آخر 10 مشاركات
كُنّ ملاذي...! (92) للكاتبة: ميشيل ريد *كــــاملة* (الكاتـب : Gege86 - )           »          ✨الصالون الأدبي لرمضان 2024 ✨ (الكاتـب : رانو قنديل - )           »          وأغلقت قلبي..!! (78) للكاتبة: جاكلين بيرد .. كاملة .. (الكاتـب : * فوفو * - )           »          ساحرتي (1) *مميزة , مكتملة* .. سلسلة عندما تعشق القلوب (الكاتـب : lossil - )           »          بقايـ همس ـا -ج1 من سلسلة أسياد الغرام- للكاتبة المبدعة: عبير قائد (بيرو) *مكتملة* (الكاتـب : noor1984 - )           »          أهواكِ يا جرحي *مميزة & مكتمله* (الكاتـب : زهرة نيسان 84 - )           »          586 - حب لايموت - صوفي ويستون - ق.ع.د.ن ( عدد حصري ) (الكاتـب : سنو وايت - )           »          602 - عودة الحب الى قلبي - كارول مورتيمر - ق.ع.د.ن *** (الكاتـب : ^RAYAHEEN^ - )           »          جدران دافئة (2) .. سلسلة مشاعر صادقة (الكاتـب : كلبهار - )           »          صفقة طفل دراكون(156)للكاتبة:Tara Pammi(ج2من سلسلة آل دراكون الملكيين)كاملة+رابط (الكاتـب : Gege86 - )


العودة   شبكة روايتي الثقافية > قسم الروايات > منتدى الروايات والقصص المنقولة > منتدى الروايات العربية المنقولة المكتملة

Like Tree3Likes
إضافة رد
 
LinkBack أدوات الموضوع انواع عرض الموضوع
قديم 18-07-19, 02:55 PM   #1

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
Rewitysmile25 قضية لم شمل / للكاتبة نهى الحسون ، عراقية مكتملة





بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته

نقدم لكم رواية

قضية لم شمل
للكاتبة نهى الحسون





قراءة ممتعة للجميع...



ندى تدى likes this.


التعديل الأخير تم بواسطة لامارا ; 08-11-19 الساعة 10:38 AM
لامارا غير متواجد حالياً   رد مع اقتباس
قديم 08-09-19, 12:46 AM   #2

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

رابط لتحميل الرواية هنـــــــــــــــــا


بسم الله الرحمن الرحيم
السلام عليكم ورحمة الله وبركاته كيف حالكم إن شاء الله دائما بخير ؟

قضية لم شمل
للكاتبة نهى الحسون





غرباء التقينا
جمعنا القدر عنوة
جمعونا في غرفة مغلقة
مجهولة الملامح
وقالوا انكم اخوة
انا في ركن
وهي في ركن
وفي الركن الاخر هو
نظرات مستغربة بيننا
خليط من الشك والقوة
يشك بي ان التفت
اشك به ان تحرك خطوة
جمعنا شيخ فان
جاء متأخرا مدعي الابوة
حالنا كحال العراق
فرقونا بالازمان
جعلوا بيننا فجوة
ويطلبوا منا العيش سوية
اخوة اعداء ولكن بلا قسوة
ترى هل اخوتنا هي الاكبر
هي الاعمق
هي الاحلى
هي الاجدر
وهل صوتنا الذي بحته الليالي
سيشدوا لنا متحديا اجمل غنوة
ها خوتي ها
كون اخوان كبال الذيب
ماتستگوي علينا ذياب
˟͙‧̩̥·‧•̥̩̥͙‧·‧̩̥❄بقلم الشاعرة هدى سعد‧❄‧̩̥·‧•̥̩̥͙‧·‧̩̥˟͙
مساء الخير والعافية عليكم جميعا احبتي
هاقد عدت لكم بعد غياب طول بقصة ((قضية لم الشمل )) تجمعني بكم سوية
احكيها لكم وانتم مجتمعون من حولي تشاركوننا عبر واحزان وافراح ابطال قصتي كما تعودنا
فانتظروني في الايام المقبلة
وان شاء الله سوف يكون لنا موعد معكم كل يوم عند الساعة العاشرة مساءا بتوقيت بغداد عدا يومي الخميس والجمعه
Nuha.d.h
فمرحباً بكم اينما كنتم يسعدني تواجدكم
احبكم كومة احبكم هواااااااااي اختكم نهى الحسون
#قضية_لم_الشمل
nuha-d-h
مساء الانوار والخير والمحبة والتسامح والتفاهم عليكم يا احبتي المتابعين طاب يومكم
انتظروني اليوم الساعة العاشرة مساءاً بتوقيت بغداد سوف يتم تنزيل البارت الاول من قصة( قضية لم الشمل )
حبيت انطيكم خبر عن الموعد حتى ننجمع كلنا سوى ونقرة القصة
والله وانا لو علية اتمنى اجمعكم داير مدايري واكعد احكيها الكم ونكعد مثل حكواتي باب الحارة من يجمع اهل الحارة ويكعد يقصلهم الله اتخيلوا وياي
انا اقصلكم وانتوا كل شوية وحدة منكم تسألني سؤال
وتكلي عيدي ما سمعتج زين وانا كل ساعة اعيد وتالي
بقية المتابعات يسحلن المكرودة الي كل شوية تسأل
وانا اكلكم صلوا عالنبي بنات
وعصابة حسب الله يصيحون الزلمة يطلع دم
وهيج تخلص القصة واختمها بكلمة عاشوا عيشة سعيدة خليتهم واجيت
اي صدك لا تنسون تجيبون وياكم حب شمسي شامية عصير لزوم السهرة
والان الى اللقاء ان شاء الله في موعدنا
اختكم نهى الحسون احبكم كومة احبكم هوااااااي



التعديل الأخير تم بواسطة فيتامين سي ; 08-11-19 الساعة 01:13 PM
لامارا غير متواجد حالياً   رد مع اقتباس
قديم 08-09-19, 12:51 AM   #3

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

مساء الخير عليكم جميعا متابعين #الكاتبة_نهى
اليوم نعود بعد غياب طويل لنجتمع معكم بقصة من قصص نهاوي



#قضية_لم_الشمل
#البارت_الاول
#الكاتبة_نهى



طرقات على باب الزمن تاتي مع مهب ريح الذكريات
فتتركنا بمواجهة الطارق الاتي
لتفتح جروح قد مرَ عليها الدهر
وتدفعنا نحو مستقبل ٌ مجهول
كلنا مجتمعين بالصف ننتظر استلام النتائج ومن عندها راح نعرف ندخل بكلوريا لو لا
اباوع للبنات الوجوه مگلوبة مخطوف لونهم وكأنما راح يعلنون موعد اعدامهم مو اعلان نتائجهم
الوحيدة اني مسيطرة وواثقة من نفسي
كانت المدرسة الست فوزية تعلن بالاسماء واني اضحك على البنات واخمنلهم منو الناجحة ومنو الي ماتدخل بكلوريا
حسيت على ايد لكزتني التفتت لكيت ندى صديقتي
همست بصوت ناصي حتى ماتسمعنا المدرسة
ندى.. لج ريم ذبي العلج لا تشوفج المدرسة وتطردج من الصف استري علينا
هزيت كتفي بلا مبالاة
.. كون هي صحيح بايعة روحها خليها تجرب تطردني وتشوف
.. يلعن بليسج شكد صلفه ولج اني راح اموت بدمي من الترقب والخوف وانتي ولا هامج الموضوع
.. يعني شنو تريدين اسوي الطم ،حبي اني ادخل بكلوريا غصباً عن الكل شنو نسيتي اني ريم
.. هنيالج ضامنة النجاح
صاحت اسماء البنات بالتسلسل منهم الفرحانات بالنتيجة ومنهم الي كعدوا ينحبون ومنهم الي كعدوا يجمعون ويطرحون بلكي يحصلون درجة زايدة منا منا
وكان يوصلني الدور واسمع اسمي صاحت
.. ريم محمد ........
كمت من رحلتي بكل ثقة عبالك ملكة راح يكرموها من زود الثقة
وصلت يم المدرسة ومديت ايدي حتى اخذ النتيجة
وكان تبشرني ست فوزية
.. راسبة بست دروس ياخاتونة. عود سلمينا على عمج مؤيد بطريقج
اسمع اصوات القرودة صديقاتي من وراي
طننننننننن
اخذت النتيجة وابتسمت بكل فخر
ورحت كعدت برحلتي مثل البرنسيس رافعة راسي ويا جبل ما يهزك ريح
ندى .. لا وواثقة من نفسها ولا عبالك
جانت تحجي وياي وتباوع هي والبنات لنتيجتي ودرجاتي
رؤى .. يبووي وتعالوا شوفوا الدرجات شلون تحفة الله عليج ريم شنو جنتي تسوين طول السنة
التفتت عليهن بكل كبرياء
.. رجاءا. ما اسمحلكم تحجون على درجاتي ترة كل درجة بهاي الدروس اني تعبانة عليها لا عبالكم اني اجيب هيج درجات بسهول
ندى.. لا والنعم منج ما قصرتي بس كليلي انشتاين شيصير من عندج اكيد على هاي الدرجات الخارقة مو اي واحد يكدر يحصلهم صاحت اسم ندى
وراحت استلمت النتيجة اباوع عليها ضربت على وجها وحركت شفايفها انرسمت عليها كلمة يبوووو بدون صوت
اجتي وكعدت يمي خطية حتى هي كانت راسبة وماداخلة بكلوريا
كعدت يمي وكالت
.. ياربي شسوي شكول لامي من اروح
_شنو تكولين يعني شصار
ندى جاوبت وهي مرتبكه وشفايفها ترجف
.. عفية سكتي ريم ما ناقصة برودج اني بورطة
المشكله شنو راح اسوي شنو اكول لنجاة اذا شافت النتيجة
كانت تقصد امها اسمها نجاة
.. بسيطة كوليلها ماما تكبرين وتنسيها ربي يعوضج بأخواني البقية
سكتت ندى شكلها ماتعرف شجاوبني بس هزت ايدها (تهي بهي)
خلصنا الوقت بين مد وجزر علمود النتائج
وناس تكول احتمال ينطون قرار دخول شامل وناس تكول لا تتأملون
وانا.جمعت الشلة وصرت اتفق على موعد الطلعة للمول
ندى بخذلان.. بالنسبة الي لا تحسبون حسابي بالطلعة
بعد هاي النتيجة ما اتوقع الاهل يوافقون اطلع بعد لأي مكان
.. ندى حبيبتي لاتخافين ان شاء الله ماراح يصير شي
.. وليش ما اخاف يعني شنو فوك راسي ريشة مثلاً
.. لا حبيبي مو فوك راسج ريشة بس بالنهاية انتي بنتهم
واكيد انتي اعز عليهم من النتيجة
فرت ايدها وباستها وحطتها على كصتها وكالت
..الحمدلله ياربي على نعمة العقل
بابا ريم اصحي حبيبتي انتي رجعتي للعراق العظيم لاعبالج بعدج برة
احنا مو عايشين بالخارج والام تجي لبنتها تواسيها وتوديها طبيب نفسي خاف اتاثرت من عرفت راسبة
لا حياتي انا امي المواساة عندها بالنعال ووين اليوجعج
رؤى .. لا عوفيها هاي بعدها متأثرة بحياة الخارج وما مستوعبة الحياة هنا شلون ماشية
دك الجرس وصارت وقت طلعتنا من المدرسه
طلعت اني صديقاتي للسايق
وجان تمر يمنا سيارة نوع camaro لونها اسود
صاعد بيها شاب ما انتبهت على شكله
مر من يمنا وداس. بانزين وارتفع صوت المحرك بصوت يجعر واني جفلت
سمعت ندى والبنات
ندى.. فدييييييت هالصوت وراعيه غير اخرب على هيج سيارة
صبا .. لج شوفي الشاب الي راكبها
رؤى.. اي صدك اتذكرت ريم هذا الولد حجة وية اخوي حتى اتوسطله واحجي وياج
يريد رقمج. يابختج ريم
رفعت راسي وباوعت لصاحب السيارة وهزيت ايدي
.. اييييع عمة حتى عمة هذا شنو عبالك زرزور. مبلل
لايكون هذا عندكم وسيم
ندى.. على كيفيج عيني انطيج عيوني تشوفين بيهم
بس صدك لو كالوها ينطي الجوز للماعنده سنون
.. لا حبيبتي خلي الجوز الج اني عني ميفيدني احب الفستق
اني الشاب اليعجبني لازم يكون رجال بمعنى الكلمة
اهم شي يشبه عمي مؤيد فديته لعمو حبيبي يخبل
ندى .. ها يعني تحبين السمر اممم
اوووف الناس وين واني وين نسيت مصيبتي وباقية احجي ماخذة راحتي
كأنما ما راسبة
هسة الكة امي منتظرتني ورة الباب. تريد تعرف النتيجة
ايد بيها حلويات وايد الثانية بيها السلاح الابيض نعال ابوية الجبير بس الله يستر
باوعت عليها مستغربة
.. يعني شنو يريد يصير شدعوة انتي هشكل خايفة
.. طبعا حقج انتي ما تعرفين العقوبات الي راح يفرضوها علية اهلي
.. شنو القضية ليش طولتيها وعرضتيها انتي بنتهم مو عدوتهم
قطع كلامنا وصول السايق
وودعت البنات وصعدت بالسيارة
وصلت للبيت وكان فارغ محد بي لاعمو مؤيد ولا عمة اسيا تعودت على هذه الحالة كلما ارجع ما الكة احد
دخلت للمطبخ وكالعادة لكيت بس ام فلاح
سألتني
.. هلا ريمة بشريني انطوج النتائج
جاوبتها بدون اهتمام .. اي استلمت النتيجة وراسبة ما داخلة بكلوريا
غيرت الموضوع واتجهت للباب اريد اطلع من المطبخ
.. خالة جهزي الغدة بين ما اغير ملابسي
.. صار من عيوني دقيقتين وتلكين الاكل جاهز
.. تسلم عيونج
صعدت فوك لغرفتي وخلص اليوم وعمو وعمة ما رجعوا للبيت ونمت بدون ما ابلغهم عن النتيجة
اصلاً عادي عندي هذا الوضع
يوم ثاني الصبح كعدت من النوم ونزلت جوة واستقبلتني عمة اسيا
.. اكلج ست ريم انتي وتاليها وياج ماراح تحسين على نفسج يعني صدك مصختيها عاجبج وضعج كل سنة
ترسبين واخوية يعوف شغله يظل يفتر يدور واسطات
حتى ينجحون حضرة جنابج
نفخت بضجر اوف معناها خالة ام فلاح بلغتها بالنتيجة
.. اهووو عمة من الصبح مستقبلتني هذا الاستقبال كولي صباح الخير
.. منين يجي الخير وانتي كاعدة من النوم بعز الظهر
وحضرتج ضاربة الكل بعرض الحايط ولاهامج احد
كانت عمة اسيا معصبة ومستمرة بدون انقطاع عبالك راديو وانفتح بس مابي
اي زر حتى تطفي
واني واكفة اسمع لموشح الرزالة امسح على راسي المسكين الي صدع من اللغوة
هسة الي يسمعها يكول هاي شكد حنينة على بنت اخوها اليتيمة وهي بالحقيقة ماعندها ذرة اهتمام وحنان الي
ما ادري ليش هشكل تعاملني احس عبالك كاطعة عليها ليلة عرسها
بس احمد الله واشكره ان عيشتي مو عليها ربي يخليلي عمو مؤيد
ولو ما عمو مؤيد يحطلها حد لتصرفاتها واسلوبها الحقير وياية
كان بس الله اليعلم شسوي بية
وخصوصاً هالايام حادة سنونها علية
وعلى حظي المصخم البارحة استلمت النتيجة راسبة والحمدلله وكعت بلسانها
وهي ما صدكت تلزم علية حجة
فرصة ما تتعوض
وهسة هي استلمتني من الصبح لحد هسة ولا سكتت يعني من صدك خنكتني وطلعت روحي
.. اوووف هسة خلصتي لو بعد شوية رزايل تضيفيها للقائمة
.. هاي شنو حضرتج گاعدة تستهزئين
الظاهر ما عاجبج كلامي اي طبعاً ما يعجبج كلامي اتعودتي على الحلل والتسيب بس هو مو صوجج ولا ذنبج
صوج اخوية الي فسدج بالدلال وهاي النتيجة تصرفاتج كلها طايشة ومستهترة
شلون ياربي هاي ما ناوية اليوم تجيبها البر وتسكت
والله بعد ما اتحملها راح انفجر بيها
.. شلون بالله ماراح تسكتين اليوم صدك بزعت روحي
يعني شنو ترديني اسوي اكتل نفسي حتى ترضين
.. انتي شكد صلفة وماتستحين كاعدة تلاسنين وتراديدين
يعني فوك رسوبج وفشلج كاعدة تحجين بكل گواة عين
بس الظاهر انتي الكلام وياج ما منه فايدةً
بسيطة خلي يجي اخوية مؤيد واخليه يشوف شغله وياج
لان وضعج بعد ما ينسكت عليه لهنا وكافي
اني مليت وتعبت من مسؤليتج
.. هسة انتي ليش معصبة نفسج
مسؤوليتي عمي حبيبي هو المتكفل بيها لتعبين روحج انتي
بعدين اريد افتهم شي واحد هو مستقبلج لو مستقبلي
اباوع لوجها صار احمر من الاعصاب
..اااااااخ لو اخوية مؤيد ينطيني صلاحية عليج
لأكون عايدة تربيتج من اول وجديد
واخليج تحلمين ترفعين عينج بعيني
وهذا السانج اكصه
جاوبتها
.. والحمدلله عمو ........
فاجئنا دخول عمو مؤيد للمطبخ
سلم علينا وعيونه تتنقل بينا اني وعمة اسيا
شكله حس بالجو المشحون
.. شكو ليش صوتكم واصل للشارع
ردت اجاوبه بس عمة اسيا سبقتني
.. الحمد لله اجيت بوكتك تعال شوف بنت اخوك شدتسوي
.. شبيها ريم
.. الخاتونة راسبة وما داخلة بكلوريا
تعال اسمعها شلون تجاوبني بكل صلافة
باوع علية وسحب نفس عميق شكله جان مبين كلش تعبان
.. ريم عمو انتي ما ناوية تنتبهين لمستقبلج
.. عمو والله اني ادرس بس ماكو توفيق
اسيا.. منين يجي التوفيق اذا انتي اربعة وعشرين ساعة
لو نايمة لو دياحة وية صديقاتج لو مكابلة النقال وكاعدة
اكو يوم لزمتي كتاب وكلتي خلي ادرس
مؤيد .. عمو ريم كل مرة اسكت واكول خطية ما اكسر بخاطرها وخليها براحتها
و ما دام انا موجود ماراح اخليها تعتاز لأي شي
بس ياعمو هسة الوضع اختلف وهواي امور تغيرت وصار لازم تنتبهين لنفسج ولمستقبلج
رحت اقتربت عليه وبسته من خده وكتفه مثلما متعودة
واخذته ورحنا كعدنا بالهول عالقنفات
.. اول شي تعال ارتاح شوية انت هسة راجع من الشغل
رفعت راسي وباوعت لعمة اسيا
.. الله يسامحج عمة يعني انت ماتشوفين عمو حبيبي شلون راجع تعبان من الشغل
ميصير اول مايدخل تستقبليه بالاخبار انطي مجال يجر نفس ويرتاح
.. لو انتي صدك حنينة على عمج.
كان عالاقل نجحتي وفرحتي بنجاحج ووفرتي سالفة الواسطات
.. عمة ماله داعي لهذا حجيج ورجاءا لاتظلين تشحنين عمو
الموضوع ما يحتاج كل هاي الهوسة هسة عمو يتصل على صديقه يروح للادارة
ويطلب منهم يدخلوني بكلوريا وكولشي ينحل
باوع علية بتعب ومسح وجهه بكفوف ايديه
وجر نفس عميق وكال
.. وانت ليش تكوليها هيج بكل بساطة وبكل برود عمو يتصل ويطلب وينجحج
زين الى متى هشكل تبقين معتمدة على عمو
وغير مسؤولة يعني برأيج اذا رسلت صديقي حتى ينجحج راح ينحل الموضوع
جاوبته بكل ثقة .. اكيد ينحل همة بس خلي يدخلوني بكلوريا والله كريم
.. زين وبعدين وبالبكلوريا من تدخلين منو ينجحج
_ هناك ماكو عمو مؤيد وواسطات كلكم سواسية بالامتحانات النهائية
.. اوعدك عمو بس هالمرة وشوفني راح اشد حيلي واتعب نفسي وادرس
.. وشنو الجديد انا كل مرة اسمع هاي الجملة
واسكت بس هسة بعد ما اكدر اسكت لهنا وكافي
انتي لازم تنتبهين لنفسج
ومنا ورايح تعتمدين على روحج مو كلشي يصير وياج تصيحين تعال عمو مؤيد الحكلي
باوعت عليه متفاجئة وحسيت بالخذلان ونظرات عيوني تلالي بالدموع
شبي عمو متغير علية
هو باوع لعيوني جر نفس بصبر
.. استغفر الله ،ربي الهمني الصبر عمو ليش هاي الدموع
انا ما اريد منج شي غير بس تنتبهين لمستقبلج لازم تعتمدين على روحج وتحرصين على دارستج
لان انا ما داي......
انتبه لروحه وقطع كلامه ومسح وجهه التعبان وحجة بصوت ناصي
.. استغفر الله ... احس يوم عن يوم الامور تتعقد
اكثر مما انا متصور
جاوبته عمة اسيا بتشفي
.. على شنو مدوخ روحك ومتعب روحك بمسؤوليتها
مو كلتلك زوجها لأبني نائل وهو يتولى مسؤوليتها وما دام هو هسة يدرس بالخارج وهي متعودة على حياة الخارج تسافر هناك وياه تكمل دراستها وعينه عليها
اهوووو هم رجعت فتحت هذا الموضوع التافه
هاي من كل عقلها اني اتزوج ابنها والله لو يبقى اخر واحد بالعالم ما اتزوجه ابقى اعنس ولا اصير زوجة لابنها التحفة
التفتت لعمو مؤيد اباوع عليه منتظرة جوابه لعمة اسيا
جاوبها بنفاذ صبر وكال
.. اسيا سدي الموضوع هذا الحجي مو وكته
انا كم مرة گلت هذا الموضوع منتهي والبنية صغيرة مو حمل زواج
.. براحتك انا ما اجبرك توافق لان ابني الف من تتمناه
بس علمود انت عمها للبنية وخاله لابني كلت تزوجهم وهو يخفف عنك الحمل
شوية وترتاح من مسؤليتها بس شكلك عاجبتك دوخة الراس ومتريد تحلها
.. هاي خليها علية حلها عندي انا اعرف شلون منا ورايح اخليها تسوي حساب لمستقبلها ودراستها
باوع علية بتوعد
كمت من مكاني واني اتسائل عمو شبي وياية شكو شصاير صارله فترة كلش ما عاجبني
وهاي الايام كلش متشدد وياي وهلشي مو من عوايده يقسى وياي علمود مستقبلي
طول عمري عايشة بحرية ما يوم حاسبني على اي شي اسويه
اني من وفاة ماما وبابا ماشفت من عمو مؤيد غير بس
الدلال والحنية ما يوم حسيت باليتم
بس هسة ما اعرف ليش هيج متغير علية قبل جان ميتأثر بكلام عمة اسيا ولا يعلق عليها اصلاً جان يحطلها حد من تحجي علية كدامه
عبالك ديحاربوني اختنكت واتوجهت لباب الصالة اريد اطلع اتوقفت
ودرت وجهي على عمة اسيا بغيض
.. هسة ارتاحيتي من خليتي عمو يعصب علية كله منج
عمو كام من مكانه وصاح علية بصوت عالي
.. رررريم انتي شلون تحجين وية عمتج بهذا الاسلوب مو عيب
وهي ماصدكت
..شفت هاي نتيجة الدلال شوف وين وصلها هاي هي كدامك شوفها شلون ماتحترم احد ولا تهتم لأحد
انانية تفكر بس بنفسها
.. اني مو انانية اني احبه لعمو و....
عمو مؤيد قطع كلامي وكال
.. ريم كافي ما اريد اسمع منج اي كلمة هسة تجين تعتذرين لعمتج كدامي
سكتت
ولميت اصابع ايدية بقبضة باوعت لوجه عمو الاصفر التعبان وقررت اعتذر واخصم الموضوع لخاطره
حجيت بصوت ناصي
.. اسفة عمة
جاوبتني بمسكنة .. اني من احجي عليج ترة كله علمود مصلحتج اني ما اريد منج اي شي
سكتت ما جاوبتها بس گلبت عيوني مختنكة من كذبها ونفاقها ادري بيها تتمسكن كدام عمو
مؤيد.. يالله سدوا الموضوع ما اريد اسمع ولا كلمة
باوع للساعة وكمل كلامه
.. صديقي ابو سيف على جية عندي شغل وياه
كام من مكانه ولزم راسه يدلكه بأطراف اصابعه
.. يالله انا فايت لغرفتي ابدل ملابسي
.. اخلي ام فلاح تحضرلك الغدة
.. لا ما اشتهي بس اريد تجهزون شي للتقديم بين ما يجي صديقي ابوسيف
.. ان شاء الله
باوعت لعمو راح دخل لغرفته كانت بالطابق الارضي
.. واني رحت صعدت فوك لغرفتي
اجاني صوت عمة اسيا خلفي
واكفة بنهاية الدرج
.. اني راح انطي خبر لام فلاح تجهز صينية واكوللها شنو تحضر وانتي تنزلين تقدميها
لعمج لان اني هسة اطلع وية جارتنا عندنا واجب تعزية
جاوبتها واني داصعد
.. ان شاء الله من يوصل عمو ابو سيف خليها تننطيني خبر
دخلت للغرفة وسديت الباب واني كولش ضايجة
اوووف
رحت اتوجهت لنقالي واتصلت على صديقتي ندى
اغلي من القهر
.. الو هلو ندوش
.. هلا وغلا حبيبتي ريمة
.. اوووف لج ندى يمكن راح ارتكب جريمة
.. والله مبين من صوتج الاوضاع يمج متوترة
يعني افتهم من كلامج عمج عرف بالنتيجة
.. اي عرف بالنتيجة والفضل يرجع لست اسيا
.. وشنو سوى من عرف
.. ظل يرزل بية وكلي اعتذري لعمتج
اسيا لان عليت صوتي عليها كدامه
.. بس هيج
.. اي بس هيج بعد شنو تردين اكثر من هيج قهر يعني بشرفج اني ريم من تالي عمري اكل رزالة طويلة عريضة من عمو
صدق او لا تصدق
.. يابة حمدي ربج وشكريه لعد لو تعرفين الجماعة العندي شنو سوو بية من عرفوا بالنتيجة
.. يا نسيت اسألج
صدك امج وابوج شنو صار من عرفوا بيج ما داخلة بكلوريا
جنت احجي وية ندى واتحرك بالغرفة عدلت وضعية سماعات الاذن
واخذت مبرد الاظافر من عالميز ورحت اتمددت عالسرير
اباوع لأظافري بتركيز صرت ابرد بيهم
ندى.. لج سكتي ريم لا تذكريني غير انكلب البيت جحيم وعلنوا الحرب علية تكولين مسلم ووكع بيد قريش
ماخلوا رزالة ما كالوها بحقي
خو امي عبالك مرت ابوي صارت كل شوية شاحنة ابوية علية واتذكره على تصرفاتي
يا ساعة تكله مكابلة المسلسلات التركية وكاعدة
لو ساعة تكله مكابلة النقال وكاعدة. احتارت شلون
تدفع بابا علية والحمدلله هسة اني حالياً فارضين علية حظر التجوال وسحبوا مني كل مستحاقتي من مصرف وطلعة واتوقع النقال ينسحب مني بأي لحظة وغيرهم وهاي من غير كل شوية يسمعوني حجاية بالطالعة والنازلة
.. اهووو هاي شنو اهلج شكد قاسيين
سالفتج لايصة معناها افتهم من كلامج متروحين لحفلة مهر ريتاج
.. والله انتي بطرانه احنا بيا حال وانتي كاعدة تدورين حفلات
.. اشكد مكروهة لازم تخربين واهسي
هسة يعني شنو واذا رسبنا قابل نهاية العالم
اهووو عوفج من هذا الكلام وخلينا بالمفيد
خلي نخطط
شلون راح نقنع اهلج حتى يوافقون تروحين وياي للحفلة
.. هاي شبيج ريم انتي شنو متسمعين
مو صارلي ساعة اكلج اهلي فارضين علية حضر تجوال
.. اي شبيج خلينا نحاول وياهم بلكي يوافقون
واني احجي وية امج واكللها اني اخذج وياي وارجعج للبيت بيدي
.. شوف هاي انتي من صدك تحجين
حبيبتي هذولي مو عمج مؤيد وما يرفضلج طلب
الجماعة العندي اذا اكوللهم على الحفلة
احتمال يكتبون بية ورقة فصل من العشيرة ويتبرون مني
.. اوف منج ندى سديتيها بوجهي وسويتها ظلمة
والله اضوج اروح لوحدي
.. اكلج انتي مو قبل شوية كلتي عمج كام يحجي عليج
علمود النتائج شلون راح يوافق على روحتج للحفلة
.. اي عادي اخليه يهديء شوية واحجي وياه
اكيد ماراح يرفض
ملتهية احجي بالنقال انفتح باب غرفتي ودخلت عمة اسيا حتى بدون متدك الباب
.. شنو انتي طرشة
نزلت تك من السماعة ورديت
.. شكو شصاير
.. صارلي ساعة اصيح عليج وحضرتج متردين بالعناد
انتبهت للنقال بيدي وكالت
.. وهاي انتي ويامن تحجين بالنقال
جاوبتها بكل برود
.. احجي وية صديقتي ندى اتفضلي عمة شنو ردتي
.. سلامتج عيني ست ريم ما اريد منج شي بس لازم تنزلين
لان ابو سيف على جية واني راح اطلع
يالله تحركي نزلي
.. اوك انتي نزلي واني جاية وراج
.. يالله مو تتأخرين
وكافي مكالمات شوكت ما اجيج الكاج تحجين بالنقال
دارت وجهه ا وسدت الباب وطلعت
عفست وجهي وغميت الباب
.. شكد كريهة
اجاني صوت ندى من الطرف الاخر
.. الوو ها شنو راحت عمتج لو بعدها واكفة فوك راسج
.. لا راحت
.. خرب هاي عمتج شكد حقنة
اكلج هي شوكت تسافر انتي مو كلتي على الاساس اولادها الي بالخارج راح يسولها دعوة ويدزون عليها تسافر وراهم
.. اي ولازالوا ديمشون بالمعاملة.
بس انتي ادعي ان شاءالله تخلص الاجراءات بسرعة وتروح
لان طلعت روحي احس بيها ماعندها شغل وعمل بس ريم
عبالك مسويتلي فضل من كاعدة هنا يم عمو مؤيد
تكول لو ما انتي هنا جان اني من زمان مسافرة يم اولادي
.. اي متروح منو لازمها
.. اي غير عمو مؤيد طلب منها تبقى عنده هنا بالبيت
علمودي وهي فرحت لان متريد تكعد هناك برة تضوج
هنا صديقاتها وجيرانها وطول الوقت طالعه هناك كاعده بالبيت وساكته
وهي جابتها كل هاي السنين محملتني المسؤولية
وكلما تحجي تكول لوما انتي
ولو ما انتي وكلها منج وانتي وانتي
سمعت صوت الجرس وحجيت
.. يالله ندوش وصل عمو ابو سيف لازم اروح
.. يالله حبيبتي مع السلامة
نهيت الاتصال
وگمت من السرير ورحت للمرايا
عدلت شعري القصير وحطيته على جانب
كان شعري موديل كاريه من ورة قصير ومن كدام على جانبين وجهي يصير اطول بقليل باوعت لبجامتي الوردية كانت مطعمة بالرصاصي لبست حفايتي الفرو شكل ارنوب
وردي ورصاصي اخذت نقالي ونزلت
لكيت ام فلاح مجهزة الصينية وحاطة فنجانين كهوة علبة تقديم صغيرة بيها بقلاوة
عمة اسيا ما موجودة الظاهر طلعت
كانت ام فلاح تنظف
.. خالة ريم ديري بالج من تشيلين الصينية مو تروحين وجه الكهوة
.. لتخافين خالة
سمعت صوت عمو مؤيد يحجي وية ابو سيف
كانت الاصوات جاية من الاستقبال
اخذت منها الصينية ومشيت بهدوء شوية لان اني بطبيعتي اركض ماامشي عادي
كان باب الاستقبال مردود شوية كنت اسمع اصواتهم
رسمت ابتسامة على وجهي واجيت ادخل
اني اعرف عمو ابو سيف صديق عمو مؤيد هو محامي
يربطه عمل وية عمو وبعد فترة اتحول العمل لصداقة قوية
متعودة على تواجد عمو سيف بحياتنا لدرجة احس بي مثل عمو مؤيد
رحت للصالون ولزمت ايد الباب اريد افتحه لكن استوقفني
كلام عمو مؤيد وعمو ابو سيف
.. مؤيد بالله ممكن تفهمني شنو سالفة هاي الاسماء الي تريدني اجمع معلومات عنها
جاوبه عمو مؤيد بصوت تعبان
.. مهيمن مؤيد....
جلال مؤيد....
نور مؤيد....
هاي الاسماء الثلاثة اسماء اولادي
ابو سيف جاوبه متعجب.. اولادك !!!!
اهتزت الصينية بين ايدية وجمدت ايدي اللاخ على يدة الباب مصدومة من كلام عمو مؤيد
بقيت واكفة ما احرك ساكن بين المصدومة ومتفاجئة بكلام عمو مؤيد معقولة الي سمعته
شنو عمو مؤيد متزوج وعنده اولاد هاي شوكت وليش اني ما اعرف عنهم شي
انتبهت لوكفتي واتذكرت صينية الكهوة لا تبرد لازم اقدمها الهم
اكيد هسة عمو ينتظر نقدم شي وحتى لا ينتبهون لوجودي ووكفتي يم الباب
طرقت الباب ودفعته
ورسمت على وجهي ابتسامة مصطنعة ودخلت
قطعوا كلامهم وباوعوا علية
سلمت على عمو ابو سيف وعيوني على عمو مؤيد
ابوسيف.. هلا بريمة شنو هاي الاخبار الي سمعتها عنج والله زعلتيني منج
مؤيد.. لا تتعب نفسك وياها هاي البنية خربها الدلال
وشكلي لازم اعيد حساباتي بشأنها
باوعت عليه بأرتباك ما اعرف شنو اجاوبه لأول مرة
يخوني التعبير وما اتبادل وياهم مناوشات الكلام مثل كل مرة
بعدني ما مستوعبة عمو مؤيد عنده اولاد
مفاجئة الخبر اربكتني وخلتني محتارة
شنو وينهم عائلته وليش اني ما اعرف عنهم اي شي زين هذولي اولاده شكد اعمارهم وعمو شوكت اتزوج
بقت الاسئلة تدور بعقلي صافنة بوجههم وكأنما اذا بقيت اباوع عليهم راح اعثر على الاجابة مرسومة بعيونهم
انتبهت على عمو ابو سيف يحجي وياي
.. شنوعمو ريم وين صافنة الماخذ عقلج يتهنى بي
.. عوفها الظاهر بعدها زعلانة من عندي
لان اليوم عصبت عليها
كان عمو مؤيد يحجي وية عمو ابو سيف وعيونه تتفحصني بأهتمام ابتسمت وجاوبته
.. لا عمو اني ما اكدر ازعل عليك اكو وحدة تزعل من اعز انسان على گلبها
ابتسم وعيونه بيهم هموم
قدمتلهم الكهوة والبقلاوة واخذت الصينية الفارغة واتجهت للباب
.. اني استأذن منكم اخذوا راحتكم خاف عندكم شغل ما اعطلكم
جاوبني عمو ابو سيف
.. براحتج عمو ان شاء الله احنا ما نطول
طلعت من الاستقبال وتركت الباب شوية مفتوح وراية
جنت شايلة الصينية الفارغة بيدي بس طلعت غيرت مسار خطواتي من الاستقبال واتكأت عالحايط الي بصف الباب المفتوح
مؤيد .. اتفضل اشرب كهوتك لا تبرد
ابوسيف.. اي والله جتي بوكتها الكهوة
تعال گلي هذا الكلام الي سمعته قبل شوية جان صحيح لو انا سمعت خطأ
.. الي سمعته صحيح مهيمن وجلال ونور اسماء اولادي
.. والله يا مؤيد بعدني ما مستوعب الخبر
معقولة انت عندك ثلاث اولاد تصدك فاجئتني ماكنت يوم متخيل ولو واحد بالمية انت عندك زوجة واولاد ثلاثة
اتوقف عمو ابو سيف لحظات شكله بدة يشرب الكهوة
ورجع كمل كلامه
.. زين هذا كله شوكت صار اشو انا ماعندي علم
ليش انا اخر من يعلم
مؤيد صححله المعلومة .. قصدك اول من يعلم
انت اول واحد احجيله عن هذا الشي
.. يا اخي سالفتك كلها على بعضها تدوخ
زين ليش تريد مني اجمع معلومات عنهم يعني انت متعرف باولادك وين همة
انتبهت لعمو ابوسيف نزل على عمو مؤيد بالاسئلة نزلة وحدة
حاله مثل حالي وكأنما ديحجي الي بگلبي ويسال الاسئلة الي تدور براسي
.. يعني معقولة ما اصدك زين زوجتك شعجب ساكتة عنك وتعال كلي اولادك هذولي شكد اعمارهم
كبار لو صغار
سمعت عمو مؤيد يجاوبه بهدوء
.. انت لو بس تسكت شوية وتوقف مطر الاسئلة الي نزلت بيها علية وتنطيني مجال حتى افهمك شنو الموضوع
.. اتفضل احجي خليني اسمع صاحبي شنو ضام عني من اسرار
.. هذا وانا بعدني محاجيلك شي من الماضي وانت مصدوم بهذا الشكل
زين لو احجيلك شلون صاروا عندي ثلاث اولاد شراح تسوي
كانت اصواتهم توصلني واني واكفه بمكاني حاضنة الصينية لصدري
اسمع كلامهم الفضول صار يقرة عندي الف اريد اعرف شنو السالفة
بدأ عمو مؤيد يحجي لأبو سيف
تعال خلي احجيلك كلشي حتى تساعدني بالبحث عنهم
.. اتفضل احجيلي عن زوجتك واولادك
جاوبه عمو بتردد
.. بالحقيقة هي مو زوجة وحدة وانما هن ثلاث زوجات
ابو سيف بتعجب .. شنو!!!!!!
شهكت وحطيت ايدي على حلكي
احس عيوني نطت من مكانها من المفاجئة هاي شنو ثلاث زوجات
شكل عمو اليوم ناوي يجلطني من ورة مفاجئاته
مؤيد
(( انا بدت قصتي
قبل ٣٠سنة جنت دائما اطلع واسافر وية ابوي الحجي
ووين ميروح لازم ياخذني وياه
واني هم جنت احب السفر واكثر سفرياتنا تكون بخصوص الشغل
كانت تجيينا بضايع نروح نستلمها اني وياه
من ميناء ام قصر
وابوي كان دائما من ينزل للبصرة يروح عند اصدقائه واصدقائه ناس معرفين بالكرم والطيب واغلب كعدات الحجي بديوانهم
واني ابنه الكبير عضيده الي لازم اتحلى بصفاته
وصادف سفرة من السفرات قدموا هدية لابوي
والهدية كانت بنية واحنا گاعدين بمضيفهم وابوية انحرج منهم وهمة ناس معروفين مكدر يرفض الهدية لان راح تكون عيبه عليه وهو كان يشتري ودهم ورضاهم
لذلك كان من الطبيعي ان يقبل هديتهم
وبنفس الوقت ابوي ما راد يكسر بأمي ويتزوج البنية
ما اشوف الا الوالد كلي وبدون مقدمات
.. مؤيد راح اعقدلك على البنية الي هدوها النا
اني بوكتها كان عمري عشرين سنة بعدني شاب واداوم بالكلية والدنيا زاهية بعيني
بالحقيقة فاجئني بطلبه وحاولت اقنعه
.. يابة انت صدك تحجي انا اتزوج
بعدني ما مستعد للزواج ومسؤلية الزواج اريد اعيش حياتي وشبابي
عمري كله على بعضه عشرين سنة ويني ووين الزواج
بس الوالد بقى مصر على رأيه وانا صرت احاول وياه بلكي يغيره
بس الوالد لزمني من ايدي التوجعني و خيرني بين امرين واحد امر من الثاني
لو اوافق واتزوج البنيه وتكون حجر عثرة بمستقبلي وانا بعدني هسه بديت امشي بي اول خطواتي
والخيار الثاني ان هو يتزوجها ويكسر امي وبهاي الحالة امي تموت قهر اذا سمعت بي متزوج عليها
اضطريت اخضع لطلبه و وافقت على الزواج بالبنية
كان اسمها زهرة
رحنا انا والوالد وعقدنا عليها ببيت اهلها وشفتها كانت حلوة اتزوجتها بس كان اتفاقي وية الوالد تبقى يم اهلها
وكانت الحجه علمود لتعطلني على دراستي
ابوية كال ميخالف اني ادبرها اتفق وية اهلها واجر بيت يم اهلها واثث البيت كله
وهي واهلها وافقوا ما مانعوا بالعكس كلش فرحوا بنتهم تبقى قريبة عليهم
وبعدما اتزوجنا كنت اروح وارجع عليها
ومن اروح يمهم تجي للبيتنا ومن ارجع لبغداد تسد البيت وترجع لبيت اهلها
واني بين فترة وفترة انزل للبصرة اشوفها وانطيها مصرف وهي ما تقصر تتلگاني بالاحضان والاشتياق وانا شاب فاير بأول شبابي وهي حلوة وحلالي
وفعلاً كنت ما اشبع من حضنها الدافي
كانت بالاضافة لحلاوة شكلها روحها الحلوة
كلش طيبة وحنونة ودافية ودائما تستقبلني ووجهها يضحك
مافد يوم اعترضت على سفري كانت مقدرة وضعي
ولا يوم اشتكت من تقصيري كانت بنية قانعة وصبورة
لان بنت خير عينها شبعانة ومترباية على الاصول
بس هذا الشي كله مخلاني اشعر بأني متزوج صحيح وبالمعنى الحقيقي للزواج كانت بالنسبة الي محطة استراحة مسافر مو اكثر
كنت اشتاق واحن لزهرة واذكرها من اشوف نفسي محتاج لها يعني بين قوسين اروحلها حتى البي رغباتي احتاجها كزوجة واشعر بيها زوجه بهذه الحاله فقط
طبعا انا بهذا الوقت ملتهي بدوام الكلية والزملاء والخشات والطلعات وكعدة النادي
لكن بيوم من الايام بأثناء ما جنت اداوم بالكلية
التقيت بطالبة جديدة كانت جاية نقل من جامعة الموصل لان ابوها صار شغلة ببغداد
لذلك سكنوا هي واهلها ببغداد اسمها رانيا متت عليها واخذت عقلي وحبيتها
بحيث نستني عندي زوجة حتى رغبتي الي كنت اشعر بيها لزهرة طفت عبالك وياها
ومرت الايام وانا يوم عن يوم اتعلق ب رانية
وبديت اتقرب لها واحاول اسوي علاقة وياها
لان اريدها الي لكن هي كانت تمانع
كانت تريد الزواج حالها حال اي بنية تخاف على سمعتها
ما اترددت ولا لحظة اخذت اهلي ورحت اتقدمتلها وطلبت ايدها من اهلها بس من رحنا لابوها
وعرف بية متزوج فاجئنا برفضه ومقبل يزوجني بنته
وهنا احس انگلبت حياتي وصار لازم اتخذ قرار
حسيت بگلبي راح يوكف
وانا بوكتها كان كل همي رانية تصير الي من نصيبي
صرت اناني
شفت نفسي مامجبور ابقى وية زهرة لان بالاصل زواجنا كان مو باختياري
اهلها فرضوها علينا وانا بالمقابل مو لازم اخسر الانسانه الي حبيتها وتمنيتها
يعني انا ما مجبور اشيل هم بنتهم الي شمروها علينا بحجة الكرم
ما اتحملت اصبر اكثر
راسا رحت سافرت للبصرة صرت اختلق المشاكل من واخترع الحجج وية زهرة
وبدون مقدمات ومن دون ميرفلي جفن طلقتها على سبب تافه اني سويت منه مشكله
صحيح بوكتها صارت هوسة بيني وبين اهلها اخوانها وابوها
واتذكر حتى ابوية بوكتها زعل مني وحيل ضاج من تصرفي حتى قاطعني لان اتفاشل وية صديقه بسببي
بس انا هذا كله ما همني المهم سويت الي براسي
ورجعت حر بدون قيود الزواج الي تحرمني من حبيبتي
خطية لحد هسة اتذكر شكل زهرة شلون گامت تبجي وتتوسل حتى ما اتركها
واني بكل جحود تركتها وطلعت ولا كلفت نفسي افهمها او اشرحلها الموضوع
طلعت من البيت او بالاحرى خرجت من حياتها
وسافرت لبغداد
ورة فترة وصلني خبر ان زهرة حامل
ما اهتميت وشنو يعني واذا حامل مستحيل ارجع واعوف حب حياتي علمود زهرة حامل
وبوقتها ما گلت لرانية ان مرتي حامل خاف يعرف ابوها ويرفض
ففضلت الالتزام بالصمت
المهم اتزوجت رانية بعد ما هدأت الامور بيني وبين الوالد
ورة فترة من زواجي تمرض والدي والتهيت بي
وبعد حوالي شهرين توفى الى رحمة الله
دارت عجلة الزمن ومرت اشهر
وصلني خبر زهرة جابت ولد وسمته مهيمن
وانا راسا دزيتلها محامي الوالد الله يرحمه حتى يرتب وية اهلها
طبعا اهلها كانوا صاحبين كبرياء لقطع النفس وحسيت بيهم مجبورين من اتصلوا علية حتى يكملون معاملة الهوية لأبني ويسجلون الولد بأسمي
وطلبوا توقيعي على بيان ولادة مهيمن
وجريت راتب كل شهر لها وللطفل لان شفت هذا واجبي اصرف على ابني
بس مع الاسف كان كل شهر يرجع المبلغ مثل ماهو ما مأخوذ منه دينار
لان زهرة عزيزة نفس وصامدة ومانزلت راسها
ورفضت فلوسي
طبعا اكيد ترفض لان الي سويته بيها مو شوية كانت حيل مقهورة
وبعد ولادة مهيمن تقريباً بكم شهر اتفاجئت بتصال اهل زهرة يطلبون مني ان اتمم طلاقي من زهرة عند السيد لان حسب كلامهم ان طلاقنا بذاك الوقت غير معترف بي لان زهرة كانت حامل من طلقتها معناها الطلاق باطل
سافرت للبصرة
واتذكر بوقتها من التقيت بزهرة كانت كاعدة يم السيد
وشايلة بيدها طفل صغير بالگماط دنكت راسي بخجل ما اكدر احط عيني بعينها حسيت بالذنب اتجاهها
كانوا اخوانها وابوها واكفين فوك راسي وكوة لازمين نفسهم ميثرموني بسنونهم كملنا اجراء الطلاق عند السيد
بس السيد من سألها عن حقوقها
كالت انا راح اتنازل عن كلشي بس عندي طلب واحد منه اريده يلتزم بي
كلتلها .. كولي اي شي تردينه يجرالج
سمعتها كالت بصوت ناصي.. ما اريد اشوف وجهك لا من بعيد ولامن قريب انا راح اعلن بين الناس انك استشهدت
اتفاجئت بطلبها
والاقوى من هذا كله ان اخوانها وابوها موافقينها الرأي
ومن يومها صرت بنظرالناس او بالاخص بنظر جوارينهم واقربائها بالبصرة انا ميت
هي حقها لان هناك عندهم المطلقة تتبهذل احوالها
والارملة اهون بالف مرة من المطلقة حتى تكف لسان الناس عنها وتكسر خاطرهم
وتعرف زمن قبل مو مثل زمن هسة
ومن خلال شرطها بعدم شوفتي ورفضها لأخذ المصرف
ثبتت لي ان هي قوية الشخصية وعكس ما جنت متوقع اشوفها منهارة
موقفها هذا طمني ان ابني راح يتربى ويصير زلمة ويعتمد على نفسه مادام امه زهرة
وخواله الرجال القوية الي واكفة ورة بنتهم حزام ظهر
ومن عندها انقطعت اخبارهم عني
لان حلقة الوصل انقطعت مع انقطاع المصرف والتواصل
ابوسيف .. يعني افتهم من كلامك
ان ابنك مهمين هسة حالياً شاب كبير
.. اي نعم اتوقع يجي عمره 29 سنه
.. والله ما اعرف شنو اكول الحقيقه يخوني التعبير
على العموم استمر كملي وشنو صار بعدها
.. وبعدها كملت حياتي و عدت الايام وانا متزوج رانية حبيبة العمر وبعد مرور سنتين بدت عدها اعراض غريبه وديتها الطبيب وطلعت حامل مو كلش اتحمست لخبر حملها احس بعدني ما اتهنيت بزواجي من رانية
والي زاد الطين بلة بمرور الايام صار حملها كلش صعب
صارت تنفر مني، تلعب نفسها من ريحتي خصوصاً من اقتربلها واريد انام يمها
يعني ما تطيقني وحتى عزلت فراشها عني
وتنام بغرفة لوحدها بسبب الوحام اضافة الى هملت البيت وغلب الاحيان الدكتورة تكتبلها ورقة دخول للمستشفى لان الطفل مهدد بالاسقاط فصارت رانيا جدا وهواسيك بخوص حملها وخايفة لا تخسر الجنين
فصارت اذا تحس بأي خلل گبل راحت للطبيب
صرت احاول اجاريها لكن بالاخير انا رجل مو ملاك
كل هاي الاسباب وكثرة ابتعاد رانيا عني اتعاونت على دفعي للبحث واشباع احتياجاتي الخاصة
وبديت امر بعلاقات طيارية وية نسوان لكن بدون اي التزامات او ارتباطات
وبالسر بعيد عن مسمع رانية كنت احاول بقدر الامكان ما اخليها تحس والحمدلله وهي وابتعادها جنبتني تبرير غياباتي عنها وسهلت علية الطريق
لكن بيوم من الايام وصادف في نفس هاي الفترة اجتي بشركتنا
موظفة جديدة اتعينت بالجديد بالمكتب
صغيرة بالعمر مثل البزونة المغمضة
وگعت عيني عليها جانت جداً جميلة وصاحبة جسم مغري يعني كانت من تدخل للشركة اباوع لعيون الموظفين كلها عليها وكانت سافرة شعرها لحد وركها
اخذته لعقلي
وصرت احاول اقترب منها وبمرور الايام خليتها تتعلق بية سألت عنها وعرفت حالتهم المادية ضعيفة وما عندها بس امها واخت وحدة متزوجة
انا صحيح عرفت علاقات هواي
بس هاي لا لا غير تختلف عنهن
كلهن بكفة وهاي بكفة كانت بنظرة منها تروح علومي كلها
طبعا اكيد حاولت اتقربلها بدون ارتباطات او التزامات
حالها حال الي قبلها بس هي كانت تقابل محاولاتي بالصد والرفض القاطع
والي افتهمته منها مستحيل تخليني اقترب منها
الا بحالة وحدة وهي بالزواج
اترددت بالموضوع لان اخاف على رانية اذا تسمع بية والله تتخبل وثاني شي ما بية حيل مسؤولية
بس بعدين استسلمت ووافقت اتزوجها بس شرطت عليها ان يكون زواجنا بالسر وهي وافقت لان جانت تحبني ومحتاجتني بنفس الوكت
اتزوجتها واستاجرت شقة واثثتها وسكنت هي وامها. بيها وانا كل يوم اروح يمها اعيش وياها احلى ايام عبالك عايش بالجنة مو عبالك بالشقة البسيطة كانت تحتار شنو تسويلي وشلون تدللني
فعلاً عيشتني احلى لحظات احس بروحي يمها سلطان زماني
كمت ما احب ارجع لبيتنا عند رانية
وبالمقابل رانية سهلت علية . هالشي
لان كانت مشغولة و ملتهية بحملها واهلها دائماً يمها
ومرت الايام
ورانية جابت ولد وسمته جلال وبعد فترة بدينا نوعاً ما نرجع لحياتنا الزوجية لكن مع الاسف مو مثل لهفة ايام قبل
رانية كانت كلش باردة وياي ما اعرف ليش
يمكن السبب لهفة سهير واستقبالها الحار الي خلتني اشوف رانية باردة
كدرت احافظ على سرية زواجي من سهير من غير ما رانية تعرف او تحس بأي شي لمدة ثلاث سنوات
ليش ما مرة من المرات سهير صارت حامل بالغلط
من عرفت بالحمل الخاطيء
اتخبلت وحركت الدنيا على سهير
شلون وليش ومنو سمحلج تحملين انا كم مرة مأكد عليج على موضوع الحمل
انا مو نبهت عليج تشلين من بالج سالفة الحمل
كانت تبجي وتتوسل بية حتى اسمحلها
لكن كان غضبي اعمى واقوى من ان اتعاطف وياها او
تكسرني دموعها
وحجيت وياها بغضب وطلبت منها
.. لازم تسوين اجهاض اني مالي دخل
شوفيلج صرفة اذا ملكيتي حل صدكيني اطلگج
ضيقت عليها الخناق وصعبت الموضوع عليها
وما كان من سهير الا ان راحت و سقطت الطفل
طبعا بعدعدة محاولات منها تتوسل حتى اسمحلها تحافظ عالحمل
بس انا تمسكت بقراري وما تراجعت عنه ابد
وبهاي الفترة صادف رانية ابوها توفى وهي كانت حيل متعلقة بي
وهم اخذتلها فترة انطوت على نفسها وحالتها النفسية تعبانه وهملتني وبعدتني عنها لأحضان سهير
بحيث صرت متعلق بسهير لدرجة صرت حتى ابات عندها واكول لرانية اني مسافر
وهم اتكررت غلطة الحمل وسهير حبلت من جديد وكانت
ببداية حملها عصبت عليها وهاي المرة صرت اقسى من المرة الي قبلها
لان هي سبق وغلطت وتعرف ردة فعلي ليش عاودتها
وطلبت منها تسقط الحمل مرة ثانية بس سهير هالمرة فاجئتني برفضها
واصرارها بالاحتفاظ بالجنين
لكن انا عاندت و خيرتها بيني وبين الحمل وبلحظتها صدمتني من فضلت الطفل علية وانا نتيجة رفضها الي تركتها ونبذتها من حياتي ضناً مني ان هي راح
تتراجع عن قرارها وتجهض الجنين مثل المرة الاولى وترجعلي من جديد
بوكتها حاولت تقنعني كالت
.. مؤيد اني كبرت واريد احس بالامومة حالي حال البنات ليش تستكثرها علية
ليش اني مو زوجتك
ليش تستكثر علية اكون عائلة تخصني ويصير عندي طفل منك
.. سهير انتي تعرفين قواعد هذا الزواج انا من البداية اكدت عليج واتفقت وياج ما اريد حمل بس انتي شكلج طغيتي ما ناوية تجيبيها البر
.. اني ما طلبت غير حقي بالامومة حالي حال اي بنيه
لكن مع الاسف انت ثبتت بهذا رفضك انت متحبني
انت متشوف بية غير قطعة جسد تفرغ بي حاجتك وتدور وجهك وتروح يعني اني بحياتك محطة مؤقتة ومع الاسف اني رخصت نفسي وحاربت مبادئي علمودك ورضيت اتزوجك بالسر علمود احبك
لكن انت قابلت موافقتي وتضحيتي بالاستهانة واسترخصتني
وسلبت مني كل حقوقي عليك كزوجة
روح اطلع من حياتي بعد ما يهمني
اني راح ابقى محتفظة بحملي مستحيل انزله
على الاقل هذا الطفل مضمون يصيرلي سند وراح يبادلني الحب
احسن منك انت ما اعرف بأي لحظة تتركني
بيومها عرفت سهير اتغيرت من هذا اليوم
وتعاملي وياها هو سبب انقلابها ضدي
اتذكر طلعت من الشقة وبعد ما التقيت بيها
مرت فترة وانا انشغلت بمكتب المقاولات وحولته
لشركة مقاولات والحمدلله
وبديت ارمم علاقتي وية رانية واخذتها وحاولت اسافر بيها للخارج حتى تغير من نفسيتها والحمدلله بدت ترجع رانية مثل قبل واكثر بس مع الاسف ماكدرت تنسيني سهير لكن عنادي وراسي اليابس بقيت مصر ما التقي بيها والباعني ابيعه فضلت علية طفل بعده ماجاي للدنيا
واختارته وتكولي احبك
ومر تقريباً ٨ اشهر وبيوم عيد رأس
كانت رانية مسوية حفلة بهاي المناسبة
وكان عمر جلال بوقتها ٣ سنوات وعازمة اقاربها واقاربي بالبيت وانا كأي اب لازم اكون متواجد وكوة ضغطت على روحي وتركت نص الشغل معلك حتى ارجع احتفل بعيد رأس السنة وية عائلتي واهلي
وليش ما شاءت الصدف وبهذا اليوم بالتحديد بأثناء ماكنا نحتفل
اجتي لبيتنا ام سهير تبجي وتتوسل حتى الحكها. لان سهير عندها ولادة متعسرة وراح يسولها عملية فتح بطن ولازم الزوج يجي يوقع وتحتاج المساعدة سمعت صوت شهكة وراي
و بهت لوني من التفتت وشفت رانية واكفة وراي وشكلها سمعت كل كلام ام سهير


