آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
31-08-20, 09:16 AM
| #51 | |||||||
|  السلام عليكم ورحمة الله وبركاته أخيرا أنهيت قراءة كل الأجزاء السابقة رواية جميلة ماشاء الله من ناحية الأسلوب والأحداث والشخصيات سلمت يداك سحاب أعجبتني حقيقة انتساب صارم و قايد للاستخبارات أظن أن لهذا علاقة بموت والد ساري أماقايد .. فأظنه الشخص الغريب من فرقة ياسر .. المتنكر .. وأراه مناسبا لشغف  خطوبة مشاعر خيارها موفق أرى أنها مناسبة لجسار أكثر من بارق استغربت في بادئ الأمر عدم رفض الاثنين لكن أظن الآن أن سبب هذا هو رغبتها في تليين قلب جسار اتجاه رعود هبه أتعاطف معها جدا تصرفاتها واقعية بالنسبة لأم بعيدة عن ابنتها وزوجة بعيدة عن زوجها أرجو أن تتحسن حالتها روح و رماح حسب كلامها فلم تجمعها علاقة محرمة لكني أذكر أنهما كانا يتبادلان الرسائل >> إذ لم تخذلني الذاكرة وطبعا هذا محرم رعود أفضل شخصية في الرواية أحببتها لسببان الأول .. اسمه المحبب لقلبي " رعد " الثاني .. فخامته ومزاجه " المروق " حتى فهد في نفس مرتبة رعود يحزنني موته  لا ألوم جسار على كمية الحقد ورغبة الانتقام التي تغزوه مكانه .. لكنها فعلت نفس الشيء >> لو كنت شاب طبعا ^^ جسار و بارق احترت في منح الأفضلية لأحدهما لكن بارق يفوز بفرق ضئيل وهذا يعود بحبس للشخصيات المضحكة الغبية في كثير من الأحيان أتمنى له إيجاد فارسة أحلام رائعة وأتمنى لجسار إيجتد ضالته من المشاعر مع مشاعر + نصيحة من أخت لأخت الفتوى مقتبسة من مركز الفتوى إسلام ويب [ وضع صور الفتيات على مواقع التواصل مدعاة للفتنة السؤال أود أن أستشيركم في رأيكم الشرعي حول الأخوات الملتزمات في لباسهن الشرعي في حياتهن، إلا أنهن عند استخدام مواقع التواصل الاجتماعي المختلفة يستخدمن صورة لفتاة أخرى قد تكون فنانة مشهورة، أو أي شخصية أخرى بصورة غير محتشمة، أو على الأقل ليست باللباس الشرعي، هل يجوز هذا؟. مع الشكر والاحترام. الإجابــة الحمد لله والصلاة والسلام على رسول الله وعلى آله وصحبه، أما بعد: فلا يجوز وضع صور النساء بحيث يطلع عليها الرجال سواء في مواقع التواصل أم غيرها، وسواء وضعت الفتاة صورتها أم وضعت صورة غيرها، فكل ذلك من أسباب الفتنة، وقد ثبت في الحديث الصحيح عن أسامة بن زيد ـ رضي الله عنهما ـ قال: قال رسول الله صلى الله عليه وسلم: ما تركت بعدى فتنة هي أضر على الرجال من النساء. ويتأكد المنع في الصور الفاتنة، أو صور الفاسقات أو المتبرجات، فهذا مما يجعل في نفوس بعض الجهال تعظيمهن وتقديرهن، وبالتالي اتخاذهن أسوة، وفي هذا من المفاسد ما لا يخفى. والتصوير الفوتغرافي في حد ذاته قد قيل بتحريمه كما سبق وأن بينا في الفتوى رقم: 10888، ومن هنا فلا ينبغي المصير إليه إلا لضرورة أو حاجة خروجا من الخلاف، ولو قدر أن احتاجت المرأة إلى التصوير فلتتحفظ إلى أبعد حد حتى لا يطلع الرجال على صورتها. والله أعلم ] في انتظار الفصل القادم شكرا على النقل أختي سبحان الله وبحمده ، سبحان الله العظيم | |||||||
|  |
|
02-09-20, 07:10 PM
| #52 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
| الجزء الثامن والعشرون * * دروب الشقا سيره طوينا بها الازمان على كف عسرات الليالي ما صفى بالي نسوق القلوب لعزها لجل ما تنهان بوقتٍ ماهو معروف مرّه من الحالي وانا قد مضى لي وقت مبحر مع الهجران اسلي خفوقي بالشعر واذكر التالي انا الغايب اللي ما فقدني سوا النسيان وانا العاشق اللي اقضي الوقت لحالي * * مشاعر بتردد: الزواج يكون على الورق جسّار بسخرية: دقيقة روحي مكتب جدي وجيبي ورقة وقلم اجهز شروطك مشاعر بقهر من سخريته الواضحة: شرطي واضح يا ولد الفهد جسّار بحدة بدون ما يلتفت لها : شرطك شرط مجانين يا بنت سعود انا ما خذيتك ناوي تركك يوم انك تشرطين هالشرط وتختبرين صبري وان كأنك من اللي يشوف للكذب ألوان وللزواج أنواع انا اشوف الكذب خيبة والزواج هو الزواج اللي تعرفينه و اعرفه مانيب ردي اتركك بنص الدرب ولا انا عاجز عشان اخذك انتقام انا خذيتك من يدين اللي يبونك مرجلة وعناد مثل ما يأخذ البحّار من جوف البحر درة تركها في معمتها بين الرضا من كلامه وبين الخوف من الجاي والخجل من اللي سوته لين سمعت تصفير روح اللي كانت واقفه على الدرج تسمع كلامهم لفت عليها مشاعر بخوف: خير وش فيك روح بمزح: وش هالمشهد اللي شفته لو انا منك من بكره أعرس عليه مشاعر بقهر وحيا اندمجوا بنفس اللحظة وأورثوا اللون الأحمر اللي انتشر بوجهها: روحي اعرسي على رمّاحك وامنعينا من ثقل الدم روح بتمثيل مسكت قلبها بخفه: رمّاح لو بس يقول مثل آخر كلام ولد العمه صدقيني انا اللي أقول له يدق على المملك مو زواج ورق صاحية انتي تطلبين هالطلب كان رفضتيه وفكيتيه محد غصبك ترى مشاعر بجدية: طلبي كان من خوفي يا روح خفت يصير لي مثل اللي صار مع ساري خفت يكون مأخذني انتقام مؤقت وبيرميني اول ما يوصل غايته وبعدين انا وافقت عليه عشان هذي فرصتي اساعد عمي رعود يثبت براءته وترجع المياه لمجاريها بس رفضه وكلامه أكد لي ان الوضع ماهو مؤقت ابد يا روح وهذا اللي خوفني فوق خوفي من اني أكون بين آل صارم روح نزلت من على الدرج متوجهه لمشاعر تسحب شيلتها اللي كانت لابستها وهي تكلم جسّار وتمسح على شعرها بحنية: والله يا مشاعر انك تهزمين آل صارم كلهم بسدلة رمش من رموشك لا تلبسين قناع الخوف وانتي الشجاعة مشاعر ابتسمت وهذا الكلام اللي كانت محتاجه تسمعه: الله لا يخليني منك يا روح ويسعدك مع رمّاح وتشوفين السعادة اللي تستحقينها روح حاوطت خصر مشاعر بحضن أخوي: ولا يخلينا من مشاعر لا احنا ولا آل صارم اختتمت كلامها بغمزه قبل تترك مشاعر وتهرب لغرفتها ابتسمت مشاعر وهي ترجع للصالة وهي تشوف نجد المندمجة بالسواليف مع شغف مشاعر بابتسامة: يا حيّ نجد يا حيّها نجد ابتسمت وهي حفظت الرد زين: الله يبقيك ضحكت مشاعر من ردها الكبير على عمرها وشاركتها الضحك شغف شغف بضحكة:يمه منها تربية جسّار وكلامه بعد كذا كثير يا نجيده نجد برفض: اسمي نجد جسّار صح شغف وش اسم ابوك؟ اكتفت شغف بالصمت بعد ما اختفت ابتسامتها لكن مشاعر تداركت الموقف وهي تنطق بابتسامة: شغف رعود اسم ابوها رعود نجد وهي تتذكر الخاتم اللي وراه إياه رعود لما انقذها: اعرف سوبرمان اسمه رعود بس ماراح اعلمكم مين شغف بسخرية: سوبرمان عاد !!! نجد بتأكيد: والله والله بس هذا سر بيني وبينه ما اقدر أقول بس انتوا عادي ما تطلعون سري صح؟ داهمهم دخول راجح للصالة: يالله حيّ نجد جسّار الفهد نجد ابتسمت بفخر وهي تتوجه له: انزل لي ابوس رأسك الله يبقيك راجح رفعها لرأسه: البنات يصعدون فوق الرأس يا بنت جسّار نجد بطفش:يوه نفس كلام أبو مشاعر خالي راجح ضحك على أسلوبها: وينه خالك نجد بعدم اهتمام:شفته برى لما جيت مع بابا راجح باستغراب: ووينه ابوك وراه مشى نجد رفعت كتوفها بمعنى عدم المعرفة: قالت له شغف انك نايم قال بيروح يخلص شغله راجح ابتسم: على خير ان شاء الله علامك مطيره عيونك فيني نجد بتأمل : تشبه ماما نوره ليه ما تشبه جدي صارم ما عندك عصا مثله وما تعصب شوي مثله راجح ضحك : اشبه النور لأنها بنتي وصارم ما حمله العصا إلا كرشه يأكل من هالدهون لين غدا طول بعرض ما تشيله الأرض نجد ضحكت بصوت عالي على الوصف المشابه جدًا لصارم الطويل والعريض: صح جدي صارم كل يوم يأكل رز رز هو وعمامي سيّاف وبتّالي بس بتّال شوي يأكل عمي عزّام مسكين ما يقدر يأكل واجد شغف باستغراب: وش معنى بتّال تقولين بتّالي نجد بتفكير: لأني احبه هو يقول نجدي وبابا ورمّاح يحبوني يقولون نجدي انا احب عمي بتّال أقول له بتّالي راجح ابتسم: يعني اللي تحبينهم يصيرون لك والله صدق من قال من خلف ما مات نجد ابتسمت: ايه يعني انت جدي امممم راجحي عادي أقول ولا مو عادي راجح ضحك من قلبه على الاسم: قولي بس لا تقولين جنب احد بيني وبينك ها مشاعر ابتسمت وهي تقطع حديثهم: تبي شاهي يا جدها الراجحي نجد بمقاطعة: ايه كوبين بدون سكر راجح اعتلت ضحكته اللي ما اختفت من دخول نجد : خطأ مو كوبين بيالتين نقول نجد هزت كتوفها ورفعت شفايفها بقهر: ابوي يقول كوب قهوة يعني ابوي غلط راجح ابتسم : لا ابوك بعيد عن الغلط القهوة تنشرب بكوب او اذا كانت عربية فنجال بس الشاهي يا نجد ينشرب ببيالة ما يصير كوب شاهي نجد بعدم اقتناع: عميمه ضوى تشرب بكوب شغف ابتسمت: وعمي سعود يشرب بكوب بعد مشاعر ابتسمت بمقصد : افا يا جدي تعلمهم يشربون بكوب وبعدها تجحدهم محد علم عياله يشربون الشاهي حار من الزمزمية وبكوب الا انت راجح حك رأسه بورطة: بس المقصد نعلم البنت الصح روحي يا مشاعر سوي بيالتين شاهي لي وللمزيونة شغف بقهر: طاح حظنا يا مشاعر قام يسميها المزيونة طاح القدر والحشيمة راجح موجه كلامه لنجد : اسمعي عمتك تغار منك نجد قاصده تقهر شغف جلست بحضن راجح: جدي راجحي عادي عميمه شغف تروح مع مشاعر عشان انا اجلس عندك؟ راجح ابتسم: قومي نادي الروح يا شغف البنت هذي عطتنا موافقتها ولا شفناها شغف بقهر وقفت على حيلها متوجهه للدرج وهي تتحلطم: ياربي يالقهر نقطة اخر السطر هذي تلعب عليك يا جدي وتتأمر وتقومني الله لنا بس راجح بتمهيد للموضوع: حبيتي بيتنا يا نجد؟ نجد ابتسمت: حلو بس بيتنا احلى فيه دان ونبض والثلاثي دال يلعبون معي بعد وبتّالي راجح باستفسار: وأمك يا نجد نجد ببساطة: عادي ماما موجودة أحبها بس ما ألعب معاها كثير عشان هي ما تعرف تلعب بس بتجيب بيبي صغير العب معاه راجح ابتسم بتصنع مستغرب من العلاقة الباردة بين نجد وأمها ما لمعت عيونها ولا ابتسمت ولا تكلمت بحماس مثل كلامها عن اللي تحبهم: طيب وهينا من حبيتي؟ نجد ابتسمت بحماس: حبيتك انت وبقول لك سر خالي أبو مشاعر حلووو يا جدي ما عنده كرش مثل عمامي وطويل مثل بابا ورمّاحي ويشبه لك شوي بس لا تزعل هو أحلى راجح اللي ضحك بشكل أعلى هالمرة على ملامح وجهها المختفية بالخجل وهي تتكلم عن سعود: ادري به ولد المزن ملح وقبله بس انا اقصد البنات يا نجدي نجد ابتسمت بخجل: البنات كلهم حلوات بس احب شغف ومشاعر أكثر لأن روح أخاف يهاوشني رمّاح اذا لعبت معها لأنها روح رمّاح مو روحي راجح بحدة: روح سعود يا نجد نجد هزت كتفها بخوف: روح سعود طيب روح سعود راجح اللي حس بخوفها وما وده انها تخاف منه : ايه شغف ندري عشانها عمتك مشاعر ليه نجد بتفكير مطول نطقت بعفوية وبشكل سريع: لأنها حلوه ابتسامتها حلوة راجح يحاول يجس نبضها: طيب لو صارت ببيتكم بتحبين بيتنا ولا بيتكم اكثر نجد بتأكيد ابتسمت: بيتنا اكيد لأن شغف تجي احيانًا واذا تجي عندنا مشاعر بعد احسن راجح اكتفى بالابتسامة رد على كلامها -عند جسّار طلع من بيت راجح وهو مبتسم وحس انه رد الكلام لمشاعر اللي دايم لسانها ما يسكت عرف مفتاح سكوتها لف يمينه وهو يسمع كحة متواصلة وكانت الكحة هذي صادره من سعود جسّار باستغراب: صحة صحة سلامات سعود اللي رمى السيجارة اللي كانت بيده ورفع رأسه بتعب لجسّار: الله يسلمك كحة خفيفة جسّار يأشر على السيجارة : ما دريت إنك مدخن سعود بسخرية: وش تعرف عني انت اصلًا جسّار ابتسم بتلاعب: افا عليك اخو الغالية اعرف عنك كم شغلة بس للأسف جلساتي معك معدودة وتو اعرف انك مدخن خبري ان جدي مانع التدخين عليكم هو يدري؟ سعود ابتسم بسخرية : وانت تظن اني ارجع بكل أموري لأبوي؟ اذا هذا ظنك ترى غلطان جسّار ابتسم : حتى لو ما رجعت له بكل أمورك فكر فيه لو يعرف انك مشيت بطريق التدخين وتهدر صحتك وش بيكون رأيه تدري يا خالي انا ما عشت ولا تربيت مع أبوي لكن سمعت عنه كثير لدرجة صرت أدرك وش الأمور اللي يتمناها مني ووش الأمور اللي ممكن يرفضها سعود بسخرية: وعشان كذا تقدمت لبنتي يا ولد الفهد طبعكم تحبون الغصيبه جسّار ابتسم : قلتها لجدي واقولها لك ما جيت غاصب جيت خاطب سعود بسخرية: وعشان كذا تهاوشت مع البارق صح جسّار بعدم اهتمام: وعشان كذا يا خال جبته باليوم اللي جاي اخطب منكم هذا اللي كنت تبيه انت وابوه لكن مشاعر لو تفكر بعقلها بتلقاني الأنسب أما الغصيبه ما دلينا دربها لا انا ولا الفهد رحمة الله عليه سعود بابتسامة سخرية محتفظ فيها مرسومة على وجهه:اجل وشلون تزوج نوره ومحد راضي عن هالزواج جسّار واللي متحامل على نفسه عشان يظهر الاحترام لسعود اللي تفنن بقهره: يا خال انت الوحيد اللي ما كنت راضي جدي واخوك بنفسه طلب من ابوي يتزوجها طلب يا خال طلب يعني لا غصيبه ولا شيء وعندك النور تسألها سعود بعدم اهتمام: كلٍ يعيش حياته بكيفه ماهو اول مرة رأيي ينضرب بجدار والزمن قاعد يعيد نفسه بس هالمرة ببنتي جسّار ابتسم بدون الملامح الباردة والمتلاعبة ابتسم ابتسامة اب يطمن اب لأنه حط نفسه بمكان سعود لو يصير لنجد هالموقف: تطمن يا خالي مثل ما نوره عاشت معززه مكرمة بذرى أبوي مشاعر ما تذوق الضيم وهي تحت جناحي وخذه وعد مني مشاعر بحفظ الله ثم بعيني وحتى روح انا كفيل رمّاح ان اذاها بكلمه حقها تأخذه مني وانا اخذه لك من رمّاح مشاعر بتصير حليلتي وروح اختي مثلها مثل شغف اللي يمسها بيمسني يا خالي ترى من ظهر العزيز ما يجي الا عزيز وانت عارف ظهر من جابني خويك سنين وانقطعتوا عن بعض عشانه اخذ النور من بيتكم لبيته ولأنك ما تبيهم يجبرون على شيء بس خذينا منكم نور ومشاعر وروح واخذوا من عندنا اللي تطلبون ختم كلامه بالجملة هذي ورفع يده بالسلام لسعود ومشى لسيارته وهو مرتاح من الكلام اللي قاله طلع اللي بجوفه كله مشى من قدام بيت راجح وهو يدندن بطرب بكلامه بصم بالعشرة انه كسب ثقة سعود وبكلامه مع شاعر كسب صمتها الجولة هذي من نصيبه ختم تفكيره بدعوة لنجد اللي كانت السبب بجيته اليوم والانجاز هذا -بيت بتّال كان الضجيج من طرف قايد اللي من دقيقة طلع من عند صارم متوجه للبيت و لأول مره يكون الطرف الغاضب قايد بغضب دخل الغرفة المشتركة للتؤام وهو قاصد رايد بكلامه: راضي عن فعلتك؟ رايد زفر نفس بملل: انت وش تبي من الصبح ناشب لي ترى الملكة مر عليها حول الثلاث شهور لا تشغلني مانيب فاضي قايد بغضب توجه له وهو يسحبه من ياقته: انت وشو مافيه إحساس انت حتى ما سألت عن البنت طيبه ولا ماهي طيبه كايد بمحاولة تهدئة الأوضاع بعد قايد عن رايد بالقوة: خير انت وياه قايد وش حارق رزك ابوها وجدي يدرون انت وش حارق رزك رايد بقهر: لا يكون كنت تبي تخطبها يا قايد قايد اللي فاضت العصبية فيه من جديد من نطق كلامه رايد ابعد كايد بقوة وهو يرجع يخنق رايد : وش مفكرني انت انتبه لكلامك يا رايد لا اخنقك فيه قبل تنطقه رايد اللي كان أعرض من قايد قدر يتخلص منه بشوية مجهود نطق بعصبية لأول مرة: وش لك بحياتي انت وش اللي قاهرك قاطعهم دخول بتّال المستغرب من أصواتهم ووراه نبض اللي واقفة بخوف وهي تدري انه هواش الثلاثي نادر لكن اذا صار يحرق من شدته بتّال بعصبية: حسافة أشنابكم انت وياه بدال ما تتعاضدون كل واحد ناشب بالثاني وش عندكم قايد ابتعد عن رايد وابتسم بقهر: اسأل ولدك وش مسوي بتّال بعصبية: ابعد عن اخوك اول هذا وانا أقول العاقل الراكز طلعت أرداهم قايد بعصبية ناسي ان اللي قدامه أبوه : الردي اللي يتزوج بنت بدون علمها ولا رضاها ويستغل ضعفها وضعف أبوها نبض شهقت بصدمة أما بتّال اللي ملامحه جامدة ما تغير فيها ولا شيء رايد ابتسم : وانت تحسب أبوي ما يدري؟ كايد نطق هالمرة بصدمة وهو ماسك قايد بالقوة لا يهجم على رايد: انت تدري يبه بتّال بهدوء: اتركوا بعض واجلسوا رايد ماهو غلطان يا قايد اجلس قايد بقهر بعد يدين كايد اللي محاوطه وسطه تمنعه من الحركة : وانا جاي اناقش ليش دام القاضي راضي عيشوا بكيفكم كان بيطلع لولا كف بتّال اللي وقفته عند الباب: اثبت يا قايد ما خبرتك مستشر اخبرك العاقل الراكد قايد وقف باحترام لأمر ابوه: سم يبه بتّال اشر على الطاولة الموجودة بيمين الغرفة واللي كان جالس فيها رايد بتعب من الهواش مع قايد: اجلسوا وانتي يا نبض سكري الباب بتقعدين اقعدي بتطلعين اطلعي مافيه خوافي بهالبيت قايد ابتسم بسخرية وهو صاد عن بتّال متوجه للطاولة وجلس بأبعد كرسي عن رايد اللي يلقط أنفاسه متواصلة بتّال بهدوء: قبل ثلاث شهور تذكر يا قايد لما تعب عمك عزّام ونقلناه للمستشفى وبنته صابها الصرع انتي يا نبض اكيد تذكرين لأن من يومها وانتي ما تفارقين فاتن نبض هزت رأسها بتأكيد وهي تتذكر الحادثة الأليمة فعلًا بتّال ما انتظر رد قايد وهو يسهب بالكلام : يومها الحمدلله نبض قدرت تتصرف وعزّام اول ما صحى وعرف اللي صار كان بوجهه رايد وانتوا كلكم تدرون انه رايد اقرب لعزّام حتى منا يا اخوانه وبقلة حيلته عرض على رايد يتزوج فاتن لأنه خايف يموت ويتركها من غير سند واللي بمثل حالتها خطابها قليل نبض بقهر: عشانها عمياء يعني وش هالمنطق والله مافيه أجمل من فاتن رايد ناظرها بحدة من كلامها عن زوجته قدام أخوانه حتى لو كان ما يعرف منها غير اسمها والوضع مؤقت لكن غيرة الرجل الشرقي بالفطرة تسلطت عليه : نبض اسكتي خلي ابوي يكمل نبض تداركت نفسها وسكتت وكمل بتّال بجدية : وش بيسوي اخوك وقتها يا قايد بيرضى عمه يعرض عليه بنته ؟ قايد ناظر برايد وهو عارف طبع أخوه: رفض العرض وخطبها بنفسه بتّال ابتسم بفخر: وهذا اللي سواه اخوك لكن عزّام ما كان وده يعلم فاتن وتحس انه قرار شفقة لأن البنت حساسة قال بيخليها على حكم الوقت وبيفاتحها بالموضوع كخطبة عادية وتوافق حالها حال البنات أما التوقيع والعقد حله جدك صارم والكلام هذا ما يطلع من سقف هالبيت لأن الزواج بيتم بوضعه الطبيعي بس تتحسن الأحوال ويمكن عرس رايد يصير مع كايد قايد اللي الموضوع بدأ يوضح له أكثر قام وتوجه لرايد وهو يربت على كتفه: لأني خابرك كفو تكاثرت انك تخطي الخطأ هذا اعذرني يا اخوك رايد ابتسم وبمزح: وش اعذرني ما اعذرني لا يا حبيبي اعتذار ناشف ما نبي شفت هالثوب اللي كان بيروح ضحية يدينك الغادرة ابي مثله خمسة ستة بس ما نبي نكلف عليك اعتلت أصوات الضحك ولا كأن كان فيه هواش قبل دقايق بتّال بجدية : والحين لأخر مرة أقول لكم هواش بهالبيت ما ابي مفهوم قايد ابتسم: اعذرني يبه ولدك ما نطق وعلمني طلعني من طوري رايد بمزح : وانت خليتني انطق طلعت بلاعيمي حشى ماهو كفوف وانا احسب ما فيك عروق ما بقى عرق بوجهك ما نط انشغلت احسبهم واكون الصورة في مخي تعودنا على هدوءك قايد ابتسم: فكرت فيها لو كانت نبض مكان فاتن وش كنت بسوي وخذتني الحمية على العموم مبروك يا عريس خلاص ألغينا الكلمة من كايد وتحولت لك رايد بمزح رفع يدينه للسماء: يالله عسى يجي اليوم اللي تتحول الكلمة لك يالصخرة لا يحب ولا ينحب قايد ابتسم : انتوا تكفون وتوفون والله الله لا أوصيك بالثقل لا تصير مثل خوينا كايد بقهر:هيه ترى من الأول ساكت ومتحمل وافككم لا تقلبون الطاولة علي نبض بفرحة وهي ماهي مصدقة ان فاتن صارت لرايد : والله الثقل بيوقف بالزاوية اذا شفت فاتن يا رايد بتّال ابتسم : اسكتي يا نبض بيخنقك ترى شوفي وجهه عشان اخوانه فيه اجلسي معه لحالكم والعبي بحسبته ماهو مشكلة انطلقت الضحكات هالمره من قايد وكايد على رايد بتّال بتعمد للطاري: على فكرة اليوم بعد المغرب بنتجمع بمجلس سيّاف جايينه جماعة رايد بطفش: الحين عمي سيّاف ليه يستقبل خطاب وهو ماهو ناوي يزوج بنته ترى طفشنا نتجمع ونسمع ناس يمدحون ولدهم وبعدها يجي عمي سيّاف بدفتر عيوب المعرس ويقضبه الباب بتّال ابتسم: ماهو كل مره بيجيب دفتر عيوب يمكن يجي الكفو هالمره ما ندري المهم خلكم جاهزين وخلونا نرتاح الواحد بهالبيت ما ينام بهدوء يا ضحك يا هواش اهجدوا الله يصلح أمكم يوم جابتكم دفعة وحده تعلموا من نبض رايد موجه كلامه لأخوانه ويده تشير للباب اللي طلع منه بتّال: كأنه مب عاجبينه ؟ نبض ضحكت: اوه من زمان ترى كل يوم يقول لأمي الله يصلحك يا لطيفه جبتيهم دفعة وحده ثلاث رجال كأنهم ثلاث أطفال نطقوا الثلاثة مع بعض دفعة وحده: لا حول ولا قوة الا بالله ناظروا بعض وضحكوا لين وصلتهم صرخة بتّال المنزعج من ضحكهم -بيت رعود دخل البيت باستعجال : وين ولدك شايل بقهر: اقعد يا رعود ذبحت الولد من التعب نايم نايم اتركه يرتاح رعود بعدم اهتمام صعد الدرج: اللي بيخدم وطنه ما ينام وهو يدري فيه خاين عيونه مفتوحه شمايل تنهدت وهي تدري حتى لو تحاول ماراح تمنع رعود اللي طال نقاشهم امس وهي تحاول تقنعه يرتاح بسبب رجله المصابة ولكن كل كلامها ضربه بعرض الجدار وداوم وصل غرفة البارق وفتح الباب والانوار: بارق قوم البارق اللي نومه خفيف جدًا صحى على طول وفز جالس: سم يبه رعود ابتسم: نوم العافية يالعاصفة البارق ابتسم بتعب وهو يبعثر شعره بمحاولة لتخفيف النوم من عيونه وحتى يستصح: العاصفة ماهي برق العاصفة برق ورعد وامطار يعني انا ماني عاصفة بدونك رعود مازال محتفظ بابتسامته وهو يفك العجينة اللي على وجهه ويستخدمها للتنكر بشكل يشبه عبدالعزيز : البارق نعسان البارق فز واقف وهو عارف الديباجه هذا: خسى النوم سم وابشر بي على يمينك رعود ابتسم : ابيك تقول وتطلع لي تقرير كامل عن ثلاث اشخاص البارق طار النوم من عيونه وهو يسحب التابلت الموجود تحت مخدته للحاجة: سم من هم رعود ضحك وهو يهز رأسه بيأس من ولده المدمن تكنولوجيا: اول واحد ساري الراشد البارق اللي كان يشتغل على التابلت : ايه وغيره رعود بجدية: سحر آل هاشم البارق هز رأسه بتأكيد : تم ومين بعد رعود بجمود: عبدالعزيز اللي يشتغل مكاني البارق رفع رأسه بصدمة واستغراب : عبدالعزيز!! -مقر ساري سحر بسخرية : صارم أقرب لك واذيته في عيالي ساري ببرود: هو ابتدى الأذية واذاني بأبوي اللي يكون أخوه ويستاهل ما يجيه سحر باستغراب: صحيح يعني صارم يكون عمك ؟ واذا صح كيف ما عرفك وضوى كيف تزوجتها عقدكم باطل ساري ببرود ساخر: صارم سلم أبوي بنفسه عشان تتم ترقيته اختبروه انه يسلم أخوه وسلمه سلم راشد آل صارم عشان يكون عميد بالاستخبارات اما كيف ما عرفني طبيعي ما يعرفني انا انولدت وعشت وتربيت في ألمانيا ما عمره شافني والعقد الباطل كان عقدي على مشاعر لأنه ما كان بأمكاني اغيره والعب فيه أما عقدي على ضوى عقدت عليها عقدين عقد باسم ساري الراشد اللي ماله وجود اصلًا دفعت لجماعة عشان يكونون لي جاهه وتعرفت على عسّاف بألمانيا وهو اللي توسط لي عند صارم العقد اللي باسم ساري ما صدقته بالمحكمة طلعت عقد جديد وبغباء عسّاف اقنعته يخلي ضوى تطلع معي بحكم انها زوجتي ولما طلعنا قلت لها ان الشيخ طلب انك توقعين الورقة هذي عشان نصدق عقد الزواج بالمحكمة وصدقته يعني ضوى زوجتي مثل ما انتي زوجتي سحر بقهر: بس مو بنفس المكانة اكيد ساري بعدم اهتمام: اتصلي على اخوك له فترة غايب شوفي وين هاج فيه لا يجيب العيد محنا ناقصين سحر بطاعة: تمام بتصل على عبدالعزيز اشوفه -انتهى جزء تعويضي للأسبوع هذا أما بالنسبة لموعدنا القادم غالبًا ماراح يكون بالويكند لأن الأحداث بدت تتعقد واحتاج وقت عشان اكتب جزء يليق فيكم راح أحدد الموعد قريب بإذن الله دمتم بخير | ||||
|
| |
|
09-09-20, 10:48 PM
| #53 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الجزء التاسع والعشرون * * اجاذبك الهوى واطرب واغني وابادلك الغرام بكل فني واشاهد صنعة الله في جمالك وحكم الذي فيك امتحني وأشوف الودّ في عيونك ولكن يرد الودّ خوف فيك مني ولا أدري وش يخيفك يا حبيبي وأنا بك مغرمٍ جاك متعني ولو انك تلاحظ شفت عيني وهي تروي حديث الحب عني تنعّم دام توك في شبابك ليالي العمر ما قط أمهلني تعال أسقيك من جدول غرامي شرابٍ فيه للعاشق تهنّي واهيم بكل سماوات المحبة الين انك بعد مثلي تغني * * -بيت رعود رعود بجمود: عبدالعزيز اللي يشتغل مكاني البارق رفع رأسه بصدمة واستغراب : عبدالعزيز!! رعود بنفس الجمود: أعيد كلامي يعني يالبارق؟ البارق بجدية رجع لجهازه: لا يبه بس يعني ليه تبحث عنه ووش اسمه الكامل رعود اخذ نفس: ماهو انا اللي وظفته ولا أعرف عنه شيء بس كفاني انه فيه شبيه بيني وبينه يسمح بإني اتنكر بشكله وهذي غلطتي وابي اصححها لأن شكوكي قاعده تدور حوله بشكل مريب البارق بتردد: كيف ابحث عنه بدون اسمه الثنائي طيب كم عبدالعزيز بالاستخبارات رعود بعصبية غير مبررة لشعوره بالخطأ : شوف لك حل وابحث يا بارق ماهو انا اللي بعلمك شغلك البارق بمحاولة تهدئة رفع يدينه : خلاص خلاص اللي تبيه يصير بالكثير بكره أعطيك تقرير مفصل عنهم رعود بحزم: ماهو بكره يالبارق بالكثير بعد ساعتين يلا ورني اللي تسميه عصر السرعة اشوف البارق اللي جمدت ملامح وجهه ولكن عصبية رعود ما تركت له مجال: ابشر ساعة ونص وهم عندك رعود طلع وصك الباب بشكل قوي وهو محتاج يفرغ طاقته بأي شيء كيف يطيح بالموقف الغبي ويقبل بشخص يكون مكانه بدون ما يكون عنده تقرير كامل عنه همس لنفسه بصوت مسموع " ما يفكك مني الا الموت يا عبدالعزيز لو طلعت انت ورى كل المصايب ما يفكك مني احد " وصله اتصال على جواله الوحيد واللي يستخدمه لكل الأغراض الشخصية والعسكرية ما يستخدم رقم مشفر ابد وما عنده الا خط واحد للجميع رفعه وهو يشوف اسم ليث رعود : نعم يا ليث ليث برسمية : طال عمرك عبدالعزيز ما داوم للآن وقلت أخبرك رعود تنهد: خلاص تمام يا ليث اذا داوم قول لي من غير ما توضح له شيء ليث : ابشر طال عمرك سكر الخط وتوجه لشمايل في الصالة رعود تخلى عن قناع البرود والروقان : شمايل شمايل بخوف: لبيه تونس شيء؟ رعود بقهر: لو انا فعلًا اللي متسبب بموت الفهد وش اسوي يمكن ما أكون انا اللي فجرته بس يمكن أكون سبب في تفجيره وش اسوي وكيف افهم جسّار والأهم كيف اواجه نوره شمايل توجهت له وهي تمسك كفوفه بيدينها بشكل مطمئن : كيف تكون سبب واللي يعرفكم الاثنين يعرف عن عمق علاقتكم بعدين يا رعود اللي بيكون سبب في موت احد لازم يكون عنده دافع وانت ما كان عندك أي دافع انك تقتل الفهد رعود ابتسم بقهر: تدرين أتمنى لو انه عايش أتمنى لو شاف ولده اللي عاش طول عمره وهو يقول لنوره اذا الله ما عطانا عيال انا راضي ويجي ويحكي لي عن شغفه انه يكون عنده ولد يشبهه يحكي لنا عشان ما يجرح نوره يقول لي انا ما يقول لأهله عشان ما يشفقون عليه الفهد كان عملة نادرة صعب القى مثله خوي ورفيق منه تعلمت ابقى واقف وما انكسر وتعلمت ما اندم على شيء مات وتعلمت ان أي تضحية في سبيل الوطن ما عليها حسايف بالعكس مكسب لكن وينه الحين ما أقول الا الله يرحمه ويسكنه فسيح جناته تصدقيني لو قلت لك ان هالعين ما ذرفت الا على موته ولا ندمت إلا لما وجهته على الطيارة الغلط ولا ضاق صدري من ضياعكم مني انتي والبارق كثير ما ضاق صدري على وحدتي بدونه انا ما ألوم صارم اذا انكسر ولا ألوم جسّار إذا عاداني والله ان الفهد فقيدة يا شمايل شمايل اللي كانت تتدارك دموعها من تأثير كلامه ولحظة عبرات رعود النادرة: الله يرحمه يا رعود تدري الموت دايم يختار الأشخاص الصح يختارهم عشان ما يتأذون بالدنيا وضيقها مكانهم أفضل يا رعود وهذا قدر ربك رعود تدارك نفسه : والله انه ماهو اعتراض يا شمايل تدرين لو كنت انا الموت بختار الفهد هو اللي يسوى اختاره وهو اللي الدنيا ما عرفت قدره لو كنت انا الموت بختاره عشان الدنيا لا تأذيه لأنه أطهر وأنقى من انه يعيش بنفس الدنيا اللي عايشين فيها سواد النفوس الموت يأخذ الطيبين لأنه ما يأذيهم يأذينا احنا اللي مليانين مساوئ وأغلاط الحمدلله على قضاءه وقدره فز واقف وهو يتراجع عن انهياراته : رايح أزوره شمايل هزت رأسها بأسى وهي تدري بعظم فقده كيف تناقشه وهو اللي اعترف ان غيابها هي وولده سنتين عن عيونه ماهو قد غياب الفهد طلع من البيت متوجه للمقبرة المدفون فيها أعظم مفقود "الفهد" وصل للمقبرة القريبة من بيته وهو اختار البيت هذا بالتحديد عشان موقعه بالنسبة للمقبرة لكثرة زياراته للفهد راح بشكله الحقيقي لأول مره لا نظارة تخبي ملامحه ولا عجين يكون من وجهه شكل ثاني الحزن مستوطنه وتأنيب الضمير يأكله لو صدقت شكوكه تجاه عبد العزيز وكان هو المتسبب بتفجير الفهد وش بيكون عذره المخفف الوحيد عليه ان عبدالعزيز ما دخل الاستخبارات الا بعد موت الفهد لكن لو كانت له صلة راح يكون خطاه هو ذكر دعاء دخول المقبرة وهو يتوجه للقبر اللي حافظه عن ظهر غيب وصل له وهو يجلس على الأرض : ماراح أطول زيارتك يالفهد وانت اللي كنت تمنعني اني ازور قبر أمي وأطول الزيارة لين تغيب الشمس لكن والله يا عمري كله لو فنيته عند ترابك ماراح عبث دنيتي الحين ماهي مثل دنيتي وانت فيها اضحك في وجه العذول وابكيك يالفهد تذكر لما كنت تجي معي قبر أمي وتقول الرعد يجي منه مطر اهطل من الدمع مطر مالح يروي ترابها ويطهر روحك بغيابها هطلت يالفهد وارعدت ومطرت لكن هالروح ما طهرت تتوسد السواد كل يوم اشوف جسّار واشوفك فيه واتوهم لو انك عايش ولو انك معي لا فقدت شغف ولا كسرت ظهر ولا صرت على جسّار جبّار روحي أتلفها السواد يالفهد وكثرت اخطائي وصرت اصدق شكوكهم فيني قاطعه صوت الصارم : لا تصدق شكوك الناس صدق شكوكك يا رعود رعود فز من جلسته : عمي صارم!!!! صارم ابتسم : لا تأذي ولدي بدموعك ولا تهطل ولا ترعد الرعد ان جاء قاسمه خير ولا داهمته عاصفة رعود وهو للآن بصدمته: انت مصدق اني ما قتلت الفهد صح صارم ابتسم وهو يربت على كتفه : ما يكذبك الا الغشيم عن علاقتك مع الفهد ولو ان اللي تحت التراب كان فوقها كان ما رضى عليك بأدناها كيف بيرضى أتهمك بقتله وانت خاويته مثل ظله وياما حميته وحاميت عنه لا تنسى انكم الاثنين متدربين تحت يدي واعرف مين مُهاب ومين الفهد رعود وهو اللي طاحت من على متونه حمول : انا اشهد انك خير مدرب تدربنا على يده بس جسّار مصر إني اللي قتلت ابوه صارم ابتسم : جسّار انلعب عليه وما أظن انك غشيم انتظر متى ترفع رأسك مع بياض الغيم ويتجلى اسمك بمعناه ويعرف جسّار من غريمه الحقيقي رعود تذكر: عرفت من خطف نجدكم يا الصارم صارم مازال محافظ على ابتسامته : تاركين التحقيق لأهله رعود ابتسم اخيرًا واستبانت اسنانه العلوية : افا من بعدك يا صارم المخابرات -أكمل بجدية - المهم ترى خطيفكم منكم وفيكم يا صارم صارم رفع حاجبه باستغراب: مننا؟ رعود ابتسم : من تشك فيه يا صارم صارم بشك: ساري؟ رعود اتسعت ابتسامته وهو واثق من ذكاء صارم وانه بيشاركه نفس الحدس: صدّق شكوكك يا حضرة الفريق أول صارم رفع حاجبه بغضب وتركه رعود بهاللحظة وطلع بحالة عكس الحالة اللي دخل فيها تارك صارم بدوامة من الأفكار أما هو راجع لبيته يشوف البارق وش سوا -مقر الثلاثي الخبيث ساري بسخرية : كان ما جيت عادي ما نحتاجك هينا عبدالعزيز بملل : وش تبي انت ترى توي مسكر من السكير عسّاف ويسأل عنك يبي فلوسه ساري اللي زلزلت ضحكته المكان: خله يصحى من سكرته ثم نتفاهم اتركه عنك وقول لي سويت اللي قلت لك؟ عبدالعزيز بثقة تأفف بملل: هل تتوقع اني ماراح استغل صلتي بالمخابرات؟ ساري ابتسم: يعني أسامينا مشفرة؟ عبدالعزيز ابتسم : سويت سجل كامل باسم ساري الراشد وزوجته ضوى وكويس ما عندكم عيال كان انشغلت اسوي لهم سجلات ساري ضحك ضحكته الرنانة : وانت تحسب اني بتصرف هالتصرف الغبي لو تذبح نفسها ما يصير ولدي حفيد صارم النذل اتركنا من هذي مافيه سجل باسم ساري راشد آل صارم صح؟ عبدالعزيز بثقة: اعتبر نفسك ميت مافيه سجل باسمك الحقيقي محد بيعرف انك من نسب آل صارم ساري ابتسم وهز رأسه براحة : زين على زين عبدالعزيز باستغراب : وش سر كرهك لصارم؟ ساري بسخرية: تشتغل معي من امس انت؟ تعبت وانا اعيد بالموضوع ما حفظته عبدالعزيز بحيرة : يعني بس عشان صارم كان سبب في سجن أبوك وأمر إعدامه ؟ ساري بقهر: وهذا سهل ان الواحد يكون سبب في اعدام اخوه؟ عبدالعزيز بعدم اهتمام: اللي اعرفه ان ابوك كان لواء وخان بسهولة بسبب وظيفته ساري عاود ضحكته الرنانة الساخرة: مسوي طالع منها انت ترى اذا كشفوك حبل الإعدام على رقبتك عبدالعزيز ابتسم : الحبل اللي بينلف على رقبتي طرفه بيتعلق برقبتك يا ساري أي شيء بيصيبني بيصيبك وما يهمني اذا انت نسيبي ولا صاحبي الروح غالية يابو راشد ساري بجمود:خير ان شاء الله -ببيت بتّال وغرفة التؤام بالتحديد بعد ما انسحبوا قايد وكايد وبقى رايد بحيرته بحياته الجديدة وتفكيره بكلام نبض قاطع تفكيره دخول نبض المستعجل نبض بعجلة : رايد وين ابوي رايد بطقطقة: يابو كايد افتح خزانة رايد واطلع لأن نبض تدور عليك -انتقل للجدية- تشوفينه هينا عشان تسأليني عنه؟ نبض بقهر: الشرهه علي اسألك رايد ابتسم: وش تبين فيه نبض بتردد: ابي اروح السوق مع فاتن رايد رفع حاجبه: وش عندكم بالسوق نبض بقهر: ياربي يا رايد وش هالاسئلة بسرعة لازم نطلع لأن فاتن عندها معهد مسائي اليوم رايد باستغراب: هي تدرس؟ نبض ابتسمت: يعني انا ادري انك عبيط بس مو كذا اكيد تدرس واشطر مني بعد رايد بمحاولة فهم: يعني هي تدرس مثلك مثلنا حتى لو هي يعني ما تبصر نبض سحبت الكرسي وهي تجلس مقابل رايد: على فكرة انت جاهل بعلمك كل شيء عشان ما تجيب العيد في حال تممتوا زواجكم بس ياربي بيتأخر الوقت رايد بسرعة:ابوي بالمزرعة مع راجح وجواله هينا يعني انسي يرجع بدري وتستأذنين منه عشان كذا كبي عفشك بسرعة وفهميني ترى انا ما اعرف عنها الا اسمها وانها بنت عمي عزّام الوحيدة نبض صفقت يدينها ببعض دليل اليأس: انا تعبت منكم انقل اخبار أجواد لكايد رضيت فيها بس انت يبي لك من الصفر بس عشان فاتن اسمع رايد بحماس:كلي اذان صاغية نبض بتراجع: ولا أقول لك لين تتم زواجك منها أخاف ترفضك وما يجوز رايد بقهر: انا ما ادري انتي تفكرين بعقلك مثلنا ولا بس مالها مجال ترفض والله لا انشب لها نشبة لين توافق بذمتك فيه وحده ترضى فيني الا عميا نبض بقهر: لا تبالغ تراك زين بس انك دبدوب شوي لو تروح نادي قايد وكايد تطلع طلقة بس انك ثور ما تبي تتحرك رايد ابتسم: منتهين من الموضوع هذا هاتي موضوع فاتن نبض طالعته من فوق لتحت: والله انها كثيرة عليك بس واضح أمي وجدتي اللولو دعوا لك كثير بس اذا قلت انها احلى بنات آل صارم ما كذبت يا رايد تحفة فنية من روعة الخالق العين ما تمل تشوفها وان حكت خذت القلب ثقافة وأدب اخخ يا رايد لو ترضى تسوي عملية النظر كان ما رضت فيك رايد اللي كان مبتسم واختفت ابتسامته عند آخر كلام نبض: لا تسوي عمليات ماهو لزوم نبض بكذب: استعجل بموضوعك ترى هي واعده عمي عزّام اذا خلصت دراستها تجرب العملية وهذا اظن اخر ترم لها رايد بقهر: سود الله وجهك يا نبض الخايبه نبض ضحكت : ياخي الله يعين فاتن عليك كانت بانيه أحلامها على فارس مزيون طلعت لها انت يالدب رايد بقهر: اتركينا من السخافة وقولي لي هي كيف انعمت اذكر انها كانت تشوف نبض اختفت ضحكتها: انت تدري أم فاتن الله يرحمها كانت مريضة صرع ولما عرفت عن حادث عمي عزّام كانت حامل بفاتن وخافت وجاها الصرع وكانت تضرب بطنها بتلقائية وأول ما انولدت فاتن كانت تشوف بس ما تشوف بشكل واضح ومع الوقت والضغوط فقدت بصرها رايد اللي سكن صدره الحزن: لا حول ولا قوة الا بالله بس فيه امل يرجع نظرها نبض بتأكيد: ايه توها مسويه فحوصات وكلام دكتورها يبشر بالخير يعني كلها كم شهر ومفروض تجرب العملية بس هي خوافة و مو مستعدة رايد هز رأسه : ان شاء الله خير خلاص قومي زودتيها نبض بتفكير: وش رأيك تودينا السوق بعد محاضرات فاتن ابوي ماراح يرفض لأن مو مع السواق رايد بتفكير: خلاص تم كم الساعة تبون نبض بحماس: بعد صلاة المغرب على طول رايد تذكر: لا ما ينفع اليوم بعد المغرب بنروح لعمي سيّاف نبض اللي غاب حماسها: يوه صح طيب خلاص واضح مافيه سوق باي رايد ابتسم من غير ما يرد عليها وافكاره توديه وتجيبه بموضوع فاتن اللي ما كان يدري عن معاناتها شيء ومو معتبرها شيء لكن ما ينكر ان رجفتها بحضنه وان حاول يتحاشى التفكير فيها تداهمه مع ريحة عطرها نفض رأسه بمحاولة انه يبعد الأفكار عنه وتوجه لبيت عمه عسّاف قاصد رمّاح اللي كان يركض بالساحة الخارجية رايد بصراخ: رمّاح هيه رمّاح التفت عليه وهو يبعد السماعات عن اذنه: سم رايد بتردد: اسمع رمّاح ابتسم من توتره: اسلم شفيك ترى ادري انها زوجتك ليه مستحي مني انا ان تزوجت بدخل عليك والضحكة شاقه وجهي رايد بقهر: انطم ياخي خلني ارتب كلامي ما خبرتك تقرق كثير رمّاح ابتسم : مبسوط ما علينا رتب كلامك يلا رايد باندفاع : اسمع اذا ابي انحف من وين ابدأ؟ وابي بسرعة بعد يعني شهرين رمّاح أطلق ضحكته العالية اللي ما تنسمع كثير: مصباح علاء الدين انا؟ بعدين وش الطاري دخلت بجو العريس اشوف وين من حنا نقنعك تسوي رياضة هذا وانت مدرس رياضة الله يخلف على طلابك بس رايد بقهر: بتساعدني ولا رمّاح بجدية بعد ما حس بجدية رايد : اسمعني اذا نحفت بشهرين بترجع دبل بيومين لا تستعجل النتايج كل شيء يجي بالراحة بعدين انت تشفع لك لياقتك واللي واقف ضدك انك مانت طويل ولا تراك مانت متين كثير يعني يبي لك شغل خفيف بس ماهو شهرين يالطيب رايد بتفكير: اسوي تكميم طيب؟ رمّاح كتم ضحكته: لا فيه عملية ثانية تسويها رايد بعجلة: وش هو قص معدة؟ رمّاح ما قدر يكتم ضحكته لكنه توقف عن الضحك بشكل سريع: لا العملية انك تحرك رجولك اكثر الحركة يا رايد تحرك وهالكرش تودعه وان ودعته ارجع لي نشوف مسألة العضل رايد بحماس: والله ما اجلس واحفر الأرض بس يمدي بشهرين صح رمّاح ابتسم: وش عندك بعد شهرين؟ رايد بتفكير: ما بعد عزمت اذا نحفت علمتك يلا سلام رمّاح بابتسامة: وين بتروح؟ رايد باستغراب:برجع بيتنا رمّاح ابتسم: ارجع بيتك يا كابتن رايد غير ملابسك وتعال هينا جري نشوف وش نقدر نغير فيك رايد رفع حاجبه بزعل : حشى من اليوم رمّاح بتمثيل للجدية: اجل انا أقول لك شيل الشهرين وحط سنتين دام هذي أولها رايد برفض: لا لا جايك بس ببدل رمّاح اشر بيده بشكل دائري على الساحة: باخذ لي دوره على ما تجي تعال معك قارورة مويا وسماعات اذا ودك رايد اشر له بابهامه بالموافقة وركض لبيتهم وسط ضحكات رمّاح على رايد وحماسه الغريب -المغرب في بيت سيّاف أجواد باستغراب: من جدك هالبرود جالسة كذا مو مشغول بالك أوراد بعدم اهتمام: ليه ينشغل بالي حسستيني اول مره يجي خاطب ويرده أبوي أجواد بحماس: لا يا غبية تو سامعة أبوي يقول لأمي إن الخاطب من طرف جدي وجدي محرص عليه يعني مستحيل يرفضه ابوي على طول أوراد باستغراب: غريبة جدي متوسط له من يكون أجواد بقهر حركت أوراد: ياختي وش انتي تحمسي شغلي عرق اللقافة روحي اسألي امي انا بموت من الفضول أوراد بصدمة: خبلة انتي تبيني انزل لأمي واسألها مين خاطبني والله من وساعة الوجه بعد أجواد ببرود: وساعة وجه ولا تجلسين مثل الأطرش بالزفة كذا بعدين تعالي قايد وينه ما خطبك أوراد بصدمة: خير انتي وش دخل قايد أجواد بعدم اهتمام : من انتوا صغار وهو ناشب لك وش صار لما كبرتوا أوراد بتمثيل للبرود: ما يهمني صدقني ولا انا مثلك ابني أحلام وتتكسر انا واقعية بعدين واحنا صغار كلنا كنا على قلب واحد ماهو زيادة اهتمام من قايد أجواد بقهر: بس بس يا حبك للمثالية اجل كلنا على قلب واحد كثري منها بس ما ادري مين اللي كانت هواش مع رايد ليل نهار وحتى راجح ما سلم منك أجواد ضحكت للذكرى اللي زارتها: يوه يا راجح أكلها مني والله مع انها كان اكبر مني بس كان يخليني اخذ حقي على راحتي ما يقول شيء أوراد ضحكت: من يومه ما يحب احد يزعل منه -أما في المجلس كانوا الكل مجتمعين بانتظار الخاطب المجهول بداية من صارم وعياله نهاية لأصغر حفيد رايد سيّاف بقهر همس لصارم: وين اللي تقول محافظ على مواعيده كم لنا ننتظر قدومه الميمون صارم بحدة: سيّاف اهجد ما تأخروا عن الموعد انت المستعجل الرفض لمتى بتخلي البنت عندك اختها اللي اصغر منها تزوجت والكبيرة للحين مقفل عليها بقفص ذهبي مفتاحه بصحراء زايدها حرّها لهيب اهجد سيّاف اللي سكت على مضض لكن ما يقدر يجادل أبوه دقيقتين ووقفوا جميعهم في استقبال الجماعة اللي دخلوا واللي كانوا ثمان أشخاص فقط يتقدمهم شيخ كبير ويختمهم الخاطب اللي كانوا جماعته قدامه بشكل يمنع الواقفين من رؤيته سيّاف ابتسم بترحيب: حياكم الله أسفرت وأنورت الشيخ الكبير: الله يحييك ويبقيك يابو -وسكت يتذكر- سيّاف ابتسم: بو أوراد يا شيخ تفضل اجلس جلسوا جميع لين وضح الخاطب المبتسم وارتسمت الصدمة على وجه جسّار وقايد جسّار بصدمة: ياسر!!! ياسر ابتسم: الله الله يا جسّار أما الطرف الناري قايد اكتفى بشرارات نظر لو هي نار حرقت ياسر وما ورثت إلا رماده سيّاف ابتسم باستغراب: تعرفه يا جسّار جسّار ومازال الاستغراب مرتسم على محياه: ايه أعرفه يا عم تونا اليوم متقابلين ياسر ابتسم: عاد انا اعرفك من زمان يا جسّار من معرفتي بعمي صارم الله يحفظه دايم يتكلم عنك جسّار اكتفى بالابتسامة ووجه كلامه لقايد اللي جالس يساره : راحت عليك يا قايد واضح إنه جاي توصية من جدي قايد بهدوء ظاهري : الله يوفقهم جسّار ابتسم بسخرية : آمين آمين تبادلوا الأحاديث الودية والتعريفية لين نطق كبير الجماعة : أنا يا وجيه الخير جاي اليوم بوساطة خير وجاهه لولدنا ياسر جايين نخطب بنتكم كريمة سيّاف لولدنا صارم ابتسم : نتشرف فيكم بس الكلام يجيك من أبوها ثم منها سيّاف والتوتر بدأ يغزاه : والله والنعم منكم بس ياسر وش يشتغل ياسر ابتسم : عن أذنك يا جدي ودي انا اشرح لعمي قايد بهمس ساخر: بيشرح الأستاذ بعد اكمل ياسر بعد ما جاته الموافقة من الجد : انا يا عمي مالي وظيفة ثابتة وظيفتي حرة وعملي مرن وعندي تجارتي الخاصة يعني منها ادير شغلي ومنها اخذ خبرة من أماكن عمل ثانية قايد بسخرية لكن هالمره على مسمع الجميع :أظن تجارتك جديدة اللي عندك وقت تشتغل في أماكن ثانية ياسر ابتسم ببرود : لا بالعكس تجارتي تحت اشرافي فقط أما الشغل عندي عمّال وشغلي بالاماكن الثانية عشان أطور من شغلي قايد بقهر والفنجال بيده شاهد قهره من شدة اهتزازه بيده : يعني متى تفضى اذا تشرف على شغلك وتشتغل في نفس الوقت بتّال بفشلة من تدخلات قايد الغريبة وهو اللي معروف بهدوءه بالمجالس: خلاص يا قايد اترك الكبار يتكلمون سيّاف ابتسم باعجاب مبدئي لشخصية ياسر: لا يا بتّال اتركه يكمل هو حسبة أخوها قايد اللي ما ان انتهى كلام سيّاف حتى حس بحرارة الفنجال اللي بدأ يتكبكب على كفه : ماهو المقصد يا عمي بس كنت اسأله عن طبيعة شغله تفضلوا كملوا كلامكم عن اذنكم شوي طلع من المجلس وسط ابتسامات صارم اللي ما قدر يكتمها على تصرفات قايد اللي تفضح حبه لأوراد اللي يحاول يخفيه ويشاركه الابتسامة جسّار اللي شهد علامات الغيرة على قايد بشكل واضح من كلامه أو ارتجاف يده وانسحابه المفاجئ سيّاف نطق بابتسامة : بإذن الله نسأل عن الولد واسأل البنت عن رأيها ونرد لكم خبر الشيخ الكبير: خذ راحتك يا ولدي استمرت الأحاديث في المجلس لبعد العشاء وفضى المجلس إلا من صارم وعياله سيّاف: وش رأيك بالموضوع يبه صارم ابتسم : قلت لك الولد بكفالتي لكن اسأل بنتك عن رأيها واسأل انت بعد وشوف كيف شفته عزّام ابتسم : انا اشوف الولد ما ينعاب سيّاف بتّال بتأكيد: صحيح ما لقينا به عيب اخلاقه واضحة ومنطوقه منطوق ولد طالع من تربية ومجتمع صالح بس انت بعد اسأل عنه زود سيّاف تنهد: على بركة الله صارم بجهورية : ترى من باكر العصر بنروح بيت راجح نملك لجسّار ورمّاح عزّام بتردد: يبه انت راضي ان جسّار يثني؟ صارم ابتسم: ليه لا دامه ناوي يأخذ من احفاد راجح ولا يأخذ من غيره عزّام بعدم اقتناع : خلاص على بركة الله بس من بيجي بكره صارم وقف بابتسامة: الجميع رايحين بس أهم شيء حريمكم لا يدرون عن شيء سيّاف بطاعة: ابشر صارم ابتسم : يلا اجل بحفظ الله انا راجع بيتي بتّال وصل اخوك وانت طالع بتّال ابتسم وهو يبعد نظره عن عزّام عشان لا يكسره بنفسه: تبشر طال عمرك انت وبو فاتن طلع صارم ولحقه بتّال وهو يدف الكرسي المتحرك لعزّام بتّال بتردد: الا أقول عزّام عزّام : سم بتّال بتردد : متى نتمم عزّام بتسويف: متى مالله شاء وفاتحت فاتن بالموضوع بتّال ما اعجبه الرد بس سكت : على بركة الله وصل لبيت عزّام وهو ينتظره يطلع مفتاحه من جيبه ويفتح الباب عزّام ابتسم له وهو يفتح الباب: اقلط بتّال برفض: لا والله تأخر الوقت خذ راحتك انت ونام اعرفك ما تسهر عزّام ابتسم : تتغير العادة يا بتّال بتّال بضحكة: خلاص بكره انتظرني بتعتم عندك والله يعينك عزّام بابتسامة: يعني ماراح تدخل بتّال ابتسم : بسلم على فاتن واوصلك غرفتك واطلع عزّام ابتسم : يلا حياك دخلوا البيت وعلى دخولهم وقفت فاتن من الصوت ونطقت بتساؤل: يبه؟ عزّام بابتسامة: يا عونك يبه فاتن ابتسمت : تأخرت عزّام اتسعت ابتسامته: وانتي ما تبطلين تنتظريني يا فاتن فاتن باستفسار لطيف يتناسب مع ابتسامتها: معك احد صح؟ بتّال ابتسم ونطق: كيفك يا فاتن فاتن ابتسمت بخجل: الحمدلله عمي انت شلونك ووشلون خالتي أم كايد بتّال باعجاب : ما شاء الله عرفتيني فاتن ابتسمت : عرفتك من الصوت وريحة العطر عمي سيّاف عطره ثقيل انت عطرك هادي بتّال ابتسم باعجاب: ما شاء الله عليك داهيه طالعة على ابوك يلا استلميه وسولفوا على بعض انا استأذن فاتن برفض: اجلس شوي يا عمي بتّال برفض: لا على قولتك الوقت تأخر خليني اروح بيتي فاتن ابتسمت بحياء يلازمها دايم: بحفظ الله بتّال : يلا تصبحون على خير عزّام وفاتن: تلاقي الخير فاتن بحيوية : تبي شاي يبه؟ عزّام برفض: لا والله شربت كثير اليوم إلا الفتنه وش سوت اليوم اشغلوني عنك فاتن ابتسمت : ولا شيء المعهد وسولفت مع نبض شوي وقبل جيتك بساعتين كانت عندي ورشة عمل الكترونية وتو خلصت عزّام ابتسم بحب وهو يتوجه لها: الله يكملك بعقلك يا ابوي فاتن بتردد: يبه مين اللي عطاني الدواء؟ الصمت كان من نصيب عزّام واللي ترك فاتن تكرر سؤالها للمرة الثانية فاتن بإصرار: مين يا يبه عزّام بتمويه: الأكيد انهم جابوا لك دكتور أو نبض فاتن بشك وهي متأكدة من كلامها : لا يبه كان رجال وريحته مألوفة متأكدة قد شميتها بس ما ادري مين عزّام بتملص: ما ادري يا فاتن انا تعبان وبروح انام وانتي لا تسهرين كثير فاتن سكتت من عرفت ان ابوها يحاول الهرب همست لنفسها : من يكون وليه أبوي تهرب من سؤالي ! -عند جسّار ورمّاح اللي كانوا سهرانين ببيت الشعر جسّار بسخرية: قايد ماراح ينام اليوم رمّاح ضحك: انا ساكت ما ودي اشمت بأحد جسّار بقهر: لا اشمت ولد عمك ذا غريب دامه يحب وبنت عمه وش مانعه يتقدم يستاهل وقلعته يحسب الدنيا بتوقف عليه رمّاح بهيام: بكره اليوم الموعود يا جسّار جسّار بسخرية : يا بعد بكرة على اللي منتظر بكره ارقد وخلنا نرقد رمّاح صد عنه وهو يعطيه ظهره وينسدح : ارقد الشرهه على اللي يقاسمك فرحته جسّار ابتسم : لا تقاسمني فرحتك خلك فيها بخيل واحتفظ فيها شاركني شقاك واشيله عنك يابو نجد رمّاح رمى التكية على جسّار: اذا الشقا اللي مقاسمني إياه تقصد فيه نجد يا زين شقاي اجل الله يكثر منه ويخلي لي إياه جسّار رجع رمى التكية على رمّاح : اذا جات نجد بنتك الصدقية لا تنسى بنتي لا اصفقك رمّاح غمز له : اذا جاك ولد غير صارم سمه رمّاح جسّار برفض: ناقص انا عشان اجيب رمّاح ثاني بحياتي ابعد عن الشر بس رمّاح بتلميح: ها ناوي على الثاني يا جسّار جسّار ابتسم : وش يمنع زينة الحياة الدنيا المال والبنون رمّاح بمزح: الله يستر شكلنا بنعيش نلاحق وراعينك وعاد يطلعون كلهم نفوس شينه يوووه جسّار ابتسم : اسكت وارقد لا اجيب لك نجد رمّاح بابتسامة : رقدنا -اليوم الموعود يوم خطبة الثنائي كان الحماس مشترك بين الاثنين والكل مقبل على حياة جديدة بشكل متفائل جسّار اللي صعد لجناحه بعد نومته الهارب فيها من هبه عشان لا يحس بتأنيب الضمير أكثر دخل الغرفة ولأول مرة ما يلقى ملابسه مجهزة على السرير جسّار بتساؤل: ما جهزتي ملابسي يا هبة هبه باستغراب: ما جيت امس وحسبتك مداوم جسّار تنهد : بدخل اتروش ما عليك امر طلعي لي ثوب وشماغ وكبك واللي انتي تعرفينه هبه فزت تجهزهم: ابشر جسّار بتراجع: لا خلاص خلي عنك انا اطلعهم ارتاحي هبه ابتسمت: ارتاح اذا انت مرتاح لأني قايمه بواجباتك جسّار بتملص: يعطيك العافية يا ام نجد تركها ودخل يأخذ له شور وبعد ما طلع لقى كل شيء جاهز من الثوب لأصغر التفاصيل حتى البخور جاهز لكن هبه ماهي متواجدة لبس ملابسه وطلع وهو يشوف أمه على السرير جسّار توجه لها وهو يبوس رأسها : حيّ من جاني نوره بحدة: ارحم زوجتك يا جسّار تخليها تجهز ملابسك لعرسك الثاني؟ مات احساسك يا جسّار؟ جسّار بندم: خذتني العادة وتراجعت بس هي أصرت نوره هزت رأسها برفض: يا خوفي انك ما تعدل بينهم يا جسّار جسّار باس رأسها مره ثانية: ربي يقدرني واعدل بينهم ان شاء الله لا تشيلين هم يمه نوره : آمين يمه آمين تجهز وروح على الوقت ترى جدك راجح ما يحب التأخير جسّار بطاعة اشر على خشمه: على هالخشم يا ام جسّار نوره ابتسمت: الله يوفقك يمه ويفتح لك أبواب الخير جسّار ابتسم وتوجه للمرايا يكمل تجهيزه ويطلع من الجناح قبل رجوع هبه اللي ما يدري وين راحت لمن توقع انها عند نجد انتهى تجهيزه خلال دقايق والتفت لأمه اللي داهمتها الدموع جسّار بفزع : افا افا يالنور وش يبكيك نوره اللي ما قدرت تكتم عبرتها أكثر وشهقت بحسرة : صرت تشبهه كثير كثير يا جسّار جسّار مسح دموعها وباس عيونها : الله يرحمه يا يمه ما ابي اشوف دموعك مرة ثانية اذا مو عشاني عشان الفهد اللي ما يحبها بعد نوره اللي سمعت كلامه وهي تمسح دموعها وتسمع صوت صارم اللي ينادي على جسّار نوره باستعجال: يلا يلا انزل هذا جدك يناديك جسّار بإصرار: ابي ابتسامتك قبل اطلع نوره شهقت:جدك ينتظرك يا جسّار جسّار ابتسم بإصرار: ابتسمي قبل اطمع بضحكتك نوره ابتسمت بحب : روح يا جسّار يا ولد جوفي وروحي جسّار ابتسم وبأس رأسها باستعجال وطلع نازل لجده : لبيه لبيه هذا انا نازل صارم اللي يشاركهم التوتر لأول مره : يلا يا جسّار تأخرنا جسّار يناظر ساعته : باقي خير يا جدي باقي وقت رمّاح جهز صارم ضحك بسخرية: رمّاح جاهز من الظهر ما كنت ادري به مطفوق كذا جسّار ضحك وهو يسند صارم ويماشيه للسيارة : طقت روحه من المنفى يا صارم وانت قسيت عليه خله يفرح يستاهل الفرحة -مشت السيارات طالعه من فلل آل صارم متوجهه لبيت راجح اللي وصلوه خلال دقايق قليلة ونزلوا من السيارات اللي كانت اشبه بالموكب من سيرها بنفس الشكل المتعاقب نزل جسّار من سيارته وهو يشد صارم ويتوجه للباب رن الجرس وفتح لهم سعود سعود بترحيب ماهو من قلبه : حياكم المجلس جسّار ابتسم بسخرية وهمس: هوّن على نفسك يابو مشاعر سعود بقهر: تدخل المجلس خاطب ولا توديني السجن قاتل؟ جسّار ابتسم وهو يلحق صارم للمجلس راجح وقف بترحيب حار وحضن بينه وبين صارم : حيّ الله وجيه الخير حياكم الله وبعد الترحيب نطق الصارم بابتسامة: طبعًا عارفين بسبب جيتنا جينا نبي الخير لعيالنا ولنا بنسبكم راجح بابتسامة: لنا الشرف حياكم الله قوم يا سعود قهوهم صارم برفض: لا والله ما يقوم خادم القوم أصغرهم يا راجح وسعود ماهو صغير قوم يا رايد رايد بورطة همس لكايد اللي بجنبه: حتى هينا انا القهوجي يارب ارحمني لو انك منتظر ببطن أمي لين اطلع كان انت الصغير كايد ابتسم بحرش: قوم يا خادم القوم رايد فز بابتسامة متصنعة وهو يسحب الدلة ويصب للرجال وصل عند سعود اللي اول ما صب له شرب البيالة كاملة طارت عيون رايد بصدمة وضحك صارم صارم بضحكة: انجز يا رايد عيال راجح يشربون مشاريبهم بحرارتها رايد بوهقة : اصب لك ثاني يا عم سعود ما قدر يكتم ضحكته : لا كفاك روّح صارم باعتذار: تدري يا راجح ان غلطة رمّاح يوم جاك يخطب بدون جاهه واليوم جاي انا وكل عيالي نخطب منك ومن سعود بناتكم سعود رفع حاجبه : لا ماهو كل عيالك وينه أبو رمّاح راجح اشر لصارم بشكل هادي وابتدأ يتكلم : انا اخوه الكبير وانا اللي ربيته ودك بالجاهه هذي هي جاهتنا واذا ودك تسأل عن رمّاح اسألني انا لا تسأل عن احد ثاني صارم بفخر: وصلك الرد يا سعود وبما إن الموافقة وصلتنا انا أقول خير البرّ عاجله ونتمم الملكة سعود ابتسم بانتصار وهذي اللحظة اللي منتظرها: قبل ما نتمم شيء بنتي الكبيرة عندها شرط لجسّار ان وافق عليه ابد على ما قلت يا عم خير البرّ عاجله صارم ابتسم بشك من ابتسامة سعود الغريبة : تبشر وش هو شرطها سعود ابتسم وكان بينطق لكن قاطعه جسّار جسّار بشك: بعد اذنك يا خالي ابي اعرف انا الشرط قبل تقوله للملأ سعود برفض لطلبه: شرط بنتي مافيه شيء عشان ما أقوله وجدك سبقك وطلبني أتكلم صارم شد على فخذ جسّار يمنعه يناقش سعود أكثر سعود بجهورية : شرط بنتي يا جسّار ان الزواج يحضره عمها رعود وولده اكتست الوجوه بالصدمة من الطلب الغريب وملى المجلس الهدوء قبل ما ينطق جسّار بالردّ اللي أخرس الجميع -انتهى أتمنى يعجبكم الجزء لأنه اخذ من وقتي الكثير وكان من أطول الأجزاء اللي كتبتها وصعب علي إني ارجع أراجعه اذا وجدت اخطاء إملائية اعتذر منكم جدًا نلقاكم على خير الأسبوع القادم ان شاء الله حسابي بالانستقرام sahab_610 | ||||
|
| |
|
19-09-20, 08:20 PM
