آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
30-09-19, 10:23 PM
| #61 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  #قضيية_لم_الشمل_ج٢ #البارت_ثلاثين #الكاتبة_نهى_الحسون نور كنت واكفة يم الكاونتر اطحن كم عشبة لخالة زهرة بالطاحونة وخالة زهرة مبسطة بالكاع المواد والاعشاب داير مدايرها توزن الكميات وتسوي الوصفات جانت تشتغل وتسولف وياية على كل الي سمعته من اخبار عن اخوانها واولادهم ونسوانهم وعن جبرانها صاحباتها مرات اضحك ومرات ينكسر خاطري على احوال بعضهم كانت خالة زهرة مسمترة بالكلام .. ولو تشوفين صاحبتي شلون اتعاركت هي وجنتها بالجدورة تكولين دجاجات وانا صرت بنصهن اهدي بيهن عشتوا عود انا دازيين علية مصلح اجتماعي اهديهن اسكت صاحبتي تعيط جنتها ونوب اسكت جنتها تعيط صاحبتي حيرني بزماني اخذت الجدر من ايد صاحبتي تريد تهد على جنتها وتحطه براسها كلتلها.. خية فطيمة ما عرفتج هاي من شوكت انتي صايرة هيج شرانية خالة تحجي واني اضحك وانا اتخيل خالة ام مهيمن الدبدوبة قصيرة واكفة بنصهن حاجوز شافتني وانا اضحك كملت كلامها وكالت .. اي ضحكي شعليج بعدج ما سامعة شي .. ليش هو شنو بقى ما سويتيه .. خلي اكملج شنو سوت خالتج زهرة وكفت بنصهن وعطت بيهن والجدر بعده بيدي وكلتلهن صلن على محمد اذكرن الله هو انا كلتلهن هيج اشو هذني زادن ما نقصن بعياطهن ونوب انا اعرف بصويحبتي فقيرة زايعة روحها بس لسان وهاي جنتها خبيثة راضعة وية ابليس بس تكمز وكلبي كام يفور منها تالي كدرت اهدي صاحبتي وكلت لجنتها يالله كافي بطلي مشاكل هاي عمتج ام رجلج مرة جبيرة ومريضة وانت بنت اصول اعتبريها مثل امج وهاي تشوفيها سكتت انتي هم كافي سكتي وهدي اللعب رجلج راح يجي تعبان من الشغل خطية يرجع ويشوفجن تتعاركن صاحبتي حطت شيلتها على حلكها وكعدت تندب حظها وتلحن بموالها هاي گدرتها .. يمة يامن تعب يامن شگى يامن على الحاضر لگة انا شسويت حگ ارباي اريده. يوليدي صحت الغوث من مرتك الجسره تردلي كل حجايه احجيها بعشره واكولن مااشتكي لابني واقهره رحت عليها اواسيها .. خية بسج كافي مردتي گلبي انا ما عولت اسكت صاحبتي اشو هاي جنتها نفشت ريشها كامت علينا .. عوفيها ما راح تسكت هي متعودة تناكرني النهار كله ومن وراها صارت عندي ميت عله كعدي اتمسكني وسوي روحج مظلومة مثل الحية تكرص وتضم راسها ما ينلام بيج ابنج الصغير من يشرد منج وذبج علينا علة على گلبي يمة انا هي تحجي وانا گلبي يفور عليها جنت واكفة بنصهن ولازمة الجدر بيدي واعاين على صاحبتي منتظرتها تطيح حظ جنتها صاحبتي كامت على حيلها وكالت .. حسبي الله عليج ونعم الوكيل جوابها لجنتها ما برد گلبي نترت بصويحبتي وكلتلها. .. ولج فطيمة مو هيج ولج هاج اخذي الجدر وزرعي براسها ونعلي ابو حظها صاحبتي كالت.. خليها تولي هاي نچرة يجي رجلها وانا اعلمه جنتها باوعت علية وكالت .. انتي خليج محضر خير لا تشتغلين وسواس الخناس عاد انا زهرة عالوا بيك يالمنك تجي العيلة انا منا شلون گلبي محمل عليها وهي حجت وياي هيج لزمت الجدر وحطيته براس جنتها وخربت الاول والتالي ونوب انگلبت العركة من فطيمة وجنتها وصارت بيني وبين جنتها وفطيمة تهدي بينا بس والله ارتاحيت وفوخت گلبي بعطوبها هلستهم هلس اااااااخ اتمنيتها كون هاي جنتي الا اخليها تمشي على الصراط المستقيم ما ادري اضحك على فطرة خالة زهرة مدري انقهر على صاحبتها المرة المغلوب على امرها سألتها .. لعد وين ابنها ما يسوي حل لمرته .. والله يخالة ابنها ملتهي بالعيشة هم يالله يلحك على مرته الافة .. زين وابنها الصغير وين راح وعافها خطية جاوبتني .. هذا خطية انضم للحشد وسافر .. ياااااا خطية خالة زهرة كملت كلامها .. والله ثلثين شبابنا رايحين للموصل ياهو الي اسأل عنه يكلي افلان سافر للموصل وعلى طاري السفر وية الحشد .. البارحة سمعت بالصدفة من مهيمن يحجي وية الحجي ابو حيدر بالنقال عن ابنه عناد يگلج حتى هذا متعارك وية ابوه وامه ومسافر للموصل يودي مساعدات وصارله ثلاث ايام هناك بهت وجهي من كلام خالة زهرة ياربي ما اعرف شصار بية احس گلبي يتسابق وية نبضاته شنو عناد سافر للموصل ياربي دخيلك انا منا كل يوم الليل كله اشوف احلام وكوابيس عن جلال كل مرة اشوفه جاي يتعذب لو مرة الكاه يرمي على مهيمن وية ناس يخوفون افز من نومي والرعب ساكن بصدري ماكفاني الي انا بي يجي خبر عناد ويكمل علية جانت خالة تحجي منطلقة وحور دخلت هي وكتابها للمطبخ وكعدت يمنا. عيونها حمر وخشمها شوكت ما اشوفه مورم مبين عليها كانت تبجي بس تتحجج بالحساسية كدام امها شكلها حتى خالة زهرة حاسة بحزن بتها على جلال بس خالة فضلت تتغاضى عنها ما تريد تتطرق لهيج موقف حساس بعدها دخلت ريم وهي حاطة لزكة عاى كصتها وكل شوية تسوي كمادات ثلجية عالمكان وگابلت المرايا وكعدت تتفحص بأثر العنجورة الي صارت كدمة زركة ام مهيمن شافتها وكالت.. ولج خالة ريمة بسج كافي رحمي روحج ترة هي عنجورة ريم طلعت كمادة الثلج وحطتها على مكان الاثر وكالت .. لاخالة. شلون اعرفها دشوفيها جنها گرن وعندي كلية ما اكدر اداوم وانا هذا شكلي ام مهيمن هزت ايدها متعجبة وكالت.. لا تكليلي انتي صارلج يومين غايبة علمود العنجورة جاوبتها بصوتها المنعوص وكالت .. اكيد يعني بعد الحادثة الي صارت مستحيل ادوام مو زين على حالتي الصحية والنفسية هذا شبه ارتجاج بالدماغ وفقدت الوعي بوقتها والمفروض ما استهان بي باربي جانت تحجي وام مهيمن فاتحة حلكها متعجبة كلتلها.. خايبة يخالة صرنا ودرنا وعدى علينا اشكال والوان الالم ماسوينا سوايتج. حور جاوبت امها وكالت.. يمة عوفي كناري جهاز حساس ضد اللمس بسرعة يعطل (ميد ان چاينا )صنع في الصين قطع كلامنا صوت نقال خالة زهرة وكان المتصل اخوها حسن هي بيها طبع كله تحجي بحاكية ما تحب تحط النقال على اذنها ردت عليه واتبادلوا السلام وبعدها اخوها كال .. خوية زهرة انتي بالبيت لو طالعة جاوبته .. انا بالبيت ليش خوية تسأل شنو راح تجينا جاوبها.. لا والله مو انا الي اريد اجي ابو سجاد يريدج بموضوع وكلي انطيها خبر اريد اروحلها للبيت واتأكدلي موجودة بالبيت لو طالعة جاوبته .. اي گوله موجودة بالبيت هلة بيه خلي يجي خوية ما عرفت شنو هو الموضوع الي رايدني بي .. خلي هو من يجي يحجيلج احسن لان الكلام طويل مو مال نقال بعدها سلم عليها وخلصت المكالمة والتفتت على حور وكلتلها .. يمة حور گومي على حيلج سوي جاي بسرعة خالج ابو سجاد على جية اباوع لحور گلبت عيونها بضجر ورفعت كتابها ودفنت وجهة بي وكالت.. هسة بس اخلص هذا الكتاب الي بيدي واكوم اسويله جاي امها باوعت على الكتاب وكالت .. حييييييل تردين خالج ينتظرج تخلصين قراءة كتابج ولج حويرة على هاي الحسبة معناها خالج راح يشرب جايه بفاتحتي من وراج انتي وكتابج شوكت ما اجيج الكاج زارعة راسج بي انتي تنقرضين والكتاب يكبر حجمه. ما اعرف منو بيكم يتغذى على الثاني بالعلم انتي لو الكتاب خالة زهرة تحجي وية حور وانا كلتلها عوفيها خالة انا اكوم اسوي جاي دارت علية وكالت.. لا والله اشو الا هي تكوم تسوي جاي شنو هي فوگ راسها ريشة كل خير ما بيها ست الدكتورة لاتشيل ولا تحط بس تاكل وتمسح ايدها بالحايط ونوب ما تستحي ماتكول خطية خلي امد ايدي وياهم بالشغل واساعد البنية على ابو هي تدرس طب ماخذتنا حاصل فاصل حورجاوبتها.. يمة الله يخليج هسة هي البنية مشتكيتلج .. ولج صدك ما تستحين يعني هي شنو البنية ابتلت على عمرها كلتلها.. لا خالة والله واصلاً شغل البيت ما يتعب وانا ماعندي شي فارغة خليها هي تدرس الله يساعدها دك الجرس وانقطع حديثنا وخالة راحت تفتح الباب لأبو سجاد ودخلته للهول رحت حطيت قوري الجاي على النار وبعدها اخذتله بطل مي من الثلاجة حتى اقدمله علما يخلص تحضير الجاي دخلت للهول وسلمت عليه رد السلام من ورة خشمه حتى خالة زهرة انتبهت عليه انطيته المي وگالي .. ما اريد اشرب سم انعم الله عليكم اخوانج ما قصروا سمموني ام مهيمن عگدت حواجبها وباوعتله بحذر وسألته .. شنو ليش هذا الحجي الي يضوج الخلگ شنو شبيهم اخوانها شمسويلك ابو سجاد نزل بالحجي وكال .. ترضيها خوية زهرة البارحة ابنج فشلني وراح مي وجهي بالديوان كدام الناس .. ليش شسوالك مهيمن جاوبها.. البارحة طلبت منه ايد حويرة منه لأبني سجاد كدام الناس وكم شيخ من جماعة اخوي حسن كانوا موجودين بالديوان .. اي ومهيمن شنو گال . گلي حوراء مخطوبة لأخوه جلال قربان لا وجان يحجيها وهو مفتخر يفضل هذا جلال الداعشي على ابني سجاد كان كلام ابو سجاد بالنسية النا مفاجئة ماعدنا علم بيها ام مهيمن نظرات الصدمة على وجهها من ورة كلام اخوها وابو سجاد انتبه عليها وسألها .. الظاهر ما عندج علم بالموضوع شكله مهيمن نسى يگلج بسوايته جاوبته وكالت .. هو مهيمن ياهو الشايفه هو النهار كله برة البيت ما يلفي الا بتالي الليل ويكعدلي بالحديقة حتى مرات الكاه نايم غافي بمكانه بعد وين الكاه ويحجيلي هم يحجون واني الدنيا ما سايعتني من الفرحة على موافقة مهيمن معقولة مهيمن قرر يوافق يزوج حور لجلال. زين شلون وشوكت وشنو الي غير رأيه وقرر يوافق على جلال اتوقعت بعد كل هاي المواقف الي صارت وياه من خطف وتعذيب على ايد داعش ان علاقة مهيمن وجلال بعد حلم ترجع واحتركت جميع الجسور بين مهيمن وجلال وخاف قبل بس كان رافض يزوجه حور هالمرة مو بعيد يحرم شوفته حتى علينا لكن اعلان مهيمن قلب كل الموازين واتأكدت بهاي اللحظة ان اكو شي صاير بين مهيمن وجلال بفترة اختفاء مهيمن خلة مهيمن هيج يغير رأيه بي وفعلاً انا لاحظت هو من رجع لليوم ماجاب سيرة جلال لابزين ولا بشين الكل فسر تجنب مهيمن عن الكلام بجلال وان سبب سكوته خجل وتهرب من سواية اخوه بس تصرفات مهيمن تبين العكس الظاهر هذا الشي الصار بينهم قوى علاقتهم وخلاها تصير احسن جنت واكفة على اعصابي كوة لازمة روحي لا اضحك واروح اركض ابشر حور حاولت انسحب من يمهم بس استوقفني كلام خالة زهرة وية اخوها ..احلفج بالله تقبليها على مهيمن يفشلني كدام الوادم ويرفض سجاد ابني موعيب عليه يجذب ويگول حور مخطوبة لجلال جاوبته بكل هدوء .. والله يا ابو سجاد مهيمن ماجذب صحيح كلامه فعلاً جلال قبل لا يسافر طلب حوراء من مهيمن .. واحنا ليش ما عدنا علم ليش محد كال منكم .. جنا مأجلين كل شي لحد ما يرجع الولد من سفرته كام ابو سجاد من مكانه ونتر بيها ووكال .. ولج زهرة لاتخبليني يعني انتي مقتنعة بحجي ابنج يعني عادي عندج تزوجين بتج لواحد ارهابي نهضت من مكانها ورى اخوها وكالت بأصرار .. انا واثقة من اختيار مهيمن لان هاي اخته وماكو واحد احرص منه على اخته فهو اعرف بمصلحتها وين ووية منو فأكيد راح اوافق على قراره وانا مغمضة لان وليدي هو نفسه ابو بيتي وعمره ما خذلني شال حملنا و مسؤوليتنا انا واخته وما بيوم طلعت منه العيبة ابو سجاد زمخ بيها .. والله عمي صدك انتي وابنج مخابيل ماعندكم عقل يعني ترفضين ابني سجااااااااد ابن الدواوين المتعام الدارس ابن الاصول وتفضلون عليه واحد ما ينعرف اصله من فصله ارهابي انگس ما خلق الله بس تعرفين شنو انتوا هذا مستواكم خريج السجون الارهابي بالله كوليلي مهيمن من يعزم الناس شنو يكللهم زوجت اختي لارهابي وصخ خريج سجون بالله اريد اشوف اليوم الي تعرسين لبتج والناس تأشر عليكم هاي اصلا اذا سوالها عرس مثل الخلگ والعالم ارهابي مطلوب للحكومة وين تلكينه وتزوجينه جان يحجي بتشمت والله گلبي حقد عليه وطلعت من الهول ما اتحملت اسمع بعد اكثر اكيد يحجي هيج من غيرته وحقده بس ما علينا اهم شي مهيمن وافق على طلب جلال لحور ابتسمت حور وينها خلي اروح ابشرها لكيت رجلية ماخذتني يم حور بالمطبخ لكيتها جاي تصب بالجاي شافتني وشالت الصينية. وكالت .. هاي هي خلصت اكيد امي دزتج وراي حتى تستعجليني علمود الجاي جانت تحجي وانا الحلگ مشكوك من الفرحة .. لج حور عندي الج خبر هسة اذا عرفتي يمكن يغمى عليج من الفرحة حور اقتربت مني وسألتني بفضول .. شنو .. شنو بس كوليلي منين سمعتي بالخبر المفرح .. من خالج ابو سجاد عفست وجها وكالت.. اهووو مادام الخبر المفرح منه ما اريده هذا ما يجي منه غير بس دوخت الراس هو وابنه ابتسمت وكلتلها .. يعني خبر اعلان موافقة مهيمن بخطوبتج لجلال تشوفيها دوخة راس ؟؟؟ شهكت ووكعت الصينية منها بالكاع وصار طشارهم ماله والي كلش وية طلعت ابو سجاد من البيت دخلت خاله زهرة وشافت منظر الاستكاين والجاي ونزلت على حور بالحجي وطلعت حرگة كلام اخوها براس حور الحلو بالموضوع ام مهيمن ترزل وحور توزع ابتسامات عبالك جاي تهنيها مو ترزلها .. ولج حويرة عليمن تضحكين فرحانة على صخام وجهج حور جاوبتها ولهانة .. يمة فرحانة لان الواحد مو كل يوم توكع منه هيج صينية ستكاين خالة زهرة بقت مصفصفة احتارت شتجاوبها وكالت .. خايبة توخرين من كدامي لا اجي امسح بيج الكاع مهيمن بعدما كملت اموري واتطوعت للحشد الشعبي اتصلت على الضابط علي وانطيته خبر بقدومي للموصل كلي .. تعال يمعود احنا بحاجة كل واحد عنده غيرة على ارضه يجي يقاتل ويانا كمل امورك وتعال رحت للمحل لكيت طالب مبسط هناك اريد اكمل مراجعة السجلات والديون وياه قبل لا اسافر وافهمه شنو يسوي لو عناد هنا جان ما يحتاج اكعد اعلم طالب هو يعرف بسياق الشغل بس هو وين مرت اربعة ايام وهو ماكو بيني وبينه بس اتصالات وبالگوة احصله وعلى طاري عناد دخل الحجي ابو حيدر للمحل وسلم علية وكال .. شنو قضيتكم لاتنشافون ولا نسمع عنكم خبر يعني ما تجي الا علمود الشغل تكمل حساباتك وياي وتروح .. اعذرنا حجي حقك علية والله الدنيا مدوختني ما تنطيني مجال اخذ نفسي .. الله يساعدك كعد يمي بالنص ساعة يسأل عن احوالي واحوال جلال ابو حيدر الوحيد يعرف بسالفة جلال لان بعد ما وصله الكلام والاشاعات اجاني بالليل لوحده وسألني وكال .. تعال گلي اخوك بشنو متورط وليش انا اخر من يعلم احجيلي يابعد عمك انتوا امانة الغالي بلكي الحك اسوي شي ابرر غلطة اخوك للناس اعين محامي شاطر اي شي المهم ما يبقى مطلوب للحكومة فهمني شنو الموضوع بالضبط حاولت اتهرب من اجابته وكلتله .. حجي ملثما سمعت انا هم حالي حالك سمعت نفس الكلام والاشاعات الي انت سمعتها .. شلون ما تكلولي عالصار شنو شوكت اخوك لحگ يمشي بالطريق الاعوج ووين لكة الدواعش وصار عميل الهم شنو يعني معقولة انت مصدگ هذا الحجي ترة الموضوع محير انت ما سألت نفسك شنو الشي الي يخلي واحد شاب مثل جلال الله فاتحها عليه من كل شي جاه ومال. وجمال وشباب شنو الي يخليه يعوف كل هذا ويروح يشتغل وية داعش ترة والله شغلة ما يشيلها العقل بلحظتها باوع علية بأستنكار وكال .. لاتكلي عبر عليك اتهامهم لجلال وصدگت بحجيهم هزيت راسي برفض يعني حتى الحجي ابو حيدر كدر يعرف بجلال مستحيل يمشي بهيج درب وگبل كذب الخبر وبليلتها اضطريت احجيله عن سالفة جلال كلها واخذت منه وعد الكلام الي سمعه بخصوص جلال يبقى سر بيني وبينه حفاظا على حياة جلال وسلامته سألني وعيونه بيهم لمعة فخر .. اكولك وهذا عنيد عنده علم بسالفة جلال لو لا جاوبته وانا بعدني ما اعرف عناد شلون عرف بجلال ضابط .. اصلاً عناد طلع يعرف بالموضوع قبلنا كلنا بس ما اعرف شلون ومنين عرف انتبهت من صفنتي على ابو حيدر كعد كدامي وكال .. اكلك بوية ما تشوفلنا هذا صاحبك ابو راس اليابس وتگعد تعقله والله ملينا تصدك امه صارلها يومين ساكنة المستشفى كلبها يوجعها اتخربطت علينا كله من وراه اتذكرت موقف عناد وضوجته من كلمة كله من وراك كلتله .. عمي اخذها مني نصيحة اذا تردون تشوفون عناد يرجعلكم ويتزوج ويستقر بحياته بطلوا من كلمة كله من وراك لا تكعدون بالطالعة والنازلة تسمعونه هاي الحجاية صدگني اذا عفتوه براحته هو من وحده راح يجيكم ويكوللكم اريد اتزوج تعالوا خطبولي غمض عيونه بتعب وكال .. والله احنا نحجي وياه هيج من زود حرصنا عليه كنا نسولف وجان يدك نقال الحجي ابو حيدر وكان المتصل حيدر فجأة كام الحجي .. يصيح بصوت فرحان .. ولك حويدر احلف صدك عناد رجع بالسلامة سكت يسمع الكلام من حيدر وبعدها انهى الاتصال وباوع علية بلهفة وكال.. وجهك خير علية صاحبك رجع سالم من الموصل الف الحمدلله سلم علية بسرعة وراح بلهفة يريد يشوف ابنه رجعت كعدت على الكرسي براحة على رجوع عناد سالم وجريت حسرة وانا اندعي ربي يفرجها على اخوي يرده الي سالم صارت شوفته اعز امنياتي خلصت شغلي وية طالب ورتبت جميع امور واتفقت وياه باجر يفرغ نفسه حتى نروح لصاحب خالي حسن الي يبيع بالاسلحة اريد اشتري سلاح وصلت للبيت ولكيت امي طالعة من البيت وحور جاي تدرس سألتها كالت امي راحت لبيت خالي حسن والبنات ريم ونور فوك صاعدات رحت صعدت فوك لغرفتي حتى احلل ملابسي وصلت يم باب غرفتي ولفت انتباهي صوت ريم تبجي وكلام غير مفهوم اتجهت على مصدر الصوت الي كان بالمخزن اخذني الفضول اشوف شنو شبيهم بس لايكون صاير شي عليهن اجيت ادخل بس استوقفني كلام ريم جانت تبجي وتحجي وية نور اسمعها تكوللها .. نور الله يخليج كافي بجي لاتصعبين علية الامور انا لازم اسافر نور جاوبتها.. ريم لخاطر العشرة احنا محتاجينج ريم جاوبتها .. نور حبيبتي اذا صدك تحبيني المفروض ما ترضيلي الاهانة بعد اتهامات مهيمن اطلع اكبر غبية اذا قبلت على روحي ابقى اعيش هنا ببيته وانا ادري بي يشوفني بعين الصغيرة ويتوقع مني اخرب اخلاق اخته بأخلاقي الطايشة الي جبتهم وياي من الخارج شنو نور نسيتي حجي مهيمن احلفج بالله لو انتي بمكاني ترضينها على نفسج احد يعيرج بحياتج الي عشتيها بالخارج اي مهيمن كانت هاي مهمته يحجي وينتقد تصرفاتي بالطالعة والنازلة وبكل تصرف يبدر مني بتلقائية ينسبه لحياتي بالخارج اريد اعرف اكو واحد كايله الي يسكنون بالخارج طايشين واخلاقهم فلتانة كلام ريم رجعني بالزمن يذكرني باكبر هفوة غبية ارتكبتها بحياتي بحق ريم ما اعرف شصار بحالي من جابت سيرة السفر غمضت عيوني بصبر مصيبة جلال شدهتني نستني حتى اسمي وخلتني اغفل عن الصار انا ما ناسي سوايتي بريم بس بكل ضني بعد الصار بينا من مصايب والشدايد كدرت تنسينا مشاكلنا وتجمعنا سوية اتوقعت كلبها ما ينطيها تعوفنا ولغت سالفة سفرها بس اثاري جرح الي بالكلب يبقى ينزف اذا بقى متروك محد يضمده وانا شكلي اتعديت حدودي وقاطع حبل الوصل بيني وبينها ما مخلي خط رجعة او شي يشفعلي يمها جنت واكف استمع لصوت بجيها وفاجئتني نور من طلعت من الغرفة وصارت بوجهي وشافتني وما حجت شي بس نظرات عيونها بيهم ادانة ولوم مشت وعافتني وراحت دخلت لغرفتي ورحت وراها بس دخلت هي سدت الباب وكالت .. انت شنو سالفتك يا اخي اتحرك اتصرف ريم راح تسافر كله بسببك اتصلت على المحامي ابو سيف وهسة خلصت الاجراءات وماعندها شي يمنعها من السفر روح احجي وياها اعتذرلها ليش احس بيك كلبك صاير صخر ما عندك احساس ولا تعرف شنو الاعتذار والتكفير عن الذنب جاوبتها.. شنو ترديني اسوي على گولتج اذا اخوج الحجارة حط ايده على شي كون يكسره .. يعني حضرتك تعرف بس تكسر الگلب متعرف شلون تجبره روح احجي وياها اعتذر منها انطيتها ظهري وطلعت من الغرفة وكلت .. انا اعرف شلون اخذلها حقها من عندي وارجعلها كرامتها يتبع | ||||
|  |
|
30-09-19, 10:26 PM
| #62 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| البارت واحد وثلاثون ج٢ #الكاتبة_نهى_الحسون #قضية_لم _الشمل صباح الانوار عليكم احبتي كما وعدتكم بتنزيل بتكملة الاحداث البارت. 🌹🌹🌹 ريم اتصل علية عمو ابو سيف وبلغني بموعد سفري حسيت الدنيا ظلمت بعيني وضاقت بية الواسعة كنت انتظر مهيمن يرجع للبيت حتى ابلغه بموعد سفري لان عكب باجر عمو ابو سيف يجي علية ياخذني لبغداد مناك اسافر من مطار بغداد الدولي نور اذتني بدموعها وصرت احاول اقنعها بصحة قراري وان اني حتى لو ابعد عنها راح ابقى وياها على تواصل وما اتركها بس كل هذا ما فاد وياها وخلاها تقنع اذا هو انا بنفسي ما مقتنعة بكلامي النقال ما يطفي نار الفراق ولا يبرد حرارة الاشتياق نزلت نور وتركتني لوحدي بعدما عجزت مني بقت لوحدي كاعدة بالمخزن ما اريد انزل ما يهون علية اشوف نظرات حور وام مهيمن او اكعد اشوف عاين البيت واركانه عشت ١٨ سنة وية عمو ما يوم بحياتي حسيت بالحنين او انقهرت على فراق مكان او اشخاص اتعودت اتنقل وياه من مكان لمكان اماكن سكنا كانت كلها راقية بس باردة خالية من الالفة والمحبة عكس هذا البيت صحيح عشت بي سنتين بس ترك بگلبي اثار الي بكل ركن منه ذكريات هنا بهذا مكاني الي انا كاعدة بي بالذات قبل لا يبني مهيمن اتذكر جلال شلون كعد يعلمني شلون تمشي البنية الرزنة هناك بذيج الزاوية جلال جابلنا بيتزا انا والبنات واتجمعنا سوية ناكل ونضحك كمت من مكاني وطلعت برة الغرفة وانا امشي ورة طيف الذكريات و لمعت عيوني بصف غرفة مهيمن هنا اتذكر كعدنا اول مرة انا ومهيمن وحطيت راسي على كتفه وگلي تعالي يابعد عمج احلى كلمة بحياتي سمعتها خنكتني العبرة وجريت حسرة اي ريم هاي هي حانت ساعات الفراق وصفى كل واحد بينا بمكان جلال مهيمن اني ونور سمعت صوت الجرس يندك واتبعه صوت ام مهيمن تسأل نور منو بالباب جاوبتها نور مستغربة خالة هذا مهيمن وعمو حسن ووياهم ورجال معكل حور جاوبتها .. يمة هذا الشيخ لفتة جاي وية خالي حسن غمضت عيوني مهيمن ما جاي اكدر احصله طول الوقت ما موجود حتى ابلغه عن سفري اريد اودعه بعيوني واشبع منه شوف بس شكله يستكثر علية حتى شوفته سمعت صوته وانعصر گلبي بعد ما اسمع صاحب هذا الصوت الحياة خلتني امام خيارين واحدهم امر من الثاني اما ابقى يمهم وانا اعرف بروحي مو مرغوب بوجودي بين امه واخته او اسافر اتحمل مرارة فراگهم انا فضلت الانسحاب واحافظ على يقايا ماي وجهي المهدور سمعت خالة زهرة تسأل مهيمن عن سبب جية الشيخ لفتة هو واخوها بهيج وقت من الليل جاوبها وكال بستعجال .. بعدين تعرفين يمة بس صيحولي ريم خلوها تجي تدخل يمنا بالاستقبال اريدها بشغلة مهمة امه سألته .. شنو يمة تدخل عليكم يم الشيوخ ولك احجي شنو صاير شبيها ريم ارتعد گلبي مستغربة طلبه شيريد مني مهيمن صعدت حور ولكتني واكفة بنهاية الدرج وكالت .. ريم تعالي نزلي جوة مهيمن يريدج بشغلة مهيمة نزلت اريد اروح ادخل للاستقبال وخالة شافتني وكالت .. اوكفي خالة لبسيلج عباية عيب تدخلين على الشيخ ببجامة البيت انطتني عبايتها وانا مستغربة من كل الي كاعد يدور حولي طلع مهيمن وشافني ولمعت عيونه .. هَـا ريم تعالي دخلي اريد احجي وياج بموضوع اجتي خالة زهرة لبست عبايتها تريد تدخل وياي استوقفها مهيمن وكللها .. لا يمة الموضوع يخص ريم اريده بيني وبينها وبين الشيوخ خالة زهرة بقت تباوع علينا والفضول يريد يطفر من عيونها حتى يدخل ورانا بالاستقبال وتشوف وتعرف شنو الموضوع اجة وگف كدامي وعدل العباية على راسي وعيونه بيهم نظرة اصرار محارب ممزوجة ب لمحة قلق دخلنا وسد الباب وراه سلمت عليهم وردوا السلام جان خاله حسن لابس الشماغ والعكال والبشت والشيخ الثاني الي كان اسمه لفتة هم لابس نفس الزي الخاص بالشيوخ الكبار خاله حسن اول ما شافني كال .. هلا يابعد عمج تعالي كعدي يمنا واستريحي عدنا سالفة وياج انا والشيخ لفتة جبير عشيرتنا باوعت لمهيمن مرتبكة الشيخ لفتة كانت نظراته مثل نظرة صقر حادة وكأنما يشوفني صورتاً ومضموناً لاول مرة اتهرب وما احط عيني بعيون شخص عبالك يقرة افكاري مهيمن جلى صوته حجة وية الشيخ لفتة وخاله حسن وكال .. شيخنا هاي بت عمي الي حجيتلكم عنها الشيخ لفتة ابتسم وباوع علية وكال .. شوفي بنيتي خلي بالاول اعرفج على نفسي لان انتي ما تعرفيني واول مرة تشوفيني انا الشيخ لفتة جبير عشيرتهم احتاريت شنو اجاوبه يعني ما اعرف شلون الواحد يحجي وية الشيوخ يعني احجي وياهم طبيعي لو اكو قواعد بالكلام من احجي وية الشيخ لان خال مهيمن هو صحيح شيخ بس اني اعرفه ومتعودة احجي وياه بس هذا الرجال ما اعرف شلون احجي وياه لان افتهمت من خلال خبصة ام مهيمن واحترام مهيمن وتقديرهم لهذا الرجال حسيت انه شخص مو عادي هيج كونت فكرتي جاوبته بصوت ناصي وكلت .. هلو عمو تشرفت بمعرفتك هذا كل الي كدرت عليه حسيت ان كل المعاني والمفردات الي باللغة العربية بكبرها اتبخرت من عقلي خاله حسن التفت على الشيخ وكال .. شيخنا اعذرها ترة هي ما تعرف بكلام الدواوين ومخاطبة الشيوخ رمشت بعيوني مستغربة مستغربة كلام الخال حسن الشيخ لفتة جاوبه .. خليها براحتها هو اصل الكلام بالديوان مبني عالاخلاق والاحترام هذني اهم خصلتين لازم الواحد يتحلى بيهن قبل لا يكعد يم الشيوخ اما طريقة كلامه واختيار الالفاظ فهذا راجع للشخص كلمن وحسب ماتعود على طريقة كلامه رجع باوع لمهيمن وكله .. احجي بوية اتفضل مهيمن باوع علية وكال.. شوفي يابت عمي انتي عندج حق عرب يمي واريد اخذ حقج مني كدام هاي الناس الخيرة احنا من عوايدنا اذا اتخاصمنا وية واحد عزيز علينا وخشنا خاطره حتى نراضيه نروحله ونتعناله وناخذله جاهة وشيوخ لحد داره حتى يطيح الحطب ويعرف بكبر مقداره ومعزته عدنا وانا لجأت لخالي الشيخ حسن وجبير عشيرتنا حتى يصيرون واسطة خير بيني وبينج جان مهيمن يحجي وانا گلبي وية كل كلمة يرفرف كمل الشيخ لفته على كلام مهيمن وكال .. واحنا يابنيتي اليوم اجانا ابن عمج ووكع برگبتنا وطلب منا نجي وياه لبيته حتى نراضيكم حجيت وية الشيخ وانا اباوع لمهيمن متفاجئة معقولة هو سوى كل هذا علمود يراضيني سألت الشيخ اريد اصدك اذني وكلتله .. عمو هو كللكم شنو حجة وياي وليش انا زعلت منه جاوبني الشيخ.. جا شلون اجينا وياه لهنا اذا ما عدنا علم بالدار بينه وبينج ابتسمت اتسامة رضى وحطيت عيني بعين مهيمن وكلتله .. يكفي انك اتنازلت من برجك العالي واعترفت بغلطك كدام الشيوخ هذا موقفت بحد ذاته فعلا ردلي اعتباري. مهيمن ابتسم بأرتياح .. انا سويت هيج لان انا اتعديت عليج وطعنتج وشككت بأخلاقج والاصول تكول ان انا لازم اردلج اعتبارج لذلك جبت خالي والشيخ لفتة علمود يابت عمي انتي علم ورايتج بيضة ياريت تحنين علية وتشرفيني وتبقين ببيتي وما تسافرين وتعوفينا كلي وعيونه بيهم لمحة اغاثة .. ريم انا بحاجتج تلزمين بيتي من بعدي وتبقين يم امي وخواتي انا