آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
08-09-19, 05:48 PM
| #11 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  #قضية_لم_الشمل #البارت_التاسع #الكاتبة_نهى نور اريد اذب الزبل بالحاوية لكن لفت انتباهي حركة بداخل سيارة كانت واكفة بالجهة المقابلة الي داخلها رجال كبير بالعمر كان يباوع علية بصورة غريبة مسحت دموعي بظهر كف ايدي حتى اركز بالنظر لان دموعي كانت مشوشة علية الرؤية باوعت عليه بشك لان نظراته كانت مصدومة ومتألمة هذا منو وليش نظراته الي بهذا الشكل صارت عيونه بعيوني واتفاجئت بي نزلت دموعه فتح باب السيارة وبالكوة نزل كان مبين عليه مريض اتكأ على باب السيارة والسايق نزل من الجهة الثانية وراح يركض عليه حتى يسنده هذا كله صار والرجال ابد ما نزلت عينه من علية اتملكني الرعب وبنفس الوقت انشلت حركتي وبقيت بمكاني ما اكدر اعوفه وارجع ادخل للبيت كانت نظراتي شاخصة عليه ليش عيونه مليانة دموع التفت عالسايق وكال .. لتخاف بس اسندي وساعدني حتى احجي وياها كان صوته حزين وضعيف وبهاي الاثناء طلعت وحدة من البنات الصغار وصاحتني .. نور .. نور تعااااالي خالة ام امير تكول خلي تجي بسرعة تنظف ارضية الصالة لان الاطفال گلبوا العصير بالكاع وصارت وسخة باوعت للبنية وهزيت راسي بموافقة وانتبهت روحي بعدني واكفة يم الحاوية واكياس الزبل بعدها بيدي نفضت راسي ورفعت غطاء الحاوية وذبيت الزبل ورفعت عيني للرجال الي كان مستند على السايق كانت نظرات الصدمة والالم مرسومة على وجهه اانخطف لونه وصار شاحب وكأنه واحد سمع خبر مفزع كان شكله كأنه يريد يسالني عن شي ، لكن فجاءة اختل توازنه وضاع الكلام واغمى عليه والسايق سنده بخوف قبل لا يوكع اني تلقائياً اتقدمت خطوة عليهم اريد اقدم المساعدة لكن خروج امير والخطار من البيت ووكفتهم بالباب خلتني اتوقف وارتد للخلف ودنكت راسي لان هواية رجال واكفين بالباب كانوا يتبادلون السلام وبعدها انتبهوا على الرجل والسايق وراحوا عليه واني دخلت بسرعة للبيت وكفتي بالباب مالها داعي خجلت من الرجال عيب مو حلوة بس ما اعرف ليش هذا الموقف ونظرات الرجل الغريب ظلت معلقة بذاكرتي بحيث حتى نساني كسرة كلبي خلصت الحفلة وطلعوا الخطار ونظفت البيت كله وبعدما خلصت شغلي جتني ام امير ونطتني كومة غراض. بالاضافة لعلب الكيك والعصاير وكلشي زايد عندهم شكرتها واني بيني وبين نفسي افكر اقسم هاي الاغراض بين بيت اسيل وبيت خالة سناء لان حلوياتهم كلش طيبة ومن احيت اطلع صاحتني مرة ثانية ونطتني علاوة على الراتب الشهري .. خالة ام امير هاي شنو كلش هواي .. هذا تعبج انت اليوم ما قصرتي بوكفتج ويانا ما انساها ربي يرزقج بأبن الحلال الي يصونج ويقدرج كانت تدعيلي ودخل علينا امير نازع سترته وربطته كلبي رف على منظره وسحبت نفس عميق مع الاسف حواسي كلها ضدي بعده فجاءة اتذكرت الرجال المريض وسألته ..اي صدك استاذ امير شنو صار على هذا الرجل الي رحتوا عليه ا.. والله ما اعرف شنو صار عليه. انا والشباب ساعدنا السايق وصعدنا بالسيارة بس خطية شكله كلش مريض وعمي سأل السايق .. اذا هو هيج مريض وحالته تعبانة ليش متوديه للمستشفى شعنده هنا جاي السايق كله.. والله ياعمي كال جيبني لهنا اريد اشوف بنتي وانا عبداً مأمور حتى ما لحكنا نوصل لبيت بنته ووكع اغمى عليه .. ياخطية ما يستاهل شوف يمكن بنته بهاي المنطقة هسة اكيد هي متدري ابوها اتخربط يم بيتها ام امير.. شلون قهر بس اكيد اتصلوا عليها وانطوها خبر امير.. شي اكيد جاوبتهم وانا بعدني متأثرة بنظرات الرجال الغريبة .. ربي ميحرم كل بنية من ابوها ويجعله خيمة على راسها .... جلال الخوف والرعب والقتال من اجل الحياة اخذ كل طاقتي وتركني خاوي بنهاية المطاف بعد الجري السريع لكيت نفسي بمنطقة مقطوعة بيها بس تلال وبساتين متفرقة شكلي يمكن ضعت بس بنفس الوقت كلش ابتعدت عنهم خليني ضايع وتايه وحدي مااعرف اني وين احس مما اوكع بيدهم ويلزموني حسيت بألم بكتفي باوعت عدل لكيت قميصي غركان دم والله حتى ما اعرف شوكت وشلون انجرحت بس هسة يالله حسيت بحرارة الالم تلسع بالعظم عبالك منخور ببسمار كنت امشي بين البساتين المجهولة. كعدت شوية ارتاح واخذ انفاسي المتلاحقة من اثر الركض احس بگلبي من كثرة وسرعة الركض يريد يطلع من صدري وشفتي اتشققت من اثر العطش والخوف والم كتفي وصل حده كلما احرك ايدي يزيد الالم كعدت تحت شجرة وانا بعدني اتلفت بحذر منا ومنا نزعت قميصي من جانب واحد اريد اشوف شنو القصة لكيت القميص لاصق عالجرح بحيث عضيت شفتي ورفعته عن الدم المتجمد عالجرح لفيت ردن القميص من تحت ابطي وشديته حول زندي صار شكلي بالقميص عبالك واحد رايح للحج بملابس الاحرام كتف مكشوف وكتف مستور رجعت راسي للخلف اتكأت عالشجرة ارتاحلي شوية وبعدين اكمل طريقي المجهول الي يشبه حياتي انا شوصلني لهنا. يمكن لو هسة اني لو اموت محد يدري بية حالي حال كلب الشوارع وحتى قبر ما يخلولي اصير مجهول الهوية ومحد يترحملي بس انا مو هاي الحياة الي اريدها لنفسي اريد اعيش واكون لي بيت وعائلة خاصة بية يحبوني واحبهم وارجعلهم بنهاية يومي معقولة اني نهاتي راح تكون هيج تعيسة ....... ريم خوف رعب وعدم امان هذا الي احس بي حاليا اليوم ثالث يوم لعمو بالمستشفى قبل ثلاث ايام اتصل سايق عمو مؤيد علينا للبيت وكال الحجي ساءت حالته ووكع بالشارع واخذناه للمستشفى وبيومها اجتي عمة اسيا هي واولادها نائل ونورس علية حتى ياخذوني للمستشفى واجتي ويانا خالة ام محمود الله يخليها ما تركتني ولا لحظة وصلت للمستشفى واتفاجئت بوجود اقارب عمو وعمامه واصدقائه بالشغل كلهم متجمعين بالمستشفى شافنا ابو سيف وتوجه علينا وكال مؤيد يريد يشوف ريم اسيا حجت معترضة .. اني اولى بشوفت اخوية من ريم اريد اتوادع وية اخوية قبل لا يموت التفتت عليها مفزوعة من كلامها .. اسم الله عليه ان شاء الله الي يكرهونه غمضت عيونها ومجاوبتني نائل ونورس حجوا وية ابو سيف .. وانت منو حضرتك حتى تقرر منو يدخل ومنو الي ما يدخل احنا اهله وهاي اخته واحنا الي نقرر منو يدخل ومنو الي ما يدخل انت كلك خلك موظف تشتغل عند خالي دفعوا ابو سيف من طريقهم واخذوا امهم وراحوا حجوا وية الدكتور ودخلوا اسيا لغرفة الانعاش الي بيها عمو باوع علية بعطف وكال .. هاي عمتج مو طردها الحجي شرجعها .. هي بعدها ما مسافرة كانت ببيت اقربائنا واولادها البارحة وصلوا علمود ياخذوها تسافر وياهم وبعد شوفت عينك شلون انقلب الوضع وعمو اتدهورت صحته واني خايفة عليه هو مصارله هواي من شفى من مرضه اخاف يرجع عليه او تنتكس صحته كانت خالة ام محمود واكفة يمي باوع علية ومسح على وجهه وسحب نفس عميق وكال .. لا تخافين ان شاء الله ماكو شي طلع الدكتور من غرفة عمو واني رحت له بسرعة كنت شايلة بيدي ملف الفحوصات والتحاليل الخاصة بعمو شاف ابو سيف وسلم عليه كان الدكتور يمشي وانا وابو سيف وام محمود نمشي بصفه ابوسيف .. ها دكتور شنو الاوضاع جاوب الدكتور متنرفز .. يعني ابو سيف صدك احرجتني كلتلك الرجل يريد يشوف بنت اخوه تروح ترسل اخته وهو شافها واضطربت صحته وهذولي اولادها مايحترمون احد اكلهم اتفضلوا طلعوا حالة المريض ما تستحمل همة ولا كأنما يسمعون ضلوا يتجاوزون وهسة انا راح اطلب لهم الامن حتى يجون يطلعوهم دخل لغرفة المعاينة ودخلنا وياه وكعد عالمكتب وشال سماعة التلفون واتصل على حرس المستشفى وانطاهم التعليمات وانهى الاتصال كان الدكتور يحجي وانا كل فكري عند عمو اقتربت من المكتب وحطيت الملف على المكتب سحب الملف وفتحه وبدة يطلع الاوراق ولبس نظارة القراءة وسأل وهو يباوع علية وعلى ابوسيف .. هاي شنو الاوراق جاوبته .. هاي اوراق التحاليل والاشعة والفحوصات الي تخص مرض عمو جبتهم وياي بلكي تنفعكم باوع لأبو سيف ورجع باوع علية سألني .. انتي شنو تقربين للمريض .. بنت اخوه .. يعني معناها انتي اكيد عندج علم بمرض عمج .. اي نعم عندي علم باوع لأبو سيف وابو سيف كعد على الكرسي الي بصف المكتب وطلب مني اكعد على لكرسي المقابل الدكتور.. شوفي بنتي ترة عمج من رجع للعراق كانت حالته جداً متأخرة والمرض منتشر بكل جسمه يعني اكيد تعرفين صار الموضوع مسألة ووقت وتعرفين شنو النتيجة النهائية لمثل هيج مرض وهالشي ما نكدر نتحكم بي هزيت راسي برفض ممصدكة كلام الدكتور .. لالا عفية دكتور شنو هذا الكلام عمو ما بي شي اصلاً هو شفى من مرضه والدكاترة بلبنان اكدوا هذا الشي عفية كولي ان هذا حلم مو حقيقة صرت احجي وابجي منهارة وابو سيف صار يواسيني وام محمود اجتي وسندتني ولمتني لحضنها يعني شنو عمو جاي يودع وراح يموت يعني هو بأخر ايامه رفعت راسي برجاء لعمو ابوسيف .. يعني كل كلام عمو كان كذب بخصوص شفائه من المرض حتى يجنبني لوعة الانتظار والتفكير بوضعه صرت احس بالخوف والجزع والتشتت باوعت لابو سيف وطلبت منه يدخلني اشوف عمو اخذني هو الطبيب ومريت من يم عمة اسيا واولادها اكيد طلعوهم من الغرفة الامن بالقوة ودخلت للانعاش كان هواي ناس ما اعرفهم موجودين منتظرين يم باب الغرفة ويحجون وية اولاد عمة اسيا ووية ابو سيف اول ما دخلت شفت عمو بوضع تعبان كانت الاجهزة محوطته بكل مكان اقتربت من عنده وكان يكدر يحجي شافني وكال .. ها بابا ريم انتي اجيتي هو كال هاي الكلمة واني انهاريت صرت ابجي وهو يواسيني بصوت جداً تعبان ومضطرب .. عمو ريم محتاجج تكونين قوية لخاطري انا محتاجج بعدها دخل الدكتور وكال خلص وقت الزيارة ما يصير تطولين اكثر اتمنيت ابقى يمه ما اريد اعوفه بقيت مكابلة المستشفى وكاعدة رغم معارضة اولاد عمتي نائل ونورس وصاروا يحجون علية حتى ارجع للبيت بس انا عاندت واصريت ابات النايم هنا بهاي المستشفى بصير عمي يعني اماني وحياتي كلها هنا صعبة علية اعوفه ما اتحمل اخسر اهلي مرة الثانية ويصيحوني اليتيمة اكره هاي الكلمة تحسسني بالضعف نورس.. شنو هي بكفيها تبقى هنا وين كاعدين المستشفى مو امان .. ما اتحرك منا وراح ابقى هنا لحد ما عمو يطلع من المستشفى وياية عصب نورس واسيا ظلت تحجي علية واني بقيت بعنادي ونائل الخيخة كان مايل للانثى اكثر من الرجل انتبهت لنورس التفت على نائل وكال .. احجيلك كلمة انت مو خطيبها حطلها حد اشو هاي ما تهتم لأي واحد رفعت راسي وحجيت .. خطيبي شنو انتوا بكل عقلكم اني اوافق اتزوج هذا اسيا.. احجي عدل لج شنو ما عنده اسم وتكولين هذا اخوية كال قبل لا يوكع بالمستشفى اتصلي على نائل حتى اعقدلهم وحتى هسة عمج من شافني اني والاولاد اكد علية وامني ان اعقدلكم انتي ونائل ولا تنسين الولد الي هددج بعده يحوم ويهدد احس جسمي كام كله يرجف منا عمو ومرضه وخوفي لا يموت ويتركني وحيدة تحت رحمة اسيا واولادها والله بساعتها اروح بالرجلين ومنا اسيا واولادها يحومون علية واكلوا گلبي بكلامهم وصاروا يضغطون على اعصابي ويردون يفرضون سيطرتهم علية من هسة صرخت بيهم بصوت منهارة اعصابي تلفت من كلامهم وتجبرهم احس حالي مثل الكبش ووكع بين ايدين ذيابة متوحشة وجوعانة ام محمود وابو سيف هدوا الوضع اما بقية اهل عمو مؤيد ضلوا يحجون شنو هاي من بنية وكحة وما تحترم شكد صلفة وهذا الي يكول هاي لو بنتي والله ادفنها وهذا الي يكول هاي متربية بالخارج ما تعرف الاصول احتاروا شلون يرجموني بالكلام صرت اسمع منهم انواع الحجي حظنت نفسي واتكورت على روحي بالكرسي وحطيت ايدية على اذني ما اريد اسمع كلامهم صرت اتمتم بيني وبين نفسي (( عمو عفية كوم وتعال شوفهم شلون يحجون علية عمو الله يخليك تعال ورد لسانهم عني اذوني بحجيهم ادري بيك منقبل احد يهضمني حتى لو بكلمة عمو انا ريم حبيبتك المدللة. شافوك مريض واتولوا علية )) كان هذا حالي لبقية الثلاثة ايام واليوم ثالث يوم لعمي بالمستشفى وهو بعده يصارع الموت كنت كلما ادخل عليه اسمعه يتكلم لوحده بكلمات غير مفهومة. سألت الدكتور كال احتمال هاي هلوسة كنت كاعدة يمه ولازمة ايده الباردة امسح عليها حتى ادفيها فتحت عيونه للنصف وهمس .. ريمة ؟؟ قربت راسي عليه بلهفة .. اي عمو اني ريمتك حجة بصوت متقطع عمو انا كلش موجوع اتمنى اموت وارتاح .. لا عفية عمو الله يخليك لتكول هيج واني منو الي بعدك ..انا ما افيدج انا انسان فاشل تدرين ... ثقل نفسه ورجع كمل .. ريم انا شفت نور بنتي تذب الزبل وتخدم عند الناس كانت عيونها مليانة دموع بنتي مهضومة منظر دموع نور وهي بهيج صورة مذلولة كان اقسى ضربة لكبريائي واقسى عقاب من رب العباد اشوف بنتي تعيش مهانة ومقهورة وانا عايش بالنعيم متهني والله اتمنيت ميت ولا شايف هذا المنظر رجع نفسه يثكل .. اروح لاخرتي وانا عيني مفتوحة على منظر دموعها وعيونها الحمرة من القهر. وضع اولادي وهم يعانون هذا اقسى عقاب شعور ما اتمناه لعدوي بقى عمو يحجي بعدها بكلام وهلوسات ما كدرت افهم منها اي شي وكلامه عن نور الشي الوحيد الي كان مفهوم وبلحظتها عرفت سبب انتكاسة عمو هي شوفته لبنته وهي بهذا الوضع هو يعرف ببنته تشتغل عاملة بس اليسمع مو مثل اليشوف .......... مهيمن كاعد اجرد بالسجلات وانا فرحان ربي يسرها علية امي كانت كاعدة يمي تصب الجاي .. اكول يمة مهيمن .. امري يمة .. ما يأمر عليك عدوا .. اليوم فاتحت خالك حسن اريد اخطبلك وحدة من بناته ما دام حالك اتيسر وبعد ما عندك حجة ترفض وتتهرب من الزواج ابتسمت بوجها وكلت .. يمة اكو واحد ما يتمنى يتزوج ويكون بيت وعائلة بس شوفت عينج كان الحال ما يساعد افتح بيت واورط بنت الناس وياي وانا حتى بيت ماكان عندي .. ومثل ما كلت بنفسك كان يعني قبل مو هسة وانا ضامة كم فلس مجمعتهم .. اي بس يمة والله هسة المحل ماخذ وكتي كله بس لو تنطيني فرصة لحد ما اجرد ارباح المحل واريد اشطب البيت بعده ما مخلص باقي عالنص اكمل البيت وبعدها اتفرغ للزواج ولبنت الحلال ها شنو كلتي .. اكلك يمة اخاف ما هاوي بنات خالك وكاعد تتهرب كلي لا تستحي انا امك اخاف ببالك وحدة بنت حلال هاويها وتحبها لنفسك ومتكدر على مهرها ضحكت على كلام امي وخيالها المحدود .. كول يا فرحة زهرة منهي هاي الي ملكت گلبك انت بس اشر واختار وانا اخطبها لك حتى لو كانت بنت ملوك خطية الوالدة طفح بيها الكيل وبعد ما عندها صبر .. ولا والله يمة ما ببالي وحدة هو انا وين فارغ احك راسي .. جا يمة ليش ما تتزوج. حتى اولاد خالك الاصغر منك اتزوجوا وصار عندهم جهال الا انت ملتهي تركض عالعيشة. اعرف امي كلش زين ما راح تعوفني الا تاخذ التريده مني ابتسمت وكلتلها.. هاي هي حجية. اتوكلي على الله خطبيلي الي يرتاحلها گلبج. الي تصلح تصير ام بيتي اريدها اخت رجال و معدلة وتكون كل اصبع مرة جاوبتني والفرحة ما سايعتها .. يايمة ربي يفرحك مثل ما فرحتني الله يرضى عليك صاحت لحوراء .. حويرة يمة انطيني النقال وتعاي بسرعة حوراء كانت تضحك وتباوع علية بفرح .. واخيرا راح يصير عدنا عرس ويصيحوني اخت العريس هلا هلا بعد ما اتحاجة منو بگدي خرب هسة اصير عزيزة وتبدي اللواكة. من بنات خوالي وخالاتي حضري روحج ام مهيمن بعد ما نطبخ غدا ولا عشا منا لحد ما مهيمن يخطب لان سألتها مستغرب .. شكو ليش حالفين تموتنا جوع .. لا خوية مو نريد نموتك جوع بس خالاتك ونسوان خوالك راح يبدون يطلعون ندارت وشطارت بناتهن كدام امك وهي تختار هلا وهلا وهلا اضحك على حركات حوراء ام مهيمن .. ولج العوبة فضحتي بنات خوالج كدام اخوج امشي روحي جيبي االنقال خلي اتصل على خالاتج وخوالج وابشرهم راحت حوراء واقتربت امي عليه وحجت بصوت ناصي كأنها عندها مؤامرة .. اكول يمة مهيمن ما عندك مواصفات بالبنية الي تريد تتزوجها يعني مثلا تريدها سمينة لو رفيعة ( رشيقة) طويلة لو قصيرة سمرة لو بيضة. .. ههههههه على كيفج علية يمة صار عندي تضارب هاي كلها لازم اعددها حتى تختارين .. اي يمة جا شعبالك لازم اخذ رأيك بالبنية. لان انت الي راح ينقفل عليك باب وباها وراح تعيش حياتك وياها اهم شي تكون انت مقتنع مو مجبور بيها حجت الكلمة الاخيرة بنبرة حزن ابتسمت ولكزتها بخصرها اشاقيها .. انت يا حلو اريدها تشبهج حنينة وكلبها جبير يوسع الكل واذا عالجمال قربت راسي يم اذنها وججيت بصوت ناصي وكلتلها .. اريدها صاحبة شعر طويل حتى اتوسد عليه بتالي الليل حطت طرف حجابها على حلكها وضحكت بخجل وضربتني على كتفي .. يا .. يااا.. فلك طرك مهيمن يمة ولك اثاريك طلعت مو هين. ونا عبالي انت فقير ..... نور اتعودت ارجع من بيت امير بعدما يخلص شغلي عالساعة بال٦ العصر نزلت من الباصات براس الشارع الي قريب على منطقتنا ولكيت سعدون ينتظرني اهووو هذا شنو سالفته صارله اسبوع على هالوضع كل يوم يلحكني بديت اسرع خطواتي خايفة اشو هذا اقترب مني وصار يمشي بصفي مو مثل كل مرة يمشي وراي بقيت امشي سريع وما باوعت عليه حجة.. نور لحظة انطيني فرصة اريد احجي وياج ماجاوبته بقيت اباوع كدام وامشي اصلا عبالك ما سمعته كال.. اهوو هاي بس لا صدك طرشة وخرسة خرب بس يالله ما علينا شسوي بلسانها وسمعها اهم هي وجسمها جنها صاروخ انتبهت علية كام يسوي حركات بيده يريد يشرحلي كان يحجي ويإشر .. نور .. نورة انا واشر على روحه .. اريد اتزوجج واشر بحركة المحبس بالايد معقولة رجال عمر بالخمسين بكد ابوي الله يرحمه يريدني اتزوجه شنو هذا بكل عقله يحجي .. على سنة الله ورسوله اشر للسما .. انا عندي هواي فلوس طلع من جيبه فلوس وفتح ايديه على وسعهم على اساس عنده كومة فلوس .. ها شنو كلتي شنو رأيج بس وافقي والله اعيشج ملكة وصار يأشر بالحركات حتى يترجم كلامه وصلت يم باب بيت خالتي وفتحت الباب وقبل لا ادخل باوعت علية وجاوبته بصوت عالي .. لووووووو تموت ما اتزوجك وسديت الباب وانا ميتة ضحك على شكله خطية شلون كمز من مكانه مفزوع من حجيت هههههه عباله صدك خرسة اسمعه من ورة الباب يكول .. ينعل ابو شكلج خرعتني بنت الابلسة وانا صارلي ساعة جني قرد اسوي حركات اثاري كانت ماخذتني على كد عقلي بس ما علينا نتحمل الي يريد الحلو يصبر على مره وراج وراج يا نور زاد خوفي بوعوده وهالشي حسسني بالتهديد ....... جلال طلعت من ذاك المكان بأعجوبة الله خلصني منهم اول ما عبرت البساتين لكيت فلاحين عندهم حصلت حمل مال مزارعين وطلبت منهم يوصلوني للشارع العام. وافقوا يوصلوني للشارع العام بس قبلها انطوني اكل وكمت اكل وايدي ترجف من الجوع لان صارلي يومين تايه وما ماكل اي شي غير بس الي الكاه بطريقي من البستان وكان فواكه قليلة متسد الجوعة كانوا اهل البستان متخوفين مني لذلك خلوني اركب ورة وية الخرفان بالصندوق مرت علية يومين وانا تايه ما اعرف انا وين باوعت منا ومنا كانت الخرفان محاوطتني هنة وريحتهن الحلوة بس الحمدلله ريحة الخرفان اهون بالف مرة من ريحة الدواعش الله يلعنهم شنو واحدهم عبالك ما شايف الصابونة الف سنة وصلت للشارع العام ونزلت واتشكرت منهم واجرت تكسي كنت كلش تعبان وخايف وصلت لمنطقتنا ورحت على بيت سلوان دكيت الباب وهو طلع وشافني اخذني بلهفة بالاحضان .. لك جلال انت عايش ولك خالك اولاده گلبوا الدنيا يدورون عليك مابقوا مكان ما راحلوه اخير شي من شفتك ما بينت ولا سمعت عنك خبر كلتله .. توفيق الوحيد الي يندل مكان جلال وين انا ما كدرت اتحمل اسكت وخالك راح على توفيق بالورشة كسر الورشة عليه تكسر وكله اذا ابن اختي ما بين خلال يومين اعتبر الورشة تحترك على راسك وهذني الفصعونات بنات خالك التوم اكلن راسي كل شوية داكين الباب علينا ويسألني .. سلوان ودينا لجلال. حافظات هاي الجملة اخذتهن اوشتريتلهن حلويات مثلما انت كنت معودهن بس هن وين ماكوا ياخذن الحلويات ويرجعن على نفس الكلام .. يالله اخذنا لجلال ابتسمت على شكله جنت كاعد يمه بالباب وهو يعاين كتفي وامه اجتي وجابتلي ماي وسلمت علية كلت لسلوان .. شوف سلوان عندي بالورشة دفتر بي المخطط مال الجهاز اريدك تجيبه لي ضروري سلوان.. صار تدلل من عيوني بس انت كوم هسة خلي اخذك لبيت خالك لان خطية ظال بالهم عليك كمت من مكاني ونفضت ملابسي من التراب ورحت وية سلوان لبيت خالي دكيت الباب وطلع مصطفى وشافني وصاح العشيرة كلها بفرحة ولمني بحضنه وهو فرحان .. لك جلال شلونك وين جنت دخلت للبيت وصرت انتقل من حضن لحضن دخل خالي وهو معصب علية .. جلال انت تاليها وياك راح تموتني ناقص عمر من وراك يعني اكو واحد يسوي سوايتك زوجته حجت .. ابو مصطفى انطيه مجال ما تشوف حالته شلون تعبانة مبين كان واكع بشدة غصب عنه سكت وحواجبه بعدها مطبوكة حضرولي الحمام وسبحت وبعدها لكيت مرت خالي محضرتلي العشا اااااااخ يابة والله جسمي يوجعني تعبان كعدت عالصينية اوجوي رند ورنين كعدوا يمي ياكلون ام مصطفى.. كومي انتي وياها مو ستوكم اتعشيتوا شكوا رحمة الله من عادها صاحت لاسراء.. تعالي اخذي خواتج خلي الولد يعرف ياكله لكمة ختلن وراي وبصوتهن الطفولي .. جلال .. جلال لا تخليها تاخذنا نريد نبقى يمك حطيتهن بحضني وكلتلها .. اسراء الله عليج عوفيهن يتعشن وياي والله مشتاقلهن سألني خالي .. شنو هاي الكدمات وين جنت بديت اتعشى وحجيت لخالي بس عن توفيق ما اريد اقلقه خالي يتخبل من هاي الامور وكال .. شوف بعد منا ورايح ماكو شغل وية هذا الي اسمه توفيق بطل من الورشة مالته انا ما ارتاحيت له .. الله كريم هو انا قررت انهي شغلي وياه وادور على غير شغل وبعدها صار خالي يسولف لي عن الاخبار والاوضاع هنا .. صايرة حركة غريبة بالموصل.انا ما متطمن لها .. شلون يعني .. اربع شخصيات من الي اعرفهم باعوا كل املاكهم وطلعوا سافروا لبرة .. اي. وشنو الغريب بالموضوع .. يعني شنو الصدفة هاي الي تخلي اربع شخصيات معروفة يصفون املاكهم ويطلعون وكل واحد بيهم مسؤل عن جهة مختصة يعني حتى ما تربطهم اي صلة عمل او قرابة اشو انا گلبي ما مرتاح .. والله يا خالي الناس صارت ما تنحزر كان خالي يحجي واتذكرت وضعي قبل يومين صدك الناس ما تنعرف ابسط شي هذا توفيق خلصت عمري وانا اشتغل وياه. وبليلة ويوم باعني للسفلة يعني شي ما يشيله العقل غفيت ونمت بنفس مكاني من كد التعب يوم ثاني كعدت على اتصال سلوان يستعجلني حتى اجي لان اخذ الدفتر من الورشة كال انتظرك بالورشة بسرعة تعال قبل لا ينتبه علية توفيق كمت بسرعة من مكاني وغسلت وجهي وبدلت ملابس وطلعت للباب واجتي مرت خالي تسألني .. خالة جلال وين رايح .. طالع بشغلة عالسريع اجيبها وارجع ما اتأخر .. مو خالك كال اذا جلال كعد لا يطلع خلي ينتظرني عندي شغلة وياه كانت واكفة يمي وتحجي وانا كاعد الكرسي المكسور البس بحذائي .. خالة كلتلج ما راح اتأخر بس عندي شغلة يم سلوان اجيبها وارجع سلمت عليهم وطلعت بالباب. اتقدمت. خطوتين وما اشوف الا وسيارة. عالية طبكت علية ونزلوا منها ثلاث مسلحين ملثمين ارتديت للخلف اريد انهزم منهم كلبي عصرني ما لحكت افتح حلكي واستنجد بالناس ما حسيت الا اجتني ضربة بكعب السلاح ووكعت بالكاع ربي دخيلك شنو ومنو هذولي وشنو يردون مني ما لحكت اتسائل بسرعة كتفوني وشالوني مثل الخروف وحطوني بصندوق السيارة وبعدها انضربت على راسي بشي حاد ما حسيت الا والظلام يسحبني ........ ريم حركة غريبة بالمستشفى خلتني انهض من مكاني واروح اشوف شكو كالوا صار انفجار وجايبين ضحايا خفت من منظر الدم الي ترس ارضية المستشفى كنت اباوع عالعوائل والناس شلون تتصارخ كلبي انقبض من المنظر صرت ابجي على بجيهم بعدها لكيت نفسي اواسي مرية كبيرة بالعمر كلنت تصيح وتبجي فاقدة تريد تعرف ابنها وين دك نقالي وكان المتصل عمو ابو سيف نهضمت من يم المرية رديت على ابو سيف بس ماكو شبكة مقطعة كنت امشي راجعة لمكاني عدت الاتصال على ابو سيف كنت مدنكة اباوع عالنقال سمعت صوت واحد كال انا لله وانا اليه راجعون رفعت راسي اريد اشوف وحان توكع عيني على خروج سدية من غرفة الانعاش الي كان بيها عمو وكان الممرض يدفع بالسدية وبيها شخص ممدد ومغطين وجهه نفضت راسي خايفة حتى اخاف افكر مجرد تفكير خايفة يكون تتحقق اسوء كابوس بحياتي حسيت على ايد لزمت كتفي التفتت وجان اشوف ابو سيف يبجي وكال .. البقاء بحياتج عمج مؤيد مات يتبع | ||||
|  |
|
08-09-19, 05:51 PM
| #12 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_العاشر #الكاتبة_نهى جلال ربي فدوة رحتلك اريد اعرف انا موقع عقد وية المصايب وما ادري بروحي اشو صرت انتقل من مصيبة لمصيبة اباوع لحالي محبوس بصندوق السيارة وما اعرف شنو مصيري صار لازم اتشاهد على ورحي من هسة واقرأ سورة الفاتحة لان هذولي اكيد نفسهم السفلة غمضت عيوني وصرت احاجي نفسي هاي هي وصل يومك ياجلال وشكلك ما راح تلحك تشوف عرسك وتتهنى بأولادك ااااخ يادنيا بعد شعندج وياية حسيت على السيارة اتوقفت بعدما مشت مدة تقريبا ثلث ساعة كنت اسمع حركتهم انفتحت ابواب السيارة وصوت خطواتهم الي بدت تقترب من الصندوق رجعت غمضت عيوني وحبست انفاسي اتصنع الاغماء انفتح الصندوق ورفعوني مثل الذبيحة من ايدية ورجلية شمروني بالكاع اجة واحد منهم كان جداً شريف ورش سطلة ماي بارد على راسي ، غصب عني شهكت من البرودة بعد ما بيها مجال ابقى متصنع الاغماء كانوا بعدهم ملثمين واحد منهم كان عنده كرش كال .. هلا والله بزين الشباب الحمدلله يحجي عراقي مو فصيح كمل كلامه .. راح تنور المقصب اليوم بلعت ريكي من گال مقصب يعني شنو راح يذبحوني مثل الكبش ويعلكوني من كراعي واصير من صدك جلال قربان قول وفعل لا ياربي دخيلك انا اتقبلت فكرة اموت بس مو بهاي الطريقة اقتربوا مني وكتفوني صرت اتلاوة بين ايديهم اريد اخلص نفسي منهم حجيت .. انتوا منو ووين ماخذيني وشنو تردون مني صاروا يمشوني بالقوة بأتجاه بيت عادي بسيط .. امشي لك قشمر امشي كدامنا وبلا صوت لا ابوك احركه اليوم همة يسحبون بية وانا مرغلت روحي تمرغل بين ايديهم اريد بس يهدوني ماكو انطاني دفرة على بطني احس اتكطعت احشائي ببطني اتكومت بالگاع من الالم ورجعوا مرة ثانية رفعوني من الكاع واخذوني سحل انتبهت للمنطقة الي احنا بيها كانت هادئة والوقت نهار مو نفس مكان معسكر الدواعش لعد هذولي منو انفتح الباب الرئيسي ودخلوني للبيت بعدها مباشرتاً اخذوني لسرداب اظلم موجود بداخل البيت لتخزين المونة توغلت برودة السرداب والخوف لگلبي رجعت اقاومهم ما اريد انزل بالسرداب ..منو انتوا وشنو تردون مني واحد منهم دفعني كدام ونزلني دفرات جوة بالسرداب وكعت بالكاع وبدوا يقيدوني بسلاسل كل هذا صار وانا بين المقاومة والدفاع عن نفسي بس قوتهم غلبتني وصفيت مقيد بالسلاسل جوة ايدهم رفعت راسي وسألتهم مرة ثانية .. منو انتوا شنو تريدون مني عندكم طلابة وياي اخاف مشتبهين بية واحد منهم انطاني بوكسي على وجهي فر راسي فر احس رگبتي طگت كال .. انت الله يحبك وشكلها امك داعيتلك. لان الاوامر تكول نضيفك يمنا كم يوم نعيد تصنيعك تربية وتعليم يعني نسوي گرصة اذن للحباب حتى ما يعيدها .. ش شنو ما افتهمت عليكم هو كان يحجي وانا گلبي صار يرعد .. يعني نربيك من اول وجديد ونرجعك للعناصر لان الامير يريدك وانت حي ترزق شكله عنده حاجة يمك كلش مهمة وما يكدر يوصللها الا وانت عايش شفت شلون امك داعيتلك كمل كلامه وبعدها صاح.. صگبان اجة رجال ضخم اسمه صگان. گله .. شوف شغلك وياه هذا جبناه لهنا فقط تعذيب يعني مو اكثر دير بالك عليه مو تنسى نفسك وتدوس زايد وانت تعذبه ..