آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
08-11-19, 09:31 AM
| #71 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  #الكاتبة_نهى_الحسون #قضية_الشمل البارت تسعة وثلاثون ج٢ مساء الانوار والسرور عليكم ريم كانوا الكل فرحانين خالة زهرة وحور ونور ومهيمن كان يبتسم برزانة اما گلبي فكان يحتفل بالنصر اباوع على مهيمن كان بالنسبة الي عبارة عن حلم متجسد على هيئة مهيمن وكنت انتظر بفارغ الصبر ان يتحقق هذا الحلم مهيمن كان عبارة عن كل شي انحرمت منه من حنان وحماية وسند واهتمام. وحضن عائلة سحبت نفس براحة ومن بين هذا كله ضمنت بقائي قرب طيف عمو مؤيد وحضوره المتواجد بشخص مهيمن من غير ما يلاحظ حركة ايده نظرات عيونه. غضبه. اهتمامه بكل شي بس محد يدرك هذا الشي الا الي كان معاشر عمو مؤيد ومهيمن اثنينهم ساعتها راح يلاحظ التشابه الكبير بين الابن والاب بعدها انتبهت من صفنتي على طلب مهيمن مني وكال .. ريم لبسي عباية وتعالي انتي وامي للاستقبال حتى السيد يعقدلنا هنا وجان يدك الجرس عندي وشهكت مصدومة وعطت وكمزتهم كلهم .. شلوووووووووون يعني راح تعقد علية وتمهر وانا بهذا شكلي لااااااااااا مستحيل اخليك تخرب علية احلى لحظة بحياتي مهيمن سألني مستغرب.. شبي شكلج اشو جنج العافية حلوة ما عايزج شي جاوبته .. مهيمن اني كنت منتظرة هاي اللحظة بفارغ الصبر وكنت راسمة ببالي هواي ترتيبات للمهر فستاني وكاسات المهر الي عليهم اسمي واسمك جنت احجي واحوم بالمطبخ والبنات نور وريم وخالة زهرة يفترون وراي يحاولون يقنعوني اعقد اليوم وهسة بهاي اللحظة خالة زهرة كالت .. ولج خالة صلي عالنبي هسة خلي السيد يعقدلكم وعود هاي السوالف مكدور عليها نسويها بعدين جاوبتها واني حاصرتني البجية على كل الامور والترتيبات الي كنت ناوية اسويها بمهري مهيمن كال .. بالله نور رحمة على اهلج كعدي فهميها منين طلعتلنا بهذا الليل بقصة الترايبات هسة هو عقد سيد بعد كون تحطون بيها سوالف تعبانة مهيمن جان يحجي واني كاعد اعدد الاشياء الي اريد اسويها .. شنو يعني ما البس قميص نوم ابيض واسويلي صينية بخت واحط بيها سبع بياضات. اخذ صور للذكرى يعني اذا كبرت بعدين شنو اتذكر من عقدي اني ومهيمن اذا كل هاي الامور ماموجوده معناها ما راح تصير عندي اي ذكريات حلوة اني جنت احجي مقهورة وحور واكفة يمي كالت .. خية حقج اهم شي الذكريات الحلوة يعني شنو تكولين لجهالج اذا شافوا صورة امهم وجها مكياجه نص ونص هسة عبالهم امهم جانت مستعجلة ما مصدكة راح تتزوج وسوت المكياج على النص شكهت واني اتذكر كنت امسح بالميك اب من سمعت صوت هلاهل خالة زهرة وتركت كلشي عالنص واجيت اركض من زود الفضول نور ضربتها على كتفها وكالت .. انتي هييي ست حور لا تزيدين الطين بلة يعني هي ما ناقصتج من غير كلشي متخبلة مهيمن جلى صوته وطلب من امه والبنات يطلعون ويتركونا لوحدنا حتى يحجي وياية بعدها طلعت خالة زهرة وهي تدردم واتبعتها نور وحور انتبهت لمهيمن كان يباوع علية اقترب مني وحط عينه بعيني وكال .. ريم اذا كلتلج لخاطري اتنازلي عن ترتيبات العقد واوعدج اسويلج حفلة مهر خاصة بس لهاي السوالف الي ذكرتيهم بس هسة خلي بالاول يعقدلنا السيد الليلة وبعدين اسويلج احلى حفلة مهر عقدت حواجبي مستغربة الحاح مهيمن لعقد القران بهاي الليلة سألته .. وشمعنا الليلة بالذات تريد تعقد يعني متكدر اتأجلهاً كم يوم بين ما اجهز نفسي اتغيرت نظرات عيونه وكال .. ريم ماعندي غير بس هاي الليلة لان باجر انا بأذن الله اسافر للموصل التحق وكع گلبي بين رجلية واتشخصت نظراتي عليه مرعوبة وجان يجي اليوم الي جنت خايفة منه همست بقلق .. تسافر!!! .. ريم انا اعرف من حقج تفرحين مثل البنات وما طلبتي غير حقج بس تعرفين الظروف وا..... حطيت ايدي على شفته وقطعت كلامه وكلت .. مهيمن ما يحتاج تبررلي خلاص خلي السيد يعقدلنا الليلة اريدك تسافر واني على ذمتك حتى من تكون عايف وراك ام وزوجة. ينتظرونك بفارغ الصبر يصير عندك حافز اكثر للرجوع النا سالم باسرع وقت ابتسم وعيونه بيهم نظرة فخر وكال .. موافقتج وكلامج هذا راح اعتبره دين برگبتي اتمنى يجي اليوم واوفي ديني وياج ولو هي مو جديدة عليج والمواقف كلها تشهد على طيب اصلج وشكلهن ديوني صارن هواية وياج جاوبته واني اقترب منه وعيوني بعيونه .. ماكو ديون بين الگلب والروح اثنينهم عايشين بجسد واحد والحال من بعضه بعدها اتوسدت حضنه بدلع مثل بزونة تتدلل بحضن راعيها وهمست .. لاتنسى ترة انت ابن عمي مؤيد قبل لا تصير حبيبي وخطيبي اباوع عليه ضحك وصار يتلفت منا ومنا وكال وهو يتوعد .. ولج غضب بعد العقد .. بعد ماتصيرين حلالي ومن تفكرين تفجرين قنبلة على الاقل اختاري المكان المناسب مو وانا بالمطبخ تفجرين العبوة بوجهي تحطين راسج على صدري وتكليلي حبيبي بالله هسة انا وين انطي وجهي ابتسمت .. اوعدك منا ورايح من اغرد اسوي حسابي واختار المكان والوقت المناسب فجاءة كمزنا على صوت نترت ام مهيمن وهي تفتح باب المطبخ وتدخل وهي لازمة حور من كتف الثوب وكالت .. ولج يامصخمة الوجه واكفة تتسمعين على اخوج ومرته مو عيب حور الوجه ينطي الوان وكالت .. هاي شبيج يمة شو گلبتي علية مو انتي الي كلتلي روحي شوفيلنا اخوج شو طول وماله صوت مهيمن رفع حاجبه وكال .. هَـا يمة اشتغلت رحمة الله خالة زهرة دارت عليها وكالت .. خايبة العوبة انا كلتلج روحي شوفي مو ترحين تتجسسين ودارت على مهيمن واستلمته اكس ومربع وكالت .. وانت شنو سالفتك شو طولت وية بت عمك وخوالك السيد ينتظرون عيب زحمة جاوبها وكال .. يمة ارتاحي تمت الموافقة جان يحجي وعيونه علية لاول مرة يخوني التعبير خالة زهرة التفتت علية اخذتني بالاحضان وكالت .. يايمة بالمبارك عليج الله يكملج بعقلج ويهدي سركم انتي ورجلج بعدها دخل مهيمن للاستقبال وخالة زهرة لبستني العباية وعلمتني شنو اسوي وشلون اردد الكلام ورة السيد طلبت من نور تدخل ويانا وتكون يمي بهيج لحظة غمضت عيوني وبدا السيد يعقدلنا اني ومهيمن جلال باوعت عليها مصدوم وكررت كلامي .. يعني انتي هسة حامل هزت راسها بموافقة وكالت وبعيونها خوف .. اي اني حامل نزلت عيوني على بطنها كانت بارزة بس شي بسيط يعني ما يجي على بال الواحد هذا حمل واصلاً انا جنت متعمد اتجنب شوفتها سألتها وانا عاقد حواجبي .. بالله شو تعالي احجيلي شنو سالفتج شلون انتي حامل وشلون وصلتي لهنا سبية لايكون هذا حملج من احد عناصرنا هي باوعت علية بحذر وجاوبتني .. راح احجيلك عن قصتنا بس لا تعصب مني اذا زل الساني انتبهت عليها جانت عيونها مليانة بالخوف وكانت كلش حذرة بكلامها وياية عبالك اذا غلطت بكلمة راح اقطع راسها .. يالله احجي اسمعج .. عائلتي من سكنة قرية بسنجار عمري ٢٢ سنة مصارلي هواي من اتزوجت كنت ساكنة انا وزوجي مع ابوية وامي وخواتي الخمسة واخواني الاربعة اثنين كبار واثنين صغار من صارت الاحداث بالموصل والوضع صار يخوف بابا طلب مني اني وزوجي نجي نسكن وياهم بالبيت للامان لان اهل زوجي ساكنين بعيد عنا وانقطعت اخبارهم .. يعني هم ساكنين بسنجار .. لا ساكنين بغير مكان اسمه بعشيقة بس مثل سنجار هم تابع للموصل وبعدما انتوا احتليتوا الموصل اااااقصد بعدما انتوا دخلتوا للموصل وصلتنا الاخبار ان داعش كاموا يدخلون على البيوت ويقتلون الرجال والشباب ويتركون النساء والاطفال ما يأذونهم ماما خافت على بابا واخواني واني هم خفت على زوجي ارفد واقترحت عليهم ان يطلعون من البيت قبل لا يجون داعش ويقتلوهم بابا وزوجي عارضوا فكرة امي لكن اتصال بأخر الليل كان بمثابة انذار لبابا بلغوه ان صديقه انقتل على ايد داعش ومن عندها ماما واني والبنات صرنا نتوسل لبابا ولأخواني وزوجي حتى يتركون البيت بابا گال لماما .. شلون اهرب من البيت واعوفكم لوحدكم ماما طمنته وكالت .. لاتخاف علينا هم ما يأذون النساء والاطفال هم يردون بس الرجال وبهاي الليلة بالذات طلع بابا وياه اخواني الكبار اثنينهم وزوجي ارفد وياهم ومناك قرروا يفرون للجبال القريبة على قريتنا لان سمعنا اغلب رجال القرية هناك فروا وبقينا اني وامي وخواتي واخواني الصغار ازاد ونائل كانت اعمارهم ٥ سنوات و ٨سنوات بس صار ما لم يكن بالحسبان دخلوا علينا جنودكم واحنا كنا متطمنين ان محد راح يأذينا فتشوا البيت عن بابا واخواني وزوجي الظاهر كان عندهم شخص يمدهم بالمعلومات عن ساكنين بيوت هاي القرية سألوا ماما عن مكان بابا واخواني وزوجي وامي جاوبتهم بعدم معرفة مكانهم واحنا صدك مانعرف وين راحوا من طلعوا عبالنا هاي هي من ما شافوا بابا واخواني وزوجي واتاكدوا احنا منعرف شي عن مكانهم انصدمنا بكلام قائد العناصر امر عناصره ياخذونا اني وخواتي خمستنا وبلحظتها مرينا بحالة فزع ورعب. امي صارت تتوسل وتترجاهم ان يتركونا. خواتي وصريخهم لازال يرن بأذني اخذونا وتركوا امي واخواني الصغار ما نعرف شنو صار بيهم من بعدما اخذونا اني وخواتي حطونا بمكان مثل البناية بيها طابقين طابق كان مليان اطفال وطابق الثاني بي نساء هواي كدرت اعرف كم وحدة منهم لان كانوا ساكنين بنفس قريتنا ويوم ثاني اخذوني اني وخواتي وكم وحدة من البنات وجابونا لهنا على هذا المعسكر حتى يقدمونا كهدايا للعناصر القذر........ قطعت كلامها وشهكت وحطت ايدها على حلكها تباوع علية بخوف عقدت حواجبي هاي شبيها كمزت بعدها رفعت حاجبي بأدراك اهوووو خطية هاي طلعت خايفة تعبر عن تقززها وكراهيتها لداعش ولحكمهم ضناً منها اني اكن الولاء لداعش وراح اغضب على كل شخص يتكلم عنهم بالسوء خزرتها وكلتلها .. يابنت الزمي لسانج لا اكصه واعطيه للكلاب تأكله هزت راسها بخوف .. لا لا اوعدك ما اتكلم عنكم بالسوء الدواعش احسن ناس وحبابين. وانت هم كلش طيب والله يحفظكم وينصركم هاي البنية والله فلم يعني صارلها ساعة تصبغ بوية وتحمد وتثني على اخلاقي واخلاق داعش اثاري المسكينة طلعت تتملقني وتحاول تكسب رضاي عنها وانا اكول اكو شي غلط بهاي البنية كلامها وياي ما ينطبق وية نظرات الكراهية والخوف الموجودة بعيونها انا هم اتسائلت وين اكو سبية تحترم الي سبوها وسبوا خواتها والله هم يضحك وهم يبجي سألتها.. يعني خواتج كانوا موجودات هنا وياج بيوم سلمج الي الامير .. اي كانوا موجودات وياي انت مبين عليك حباب وكلبك طيب ممكن اطلب منك طلب كلتلها وانا اعرف بيها جاي تحمي سوكي وتحجي هذا الكلام حتى تكسبني لجانبها .. بالله كولي شنو هو طلبج .. اني اريدك بس تسألي عن مكان خواتي وتعرفلي اخبارهم وتطمني عنهم . سألتها.. بالله انطيني اساميهم واعمارهم حتى اعرف اوصل لأخبارهم جاوبتني وكالت .. هم اربعة بنات. زينة عمرها ٢٠ سنة وجوانا عمرها ١٨سنة. ويسر ١٥وميار ١٢ سنة وهي كانت اصغر وحدة بالسبايا الي جابوهم لهنا من ذكرت عمر اختها الصغيرة بسرعة حضرني موقف الامير اختار اصغر وحدة بالسبايا. وقبل ثلاثة ايام شفتهم طلعوا بنية صغيرة من غرفته كانت ميتة ما اتحملت الوضع وماتت شحب لوني وانا اباوع لنظرات هَنا المتأملة كان تباوع علية وهي كلها رجاء كالت بتوسل .. اكون ممنونة من كرمك اذا كدرت تجيبلي اخبار خواتي. صرت اعاين مكان الجرح حتى اتهرب من نظراتها يالله شكد شفت ظلم وية داعش صار كدام عيوني بس مثل هذا الظلم ما شايف دك المنبه واجة بوكته. نهضت من مكاني وكلتلها .. انا طالع للشغل ومن يكون عندي وقت اسأل عن خواتج واشوف طلعت من الغرفة ونظراتها تطاردني كرهت نفسي وكرهت ضعفي والظلام الي انا بي نور دخلت وية ريم للاستقبال حتى السيد يعقدلها واول ما دخلت اتفاجئت بوجود عناد. هنا هاي شنو شوكت اجة مو على اساس الاخ عنده شغل مستعجل اشو كاعد هنا. باوعلي ورفع حاجبه بتحدي واني درت وجهي ورحت كعدت بصف ريم يم خالة زهرة بدأ السيد يعقدلهم كان صوته وقور ومهيمن كان يردد وراه وبعده ريم صارت تعيد الكلام وتم العقد وباركلهم السيد بعقد القران خالة زهرة باركت لريم واني اخذتها بالاحضان فرحانتلها .. الف مبروك باربي. يارب نفرح بعرسكم ريم همست بأعتراض وكالت .. هاي شنو يعني تم العقد وخلص كل شي جاوبتها.. اي الحمدلله تم العقد .. هاي شنو لعد ليش ماكال قبلها يا هذا اشو مو مثلكم بالعقد نور ضحكت وكالت .. حبيبتي ذاك الشيخ الي عقدلنا كان صديق عمو ابو عناد ومن باب الدعابة حجاها يعني كان يقصد بيها. صارت حلال عليك واني مثل الصدك كاعد انتظر هاي الجملة اوووف منك مهيمن اي كان على الاقل لو جبت ذاك الشيخ هسة اني شنو اتذكر من هذا كله ابتسمت على خبالات ريم وكلت .. راح يكون احلى ذكرى يكفي ان مهيمن صار حلالج بهذا اليوم وهي هاي اهم فقرة بكل الهوسة والترتيبات الي كنتي تردين تسويها ابتسمت بقناعة وعيونها لمعت بوكاحة وكالت .. اي صحيح كلامج اهم شي مهيمن صار حلالي اما الباقي مكدور عليه كنا نحجي اني وريم ونسمع اصوات المباركة من خوال مهيمن واولادهم بعدها خالهم حسن جلى صوته عبالك راح يلقي خطاب صارت هدوء وكال موجه كلامه لاخته زهرة .. خيتي زهرة گرت عينج بعقد قران مهيمن ويارب تفرحين بزواجه. وان شاء الله تشوفين اولاده شوفي خوية اريدج تصيرين قوية وتباركين لابنج وتدعيله لان باجر مهيمن راح يسافر للموصل ريم اعلان خال مهيمن عن سفره قلب اجواء الفرح حبست انفاسي واني اراقب ردت فعل خالة زهرة هاي اللحظة الي جنت خايفة منها اباوع لنور نست زعلها وانخطف لونها وكالت .. يعني هاي هي صارت صدك ومهيمن باجر راح يسافر ويعوفنا اما خالة زهرة رفعت راسها تباوع لمهيمن وكالت .. هَـا يمة مهيمن يعني عقدت على بنت عمك حتى تمهدلي لسفرتك والله حرت شلون تكسر وتجبر بأمك اخوها قاطع كلامها وكال .. زهرة ديري بالج من كلام العتاب وية ابنج. مو زين عليه خلي ببالج كل حسرة تبدر منج علمود ابنج راح تصير عثرة بدربه وتعرقل عليه نيته وطريقه خليج مثل مااعرفج انسانة صابرة. وادعيله. بالنصر والتوفيق وام مهيمن كانت مثل كل ام كلبها ما يطاوعها تعوف ابنها وحيدها يروح برجليه للخطر صار الليل ومهيمن صعد لغرفته بعدما ودع الكل واخذ وقت طويل وهو كاعد يم امه بالغرفة يواسيها ويوصي حور ونور على نفسهم وعلى البيت وبعدها صعد فوك حتى ينام والفجر يسافر كنت متمددة بفراشي اتگلب ما اجاني نوم ولا عيني غفت اخير شي شمرت الغطى وطلعت من الغرفة رحت صعدت فوك مثل طفلة تدور على ابوها فتحت الباب كان متمدد بفراشه ومن دخلت عدل كعدته وسألني .. ريم ليش ما نايمة لحد هسة رمشت بعيوني مبرطمة شفايفي وكلت .. ما اكدر انام الليلة واني اعرف بيك راح تسافر الفجر وتعوفني مسح وجهه وكال .. المطلوب مني شنو مااسافر يعني هاي انسيها ابتسمت وكلتله .. لا مو ما تسافر المطلوب منك تلزم شيطانك الشاطر وتقيده وتخليني الليلة انام على ايدك ضحك بعدم تصديق وفتح ايديه وكال .. تعالي يابعد عمج نامي على ايدي وخليني الليلة انا وشيطاني نتصارع بنارنا علمود حضرتج ترتاحين وتطمنين اقتربت يمه وهو رجع اتمدد وسوالي مجال ومد ذراعه واشرلي بعيونه على المكان السواه حتى انام نمت على ذراعه وانا احس روحي جانت تايهة وضايعة وبهاي اللحظة عثرت على بيتي وملجأي بحضنه كان وجهي مقابل وجهه كانت عيونه ترسم معاني وجهي وتركزت على شفايفي وكال ظلي استمري احجي وياي وشتتي تفكيري عن شفايفج حتى لا يقوى شيطاني ويتحررمن قيوده ويكوم عليج ويخرب الاول والتالي ابتسمت وضربته من صدره وكلت .. لا تصير خبيث لمرة وحدة بحياتك صير حباب وصفي نيتك وخليني احتفظ بهاي اللحظات البريئة بقربي منك بقيت اسولف وية مهيمن وهو يباوع علية وبعدما خلص كل كلامنا وصارت نظرات عيونا هي الي تحجي حسيت بأيده ارتاحت على خصري سألني وكال .. يعني ما بيج مجال نركن البرائة على صفحة ونزين هاي الليلة بذكرى وكحة تحتفظين بيها ابتسمت وكلتله واني انزل ايده من خصري وكلت .. لاااا ما ينفع اربط ذكرى مقدسة وية حركاتك الوكحة. صير عاقل وخليني اتمتع واتنعم بحضنك ابتسم وكال .. امري لله حكم القوي على الضعيف غمض عيونه نعسان وشكله غفى واستسلم للنوم وبعدها بقيت اتمعن بكل تفاصيله بوجهه وصدره بكلشي قربت راسي على مكان نحره واتنفست عطره رگبته كانت خشنة من شعر اللحية رجعت اباوع لمعاني وجهه انتبهت على لحيته كان بيها مكان ضربة قديمة رفعت ايدي صرت اتحسس عليها بلمسات ناعمة. وكأنما اعتذرله عن الضربة الي علمت على وجهه وتركت اثرها لكن فجاءة مهيمن فتح عيونه ولزم ايدي وكال .. الظاهر من قيدت شيطاني نسينا شيطانج يسرح ويمرح بكيفه جاوبته وانا اكتم ضحكتي .. مهيمن اوعى تفهمني غلط .. خاب دتعاي مو سمطتي ابو ابوية قربني عليه واختلطت انفاسنا بلهفة بعد طول انتظار جلال عدى الشهر واجة الي بعده. وانا اشتغل على قدم وساق كانت اخر مرحلة بالمهمة. وكدرت اوصل اخر المعلومات المطلوبة وكانت بخصوص اماكن خزن الذخيرة. والعتاد كنت منتظر منهم اشارة حتى اترك مكاني واليوم بالتحديد كدرت استلم منهم رسالة مشفرة. كان مفهومها تمت المهمة وصار لازم اترك معسكر داعش بأقرب فرصة لان راح يتم الهجوم عليهم مستعينين بطائرات وصواريخ لمعت عيوني بالنصر واللهفة رحت اركض بكل لهفة لغرفتي ما مصدك واخيراً راح اتحرر واتخلص من هذا السجن فتحت الباب وجان تصير بوجهي هَنا كانت تنظف بالغرفة وبطنها بدت تبرز شوية وهنا جمدت واكف بمكاني اباوع عليها بحيرة خلال الايام الفاتت قوت علاقتي بهنا من بعدما عرفت بيها حامل وعرفت بقصتها هي واخواتها صرت بالنسبة الها مثل حبل النجاة والخلاص اما هي فصارت بالنسبة الي الاخت والايد العطوفة الي تربت على كتفي تواسيني حتى ابقى صامد كدرت اوصللها اخبار عن خواتها واتطمنت عليهم بس ما خبرتها بوفاة اختها الصغيرة ورغم قوة العلاقة وياها بس ما كلتلها عن حقيقتي بقيتها لهذا الحد قبل شوية شكد جنت فرحان بالخبر الي سمعته بس هسة وانا واكف كدام هنا. اختفت كل اثر للفرحة من وجهي صرت اعاين بوجهة عاجز محتار شنو اسوي الواجب ينادي والاوامر تكول لازم انسحب بأسرع وقت منا. والضمير يطالب بعدما اتقاسمنا الهموم وصرنا رفقة بنفس المحنة صار تنفيذ الاوامر صعب غيرتي ما تسمحلي اعوفها هي وخواتها وراي وهنا بدت اول خطوة ببداية النهاية مهيمن بينما كنت وية ريم ارتشف شفايفها الي طالما عذبتني شوفتها وكنت اتمنى ارتوي منها دك المنبه يعلن عن وقت التجهيز للسفر سحبت نفسي بالكوة لان ماكانت تطاوعني اترك ريم بس الواجب واخوية خلوني اتشجع واكوم بسرعة لبست ملابسي وريم نزلت حتى تسوي جاي مثل ماطلبت منها من نزلت تفاجئت الكل موجود وينتظرني امي ونور وحور واكيد نبض القلب ريمتي وياهم كعدنا نتريك سوة صحيح مالنا نفس ناكل بس كان وجودنا سوة هو الاساس شربت الجاي بسرعة ولكيتهم مسويلي لفات للطريق خليتها بالجنطه بست نور من راسها وحور وريم ووصلت لامي رفعت ايدها وبستها وطلبت منها تدعيلي واخذتها بحضني شميت عطارها بكل قوتي حتى تبقى ريحتها وياية متفاركني طلعت بسرعة حتى لا اتاخر ولا اشوف دموعهم وامي تمشي وراية بطاسة المي واسمع صوت دعائها مع نشيج بكائها وسمعت كناري تصيحني مهيمن انداريت عليها وجتي حضنتني قوي واني حضنتها كلتلها اريدج مثل مااعرفج قوية وتكونين بكدها وتسدين مكاني جاوبتني وكانت دموعها مبللة خدودها لا يظل بالك ان شاءالله ترجعلنا بالسلامة وصلت للموصل وانا ما عندي اي خبر عن اخوي عايش لو ميت لان انقطع تواصلي وية الضابط علي داعش قطعوا كل شبكات الاتصال الموجودة بالموصل وما عندي اي وسيلة توصلني الهم كان اخر خبر وصلني عن جلال ان اخباره انقطعت عنهم وبعدها سمعت واحد من العناصر المزروعين بين داعش انقتل وما يعرفون منو منهم وبقت روحي معلكة هنا واول ما وصلت التقيت بالضابط علي. وتبادلنا السلام. وسألته عن اخبار اخوية وانا حابس انفاسي .. هَـا سيدي بشرني شنو اخبار جلال أخوية ان شاء الله رافع راسي ابتسم وكال اخوك العلم رافع راسنا كلنا هو ومجموعة الصقور الي وياه. ومنتظرين ساعة الصفر حتى ينسحبون ادعيله ربي يفرجها عليهم جواب الضابط كان مثل الرحمة نزلت على عبد بائس وبنفس اللحظة كعدت بالكاع وسجدت لله سجدت شكر على سلامة اخوي ونهضت من مكاني وانا كلي همة وضربت على صدري. اتعهد للضابط وكلتله .. سيدي انا جاي وناوي امشي على الدرب المشاه اخوي جاي وانا ناوي اگوم بالواجب وية ام الربيعين عروسة العراق حالف ما اعوفها الا وانا محنيها بدمي لمعت عيون الضابط بفخر ممزوج بالحزن وكال والنعم منكم ومن اصلكم الطيب التحقت وية الشباب بالجبهة ومضى شهر وانا نازل واجب هناك بالجبهة بين الدم والترابة واصوات المدافع تدوي والرمي يروش وبوشة القذائف وعليهم كلهم صوت الموت يحوم فوك راسنا جنا انا والشباب وية كل طلقة نرميها نصيح بصوت عالي مثل اسود غضبانة نردد (احنا ازلامك يا عراق وما نهاب الموت. ) كنا نتقدم ونتبادل بالمواقع وية الشباب واحد يرتاح والثاني يكمل عنه كلنا مزروعين بمواقعنا. جنت كلما اباوع بذاك الصوب الموجودين بي الدواعش انادي بصوت عالي مثل المجنون ( جلاااااااااااااااااال قربان. تذكر من كلتلك لو تروح للموت تلكاني وراك وهذا انا وراك .. وراك. حتى الجنود الي وياي حفظوها لهاي العبارة من كثرما اكررها كل يوم ويضحكون علية من من اوكف وانادي بصوت عالي .. جلااااااااااااااااال قربان .......... اتعودنا على بعضنا ولكل واحد بينا كان عنده حلم يحب يحققه ويملك غيرة وشهامة. تفوق العقل لدرجة يبذل النفس لاجل كلمة الحق وتحقيق النصر كنت طول هاي الفترة اتواصل وية الضابط علي من خلال جهاز اللاسلكي واتبادل وياه الاخبار عن الموقع وغيرها من الامور واختم الاتصال بسؤالي عن اخبار جلال لكن هاي المرة بلغني وكال .. مهيمن نريدك تعرف بخصوص اخوك جلال جمدت بمكاني وسألته .. شبي جلال .. قبل اربعة ايام رسلناله امر بالانسحاب وهو واثنين ضباط وياه جمدت بمكاني وانا متظر .. واستلم الرسالة لو بعده .. اي استلم الرسالة بس لحد الان اخوك ما بين الضباط الثنين انسحبوا صارلهم يومين ومن رجعوا. بس جلال ما بين .. يعني شنو قصدك جلال محاصر هناك وما يكدر يرجع لو شنو جاوبني وكال .. بالحقيقة لحد الان ما نعرف شنو السبب الي معرقل انسحاب جلال. واحنا مضطرين نشن الهجوم على المعسكر راح نستخدم الطائرات ويصير القصف عشوائي لان الوقت جاي يداهمنا والتأخير مو لصالحنا. نهضت من مكاني مفزوع وكلت ششنو شلون تهجمون واخوي هنااااااك يتبع اتمنى لكم قراءة ممتعة اختكم نهى الحسون | ||||
|  |
|
08-11-19, 09:35 AM