اتطوعت بالحشد الشعبي وراح اسافر للموصل واحتاج وحدة قوية مثلج تحافظ على بيتي من بعدي اريد اروح للجبهة وانا متطمن عايف بيتي وانتي موجودة بي اتحولت فرحتي برد الاعتبار الى خوف وفزع وسألته .. مهيمن انت شكاعد تحجي شنو تسافر للجبهة جنت احجي وياه مرعوبة ناسية مكاني والشيوخ ودموعي نزلت بجزع خايفة من المصير الي ينتظر اولاد عمي مهيمن كنت اگلب السلاح بيدي اعاينه وكعدت اتفحصه سويتله تفكيك قطعة ورة قطعة بكل سهولة انا متعود على الاسلحة ورجعت ركبت القطع مرة ثانية عشت طول عمري يم خوالي ايديهم ابد ما تخلى من الاسلحة من صغري وخالي حسن علمني شلون استخدم السلاح احنا ما عدنا ولد يكبر ويشب بدون ما يكون متعلم على حمل السلاح جنت ببيت الرجال الي يصير صاحب خالي حسن هو الي جهز نص شباب منطقتنا بالسلاح حتى يتطوعون اغلبهم يشترون منه لذلك خالي حسن من عرف بية اريد اتطوع نصحني اروح لصاحبه. طالب جاي وياي وجان واكف يمي ويباوع للسلاح بيدي وسألني .. يعني هاي هي نويت وراح تسوي الي ببالك جاوبته .. اي والله نويت وقافل عالقضية محد يكدر يغير رأيي رايح ورة اخوي اتعقب اثاره بالدرب وامشي على خطاه جنت بعدني اعاين السلاح واگلب بي گلت للرجال .. هذا هو اعتبرني اشتريته منك بس اريد مخازنه وذخيرة جاوبني .. اكيد من غير ما تكول بي مخزنين احتياط والطلق مالته متوفر غلفه الي بقطعة قماش بيضة كان السلاح نوع بندقية (بي كي سي ) بالطريق بعدما اشتريت السلاح طالب باوع علية وكال .. مهيمن تدري اليوم عمتي زهرة دزت علية للبيت وكلتلي تعال يمي اشربلك استكانة جاي مشتاقتلك هو گال هيج انا ضيگت عيوني بحذر وكلت .. لا طالب لا تكولها كل شي ولا امي تعزم احد على استكان جاي (امي اذا جانت تريد واحد بسالفة او عندها موضوع قوي او مصيبة جاية بالطريق گبل تروح عالمكرود المشتاقتله الي يوكع عليه الاختيار وتحجي مقولتها الشهيرة (مشتاقتلك عنيت علية صارلي هواي ما شايفتك كول هاي عمتي خطية اسأل بيها امر عليها اشرب يمها شوية ستكان جاي ) ولا مو بس هيج وتحجيها بكل بلطف وحنان ) جاوبني بصوت مغلوب على امره .. هو محد عم علينا غير هذا استكان الجاي عبالك صافرة انذار لو تشوف ابوي من سمع عمتي زهرة دازة علية مشتاقتلي حتى اشرب يمها استكان جاي گبل دار علية وسألني .. هَـا ولك طويلب شمصخم وعمتك عزمتك على استكان جاي ولا وبعد. فوكاها مشتاقتلك. يعني السالفة جايدة خو امي بس باوع عليها ابوي بتسائل گبل رفعت ايديها بأستسلام كدام ابوي وكالت .. لاتباوعلي هيج انا كلشي ما سويت مو تكعد تخزرني بعيونك هي كالت مشتاقة لأبنك مو الي معناها انا رايتي بيضة راضية عني ما ادري اضحك لو ابجي على سوالف امي حثيته حتى يكمل كلامه. .. اي كمل وشنو رادت منك من رحتلها للبيت .. استقبلتني بالترحيب والسلام الحار بحرارة الجاي وصبتلي استكان الجاي المهيل يعدل المزاج واتربعت كدامي وباوعتلي وضيگت عيونها وكالت .. شوف طويلب اسألك وتجاوبني اريدك تگلي مهيمن ليش يريد يشتري سلاح شعنده بي معقولة عنده طلابة وانا ما ادري سألتها جنت كاعد كدامها و متربع مثلها وقلدت صوتها .. وانتي منين سمعتي مهيمن يريد يشتري سلاح نترت بية وكالت .. خايب طويلب تحجي عدل لا ادير فجك ولك اعرف بيك كلش زين صاير بيت اسرار لمهيمن ومو بس بيت وكاعد تطمطم له وتضمضم عني حتى تسلك امور ابن عمتك بس انا ماعلية هذني السوالف ما يعبرن علية كلي من الاخير مهيمن شيسوي بالسلاح .. وانت شجاوبتها .. بعد شجاوبها امك اذا لزمت واحد ما تهده الا وهو زايع الاكو والماكو وانا ابن خالك مو حمل كلام عمتي على رگبتي مثل السيف اذا هو ابوي الشيخ حسن بكبره يسويلها الف حساب وما يرفضلها طلب تريدني انا ارفض وابقى صامد اقاومها .. يعني افتهم من كلامك امي كدرت تسحب لسانك وعرفت انا شسوي بالسلاح .. شوف هذا خايب جان زين اذا بس على سالفة السلاح نترت بي .. ولك خايب طويلب اجمد وگلي شخبصت شسوتلك وانت هيج رحت مسلم مفتاح لسانك الفاهي طالب جاوبني بذنب .. بالحقيقة هي ما سوت شي هي بس شمرتلي گشر موز وانا اتزحلگت ومن بعدها ما حسيت الا ولساني انحلت عقدته تكول دكمة مسجل وشغلتها والحمدلله ابن خالك كت الاول والتالي وما بقيت شي يعتب علية وانا اخوك نجر ذيب هي تجرجرني بمصيبة اروح انا فاتحلي عشر مصايب من ورة الجفصات وامك متونسة على شطحات لساني وداعتك مو شربت استكان جاي طلع عبالك شربت بطل بيرة وهيج انا اتفرهدت منا علما طلعت من بيتكم عمتي زهرة عصرتني عصرة معدلة هسة لو تنفضني ما تلگة ولا سر باقي بگلبي الك كلهن زعتهن يم امك الله اتخيل حتى على سفرتك مالت الموصل وعلى تطوعك عرفت وحتى على روحاتك للشغل هم درت بيها اكلك ما بقيت شي ما كلته .. لا ونوب يحجي بكل ثقة هسة كون مال انطيك دفرة تعدل فهاوتك والله عرفت بيك اثول ما راح تدبرها انت مو مال واحد يكدر يعتمد عليك جاوبني .. بس تريد الصدك فد ارتاحيت من حجيتلها عبالك طابوكة وحاطيها على گلبي دخيل الله حمل الاسرار والله ثكيل متعب. يا اخي يحتاجله قدرة خارقة وخصوصاً من اوكف يم امك وانا حامل السر احس بروحي عبالك مهرب مخدرات ساعة الساعة يلقون علية القبض .. خايب توخر من كدامي لا افرغ هذا الشاجور براسك ينعل بليسك انت شنو من كارثة نور اباوع لخالة زهرة تحوم بالبيت معصبة وحالتها حالة تروح منا وتجي منا وتحجي وية روحها سألتها.. شنوخالة شبيج صاير شي ضربت كفوف ايديها على رجليها وكالت .. ليش هو شنو الماصاير اثاري طلع الماي يمشي من جواي وانا ما ادري جانت تحجي معصبة .. خالة لاتعصبين مو زين على ضغطج لزمت ايدها بهدوء وسحبتها وكعدتها .. احجيلي شنو الموضوع .. شحجي وشكول اخوج احتار شلون يجلطني يريد يموتني بس ما يعرف شلون بيا طريقة موتي .. اسم الله عليج خالة على كيفج وية روحج انتي تعرفين مهيمن رجال جبير مسؤل عن تصرفاته خلي براحته .. ولج خالة شلون اعوفه يتصرف بكيفه ولج اخوج اتطوع ويريد يسافر للموصل هالمرة انا الي جمدت بمكاني وانصدمت وسالتها بخوف .. ششنو ليش يريد يسافر زين واحنا منو النة. وشوكت قرر اشو ما سمعنا ولا كللنا .. هو هذا الي راح يموتني مقرر وناوي ورايح مشتري سلاح حتى يجهز روحه كل هذا سواه بدون علمنا واحنا ياغافلين الكم الله خالة كانت تدردم وانا بدت المخاوف تتسرب لداخل عروگي مثل الحية نفضت راسي اطرد غيمة الافكار السودة ابي تحاول تسيطر على عقلي لا مستحيل ما اسمح لهاجس الخوف يتمكن مني سحبت نفس عميق اطمن نفسي .. مهيمن اخوي مستحيل يعوفنا وهو يعرف كلش زين احنا ما عدنا غيره. ويعرف بحاجتنا اله اباوع عليها سحبت نقالها واتصلت على اخوها حسن وحجت وياه وكالت .. يا خوية مع الاسف عليك. ليش انا مو اختك امانة ابوي عندك سالها.. خيرج خوية زهرة كليلي شنو الصار كالت.. يا خوية بعد شنو الي يصير وليدي يريد يسافر للموصل واسمع بخال ابني يوديه بيده يشتري سلاح والله هاي ما مرجية منك هاي بدال ما تكعد وياه وتعقله وتوصي على امه وخواته. جاوبها .. شوفي زهرة انا الي اعرفه عنج انت مرية مؤمنة وتأمنين بالله انتي تعرفين كلش زين مهيمن رجال وشوره من راسه على خواله ما يوم اترددنا بطلابة الحق تلكينا للينخى اول الناس حاضرين اذا اقتنع ونوى على امر فلا تتوقعين احد يكدر يردعه والمشكلة ما اكدر الزمه واكعد اعاتبه انا الي علية نصحته وفهمته بس شكله هو قافل عالقضية وهالشي المفروض تفتخرين بي هذا انا كدامج ولدي اثنينهم اتطوعوا و الاسبوع الجاي منتظر ومنتصر يسافرون للموصل حتى يلبون النداء ما اجذب عليج واكلج انا ما خايف عليهم بس بنفس الوكت مودعهم بيد الله الذي لا تضيع ودائعه حطي عينج بعين الكريم هو احن منج ومني على اولادنا ولطيف بعباده احنا ما بيدنا شي نسوي غير بس نمنحهم رضانا لان رضى الله من رضى الوالدين والام اذا رضت على ولدها الله يرضى عليه والراضي عليه رب العباد تتيسر اموره دنيا واخرة وتترتب حياته كدر عمو حسن يهديء من مخاوف خالة زهرة وشوية بدت تتقبل الامر نوعاً ما انهى كلامه وياها وكال .. هسة اريدج تصلين على نبيج وتعوفين عنج سوالف العرضة لطريق ابنج مو زين عليه .. ياخوية لا تحاول وتتعب نفسك وتقنع والدة تبطل خوف علًى ولدها وهالشي محال من تشرق الشمس من الغرب ساعتها الام تبطل خوف على ابنها .. ميخالف انا ما طلبت منج متخافين عليه بس اريدج تصيرين قوية الله وكيلج ترة انا حالي اضرب من حالج انتي اذا واحد فأنا اثنين راح يسافرون وبعدها اتبادلوا الادوار وصارت خالة زهرة تدعي لاولاد اخوها بالسلامة والحفظ وتواسي اخوها يتبع اتمنى لكم قراءة ممتعة اختكم نهى الحسون | ||||
|
| |
|
01-10-19, 04:20 PM
| #63 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #قضية_لم_الشمل #البارت_اثنين_وثلاثين_ج2 #الكاتبة_نهى_الحسون ريم رغم الخوف ورغم الالم نشوف هناك بزواية من حياتنا بيها بصيص امل ولو قليل لازم نستغل وجوده لابعد الحدود رغم خبر سفر مهيمن وللحشد الشعبي وخوفي عليه سلب فرحتي بمصالحتي وياه يعني مهيمن بموقفه هذا اثبت لي انه انا شخص مهم بحياته وهو ندمان على غلطه بحقي جاب خاله والشيخ حتى يراضيني ويرجعلي حقي وطلب مني ما اسافر وابقى يمهم كل هذا دليل حبه واهتمامه بية مرات الافعال تغنينا عن الف كلمة حب وافعاله هاي كانت اعتراف بحبه الي بدون ما يكول طلعوا الشيوخ ومهيمن طلع وياهم بسرعة واتصل على طالب يگله انتظرني انا جاي بالطريق حتى نروح نشوف عناد رجع بالسلامة من الموصل نور سألته بلهفة بدون ما تنتبه على نفسها .. صدك والله !!!!! عناد رجع سالم مهيمن جان منطيها ظهر متوجه للباب يريد يطلع ورة الشيخ وخاله وجاوبها .. اي والله رجع بالسلامة وابوه مسوي عزيمة عازمنا كلنا جماعة عناد واهل السوگ حور لكزتها وكالت.. ولج نويرة فضحتينا بين العربان انخبصت من يمها وصارت ما تعرف وين تنطي وجهة قطع علينا كلامنا سؤال خالة زهرة .. اكول خالة ريم شنو سويتوا جوة بالديوان وليش بس انتي دخلتي احجي شنو هو الموضوع جانت تحجي والفضول وصل حده عندها احس بي كام يكمز من عيونها مو بس ينط تريد تعرف شنو الي صار من وراها جاوبتها .. خالة خلي يجي مهيمن وهو يحجيلج احسن نور لكزتني وهاي الثانية هم انتقلتلها عدوى الفضول من خالة زهرة حجت بصوت ناصي .. شنو شبيج احجيلنا نريد نعرف شعنده الشيخ هنا .. انتي هم انتظري مهيمن وسأليه جنت احجي واوزع ابتسامات رغم كلامه الاخبر بسالفة السفر خوفتني بس هذا ما يحرمني من فرحتي برجوع مهيمن الي حور .. خير ست باربي هسة الي يسمعج يكول اسرار البيت الابيض عمي احجلينا لا اهد علج زهرة وتطلع لج عنجورة جديدة بالجهة الثانية من كصتج واخليهم يصيحولج بالمنطقة ام گرون رديت عليها.. لا تعبين نفسج ما راح اكدر احجي لان هو لو يريد امه تعرف بالصار كان خلاها تدخل ويانة بالديوان فالاحسن انتظروه يرجع وسألوه كلبت عيونها وهزت ايديها وراحت لنور صاحتها .. نورة حبيبتي تعاااااااالي خلي نروح يم امييييييي زهرة كامت تجر بالكلام وتلحن بي عبالك طفلة تريد تستفز صديقتها غمضت عيوني وهزيت شعري بدلع واني اتذكر كلام مهيمن وكلبي يريد يطك من الفرح ما مصدكة مهيمن رجع لي وما انطاه گلبه اسافر واخليهم لوحدهم صرت اوزع ابتسامات وانا اتخيل مهيمن يحبني ويخاف علية رحت وراهن دخلت للهول لكيت خالة زهرة وحور ونور كعدوا على صفحة يتبسبسون بينهم ويباوعون علية والوجوه مطنكرة ابتسمت على شكلهن وحور كالت .. يمة شنو رأيج نكوم عليها انا ونور ونربطها الج هنا يمج وتكعدين تستجوبينها ام مهيمن لمعت عيونها بتفكير ونور ضحكت وكالت وهي ترفع اردانات الثوب وكالت اني ما عندي مانع الزم رجليها وانتي ايديها كامن من مكاناتهن والنية مبينة من عيونهن اسمع حور تغني ( يختي عليها ويختي عليها دي جت برجليها دي جات برجليها ) اني كمزت من مكاني متعثرة وعطت بيهن واني ارتد للخلف واتوعدلهن واشرلهن بتحذير باصبع السبابة .. والله الي تفكر تلمسني اشتكيها لمهيمن يعلكها بالبنكة خالة زهرة صاحت ولج حويرة العوبة خرعتي البنية هسة تصدك حور مشت بأتجاهي وكالت .. شنو شبيج زهرة شبسرعة گلبتي علينا ترة بعدها ما اشتكتنا لمهيمن ما انطيتها مجال تكمل هاي حور مخبلة تسويها رحت ركضت ودحلت للغرفة وانا متحلفة بيها ورة ساعتين رجع مهيمن للبيت بقيت بالغرفة م مستحية ما عبالك اول مرة راح اشوفه لان اتصالحنا. سمعت ام مهيمن تكله تعال يا ابن بطني وفهمني صايرة هنا بالبيت مثل خراعة الخضرة لا اهش ولا انش والماي يمشي من جواي مهيمن كللها.. شنو شبيج يمة منو دايسلج على طرف وانا ما ادري كليلي امه جاوبته .. هو انا وين اشوفك واكلك اذا انت صاير ماتنشاف تعال گابلني واكعد احجيلي شنو هذا الحجي السمعته تريد اريد تتطوع للحشد جا يمة وانا وين رحت كعد مهيمن يحجي لأمه عن قراره ونسته ويطمنها وامه تحجي وياه بخوف تريده يتراجع بكلامه وانا بس سمعت بطاري سفره طلعت من الغرفة ورحت يمهم شافني وابتسم جان كاعد يم امه. وحور ونور عيونهن تتنقل مني لمهيمن خالة زهرة بس شافتني باوعت عليه وكالت.. بالله تعال گلي سالفة الشيوخ وية بنت عمكً باوعت علية وكالت .. لو جنك ما ناوي تكللنا باوع علية وابتسم وكال .. ليش يعني ريم ما كلتلكم السالفة حور حجت من يمها.. لا والله صارلنا ساعة نسألها شعندهم الشيوخ هنا تكلي لو مهيمن يريدكم تعرفون جان خلة امه بس الظاهر راد الموضوع بيني وبينه ضحك وبعدها عيونه بعيوني .. والله كفو منج صدك تفيدين تلزمين ظهري بوكت العازة عقدت حواجبي وكلت .. مو عيب شنو الزم ظهرك هَـا مهيمن هسة منو بينا لسانه مزروف تردني الزم ظهرك بعد ما تريدني اسويلك مساج .. الله ياخذ عدونج على هاللسان اكلتيني حاصل فاصل انا قصدي يعني انتي سباعية اكدر اعتمد عليج ما تطلعبن سري بس الظاهر عقلج نيتج مو صافية ام مهيمن قاطعت كلامنا .. اي انتوا ظلوا تسامروا بيناتكم ووزعوا ابتسامات وخلوني ملطوعة بينكم مثل الاطرش بالزفة مهيمن.. حشاج يمة انتي الخير والبركة .. لاتكعد تحمي سوكك يمي كلي من الاخير الشيوخ هنا شيسون جاوبها وعينه علية .. جبيتهم هنا حتى اكول لبت عمي كدامهم حقج علية واطلب منها تلغي سالفة سفرها وكلتلها لاتعوفين بيتج ام مهيمن بأحباط .. يعني بس هيج جاوبها .. يعني شنو تردين بعد هزت ايدها بعدم اقتناع وكالت .. تهي بهي والله ياربي وانا عبالي كلت وليدي جاب الشيخ لهنا حتى يعقد على بنت عمه ويفرحني مهيمن كال .. يمة انا كلتها كلمة وما راح اثنيها بت عمي الي وطلبت ايدها مرة وكلتلها شوكت ما تشوف نفسها مقتنعة بمهيمن تجي تبلغني موافقتها وانا باقي عالوعد منتظر جان يحجيها ونظرات عيونه تصطاد ونظراتي ابتسمت له ودرت وجهي وطلعت من يمهم .. جلال موقف مرعب شي ما يشيله العقل ظلام زائد جحيم بدايته الخوف والنهاية مرعبة هذا ملخص قصة حياتنا اتعرفت على واحد من العناصر المزروعة هنا هم مثل حالتي تم زرعه عن طريق خلية الصقور الاستخبارتية العراقية الي كان واحد منهم كان اسمه حارث كان ضابط اقدم مني واعلى من رتبتي هذا الشخص كان بطل بمعنى الكلمة انظم لداعش ببداية تحرير الموصل هو ومجموعة ضباط وانا كنت من ضمنهم لكن فترة اختراقي لصفوف داعش مو نفس الفترة لكل واحد بينا من هذولي الضباط رسالة ومهمة يمكن انا اهون واحد بيهم على الاقل مهمتي تقتضي عملي بالورشة وعن طريق تواجدي داخل المعسكر انقل ما يدور بغرف الاجتماعات من اضطرابات او خطط هجومية ويتم ايصال مخططاتهم وذكر اسماء عناصر القياديين الى وحدة الاستخبارات العراقية بطرقنا المدرب عليها لكن البقية كانت مهمتهم اصعب يكلفونهم داعش بتوصيل شحنات من المتفجرات من مجموعة سيارات مفخخة حتى ينفذون العمليات الانتحارية بس اليوم وانا اشتغل بالورشة واذني يم اثنين من عناصر داعش اسمعهم يحجون عن القبض على واحد من عناصرنا كلبي وكع بين رجلية ايدي رجفت ووكعت مني الاسبانة والتفتوا علية ورجعوا كملوا كلامهم. اليوم راح يتم تنفيذ حكم الاعدام عليه بقطع راسه صاحبه كال .. ليش ما يتم حرقة بالتيزاب مثل الي قبله جاوبه.. لا القادة يردون جثته تبقى عبرة ودرس لكل جاسوس يحاول يتوغل بينا ويخون دولتنا نحن لهم بالمرصاد تركتهم وبلشت شغلي مرت علية الايام وضاع علية حساب التواريخ والساعات والزمن اصبح ماله قيمة والوقت ماله وجود بس كل الي عرفته من المعلومات مهمتي شارفت على الانتهاء وما بقى الا القليل ويصبح الانسحاب التكتيكي تشدد عناصر داعش علينا خلاني انقطع عن التواصل وية خلية الصقور العراقية وتسليمهم المعلومات كنت حيل حذر ما اكدر اجازف مثل الضابط الي قبلي صارت بيني وبين حارث علاقات سطحية لكن بنظرات التفاهم كانت اعمق كان يعدي علية فقط للسلام والاطمئنان بس هالمرة من مر من يمي كانت عيونه حمر وكال البقية بحياتك سقط صقر من صقور العراق وانتقل الى رحمة الله كان يحجيها وهو يمشي اصلا حتى ما جاي يحرك شفايفه لكن كلامه كان بصوت داخلي هو كال هيج وانا گبل رحت اركض على مكان تنفيذ الاعدام ولكيتهم مخلصين تنفيذ الاعدام كان لابس زي برتقالي ومعصبين عيونه بشريط اسود ارتديت للخلف مصعوق وهزيت راسي بقلة حيلة لكيت راسه مفصول عن الجسد لا ياربي دخيلك. هذا نفسه الولد الي كان يحط اشارات على السيارات المفخخة. حاولت اتمالك اعصابي احسها راح تخوني اذا بقيت دقيقة وحدة واني اشوف هذا المنظر المرعب راح يغمى علية صحيح شاركت وياهم بالمعركه وشفت قتلى بس مو بهيج شكل فضيع راسا رحت لغرفتي شافني واحد من الانذال واني متجه لغرفتي ..سالني شبيك ليش وجهك اصفر جاوبته بسرعة .. صار زمان اشتغل ومدنك راسي والظاهر ضغطي هبط اروح شوية اغسل وجهي واتمدد اصير احسن ورحت كملت طريقي لمكان غرفتي فتحت الباب وغلقته وراي ورحت مباشرة للحمام ماصدكت دخلت وبديت اتقيئ من المنظر الي شفته قبل شوية اغمض عيوني حتى يروح المنظر الكه الصورة متربعة بدماغي مالي اي مهرب منها بعدها حسيت قوتي راحت واعصابي انهارت جثيت على ركبتي بالكاع حسيت بدموعي نزلت .. دموع قهر وحزن على مفارقة عراقي حقيقي بطل استشهد على ايدي الانجاس احس دموعي من قهري وغضبي حارة تحرك وملوحتها تحفر خدي وتجرحه معاناة ما بعدها معاناة ،راح البطل شهيد فداء للوطن مهيمن كنت بالمحل واتصلت على عناد وطلبت منه يجيني لهنا محتاجه بموضوع كنت كاعدة حسبة تجيبني وحسبة توديني لازم اسافر خلال هاي الايام الجاية اولاد خالي حسن منتصر ومنتظر سافروا قبلي وانا سالفتي تختلف عنهم صحيح انضميت وية الحشد الشعبي بس الموقع كان اقرب نقطة لمعسكر الدواعش كان هذا اتفاقي وية الضابط علي وهو ما قصر كلي صار ٺــڊٍلََُلََُؖ باي مكان نحطك بي راح تنفعنا كان الي شاغل بالي من كل هاي الهوسة اهلي شلون بيهم هواي شايل هم من اسافر منو الهم وخايف لايصير على نور وحور شي خصوصا سجاد حاد سنونه على حور ونور رجل خالتها اكيد ما راح يبطل ويسويله فلم جديد بغيابي يعني كلام خالي حسن بخصوص تزويج اختي كان بمحله ازوج اختي لرجال كفو حتى اكدر اامنه على بيتي واهلي بساعة الي اقترح علية خالي حسن هذا الاقتراح وانا حسيت بالراحة وگانما خالي حسن قدمي لي الحل فعلا لازم ازوج اختي حتى اضمن وجود رجال وياهم بس اختي نور الي ازوجها مو حور وبهاي الاثناء دخلي علية عناد وشافني وابتسم وكال .. هاي شنو ما اصدگ عيوني مهيمن رجع يشتغل بالمحل منك من الشيطان والله نورت المحل والله اتطورنا صرنا نشتغل ابتسمت بوجهه وانا ااشر على الكرسي الكدامي وكلتله .. بعدك كلشي ما شايف من مفاجئات مهيمن تعال اكعد خلي احجلك شنو سويت وعلى شنو ناوي .. الله يستر على شنو ناوي انت واخوك مفاجئاتكم تخوف كعد وهو يباوع منا ومنا هاي شنو وين العمال اشو لوحدك بالمحل خلص الشغل ووقت غدا كلمن راح لبيته وفضلت استغل الهدوء حتى احجي وياك بموضوع لوحدنا .. شنو قصدك مهيمن تستغل الهدوء وتحجي وياية والله اكول لابوية وعمامي عليك واسويها كعدة عشاير تريدني تجي لبيتنا تخطبني من ابوية مكدرت اتمالك نفسي ضحكت بصوت عالي من كل كلبي ضحكة صار زمان ماضاحكها ..خرب يومك عناد والله ضحكتني واحلى شي كاعد تسويلي حركات مال وحدة متحارشين بيها وتهدد تجيب ابوها وعمامها .. اي عيني عبالك اسكتلك شنو قصدك بالهدوء ..خاب والله مصدك روحك مو زين اني احجي وياك سبحان الي خلاني اغير رائي بيك واحجي وياك وتصير صديقي ظلينا نضحك اني وعناد واحنا نتذكر مواقفنا اني وياه شلون جنا واحد مو طايق الثاني عناد جاوبني ..خرب شكد جنت اشوفك ثقيل وغثيث واضوج منك ..والله الكلوب سواجي نفس الاحساس عندي بس تزيد عليه اشوفك واحد فلتان وشايف روحك ومتكبر .. لا بربك انت جنت تشوفني شايف روحي ومتكبر هواني الي جان عندي هذا الاحساس واكول هذا شبي ليش هيج خشمه يابس وشايف روحه جاوبته متفاجيء بالفكرة الي ماخذها عني اشرت على نفسي وكلت .. انا متكبر لا لا بالعكس جنت وية الكل متواضع حتى وية عمالي حالي من حالهم ما يوم حسست احد عامل يشتغل عندي بالعكس اكل وياهم واكعد بينهم واتواصل وياهم حالهم حال اقاربي .. اي صحيح بس من توصل يمي هذا التواضع كله يتبخر وتنگلب علية لوفة بالتسعين حيريتني بتصرفاتك وكلت احاول وياك امد لك غصن الزيتون بس انت كنت رافع راسك وما تتنازل حتى ما حاولت تقترب مني جاوبته .. انا طبعي اتخبل من واحد يشوف نفسه احسن من الكل والقدر جمعنا انا وياك بالصدفة وكانت حادث سيارة وانت جنت كلش مطعوج بزر دلال عناد كال.. والله حقك بالحقيقة كلما اتذكر روحي شلون جنت انفة وشايف حالي اظل اضحك واتعجب شلون جنت هيج اتصرف واهلي وينهم عني اهوووو هواي اشياء كلتله .. بس سبحان الله مغير الاحوال شلون دارت الدنيا وصار عناد بالنسبة الي مثل ستري وغطاي ووكفتك وية اهلي من بعدي كبر معزتك بگلبي ضحك عناد وكال .. اي والله صدك الدنيا دوارة شلون هسة انا كاعد يمك اضحك واسولف والي يزعلك يزعلني والي يفرحك يفرحني والله جنت حيل اكرهك زاد وحقدي عليك بيوم رفضت تزوجني اختك. فد ضجت منك اتمنيت الزمك واسوي بيك مثل ما سوينا بأبو طبرة بس گلت عيب زحمة شلون اريده يزوجني اخته واسوي بي هيج شريط ذكرياتنا كان لازم يدخل بي الشخص الثالث جلال لان هو كان ويانا بكل خطوة بعدها تغيرت ملامحنا واختفت الضحكات الي كان صداها يرج المكان باوعت على عناد الي حاول يخفي حزنه على غياب الصديق الي يشوف بي اخو سكتنا شوية وبعدها جليت صوتي وانا اريد اكلمه بالموضوع الي اريده بي ..تذكر اخر مرة طلبت بيها ايد اختي نور شكلت وكفت وكلت اني اخطبها مرة واثنين وثلاثة وعشره لحد ما تملون وتجون تزوجوني اختكم بأيدكم هو صافن بوجهي وجاوبني بأصرار ..اي ولازلت عند كلامي وماغيرته ليش سامع شي لو عندك اعتراض جريت نفس عميق مرتاح بجوابه وكلت .. يعني لازلت مصر وباقي على كلامك رفع راسه بتحدي وكال .. وانا عند كلمتي وانا من يومي ما استحي من الحق اعرف بروحي ما غلطان ومن حقي اطلب اختكم بالحلال لان لا غاضب الله ولا متجاوز على عبده باوعلي عناد وهو متضايق وسألني .. بالله انت ما تگلي على شنو دزيت علية حتى تهيج علية المواجع لو تريد تلعب بأعصابي جاوبته وكلت وانا واثق من قراري .. لو بعد مليون سنة واحد يجي ويكلي يا مهيمن انت راح تزوج اختك لعناد بنفسك. يمكن اتهمه بالجنون بس اثاري صدك الدنيا دوارة وانا اتصلت عليك وجبتك لهنا حتى اگلك اجى اليوم الي كلت عنه انزوجك اختنا بيدنا جان كاعد متكئ ومسترخي من سمع كلامي انخبص وعدل كعدته متفاجيء من الي سمعه .. ششنو مهيمن بالله عيد حجايتك جني ما سمعتك زين .. كلامي واضح عناد انا مليت منك وانت شكلك لزكة راح اضطر ازوجك اختي نور وماكو واحد كفو مثلك اكدر اأمنه عليها عناد بحذر بعدم تصديق.. مهيمن هالمرة قبل لا اسافر للموصل عناد اختفت الدهشة من وجهه ونهض من مكانه وكال .. تسافر للموصل مهيمن ليش شكو شصاير من وراي .. مو كلتلك عندي هواي مفاجئات الك دكعد وخلينا نحجي رجع كعد وهو بعده متعجب .. شوف عناد انا رايح ورة اخوي جلال للموصل وما ارجع الا وهو وياي بقة عناد يباوع علية وشكل الكلام خانه وميعرف شنو يحجي .. كول مهيمن شنو تريد مني اسوي تريد اجي وياك ماعندي مانع جاوبته.. لا عناد انا بعازتك تبقى هنا عينك على حلالي واريد اعقدلك على نور قبل لا اسافر حتى اضمن اكو رجال بالبيت ما اريد يصير بيهم مثلما صار بغيابي خايف لا رجل خال نور صابر يسويله لعبة اباوع لعيون عناد لمعت بفخر وكال.. الي الفخر اناسب ناس سمعتهم ذهب وبذكرهم ينرفع الراس مهيمن حضر روحك باجر تجيكم مشية زلم اهلي وناسي ماايد اختك نور جنا انا وريم نصعد بقطار الجنط كنت هواي فرحانة لان مهيمن صالحها وهالشي ادخل علينا الفرحة وزاد الامل بالگلوب حور صعدت اخر جنطة وكالت .. يمة الله يساعدك يلي بگلبي على هالمصيبة ولج شنو عندكم ازمة ملابس وهالكد ماخذة. ينعل بليسج ريم جاوبتها .. هذني مو كلهم ملابسي يعني بيهم جنطي واحذيتي واكسسواراتي وهواي شغلات جنا نحجي وجان اسمع صوت مهيمن يسأل خالة زهرة عني بعدها صاحني من جوة بصوت عالي .. نوووووووووور تعااااالي شكله جان مستعجل نزلت الجنطة وانا اباوع للبنات بتسأئل نزلت يمه .. ها مهيمن .. تعالي كعدي يمي اريد احجي وياج بشغلة مهمة رحت كعدت يمه بالغرفة لكيت خالة زهرة كاعدة بالغرفة شافها كاعدة وابتسم .. والله عرفتج يمة مو بيدج مال تعوفيني انا واختي لوحدنا هذا حلم امه ردت عليه وكالت .. خايب مهيمن انا امك صاير ما تستحي وتضم علية جاوبها .. يمه اكو شي اسمها خصوصيات انا واختي گلبت عيونها وكالت .. هسة يالله عااااد احجي اعتبرني ما موجودة ابتسم وكال .. يمة انا راح احجي رية اختي مو تظلين تكمزين وتأثرين عالبنية انا اعرفج بهيج سوالف تفقدين .. ولك خايب تحجي مو طگيت چبدي هم يحجون بينهم وانا واكفة محتارة ما فاهمة شنو الموضوع صرت اراجع بأغلاطي شنو سويت وويامن كعدت باوع علية وكال.. شوفي نور اليوم عناد ابن الحجي ابو حيدر طلب ايدج للزواج مني وانا يابنت الحلال راح انطيج رأيي بي وانتي بكيفج تقررين وراح اكتفي اگلج كلمة وحدة عنه الولد ذهب وابن اصول والدليل انا بنفسي خطبته الج گلبي انتفض وعيوني راحت على مهيمن متفاجئة من سؤاله ارتجاج بالقفص الصدري كان الدليل على حالة الارتباك والمفاجئة مهيمن .. هَـا هسة شنو گلتي اي لو لا موافقة لو لا خالة زهرة قاطعت كلامه وكالت .. طبعاً موافقة هاي ما يحتاجلها سؤال مهيمن التفت عليها وكال .. يمة ترة العريس جاي على نور مو عليج..... يتبع........ مهيمن حضرت الزي العسكري المرقط الخاص بالجيش الحشد الشعبي حتى هذا اشتريته بسطال عسكري وخوذة وجعت للبيت اتسحب وانا حابس انفاسي | ||||
