07-09-19, 09:57 PM
| #54 | ||||
|  بدايه حلوه بس من الي فهمت سعود وام سعود زوج بنت راعي المخدرات التومن البنت متزوجة ولدخالها والولد يحب البنت الي مع عمتها تدرس الي تصير اخترسعود الي تزوج بنت راع ي المخدرات فهد ولد عم التوم متزوج وحده دلوعة ويدور وحده يتزوجها ولد عمه يحب بنت عمته وشكل ولد عمه متزوجها اذا موغلطانه هي اخت سعود ام الطفل واخوه يحب بنت ثانيه يمكن اختها شكل الاب عنده ملاحظه علي عيال اخته الان لايكون ذيك البنت النشبه الدلوعه هي الي يحبها الان مطلق يحب بنت عمته كذا يبي لنا نحفظ الاسما | ||||
|
|
10-09-19, 11:46 AM
| #55 | ||||
| السلام عليكم ورحمة الله وبركاته .. اخباركم جميلاتي .. سيكون هناك توضيح عن كل شيء وتبرير لغيابي ومواعيد جديده .. كل هذه ستكون الليله 💗 اليوم عندنا فصل استنززززفني جداً جداً واستنزف مشاعري 😩 مقدمماً .. اعتذر جددداً جداً لكم الهائل من الحزن في هذا الفصل لكني حاولت اخراجه لكم كما يتطلب 😩💔 الفصل طويل جداً ونقله نوعيه للروايه اثر فيني هذا الفصل وهو يلامس شيئاً في قلبي 🥺 حالياً انا فالجامعه وابي يكون لي نظرة تصحيح اخيره على الفصل للتصحيح يعني ترقبو ان شاء الله الساعه 8 موعدنا بإذن الله .. تحياتي لكم 💗 التعديل الأخير تم بواسطة ebti ; 10-09-19 الساعة 09:12 PM | ||||
|
|
|
10-09-19, 08:24 PM
| #58 | ||||
| الفصل الخامس .. واذكر جهودك عندما جاوزت أول منعطف أرأيت أنك تستطيع؟ أم أن من قطع المصاعب كان شخصاً مُختلف؟ أنت الذي إن شئت حوّلت الخريف إلى ربيع فاعبر و واصل بالمسير، لا تخف تعال تعال حبيب خاله قالها وهو يرى خطواته المتعثره تجاهه وهو يحمله ويقبله : ذيب كنك خالك دخلت الجوهره تحمل القهوه وتضعها ع الطاوله: لايكون بيقعد هنا نظر لها بطرف عينه : مضيق عليتس الجوهره: ابداً لكن ما احب ازعاج الأطفال ينرفزني فهد بضيق: اتوقع الله مأخر عننا الخلفه بسبة كلامتس ذا وضعت رجل فوق اخرى ولم يروقها حديثه: انت اللي مستعجل بزياده والا ما تأخرنا بعدين شوف شلون تعب ومسؤوليه ما اتخيل والله فهد: شلون ماتتخيلين مالتس نيه يعني ! قطع حديثهم اتصال هاتفه ليرد ثم يصرخ بحمّيه: ابشررر ارسل لي الحين اغلق الهاتف وخرج مسرعاً منادياً ابناء عمه .. قبل يوم .. سمعت صوته يدخل قسم الرجال ثم يدخل مسرعاً نحوها ويلقي هاتفها عليها: امسكي جوالتش و اصه الربع عندي مانيي قهوه ولاشي ادخلي غرفتش حتى المطبخ لاتطلعين له ولا ابغى اسمع صوتش او اي شي قالها وهو يغلق الباب لكنه لم يجد مفتاحه ليهمس بغضب: ويننننه يابقره مهره: ما ادري انت اخر مره شليته تذكر انه من اخذه ليخرج مسرعاً وهو يغلقه اما مهره دخلت غرفتها وهي تتصل بشقيقها مطلق وتبوح له بما ضايقها منذ زواجها ، لن تصمت بعد الآن ستخبر خالها كذالك ، طيلة حديثها كانت تسمع غضب مطلق وهو يكيل عليها وعليه الشتائم ويوبخها لماذا تصبر على كل هذا بل انه اقسم انه سيكون عقابه قاسياً له وانه سيعود اليوم على اول طائره بالرغم انها لم تخبره بكل شيء وبضربه المبرح وكلامه عنهم داائماً وبالرغم من هذا اقسم انها لن تعود له حتى لو كلفه حياته وشدد عليها الاتخبره بما فعلت وان تتجنبه حتى عودته اغلقت منه بعد ان شعرت ان هماً كبيراً قد انزاح عنها بالرغم غضبه الشديد منها الا انها تعلم انه تحت تأثير الصدمه ولكن فالنهايه سيتفهم موقفها وسبب سكوتها عنه .. مرت الساعات وهي لاتزال حبيسة الغرفه لاتسمع اي صوت فالخارج ولكن تهديده جعلها تستجيب لطلبه حتى سمعت ضجيج فالخارج يتبعه صرخه انثويه مدويه ، خرجت مسرعه وهي لاتشعر بشيء سوى صوت الصرخه اللذي سمعته وتطوف بها خيالات عده ، فتحت الباب الفاصل بينهم وهي ترا باب الشقه يغلق بسرعه ، اسرعت للمجلس لتصدم بما رأت وتبرد اطرافها .. المجلس غارق بالفوضى وعشاء يتوزع على طاوله صغيره فالمنتصف والأغرب حذاء نسائي ذو كعب عالي ملقى وبجواره ربطة شعر ، ولكن ماجعلها تفقد توازنها وتبرد اطرافها هو منظره المخيف .. مستلقي وقد انصبغ وجهه باللون البنفسجي وجحضت عيناه بلون احمر كالدم و تجمع حول فمه زبد ابيض منضره يدل على انه مختنق ، اقتربت منه وهي ترجف من شكله اللذي يدل على ان الحياه قد فارقته ، وضعت يدها على خده وهي تهمس بأسمه لكنها صرخت وهي تعود للخلف بشده من ملمسه البارد كطعة ثلج ، اجهشت ببكائها وهي ترا الروح قد سلبت منه تماما ، وضعت يدها على فمها وهي تركض للخارج دون ان تدرك انها خارجه في منامتها فقط ، طرقت الباب المجاور لشقتها وهي تصرخ بهم : افتحححو تكفووووون فتح الباب ليصد بصدمه من منظر الأنثى المتكشفه امامه وهي تصرخ: تكفى يابومشعل الحقه ناصر بيموت سحبها للداخل وهي يصصرخ بزوجته ويخرج مهرولاً لشقة جاره ليتبعه العديد من الجيران اللذين خرجو على اثر الصراخ .. احتضنتها عبير وهي تهدئها وتذكرها بأجر الصبر والأحتساب وهي تنتفض بين يديها وتبكي من منظره الغريب والمخيف : ماشفتيه كيف صاير مب ناصر تغير والله (وضعت كفيها على فمها) لونه بنفسجي ماعرفته شكله غير عبير : تصبري حبيبتي الله يجبر كسرك ابتعدت عنها بسرعه وهي تتذكر: جوالش بكلم اخوي تكفين بسرعه خالي لايدري (بكت بحرقه) بينفجع خالي تكفين عطيني اكلمه بالرغم من المها وفجيعتها الا انها لم تفكر الا بخالها اللذي كان نعم الأب