يتبع.....


لامارا غير متواجد حالياً   رد مع اقتباس
قديم 08-09-19, 12:59 AM   #4

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

#الكاتبة_نهى_الحسون
#قضية_لم_الشمل
#البارت الثاني

مساء الانوار والخير والمحبة والتعاون عليكم احبتي
((يااااااااااااا بناتي ويا خواتي يااااا خالاتي. يااااا اخواني المتابعين بطلب من المتابعين اكثر من رسالة وصلتني عالخاص
يكولون ست نهى عفية الي قاري القصة قبل
لا يعلقون بأحداث القصة حتى لا يحرك عليهم الاحداث ))
اما انا عني ما راح يفرق عندي اذا تكلمتوا او لا
لان الكل يعرف انا عندما اسرد القصة سوف تكونون معي على ارض متحركة غير مستقرة ولا يسعكم
الا متابعة القراءة وكأنما تقرؤنها اول مرة
وشكراً



كان وجه رانيا مخطوف لونه وبساعتها عرفت ان هذا اليوم ما راح يعدي على خير
وساعتها انقلب عيد رأس السنة من اجواء احتفال وفرح الى اجواء نار وغضب وكابوس
ورانية انهارت وحرگت الدنيا ولمت
ملابسها وطلعت زعلانة واخذت وياها جلال
كانت هاي الليلة اسود ليلة بحياتي مصيبة ووكعت على راسي وبعد ما رانيا تركت البيت وطلعت زعلانة
رحت وية ام سهير الي تنتظرني حتى اروح وياها كانت خايفة على بنتها
وصلنا للمستشفى الي بيها سهير
ووقعت على مسؤليتي حتى يجرون عملية
ما انتظرت الى ان تخلص العملية وتولد راسا طلعت من المستشفى اريد الحك على رانيا عند اهلها حتى افهمها كلشي
بس مع الاسف طلعلي اخوها كان كلش معصب وكال ماعندك مرة يمنا وصار يغلط ويتجاوز
مجاوبته وكلت حقهم يعصبون لان هاي اخته والي سويته انا ما ينسكت عليه
كلت خلي اتركهم بلكي يهدؤن واعرف افهمهم وصرت اعض ايدي من الندم شلون طلعت الامور من ايدي من دون ما احسب حساب لهذا اليوم الي تعرف بي رانية
يوم ثاني الصبح كعدت من النوم على صوت النقال يرن وكان المتصل ام سهير تطلب مني الحضور للمستشفى حتى اوقع على بيان الولادة
رحت للمستشفى وامها كانت منتظرتني بالاستعلامات
راسا اخذتني لمكتب الموظفة
انطيتها بطاقتي الشخصية حتى تاخذ المعلومات منها وتملي بيان الولادة
واني كنت بحالة غريبة متوتر ومخبوص ما اعرف ليش كل هذا صار وياية
كل شي انقلب ضدي وانا ما متعود تصير الاشياء غصب عني
سحبت جيكارة من الباكيت اريد ادخن احس بروحي صدري عليه حجر
بس الموظفة طلبت مني اوقع على البيان اطلع ادخن خارج الغرفة
طلعت وتركت ام سهير عندها هي الي تكمل المعلومات الباقية
سمعتها سألت
.. شنو اسم المولود
جاوبتها ام سهير.. نور
كتبت الاسم
واني وكفت انتظرها برة على جهة واني عقلي مشتت
وكل شوية اباوع لساعتي بأستعجال اريد بس اخلص من الاجراءات حتى اروح اشوف رانيا بلكي هسة هدأت واكعد اتفاهم وياها خايف تسافر للموصل وتتركني لان اهلها رجعوا للموصل وحتى اخوها كان بوقتها يريد يرجع
بعدما خلصت الاجراءات وطلعت ام سهير من عند الموظفة وانطتني هويتي
طلعت فلوس من جيبي وحطيتهم بيد ام سهير
.. خالة خلي هذا المبلغ جوة ايدكم اخاف تحتاجون شي
وان شاء الله اني ابقى على تواصل وياكم
درت وجهي اريد اطلع
صاحتني ام سهير وكالت
.. متدخل تشوف سهير وتتحمدلها عالسلامة
هي بحاجتك البارحة طول الليل وهي تصيح بأسمك
كان من غير اللائق ارفض طلبها رحت دخلت على سهير كانت تعبانة ووجهها اصفر شاحب من اثر الولادة
كان يمها طفل صغير بالكماط
.. الحمدلله على سلامتج ومبروك ما اجاج
همست بضعف مصاحب للأمل
.. مؤيد انت اجيت كنت اعرف انت راح تجي
عفية كلي انت اجيت حتى تبقى وياي
امها طلعت وتركتنا لوحدنا
من سمعت كلامها حسيت بروحي نذل متحملت ابقى كرهت روحي ورطت بنات العالم وما وفيت لأي وحدة بيهن لاهن مرتاحات وياي ولا انا الي كدرت ارتاح وياهن
يعني ما اكدر اعيش لا وياهن ولا اكدر اعيش بدونهن
صدك معادلة صعبة شكلها هاي حوبة زهرة المسكينة
طالت حياتي
درت وجهي ما اريد اعشمها واخليها تبني امل
وجاوبتها
راح اتفق وية المحامي يرتبلج مصرف انتي والطفل
سهير بصوت مكسور
.. يعني شنو افهم من كلامك راح تتركنا
.. سهير انا من البداية فهمتج شنو شروطي
ولا تتوقعين ان ولادة الطفل راح يغير شي من قراري ويكدر ويرجعنا سوية لبعضنا اني احب رانيا وانتي تعرفين هالشي زين
باوعت عليها كعدت تجمع بقايا كبرياءها المكسور
.. انت من شنو مخلوق
شنو هالقساوة الي تملكها
صدمتي بيك خلتني اعض ايدي من الندم كل يوم
على كل لحظة ضيعتها من حياتي وياك طلعت انسان ما تستاهل حبي لك
قاطعت كلامها
.. ما الومج على كلامج انا هم متندم على الي سويته بيج وبرانية بس لتخافين انا صحيح ما ارجع وياج
بس بالمقابل ما راح اقصر وياكم انتي وابني راح اجريلكم مصرف شهري وعندج رقمي اذا تحتاجين اي شي تكدرين تتصلين
سكتت ومجاوبتني نظرات عيونها بيهم خذلان وكره وشي ثاني مجهول ما عرفته انتبهت على حركاتها
قربت الولد وضمته حيل لحضنها
وكأنما تخاف اخذه منها
.. ما اسمحلك تاخذه........
قاطعت كلامها حبيت اطمنها
.. لتخافين ما راح اخذه منج هو مو بنية حتى اخذها منج
انتبهت عليها تباوعلي بصدمة يمكن بينها وبين نفسها حست بعد ماكو كلام ينكال بخصوص هذا الموضوع
انتظرت دقيقتين
كان الصمت سيد الموقف والظاهر صار لازم اروح سلمت عليها وطلعت
ومن بعدها التهيت بمشاكلي انا و رانية
فاجئتني من رفعت علية دعوة طلاق وانا بكل عناد رفضت اطلكها بس هي بقت مصرة
حاولت اضغط عليها واستخدمت كل وسيلة متاحة حتى اثر عليها
اخير شي
جربت استخدم ابني جلال حتى اضغط عليها
اتصلت عليها وكلتلها
.. خلي ببالج اذا طلكتج جلال يبقى عندي وراح تخسرين كل حقوقج
خليت كل هاي الشروط حتى اجبرها ترجعلي
بس هي كانت اكثر عناد تركت جلال عندي
وبأول اسبوع جلال اتمرض وانا هواي اسافر ودائما اتركه عند الخدامة او عند والدتي
بس امي كانت مرة كبيرة بالعمر
و اختي اسيا كانت متزوجة بالكوت هناك مستقرة هي وعائلتها واخوي المرحوم ابو ريم كان ملتهي بدراسة الدكتوراه ،وصادف كان متزوج جديد
وانت يابو سيف بعد تعرف انا ماعندي بس اخ واحد
ومن رجعت من السفر وشفت جلال بحاجة امه وصحته انتكست وعرفت بلحظتها انا
ما اكدر اربي طفل صغير وانا لوحدي مستحيل ما اكدر اترك شغلي واكابله واكعد
وقررت اتنازل واتصل على رانية وكلتلها على وضع جلال كالت
.. عرفت بيك ما راح تدبرها لان انت مو كفو مسؤولية
بيت وعائلة
.. رجعيلي وخلينا نفتح صفحة جديدة وكلشي ينحل
بس كان جوابها الرفض والصد جنت متوقع هذا ردها بس كلت احاول يمكن تحن وتقبل ترجعلي
جاوبتني
.. مستحيل ارجعلك لو اعرف حياتي تعتمد على هذا الشي
وحاولت وياها من درب ثاني يمكن يفيد
.. شوفي راح انطيج جلال يبقى عندج بس خلي ببالج
النفقة راح تكون فقط لجلال
كنت متمسك بتهديدي هذا لحد اخر لحظة
على أمل ان اضغط عليها حتى تستسلم وترجعلي
لكن صدمتني بموافقتها
.. خلي فلوسك الك حتى نفقة جلال ما اريدها صدكني ما اريد اي شي يذكرني بيك حتى لو كان هذا الشي فلوسك
وعرفت بوقتها انا خسرت رانية للأبد
واتنازلت عن جميع حقوقها هي وابنها بس بالمقابل طالبتني ان اتنازل عن حضانة جلال واوقع على ورقة تسمحلها بالسفر مع جلال لخارج العراق بأي وقت يعجبها تحسباً للظروف
اتذكر سألتها
.. ليش هذا الطلب شنو انتي ناوية تاخذين جلال وتسافرين للخارج
جاوبتني وكالت
.. بالحقيقة ما مقررة السفر لكن اذا قررت السفر
مستقبلاً فما اريد
ابقى اركض وراك حتى تنطيني موافقتك على سفر جلال وياي صدكني اني اريد اقطع اي صلة تربطني بيك واريد افض كل شي وياك حتى ما يكون عندي سبب يخليني التقي بيك
وبيوم شفتها بالمحكمة. وانا وقعت على شروطها
وقبل لا تطلع من المحكمة وكفت كدامي وحجت بقوة
.. انت واحد مغرور وتافه وحرامات هدرت احلى سنين حياتي مع واحد ما يقدر ولا يستاهل
كان المفروض ما اوافق بيك من يوم الي سمحتلك نفسك ان تطلگ مرتك الاولى وهي حامل بطفل
انا بهتت من كلامها معقولة كانت تعرف واني الي قضيت سنين زواجي وياها حريص ميوصلها خبر
..اي لتستغرب اني عرفت بأبنك بس عرفت بي متأخر مع الاسف
.. شلون عرفتي
.. الموظف الي كان عندك بالمكتب قبل لتسوي الشركه
من كنت تدز بيده الفلوس للبصرة اجاني هنا وكالي كل شي
سألتها .. وشنو هذا الي عرفتي
.. عرفت بكل شي عنك وعن ابنك الي ما شفته حتى من رحت وقعت على بيان ولادته مكلفت خاطرك تروح تشوفه وتطمن عليه بس تدري شنو
اهنيها لزوجتك الاولى هي كانت احسن مني بهواية
لان طردتك من حياتها وكملت طريقها من جديد وورفضت تاخذ منك اي مساعدة
واني الغبية كنت اتوقع من صار عدنا جلال
راح نكون اني وهو اغلى شي بحياتك بس مع الاسف كان لازم اعرف الي يبيع مرة يگدر يبيع الف مرة والنتيجة انت ما وفيت وياية ولا وية الي قبلي
وهسة اني راح اطلع من حياتك وتحلم اخليك تشوف طيفي
انت فلست من زوجتك الاولى وابنك وهسة راح تفلس مني ومن ابنك
والله اليعلم المسكينه الثالثة الي ولدت ومحد يدري بحالها هي وابنها
ووين راح يصفى بيهم الوكت والحال وشلون راح تكدر تربي الطفل لوحدها وهي ماعدها احد
وهاي اولادك صفو كل واحد بمكان عايش وحيد وية امه ماله سند بالحياة
والبركة بيك لانك انسان اناني وما تعرف قيمة النعمة الي انت عايش بيها
على فكرة النعمة مو بس المال
النعمة ان تكون عندك عائلة تحبك ترجعلها يومية اخر النهار ترتاح ببيتك وهم موجودين حولك
صدگني راح يجيك اليوم الي ينكسر بي غرورك وتكعد تتحسر عليهم
تتندم على الايام الي فرطت بيها واولادك بعيدين عنك
وبيومها لزمت ايد جلال بيدها وراحوا
وهذا كان اخر لقاء بيني وبين رانية
اما سهير من يوم الي تركتها بالمستشفى وانا بعد ما شفتها لان انشغلت بقضية طلاقي اني ورانيا وفاتت فترة تقريباً شهرين على اخر مرة شفتها رحت للشقة حتى اتطمن عليها
دكيت الباب ماكو رد استخدمت المفاتيح الاحتياط
دخلت للشقة سفتها مهوسة وماكلها التراب كانت مبينة مهجورة من فترة
استغربت وضع الشقه والسؤال سهير والطفل وين
تركت الشقة واتجهت مباشرة. لبيتهم القديم الي جانت ساكنة بي هي وامها
قبل لا نتزوج
وكلما اروح ادك الباب محد يطلعلي البيت فارغ ومرة شافتني جيرانهم كالت
انتقلوا لغير بيت وهذا البيت استأجره ناس غيرهم
فكرت اني وين ابقى ادور عليها. بنص بغداد
وانا عندي كومة شغل
ومن هذا اليوم سهير وابني فص ملح وذاب وما عرفت عنها اي خبر بالرغم دورت عليها بس الحقيقه
مو بصورة جدية يعني عفت الموضوع لهذا الحد
كنت متأكد هي من وحدها راح ترجع لان هي حالتهم ضعيفه
اكيد راح تحتاج فلوس او مساعدة مني بس هي ما رجعت ولا طلبت شي ومن عندها انقطعت اخبارها
ابو سيف .. والله يا مؤيد امرك عجيب بشنو جنت تفكر من اتخذت هيج قرارات بحياتك
ابتسم وكمل كلامه
.. واني البطران كل هاي السنين وانا احسدك على راحة بالك واكول بس مؤيد بينا يفتهم ما اتزوج وورط روحه بعائلة وزوجة واطفال وقضى حياته كلها سفر ونسة هنياله حر نفسه
طلعت انت داهية وانا ما اعرف
يعني لو اكعد اراجع كلامك الف مرة حتى اقنع عقلي ان الي مسوي كل هذا
هو نفسه صديقي مؤيد عقلي مراح يقتنع لو بعد الف سنة
مؤيد .. كل انسان له جانب مظلم بحياته
.. زين كلي شعجب ليش ما تعرف اماكن تواجدهم
يعني معقولة. طول هاي السنين محاولت
ولو مرة ان تتواصل وية اي واحد بيهم
.. ابو سيف انا بعد الي صار صفيت كل املاكي وطلعت خارج العراق. يعني مصارت فرصة ان اتواصل وبنفس الوقت انا ما كلفت نفسي وحاولت اتواصل وياهم انا اعرف بروحي مقصر وياهم وجاي متأخر
.. زين على الاقل كان اتواصلت حتى لو بس وية جلال
.. اي نعم انا فقط تواصلت وية رانيا حتى اشوف جلال مثلما اتعودت اشوفه بين فترة وفترة عن طريق المحامي يتم اللقاء وية ابني وهذا كله يعتمد على وقت فراغي حسب ظروف شغلي
مرة من المرات اتصلت على اهل رانية حتى اتفق وياهم على يوم اجي اشوف جلال طلعلي اخوها وكال رانيا سافرت للخارج واخذت جلال
.. يعني شلون تسافر خارج العراق بدون ما تنطيك خبر على الاقل تبلغك عن موعد سفرها مو تتركك تعرف بالصدفة
.. كلتلك قبل شوية اني اتنازلت عن حق حضانة جلال وانطيت الصلاحية المطلقة لرانيا ولها حق التصرف واتخاذ القرار بحق جلال
تكدر تكول طلعتها كانت هاي طريقة انتقامها مني
و اعترف انا كلش بحق اولادي وكل شي يصير بية عقاب نتيجة اهمالي لهم
بس صدكني كان كل اعتقادي هم ما يحتاجوني
كنت اقنع نفسي ان حياتهم بدون وجودي يمهم احسن
خليهم يعيشون عند امهاتهم احرص عليهم من عندي
وبالمقابل صرت اكفر عن ذنوبي
ببنت اخوية اليتيمة
ابو سيف .. وانا اكول ليش علاقته ببنت اخوه ومتعلق بيها
اشوفك شلون تعاملها بدلال طلعت تشوف بيها البديل عن اولادك
.. ما اعرف ريم يمكن جتني نعمة من الله
صحيح كان خبر وفاة اخوية فاجعة بالنسبة لي
يعني تخيل في ليلة وضحاها جاني اتصال يكلولي البقية بحياتك اخوك الدكتور محمد توفى بحادث سيارة هو وزوجته
رجعت بسرعة للعراق امي منهارة ومرتفع ضغطها وكانت نايمة مستشفى
اختي اسيا واولادها بالبيت ووياهم ريم
وبعدما خلصت الفاتحة اتفاجئت امي تحملني مسؤلية تربية ورعاية بنت اخوية المرحوم
.. مؤيد بنت اخوك المرحوم امانة عندك صونها وديربالك عليها
وفعلا من يومها صارت جزء من حياتي
وسفرتها هي وامي وياية للخارج هناك شغلي وبيتي
وامي بقت تعتني بريم وانا بقيت مثل ما انا
شغل وسفر وعلاقات عابرة
بعد ما مريت بثلاث زواجات فاشلة
قررت مستحيل اربط نفسي بوحدة .. وصرت اعيش مثل الطير حر اي وقت يعجبني افرد جناحاتي واطير
.. زين شلون دبرت امورك وية بنت اخوك من توفت والدتك
.. كان عمر ريم ١٦ سنة من اتوفت امي الله يرحمها واحتاريت
شلون ابقيها لوحدها واحنا بالخارج
بس اختي اسيا عرضت علية هي تجي يمي بعد ما رجعنا للاردن وتبقى يم ريم
طبعا اني اعرف اختي ضاجت من حياتها برة وهي متعودة يكون عدها جيران وصديقات
بس دائما تحاول تحسسني ان هي تركت اولادها وجتي حتى تبقى يم ريم
هي فعلا نقذتني بقرارها بس بالمقابل اني نقذتها من حياة ممله وحدها هناك
انهى كلامه وكال
.. اخذنا الحديث ودخلنا بمواضيع ثانية
خلينا بالمهم انا دزيت عليك حتى اطلب منك ان تبحث عن مكان اولادي واتمنى من خلال هاي المعلومات البسيطه الي نطيتها لك ان تكدر تبحث عنهم
ابو سيف .. سهلة بسيطة هاي عوفها علية ان شاء الله ادور عليهم واعرف اماكن تواجدهم
.. بس لا تنسى اهم شي اريدك اذا عثرت عليهم تجمعلي عنهم معلومات طول هاي السنين شلون عاشوا وين سكنوا شنو مخلصين دراسات شنو شغلهم يعني بأختصار اريد اعرف عنهم كل صغيرة وكبيرة
.. صار تدلل هاي شغلتي وان شاء الله ربي يسهل
بعدها انتقل كلام عمو وية ابو سيف لأمور العمل
وانا تركتهم ورحت بعدني مصدومة وعقلي ما مستوعب الي سمعته قبل شوية
معقولة كانت حياة عمو مؤيد بهذا الشكل
كانت مشاعري غريبة بين المتفاجئة من الي سمعته وبين فرحانة ان عرفت عندي اولاد عم كان الفضول يلعب دوره بمشاعري اتمنى اشوفهم
ابتسمت واني مامصدكة يعني اني عندي اولاد عم مثل
صديقاتي من اسمعهم يحجون بأقاربهم كنت مرات حسدهم ان عندهم عائلة كبيرة عكسي كل عائلتي تتكون من عمو مؤيد وعمة اسيا اما الباقي فتربطنا بيهم قرابة بس من بعيد يعني علاقتنا مو قوية بيهم
في مكان اخر
مهيمن في عز الظهر والشمس الحارة فوك راسه
وهو يشتغل بهمة وية العمال يريد يشطب البيت
اجاه صوت صديقه
.. ها ابو الهمم بشر شنو شوكت تخلص
رفعت راسي وظللت عيوني بكف ايدي الخشنة المتقرحة من ورة خلطة الاسمنت اكلت ايدي
باوعت لصاحبي ورجعت اباوع للبيت كان فقط هيكل
.. والله ان شاء الله ما باقي شي واخلص
ابتسم صاحبي مستغرب
.. يا ما باقي شي بعد وراك حصبة وجدري
بعده البيت بحيله
.. بعد انت تعرف البير وغطاه انا ابني على كد فلوسي
واهم شي عندي اخلص اساسيات البيت من شبابيك وابواب وتأسيس البواري للماي
ان شاءالله من رب العالمين يرزقني اكمل نواقص البيت بالتدريج وعلى راحتي
.. وانت ليش هشكل مستعجل عليه
.. يا اخي مو طلعت روحي اريد بس استقر متشوف امي واختي بصفحة ببيت خالي وانا بصفحة هنا ابات تبهذلت
.. والله انت مشتري تعب الحال لروحك خوالك الله رازقهم متروح تطلب منهم
يداينونك دين مابيه شي كم فلس تمشي بيهم امورك
.. رحميم اكلك هاي شحال لوما انت متربي وياي وتعرف طبيعة الوالدة شنو
.. اي والله صدگت انا اشهد على عزة نفسها لأمك وتعففها. امك عجيبة ماكو مرة مثلها تتحمل هالعيشة
وتدوس على نفسها
والله ابوي دائماً يحجي بيها يكول كضت طول عمرها كله تداري بأيتامها
حاربت الحياة بأيدها وسنونها في سبيل تعيشهم ومتقصر وياهم وكبرتهم وهي تجاهد
.. اسكت لا تذكرنا بأيام الكفاح
وبسبب عزة نفس الوالدة وتعففها خلت خوالي
ياخذوني وياهم للشغل حتى اشتغل وياهم عامل
.. اي واتذكر من جنا نشتغل عندهم عمال انت ينطونك يوميتك اكثر من عدنا
ابتسم مهيمن وغمض عيونه .. هذا كله حتى ما يحسسون امي
ان هم جاي يتصدقون عليها
جنت صغير بوكتها ما افتهم شنو القضية تالي من كبرت واتعلمت وانتبهت لأمي ما يوم مدت ايدها لأحد وكالت انا محتاجة. كلما يسألونها عن حالها تجاوب
وهي مبتسمة الحمدلله بخير
لذلك من كبرت ووعيت عرفت هم بالاصل مامحتاجين عمال وانا مشغليني
زيادة خير لخاطر امي والشي الي ما ترضاه امي على نفسها وكضت طول عمرها مرفوعة الراس
انا همين ما ارضاها على نفسي وماي وجهي عزيز علية مستحيل اقبل احد يتصدق علينا
.. اي بس زين تسوي سحبت نفسك من خوالك وفتحتلك بسطية لوحدك على الاقل كدرت تطور نفسك وحلالك انت حر التصرف بي عكسي انا استمريت اشتغل عندهم عامل وبقيت لحد هذا يومك اشتغل عامل ما اكدر اتحرك لا منا ولا منا
.. الحمدلله هاي كلها بفضل الله وامي وعزة نفسها
.. اي والله صدكت وشكلك انت ورثت هاي الصفة وضيف فوكاهم الراس اليابس من امك
.. ورثتها وكلي فخر
رحيم مسح على بطنه
.. اكول ابو الشباب جاي اشم ريحة اكل شنو الظاهر
الوالدة دازتلك اكل
.. اي وخير ياطير انت شكو. لايكون ناوي تاكل وياي
.. ولك خاب انا سامع يكولون ابوك جان كلش كريم
وما يرد احد. جا انت عليمن طالع هيج يابس
.. اها شكلك لزمتني من ايدي التوجعني وعرفت شلون
تكسر خاطري لزمتني بكرم المرحوم ابوية
خلاص تعال اتفضل اكل وياي
اشرتله على علاكة موجودة بالكاع يم السياج جان بيها حافظة اكل
.. روح اكل منها واقرة الفاتحة لابوي
راح وفتح الحافظة وفر ايده وكال
هسة الي يسمعك يكول عازمني على مفطح وانت شنو مبقي بالحافظة طاير ثلثين الاكل
.. اكول اكل وانت ساكت لا تخليني اخذه منك وانطيه
لصلبوخ واخليه ياكله شكله جوعان
جنت احجي واباوع على واحد من العمال ضخم
من اولاد منطقتنا يشتغل عمالة بالبيت
هذا شنو ننطيه ياكل وابد ما يكول شبعت
كعد ياكل ويثني على طبخ امي فعلاً امي نفسها بالطبخ
ماكو منه وكلمن اكل منه يشهد عليه وخوالي كلما تصير عندهم مناسبة عرس لو يردون يعزمون الشيوخ يدزون على امي هي تطبخ للعزيمة
لان مضروب بيها المثل
دك نقالي وجاوبت بأمل جنت موصي على شغلة وبلكي الله وتصير
.. هلا والله بالحجي ابو حيدر شلونك بشرني
ابتسمت بفرح
.. الف الحمدلله كول والله يعني وافق يبيع
والله حجي هذا جميلك دين بركبتي ما انسالك اياه طول عمري
ان شاء الله بأقرب فرصة اجيب فلوسي ونتكاتب
سلمت عليه وانهيت الاتصال وانا احس برحمة الله الواسعة شكل دعاء الوالدة مستجاب
يمكن طيبة امي وكرم ابوي الله يرحمه
بسببهم الله يرسل بطريقي اولاد الحلال يقضون حاجتي
عبد الرحمن .. ها بشر شنو الاخبار
التفتت عليه .. الف الحمدلله حصلت المحل قبلوا يبيعونه اااخ صدك لو كالوا ينسد باب بوجهك وينفتح الف باب رحمة ربك هاي
البارحة انا جانت ضايكة الدنيا بعيني لان شرطة التجاوزات فلشوا بسطيتي البارحة احس اندليت مكان گلبي من طشروا الغراض بالكاع
..الله يساعدك والله من يمي متت قهر عليك اباوعلك البارحة شطت للزرگة من وراهم
.. الحمدلله على كل حال ربك ياخذ منك شي وينطيك شي احسن وافضل للبشر
رن نقاله مرة الثانية
وكان المتصل امه
مهيمن .. هلة بالغالية
.. اي وصلني الاكل وعاشت ايدج ربي ما يحرمني من
طيبة گلبج ابشرج يمة صار المحل من نصيبنا
اسمع فرحة امي ودعواتها من الطرف
الثاني واضحك
.. تمام تردين اجيبلج وياي كونية طحين من ارجع صار تدللين بعد ما تأمرين على شي
وانا راجع
سكت لحظات يسمع لكلام امه وجاوبها
.. انا كلتلج يمة مستحيل اجي ابات ببيت خالي وبنات خالي يتقيدن بوجودي خليني انام هنا ببيتنا وماخذ راحتي وان شاء الله هانت ما بقى شي واخلص البيت وتنتقلون انتي وحوراء هنا يعني من هسة اكلج جهزي امورج احتمال هاليومين ننتقل بالبيت
يالله يالغالية انا لازم اروح ارجع للسوك لان تركت البسطية يم صاحبي واجيت لهنا حتى احاسب العمال واشوف الشغل شلون ماشي
يالله مع السلامة
نهيت الاتصال وية امي وانا ابتسم
التفتت لرحيم
.. يالله خوي انا رايح عينك عليهم الله يرضى عليك
خطية جبت رحيم وياي حتى يلحم الباب مالت المطبخ عنده مكينة لحيم ويعرف يلحم
.. روح اتوكل هاي انا جبت المكينة وياي وراح ابلش هسة
نفضت ملابسي وايدية من تراب البناء واتوجهت على دراجتي
وصلت للسوك متوجه للبسطية مالتي ولكيت ناس متجمعة سمعتهم يصيحون لزموه هذا حرامي
اخذني الفضول اشوف شكو شنو الصاير اتعودت على هذا المنظر بالسوك كل يوم نلزم حرامي من المتجولين
الي يبوك نقالات من الناس والي يسرق
غراض من المحلات والي يطك جيب واحد غافل
ويبوكه والي يبوك جنط النسوان وغيرها من الامور
الي نشوفها بالسوك
رحت اقتربت
بفضول اباوع اريد اعرف عليمن يصيحون حرامي
رحت بأتجاه الناس المتجمعة وشفت الرجال ابو سجاد لازم ولد صغير من اذنه املح اسمه لؤي بعمر ال٨سنوات
ابو سجاد .. ولك انت شنو سالفتك مااتوب
كم مرة الزمك تبوك من الدكان
باوعت على لؤي وانكسر خاطري عليه فرقت الناس المتجمعة من كدامي
رحت يمهم وسحبت الولد الصغير من ايده
لؤي .. والله عمي جوعان واريد اكل وعندي امي وخواتي ينتظروني اجيبلهم اكل والله خبزة ماعندنا بالبيت
جريت الولد وخليته وراية
مهيمن .. عمي لخاطري بس هالمرة سامحه والمرة الثانية اذا عادها و مد ايده وسرق انا بيدي اغسله الك
غسلة معدلة كون اكسر ايده اخلي يتوب يعتب برجليه بالسوك
.. شوف ولك هاي لخاطر مهيمن
راح اسامحك هلمرة
بس والله اذا اشوفك يم الدكان احرك الخلفوك
لزمت ايديه الصغيرة وسحبته وراي ورجعت بي لبسطيتي وكعدت بمكاني يم البسطية وكعدته كدامي على صندوق خشب قديم باوعت عليه وخزرته
.. انت وتاليتها وياك مو وعدتني ماراح تمد ايدك للحرام
لؤي-عمي والله دورت على شغل واتوسلت الهم ياهو الي اروحله اطلب منه يشغلني يگول امشي مانشغل زعاطيط والله طكتني الجوعة و اتوسلت بأبو سجاد
ينطيني ربع اشتري خبزة اسد جوعتي بس هو ماكو يسوي روحه ما يسمعني
باوع علية بعيونه الصغار
بقيت اباوع عليه وهو مستمر يحجي ويعددلي الاماكن الي قصدها حتى يشتغل صحيح هو كان صغير بالعمر لكن انتبهت عليه كان كلامه موزون عبالك ولد بعمر ال١٦ طبعاً الي يعيش ويتربى بالسوك يكبر اكبر من عمره كمل كلامه وانا اسمعه
.. عمي تدري شنو اتمنى
جريت حسره .. كول شنو تتمنى
.. اتمنى عندي فلوس اشتري بيها عربانة الله لو عندي عربانة جان ما احتاج احد اصير ملك زماني اشتغل بيها
واحمل بيها والله اشوف هواي ناس يحتاجون احد يحملهم غراض بالعربانة
ما اعرف اضحك على كلامه مدري انقهر
يعني ولد بعمره المفروض يحلم يحصل على لعبة
او يحلم يكمل دراسته مو يحلم يحصل عربانة
لزمت من كتفه
.. لايابة شتدفع وين بيك حيل تدفع عربانة
كلك على بعضك عمرك يجي ٨سنوات
غمضت عيوني بقلة حيلة حسيت بالمسؤولية أتجاه هذا الولد
احس صار من واجبي انتشله من الضياع
اي لأن السوك يخوف بي الزين وبي الشين وهذا اذا بقى هشكل راح يلتم على شلة عصابة تتبناه وتاليها يضيع ويروح بالرجلين
.. شوف لؤي تعال اشتغل عندي صبي تساعدني بالبسطية والك يومية هالمقسوم
واذا الله رزقني ووسعها علية ازيدلك اليومية
شفته طار من الفرح وكام وباسني من راسي
.. ربي يحفظك الي عمي ما كذب السانه من سماك ابو الهمم
ابتسمت على كلامه
خطية هالولد ذاك اليوم ابوه توفى بالانفجار
وماعندهم معيل الله يساعدهم
رجعت لشغلي وكعدت ارتب علب الحليب وعدلت البسطية وصرت ابيع لكم واحد من المشترية
ومثل كل يوم من اريد اعزل اسحب شوالات المواد الغذائية من حبوب وغيرها وياي واحملهن واضمها عند محل قريب علية
هم يبيعون حلويات بس الله يرضى عليهم سهلوا علية امري
خلوني اخزن السلعة يمهم بالتعزيلة
اي صدك اتذكرت امي وصتني كيس طحين بس راح اخذلهة كم كيلو خطية الوالدة عبالها عندي
سيارة بيك اب هي كلها على بعضها خلك دراجة
وفي نفس الوقت لكن في مكان اخر تحديداً في الموصل
جلال
اخ يابة انكسر ظهري
سلوان-ها خلصت تصليح السيارة لو بعدك
مسحت ايدية من زيت السيارات الاسود وباوعت عليه
.. شتشوف
.. اشوف واحد مدهن ويصلح سيارة
دفضها خلصت لو بعدك
.. تقريبا خلصت ما بقى شي ليش تسأل
التفتت واشر بنظراته لباب الورشة كانت وحدة واكفة بباب الورشة يم سيارتها
بس شفتها عرفتها گلبت عيوني بقلة صبر
واجيت احجي وية سلون حتى يصرفها لان هاي صارت تجي للورشة بحجة تصلح سيارتها
علمود تحجي وياي واعرف شنو تريد مني بالضبط بس انا اغلس عليها هي متشوف روحها مرة جبيرة
وبهاي الاثناء لفتتني حركة عصام ابن صاحب الورشة شلون اتحارش بيها
اتوجهت عليه وبعدته عنها
.. خير عصام سالمين خوماكو شي وين كاعدين
عصام .. شكو منو يمك
_ خلي عندك غيرة
دفعته من صدره
وهي رجعت للخلف وحجاية مني وحجاية منه
وشكله راد يراويها قوة عضلاته ويسترد كرامته
انطاني لطمة على عيني حسيت بيها انطفت
وبعدها صرنا انا وياه نتلاوة
وجان يجون الشباب وفرقونا عن بعضنا اسمعه كعد يهدد بية
ويكلي انت من اليوم مطرود من الورشة شوفلك غير ورشة تشغلك عندهم
.. خاب دكوم انت وشغلك عمي العيشة كافلها الله
وسلوان كام يدفع بية وطلعني من الورشة
جنت حيل معصب ومقهور بنفس الوقت
اتلمست فكي جان يوجعني
.. اااخ يابة الله يلعن بليسه شنو مو ايد حشى حديد
.. تستاهل يا اخي اكو واحد يسوي سوايتك
-. اي ما شفته شلون يتحرش بيها گدامنا
.. وانت شكو خال ولد عم بنية حتى تتدخل
.. وربي ماتحملت من شفته كعد يتحارش بيها وهو عباله نشوف ونسكت و ما نحجي
والله لان ابوه يصير ابو خبزتنا لازم نشوف وصخه ونغلس ونسكت عمي خلي يطير العيشة كافلها الله
.. لك جلال هاي ثاني مرة تنطرد من شغلك وانت شوفت عينك احنا بالگوة ندبر الشغل
.. اسكت ذكرتني بخالي شلون راح ارجع للبيت
وما بيدي اليومية مالتي والله يعرس علية
.. خرب بالحظ هو فوك ما الدنيا سودة
خالك جاي يكملها عليك بس شتسوي اتحمل نحاسة خالك احسن ما تنشمر بالشارع
دنكت راسي بحسرة واتذكرت حلاوة ايامي الماضية
.. تدري سلوان من اتزوجت امي وسافرت للخارج وية رجلها وتركتني عند جدتي لليوم ما شفت طعم الراحة جنت اتمنى الكة حنان امي عند خالي وعائلته بس من وين يجي الحنان وهو خالي مخلف فيلق كامل حشة مو عائلة معسكر
تدري من اشوفهم اتذكر فلم (افواه وارانب)
بيتهم كله جهال دگ دگ وين ماتروح تدوس على جاهل الله يخفظها زوجة خالي كل خميس وجمعة مخلفة واحد
خالي سايق تريلة (سيارة حمل بضائع ) وكوة مدبر الخبزة وهو مبقيني وياه بالبيت مو لسواد عيوني لا وانما علمود اساعده بالمصرف هم الله يساعده يالله يلحگ
كلما اتعارك وياه يعيرني بأبوي ويكلي ذبك علينا وسافر اتذكر اكثر من مرة حاولت ادور عن الرجال الي يسمونه ابوي بس كل مرة ادور بيها عليه يكلولي نفس الكلام مؤيد صفة املاكه وسافر للخارج حاولت اتواصل وياه اتمنيت اوكع على رقمه ما اريد شي منه غير بس اسأله
ليش خلفني وجابني للدنيا اذا هو مو حمل مسؤولية واولاد
قطع علية تفكيري كلام
سلوان ..لاتكعد تصفن روح اعتذر من الاسطى
خليه يرجعك للشغل بالورشة
جلال عامل يشتغل بورشة تصليح وتشحيم الالات واعادة تدوير المكاين الخاصة بالمعامل ومكائن السيارات
جلال بكبرياء .. وعنه لا شغلني ناره تاكل حطبه
شنو سلوان نسيت ترة انا جلال والف ورشة تتمنى اشتغل وياهم
.. اي اعرف بس مو كل الورش يخلوك تشتغل براحتك شنو نسيت المكينة والجهاز الجديد الي كاعد تشتغل عليهم لاتنسى ترة الاسطى توفيق هو الممول الوحيد لهذا شغلج لوما هو وافق يتحمل تكلفة المواد الي تطلبها منه جان ما تكدر تسوي او تبتكر اي الية من هذني الي سويتهن
صفنت بكلام سلوان كان كله صحيح انا بحاجة الاسطى
توفيق فعلاً لوما دعمه وورشته انا مستحيل اكدر اتحمل مبالغ الاجهزة
.. حرامات ما بقى شي وتخلص المكينة ليش تخرب شغلك الي تعبت عليه
مسحت وجهي بثنبن ايدية وانا افكر اختار كرامتي لو
حلمي منو بيهم اعز علية
جنا كاعدين برة الورشة انا وسلوان وجان اسمع صوت مرية تصيح بأسمي التفتت ولكيتها نفسها
صاحبة السيارة
.. استغفر الله اللهم صبرج ياروح
بالله هاي شحجي وياها ابتليت على عمري
بيوم صلحت سيارتها ووصلتها لبيتها
هاي ما ناوية تجيبها لبر ادري متشوف نفسها بكد امي
متستحي على روحها كاعدة تمثل دور الصبايا
.. كله منك انت صوجك منو گلك صير شهم وصاحب نخوة وية النسوان
ترة يفهمونها غلط بس انت ماكو ولا على بالك
ريم
مرت الايام اني اراقب عمو مؤيد من يوم عرفت
بأسرار عمو واني الفضول ذابحني اتمنى اصارحه واكله اني عرفت بكلشي وشنو السبب ما يكول عنهم
بس بنفس الوقت وبأثناء مراقبتي لعمو انتبهت عليه دياخذ علاج ويوم عن يوم وجهه يذبل اني نقطة ضعفي بالحياة هي عمو مؤيد.
اقتربت منه وسألته
.. عمو انت هواي دتاخذ علاج هذا الدوة مال شنو
انت مريض واني ما اعرف
جاوبني .. اي عمو عندي ضغط ولازم اخذ علاج
دك نقاله وكان المتصل عمو ابو سيف
باوع للنقال ورجع باوع علية
وكال حتى يصرفني
.. عمو ريم روحي جيبيلي كلاص ماي
عرفت المكالمة مهمة
اتوجهت للباب وهو
رد عالمتصل
بس رحت ركض جبت كلاص ماي من الثلاجة ووكفت يم الباب حتى الحك اسمع شنو يحجي
جنت الهث من السرعة
سمعته يكول
.. لا تشيل هم صفيت املاكي الي بالخارج كلهم ورجعت لهنا عفية ابو سيف استعجل ترة احس بروحي بعد ماظل عندي وكت بهالدنيا والمرض جاي ياكل بية اكل صارت ايامي معدودة
وهاي الكلمات الي كالها عمو عن مرضه هزت عالمي
وحسيت الكاع اهتزت من جواي مدري رجلية رجفت من اثر الخبر
وكع اكلاص الماي من ايدي وشهكت مرعوبة اريد استوعب الصدمة
.. لا مستحيل

ولكم مني اجمل تحية اتمنى لكم قراءة ممتعة
اختكم نهى الحسون
احبكم كومة احبكم. هوااااااااي

يتبع....


لامارا غير متواجد حالياً   رد مع اقتباس
قديم 08-09-19, 01:05 AM   #5

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

مساءاً محملاً بالخير والسعادة والتفائل
عليكم يا احبتي
شكراً لتعاونكم وتفاهمكم وتفاعلكم