|
| |
|
08-11-19, 08:33 AM
| #64 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_لم_الشمل #البارت ثلاثة وثلاثون ج ٢ السلام عليكم ورحمة الله وبركاته اسعد الله مساءكم يا احبتي المتابعين ❤️ ودمت سالماً ياعراق المحبة والمحبين 🇮🇶🇮🇶🇮🇶 نور كاعدة مدنگة راسي مرتبكة واصابع ايدية تتلاوة مع بعضها ونظراتي تتنقل بين مهيمن وخالة زهرة كنت بعدني ما مستوعبة كلام مهيمن الشي الوحيد الي كان يدل على ادراك معنى كلامه هو اضطراب ايقاع داگات گلبي المخبوص كمل كلامه وهو يباوعلي وكال .. نور ترة القرار راجعلج وهاي حياتج انتي الي تختارين انا بس اريد اتطمن عليج واامنج بيد رجال يستاهلج ويصونج قبل لا اسافر ما اريد يصير بيج مثل الصار بذيج المرة تجي خالتج هي ورجلها يستغلون غيابي و يسولهم فلم ثاني حتى ياخذونج وياهم تعيشين جوة ايدهم خالة زهرة اكدت على كلامه.. اي والله صحيح كلامك وهو رجع باوع علية و سألني .. هَـا شنو گلتي موافقة لو لا ترة الولد ينتظرني اردله جوابج تهربت بنظراتي وصرت اباوع بكل مكان الا على مهيمن استحيت لا توكع عيني بعيونه وساعتها راح يكدر يخمن من نظرات عيوني المتلهفة الي ما اكدر اداريها كان بعده يباوع علية ينتظر ردي جليت صوتي اتعثرت بكلامي وكلت.. بالحقيقة مهيمن انت فاجئتني بالموضوع يعني ما اعرف شنو اكول مهيمن ابتسم .. انا ما اريد اضغط عليج اعرف كل بنية تحتاج فترة حتى تفكر بالموضوع وتقرر بس احنا وضعنا يختلف انتي تعرفين عناد ما يحتاج اعرفج بي وانتي اكيد كان عندج علم هاي مو اول مرة يطلب ايدج مني فلابد انتي كانت عندج رد فعل بلحظتها وانا اريد اعرف ردة فعلج بتجاه الموضوع حتى اعرف رأيج شكد زحمة والله استحي شنو اجاوبه واكله خوية اختك بلحظتها اجة يوگف گلبها من رفضه جلال لو اگله على حال گلبي شلون جاي يطرب من الفرحة جاوبته امتمت .. ماا اعرف انت بكيفك خالة زهرة نطقت بنفاذ صبر وگالت .. .. خالة ما يحتاجلها علم اختاري وحدة من الثنين لو اي. لو موافقة يابعد خالتج جاوبي اخوج وبردي گلبه باوعت على ام مهيمن استنجد بيها بس اشو هي الثانية خطية جانت اضرب من حالي الحماس عندها فول وكلامها كان خير دليل مهيمن ضحك وكال.. خير يمة شنو هاي جاي تسوين تمويه للبنية لو ناصبتلها كمين رحمة على اهلج يمة خلي البنية تجاوبني براحتها لاتأثرين عليها بكلامج انهى كلامه وية امه والتفت علية يتظر مني الرد بعلت ريگي خايفة لا ينعقد الساني من المستحة جاوبته .. مهيمن انت بكيفك انت شنو تشوف اني وياك اكيد قرارك هو الانسب الي لمعت عيونه بفخر وكال .. والله اذا اريد اترحم لأبوي على شي فهو وجودكم بحياتي انتي وجلال وام السان المزروف احسن شي سواه ابوي بحياته هو انتوا خالة زهرة باوعتلي برضى ومهيمن كمل كلامه وكال .. نور ثقي بالله انا مستحيل اقدم على هيج خطوة لوما متأكد من الولد شاري وان هو بگدها واگدر اعتمد عليه وانا مثلما تعرفين وراي سفر وما اعرف سفري شكد يطول واريد اروح وانا مأمنكم عند رجال يصونكم يدير باله عليكم بغيابي ام مهيمن .. والله يازين ما اختاريت عناد خوش عناد ابتسم وكال بأدراك .. نور اريد اسمع موافقتج بأذني گوة كدرت اطلع الكلمة مني همست بصوت ناصي ... موافقة ابتسم وكال .. يعني هاي هي جواب نهائي ام مهيمن قاطعت كلامه بنفاذ صبر كالت .. اي جواب نهائي شنو رحمة الله من عادها. مهيمن باوع لامه بقلة صبر كال .. شلون بيج يمة. خلي البنية تجاوبني ترة هي الي راح تعرس مو انتي .. يايمة مو جاي تشوف اختك بالكوة نطلع الحجاية منها وانت كاعد تلعب باعصابها عفية مو كل شوية تكعد تسألها خاف البنية تهون وتغير رأيها وترفض .. والله يمة مو بيدج ابو طبع ما يجوز من طبعه سحب نقاله ورسل رسالة بالواتساب يبلغ عناد. الموافقة لحظات مو اكثر دك نقال مهيمن والمتصل عناد وكان صوته واضح.. احلف كول والله وافقت مهيمن جاوبه وكال.. بالحقيقة مو هي الي وافقت امي الي اعلنت الموافقة شكلي راح ازوجك امي بدال اختي جان يحجيها وهو يباوع على امه مهيمن وجلال عندهم ميانة وية عناد وشقاهم يصير ماله حدود خالة زهرة شهكت وضربته على كتفه وكالت.. ولك صدك ما تستحي مهيمن يضحك وكال .. يالله ابو الشباب اتوكل بلا مطرود الموافقة واخذتها بعد شعندك لاطش عناد كله .. يااا اخي انطيني صبر غير تگلي شنو اسوي خوما تخليني معلگ گلي شوكت اجيب اهلي لو شنو مهيمن ضحك وجاوبه .. بعد هاي الرسميات بقت يمكم مو يمي لايكون تريد انا هم اخذلك مشاية على بيتكم واخطبك من اهلك فرد نوب عناد.. اي والله ياريت ابوي ما يگول شي بسرعة يگلك گبع واخذ .. اكول ابو الشباب شكلك مصدگ روحك لاتخليني اگلب عليك واغير رأئي .. لا على بختك كل شي ولا تگلب علينا عمي خليك هيج على حطتك وانا رايح ابلغ الاهل وامري لله وراها انهى المكالمة وهو يبتسم وباوع على امه وكال.. ها يمة هسة ارتاح گلبج خالة زهرة جاوبته .. طبعاً يرتاح گلبي اي ام تفرح لبنتها وتحب تتطمن عليها ونور من يوم عتبت دارنا الله الشاهد علية صارت من حسبت اولادي عيوني لمعت بالدموع وجاوبتها .. اشكرج خالة ما تعرفين هذا كلامج شكد اله تأثير بنفسي .. يوم المنى ازوجكم وافرح بيكم كلكم والله يمد بعمري واشوف جهالكم يلعبون حوالية مهيمن باوع لامه وكال .. بس اريد اعرف شنو سالفتج وية الزواج كلما يمر طاريه تلمع عيونج والله اذا ظليتي على هالحسبة شلون ما اشوف يايمة شكلي راح اكسب بيج اجر وازوجج بس صبري علية خلي ازوج خواتي واتفرغلج خالة زهرة .. هايمة خير سالمين اشو درت علية شنو شايفني معلگة اعلان وكاتبة اريدن رجل .. لا يمة بس كلت خطية اشوفج تنخبصين و تهمين وتلمع عيونج من تسمعين بعريس جاي عالبنات فكلت عالواهس انتي همين اخطبلج حالج حال خواتي امه جاوبته.. اي عفية وليدي من هسة كعدت تصفي بينا حتى يخلالك البيت انت ومريتك ويبقى البيت لأم طيرة طارت بي فرد طيرة وتعال كلي شنو سالفة تخطب لخواتك الي يسمعك يگول فاتح بيهن مزاد .. والله يايمة ابنج گلب الموازين كلها اشو بدال ما يجوني الناس يطلبون ايد خواتي مني صرت انا الي احجز العرسان لخواتي ذاك اليوم حجزت جلال لحويرة وهسة خطبت عناد لنور امه ابتسمت وكالت .. ترة هم كالوها اخطب لبنتك ولا تخطب لأبنك هم يحجون واني وجهي صاير نار يمكن صخنت وجان يندك نقال مهيمن مرة ثانية وهالمرة كان المتصل الحجي ابو حيدر كان نهضت من مكاني مرتبكة اكيد الحجي اتصل على مهيمن علمود موضوع الخطوبة انسحبت من الغرفة بكل هدوء عكس عاصفة المشاعر الموجودة بداخلي ريم كنت انا وحور ونور نرجع الجنط لمكانهم بالمخزن ومهيمن صاح لنور وهي نزلت تشوفه شنو يريد منها بقينا انا وحور اباوع عليها رفعت الجنطة وحطتها على البقية وهي تنافخ ضايجة رفعت حاجبي وسألتها .. شنو خير ليش عاقجة وجهج وضايجة حور دارت علية وكالت .. هذني بنات خالي العوبات من يوم مهيمن بلغ خوالي بموافقته على خطوبة جلال الي وهن كالبات الجهرة علية ولج حتى نغم الحبابة هم صفت وياهن تصدكين صرت حتى اكره اروح وية امي لبيت خوالي .. ليش شنو حجوا عليج .. هاي البارحة بت خالي كعدت كدامي وعينك عليني تگلي كدام البنات والله بخت الزركة گاعد كل يوم جاي خطابة يطلب ايدها مرة صديق اخوها بالسوك ومرة سجاد ونوب فوگ هذولي كلهم تالي وگعتلها بواحد من جماله يوگع الصكر جاوبته العوبة نغم وكلتلها .. قابل مثل حظنا هو واحد وشرد جانت تقصد على مهيمن ونوب كملت كلامها وتكول يارب بس اريد اعرف هم شنو شافوا بيج وهيج كاتلين روحهم عليج هاي العوبة تكللها .. بخت الزرگة يلوح بالعلالي قابل مثلنا بالرغم احنا احلى منها ومحد دگ بابنا براسه خير كلهم عاوين وين الزبالة. يلفي على حظي جانت تحجي وهي كلش مهضومة منهن كسرت خاطري كلتلها.. ما عليج بيهن والله يغارون منج انتي بس عيونج تسواهن وتسوى عشرة منهن وسمارج الحنطاوي هو الي اسر جلال واتربع بگلبه جاوبتني وكالت .. على شنو يحسدوني ياحظي حتى الولد ما اعرف وين اراضيه خطبه مهيمن الي وهو ابو الانا ماعنده علم صار مخطوب وارتبط اسمه وية اسمي تصدكين ريم انا من يوم الي سافر بي جلال وانا عيوني ما تعرف طعم النوم من ورة التفكير خطية حور شكد عانت وبعدها جاي تعاني الغياب المجهول لجلال خلة ثغرة. غموض ترك خلفه الالاف الاسئلة. والشكوك الي لحد الان مالها جواب والاغرب من هذا كله مهيمن وسكوته الغريب وحور وخوفها المبالغ بي على اختفاء جلال ما اعرف ليش جاوبتها حتى اواسيها .. حقج ادري بيج جاي تعانين مو بس انتي كلنا خافين على جلال ونتمنى اليوم قبل باجر يرجع بالسلامة جرت حسرة وكالت .. اللهم امين ربي يسمع منج .. بس حور امانة لاتخلين كلام بنات خالج يأثر عليج .. صعبة موبيدي شلون ما يأثر علية ولا اتأثر بي اذا اسمع اخت سجاد الغبية تكلهن .. تهي ... بهي والله ياربي هسة عاد هي شلون قسمة ينرفع بيها الراس اشو هو ارهابي والحكومة تطارده حتى ما يعرفون وين اراضيه وانا ما اتحملت كمت عليهن و اتعارك وياهن وحتى نغم زعلت عليها لان هم كامت تحجي علية وتكلي .. انتوا واخوج ما اعرف شبيكم جنكم مسحورين جلال وبت عمه عامينكم وصرتوا مثل الخاتم بأصبعهم حجاية مني وحجاية منها وكبت العركة واجتي امي وطحيت حظي كدامهم وخالي حسن طيح حظ بته وكللها شلون تهضمين بت عمتج وتزعليها وهي ضيفة بداري خليني اسمع بيج مسمعتها كلمة تغث صدكي ما تلومين الا نفسج وانا رجعت للبيت وامي نبهت علية وحذرتني ما اجيب سيرة بموضوع العركة لمهيمن تدري بي يتعارك ويسوي مشكلة وية خوالي جاوبتها .. اشوفج البارحة بالليل اول ما دخل خالج ومهيمن رحتي شردتي اثاري اكو ان بالموضوع وفجاءة اتذكرت موقف نغم وياي بالكلية ولكزت حور من خاصرتها وكلتلها بنذالة .. حل تستاهلين الصار بيج حتى تحسين بقهرتي بيوم ست نغم اجتي تسألني وتگلي سمعت خبر انتي تردين تسافرين للخارج يم عمتج شوكت راح تستفرين وسألتها .. ليش تسأليني عن موعد سفري فلت وجهة وكالت .. هَـا مو نريد اني وامي نجي لبيت عمة زهرة حتى نسلم عليج ونودعج قبل لا تسافرين وانتي الثولة واكفة بيني وبينها وكاعدة توزعين ابتسامات مثل الخبلة. شكلج عاجبج الوضع ضحكت وجاوبتني وهي تتذكر الموقف وكالت .. مو انتي ما شفتي روحج شنو سويتي اجيتي تاكلين نغم الا شوية نزلتي على البنة اكس ومربع. بشرفج اكو وحدة يسألونها عن موعد سفرها بصفاء نية تكليلها .. حبيبتي لاتقنعيني انتي ميتة علية وتردين تودعيني والله شي يضحك تتعاركون مثل الشرايج كدامي اباوع عليكم واكول مكرودة يازهرة عندج شرايج اثنين يتعاركن على ابنج ولا محصلة ولا وحدة بيهن لحد هسة گلبت عيوني بكل ثقة وانا الگلب. يطرب بغرور .. حٍٍِْــًبٌٍـــِٓېٍٓ حور بلعي كلامج ماكو شي اسمه شرايج او ضرة مهيمن ملك خاص حصري بس الي گلبت عيونها وگالت .. اهووووو رجعت ريمة لعادتها القديمة يعني شدوا روسكم يا گرعان. اتخصرت وگلتلها .. ليش عيني شنو صاير .. مكرود مهيمن عم على روحه بيوم راضاج هسة بعد شيخلصنا من ريم هزيت شعري بثقة وكلتلها .. حٍٍِْــًبٌٍـــِٓېٍٓ محد ضاربه على ايده هو الي اختار يراضيني حتى ابقى هنا وما اسافر وبموقفه هذا عرفت مكانتي بحياته معناها هو مايكدر على زعلي وهالشي اعتبره تصريح من عنده الي واعتراف بالملكية الحصرية لحضرتنا وخلاص هو اختار اذن لازم يتحمل تبعية اخياره حور شهكت وكالت.. عزة بعينج ريم الله يعلم شنو ناوية على اخوي المكرود .. لاتخافين على اخوج. مني خافي عليه من الحية بت خالج ست نغم. شفتيها شلون تسألني بشماتة شوكت اسافر حضرت الست كانت تتأمل اسافر وتفرغلها الساحة ويرجع يتقدملها ابتسمت برضى وكملت كلامي .. بس وين اني ريم مستحيل اخليها تطول مهيمن وافرغلها الساحة حتى تاخذ راحتها لاعيني لا. لاگلبي لا عشم بليس بالجنة شكلي راح ابقى كاعدة على گلبها حور .. الله يرحمج نغم جانت خوش بنية باوعت بفخر وغرور واتنفست برضى وكلت .. ما تدرين انا شكد متلهفة. على الدوام اريد اشوف وجه نغم من بعدما مهيمن راضاني اكيد هسة ابوها راح يسولفلهم على سالفة مهيمن وطلبه من الشيخ حتى يتوسطوله يصالحون بيني وبينه .. ريم والله انك خطيرة وتخوفين. ولج راح تخليني حتى اخاف على اخوي منج باوعت للساعة وعقدت حواجبي مستغربة هاي شنو نور وين راحت اشو طولت جاوبتني .. مهيمن صاحلها وكللها تعالي اريدج بموضوع مهيم يمك...... فجاءة قطعت كلامها وضربت كف ايدها على كصتها وكالت .. عزة هاي شلون فاتتني سالتها بأهتمام .. شنو شصاير نهضت من مكانها بسرعة وكالت .. خلي اروح الحگ افتهم شنو الموضوع عافتني وراحت وانا اتبعتهت ونزلت وراها لكيتها واكفة يم باب غرفة مهيمن جاي تتسنط وكفت يمها وسألتها .. شنو الموضوع ليش واكفة تستمعين لكلامهم سدت حلگي بثنين ايديها وكالت .. اششششش ولج عوبة شهرتينا خلي اسمع شكله اخوي جايب عريس لنور كملت كلامها ورجعت حطت اذنها عالباب واني تلقائياً سويت مثلها وصرت اسمع بس ما لحگنا نسمع شي الا القليل يعني صوتهم كان ناصي. بس خلاصة الموضوع اكو عريس متقدم بس منو هو ما كدرت اعرف انفتح الباب وانا وحور صرنا بحضن نور الي كانت تريد تطلع من الغرفة وبسرعة اتلاحگنا لروحنا قبل لا ينتبهون علينا مهيمن وامه عدلنا وكفتنا بخفة وسحبنا نور وسدينا الباب اخذناها على غفلة خطية هي من المفاجئة والصدمة ما لحكت تحجي شي طوقناها من الجانبين عبالك شرطة ولزموا حرامي گامت تباوع علنا منا ومنا واخذناها سحل عالغرفة سدينا الباب وحور باشرت بالاسئلة .. شمينا ريحة عريس بالجو واجينة نركض وانا كملت كلامها .. احجي منو هذا اشو مبين من شكلج فرحانة وراضية بي معناها تعرفينه جاوبتنا .. هوب .. هوب وحدة. وحدة على كيفكم وياي اول شي انتوا مبين من شكلكم جنتوا واكفين تتسمعون ورة الباب انا وحور ردينا بنفس اللحظة باجابات مختلفة حور .. لا ما جنا نستمع وانا .. اي صحيح كنا واكفين نستمع لكلامكم بس شكلنا اجينا متأخرين ما لحگنا غير بس على البركة وموافقة حور لكزتني وكالت .. لج عوبة بعد لو تموتين ما اعزمج على جريمة فضحتينا وشوهتي ام السمعة الزينة. نور ضحكت وكالت .. لا تتعاركون هسة احجيلكم الموضوع كله وكعدت نور تحجيلنا عن موضوع خطوبتها وبعيونها الفرحة جلال مرت الشهور وداعش سيطرت على الموصل بأكملها وناوين يستمرون بالتمدد للمناطق المجاورة. كانت حرب غير متكافئة بين الطرفين داعش تملك احدث الاسحلة واقوى عتاد بس رغم هذا قواتنا بدت تحرز تقدم هو صحيح كان تقدم بطيء لكن كل خطوة كانت كفيلة بتلقين الدواعش درس وتكلفهم خسائر فادحة وانا طول هاي الشهور كنت مستمر بشغلي بالورشة وانتهز اي فرصة لتزويد جهات الاستخبارات بالمعلومات مو بس انا حتى العناصر البقية الي كانوا وياي مثل حارث مشتغللهم بالمرصاد مرات يظل بالي عليه خايف لا يكتشفونه بس الله الحافظ ويعمي عيونهم عنا الفترة الفاتت انا مركزي قوى عندهم والبارحة الامير حجة وياي وكلي ((جلال قربان انك رجل شجاع ولقد قررنا ان نقوم بتكريمك على جهودك المبذولة معنا لما قدمته لدولة الخلافة من صنيع كن على ثقة اسمك سوف يذكر بتاريخ دولة الخلافة وعلى لسان كل المسلمين )) جاوبته نص عربي فصحى ونص عراقي .. والله انكم قوم سائرون على طريق الخير والحق وتستاهلون الواحد يوكف وراكم وينصركم ضحك وكال .. جلال قربان اسعى لتحسين كلامك بالعربية الفصحى فأنها لغة القران ونحن مصرين ان نحافظ على ديننا غمضت عيوني وكوة لازم روحي لا افلتها ابو الوصخ يريد يحافظ عالدين ولغة القران خاب دروح اسبح بالاول واتطهر وبعدين تعال احجي بالدين واحدكم ريحته كلها زنجار. خرب طبعاً المعسكر الي انا موجود بي موجود بأطراف مدينة الموصل لذلك لحد الان ما شايف مدينة الموصل ولا دخلتلها من عهد ما طلعت منها لان داعش بطول ذيج الفترة. شددت على جميع العناصر الموجودين بالمعسكر وبقيت محبوس بالورشة بس اشتغل عالاجهزة ما كدرت اطلع اكلي وشربي يوصلني للورشة مو بس انا كل الي وياي مثل حلاتي وكلما اريد اطلع للمدينة ياخذني الفضول اريد اشوف شنو جرى عليها. اواجه رفض من الامير وكل مرة يگول نفس الكلام .. جلال ليس الان الوضع لا زال خطراً في المدينة يوجد هناك اعداء يتربصون بعناصرنا في كل مكان ويغتالونهم ونحن حريصون عليك لا نستطيع ان نجازف بك وندعك تخرج في المدينة بالوضع الراهن ادري بيهم موخوفاً علية وانما حفاظاً على مصالحهم وفائدتهم يحرصون علية سلامتي بقيت على هالحال من الورشة للغرفة ومن الغرفة للورشة لحدما بدوا يوسعون سيطرتهم رخوا الحبل وبدوا يتساهلون وبعدما كنت امولهم بالاجهزة. وتصنيعها بديت انفذ خطة رقم اثنين احاول المماطلة بتصنيع الاجهزة يعني كل شهر يمكن لو اسوي جهاز واكمله وية السيارة لو اكعد اختلق الاعذار مرة اگلهم اكو نقص بالقطع او تلف بالاجهزة او اطلب منهم لبات تعجيزية معقدة احتاجها للجهاز حتى مرة صارت مشكلة بيني وبين احد القادة كام يصيح بوجهي ابن الشريفة لان اتأخرت عليهم بتوفير الطلبية لمجموعة السيارات المتفق عليهم واليوم بعدما بدت الامور شوية تهدأ داخل المعسكر قررت اطلع وياهم للمدينة لان فاض بية الحنين للموصل وبعد ما عندي صبر بلغت ابو بهاء حتى انزل للمدينة گلي تمام اذن بعد فد مرة بدربك اشتري النواقص الي تخص الاجهزة وروح وية عناصر هيئة الحسبة هسة راح ينزلون للمدينة ويقومون بدورية لرصد ومعاقبة المخالفين عقدت حواجبي مستغرب ونوب هذولي الحسبة شنو سالفتهم صعدت وياهم بسيارتهم كانوا مجموعة لحاياهم طويلة وملابسهم سود وشكولهم مگلبة ما تمت بأي صلة للاسلام او السلام وكأنما مهج رعاع ولفوا عالعراق دخلت للمدينة واباوع عالناس شنو الموضوع وين اهل الموصل. هذولي منو جانت السيارة تتوغل بالشوارع وانا اتلفت منا ومنا اباوع مصدوم على معالم المدينة. المرعبة وعلى الوجوه الغريبة هاي الوجوه ما اعرفها ولابيها اي لمحة من اهل الموصل كلهم لحاياهم طويلة. وملابسهم كانت قريبة على الزي الافغانستاني مريت على معالم اعرفها واتفاجئت من شفت مراقد النبي شيت والنبي يونس مهدومة. اجة عقلي ينجن من كمية الخراب العام بالمدينة فجاءة اتوقفت السيارات على عفلة ونزلوا عناصر هيئة الحسبة. وراحوا على شاب يبيع جيكاير لزموه وسحلوه. بوسط السوگ وحطوه وجلدوه اربعين جلدة گدام الناس سألت واحد من العناصر عن السبب ليش جلدوه جاوبني القندرة وكال .. لايجوز بيع المحرمات والتدخين من المحرمات وبعدما جلدوه طلبوا عليه غرامة عقاباً له وبعدها صاروا يتجولون بالاسواق والشوارع وكل شوية متوقفين ولازمين مخالفة اباوع عليهم لزموا كم شاب لابس بنطرون جينز وجلدوه. والمشكلة يعاقبونه ويكلوله عليك مخالفة شريعية بمنظورهم التعبان يعني الجماعة. يشوفون نفسهم هيئة الامر بالمعروف والنهي عن المنكر بعدها لفت انتباهي صوت تحذير من واحد عناصر هيئة الحسبة ينبه مرية. كانت منقبة. عاط بيها بصوت عالي بتحذير .. انتي يا امرأة تستري يعني تلتزم بالنقاب وشروطه اباوع عالمرية مستغرب كانت من فوك ليجوة عبارة عن سواد بس عيونها طالعة بعد شنو تسوي و تتستر تختفي مثلاً اسمعه يكللها النقاب وهي بأرتباك نزلت البرگع الثاني على وجهة انا من يمي اختنگت الله ياخذهم هذولي شنو مصخمين بأهل الموصل او بالاحرى بقايا اهل الموصل من الله لا يوفقهم بعدها اخذوني حتى اروح اكمل شغلاتي من صعدت وياهم بالسيارات وتوغلنا لداخل الموصل بين الاحياء السكنية وية كل خطوة اخطيها لداخل مدينتي گلبي ينزف على معالمها عديت على اماكن ياما كنت اتمشى بيها انا سلوان والي بيها ذكريات بس مع الاسف ما باقي بس الاطلال كلبي ينزف وخنكتني العبرة على مديني جانت مثل عروسة جميلة وتشوهت معانيها بسبب الدمار بعدما صال وجال بيها الزمن صال كملت شغلي واحياجاتي ورجعت وية العناصر للمعسكر وانا گلبي مليان حقد اضعاف مضاعفة عليهم وزاد عزمي واصراري اكثر من قبل بس صبروا علية بالطريق واتصل عليهم ابو بهاء وحجة وياهم انهى الاتصال وباوع علية قائد الحسبة وكال .. والله ياجلال انك لذو حظ عظيم يافتى. وكأن الله القى عليك محبتاً واصبحت الفتى المدلل لدى الامير .. اشم رائحة حسد يا اخي بالاسلام شكلك غيران مني .. وكيف لا احسدك والامير يبلغني ويقول عندما يصل جلال فليأتي لي مباشرتاً فعندي له مكافأة تنتظره. ابتسمت ابتسامة صفرة وكلتله.. ياقرة عين امي بي وفرحتها كم انا سعد الحظ والله وانت ما محلفني اتمنى ابوي عايش ويشوف بعيونه انجازاتي المشرفة وياكم اتخيل عيناه سوف تفيض بالدموع من شدة الفرح وصلنا للمعسكر انتبهت على حركة العناصر مشغولين عبالك خلية نحل عملهم على قدم وساق اتوقفت بمكاني وشفت وحدة اجنبية داعشية حتى ما تعرف تحجي عربي شايلة سلاح ولابسة زي عربي جبة سودة ومقنعة طويلة جانت تحجي بوحشية وية واحد من العناصر الي افتهمته هي راح تنفذ مهمة بتفجير كنيسة. وتنتظر الاوامر من الامير انتبهت لحارث كان واكف يمها هو راح يكون الشخص المرافق وياها بالعملية الله يكون بعونك ياحارث. على هالطركاعة هناك وجان اشوف ابو ذياب صارلي اشهر ما شايفة لان انتقلوا هو وابو جراس لغير موقع رحت يمه وانا مستغرب هذا شمسوي بروحه .. لحيته واصلة لكرشه سالته .. هَـاي شنو ابو ذياب ولا عرفتك شصاير بيك التفت علية وشافني وابتسم .. ياهلا بجلال قربان .. والله والك وحشة ماصرنا نشوفك لاانت ولا ابو جراس جاوبني باسف وگال .. ابو جراس استشهد على ايد الكفرة الانجاس جان يقصد على الجيش العراقي والحشد الشعبي استغفر الله يا ربي هم نزل. وهم يدبج ماكاعد راحة ابو الوسخ باوعت منا ومنا وانا اشاهد الهوسة وسالته.. شنو الموضوع ليش كل هاي الهوسة صاير شي هنا اكو ضغط عليكم حاوبني وهو يضحك .. هاي الهوسة كلها علمود راح يجيبون سبايا للمعسكر الامير گال هاي هدية لكبار العناصر ومكافأة الابطال انخطف لوني ووكع گلبي بين رجلية سألته والنفس انسحب من بين ظلوعي .. ششنو شلون يعني سبايا ريم اليوم اجوي بيت اهل عناد امه وعمته واخته رغد كان عدنا خبر بزيارتهم لان البارحة الحجي ابو حيدر . اتصل على مهيمن واتفق وياه يجون الاهل حتى يتفقون وية نور وامه وهسة خالة زهرة طلعت استقبلتهم ورحبت بيهم واني وياها وحور بالمطبخ تحضر صينية التقديم. ونور بالغرفة تركتها تبدل ملابسها اتبادلوا السلام وكعدوا ورغد سألتني بلهفة عن نور .. شنو وين عروستنا نريد نشوفها مشتاقتلها خالة زهرة باوعتلي و كالت .. ريمة خالة روحي صيحي لبت عمج خليها تجي تدخل تسلم استأذنت منهم ورحت اصيح لنور دخلت للغرفة ولكيت الاخت مخبوصة. تروح منا وتجي مناك. سألتها متفاجئة .. هاي شنو اشو بعدج كل شي ممسوية نور باوعتلي بقلة حيلة وكالت .. سكتي ريم راح اموت من الخوف ما اعرف شنو البس اشو شنو البس اشوفه مو حلو علية عقدت حواجبي مستغربة .. من شنو خايفة ترة عناد مو وياهم يعني بعد وكت على سوالف الارتباك الخوف. وثانياً انتي حلوة وما عايزة شي يجملج واي راح تلبسينه راح يكون حلو عليج. بس ينقصج شوية ثقة بالنفس تركتها ورحت فتحت الكنتور وطلعتلها لبسة حلوة مرتبة وبسيطة مو متكلفة وكعدتها عالسرير وطلعت علبة الميك اب ورتبت وجها هي اصلاً حلوى ما يحتاجلها تعديلات هواي بس كانت حيل مخبوصة ومرتبكة جنت ارتبها واحجي وياها .. نور شبيج مو گلنا عناد مو وياهم بس امه واخته اجوي بعد المن الخوف جاوبتني .. هو انا هذا المخوفني وجود امه لان اخر مرة من التقيت بيها بعرس رغد سمعتني كلام يسم البدن ومو حلو بحقي وما اعرف هسة هي شنو موقفها جاية لهنا من رضاتها لو مجبورة ريم اباوع عليها وكلت .. نور انتي ليش تصعبين الامور على نفسج وحسب الكلام الي سمعته هم ما مصدگين نفسهم عناد وافق اخيراً يتزوج نسيتي مو كل مرة اخته تكول اهلي يردون يزوجونه وهو يتهرب يعني اكيد هسة اهله الكاع ما شايلتهم من الفرحة فلاتكعدين تسوين افلام من يمج عيشي اللحظة وتركي عنج الحذر ولو لمرة وحدة بحياتج. يالله بالله شو گومي خليني اشوف ابتسمي ابتسمت مترددة نور كدامها مشوار طويل حتى تكدر تعتمد على نفسها وتواجه الحياة لوحدها بدون خوف ياترى هم راح يجي اليوم واشوف الجانب القوي من نور يالله امشي اتأخرنا عليهم لزمت ايدها واخذتها للمطبخ لكيت حور مجهزة صينية العصير والكيك انطتها لنور ورحنا انا وحور دخلنا قبلها وكعدنا نسولف وية البنات وام مهيمن وام عناد وعمته منطلقين بالسوالف كان الود والالفة. عام الجو دخلت نور والكل باوع عليها كانت النظرات ما بين فخر واعجاب مثل نظرة خالة زهرة ومابين نظرات تمعن مثل ام عنا وعمته عمة عناد صلت النبي وكالت .. ماشاء الله عين الباردة عليج وكامت باست نور كان الكل يراقب نور الا اني كنت اباوع لردة فعل ام عناد وادرسها نور سلمت عليها وهي بادلتها السلام بكل برود ما شفت بيها اي لهفة عكس سلام رغد وعمته كان كله لهفة يعني مخاوف نور بتجاه ام عناد كانت بمحلها مو عبث فعلاً امه مبين من شكلها وبرودها ما مقتنعة نور راحت كعدت يم رغد رافقتها نظرت الاعجاب من عمة عناد وكالت .. والله طلع ابن اخوية مو هين عرف يختار خبصنا يصيح بنص البيت اريدكم تخطبولي حمامة بغداد اثاري الولد واكع ومحد مسمي عليه ام عناد جاوبتها ام عناد وكالت .. احنا اهم شي عدنا بالنية هي الاخلاق لان الجمال كل شي عادي اي وحدة تكدر تصير حلوة بكم شغلة تجميل وتصير لعابة بس الاخلاق تجري بالدم صعبة تتحصل بهذا الزمن باوعت لخالة زهرة .. صحيح ام مهيمن كلامي لو لا جاوبتها خالة زهرة بطيب خاطر بدون ما تعرف شنو يكمن خلف كلام ام عناد وشنو غايتها .. اي والله كلامج صحيح جمال البنية بأدبها واخلاقها. وانتوا شكلكم الله حاب ابنكم بيوم اختار اخت مهيمن ذهب مصفى وبعد هذا الكلام ام عناد دخلت بصلب الموضوع وصاروا يتفقون بينهم على شغلات الخطوبة والمقدم والمؤخر ومن هالكلام اتفقوا على كلشي ومن وصل الموضوع لحفلة المهر نور اعترضت وكالت .. اني ما اريد اسوي حفلة مهر ولا البس بدلة واحتفل وانا ما اعرف عن اخوية جلال اراضيه وين. حتى ما ينطيني گلبي افرح صحيح وافقت عالخطوبة والعقد لان مهيمن يريد يتطمن علينا قبل لا يسافر. اتمنى تتفهمون ظرفي ام عناد كالت معترضة .. اي بس اني ام شنو ذنبي اريد افرح بأبني واريد قاريبنا واهلنا كلهم يجون ويشوفون خطيبة عناد ويتعرفون عليج واظن هالشي من حقنا ام مهيمن صحيح كلام والا اني غلطانة ام مهيمن ساندت نور وكالت .. خية حقج والله حاسة بيج كل ام يوم المنى عندها من تشوف ابنها يخطب وتفرح بي بس انتوا اهلنا مو غربة عنا وتعرفون بالصار بينا. عمت عناد كالت .. والنعم منكم صدك كلامج احنا اهل مو غربة وهالرسميات مو مهمة بقدر ما يهمنا نتمم فرحة ابنا درات وجهة على ام عناد وكالت .. ام حيدر واذا جان غايتج من الحفلة علمود اقاربنا واهالينا يشوفونها ويتعرفون عليها فيا مكثر الحفلات عوضي عن المهر بالحنة او بالعرس عندج هواي مناسبات تكدرين تعرفيا بأهالينا ام عناد كانت نظرات الضيق مرسومة على معالم وجهة وكالت .. الله كريم اني اهم شي عندي سعادة ابني بعدها تم بقية الاتفاق وية خالة زهرة وام عناد رغم كل المودة الي تبادلها لخالة زهرة لكن من يوصل الكلام وية نور تختفي كل معالم الود ويحل محلها النفور والغيض واتعمدت تخلي الحديث والاتفاق يدوربس وية ام مهيمن ولغت وجود نور والقهرني بالزايد موقف نور الي انكمشت بمكانها حتى ما حركت ساكن ورة ساعتين راحوا اهل عناد ودخلت خالة زهرة للبيت بعدما وصلتهم للباب ونور راحت الغرفة واني رحت وراها وحور اتبعتنا اباوع عليها نزعت حذاها و كعدت على الكرسي وسحبت انفاسها براحة حاطة ايدها على گلبها باوعت علينا وكالت .. يمة و اخيراً راحوا گلبي اجة يوكف ما شفتوها شلون تباوع علية باوعت عليها مقهورة بقلة حيلة اتمنى تصير قوية شخصية هاي عمتها مو هينة بس التزمت الصمت ماكدر احجي واخوفها بالزايد هاي اليومين الفاتت انشغلنا بين تجهيزات خطوبة نور ودوامنا انا وحور طلعت نور وية ام عناد وخالة زهرة ورغد يشترون ذهب وحلقات عناد وصلهم للصايغ وبعدها اترخص من ام مهيمن ونور وكللهم اخذوا راحتكم كان الصايغ واحد من معارفهم بس بيومها نور رجعت كلش ضايجة عكس ام مهيمن الي كانت كل شوية تصلي وتهلي فرحانة لنور سألتها ليش واجتي حور سألتها بفضول شنو اشتريتوا ام مهيمن جانت شايلة علبة مربعة بحجم كتاب لونها احمر مبينة علبة ذهب وكالت .. تعالن شوفن جهاز اختكم فتحت العلبة كان بيها طقم ذهب. متكون من كلادة وتراجي وسوار ومحبس سيت واحد بس كان حجمهم اوفر حور .. بالعافية نور كلش حلوات بس خلي ببالج هاي راح تلبسيهم بس بالمناسبات لان حجمهم جبير. ام مهيمن دك نقالها وراحت ترد ونور مبرطم والوجة محتقن تريد تبجي كعدت يمها ولكزتها .. شنو شبيج احجي ليش ضايجة احد سمعج كلمة ؟؟ لو ام عناد شنت الحرب نور باوعت علية بقلة حلية وكالت بصوت ناصي .. ما انطتني مجال اختار. هذا كله اختيارها اي شي يعجبني واختاره هي تطلع بي الف عيب وتاخذ الي يعجبها كان اسلوبها كلش مو حلو .. ليش ما كلتيلها انتي همين ما يعجبج اختيارها يعني هي مرة جبيرة ما يصير تختار على مزاجها زين وخالة زهرة شنو كالت .. لا خالة زهرة محجت شي بس باوعتلي لان كان مبين علية انا ما حبيت الطقم وسألتني وكالت .. خالة نور احجي اذا ما عجبج الطقم نبدله ما دام احنا بعدنا بيها ويم الصايغ گبل ام عناد طفرت من يمها وكالت .. اي ياعيني ابو المثل يكول اكل ما يعجبك والبس ما يعجب الناس احنا لو نبقى على ذوقهن يختارن كله نص الذهب كرستال وشذر ويروح الوزن عالخالي بلاش حرامات كلتلها .. اي بس خالة موديلهم مو حلو هي جاوبتني .. لا عيني شنو قصدج يعني انا ما عندي ذوق حبي احنا ما نلبس الا الغالي والجديد احنا ما نشتري قديم وكانت هاي بداية معاناة نور وية عمتها ام عناد والحبل عالجرار مهيمن دخلت للبيت اتسحب على اطراف اصابعي وانا شايل بيدي البدلة العسكرية المرقطة والبسطال العسكري ما اريد امي تشوفهم وتكعد تنصبلي مناحة جهزت نفسي حتى التحق جنت بهاي الفترة ارتب اموري وية الجهات المختصة بسفرنا للموصل وبين اكمل شغلي وشغل جلال باقي هواي متعلقات ببناء بيت جلال. انا من رجعت لكيت البناء مستمر والحمدلله هالشي طمني جنت كلش ممنون من رأي ريم بالموضوع واصرارها يكملون بيت جلال هالشي خلاني ارتاح عالاقل اكون سويت شي براسه خير لأخوي وبعدما خلص المبلغ المخصصه جلال للبناء وطال غيابه قررت اكمل البيت من عندي وان شاء الله من يرجع بالسلامة اريده كون يلكة بينه جاهز ومكمل هاي ابسط هدية اهديها اله وما اوفي بحقه ولازم افرغ نفسي علمود باجر مشية الزلم من اهل عناد نور دكات گلبي ترعد بداخل صدري ريم ساعدتني بترتيب وجهي واختيار الملابس ولبست فستان كوكتيل بسيطة. كانت ثلاثة ارباع الردن وطولها يوصل لتحت الركبة بشرين يعني لاطويلة ولا قصيرة بس الفيكة بدلعة الفستان كانت مربعة. ونازلة باوعت لريم وكلتلها .. اكلج ريم انطيني شال احطه على كتفي لان هاي الدلعة كلش جبيرة ريم شهكت وكالت .. لااااااا مستحيل والله اصلا لاتفكرين والله اموتج تخربين ستايل الفستان جاوبتها بضيق واني احاول الملم اطراف الدلعة .. ما مرتاحة احس بروحي مصلخة حور گلبت عيونها بملل .. خاب شوف هاي مصدكة روحها لابسة بدلة يابة دروحي شوفي البنات شنو يلبسون بحفلاتهم لايبقن صدر ولا يبقون سيقان وداعتج اصلاً حفلة المهر مسويها لعرض البضاعة على العريس المكرود حتى يعرف فلوسه ما راحت عالخالي بلاش. يعني بين قوسين نسويله طعم حتى يستعجل بالزواج جاوبت حور .. لا الحمدلله عناد ما راح يدخل لان ماكو حفلة بس امه وخواته وعمته ومرت اخوه حور فتحت حلكها تريد تجاوبني وكالت .. هههههه والله انتي فطيرة وعلى نيتج عنا... بس ريم قاطعتها بسرعة وكالت .. مو شرط عناد يدخل احنا نريدج تراوين ام عناد جمالج وتحرگين گلبها حتى تعرف ام كرش من تحجي عن الجمال گدروا البنات يهدؤن مخاوفي سمعت صوت الجرس وكلبي يدك وية نغمة صوت الجرس وزادت حركة البنات وبعدها ام مهيمن دخلت وشافت نور وصلت عالنبي وكالت .. يالله خالة كومي دخلي سلمي اجوي اهل عناد جايبين شيوخهم وناسهم يتبع احداث البارت القادم جلال اباوع وانا مصدوم دخيلك يا ربي ماعاد بالگلب صبر احس بروحي راحت السلاح معلگ ورة ظهري والشيطان يوازيني اهجم عليهم وجسمي كله ينتفض عالمنظر الي يشيب الراس اتمنيت اهدر بيهم بصوت عالي وما اخلي اي واحد يعيش بيهم اتمنى لكم قراءة ممتعة مع تحيات اختكم نهى الحسون | ||||
|
| |
|
08-11-19, 08:40 AM
| #65 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_لم_الشمل #البارت ثلاثة وثلاثون ج ٢ السلام عليكم ورحمة الله وبركاته اسعد الله مساءكم يا احبتي المتابعين ❤️ ودمت سالماً ياعراق المحبة والمحبين 🇮🇶🇮🇶🇮🇶 نور كاعدة مدنگة راسي مرتبكة واصابع ايدية تتلاوة مع بعضها ونظراتي تتنقل بين مهيمن وخالة زهرة كنت بعدني ما مستوعبة كلام مهيمن الشي الوحيد الي كان يدل على ادراك معنى كلامه هو اضطراب ايقاع داگات گلبي المخبوص كمل كلامه وهو يباوعلي وكال .. نور ترة القرار راجعلج وهاي حياتج انتي الي تختارين انا بس اريد اتطمن عليج واامنج بيد رجال يستاهلج ويصونج قبل لا اسافر ما اريد يصير بيج مثل الصار بذيج المرة تجي خالتج هي ورجلها يستغلون غيابي و يسولهم فلم ثاني حتى ياخذونج وياهم تعيشين جوة ايدهم خالة زهرة اكدت على كلامه.. اي والله صحيح كلامك وهو رجع باوع علية و سألني .. هَـا شنو گلتي موافقة لو لا ترة الولد ينتظرني اردله جوابج تهربت بنظراتي وصرت اباوع بكل مكان الا على مهيمن استحيت لا توكع عيني بعيونه وساعتها راح يكدر يخمن من نظرات عيوني المتلهفة الي ما اكدر اداريها كان بعده يباوع علية ينتظر ردي جليت صوتي اتعثرت بكلامي وكلت.. بالحقيقة مهيمن انت فاجئتني بالموضوع يعني ما اعرف شنو اكول مهيمن ابتسم .. انا ما اريد اضغط عليج اعرف كل بنية تحتاج فترة حتى تفكر بالموضوع وتقرر بس احنا وضعنا يختلف انتي تعرفين عناد ما يحتاج اعرفج بي وانتي اكيد كان عندج علم هاي مو اول مرة يطلب ايدج مني فلابد انتي كانت عندج رد فعل بلحظتها وانا اريد اعرف ردة فعلج بتجاه الموضوع حتى اعرف رأيج شكد زحمة والله استحي شنو اجاوبه واكله خوية اختك بلحظتها اجة يوگف گلبها من رفضه جلال لو اگله على حال گلبي شلون جاي يطرب من الفرحة جاوبته امتمت .. ماا اعرف انت بكيفك خالة زهرة نطقت بنفاذ صبر وگالت .. .. خالة ما يحتاجلها علم اختاري وحدة من الثنين لو اي. لو موافقة يابعد خالتج جاوبي اخوج وبردي گلبه باوعت على ام مهيمن استنجد بيها بس اشو هي الثانية خطية جانت اضرب من حالي الحماس عندها فول وكلامها كان خير دليل مهيمن ضحك وكال.. خير يمة شنو هاي جاي تسوين تمويه للبنية لو ناصبتلها كمين رحمة على اهلج يمة خلي البنية تجاوبني براحتها لاتأثرين عليها بكلامج انهى كلامه وية امه والتفت علية يتظر مني الرد بعلت ريگي خايفة لا ينعقد الساني من المستحة جاوبته .. مهيمن انت بكيفك انت شنو تشوف اني وياك اكيد قرارك هو الانسب الي لمعت عيونه بفخر وكال .. والله اذا اريد اترحم لأبوي على شي فهو وجودكم بحياتي انتي وجلال وام السان المزروف احسن شي سواه ابوي بحياته هو انتوا خالة زهرة باوعتلي برضى ومهيمن كمل كلامه وكال .. نور ثقي بالله انا مستحيل اقدم على هيج خطوة لوما متأكد من الولد شاري وان هو بگدها واگدر اعتمد عليه وانا مثلما تعرفين وراي سفر وما اعرف سفري شكد يطول واريد اروح وانا مأمنكم عند رجال يصونكم يدير باله عليكم بغيابي ام مهيمن .. والله يازين ما اختاريت عناد خوش عناد ابتسم وكال بأدراك .. نور اريد اسمع موافقتج بأذني گوة كدرت اطلع الكلمة مني همست بصوت ناصي ... موافقة ابتسم وكال .. يعني هاي هي جواب نهائي ام مهيمن قاطعت كلامه بنفاذ صبر كالت .. اي جواب نهائي شنو رحمة الله من عادها. مهيمن باوع لامه بقلة صبر كال .. شلون بيج يمة. خلي البنية تجاوبني ترة هي الي راح تعرس مو انتي .. يايمة مو جاي تشوف اختك بالكوة نطلع الحجاية منها وانت كاعد تلعب باعصابها عفية مو كل شوية تكعد تسألها خاف البنية تهون وتغير رأيها وترفض .. والله يمة مو بيدج ابو طبع ما يجوز من طبعه سحب نقاله ورسل رسالة بالواتساب يبلغ عناد. الموافقة لحظات مو اكثر دك نقال مهيمن والمتصل عناد وكان صوته واضح.. احلف كول والله وافقت مهيمن جاوبه وكال.. بالحقيقة مو هي الي وافقت امي الي اعلنت الموافقة شكلي راح ازوجك امي بدال اختي جان يحجيها وهو يباوع على امه مهيمن وجلال عندهم ميانة وية عناد وشقاهم يصير ماله حدود خالة زهرة شهكت وضربته على كتفه وكالت.. ولك صدك ما تستحي مهيمن يضحك وكال .. يالله ابو الشباب اتوكل بلا مطرود الموافقة واخذتها بعد شعندك لاطش عناد كله .. يااا اخي انطيني صبر غير تگلي شنو اسوي خوما تخليني معلگ گلي شوكت اجيب اهلي لو شنو مهيمن ضحك وجاوبه .. بعد هاي الرسميات بقت يمكم مو يمي لايكون تريد انا هم اخذلك مشاية على بيتكم واخطبك من اهلك فرد نوب عناد.. اي والله ياريت ابوي ما يگول شي بسرعة يگلك گبع واخذ .. اكول ابو الشباب شكلك مصدگ روحك لاتخليني اگلب عليك واغير رأئي .. لا على بختك كل شي ولا تگلب علينا عمي خليك هيج على حطتك وانا رايح ابلغ الاهل وامري لله وراها انهى المكالمة وهو يبتسم وباوع على امه وكال.. ها يمة هسة ارتاح گلبج خالة زهرة جاوبته .. طبعاً يرتاح گلبي اي ام تفرح لبنتها وتحب تتطمن عليها ونور من يوم عتبت دارنا الله الشاهد علية صارت من حسبت اولادي عيوني لمعت بالدموع وجاوبتها .. اشكرج خالة ما تعرفين هذا كلامج شكد اله تأثير بنفسي .. يوم المنى ازوجكم وافرح بيكم كلكم والله يمد بعمري واشوف جهالكم يلعبون حوالية مهيمن باوع لامه وكال .. بس اريد اعرف شنو سالفتج وية الزواج كلما يمر طاريه تلمع عيونج والله اذا ظليتي على هالحسبة شلون ما اشوف يايمة شكلي راح اكسب بيج اجر وازوجج بس صبري علية خلي ازوج خواتي واتفرغلج خالة زهرة .. هايمة خير سالمين اشو درت علية شنو شايفني معلگة اعلان وكاتبة اريدن رجل .. لا يمة بس كلت خطية اشوفج تنخبصين و تهمين وتلمع عيونج من تسمعين بعريس جاي عالبنات فكلت عالواهس انتي همين اخطبلج حالج حال خواتي امه جاوبته.. اي عفية وليدي من هسة كعدت تصفي بينا حتى يخلالك البيت انت ومريتك ويبقى البيت لأم طيرة طارت بي فرد طيرة وتعال كلي شنو سالفة تخطب لخواتك الي يسمعك يگول فاتح بيهن مزاد .. والله يايمة ابنج گلب الموازين كلها اشو بدال ما يجوني الناس يطلبون ايد خواتي مني صرت انا الي احجز العرسان لخواتي ذاك اليوم حجزت جلال لحويرة وهسة خطبت عناد لنور امه ابتسمت وكالت .. ترة هم كالوها اخطب لبنتك ولا تخطب لأبنك هم يحجون واني وجهي صاير نار يمكن صخنت وجان يندك نقال مهيمن مرة ثانية وهالمرة كان المتصل الحجي ابو حيدر كان نهضت من مكاني مرتبكة اكيد الحجي اتصل على مهيمن علمود موضوع الخطوبة انسحبت من الغرفة بكل هدوء عكس عاصفة المشاعر الموجودة بداخلي ريم كنت انا وحور ونور نرجع الجنط لمكانهم بالمخزن ومهيمن صاح لنور وهي نزلت تشوفه شنو يريد منها بقينا انا وحور اباوع عليها رفعت الجنطة وحطتها على البقية وهي تنافخ ضايجة رفعت حاجبي وسألتها .. شنو خير ليش عاقجة وجهج وضايجة حور دارت علية وكالت .. هذني بنات خالي العوبات من يوم مهيمن بلغ خوالي بموافقته على خطوبة جلال الي وهن كالبات الجهرة علية ولج حتى نغم الحبابة هم صفت وياهن تصدكين صرت حتى اكره اروح وية امي لبيت خوالي .. ليش شنو حجوا عليج .. هاي البارحة بت خالي كعدت كدامي وعينك عليني تگلي كدام البنات والله بخت الزركة گاعد كل يوم جاي خطابة يطلب ايدها مرة صديق اخوها بالسوك ومرة سجاد ونوب فوگ هذولي كلهم تالي وگعتلها بواحد من جماله يوگع الصكر جاوبته العوبة نغم وكلتلها .. قابل مثل حظنا هو واحد وشرد جانت تقصد على مهيمن ونوب كملت كلامها وتكول يارب بس اريد اعرف هم شنو شافوا بيج وهيج كاتلين روحهم عليج هاي العوبة تكللها .. بخت الزرگة يلوح بالعلالي قابل مثلنا بالرغم احنا احلى منها ومحد دگ بابنا براسه خير كلهم عاوين وين الزبالة. يلفي على حظي جانت تحجي وهي كلش مهضومة منهن كسرت خاطري كلتلها.. ما عليج بيهن والله يغارون منج انتي بس عيونج تسواهن وتسوى عشرة منهن وسمارج الحنطاوي هو الي اسر جلال واتربع بگلبه جاوبتني وكالت .. على شنو يحسدوني ياحظي حتى الولد ما اعرف وين اراضيه خطبه مهيمن الي وهو ابو الانا ماعنده علم صار مخطوب وارتبط اسمه وية اسمي تصدكين ريم انا من يوم الي سافر بي جلال وانا عيوني ما تعرف طعم النوم من ورة التفكير خطية حور شكد عانت وبعدها جاي تعاني الغياب المجهول لجلال خلة ثغرة. غموض ترك خلفه الالاف الاسئلة. والشكوك الي لحد الان مالها جواب والاغرب من هذا كله مهيمن وسكوته الغريب وحور وخوفها المبالغ بي على اختفاء جلال ما اعرف ليش جاوبتها حتى اواسيها .. حقج ادري بيج جاي تعانين مو بس انتي كلنا خافين على جلال ونتمنى اليوم قبل باجر يرجع بالسلامة جرت حسرة وكالت .. اللهم امين ربي يسمع منج .. بس حور امانة لاتخلين كلام بنات خالج يأثر عليج .. صعبة موبيدي شلون ما يأثر علية ولا اتأثر بي اذا اسمع اخت سجاد الغبية تكلهن .. تهي ... بهي والله ياربي هسة عاد هي شلون قسمة ينرفع بيها الراس اشو هو ارهابي والحكومة تطارده حتى ما يعرفون وين اراضيه وانا ما اتحملت كمت عليهن و اتعارك وياهن وحتى نغم زعلت عليها لان هم كامت تحجي علية وتكلي .. انتوا واخوج ما اعرف شبيكم جنكم مسحورين جلال وبت عمه عامينكم وصرتوا مثل الخاتم بأصبعهم حجاية مني وحجاية منها وكبت العركة واجتي امي وطحيت حظي كدامهم وخالي حسن طيح حظ بته وكللها شلون تهضمين بت عمتج وتزعليها وهي ضيفة بداري خليني اسمع بيج مسمعتها كلمة تغث صدكي ما تلومين الا نفسج وانا رجعت للبيت وامي نبهت علية وحذرتني ما اجيب سيرة بموضوع العركة لمهيمن تدري بي يتعارك ويسوي مشكلة وية خوالي جاوبتها .. اشوفج البارحة بالليل اول ما دخل خالج ومهيمن رحتي شردتي اثاري اكو ان بالموضوع وفجاءة اتذكرت موقف نغم وياي بالكلية ولكزت حور من خاصرتها وكلتلها بنذالة .. حل تستاهلين الصار بيج حتى تحسين بقهرتي بيوم ست نغم اجتي تسألني وتگلي سمعت خبر انتي تردين تسافرين للخارج يم عمتج شوكت راح تستفرين وسألتها .. ليش تسأليني عن موعد سفري فلت وجهة وكالت .. هَـا مو نريد اني وامي نجي لبيت عمة زهرة حتى نسلم عليج ونودعج قبل لا تسافرين وانتي الثولة واكفة بيني وبينها وكاعدة توزعين ابتسامات مثل الخبلة. شكلج عاجبج الوضع ضحكت وجاوبتني وهي تتذكر الموقف وكالت .. مو انتي ما شفتي روحج شنو سويتي اجيتي تاكلين نغم الا شوية نزلتي على البنة اكس ومربع. بشرفج اكو وحدة يسألونها عن موعد سفرها بصفاء نية تكليلها .. حبيبتي لاتقنعيني انتي ميتة علية وتردين تودعيني والله شي يضحك تتعاركون مثل الشرايج كدامي اباوع عليكم واكول مكرودة يازهرة عندج شرايج اثنين يتعاركن على ابنج ولا محصلة ولا وحدة بيهن لحد هسة گلبت عيوني بكل ثقة وانا الگلب. يطرب بغرور .. حٍٍِْــًبٌٍـــِٓېٍٓ حور بلعي كلامج ماكو شي اسمه شرايج او ضرة مهيمن ملك خاص حصري بس الي گلبت عيونها وگالت .. اهووووو رجعت ريمة لعادتها القديمة يعني شدوا روسكم يا گرعان. اتخصرت وگلتلها .. ليش عيني شنو صاير .. مكرود مهيمن عم على روحه بيوم راضاج هسة بعد شيخلصنا من ريم هزيت شعري بثقة وكلتلها .. حٍٍِْــًبٌٍـــِٓېٍٓ محد ضاربه على ايده هو الي اختار يراضيني حتى ابقى هنا وما اسافر وبموقفه هذا عرفت مكانتي بحياته معناها هو مايكدر على زعلي وهالشي اعتبره تصريح من عنده الي واعتراف بالملكية الحصرية لحضرتنا وخلاص هو اختار اذن لازم يتحمل تبعية اخياره حور شهكت وكالت.. عزة بعينج ريم الله يعلم شنو ناوية على اخوي المكرود .. لاتخافين على اخوج. مني خافي عليه من الحية بت خالج ست نغم. شفتيها شلون تسألني بشماتة شوكت اسافر حضرت الست كانت تتأمل اسافر وتفرغلها الساحة ويرجع يتقدملها ابتسمت برضى وكملت كلامي .. بس وين اني ريم مستحيل اخليها تطول مهيمن وافرغلها الساحة حتى تاخذ راحتها لاعيني لا. لاگلبي لا عشم بليس بالجنة شكلي راح ابقى كاعدة على گلبها حور .. الله يرحمج نغم جانت خوش بنية باوعت بفخر وغرور واتنفست برضى وكلت .. ما تدرين انا شكد متلهفة. على الدوام اريد اشوف وجه نغم من بعدما مهيمن راضاني اكيد هسة ابوها راح يسولفلهم على سالفة مهيمن وطلبه من الشيخ حتى يتوسطوله يصالحون بيني وبينه .. ريم والله انك خطيرة وتخوفين. ولج راح تخليني حتى اخاف على اخوي منج باوعت للساعة وعقدت حواجبي مستغربة هاي شنو نور وين راحت اشو طولت جاوبتني .. مهيمن صاحلها وكللها تعالي اريدج بموضوع مهيم يمك...... فجاءة قطعت كلامها وضربت كف ايدها على كصتها وكالت .. عزة هاي شلون فاتتني سالتها بأهتمام .. شنو شصاير نهضت من مكانها بسرعة وكالت .. خلي اروح الحگ افتهم شنو الموضوع عافتني وراحت وانا اتبعتهت ونزلت وراها لكيتها واكفة يم باب غرفة مهيمن جاي تتسنط وكفت يمها وسألتها .. شنو الموضوع ليش واكفة تستمعين لكلامهم سدت حلگي بثنين ايديها وكالت .. اششششش ولج عوبة شهرتينا خلي اسمع شكله اخوي جايب عريس لنور كملت كلامها ورجعت حطت اذنها عالباب واني تلقائياً سويت مثلها وصرت اسمع بس ما لحگنا نسمع شي الا القليل يعني صوتهم كان ناصي. بس خلاصة الموضوع اكو عريس متقدم بس منو هو ما كدرت اعرف انفتح الباب وانا وحور صرنا بحضن نور الي كانت تريد تطلع من الغرفة وبسرعة اتلاحگنا لروحنا قبل لا ينتبهون علينا مهيمن وامه عدلنا وكفتنا بخفة وسحبنا نور وسدينا الباب اخذناها على غفلة خطية هي من المفاجئة والصدمة ما لحكت تحجي شي طوقناها من الجانبين عبالك شرطة ولزموا حرامي گامت تباوع علنا منا ومنا واخذناها سحل عالغرفة سدينا الباب وحور باشرت بالاسئلة .. شمينا ريحة عريس بالجو واجينة نركض وانا كملت كلامها .. احجي منو هذا اشو مبين من شكلج فرحانة وراضية بي معناها تعرفينه جاوبتنا .. هوب .. هوب وحدة. وحدة على كيفكم وياي اول شي انتوا مبين من شكلكم جنتوا واكفين تتسمعون ورة الباب انا وحور ردينا بنفس اللحظة باجابات مختلفة حور .. لا ما جنا نستمع وانا .. اي صحيح كنا واكفين نستمع لكلامكم بس شكلنا اجينا متأخرين ما لحگنا غير بس على البركة وموافقة حور لكزتني وكالت .. لج عوبة بعد لو تموتين ما اعزمج على جريمة فضحتينا وشوهتي ام السمعة الزينة. نور ضحكت وكالت .. لا تتعاركون هسة احجيلكم الموضوع كله وكعدت نور تحجيلنا عن موضوع خطوبتها وبعيونها الفرحة جلال مرت الشهور وداعش سيطرت على الموصل بأكملها وناوين يستمرون بالتمدد للمناطق المجاورة. كانت حرب غير متكافئة بين الطرفين داعش تملك احدث الاسحلة واقوى عتاد بس رغم هذا قواتنا بدت تحرز تقدم هو صحيح كان تقدم بطيء لكن كل خطوة كانت كفيلة بتلقين الدواعش درس وتكلفهم خسائر فادحة وانا طول هاي الشهور كنت مستمر بشغلي بالورشة وانتهز اي فرصة لتزويد جهات الاستخبارات بالمعلومات مو بس انا حتى العناصر البقية الي كانوا وياي مثل حارث مشتغللهم بالمرصاد مرات يظل بالي عليه خايف لا يكتشفونه بس الله الحافظ ويعمي عيونهم عنا الفترة الفاتت انا مركزي قوى عندهم والبارحة الامير حجة وياي وكلي ((جلال قربان انك رجل شجاع ولقد قررنا ان نقوم بتكريمك على جهودك المبذولة معنا لما قدمته لدولة الخلافة من صنيع كن على ثقة اسمك سوف يذكر بتاريخ دولة الخلافة وعلى لسان كل المسلمين )) جاوبته نص عربي فصحى ونص عراقي .. والله انكم قوم سائرون على طريق الخير والحق وتستاهلون الواحد يوكف وراكم وينصركم ضحك وكال .. جلال قربان اسعى لتحسين كلامك بالعربية الفصحى فأنها لغة القران ونحن مصرين ان نحافظ على ديننا غمضت عيوني وكوة لازم روحي لا افلتها ابو الوصخ يريد يحافظ عالدين ولغة القران خاب دروح اسبح بالاول واتطهر وبعدين تعال احجي بالدين واحدكم ريحته كلها زنجار. خرب طبعاً المعسكر الي انا موجود بي موجود بأطراف مدينة الموصل لذلك لحد الان ما شايف مدينة الموصل ولا دخلتلها من عهد ما طلعت منها لان داعش بطول ذيج الفترة. شددت على جميع العناصر الموجودين بالمعسكر وبقيت محبوس بالورشة بس اشتغل عالاجهزة ما كدرت اطلع اكلي وشربي يوصلني للورشة مو بس انا كل الي وياي مثل حلاتي وكلما اريد اطلع للمدينة ياخذني الفضول اريد اشوف شنو جرى عليها. اواجه رفض من الامير وكل مرة يگول نفس الكلام .. جلال ليس الان الوضع لا زال خطراً في المدينة يوجد هناك اعداء يتربصون بعناصرنا في كل مكان ويغتالونهم ونحن حريصون عليك لا نستطيع ان نجازف بك وندعك تخرج في المدينة بالوضع الراهن ادري بيهم موخوفاً علية وانما حفاظاً على مصالحهم وفائدتهم يحرصون علية سلامتي بقيت على هالحال من الورشة للغرفة ومن الغرفة للورشة لحدما بدوا يوسعون سيطرتهم رخوا الحبل وبدوا يتساهلون وبعدما كنت امولهم بالاجهزة. وتصنيعها بديت انفذ خطة رقم اثنين احاول المماطلة بتصنيع الاجهزة يعني كل شهر يمكن لو اسوي جهاز واكمله وية السيارة لو اكعد اختلق الاعذار مرة اگلهم اكو نقص بالقطع او تلف بالاجهزة او اطلب منهم لبات تعجيزية معقدة احتاجها للجهاز حتى مرة صارت مشكلة بيني وبين احد القادة كام يصيح بوجهي ابن الشريفة لان اتأخرت عليهم بتوفير الطلبية لمجموعة السيارات المتفق عليهم واليوم بعدما بدت الامور شوية تهدأ داخل المعسكر قررت اطلع وياهم للمدينة لان فاض بية الحنين للموصل وبعد ما عندي صبر بلغت ابو بهاء حتى انزل للمدينة گلي تمام اذن بعد فد مرة بدربك اشتري النواقص الي تخص الاجهزة وروح وية عناصر هيئة الحسبة هسة راح ينزلون للمدينة ويقومون بدورية لرصد ومعاقبة المخالفين عقدت حواجبي مستغرب ونوب هذولي الحسبة شنو سالفتهم صعدت وياهم بسيارتهم كانوا مجموعة لحاياهم طويلة وملابسهم سود وشكولهم مگلبة ما تمت بأي صلة للاسلام او السلام وكأنما مهج رعاع ولفوا عالعراق دخلت للمدينة واباوع عالناس شنو الموضوع وين اهل الموصل. هذولي منو جانت السيارة تتوغل بالشوارع وانا اتلفت منا ومنا اباوع مصدوم على معالم المدينة. المرعبة وعلى الوجوه الغريبة هاي الوجوه ما اعرفها ولابيها اي لمحة من اهل الموصل كلهم لحاياهم طويلة. وملابسهم كانت قريبة على الزي الافغانستاني مريت على معالم اعرفها واتفاجئت من شفت مراقد النبي شيت والنبي يونس مهدومة. اجة عقلي ينجن من كمية الخراب العام بالمدينة فجاءة اتوقفت السيارات على عفلة ونزلوا عناصر هيئة الحسبة. وراحوا على شاب يبيع جيكاير لزموه وسحلوه. بوسط السوگ وحطوه وجلدوه اربعين جلدة گدام الناس سألت واحد من العناصر عن السبب ليش جلدوه جاوبني القندرة وكال .. لايجوز بيع المحرمات والتدخين من المحرمات وبعدما جلدوه طلبوا عليه غرامة عقاباً له وبعدها صاروا يتجولون بالاسواق والشوارع وكل شوية متوقفين ولازمين مخالفة اباوع عليهم لزموا كم شاب لابس بنطرون جينز وجلدوه. والمشكلة يعاقبونه ويكلوله عليك مخالفة شريعية بمنظورهم التعبان يعني الجماعة. يشوفون نفسهم هيئة الامر بالمعروف والنهي عن المنكر بعدها لفت انتباهي صوت تحذير من واحد عناصر هيئة الحسبة ينبه مرية. كانت منقبة. عاط بيها بصوت عالي بتحذير .. انتي يا امرأة تستري يعني تلتزم بالنقاب وشروطه اباوع عالمرية مستغرب كانت من فوك ليجوة عبارة عن سواد بس عيونها طالعة بعد شنو تسوي و تتستر تختفي مثلاً اسمعه يكللها النقاب وهي بأرتباك نزلت البرگع الثاني على وجهة انا من يمي اختنگت الله ياخذهم هذولي شنو مصخمين بأهل الموصل او بالاحرى بقايا اهل الموصل من الله لا يوفقهم بعدها اخذوني حتى اروح اكمل شغلاتي من صعدت وياهم بالسيارات وتوغلنا لداخل الموصل بين الاحياء السكنية وية كل خطوة اخطيها لداخل مدينتي گلبي ينزف على معالمها عديت على اماكن ياما كنت اتمشى بيها انا سلوان والي بيها ذكريات بس مع الاسف ما باقي بس الاطلال كلبي ينزف