والسند منذ طفولتها لاتريد ان يفجعه احد فهي تعلم انه يبيع الدنيا كلها لأجل ابنه ناصر فكيف سيكون وقع الخبر عليه :: :: :: أقْلِل عتابك فالبقاء قليلُ والدهر يعدل تارة ويميلُ ولعل أيام الحياة قصيرة فعلامَ يكثر عتبنا ويطولُ رأى اتصال ابن عمه وشقيق زوجته يضيء شاشة هاتفه ، استغرب وهو يرى الساعه تشير للواحده ليلاً همس بقلق (خير اللهم اجعله خير) رد على الأتصال: مرحبا ابو سعد ابو سعد بإحترام : السموحه نفدا خشمك على الأزعاج لكني دخلت المجلس ابغاك توقف بقلق وهو يؤكد احساسه: ارب مابه خلاف ابو سعد: ان شاء الله مابه خلاف تعال خرج مسرعاً وهو يرتدي لباسه ويسمع نداء زوجته خلفه لكنها حاول ان يطمنها رغم قلقه .. دخل المجلس ليتوقف بصدمه وهو يرى ثلاثه من ابناء عمه وصديقه المقرب علم ام هناك امر جلل .. قبل ان يسلم همس بقلق: منهو ؟ تقدمو منه جميعهم للسلام ليرد اكبر ابناء عمه: اجلس يابوناصر بتخلينا واقفين امسك ساعده وهو يشد عليه بحزم وقد ارتجف صوته: سألتك بالله منهو من عيالي مطلق والا ناصر حينها اقترب وهو يربت على كتفه بمواساه: الله اللي عطى والله اللي خذى ولدك ناصر يطلبك البيحه تهاوى على الكرسي وهو يضع يده على عينيه ويهمس بضعف: اللهم اجرني في مصيبتي واخلفني خيراً منها ، اللهم اربط على قلبي وقلب امه ومرته ان لله وانا اليه راجعون تأثرو جميعاً من تماسكه اللذي صدمهم ومن نبرة الحزن والكسر اللتي غلفت صوته اقترب منه صديقه حسين ، جلس بجواره و وضع يده على ركبته: الله يثبتك وانا خوك و يعوض شبابه فالجنه ويخلفك خير في مطلق نظر له وقد التمع الدمع في عينيه ، ثم اشار بكفه على كتفه من الأعلى: اما انا ياحسين ذا اليوم كن من قص يدي منيه (قالها وهو يشير بعلامة القطع على كتفه) راح ذراعي وراح يميني ويمين خواته انهى كلامه ليغطي عينيه بغترته ويبكي بخفوت ، وذكريات ابنه تطوف امامه منذ طفولته حتى مراهتقه وشبابه ، أبنه الغامض الذي لم يستطيع الأقتراب منه ابداً وهو يرده في كل مره حاول الأقتراب ، ابنه الغيور اللذي يعتقد دائماً انه يفضل مطلق عليه ولو علم مكانته في قلبه لما تجرأ على التفكير، لاينسى مكالمته له قبل ليله واحده فقط وهو يوصيه بنفسه كثيراً ومطولاً ثم يتبعه بعد ان اغلق الهاتف بأن قام بتحويل مبلغ مالي له ، مسح عينيه وهو يحدث صديقه بحزن: قلبي قرصني عليه البارحه وكلمته وتطمنت عليه وقال ماعليه خلاف ، ويوم قفلت عيا قلبي يرتاح قلت يمكن محتاج فلوس ومستحي وارسلت له بدون مايطلب مادريت ان فرقاه هي اللي ماكله قلبي (غطى وجهه بإنهزام) ينعى وجهي يابوك ينعى وجهي ابو سعد: ادع له بالرحمه نفداك وتماسك عاد قدامك عرب داخل وهات اغراضك عينا لكم حجز كلكم الفجر معاد الا ساعتين رفع رأسه بتساؤل مكسور: حادث ؟ هز رأسه بالنفي: ظني انها سكته قلبيه ، مطلق كلمنا وعطانا العلم وهو قدهو بعد فالطياره بيوصل بكره ان ربي احياه ابو ناصر وقد تذكر مهره: وبنتي ؟ مهره من اللي معها لم يود اخباره فهو يجهل ردة فعله لكنه اجبر: عيال عمها وعمامها كلهم عندها حينها توقف وقد انزاح همها قليلاً فقد آمن ان ولو بعد حين سيجتمعون :: :: وإنْ مررتُ مكاناً كان يجمعنا فاض الحنين وضاقت منه أضلعُهُ من ذا سيرحلُ ؟ قد حار الوداع بنا تُرى أُودِّع روحي أم أودّعُهُ …!؟ في الصاله تجلس يجوارها وقد نقلت لها توترها: نوره وش قال لش ؟ اخلعتيني نوره وقلبها قد امتلاء بالعبرات التي تجهل سببها: مدري طلع يسعى يافاطمه يالله يارب انك لاتفجعنا لم تكمل حديثها حتى تسمع صرخه دوت فالمكان وهزت ارجاء المنزل نزلتا مسرعتين لتعود فاطمه بسرعه وهي ترا شقيق نوره يحتضن ريم بقوه و هي تنتحب بين يديه سحبت جلال الصلاة من الصندوق المخصص له وهي ترتديه على عجل وتغطي وجهها بطرفه بعد ان سمعت بكاء زوجة اخيها ، وهي تنزل متعثره فالدرجات ومسرعه للأسفل ( يارب لاتفجعنا ربي لاأسألك رد القضاء ولكن اسألك اللطف فيه) وصلت للأسفل لتركض لها ريم وهي تنتحب: راح ناصر ياعمه خوووووي مات ليت يومي قبله وضعت كفها على قلبها وتوجهت نظراتها بسرعه لشقيقها ، لسندها و ارتكازها في هذه الدنيا ، لمن جعل الدنيا سعه ورحابه تحتويها بعد ان جعلها والدها اضيق من خرم ابره ، رأت عينيه المكسوره اللتي تخبرها ان فراق ابنه قد كسره ، توجهت مسرعه وهي تحتضنه بقوه تواسيه وتواسي نفسها ، دفن وجهه في كتفها وهو يكتم نشيجه ، هي شقيقته و والدته هي جبراً لكسره دائماً ، ليتشاركاً المهما الآن ليشكي لها فراق ابنه وتشكي هي ضعف صغيرتها الأرمله : راح سند ظهري يافطوم ، كم قسيت عليه وخاصمته عشان خواته بعد عيني مادريت اني انا اللي بعيش لهم لحالي وهو بيخلينا احتضنته بشده وهي تود ان تزرعه بداخلها: انا عونك وانا ظهرك ياخوي راح ناصر وعاد مطلق والله لو تقول له احذف عمرك فالضو مايقول لا علي: الله يخلفني فيه خير ويعوض مهره ويجبر كسرنا ابتعد قليلاً وهو يمسح دموعه لتنحني وهي تقبل يده وسط دموعها: تكفى نفداك لا اشوفك مكسور تراك قوتنا وسندنا لاشفنا حالك شين ضعنا من بعدك جعل شباب ناصر للجنه وجعلك من الصابرين المحتسبين علاقتهم منذ نعومة اظافرهم وهي فريده ومختلفه حتى في ضروفهم القاسيه عاصرو وكافحو وكأنهم روح واحده وهاهي تورث هذه العلاقه الفريده لتوأميها .. :: :: :: بعد خمس ساعات درب ، حياتس