تأمرني امر باشا من عيوني راح ادير بالي عليه جاوبه صگبان وهو يباوع علية بوحشية وكأنما گلب مسعور وهدوه كان هذا حال صكبان من بدة يطبق علية انواع التعذيب وبعدها صرت من الضرب والجوع ما اعرف نهاري من ليلي احس زهگت روحي وصرت اتمنى الموت بكل ثانية من كد الالم والتعذيب اباوع عليه من يدخن جكارة ريحتها غريبة موطيبة يفقد بالتعذيب لحد ما فرت روحي من الالم وفصلت عن العالم مثل الضوء وانطفى هذا حالي ..... نور اشتغل ببيت امير وگلبي وفكري كله مشوش خايفة لا صابر زوج خالتي ينفذ تهديده غمضت عيوني وانا اتذكر شلون صابر دخل علينا بالليل وصاحني وصاح لخالتي كعدنا يمه وكال لخالتي باجر جهزي بنت اختج خطابة سألته خالتي .. منو هذولي الخطابة .. سعدون صاحبي طلبها من عندي وانا وافقت نهضت من مكاني مفزوعة لاول مرة انطق واسمعه صوتي بعدما قضيت عمري وياهم كله خرسة بس افعاله تنطق الحجر .. اني ما موافقة باوع علية وكال .. وانتي الخرسة منو طلب رأيج .. مالك حق تجبرني عالزواج انا مو صغيرة ولا انت مسؤول عني وبيومها كام علية غلط وسب وخالتي دفعتني ودخلتني للغرفة وطلبت مني اسكت وهي تحجي وياه اسمعها تكله .. لحظة صابر اهدي شوي ولا تعصب وخلينا نفتهم هو سعدون مو متزوج اثنين نسوان .. اي وشنو يعني اذا متزوج اثنين هو رجال الله رازقه والله حلله اربعة ويريد يتزوج شنو قابل نمنعه .. لا ما تمنعه بس مو معناها يتزوج نور .. وشبيها نور على راسها ريشة متقبل بي ومنو هي حتى ترفضه اصلاً لحد هذا يومج محد دك بابها وطلبها مو انعم الله اجاها سعدون اسمعهم يحجون وانا گلبي يرجف .. خليها تعنس ولا تتزوج سعدون .. اكلج انتي مالج غرض لا تكعدين توزين البنية بيج خير قنعيها توافق على سعدون احسن ما باقية عالة علينا ولا تنسين سعدون علينا دين يمه يكسر الظهر .. عزة العزاني لك صابر شوكت لحكت تداين من سعدون هو مو يشتغل بالفايز شلون تتسلف منه اسمعها كامت تلطم وتحجي .. هاي من وين طلعتلنا بهذا الدين وبالفايز مصيبة ووكعت فوك راسنا هذا سعدون يحمل الدين اضعاف الله يعلم هسة الدين لشكد وصل ولك صابر گلي شلون بيك جاوبها .. سهلة لا تخافين اعتبري الموضوع محلول مجرد ما بنت اختج توافق عالزواج هو يتنازل عن كل الدين .. بعني تريد تبيع البنية وتوفي دينك براسها صخام الصخمك صابر .. لج بنت الحيوان على منو الصخام اشو كمتي تتجاوزين هد على خالتي وضربها والبنات كامن يبجن على امهن وخالتي تصيح وهو يضربها واني باقية خاتلة ورة الباب افرك بأيدية الخوف بلغ عندي لحد الفزع .. شلون ياربي وين انطي وجهي انتبهت من صفنتي على صوت امير كنت واكفة اغسل الصحون امير.. شنو نور شبيج تبجين باوعت عليه بأمل اريد انخي احد يفزعلي ويرد عني رجل خالتي .. مصيبة وحطت فوك راسي .. أول شي اتركي الصحون من ايدج وتعالي كعدي وفهميني شنو الموضوع بلكي اكدر اساعدج غسلت ايدي من الصابون ورحت كعدت على ميز الطعام وهو كعد كدامي ونظرة الاهتمام والعطف بعيونه .. يالله احجي اسمعج .. والله ما اعرف منين ابدي وشنو اكول انا الله بلاني برجل خالتي يريد يزوجني غصب عني لصديقه رجال بكبر ابوي الله يرحمه ويمكن اكبر وصرت احجي لامير عن كلشي صار وياي واني كلي امل بعدما انتهيت من كلامي كال يطمني .. شوفي نور انا اعرف كلش زين انتي بنية كلش فقيرة وخوافة وما راح تكدرين توكفين بوجه رحل خالتج لان عشتي ويانا وعرفت طبع بهواي مواقف انتبهت عليج تلتزمين السكوت وتتنازلين عن حقج وهذا الشي راح يحطم حياتح .. شسوي والله اخاف هالشي مو بيدي .. محد راح يكدر يحميج من طغيان رجل خالتج غير نفسج الي ما تعرفينه انتي بعمر يسمحلج ان ترفضين ومحد يقرر عنج انتي مسؤلة نفسج يعني اذا جبرج هذا الي اسمه صابر عالزواج الج الحق ترحين تقدمين عليه بلاغ بالشرطة وهمة يشوفون شغلهم وياه يعني بأختصار احب اكلج القانون وياج .. خايفة اذا خطيت هيج خطوة يطردني من البيت ويشمرني بالشارع .. اذا طردج بيتنا موجود. اشو انتي كله يمنا وترجعين لبيت خالتج بس للنوم يعني احب اكلج بيتنا موجود وانا مثل اخوج لا تستحين مني كلام امير رفع الامل عندي احس صار عندي اصرار انا لازم ابقى احارب نهض من مكانه وكال .. مو تنسين الكلام الي كلتلج اياه صيري قوية ودافعي عن حقج لا تستسلمين اتشجعت بكلام امير وجاوبته .. هذا هو اليوم من ارجع احط حد لصابر وتدخلاته بحياتي وفعلا خلصت دوامي ببيت امير ورجعت لبيت خالتي مريت من يم باب بيت اسيل شفته مقفول جريت حسرة .. اوووف يا اسيل لو تدرين شكد محتاجتلج بس شسوي اتزامنت سفرتهم السياحية لاربيل وية مصيبتي خو ما تكعد تنتظر تخلص مشاكلي وتروح قابل ابتلت بية وصلت لبيت خالتي ودخلت لكيت خالتي مجبرين ايدها ولافين راسها خطية كسرت خاطري البارحة انضربت من وراي ولو هي متعودة على ضرب صابر اقتربت منها وسلمت عليها .. خالة انا اسفة عالصار بيج كله من وراي بس والله صعبة علية اوافق اتزوج من سعدون جاوبتني خالتي.. انا مستحيل اسكت لصابر على سوايته ومستحيل اخليج تتزوجين سعدون هذا الشي سويته مو بس علمودج حتى علمود بناتي يعني اذا زوجج لسعدون معناها راح يجي الدور على بناتي ويزوجهم بهاي الطريقة لكل واحد متداين منه ويكعد يوزع بيهن على الديانة الله لا يوفقه بجاه النبي ورجعت خالتي تدعي وتندب حظها وانا كمت ودخلت للغرفة لليل اجة صابر وجايب وياه سعدون والسيد يريد يعقد علية وانا من خوفي رحت ركض ختلت بالغرفة وقفلتها علية واتصلت على امير حتى يلحكلي ما عندي غيره .. ريم خوف وحزن وغصة هذا كل الي مريت بي بهاي الثلاث ايام اليوم ثالث لفاتحة عمو احس غرگت بحزني لدرجة ما اكدرارفع راسي او اقرر اي قرار ام محمود ما عافتني ولا لحظة وعمة اسيا من وفاة عمو الله يرحمه. انگلب تصرفاتها وصارت كلش حنينة علية وكل شوية تاخذني لحضنها وتواسيني اسيا.. سكتي يابعد عمتج مو كطعتي گلبي بدموعج ياااخوية المن تركتنا ورحت اااخ يا خوية وهاي اليتيمة بخلافك الحزن غير معانيها كانت تحجي وتبجي صار الليل وعزلوا الفاتحة ودخلوا اولاد عمة اسيا نورس ونائل كان البيت اظلم وخالي ما بي احد بس اني وهم وام محمود الي قررت تبات وياي وعمتي اجتي وكعدت يمي اسيا.. شوفي عمة ريمة. ولو هو مو وكته هذا الموضوع بس لازم يتم لان وصية المرحوم اخوية قبل لا يتوفى امني عليج كال اريد اموت وانا متطمن على مستقبل ريم فخاف انا اموت اريدج تزوجيها لنائل ابنج وانتي تعرفين الميت يرتاح بكبره اذا اتطمن على اهل بيته باوعت عليها بحزن وبنفس الوقت خايفة حزني على فراق عمو كان ماخذ كل عقلي وهو الي مسيطر على كل انفعالاتي وقراراتي باوعت عليها بذبول وجاوبتها .. اذا كان هالشي يريده عمو ويريحه خلاص انا موافقة اتزوج نائل على الاقل احقق ولو شي بسيط من الي كان يتمناه عمو دنكت راسي صار ما يهمني اي شي بالحياة اتزوج نائل او اموت او انسجن كله عندي سواسية لان البؤس والحزن سلب مني كل ذرة بالحياة ...... جلال كنت احلم بأمان بيت خالي نايم بفراشي ومخدتي وغطاي رغم بساطتهم بس بهاي اللحظة هذا احلى واامن مكان عندي بالعالم يشبه الجنة نبضة خفيفة ولفحة هوى جديد احس بروحي عبالك راكب الموج انا وين جفوني بعدهم ثكال ما اكدر افتح والنفس كوة اسحبه والصوت ما اكدر اطلعه بس اذني الوحيدة تشتغل وتكدر تسمع سمعتهم يحجون .. باشا الحك تعال بسرعة ننتظرك انا وين هذا هوى عالي واحد منهم حجة .. هسة شنو نشمره بالزبل لو ننتظر الباشا جاوبه صوت ثاني.. كله منك صگبان كلولك بس عذبه عالخفيف مو تموته صگبان .. شسويله هو فطس بين ايدية حتى الصعقة الكهربائية مو قوية .. عمي يا مو قوية انت ناتل الولد بفولتية قوية ما اتحملها گلبه ومات كله من وراك انت من تحشش تفقد وتنسى روحك هسة هيج احسنلك تعال شنو نسوي بهاي المصيبة الوكعت فوك راسنا سمعت صوت سيارة ونزل واحد يركض وانا على حطتي مطروح عالكاع مسلوب القوة والنفس كوه اطلعه عبالك مشلول اتكلم متفاجيء .. لك هاي شنو صكبان لاتكول موتت الولد جاوبه .. هو بسرعة مات ما لحكنا عليه جاوبه صاحبه .. اذا انت ناتله بالكهرباء .. مو اكدت عليك قبل لا اسلمك الولد بس شوية تعذيب صگبان .. هذا يومه بعد لا تكعد تلومني كلي شنو نسوي بي هسة .. الله ياخذك صكبان شلون ورطة هاي تعال هسة شنو اكول للجماعة وهذا الامير مالتهم يريده صكبان.. كله غفلوا عنه الولد وشرد من عندهم .. حتى ما يحركون عشيرتي .. شنو القضية هسة هو مو شارد من عندهم قبل كم يوم وهمة معسكر شكبره. بقت علينا ما ينهزم من عندنا نفس الشي الرجال.. شنو فحصته واتأكدت منه ميت جاوبه.. اي فحصته ورة ما صعقه ما بي اي نبض .. وهسة انتوا ليش جايبنه لهنا شراح تسون بي ..راح نشمره بالزبل والكلاب تاكله لعد شمروه بسرعة وتعالوا وراي خلي نشوفلنا حل بهاي المصيبة صگبان.. انت مدري منين تجيب لنا هاي الكراوي التعبانة ....... نور بعدما اتصلت على امير گلي قفلي الباب عليج انا جاي قفلت الباب وصابر صار يدك بالباب يطلب مني اطلع .. نور طلعي ما راح اسويلج والله بس افهمج بقيت متكورة على نفسي ورة الباب ماجاوبته الساني ثكل ما يقبل يجاوبه وهذا عيبي رجع دك الباب مرة ثانية .. نور تسمعيني مو احجي وياج فتحي الباب هزيت راسي بدون كلام سمعت خالتي تحجي وياه .. صابر البنية ما تريد تتزوج ترة هي مو بالكوة .. انت سدي حلكج وسكتي لا تخليني اكوم عليج ترة والله ازوجه وحدة من البنات خالتي.. يمة صخام الصخمني ولك بناتي صغار الله لا يرضى عليك ولا يوفقك دفعها وكال .. بالله شو وخري من كدامي موتيني انتي والنكة مالتج نص ساعة واندك الجرس وبعدها صار صياح مال رجال وهوسة گلبي وكع بين رجلية اندك الباب وكان اسمع صوت رجال غريب يحجي .. الاخت نور سمعيني زين انا الضابط حسين من قسم الشرطة المجتمعية ممكن تفتحين الباب حتى نحجي وياج لطمت على وجهي بخوف عزة هاي الشرطة شسوي هنا فتحت الباب ولكيت ثلاثة رجال من الشرطة وامير واكف يمهم وصابر وسعدون واكفين على صفحة يباوعون لي بحقد كنت افرك بيدي بقلق سألني الضابط .. نور مؤيد تم تقديم بلاغ ينص على التعدي عليج وتعنيفج للزواج بالقوة هزيت راسي بالموافقة ما اكدر انطق بالكلام التفت الضابط على صابر وسعدون وكال ممكن تتفضلون ويانا وانتي هم تجين ويانا للمركز انخطف لوني وهزيت راسي برفض اقترب امير وفهمني .. نور لا تخافين. هذا كله لمصلحتج امشي روحي وياهم وانا هم اجي وياج رحنا للمركز وبعدما حجة وياية الضابط واخذ مني بعض المعلومات يعني مثل شكد عمرج وشنو حالتج الاجتماعية وشنو يقربلج هذا الي اسمه صابر وبعدما اخذوا كل اقوالي باوع الضابط لصابر وحجة وياه بتحذير .. البنية بعمر يحقلها حرية اختيار الزواج وانت مو مسؤول عليها انت غريب عنها ماعندك الحق اتزوجها وبعدها طلب من سعدون وصابر ان يوقعون على ورقة عدم تعرض لي طلعنا من المركز وامير راواني الورقة وكال رجعي للبيت ولا تخافين شايفة هاي الورقة اي حركة منهم اتجاهج صدكي مباشرتا ينشمرون بالحبس رجعت للبيت وية خالتي وصابر وسعدون كنت كلش خايفة وصابر طول الطريق غلط وسب وكفران وكف شعر راسي وارعبني .. ولج ساقطة انا من تالي عمري ياخذوني الشرطة سحل من بيتي لعد بس اصبريلي اذا ما اراويج النجوم بعز الظهر ما اتسمى صابر خالتي حجت بصوت ناصي وكالت .. خالة سكتي لا تجاوبينه خلي هسة يعصب شوية ويسكت بس الايام الي تلت هذا اليوم كانت عكس ما كالت خالتي يوم ثالث من رحت لبيت امير مثل كل يوم اتفاجئت بوجود كومة سيارات يم بابهم هذولي عمام امير شكو شصاير يا ستار رحت اركض واني كلي خوف ورعب على امير واهله بس لا خالة بيها شي دخلت ورجلية من الخوف بادت لكيت خالة كاعدة ويمها امير كاعد كان مضروب براسه ووجهه صاير علبة الوان اسمعه يطمن بأمه حتى لا تخاف والاستقبال كان كاعدين بيها عمامه واولاد عمه وخواله يحجون بس شافتني خالة عقجت وجها وصدت عني سلمت ما ردت السلام سرى كانت واكفة على صفحة تبجي بس شافتني اجتي هجمت علية وصارت تحجي .. لج ليش مو احنا لفيناج ببيتنا وحسبناج وحدة منا شلون تورطين اخوية وتأذينه وية ناس زبالة قاطعها امير وزمخ بيها .. سروى بلا حجي زايد الي صار ماله دخل بنور هالمرة ام امير حجت .. شلونه ماله دخل وهمة الي اجوي عليك نفسهم الي انت اشتكيت عليهم قبل فترةً .. نور ما طلبت مني اشتكي عليهم انا من يمي اشتكيت اذن البنية مالها دخل سمعنا واحد من عمامه صاح امير وطلب منه يجي بالاستقبال يردون يحجون وياه وام امير صاحتني وكالت تعالي اخذيني للغرفة رحت عليها ودفعت الكرسي المتحرك ودخلتها للغرفة باوعت علية وكالت فوتي جوة وسدي الباب وراج دخلت وسديت الباب واشرتلي اكعد كدامها عالسرير باوعت علية بنظرات صارمة وكالت .. شوفي خالة نور انا من اول يوم دخلتي لبيتنا عاملتج بما يرضي الله وحسبتج وحدة من عدنا وما قصرت وياج كنت اكول خطية فقيرة واكسب بيها ثواب بس من يصير وجودج ببيتنا يشكل تهديد لحياة ابني لا هنا تتغير الامور ويصير لازم واحد يحط حد لهذا الشي انا مرة كبيرة ومريضة وما عندي غير بس هذا الولد ما مستعدة اشوفه يضيع عمره علمود يفزعلج ويركض يحل مشاكلج هذا الشي ما يصرفلي وبما ان اني اعرف ابني كلش زين ما راح يبطل يساعدج ويدافع عنج لان غيرته ما تسمحله لذلك قررت اطلب منج تبطلين من الشغل عندنا وتشوفيلج غير مكان بشرط اريدج انتي ترحين وتكولين لأمير اريد ابطل يعني تفهمينه القرار صادر من عندج ولخاطر كرمنا وياج اريدج توعديني ما تجيبين سيرة بالدار بيني وبينج لأمير لان راح يرفض ويعند ويتعارك وياي وانت بكيفج تقبلين تصيرين السبب بمشاكلنا اني وامير همست بصوت مخذول واني مدنكة راسي .. لا اكيد ما ارضى هذا الشي يصير .. الله يبارك بعقلج وانا هم ما راح اقصر وياج انطيج الراتب مقدماً مال هذا الشهر ومن هذا اليوم احنا نستغني عن خدماتج رفعت راسي اباوع عليها بتوسل وعيوني تدمع .. بس خالة اني احبكم صعبة ابطل وما اشوفكم انتوا بالنسبة الي مثل اهلي والله الشاهد علية ما اتمنى احد يأذيكم .. ادري بيج تحبينا وموافقتج بترك الشغل تثبت صحة كلامج كلامها حشرني بزاوية كملت كلامها بسؤال .. ها شنو كلتي؟؟ هزيت راسي بالموافقة .. هذا هو خالة اوعدج بعد ما تشوفين وجهي كنت احجيها وكلبي ينزف عبالك مطعون بسكين وكل كلمة انطقها تحرك السكينة اكثر بنص گلبي .. انا اعتذر منج عالصار بأمير وربي يبعد عنكم اولاد الحرام كمت من مكاني ام امير.. لحظة قبل لا ترحين انطيني هاي الجنطة كانت تأشر على جنطة موجودة عالميز سلمتها لها وهي طلعت منها مبلغ من الفلوس وسلمته لي وكالت .. هاج هذا راتبج وفوكاه زيادة. اخذيه ومثلما اتفقنا ترحين كبل تحجين وية امير طلعت من يمها وبعدها طلعت من بيتهم ورة ما بلغت امير خطية وهو صار يحاول يقنعني ان اغير قراري لكن اني بقيت متمسكة بكلمتي اخير شي رفع ايديه بأستسلام وكال .. براحتج هذا قرارج انتي كنت اتمنى تبقين ويانا شكرته ودرت وجهي اريد اطلع من بيتهم استوقفني بسؤاله .. نور لحظة قبل لا تطلعين منو. ورة قرارج هذا الخوف من القادم لو احد ضغط عليج حتى تبطلين .. محد ورة قراري تعرف بية اني انسانة مسالمة ومالي بالمشاكل وانت من اتصلت على الشرطة وجبتهم للبيت الناس صارت تحجي بسمعتي وصارت سيرتي على كل لسان ما انطيته مجال يحجي مباشرتاً طلعت من بيتهم والتفتت عليه وعيوني تدمع هنا بهذا البيت دفنت احلى ايام بحياتي همست بصوت ناصي .. في امان الله يا امير گلبي دنكت راسي ومشيت وكانت هاي اخر مرة اشوف بيها هذا البيت وصلت للمنطقة وعيون الناس كلها تاكلني فعلا. من يوم الصار الناس كامت تحجي بسمعتي وطلعوا اشاعة علية يكولون (( نور اتصلت على صاحبها وهو جاب الشرطة وشمر خالها وصاحبه بالسجن لان ما رضى يزوجوه نور )) وگلبوا الكلام كله. واني مثلما اني ما اتغيرت الخرسة نور تبقى تسمع وما تدافع عن نفسها. مريت من يم باب بيت اسيل ولگيته بعده مقفول صرت اتوسل بالباب اكوله رحمة على اهلك متكلي شوكت يردون احبابك ترة فاض بية الامر واتكطعت بية الاسباب خلهم يردون ويفتحون الابواب مشتاقة لكعدتهم يم عتبت الباب دخلت للبيت وبعد ما طلعت منه اتمرضت وصحتي انتكست لان مو هين علية فراق اعز انسان على گلبي هاي من غير الحرب النفسية الي شنها علية صابر اليوم بقيت نايمة بفراشي لوقت متأخر احس اكو فراغ بحياتي كلش مرعب واظلم كنت نايمة واندك الجرس شوية وكان تدخل خالتي سناء وكالت .. اكلج نور كومي بسرعة هذا واحد واكف بالباب يسأل عنج شمرت الغطا وسألتها .. ما عرفتي بي منو وشنو يريد مني جاوبتي .. لا ما كدرت اعرفه وهو طلبج بالاسم حتى تستلمين الرسالة وتوقعين. بس شكله رسمي عزة بس هذا من جماعة الشرطة كانت خالتي تحجي واني اتحرك بالغرفة حتى ابدل ثوبي والبس حجابي رحت غسلت وجهي عالسريع وعدلت حجابي وطلعت للباب وخالتي وراية سلمت عالرجال الواكف يم الباب ينتظر سألني .. انتي نور مؤيد هزيت راسي بموافقة وخالتي حجت .. اي نعم هي نور مؤيد مد ورقة كدامي وكال .. شوفي اختي مطلوب منج الحظور غداً الى مكتب المحامي ابو سيف هذا العنوان هنا موجود بهاي الورقة حتى يتم فتح وصية المروحوم والدك .. ممكن توقعين هنا .. وهذا المحامي وين جان عن الوصية شنو هستوه اتذكر يفتح وصية الرجل جاوبها .. يعني حتى المرحوم ترابه ما جف يعني مصارله اسبوعين من توفى والمحامي ابو سيف مامقصر خلص الاجراءات بأسرع وقت انهى كلامه وخالتي شهكت متفاجئة وانا اترنحت مصدومة شنو معنى هذا الكلام ......... جلال بديت ارجع للوعي حسيت بروحي بمكان غريب لكن ما الحك اركز افرزن المكان لان غصب عني ارجع بالظلام يغمى علي ورة لحظات حسيت اكو شي بصف ايدي يقرض بيدي گوة كدرت احرك صبعي انتبهت بخوف هذا هذا شنو جرذي (جرذ) كوة حركت ايدي ابعده عني بس مع الاسف تحريك ايدي كانت مهمة عقيمة وكلش صعبة بعدها سمعت صوت نباح الكلاب واصوات نباحهم صارت قريب علية هاي هي خلي اسلم الروح بعد ما منها مفر هاي تاليتي اصفة وجبة طعام للكلاب والجرذان وبعدين يقرون على روحي الفاتحة بعد ما يسوون لحمي ثوابات ويوزعونه عليهم صرت اهلوس بالكلام حرارة جسمي نخرت عظامي انتبهت على شي بدة يسحبني من رجلية يمكن الكلاب راح تنهش لحمي رجعت غطيت بظلام كلش عميق ما حسيت على شي ابداً وما اعرف اشكد بقيت على هذا وضعي بعدها وعيت وفتحت عيوني وصار ضوة كلش قوي بعيوني رمشت حسيت على جسمي دافي وبديت اتلمس هاي شنو انا اكدر احرك اطرافي هاي بطانية منو مغطيني واني وين كنت وضعي مثل طفل مولود يريد يستطلع الاشياء الي حوله ردت ارفع ايد ماتنرفع بعدين شفت ايدي ملفوفة بشاش وصلت لخشمي ريحة ديتول درت وجهي شفت ممرضة واكفة قرب السرير وتزرق السيروم المعلق يم راسي ابرة وشايلة بيدها ملف ابتسمت بوجهي عرفت نفسي اني بالمستشفى ردت احجي بس ماگدرت اطلع صوت حنجرتي جافة كلش بصوت متجرح ثقيل .. احم احم ماي ماي عفية ماي الممرضة .. بس لحظة انتظر راحت وشوية رجعت وياهة دكتور الدكتور.. الحمدلله على سلامتك ياامير شلونك اليوم بس ذكر كلمة امير اقشعر جسمي كرهت حتى هذا الاسم من كد الرعب الشفته على ايدهم .. دكتور احس جسمي مكسر .. لاتخاف هاي كلهة رضوض وبمرور الوقت تتعالج .. صارلي شكد هنا بالمستشفى جاوبتني الممرضة .. صارلك اسبوع تقريبا من جابوك عالمستشفى .. منو جابني هنا .. رجال كبير شافك بالزبل وجس نبضك وشاف بيك روح وطلب الاسعاف وهسة انت بالمستشفى الدكتور .. بس الظاهر حضرتك متعرض للتعذيب لان الاثار الموجودة بجسمك تثبت ذلك .. الله لا يوفقهم دمروني الدكتور .. الشرطة منتضرتك من تفيق حتى ياخذون اقوالك اهوو صارت بيها شرطة وتعال سين وجيم وادري كلش زين حتى لو احجيلهم عالشفته ما اتوقع راح يكدرون يسوون شي ورة خمس دقايق دخل علية شرطي وبدة ياخذ اقوالي وبدت السين والجيم كان مبين جاي كأجراء روتيني يسونه مع اي واحد مثل وضعي اني درت وجهي وغمضت عيوني اجتي الممرضة .. بلا زحمة ممكن سؤال .. تفضل .. تكدرين تدبرين نقال اريد اتصل على اهلي اكيد هسة هم مخبوصين على غيابي .. صار راح انطيك نقالي حتى تتصل على اهلك راحت واخذت صينية الادوات ورة دقايق رجعت وبيدها نقال فتحته وسلمته لي الرقم الوحيد الي حافظه هو رقم سلوان وما اكدر اتصل عليه اكيد مراقبينه الحذر واجب فكرت بطريقة تخلي يتصل علية من رقم ثاني غير رقمه رسلتله رسالة وكتبت بيها .. سلوان. انا رنين ورند خابرني من غير رقم ضروري مسحت الرساله وانطيت التلفون للمرضة وشكرتها .. اشكرج اختي رسلت رسالة ومنتظرهم يتصلون علية .. لا ليش رسلت رساله ترة عندي رصيد تكدر تتصل كانت تحجي وقطع علينا صوت نقالها رقم غريب .. هذا الي رديت عالمتصل وسمعت صوت سلوان كان يحجي بلهفة حجيت بصوت حذر .. الو هلا سلوان تسمعني .. كلي انت جلال عايش ما اصدك اذني سألته.. سلوان ما عندي وقت هذا النقال مو مالتي .. لك والله من وصلتني الرسالة وقريتها گلبي طار من الفرحة .. هسة عوفك من هذا الكلام .. انت وين هسة .. بالمستشفى ال.. .. سد النقال وانا دقايق وجاي عليك .. لالالا سلوان دير بالك تجيني ترة الموضوع اصعب مما احنا متوقعين هذولي السفلة همة الي خطفوني واحتمال قوي انت هسة مراقب ونقالك مو بعيد يطلع مراقب ..جلال ترة خالك راح بلغ الشرطة وما اكتفى بس بالشرطة راح بلغ الاستخبارات عن موضوعك وحجالهم عن توفيق والموضوع كلش كبر باوعت للممرضة كانت تباوع علية بحذر شكلها بدت تخاف مني ومن كلامي .. عوفك من هذا الكلام ما اكدر احجي هسة الكاع محضورة هسة اول شي اريدك ترسل بيد اي واحد بس كون ثقة ملابس ونقال وثاني شي تروح تطمن خالي وكله جلال بخير لا يخاف علية .. جلال الدفتر الي بي المخطط طلعته من الورشة وهسة هو عندي ضامه بكنتوري .. تمام عاشت ايدك يا بطل والله من غيرك انا اضيع .. جلال انت ظلع من ظلوعي ، بس ظلع اعوج ما يصيرلك حل وخايف لا يجي اليوم وينكسر ظلعي باوعت للمرضة بعدها واكفة وكل شوية تستعجلني اخلص .. يالله سلوان انا لازم انهي الاتصال راح اسلم النقال مو تنسى ترسل الدفتر مع الغراض .... مهيمن راجع من الشغل للبيت ودك نقالي وكان المتصل رقم غريب رديت .. الو .. العفو حضرتك مهيمن مؤيد .. اي نعم منو وياي .. وياك المحامي ابو سيف اتصلت عليك بخصوص الوالد سألت مستغرب .. شبي الوالد الله يرحمه .. استاذ مهيمن الي متعرفه انت الوالد قبل اسبوع اتوفى وكتب وصية والمطلوب منك تجي لبغداد وهناك بمكتبي راح تنفتح الوصية نهضت من مكاني متفاجيء .. لحظة انت شكاعد تحجي لو انضربت بعقلك انا ابوي مستشهد صارله ٢٩سنة يتبع | ||||
|
| |
|
08-09-19, 05:55 PM
| #13 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_الحادي_عشر #الكاتبة_نهى مهيمن يعني انا كنت عايش كل هاي السنين بكذبة زين ليش وشنو السبب من هذا كله امشي بالطريق وعقلي مشوش والصدمة مرسومة على وجهي اريد استوعب الي سمعته من هذا المحامي صار الي يشوفني بالسوق يسألني .. خير مهيمن شكو صاير شي اجاوبهم وبالي مو يمهم حتى ما اعرف شنو جاوبتهم كنت مثل المضروب على راسي يمكن لو واحد جاي ضاربني طلقة ولا هذا الخبر الي سمعته ربي عقلي اتشتت من كثر الاسئلة شلون وليش ويازمان كل هذا صار وليش انا ما عندي علم يعني امي وخوالي كلهم يعرفون وضامين عني،طيب شنو السبب الخوف الي بگلبي كل شوية يزيد ويكبر خايف لا اكتشف بعد شي ثاني غير موضوع وفاة ابوي طلعت النقال من جيبي واتصلت على امي وغصب لازم روحي .. يمة انتي وين جاوبتني .. اول شي سلم كول يمة شلونج شخبارج شنو راسا (الو يمة انتي وين ) كانت تحجي وتقلد صوتي .. يمة سألتج جاوبيني انتي وين .. انا بالبيت وشبيك تحجي وياي بنترة ومعصب ،ها ولك جاوبتها بنفاذ صبر .. يصير خير انا جاي للبيت انتظريني وراح تعرفين شبية وصلت للبيت وحوراء فتحتلي الباب سألتها .. منو موجود جاوبتني وهي تباوع لوجهي المدخن مستغربة .. محد موجود بس اني وامي دخلت للبيت ولكيت امي تنتظرني ووجهها ثكيل وحوراء تمشي وراي وتباوعلي بفضول التفتت عليها وكلت .. حوراء طلعي برة وسدي الباب وراج انتبهت لأمي اتخلت عن نظرات الزعل وصارت تباوعلي بأهتمام .. شنو يمة مهيمن شبيك سامع شي ..اي والله يمة اليوم بالصدفة سمعت ابوي مؤيد انطاج عمره ، صارله اسبوع من توفى ركزت عيوني عليها اراقب وجهها شهگت وحطت ايدها على حلكها متفاجئة بالخبر سألتها بعتب .. ها يمة شنو شبيج اشو اتفاجئتي كامت من مكانها وكالت .. يمة مهيمن خليني افهمك قبل لا تحجي اي شي هي حجت هاي الكلمات وانا من قهرتي نزلت بالحجي .. يالله گولي انا اسمعج فهميني ليش انا اخر من يعلم بوجود ابوي شنو السبب الي خلاج تضمين عني مثل هيج شي ليش تركتيني عايش طول هاي السنين يصيحوني اليتيم وانا مثل الاعمى اتفاجيء بأبوي كان عايش اقتربت مني تريد تهديني .. يمة اهدي واذكر الله احس بداخلي نار ما تنطفي قاطعت كلامها .. جاوبيني اريد اعرف شلون انطاج كلبج تضمين عني هيج شي. وتشوفيني كدام عينج شلون جنت اتحسر على الاب من ينكسر ظهري من ورة تعب الشغل معقولة ما كسرت خاطرج وتكولين خلي اجبر بخاطره واكله انت عندك اب يسندك حالك حال الاولاد على الاقل طمنيني خليني اعرف انا مو وحيد بهاي الدنيا اتغيرت معالم وجها للجمود .. هسة خلصت كلامك لو بعد عندك عتب وياي .. اي ومنتظرج تفهميني .. ما راح اجاوبك لان تعرفني كلش زين بية طبع ما احاجيك وانت معصب وهاي حالتك ما ينفع اطفي النار بالنار طلعت من الغرفة وصاحت لحوراء .. حوراء يمة حضري لاخوج الغدا رحت وكفت كدامها وقطعت عليها الطريق بعناد .. وين رايحة ما تطلعين وتعوفيني قبل ما تفهميني كلشي باوعتلي بعناد .. مو انت الي تعلمني شكوت احجي وشوكت اسكت لا عبالك كبرت وصرت رجال وتفرض كلمتك على امك ما اريد اغضب عليك وربي يعابيك وتتحاسب علمود ساعة غضب راحت ووتركتني لوحدي اتگلب بناري وامي مثل كل مرة مستحيل تحجي وياي وانا معصب هذا طبعها التفتت ووكعت عيوني علىً خيال صورتي بشباك الغرفة وبضربة وحدة كسرت كل شي وتناثرت قطع الزجاج مثلما تناثرت كل ايامي بخيبة امل دخلت حوراء جايبة الاكل شافت المنظر حطت الصينية بالكاع سألتني بخوف .. شنو هاي مهيمن ايدك مجروحة تنزف دم ما جاوبتها وهي راحت طلعت تركض وبقيت انا وحدي وعقلي ما صدك يستفرد بية حتى يبدي الوسواس .. زين و ابوي وين من هذا كله معقولة ما خطر على باله طول هاي السنين فد يوم يسأل عني شنو سبب غيابه وشنو عذره هو رجعت حوراء وبيدها القطن والديتول ولزمت كف ايدي تداويه وتباوع لي بحذر سألتني بصوت ناصي .. ابو الهمة ليش معصب وزعلان .. هيج كلشي ما كو سألتها .. اكول حوراء امي وين .. كاعدة برة بالحديقة وهي مثلك وجهها ما يتفسر شبيكم شجاكم محد يرضى يحجي والله خوفتوني .. كلتلج ماكو شي كامت من يمي بعدما ايست صحتلها .. حوراء اخذي وياج صينية الاكل .. ليش هسة امي تزعل اذا ما تاكل .. ما اشتهي اكل شيليه اخذت الصينية وراحت وانا رحت كعدت بالكاع مستند عالحايط وبعده عقلي يحلل بكيفه خايف لا اكتشف ورة هدوء امي ضربة ثانية اقوى من الي قبلها حرب نفسية بيني وبين نفسي وبقيت على هذا الحال ما بين مد وجزر والله احس راسي راح ينفجر من كثر التفكير ورة ساعة نهضت من مكاني وطلعت من الغرفة ادور على امي لكيتها بعدها كاعدة بحديقتنا الصغيرة تشلع من الحشيش نبات اسمه خراب الگاع بس شافتني اتوقفت ونفضت ايدها من التراب حجيت بصوت واهن تعبان وبنفس الوقت خايف .. يمة رحمي بحالي وجاوبيني ليش انا انحكم علية البس ثوب اليتم غصب عني وانا مو يتيم قست ملامح وجهها وكالت .. يعني بعدك مصر تتهمني بالتقصير لان ضميت عنك حقيقة ابوك .. انا ما جاي اتهمج بالتقصير انا معترض على الي سمعته واريدج تفهميني شنو السبب من هذا كله .. خوش ما دام هيج الحجي صار جا تعال يا ابن بطني خليني احجيلك عن موضوع ابوك بعد ماله داعي اكتم بگلبي واتحمل .. واصلاً ليش تكتمين .. لان ما ردتك تعرف بأبوك عافك وانت لحمة حمرة وراح علمود يتزوج وحدة ثانية علنت وفاته وما متندمة على قراري ولو يرجع بية الزمن مرة ثانية ارجع اعلن وفاته تعرف ليش انا سويت هيج كلام امي صدمني اكثر من صدمتي بخبر وفاة ابوية وبلحظة وحدة انقلب بية الحال من صدمة وغضب الى متفاجيء كملت كلامها .. ردت نعيش اني وياك بين الناس معززين ومكرمين ما اريد احد يحجي بينا ويكول رجلها نبذها ونبذ ابنها وعافهم وراح وانا كضيت عمري رافعة راسي بين الناس وابوك بعملته وياية هجرني وكسرني طلكني بدون ذنب حتى ما كلف نفسه يشرحلي الاسباب وتركني مثل الاطرش بالزفة وخلاني اسمع بخبر زواجه الثاني من الناس كانت كل كلمة تنطقها امي مثل السهم المسموم ينبت بگلبي .. يعني افتهم من كلامج انا جنت نكرة وغلطة بحياة الوالد الظاهر كنت بالنسبة له زايد عنده .. لا يمة حشاك لا تكول هيج انت وليدي قطعة من گلبي وغالي عندي وابوك من تركك صدكني هو الي خسر وخسارته بالنسبة الي صارت ربح جانت امي تحجي وعيونها تلمع ما اعرف بعد الي سمعته انقهر عليها لو احقد على انسان ميت سألتها مستغرب .. زين ما دام هو هشكل انسان تافه ليش تزوجتيه لاحت الدمعة بعيونها وسافرت النظرات لبعيد وبدت امي تحجيلي شلون صارت قسمتها وية ابوية وشلون عاشت حياتها وياه ومع الاسف كل الي عرفته خلاني اكره شي اسمه اب وبساعتها طلعت من البيت هايم على وجهي بأرض الله الواسعة امشي ونار الخذلان تسعر جوة گلبي وصلت لنهاية مزرعة بيت خوالي وصحت بصوت عالي مقهور .. هااااااااا يا دنيا شورطج وياي ضربت على صدري اتحداها شعندج بعد وياية ترة انا طلابج غدرتيني من الصغر وما رحمتي بحالي عندي وياج دين ولازم توفينه كعدت بالكاع مغثوث احس عبالك واحد سلب حقي غصب عني سحبت نفس عميق بعجز مؤيد كسرامي ودفنها بالحياة اول مرة بحياتي اشوف امي هيج مكسورة وضعيفة والله تمنيته عايش واكعد احاسبه على كل غلطة ارتكبها بحقي وبحق امي كلما افكر كلما يزيد حقدي على مؤيد واكرهة صرت احوم بالمزرعة مكبوت والافكار تاخذني وتجيبني احس بروحي صرت اتعارك وية شبح ميت اريد شي اطفي ناري بي ويبرد گلبي لكن فجاءة اتذكرت كلام المحامي رجعت لبيتنا وصحت لحوراء .. حوراء جهزيلي جنطتي انا راح اسافر امي اقتربت علية بخوف ..ها يمة وين ناوي تسافر كسرت خاطري بخوفها علي .. يمة لا تخافين انا لازم اسافر لبغداد. شكل الوالد كاتب وصية اتغيرت ملامحها للحذر .. وصية شنو .. ما اعرف شنو هاي الوصية بس كل الي اعرفه انا عندي حقوق بحلال مؤيد ولازم اروح اخذ حقوقي ، واطلع غبي اذا اتنازلت عن حقي لعائلته الفايخة ، مستحيل اخليهم يتهنون بي ورة ساعتين من جية خوالي بعدما عرفوا بالصار خالي حسن حذرني من اهل ابوي يكول دير بالك منهم هذولي ناس ما ينحزرون .. لا تخاف خال وانا الكدامك لحمي مر ما اتنازل عن حقي لو اموت سافرت لبغداد ونيتي سودة عليهم يمكن ثلثين اصراري على التمسك بحقي من حلال مؤيد هو الفضول اريد اشوف عائلته الي تركنا علمودها شلون يصير شكلهم منو هذولي الي اخذوا مكاني بحياته وفضلهم علينا انا وامي ااااخ شكله الوالد ما جان دارس الموضوع صح من قرر يتذكرني بوصيته وحيل مستهان بردة فعلي اتمناه عايش ويشوف بعينه شنو ناوي اسوي الا اخليه يكول ياريت الي جرى ما صار ما راح ارحم ولا واحد من عائلته ....... ريم كاعدة بالاستقبال يم ندى ورؤى صديقاتي افرح بزيارتهن احس اكو حياة من اشوفهم .. عفية بنات دائما تعالوا اضوج لوحدي رؤى.. حقج علينا اني عني ادري بروحي مقصرة وياج بس انتي تعرفين عندي امتحانات وهسة يالله خلصت ندى.. اني عني امري مو بيدي تعرفين الاهل فارضين علية حضر تجوال ما يحتاج اكلج وبالكوة يوافقون ازورج كنا نحجي ودخلت علينا عمة اسيا .. عفية ريم اذا تكدرين تطلعين انتي والبنات من الاستقبال لان جماعة نائل ونورس يردون يدخلون غمضت عيوني بقهر ااااخ هذا ياوكت نائل ونورس يتصرفون ببيت عمو بكيفهم ويعزمون جماعتهم وكأن البيت بيتهم ماجاوبتها لان نفسيتي تعبانة ومالي خلك احجي وياها كمنا اني والبنات وطلعنا من الاستقبال وصعدنا فوك بغرفتي ندى.. اكول هاي عمتج شبيها هيج وجهها مگلوب جنها عجوز مأكول عشاها .. سكتي هذا حالها من يوم ثالث للفاتحة رؤى.. ليش شكو شنو صاير .. مو اني ما كلتلكم ان عمتي بثالث يوم الفاتحة اجتني وكعدت تحجيلي عن وصية عمو مؤيد لها وان هاي امانة ولازم تصونها واني وافقت بلحظة حزن ورادت تعقدلنا اني ونائل ندى .. عزة بعينها لج ريم وانتي عقلج وين جان من وافقتي .. اني بوكتها فراق عمو كسرني وحزني عليه سلب مني كل شي بحيث كانت الدنيا طالعة من عيني وما يفرق عندي اتزوج نائل او اي شخص مو مهم اهم شي عندي كان تحقيق وصية عمو مؤيد الي طلبها من عمة اسيا بس اشو من راحوا يجيبون السيد وطلبوا مستمسكاتي علمود العقد جاوبتهم .. المستمسكات كلها عند المحامي ابو سيف اسيا.. وشتسوي مستمسكاتج عند المحامي .. والله ما اعرف عمو الله يرحمه قبل لا يتوفى طلبهم مني وانطاها لأبو سيف وبيومها اسيا اتصلت على ابو سيف واجتي تنشل من الصدمة من كللها ابو سيف .. ان المستمسكات يبقون عندي لان محتاجهم بتكملة اجراءات الوصية وهي من يوم الي عرفت اكو هناك وصية وهي انگلبت طنطل ما تعرف شنو تسوي رؤى.. عزة بس لا دتأذيج .. رؤى ترة اني حزنانة على عمو مو مشلولة مستحيل اسمحلها تستقوي علية او تتحكم بية وترة لا عبالج موافقتي بزواجي من ابنها خوف منها او ضعف مني لا حبيبتي كان هذا قراري نابع من ساعة حزني وكسرتي على عمو وهي شكلها عرفت شلون تستغل وضعي وربج الحمدلله فشل كل مخططاتها وهسة التهت بسالفة الوصية كل شوية تجي تحجي وياي وتسألني .. اكول ريم متعرفين شنو المذكور بالوصية وشوكت كتبها اشو انا ما مقتنعة بسالفة الوصية جاوبتها بعدم معرفتي بالموضوع وبالحقيقة انا صدك ما اعرف بسالفة الوصية الا من حجة ابو سيف ندى .. زين وهاي والوصية شوكت ناوي يقراها المحامي شنو ينتظر ابتسمت بأمل وانا اتخيل وجه عمة اسيا وهي مصدومة .. ابو سيف كال انتظر حظور كل الاطراف المعنية رؤى .. ومنو هذولي الاطراف المعنية كمت من مكاني وعيوني تلمع ورحت فتحت المجر مالتي وطلعت منه دفتر فتحته واول ورقة كنت حاطة بيها صور اولاد عمي ثلاثتهم مهيمن وجلال ونور رجعت كعدت بينهن وشوفتهن الصور باوعن للصور وسألني .. هذولي منو .. هذولي همة نفسهم الاطراف المعنية اولاد عمو مؤيد اشرت بصبعي هذا مهيمن ابنه الكبير من زوجته الاولى وهذا جلال. ابنه الوسطاني من زوجته الثانية .. وهاي نور بنته الصغيرة من زوجته الثالثة ندى بصوت متعجب .. يخرب بيت عمك على هالعملة شو هاد رؤى .. خطية ندى من الصدمة بعائلة عمج كامت تحجي لبناني ندى لكزتني بخاصرتي وكالت .. اكول عن الشقة انا مو صديقتج المقربة .. اي واحلى صديقة فديتج اباوع عليها اشرت على صورت جلال وكالت .. انا طالبة القرب منكم واريد اطلب ايد ابن عمج هذا الحلو دخيل ربه هذا بشنو امه متنسية بي ابتسمت على كلامها .. من عيوني بس خليهم بالاول يتقبلون وجودي وتقوى العلاقات وانا بيدي اخطبلج جلال ورؤى لزمت صورة مهيمن .. عزة لج هذا مهيمن من وين .. من البصرة .. يبوووو غير اخرب واتكهرب على اهل البصرة ندى.. اهووو هسة رؤى راح تبدي تسحل روحها اخذت صورة مهيمن من عندها وضربتها على ايدها بغيرة ما اعرف ليش .. شيلي ايدج عن الصورة هذا ملك حصري بس الي ندى.. هلو يابة اشم ريحة غيرة شنو يا حلوة وكعتي بالحب من ورانا .. لا حبيبتي ما وكعت بحبه شنو كلولج علية مراهقة واحب من الصورة رؤى رفعت حاجبها .. لعد شنو الموضوع .. هو صحيح ما احبه بس تكدرين تكولين اي اغار عليه لان بي هواي شبه من عمو مؤيد وكفته طوله نظرات عيونه كله على بعضه يشبه عمو بس يا ترى شخصيته تشبه شخصية عمو مؤيد لو لا ...... جلال بالمستشفى كاعد والحمدلله اليوم ثالث من فتحوا الخياط مال راسي والشداد الدكتور .. الظاهر الجماعة من عذبوك كانوا حريصين على سلامة اطرافك ومتجنبين التكسير ابتسمت بوجه الدكتور وانا احجي بگلبي اي اكيد يديرون بالهم على اطرافي لان اكيد ما يستفادون مني وانا مكسور طلع الدكتور وانا كبل طلعت دفتر مخطط الجهاز وسحبت نقالي الحمدلله سلوان رسل الدفتر والملابس وحتى نقالي طلع واكع مني يم باب بيت خالي بس اول شي سويته من وصلني النقال بدلت الشريحة للامان كلشي يصير وصرت اتواصل بس وية سلوان دك نقالي وكان المتصل سلوان من شريحته الجديدة .. الو هلا سلوان .. هلا جلال اكلك هذا واحد اليوم اجة للورشة يسأل عليك .. منو هذا انت تعرفه .. لا ما شايفه قبل بس سألني عليك وطلب رقمك .. ما عرفت شنو يريد مني .. اي سألته وكلي ابو جلال توفى والرجال يدور عليك علمود ابوك تارك وصية وضروري تحضر فأنا من سمعت هيج كلتله ما ادري هو وين واذا شفته ابلغه هذا كلامك وانطاني رقمه اذا شفته انطي هذا الرقم وخلي يتواصل وياي كان سلون مستمر بالكلام وانا عقلي سافر لبعيد معقولة مؤيد مات استغفر الله ليش مات مو وكته راح تظل حسرة بگلبي اريد اسأله كم سؤال ليش انطردت من بيته وانا صغير وشذكره بية بعد كل هذا العمر قطع علية تفكيري صوت سلوان .. الو جلال تسمعني .. اي . اي اسمعك كمل .. بعد شكمل كلتلك كل الي صار تريد ارسلك رقم الرجل حتى تستفسر منه وتعرف شنو يريد منك بالضبط .. اي رسله بلكي الوالد تركلنا كم فلس نستفاد منهن ما فادنا وهو عايش على الاقل نستفاد منه وهو ميت نهيت الاتصال بعدما اتفقت وية سلوان يرتبلي موضوع خروجي من المستشفى لان الدكتور گال خلال هاي الايام راح اكتبلك على ورقة خروج من المستشفى وقررت مناك اسافر لاربيل وقبل لا اسافر كلت اتنكر واروح لبيت خالي اسلم عليهم وصلتني رسالة من سلوان بيها رقم الرجل مباشرتاً فتحتها واتصلت على الرقم رد الرجل وسلمت عليه بعدما عرفته على اسمي وهو سألني كم سؤال للتأكيد واستغربت من شغلة ان الرجال الي كنت احجي وياه كان مبين عليه يعرف هواي تفاصيل عني وعن حياتي لدرجة وصل بية الخوف حتى اشك بي هذا بس لا من جماعة داعش صرت ما عندي ثقة بأي واحد فقط سلوان صاحبي كمل الرجال كلامه وبيديت اتطمن من كال ابوك ترك وصية وضروري تحضر لبغداد وانطاني عنوان المكتب واول ما غلقه راسا دخلت للانترنيت وبحثت على عنوان المكتب وفعلاً كان اكو مكتب بهذا المكان الي وصفه انهى المكالمة بعدما اخذت كل المعلومات .. والله وفاة مؤيد اجة بوكتها لان انا حالياً بعازة الفلس ولازم ابتعد من الموصل بأقرب فرصة قبل لا يكتشفوني عايش طلعت دفتر المخطط وصرت اگلب بي وانا افكر بلكي ابوي تاركلي شي بالوصية ينفعني وعد علية اول شي اسويه اوفر كل المعدات الي احتاجها بتصنيع الجهاز ارتفع بگلبي الامل وصار عندي حماس واخذتني الاحلام لبعيد وبهاي الاثناء وجان يدخل علية ضابط ووياه الدكتور شكل الضابط كان هيبة ومن شفت رتبته بلعت ريگي خايف هذا شعنده هنا مستغرب وجوده كان الضابط وياه حماية اباوع عليهم ما دخلوا بقوا بالباب والضابط دخل للغرفة اقترب عالسرير ومد ايده للسلام وكال .. الحمدلله على سلامتك جلال قربان باوعتله بحذر ورديت .. الله يسلمك سيدي .. وياك الضابط علي محمد من قسم الاستخبارات مديت ايدي وسلمت التفت عالدكتور واستأذن منه حتى يتركنا لو حدنا وانا بدت الافكار والشكوك تلعب بعقلي طلع الدكتور وبقيت انا والضابط لوحدنا سحب كرسي وكعد يم السرير وباوع علية وبدأ كلامه .. بالحقيقة احنا وصلتنا معلومات تكول بأن انت كنت تشتغل بمعسكر داعش وانهزمت منهم .. انا ما كنت اشغل وياهم انا رحت لمعسكرهم حتى استرد منهم شي يخصني سرقوه مني وخلاص ابتسم الضابط .. شوف جلال راح ادخل بالموضوع مباشرتاً من فترة خالك قدم بلاغ عن اختفاءك والمعلومات الي عرفناها عنك من خلال خالك ومن التحقيقات وية جماعتك بالعمل اكتشفنا ان العناصر الارهابية الملقبين بداعش عندهم شي مهم يمك ويحتاجونه بعملياتهم الارهابية هاي المعلومات تتطابق مع معلوماتنا عن داعش .. سيدي وانا من هذا كله شنو المطلوب مني .. المطلوب منك نريدك ان تتعاون ويانة باوعتله بشك وسألته .. بشنو اتعاون وياكم .. اذا وافقت تتعاون ويانة راح يتم ارسالك لمعسكر داعش وتحط ايدك بأيدهم يعني بين قوسين نزرعك كعنصر بينهم تمدنا بالمعلومات واهم شي بهذا عملنا السرية التامة ما نريد اي مخلوق يعرف باتفاقنا وياك نتمنى ان تتعاون ويانا وتحط ايدك بأيدنا حتى نخلص العراق من هذولي السفلة على فكرة داعش بعدهم غير معلن عنهم واذا اتوسعوا راح تصير كارثة بالعراق الضابط كان يحجي وانا گلبي يريد يطلع من صدري وجسمي قشعر من كلامه واصلاً منو يكول كلامه صحيح وشنو الي يضمنلي ما يغدر بية ويقدمني قربان للدواعش مثلما سوة بية الاسطى توفيق اذا هو توفيق ربيت على ايدها من صغير وانا اشتغل عنده باعني وغدر بية بكل برود شنو الي اترجاه من رجال يدعي انه هو ضابط وحتى لو كان صدك ضابط منو يأكدلي هو مو خاين تراب الوطن اختلفت الالوان عندي وصار بوطني الحرامي والضابط يتشابه بلبسه وضاعت علية السالفة منو الية ومنو العلية الضابط .. ها شنو كلت باوعت عليه .. اسف سيدي ما اكدر اتعاون وياكم مستحيل اعيد تجربتي وياهم وهذولي اذا لزموني ما راح يهدوني وراح يشكلون خطر علية وعلى اهلي باوعلي الضابط .. بس خلي ببالك لا تتوقع بهذا قرارك راح تكدر تبتعد عن الخطر ترة الخطر يبقى يلاحقك ويهدد حياتك حتى لو حاولت تبتعد عنهم وتتخفى ما راح تكدر تنفذ منهم الا بمساعدتنا انت تحتاجنا نخلصك منهم واحنا نحتاج تكون وسيلة نخلص وطنا من شرهم .. اسف سيدي ما اكدر اساعدكم طلعوني من الموضوع انا شاب قضيت عمري كافي خيري شري كنت قافل عالقضية وما ناوي اسمع اكثر بكل عقله يريدني اصدكه والله ياربي على الي شفته بالمعسكر وعلى الناس الي تتعامل وياهم عرفت الوطن مبيوع وانا مو غشيم اسلم نفسي لداعش من جديد نفس الوسيلة بس الطريقة تختلف ذيج دخلولي بالفلوس وهذا جايني بالوطن نهض الضابط وكال .. على العموم كنا نتمنى ان تتعاون ويانا بس شكلك مو كفو حتى تخدم الوطن او يمكن بعده جرحك ما طاب وخايف تعيد الي صار طلع من جيبه كارت وسلمه الي .. هذا الكارت بي ارقام خاصة اذا غيرت رأيك اتصل علية وانا موجود بعدها طلع الضابط وانا راسا نهضت من سريري وانا استند على العكازات وبديت اغير ملابسي انا لازم اطلع من المستشفى ما دام رفضت طلب الضابط معناها الدواعش السفلة عرفوا بمكان وجودي حطيت الدفتر واغراضي الي جابهم الي سلوان دخلت الممرضة وشافتني .. هاي شنو وين طالع ترة بعده جرحك ما شفى والدكتور ما سمحلك تطلع من المستشفى .. راح اطلع على مسؤليتي حطيت جنطتي على ظهري واخذت العكازات والممرضة تباوع علية بأعتراض طلعت من الغرفة واتصلت على سلوان .. سلوان انت وين .. انا بالورشة ليش تسأل .. اترك الورشة وتعال بسرعة. الدواعش شكلهم عرفوا اني مو ميت وعرفوا مكاني تعال اخذني لبيت خالي بعدها اجة سلوان واخذني من يم الكشك القريب عالمستشفى واتلثمت ورحت لبيت خالي واول ما وصلت ودخلت لبيتهم احس روحي ردتلي من شفتهم اخذتهم كلهم بحضني وهم همين كانوا كلش خايفين علية وخالي الي لحيته طالت حزن على صديق عمره ناجي ومصطفى كل شوية يسألني .. جلال شنو ناوي تسوي ووين راح تروح وخالي نفس سؤاله كعدت وية خالي وحجيتله على موضوع ابوي ووفاته وقصة الوصية خالي جاوبني.. يعني ابوك رجع للعراق الله يرحمه .. اي يمكن هنا متوفي .. على العموم اجتي بوكتها روح سافر لبغداد حتى تبتعد عن الخطر طلع مبلغ قليل من جيبه وكال .. خلي هذا المبلغ جوة ايدك يفيدونك كروة توصلك لكراج بغداد. ادري بيك ما عندك فلوس اخذتهم منه وانا اوعد نفسي اول ما اخذ ورثي من ابوي ارسللهم مبلغ يعينهم على المصروف انا اعرف بوضع خالي تعبان وزاد وضعه من بعد وفاة صاحبه صار ما يطلع يحمل باللوري بعدها جمعت ملابسي واخذت كل مستمسكاتي وسلمت عليهم كلهم وكسروا خاطري رند ورنين خطية لحد اخر لحظة بقوا معلگين بذيالي ما كدرت ما اخذهم واشتريتلهم حلويات قبل لا اسافر لان احتمال اطول عليهم بالغيبة واشتاقلهم رحت للكراج واجرت سيارة لبغداد والتفتت على صاحبي سلوان وحضنته .. دير بالك على نفسك ولو تحصل شغل خارج ورشة توفيق يكون احسن سلوان ضحك .. لا تخاف علية انا مو ذكي مثلك حتى اوكع بالمشاكل واتورط همة يدورون بس على الاذكياء ضحكت على كلامه وسلمت عليه وركبت بالسيارة الي كانت متوجه لبغداد ....... نور دخلت وسديت الباب ورة الرجال وبيدي الورقة الي بيها العنوان باوعت لخالتي سناء الي كانت نفسي مصدومة بالخبر .. خالة انت سمعتي الي اني سمعته جاوبتني خالتي والصفنة ماخذتها .. والله ياخالة انا مصدومة من الي سمعته معقولة رجل سهير عايش وانا ما ادري وزين سهير ليش كالت مات والله صابر ذكي اول ما شاف ابوج من كان يوصلني لشقة سهير كال هذا رجل اختج غامض احس وراه سالفة وكعدت خالة تحجيلي عن حياة امي وية ابوي .. سهير كانت اسعد انسانة بزواجها من ابوج كانوا عايشين مثل العصافير عندهم بشقة مأجرة ومأثثة بأرقى الاثاث وكان ابوج مبين عليه يحب امج بس انتبهت لشغلة ولا مرة شفتهم طالعين سوية لأي مكان وسهير الله يحفظها كانت كلش متكتمة ومتحجيلي كلشي ومن حملت بيج صارت مشكلة وما عرفنا شنو سبب المشكلة بس اتذكر امي كانت دائماً تكللها كلة من ايدج وتستاهلين الي ديصير وياج وبوكتها ما افتهمت شنو كانت تقصد امي وخطية ومن ولدتج انتقلت من الشقة واجرت بمكان ثاني هي وامي وكانت كلش متأذية كلما اسألها عن زوجها تكلي اختفى او سافر وورة سنتين من ولادتج اتوفت امي وسهير بعد اسبوع من وفاة امي كالت مؤيد مات بالخارج من كان مسافر زين اذا الرجال ما ميت وين كان ما اجة يدور على بنته .. اخاف ما يعرف بوجودي .. لا عيني صابر بنفسه كال اجة رجل اختج للمستشفى وشافه انطى فلوس لأمي ودخل على سهير وشافج واتطمن عليكم بس بعدها ما شفناه وسهير انتقلت بغير مكان وضاعت علينا السالفة خالتي كانت تحجي وانا مصدومة وعندي اسئلة هواي واريد احد يجاوبني عليها شلون وليش وشوكت وشنو بعد ينتظرني وشنو سالفة الوصية دخل صابر وشافني انا وخالتي كاعدات وكال منو هذا الرجال الي جاي للبيت خالتي سألته .. وانت منين عرفت رجال جاي لبيتنا .. سعدون شافه بالباب وجاي يحجي وية الخاتونة بنت اختج. احجي منو هذا الي ملفيته علينا كولي لا اليوم البيت احركه على روسكم كل يوم جايبتلي واحد غريب للبيت خالتي .. اوكف لحظة انطينا مجال نحجي وياك اكلتننا بكشورنا .. يالله احجي اسمعج .. هذا واحد من طرف ابو نور سلمها عنوان مكتب مال المحامي وبلغها ضروري تحضر باجر لان ابوها توفى وتارك وصية ومنتظرين حضورها حتى يتم فتح الوصية اباوع لصابر بهت وجهه وصفن بتفكير وهو يفتل شواربه بيده وكال.. ها سناء مو كلتلج سالفة رجل اختج مو خالية التفت علية وكال .. بالله شو انطيني الورقة خلي اشوف العنوان وين حتى نروح باجر ونشوف شنو سالفة الوصية .... مهيمن جلال نور ريم كل واحد بيهم طلع من بيته متوجه للمجهول وگلبه محمل بالفضول والحذر والشك والغضب ولكل واحد عنده هدف من ذهابه يتبع | ||||
|
| |
|
08-09-19, 06:00 PM
| #14 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_الثاني_عشر #الكاتبة_نهى اسعد الله مسائكم ياحبتي المتابعين #الكاتبة_نهى_الحسون #قضية_لم_الشمل مهيمن وصلت لبغداد وكان الوقت الساعة ب١ الظهر اتصلت على المحامي الي اسمه ابو سيف .. ابو سيف انا وصلت لبغداد انت وين موجود بالمكتب ؟؟ ابو سيف بلهفة.. اي .. نعم انا موجود انتظرك تشرفني بمكتبي وبعدها سألني .. مهيمن انت تغديت لو بعدك ؟ جاوبته مستغرب .. لا والله ليش اكذب عليك انا هسة وصلت من البصرة بس لاتكلف نفسك الله عليك انا جاي بس اكمل وياك معاملة الوصية وارجع للبصرة بنفس اليوم جاوبني .. لا ميصير عيب علينا تنزل عدنا ببغداد وما نضيفك تعال انا راح انتظرك بالمكتب حتى نتغدا سوا نهيت الاتصال بعدما اتشكرت منه ورحت مباشرتاً بوجهي للمكتب رن نقالي وكان المتصل امي على طول الطريق وهي ما بطلت اتصال جاوبتها.. هلا يمة انا وصلت لبغداد وهسة متوجه لمكتب المحامي انتي لا يبقى بالج كالت وصوتها بي رعشة بجي .. يا يمة الف الحمدلله على سلامتك ، يمة مهيمن طمني اكلت شربت لو بعدك ؟؟ .. لا يمة بعدني هسة رايح اتغدا وية المحامي .. اي يمة الله يرضى عليك اكلك لكمة لان انت من البارحة باقي على لحم بطنك كل شي ماماكل .. لتخافين ما يصير بي شي .. زين شلون بيك وين راح تنام اليوم وعند منو تبات .. والله ما ادري احتمال ارجع بنفس اليوم بلكي ما يحتاج اظل ببغداد اروح للمحامي وافتهم منه ان شاء الله الشغلة ما تطول .. اي وعفية يمة ما اوصيك اذا رحت يم المحامي مو تعصب جاوبتها.. شلون بيج يمة وتالي وياج ما كافي اسئلة اريد اروح للمحامي ينتظرني .. ولك يمة غير خايفة عليك هسة قابل عندي عشرة واعوفك هيج ما ادري عنك وين ما وين .. رحمة على موتاج يمة ما تكليلي انا وين رايح وكل شوية متصلة علية هي بغداد هسة الي يسمعج يكول رايح اجاهد .. مو ادري بيك بسرعة تعصب وتظل تحرك بدمك وخاف تسمعلك كلمة من اهل ابوك تسم البدن وما تتحملهم وتتعارك وياهم امانة عليك يمة لا تعصب واول ما تطلع من يم المحامي تطمني عليك ادري بأمي مستحيل تعوفني ولو انطيها بعد مجال تخلي الخط مفتوح على طول وتبقى وياي تحاجيني وين ما اروح ومو بعيد تطلب مني افتح كاميرا بس الحمدلله ماكو كاميرا بالاتصال عالخط جاوبتها اطمنها .. صار يمة وبعدين اكولج كل شي يصير بيني وبين المحامي بعد تأمرين على شي ثاني .. لا يمة سلامتك ما يأمر عليك عدو سلمت عليها وانهيت الاتصال وتوجهت للمكتب وانا متأهب للقادم الاتي عبالك عندي حرب اكيد عائلة مؤيد راح يطلعون ناس متكبرين وحقنة وشافين نفسهم والله العظيم اذا المح واحد منهم يوجه لي نظرة وحدة بعين الصغيرة امسح بيهم الاراضي ذهابا وايابا واحرك المكتب على روسهم انتبهت لروحي عاگد حواجبي ولام ايدي بقبضة عبالك عندي عركة استغفر الله هسة انا بعدني كل شي ما شايف منهم ولا اعرف عنهم شي وحاد سنوني عليهم بالله طلعوا عكس ما انا متوقع لالا .. الله لا يگولها يارب كون يطلعون عائلته ناس يستاهلون السحل حتى اكدر اطفي ناري المستعرة بيهم وصلت لمكان المكتب ودخلت ولكيت رجال يجي عمره بالخمسين لابس ملابس رسمية منتظرني بباب العمارة الي بيها المكتب شافني وابتسم واجة بأتجاهي وسألني .. انت مهيمن صح ؟ هزيت راسي بالموافقة.. اي نعم مد ايده للسلام وابتسامته المرحبة مالية وجهه .. هلا والله بأبن الغالي نورت بغداد يجيتك سلمت عليه .. بغداد منورة بأهلها .. تعال تفضل جوة بمكتبي خلينا ناكل لكمة ونسولف ما تعرف شكد كنت منتظر هاي اللحظة من زمان كان يحجي وياي عبالك يعرفني من زمان وبالحقيقة هالشي طمني وبنفس الوقت بعدني متمسك بالحذر ما اتنازلت عنه دخلني المكتب وكان كلش كبير كان اكو مكتب بالنص وعلى جانب بعيد من المكتب كان اكو ميز وكراسي على صفحة و الاكل مفروش عالميز ووكعت عيني على شاب كاعد على ميز الاكل كان ماد ايده يريد ياكل وهو اول ما شافنا بسرعة سحب ايده من الاكل وكفت اللكمة بحلكه من الفشلة باوع علينا بأحراج ابو سيف كله .. الله عليك اخذ راحتك ومد ايدك واكل لا تستحي نظراته كانت كلها شك وريبة الشاب جاوبه.. والله ما راح اكلك لا لان اني ميت من الجوع وهاي جيتي من الموصل واجيت راسا بوجهي للمكتب ابوسيف.. يخسي الجوع تعالوا خلينا ناكل لان انا مثلكم جوعان كان المحامي يباوع للشاب ويبتسم ويرجع يباوعلي ما اعرف ليش احس ورة هذا المحامي سالفة التفت علية وكال .. تعال مهيمن اتفضل اكعد اكل ويانة ومد ايدك باوعت للمحامي انتظره يعرفني عالشاب قبل لا اكعد اكل وياه لان عيب زحمة نكعد ناكل سوية ونتشارك الملح والزاد واحنا ما متعارفين على بعض على الاقل من باب اللياقة والاصول بس شكله هذا ابو سيف مو ابن ديوان ولا يعرف للاصول اهووو هسة انا شنو قصتي من يوم الي عرفت بشغلة ابوية وانا صرت هواي احلل وادقق بالتفكير. وهذا مو طبعي رحت كعدت عالميز ودك نقال المحامي استأذن من عدنا وكال .. انتوا اخذوا راحتكم اكلوا بين ما اخلص هاي المكالمة ما راح اتأخر عليكم تركنا وطلع برة المكتب يحجي وية المتصل باوعت للاكل ومعدتي علنت عن اعتراضها لان ناسيها انتبهت للشاب يباوع علية وتبادلنا النظرات بفضول للحظة حسيت هذا الشاب انا شايفه بس ما ادري وين جليت صوتي قبل لا امد ايدي واكل وحجيت وية الشاب .. هذا ابو سيف شكله نسى يقدمنا لبعضنا مديت ايدي للسلام وكلت .. وياك مهيمن من البصرة هو مد ايده بابتسامه وكال .. يا اهلاً وسهلاً بيك وبأهل البصرة وانا جلال من الموصل .. حيا الله اصلك وضحتله .. احنا اهل البصرة بينا طبع نحب نعرف الي يشاركنا الملح والزاد ضحك وكال .. يابة عند البطون تعمى العيون انا الكدامك هاي جيتي وما ماكل صارلي قرن ، باقي على اكل المستشفى بديت اخذ راحتي وياه لان من جوابه كان مبين شاب بسيط مو معقد وبدينا ناكل ونحجي بأمور عامة ونسينا حتى المحامي وبعدها سألته.. انت منو مسوي بوجهك هيج بلع لگمته وكال .. اسم الله عليك سويت حادث سيارة بقينا نحجي على الاوضاع وبغداد وازدحاماتها بعدها كملنا اكلنا وكام الشاب الي اسمه جلال واستند عالعكازات وكال ..اذا تريد تغسل ترة هناك اكو حمام اشرلي على باب بزاوية بالمكتب نهضت من مكاني .. اي والله محتاج الحمام رحنا غسلنا ورجعنا نريد نكعد بس فجاءة الشاب اختل توازنه ووكعت العكازة من ايده وانا اتلاحكت عليه وسندته قبل لا يوكع ويتكسر وهو استند على كتفي وكان مصدوم من اثر الهبطة عدلت وكفته اريد اخذه للكرسي حتى يكعد وبهاي الاثناء دخل علينا المحامي وشافني والشاب متكئ علية حتى اوصله لمكانه باوع علينا وعيونه لمعت بدهاء وكال .. مرحبا شباب اعتذر عن التأخير بس كانت المكالمة كلش مهمة. كان يحجي ونظراته تتنقل بيني وبين الشاب بعدها كمل كلامه .. اي صدك انا اعتذر منكم لان نسيت اعرفكم على بعضكم جاوبته وانا ذراعي محوطة خصر الشاب الي متكئ علية .. ما يحتاج تعرفنا على بعضنا سبقناك وتعارفنا والشاب جاوب .. اي والله مهيمن سبقك ابتسم المحامي وكال ..اي صحيح انتوا تعارفتوا لكن بس بالاسماء وانا اريد اعرفكم على بعضكم بصورة ادق عقدت حواجبي هذا شبي المحامي شكد يحب يلف ويدور حجيت وياه بقلة صبر.. فهمنا شنو تقصد بهذا كلامك انتبهت عليه سحب نفس عميق وغمض عيونه شكله عبالك واحد راح يلقي خطبة قوية واني والشاب بعدنا واكفين على وضعيتنا وكال .. مهيمن الي ما تعرفه ان جلال يصير اخوك ابن ابوك لحظة هدوء قاتل عم المكان نظرات الصدمة محتلة معالم وجهنا وباوعنا للمحامي متفاجئين جمدت بمكاني وحسيت على جلال انكمش بين ايديه حسيت عليه لان كنت بعدني سانده وذراعي لافها حوله همس الشاب بصوت واطي مستنكر .. هذا شكاعد يحجي المحامي اختار لحظة حرجة ابد ما جنت محسب حساب هيج لحظة ولا متخيل الكة روحي بموقف محرج ولأول مرة بحياتي تخوني الكلمات وما عرفت شنو اتصرف والظاهر الشعور كان متبادل وية جلال ...... جلال احس گلبي اجة يطلع من بين ظلوعي من كال المحامي كلمة اخوك شنو هذا الي يصير ، معقولة هذا الشاب الي واكف واني متكئ عليه يصير اخوي بقيت مصفصف كل شوية اباوع عليه وانا الصدمة شلت حركتي بس انتبهت لمهيمن بسرعة رجع اتمالك روحه واتغيرت معالم وجهه للبرود كمل طريقه و وصلني لأقرب كرسي حتى اكعد عليه وبعدها راح جابلي العكازات وحطهم يمي ولا كأن الخبر الي سمعه يعنيه بشي وصار متحفظ بتصرفاته وياية عكس قبل قليل معقولة ماكو شي اتحرك عنده ليش انا احس جسمي بعده كله ينتفض ، يعني الواحد مو كل يوم يعرف عنده اخ بالصدفة وهالشي جديد علية مهيمن كال بصوت ثابت .. اي ابو سيف كمل كلامك شكلك بعد عندك هواي مفاجئات اتفضل كول بعد شنو عندك غير هذا الاخ كوللنا خاف ناسيلك واحد منا منا وانا هم سألته .. اي صدك ابو سيف احجي كول لا تستحي خلينا نعرف ابونا شنو ضام لنا من مفاجئات خطية ابوسيف شكله مثل الفارة الي انحشرت بالزاوية من ورة اسئلتنا جاوبنا .. طبعاً مهيمن انت الابن الكبير من زوجة الحجي مؤيد الاولى وجلال الابن الاوسط من الزوجة الثانية لابوك مهيمن راسا رفع راسه يباوع علية وعيونه صارت تجدح شرار كأنه واحد كله هذا قاتل الحمزة كمل ابو سيف كلامه وعندكم بعد اخت اسمها نور من زوجته الثالثة مهيمن بأستنكار .. زوجة ثالثة !!!!! جاوبته .. اي زوجة ثالثة شبيك مستغرب ترة الشرع حلل اربعة والظاهر الوالد الله يرحمه شكله حب يطبق الشرع بس خطية ما لحك على الرابعة ابو سيف .. عمو جلال راح تبقى كل شوية تعلق على كلامي لو تخليني اكمل الموضوع وكعت عيني بعين مهيمن اشو هذا خزرني عبالك طالب عنده ويريد يعلمني حسن التصرف حجة بتحذير.. اتفضل ابو سيف كمل كلامك وعوفك منه شكله بعده ما مستوعب الصدمة من ورة سوالف ابوه معذور ابن دلال وروحه ترفة بسرعة يتأثر رفعت حاجبي ونظراتي تتحداه وابو سيف كعد يجلي صوته لان التوتر داخل الغرفة بدة يشتد ابو سيف.. بالحقيقة حبيت بالاول اجتمع بيكم انتوا الاثنين قبل البقية حتى افهمكم على كل شي ما اريدكم تتفاجئون وتنفعلون كدام بقية اقاربكم حتى لا تصير تصادمات بينكم واحراجات مهيمن.. عن اي اقارب تحجي جلال .. اي صدك عن اي اقارب تحجي التفت مهيمن علية وكال .. شنو حضرتك الصدى مالتي وكل شوية مكرر كلامي وراي جاوبته بستهزاء .. لا اني الببغاء وانت شدعوة عليك هشكل متحسس مني هسة شنو حجينا مهيمن بتحذير.. انتبه لكلامك ولا تستخف دمك لا اجي اعلمك شلون تحجي جاوبته بتحدي .. ما تكول لروحك اشو كل شوية تباوعلي بنظرة مستفزة عبالك واحد بي گمل وخايف يعديك جاوبني بغضب.. يالله بالله هذا شحجي وياه هسة من اكوم اعدل حلكة اكو واحد يلومني ابو سيف كام من مكانه حتى يهدي شرارة الجدال بيني وبين مهيمن بعد ماشافني تحفزت اريد اكوم .. لحظة شباب ممكن تهدون. ترة مو حلوة بحقكم تتعاركون بينكم وانتوا اخوان جاوبت المحامي .. والله عمي لو ما معرفنا على بعضنا ومخلينا على عمى وجهنا هواي احسن، على الاقل من كنا غرباء وما نعرف بعضنا البعض كنا اكثر الفة وواحد بدة يتقبل الثاني اكثر من تقبلنا هسة واحنا اخوان هزيت ايدي .. لا ونوب فوكاها طلع اخوي الكبير ومهيمن جاوبني بتلقائية .. غصباً ما عليك اخوك الكبير وتاج راسك بعد اذ........ كالها وكأنما شغلة طبيعية ومفروغ منها حتى هو انتبه لروحه وقطع كلامه بعد ما حس على هفوة لسانه الي بيها اعترف باخوتنا من دون مايشعر بعدها رجع لتحفظه والتفت على ابو سيف وكال .. كمل ابو سيف اريدك تحجيلي التفاصيل كلها وبعدها صار ابو سيف يحجيلنا عن مؤيد وشلون فكر يكتب الوصية بس لحد الان ما فتحها وبعدها كام يحجيلنا عن اقارب ابونا وكم شخص وانا ومهيمن بقينا نستمع بصمت بعد الشرارة الي صارت كل واحد بينا كعد بصفحة وصار يسأل ابو سيف عن الشي الي يخصه وكل شوية استرق النظرات واباوع لمهيمن بحذر وهو يحجي وية ابو سيف بدون ما ينتبه علية بديت ادرس شخصيته وتصرفاته من خلال كلامه وية ابو سيف بس مبين عليه شخيصته قوية ورزن نزلت عيوني اتفحص ملابسه كانت ملابسه جداً بسيطة لكن كلمة حق تقال شخصيته فارضة هيبته على الكل حتى انا جلال قربان ابو لسان الي ما يسكت سكتني بس غير هو اخوي الكبير وانا ولد حباب ومؤدب واحترمه ابتسمت وعيوني بعدها تراقبه صادني وانا اباوع عليه وصديت عيني منه انهى كلامه ابو سيف وگال .. عندكم اخت اصغر منكم اسمها نور هي هم ما تعرف بوجودكم وراح تجي هي وخالتها وزوج خالتها كل الي اطلبه منكم ان تتقبلونها كأختكم وما اريد هاي حركات المشاحنة بينكم تصير كدامها لان خطية هي كلش حساسة وبسرعة تخاف من الناس الغربة مهيمن.. شكل الوالد كلش مخربها بالدلال ابو سيف.. مع الاسف نور هم مثلكم ما تعرف بوجود ابوها ولا عاشت عنده جلال .. لا الاله الا الله ويكلك ليش تحجي شنو قصته الوالد شغلته كانت يخلف ويذب عالناس ابو سيف.. ما اكدر اجاوبك عن هذا الشي لان ابوكم تارك بالوصية لكل واحد بيكم رسالتين الرسالة الاؤلى اسلمها الكم هسة والثانية اسلمها بعد تنفيذ شروط الوصية كنا نحجي واندك الباب ودخل السكرتير واخذ الاكل من عالميز وابو سيف كله .. طلال دخل البنية المنتظرة برة .. استاذ ادخلها لوحدها لو هي والمرافقين .. دخلهم كلهم اكيد ما راح تقبل تدخل لوحدها هي تخاف من خيالها وكفت على حيلي مثل الي ياخذ وضع الاستعداد منتظر تدخل بنية من هذا الباب يكولون عنها تصير اختي الصغيرة مجرد طرق الاسم بتفكيري جسمي قشعر انتبهت لأستاذ مهيمن الي مسوي نفسه مو مهتم ويكابر عدل گعدته واتقدم للامام وذراعه مستندة على رجليه وعيونه كل شوية تصد عالباب انفتح الباب وجان تدخل منه بنية شابة واول ما شفتها هيج من الله گلبي رف عليها كانت بنية كلش ضعيفة ومحجبة وبسيطة وبنفس الوقت حلوة ودخلو وراها مرة ورجل سلم عليهم ابو سيف واشرلهم على الكراسي حتى يكعدون اباوع عليها شلون كعدت كانت هادئة او تمثل الهدوء لان حركة ايديها وهي تفركهم مع بعضهم تدل على توترها وارتباكها بدة ابو سيف يسأل نور عن احوالها بعدما قدم نفسه لها بصفته المحامي لكن لفت انتباهي شغلة ان نور ابد ما حجت والي كان يجاوب المحامي عن اسئلته هذا رجل خالتها شكو شبيها متحجي وهذا الرجال نزل على المحامي بالاسئلة الي يسمعه يكول ورث الي خلفوه وجاي يستفسر عنه ما ادري ليش ما حبيته جاوبه المحامي .. قبل لا اجاوبك عن اسئلتك احب بالاول اعرف نور على اخوانها وبعدها نتناقش بالموضوع مجرد ما ذكر ابو سيف كلمة اخوانها انتهت عليها رفعت راسها مصدومة وباوعت علينا بنظرات متسعة متعجبة وصارت نظراتها تتنقل بيني وبين مهيمن للحظة خلتني اشك بروحي انا عندي راسين مو راس واحد هاي البنية غير شفافة وسهلة القراءة حجت بصوت ناصي كوة ينسمع .. اخواني وجان يهتز الجبل الصامت الي كاعد بصفي وجلة صوته وكال بكل هدوء يطمأنها بحنية .. اي اخوانج انا اسمي مهيمن اصير اخوج الكبير هاي شنو ولا عرفته طلع لطيف وية الجنس الناعم اشو بس علية كشر عن انيابه والتفت واشر علية وعفس وجهه وكمل كلامه .. وهذا يصير اخوج الثاني اسمه جلال جاوبته.. وشبيك تحجيها وانت ضايج عبالك واحد شم ريحة خيسة ابو سيف .. جلاااااال شكلنا نطق اسمي بتحذير وهو يأشرلي بنظرات عيونه على نور انتبهت عليها باوعتلي بحذر وخوف غيرت معاني وجهي وابتسمت .. ههههههه شبيك يا عيني غير اضحك وية اخوي الكبير فديته باوعت عليها .. لتخافين مني انا جلال قربان ترة لا يغرج شكلي هذا انا بالحقيقة احلى من هيج بس الحادث گلب الخلقة سمعت مهيمن يستغفر بصوت ناصي من بين اسنانه .. استغفر الله ربي واتوب اليه هذا منين ينطفي جاوبته .. والله اذا بقيت على هالحال بأذن الله تدخل الجنة من وراي سألني مستغرب.. ليش .. لان راح تكضيها تستغفر ربك كل شوية من وراي قاطع كلامنا صوت رجل خالتها المستنكر الرجال.. اخوااااانها !!! رفعت حاجبي وجاوبته .. اي اخوانها شنو ما عاجبينك .. لا ما عاجبيني ولا مقتنع بيكم اصلاً مهيمن .. مشكلتك هاي اقتنعت او ما اقتنعت نفس الشي لا تقدم عدنا ولا تأخر مهيمن كان يحجي ونظراته تتحدى الرجال يعترض على كلامه والله لو ما اهضمه جان صفرت له على هالقصف خلة الرجل يبلع لسانه و يسكت يعني بس باوع لمهيمن وسكت مانطق ولا حرف ..... ريم اليوم راح اشوف اولاد عمي مؤيد احس بلهفة كبيرة للقائهم يمكن الدم يحن او لان هم من ريحة عمو مؤيد الله يرحمه كنت احضر بنفسي ومحتارة شنو البس اريدهم ياخذون عني فكرة حلوة حتى يتقبلوني لبست جينز اسود بسيط وقميص اسود قصيرلحد الورك وشعري القصير بقيته نازل ما رفعته احس بالامان اكثر وهو نازل على جانب وجهي لبست نضاراتي الشمسية الي كانت ماركة ديور مغطية نص وجهي واخذت جنطتي وطلعت من الغرفة ونزلت ولكيت عمة اسيا واولادها محضرين نفسهم قبلي ووجوههم مقلوبة نورس شافني ونهض من مكانه .. يالله جاهزين حتى نروح جاوبته .. اي نعم اني جاهزة اسيا.. لعد يالله خلي نروح لمكتب ابو سيف ونفتهم شنو الموضوع صعدنا بالسيارة متوجهين للمكتب رن نقالي وكان المتصل ابو سيف يستعجلنا بالحضور نهيت الاتصال وكلبي زادت دكاته هسة اولاد عمو شنو وصلوا لو بعدهم ما جايين ما كدرت اسأله عنهم كدام عمة اسيا ما اريدها تعرف بحضورهم حتى ما تكعد تخططلهم او تكدر تسويلهم كل شي اتوقع منها بعد الي سمعته من عمو بخصوص طرد ابنه جلال وهو صغير من بيت ابوه صرت ما اثق بيها وصلنا للمكتب وشافنا السكرتير ودخل للمكتب حتى ينطي خبر لأبوسيف بعدها طلع وفتحلنا الباب ودخلنا واول ما دخلت عيوني بدت تدور بالمكان وجان نظراتي توكع على بنية ضعيفة تركت ابو سيف يسلم على عمتي اسيا واولادها واني غصب عني لكيت رجلية ماخذتني لعند نور اقتربت منها وبادلتني النظرات بأرتباك ابتسمت ومديتلها ايدي بالسلام .. شلونج نور اني بنت عمج اسمي ريم ابتسمت بتردد وبادلتني السلام وحجت بصوت ناصي .. هلو ريم كان مبين عليها خجولة وتستحي تحجي انتبهت لحركة قريبة التفتت وشفت واحد واكف عالعكازة مبتسم باوع علية وكال .. وانا ابن عمج الوسطاني اسمي جلال بادلته الابتسام وجاوبته متفاجئة بشكله ما يشبه الصورة .. جلال قربان هاي شنو شصاير بيك جاوبني .. هاي شنو حتى انتي تعرفين بلقبي باوعت عليه هو ونور وجاوبته .. اني تقريباًً اعرف عنكم كلشي جاوبني .. لعد ما دام تعرفين عنا كلشي التفت وعفس وجهه واشر على مكان خلفي وكمل كلامه .. معناها اكيد تعرفين اخونا الكبير مهيمن التفتت وباوعت عالمكان الي اشر عليه جلال وجان اشوف الشخص الي اول ما دخلت كانت عيوني تدور عليه باوعت عليه كان كاعد لوحده على صفحة وباله مو يمنا كانت عيونه تباوع على عمة اسيا واولادها والشرر يطلع من عنده وبالمقابل اولاد عمة اسيا نفس الحالة كانوا يباوعوله بتكبر ومستغربين نائل حجة بصوت ناصي .. اكول هذا ليش هيج يباوع علينا. كأنه طالبنا بثار نورس باوع على اولاد عمي بأستغراب وسأل ابو سيف .. ابو سيف شنو القضية هذولي منو شنو يسون هنا .. هذولي اولاد عمك مؤيد الله يرحمه وبدأ ابو سيف يعرفهم على بعضهم البعض نورس بأعتراض.. زين وهذولي وين كانوا وهسة يالله عرفوا عندهم اب نهض مهيمن من مكانه بتهديد .. انت هي انتبه لكلامك ولا تظل تحجي بكلام اكبر من راسك نورس بتحدي.. وانت منو حتى تعلمني شنو احجي .. انا ابن مؤيد الكبير و انت جاي لهنا مستطرق يعني مالك لزمة جاي حتى تسمع المحامي يقرة الوصية فأحسنلك تحترم نفسك وتروح تكعد يم امك وتسمع بهدوء محد طالب رأيك بينا ((وين جنا وليش جايين لهنا وشنو نريد نسوي )) هذا الشي راجعلنا انا واخواني محد له دخل احنا بكيفنا شوكت ما يعجبنا نظهر و نحضر بالوقت الي يصرفلنا فاهم لو اعيد كلامي عليك مرة الثانية نائل.. ابو سيف هاي شنو كول كلمة يتجاوزون علينا واحنا كاعدين بمكتب كان جلال واكف يم نائل اتكأ عليه ولزمه من علباته وكله .. اذا تكلم الكبار فعلى الزعاطيط ان يلتزموا الصمت صير حباب وروح اكعد يم ماما ابو سيف بتوتر .. جلال مهيمن اترجاكم بلا مشاكل اتفضلوا كعدوا والتفت على عمة اسيا وكال .. وانتي ام نورس كولي للشباب خلي يلتزمون الهدوء ميصير هيج والله صارت فوضى هنا مكتب محامي محترم اباوع لأسيا كانت بعدها صافنة مشلولة من الصدمة خطية نفضت راسها ما مستوعبة الي يصير كدامها شكلها كان مثل واحد سحبوا البساط من تحته ووكع على وجهه التفت على اولادها وكالت .. اهدؤوا شوية خلونا نفتهم شنو الموضوع وشنو يصير هنا شفت واحد كاعد يم مرة كبيرة ما عرفتهم كال .. اي والله ابو سيف فهمنا شنو الموضوع صارلنا ساعة كاعدين مثل الاطرش بالزفة كلتلنا تعالوا علمود الوصية واحنا اجينا ولحد الان انت ما فاتح الوصية ابو سيف جاوبه .. العفو شنو كلتلي اسمك .. اسمي صابر .. اخ صابر انت مو من ضمن الاطراف المعنية انت كاعد هنا بدون سبب .. لا انا بمثابة ابوها لنور لان ربيتها على ايدي واعرفها كلش زين فقيرة واذا تركتها يمكم لوحدها وما حجيت راح تاكلون حقها اني هنا حتى لا يطرا على بالكم هي لوحدها ابو سيف .. شوف اكولك انا وافقت على دخولك للمكتب لخاطر نور لان اعرف بيها تخاف تبقى لوحدها وية ناس غربة ما تعرفهم يعني انت اي دور مالك في بالوصية مجرد مستمع فاهم لو اعيد بعدها ابو سيف التفت على جهة عمة اسيا واولادها وكال بصوت امر .. اترجاكم تسكتون وتخلوني اشوف شغلي لا تجبروني اتخذ اجراءات صارمة واطرد الكل وابقي فقط الاطراف المعنية بالوصية بعد كلام ابو سيف الغاضب الكل التزم السكوت واولاد عمة اسيا. كل شوية ينافخون بضجر وعيون مهيمن تراقبهم مثل الصياد شكله ينتظرهم يزلون بكلمة حتى يشوف شغله وياهم وجلال رافع حاجبه يتحداهم واشر بأثنين اصابعه على عيونه ووجههة على عيونهم بحركة ( ترة جاي اراقبكم وهمس بصوت ناصي يهدد اولاد اسيا وكال وعيونه على مهيمن .. اريد من الله واحد بيكم ينطق كلمة، والله اهده عليكم وعمو ابو سيف فتح الوصية وبدأ يقراها ابو سيف.. بسم الله الرحمن الرحيم تمت كاتبة الوصية (..) في اليوم المصادف وذكر التاريخ واسم اليوم وبحضور الشهود .... شاهد اول ..... شاهد ثاني وبعدها انتقل ليرد تفاصيل الوصية قام الحاج مؤيد بكتابة الوصية لتقسيم املاكه الخاصة وقرر ان يتم تقسيم املاكه الخاصة بين اولاده الثلاثة المذكور اسماءهم مهيمن مؤيد.. جلال مؤيد.. نور مؤيد حسب ما ينص عليه الشرع اما ما يخص املاك اخيه التي تخص ابنته ريم والتي بقت تحت وصايته فسوف يتم تحويلها اليها في حينه وسوف يتم تسليم حصص الجميع لكن بعد اتمام شروط الوصية المفروضة على الاطراف المعنية وهم مهيمن مؤيد ..