وخنكتني العبرة على مديني جانت مثل عروسة جميلة وتشوهت معانيها بسبب الدمار بعدما صال وجال بيها الزمن صال كملت شغلي واحياجاتي ورجعت وية العناصر للمعسكر وانا گلبي مليان حقد اضعاف مضاعفة عليهم وزاد عزمي واصراري اكثر من قبل بس صبروا علية بالطريق واتصل عليهم ابو بهاء وحجة وياهم انهى الاتصال وباوع علية قائد الحسبة وكال .. والله ياجلال انك لذو حظ عظيم يافتى. وكأن الله القى عليك محبتاً واصبحت الفتى المدلل لدى الامير .. اشم رائحة حسد يا اخي بالاسلام شكلك غيران مني .. وكيف لا احسدك والامير يبلغني ويقول عندما يصل جلال فليأتي لي مباشرتاً فعندي له مكافأة تنتظره. ابتسمت ابتسامة صفرة وكلتله.. ياقرة عين امي بي وفرحتها كم انا سعد الحظ والله وانت ما محلفني اتمنى ابوي عايش ويشوف بعيونه انجازاتي المشرفة وياكم اتخيل عيناه سوف تفيض بالدموع من شدة الفرح وصلنا للمعسكر انتبهت على حركة العناصر مشغولين عبالك خلية نحل عملهم على قدم وساق اتوقفت بمكاني وشفت وحدة اجنبية داعشية حتى ما تعرف تحجي عربي شايلة سلاح ولابسة زي عربي جبة سودة ومقنعة طويلة جانت تحجي بوحشية وية واحد من العناصر الي افتهمته هي راح تنفذ مهمة بتفجير كنيسة. وتنتظر الاوامر من الامير انتبهت لحارث كان واكف يمها هو راح يكون الشخص المرافق وياها بالعملية الله يكون بعونك ياحارث. على هالطركاعة هناك وجان اشوف ابو ذياب صارلي اشهر ما شايفة لان انتقلوا هو وابو جراس لغير موقع رحت يمه وانا مستغرب هذا شمسوي بروحه .. لحيته واصلة لكرشه سالته .. هَـاي شنو ابو ذياب ولا عرفتك شصاير بيك التفت علية وشافني وابتسم .. ياهلا بجلال قربان .. والله والك وحشة ماصرنا نشوفك لاانت ولا ابو جراس جاوبني باسف وگال .. ابو جراس استشهد على ايد الكفرة الانجاس جان يقصد على الجيش العراقي والحشد الشعبي استغفر الله يا ربي هم نزل. وهم يدبج ماكاعد راحة ابو الوسخ باوعت منا ومنا وانا اشاهد الهوسة وسالته.. شنو الموضوع ليش كل هاي الهوسة صاير شي هنا اكو ضغط عليكم حاوبني وهو يضحك .. هاي الهوسة كلها علمود راح يجيبون سبايا للمعسكر الامير گال هاي هدية لكبار العناصر ومكافأة الابطال انخطف لوني ووكع گلبي بين رجلية سألته والنفس انسحب من بين ظلوعي .. ششنو شلون يعني سبايا ريم اليوم اجوي بيت اهل عناد امه وعمته واخته رغد كان عدنا خبر بزيارتهم لان البارحة الحجي ابو حيدر . اتصل على مهيمن واتفق وياه يجون الاهل حتى يتفقون وية نور وامه وهسة خالة زهرة طلعت استقبلتهم ورحبت بيهم واني وياها وحور بالمطبخ تحضر صينية التقديم. ونور بالغرفة تركتها تبدل ملابسها اتبادلوا السلام وكعدوا ورغد سألتني بلهفة عن نور .. شنو وين عروستنا نريد نشوفها مشتاقتلها خالة زهرة باوعتلي و كالت .. ريمة خالة روحي صيحي لبت عمج خليها تجي تدخل تسلم استأذنت منهم ورحت اصيح لنور دخلت للغرفة ولكيت الاخت مخبوصة. تروح منا وتجي مناك. سألتها متفاجئة .. هاي شنو اشو بعدج كل شي ممسوية نور باوعتلي بقلة حيلة وكالت .. سكتي ريم راح اموت من الخوف ما اعرف شنو البس اشو شنو البس اشوفه مو حلو علية عقدت حواجبي مستغربة .. من شنو خايفة ترة عناد مو وياهم يعني بعد وكت على سوالف الارتباك الخوف. وثانياً انتي حلوة وما عايزة شي يجملج واي راح تلبسينه راح يكون حلو عليج. بس ينقصج شوية ثقة بالنفس تركتها ورحت فتحت الكنتور وطلعتلها لبسة حلوة مرتبة وبسيطة مو متكلفة وكعدتها عالسرير وطلعت علبة الميك اب ورتبت وجها هي اصلاً حلوى ما يحتاجلها تعديلات هواي بس كانت حيل مخبوصة ومرتبكة جنت ارتبها واحجي وياها .. نور شبيج مو گلنا عناد مو وياهم بس امه واخته اجوي بعد المن الخوف جاوبتني .. هو انا هذا المخوفني وجود امه لان اخر مرة من التقيت بيها بعرس رغد سمعتني كلام يسم البدن ومو حلو بحقي وما اعرف هسة هي شنو موقفها جاية لهنا من رضاتها لو مجبورة ريم اباوع عليها وكلت .. نور انتي ليش تصعبين الامور على نفسج وحسب الكلام الي سمعته هم ما مصدگين نفسهم عناد وافق اخيراً يتزوج نسيتي مو كل مرة اخته تكول اهلي يردون يزوجونه وهو يتهرب يعني اكيد هسة اهله الكاع ما شايلتهم من الفرحة فلاتكعدين تسوين افلام من يمج عيشي اللحظة وتركي عنج الحذر ولو لمرة وحدة بحياتج. يالله بالله شو گومي خليني اشوف ابتسمي ابتسمت مترددة نور كدامها مشوار طويل حتى تكدر تعتمد على نفسها وتواجه الحياة لوحدها بدون خوف ياترى هم راح يجي اليوم واشوف الجانب القوي من نور يالله امشي اتأخرنا عليهم لزمت ايدها واخذتها للمطبخ لكيت حور مجهزة صينية العصير والكيك انطتها لنور ورحنا انا وحور دخلنا قبلها وكعدنا نسولف وية البنات وام مهيمن وام عناد وعمته منطلقين بالسوالف كان الود والالفة. عام الجو دخلت نور والكل باوع عليها كانت النظرات ما بين فخر واعجاب مثل نظرة خالة زهرة ومابين نظرات تمعن مثل ام عنا وعمته عمة عناد صلت النبي وكالت .. ماشاء الله عين الباردة عليج وكامت باست نور كان الكل يراقب نور الا اني كنت اباوع لردة فعل ام عناد وادرسها نور سلمت عليها وهي بادلتها السلام بكل برود ما شفت بيها اي لهفة عكس سلام رغد وعمته كان كله لهفة يعني مخاوف نور بتجاه ام عناد كانت بمحلها مو عبث فعلاً امه مبين من شكلها وبرودها ما مقتنعة نور راحت كعدت يم رغد رافقتها نظرت الاعجاب من عمة عناد وكالت .. والله طلع ابن اخوية مو هين عرف يختار خبصنا يصيح بنص البيت اريدكم تخطبولي حمامة بغداد اثاري الولد واكع ومحد مسمي عليه ام عناد جاوبتها ام عناد وكالت .. احنا اهم شي عدنا بالنية هي الاخلاق لان الجمال كل شي عادي اي وحدة تكدر تصير حلوة بكم شغلة تجميل وتصير لعابة بس الاخلاق تجري بالدم صعبة تتحصل بهذا الزمن باوعت لخالة زهرة .. صحيح ام مهيمن كلامي لو لا جاوبتها خالة زهرة بطيب خاطر بدون ما تعرف شنو يكمن خلف كلام ام عناد وشنو غايتها .. اي والله كلامج صحيح جمال البنية بأدبها واخلاقها. وانتوا شكلكم الله حاب ابنكم بيوم اختار اخت مهيمن ذهب مصفى وبعد هذا الكلام ام عناد دخلت بصلب الموضوع وصاروا يتفقون بينهم على شغلات الخطوبة والمقدم والمؤخر ومن هالكلام اتفقوا على كلشي ومن وصل الموضوع لحفلة المهر نور اعترضت وكالت .. اني ما اريد اسوي حفلة مهر ولا البس بدلة واحتفل وانا ما اعرف عن اخوية جلال اراضيه وين. حتى ما ينطيني گلبي افرح صحيح وافقت عالخطوبة والعقد لان مهيمن يريد يتطمن علينا قبل لا يسافر. اتمنى تتفهمون ظرفي ام عناد كالت معترضة .. اي بس اني ام شنو ذنبي اريد افرح بأبني واريد قاريبنا واهلنا كلهم يجون ويشوفون خطيبة عناد ويتعرفون عليج واظن هالشي من حقنا ام مهيمن صحيح كلام والا اني غلطانة ام مهيمن ساندت نور وكالت .. خية حقج والله حاسة بيج كل ام يوم المنى عندها من تشوف ابنها يخطب وتفرح بي بس انتوا اهلنا مو غربة عنا وتعرفون بالصار بينا. عمت عناد كالت .. والنعم منكم صدك كلامج احنا اهل مو غربة وهالرسميات مو مهمة بقدر ما يهمنا نتمم فرحة ابنا درات وجهة على ام عناد وكالت .. ام حيدر واذا جان غايتج من الحفلة علمود اقاربنا واهالينا يشوفونها ويتعرفون عليها فيا مكثر الحفلات عوضي عن المهر بالحنة او بالعرس عندج هواي مناسبات تكدرين تعرفيا بأهالينا ام عناد كانت نظرات الضيق مرسومة على معالم وجهة وكالت .. الله كريم اني اهم شي عندي سعادة ابني بعدها تم بقية الاتفاق وية خالة زهرة وام عناد رغم كل المودة الي تبادلها لخالة زهرة لكن من يوصل الكلام وية نور تختفي كل معالم الود ويحل محلها النفور والغيض واتعمدت تخلي الحديث والاتفاق يدوربس وية ام مهيمن ولغت وجود نور والقهرني بالزايد موقف نور الي انكمشت بمكانها حتى ما حركت ساكن ورة ساعتين راحوا اهل عناد ودخلت خالة زهرة للبيت بعدما وصلتهم للباب ونور راحت الغرفة واني رحت وراها وحور اتبعتنا اباوع عليها نزعت حذاها و كعدت على الكرسي وسحبت انفاسها براحة حاطة ايدها على گلبها باوعت علينا وكالت .. يمة و اخيراً راحوا گلبي اجة يوكف ما شفتوها شلون تباوع علية باوعت عليها مقهورة بقلة حيلة اتمنى تصير قوية شخصية هاي عمتها مو هينة بس التزمت الصمت ماكدر احجي واخوفها بالزايد هاي اليومين الفاتت انشغلنا بين تجهيزات خطوبة نور ودوامنا انا وحور طلعت نور وية ام عناد وخالة زهرة ورغد يشترون ذهب وحلقات عناد وصلهم للصايغ وبعدها اترخص من ام مهيمن ونور وكللهم اخذوا راحتكم كان الصايغ واحد من معارفهم بس بيومها نور رجعت كلش ضايجة عكس ام مهيمن الي كانت كل شوية تصلي وتهلي فرحانة لنور سألتها ليش واجتي حور سألتها بفضول شنو اشتريتوا ام مهيمن جانت شايلة علبة مربعة بحجم كتاب لونها احمر مبينة علبة ذهب وكالت .. تعالن شوفن جهاز اختكم فتحت العلبة كان بيها طقم ذهب. متكون من كلادة وتراجي وسوار ومحبس سيت واحد بس كان حجمهم اوفر حور .. بالعافية نور كلش حلوات بس خلي ببالج هاي راح تلبسيهم بس بالمناسبات لان حجمهم جبير. ام مهيمن دك نقالها وراحت ترد ونور مبرطم والوجة محتقن تريد تبجي كعدت يمها ولكزتها .. شنو شبيج احجي ليش ضايجة احد سمعج كلمة ؟؟ لو ام عناد شنت الحرب نور باوعت علية بقلة حلية وكالت بصوت ناصي .. ما انطتني مجال اختار. هذا كله اختيارها اي شي يعجبني واختاره هي تطلع بي الف عيب وتاخذ الي يعجبها كان اسلوبها كلش مو حلو .. ليش ما كلتيلها انتي همين ما يعجبج اختيارها يعني هي مرة جبيرة ما يصير تختار على مزاجها زين وخالة زهرة شنو كالت .. لا خالة زهرة محجت شي بس باوعتلي لان كان مبين علية انا ما حبيت الطقم وسألتني وكالت .. خالة نور احجي اذا ما عجبج الطقم نبدله ما دام احنا بعدنا بيها ويم الصايغ گبل ام عناد طفرت من يمها وكالت .. اي ياعيني ابو المثل يكول اكل ما يعجبك والبس ما يعجب الناس احنا لو نبقى على ذوقهن يختارن كله نص الذهب كرستال وشذر ويروح الوزن عالخالي بلاش حرامات كلتلها .. اي بس خالة موديلهم مو حلو هي جاوبتني .. لا عيني شنو قصدج يعني انا ما عندي ذوق حبي احنا ما نلبس الا الغالي والجديد احنا ما نشتري قديم وكانت هاي بداية معاناة نور وية عمتها ام عناد والحبل عالجرار مهيمن دخلت للبيت اتسحب على اطراف اصابعي وانا شايل بيدي البدلة العسكرية المرقطة والبسطال العسكري ما اريد امي تشوفهم وتكعد تنصبلي مناحة جهزت نفسي حتى التحق جنت بهاي الفترة ارتب اموري وية الجهات المختصة بسفرنا للموصل وبين اكمل شغلي وشغل جلال باقي هواي متعلقات ببناء بيت جلال. انا من رجعت لكيت البناء مستمر والحمدلله هالشي طمني جنت كلش ممنون من رأي ريم بالموضوع واصرارها يكملون بيت جلال هالشي خلاني ارتاح عالاقل اكون سويت شي براسه خير لأخوي وبعدما خلص المبلغ المخصصه جلال للبناء وطال غيابه قررت اكمل البيت من عندي وان شاء الله من يرجع بالسلامة اريده كون يلكة بينه جاهز ومكمل هاي ابسط هدية اهديها اله وما اوفي بحقه ولازم افرغ نفسي علمود باجر مشية الزلم من اهل عناد نور دكات گلبي ترعد بداخل صدري ريم ساعدتني بترتيب وجهي واختيار الملابس ولبست فستان كوكتيل بسيطة. كانت ثلاثة ارباع الردن وطولها يوصل لتحت الركبة بشرين يعني لاطويلة ولا قصيرة بس الفيكة بدلعة الفستان كانت مربعة. ونازلة باوعت لريم وكلتلها .. اكلج ريم انطيني شال احطه على كتفي لان هاي الدلعة كلش جبيرة ريم شهكت وكالت .. لااااااا مستحيل والله اصلا لاتفكرين والله اموتج تخربين ستايل الفستان جاوبتها بضيق واني احاول الملم اطراف الدلعة .. ما مرتاحة احس بروحي مصلخة حور گلبت عيونها بملل .. خاب شوف هاي مصدكة روحها لابسة بدلة يابة دروحي شوفي البنات شنو يلبسون بحفلاتهم لايبقن صدر ولا يبقون سيقان وداعتج اصلاً حفلة المهر مسويها لعرض البضاعة على العريس المكرود حتى يعرف فلوسه ما راحت عالخالي بلاش. يعني بين قوسين نسويله طعم حتى يستعجل بالزواج جاوبت حور .. لا الحمدلله عناد ما راح يدخل لان ماكو حفلة بس امه وخواته وعمته ومرت اخوه حور فتحت حلكها تريد تجاوبني وكالت .. هههههه والله انتي فطيرة وعلى نيتج عنا... بس ريم قاطعتها بسرعة وكالت .. مو شرط عناد يدخل احنا نريدج تراوين ام عناد جمالج وتحرگين گلبها حتى تعرف ام كرش من تحجي عن الجمال گدروا البنات يهدؤن مخاوفي سمعت صوت الجرس وكلبي يدك وية نغمة صوت الجرس وزادت حركة البنات وبعدها ام مهيمن دخلت وشافت نور وصلت عالنبي وكالت .. يالله خالة كومي دخلي سلمي اجوي اهل عناد جايبين شيوخهم وناسهم يتبع احداث البارت القادم جلال اباوع وانا مصدوم دخيلك يا ربي ماعاد بالگلب صبر احس بروحي راحت السلاح معلگ ورة ظهري والشيطان يوازيني اهجم عليهم وجسمي كله ينتفض عالمنظر الي يشيب الراس اتمنيت اهدر بيهم بصوت عالي وما اخلي اي واحد يعيش بيهم اتمنى لكم قراءة ممتعة مع تحيات اختكم نهى الحسون | ||||
|
| |
|
08-11-19, 08:53 AM
| #66 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت اربعة وثلاثون ج٢ مساء الخير يا اهل الخير والمحبة ريم خالة زهرة اخذت نور ودخلتها يم النسوان بالهول مهيمن طلب من خواله يتواجدون وياه بالخطوبة كدام الناس هيبة ورفعة راس لخاطر نور اجوي خواله ونسوانهم وبناتهم واولادهم ماشاء الله انملى البيت كانت نور حيل مرتبكة ومتوترة ابتسمت على منظرها عبالك واحد راح يدخلونه للامتحان بس للامانة ارتباكها ضايفلها جمال وحلا. ما اعرف ليش ماجاي اتخيل نفسي اصير خجولة بهيج لحظات بالعكس راح اكون بقمة سعادتي ومتلهفة عدلت نفسي وبدلت ملابسي لبست تنورة قصيرة لنص السيقان وعليها بدي كتف مكشوف والكتف الثاني مستور لبست اكسسوارات نسقتها وية اللبسة وشعري سويته ويڤي ولبست كعب عالي. صوت خطواتي يسبقني ويعلن عن وجودي قبلي رحت دخلت للمطبخ حتى اساعد حور ولگيتها هي والبنات يحضرون صواني التقديم كانت توزع قطع الكيك بالصحون ونغم وبقية البنات يتحركون منا ومنا يساعدونها صرت اعرف فلمهم فديتهم وحدنهم تريد تبين نفسها عود شوفوني شكد نادرة وام بيت خرب يومكم على هذا الزحف منتهي الصلاحية هاي شكد قديمة افكارهم تعبانة باقية على زمن جدي ابو جهل باقية على افكار زمن قبل عندهم البنية اذا تريد تلفت انتباه الناس لازم تصير سباعية ونادرة ام بيت وتگلب دقلة وتحتار شنو تسوي دخلت للمطبخ والبنات التفتوا يباوعون علية من فوك لتحت مصدومات النظرات كانت ما بين تعجب وغيض باوعت على ملابسهم تقريباً متشابهة بالموديل فساتين خاصة للمحجبات ولابسات شالات حاطات ميك اب اوڤر وكلهم على فرد عدسات زرگ عبالك عندهم خرعة اغلبهم ما عرفتهن مدري المكياج مغير معالمهم نعلوا ابو حظ الموضى اتمنيت اعيط بيهن ولكم مو هيج الموديل خربتوا كل قواعد الاناقة اوووف سمعت وحدة من بنات خال حور تحجي وية الي يمها بصوت ناصي وتگلها وهي تباوع علية .. عزة بعينها هاي شنو لابسة ملابس مشخلعة رفعت حاجبي وهزيت شعري بغرور بحركتي المشهورة واسمع الثانية تكللها .. شنو هاي اييع شكد فاهي جمالها ولا حلوة خطية مالگت شي تلبسه وتلفت انتباه كالت اتصلخ كدام الوادم وتطلع بياض زرورها حتى بلكي يشوفوها ويخطبوها رفعت حاجبي وجاوبتهم .. حياتي كلمن يرى الناس بعين طبعه اني ماعندي شي اخجل منه واخفيه عن الناس هاي حقيقتي احب اكون على طبيعتي غير متصنعة لان مقتنعة بنفسي عكسج تماماً ماعندج قناعة بروحج غاطة وجهج بالطحين عبالج هيج يحطون مكياج شكلج تردين تلفتين انتباه وعبالج الناس كلها مثلج هم تريد تلفت انتباه على فكرة اني مو بحاجة الفت انتباه واتعب نفسي علمود احصل عريس لان اني بالاصل مخطوبة لأبن عمي مهيمن وكع الكلاص من ايد نغم تباوع مرتبكة والبنات ظلوا وحدة تباوع بوجه الثانية. النظرات مليانة كلام ابتسمت وكملت كلامي .. وان شاء الله عن قريب راح تسمعون بخبر عقد القران واكيد نعزمكم على عرسنا اني وهيما حبيبي حور كانت تباوع علية و ابتسامة النصر على وجهها وسوتلي حركة اوكي بأيدها للتشجيع بس اشو هاي فجأة اختفت ابتسامتها. وقلبت حركة ايدها للاسفل ترمز للفشل كانت تباوع وراي وهدوء البنات حسيت على واحد واكف وراي التفتت وجان اشوف مهيمن متكتف وعيونه علية اتسعت عيوني متفاجئة بوجوده رجعت باوعت لحور بنظرة تسائل هذا من شوكت كان واكف هنا ؟؟؟ حور جاوبتني وكالت .. كان واكف من اول ما بديتي تعزمين الناس على عرسكم انتي وياه دخلت خالة زهرة مخبوصة وراحت على مهيمن تحجي وياه .. اي يمة همزين اجيت عفية من يريد السيد يعقد انيطنا خبر قبل خمس دقايق حتى نحضر اختك جاوب امه ونظرات عيونه بعدها تطاردني .. يمة رحمة على اهلج خلي النقال يمج حتى من احتاج شي اتصل واتردون علية مو تخلوني ادعم واضطر ادخل يم النسوان كنت بعدني واكفة ورة ميز الطعام البلاستك الموجود بالمطبخ اول مرة بحياتي احس بالخجل من ورة هالموقف المحرج شكلي حسدت روحي درات ام مهيمن وجهها واكدت على حور تكمل الصواني والترتيبات وبعدها طلعت من المطبخ تهربت بنظراتي من مهيمن سويت روحي ملتهية اعدل بصينية العصاير عبالي. اسمعه يحجي وية حور وكللها .. حور جهزي كلشي وحطي هناك يم الباب حتى الشباب . طالب ومؤمل راح ياخذون الضيافة ويقدمون للناس انا راح انشغل اريد كون كلشي مرتب وبمكانه لاتفشلوني كدام الناس كنت اسمع صوته رفعت طرف عيني اباوع عليه كان شكله مرتب بملابس كشخة يسلب عقلي بشكله الرجولي هو صحيح مو خارق الجمال لكن بعيوني عندي اجمل رجال اشوفه بحياتي خزرته رزانته شخصيته كل هاي الصفات اتجمعت وصنعت منه بكلبي رجل بمعنى الكلمة صحيت من سرحان افكاري على مهيمن ابتسم لنغم الي كانت تسلم عليه سألها على السريع قبل لا يطلع عفية نغم انطيني كلاص ماي ما اعرف شبية ريگي جاف عبالك جاي امر بمحنة صدگ خطوبة الاخت امتحان صعب لأخوها نغم ابتسمت وجاوبته .. الله يكون بعونك صدك موقف صعب ويوم الالك ونفرح بيك انا كنت جامدة مصدومة من ورة هجوم كمية المشاعر الجياشة للغيرة الغيرة المتراكمة. عبالك واحد كفخني كفخة قوية على راسي فجأة وصارت تتوالى علية الكفخات من كل مكان من غير ما ينطيني مجال استوعب الي صار اتفرهدت جانت تحجي وياه وتبتسم واخذتله اكلاص الماي تريد تودي اله ما حسيت الا ورجلية ماخذتني لحد عندها غصب عني مو بيدي الغيرة صارت تتحكم بأفعالي غافلتها وسحبت كلاص الماي بسرعة من ايدها قبل لا توصل لمهيمن شهكت ووكفت بمكانها تباوع علية مستغربة حركتي واني بعدما اخذت الكلاص وديته للاستاذ مهيمن الي كانت عيونه تريد تطلع من مكانها مصدوم هو الثاني وما اعرف شنو سبب صدمته بس ما يهمني رفعت راسي وحطيت اكلاص الماي يم صدره وكلت بغيض بصوت ناصي .. هاااااك انفضل هذا كلاص الماي مرة ثانية من تريد شي تطلبه مني فاهم اشو هذا اخذ اكلاص الماي من ايدي وكال من بين سنونه ما يريد يسمع بنات خاله كلامنا .. ولج غضب هاي شمسوية بروحج شنو لابسة عقدت حواجبي مستغربة انقلاب مزاجه باوعت لملابسي وجاوبته .. شبيهم ملابسي طبيعيات مال مناسبة اقترب علية وعيونه تباوع منا ومنا ومسح وجهه اباوع علية كوة لازم نفسه لا ينفجر بوجهي مبين على طرف السانه هواي حجي بس الگاع محظورة حجة بصوت ناصي يهمس وكال .. .. ولج غضب امشي روحي غطي جسمج لا ابتلي بيج وخلي اليوم يعدي على خير اتخصرت وكلتله بصوت ناصي ما اريد البنات ينتبهون علينا ولو هن الحمدلله عيونهن وحلگهن وخشمهن وكل حواسهن اذان صاغية .. وليش ابدل ملابسي شنو موحلوات .. لا الحمدلله كل شي ما بيهم بس شوية رجليج وزنودج طالعات يجيبون التايه ويرفعون الضغط وراها مباشرةً جلطة جان يحجي ونظرات عيونه كل شوية تسافرعلى طول جسمي ابتعدت عنه واتجهت لباب المطبخ حتى اطلع وجاوبته من بعيد .. مهيمن ما راح اغير اي شي كنت اقصد على الملابس ما ردت اعلن عن طلبه كدام البنات وتصير سالفة على كل السان هم ما يصدكون يلزكون بسالفة يحجون بيها طلعت من المطبخ وبعدني ما مشيت هواي ما حسيت الا على ايد لزمتني من زندي باوعت وجان اشوف الغضب الساطع ما انطاني مجال استوعب المفاجئة عزة بعينه هذا اتخبل رسمي سحبني وراه بسرعة وبكل خفة حتى بدون ما احد ينتبه عليه ودخلني لأقرب غرفة كانت غرفتنا اني والبنات رگع الباب وسده وراه .. ريم ستري على نفسج ولاتخليني اطلع جناني عليج خليني كوة لازم روحي عنج. رجعت للخلف وجاوبته وانا اتصنع القوة .. مستحيل ابدل ملابسي شنو تريد البنات يضحكون علية ويتشمتون بية زمخ بية بغضب .. لااااااااا استغفر الله زحمة شلون اخلي البنات يتشمتون بحضرة الست ريم. بس عادي اخلي اولاد خالي يدخلون للمطبخ وانتي تسويلهم عرض سيقان وزنود ما بيها شي جان يحجي بأستهزاء عاط بية وكمزت من مكاني .. اكلج تمشين من كدامي وترحين تبدلين هذني ملابسج لا والله ابتلي بيج كتفت ايديه وهزيت راسي برفض اتنفس بنفاذ صبر وباوع لساعته .. استغفر الله منا الناس وهاي كاعدة تلعب علية شلون ياربي راح ابتلي بيها وانا عقل براسي ما ضل رجع باوع علية مثل واحد بحاول يقنعله طفل .. يالله عفية بالحبابة سمعي الكلام وروحي بدلي ملابسج .. اهووو مهيمن كبر عقلك شوية ملابسي عاجبتني ليش ابدلهم وهي كعدة نسوان واذا على اولاد خالك اوعدك ما راخ ادخل للمطبخ لزم راسه يمسد عليه مثل المصدع بعدها باوع علية بأستسلام وكال. .. هذا هو براحتج يجرالج الي تردينه. بختج بالناس وراسي يريد ينفجر والاانتي تعرفين تحلمين اخليج تبقين بيهن اتوجه للباب يريد يطلع وكال على فكرة بعده كلامنا ما انتهى ابتسمت بأنتصار فتح الباب وطلع من الغرفة واني اتبعته بكل ثقة. مامصدكة واخيراً مهيمن قرر يتنازل ويتفاهم فديته اثاري مهيمن رجل سهل قابل للتفاهم وحباب بس شكلي اني الي جنت مصعبه الامور على نفسي راح دخل للمطبخ حتى مناك يطلع للخطار واني كنت امشي وراه امشي واوزع ابتسامات بغرور مثل الطاووس على عناد العواذل حجيت من وراه .. مو تنسى مثلما اتفقنا اي شي تحتاجه مني من خالة بس اتصل علية اوك التفت علية ورفع حاجبه ونظرة المعرفة بعيونه وكال .. ان شاء الله اتصل عليج بس عفية انطيني وياج كلاص عصير ابلل ريكي بي لان احس ريگي يبس من وراج ابتسمت وجاوبته .. تدلل من عيوني جنت احجيها بدلع جاوبني وهو سرحان بوجهي .. تسلم عيونج رحت جبتله كلاص العصير مد ايده وعيونه بعيوني تريد تاكلني اعرف بي من اتدلع يشطح عقله والهوائي مال النية ابد ما يصفى عنده يظل يخبص على قنوات عقله اخذ اكلاص العصير من ايدي وعيونه لازالت تتواصل وية نظرات عيوني للحظة فهيت ونسيت نفسي لكن فجاءة ما حسيت الا اكلاص العصير ينگلب من ايده على ملابسي شهكت مصدومة ورجعت للخلف واني اصيح .. لااااااا هاي شنو مهيمن غير تنتب..... بس فجأة قطعت كلامي بأدراك الحيلة الي سواها حتى يخليني ابدل ملابس سواها شغلة حادث صدفة حتى يخليني اغير ملابسي مجبورة احس البركان من الغضب صعد لراسي وصار الدخان يطلع من اذاناتي من القهر ابتسم بنصر وهو يتوجه للباب وطلع يضحك بأنتصار جمعت قبضة ايدي بغيض وطلعت من المطبخ .. بسيطة يامهيمن والله ما راح اعديها الك بس اصبرلي نور خلص العقد وگلبي من اول ما دخلت للهول بم النسوان وسلمت عليهم لحد ما مهيمن اتصل على خالة زهرة وطلب منها تحضرني لعقد السيد بس يرتعد ابد ما هدأت نبضاته كنت لابسة عباية راس مغلفتني من راسي لرجلية كلشي ما طالع مني دخلت وية خالة زهرة بالاستقبال وهناك عقدلنا السيد كنت اسمع صوت عناد يردد الكلام ورة السيد بصوته المميز احس انفاسي تنحبس بداخل صدري بترقب واني هم صرت اردد بصوت ناصي اقرب للهمس لدرجة السيد كل شوية يعيد السؤال لان ما يسمعني وام مهيمن خطية من زود الحماس توصل كلامي للسيد بس السيد طلب منها تلتزم السكوت ويريد يسمع الموافقة من صاحبة الشأن مهيمن خزرها بنظرة هَـا يمة اشتغلت رحمة الله وهي باوعت علية وكالت .. ياخالة عليّ صوتج شوية السيد كلشي ما جاي يسمع راح يزعل من وراج وما يكمل عقد مهيمن رد عليها .. يمة السيد اذا طلع زعلان فمن وراج مو من احد ثاني ابتسمت على كلام مهيمن وبعدها كمل العقد اني كنت طول فترة العقد مدنكة وكلشي ما اشوف بس اسمع بس كل الي عرفته ان الشيوخ والعمام بعدما قروا الفاتحة وتمت الخطبة راحوا طلعوا. وبقى بس ابو عناد واخوه والسيد علمود يتم العقد وبعدما خلص العقد وباركلنا السيد وسمعت كلمة السيد بالاخير قبلها ياهذا ما حسيت الا الضوة انحجب علية كنت مدنكة باوعت رجلين رجال اقتربت يمي رفعت راسي اشوف وجان اشوف عناد واكف متشخص كدامي وابتسامة الخباثة مرسومة على وجهه .. هذا شبي شنو يريد لكن فجأة عرفت شنو ورة ابتسامته گلبي فز من مكانه عزززززة لايكون يريد ينفذ كلام السيد كدام الناس بقيت كاعدة ام مهيمن كومتني عبالك احد موصيها عناد مثل الواحد ما مصدگ حظه دنك علية وارتعد جسمي حسيت بحرارة شفايفة لامست جبيني وباسني من كصتي وهمس بصوت ناصي محد يسمعه .. واخيراً حمامة بغداد صارت حلالي بعدها سمعت مهيمن جلى حنجرته بصوت متضايق بأختصار هاي اشارة تنبيه لعناد وقطع علينا اللحظة دار عليه عناد وكال .. خير سالمين ابو الهمة يعني الواحد ما يعرف يبارك لمرته ترة هاي مو حالة الحجي ابوحيد جاوبه وهو يضحك .. ولك عنيد هو احنا لو بالگوة نعرسلك لو بالكوة نشلعك عيب يابعد ابوك اخوها حاضر بعدها الحجي اجة وباركلي .. الف مبروك بنيتي منه المال ومنج العيال ربي يبارك ويتمم عليكم دنكت مستحية احس بأنفاسي اتقطعت عبالك جنت اركض بسباق جاوبته بصوت ناصي .. شكراً عمو الله يبارك بيك واتبعه صوت اخوه حيدر باركلي وبارك لأخوه بعدها طلعت من الاستقبال ورحت يم البنات وصاروا الكل يباركلي وعمة عناد هلهلت وحضنتني وامه اجتي وباركتلي ورغودة صارت تهلي وتصلي ريم اجتي ونزعتني العباية وصارت تعدل بشعري وكعدت بمكاني مثل الطالبة العاقلة طبعاً طالما اني كاعدة ما فاتتني تلميحات ام عناد وكلامها وية رغد كانت مبين عليها كلش متضايقة اسمعها تكللها يعني شنو الست ترفض يدخل يلبسها الذهب ترة ما يصير هيج احنا هم نريد ناخذلهم صور للذكرى هسة حفلة وافتهمنا ما تريد تسوي حزنانة علمود اخوها بس هذا الشي مو من حقها تحرمنا من عنده بالحقيقة اني ماعندي علم اصلاً بهاي الفقرة مال تلبيس الذهب بس شكلهم هم من يمهم مفتهمين رفضي للحفلة معناها