#قضية_لم_الشمل
#البارت_الثالث
#الكاتبة_نهى_الحسون


صدمة وخوف وحيرة والم
شعور واحد اسوء من اللاخ
شهكت وكع الكلاص من بين ايدية وانكسر ولفت انتباه عمو
و اول مشاف شكلي كام من مكانه متفاجيء بوجودي وبشكلي
قطع كلامه وية ابو سيف وگال
.. لحظة ابو سيف شوية وارجع اتصل عليك خلي اشوف هاي المصيبة منين طلعتلي
انهى اتصاله وباوع علية
ومكدرت ابقى بمكاني رحت عليه
ودموعي غزت عيوني
هزيت راسي بعدم تصديق صرت احاجي نفسي بخوف لا مستحيل ما اصدك عمو مؤيد مريض بالسرطان
.. ريم!!! شكو شبيج
حجيت بصوت يرجف
.. عمو اني سمعت كولشي عفية عمو كولي الي سمعته
كذب وان انت ما بيك شي گلي انت مو مريض
غمض عيونه بعجز مكدر ينكر ولا يكدر يكول اي شي
يهون علية الخبر
رحت ركضت لحضنه مثل الطفلة خايفة على ابوها يروح منها بأي لحظة
خايفه ارجع احس باليتم مرة ثانية
احس كل عالمي انهار في ليلة وضحاها انگلب
صرت ابجي بين ايديه رفعت راسي اباوع لوجهه الشاحب
.. عفية عمو احجي كولي هذا حلم
لزم وجهي بين كفوف ايديه وكال بصوت واهن تعبان
.. عمو ريم هذا قضاء الله وقدره
ما اريد اشوفج تبجين
ترة صدگي دموعج تصعب علية الامور اريدج تصيرين قوية وتساعديني
.. عمو شلون تريد مني اصير قوية ومصدر قوتي
ديصارع الموت واني ما عندي علم
مسح على راسي وكعد يطمني
.. عمو ريم كولي يالله ترة
هذا انا بعدني واكف كدامج بس انتي ادعيلي
وان شاء الله بأقرب فرصة اكمل اموري والاجراءات
واسافر للعلاج وان شاء الله ارجع مثل قبل واحسن
حجيت بتوسل .. عمو تاخذني وياك وين ما تروح
ما تتركني لوحدي. اني بدونك اضيع عفية لا تفكر تتركني يم عمة اسيا صدگني امو.......
حط ايده على حلكي وقطع كلامي
.. اششششش كافي مو وكته هذا الحجي
مسحي دموعج
.. عفية عمو اوعدني تاخذني وياك
جنت احجي وارجف احس انقلبت الادوار وصار عمو هو الي يهدي خوفي بدال ما اني اكعد اواسيه
بس غصب عني دموعي تنزل صرت انعي عمو وهو عايش حسيت عليه لمني لحضنه يطمني وكام يمسح على ظهري بكف ايده
مسحت دموعي وسألته
.. عمو سؤال
.. كولي شنو سؤال
.. انت ليش ما بلغتني بموضوع مرضك
اصلا انت ليش تضم عني اسرارك
.. سالفة مرضي مو شي مفرح واكعد ابشرج بي ما اكدر اشوف دموعج واكسر گلبج مثل هسة
حجيت من بين دموعي
.. زين واسرارك البقية ليش ضامهم عني هم تريد تحميني شنو عذرك
.. عن اي اسرار تحجين
.. عمو اني كبرت يعني الكدامك عمرها ١٩ سنة مو صغير واعرف الحياة شلون ماشية
في غض النظر بعض الاحيان اتصرف تصرفات طايشة وهذا نابع من حماس اللحظة
مو ناتج عن طفولة او عدم فهم تكدر تكول مغامرة
انا اعرف حدودي وشنو الي وشنو العلية انتظرتك انت تجي وتصارحني بموضوع عائلتك بس شكلك
ناوي تتركني للايام حتى تصدمني باسرارك مثلما انصدمت بذاك اليوم من سمعتك تحجي وية عمو ابو سيف عن زوجاتك واولادك الثلاثة
باوعت لعمو بهت لونه وانسحب منه الكلام
شكلي فاجئته ما كان متوقع اني اعرف
شكله ما عنده كلام يحجي وجهه صار ينطي الوان
خجل على تردد ارتبك
.. اكيد بعد الي عرفتي عن عمج اكيد صورتي اهتزت بنظرج
.. ما انكر اني اتفاجئت بالي عرفته عنك
بس صدكني ما اثر على مكانتك بگلبي ولا نقص مقدارك راح تبقى انت اعز واغلى انسان بحياتي بس اتمنيت انت تعرفني على عائلتك واولادك
ابتسم بوهن .. هو بالاول خلي الكاهم وقتها اخليج تتعرفين عليهم واحد واحد
.. زين وعمة اسيا تعرف بهذا كله مرضك واولادك وزوجاتك
.. اي عمتج اسيا تعرف بموضوع مرضي وزوجاتي
.. ليش كل هذا التأخير
.. جنت حاب اتحرك بالموضوع خطوة خطوة. بالاول اريد الكاهم وبعدين لازم امهدلهم وجودي بحياتهم اروح اشوفهم واقابلهم واطلب منهم الغفران
اعرف بحلمي حلم عاقر ما منه رجى
بس عسى ولعل ربي يحنن گلوبهم ولو بالشيء القليل
اباوع لوجه عمو نظرة الامل تغزوها
.. ان شاء الله راح يجي اليوم الي تلتقي بيهم وتنتهي الامور مثلما تتمنى
لان انت تبقى ابوهم
صرت اطمنه وارفع معنويات عمو بهذا الكلام لان لاحظ عليه بدة يتأمل خير وبدة وجهه يسترد لونه يرتاح
.....
جلال
ببيت خالي واولاد وبنات خالي الصغار داير ما دايري
فرحانين بعلاليك المسواك خطية كوم لحم عددهم ٧ اكبر واحد بيهم عمره ١٤ سنة واصغر واحد بيهم سنة ونص
دانة تعزل بالمسواك وظفايرها مكوشة جانت بعمر ١١ سنة
.. الله جلال عاشت ايدك انا احب الفواكه
جاوبتها وانا شايل ابن خالي الصغير حنوش
وابوس بخدوده
.. الف عافية عليكم اكلوا وادعولي ربي يرزقني
واشتري لكل واحد بيكم لبسة للعيد
اسراء .. ربي يرزقك وتفرحنا
عفية جلال انا اريد لعابة باربي يصير عندها شعر طويل
مصطفى اكبر واحد بأولاد خالي جان يدخل بعلاليك المسواك حطهم بالكاع
واجة وكف يمي
.. جلال عفية اخذني وياك اشتغل بالصناعية
حتى لو امسح جام السيارات
.. بعدك صغير لاحك على التعب خلص مدرستك واخذ شهادتك واني اسعى بيدي ورجلية حتى تتعين
لو اعرف احفرلك بالصخر لازم ادبرلك وظيفة
ام مصطفى زوجة خالي جانت تعزل بالمسواك هي والبنات
.. خالة جلال ربي ما يحرمنا من كرمك وويوسع رزقك ويباركلك بي
بس خالة ميصير كلما تستلم راتبك تصرفه علينا
هم بقيلك كم فلس لتفسك للايام السودة
اباوع عليهم
سبحان الله عائلة خالي عكس خالي
تصرفاتهم وطيبتهم هي الي مخليتني مستمر وياهم
عايش والا لو بقى الموضوع على خالي
جان انا من زمان تركت البيت وطلعت
دخل خالي علينا وهو معصب
.. واخيراً شرف استاذ جلال همزين شفنا ابن الخايبة
.. خال ماله داعي هالكلام الخشن
.. اكول انت شلون ترجع جماعتي
.. ها كلولك
.. شلون تفشلني كدامهم ادزهم عليك للورشة حتى تصلحلهم سياراتهم تكللهم ما اصلح حتى لو جايين من طرف خالي
.. اي اكيد ما اصلحلهم
.. لا تصلحلهم غصباً على الي خلفوك سامع
جاوبته بعناد بصوت عالي
.. لا ما اصلحلهم هي مو بالكوة ترة الورشة مو مالت الي خلفوني واكعد اصلحلهم ببلاش وجماعتك ما يدفعون فلوس يجون يصلحون ويدورون وجهم ويرحون والتكاليف كلها براسي والاسطى توفيق يكعد يخصمها من يوميتي تقبلها انت
.. شدعوة عاد هي شلون يومية الي يسمعك يكول يشتغل
بالذهب هو كلك خلك صبي يشتغل بورشة سيارات عطلانة
بس انت مو وجه نعمة كم مرة اكلك
عوف الي بيدك وتعال اشتغل وية صاحبي ناجي
يحصل خير من الله
ابتسمت.. خال ترة صاحبك ناجي يريد يشغلني بملهى الم الفلوس من جوة الراقصات
انت شلون ترضاها علية
.. اي وشكو بيها الشغل مو عيب
هسة هذا شحجي وياه
.. يعني احلفك بالله انت تقبلها رجال طول بعرض تالي عمري اشتغل هاي الشغلة
حتى ماي بوجهي ما يبقى
بعدين اذا انت هيج عاجبك الشغل متروح انت
تشتغل بمكاني بدال ماكاعد بس تتأمر
زمخ بية ولطمني براشدي على خدي سمعت شهكت مرت خالي وبناتها
وحنوش صار يبجي
وخالي كام يتوعدلي بقيت واكف كدامه راص على اسناني
كوة اتمالكت اعصابي ما اهد عليه واردله الراشدي اضعاف ما اكدر اهينه كدام عائلته صعبة
.. لك جلال والله ثم والله اعيد تربيتك من اول وجديد مو تشوفني ساكت عليك عبالك ما اكدرلك
وتكعد تتجاوز حدودك وياي شوف واسمعني زين واتذكرني عدل
ترة انا بعدني بحيلي ومن احطك براسي ظلوعك اخسفهم جوة صدرك مثل ماجنت اسوي بيك قبل شنو نسيت
لاتشوف نفسك كبرت واشتغلت وطلعلك السان
صدكني ادوسك جوة رجي مثل الحشرة
انطى المقسوم وطلع برة البيت وهو معصب نعرف كلش زين
بعدين تالي الليل يرجعلنا سكران مفول
احس النار صعدت لراسي من القهر
طلعت من البيت ورحت كعدت برة بالشارع يم باب البيت
طلعتلي جيكارة من الباكيت وكعدت ادخن اريد ابرد نار صدري بنار تكوي
صرت اطفي النار بالنار
دك نقالي وجان المتصل سلوان
رديت
.. الو هلا سلوان.
اي تعال انا بالبيت موجود كاعد بالباب
جيب وياك كلاصين جاي
بيت اهل سلوان بنفس المنطقة مال بيت خالي
جانت منطقة شعبية بسيطة
انفتح باب بيت خالي وطلعت اسراء وبيدها لفة
اقتربت مني ومدت اللفة الي
وكالت .. جلال هاي امي سوتها الك وتكول خلي يتعشى
.. رجعيها ما اشتهي اكل
اسراء بصوت ناعم طفولي .. عفية جلال لاتزعل من بابا الله يخليك لا تتركنا
احنا نحبك اذا انت تروح الدنيا تصير مو حلوة
غمضت عيوني بصبر استغفر الله يا الله
مديت ايدي واخذت اللفة منها
باوعت عليها شلون تعتذر مني عن تصرف ابوها غير الحياة متنافضة
.. هو اني عليمن متحمل خالي واستهتاره وياية غير هذا كله علمودكم
انتوا نقطة ضعفي وسبب كعدتي بهذا البيت
.. الله يخليك النا وما يحرمنا من حنانك
ابتسمت بوجهها حتى اطمنها وصرت اكل باللفة انتبهت لروحي حيل جوعان
دخلت جوة للبيت واجة سلوان وكعد يمي بالباب متعودين كل يوم بيهيج وكت احنا نكعد لو يم باب بيتنا لو يم باب بيتهم نتسامر ونسولف ومرات نكعد نلعب طاولي
سلوان.. اكول جلال صدك قبل لا انسى اتصل علية
الاسطى توفيق وكال باجر انت وجلال ومثنى اريدكم تجوني من الفجر ضروري
.. ما عرفته شيريد من عدنا
.. يكول راح ارسلكم للقاعدة العسكرية مالت الجيش علمود تصلحون سياراتهم العسكرية عندهم عطلات وكال الكم يومية ثلاث اضعاف
.. اي هذا الشغل المعدل
.. فگال جهزوا نفسكم حتى تتوكلون على الله من الصبح
.. صار اني عني ما عندي شي بس انطي خبر لبيت خالي خاف اتأخر عليهم
......
مهيمن
بصوت عالي
.. على كيفك وية الغراض لا تكسرهم من تنزلهم
ام مهيمن .. يمة مهيمن كافي على كيفك وية العمال كضيتها علينا بس صياح هسة شنو افتهمنا
.. يمة ما جاي تشوفيهم شلون يدوسون بالمصارين ببرودهم
احجي وية امي وادخل لااغراض احطهم بالطارمه
باوعت لحوراء اختي طلعت حتى تسحب الكاونتر لداخل البيت
جان باب الشارع مفتوح وهي جانت لابسة بس شال ودشداشة مال بيت
عطت بيها .. حوراااااااء فوتي جوة منا عمال
خطية هي كمزت من مكانها وركضت دخلت جوة للبيت
باوعت لامي .. يمة رحمة على موتاج لتخلين البنات يطلعون برة
خلي يخلصون العمال نقل الغراض
وسدوا الباب وكعدوا رتبوا البيت على راحتكم
امي جايبة وياها فيلق كامل من بنات خالي حتى يساعدونها هي وحوراء
لان اليوم انتقلنا للبيت الجديد
كملت نقل اغراض البيت والحمدلله كانت الاغراض قليلة مو اهواي
حاسبت العمال بالباب وصحت لأمي
.. ام مهيمن تعاي
اجتي امي ووكفت يمي تعدل بحجابها
.. ها يمة امر
.. ما يأمر عليج ظالم يمة انا خلصت نقل الاغراض
وهسة انتي والبنات سدوا الباب عليكم وشوفوا شغلكم
بس رحمة على والديج وصيهن صوتهن لا يطلع برة يمنا جوارين قريبين
ادري بيهن من يلتمن يظل صوتهن يلعلع مثل الدجاجة من تبيض
ينسون نفسهن بالسوالف
اتوجهت للدراجة يالله انا رايح للسوك. اذا تحتاجين شي اتصلي علية
.. روح يمة اتوكل على الله ربي يفتحها بوجهك
شغلت الدراجة ورحت وبالشارع والساعة صادف وقت طلعة موظفين وطلاب مدارس وصايرة لخة وازدحام
والحمدلله انا دراجة واكدر اراوغ بيها بين السيارات
واقود الدراجة وببالي حسبة المحل يحتاج راس مال
حتى اكدر اشتري بضاعة ومحتار شلون ادبر
الفلوس فكرت بخوالي بس شوية استصعبتها
اتداين منهم وهمة مصارلهم هواي من انطوا حصة امي من الورث
مصارلهم شهرين
صعبة هسة اجيهم واطلب منهم يداينوني
غركان بالتفكير وبنص الازدحام وجان تجيني ردمة قوية من خلف الدراجة
وما احس الا وانا والدراجة انگلبنا اتگلب بالگاع وما اشوف نفسي الا وانا جوة سيارة عالية هي لحظات مو اكثر بس من الهبطة والمفاجئة ما اعرف شصار بية اسمع اصوات هورنات السيارة
والناس تصيح وانا ما اعرف بروحي منو اكثر شي فزعني جرح راسي الي بدء ينزف دم مدري خرعة الموقف ومكاني المطروح جوة تاير السيارة
.......
جلال
يوم ثاني الصبح طلعنا انا وسلوان والولد مثنى
بعدما اخذنا المعلومات من الاسطى توفيق وشلون راح نوصل
.. اولادي سمعوني زين هذا التكسي راح ياخذكم ويوصلكم لهناك انا نطيته اجرته
ومناك راح تلكون سيارة عسكرية تنتظركم وهمة راح ينقلونكم وياخذوكم للمعسكر
جاوبته.. وشوكت نرجع اذا راد الله
.. احتمال تتأخرون لليل واذا اتأخرتوا كلش باتوا يمهم بالمعسكر ويوم ثاني الصبح رجعوا
.. زين ويوميتنا من يحاسبنا عليها انت لو همة
.. يوميتكم يمي لتخافون راح ادير بالي عليكم وادللكم
باليومية اخليها الكم دبل
اخذنا التعليمات وصعدنا بالتكسي
وصاح من ورانا
.. من توصلون اتصلوا علية طمنوني
.. صار استاذي
اخذنا التكسي وصار يتوغل بالشوارع وبدينا نبتعد من مركز المدينة وبدت التلال والطبيعة تحيط بينا
وتقريبا مشت بينا بيها ساعتين
والسايق يسولف ويانا ويسألنا
.. عمي شعجب رايحين لهناك
سلوان .. ليش شكو هناك
.. ماكو شي بس الطريق يخوف ومو امان
وانتوا شباب
سلوان التفت علية وكال
.. اكول جلال انا ما مرتاح لهاي الشغلة اشو الطريق طول
.. اي غير رايحين للمعسكر ايد يصير بعيد شتريد يخلولك المعسكر بقلب المدينة اكيد يصير خارج المدينة
.. الله يخليك يا خارج المدينة متشوف اللافتات احنا شكلنا راح نطلع خارج العراق بكبره
ابتسم ابو التكسي وكال
.. ههههه لتخاف وليدي بعدنا بالعراق بس هو هذا الطريق مزعج
مثنى طمنا
.. لتخافون شباب انا سامع بهذا المعسكر اخوي ملتحق بي و انا رايح حتى اشوفه
وصلنا يم لافتة زركة جبيرة
وكف التكسي وباوع علينا السايق وكال
.. عمي انا لهنا وتخلص مهمتي وياكم بعد ما اكدر اتوغل اكثر اخاف على عمري
سألته.. وليش متوصلنا هو شكو هنا
.. يابة شايف هذا الشارع
جان يحجي ويأشر على شارع فارغ مابي حتى طير
.. اي عمي شايفه
.. هذا الشارع يسمونه طريق الموت الي يعرفله
وحافظه ومتعود عليه يكدر يجتازه وانا صاحب عائلة
واولاد ما مستعد ايتمهم من هسة
.. زين السيارة العسكرية وين راح نلكاها
انتوا بس تمشون تقريباً كيلو متر راح يشوفوكم ويجون عليكم ياخذوكم
الاسطى توفيق منطيهم خبر ويعرفون بجيتكم
.. اها تمام
حطيت جنطتي على ظهري وفتحت الباب اريد انزل
لزمني سلوان من كتفي بخوف
.. شنو جلال اوكف لحظة وين نازل
شنو انت ما سمعت السايق شنو گال
مثنى.. يكول هذا الشارع اسمه طريق الموت
جلال.. اي هو اسمه طريق الموت بس مو معناها كل واحد يمشي بي لازم يموت
يعني مثل لعبة سكة الموت اسمها عربة الموت بس كلمن ركبها يرجع حلكه مشكوك من الضحك
شفت شلون
سلوان باوع للسايق .. بس احنا ما اتفقنا على هيج
الاسطى اتفق وياك تسلمنا للنقيب اشو لا اكو نقيب ولا سيارة عسكرية
.. والله هذا مو شغلي المفروض النقيب يكون هنا
يالله بوية اتوكلوا ومثل ما كال صاحبكم شكله هذا گلبه ميت شكله مقدم روحه قربان
ماكو شي يخوف لاتنسون ترة راح تحصلون يومية دسمة تعوضكم بدل خطورة
هو مجرد بس ذكر اليومية وقيمتها كفيل بدفعي حتى اروح
اجة على بالي اولاد خالي وبناته وامهم والعيد على الابواب وهاي الفلوس اجتي بوكتها
.. شباب انا عني رايح ترة احنا مو اول بشر يمشي بهذا الطريق امة محمد كلها تعبر وتوصل لذاك الصوب
والحافظ الله
سلوان.. لك جلال شكله هذا الاسطى توفيق مقدمنا كبش فداء ورسلنا على عمى وجهنا
ابتسمت.. اكلك اذا هم امي وابوي متنازلين عني من زمان
تريد الاسطى توفيق يحن علية
سلوان التفت للسايق
.. عمي اخذني وياك انا عني ما اروح ما بايع نفسي
بالله هذا مخبل واهله بايعينه
ابتسمت سلوان رابي وياي من الصغر ويعرف كلشي عن حياتي واجتي كلمته عالجرح
اباوع للولد مثنى بقى واكف متردد يجي وياي لو يرجع وياهم
سلمت عليهم بطرف ايدي بأشارة حركة السلام العالمية
.. يالله شباب اسلم عليكم انا رايح
مشيت واسمع صوت سلوان الخايف ضل يصيح علية حتى ارجع
.. لك جلال انت صدك مخبل مو عاقل
انا الله بلاني بيك بلوة
وخطيت على اول خطوات بطريق الموت
سمعت الرجال ابو التكسي صاح من وراي وهو يضحك
.. جلاااااااااال قربان يا رجال روح في امان الله
جنت مستمر بالمشي ومنطيهم ظهري ورفعت ايدي بحركة الوداع
جنت امشي وجنطتي الصغيرة على ظهري واراقب الطريق كدامي اشو ماكو اي اثر
بس السماء والطارق
اظلل عيوني بكف ايدي صارت الشمس عالية
بيها نص ساعة امشي
لحظات من التفكير بالخيارات وجان اسمع صوت واحد يركض ويصيح من وراي التفتت
وجان اشوف صديقي سلوان يهرول ويأشرلي
اتوقفت بمكاني وهزيت راسي اضحك على شكله ووجهه جان احمر ابيض
وصل يمي وهو يلهث لزمته من كتفه
صاحبي واعرفه كلش زين ما راح يكدر يعوفني لوحدي
سلوان .. والله العظيم اذا اموت من وراك عشيرتك احركها مو تكول ما كال سلوان
.. الله كريم هسة انت موت وعود راويني شلون تحرك عشيرتي
كملنا طريقنا وسلوان على طول الطريق يدردم
سألته على مثنى كال ما قبل يجي خاف على روحه جبان
رفعت حاجبي اذكره بكلامه وية السايق
.. ومنو كال قبل شوية عمي اخذني وياك انا ما بايع روحي
سلوان .. هذا عقل سلوان اما هسة الي جاي يمشي يمك
گلب سلوان وداعتك
كلبي ما انطاني اعوف جلال قربان لوحده
اريد اشوفك شلون تموت حتى اخذلك صورة تذكارية
صرنا نمشي ونسولف وهناااااااك وجان نشووف !!!!!
........
مهيمن
لحظات بين فاقد الوعي وبين اسمع اصوات الناس
بديت شوية استوعب حالتي كم واحد اجة وساعدني اكوم
.. ها بيك حيل تكوم
اشرتله براسي اي اكدر
شكلي من الهبطة الساني ثگل
نهضت من الكاع وسمعت شرطي المرور يحجي وية
صاحب السيارة يكله
.. ترة انت الغلطان
وبديت استوعب وضعي واتماسك وبدت علامات الغضب اريد شوف منو هذا الي دعمني يا اعمى
لفتني كلام صاحب السيارة جاوب المرور بعصبية
.. لا ما غلطان هو شمر روحه جوة سيارتي
باوع علية من فوك ليجوة مثل يعاين الشخص الي كدامه
بنظرة تكبر وكمل كلامه وية الشرطي
يعني هي مبينة هيج نماذج كاموا يسترزقون بهيج سوالف بعد تعرف شغل الشحادة
يشمرون روحهم كدام السيارات وتعال
يا ابو السيارة ادفع تعويضات واكعد افصلهم
هو جان يحجي وية شرطي المرور ويباوع علية بنظرات احتقار
بس انا وية كل كلمة احس بالنار صارت تسعر بگلبي
ومن ورة الغضب ما اعرف منين اجاني الحيل
هديت عليه اريد بس الزمه افرغ حركة گلبي كل شي ما اريد
بس كون اغير خارطة وجهه الحقير وامسح من عيونه نظرة التكبر
هي لحظات ما حسوا الا وانا. زانك الولد من ياخته
ومنومه بالكاع انطيته كله براسه وهو مبين عليه بزر دلال بسرعة سنح جوة ايدي جماعته هدوا عليه
رفسات على خاصرتي
بس انا وين صار الشاب الفايخ هو حصتي ما همتني ضرباتهم بكد ما حرصت ان اندمه على اليوم الي
اتجاوز علية
صياح رياجيل ومدافع وانا على نفس وضعي محد كدر يخلص الشاب من جوة ايدي
وجان تجي سيارة مفرزة شرطة.
وتلمنا انا والشباب واخذونا دفع وصياح يحطونا بفرد سيارة وجان ياخذونا لمركز الشرطة
فجاءة وعيت على وضعي واتذكرت امي واختي
والبيت وشلون منو يبلغهم هسة امي تنجلط من تسمع بالصار
........
ريم
حياتي على المحك احس الزمن عندي اتوقف
جنت امشي واتحرك مثل المخدرة مرض عمو قلب عندي الموازين
كانت مخاوفي محتلة كل افكاري
وصرت اراجع تصرفات عمو وياي باخر فترة
حرصه المفاجيء على مستقبلي واصراره على التزامي بدراستي وغيرها من الامور الي جانت كلها رسائل منه
حتى اكون مسؤلة عن حياتي شكله كان يهيئني
شلون ادير حياتي من بعده
لالالا ربي دخيلك احفظ عمو من كل شر وطول بعمره
اتكونت غصة بين ثنايا ظلوعي حاولت اكتمها
اول مرة بحياتي اخاف على احد و احس بهذا الشعور الي يعصر الگلب
هاي الفترة عمو حاول يدبرلي واسطة حتى يدخلني
بس مع الاسف هالمرة ما فادت الواسطة شكلي راح اعيد السنة
جان كل يوم يعدي علية واني اراقب عمو
وافتر وراه مثل ضله بدون ما يحس علية
هدوئي لفت انتباه الكل
عبرت من يم غرفة عمة اسيا
جان باب غرفتها مفتوح
باوعت جانت ناطيتني طهرها وتحجي بالنقال
اسمعها تكول
.. لك ماما نائل انت ليش متسمع الكلام وترجع للعراق
لك سمعت خالك صفة املاكه وجمعهم هنا بالنك
دتعال صير جوة ايد خالك هسة هو بعازة. احد يساعده
بلكي ينولك من خيره شي
سكتت لحظات ونوب رجعت كملت كلامها
.. اي حبيبي ريم الك متصير لغيرك بس انا اريدك تجي يم خالك هسة هو ديصارع الموت وما باقي على موته شي دتعال وثبت موقف مشرف كدام خالك
حتى نضرب عصفورين بحجر واحد
بقيت واكفة مصدومة من تصرف عمة اسيا وهي ليش هيج متأكدة من موافقة عمو وموافقتي عالزواج من ابنها والله لو يكطعوني وصل الا اني مخبلة. ومو بعقلي
واتزوجه
اني من غير كلشي اتخبل منها هي وابنها ونوب
اسمعها تكعد تخطط شلون تستغلني
ولو هي معروفة بالجشع لا مو جديدة عليها ياما استغلت طيبة عمو مؤيد حتى
يدعم مشاريع اولادها بالخارج ويمولهم
بس شكلها راسمة لبعيد ياربي شكد طماعة هاي الانسانة
زين هي ليش مالية ايدها ان عمو يموت
زاد خوفي على عمو وعلى مستقبلي واحتاريت شنو
اسوي
لا بس هذا الشي الي سمعته ما ينسكت عليه اني
لازم اروح اكول لعمو مؤيد على السمعته
رحت لغرفته ما لكيته
عقدت حواجبي هاي شنو قبل شوية شفته دخل للغرفة
رحت دخلت للمطبخ ادور عليه لكيت خالة ام فلاح دتسوي كهوة
.. احول خالة مشايفة عمو وين
.. عمج بالاستقبال يم ابو سيف
.. ها يعني ابو سيف هنا
معناها جايب اخبار عن اولاد عمو
اتوجهت للباب صاحتني
.. خالة ريمة اخذي وياج صينية القهوة
اخذتها من عندها واتوجهت للاستقبال
دكيت الباب ودخلت
سلمت عليهم شكله عمو ابو سيف ستوه واصل لان جانوا يتبادلون السلام
قدمتلهم الگهوة وعيوني تراقبهم
ابو سيف .. بشرني شلون صحتك
.. والله على حطت ايدك نفس وضعي كا اتغيرت
.. بس هزلان ترة على فكرة انا كملت اجراءات السفر
واتصلت على مستشفى الجامعة الامريكية بلبان
وخلصت كل ترتيبات الحجوزات
بقى بس اخذ جوازك انت وام مؤمل جان يقصد على عمة اسيا
حتى افيزهم
ما سمعته ذكر اسمي
واني اجة گلبي يوكف من الخوف
رحت كبل لعمو مؤيد حجيت بتوسل
.. عمو اسافر وياك
دخلت عمة اسيا وسلمت على ابو سيف وكعدت
واني كملت كلامي اترجاه
.. عفية عمو خليه ياخذ جوازي
.. لا عمو ريم انتي تبقين هنا عندج امتحانات
.. عمو انت تعرف كلش زين اني ما داخلة بكلوريا
ليش تريد تبعدني عنك
غمض عيونه بصبر
.. اعرف ما داخلة بكلوريا بس وصلني خبر اكيد ان الدخول هالسنة راح يكون شامل
ولازم تبقين تدرسين بكلوريا فلا تضيعيين تعبي اهتمي بدراستج وبمستقبلج لخاطري
اسيا.. اي صحيح انتي لازم تبقين هنا وراح اوصي بنت خالة امي خالة فليحة مرية جبيرة متكول شي
تجي تبقى يمج بين ما نرجع
فاحسن شي تنتبهين على دراستج
واخوية اني اسافر وياه وادير بالي عليه ميحتاج انتي تسافرين وابني نائل يجي هناك يدير باله على خاله
باوعت عليها بغيض اتذكرت كلامها التزمت الصمت مجاوبتها وجود عمو ابو سيف هنا هو السبب الي يخلني اسكت وما احجي الي سمعته قبل شوية
عمو مؤيد اضاف على كلامها
.. الله يرضى عليج ريم لا تعبيني بعنادج
هزيت راسي بخوف وجزع اذا راح عمو وية اسيا وابنها معناها كل كلام عمة اسيا راح يتحقق
بجيت بكل جزع وخوف
.. عفية عمو ابوس ايدك اخذني وياك لا تتوقع مني اكدر ادرس او امتحن واني بالي يمك
اسيا.. عاد انتي شلون جنتي شاطرة وهسة متكدرين تدرسين هاي خوش حجة حتى تغطين على فشلج
باوعت عليها .. عمة اترجاج لتتدخلين
ورجعت التفتت باوعت لعمو
.. عفية عمو الله يخليك اخذني وياك لتتركني هنا اموت من الخوف من التفكير بيك
باوع علية بعطف وكال
.. زين شلون ومستقبلج
.. عمو انت مستقبلي لتتوقع مني ينطيني گلبي اكعد ادرس وكأنما شيئاً لم يكن
غمض عيونه وكال
..شلون بيج والله حيرتيني وياج لا اكدر اخذج وياي وبنفس الوقت ما اكدر اعوفج وانا اعرف بيج راح تكلبيها مناحة كليلي شنو الحل
.. عمو الحل بسيط تاخذني وياك لان ما عندك خيار ثاني اذا تركتني ما راح اضمنلك روحي شنو اسوي
باوعلي بأستسلام وكال
.. امري لله ماعندي غير حل
التفت على ابو سيف وكله
.. ابو سيف اخذ جواز ريم وياك حتى تفيزه ريم تسافر وياي
ابو سيف.. صار تدلل ست ريم
جهزي جوازج حتى اخذه وياي من اطلع
احس هدأت نبضات گلبي باوعت لنظرات عمة اسيا
كامت تجدح من الغيض
عمو مؤيد .. ادري بيها هاي مخبلة راح تظل تنك وتتوسل ومراح تتركني ارتاح الا من اخذها وياي
.. كلتلك عمو من البداية اني راح ابقى وياك مثل ظلك صعب تتخلص مني
ابتسم بتعب وكال.. وهو انت ثبتي كلش صعبة اتخلص منج
اسيا.. ومثل كل مرة الخاتونة تمشي كلامها عليك وتسوي الي براسها
سكتت مجاوبتها بس عمو جاوبها
.. شعندي غيرها حبيبة عمها
اقتربت عليه وبست راسه
.. ربي يخليك الي وما يحرمني منك
قاطعنا كلام عمو ابو سيف
.. هسة خلونا بالمهم انا ما اجيت بس علمود الجوازات
انا جاي على موضوع كلش مهم
عمو سأله.. بخصوص شنو هذا الموضوع
.. بخصوص اولادك
.. اي
حثه عالكلام
اباوع لابوسيف فتح جنطته تصير مثل حجم الكتاب
وطلع منها اوراق وكال
.. مؤيد انت طلبت مني ان اجمع معلومات عن اولادك
وانا اول شي سويته حتى الكة مكاناتهم رحت على
دائرة النفوس الي صدرت منها بيانات الولادة حتى من عندها اكدر انطلق
لكن بأثناء البحث جاي اتفاجئت بشغلة كلش مهمة انت جنت غافل عنها ما اعرف او تم خداعك
مؤيد بصوت مبهوت .. شنو هاي الشغلة
.. الشغلة ان ابنك الثالث نور مؤيد
مو مثل ما جنا متوقعين ولد
نور طلعت بنية يعني كل هاي السنين عندك بنية مو ولد
اباوع لعمو نهض من مكانه مصدوم
.. بنية !!! يعني ن. و ر بنية
انخطف لون وجهه واختل توازنه واغمى عليه في ركضت عليه
.. لااااا عموووو!!!!!!!!!



يتبع.....


لامارا غير متواجد حالياً   رد مع اقتباس
قديم 08-09-19, 01:10 AM   #6

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

مساء الانوار عليكم احبتي
صحيح اليوم خميس ويوم عطلتي بس ما هان علية
اتركم بدون ما اشاركم ولو شيء بسيط من احداث القصة