| #72 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت اربعون ج٢ مساء الانوار والسرور عليكم نور سافر مهيمن وبدت رحلتنا بالمعاناة مع الانتظار كل وحدة بينا كانت تحتفظ بمخاوفها لنفسها كنت كلما استسلم للخوف على اخواني ويبدي الحزن يسيطر علية اتذكر كلام مهيمن طلب مني ما اسمح للضعف والخوف يتمكنون مني لازم اكون قوية حتى اكدر اواجه الحياة بغيابهم واوكف وية خالة زهرة والبنات بشدتهم. مهيمن وجلال بحاجة دعائنا مهيمن من سافر للموصل انقطع اتصالنا وياه وانقطعت اخباره لان باخر مرة حجينا وياه بلغنا ان هو راح ينزل للجبهة ويلزم واجب وية الجنود وطمنا عليه وكال .. خاف ما تحصلوني ترة ماكو هناك شبكة للاتصال لا يظل بالكم علية انا راح ابقى ملازم مكاني بالموقع نازل واجب وية الجنود ومن يوم نزل للواجب بعد ما سمعنا عنه خبر وكلما نتصل عليه يطلعلنا الجهاز مغلق او خارج منطقة التغطية ومن هذا اليوم عشنا بحرب اعصاب وكل وحدة بينا تدورلها على وسيلة تتبع بيها الاخبار وتتحرى ريم كانت مكابلة مواقع التواصل الاجتماعي الي عن طريقها تعرف الاوضاع بالموصل واني عن طريق عناد واتصالاته وية الضباط اسمع الاخبار وحور حالها من حال ريم واي وحدة بينا تسمع خبر يخص الموصل وقوات الجيش العراقي تجي تركض تخبر الكل اما خالة زهرة كانت مگابلة التلفزيون وكاعدة. وصارعدها هوس بقنوات الاخبار متابعة الاخبار كان شغلنا الشاغل هو وسيلتنا للتواصل وية اخبار مهيمن وجلال واولاد خاله ومنها نعرف الاوضاع ومرة من المرات بوحدة من النشرات الاخبارية نشروا خبر بخصوص صعوبة توصيل المؤنة للمقاتلين. بالجبهات وطلعوا مقطع فديو لمجموعة جنود عراقيين نايمين بين الصخور وحاضنين اسلحتهم ولازمين واجب بمواقعهم كانوا يرجفون من البرد واحد من الجنود كان يحجي بالفديو يكول .. مرات يمر علينا يومين ما ناكل لان المساعدات بالگوة توصل لمواقعنا لان القناص مترصدلنا يعني لو تحرك صبعك تجيك الطلقة تركض وبعدها عرضوا مقطع فديو كان عبارة عن اصوات دوي المدافع اصوات القصف ممزوجة لاصوات زئير الجنود العراقيين وبيومها خالة زهرة نصبت مناحة .. يمة مهيمن سودة علية شلون بيك رحت عليها حتى اهديها باوعت علية وهي تأشر على التلفزيون فاقدة وكالت .. ولج خالة نور اخوج هناك يتلاوة وية الموت يمة وليدي ما اعرف بيك بردان لوجوعان وين الگاك يمة واغطيك واخذك لحظني وادفيك وبلحظتها انهارت من البجي وخوال مهيمن اجوي يشوفون اختهم ويتطمنون عليها من اشوف حرصهم على اختهم اتذكر جلال ومهيمن وادعي ربي يسلم اخواني وكاعد اتذكر طيبة گلبهم وياية من اول يوم التقينا هم اخذوا على عاتقهم يحيطوني بالحماية والامان مرت الايام بينا والانتظار والترقب كان سيد الموقف خالة زهرة قررت تنهض وتوكف على حيلها ورجعت لشغلها بخلطات الاعشاب الطبية خطية كاعدة تطحن بالاعشاب اسمعها تحجي وية نفسها وتنذر .. نذراً علية لوجه الله تعالى من ورايح اسوي خلطات للعلاج وازوعها للمحتاجين ببلاش منا لحد ما يرجعلي ابني سالم وياهو اليجي وتنطيه. تكله امانة اندعي لمهيمن و لاخوه يردون بسلام وصدك من يومها صارت خالة تسوي الخلطات للنسوان وترفض تاخذ منهم اي فلس وحتى البنات من شافتهم كثرت غياباتهم عن الكلية گامت تحجي عليهم .. ما يصير نعوف واجبنا ونگابل حزننا ما اريد مهيمن من يرجع يلكاكم مخربين كل الي بناه وتعب عليه اي يمة حور اخوج ما تعب كل هذا التعب ووصلج لهيج كلية مو علمود انتي تهملين مستقبلج بلحظة حزن بعدها التفتت باوعت على ريم وكالت .. وانتي خالة ريم شدي حيلج وتركي عنج الحزن واهتمي بدراستج. واعتني بشعرج وترافة وجهج ما اريدج تهملين نفسج. اريد وليدي من يرجع يلكاج مثل شطب ريحان اريده بشوفتج تزيلين كل همومه هي جانت تحجي وية البنات واني غصب عني دموعي غدرتني. وصرت ابجي باوعت علية وربتت على كتفي وكالت .. كافي خالة نورة بس لتظلين تبجين والله ما يلوكلج الهم جاوبتها واني اناشغ .. والله خالة موبيدي ما اكدر اسيطر على دموعي من يمر طاري اخواني كدامي. .. عفو عليج خالة يعني اني احجي وياج حتى تبطلين نحيب من تزيدين بالبجي يعني شكول لاخوانج اذا شافوا عيون اختهم ذبلها الحزن شكللهم اذا عاتبوني على الامانة الله يرضى عليج مسحي دموعج وبطلي حزن خليني اتلگى اخوتج بالوجه الابيض كان كلام ام مهيمن دافع قوي حتى نستمر بحياتنا وكل وحدة بينا شافت شغلها وبهاي الايام اتعودت على عناد كل يوم يجي من يخلص شغله رجع مثل ماكان مهيمن مسافر المرة الفاتت استلم الشغل وية طالب يجيب مصرف للبيت ومسواك بين فترة وفترة ومن تطلب منه خالة زهرة يدخل للبيت .. صدك جذب خالة قابل انت غريب انت ابننا تعال فوت ادخل جاوبها وهو واكف بالباب .. والنعم منج خالة بس گوليلي شلون يطاوعني الگلب اخطي عتبة باب ربعي وهم ما موجودين ماكان يرضى يدخل للبيت يبقى بالباب يسلم السجلات والمسواك ويروح. اما اني فيتطمن علية بالنقال يسمع صوتي ويسأل عن احوالي وبعدها اسأله عن اخبار مهيمن وجلال وهالمرة اتصل علية يسألني عن امه .. نور اريد اعرف منج امي ما كالت شي من اجتكم هي وعمتي جوابته .. لا ما كالت شي كانت كاعدة وية خالة زهرة تواسيها هي وعمتك يعني ما دار بيني وبينها كلام وبعدها سألني .. انا جايكم للبيت جايب مسواك وحتى انطيج السجلات تدقيقها تحتاجين شي اجيبه بطريقي وانا جاي .. لا ما اريد اي شي غير بس سلامتك سكت وبعدها كال .. اشو صايرة قليلة الكلام وياية حتى كلمة حبيبي بعد ما سمعتها منج خيرج حمامة بغداد شلج بخطية ابن الملحة ابتسمت وكلت.. لاتخاف حمامتك بعدها على العهد حتى لو الدنيا شغلتني بمصايبها اتطمن حبك زرع بذوره بالگلب عناد .. حييييييييل يعني هستوج يالله بديتي تزرعين بذور حٍٍِْــًبٌٍـــِٓېٍٓ بگلبج يعني افتهم من كلامج حبي حديث العهد بعده ماله جذور ثابتة بگلبج ابتسمت وكلت .. اكول استاذ عناد صاير تدور الزعلات علية ابتسم وكال .. ما تعرفين شكد مشتاقلج مرات اكول هسة انا لو رايح متطوع وية مهيمن وملتحق مو احسن من هذا العذاب على الاقل هناك التهي وما اشوف حلالي كدام عيني وما اكدر اطوله جاوبته .. لا عفية عناد صير عاقل وبطل هالحجي والله كافي علية خوفي على اخواني وگلبي معصور بغيابهم وداعتك اني لحد هسة گلبي ينتفض من اتذكر شلون سافرت للموصل بذاك اليوم. علمود توصل سيارة مساعدات ودخلنا كلنا بالانذار من وراك. .. اسم الله على گلبج يالله انا راح اسد النقال سيطرة كدامي عود ما اوصيج ديري بالج على بذوري واسگيهم انهى المكالمة باوعت على النقال ابتسم على خبالات عناد ريم سألتني .. ليش ما كلتيله عن امه جاوبتها .. لاعيب استحي ترة كلامها كان نصيحة جنت احجي وية ريم واني اتذكر كلام ام عناد البارحة اجتي هي وعمته. علمود يتطمنون على صحة خالة زهرة ويواسونها ومن قدمت الصيافة الهم وسلمت عليهم طلبت مني تحجي وياية لوحدنا باوعت عليها ورجعت باوعت على خالة زهرة اريدها تسعفني شنو اسوي بهاي الحالة. ما اعرف ليش انمغصت بطني من طلبها خالة زهرة كالت .. نورة يمة اخذي عمتج وكعدي انتي وياها بغرفة البنات وشوفيها شتريد اكيد عندكم خصوصيات وامور عائلية تردون تناقشونها بينكم قبل الزواج حركت راسي بالموافقة اخذتها لغرفة البنات حتى تحجي وهناك. ام عناد اول ما دخلت فاتت بالموضوع وكالت .. شوفي خالة سمعيني زين احنا اهل بيت وعيال وانتي راح تدخلين ببيتنا وتصيرين جنة. وانا عمتج واحنا بشر ما معصومين من الغلط ومصارين البطن تتعارك. فما بالج عائلة بيت يوم نتعارك ويوم الثاني نتراضى من تسمعين مني حجاية تزعلج او اي واحد يسمعج حجاية تضوجج تعالي كعدي وياية وگوليلي وعاتبيني واني اكولج الي مزعلني منج وتحجيلي الي زعلج مني ونتصافى بينا لاتدخلين عناد بمشاكلنا انا وياج. وحاولي تخلين الامور بيني وبينج ولازم تعرفين مو كلشي يدور بيني وبينج من مشاكل وعتاب ترحين توصلينه عناد بطبعه عصبي نار. وما عنده شي اسمه خط رجعة ومن يحجي يخرب الاول والتالي بلحظة وما يفكر بكلامه تدرين بذاك اليوم حرگ البيت علينا وضغطه ارتفع من وراج حتى هدد يعوف البيت ويطلع والظاهر انتي الج تأثير كلش قوي على عناد الي افتهمته من كلام ام عناد ان هي تحس بالتهديد من وجودي ببيتها باوعت عليها وكلت .. بالحقيقة. انا بطبعي ما احب انقل كلام بس الحقيقة هالمرة كنت مضطرة اگوله لان شفت الامور بيناتنا ماراح تمشي عدل ومن الافضل هو يكعد يحجي وياج ويفهمج عني هو ابنج وانتي امه واحدكم يعرف بطبع الثاني لان اني بوكتها لو حاجية وياج كان اعتبرتي كلامي تجاوز عليج اكيد راح تصير مشكلة والزعل يكبر بينا ما يقل باوعت علية بنظرة اعجاب على شك بكلامي وكالت .. انا ما اريد منج شي كل الي اريده تدارين ابني وتتقين الله بأمه وابوه موتستغلين طيبة گلبه وحبه الج وتكعدين توزينه علينا جاوبتها .. اني اعرف حق الله ولوما اعرف حق الله جان جاوبتج بوكتها وماسكتت وتكبر المشكلة بيني وبينج وقتها ماراح نكدر نصلح شي اما اعلى الجايات ان شاءالله مايكون اكو شي جاي غير الي صار اني اكول انطي لنفسج فرصة تعرفيني خيري من شري وبعدين قرري شلون تعامليني وان شاءالله راح تلاكيني عند حسن ظنج بالنهاية احنا اثنينا نريد سعادة عناد بعدها صارت ام عناد تحجيلي عن حياتهم وبيتها وبناتها كانت تحاول تنقلي صورة عن نظامهم بالبيت وحياتهم شلون ماشية واني فضلت اسمعها واجاريها ريم باوعتلي وكالت .. اي بس اني كنت افضل لوما كاعدة وياها لوحدكم احسن لان ما ارتاحلها .. ريم اذا كنت اريد السفينة تبحر بسلام لازم اتوصل لحل وية ام عناد ونحط النقط على الحروف وكل واحد بينا يعرف حدوده سمعنا صوت الجرس بعدها اجتي حور تركض بسرعة وكالت .. نور. . نور .. تعالي بسرعة هذا واحد بالباب اسمه امير يكول جوارينكم ببغداد وجاي يسأل عليج كمزت من مكاني متفاجئة بالشي سمعته جلال كنت اباوع على هَنا هي وبطنها منظرها الضعيف تخلي الواحد غصب عنه يحميها وما يطاوعه گلبه يشوفها تتأذى قررت احجي وياه. بموضوع انسحابي من معسكر داعش بس اكيد من غير ما اكوللها شي عن السبب او عن شخصيتي جليت صوتي ورحت كعدت على السرير وكلتلها .. هَنا تركي الشغل من ايدج وتعالي كعدي اريد احجي وياج بموضوع مهم باوعت علية بنظرة استفهام كانت شايلة بيدها ملابسي الوسخة تريد تغسلهم تركتهم على حافة السرير واجتي كعدت بالكاع يم رجلية وكالت .. كول جلال اسمعك .. شوفي يابنت الناس انا قررت اغادر واترك المعسكر فكلت اسألج قبل لا اروح اذا كنتي تردين تجين وياية .. شنو ليش تريد ترحل يعني انتقلت لغير مكان جاوبتها .. ردي على كد السؤال ولا تسألني عن شي ما يخصج هذا مو شغلج كانت تباوع علية مستغربة اللهجة الحادة بكلامي كنت متعمد اكون وياها جاف بالكلام ما اريدها تشك بولائي لداعش وبنفس الوقت اريدها تتطمن تجي وياي جاوبتني وكالت .. اكيد اروح وياك مستحيل ابقى هنا لوحدي اكيد اذا تركتني راح يهدوني لغيرك احتمال يأذيني مثلما اذوا اخواتي البقية جاوبتها .. يعني موافقة تٌـٌـمــام جهزي حالج باجر نطلع من المعسكر انا وياج استوقفتني بتوسل وكالت .. جلال واخواتي شلون اروح واعوفهم هنا لوحدهم بخطر هذا الي جنت خايف منه باوعت عليها حتى اضمن ولائها هي واخواتها ما يطعنوني لازم اكون انا المسيطر باوعت عليها وكلت .. اسمعيني يامرة. انتي جاريتي ولي حرية التصرف بكِ واذا غادرت المكان. انا وياج مو مشكلة بس اذا اتصخمت وقررت اخذ اخواتج ويانا معناها راح تصير عملية تهريب وهذا الشي راح اتعاقب عليه عيونها لمعت بالدموع ولزمت رجلي تريد تنزل عليها تبوسها .. احلفك بالغالية امك وبمحبتك لاختك ما تتركنا انا واخواتي هنا احنا بحاجتك كمزت من مكاني معترض على حركتها احس گلبي انمرد عليها بس لازم اكون قاسي بتعاملي وياها هي واخواتها حتى اضمن الموضوع ما يطلع من ايدي كلتلها بنترة .. يكفي يامرة كافي لاتلغين امسحي دموعج هاي هي امري لله راح اتورط على عمري واخذ اخواتج على كل حال اذا جنتي تردين اخذهم ويجون ويانا فلازم بالاول تحجين وية اخواتج بالاول وتتفقين وياهم وتضمنين التزامهن بالسرية. انا عني ما علية شي او خطر شوكت ما يجي بعقلي اعوفكم واروح بس خواتج اذا رادوا الحرية والنفاذ بجلدهم لازم يبلعون لسانهم ويصيرون خرسات وينفذون كلامي بالحرف الواحد يمشون بأنتظام مثل الساعة شنو اكولهم يسون بدون مناقشة منا لحد ما اطلعهم من داخل المعسكر والله المستعان سألتني.. بس شلون اتواصل وية خواتي واتفق وياهم وافهمهم على الكلام الي كلته باوعت عليها وكلتلها .. انا راح ارتب الموضوع واطلب الاذن من الامير يسمحلج بلقاء خواتج طلعت من يمها واتوجهت على مكان الامير الوقت جاي ينفذ مني كنت امشي وعقلي يخطط لطريقة مضمونة اهرب بيها البنات وصلت لغرفة الامير طرقت الباب ودخلت والقيت السلام لكيته مجتمع وية مجموعة من القادة ووجهم مرسوم عليه معالم الريبة شكلهم الجماعة مزنوگين رفع راسه وكال .. اهلا وسهلاً جلال قربان بماذا ادين لك بهذا الطلة الحميدة جاوبته .. مولاي الامير جاريتي حامل وانا ابتليت على عمري وما اعرف كيف اهتم بها فقلت الجيء اليك واطلب منك ان تسمح لأخواتها الجواري يشوفونها ويدارونها لبعض الوقت اتسعت عيونه بفخر وكال .. ايها الملعون يبدوا ان الفحولة عالية لديك لدرجةً جعلت جاريتك تحمل منك في فترة وجيزة ابتسمت بغرور وكلت .. صدقت يامولاي الامير انا فحل ابّاً عن جد. بس غير انا ما احجي طكها ضحكة وكرشه يصعد وينزل يضحك وياه وكال .. لك ما تريد اذهب وسوف ارسل اخواتها خلفك ليجلسوا مع اختهم طلعت ورحت للغرفة وبلغت هَنا بوصول اخواتها والله وصدك دقايق وجان يندك الباب ويدخلون علينا خواتها ثلاثتهم اباوع عليها شلون صرخت بفرحة ولهفة من شافتهن وهن بالمثل نفس ردت فعلها اتبادلوا الاحضان ممزوج بالدموع غلقت الباب وكلت لهنا اذكرها وانا اباوع لساعتي .. هَنا ما عندنا وقت بسرعة احجي وية خواتج وانا داخل للحمام. تركتهم ودخلت للحمام كنت واكف اتسمع لحديثهم. ما اكدر اامن بيهن كلهن خايف لا وحدة منهن تفشي سري. اريد اعرف بشنو يفكرن كانت هَنا وخواتها يحجون عن الصار وياهم من بعد الفراق ولكل وحدة بيهم قصة تختلف عن الثانية. لكن هَنا انصدمت من عرفت بخبر وفاة اختها الصغرة وبعدما اتبادلن الاخبار بلشت هنا تشرح لاخواتها عن موضوع الهروب سمعت وحدة منهم سألتها وكالت يعني شنو الي يضمنلنا ما يسوي بينا شي هو داعشي قذر وكلشي اتوقع منهم اسمع هنا تسكتها .. اششسش نصي صوتج لا يسمعج جلال ويعصب علينا ويغير رأيه .. هنَا احنا شفنا ايام سودة على ايدهم مستحيل اكدر اثق بي هيج بكل سهولة. سمعت صوت اختها الثانية تأكد على كلام اختها .. اي صدك هنا. شنو الي يخلينا نأمن بي وننطيه ثقتنا هيج بكل سهولة هنا جاوبتهن وكالت .. بنات ما عدنا اي حل اخر كدامنا غير بس نسلمه ثقتنا واني متأكدة جلال ما راح يخذلنا لان يحمل بداخل قلبه رحمة. وعطف وهذا الشي يخليني اثق بي وبعدما اتفقوا البنات على الموافقة غسلت شعري وطلعت من الحمام التفتوا يباوعن علية كانت نظرات الشك والحذر تحوم بعيونهن عجبني حذرهن وخوفهن مني وهالشي شكل نقطة لصالحهن هنا شافتني وراحت ركضت جابتلي المنشفة اخذتها منها وكالت .. جلال اني حجيت وية البنات واتفقنا كلنا نطلع وياك جاوبتها وكلت .. حلو.. هذا هو لعد خلونا نحجي بالمفيد لكيت نفسي مستلم دور القائد وكعدت انطي الاوامر بتنفيد الخطة. كانوا يباوعون بوجهي وعيونهن مثل عيون القطط .. شفوا بنات اريدكم تركزون وياي وتسمعوني زين باجر الساعة سبعة بعد المغرب كل وحدة بيكم تدبرللها عذر حتى تطلع اريدكم كون الساعة بالسبعة بعد المغرب تكونون كلكم موجودين بالورشة ما اريد اي تأخير وحاولوا بقدر الامكان ما تلفتون الانتباه خلوا ببالكم اي غلطة راح تكلفكم حياتكم اتفقنا على كل شي وراحوا واني متاكد من نجاح الخطة لان كانوا يملكون بداخلهم روح قتالية للنجاة. من هذا السجن مهيمن الجنود اجوني على صياحي كنت احوم بمكاني قرب الساتر احس بروحي فرت مثل الطير المذبوح واحد من الشباب الي لازمين الواجب كان اسمه عباس صار يحاول يهديني .. مهيمن اهدي شوية جاوبته وانا ما اعرف شنو اسوي .. ولك عباس شلون اهديء ولك يردون يقصفون المعسكر الي بي اخوي .. لاتخاف على اخوك انت مو تكول هو استلم الرسالة اكيد هو مو غبي حتى يبقى هناك وهو عارف بالاوامر صار عباس يحجي وياي حتى يخليني استوعب .. لا تخاف اخوك ذيب ما شاء الله لان الشخص الي يتوغل بين الضباع والثعابين بكل اصرار اكيد شايل گلب ميت ما يهاب المنية وراح يكدر ينقذ نفسه ابو الهمة عض على جروحك و گوم يابطل لاتخلي الحزن ينسيك واجبك ترة وارضنا بعدها مسلبة ومهضومة والواجب بعده ينادي علينا گوم وياي وصب غضبك الي جاي اشوفه بعيونك على راس الانجاس طلع حرگت گلبك واشفي غليلك بيهم كان يحجي واصوات القصف احوم فوگ راسنا نهضت من مكاني الغضب والحقد على هذولة الانجاس مالي كلبي جاوبته .. وداعتك ياخوي الا احرم عليهم شم الهوى وافنيهم فني واخلي بذكرهم يرافقه اللعنة مرت الساعات علينا اندمج ليلنا وية نهارنا واختفت معاني الوجوه من اثر الغبرة نحارب ونناور وصرنا نتقدم ونتوغل والگلوب ميتة طر علينا الفجر وسيطرنا عالمنطقة. الي احنا بيها كنا نتناوب وية الشباب مجموعة ترتاح وتجي مجموعة بدالها انا كنت مسؤول على القاذفات لگيت روحي استاذ بالفطرة ما انكرالتحاقي بالدورة الخاصة بالمتطوعين هواي فادتني. يوم ثاني الظهر اجاني عباس يركض شايل بيده اللاسلكي وكال .. اجتنا اخبارية تكول سيارة مدرعة. محملمة. (....) طن من المتفجرات وبيها انتحاري اجتازت السيطرة العراقية . وعبرتها من غير ما يكدرون يوقفونها. جاية بأتجاهنا اجة الصوت الضابط يملي الاومر يجب توقيف المدرعة اجة واحد من الجنود يستعجلنا كان شايل بيده ناظور جان يركض .. شباب .. المدرعة بينت من الافق الضابط المسؤل عنا صار ينطي الاوامر رحت وكفت يمه وكلتله .. سيدي هذا ما راح يوكف الا بقاذفة باوع علية وكال ..ولك مهيمن انت مجنون. المعلومات تكول المدرعة بيها (..)طن من المتفجرات. يعني الا انتحاري جاي ينفذ المهمة سألته .. ليش سيدي .. ولك ما ينفع مع انطلاق القذيفة . وابعادها صار الضابط ينطيني احداثيات. عن مسافة وسرعة القذيفة وقوة انفجار المدرعة التخمينية جاوبته بكل همة ونار الغضب تسعر بگلبي وشلت القاذفة وثبتتها على كتفي. صحت بصوت .. سيدي انطيني الامر بالتنفيذ باوع علية ولزم كتفي وكال .. مهيمن هاي مجازفة صعبة انت بگدها ؟؟؟ ضربت صدري وكلت .. سيدي فوت بيها وعالزلم خليها انا ابن الملحة گدها وگدود وافق الامر بالتنفيذ وانا لمعت عيوني بالحماس شلت القاذفة وثبتتها على كتفي. المفروض الزم الطريق بسرعة. . حتى اسبق الوقت كنت امشي وعباس يمشي بصفي ويملي علية بالمعلومات والاحداثيات وصلت لراس الطريق كان مثل التلة عالي المستوى ثبت القذيفة على كتفي وحطيت قطعة الكاتم بداخل اذني حامل سلاح المنايا وهاجم عليهم بكل عزم وتصميم متوكل على رب العالمين يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 09:37 AM
| #73 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت الواحد والأربعون ج2 مساء الانوار والسرور عليكم نور كمزت من. مكاني متفاجئة. .. اميرر!!! حور جاوبتني .. اي يكول اسمه امير اتبادلنا اني وريم نظرات المعرفة حور كملت كلامها .. امي كالت صيحي لنور لان الولد يريد يشوفج ويسلم عليج بس خرب يومه والله بقلاوة انخبصت ما اعرف شصار بية اجتاحتني كمية مشاعرغريبة ماكدرت احزرهَا شنو احس بروحي دخلت بحالة فوضى صار عندي تضارب بين الماضي والحاضر هجمت علية الذكريات صرت مثل واحد فتح كتاب قديم تتوسطه وردة قديمة رغم جففها الزمن وسلب منها عطرها وجمالها لكن بقت بين ثنايا الروح لها قيمة كلما نشوفها تحرك مشاعرنا غصب هذا حالي كان وية امير ريم اقتربت مني وبيدها شال وكالت .. نور بالله شو هاج اخذي لبسي هذا الشال واهدي خلي نفتهم ليش جاي اخذت شالي منها ولبسته وبعدها سحبت نفس عميق وطلعت من الغرفة وريم اجتي وراية لكيت خالة زهرة واكفة بالباب تحجي وية امير هنا وجان اسمع صوت عناد سلم على خالة زهرة وامير ما اعرف ليش من سمعت صوت عناد رجلية اتوقفت عن المشي اترددت اكمل طريقي للباب ريم بصوت ناصي.. شكو ليش اتوقفتي باوعتلها بحيرة ما اعرف احس الموقف كلش مربك ومعقد التفتت خالة زهرة على صوت ريم اتحركت للجانب تفسح المجال وكالت .. هاي هي نورة اجتي. تعالي خالة نور سلمي على جاركم استاذ امير اتقدمت وعيوني وكعت على امير احس وكف بية الزمن ورجعت ذيج نور الاولية الي جانت تشوف بأمير شمعة تضوي عالمها المظلم شافني واتسعت عيونه وابتسامته المتعجبة ضوت وجهه وكال .. لج نور هاي انتي نوارة نفسج !!!! اتسعت ابتسامتي وحجيت بحماس .. امييييير !!!!!! شلونك وشلون الوالدة وربي مشتاقتلها رمش بعيونه وكال .. وربي لوما صوتج ما اصدك هاي انتي نوارة عناد جلى صوته وكال .. شنو راح تبقون واكفين تسولفون على الباب خالة زهرة كالت .. يا والله عيب شلون زحمة اخذتنا السوالف ونسيت اكله اتفضل جوة للبيت امير جاوبها .. والله خالة انا ما ناوي اطول بس حبيت امر على نور واتطمن عليها عناد جلى صوته متضايق وكال .. اتفضل ادخل جوى للبيت وهناك كمل سوالفك مبين عليك عندك هواية سوالف جاوبه امير وهو يبتسم بخفة وكال .. اي والله من شفت نور انطلق الساني مثل قبل من احجي وياها. انسى نفسي عناد نطت عيونه من كلام امير وكال .. شكلك بديت تنسى نفسك مرة ثانية كلام عناد وية امير كان بمثابة انذار بس شكله امير كان غافل عن تحذير عناد دخل للاستقبال وكعد وريم دخلت قدمتله ماي وعصير انتبهت عليه كان كل شوية يباوعلي بنظرة تعجب ممزوجة بالفضول سألته ..امير ما كلتلي شلون صارت صحة الوالدة واختك الدكتور سرى شلونها وزوجتك شلونها جاوبني وهو يجر حسرة وكال .. والله امي صحتها كلش متدهورة. اما اختي سرى تزوجت وسافرت للخارج وية زوجها اما زوجتي الي هي بت خالي مع الاسف. انفصلت عنها لان سبت امي سباية سوت مشاكل هواية وبأخر المطاف خيرتني لو اخلي امي بدار. عجزة. لو اطلگها ماكان بيدي غير اطلكها وابقى اهتم بأمي جاوبته واني احس أتجاهه بالاسف .. يااااخطية خالة ما تستاهل الي يصير بيها .. تصدكين نور من عهد ما تركتينا بعد ما دخلت بيتنا وحدة مثل اخلاقح وحنيتج على امي كل وحدة اجيبها كانت روحها بخشمها وكوة تهتم بأمي كنت اتمعن بشكله مو هواي متغير يمكن جسمه شوية مليان قبل كان ضعيف وهزيل رفع راسه وباوع علية ونفض عن وجهه معالم الحزن وابتسم .. عوفج مني وتعالي كوليلي شنو هاي الاخبار الي سمعتها عنج. يكولون عندج اخوان من ابوج ابتسمت .. منو وصلك الاخبار يعني شلون سمعت اني عندي اخوان. نور تصدكين اذا اكلج انتي دومج على بالي انتي من يوم راد زوج خالتج يزوجج لسعدون بالغصب احس صرتي مسؤليتي ما اعرف ليش ورة ما اتعرضت للضرب على ايد جماعة صابر وسعدون انتي اختفيتي. وانقطعت عني اخبارج رحت لبيت خالتج اسأل عليج هي خبثت ما قبلت تنطيني اي معلومة عن مكانج ووين تعيشين جنت خايف لا يكونون مزوجينج لسعدون بس بعدما بقيت مصر اعرف اخبارج كالت نور طلعوا عندها اخوان وما تعرف عنهم وراحت وياهم وخلتني معلك طلبت منها رقم نقالج او اي شي اتواصل وياج بس ماكو كانت كلش معندة وياية بس قبل ثلاث اسابيع اتفاجئت بخالتج اجتنا للبيت تطلب مني اتوسطلها عندج حتى بلكي ترجعين تصرفيلهم الراتب الشهري وبيومها انطتني عنوانج بالبصرة. بس بدون رقم نقال تكول انتي بدلتي الرقم ومتقبلين تتواصلين وياها وكالت اخوانها مسيطرين عليها وعلى اساس واحد من اخوانج مطلوب للحكومة لان يشتغل عميل وية داعش ما تعرفين شنو صار بينا انا وامي من سمعنا بأخبارج امي كالت من تسافر للبصرة مر عليها واسأل عن احوالها واذا اقتضى الامر وشفت نور بحاجة المساعدة كللها بيتنا مفتوحلها هلا بيها بأي وكت نور طمنيني صدك هذا الشي الي سمعته انتي مغصوبه عالزواج من واحد فرضوه عليج اخوانج وعلى طاري الزواج عنادبعد مااتحمل طك وانفجر من يمه باوع عليه وكال .. خايب ما تحجي عدل صارلك ساعة كاعد ما كلت سالفة براسها خير كل سوالفك غثيثة امير عقد حواجبه وسأل ..العفو انت منو حضرتك حتى تعلي صوتك علية عناد نطت عيونه واني بسرعة اتدخلت وجاوبت امير .. امير هذا عناد خطيب..... عناد قاطع كلامي وهو يخزرني وكال .. لا مو خطيبها انا زوجها خالة زهرة اتدخلت وكالت لأمير .. خالة لاتصدك كلام بيت خالتها هذولي ناس ما عندهم مخافة الله يحبون يتبلون على الوادم اخوانها اتطوعوا وسافروا للموصل روح اسأل عن اخوها مهيمن وخلي الناس تحجيلك عنه وعن اخلاقه. وهذا زوجها كدامك ابن اصول والنعم منه عناد حجة بغيض وكال .. خالة مالة داعي تكعدين تبرريله افعالنا ومكانتنا وهو بصفته شنو حتى يكعد يقيمنا ويحكم علينا خال ولد عم بنية امير جاوبه .. بحكم العشرة والزاد والملح وكلام خالتها هو الي جابني لهنا حتى اتطمن عليها جاوبته بأمتنان وكلت .. امير مشكور ما تقصر انت دومك صاحب نخوة وما يوم خذلتني ربي يحميك ويحفظك لامك خالة زهرة كملت على كلامي وكالت .. والله اتمنيت اخوانها هنا ويشوفونك حتى يشكرونك على طيب اصلك ووكفتك وية اختهم امير جاوبها محرج ..انا ما مسوي شي هذا واجبي والناس لبعضها يوم لك ويوم عليك وانا كل الي ردته اشوف نور واتطمن عليها. والحمدلله بعدما شفتها اتطمنت خصوصاً من شفت وجهها المورد يدل على الراحة عناد نهض من مكانها بنفاذ صبر كان مبين عليه گوة لازم روحه ما يطحنه شكله محكوم بأصول الضيافة گام من مكانه وكال .. مشكور ما قصرت كلفت نفسك واجيت تتطمن ان شاء الله نردها الك بالافراح من تتزوج مرة ثانية كانت طردة بنزاكة امير جلى صوته وحس على نفسه وكام من مكانه وكال .. انا صار لازم اترخص منكم لان عندي اقاربي ينتظروني بالسيارة برة واني نهضت وياه وكلتله .. امير مشكور على سؤالك عني امانة توصل سلامي لخالة. .. على شنو تشكريني هذا واجبي انا ما سويت شي اي واحد بمكاني هم راح يسوي مثلي و العشرة ماتهون الا على ابن الحرام خالة زهرة .. والنعم من اصلك امير اتجه للباب ورة عناد واني وخالة زهرة اتبعناه للباب وصل للباب واتوقف والتفت علية وكال .. نور ديري بالج على نفسج باوع لعناد وكال .. ما اوصيك عليها الله حط بيدك جوهرة دير بالك تفرط بيها عناد غمض عيونه بقلة صبر وكال .. انا مو غبي مثل بعض الناس وافرط بيها عناد كان مبين من نظرات عيونه كان يقصد امير بكلامه عقدت حواجبي مستغربة عناد شبي معصب من امير عبالك عنده عداوة وياه كنا واكفين بالطارمة اني والبنات وخالة وعناد واكفين بالباب ريم حجت وياية بصوت ناصي وكالت .. اذا راح امير لزمي عناد واحجي وياه لاتخلينه يروح وهو هيج مطنكر شوفي شبي ليش هيج كالب الخلفة حور كالت وهي تباوع بتفكير .. حسب تحليلي لانواع الطنكورات الي مارة علية اخونا بالله جاي يمر بحالة الغيرة الطنكورية ريم .. وهو وين لحك يشوف امير وشنو عرف عنه حتى يغار منه حور .. والله هذا جوابه راح نلكاه عند صاحب الطنكورة دخلت خالة وعناد بقى بالباب يحجي وياها رحت يمهم وكلت .. عناد تعال ادخل جوة للبيت ليش واكف بالباب جاوبني بدون ما يوجهلي نظرة كال .. اريد اروح مستعجل عندي شغل مهم اجيت بس انطيكم الاغراض والسجلات خالة زهرة كامت تدعيله. واني بقيت واكفة بمكاني منتظرة خالة تدخل حتى احجي وياه اخذت منه السجلات وراحت دخلت جوة للبيت تصيح للبنات حتى يدخلون المسواك استغليت الفرصة وسألته .. عناد شنو شبيك ليش گالب الوجه شنو صاير شي جاوبني من ورة خشمة وكال .. ما صاير شي سلامتج .. عناد بدون لف ودوران احجي شنو شبيك .. كلتلج ما بية شي لا تلحين .. شلون ما بيك شي وانت قبل شوية جنت تحجي وياي بالنقال طبيعي وجنك العافية. اشو هسة انگلبت احوالك خصوصاً من شفت امير. صرت مو على بعضك عناد ادري بيك مستغرب جية امير وسؤاله عني بس هو مثل ماشفت اجة بحكم الجيرة والعشرة يسأل عني ويتطمن مسح وجهه بكفوف ايديه ونتر بية وكال .. انتي ما انتبهتي لروحج شنو سويتي مشفتي نفسج شلون لمعت عيونج. من شفتي امير انتي حتى ما كلفتي روحج تعرفيني عليه حقج معذورة لان حضرتج جنتي فاصلة عن العالم وما تشوفين كدامج غير بس امير .. عناد ترة ماله داعي هالحجي ومو حلو بحقي اشو كمت تحلل بكيفك وتستعجل بحكمك وتدور الزلة علية .. ترة الموضوع واضح ما يحتاجله تحليل لا عبالج عبرت علية سالفة جاي يتطمن عليج حباً لله ترة جان مبين عليه هو جاي وبباله يلگى نور نتنظره وباقية على العهد القديم من يلتقي بيج يطلب ايدج الظاهر ما لگة وحدة تتحمل امه غيرج .. عناد شنو هذا الحجي تفكيرك هواي رايح زايد كلامك ما بي اي ربط شنو امير جاي يطلبني شنو ما لكة وحدة تتحمل امه غيري انت منين جاي تجيب هذا الحجي. جاوبني وكال . . نور ترة الحليم تكفيه الاشارة هو اول ما سألتيه عن احواله. بلغج بخبر انفصاله من زوجته انا رجال واعرف الرجل من نظراته وبشنو يفكر هزيت راسي برفض وحجيت وگلت .. لا عناد انت متوهم وكل هذا الحجي الي گلته ماله وجود .. نور ترة اعرف امير شنو جان بالنسبة الج والظاهر بعدها اثار حبه باقية لليوم بگلبج اتسعت عيوني وسألته بأستنكار. متعجبة .. اثر حبه بگلبي ؟؟؟؟ عناد انت منتبه لنفسك شنو جاي تحجي لو لا ترة كلامك هذا اتهام باطل بحقي واني ما انطيتك سبب حتى يخليك هيج تحجي وتتهمني انت حتى ما تعرف امير شوكت لحكت شفته وعرفت اني احبه وهو هسة جاي يريد يرتبط بية كان ينزل بالاغراض من السيارة كمل تنزيلهم وحطهم بالباب ووكف كدامي وكال .. شنو نور نسيتي لو اذكرج ترة انا نفسي عناد او خلي نكول رغد. الي كان يتواصل وياج و انتي بنفسج حجيتلي عن حبج لأمير وشلون انولد حبه بگلبج وكيف انتهى والله العظيم بختج باخوانج. ما موجودين والا جان خليت هذا امير يطلع من بيتكم زحف على ركبه على هاي سوايته بس انا مو عديم المروة واخلف بوعدي لصاحبي شكهت مصدومة وحطيت ايدي على حلكي متفاجئة بكلام عناد بعدها دار ووجه وراح وتركني يا الله الدنيا شكد صغيرة. دخلت للبيت احس بروحي خاوية وضايعة اتهامات عناد كانت بمثابة طعنة بالثقة اول ما دخلت للمطبخ خالة زهرة استلمتني وكالت .. اكول خالة نور طبعاً انا ما كدرت احجي كدام عناد بس هذا الولد مبين عليه جاي وكان ناوي يخطبج بعدما يشوف وضعج كان يريد يستغل سوء حالج ووضعج عباله انتي مثل قبل لا حول ولاقوة مالج سند وظهر فحب يستفيد من الوضع اتسعت عيوني من كلام خالة زهرة معقولة هم ما جاي يشوفون الي اني اشوفه . .. حييييييييل خالة انتي رايحة لبعيد ترة امير مو بحاجتي وهو صاحب الفضل علية واذا كنتي تقصدين على سالفة امه ترة هو يكدر يجيب اي وحدة. بكل سهولة لاتظلمينه بحكمج بس كل ما في الموضوع هو حب يعمل بأصله ومسوي حساب للعشرة واجاني بسال عن احوالي جاوبتني خالة زهرة وكالت .. هذا الشي قنعي روحج بي خالة انتي على نيتج فتشوفين الناس كلها مثلج بس خلي ببالج هذا سالفته مبينة لاصامَ ولا صلى الا لحاجةً تُقضى باوعت عليها محتارة شنو اجاوبها بالحقيقة كلامها سلب مني القدرة عالكلام ريم مرت الايام علينا وصار يوم يجر يوم واسبوع يتبعه اسبوع وضاع علينا الحساب الشي الوحيد ثابت بعد سفر مهيمن هو المشاعر كانت عبارة عن خوف وحنين واشتياق وانتظار رجوعه بلهفة كنت كل يوم اصبر الگلب وواتعشم برجعة حبيبي واكول هانت باجر حبيبي يعود و نتسامر اني وياه ونعوض كل ليالي الشوگ بثمرة صبرنا صحيح اتعودنا عالوضع وكدرنا نرجع لحياتنا بغيابه بس ما نسيناه ولا نسينا جلال هو هم ما اعرف وين صفت بي دنياه سكوت مهيمن وتغاضي حورعن موضوع انضمام جلال لداعش جلال شي مو طبيعي احس الكل يعرف شي عن جلال الا اني كنت كاعدة بالمطبخ على الميز جاي ادرس اباوع لنور دتشتغل اليوم مسوية حملة عالبيت احس بيها جاي تطلع حركتها بالتنظيف وهاي الثانية هم وضعها ما عاجبني خطية من صارت سالفة امير و هي وعناد علاقتهم توترت ودخل بينهم الزعل وبعدها عناد قلت مكالماته وية نور بس ما بطل زياراته النا للبيت وبقى مستمر يشوف طلبات البيت ويتسوك ويسلم على خالة زهرة. ومرات اني اطلعله لو حور بس نور رغم تعرف بموعد جية عناد ولا يوم فكرت تطلع تفتحله الباب وتحجي وياه هي هم شايلة بخاطرها وزعلانة عليه وماخذة موقف منه اندك الجرس ونور جمدت بمكانها والتفتت علية وهي تباوع للساعة بلهفة وگالت .. اكيد هذا عناد هو كل يوم هيج وقت يجي كمت من مكاني ورحت فتحت الباب وصدك ابن الحلال بذكره كان عناد واكف بالباب لابس نظارات شمسية وتيشيرت ابيض وبنطلون جينز الي يشوفه يكول هنيال الي تصير من نصيبه وشكد محظوظة بس محد يعرف المحظوظة عايشة بتعاسة وياه سلمت عليه .. هلا عناد شلونك جاوبني وهو ينزع نظاراته وكال .. الحمدلله بخير شنو خالة زهرة وين اشو اليوم انتي صايرة ابو البيت وتفتحين الباب جاوبته وانا عابسة ما اعرف اني شبية منو يمي شنو يعني تضامناً وية نور ومطنكرة على عناد .. خالة زهرة. جوة جاي تحجي بالنقال بعدها سألني عن دراستي واحوالي ما اعرف ليش احس بي من يحجي وياية عبالك جاي يحجي وية وحدة صغيرة يجاملها عايز بعد بس يكرصني من خدودي وينطيني لّعابة عابتله انطاني الاغراض وكال .. يالله حبابة فوتي دخلي جوة دار وجهه راد يروح استوقفته وگلت .. عنااااد .. لحظة. . شنو باوع علية . . هَـا شكو كولي حاولت المح عن نور بس بصورة غير مباشرة حتى لايفهم كلامي غلط ويكول نور رسلت بنت عنها حتى احجي وياي جليت صوتي وكلت .. احم ما ناسي شي منا .. منا باوع علية وكال .. لا سلامتج ما ناسي شي واذا اتذكرت عندي رقم نقال ام مهيمن واتصل عليها راح عناد وكالعادة ما جاب طاري نور. ولا سأل عنها اني لو بس اعرف هو ليش هيج مكبر الموضوع وماخذ موقف من نور دخلت الغراض للبيت ونور سألتني .. هذا عناد الي كان بالباب كلتلها .. اي عناد وجاب السجلات سألتني .. شلونه .. ما سألج عني ؟؟ جاوبتها وانا مقهورة عليها .. لا ما سألني عنج ولا جاب سيرتج ساد الحزن بنظراتها ورفعت راسها تكابر . . عادي وشنو يعني ما يهمني وعنه لا سأل اصلاً اني هم ما احب اعرف عنه شي ولا يعجبني اسمع اخباره كانت تداوي كبريائها المجروح .. نورايتي ليش ما تكعدين تحجين وياه وتصلحين الموقف ترة هو مجرد سوء فهم دنگت راسها بوهن وكعدت عالكرسي كدامي وكالت .. المشكلة كان كلام عناد وخالة زهرة بخصوص امير كله صحيح وطلع توقعهم بمحله وموضوع جية امير وسؤاله عني طلع مو لله مثلما اني متصورة عقدت حواجبي مستغربة .. شلون يعني ما افتهمت .. طلع امير عنده غاية بزيارته الي وحب يضرب عصفورين بحجر واحد بس اني ياغافلين الكم الله لان بعد الي صار اتفاجئت بأتصال من اسيل تحجي وياية بخصوص موضوع امير هو حاجي وياها وطلب منها ان تحجي وياي تجس نبضي اذا كان بية مجال اوافق على طلبه اتخيلي يكول لأسيل انا شفت خطيبها ومبين عليه عصبي ما ينجرع. اكيد اخوانها غاصبيها عليه سألتها .. زين امير شوصله لأسيل .. هو يعرفها من زمان كنت دائماً احجيله عنها فعادي مثلما خالة سناء حبت تستغلني هو هم شاف بية فرصة ما تتفوت بس اني ما سكتت انطيته الرفض وفوكاها رسالة بيها رزالة محترمة. مثل البسمار بالنعش وخليت اسيل توصل الرسالة بس تدرين اني هذا كله ما همني الي قاهرني تصرف عناد شلون هنت عليه وانطاه گلبه هيج يديرلي وجهه وينطيني ظهره واني بأمس الحاجة لوجوده بهاي الفترة بغياب اخواني ويعرف بية احبه و گلبي بيده من زمان ما يدري بجفاه وصده شسوى بية جنا نحجي اني ونور فجاءة سمعنا صوت صريخ وصياح واتبعها دخول خالة زهرة للمطبخ كانت تعيط بصوت مفجوعة وتلطم على راسها وحور دخلت وراها تلطم خدودها جلال الساعة بالسبعة مساءاً دگت ساعة الصفر وآن الاوان. كنت كاعد بالسيارة. خلف المقود وهَنا كانت كاعدة بصفي تمت تنفيذ المرحلة الاولى من الخطة بنجاح اخواتها تلاثتهم خاتلات تحت الكشن طول اليومين كنت بالورشة اشتغل عالسيارة حتى ارتبلهم مكان اخفيهم بي سويت تحت الكشنات مكان مثل الصندوق دخلن جوة بيهن ورجعت عليهم الكراسي كانت السيارة عالية نوع جيب اتفقت وية هَنا تحاول تسوي نفسها موجوعة عندها الام ولادة. اتخذت من حملها حجة حتى اطلع بيها من المعسكر اخذها للقابلة المأذونة. الموجودة بالقرية حتى تشرف عليها وتولدها طبعاً اختاريت هذا الوقت بالتحديد متزامن وية لحظة شن الهجوم القوات العراقية على معسكر الدواعش اتعمدت اطلع قبل الوقت بنص ساعة مسوي حساب خوات هنا حتى منا علما يفتقدون وجودهن بالمعسكر ويربطون هذا وية خروجي انا واختهم هنا اكون اني كدرت الزم نهاية المنطقة وتكون الطائرات القوات العراقية بهاي الاثناء شنت الهجوم يعني بين قوسين يلتهون بالهجوم ما يكدرون يطاروني انا والبنات كانت المعادلة صعبة مثل حد السيف حركت السيارة واتوكلت على الله واتشاهدت ووقفت كدام البوابة. وباوعت كان بس حارس واحد واگف يم البوابة هم بهيج وقت عندهم يصير فتور وباقي الاوقات يكون اكثر من حارس عالبوابة لذلك القوات العراقية اختاروا هذا الوقت بالذات لشن الهجوم وكانت هاي الفقرة من ضمن المعلومات الي وصلتها الهم اني وباقي الصقور الحارس كان شايل سلاحه بوضع الاستعداد لكن من شافني علگه ورة ظهره. اجة بأتجاهي التفتت على هَنا. وكلتلها .. يالله هَنا جنت اريد انطيها الاشارة حتى تبلش تمثل بس هي كانت تباوع على الحارس بنظرات كلها خوف وترقب ورعب وجان تصرخ بصوت مرعوبة واتبعها عدة صرخات الم ولزمت بطنها اتفاجئت بصرختها وباوعت عليها بشك متوتر هسة هاي شنو تمثل لوصدگ صار وجهها لونه اصفر وعيونها لازالت على الحارس ونفس الوقت تتحسس بطنها انا عاد هنا انخبصت وباوعت لبطنها بأرتباك مصدوم وسألتها بخوف .. ششنو شبيج هنا الطفل بي شي من صدك خرب هاي بس لا من الخوف صدگ راح تطلگ علية لا يا الله دخيلك كلش مو وكتها الوقت جاي يداهمنا مو مال اروح ابتلي بيها وبهاي الاثناء دنك الحارس على نافذة السيارة من جهتي وباوع لهنا. ونوب علية وكال .. ما الامر. ماذا هناك التفتت عليه وانا مخبوص وسألته .. المرة مثلما ترى يا اخي انها سوف تجيب ارجوك ساعدني ودليني على مكان قابلة تجيّب النسوان. باوع عليه بعدم فهم وگال .. لم .. افهم .. عليك ماذا .. تريد ان افعل بالضبط اهوووو هذا الاخ مبين عليه من شكله وكلامه المگطم مو عربي و حافظله كم كلمة بالعربي وجاي يخرطهن براسي وجان ست هَنا تصرخ مرة ثانية. بصوت عالي موجوعة كمزت من مكاني مخترع. من ورة صوتها احس طبلة اذني انزرفت وطرشتني ينعل يومج على هالصوت انداريت بسرعة عليه سألته مستعجل .. ولك ابن الزفرة بسرعة روح افتح البوابة من الله ياخذك بقى صافن بوجهي مثل الحمار كلشي ما يفتهم اخير شي باوعت عليه بحيرة. بالله هذا شلون راح افهمه اخير شي حاولت احجي وياه بالاشارة واشرت على بطني وصرت اعصر بوجهي عود جاي اطلگ وفهمته بالاشارة على كم كلمة عربي فصحى واكول .. ااااااااه .. ولك. اااااااااه طفل .. طفل صغير قادم اوواااا. .. اووااااا اخير شي صرت اقلد صوت الطفل الصغير وهو يبجي من ينولد. رفع حاجبه متفاجيء وصاح بمعرفة .. انك اهاااااااااااااااااااا تقصد عندها الام المخاض صحت براحة وانا اهز راسي بتأكيد .. نعم .. نعم ياخي عندها الام المخاض .. جاي تطلك. من الله ياخذ العربي الفصحى وياك بس للامانة كلمة حق لازم تقال على الاقل احسن مني باللغة العربية ابن الزانية ضابطها اباوع عليه بسرعة ركض للبوابة وفتحها. وشفته يحجي بالجهاز اللاسلكي اكيد بلغ السطرة الثانية عن خروجي وبلحظتها انطلقت بكل سرعتي اتسابق وية الريح كنت رابط الجهاز الخاص بزيادة السرعة .. اختراعي والله واجة وكته سمعت هَنا تحجي بفرح .. واخييييييراً. لزمنا طريق الحرية التفتت عليها متعجب وكلتلها .. هاي شنو وين راح الم المخاص وصرخات فلم الرعب الي شگت اذني كنت احجي وياها وانا اسوق بأقصى سرعتي جاوبتني .. غير انت طلبت مني امثل دور الالم غيرت الكلام وكالت .. جلال انطي خبر لخواتي يطلعون من تحت الكراسي لو بعد جاوبتها وانا اباوع بالمرايا الامامية .. لا بعد مو هسة يطلعون انتظري لان هذا الحارس الغبي عطلنا كلش هواي واخذ من الوقت المحسوب واحتمال راح يكتشفون هروبنا قبل لا الحگ الزم نهاية الطريق وصلت يم سيطرة خففت السرعة وهنا كامت تصرخ بأعلى صوتها خطية هاي من حلاة روحها عبالها كلما تصرخ اكثر يصدكن بيها كانوا رافعين الرايات السود المكتوب عليها داعش هاي السيطرة كانوا حوالي خمسه واحد منهم كان يحجي بالجهاز والباقين اشرولي اكمل الطريق اكيد عدهم علم من السيطرة السابقة لان لازم يبلغهم عن خروج سيارة ووصولها بعد شوية يمهم بنفس الوقت الي شفت اشارتهم الي حتى اكمل طريقي سمعت الي بيده اللاسلكي صاح بصوت عالي .. اوقفوا السيارة واني انطيتها اللهيب وما اسمع الا وصوت الرمي حرگ الجو باوعت بخوف بالمرايا الامامية وجان اشوف السيطرة صاروا يرمون علينا واثنين منهم توجهوا لسياراتهم حتى يتبعونا وبسرعة لزمت راس هَنا ودفعتها ونزلت جوة. سمعت اصوات البنات يصرخون مفزوعات صحت بصوت عالي بنات لحد تتحرك من مكانها ابقوا مثلما انتوا باوعت كدامي للطريق ودست سرعة. وانا حابس انفاسي وصرت اتسابق وية الريح والموت وراية يطاردني مهيمن واكف منتظر المدرعة المتوجهة على الفيلق مالتنا انتشروا الجنود ينفذون اوامر الضابط كل واحد بيهم اخذ موقعه. اتحركت السيارات العسكرية. حتى تعرقل حركة المدرعة وتبطيء من سرعتها وانا كنت لازم صدر الطريق والجنود بلشوا يرمون عليها وجان المحها جاية بكل سرعتها من نهاية الطريق اتشاهدت وثبتت القاذفة على كتفي انتظر اشارة من الضابط حتى انفذ وارمي وهنااااااااك وجان اسمعه يصيح بصوت عالي .. يااالله ياااابطل وديهم لجهنم خليهم الليلة هناك يتعشون وية ابو لهب رميت وانا اصيح بصوت عالي عد عيناك ياعراق احنا زلام الكلفة يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 09:41 AM
| #74 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت الثاني والأربعون ج2 مساء الخير والعافية عليكم اليوم خميس عطلتي بس شفت هواية يطالبون بالبارت يردون يعرفون الي صار واني محبيت ارد طلبكم واخليكم تنتظرون الاحداث فحاولت اخذ من وقتي واكعد اكتبلكم تصبيرة 🌹 مهيمن كانت المدرعة مابيها غير المكان الي يشوف منه السايق الطريق والباقي من الحديد ولازم اخلي القذيفة تخترق المدرعة من هذا الشباك الصغير الامامي اكيد محمل بكمية كبيرة من المتفجرات وجاي علينا انطلقت القذيفة. بأتجاه المدرعة وعيوني تتبعها اريد اتاكد من اصابة الهدف كنت قريب منها هي مسألة حياة او موت بالنسبة الي يا افجر المدرعة واني وكل الموجودين نعيش او هو يستمر بتقدمه وينهينا وشفت القذيفة اخترقت المدرعة واتبعها انفجار قوى مدوي ومن قوة عصف وضغط الانفجار. لگيت نفسي طرت بالهوى وبعدها انطرحت بالكاع على ظهري. على بعد امتار من مكاني الي جنت بي واذني صار بيها صوت وشة. قوية وبعد دوي الانفجار مباشرةً. تعالت الاصوات بزئير الجنود يهتفون بأنتصار الله اكبر .. الله اكبر .. حنى الله جفك يابطل والله سويتها وصبت الهدف كنت بعدني ممدد بمكاني على ظهري اجوني الشباب يركضون وعباس دنگ علية يضحك اني بعدني مذهول ونايم على ظهري على نفس وضعيتي ما زلت بحالة صدمة ما اكدر اتحرك للحظات خانتني قوتي وباد جسمي كله وفقدت السيطرة مثل المشلول بعده عقلي ما مستوعب الصار انا عايش لو ميت عباس كال ونظرت الفخر مالية عيونه .. هَـا ياحيد اشو بعدك نايم شو چن حلتلك نومة الگاع كوم انهض رغم الصار لا زال القصف والرمي مستمر كانوا الجنود والضابط ملتمين علية كلشي ما افتهمت منهم بس صياح واومر عباس وواحد من الجنود صاروا يتفحصون جسمي اسمعه يسأل الجندي يكله .. هذا شنو الدم منين جاي ينزف اسمعهم واشوفهم. شلون يحومون مخبصوين فوك راسي بس ما اكدر احجي لساني صار خشبة مايساعد على الكلام انتبهت عليهم فتحوا قميصي هذا الجندي كان متطوع ويانة معاون طبي مو دكتور صار يعاين يدور على الاصابات الي بجسمي بالحقيقة انا كلشي ما احس فقدت حتى شعوري بالالم عباس سأل الجندي بقلة صبر .. هَـا شنو بشر كدرت تعرف شنو مصدر هالنزيف حسيت ببرودة عبالك واحد مبللني بالماي جاوبه الجندي وهو يطلع الادوات من جنطته وكال .. لاتخاف ماكو شي مجرد جروح طفيفة عباس سأله .. زين شبي ما يحجي بس يعاين علينا جاوبه .. عوفه حقه مو زين منه هسة هو باقي هاديء خطية هذا بعده بحالة ذهول من ورة الانفجار ورة ربع ساعة والجندي اسعفني وعباس لازال فوك راسي اما الجنود البقية. والضابط انتشروا بالمكان ينفذون اوامر الضابط كدرت احرك راسي واستوعب الصار وبديت بالتدريج اتمالك نفسي وجمعت كل قوتي حتى اسيطر على اعصاب جسمي الي خرجت عن سيطرتي بعدها نقلوني للفيلق الموجدود قرب السواتر بمساعدة عباس وكم واحد من الشباب ما يكدرون يرجعوني للموقع لان احنا لازلنا بحالة تقدم وتطهير للمنطقة ما عدنا مكان ثابت مستمرين بتحرير المناطق من الدواعش متنقلين يعني ما عندنا سقف ثابت بقيت على وضعي منا لليل وجان يجي الليل وهي هاجت علية المواجع واحتار الالم منين يبدي من اي مكان من جسمي صرت جنازة من كد كمية الالام الي سكنت صدري وظهري كنت اصيح بصوت موجوع .. ااااااخ يايابة صدري. ولك عبيس الحگني ما اكدر اتنفس احس بصدري مخسوف عباس ابتلى بية هو وكم واحد من الشباب الي ويانة راح جاب الجندي نفسه وگلة .. عفية تعال شوفه كام يون من الالم ماعندك شي يهدي جاوبه الجندي وكال .. هاي طلع عليه الالم وهذا الشي متوقع اكيد راح يتألم بعدها ضربني ابرة مسكن وكال .. هاي كلها سالفة رضوض وهسة انطيته علاج بأذن الله باجر تلگاه يركض گدامك وورة ما اخذت الابرة بشوية بدت الالام تخف علية وجفوني ثگلت وغفت عيوني ورحت بنومة عميقة وانا على نومتي زارتني نسمة هوى مغربة تتمايل بمشيتها اجتني تمشي بهداي وعيونها تلمع بلهفة شوگ .. جنت متفاجيء بشوفتها وسألتها .. ريم شجابج !!!!!! حجت بصوت كله دلع وگالت .. جابني الشوگ الك متعنية اقتربت مني ومددت طولها وية طولي وحطت راسها على صدري وگالت .. حبيبي ضمني لصدرك حيل خليني احس بنبض گلبك باوعت عليها استوعب وجودها هنا بهذا المكان صارت مشاعري متذبذبة بين الفرحان مشتاقلها وبين المعصب وغضبان هاي شلون تجي لهنا وبنص الجنود حجيت وانا اريد اضمها من عيونهم .. ولج غضب انتي شلون تجين لهنا بنص الجنود حطت ايدها على شفايفي تسكتني وگالت وهي تدفن راسها برگبتي .. مهيمن عفية عوفك من العتاب وتضيع وكتنا خليني اشبع من حضنك لميتها لصدري ودنگت راسي يم نحرها وصرت اشتم واتنفس عطرها بكل لهفة مامصدگ روحي وهي هم كانت تبادلني لهفتي احتاريت منين ابدي بيها وشلون انتهي غرگت بحضنها وصارت ايدي تتجول على ثنايا جسدها مثل الطفل ارفع راسي واعاين عليها اريد اتأكد من وجودها ابتسمتلي وحطوت رگبتي بأديها الناعمة سحبتني عليها تقربني منها لكيت نفسي زارع راسي برگتها وصرت اشمها شم مثل المدمن كنت اصول واجول غاط بالعسل ورايح بيها انتبهت لريم بدت تسحب نفسها من حضني بكل هدوء اجتي تنهض من يمي لزمتها من زندها ورجتعها لصدري وكلت .. تعالي ولج وين تردين تولين اليوم حالف ما اعوفج كون اگطع هذني الشفايف بس هاي جرت ايديها بقوة وزمخت بوجهي وكالت .. ايييييع شنو هالقرف ولك خايب مهيمن تعوف ذراعي لا وعليّ بالرشاشة على راسك وابتلي بيك عقدت حواجبي مستغرب هاي شبيها هيج انكلبت مثل الوحش بس فجاءة فتحت عيوني واباوع حولي داير مدايري. استوعب مكاني انا وين رمشت عيوني وجان اشوف كدامي وجه عبوسي الاجلح الاملح باوع علية وهو يهز بيده. وكال .. متگلي انت شنو سالفتك البارحة الليل كله تشمشم بية تكول جرو جان مضيع امه ولگاها بس تشمشم اتسعت عيوني ونهضت من مكاني مفزوع باوعت عليه وانا متقزز .. احترگت عشيرتك عبيس على هاي الدگة ولك ابو ريحة المعفنة شجابك يمي جاوبني وهو يضحك .. غير صرت شريف وجبت فراشي وحطيته بصفك عودك گلت اداريك خاف تحتاج شي جان وضعك مو مستقر .. خايب لو عايفني متلطم لوحدي ولا هالقرف خربت ابو الحلم بهذا وجهك الاملح دتعال گومني خلي اروح اغسل الدم ميبس بشعري وجسمي سندني ونهضت جنت اتحرك بهداي بعدني متأذي من الرضوض جنت امشي ووية كل حركة اصيح اااخ جلال صوت رمي الرصاص اختلط وية الاصوات المفزوعة للبنات كنت لازم المقود بأثنين ايدية دايس عالبانزين منطلق بأقصى سرعة احاول ابتعد عنهم حرگت الطريق حرگ. كنت اسوق وبنفس الوقت اباوع بالمرايا الامامية اشوف اذا هم وراية بعدهم ما بينوا تركت اثنين من الدواعش اتوجهوا لسياراتهم حتى يلحگوني اسوق وعيني على الساعة احسب الوقت وانا حابس انفاسي . منتظر اسمع دوي الانفجارات بأي لحظة كنت اردد بصوت ناصي قلق.. يالله حانت اللحظة الحاسمة يالله .. يالله.. يالله. .. يالله كنت اردد الكلمات مثل التسبيح وهناااااااااك وجان اسمع احلى صوت بحياتي صوت الطيارات والانفجارات جنت كل يوم احلم بهاي اللحظة الحلم تحقق وانا هسة اسمع صوت الانفجارات الي كانت اشارة تعلن بيها عن النصر القادم والاخذ بالثار كنت اسمع الصواريخ وهي تضرب المقر الرئيسي لداعش وتفجره علت صرخات البنات المرعوبة خايفات من صوت الانفجارات ميدرون شنو الموضوع. اما انا فكانت اصوات الانفجارات بالنسبة الي مثل اغنية وطنية حماسية تحتفل بلحظات النصر باوعت بالمرايا دخان الانفجار وصل للسما استرديت انفاسي وصحت بصوت عالي منتصر وانا عيوني مدمعة .. ررررررررررند رنين اسرررررراء سلواااااان مصطفى حنوش اليوم اخذت بثاركم وانتقمت من الي سلبوا ارواحكم جنت اهتف واحجي بصورة هستيريا البنات طلعوا من اماكنهم يباوعون علية خايفات ومستغربات حالتي وهَنا سألتني بصوت مرعوب .. جلال عفية گلي شنو ديصير. كنت مستمر اسوق بكل سرعتي باوعت على هنا وخواتها ااشرتلهم يصبرون ويلتزمون بالهدوء بعدها مهمتي وية البنات ما خلصت اريد اوصلهن لبر الامان انا كنت مخطط الزم الطريق الي يوصل لخارج مدينة الموصل وما جنت حاسب حساب التأخير الصار ويانا بالبوابة. ما اعرف منين طلعلنا هذا الحارس العكرة القذر واخرني. واخذ من وقتنا وعرقل علينا الهروب اخرنا حوالي ربع ساعة واني كل دقيقة عندي من ذهب لذلك غيرت طريقي متوجه ناحية اقرب قرية حتى ننزل انا والبنات ونحتمي بيها قبل لا تدركنا الطيارات الحربية وترصد حركتنا لان الغارات الجوية يضربون شكو هدف متحرك الوقت جاي يداهمني وصار عندي سباق وية الزمن احس بالزمن لازم سيفه علية عبالك جلاد منتظر اللحظة الاخيرة حتى ينفذ الاعدام لازم اترك السيارة بأسرع وقت لانها كانت وحدة من سيارات الدواعش وراح اصير هدف للقصف سمعت صوت الطيارات الحربية لا يالله دخيلك خففت السرعة حتى اكدر اوكف وكفت و ركنت السيارة هذا الي كدرت اوصله اقرب نقطة دالة على القرية التفتت على هنا وخواتها وصحت بصوت امر استعجلهن .. بنات بسرعة نزلوا من السيارة. ما انطيتهم مجال يحجون فتحت الباب بسرعة ونزلت من السيارة خطية وهن ما ناقشن ولا سألني ليش من شافني نزلت بسرعة نزلن وراي يتراكضن كنت خايف على هَنا حامل خاف ما تكدر تركض رجعت عليها وانا استعجلها .. هنا دخيل الله بسرعة ركضي خواتها الصغار سبقونا بس زينة بقت لازمة اختها تهرول بيها بين الاشجار اني نزلت ركضت شوية ووكفت اتفقدهن وااشرلهم على اتجاه الطريق الي يوصل للقرية انتظرت البنات يركضون كدامي بمسافة. اريد اتخلص من هذا الزي المشبوه قبل لا يتشتبهون بية. اتوقفت يم شجرة حتى انزع كنت مسوي حسابي من اطلع من يم داعش ولبست ملابس عادية تحت الزي الافغاني نزعت السروال الاسود عالسريع كنت لابس جواه جينز وبديت افتح دگم القميص بسرعة. لكن فجاءة. انصعقت مصدوم بضغط انفجار السيارة ما حسيت على روحي الا وانا مطروح بالكاع على وجهي مكطوع الانفاس نور خبر استشهاد منتظر ابن خال مهيمن وگع على روسنا مثل الصاعقة حلت علينا الفاجعة وهزت اركان صبرنا وسلبت منا الامل وزادت معاناة خوفنا على مهيمن بجيت وحزنت على منتظر وشبابه وكسر گلبي حال امه وخواته واخوانه وابوه الي كان محني الظهر حتى ما بي حيل يمشي من شفت البنات يبجون لفقد اخوهن اتذكرت اخوي مهيمن كنت حاسة بيهم لان اعرف الاخو شلون عزيز بساعتها انهاريت من البجي وصرت اصيح اسم الله على اسمك ياخوية مرت الايام وخلصت ايام العزاء والناس توشحت بالسواد واتعلگت صورة الشهيد براس الشارع وهو بالزي العسكري حاله مثل حال الشهداء الي سبقوه كانوا كلهم قرابين ارض الوطن بهاي الفترة اني والبنات كنا نمر بحالة خوف وترقب وخالة زهرة من ذاك اليوم لهذا اليوم وهي بعدها متأثرة بفقد ابن اخوها وصارت تنعي فقد مهيمن لوحدها من غير ما تحس مرات اسمعها تبجي وتكول تكول يمة مهيمن اشو اتأخرت علينا وطالت الغيبة ما تگول هاي امي الحنينة ارجع ابرد گلبها صرت اندعي بگلبي .. ربي لاتفجعني بأخوتي وتخلي وجهي فاهي بمصابهم وردهم الي سالمين ربي انت تعلم بحالنا كضينا العمر واحدنا ما يعرف بالثاني كلمن عايش بديرة حتى ما لحگت اتهنى بيهم اسألك ربي تدفع عنهم كل مكروه وتجمع شملنا انا واخوتي مرت مدة واحنا على هذا الحال لكن ريم صدمتنا اليوم بموقفها جانت راجعة من الكلية وشايلة بيدها باكيت جبير بالحجم عقدت حواجبي مستغربة هذا شنو دخلت للمطبخ وراها حور تباوع لريم بنظرات متعجبة اسمعها تكوللها .. شنو ريم شبيج شنو تحسين ريم كانت الابتسامة مرسومة على وجهها ابتسامتها جانت اول بادرة للحياة وسألتني .. نور خالة زهرة وين جاوبتها وانا اباوع عليها وااشر على الهول .. خالة هناك كاعدة عافتني وراحت كملت طريقها حور كالت .. ولج ريم انتي من صدك تحجين رحت وراهم اريد اشوف شنو الموضوع لكيت ريم كعدت كدام خالة زهرة وبدت تفتح الباكيت وطلعت من عنده. فرشة عرس بيضة. كانت كلش فخمة نظرات خالة زهرة كانت تتنقل بين ريم والفرشة وسألتها بصوت واهن وكالت.. خالة هاي شني الفرشة ريم جاوبتها وهي مبتسمة .. هاي فرشة عرسنا اني ومهيمن اباوع لخالة زهرة نزلت دموعها لا ارداياً اختنكت بالكلام .. عرسكم !! ريم جاوبتها وبعيونها نظرة اصرار وكالت .. اي عرسنا اني ومهيمن اني قررت من اليوم ابدي اجهز لعرسي. كالت بصوت تعبانة.. يايمة ياجهاز عرس هذا الجاية تحجين عنه وانا ابني ما ادري بي عايش لو ميت ريم جاوبتها .. شوفي خالة. انا ما راح ابقى اسمعج تنعين ابنج وتلبسينه ثوب الچفن وهو عريس واحط ايدي على خدي ام مهيمن سألتها .. ولج خالة شتردين مني .. اريدج تنفضين عنج غبار الحزن وتجهزين وياي لعرس مهيمن شنو انتي مو خطبتيني لابنج يعني شوكت ناوية تفكرين تاخذيني وتجهزيلي ترة اني ساكتة طول هاي الفترة وصابرة لخاطرج بس مو معناها تحرميني فرحتي بتجهيز عرسي .. على فكرة اني قررت اطلع اختارلي غرفة نوم وخلي ببالج اذا ماتجين وياية براحتج اني اروح بدونج واذا شفت غرفة حلوة وعجبتني گبل اشتريها مو تكولين خالة زهرة شهكت وكالت.. خايبة ولج شو گمتي تخبصين تردين تختارين غرفة وليدي بكيفج. وچا وانا وين وليت خايبة بعدني ما متت وكعدتي تلعبين انا حالفة غرفة وليدي انا اشتريها بنفسي شنو قابل هي هيتة واخليج براحتج تختارين وهنا بينت بوادر الحياة عند. خالة زهرة. وريم ابتسمت بنصر وگالت .. اني گلتلج براحتج اذا انتي هيج ملتهية بالحزن ما فارغة تجهزين وياي مو مشكلة اني ابدي اجهز من هسة واختار الجهاز على ذوقي لان مهيمن حبيبي يموت علي ذوقي اباوع لخالة زهرة نطت عيونها وكالت .. خايبة العوبة هو ابني قبل لا يصير حبيبج. وكضى طول عمره يعجبه ذوقي شنو يعني الي اجة. من تالي عگبك حور گلبت عيونها وگالت .. اهوووو اشتغلت رحمة الله. وراح تبدي ملاحم العمة والجنة وتعال شيخلصنا جاوبتها واني ابتسم .. ونوب شلون اثنين وحدة نار والثانية بانزين. كانت مبادرة ريم شمعة امل ضوت بالبيت كدرت تسحب استجابة من خالة زهرة. ثاني يوم خالة زهرة طلبت من عناد ياخذهم للمعرض هي وريم حتى يشترون غرفة لمهيمن خافت من ريم لتسويها وتجيب الغرفة فوك راسها وهي كاعدة وصدك اخذهم عناد بعد يومين لمعرض الاثاث واشتروا غرفة وبدت خالة زهرة. وريم يأثثون الطابق الثاني صحيح كانت الطلعات يتخللها تضارب بالاراء واغلب الاحيان اختيار ريم هو الي يتنفذ بالاخير بس بعدما تطيح وصلة من لسان ريم وحور يالله تقتنع خالة تسوي الي يردونه دك نقالي وكان المتصل رغد اخت عناد رديت عليها وسلمت وبعدما تبادلنا بالسلام والسؤال عن الاحوال فاجئتني بكلامها .. نور حبيبتي. عناد بلغني اكلج تبدين تجهزين نفسج للعرس لان قرر بس ينزل مهيمن مجاز يسوي العرس عقدت حواجبي مستغربة هذا شنو قصده ليش هيج يسوي جاوبتها وگلت .. رغد وليش مو حضرته هو يتصل علية بنفسه ويگلي هذا الحجي شنو راح نعرس بالمراسلة رغد كالت.. هو هذا الي محيرني اتصلت عليج وانا مستغربة من طلبه واحتاريت اكثر من كلي اتصلي على نور نور ولو اني ما احب اتدخل بس ممكن اعرف شنو الي كاعد يصير بينج وبين عناد لان الكل. منتبه عليه صاير نار كبرة وما يتحاجة والاغرب من هذا حتى امي عجزت وياه واحتارت شلون تطيح على علته كعدت احجي لرغد عن الي صار بيني وبين عناد لان رغد بهاي الفترة الفاتت كانت.مثل الايد الي تطبطب على اكتافي ودائما تسأل عن احوالي عكس استاذ عناد ابو راس اليابس بعدما خلصت كلامي رغد كالت.. نور اخذيها مني نصيحة عناد اخوي وانا اعرفه كلش زين مستحيل يجيج متعني ويعترفلج بخطأه لو على گص رگبته ما سواها قبل ولا راح يسويها هسة ابو طبع ما يجوز من طبعه ويبقى يتهرب او يتجنب الشخص الي عنده وياه مشكلة الا واحد يجي ويواجهه بأخطاءه ويحطها بوجه رغد جانت تحجي واني افكر بكلامها جاوبتها .. والحل .. الحل عندي بس اريد منج تصيرين قوية وكدها وتساعديني وتبقين وياي للاخير مهيمن جنت انا ومجموعة من الجنود نمشط المنطقة ونطهرها من الدواعش بعدما شنت الغارات الجوية قصفها على مواقع الدواعش اتقدمت قواتنا كنت احجي باللاسلكي وية الضابط اتلقى الاوامر بلغني اتوخى الحذر انا والجنود من دخول البيوت المهجورة لان احتمال يكون الدواعش مفخخين البيوت ويسوها كمين للجنود العراقيين وعباس كان سابقني بمسافة جبيرة باوعت عليه كان متوجه يريد يدخل لواحد من البيوت صحت بصوت عالي استوقفه ما يتقدم بس اصوات القصف غطت على صوتي دخل للبيت من غير ما يسمعني رحت اركض فاقد مثل المجنون بتجاهه وصلت مسافة عالبيت وجان ........ يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 09:44 AM