دخلت امرأه في منتصف الستين وصوت ذكرها يملأ المكان ، نظرت للفتاتين امامها لاتعلم ايهم هي لكنها سألت بحذر: مهره رفعت رأسها بحده وهي ترا امرأه امامها خلعت نقابها وهي تتقدم قليلاً : مهره انا ام فهد مرة عمتس مسفر شهقت بصدمه وهي تشعر ان الأرض غير ثابته تحتها ، غطت وجهها وهي تنتحب بشده فهي لاتزال تحت تأثير صدمة منظر ناصر ، لكن المرأه تقدمت بسرعه وهي تحتضنها بحنان: عظم الله اجرتس يابنيتي ، (دنت من اذنها وهي تهمس) حن اهلتس وحن عونتس كلمنا مطلق وجيناتس يابنيتي بكت بشده: وين امي ومطلق ابغاهم ، خالي بينهبل انفداش طمنيني هو بخير تكفين علميني ام فهد تأثرت وهي ترا ثمرة تعب خالهم الآن وهي تنسى حزنها وتحرص على خالها اكثر من نفسها ، خالها الذي فعل اللذي لم يفعلوه هم : بخير وكلهم جايين الحين قومي غسلي وجهتس يابنيتي عيال عمتس يبون يعزونتس توقفت وعبير تسندها وسط استغرابها لهذا اللقاء الغريب ، ساعدتها تغسل وجهها وهي تعطيها عبايه لها لبستها وهي تشعر انها تسير بلا روح عاد لها منظر ناصر لتنتحب اشد من قبل وتنهار على الأرض بلاحيله وتأتيها زوجة عمها مسرعه وهي ترفعها بمساعدة عبير: اذكري ربتس يامال الجنه ادعي له بالثبات والرحمه ( التفتت لعبير) يابنيتي اذا عندتس عصفر عطيني مع ماء ذهبت تحضره وهي قادتها للصاله بعدما عدلت حجابها بيدها ثم ناولتها قليلاً من العصفر: سمي يابنتي اشربيه عن الروعه الله ينفع به خذت عدة رشفات ثم تنقبت وهي تسمع صوت جارهم اللذي امر زوجته بالدخول وتخبرهم ان هناك رجلان سيدخلان الآن لكن زوجة عمها منعتهم: كلموها من ورا الباب المره في حداد تحدث متعب: ياعمه خليها تجي بيتها وتعالي معاها الشرطه يبونها تمسكت بيد عمتها بقوه وهي ترجف : ليه الشرطه وش يبغون طمنتها عمتها: تعالي وبنشوف خرجو لتصدم من تواجد رجال الشرطه وقد احاطو المكان واخلوه سوى من اربعة رجال لاتعرفهم هاماتهم قد زاحمت الضياء المتسلل من مدخل العماره فحجبوه بالكامل ، شدت على يد زوجة عمها وهي تسمع صوت قريب منها: عظم الله اجرتس ام مطلق ادخلي الضابط يبيتس وامي بتدخل معتس تحدثت بصوت قد انهكه البكاء: وش يبون فيني خلوها لين يجي مطلق تكفون مطلق جاي مابيخليني فهد: والله لو علينا مادخلناتس بس الوضع اكبر مننا خلينا ندخل عشان ننهيها والجيران مايقعدون يطلعون القيل والقال دخلت المنزل وهي ترا المجلس وتصد بسرعه وهي ترا المكان قد خلى منه ولايوجد سوى رجلان من البحث الجنائي توجهت للصاله وهي تسقط على اول كنبه بعد ان عجزت ركبتيها على حملها ، رفعت رأسها للذي امامها وهي تسأله بقلق: وش يسوون في غرفتي ليه يفتشون البيت متعب بهدوء: بيجيتس الحين الشرطي بيسألتس وبيوضح لتس كل شي قاطعه فهد: انت تعرفين شلون مات هزت رأسها بالنفي وهي تختنق وتتذكر صرخة المرأه سمعت خطوات الضابط امامها وهو يجلس بعيداً قليلاً: عظم الله اجرس اختي اومأت برأسها بعدما عجزت عن الرد ليكمل : المفروض مب ذا مكان التحقيق لكن عشان خاطر اخوانس ، وانت خليس دقيقه في اجاباتس عشان تطلعين منا بدون مانحتاج ناخذس قاطعته: ليه تفتشون بيتي الضابط: شلون مات ناصر هزت كتفيها بحيره: دخلت عليه لقيته مختنق و اول مالمسته لقيته بارد وميت ورحت علطول للجيران الضابط: ومتى اخر مره شفتيه؟ مهره: قبل يموت ب 7 ساعات يمكن دخل وقال عنده ضيوف الضابط : ومين اللي كانت معاه ؟ كاميرات الشقق رصدت دخولها وخروجها رفعت رأسها لتسقط عيناها الواسعه بعينيه المدققه ، لكن عينيها الجمته وبعثت رجفه في اوصاله جعلته غير قادراً على السيطره على نفسه بالرغم انها تضع الطرحه مغطيه عينيها الا ان صدمتها فضحت جزء منها: ما اعرف قلت لك قالي عندي ضيوف لاتدخلين حاول ان يستجمع نفسه وهو يشعر ان عينيها قد اخترقت اعماقه ، وتوتره لم يطوف الأثنان الواقفان الضابط: اشرحي لي من البدايه شرحت منذ دخوله حتى سماعها الصرخه وخروجها من الغرفه .. الضابط: طيب زوجس تعرفين احد من ربعه اللي يقعد معاهم اي شي بسيط بيفيدنا هزت رأسها بالنفي: لا ما اعرف اي احد حتى اسمائهم (اردفت بخوف) زوجي مقتول ؟ الضابط: للأسف التحليل وصلنا قبل شوي زوجك ميت بسبة جرعه زايده شهقت بعنف حتى كاد نفسها ان ينقطع: جرعة ايش انت تسمع وش تقول الضابط: اقدر صدمتس لكن زوجس كان يتعاطى و كان فيه حرمه معاه بالرغم اني استغرب شلون ماحسيتي بكل هذا مالت برأسها على كتف ام فهد وهي تعض شفتيها بقوه كي لايخرج انينها الله يسامحك ياناصر الله يغفر لك الضابط: اختي انت مب متعاونه معانا ( التفت لفهد ومتعب اللذان غلفتهم الصدمه حتى الجمتهم ): اسمحو لي هي مب متعاونه وانتو تشوفون مافيه حرف يخدمنا او يخدمها فالتحقيق تكلم بصوته الأجش: بعد اذنك بكلمها الضابط: تفضل متعب: المرحوم قد شفتي عليه تصرفات غريبه ؟ شلون يدخل حرمه البيت وانت ماتدرين والشقه صغيره لايعلمون شيءً ، ولن اذكر شيء يمسه بسوء رحل بطيبه وشره ، هزت رأسها بالنفي: ماشفت منه الا خير والحرمه ماشفتها كنت ادرس فالغرفه وانت يوم فتشتو اكيد شفتو لابتوبي وكتبي مفتوحه كلها وهو قالي عندي ضيوف طبيعي اني ماراح ادخل (اختنق صوتها) وانا احسبهم رجال ماقد شفت عليه اي شي يخليني اشك اتاه اتصال فخرج للخارج وهو يشير لفهد ان يحاول ان ينهي التحقيق دون خروجها .. الضابط بثقه: اخت مهره الواقع ينافي كلامس انت تقولين شفتي كل خير واخنا لقينا فالشنطه اللي معاه فالمجلس هذا (قالها وهو يشير بورقة تحمل ختم المستشفى قبل ستةً اشهر) هذا تقرير ضرب واعتداء ماخذته من مستشفى ؟ ابتعدت قليلاً وقد شعرت بشيء اشبه بالطعنه الحاده ان يكون كل ماحرصت على اخفائه مكشوف للعلن ولمن تراهم لأول مره مهره: مايحق لك تتكلم في خصوصيات عائليه قدامهم ولا فيه قانون يبرر لك تلعثم من ثقتها ومن عينيها اللتي التمعت بكسر غريب: اعتذر بس هذول اهلس والا غلطان مهره بنفي: ولاحتى قدام اخوي الضابط اشار لفهد: تقدر تتفضل يابوعبدالعزيز رفع حاجبه بغيض: اسمح لي (التفت لمهره) وانت يابنت العم اعتبريني جدار وامي ازهليها السر مب طالع من بين جنوبها لم تستطيع الرد ولم يعود بها طاقه حتى ، بلا شعور قبضت بشده على كف زوجة عمها وهي تتذكر ضربه لها تلك الليله حتى سقطت بين يديه بلا حراك وعندما نقلها للمستشفى ورفضو خروجها حتى تأتي الشرطه لكنها اقنعتهم ان خرانه عملاقه سقطت عليها .. شعرت بألم في اسفل ظهرها مكان ظربه تلك الليله اللتي لم يرحم ضعفها وتوسلها بالرغم ان القطب لم تكن كبيره لكن شعرت انها حديثه للتو عندما ذكرو هذه الذكرى .. انتهى التحقيق وذهب الضابط توقفت بجوار ام فهد وهي ترمي بثقلها كاملاً على جسدها فلاطاقه لها بعد الآن لأي شيء ،ماسمعته اكبر من احتمالها وطاقتها ، توقفت بالقرب منه ولكن بينهم عدة خطوات: انا ما اعرفكم ولا ادري وش طينتكم ، لكن بحساب الدم اللي بيننا تراني طالبتكم (استرو ماواجهتو) الشي اللي انكشف قدامكم مادرو به هلي وتراه من ذمتي لذمتكم محد يدري حتى خالي اختضنت كتفها بحنان: الله يكملتس بعقلتس يشهد الله اني ماسمعت شي فهد بثقه: روحي يامهره وماسمعنا هنا اندفن هنا ولاتخافين حتى سبب موته يشهد الله محد درى من العيال برا الا انا ومتعب خرجت وهي لاتريد سوى رؤية مطلق :: :: :: مرت ايام العزاء الثلاثه ثقيله ومتعبه تغيرت فيها اشياء كثيره ..' العزاء اقيم في مجلس ال مطلق بالرغم من رفض ابو ناصر القاطع لكن مفلح اصر وهو يطلب ان تعود علاقتهم السابقه المنقطعه خصوصاً ان اجرائات الوفاه والتحقيق استغرقت يومان مما اخرهم .. .. اعادو فتح فلة الجده واقامت فيها فاطمه وابنائها وكذالك الجده انتقلت بجوارهم ، وبالرغم من مصابهم الا انها سعيده بهم حولها خصوصاً بذلك الشامخ اللذي ترى فيه ابنها الراحل و لمعة الحنان في عينيه عندما يرى امه وشقيقته تذكرها بتلك النظره الخاصه بأبنها عندما يراها .. ابو ناصر لايستطيع تجاوز وفاة ابنه خصوصاً عندما علم سبب وفاته اللذي اودعه طريح الفراش في المستشفى يوماً كاملاً ، ولكن فهد ومتعب اخبروه ان لا احد يعلم حتى مطلق ومنذ ذالك اليوم وهو يسعى للصدقات وبناء المساجد علها تكفر ذنب ابنه .. مطلق لقائه بأبناء عمه كان مؤثراً جداً بالرغم انه لم يعبر عن ذلك لكن تواجدهم بجوار شقيقته ثم جواره اشعره ان هناك سند له في هذه الدنيا ، والأهم من هذا لقائه بجدته الذي لن ينساه ابداً .. .. وكنت أزعم مثل الناس إذ زعموا بأن من غاب عني غاب عن بالي واليوم كذّبني قلبي وكذّبهم فارقتهم وأقاموا بين أوصالي قبل يومان .. اخبروه ان جدته تريد رؤيته ، شعر بتوتر لكن وجود ابناء عمه هو مادفعه للأمام ، دخل غرفه صغيره تفوح برائحة العود و البخور ، توقف وهو يرى جدته تجلس على كرسيها وترتدي برقعها وجلال قطني ، لم يعتاد هذا المنظر في المنطقه الجنوبيه لكن تلك العين التي تطل من تحت البرقع بعثت في روحه شيئاً غريب ، ربما هو حنان الدم بينهما ، القى السلام بصوته المبحوح وهو يتقدم ليقبل رأسها لكنها ما أن انحنى عليها حتى احتضنته بقوه وهي ترحب: يامرحبا بسميّ الغالي يامرحبا بريحة حشاشتي ابطيت وانا امك علي ابطيت جعلني ما اعدم ذا الزول تصلب بين ذراعيها وهو يشعر بكلماتها الحزينه تخترق اعماقه وتبث فيه روحاً جديده وهو يشعر برائحة والده تحوم حوله وتلتف به ، شعر بها تسحب كفه تريد تقبيله لكنه كان اسرع منها وهو يسحبه بسرعه ثم يجلس على ركبتيه امامها: محشومه الله يطول في عمرش احتضنت وجهه بين كفيها وهي تطيل النظر به ثم تتحدث بشجن: والله انك ماخليت منه شي حتى الصوت خذيت صوته ، سنين وانا قلبي ينعصر بين جنوبي ابي شوفتك انت واختك لكن الله كتبها بذ الظروف سامحني يا امك شعر بخجل من حنانها اللذي تغدقه به وهو لايبدي ردة فعل: الله يعفو عن اللي راح ياجده قبلت جبينه بحب: قول يمه مثل عيال عمك (رفعت رأسها للسماء) يالله لك الحمد اللي احييتني وشفت عيال مطلق قدامي سحب كفها وهو يقبله: عسى عمرش طويل ع الطاعه ام مسفر: وعمرك انت واختك ، الله يعوضها خير ذيك الغزال ويرزقها شيخ يلوق بها خذها مني ذاك الزين اللي ماقد انخلق ماهي مطوله تلعثم وهو يرى وجوه ابناء عمه وهم يتظاهرون بالأنشغال ويقاطع جدته قبل ان تكمل: يمه فهمت عليه لتبتسم بحب: والله اني قلته مطلق ابوك ماخليت شي حتى الحميه حميته توقف وهو يريد الإنصراف : انا بشوف اهلي ثم بعود للمجلس في خاطرش شي جدته: روح ياعين امك لافضيت تراني ابغاك انت وامك واختك بموضوع :: :: :: عوَقد ألقاك فِي سفرٍ وَقد ألقاك فِي غُربه كِلانا عاش مُشتاقًا وَعاند فِي الهوى قلبه عدلت حجابها ولثمتها وهي تجلس بجوارها وتضع كتبها على الطاوله: حرففففياً تجمدت من ذا البرد وضحى: تستاهلين قلت لتس البسي جاكيتس ساره: اصلاً برجع الحين اعتذر اخر محاظره ترجعيني والا انتظر المترو ؟ وضحى: لاقومي برجعتس عندي بريك ثلاث ساعات ساره: وش رايتس نطلع نتغدى قبل تنزليني وضحى: مايمدي ابدداً لازم ارجع عندي موعد سونار التفتت لها بحماس: بتشوفينه ضحكت وضحى: وش اشوف ياماما نتيفه بس لازم تشوف مكانه و الماي والمشيمه وكل هالسوالف كشرت بضيق: اوف يختي زهقانه زهق ابي اروح لأهلي والله احتاج اخذ جرعة طاقه من امي وارجع وضحى: تو الناس ياحلوه (تذكرت شيئاً) الا شفتي جارنا مطلق اللي جنب شقتس ساره: ايه شفيه وضحى بحزن: مسكين اعتذر ذا الكورس زوج اخته توفى وراح لهم وبيقعد عندهم ذا الكورس ساره: حرام لنا شهر ونص من بدت الدراسه واكيد قدم الميدتيرم يعني راحت عليه هزت كتفيها: على كلام يوسف ايه يقول هو اخوها الوحيد ولايقدر يخليها هي وامها ابوها ميت اتوقع تنهدت بشوق لأهلها ولأمها خاصةً: الله يعين على هالدنيا .. :: :: :: :: متماسكٌ والأرضُ ترجفُ بي وعلى شفيرٍ مائلٍ أقِفُ ، ما كان أحوجني لمُتَّكَـأٍ ، لكن دهري ما له كتِفُ ! اجتمع عمه مفلح وشافي وخالهم بالتوأمان .. دخلت مهره وهي ترتدي جلابيه وجلال كبير تلفه حول رأسها وجسدها كما امرتها جدتها ، القت السلام ليشير لها عمها مفلح بجواره لتنصاع اليه ، بالرغم خجلها منهم الا انها تشعر بأرتياح شديد لهذا الرجل بعكس الأخر اللذي يرمقهم بأستعلاء ، احتضن كفها بين كفيه وهو يحدثها بحنان: شلونتس يا ابوتس ؟ مهره: الحمدلله على كل حال مفلح: انا جمعتكم اليوم لكلام اكيد كلكم خابرينه واسمح لنا يا ابو ناصر يمكن ماهب وقته لكن راح من العمر ماراح ، انت رجال سنافي سويت اللي حن ماقدرنا نسويه وقمت بعيالنا كنهم عيالك وانت ادرى باللي صار ذيك السنين ولا نبي الحين نرجع نبش بالمواضيع ، العيال وامهم مكانهم محفوظ و حقهم محفوظ ، والبنت الحين ودنا تقعد حولنا وقريب منا ومطلق لاعود بالسلامه بيت ابوه ينتظره واكيد ان امه معاه ( التفت لمهره) وش رايتس يابنتي ردت وهي ترا خالها وكأنه قد كبر 30 سنه تود ان تعود معه فهو والدها الذي لم تعرف سواه لكن كلمات ناصر لازالت ترن في رأسها : الرأي راي خالي ومطلق ابو ناصر: اللي سويته بسويه لين اخر يوم في عمري العوال عوالكم ان كان ودش يامهره تعودين الجنوب فأنتي تدرين عين فراش وعين لحاف وانت تعرفين الشهر الجاي بننقل هنا عشان وظيفة ريم ، وان كان ودش تقعدين فذولا هلش ولا لش بد منهم وقدحن حولش معاد به بعده ، وتراني قد كلمت امش وقلت المكان اللي بتقعد فيه مهره تراش معها ، شورش زمان فيد رجالش الله يوسع عليه لكن الحين شورش عند خوش الله يحيه لش همست بحب: ويحيك جعل يومي قبلك توقف مطلق وانحنى على خاله يقبل انفه: جعل عمرك طويل ويشهد الله يالغالي انحن مابنطلع من جزاك لين نموت ، كانك بتسمح لها نفداك هي وامي فودي يقعدون هنا فبيت بوي وانا قدني بقعد معهم ذا الترم أجلته لين تطلع مهره من الحداد ماودنا يكثر الحكى اللي ماخلونا الناس منه ابو ناصر: اللي يريحكم يابوك انا قلت لكم وين مابغيتو الله يسمح دربكم مفلح: بيض الله وجهك وجمل حالك ، احنا قصرنا واجد وجا الوقت اللي نصحح فيه علط المرحوم ابوي الله يغفر له ، والصراحه لكم حقوق ودنا ننتهي منها الأمانه شينه توقف ابو ناصر يود الأنصراف لكن مطلق امسك يده بقوه: على وين يا خال ؟ ابو ناصر شعر ان لامكان له بينهم خصوصاً اثناء هذه الأحاديث الخاصه: خذو راحتكم انا بروح اجلس مع امك قبل اطلع تحدث مطلق بحزم ، يريد منه ان يفهمون ان خاله هو الأحق بهم من الجميع: اجلس جعلني فدا خشمك نسمع وش عنده ابو متعب ثم روح بعدها لم يروق لمسفر انه لم يقل له عمي لكنه لايلومه ابداً: مطلق صادق منت غريب ، ابوكم الله يرحمه كان له مزرعه من المزارع اللي وزعها علينا ابوي الله يرحمه ، والمزرعه فيه حلال وقايم بها متعب ولدي وله ذا البيت اللي فيه امي وهي كلها بإسمي تحدث بعد ان التزم الصمت بعد تهديدات شقيقه: بيت امي بأسمها رفع نظراته الحاده له وقد تضايق من تواجده منذ البدايه: كانه بيت امك على قولك محد بغاصبك عليه ، وكانه بيت ابوي فحن طلابين حق ، ماجينا نبغى شي ابوناصر طول الله عمره مالي نفوسنا من صغرنا ، لو بغينا حقوقنا جيناكم طلابين من سنين شعر ان الدخان يتصاعد من اذنيه لشدة غضبه من رد مطلق الذي الجمه ، لكن لم يستطيع الرد وهو يرى نظرات مفلح المتوعده: لاطلبتو فأنه حقكم وابشرو به ، متى ماودك تاخذ توكيل عن مهره ونروح المحكمه انقلها لك بيع وشرا ، يشهد الله ان ذا الأمانه كاسره ظهري اخاف اموت ويتقاسمونها ويبخسونكم حقكم :: :: :: تمدد لا نعرف كيف واين نستريح نحن الذين اعتادت قلوبنا على الركض على السرير وهو يراها عائده من الخارج وتضع عبائتها على يدها ، القت السلام ليرد بخفوت ، سألته وهي تمسح زينتها: غريبه للحين ماطلعت فهد: استحي اترك مطلق وخاله التفتت له وهي ترفع حاجب: انا مستغربه شلون رجعو لكم بعد كل هالسنين اعتدل في جلسته: لأنهم بشر متعلمين كيف يتسامحون بدون مايحقدون واللي صار مالنا يد فيه توقفت وهي تتجه له وتجلس بجواره : تدري ان مرة عمك دكتوره ( ابتسمت بسخريه) وبنتها الحين تشتغل على رسالة الماستر سبحان الله تعرف نظام اللي يدعون المثاليه فهد: ماشاء الله مسرعتس حكمتي عليهم ضحكت: احنا الحريم هالأمور ماتاخذ منا وقت مره مره مايدخلون القلب غرور الله وكيلك ماتقول انهم اهل المصيبه فهد: خلي عنتس الناس ( اقترب منها قليلاً وهو يسحب كفها يقبله لتصرخ) : شوي شوي عورررتني نظر لها بإستغراب فهو ما ان يقترب لها حتى تصده: تستهبلين انت ترا طقت كبدي الجوهره بصدق: لا والله بس توهم ركبو لي الجهاز في ذراعي ويعوري لاحركت يدي عقد حاجبيه بإستغراب: جهاز وشو ؟ الجوهره بثقه: جهاز يكون مانع للحمل بدال الحبوب اللي اخذها يوم وانساها عشر انصدم مما تقول صرخ بقوه: نعععععم بعد كنتي تاخذين حبوب والجدار اللي قدامتس ماله رأي ولا كلمه وش شايفتني خافت من غضبه وصراخه اشارت له: وط صوتك كلن بيسمع صوتك البنات فالحوش سحبها بذراعها حتى توقفت امامه: انا خلاص معاد اقدر اتحملتس ولا اتحمل حركاتس عطيتس راحتس فوق ماتتخيلين اسمعيني زين بطلع الحين واقسم بالله ارجع الاقيتس فاكه هالزفت و تصرفي انا رجال ابي عيال واذا ماتبينهم تراني بعرس صدمت من كلامه كان يهم بالخروج لولا انها لحقته بسرعه وهي تمسكه: فهد اصبر بكلمك بفكه والله بفكه بس لاعاد تجيب طاري العرس نفض يدها بقوه: ارجع الاقيتس رايحه وشايلته والا والله مايحصل لتس خير واذا ماتبين تشيلينه شيلي اغراضتس وعلى بيت اهلتس خرج وهو غاضباً بشده دخل فلة والده وهو يرى امه تخرج من المطبخ والخادمه خلفها تحمل عدة حافضات : وش ذا الأكل يمه؟ ام فهد: ابرسله يم بيت ام مطلق (اردفت بإستغراب) وش فيك وجهك مقلوب فهد: يمه انا بخطب ام فهد: ياولدي اصبر انشغلت مع ام مطلق وبنيتها وش تخطب انا بدور لك ابشر فهد بثقه: هي اخت رفيقي واثق فيه ثقه عمياء ونسبهم ينشرى يمه بكلمه وانتي تروحين تشوفينها ام فهد بضيق: متأكد يمه ترا الموضوع مب سهل فهد: ايه يمه انا رجال مب ناقصني شي وابي لي عيال ام فهد: الله يكتب لك اللي فيه الخير :: :: :: :: لا تغرب عن وجهي ، أشرق فقط " تأخرتو ! جلس مطلق بجوارها وهو يختضن كفها ويقبله عدة قبل كعادته دائماً: عماني كانو يبغون يشوفون وش نيتنا نقعد والا نروح انتقلت عينيها بينهم بقلق: وش نويتو مطلق برجاء: نقعد يمه ، طول عمرنا مثقلين على خالي وشايل همنا فوق همه ، وانا بقعد معاكم ذا الفتره وبعدين لاتخرجت يمه انت تامرين امر تبينا نقعد فبيت ابوي والا نشتري بيت انتي اشري وانا تحت امرش فاطمه بحب: انا فالمكان اللي انتو فيه لو تودوني اخر الأرض انا مرتاحه ، ولو اني شايله هم علي مطلق: لاتشيلين همه جعل يومي قبلش هو موافق ومأيد واذا ودش تقعدين معاه روحي اسبوعين ثلاث وانا هنا مع مهره انهى كلامه وهو يلتفت لها مستغرباً انها لم تشاركهم الحديث .. واقفه امام الزجاج الكبير العاكس وهي تنظر للخارج ترا رجل ابنة عمها مها يحمل ابنه الصغير ويمشي بالقرب منها ثم يميل عليها قليلاً يحادثها عن قرب ثم يضحك بشده بعدها ركب السياره وهي جواره ولازال يضحك وهي تحتضن طفلها .. تذكرت حياتها السابقه لماذا لم اعيش لحظه كهذه مطلقاً حتى في اول زواجي .. اهكذا انقضت حياتي يتجربه بائسه ، يبدو اني لم اشارك امي ملامحها فقط بل حتى حظها البائس الذي دمر شبابها ، تعلقت عينيها بالطفل بينهم لتسقط دمعه وهي تتذكر صغيرها الذي فقدته وهو لايزال فالأسبوع الثالث ، ابرحها ضرباً حتى دخلت المستشفى واستيقضت على خبر فقدان طفلها قبل ان تعلم بوجوده حتى احتضنت بطنها بذراعيها وكأنها تواسي نفسها بحركتها هذي ، تواسي فقدها وحزنها وحلم لم يكتمل شعرت به يقف جنبها ويحتضن كتفها: تعوذي من الشيطان وانا اخوش مسحت وجهها بكفيها وهي تتنهد لتردف والدتها بحزن: الله يعوظش خير ويصبرش ابتسمت بألم: العوض في روسكم و دراستي وغيرها خذيت نصيبي حزنت فاطمه وهي تظن ان حبها لناصر جعلها تكره الرجال من بعده اما مطلق فهم مقصدها تماماً ، التفتت له: قعدتك بترجع ناصر اسكتها قبل تكمل: الموضوع مافيه نقاش كيف تبغيني اروح وانتي وراي ماطلعتي من الحداد مهره برجاء: تكفى يامطلق ماعلي خلاف امي معاي والحين انا حول اهلي ماعلي شر خلاص لاتخليني اثقل عليك بهمي افتك خالي من همي وطحت فكبدك نظر لها بصدمه هو و والدته ، تحدث بغضب: انت مستوعبه كلامش سامعه وش تقولين مهره بضعف: تكفى لاتخليني اوقف بمستقبلك ادري انك ماتقدر تخليني وشايل هم كلام الناس صرخ بها وهو يستغرب تفكيرها: اصه اصه ولا كلمه زياده تندمين عليها ، انا مطلق خذو عقلش ، انا اخوش وخدامش لو قد عيالش في طولش وذا الكلام لنا قعده نتفاهم فيه علمت انه غضب بشده فلأول مره ترا ردة فعله هكذا ، سحب مفتاحه من الطاوله الجانبيه وهو يحدث والدته: عقلي بنتش يمه شكل عقلها ظاربه شي من الصدمه وقولي لها لاتكلمني لين تعقل خرج لتجلس بضعف: الحين وش قلت عشان يعصب نظرت لها والدتها بإستغراب: مهره انت بعقلش وانت تقولين له ذا الكلام وتقولين ليه معصب مهره: يمه شوفي كيف وقفت بوجهه ذي اخر سنه وللأسف بتزيد عشاني جلست فاطمه بجوارها: لاعزالله منتي بصاحيه وان فيش بلا مطلق بغى يموت يوم تأخرت رحلته عشانش والله اني خفت يجيه شي من القهر وانت تقولين له كذا وش تتوقعين ردة فعله مهره بضيق: خليه يجي وانا براضيه ، بقوم اتسبح تبين شي يمه فاطمه: روحي فديتش انا بصلي ثم بنام اكيد مطلق بيقعد مع الشباب التفتت لأمها: يمه بسألش ريم وش فيها؟ فاطمه: مافيها شي ! ليه؟ مهره: احسها ماخذه موقف مني حتى ماتكلمني قلت مصدومه ومتأثره بس مب كذا ! فاطمه: لاتشرهين عليها تعرفين غلاش عند ريم .. :: :: :: إني لأعجبُ من مرآةِ غُرفتها … ترى الجمالَ زمانًا وهي لم تَذُبِ في الفله المجاوره.. هذا وهم حزينان وبدون مكياج كذا صواريخ ! العنود: ماشاء الله والله حسيت اني ولد ولافيني انوثه جنبها فهده: امها تدرون اني احسبها هي مهره لاقوة الا بالله هذي شاربه شي مايكبرها لا و دكتوره بعد العنود: والله ما الوم عمي مطلق الله يرحمه طب على وجهه لا ابوكم لا ابو عرسكم ومن ينتظره ههههههههههه مزنه بخبث: طيب وراتس ماتاخذين اخوي اللي نشف ريقه بدون عرس وتسوين سواة عمتس دامها عاجبتس شهقت وهي تلقي عليها قارورة الماء: يامال الوجع يالوصخه انطمي شايفتني متملكه عليه صخبت مزنه بضحكاتها وهي تحرك حاجبيها بخبث: يعني اقوله ملك ودربك خضر الأمور تمام توقفت العنود وهي تتجه لها ثم تدفعها لتستلقي تحتها وتسحب اذنيها: انت ماتعرفين الحياء ماتدلين له طريق شهقت مزنه: ياويلي على اخوي فهمت مقصدها لتفتح عينيها على وسعها وهي تطوق عنقها: انا ذابحتس ذابحتس ياقليلة الحياء دخلت والدتها على منظرها وفهده غارقه في ضحكها على خناقهم اللذي لاينتهي ابداً : يالله اني فوجهك من ذولا البزارين اللي كلن بيكبر وانا عادني افرع بينهم (افرع= ابعد بينهك وتقال للي يتضاربون) ابتعدت العنود وهي تظربها على ظهرها: يمه والله اني عاقله بس ذي ماتستحي مزنه بخبث: عمتي هي الحكم اشارت لها بتهديد ان تصمت لتضحك مزنه جلست ام فهد: بدال منتو مجتمعين هنا كان رحتو قعدتو مع بنت عمكم تسلونها شوي مزنه: الصراحه ياعمه مستحين منها هي وامها يمكن مب متقبلينا جدي طاردهم ويوم جا الحين نلزق فيهم غصب يحبونا ام فهد: روحو جربو مب تقعدون وتقولون نخاف فهده: الا ياعمه شفتي زينهم وش ذي الأم اللي كنها ام 30 ماشاء الله ام فهد: بسم الله عليها اذكرها يوم عزا مطلق كانت بزر صغيره بس الزين ماليها العنود: هي ماتزوجت بعد عمي؟ ام فهد: ماعرفت الا هو وليله وحده ولاعاد عرفت بعده مزنه بدفاشه ضربت العنود على ظهرها: تعلمو الحب ياجاهلينه حتى ولدها سمته عليه تألمت العنود من دفاشتها: لاتعلمتي النعومه ان شاء الله ام فهد: لارحتو خلو عليكم الجلال اكيد مطلق هناك يويق على امه واخته مزنه بحالميه: الا ياعمه وش ذا المطلق الله حسيبكم يوم ماعلمتوني عليه قبل اعرس ضحكت عمتها: ههههههههههههه انت ماتخلين سوالفتس الفاصخه مزنه: والله ياعمه هذا وهو انتاج سريع سريع وتحت ضغط الضروف جابو ذا الكيكتين لو روقو وش يجيبون وضعت كفيها على رأسها: سود الله وجهس يالفاصخه انت متى تستحين زوجناتس بتتحشمين الا زدتي فصختي ضحكت بخبث: انا اول مره ادري منتس ان الزواج يأدب واضح معلوماتي غلط لأن اخبره يخرب نهرتها: انتي يا الفاصخه قومي لابارك الله في ماجد اللي خلاتس تمسين عند هلتس قومي لاتخربين ذا العذارى يامال العافيه :: :: لقَيـتُ فـي سَمَـعِ الحَبِيبِ كُـلَيمَةً جَـرَحَـتْ عَـواطِـفُـهُ فَـمَـا أقسَانِيْ قَـطَعَ الحَديثَ ورَاحَ يَمْسَحُ جِفْـنَهُ فَـوَدَدْتُ لَـو أجـزَىْ بِقَـطْـعِ لِسَانِـيْ اليوم سيعودون لأبها ، وسيزورون عمتها قبل عودتهم بالرغم انها لاتريد رؤية مهره لكنها مجبره لأجل عمتها.. موت شقيقها كسر اشياء كثيراً في نفسها بالرغم ان علاقته بها بارده جداً وسطحيه لكنه يبقى اخيها الذي تفديه بروحها وكل ماتملك .. منذ دخولهم والهدوء يعم المكان و والدتها ملتصقه بمهره كظلها لاتعلم مالذي تغير ولكن بعد وفاة ناصر تغيرت والدتها كثيراً واصبحت اكثر مرونه مع مهره و والدتها ، استأذنت مهره لتصلي المغرب في غرفتها وهم تفرقو للصلاة لكن عمتها امسكتها وهي تطلب منها ان تلحق بمهره ، ولم تستطيع ردها دون سبب لذا انهت صلاتها ثم طرقت الباب ليأتيها صوتها: ادخل دخلت وهي تجلس على المقعد المجاور للسرير ومهره تتوقف وتلف سجادتها: يالله حيها ، ليتنا كلنا بذا البيت ولانفترق ابتسمت مجامله لم تفت مهره: ريم وش فخاطرش؟ ريم بلا مبالاه: ولا شي تعبانه جلست امامها : ادري حزينه ومكسوره لكن ادعي له بالرحمه والمغفره تمتمت: الله يغفر له مهره: تأكدي اني حاسه بأحساسش بس ترانا مسؤلين عن ناس غيرنا يحتاجونا توقفت بغضب وهي ترتجف من شدة محاولتها لأخفاض صوتها: لا ماتحسين فيني ولاتمثلين علي الحزن انا مب ابووي تلعبين عليه اصححي يامهره تراجعت بصدمه وهي تشير لنفسها: انا امثل ريم بغضب: ايه انت ، خلاص ارتحتي من ناصر افتكيتي صار اللي ودش فيه شعرت بصدمه كاسحه وهي ترا عينا ريم التي ترميها بنظرات ناريه: انا ماتمنيت لعدوي يموت بتمناه لزوجي انت صاحيه؟ ريم: ولاكلمه زياده حسبي الله عليش احرقتي قلبه وراح ناقص عمر ، ابوي بداش عليه وعلى راحته ونسى انه هو ولده اولى منش لكن روحي الله يذوقش وجيعته وغبنته انهت كلامها تريد الخروج لكن مهره سحبتها بقوه لم تتوقع من قبل انها تسكن جسدها مثل هذه القوه سحبتها ثم دفعتها تجاه الكنب وهي تغلق الباب بالمفتاح وتعقد يديها امام صدرها وسط دهشة ريم: تفضلي اخت ريم فضفضي لي عن الشي اللي سويته غبنش وغبن ناصر والله ماتطلعين من ذا الباب الا قد تحاكيتي تقدمت ريم بغضب تريد فتح الباب وقد امتلئت عينيها بالدموع: بعدي عني انا مب طايقه نفسي عشان اطيق اقعد معش قالتها وهي تحاول فتح الباب لتدفعها مهره مره اخرى وقد اعتراها الغضب ، اشارت بسبابتها امامها: انت مب تقولين اني امثل واحرقت قلوبكم تكلمي ياريم ياحسرة اليوم اللي اعتبرتش اختي حينها انفجرت ريم بغضب هادر : كله بسبتش ابوي عصب عليه وقاله لا طلقتها لا انت ولدي ولا اعرفك بداش ابوي على راحة ولده يترجى ابوي يقول ماتبغاني حتى يوم قال لأبوي عن علومش المخنزه قال ابوي معليه سفيهه انت الرجال العاقل علمها وقعد ياكل بنفسه من ذاك اليوم خرجت عينها من الصدمه ، هل يعقل ان خالها صدق كلامه عنها كما صدقته هي ، ارتجفت شفتيها: انت من جدش صدقتي ذا الكلام تقولين عني علومي مخنزه؟ ريم بإنفعال: كذبي الميت بعد ذا اللي ناقص لاعاد تحترمينه لاميت ولا حي ، ويكون لعلمش ترا ابوي يدري بعنادش له ولسانش الطويل وتقصيرش في بيته وحقوقه اجل فيه مره تقفل البيت على زوجها لين ينام فالأستراحه (ضحكت بسخريه) تدرين وش قال ابوي له قال المره ماتكره زوجها الا اذا هو مقصر معها ، قهرتووه حتى ابوي ما انصفه بداش عليه وقهره هزت رأسها بنفي: يمين بالله ماقال حرف صدق والله انه هو اللي عذبني من رحت عليه صرخت بها: احترمي حرمة الميت خافي ربي تحدثت بحزم تخفي خلفه الم كبير: دامش تبينها كذا ياريم فأبشري باللي يسرش ، ناصر راح جعل ربي يسامحه ويغفر له وانا سكت واجد عشان خالي وعشانش لكن ماتستاهلين فذمتي مدت يدها تخلع قميص بجامتها وسط شهقة ريم اللتي لاتعلم لماذا فعلت هذا ، بقيت في حمالة صدرها اشارت لمكان اسفل ترقوتها يرتسم عليه لون ازرق بدأ بالإختفاء: تعرفين وش ذا ؟ ذا من عقال اخوش عشان قلت له ابغى ازور امي وقريب توه ماله خمس ايام عاده مابرى بسطت كفها ليضهر جرح صغير لكنه عميق: هذا مفتاح سيارته شوفي شلون حافره بإيدي حفر بغى يطلع قلبي من الضيم يقول انه يوم نزل المحل وانا فالسياره اني اشرت لواحد جنبي دارت وهي تريها اثر خياطه اسفل ظهرها : هذا ضرب بكل شي طاحت يده عليه انت بتتحملين تنظربين بالرسيفر و الريموت والجوال اخر شي شمعه قزاز مستوعبه انها انكسرت على ظهري (تحشرج صوتها) يومها قمت وانا فالمستشفى و فاقده حملي اللي توه ثلاث اسابيع اللي قلت لكم زلقت فالمطبخ حررت شعرها ثم فرقته من المنتصف للتبين علامه صغيره تخلو من الشعر في مؤخرة رأسها بالقرب من عنقها : هذي عاد هدية شهر العسل غرزتين بالراس بعد مادفني وضرب راسي فالمرايه طبعاً غير الضرب اللي اصبح وامسي عليه لكن هذي العاهات المستديمه اللي خلفها اخوش التفت لها وهي تراها تضع يديها على فمها تكتم شهقاتها وعيناها جحضت بصدمه: وش كان يخليني اسكت يالشيخه ريم ؟ خوف منه لاوالله ماكنت اسكت الا عشان خاطر خالي والا لو شكيت خالي بيجيب حقي قبل يجيبه مطلق بس قلت خالي ماقصر معانا شالنا على راسه مابضيق صدره ، هاه يا ريم بتسوينها ، بتبلعين الظيم وتسكتين بتبدين خاطر غيرش على خاطرش ؟ لكن تدرين كلكم مالكم ذنب حتى ناصر ماله ذنب ابد انا استاهل دامني حطيت الكل فالمقدمه وانا فالأخير يشهد الله اني استاهل وقليل علي بعد اجهشت ببكائها وهي تحاول ان تحتضنها لكنها صدت بقسوتها: ماقلت لش عشان ترحميني ولاكنت بتكلم واللي قلته لش امي وهي امي مادرت عنه مات الله يغفر له بخيره و شره لكن انت اصريتي تنبشين شي يوجعني و يوجعش والحين اطلعي ياريم ولا عاد ابغى اشوف وجهش بديتش على عمري وقلت بقويها في حزنها وانتو كلكم ماتدرون وش صار لي ذاك اليوم لكن ماتستاهلين بكت ريم وعي تراها ترتدي قميصها ، تعلم ان اخيها قاسي قليلاً وكم لاحظت ان علاقتهم متوتره لكن لم تتصور ابداً ان يصل لهذه الدرجه ، مهره تحملت شيءً لن تستطيع هي تحمله ابداً منظر جسدها و كلامها جعلها تدخل في نوبة بكاء حاده وهي تشعر انها خسرت مهره كما خسرت ناصر حاولت ان تستجمع نفسها: مهره تكفين مهره بقسوه تتسربل بها لأول مره: برى ياريم ماعاد ابغى اسمع شي جرت اذيال الخيبه وهي تتوجه للباب لم تتوقع ان علاقتها بمهره اللتي لم تعرف اخت وصديقه غيرها بالرغم من فرق العمر الا انهما كتوأمين في علاقتهم ولكنها هي بتسرعها فقدت اقرب صديقه لها توقفت وهي تلتفت لها وتراها تقف امام الخزانه وتعيد ترتيب قطعه فيدها ، همست بألم: سامحيه يامهره كان لأبوي خاطر عندش سامحيه ردت دون ان تلتفت لها: من قبل يدفنونه سامحته وحللته لاتخافين خرجت وقد انتفخ وجهها من شدة البكاء نظرت لها والدتها بصدمه: شقومش هزت رأسها بالنفي وهي تسحب عبائتها وترتديها ثم تجلس بجوار والدتها اللتي مستغربه منظرها لكنها خمنت انها ربما تشاركت مع مهره الهموم .. :: :: تمت .... | ||||
|
|
|
11-09-19, 07:05 AM
| #60 | ||||
| سَلمتي وسَلم فكرك من كل تشويش بارت جمييييل جداً الصراحه الصراحه حسيت كذا بنشوه فرح بموت ناصر 😝اخيراً تخلصت منه مهره من غيره شوشره ومشاكل اوووف اما فهيدان واه من فهيدان 😴حاسه انه مهره من نصيييبه وبيعييش حياة كان يتمناها بس متى 💔 سعود له فقده والله 💔 مطلق اللقاء بينه وبين الجده جمييييل والحمدلله التم شملهم 💕💕 اتمنى ماتتاخري علينا بالبارت طلبببببتك 💔💔 أُلاحظ انك رجعتي للعبه الغمايه مره ثانيه بعد البارت 💔💔بس الله يسهل دروبك 🌹🌹ويارب ماتطولين لكي مني كُل الحُب 🌹💕 | ||||
|
|
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
2Likes
العرض العادي
