني يوم جنت بخارج المحافظة ورجعت تعبان وجايب تليفون لرقيتي حتى اتعرف عليها اكثر .. خابرني عمي أبوها يبلغ نسوانهم يردن يجن رحبت بيهم بحرارة -والله يا ابني انت مو غريب ترة سبب الزيارة النسوان يردن يفاتحن نسوانكم هلمرة احنه طالبين بتكم المصونة لأبنا مرتضى - منو !!!!! اقصد شنو عمي منو ابنك !! يتبع | ||||||||
|
| |
|
06-07-19, 03:57 AM
| #7 | ||||||||
| مراقبة عامة ومشرفة منتدى الروايات المنقولة
| #شيخ_الشباب #زهراء_العراقية #البارت_السادس أيقتلك البرد ؟ أنا يقتلني نصف الدفء ونصف الموقف أكثر..! -مظفر النواب ▪︎مرتضى شكوكي كانت قوية ناحيته خاصة بعد ما عرف بحالتها وهم وافق بكل بساطة ! شي بداخلي ما مرتاح ابد وخايف عليها حيل ، بنفس الوقت من اشوفها من غير جانب هو فرصة لرقية ما تتعوض ، اذا يراعيها عادي البنية ليش تنعدم حياتها هذي خالتي ام رنين متزوجه من ٢٠ سنة وعدها اولاد وهي تشبه حالة رقية ، بس هذا ياسر يا مرتضى الي اخذك لمكان مقطوع حتى بس يخلص عليك لو لا جده ، يعني معقولة لهسة عقلية صغيره و يفكر بالانتقام ، لا لا مرتضى الرجال كبر عمرا و اسما ، اسمة كبير بين التجار وعنده خوات ممعقولة يلعب بأعراض العالم بالله اخذها وبعدين ما تحمل ؟ اخ حيل ما ضامنه لهذا رجعت من الدوام هليام ارق ولا انام بس افكر بقصة رقية دخلت للصالة سلمت على امي ورقية -صبيلي غده بركتنا رقية -اي اي.....بس هههه....اضم مهري هههه......مهري التفتت شفت بيد امي الافلوس وكالت الها ضميهن يمه رقية- ماما اريد اريد جنطه حلوة ههه حلوة حتى من اطلع ويه ياسر البس حلو امي-تمام ماما باجر اكل لابوج نطلع رقية -خوش هههه خوش راحت من كدامي رقية وانتبهت الي امي -ها يمه ما تصعد تغير ملابسك - اشوكت جابو امهر - بسلامتك بيوم العقد يمه ! - ها زين شنو قصة طلعتها هاااا - العريس اخذ اذن من ابوك ويريد يطلع وياها وهم مشتري الها تليفون يريد ينطي الها - شنو هاي السالفه التعبانه.....روحي وياهم ما عدنا بنات يطلعن وحدهن واصلا شعدها طالعه وياه ياخذها ببيته وبكفيه بعد العرس يطلعها - لعد المن ابوك طلب وقت للخطوبة غير يمة يتعرفون على بعض بعدين مقتدى وياهم مخليهم وحدهم - احسن صعدت واني اكول صوجي لو ما موافق وگالب الدنيا عليهم ، اجتني زينب بعد ما تغديت واستقريت بغرفتي كعدت على سريري حاطه هدفون و اشوف فلم مصري -زينب زينب رحت يمها على سريري سحبت السماعه -اسمعي ....هذا الي اسمه ياسر متأكد مجان يعرفجن -شنو قصدك ؟؟ - يعني هم مسولف ويه رقية بأيام المدرسة -شنو شنو هاي اشبيك رقية وينها وين هاي السوالف - يجوز مستغل طيبتها -شنو يستغل واني وياها دوم وبعدين الصراحه احنه نعرفه جنا يكرهك ...... و اخته هم جنت اتخبل منها - اها هاي الصغيرة !؟ -اي اخته من امه وابوه سولفت الي سالفه امه ما ادري امه مزوجه قبل ابوه وعنده خوات من غير أب - اكلك مرتضى ما تاخذ اخته انت مو تريد تزوج وعندك فد مواصفات حاطهن ببالك ترة هي طالبة جامعية و حليوة صحيح كصيره بس حلوة حيل اعيونها خضر وناعمة وجسمها... -اش توصفين بنت الناس حرام وعيب - اخذ اخته حتى نضمنه اكثر بعدين نسبهم يشرف الصراحة - كلتي اشكد عمرها -بعمري -اشلونها - بيضة ع حنطاوية واع..... -مو شكلها .... شخصيتها اشلونها مرحة وكلها حيوية ونشاط ....اريدها تبث نشاط مو نكد - مدري مو كلش اعرفها ....بس بالعقد حششت وياي ولو جانت تضرب بسامير عليه بس دمها ينبلع - وانت سكتي !؟ - لا ضربتها هاونات هههههه اذا صارت مرتك مكافش اني وياها - خليتيني افكر بالموضوع ....والله خوش اقتراح هم نسب يشرف وهم بيها المواصفات الي اريدها من حيث مستواها التعليمي -وشكلها هم هههه رجعت اتشوف فلمها زينب ...كمت من يمها واني اذكر ذاك اليوم ، بس ملامحها باهته بعيني بادي يصير عليها غواش ابيض قوي بذاكرتي لأن من زمان فات وهي كانت صغيره كنت طالب جامعي متعارك ويه والدي على ريوك ، بسبب تدخلة بخصوصياتي مثلا ابسطها علاقتي بديني وبدأ يحاسبني على صلاة الصبح وتأخيرها كنت احاول اثبت شخصيتي واتمرد ناسي هو والدي ! كنت اشوفه حكم على تصرفاتي ، طلعت متأخر ناوي اكلف كرار ابن عمي يوصلني بالتكسي مالته مريت من يم فرع ... اتوقفت من سمعت صوت -لج يمه الحكينا رجعت لفتحة الدربونه و اشوفلك اثنين بنات محصورات على الحايط ويتباجن ( يبكن ) و حاصرهم علي المخبل (مشهور بالمنطقة اهلة دوم حابسيه لكن مرات من يفك قيده يشرد للشارع يسوي اذيه وارهاب للنسوان ) شهد -لج رنا هذا مثل خالي ! راح نمووت راح نموت ركضت عليهن ما كانن ببداية الفرع بعيونها وحده منهن ترجتني ابعده عنهن حطيت اصبعي على حلكي بمعنى اش اجيته من ضهرة حتى اغدرة و ابعده طالب منهن يسكتن وحده منهن صاحت -عمو وخره عنه حباب اندار عليه بوجه غضبان وكال -الك وحده والي وحده ! رفعت اديه اثنينهن كدامه وكلت اله -خوش خوش ميخالف الك وحده والي وحده صرخت ام عيون خضر - يمة يمة غمزت الها سكتت مرتعده وخايفه منا اثنينا جرها اله المخبل وقرب راسه بسرعه و حط شفته على خدها الغض ضربته براسي (كلة) و ببطنه دفتره هاج عليه بسجينته ولا كأني ضاربه ! صحت عليهن -اركضن روحن منا وحده منهم شردت صحت -روحي روحي ام عيون خضر ظلت صافنه عليه مجفولة ولازمه خدها ضليت اتلاوة وياه وضربني بسكينته طلع الي جار مطلع ولده للمدرسة شافني اجه لزمه وياي واجه جار ثالث ورابع ما اعرف اشلون التمو ، جابو حبل وعفتهم يربطون بيه ورحت الها بدكم قميص نصها مشلوعه وايدي على جرح قرب متني فوق صدري صادني بسكينه من جنت اتلاوة وياه وعاده يصير المختل قوته اضاعف قوة الاصح .. - روحي لبيتكم ادخلت مرة - يمه البنية خايفه شسوة بيج هذا جاوبت اني -كلشي ما سوة بيها خالة اني راح اوصلها كرايبنا هي حطت ضهرها بايدي من غير ما المسها مقوس ايدي خلفها وهي مشت وما زالت ايدها على خدها -وين بيتكم مشت ما حجت وهي تبجي - عمو لا اطلعين بعد وحدكم للمدرسة اذا بيتكم بعيد خل والدك يوصلك او اخوج وكفت تشهك و تفرك بعيونها شهد-بابا ميت - اها ... الله يرحمة امشي لا توكفين احسن وانت عبايتج توها انتبهت على نفسها عباتها متربة -شنو سوالكم قبل لا اجي - ركض ورانه وخفنا وردنا نرجع للبيت وكعت واني اركض بالفرع واجيت انت كل كلمه اتكولها تتبعها شهكة خوف .. دخلنا فرعنا السابق وكفت بالتحديد كدام بيت ابو خليل انوب مشت اشوية و وكفت كدام البيت الي كنا مأجرية -انت اقارب ياسر -أخوية ! -ادخلي ادخلي .... اليوم غيبي باجر خل اخوج يوصلك -مريض اخوية دخلت وتركتني مذكر ضربي اله وجواية احساس غريب قريب للندم اعتصر گلبي هذا الموقف كما تدين تدان يا ياسر اتعرضت لخواتي وخوفتهن اجه من ياخذ دينه منك باختك يا غبي بعدها ما اعرف ظل بالي عليها رحت لبيت ابو المجنون واشتكيت منهم واخذت والدي وياي ... وسولفت لهلة على البنات وشنو كان ناوي يسوي بيهم ... أبوية كلمهم يطلعوه من المنطقة الحبس ما يفيد يشرد .. رحنا ورة ايام مرة ثانيه اخذ والدي رجال من المنطقة وهم كعدو وياهم الى ان قبلو ياخذوه مصحة .. بعدها بشهرين اخذني اخوها لمنطقة صحراوية واتعده علية !! تركت شغلة الثارات خوفا على خواتي ومسحته مسح من المنطقة ولهذا اليوم ما شايف اني ام عيون خضر ، اتعمدت هالزينب تصعد الي ثاني يوم جايبه تليفون فاطمه سالتها وهي اتكول راح اراويك صور - شنو فاطمه يمنا -اي اجتي -همزين اليوم جمعة اكعد وياها - داوكف قبل لا اسلم عليها دشوف تليفونها صور عقد رق رق - كعدت تراويني كلهم محجبات الا رقية كانت ملاك وكاعد بين ادين شيطان ..... ظليت مركز بعيون ياسر باحد الصور مركز على وجه رقية وهي مدنكه خجلانه ... نظرته مو عابثه ...كانت محتوية ابسط تفاصيلها ...اكدر اميزها اني شاب مثله باوعت لصورة لخ .. -منو هاي الهوسة زينب - هاي خواته .. كلهن مزوجات عدا ام عيون خضر شهودة ركزت بيها شكل ثاني مدري ناسي اصلا وجهه ظلت بس اعيونها ببالي ملونه ممتزجة الرقة و الشقاوة بنظرة اعيونها ولزمتها المتملكة لأخوها وبزاوية شفتها ابتسامة شقية رجعت التليفون لزينب -الله يستر عليها - نازكة حيل باوعت لوجه زينب اللعوب -ها ولج روحي منا زينب وهي تطلع دندنت -بين العصر والمغرب مرت لمة خيالة واعرفت فرسي وليفي لأنها شكره و ميالة ! سمعت صوت بابا يكول الها اشعندج هليام كله ويه اخوج هااا -ها هيج هيج بابا وهرولت خايفه منه شصعدة عليه دخل بعد ما دك الباب وأستأذن هاي عادته -اتفضل بوية عدلت كعدتي بعد المقدامات ما تخلو من اقوال النبي عليه افضل الصلاة والسلام كالي بيتنا اجوه شراية ...ما بقى شي على اكتمال بيتنا الجديد ، ما ناوي تخطب وحده من بنات اعمامك او اقاربك -بوية اني اريد وحده مثلي مكملة - حقك ، بس تدري ببنات عمك ابو كرار بعد السالفه الي صارت امك مراح ترتاح وياهن تدريهن بس هنه مخلصات والغريب لا يغرك كلام الامثال مال بس اشر تلكه ، ترة بالواقع تحفى الا تلكى بت حلال تقبل تعيش على محبة الله . هسة صارو يحطون شروط تكسر ضهرك كأنه الزواج تجارة والعياذة بالله - بوية شرأيك اخطب رضيعة ياسر صفن بوجهي - بوية اني ادري بعدك شايل بخاطرك لان وافقت على الولد واعتقد لهسة گلوبكم مو صافية - لا ابد ، لو حاقد عليه لهسة ما انطيه اختي على جنازتي ، بس مااكذب عليك مو هلكد مرتاح اله -وتاخذ اخته! بعيونه نظرات شك -اي بوية .... هيج اضمن لرقية وهمين والله بوية احطها بعيوني مو ناقص اني اخذها بعناد اخوها ، لا والله بس بعد هي انسب شي الي حاليا..... -يصير خير .. ▪︎ زينب صعدت لمرتضى ونزلت ارجع تليفون فاطمه الها وصلت لغرفة امي ردت ادخل سمعت فاطمه- كلش حزت بخاطري من كالت الي مرت حماي امي-خاف اتريد تخرب بينكم هاي ردت ادخل عادي انطي فونها واطلع بس توقفت ايدي عن فتح الباب من كالت فاطمة- لايمة هو من زمان ماخذ موقف من زينب هسة اخوه يلح عليه يكله لا شوف غيرها حيل حزت بنفسي اشبيها اختي انوب حتى عمتي اتكله خل اخوك ياخذ اخت مرتك اشبيها يكلها لا شوفي غيرها انوب حتى ما كايل الي عرفت منهن الزمت من كتفي ايد انحطت عليه واني اصنت على امي واختي حاطه اذني على الباب ، التفتت لأنه ابوية نازل وعاكد حواجبة عليه - زينب يا زينب وتالي وياج -ردت انطيها فونها .... دخلت للغرفة ركض انطيته الها وفلتت ابوية معصب ، واني هم كنت حامية بداخلي كبرياء مجروح ، اشبيه وما يريدني لأخوه ؟ رحت لغرفتي دمعتي بعيني ، شنو شايف مني سيد محمد وهيج ماخذ موقف ! انوب هذا منو اخوه ، بس لا ابو لحية؟ ، مرتضى دخلت ببالة شهد اضاهر ابوية كلم ياسر عليها وحطيناهم بموقف لا يحسد ، لا تكدر امه المتكبرة ترفض ولا ياسر هم رحنا الهم اني وفاطمه وامي ورقية ،طبعا الكل متبوش الا اني ! يمكن اريد اثبت لنفسي اني عندي متنفس حرية حتى لو واهم وبسالفه تافهه مثل البوشية على الاقل! وصلنا للمشخاب وبصراحه شي ثاني عبالي عرب ريف يعني ، طلعت قضاء واحلى شي بيها حقول التمن و النخل اكو اراضي مهجورة ما بيها زرع سألت بابا عنها ليش هيج ، كال هاي بسبب الدولة التعبانه ما توفر للفلح اقل الامكانيات ، -زين هاي المزروعه الي فتنا بيه قبل شوية شنو ؟ - هاي اصحابها يعتنون بيها عناية ذاتية الي عنده بس -زين عبالي ما بيها حدائق فتنا من يم حديقة ابتسم وكال - لا بوية قضاء هاي كلشي بيها مستوصف ومدارس و خيرات الله بس هسة شحت المحاصيل اكو اهواي ناس بطلت تزرع بسبب عدم الامكانيات سكتت وره مده هم سألته عن نهر ممتد شفته اول ما دخلنا -هذا شنو اسمه بابا شط لو فرع نهر بابا ؟ جاوب- هذا نهر المشخاب بوية من فروع نهر الفرات -هااا رقية-نهر الفرات اسمه الثاني دجلة مو بابا تنهد وكال بيأس -نسيتي بوية ماخذته بالجغرافية العراق بيه نهرين دجلة والفرات ، اتصل بياسر ... وصف النا بيتهم بالضبط وين ..وكفنا كدام قصر ..