| #75 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت الثالث والأربعون ج2 مساء الخير عليكم جيمعاً اينما كنتم اللهم استودعك والعراق واهله من كل سوء وفتن من كل حرب ومحن فسلاماً مني اليك ايها الوطن الشامخ 🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶 مهيمن جنت اركض واصيح بصوت عالي مثل مجنون فاقد عقله بس صوت القصف غطى على صوتي وصلت مسافة عن البيت وجااان يتزلزل المكان كله بأنفجار مفزع الكاع ارتجت من تحت اقدامنا اباوع للجنود الي كدر يلحگ يحتمي والي ما لحگ يحتمي مثل حلاتي صارت حصته شضايا كلمن هو وحظه. بيهم الي كان واكف بمسافة قريبة عالبيت وبيهم الي كان بعيد عنه وبعد الانفجار مباشرةً صارت الشظايا تتطاير وگامت الغبرة لكيت نفسي واكع بالكاع على وجهي والشظايا والاحجار كانت تتراشك علينا انا والجنود كنت احس بأشياء طفيفة من الشضايا تترامى على ظهري بس ما كدرت تخترق السترة الواقية ضد الرصاص هي كانت مجرد لحظات مو اكثر وراها انجلت الترابه رفعت راسي بسرعة اعاين على البيت شهكت بغضب صحت بصوت مفجوع من المنظر وانا احاول انهض من مكاني .. لااااااا يااا الله دخيلك عباااااس صراخ الجنود والشباب يتراكضون وسيارة عسكرية همر وكفت قرب مكان الانفجار رحت وراهم على مكان البيت جنت امشي واتعثر بخطواتي من غير ما اهتم بالالم الي كان يخترق رجلي عبالك سجين نابتة بفخذي. وذبيت حملي عالرجل الثانية راص على اسناني من الوجع كنت مو بحالة وعي لوضعي ووصلت يم البيت واجتازيت الجنود الواكفين يمه وكملت طريقي لداخل البيت جانت نار الانفجار بعدها تلهب بالداخل كنت فاقد اصيح بصوت منكوب .. ولكم عباااااااس هنا دخل. !!! واحد من الشباب اعترض طريقي يمنعني ادخل .. يمعود اتخبلت وين تريد تروح ؟؟ كان حاجزني ما يخليني اروح عالبيت كلتله بأمل واهن ضعيف وانا ااشر وراه .. ولك خليني افوت شفت عباااس دخل هناك . جاوبني وكال وبعيونه حالة اسف وحزن .. شكله عباس سبقنا ونال الشهادة قبلنا عجزت وانا احاول ابعد الشاب عن طريقي حتى ادخل واشوف عباس بعيني بس غصب عني انهاريت وخانتني قوتي لگيت روحي مستند على صدر الشاب بلا حول ولا قوة رجلية بعد متگدر تشيلني كعدت بالگاع شكد جانت علية صعبة وكلفة من تهل العين ويصب دمعها بس اليوم ياعين صبي عالغمضت عينه واخذته المنية صحت مستسلم .. ولك عبوسي ابو الغيرة شبيك استعجلت عالموت. جنت احجي وانا اعاين على بقايا البيت المنهار شهكت بصوت واهن ضعيف اناشد البيت .. ولك يابيت المنية گلي وين الجاك متعني اشو ما بيّن بعد ولاجن مر عليك الضيف عبااااااااااااااس .. عبااااااااااااس .. عبااااااااس گوم امشي وياي ياحيد خل نرجع سوية نكمل الشدات تباريني واباريك اختلطت دموعي وية الدم وضاعت علية المواجع صرت ما اميز بين الم جرحي من الم حزني غمضت عيوني بتعب سمعت الشاب ينادي بصوت عالي على فريق المسعفين .. شباااااااب تعالوا بسرعة سقط عدنا بعد جريح هنا فتحت عيوني اتلفت ادور عالجريح وينه اكيد واحد من الشباب الي كانوا وياية متصوب ياربي لا تفجعني بواحد ثاني جنت بعدني متكيء عالشاب سألته ..وينه الجريح باوع علية وكال .. شكلك بعدك ما حاس بجروحك ماتدري بروحك متصوب اتذكرت الوجع دنگت اباوع لرجلي لگيتها متصوبة بشظية شاكة ملابسي ونابتة بلحم الفخذ والجرح غركان دم حركت ايدي حتى الزم مكان الجرح وجان اصيح بصوت مجوع شكلي متصوب بكتفي وصلت سيارة عسكرية حتى تنقلنا انا المصابين نزلوا الجنود من السيارة الاسعاف العسكرية وانتشروا بالمكان اتوزعوا عالشباب المتضررين وانا واحد منهم غمضت عيوني دايخ شكلي راح انام بس فتحتها اعاند روحي بكل عقلي متعشم اشوف عبيس كاعد اعاين على المسعفين دخلوا للبيت جنت اتمنى عندي القوة واروح ادخل وياهم بس ما اكدر اشيل لا ايد ولا رجل وباقي بس الساني يتحرك حجيت وية الشاب وطلبت منه .. ولكم رايد اشوف عبيّس جنت من كل عقلي كاعد اناشد المُحال الشاب غمض عيونه بحزن وگال .. منين اجيبلك عباس اذا هو صفى كومة لحم الله وكيلك ضاعت اوصافه واتغيرت معانيه فما انصحك تشوفه لان احتمال اذا تشوفه تفقد عقلك كان يحجي الشاب وعيونه راحت وراي التفتت درت وجان اشوف المسعفين شايلين بقايا اجزاء جسد كان الدم مختلط بملابس الجيش المرقطة الممزقة كان هالشي الوحيد الباقي من عبوسي هزيت راسي ما مستوعب المنظر جان كلش هواي على عقلي يتحمله .. لاااااااا ياربي دخيلك. احس عيوني غامت وظلمت الدنيا بوجهي وصرت اهلوس بالحجي اجة المسعف وكعد بالكاع يتفحص بجروحي بعدها فتح عيوني المغمضة يفحصها والتفت بسرعة ونادى .. بسرعة شباب جيبوا النقالة بالعجل المصاب اصابته بليغة ولازم نتلاحگله محتاج دم هواي فاقد. دم حسيت عليهم شالوني بالنقالة وانا على حالي بلاحول ولا قوة جلال كنت واكف بمفترق طرق محتار اي طريق اختار اسلك بيهم شفت مهيمن واكف بواحد من الطرق جان يباوع علية بخوف وهو ينزف وگلي بصوت يتوسل .. ولك جلال تعال اسندني ياخوي انهد حيلي راح اوگع كلبي انتفض ردت اروح لمهيمن اساعده بس استوقفني صوت رنين ورند يصيحوني بأصواتهم الطفولية جانوا واكفات بالطريق الثاني كانت نظراتهم بيها سعادة وراحة وفرح عمري ما شفتهم هيج فرحانين بكد هاي اللحظة يباوعن علية وكالن .. يالله جلال تعال ويانا ليش واكف شنو تنتظر لگيت رجلية ماخذتني بتجاه رنين ورند كان طريقهم يغريني اروح وياهم كلش حلو اريد اشوفهم مشتاقلهم بس اشو فجاءة اتوقفت رجلي عن المشي ما اكدر اوصل للبنات عقدت حواجبي مستغرب شنو ليش اتوقفت ليش ما اكدر اتقدم دنگت اشوف شنو سبب عدم حركتي وجان اشوف حبل مقيدني يمنعني اتقدم كان الحبل مربوط بخصري التفتت معصب منو هذا الرابطني هيج بالحبل جانت عيوني تتبع الحبل الممدود جنت اريد اعرف من وين امتداده ومنين جاي اريد اعرف منو لازم بطرف الحبل وهيج يجرني للخلف ويمنعني اكمل طريقي وهناك من بعيد شفت نور اختي هي الي لازمة الحبل بكل قوتها وتسحب بي لدرجة صرت ارجع للخلف متعثر وضغط الحبل على خاصرتي كام يأذيني ما اكدر اتنفس صرت اقاومها اريد اتخلص من الحبل المربوط على خصري لان حيل اذاني يضغط على انفاسي فجاء وجان افتح عيوني على وسعهن وشهكت بصوت مفزوع اريد اخذ انفاسي من گد الالم لگيت نفسي بغير مكاني متمدد و رجال واكف بصفي بقيت افتح بعيوني وارجع اغمضها اريد استجمع تركيزي انا وين وهذا الرجال منو وشنو كاعد يسوي انتبهت عليه جان يلف شي على جذعي شنو الموضوع عقدت حواجبي انا وين باوعت بالمكان بتعب ورجعت غطيت بالنوم ما عندي قوة وراها رجعت اتحامل من جديد اريد افتح عيوني انيت بألم وانا افتح عيوني للمرة الثانية بس هالمرة طلت علية اربع وجوه بعيون ملونة مثل القطط. يباوعون علية بأمل للحظة صفنت بوجهم مستنكر وجوههم بعدها اسعفتني ذاكرتي (هنا وخواتها ) هَنا كالت بصوت بي فرحة .. واخيراً رجعتلنا خوفتنا عليك تصدك فقدت الامل برجوعك للحياة عبالي متت وتركتنا حجيت والصوت بالگوة يطلع .. ليش هو شنو الصار وانا وين اتغيرت نظرات عيونها للالم وجاوبتني .. جلال الطيارة قصفت سيارتك وانت وگعت عالارض جثة هامدة. اني والبنات كنا نركض مثل ماانت كلتلنا بعدين سمعنا صوت الانفجار صرنا نصرخ بخوف وصرنا نركض بسرعة نريد نبتعد عن القصف خاف يشوفونا الطائرات بس افتقدتك بعد لان ماشفتك بينت ورانا اتوقفت بمكاني وگلت للبنات .. بنات اوكفوا انتظروا اشو جلال ماكو رفضت اكمل طريقي قبل لا اتأكد من وجودك ويانا ورجعت لمكانك وگلت لزينة .. انا راجعة اشوف شنو سبب تأخيره خاف صار بي شي تركت زينة تصيح وراي تريدني ارجع واني استمريت امشي صحيح خايفة بس كنت استمد قوتي من انادي بأسمك .. جلال. . جلاااااااال .. جلااااااال بس فجأة جمدت بمكاني مصدومة كنت واگع عالارض وتنزف حتى ما اعرف منين مصدر النزيف هي جانت تحجي وانا عقلي بدا يسترجع الاحداث المرعبة داعش الهروب والقصف الجوي وعصف الانفجار وصياح البنات. اخر لحظات اتذكرها كانت هَنا تصرخ بصوت عالي .. لااااااا جلااااااال اجوي البنات يركضون على صراخها حسيت بيها كعدت يمي على الكاع وصارت تجس نبضي شكلها تريد تتأكد مني عايش لو غادرت الحياة جنت احس بحركتهم واسمعهم بس مااكدر حتى افتح عيوني او اجاوبهم حتى صوت انين من الالم ميطلع مني كانت هنا تحجي وية خواتها الي كانوا يطلبون منها تتركني ويكملون طريقهم بس هي بقت مصرة اسمع اختها زينة تستعجلها وهي خايفة .. هَنا عوفي جلال عفية اتحركي بسرعة لازم نهرب اذا بقينا هنا نموت كلنا .. لا مستحيل اتركه وهو بهيج حالة ومحتاجنة احنا هربنا كلنا سوية وهو جازف بروحه علمود ينقذنا ويخلصنا من الدواعش هذا كل الي اتذكره قبل لا ادخل بنفق مظلم حتى ما اسمع صوتهم ارتعد گلبي وانا اتذكر الانفجار وشصار بية باوعت لهنا وسألتها .. زين هسة احنا وين شلون وصلت لهنا جاوبتني .. مو بوكتها طلبت من البنات وكلتلهم اني ابقى يم جلال وانتوا روحوا للقرية وطلبوا منهم المساعدة وأكدت على البنات يكولون للناس انت اخونا احتياط امني لان كنت خايفة وما متأكدة من المنطقة الي احنا بيها تحت نفوذ داعش لو خارجها ولا اعرف اصحاب القرية وياهم لو ضدهم فگلت اتوخى الحذر نزعنا عنك الزي الافغاني وشكلك انت كنت مسوي حساب للهروب كنت لابس جينز و قميص ملون وبعدها البنات راحوا وكدروا يجيبون وياهم رجال جبير حتى يساعدنا. وصدك اخذنا وياه للبيت وطلب من جارهم المضمد يضمد جروحك اتحركت شوية ونغزني جذعي من الالم بديت استكشف مكاني اباوع منا ومنا كانت غرفة متهالكة سألتها .. وهسة احنا وين بالضبط جاوبتني بصوت ناصي.. احنا بمزعة الرجال لان صادف انت وگعت جريح على ارضه اباوع عليها نصت صوتها وحجت بحذر وكالت .. جلال دير بالك تجيب سيرة داعش هنا ولا تخليهم يعرفون بيك انت واحد من عناصر داعش سألتها.. ليش جاوبتني بنفس الصوت الناصي الحذر .. سمعت من الناس الي ساكنين هنا ان هاي المنطقة صارت تحت سيطرت القوات العراقية وهسة هم مسوين حملة تطهير المنطقة من الدواعش يعني اذا عرفوا بيك داعشي صدگني تروح بالرجلين ويقتلونك خطية كانت كلش خايفة سألتها .. ليش انقذتيني مو انا داعشي قذر .. جلال الايام الي عشتها وياك خلتني اعرفك زين صحيح انت كنت تنتمي لداعش وتعمل وياهم بس كل شرور الدواعش ما كدروا يقتلون بذرة الخير الموجودة بداخلك كعراقي والظاهر هاي البذرة بدت تنمو وتكبر لحد ما خلتك تنتفض وتقرر تتركهم وتهرب منهم ومو بس هربت نفسك انت ساعدنا وهربتنا وياك وهذا موقفك خير دليل لرجوعك لوعيك الصائب رجعت عراقي اصيل ترفض الداخلين علينا اجانب من غير بلادنا يغدرونا ويريدون موتنا لذلك اني حبيت انقذك وانطيك فرصة حتى ترجع لحياتك وتعوض ما فاتك ابتسمتلها بتعب كنت بعدني عندي هواي كلام اريد احجي بس غصب عني لگيت نفسي تحت سطوة النوم ورجعت غطيت بالنوم ريم مرت الايام على وفاة منتظر بس خالة زهرة بقت متقوقعة بداخل شرنقة حزنها ترفض تطلع منها كانت حزينة على ابن اخوها وبنفس الوقت خايفة على مهيمن وصل بيها الحال بالحزن صارت تنعي ابنها وتبجي وهالشي حطم اعصابي وزيد مخاوفي فوگ ما اني خايفة. يعني حتى هم بنفسهم اهل منتظر بدوا يرجعون لحياتهم الطبيعية ويستسلمون للامر الواقع كم مرة تتخربط صحتها وحور حجت وية خالها حسن طلبت منه حتى يحجي وية امها تبطل نوح وتتفائل بسلامة مهيمن وهو هم خطية اجة وصار يحجي عليها حبيت كلامه وياها من يكللها .. زهرة خوية ما يصير الي كاعد تسوينه حرام اذا زاد النعي عن حده وكثرة البكاء والنوح لدرجة المرض يسمونه جزع واعتراض على امر الله واحنا يابعد اخوج ناس مؤمنين بأمر الله والمؤمن مبتلى. الله اذا احب عبداً ابتلاه والحمدلله احنا كدرنا نتواصل وية ناس يطمنونا على مهيمن وحتى بلغونا راح ينزل مجاز بأقرب فرصة بس رغم هذا الخبر ما كدر يبرد گلب خالة زهرة ولا كدر يطلعها من حزنها تگول دائماً احلم بي يرمون على مهيمن ويصبونه من شفت ماكو نتيجة بوكتها قررت ماعندي حل ثاني الا استفزها حتى ادفعها واحطها امام الامر الواقع تبدي تجهز لعرس ابنها اعرف هذا الشي راح يخليها تنشغل عن حزنها شوية ويرفع معنوياتها احسن ما تظل مگابلة الاخبار وكاعدة تاكل بروحها ام مهيمن بهاي الفترة حياتها كلها تدور بس حول ابنها. نست بنتها اهلها جيرانها اريد مهيمن من يرجع على الاقل يلگة صحت امه زينة مو منتكسة. وفعلاً هالشي جاب نتيجة. وياها. خطية اباوع عليها كانت متلهفة تجهز لعرس مهيمن بس مترددة ومستحية من اخوها وبوكتها اترخصت من اخوها حسن. حتى تشتري غرفة لمهيمن لان اني اصريت اكمل غرفتي وهو كاللها .. خوية زهرة ماله داعي تستأذنين مني علمود تجهزين ابنج هَـاي سنّة الحياة وهذا حال الدنيا ماكو شي يتوقف والحياة تستمر واحنا نكمل طريقنا وانتي ربيتي وصبرتي وتعبتي الى ان اقتنع و وافق مهيمن يتزوج فجهزي ابنج وفرحي بي وبالمبارك عليه وعليج والحمدلله مرشهرين على التجهيزات لان كان عندي دوام يعني مو كل يوم اكدر اطلع اشتريت الغرفة وبدينا تنصيبها. وكل فترة نطلع نكمل شغلات الغرفة صحيح خالة زهرة صعبة الاقناع. وهواي تعامل. من تريد تشتري ومرات ما نتفق اني وياها على شغلات هي تعتبرها مهمة واني اشوفها مو ضروري واصلاً تخرب ديكور الغرفة بعني مرة تجيني تگولي لازم اسوي نضدة فراشات ومخدات وبطانيات فوك الكنتور اجيت انجلط الا شوية الى ان قنعناها انا وحور وكعت وصلة من الساني يالله اتنازلت عن هاي الفقرة الجميلة صحيح هي هواي تعارض بس الكلمة الاخيرة الي بس الحقيقة بعد عملية اقناع متعبة ابتسمت .. يالله اتعودت عليها جنت لازمة ملزمتي ما اربد ااثر على دراستي اريد مهيمن يرجع ويلكاني ناجحة. طالت فترة غيابه علينا والگلب فاض بي الحنين والاشواق اعد الليالي والايام وحتى الساعات مكنت سرحانة بأفكاري وكاعد اگلب بالملزمة گدامي من غير ما انتبه عليها مرت من يمي نور وجانت تدردم معصبة تحجي وية نفسها اهووو هسة هاي الثانية بعدها هي وعناد متزاعلين تركت الكتاب ورحت وراها اسألها .. شنو شبيج تنافخين شنو صاير جاوبتني وهي ترگع بالكاونتر ترجع بالصحون الي غسلتهم قبل شوية .. بعد شنو يصير بية اكثر من الي انا بي اخواني بنص الخطر وما اعرف وين اراضيهم واستاذ عناد حضرته مكلف اخته رغد تبلغني حتى ابدي اجهز نفسي للعرس علمود يكون زواجنا اول ما ينزل مهيمن مجاز يعني اتخيلي حتى ما كلف نفسه يتصل يكولي بنفسه ياعمي بلا الاتصال يراسلني على الاقل ويبلغني بقراره. لا هو حضرته دز اخته هي الي تگولي والله ليش لان حضرته بعده زعلان وماخذ موقف مني من الصار بذاك اليوم بسالفة امير حضرته كاعد يكابر وكرامته ماتسمحله يتنازل ويحجي وياي سألتها .. وانتي شنو گلتي لأخته .. اكيد رفضت واعترضت وحجيتلها عن زعلنا .. ورغد شنو گالت .. طلع ما عندها اي علم بطناگير اخوها. تصدگين ريم هو حتى اهله ما عندهم علم بزعلنا اني وياه بس مستغربين عصبيته وغضبه الزايد بداخل البيت اباوع عليها شلون كانت ترجف وتحجي دمعتها بطرف عينها اخذتها وكعدتها وكلتلها .. حبيبتي اهدي خلينا نفتهم وگوليلي انتي شنو الي مزعلج ترة عناد حقه صبر هواي ويريد يتزوج جاوبتني بتعب .. يعني هو ما يشوف وضع اخواني ليش مايقدر ظروفي وربي الليل كله ما تغمض عيني خايفة عليهم وافكر بيهم وادعي الله صبح ومسية يسلمهم ويرجعهم بالسلامة معقولة ما يأثر بي هذا الشي ومايحس اني مصدومة من تصرف عناد احس بي اناني هو حتى ما اخذ رأيي بالموضوع وفوگ هذا كله مستعجل الاخ جاوبتها واني امسد على ايديها .. هاي ما يسموها انانية هاي يسموها لهفة تلگينه حس بالتهديد من ظهور امير بحياتج اي صدك ما گلتيلي رغد شنو كالت من عرفت بموضوعكم جرت حسرة وكالت .. اصلاً ما استغربت موقف اخوها لان تعرف بي راسه يابس وما يعترف بخطأه بعدها رغد كعدت تحجي وياي عن اخوها تريدني اجي لببيتهم واواجه عناد بغلطه بحقي بخصوص امير واكعد اتفاهم وياه عن تأجيل التجهيز للعرس وعزمتني على طهور ابنها راح تسوي حفلة طهور ببيت اهلها صحيح عزمتكم كالت تعالي انتي والبنات وهناك من تجين احجي وياه كلتلها بتشجيع .. حلو هذا خوش حجي. وانتي. شنو قررتي .. ما اعرف مترددة. جاوبتها بأصرار .. لاااا ماكو شي اسمه مترددة اذا ما واجهتي عناد هسة وبقيتي كاعدة هنا زعلانة مثل البومة فلا تنتظرين من عناد بعد يسويلج اي حساب منا ورايح . لاتخلين يهمش دورج انتي نصفه الثاني يعني شريكة وياه بكل شي الي راح يجري عليه يجري عليج فما يصير يتخذ قرار يخصكم اثنينكم لوحده بدون ما ياخذ رأيج جاوبتني وعيونها بدت تلمع بأصرار .. خلاص اروح واحجي وياه حتى احط النقط على الحروف ونشوف شنو تاليها وية استاذ عناد نور واكفة يم ريم وحابسة انفاسي وگلبي يدگ حيل منتظرة يفتحون الباب كل شوية اسأل ريم .. اكول ريم شنو تكولين هسة عناد موجود بالبيت لو طالع ريم گلبت عيونها وكالت .. اكول ست نور ما بقى شي ويفتحون الباب وتعرفين بعناد موجود اولا سمعت صوت خطوات تتقدم للباب البارحة بالليل بعدما عزمتني رغد على حفلة طهور ابنها گلت لخالة زهرة علمود تجي ويانا تغير جو بس هي وين رفضت رفض قاطع ما قبلت تجي كالت .. خالة روحي انتي والبنات وخلوني هنا انا مو بحال هاي السوالف وسلميلي على ام عناد واعتذريلي منها وحور هم رفضت تجي ويانا وهاي البنية هواي اتغيرت احوالها من بعد سفر مهيمن وجلال واغلب الاحيان تدرس حتى مرات احسها تتخذ من الدراسة حجة حتى تتهرب من واقعها ومخاوفها اتصلت على رغد وطلبت منها تبلغ عناد وتنطيه خبر اني راح اجي لحفلة الطهور حتى يكون عنده علم بخروجي من البيت وكالت .. اوك راح ابلغه وبعدها اني وريم جهزنا نفسنا وخالة زهرة طلبت من طالب يوصلنا لبيت الحجي ابو حيدر اباوع للباب واسمع صوت الخطوات انفتح الباب وطلت علينا رغد والابتسامة منورة الوجه سلمت علينا وبعدها صرت اتنقل بالسلام من واحد لواحد لحد ما وصلت اسلم على ام عناد الي كصتني بنظراتها من فوگ لجوة عبالك جاي تقيم بضاعة وسألتني على ام مهيمن واحوالها جاوبتها بكل تحفظ بعدني ما اكدر اخذ راحتي وياها بالكلام دخلنا بالهول مزينين البيت بالزينة والنشرات الضوئية اجواء الاحتفال تشع من كل مكان كعدنا اني وريم يم البنات كانوا الكل جايين وشكل حفلة الطهور بس للبنات يعني ماكو رجال بس حيدر ومر من يمنا وسلم علية وطلع من البيت اما عناد لحد الان ما بين كل شوية اباوع للباب بلكي اشوفه رغم الزعل الي بيني وبينه بس گلبي بعده يحن لشوفته ويشتاق لسماع صوته صافنه بغير عالم حسيت على ضربة كوع ريم بخاصرتي باوعت عليها .. شكو خير ليش لكزتيني جاوبتني بصوت ناصي بقلة صبر .. ست نور اتحركي اتلحلحي گومي وية رغد وسوي نفسج تساعديها بالتقديم ثبتي وجودج ببينهم. بينيلهم انتي مسيطرة فرضي شخصيتج لاتظلين گاعدة عاقلة جنج طالب بصف اول ابتدائي و اول يوم له بالدوام ابتسمت عالتشبيه وكلت .. عابتلج ريم ما اعرف منين جاي تطلعين بهاي السوالف عبالك مرية عجوز باوعت لرغد كانت شايلة الصينية وتريد تطلع من الهول صحتلها ونهضت من مكاني وكلتلها .. رغد اخذيني وياج اساعدكم على الواهس وية البنات ابتسمت وكالت .. حبيبتي ما تحتاجين تكوليلي ولا اني اكولج حتى تساعدين هذا بيتج انتي تجين وتفوتين بدون رسميات ابتسمت وجاوبتها بأرتباك .. هو غير من الذوق استأذن شلون بالله ضحكت وكالت .. فديتج كلج ذوق بس بالشغل والمساعدة خلي على صفحة يالله تعالي وياي راحت دخلت للمطبخ واني دخلت وراها لكيت كم بنية من اقاربهم كانوا بعمر اخت عناد الصغيرة بالبداية كنت مترددة بس بعدين انطلقت وية البنات سوالف وضحك دخلت ام عناد وشافتتي اضحك وية رغد واحضر وياها صواني التقديم باوعتلي متعجبة وكالت .. هاي شنو طلعتي تعرفين تضحكين اختفت ابتسامتي من على وجههي وبهت لوني من سؤالها رغد سألتها.. شنو يوم اشو تحجيها وانتي مستغربة .. مو اتعودت شوكت ما اجيها الكاها حاطته عالصامت والله عبالي متعرف شي اسمه ابتسامة ومجاملة رغد جاوبتها وهي تضحك وباوعتلي .. والله يا امي عليج سوالف هسة هي غير جديدة وتستحي انتبهت لرغد كان شكلها تريد تلحم الموضوع محرجة من امها بدت اصوات المولود والاحتفال ورغد التفتت علية اني والبنات بأستعجال .. يبوو بدت الحفلة واحنا بعدنا ما مكملين تقديم صرت اقدم وية البنات. للمعازيم وكلما وحدة شافتني من المعازيم تسألني انتي زوجة عناد وطول الحفلة اني ما اقتربت من ام عناد وحاولت اتجنبها دخلت للمطبخ اني ورغد شايلين الصواني بيها الصحون الفارغة. وجان اشوف عناد واكف يم امه يسولف رغد بس شافته كالت.. هَـا استاذ عناد شعندك هنا بالمطبخ لو سمعت بالحبيب هنا موجود رفع راسه مبتسم يريد يجاوب رغد بس فجاءة اختفت ابتسامته. وعقد حواجبه مستغرب وكال.. نور !!! هاي شنو اشو انتي هنا ليش انا ما عندي علم شنو الموضوع جمدت بمكاني مصدومة بعناد ماعنده علم بطلعتي من البيت باوعت لرغد وسألتها.. شنو رغد انتي ما گلتي لعناد ؟؟ ضربت كصتها وكالت .. اهوووو خرب بالحظ شوف شلون نسيت عناد ترة نور البارحة كلتلي حتى انطيك خبر بطلعتها من بيتهم بس والله نسيت مسحوها بوجهي هالمرة والله هذا ابني التهيت وياه البارحة كله يبجي متأذي من الطهور قاطعت كلامها ام عناد وكالت .. وليش تتصل عليج حتى تكوليله ليش مو هي تتصل على زوجها وتبلغه بنفسها كانت تحجي ونظراتها تتنقل بشك بيني وبين عناد عناد جاوبها وكال.. يمة اني لان زعّلت نور وخشنت خاطرها وهي اخذت موقف مني عرفته من جوابه لأمه ما يحب احد يتطلع على مشاكلنا وهاي نقطة لصالحه امه سألته .. وليش مزعلها شنو سويت ؟؟ رغد جاوبتها .. بعد انتي تعرفين ابنج ومشاكله وطناگيره ما يحتاج تسألين واكيد هاي المسكينه لاحتها وحدة من طناكير عنودي الطايرة واني خايفة لا بنت الناس تطفش من ورة راسه اليابس وتشرد بروحها العزيزة منه اباوع عليه شلون عبس وجهه وجاوب رغد بنترة متضايق .. انتي هييي خير سالمين شنو تشرد شنو تطفش الي يسمعج يكول متزوجة وحش بالله شو كرمينا بسكوتج جاوبته وهي تضحك.. عابتلك مو صوجك صوجي اني الي كاعدة اتوسطلك يمها حتى تحن عليك وتجي لهنا جاوبتها محرجة .. رغد ترة اني اجيت لهنا لخاطرج ولخاطر ابنج اقترب علية وحجة بغيض ولزم ايدي وكال .. نور تعالي اريد احجي وياج ما انطاني مجال گبل اخذني وطلع من المطبخ صحيح اني كنت مقررة احجي وياه و اواجهه بس اشو من صارت صدك انخبصت وما اعرف شصار بية اتعثرت بالكلام .. اوكف لحظة عناد الحفلة بعدها ما انتهت جاوبني من بين اسنانه .. لاتخليني اسب حتى ابو الحفلة وصلنا للغرفة فتح الباب ودخلني كدامه ودخل وغلقه وراه كتف ايده على صدره وباوع علية وكال .. يعني حضرتج تطلعين وما تكلفين نفسج تبلغين زوجج اشو حضرتج هواي مستاهنة بية رفعت راسي باصرار ما اسمحله يرهبني وجاوبته .. اني بلغت رغد واكدت عليها تنطيك خبر بعد اني ما ادري بيها راح تنسى .. وليش مو انتي تتصلين وتكليلي بنفسج .. عناد مالك حق تعترض عن خطأ كنت انت السبب بوقوعه تصرفي هذا كانت نتيجة مبادرتك الحلوة مو انت الي خليت اختك رغد مرسال بيني وبينك وخليتها تبلغني بخبر زواجنا بكبره وتجهيز نفسي خلاص بعد مالك حق تلومني وتعتب علية اني سويت مثلك بلغتها تكولك وعلى فكرة اني لخاطر اختك وابنها اجيت لهنا والا فلا اخليك تشوفني على طلعتك وياي جاوبني .. يعني كلهم عندهم خاطر يمج الا عناد ماعنده خاطر يمج ولا له مكان بگلبج دخيل الله انتي شكد مغرورة وراسج يابس رمشت بعيوني متفاجئة بهجومه اشرت على نفسي وسألته .. هاي عليمن تقصد مغرورة وراس يابس علية اني !!!؟؟ .. اي عليج انتي يعني حضرتج شفتيني طلعت من بيتكم معصب وزعلان وتعرفين كلش زين شنو سبب زعلي وانا على حق حتى ما كلفتي نفسج تتصلين وتحاولين تبردين ناري بس الظاهر انا مو شي مهم عندج والا لو جنت مهم جان بادرتي بالاتصال بقيت فاتحة حلگي بالله هذا شنو احجي وياه شكله كتلني وبكى سبقني واشتكى ونوب طلع هو الزعلان جاوبته بغضب يوازي غضبه وكلت.. ما تكول لروحك هذا الشي معناها اني هم مو مهمة عندك لدرجة. ما كلفت نفسك وتتصل علية وتسألني عن احوالي وانت تعرف بنفسك كلش زين انت غلطت بحقي وجرحتني بالكلام ودرت وجهك ومشيت من غير ما تهتم بالسويته حضرتك يعني اذا اكو واحد مظلوم بهاي المشكله فهو اني .. انا ما غلطت بحقج واي واحد بمكاني ما راح يرضى يشوف مرته كاعدة تتبادل ذكريات الايام الخوالي وية رجال جاي متعني من بغداد للبصرة علمود يشوفها. هيج بكل صلافة ..لا وراسم للبعيد الاخ جاي وناوي يرتبط بيها. ترة انا رجال مو طرطور وترديني ابلع الموقف واسكت هيج بدون ما احجي ولا ازعل اكيد اعصب وحمدي ربج انا كدرت الزم نفسي وتركته يطلع من البيت وهو سالم بس بخته باخوانج ماكو والا جان حق الله اخلي دمه بطوله .. عناد انت شنو جاي تحجي ترة الرجال كان جاي حتى يتطمن علية ويسأل عن احوالي هذا يدل على حرصه ونخوته .. ومنو هو اصلاً وبصفته شنو جاي بكل صلافة يسال خال ولد عم بنية ما تقنعيني هو جاي لهنا متعني حباً لله اكص ايدي اذا ماجانت ورة هاي جيته نية يطلبج للزواج .. لا هو جار ابن اصول جابته النخوة وحتى لو كنت مثلما تكول جاي ونيتة يطلبني للزواج ترة مو عيب ولا تجاوز ولا غلط بحق احد سواء كان عنده نية ورة سؤاله عني او لا والله هالشي ما راح يقلل من موقفه الكريم بنظري على الاقل كلف نفسه وحب يتطمن علية ويسأل عن احوالي .. احسن من بعض الناس حتى ما كلفوا نفسهم يسألون عن احوالي وهم يعرفون كلش زين شلون جاي اعاني بهاي الفترة وية غياب اخواني وخوفي عليهم خزرني واقترب مني بغيرة وگال .. يعني صار امير الاثول خوش رجال وانا طلعت. النذل وبايع حقارة وياج اقترابه مني سوى عندي ازدحام بالمشاعر حتى سوى عندي ازدحام بالتنفس زكمت اتنفس بسرعة حركت راسي بالرفض .. لا حشاك من الحقارة والنذالة بس زعلك كان بمثابة خذلان الي .. يعني تشوفين مالي حق اغار وازعل عليج ولج نور تصدكين اذا اكلج اغار عليج حتى من حضن اخوج مهيمن .. اي اني زعلت لان انت كبرت الموضوع وانطيته اكبر من حجمه وهو ما يستاهل كل هذا التعصب منك وخلي ببالك اني وافقت عليك بأرادتي وبقناعتي محد فرضك علية يعني لاتتصور حضور امير او طلبه للزواج راح يغير شي عندي او يأثر بية .. اي صحيح بس ما شفتي شكله شلون انصدم من عرف بيج مخطوبة وراحت عليه حمامة بغداد وعليه انا قررت اسد جميع ابواب رحمة الله بوجهه واتمم الزواج .. اكول استاذ عنودي انت شلون تقرر هيج قرار بدون ما تاخذ رأيي بالموضوع ولا وفوك هذا كله داز الخبر بيد اختك عناد صدك خليني اكلك من هسة اني مستحيل اجهز لعرسي وأخواني بحضن الخطر يتلاون وية الموت صعبة والله صعبة حط روحك بمكاني وشوف نفسك شيكون حالك اذا واحد من اهلك بخطر وانت تعرف التجهزات للعرس يحتاجلها واهس وتفرغ منين اجيب الواهس والخوف متربع بگلبي على اخواني مهيمن بارض الموت وجلال مجهول المكان حتى ماعندي خبر عنه يطمني عليهم حجيت الكلمة الاخير وخانتني دموعي ونزلت غصب عني غطيت وجهي بكفوف ايدية ما اريده يشوف ضعفي سمعت صوت عناد المستغرب زاد بقربه مني ودنك راسه لمستواي ولزم كفوف ايديه يبعدهم عن وجهي .. هاي شنو نور ليش تبجين المن نزلت هاي الدموع من كون احترك عناد وعشيرته بنار مشتعلة جاوبته من بين دموعي واني اتهرب واكابر .. لا ما دابجي وخر عني اني حالفة ما انزل دمعتي گدامك ولا ابين ضعفي يمك حوطني بذراعه ولمني لحضنه رغم ممانعتي بقى مطوقني مثل طوق النجاة ..لج نور شنو هالحجي ترة انا مو عدوج وتكابرين تظهرين الالم كدامه انا زوجج يعني سندج تواسيني واواسيج واتشارك وياج بحمل الهموم وما عليج بطناگيري على گولت رغد الله ورطج بحب واحد مجنون عقله قافل على حبج حالف ما يحيد ولا ينثني كسبي بيه اجر وسويها لله واتحملي جنونه ابتسمت من بين دموعي وكلت بصوت مكتوم .. ما اسمحلك تكول على ابو بيتي مجنون فاهم جنت دافنة راسي على صدره ودموعي مابطلت تنهل على قميصه باس راسي وكال .. حمامتي كافي لاتنزلين دموعج وتبجين هيج لزم طرف وجهي ورفعه حتى اعاين عليه دنك علية وباسني من كصتي رجفت اعضاي وانخبصت حواسي وصرت كلي ترقب لاي حركة منه. عبالك العالم ساكن وماكو شي يتحرك الا عناد رفع راسه ومسح دموعي الي بعدها تنزل .. اششششش كافي بجي والله مو حلوة بحقي بحضني ودموعج تنزل عيب علية والله رجع مرة الثانية وطبع بوسة على كصتي. واتبعها وحدة ثانية. على خدودي وية الدمع وكمل طريقه و زحف لشفايفي وصار يستذوق حزنهم اتغير ايقاع انفاسه الحارة ودفن راسه برگبتي صار يطبع حنانه عالنبض ماخذه الواهس وناسي نفسه ونساني حالي وياه اباوع لنظراته مثل ثعلب يستدرج حمامة بعدت راسي مرتبكة وبسطت كفوف ايديه على صدره احاول ابعده وحجيت وياه بتحذير .. ششنو عناد شجاي تسوي قربني عليه شكله قافل عالقضية وگال .. شنو شبيج لاتفهميني غلط ترة انا جنت اواسيج مو جنتي تبجين رجعت دفعته مرة الثاني وهالمرة خليت مسافة امنة بيني وبينه وكلت .. هو هيج الي يريد يواسي شخص حزنان .. انا هذا الي اعرفه اذا شفت واحد حزين اخذه بالاحضان واطبطب عليه وابوسه على فكرة المواساة انواع كلمن اواسيه حسب غلاته عندي يعني اذا جان شخص عزيز علية اكيد راح اكون وياه كلش كريم وما ابخل عليه بأي شي واصير كلي تحت امره لأجل انسيه كل همومه واحزانه جان يحجي بصوت ناعم وهو يلتف حولي مثل الحية اتعجبت عليه شلون كدر هيج يستدرجني ويرجعني لحضنه . كان بين كل كلمة وكلمة يوزع اختام كرمه بمواساتي على وجهي وركبتي ورجع على شفايفي وبعدها اخذ ايدي حطها على صدره خرب هذا شوكت فتح قميصه وهنا حسيت بالخطر وان عناد زاد بكرمه عن حده وعبر الحدود بلمساته الجريئة وصار استغلال واحتلال اعرف سكوتي عنه هو الجنون بعينه. رفعت راسي وباوعت عليه اريد اهديه همست .. عناااد باوع علية نظرات عيونه كانت مختلفة عبالك نظرات ذئب تتوعد فريستها بالقادم الاتي انتفض گلبي وانطلقت صافرات الانذار بعقلي دفعته وابتعدت عنه بسرعة وكلتله واني واكفه يم الباب واعدل ملابسي وشعري بأيدين مرتبكة وخدودي حارات كلتله .. شكلك اتعديت حدود الكرم بالمواساة وصرت طماع. وطمعهم قتلهم جان متفاجيء بحركتي وكال .. ششنو نور تعاي وين طالعة كان يحجي ويتقدم علية فتحت الباب بسرعة حتى اطلع سمعته صاح وراي .. من احتركوا ولج تعاي رجعي يعدنا ما خلصنا كلامنا جاوبته واني اتجه للدرج .. صدكتك خوش كلام عليك جان يدكم بقميصه بأستعجال وكال من بين اسنانه .. هسة وين شاردة قابل راح اكلج بس تعالي احجي وياج عدنا هواي حجي ما اتفقنا على موضوع الجهاز والزواج جاوبته واني انزل الدرج .. عندك اختراع اسمه نقال تكدر تتصل علية نكمل كلامنا بهذا الموضوع نزلت احداث البارت القادم جلال جنت واكف وجان اشوف هنا وخواتها اجوي يركضون بفزع بأتجاهي ويأشرون وصلت اخت هنا الصغيرة وهي تلهث كالت .. جلال بسرعة اهرب راح يجون يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 09:52 AM
| #76 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت الرابع والأربعون ج2 مساء التفائل والامل يااااااعراق ترجع شي اكيد بحيلك يضحك نهارك ياوطن وية ليلك جرحك جرحنا وانت ابونا الغالي شتريد منا اطلب ونسويلك منّا اطلب التريده بكيفك ٺــڊٍلََُلََُؖ انت وطنا نريدك ترجع الاول ياحنا الاكبر نحبك اكثر الله اكبر 🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶 مهيمن بالگوة كدرت افتح عيوني وضربها ومضة ضوء قوي خلتني اشهك مرعوب وصرت اصيح بصوت مفزوع .. ولك عبااااااااس ارجع لا تفوت للبيت مفخخ سمعت اصوات يمي وايدين تحاول تثبتني بمكاني ما تخليني انهض من السرير انتبهت لغرابة المكان الموجد بي وبديت اركز واتوقفت عن الحركة مستغرب لحظة شنو سرير ليش انا وين رجعت افتح عيوني بتركيز وصرت اعاين بالمكان شفت شاب لابس زي خاص بالتمريض وجاي يحقن ابرة بالسيروم المعلق وواكف بصف السرير يمه دكتور باوعتلهم وبديت استرجع ذاكرتي باخر لحظات شلون تم نقلي انا والمصابين بطيارات عسكرية مخصصة لنقل الحالات الطارئة لاحد مستشفيات بغداد هذا اخر شي اتذكره بعدها صارت صور الانفجار والجنود ومنظر عباس ابو ضحكة الحلوة دخل للبيت مبتسم وماطلع منه بعد عدلت وضعية جسمي عالسرير صحت بصوت متأذي من رجلي وكتفي .. اااااااخ بوية. ابتسم الدكتور وكال .. الحمدلله على سلامتك يابطل واخيراً قررت تصحى وتشرفنا بصوتك سألته وانا امسد على فخذ رجلي .. الله يسلمك دكتور ليش انا صارلي شكد هنا جاوبني .. صارلك يومين هنا نازل عدنا ضيف بعدما تمت معالجة اصاباتك البليغة خليناك عالمسكنات لان وصلتلنا كنت كلش منهار عصبيا وجسدياً بالحقيقة كانت رجلك اخطر شي من بقية الاصابات الموجودة بجسمك بفضل الله كدرنا نتلافا التلف وخسارتها ارتعد جسمي على كلامه باوعت لرجلي وصرت اتحسسها خايف كانت ملفوفة بشاش ومجبّريها باوعت للدكتورة وسألته بتعب .. شنو دكتور يعني ارجع امشي من جديد .. ان شاء الله ترجع تمشي من جديد عليها بعدما تشفى وتطيب والحمدلله رجلك بدت تستجيب للعلاج وتم نقل دم الك على الفور من وصولك ورة ما خلص الدكتور كشف حجة وية الممرض وطلب منه ينطيني بعد جرعة ابرة مسكنات والتهابات وبعدها طلع كنت متمدد بالسرير اراجع الحادث اصابتي والصار والشباب وعباس واهله احلامه وامي شلون بيها بس لا وصلها الخبر وريم والبنات بس لا ينخبصون فجأة انفتح الباب وجان يدخل عناد ووجهه لونه مخطوف .. هَـا يابطل صحيت هاي شنو سمعت بيك صاير تتشاقى وية الموت حجيت مستغرب وجوده .. عناااد الغالي هاي شجابك . وراي شلون عرفت بية انا هنا وهو بين المصدگ والمامصدگ كال .. اسكت ولك غير اجيت انجلط من سمعت بيك متصوب .. خير على شنو تنجلط لاتگول خايف علية جاوبني وعيونه تلمع .. لا يابة اخاف عليك شنو بس خفت لا تسويها وتموت ويتأخر عرسي من وراك ختم كلامه ودنك علية وباسني من راسي سألته.. لا بس صدگ شلون وصلك الخبر ومنو اجة وياك .. اول البارحة اتصلوا علية وبلغوني بالخبر الظاهر انت ناطيهم رقمي حتى يتصلون علية .. اي صحيح اتذكرت من ردت اتطوع طلبوا مني املي البيانات والمعلومات ومن ضمن البيانات طلبوا مني رقم اي شخص قريب علية حتى يتواصلون وياه. بالحالات الطارئة بوكتها فكرت بيها ماردت احط رقم واحد من خوالي او اولادهم خاف بساعة وفاتي يتصلون عليهم ويوصل الخبر لأمي بسرعة بدون تمهيد ويصير بيها شي من الهبطة فگلت ماكو غير عناد صديقي اكدر اعتمد عليه جاوبني وهو يبتسم بثقة وكال .. ترة انا اعجبك بالفزعة. على فكرة خالك حسن وابنه طالب اجوي وياي من البارحة وخالك من سمع بالخبر اكد علينا ما نگول شي عنك گاللنا .. والله امه تتخبل اذا عرفت بي متصوب خلي بالاول نتطمن عليه ونشوفه شلون وضعه وبعدين انا اكوللها سألته .. هسة هم وين .. مو خالك البارحة عاند واصر الا هو يبات هنا يمك ماقبل يعوفك. والمستشفى مايقبلون بس مرافق واحد وية المريض واضطرينا انا وطالب نرجع للفندق القريب منا على المستشفى ونمنا هناك والصبح اجينا واخذت مكان خالك حسن وگلت لطالب ياخذه عالفندق حتى يرتاح لان مبين عليه كلش تعبان قبل نص ساعة طلعوا .. خطية خالي انشلع گلبه وياي يعني هسة امي والبنات ماعندهم علم لحد الان .. خالك گال مو هسة خلي مهيمن يصحى ونتطمن علية وبعدين وانا ابلغهم بنفسي وهو راح وما يدري بيك صحيت غمضت عيوني بتعب وكلت.. احسن لحد يكللها لحد ما ارجع خليها تعرف بوكتها تعال احجيلي عن امي شلونها والبنات شلونهم ولك ما تدري شكد مشتاقلهم وگلبي عليهم نار عبالك مفاركهم من سنين ..الكل زينين وبخير بس تعرف بعد امك گلب والدة وگعت مريضة من بعد . غيابك ونوب كملها استشهاد ابن خالك منتظر جريت حسرة .. الله يرحمه ويغمد روحه الجنة وصلني خبر استشهاده وانا هناك بالجبهة بوكتها جنت. نازل بواجب رجعت سألته بقلق على امي .. وهسة هي شلونها ما اتحسنت شوية .. لا حالياً هي زينة الحمدلله بفضل بنت عمك الله يرضى عليها عرفت شلون تطلع امك من حزنها واصرت عليها تجهزها للعرس والحمدلله امك ماقصرت عيد وجابه العباس النا يعني بأذن الله تروح تلكة كلشي جاهز بس تلبس قاط العرس جاوبته وومضة الفرح الي اشتعلت بكلام عناد عن امي وريم وعرسي اختفت بسرعة من وجهي .. ولك ياعرس وانا اخوي ما طحت بي ولا كدرت الكاه ونوب المصيبة الاستخبارات انطوهم امر هو. وكم واحد وياه ينسحبون من مقر الدواعش حتى يتم القصف الجوي سألني بقلق .. اي وتالي شنو سوى انسحب لو لا .. كلهم انسحبوا ورجعوا بسلام الا جلال ما بين منه خبر وراح اتخبل هسة ما اعرف شنو الاوضاع هناك وما سمعت اخبار عن جلال بعد القصف لمعسكر الدواعش لان بوكتها احنا بدينا نتقدم بعمليات التحرير و ما گدرت اتواصل وية الضابط المسؤل وانا كنت لازم واجب وما اكدر اتحرك بدون رخصة من الآمر المسؤل عن الفيلق الا انسحب وانا بالحقيقة ما سافرت لهناك علمود تالي انسحب مو حلوة بحقي عناد جاوبني وكال .. لاتخاف عليه جلال ذيب امعط وسبع مستحيل يخلي الدواعش يحسون عليه اكيد راح ينفذ منهم من غير ما يحسون عليه .. الله يسمع منك .. ولك هو انا وانت عايشيين وياه مرافقينه وما كدرنا نحزر هو ضابط ولا طحنا على علته .. ما تعرف شكد شايل همه خصوصاً. من نزلت للجبهة وشفت الموت الاحمر شلون يطاردنا. وملك الموت واكف يحوم على روسنا اصوات الهاونات والصواريخ والقذايف بالقصف تصول وتجول.علينا هواي استشهدوا منا وهواي جرحى شباب ورجال وجنود وضباط. انعجن تراب الوطن وية دمهم وكلما الزم واجب وية الشاب خلف السواتر واشوف الجثث تترامى كدام عيوني بكل مكان اتخيل جلال وگلبي ينقبض اكول خاف يشوف هاي الكوارث الي يم دواعش. ويهون وما يتحمل هالمنظر وينتفض عليهم او يمكن يتراجع ما يكمل صارت اشكال الوساوس تهوجس بگلبي جاوبني .. لا تخاف عليه اكيد هم مهيئينه ومدربينه قبل لا يزرعونه بين الدواعش تلكاه داخل وهو متوقع منهم كل شي غمضت عيوني بتعب وحطيت ذارعي على عيوني وگلتله .. همزين اجيت انت وخالي حتى ارجع وياكم للبصرة ما اريد ابقى هنا اختنگ ما اتحمل جو المستشفى كال .. مهيمن ما اتوقع يخلونك تطلع تسافر وياي بعدت ايدي عن عيوني وسألته .. ليش ما يقبلون .. سمعت على اساس هم مسوين ترتيب لرجوعك يعني مخصصين سيارة عسكرية توصل المصابين لبيوتهم يعني هذا اجراء تكريم بحقكم انت وكل واحد مصاب جنا نحجي وجان يدخل واحد وبالدولة ووراه. دخلوا مجموعة حماية ودخل وراهم صحفي لوحدة من القنوات وكاميرات تصور المسؤول وهو يقوم بزيارة المستشفى حتى يتطمن عالجرحى والمصابين اجة سلم علية واتحمدلي عالسلامة وكال .. بارك الله بمجهودكم ابطال رفعتوا راسنا وجاوبته .. الله يسلمك هذا واجبنا القى كم كلمة كدام الكاميرا كان مضمونها انتوا رفعتوا راسنا وانا لازلت متفاجيء بوجودهم ما طول دقيقة يمي بعدها طلع يكمل زيارته يتنقل بين الجرحى والمصابين يتطمن عليهم وبس طلعوا عناد كعد يعدل بروحه ورفع ياخة قميصه ويرتب بشعره صاح وراهم يتكنى .. ولكم تعالوا رجعوا كملوا تصوير خرب بالحظ مالكوا الا هاي اللحظة يجون بيها هسة عالاقل جان انطونا خبر بزيارتهم نلحك نرتب شكلنا شكد زحمة ونوب انا گاعد يمك بهذا شكلي جني وحدة مطلگة هزيت راسي وكلت .. خاب شوف هذا البطران الناس وين وهذا دايخ بالكشخة جاوبني.. ولك مو غير هذا اللقاء راح يطلعونا بالتلفزيون ونوب انت ووجهك هذا جنك ارهابي مزنجر بهاي لحيتك ووجهك الاصفر بالقران بنت عمك بس تشوف وجهك گبل تگلب عليك وتگول غشوني ابتسمت ..احلف عليك مخبل حضور عناد كدر يغير علية الجو رغم الهم والتعب لليل دخل علية المضمد وبلش يبدل الضماد مال رجلي عضيت على الساني بالكوة لازم نفسي لا اصرخ بصوت موجوع خصوصاً من سحب الفتيلة. الي برجلي منا على ما خلص الممرض احس بروحي فرت من الالم كان طالب وخالي حسن واكفين فوگ راسي اسمع خالي حسن يكله .. ماعندكم ابرة تخدير او اي شي يخفف عنه الوجع جاوبه الممرض.. هسة انطي ابرة مسكن ويرتاح بعدها ضربني الابرة وطلع دقايق وجان يدخل عناد ووجهه مخطوف لونه سألته وانا حابس انفاسي .. هَـا عناد بشرني شنو الاخبار جاوبني باسف وكال .. ما ادري شنو اكلك بس الاخبار تكول تم قصف معسكر الدواعش بغارة جوية شنتها القوات العراقية وما طلع منه اي واحد من الناجين گلبي انتفض من بين ظلوعي وكلت بصوت واهن .. يعني شنو وجلال !!!!!! مكدرت اكمل كلامي احس الغصة بلعت صوتي جلال مر ت علية الايام وانا بين الصاحي والغايب عن الوعي جنت بين كل فترة وفترة انام واكعد مدري اغيب عن الوعي مدري هذا نوم والله ما اعرف شنو جاي يصير وياي ضاعت علية السالفة و بقيت على هذا الحال لمدة اسبوع لحد ما بديت. استرد قوتي. وصحتي بدت ترجعلي بفضل الله وعناية البنات الي وكدرت اعتمد على نفس ونهضت من فراشي وبديت اخطي وانا مستند عالحايط الايام الفاتت كنت احاول اعرف انا وين بالضبط ماگدرت اعتمد على المعلومات الي كالتها هَنا ردت اتأكد بنفسي كدرت اعرف بعض المعلومات عن المكان الي احنا بي عن طريق المضمد كان يجي لهنا حتى يضمدني وگلي القوات العراقية سيطروا عالمنطقة. سيطرة تامة بس المشكلة الرجال بالگوة اطلع منه الحجاية كان قليل الكلام اما صاحب المزرعة فكان يتعامل ويانا انا والبنات بحذر من حجيت وية البنات مستغرب برود المضمد والفلاح زينة كالت .. مو بس هم. ترة كل اهل المنطقة هيج حذرين وية الناس الغربة لان قبل فترة اتعرضوا للغدر من الدواعش باوعت داير مدايري عالغرفة الي احنا بيها وكلت .. بس انعم الله عليه قام ويانا بالواجب وحطنا بغرفة معزولة خارج بيته. شكلها غرفة خاصة بالادوات الزراعية كنت انا والبنات ننام بيها. هواية عانيت من الاحراجات خصوصا يساعدوني ابدل ملابسي جنت اتحامل وية الجرح حتى اعتمد على روحي بالكوة البنات وخصوصاً هنا اتعودت هي الي تقوم بواجباتي اما خواتها فكانوا يطلعون الصبح اسمع اصواتهم يكعدون خارج الغرفة هَنا كالت يساعدون زوجة الفلاح بالشغل عندهم مزرعة ونساعدهم بيها كل يوم يجيبون حليب رايب وخبز ونگعد ناكل انا والبنات سوية ا خلال الايام الفاتت اتوطدت علاقتي وية البنات ماعدنا شي نسوي محبوسين بالغرفة من بعد صلاة المغرب لذلك نظل نسولف ونحجي قصص عن الناس او عنا كنا مرات نضحك ومرات نحزن واتشاركنا قصصنا اتفاجئت من عرفت بيهم شاطرات بالدارسة وعندهم طموح يتمنون ياخذون شهاداتهم اتجنبت اسألهم عن وحشية الدواعش وياهم وشنو الاضرار الي سببوها الهم. كنت محرج كنا ناكل وازاد سالتني .. جلال شنً سبب انضمامك لداعش شنو ليش صرت داعشي هم ناس قذرين متوحشين شتسوي وياهم على فكرة انا اكره كل داعشي وراح ابقى حاقدة عليهم للموت كان كلام ازاد اول لمحة للحرية بالكلام بدون خوف مني لان كانت ضامنة لنفسها هي بأمان بعد ما تخاف من داعشي مصاب جاوبتها وانا بعدني تعبان .. القدر جمعني بيهم وحطني بطريقهم صارت حاجتهم يمي وحاجتي يمهم غيرت الموضوع ودرت على هَنا وكلتلها .. هَنا اذا شفتي الرجال صاحب المزرعة تكدرين تكليله اخوي يريد يحجي وياك اتوقفت عن الاكل وكالت .. بخصوص شنو تحجي وياه .. صار لازم نترك المكان هواي طولنا على الرجل وهو فقير على كد حاله وانعم الله عليه ضيفنا كل هاي الايام .. جلال صعبة طلعتك منا المنطقة مليانة بالقوات العسكرية العراقية. والبحث عن عناصر الدواعش لازال مستمر .. لاتخافين مثلما كدرت اطلعكم من بين ايدين داعش بسلام اوعدج بأذن الله راح اطلعكم منا سالمين وانا وياكم للعصر طلعوا هنا هي وخواتها يكملون شغلهم بعدها اجاني الفلاح دخل علية للغرفة وسلمت عليه كال .. اختك گالت تريد تحجي وياي جاوبته .. حبيت اشكرك على كرم ضيافتك وياي انا وخواتي جميلك دين برگبتي ما راح انساه الك .. هذا واجبنا. نساعد المحتاج وانت وگعت جريح على ارضي .. عمي حبيت انطيك خبر انا وخواتي لازم نرجع لديارنا بس محتاج اجري مكالمة وية اخوي حتى انطيه خبر بمكان وجودي اكيد هسة اهلي ظال بالهم علية باوع علية بحذر وكال وهو يطلع نقاله البسيط من جيبه متضايق وكال .. هاك نقالي اجري مكالمتك گدامي وانا واكف هنا ما اتحرك هزيت راسي موافق واخذت النقال منه وجان ادك اول اتصال على الرقم الي حفظته على ظهر قلب اتصلت على جهاز الاستخبارات وانطيتهم عنواني وموقعي بالضبط وبلغتهم عن اصابتي وكل كلامي غير مفهوم للفلاح انهيت الاتصال وسلمته للفلاح وكعدت اتشكر منه هو سألني .. شنو ويامن تحجي كنت احس بيك كنت ومتعمد تحجي هيج حتى ما افتهم عليك ترة انا ما مرتاحلك جان الرجال يحجي ودك نقاله باوع الفلاح للرقم وكال هذا رقم غريب اتوقع الك اخذته منه ورديت وجان اسمع صوت الضابط علي يصيح بفرح .. لك جلااااااال قربان البطل هذا انت بعدك عايش يارجااال موتتنا عليك جاوبته وانا ابتسم بنصر .. الحمدلله خوية علاوي انا بخير الله كتبلي عمر جديد شبسرعة وصلك الخبر جاوبني .. انا منبه على الجماعة اول ما يسمعون خبر عنك يوصلونه الي لان اخوك مهيمن اكل گلبي بالاسئلة .. ليش شنو بعدك عندك تواصل وية مهيمن جاوبني .. لك بابا اخوك اجة لهنا للموصل وراك انقبض گلبي وسألته .. شلون شيسوي جاي الموصل خطر على حياته جاوبني الضابط .. هذا اخوك سالفته سالفة اتطوع بالحشد واجة لهنا. يكولون الجنود كلما ينزل للجبهة يصيح بصوت عالي جلاااااال قربان وراك وراك ضحكت وعيوني دمعت بشوگ يا الله شكد مشتاقله بگد رحمة الله حنيت حتى لغضبه علية ولحشريته ولحرصه بس خوفي عليه خلاني احبس انفاسي سألته.. طمني عليه هسة هو وين خو ما عليه شي بالجبهة جاوبني وكال .. اخوك البطل طلع طلعة مال واحد گلبه ميت وحاطه بثلاجة يگولك اخذ قاذفة وضارب المدرعة وهي مفخخة عن بعد مسافة قريبة. كان يسوقها انتحاري خلى الكل يحجي بموقفه هذا والجنود صاروا يهوسوله ((بايع روحة يابصرة ابنج )) بس يا فرحة الما تمت بهت لوني وسألته بصوت واهن .. شنو شبي شصار بأخوي گلي جاوبني بأسف .. اخوك قبل اسبوع اتصوب بأنفجار بيت مفخخ مسوينه الدواعش كمين لقواتنا ونقلناه على اثره لوحدة من مستشفيات بغداد كنت احجي وية الضابط والفلاح جلى صوته يذكرني بوجوده بعده واكف منتظر اتعمدت احجي وية الضابط عبالك جاي احجي وية اخوي وابلغه عن مكان تواجدي .. علاوي انا لازم انهي الاتصال النقال مو مالتي مالت الفلاح . اي صدك قبل لا انسى ترة انا مو لوحدي انا اجيت وجايب خواتي اربعتهم وياي طكها ضحكة وكال .. هَـا يا جلال الملعون اربعة مرة وحدة شكلهم الدواعش مأثرين بيك جاوبته .. علاوي لايروح بالك بعيد صفي النية هذني حصيلة تأدية الواجب .. دومك صاحب نخوة مو بيدك رجعت اذكره وانا اباوع للرجال .. عفية مو تنسى انا انتظر منك ترجعلي خبر منين يا طريق اسلك اتصل على هذا الرقم وهسة لازم ارجع النقال لصاحبه جاوبني الضابط علي وكال .. هذا هو اتطمن خلي الباقي علية انا ارتب امور رجوعكم نهيت الاتصال وسلمت النقال للفلاح اخذه مني وكال .. شنو شوكت تغادر المكان انا محتاج هاي الغرفة عرفت مكالمتي وكلامي وية الضابط زادت مخاوفه مني جاوبته.. ما ظل شي ونترك المكان اول ما يتصل علية اخوي انا وخواتي نرجع لديارنا تركني وطلع من غير ما يباوع علية ريم دخلت للغرفة الجديدة واني شايلة كم شغلة من اكسسوارتي اني بهذا الاسبوع قررت احط ملابسي اكسسوارتي وارتبهم بغرفتنا اني ومهيمن الجديدة وخالة زهرة من تشوفني ارتب واصفط تظل توزع ابتسامات وياها نظرة رجى اسمعها تدعي .. ربي لاتضيع فرحتها وتفهي وجهها ورجع غاليها بسلامة وفرحني بيهم كان هذا الدعاء واحد من الالف الادعية الي اسمعها منها كل يوم كملت ترتيب الغرفة اتعودت كل يوم اصعد اسويلي شغلة وفيكة بالغرفة. احس صار عندي هوس اصلاً . الغرفة صارت بالنسبة الي مثل المزار المقدس هيج اعاملها بكل حب وهبتها احلى الاشياء كنت اهرب الها من تبدي الشكوك والمخاوف تهجم علية اروح اصعد هناك واقهر خوفي وانتصر عليه واعاند الجزع رافضة استسلم انفتح الباب ودخلت حور شافتني جاي اضيف لمسات على تاج السرير ابتسمت وكالت .. والله عرفت راح الكاج هنا كعدت تتفحص بالغرفة جاوبتها .. گلت مادام كاعدة.