#قضية_لم_الشمل
#البارت الرابع
#الكاتبة_نهى_الحسون



ريم
الموقع في بيروت
عمو مؤيد انصدم من عرف نور بنية مو ولد مثلما كان هو متصور
اغمى عليه ودخلنا كلنا بحالة فزع وبعدما
اخذناه للدكتور گال لازم يدخل عملية حتى نستأصل الورم لان هو كان المفروض يسويها قبل شهر بس مااعرف ليش اتاخر وحالته تدهورت
ابو سيف اعترض وكال انا مفيز للبنان ومجهز كلشي وهناك يسافر ويسوي العملية
جهزنا كلشي احس بروحي متشنجة وعقلي متوقف حتى نسيت شلون اتنفس
فكري كله يم عمو خايفة لا يروح من بين ايدية
وزاد خوفي كلام الاطباء عن حالته
سافرنا للبنان ومباشرتاً دخلوه مستشفى وراسا تحاليل واشعة وكل الفحوصات اللازمة وطبعاً بمساعدة الفحوصات والتشخيصات القديمة
قرر الدكتور المختص بالاورام السرطانية ان عمو ضروري يدخل صالة العمليات لاستئصال الورم
وقعنا ورتبنا لعمو لدخول العملية بعد يومين من دخوله المستشفى تدهورت صحته وصارت بالنازل
بس كلما يصحى ويشوفني كدامه يكوم يحجي بموضوع بنته نور ويلوم بنفسه
..البنية مو مثل الولد صعبة تعيش بهذا العالم بدون حماية اب او سند ودعم. تعرفين
لزمت كف ايده حسيت عليه شكد ضعف بهاي المدة البسيطه
اريد اهدي
.. عمو الله يخليك كافي تلوم نفسك على شي خارج عن ارادتك يعني هذا الشي صار غصب عنك
وصار كل شوية يتسائل عن وضعها
.. يا ترى سهير گدرت تحافظ عليها وتصونها لو لا.
ما اعرف هسة هي شنو وضعها بنتي اكيد شايفة الضيم او يمكن طلعت عن الطريق او احتمال هسة ميتة اصلاً
.. الله يخليك عمو كافي مو زين على صحتك هذا القلق
ما جاوبني وبقى بتساؤلاته عن بنته وكأنه بغير عالم
.. يمكن لو كانت نور عند زهرة ما راح اخاف عليها واشيل همها مثل هسة
وحتى لو كانت عند رانية هم ما يوصل هيج بية الخوف
بس سهير غير تختلف لان اعرف بيها مرة ضعيفة وفقيرة لا حول ولا قوة
ماعندها سند و ما عندها احد يعينها شلون دبرتها وية بنتي شلون عيشتها بأي طريقة
بكل ظني ان نور صار رجال يعتمد عليه وصار سند لأمه سهير مثلما كانت هي تتمنى لذلك فسرت غيابها ان هي كدرت تدبر امورها هي وابنها
سهير ليش هشكل سوت ليش ما صارحتني ليش شردت
دخل علينا الدكتور ووياه الممرضة وشاف وضع عمو كان منهار
اشر للمرضة وانطاها بعض التعليمات وهي زرقت بالمغذي ابرة. بعدها بعشر دقايق بدة عمو يهدء ويغط بالنوم
((هنااااااااك بين ثنايا الحياة كانت هناك عصفورة رقيقة من عصافير بغداد
تخاف ان تفرد جناحيها وتطير تنظر بخجل وتردد من خلف ستائر النافذة مرعوبة من العالم الخارجي ))
نور
كل يوم اكعد وبگلبي امل مدفون
اتأمل ان باجر اجمل واحلى من اليوم
نهضت من فراشي رتبته وحطيته بمكانه كاونتر حديد قديم وبسرعة اخذت قراصة ولميت بيها شعري الي يوصل لحد وركي
عبرت بنات خالتي الثلاثة الي كانوا نايمين وياية على الكاع بنفس الغرفة
جنت اتحرك بداخل الغرفة بسرعة وحذر
وكل شوية التفت عالباب خاف يدخل علية
رحت اخذتلي ملابس من الكنتور ورحت وكفت ورة الباب وبديت اغير ملابسي هم يالله اروح على شغلي هسة الكة خالة ام امير تنتظرني
حطيت ربطتي على راسي وحكمتها عدل
بعدها طلعت وانا اراقب يا ترى صابر موجود لو طالع اريد اروح للحمام بس خايفة يطلعلي
كان الوقت بالسبعة الصبح والبيت هدوء مشيت على اطراف اصابع رجلي ودخلت للحمام الحمدلله كان فارغ
نزعت حجابي ورحت غسلت وجهي ومشطت شعري وسويته كعكة حتى ما يضايقني تحت الحجاب
لبست حجابي كدام مراية الحمام الصغير
وطلعت من الحمام
وجان تصير خالتي سناء كدامي
.. صباح الخير خالة
.. هلا صباح النور ها كعدتي راح تطلعين
.. اي والله خالة هم يالله الحك لان ام امير عندها علاج لازم تاخذه الصبح
جنت احجي وامشي متوجه للباب اريد اطلع
اخذت جنطتي بدربي وطلعت خارج البيت رفعت راسي لضوة شمس الصبح كانت حلوة
مشيت بهمة واني جنطتي على كتفي
رن نقالي طلعته من جنطتي كان نوع نوكيا صرصور
او كتكات يفي بالغرض
.. الو هلو وردة شلونج
الف مبروك حبيبتي الله يتمم عليج
سكتت لحظات ورجعت اجاوبها
.. الله شكد حلو يعني عازمة صديقاتنا كلهم
والله ان شاء الله احضر واباركلج وردة انتي تستاهلين كل الخير
سلمت عليها وانهيت الاتصال واني ابتسم وهاي
وحدة من صديقاتي الي بالكلية راح تتزوج وعزمتني على حفلة الحنة يارب يوم الالي واتزوج من حب حياتي
اوووف يرف گلبي من يمر طاريه على بالي
حبه مدفون بگلبي استحي اعلنه للوجود
باقية اداري حبه بگلبي مثل الحرامية
وصلت لكراج السيارات
وركبت سيارة نفرات بعدها وصلت لراس الشارع وصحت نازل واتوقف الباص ونزلت واتمشيت على بيت ام امير جان بيتهم قريب عالشارع العام بمنطقة راقية.
وصلت لبيتهم وگلبي خفق بلهفة بشوفة اعز انسان على گلبي
لكيت امير فاتح باب الكراج يريد يطلع سيارته
شافني وابتسم بود وسلم
.. صباح النور يانور
كانت كلماته المعتادة هو ينطقها بكل حيوية واني گلبي
ما اعرف شيصير بي يظل يخبص من يمه
.. صباح الخير شلونك استاذ امير
امير اسم على مسمى دكتور واستاذ جامعي
واخلاقه اخلاق الامراء طيب وهاديء ووسيم ياربي
امه من كانت حامل بي بوجه منو تصبح كل يوم
ياربي حن عليه وخلي الاحبه يصير الية
.. اجيتي بوكتج صدك بنت حلال ستوني جنت افكر بيج
يبوووووي يعني هو هم مثلي يفكر بية
انخبصت .. ااااا ببشنو جنت تفكر بية
.. جنت افكر شلون اسلمج الراتب اليوم خاف ما الحك عليج من ارجع من الدوام
.. استاذ اني ما طايرة شوكت ما يعجبك سلمني راتبي
.. لا ما يصير هذا حقج ولازم تاخذين اجور اتعابج
والله يانور لو ما انتي تجين يم امي جان هسة الله يعلم بحالي والله وجودج بحياتنا احلى هدية
احس خدودي صاروا نار من الخجل صرت اهفي بيدي على وجهي اطلب الهوى يمة ما اكدر انا على لسانه العسل
.. والله انتوا وجودكم بحياتي احلى شي حصل بحياتي ربي ما يحرمني منكم
.. اللهم امين
طلع فلوس من محفظته وسلمني اياهم
.. هاج اتفضلي راتبج واي شي تحتاجينه كولي لا تترددين
.. تسلم ما تقصر افضالكم مغرگتني
اباوع عليه ركب سيارته وطلع واني سديت باب الكراج وراه واتكأت عليه.
.. روح الله يحميك يانبض قلب نور
انتبهت من صفنتي وحطيت الفلوس بالجنطة ورحت دخلت جوة للبيت جان البيت هاديء اكيد هسة خالة ابتسام نايمة بعدها
نزعت شالي وعلكته بالمطبخ
هذا البيت المكان الوحيد الي احس بي بالامان
اي الامان الي فقدته من يوم وفاة امي الله يرحمها
بديت اشوف شغلي بالبيت مثل كل يوم
ابتسمت واني اتذكر اول يوم الي بهذا البيت قبل سنتين شلون كنت بوقتها كلش خايفة ومترددة احس بروحي عبالك ضايعة ماعندي ثقة بأي احد
لكن بمرور الايام بديت احس بالامان
من ناحيتهم كانوا عائلة صغيرة يتكونون من ولد وبنية وام مقعدة. امير واخته اثنينهم دكاترة بس سرى دكتورة اسنان وهو استاذ جامعي عائلة مثقفة ومحترمة ربي حطهم بطريقي حتى اشتغل عندهم عاملة
اشتغلت عاملة غصب عني لان ماكو تعيين ولا واحد قبل يوظفني عكس صديقاتي اغلبهم اتعينوا يعني بين وظائف بعقد مع شركات اهلية وبين وظيفة حكومية واذا كلش ماكو تعيين يرحن يتعينن محاسبات بالمولات
والمحلات
الا اني حظي حتى المحلات والمولات يرفضون يعينوني ما اعرف ليش شنو السبب اول ما يلقون نظرة على شكلي وملابسي راسا يجاوبوني
اسفين اختي ما تتوفر بيج مواصفات الموظفة المطلوبة
يعني اريد افتهم المظهر شنو دخله اذا اني اقوم بأتقان عملي واتمامه على اتم وجه
والله ياربي شلون كلام هذا المظهر الخارجي من ضمن المواصفات المطلوبة اريد افتهم بشنو راح يفيدهم اووف
رحت دخلت اني وسطلة الماي لغرفة حبيب الگلب
واول ما دخلت لفحني ريحة عطره الرجالي القوية
اووووف ياريحة المحبوب تنطبع بالذاكرة
من بديت اشتغل عند بيت ام امير جنت احاول ما التقي بأبنها امير جنت اتجنبه كانت فكرتي عن الرجال مرعبة. بس من التقيت بي بالصدفة وشفت معاملته اللطيفة وياي وشلون طيب وحريص على ان اخذ راحتي ببيتهم.
لكيت نفسي واكعة بحبه بدون ما ادري
صرت اراقبه من بعيد صار بالنسبة الي مثل الهوس
احبه واعشق كل تفاصيله وهو بالمقابل. كانت تصرفاته
ومعاملته وياي توحيلي انه هو يبادلني الشعور بس بدون ما ينطق الكلام
كان دائما يسألني شنو احتاج ومرات يشتريلي شغلات
مثل مرة اشترالي جاكيت صوف نسائي من شافني جاية لبيتهم
بعز البرد بس بالقميص والتنورة
اتذكر بيومها كام يحجي علية ومن رجع من الدوام
لكيته جايب لي جاكيت صوفي ثخين
احمد الله واشكره الف مرة اني اشتغلت هنا عندهم
مو بغير مكان
كملت شغلي وسويت ريوك وبديت اتريك وبعد
كعدت خالة ابتسام وصرت اشوف شغلي وياها
مثل كل يوم سباحة وريوك وعلاج وغيرها من احتياجات خالة
وكانت دائماً تدعيلي بأبن الحلال
واني ابتسم بگلبي بفرحة اي اموري ابن حلال مصفى
.. تسلمين خالة على هذا الدعاء الي يشرح الگلب
للظهر خالة كالت لي
.. حبيبتي نور اليوم تكدرين ترحين لبيتكم من وكت
.. ليش خالة ارجع من وقت
اتعودت كل يوم للعصر ينتهي وقت عملي ببيت ام امير
باوعتلي وابتسمت
.. شنو ليش
مو انتي قبل شوية كلتيلي ان صديقتك راح تتزوج واليوم اتصلت عليج وعزمتج للحنة
ضربت على كصتي
.. اهووو شوف شلون نسيت الحفلة. خرب بالحظ هذا عقلي المعلك شكله خربان
ضحكت ام امير على كلامي وكالت
.. الله يساعد عقلج عليج ما اعرف ليش احس بيج مطفية
تدرين مرات اتسائل هاي شلون مدبرة امورها بالدنيا
ابتسمت وجاوبتها.. ربي هو الي يدبر اموري
وانا عايشة تحت رحمته
.. والنعم بالله
........
جلال
نمشي انا وسلوان ونسولف ونراقب الطريق بحذر بين فترة وفترة
هناك ونشووف !!!!!
سيارتين همر بس مو عسكرية طالعين من نوافذ السيارة رجال ملثمين وشايلين اسلحة. بس ما لابسين زي عسكري ولا السيارة شكلها عسكري
جمدنا انا وسلوان بمكانة.
التفتت عليه
.. سلوان هذولي منو
.. شمدريني هذولي منو
جايين بأتجاهنا بكل سرعة
بلعت ريكي بخوف
اباوع لسلوان وجهه انخطف لونه
سلوان.. هذا الي خايف منه كله منك مو كلتلك لانروح خلينا نرجع
الله يعلم هذولي منو وشنو يردون من عدنا
سلوان كان يحجي بخوف مرعوب من منظرهم
حسيت بالذنب لان انا جبته لهنا كله بسببي
اتقدمت ووكفت كدامه وكلت
.. سلوان انا راح ابقى بمكاني وانت انهزم بسرعة وما عليك بية
باوع عليه ونفخ نفس بقلة صبر
.. خاب شوف هذا شنو يحجي تسوي روحك براسي جاكي شان
لك جلال حتى لو اريد انهزم واعوفك. ما الحك راسا يلزموني
متشوفهم شلون جايين علينا بكل سرعتهم
شكلهم ناوين علينا
لزمت كتفه
.. بعد ما يفيد الحجي الفاس وكع بالراس
وصلوا قريب علينا ووكفت سياراتهم
ونزلوا من السيارة اربعة
واحد ضخم وملثم سألنا
.. انتوا من طرف توفيق ابو السكراب
سلوان جاوبهم بسرعة .. لا احنا مومن طرف توفيق
اباوع عليهم باوعلنا بحذر ورفعوا سلاحهم
لزمت سلوان .. لحظة سلوان لا تستعجل خلينا نفتهم شنو السالفة
واتقدمت عليهم .. اي احنا من طرف الاسطى توفيق
سألني نفس الشخص .. زين هذا ليش نكر معرفته بتوفيق
.. صاحبي اتفاجيء بيكم وجاوبكم هشكل يتوخى الحذر منكم لان الاسطى ما فهمنا الموضوع بالضبط شنو دزنا على عمى وجهنا
.. وشنو الي يضمن انتوا من جهة توفيق
..تكدر تتصل على الاسطى توفيق وتتأكد بنفسك
وفعلاً طلع نقاله. واتصل وصار يحجي وية الاسطى وعيونه علينا تراقبنا
وانا عيوني تراقب اشكال الي وياه احس اكو غلط بالموضوع بس ما بيدي شي يثبت صحة توقعي
انهى اتصاله وسألني
.. انت شنو اسمك
.. اسمي جلال
والتفت على سلوان وسأله
.. وانت؟؟
.. ااس اسمي سلوان
اهو صاحبي كام يعلك شكله الخوف وصل عنده لحد النخاع
سألنا .. لعد وين صاحبكم الثالث توفيق كال
دزيت ثلاث شباب اشو انتوا بس اثنين
.. مثنى صاحبنا رجع وية ابو التكسي لان الامور ما سارت مثلما كان مفهمنا الاسطى توفيق
لمعت عيونه وكال
.. وانتوا ليش ما رجعتوا وية صاحبكم من شفتوا الوضع مو مريح
جاوبته .. گلنا الما يجينا احنا نروحله
وخبزتنا رزقنا هنا بهذا المكان نلحكها وين ما تكون
سلوان .. انا عني ما اريد خبز بطلت اريد ارجع
الملثم نزل لثامه وگال .. لتخاف انتوا بأمان يمنا
محد يگدر يتعرضلكم وابو بهاء موجود
اشر للشباب الي وراه
.. عبدالله. منتصر شوفوا شغلكم وضيفوا الشباب
خاف تعبانين وبعدين اخذوهم على مكان السيارات والمكاين
سمعت واحد سحب نفس عميق يدل على الراحة باوعت لكيته سلوان الظاهر كان حابس انفاسه عمي حقه الي كاعد يصير بينا مو طبيعي والله بگت طن هوى من عندهم
مشينا وراهم وركبنا بالسيارة الثانية
سلوان بصوت ناصي.. ولك جلال بالقران گلبي راد يوكف
.. شبيك جبان لتخاف ماكو شي يخوف الامور طبيعية ناس تريد تصلح سياراتها ومحتاجين مصلحين
سلوان فتح حلكه راد يحجي بس انتبه على الرجال الي بصفنا كان شكله يستمع لكلامنا
سلوان باوع عليه وقرر يسكت واشرلي بعيونه بعدين نحجي
مشت بينا السيارة واختفى تبليط الشارع
وصار الطريق متعرج اتوغلت السيارات داخل مزارع وبساتين كانت اشجار الزيتون تحيط بينا والخضار الي بيها يجنن يعجبك بس تكعد بيها
بدينا شوية نتطمن وصلنا يم بوابة كبيرة واكفين عليها اثنين حرس حاملين سلاح وهم ملثمين
دخلت السيارات لداخل ساحة كبيرة بنهاية الساحة بيت كبير او بالاحرى قصر حلو
السيارة الاولى اتوقفت امام القصر اما سيارتنا فكملت طريقها لخلف القصر وهناك خلف القصر
كان عالم ثاني كله مكائن والالات وسيارات بكل انواعها بقينا انا وسلوان واحد يباوع للثاني ونطرات عيونا بيها كومة اسئلة
.......
مهيمن
وصلنا للمركز والوجوه معصبه بوجه بعضها
كعدونا بغرفة التحقيق
منتظرين دخول الضابط حتى ياخذ اقوالنا
انا جنت كاعد كدام هذا المدلل الي دعمني
كنت اخزر عليه بخزرة وهو هم بادلني الخزرة نفسها
مسح على فكه الازرق ودردم
واني جاوبته بصوت
.. علي صوتك وسمعني شنو جاي تحجي لتضل جنك مرية عجوز تدردم
ادري بي يحجي علية وانا گلبي بعده ما مرتاح يحوم عليه اتمنى بعد اغسله
ورفع حاجبه وهز ايده
صاحبه حجة وياه .. عناد رحمة على والديك كافي
انت منتبه لنفسك هاي ثاني مشكلة سويتها من وصلت للعراق لحد الان
اهووو شكل الاخ بزر دلال من صدك الظاهر ما ضاربته شمس البصرة ولا سابح بمايها المالح شكله بعده مامتعود عالوضع هنا
اتمنى الله يوليني عليه واعيد تصنيعه هالفايخ
عناد .. اتصلتوا عالوالد
.. اي اتصلنا وجاي هو واخوانك بالطريق
كانوا يحجون ودخل علينا الضابط نهضنا من مكانة
وهوً اشرلنا نكعد
قرة التقرير الي كدامه واتطلع عليه ورة خمس دقائق
تكلم ويانا
.. منو مهيمن مؤيد
.. انا سيدي
.. انطيني هويتك واجازة الدراجة
سحبت الهوية من جيبي والاجازة وحطيتها كدام الضابط
.. منو عناد منذر
جاوبه
.. انا سيدي
وطلب منه نفس الشي هويته واجازة السوق
سلمها له ورجع كعد بمكانه بعدما الضابط طابق المعلومات تكلم
وهو يحجي وية عناد
.. شوف عناد التقرير المروري يشير انت المتجاوز
سايق الدراجة والدعمة اجته من الخلف
وكعد الضابط يعدد مخالفات عناد بالحادث
وانا اسمع
انهى كلامه وية عناد وكال
.. لازم نحيلك على التوقيف لمدة يومين مع دفع غرامة
للمتضرر مهيمن مؤيد
اباوع على الولد ما عجبه الحجي وكال
.. سيدي ماله داعي تحجزني بالمخفر انا احلها وية الولد انطيه كم فلس ويتنازل عن الدعوة
باوع علية الضابط وكال
.. هو حتى لو اتنازل هم لازم تبقى عدنا كم ساعة لاكمال الاجراءات الروتينية اما بحال ما اتنازل
فنعتذر تبقى بالحجز يومين مع دفع الخسائر
عناد حجة بثقة .. هاي سهلة
التفت علية وكال من ورة خشمه
.. كلي شكد تريد حتى تتنازل عن الدعوة
ابتسمت نصف ابتسامة عيد وجابه العباس النا
انا قبل شوية ادعي ربي كون يوليني عليك
وهسه تسألني اعتقك اااااخ محتار منين ابدي بيك
.. خلي فلوسك بجيبك اليوم محد يفيدك حتى فلوسك ما راح تنفعك ولا تشفعلك يمي والله لو مو تدفع كفالة
عسى ما يصيغونك ذهب ما اتنازل عن الدعوة
.. ليش تحجي هيج انت شكلك واحد محتاج اخذلك كم فلس خليهم ينفعونك
لزمه صاحبه حتى يسكته
انا جاوبته .. شوف انت كلما تفتح حلكك تزيد الطين بلة وانا ازيد عناد
ويا استاذ عناد كون اشوفك تخيس يومين بالسجن
وهذا الشي الوحيد الي راح يشفي غليلي بيك
اجاني صاحبه وكال
.. يابة حقك علينا وامسحها بوجهي عذره كان يسوق مستعجل لان اخوه مسوي حادث
كان صديقه يحجي والاستاذ ينافخ بقلة صبر
.. لو كنت انت الي داعمني وهذا اسلوبك وياي بالكلام
كان اتنازل لك بكل سهولة لان انت عندك اسلوب ومحترم
بس الاستاذ الي كاعد تحجي عنه
ماعنده اسلوب وشكله اهله ما علموه الاحترام والاصول
عناد.. اكول اشو انت كمت تتجاوز بالكلام
الضابط .. رجاءاً قطعوا الكلام
صاح العريف وكله اخذ استاذ عناد عالحجز
وكلي تعال وقع هنا على الدعوة
كمت من مكاني واتجهت على المكتب يم الضابط
واخذوا عناد الي كام يغلط ويصيح
حسيت بالانتصار عبالك ماي بارد وكع على كلبي
وقعت على الاوراق
وطلعت من مكتب الضابط
جنت امشي بالمركز. واشوف من بعيد ضابط ووياه رجال كبيربالعمر ورجال اثنين يمشون بالممر
ركزت بالوجوه هاي شنو هذا الحجي ابو حيدر تاجر معروف بالسوك وهذولي ولده حيدر وكرار شيسوون هنا
الحجي ابو حيدر الي اتوسطلي ببيع المحل وسهل امر البيع لان صاحب المحل كان رافض يبيع وابو حيدر اتدخل وخلاه يوافق
هذا الرجال صاحب فضل كبير علية انقهرت على شكله
رحت عليهم شافوني وسلموا علية شكلهم مستعجلين عندهم شغلة مستعجلة
.. مرحبا حجي خير سلامات شبي وجهك اصفر
خو ماكو شي
جاوبني الحجي فحطان وانفاسه تتلاحق
.. والله ما اعرف شحجي وشكول
جاوبني حيدر.. اخوي الصغير داعم له واحد وحطوا بالحجز
.. لا ياربي دخيلك خو ما ميت الداعمه
.. ما ادري يكولون ماميت بس رافض يتنازل
عن الدعوة وهسة احنا اجينا لهنا نريد نفتهم شنو السالفة
جاي نحجي وقاطعنة صوت واحد سلم على الحجي والولد حيدر وكرار
التفتت وجان اشوف هذا نفسه الولد الي كان يقنعني اتنازل عن الدعوة علمود صاحبه العار
اتشنجت لحظة واتسعت عيوني متعجب
سلم عليهم وسأله الحجي
.. ها منقذ گلي عناد وين
جاوبهم ونظراته العدائية متوجهة علية
.. اخذوا عالحجز
.. لا تكولها هاي شلون حلها بالله
ليش ما حجيتوا وية اهل المصاب نعوضهم بس خلي يتنازلون عن الدعوة
همة يحجون وانا الدم صار يفور بگلبي معقولة اكو هيج
صدفة هذا الشاب العار يطلع ابن الحجي الكريم ابو حيدر ما اصدك ياربي هذا شلون امتحان
جاوبه الولد .. حجي ما يحتاج نحجي وية اهل المصاب
هذا المصاب بذات نفسه واكف يمك
كان يتكلم وياهم ويأشر علية بنظرات عيونه
حيدر باوع علية وسأله مستغرب
.. ومهيمن شنو علاقته بالموضوع
.. مو عناد دعم مهيمن بأثناء ماكان يقود الدراجة
الحجي باوع علية بأمل وكأنه ارتاح من عرف انا صاحب الحادث
.. عمي مهيمن الحمدلله على سلامتك خو ما متأذي
.. الله يسلمك حجي لا الحمدلله اجتي سليمة
بس انا ما ادري ان هذا الشاب يصير ابنك
حيدر.. حقك ما تعرفه اذا هو احنا اخوانه ما نشوفه الا بالمناسبات الاخ كاضيها سفر يدرس برة
و بس بالاجازات نشوفه وهسة هو نازل مجاز
كرار.. مهيمن اذا تحتاج دكتور علاج دراجتك اذا محتاجة تصليح كول احنا خسّارين
.. لا يابة والله ما اخليكم تدفعون فلس احمر
حيدر جلة صوته .. الحمدلله سالفتنة عالكة وياك مو وية غيرك جنت شايل هم شلون نطلع اخونا من الحجز وانت تعرف بس يبات بالحجز گبل تجينا حجاية والناس ما ترحم تاكل الوجوه يضلون يألفون افلام من عندهم حتى لو كانوا يعرفون سبب حجره بالسجن هو الدعمة ما يصدكون بعد انت تعرف كلام الناس ما يرحم
افتهمت من كلامه يريدني اتنازل ولو همة من غبر ما يطلبون انا من يمي اروح اتنازل لان زحمة من الحجي
افضاله مغرگتني
.. حيدر من غير ما تحجون انا راح اتنازل عن الدعوة ضده لخاطر الحجي ابو حيدر. وجيته لهنا
بس كل الي اريده منكم ان يجي يعتذر مني لان ابنكم
اتحاوز علية
الحجي.. هاي سهلة اجيبه لحد عندك واخلي يعتذرلك
وهو الممنون هذا الولد من يوم ولدته امه. حامض وخشمه يابس
احلى شي بجماعة السوك التواضع الالفة
وانا الولد حيدر وكرار جماعتي وابوهم هم بس هذا المفعوص مع الاسف ابنهم
بعد فترة تمت الاجراءات واتنازلت عن الدعوة وطلعوا
عناد وسلمت عالحجي واولاده الا عناد ما سلمت عليه
وتركتهم وطلعت من المركز
ورحت للسوك. واول ما وصلت للسوك دك نقالي والمتصل الحجي ابو حيدر
وفاجئني بسؤاله عن المحل
الحجي .. اكول مهيمن شنو سويت عالمحل
.. والله حجي كملت كلشي باقي بس اشتري بضاعة للمحل حتى ابدي اشتغل
راسا داهمني بالسؤال
.. شوف بوية مهيمن بما ان انت جديد عالسوك والمحل يحتاجله راس مال حتى تنهض بي
فأعتبرني انا داخل وياك شريك امولك بالمبلغ
وانت اتوكل على الله وربي يرزقك
من سمعت كلام الحجي احس گلبي كمز من مكانه
حتى الكلام راح مني ما اعرف شنو اجاوبه
.. حجي انت مامجبور تدخل وياي شريك علمود
انا اتنازلت عن الدعوة ترة احنا اهل واصدقاء
وما بينا تكلفة
.......
نور
وصلت لبيت صديقتي كان بيتهم بزيونة كانوا بنات صغار لابسات فساتين تول لونها ابيض وردي
كانوا واكفين يم باب بيت صديقتي
سلمت عليهن ودخلت للبيت شكل الحفلة بادية والديجي صوته واصل للشارع
اترددت ادخل للاستقبال لان شفت البنات من بعيد
كلهم كاشخات وفساتين استحيت ادخل احس بروحي مامرتبة جنت واكفة افكر ادخل لو ارجع للبيت واحفظ ماي وجهي
بعدين قررت ادور على صديقاتي اشو الوجوه كلها مگلبة ما تنعرف من ورة الميك اب وحدتهم تكول عبالك طالعة من مجلة لك سيدتي من الجمال والكشخة
شكلي جنت هواي واثقة من نفسي من اختاريت هذني الملابس كنت امشي بين المعازيم
وقطعت طريقي بنية حلوة لابسة فستان احمر قصير ورافعة شعرها
.. هلا نور شلونج ولج خرب يومج نفس ما انتي ولا متغيرة
ابتسمت .. هههه لج فاتن هاي شنو طالعة كيكة ولا عرفتج
.. لعد شنو ترديني ابقى مثلج جنج اثار بابل
انتي وحواجبج وشواربج الثخان
ادري شنو سالفتج ليش ما حافة لحد الان
شنو ناوية تربيهم حتى تحلفين بيهم
هو اليدري يدري والمايدري يكول كمشة عدس
حقهم محد يعرف بحياتي شلون دتمشي وليش اني هيج
دافنة شبابي وخافية معالم جسمي عن العيون
حسيت عليها لزمتني من ايدي واخذتني عالبنات
وصرنا نتبادل السلام
والاخبار ورحنا باركنا لصديقتنا وردة
بعدين كعدنا سوية على صفحة نسولف عن حياتنا بعد الكلية
فاتن صديقتي كانت معروفة بالكلية بدور المحقق عالبنات ويا ويلها الي توكع بلسانها
وصلني الدور بالكلام
التفتوا علية
.. وانتي ياحلوة شوكت ناوية تنزعين الاسود عالمرحوم
وتحفين ماكافي حزن على ابو غايب
بقيت فاتحة حلكي .. اهووو عفية فاتن ما بية حيل اوكع بلسانج
اتكلمت وحدة من صديقاتي
.. اي صدك نور انتي بنية شابة وحلوة يعني ليش هشكل دافنة نفس وهاملة روحج تدرين امي ذاك اليوم شايفتج بالصدفة سألتني تكول
نور صديقتج ليش تلبس ملابس امها لان شافتج بملابس اكبر من قياسج
فاتن .. صدك نور انتي شنو عاجبج بهذني الملابس
يعني هذا شكلج وتشتكين ليش ماكو تعيين ومحد يعيني



يتبع
اتمنى لكم قراءة ممتعة
احبكم هواي احبكم كومة اختكم نهى الحسون


لامارا غير متواجد حالياً   رد مع اقتباس
قديم 08-09-19, 01:12 AM   #7

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

#قضية_لم_الشمل
#الكاتبة_نهى
#البارت الخامس



نور
نزلوا البنات علية بالاسئلة والفضول ياكلهم
اتعودت على صديقاتي وطريقة اسئلتهم
وبهاي الاثناء قطع كلامهم دخول اسيل صديقتي
سحبت نفس عميق براحة واخيراً اجتي فرقة الانقاذ
حضنتني من الخلف وكالت
اسيل.. خير بنات شكو نازلين تحقيق وية وردتنا المغمضة شبيكم مامصدكات اكو بنية خام بهذا الوقت