اه اي والله قصر نزلنا من السيارة والباب انفتح طلع النا ياسر ... سلم على والدي وعلينا . وصل لرقية انطاها سلامها مع ابتسامه كاسرة حدية وجهه ، دخلنا لبيتهم واستقبلتنا اختهم كوثر دخلتنا ، اتلكتنا الام بالاستقبال بوجه يضحك اني ظليت صافنه على لبسها بنطرون كابوي تسعين مع قميص طويل تحت الورك مفتح من الجوانب و من غير ردن جواه بدي كريمي بلون وردة القميص الحني . والشعر ذيل حصان تحت الخصر والذهب يلمع ! استحيت من الجبة النيلية الي تحت العباتي ! الغريب هالمرة ترحب وجها يضحك ! اجت كوثر جايب صينية حطتها ، على الطاولة وراحت جابت صينية مثلها هم حطتها وراحت جابت صينية عصائر بكؤؤس و بيهن قصب . من كملت كامت اتحط على طاولاتنا صحون الكيك القطع المحشي والعصير من شكله مبين فرش امي مو من النوع الي تحجي اهواي ابسرعه دخلت بالموضوع اهنا دخلت بيبية شهد ام امها وسلمت وكعدت تباوع لرقية كملت امي كلامها - ابني موظف بدائرةال *** - عمره ٢٨ سنة ومهندس اتعرفون وانتم شفتو صورة بالهول (صورة تخرجه كبيره معلكه بالهول رغم بابا مكان رايد اله هندسة ، لكن من تخرج كبر صور وحطها والحلو بالموضوع يحجيها هسة بفخر لأقاربنا ابنه مهندس !) دخلت علينا شهد ، شعرها لمتنها ، بني العيون خضر وهذا شي مميز عدنا بالعراق و الوجه بياضه على قمحي يعني اني ورقية ابيض منها ، بس هي قصيره وناعمه حيل وجها طفولي تبين طالبة اعدادية بيها كمية براءة مجملة وجها حيل حبيت تفاصيلها نزاكتها من كعدت ، حسدت رجلها الي بيها حجل بيه ورد صغير ذهبي ، اذنها الي بيها ثقبين وزوجين تراجي ، ثوبها الصيفي السماوي لونه قصير تحت الركبة مع سترة كابوي بيها رباط من اسفلها رابطه الجاكيت فوك خصرها الي لابسته بكل اريحية كحلتها الي بعينها ! حمرتها الورديه ... حاجبها المنتوف بطريقه بناتيه بحيث محافظه على ثخنه بس بطريقه مرتبه ،حسدت كل تفاصيلها ! آخرهم تليفونها الكبير الي حطته على الطاولة وتباوع لوالدتي بكل ثقة وتبتسم بخجل طفيف لايگ على ملامحها امهم مبينه طايرة طيور ومتغير باسلوبها ورة ما امهم انطت القبول النسائي المبدئي كوثر كالت تعالي رقية حبيبتي اراويج بيتج فاطمه - اكوم وياها واني هم نبزت كمنا بقت بس امي اول ما دخلتنا لهولهم الي بكد استقبالنها واعرض بالمساحه شفنا ياسر كاعد على القنفه وكف النا واني أسأل وين ابوية ؟ فاطمه نزلت البوشيه ورقية هم نزلت اني مديت ايدي رفعتها الها وهمست -لج رجلج هذا فد خجلت صارت طماطيه نزلت راسها وهو اعيونه ولا نزلت عنها خلاها اجر البوشيه مغطيه وجها اخته راحت شو ما فرتنا بيتهم ياسر - اراويكم بيت اختكم بالمستقبل القريب فرنا المطبخ يخبل كبير يمشي كدامنا ويلتفت على رقية الي مبوشه اني وكفت يم رف جوة الدرج -هاي شنو الكتب واو فكرة حلوة رفوف خشبيه تحت الدرج هم تشغل المساحه عجبتني شرأيج فاطمه خلي بابا يسوي النا مثلها ببيتنا الجديد وكفت يم الكتب اشوف شنو يقرون كتب دينية على ادبية على عناوين كتب برمجيات ، سالته- صدوك انت داومت ببغداد مو قاتلة الصمت والجمود فاطمه ساكته اكيد سيد محمد محرم عليها اطلع صوتها تهي بي ! كال الي - اي بالمستنصرية ردت - جنت بيها من جنت سكتت واني مبتسمه متذكره الماضي هو غلس رحنا للغرف اشر عليهن من غير ما يفتحهن لامه وخواته ولخواته الخطار حاطين غرفة طلعنا على الحديقة الي داير مداير البيت والي اتضح هي جزء من بستان من نطلع من الحديقه نلكه نفسنا داخل بستان نخيل واسع ...والقصر لجده طلع سالت على تنور طين بالحديقه الخلفية -كال هذا اهنا مرات تحب الوالده تشوي بيه على الحطب او تخبز حسب الرغبة باوع لرقية وكال -لا تخترعين ما تخبزين بيه وغمز درفعي الغطا .. اني نبزت - رقية تموت بالزرع ترة .... اخذها راويها البستان من خارج فاطمه -تعبانه زينب مبيه جاوبت-احنه ما انروح اني هم تعبانه جريت فاطمه جر وهي اتكول لج اشلون وحدهم من رجعنا لامي بعيونها تسألن عن رقية جاوبت -ظلت اشوف الزرع يوم سكتت امي كل ظنها كوثر الي وياها ▪︎ ياسر طلبت من كوثر اطلع الي رقية تارك الشيخ ابوعلي بديوان جدي وخالي بگلبي شكرت ممتن زينب من صرفت اختها وراحت تاركه يمي الحمامة الوديعه القاسية ظامه وجها بس اختفن طلعت اديه من جيوبي لان اجه وقت عملهن و كفت يمها وخرت الغطا عنها اتلكاني سحر اعيونها الخفي رفعتها عنها و زحت البوشيه عنها كاضها بايدي - رقيتي كافيج تشويق عمي احتركت مشتاق لعيونج الحلوة ما عونت اصير حلالي ومالي حتى انسحر بيها واذوبن انه عطشان نظر منج ابتسمت خجلانه -يحلات خجلج يحلوة يكيمر السدة هذا وجهج شنو مغمسيه بحليب وهيجي ترف رايب تعالي اراويج خيرنا اخذت ايدها منها ...حسيتها ارتبكت ويحلات ربكه البدايات - بت الشيخ ماكو جواب منها - يا بت المومن رقية - ها وكفت بنص الدرب ما واصلين سياج البيت - وفيت بوعدي واجيتج ... اريد أسال سؤال والله عليج صارحيني صفنت بوجهي - مرتضى اذاج من شافج ذاك اليوم ؟ -شنو ها ظلت ترمش برمشها الطويل -ضربج من شافج وياي من انطيتج رسالة - ما فهمت ! بس مرتضى ما يضربني ما يضربني اهه ضحكت بخفوت - تعالي ليش اتفركين بأديج دتعالي اخذتها بين النخل مشينا .. وكفتها وظليت اتمعن كل شبر بوجهه - رقية -ها -رقية - ها سمعت ترة -رقية -ها نزعتها الجف (الكف ، كفوف سود) - اني احبج ابتعدت خطوة عن كدامي وخجلت - رقية تحبيني ؟ انت انتظرتيني ؟ لو لا مجرد ماكو قسمه مناسبة ؟ - ها اني اني احب كل الناس...ما اكره احد ضحكت - لا تراوغين وكولي انت تحبيني لو لا - اذا انت حباب احبك اي احبك احبك كالتها بكل بساطه طالعه من ثغرها خلت ثغري تشگة ابتسامه تارسه وجهي وك گلبي يتنفض وينبض بقوة متروس بالعشگ .. - احبك مثل ما احب مرتضى هو هم حباب الابتسامه اختفت و اعتلاني الغضب الغيرمبرر من ذكرت طاريه عضت شفتها وكالت -عطشانه هههه عطشانه خل نرجع -انه سگايج ! (ساقيك) سويت منيتي عافص (لازم بقوة) خدودها الاثنين بأيدي بارز كدامي شفايفها اروي عطشي و اسد جوعي بيهن انه ما بايس حرمة من قبل اخذتني الفطرة بلمسهن ، مدا اضوگ (اذوق). مدا ارتوي !؟ خفة لمسي الهن ما نفعت وياي كمت ابوس بقوة مثل نحلة تاخذ رحيق الزهر ماصته بقوة تسولف حرمان دهر تركتها اتنفس هوى ريتها وخشمي على خشمها ناخذ انفاسنا من بعض - ر رجعني .. ما سمعتها ورجعت عليها ازوع بوساتي على وجناتها الطريات على حنچها (ذقنها )على جبينها وخشمها عضيته من ارتفاعه و نزلت على الشفة راجع الهن بشغف و رغبة نيران سائلة اشتعلت بوريدي مو دم . همست بصوت مجهد من اللذة -احبج احبج لج طعمج يغري ولا ودي اعوفنج انتبهت عليها كانت ترتعش ومنتفضة - بيج شي رقية - هاي هيج اسوي من نزوج سؤالها صهر گلبي - لا اكثر كانت اعيونها مقابله اعيوني اني منزل راسي وهي رافعه راسها واثنينا نلهث - اذا تحبيني اثري على اهلج نقدم الزواج ها اسويها لو لا ! كلت واني اشاقه وياها و اعدل شعري وانطيتها بوشيتها لانها كانها خايفه مدري مرتبكه خجل ناوي نرجع - ميخالف ابوسج لو خوفتج بس ردها خبلني -بوسني دعوتها فقدتني العقل والفكر اخذتها ممصدك ما شايف وشاف ، جاهل بالعشك ودخل يخربط حروفه حطيتها على صدري اتلمس ضهرها وكفتها كدامي حطيت بوشيتها ولزكتها ورفعت عبايتها جريت ايدها وحده منهن انه منزعها الجف الاسود رفعتها جدامي امتصيت اصبع اصبع من جفها اليانع ودخلتهم بالجف ماخذها للدار لكيت اهلها يردون يطلعون اخذوها وراحو ، ريتني مأخرها بلجن يطلعون ويتركوها ناسيها يمي ! طلع من بيت جدي ابوهن و ابتعدت سيارتهم عنا ....واني طالع بين النخل اعاين عليهم وايدي تتلمس شفتي انه ضكتها ! المحبوبة الي ملكي مالتي هاي جنت مستبعدها ! ، اجتمعت باهلي والغصة بگلبي من شوفت شهد كاعدة ومرتاحه وامي اسولف عن التفاصيل ولازم اكول لعمامي وانه صافن على حال امي اشلون تغير من ابنهم خطب بتنا ، مهندس و عايش بالمدينه بمركزها وخريج هذي المواصفات الي تسعى الها لشهد اتكول لا تخيب مثل خواتها تاخذ برة السلف واحد مثقف مثلها بتي تعبانه على نفسها كيفت حيل بيه وخلتني بموقف محتار شهد برغبتها وفرحتها ... انوب جدي هم كيف نوسع نسبنا ونكثف علاقتنا بيهم اكثر .. كلهم موافقين وحده الي داخلي كان معترض و الگشة (القشة) الي جسمت (قصمت) ضهري من كالت امي اذا ما تنطيهم تحكم على خطبتك بالفسخ ترة اهانه الهم ينطونا واحنه لا ولا تحجج بالدراسه ابو كالك الولد ينتظرها شنو حجتك رادو بس خطبه وحجز ... رحت لغرفتي وانه اكول انه تعبان تعبان حيل ... شصير لو فرحت نفسي بشي وعفت القلق ، خل اعوف موضوع شهد يمشي وين ما يوصل انه تعبت واريدن رقية يمي و شهد انه مقصرت وياها ، بلجن يرعاها ، احاول اقنع نفسي بسه انه داخلي القلق ذابحه مدت راسها شهد وهي لازمه الباب -ادخل -ولا اتبطلين هاي العاده جم مرة دخلتي وانه انزع ملابسي -ههه انت ما تبدل عادتك وتقفل الباب -دشي دش عليج جني مخبلج شرايده -ههههه والله مرات من تقفل واتكول كلام حيل عربي تقفل -دنجبي يلا هيجي احسن الج - هههههه اشبيك عاكد حواجبك -ما بيه -لا اني ادري انت اشبيك جا انت اذا اتعرفين شبيه ليش جايه تسألين - ياسر ... انت زعلان مو -شرايج ....تدرين شنهو بينا وافقتي اعليه - وافقت عليه لان هو الانسب الي ! صفنت عليها ودي اكوم اشبعها كتل غاير حيل غاير من تحجي واتكول موافقه - ياسر راح اسولف الك سالفه سولفت الي شي طير عقلي كمت غضبان واكف -لج متعرض الج مخبل وتوج اتكولين -جنت مريض ....ياسر -ومرتضى وصلاج (وصلج ) للبيت وما اتعرض الج -لا لا والله وين بالعكس خلووق كلش جان واهلهم خوش ناس كالتها بترجي حتى اوافق لهسة ما منطي اجابه رسمية وكفت يم الباب وكالت صدك انطيت التلفون لزينب ترة لأن انت اخذتها وما رجعتها الا من اجو يرحون -اووه نسيته همزين انطيتيه المغرب طلعت من غرفتي والشياطين كدامي ترفرف دخلت اعليها چانت كاعده تقرة -شهد هم اتعرض الج مرة ثانية مرتضى ورة ما ساعدج هااا انطقي لا تخبليني عودك هو بطل وظل يشوفج حاله هااا وكفلج يم المدرسة - لا لا والله ابد ولا شفته واكفلي بيوم بالعكس -جا اشلون عرفتيه ابن المومن هاااا بلعت ريكها بخوف من عصبيتي - شفته يمشي و يه زينب بس والله ولا رفع نظرة عليه ولا شافني يمشي مدنك وما بيوم شفته يم مرستنا ....بس اكيد اصادفه احنه كنا بنفس المنطقة وترة حتى قبل لا يساعني هو وجه كان مألوف عليه لا تنسى كان جارنا من كنا عايشين ببيت خالي يا الهي اجيب طاريه بأعجاب نصت صوتها وبرقتها المعهوده كالت -ادري بيك تخاف عليه لا عود يسويها وحده بوحده ، ترة هو مثقف مبين ما اعتقد تفكيره سطحي هالدرجة بس اخته بالكعده كالت شارط الا مخلصه دراسة .. .. ايام ويلحن ويصرن اعليه كرهني بالبيت وانه مغلس رغم ثبرني انه اهنا كل يوم ازداد تعلق بيها هالرقية شنو حجي شنو أسلوب عليها خابرتها ب الليل مثل كل يوم - اشلونها العشگ مالي - حبيبي هههه اشلونك ...اشلونك -فدوة رحت لليعيد الكلام -اكلك اكلك -كول يا گمر - ا ا اطلب منك طلب -امري .. - اشوكت....اشوكت توافق هاا -قصدج على اخوج -اي اي مرتضى خوش مرتضى - منو يشهد للعروسه - وا وافق ههههه وافق حباب هههه لا اهلي هههه يزعلون يزعلون اووف مرات يزعجني دلالها من تعيد الكلام بس والله اعشكها لهلبنت حتى من ادقني احبنها بزياده - شنو قصدج مسويها كصه بكصه مو ؟ سكتت اهواي و سدت الخط -نحجي رسايل احسن ياسر اختي يمي ما اريدها تسمع -لج موحلوة اسديه هيجي اقصد هيج بوجهي احاول احجي مثلها لانها مرة كالت ما احب لهجتك ! حباب احجي مثلنا اتعمد احجي لكنتي واصحح الها حتى تتعوداعليه -عوفك هسة من سدة الخط صارت من غير قصد ، اشبيه اخويا ها ترة اني هم ازعل والله ليش مأخر الموافقه ....ترة اخوية زينه الشباب والله -ما كلت شي عليه ترة -تصرفك وتأخيرك يدل ما عاجبك فجأ صار كلامها جاف وحاد اشبيها هاي ابسرعه تتغير -جا انتم هم تأخرتو بالرد اعليه جاري الكتابه الله يستر تأخرت شنو تكتب جريده - احنه تأخرنا الأسباب واضحه انت تأخرك ماله سبب ، بس هسة عرفت اضاهر اتريد تردها النا....على العموم اني حيل زعلت منك عبالي تحب اهلي على محبتي ونسيت الراح بس هي المواقف تبين النوايا تصبح على الخير اروح انام كتبت وانه مشتعل كلشي ولا واحد يعوفني بنص النقاش لا وبعد تكتب جرايد كلام مو صحيح وترسل وتشرد -اوكفي ولج -لا تكول ولج وتصبح على خير -رقية اوكفي لا اتصيرين منفعله اتصلت بيها ما ترد انوب غلقته جننتني حيل الصبح صبح شعلت تليفونها شعل ما ترد تاليها رسلت الها -عاندي يا رقية نشوف منهو يعاند اكثر ! عفتها لبستها ايام وما انطيت رد لهلها معاند وياها دز عليه جدي ، كال ابو علي ابو خطيبتك خابر يريد خبر منا ابني تأخرت وافقت لا ازعل شهد غصبا عني ما اريده ولا اطيقه اشلون انطيه اعز ما عندي....قلعتها من لحمي كلمه موافق قلع امي كيفت وشهد اشوف الفرح بعيونها من غيرتي كلت الها ماكو زواج الا بعد التخرج ! ، مر اسبوع وهاي القاسية ما اتصلت ولا بادرت انه رجالها غير اشوية تراعيني وتتصل ماكو هي غلطت بحقي سدت الخط وحجت بعصبيه و طردتني ونهت الكلام ... وراحت هسة وافقت على اخيها ليش هم ما بادرت ؟ انتظرت يوم واثنين زياده صارن ١٢ يوم انه ما سامع صوتها وعايش ومتغذي على رسايلها القديمه تالي الليل من اجي للفراش تعبان من يوم شغل ، اقرة وانام اعليهن ما كدرت اتحمل....واتصلت بيها العن بشوگي لعن ردت بلهفة عكس جفاها وقساوتها - الو رقية- الو ياسر اشلونك -لوني مثل ماهو ابيض انه وگلبي ابيض موش مثل فد ناس گلبهم بلون شعرهم -هاا شنو لون شعري اشبيه اضاهر مسمعت الشبكه ضعيفه -ما اشتاقيتي يا ظالمه ....