جلال مؤيد ..نور مؤيد ..ريم محمد فتح ورقة ثانية من الملف وبدة يعدد شروط الوصية الشرط الاول يجب على كل من جلال ونور وريم المذكور اسماءهم في الوصية العيش في بيت الاخ الاكبر مهيمن مؤيد لمدة سنة كاملة انتبهت لوجه مهيمن انصدم من شرط المحامي وجلال بقة يباوع للوجوه بشك اما اني فگلبي انتفض من نظرة مهيمن اتجاهي واتجاه نور وجلال احس بي صار يدرسنا من جديد عبالك اول مرة يشوفنا عزة هذا عيونه مو طبيعيات اربكني انتبهت لاولاد عمة اسيا وهذا رجل خالة نور نهضوا من مكانهم معترضين نورس.. انا اعترض شنو هذا الكلام من كل عقلك نخلي ريم تروح تعيش ببيت واحد هسه عرفناه وين كاعدين صابر.. حتى انا اعترض على هذا الشرط ابو سيف الغي هذا الشرط من الوصية لان مستحيل نوافق نترك نور تسافر وية واحد هسة عرفته وهي نور بالاصل تخاف من خيالها جاوبهم ابو سيف .. مع احترامي الكم بس انتوا مالكم اي حق تتدخلون لان اصحاب الرأي موجودات والبنات بعمر قانوني يسمحلهن بأتخاذ القرار وهالشي راجعلهم وعلى فكرة بعدني ما منتهي من قراءة بقية شروط الوصية بعدنا بس بأول شرط بقوا اولاد عمتي وصابر يدردمون وانا ونور وجلال ومهيمن بحالة صدمة مهيمن .. ابو سيف كمل قراءة شروط الوصية وما عليك منهم خليهم يهذون لوحدهم ما راح يقدمون او يأخرون نريد نعرف شنو الي النا وشنو الي علينا كال هذا الشي وعيونه عليهم ورجع ابو سيف يقرأ بشرط الوصية الاول للتوضيح ومهيمن كعد يسأله بعض الاسئلة وجلال وبعدها كمل ابو سيف كلامه وفي حال اي واحد من الاطراف رفض اوتراجع عن تنفيذ هذا الشرط سوف يأخذ نصف حصته وتقسيمه على الثلاثة الباقين جلال.. لا يابة انا عني موافق ما عندي مانع اسافر وية مهيمن للبصرة واعيش وياه بنفس البيت خزره مهيمن كوة لازم روحه ما يهد عليه ويسحله رص على اسنانه وكال.. خلي ابو سيف يكمل كلامه ابوسيف.. الشرط الثاني املاك ريم بالتحديد تبقى تحت وصاية مهيمن بشرط اتمام زواج مهيمن من ريم في حال موافقة الطرفين على تنفيذ هذا الشرط يتم تسليمهم حصصهم مباشرتاً اما في حال عدم موافقة مهيمن على هذا الشرط فراح تتسجل نص حصته بأسم ريم واذا ريم رفضت الزواج من مهيمن فراح تبقى كل املاكها تحت وصاية مهيمن لمدة سنتين ويكون المسؤول عنها في كل صغيرة وكبيرة وهو الي يقدر مصروفها الشهري عمو ابو سيف كمل قراءة الشرط واولاد اسيا نهضوا يحجون معترضين بغضب على هذا الشرط نورس .. لاااااااا لهنااااااااا وحدكم سكتنالكم بما فيه الكفاية بس صار كلامكم يدك بالعظم لو نعرف نقتل وننقتل ما نخلي ريم تتزوج هذا واشر على مهيمن هو مهيمن من مبين لازم روحه غصب عنهم ومنا شروط الوصية الي ضغطت على اعصابه واخر شي هذا نورس تجاوز بكلامه مهيمن هد عليه وزنگه من ياخة قميصة .. خااااااب شو تعال. صارلك ساعة تسربت وانا كوة متحملك جلال .. هلا والله عالوا بيك يل منك تجي العيلة والله كام علينا ابو زيد الهلالي يتبع اتمنى لكم قراءة ممتعة مع تحيات اختكم نهى الحسون | ||||
|
| |
|
08-09-19, 06:03 PM
| #15 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #_البارت_الثالث_عشر #الكاتبة_نهى مساء الانوار والسرور عليكم احبتي المتابعين #الكاتبة_نهى_الحسون #قضية_لم_الشمل نور صدمة ورة صدمة هذا حالنا من اول ما دخلت لمكتب المحامي والصدمات صارت تتوالى علينا من كل حدب وصوب كان شعور جداً غريب من عرفت عندي اخوان ونوب مو بس واحد لا اثنين ما اكذب بالاول كنت حذرة وخايفة منهم لكن سرعان ما اختفى خوفي وحل محله الطمأنينة من حجة وياي مهيمن وعرفني على نفسه اكو ناس من نظرة عيونهم وشكلهم ترتاحلهم وتحس وياهم بالامان هيج من الله. مهيمن من هذا النوع كدر بكلمات قليلة يسحب من الشعور بالخوف ويبدله بأمان اما جلال فهذا كان بحثاً اخر اي واحد يشوفه راح يعتقد انه غير مبالي وهواي مستهزء بالموقف مومهتم لكن بالحقيقة كان جلال اكثر واحد بينا خايف ما فاتتني نظرات الاهتمام الي يلقيها على مهيمن وعلية بين لحظة والثانية ولا فاتتني حركة ايده المتوترة كل شوية يرفع شعره للخلف من نظرات الشك والحذر والاسئلة كلها تدل معاناة جلال والظاهر هو اكثر واحد بينا كان يعاني ومتأذي من مصاعب الحياة والكتاب مبين من عنوانه اباوع عليه لجسمه الهزيل التعبان المتضرر رغم الي هو بي بس كان جداً حريص ان يظهر امامنا بصورة الشخص المستهزء الي ما عنده هموم ما يريد نشوف ضعفه وهذولي الاشخاص الي مثل جلال على كثر مشاكلهم والصعوبات الي عايشينها وشايفينها راح تلكاهم كثيرين التمرد والاستهزاء والشقاوة المرافقة للضحك وكأنه يتهرب من ضغوط الحياة لكن مع الاسف هالشي ما عبر علية مثلما عبر على المحامي ومهيمن وريم وبهدوئي كنت اراقب الكل وادرسهم اباوع لريم شلون لمعت عيونها من سمعت بشرط الوصية خصوصاً الشرط الي. يقتضي زواجها من مهيمن معالم وجهة اتغيرت من الهدوء للمفاجئة وبعدها اتحولت الى ابتسامة انتصار عبالك واحد كللها انتي ربحتي اليانصيب ريم كانت قمة البراءة وجداً طبيعية ومبين عليها طيبة وتتصرف بگلبها اكثر من عقلها خلال الساعات الي قضيتها وياها ومن اسئلتها للمحامي كان مبين عليها مو انانية وجداً طيبة بالحقيقة من كال ابو سيف راح تجي بنت عمكم يتيمة وعاشت تحت وصاية مؤيد واول ما دخلت علينا للمكتب اني كونت عنها فكرة ان هي مغرورة ومتكبرة وشايفة نفسها لكن فاجئتني من اجتي علية وذكرت اسمي وابتسمت وسلمت علية وكأنما كانت تعرفني من زمان وشايفتني للحظة جمدت بمكاني لان ما متوقعة منها الود رجعت اباوع لمهيمن كان يكابر حذر ويانا بس مبين عليه صاحب مسؤلية ويعرف شنو يريد رغم الصدمات الي مرت علينا اباوع عليه اكثر واحد بينا كان متمسك وهاديء بس مع الاسف شكلها وصية الوالد وتصرفات اولاد العمة المستفزة. زادت عن حدها وطلعته عن طوره وهد عليهم ولزم الشاب الي اسمه نورس من ياخة قميصه يتوعدله وانطاه لطمة على وجهه خلة الولد يسنح بحضن امه واسيا تصيح .. شنو هاي الوحشية عزة ما ينلام اخوية مؤيد من يعوفكم وينهزم اثاري انتوا طلعتوا وحوش مو بشر جلال.. اي ديري بالج من عدنا ترة عضتنا تموت جان گاعد ويباوع عليهم بتشفي نائل اتقدم متردد وكال .. انت صدك همجي وما تحجي الا بأستخدام القوة جلال .. يالله هاك اتفضل ويكولون جلال اسكت لا تحجي هسة هذا سبونج بوب اذا لزمه اخونا الكبير ومسح بيه الكاع اكو واحد يلومه ريم .. نائل كافي ماله داعي هذا الكلام نائل .. وانتي شنو حضرتج معينينج عليه محامي وجاي تدافعين للباشا مهيمن .. حجية اشتري ولدج وطلعيهم برة ولا والله العظيم امدد هذا المايع بصف اخوه بالگاع بحضنج جاوبته اسيا بأعتراض .. حجية بعينك شنو تكول حجية ورجعت باوعت لنائل وكالت .. ماما نائل اسكت لا تحجي وياه متشوفهم شلون حادين اسنانهم علينا مبينين جايين متحلفين نيتهم سودة نائل .. لا تخافين ماما ما يكدر يسوي شي مهيمن شنف ردانه معصب ناوي يهد عليه لكن ابو سيف صار بينهم يهدي الموقف وفرقهم عن بعض حتى يحل النزاع باوع مهيمن للمحامي وكال بأمر .. شوف ابو سيف هسة تطلع من المكتب شكو شخص ماله علاقة بالوصية انت مو كلت هاي الوصية تخصنا انا وجلال ونور وبنت عمنا .. اي نعم وعمتك اسيا هم من ضمن الاطراف المعنية .. خلاص ما دام الوصية خاصة بينا اذن البقية مالهم لزمة وبالحقيقة وجودهم غير مرحب بي واصلاً منو كلك احنا . نقبل تقرة الوصية علينا كدام الناس الجائز الوصية بيها امور ما يعجبنا احد غيرنا يتطلع عليها اسيا.. اي بس هذولي اولادي من ناس غربة وهي اصلاً وصية خالهم يعني ... قاطع كلامها .. اولادج شي خاص بيج بس احنا ما مجبورين نتحملهم والوصية شي خاص بينا ما نسمح لأي شخص يتدخل بينا اسيا.. وانت شكو تكمز من يمك هسة مو هذولي اخوانك وياك اشو محجوا شي بس انت كالب الدنيا بصياحك ومعترض عليهم انتبهت على جلال استند على عكازته ووكف من مكانه وكال .. لا مو بس هو معترض على وجود اولادج انا من رأي مهيمن افضل ان تتم قراءة الوصية فقط بينا لان هاي خصوصيات منحب احد يتورج علينا باوعلي رجل خالتي صابر وحجة وياي بصوت ناصي .. نور ديري بالج توافقيهم على رأيهم لان معناها يطلعونا انا وخالتج من المكتب وانتي ترحين بالرجلين يالله كومي وكليلهم انا اعترض على كلامكم اريد خالتي ورجلها يبقون هنا يمي باوعت عليه بكره وحقد مدفون بگلبي من سنين وهسة وبهاي اللحظة حسيت بالقوة والجراءة حتى احجي واعبر عن الي بداخلي بحرية وبدون ما اخاف من احد كمت من مكاني يتصميم وحجيت بصوت ناصي لكن مسموع .. اني من رأي مهيمن وجلال فعلاً هذا شي خاص بينا وميحق لأي شخص يتدخل بينا ويسببلنا مشاكل ويعقد الامور فوك ما هي متعقدة باوعت لصابر نطت عيونه مصدوم من كلامي جاوبنا ابوسيف .. اكيد هالشي من حقكم خلاص مادام هذا طلبكم اذن الموضوع طلع من ايدي باوع لعمة اسيا وولدها نائل ونورس وخالتي ورجلها وكال .. انا اعتذر منكم لازم تتفضلون تطلعون برة تنتظرون بعد انتوا سمعتوا بأذنكم طلب اصحاب الشأن وهذا الشي من حقهم اولاد اسيا اعترضوا وظلوا يحجون بس امهم هدتهم وطلبت منهم يطلعون حتى تفتهم الموضوع اما خالتي فعدلت عبايتها وكالت خالة احنا راح ننتظرج برةً لكن صابر وما ادراك ما صابر صار الشرر يطلع من عيونه يتمنى يهد علية وياكلني بأسنانه لان كلبت عليه مر من يمي وحجة بصوت ناصي .. والله وكت الخرسة طلعلها صوت وصارت تقرر وتحجي بزود بسيطة هين يانور انا اعلمج شفتي اخوانج واستسبعتي بيهم بلعت ريكي وارتديت عنه بخوف وانكمشت بمكاني شنو انا ليش استعجلت هذا صابر شيطان خاف يسويلي شي من نرجع للبيت رجعت كعدت بمكاني الي كان بصف ريم وبدة ابو سيف يكمل قراءة شروط الوصية ومهيمن وجلال واسيا يستمعون للمحامي بأهتمام ابو سيف.. اتوقع الشرط الاول كان واضح اما بالنسبة للشرط الثاني باوع لمهيمن ولريم ووجهلهم الكلام .. اذا واحد بيكم عنده استفسار عن الشرط خلي يكول مهيمن سأله.. بس اريد اعرف هو اكو زمن محدد لتنفيذ هذا الشرط حجاها وباوع لريم بتمعن واستغراب ابو سيف جاوبه.. بالحقيقة ما ذاكر بالوصية تاريخ الزواج اباوع لمهيمن صد عن ريم شكله كان ما مقتنع بالسالفة بس فضل السكوت عن الموضوع حالياً خطية مهيمن انفرضت عليه يتحمل هواي امور اخذ بطل الماي من كدامه حتى يشرب التفتت اباوع لريم اريد اعرف شنو ردت فعلها لكيت الاخت صافنة بغير وادي كانت عيونها ثابتة على مهيمن كصته كص بنظراتها ما شالت عينها عنه عبالك بس هو موجود بغرفة المكتب ابو سيف .. وانتي ريم تحتاجين اعيد قراءة شرط الوصية ريم بدلع .. لاعمو ما يحتاج تقراها افتهمت كلشي وعرفت ان مهيمن راح يصير زوجي هي نطقت هاي الكلمة وما احس الا مهيمن شرك بالماي وجلال المفضوح طكها ضحكة مثل المتونس على زنكة مهيمن واحراجه والمشكلة الاخت حجتها وهي مسيطرة يعني الله يحفظها حتى ما خجلت مثل البنات او تستحي بس شكلها متعود تحجي الي بگلبها بحرية بدون تقييد لا ونوب تباوع علينا مستغربة ليش نضحك ريم .. ليش تضحكون شنو اني كلت شي يضحك همست يم اذنها اباوع لمهيمن صار وجهه احمر طماطة من الغضب بس كوة لازم نفسه .. لج ريم كافي لا تلحين بالموضوع عيب البنية تحجي بهيج امور كدام الكل لازم يكون عندج حياء باوعتلي مستغربة.. شنو يعني حياء قابل اني كلت شي غلط اهووو بالله هاي شنو افهمها ابو سيف جلة صوته وكال .. ترة ريم عاشت اغلب حياتها بالخارج وية ابوكم ومن رجع للعراق هي رجعت لذلك لا تستغربون لسانها وتصرفاتها ما عليهم كونترول مهيمن .. اهاااااا هنا بنت الدلال الي جنت اسأل عنه ابو سيف.. اي نعم الوالد الله يرحمه كان مدللها ويحبها ولان يتيمة كان ابو سيف يحجيها بصفاء نية لكن مع الاسف كلامه اجة على جروحنا مثل لسعة الملح مهيمن.. زين طلع الوالد عنده انسانية يحن على ايتام غيره وعايف اولاده عايششين بثوب اليتم والحاجة صدك معادلة غريبة اتبادلنا اني وياه وجلال النظرات وابتسمنا لبعضنا على سخرية القدر بعدها ابو سيف كمل قراءة الوصية وكال .. البند الثالث من الوصية ينص ان البيت الي ساكنين بي ريم وعمتها تم بيعه هو واثاثه بالتاريخ المرقم (...). وتم ايداع المبلغ بالبنك وتقسيمه حسب الشرع على اولاده الثلاثة المذكور اسمهم مهيمن وجلال ونور رفع راسه من ملف الوصية وباوع لريم واسيا وكال .. لذلك احب انطيكم خبر بأخلاء البيت لان المشتري انطة مهلة للحجي مؤيد الله يرحمة مدة. خمسة اشهر ومضى من الخمسة اشهر شهرين كان يحجي واسيا بعدها مصدومة من الخبر وشكلها انشلت ريم جاوبته .. اني ما عندي مانع من اليوم ابدي اجمع اغراضي وحاجياتي. حتى اسافر وية مهيمن لبيت زوجي حجتها وعيونها على مهيمن تلمع خرب يومها فضحتنا وربي هاي البنية مو طبيعية عبالك مفخخة كلما تحجي تفجر قنبلة ومهيمن المكرود عركت كصته وصار ينفاخ وجلال الشيطان سحب كلينكس من العلبة الي كدامه وانطاها لمهيمن وكله.. امسح خوية. امسح غديت ماي الله يساعدك على هالبلوة اخذها منه مهيمن بنترة وكال .. انت انلصم ما اريد اسمع صوتك ..همة كالوها ابوي ما كادرالا على امي خطية شكله انحشر وما يعرف شنو يتصرف وياها ابو سيف.. احم خلونا نكمل البند الرابع تم صرف مبلغ مالي لكل من مهيمن وجلال ونور وريم يتم تسليمه شهرياً ولمدة سنة ودلك لتدبير شؤنكم واحتياجاتكم الى حين الانتهاء من تنفيذ شروط الوصية واستلام حصصكم واضح الكلام لو اعيده مهيمن.. لا واضح ما يحتاج والله والنعم منه طلع الوالد حنين يفكر بينا شلون نعيش خلال هاي السنة وندبر امورنا وماكو دعم مادي منه حجاها بأستهزاء جلال.. يعني راح نبقى عالراتب الشهري زين ليش ما ناخذ حصتنا من هسة يعني احنا موافقين نعيش سوية ابو سيف.. لا موافقتكم المبدئية غير مضمونة بتنفيذ شرط الوصية لذلك هو قرر هشكل حتى يضمن عدم انسحابكم او التهرب من التنفيذ نور.. اني ماعندي اي اشكال والمبلغ كولش هواي ريم بأعتراض .. لا هواي شنو باوعت لابو سيف وكالت.. هاي شنو عمو هذا المبلغ كولش قليل هذا لنص الشهر ما يكفي جلال .. شنو عندج عائلة تصرفين عليها هو بس انتي نور.. عزة بعينج هذا المبلغ كله ما يكفيج لنص الشهر لج انا هسة كاعدة محتارة افكر شلون ووين راح اصرفه ريم.. اني طلعة وحدة للشوبنك اصرف نصه شكهت اريد انجلط من هاي البنية جلال .. اهووو وانا اكول هاي البنية ياربي جنها لعابة باربي اثاري طلع متعوب ومصروف عليها كلش هواي ريم باوعت للمحامي وكالت.. عمو احجيلك كلمة عفية زود الراتب هذا ما يكفيني مهيمن بصوت جدي .. اكول بلا كلام زايد انصرفلج مبلغ مالي حالج من حالنا دبري امورج بيها لا تظلين تتنعوصين هاي مو وياج نور هم بنية حالها من حالج اشو ما اعترضت برطمت شفايفها بزعل وباوعت للمحامي برجاء وابو سيف رفع ايديه بأستسلام وكال .. اسف عمو الموضوع متفق عليه ومنتهي ومثل ما كال ابن عمج دبري امورج بيهن واتعايشي مع الضروف حالج حال البقية بعدها التفت المحامي لمهيمن .. مهيمن في حال اذا تمت موافقتك على عيش جلال ونور وريم في بيتك عليك ان توقع على هاي الورقة اسلمك الرسالة خاصة من المرحوم مهيمن .. بالحقيقة ابو سيف انت فاجئتني بشروط الوصية وهيج قرار ما اكدر اتخذه لوحدي لا تنسى انا ما عايش بالبيت لوحدي لازم استشير الوالدة واخذ رأيها بهيج قرار لان هذا بيتها فارجو منك ان تنطيني مهلة يومين ارجع للبصرة واحجي وية الوالدة وبعدها اردلك الخبر ابو سيف.. كلامك صحيح وهذا من حقك خلاص ننتظرك يومين والله كريم كلبي نغزني من سمعت كلام مهيمن ما اعرف ليش خفت شلون بية واني الي اتحديت صابر وبكل ضني راح اطلع من بيته وبعد ما اشوفه بعدها ابو شيف گلب الورقة وكال .. تم ترك مبلغ مادي بأسم العاملة ام محمود ويتم تسليمها المبلغ مباشرتا بعد قراءة الوصية مع رسالة شكر واحترام لهذه المراءة لما قدمته من خدمات وتفاني للعائلة وللحاج مؤيد بالخصوص وهسة نجي للبند الي يخص الست اسيا اخت المرحوم سوف تستلم حصتها من بيت ابوها حسب ما ينص عليه الشرع عقد حواجبها بأستنكار وكالت .. شلون يعني .. يعني بيت ابوج القديم الي بالمحلة ال....... راح يتقسم حسب الشرع عليكم انتي واولاد المرحوم مؤيد بصفتهم الورثة وريم بصفتها وريثة اخوج محمد كامت من مكانها وكالت .. لا مستحيل ما اصدك معقولة اخوية ما يترك لي اي شي من حلاله يعني هو ذاكر الكل بالوصية بحلاله وحتى ذاكر الخدامة ام محمود ما ناسيها الا اني واولادي ما ذاكرنا لا ما اصدك مستحيل اني اتوقع انتوا متفقين بينكم على هاي الوصية ابو سيف .. ام نورس انا ارفض التجاوز على نزاهة عملي ترة الوصية مصدقة بالمحكمة وعند القاضي بزمن المروحوم يعني ما بيها اي مجال للطعن بصحة الوصية تمت كتابتها حسب الشرع والقانون واي ثغرة ما بيها وتكدرين ترحين تتأكدين بنفسج بعد انتهاء من قراءة الوصية دخلوا اولاد اسيا وعيونهم على امهم الي كانت تدردم وكعدوا يستفسرون من امهم اما اني ومهيمن وجلال وريم صرنا نتبادل النظرات بتوتر لان هاي هي خلصت قراءة الوصية كنا نتبادل النظرات وكل واحد عنده كومة اسئلة يريد يوجه للاخ بس مترددين واني وحدة من الناس بعدما خربت وية صابر خايفة ارجع وياه للبيت وبنفس مستحية اسألهم نهض مهيمن من مكانه و هو يباوع لساعته وكال .. انا اترخص منكم صار لازم اتوكل واسافر للبصرة ابو سيف.. تمام كلما تستعجل يكون افضل حتى اكمل الاجراءات التفت على جلال وكال .. وانت جلال وين راح تبات اليوم باوع على المحامي وكال .. بالحقيقة انا ماعندي مكان ابات بي بس لا تشيل هم ااجر فندق وابات بي مهيمن حجة بتحدي .. وليش تبات بفندق وبيت ابوك موجود روح بات بي انت اولى بي من غيرك وكان يحجي ويباوع على اولاد عمة اسيا. ابو سيف جاوبه.. اي صحيح هاي شلون فاتتني فعلاً بيت ابوك موجود نورس بأعتراض .. شنو ..شنو وين كاعدين واحنا شنو نعرف من عنده ونخلي يبات بالبيت يعني هستونا التقينة بي شلون تريدنا نأمن بي ونبيته عدنا نائل .. اي والله صدك وحتى شكله مشبوه شوفه شلون مگلب بالله طلع حرامي. مجرم خريج سجون جلال بستهزاء .. لا انا مو حرامي ولا خريج سجون بس شوية بوقت فراغي اطلع اشتغل وية داعش مهيمن ابتسم على كلامه وكال.. عسى ما يطلع ارهاب رقم اربعة غصباً على اليرضى والمايرضى بيت ابوه اولى بي والما عاجبه يضرب راسه بالحايط وانا لو ما عندي وقت ولازم ارجع للبصرة جان هم ابات ببيت الوالد واريد زلمة يفتح حلكه جلال.. لا تعصب روحك خليهم يهذون لوحدهم هذولي مثل الذبان بس يغوغي عالوجه ما يأثرون اسيا بغيض .. شترجى منكم مبين عليكم تربية شوارع ما اعرف اخوية شنو كان بفكر بيوم قرر ينطي حلاله لهيج شكولات مهيمن يباوع عليها بهدوء واستصغار وجلال حط جنطته على كتفه وعدل عكازاته وكال .. امشونا لبيت عمتنا نتونس نفتح كنتورها وشنريد نلبس كان يحجي الكلمات ويحرك بحواجبه بتجاه اسيا الي كانت راح تنجلط من سوالف جلال .. يالله ابو سيف دلينا على بيت ابونا لان كلش تعبان واريد انام خطية كان مبين عليه التعب انتبهت عليهم اتوجهوا للباب يريدون يطلعون كمت من مكاني واستوقفتهم .. ممكن لحظة التفتوا علية جلال ومهيمن والبقية يباوعون بفضول حجيت بصوت ناصي وية ابو سيف .. انا اريد احجي وية مهيمن وجلال لوحدنا ممكن ابو سيف .. اي عادي عمو اخذوا راحتكم راح افرغلكم المكتب الكل طلع من المكتب وبقيت لوحدي يم مهيمن وجلال وكلبي يريد يطلع من مكانه احس بروحي صار عندي حق واكدر احجي كنت مستحية ومرتبكة ما شلون اوصللهم ان اني خايفة ارجع وية صابر بعد ما انطيت بي كدامهم مهيمن .. نور اتفضلي احجي كلتي عندج كلام رفعت راسي وكلت .. بالحقيقة انا اريد اروح اعيش ببيت ابوي من اليوم جلال.. الحمدلله صرنا اثنين على الاقل مو لوحدي ابقى وية هذولي مهيمن سألها بشك.. وليش هشكل تردين تطلعين من بيت خالتج مستعجلة شنو السبب بلعت ريكي وكلت .. ااا انا خايفة من رجل خالتي خاف يسويلي شي جلال بغيض.. والله العظيم عرفته ناقص اول ما شفته كلبي ما ارتاحله هيج من الله مهيمن .. انتظر جلال لحظة خلي نفتهم باوع علية وسألني .. يعني افتهم من كلامج هذا ان رجل خالتج هددج .. تكدر تكول هيج شي مهيمن .. خلاص هاي هي ما ترحين وياه حتى ببيت مؤيد ما اريدج تبقين. اذا توافقين تجين وياي للبصرة هناك يم امي واختي ما عندي مانع بيتي مفتوحلج واذا تشيلج الكاع تشيلج عيوني كان مهيمن يحجي وياي بنخوة ولاول مرة بحياتي احس بروحي عند سند جلال بصوت ناصي.. وجلال ابن البطة السودة تخلي يبات ببيت مؤيد يم عصابة ابو طبر جاوبت مهيمن.. لا لا مهيمن ما اريد احرجك وية اهلك بيت الوالد موجود وانت روح سافر حتى تاخذ من تحجي وية امك بموضوع الوصية ترة الموضوع مثلما هو صعب عليك راح يكون هم صعب على امك لاتنسى احنا اولاد زوجها من غير نسوان واخاف تحسس من الموضوع ومو اي وحدة راح توافق تستقبل اولاد زوجها يجون يعيشون ببيتها مهيمن ابتسم وكال يطمني.. معذورة وحقج تحجين هيج لان بعدج ما تعرفين الوالدة. وكرمها هي بيها طبع كريمة وية الكل وتوكف للغريب قبل القريب وانتي سالفتج تختلف من اللحظة الي عرفت بيج انتي اختي و بنت ابوي ومن عندها صرتي عرضي وتنحسبين علية يعني انا ما مسوي براسج فضل جلال كمل .. نور هذا واجب الاخ بتجاه اخته يحميها ويصونها حجاها جلال بهدوء كلبي غرد على كلامهم وصار مثل العصفور الي يفرد جناحاته فرحان .. ربي يسلمكم اني ما اريد شي بس تجون وياي اجمع غراضي من بيت خالتي واروح وية جلال ابقى ببيت ابونا. وانتظرك علما تمهد لوجدونا عند امك احسن مهيمن .. خلاص هذا هو براحتج اذن خلينا نتوكل نور طلعنا من المكتب وصابر كل شوية يخزرني كام من مكانه وكال .. يالله امشونا اتكسرنا تكسر من الانتظار وكف مهيمن كدامي وكال احنا رايحين وياك للبيت حتى نور تجمع غراضها وتجي ويانا. خالتي سألتني مستغربة .. صدك خالة نور يعني وافقتي عالشرط راح تسافرين وياهم جاوبتها .. اي خالة انا راح اروح وية اخواني صابر شهك متفاجيء .. شنو وين كاعدين نخليج ترحين وية اثنين شباب ما نعرف اصلهم من فصلهم عود هستونا عرفنا بيهم اخوانج غير نسأل عنهم ونتأكد من خلفيتهم وانتي شعرفتي منهم حتى توثقين بيهم وتوافقين ترحين وياهم واثقة منهم قاطع كلامه ابو سيف وكال .. اخ صابر. ابوها الحجي مؤيد الله يرحمه قبل لا يحط الوصية اتحقق من خلفيات اولاده وعرف عنهم كل شي والحمدلله سمعتهم نظيفة وما عليها غبار وهو لو ما متأكد وواثق من من نزاهة مهيمن واهله ماكان حط هيج شرط بالوصية فرجاءاً لا تكعد تصرح من يمك بأمور ما تخصك بعدها المحامي ابو سيف سلمنا كل واحد بينا المبلغ المالي الشهري الي حجة عنه قبل قليل وسلمنا لكل واحد رسالة خاصة من حضرة الوالد وكال من اليوم راح نبلش بتسليم الراتب والرسايل اتمنى تقروها ولا تحلون غضبكم على ابوكم وتقصيره يتحكم بيكم وبقراراتكم اخذت الفلوس وعيون صابر تريد تطلع من ماكانها بعدها طلعنا من المكتب وانا احس بروحي عبالك سجين وطلقوا سراحه اتمنى اصيح بعالي صوتي. اني عندي اخوان ابتسمت على افكاري طلعنا خارج المكتب واجانا صوت ناعم التفتنا شفنا ريم اجتي بتجاهنا تهرول وكالت بلهفة .. مو تتأخرون انتظركم راح اخلي خالة ام فلاح تسوي عشا كانت تحجي ويانا وعيونها على مهيمن جاوبتها .. لا تكلفين نفسج ما نريد نتعبج جلال.. عمي عوفيها هسة هي شمسوية الله يخلي ام فلاح راح تطبخلنا باوع لريم وكال .. عمي باربي الله يكثر خيرج وتعزيمنا المشكلة جلال يحجي وياها والاخت سرحانة تباوع لمهيمن الي انكلب وجهه احمر منها وصار يتهرب من نظراتها وكل شوية يستغفر اقتربت منه وهو باوع عليها وشافها بعدها تباوع علهي وكال .. شكو تباوعين مضيعة شي بوجهي ما اهتمت لسؤاله وسألته غير سؤال .. وانت مهيمن ما تجي عالعشا خرب هاي البنية عبالك عايشة بغير عالم جاوبها .. لا لا انا بس اجيب نور للبيت واسافر للبصرة .. امانة اذا سافرت سلم على خالة ولا تتأخر علينا احنا ننتظرك صد نظراته بعيد عنها وكال .. الله كريم بعدها اتحرك بتجاه الشارع العام واجر تكسي وكال يالله شباب اتحركوا ما اريد يجني علية الليل وراي سفر وصلنا لبيت خالتي ودخلت للبيت ومهيمن وجلال بقوا بنتظروني بالباب وصابر دخل للبيت وضل يحوم ويغلط علية وعلى خالتي صابر .. شفتي سناء مو كلتلج هاي كلبة ولئيمة واول ما عرفت عندها ورث وحلال راح تطلع من عدنا وما تعبرنا سناء.. الله يهنيها شريد منها خليها تعيش يم اخوانها احسن انت مو ذاك اليوم كنت تشتكي من مسؤليتها وتريد تزوجها لسعدون خلاص هاي اجوي اخوانها وراح يرحيونك من مسؤليتها كانت خالتي تحجي وية صابر واني اتحرك بالغرفة عالسريع احضر بغراضي وكم غرض من امي محتفظة بيهم وحطيت مستمسكاتي وشهادتي بالجنطة وسمع بكلام خالتي كسرت خاطري دخلت يمي وهي توصيني اصير فطنة وحذرة من الناس الي رايحتلهم واني اقتربت منها وطلعت من جنطتي فلوس من الي استلمتهم من المحامي وانطيت لخالة سناء نصهم وحجيت وياها بصوت ناصي .. خالة انا ما ناسيتج بس ما اريد انطيج الفلوس كدام صابر خاف يلغفهم منج وان شاء الله ما راح انساكم انتي والبنات سناء.. يا خالة خليهم عندج خاف تحتاجين ما عليج بكلام صابر انا ما اعلق عليه ادري بيج طبية حطيتهم بيدها وكلتلها خالة اخذيهم لخاطري اخذتهم وضمتها بصدرها حتى ما يشوفهن صابر خلصت جمع غراضي القليلة وحطيتهم بجنطة وسلمت على خالتي والبنات سناء.. مو تنسن من توصلين تطمنينا عنج .. ان شاء الله خالة صابر.. لا تخافين عليها هاي بزونة بسبع ارواح ما يصير بيها شي طلعت من بيتهم ووكفت بالباب واني ابتسم على كلامه لان يخاف من مهيمن وجلال فما بيده يسويلي شي بس يكدر يحجي خطية طلعت بالباب وشافني مهيمن اتوجه علية واخذ الجنطة من ايدي كنت بس اوزع ابتسامات جلال .. عبالك وحدة طالعة زعلانة من بيت عيالها ما مصدكة اتسعت ابتسامتي وجان يقاطعنا سعدون سعدون.. هذولي منو الي واكفة تتمضحكين وياهم بالباب انتي شنو سالفتج كل يوم اجي الكاج واكفة وية واحد دفعه مهيمن على كيف من كتفه وكال .. انت هييي خير سالمين حضرتك منو حتى تكعد تحاسبها سعدون بكل ثقة .. انا خطيبها شهكت ولطمت صدري والتفتت على مهيمن .. والله كذاب. اصلاً هو وصابر يردون يزوجوني بالكوة لوما رب العالمين سخرلي اولاد الحلال وخلصوني منه كان الله يعلم بحالي شنو صار مهيمن رجع دفعه من صدره وهالمرة اقوى خلاه يرتد للخلف وكله .. شوف حباب هاي البنية الي صارلك ساعة تحجي بعرضها تصير اختنا. وحق الكعبة لوما عمرك والشيب المغطي راسك جان خليتك فرجة لأمة لا الاله الا الله بس احتراماً لعمرك وراح اسويها لله واخلي سبيلك فهسة اتحرك من كدامي بدون ولا حرف جلال .. يالله حباب اتوكل ارجع لأهلك ماشياً على القدمين احسن ما ترجعلهم زحفاً على الركبتين ترة وداعتك الاخ هنا حاد سنونه ينطي فلوس علمود يتعارك خزره مهيمن وكال بتحذير .. جلاااال وجلال غمزله وكله بصوت ناصي .. هاي شبيك كلنا نضيف شوية بهارات حتى سعدون يخاف ويشرد بروحه العزيزة وفعلاً طلع صابر على اصوات الولد وشاف سعدون واخذه وراح وكل شوية يلتفوتون ويباوعون علينا .... مهيمن بالطريق للبصرة راجع وانا محمل بهموم فوك همومي سافرت لبغداد وانا احس بروحي مظلوم وجنت ناوي اخذ حقي من اخواني اشو اجيت ولكيت اخواني مظلومين اكثر مني محد بيهم مرتاح واسوء من عيشتي جلال الي مبين عليه التعب والضيم ونور المسكينة سحبت نفس عميق وغمضت عيوني .. بيمن ادعي عليك يا مؤيد حطيتنا بطريق القدر وتريد منا ننجمع طلعت الرسالة الي سلمها الي ابوسيف وكعدت اكلب بيها ياترى شنو كاتبلي مؤيد بالرسالة يتبع اتمنى لكم قراءة ممتعة مع تحيات اختكم نهى الحسون | ||||
|
| |
|
08-09-19, 06:05 PM