فاتن.. يابة هاي ما يسموها خام هاي يسموها بهذلة
اسيل .. خلينا الكشخة الج ست فاشنيستا
قاطعت كلامهم ادري اذا استمروا هيج يتكلمون راح تصير مشكلة غيرت الموضوع
.. بنات هسة عوفكم مني وتعالوا كلولي شنو راح تقدمون هدية لوردة بمناسبة زواجها
اسيل .. اني عني ما لحكت اشتريلها هدية
لذلك راح اقدملها ظرف بي فلوس
وصاروا البنات يعددون الهدايا
واني جاوبتهم .. اسيل اني مثلج ماصار عندي وقت اشتريلها لذلك راح انطيها فلوس بظرف
وهي تشتري هديتها على ذوقها
وبقينا اني والبنات نحتفل وية صديقتنا وكل وحدة بينا تتمنى ان يجي اليوم ونصير بمكانها ونلبس الابيض وية. شريك العمر
خلصت الحنة وبدوا الناس يطلعون واني واسيل طلعنا سوية من بيت اهل وردة مشينا للشارع العام
حتى نأجر تكسي وبأثناء ما كنا نمشي بالطريق
بدينا نسولف
اني واسيل صديقات من الطفولة ما يوم تفارقنا
هي ساكنة في نفس منطقتنا والوحيدة لامها وابوها
رغم بساطة حياتهم بس اهلها مدلليها
هي اختي الي ما ولدتها امي ومواقفها وياي تثبت ذلك
هي تعرف عني كل شي واني بالمقابل بير اسرارها
اسيل .. لا تهتمين لكلام البنات هن بطرانات عليهن بالظاهر لاتخلين كلامهم يأثر عليج
.. لا ابدا مستحيل اخليهم يأثرون علية اصلاً اني اتعودت على انتقادات الناس
.. اي صدك نور امي ذاك اليوم سألتني عليج وكالت عزميها على الغدا يوم الخميس مو ما تجين
اتعلمت على ام اسيل من بعد وفاة امي بين كل فترة تكول لاسيل حتى اروح اتغدا يمهم وتعرف اخباري
اسيل .. ها هسة شنو كلتي تجين لو لا
.. ان شاء الله اذا ماعندي شي ببيت خالة ام امير
اجيكم على الغدة بعد انتي تعرفين خطية ام امير مريضة
ويظل بالي عندها
اسيل ابتسمت بمعرفة
.. انتي متأكدة خالة ام امير هي الي شاغلة بالج لو امير ابن الخالة
خدودي صاروا نار وهربت بنظراتي من عندها
.. هههههههه لج هاي شنو انتي الظاهر واصلة مرحلة
وحالتج متأزمة يعني بعدنا ما كلنا شي وانتي انخبصتي
.. اهوووو اسيل عفية لا تحرجيني والله استحي
.. فديت الي يستحون والله بنتي نور كبرت وصارت تخجل
هزيت راسي بعجز وغيرت الموضوع
.. هسة عوفج مني وتعالي احجيلي شنو سويتي بقصة ابن عمج الي ناهي عليج
.. هههههه لا تذكريني غير بابا ذاك اليوم حرك الدنيا عرس عليهم
كللهم انا ما اعترف بهاي السوالف
وعمي كله .. هاي سنة الله ورسوله الولد يريد يخطب بنتك
وبابا جاوبه .. ترة اكو فرق كبير بالموضوع
بين الولد يطلب ايد البنية. عن الولد ينهى على البنية
عمي كله .. وشنو الفرق
بابا كله.. اذا ابنك طالب ايد بنتي مثل الخلق والعالم
فهي معناها لها الحرية توافق او ترفض
بس اذا انت جاي وتكلي ابني ناهي على بنتك
هنا بنتي راح تكون مثل السبية مالها حق توافق او ترفض وانا سألت بنتي وهي رفضت الزواج من ابنك
نور لو تشوفين عمو شسوة حرك الدنيا على بابا
بس فديته لبابا شلون رده رد احس شفى غليلي بيهم
سالتها بلهفة اريد اعرف
. شنو شنو كلهم
.. كلهم انا امشي وية شرع الله وسنة نبيه والدين يكول
لا اكراه بالزواج اما اذا تردون حكم العشيرة الي اغلب قوانينها مستمديها من البربرية قانون غابات
فانا اعتذر انا اريد ازوج بنتي لواحد يعرف حق الله ويخاف ربه
وانتوا بموقفكم هذا ثبتوا انتوا ماعندكم مخافة الله
وبيومها عمي واولاده طلعوا زعلانين وبتوعدون
الي ولبابا. لان رفضناهم
.. هذولي شلون يفكرون غير مرضى ،الله يحفظلج ابوج خلصج منهم
.. اي والله لولا بابا حطلهم حد كان الله العالم شنو يسوون بينا
نهت كلامها وكالت .. اي تعالي احجيلي مو تتهربين
امير ما صارحج بحبه
.. لا بعده ما صارحني بس تدرين شنو انا احس من خلال كلامه هو وخالة ام امير يلمحولي ، شكلهم يردون يجسون نبضي مترددين
اسيل بأمل .. يااااي شكد حلو هم ما يدرون ان صاحبة
الشأن ذايبة ومنتهية بحب استاذها. اموري فديته
خزرتها وحجيت .. هييي انتي انا اكول فديته اي
بس انتي ماتكولين فديته اموري بس وحدة لها الحق تفديه وتدلعه الي هي اني
.. هلا وهلا هاي شنو نور طالعة عينج وتتعاركين على الحب هذا وهو بعده ما مصارحج
بعتي صديقة الطفولة زين تعاي من يصارحج بحبه شتسوين يمكن تنطيني دفرة وتحطين على كصتي ختم احمر وتصدريني خارج العراق
.. ههههههههه لا شدعوة مو لهاي الدرجة كافي عليج بس الدفرة اني مو لهاي الدرجة عنيفة
.. لا والله كريمة والنعم منج
كنا نمشي ونضحك
.. اي صدك قبل لا انسى شخبار صابر وياج
امي دومها تسألني عنج وتكلي اتصلي عليها خلي احجي وياها
ابتسمت .. ربي ما يحرمني من حنانها وحرصها علية
اتصلت علية البارحة وهم كعدت تسألني خطية خايفة علية
اسيل .. نور تتذكرين من اتوفت امج وانتي جنتي بعمر ال١٣ سنة صادف كان عندج امتحانات والله مرت ايام
كلما اتذكر حالج جسمي يقشعر
.. اووف شلون ما اتذكر ليش هو منو يكدر ينسى
والله يخليلي امج علمتني
اتذكر شلون اجيتكم للبيت خايفة
.. اي ماكدرت اشوفج بهذا الموقف وما اتدخل
كنا نتكلم اني واسيل واخذتني الذكريات ورجعتني لذاك المكان وذيج السنين
كنت بعمر ال١٣ سنة صادف كان نفس السنة امي توفت بيها عشت عند بيت خالتي سناء لان ماعندي غيرها
تتكفلني
كنت بعدني صغيرة وما افتهم اي شي اتعلمت على رعاية امي الي ودالالها ماما رغم حياتنا البسيطة كانت
تحاول توفرلي كولشي اطلبه بحيث كانت
تقصر على نفسها وتشتريلي ملابس العيد ومستلزمات المدرسة والملاعيب
وكل شي اتمناه الكاه كدامي
كانت كل اسبوعين تطلعني لمدينة الالعاب تخليني العب ومايظل بنفسي شي
امي طيبة وحنونة بس مع الاسف الدنيا غدرتها وسرقتها مني بليلة ظلمة
واتحولت حياتي بليلة وضحاها الى كابوس اسود
انقلبت كل الموازين
وبأول يوم دخلت بي لبيت خالة سناء كانت الوجوه مگلوبة وثقيلة شكل وجودي ما مرغوب بي
لكن الشي الوحيد الي كان يشفعلي عنطهم ومخليهم متحمليني
راتب ماما بعد وفاتها اي لان ماما كانت موظفة بشركة حكومية
كنت بنية جداً طبيعية واتصرف على سجيتي بدون قيود مثلما متعودة اتصرف ببيتنا وية ماما وبلغت وصرت مثل البنات تجيني الشهرية
خالتي كانت ما مهتمة ولا كلفت نفسها تعلمني شنو المطلوب مني.
ومن خلال الكلام الي اسمعه من اسيل صديقتي اطبقه على نفسي
وصادف مع وصولي لسن البلوغ بدت تظهر معالم جسمي الي كانت بارزة جداً
وصارت تضايقني من اشوف نظرات الي حولي
ما اعرف شنو اسوي وشلون احفظ نفسي كنت اتمنى روحي
ولد ولا هذا الشعور الجديد الي احسه واعاني منه
اتمنيت ابقى طفلة لان من وصلت لسن البلوغ لاحظت ان اذا اتكلمت او اتحركت اي حركة راح يفهموها غلط
اي بس اني بعدني طفلة بجسد امراءة شنو ذنبي
بس مع الاسف واحد من الاشخاص الي فهم تصرفاتي البريئة بصورة خاطئة
زوج خالتي صابر
تخيل كلامي ولعبي وية بناته ودلعي انها كلها ايحاءات
له او هو عقله قذر ونظرته حقيرة أتجاهي
كانت نظرات عيونه وتصرفاته وياي مو مريحة وتخوف الى ان اجة اليوم الي بدأ يتحرش بية و مرة من المرات
طلعت خالتي من البيت وبناتها وبقيت اني نايمة
فزيت من النوم على حركة غريبة يم رجلية
شهكت برعب من استوعبت وجود صابر رجل خالتي
يتلمس برجلية
انطيته دفرة على وجهه وهو كمز من حركتي عباله كنت نايمة وهو ماخذ راحته
بالبداية صار يتوسلي ان ما احجي الصار
بس اني بقيت اعيط بصوت عالي واغلط عليه وابجي
بنفس الوقت هو اقترب مني وكعد يهددني اذا اتكلمت
يعذبني ويكسرني ومحد يخلصني منه
ومن بعدها اني بقيت ملتزمة بالسكوت خوفاً منه
بس هو ما بطل كان يستغل اي فرصة حتى يلمس جسمي او يلمحلي
ويوم عن يوم يزيد خوفي و انقطعت شهيتي عن الاكل واتمرضت وكمت اتقيء يمكن بوقتها صارت بية حالة نفسية
ويوم بالمدرسة كانت اسيل صديقتي
كلش علاقتي بيها قوية وكانت تحجيلي كل اسرارها عن
حب الطفولة واشياءها
واني هم بديت احجيلها عن موقف صابر وياي وتحرشه بية اسيل بقت تباوع علية مصدومة وما جاوبتني اي شي غير بس كلمة ديري بالج منه هذا خاف يسوي بيج شي
اتذكر يوم ثاني من داومت بالمدرسة مثل كل يوم
اسيل بس شافتني اجتني تركض عبالك كانت تنتظرني
اقتربت مني وشاورتني
.. نور ماما تكول اليوم من تطلعون من المدرسة جيبي صديقتج نور وتعالي لبيتنا
كان بيت اسيل بنفس طريقي مرات امر عليهم واشرب ماي بطريقي واوصل المشي للبيت
اتذكر بيومها رحت وية اسيل لبيتهم استقبلتني امها
وكعدتني بالاستقبال
كنت جداً حذرة منها ما اعرف شنو سبب طلبها وشنو تريد مني
كانت تباوع علية بنظرات كلها عطف وحنان
.. شوفي ماما نور اني عرفت كل شي عن موضوعج
البارحة اسيل اجتي وسولفتلي عن موقف زوج خالتج وياج
وصارت ام اسيل تسألني عدة اسئلة عن حياتي وية بيت خالتي واني اجاوبها
كنت كولش مستحية وخجلانة منها
.. خالة لا تستحين اعتبريني مثل امج الله يرحمها
اسيل.. ماما اني كلت لنور تروح تشتكي عليه يم خالتها
وتحجيلها على زوجها
جاوبتها امها
.. لا ماما هذا مو حل بالعكس احتمال اذا كالتلها الامور راح تتعقد اكثر
اسيل.. ليش ماما تتعقد
.. اي منو يكول ان خالتها راح تصدك بكلام نور الطفلة المراهقة وتكذب زوجها ابو اطفالها
جاوبتها.. اي خالة كلامج صحيح خصوصاً خالتي كلش تحب زوجها مجنونة بي اكيد ما راح تصدكني اذا حجيت وهو راح يكذبني كدامها ومو بعيد يضربوني ويأذوني
.. شفتي شلون اذن خلينا بالمهم
شوفي خالة اريدج تسمعيني زين وتحطين هذا كلامي
مثل الترجية بأذنج انتي بنية كبرتي ونضجتي وحسب كلامج رجل خالتج قبل ما كان منتبه عليج بس من بلغتي وبديتي تنضجين هو اتغيرت نظراته الج صار يقترب منج
.. اي صحيح
.. وبما ان انتي وحيدة وما عندج لا ناصر ولا معين
ولا اني الي الحق اتدخل بحياتكم ما اكدر احميج منهم
لذلك اريدج تسمعين كلامي وتطبقيه بالحرف الواحد لان الوحيد الي يكدر يحميج من رجل خالتج هو رب العالمين وانتي
.. شلون شسوي يعتي ما اكدر عليه هو اكبر مني واقوى مني شلون احمي نفسي
.. انا اكلج شلون
بنتي انتي كبرتي ومعالم جسمج ما شاء الله برزت فأول شي تسوينه تحاولين تلبسين ملابس فضفاضة عريضة ما عليها العين وما تفصل تقاسيم جسمج
وثاني شي اريدج تكونين فطنة وحذرة بكلشي
وصارت خالة تم اسيل تنطيني التعليمات الي راح تساعدني وتحميني من صابر
وكملت كلامها
.. وما اوصيج حتى من تدخلين للحمام اريد تتأكدين من القفل زين وتسديه وراج
وديري بالج تنامين لوحدج وين ينامون بنات خالتج انتي نامي بينهم احسن حتى يخاف
ولازم تلبسين حجاب حتى بعد ميشوف شعرج
وبهيج شي انتي تصونين نفسج من زوج خالتج ومن اي واحد ثاني لحد ماتكبرين وتعرفين تدافعين عن نفسج
من يومها بقت نصائح ام اسيل
مثل الترجية معلكة بأذني وفعلاً من طبقت نصاحئها
وهملت تعديل شكلي مثلما كنت قبل احب اتجمل مثل اي بنية والفت الانتباه كل هاي الامور بطلتها
واتذكر كامت تشتريلي صدرية للصدر حتى تحمي
وما يهتز ويلفت الانتباه ام اسيل هواي فادتني بفترة مراهقتي كنت محتاجة ناصئحها بهيج عمر
وعلمتني ان انتبه على حركاتي وكعدتي وكومتي ما ادنك كدام اي رجال وانتبه على كلامي وصوتي
ما اطلعه ومن احجي يكون كلامي بجدية كانت مثل المدرسة الي واني اتعلم منها
خطية صارت تشتريلي ملابس داخلية لتحت الدشداشة تكلي حتى ما تلالي بضوة الشمس ويبين جسمج
كل كلام ام اسيل طبقته بالحرف الواحد وفعلاً جاب نتيجة وصار وكدرت ابعد نظرات صابر تلقائياً عني ، ما ينتبه علية ولا يشوفني
اصلاً صرت بنظره ولاشي مثل الحايط
اسمعه يكول لخالة سناء هاي بنت اختج الخرسة مثل ان حضر لا يعد وان غاب لا يفتقد
وهو المطلوب انا هذا هدفي كل البيت صاروا يسموني الخرسة لان قليلة الكلام. وما اتفاعل وياهم
عبالهم اني مطفية بس همة ما يعرفون شنو سبب تحفظي وصار هذا الحال قاعدتي بالحياة
كنت اسمع مشاكل البنات والتحرشات الي يتعرضولها بالسوق او بالمدرسة او بالكلية او بأي مكان
والحال الي طبقته وية صابر وجاب نتيجة طبقته بحياتي
الثانية وصدك كنت مرتاحة وراسي بارد
صحيح خسرت هواي جوانب من حياتي ان البس واكشخ واتجمل حالي حال البنات بس كل هاي الاشياء ما تسوى شي مقابل حفاظي على شرفي ويجنبني كلام الناس لان البنات عندهم احد يحميهم بس اني ما عندي احد يحميني غير بس الله ونفسي
ومن يومها صارت ام اسيل صاحبة فضل علية ولولا هي كان الله العالم اني شنو حالي ومو بعيد اضيع بس ربي ما يترك عبده
لابد وان يسخر الناس لبعضها رحمته وسعت كل شيء
قطع علية ذكرياتي صوت اسيل
.. شنو وين صفنتي الظاهر الكلام هيج المواجع عندج
.. اي والله اتذكرت ايامي السودة الله لايعودها
.. المهم عوفج من هذا الحجي وكليلي شنو هاي التطورات انتي واستاذ امير والله فرحتلج من كلتي
صاير يسولف وياج ، شكل الاخ ناوي عليج
والله امه داعيتله اذا صرتي من نصيبه وين يلكة هيج جوهرة خام
ابتسمت على كلامها وانا كلي امل
..............
ريم
بعد عملية استئصال الورم لعمو مؤيد
الدكتور كال
.. الحاج مؤيد لازم يخضع لجلسات علاج كيميائي
وهاي الخطوة لا بد منها لان ضروري تتبع كل عملية استئصال ورم سرطاني جلسات كيميائي
ومن بعدها عمو دخل مرحلة ثانية من العلاج وهاي المرحلة كانت جداً صعبة على عمو وعلية
لان كنت وية عمو بكل لحظة من علاجه تقريباً
وانا وعمة اسيا كنا حاجزين فندق قريب عالمستشفى
وعمو بقى بالمستشفى
سكنت المستشفى اروح للفندق فقط للنوم وتبديل الملابس
كنت شاهدة على كل مراحل علاج عمو
اكتفي اراقبه من برة الغرفه من الزجاج الخاجي
ومرات الدكتور يوافق ادخل على عمو بعدما اخذ احتياطاتي والبس الزي الي يلبسونه لمرافق المريض كأحتياط وقائي حتى عمو لياخذ اي مكروب او فايروس
وخطية عمو بكل جلسة علاج كانت قوته تضعف
وتوالت الجلسات وصار عمو كلش هزيل
وشعره بدة يتساقط ووجهه شحب لونه بالزايد
هذا كله كان يصير كدام عيوني
واني ما بيدي شي اسوي حتى اساعده او اخفف عنه الالم ماعندي غير بس الدعاء والترقب وصارت
مراقبة ذبول عمو اشبه بمراقبة تساقط اوراق وردة وحدة ورة الثانية وتبدي تذبل لحد ما تيبس
وبنفس الوقت صحتي انا هم اخذت بالنزول ارفض الاكل وارفض الراحة بقيت متلازمة وية عمو
بكل ضني اذا اتركه هو يصير بي شي
وبدأ عمو يسترد صحته وطول هاي الفترة كان على اتصال دائم وية ابو سيف حتى يعرف الاخبار عن اولاده
انهى اتصاله وباوع علية وشافني شلون ضعفانة وهزيله
.. عمو ريم هاي ليش وجهج صاير اصفر
صادف كان الدكتور المشرف على حالة عمو موجود
من عمو سألني
الدكتور باوع على وجهي وابتسم وكال
.. لا تخاف عليها شكل بنتك تمر بحالة نفسية بسسب حالتك الصحية كانت دائما متواجدة هنا بالقرب منك
طول فترة علاجك شكلها جداً متعلقة بيك
باوع علية عمو بنظرات كلها خوف وصار يفكر
بعدها انتظر الدكتور يمكمل اجراءاته
واني واكفة يمهم اباوع للممرضة شنو تسوي ارقب وجه عمو
صارت عيونه بعيوني ولاحظ القلق
وكال.. عمو ريم ممكن تروحين لعمتج اسيا تجي
كوليلها ضروري تجي لان جداً محتاجلها
هزيت راسي بموافقة
.. صار عمو هسة اروح بس انتظر يخلص الدكتور فحصه وبعدها اروح
ما اكدر اتركه لوحده
لكن عمو اصر
.. لا هسة اريدها تجي لا تنتظرين الدكتور قابل اني طفل وانتي واكفة فوك راسي
يالله عمو الله يوفقج روحي بلغي عمتج تجي بسرعة
بعدها تركته وطلعت برة الغرفة ودورت على عمة اسيا ماكو ما موجودة برة يمكن رجعت للفندق لان هي بسرعة تتعب مرة كبيرة وصاحبة سكر
طلعت نقالي واتصلت عليها. يدك ومحد يرد
بقيت اتصل عليها وماكو ضل بالي وين راحت
دقايق ورن نقالي عمة اسيا تتصل
جاوبتها وكان صوتها ثقيل من اثر النوم
الحمدلله كانت نايمة ولا غير شي
بعدها بلغتها ان عمو يريدها تجي للمستشفى ضروري
انهيت الاتصال ورجعت للغرفة يم عمو مرة ثانية
لكيت عمو مبتسم والدكتور يحجي وياه
.. عمو اتصلت على عمة وهسة هي راح تجي
.. الله يبارك بيج حبيبة عمج
كان يحجي وعيونه تلمع
بعدها طلع الدكتور والممرضة وبقينا اني وعمو نسولف ونحجي
كان اغلب كلامه امنيات ووعود اذا كمل علاجه وربي كتبله عمر جديد وعدني انه راح يفتح صفحة جديدة
من حياته
وصار يعددلي شنو راح يسوي
..اول شي اسوي اجمع اولادي يمي وابذل
كل جهدي حتى يسامحوني لو اعرف
اعتصم يم ابواب بيوتهم اطلب الغفران
واحصل رضاهم ما اتردد ولا لحظة
تصدگين عمو ريم لمحة رضى من عيونهم تكفيني
اعيش طول عمري مرتاح واموت انا مرتاح
وبنتي نور اعيشها مثل الاميرة حتى لو ترفضني
وجلال ومهيمن راح ابنيلهم احلى مستقبل
بس كون الله يكتبلي عمر
اجتي عمة اسيا وكعدت يمه وصار يحجي وياها بأيامهم
الماضية خطية عمو شكله ضاج من كعدتي وياه ويريد
يتسامر وية شخص بعمره
وبعد اسبوع فاجئني عمو بدعوة صديقه اللبناني ابو جورج هو وعائلته المتكونة من بنته وزوجته وابنه جورج البالغ من العمر ٩ سنوات
وطلب من ام جورج ان تخلصه مني وتاخذني
وتطلعني
مؤيد.. اترجاج تخلصيني من هاي المفعوصه
ام جورج كسبي بية حسنة واخذيها لشارع الحمرا
اريد تسويلها اعادة تصنيع صالون ملابس ماركات
تطلعيها تغير جو لان وردتي ذبلت لان ما متعودة
على اجواء المستشفى
جاوبته ام جورج كان اسمها مايا
.. ولو حاج مؤيد انت بتمون
ابو جورج .. لتاكل هم بنت خييك انا فرجييها بيروت
حتشوف كيف بتنبسط معنا
وفعلاً اخذوني عائلة ابو جورج واني معترضة واباوع لعمو
وهو يضحك وكال
.. انتي تعرفيني كلش زين انا رجال احب الجمال وانتي بديتي تذبلين فأعتبري روحج تسوين هاي الاشياء لخاطري لان ضحكتج وحيويتج راح تمدني بالطاقة الايجابية
ابتسمت على كلامه وتشجيعه
وفرحت اكثر من سمعت بالاخبار الجديدة من الدكتور
عن صحة عمو الي بدت تتحسن وهالشي زاد فرحتي وزرع الامل بگلبي
باوعت لعمو وكلتله
وبهاي المناسبة راح اشتري هدايا لنور ولمهيمن ولجلال
حتى لو ما اعرف شنو يحبون او يفضلون
بس اتوقع راح تسعدهم الهديه
لمعت عيونه وگال
.. ما اعرف ليش عندي احساس ان انتي الي راح تجمعين شمل اولادي
.. اشرتله على گلبي وعيوني وراح تشوف بعينك بأذن الله راح ابذل ما بوسعي حتى اجمعهم الك وتفرح بيهم
........
جلال
بعدما خلصنا تصليح السيارات المترفة
والي كانت عطلاتها بسيطة وتافهة واصلا اغلبهن ما بيهن اي عطل
بعدها ابو بهاء طلع وسلم علينا واثنى على عملنا ووعدنا ان نرجعلهم مرة الثانية
ابو بهاء.. انا قلبي اطمئن لكم وان شاء الله سوف يكون بيننا تعامل في الايام القادمة اذا بقيتم على نفس الحماس والهمة سوف تكونون من المحظوظين
وامر رجاله وكال
.. عبدالله لا تنسى ان تكرم ضيوفنا وتقوم بالواجب
همس سلوان بعدما تركونا
.. هذا عود ليش يحجي هشكل باللغة العربية الفصحى
شكله كأنه واحد عنده امتحان قواعد
جاوبته .. يمكن احنا دخلنا بالغلط بين قبيلة قريش
عايز بس يطلع سيفه ويصيح
((ويحكم ياقوم لما لا تدخلون خسئتم عليكم اللحمه ))
.. لك يا لحمه شنو خاف جوعان اللعنة خرب هبل
وبقينا انا وسلوان ما مفتهمين شي من كلامه وشنو كان يقصد
يعني ليش لهاي الدرجة مهتمين بينا واحنا خلك عمال تصليح سيارات
احنا شنو دخلنا بيهم بس الظاهر عليهم من الناس المحتارين وين يصرفون فلوسهم
مبين عليهم البدخ والترف
بأثناء استراحتنا انا وسلوان صرنا نستطلع المكان والمزرعة بس تحت مراقبتهم واذا ماكوا حرس حولنا كانت اكو كاميرات مراقبة شدعوة هالتشديد بالحراسة
بعدها شفنا مزرعة خيول كبيرة وخيل تجنن
فتحنا حلكنا منبهرين انا وسلوان طلعنا من المزرعة بنهاية اليوم وعلامات الاستفهام فوك راسنا
والاسئلة على طرف لساني ولسانه بس منكدر نحجي
بيناتنا نتوخى الحذر كان كلامنا فقط بالعيون نتواصل
كنا منتظرين شوكت نطلع من هذا المكان واول ما خلصنا شغلنا
اجوي الشباب محملين بصناديق فواكه وعلب حلويات وانطوا لكل واحد بينا صدوق فواكه وباكيت حلويات
بيها من السما وبقلاوة.
بعدها اخذونا بنفس السيارات ورجعتنا على نفس الطريق المسمى بطريق الموت
وقريب على مكان الي نزلنا يمه ابو التكسي
سلمنا عليهم وشكرناهم على هديتهم
ونزلنا ومشينا لاول الطريق واحنا شايلين صناديق الفواكه والحلويات وهم بقوا ينتظرونا يراقبونا من بعيد
لحدما اجرنا تكسي وركبنا يالله تحركوا
التفتنا انا وسلوان نريد نتاكد
وبساعتها انطلقنا بالكلام
سلوان.. جلال هل تفكر بما افكر
.. وكيف لي ان افكر بما تفكر هل اصبحنا نتكلم مثلهم ياهذا
وصرنا نضحك ونصنف على ابو بهاء واحنا غافلين
سلوان.. اي بس صدك لا لكينا قاعدة عسكرية ولا شفنا ضباط
صفنت بكلامه .. هذا السؤال جوابه عند الاسطى توفيق
باجر اول شي اسويه اطالب الاسطى توفيق بالاجابة
وصلت لبيت خالي واستقبلوني الجهال وفرحوا بالفواكه والحلويات ابتسمت على شكلهم
كعدت بالگاع واتكأت عالحايط بتعب
اجوي بنات خالي التوأم رند ورنين يصير عمرهن
ثلاث سنوات كعدوا يمي فرحانات ونزعوني حذائي والجواريب وعيونهن تلمع وخدودهن حمر
وشعرهن مهوس اشقر
طلعت من جيبي لكل وحدة بيهن ربع دينار
اخذنها وطارن من الفرح
هذني الثنين اموت عليهن الهن معزة خاصة يجننوني بحركاتهم وشقاوتهن
مرات يضمن حذائي وانا ابقى ادور عليه وهن الملعونات يدورن وياي على الحذاء الضايع
ومن اعلن جائزة للي يلكة حذائي يروحن يركضن بسرعة ويجيبون كل وحدة فردة حذاء
اعرف بيهن هن ورة اختفاء الحذاء بس انا اجاريهم
باللعبة وهنة فرحانات بنصرهن البسيط
بعدما نزعني الحذاء والجواريب حذرتهن
.. عفية ببناتي رنين ورند مو تنسون تحطون الحذاء عالدرج اريد من اكعد الصبح الگاه موجود
رنين.. صار جلال
رند.. من عيوني جلال
اجتي مرت خالي
ام مصطفى.. خالة جلال اصبلك عشا
.. لا خالة تسلم ايديك انا متعشي
ام مصطفى.. خالك طلع قبل شوية يبحث عليك
وراح لبيت سلوان يسأل
خالي رغم قسوته يضوج من اتأخر عالبيت
وما يرتاح الا من ارجع للبيت
يعصب ويظل يهدد ويكلي البيت مو حلل وله كبير تحترمه وترجع من وكت للبيت
اولادي يشوفونك صايع ويكعدون يقلدونك
رحت راسا دخلت للغرفة وحطيتلي فراش ونمت على وجهي حتى بدون ما اغير ملابسي او اسبح
يوم ثاني
بالورشة كنت انتظر جية الاسطى
وسلوان وصل وراي. وبعدها اجة صاحبنا مثنى
واول ما شافنا كال
.. ولكم تعالوا كلولي انتوا وين رحتوا
تدرون انا ليش رجعت وية ابو التكسي
.. ليش
.. لان انتبهت عالطريق الي اخذنا بي السايق مو نفسه الطريق الي وصفه الي اخوي
ومن ابو التكسي كال هذا طريق الموت خفت لان اخوي ولا مرة ذاكر هيج اسم طريق يوصل لقاعدته العسكرية لذلك انا خفت من السايق ومن الموضوع كله
لان انتبهت للسايق يعرف كلشي ويعرف شنو ورة هذا الطريق
اي صدك انتوا وين رحتوا
سلوان فتح حلكه حتى يحجي له
بس انا سبقته وكلت للولد
.. ماكو ما رحنا لاي مكان رحنا وما لكينا شي ورجعنا بدربنا
سلوان عقد حواجبه مستغرب من جوابي للولد
............
ريم
بعدما طلعت واتونست احس مثل العصفور الي كان بالقفص وطلقوا سراحه
هذا حالي كانت عندي لهفة للتسوق ما متعودة اغيب
عن الشوبنگ كل هاي الفترة
بعدها اخذوني لصالون تجميل سويت عناية لاظافري
بدكير ومانكير
وصبغت شعري عسلي وعدلت موديل القصة
وما خليت محل يعتب علية بشارع الحمرة
واشتريت هدايا لاولاد عمي ولكل واحد بيهم اخذتله خمس هدايا لان ما اعرف شنو اطباعهم وشنو يفضلون
وصرت اتخيل روحي شلون اصير صديقة نور
الله ياربي شوكت يجي هذا اليوم والتقي بيهم شنو
راح تكون ردت فعلهم بتجاهي
اوووف صار يوم عن يوم تكبر اللهفة بگلبي حتى التقي بيهم
خلصنا تسوق ونزلت عالفندق وحطيت الغراض بغرفتي ورحت مباشرتاً للمستشفى دخلت على عمو مؤيد لكيته فرحان والضحكة مالية وجهه
.. يارب دوم الضحكة
مؤيد.. عمو ريم ابشرج ابو سيف لكة اماكن اولادي
يعني جهزي نفسج راح نرجع للعراق بأقرب فرصة