رافضة كلشي حتى تلبيس الذهب ظلت ام عناد تنگ لحد ما ام مهيمن راحت حجت وية مهيمن علمود يدخل عناد للهول ويلبسني الذهب اتوترت ورفعت راسي ادور بعيوني على ريم حتى تلحگني بشال اغطي دلعة صدري بس ريم الظاهر مو بحالي كانت تباوع على نغم وخواتها والشرارة مبينة بعيونها خرب يومج ريم ابد مو وكت عرايك دخل عناد وسمعت هلاهل وهوسات عماته وخواته وكعت عيونه علية وانا صرت بنص هدومي احس بروحي من غير هدوم من ورة نظراته صرت احاول ارفع فتحة الصدر مرتبكة كانت محاولة عقيمة شغطي وشنو اضم. خرب يومج ريم على هالاختيار بعد تحلم اسمع كلامها واشتري شي على اختيارها انتبهت عليه كعد يمي وصار يوزع ابتسامات لامه ولاخواته ولعمته هو هم كان شكله محرج. لان هو كان مركز انتباه الكل حسيت عليه التفت علية يباوعلي. رفعت طرف عيني وجان اشوف الاخ المحرج اتغيرت نظراته وصارت وكحة نزلت على مكان ايدي كنت بعدني لازلت احاول اعدل الدلعة ابتسم وقرب راسه يم اذني وهمس بصوت ناصي بحيث حسيت بحرارة انفاسه لفحت رگبتي شعر جسمي وكف گال.. رحمي بحالي ونزلي ايديج عن صدرج المسكين صار احمر مو نعلتي ابو طاهري من دخلت وانتي تتلاوين وية صدر الثوب يعني حتى الي ما منتبه راح تخلينه ينتبه ويشوف الجمار يبووووو تعالوا دوروا علية راح اتبخر من الاحراج جاوبته بسرعة ابرر موقفي .. لا والله كنت احاول اعدل دلعة الفستان واغطي صدري قبل لا تدخل ابتسم وكال .. لا تخافين مني ما راح اكلهن بعدين مو هسة وكت الاكل كل شي بوكته حلو شهكت واتسعت عيوني عزة بعينك يا عناد الوكح جاوبته بغيض .. ما تستحي كون يسمعك مهيمن هو اني گلت هيج وهو طكها ضحكة قوية لفت انتباه الكل وكال .. لااااا هاي صدك قوية قابل انا عشيقج واخاف من اخوج ولج بابا انتي صرتي حلالي يعني هسة لو تدك بعقلي اكدر اخذج وياي لبيتنا واخوج ما يكدر يعترض رجف گلبي وباوعت عليه وسألته خايفة .. لا عفية عناد لاتخوفني منك ترة والله اهون وابطل ضحك وكال.. ولج قابل هي لعبة وتبطلين بعد الفاس وكع بالراس ماكو مهرب جنت اباوع عليه مرتبكة وكلت .. بس مو كأنك مستعجل يعني احس كلشي جاي يمشي سريع والله حتى بعدني ما متعودة عليك جاوبني وعيونه تلمع وكال .. يعني ما اعرف انا شنو مسوي بحياتي من خير حتى ربي يجازيني هيج وردة مغمضة لزم كف ايدي وغطاها بيده الخشنة وكال .. ايديج باردة لاتخافين جنت اضحك وياج قاطع كلامنا صوت امه كالت .. يالله عناد لبس عروستك الذهب حتى ناخذلكم صور كللها بتحذير .. تصورين بكاميرة كانون. ما اريد اي نقالات تصور مو تكولين ما كال عناد .. لاتخاف نبهت على الكل هسة فضها ولبس خطيبتك ابوك حرگ النقال علينا بعدها فتحت علبة الذهب انتبهت لريم وحور كانوا كاعدات قريب علينا ابتسمت الهم وبدأ يلبسني الذهب والاخ استغل الوضع لصالحة وصار يتفنن ويلعب بأعصابي كل شوية اكمز من حركاته الوكحة وما اكدر احجي او اعترض امه وخواته واكفات فوك راسنا بس عيوني تخزره بتحذير والاخ يضحك متونس على حسابي بعدها وصل لفقرة التراجي كانت نوع برغي حاول بكل طريقة يلبسني بس كانت صعبه سأل امه وكال .. ماتگليلي وين لاگين هاي التراجي حتى ثگال شگيت اذنها امه جاوبته وكالت .. غير هي مرتك اختارتهن ما تريد الا الوزن الثگيل جمدت بمكاني مصدومة بكلامها شنو قصدها هي من اول ما دخلت لحد الان كانت تسمعني كلام بس اني فضلت ما اهتم الها بررت موقفها كلت مخبوصة بحفلة ابنها واكيد تصير اعصاب بس بهذا كلامها كان رسالة رفض واضحة اني هي لحد الان ما مقتنعة بية عروس لابنها انتبهت لريم حجت تريد تقاطع كلام ام عناد بس حور لزمتها بسرعة من زندها وكعدتها وريم صارت تدردم وية حور حتى تتركها واني صحت بأسم ريم التفتت علية وباوعت عليها بنظرات اطلب منها تلتزم الهدوء وما تكبر الموضوع ً وريم كعدت بمكانها وكتفت ايديها ووجها ما يكصه السيف جانت ضايجة من الكل خلصت الخطوبة وعناد اكد علية قبل لا يطلع كال .. باجر حضري روحج اخذج نسوي تحليلات بالمستشفى ومناك نعقد بالمحكمة لان اخوج يريد وانا لازم استعجل بالاجراءات هزيت راسي بالموافقة وام عناد دارت على خالة زهرة وكالت .. عيني ام مهيمن باجر نريدكم تشرفينا انتي والبنات معزومات على الغدا يمنا لان انا سويت عزيمة لكل اقاربنا حتى يشوفون خطيبة عناد ويتعرفون عليها وماكو احلى من جمعة احباب حتى نهنيهم بعد عقد المحكمة ريم الي كاعد يصير كدامي الظلم بعينه معقولة اكو هيج انسان حاقد وخبيث مستعد يخرب احلى لحظات سعادة بحياة ابنه في سبيل يحقق اهدافه كانت ام عناد تركيبة غريبة ما گدرت احزر موقفها من وصلت الى الان هي بس تتشكى وتتأفأف بضجر كلشي ماعاجبها من دخلت نور وهي اتفحصتها وكالت هسة انتوا مشترين فستان للحفلة بقت على المعازيم الي قهرني نور ابد ما حجت شي كانت مشغولة بخجلها مدري تتهرب من مواجهتها بس اني جاوبتها .. خالة هذا مو فستان حفلات هذا فستان بسيط مال مناسبات بسيطة مو مال حفلة مهر. احنا لو كنا نريد نشتري فستان ونسوي حفلة مهر جان راح يكون مختلف واكيد انتي تعرفين فساتين حفلة المهر شلون يصير شكلهن بس هي ما اكتفت ما اعرف وين تريد توصل بهاي تصرفاتها اني حاولت ابعدها عن نور واصلا الحمدلله نور انكمشت بمكانها ولو عليها اصلاً تنهزم وتختفي بأقرب غرفة قررت هالمرة ما راح اسكت ولازم واحد بينا يكعد يواجه نور ويفهمها ان الي جاي يصير غلط وبسكوتها ام عناد راح تزيد ما تنقص السكوت ابد ما كان بيوم حل لتلافي المشاكل جلال .. سبيااا !! شنو كنت واكف كدام ابو ذياب وانا حابس انفاسي خايف من جوابه ضحك وكال بفخر... هذولي يامحفوظ السلامة اسيرات سألته بصوت واهن .. وهسة هن وين .. اخذوهم يم الامير بالمكتب وصاح على القادة واسمك يابخيت كان من ضمنهم تركته ورجلية اخذتني عالمكتب اتوقفت لحظة واخذت نفس عميق حتى اكدر اسيطر على اعصابي لان القادم راح يكون امتحان لحرب الاعصاب بعدها حاولت ارسم ابتسامة اللهفة والحماس وفتحت الباب والقتيت تحية الاسلام .. السلام عليكم ورحمة الله وبركاته ودخلت للمكتب وعيوني تدور على السبايا وكعت عيني على مجموعة بنات موشحات بالسواد كان عددهم ١٣ وحدة تتراوح اعمارهم بين ال ٣٠ سنة وال١٢ سنة كانت معالم الخوف والرعب مرسومة على وجوهم اباوع على نظرات الدواعش القذريين شلون يباوعون عليهن بشراهة والله بلحظتها حسيت بگلبي انعصر اندليت مكانه الامير رد السلام .. وعليكم السلام والرحمة يا ابا القرابين لقد وصلت في وقتك لقد كنا بأنتظارك حتى نوزع المكافأت عليكم انت والقادة نهض من مكانه. واتقدم عليهن وصار يعاين على كل وحدة بيهن. انتبهت لوحدة بيهن كانت بعيونها نظرات الفزع والخوف كانت الوحيدة تلوذ خلف البنات مثل الي تريد تختفي من الانظار ما اعرف ليش گلبي ارتعد عليها وذكرتني بخوف اختي نور بأول مرة شفتها بيها بمكتب المحامي انتبهت لعيونها الحايرة الخايفة كانت تدور بالمكان مثل طير يدور على منفذ للهروب حتى ينقذ نفسه وبلش الامير يعاين على كل وحدة بيهن ويصيح بأسامي القادة حتى يجي يستلم هديته صاروا كل واحد ياخذله وحدة من وصل الاختيار للبنية الي كانت تحاول تضم روحها عن العيون صحت بصوت مسموع استوقف الامير وكلت .. مولاي الامير ( انا لها ) يعني وقع الاختيار عليها التفت علية وضحك وكال .. خذها فأنها لك هنيئاً يا ابو القرابين انت تستحق جائزتك في الدنيا والاخرة. ابتسمت وانا عيوني راحت عالبنات الي اخذوهن سحل جاوبته وكلت .. شكراً لكرمكم معي مولاي الامير بعدها استأذنت منه وعلگت الرشاشة ورة ظهري وانا مختنك كوة عاظ على الساني لا افقد السيطرة من الغضب المكتوم بداخلي درت وجهي على البنية الي كانت مدنگة وترجف لزمتها من زندها وسحبتها لجانبي وانا اباوع لنظرات الحسد من عيون العناصر مو الكل كدر يحصل على جارية كان كل همي ابعدها عن عيونهم صرت اباوع على حال بقية البنات يالله شنو بيدي اسويه صرخة فزع لامست اذني لوحدة من البنات دخيلك يا ربي ماعاد بالگلب صبر احس بروحي راحت السلاح معلگ ورة ظهري والشيطان يوازيني اهجم عليهم وجسمي كله ينتفض على المنظر الي يشيب الراس اتمنيت اهدر بيهم بصوت عالي معترض واهجم عليهم بمحاولة عقيمة حتى اطفي ناري وانا ادري بروحب كلش زين بهذا هجومي ما راح ابلغ هدفي ولا راح اكدر اسوي اي شي ولا اكدر اخلصهن واحررهن من بين ايديهم صبراً ياگلب حلمك علية. عهد علية اذا ما اخذ ثار كل وحدة بيهن صرخات خوف غمضت عيوني احس گلبي انعصر يا الله امتحانك صعب هنا احتاجيت لكل ذرة قوة تحمل وارادة حتى ما تخوني مشاعري وانتفض درت وجهي ولزمت البنية من زندها كانت ترجف مثل الورقة يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 08:59 AM
| #67 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت خمسة وثلاثون ج٢ مساء الخير والسلام عليكم 🇮🇶 جلال اعض على الجرح واتحامل عليه واصبر بالنفس بلكي تهدأ وتخمد نار گلبي الشابة جوة ظلوعي كنت لازم البنية من زندها اسحبها وراية كانت ترجف جوة ايدي وصلت للغرفة وباوعت منا ومنا قبل لا ادخل فتحت الباب اريد ادخلها وياي بس انتفضت جوة ايدي معترضة وصارت تتلاوى وياي بخوف رافضة تدخل وياية للغرفة. سمعت صوتها الخايف .. لالا لا ما اريد عفية لاتأذيني حجيت وياها من بين اسناني بصوت ناصي وطلبت منها .. رحمة على اهلج بس دخلي الله يرضى عليج. لاتشلعين گلبي انتبهت. بطرف عيني ابو بهاء ووياه كم واحد من عناصر داعش جاي يمشون بنهاية الممر من شافني وابتسم بفخر وكال. بصوت عالي حتى اسمعه لان الممر طويل وغرفتي بنهايته كال .. مبارك لك يا جلال هذا يومك يابطل باوعت عليه وابتسمت ابتسامة مصطنعة وانا احاول اثبت البنية بكل قوتي لجانبي ابين كدامهم مسيطر عالوضع جاوبته .. الله يبارك بك يا ابو البهاء كما ترى الليلة ليلتي ومحد بگد فرحتي اباوع عليه ابتسم اشرلي بعلامة النصر وهي الله يحفظها ظلت تزاكط مثل الدجاجة جوة ايدي تريد تنهزم وهذا المحمض كال .. يبدو جاريتك عاصية عليك بالعصا جاوبته .. لا ياخي اين ذهبت يداي هي خير من العصا هسه اخبزها على بختك انها لاتعرف منو جلال قربان هم حقها وهاي رجعت تتلاوى وياية وتصيح هاي شلون صرت بمأزق مو مال ابين ضعفي كدامهم وما اسوي شي لازم اتصرف وياها التصرف الي متوقعينه من اي عنصر منهم لزمتها وانطيتها دفعة بكل قوتي لداخل الغرفة لدرجة المسكينة طارت واتعثرت ووكعت على وجهة بالكاع وصرت اغلط واسب بيها بصوت عالي حتى يسمعون .. الله يلعنكي يا امراة. لا تأتين الا بالعين الحمراء متنطين عين يبدوا ان اهلك لم يعلمونك الاخلاق ياعوبة بعدما استدار ابو بهاء والذيول الي وياه ودخل للممر الثاني دخلت للغرفة. وسديت الباب وراي واتكأت عليه بسرعة. اباوع عليها شلون . دارت علية بسرعة مخبوصة كانت بعدها واكعة بالكاع باوعت عليها والتقت نظراتنا كانت عيونها بلون البحر بس دخيل الله اكو شي بعيونها ما اعرف شنو هو بالضبط بس كلما اشوف نظرات الخوف الموجودة بعيونها اتذكر نظرات نور هيج شكلها بحيث للحظة گلبي فوت نبضة وانا اتخيل نور اختي وهي واكعة بهيج شدة عظيمة ارتعد جسمي من مجرد التخيل اسم الله عليها ربي لا يكولها رجعت اعاين عليها محتار بأمرها. ما اعرف شلون راح اتعامل وياها استغفر الله ياربي هاي شلون مصيبة وكعت على راسك ياجلال شلون ورطة. مو على اساس. انا ناقصني ضيم والزمن كاعد يكملها بهاي المصايب بالله هاي شحطلها وتطيب اتقدمت عليها مديت الها ايدي كنت احاول اساعدها حتى تكوم من على الكاع. وتكعد عالكرسي ردت احجي وياها واطمنها بس هي صارت تبجي بخوف مفزوعة ورجعت زحف للخلف وهي بعدها بوضعية الجلوس كالت من بين دموعها .. احلفك بحياة. والدتك وبستر اختك. ما تلمسني اترجاك لاتأذيني اقتربت عليها وانا بنيتي اهديها .. لا لاتخافين اهدي ما راح اسويلج شي استمرت ترجع للخلف وهي تتعثر انتبهت عليها. طلعت مشرط صغير من تحت عبايتها وحطته على معصمها تهددني وكالت .. لاتفكر تقترب مني صدگني اقتل نفسي جمدت بمكاني مصدوم بحركتها. وبنفس الوقت گلبي انكسر عليها. رفعت ايدية اثنينهم بحركة استسلام وابتعدت عنها وخليت مسافة بيني وبينها كلش جبيرة حتى تطمن وكلتلها .. اهدي وتركي المشرط من ايدج. لاتخافين ما راح اسويلج شي شكلج عندج حظ لان انا اليوم كلش تعبان وما بية حيل احرك اصبع واحد. فأطمني ما راح اقترب منج ما كدرت اجازف واطمنها واتعامل وياها بود ورحمة ما اكدر اكشفلها اوراقي لازم اخلي الامور تاخذ مجراها الطبيعي ما اريد اصححلها الموقف وامحي نظرت الخوف من عيونها حتى محد يشك بأمري رحت وصلت يم الباب وكلتلها وانا منطيها ظهري انا طالع وبعدين ارجع ما راح اتأخر طلعت وقفلت الباب وراي خايف لا واحد من هذولي الحيوانات يستغل غيابي ويدخل عليها كلشي اتوقع منهم رحت وطلبت من المسؤول عن توزيع الوجبات على الجنود والعناصر كلتله اريد صينية عامرة بالاكل انا راح انتظرك هناك بالساحة طبعاً هنا عندهم نظام بتقديم وجبات الاكل ومعاملة خاصة الجنود المرتزقة اكلهم يختلف عن اكل العناصر والقادة وانا اعتبر من العناصر المهمة رحت طلعت للساحة هايم على وجهي حطيت ايدية بجيبي حتى اسيطر على انفعالي واهدي نفسي رفعت راسي للسما. اتأملها وبگلبي جنت اخوض حرب اعصاب مريرة صرت للمرة الالف اردد عبارة. ((اتحمل ياجلال هانت ما بقى شي وينتهي هذا الكابوس وتاخذ بثارك وتنتقم منهم )) اي بس لشوكت ابقى انتظر حتى يجي هذا اليوم مو طالت الايام وصارت شهور وخلص صبري والروح صارت هايمة تطلب احبابها لا اني المنتصر على الظلم ومحقق احلامي ولا اني المنتفض اشو يوم عن يوم اشوف احلامي تتحول وتصبح كوابيس مظلمة غمضت عيوني وجريت حسرة ااااااخ والله تعبت من الانتظار احس بروحي محبوس مثل الرهينة بداخل لعبة ولابس قناع بشع وعايش بعالم مو عالمي انا طول هاي الفترة كنت شاهد على جميع دسائس وجرائم داعش من قتل وسلب ونهب وذبح بحجة الدين مرت علية كدام عيني اشكال وانواع البلاء الي ما يشيلها العقل وتنطق الصخر صرت اتسائل للمرة المليون انا شلون وصلت لهنا وليش لحد الان بعدني باقي وياهم هذا مو مكاني ولا هاي حياتي صرت اعاين داير مادايري واتمعن بكلشي من حولي اباوع عالجنود المرتزقة وشكولهم اعاين عالمكان الي انا.بي. صرت يوم عن يوم احس بالظلام والسواد يتوغل لروحي مثل الموت البطئ ويسد عنها كل منافذ النور احس اكو صوت يصرخ بداخلي يطالبني افرج عنه احرره من سجنه غمضت عيوني وانا اعرف صاحب هذا الصوت كلش زين لان انا سجنته بداخلي. من يوم الي قررت انضم للاستخبارات وانا ما رجعت ذاك جلال الاولي. اختفى اي صحيح جلال قربان انحكم عليه بالسجن. بداخل العنصر الارهابي جلال الداعشي الملقب ابو القرابين يااااااااارب متى الفرج والله فاض بية الحنين وطغى والله مشتااااااااااق بگد رحمة الله للمة اهلي وناسي تركت وراي هناك احباب ينتظرون رجوعي على احر من الجمر مهيمن ونور وباربي وغزال البصرة وام مهيمن كلهم مشتاقلهم يمكن يجي يوم وارجع لناسي واحبابي وساعتها ترجع الحرية لجلال .. جلول خنگتني العبرة مثل طفل يبجي مضيع اهله هذا حالي من الحنين بهاي اللحظة ارتفع الصوت الي بداخلي مصر يريد يتحرر حطيت ايدي على گلبي اطمن گلبي الرهين لاتخاف اوعدك راح يجي اليوم وتطلع من هالمغارة الظلمة وترجع لاهلك وناسك منتصر بعون الله راجعلهم منتصر بس بوحدة من الحالتين اما ارجعلهم وانا شايل العلم على اكتافي مفتخر لو العلم شايلني مغلف التابوت هي وحدة من الثنين وبالحالتين الي الفخر انتبهت على صوت الجندي وراي كان شايل الصينية بيده اخذتها من ايده ودخلت بيها جوة واتوجهت للغرفة وفتحت الباب بالمفتاح ودخلت الصينية وياية ورجعت قفلت الباب بالمفتاح اباوع عليها كانت بعدها كاعدة بالزاوية بعدها لامة روحها بيدها من شافتني قفلت الباب زادت ببعدها وحشرت روحها بالزاوية عبالك تريد تختفي من كدامي حطيت الصينية بالكاع وقربتها عليها وهي كرفصت على نفسها وحضنت روحها اكثر مثل الطفل خليت الصينية يمها وابتعدت عنها ورحت بتجاه الباب اريد اطلع وقبل لا اطلع كلتلها .. هذا الاكل الج انا طالع وراح اقفل الباب وراي كلشي تحتاجينه موجود هنا. يمج حمام اكل. فراش هذا الي اكدر اوفره الج بالوقت الحالي ما جاوبتني ولا نطقت بأي كلمة وانا بالاصل ماكنت منتظر منها تجاوبني طلعت وقفلت الباب عليها ورحت مباشرةً بوجهي للورشة. وهناك بين الدهن الاسود والمعدن المصدي الكة روحي غركان ريم اليوم عقد قران نور بالمحكمة. قررت اليوم اكعد من وكت حتى اساعدها لكيتها كاعد قبلنا ومسوية الريوك طلعت من الحمام لافة المنشفة على شعرها وحور انضمت النا وهي الثانية حاطة خلطة قناع على وجهة تضامناً وية نور سالتهم .. هاي شنو خيانة كاعدين قبلي حور جاوبتني .. راحت عليج ياحلوة خلصنا اني ونور جلسة التجميل بدكير ومنكير اباوع لنور كان وجهة منور ووبعيونها حماس عبالك طفل وكلوله اليوم العيد خطية هيج كان حال نور رحت افتر وراها بالغرفة واحجيلها على موقفي البارحة وية مهيمن وبنفس الوقت كنت فاتحة الكنتور حتى اساعدها تختار اللبسة لان اليوم تروح وية عناد حتى يكملون التحاليل والفحوصات بعدها يرحون للمحكمة ويعقدون وعناد شكله عنده معارف سهلوا عليهم الامور حتى يكملون عقد المحكمة كملت كلامي ونور دارت علية متفاجئة .. عزة بعينج ريم كولي والله مهيمن كان واكف وسمع كل هذا الحجي .. اي والله كان واكف متشخص وراية حور كالت وهي تمشط بشعرها .. مو انتي ما شفتي بنت عمج شلون كانت واكفة بنص المطبخ وتحجي عبالك كانت تلقي خطبة على مسامع البنات. ولا الحلو بالموضوع منظر اخوي المكرود صار ينتقل من صدمة لصدمة على ايد ريم لان بالبداية ماشاف شلابسه لان هو كان واكف بالباب مال المطبخ ما داخل جوة وهي ماخذة راحتها واكفة صفح بصف الفريز لاشاف السيقان الطالعة ولا الزنود بعدين جته مثل العاصفة انطته المي وشافها .. شكد عيب انا يمكن لو بمكانج ما اطلع بباب الغرفة ولا اراويه وجهي لمدة اسبوع هسه الملابس عادي تعودنا بس الحجي خرب .. ليش عيني واذا سمع عادي وشنو يعني انا ماگلت شي غلط صدك هو خطيبي ليش مو هو بذات نفسه يطرد الخواطيب ويخوفهم ويهددهم ويكللهم ريم مخطوبة له خلاص حتى اني هم من حقي اعلن هالشي كدام البنات واطردهن قبل لا يفكرون حتى ولو شوية يتلاعبون واثبت حقوقي. حتى اكطع المي والكهرباء وجميع الجسور على بنت خاله نغم علمود لا تتعشم وتحلم تاخذه خليها تروح تدور على عريس بغير مكان بعيد عنا حور كملت كلامي .. بعد فرد نوب علگي على باب البيت لقد تم شراء العنصر المرغوب به ينعل ابليسج حسستيني اخوي بضاعة واشتريتيها يا اختي خفي علينا ترة خطية اخوي نور ابتسمت .. لج حور عوفيها هاي بس حجي دعاية واعلان. ماكو تنفيذ. هي لو صدك سباعية تروح تخبر مهيمن عن رأيها بالزواج منه رفعت حاجبي وانا اتوعد.. بس صبركم علية. لانستعجلون كلشي بوكته حلو لاتنسون ترة هو هسة يالله صالحني يعني العافية درجات ما يصير يصالحني منا اروح. اجيت عليه منا عيب شنو يكول علية ماصدكت.على الله راضيتها كنت احجي وطلعت لبس لنور فستان بسيط لونه اوف وايت مدموج مع الوردي الباهت كانت الوانه متداخلة حلوة عرضته كدامها وكلت .. هَـا نور شنو رأيج بهذا حلو هزت راسها بالموافقة وبالها بغير وادي كان مبين عليها سرحانة بأفكارها حقها لان اليوم راح توثق العقد بالمحكمة وتصير زوجة عناد شرعاً وقانوناً انطيتها الملابس حتى تبدل راحت حتى تلبس وسمعت صوت نقالها كان يمنا عالميز كل شوية يعلن عن وصول رسالة واتساب كملت لبسها وراحت اخذت النقال وكعدت عالسرير وفتحته وشافت الواتساب وابتسمت والخدود انگلبوا طماطة رحت بكل هدوء كعدت يمها كتبت بالواتس ترد على عناد. بسمايل خدوده حمر خجلان لحظات ودك النقال اباوع عليها انخبصت ودارت علينا وكالت .. هذا عناد يتصل. جاوبتها .. اي عناد ما تردين عليه شنو تنتظرين باوعتلي.. هَـا اي هسة ارد بس بالاول انتوا طلعوا يالله ارد عليه رفعت حاجبي.. ليش عيني شنو خايفة لا اسمع صوت البلبل الفتان استاذ عناد لو خايفة على اسرار الدولة خاف نسربها جاوبتني مرتبكة .. لا هذا ولا ذاك لا تصيرين ثقلية دم. بس كل ما في الموضوع اعرف هذا الشخص لسانه مزروف يعني مثلج ماعنده كونترول واخاف يجفص بكلمة وانتوا يمي هنا عيب انقطع الاتصال. حور كعدت بالجهة الثاني من نور وكالت بمكر .. اي يا عيني ياحبيبتي شدعوة عليج ليش تكطعين علينا رحمة الله خلينا نسمع ومنكم نستفيد حتى نطبقهن بالمستقبل على ازواجنا المستقبليين نور خزرتها وكالت.. حور كون خالة زهرة تسمع هذا كلامج والله تملص اذانا....... قطع كلامها صوت النقال يدك مرة ثانية لكزتها وانا كاعدة بصفها .. اااي يالله عاااااد ردي عليه مو كطعتي الولد خطية ردت عليه وحطت النقال على اذنها وصارت تحجي بصوت ناصي تمتمت .. هلو بيك عناد صباح الخير ابتسمت وكالت .. يالله لا تزعل صباح الخير حبيبي جانت الاخت مندمجة تحجي وناسية روحها واني قربت راسي يم راسها حتى اسمع وحور من الصفحة الثانية اسمعه يكللها .. اكول ياحلو البارحة خوش اكلت بوري معدل بقيت انتظر منج اتصال حتى اسمع صوتج بس وين حضرتح ضربتي التغليسة همست .. والله البارحة حيل تعبت ونعست حتى ما حسيت على روحي من نمت جاوبها.. يعني انتي نايمة متهنية وانا محروك ابو ابوي من وراج. بس يالله ما علينا هانت هاي هي مادامج ببيت اخوج شبعي نوم واخذي راحتح. وسوي حسابج من تجين يمي ببيتي انسي شي اسمه نوم. حالف الا اطلع بيج القضى والمضى جانوا يحجون مندمجين بسوالفهم واني اسمع واوزع ابتسامات اتخيل مهيمن هيج يحجي وياي لا ما اتصور مهيمن يحجي وياي هيج لان اصلاً اني ما راح انطيه المجال يحاول گبل يلكاني متوسدة بحضنه اعوض عن حنان سنين ردت عليه بسرعة وكالت .. لعد هاي هي هونت ما اريد اتزوج ضحك وجاوبها .. مو هو على اساس انا بكيفج ما تردين غير بختج بأخوج جلال. مسافر والا جان هسة انا معرس من زمان وعندي اثنين جهال منج ما حسينا والا على حور شهكت وكالت .. عزة شنو قصده يخلف اثنين جهال بهيج فترة قصيرة لايكون حضرته عباله بكتريا ويتكاثر بالانقسام البسيط بس شكله زوجج حمى طفي بسرعة نور دارت علينا انا وحور. وخزرتنا واشرتلنا حتى نسكت اسمع صوت عناد يضحك كامت من يمنا وراحت تحجي وياها بعيد عنا بس تبسبس وتضحك جليت صوتي وكلت .. احم احم نحن هنا شكلج نسيتي اكو هنا رويحة حلال اتقوا الله بينا يا اهل الرحم حور حجت بصوت عالي حتى تسمعه .. نور امي تكول روحي صيحي نور رجلها على جية مكرودة يايمة انتي شايلة همهم وهم ناسين الدنيا وكاعدين يسولفون. وشكلهم نسوا حتى عقد المحكمة نور شهكت وكالت .. عزة عناد العقد جاوبها .. شبي العقد .. راح نتأخر على المحكمة . . ههههههه هو انا جاي بالطريق احجي وياج بالنقال .. هَـا لعد يالله انهي الاتصال علمود اكمل اجهز روحي لا تلهيني وتالي اتأخر عليك خلصت المكالمة ودارت علينا ولزمت المخدة وشمرتها علية اني وحور .. حشى مو بنات شكد عيب من الرجال يكلي هذني رية وسكينة شيسوون يمج وگام يحجي علية من وراكم يگلي .. لاتخلين احد يتسمع لكلامنا هالشي ممنوع بس هو ما يدري بالقرودة العندي ما يكدرون اذا ما يتعلكون بالبنكة حور هزت ايدها .. تهي ،، بهي عالم ماتخاف الله سوتنا قرودة عمي خلي اروح اشتهيت اكل فواكه من وراج طلعت حور وهي تضحك نور باوعتلي .. وانتي تعالي رتبي وجهي رحت جبت العلبة وكعدت كدامها احطلها ميك اب صباحي بسيط هي معانيها حلوة ميحتاجلها تتكلف البارحة ما صارلي مجال احجي وياها عن موقف ام عناد لان كنا كلنا مشغولين لذلك اول ما اجة الليل كانوا الكل نايمين على وجههم من التعب واني وحدة منهم لذلك استغليت الفرصة وقررت افتح وياها موضوع عمتها وتصرفها حتى تنتبه لنفسها .. اكول نور شنو راح تحجين لعناد عن سالفة الذهب وكذبة امه لو تسكتين تصدكين البارحة الليل كله افكر بنذالتها ولوما حور لزمتني فلا اعديلها الموقف سلامات والا اطلع جذبتها كدام ابنها نور كالت بتفكير .. تصدكين حتى اني هم مثلج انصدمت بكلامها وفكرت بي بس تالي اتوصلت لقناعة ان هي مثل كل ام صعبة عليها تتقبل اختيار ابنها للزوجة الي فضلها على اختيارها وهالشي مو هين عليها واكيد ما تسكت وتحاول تطلع الف عيب حتى تثبتله ان كلامها كان صحيح وان هي تعرف بمصلحته اكثر منه .. اي بس نور انتي ما يصير تسكتيلها وتخليها تتنمر عليج ترة الناس الي مثل شاكلة ام عناد ما يحترمون الشخص الضعيف بالعكس اصلاً يحتقرونه ويحاولون يدمرونه بكل طريقة لان اكيد راح تشوفج مو كفو لأبنها . . لا ريم غلطانة. اذا كنتي تظنين بسكوتي عنها ضعف بس اني قررت اثبتلها ان عناد قراره صحيح وبمحله وناوية اوكف وية عناد وما اخيب ضنه بية وارفع راسه. كدام اهله بأختياره مثلما هو صبر على اخواني ومضايقاتهم وصمد كدامهم لحد ما صرت حلاله اني هم راح اصبر على امه حتى يستمر الزواج هناك اكو قاعدتين ولازم نختار اما اني وزوجي نتعاون عالزمن او اني والزمن نتعاون على زوجي واني قررت اختار الاولى لان اريد زواجي ينجح ويستمر ونتعاون اني وعناد عالزمن كانت تحجي بكل ود وسلام جاوبتها وكلت بغيض .. تعرفين شنو انتي المفروض يعينونج سفيرة النوايا الحسنة او سفيرة السلام على هذا الگلب العندج يا اختي تقنعين الحجر بأسلوبج واتمنى كلامج يكون صحيح وما تتندمين عليه بس خلي ببالج اني راح ابقى وراج. واراقب حركات ام عناد بس هَـا من هسة اكلج مستحيل بعد اسكتلها ابتسمت نور على كلامي وكالت .. يا اختي هسة انتي جاي اتعاركين عالسمج البشط يعني من هسة محزمة للعركة وهي بعدها ما صايرة انتي ريم هم لخاطري هدي لعب هذا زواج مو حرب كملت اللمسات الاخيرة. للميك اب وحضنتها وكلت .. لج نور اني من حرصي عليج وحبي الج هيج احجي ما اريد احد يجرحج حتى لو كانت كلمة. ابتسمت وكالت .. اعرف واني هم بعد احبج يس المفروض تخليني اواجه الامور لوحدي حتى اصير قوية لشوكت تبقون انتوا تحموني وتدافعون عني استسلمت وقررت ابقى اراقب الوضع من بعيد من غير ما تحس عسى ولعل تطلع مخاوفي مالها داعي نور تم العقد واتوجهنا لبيت اهل عناد . للحظة حسيت بالخوف لان كنت لوحدي هالمرة محد