| #16 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_الرابع_عشر #الكاتبة_نهى مهيمن دولاب حطنا الوكت ياناس وتطشرنا لااخ يعرف اخو ولاجن اخت عدنا اب لاهي بدنيته ولافكر يوم البزرنا زنبور اصفر مابي فود بس يخرب عنب حديقتنا بيوم دكة المرض طرش الوادم تدورنا حسباله دكمة كهرباء ساعه يطفينا وساعه يشغلنا يابوية احنا بشر عدنا احساسنا وعدنا مشاعرنا تريدنا نعيش سوة اغراب ومن غصب عنا خل نشوف الايام وهالسنة شلون تمضي من عمرنا هدى سعد ....................................... الطريق كله من بغداد للبصرة ظليت حاير اقلب الامور براسي شلون وصلت لهاي المرحلة ، اني بشنو رحت وبشنو رجعت راسي راح ينفجر من التفكير وافكاري مشوشة ومااعرف شسوي بس الوالده الكة عدها الحل والنصيحه وصلت للبيت بوقت كلش متأخر ولكيت امي تنتظرني على نار واول ما شافتني صارت تتحمدلي عالسلامة لكيتها تحوم يم الباب كسرت خاطري وشلت هم شلون راح افاتحها بالموضوع والله حتى ما ينطيني گلبي اذكرها بخيانة مؤيد لها شراح اكولها مؤيد تركلج حمل جديد بعد موته يعني استغفر الله ما اكتفى بالي سواه بيها لا والادهى يريدها تستقبل اولاده شنو من امتحان صعب انحطيت بي انا بالحقيقة ما عندي اشكال يجون يمي بس امي شلون بيها دخلت للبيت وهي تفتر وراي وتسألني .. ليش اتصل عليك يطلع جهازك مغلق والله گلبي اجة يوكف من الخوف ولو مطول شوية جان صبحت انا وخوالك ببغداد التفتت عليها وبستها من راسها وكلت .. ام مهيمن اهدي شوية وانطيني مجال افهمج القصة النقال خلص شحن وانا ببغداد وما صارت فرصة حتى اشحنه كنت احجي وية امي وابدل بملابسي وهي تحوم يمي وتجمع بيهم وراي باوعت للبيت منا ومنا وسألتها .. اشو البيت هدوء حوراء وين .. اختك نامت اليوم من وكت .. شعجب مو من عوايدها تعزل من وكت .. اتعاركت وياها ونامت زعلانة .. ها يمة جا انا مو محلفج ما تزعليها وتكسرين بخاطرها .. خلي تولي انت مطلع عينها .. ليش هي شسوت ؟ .. انا وصيتها تغسل البطانية وطلعت لبيت خوالك اريد واحد يطمني عنك وعن احوالك رجعت للبيت ولكيت الشارع فايض وصاير (روجة تطك بروجة ) واثاري الخاتون ناسية الماي مفتوح على البطانية وهي كاعدة تتابع مسلسل تركي عاد انا منا گلبي محترك عليك ومنا هي حركته اكثر طفيت التلفزيون وشلت هذا الجهاز الصغير ابو القنوات (الريسيفر) وضميته بكنتوري .. الله يسامحج يمة امي تحجي وتذكرت ريم بنت عمي تقريباً تصير بعمر حوارء اختي ههههه والله امي لو تشوف ريم وتصرفاتها ولسانها جا شتسوي ضحكت لااراديا من الفكرة باوعتلي وكالت .. يمة عساها الضحكة دوم مو بس يوم .. دايمة بوجودج ياغالية .. اي يمة ما كلتلي شنو سويت بقصة الوصية .. كولي شنو سويت بكل الصدمات الي طلعتلي هناك .. ياستار شكو شصار لا يكون تعاركت وية اهل ابوك احجيلي خو ما هدوا عليك اقتربت علية وصارت تعاين تتفحص جسمي خاف مضروب ونزلت علي بالاسئلة نزلة وحدة ماالحك اجاوبها .. لحظة يمة مابية شي احس انحشرت بزاوية المشكلة اي كلمة راح اكولها راح تذكرها بكسرتها بس شسوي هذا شر لا بد منه .. اي يمة كول يابعد امك شبيك شنو صار هناك .. والله يمة لو اسولف سالفتي للمجنون ما راح يعقلها اخذتها وكعدنا بالهول وصرت اعيد عليها كل الي صار وياية موضوع لقائي باخواني وشلون اتفاجئت بيهم .. يايمة الله يساعد كلبك على هذا الموقف والله من يمي جسمي قشعر ما كلتلي اخوانك شلون اوضاعهم .. صدكيني وبدون مبالغة يمة حالهم اضرب من حالي عايشيين بالضيم وحجيتلها عن كل واحد بيهم وشلون عاش حياته جرت حسرة وكالت ..الله يسامحك يامؤيد على هاي العملة ،خطية والله كسروا خاطري استغليت لحظة انفعالها وتعاطفها .. لو تشوفين نور راح ينفطر گلبج عليها بالزايد .. اووف صدك الي يشوف مصايب الناس تهون عليه مصيبته اي يمة كمل وتالي بعدين شنو صفت السالفة وية اخوانك جريت نفس عميق يشجعني على التكملة .. وتالي يا محفوظة السلامة طلع الوالد حاط شروط بالوصية وكاتبلنا بيها اذا نريد نستلم حصتنا لازم ننفذ شروطه .. وشنو هاي الشروط .. شروطه تكول انه لازم اجيب اخواني وبنت عمي يعيشون يمي بالبيت لمدة سنة كلت هذا الشي بسرعة وبعدها راسا كعدت اشرحلها افهم امي شرط الوصية وشنو المطلوب مني شخصيا وهي كانت بس تستمع ما علقت كنت اراقب وجهها ، كلتلها تقريباً كل شي الا شغلة وحدة ما كلتها فضلت اتغاضى عنها وهو شرط زواجي من بنت عمي ريم لان ابدا مو وقتها اكول للوالدة هذا الشي بالاول خلي امهدلها. الموضوع حتى تتقبلهم بالبيت وبغير وقت اكللها لان اذا اكللها هسة احتمال تنصدم ومو بعيد تنجلط اذا شافت البلوة كدامها فخلي الموضوع على ماهو عليه ولكل حادث حديث وكملت كلامي .. وهسة انا طلبت من المحامي ينطيني مهلة كم يوم حتى ارجع للبصرة واحجي وياج واخذ رأيج بموضوع نور وجلال وريم لان انتي ام البيت وصاحبة القرار بي شوفي يمة قبل لا تكولين شي وتقررين. اريد اكلج انتي مامجبورة على اي شي واي قرار تاخذينه انا راح احترمه وانفذه وانا الممنون وانتي براحتج اباوع عليها ابتسمت وكالت حتى بدون ما تنتظر الى ان تاخذ وقت تفكر بي ..يمة هلا بيهم بأي وكت يشرفون ، بيتي مفتوحلهم يكفي هم اخوانك من دمك ولحمك. واذا ما كفاهم البيت احطهم على راسي شتريد بعد اكثر يالغالي .. يسلم راسج يالغالية دومج رافعة راسي لو تدرين شكد جنت شايل هم لهذا الشي وخايف لا ترفضين جيتهم وانحط بين خيارين واحدهم امر من الثاني ولازم اختار بين رضاج علية وبين عرضي اختي وبنت عمي مااكدر اعوفهم وحدهم سايبات بهاي الدنيا بس الحمدلله بموافقتج خففتي عني حمل بكد الجبل على صدري .. جيبهم يمة ولا تشيل همهم سويها لله ما خسران شي ان شاء الله لمتكم بيها الخير عليك وعلى اخوانك .. بس يمة اضمها عليج على الله ما تنضم انا بعدني عندي شكوك ومتخوف منهم صحيح الي عرفته عنهم والي شفته منهم لحد الان يبشر بخير مساكين لا حول ولاقوة بس خايف لا تكون هاي بس الواجهة ويكون ما خفي كان اعظم. ما اريد انصدم بيهم .. يمة ما راح تكدر تعرف معدنهم بيوم ليلة هي الايام والمواقف تبين معادن الناس فخلي الايام الي تراويك معدن اخوتك .. يمة انا خايف عليكم انتي واختي لا تنضرون من وجودهم وياكم لان بعد غدر الوالد غسلت ايدي وصار مالي ثقة بالناس كنت افضي بمخاوفي لأمي وصارت امي تطمني وتشجعني امي الي عدها الرأي الحكيم دائما ويساعدني بحياتي واتخاذ قراراتي مسحت على اكتافي .. لا تخاف علينا ما يصير بينا شي تطمن انا امك مو بنت اليوم بنت شيخ ومفتحة واعرف البشر من شكلهم وذا تريد اانا ختبرلك اياهم حتى تتطمن ويرتاح بالك .. ما تعرفين اشكد ارتاحيت من حجيت وياج احس هم وانزاح من على ظهري كمت من يمها حتى اروح ارتاح لان كلش تعبان .. يمة ادعيلي كون اصون الامانة واكون كدها .. ان شاء الله يمة ربي يسهل عليك ويهدي اخوانك الك دخلت لغرفتي وشفتهم فارشين فراش رحت اتمدد وهنا تذكرت الرسالة واكعة مني الظاهر من بدلت ملابسي دنكت واخذتها مستغرب من نفسي ليش هذا الشي مكلته لامي ولاجبت سيرة الرساله من مؤيد. تمددت بفراشي وفتحت الرسالة كانت عبارة عن ورقتين مليانة بأسطر من الكلمات صارت نظراتي تتناقل بين الحروف والكلمات على عجل اريد اعرف شنو كاتبلي كانت مكتوبة بخط ايده اكيد هذا خطه باوعت لتوقيعه بعدها بديت اقرة المكتوب لكيت نفسي وية كل كلمة اقراها احس شي يتوغل بين ثنايا روحي غصب عني (رسالته كانت مملوءة بالاعتذارات والاعترافات يعترف بنفسه انه مذنب ومقصر في حقنا هو الان يعرف انه لا يملك الحق بطلب الغفران لكن كل ما يطلبه مني ان استلم زمام الامور بدل عنه واقود اخوتي واصل بيهم الى بر الامان الذي اخفق هو في تحقيقه لنا ) وبقيت اتنقل بين السطور الى ان نهضت من مكاني مصدوم وانا اعيد قراءة هذا السطر معقولة ما جاي اصدك يعني الحجي ابو حيدر كان له علاقة وية مؤيد زين هاي شلون وشوكت ...... نور ببيت ابوية كاعدة واحس بالغربة واحس بحالي مثل الضايعة وخايفة ومترددة خطية ريم ما قصرت وياي لكيتها مجهزتلي غرفة خاصة حتى اخذ راحتي. اول ما دخلت للبيت تفاجئت بضخامته ماكان يجي على بالي هو بهذا الشكل الفخم والراقي بكل معنى الكلمة. لفت انتباهي صفير جلال هو مثلي متعجب من البيت وفخامته جلال .. حييييييل هذا البيت كله كان لأبونا الله يرحمه شكله كان صاحب ذوق راقي اجانا صوت اسيا من ورانا يحذرنا ما نلمس اي شي جلال باوعلها وكال .. البيت بيت ابونا والقوم حاربونا حجية بس اريد اذكرج هذا هسه بيتنا حلالنا اكول الافضل روحي لاتظلين واكفة فوك راسنا لان اذا بقيتي فبأذن الله راح تنجلطين وانا غير مسؤول ريم كانت واكفة يمنا ابتسمت على كلام جلال اسيا جاوبته من بين اسنانه المصطكة بغيض .. وقح وقليل ادب حجيت وياه بصوت ناصي .. جلال عوفها لاتحط بالك يمها احنا جايين هنا خطار مؤقتاً كم يوم وطالعين عدل العكازة وكال .. لانور انتي متوهمة احنا مو خطار هي واولادها خطار عدنا خلي تروح موتتنا صارلها ساعة تباوع علينا بنظرات متقززة الي يشوفها يكول داخلين عليها غجر لازم تعرف حدها وتعرف مو من حقها تكعد تحاسبنا وتقلل من مقامنا احنا اصحاب الفضل عليها وعلى اولادها مو هم ريم .. جلال ما عليك منها لا تضوج هي هذا طبعها احس بريم تريدنا ناخذ راحتنا بالبيت بس عمتها واولادها ما منطيها المجال مديت ايدي واخذت اغراض جلال من عنده وكلتله .. انطيني جنطتك عنك ريم .. تعال جلال خلي ادليك على غرفتك .. اي والله ياريت مشينا انا وجلال وراها وريم اتوقفت يم باب غرفة وسحبت نفس عميق وغمضت عيونها وفتحته الغرفة كانت جوة بالطابق الارضي بقت واكفة بالباب وكالت انتوا اخذوا راحتكم واني رايحة انطي خبر لأمو فلاح حتى تجهز العشا جاوبتها .. ماشي تمام. راح نتعبج ويانا ابتسمت وكالت.. تعبكم راحة دخلنا انا وجلال للغرفة وحطيتله الجنطة عالسرير جلال كسر خاطري احس بي محتاج احد يهتم بجروحه ويضمدها كلتله .. جلال اذا تحتاج اي شي كول لا تستحي اني اختك سكت ما جاوبني باوعت عليه لكيته مركز نظراته على شي كان خلفي التفتت وكان اشوف صورة معلقة على الحايط لرجل يجي عمره تقريباً بالخمسين او اكثر كان واكف بيهيبة ومبتسم ووجهه بشوش. كان الرجل عيناً يشبه مهيمن لكن هذا كان عمره اكبر جلال.. اتوقع هذا حضرة الوالد ابونا راح اقترب من الصورة وصار يخاطبها .. ها مؤيد شلونك انا ابنك جلال قربان بلا زحمة عندي كم سؤال ظلت حسرة بگلبي بالله متجاوبني عليهن رحمة لوالديك اباوع لجلال كان يكلم الصورة بأستهزاء لكن رجفة فكه ورصت اسنانه دلت على غضب مكبوت وحزن دفين يحاول يغطي بالضحك جليت صوتي ورجعت اباوع للصورة واني احجي وية جلال .. جلال لا تتعب نفسك ما راح يجاوبك روح ادخل اسبح وارتاح شوية احسن لك من الوكفة وعندك الليل بطوله تكعد تسولف وية صورة الوالد الظاهر اليوم راح تنام بغرفة سيد الوال....... قطعت كلامي فجاءة ونظراتي اتوقفت على عيون مؤيد رحت اقتربت من الصورة وهمست بصوت ناصي.. اني شايفة هذا الرجل وخصوصاً هاي العيون عندي احساس اني شايفته بس وين مااعرف جاوبتي جلال.. يخلق من الشبه اربعين قاطع علينا كلامنا دخول ريم وطلبت منا نجي نتعشا جلال.. انتوا روحوا وانا شوية واجي وراكم عشر دقايق واجة جلال وكعدنا اكلنا كلنا سوية بس ما عدا نورس ونائل كانوا طالعين من البيت كانت اجواء العشاء متوترة وجلال كلش هاديء حتى ما اكل اي شي شوية واستأذن منا وكام بسرعة من الاكل كان مبين عليه كلش مختنك ما اعرف شبي هسة كان طبيعي ما بي شي خلصنا العشا واخذتني ريم لغرفتي احس هذا اليوم كان اطول يوم يمر علية بحياتي كنت جدا تعبانة من الي صار صعدت وياها فوك ودخلتني بغرفة حلوة بسيطة لكيت جنطتي الكبيرة مركونة قرب الكنتور ريم.. اخذي راحتج مبين عليج تعبانة اني لو علية ما اعوفج تنامين بس ما علينا الايام الجاية هواي وحضري نفسج تبقين سهرانة وياي يومية للصبح طلعت وتركتني بالغرفة لوحدي. سمعت صوت نقالي يرن اتوجهت على جنطتي وفتحتها وكعدت عالسرير كان المتصل خالة سناء تريد تتطمن علية بعدها انهيت الاتصال وياها ووكعت عيني على الرسالة الي سلمها لي المحامي ابو سيف عقدت حواجبي طلعتها من الجنطة وفتحتها وبديت اقرة بيها وياريتني ما قريتها مع كل كلمة اقراها بالرسالة كنت احس بغصة كبيرة في بلعومي مااكدر حتى ابلع ريقي نهيت الرسالة وحظنتها لصدري ودموعي غزت خدي يعني معقولة الاب الي شفته بذاك اليوم يم بيت امير الي كالوا عنه جاي علمود يدور على بنته هو نفسه (ابوية ) وكان جاي يدور علية اني ... بنته غمضت عيوني واني اتذكر نظرات عيونه ودموعه بذاك اليوم والكلام الي مكدر ينطقه لان وكع وهو ماد ايده كانه يكولي تعالي انتي المقصودة واني يومها مفهمت عليه ولا على مدت ايده المستعطفة الي تريد تحضني ........ ...... ريم والله كلبي من الفرحة يريد ينفجر اليوم مهيمن اتصل على عمو ابو سيف وبلغه عن موافقته على الشرط الاول من الوصية جلال من سمع الخبر بقى هاديء ما كال شي لكن نور سحبت نفس عميق بأرتياح شكلها هي مثلي كانت شايلة هم لرد مهيمن وارتاحت لما سمعت بموافقته بديت اجهز الجنط والاغراض بالحقيقة كانوا هواي بس كلت اخذ نص واخلي النص الباقي عمو ابو سيف يشحنه للبصرة لان اكيد السيارة ما راح تكفي الليل كله ما اجاني نوم بس اتگلب بفراشي واتخيل حياتي من انتقل لبيت مهيمن وراح اكدر اشوفه كل يوم غمضت عيوني واني اتذكر شكله وشخصيتة وهو معصب على اولاد اسيا وشلون سكت اسيا واخذ دور القيادة بصورة تلقائيا وية اخوانه وكأنما هو متعود على هذا الشي من شفته بالصورة حبيت شكله لان يشبه عمو مؤيد الله يرحمه لكن من التقيت بي وشفت شخصيته عجبني الي عرفته عنه لحد الان واتمنى ما يخذلني ويبقى هيج سحبت الجنطة الاخيرة وكمت من مكاني ورحت اشوف على الجنطة اليدوية الي راح اخذها وياي بالسيارة فتحتها حتى اتأكد من المستمسكات وجان توكع عيني على رسالة عمو طلعتها من الجنطة وكعدت على كرسي ميز المرايا بديت افتح بيها وبس فتحتها لفحتني ريحة عمو وحن عليه گلبي المشتاقله فتحتها وبديت اقرة بيها ووية كل كلمة اقراها دموعي تنزل غصب عني عبالك داسمع صوته يحجي وياي كانه هاي الكلمات احسها صارت ايده وتمسح على شعري بحنية كان يوصيني على اولاده وبنته وكاتب ( ريمة صحيح انتي اصغر وحدة بيهم لكن الي اعرفه قلبك كبير ويوسع الكل ) بقيت اقرأ كل كلمة بتمعن عبالك اريد احفرهم بذاكرتي كان يشرحلي عن شرطه بالوصية بزواجي من مهيمن ( سيأتي يوم واتمنى ان يكون قريب جدا تعرفين ان مافعلته وشروط الوصية هو لمصلحتك التي حرصت عليها طوال مدة اقامتك معي ) وبعدها كملت القراءة واني مامصدكه الي تقراه عيني بقيت اباوع متفاجئة على الكلام المكتوب معقولة الي جاي اقراه عمة اسيا طلعت ورة موضوع قصة الصور والتهديد يعني معقولة حقدها وطمعها يوصلها لهاي المرحلة معقولة ..... ..... نور بالطريق للبصرة اني وجلال وريم گلوبنا كانت محملة بالترقب باوعت لريم الي كانت حاطة راسها على كتفي غافية خطية تعبت بتحميل جنطها ابتسمت واني اتذكر جلال شلون انصدم بالكم الهائل من جنط ريم التفت علية وسألني .. نور رحمة على والديج بالله روحي اتأكدي هاي الجنط المن هاي بس لا اهل المنطقة ناوين يسافرون ويانا للبصرة ريم تباوع عليه بكل هدوء جاوبته .. لا جلال هاي الجنط كلهم الي .. شكو حضرتج طالبة لجوء وماخذة هالكد جنط شدعوة ترة بيت مهيمن بالبصرة مو بصحراء الربع الخالي .. اي هو اني هم كلت هشكل لذلك اخذت نص الجنط جلال فتح حلكه وبقة بس يباوع عليهاعبالك ديشوف كائن غريب كدامه .. لا والله بيج الخير شلون ما اشوف انتي رايحة للبصرة حتى تغزين بيت المكرود مهيمن احلى شي بالموضوع الاخت البث ما يوصللها بسرعة .. جلال شنو مگرود .. معناها الضحية جلال كان الطريق طويل من بغداد للبصرة خلصتها كلها صفنات من يوم الي دخلت بي للمكتب وانا احس بروحي بحلم شلون صفة بية القدر متوجه للبصرة شكد بعيدة عن الموصل اليوم قبل لا اسافر حولت الراتب كله لبيت خالي واتصلت عليه وسألته كم سؤال كان گلبي متشعوط من ورة الي قريته بالرسالة. وجوابه اكد الكلام المكتوب بالرسالة البارحة من نمت بتالي الليل فتحت الرسالة وانا الفضول يقرة عندي الف كنت بس اريد اعرف مؤيد شكاتبلي قريت المكتوب الي ما منه مهروب كان كلامه كله اعتذار وندم. وامنيات. واتفاجئت كن عرفت ان اسيا ورة موضوع طردي من بيته وهو عرف بالموضوع قبل لايموت بعدها صار يطلب مني السماح. لرجل شارف على الانتهاء احس بروحي انطعنت من هذا الكلام طويت الرسالة وما كملت قراءتها لان اكتفيت من الي عرفته ما اريد اعرف بعد اي شي صرت اكره المفاجئات باوعت للسايق الي كان يسوق وعينه عالطريق التفتت اباوع على البنات نور وريم كاعدات ورة بالسيارة ريم كان مبين عليها بزر دلال. ونور مثل حلاتي متعودة على عكوسيات الحياة هذولي هم امانة صاروا بركبتي. وين جانتلك هاي يا جلال ...... نور احس بروحي اتكسرت من كعدت السيارة هاي اول مرة بحياتي اسافر بهيج طريق طويل باوعت لجلال يباوع علينا ابتسم بوجهي وكال .. ما بقى شي ونوصل باوعنا لريم الي كانت كل شوية تهفي على وجها ريم.. اوووف كولش حارة جلال التفت علينا كان كاعد يم السايق وكال .. هسة باربي تسيح من الحر لان وصلنا البصرة ترحب بكم بشمسها التي تسمط الي خلفوكم ريم .. حقك عيني تقلد علية اذا انت حاط منشفة على جام السيارة حتى ما توصلك الشمس رن نقال جلال وجاوب المتصل .. الو هلا مهيمن اي اي احنا هسة دخلنا للبصرة بس اريدك توصف للسايق وين بيتكم مد ايده بالنقال للسايق حتى يحجي وية مهيمن بعدما وصف للسايق المكان بثلث ساعة وصلنا لمنطقتهم ودك نقال جلال والمتصل مهيمن جلال .. مهيمن وصلنا لمنطقتكم بس اطلعلنا تمام .. صار يعني تريدني اغلف باربي انهى الاتصال والتفت علينا وباوع لريم .. باربي مهيمن يكول خلي ريم تحط شي على راسها ريم.. يعني شنو احط شي على راسي جلال .. استغفر الله ربي واتوب اليه يعني بين قوسين( اتستري يامرة ). يالله بالعجل ترة وصلنا التفتت علية تستفسر جاوبتها .. جلال قصده يعني لبسي حجاب على راسج لان اهل مهيمن ناس ملتزمين ريم بأعتراض.. هاي شنو اي غير تنطوني خبر حتى احضرلي شال يتناسق وية ملابسي بالله هسة اني منين اجيب شال اصلاً. جلال بنفاذ صبر .. نور رحمة على والديج ما عندج حجاب تحطه على كفشتها وتستر علينا جاوبته.. لا والله ما جوة ايدي. بس عندي ورة بالجنطة مالتي. اذا تريد جلال.. لا يابة شيطلعها للجنطة مالتج اذا ست باربي مقبطة الصندوق بجنطها السايق كال.. اتوقع هاي الجهال واللمة الكم التفتنا كلنا نباوع كدام وجان نشوف مجموعة اطفال صغار اجوي يركضون وعجاجة الترابة هايجة من ركضهم. عالسيارة انتبهت على مهيمن كان واكف يم مجموعة زلم رجع جلال يستعجل ريم.. خرب بالقسمة السودة لج ريم وصلنا وانتي بعدج ما حاطة شي على راسج ريم جاوبته بارتباك .. شنو ما دتشوف ماعندي شي اخليه على شعري وكفت السيارة قريب على مهيمن وجلال التفت بسرعة سحب المنشفة الي كانت عالجامة .. خاااب دتعاي صارلج ساعة تنعوصين علينا اشو حطي هذا على راسج دبري امرج بي حط المنشفة على راسها وريم عاطت .. لالالا جلال عيييييع راح تخرب النيولوك كله كاتمة ضحكتي على شكلها كانت لابسة نضارات شمسية وحاطة خاولي على راسها جلال.. هسة ديالله ما تكليلي منو راح يعرفج اذا شافج هشكل ريم.. خربت كشختي اجة مهيمن وفتح الباب الي على صفحتي وكال الحمدلله على سلامتكم ونورت البصرة بجيتكم يتبع | ||||
|
| |
|
08-09-19, 06:08 PM
| #17 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_الخامس_عشر #الكاتبة_نهى ها نحن ذاهبون خلف اقدارنا آملين ان نجد الامان في احضانه نور وصلنا لبيت مهيمن والافواج بدت بأستقبالنا مهيمن فتحلي باب السيارة وكال الحمدلله على سلامتكم نورت البصرة ابتسمت ونزلت من السيارة .. الله يسلمك البصرة منورة بأهلها جان يحجي ورفع راسه وسلم على جلال واشر لمجموعة شباب .. شباب تعالوا سلموا على جلال اااخوي اتعثر بكلمة اخوي بعدها الكلمة جديدة عليه والتفت لجلال وسلم عليه وكله.. جلال سلم على خوالي واولادهم جلال اتقدم مستند على عكازاته وسلم عليهم وهو مبتسم ومتعجب بنفس الوقت على الاستقبال الحافل مهيمن بأبتسامة .. تعاي نور فوتي دخلي جوة امي واختي والبنات كلهم ينتظرونكم بالبيت اشرلي على باب مفتوح رفعت راسي اباوع للبيت كان كلش بسيط وغير كامل مو مهم عندي شكل البيت اهم شي عندي كون احس بي بالامان سمعت جلال .. خرب بالحظ هذولي الزعاطيط عبالك عندهم عرس فجاءة صاح جلال وهو يضحك .. لك مهيمن الحك على باربي هذولي الجهال هجموا عليها راح يفطسوها اتبع كلامه لعنة مهيمن المتفاجيء التفتت ادور على المسكينة ريم لكيتها حاطة المنشفة على راسها مسويتها مثل التوربان ونص شعرها طالع خرب يومها اهم شي عندها اناقتها حتى المشفة ما خلصت منها مهيمن.. لا ياربي والله اشتهرنا بين الوادم اباوع عليه طكها ركضة لداخل البيت عالسريع وصاح يمة لحكينا بعباية بسرعة خطية ما طول لحظات ولكيته مزروع يم ريم الي كانت واكفة بالجهة الثانية من السيارة وبسرعة غطاها بعباية الراس من راسها لاقدامها، غلفها تغليف ما اسمع بس ريم تنعوص مثل الكتكوت الي من يحشرونه بزاوية .. مهيمن هاي شنو كل شي ما اشوف اختنكت راح اوكع على وجهي حصرتني الضحكة على شكل مهيمن وريم بس ما اكدر اضحك منا الناس واستحي ادخل لوحدي للبيت منتظرة مهيمن يجي يدخلني للبيت لعند امه واخته بقيت واكفة اباوع عليه شلون يسحبها هي والعباية وراه وعيونه تراقب منا ومنا وكل شوية يلعن ويخزر اي واحد توكع عينه عليه يباوع لريم خطية عبالك واحد عنده عركة احلى شي الباربي ريم على كولت جلال صارت تمشي بالعباية وتتعثر بيها منا على ما وصلها للبيت كانت ريم شبعانة كفخات من ورة العباية والحذاء العالي دخلت هي ومهيمن واني دخلت وراهم اباوع عليه كان كلش معصب ويدردم صاح.. يمة تعاي اجوي البنات اجتي مرة متوسطة العمر صاحبة جسم مليان ووجهها كان بشوش وابتسامتها مالية وجهها ام مهيمن .. يا هلا وميت هلا بالجاي صوبنا يمة تفضلن تفضلن مية هلا بأخوات العزيز كنت حابسة انفاسي وشايلة هم لهاي اللحظة بس الي يشوف استقبال ام مهيمن غصب عنه يذوب حتى لو كان گلبه من حديد راح يبادلها السلام بكل رحابة صدر اقتربت مني واخذتني بالاحضان عبالك تعرفني من زمان كنت اسلم وانتبهت على بنية واكفة ورة ام مهيمن منتظرة دورها بالسلام كانت حلوة حنطاوية البسمة مرسومة على وجها سألتني بفرحة.. اكيد انتي نور هزيت راسي براحة .. اي اني نور وانتي اكيد اخت مهيمن الصغيرة هم سوت مثلما سوت امها اخذتني بالاحضان وكالت بصوت بي بحة تجنن .. انا اسمي حوراء تعالي تفضلي البيت بيتكم ليش واكفة بالباب كانت تحجي وياي وعيونها على ريم ريم الي كانت بعدها دتتصارع وية العباية حتى تنزعها بس نزعت العباية حوراء شهكت وكالت .. هلا والله هذا الكناري منين ابسمت وصحت لريم ريم تعالي سلمي على اهل مهيمن اجتي ريم بعد ما اتخلصت من العباية والمنشفة وشمرتهم بالكاع وراحت لأم مهيمن تسلم عليها بكل لهفة .. هلو عمة شلونج اني ريم بنت عم مهيمن .. ياهلا بيج حبيبة منورة واخذتها بالاحضان وريم غركت وانخبصت بالسلام ام مهيمن تحجي وعيونها تريد تطلع من مكانها على ملابس ريم خطية ريم كانت لابس ملابس فول مواصفات جينز كاحت وقميص اسود ثلاث ارباع الردن وبي فتحات هوائية صغار من الكتف مطلع بياض كتفها بعدها ام مهيمن شهكت وكالت .. يا ولج حويرة ركضي شيلي عباتي بسرعة لا يدوسوها الجهال هاي ال .... حبابة ذبت عباتي بالكاع (خطية ام مهيمن شكلها اتلاحكت لروحها وبدلت كلامها بعدها التفتت ام مهيمن وصاحت دستة مال نسوان وبنات تتراوح اعمارهم بجميع الفئات العمرية وصارت تعرفنا عليهن والي افتهمته ان هذولي يصيرون خواتها ونسوان اخوانها وبناتهم وجهالهم يعني بأختصار صارت لخة احلى شي ريم كان شكلها غريب مثل الطاووس بين الدجاج وعيونهن تتفحص والجهال محوطين ريم بعدهم وهي خطية بس توزع ابتسامات اجتي حوراء وبعدت الجهال عن ريم وكالت .. كش .. كش روحوا منا حشا مو جهال ذبان وبعدها دارت على ريم وابتسمت وكالت تعالي حبيبة خلي اسلم عليج .. انا حوارء اخت مهيمن ريم اتسعت ابتسامتها وكالت بفرحة .. يااااااي انتي اخت مهيمن يعني راح تصيرين حما..... قاطع كلامها صوت مهيمن الي وجهه كام ينطي الوان كان شايل الجنط يدخلهم للبيت وشكله سمع ريم شنو رادت تكول .. اكول يمة شنو راح توكفين البنات بالباب اخذيهم وفوتوا جوة للبيت عيب من الزلم راح يدخلون بالاستقبال .. اي والله يمة صدك اخذتنا السوالف باوعت علينا واتوجهت كدامنا لداخل البيت وكالت .. تعالن يمة فوتن دخلن جوة خطية اكيد هسة ساحت ارواحكم من الحر دخلت ريم والبنات واني اجيت ادخل لكن وقفني صوت مهيمن .. نور لحظة قبل لا تدخلين باوعت عليه .. كول مهيمن اقترب مني وحجة بصوت ناصي وهو يراقب المكان كال .. نور رحمة على والديج اريدج تنتبهين لريم خاف تجيب طاري الزواج لأمي وانا بعدني ما حاجي وياها على شرط الوصية مال زواجي بريم. ردت تستقر الامور وبعدين اكوللها وهاي بنت عمج فطيرة ما عندها كونترول وشكلها راح تجيب اجلي وتجلط امي ابتسمت على كلامه وطمنته .. لا تخاف راح ادير بالي عليها واحاول احجي وياها حتى متكول .. والله ياريت يالله فوتي اخذي راحتج بس صدك صيحي حوراء والبنات حتى يدخلون جنطكم للبيت كان يحجي ويرجع يباوع عالجنط مستغرب اني ابتسمت واشرت على جنطتي الصغيرة الضايعه بين جنط ريم الكبار والماركه .. على فكرة اني ما عندي بس هاي الجنطة الصغيرة اما قطار الجنط الي كدامك هذا يعود لريم .. حيييييييييل هاي بس لا جايبة وياها غراض بيتهم وجاية ..هههه لا وتكول هذولي نصهم مو كلهم والنص الباقي راح يشحنهم بعدين ابو سيف ويرسلهم وراها للبصرة وكف مخصر ويباوع بتعجب للجنط بدون ما يحجي بعدها راح وتركني خطية مهيمن اتورط على عمره دخلت لبيتهم من باب المطبخ واستقبلتني ريحة الطبخ الطيبة كانت عبارة عن ريحة تمن عنبر المطبوخ وريحة السلطه مالية المكان ممزوجة براوئح السمك حسيت بمعدتي كامت تغني كان بيتهم من الداخل جداً بسيط ونظيف شافتني ام مهيمن وصاحتني حتى اجي اسلم على امها كانت مرة كبيرة بالعمر سلمت عليها و ريم كانت كاعدة بصفها بس شافتني ابتسمت بفرح عبالك كانت ضايعة خطية هي ما تدري الحال من بعضه كلنا حاسيين بالضياع ومترددين كعدنا يمهم وبعد ما اتحركت من مكاني شاورت ريم .. ريم سمعيني زين مهيمن بلغني اكولج لا تفتحين موضوع شرط الوصية بخصوص الزواج بلغتها كل الي كاله مهيمن باوعت علية وكالت .. اوك راح انتظره هو يفاتح خالة بالموضوع بس ها .. مو يتأخر لان اني ماراح ابقى اخلي ايدي على خدي انتظره يفكر يفاتح خالة وهذولي البنات داير ما دايره مثل الزنابير ما اضمن نفسي اسكت ، اريد من هسة اثبت حقوق الملكية باوعت عليها محتارة شنو اجاوبها ما اعرف اضحك لو انقهر عليها .... مهيمن اتعمدت اعزم خوالي واولادهم حتى اعرفهم على اخواني صبينا الاكل واباوع لجلال كاعد بين اولاد خوالي بس يوزع ابتسامات مبين عليه يجاملهم كلت بس تخلص العزيمة افوته للبيت يرتاح بغرفتي اكيد هسة هو تعبان واشوف يوم اخذه للمستشفى حتى يعاينون جرحه نشوف شنو قصته جنت اباوع لجلال وصافن قاطع صفنتي كلام خالي حسن .. اكول مهيمن شلون راح تعلن عن وجود اخوتك بين الناس بالسلف وانت تعرف احنا اعلنا وفاة ابوك من سنين وكلنا للناس ان ابوك استشهد وهسة الوادم راح تكعد تسأل ووين جان عن اخوته طول هاي السنين باوعت عليه وانتبهت لجلال كان ملتهي ياكل لكن بس سمع هذا الكلام اتوقف عن الاكل ورفع عيونه يباوعلي وينتظر ردي على خالي ابتسمت لخالي وكلت .. خال هاي سهلة اني فكرت بيها من قبل ولكيتلها حل نكوللهم ابوي الله يرحمه قبل لا يستشهد كان متزوج غير امي اثنين نسوان ببغداد وخطية من مات عافهن حوامل واحنا ماعدنا علم بيهم وهسة من توفت ام اختنا رادت ناس تتولى امرها فدورت علينا اني وجلال حتى تأمن اختنا عدنا وهي صارت سبب جمعتنا وهذا كلما بالموضوع ما ينرادلها روحة للقاضي جلال سحب نفس عميق براحة وخالي حسن كعد يدرس كلامي خالي حسن هو من الناس الكبارية بالعشيرة ويفهم بكلام السلف شلون يتداول بينهم وهو يعرف راح يكعدون يحللون فكان محتاج مني عذر مقبول حتى يكوله بالديوان كدام الناس ومن بعد كل السلف يعرفه ...... نور صار الليل وكلمن رجع لبيته وبقينا لوحدنا ومهيمن دخل جلال لغرفته. بعدما فرشله وخلاه يسبح حتى يرتاح وسأله .. انت شنو ما عندك علاج تاخذه جاوبه.. لا والله ماعندي علاج .. هاي شلون يصير وانت بهاي حالتك المفروض تاخذ علاج على كلٍ انا باجر احجزلك على دكتور يعاين جروحك جلال .. لا تدوخ نفسك بية اكيد انت عندك شغل كومة وما ناقص جلال يحملك فوك حملك .. لا انا ما راح اعطل شغلي علمودك بس بعد ما اعزل اجي اخذك للطبيب ابتسم جلال وشكره واني وريم اخذتنا حوراء لغرفتها بعدما دخلنا الجنط وقبطت الغرفة بالجنط حوراء تباوع عليهن وكالت .. اليوم شكلكم راح تنامون عالجنط واني باوعت لريم وكلتلها .. ريم طلعي من الجنطة الشغلات المهمة حتى نطلع الجنط من الغرفة ريم .. اوك راح اطلع بس الشغلات الي احتاجهم بالحقيقة اني مسوية حسابي خصصت جنطة وحطيت بيها الاغراض الي احتاجهم بأول يوم طلعتها. وبقية الجنط نقلناها اني وريم وحوراء وحطيناهم نص جوة الدرج ونص فوك بالبيتونة بعدها راحت الاخت فتحت جنطتها وبسطت بيها بالكاع وصارت تطلع زيوت وعطر ومنشفة كبيرة. وبرنص وفرشة اسنان وبجامة نوم ستن بناتية لونها نيلي منقطة بأبيض وشبشب بيتي شكله ارنوب وغلقت جنطتها وسألت حوراء .. حوراء عفية اريد اخذ حمام قبل لا انام احس بروحي دبكت من الحر .. صار تددلين من عيوني بس انتظري. مهيمن يطلع من الحمام لان جاي يسبح ريم متعجبة .. هاي شنو. كلكم تستخدمون نفس الجمام ما عندكم غيره .. لا حبيبة ما عندنا غير بس حمام واحد خطية ريم الظاهر هواي راح تعاني هنا شكلها راح تواجهها صعوبات الى ان تتاقلم راحت ريم تسبح وحوراء فرشت لنا بالكاع وكالت .. مرحباً بكم في غرفتي المتواضعة شوية وجان نسمع صوت مهيمن كام يلعن وصاح حوراء طفرت حوراء من مكانها وراحت لأخوها وبعدها بدقايق ريم دخلت للغرفة ووجهة احمر كانت لابسة بجامتها ولافة المنشفة على راسها وعلبة مستحضرات الاستحمام وياها بعدها دخلت حوراء والوجه احمر وباوعت لريم سألتها .. شبي مهيمن حوراء.. شاف الكناري بنت عمج طالعة من الحمام هي وبجامتها وتفتر كدامه التفتت على ريم وكالت ريم.. هو شدعوة عليه نتر بوجه متفاجيء بشكلي الي يشوفه يكول شايفني بدون ملابس ترة اني كنت لابسة بجامة دخلت ام مهيمن وشافت ريم شكله مهيمن دزهة حتى تحجي وية ريم وتفهمها .. خالة ريم بلا امر عليج ما يصير تطلعين بمثل هاي الملابس كدام الرجال كانت ام مهيمن تحجي وتباوع .. وانتي الله يستر عليج جنج گلوب ضاوي ولابستلي هيج هدوم زين ما وليدي انجلط ريم.. اوك خالة راح احاول مرة ثانية ما يشوفني .. اي يمة صيري فطنة منا ورايح وانا عندي شاب واخاف عليه من نظرة الحرام ريم تباوع على ام مهيمن مستغربة وكلشي ما مفتهمة شكلها اول مرة بحياتها واحد يطلب منها تتقيد بملابسها وام مهيمن كامت تباوع لريم بحذر وريبة اني من شفت الوضع بدة يتوتر حقها ام مهيمن تتحوف من عندنا واكيد منا ورايح تراقب تصرفاتنا لان بعدها ما تعرفنا وريم الله يحفظها دخلت عليهم من اوسع ابواب الحرية بتصرفاتها التلقائية وهاي واحنا بعدنا ببدايتها هشكل الله يستر من الجاي كمت من مكاني حجيت وية ام مهيمن حتى اوضحلها موقف ريم حتى لا تاخذ عليها فكرة مو حلوة .. خالة حبيبتي عذريها لريم هي ما متقصدة هشكل تسوي هي تتصرف على طبيعتها ام مهيمن بتعجب .. يا يمة يعني هي بطبيعتها هناك جانت هيج تطلع كدام اي رجال بهذا لبسها .. لا خالة هي كانت عايشة كل حياتها بالخارج وية الوالد وهسة بأخر سنتين رجعت للعراق ومن رجعوا للعراق سكنت ببيت لوحدها وية عمتها والوالد ببيته ماشاءالله قصر فتشوفيها ماخذة راحتها لان متعودة محد موجود باوعت عليها ام مهيمن وهي تدرسها وريم تباوع علية شلون ابرر لخالة حتى تعذرها ريم اقتربت من ام مهيمن وكالت .. خالة اني اعتذر لان سببتلكم احراج ومنا ورايح اخذ احتياطاتي ام مهيمن بعد كلامي وكلام ريم بدأ وجهة يلين وكالت.. يايمة معذورة و الله