انه طلعت احبنج اكثر من ما انت اتحبيني -احبك بس كالتها بحزن -بس شنهو ، ليش ما تسألين - غصبا عني - ها هيجي كبرياء يعني خل يفيدج سديت انه الخط واضحك على نفسي اشكد الحب صغرلي عقلي وطيرة الي رجعني مراهق خليتها تتصل الا ارتاح دليلي - ياسر انسى انسى الي صار خوش -ها ازعلين من غير سبب وانسى هيج انت شنو من گلب عندج -اني احبك نستني هلي بهاي الكلمه الي انسطر بسمعها بردت زعلي ونسيت ! انه جنت بس رايد اسمع صوتها و ما اعاتب ،عاتبت...اسد الخط واروح ما رحت انه احبنها فوك حبي لنفسي عنادها وعصبيتها المفاجئة و تحديها الي صار متنفسي بالهحياة كعدنا كعده زلم و انطينا كلمه الهم و صارت الخطبة لكن لهسة ما عقدو كالو من ننتقل لبيتنا الجديد ، بيوم عزمني عمي على العشا ...رحت ولكيت عديلي زوج اختها وقت الصب هالمرتضى تارك ابوه يجيب الصواني الا دخل سبع السباع مرتضى سلم علينا وراح لغرفته انه وكفت يم باب الاستقبال اول ما يجي الحجي شايل صينية اخذها منه وارص الاكل بالسفره ..وابنه الصغير و ابن بته ما همه دزهم يجيبون روبه ورجعو رصوهن بالسفرة وكعدو اجه حضره جناب مرتضى بسيت بيتي وكعد يم والده بكل برود يرد على أسئلة ابوه من كله -بوية خلص المشروع الي جنت مشارك باعداده -لا لهسة وراح يتوقف سال سيد محمد -ليش -بوك سيد بوك وسرقات لا تعد عاف اللگمة مادخلت زردومه الحجي وكال بقلق وهو يباوع لابنه الي ياكل ببرود -خو ما عليك انت مسؤولية ابني - اي اني اكيد وياهم - لا حول ولا قوة الا بالله انه ما اعرف ليش اعيوني ازوغ اعليهم وعلى علاقتهم شال لحمه وحطها على صحن ابنه قدم الخبز كدامه وهذا ياكل بكل برود ولا حاس متعود ما يدري ، انه مستعد ادفع نص العمر والثاني منه بس اكعد هاي الكعده ويه ابوي ! التمس حنيته و امجد حضوره احنه اهنا بس الزلم ماعدنا نساوين تاكل ويانه اضاهر يتحرجن مني وحكهن انه بعدني ما ماخذ بتهم ، كمت اريد اروح ،الاب كال اوكف بوية اصيح الك رقية سلم عليها راح ودزلي هاي المصيوبة المصوبتني بدلالها بست راسها وشميت عطرها ورحت ، حديقتهم هاي موش بستانه حريمه ▪︎زينب كنت اريد اغفي وكالعاده كعدتني رقية خطيبها اتصل وتعالي وياي -خرب لج عوفيني نعسانه احجي وياه وحدكم -ما فهم نص حجيه حجية حبابه حبابه كمت اتكرظم -لج خلي خصوصية الكم اووف الرجال بدده يطلع ع الترابي وياج بالكلام مال مخطوبين والله استحي ظلت تبوس بية وتتوسل حطيت مذكرة ورقية على الميز ورقية فاتحه سبيكر و شيكول هو اكتب كلمه كلمه رد عليه و رقية تجاوب لانها بطيئة الفهم وما اتريد تتفشل مرات اخبث وازعل عليه اقصد اخليها هي تزعل عليه حتى يظل يرضي و واعززها عليها ... احلى شي من ضغطت عليها وخليت رقية ايام طويلة ما تراسله ، توسلت الها لخاطر مرتضى وهي تحبنا تحملت خطيه وصرت اشوفها حزينه تعبانه بس ما كسرت بخاطر مرتضى مرات اخجل وما اريد ادخل توصل بيها تبجي ولا ترد عليه من غيري اتكول ما افهم اول اتصال بينهم هم كامت تبجي اشلون ما اعرف احجي اخاف يقلد لان يعيد ، اني كلت الها عيدي عادي علميه عليج واني اساعدج بالكلام مؤقت ، شو هاي اتعلمت اني وياهم لازم انوب كلش صارت اذا عاندت تكعد تبجي دموع وتقهرني عليها حلفتها ما تكول لامي فشله واني مرات ضمري يوجعني اريد أبطل اسمع كلامهم ما تخليني اتعلقت بيه حيل ومرات اكول اني ما حاجيه وياه مجرد اساعدها طبعا بابا موافق على فكرة التليفون لرقية لانها هاهي راح تزوج ولازم تتعرف على خطيبها فادتني هاي الشغله ودوم العب بيه واكنك بالسيم ومرفه عني ،رقية بس وقت الاتصال تستخدمه مو هلكد بيه ع كد الاتصال تعرف ، مرات يرسل رسايل بالنهار واني العب بالفون اجاوب طياري عليه واغثه هههه احب اغثه الصراحه حاقده ع الزلم بس مغثه خفيفه يحسبها دلال بيوم هم كاعده عايفة روايتي و اكتب بالقصاصات بسرعه البرق رد للأستاذ خرب حظه اشلون يتغزل - رقية شنو تحسين من ابوسج هزيت ايدي وما كتبت اريدها هي تعبر صفنت عليه وهو يكول الو الو دنكت كتبت بقلة حيلة - ما اعرف كالتها رقية مع اعاده كتبت - لا تسألني هيج استحي نزل ع الترابي كتبت -بعد الزواج ياسر لا تنزل كلش وياي محبيت كالتها رقية بطلوع الروح وبكل فهاوة خلته يشتعل وكال تمام احترم طلبج اشكد احب شخصيتج ! خلصت المكالمه ورقية موتتني اتكلي خطية خاف زعل هي واسبوع افرغ ونطلع طلعتنا الي دوم تتأجل ، وهي من هسة اتكول حبابه روحي وياي ! - شروح ولج ما عليه بس قداوي يرافقكم وعادي واذا هو يعرف طبعج ترة اشبيج .. ، اني وعماد من نشوف بعض نتكلم بالنظرات ومرات نتكلم كلام عادي سؤال ع الحال بس العيون غير كلامها ، لحد ما بيوم بابا عزم نسابته محمد و ياسر من راح ياسر طلعنا يمهم كعدنا كلنا اني اخر وحده اجت كعدت يمهم اقلب بفون رقية وبابا كال - ماجد خوش رجال وسيد ينشهد بأخلاقه وهذا سيد محمد هم يحجي ويذكر واحد بالكلام الطيب ، عرفت من كلامهم اخو محمد مرتضى - هو خوش انسان وين نلكه مثله اهنا لفتو انتباهي اشبيهم بس يمدحون بيه امي -والله يا ابو مصطفى من غير ما تجي امك العلوية اني اكلك ننطيكم وين نلكه مثلكم وانت ابنا والله احسبك بغلاوت فاطمه ظليت افرفر بالوجوه اكو واحد متقدم لوحده بس منو همه يحجون كانما البنية موافقه و يحجون كامو بالمهر وامي تكول كبع واخذ وابوية يسأل عن اكتمال بيت العريس ومرتضى مكيف و خططو و زوجو و وكلهم انطو رأيهم الا اني زين اذا اني العروس هو محمد مو جان رافض لو هاي فاطمه ذلتني وفاتحته بالموضوع ! زين ليش امي تكولك وين نلكه مثله وشفايت النا كبع واخذ زينب عادتها اكثر من مرة طايرة طيور شنو هو هيج اهواي عليه ؟ انتظرت بابا يكول شي يدل على بعده ما موافق او ماما اتكول نسأل الابنية ماكو محد جاب طاريي هاي فاطمه شو تباوع الي ومبتسمة اني مو عود يابة صديقتها واختها ليش خلتني بهذا الموقف وما حاولت ولو محاولة تكول الي عمي تبلغني مو تاخذ رأي بس ابلاغ ابوية كال -بتنا زينب راح ترتاح وياه اشوكت ما ترتبون اموركم بلغونا واحنه اهل ماكو داعي للرسميات - بابا اني ما موافقه اذا اني العروس ما موافقه ولا راضية اذا قصدكم اني عني كلتها واني منفعلة بشبه نتر باكي مهظوم طلع صوتي وركضت متحملت نظراتهم المصدومه من النكرة الي حجت بشي كانما يخصهم ما يخصها ! صيحت كدام هذا محمد وطلعت لغرفتي ابجي يتبع | ||||||||
|
| |
|
10-07-19, 03:23 AM
| #8 | ||||||||
| مراقبة عامة ومشرفة منتدى الروايات المنقولة
| #شيخ_الشباب #من_كتابات_زهراء_العراقية #البارت_السابع صباح الريحان - قيل عن الأخت إنها اليد اليمين ، ضلع ثابت لا يميل ، قطعه من الاُم تورد لك الحياة . ▪︎زينب رحت دخلت لغرفتي وقفلتها على روحي وجهي على الباب محتضنته و انحب لدرجة اعصاب جبيني وعيني وجعتني حيل اندكت باب الغرفة علية -افتحي هذا صوت بابا اه مو وكت الحساب امي كالت -يمة افتحي افتحي عيب الي سويتيه كدام الرجال كنت مادة رجليه و مسنودة على الباب كمت فتحتها ابوية صار بوجهي و ينظرلي بتمعن ضربني كف رجعني للخلف لزمته امي بس متأخرة -لا ابو علي مو هيج لزمت خدي واني منحنية همهمت بخوفت حاد وما ظال عقل براسي - ليش انتم عائلتي ! لزمتني امي من امتوني -اشبيج ولج اشبيها عائلتج ..... جنا ندنش..... الرجال توه طرح السالفه على ابوج واكيد نسألج..... فشلتينا والدي سكتها من كال الي بغضب - غبية من يومج صغرتيني كدام الرجل بصوتج العالي وانفعالاتج الي مالها لزوم.......رقية وفاطمه ما زوجتهم الا ما الحيت بأخذ رأيهن سفيهه لو صابره من طالع مهما كانت رغبتنا بالولد قوية مراح نجبرك عجولة ورعنة طلع بعد الرزالة واني كفي انشل على وجهي ما نزلت ايدي ، تركتني امي وهي تكول - هو انت فايتلج واحد مثله انكلبت السالفه عليه شو !؟ زين سيد محمد مو يكولون من الاهل ليش هيج بالغو من انفعلت كدامه ؟ رحت غسلت وجهي بعد ساعة بجي ورقية ماكو ورجعت لكيتها داخله كعدت على فراشي دمعت واني اتذكر الراشدي(كف) الي اكلته ، ما هانت عليه روحي اني مغلطت ، اني حاولت انفي تهميشي عبالهم استحي انطي رأي بوجود محمد وهم بدو رأيهم عليه ومشى الامر مو من حقي اخاف لا يجيب اخوه ويعقد عليه عايزة معقدين اني لو اعرف انتحر ولا حياتي الثانية هم يم واحد يشبه ابوية لكيت نفسي رجعت ابجي ، وادين حاوطتني وراس انحنى على متني هذي ريحة رقية هي وتبجي كالت - لا تبجين لا تبجين اني هم ابجي ! رفعت راسها عني وانطرحت ظلت كاعده تمسح اعيونها وتباوع الي وشفايفها مبرطمة ، جريتها حطيتها على ايدي و دنت راسها على صدري ورة دقايق نامت بحضني ، واني صافنه على السكف اباوع للمروحة تفتر وتفتر نفس المسار ماخذه ونفس الفرة ، يمكنها مثلي مهما حاولت انعوج عنهم دا يحطوني وياهم وافتر مثلهم نفس مسيرة حياتهم ، حبسة ظلمة حتى بطلعتهن غواش البوشية يظلل الرؤيا ظليت احوس مكدر انام الافكار تزاحمت ،كمت مقررة اجيب رقم عماد ! صعدت لفوك وكفت يم باب غرفة مرتضى ، اسمع صوت التكيف مالته يا ترى نايم لو لا ، يلا اذا صاحي اتحجج بأخذ شاحنته فتحتها ، دخلت شفت مقتدى نايم على ضهره وخالع فانيلته ... ومرتضى مثله ونايم على صفحته ، اتخنست بهدوء لسرير مرتضى باوعت اله ، بسابع نومه يا ربي التليفون يمة على السرير يم ايده والفلم مشتغل والجهاز هم على ضهره واكع اعتقد مشغله للسكف والهدفون واحد بأذنه والثاني واكع مديت ايدي على التليفون وهي ترجف لزمته ، وقفت الفلم بطرف بهامي ، ملصت السماعة اتحرك مرتضى خلاني اجفل ،نام على ضهرة ، لزمت التليفون كام يحك بشعر صدرة الخفيف كلت كعد بس لا اكدر اهد التليفون ولا اخذه جمدت خوف ، هدأ وما فتح اضاهر بعد نايم ، جريت التليفون وطلعت بالممر ، ادور بالسجل مالته ، عزة اثنين عماد همزين كاتب اسامي الاباء ، خذت رقم عماد حطيته بتليفون رقية ! و رجعت حطيت الهدفون و رجعته ع الفلم بس وقفته ، وطلعت واني انزل على مهلي لا اوكع الاضوية مطفية ، غرفتي مفتوح بابها معقولة رقية كاعده ؟ شهكت من شفت بابا واكف يم فراشي وايده بجيب كلبيته اندار عليه وكال -اجيتي من فوك ؟ تلقائيا التليفون صار ورة ضهري دنكت وجهي وهزيت راسي بالا - نامي بوية لا ظلين سهرانة حط ايده على متني ربت عليه وراح دخلت بفراشي واني تسأل شجابه هيج وقت ، ها وهو اصلا ما يفتح باب احد ويدخل ؟ مو من عوايده يطمن على رقية هيج ساعة ؟ ! ممم ، نمت الصبح ما طلعت اتريك مستحية على زعلانه منهم كلهم صارت ب ١٠ دخلت رقية بصينية ريوك - اكلي يا حنيتها اسوي لكم بيض واتحط بحلكي ، البيض جان طيب حيل بس ما مديت ايدي ما اريد اوسخها حتى لا اطلع ؟ وهاي تضحك مكيفة كل ما توكلني واكل من ايدها و اشرب جاي .. خلصت وراحت تغسلهم دك تليفونها يمي ، فاطمه صحت لرقية ، اجتي هي فتحت خط وحجت وياها رقية- زنوبة تريد تحجي وياه هاج اشرت بايدي بلا ملحكت حطته يمي وراحت ، -الو كلتها بزعل -اشلونج ولج - لوني فاهي وباهت هو الي يعيش يم حسن(ابوية) يبقى يمه لون حتى الالوان حرام تضهر بالوجه ما دريتي -لج هاي كلها رد على كلمة اشلونج ! المهم حبيبتي يروحي ليش البارحه عصبتي علينا طبعا حبيبتي و روحي كالتها بعصبيه وزعل - مغفل وكاعد بينكم العفو منكم اسفة اعتذر يابة بعد ما انطي رأي بأموري الي تخصني اسفة -احد كال الج مناخذ رأيج ؟ - كلهم كوم عندي وانت كوم اشلون اتخونيني وما تكليلي ع الاقل ما اتفاجأ فاطمة-لج هو فاجئنا كلنا اني شعليه والله ما ادري -فاطمه ترى ادري كلشي ، ادري اخوه طالب يخطبني وهو كان مموافق ومبينه كلش زين ترة انت دافعته ومتوسله اله يمكن -يا يا لج اشمدريج ، هاي امي ما تضم سالفه - لا مكالت هي ،عوفج هسة منها وكولي شكال عليه رجلج من طلعتو -مكال سكت ،والصبح كال سدي الموضوع ويه اهلج وراح اسدة ويه ماجد -ها خوش اي سدوها للسالفة -راح اتندمين البارحه من كال محمد فد فرحت ، ماجد يتوالم وياج -اي كلش ههههه -لج عنده بيت وسيارة وحالة ميسورة الحمدلله و فوكهن شهادة والله حباب اني معاشرته سنوات قبل العزال ليش رفستي القسمة ، - شنو الفايده ما تنعم بخيرة بعدين اني لا تهمني مادة ولا مناصب ، اني اريد واحد يفهمني و يكون لين مو متشدد - ماجد مرن مو متشدد -ههه نفس العبارة كليتها عن محمد مرة وهه شوفي مرونتة ، بطلج من وظيفتج وحبسة ويه جهالة -لج كم مرة كلت الج اني تركت التعليم متعب والوظيفة اضاربت ويه البيت ما كدرت اوفق بينهم اووف انت كلش قافلة حبابه ، وافقي واني محمد احجي وياه لج ما يتعوض والله - لا عيني ما اريد سيد حقنه -يا -اي السادة مزاجهم صعب بعدين انت اتعرفين وين هواية منسم -هواج مو مضمون لج صارلة سنين كلشي من ممسوي بارد حيل عماد -انتظرة ميخالف ،اني احبة -بكيفج انت صاحبة الامر و اتعرفين مصلحتج بس اذا فات الفوت ما ينفع الصوت! الضهرية طلعت و اتغديت وياهم عادي ولا كانو صاير شي العصر صاحتلي امي ،وهم فتحت الموضوع و كلش رفضت ،تحول رفضي عناد تحدي امشي كلمتي عليهم هيج شي ولا فكرت بضروف العريس انرفض رفض قاطع ماجد و مرة فترة واجاني هم عريس ، خلفة بناء ورفضت ناسورة عرسان وانفتحو عليه اعتقد لأن رقية انخطبت والناس عرفت العائق راح وشو يشوفون شكلي يمكن جذاب ، عكسي ! اشوفه بائس! و تعليمي مقبول اعدادية ، و عمري عمر زواج ٢٢ عام هم رفضت منتظرة عماد ..... انوب اجاني ثالث خريج ما متعين ويشتغل بأجر يومي بس اهلة حالهم زين وهم رفضت وامي بدت اهواي تلح وتحجي عليه ، اهنا بعد انزال خوفي وكلت اتصل بيه واحاجيه مباشرتا افضل صارلي مده من اخذت رقمه و اتردد واخاف احجي وياه بس يلا لازم اشوفه بعده عند وعده اني وفيت الوعد وصمدت مع ضغوط امي عليه اتصلت بيه بأحد العصريات رن فتح خط ، -الو -الو عماد ؟ -نعم منو حضرتج -اني بت عمك زينب سكت اعتقد تفاجأ اتخيلته رفع الجهاز عن اذنه ويباوع للرقم - زينب ، اشلونج -الحمدلله -امنين تتصلين -انت شلونك -ماشي حالي ، بس كولي رقمن هذا رقمج ؟ عمي اشترة الج تليفون كالها بنبرة متخوف -لا هذا مال رقية اهنا اجتني مكالمة اخرى باوعت هذا ياسر عزة لا اسبب للبنية حرج ، -اكلك ياسر غير مرة اتصل ! - شنو ياسر ؟ -عفوا مو والله دك ياسر خطيب رقية هسة دا يدك وخربطت - سديه زينب ولا تعيديه عيب من البنية عزة سد الخط بوجهي اشكد عيب صحت رقية هذا يلح ويلح ياسر اجتني ، - من جنت اتصل بعماد هو يدك وهسة لح على ما اجيتي فاهية من الخوف انطيته رفض بالغلط وهم رجع يدك - عماد ها عماد ليش -بعدين اكلج رجع رن وردت وهي متعوده تفتح مايك اجاني اصياحه -ليش صارلي مده اتصل ماكو هااااا ويامن جنتي تحجين كل هذا الوقت -مو اني زينب اشرت الها لا تكول ملحكت -ههه زينب والله تتصل ببن عمي -انعل يومج هسة ؟ اختج شعدها تاخذ تليفونج وهذا رقمج الخاص شعدها اختج تتصل منه هااا هسة صار عنده لهجته صياح بصياح عزة اني من يمي خفت رقية دمعت وشفتها ترجف رقية- ا ا اسفة وهو ولا يسمع يعيط و يرزل و نار صاير -اليوم احرك الدنيا لج جايج جايج للبيت والرقم راح اغيره الج اسيف عند ابن عمج ، هاي اختج الا اكول لابوج عليها !! سدة واني كمت ابلعم بعد اريد اتن١فس مكدر -لج رقية اصرفيه هدية الله عليج لا يجي ولج هدية عفيه هذا نار طلع كامت تبجي كلش واتكول راح بابا يموتج اشلون بينا وما تكدر حتى تتصل من الرعب -حبابة اهدي واتصلي لا تخافين عفية اتصلي هدية -ما كامت تبجي بصوت -راح يكول لبابا عليج اااي خرب هاي كلش من خوفها عليه انهارت بالبجي وما تفيد اخذت التليفون واني رنيت عليه انطاني رفض .. كتبت وهاي اول مرة اكتب كلمة حبيبي بصورة مباشره اله كنت اكتبها بورقة لرقية اعلمها -حبيبي اهدأ والله اكسر الخط وجيبلي غيره وبعد ما تنعاد بس لا تجي حباب ماكو رد وتمت الرؤيا - ياسر اذا تحبني أهدا لا تأذي اختي ترة كانت تتصل على مود يجيب الها غرض حباب بطل عصبية - وينك شنو صدك جاي ، ! -رد مو راح اموت من الخوف والله اهنا بهاي الرسالة اتصل فتحت مايك وكعدت يم رقية التبجي -الو ولج وينج ليش خايفة لعد اذا يجبب غرض الها وعادي هاااا طبعا ميانه بالكلام بحكم خطوبتهم صارلها مده شهرين وهو هسة معصب هاي اول مرة هيج يرزل رقية مسالمه بصوت خشن سال -ليش تبجين ، رقية اسكتي جاي اسوق جاي لبيتكم ولج الو لا تبجين سكت و اسمعه يتنفس بصوت -يلا اسكتي يلا حبيبي اسكتي كافي لا تبجين يعمر ياسر ظل يزفر نفسه - ما احجي اشبيج صدكتي ، كلمة وطلعت بساعة عصبية يلا حبيبي سكتي سكتت اشوية بطلت عويل وظلت تنشغ -ها زينه هسة ام دميعة -خفت........خفت.....على ز زينب - گلبج جبير يبت أجلاي بس ليش اتضوجيني ، ما اريدن رقم امريتي يصير عد رجال - و و مرتضى -فطيرة مرتضى اخيج ، بس ابن عمج لا -صدك انت جاي -اي اشوية واوصل اراضيج -خل اكل لبابا هاي المخابرة اني ولا دخلت بيها ظلت تمسح بوجها وكالت اغسل واكول لبابا راحت اني اخذت فونها واتصلت بعماد -زينب ما يصير تصلين ، ترة اخوج يمنا - عماد بعدك على وعدك ؟ ترة اني جاي ارفض اهواي عرسان لأجلك بس اريد اعرف منك مباشرتا خابرت - ما توقعت تجيج جرئة اسويها واكول الج اخوج يمنا ما تهتمين -اكيد مكاعد يمك ....بعدين هاي اول واخرة مرة احاجيك مباشرتا من غير وسيط وسببت احراج لاختي ، حتى بس اعرف راسي من رجلية - ما ادري اذا كل الابواب مسدوده - ماتدري -زينب انتظريني .....لا اصيرين انت والدنيا عليه....بس اني ما واكف متحنط راس الشهر راح ابدي ابني فوك السطح غرفة تنهدت برتياح -انتظريني بت عمي -خوش احذف رقم رقية و اني هم راح احذفه -صار غلقته واني ضايجه حيل من كلمته شنو ما متوقع مني اتجرأ واتصل لعد هذا مو مستقبلي ! شنو لعب غير افهم راسي من رجلية مده صارلة مغلس ولا تارك خبر يم خواته واني اتعمد احجي وياهن ع العرسان الي يجون ، اني تاركه التعليم يعني هو كاعد للزواج ما يصير هيج يعلكني من غير تثبيت كل مده ولو يكول بعدني اريدج حتى انتظر حذفت الرقم دخلت عليه رقية فرحانه وكالت بابا كال موافق وطلع وكال لمقتدى يكعد يمه مرتضى هم طالع رحت نطيت لغرفة ماما ، ماهي بيها همزين ،اخذت قلم حمرة احمر من بين اربع اقلام قديمات حيل بعلبة جكليت على ميز تواليها وكحلة ورحت لرقية لكيتها بدلت دشداشه عادية ! -مو كلتي الي بابا طالع وكال لقداوي يستقبله رحت طلعت سيت برموده الي اشتريناه من رحنا للطبيب وكلت الها تلبسه -استحي استحي -لج همه هذا لبسهم العادي يحظي هذا زوجج بدلي وافرحي كدامه بعدين والله مستور البدي مالته طويل لبسته بتردد وفرح طلعت حلوة حيل حليت شعرها ومشطت الها ورفعته ذيل حصان وظل على تحت خصرها يتلولح حطيت حمرة امي و كحلة وهي ما تكول لا لأن بس اتكول اخزرها -استحي طبعا كلام رقية يطلع بارد وفاهي والكلمه اجر بيها بطيئة بالكلام -لا تستحين اصرفلج مقتدى اندك الباب وفتحه قداوي اجه كال النا اجه، اني انطيته خمس يشتري اله حبشكلات وياخذ الباقي اله كيف وراح نسى وعده لابوية !؟ امي دخلت سلمت عليه اني اشجع برقية ومشت كدامي مثل الثلاجه العطلانه ادفع بيها من ضهرها وكفت يم الباب ومتردده شلعت قلبي الا دخلت عليه ▪︎ياسر الحجية طلعت الي واستحيت اشوية اتحججت مريت من يمكم وكلت اسلم -شنو هاي الزحمه ابني تقصد علب الحلويات الي حطيتها على الطاولة - زحمتيش اني لو حاط بحسابي اجي جان مريت بالمخزن جبت تمور و لبن بس يلا خيرها بغيرها دخلت رقية - اشلونك -ماما كولي السلام عليكم باوعت لامها واستحت -السلام عليكم - قطعة نستلة حليبية وتمشي رديت عليها وانه صاد لكل شبر بيها لابسة الي تراك اصفر واسود والجدم طالعه واصله للركب وضامتها بجامه سودة -يمه جيلي ماي لرجلج اااخ يا عمة ودي ابوس راسج على هاي الكلمة(رجلج) لا لا بطلت لو ما كايلتها احسن التفتت ام الحسن والكصيبة تضرب بجوة الخصر ضرب ويه لفتها المرتبكه السريعة راحت وانه عمتي تحجي وياي واعيوني على الباب اجتي و مدت الكلاص كدامي فيضتني تندي عليه وهي اتمده الي ، اخذته منها وصكيته كله گلبي محتر ومتلوع يابه انه ما شايف لا تخبلوني كعدت يم امها ام علي - اوضاع الانبار شنو ابني -والله يعمة الاخبار ما تسر غير تكوم الحجية ، دكومي رحمه على جدج انه تدودهت ،مهما كان انه بيتهم وعيب جدام المره اباوع لبتها فمضطر ادعي التركيز لامها واغض نظري الحراك عنها كامت الام ورة نص ساعه انه طفرت من مكاني يمها -جا لو ادري هيج الزعل يشوفني مشاوف جا دوم بعد ازعلج واجيج ارضي -لا لا تصيح تصيح وتعصب عليه بعد بعد حباب ، حباب اخاف اخاف والله شفتها تفرك بايدها يالله شنو هاي من بنت مزيج من العصبية ! والهدوء والرقة والترافه والبراة - انه ترة عصبي بس الله وكيلج بس يفوت وكت اصير رماد رفعت حنجها عليه -انه اخوف ، حبيبتي انت جلاي (الكليتين) هزت راسها باي -بس من اصيح اصيح عليه تخوف ، بست خدها ويا محلى الاعتذار -اعذريني بت جلاي - يعني يعني شنو جلاي -الكلية يالترفة -الكلية هاي اليي دخلوها طلاب مفهمت اشلون اني بعدها اني ما داخله كلية؟ -هههههههههههههههه لج طلعتي حشاشه والله ههههههههههه كلياتي وجعني من الضحك خرب حظج ضحكت على جديتج بالكلام اكثر من التحشيش سكتت اني عيوني مدمعه ضحك لمحتها مدمعه وبمرطمة -هاي اشبيج ، شنو بعدج مهظومه لان صيحت حطيت ايدي على متنها ،مقربها الي وبست راسها من جانبه - عمي انتي بت المدينة حيل ترفة طلعتي اشلون بيج انه كل عيطه اعلى من الي سمعتيها اليوم على شهد اعيط وتضحك بوجهي وانتي بصيحةاوحيده هيجي تنهظمين بست خدها مرة ثانيةارضي بيها عبالي ما افهم للنساوين ، طلعت اعرف اسكت والله وحاليلي زعلها البوسة الثانية مجانت صافية النية خدها شفتي تروح وترجع مثل الفراش السفنج يترافتج يحلوتي -اكلج انه بديت احتر الاحسن اروحن لا ادك الناقصة ببيت الرجال ما يصير دايس عتبتهم وهمه موش اهنا -ليش ليش مشغلين سبلت ههه سبلت -لج انه بس انت اطفيني - اهفيلك !؟ -هههههه كافي تحشيش ولج صيحي امج خل اروح راحت اصيح امها واي ويه كل خطوة لرجشلها اكول افيش يربي الكصيبة مكانها خطر ! طلعت بيها لحمه مريتي ومربرب همزين طلعت من بيتهم وانه و مخنوك ما اريدن اطلع ! ، ورة فترة خالي اتخربط واني خفت حيل هذا بمعزة والدي ، رحت فاتحت ابوها بالموضوع صار ثلاث اشهر على خوطبتنا واريد اقرب موعد الزواج لا خالي كلش تسوء حالته و ماضامن العمر خفت ينشمر العرس لموعد بعيد اذا صار قدر اتفهم والدها وكال انشالله يصير خير بدن يحضرن للعرس رقيتي وامهاتها اهنا احسها اشوية حيل خضعت الي وبداخلي شي ضاج اريدها تتحداني احبنها من تتحداني وتزعل وتشاكس ، صارلها شهر وديعه زياده عن المطلوب و اعترفت الي ترى مو دلال هي طبيعة كلامها تعيد بيوم اتعمدت الاشيها (اتحارش بيها حتى تعصب ) وعيبت عليها بشي هنه البنات ياخذنه على محمل الجد ، وهو موضوع جسمها كلت الها سمينه وهي ضحكت كالت اضعف ميخالف ميخالف اقلل اكلي منا للعرس ! انوب ضجت عليها وحسيت بالذنب اتمنيت تتعارك وياي مثل قبل وتفرض رأيها سدت الخط و راحت رحت اتعشه ورجعت الها رسلت بالواتساب .. - ها حبببتي اكلتي تأخرت الا كالت -اي طبعا اكلت لا يكون عبالك اثرت بيه وصدك ما اكل -هاي شنو ولج لهسة اذكرين -اي عيني اذكر اصلا جسمي حلو مو سمين رشيق احسن منك بلاعيمك طالعه لكدام ماعندك لحمه ركبتك جلد ضحكت عليها اي هيج اريدج اداهريني ، ثاني يوم رحت للمخازن وكعدت اعاين سجلات دخل عليه مرتضى -السلام عليكم انه كاعد ورة مكتبي ،كمت اله من ورة المكتب تصافحنا وكعد كدامي .. -تشرب جاي لو بارد ؟ - لا ما تقصر ....اني مستعجل ما مطول ما اخذ من وقتك سألته - خير مرتضى صاير شي - انشاء الله خير اجيت أسألك انت تعرف حالة رقية جاوبت واني اتلفت على العمال - يا خي اجيب طاري اختك اهنا؟ مكان شغلي - اولا ما كمت اصيح بأسمها انت ورة مكتبك كاعد .....ثانيا ما اندل بيتكم اني هي مرة رحتله بقلة صبر - اشبيها - ياسر .....كلها ايام واختي تسكن ببيتك واصير نسيبي - قابل هسة مو نسيبك انه مالچ اعليها (عاقد عليها) تنهد واعتصر كفه سبحته الزغيرة(الصغيرة) وكال - الراح انشاء الله انسى وفات ؟ -شتقصد - ياسر فاهمني وفاهمك ....ايامنا الراحت انتهت دمنا راح يختلط و اصير خال اولادك وخال اولادي الوحيد انت يا ياسر راح اصير .....نسيبي وساتر عرضي مثل ما يكولون ..... اجيتك حتى اذا بالگلب شي خل نطلعه هسة ونبدي من جديد ويه زواجك - الله يحي أصلك ....و يرحم البطن الي جابتك سكت مدنك وكال - اكيد اختك ام رقية(كوثر) كالت الك حالة رقية بس للتأكد اجيت اني هسة افهمك حالتها بالتفصيل واكيد انت اتعرفت عليها من خلال تواصلكم وان كان قليل لكن هي تبين ابسرعة واضحة حالتها - حالتيش اهنا اجاني صبي طلب مني اشوف دين فلان جاي طلبت منه يصرفه لغير وقت -اي مرتضى شنو جنت اتكول - على حالة رقية .... رقيتنا على البركة يعني حالتها لا تتحسن ولا تسوء ...عمرها كله ومن هسة اكلك هاي شغلة بالوراثة عدنا خالتي مثلها ... عدهم بطئ بالفهم والتركيز وعلى البركة من اهل الله تحتاج منك طولة بال و خلك طويل توني انعجبت بتصرفه وكلت حياه الله جاي يصفي كلبه وياي وهسة طلعت نواياه جايني يخرب مثل النسوان الجبانه يخسأ انطي اختي على هالتفكير الخايس مثل الحية يبخ سم جا انه ما حاجي ويه اختك شهرين وياها لنص الليل عقلها سوة عقلك ! حسافة وجهك الرحماني الي جايني بيه وانه الي ما انخدع انخدعت وكلت صار رجال جاي يتبارة ذمة وياي لأجل اخته كمت من كدامه و دنكت عليه همست -حياك الله نورت .....