يتبع.....


لامارا غير متواجد حالياً   رد مع اقتباس
قديم 08-09-19, 05:35 PM   #8

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

#قضية_لم_الشمل
#الكاتبة_نهى
#البارت السادس



مساء الانوار والخير عليكم يا احبتي المتابعين
نور
مثل كل يوم ببيت ام امير
ابدي يومي بالتنظيف وغسل الهدوم
بالحقيقة بيتهم ما يتعب نظيف لان ما عندهم اطفال يوسخون
اغلب شغلي يكون مع ام امير لان هي تحتاج احد يساعدها من تسبح
او تتحرك بالبيت ومن تريد تطلع للحديقة تتشمس
اما باقي ملحقات البيت فتكون تقريباً نظيفة بس يحتاجلها تهوية وتنظيف الغبار عنها
واول ما انظف ابدي بغرفة الحبيب
دخلت لغرفة امير وبديت انظفها واتذكرت هديته البارحة يمة فديته
لحد هسة گلبي يرجف كلما اتذكر شلون دخل للمطبخ وبيده كيس وكال
.. كنت طالع للمول واتذكرت سرى اختي وصتني على
شال لونه فيروزي واثناء ما كنت اشتري وكعت عيني على الملابس
تذكرتج جيتي على بالي وكلت خلي اشتري لنور خليها هي هم تفرح
اخذت منه الكيس واني احس بروحي راح اذوب من الخجل
لساني ثكل وانعقد حتى ما اعرف شنو اجاوبه
.. اااااشكراً استاذ
.. بطلي كلمة استاذ انتي صرتي وحدة من عدنا يعني
واكفة تصيحيني استاذ
ابتسمت بوجهه وبقيت بس ارمش بعيوني
فتحت الكيس وباوعت لداخلها هاي شنو فستان مال مناسبات وشال
رفعت راسي وسألته متفاجئة من اختياره لهاي الملابس وشنو مناسبة الهدية
كنت مستغربة وفرحانة بنفس الوقت وابتسمت واني اسأله
.. هاي وين البسهم
لمعت عيونه بفرح وكال
.. ان شاء الله عن قريب
راح تلبسيهم بمناسبة سعيدة تخصنا
يمة هو كال هيج وانا رحت وانصهرت
احتاريت وين اضم روحي وهو يباوع علية و خربان ضحك على شكلي
جاوبته واني ارجع الاغراض للكيس
.. تدري انت فاجئتني بهديتك وبكلامك هذا
ابتسم بفرحة وكال
.. منا ورايح اتعودي على المفاجئات
بس انتي ادعيلي ربي ينولني الي ببالي وساعتها راح اشبعج هدايا
رفعت ايدية اثنينهم ادعي له
.. يارب يحقق احلامك وينولك مرادك
.. اللهم امين
خلصت شغلي ورحت لغرفة الدكتورة سرى
كان تنظيفها شوية معقد
لان كتبها وتقاريرها وهوسة المكتبة مالتها متحب احد يلمسهم
تكول ما اريد احد يعدل هوسة المكتبة اخاف يخربط علية النظام ويضيع علية الاول والتالي
لذلك اني اتعلمت عليها صرت انظف كل شي بغرفتها من تنظيف سرير وملابس ومسح وتهوية
الا المكتب مستحيل اقتربله، خط احمر
بعدما خلصت
شغلي فوك ونزلت جوة للبيت وصار الوقت ظهر
ومريت على الهول واني شايلة بيدي سطل التنظيف
كانت ام امير كاعدة بالهول وتحجي بالنقال وية وحدة
اسمعها تكول
.. اي عيني البارحة حجيت وية امير عنها
وكلتله ماما امير والله البنية ذهب مصفى ويتيمة ما تتفوت
وتشوفها كدام عينك كل يوم شلون طيبة
سكتت شوية تسمع الطرف الثاني ورجعت كملت كلامها
.. على الاقل نعرفها ونعرف اخلاقها واني بيني وبينج
حسيت بيها هي هم شكلها مايلة لأمير
.. شنو شلون عرفت هي مبينة من نظرات عيونها
وكلامها وية امير ثبت صحة كلامي
وحتى انتبهت لأمير بدأ يتودد لها وتصرفاته هو الثاني هم تثبت اعجابه بيها بس انتي ادعي له ان شاءالله ربي يتمم عليه
كانت ام امير مستمر تحجي بالنقال
واندك الجرس انتبهت من سرحاني تركت سطل التنظيف ولبست شالي ورحت افتح الباب اكيد هاي الدكتورة سرى وصلت باوعت لساعة المطبخ واني طالعة افتح الباب اي هسة وقت وصولها
فتحت الباب واني مبتسمة
سرى.. هلوووووو نونة شلونج
.. هلا بيج دكتورتنا
دخلت سرى واتبعتها بنت خالها زهراء وياها بكلية الطب اتعودت كل يوم تنزل تسلم على خالتها وترجع لبيتهم القريب
زهراء.. هلوووو نونة شلونج
.. هلووو زهورة
.. عيني عاااااشت ايدج على الكليجة ماما وبابا اكلوها
وسألوني عليها منين هاي الكليجة
وطبعاً كلتلهم عليج
.. الف عافية اذا تردون اسويلكم بعد وجبة
سحبتها سرى من ايدها تدخلها لداخل البيت
سرى.. نونة عوفج منها هاي وحدة جوعية لا تنطيها مجال خلي الكليجة بس الي
دخلوا للبيت وراحت سلمت على خالتها مثل كل يوم واني التهيت اشوف شغلي بالمطبخ بديت احمي الاكل
وبعد خمس دقايق طلعت زهراء وسرى سدت وراها
الباب اتعودت على هالمنظر بين فترة وفترة زهراء تنزل تسلم على خالتها
وكلما اشوفهن اتذكر ايام الكلية واحن لها
صبيتلهم غدا فاجئتني ام امير بطلبها
وكالت
.. خالة نور تعالي كعدي اتغدي ويانا
باوعتلها مستغربة
.. لا اني بعدين اكل انتوا اخذوا راحتكم
سرى.. اكول بلا دلع شو صبيلج اكل وتعالي اكلي ويانة عالواهس
رحت طلعت ماعون وصبيتلي وكعدت وياهم على ميز الطعام
وبديت اكل وسرى تسولف لامها على كليتها والوضع
وكالت زهراء بنت خالتي اتقدملها واحد بالكلية
وام امير .. ومنو هذا
سرى.. بالحقيقة لا اني ولا هي نعرفه للولد بس كان مبين من شكله شاب محترم
كانت سرى تحجي ودخل امير احلامي
سلم علينا وباس راس امه
واني بسرعة كمت من مكاني حتى اصبله غدا لان هو متعود اول ما يوصل يبدل ملابسه ويتغدا
دفعت الكرسي حتى انهض من مكاني
بس وقفني صوته
.. رجعي كعدي بمكانج كملي اكلج انا هسة ابدل ملابسي واصب لنفسي اكل
.. لا عادي اني ما عندي شي
.. كعدي كملي اكلج متشوفين روحج صايرة جنج
عصفور صغير ياعيني انتي لازم تاكلين
حتى يرهم عليج الفستان
دنكت راسي يمة كلامه هواي علية انا گلبي مو حمل هيج عسل والله اخاف يرتفع عندي السكر من حلاوة كلماته وياي
بعدما خلصنا الغدة صعد امير فوك لغرفته حتى ينام وسرى نفس الشي وخالة ام امير بقت تشرب جاي ما بعد وجبة الغدة هاي القاعدة عندها ثابتة
كانت تشرب جاي يمي بالمطبخ واني اغسل الصحون
.. حبيبتي نور عفية باجر تعالي من وقت
.. شنو خالة عندج عزيمة
.. لا خالة بس اريدج تطلعين الاستقبال والهول وتنظفيهم تنظيف زين لان عن قريب عندنا مناسبة فرح
انتفض گلبي بين ظلوعي
.. راح نفرح بمنو ان شاء الله
.. عن قريب راح تعرفين خليها مفاجئة الج
من تصير راح تكونين اول وحدة تعرف اكيد
فما اوصيج اريدج تجهزين نفسج من هسة
اريد كون كلشي جاهز لان ما بقى شي على فرحتنا
هي كالت هاي الكلمات وانا صرت مثل الطير الي فردوا جناحه وكالوله طير انت حر
........
جلال
كنت اشتغل واحوم بالورشة انتظر على نار وصول الاسطى
وسلوان يشتغل وعينه علية
واول ما وصل الاسطى گبل رحت عليه
شافني وابتسم
.. هلا والله بجلال قربان شخبارك
.. بخير استاذي ما دامك بخير
.. والله ان شاء الله بخير ومنا ورايح اتوقع مني كل الخير
.. اي استاذي على طاري الخير مو شكلك نسيت
تكللنا شي مهم عن الصار
.. وشنو هالشي المهم
.. اسأل نفسك
اقترب سلوان من يمنا وكال
.. استاذي البارحة من كلتلنا راح ترحون لمعسكر
وتصلحون سيارات اشو ما شفنا اي شي من الي كلت عليه
ومنو هذولي الناس الي رحنا عندهم
ابتسم الاسطى .. هسة انتوا شنو دخلكم بيهم تريدون تتعرفون عليهم راح تناسبوهم
رزق وجايكم بعد ضباط او مو ضباط هاي شي مو مهم
اهم شي عندي انتوا عجبتوا ابو بهاء
سألته.. بشنو عجبناه ليش هو احنا شنو سويناحتى نعجبه
لايكون عبالك صدكنا قصة التصليح
باينه مثل عين الشمس كلها كلاوات وكذب
ماشفنا اي عطل بالسيارات
والبارحة كضيناها كلها نغسلها ونلمعها لان ماعدنا شي نسوي
ورجعنا واحنا ما افتهمنا كل شي
.. لك بابا جلال انت ليش تصير غبي
هذولي ناس الله ناعم عليهم من خيراته
وهذا ابو بهاء فهمني كال احتاج مصلحين يسوون ادامة للسيارات والمكائن
انتوا البارحة من رحتوا يمهم شفتوا اليات ومكائن
سلوان جاوبه .. اي شفنا هواي سكراب عندهم حتى شكلهم متناقض وية مكان وجودهم يعتي مزرعة تشبه الجنة وسيارات اخر موديل وكلها فخمة
وفجاءة تشوف سكراب وخردة خلف ساحة القصر استغربنا
الاسطى.. هسة انتوا ليش تسألون هاي رزق وجايكم
انتوا ليش ما تستغلون الفرصة
اي صدك ذكرتوني تعالوا اخذوا يوميتكم
كمل كلامه وهو يتوجه للمكتب مالته وكعد على الكرسي وطلع مفتاح من جيبه وفتح المجر وطلع رزمتين فلوس
وشمرهم عالمكتب بأتجاهنا وكال وهو مبتسم وعيونه تلمع بفخر المتفضل علينا
..هاي كل واحد بيكم رزمة
باوعنا انا وسلوان على الفلوس متعجبين
سألته.. هاي شنو الفلوس
جاوبني .. هاي يوميتكم مالت البارحة مو كلتلكم بس ترحون الكم يومية دبل
اخذنا الفلوس وحسبناها وصدك كانت اضعاف يوميتنا
.. يالله اخذوها وادعولي شفتوا شلون انا اتمنالكم الخير
سلوان بفرحة .. تسلم استاذي كلك خير وبركة
انا عني ما عندي اشكال اذا دزوا علينا مرة اللخ
لان كلبي اتطمن لهم شكلهم ناس طيبين
كان سلوان منطلق بالكلام وانا عيني على الاسطى
.. استاذي انت ما كلتلي هم شنو يردون من عدنا
اختفت ابتسامة الاسطى توفيق وباوع علية بجدية وكال
.. انت صاير هواي تسأل هسة انت شلك غرض انت اهم شي توصلك يوميتك كل يوم بعد مالك دخل بيهم هم منو ليش هيج يدفعون هذا مو شغلك
فلوسهم واحرار بيها عسى مايحركوها
سامع مو من حقك تسأل
.. لا من حقي اسأل عنهم وافتهم شنر الموضوع
لان مو انت الي مشيت على طريق الموت احنا الي مشينا وجازفنا بأرواحنا
نستحق واحد يفهمنا الموضوع شنو
لان احنا مو حيوانات ووتودينا على عمى وجهنا لطريق ولناس غربة ما نعرفهم
سكت .. شوف جلال كثرة اسألتك راح تكلفك هواية واولها باب رزقك وثق بالله انا لوما اتمنالكم الخير كان ما رسلتكم الهم وهمة ناس خيرة وانا سبق وان اتعاملت
وياهم فلا تخافون هذا انا كدامكم صاغ سليم
وكعد الاسطى توفيق يطمنا وبفهمنا شنو المطلوب من عدنا
الي افتهمته انه شغلنا وياهم حسب ماهم يطلبون
يعني تجي ايام ماعندهم تصليح سيارات
احتمال تصلحون مكاين والالات
حسب الحاجة هيج شي وبالحقيقة
انا كنت كلش محتاج
اليومية وخصوصا ان اليومية يمهم تصير اضعاف اليومية الي احصلها من الورشة لذلك انا وسلوان
بعدما تطمنا وافقنا على الشغل وياهم
وفعلاً الايام ثبتت
صحة كلام الاسطى توفيق
واول ما اخذت اليومية وخلصت شغلي بالورشة
مباشرتاً رحت للسوك
واشتريت ملابس لبيت خالي رند ورنين ودانة واسراء وحنوش ومصطفى واحمد كنت اشتري واتخيل فرحتهم واشتريت لي نقال حديث لمس وسلوان كان وياي اشترى لأمه محبس واشتراله نقال حديث
كنا كلش فرحانين
ورجعت للبيت صادف الوقت مغرب
واستقبلوني اولاد خالي كالعادة وطاروا من الفرح بملابس العيد وبدوا البنات يتعاركون على الغراض
انتبهت لخالي كان كاعد على صفحة وزوجته كانت كاعدة بصفه تطبطب على ظهر تواسيه وهو كان حاني راسه على صدره سمعت صوته كان يبجي بحرگة گلب
عقدت حواجبي وتركت الغراض من ايدي وصحت مصطفى مستغرب
.. مصطفى تعال
.. نعم جلال
اشرت بعيوني لمكان خالي
.. شكو شبي خالي يبجي شنو صاير
جاوبني بصوت متأثر.. مو اليوم قتلوا عمو ناجي صاحب بابا
.. شلون!!!! منو قتله ليش انقتل
.. ما اعرف بس بابا يكول جماعة مجهولة
رحت كعدت كدام خالي وسلمت
.. البقاء لله خالي الله يرحمه كلمن يموت بيومه
رفع راسه وعيونه حمر لأول مرة بحياتي اشوف خالي متأثر
.. لك جلال هذا ظلعي انت ما تعرف ناجي شنو بالنسبة الي هذا صديق العمر
.. الله يرحمه
زين ماعرفتوا منو الي ورة مقتله
جاوبني بقهر .. والله ما اعرف منو بس هاي صار فترة نازل موديل اكو جماعة مجهولة دتصفي اصحاب الملاهي والبارات ومحلات الشرب وناجي المسكين شكله وصله الدور بالتصفية وقتلوه الملاعين الله لا يوفقهم
.. خال ما دام هيج صار الوضع معناها انت هم لازم تاخذ حذرك وتدير بالك هاي الايام لا تقترب على ذيج الاماكن
باوع علية بقلة حيلة وماجاوبني
عرف شنو كنت اقصد
اريده يقطع الشرب ويلتفت لعائلته
هو صحيح يشرب بس يحاول ما يقصر على عائلته
يحبهم بس الشرب عنده ادمان ولع مو بيده
وهالشي لابد وان يأثر على عائلته اكيد راح يضرهم حتى لو كان يحبهم ويهتم بيهم
الحب وحده مايفيد
ورة ساعتين كامت ام مصطفى وصبتلنا غدا
وكعدنا كلنا على فرد صينية انا والاولاد والبنات وخالي وزوجته
اتذكرت نقالي الجديد ورحت طلعته من العلبة
وشوفته الهم وفرحوا بي
.. تعالوا مادام كلنا مجتمعين خلي ناخذ صورة
واخذنا صورة كلنا سوية كانت الوجه ضاحكة بشقاوة
بس خالي كان يباوع للكامرة وعيونه بيهم ذبول الحزن
تعشينا وبعدها التموا الجهال داير ما دايري
حتى اخذلهم صور وكانت اغلب الصور من نصيب
رنين ورند وحنوش
اما اسراء ودانة فأخذوا صورتين وهن كوة لازمات ضحتهن وكل مرة تطلع بالصورة حلكهم مكور من الضحك
ومصطفى المراهق الجديد الي يريد يمثل الرجولة امام الكامرة واحمد الي يسوي الحركات البهلوانية
اما حنوش ابو خدود فهذا مترأس القائمة كان شكله وخدوده يسوون واهس للعض والصور وانا استغليت
فرصة التصوير وصارت الصورة عليه بعضة
اطك صور واعض بي وهو شكله مثل البزونة تحب خناگها
...........
مهيمن
بديت شغلي بالمحل بعدما مولني الحجي
اشتريت البضاعة رتبتها بمكانها
سويت دفاتر حسابات نظامية بكل الي اشتريته والمصاريف الي دفعاتها
وبالجهة الثانية كل شغلة تنباع تسجل وعلى صفحة الربح بكل شغله انباعت
من زارني ابو حيدر تعجب بترتيب المحل والدفاتر المضبوطة
الحجي.. ما شاء الله مهيمن انت صدك سبع
اهم شي بالتجارة هي دفاتر الحسابات المضبوطه الي تخليك تعرف شنو الك وشنو عليك
وشكد صرفت وشكد ربحت
الله يبارك بيك كدرت تنظم امور المحل وتبدي شغل سليم ومرتب خلال ايام
رغم بعدك جديد على السوك
.. تسلم حجي لاتنسى يكولون ابن الوز عوام
وانا عندي الوالد الله يرحمه والخوال كلهم عقليتهم تجارية
.. والنعم منهم خوالك اهل نخوة واصل واسمهم بالسوك دوم مرفوع
رجعت لبيتنا ولكيت امي جامعة العشيرة ببيتنا
امي صاحبة كرم.. من غير اي شي كان رزقها محدود
وهي تعزم مو نوب هسة بعدما الله فتحها علينا
خطية بنت ديوان مو بيدها الكرم يمشي بدمها
ما يمر اسبوع علينا اذا ما تعزم خوالي وعوائلهم
دخلت للبيت والجهال الصغار استقبلوني من راس الشارع اجة مهيمن اجة ابو الهمة
دخلت للبيت ولكيت امي مشمرة ذراعها وواكفة عالطباخ
بنات خوالي شافوني وركضن دخلن جوة يلبسن حجاباتهن ونسوان خوالي كعدن يسلمن علية
رحت بست امي من راسها
.. يوم ابشرج قدمتلي وقدمتلج عالحج
بلكي الله ويطلع اسمنا بالقرعة حتى اخذج نحج بيت الله الحرام
لمعت عيونها بفخر وفرحة بين النسوان وباستني من كتفي لان هي قصيرة بالنسبة لي توصل لكتفي
باوعت لنسوان خوالي وبناتهم وكالت
.. يايمة مهيمن ربي يحفظك لي ويفرحني بيك
بس يمة بالاول خلي ازوجك وبعدين نفكر نروح للحج
.. هذا نذر قاطعه على نفسي اول ما الله يفتحها بوجهي ويرزقني اخذج للحج
دخلت حوراء ولازمة بيدها ايد جدتي ودتمشيها بالبيت على كيف
جدتي مرة كبيرة بالعمر نظرها ضعيف
شافتني وعقدت حواجبها وكالت
.. ولكم هذا ياهو الزلمة يكول عامود كهربة
خطية نظرها ضعف جدا متشوف عدل
امي كالت.. يمة هذا وليدي مهيمن
اقترب جدتي مني وصارت تركز بوجهي وكالت
.. ولج زهرة هذا صاير يشبه ابوه العار عيناً
عقدت حواجبي مستغرب حز بخاطري كلامها
باوعت لأمي فتحت حلكها ورجعت سدته دارت وجها
على كدورة الطبخ وكالت بصوت عالي
.. الله يرحمة ويطيب روحه الجنة
وغيرت الموضوع وكالت
.. يمة مهيمن الله يرضى عليك ما تروح تصيح خوالك كلهم الغدا جاهز
.. ليش همة وين
.. همة مجتمعين بييت خالك حسن
طلعت من البيت
الحلو ببيوت خوالي واحد قريب عاللاخ وبيتنا يصير اخر بيت بيهم قريب عالشارع
رحت اصيحهم وانا عقلي مشغول بحجاية جدتي
اول مرة اسمع واحد يحجي عن ابوي بكلمة شينة
انا يزيدني فخر من اسمع خوالي او امي تگلي صاير تشبه ابوك عيناً
وكلام جدتي عن ابوي الله يرحمه ضوجني
اتذكر من كنت صغير اشتغل عامل عند خوالي
كان خالي حسن من يعصب علية بالشغل يسبني ويسب ابوي وبعدها يرجع يكلي
لاتزعل مني كنت بساعة غضب
هو طبعه هشكل حتى وية اولاده اذا اتعصب بالشغل يظل يسبهم لسابع جد يعني بأختصار حتى يغلط على روحه
بس انا استهضم من احد يسب ابوي الله يرحمه
لان الميت ما يجوز شتمه
......
نور
رجعت لبيت خالتي والدنيا ما سايعتني من الفرح
ام امير بأخر فترة هواي تلمحلي كل شوية تدعيلي بأبن الحلال
كثرت دعواتها من هذا النوع كانت كل كلماتها تثني على تربيتي وهالشي جديد علي
.. الله يرضى عليج يا طيبة
او
..رحمة الله بطن الي حملتج على هاي الاخلاق
يارب افرح بيج واشوفج عروسة
.. ويفرحني بعزيز گلبي بيوم اشوفه عريس
وافرح ببنيتي سرى
كان كل كلامها يبشر بخير
وصلت لمنطقتنا واتصلت على اسيل صديقتي وسألتها
.. اكول اسولة انتي بالبيت لو طالعة
.. لعد تمام فتحيلي الباب انا قريبة على بيتكم
عندي الكم خبر الابشدة
وصلت لبيتهم ولكيتها منتظرتني بالباب
حضنتني وسلمت عليها وعلى امها
ام اسيل.. هلا بسورها ونورها
حضنتها بلهفة .. خالة باركيلي راح انخطب
واسيل بس سمعت هاي الكلمات هلهلت بفرحة وبصوت عالي
.. كلللللللللللللووووووووش
ام اسيل .. لج اسيل الله يقطع بليسج فضحتينا
خلينا نفتهم بالاول شنو السالفة
لزمت ايدي ودخلتني للبيت
واسيل تمشي ورانا تهوس بفرحة
.. زوجناها وخلصنا منها وبقيت اني الاصغر منها
كعدنا بالهول وعيوني من الفرح تدمع
ام اسيل .. اي احجيلنا منو هذا سعيد الحظ الي راح يتقدملج
التفتت لاسيل اريدها تحجي خجلت لان موضوع حبي لأمير كان سر بيني وبين اسيل
اسيل .. شوفي ما محفوظة السلامة
الاخت نورة مثلما تعرفين تشتغل عند بيت الدكتور امير
وخلال العشرة والسنين بيت اهل امير الي هي امه واخته انعجبوا بأخلاق ورقة نور وطبعا شي اكيد الاستاذ امير وقع بحب وردتنا من غير كلام
كنت اضحك ودموع الفرح مالية عيوني
اجتي وكعدت يمي وحضنتني وكالت
.. يعني افتهم من دموعج ان صار الي كنا نحلم بي
هزيت راسي بالموافقة
وهمست بخجل.. اي وام امير كالت خالة جهزي نفسج
ما بقى شي على فرحتنا
اسيل كمزت من مكانها .. شلوووون مابقى شي
وتحجيها هيج بكل برود
عزززة وين نلحك لج معناها ماعندنا وقت حتى نجهزج ورانا كومة شغل
ام اسيل.. اي ياعيني غير ينطونا موعد حتى نعرف راسنا من رجلينا
.. خالة انا اهم شي عندي اصير زوجة امير والباقي
كله لاحكين عليه
اسيل.. شوف حظي شلون تحجي لج حبيبتي ماما دتقصد شوكت نلحك نوديج صالون ونجهزج ترة وراح حصبة وجدري يعني يادوب نلحك على الاقل حفافة ترتيب وجه وشعر ونطلع سوق
اهوو وتعالي لازم تبلغين خالتج حتى تجهز امورها
.. لا خالتي خليها بالاخير كلش من يردون يجون يخطبون يالله ابلغها بالخبر حتى ما يطلعولي عكوسيات
ويسون مشاكل وياي
ام اسيل .. اي هم صدك بس انتي ابدي جهزي نفسج من وراهم من غير ما ينتبهون
اسيل لزمت نقالها وكالت
.. لعد خلي اتصل على الصالون اشوفهم مفتحين لو لا حتى احجزلج موعد وياهم علمود نبلش بالتحضيرات
ام اسيل .. اي وضروري نطلع للسوق حتى نشتري ملابس اكلج شنو رأيج باجر تاخذين اجازة من بيت ام امير ونطلع للسوك نكمل تجهيز شغلاتج
.. لا مو باجر اخذ اجازة لان باجر همة محتاجيني نكمل تجهيزات البيت احم احم ومثلما تعرفون البيت كله على ايدي فيحتاجوني حتى اكعد ارتب وياهم
فخلوها عكب باجر اخذ منهم اجازة يومين
حتى اجيب الفلوس ونطلع للسوك براحتنا
ام اسيل.. خالة نور امانة اذا تحتاجين فلوس كولي ترة عندي جوة ايدي كم فلس
.. لا خالة تسلمين ربي ما يحرمني من حنانج وعطفج
بس اني مجمعة كم فلس ضامتهم لهيج ايام
اعجبج بهيج امور
.. والله سباعية خلي بعض الناس يسمعون بلكي يتعلمون يحرصون ويجمعون
اسيل تگلب عيونها .. ماما والله بطلت اجمع فلوسي
لان صارت بية خوفة من ايام العيدية من كنت اجمعها واضمها عندج
وتالي من اكلج انطيني فلوسي تكليلي
( انتي صدك ما تستحين جاية تطالبيني بكم فلس
ياما وياما صرفنا عليج
لج ما يغزر بيج هذا الصرف الي اصرفه عليج ملابس واحذية وجنط جاية على كم فلس مجمعته تحاسبيني عليه )
ام اسيل .. شوف هاي مصدكة نفسها وتسمي العيدية تجميع عمي الحمدلله ما تصرفين علينا كان ظلينا بالضيم و متنا جوع لان كل شوية مذكرتنا بفلوس العيدية
كانت اسيل وامها يتناكرون واني اضحك على شكلهم
للحظة اتمنيت وجود ماما وبابا الله يرحمهم بهيج يوم حتى اشاركهم فرحتي
........
ريم
بعدما بشرنا عمو ابو سيف بخبر عثوره على عناوين اولاد عمو مؤيد عمو قرر يرجع للعراق
.. شنو عمو شلون نرجع للعراق وانت بعدك مامكمل جلساتك الكميائية
باوع للدكتور الي كان واكف وراي وكال
.. دكتور رحمة لوالديك فهمها لبنت اخوية عن وضعي الصحي
اباوع للدكتور مسح جسر خشمه وكعد يحم حم وكال
.. بالحقيقة يا انسة ريم
الحاج مؤيد صار فيه يخرج من المستشفيي امتى ما بدوا لان جسموا صار ما بيحتاچ للجلسات الكيميائيي
وبعدما طمني الدكتور على صحة عمو وطلع
من الغرفة عمو باوع علية وگال
.. وهسة ارتاحتي من اتطمني لو بعد عندج اسئلة
ابتسمت بفرح ورحت حضنته
.. والله ياعمو لو تعرف انا شكد مشتاقة ارجع للعراق
يمكن اكثر منك
.. اي والله ماكو احلى من ريحة هوى بلادي
حال بلدنا مثل ام مهضومة تنزف تعبانة وبنفس الوقت تبقى تبتسم بوجه اطفالها وهذولي الاطفال يبقون يحبون امهم رغم مرضها ما يتغير حبها بگلبهم شعرة
ابتسمت على كلام عمو ذكرتني بكلمات اغنية كنت اسمعها دائما بس ما كنت ادرك معنى كلماتها
.. جنة .. جنة ..والله يا وطنا
وعمو كمل كلمات الاغنية بحنان وصوت تعبان
.. ياوطن ياحبيب .. يابو تراب الطيب
حتى نارك .. جنة .. والله حتى نارك جنة
............
جلال
مر اسبوع على شغلنا انا وسلوان وية ابو بهاء
وصرنا ناخذ يوميتنا من عنده مو من الاسطى توفيق
وبنفس الوقت كنا مستمرين بشغلنا
بورشة الاسطى لان بالحقيقة هو صاحب عملنا
وله الفضل بتعرفنا على هذولي الناس
وطول هاي المدة كنت لازلت مستمر اشتغل على الجهاز المتكون من الية بسيطة تتركب وية المحركات
ويزيد من سرعتها للدرجة القصوى
سلوان يسألني .. يا اخي انكسر ظهرك على هالجهاز
والمشكله كلما اشوف حجمه الصغير يزيد احباطي
كنت كاعد بنهاية الورشة بالكاع اركب بالجهاز ومركز بدقة تنظيمه
رفعت راسي باوعت عليه ومسحت العرق
.. شايف هذا الجهاز الما عاجبك
اذا ركبته وية محرك اي سيارة حتى لو قديمة رايحة مابيها حيل تمشي
راح تشوفها تنطلق بسرعه تنافس السيارات الحديثه
يعني المتعارف عليه ان هاي التقنية تتوفر فقط
بأفخم السيارات واضخم المحركات وانا
اذا راد الله وتمت المهمة راح اكدر بخلال هذا الجهاز
ودمجه وية محرك السيارة راح يزيد من قوة عزم المحرك وبالتالي ينتج السرعة القصوى
يعني اذا نجح هذا الجهاز راح تكون ضربة قوية لك مو بعيد حتى يدزون علينا بالخارج حتى نعلمهم شلون يصنعون مثله
اااااخ بس كون ينجح
كنت اشتغل بأجتهاد وبنفس الوقت سلوان يساعدني
بتمويلي بالقطع النادرة والحساب طبعاً على الاسطى توفيق
كنت حافظ مخطط الجهاز كله بدفتر سري وهذا الدفتر فقط عندي محد يعرف بي
سلوان .. والله هذا شغلنا لو بدول الخارج كان
بنظرة وحدة راسا يتبنون اختراعك
ويدعمونك. بس مع الاسف احنا بالعراق
محد له خلك يهتم بالشباب مواهبهم
مثنى .. فالحين بس يدعمون مواهب الشباب الغنائية
سمعتلك فد يوم علنوا او ذاعوا بالتلفزيون عن مسابقة اختراعات
او مواهب وافكار الشباب
او برنامج مسابقات المنافسة بين المدارس
للتحدي بين الاذكاء مثل دول الخارج
.. لا والله ما سامع
كانوا يشتغلون بسيارات الورشة
وانا كارص على صفحة لوحدي اشتغل عالجهاز
وبنفس الوقت اسمع كلامهم
مثنى وسلوان الوحيدين الهم الحق يشوفون شغلي من اشتغل
لان هم مايعرفون شنو اساسيات عملي
يعني مثنى لو انطيته الجهاز بيده ماراح يعرف طريقة تركيبه وتشغيله
اما سلوان فهو الوحيد الي كنت اشرحله
طريقة عمل منضومة الجهاز ولكن بنفس الوقت ميعرف الجهاز شلون يتصنع
واليوم بعد طول عناء وسهر ليالي وشغل وتجارب لمدة ثلاث سنوات
خلص وصار بالشكل الي اني راسمه ببالي
اليوم انا وسلوان ومثنى راح نربط
الجهاز بالمحرك
مثنى كان مجهز السيارة وسلوان محضر العدة
وبلشنا نركب الجهاز وضعي كان اشبه بوضع دكتور اعصاب يجري عملية جراحية دقيقة وحساسة
لمريض ونسبة النجاح تعتمد على مدى مهارة الجراح هذا حالي وية تركيب الجهاز واستمرت عملية التركيب خمس ساعات متواصله
كنت فقط استريح اشرب ماي وارجع اكمل
ربط اسلاك الجهاز بالمحرك
بعدما انتهينا من ربط الجهاز اخذنا السيارة بساحة الصناعية
وركبت السيارة القديمة وشغلتها امام عيون مثنى وسلوان. وجان تنطلق السيارة وينتج عنها صوت يدل على قوة محرك السيارة القديمة كان وضع السيارة عينا يشبه رجل عجوز كبير بالعمر ويحطوله گلب شاب عشريني
هذا كان حال السيارة شغلت السيارة وانطلقت بيها بأقصى سرعة وهاي كانت اول تجربة الي اطبقها على ارض الواقع
حسيت انا ملك وقفت السيارة بنهاية الطريق ونزلت منها
رفعت ايدية اثنينهم بعلامة نصر وصحت بصوت عالي
.. جلاااااااااااااااااااااال قربااااااان
اجوي سلوان ومثنى وعيونهم بيها الفرح
حضني سلوان .. ولك عمي صدك سبع
واخيرا نجحت شنو راح تسمي اختراعك
.. راح اسميه جلال قربان
مثنى.. والله تستاهل يا جلال كل خير
لان هواي تعبت عليه
حضنتهم اثنهنم على الجانبين وصرنا نمشي بتجاه الورشة
.. طبعاً ما راح انسى وكفتكم وياي وراح يلوحكم من الخير نصيب
بعدها رجعنا شلنا الجهاز من المحرك
ورحت خبيته جوة بالسرداب يم السكراب القديم
هو كان مثل المخزن
اتصلت على الاسطى توفيق وبشرته بالخبر
وهو طار من الفرح وگال
.. وبهاي المناسبة اخذلك اجازة حتى ترتاح وبعدها تعال علمود نحتفل بفخرنا
.......
ريم وبعد اسبوع من الانتظار
رجعنا للعراق وعمو بدة شوية يرتاح خطية كل شخص يحن لبيته خصوصاً اذا كان مريض يحس بيته عبالك حضن دافي يخفف عنه المه ويحسسه بالامان
هشكل كان حال عمو مثل الطفل ورجع لحضن امه
واول ما وصلنا للبيت عمو مباشرتاً اتصل على ابو سيف
مؤيد.. شوف ابو سيف هسة بوجهك تجيني وتجيب الملفات وياك بعد ما عندي صبر حتى اعرف الاخبار
بعدها غلق النقال وباوع علية وگال
عمو تعالي ساعديني خلي ابدل ملابسي قبل لا يجي ابو سيف
جان يحجي وعيونه تلمع
دخلت علينا عمة اسيا بأثناء مكنت اساعد عمو
باوعت علينا بشك وكالت
.. ليش احس بينكم اسرار ضاميها عني
ومتردون اعرف بيها
..
عمو مؤيد ابتسم وكال
.. مثل شنو هاي الاسرار الي احنا ضاميها عليج وليش نضمها عنج
.. ما اعرف اسأل نفسك اشو كثرت كعداتك وية بنت اخوك واشوفكم دائما تتهامسون ومن ادخل عليكم تسكتون والاخت هنا صايرة هادئة مو من عوايدها
.. شكلج اسيا كبرتي وصار عقلج يخيلج اشياء مصايرة انتي متوهمة كل ما في الموضوع بنت اخوي صارت بنية حبابة شكلي كسرت خاطرها وبطلت
شغب وعفرتة
جاوبته واني ابتسم .. يعني على هذا كلامك اني صاحبة مشاكل ومسببتلك قلق
.. اي والله عمو انتي متدرين شلون يكون شعوري من اسمع بيج مسوية مصيبة احس بروحي داخل بأنذار
بس ما اكول غير الله يساعد الي تكونين من نصيبه
اسيا .. قصدك على عريس الغفلة الي راح يتورط بيها
مؤيد.. اسيا انتبهي لكلامج مو بعيد يكون عريس الغفلة الي دتحجين عنه هو ابنج نائل
اباوع عليها من صار الكلام بأبنها
راسا بدلت اقوالها
.. لا ابني نائل رجال مثقف وواعي ماكو احسن منه
واكيد راح يكدر
يستوعبها لريم ويتفهمها وبنفس الوقت راح يغير بيها هواي اشياء وطبعاً راح يكون هذا التغيير نحو الافضل ولمصلحتها ومن حسن حظها اذا كانت من نصيب ابني
باوعت عليها وگلبي يفور
مصدكة روحها اني اتزوج ابنها والله لو تموت
يكفي امه اسيا وهذا اكبر عيوبه
وهذا سبب كلش كافي يخليني ما اطيق فكرة زواجي منه
قطع علينا الكلام صوت الجرس
وعمو كال .. احتمال وصل ابو سيف اسيا روحي فتحي الباب ودخليه بالاستقبال بين ما اجهز نفسي
............
جلال
يوم ثاني ما انطاني گلبي اخذ اجازة واكعد بالبيت وارتاح وانا كلي حماس ولهفة
احس حتى النوم طار من عيني
يوم ثاني اتصلت على سلوان من الفجر وسحبته من الفراش بالكوة
طلع لي سلوان من بيتهم فاتح عيونه وحدة ووحدة
من اثر النوم حجة بصوت نعسان
.. جلال انت والله مخبل لك روح ارجع نام اليوم عدنا عطلة شنو نسيت
.. لا ما نسيت بس ما جايني نوم لاحكين عالنوم
يالله بدل وتعال وياي
اتثاوب وحك راسه وهو يدردم علية
.. الله بلاني بيك بلوة
دخل للبيت وكعدت يم عتبة بابهم انتظره لزمت
غصن نبات يابس وصرت اخطط على تراب الارض احلامي
رسمت دائرة وكتبت عليها عائلة خالي اكيد هذا الجهاز
راح اجني من وراه الملايين
اول شي اسوي اشتري بيت كبير لبيت خالي بي حديقة
حتى رند ورنين وحنوش يلعبون بيها
وثاني شي اسوي نفتح انا وسلوان ومثنى ورشة خاصة بينا لتصليح السيارات
جنت ارسم واخطط وجان تهب نسمة هوى باردة
وتحرك التراب وتخفي معالم المخطط
طلع سلوان وهو يتأفأف بضجر
.. وين انهزم منك يا جلال يمكن حتى بيوم عرسي
الكاك تكطع ليلة عرسي وتكلي تعال سلوان محتاجك
.. شعندي غيرك يا صاح
بعد فترة وصلنا للورشة ولكينا الاسطى توفيق ويمه رجال اثنين الظاهر عندهم تصليح
شافني وابستم وكال
.. ها اشو اجيتوا مو انطيتكم اليوم عطلة
ابتسمت وكلت
.. تصدك استاذي ما كدرت انام ولا خذت عيني الراحة
كلت اجي واراويك شلون يشتغل الجهاز
كال .. خلاص ما دامك اجيت هاي هي
روح جهز المحرك بين من احاسب الشباب
دخلنا للورشة ورحت خلف السكراب ورفعت غطاء السرداب ونزلت جوة ورحت على مكان الي خفيت بي
الجهاز
بعدت الغطا وبعدها انصدمت صدمة عمري