يكملج بعقلج وانا هم منا ورايح اخلي مهيمن يدير باله هو هم لازم ما يكعد يتمشى بالبيت براحته. شوكت ما يعجبه لازم يحمحم وينطي خبر الي ولحوراء ريم بصوت ناصي.. لا على بختج خالة شنو راح تسوين حضر تجوال وتكطعين علينا الهوى الماي لعد اني المن اجيت من بغداد للبصرة غير علمود اكحل عيني بشوفته كل يوم وكل ساعة وكل ثانية. لكزتها بخاصرتها حتى تسكت باوعتلي وعيونها بيهم لمعة وكاحة يبوووووي الله يساعدك مهيمن على هاي الورطة شكل البنية ناوية عليه نمنا بيومها بالكاع اني متعودة على نومة الكاع بس ريم الليل كله كامت تتكلب ما تعرف تنام بالكاع خطية اول مشافت الفراش سألتني بصوت ناصي .. هاي شنو راح ننام بالكاع نور اني ما اعرف انام بالكاع ريم من احراج قصة الحمام بعد بطلت تعلن عن اعتراضها صارت تحجي بس يمي حجيت وياها بصوت ناصي .. حبيبتي جربي اليوم نومة الكاع اصلاً تقوي الظهر خطية ظلت بس تباوع علية بقلة حيلة ...... مهيمن كاعد بالسوك منتظر جية ابو حيدر من قريت الرسالة وانا مصدوم اتصلت على ابو حيدر وسألته عن مكانه حتى اروحله وكلي انا موجود بالعلوة تعال هلا بيك صحت لأبن خالي يجي يلزم المحل وعيونه على العمال حتى اروح لابو حيدر كانت محلات الحجي او مثل ميسميها اهل السوك علاوي ابو حيدر يمي بنفس السوك مو بعيد علية دخلت عليه بالعلوة ولكيت ابنه حيدر واكف فوك راس العمال ينفضون الحمولة اجة بأتجاهي وسلم علية وسألني.. شلونك يالحبيب شنو وينك هاي الايام اشو ما نشوفك .. والله ملتهي بالشغل باوعت منا ومنا ادور على الحجي .. اكول وين الحجي .. الحجي كاعد بالاوفيس ( غرفة المكتب الي داخل العلوة ) كان كاعد ويحاسب المشترية واستاذ عناد كاعد يم ابوه عالكتييف وحاط رجل على رجل مبين جاي للسوك بالكوة قابضاً جليت صوتي حتى الفت انتباهه والحجي بس شافني ابتسم ونهض من مكانه وسلم علية اباوع لعناد ما اتحرك من مكانه حتى يسلم لبسته حتى ما وجهتله سلام رحت كعدت يم الحجي وكعدنا نتبادل الاخبار عن السوك وعناد كل شوية ينافخ وبعدها سألني ابو حيدر .. شعجب نورتنا بجيتك للعلوة مو من عوايدك كل مرة انا امر عليك عناد بصوت ناصي يسمعني .. تلكاه احتاجله كم فلس ولفة علينا ما جاوبته لان الي انا مو بحاله لان تفكيري بهاي اللحظة كان مشغول بغير موضوع باوعت لابو حيدر وسحبت نفس عميق وحجيت وياه .. بالحقيقة اجيتك اليوم بموضوع بعيد عن الشغل حط ايديه على سطح المكتب وتقدم يباوع علية .. اتفضل كول مهمين شنو هذا الموضوع .. حجي انا عرفت منو ورة فلوس تمويل البضاعة للمحل وعرفت مو انت الشريك الي داخل وياي عناد بنترة.. احجي عدل شنو هذا الكلام شنو حضرتك تريد تاكل الفلوس الشراكة على ابوي باوعت عليه من ورة خشمي وكلتله .. محد موجهلك الكلام انا كلامي وية الحجي فرجاءاً لا تدخل نفسك بشي ما يخصك عناد فتح حلكه يريد يجوابني بس ابوه سكته ابو حيدر.. عناد كافي انت ما فاهم الموضوع عناد .. شنو ما فاهم الموضوع .. بعدين تفهم باوع علية وكال .. يعني افتهم من كلامك ان انت عرفت بوجود ابوك الله يرحمه .. اي الوالد تركلي رسالة قبل لا يتوفى وكان كاتب بيها كلشي بالحقيقة اتفاجئت بالي عرفته ما كنت متوقع واحد بالمية ان ابوي ورة كل هذا الدعم وان انت كنت وسيط بيني وبينه اتعمدت انطق كلمة ابوي كدام عناد ما اريد احد يلزم علية هفوة ويعرف بنقاط ضعفي ابو حيدر.. والله يا مهيمن ابوك الله يرحمه كان صديق عزيز علية وما هان علية ارد طلبه كان يوصيني عليك حتى اخذ بالي منك بس من غير ما تعرف يعني من بعيد لبعيد بالحقيقة انا ما جنت اعرفك الا من هو اتصل علية وطلب مني اسأل عن شخص اسمه مهيمن يشتغل بالسوك وعنده بسطية ومن عهدها من عرفتك شفتك شاب يعتمد عليه بس الحجي فهمني ان كان بينكم مشاكل قديمة ومقاطعة لذلك ما اتفاجئت بيك من سالتك عن ابوك وكلتلي ابوي ميت. وعرفت بيك ما تريد تحجي عن الموضوع وهالشي خاص بيك انت ابوك الله يرحمه تصدك اول ما شفتك بالسوك وشكلك التعبان اتفاجئت بيك انت نفسك ابن الحجي مؤيد ال ...... عناد من سمع الاسم نهض من مكانه متفاجيء حجة بصوت مصدوم .. مهيمن يصير ابن الحجي مؤيد ال.... هو نفسه ما غيره اجتي عيونه تطلع من مكانه باوعت عليه بدون اهتمام كمل كلامه .. يابة انت متأكد. يعني الحجي مؤيد ال.. ابو مهيمن ابو حيدر .. اي يصير ابوه والفلوس مالت التمويل كلها كانت من ابوك. مهيمن .. زين وفكرة شراكة المعمل الي اقترحتها علية بذاك اليوم هم كانت من ابوي .. لا والله هاي الفكرة كانت نابعة من عندي بعدما شفت حرصك وشطارتك بالحقيقة. احبيت استغل شطارتك احط ايدي بأيدك من صدك هالمرة بعيداً عن ابوك ومركزه. هالمرة انا ردت اشاركك لان انا محتاج هذا المشروع واعرف ان المعمل يحتاجله واحد سبع مثلك وانا بنفس الوقت اولادي شوفة عينك كلهم ملتهين بالعلاوي ما بيها مجال اضيفلهم مسؤلية شغل ثاني لذلك اختاريتك لان نزيه وسبع عناد نهض من مكانه وباوع بتحدي لأبوه .. وليش انا وين رحت حتى تدور على احد يديرلك المعمل ابو حيدر لمعة عيونه .. والله يابوية اجتي والله جابها طلعت منك مو من عدنا هلا بيك ان جان عندك النية تدير المعمل خلاص اعتبر نفسك انت داخل شريك وية مهيمن بالمعمل رص على اسنانه وكال .. ولو ما يحتاج شريك بس ابن صاحبك ما نكدر نرده كلبت عيوني مختنك من غرور هذا الرجال احس فايته طن كتل. مال غسل ولبس .. نور كعدت الصبح من وقت واني كلي نشاط متلهفة للحياة الجديدة ما اريد شي يفوتني كمت ولميت فراشي لكيت خالتي ام مهيمن وحوراء كاعدات قبلي وريم بعدها نايمة خطية لان عفتها البارحة تتصارع وية الفراش متعرف تنام اكيد نامت متأخرة طلعت من جنطتي دشداشة عادية نفس ملابس ببيت خالتي ريم كعدت من حست على حركتي وكالت .. هاي شنو اشو كلكم كاعدين من الفجر شكو صاير شي ضحكت وكلتلها .. لج عيني يافجر هذا دشوفي الساعة ب٩ الصبح الكل كاعدين عيب بس اني وياج نظل نايمين زحمة خطية كامت وهي تتمطى جنها بزونة .. ااااااوي ماما عظامي اتكسرت من نومة الكاع ابتسمت وتركتها .. مو تنسين تسفطين فراشج وياج وطلعت من الغرفة مترددة ورحت للحمام ما لكيت احد بي غسلت وعدلت وطلعت من الحمام ورحت للمطبخ لكيت حوراء دتمسح بالكاع وخالة تسوي ريوك شافتني وصارت نظراتها تتفحص لبسي وابتسمت برضى .. هلا. صباح الخير تعالي بوجهج تريكي ويانة وين بنت عمج دخلت ريم وراي .. هلوووووووو صباح الخير خالتوووو كانت ريم بنفس البجامة بس غاسلة وجها ام مهيمن .. هلا بيج خالة جا خالة ماعندج غير هاي البجامة كملت كلامها .. ونوب طالعة بيها جنها جمارة بالله هاي شلون راح تكضيها كدام المكرود ابني ريم جاوبتها .. لا عندي كومة منهم وبجميع الالوان حوراء.. يالله هاك اجت تكحلها عمتها يالله خلي ام مهيمن تشوف بعينها سوالف الكناري تويتي حتى تحمد ربها عالنعمة الي عندها فديتني والله ماكو مني اثنين ابتسمت على كلامها وفتحت شعري رحنا كعدنا كلنا عالصينية حتى نتريك انفتحت قراصتي ونزل شعري وكنت اتريك ما كدرت ارفعه فخليته حوراء .. الله نور شعرج كلش حلو نفس طول شعري بس اني اسرح من شعرج ام مهيمن .. كولي ما شاء الله باوعتلي وكالت .. يمة شعرج جاف يبجي له على زيت الزيتون ريم .. الله شكد حلو اثنينكم شعركم طويل عكسي اني ما احب اطول شعري اختنك منه وهزت شعرها بدلع حوراء.. هنيالج انا اتمنى اكص شعري بس امي ما تقبل اكصه ام مهيمن.. حتى ما اكص ايدج والله هو حلات البنية بطول شعرها. ما تشوفين اخوج من رادنا نخطبله مرية كال اهم شي اريد شعرها طويل هي ام مهيمن حجت هشكل وريم كمزت من مكانها مثل المكروصة يتبع | ||||
|
| |
|
08-09-19, 06:15 PM
| #18 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_السادس_عشر #الكاتبة_نهى ريم كلام ام مهيمن اجة مثل الضربة المفاجئة احس بروحي انخبصت شكو.. لعد واني شنو موقعي من الاعراب انتفضت من مكاني معترضة بس نور سحبتني وكعدتني يمها باوعت لنور معترضة وبعدت ايدها من زندي .. لحظة نور بس اريد افتهم شنو الموضوع ام مهيمن.. اسم الله خالة شبيج كمزتي من مكانج وكمزتينا باوعت لنور الي كانت تنظرلي بتحذير واتذكرت كلام مهيمن .. خالة صارلكم شكد من تكلمتوا انتي ومهيمن بهذا الموضوع صفنت بتفكير تتذكر وكالت .. صارله تقريباً شهر من حجينا ليش يمة تسألين ابتسمت براحة وجاوبتها .. لا خالة هيج اسأل لان موديل الشعر الطويل صار قديم هسة نزل موديل الشعر القصير فلازم ترجعين تسألين مهيمن شنو يفضل كنت احجي ونور تبتسم وحوراء تاكل وعين على امها وعين علية وكالت .. شفتي يمة يكلج الشعر الطويل صاير موديل قديم فدوة خليني اكصه لشعري لا بعدين اعنس واكعد على گلبج ومحد يكلبني سمعنا صوت واحد يحمحم ام مهيمن .. ياااا خطية هذا جلال والتفتت على نور وكالت ..خالة بلا امر عليج ما تكومين تشوفين اخوج شنو يحتاج لان انا قبل شوية حطيتله صينية الاكل وسألته اذا محتاج شي بس هو مبين عليه يستحي مني بعده ما متعود علينا انت اخته صحيح جديد عليج بس تبقين اسمج اخته اقرب وحدة له كامت نور من مكانها وكالت بخجل .. صحيح كلامج خالة فعلاً جلال محتاج احد يساعده راحت نور تشوفه شنو يحتاج واني اجيت اكوم وراها حتى اني اريد اساعد جلال اني قطعت على نفسي وعد لعمو اهتم بأولاده وجلال واحد منهم كمت وسألتي ام مهيمن .. ها خالة وين رايحة باوعت لها .. رايحة اشوف جلال شنو محتاج لطمت على صدرها .. يمة صخام تردين ترحين هشكل للولد بهذني ملابسج باوعت عليها مستغربة ورجعت اباوع لملابسي لا يكون بيها شي بجامة طويلة مابيها اي شي غلط جاوبتها .. ليش عمتوو شبيها بجامتي ام مهيمن.. يمة خلي اكلج اياها من الاخير احنا ما يصرفلنا بناتنا يلبسن هيج كدام اي واحد ، يمة ستري نفسج شوفي هسة هاي حوراء وبنت عمج نور ملابسهن شحلاتهن شرحة وترد النفس سكتت ما جاوبتها شي ، من حقها لان هذا بيتهم وهذا نظامهم عكس نظام حياتي الي كنت عايشتها قبل لكن بما انه اني وافقت اجي اعيش هنا بكامل ارادتي معناها لازم اتحمل تبعية اختياري ميخالف كله يهون لعيون عمو ما علينا نغير الملابس شورانا .. اوك عمتوو. هسة افتح جنطي واراويج ملابسي وانتي كولي شنو المناسب بيهم حتى البسه بالبيت .. الله يكملج بعقلج حبيبة. يمة حوراء وانتي هم ما اوصيج هم ساعدي البنية واحجي وياها ترة هم حقها ما تعرف طبعنا واحنا نزلنا عليها نزلة معدلة حوراء .. صار من عيوني هسة من تخلص ريوك نكعد انا وياها ونبسط بجنطها ونعزل المحضور ونبقي المستور. والمشخلع يكون من حصتي تعرفين انا ما اشتغل مجاناً ام مهيمن .. اي صدك اتذكرت حوراء يمة انطيني نقالي خلي اتصل على اخوج يجب وياه جرباية ( سرير) لبنت عمه خطية البارحة الليل كله ما نامت تتكلب مثل السمجة نور مرت الايام علينا ببيت مهيمن وبدينا نستقر ونتوالم وياهم بالبداية اني وجلال كنا جداً مقيدين لكن ريم كانت منطلقة ماخذة راحتها بالبيت وبكيفها تتنقل من مكان لمكان اصلاً حتى اباوع عليها اتوالمت وية جلال وحوراء اكثر مني عبالك تعرفهم من قبل صارت بينهم صداقة عكسي اني ما اتحرك من مكاني كنت استحي لكن ام مهيمن ما تركتنا لحالنا علمتنا عالبيت وفعلاً وبتصرفاتها التلقائية الدافية حسستنا ان هذا البيت بيتنا كامت تصيحني اجي يمها بالمطبخ اساعدها واني اصلاً احب شغل المطبخ وتطلب من ريم تساعد حوراء بشغل البيت هذا كله علمود تخلق الة بيناتنا وفعلاً بمرور الايام كدرت تخلينا نتعود عليهم اباوع عليها شكد طيبة وكريمة مو بس ويانا حتى وية الجوارين واقاربها بابهم ابد ما ينسد دومه مفتوح لان ام مهيمن تعرف هواي شغلات بطب العرب ومرات كل فترة تجي مرية ايدها مفصوخة او عندها متن او خلع بكتفها تجي لأم مهيمن وهي بطريقتها تدلكها وترجع العظم بمكانه. لذلك اغلب الاحيان بيتهم بي نسوان صحيت من سهوتي على صوت ام مهيمن .. اكول خالة نور اريد اسألج انت شعجب لحد هسة ما متزوجة. يعني الي بعمرج متزوجات وعندهم بيوت جانت تحجي وياي وتعجن بالعجين ابتسمت .. والله ياخالة محد دك بابي. الظاهر شكلي ما يعجبهم. مو من النوع المطلوب .. يا خالة شنو الي ناقصج والله انتي حلوة بس تبجين على لحمة.ينراد تسمنين شوية بس وداعتج الا اخليج تربربين على ايدي ضحكت.. والله خالة طبخج طيب ماكو منه دك نقال خالة وكان المتصل مهيمن طلب من خالة تسأل ريم عن معلومتها المدرسية لان راح ينقلها لمدرسة حوراء حوراء هالسنة سادس وريم هماتين عايدة سنة والمدارسة عالابواب ام مهيمن.. بالله خالة ما تصيحين ريمة خلي تجي تحجي وية مهيمن كمت من يمها ورحت صحت لريم الي كانت مستلقية على سريرها الي اشتراه مهيمن اول ما اجينا للبيت خطية فرحت بالسرير وفرحتها زادت من. طلبت من مهيمن ياخذها تشتري فرشات للسرير وبيومها اتذكر اخذنا اني وياها وحوراء وما قبل يطلع بباب البيت وياها من ورة ملابسها هههههه وعشر مرات تبدل ملابسها وتراويها لمهيمن وهو يشوفها ويهز راسه برفض ويسوي حركة دورانية بيده. ( يعني رجعي بدليهم ) وهي تروح تدردم عليه بزعل وتصيح بصوت مسموع ريم راحت لغرفة حوراء حتى تبدل مرة اللخ .. يعني الواحد شنو يلبس ومهيمن باوع علية وكال .. نور رحمة على والديج علميها شلون تلبس شلون تمشي كليلها احنا ما عدنا مرة تطلع سافرة. ومفرعة. عفية انطيها شال من عندج او من حوراء واختاريلها ملابس مستوره. ماكو تحلم اخليها تطلع لباب البيت وهي هذا شكلها تجيب التايه كمت من يمه ورحت وراها لكيت الغرفة مگلوبة ساحة حرب من ورة ملابس ريم دخلت ولكيت عيونها حمر خرب هاي البنية دمعتها بسرعة توكع على ابسط الاشياء حضنتها وكرصتها من خدودها .. بالله شو كومي وياي خلي اني اختار هاي المرة وشوفي وبعد عناء طويل كدرت الكة لبسة تتوالم مع شال ريم .. لا تكولين لازم البس شال .. اي نعم هاي اوامر الجهات العليا ريم بغيض.. زين هذا ابو راس اليابس استاذ مهيمن ليش ما يجي يحجي وياي ليش كل مرة يريد مني شي يكلج الج لو لخالة لو لأخته حوراء وانتوا توصلولي ليش اني شنو بية جرب ويستنكف يحجي وياي اصلاً منتبهة عليه دائما يحاول بقدر الامكان يتجنبني ويصد عني حتى لو اني احاول احجي وياه هو يدبر اعذار ويبدي يتهرب وزادت دموعها بالنزول ابتسمت .. هسة ما افتهمت انتي على شنو دتبجين على تغيير ملابسج كل ساعة لو لان مهيمن ما يعبرج بكلمة مسحت خشمها الاحمر وكالت .. اني ابجي على كل شي احس كل شي هنا بهذا البيت يمشي ضدي سمعت صوت مهيمن من ورة الباب يستعجلنا باوعت عليها وكلتلها .. يالله كومي بالعجل بدلي ملابسج ورانا طلعة .. روحي واني جاية وراج طلعت وورة فترة طلعت ريم لابسة الملابس الي اختاريتهم لها والشال صحيح كان غير مضبوط بس يالله العافية بالتداريج كانت عيونها حمر من اثر البجي اباوع لمهيمن عيونه بقت ثابتة على ريم وضل يحوم وكل شوية يباوع عليها اخير شي سألني .. ريم ليش عيونها حمر شنو كانت تبجي ؟؟ .. اي خطية كانت تبجي لان كل شوية مرجعها تغير ملابسها ابتسم وكال الله كريم اليوم انا ادفع فصل لدموعها وفعلاً بيومها اخذنا مهيمن للمول الي موجود بمركز المدينة وخلاها تشتري على راحتها من غير ما يعلق خطية كان بس ينافخ ماكال اي شي ...... دخلت عليها بالغرفة حتى اصيحها تحجي وية مهيمن بالتلفون كانت متمددة عالسرير ومثل كل مرة ريم محولة السرير البسيط الى سرير اميرات حاطة كوشايات على گلوبات ناعة على تيبل لامب. مو بيدها تحب هاي السوالف ست باربي .. ريم كومي مهيمن اتصل على خالة يريد ياخذ منج معلومات عن مدرستج طفرت من السرير وكالت شنو منو كلتي مهيمن يريدني ابتسمت على شكلها شمرت نقالها والدفتر الي كانت تكتب بي عالسرير وراحت تركض ابتسمت على خبالها هاي راح اسميها منا ورايح مجنونة مهيمن لان من يوم وصلت لهنا لهذا يومنا تقريباً راح يصير شهرين الاخت من اول ما يدخل مهيمن البيت هي تبقى زارعة روحها كدامه خطية والولد يحتار وين ينطي وجهه بس هي مو بيدها عيونها مفضوحات بلمعة الحب والشغف اي ريم حالتها يطلقون عليها شغف اتعلقت وحبت شخص يشبه عمها واتمنى مهيمن ما يكسر گلبها اسم الله عليها من كسرة الگلب رفعت راسي ووكعت عيوني على وجهي بالمرايا وابتسمت اقتربت اباوع لوجهي وشكلي واتذكرت سؤال ام مهيمن بخصوص الزواج اي صدك اني ليش لحد الان ما اتزوجت شنو السبب اني شنوناقصني اغلب صديقاتي اتزوجوا وحتى الي ما اتزوجت انخطبت والما ماخطوبة. على الاقل اجوها خطابة ودكوا بابها وهي رفضت وحتى اسيل صديقتي مأجلة مسألة الزواج تريد تاخذ شهادة الماجستير قدمت عليها هالسنة ورغم هذا كله هم عندها ابن عمها كاتل روحه عليها وهي ما تريده على الاقل اكو من ذكرها جريت حسرة واتذكرت حبي لامير كان حب من طرف واحد انا كنت احبه وهو كان يعطف علية فتحت شعري وصرت اگلب بي اكيد اني مو حلوة منو يباوع لهيج شكل شوية سمعت صوت جلال يصيحني خطية هذا مثلي هم هو متضايق من يوم الي دخل بي لبيت مهيمن وهو ما يرفع عينه وصاير كلش هادي ابد مو جلال الي اتعرفت عليه بمكتب ابو سيف شكله مثل حلاتي يستحي طبعا مهيمن بهاي الايام اخذه للدكتور بدة يترك العكازات وام مهيمن استلمته بالاكل وطب العرب شوية بدة يسترد صحته وجهه بدة يسترد شكله الطبيعي وما شاء الله هو شايل جمال رباني ملفت للنظر كان يدخل لغرفة مهيمن وبعد ما يطلع منها الا من يرجع مهيمن من الشغل كان يكسر خاطري بدت علامات الشفاء تظهر عليه وبدأ عوده يقوى جلال كاعد بالبيت وضايج ومختنك ام مهيمن ومهيمن ما مقصرين بس محتاج اطلع من البيت عندي احتياجات الحمدلله بديت اتشافة بس احس طكت روحي من كعدت البيت ما متعود هلكد اكعد. وصحت لنور تسويلي طريق اطلع برة خاف اخت مهيمن لو ريم ولو هي ريم كل شوية تزرع روحها كدامي انتبهت لبيت مهيمن ناقصه هواي اشياء وخصوصاً الكهربائيات والاضوية الخارجية وصرت كل مرة اطلع بيها من غرفة مهيمن اتفحص بعيوني النواقص الموجودة بالبيت شفت ام مهيمن بالمطبخ لوحدها ودخلت متردد سلمت عليها وهي شافتني وابتسمت ورحبت بوجودي يمها سألتها.. اكول خالة انا اريد اطلع للسوك اذا متصير زحمة بلكي تكلفين واحد من الشباب يجي وياي حتى يدليني. محتاج الي كم شغلة ابتسمت وكالت.. صار يمة تدلل هسة اتصل على سجاد ابن اخوي يمر عليك وياخذك وياه بس ماكلتلي شمحتاج يمة .. والله خالة احتياجات رجالية مكينة حلاقة على ملابس داخلية بعد انتي تعرفين. صحيح مهيمن ما مقصر بس ما يعرف انا شنو افضل .. اي يخالة هم صحيح كلامك. هذا مهيمن احنا اهله ما شايفينه. لزمت ورقة بيها طلبات وانطتني فلوس وكالت .. يمة وياك اشتريلي هذولي الطلبات بدربك .. صار خالة تدللين بس خلي فلوسج عندج اني عندي جوة ايدي باوعت لي بحزم وبقت مصرة ان اخذ الفلوس منها وفعلاً اجة سجاد. وطلعنا واشتريت كل احتياجاتي من السوك واشتريت عدة كاملة مال تصليح ووايرات وغيرها من الاشياء الي احتاجها بشغلي بالبيت اتصلت على صاحبي سلوان وصرت اسولف وياه عن الشغل فاجئني من كال الاسطى توفيق عزل الورشة مالته. وصار رجل دين سلوان.. لك جلال لو تشوفه ما تعرفه هو ولحيته ودشداشته والله امره غريب .. الله يهدي. زين ما كلتلي اتصل على بيت خالي محد يرد علية ويجاوبني واني الصغاررند ورنين وشلعوا گلبي كلش ما افتهمت منهن غير بس كلمة كلللللوووووش عروس سلوان .. هههههه اي صدك نسيت اكلك اسراء بنت خالك اجوها خطابة اليوم خطوبتها .. لا تكولها لك اسراء بعدها صغيرة هذا خالي شيحس نعلة على يومه بعدما اتبادلت الاخبار وية سلوان وانهيت المكالمة رجعت للبيت كان الباب مفتوح دخلت بوجهي وشايل بيدي الغراض وسجاد دخل الكراتين البقية دخلت جوة للمطبخ اتفاجئت بوجود نسوان دنكت راسي وسلمت ام مهيمن .. تفضل يمة جلال محد غريب هذني جاراتي بوجهي مباشراة عبرت مر المطبخ اريد اروح لغرفة مهيمن سمعت وحدة م النسوان سألت ام مهيمن وكالت .. اكول خالة هذا الحلو منين شنو يقربلكم .. كولي ما شاء الله خمسة وخميسة بعين المايصلي عالنبي هذا جلال اخو ابني مهيمن البنية بمفاجئة .. اخووو مهيمن كنت اسمع حجيهن ابتسمت وانا اهز راسي على كلامهن. كنت متوجه لغرفة مهيمن وما حسيت الا على وحدة جاية تركض بكل سرعتها شاردة ما اعرف منين واصطدمت بصدري بحيث وكعت الغراض من ايدي وارتديت للخلف واختل توازني ردت اوكع وهي شهكت متفاجئة ولزمتني من مقدمة قميصي لزمة قوية حتى لا اوكع. كان الموقف مجرد لحظات مو اكثر دنكت اباوع منو هاي وهي رفعت راسها ووكعت عيونها بعيوني شهكت واتسعت عيونها وبسرعة طكتها ركضة ما شفت بس غبارها بقيت واكف بمكاني لازم مكان صدري المضروب افركه هاي شنو العاصفة الي مرت علية قبل شوية معقولة انا جنت اتخيل قبل لحظات مرت من يمي غزالة اجتي ريم تركض مستعجلة وهي تلهث وسألتني .. جلال هسة حوراء عدت منا ما شفتها وين راحت اشرتلها على باب الاستقبال وراحت ريم كملت طريقها على السريع وهي تتوعدلها .. بسيطة اني لها وين تروح مني شلت غراضي من الكاع وانا ابتسم ههههه يعني الغزالة الي دعمتني وهشمت صدري طلعت غزال بصرواي بس خرب يومها والله عليها عيون ....... ريم .. لج غبية شلون تشمرين على ظهري ماي بارد انا الج لزمت حوراء اريد ابللها بس اشو هاي البنبة مصفصفة ما تقاومني .. هي حوراء مو احجي وياج وين صافنة حوراء.. اكول ريمة هذا الولد الي قبل شوية عديت من عنده .. اي هذا جلال شبي حوراء متعجبة.. جلال. اخو اخوي ما غيره .. اي جلال اخو مهيمن ما غيره وشبيج تحجيها وانتي مصدومة .. لا بس اشو ما يشبه الي شفته اول مرة هذا يختلف .. اي غير كان مسوي حادث وهسة الحمدلله طاب وانتي شنو ما شايفته هسة يالله انتبهتي عليه حوراء وهي صافنة.. غبية هو انا وين اشوفه اذا هو النهار كله لو بغرفة مهيمن لو كاعد بالباب يم اولاد خوالي وين اشوفه بعد يا حسرة لكزتها من خاصرتها وحركت حواجبي .. شنو يا حلوة شكلج انعجبتي بأبن عمي جلولي حوراء دفعتني عنها وكالت وهي تكلب بعيونها .. اعووع عابتلج انتي وابن عمج اثنينكم ثقيلين دم والله واثقة من نفسها هي وابن عمها ابو عيون الخضر جنهم عيون بزون. عابتله شلون طول وشلون عيون وراحت وعافتني. وهي عابسة الوجه وتهز بيدها رحت وراها اندك الباب ووراحت حوراء فتحته ودخلت جوارينهم حوراء.. هلو زمن. شلونج زمن دخلت للبيت عيونها تباوع منا ومنا شكلها تدور على شي زمن.. خالة ام مهيمن موجودة .. اي امي موجود اتفضلي دخلي بالمطبخ زمن تدلك بمعصم ايدها وبعدها عيونها تدور .. ايدي انفصخت مرة ثانية اريد خالة تدهنها وتطكها الي راحت دخلت جوة حوراء.. اكول اشو هاي ست زمن كثرت جياتها على بيتنا شنو سالفتها .. حبيبتي حوراء لا تظلين تتهربين من كلامج شنو تعيبين علية اني وعلى ابن عمي عاد شلونج انتي واخوج مكسرين الدنيا بغروركم وشايفين نفسكم ما تتحاجون وانتوا اصلاً ملحان التفتت علية واتخصرت وكالت .. يا اختي يحقلنا الغرور مو ياهو اليجي يكدر يصير املح ملحان من كاع البصرة احسن ما نصير فاهين مثلج ومثل ابن عمج عيييع كلما اتذكر عيونه كلبي يطفر من مكانه ااااااقصد تلعب نفسي من شكله ابتسمت .. اي واضح مبين عليج لعبانة نفسج من عيونه ست حوراء منو يغسل الملابس بقو بالطشت شهكت حوراء وطفرت من مكانها وكالت .. الله يلعنج يا ريم انتي وابن عمج نسيتوني غسل الملابس هسة امي تحرك الدنيا على راسي وراحت تركض ورحت وراها واني اضحك حوراء فلم امشي وراها واتعثر بالدشداشة كنت لابسة دشداشة من حوراء بس هي اطول مني وكل شوية اريد اوكع على وجهي من وراها الحياة ببيت اهل مهيمن احسن بهواي من حياتي ببيت عمو صرت يوم عن يوم اقارن بين حياتي هناك وحياتي هنا هنا كان اكون جو عائلي دافي يسوده الفة ومحبة وطيبة عكس حياتي قبل صحيح كانت مترفة وكل شي اريده يتنفذ لكن كانت باردة وخالية من اي دفو مرات اباوع لام مهيمن شلون تكعد تدهن شعر حوراء الطويل وتهتم بي وحوراء الي تتشكى بملل من هذا الاهتمام تمنيت للحظة اكون اني بمكانها بهذا البيت اكتشفت هواي اشياء كنت ما منتبهة عليها ومفتقدتها ووحدة من هاي الاشياء هو الحنان وحرصهم على بعضهم حوراء .. انتي هي كناري. مو تغلسين انا علية اغسل الملابس وانتي تنشريهم على حبل الغسيل من يوم الي دخلت لهذا البيت واني صرت رفيقة حوراء صرت امشي وياها مثل. ظلها. احس اكو تفاهم بيني وبينها اما نور لا كانت اكثر شي وية ام مهيمن ههههه كلمن يطرب بحله .. حوراء هاي دشداشة طويلة انخبصت ما اعرف اشتغل بيها حوراء.. هاي خوش حجة علمود ما تنشرين الملابس اشو رفعي الدشداشة من الجوانب وعلكها بالشسمة وصارت حوراء تعلمني واضحك على شكلها وسويت مثلها واني معجبة بهذا الي سوته .. خرب لج حوراء شكد حلو صارت فستان حوراء.. يا الله مو راح نطلع بيج عرض ازياء استغفرالله ربي هسة تجي زهرة وتلكة الملابس بعدهم ما مخلصات وراح تطك راس براس والاخت كاعدة تعرض لي خايبة يا ريم البلا روحي نشري الملابس ريم .. اوك. هسة انشر الغسيل حوراء رفعت حاجبها وكالت .. اوووي الله يخرب بيت لعابتكم هاي البنية حيل مايعة اخذت السلة واني اضحك حوراء.. مو تنسين عصري ومفضب وبعدين تشري كانت كاعدة عالتخت وتغسل بالملابس وتحجي وياي واني جاوبتها .. اوك. وبديت اعصر وانفضهم زين وانشر حوراء عاطت ولطمت على رجليها وكامت من مكانها تريد تطك .. يبوووووي علية ربي لو منطيني صخلة اعلمها ولا هاي البنية بالله شو تعالي اخذت من ايدي الثوب وكامت تعلمني شلون اعصر وانشر .. صعبة والله صعبة ما اسيطر عالثوب خاف تتكسر اظافري .. هنيال امي عليج ادري انتي امج من جابتج. هم كالولها عالخير .. اي اكيد كالولها مو بس هيج حتى هدولي اسوارات ذهب واني صغيرة .. يبوووي عليج حوراء هاي وين جانتلج هاي البنية راح تجلطني جانت تنشر بالملابس وتحجي علية واني اضحك واباوع للوضعية الي احنا بيها وكلتلها .. الله لج حوراء تدرين واني انشر الملابس احس بروحي عبالك نانسي عجرم. .. خوش جا اخذي كملي نشري هذني قبل لا تتحولين لنانسي عجرم وما نلحك عليج اخذتهم منها واني اضحك وهي رجعت تكمل شغلها واني اتنقل بين احبال الغسيل وعجبني والوضع وصرت اغني لنانسي عجرم واشر ملابس واتمايل بخصري حلوة الاجواء كلها متوفرة مو كل يوم واحد يحصل هيج شي حوراء خلصت وبدت تعزل المكان من المنظفات وكالت .. اكول نانسي انا راح ادخل جوة مو تنسين عصري وشري وبطلي غنا لا تجيج ام مهيمن تعلمج شلون تغنين عدل .. حاااااضر من عنية التنين هزت ايدها ودخلت جوة راحت واني بعدني منطلقة ( مافيش حاگة تگي كدة اهدة حبيبي كدة وارجع زي زمان يابني اسمعني حتدلعني تاخذ عيني كمان. حبيبي قرب بص وبص بص زعلان ازعل ازعل اه ونص )) جنت مندمجة اتمايل واغني انشر ملابس مسوية لروحي اجواء ووية كلمة حبيبي قرب بص وبص بص وما اسمع الا مهيمن صاح بصوت يرعد .. هااااااااي شنووووووو من احتركوا نار ونفط نزلت الحبل وجان اشوف كدامي مهيمن واكف وعيونه تريد تطلع من الغضب اباوع عليه عض ايده بغيض وكال ترحين تدخلييييين جوة بالبيت لا اجي البيت احركه رمشت بعيوني وكلت .. بس الملابس بعدني ما شارتهم هو اني كلت الملابس وما اشوف الا مهيمن شال سلة الملابس وشمرها بالكاع ووكعت كل الملابس المغسولة بالكاع .. من انعل ابو الملابس لابو الي جابهن تتحركين من كدامي لا بالقران ابتلي بيج شهكت بخوف منه وركضت دخلت للبيت شافتني حوراء .. ها خلصتي هزيت راسي بنفي دخل مهيمن وهو معصب وكال.. ونوب اذا شفت هاي تشر ملابس لاحرك البيت على روسكم مو تكولون ما كال مهيمن ام مهيمن اجتي على صوت ابنها وكالت .. ها يمة مهيمن الله يساعدك جانت تحجي وهو واكف وراي قريب وكال بصوت ناصي من بين اسنانه .. ولج غضب نزلي الدشداشة مو فضحتينا نزلتها واني اباوع عليه مستهضمة هذا شبي جاي معصب هشكل علية اشو بس اني يعصب علية من دون البنات ام مهيمن .. شبيك يمة معصب .. ما اريد هاي البنبة بالذات تطلع بباب المطبخ سامعة يمة لو اعيد ام مهيمن.. صار يمة تدلل يجرالك بعد ما اخليها تطلع بس انت لا تعصب يابعد بيتي نور دخلت وسلمت عليه وهو رد عليها السلام بكل هدوء باوعت عليه وگلبت عيوني وحركت راسي بزعل ودرت وجهي وطلعت من المطبخ واني اغلي من الغضب من عنده ام مهيمن فوت يمة روح بدل ملابسك حتى. اصبلكم غدا مهيمن .. جلال وين ام مهيمن .. يا خطية جلال. من رجع من السوك وهو صاعد فوك السطح .. اهاا تمام اباوع عليه مر من يمي بدون ما يحجي اي شي ودخل لغرفته حتى يبدل اني احس بنار تاكل بگلبي ما اعرف شبية هو شنو يصيح علية ويعصب اني بعد مستحيل اسكتله رحت بكل غضب فتحت الباب عليه ودخلت جوة لغرفته وسديت الباب وراي ورفعت صبعي بوجهه بتحذير ورفعت راسي اريد اهجم عليه بالكلام. لكن فجأة انبلع الكلام ونظراتي جمدت على منظره كانت نازع القميص وباقي بالبجينز كان متفاجيء من دخولي عليه للغرفة واني سرحت بشكله ونسيت نفسي اصلاً اني على شنو اجيت جلة صوته مرتبك ورجع لبس قميصه وعاقد حواجبه .. احم. ريم شعندج داخلة لغرفتي مثل الاعصار شكو صاير شي كوة سحبت عيوني من على صدره ونفضت راسي جاذبيته. تخليه يملك سلطة علية وتنسيني حتى اسمي وكل مرة اتوعد واحلف ان اردله الصاع صاعين بس مع الاسف اني بس اشوفه تخوني مشاعري وتنصاع وراه مثل العمية .. اااا اني اجيت حتى احجي وياك واحط حل. لتصرفك وياي شمعنا اني تتصرف وياي هيج وتعاملني بغضب وعصبية. جنت احجي واتقدم عليه واعصابي نار اني ما متعودة احد يتجاهلني ويعاملني بهذا الاسلوب اباوع عليه ارتد للخلف وعيونه صارت تتجول بكل مكان بالغرفة الا علية الظاهر ما يحب يشوفني حصرتني البجية .. باوع علية من احجي وياك حجيتها بصوت حاد وبسرعة باوع علية وعيونه خزرتني بغضب .. اشششششش ولا كلمة لج ريمة انتبهي على تصرفاتج انتي مرة مو صغيرة ميصير تدخلين بغرفتي بهاي الطريقة .. ليش ميصير غمض عيونه بنفاذ صبر ومسح على وجهه وكال .. لان انا رجل وانتي مرة وافتهميها لخاطر الله وطلعي برة .. اني هذا كلامك ما يهمني ما اطلع اذا ما تفهمني شنو سبب نفورك مني مهيمن انت ليش تكرهني حجيت الكلمة الاخيرة بقلة حيلة ودموعي نزلت غصب عني انخبص وارتبك من بجيت وكال .. كافي رحمة على موتاج كافي لا تبجين هاي هي خلاص بعد ما احجي وياج وبراحتح طلعي شري ملابس بالطارمة بس الله يستر عليج لا تغنين وتتمايلين ترة السطوح كلها تطل علينا والناس تشوفج حجاها وهو يمسح بكصته من العرق .. وهسة الله يرضى عليج اتفضلي طلعي برة ما يجوز وجودج بغرفتي مو حلوة بحقج ولا حلوة بحقي رمشت وسحبت نفس عميق وهزيت راسي بموافقة .. اوك راح اطلع من غرفتك درت وجهي اريد اطلع ورجعت مرة ثانية درت عليه احذره وهو هم نزل ايديه بسرعة من على دكم قميصه شكله كان يريد ينزع وكلتله بتحذير.. بس هااااا دير بالك تعيدها وتعلي صوتك علية .. صار تدللين حجاها وكتف ذراعه على صدره. واتكأ على ميز المرايا الي بصفه .. بس طلعي رحمة على اهلج .. اي صدك قبل لا انسى وومرة ثانية من تريد شي مني لا تروح لخالة او نور ودزهم يجوني ويحجون وياي اذا عندك ملاحظة على اي شي يخصني انت تعال واحجي وياي وكلي الي تريده مني ترة اني بنت عمك وان شاء الله عن قريب اصير زوجتك هو اني حجيت هاي الكلمة وجان مهيمن يتعثر بوكفته على ميز المرايا انخبص وكام يلعن بصوت ناصي غمض عيونه وسحب نفس عميق بصبر شكله انحشر بزاوية وكوة لازم روحه لا يعصب .. هذا هو تمام يجرالج كل التردينه يابنت عمي بس طلعي الله يستر عليج .. اوك راح اطلع درت وجهي وفتحت الباب وطلعت وسمعته يحجي بصوت ناصي.. يلعن بليسج مو مرة. قنبلة ذرية ابتسمت وهزيت شعري بدلال حركتي المفضلة شافتني ام مهيمن طالعة من الغرفة وهي عيونها اجتي تطلع من مكانها ووجههة كام ينطي الوان ....... جلال خلصت كل شغلات البيت الكهربائية ومهيمن بقى متعجب علية شلون اسست كهرباء للتكيف وصار بعد ما يفصل سألني .. انت شنو جنت تشتغل كهربائي واتفاجيء بية من كلتله .. لا انا مو كهربائي انا عندي خبرة بالكهربائيات بس تكدر تكول مهندس ميكانيكي لازم يعرف للكهرباء باوع علية ولمعت عيونه .. بعني انت مهندس ميكانيك ما شاء الله ولا مبين عليك جان كاعد يمي يربط تيب اللاصق بالواير ويحجي وياي وانا اسوي بمكينة الماطور لان عطلانة .. ليش ما يبين علية .. ما اعرف هيج حكمت عليك من شفتك ابيض وشكلك يوحي بالرفاهية ضحكت. وكلتله .. لعد واذا اكلك انا جنت اشتغل بورشة تصليح سيارات وهاي دراجتك البارحة شفتها ناقصها هواي شغلات لازم تضبطها عندك مثلا البريك ينرادله تحكيم واذا بقيت هشكل هاي تسويلك حوادث بقة فاتح حلكه متعجب وكال.. لك انت داهية والله صدك كلامك ذاك اليوم سويت بيها حادث ومن هذا اليوم بدت شوية علاقتي وية مهيمن تتوطد اما ام مهيمن وما ادراك ما ام مهيمن صارت كل يوم جايبتلي واحد من بيت جوارينهم حتى اصلح له شغلة عطلانة ماطور مبردة اي شي سيارة ستوتة ما بقت واحد ما جابته بحيث انگلبت طارمتهم ورشة تصليح من ورة ام مهيمن. وبين فترة وفترة اسمع اصوات البنات بالمطبخ واضحك على تحشيش حوراء على ريم وعلى امها كان صوتها بي بحة حلوة جنت مندمج بلتصليح انفتح باب الشارع ودخلت وحده لابسة عباية راس شافتني وابتسمت هاي دايماً تجي لهنا من تدخل لازم تكعد تسولف وياي ونظراتها مو راحة وهسة مثل كل مرة اجتي وكفت يمي وصارت تسألني وتسولف وياي هاي شكلها من جوارينهم هي ماخذة راحتها بالسوالف واني مدنك اشتغل ما اريد انطيها فرصة تاخذ راحتها وياي لان اعرف هيج نماذج وين تريد توصل بالحقيقة انا ما انطيتها مجال مو لان استحرم. وانما صديتها لان تكون جوارين مهيمن معناها جواريني وعيب زحمة والا انا لو علية فأنا اموت على الجنس الناعم وسوالفهن ضعيف كدامهن بس عندي قواعد وهو اهل بيتي وجوراينا يكونون من المحضورين وخط احمر ما اقترب منهن طلعت ام مهيمن وشافتها وسلمت عليها وكالت .. تعالي خالة زمن تفضلي لاتكولين ايدج انفصخت مرة الثانية باوعت علية وابتسمت وكالت .. لا هالمرة اجيت مو علمود ايدي اجيت علمود جلال اريده يجي وياي يشوف المبردة ما اعرف شبيها يمكن ماطورها احترك جانت تحجي وتباوع لي بلهفة ام مهيمن .. يايمة جلال الله يرضى عليك ما تكوم تروح وياها تشوف مبردتهم ينوبك اجر وثواب بهذا الحر هاي مو خوش سالفة لان ما اكدر ارد طلب ام مهيمن جاوبتها واني كاعد بمكاني وما رفعت راسي ..