من رخصتك ما فارغ ! رفع نفسة وكام وصار وجه بوجهي - اني اترخص.......وارفع الزحمة راح مرتضى مفور دمي اتصلت برقية اسولف الها سوالف اخوها - ترة ، صحيح صحيح اني هيج .- اسكتي ادافعين عنه ، انه اعرفنج فطيرة گلب بس هو ما شفتيه وصفج بصورة ولا يكلك اخته صاحلي واحد من العاملين ، -بعدين ادك عليج هسة مشغول ، رجعت للبيت بالليل رحت لغرفة كوثر - اكلج كوثر صدك عود اهل رقية كالو شي الج عنها - هاا مثليج وشوكت !؟ - من انطو الموافقة - لا شنو مثليج يعني ما افتهمتك - لا هيج هيج عفتها ورحت لا اطلع سمعة على الابنية يم خواتي بسبب اخوها اتگرب موعد العرس اهنا دزو عليه عزموني على غدا ابوها وامها و مرتضى كاعد ابو علي - ابني بعد اسبوع وتاخذ رقية لبيتك - احطها بعيوني عمي وصيتك مرفوعه - ترة رقية انت عرفتها بعد بس هم لازم نفتح هذا الموضوع وللمرة الاخيرة.....اكلك ابني انت شيال لهذا الحمل ؟، اهلك خو ما فارضها عليهم - عمي انه شاب وازوج حالي حال هالشباب الحمل للرجال - بوية انت تحجي كأنك ما تعرف حالة البت يا ابني البت على البركة .... بلغة الدكاترة حالة خاصة ..... عدها بطئة فهم وقلة استيعاب ......وهم بكل أسف اكلك مأثر على طريقة حوارها ما تسمعها من تخابرك تعيد ؟ اني اريد القي عليك الحجة صفنت بكلامه كله صحيح انه ملاحظة اشوية عدها بطئ بالاستيعاب بس مو مرعب لدرجة مرض اضاهر يخافون حيل لا ما اتحملها هو ابوها حيل يعقد الامور و وهواسي وحيل مدللها ، اني حاجي وياها البنية عادية بروح ملائكية ارفس النعمة بأيدي انه احبنها هيج وهي مو مهبولة ▪︎رقية زينب من اتصلت بعماد و ياسر صيح عليه حلفت ما تاخذ تليفوني بعد ولا عليها بياسر ، من اجه يمنا ياسر وطلع رحت الها وشكيت - شو يضحك على على كلامي كلامي .ويكول اتحش اتحشيين كمت ابجي ، ابجي كدامها - حبيبتي يتعود عليج بالليل اتصل ما قبلت تكتب الي هو يلح بالرسائل يريد يسمع صوتي قبل لا ينام وهي متقبل ، خفت هم ما يعجبه كلامي ويضحك عليه مثل العصر كمت ابجي اني ليش هيج ؟ ليش مو مثل زينب ذكية وما تخاف اني اريد ياسر يشوفني ذكية مسحت رأسي زينب - رقية انت مو تحبين ياسر - اي اي - احجي وياه مثل ما تحبين اني عبالي اعلمج اشلون تحجين هيج عادي حالي حال الخوات من يعلمن خواتهن بس الشغلة زادت عن حدها اتعمقت حيل بيكم واني احسب نفسي وياج شي واحد بس ما يصير بعد لهنا وانتهى مشواري وياج ، اعتمدي على نفسج و خلي لنفسج مساحه وبنيها وية ياسر خلي اعتمادج عليه - شنو يعني -اوه كله هذا وما عرفتي قصدي -بعد ما دخل ........ رقية الخلاصة كرهت نفسي واني اكله حبيبي بأسمج فهمتي -مكلتي مكلتي اشوكت اشوكت - يوووه انت شنو ما تقرين الرسايل مو العصر حتى اهديه اضطريت اكله بعدين تعالي خاف يتعود على اسلوبي خلي اسلوبج يطغي اني معليه طلعيني من السالفه واذا ما عجبه الباب يفوت جمل ! عفتها وقويت گلبي واني اعتصر بروحي ودي اكوم الها اسكتها مثل الطفل الي تريد تمنعه من شي ، همه دوم بعد الاتصال يحولون رسائل منا من ينامون حتى لا يضايقوني هو هيج يفكر ما يدري هي عايفه فراشها وتتوسل بيه افهمها كلامه ودقني خلتني اجر التليفون لان متفهم كلامه حتى بعد الشرح مع انو هو عادي ... سولف الي اقصد الها عن اصدقائة و هي ما فهمت الموقف سألته اني اذا كان عنده صديق من بغداد واخذتنا السوالف عن ايام دراسته ببغداد ظليت أسألة عن النظام اهناك اشلونه اقصد نظام الجامعات وسألته يعني شنو نادي الصيد وشنو تجمع الكلية حسيت بثكل على متني اباوع والكه رقية بسابع نومه..... رسلي موقف هو مسويه بالنادي مضحك محرج وتعارك و ضارب ومضروب اخذتنا السوالف الى ما بعد التخرج .. التاف وياي بالسوالف الى عملة ، حياته كانت صعبة من تكعد الصبح اكعد افهمها اشلون جده قسى عليه من مرتضى شرط عليه يعوف المنطقة اني مجنت ادري بالقصة كاملة وعمله الصعب ويه جده واشلون اطور عجبني أصراره حيل اتمنيت لو ينطي ذرة منه لعماد ،اخ يا عماد ! ما حسيت على نفسي والا الساعة ب ٢ بالليل وبعدنا نسولف رسائل -تصبح على خير نعست - بعد وكت حبيبتي .....اه اشوكت اتنامين بحضيني رقيتي سديته وما اجاني نوم ... كعدت ثاني يوم معصبة اجتني رقية - زنوبة سويلي شعري كباية عالية - رقية ولي عني ومنا وجاي اسوين كلشي لنفسج فاهمه زجرتها و رحت اكلت وما دخلت للغرفة وبس تجي تكعد يمي اكوم من المكان الضهر دخلت اريد اصلي لكيتها على سجادتها تبجي همست -ليش تبجين كامت الي -زينب اني اسفة اسفه انت ضايجه مني مو مو!؟ اني شسويت الج لا ازعلين لا ازعلين احبج والله واذا على على الكباية والله والله بعد ما اريدها اجيت اضربها راشدي وعصرت ايدي مكدرت هزيتها من متنها - لج اني بديت اميل لخطيبج افهمي عاد مو الكباية السبب افهمي - شنو يعني -اه اه ياربي عفتها وطلعت للعصر راضيتها كلت الها مزعلانه بس ما انطيتها وجه ...ظليت كالبه خلقتي عليها ، وهي كامت اتخاف من زعلي جابت التليفون وكالت بس من ما افهم اكتبي الي حبابه - رقية بالقران اكل لابوية عليج اذا جيتي اطلبين - ها ليش واذا يعني يعني قصدج هو يكتبلي ، بس استحي منه هو يردلي والله استحي من بابا -اه ياربي اخذ امانتك وخلصني ياربي موتني جلطة و خلصني اكولها واني ميته ضحك خليتها تصفن عليه واني اتخيل بابا يرد الها خرب عبالها عادي ومباح ، صمدت من شفت انذار يخوف لشي غلط ديصير بدواخلي .....اني افهم الي دا يصير وياي ناتج عن كبت تعبير مشاعر او كبت تعبير رأي او لان ما عندي شخص يواطي افكاري اني احب عماد وانتظرة و انشالله احقق احلامي وياه ، خليتها تخاف تجيني تطلب اصيح عليها وازعل و كامت ما تبجي لان اشوفني اظل يوم كامل ما احجي وياها قللت اتصالاتها .وراسيلها انعدمن وياه واني بالليل من اتخابر اروح يم مرتضى اخذ حاسبته اتفرج لو اخذ كتب من كتبه اقرة بيه ، هيج مرت فترة وقرب ياسر موعد العرس وحدده بدينا بتجهيزها ، وبليلة ما رضت تطلع من الغرفة تتعشى شو دخلت عليها لكيتها ضايجه حيل واتريد تبجي رقية-ما عاجبته ما عاجبته يكول سمينه انت لا تاكلين -يشاقه ولو شقة سخيف بس يشاقه اعتقد -لا لا هو ما عاجبة جسمي. حتى من اطلع بثوب حلو ابسرعة يروح - لج لا تبجين يااا خرب بس هالمرة خل اتوبة خاف هذا ياخذها عاده حتى لو بالشقة لازم ما ياخذ عليج هيج ويحترم مشاعرج اني رديت من راسلها .. وهاي جانت اخر رسالة مني اله ، حجزنا بدلة الها واجتنا امه و تعاندت ويه امي اتريد بالبيت وامه اتريد بقاعه امي- ليش القاعه يا عيني ام ياسر- حتى بناتنا ياخذن راحتهن ويركصن و يهوسن لاخوهن - لا دخيلج ركص وغنى ما انريد احنه نسوي مولد والبنية تتبرك بيه بالبيت - صدوك تحجين عيوني انت هذا وحيدي والله لنحط ديجي ونعلكها بعرسة وانريد قاعه حبيبتي معازيمنا اهواي واعتبريها هدية مني أجور القاعة ولو هي عرفيا على اهل العروس الحنه بس يلا لخاطر نفرح - عيني شنو لازم الحنه هو مولد بيوم العرس ويجي رجلها ياخذها من بيت ابوها - لا يخيتي اريد حنه وعرس لوحيدي وخل ببالج بقاعه بيتكم صغير خلن العقده بالمنشار وما تفاهمن لحد ما راحت امه خابر رقية كال سوالف النسوان عليج حليها انت رقية معرفت شسوي وما تعرف شنو يعني قاعه وعلى مبدأ امي كالت ما اريد اغاني ... وتعال يا عمي شيلني وصلت السالفه لابوي حلها كال خلو الحنة لأهل العريس بقاعه وتردن اتروحن او لا بكيفكم والعرس علينا ببيتنا تطلع العروس واهلة يجون زوافيف ثاني يوم رحنا اني ورقية وفاطمه وامي وبابا ودانه زرنا الامام علي طلعنا للكوفة ... وكفت وكلت الهن خل ناخذ صور اني وفاطمه ورقية اني ضحكت هنه بس اعيونهن طالعه وكلت تفاااااحاااا ومديت بوزي اخذتنا فاطمه للمحلات وعفنا بابا وماما اهناك فرينا المزارات بيومها ، واخرها كان مرقد الشهيد الصدر الثاني و اولاده كعدنا اهنا المكان صغير اني وامي والبنات جانت مرة اسبح واتباوع كلساع لشقانه اني وفاطمه ناصبات على رقية سألت -انتن خوات كالن اي سوة فاطمه ورقية كالت وانت امهن جاوبتها امي بهز راسها ظلت مركزة بوجه رقية - يا يمة طريقج كل عثرات دربالج منه رقية -شنوخالة - لا تخافين يا يمة نيتج تدفع بلا عنج و الي يعثر طريقج ينصاب بالدنيا قبل الاخرة اني سألتها - انت تاخذين فال شوفيلي حظي الي ببالي يصير لو لا ظلت صافنه عليه وكالت - تمشين بدرب مو دربج طريقج صعب يا بنيتي اتعوفين الي رادج والي ردتيه وتحصلين مرداج واتخسرين باوعت لرقية وسكتت ما ارتاح گلبي لكلامها كالت اخسر وباوعت لرقية -تاخذين نصيب غيرج هذا المكتوب يا يمة وتباوع لرقيةبكل تركيز ابتسمت بشحوب واني اكول بگلبي دجالة وجاي تبرز عضلاتها كدامي واحنه كاعدين وامي اصلي وهم المرة بس تباوع لرقية واسبح لدرجة رعبتها بعد يومين بيوم الحنه امي راحت ويانه للصالون و خلصوها و دخلت ويانه للقاعه اطمنت علينا وراحت امي ما ظلت اني يحظي وين واشجابني اهنا ؟ هي بدت الحفلة والنسوان التلمع كدامي شنو لبس شنو فخفخه اني فستان وردي مال محجبات منغلق بس الصراحه عاجبني شو طلعت بس السان استحي اصلخ مثلهن وشعري كوته الي فاطمه شعري كيرلي مرول فوق متني هسة سويته ناعم وصل لجوة متني غطى بس رقبتي وبلا مكياج ... مجرد حفيت شواربي لا اطلع العكيد ابو شهاب بالجديد كمت اشوفها ، فاطمة طلت وكانت انيقة بفستان بلا ردن فضي وشعر محلول و هي متروس جسمها من غير زوادات شهد لابسة من غير هدوم حرام اتكي اطول من ثوبها الوردي وشعرها تسريحه ومكياج يخبل عليها صابتني الحسرة من عرفت رقية على صديقاتها بالكلية اني واكفه يم رقية واباوع الهن من كصتي كلهن ، رقية العروس الفراشة مودة بدلتها الليمونية كانت ام الياخة وبلا ردن اختيار ام ياسر هي اختارت بدلات الحنه ، ومكياج ناعم ما احتاجت لان معانيها تتجمل بالمكياج البسيط حلوة و ام العريس وكفت على ام الصالون اتكول الها لا تكثرين اسويه مال معدان فدوة هي حلوة لا تكبريها بكثرته لبست وردية ..... وبعدها سمائية جنت اشوفها طفلة وفرحانه بثوب العيد والاضواء الي عليها يارب ديم فرحتها...تضحك من كل روحها لبست صفرة ،و الجويتي ، و راهن ختمتها بكريمية بيها تطعيم احمر من التول تخبل صدر .. طبعا الحنة عبارة عن غنا وركص والمغرب فتحو البوفيه وراها المعازيم بدت تروح دخل ياسر مبتسم بقاط كحلي ... ما اعرف شعوره او شعورها شنو بس كانو عصافير بغير عالم بنظراتهم اجت المصورة وطكت وياه صور بجميع فساتينها هاي وراء الكواليس رجعت عادت البدلات وياه والحركات ارهقنها هي طول اليوم شيكولون الها تنفذ و ما تحجي رجعناها ورجعنا للبيت وكرايبنا ملتمات ... نامت حتى شخرت خطية من التعب الصبح اني رحت نضفت و حرت بالخطار وهي للصالون ويه فاطمه اجت الضهر وسوينا الها مولد .. يضم بيه اهلنا واقاربنا وصلنا للجلوة وبدت ملة المنطقة تنشد جميلة في معانيها. امينة في امانيها الجلوة عبارة عن وصلة بيضة وترش عليها الياس. واوراق الورد الجوري وشمعه تلزمها العروس ومع قرأن والملة قرت دعاء الها ، اني اهنا من حسيت كلشي خلص والحفلة خلصت الفرحة راحت اجتني نغزة گلب و خوف غريب ! ما اعرف اشبيه ودي الزمها وارجعها لغرفتنا ...امسح مكياجها ..اعيد وجهة طبيعي وكعدها يمي وانام مثل كل يوم اااه فد روحي اتهسترت واني اتخيل وحدها ويه اهلة ! وحدها وياه وحدها يا زينب اشلون ! احنه سوة من يوم ما انولدت اني ! اباوع الها وحده ثانية بميكاج عرس وبحمرة مارونية والشعر تسريحة حل مرول وتاجها يلمع .. البدلة بيضة وردنها تول شفاف كانت حلوة ونازكه كالو أجت الزفة صابني دوار وغثيان قوي وغواش تبع دكات خافقي ، جنت واكفه يم باب استقبالنا وهو دخل كدامي من الباب الثانية..... بين الشعور والا شعور رحت الها وكفت يمها واني بغير عالم شلت بدلتها و طلعت ... برنص وعلى متنها عباة ابوها البيضة مغطيتها طنشت فاطمه هي على اساس تصعد اني صعدت يمها والعريس بالصدر يم السايق مشت السيارة واني انهديت من دا اودعها اخر وداع كمت ابجي متحملت بصوت خليل - وين ماخذيها ترة هاي وينها المشخاب ياسر - اسكت انت عوفها براحتها اني انطلقت بالبيجي ياسر -زينب لا تخليها اضوج خليل - هاج ... مدلي علبة اكلنس مبيه ارفع ايدي اخذها -زينب اتفضلي سمعت ياسر يداهرة - لك كول الها خيتي اخذت العلبه خليل - زينب راح ادك الكم اغاني اتنسيكم البجي ضربه على متنه من عاند اني ضحكت من بين دموعي واعيوني صادته يباوع عليه خليل من المراية ودك اغاني ثولتني وصلنا للفندق ... واهنا المفاجئة... يتبع | ||||||||
|
| |
|
10-07-19, 03:34 AM