وياي لاخالة زهرة ولا ريم ولامهيمن اتشجع بيهم. كنا بالطريق ودك نقال عناد والمتصل مهيمن رد عليه عناد كلشي ما افتهمت منهم بس عناد يضحك ويكله عدل بدل انت من صدك تحجي اي غير مرتي شلون بالله نوب ناخذ اذن منك. وبعدها كعد يضحك وكله .. هاي هي صار اخذها حجاية مني اوعدك اختك راح ترجعلك قطة وحدة. ما ناقص منها لا ايد ولا رجل بعد شتريد. ضحك وكال .. ههههههههه يالله مع السلامة انهى الاتصال والتفت باوع علية وكال .. خرب يومه هذا اخوج كارثة ما اعرف الله من اي طينة خالقه. والله عليه راس يابس سالته بفضول .. ليش شبي .. اخوج كعد يهدد بية ويتوعد ويگلي .. شوف عناد من هسة اگلك بس يخلص الغدا اجي على امي ونور والبنات و اخذهم مو تكعد تسويلك حجة وتحرجني كدام الحجي حتى تبقي اختي يمكم والله احرك عشيرتك واخرب الاول والتالي مو تگول ما كال مهيمن واني وعدته ارجعج صاغ سليم قطعة وحدة مناقص منج شي ابتسمت محرجة شكد زحمة بس بهاي اللحظة حسيت بالخوف تذكرت من توسلت بي علمود جلال كال ارجعه قطعه وحدة واني من يومها صرت اعرف وعود عناد ظاهرها عكس باطنها واني غركانة بتفكيري انتبهت للسيارة اتوقفت كدام البيت اختفت ضحكتي وبهت لوني وعناد انتبه علية لزم كف ايدي وكال .. شنو شبيج. اشو انخطف لونج. باوعت عليه وكلت.. مرتبكة وخايفة تعرف هاي اول دخلتي لبيت اهلك واني خطيبتك واكيد كل اقاربكم موجودين .. اولا انتي زوجتي مو خطيبتي ثانيا لاتخافين انا وياج واهلي وناسي كلهم ناس اليفين من زمان طلعوهم من الغابات ما ياكلون بشر بس انا بقيت متوحش واحب اكل الحمام. البغدادي التفتت عليه وابتسمت وكلتله.. انت ليش دائماً تحاول تخليني اخاف منك يعني عاجبك اروح ارجع لبيتنا واخليك فتح الباب وهو ينزل .. مو هي هيتة واخليج بكيفج ترجعين نزل من السيارة واتبعته دك الجرس وطلعوا الجهال فتحوا الباب شكلهم بيتهم بي هواي ناس لان منظر الجهال الي اجوي عالباب يأكد كلامي اتمنيت اتصل على ريم واشوفهم اجوا لو بعدهم طلعت رغد واستقبلتني ورحبت بية ولزمتني من ايدي ودخلتني عالصالة. وهناك صرت انتقل من سلام لسلام ومن حضن لحضن. وبنفس الوقت كعدت رغد تعرفني عليهم وهناك وجان اشوف ريم وحور وخالة زهرة كاعدين اتنفست براحة واتطمنت بوجودهم مر الوقت من غير ما احس كانت سوالفهم حلوة اني بطبعي مو اجتماعية. عكس ريم وحور كانوا منطلقات بالكلام خو ريم فكانت رئيسة الكعدة. طبت بيهم طول بعرض لان اغلب مواضيع الكلام كانت بخصوص الموضى والاناقة والتجميل والسفر يعني مو اختصاصي يمكن لو يحولون على الطبخ احتمال ابدع بالسوالف لان اني عشت بعالم محدود عكس حياة ريم المتفتحة وعلى طول الكعدة اباوع لنظرات ام عناد كانت تراقبني وتدرسني من بعيد لبعيد كانت تكتفي تسألني كم سؤال واني ارد على كد الجواب بعدها كامت وراحت للمطبخ حتى تبدي تصب الاكل وصاحت للبنات وبدت الهوسة مالت التحضيرات للغدا اجتي اخت عناد وكالت نور تعالي امي تكول خلي تجي ويانا بالمطبخ هذا بيتج صار باوعت لأم مهيمن احتاج تشجيع كالت .. كومي يمة روحي شوفي بيت عيالج كمت ورحت ورة اخته الي سبقتني وراحت دخلت للمطبخ وشفت ريم كامت وياي. الحلو بريم ما عندها شي اسمه زحمة وخطار تتصرف على طبيعتها واني اعرف هي ليش اجتي وياية يمكن ما تريد تعوفني لوحدي يم ام عناد خطية شكلها بعدها ما مرتاحتلها وصلنا للمطبخ وكان اسمع صوت ام عناد دتحجي وية عمته وتكللها .. واذا حلوة وشنو يعني قابل بس هي حلوة بالعالم يا اختي والله دمها ثقيل. وجامدة. هسة شفتيها لاتسولف لاتضحك هاي شوفت عينج مو البنات وياها هاي بت عمها ريم الله يستر عليها شحلاتها هسة لوعناد خاطبها هي. بدال هاي الطابوكة جان ما فتحت حلگي ولا حجيت. بالعكس اصلاً اكشخ بيها كدام الناس شفتيها شلون مرحة ونازكة عكس الاخت حتى ملابسها ما اعرف منين جايبتهم. بقيت جامدة بمكاني حتى عيوني ما رمشتها صدمتي بكلام ام عناد. مثل ضربة سكين بالخاصرة ريم جانت عيونها كلها غيض اتقدمت حتى تعلن عن وجودنا وينتبهون من غفلتهم قبل لا يكملون ونسمع الاسوء كافي الي سمعته لحد الان احس اكو غصة صارت بحنجرتي لاهي طالعة ولاهي نازلة ريم جانت تدردم بينها وبين نفسها اسمعها تكول .. هاي شنو صاحولنا للمطبخ حتى يسمعونج هذا الكلام موعيب والله ما راح اعديها اجتي تدخل تهجم وهي معصبة لزمتها من ايدها وكلتلها بصوت ناصي .. ريم اياني وياج تحجين الي سمعناه عيب راح ياخذون علينا نظرة مو حلوة بحقنا. واحنا خطار على فكرة ترة المرية ما كذبت وما حجت شي غلط صدك اني كنت متحفظة وياهم. وطبعي مو اجتماعية ما اعرف اجامل مثلكم انت وحور. يعني هالشي موجود بية ليش ازعل من كلامها الصريح هي ما اتبلت علية حتى اعترض اجتي رغد وكالت .. هاي شنو ليش واكفين هنا بالباب تعالوا دخلوا ترة البيت بيتكم على فكرة اني الخطار حضري روحج من تتزوجون اريد من اجي على بيت اهلي اريدج تتلكيني من الباب ريم سألتها .. شنو جاية من الحرب وتستقبلج من الباب رغد ابتسمت وكالت .. لا ما جاية من الحرب بس عاجبني اطبق سوالف الحموات وياها وكذا بقيت بالمطبخ يم البنات اباوع لأم عناد حاولت بقدر الامكان تتجنبني ولا خلتني امد ايدي على شي وكأنما اي حركة مني. راح افشلها. كدام اقاربها بحيث وصلت الدمعة بطرف عيني. بعدما انتهوا من صب الاكل واجتمعوا الكل. وكعدوا ياكلون واني والبنات من ضمنهم كانت نفسي مسدودة مالي نفس اكل هم صبوا الاكل النسوان لوحدهم والرجال بالاستقبال كنت كاعدة بس هيج احرك بالاكل يمكن لو اكل لكمة وحدة اغص وتوكف ببلعومي بعده كلام ام عناد يرن بأذني حاولت ما ابين كدام ريم شي واكون قوية بس مع الاسف ام عناد كدرت تكسر شي بداخلي عرفت شلون تأذيني خلصنا الاكل وصبوا الجاي رحت كعدت يم البنات عمة عناد سألتني .. خالة نور انتبهت عليج ما اكلتي شي عالغدة حتى ما مديتي ايدج عالسمجة الكدامج. .. لاخالة اكلت شوية بس ان..... ام عناد قاطعت كلامي وكالت .. عوفيها خاف ما عجبها اكلنا خالة زهرة جاوبتها .. لا بالعكس اكلكم طيب بس خطية هي هذا طبعها بالكوة تاكل متعبتني وياها عبالك عندها معدة عصفور عمة عناد كالت .. وانا اكول يارب ليش الجسم يشبه جسم التركيات اثاري الاخت طلعت عندها معدة العصفور دارت على بنات اخوانها وكالت .. بس اريد اعرف العندنا شنو معدتهن رغد جاوبتها وكالت .. عمة احنا نملك معدة طائر العنقاء ما عليج بينا. اوعدج بس تدخل مرت عناد لفريقنا الا اخربها واخليها ماتعدي من الباب قاطع كلامنا صوت عناد وهو ينشف بالمشفة شكله كمل اكل وكال .. رغد ديري بالج تفكرين بهذا الشي رشاقة مرتي خط احمر لاتخربين افكارها. بسوالفج. جنج ثلاجة. متنقلة ابتسمت على كلامهم. باوع علية وكال نور تعالي بسرعة اريدج بشغلة مستعجلة كمت من مكاني واتبعتني ريم هم كامت وياي حور لزمتها .. هييي انتي خير سالمين شعندج رايحة وراهم ريم نفضت ايدها وكالت .. انتي ماعليج انا عاجبني اروح وياها. ابتسمت على عقل ريم عناد كانت عيونه علية يباوعلي ويبتسم راح دخل للهول كان محد بي فارغ اجة يسد الباب وريم دخلت بسرعة عقد حواجبه مستغرب وجودها كال .. خير سالمين انا صحت نور مرتي ما كلت عشيرتها تجي وراها يالله حبابة روحي طلعي وسدي الباب وراج ريم خزرته جان مستهان بيها شافها كيوت وناعمة عباله صغيرة بالعمر خطية ما يدري بلسانها شلون اطول منها كلتله وهي عيونها تتحداه .. اني ما جاية علمود سواد عيونك بس ما عندي فرصة احجي وياك براحتي غير بس هاي اتسعت عيوني من تصرف ريم معقولة راح تكول لعناد عن الصار لا مستحيل باوعتلها بتحذير وكلت .. ريم مو وكته هذا الحجي ريم جاوبتني بأصرار .. لا وكته ونص. انا ما راح اكعد اباوع عليهم شلون يحاربونج بكلامهم وانتظرج تتحركين وانتي ذابته عالصامت كدرت تلفت انتباه عناد بكلامها وكال وهو عاقد حواجبه .. شنو الموضوع صاير شي باوعت عليه وكلتله .. ماعليك منها هاي بت عمي تتدلع وحساسة ريم قاطعت كلامي .. لا نور خلي يعرف من هسة احسن علمود يكون عنده علم وما يتفاجيء بتصرفات امه فتحت حلكي حتى اسكتها عناد قاطع كلامي وكال لريم .. نور انتي سكتي خلي ريم تحجي وتكولي شنو صاير وعن اي كلام تقصد شبيها امي ريم جاوبته.. عناد. حاول تكعد وية امك وتكوللها وين تريد توصل بهاي تصرفاتها .. ليش شبيها امي شنو سوت ارتبكت من الموقف المحرج وكلت .. كلشي ما سوت ريم كملت كلامها وكأنه ما حجيت كالت .. بربج هي شنو الي ما حجته اشو من اول يوم اجتي تشوفج بي حتى تتفقون لحد هاي اللحظة هي مشتغلة حرب اعصاب وياج كل شوية تذب كلام يهد جبال دارت على عناد وكعدت تحجيله عن مواقف امه وحتى عن اخر شي سمعنا واخر شي باوعتله بتحدي وكلتله ..على فكرة امك هي الي اختارت الذهب وماخلت لنور فرصة تشتري شي يعني الموجود مو ذوق نور ولا عاجبها فوكاها من تجي تلبسها تكولك ذوق نور وتريد ذهب ثكيل ليش شنو شايفتها جاية جوعانه عريانه تدور ذهب يمكم ريم فجرت القنبلة بوجه عناد وعم الهدوء المكان بعدها ريم كالت قبل لا تتركنا وتطلع .. عناد حبيت اكون وياك صريحة وردتك تعرف كلشي لان اعرف بنور فقيرة وما راح تدافع عن نفسها راح تكتفي بالتزام الصمت وهالشي اعتبره ظلم وانت بصفتك كزوج لازم تحرص عليها ومتسمح لاي شخص يأذيها حتى لو كان هذا الشخص امك بنفسها هم لاتسمحلها ما دام تصرفاتها وكلامها تأذي نور اذن لازم تحطلها حد وكالمعتاد ريم سوت الي تشوفه صح وطلعت وتركتنا وحدنا يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 09:02 AM
| #68 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت ستة وثلاثون ج٢ مساء الانوار عليكم احبتي المتابعين بما ان اليوم جمعة ومثلما تعرفون اليوم عطلتي بس ما حبيت اعوفكم منا لباجر بدون ما انزللكم بارت تصبيرة لتواصل الاحداث نور بعدما ريم انطت المقسوم لعناد ووصته يدير باله علية وينتبه لتصرفات امه. بعدها طلعت وتركتنا لوحدنا اباوع لعناد دار وجهه وراد يطلع من الهول وبسرعة لزمت ايده بخوف لان جان كلش معصب .. عناد عفية وين رايح شنو تريد تسوي نزلت عيونه على ايدي الي كانت لازمة زنده وكال .. لاتخافين ما راح اسوي شي لان منا عمامي وعماتي هنا ما اكدر احجي بس ماعلينا .. كل شي بوكته حلو طلع من الهول للصالة الي كانوا كلهم مجتمعين بيها وامه بس شافتنا طلعنا گالت بضيق .. شنو عناد هسة وكتها رحت كرصت بزوجتك اي مو عمامك واولادهم جايين لهنا حتى يباركولك مرتك بعدين لاحك عليها ما راح تطير باوع عليها وكال .. عمامي واولادهم مو خطار ما عليهم شي ابوي وحيدر يمهم وانا صاعد فوك اريد نور تشوف الغرفة حتى اخذ رأيها بكم شغلة قبل لا اصبغها واغير لونها وكع گلبي بين رجلية من كال هيج هسة ما اعرف ياموقف بيهم اصعب من الثاني كعدتي وية امه واقاربهم لو صعدتي وية عناد لغرفته والله بالحالتين اني راح ابقى اعاني من الاحراج والتوتر لزم كف ايدي الي حسيته ضاع بكف ايده ومشى من غير ما ينتظر جواب امه شكله هو كال هذا الشي بس علمود ينطيها خبر مو علمود يستأذن منها سحبني وراه ووجهي كان ينطي الوان باوعت بطرف عيني لريم شلون كامت توزع ابتسامات نصر اما ام عناد حتى ما اتجرأت اباوع عليها صعدنا فوك كانت غرفته بالطابق الثاني من كد الارتباك حتى ما شفت دربي كان عقلي يتخبط شلون ابقى وية عناد لوحدي فتح باب الغرفة وسوالي مجال حتى ادخل قبله باوعت عليه مترددة قبل لا ادخل كان مبين عليه معصب .. ولج بابا شبيج لاتخافين فوتي دخلي والله ما راح اكلج المشكلة نظرات عيونه ما تطمن ما بيهم اي براءة يحسسني عبالك الذيب الي وية ليلى من يريد يطمنها حتى تحس بالامان وياه عيناً شعوري بتجاه عناد بهاي اللحظة دخلت ورجلية وحدة تضرب بالثانية عبالك طفله هسه متعلمة تمشي اتعثرت بالسجادة وبسرعة لزمني من زندي وكال .. انتي شنو قصتج وية العثرات اول ما وكعت عيني عليج اتذكر اتعثرتي ووكعتي بالشارع كدامي وهسة اتعثرتي نفضت ايدي منه وابتعدت عنه لداخل الغرفة. وكلتله. .. كلة منك انت ما اعرف شلون تباوع علية بنظرات ابد مو مريحة. تخليني ما اشوف دربي .. نور ما اريدج تخافين مني لان انا رجلج والمفروض اكون الج مصدر الامان والسند بهاي الدنيا وعلى طاري الامن و السند اريدج تكوليلي معقولة امي كانت تحجي هيج وياج وكدام الكل وانتي ساكتة اريد اعرف ليش هيج سوت وياج وزين وانا شنو موقعي بالاعراب طرطور ما مالي عينها جاوبته .. عناد عفية لاتخلي ببالك ترة الموضوع ما يستاهل وماعليك بكلام ريم باوع علية وكال .. هاي بالنسبة الج ما يستاهل اما انا بالنسبة الي هاي اعتبرها اهانة بحقي . انا ما اسمح لكائن من كان يستهين بية ويلغي وجودي واليوم ما راح اخلي الموضوع يعدي على خير من غير ما احط حد جان كلش معصب ونيته واضحة من عيونه مبين عليه ما راح يسكت واحتمال يتعارك وية امه عركت كصتي وبهت لوني .. لا لا عفية عناد لخاطري اهدىء و لاتكبر الموضوع وتسوي مشكلة .. نور انتي مالج دخل هذا الموضوع مو يمج .. لا عفية عناد شلون مو يمي وانت لوما ريم حاجية وياك عن الي صار جان ما عصبت على امك وتعاتبها يعني والله عيب هسة شنو يكولون علية اول دخلتي الكم للبيت وتصير مشكلة وية امك من وراية شكد عيب هسة يكولون بعدها ما داخلة للبيت كامت تسوي مشاكل باوع علية وكال .. ومنو گلج انا راح اتعارك وية امي انا بس اريد اكعد وياها واحط النقط على الحروف واخلي حد محد يتجاوزني وهذا الشي راح يكون وية الكل. مو بس وية امي لان مستحيل اخلي الصار. يعدي هيج بكل سهولة من غير ما ارد اعتباري .. بس انت هسة معصب واكيد هسة من راح تحجي وياها. راح تخشن خاطرها وتصير مشكلة وهالشي مو حلوة بحقي والكل راح ياخذون موقف مني لان نقلتلك الي سوته .. نور ترة خلي ببالج تصرفي هذا لازم يصير سواء كنت متزوجج الج او متزوج وحدة غيرج انا ما ارضى على اي واحد يستهين بية وما يسويلي حساب كلتله .. هسة انت ليش معصب ترة محد مستهين بيك وهي حجت علية مو عليك عفية لاتسوي من الحبة كبة .. هاي شبيج نور ترة انتي مرتي يعني كرامتج من كرامتي والي يتجاوز عليج ويهينج معناها اتجاوز علية. وما يشوفني رجال كفو حتى يحترمني ويسويلي حساب .. براحتك ما راح اكدر اغير قرارك بس اترجاك من تحجي وية امك احجي وياها بهدوء بدون ما تعصب ابتسم واتجه علية. ولزم ايدي وكال .. هسة عوفج من امي وشلون احجي وياها انا اعرف شلون اتصرف هذولي اهلي وانا ادرى بيهم خلينا لانضيع هاي اللحظات واحنا سوية بجدال الي لايودي ولا يجيب كان واكف كلش قريب مني وعيونه اااخ من عيونه كانت نظراته ترسم معاني وجهي واتركزت على شفايفي قرب وجهه على وجهي والنية مبينة من عيونه رفع كف ايده الخشنة وصار يتحسس مكان النبض برگبتي وسافرت لمساته على طول رگبتي وعلى اثر حركته جمدت بمكاني وارتفعت دكات كلبي وانحبست انفاسي وعيوني مفتوحة على وسعها ما ترمش الحواس عندي كلها تمر بحالة فوضى شي يدعم بشي دنك راسه يقربه علية اكثر همس بصوت ناصي وكال .. دخيل الله شكد جنت منتظر هاي اللحظة انخرست ما اعرف شنو اجاوبه اي صدك هم الناس شنو يحجون بهيج لحظات بالحقيقة ماعندي معرفة بهيج امور بقيت ساكتة ما حركت ساكن جامدة بمكاني وگلبي يريد يطلع من بين ظلوعي انتبهت عليه اتوقف عن اقترابه وعقد حواجبه مستغرب هدوئي. بس اشو هذا فجأة. اتسعت عيونه متفاجيء و كمز من مكانه و ابتعد عني وكال .. لالا نور اترجاج الله يخليج لاتخافين والله ما عندي نية ااذيج بالله شو اخذي نفس عميق واسترخي صدگيني ما راح اسويلج شي جان عبالك واحد جاي يريد يطمن طفل رمشت عيوني وما جاوبته مستغربة ابتعاده المفاجيء هذا شبي نط هاي النطة العجيبة شكو شصار اباوع عليه كام يحوم بالغرفة مخبوص ما يعرف شنو يسوي رفع شعره بتوتر واسمعه يدردم بينه وبين نفسه ويكول .. لا يا الله انا شسويت بس لا انصدمت البنية من وراية بالله شكول لأخوها من ارجعله اخته مصدومة ما تحجي اكله ردت ابوس اختك. ورعبتها حتى بعدني ما بستها شنو من حظ شايل اني ..خرب هو يحجي وانا دك الجرس عندي عززززة هذا بس لا عباله اني دخلت بحالة صدمة من الخوف . ينعل ابو شكلك يا عناد هذا ما يميز بين الخجل والخوف رجع باوع علية وكال .. الله يخليج نور احجيلج كلمة لاتدخلين بخطيتي والله العظيم اخوج التيس يسحلني اذا درة مسويلج شي هزيت راسي باعتراض محتارة شنو اجاوبه اباوع عليه اتجه للباب بسرعة وهو يحجي وكال .. لاااااا يالحمزة ما جاي تكدر تحجي صارت السالفة صدك خلي الحك اصيح لرغد تلحكنا وصل للباب يريد يطلع وصحت عليه استوقفه .. لحظة عناد اوكف لاتصيح لرغد اني ما بية شي بسرعة دار علية ونظرات الهلع بعيونه بدت تخمد ترك الباب واقترب مني وكال .. لعد ليش بقيتي ساكتة مثل المصدومة وماتحجين دنكت راسي بخجل وكلتله .. كنت ساكتة من الخجل مرتبكة مو من الخوف لمعت عيونه وابتسم وكال وهو يلزم ايدية .. الله يلعن بليسج وكعتي گلبي. يا اخت مهيمن وانا عبالي مصدومة ابتسمت ودنكت راسي محجيت مد ايده ورفع راسي وكال .. شنو كلتي هذا خجل مو خوف يعني افتهم من كلامج متقبلة قربي مجاوبته يبوي عليك عناد وين انطي وجهي بهاي اللحظة ضحك وكال .. لاول مرة احب سكوتج لان بي علامة الرضى ختم كلامه وقرب انفاسه وختمه على شفايفي وغلفها بحرص متفنن ارتعد گلبي بس مو من الخوف كانت رعشة حماس ولهفة كنت مثل طفلة وبدت تكتشف العالم حواليها فجاء وجان اكمز من مكاني على صوت نقال عناد يدك انخبصت وارتبكت عبالك واحد دخل علينا حاولت ابتعد عنه وكلتله .. عناد نقالك يدك بس هومقيدني رجع دفن راسه برگبتي وكال .. عوفي ما عليج بي غلسي كان النقال مستمر يدك بألحاح دفعته من صدره اريد ابعده وكلت .. عناد عفية رد رفع راسه معترض وعيونه بيهم نظرة واحد يريد يغزي مد ايده على النقال وهو يدردم وكال .. بس اريد اعرف هذا يا شريف متصل الا احرك عشي.... قطع كلامه وهو يباوع عالنقال واخذ وقفة الاستعداد ورد بسرعة .. الو هلو مهيمن شنو شلون انت جاي تنتظر بالباب !!!!! نزل النقال من اذنه وباوع علية وعيونه تبدلت نظراتها راسا عبالك اجته ضربة على راسه صحته كال بصوت مبحوح.. مهيمن بالباب وصل ينتظركم اتصل حتى ابلغكم تطلعون واني انخبصت مااعرف شلون اطلع من الغرفة الي يكول مهيمن عنده كاميرا يشوفني هو مشى كدامي وفتح الباب بقوة وهو يكول .. اني اعلمك مهيمن اصبرلي الا اخرب عليك ايام خطبتك جلال دكت ساعة المنبه مثل كل يوم كنت اوقتها قبل لا انام مديت ايدي حتى اسكتها صوتها يسطر نهضت من مكاني وعيوني مغوشة من النعاس كانت الساعة اربعة ونص بالخمسة الفجر لازم الكل يكون كاعد مسحت وجهي واتمغطت وسحبت المنشفة واتوجهت مثل كل يوم للحمام بس هناك وجان تطيح عيوني على سيقان بيض مرمر سافرت نظراتي على طول رجليها وانتقلت لجسمها ووصلت لشعرها. كان الشعر متناثر عبالك خيوط ذهب. شنو شكو معقولة اني متت والله دخلني للجنة وانطاني حورية واني ماادري حكيت راسي بقوة اريد اصحي نفسي حتى أتاكد اني موجود بالدنيا واكدر افكر زين هنا رجعتلي ذاكرتي السبية الي هدية الامير يعني معقولة هاي الحورية النايمة هي السبية .... هي الجارية مالتي لك جلال قربان معقولة هذا الجمال كله نايم وياك الليل كله وانت ماعندك علم خلي امد ايدي زين بس اتحسس هاي السيقان الطالعة اريد اعرف مثلنا دم ولحم لو حليب وبسكت كعدت يمها على الكاع ومديت ايدي اتحسس يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 09:18 AM
| #69 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| مساء الخير والعافية عليكم جميعا اليوم نهى عدها مشكلة بالنت هذا الي وصلني منها وكانت بعدها تكتب وماعدها نت من قبل سبع ساعات راح انشرلكم الموجود عندي وان شاءالله يرجع يمها النت وتنزل الباقي الي عدها اصدقاء على الماسنجر راح يشوفون فعلا مو موجودة من قبل سبع ساعات البارت سبعة وثلاثون ج2 هدى جلال كعدت يمها بالكاع ومديت ايدي اتحسسها وصلت ايدي يم رجلها لكن فجأة اتحركت بنومتها موجوعة وسمعت صوت انينها يثبت المها كانت نايمة بزاوية الغرفة غافلة عن الخطر المتربص بيها اجة صوتها مثل الصاعقة على راسي صحتني من غفلتي وبلحظتها انتبهت لأيدي الممدودة و لوضعي ولمكاني والاغرب من هذاكله صدمتي بنفسي صدمني تفكيري ونيتي الي كنت ناويها نهضت من يمها مفزوع ما مصدگ نفسي .. لا ياربي دخيلك شنو جاي يصير وياي نفضت راسي واتبعدت عنها بسرعة و اتوجهت للحمام عبالك واحد يركض وراي سديت الباب وانا بعدني مصدوم من نفسي رحت للمغسلة وكعدت اغسل وجهي بماي بارد مثل المجنون صرت اكفخ وجهي بالماي مرة مرتين تلاثة اريد اصحى من غفلتي اصحي ضميري الي الظاهر نام وتركني رفعت راسي ووكعت عيني على انعكاس وجهي بالمرايا صرت اتمعن بعالم وجهي القاسية منو انت ماجاي اعرفك رفعت ايديه اتحسس وجهي اريد اتأكد من وجودي اتحسست لحيتي الطويلة شكلت وية معالم وجهي صورة لقطاع طرق مابية قطرة رأفة. لكمت الحايط بقبضة ايدي اااخ يالله رحمتك شلون هانت علية نفسي وسمحت لنفسي انجرف وية همجية داعش ليش مو انا الي بذلت النفس واقسمت احافظ على شرف الوطن اشو صفيت انا اول من ينتهك عرض بنت ولايتي شنو فرقي عن داعش ووحشيتهم سحبت نفس عميق اصبر النفس اصبر ياجلال هانت وهذا واحد من الامتحانات مثلها مثل القبلها انا ما تعبت كل هذا التعب ولا ضحيت بكلشي علمود اهدمه بلحظة ضعف صحيح النفس امارة بالسوء بس للي مثل حالتي ماعنده مكان للسوء بگلبه وهيهات منا الذلة الي موجودة وياي بالغرفة بنت ولايتي جار عليها الزمن وصلها لعندي. وربي بهاي اله بيها حكمة وامتحان للصبر رفعت راسي واتعوذت من ابليس ومسحت وجهي وصرت اراجع اسباب قدومي لهنا وية داعش ديربالك جلال تغفل عن مهمتك واصبر حتى تنال النصر بشرف وعزة نفس خلي ايدك نظيفة. وحافظ على سترها وصونها حالها حال اختك نور ياالهي ابعد عني شيطان نفسي اني مجاية هنا حتى اكون مثلهم ساعدني ياربي غمضت عيوني وهدأت نبضات گلبي وانا اتذكرعيون حوري غزال البصرة الي كاعدة تنتظرني على احر من الجمر. مسحت وجهي وطلعت من الحمام وبوجهي مباشرةً طلعت برة الغرفة حتى بدون ما القي عليه نظرة غضيت البصر وقفلت الباب ريم كنت كاعدة وية خالة زهرة وحور وانا احس بالراحة من حجيت رية عناد عن موقف امه قررت ما اسكت وانا ادري بنور ما راح ترضى على موقفي بس احسن لازم واحد بينا يوصل الصار قبل لا الامور تكبر ويصير صعب حلها كانت خالة زهرة منطلقة بالسوالف وية ام عناد وعمته واني وحور والبنات كاعدين نسولف وسالفة تجر سالفة رغد سألت حور .. انتي مرتبطة لو لا جاوبتها حور .. اي اني مخطوبة رغد بأسف .. عود ردت اخطبج لاخو زوجي يدور على بنت حلال اي بس صدك اشو اني ما ادري بخبر خطوبتج انخطبتي لمنو اني جاوبتها .. مخطوبة لابن عمي جلال رغد اتسعت عيونها بلهفة وعدلت كعدتها وكالت وأشرت على عيونها .. عاااا جلال .. جلال !! حور جاوبتها وهي تگلب بعيونها .. اي هو جلال بعينه شبيج منفاجئة .. لا مو متفاجئة. بس جنت دائما احس بي مغرور واكول هذا من راح يخطب اكيد راح يدور العالم حتى يوكع بوحدة احلى منه حور مالت علية وحجت بصوت ناصي .. اكول هاي موجنها جاي تهيني يعني شنو قصدها. هسة شنو اهد اسحلها لو عيب درت عليها وكلتلها من بين اسناني .. اششش عيب سكتي خلها هي دتحجي على فطرتها مالها قصد بيها ولاتخافين متزوجة شتسوي بجلال انتبهنا لرغد كانت تسولف لبنات عمها مستمرة بالكلام كملت كلامها .. تصدكون من اشوفه مرات يجي لبيتنا وية عناد وانا عندي اخوية بعيني حلو اسمر مملوح وكشخة جنت اكول محد احلى منه بس من شفته هو وجلال اشو اباوع لوجه اخوي عناد شو صار بعيني اجلح املح وارجع اباوع لجلال تكول عبالك مسبحينه بماي ذهب ومرة جيت على عناد سالته بعد مااتحمل ما تضوج من تمشي وياه يعني انت جنك فلافل و هو جنه كيمر يعني هواي فرق جانت رغد منطلقة تحجي وحور صارت تحوم و الدخان كام يطلع من اذاناتها البنات سألنها ونظرات الفضول تقرا الف .. ما عندج صورة اله بنقالج نريد نشوفه حور ابتسمت بكل ود وكالت .. بالحقيقة صورته بنقالي والنقال نسيته بالبيت بس اوعدكم غير مرة. من تصير فرصة اشوفكم صورته اني جاوبت من يمي وكلت .. اوكفي لحظة اني عندي صورة لجلال بنقالي كمزت من مكاني متفاجئة على كرصة حور وباوعت عليها جانت توزع ابتسامات للبنات وتكرص بية سألتها بصوت ناصي .. اااي شنو شبيج ليش تكرصين .. ووجعاي انا الج بسيطة حسابي وياج بعدين قاطعت كلامنا رغد و كالت .. الله عليج طلعي الصورة خلي البنات يشوفونه فتحت النقال والبنات التموا علية وحور بقت توزع ابتسامات مجاملة بس مبين عليها اذا لزمتني راح تسحلني سحلة معدلة فتحت النقال وراويتهم صور جلال وهن ما قصرن كاموا يعلقون بكل اللهجات العربية سوري على لبناني على مصري (واوي شو هايدا بيعئد. بيجنن ما احلاه ويؤبرني على هالطلة ..ايه الحلاوة دي ياكدع دة مز اوي) هم ماخذات راحتهن يعلقن واني شبعت كرص وبهاي الاثناء عناد ينزل الدرج وهو يدردم وبيده النقال ونور وراه تنزل بكل هدوء والوجه احمر كل شوية تعدل بشالها مبين عليها الارتباك خرب يومها شكد مفضوحة هاي البنية اجوي يمنا وعناد باوع لخالة زهرة وكال وهو ضايج .. خالة مهيمن بالباب ينتظركم خالة زهرة كالت.. يا خطية بس لا متصل علية وانا ناسية النقال بالبيت جانت تحجي وهي تعدل بعبايتها على راسها واني وحور نهضنا وراها وجتي نور انضمت للمجموعة اما ام عناد كالت .. وين رايحين شنو بعد وكت حتى ما لحگنا نشبع من سوالفج جانت تحجي وية ام مهيمن عناد كمل على كلام امه .. والله ما اعرف شعنده مهيمن مستعجل مو كلتله انا ارجعكم .. لا خالة ما قصرتوا هم يالله نرجع وهو هم خطية لوحده بالبيت وشفناكم والحمدلله. بعدها اتبادلنا السلام وية البنات ورغد وعيوني على ام عناد الي جانت نظراتها مزروعة بوجه نور ام عناد كالت.. والله ما لحكنا نشوفكم خو نور كلشي ما شفنا منها اشو كل الوكت بقت كارصة هي و عناد فوك عناد بسرعة انطاها نظرة لامه سكتتها ودار وجههة ومشى كدامنا وكال .. يالله خالة مهيمن حرگ علية التلفون طلعنا لمهيمن بالباب سلم على الحجي والشباب وفتحلنا باب السيارة صعدنا بالسيارة صعدت حور بالاول ونوب اني وراها نور بعدها السيارة ما حركت وما احس الا الكرصات نزلت علية من كل حدب وصوب من كلا الاتجاهات نور وحور ونور كرصتني وكالت بصوت ناصي تتوعدلي .. اني الج ست ريم مفخخة. حسابي وياج بعدين بالبيت بس خلي نرجع وحور .. لج ريم عوبة شلون تراوين صورة جلال للبنات هااااولج اليوم اذا ما نتفت شعرج ما اطلع حور وحدة تكرص من زندي ووحدة تكرصني بزري اخير شي عطت بيهن .. ااووووي كاااااافي لاتكرصون والله مكان الكرصة راح يصير ازرگ من وراكم مهيمن باوع علية بالمرايا وعيونه اجتي بعيوني ..