| #54 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الجزء الثلاثون * * بداية العقدة الثلاثينية تكمن بإن تصديقها أشبه بالمستحيل هنا جسّار وبالطرف الآخر رعود ومشاعر بالمنتصف من سيكون المنتصر * * سعود بجهورية : شرط بنتي يا جسّار ان الزواج يحضره عمها رعود وولده اكتست الوجوه بالصدمة من الطلب الغريب وملى المجلس الهدوء قبل ما ينطق جسّار بالردّ اللي أخرس الجميع جسّار بابتسامة عريضة : عزّ الطلب أي والله عز الطلب يجي ليه ما يجي ولا تدري يجي قبل الضيوف بعد لأنه عم العروس صح وان استمر وجوده يزف العروس بعد وش المشكلة الصدمة الآن كانت من نصيب الجميع حتى سعود اللي تبدلت ابتسامته لمعالم الصدمة أما مشاعر اللي ما كانت متأكدة ان هذا رده ابتسمت الآن تقدر تتطمن انه زواجه منها ما هو عشان انتقامه من رعود لأنها بشرطها اعطته الضوء الأخضر انه يتركها بيوم الزواج لأنه بيكون وصل لرعود وخلاص لكنه ذكر الزفة يعني حتى اذا اخذ انتقامه مصيرها واحد زوجته بشكل رسمي انسحبت من قدام المجلس للصالة تكمل قهوتها أما بنفس المجلس انتهت الصدمة من نطق راجح : رعود ما تشوفه عيني ولا يدخل لي بيت إلا وهو مثبت براءته حفيدي وبنتي ورفيق عمري اللي رجعوا لي عقب سنين عجاف مانيب مفرط فيهم جسّار بسخرية قاصد فيها سعود: سمعت يا خالي هذا ماهو كلامي هذا كلام جدي سعود بهمس لأبوه: هذا شرط مشاعر يبه راجح بحدة: بنتك هذي لي تفاهم معها سعود بقهر: بس يبه حقها راجح بعدم اهتمام بكلام سعود نطق بجهورية: ابد يابو سيّاف جيتوا طالبين بناتنا اللي هم قطعة من قلبي وانا عطيتكم عيوني الثنتين وان شاء الله ما نختلف على شيء صارم ابتسم بعد التوتر اللي كان من دقايق : اجل من بعد اذنك ولا طلبنا الا الشرع عيالنا ودهم بالشوفة الشرعية ان كان ما عندكم مانع جسّار اللي كان مستمتع وجدًا بملامح وجه سعود اللي بالدقيقة تتشكل لأكثر من شكل: وش قلت يا جدي راجح ابتسم : الرأي ماهو رأيي يا جسّار تعرف الأمور هذي عند البنات ولا انا ما عندي مانع بس ولا يهمك قايم أشوفهم بنفسي سعود وقف باستعجال: اجلس يبه انا أقوم راجح ابتسم بامتعاض لسعود : اجلس يابو مشاعر رايح بنفسي سعود جلس وهو يهز رجلينه بغضب انتبه له رايد اللي كان يصب الشاهي رايد صب البيالة لسعود ومدها : سمّ يا عم مليتها لأنك تحبه حار بس لو بتستمر تهز كذا بتحترق سعود اخذ منه البيالة بعدم اهتمام بس عشان يسكت من كثر الكلام ويروح للي بعده شرب بيالته دفعة وحدة وهو يتركها على الطاولة وكان وده لو هو اللي راح ماهو راجح كان قال لهم ان بناته رافضين الشوفة بدون ما يشاورهم حتى عند راجح اللي وصل الصالة اللي متجمعين فيها البنات راجح ابتسم ونطق: متجمعين والله شغف بحماس: ننتظر وش عند آل صارم راجح ابتسم : تنتظرون ولا فيه تحقيقات من ورى الأبواب مشاعر تركت كوبها بحذر على الطاولة وهي تطلع من وضعية عدم التفاعل وتندمج بكامل حواسها معاهم شغف بتمثيل للأسى: للأسف يابو سعود ما سوينا تحقيقات لأن ندري بنات سعود بيروحون لعيال صارم وبنصفى انا وياك يا شقاك يا بابا راجح راجح ابتسم: دام الشغف عندي عز الله ما أفلست روح بابتسامة: افا بعتنا يا جدي راجح ابتسم: انتي بالذات ماراح تحزنين على هالبيعه ودك بها من زمان روح بخجل سيطر عليها: جدي !! راجح ابتسم: ما علينا من جدي وحركات البنات جسّار ورمّاح يبون الشوفة يا بنات وش قلتوا مشاعر بجمود: مافيه شوفة راجح اختفت الابتسامة من وجهه: ترى انا ساكت عن شرطك يا مشاعر بكيفي ولا لو بناقشك بتزعلين يا مشاعر لأن كلامك كلام جهال ما خبرته فيك لو هو جاي من الثنتين أهون من انه يجي من العاقلة يا مشاعر مشاعر بتوضيح: جدي انت تدري ان عمي رعود ما ذبح أبو جسّار راجح هز رأسه بتأكيد: وادري ان رعود بيجي ورأسه مرفوع وبيده دليل براءته ما ابيه يجي بعين المذنب يا مشاعر ما ابي عيون آل صارم تتصيده ابيه يجي وبجيته تنكسر كل عين ودها تناظره والرعد ما ينشاف يا مشاعر ينسمع دوي حسّه ونخمن شيئيين يا أمطار خير يا صواعق الله يحفظنا منها دامك اخترتي جسّار عيشي معه بعيد عن دور محامية رعود يا مشاعر ولا الآن ارجع المجلس اللي جيت منه وأقول له بنتنا ما تنفع لك وش قلتي يا مشاعر مشاعر سكتت باقتناع بكلام جدها ويكفيها من هالكلام كله ان راجح متأكد من رجعة رعود وهو بريء شغف بتضييع للموضوع الحساس اللي كسب الصالة توتر جديد : يلا يلا قوموا تجهزوا مشاعر تكفين تكفين انا بختار لك لبسك تكفين ياخي ابي اخوي ينهار لو عليك بتلبسين تنورة الجامعة وقميص رسمي بس تكفين خليها علي روح بمزح تساعد فيه شغف على ابعاد التوتر: وانتي بعتيني بعد شغف بملل: انتي زوجك يبيك بدون ما يشوفك وش اساعدك فيه بساعد الخبلة ذي أخاف تلوث عيون اخوي ترى عيونه تصيد الزين ها نبهتك راجح بابتسامة : يلا عاد يا شغف روحي يمين مشاعر لو تلبس اردى من اللي قلتي وقفت جسّار وآل صارم على رجل يحمد ربه اللي وافقت عليه مشاعرنا روح بقهر: وينك يا ابوي تجي تعزز لي نسوني راجح بجدية : يلا عاد تجهزوا بسرعة ولا تبالغون بالزينة الرجال ينتظرون وانتي يا شغف اعقلي تركهم ورجع للمجلس مبتسم : طلبتوني الشرع وطلبتكم حق الصبر بس لين يجهزون ما عطيتونا خبر قبل صارم ابتسم : خذ راحتك ما ينمل من جلستك يا راجح نصبر وش المانع راجح ابتسم : صابك اللي صاب الزمن يا صارم وين اللي يوقف العسكرية على رجل غدا يحتاج من يوقفه صارم بطقطقة ممازحة: ما نأخذ زمنا وزمن غيرنا يا راجح يكفي اللي عشناه انصحك تشتري عصاك من الحين يا راجح راجح بثقة: الله لا يعوزني لها يالصارم اخدم بدنك بشبابك يخدمك بمشيبك مير انت ذبحتك المفاطيح والدسم رمّاح ينغز رايد اللي كان يصب له القهوة: اسمع كلامه يا رايد اخدم جسمك بشبابك يخدمك بمشيبك شوفه ما شاء الله ما كأنه إلا اخو ولده وما كبره غير الشيب رايد بهمس نزل لمستوى رمّاح : اقسم بالله اول ما جاء خطبة كايد جلست اطالعهم ابي اعرف من فيهم راجح وما استوعبت لين خذه جدي بالاحضان انا الجد مو هو والله ما شاء الله الله لا يضره رمّاح بابتسامة مصطنعة: خلاص نصحناك امش فضحتنا رايد بنفس الهمس: يوووه نسيتهم ذول هات هات مناديل من جيبك رقعها رمّاح كتم ضحكته وهو يطلع مناديل من جيبه ويمدها لرايد اللي كان ماسك المعاميل بيدينه الثنتين ومافيه مجال يأخذ المناديل رايد بقهر: خذ من يدي ولا رميتهم كلهم رمّاح سحب الدلة من يده وهو يمد المناديل وقد ما يقدر كاتم ضحكته على رايد والنظرات المتوجهه عليه من سعود الناقد تصرفاته وبعد ما مر وقت كافي على تجهيز البنات نطق راجح بهمس لسعود : خذ جسّار للمجلس الثاني وناد مشاعر وشغف عشان تجلس معهم وانت خاوي رمّاح لمجلس الحريم وناد روح ابطينا على الجماعة سعود بامتعاض: ابشر فز على حيله وهو ينطق بصوت ماهو جهوري لكن مسموع للجميع بشكل متوسط : حياكم ألحقوني جسّار اللي دخل جواله بجيبه بعد ما ردّ على رسالة شغف اللي تسأله عن اللون اللي يحبه رد بعدم مبالاة " مافيه لون مميز بس الأسود أفخم الألوان " رفع رأسه وهو يشوف رمّاح سابقه وهو يعدل شماغه بتفنن ابتسم بسخرية على حماسه سرّع من خطواته وهو يدق على كتف رمّاح رمّاح لف بسرعة: هلا جسّار بتنبيه: انا الكبير ترى رمّاح بسخرية متبادلة : انا خاطب قبلك سعود اشر على يمينه بدون ما يسمع همسهم : ادخل هينا يا جسّار جسّار موجه كلامه لرمّاح: لا أوصيك بالثقل يابو نجد المستقبلية رمّاح يأشر على سعود بعيونه : من غير ما توصي سعود بحدة: مطولين ؟ جسّار ابتسم ودخل المجلس وهو يعدل شماغه من قدام بشكل يناسب الشخصية اللي معتمدها للمناسبات سحب الجزء اليمين من الشماغ وهو يرجع ينسفه لوراء بخفة جلس على الكنب وهو شخصية تكره الانتظار ما ينكر حماسه انه يشوف مشاعر البنت المتخفية ورى كتلة القوة واللسان السليط كيف بيكون شكلها سمع صوت الباب وهو كشخص مهتم بشكله عدل جلسته بخفة وهو يمثل الانشغال بجواله اللي كان ماسكه بالمقلوب الجهة الخلفية قدام وجهه والجهة الأمامية مقابله لشغف اللي دخلت بحماسها المعتاد شغف اللي انتبهت للجوال وضحكت بصوت رنان: يالطيب الجوال مقلوب على الأقل اذا بتخفي حماسك انتبه ترى مشاعر تنتبه لأقل حركة جسّار بتمثيل للجمود عكس القهر اللي تملكه هاللحظة من ضحكة شغف : انتي تعاملين الباب كأنك فاتحه القدس الجوال كان بيطيح ومسكته عشان كذا مقلوب شغف ضحكت مره ثانية وهي تأشر بسبابتها بمعنى لا : لا لا مستواك بالترقيع طايح بالأرض اذا بترقع مرة ثانية انتبه اكثر لأن الباب صوته مو قوي شدعوه عليك ما علينا جايه أسليك لين تجي مشاعر وماراح تطول اصلًا بس راحت تشوف روح جسّار رجع يطقطق على جواله بدون هدف: عادي شلون رأسك الحين شغف بمبالغة : اوووه ما احس انه يوجعني من كثر ما اني مبسوطة انك بتتزوج مشاعر جسّار بسخرية: ذكريني قبل الزواج نضرب رأسك مره ثانية نشوف بتحسين ولا لا شغف بقهر: يا شينك لا سويت بارد اترك جوالك يلا جسّار بطاعة دخل جواله بجيبه : سمي يا شغف الروح هذا الجوال ودخلناه مو انتي جايه توسعين صدري تفضلي هاتي ما عندك -عند مشاعر وروح دخلت مشاعر عند روح بعد ما طقت الباب روح اللي كانت متوترة بزيادة توجهت لمشاعر وهي تمسك كفوفها بكفينها