ماعندي امتحانات كلت استغلها فرصة واكعد ارتب ملابسي بالكنتور ونقلت شغلات مهيمن وحطيتهم هنا. .. هو انتي تردينها من الله بس حجة حتى تدخلين للغرفة ولو عليج حتى تنامين بيها .. لا مستحيل انام بيها. من غير مهيمن ابتسمت بحسرة وگالت تتهرب .. اهووو شوف شلون راح تنسيني يالله نزلي الاكل جاهز تعالي ناكل نزلت اني وحورة لگينا نور جاي تصب بالغدى وخالة زهرة كاعدة عالميز دخلنا اني وحور سألت حور وكالت .. اكلج يمة حور ما عرفتي خالج حسن وابنه ليش سافروا جاوبتها .. يمة نغم تكول سافروا للنجف يزرون منتظر .. اي بس هو متعود يسافر كل خميس شعجب سافر الثلاثاء .. والله ما اعرف يمكن عنده شغل شوف شلون نور كملت صب الاكل وخالة زهرة كامت تريد تنسحب وكالت .. انتوا اتغدوا بالعافية انا ما اشتهي اكل اتعودنا عليها من عهد سفر مهيمن وهي بطلت تكعد على صينية وتاكل ويانة بس حور اخذت صينية صغيرة بيها الغدى وراحت يم امها تاكل لوحدها وبالكوة كعدت اني ونور ناكل وسألتها .. هَـا حصلتي عناد جاوبتني .. اي اتصلت عليه كال خلصت شغلي ببغداد وانا راجع بالطريق اتوقع هسة على جية كلي اول ما اوصل امر عليكم حتى انطيكم الاغراض جايبلكم مسواك وشغلات وياية من بغداد جنا نحجي واندك الجرس وباوعت للساعة نور گمزت من مكانها وكالت .. عزة هذا بس لا عناد وصل خرب وانا بعدني ما معدلة نفسي عفية ريم گومي فتحي الباب علما اروح ارتب نفسي بالعجل نهضت من مكاني وگلبت عيوني بملل .. ترة اني ما اشتغل عندكم مرسال غرام بينج وبين استاذ عناد والله يا الله رحت للباب امشي بملل اسمع صوت الباب يندك بألحاح جاوبت واني بعدني ما واصلة للباب .. جاية .. جاية ترى ما راح نطير على كيفكم وية الباب جنت احجي وفتحت الباب وكان اشوف عناد بالباب والفرحة مالية وجهه كال.. هلة بكناري شوفي شنو جبتلج وياية حجة ودار وجهه على سيارة عسكرية واكفة بالباب ومفتوح الباب مالتها من الجانب الثاني انتبهت لخالهم حسن كان. واكف يم السيارة العسكرية واولاده واخوانه واولادهم تارسين الشارع كلهم موجودين واكفين يمه وشفت طالب هو وجندي واكفين يم الباب المفتوح من الجانب الثاني عقدت حواجبي مستغربة گلبي انتفض وعقلي اتوقف عن التفكير ونظراتي انتقلت على عناد وسألته بشك .. شنو شكاعد يصير سمعت خالهم حسن كال بصوت عالي .. يا هلا بالبطل حياااااالله اصلك يارفعة راس خالك بسرعة قطعت كلامي وباوعت بتجاه نظرات خالهم حسن وهنااااااك وجان اشوف مهيمن واكف مستند على العگازات وعلى كتفه لاف العلم العراقي و طالب ابن خاله واكف بصفه والضابط واكف وراه شهكت بصوت واحطيت ايدي اكتم صرخة المفاجئة عيوني غوشت كلهم التموا عليه وصار يتنقل بالسلام من حضن لحضن جانوا يسلمون عليه بلهفة واني بقيت جامدة بمكاني انشليت من المفاجئة انتبهت عليه رفع راسه وباوع بتجاه باب البيت وهنا جان توكع عينه بعيني اتسعت عيونه وصار يتلفت و يباوع منا ومنا ورجع باوع علية بنظرة شوگ وكال .. ريم !!! هو نطق باسمي و اني صرخت بأسمه مامصدكة صرت اكرر اسمه مثل المجنونة طلعت بالشارع اركض عليه بتجاهه مثل طفلة وكلولها ابوج اجة من الحرب هذا حالي شمرت نفسي بحضنه من غير ما اهتم بالناس ولا اهتم بشكلي كنت ما حاطة شي على راسي وگعت وحدة من العگازات من ايده ولمني بحضنه حيل صرت اشهگ واني اتنفس عطره من يم صدره سمعته كام يلعن ويسب من بين اسنانه حسيت على شي انحط على راسي رفعت راسي مستغربة شنو هذا لكيت مهيمن يغطى بشعري بالعلم العراقي سواه حجاب قرب راسه وباسني من كصتي وحجة بغيض من بين اسنانه بصوت ناصي.. ولج غضب اشتهرنا بين الزلم شكله حلمي اتحقق وانتي واكفة بنص الجنود مفرعة جان يحجي ويعدل بالعلم على راسي يريد يغطيني ابتسمت ودموعي تنزل .. ما يهمني كلام الناس عني خليهم يكولون عني مجنونة وربي لو تدري شكد مشتاقة لكلمة غضب منك جان ما حجيت على اصوات الزلم طلعت ام مهيمن وشافت ابنها وجان نسمع صوت الهلاهل ملت البيت والشارع وعلى اثرها التموا الجيران والحبايب جتي خاله زهرة عليه فاتحة ايديها على وسعهن تريد تلم الدنيا كلها وتحضنها من تلم ابنها لحضنها وهي تبجي اباوع عليه شلون يداري بدموعه كدامها باسها من راسها وكال .. مسحي دموعج بالغالية تراهن غاليات علية وصعب حملهن نور وحور هم كان الهم النصيب من هذا اللقاء المفرح المبكي كان هذا اليوم احلى يوم عمري ما راح انساه لليل من خف توافد الخطار على البيت ومهيمن فات على غرفته القديمة لان ما يكدر يصعد فوك. تركته هو وخالة زهرة لوحدهم حتى ياخذون راحتهم ورحت للمطبخ ولكيت حور تبجي سألتها .. شكو شبيج جاوبتني .. هاي مرت خالي ام سجاد الخبيثة كل ما تشوفني كون تذب سمها علية جنت كاعدة يمهم هي ونسوان خوالي مثل الصدك على اساس جاية تتحمد على سلامة مهيمن بس شافتني كامت تحجي وية زوجة خالي حسن تكللها .. والله مهيمن جرم بحق البنية يعني وين صايرة طالبة طب يكسر قسمتها ويحجزها لواحد ارهابي. ادري شنو هذا مهيمن ماله رداد واحد يحطه عند حده حور بغيض مقهورة .. بس اريد اعرف هي منو شاكليها .. ماعليج بيها والله تغار وميتة قهر لان ما صرتي لابنها حور بيأس .. وينك ياجلال مو خلص صبري وصرت علچ بحلك اليسوى والمايسوى اريدك ترجع وتسكت اليحجون كنا نحجي وسمعت صوت مهيمن ينادي يصيحني نهضت من مكاني ورحت بسرعة بأتجاه صوته حور ونور اجوي وراي بنفس الوقت كلنا سألنا .. ها مهيمن رفع حاجبه وباوع على نور وحور وامه وكال .. انا صحت ريم ما گلت العشيرة امه كالت .. يمة شبيك وية خواتك تلكاهن هاي من لهفتهن عليك اجن يركضن كنت اباوع عليهن بغرور وحركت شعري بحركة الثقة وحور .. على شنو تضحكين ياحلوة ترة راح يكربج ويخليج سهرانة عليه ويا تودينه للحمام يا تعدلينه تنطينه علاجه. جاوبتها وكلت .. عادي غير اني مرته اهم شي ابقى يمه طلعوا البنات وخالة زهرة وانا رحت كعدت بصفه جان متمدد بفراشه عالكاع ابتسم وكال .. بالله شو تعالي اقتربي مني. عدلي المخدة من ورة ظهري اقتربت منه بكل بساطة اني اتقربت اشو هذا جرني حيل عليه ووكعني على صدره و وكال .. متحلف بيج حلفة كون اخليج تبجين للصبح انتي شلون تطلعين مفرعة هيج كدام الزلم اتفاجئت بحركته وكلامه حجاه مثل واحد يتوعد ضربته على صدره وكلت .. عباتلك كمزتني ترة اني كنت بحالة صدمة واللاوعي هسة شنو شتريد متندم على الحضنة لان حضنتك كدام الناس .. هالمرة سماح بس على طاري الحضنة ولج ياريم البلى غير ماتدرين شسويتي بية خليتيني بنص الجنود اهوجس بيج واتحلم بحيث كثر اللهفة العشتها حلفت كون اطبق الحلم على ارض الواقع استرخى رجع للخلف ورجعني عليه وبدا الكلام يحلى .. كلي شنو حلمت بية اكيد حلمت بية لابسة بدلة بيضة مال عرس لان اني هواي احلم بيها هاي الايام .. شوف هاي الفطيرة. ولج ان جان زين اذا على البدلة البيضة هذا حلم غير يختلف سالته بقلة صبر .. اهووو احجي عاد شنو هو الحلم والله شلعت گلبي قرب راسه وحجة بصوت ناصي وكال.. هذا الحلم بالذات كله افعال ما بي كول .. شلون يعني ما افتهمت همس بأذني وكال ولج غضب حلم +18 .. حلمت بيج. اجيتي ونمتي بحضني وانا بنص الجنود ابتسمت واني ذايبة بحرارة انفاسه يم رگبتي وخدودي گال .. ترة خدودجً اتخرمشت من ورة لحيتي على گولت عنيد اني هسه مثل واحد ارهابي اتلمست لحيته وكلت بدلع .. ماعليك بعناد بالعكس اصلاً اللحية ضايفتلك وسامة وزايدتك حلا بعيني لاتضيع السالفة وكمل الحلم وشنو بعد صار من اجيت يمك سألني وعيونه لمعت وكاحة .. انتي متأكدة ترديني اكمل هزيت راسي موافقة .. اممم .. عود ليش من احتاج اسمع صوتج يختفي .. اهوووو مهيمن كمل عاد طكها ضحكة وجرني عليه وصار يحجيلي الحلم صوت وصورة. ويطبق كل لحظة من حلمه على شفايفي واني بحضنه صرت كلي تحت طوعه ورة فترة رفع راسه من على رگبتي وكال .. ولج غضب نقذي نفسج وبعديني عنج ترة انا طماع وخاف ما اكدر اكتفي بس بالشفايف الي عبالك حلقوم جاوبته ولمعت عيوني .. اتحملك حتى لوكنت طماع اتسعت عيونه وكال.. ولج انتي صدك قنبلة ولسانج بعده مزروف .. هاي اني وهذا حظك ابوك ورطك بية ووكعت براسك .. ولج غضب كومي من يمي لا اجيب العيد واجرم بيج ويقع المحضور جاوبته بعناد.. واذا اكلك عادي اني مرتك كدام الله وخلكه خلي يوگع المحضور فتح حلكه وانوب سكت ومسح وجهه اشو هذا صاح بصوت عالي .. يمة زهررررررةةةةةة تعااااااالي لحكيييي .. يمة لحكي علية بسررررعة ابنج راح يتورط ويسوي مصيبة كمزت من مكاني على صوته العالي وبسرعة وكتمت صوته بكف ايدي اريد اسكته واني مرتبكة .. ولك اشششسششس عزة بعينك مهيمن فضحتنا الله يلعن بليسك جنت نايمة على صدره وبأيدي سادة حلكه امنعه من الكلام وفجاءة جان تدخل خالة زهرة ووراها حور ونور مفزوعات عبالهم مهيمن بي شي بس وكفن مصدومات من المنظر اول مرة بحياتي اعرف معنى كلمة احراج حور ضيقت عيونها بنظرات شك وكالت .. هااااااا ولج كناري شجاي تسوين بأخوي نور كملت الكلام كاتمة ضحكتها .. عزة بعينج ياريم شسويتي بأخونا المكرود خالة زهرة .. يافلك معبة بتنك. ولكم خايبين شني هااااي ياااا .. ياااااا خطية المرة شكلت ما تعرف شنو تحجي ..حور لحكي على اخوج الفرخة تسودنت جلال مر علية يومين وانا انتظر الضابط علي يردلي الخبر على نقال الفلاح هسة ما رايد شي بس يدليني عالطريق الي اسلكه ووين اتجه ومن اطلع كنت واكف اشتغل اصلح بسيارة الفلاح خطية سيارته عطلت وشفته مخبوص ومحتار شيسوي رغم صعوبة حركتي بس ايدية تكدر تشتغل لكيت نفسي رايح يمه وعرضت عليه خدماتي باوع علية وسوالي مجال وكال .. هلا بيك ما اكول لا اذا تكدر تصلحها اكون ممنون بلشت اشتغل وهو يشيل عني ويناوشني ادوات التصليح كان العطل شي بسيط يحتاجله شوية اعادة تنظيم كلتله .. بالله اصعد بالسيارة وشغلها راح كنت واكف مستند على السيارة وصحت يالله شغل دار السويج مرة مرتين وبالثالثة اشتغلت نزل من السيارة يضحك وشكرني كنت واكف يم الفلاح سمعت اصوات صياح البنات التفتت وجان اشوف هنا وخواتها اجوي يركضون بفزع بأتجاهي ويأشرون علية. عقدت حواجبي شنو الموضوع رحت اتقدمت عليهم وصلت اخت هنا الصغيرة اول وحدة بيهم وهي تلهث كالت .. جلال بسرعة اهرب راح يجون سألتها .. ازاد اهدي منو هم الي راح يجون كنت احجي وية ازاد ووصلوا البنات هنا لزمتني من ايدي وكالت بأستعجال .. عفية جلال انهزم مناك روح بتجاه الجبل لا تبقى هنا كانت تحجي وتدفعني للخلف خايفة .. شنو وين اروح وليش غير تفهموني شنو الموضوع عاطت زينة وكالت .. وصلوووو هذولي هم راح ياخذونك رفعت راسي وانا اسمع صوت سيارات باوعت بالاتجاه الي تأشر عليه زينة وجان اشوف سيارات عسكرية نوع همر جاية بأتجاهنا انا شفتها وانا صحت بصوت عااااالي .. الجيش العراااااقي !!!!!! هَنا .. اي اجوي عليك يمكن راح يلقون القبض عليك عفية اشرد واحنا نقطع عليهم الطريق نأخرهم ابتسمت وكلتلها .. انا عمري ما انهزمت لامن عدو ولا من صديق هلا بيهم خليهم يجون زينة بغضب صاحت بوجهي .. والله انا انت مجنون اني من الاول كنت اكول عنك مجنون بس هنا ما تقبل احجي عليك يامجنون راح ياخذونك من عدنا واحنا منو النا بعد يوصلنا لاهلنا حجتها وهي تبجي وكفت السيارات العسكرية اباوع عليهن وكفن كدامي بيأس وسون حاجز حتى يحمني ووجهم شاحبة من الخوف تعاين على الجنود الي نزلوا لزمت هنا وانا ابتسم وكلت .. لاتخافون ماكو شي انا هسة احجي وياهم بعدتهم عن طريقي واتقدمت واحد من الجنود اتقدم بأتجاهي وقرب علية واخذلي تحية. وكال.. ملازم جلال اخيرا شفناك طمنا عنك سيدي ان شاء الله بخير كان يحجي وجان ينزل الضابط علي من السيارة والضحكة مالية وجهه انصدمت بي وبشكله هذا شنو صاير بحاله كبران والشيب مالي شعره رحت عليه وهو اتقدم وكال .. ها ياذيب والله حيرتوا العالم انت واخوانك الصقور بشجاعتكم ما انطاني مجال احجي گبل اخذني بالاحضان .. سيدي هذا كله بفضل الله وبفضلكم بس طمني على اخوي مهيمن شلون صار .. اخوك بخير ورجع للبصرة .. والموصل والدواعش .. داعش جاي تحتضر وبأخر انفاسها باوع وراي وكال .. ولك جلال شنو هذني حور العين لاتكول هذني اخواتك الاربعة الي گلت عنهن ضحكت وكلتله .. اي والله هذني خواتي ونعم. الاخوات التفتت عليهن وصحتلهن وانا اضحك جانوا يباوعن علية بحيرة وتعجب شكلهن راح يتخبلن من وراي خطية كل يوم طالعلهن بسالفة مرة داعشي شيطان يذبح ويصلخ ومرة مرتد خاين و قرر يتوب وهسة ختمتها بضابط عراقي .. تعالوا بنات لتخافون هذولي جماعتي هَنا سألتني بحيرة .. جلال انت منو .. وياج الضابط جلال قربان من شفتيني بمعسكر داعش كنت اقوم بواجبي بمهمة سرية ازاد كالت بفرحة .. والله كان عندي احساس انت انسان حباب زينة دارت عليها وگالت .. ترة كلنا عندنا احساس هو شخص زين مو بس انتي يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 10:23 AM
| #77 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل البارت الخامس والأربعون ج2 مساء الخير عليكم اصبر يا وطن كل شده وتهون جرحك على الشعب قسمته ماعون اصبر يا وطن كل احنه بيتك علينا توزعت صرنه هويتك اصبر يا وطن كل شدة تنحل كَوم تعاونت ما يوم تنذل نتكاتف نصير حزامك الكل نطلب يا حكومة العدو يرحل 🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶🇮🇶 جلال تركنا المزرعة واخذت البنات وياي بعدما اتشكرت من صاحب المزرعة الي كان متفاجيء بية من عرف حقيقتي وسألني ..ليش ما كلت انت ضابط كان ما تركتك هيج تتبهذل وكان قدمتلك يد المساعدة ليش خليتني اتوهم انت واحد من الدواعش الفاسدين بالحقيقة انا عثرت على زي قندهاري اسود كان قريب على مكان اصابتك بمزرعتي وهالشي خلاني اكون حذر بتعاملي وياكم انت وخواتك وحتى بلغت المضمد عنك حتى يكون عنده علم كنت متخوف منك خفت لاتأذيني انا وزوجتي وانا رجال كبير بالعمر مثلما تشوف كانت نظراته تعبر عن الاسف ربتت على كتفه وجاوبته .. عمو عذرك وياك محد يكدر يلومك ورغم كل شي انت تبقى الرجل الي نقذني وساعدني توادعنا وتركنا خلفنا بصمة في كل مكان كانت النة بي مغامرة وذكريات حزن والم وامل صعدنا انا والبنات بسيارة كانوا فرحانات وكل شوية يباوعون علية بنظرة اعجاب وفخر زينة سألتني .. جلال قربان اذا كنت راح تذكر قصتك للناس مو تنسى تنقل مظلوميتنا اني وخواتي اني زينة من جبل سنجار اتعرضنا للخطف اني وخواتي واخذونا سبايا كان حلمي اصير دكتورة. بس داعش ذبحوا حلمي ياترى اكدر ارجع احلم مرة ثانية باوعت عليها وكلت .. الانسان هو الي يصنع الحلم والامل مو الحلم يصنع الانسان ما دامج انتي بعدج على قيد الحياة اذن لازال الامل موجود ونكدر نحلم من جديد الاحلام مالها حدود طول الطريق ساعة ونض منا لحد ما وصلنا لمقر قوات الجيش العراقي كان المعسكر كله جنود وسيارات نزلت وباوعت للبنات ورجعت باوعت للمكان كلتلهم انتظروني هنا خلي اشوف وين راح نستقر الليلة اجوي ضباط اثنين اصحاب رتب اخذتلهم تحية وسلمت عليهم الضابط علي كللهم .. هذا هو جلال قربان الي كنا ننتظره الي فهمته ان هذولي الضباط من فرقة الصقور واحد من الضباط كال تعال منا اتفضل ادخل كادر الطبابة ينتظرونك باوعت للضابط علي بأستفسار جاوبني وكال .. انا انطيتهم خبر يجهزون فرقة الطبابة حتى يكشفون على جرحك حسب علمي جرحك ما خضع للفحص وما دخلت مستشفى واكتفيت بعلاجك بس عالمضمد رحت وياهم ودخلت على غرفة الكشف وفعلاً طلع الجرح ملتهب وسألتهم عن الالم بمنطقة الصدر خصوصاً من اخذ نفس عميق بعدها اخذولي اشعة وطلع عندي واحد من اظلاعي مكسور وبادي يتلحم ضمدوا جروحي الي كانت تقريباً شارفت عالشفاء فقط اما الضربة الي براسي كالوا الاطباء تحتاج تضميد ما يصير تبقى هيج منا لحد ما طلعت منهم انا مغير كل الضمادات راسي مشدود ووجذعي وانطوني مجموعة ابر خاصة للالتهابات بعدها انتقلت وياهم لمكتب اللواء انا والضباط وهناك صرت اسردلهم الاحداث وقمت بالكشف عن بعض الامور والمعلومات الي استعصى علية ايصالها الهم كنت احجي وياهم وانا بالي يم البنات شكلي راح اتأخر عليهم ريم مر اسبوع على رجوع مهيمن بدة جرحه يشفى بفضل الله ومداومة خالة زهرة على استخدام مجموعة خلطاتها السرية للعلاج ومرات تصير مشاحنات بخصوص العلاج مهيمن يكوللها يمة الدكتور انطاني علاج كافي ما يحتاج انتي هم تجين تضيفين خاف يصير تضارب وخالة زهرة تجاوبه بكل اصرار .. ولك يمة ليش تعاند انا امك واعرف دوة العرب هو الاصل وداعتك وهذا العلاج الي صرفه الك الدكتور كله طباشير كميائي يصلح شي ويخرب عشرة لاعبالك تاخذه وتطيب بالاخير مهيمن يستسلم لملحة امه اما اني ومهيمن يوم ثاني من موقفه وياية كنت امثل دور الزعلانة اي امثل لان ما يهلي ازعل عليه وانا ما صدكت رجعلنا سالم مو مال اضيعها بالزعل لكن لا بأس اسويله كرصة اذن على موقفه المحرج وياية خرب صرت فرجة كدام البنات والاخ يوم ثاني من شافني مطنگرة وزعلانة عليه حجة وصرح يم امه والبنات على الريوك وكال .. يمة بخصوص موقف البارحة ترة انا العايل ببنت عمي وجنت اضحك وياها بيوم صحت بصوت عالي عليج امه خزرته وكالت.. ولك خايب هي هاي السوالف مو مال شقى وضحك عيب استحي على دمك شفت البنية فرحانة بجيتك ومتلهفة تكوم تستغلها حطيتها على صدرك وصحت عليها حرامي هي هاي جزاتها .. يمة هي غير مرتي وحلالي واضحك واتشاقى وياها وهي بالحقيقة تشهي على التهور هواي تتدلع وتنعوص علية گلت اسويلها درس حتى تبطل تعيل بية .. ولك يمة ترة انت الي صحت البنية وانت الي بديت والبادي اظلم ضحك وكللها .. بس تعالي كوليلي يمة انتي وبناتج شبسرعة اجيتوا تركضون على صوتي شنو خاتلين ورة الباب ولك انت صاير كلش ما تستحي وبايع ومخلص شكلك الضربة براسك مو بس جرح مبين ضربت عرك المستحة عندك وطيرته گام وهو يضحك ولم امه لحضنه وكال .. والله ما تدرين شكد مشتاق لعصبيتج ولهاي سوالفج امه مثل كل مرة بكلمة وحدة نست واتناست الموقف اما حور ونور فهذني كان عندهم موقف ثاني مختلف ذلوني بس اكعد وياهم گبل يرفعون حواجبهم ووحدة تباوع للثانية ويظلن يضحكن وهاي حور الثولة استلمتني تصنيف خلتني احقد على مهيمن حصرة علية احجي گبل تكلي ها ست ريم هم الج عين وتحجين زين ما اكلت اخوية سودة علية وهو نايم لاحول ولاقوة شنو خايبة ذيبة وتريدين تفترسين اخوية المسكين .. لاتخافين على اخوج مني لايغرج المنظر هو مسوي روحه ضحية وهو بالحقيقة افة محد يكدر عليه ترة ما خفي كان اعظم. وخليني ساكتة احسن ما اريد احجي بعدج صغيرة على هاي السوالف هو انا حجيت هيج وهي گامت تكمز .. صغيرة بعينج ياحولة كنت احجي وية البنات واجوي خطار نسوان صديقات ام مهيمن وحور كامت تقدم للنسوان سمعت صوت مهيمن يصحني الحلو بالموضوع مو عرف بية زعلانة صار يصيحني الي اذا يريد اي شي بس علمود يخليني احجي وياه وكفت بالباب من غير ما ادخل وسألته .. كول شنو تريد مني ابتسم بذنب وكال .. سلامتج بس ردت تحضريلي ملابس ما جاي الكة ملابسي وين حاطينها جاوبته وانا لامة شفايفي بزعل .. ملابسك صعدتهم فوگ بغرفتك الجديدة .. وشبيج تحجيها وانتي ضايجة وتعاي شنو تكولين غرفتك مو غرفتنا ..خاف اكول غرفتنا وانت يروح تفكيرك لبعيد وتعتبرها دعوة للتحرش بحضرتك منا ورايح الا اخليك تحلم بقربي منك ضحك بشيطنة وكال .. وليش احلم وانا الواقع موجود يمي حلال علية هزيت شعري بحركة غرور وكلتله .. خلي نشوف منو بينا الي كلامه راح يمشي على كلً شنو تريد اجيبلك ملابس .. اريد دشداشتي البيضة لان مثل ماتشوفين راح يجوني ناس .. اهووو راح تنسيني خلي اروح اجيبها الخطار على جية رحت صعدت فوگ وجبتها كانت مكوية ومعلكة كنت اتخيله يلبسها بصباحية عرسنا بس ما علينا اهم شي هو يلبسها مو مهم الوقت نزلت .. هاك اتفضل .. شنو هاك اتفضل يعني بربج منو يساعدني البسها انت غير مرة قاسية ادري ما جاي تشوفيني شلون عاجز .. انت متأكد ترديني اني اساعدك باللبس يعني متخاف مني استغل الوضع واسويلك شي احب اذكرك امك واخواتك يم الخطار مشغولين ما يلحكون عليك هالمرة اذا صار بيك شي سد الباب واتكيء عليه وهو يضحك وحجة بصوت ناصي فتح ذراعانه وكال .. يالله تعاي ياريت تكسبين بية اجر والله ما راح اكول شي هاي المرة اوعدج اصير حباب ما اصيح لامي عليج سألته .. يعني انت بكدها تريدني اساعدك تلبس الدشداشة ضحك بثقة .. حمدي ربج راح تساعديني بلبس الدشداشة مو زين ما طلبت منج تلبسيني البنطلون وانا بهاي حالتي جان قصده يحرجني بس عليمن جاي علية اني الا اخليه يتوب يلعب بالنار وياية .. براحتك انت الي جبتها لنفسك مو تكول طلعت الدشداشة من التعلاكة واقتربت منه رفعت راس الثوب وهو دنك لمستواي ودخل راسه بفتحة الثوب صار وجهه قريب على وجهي ابتسمت بخباثة واقتربت عليه وحجيت بدلع وعيوني تتبع تفاصيله وية كل كلمة احجيها اتنهد همست .. يابختها للدشداشة شكد محضوضة راح تحضن اكتافك وتتوسد على صدرك وتلامس كل شبر من طولك ترهم عليك ومفصلة تفصال اباوع عليه بلع ريكه ونسى حاله لزمني من زندني يقربني عليه بلهفة وكال .. اشو هاي الدشداشة طلعت وكحة وما تستحي بس تردين الصدگ اشو حبيتها دنگ راسه يم اذني وهمس .. اي كملي بعد شتسوي هاي الدشداشة العجيبة غير الحضن جاوبته وگلت .. تريد اراويك الدشداشة شتسوي جاوبني بلهفة مستعجل .. ولج غضب راويني شتنتظرين مو سمطتي الخلفوني سحبته علية من مقدمة ثوبه قربت راسي على رگبته واتنفست عطره بعمق حرارة انفاسي لفحت ركبته حسيت بي ذايب ومسلم واصل للاخير ابتسمت بخباثة وهمست بصوت معسول وكلت .. هذا درس الك حتى تبطل خباثة وعلى غفلة دفعته وابتعدت عنه نفض راسه يريد يستوعب الصار رحت تركته وهو يصيح وراي .. ولج غضب تعالي رجعي خليتيني عالنص معلگ الله يلعن بليسج مو مرة قنبلة درت وجهي واني اضحك تستاهل حتى تبطل تخبث علية جلال بعدما خلصت كل الامور والمتعلقات طلبت الاذن بالنزول مباشرتاً للبصرة الضابط علي كلي انتظر بس الليلة لان باجر راح نسافر وياك نوصلك للبصرة هناك عشاير البصرة ينتظرونك واللواء (....) هم راح ينتظرك حتى يستقبلونك يم بوابة البصرة و يقومون بالواجب گلتله وانا احس گلبي يريد يطير من كمية الفرح والاعتزاز كلتله اريدك تتصل على اخوي مهيمن وتنطيه خبر بجيتي بس قبل وصولي بساعة تبلغه اريد اسويله مفاجئة كنت احجي وية الضابط علي وامشي بتجاه مكان البنات خطية كعدوهم بالمكتب مالت الضابط لان كلش اتأخرت عليهم بحيث اول ما دخلت بسرعة كمزوا من مكانهم وصاحن .. جلااااااال وينك ليش اتأخرت كان مبين عليهن الخوف قهرني منظرهم .. اعتذر منكم لان طولت عليكم بس كان عندي شغل مهم ولازم اخلصه والحمدلله كملته الضابط كال راح نفرغ كرفان من كرفانات المعسكر بس الليلة للبنات حالة مؤقتة حتى يرتاحون وباجر نوفرلهم مكان يسكنون بي منا علما يوصلون اهلهم عقدت حواجبي .. ليش منين عرفت اهلهن جاوبني .. مو انت بين ما كملت فحوصاتك انا كعدت استجوبهن وسويتلهم تقارير بالصار بيهن وتم التوقيع والختم عليه ومن خلال الكلام وياهم توصلت اختهم الصغيرة ازاد حافظة رقم ابوها بس ما متأكدة من النقال بعده عند ابوها لو ضاع منه واحنا اتصلنا عالرقم والله ووصلنا الرد وحجينا وية ابوهن كان كلش منهار لان اول البارحة استشهد واحد من اولاده بالجبل والثاني متصوب وهم مشغولين بي وزوج اختهم الكبيرة صارله يومين مختفي الاب طلب منا ننطيه مهلة اسبوع بين ما يخلص امور ابنه المتوفي وتستقر حالة ابنه الثاني المصاب وهو يجي ياخذ بناته خطية كان كلش منهار على مقتل ابنه بحيث احس ضاع علية منو بيهن اشد عليه بالضيم مصيبة بناته لو مصيبة ابنه لو هو الي كان بالجبل بعده خايف ما يكدر يطلع الا يتأكد من الوضع والامان كان علي بحجي باوعت عالبنات عيونهم كانت حمر من اثر البجي والخوف والتعب. كسروا گلبي اخذتهم للكرفان ودخلن لكيتهم فارشين فراشات وبطاطين والغرفة دافية عكس صقيع البرد الي بالخارج سألتهم تردون اجيبلكم عشى هنا كالت .. لا جلال احنا اكلنا صديقك جابلنا اكل شكراً تعبناك ويانا جاوبتها وانا متردد افاتحهم بموضوع رجوعي للبصرة اجلت الموضوع على باجر الصبح احسن خليها قبل لا اسافر ابلغهم واسلم عليهم طبعاً اكيد بعدما اتأكد من توفير مكان سكن مريح وامن الهن يالله اسافر مستحيل اعوفهم من غير من اتطمن عليهن اصلاً حتى وصيت اشتريلهن نقال وشريحة حتى ابقى على تواصل وياهن واتطمن عليهن .. يالله انا رايح تصبحون على خير ازاد سألتني بصوت خايف .. جلال عفية لا تعوفنا هنا لوحدنا. احنا نخاف هنا هواي رجال عندكم ما اكدر اغمض عيوني وانام .. لتخافين ازاد انا غرفتي هنا يمكم مو بعيدة واي شي تحتاجونه تلكوني يمكم والجنود والضباط الي هنا كلهم ناس شرفاء مهمتهم حماية الوطن لتخافين انتي بأمان هذولي مو مثل دواعش قذرين هذولي عندهم غيرة وناموس نامي وانتي متطمنة بعدما هدئت خوف البنات رحت للكرفان الثاني جانوا مجهزينه ومرتبينه بحيث بس دخلت شربت من العلاج الي انطونياه وحطيت راسي ونمت بس. احس بظلوعي فالتة بس تطكطك .. اااخ يابة يوم ثاني الصبح كعدت على صوت محرك سيارة يجعر كمت من سريري وغسلت وجهي وبللت شعري اتلمست لحيتي اريد ازينها شلون بس ماعندي مكينة حلاقة سمعت الباب اندك رحت فتحته كان الضابط علي واكف بالباب دخل للغرفة وصاح .. تعال محسن فوت دخل صينية الريوگ وجيب البدلة وتعال بالعجل دخل وحط الصينية عالميز كدامي وطلع وترك الباب وراه مفتوح والبرودة اقتحمت جو الغرفة الدافي باوعت لعلي وكلتله .. شنو يا بدلة تقصد جاوبني وكال .. بدلة عسكرية اريدك من تسافر للبصرة تكون لابس بدلتك العسكرية ومعلك الرتب على اكتافك حتى من يستقبلونك العشاير والضباط واخوك والعشاير واخوك راح يشوفونك وانت بالزي العسكري هيبةً ويرفعون راسهم بيك لمعت عيوني وانا اتخيل ردة فعل مهيمن من يشوفني وانا بالبدلة صرت كلي حماس اتمنى كون ادوس دگمة والگة روحي بالبصرة اتريكنا وخلصنا واخذت البدلة وحطيتها عالسرير وطلبت منهم مكينة حلاقة كهربائية حلقت وجهي وبقيت لحية خفيفة بالحقيقة وحددتها خلي استغلها اني متصوب اكدر ما ازين لحيني واخذتلي حمام بعدما سلفنت الضماد بنايلون وشعري ما غسلته لان بعده الجرح ومضمد بلفاف وقطن مو مال اكعد ابلله ويلتهب بعدما خلصت ولبست البدلة العسكرية وعلگت الرتب على اكتافي حسيت بروحي رجعت جلال الاولي واخيراً رجعت لروحي انا جلال مؤيد جلال قربان طلعت من الغرفة واتوجهت على غرفة البنات من طليت عليهن وشافني بهاي صورتي الجديدة لمعت عيونهن بأعجاب هنا كالت .. شكد حلو عليك الزي العسكري زينة .. هاي الملابس احلى عليك من ملابس القندهاري الافغاني شلون اتحملت تلبسهم ازاد كالت .. كلش حلوات اصلا ما عرفتك من دخلت جوانا كالت .. انت من الاول كنت حلو وهسة صرت احلى تشبه اخوية الكبير عيناً قاطعتها ازاد .. اي صحيح خصوصاً من حلق لحيته بس جلال اضخم كانوا يتكلمون وانا واكف محرج اوزع ابتسامات كانت كلمات الاطراء بالنسبة الي احراج بس رغم هذا كان الحزن محتل معاني وجهم خطية اخوهم انقتل وهواي خسروا بحياتهم بعدها طلبت منهم حتى يجهزون نفسهم .. يالله بنات لازم نطلع منا حتى اخذكم عالمكان الي راح تستقرون بي وهناك راح تبقون تنتظرون ابوكم واخوكم يجون عليكم بعد اسبوع بالكثير ابوكم كال يحاول ما يتأخر عليكم اخذت البنات ورحنا انا وياهن وية الضابط علي حتى يوصلنا عالمكان الي جهزوه الهن وصلنا للمكان كان عبارة عن مخيمات مجهزة للنازحين بصورة مؤقتة نزلوا البنات ورحت اتأكدت من المكان كان بي اغطية وفراشات كلش هواي وسألت الضابط علي عن مأكلهم ومشربهم جاوبني وكال .. اكو جهات مسؤولة بتوصيل المساعدات من مواد غذائية وطبية وكلشي لتخاف عليهم. تكدر تسافر وانت متطمن عليهم سألته .. جبت النقال والشريحة الي طلبتهم منك البارحة طلع نقال صغير يشتغل عالدكم اتشكرت منه. ورحت على مكان خيمتهم دخلت عليهن كانوا يتفحصن المكان بحذر دخلت وانا شايل هم للحظة الوداع شلون راح اعوفهن واروح وهن هذا حالهن مديت ايدي بالنقال لهنا حتى تاخذه مني وجليت صوتي وكلت .. هَنا هذا