| #9 | ||||||||
| مراقبة عامة ومشرفة منتدى الروايات المنقولة
| #شيخ_الشباب #البارت_الثامن.... أنه بعـدك ماضگت غمج الدفـَو آرد اشمك من غمـيجك من غميجـك .! -مظفر النواب ▪︎ياسر كلها ليلة والثانية عروستي تنور الي الليالي ، جانت الليلة الحنة حلوه لكن هي من غير هاي التعديلات جمالها من النوع الهادئ الي يريح الگلب ويبهج الروح بدون بهرجة ، كضيت ليلة الحنة بعد ما طلعت من حفلة النساوين بالبستان والشباب ما قصرو وگرابتي ترسوة بيت جدي وبيتي هذا خليل كلف خوالي بنص بستانهم سوة الي حفلة نص الليل الا خلصت ، ليلي ما نمته وانه حاضن سيتها الاسود والاصفر الي طلعت الي بيه مرة منتظر خيوط الليل تنسحب .... الصبح هل علية مثل مصباح العيد لكن تزينها هلاهل جداتي ، خابرت خليل اكد عليه على حجز الفندق دخلت المطبخ هوسة وروشة بالبيت شهد -هلا بالعريس والله ليش واكف على صفحه تعال اسويلك احلى ريوك اشرت بايدي متخوف -لا دخيلج لا انه عريس ما اريد انام مسمم بالمشافي اتخوصرت - لعد غير اني ناذرة اسويلكم عشا العرايس وادزة للفندق - لا والقسمة الگشرة - تردين اتموتين مرتي -اها عيني من هسة صارت مرتك الاولى....وازعل اختك حبيبتك لخاطرها اووف يا مسكينه يا اني صدوك لا كالو الاخ اخو مرته لويت اذنها وخواتي كاعدات يتريكن يضحكن علينا امي كالت - ما جذب السانج يشهد ضربت شهد على متنها وخرتها عن كدامي ورحت لتوبة اسوي الي بيض ورحت لغرفتي ...دخلت علية توبة بالصينية - وجهك منور اليوم ابتسمت وكعدت على الكاع اكل كعدت كدامي توبة - اني شفتها بالحنة حيل وديعة وحبابه تحملت تدخل امي الزايد خطية اختارت تسريحه امي فرضت عليها غيرها وسكتت وكله صار وتم ما تفتح حلكها بغيرهن - هو ليش حبيتها تفهم بالاصول و مطيعة بس ها مو ضعيفة وكت اللزوم تهيج اللبوة گوية يا توبة حيل گوية ! - اها اني هم استغربت بس البارحه اضاهر خجلانه البنية بس اني كلت ياسر يرادلة وحده السان لبق وتعرف تحويه بس انت اضاهر تعرفها كلش زين اني شفتها مرتين بالمهر و الحنة ابتسمت وانه اكمل اكل ، اخذوني جماعتي خليل و محسن وصادق لحمام سوك خليل- دخيلك ابو عباس اريد اطلع اله وجه ثاني (ابو عباس المدلكجي ) جان يسوي ليفة كعدت على المسطبة واني لاف تحت خصري بخاولي وبدأ يحجر بمحجرة حجرية عتيكه والبخار من حولي ، و هذا خليل ناصب اعلية و ساعة يحجي ألفاظ شبابية وحجي مشفر هو و الربع عن مغامراتهم الي هي اكبرها تصجيمة ! لو لزك روحة بالنسوان ايام المراهقة من شافني متهني بسبحي كعد يلعن اليوم الي فسخ خطوبة من ورة عمته اخت ابوه و ام خطيبته كمت من يم المدلكجي اغرف من الحوض واذب على نفسي ماي شاورني خليل وهو ياخذ الطاسه مني - ولك والله العظيم اني غرت حيل اريد اعرس شنهاي هنيالك الليلة ليلتك راح ا.... - بسك ولك ضربته جلاق ودفعته - صارلي ساعه منطيك مجال جا ما اتروح اتعرس كاضك انه كامو يضحكون عليه خليل- عيب عليك يا ياسر تتزوج من غير ما تعزمني وياك اجيت اركعه بالطاسه وربعنا وكفو بنصنا يضحكون يفكوه مني خليل- ولك مو هيج قصدت جان خطبت الي وياك ونعرس سوة - طايح الحظ اعرف قصدك ابو كشة خليل-تقار من شعري ، واحنه نطلع من الحمام بوجوه وعيون حمرة من البخار سألته - جهزت السيارة خليل - اي وكتبت عليها اخذت الاحبها غصبا على اخوها -ايا ناقص لك تفضحني وتفضح الوادم خليل-جا من غيرتي شسوي وضرب قفى ايده يقلد صادق-والله نفسية انت لك راح تضرب الرجال عين خليل -عساني رحنا لبيتي وبوسط اغاني خليل الفاجرة والشباب بالغرفه وياه اصفك خالي الصغير يكبرنا ب ما يقارب العشر سنوات يلبسني قاطي واحنه ميانه وياه طلعت للمزرعة جدي بيها العشا سفر ممتدة و تتوسطها صواني تمن و افخاذ غنم اعليها و اولاد عمومتي تنكل الفواكه اعمامي اتكفلو بالعشا اعليهم وهم الي ذبحو الذبايح ..... جنت لابس قاط اسود و استقبل الناس ويه جدي اعيوني ادور خليل ماهو دخل وسلم اعلى الوادم بشعرة السرح واصل ويه ركبته وكالبة من كدام من غير ما ينسفط بشي يريد جدي ينحرة بنظراته ، قميصه السمائي المفتوح لحد صدرة والسنسلة تلمع شفته كعد يم جدي وجدي يهز بأيده ما عاجبه گربت ساعه طلعتنا الساعه ب٥ العصر عشينا الوادم من وكت لاجل نلحك مسافه طريق عدنا طلعت من غرفتي مرة ثانية مغير ملابس العشا ، الى الزي العربي ! لكيت جدي بالصالة واكف والزلم تارسة البيت اتگرب ليه جدي و باسني واتحاضنا جدي -كبرت يا ياسر واجه اليوم الي توكف كدامي عريس عدل غترتي البيضة ...وعباتي على متني طلع سبحة لونها اسود قديمة من كنت طفل لهليوم اشوفها بأيده أنفتضت أحاسيسي وثار عواطفي من سلمها بأيدي وكال - ما فاركتني يوم ، فال خير علية احسبها رديتها جدي- حشا ، حشا يا ابني ترد الكريم ايدك يابني احفظك سرك ، و راعي عرضك بسته من راسه ممتن اله بوسط نظراتنا انه وجدي و تأثير عواطفنا اعليها واضح ، ادخل خليل وهو يرجع شعرة للخلف - جا يحظي من عرس ابوي ما انطيته سبحتك جا عاد انطاها الي اني المسكين باوع جدي لولده الي مسطرين مجهزين للزفه وكال - اتعذروني ما بيكم واحد يشبهني حيل مثله يولدي العليم الله انتم ضوى اعيوني ، بس اني شفت روحي بطلعة ياسر ، يشبهني وانه ابوكم حيل هالسبط الوحيد عزيز وغالي رحت سلمت على خال خال وعم عم. والگرابة وجريت خليل جر واكف جدام خالي ابوه الي كاعد على كرسي يتوسله يزوجه اليوم ! طلعنا من المشخاب ل بيت المومن ماخذ بركتهم مثل ما يسميها ابوها بست سبحة جدي وانه اتعهد على نفسي أحفظ هالمخلوقة واحطها بعيني ،وصلنا بيتهم نزلنا الهم نزل كبيرنا عمي الكبير ، جدي ما اجه ويه الزوافيف ظل يم خالي ابو خليل لكن خوالي كلهم ما قصروا لمحت ابوها بلبسة الرسمي وعمامته البيضة مثل گلب بته ! وابنه مرتضى لابس قاط رسمي واكف النا يمه و عمها عمي الجبير سلم على ابوها وانه وراه حطيت يايدي بأيده وصافحته بست راسة باس خدي و حضني وخرني عنه ولزمني من اجتافي ما مهتم لعمي الثاني وراية يريد يسلم اعليه - اني انطيتك اغلى ما بوجودي يا ابني بركتي الي ويه جيتها حلت البركة عليه اول مرة اكلك هذا الشي ، هذا ابني(اشر على مرتضى ) كان واصل الموت مثل علي اخوه واليوم الي اجت بيه على الدنيا اخوها الله كتب اله الشفا -بالحفظ والصون عمي ودكيت على صدري ومديت ايدي لمرتضى الي صافحها ابسرعة مرتضى - مبارك عليك -الله يبارك بيك سلمت على البقية ورحت للداخل وكدامي ابوها سبقني .. شفته باس راسها .. وتركها الي ... جوهرتي ما كدرت اشوفها زين كانت ضجة والمكان مزدحم و هوسة نسوان يمي وانه الرجال بنصهن امها كالت بصوت عالي حتى يوصلني صوتها - دربالك عليها اوليدي اشرت على عيني وكلت بصوت سكت هوسة النسوان -بجفني ساكنه بنتج جا غير انه احبنها صارت ضحكة مدري ربده النسوان جنهن تخبلن وامها دنكت خجلانه اخذت كم صورة وياهن وبوسط غناء خواتي وكفت رسلان - مبروك ابن خالي اخذت كفي وادنت ليه جنها (كأنها) اتريد تبوسني لو لا رجعت راسي للخلف وخزرتها خلت ام العروس تصفن علينا و رقية تباوع الي برموش ترمش متعجبة اجت امي جرتها بخفه وكالت ببتسامه شاحبة من تصرف بت اخوها - اخته هذي رابيه وياه ام علي ام العروس ابتسمت ببهوت خرب عمي هاي شسوت انه اعلمها وكفت توبة وهي رافعه ايدها بنصنا وأصيح -ياسر شهم ياسر زين ياسر يحفظة الحسين والثانية اصيح نشكر من امها وابوها ونشكر من كال اخذوها شهد اتگربت منا وكالت لرقية -لج بنات عمج وحده بيهن كامت تحجي على حظج ما منتبها اني اخت العريس يمها ، مبينات يحبنج وغمزت الها وكملت -اتعجبن بأخوي الغيارات اعذريني بس الغيرة مالتهن خلتهن يطلعن سكتت شهد وامرت يلفوها الي مثل ما يلفون باگة الورد الياسميني اجتنا اختها زينب بعيونها دموع وكالت اني البسها لبستها وهي تشهك بس رقية كان مشايفة احد والابتسامة زايدتها بهجة مشينا ردنا نصعد كالو اختها الجبيرة ويانه بس شو غيروا الصغيره و كعدت يمها ما خلتني اكعد ! انه هم كلت احسن عمي ما ضامن هذا خليل اليوم حيل فلت عيارة يمشي ويصيح زوجوني ما اكعد البت يمة وما جذب ظني بس يبصبص الها من المراية وهي ولا معبرته فشلني وصلنا للفندق واهنا تفاجأت بحضور اولاد عمامي ! جدامي واصلين و الدفوف بيدهم نزلت انه وخليل جدام بوابة الفندق دكو الدفوف وسوي الي استعراض بركصهم وانه اتفرج وخليل وصادق دخلو وياهم رواكيص والحرس مال الفندق طلعو يصورون الهوسات . والنسوان نزلت من سيارتها تتفرج واتصور كالو الي نزل عروستك ، نزلتها و همه ورانه يدكون بالطبل والدف زينب -يالله هذا الي كان يسوق مخبل ضحكتي شكت وجهي من وصفته بالخبل يستاهل الغبي نسة الي حط عينه عليها وركص كدامها اجت اختها الكبيره وخرت الصغيره رجعتها للسيارة بأمر منها وهي الي صعدت ويانه و بيدها جنطة رقية وصلتنا للسويت مالتنا ،انه طلعت برة الغرفة تركتهن دقايق وطلعت ام مصطفى اختها وكالت اخذو راحتكم - اتعشو بالعشا الي حضرنا الكم هاي عادة لازم تمشي عليها .. نزلت بوشيتها وطلعت... رجعت لرقية اميرة وتوجت على عرش الملوكية اليوم بتاجها الي يلمع .. قطعة من الجنة الخضرة و كاعده جدامي تفرك بأيدها على سريرها ومدنكه وشعرها على زنودها مدري شعاملة بيه مخليته هيجي مترول اتقدمت اعليها - احبنج وانت خجلانه احبنج وانت زعلانه احبنج وانت اضحكين احبن دموعج عاشكج نه يالمصيوبة رفعت راسها - واني اني هم ضحكت بعيون دامعة فرح جنها مسوية انجاز اهتزت رقبتها و ذقنها رجف وياه مرجف شفتها الطرية خلت گلبي يضرب اضلوعي ضرب مخبول ، ذبيت الغترة والعباية وكعدت يمها - صرتي امريتي ، انسد باب اعلينا رقيتي اخذت شفتها اطمغ عليها ملكيتي ، رفعت وجهي عنها -اااااااه افيييش يا ريحة الجنه -يلا بطلتي كومي غيري وانه هم اريد اسبح واصلي ، تركتها تاخذ راحتها ورحت سبحت لبست سيتي البيتي وطلعت ، اخذت السجاده تاركها تاخذ ملابس اختها مطلعتهن الها وانه افرش سجادتي -افتحلج السحاب - فاطمة فتحتها راحت للحمام ابسرعه الباب انفتح وانشمر الفستان كدامي بس ايدها مادتها، وانه اصلي مردلي گلبي التخيل ، كطعت الصلاة ،استغفرت تاليها عدت وانه داخل اجواء طاعة للرب ، صليت فرضين المغرب والعشا ، وركعتين لوجه الله تعالى طلعت حاطة برنص الحمام اعليها -كعدت محررةشعرها على متنها غير مغسول على تسريحتها بس تاج ماكو -كومي توضي -توضيت كعدت يمها وحطيت ايدي على راسها درتها على القبلة و حطيت ايدي على مقدمة راسها وتمتمت دعاء الامام الصادق اللهم بامانتك اخذتها ، وبكلماتك استحللتها .. فان قضيت لي منها ولدا ، فاجعله مباركا تقيا من شيعة ال محمد ، ولا تجعل للشيطان فيه شركا ولا نصيبا ، تركتها اتروح اصلي فرضها ورحت العب بتلفوني فاتحه على ما تخلص ، هي مخبرتني من قبل بطيئة بالصلاة . انتظرت وانتظرت حتى حسيت بالوحدة !؟ يا أللهي اذا سجددت دقايق الا تكوم واذا كامت دقايق طويلة الا تركع شفتها وصلت للتسليم بعد نص ساعه انتظار -خلصتي ؟ - بعدلي ركعتين شكر ؟ بالثلث ساعة رحت ،اتعشة بيهن جعت اختها محظرة على الميز مشاوي تكة وكباب و مندي الي انه وصيت اعليه احبنه اكلت وخلصت الا هي خلصت صلاة كعدت يمي محنية الراس - يدلل الخجلان انه اوكلج بأيدي صرت اسوي لفات وهي تاخذ بخجل مني ..الا ان كالت شبعت -اكلج شنهو وين هذا الروب ابو الريش بلاكن انه اتخيل شي وانت لابستلي شي مو على بالي (برنص الحمام ) جا هاي بس بالافلام ؟ -مبيه ريش روبي مبيه روبي بس بس سكتت غمضت اعيونها مردتهن وهي اتكول -لابسته لابسته لابسته جوة استحي - لك انه افدي الخجلان برويحتي كومتها للحمام وهي تتسأل شسوي وكفتها على المغسلة غسلت اديني وي ادينها سوة وانه اهمس بأذنها -احنه واحد من اليوم يجلاي صوبنت حلكها وهي تضحك ترتعش مني مضمضت و وكفنا نفرچ(نفرش) اسنانه واحدنا اتزوغ عينه اعلى الثاني بالمراية لزمتها نزعتها البرنص مطلع ثوبها الشكري مدري روبها كصير و بيه حركات ، -بسم الله ما شاء الله شلتها من الحمام للغرفة وانه اغني الها -اعيونه اعيون غزلان صد بيه ورماني حطيتها على السرير على كيفي خايف هالفخارية تتهشم وطرت انطرحت ابصفها واباوع للسكف واسمع صوت انفاسها المتخربطة التفتت عليها لكيتها مبتسمة وتباوع الي هالحلوة واني اكولن ليش انفاسها يم اذني كلت - خلص الكلام كمت طفيت الضوة ورجعت الها ماخذها بتيار بحري نغرك اثنينا سوة جنتي الخاصة جانت بذيج الليلة ما جنت اعيش بذيج اللحظة جنت اعيش داخل حلم من احلامي هي يمي وادية حرة أبية تلمس الي اتريدة من غير قيود ، انعدام الوكت وتجاهلت المكان وهي اجت اذوب خجل بين ادية تتجاوب بالخفية ابوسها من شفتها تبتسم من اوكف وتحط راسها جوة عنكي(عنقي) ، بديت اتحسس خجلها القوي من حرارة وجناتها بفكي الخشن فرق مابين بردوها الضاهري السابق و بين احتوائها لخصري بهاي الليلة وحرارة أستقبالها لكل ما يبدر منها كان أستسلام ناعم ياخذ لب العقل و يجرف الگلب ويدخلة بمحنة عنف المشاعر اتلمست ذروة العشك و امتصيت ريحقها وردتي الخجولة ، انطرحت ابصفها تاركها ترتاح واني خايف - تحبيني ؟ كأني أسألها بعدج راغبة بيه لو لا - حيل جوابها ريحني ، عفتها اتكوم للحمام و رجعت سابحه بالبرنص وفتحت الضوة وطلعت ورقة تقراها و تعض اصبعها كانها داخله لقاعه امتحان لبست سروالي وكمت الها قريت طريقة غسل ال... وخرت الورقه ورة ضهرها وندارت عليه بوجه خجلان -نسيت نسيت شردت من يمي - وين رايحه ؟ -اكمل اكمل شردت تكمل سبحها واني ميت ضحك عليها ، متوسد راسها على ذراعي و شعرها متخربط حتى يم حلكي وانه صافن اعليها ما متعود احد ينام يمي وطبعي صعب حيل ما اكدر انام واحد ابصفي مو على ايدي ، انشل حالي الصبح لكيت ادين اتكعد بيه فتحت لانها رقيتي -ليش ليش اهنا هاا شنو اني ضوجتك ضوجتك كوة طلع صوتي من النعاس - انت نسمة هوى عليل تريح الروح بس انه ما اعرف انام الا وحدي كامت عني رجعت كعدت على السرير كمت من على القنفة مكسر كعدت يمها -ضجتي ؟ مريتي .....عوديني انت يرويحتي - اي اي ههههه اي جوعانه .... جوعانه حيل - تأمرين يخسا الجوع باوعت للساعه شفتها ب ٩ نزلنا جوة وهي وراية تمشي منقبة كعدنا بالمطعم واتريكنا ورجعنا صعدنا .. اشتميت نسيمها الغير مشبع و طلعنا للبيت بسيارتي عايفها الي خليل بالبارك وبعدها مزينه ... همزين الكذاب ما كاتب عليها شي بس ورد وشريط احمر مزينها ... وصلنا للبيت انه داك على. خالي قبل لا اوصل حتى يتلكانه بامر من جدي . ذبحو تجرات دم جوة رجليها وهي اتباوع مخترعه مشبثه بيه همست -خطية ليش عوفوه عوفوه - هذا فدوة الج اجه خالي ودمر حذائها دم وهي خافت اكثر ،ودخلنا للحديقة بوسط هلاهل امي وخواتي اجتني امي شاورتني هزيت راسي بأيجاب ورحنا لطابقنا .. كان بيت كامل مطبخ و غرفتين و حمام فقط داخل غرفتنا وبرة الغرفة تواليت وحمام خارجي وصالة .. مأثث وكلشي تريد بيه دخلت لغرفتها و شفت بعيونها الانبهار وارتاحيت مصارت فرصة اشوفها الها بس غرفة النوم هي اختارتها بالصور بس اثاث البيت كله من زمان مجهزة لزمت ايدها ما مهتم لخواتي وامي وكلت -شوفي هذا الطابق الج ....انه معليه بيه شنو ما عجبج وتردين اسوين تغيرات سوي ملكج ... امي - الاثاث يخبل والديكور هم عليش اتعب نفسها ومنا وجاي خطار جاي خطار رايح همست لرقية - احبنج لانها كانت تباوع لامي بأيجاب .. طلعنا كلنا وعفناها ترتاح انه نزلت اسلم اعلى العالم .. ▪︎زينب كعدت بغرفتي واكول شنو حال رقية هسة يا ترى امي وفاطمه قامن بالواجب واختلن بيها وعلمنها على ليلة الزواج بس منو يكول فهمت ياربي سهل امرها ياربي لا يضرها اباوع لفراشها الي ما مفروش مسفط على النضيده والدمعه خرت من عيني رحت فرشته ونمت عليه ابجي بحركة دخلت فاطمة اليوم بايته يمنا ، جابت اطفالها حطتهم بعد ما فرشت واجت يمي انطرحت -ليش هالدموع اختج تلكاها متهنية بالعسل - يا عسل كلتها بصوت باكي - تلكاه يغتصبها هسة اااه رقية شجاني و خليتج وحدج ضحكت فاطمه بصوت - ولج عوبة انت شعندج حاشرة خشمج وياهم هههههههه يلعن بليسج - گلبي ناغزني يا فاطمه ما سمعتي هاي ام الفال شكالت -لج كذب المنجمون ولو صدقوا - مدري اني شو اتقشعر بدني من حجت وخفت حيل من احصل الي اريده واخسر - دروحي انت معقلين لو صدوك تاخذ فال ليش ما اخذت الي او لامي بس شافتجن جهال ضحكت عليجن - هسة شسوي رقية ، حاصرها ياسر ويضربها بالعكال ! لو تتوسل بيه - زينب لا تفكرين بيها ولو يوم فكري بروحج ، و عوفج من هذا عماد ما بيه خير - لا تحجين عليه فطوم احبه - لج بارد داقني خو هو ابن عمي واحبه بس احسه هو جامد اووف لو اكولج على ماجد -يبووو مو خطب ما نخلص من طاريه - لج الي مشى عليها طالبه و موافق اتكمل يمه اووف وبنت بسيطه ناس ع كدهم بس طيرتيه من ايدج والله كولت الج يدللج بس ما سمعتي نصيحه -اها اشعجب عبالي مثل اخوه المهم الله يوفقه ويوفقني اني هم عماد يختلف عن اهلة وراح يدللني انشاء الله حجينا لنص الليل ونمت تعبانه كعدت الصبح اشوف مكان رقية اتشغله فطومة وهي ماكو متحملت اخت تليفون فاطمة واتصلت عليها ردت الووو زوبة -لج رقة اشلونج اشلونج شلون كضيتي ليلتج - هههه زينة ههههه زينة -شصار -صرت مرت ياسر ! -ها -شنو ولج شو مكيفه وشنوهاي الاجابة هاا -هو كال ههههه هو كال اذا سألج من اهلج شصار كول كولي كولي صرت مرت مرت ياسر وتضحك بهبل و صوتها يبث ارتياح وفرح وصلني تيار فرحها و رتاحيت لراحتها ، كالت اروح اصحي نايم ، ب ١٠ ردنا انروح الهم اني بالغرفة ابدل وسمعت صياح قوي انهبطت. يتبع | ||||||||
|
| |
|
11-07-19, 08:01 AM
| #10 | ||||||||
| مراقبة عامة ومشرفة منتدى الروايات المنقولة
| #شيخ_الشباب #من_كتابات_زهراء_العراقية #البارت_التاسع مو حزن لكن حزين مثل ما تنقطع جوّا المطر شدّة ياسمين. -مظفر النواب ▪︎زينب طلعت اشوف شكو هالصياح هاي مرت عمي وبتها دينا تتصايح صوتها عالي حتى بالعتاب ! اجتي فاطمة اشوف شكو مثلي طالعه من المطبخ امي كالت بصوتها الهادى - هسة اني شنو فهمت يا عيني منو طاردكم البارحة ام كرار- بنتج عيني طردت بناتي واشرت على فاطمه يهوو ذني يراد الهن گلب واني روحي ما حاملتها ، اوف كله من ورة عمي اجه وطاح على راس بابا واعتذر قبل مده وجاب مرته اعتذرت وابنه اعتذر من بابا وعزومنا مرة بس ماما وبابا راحو هسة رجعو همه ومشاكلهم نزل مرتضى -شنو هذا الصياح شاف مرت عمي و بتها دينا كال الهن عمة ليش هالصياح منا جيران هو هيج العتب عرك اضاهر فاهم السالفه وهو بغرفته من صياحهن ، فاطمه ما بررت دخلت اتكمل تدبيل اولادها ولا مهتمه الهن ، عفت مرتضى يهدي الوضع ورحت سألتها صدك طارتهن فاطمة- لا بس هنه واكفات ويحجن على رقية البارحه بالزفه وشهد اخته يمهن فد استحيت ، من راحت شهد يم العرسان كلت الهن يكفن حجي عنها شنو هبلة شنو غشوه اهلي كالو اله وهو رايدها الولد محد غش احد عيني همزين هوسة واخته ما سمعتكم عدل دينا- ممعقولة شكله ابن شيوخ من لبسة و قيافته اضاهر ميعرف فاطمه- لا يعرف الحمدللة الحجي ابو علي ما يغش احد ، والي عنده كلمة تغث يبلعها يكون افضل دينا- هسة شكلنا مو زين خايفين عليها لا ترجع عليكم - لا ما ترجع وما يصير مناكم -شنو قصدج -ما قصدي شي عيوني انتي الحمدلله همه الي اجو خطبو وتوسلو ما حفينا وراهم ضربتها بسمار متقصده لان دينا مشت عليها اشاعه بين الاقارب انو هي توسلت بحبيبها يخطبها خلت دينا اتكول -اشبيج ويانه عيني ما عاجبتج جيتنا - رحم الله من زار وخفف كالتها فاطمه بضحك وراحت عنها وهنه سونها طردة بس فاطمه حيل ضاجت من كلامهن كدام النسوان على رقية سكتهم مرتضى وطبعا حلفن ما كايلات شي عن رقية وفاطمه ضايج من وجودهن ابوية طلع سلم عليهن وكان متحضر للطلعه انوب لزكن كعدن وامي سوت الهن ضيافه ولا يحسن ناس عدنا عرس ومن الواجب انروح للبنية وحدها اهناك اني گلبي نار وذني على اقل مهلهن ياكلن ندكت الباب مقتدى اجه كال - هذا خليل اجه يكول رايح للمشخاب منو يروح وياي خاف سيارتكم ما تكفي امي -هاي ام ياسر منطيته علم خابرتها كلت الها على جيتنا ام كرار- صدك عدكم سيارتين صارن خل اروح وياكم اني ودينا ! فاطمه - يلا يمة تأخرنا هم يلا تكفينا السيارات عندي جهال يرادلهم شفل ولا اهتمت ام كرار ببسمار فاطمه مرتضى راح لخليل دخله للأستقبال ورجع دينا -رضاوي خو ما ازعجناك الصبح وكعدناك اعذرنا بس والله البارحه كولة اني منايمه واعيوني حمر من البجي ، هيجي ام مصطفى طردتها حزت بكلبي رديت اني سابقة مرتضى - اي مرتضى يفتهم بالاصول ما يضرب ويمد ايده حتى داخلات نسوان عراكه علينا مرتضى - زينب ! مطت شفتها دينا وعوجت حلكها اهنا امي تلوب اتريدهن يرحن لبيتهن وتستحي تحجي مرتضى سكت مغلس عن مياعتها عابت الها حتى بعدها ما مخلصة عدة طلاقها وجايه تتموع عليه مدري اشلون جان معجب بيها ويريدها !؟ راح يم خليل وخابرن زهراء اختها اجت وكملت السبحه انوب خلنا ننتظر زهيرة وكانه ناقصين مرتضى من شاف العدد كثر وحتى سيارة خليل ما تكفي كال ما اروح وياكم بابا اخذ وياه امي و فاطمة و اطفالها و و زهراء لزكت راحت صعدت بالصدر يم ابوية سابقتني بتعمد ادري بيها اما مقتدى ومصطفى كعدو دحسو نفسهم بالصدر يم ابو شعر (خليل) واني و المزعجات ام كرار ودينا بالخلف الطريق طويل وهذا خلصها علينا اغاني ، گلبي انقبض منها الكعده ويه ناس ما تحبهم تخنكك هاي دينا ولا تستحي ظلت تسال الولد عن منطقتهم المشخاب وليش عايفها وساكن يمنا و شنو دراسته خليل-امي وابوي يحبون گريب على امير المؤمين واني من صغري اهنا باوعت لكفاه وهو يحجي وياه لكيت عينه عليه بالمراية ويجاوب وصلنا لبيتهم اعيوني ادورها نزلت و شهد وراها باوعت لوجهه مبين ادين شهد مشتغله عليه ، حاطه الها مكياج حلو ولابسة قفطان مغربي وردي و شعرها الاصفر العسلي على طولة مفرود . كعدت يمنا حمل وديع تبادل الناس ببتسامة و ساكته ما تحجي ، وهذا الطبيعي للعروس اما ابوية ولا شفناه بديوان الشيخ كمت ويه النسوان للمطبخ كعدت الكط خضرة وياهن وبالي شارد بهاي الاجواء الجديده بالنسبة لرقية و رقية غرفتها صعدت ويه امي وفاطمه واني توبة صاحتلي اكعد وياهن شهد كرصت بت خالها كومتها من يمي وكعدت بمكانها شهد -اي شلونج زنوبة اها ، هاي متغيره وياي جنا وحده ماخذه موقف من الثانية - الحمدلله حزينة على فراق رقية اخذت الريحان واتقطف بيه -تتعودين وبعدين النت يمج اتصلي بيها فيديو واشبعي منها كل يوم - اهه انشاء الله ما تدري معندي تليفون! سمعت واحد يكول -اشوكت اتخلصون غده ام ياسر -ادخل يمة خليل دخل همزين اني كاعده بعباتي دخل يشاقه ويضحك ويه بنات عمامه وميانه ويه شهد محبيته الصراحه -ها مشغلين الخطار وياكم .. باوعت اله يحجي وية توبة الي تطبخ توبة- البيت بيتها خليل هاي اخت العروس كوثر-اكلك العريس كاعد بالديوان -اي يحجي ويباوع عليه صاح لشهد وراحو بالممر شعنده وياها ياربي واني ورطت مرتضى وحاجزها شنو هاي الاجواء ولا حبيت انوب حجابها نص ردن كدامه الشال مفتوح و الردن صاعد ، دخلت اجتني هالمايعة نزلت من عيني -اكلج شرأيج اخذج هسة لمزرعة جدي - لا استحي -يمعوده الخطار كلهم بالبيوت مطشرين محد طالع و مرت عمج و بناتها بالديوان يم بيبي كمت وياها بسبب الحاحها ورحت وياها لبست عباية فوك حجابها وطلعنا تختلف بشكلها عن البستان ، حبيت گن الدجاج الكبير كأنه برج اخذتني وكعدنا على كراسي الخوص وكدامنها اشجار فواكه غيرمحملة اجانه ابو شعر ،يوه ولا اطيقة خليل- ها شخباركم بنات ؟ شهد كالت ها شجابك وتضحك غلست عنهم وهمه يشاقون بينهن و افكر برقية خليل - وين داومين زينب باوعتله بجمود من ذكر اسمي وكاني اقربله - ما اداوم - اشعجب بعدج صغيره على التخرج شهد - ما مكملة زينب حسيتها تضربني بخنجر وكأنها تنتقص مني او هي احسن مني مع العلم كالتها بغير قصد لكن اني وسطهم احس بالنقص ما حبيت كلامه وياي وكعدته ويانه كمت مترخصة ومخليه شهد تكوم وراية اهنا وصلت لبيت ياسر لكيت مرتضى اضاهر توه واصل هو كال اجي بتكسي على راحتي رحتله و وراية شهد وخليل مرتضى- السلام عليكم شهد وخليل- وعليكم السلام خليل-اتفضل مرتضى وياي اشرلة على بيت جده مدنك مرتضى ولا تباوع لشهد الي اكلته بنظرها وراح ويه خليل و اني فتت ويه شهد اتغدينا و رجعنا واني بالي مرتاح شفتها زينة ومرتاحه واهناك نفه اكثر من اهنا وهي تحب ياسر والعجيب بالامر اخذها عليه وكأنها تعرفه من سنين معرفة قوية عايش يمها و متعايشة وياه من قبل عكس تعاملها مع الي خارج عن عائلتها امها وابوها و اخوانها ، الحياة صعبة حيل صارت اذكر عانيت من ازوجت فاطمة كنت متعلقه بيها حيل امي الثانية كان عمري لا ما يجاوز ال٨ سنوات ، كانت تعتني بيه بسبب انشغال امي وابوية برقية اول ثلاث ايام كضيتها اكتأب وضوجه ، ▪︎ياسر بصباحيتي لحد العصر انه ما داخل غرفتي يم الخطار الرايح والجاي والغده اهلها بعد الضهر راحو ، المغرب الا صعدت الها وهم تنهدت بقهر سالتها مرة ثانية ونفس الاجابة ردت - ليش صابغه شعرج احبه اسود - ع عمتي عمتي ههههه رادته ههههه - قصدج امي اني نسيت هاي السالفه مال العرايس جان وصيتج ورة الصلاة ، العشا صعد النا طلعتها بالصالة على الطاولة ناكل - هههه ما ما اعرف اكل هيج ههه هه - تتعودين ! فتحت الشاشه و كان طالع فلم اجنبي . -هاي السلسلة الي تحبيها ، بس صدكي الجزء الاول احلى من الثاني شعاجبج بالثاني - ها ! - وين بالج -هههه وياك وياك بس اني م ما احب الافلام حرام هههه حرام اتلاشت أبتسامتي واني واكع ببير الاستغراب ! هاي السلسلة كالت متابعه منها جزئين -المهمة المستحيلة مو شايفته ؟ حراميش يمعوده ؟ نسيتي من اتعاركنا ؟ كلتي اتحبين شكل توم كروز ..... علينا ؟ ضحكت عليها وغمزت الها - ها اي بكيفك لعد .. نزلت لجوة ارجع الصينية وشفت خليل ما رايج لهلة كاعد ويه امي وخالي حيدر -شهد تعالي اجت ورايه لزمتها من زندها -كم مرة كلت الج عدلي شعرج -اي اي ايدي حباب - حجابج جدام خليل و اولاد خوالج اريده كامل -صار صار بس هو والله مثل اخوية وماما اتكول.... -اش محد خربكم غير امكم -اشبيها امك كالتها امي وهي رابطه اديها على صدرها ببداية المطبخ - يوم ممنوع منعا باتا شهد تطلع شعرها لو لبسها كصيف ضربتها على متنها وكلت الها. - خليل هذا الي رابيه وياه خواته محتشمات و محترمات نفسهن جدامي لا تفشلني جدام الوادم امي-قصدك كدام مرتك مو عيني من هسة تخاف منها تاخذ عنك نظره هااا . بت المومن هاي من هسة هيج - يوم لا تشتغلين من هسة دور العمة ما لايك الج ابد لأن الدور محتاج اتكونين ام للولد بالاول ! صدتني بنظرات احتقار تركت الهن المكان و رحت يم خليل ، صعدت لغرفتي ورة ما راحو اه عندي مرة وتنتظرني بيها لكيتها بالغرفة ، لابسة ثوب اصفر ▪︎رقية لبست مثل ما علمتني فاطمة ثوب مال نوم ، ما اعرف ليش يصيحوه مال نوم شوه هو مو مريح بيه بلك لامع بصدره يحكحك بيه .. و المكياج ما كدرت احط ، غير كحلة وطلعت من عيني منها ما عرفت احطها رحت غسل غسلت وجهي ورجعت مشطت شعري و رشيت عطر وكعدت انتظرة دخل وما حجى وياي شو !؟.. كبل نزع فانيلته ظليت صافنه على صدرة ابيض كلت بگلبي اخاف اظل اباوع اله وعبالي ما استحي مو خوش أبنية؟ كعد يمي - عروستي اليوم ما خلوني اشوف اعمالي هذولي الخطار - ها ههههه عندك شغل هههه انت شنو شتشتغل ؟ -هههه لا اقصد اعمالي كعريس بعدين تعالي شنو اني شنو اشتغل الف مرة كلت الج شغلي انه تاجر و عندي كاع حلالي و هذا البيت هذاكله خير من الله - ها ههه اي اي نس نسيت - تعالي هسة اريد اشوف شغلي كعريس - شنو تشتغل يعني - اهنا بالغرفة ادك عمالة -ها شنو تشتغل بناء يعني اهنا ليش ليش ههههه الغرفة الغرفة حلوة وين انروح -شگيتي گلبي انت شو تعالي ظل يقرقر رقبتي مدري ليش كمت اضحك بصوت ونزل على صدري الايسر حط راسه و ظل حاط اذنه عليه - شسوي - اخاف - شسيوي ههههه شسيوي -دكات گلبچ مثل الطبل اخاف توكف - ههههه واذا وكفت اموت مو ؟ - غير يوكف گلبي وراها وخر عني و سنح على بطنه رافع وجه سانده على ايده ، وجه ابصف وجهي واني على ضهري -تدرين لحد البارحه العصر خايف لا يصير شي وما اخذج الي سكت وظل يباوع بعيوني معرف شكول اله - انه تعذبت بطفولتي اهواي! وحتى بداية بشبابي عشت ما مرتاح بسبب تتبعات الماضي انت الشي الوحيد الي اخذتج بأرادتي لونسة الروح انگلب على ضهرة وهو يكول - اتصدكين اذا كلت الج انه ما عاينت لبنية بيوم مثل ما صديت ليج - رقيتي انت قبل ما اخطبج شنو جنتي اسوين - ها !؟ هههههههه شنو ما فهمت - يعني هم يجوج خطابة هم اتمنيتي شاب ببالج يخطبج لو تنتظريني جنتي كولي رقيتي ليش دوم تتهربين من هذا السؤال -ما ادري ! شفته يحك صدره خطية يمكن يتحسس من شعرة مثل بابا عنده حساسية بجلده حكيتهم اله باطراف أصابيعي ، بس مو حيل خفت عليه لا اوجعه . ظل صافن عليه واعيونه ما ترمش و شو صدرة صار ينهز هاي شنو گلبه مريض دنكت عليه اسمع دگات گلبه -انت انت انت هم هم گلبك يدك ابسرعة راح اتموت اتموت ظليت اصنت عليه طاخه راسي بصدرة وخرت راسي كلت اذا رجعت احك اله صدرة يروح وجع گلبه ! يجوز من الحساسية باوعت اله واني احك ، غمض اعيونه مسحت وجه -ياسر ..... ياسر متت متت كمت عنه وركضت صرت سريعه حيل طالعه من الغرفة للصالة ▪︎ياسر كنت ما اطلب منها شي مبادرة غير اقل شي شهر يجوز اكثر الا تاخذ اعليه و تاخذ راحتها وياي ، بس هي كالعادة فاجئتني و بتدليك صدري وكفتلي اضلوعي و سرت حمم بركانية ويه الدم تمكن من اعصابي ، غمضت واسترخيت الها ولحركاتها وتر كهربائي بين اديها و صدري تنطيه موجات قشعريرية و رغبة محمومة صعدت حرارتي .. توقفت حركاتها وحسيتها طلعت فتحت هاي طالعت صدك ؟ اني متبنج منها كمت وراها اريد اتعثر .. وصلت لنهاية الصالة للدرج لزمتها شهكت و ذبت نفسها عليه -ما ما متت ما متت خفت خفت حيل ! انجفلت ماي بارد وطفاني تصرفها هاي مجاي تشاقه ؟ طالعه شبه نازعه لجوة وخايفه وتبجي اشبيها ؟ جريتها وانه اتذكر كلام الشيخ حسن شنهو لهلدرجة ؟ كعدتها بالغرفة وجبت الها ماي وظلت تبجي واسكت بيها بوسط انقباضه بگلبي قوية منظرها وهي هيج ما عدها ادراك و قلة استيعاب اذاني و وجعني ما تخيلتها لهاي الدرجة وصف غبية ما هان عليه اكوله ببالي وكلت بلكت من انحراجها هيج سوت انرعبت من شي ثاني ! ما انطاني گلبي اتگرب عليها خليتها يمي واهود الها تسكت عبراتها نامت وهي تشهك على ايدي لنص الليل عفتها ورحت دخنت برة الغرفة ورجعت ليها محتار للفجر انه كاعد كعدت اتوضت وصلت وظلت تقرأ قرأن وانه صليت ومنتظرها ، - ياسر ليش كاعد ها ليش ما لكيتك من من كعدت لو لو نمت وحدك هههه وحدك ههههه - مو وحدي روحج وياي -ها ، اني اني ما ما كاعده جنت هههه نايمه هههه نايمة - تعالي يمي انطرحت بصفي -ارفعي اديج لفوك رفعتهن ! -نزليهن نزلت -كومي افتحي الضوة كامت فتحته -طفيه طفته -روحي جيبي الي سمج بالفريز اكله اجت تطلع -انتظري وين رايحه -ها ههه اجيب اجيب الك السمج مسحت وجهي بقوة مصدوم هاي صدك ! بلكت تشاقة بلكت تشاقة اي تشاقة مو لهلدرجة لا مو لهدرجة مو مغفلة ولا هبلة ، انه اعرفها اي اعرفها تثلاث اشهر اسهر ليلي وياها مو هيج مو هيج ورة فترة رفعت الغطا عنها -بارده السبلت عالي هههه عالي غطيني. حباب نزلت على وجهة بست كل قطعة بيها متلذذ احاول اخمر روحي وانسى مخاوفي والهواجس امحيها بطعم شهدها غزيتها غزو المطر للورد يحيها و يرضيني تجاوبها يرضيني تنفسها السريع راكض ويه مشاعري حركات اديها العشوائية على شعري تدس وجهي بين اضلوعها ... ▪︎زينب اليوم السابع مال رقية حبيبتي كالو اعيالها نسوي الها سابع بس شو غلسو خابرتني غاده وهم نفس الكلام عماد كاله الي انتظريني دا الم نفسي - هم راح اتروح عليه سنة غادة اريد اقدم السنة الجايه غادة- حبي بعدج صغيره اما عماد سكت ما جاوب اه اضاهر مأيس من نفسه كلت-شنو الوضع غادة شو سكت غادة- حبي هسة هو بنى الغرفة ودا يلم المهر والله كريم زوبة فرجت انشالله سديته من يمها جانت الدنيا عصر دخلت عليه امي - زينب ! كالتها بصياح ونتر التفت عليها ، خلصت الضهرية واني ما كايمه ولا لامه فراشي -ها يمة هسة الم فراشي ، -البسي عباتج وتعالي اختج ورجلها اجو ؟ -ها ؟ - تعالي ابسرعه وراية راحت واني گلبي نزل على معدتي احسها هي الي تنبض و انقبضت بطني كلها تنبض خوف .، اديه ترجف واني الزم يدة الباب و افتحها مطلعه حجاب لفيته و عباية وامشي للاستقبال .. لكيت ابوية كاعد و امي ابصفه و تضرب على رجلها ، التفتت اعيوني على رقية تبجي وتشهك ... شافتني زادت بالبجي وصارت تعصر بنفسها وصوتها اعلى طلع جرتني امي من ايدي و كعدتني يمها بعد ما جنت واكفه ،ياسر كدامنا بصف رقية و عاصر سبحة سودة بأيده عصر ما باوعت لوجه بابا اخر شخص ممكن اباوع اله واني بقمة خوفي و اكول لا يا زينب انت ما مسوية شي شكو ليش صاحوني لعد ، معقولة لان جنت اساعد رقية لا يربي لا ياالله احجو ليش ساكتين احجو دمرتوني يارب افرجها عليه ام علي - رقية احجي ياسر زفر نفسة خلاني ارجف من صوته باوعت لكيته يباوع الي والها بغضب و اعيونه حمر وخشمه هم بعدين انتكا على القنفه و غمض ام علي - رقية احجي شكلتي لياسر - ان اني من من جنت احجي احجي احجي ..... اخذها البچي ومكدرت اكمل واشنج صوتها مع نشيج البچي ابو علي - زينب جنت تحجين ويه سكت -لا حول ولا قوة الا بالله ، جنت تحجين ويه رجل اختج بمكان اختج ، عود اساعديها اضلوعي اتكسرن نبتن بگلبي واتهشم بداخلي واني اسمع سؤال ابوية حسيت بالاشمئزاز من السؤال ! امي- احجي ولج - ا اني اني اباوع لرقية الي تبجي وتهز براسها بأيجاب الهم كمت ابلع بريكي ودنكت ياسر - عمي اريد افتهم راسي من رجلية ابو علي- اني فهمتك ابني انت تعرف وضع رقيةمني -شفهم عمي ..... احجيها الك بوضوح بتنك جانت طبيعية وياي .....بالليل على المخابرات انه عرفتها......طلعاتي وياها قليلة و وياها اخوها........و جيتي.......لهنا هم قليلة استحي طاب طالع اعليكم.....انه ما يفوت يوم اذا ما احجي وياها تلث اشهر احجي وياها اكثر من هلي اتفأجاة بيها وحده ثانية ما تعرف الله وين حاطها جان كاعد ويحجي بحرگة ولوعة - كل هاي المدة واحجي ويه اختها ؟ ابو علي -بنتي ما اسويها سكت ياسر واني اتحطمت تحطيم من ثقة والدي ابو علي- لو لا كلام رقية ما صيح الها واكعدها هاي الكعده اكيد اكو سوء فهم مو بوية زينب احجي جنت اتعلميها من ابعيد وهي تحفظ الكلام .....رقية تحفظ مو باوعي الي بوية رفعت راسي واني الدموع غسلت وجهي محجيت ياسر - رقية منو جان يراسلني احجي منو - ز ز زينب ودنكت وهي تبجي بصوت -منو جان يكعد وياج يكتبلج وانت تحجين -ز زينب . - مو جنت اتنامين واحجي ويه اختج هزت راسها باي ابوية ظل يباوع الي واني دنكت ارجف وامي ضربت رجليها بقوة ، ابو علي- احجي زينب انت جنت تراسلين؟ كالها بصوت ضعيف - ا اي بس والله جنت اريد اساعدها دنك راسه ابوية و ايده وكعت منها السبحه وامي شالتها وكامت تبجي وهي اتكول عزة العزاج نسرين وكف ياسر - حتى كلامها مو بس رسايلها،جانت تعرف تحجي اشلون انغشيت وكف ابوية كدامه على وكفته -اني اول ما خطبتها قبل كلشي ما يصير رسمي دزيت على اهلك واعتقد اختك قبل لا تعقد وتخابرها كلشي كلنا الكم ،ابني هم كال الك شافك ما مصدك كالي ابلغك بالتفاصيل بنفسي خاف اهلك ما وصلوا الفكرة بنتي هيج وهيج حالتها كلت الك لو لا -كلتو توحد عادي عبالي بصغرها وراح انت تبالغ ، كلامها جان لمرة طبيعية طبيعية يا عمي طبيعية لا تخبلوني -بس اني كلت الك امام الله بريت ذمتي وانت وافقت - شنو الفايده كلت الي و بتك الثانية دازها اتغ صاح ابوية مقاطعه - لعنتة الله على شيطانك ثمن كلامك راح وكف يم الباب ياسر وكال هذا حملك وانت شياله انه انغشيت بيكم عبالي تربيتك صالحة طلع وخلة ابوية واكف اني كاعده بمكاني ... كامت امي وضربتني راشديات (كفوف) بكل ما تملك من قوة غطيت وجهي منحنية دكت على جسمي راحت للصالة طالعه اني ما زلت ابجي جرتني واخذتني وبيدها مداس وحطتني بغرفتي و تضرب حيل بالمداس على كل كتر بجسمي و ملخت شعري تملخ مدري عن الحجاب وين راح - نزلتي راس ابوج فضحتينا فضحتينا ودك على كل كتر بيه شفت شي وكع بحظني طركه المداس انشلعت شالت التبلام و بيه ركعت وجهي طك خشمي دم و ظلت تركع بيه بضهري لحد ما ظلت بس الحديده مالته ما مشلوعه تضربني بيها اجت رقية - بابا اختنك ماما بابا اختنك راحن اني جسمي متبند ما احس بوجع بعد خدرت وكمت و اتلمس بالحايط وامشي لحد ما وصلت للأستقبال شفت والدي فاتحه امي ازرار دشداشته و تهفي بوجه وخرها هو عنه وكال بصوت مخنوك - انفضحت يا نسرين بتج بيوم سابعها ردوها الي رجعت اتعثر الغوش والالم هاج عليا وكعت يم باب غرفتي ابجي واني أسال اني بس ساعدتها هو ميت واحد كله بحالتها اني شسويت ؟ وليش بابا سألني حاجيه وية رجل اختج ؟ اني احجيها هي مو احجي كاني !؟ للمغرب دخلت فاطمه وباوعتلي بتأنيب وطلعت الخوف كل الخوف من مرتضى حتى ابوية بعدني مترقبة منه فعل اقوى بين ضياعي و حيرتي وندمي واحساسي بالشي الي اضاهر حيل كبير دخلت امي ومرة ثانية انهدت علية تضرب - تردين جامعات لج منحلة طايحة الحظ حقيره همزين ما دخلناج اجت فاطمه وخرتها عني -يمة انت مريضة لا تحركين بروحج -انفضحنا يفاطمه انشهرنا بين الوادم ما سمعتي هذا ياسر شكال ، كال احنه انطينا وحده وخلينا الثانية تحجي وياه ولج سوة ابوج مگرن استغفر الله لج انفضخنا يا يمة تالي الليالي بت الكلبة تحجي ويه رجال كمرته و وياريته غريب رجل اختها كعدت كدامي تبجي كومتها فاطمه طلعتها واني شعري منفوش مهلس منه و وجهي مورم ويه خشمي طك دم من جديد ايدي زركه واعتقد كل جسمي ازرك دا يون عليه اول مرة بحياتي كلها اتمنى الموت ، تمنيته لدرجة افكاري بدت اسيطر عليه اروح للمطبخ وانحر نفسي اهنا دخل مرتضى عليه !! يتبع ماعندي وقت محدد للنشر حسب التساهيل وغير مرتبطة وياكم باي موعد الي اولة شرط اخره نور ملحوظه البارحه نشرت بارت😁❤ | ||||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
2Likes
.png)
العرض العادي