صار خالتي بس اخلص الي بيدي وانتي خالة تاخذيني لبيتهم زمن بالحاح.. لا يابة شدعوة.يعني تريد انتظرك تخلص هذا كله كانت تقصد على المولدة الي كنت كاعد اشتغل عليها كملت كلامها .. هذا بيتنا قريب والمبردة ما راح تاخذ من وقتك ام مهيمن.. اي يمة كوم الله يرضى عليك نهضت من مكاني ومسحت ايدية من زيت المولدة .. صار من عيوني زمن بدلع .. تسلملي عيونك اشرت لها تمشي كدامي تدليني بيتهم عدلت قميصي ورحت اغسل ايدية بالمغسلة البرة وبللت شعري ورجعته للخلف رفعت راسي وجان تجي عيني بعيون الغزالة الي كانت تباوع من شباك المطبخ صدتها تباوعلي اشو هاي برطمت شفايفها وهزت ايدها وسدت البردة بوجهي هاي شبيها عمي والله مبين عليها اخت مهيمن اثنينهم يملكون نفس الطنكورة طلعت ولكيت زمن تنتضرني مشت كدامي وصدك عبرت بيتين وفتحت باب ودخلت والتفتت علية وكالت .. تعال جلال اتفضل ادخل لا تستحي دخلت للطارمة مالتهم وانا متردد. اريد احد يطلع ابوهم قرايبهم رجال حتى اخذ راحتي التفتت اباوع عليها لكيتها مادة راسها من الباب تراقب الطريق منا ومنا ونوب دخلت وسدت الباب وقفلته ودارت علية وعيونها لمعت وكالت .. تعال اتفضل خليني اضيفك بقيت واكف بمكاني .. لا ما يحتاج تضيفيني بس دليني المبردة وينها .. عود ردت اضيفك قبل لا تبلش على العموم تعال هاي المبردة اشرتلي على وحدة بالركن رحت عليها وبلشت افتح ابوابها واشوف شنو الي بيها وهي راحت دخلت جوة. دقايق واجتي يمي لفحتني ريحة نسائية وصوت خرخشة رفعت راسي وجان الكة زمن واكفة يمي ولابسة ملابس تجيب التايه. بنت اللذين مسويتلي طعم بس شلون طعم يسطر سطر احتاريت وين انطي وجهي المشكلة انا رجل مو ملاك وهاي جاي تعرض علية المغريات واني صار زمان محروم اقتربت علية ولزمت ايدي وهي مبتسمة .. بالله شو عوف عنك المبردة وتعال يمي افحص گلبي كلش تعبان من وراك صارلي ثلاث اشهر اركض وراك وانت بايع ثكل براسي متكلي شنو سالفتك هي جانت تحجي وتسحبني وراها. وانا مثل المنوم مغناطيسيا امشي وراها بكل طاعة عبالك خروف اثول بس فجاءة انصدمت من نزعت الثوب الي لابسته ارتديت للخلف بأعتراض جلال دير بالك هاي مبين عليها حية رقطة. ما ينفع اتورط وية جوارين مهيمن كلش مو وكتها .. زمن ستري روحج مشيت ابتعد عنها اشو هاي ركضي وسدي علية الطريق .. لالا جلال وين تروح ما اخليك هو اني ما صدكت تجي لعندي دفعتها عني وركضت وراي وانا هرولت للباب صدك خفت من نيتها خاف تبليني وصلت للباب اريد افتحه بس لكيتها قافلته نترت بيها.. زمن ستري على روحج وخليني اطلع .. بس تطلع اصرخ والم الناس عليك وانت بكيفك .. لعد صرخي انا ما راح انتظرج رحت بكل سرعة وطفرت من السياج بروحي العزيزة الله يلعنها وكعت ونهضت من الكاع انفض من ملابسي التراب شفت رجلين واحد واكف كبالي يتبع #قضية_لم_الشمل #الكاتبة_نهى مو بارت 🌹🌹 ................... #قضية_لم_الشمل ........................ السلام عليكم ورحمة الله وبركاته احبتي المتابعين معكم اختكم نهى الحسون طبعاً انا اعتذر على التقصير في عدم التواصل معكم وذلك لضيق الوقت اليوم احببت ان اكتب لكم شيء يمكن ان تجدوا فيه الاجابة على بعض اسئلتكم لاحظت الكثير من المتابعين يسألون بخصوص قصة قضية لم الشمل هل هي حقيقية ام خيالية احب انوه ان القصة حقيقية وحصلت في ارض العراق بالتحديد نعم هناك اب اهمل اولاده الثلاثة وفرط بهم وتركهم للزمن لكي يتعارفوا فيما بينهم اراد الاب ان يكفر عن ذنبه في اخر عمره فقسم امواله فيما بينهم ضناً منه انه سوف يعوضهم عما فقدوه متأملا ان يجتمعوا سوية بعد ان فرقهم هو نفسه وكان رهانه على الاخوة ربما مع مضي الوقت روابط الدم تجمعهم يوما ما وانا بدوري احببت ان اتبنى هذه القصة واعتبرتها قضيتي وقضية العراق ولكل واحد منا له وجهة نظر وزاوية ينظر بها الى القصة والقاريء الحذق سوف يقرأ ما بين السطور وبما اننا في العراق العظيم يجب ان تكونوا اكثر تصديقاً للقصة لان هناك اقسى واغرب من قصة مؤيد تحدث كل يوم اما عن سؤال البعض من الذي قام بسرد القصة انا اعرف كل الاطراف الحقيقية الموجودة في القصة وانا احببت ان تكون طريقة سرد القصة على لسان كل بطل على حدة لكي يتم رسم المشهد الذي انوي ان اوصله للقاريء وبما انني لا املك كاميرا تصوير ولا فريق عمل ولا ممثلين لكي اجعلها مسلسل واقدمها لكم فأنا لا املك سوى قلمي الذي اسرد فيه القصة لكم بما شاء خيالي وصديقتي هدى التي تقف ورائي وتدعمني وبمساعدتهما اسعى لكي ارسم لكم اجمل مشاهد واحلى المواقف في قصتي حتى يمكنكم ان تتخيلوا معي كيف تسير حياة هؤلاء الاشخاص أشكركم جزيل الشكر على تعاونكم ودعمكم لقلمي مع تحيات اختكم نهى الحسون | ||||
|
| |
|
08-09-19, 06:17 PM
| #19 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_السابع_عشر #الكاتبة_نهى جلال وطفرت من السياج شارد بروحي العزيزة الله يلعنها من مرة وكعت ونهضت من الكاع انفض من ملابسي التراب شفت رجلين واحد واكف كبالي رفعت راسي وجان اشوف مهيمن واكف باوع علية مستنكر موقفي .. جلال!!!! وجان ينفتح الباب وراي وتطلع زمن بكل سرعتها وشافت مهيمن شهكت وسدت الباب بسرعة مهيمن عقد حواجبه وباوع للشارع يراقبه وكال بصوت هاديء .. انا رايح قبلك للبيت الكاك مزروع كدامي وهناك يصير خير جان يحجي بأنذار عدلت قميصي وجليت صوتي وكلته .. اي جايين وراك متكلي شعدنا ، حرامي لا تصير من السلطان لا تخاف مشى كدامي اباوع عليه من الغضب يحفر الكاع حفر بمشيته الله يستر شد راسك ياجلال وكعت بلسان مهيمن شراح يخلصني .. دفع باب البيت بكل غضب ودخل جوة .. مهيمن على كيفك وية الباب شنو ذنبه هيج خلعته جاوبني بغضب يزئر والله ابو الهمم .. جلال صوتك ما اريد اسمعه فااااااهم حسابي وياك بالغرفة لوحدنا جاوبته .. مهيمن انا مو جاهل على فكرة وانت مالك حق تحاسبني ممكن عندك حق تسألني عن الي صار وانا اجاوبك .. تاكل تبن احاسبك غصباً عليك وانت تسكت لان انا اخوك الجبير صار النقاش اكثر حدة بيني وبينه وعلى اصواتنا اجتي ام مهيمن تركض وتباوع علينا بخوف والبنات اجوي ووكفوا بباب المطبخ يستمعون باوعت لمهيمن مستحي من البنات ما اريدهن يعرفن بالشغلة الي صارت عيب حجيت وياه بتحذير .. مهيمن اني داخل للغرفة وهناك نتناقش بالموضوع رحت سبقته ودخلت لغرفته وانا احوم. متوتر وضايج من الي صار هذا الي اني خايف منه والحمدلله اجتي على هيج وما تورطت وياها جان اتندمت على الساعة الصرت بيها دخل مهيمن وامه بعدها تمشي وراه تستفسر ام مهيمن .. يمة مهيمن فهمني شنو الصاير بينك وبين اخوك. مهمين.. ماصاير شي. هيج موضوع خاص بيني وبينه اترجاج يمة تتركينا لوحدنا بعدها تركها وفتح باب ودخل للغرفة وغلقه وراه واقترب مني وصرنا واحد مقابيل الثاني كنا نباوع لبعضنا. عيونه نار تجدح وعيوني تتحداه كال .. شي واحد اريد اعرفه شوداك على ببيت هاي السافلة شعندك هناك ببيتهم وليش طفرت السياج كان معصب ويحجي بغضب بس لفت انتباهي كلمة سافلة معناها مهيمن عنده علم بيها ويعرف بسوالفها جليت صوتي وحجيت.. شوف مهيمن انا راح احجيلك كل شي وانت تكدر تتأكد من كلامي من الوالدة هي كانت بالشهود .. يالله احجيلي غرد خلي اسمعك لحد اي مستوى واصل وية الست زمن واريد اعرف شورطك وياها .. والدتك هي الي ورطتني بيها مهيمن.. شلووون!!! .. مو الوالدة حرجتني كدامها وطلبت مني اروح وية زمن لبيتهم علمود اجيك مبردتهم بس الظاهر امك ما عندها على بسوالف زمن التعبانة مثلما انت مبين عليك تعرف بسوالفها وصرت تحجيله عن كل الصار ببيت زمن باوع علية وكال .. بختك بسمعة المرية الردية والا جان حركت البيت على راسك وخلي ببالك هاي طفرة السياج عليها فصول وياما شباب دفعوا عمرهم ثمن هيج سواية محد راح يعذرك اذا شافك طافر من سياجهم وراح يحاسبوك على هاي سوايتك ومو بعيد يبلونك بيها حتى تتزوجها .. لا يابة الله لا يكولها متكلي اني شمسوي .. انت تكول هيج لان مقتنع بنفسك ما مسوي شي بس تعال تقنع منو من العشاير وحكمهم ، الناس عليها بالظاهر بقيت صافن على كلام مهيمن شنو معقولة اكو هيج ناس متزمتة ومتشددة وعندهم اعراف تدين الواحد بالظلم مهيمن كمل كلامه .. اريدك تصير منا ورايح فطن مو ياهي الي تجي انت تروح وراها مثل الخروف. ترة كيد بعض النساء عظيم فاحذر منهن حجيت بصوت ناصي غير انا گلبي ما ينطيني اعوفهن بحاجتي گلبي الطيب لا يتحمل رهيف عليهن مهيمن عقد حواجبه .. شنو شكلت .. اكول غير انا كلبي ما ينطيني احرج الوالدة كدام النسوان .. هذا هو خلاص راح انطيها خبر حتى ما تدخل نسوان للبيت وخصوصاً هاي الي اسمها زمن توجه للباب يريد يطلع استوقفته وسألته جلال.. مهيمن لحظة قبل لا تطلع عندي كلام وياك دار وجهه علية وسأل .. اتفضل كول اسمعك .. اريد تشوفلي شغلة على معرفتك احسن ما ظال كاعد بالبيت وكعدة البيت للرجال ما تجيب بس الاذية والمشاكل وهاي شوفت عينك اليوم زمن وباجر الله يعلم . منو باوع علية بتفكير وكال .. والله اجيت بوكتك بالحقيقة انا محتاج واحد يلزملي المحل لان انا بهاي الايام مشغول بالمعمل الجديد الي دخلت بي شراكة وية. الحجي ابو حيدر صاحب الوالد .. هاي هي تمام اخذني وياك وفهمني شنو تريد وانا من ايدك هاي لأيدك هاي وان شاء الله اعجبك .. خلاص هاي هي حضر روحك باجر تجي وياي من الصبح حتى اعلمك على شغل المحل وشنو تسوي طلع مهيمن وصاح لامه والبنات اجوي وراها مهيمن.. يمة انا كم مرة منبه عليج وگلت هاي زمن ما تدخل للبيت انتي ليش ما تسمعين كلامي الله يخليج ام مهيمن .. يمة استغفر ربك هاي اعراض ناس لا تجيبها على السانك البنية ما شايفة عليها اي شي وتجي اداويها وتروح لبيتهم ..يمة انتي لان طيبة وعلى نياتج فتشوفين كل الناس مثلج هاي البنية اليوم الله سترنا وما بلتنا بسوايتها .. شنو يمة شسوت غنض عيونه وباوع للبنات وكال .. يمة رحمة لاهلج سمعي الكلام ولا تدخليها هنا للبيت ، ما يجوز كل شي ينحجي هذا بيت وله حرمته بس كل الي اكدر اكوله ان زمن اتجاوزت حدودها وما اريدها بعد تدخل لبيتنا صار معلوم لو اعيد .. هاي هي يمة صار بعد ما تدخل لبيتنا بس انت الله يرضى عليك شوية هدي. وتعال كلي خو ما سويت لأخوك شي سحب نفس بصبر وكال وهو يباوع علية .. هذا هو كدامج كامل ما سويتله شي ابتسمت وكلتلها.. خالة لا تخافين هيج صار بينا سوء فهم وصححناه مهيمن.. يمة جوعان صبيلي اكل .. وانا هم اريد اكل وياه حجيتها متردد ودرت وجهي مشيت ورة مهيمن وصارت عيني بعين الغزالة اشو هاي خزرتني وعيونها تجدح الله يستر عليها نظراتها تكتل كتل ودارت وجهة وراحت هزيت راسي مستغرب هاي شبيها ليش احس بنظراتها بيهم لوم شكو صاير شي صبوا الاكل وكعدنا انا ومهيمن على صينية وحدة اتعودت كل مرة اكعد اتغدى لوحدي لان مهيمن يرجع من الشغل متأخر ويتغدى لوحده حجيت وياه .. اكول مهيمن انا اريد اشارك بمصرف البيت رفع راسه وباوع علية وكال .. ليش اكو واحد شاكيلك .. لا بس انا ما اعرف اكعد ببيت اكل واشرب منه احس بروحي عالة عليك وهالشي ما اسمح له يصير بالبداية كنت معذور لان كنت متكسر وتعبان من الحادث فما اكدر اعيل نفسي بس هسة بعد مالي عذر وراتب عندي صحيح احول نصه لبيت خالي بس ان شاء الله راح اشتغل وياك منا ورايح ويصير عندي وارد اصرف على روحي واشارك بمصروف البيت .. طبعاً هذا من حقك انا هم لو بمكانك راح ارفض احد يصرف علية واكعد عالة بس خلي ببالك انا مو اي احد. انا اخوك يعني انت جاي تاكل وتشرب ببيت اخوك ويحقلك تسوي الي تريده لمعت عيوني من كال هاي الكلمة احس مثل الي انطاني هدية. عمري وحياتي ما سامع من احد يكلي هيج كلام يحسسني بالانتماء. بدون منية .. هو انت لان اخوي ما احب استغلك اريد كل شي انت تسويه انا اسوي مثله .. خلاص يجرالك الي تريده تشارك وياي بمصرف البيت حتى ترتاح خلصت غدا وغسلت وسمعت اصوات البنات ريم وحوراء يحجون بسوالف المدرسة طبعاً بدت المدراس واشوفهن مخبوصات هاي الايام بتجهيز نفسهن الي يشوفهن يكول تجهيز عرس خصوصاً باربي كالبة دقلة وخابصة البيت اجتي نور يمي وكالت وهي عاقدة حواجبها الثخان .. اكول استاذ جلال ليش كل ما تدخل للحمام تغسل ملابسك وياك عود هاي شيسمونها. مو عيب عليك عندك اخت وما تستغل وجودها بغسل ملابسك سؤالها فاجئني وارتبكت ما متعود اتكل على احد .. لا نور ميخالف جاي اشوفج هاي الايام هواي مشغولة بشغل البيت ما ردت اكلفج بغسل ملابسي نور .. جلال انا من يوم الي بديت اتعرف عليكم وهذا الشهر الثالث وانا گلبي انفتح لكم تكدر تكول هاي فطرة بشرية الي خلتني. اخذ عليكم واتعود على وجودكم بالرغم انا طبعي خجولة وانطوائية بس بعشرتي وياكم خلتني اتخلى عن كل حذري واتقرب منكم وانت اول شخص بديت اتقرب منه بس الله يحفظك انت شكلك على كولت حور ثقيل وطينة ما ناوي تمد ايدك للسلام ابتسمت على كلام نور وياي فعلاً نور هواي اتغيرت من دخلت لهذا البيت وهي يوم عن يوم صارت تتفتح مثل والوردة. والوانها صارت زاهية وتنطي عطر فواح وطيب للي حولها .. انا ثقيل وطينة ..هاي مو اني الي اكول هذا الشي ، هاي حوراء .. ما عليج منها ست حوراء هاي شكلها حولة ما تعرفني زين سمعت صوت شهكة وراي والتفتنا وكان اشوف ابن الحلال بذكره الغزالة واكفة انطتني خزرة من عيونها وراحت باوعت لنور .. شفتي هاي من يومها كلما تشوفني تخزرني عبالك عندها دعاية مال عيون بنت اللذين .. هههههههه عابتلك اذا انت قصفتها وتكول عليها حولة مو زين ما اجتي وخنكتك. عاد هي بيها طبع ما تضيع لها حق يبتلي على عمره الي يتورط وياها همست .. وربي احلى ورطة نور.. شنو ما سمعتك شكلت .. اكول الله يساعد مهيمن عليها هسة خلينا منها وتعالي انتي قبل شوية عرضتي علية ان استغل وجودج .. اي نعم .. خلاص ما دام هيج ياريت اليوم تكوين ملابسي باجر راح اطلع للشغل وية مهيمن نور بفرحة.. والله هذا احلى خبر احسن لك من كعدت البيت لان اشوفك بهاي الايام طاكة روحك من كعدت البيت. بالحقيقة حتى اني اتمنى اشتغل بشهادتي لان ما متعودة اكعد بدون شغل .. ليش انتي جنتي تشتغلين قبل .. اي نعم كنت اشتغل .. شنو متوظفة حكومي لو بعقد ابتسمت وكالت بكل بساطة.. لا هاي ولا ذيج كنت اشتغل خدامة ببيت ناس طيبين هو الشغل مو عيب هي كانت تحجي بكل بساطة وانا احس واحد لزم گلبي وعصره بهت لوني .. شنو كلتي ؟؟؟ .. شنو جلال عفية لا تاخذ الموضوع انت الثاني بحساسية مثل مهيمن بيوم سمع بية كنت اشتغل خدامة. بقى يومين ما يراويني وجهه عبالك هو السبب بشغلي هذا ولا ورة اليومين بعدما اتقبل الموضوع اجاني وكال.. نور انتي اختنا صحيح ابونا غلط وهملنا كلنا بس ما اريد هذا الشي يأثر عليج اكيد اهمال ابوي وحياتج وية بيت خالتج خلتج ترحين تطلعين تشتغلين بالبيوت بس هسة صار عندج اخوان اريدج تبقين تعيشين يمنا معززة ومكرمة ومحد يكلج على عينج حاجب. وشنو تردينه انا موجود بس اشري احرك السما والكاع علمود اوفره الج المسكين كان يحجي بحركة وقهر جانت نور تحجي وكلبي يفور حقد وغضب على ابوي شنو ذنبها بالله احنا رجال وما علينا شي بس هي بنية ما جاي اكدر اتخيل شكلها وهي تشتغل ببيت الناس وتعبانة باوعت عليها ظلت تراقب الغضب الي بعيوني وكالت .. جلال عفية لا تخليني اتندم ان كلتلك اتقبل الموضوع يا اخي نفضت راسي وحبيت اغير عليها جو الكابة وكلتلها .. خلاص هاي راح اسد الموضوع لخاطر هاي شواربج راح اسكت اتسعت عيونها وحطت ايدها على شفايفها وكالت .. عابتلك جلال قصفت انوثتي ضحكت على كلامها رحت للغرفة اريد انام هم يالله وراي كعدة من الصبح ريم بدت المدارس وبدينا اني وحوراء نجهز مستلزمات المدرسة من صداري وسجلات وشغلات ثانية بالحقيقة. انتبهت لحوراء وصت امها تخيطلها صدرية وحدة وقميص بقيت اباوع عليها متعجة وسألتها .. لج حوراء وين تكفي صدرية وحدة وقميص باوعت علية .. حياتي اني عندي مالات العام موجودات وهم اداور بينهم عادي ترة هاي اخر سنة الي بالمدرسة يعني حرامات الواحد يصرف فلوسه على الملابس وهنة بس هاي السنة راح نستخدمهن. لو انتي ناوية تطولين بالسادس .. لا مو شغلة اطول بالسادس بس انتي كلتيها سنة كاملة مستحيل اتحمل اصبر ابقى على قميص وصدرية غير اختنك واموت ويظل جلدي يحكني اذا ما اغيرهم كل فترة وفعلاً استلمت الراتب الشهري ورحت للمول وية جلال ونور واشتريت كل الي احتاجه بحيث صرفت فلوسي كلها وجزرت انتبهت لجلال ونور يباوعون علية ويهزون ايدهم وصلنا للبيت ومهيمن شاف الغراض وعرف ان اني صرفت. فلوسي كلها باوع علية وكال .. يعني انتي صدك تحجين صرفتي مبلغ يعيش ثلاث عوائل علمود تشترين هاي الغراض بالله كليلي شنو الشي المهم الي اشترتيه من هذا كله باوعت عليه مستغربة من كلامه وياي .. مهيمن انت مالك حق تحاسبني اني صرفت من راتبي يعني ما طالبة منك متكلي على شنو انت معصب علية باوع علية وخزرني وكال .. شوفي ريم وسمعيني زين هاي المرة صارت وراح اعديها الج لان ما تعرفين طبعي زين مرة الثانية انا غير مسؤل عن الي يبدر مني وخلي اكلج اياها من الاخير انتي جبيرة مو صغيرة ما دام وافقتي تعيشين بهذا البيت اذن معناها تخضعين لكل قوانينه وهنا انا القانون اليبهذا البيت كل الي اكوله يمشي على الكل فاهمة لو اعيد باوعت عليه بغيض والدمعة لالت بعيوني شمرت الغراض كلها بالكاع .. خلاص ما اريدهم بعد طلعوا من عيني ودرت وجهي رحت دخلت لغرفة حوراء هو ليش هيج قاسي وياي بكلامه بس اريد احد يفهمني اني اول مرة بحياتي واحد يلزمني ويحاسبني ويفشلني كدام الكل احس عبالك مثل الطفل ويضربونه بالمسطرة على اطراف اصابعه اختنكت اني اكبر غبية شنو الي جابرني اتحمل كلامه ضربت صدري بقيضة ايدي اعاتب گلبي والومه .. كله منك انت الي صرت نقطة ضعفي باتخاذ قراري وخليتني اقطع وعود لعمو على فراش الموت وصار هذا الوعد امانة يوم بعد يوم يلتف حول ركبتي مثل السلاسل ويخنكني والادهى ما كفاك تقطع وعود وتتحمل فوك هذا كله رحت اتورطت وحبيت واحد مو مهتم لوجودي اصلاً هسة ارتاحيت ياكلبي جاي احترك بناري من وراك دخلت نور واجتي كعدت يمي وكالت .. ريم عفية لا تبجين والله ما يلوكلج البجي بس والله حقه مهيمن من يحجي ترة الي سويتيه غلط المفروض تكونين اكثر مسؤلية حتى انا وجلال ما رضينا عليج ونبهناج بس انتي كنتي مثل العصفور المشتاق للحرية وصرتي تصرفين بغير مبالات .. وهو شدعوة عليه هيج كام علية على فكرة صدك اني حجيت ، فعلاً انا ما صارفة من جيبه وما مإثرة عليه .. يعني حضرتج بعدج مصرة ان كلامج صحيح يعني ما فكرتي اذا خلص مصرفج الشهري شلون راح تدبرين امورج مثل اجرة السايق الي راح ياخذج للمدرسة او مصروفج اليومي او غيرها من الامور الي تتطلب منج مبلغ مالي يعني فعلاً كلام مهيمن صحيح انتي غير مدبرة تصرفين براحتج وناسية روحج عبالك بعدج عايشة بالدلال عمج لازم واحد يكعدج ويعلمج شلون تتصرفين وبقت نور الليل كله تحجي وياي وصارت تراويني الحياة من منضار ثاني غير الي اني اشوفه ..... جلال يوم ثاني رحت وية مهيمن بالشغل وبدأ يعلمني على نظام شغله كان المحل عبارة عن مواد غذائية مهيمن.. جلال انت عليك تبقى كاعد تحاسب الزباين والمعاميل شغلك كله على الحاسبة وتنطي اوامر للعمال يجهزون القوائم. والبضائع للناس هزيت راسي بموافقة .. صار تدلل بلشنا نشتغل وبدوا الناس يتوافدون عالمحل ومهيمن كل شوية معرفني على واحد من جماعة السوك وهمة ما يعولون يصنفون واحد يكله ولك هاي شنو مهيمن معقولة هذا اخوك والثاني يكله انا لو منك استحي اكول هذا اخوي وهذا يكله حلو اكعد اكشخ بأخوك كدام الناس ورة عدت ساعات اخذت ايدي عالشغل كان كلش سهل وبسيط مقارنتاً بشغل الوشة والسيارات الي يكسر الظهر دك نقال مهيمن وجاوب المتصل وكال من ورة خشمه .. الو هلا عناد. تمام محتاجيني اجي للمعمل صار دقايق مسافة الطريق وانا يمكم واشوف شنو صاير بالمكائن كان هو يحجي بالنقال وانا حاط كوعي على ميز المكتب ومتكي وصافن عليه ما شاء الله عنده طاقة حيوية انهى الاتصال والتفت علية وكال جلال انا لازم اروح المعمل بعد ما اوصيك على المحل هو وصل يم باب المحل وجان يدخلن اثنين بنات شابات ووياهم مرة كبيرة اباوع على مهيمن رجع التفتت علية وكال .. جلال صير فطن ديربالك تصير خروف وتنثول جنت متگيء وعلى حجايته وقصفه كدام البنات اتعثرت وانخبصت الله يلعنك مهيمن شبقيت للهيبة عدلت شعري ورفعت ياخة القميص وباوعت للبنات يباوعن علية ويبتسمن فركت ايدي مع بعضهم عبالك عندي وليمة وكمت من مكاني .. هلا والله هسة بدأ الشغل يحلى ويصير احلى واحلى اينما يوجد الجنس اللطيف اذن لايوجد هناك مكان للمل في عالمي رحت عليهم وسلمت على الحجية وبديت الشغل العدل وصرت جنتل مان والواحد. لازم يشرف على باب رزقه عن قرب يعني خو ما يخلي بيد العمال هاي نعمة الله ميصير ريم مرت الايام ومهيمن بعده زعلان مني لان كلامي وياه بذاك اليوم كان قلة احترام واني بعدها ادركت غلطي وياه وحاولت اقدم له غصن الزيتون لكن هو بقى متمسك بوجهه العابس ما يتجاوب وياي يضحك ويتعامل مع الكل بطبيعية الا اني صرت اغار من الكل من امه من اخواته من يحن عليهم احس عبالك متعدين على حقوقي اختنكت من نظرات اللوم الي كان يوجهها الي كل تصرفاته وحركاته بالزعل كانت تشبه تصرفات عمو مؤيد من يزعل وياي صرت اكره اكل وياهم والكل انتبه على وضعي وهو هم قلة جياته للبيت يكول عندي لود مال شغل ، ضغط شغل مو طبيعي وكلش مشغول بدت المدارس وحطلنا سايق للمدرسة وهو دفع اجرة السايق عني وعن حوراء وكان ينطي مصرف لحوراء والي كنت ارفض اخذهم منه لكن حوراء تاخذهم منه وتجبرني هناك بالمدرسة تشتري لي اشياء عصاير كيك وتحطهم كدامي حتى اكل . مر علية اسبوعين ما شايفته ولا حاجية وياه كان يدخل يسلم وبوجهه يدخل للغرفة وينام خطية حتى امه تترجاه يطلع يكعد وياهم بس عيونه الذبلانة كانت تعلن عن التعب حتى جلال صرنا ما نشوفه هذا الثاني ماشاءالله هم صار عنده شغل هواية ومنشوفه اواحنا تعودنا عليه بذيج الايام الفاتت اني وياه ونور نجتمع بالسطح ويسويلنا كعدة عصرية ونبقى نسولف. شوية على كولته هاي غرفة الاجتماع الخاصة بينا وصدك كنت احجيلهم عن قهري من مهيمن وجلال يكعد يواسيني واني دائماً اسأله عن مهيمن .. جلال انت ما ملاحظ كثرت غيابات مهيمن عن البيت صارت وية مشكلتنا اني وياه جلال .. ولج باربي انتي هم مصدكة روحج عبالج الولد ما يلفي لبيتهم علمود حضرتج مزاعلته سألته .. لعد شنو تسمي كثرت غياباته .. يابة الولد داخل بمشروع جديد عليه خطية فتح معمل تعليب مواد غذائية داخل شريك وية واحد اسمه عناد ابن التاجر الي كان صديق عمج مؤيد وهو ما فارغ يحك راسه هسة ارتاحي ست باربي الرجال مو علمودج شارد من البيت علمود باب رزقه والله انتوا النسوان فلم عبالكم العالم كله يفتر حولكم واحنا ما عدنا شغل وعمل غير بس سوالفكم الرقيقة واليوم احس طفح بية الكيل وصل حدي بعد ما اتحمل ابقى اني وياه متزاعلين قررت اروح اصالحه سمعت صوته صاح لحوراء حتى تفرشله الفراش استغليت انشغال حوراء ورحت دخلت لغرفته وفرشتله دخل للغرفة وشافني واكفة منتظرته عقد حواجبه والتفتت للباب يريد يفتحه رحت ركضت عليه وصرت كدامه وحطيت ايدي على ايده امنعه يفتح يدة الباب وهو بسرعة سحب ايده عبالك تماس كهربائي .. ريم شكو شعندج هنا انتي ما تبطلين هاي حركاتج .. اوكف مهيمن لحظة عندي كلام وياك اريد احجي .. اتفضلي اسمعج سويت نظرة استعطاف ولميت شفايفي مثلما اسوي لعمو مؤيد من كان يزعل مني كنت متعودة من اريد اراضيه اسوي هذا الشي استعطفه بنظراتي للحظة شفت بمعاني وجهه وزعله وحواجبه المعقودات صورة عمو مؤيد رحت اقتربت عليه بسرعة ورفعت روحي على اطراف رجلية حت اوصل لخده وبسته بسرعة وكلتله .. اسفة عمو حقك علية والله بعد ما ازعلك حسيت عليه مثل الي انتفض من حركتي ولزمني من زندي وقربني عليه معصب وكال .. ولج غضب انا مو عمج من عمة العماني على هالمصيبة ولج الف مرة اكلج انا زلمة مو حجر وانتي بتصرفاتج هاي تنطقين حتى الحجر قرب وجهه على ركبتي واستنشق انفاسه ونتر ايدي وبعدني عنه فجاءة وانطاني ظهره وكال .. ريم طلعي وسدي الباب وراج . جلال لاكتني ريم طالعة من غرفة مهيمن باوعت علية بأرتباك وخدودها حمرة هاي البنية مو طبيعية اتوقع طاك عندها فيوز بعقلها دخلت ولكيت مهيمن معصب ويسب ويغلط ويخربط بالفراش مالته يالله هسة هذا شبي الثاني بس لا باربي مسوية مصيبة كعدنا انا ومهيمن نتناقش بالشغل اباوع عليه باله مو يمي ريم يوم ثاني السايق ما اجة علية اني وحوراء ومهيمن طلب من جلال يأجر تكسي ويوصلنا بطريقه للمدرسة وفعلاً اجة جلال واخذنا. اني وحوراء وكال .. هاي شنو والله لايك عليكم زي المدرسة حوراء حجت بصوت ناصي .. استغفر الله هذا الولد شنو مشكلته ما يكدر يشوف بنية الا ويعلق عليها جلال .. جاسم اني مل موجه الكلام الج اني جاي احجي وية بنت عمي ريم وصلنا يم باب المدرسة واستاذ جلال يشوف البنات. كام يهتف .. هلا والله. هنا ارض العراق هنا البصرة هنا ارض الغزلان نزل من السيارة بسرعة وعيونه ما يعرف على منو يركزها وحوراء عاطت بي .. انت هي خير شكو شعندك نازل ويانا روح ارجع اركب بالسيارة واتوكل على شغلك باوع عليها وبعدها انتقلت عيونه عالطالبات .. خير وانتي ياهو يمج انا اريد اوصل بنت عمي لباب المدرسة خايف عليها بالله شو وخري من كدامي كطعتي عنا الماي والكهرباء بطنكورتج هاي باوع لحوراء وجهها صار احمر من الغيض وصلنا للباب وحجة ويانا بصوت مسموع .. بناتي اي شي تحتاجونه انا عيوني الكم جان يحجي وعيونه تبصبص وحوراء جاوبته.. عمة حتى عمة لهاي العيون دخلنا للمدرسة وتركنا جلال ركب السيارة وراح على شغله وبعدها صاروا البنات كل شوية تجي مجموعة يسألوني لو يسألون حوراء هذا الولد شنو يصير منكم حوراء كلبت عيونها بغيض .. هذا الشاب يصير ابن عم ريم ليش ما وحدة من البنات مبينة من اهل المنطقة كالت .. حوراء ليش تكذبين قبل كم يوم اخوي شايفه بالمنطقة ووسأل عليه وكايله انا اخو مهيمن التفتوا البنات على حوراء وكالوا .. خو كولي اخوج بعد عليمن تطردين عيون ترة ما راح ناكله وحدة من البنات.. هههههه بس تردون الصدك هو عبارة عن جكليتة بطعم التفاح حوراء عصبت منهن وكامت .. هي. انتي وياها بالله شو كلمن تروح على رحلتها لا اجي اعلمج شلون الجلكيت يصير بطعم التفاح اوخلي بنكهة الدفرات الله يلعنجن مو بنات حشى جانت تحجي وانا اضحك على شكلها وهي معصبة حوراء وكعت بحب ابن عمي جلال قربان ابو النسوان شكل الاخت راح تضل تعاني همست يم اذنها .. معقولة وكعتي بحب اخو اخوج حطت ايديها على خدودها وجرت حسرة .. اي والله شكلي ربي بلاني بحب ابن عمج الاغبر وما اعرف ليش استحي اعترفلج بحبي له احس بروحي عايشة بمسلسل العشق الممنوع وتعال ياهو الي يقتنع انا احب اخو مهيمن اكيد راح يباوعلي بنظرة شك وعيونه تكول الله يلعنك على هاي السواية واحتمال لو اكول لزهرة. تنجلط فخليني ساكتة احسنلي اباوع لحوراء جانت تحجي مقهورة خرب هاي حالها اضرب من حالي اووف واني الليل كله ما نمته ما اعرف وين انطي وجهي والمن احجي الصار حتى ينصحني اخير شي اضطريت اطلب من نور تصعد وياي فوك السطح حتى احجيلها عن الصار وفعلاً اول ما حجيت لنور عن السويته لطمت على صدرها متفاجئة .. عزة بعينج يا ريم لج انتي شنو قصتج معقولة انتي ما عندج عقل شلون تتصرفين بهاي الطريقة وية مهيمن هسة شنو يكول عليج والله زين منه ما ضربج وطردج من الغرفة عمي الله يساعده عليج شنو جنتي تحسين من رحتي وبستي الولد من خده .. نور انا ما حجيتلج علمود تلوميني اني اريدج تساعديني وتكوليلي شنو اسوي اني كان قصدي شريف والله للحظة شفت بي عمو مؤيد الله يرحمه نور صفنت بوجهي بتفكير وكالت متعجبة .. ريم انتي كبيرة مو صغيرة في غض النظر عن حسن نيتج. اتجاه مهيمن بذيج اللحظة تبقين انتي بنية وهو شاب وكل اثنين ثالثهم الشيطان يا اختي انتبهي على تصرفاتج وحشمي نفسج واتوقع بعد الي صار اليوم بينج وبين مهيمن صارت الامور اكثر تعقيداً من ورة تصرفج الغير المدروس صرت كلما اتذكر الموقف وانفاس مهيمن الحارة على ركبتي يرتعد جسمي وحسيت بلحظتها من رجفة كلبي بأحساس مهيمن بذيج اللحظة وما اعرف ليش ما كلت لنور عن ردة فعل مهيمن جلال رجعت من الشغل واني محمل بالهدايا مرت فترة على شغلي وية مهيمن والحمدلله الشغل يمشي عال العال لا يخلوا من بعض المشاكل واحلى شي بالموضوع مهيمن مو فوك راسي دخلت للبيت وانا اباوع للهدايا مثل كل مرة انطيها لنور اذا كانت تفيدها وهي تظل تحذرني من هاي التصرفات وانا اضحك واكللها .. الرسول قبل الهدية والله كلبي ما ينطيني ارفض هديتهن كنت ابتسم وسمعت اصوات نسوان بالمطبخ يحجن وية ام مهيمن ولفت انتباهي اسم نور بالموضوع ام مهيمن.. يا خية والله نور كل اصبع مرة واليتزوجها امه داعية له المرية جاوبتها وكالت .. لا خية ام مهيمن الولد شاف نور ورفض ويريد بنت عمها هي ال عجبته باوعت لنور نزلت راسها بخجل وخيبة يتبع | ||||