يتبع
اتمنى لكم قراءة ممتعة
احبكم كومة احبكم طوخ
مع تحيات اختكم نهى الحسون


لامارا غير متواجد حالياً   رد مع اقتباس
قديم 08-09-19, 05:38 PM   #9

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

#قضية_لم_الشمل
#الكاتبة_نهى
#البارت_السابع


جلال
شنو الجهاز وين
احس گلبي يريد يطلع من صدري
طلعت بسرعة من السرداب اريد اعرف منو اخذ الجهاز طلعت لكيت الاسطى ديحجي بالنقال
رحت ركض عليه
.. استاذي الحك الجهاز اختفى
سلوان اجة وراي
.. شنو شلون اختفى البارحة احنة بالليل
عزلنا الورشة وهو كان موجود بمكانه منو اخذه
التفتت على سلوان
.. سلوان اتصل بسرعة على مثنى
قطع كلامي الاسطى توفيق
.. انتظر لحظة جلال ما يحتاج تتصل على مثنى وتسأله
باوعت عليه بشك منتظره يحجي
.. الجهاز انا اخذته وعرضته على ناس يحتاجونه للجهاز
عكدت حواجبي مستنكر موقفه وياي
.. ومنو سمحلك تاخذ تعبي وتعرضه للبيع بدون علمي
.. على كيفك لحظة ترة الجهاز مثلما انت الك بي حق انا هم الي بي حق
جلال لاتنسى انت صنعت الجهاز بفلوسي يعني لوما انا
انت مستحيل تكدر تسوي هيج جهاز
.. واذا انت مولتني بس هذا مو معناه ينطيك الحق تروح تتصرف من يمك بدون ما ترجع لي وتاخذ اذني
.. لا تكعد تبجي مثل النسوان انا عرضته لفائدتك
لان الجماعة الي راح يتبنون الاختراع انت تعرفهم كلش زين
وانا قررت ابيعلهم الجهاز سواء رضيت او ما رضيت
ولا تخاف راح انطيك اتعابك
باوعت للاسطى توفيق بحقد وقررت العب وياه على نفس منواله يعني الناقص يريد ياكل حقي
مقرر ينطيني تفاليس حالي حال اي عامل ولا كأنما انا صاحب الفكرة والتخطيط بسيطة ما علينا
.. خلاص هذا هو ما دامك انت قررت من يمك
بالعافية عليك الجهاز والبيعة
درت وجهي واتوجهت لباب الورشة مشيت بكل ثقة وكلت قبل لا اطلع
.. خلي الجهاز ينفعكم بس يكون بمعلومك
ترة الجهاز بدوني ما يسوى شي
لان انا الوحيد الي يعرف شلون تشتغل منضومة الجهاز وشلون طريقة دمجه وية المحرك
فخلينا نشوف شلون راح تكدر تتمم البيعة بدوني
سمعت صوت توفيق صار يلعن ويشتم
شكلها الامور طلعت عن سيطرته وانسحب البساط من تحته مشيت وتركته
صاح بصوت عالي يستوقفني
.. جلال لحظة انتظر لا تروح
وكفت بمكاني منطي ظهري بكل ثقة
لان انقلبت الادوار وصار هو حاجته يمي
.. كول توفيق شتريد من عندي
سمعت صوت غضبه
.. شنو اشو تكول توفيق هيج حاف بدون استاذي شكلك نسيت نفسك ياولد
.. لا ما نسيت نفسي بس بما ان الامور اتغيرت
لان انت غدرت وانا الضحية
فلا تتوقع مني الاحترام منا ورايح
كنت احجي وياه وگلبي يغلي عالجهاز اريد بس اوصله
احس عبالك ماخذين وصلة من روحي
اباوع عليه صك على اسنانه بغيض بس مجبور يجاريني لان يحتاجني
.. لحظة جلال ارجع خلينا نگعد ونتفاهم
.. ما يحتاج نتفاهم گلي وين اخذت الجهاز والمن انطيته
.. انا اكلك بس بالاول تعال اكعد خلي نتفاهم
.........
ريم
كنت اساعد عمو حتى يجهز نفسه لقدوم ابو سيف
دخلت عمة اسيا
عمو سألها .. ابو سيف وصل
.. لا مو ابو سيف هذني جاراتي اجوي علمود يتحمدون
السلامة علمود رجوعك من العلاج
عمة كانت تحجي وية عمو واني
كنت افكر بغير وادي
منتظرة وكلي لهفة حتى اعرف تفاصيل حياة اولاد عمي هم وين عايشيين وشلون شكلهم عندي فضول قاتل حتى اعرف كلشي عنهم
ورة عشر دقايق اندك الجرس ورحت فتحت الباب
وجان القادم ابو سيف اتحمدلنا عالسلامة وسألني على
صحة عمو بين ما جنت ادخله للاستقبال
.. عمو بخير وهسة ابلغه بحضورك وانت تشوفه بعينك وتحكم بنفسك على صحته
بعدها
دخل عمو للاستقبال وسلم على عمو ابو سيف
كعد على القنفة وعمو ابو سيف كعد عالكرسي الي بجانبه
باوعلي عمو وكال
.. عمو ريم قدمي الضيافة لعمج ابو سيف
ابو سيف .. قابل انا خطار عمي ما نريد نتعبها للحلوة
ابتسمت وجاوبته .. لا عمو تعبك راحة
رحت بسرعة جبت صينية الضيافة
ودخلت وقدمتلهم
وبقيت واكفة يمهم ولازمة الصينية بثنين ايدية
انتبهت على نظراتهم اثنينهم باوعوا علية
يعني بين قوسين اتفضلي من غير مطرود
مؤيد.. يالله يا حلوة تندلين الباب لو ادليج حتى تطلعين
ابتسمت بوداعة الاطفال وكلت
.. عمو ليش اطلع ترة اني صرت شريكة وياك بكلشي يعني
صار لازم اعرف اخبارهم حالي من حالك
ما راح يأثر عليك اذا بقيت وسمعت مو احسن ما اطلع وابقى اتلصص واستمع لكلامكم
باوعلي عمو بتفكير وكال
.. هو انا اكدر لهذا لسانج دائما غالبتني
يالله سدي الباب وتعالي كعدي وما اريد اسمع اي مقاطعة
حطيت ايدي على حلكي بحركة كاتم
ابو سيف .. اي هيج احسن لان المعلومات تخص اولاد عمج ولازم عمج يركز وياي بكل كلمة اكولها حتى يكون على بينة
سويت حركات القرود الثلاثة لا اسمع لا ارى لا اتكلم
همة اثنينهم ضحكوا على شكلي
وبعدها انتقل عمو ابو سيف للجدية
وطلع من جنطته ثلاث ملفات
وكال
.. طبعا بطلاع الروح يالله كدرت اوكع على عناوين اولادك
.. ادري تعبتك وياي وراح تتعب اكثر اذا كملت المهمة
بس شسوي لازم تتحمل هذا شغلك
.. ما دام انا محاميك اذن هذا من واجبي اتجاه كل وكلائي
وانت ياما كلفتني بمهمات يعني مو جديد علية هالشغل
.. هو انا ليش اختاريتك انت للمهمة لان ادري بيك كفو وراح تصون الامانة
.. تسلم يالغالي
هسة عوفك مني وخلينا بالمهم
شوف يامحفوظ السلامة هذني ثلاث ملفات سويتهم راح تلكة بيها معلومات مفصلة عن حياة كل واحد منهم
وبيها صورة لكل واحد بيهم حتى تتأكد وتتعرف عليهم وتكدر تكون فكرة عن شخصياتهم
.. ابدي اقراها الي وراويني صورهم
ابوسيف .. شوف راح ابدي بملف ابنك الكبير
لبس نظارة القراءة وفتح الملف وطلع من عنده صورة وانطاها لعمو وكال
.. هاي صورة ابنك مهمين شوفها بين ما ابدي اقرالك المعلومات
جنت كاعدة يم عمو مؤيد عالقنفة قربت راسي بفضول اريد اباوع وياه على الصورة
اخذها عمو منه
انتبهت لأيد عمو صارت ترجف واتلمس الصورة بأصابعه
بدت اصابعه تنزل عن وجه ابنه وصارت معالم صاحب الصورة تبين بالتدريج
جانت الصورة ماخوذة لرجل اسمراني مملوح لابس قميص كاحت تعبان عاقد حواجبه وواكف مخصر عبالك واحد مستعد للعركة او هو شكله يوحي للعنف
كان شعره مهوس مبين الصورة مأخوذة بدون علمه
لان كان واضح عليه الغفلة وعدم الانتباه
بعدما كملت معالم الصورة كدامي هنا تكمن المفاجئة
صرت اباوع للصورة وارجع اباوع لعمو متعجبة
وارجع اباوع للصورة مرة اللخ
.. عمو هاي شنو مهيمن كلش يشبهك عيناً
اتذكر عندك صورة وانت شاب هيج كان شكلك
ابتسم ولمعت عيونه بدموع الفخر
.. شكلي خسرت هواي امور بحياتي ووحدة من هاي الامور
خسرت حقي من ان افتخر بين الناس بأبني الي صار رجال ويشبهني
كان الندم واضح عليه سكتنا اثنينا ورجعنا نباوع للصورة مرة ثانية بتمعن
كنت احاول اكون انطباع عن شخصية مهيمن من خلال الصورة لكن ما كدرت
كانت نظرات عيونه غامضة صاحب معاني حادة
مبين عليه طويل بس شكله يلفت النظر غصب عني لكيت اني كل شوية اسرق النظرات على صورته
ابو سيف جلى صوته حتى يلفت انتباهنا
واني بعدني عين على صاحب الصورة وعين على ابو سيف حتى اسمعه شنو يكول
وصار يقرأ
.. الاسم مهيمن مؤيد ..... العمر ٢٩سنة
خريج كلية زراعة ساكن بشمال البصرة قرب بيت خواله
عايش وية امه واخته وغير متزوج
مؤيد .. يعني زهرة اتزوجت من بعد طلاقنا والله عفية عليها شافت حياتها وما التفتت للماضي
.. اي نعم بعد طلاقها بأربع سنوات اتزوجت واحد ضابط وصار عندها بنية من عنده واستشهد رجلها بعد ثلاث سنوات من ولادة بنتها حوراء
مؤيد .. شكلها هالمرة ما مكتوبلها ترتاح
.. كلشي بالقسمة
ورجع ابو سيف يسرد المعلومات عن مهيمن من جديد
مهيمن هو المعيل الوحيد لعائلته
وحسب المعلومات الي وصلتني ان مهيمن
بالوقت الحالي اشترى محل بالسوك ويشتغل بي
المعلومات تكول مصدر فلوس المحل كان
من الارض الزراعية الي ورثتها امه من ابوها
باعت نصها وبنوا بالنص الباقي بيت وهسة البيت مبني عالنص
سكنوا بي وهو مو كامل حاسبين حسابهم
بالتدريج يكملونه
كان عنده قبل لا يشتري المحل بسطية صغيرة يبيع بيها مواد غذائية
مهيمن رجل شاغول كان يشتغل وية خواله بمحلاتهم
ومن كبر استقل عنهم بالبسطية حتى يصير عنده شغله الخاص
سمعته زينة وطيبة ماعليها غبار شهم وصاحب نخوة
لكن ديربالك تدوسله على طرف هذا الكلام يتفق عليه اهل السوك كلهم
بساعتها امك داعية عليك
يسمونه بالسوك ابو الهمم بس تنخاه تلكاه عند يمناك هاي كلام واحد يدفع عربانة من سألناه عن مهيمن كان هذا جوابه
عمو سحب نفس عميق وكال بصوت تعبان
.. شكله طالع على خواله بكل شي مبين عليه صاحب مسؤولية
كان عمو يحجي ونظراته سارحة بعيد بعدها اشر لأبو سيف حتى يكمل
ابو سيف .. وهسة هو داخل شريك وية تاجر كبير بالعمر معروف بالسوك وحالياً بعده ببداية المشروع
ويتأمل خير من ورة هاي الشراكة
.. الله يوفقه شكل زهرة عرفت تربي و الله عوضها بولد يرفع الراس
.. فعلا الواحد يفتخر يكون عنده ابن مثله
على فكرة قبل لا انتقل للملف الثاني
مهيمن لحد هذا يومك يعرف بيك متوفي.
.. يعني زهرة علنت وفاتي حتى امام مهيمن
اباوع لعمو كانت نظرات الندم باينة من عيونه
بس مايفيد الندم بعد الخسارة
والي صار صار
.. لهنا ونغلق ملف مهيمن
ان شاء الله تفيدك هالمعلومات
.. ما قصرت والنعم منك
طلع ابو سيف ملف ثاني وفتحه وسحب منه صورة نفس حجم صورة مهيمن كان حجمها بحجم ورقة الكتاب
مدها لعمو وعمو اخذها منه
وباوع للصورة
كان صاحب الصورة شاب جداً وسيم
كانت عيونه ملونه عسلي واخضر
نظراته بيهم نوع من المرح والشقاوة
بشرته برونزية لافحتها الشمس
عكس اخوه مهيمن يعني الي يشوفهم مستحيل يكول هذولي اخوان واحد شمال وواحد جنوب
بدة ابو سيف يسرد المعلومات عن جلال
.. عندك الابن الثاني
جلال مؤيد ...... العمر 27سنة
خريج هندسة ميكانيك
غير مرتبط لا زواج ولا خطوبة
حياته غير مستقرة
امه اتزوجت وسافرت وية زوجها للخارج وتركت جلال يم امها ببيت خاله
.. ليش تركته عند اهلها. ليش ما رسلته الي
انتبهت لأبو سيف جلى صوته مرتبك وكال
.. هو هنا انا اتفاجئت من عرفت
ان ام جلال رسلتلك جلال قبل لا تتزوج والمعلومات تگول ان انت رجعتلها جلال ومبلغها ان ما دام هي وقعت بالمحكمة ورادت وانها تتحمل المسؤولية الكاملة عن ابنها
بعد ما يحقلها تشمره عليك
بيني وبنك مؤيد انا من سمعت بهذا الكلام انصدمت
وصرت اتسأئل الف مرة مستحيل صاحبي يسويها
والدليل الثاني الي خلاني اتأكد ان مو انت الي رجعت جلال على امه هو فترة ارسال جلال لبيتك
في نفس الفترة الي كنت انت بيها مسافر
يبقى السؤال منو خلف ترجيع جلال على امه
وتكلم بالنيابة عنك
كان ابو سيف يحجي وعمو عيونه على الصورة ورجفة ايده تدل على البركان الي يغلي جواه
ابو سيف كمل كلامه
.. راح اترك لك موضوع
التخلي عن جلال انت تتصرف بي لان الي متصرف هذا التصرف واحد منك وبيك
بس عليك انت تتذكر من سافرت المن سلمت البيت بوقتها
عمو هز راسه بمعرفة وفضل السكوت ومعالم وجهه تسجل حرب بين الذات
ابو سيف كمل كلامه وكال
.. عالعموم خلينا بالمهم
المعلومات تكول ما بعد ذلك ام جلال
قررت تتركه عند امها ويم اخوها بالموصل
وتتزوج وتسافر للخارج
وبنفس الوقت رانيا ما اتخلت عن جلال بقت هي المسؤلة عن جميع صرفيات جلال الى ان وصل جلال
لأول سنة كلية وصادف صار حادث على واحد من اولادها واحتاجله علاج مكلف
وحسب المعلومات جلال طلب منها ان تتوقف عن ارسال المصرف لان هي بحاجته اكثر من عنده
ومن عندها جلال بلش يشتغل بورشة تصليح سيارات
وكمل كليته
وبقى يشتغل بالورشة لان ماكو تعيين
قلب ورقة بالملف وكمل كلامه
جلال كلش ذكي
وحاليا هو معروف بالصناعية بأسم جلال قربان
اي واحد تعصى عليه مكينة سيارة راسا يدلوا على الورشة الي يشتغل بيها جلال عامل
ابتسم وسأل ابو سيف
.. ليش اسمه جلال قربان
.. يامحفوظ السلامة ابنك انعرف بهذا الاسم بسبب مقولته الشهيرة كلما يدخل بعمل صعب يكول اني اهلي بايعني وناذريني قربان
عمو عقد حواجبه وكال
.. يعني جلال مكون صورة بباله انه منبوذ من عدنا انا امه
ولو يدري مستعد ادفع نص عمري في سبيل نظرة
رضى من عنده انا صحيح بنيت حياتي على خراب
بس مستحيل اتنازل عن اي واحد من اولادي لو كان بحاجتي
بعدها غير كلامه عمو وسأل ابو سيف
.. معرفت مثليش هاي المهمات الي يرسلونه بيها
.. اخر مهمة ان يشتغل وية جماعة مجهولة الهوية
حتى مصادري ما كدرت تتعرف عليهم منو هم وشنو يشتغلون ما كدروا يوصلون لاي معلومة عنهم
بحيث الشي الوحيد الي عصى علية بالبحث عن جلال هذا الشي بس لاتخاف كل المعلومات تشير وتأكد جلال قربان سبع ما ينخاف عليه
لمعة عيون عمو وهو يدنك ويباوع على صورة جلال بفخر وكال
.. الله يستر عليه ويحيطه يحفظه
طبعا كلش يشبه رانيا ابد ما يشبهني
ابتسم ابو سيف
.. هههه لا تستعجل على رزقك عنده خصلة يشبهك بيها
.. شنو
.. الاخ مغازلجي درجة اولى وبالمقابل يموتون عليه النسوان
وهو بالمقابل هم حنين عليهن ويحبهن مايرد وحده تقصده
ضحك عمو .. بهاي انت صدكت
ابو سيف كمل
.. ملاحظة عن جلال قبل لا انتقل للملف الثالث
جلال شكد شاطر بشغله وشكد يحب الشغل
بس عيبه هواي يتعارك بالعمل مرات يتعارك وينطرد
من الشغل
.. شكل جلال دمه حامي ومتهور
.. وحالياً جلال ساكن بالموصل مع خاله ابو مصطفى
لهنا وتخلص معلومات جلال وان شاء الله تفيدك
مد ايده على الملف الثالث وطلع صورة
وكال قبل لا ينطي الصورة لعمومؤيد
وهسة وصلنا للملف الثالث
وهو ملف نور وهذا اكثر واحد تعبنا بالبحث
مد الصورة لعمو وميلت راسي بأتجاه عمو حتى اشوف وياها الصورة عمو اخذ الصور وهو جداً متلهف حتى يشوفها ويعرف عنها المعلومات
عمو باوع للصورة وعيون عمو اتسعت
.. ليش بنتي نور هيج صورتها حزينة.
تشبه سهير فقط بالشكل اما الباقي فتختلف
سهير كانت وردة زاهية بألوانها
اما هاي الشابة الي اشوفها كدامي بالصورة
كأنها نبات ذبل عوده بفصل الخريف وتساقطت اوراقه غصب عنه
صحيح نفس العيون ونفس الرقة بس ليش هاي كمية البؤس الموجودة على معالم وجهة
رفع راسه بعدما خلص تسائلاته وكال
ابو سيف ابدي اقرة بعد ما بية صبر احس گلبي كام يعصرني
فتح الملف وبدة يقرة معلومات نور
.. نور مؤيد
العمر ٢٥ سنة خريجة علوم حاسبات
غير مرتبطة
تسكن حالياً في بغداد عند خالتها سناء
.. ليش سهير وين لاتكول هي الثانية اتزوجت
.. لا ما اتزوجت سهير ماتت بأثر انفجار مفخخة قرب مكان علمها يعني موت مفاجيء لم يكن بالحسبان
ماتت بعمر ال٣٣ سنة يعني بعدها شابة الله يرحمها
ملاحظة قبل لا اكمل
نور مثل مهيمن تعتقد ابوها متوفي من امها حامل بيها
عمو التزم الصمت واخذ كلاص الماي وشربه
صارت كصته تنضح عرق
وهمس بصوت واهن .. كمل
.. حالة خالتها المادية ضعيفة
زوجها يشتغل حارس بشركة اهلية
قدمت على الكثير من الوظائف وما حصلت تعيين
بسبب مظهرها الي ما يتطابق مع مواصفات الوظيفة
لذلك اضطرت ان تشتغل كمنظفة ببيت ناس محترمين
وصارلها سنتين تعمل عندهم
والى الان ماعندها شي جديد بحياتها
هاي كل المعلومات الي كدرت اجمعها عن نور
كان ابو سيف يحجي وعمو اخذ صورة نور ونهض من مكانه وكأنه يحاول يوصللها
سأل ابو سيف
.. انت كلت نور ببغداد يعني قريبة علية
كان يحجي ويباوع للصورة
.. اي نعم عايشة ببغداد
صار يحجي وية صورة بنته متناسي وجودنا
.. نور بابا ليش هذا السواد
ليش بعيونج نظرة هضم وحزن و عدم امان
بابا طمنيني وكوليلي انتي بخير
..............................................
((جميلة
منمقة انتي يا ابنة بغداد
فراشة حقل
ابدع فصورها رب العباد
جارت الايام
فصرتي بوصاية الجلاد
اجنحتك البيضاء احترقت
بنار الغل والاحقاد
رثة الثياب
اعلنتي على نفسك الحداد
اين جمال روحك
ودجلة الخير يسكنها
لماذا غلفها السواد))
هدى سعد
................................................
نور
اخذت اجازة اليومين
وبأول يوم طلعت من البيت بنفس موعد روحتي لبيت ام امير حتى خالتي سناء ما تحس علية
ورحت لبيت صديقتي اسيل
ومناك رحنا انا وياها وخالة للسوق واشتريت كم شغلة للخطوبة
ورحنا بعدها للصالون
واول شي سويته حفيت حواجبي حفافة بناتية
لان ام اسيل كالت علمود لاتخفيفيهم
حتى يصير فرق بالخطوبة والعرس.
شكلي اتغير بالتسعين من حفيت بدت
ارتفعت معنوياتي وزادت ثقتي بنفسي
اسيل.. هلا والله هسة اموري يشوف هذا الجمال
وينصب خيمة يم بابكم
كنت اضحك على كلمات اسيل
دك نقالي وكان المتصل
ام امير اشرت لأسيل حتى تسكت لان المكالمة مهمة ا
.. اش اسيل سكتي هاي خالة ام امير دتتصل
ام اسيل .. ردي خالة بالعجل خاف متصلة علمود تتفقون عالموعد
سحبت نفس عميق اريد اهدي نبضات گلبي بعدها رديت
.. الو هلا خالة شلونج
.. هلا وغلا بنورة عذريني خالة اتصلت عليج بيوم عطلتج
.. لا عادي خالة بأي وقت يعجبج
اتصلي انا موجودة
.. تسلمين حبيبتي انا اتصلت عليج
علمود اطلب منج تسوين فد ثلاث كليو كليجة علمود
خطوبة امير عكب باجر عفية خالة وياريت تجين
تساعديني بالخطوبة لان الشغل واصل لهامتي وما الحك اسوي شي
بهت لوني وعرگت گصتي
.. لحظة خالة ممكن تفهميني شلون امير عكب يتقدم ويخطب زين واني شوكت ناووين تنطوني علم
ام امير بتلقائية .. يا حبيبتي شلون ما ننطيج خبر
وهو امير البارحة بذات نفسه اصر علية ان اتصل عليج وابشرج بخبر خطوبته واكد علية ان اكلج انتي معزومة ويكول ازعل عليها اذا ما حضرت
ام امير تحجي وانا النقال وكع من ايدي
احس العالم كله افتر داير مدايري
ما اعرف شصار بية هو العالم يفتر مدري انا الي اختل توازني بس كل الي اعرفه اني بهاي اللحظة اني كاعد انازع من الصدمة و اتمنى اختفي اواموت
..
مهيمن
.. ما عرفت منو هذولي الجماعة الي جايين يسألون عني وشنو يردون مني
.. والله يابو الهمة ما عرفت منهم شنو يردون بس الغريب بالامر
طلعوا سألين قبل فترة كم واحد من اهل السوك
وواحد منهم كال شفتهم حتى اخذوله صورة من بعيد
عقدت حواجبي مستغرب عجيب منو هذولي
بقت السالفة تدور بعقلي منو هذولي وشنو يردون مني
معقولة هذا عناد الخسيس
وعلى طاري عناد
صدك ابن الحلال بذكره
وكأنما يعرف كنت افكر بي
ركن سيارته كدام المحل كان شكله وملابسه كلها توحي بالبذخ شاب طول بعرض
كورت ايدي بغيض هسة من اشوه وجهه الحلو اكو احد يلومني شلون يتجريء ويروح يدز ناس وراي يتبعوني
نزل من السيارة ونزع نضاراته الشمسية واجة بتجاهي
وباوع للمحل بتمعن وكال
.. شلونه الشغل وياك
كان يحجي ويكلب بعيونه بأنحاء المحل هاي من غير
نظرات التكبر الي يلقيها علية
.. والله الشغل بخير اتفضل محتاج اساعدك بشي
.. لا مو انا اليحتاج مساعدة خلينا المساعدة للناس اليحتاجونها
على فكرة الوالد عطف عليك وشاركك بالمحل
ترة مو تصدك ابوي حط ايده بيدك عبالك انت تاجر جبير ومعروف
ما انطيته مجال يكمل كلامه
هو انا منا گلبي محمل عليه من ورة هذولي الناس الي دازهم وراي يراقبوني ونوب هو كام يحجي هيج
ما حسيت الا انا لازمه من ياخته ولاطشه عالحايط
.. حرمات هاي الخلقة الحلوة تتخربط معانيها
......
جلال
وصلت لنفس المكان المسمى بطريق الموت
بلعت ريكي واتوكلت على الله.
سمعت صوت سلوان وراي .. جلال بدون عناد
خليني اروح وياك
.. لا سلوان خليك انت هنا
كلشي يصير الوضع ما ينعرف يم الجماعة اريد افتهم شنو الموضوع واشوف الجهاز بعيني ويفهموني شنو يسوون بي وبعدين انا اقرر اتعاقد وياهم اولا
كنا نحجي ووصلت نفس السيارات الي كانت تاخذنا
للمزرعة رحت صعدت وياهم بالسيارة
سلمت عليهم وردوا علية السلام بلغتهم العربية الفصحى
بعدما كعدنا انا والاسطى توفيق وبدة يشرحلي
شنو المطلوب مني وشنو الي يردونه من هذا الجهاز
كل الي افتهمته ان همة ناس تجار
وعندهم تعامل بجاه بالخارج هم الوحيدين الي يكدرون يدعموني ويوصلوني للجهات المعنية بشغل التقنية والتطور
كيفت على كلام توفيق وبنفس بعدني متردد
يعني معقولة الاسطى توفيق هيج بكل سهولة وطيب خاطر يريد مصلحتي وحتى وان اخذله ربح من الجهاز
راح يكون ربح قليل بالنسبة لشغله المعروف عنه
جاريته بالكلام وخليته يرتبلي موعد وياهم
اهم شي عندي اوصل للجهاز وافتهم بطريقتي شنو يردون مني
كانت السيارة تمشي على نفس طريق المزرعة
ورة ربع ساعة اتغير مسار السيارة
وبدت معالم الشارع يختلف والطريق اصبح ترابي محوط بأسلاك شائكة بعدها وصلنا لبوابة عليها حرس وبيدهم اسلحة وجهاز حاكية
فتحوا البوابة والغبار مالي ساحة الداخل
وسط الساحة ترابية كانوا مجموعة يتدربون
على تفكيك الاسلحة
هناك وجان اشوف ابو بهاء اجة بتجاهي لكن هالمرة كان لابس زي اسود ولابس عمامة سودة
بلعت ريگي وعيوني صارت تستطلع المكان بحذر
ابو بهاء.. السلام عليكم يا جلال قربان
.. وعليكم السلام ورحمة الله وبركاته
ربت على كتفي بترحيب وگال
.. مرحبا بك في موطيء السلام والان سوف
ينالك شرف الاطلاع على رايات الاسلام
كان ابو بهاء يحجي بفخر ويمشي كدامي للامام يدليني الطريق وانا والرجال نتبعه بكل هدوء
بس كل الهدوء المرسوم على وجهي
اختفى وحل محله الرعب وكف امام بوابة كبيرة
وبدة يفتحها بثنين ايديه وكال
.. انضامك لنا وعملك معنا سوف تكون
ضربة نصر ضد الشيطان
واول ما فتح البوابة وجان اشوووووووف