النقال خلي يمج حتى اكدر اتواصل وياج من اسافر الكل حجة على فد سؤال .. شنو !! راح تسافر وتعوفنا دنگت راسي اتهرب من نظرات عيونهن وكلت .. انا لازم اسافر عندي اهلي وناسي ينتظروني بفارغ الصبر وگلبهم علية مثل الجمر خايفين علية يردون يتطمنون علية هنا سكتت خواتها ازاد ووجوانا كامن يبجن وزينة بقت صامدة ما حجت اما هَنا كالت .. جلال شكراً الك على معروفك ويانا انت ما قصرت وقمت بالواجب وزيادةً وصار لازم تنتهي رحلتك ويانا واحنا هم لازم نعتمد على نفسنا وهذا المكان مبين عليه مكان امن محد راح يكدر يأذينا جلال روح اتمنى توصل بالسلامة لديارك وزينة كالت.. مع السلامة جلال انت انسان طيب وراح ابقى اتذكرك طول حياتي ما انسى شهامتك معنا وراح احكي قصتك لاولادي واولاد اولادي احفادي احكيلهم قصة الرجل الشهم الي انقذ جدتهم بأيام شبابها ابتسمت بفخر كلمات زينة كان خلفها ابعاد كدرت تجسد موقفي معهم بلوحة راقية للتاريخ تثبت ان الموقف انحفر وترك بصمة بالعقول وراح يبقى ينذكر على مر الاجيال ودعتهم وطلعت من غير ما التفت عليهم الهوى البارد ضرب وجهي وارتعدت صعدت بالسيارة حتى نسافر والتفتت اباوع من الجامة على مكان المخيم شفتهن طلعن كلهن من الخيمة لاحظت الهوى عالي وبارد هنا كان يرفع بغطا الخيمة باوعت عليهن شلون متجمعات وحدة يم الثانية وعيونهن تدمع بخوف اتحركت السيارة ورفعن ايدهن ب حركة الوداع وانا رفعت ايدي اودعهن غمضت عيوني استدارت السيارة وصار مكان البنات خلفنا بقيت اكابر واداري ما اريد استدير واباوع عليهن جلال ديربالك تضعف انت تعرف مرافقتك للبنات مكتوب نهايتها الفراق وهذا مصيرهن بقيت اردد كلمة جلال اجمد .. جلال قوي گلبك .. جلال لاتضف لاتباوع عليهن عوفهن لكن غصب عني لكيت نفسي مستدير للخلف وباوعت عليهم من الجامة الخلفية للسيارة لكيتهن بعدهن واكفات يعاينن ورة السيارة والهوى البارد يضربهم ويرفرف بملابسهن الخفيفة اخذت نفس عميق ورجعت بگعدتي وكلت بصوت امر للسايق .. وقف السيارة بسرعة الضابط علي باوعلي مستغرب .. شنو شبيك جلال كلتله .. خلي السايق يرجع للمخيم .. ليش شنو نسيت شي هناك .. اي نسيت وعدي الي قطعته للبنات انا انطيتهن وعد وما وفيت بي .. عن اي وعد تحجي شبيك جلال .. وعدتهن اسلمهن بيدي لأهلهم واحافظ عليهن وابقى وياهن للاخير .. ادري يعني خوما تكعد هنا تنتظر ابوهن لحد ما يجي وتسلمه بناته بيدك واصلاً احنا ما متأكدين موعد قدومه لهنا منو يكول صدگ اسبوع ويجي جائز يطول اكثر من اسبوع جاوبته وانا متأكد من قراري .. منو گلك انا راح ابقى هنا .. لعد شنو .. انا راح اخذهن وياي للبصرة وهناك ينزلن ضيوف عدنا لحد ما يجي ابوهن ياخذهن. بقى الضابط يباوع علية محتار شنو يحجي وكال .. براحتك جلال بس خلي ببالك ترة راح تاخذهن على مسؤوليتك كلشي يصير عالبنات انت الي تتحاسب ابتسمت وكلتله .. شيريد يصير بعد اكثر من الي صار بيهن رجعت السيارة بينا لمكان المخيم ونزلت اركض من السيارة ورحت دخلت على خيمتهن جانن گاعدات بالزاوية يبجن بصوت ناصي انمرد گلبي عليهن اتخيلت نور وريم وحور هيج حالهن والدنيا تجور عليهن نفضت راسي مرعوب .. هَـاي شنو بناتي اشو كاعدات تبجن بعدني ما رحت بس سمعن صوتي وشافني صاحن بصوت متفاوت هنا .. جلااااال زينة .. ليش رجعت ازاد.. شنو عطلت السيارة ابتسمت وكلتلهم .. لا رجعت حتى اخذكم وياي للبصرة تنزلون يمي هناك ضيوف عدنا ومن يجي ابوكم انا اسلمكم بيدي له مثلما وعدتكم ازاد الصغيرة اجتي وحضنتني وصارت تبجي مثل الطفل المهضوم هَنا كالت بأحراج .. اخاف نسوي عليك زحمة واحراج جلال ما نريد نتعبك ويانا اكثر من هيج لتخاف علينا احنا نكدر ندبر امورنا هنا جاوبتها .. لا هَنا انتي حامل والجو هنا صقيع بارد دشوفي الهوى شلون يلعب بالخيمة ما اكدر اعوفكم بهذا المكان صعبة ما راح تكدرون تدبرون اموركم لوحدكم تعالوا وياي وصدك اخذت البنات وياي بعدما الضابط علي اخذ الملف مالتهم المسجل بي كل المعلومات والضابط المسؤول وقع على تقاريرهن. وانا وقعت على الكفالة بكل اصرار واخذتهم وسافرت بيهم للبصرة وانا بالي مرتاح ومتطمن مهيمن اخوي شنو تعني هالكلمة يمكن بعضنا من كثر ما اتعود على استخدامها ما يدرك معانيها ولا يستوعب قيمتها مكانتها بالگلب الا من بيدي الزمن يتلاوة وياك حتى يسلب اخوك منك وبساعتها راح تعرف شنو تعني هالكلمة شكبرها عليك كلمة اخوي من تفقد ذكرها على السانك صحيح عشرتي وية اخوي موطويلة بس اخوتنا جذورها اصيلة اخوتنا موجودة من زمان من اول ساعة النا بالدنيا مكتوب علينا نكون اخوان بعلمنا او من غير علمنا احنا اخوان رضينا او رفضنا هذا قدرنا جمعنا وكنا مستنكرين لبعضنا بأول يوم.. واول لقاء كنت اباوعله بدون اقتناع وهو كان يبادلني الشعور ما مقتنع اصلاً لحد الان اتذكر كلامه وية المحامي (( ابو سيف لو عايفنا على عمى وجهنا وما معرفنا على بعضنا هواي احسن على الاقل جنا متفاهمين ومتقبلين بعضنا اكثر واحنا غربة )) شكد مرت علينا ايام وليالي كانت علاقتنا ببعضنا مثل المد والجزر ساعة اتعارك وياه وساعة الكة روحي افتخر بي اطارده بفضولي من خوفي عليه يستقبلني بضحكته وروحه الطيبة ياما عصبت وغلطت وغضبت عليه ما يجاوبني ولا يتجاوز علي يتركني ويزعل ويسكن المعمل وبكلمة مني بسرعة يتنازل ويتقبل الصلح ويرجع مثل اول واكثر شكد شايل محنة الي وانا شگد كسرت گلبه خذلته ياترى هم يرجع ويسامحني مثل قبل كنت كاعد لوحدي ضايج مختنك خالي حسن اليوم مسوي ثواب على روح ابنه منتظر وعازم الكل ببيته خوالي واولادهم ونسوانهم وكم شيخ من الشيوخ جماعته اجري جهزت نفسي ورحت انا وامي ونور للعزيمة حور وريم رفضوا ما قبلوا يرحون وصلت يم بيتهم. انتظرت امي تنزل ونور اتبعتها. امي فاتت دخلت جوة ونور دخلت وراها وانا اتجهت على باب الديوان دگ نقالي برقم الضابط علي اتوقفت بمكاني مصدوم كلبي فوت نبضة خايفة ورديت عليه بسرعة جاوبني وكال .. مهيمن حضر روحك وجيب ناسك واهلك وتعال يم بوابة البصرة انتظرنا همست بصوت بالكوة يطلع .. ليش شكو شنو صاير .. انا جاي وجايب وياي الضابط جلال مؤيد واخوك يريدك ابو الهمة هناك تستقبله حجيت وانا احس بالحماس صار يمشي بدمي .. سيدي انت من صدك تحجي يعني اخوي جلال عايش الضابط جاوبني وكال .. اكولك انت شكلك راح تضيع الوكت واحنا راح نوصل روح بسرعة حرك رجليك وجيب الجاهة وتعال وانهى الاتصال جانت الوجوه كلها تعاين علية عناد سألني بفضول .. شنو مهيمن شبيك صاير شي جلال شبي بقيت محافظ على جمود وجهي ما بين علية اي اثر للفرحة. مو هسة الفرحة بعدها ما اجت اشوفه بعيني يالله بساعتها من صدگ افرح خالي كرر سؤال عناد .. شبيك مهيمن صاير شي ما تحجي خوفتنا باوعت للكل وعيوني ثبتت على خالي ابو سجاد وسجاد واولاده البقية وخبرت الكل وانا متوجه للباب اريد اطلع كلتلهم كلهم بصوت عالي مستعجل .. خالي اجمع ناسك والجاهة وشيوخك وتعال الحگني هناك لبوابة البصرة اليوم محتاج فزعتكم وياي خالي حسن .. ولك بوية مهيمن بس فهمنا شنو صاير .. خالي انا رايح ماعندي وكت مو تنسى جيب الشيوخ وخوالي واولادهم انا اليوم بعازتكم رايدكم كلكم وياي انهيت كلامي وطلعت من الديوان متوجه لسيارتي اسمع صوت خالي حسن صار يحشم بأولاده بوية حضروا سلاحكم خلينا نلحگ ابن عمتكم شكله واكع بشدة اتعمدت ما اخبرهم عن الموضوع حتى اضمن وجود الكل لازم يكون هناك فزعة بالموضوع وخوالي اعرفهم بالفزعة بسرعة يركضون صعدت سيارتي وعناد وطالب لحكوني طالب بسرعة فتح الباب وكعد يمي بدون ما يسأل وعناد اتجه على سيارته درت عليه وسألته.. هسة انت شعرفت وگبل اجيت وصعدت جاوبني وكال .. ما افتهمت اي شي بس سمعتك تكول اليوم محتاج فزعتكم ومن هسة اگلك انا وياك للوحة. ابتسمت بنصر والحماس يجري بدمي شغلت السيارة وحركتها بكل سرعتي اريد اوصل اول واحد صرت اتسابق وية الريح اريد اكون اول واحد يستقبله كانت بوابة البصرة قريبة علينا. وصلت يم البوابة وركنت سيارتي ونزلت بسرعة واتبعوني عناد وطالب لكيت مجموعة سيارات عسكرية. مجموعة زلم معگلة شكلهم ينتظرون وصول جلال عناد ركن سيارته بصف سيارتي ونزل .. فهني شنو الموضوع ترة ما ظل دين براسي احجي جاوبته وانا عيني عالطريق اراقبه .. انتظر وراح تشوف بعينك دقايق وجان يوصلون خوالي واولادهم كلمن شايل سلاحه بيده خالي حسن اجة يمي وكال .. وينهم يابعد خالك كلي منو الي عايل عليك شنو موضوعه كان الكل يباوعون علية ويتسائل شنو السالفة ينتظرون جوابي خالي ابو سجاد. كال بنفاذ صبر .. هسة هو غير يحجي كلتلهم .. جبتكم لهنا حتى تستقبلون وياية اخوية جلال راح يوصل اباوع عالوجوه اتغيرت نظراتها للبرود وخالي ابو سجاد هز ايده بستهزاء وكال .. خايب انت صدك تحجي لو تجذب جايبنا مناك لهنا وخبصتنا وجبنا شيوخنا وجينا علمود نستقبل اخوك الارعن لايكون تريدنا ناخذه دخيل عدنا ونحمي علمود مطلوب للحكومة سأله الشيخ صاحبهم بفضول .. ليش شبي اخوه جاوبه ابو سجاد .. حشى الزينين اخوه واحد صايع زايعته الدنيا خالي حسن كله .. ابو سجاد كافي ماله داعي هالحجي ولا وكته التفت علية خالي وكال .. مهيمن كول جبتنا لهنا علمود اخوك يحتاج الفزعة جاوبته وكلت .. جبتكم لهنا اريدكم تشوفون اخوي جلال من يوصل اريد اليوم اسكت اليحجون وخلي الشامت يبلع لسانه ويرجع ليورة وهذا انا اكلكم جلال اخوية وافتخر بي واحجيها بزود وبصوت عالي وخلي المايعجبه الحجي يعاين لروحه ويوكف عالدرب ويشوف. شلون ابن الوطن ميهاب اللوحة جلال قربان بطل واليوم اريد اتنومس بيه خالي ابو سجاد وسجاد واخوانه يهزون بيدهم بشماتة دقايق مو اكثر وما اشوف الا السيارات بدت تتوافد وبمقدمتهم سيارة مدنية عليها العلم العراقي وجان اسمع اصوات الرمي علت بالجو التفتت وجان اشوف ضباط ثنين واكفين يم الشيوخ اتبع صوت الرمي هوسات للشجعان صوت المهوال عالي .(( هلة يالرافعين الراس .. انتم بالملاعب ثبتوا الساس طاريكم ينشف الدمع من العين وحگ حسين والعباس هاااا خوتي هااا هاااا انتم عز النة وسيف النطبر بيه ) ها..ها..ها شرد أوصفنك مثل حاتم طي لكن تزيد علوم شرد أوصفنك مثل عنتر خاف أظل مندوم هَـا انجب يالشامت شد ذراعه وعرس بيه ها انجب يالشامت هذا اليوم النفرح بيه )) اتوقفت السيارات والهوسات مستمرة عناد صاح بفرح .. لك مهيمن جلااااااااااااااال وصل .. وصل البطل وطكها ركضة ارتج گلبي بين ظلوعي يطالبني بشوك اركض لگيت رجلية غصب عني ماخذتني له نزل من السيارة. بالزي العسكري الملازم جلال قربان يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 10:28 AM
| #78 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| حانت لحظات شد رحالي ايها المتابعون 🌹🌹🌹 #الكاتبة_نهى_الحسون #قضية_الشمل البارت قبل الأخير مساء الخير عليكم احبتي طبعاً كنت مقررة ما انزل بارت اليوم لان مثلما تعرفون قررت اختصر القصة لذلك البارت الاخير بالذات يتطلب مني تركيز وترتيب ما اريد ابخس حق القصة واكيد راح ياخذ مني وقت طويل لكن الادمن هدى اصرت علية ان انزل بارت حتى لو صغير علمود مواصلة احداث القصة وما ينقطع عليكم التشويق فكتبت لعيونكم بارت لتكملة احداث اللقاء مهيمن وعلى صوت هوسات المهاويل والشيوخ وصوت الطلق وجان ينزل من السيارة بالزي العسكري الملازم جلال قربان ارتج گلبي بين ظلوعي يطالبني بشوگ اركض عليه لگيت رجلية غصب عني ماخذتني لعنده اريد اوصله التموا الشباب حوله وقطعوا الطريق عليه وصار يتنقل بالسلام من حضن لحضن اعاين عليه. من بعيد لابس البدلة والرتبة على متونه واكف ورافع راسه بهيبة ردت اروح عليه بس الزلم سادين الطريق علية كنت متلهف اتمنيت رجلي صاحية واروح اركضله وانا كلي لهفة قطع علية الطريق الضابط علي وسلمت عليه وسلم علية سألته بصوت عالي اريد اخلي العواذل كلهم يسمعون .. ها سيدي بشرني كولي عن أخوية البطل وگولي شنهي علومه .. قرت عينك بسلامة اخوك البطل والله كفى ووفى ماقصر رجعلنا وجايب بشارة النصر وياه ماقصروا ولد الملحة كنت اسمع الضابط يحجي بس ما فاتتني وجوه العواذل شلون بهت اللون من وجوههم وظلت الوجوه مغبرة واكفين مصفصفين اباوع بطرف عيني على خالي ابو سجاد شلون راح يطك من الفضول يسمع كلام الضابط وصار يصفك كف بكف متعجب رفعت راسي عاينت على مكان اخوي عيوني لمعت بالفخر اريد اصيح بصوت عالي واكلهم يااااناس انا اخو هذا البطل جنت واكف وية الضابط علي بس كنت واكف وياهم على اعصابي وعيوني وگلبي هناك بذاك الصوب يم جلال انتبهت عليه كان يسلم على الضباط وعيونه تدور بالوجوه عبالك واحد ضايعله ولف اترخصت من الضابط تركت خوالي واكفين يمه يحجون وياه مشي شوية وبعدها وكفت بمكاني ما اكدر اوصله واني طك بيه الصبرمتلهف لملگاه عيوني تعاين عليه بلهفة وعيونه بعدها تحوم بين الوجوه بعده ما لگةً مگصده وانا واكف اتوسطت بالميدان رفعت ذراعي اليمنة واهوس بالعكازة واشرت عالربع كلهم يسكتون وبصوت عالي نشادته .............. خوية دموع فركتك ياخوية باليمنى حنت ..(يبكي دم) طكت عروك الگلب لذكراك حنت.. (اشتاقت) امي العجنت حنتك ولاختي حنت ..(حنة العرس) متعني ارد المك بس خانتني رجليه ها خوتي هاااا ياهو الياخذ كلبي يوصله...ها ياهو الياخذ كلبي يوصله.. كون يوصلونة لجلول هدى سعد .................... صرت اهوسله. بهوسات اريده يلتفت صوبي ويعاين علية جلال كنت واكف اسلم على الشيوخ والزلم والكل فرحان بية يتحمدولي على السلامة بس كانت عيوني بعدها تحوم تدور بالوجوه اريد اكحل ناظري بشوفة ابو الهمة هناااااك وجان اسمع صوت هوساته التفتت اباوع لگيته واكف متوسط الميدان ويهوس بعكازته وينشدلي بالهوسات اخذتني رجلية عليه بدون ما حسيت الا انا فتحت طريقي بنص الناس ووصلت يمة ووكفت كدامه هسة يالله حسيت بالنصر من شفت لمعة الفخر بعيون اخوي جان واكف مستند على عكازاته حط وحدة منهم بيده الثانية صارن اثنينهم بيد وحدة وفتحلي ذراعه وحجة بفخر وكال .. هلا بالضابط الگاصد علينا والرتبة مشدودة على متونه هلا بجلال قربان يل بالديوان للكلفات يردونه اقتربت منه دمعت عيوني ما اشوف نفسي الا وهو ماخذني لحضنه تلاگينا بالاحضان ووجوهنا توسدت الاعناق اتنفس الخوة من نحره ويشم النصر من ثوبي رفعت راسي وكلتله واني اضحك.. سمعت بيك سافرت وراي للموت حالف تتعارك وياه وتصيح بنص الهيمة وراك وراك رفع راسه والدمعة تلالي بعيونه گالي .. كلتلك لو تروح للموت تلكاني وراك ابتعد عني ورجع للخلف يتوسط الميدان بين الزلم وعيونه بعيوني وكال وعلى طاري الموت اسمع هاي الهوسة مني اريد اهوس وبهوساتي معاني هذا الحيد هو والذيب خوان اخوي و نظل للموت خوان لابينا الي يغش ولا بينا خوان ..خائن) نموت ونحيا سوية اسمع هاي انا گاصدها و احجيها وخل يسمع حچينا البينة شمتان جلمتي هاي وحدة وما اثنيها اسكت يل كلت عنه بايع وخوّان ماصدكو كالو هالبدلة مو راعيها مادروا بي صاير للوطن قربان بطل وهز عروش داعش والحواليها وخشوا انتو جحوركم يجرذان ها خوتي هااا هاااتنومس خوية اتنومس هاااا اتنومس خوية تنومس اشكد الرتبة تلوگ عليه .. اتنومس خوية اتنومس اشگد الرتبة تلوگ عليه اباوع على خاله حسن اولاده وبقية خواله رفعوا اسلحتهم ليفوگ وگاموا يرمون بالجو ومن بين كل هاي الهوسة وجان المح واحد اقترب علية وبعيونه نظرة عتب .. جلال قربان الي دين يمك واريدك توافيه لا عبالك الرتبة الموجودة على متونك تخليني اشفعلك وانسى الزعل وياك كان يحجي بزعل وذراعه مفتوحة ضحكت من كل گلبي واخذته بالاحضان .. الحمدلله اتطمن گلبي بعدك عار ما اتغيرت من يوم الي عرفتك انت بالزعل بوخة ضحك وكال ..بالله يالنسيب ترة العار يلوحك ياخال ابني حور اندگ الباب ودخلت نور وامي مخبوصات وامي معصبة سألت نور .. شكو شبيها امي معصبة جاوبتني وكالت .. ما اعرف شنو الموضوع بس يكولون مهيمن طلع من بيت خالكم حسن وهو مستعجل وكللهم محتاج فزعتكم وخالج والشباب اخذوا سلاحهم وراحوا وراه وخالة زهرة حرگت الجو ياهو الي تسألها من نسوان اخوانها شنو الصاير تجاوبها والله ما ادري علمي علمج تالي خالة عاطت بيهن وكلتلهن .. ولجن خايبات انا زهرة. كاعدات تضمن علية اكص ايدي اذا ما طلعتن كلشي تعرفن بس تتسترن على الموضوع تالي عافت البيت وطلعت زعلانة واني كل شوية اتصل على مهيمن ما يرد واتصلت على عناد ما يرد ظل بالي جانت نور تحجي وريم دخلت مسوية الشعر كيرلي والبدي زنادي ابيض وجينز حصر عالورك طالعة عبالك لبنانية عبالك عندها حفلة نور باوعت لريم نست الموضوع وسألتني .. هاي وين طالعة جاوبتها .. هاي من يوم الرجع المگرود اخوي وهي انگلبت علينا طنطل ريم اكتفت هزت شعرها بغرور ورفعت تك كتف بدلع وراحت وعافتنا .. يالله هاج استلمي شوفي شلون تتدلع راح تخبل الزلمة. ما اعرف كلما اشوفها واشوف مهيمن دايخ ومسطور بسوالفها اتذكر هاي البزونة الي وية توم وجيري بيوم تدلع عليه. ريم رفعت حاجبها بدلع وبصوت ينعوص .. مييييييو .. مييييييو ديري بالج مني ترة اني بزونة واخرمش هديت عليها ونور لزمتني .. ولكم عوفوني عليها خلي انتف شعراتها الي صارلها ساعة تتدلع بيهن ريم بسرعة صارت ورة نور وكالت .. لمسي شعرة مني والله اكول لمهيمن عليج نور عاطت بينا وكالت.. ولكم بس كافي هو مهيمن بيا ضيم وانتن كاعدات تتعاركن ريم سألتها.. ليش شنو صاير حنا نحجي وجان يندك الجرس امي دخلت للمطبخ وهي تدعي .. يارب كون هذا مهيمن وراحت طلعت تفتح للباب لحظات مو اكثر وجان اسمع صوت هلهوله امي واتبعها اصوات الزلم .. يصلون عالنبي ركضنا اني والبنات بسرعة نريد نشوف شنو الموضوع وهنااااا وجان اشوف جلال جاي يبوس راس امي وهو لابس الزي العسكري ومهيمن واكف بصفه شهكت وحطيت ايدي على حلگي ودموعي هلت على خدودي باب الشارع مفتوح على وسعه والزلم تتوافد عالبيت انتبهت لطالب حط الخروف يم رجلين جلال وذبحه صرت اسمع بوضوح هوسات الشباب مالية الشارع سمعت صرخة فرح نور ومن غير شعور راحت تركض على اخوها. من غير ما تهتم بالناس هي بطبعها خجولة بس حنينها لأخوها طغى وغلب خجلها اباوع لمهيمن جان يوزع ابتسامات والفرحة ما سايعته وعناد معصب النار تطلع من اذاناته اسمعه يحجي وية الزلم خوالي واولادهم والربع كلهم .. اتفضلوا .. اتفضلواا بالديوان .. ياهلا بعدما دخلوا بقى بس كم واحد من اولاد خوالي ريم طلعت والفرحة ما سايعتها وحاطة على راسها شال راحت سلمت على جلال اباوع لمهيمن بدون ما يهتم للموجودين گعد يعدل بحجابها. وامي جانت بعدها تهلهل والنسوان الحمدلله وحدتهن تگول عبالك الرجل الوطواط ( بات مان ) حاطة عبايتها ورة الباب للطواري وبسرعة بس يصير شي تلگيهن يركضن والعباية تهفي وراهن ويسألن بفضول بنات خوالي ونسوان خوالي كلهم اجوي امي اخذت النسوان ودخلت بيهن جوة وانا باقية بباب المطبخ استحي اروح اسلم اصرت اتحسد لريم ولنور لان سلم عليهن اباوع عليه يسولف منطلق وعيونه تتلفت بالمكان ما يريد يلفت انتباه مهيمن بنظراته هناااااك وجان توگع عيونه علية وصرنا نتبادل النظرات بلهفة يمة نظرات عيونه تذبح وصرت انا اول كبش مذبوح ورجلية اتحولت جيلاتين وصارت ترجف اتكأت عالحايط استند عليه لزمت گلبي گام يخفق نسى نفسه وابتسم وحرك شفايفه بكلمة مشتاق من غير ما يحجي مهيمن انتبه على اتجاه نظراته والتفت علية جلة صوته وجلال بسرعة صد عني بنظراته سوى روحه يباوع عالحايط عززززة غير اني اجيت انصهر ومحد يلحگ علية واصير مثل الماي بالگاع ويلموني بوصلة مسح وارجع انصهر مهيمن صاحني وكال .. حور تعالي سلمي مو عيب لحد هسة ما مسلمة على خطيبج انتبهت لجلال بسرعة التفت وكرر كلام مهيمن .. خطيبج !! ريم كالت .. اي مو مهيمن صار يصطاد العرسان وخطبك لحور وخطب عناد لنور واني خطبته كما تدين تدان جلال ضحك وعيونه بيهم لمعة بحماس وكال .. شنو جاي يصير منو لاعب بالاعدادات هو منو يخطب منو بس تدرون حبيت التحديث الجديد اقترب وسلم علية وكال .. اشو صايرة حيليانة على فراگي مهيمن كله.. خير سالمين ترة بعدنا ما گلنة حلال باوعت لمهيمن دنكت مستحية عندي كلام هوااااااي يمكن لو ابدي اسولف انا وياه ما يخلص للصبح دگ نقال جلال ورد عالمتصل كان النقال اسود ابو الدگم صغير حجة وية واحد اسمه الضابط علي كان يحجي بالطارمة وعيوني تراقب كل تفاصيله اسمعه يكول .. هَـا وصلتوا .. يالله انا طالعلكم بالباب انهى المكالمة نور سألته والوجه منور .. شنو راح تطلع راح للباب وگال ..لا ما طالع بس انتظروا لحظة مهيمن دار علينا وگال .. امشوا دخلوا جوة شنو اخذكم الواهس واكفات هنا منا الزلم دخلنا للمطبخ وانا الضحكة منورة وجهي وعيوني والفرحة ما سايعتني لگيت بنات خوالي واكفات بالمطبخ جانن يعاينن علينا من شباك المطبخ والله اجيتوا والله جابكم. رفعت راسي مثل الطاووس المغرور ونفشت ريشاتي وحجيت وية ريم اريد اسمعهم .. ريم حبيبتي شفتي الملازم جلال خطيبي فديته شلون متغير. ريم .. لج اي عيني ضابط استخبارات محد بگده اخت سجاد سألت والفضول يريد يطلع من اذاناتها .. شنو هاي شوكت صار ضابط اشو ذاك اليوم گالوا عنه ارهابي هسة يصيحون ضابط جاوبتها .. حبيبتي جلولي جان بمهمة سرية. ودزوه على داعش ريم ضربتني بكوعها وحجت بصوت ناصي .. اكول هاي شوكت لحگتي تعرفين هاي المعلومات كلها وهو هسة يالله وصل جاوبتها ببتسامة فخر.. حٍٍِْــًبٌٍـــِٓېٍٓ ان بير اسرار جلال كل شي اعرف عنه بس حافظة سره وكاتمة بگلبي لأجل سلامته اتسعت عيونها وكالت .. عمى بعينج يعني طلعتي كلشي تعرفين بسيطة يا حور انا ال....... قطعت كلامها وسألتها .. شكو شبيج سكتي جنت واكفة وظهري للباب اباوع لعيون البنات گلها اتشخصت يباوعن بفضول على شي واكف وراي سمعت صوت جلال گال .. نور صيحي خالة ام مهيمن خلي تجي تستقبل البنات وتدخلهن للبيت التفتت وجان اشوف جلال واكف بباب المطبخ وراه واكفات اربع حوريات نازلات وياه من الجنة كمل كلامه وگال .. تعالوا بنات فوتوا دخلوا جوة لزمت گلبي حسيت الگاع اهتزت بية مدري دخت مدري الدنيا دوارة ريم سندتني سألتني .. شنو حور شبيج احس بروحي اتفرهدت جاوبتها .. يمة زهرة تعالي لحگي علية. ريم .. لج مخبلة شبيج كمتي تهلوسين جانت تحجي وتباوع للبنات جاوبتها .. عزة بعيني ان شاء الله ولج ابن عمج گلي رايح احرر الموصل وارجع ماگلي يجيب الموصل بكبرها ويجيني بطركاعة مهيمن طلعت وية جلال بالباب وسألته .. شنو ليش واكف بالباب منو راح يجي جاوبني وهو يعاين عالطريق وگال .. مهيمن مااكدر احجيلج عن الصار بية هناك بالموصل وانا يم الدواعش لان ماكو وكت ويوصلون البنات .. يا بنات .. هذني البنات اخذوهن الدواعش سبايا وقصتهن قصة. ربك حطهم بطريقي بأثناء قيامي بواجبي وهن كانوا سبب تأخيري بالانسحاب. وجبتهن وياي وبعدين اگلك ليش جبتهن كل الي اريده منك تبقيهم هنا منا علما ارتبلهم البيت ديگيتله صدري وگلتله .. تم. ضيوفك هم ضيوفي .. لعد وين جانوا اشوف ما شفتهم وياك جاوبني .. مو هذا الجندي الي يسوق السيارة بنچر التاير عنده بأثناء ما جان راجع ويانة للبيت وتيه العنوان وخطية الضابط علي راح عليه وجابه جنا نحجي والله جان توگف السيارة ونزل منها الضابط علي ووراه اربع بنات مو محجبات عبالك انگليز جانت نظراتهن كلها خوف بس شافن جلال ركضن عليه وهنة يحجن بأصوات متفاوته جلال .. جلال . عبالك كتاكيت يوصوصن جلال كللهن .. تعالوا سلموا على اخوي الكبير مهيمن سلمن ونظرات الفضول طبگت سيارة كلها زلم وشيوخ بالباب وشفت خالي حسن طلع من الديوان شكله يريد يستقبلهم كلت لجلال يدخلهن جوة للبيت عيب وگفتهن بالباب وانا رحت دخلت للديوان وية الضابط علي وشيوخ خالي حسن ورة عشر دقايق دخل جلال وكعد يمي بعدما اتطمن عالبنات وسلمهن لأمي جنا كلنا كاعدين بالديوان خالي حسن عاين علية وكال وعلامات الاعجاب بنظراته .. بوية مهيمن فهمنا شنو سالفة اخوك جلال شلون صفى ضابط استخبارات والحكومة علنت عنه ارهابي باوعت عالضابط علي وكلتله .. سيدي احنا النة حگ عليكم اخوي گام بواجبه وادى المهمة بس اتشوهت سمعته بين الناس وشاعوا عليه ارهابي والصار اليسوى والمايسوى يذم بي ويحجي عليه وانا اريدك تحجيلهم عن الاسباب يتبع اتمنى لكم قراءة ممتعة اختكم نهى الحسون | ||||
|
| |
|
08-11-19, 10:34 AM