|
| |
|
08-09-19, 06:19 PM
| #20 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_الثامن_عشر #الكاتبة_نهى نور اتعودت على ام مهيمن صارت كلما تشوف نسوان او تطلع لمكان معزومة لازم تاخذني وياها تكلي تعالي وياي شوية غيري جو بدل كعدة البيت انتي الوحيدة الي ما تطلعين من البيت وفعلا كان كلامها صحيح كان الكل يطلع من البيت واني ابقى مرات لوحدي طبعاً من بدت مدارس البنات اني ااخذت على عاتقي شغل البيت كله اني ماعندي شي وهم صف سادس وراهم بكلوريا بس حوراء ما تقبل تعوفني اشتغل لوحدي ودائما تساعدني احس ام مهيمن صار شغلها الشاغل شلون تعثر لي على زوج مرات اضحك على سوالفها شلون تكعد تحمد بية كدام النسوان وتدعيلي بالزوج الصالح هههه تذكرت كلام ريم تكولي انتي تاليتج من ورة هاي الدعوة راح تبقين بدون زواج لان الظاهر ماكو رجل صالح دارت وجهها على خالة ام مهيمن وكالت .. عمتووو غيري الدعاء وكولي فقط ربي ارزقها بواحد يتزوجها ويخلصنا منها حوراء.. اي يمة والله صدك شكل صالح انقرض من العراق بقى بس طالح يلعب لوحده بالساحة واليوم مثل كل يوم ام مهيمن جايبتلي ناس حتى يشوفوني وعادي مثل كل مرة يرفضون اصلاً اتعودت كانت نظراتي كلها خيبة وخذلان من الي سمعته رفعت راسي وجان اشوف جلال واكف يم الباب عاقد حواجبه ويباوع علية بحرص شكله سمع كلامهن انحرجت وارتبكت وصارت عيوني تحوم بكل مكان حتى ما احط عيني بعينه دنك راسه ودخل سلم على ام مهيمن وكمل طريقه للداخل وهو يحمحم مثلما اتعود كل مرة حتى البنات ياخذن احتياطهن صار الليل واني نسيت الموضوع جنا كلنا كاعدين متجمعين بالهول اني وريم وحوراء الي كانوا يدرسون وريم كل شوية تغافل حوراء وتكعد تكلب بالنقال هاي البنية شلون ما اشوفها ما راح تطلع من السادس هاي السنة احس بيها بس تريد تتهرب من الدراسة اقتربت عليها حتى احجي وياها ودنكت اباوع على النقال اريد اشوف شنو الي شاغلها كان اشوفها تشتغل على فوتوشوب لمجموعة صور تخص مهيمن ماخذتهم له بدون علمه ودامجتهم بصورة وحدة وية صورة رجل كبير كان يبتسم بالصورة ركزت على الصورة. وحسيت كلبي عصرني بلهفة على صاحب الصورة هاي صورة ابوية صرت اباوع لريم شلون دمجت صور مهيمن وابوي مع بعضهم سبحان الله صدك الشبه بينهم كلش كبير الله يرحمه لو كان عايش كان افتخر عنده ولد مثل مهيمن يشبهه مسكينة ريم كانت تشوف بمهيمن عمها وتريد تعوض فقدانها له بمهيمن ياترى راح تكدر تفصل بينهم لولا .. ريمة تركي عنج هاي السوالف وانتبهي لدراستج احسنلج ابتسمت وكالت .. اني خلصت دراسة تقريباً .. لعد عوفي النقال وخلصي الي بقى من دورسج انتي هالسنة بكلوريا ولازم تشدين حيلج بالدراسة اباوع عليها غلقت النقال ورجعت تتابع دراستها وية حوراء كنا كاعدين بهدوء ومنتظرين رجوع مهيمن وجلال من الشغل حتى نتعشى وبعد شوية دخل علينا مهيمن مثل العاصفة .. ياستار ودخل وراه جلال يهدئ بي .. صلي عالنبي يا اخي خليني افهمك قبل لا تتهجم علية .. ما اراح اعيد كلامي من باجر تترك شغلك بالمحل وتنتقل تشتغل بالمعمل وية عناد لا تخليني اعيد كلامي .. يعني هاي هي حكمت المحكمة عندك خلاص .. اي حكمت عندي ام مهيمن تباوع عليهم مستغربة ام مهيمن باوعت لحوراء وكالت .. يمة حوراء كومي جهزي العشا واخذي ريم وياج كاموا البنات واني بقيت استمع لحديثهم ام مهيمن .. شبيكم يمة شجاكم هاي عين وصابتكم ليش تتعاركون .. مهيمن .. حجية سأليه هذا هو كدامج والله حيرني بزماني هذا الولد جلال.. هسة يا اخي غير تكلي انا شسويت شنو الجرم الي ارتكبته حتى انت هيج معصب اشو نزلت علية مرة وحدة بالحجي وما افتهمت منك غير من باجر تترك الشغل بالمحل وتنزل تشتغل بالمعمل شنو انت شفت علية تقصير بشغلي بالمحل .. لا ما شفت عليك تقصير والحمدلله الزبونات كثروا على عينك واسلوبك وتصرفاتك حتى الما تريد تشتري ، تجي تشتري حتى اهل السوك انتبهوا عليك يكولون المحل ما يفرغ من النسوان ودير بالك على اخوك لا يتبلون عليه بشغلة يا اخي ادري شنو قضيتك وين احطك الكة النسوان يمك جلال بكل براءة .. يا اخي انا كاعد بمكاني هم يجون وراي اني ما داز عليهم يعني شنو اسوي اذا وحدة تجي تريد تتسوك اطردها مثلا اكوللها بطلنا ما نبيع اخوية ما يقبل نبيع للنسوان مهيمن جاوب بنفاذ صبر .. والله اكص ايدي اذا مو انت مسويلهن واهس ومنطيهن مجال هن ما يجن هذا انا مو وياك جنت اشتغل بالمحل اشو ماكو ما شفت هاي الاشكال الغريبة مرت علية بالمحل ، الي يجوني نساء ربات بيوت يشترون اغراض محتاجيها للبيت اني عندي محل مواد غذائية مو محل مكياجات ويلتمون بي هيج البنات ولك اتخيل حتى الحجي ابو حيدر انتبه عليك اجاني يكلي والله مريت من المحل مالتك الله يستر عليه اخوك مسويه عبالك محل صياغة ذهب مجمع عنده النسوان جلال.. هذا ابو حيدر كلك هيج .. اي والله الحجي ابو حيدر هيج كال جلال..شكله الحجي محروك كلبه غيران .. ينعل ابو شكلك يا جلال ولك حتى الحجي ما خلص من السانك شوف انا كفاً للمشاكل من باجر تروح تبلش بالمعمل واصلاً من زمان ردتك تطلع على المكاين بما انك كلت عندك خبرة بهذا المجال فاريدك توكف فوك راس هذا عناد ابو راس اليابس تعلمه المكاين شلون تشتغل جلال.. خلاص ما دام صار بيها مكاين انا من باجر ابلش والله كريم اباوع لأم مهيمن حاطة طرف حجابها على حلكها وتحجي بصوت ناصي وهي تكلب بعيونها .. صدك لو كالوا ابن الوز عوام جلال.. ها خالة شنو ، تحجين وياية .. لا هيج بس اكول صدك لو كالوا الي خلف ما مات خالة جلال الله يرضى عليك اسمع كلام اخوك ولا تعبه جلال.. ان شاء الله مهيمن صاح .. شنو وين صار العشا حوراء جاوبته بصوت عالي .. هسسسة هسسسة. جاااااااي جاااااي بالطريق جلال.. حشة الجماعة عبالك كاعدين بالسوك ابتسمت ولكزته .. اششش لا يسمعك مهيمن ويسويك سوك والله جابوا صينية العشا وكعدنا اني وخالتي ومهيمن وجلال والبنات سولهم لفات ورجعن على مكان كتبهن بعيد عنا يكملن دراسة ام مهيمن .. اي صدك تذكرت قبل لا انسى اليوم اجوي ناس طلبوا ايد ريم من عندي جان مهيمن ياكل وعلى كلام امه غص بالاكل وجلال صار يضرب على ظهره واني انطيته كلاص ماي ام مهيمن.. يمة اسم عليك شبيك اخذ اكلاص الماي من ايدي وعيونه على امه شرب الماي وكال .. كلمة وحدة ما اعيدها لا تعبين نفسج وتحجين وياي بالموضوع كليلهم ما عدنا بنات للزواج ام مهيمن.. بس .... مهيمن قاطعها بحدة.. لا بس ولا غير شي كلت لا يعني لا .. هسة انت شفتهمت وراسا رفضت هسة عاد هي بنت عمك شلون مرة حوك وام بيت وتنحط على الجرح وانت كاعد متبطر ترفض من يمك .. انا هذا الي عندي يمة رحمة على والديج بدلي الموضوع لان انسدت نفسي هزت ايدها ما عاجبها الوضع وهي تباوع باتجاه ريم الي كانت كاعدة بعيد ملتهية وية حوراء بالدراسة وما سمعت الكلام خلصنا عشا واجاني جلال وكال .. نور. اني صاعد بالسطح بلا امر عليج فد كلاص جاي من ايدج الحلوة ووياج صيحي باربي اريدكم بموضوع سمعنا وحدة تنافخ من ورانا ابتسم وهو يكول هاي البنية اذا ظلت تنافخ هيج احتمال تطير كان يقصد على حوراء سويت الجاي وصبيت لمهيمن وخالتي واخذت جاي لجلال وصعدته فوك وصحت لريم تجي وياية صعدنا فوك ولكيناه فراش الحصيرة وكاعد متربع بالنص انطيته الجاي وكعدنا يمه انا وريم ريم .. جلولي وين حب الشمسي الي كلتلك عليه طلع من جيبه حفنة حب شمسي انطاها .. اليوم ما صارتلي فرصة هالمرة اشتري بس شوية اخذته من ايده وكعدت تسلس وانا اباوع عليه منتظرته يحجي .. شنو سبب الاجتماع شرب شوية من الجاي وحطه بالكاع وحط ايده بحيبه وطلع محفظته وسحب منها فلوس حسب منهن وحطهن على صفحة ورجع محفظته لمكانها واحنا بعدنا نباوع شال الفلوس وحطهم بحظن ريم وكال .. شوفي باربي هاج هاي الفلوس اريدج تاخذين اخوي نوري وتسويله غسل وتشحيم. تگلبيها عالبطانة اريد كون اروح وارجع الكة نوري اخوية صاير اختي نور سويها مثلج لعابة ، انتي باربي هي فلة بس ها مو مايعة وفاهية مثلج لا خلينا بس على المظهر الخارجي ريم .. يعني شسوي مثل شنو جلال.. شمدريني شتسوين تزينين شورابها تخففين حواجبها اثخن من حواجبي تسويلها غسل وتشحيم شمعرفني اني هو يحجي وانا اضحك ريم .. لا عليك الله صدك تحجي جلال .. يعني بربج ترديني انا اعلمج شنو تسوين كلتله .. جلال شبيك شارب شي .. اي شارب جاي من ايدج تذكرت موقف النسوان اليوم وعرفت جلال ليش وشنو قصده اتوقع الكلام الي سمعه اليوم عن الخطابة مأثر بي واني كسرت خاطره .. جلال انت ما مجبور تسوي هذا الشي .. لا مجبور ونص ما يصير والله قهر اباوع لشوارب اختي. اثخن من شورابي يعني مرات احط ايدي عليهن اريد احلف بيهن اتذكر شواربج ابطل ما اعرف شصار بية من الخجل خرب يومك جلال صدك حرجني طلب جلال اجة بوكته لان اني كنت اريد اهتم بشكلي بس كنت خجلانة اطلب بلساني خايفة يفهموني غلط يعني مصارلي فترة عندهم واجي اكوللهم تعالوا اخذوني لصالون اريد اعدل نفسي ، مو حلوة شنو يكولون علية جلال .. هسة خلينا بالمهم ست باربي اريد اختي تصير فلة بس ها ديري بالج تلعبين بشعرها وتكصيه وتصير مثل شعرج المنتف ريم هزت شعرها بدلع حركة الغرور .. وليش عيني شبي شعري يجنن جلال.. يجنن على نفسج. انا نقطة ضعفي الشعر الطويل غير اخرب عليه فانا كرجل اكلج بعين الخبرة اختي ما تكص شعرها صار معلوم لو اعيد ريم.. تمام افندم شكلك اجيت للشخص الصحيح التفتت علية وصارت تباوع الي يشوفها يكول راح تسويلي عملية تجميل ريم بكل ثقة .. راح تشوف بعيونك ريم شنو تكدر تسوي بأخوك نوري الا اخليك من تشوفها ما تعرفها .. هو انا ليش لجأت الج لان ادري بيج خبرة بسوالف الترتيب والتجميل يعني لا تطلب الحاجات الا من اهلها وانتي اهلها يا ست باربي .. نعم نعم .. اكولج لتصدكين روحج هي اصلا متحتاج شي بس تشيلين الشعر الي بوجهها تطلع تخبل كافي عيونها بمرة سمعنا حركة ورانا بالسطح وابتسمت اكيد هاي حوراء اتعودنا كلما نصعد فوك السطح تظل هي تحوم وتتختل علمود تتسمع علينا جلال ابتسم غمز لنا وكمل كلامه وكال .. يعني انا لوكانت عندي عركة كان رحت لحوراء اخت مهيمن حتى تفزعلي لان شكلها بالاساس مال واحد عنده عركة خصوصاً من تخزر بعيونها غير راسا ينهزمون الهدادة من يشوفون عيونها سمعنا شهكة ووكعه غراض من الترك ولعنة مكتومة جلال .. ههههههههههههههه ويلوموني من احجي عليه خطية حوري هي لو عليها تجي تكعد يمنا بس بقانونهم يعتبر جلال بالنسبة لحور من المحظورين لان ام مهيمن كانت دائماً من تشوف حوراء تضحك بصوت عالي وجلال هنا كبل تكرصها وتكللها ثكلي شوية ونصي صوتج منا الولد عيب شيكول عليج كنا بعدنا نسولف ونضحك وكان يقطع علينا الجو صوت نقال جلال باوع للمتصل دنكت اباوع لشاشة نقاله بفضول كان المتصل جبار ٢. جلال.. يالله شباب رحمة الله من زار وخفف يالله هونا عزلنا كلمن يروح لبيته ريم.. اهووو شكله جبار يحتاجله اجواء هادئة حتى استاذ جلال ياخذ راحته بالكلام وياه جلال.. اششششش نصي صوتج الله يلعنج سمعنا صوت مهيمن يصيح لجلال وهو يصعد الدرج طلع للسطح وشافنا وعقد حواجبه مهيمن .. الله بالخير اباوع لجلال بسرعة انطة رفض لجبار ٢ وكال .. يا هلا يا مرحبا الله بالنور تعال تفضل يمنا ياشيخ كان جلال كاعد بنصنا مهيمن .. انت شنو كلما اشوفك الكاك يم النسوان اريد اعرف امك وين دافنة صرتك جلال.. اتوقع دافنتها بحمام نسوان وانا هيج طلعت حبيب للنسوان مهيمن خزره وهو يباوع علية .. بلا حجي فارغ منا البنات بالله شو كوم تعال شوف الدراجة ما اعرف شبيها اليوم كل شوية توكف علية بالطريق نزلوا كلهم جوة وعيوني تراقبهم ما اعرف شبية احس اكو نار مشتعلة بصدري اتمنى الزمه واخنكه على العذاب الي كاعد اشوفه من وراه الناس كلها تنام بالليل مرتاحة وانا انكوي بناري الف مرة من ورة حضرته. كل يوم بالليل اسمع صوته فوك السطح يهمس ويضحك باتصالات تالي الليل والله يعلم وية منو يحجي وينكت اكيد بنات ما بيدي اي شي اسويه غير بس اباوع واكل بروحي من وراه يضرب الحب شو بيذل مرت ست اشهر وهمة عدنا واني من يوم الي انضربت بجلال وانا احس بگلبي انسلب مني بلحظتها وصار معلك بصدره و تحت امره اكابر واعترض ما ابين الهم بس مو بيدي غصب عني حبيت وكان حب اغبر جلال قربان شكله واحد ابو نسوان وراح يشلع گلبي المفروض اني ابتعد من ناره لكن مع الاسف اشو اني بس اسمع بطاريه الكة روحي مثل الفراشة تروح متلهفة على ضوة ناره جلال يوم ثاني بلشت الشغل بالمعمل ومن اول يوم دزني مهيمن للصناعية هناك مركز المعامل ما اجة وياي ورحت وية واحد من العمال دخلنا ولكينا المعمل ما شاء الله جبير والعمال منتشرين كلمن على شغله العامل حجة بصوت عالي لان اصوات المكاين عالية واشر على ولد شاب مرتب كال.. هذا استاذ عناد ابن الحجي يالله انا رايح اشوف شغلي طبطبت على ظهره وكلتله .. الله وياك روح كنت احجي وانا اباوع على الشاب الي اسمه عناد الى كان جاي باتجاهي اول ما وصل يمي مديت ايدي مبتسم بوجهه .. مرحبا عناد ، اني جلال ابتسم بوجهي ومد ايده صافحني .. اهلا وسهلا اتفضل بشنو اخدمك .. شنو مهيمن ما اتصل عليك ينطيك خبر بقدومي رد علية باستغراب .. اي صح مهيمن اتصل وكال راح يجي اخوي واسمه جلال ضحكت وجاوبته .. الي هو اني جلال اخو مهيمن ضحك .. والله ما اضمها عليك بالحقيقة جنت متوقع اخو مهيمن راح يكون واحد معقودة حواجبه من الطنكورة ويشبهه بس اشو طلعت عكس الي كنت المتوقع تمام ضربني ضربة خفيفة على كتفي ومشى واني مشيت وياه .. بالله شو تعال خلي نضيفك لان هاي اول مرة الك بالمعمل وفعلاً ضيفني وصار يشوفني المكاين الجديدة ويشرحلي عن عملهن وشلون تم تنصيبها وانا بقيت ساكت بس استمع بعدها كعد يفهمني شنو المطلوب مني ومنه عناد.. يعني انا وياك كل شي ما نسوي غير بس نجرد البضايع الموجودة بالمخزن ونشرف على العمال وبديت يومي على نفس الوتيرة الي هم متبعينها بنظامهم وصرت اسجل الملاحظات ونقاط الضعف الموجودة بالمكاين وخلال ايام قليلة كتبت لمهيمن كل شي يخص المعمل وطبعاً وبهاي الايام علاقتي بعناد صارت قوية وثبتلي اكثر من مرة هو شخص لطيف بالتعامل ومرة من المرات كنت واكف بباب المعمل معصب .. منو ذب هذا السكراب يم باب المعمل واحد من العمال كال .. استاذي هذا السكراب مو مال المعمل هذا مال المعمل الي بصفنا باوعت عليه.. وهذولي شلون يتجرأون يسون هيج شنو وين كاعدين بغابة والله الا اخليهم يلمون سكرابهم بيدهم وهمة الممنونين اجة العامل وياي ورحت على معمل الثاني كان معمل جبس بقيت واكف برة صحت بصوت عالي على واحد من عمالهم .. انت هيييي وين صاحب المعمل هو اجة علية كان جسمه مفتول ،هو وكم واحد من العمال وكال .. اتفضل ابو المعمل ما موجود احنا هنا .. ما دام هيج الموضوع بالله ما تجون تشيلون زبالتكم من يم باب المعمل هذا اتقدم علية وكال.. احترم نفسك واحجي عدل لا اجي اكلب لك خلقتك شنو نشيل زبالتنا ها ولك .. اهووو يعني انتوا من جماعة (احترم نفسك) .. اكول الظاهر انت شكلك فايخ ، بالله شو روح منا لا تنسحل .. لا والله اشو ما اتحرك منا ولازم الزبالة تنشال من باب المعمل .. ابن الطركة اشو جاي تصيح علينا وهد علية ولطمني على وجهي بسرعة بحيث ما. لحكت اتصدى له الظاهر الاخ مشتهي عركة من الصبح وانا ما خذلته اتعلكت بقميصه وصارت اضربني واضربك واجة عناد والعمال يركضون وفرقوا بينا. وسحبني على صفحة حتى يبعدني عنهم وهذولاك بعدهم يهدون وينثون عناد.. جلال عيب شنو هاي الحركات مال العراكة ترة عيب تروح تهد عليهم. بالمعمل وين كاعدين عناد لازمني ويحجي وانا ادفع بعناد من طريقي اريد اهد عليهم .. ولك عناد عوفني عليهم انت ما تعرف شصار جنت احجي وياهم حجي اشو هم كعدوا. يسبون وبدوا المضارب عناد .. شلوووون يعني همة الي بدوا بالضرب .. اي والله واسأل العمال انا حجيت هيج اشو هذا عناد عا فني وراح هد عليهم يهد ويغلط عناد.. اليوم المعمل نعزله عليكم تغلطون علينا انا اعلمكم وصار الضرب بفلس ونوب انكلبت الاية من عناد يفاككني ويهديني الى عناد يتعارك وياهم ويغلط وبعدها اجة الحجي ابو حيدر وهد العركة وفرقنا عنهم ودخلنا انا وعناد بالكوة للمعمل ووجوهنا صايرة خريطة وهدومنا مكطعة اباوع لعناد خطية راحت الكشخة والشعر المرتب التعبان عليه صار مهوس جنا واحد يباوع للثاني عناد اتلمس فكه وابتسم وكال.. هههههه الله عليك روح شوف وجهك بالمرايا جلال قربان صرت جنك عتوي داخل بعركة ضحكت عليه وجاوبته .. لعد ما تشوف روحك بالاول شكلك جنك ديك مهلس بس والله لايك عليك الحجي ابو حيد كان كاعد كدامنا ديتصل على صاحب المعمل القريب ويشتكي له عن افعال عماله انهى الاتصال وباوع علينا بغضب .. صدك جذب تحجون يعني هاي انتوا الكبار هيج تسوون شبقيتوا. للجهال عناد.. بوية يستاهلون الضرب لان همة الي عالوا بينا واتجاوزوا علينا .. ابني مو هيج تنحل الامور ما كو شي ينحل بالعراك المفروض تنتظروني اجي وانا اروح اتفاهم وياهم جلال.. حجي حقك علينا بس همة كلامهم يدوس بالمصارين .. ابني ميخالف هسة انا اتصلت على ابو المعمل وهو جاي وراح نتفاهم بالموضوع وانت عناد اخذ جلال وروحوا للبيت بدلوا ملابسكم ورجعوا وانا انتظركم هنا وطالعنا انا وعناد كلتله .. انت روح للبيت وانا راح اخذلي تكسي عناد.. لا يابة وين كاعدين تاخذلك تكسي والله ما عرفتك صاير حباب وتستحي بالله شو تعال اصعد بالسيارة خلي اوصلك لبيتكم لا اخذك سحل فتحت باب سيارته وصعدت .. هو مو صوجك صوج اليحترمك كلت خطية شيوصله لأطراف البصرة بس الظاهر انت هاوي التعب صعد هو اللاخ وشغل السيارة وكال .. اكلك هي كتلة واكلناها من وراك بقت على بهذلة التوصلية ما نتحملها ربتت على ظهره وانا اضحك .. تدري عناد قبل لا اشوفك جنت متخيلك واحد عكرة ودمه ثقيل بس من عاشرتك شفت العكس عناد.. وانت وين شايفني قبل حتى تكون عني فكرة جاوبته.. من ورة مهيمن اخوي اشوفه من خلال اتصالاته وياك انت وياه مو على توافق ودائما تتعارك وياه .. خرب لا تذكرني بأخوك العكرة. حتى تزعل اخوك ثقيل ما ينجرع مر المعشر يا اخي ما اعرف على شنو شايف نفسه من يوم الحادث وصار عناد يسولف لي عن لقائة بمهيمن وشلون واحد صار ما يجرع اللاخ عناد.. ومن يومها اخوك ما يتحاجة وكل ما يشوفني يباوعلي بغيض عبالك واحد كاتل ابوه وصلنا لمنطقة مهيمن ويم راس الفرع مالتهم التفتت عليه وكلت لعناد .. وكف السيارة هنا لا تدخلها بالشارع لان كله طسات وحفر خاف تدك السيارة فعلاً كانت منطقة مهيمن زراعية شوارعها ما مبلطة وكف عناد السيارة ونزلت .. انتظرني هنا ما اتأخر عليك ....... نور اعدل بالحجاب وعيوني لحد الان ما مصدكة التغيير كنت اباوع على شكلي بالمريا قبل اسبوع اخذتني ريم بعدما جمعت معلومات كومة عن مراكز التجميل المضبوطة اباوع عليها من يوم الي كلفها جلال بالمهمة كابلت النقال وكعدت وصارت تبحث وتسأل بالانستا وفعلاً كدرت تعثر على مركز جيد وحجزت عن طريق الانستا وبيومها طلبت من جلال ياخذنا وطبعاً اني كلت لخالة ام مهيمن عن الي اريد اسوي وهي كيفت وكالت ..اي والله خالة يا ريت ترة مو عيب البنية تحف وتهتم بنفسها هذا يسمونه نظافة للوجه حوراء.. جا يمة مادامه نظافة للوجه ما تكولين لروحج ليش ما تخليني احف وجهي ام مهيمن.. انتي انجبي بعدج صغيرة على الحف حفافة الوجه للي بعمرج تسلب براءة وجهج حوراء.. خرب شوف امي تريد تحافظ على براءة وجهي المتعفنة يمة بشرفج باوعي لوجهي عدل وين البراءة بالموضوع تريدين ازيدج من الشعر بيت التفتت على ريم وكالت .. تدرين عندج المدرسات اول ما يشوفون وجه كناري وشكلها يكولن (فدوة لله شنو هاي الكياتة ) يعني ابشرج محد باوع لجهرتي وكال فدوة لله لهاي البرائة اشو هاي ريم حافة وحافظها الرحمن ووجهة بعده كله براءة وعفة وتقوى ريم .. شكلج حميتي بعد بعد كولي سلام الله علية وفعلاً بيومها ريم اخذتني لمركز تجميل وعناية اني عزلت فلوس جلال وضميتهم بكنتوري ما قبلت استخدم من فلوسه لان اني عندي مجمعة راتبي مال الشهور الفاتت يعني اني لا طالعة ولا ماشية حفيت وجهي وحواجبي وسويت لوجهي تنظيف بشرة عميق وخبيرة التجميل نصحتني اسوي ميزو لوجهي وبعدها صرت اتنقل من ايد لأيد وحتى شعري عدلت موديل الكصة وريم سوت عناية لأظافرها ريم تباوع علية وكالت .. لج نور ما تدرين شكد مشتاقة لهاي الاجواء باوعت عليها.. ليش انتي متعودة دائماً ترحين للصالون .. اي دائماً ما يمر علية اسبوع اذا ما اروح للصالون وبعد الانتهاء كانت النتيجة النهائية للتعديل خرافية ريم صفكت بأعجاب وكالت.. والله هسة اذا شافج جلال راح ينصدم من النتيجة وبيومها رجعنا للبيت وشافني جلال .. لالا لا ما اصدك احجوا وين وديتوا نوري اخوي سألته .. لا عفية جلال عن الشقة صدك دتلاحظ التغيير ابتسم ومسح كف ايده على راسي وكال .. وربي طالعة صاروخ لج نور ليش هيج دافنة هذا الجمال كله مو حرام عليج ابتسمت .. الظروف حكمتني وفرضت علية البس ثوب الكبت غصب عني صحيت من سهوتي على صوت ام مهيمن .. يالله خالة نورة استعجلي راح يبدي المولولد وانتي بعدج ما جاهزة هياتني خالة خلصت بس اعدل حجابي باوعت لروحي بالمراية نظرة اخيرة وكنت راضية على ملابسي ولاؤل مرة بحياتي هيج اكشخ واتجرأ البس هيج الوان طلعت من الغرفة وشافوني البنات حوراء صفرت .. هلا والله نور طالعة صدك جنج صاروخ على كولت جلالوه ام مهيمن وعيونها تلمع بفخر .. ولج حويرة صلي عالنبي لا تحسدين البنية وهي هسوتها كالت يالله وجرت نفس ريم .. وواو طالعة تحفة فنية فديت اني على الابداع حوراء .. اي فالحة بس بهاي السوالف بالله هسة فنج اذا عرفتي. جزر لانجرهانز وين تصير .. من اسمها جزر يعني تصير بنص المحيط حوراء طفرت على ريم وجرتها من اذنها .. والله ثولة ضاع تعبي وياج بالتدريس ريم .. اي .. اي ماما شعري تركي شعري ام مهيمن.. ولج حويرة عوفي البنية فطستيها هي منا مايعة ونوب انتي كمتي عليها كامت تنعوص علينا دارت علية .. يالله يمة امشينا خلي نروح هم يالله طلعنا بالباب ومشينا شوية وصادفنا جلال بطريقنا ام مهيمن.. يا ستار ولك جلال هذا ياهو مسوي بوجهك وملابسك هشكل لا تكول متعارك دنك راسه يتهرب وكال .. لا خالة ما اتعاركت بس صار سوء تفاهم بالمعمل وهسة انا راجع ابدل ملابسي وارجع للمعمل .. كول والله ما صاير شي .. والله خالة شبيجما تصدكيني .. ومهيمن وينه .. مهيمن بالمحل .. بالله انا اترخص انتوا كملوا طريقكم ها اي خالة قبل لا اروح. مو تكولين لمهيمن انا اكله .. صار يمة بس كون الله يهديك وتبطل مشاكل عافنا وراح كمل طريقه للبيت واني وخالتي كملنا الطريق لبيت اخوها مسويين مولود والبنات ما اجوي ويانة عندهم امتحان وام مهيمن مثل كل مرة ما تفوت هيج فرصة لازم تاخذني وياها هو اني جان شكلي عادي وهي ام مهيمن ما كاعدة مو نوب حفيت وعدلت صارت اذا تريد تشري صمون تاخذني وياها ام مهيمن.. والله هذا جلال ما راح يبطل من المشاكل الا انزوجه يالله يكع ويعقل .. خالة انتي بالاول زوجي مهيمن يالله تجزوجين اخوه الصغير .. اي والله خالة صدك كلامج هو انا الجبير ما كادرة ازوجه اشو صاير هواي يتهرب من سالفة الزواج بس ما علينا ان شاء الله هانت ما بقى شي وبنت اخوي نغم تخلص دراستها ونتقدملها سمعت كلام ام مهيمن منا. واني اتعثرت منا ووكعت على وجهي يبووووي على حظج ريم عزة والله اذا درت بالموضوع تنجلط انخبصت والدمعة طفرت من عيني ما اعرف عليمن ابجي عالكشخة الراحت لو على الم الوكعة لو على حظ ريم اشو كلها التمت علية ام مهيمن .. اسم الله يمة نورة خو ما اتأذيتي اقتربت مني تريد دنك حتى تساعدني اكوم من الكاع وهي خالة ام مهيمن سمينة تارسة وصارت تناهد ما حسيت الا على واحد سبق ام مهيمن ودنك علية حتى يساعدني وكال .. اسم الله .. اسم الله والله هاي عيني الحاسدة صابتج. رفعت راسي ودموعي مالية عيوني اريد اباوع منو هذا الي ديحجي وياي كان شاب لابس نظارت شمسية حجة بصوت ناصي قبل لا توصل ام مهيمن وكال .. وربي جنت اباوع عليج من طلعتي من راس الشارع وحجيت بكلبي اكول جنها حمامة ترفة بقيت فاتحة اجتي ام مهيمن ولزمتني من زندي من الجهة الثانية والرجال هم مد ايده حتى يساعدني . ارتعد جسمي من لزم ايدي بسرعة سحبتها من بين ايديه. وابتعدت عنه بحذر نظراته كانت تمشي علية مثل الليزر الشاب.. خالة تردون شي مساعدة او اخذكم للمستشفى ام مهيمن رادت تصرفه .. لا يا خالة شدعوة هي عثرة قابل سوت حادث حتى نوديها للمستشفى مشكور خالة عالمساعدة. احنا جايين لبيت اخوي يصير هنا قريب نفضت ملابس المتربة والشاب بعده يباوع علية ام مهين .. ها نورة تردين نرجع للبيت لو نكمل طريقنا لبيت اخوي وهناك ترتبين نفسج .. لا خالة ميحتاج نرجع اني بس اوصل لبيتهم ارتب ملابسي ووجهي ... ريم من يوم الي صار بيني وبين مهيمن بعد ما شفته هواي تغير علية وصار ما يباوع بوجهي مو مثل قبل كنت اصيده يباوع علية بالخفية ومن تجي عيني بعينه. يتهرب هسة حتى هاي النظرات خسرتها هو حتى ما يحجي وياي. فقدت حنيته علية من يشوف دموعي كان ينخبص صارت حتى دموعي ما تهمه ليش احس بي يريد يعاقبني عن الصار احبه واريده واتمنى وصله صرت احن لنظرة حنان منه مفتقدة طيبة گلبه وحرصه علية صرت افتعل المشاكل بالبيت حتى الفت انتباهه حتى لو يجي يتعارك وياي هم ميخالف اهم شي يحجي وياي ويبادلني الكلام ما متعودة احد يزاعلني هالكد حتى عمو مؤيد الله يرحمة كان من يزاعلني حده يوم وبعدها يجي هو يراضيني نزلت دموعي وانا اتذكر اخر نظرة لمهيمن الي كانت بغرفته اتلمست ركبتي واقشعر جسمي ها يا گلبي حنيتله ((يا ابو الهمم يا زين ليش تصد وانت جاي ماتشوفني منك يا عين عظمي انگلب ماي لا شفتك بكل حين ترجفلي كل عضاي تنشدني جاية منين مجنونة ايا هواي والشمة ...اااه الشمة والشمة تكول ناسين رجعولي يا شماي ردتك تجيني يوم تكلي شنو الي صار ماتشوفني مهموم وگلبي انا يسعر بنار ليش الجفا واللوم ظل العقل محتار واني الي احبك دوم ياطير شمني وطار نذراً علية صوم لو للركبة رد وزار)) (بقلم هدى سعد ) جلال بدلت ملابسي وطلعت من البيت وانا اضحك هاي البنية مخبلة والله مو عاقلة انتبهت لروحي جاي امشي بالشارع واضحك على موقفها استغفر الله شكلي انا الي تخبلت خلتني امشي واضحك وية روحي وصلت لسيارة عناد .. يالله اتوكل هم يالله نرجع للمعمل قبل لا يجي مهيمن ويعرف بالعركة خلي انا افهمه شغل السيارة وحركها انتظرته يجاوبني التفتت لكيت الرجال باله مو يمي .. هييي عناااااد مو احجي وياك وين عقلك عناد.. ولك جلال اسكت قبل لا تجي بشوية. شفتلك حمامة بغدادية تسطر سطر ابتسمت على كلامه هذا مبين عليه مثل حلاتي ضعيف گلبه كدام البنات .. اكول يا صاح. متكلي وين لحكت تعرف الحمامة من بغداد .. مو خطية البنية اتعثرت ووكعت بالكاع وانا اخوك ابو النخوة رحت اقدم لها المساعدة .. فدوة لكلبك غير احنا النخوة تمشي بدمنا دار علية وابتسم وكال صدك والله تعال قبل لا انسى باجر صاحبنا معن .. شبي معن .. ولك شبيك البارحة مو عزمنا على حفلة الحنة مالته يكلك راح يجيب فنانين .. اي اتذكرت هو حتى عازم مهيمن لان بارحة شفت البطاقة لعد تمام اذا راح مهيمن انا اروح وياه .. لا ولك ضروري تجي ضاملك مفاجئة اليوم بالليل الله يستر من مفاجئاتك صار الليل وحضرنا نفسنا انا ومهيمن حتى نروح لحنة صاحبنا صحت لنور حتى تجي تسويلي الساعة بمعصمي اشو اجتي تعرج كدامي .. استغفر الله يعني احنا نصلح شي يخرب شي ثاني وتالي وياج وين اوديج اخذت الساعة من ايدي وكالت .. اسكت اليوم وكعت على وجهي بالشارع واتكسرت اتكسر وهسة يالله طلع علية الالم مهيمن دخل وكال .. هاي خلصت لو بعدك .. لا هاي هي جهزت مهيمن شاف نور وسألها.. بعدج متأذية .. اي والله ركبتي كامت كلش توجعني مهيمن.. اليوم من ارجع اخذج تعاينين جرحج .. لا خالة دهنتها بمرهم دك نقالي والمتصل عناد يستعجلني .. يالله ياعيني ما تكلي وين صرت بدت الحفلة .. يالله جاين بالطريق افتح الباب تلكاني كدامك ريم .. كذاب وربي اكبر كذاب اتعجب على خشمك لحد هسة ما طولان من ورة كذبك تركتها وراي تحجي ورحت على مهمين الي طلب سيارة سجاد ابن خاله حتى نروح بيها للحفلة والله ووصلنا للقاعة وجان نلكة الاجواء مشعللة من الباب وافترقنا انا ومهيمن هو راح على ميز كبار التجار الي يعرفهم اغلبهم جماعته وانا انطلقت وية الشباب والطرب اول مرة بحياتي احضر هيج حفلة واحضر هيج اجواء كنت اباوع عالشباب واتذكرت صاحبي سلوان كضينا عمرنا انا وياه متعوبين ما مرت علينا هيج اجواء وعد علية بس خلي استلم ورثي الا اخذه سفرة سياحية ونتونس اني وياه احلى ونسة مرت ساعتين واتصل علية مهيمن ..الو هلا جلال وينك ادور عليك ما لكيتك .. كاعد وية الشباب ليش تسأل .. انا راح ارجع لان راسي انسطر من ورة صوت الديجي والمطرب راح ارجع للبيت انت شنو ما وراك رجعة لكزني عناد بخاصرتي وغمزلي وسويت النقال كتم دنكت راسي حتى اسمعه .. شكو .. ابقى ويانا لا تروح احنا نرجعك للبيت ترة الحفلة الحقيقية بعدها ما بادية باوعت عليه متعجب .. ولك هذا كله وتكول الحفلة بعدها ما بادية لعد هذا الدك والركص شنو ولك ورانا بعد فقرة توديع العزوبية اها لعد خلي اكول لمهيمن يروح صار بيها توديع عزوبية .. الو مهيمن انت روح واني اجي وراك الشباب يوصلوني للبيت وصار عناد يفهمني .. ينتظرون المعازيم الكبار يغادرون القاعة من بعد الساعة ١٢ يجبون الكاوليات وتشتعل الاجواء شعل جلال.. شنو كاوليات .. ولك فتح وياي كاولية معناها. راقصة وللصبح واحلى ونسة وطرب .. هلا والله هسة بدأ الشغل يحلى ويصير احلى واحلى .. جا ليش اكلك لا ترجع وية مهيمن والله وجان تبلش اجواء ما بعد الساعة ال١٢ وتنكلب الحنة الى قاعة ملهى نسوان وركص وشرب كنت اتنقل ما بين الطرب والركص بس كنت حذر ما اقتربت لا على شرب ولا على كاولية على كولتهم لان بعدني جديد على هاي الامور اخاف ابتلي بس عناد كان كل شوية يكيت فلوس على راقصة وعلى مطرب يعني يعني ماخذ راحته على اخر صارت الساعة بال٢ وبديت انسطر واتعب لان ما متعود وجان يندك نقالي والمتصل مهيمن حجة وياي بعصبية وواصل حده. .. جلال انا منتظرك بباب القاعة هسة تطلعلي .. صار والله اجيت بوكتك انا جاي دورت على عناد ما لكيته رحت اخذت السترة وطلعت لمهيمن بالباب صعدت بالسيارة وتصل علية عناد .. الو هلا عناد .. شنو وينك انت اكلك خلي نطلع من الحفلة بسرعة شكلها انكلبت كلها ممنوعات لا يبلونا وجان اسمع صوت صياح عناد المتفاجيء شكله وكع نقاله منه .. الوووو عناااد .. الو عناد نزلت من السيارة اركض ومهيمن نزل يركض وراي مهيمن.. شكو جلال فهمني شصاير يتبع | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
3Likes
العرض العادي