يتبع


لامارا غير متواجد حالياً   رد مع اقتباس
قديم 08-09-19, 05:41 PM   #10

لامارا

مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام

 
الصورة الرمزية لامارا

? العضوٌ??? » 216
?  التسِجيلٌ » Dec 2007
? مشَارَ?اتْي » 87,659
?  نُقآطِيْ » لامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond reputeلامارا has a reputation beyond repute
افتراضي

#قضية_لم_الشمل
#الكاتبة_نهى
#البارت الثامن



مساء الانوار عليكم احبتي المتابعين
جلال
كنت امشي ورة ابو بهاء مستغرب على تغيير شكله
وبنفس الوقت متخوف شنو الموضوع
توقف امام بوابة ضخمة وبدأ
يفتحها على وسعها
هناااااا وكان اشوف
الكابووووس الاسود الرايات السود
تشهدت على روحي ووصلت دكات گلبي لحنجرتي
اباوع على راياتهم السود ترفرف
بوسط قاعة تصنيع ضخمة
كانت عبارة عن مجموعة. ورش تصنيع ومختبرات عجيبة بأنواعها وعمال تقنيين واشخاص هواي من مختلف الجنسيات نظراتي تتنقل بيناتهم باستغراب
كلهم يشتغلون على قدم وساق مثل خلية نحل
والعجيب بالامر
انتبهت على حالة ان هذولي العمال الي يشتغلون
من دخلنا عليهم بقوا مستمرين بشغلهم ولا واحد بيهم التفت او رفع راسه
حتى يشوف منو الي دخل عليهم
يعني على الاقل من باب الفضول
شنو القضية هذولي شنو فلمهم شنو يصنعون هنا وشنو شغلهم
اقتربنا لورشة الحدادة
بس مبين شكله مو عراقي
التفت علية ابو بهاء وكال
.. اسمعني جيداً يا جلال
عملك سوف يكون مشترك مع ابو درع
هو ايضاً يعمل على السيارات وسوف يريك كيفية العمل هنا وانت بالمقابل سوف تريه كيفية ربط الجهاز ارجو ان تتعاونوا كما يتعاون الاخوة فيما بينهم
هزيت راسي بالموافقة وانا اباوع لهذا الي اسمه ابو درع وشنو يشتغل
ابو درع حداد كان يلحم مصفحات من الحديد المسلح
على واجهات سيارات صالون حديثة حتى تكون مقاومة ضد الرصاص
انتبهت من صفنتي على كلام ابو بهاء
.. يا جلال هل تسمعني ام تريدني اعيد عليك الكلام
مرة اخرى
هزيت راسي بالموافقة
.. تمام سيدي
.. انت اصبحت منا ويجب ان تقول مولاي الامير
.. سمعاً وطاعة يا مولاي
ما اعرف ليش من احجي وياهم هشكل احس بروحي كاعد اقرة كتاب الف ليلة وليلة
رجع باوع علية بنظرات تدرس وجهي وحط عيونه بعوني عبالك يريد يقرة دواخلي
وهالشي زرع بية الخوف المميت
وصار گلبي يرعد عبالك عندي امتحان
باوعت شلون اتقدم علينا ابو درع
مدري ابو بريص شكله يشبه البرص
ومد ايده القذرة الي كلها صخام ودهن تشحيم اسود
حتى يسلم علية
.. مرحباً بك في دولة الخلافة وبارك الله فيك لاختيارك
في الانضمام معنا لكي نعيد معاً الاسلام الى عهده السابق
هسة هذا بالله شجاوبه
.. يافرحتي بيكم
يمعود والله وانت ما محلفني اكاد اطير من الفرحة
كان كلامي عبارة عن كوكتيل فصحى مخلوطة بعراقي
ابتسم وكال
.. لقد اتطلعت على تقنية الجهاز ورأيت انك قد احسنت صنعاً
كان يحجي وياي وبعده ماد ايده للسلام نزل نظرته وباوع لايده الممدودة
وانا حسيت على دمي وصافحت ايده
.. تسلم يا اخي ان هذا بعض ما عندنا
بعدك ما شايف شي ان شاء الله اكون عند حسن ضنكم
......
نور
فتحت عيوني ولكيت نفسي نايمة بصالة بيت اهل اسيل
هاي شنو شلون وشوكت وليش منو جابني هنا
اتذكرت الصار بية ورجع گلبي انعصر داخل صدري وحتى النفس صار صعب اتنفسه
رفعت راسي ولكيت اسيل وامها يباوعون علية بعطف
نزلت دموعي وكلت بصوت مكسور
.. اسيل طلع امير ما يقصدني الي
اثاري كان يفكر يخطب غيري وانا الغبية مثل العمية
اتبعت امل واهن وصرت ابني احلامي بالرمل
ناسية موج الشط شكد غدار وشلون
بلحظة هدم كل شي
ام اسيل.. كولي يالله خالة ومسحي دموعج وحمدي ربج
ان السالفة اجتي على هيج
يعني هسة الي يسمعج يكول متفق وياج على الزواج وخلف وعده
.. لا خالة امانة الله الرجال ما واعدني بشي
بس الصوج مني اني
انا الي كنت عمية لدرجة صرت اشوف العطف الي بعيونه حب وعشق
ما اعرف شبية وشجاني يمكن طمعت بعطفه وشكلي اتعديت حدود الحلم وصار لازم ارجع لأرض الواقع يمكن المثلي هواية عليها تحلم واصلاً مالها حق تحلم
انا بنية عشت طول عمري ماسامعة كلمة طيبة
ومن يوم وفاة امي صرت ادور على الامان
ومن لكيت الامان والحنان والكلمة الطيبة ببيت امير
صار عندي امل وهوس شلون احافظ على هاي النعمة
حسيت بنفسي انسان مثل باقي البشر احب وانحب
ام اسيل جاوبتني وهي تمسح على راسي
.. تعوذي من الشيطان وكومي غسلي وجهك
وكولي يا الله. ولاتخلين الموضوع يأثر عليج
.. خالة صعبة
.. بنتي صلي عالنبي ، الله يساعد البنات الي
يواعدوهم الشباب على الزواج وبعدين يقلبون عليهن
هاي من غير سوالف الغدر والخيانة هاي لو انتي بمكانهن شنو تسوين
خالة كومي الله يرضى عليج
بس تشوفين مصايب الناس راح تهون عليج مصيبتج
اسيل.. اي والله ماما كلامج صحيح ياما وياما بنات
تحطمت حياتهن واحلامهن كله من ورة الحب والوعود الكاذبة
وتالي يعوفها ويتزوج غيرها
حمدي ربج على الاقل امير ما وعدج وبعدين خذلج
كانت اسيل وامها يواسوني
واني دافنة راسي بين ادية انا اعرف كلامهم كله صحيح.
بس غصب عني ابجي والله الامر مو بيدي
يعني سنتين مرت علي ما يوم احط راسي عالمخدة. اذا ما احلم بي
واحلم شلون تكون حياتي وياه اذا اتزوجنا
وشلون نخطط حياتنا سوية
اي شي اتمناه كان لامير حصة بي
معقولة اكدر انام وما احلم بأمير
مسحت دموعي كدام اسيل وامها كانت عيونهم مليانة عطف وحزن
سحبت نفس عميق ونهضت من مكاني ونفضت ملابسي
المعكرة بيدي صرت اعدل الكسرات بعناية
صارت عبالك ترتيب ملابسي اكبر همومي
انا لازم اتمالك نفسي مو من صالحي احد يشوفني وانا ابجي منهارة
ومثل كل مرة اتعودت احتفظ بمشاعري وانطوي على نفسي
واكتم حزني بگلبي مو شي جديد علية
همست بصوت مبحوح من البجي
.. مع السلامة تعبتكم وياي
ام اسيل .. وين رايحة ابقي شوية
.. لا خالة لازم ارجع عندي كومة شغل ينتظرني
خطية ام امير وصتني اسويلهم كليجة على باجر
وزحمة ارد طلبها و همة ناس طيبين وافضالهم مغركتني
وهذا اقل شي اسويه الهم
مو ذنبهم انا غبية وفهمت كرمهم وياي غلط
المفروض من الاول اكون فطنة واحمي گلبي من هيج غصة واعرف حدي
ام اسيل غمضت عيونها بقلة حيلة وعطف
اسيل .. نور ترة انتي ما مجبورة تحضرين حفلة خطوبته
........
ريم
مرت الايام وكثرت زيارات ابو سيف وانفراده مع عمو بالاستقبال مانعين دخول اي شخص وياهم
اكيد ديحجون عالشغل الي بقى متراكم بعد رحلة علاج عمو
اما انا بهاي الايام رجعت اتواصل مع صديقاتي ندى ورؤى
كلش مشتاقتلهم ورجعت لحياتي القديمة طلعات ونسات وية الشلة وبنفس الوقت اراقب عمو بس الغريب بالامر
عمو لحد الان بعد ما كال اي شي عن اولاده
يعني محدد اي وقت ناوي يلتقي بيهم
الي فهمته يريد يمهد لوجوده بحياتهم قبل لا يشوفهم
قطع حبل افكاري صوت الجرس ورة خمس دقايق
دخلت ام محمود علية للغرفة وبيدها ملابس مكوية
راحت فتحت الكنتور وعلكتهم
كنت مستلقية عالسرير على بطني اگلب بالنقال
سألتها .. اكول خالة منو دك الجرس
.. ما اعرف هذا رجال غريب ما شايفته انطاني ظرف
وكال سلمي هذا الظرف لحجي مؤيد ضروري
يقر......
كنا نحجي
وفجاءة قطع كلامنا صوت صرخة عمو يصيحني بعصبية
.. ريييييييييييم
طفرت من السرير مفزوعة وباوعت لأم محمود
ام محمود.. دخيلك ربي شبي الحجي
ما انتظرتها تكمل كلامها رحت ونزلت الدرج مستعجلة عالسريع
اريد بس اوصل لعمو الي بعده ينادي بأسمي
دخلت عليه بالغرفة لكيته يسعل بصوت عالي ولازم خاصرته
وعمة اسيا واكفة يمه تهدي بي
.. مؤيد الله يخليك اهدي شوية وخلينا نفتهم شنو الصار موزين عليك تعصب
رعبني منظره اول مرة بحياتي اشوف عمو هشكل معصب ومتنرفز
انتبهت عليه اختل توازنه
شهكت بخوف ورحت ركض عليه حتى اسنده قبل لا يوكع
صد ايدي بقوة دفعني عنه بنترة
باوعت عليه متعجبة
.. عمو شكو شصاير ليش هيج انت معصب
شنو سامع شي
ما حسيت الا على راشدي طبع خدي
شهكت متفاجئة من ضربته
الصدمة شلت لساني اتلمست خدي الحار
واني اباوع عليه
سحب مجموعة صور كانت متناثر عالميز وشمرهم بوجهي
مؤيد بعصبية.. لج كلبة حيوانة انا من تالي عمري يجي واحد يهددني بصورج
يساومني عليهن انطيه فلوس حتى يستر عليج
رجع مرة اللخ انطاني ضربة وهالمرة وكعت بالكاع
كنت خايفة منه وعليه ومتفاجئة بنفس الوقت
اريد احد يفهمني شنو الموضوع وصوري ليش عند عمو ومنو هذا الي يهدد عمو بصوري وشلون وصلن صوري عنده
رجعت كمت من مكاني اريد ادافع عن نفسي
.. عمو الله يخليك اهديء شوية و خليني افهمك
صدكني انا ما عندي علم بهذني الصور ولا عندي احد ارسل له صوري
.. لج سكتي حيوانة ما اريد اسمعلج اي نفس
هاي تالي دلالي الج استغليتي ثقتي بيج
سودتي وجهي بحركاتج الطايشة الله يسود وجهج على هاي العملة
روحي طلعي من كدامي ما اريد اشوفج
عمة اسيا التفتت علية معصبة
.. طلعي برة لا يصير بأخوية شي من وراج
الله لا يوفقج شكد طايشة
هذا الي كنت خايفة منه تجيبيلنا العار والله ما اعرف اذا صار على اخوي شي
انتي شتصخمين من وراه والله تصيعين ومحد يردج
عمو رجف جسمه وكعد على السرير وكال بضعف
.. هو انا هذا الي شايل همه
كلما اكول هاي البنية عقلت وتغيرت
تطلعلي بسالفة اقوى من الي قبلها
بس اني لحد هنا وكافي بعد ما عندي اي طاقة تحمل والي بية كافيني
حجيت بتوسل ادافع عن نفسي
.. عمو الله يخليك بس اسمعني والله ما اعرف منو هذا الي دازلك الصور
بشنو تريدني احلفلك ما اعرفه
كنت لازمة الصور بيدي واگلب بيهم
.. شلون ماعندج وياه علاقة وهذني الصور شنو تفسريهن
وشلون يعرف بتفاصيل حياتنا
لج حتى عن مرضي حاجيتله وتحلفين ماعندج شي وياه
اسيا طلعيها برة لا اكوم اجرم بيها
كان يحجي ويرجف
.. يالله خلاص راح اطلع برة بس الله يخليك كافي لتعصب وجهك احتقن لونه
اتوجهت للباب اريد اطلع من الغرفة واني ابجي بقهر حايرة
بس قبل لا اطلع عمو طلب من عمة اسيا
.. اسيا اتصلي على ابنج نائل خليه بسرعة يرجع للعراق حتى يعقد على هاي الحيوانة وياخذها وياه بعد ما اريد اشوفها
صرخت مصدومة من كلام عمو احس الصدمات والمفاجئات نزلت على راسي نزلة وحدة
رجعت عليه
كمت ابجي بجزع
.. عمو معقولة تزوجني غصب عني والله اكتل روحي وما اتزوج نائل
انا ما سويت شي
مستحيل اخليك تعاقبني على غلط اني ما ارتكبته
.. انتي تاكلين وحل وتسكتين ما اسمع منج ولا كلمة
يجي ابن عمتج واعقدلكم اثنينكم خليه يستر عليج
ياخذج تعيشين برة انتي تصرفاتج ماتمشي هنا بالعراق
التفت لى عمة وكال
.. اسيا انطيني النقال خلي اتصل على الضابط اركان
خلي يشوفلي حل بهاي المصيبة الي وكعت على راسي
العار منطيني يومين اذا ما انطيه الفلوس ينشر صورها
اسيا.. صار خوية بس انت اكعد شوية
انطته كاسة ماي
.. اشرب شوية ماي بلل ريكك
لا يصير بيك شي من ورة هالغبية.
اخذ كاسة الماي من ايدها وشربها
وهي كملت كلامها
.. لازم تحصدين نتيجة تصرفاتج الطايشة
اخذ النقال وفتحه وكال
.. طلعوا كلكم برة اريد احجي وية الضابط ما اريد اسمعلكم صوت
اجتي اسيا ودفعتني برة غرفة عمو
.. يالله طلعي برة
طلعت وسدت الباب وراها وهي تدردم
.. بالله شو وخري من وجهي
خلي اروح اتصل على ابني نائل واقنعه بلكي يستر عليج بعد هاي سوايتج السودة
كانت الصور بعدهم بيدي نزلت عيوني اباوع عليهن
وجان اشهك بصدمة هذا وجهي اي بس هذا مو جسمي
عزة هاي صوري كلها بالملابس الداخلية
وعندي صور بنفس ملابس حفلة مهر صديقتي ريتاج وواكفة يم ولد
منو هذا الشاب كل صوري عبالك تعود لوحدة ساقطة عاهرة
صرت ابجي بجزع حاطة ايدي على حلكي اكتم صوتي لا يسمعني عمو
هاي مو صوري كعدت عالكاع يم باب غرفة عمو
رفعت راسي ولكيت ام محمود بعدها واكفة يمي
وبعيونها نظرة عطف
.. صدكوني هاي الصور والله مو الي صحيح هاي اني
بس عمري وحياتي ما طاكة هيج صور وبهيج وضعيات
اصلا ما اتذكر انا ماخذة صورة بملابس داخلية
اجتي اسيا ورفعت صورة من الصور
.. زين هاي الصورة مو صورتج بحفلة صديقتج ريتاج
اني شايفتج بهذا الفستان تتذكرين بيوم كلتلج هذا
الفستان مو مناسب لعمرج قصير مكشف من يم الصدر
هم ننكرين ملابسج
هزيت راسي بعجز لاحول ولا قوة شجاوبها وكل الادلة تؤيد صحة كلامها
راحت وتركتني انكوي بناري خايفة
اباوع لأم محمود جمعت الصور من الكاع وهي تتحسب
.. حسبي الله ونعم الوكيل عالظالم
عرض بنية البيوت يعثر ياخالة
وان شاءالله انتي عندج حظ وبخت المظلومات صدكيني
راح تعثرين كل من نصبلج فخ
وربي هو ينطق الحق
مثلما نطق الحق ليوسف وسخر الحق يشهد لصالحه ويثبت برائته
وصارت خالة ام محمود تواسيني وتطبطب علية وتدعيلي
وانا الخوف اخذ مني كل اسلحتي
موضوع صدمة صوري المفاجئة
تركني بحالة عجز حتى ما اكدر افكر شنو اسوي ولمن التجيء بهاي الحالة
...........
جلال
رحت ورة ابو درع وجان اشوف الجهاز مالتي عالميز
اسلاكه طالعه شكلهم كانوا يتفحصون طريقة الربط
كوة لزمت نفسي ما اركض عليه واخذه
اتمالكت نفسي
باوعت لابو درع فتح غطا المحرك
وانا صرت اعاين المكان اريد اعرف وين مخارج هاي القاعة
انتبهت على شباك
ابو درع.. انظر هناك عدة اقسام من التقنيين
قسم ادامة وقسم مدرعة وقسم مفخخة
انت راح تعمل مع قسمين فقط قسم المدرعة وقسم المفخخة لان كلا القسمين يحتاجون السرعة القصوى بتنفيذ العمليات الانتحارية او المداهمة
هو يحجي وانا جسمي يرتعد
هم هذولي نفسهم الي ديحاربون عالحدود
اي انا سامع عنهم وشايفهم بنشرات الاخبار
ربي دخيلك انا شلون دخلت بهاي الدوامة
لا وانا تالي عمري اشتغل وية ارهاب
ابو درع كمل كلامه
.. انا يجب ان اتركك لوحدك حتى تكمل عملك
وسوف نلتقي فيما بعد حتى اعرفك على بقية العناصر
.. ان شاء الله
جاوبته وعيني عالجهاز
طلع وتركني بالورشة كانت عبارة عن ضوء اصفر معلك فوك ميز الادوات وعلى الميز كان الجهاز ينتظرني
رحت بسرعة عليه لزمته بيدي وصرت اتفحصه واگلب
غمضت عيوني وحسبت للعشر هنا صار لازم اتخذ القرار واختار بين اثنين
اما اتنازل عن حلمي وتعب السنين وارجع ابدي من الصفر واشتري مقابله دم اخوتي العراقيين
او احط ايدي بإيد هذولي ويتحقق حلمي على حساب هدر دم الابرياء وساعتها اكون بعت تراب الوطن
ونفسي وشرفي ومبادئي
وجان اتخذ القرار الي ما منه رجعة
ياوطن خلينا انا وياك على الزمن
لزمت الجهاز وبديت افككه بأيدين ترجف عين عالباب وعين على الجهاز
كطعت كل الاسلاك محيت حتى شكله
بعدها اتلفتت حولي بالمكان ادور على مخرج
طلعت من الورشة والعرك مالي جبيني
صارت عيوني تحوم على مخرج
سألت واحد مر من يمي وين الحمامات
اشرلي على نهاية الممر
مشيت بكل هدوء حتى ما الفت انتباههم
توجهت على الحمامات فتحت الباب
الريحة كانت نتنة كريهة
الله يلعنكم شكد قذرين
صرت ادور على منفذ اطلع منه
ما بقى عندي وقت بس يشوفون شكل الجهاز المكسور
راسا يعرفون بهروبي
شفت شباك فوك للتهوية حجمه وسط
اتسلقت بروحي العزيز
صرت اتعلك بالحايط وصلت للشباك وطلعت راسي بالاول وشفت الوضع بالخارج
شكل الحمامات بالخلف لان كانت على بعد متر من سياج المعسكر الي كان محاط بأسلاك شائكة
توكلت على الله وبديت اطلع جسمي من الشباك شوية شوية
صحيح كان حجمه وسط لكن اكيد مو مناسب لجسمي الرجولي
وتجرح جسمي من قطعة زجاج صغيرة باقية بالشباك الي كسرته
مو مهم كان شعور الخوف والقتال علمود الحياة هو الي يحركني
انسلخ جلدي من صفحة خاصرتي
بس هذا كله انا ما احس بأي شي
ويا روح ما بعدج روح
طلعت جسمي كله ووكعت على كتفي بالكاع لان الشباك كان عالي لزمت خاصرتني ونهضت من الكاع
ورفعت راسي حتى اعاين ارتفاع السياج
كان ارتفاعه تقريباً مترتين ونص
سمعت صفارات الانذار بالمعسكر
واصوات العناصر العالية صارت خبصة
ربي دخيلك
يمكن عرفوا اني هربت
صار رمي مفزع بالجو
ما اعرف منو المقصود اني لو غيري من هذا الرمي
سمعت صوت انفجار
وصوت ابو بهاء ينادي على العناصر
.. يا اخواااان لقد غاروا علينا بالهاونات
استخدموا المدفعيات من المخارج
بعدها بدت اصواتهم تقترب على جهتي
ربي سترك راح يشوفوني
رجعت للخلف ورفعت راسي وبعدها انطلقت اركض بكل سرعتي واتسلقت عالسياج
هي قفزة وهي وكعه من الجهة الثاني للسياج
من حلات روحي بسرعة نهضت من وكعتي وباوعت للمكان داير ما دايري كانت بساتين واشجار تحيط بالمكان
وركضت على وجهي بكل سرعتي صرت انافس الفهود بسرعتي وكأنما جهاز السرعة الي صنعته ربطته برجلية يا روح ما بعدج روح
اذا يلزموني والله يثرموني بالمثرامة
ربي نجيني من القوم الظالمين
.......
ريم
يومين مرت علية عمو ما يقبل يشوفي او يحجي وياية
والمشكلة عمو فاجئنا اليوم بموقفه الصارم حتى من عمة اسيا
واول ما دخل للبيت صاح لعمة اسيا و دخلوا بالغرفة وسدوا الباب عليهم
بعد نص ساعة بدت اصواتهم تعلى وصار صياح
وكان صاحب الصوت العالي هو عمو
شكو شنو صاير
المشكلة ما اكدر انزل
بقيت واكفة على الدرج اريد اعرف شصاير حتى ام محمود طلعت من المطبخ
وتباوع على غرفة عمو
ورها طلع عمو من الغرفة وصاح بصوت منفعل ومعصب
.. ام محمود تعالي ساعدي اسيا حتى تلم ملابسها وتطلع
لان راح تسافر
انرسمت على وجهي علامات التعجب
.. عمة اسيا راح تسافر معقولة
طلعت عمة اسيا ورة عمو تتوسل بي
.. مؤيد انطيني فرصة بس افهمك ترة الي وصلك
الكلام يكذب عليك يريد يوكع بيني وبينك
.. اسيا رحمة على والديج سكتي وخليني متحملج ما دام النفس بعدها عليج طيبة لا تخليني اتخذ اجراءات بحق اولادج واسحب منهم مساعدتي وانتي تعرفين شنو اقصد
.. مؤيد ابوس ايدك اسمعني انت لازم تعرف انا سويت كل هذا علمود مصلحتك
.. اسياااا يا مصلحة تخليج تطردين طفل صغير من بيت ابوه
اريد اعرف شلون انطاج گلبج تطردينه وتكذبين علية وعلى امه
منو انطاج الحق تحجين نيابة عني
.. بس شكلي انطيتج مجال اكثر مما تستحقين
انتي كفر اسميج اختي
اباوع لعمو لطالما يحجي كان لازم خاصرته موجوع ا
توجه للباب يريد يطلع من البيت وكال
.. جمعي كل غراضج والسايق ينتظرج بالباب حتى ياخذج لبيت خالة امي
خالة فليحة تبقين عندهم
منا لحد ما يحين موعد طيارتج
منا لذاك الوكت ما اريد اسمعلج اي نفس
ولا تفكرين ترسلين واسطات وناس حتى يصلحون الوضع بينا
لان ساعتها ما راح اسكت وافضح كل سوالفج
طلع من البيت وترك عمة اسيا تحوم بالبيت وتتصل على اولادها
.....
نور
طلعت من بيت خالة سناء
وشايلة بيدي سلة الكليچة اليوم حفلة خطوبة امير
وام امير وسرى اتصلوا واكدوا علية اجي للخطوبة
لبست فستاني الي اشتراه امير
بلعت الغصة ودست على كسرة گلبي ورفعت راسي بتصميم
ادعي ربي ان ينطيني القوة والصبر حتى ما انهار
كدام الناس ربي طلع حبه من گلبي
مثلما دخل بگلبي من غير ما احس
لبست شالي كانوا بنات خالتي واكفات يمي يباوعون علية بأعجاب
كانوا بنات صغار تتراوح اعمارهم بين ال ١٣ سنوات وال ١٦سنة
.. نور صايرة تخبلين
جاوبتها الثانية.. صاير مثل عروس حلوة
ابتسمت بوجههم بدون ما اجاوبهم اتعودوا على سكوتي
اخذت السلة وطلعت من البيت وشافني زوج خالتي ووياه صديقه سعدون
مشيت وتركتهم ما سلمت عليهم المعروف عني الخرسة
يعني ما احجي وية اي بشر بالمنطقة
عكس صورتي وانا ببيت اهل اسيل وبيت امير
اكون منطلقة بالكلام وما خايفة
سمعت سعدون يحجي وية رجل خالتي صابر
يكله .. ولك صابر هاي الصاروخ منين
زميت شفايفي بصرامة وعجلت بخطواتي عالسريع
شكد اكرهم الله ياخذهم
سمعة سعدون وصابر بالمنطقة زفت وكلها تصيح منهم الغوث
وصلت لبيت امير وهناك كانت اجواء البيت يعمها الفرح
واول ما دخلت استقبلتني الدكتورة سرى
.. شنو هذا الكيك نور وين جنتي دافنة كل هذا الجمال عنا
ابتسمت بخجل وجاوبتها .. حتى انتي حلوة
كانت لابسة فستان ابيض واسود قصير
رحت حطيت السلة عالكاونتر
وشفت كراتين قطع الكيك والعصاير بأنواعه
وسلة كبيرة كان بيها علب المهر
اشكال كولش حلوة
دخلت ام امير بكرسيها المتحرك وكان امير يدفعها
رحت سلمت عليها وباركتلها بخطوبة ابنها
وحرصت ما اخلي عيوني توكع على امير
لكن اين المفر
قاطع كلامي امير وكال
.. وانا مالي كلمة طيبة يعني مو شكلج نسيتي تباركيلي
رفعت راسي ووكعت عيني عليه ورف گلبي غصب عني
كان لابس قاط رصاصي وطالع يجنن
ماشاء الله
همست بصوت ناصي.. امير مبروك ربي يسعدك
.. مشكورة ويوم الالج اشوفج عروسة وبشرط
هذا الي يتزوجج انا اروح اسأل عن اصله وفصله منين
لان احنا ما نزوج بناتنا لأي واحد
ابتسمت على كلامه الطيب وياية مث ماهو متغير
سرى.. استاذ امير هسة ما افتهمنا تزوجني لو تزوجها
ما اعرف ليش احسك هاي الايام صاير مثل دلالة تزوج البنات
كنا نحجي ورن نقال امير رد عالمتصل وبعدها
غلق النقال وكال يستعجلنا
.. يالله بنات جهزوا نفسكم راح يجون عمامي وجايبين وياهم الشيخ
يالله استعجلوا خلونا نروح
رحنا لبيت العروس
وكانت الناس متجمعة بالفرح خطبوا وبعدها عقدوا لأمير وبنت خاله المرحوم اسمها دينا عقدوا للعرسان
كان بيت العروسة صغير وكانوا مخططين بس يعقدون
تنتقل الخطوبة لبيت امير هناك يسون الحفلة لان بيتهم اكبر
ياربي صبرني
رجعنا لبيت امير وهناك بدت الحفلة واشتغل الديجي ودخل امير وكعد يم عروسته
وانا احس برجفة برد وصلت لكلبي اشوفه شلون
يهمسلها ويلبسها الكلادة.
غمضت عيوني وابتعدت من كدامهم وصرت اقدم
الحلويات والعصاير عالمعازيم
رربي يسعدهم ويبعد عنهم كل شر
ما لي حق اتحسر على شخص هو بالاصل مو الي
كانوا المعازيم هواي والاطفال بدوا يزعبلون البيت
صرت اركض وراهم والم كراتين العصاير الي بالحديقة
وعيوني بعدها تدمع من وحدها
جبت اكياس بلاستك خاصة بالزبل وبديت اجمع
الزبل حتى اطلع اذبهم بالحاوية
كانت الحاوية قريب عالباب
عدلت شالي على راسي
وطلعت برة يم الباب وبيدي اكياس الزبل
وقتربت من الحاوية وعيوني تدمع
لفت انتباهي حركة بداخل سيارة
كانت واكفة بالجهة المقابلة الي
داخلها رجال كبير بالعمر كان يباوع علية بصورة غريبة
مسحت دموعي حتى اركز هذا منو وليش هشكل يباوع علية



يتبع
اتمنى لكم قراءة ممتعة
مع تحيات اختكم نهى الحسون


لامارا غير متواجد حالياً   رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة

الانتقال السريع


الساعة الآن 02:28 AM



Powered by vBulletin®
Copyright ©2000 - 2024, vBulletin Solutions, Inc.