شنو ريم خيرج شبيج تنعوصين شنو هو الي راح يصير ازرگ .. اجيت احجي حور لزمتني من ذراعي وتتوعدلي ونور تأشرلي بالسكوت على شفايفها جاوبته واني محاصرة حاصرتني البجية وكلت .. مهيمن ما اكدر احجي واكول شي نور وحور ديكرصون متحلفات بية حور لكزتني وكالت بصوت ناصي .. ولج عوبة ام لسان مزروف انا الج بس خلي نوصل خالة زهرة كالت لمهيمن انا نزلني يم بيت اخوي حسن اريد اسلم عليه واتطمن على اخبار اولاده منتصر ومنتظر نزلها يم بيت خاله وكملنا الطريق للبيت وانا كنت كاعدة بنص الاعداء وحدة ترفع وحدة تكبس منا علما وصلنا للبيت انا منتوفة نتف لا وبعد الاضرب من هذا كله وراي حساب بالبيت واول ما وكفت السيارة. نزلت من السيارة قبلهن اركض ومهيمن باوع علية وصاح من وراي .. خير ريم شبيج تركضين بيج شي اسمع حور تكله .. خطية كناري مفولة محتاجة حمام متشوفها طول الطريق تحوص لان محصورة دخلت للبيت ورحت مباشرةً دخلت للغرفة واني ادردم عليهن نزعت ملابسي اريد اشوف مكان الكرصات والله اذا صار ببشرتي شي والله اكلب البيت عليهن عزة وجان اشوف بشرتي صايرة طبعات زرگ لالا .. بشرتي خربت لبست بجامتي وجاي البس التشيرت وجان ينفتح الباب وتدخل علية حور وراها نور مثل العاصفة حور كالت وهي ترفع رداناتها والنية باينة من عيونها ناوية على عركة .. ولج ام السان المزروف اليوم دمج مهدور وين يروح المطلوب النا وين تشردين وراج وراج كون اليوم هذا السانج المزروف اخيطه الج كاعدة تعرضين بصور جلال كدام البنات عبالك فاتحتلي بي مزاد وكل شوية مشوفتهم صورة شكل ابتعدت عنها وخليت نور بينا اروح منا واجي منا واني اعيط بصوت عالي .. لج حور والله اذا لمستيني احرك الدنيا على راسج جسمي تشوه من وراج وراح يصير بية تسمم من ورة الكرص حور تحاول توصلي كالت .. بعدج كلشي ما شفتي شايفة هاي شعراتج الفرحانة بيهن الا انتفهم الج نور تكمل على كلام حور .. حتى مرة ثانية تبطلين حشرية كلتلهم .. انتوا صدك مو مال واحد يسوي وياكم زين بس هم كالوها سوي زين وذب بالشط طبعا كنت احجي وانا اتحرك منا ومنا ورة نور لان حور بعدها تناور تريد تلزمني المخبلة حور كالت سألت نور باستغراب.. ليش انتي هم شوفت صورج للبنات نور جاوبتها .. لا اني فجرت علية عبوة من عبواتها الناسفة وراحت وخلتني بموقف لا يحسد عليه جاوبتها واني بعدني اراوغ حور .. الي يسكت عن الحق شيطان اخرس حور جاوبتني .. هو ياهو الداز عليج بخط مصخم وكلج تعالي راوي الصور جاوبتها .. وانتي شبيج گلبتي الدنيا علية لو هو ابوي ما كادر بس على امي لو بيج خير روحي طلعي بطولاتج على بنات خالج من يكعدن يصنفون عليج ويعيبون ويصيحولج الزركة اشو ما عصبتي عليهن وكرصتيهن مثلي حور نطت عيونها وشهكت .. ولكم انطونياها تدرين انا شنو سويت ببنات خالي من عالوا بية دتعالي خلي اراويج شسويت بيهن وجان تلزمني من تشيرت البجامة استلمتني اكس ومربع يكول عبالك الملاكم تايسون .. لا لا لج حور التشيرت راح ينشك ويخرب شهكت لاااااااا لهنا وحدج الا شعري اااااي لج حور لا اووووي لاااا اوووي حور .. ولج العاوية منين ما الزمج تصيحين اوي تشتغلين على اللمس جنج نقال صيني بسرعة تخربين بس والله الا افرمتج من جديد واسويلج إعادة تصنيع من جديدة واكتب عليج . (ميد ان إراك ) اما نور خلصتها علينا صلوا على محمد شبيكم تخبلتوا واني كمت اعيط اني كظيتها بس اخرمش ما بية خير واني ياروح ما بعدج روح كوة خلصت روحي واتملصت منها وطگيتها ركضة عاااااا اجتي وراي طلعت اركض خاطتني خوط عبالك جنت داخلة بغسالة اياوع لملابس شلون معفوسات والبجامة رجل صاعدة ورجل نازلة وشعري منتوف وياخة التشيرت صايرة صفح وحالتي حالة. ينعل ابو شكلج ياحور. شمسوية بية. عبالك واحد مدخلني للغسالة ومطلعني منها. صار الدرج كدامي وصعدت فوك بالعجل اني اركض وهي تركض وراية صارت باب غرفة مهيمن كبالي فتحتها وفتت بسرعة ردت اسدها واقفلها بس هي جانت قريبة ملحكت كامت تدفع حيل بيها واني وخرت هي وكعت واني كمت اضحك بانتصار حور شافتني اضحك زاد جنونها كامت ولزمتني بقوة من شعري واني رجعت اصيح هنا دخلت نور وباوعتلي وهي مبتسمة .. تستاهلين حتى بعد ماتدخلين بشي ميعنيج وهنا سمعت صوت مهيمن فديت صوتك هيما المنقذ راسا حسيت شعري انفكت ايد حور منه صاح بصوت عالي .. هاي شكو شصاير اني راسا جاوبته ..همزين اجيت تخلصني من هذني المتوحشات نور وحور عقد حواجبه .. حور ونور ؟ ليش خير شصاير ..شمدريني شبيهم اني بس ... محسيت الا حور ضربتني بخاصرتي على كيفها وكالت والابتسامة على وجهها .. شبيج محد يعرف يضحك وياج ياعمي عم نمزح هنا الاخوات انكلبن ملائكة وياية كل وحدة تباوعلي وبعيونها نظرة توسل رجعت حور تباوع على مهيمن .. نضحك ونتشاقى بيناتنا اخوية وشوية الشقى ثكيل وباربي ماتتحمل تعرفها طلعوا اثنينهم وعيونهم بيها توسل حتى ماافضحهم اتنفست بقوة وعدلت نفسي شوية خرب شسوت بية حور اني اعلمها واني هم اتوجهت للباب اريد اطلع بس رجلي متكدر تكمل الخطوات اكو شي يمنعها كان مهيمن واكف كدامي وسد باب الغرفة سمعته يكول وين هو على كولتهم دخول الحمام زي خروجه .. احم احم شنو قصدك مفتهمت .. هسه اني افهمج جنت حاب اسالج عن بعض الامور .. ياامور تقصد ..اكول ست قنبله اشو صايرة تصرحين من وحدج وتكولين خطيبي واني اخر من يعلم حضرتج شوكت ناوية تردين الخبر وانا كاعد انتظر شنو لحد ما الكة روحي معرس وانا ما ادري بنفسي يتبع | ||||
|
| |
|
08-11-19, 09:21 AM
| #70 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت ثمانية وثلاثين ج٢ مساء الانوار والسرور عليكم ريم اتوجهت لباب الغرفة اريد اطلع ومهيمن قطع علية الطرق وسد الباب وكال .. على وين ان شاء الله رفعت راسي باوعتله بأستفسار .. شنو شكو اريد اطلع .. على كولتهم دخول الحمام مو زي خروجه .. احم احم شنو قصدك مافهمت .. هسه انا افهمج اكول .. ست قنبله شو صايرة تصرحين من وحدج وامة محمد كلها تدري بعقد قرانا القريب وانا صاحب الشأن اخر من يعلم يعني بربج بدل ما كاعدة. تطشين الخبر بالولاية تعالي كليلي الي انا اولى من الناس الباقية بمعرفة الخبر باوعت عليه بتحدي وجاوبته وكلت .. شو اني ما كان عندي علم من كعدت تطرد بالخواطيب وكلتلهم بت عمي مخطوبة الي ولا اجيت سألتني عن رأيي واني كنت اخر من يعلم باوع علية وكال .. هذا موقف غير يختلف سويت هيج حتى احط حد لزملائح بالكلية انا مو طرطور يجون يخطبونج مني. .. اني هم سويت مثلك حبيت احط حد لبعض الناس فگطعت عليهم الماي والكهرباء يعني مو حلال عليك وحرام علية باوع علية متعجب وكال .. ولج لا تخبليني انا رجال واحجي بزودي. والاصول تكول الرجال هو الي يخطب ويعلن ويعزم الناس . البنية المثل حلاتج المفروض تگعد تستكن بالبيت مو تروح تسوي دعاية واعلان بس اريد اعرف انتي المن حاجية بعد لغير بنات خالي وكايلة عقد القران عن قريب رمشت عيوني بذنب وجاوبته. .. ما كلت لأحد بس لبنات خوالك. والنسوان الي يجون ياخذون خلطات اعشاب من خالة زهرة وكم جارة من جارات امك هَـا وعلى فكرة يعني للامانة امك هم شاركت بالحملة الاعلانية يعني اني مو لوحدي هي كلما تجي وحدة من صديقاتها او جاراتها تكللهم هاي خطيبة مهيمن .. لا والنعم منج انتي وامي ما تقصرون گايمات بالواجب وزيادة وحدة ترفع وحدة تكبس شلون اثنين الله بلاني بيكم بس على الاقل جان انطيتوني خبر حتى اسوي حسابي مو اتفاجيء بالناس يباركولي على خطوبتي ويسألوني شوكت الزواج. لا والاقوى منها خالي حسن لزمني ويگولي ولو اني عاتب عليك خطبت بنت عمك وماكلتلي ما عليه مبروك بس شنو تنتظر ليش لحد الان ماعاقد على بت عمك عيب زحمة من الناس شنو تكول عليك خاطبها وماعاقد عليها وهم بنفس البيت وتصير حجاية مو حلوة على بت عمك اسألج بالله انتي مو تدرين بية انا منتظر منج الجواب رفعت حاجبي بتعجب .. لايكون كنت منتظر اني اجيك واكلك مهيمن اني موافقة تعال اتزوجني .. اي اكيد لان انا عرضت عليج الزواج مثل الخلگ والعالم وانتظر منج جواب بالله شلون تريديني اعرف بموافقتج قابل اشم گفى ايدي لو اكعد اقرة الفنجان حتى اعرف بيج موافقة .. اني اشوف ما يحتاجلها كل هذا الحليم تكفيه الاشارة والحمدلله اني ادري بيك فطن وتلكفها وهي طايرة شمعنا هاي الي ما لكفتها لمعت عيونه وكال .. .. يعني افتهم من كلامج وتصريحاتج بخصوص الخطوبة كانت اشارة بالموافقة هزيت راسي بالموافقة .. هاي شنو خير وين اختفى صوتج اشو گمتي تهزين براسج لو هو لسانج المزروف من وصلت للموافقة بطل يغرد اتخصرت وبرطمت شفايفي وحجيت بدلع وكلت .. والله حيرتوني انت وخواتك شنو اسوي ما يعجبكم اغرد بلساني تظلون تحجون ابطل تغريد هم تحجون علية والله حيرة شنو تريدوني اسوي زمخ بية بقلة صبر مثل واحد طفح بي الكيل وكال بتهديد يتوعدلي .. بالله شو عدلي روحج واوكفي عدل بلا تنعوص انتي تعرفيني انا شنو اريد فضيني لا تخليني هسة اطلع خبالي عليج واسحب الموافقة من هاي شافيفج العاوجتهن علية لمعت عيوني بوكاحة جوابته واني اقدم شفايفي كدام بوضع البوسة وقربت عليه وحطيت عيني بعينه بتهديد وگلت بصوت كله دلع .. ومنو مانعك ما تجي تسحبها من شفايفي اباوع عليه خطية انصدم من حركتي الجريئة ورجع شوية للخلف وكال .. الله يلعن بليسج ولج بلاء هاي شجاي تسوين !!!؟ جاوبته واني اباوعله بنظرات تحدي .. مو انت كلت اسحب الموافقة من شفايفج هاي اني اسهل عليك الامور .. ولج غضب صفي النية انا قصدي على الموافقة. وهنا انقلبت الادوار بيني وبين مهيمن اقتربت منه بتهديد ونظراتي تلمع بوكاحة وكلت .. ومنو گلك اني اريد اصفي النية اصلاً اني خليت النية الصافية الك هو انا اقتربت عليه اشو هذا كمز من مكانه مثل المكروص ابتعد عن الباب وراح لوسط الغرفه وعيونه بيهم شك مريب وكال متفاجيء .. لا يا الله هاي البنية بس لا تتعاطى ولج غضب ستري على روحج وبطلي هاي الحركات لا تختبرين صبري وياج ترة للصبر حدود والشيطان شاطر جاوبته بأستفزاز .. شنو منتظر ما تعبر حدود الصبر منو الي لازمك .. لا هاي البنية اليوم مو طبيعية ناوية تجلطني باوع علية مثل الي يريد يحاول يقنع بطفلة .. يالله هاي هي وصلت الرسالة وعرفت ردج عفية بالحبابة واتعوذي من ابليس وصيري خوش بنية وطلعي برة نفذي بجلدج قبل لايوگع المحضور ترة الله وكيلج انا گوة لازم روحي عنج ما ابتلي بيج جاوبته وكلت .. شبيك لاتخاف ما راح اسويلك شي هالمرة سماح بختك بخواتك هنا والا جان عبرتك حدود الصبر واوصلك بذاك الصوب وساعتها ما يهمني اذا وقع المحظور هو انا حجيت هيج وهو هد علية وكال بغضب .. خاب دتعالي صارلج ساعة واكفة تتحديني وتوزيني عليج دتعالي خلي اعلمج شلون الصبر من ينفذ ويتحول افعال كان جاي بتجاهي والعيون بيهم بركان ثاير شهكت حذرة من نظراته عزة هذا اذا لزمني والله يجرم بية اني جنت بعدني واكفة يم الباب ما لكيت نفسي الا فاتحة الباب بسرعة و ركضت شاردة منه واني خربانة ضحك عليه واخيراً اهتز الجبل الصامد جلال مرت الليالي والايام لازلت اجاهد وابذل اقصى ما بوسعي حتى اتمم المهمة واوصل المعلومات المطلوبة عن الموقع كنت استغل في بعض المرات اجهزة المراقبة والتنصت الموجودة عندهم وعن طريقها اوصل المعلومات. كنت استغل اي فرصة كدامي حتى عن طريقها اوصل المخططات كدرت اعرف اماكن مخازن الذخيرة والاسلحة. بس اليوم بأثناء ماجنت احاول التسلل لغرفة التجسس والاجهزة مالتهم وكعت بمأزق دخلت مثل كل مرة بوقت متاخر من الليل حتى استغل فرصة غفلة العناصر عن الغرفة. جنت كلش حذر واشتغل بخفة لكن فجاءة سمعت اصوات قريبة. نهضت من مكاني بسرعة واتوجهت لاقرب مخرج كان مثل فتحة مفرغة هوا موجودة فوك انا جنت مسوي حسابي على هالشي بحالة اذا لكيت نفسي بمأزق وبسرعة اتسلقت الميز الي عليه الاجهزة والديلاب اتسلقت ودخلت داخل الفتحة مثل القرد بس شكله هرمون الادرينالين حفزني وساعدني على الهروب بأي وسيلة بحيث بالگوة كدرت انفذ بجلدي واطلع من هاي الفتحة الصغيرة بس صادف كان اكو شيش حديد بارز بالجهة الثانية من الفتحة ماجنت حاسب حسابه جرح خاصرتي بأثناء ما جنت احاول الخروج من الفتحة بعدها وكعت بالكاع ولكيت نفسي بالممر الخلفي للمعسكر الي يوصل للساحة الامامية وبسرعة نهضت بخفة ومن عندها دخلت للمقر متوجه لغرفتي رجعت للغرفة وانا لازم خاصرتي حسيت بالجرح ينزف وقميصي الاسود اخفى اثار الدم وكانت الساعة ب٢ ونص بالليل فتحت الباب وانا هلكان من التعب. طبعاً انا من يوم الموقف الي صار تقريباً راح يصير اسبوعين حاولت بقدر الامكان اتجنب اكون بغرفتي وية البنية طول ذيج الايام الي فاتت كنت اطلع من الفجر وما ارجع الا بنص الليل هلكان من التعب اتركها طول اليوم لوحدها بالغرفة حتى تاخذ راحتها وحتى الاكل جنت ادخل احط الصينية يم الباب بالكاع من غير ما احجي وياها وبسرعة اطلع من الغرفة واقفل الباب وراي ارجع اكمل شغلي اتعودت ارجع بتالي الليل ميت من التعب مرات الكيها كاعدة بزاوية الغرفة وهي الحمدلله جانت كلش هادئة مدري من ورة الخوف التزمت بالصمت يمكن تخاف تحجي وتلفت انتباهي عليها واني ادخل و بوجهي عالسرير انام على وجهي حتى ملابسي ما اغيرهن من گد التعب هاي المرة هم كانت كاعدة مو نايمة رغم الوقت متاخر من فتحت الباب وكع ضوة الممر عليها كانت كارصة بالزاوية وحاضنة روحها ماادري شصاير وياها دخلت وسديت الباب وراية وغطت الغرفة بالظلام ومثل كل مرة رحت اتوجهت للسرير وقبل لا اتمدد نزعت القميص كله دم. واتمددت عليه انيت بصوت موجوع احس بعظامي كلها متكسرة من كثر الالم حتى ما اهتميت لجرحي من كثر التعب ثگلت جفوني ولگيت روحي غاط بسابع نومة ما اعرف شكد بالضبط مر علية. وانا نايم بس حسيت على حركة غريبة بصفحة خاصرتي بسرعة فزيت من نومي ونترت الايد الي كانت تتحرك على مكان خاصرتي سمعت شهگة خوف رفعت راسي اباوع استوعب الموقف شفت البنية واكفة قريب على السرير وحاطة ايدها على حلكها تكتم صوتها شكلي خوفتها بردة فعلي انا من يوم الي حطيت رجلي هنا بمعسكر الدواعش اتعودت انام وانا حذر كلي يقضة متأهب للغدر بأي لحظة على ايد الدواعش لذلك انام نومة الذيب نص عينه مفتوحة سألتها بنترة .. شنو جنتي تسوين شعندج هنا جاوبتني بسرعة بصوت ناصي وكالت .. كعدت من النوم ولكيت الفراش كله دم وانت نايم ماتدري بروحك مجروح حاولت اصحيك بس ما رديت علية وخفت لا يصير بيك شي اقتربت عليك حتى اعاين مكان الجرح جانت تحجي وعيونها على خاصرتي باوعت على مكان الجرح جان مو عميق اشرت على مكان جنطة معلكة على بسمار بالحايط هاي سلموها الي الدواعش من اول يوم دخلت بي للمعسكر كل عنصر عنده مثل هاي الجنطة مال اسعافات اولية بيها شاش وقطن ولاصق للجروح ومعقم .. جيبيلي هاي الجنطة كامت جابت الجنطة وفتحتها الي وطلعت الغراض منها وساعدتني حتى اضمد جرحي بعدها اتكأت على ظهر السرير انتبهت على روحي ما لابس قميص جليت صوتي بأحراج وكلتلها .. طلعيلي قميص من الدولاب بسرعة راحت جابت القميص اخذته منها وشكرتها. ولبسته جانت تباوع علية مستغربة عبالك جاي تباوع لكائن فضائي عيونها بيهم فضول واسئلة هواي بس مبين عليها مترددة تسأل رفعت حاجبي وكلتلها .. خير سالمين شكو تباوعين رجال جاي يبدل ملابسه غير المفروض تغضين النظر لو عاجبج العرض اباوع عليها ارتبكت ودارت وجها الاحمر .. اسفة صدگني ما كنت اقصد اتفرج عليك بس كنت اباوع عليك من باب الفضول مستغربة وضعك وتصرفاتك .. وشبيها تصرفاتي حتى مستغربتها جلت صوتها مترددة وتعاين علية متكدر تحجي حثيتها عالكلام .. شنو احجي كولي المن هاي نظرات التعجب حجت بخوف وكالت.. اذا كنت تريدني اتكلم بالاول اتعهدلي بالامان اذا حجيت وما تعصب علية وما تضربني غمضت عيوني وجاوبتها بنفاذ صبر .. الج الامان يالله اتفضلي كولي نظرت الاطمئنان حلت محل الخوف ابتسمتلي وكعدت على طرف السرير وكالت .. تصدك اذا اكلك انت خليتني بهاي الكم يوم اغير نظرتي الخاطئة بحق الدواعش كالت كلماتها واتوقفت تشوف ردة فعلي على كلامها يعني تجس نبض عقدت حواجبي مستغرب ماافتهمت شنو تقصد بالضبط .. اي كملي كلامج بعدها انطلقت بالكلام بعد ما حست بالامان كملت كلامها وكالت .. احنا اول ما دخلوا علينا الدواعش كنا ماخذين عنهم فكرة يعني الحقيقة مو حلوة. سالتها وانا اتلمس مكان التضميد اعدل الشاش .. مثل شنو هالفكرة ؟ .. اگلك بس مو تزعل او تعصب علية .. لا ما ازعل كملي .. من الاخبار الي وصلتنا والي سمعناه ان انتم ناس متوحشين مجرمين ما عندكم رحمة بگلبكم قادمين للتخريب بس اتفاجئت بيك وبتصرفاتك يعني انت بما انك واحد من عناصر داعش اكيد انت تمثل البقية بتصرفاتك ما شفت منك اي شي من هذا الي سمعته. يعني اتوقعت من اخذتني وياك راح تأذيني وتغتصبني بس الايام ثبتتلي العكس واني تطمنت هي جانت تحجي وانا كاعد احلل وين تريد توصل وهناك وجان يدگ عندي الجرص وافتهمت منها هي عبالها ان الدواعش كلهم هيج اخلاقهم عالية هههههههه خوش سمعة حصلوا داعش من وراي ما جاوبتها ولا حاولت اصححلها معلوماتها بس كلتلها .. بس خلي ببالج اصابع الايد مو كلها متساوية هسة عوفج مني ما گلتيلي شنو اسمج ابتسمت وكالت .. اسمي هنا وانت شنو اسمك جاوبتها واني عافس وجهي من الوجع وكلت .. اسمي جلال قربان. كومي انطيني ماي لان حيل عطشان ابتسمت وكامت من مكانها وكالت .. صار من عيون..... وبعدها شهكت موجوعة ولزمت بطنها باوعت عليها بأهتمام .. شنو شبيج موجوعة مغص بطنج ؟؟ جاوبتني وهي عاگدة حواجبها من الالم وكالت .. لا مو مغص هاي تقلصات حمل جمدت بمكاني مصدوم ورددت وراها مثل الصدى .. تقلصات حمل !!!! يعني شنو انتي حامل نور يوم عن يوم احس علاقتي تقوى وية عناد اكثر طبعا اني من قبل اعرف طباعه من ايام كنت احجي وياه على اساس رغد جنت اعرف كل صغيرة وجبيرة شنو يحب وشنو يكره لكن اتفاجئت هو نفس الشي يعرف عني هواي امور ماجنت اظن باقية بباله ومن سألته گلي .. نور ترة انا ما ناسي اي كلمة من كنت احجي وياج بصفتي رغد لاعبالج الي صار بيني وبينج جانت بالنسبة الي مجرد نزوة عابرة وحبيت اتسلى وياج الحقيقة الموضوع مو مثلما انتي متصورة اصلاً علاقتي وياج بذيج الفترة كانت الشي الوحيد الحلو والبريء بعالم عناد الاعوج المظلم جنت ما مصدگ اكو هيج برائة بعدها موجودة بهذا الزمن بالبداية جنت اقنع نفسي واكول خلي اختبرها بالاول هذا مجرد اختبار كانت هاي الحجة الي عندي بس بمرور الايام نسيت نفسي ولكيت روحي متعلق بشي اسمه نور اتعودت على وجودج بحياتي كدرتي تأثرين بية بالرغم جانت بينا بس الرسايل ادري هذا الشي ضايقج وترك نقطة سودة بسجلي وما افتخر اتذكرها بس اريدج تعرفين شغلة وحدة انا وكعت بشر اعمالي حبيتج وبالوقت الي عرفت بي انا حبيتج وردت اصارحج انتي اكتشفتي الخدعة وكلبتي الدنيا على راسي بوكتها اول مرة بحياتي هيج اعاني وشكلها الدنيا حبت تأدبني و ضربتني على راسي بأخوية كل مكالمة بيني وبينه اكتشف شي جديد عنه اما امه فأبد ولا مرة. حاول يفتح وياية موضوعها كنت اكتفي بسؤال عابر عنها وعن الوالد والبقية وهو يجاوبني على گد السؤال كنت اضبط بالشال اليوم عناد اتصل علية وكال جهزي نفسج حتى نطلع نختار الغرفة حسيت على لكزة كوع بخاصرتي التفتت اباوع منو لكزتني لكيت حور واكفة يمي وكالت .. عفية نور گولي لأمي خلي تخليني اروح وياكم انتي وريم من تطلعون تختارون الغرفة ريم جاوبتها وهي تبدل .. كلت لخالة زهرة قبل لا تحجين بس رفضت تكول.. شنو خالة رايحات زفة الكل طالعين وية البنية وزوجها علمود يشترون غرفة كلتلها .. خالة هو بس اني ونور وحور جاوبتني وكالت .. وهو هم ماخذ مناك امه واخته شنو هاي ما طلعت غرفة. حور جاوبت وهي ضايجة.. هاي امي كون تطلع الف سبب حتى تمشي كلمتها ابتسمت ريم وغمزتلها.. لا تزعلين خيرها بغيرها اوعدج اخذج وياي من اجهز للعرس كنا نحجي وجان يتصل عناد منتظرنا بالباب طلعت اني وريم بعدما استأذنت من مهيمن اطلع واخذ ريم وياية هو وافق وكلي عينج على بت عمج ترة السانها مزروف خاف تجلط عناد بقنابلها. واحنا ما بينا حيل ندفع فصل جاوبته واني ابتسم .. لاتخاف عليها باربي سباعية تعجبك بالفزعة كلت بگلبي والله يا مهيمن شكلك اجيت متأخر ريم فجرت العبوة بوجه عناد وراحت وانتقلت لأمه والله يستر من هاي الطلعة صعدنا بالسيارة واني صعدت ورة لان امه كانت كاعدة كدام واخته ورة سلمت عليهم وصعدنا اني وريم وبعدها بدت جولة البحث عن غرفة حلوة بس شنو اتفاجئت بتصرفات ام عناد وتغير تصرفاتها وياية كانت كلش هادئة وحبابة وكله تحجي وياي بود واي غرفة تشوفها تجي تصيحني وتكولي ..بالله تعالي شوفي هاي الغرفة حلوة عجبتج لو لا اني باوعت عليها مترددة وكلتلها .. بكيفج خالة بتها كالت .. ماما ما يحتاج تسأليها ترة الغرفة كلش حلوة امها جاوبتها .. لا يوم شلون ما اسألها غير هي العروسة وتختار غرفتها والي يعجبها ريم كانت تباوع عليها متعجبة وهمست بصوت ناصي .. شنو هاي ام عناد نفسها لو خاف مبدليها جاوبتها كاتمة ابتسامتي وكلت .. اششش نصي صوتج لا تسمعج .. والله شكله عناد مسويلها اعادة تصنيع والله هذا الشغل العدل بالرغم ان ام عناد كانت حبابة بكل كلامها وتصرفاتها بس اني كنت كلش حذرة منها يعني اكيد هذا التغيير وراه عناد والله العالم شنو دار بينهم من كلام عني حتى هي التزمت حدودها وقررت تكون هيج و تغير تعاملها وياي بس ما علينا خليها للايام هي تجاوب مهيمن واكف اباوع على بيت جلال الحمدلله اليوم خلصت تشطيب البيت عيوني لمعت بفخر ان شاء الله راعي البيت يجي ويمليه بصوته ويزينه بحلاله اخذت المفاتيح من الاسطى بعدما اتأكدت من قفل الباب شفت طالب يمشي بأتجاهي بالشارع وصل يمي وكال .. مهيمن شنو صدك هذا الخبر الي سمعته من ابوية .. شنو .. يكول مهيمن اتصل علية وكال باجر راح التحق واسافر للموصل .. اي اليوم اتصلوا علية وبلغوني اجهز نفسي حتى الفجر اطلع وياهم ربت على كتفي وكال .. بحفظ الله يابطل تروح وترجعلنا بالسلامة بس ما گلتلي ليش تريدني اجي عدكم بالليل واجيب جنسيتي وياي جاوبته وگلت .. انت ما عليك الك الصافي بوكتها تعرف .. والله يامهيمن صاير ما تنحزر هسة غير نعرف على شنو ناوي .. لا تلح كلنالك بعدين تعرف تركته ورحت صعدت بالسيارة وانا شايل هم امي شلون بيها هي بالكوة يالله اقتنعت بسالفة التطوع والسفر بس اكيد من يصير وقت الجد راح تنصب مناحة بس انا اليوم لكيت الحل وراح اخليها تنسى كل همومها طلعت نقالي واتصلت على عناد وكلت .. هَـا عناد سويت الي كلتلك عليه جاوبني.. ابو الهمة كلشي جاهز منتظر منك بس اتصال حتى اتوكل .. هاي هي خلاص نفذ الي طلبته منك وتعال انا منتظرك بعدها مريت على خالي حسن ولكيته جاهز ومتحضر وكال .. هَـا يابعد خالك نتوكل .. اي والله خالي هم يالله نروح خير البر عاجله ما اوصيك اريدك تحجي وية اختك لان بس انت الي تعرفلها وتعرف شلون تهديها .. لا تخاف عليها موضوع امك خليه يمي ريم رجعنا للبيت اني ونور عناد وصلنا للبيت عالسريع جنت منتبه عليه شكله كان مستعجل بس يريد يوصلنا للبيت ويروح حتى امه كلتله .. يوم عناد عيب نرجع البنات بدون ما نعشيهم على الاقل اركن على مطعم حتى نتعشى جاوبها وهو باله مو يمها وكللها عندي شغل مستعجل ما الحك اول شي وصلنا امه واخته بطريقنا لان بيت اهله كان اقرب علينا وبعدها وصلنا اني ونور وصلنا للبيت نور كانت ضايجة من تصرف عناد الفض واول ما وكفت السيارة نزلت. وسدت الباب حتى من غير ما تلتفت وتسلم على عناد اسمعه صاح وراها وكال .. هاي شنو شصاير شبيها بت عمج طنكرت علية جاوبته وكلت .. اسأل روحك وشوف روحك شنو سويت وبعدين اسألني باوع علية بعدم فهم وكال .. هسة هاي شنو حزورة اشو كعدتي تحجين بالالغاز هسة انا شفتهمت منج عمي لو عايفتني على عماي اهواي احسن ابتسمت ونزلت تركت المسكين يضرب اخماس باسداس اثاري كلهم يتحول عقلهم طابوكة من يوصل الموضوع يم فهم المرأة رحت ورة نور وسألتها .. شنو شبيج زعلتي .. انتي انتبهتي عليه شلون جان مستعجل حتى يوصلنا للبيت عبالك كاعدين على گلبه .. يابة كلج الولد مستعجل وعنده شغل .. انا انتبهت عليه من اجاه اتصال هو گبل انكلب حاله وصار كل شوية يستعجلنا قطعت كلامها متضايقة دخلنا للمطبخ لكينا خالة زهرة وحور مخبوصات سألت حور .. شنو منو عدنا جاوبتني وهي تحضر بصينية التقديم .. مهيمن عازم خوالي واولادهم. رحت دخلت للغرفة سمعت صوت مهيمن كان يحجي بالنقال اسمعه يحجي وية عناد.. شنو عناد ما تكلي وين صرت يالله بالعجل ترة الكل وصل و منتظرينك تجي وتفضنا كملت تبديل ملابسي ونور خلصت قبلي وطلعت يم خالة زهرة وحور حتى تساعدهم جنت امسح بالميك اب وجان اسمع صوت هلهولة خالة زهرة تركت وجهي عالنص ورحت طلعت من الغرفة بالعجل اريد اعرف شنو الموضوع دخلت للمطبخ ولكيت مهيمن جاي يبوس راس امه وهو يضحك ونور وحور فرحانات سألت حور .. شنو صار وخالة ليش تهلهل حور باوعتلي وكالت .. مبروك يا حلوة مهيمن جاب السيد وقرر يعقد عليج هي كالت هيج واني گلبي كام يغرد وعيوني لمعت بحماس باوعت لمهيمن والتقت نظراتنا اقترب مني وكال .. قررت اعقد عليج واثبت الملكية على كولتج خالة زهرة جاوبته من يمها وكالت.. ثبت يابعد امك ثبت ياهو اللازمك يتبع ريم هاي اللحظة الي جنت خايفة منها اباوع لنور نست زعلها وانخطف لونها وكالت .. يعني هاي هي صارت صدك ومهيمن باجر راح يسافر ويعوفنا اتمنى لكم قراءة ممتعة اختكم نهى الحسون | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
3Likes
العرض العادي