| #79 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| #الكاتبة_نهى_الحسون #قضية_الشمل ج٢ مساء الخير عليكم حبايب هذا قسم من البارت الاخير وان شاء الله باجر انزل الباقي مهيمن كاعد بالديوان وعلى يميني جلال كاعد وعلى يساري طالب جنت اعاين بالوجوه اتحدى ينظراتي الكل منتظر الضابط علي يجاوبني باوع علية وكال .. والله ما تنلام وما طلبت غير حقك وحق اخوك بس نوبات يگولون الغاية تبرر الوسيلة احنا كانت عندنا شغلة مهمة يم جلال خلتنا نلجئ له وطلبنا منه يساعدنا ويوكف ويانا خالي ابو سجاد سأله والفضول مبين .. وشنو هي هاي الشغلة المهمة الي تخلي الحكومة بكبرها تطلب من هذا يساعدهم انتفضت وانا بمكاني وهميت ارد عليه بس خالي حسن سبقني وگله .. ابو سجاد زحمة وانت ابن ديوان تطلع منك العيبة ترة الگلت عنه ( هذا) بالتهميش تراه ضابط استخبارات موش هيّن يابعد اخوك كملت على كلام خالي وكلتله .. خالي عذره خاف بعده الاسم جديد عليه انا اذكره اسمه الملااازم جلال قربان ابو سجاد حجة متضايق .. عمي شنهي اكلتوني بگشوري وضيعتوا علينا السالفة هسة انا شگلت حتى هيج هبيتوا علية هاي الهبة بوية سيدي الضابط كوللنا شنو هي الشغلة المهمة رحمة على والديك الي خلت الحكومة هيج تتعنى على ابن مؤيد باوع لخالي حسن وگال .. هَـا هم احجي عاد هنا محد اله حق يمي ما عايل بأحد هو صدگ ابوه اسمه مؤيد رد عليه الضابط علي وكال .. بدت سالفتنا وية جلال من بدينا نجمع معلومات عن الدواعش ومن ضمن هاي المعلومات الي وصلتنا عرفنا اكو شاب مهندس اسمه جلال مخترع جهاز خاص بالسرعة وينربط وية المحرك يزيد السرعة اضعاف وهذا الجهاز الدواعش محتاجينه لتنفيذ المهمات الانتحارية وغيرها وسبق وان طلبوا من جلال يشتغل وياهم بس بمرور الايام جلال من بلش يشتغل وياهم وعرف منو هم. انسحب منهم وعذبوه وعلى اساس ظنوا هم قتلوه بس ربك كاتبله عمر جديد. وبهذا اليوم احنا عرضنا عليه يساعدنا حتى نستخدمه ونزرعه بين عناصر داعش ويتوغل بينهم وهنا وبهذا مكانه وعن طريق الجهاز راح يگدر يساعدنا بأيصال المعلومات عن الدواعش والحمدلله ربي ماقصر ويانا جلال بعد فترة من طلبي اتخذ قراره واتصل علية وكال انا مستعد اقدم مساعدتي ومن بعدها كعدنا وياه انا والضباط وفهمناه شنو المطلوب منه واول شي طلبناه ان يلتزم بالسرية التامة وثاني شي يلتحق بدورة تدريب وينضم لدفعة الضباط حتى نكدر نهيئه وندربه للمهمة. وبعدما بلش جلال بالمهمة وسافر للموصل والتحق بين صفوف داعش الظروف دفعتنا حتى ندفع الشبهة عن جلال ونقوي مركزه بين صفوف داعش اضطرينا نعلن عنه ارهابي هاي نقطة تعزز ثقة الدواعش بي بأسرع وقت جان الضابط علي يسولف الاحداث الي جرت على جلال واعاين على الشيوخ شلون ينظرون لجلال بأعجاب وبعدما خلص الضابط علي من تبرئة سمعه جلال صارت الاسئلة تتوالى على جلال وصار جلال يسردلهم بعض المواقف الي حصلت وياه وشلون كان يتلافى الاختلاط وشلون حس بروحه مختنگ وسولفلنا على الضابط الي كان وياه من ضمن العناصر الي زرعوها خلية الصقور بين الدواعش وشلون ذبحوه گدامه وهواي احداث باوع علية وگال بس كلها بصفحة وموقف مهيمن بصفحة من لحكني بسيارته وانا مسافر بالطريق للموصل جنت بعدني بأول خطواتي بالمهمة خالي حسن باوع علية مستغرب لان انا من هربت من داعش ما جبت سيرة جلال ولا كلتلهم منو ورة اختفائي گال .. اي يابعد خالك سولفلنا عن الصار لان اخوك بساعتها ما انطانة نشدة لا فهمنا عن الصار جلال كله .. والله ياخالي محتار منين ابدي احجيلك ترديني اوصفلك حالي بذيج الساعة وانا اشوف اخوي كدام عيني شلون وگع بيد الما يرحمون لو احجيلك عن رجفة رجلية بيوم ركضت على اخوي اريد اخلصه منهم قبل لا يقتلونه كان جلال يحجي الموقف والربع والشيوخ كلهم يسمعون كومة مواقف تخلي العقل مشدوه يصفن واحد من الشيوخ كله بأعجاب .. باجر كلكم معزومين عندي بالديوان وهذا البطل اريده يحجي قصته بديواني اريد الداني والقاصي يسولف بسالفته وبعدها اتبعه كم واحد من الموجودين وصاروا يتنافسون منو اول واحد بيهم الي يعزم جلال والضابط علي حتى يحظي بجلال ويكعد يحجيلهم عن المواقف الصارت وياه بين داعش بأثناء المهمة كدام الزلم وبديوانهم هذا الموقف عند الشيوخ له هيبته ومكانته والشيخ يظل يتفاخر بيه كدام الجاهة ان في يوم ما كان اكو بطل اسمه جلال قربان كعد بديوانهم وحجالهم عن الصار وياها ووية داعش وهكذا تظل تتناقل الحادثة انتبهت لطالب قرب راسه علية وحجة بصوت ناصي وكال .. عليك الله عاين على عمي ابو سجاد شلون فاتح حلگه ويريد يطك عرگ عنده .. خله يعرف احنا منو علمود منا وغاد يثمن كلامه قبل لا يشمر بالحجي طالب ضحك .. مهيمن حرامات فاتك الموقف ما شفته شسوى من شاف جلال .. شبي شسوى .. اول ما نزل جلال وهو لابس زي العسكري والناس هبت يسلمون عليه ويهوسوله اعاين عليه اتفرهد الزلمة وكام يحجي وية ابوي يگله .. ولك خوية شنو هاي گاعد يصير بالدنيا صايرة تمشي بالمگلوب شجاها الوادم تخبلت وعماها الباطل هذا يازمن صار الذيب يتنكر بملابس الحمل يعني الدجاجة اذا طارت شوية وعلت على السياج ينگال عنها صگر والله عقلي راح يوكف خلي واحد ابن شريف يجي ويفهمني هذا شوكت لحك يصير ضابط ملازم ولا فوكها استخبارات والناس تهوس بأسمه ابتسمت على كلام طالب وهو يقلد خالي ابو سجاد وكلتله .. ما تشوفه كاعد متربص على الزلة يريد يلكاله فد هفوة ويگعد يعلج بيها حور جنت كاعدة بالهول كدامهن اربعتهن اباوع عليهن وحدة وحدة قبل ساعة جلال دخلهن وصاح لامي حتى تستقبلهن وتدخلهن للبيت وخطية امي من عرفت بيهن نازحات جايات من الموصل وهي گابلتهن وگعدت تنعي وتنوح والحلو بالموضوع امي تنعي وهن يباوعن عليها بعدم فهم كان مبين عليهن ميعرفن امي شكاعد تكول لان نص كلامها مامفهوم بالنسبة الهن كلتلها وانا اعاين عليهن .. يمة رحمة على والديج بدلي الموجة ودوري على غير قناة ترة كلشي ما افتهموا منج بعدها امي زهرة شافت ماكو تفاعل من الجمهور باقين مصفصفين صافنين بوجهها بدلت الموجة وسألتهم .. خالة راح اصب غدة وتتغدون ويانة مو هم تفشلوني وما تاكلون والله ازعل عليكم جاوبتها اصغر وحدة بيهم .. اي خالة اني جوعانة واريد اكل وياكم جاوبتها امي.. يخسى الجوع هسة دقايق اصبلكم والكبيرة كالت .. ام جلال احنا نشكرك وراح نتعبك ويانة امي لمعت عيونها بفخر وكالت .. يمة ضيوف ابني جلال احطهم على راسي كامت امي هي وكم وحدة ونسوان خوالي الجايات وصبوا الغدة. اما نور وريم فكعدوا يسألونهم على اساميهم وكم اعمارهم وما كدروا يكملون حجي امي صاحتلهم يجون يتغدون وبعدما خلصوا من الاكل امي كالت لنور .. خالة نور رحمة على موتاج حضري الجاي حتى نكعدلنا شوية نشرب ستكانة جاي وية البنيات جانت تحجي وتعاين على البنات وعيونها مبين مبيتة النية هن باوعن على امي وابتسمن بود لأمي ميخالف خطية ما يدرون بسالفة استكان الچاي معناها زهرة حطتهم ببالها وراح تكعد تستجوبهن لحدما تعرف سابع جد الهن وتفوت بيهن طول بعرض واما اني وما ادراك ما اني من اول دقيقة دخلوا بيها البيت صرت احوم فوگ راسهن عبالك الشمر الدخان يطلع من اذاناتي هيج ما ادري شجاني احس نار تاكل بصدري اعاين عليهن واتفحص شكلهن طولهن لون عيونهن و شعرهن صرت اتمعن كل شي بيهن احاول ادور على عيوب بشكلهن حتى ارتاح ريم وكفت يمي تباوع عليهن بفضول كالت .. اوف والله مسكينات هالبنات جاوبتها .. والله ماكو مسكين بهاي الهوسة الا اني المكرودة الوحيدة دشوفيهن جنهن حوريات شوفي عيونهن زرگ عبالك دعابل. شعرهن خيوط الشمس وعودهن ريان بس الثنين الصغار ضعاف كلش يمة زهرة لحگيني شلون بجلولي جان كاعدلي بين اربعة نثايا وبعده لحد هسة. صاغ سليم ياهو اليطمني على حلالي ريم باوعت علية ورجعت باوعت عليهم وكالت .. لج عوبة من صدك انتي تحجي لو تتشاقين .. اي من صدگي احجي وين الشقى بالموضوع خطيبج يرجع وجايب وياه اربع بنات هيج بكل بساطة تتقبلين الموضوع لا وبعد شابات وحلوات يعني مو هيج بنات عاديات بجمالهن جاوبتني وكالت.. اوكي الحقيقة هن صحيح حلوات. بس مو احلى منج يعني المفروض انتي تكونين مسيطرة وواثقة من نفسج مو انتي الي تحجين هيج .. بابا هاي مالها علاقة بالثقة بالنفس هم ما دامهن نسوان واكو رجال بالموضوع لا ونوب مو اي رجال ابن عمج الضابط الشهم الي نقذهن وجابهن واجاني يركض بيهم .. هسة انتي شنو عرفتي عنهن وگبل شنيتي الحرب عليهن دشوفيهن خطية شلون يكسرون الخاطر مبين التعب والخوف على عيونهن والله وحده الي يعلم شنو صاير بيهن وشلون رماهن الدهر لدرجة يجون وية جلال للبصرة عدت من يمنا نور شايلة بيدها صينية الجاي باوعت لريم وكلت امشي صار بيها جاي خلي نشوف شنو راح يحجن بعد استكان الجاي مال وهرة رحت دخلت وكعدت يم نور وريم كعدت بصفي نعاين عليهن ريم كانت ودية وياهن ونور كانت حنونة. بس انا يمة مني انا اباوع عليهن واحس بكل وحدة بيهن الي ند وغريمة تنافسني على جلولي والله لوما جلال چان حبيتهن وحطيتهن على راسي بس جلال جلول الارض المحرمة امي خلصت استكان الجاي وجان تعاين على اختهن الكبيرة الي كان اسمها هَنا وسألتها عن اهلها ووين ساكنين وشلون اتعرفوا بجلال بدت هَنا تحجيلنا عن قصتها هي واهلها واخوانها وخواتها مرات تتوقف بالبجي وزينة تكمل عنها الكلام انكسر خاطري عليهن وتعاطفت وية قصتهن بعدها هَنا صارت تحجيلنا شلون دخلوا عليهم الدواعش واختطفوهن هي وخواتها واخذوهم سبايا احس انمرد گلبي ياربي دخيلك وشكد مظلومات حتى كرهت نفسي على تعاملي الجاف وياهن بس !!!!!!!!!! من كملت هَنا كلامها وكالت .. واني كنت من ضمن السبايا الي واكفين كدام امير الدواعش وكان يريد يوزعنا هدايا على العناصر اصحاب المراكز المهمة عندهم وكان جلال من ضمن العناصر المهمين الي تشملهم الهدية لحد هسة اتذكر كنت واكفة وبدة الامير يوزع بينا كنت خايفة على خواتي بالذات على اختي الصغيرة ميار كان عمرها ١٢ سنة ما نعرف شنو مصيرنا وشنو ينتظرنا فجأة وصلني الاختيار وجان اسمع صوت جلال كال .. سيدي انا لها جلال وقع اختياره علية والامير سلمني اله وصرت من يومها اني جارية جلال صارت تحجيلنا شلون كانت خايفة منه وشلون هو عاملها بحنان وعطف عليها صرت اباوع كلشي كدامي باللون الاحمر ما اعرف وين انطي وجهي وشسوي يعني هي وجلال جانوا اثنينهم بغرفة ياكلون ويشربون ويسولفون سوية ونوب نزلت عيني على بطنها حامل عزة بعنيني هي تحجي وانا انصرعت بمكاني كمت من مكاني بعد ما اتحملت وطلعت من الهول دخاني وراي يبووووووووووووو نور گامت وراي وانا صرت احوم شايطة مثل واحد النار شابة باذيال ثوبه نور تهدي بية كالت .. لج حور انتي والله مخبلة ترة البنية ماكالت شي .. ولجن جاي وجايبلي وياه مرته حامل ريم دخلت ورة نور وكالت .. والله عرفت بيج مخبلة وراح تلكفين طرف السالفة وتكعدين تكمزين لج عوبة هي متزوجة وحامل من زوجها من اخذوها داعش نور كالت.. عيب حور كبري عقلج هذني ضيوفنا واحنا لازم نكوم وياهم بالواجب ولا تخافين جلولي جايبهن نخوة منه وحجاية من نور وحجاية من ريم بالكوة يالله كدرت اقتنع شوية ارجع اكعد وياهن واكابلهن اعاين عليهن هن يحجن بصوت ناصي يتنعوصن مدري هنة يحجن على كيفهن والتفتت لريم وكلت .. ولج خية كناري شكلج شورتي بية. صرت من بزونة وحدة الى اربع بزازين اجني وياج جنا نحجي اني والبنات وجان يدخل جلال كان مبدل ملابسه وسابح شكله صعد فوك بغرفة مهيمن بدل واول ما دخل اجتي عيونه علية عاد اني هنا نسيت روحي وانحلت كل البراغي وسبلت عيوني بس البنات اول ما شافوا جلال طفروا من مكانهن وراحن عليه وكالن .. جلال وينك والثانية تكله .. جلال اهلك حبابين والثالثة كلتله .. امك حنونة وطيبة مثلك اما ازاد گالت .. هي هاي حور الي كاتب اسمها بظهر الميدالية الموجودة حول رگبتك كمزت من مكاني وانوجهت اريد اطلع من الهول انطيته نظرة وخزرته بغيض كنت فايته من يمه اتوقفت وكلت من بين اسناني .. لعد شكد جانت قريبة منك لدرجة تشوف الميدالية الي بركبتك وتگعد تگلب بيها ضرب گصته وكال .. لا يالحمزة غزال البصرة طبگن عنده الوايرات باوع كدام ونوب رجع باوع علية بسرعة وكال .. ما اكدر احجي شي بس فد شوية اكعد احجي وياج وافهمج موقفي لان مو مثل ما انتي فهمتي ريم صار الساعة ب١١ بالليل والناس هسة يالله بدت تخف وكفت بالمطبخ وية نور اساعدها واحجي وياها على حور الي انگلب وجها من سمعت حجي البنات نور كالت .. المفروض تكبر عقلها وما تسمح بالظروف تخرب الي بينها وبين جلال ترة هي تعرف كلش زبن جلال يحبها ويموت عليها وهاي الظروف غصب عنه جاوبتها وگلت .. بس بيني وبينج الحجي اني لو بمكانها واسمع بمهيمن هيج صاير وياه اتخبل عليه واخليه يمشي ويتلفت يعني حقها الشغلة مو هينة يعني شنو تردين منها تفكر بجلال وهو كاعد وية بنية شابة وحلوة لوحدهم بغرفة على كولت مهيمن كل ثنين ثالثهم الشيطان بهاي الاثناء واحنا نحجي وجان يدخل جلال للمطبخ وسلم ونور راحت عليه استوقفته مشتاقتله واني انضميت الهم وكلتله بعتب ومتفاجئة بموقفه .. خرب يومك جلال تصدك من عرفت بيك ضابط استخبارات شلتني المفاجئة خليتني احجي وية نفسي مثل المخبلة واني اتذكرك واتذكر مسجاتك من كنت تكلي مرات انا الضابط جلال قربان وانا كنت اضحك عليك يااااااربي شكد كنت غبية وانت استغليت غبائي واخذت راحتك بالحجي ينعل يومك جلال جاوبني وكل.. باربي عوفج مني ومن سوالفي اريد تركزين وياي اريد تدبريني .. شنو شكو .. اريد تشوفيلي مكان خاص اريد احجي وية حور عندي كلام مهم وياها ولازم اوضحلها موقفي صفنت افكر بالله هاي شلون راح تتدبر نور كالت .. صعبة وين تكدر تشوفها والبيت خبصة ريم كالت .. بالله خلي اشوف شنو اسوي حتى اخليك انت وحور تكعدون تحجون سوية واحنا نحجي ونخطط وجان يدخل علينا مهيمن ويسويلنا كبسة باوع على جلال بنظرات اصرار وكال .. اكول ابو الشباب شنو اخذك الواهس مو شفتني خطبتك لأختي تگوم تستغل الوضع وتتمادى وتصير طماع جلال باوع عليه وكال .. شلون بالله يعني الناس المن حطوا الخطوبة غير علمود المرة والرجال يكعدون سوية ويتفاهمون على الاشياء الي تخص زواجهم لو بس انت الخطوبة حكمها عندك الله گالبها حاطها للتمويه كدام الناس مهيمن كله .. اكول انا هذا العندي اذا جنت تريد تاخذ وتنطي بالحجي وية اختي روح جيب الشيخ واعقد عليها والك الي تريده ما عندك شي يعرقلك اشو الكل موجود جلال ضحك وكله .. خرب بالحظ يعني انت ما حجيت الا هسة بنص الليل شوكت يجي باجر واجيب الشيخ واعقد عليها وبعد محد بعد عنده حق يمي مهيمن گله .. على طاري باجر مو تنسى حتى اخذك اشوفك بيتك شلون صار جلال باوع عليه متفاجيء وكال بسؤال .. ليش هو صار بيت انا تركته عالنص مهيمن ابتسم بفخر وكله.. باجر امشي وياي وشوف بعينك جنت اباوع عليهم وعلى لمتنة اني ونور ومهيمن وجلال وهناك ست حور واكفة تعاين بزعل احس بگلبي فرحة توسع العالم كله طرا على بالي عمو مؤيد وصرت اترحمله فاته هواي اشياء ضاعت من ايديه من غير ما يحس بقيمتها جمعتهم ولمتهم الفتهم ولائهم لبعضهم كل هاي الامور جعلت منهم سند لبعضهم دخلت خالة زهرة وكالت يالله بنات عفية روحوا نزلوا الفرش خطية البنيات نعسوا اجة جلال وكف يمها وصار يسألها .. هَـا حجية طمنيني على بناتي شلونهن ابتسمت وكالت .. بناتك يكسرن الگلب وراسي خوة من گد البجي البجيته وياهن. هو يحجي وحور تدردم .. العب ونوب صاروا بناته لاربحنا لعد انا شنو خراعة خضرة ضحكت وسحبتها وياي .. لا انتي ماما الحنينة امشي خلي نروح ننزل الفرش من المخزن حور صعدت وبعدها تدردم .. اكول شنو اشو سمعت مهيمن يحجي بشيخ وعقد جاوبتها .. ياحظي ما تدرين جلال باجر راح يجيب السيد علمود يعقد شهكت وكالت .. صخام الصخمني يعقد عليمن .. شكلها الغيرة ولدت عندج الغباء شنو يعقد عليمن قابل يعقد على امج زهرة غير عليج انتي العوبة جمدت بمكانها وكالت .. يعني باجر يعقد علية اني لوحدي يعني محد وياي من هذني البزازين الي جابهم وياه تركتها وكملت الدرج واجتي وراي .. انتي مخبلة والله وعقلج شافط خطية هن البنات اصلاً عالضيم الي شافنه مو بحالج ولا بحال الحب هذني الحياة خطفت منهم كل شي جميل بي لون وصاروا يشوفون الدنيا من غير الوان كله بالابيض والاسود طلعنا الفرش من المخزن وحور لا زالت تحجي من غير انقطاع وكأن تريد تعوض عن الايام الفاتت الي كانت بيها عالصامت حطت مجموعة الفرش يم الدرج وگالت اني راح انزل وانتي شمريهم علية من فوك واني افرشلهم وانتي رجعي الغراض للمحزن .. اوكي صرت اشيل الفرش واشمرهم عليها من فوك وهي تاخذهم وبهاي الاثناء وجان يكسر ظفري شهكت احس گلبي انتفض احس بروحي مثل وحدة راسها اگرع هذا حالي عندي الظفر مهم حاله حال الشعر وقبل لا انصبها مناحة سحبت نفس عميق شهيق زفير وتمالكت نفسي وصرت اهدي نفسي .. لا ريم استرخي واهدي وبدون دموع انتي كبرتي وانتي اقوى من هالشي الظفر يجي مكانه ظفر مو وكتها تضوجين اليوم فرحانين رحت اكمل تنزيل الفرش وعيني كلما تصد عالظفر ينمعط گلبي عبالك خاسرة شي عزيز خلصتهم وحور صاحت .. مو تنسين الغراض رجعيهن .. ماشي رحت للمخزن ورجعت الجنط والغراض لمكانهم وهنااااااا وجان ينكسر ظفر ثاني لاااا هسه بعد مابيها مجال كعدت بمكاني وصرت انحب لوحدي بس حاطة ايدي على حلكي ما اريد احد يشوف معاناتي اباوع عليهن وابجي ليش اظافري الحلوات خربت واتشوهت ايدي ولا بعد وراي عرس وعرس نور وهواي مناسبات كنت اعدد المناسبات واباوع لأظافري وابجي .. يعني ليش .. ليش هيج سمعت صوت مهيمن من وراي وكمزت كال .. لا وبعد نسيتي وراج عرس جلال وحور. التفتت عليه جان واكف عالباب ويباوع علية ونوب صار يذكرني زدت بالبجي .. اي عفية ووراي حفلة حوووووور اتغيرت نبرة صوته وكال .. بالله شو تعاي طلعي من المخزن ظلمة كلشي ما اشوف طلعني من المخزن ودخل للغرفة وشغل الضوة وشاف وجهي وكال .. لاتكولين جنتي كاعدة هنا تبجين علمود ظفرج انكسر رفعت ايدي كدامه وكلت .. لا مو بس ظفر واحد اثنين .. ولج انتي من صدگ تحجن لو تجذبين مسوية العيون حمر علمود ظفر مكسور رفعت راسي وگلتله .. مهيمن عفية لا تكعد تصنف علية وتستهان بموقفي ادري بيك هالشي عندك تافه بس اني عندي شي كبير وعلى فكرة. ترة اني هالمرة ما صرخت ولا لميت البيت ترة كنت ابجي بصوت ناصي ولوحدي باوع علية ووجهه مصدوم .. لا والنعم منج هواي مكلفة روحج اريد اسألك بالله شيصير بيك من تزين لحيتك وبالغلط تطير نص شاربك شكبرها عليك .. غير انا زلمة وزيان الشارب على الزلمة ينعد كلفة .. ترة. حتى اني نفس الشعور وكسر ظفري كلفة علية صدگني .. ولج ام لسان المزروف عرفتي شلون تغلبيني بالحجي بالله شو راويني خلي اشوف وين الكارثة حجيت بدلع ورفعت ايدي كدام عيونه وكلتله.. شوف شلون تشوهت ايدية .. ولج غضب اذا هذا الزبد كله وتكولين عليه متشوه زين انا شكول الي جسمي وذراعي صايرات خريطة من الجروح .. انت رجال تتحمل بس اني بنية ما اتحمل لمعت عيونه واقترب علية وسحبني عليه وكعدني على رجله الصاحية وگال وهو يلمني بحضنه .. تعاي يابعد عمج اليوم انا فصّال مربع لظفرج لزم كف ايدي وباوع لاظافري وصار يتلمس بشرة ايدي بأيده الخشنة رفع كفي وطبع شفايفه بباطن كفي احس سرت رعدة على طول ايدي ملمس ترافة شفايفه وية خشونة شورابه احساس غريب معسول باوع علية وگال .. بربج تبجين على ظفر زين شلون بيج باجر عكبة وراج طلوگ وولادة وجهال وفوگ هذني عليهن كلهن انا شلون بيوم عرسنا شراح تسوين باوعت عليه وانتبهت لروحي بحضنه ونسيت ظفري وكلامه احتل عقلي وملاه وما بقى مكان لاي شي اسمه ظفر جاوبته بكل برائة.. لا بالعكس اني انتظر يوم عرسي بفارغ الصبر واحلم بهذا اليوم واني لابسة البدلة البيضة اباوع عليه عيونه لمعت ودنك راسه يم ركبتي وكال .. اي كملي ما بعد البدلة البيضة شيصير باوعت عليه وارتبكت .. اكول احنا شلون وصلنا لهنا بكلامنا احنا مو نحجي بالظفر شنو تستغلها اصيحلك امك طگها ضحكة وكال .. اثاري طلعتي بوخة ام السان المزروف. ختم كلامه الحار على شفايفي وصار يتفنن برسمهم سمعت صوت خالة زهرة صاحتني وبسرعة كمزت من حضنه وعدلت شعري ورحت وكفت كدام المرايا اريد اخفي معالم الجريمة وشهكت من شفت شفايفي مورمة .. عزة هاي شنو سويت لشفايفي فلر ضحك وكال .. هم كولي سلبت منج برائة شفايفج بعد شنو تريدين سويتلج فلر على كولتج نفخت شفايفج مجاناًً هذا تعويض عن الاظافر المكسورة حور دخل علينا مهيمن والوجه مظلم ضايج امي شافته وسألته .. شنو شيبك ضايج .. ما بية شي ما ضايج .. شنو وين جنت طالع . جنت يم خالي حسن بالديوان .. ومنو هناك جان .. خوالي كلهم وكم واحد من جماعة خالي حسن .. اي كمل يابعد امك وكلي منو مسمعك حجاية امي وفنون الاستجواب عندها مالها حدود مهيمن كللها .. طلبت من خالي حسن اليوم العصر يحضر عقد جلال هو وخوالي البقية ما حبيت جلال يبقى وجهه فاهي ويكون وحده بهذا اليوم وخالي حسن كلي .. جلال ابنا ويستاهل نحضر وياه فرحته ونخطبله بس اخوج ابو سجاد ما يكدر اذا ما يكعد يشمر بالحجي وياي ما اعرف هذا الزلمة طالبنة بثار وانا ما ادري شعنده ويانة امي سألته.. شنو كال .. گام يحجي بمنية علية وگال من ورة خشمه يالله نكسب اجر بأخوك ونحضر وياه العقد خطية معذور ماعنده وادم واهل ويجون وياه مشاية ولو احنا دومنا اصحاب فضل خلي نسوي فضل براس اخوك ما خسرانين شي جاوبته مقهور .. الزلمة الخيّر اذا سوى فضل ما يكعد يمن عالوادم بفضله وخلي ببالك ترة الف من يتمنى مكانك وينال شرف يكون واحد من المشاية بخطبة اخوية الضابط ملازم جلال اسمع حجيهم وكلبي انعصر وحقدت على خالي نهضت من مكاني ورحت لنور وريم لكيتهم مخبوصات وجاي يعدولون بالزينة مالت الكيكة لكيت ريم محضرة سلة المهر والبنات هنا وخواتها يساعدون نور وريم ويسون النشرات اشكد جنت ضايجة ومقهورة من الحجي السمعته بس من شفت حماس نور وريم والشغلات المسوياتها علمودي اتحمست ونويت ما اخلي العواذل يخربون علية احلى لحظات بحياتي مهيمن صار العصر وجلال بعده ما بين ماكو لحد هسة وخوالي وصلوا واستقبلتهم ودخلوا بالديوان كعدوا وضيفتهم وانا عيوني عالساعة استغفر الله هذا وين راح كاعد على اعصابي شاورت طالب وكلتله گوم اطلع واتصل على جلال شوفه وين ولى كله ليش اتأخر جنت احجي وجان خالي ابو سجاد حجة .. .. ادري هذا اخوك شكله ما يعوف بألاصول عايفنة هنا مشتولين ننتظر حظرة جنابه يشرف فوگ ما جايين متعنين علموده. تالي هيج يتأخر هي هاي جزاتها خالي حسن كله.. صبرك يا ابوسجاد الغايب عذره وياه وثاني شي احنا اهل مابيناتنا رسميات باوعت لطالب وكلتله من بين اسناني اتحرك بسرعة ورجعت گلت لخالي ابو سجاد .. خالي احنا ما نريد نعطلك اذا عندك شغل تكدر تروح انا اهم شي عندي خالي حسن موجود لان مثلما كال خالي انا واخوي واحد ما بينا كلفة عسى ما اعقدلهم بمكتب الشيخ ما يهمني كله عندي واحد جنا نحجي وجان يدخل علينا طالب بسرعة وكال .. مهيمن كوم بسرعة اخوك جلال جاي وجايب وياه الفيلق بكبره سدوا الشارع والصار من الطول للطول كله سيارات باوع لأبوه وكال خالي حسن سأله .. ولك طويلب احجي عدل هسة اجنا شنو افتهمنا منك اشو بس تخرط علينا جاوبه طالب وكال .. بوية جلال جاي وجايب وياه مشية زلم ضباط وشيوخ حتى ياهم هذا اللواء الي سلم عليك بالبوابة خالي حسن نهض من مكانه وعدل عگاله والبشت وكال على بركة الله كل الهلا بالجاي لينا وطلعنا انا وخوالي نستقبل الزلم اباوع ماشاء الله كلهم جايين بزيهم بس جلال لابس قاط واتفاجئت بالحجي ابو حيدر وحيدر وعناد جنت اسلم عالزلم وانا رافع راسي كانت فرحة جلال مالية وجهه لمعت عيوني فخر وانا اعاين عليه عناد اجة وكف بصفي هنا وجان توصل سيارة نزلوا منها ضباط اثنين جانوا اخر الواصلين جلال شافهم واخذهم بالاحضان بفرحة اباوع عليهم هوسولوه برزانة .. عفنا بيوتنا وجينا وللغالي تعنينا بعدها جلال خلاهم يتقدمون عليه حتى يدخلون جنت واكف سلمت على الاول وصل الدور للضابط اللاخ هم سلمت عليه وانا مبتسم رحبت بي بنفس الكلمات الي كلتها للضابط الي قبله .. ياهلا ومية هلا. شرفتونا بس اشو هذا الضابط ما اتحرك وعيونه تعاين بعيوني هذا شبي علگ بالباب رجعت كررت كلامي وضفت فوكاه .. اتفضلوا .. اتفضلوا بس اشو بعده ما اتحرك جلال جان واكف وراه يسولف وية طالب ويضحك جليت صوتي ودرت وجهي للجانب على عناد وحجيت من بين اسناني بصوت ناصي .. هذا شبي وكف بعد ما اتحرك بس لا البطارية خلص شحنها عنده عناد ضحك بصوت عالي وكال.. بالله شو ارجع عاين عليه مرة ثانية وركز معقولة ما عرفته رجعت اعاين عالضابط عقدت حواجبي وگلت انا شايفك بس ما اعرف وين ضحك الضابط وگال .. الظاهر عندك هواي جرائم اختطاف لدرجة صرت ما تميز بوجوه المخطوفين سألته مستنكر .. خطف شنو ومنو انت ضحك وكال .. وياك ضابط الاستخبارات همام الملقب بأبو طبرة هو گال هيج وانا جمدت بمكاني فاقد النطق نفضت راسي وانا ارجع اباوع عليه مرة ثانية درت على عناد وكلت ..يعني انت هو نفسك ابو طبرة الي حطيناه بصندوگ السيارة وخطفناه وكمل الضابط كلامي.. لاتنسى وياك التعذيب والله عليك ايد جنها كرك مال عمال صرت اعاين عليه وارجع اضحك .. يالله احنا شمصخمين وية الوادم لاعبين طوبة كلة من عناد التيس جلال گال للضابط .. همام اخذ عناد حلال عليك وحطه بصندوگ السيارة اعتبره فصل منا الك نور اصفگ بفرحة واني اباوع بعيوني مهيمن شلون دخل جلال يم حور حتى يلبسها الحلقة ما لحكنا اليوم نشتري بس الحلقات خلص العقد وحور صارت حلال لجلال اول ما دخل جلال اتوقف وعيونه ثبتت على حور بلهفة واعجاب هو من غير كلشي يحبها ونوب ست ريم اتدخلت واستخدمت لمساتها وصارت تتفنن بالميك اب ونوب ما اكتفت بس بالمكياج دارت عالفستان مختارة فستان يجيب التايه بحيث المكرود جلال اول ما كعد يم حور كبل كللها .. غزال البصرة اشو صاير بطل وكاعد تعرض لحمتك الترفة گدام انياب ذيب جوعان حور قربت راسها وكالت .. عيب صير عاقل منا الناس .. خليهم شيحجون شلها غرض بينا الناس ابتسمت وكالت .. هالكلام گوله لاختك الواكفة فوگ راسنا لاطشة شكله شغل الحموات بدا من هسة شهكت وانا ابتعد عنهم .. عمى بعينج ياعوبة ياحويرة فشلتيني دارت على جلال وكالت.. شفت اختك شلون كامت علينا عود هاي احنا بعدنا بدايتها الله يستر من الجايات جاوبتها واني اضحك .. اي ديروا بالكم مني انت وست باربي اني حمات والساني متبري مني جلال ضاف على كلامي.. لا ونوب اختنا الوحيدة مالنة غيرها يعني بعد هاي ما بيها مجال وتكوم عليجن انتي وباربي مثلما خالة زهرة بيوم تكوم على نسوان اخوانها وتخليهم يدعمون حور كنت فرحانة واني احجي وية نور وجلال كاعد بصفي ومحد بگدي جاوبت نور .. لا على بختج ام الغيرة كلشي ولا تصيرين مثل امي اعوفلكم البيت واشرد جلال كال.. ويحك يا امرأة كيف تحجين على اختي هكذا يجب ان اجلدك على هذا الحجي حور رفعت حاجبها.. المسني وشوف حتى ما يجيك مهيمن وينزعك جلدك جلال قرب راسه على اذني وگال .. لايكون تريدن كلما اريد المسج اطلب الاذن من اخوج ولج حور ديري بالج تلعبين بالاعدادت مال عقلي وتدوسين دگمة بالغلط واتحول عليج وداعتج الي كدامج معاشر الدواعش وماكل وشارب وياهم عشرة عمر لاتخلني اگوم عليج يامرة. واخذكي معي سحلاً الى البيت جاوبته .. حتى ما احرك البيت عليك وما تخلص من الساني جلال غمزلي وكال .. انا لو منج ما احجي بزود ولا توثقين بلسانج لان اذا دخلتي لبيتي ساعتها اتراهن وياج على هذا السانج الا اخليج كله تناديني يامولاي الامير وشنو اطلب منج تكليلي (سمعاً وطاعة بلعت ريگي وگلت .. احلف .. وليش احلف تردين نجرب احنا بيها وخصوصاً انتي لابسة هاي البدلة تشهي الواحد يهجم على هالزنود شكت وصحت .. يمة زهرة لحكي علية مولاي الامير گام علينا فللنهاية بقية اتمنى لكم قراءة ممتعة اختكم نهى الحسون | ||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
3Likes
العرض العادي