الباردة : مشاعر بديت اتصرقع جد وش اسوي يمكن ما اعجبه بعد وش بيصير خلاص مافيه رمّاح مشاعر ابتسمت وهي تشوف اختها اللي كانت تجمع البساطة بشكلها الغير متكلف والفخامة بشعرها اللي رافعته لفوق أضاف سحبه حلوة لعيونها الواسعة وابرز وجهها الصغير بشكل فخم وجهها اللي كان خالي من أي مكياج اكتفت بتكثيف رموشها وتوريد شفايفها فقط سحبت كفوفها من كفوف روح الباردة وهي تحضن وجهها بكفوفها : افا من يشوف هالجمال وما يعجبه إلا ما ينلام اذا قال الزواج بكره بعدين بس ابتسامة بسيطة بعيد عن التوتر وصدقيني على رمّاح السلام البنت اللي عندها غمازة ما تهاب الاعجاب كيف لا صارت هالبنت روح بنت سعود يلا عاد ابتسمي وانزلي بدون توتر دخلي الضيافة وطلعي على طول مو تفهين يا روح روح ابتسمت : يلوموني فيك والله بعدين الخوف مو على رمّاح الخوف على جسّار وين اللي حلفت ما تلبس ابيض يا مشاعر وش صار مشاعر ابتسمت بعناد : شغف قالت انه يحب الأسود لبست أبيض روح ابتسمت بصدمة: مشاعر انتي تبينه ولا ما تبينه ليه تنفرين منه مشاعر ابتسمت : لو أبي أعجبه بخليه يحب الأشياء اللي يكرهها أبي أكون البصمة ما ابي أكون مرور عابر يا روح روح ابتسمت باعجاب: تقولين وتطولين دخل عليهم سعود بابتسامة : اللي عندها الزين كله ما يقوى يعطيه لأحد والله وش رأيكم نكنسل الشوفة والخطوبة وتجلسون بالبيت مشاعر ابتسمت : الحل والربط عندك يابو مشاعر سعود ابتسم : عشان راجح يقلب نهاري ليلي مو مهم رأيي المهم رأيكم انتوا مشاعر بتمثيل لعدم العلم والجدية بملامحها : يبه وش صار على شرطي؟ روح بصدمة : وهو للحين انتي مصره على شرطك الغبي يا مشاعر مشاعر عرفت ان روح تقصد شرطها الأول اللي شرطته على جسّار ان الزواج يكون شكلي فقط أرسلت نظرة لروح تمنعها تكمل كلامها : رضى عمي رعود يحضر ؟ سعود هز رأسه بالتأكيد : ايه رحّب وهلّا بس جدك رفض نتكلم عن هالموضوع بعدين انزلوا الحين لا تتأخرون ونتفشل عند صارم وجاهته مشاعر باستفسار: مع بعض! سعود ابتسم : شغف معك بما انها من محارم جسّار وانا مع روحي ولا أوصيك يا مشاعر وانتي العاقلة اللي تعرف الأصول مشاعر ابتسمت : لا توصي بس انتبه للي معك ترى التوتر ذابحها سعود بابتسامة باس خد روح: يتوتر اللي بيقابل المحامية روح ماهو العكس يا يبه بعدين بيني وبينك رمّاح الظاهر انه ماهو شارط شيء حتى انه ما تكلم من يوم وصل يعني ان شاء الله سهالات مشاعر بابتسامة : قصدك انا اللي مفروض أتوتر يعني سعود ابتسم بتعجب: ما خبرت المشاعر تتزحزح يبه مشاعر ابتسمت : صح خبرك يبه سعود باستعجال: يلا يلا يبه لا نبطي أكثر مشى سعود وهو حاضنهم الثنتين وحده من يمينه وحده من يساره وصل للمجلس اللي فيه جسّار : هينا يا مشاعر تبين ادخل معك بعدين اروح مع روح ؟ مشاعر بثقة : شغف داخل؟ سعود بابتسامة : ايه داخل مشاعر بادلته الابتسامة : خلاص اجل خلك مع روح خذت صينية الضيافة اللي كانت موجودة بالممر وهي تسمع صدى ضحكته مع شغف واللي لأول مره تسمعها دقت الباب مرتين وهي تسمع صوت شغف شغف بضحك : درعمي ادخلي جسّار كتم ضحكته وهو يمثل الجدية وانتقلت انظاره بشكل تلقائي للباب وهو يسكر مقدمة ثوبه اللي كانت مضايقته مع الضحك وفتحها رجع يسكرها الآن لكن يده جمدت على عنقه وهو يشهد دخول مشاعر أو هالة الحسن الواضحة اللي كانت مصاحبتها رفع عيونه من فستانها الفضفاض الأبيض اللي يعاكس شعرها العتيم الناعم بكثافته مشترك بالصفة مع حواجبها الكثيفة بشكل أضاف لعيونها الواسعة فتنة صريحة تركت عيونه تعلق بعيونها من غير ملل لخشمها لباقي تفاصيلها ما كان فيه مجال يقارنها بهبة لأن جمالها الغاير يعاكس جمال هبة الهادي مثل شخصيتها جمال مشاعر كان سليط مثل لسانها حدة نظرتها كانت فرط البهاء بالنسبة لجسّار حب قوتها قبل يشوفها والآن حدة النظرة وقوة الحسن يشاركون بالمشهد انتبه لابتسامتها الساخرة من تأمله العميق وقتها حس على نفسه وهو ينزل عيونه ومنصدم من عدم توترها ولا لقى فيها الخجل اللي يسمع فيه قطع عليه ذهوله ضحكة شغف اول ما تركت مشاعر الصينية وطلعت من الباب وتوه ركز بطولها المناسب لطوله جدًا الصفة المشتركة الوحيدة بين مشاعر وهبة لقاها الآن وهي الطول جسّار لف عليها بحدة : خير انتي بعد شغف ماهي قادرة توقف ضحك : متأكد انها ثاني مرة تتزوج؟ جسّار ناظرها بحدة : شغف اعقلي شغف بضحك : توترت والله توترت يدك عيت تنزل عيونك بتأكلها ومشاعرنا جدار تركت اللي بيدها وطلعت ما ناظرت فيك حتى جسّار بمحاولة لتضييع التوتر قدام شغف ولاسترداد هيبته : مين قال لك عيوني صادفت عيونها على طول كيف ما ناظرتني شغف ضحكت من غير ما ترد عليه تاركته يراجع صورة مشاعر اللي انرسخت بذاكرته واكثر ما رسخ هو عنادها حتى باختيار لون الفستان أما بالطرف الثاني مشاعر اللي كانت حالتها ما تقل عن حالة جسّار ما تنكر انها شافته أكثر من مرة لكن بالشماغ وبالطريقة القريبة هذي كانت اول مرة عبرت عن توترها وهي تطلق نفس عميق وتهز رأسها يمين يسار تحاول تنسى اللي شافته واختتمت طقوسها بإنها حطت يدينها الباردة على وجهها اللي تحس بحرارته من نظرات جسّار اللي حست من حدتها إنها تجاوزتها وعبرت ما كانت نظرة كانت أعمق لكن لا مو مشاعر اللي تتأثر لا -بالطرف الثاني مجلس الحريم اللي كان يحتوي رمّاح اللي يدندن بنغم لحاله ينتظر دخول روح وسعود لكن طال انتظاره وقف وهو يهمس لنفسه " اشرب قهوة ازين لي واضح العم بيطلع قهره بي يا حظ جسّار عنده اخته نزل للقهوة الموجودة وكان بيفتحها لكن وصله صوت سعود " سعود بسخرية : أفا يا ولد عسّاف ودك بقهوة وانا جايب معي الحلى خلاص شكلك حليت وخلصت ارجعي يا روح رمّاح اللي ترك الدلة من يده اول ما سمع أسمها رفع عينه وهو اللي انتظر هاللحظة من سنين من اشتغلت عنده بالمكتب من عشقها والسبب اختلافها عن البنات اللي شافهم واشتغلوا معه كانوا البنات هم اللي وراه لكن روح كانت لها من اسمها نصيب سرقت روحه لآخر رمق وتركت له عيونها فقط اللي كانت تظهر من نقابها وما تتركه الا يلمحهم فقط لكن الحين الحين يا رمّاح هذي هي روح قدامك ما ينكر انه ادرك انها بتكون جميلة من ملامح سعود اللي كانت تلميحة بسيطة لرمّاح لكن روح كانت مبهرة لعينه غابت الألوان عن عينه و ما بقى إلا أزرقها اللي التفت فيه روح هالمرة وكان مناسب للون شعرها البني الفاتح لوجهها الصغير اللي متأكد انه اصغر من كفه ابتسم تلقائي من لمح الغمازة اللي انحفرت بخدها بشكل واضح و امتلاء مبسمها اللي ما تلاشى اثر ابتسامتها انتقل بعيونه لعيونها بشكل سريع والعيون هذي سهرة ليله من لمحها حتى انه رسمها وهو بألمانيا عشان ما يفقد شوفها تذكر الرسمة رمّاح بابتسامة : طالبك يا عم سعود ابتسم من ابتسامته الواسعة : وش طلبك رمّاح باستعجال : بروح ثواني بجيب شيء وراجع لا تطلعون تكفى سعود ابتسم وهو يجلس على الكنب ويسحب روح جنبه : خذ راحتك رمّاح طلع من المجلس ومن البيت بكبره وهو ينتقل لسيارته بشكل مستعجل فتح الباب وهو يطلع اللوحة المغلفة واللي كانت رسمة لعيون روح اخفاها وراه وهو يرجع للمجلس لكن سكت من شاف نظرة سعود الحادة المعاكسة لابتسامته قبل يطلع نطق بتوتر : ارجعها؟ سعود بتمثيل للحدة: وش هذي؟ رمّاح بتوتر: هذي لروح بس اذا رافض خلاص اعتبرني ما جبتها سعود ابتسم : هاتها هاتها ما يحتاج تتوتر رمّاح مد له اللوحة وابتسم بتوتر وهي يحتفظ بآخر نظراته لروح اللي كانت متخفية عنه بذراع أبوها صد بقهر من حركتها وجلس على الكنب شاهد خروجها بلوحته ووقوف سعود قدامه رمّاح باستغراب من وقوف سعود أمامه مباشرة وقف بشكل تلقائي: سم يا عم سعود بحدة : شفت النظرة اللي طلعت منك قبل شوي لروحي اعتبرها اعظم شيء ممكن تسويه بحقها ويا ويلك مني لو يطلع منك ادناها الروح ما تنجرح وصاحبها عايش يا ولد عسّاف ولا تحسب زواجك منها انك تملكتها لا ترى ما زالت بنتي وروحي وضلعي المستقيم لو تضرها بأدنى شيء بتلقاني خصيمك وحط الكلام هذا حلق بإذنك يا ولد عسّاف ان طلع بك عرق من رداة أبوك قاطعه رمّاح بقهر: ترى اذا قلت ولد عسّاف انت ما تهينني لأني فعلًا ولده وهو أبوي لكن لما تشبهني بطبايعه تهينني لأني انا اللي نويت اغيرها واللي يهب ويرعد بالبنات ماهو رجال يا عم والشيء هذا تعلمناه من صارم لأصغرنا وشلون لو صارت روحك روحي والله ما تنضر مني شعره وان ودك اعتذر لها عن النظرة ابشر وعلى هالخشم سعود بجدية : ما اشبهك بأبوك بس احذرك يا رمّاح عشان تكون عليك حجة لو زعلت روحي رمّاح بابتسامة: وخذها علي حجة طول ما انا عايش ما يزعلها مني شيء بإذن الله ان حميتها انت من الزعل واشباهه 24 سنة انا مستعد احميها طول العمر واشاركك المسؤولية وابتسامتها ما تغيب عنها إلا تتضاعف ما عادت هي روحك وبس بعد ما نعقد القران بتكون روحي بعد سعود ربت على كتفه وطلع تاركه ومبتعد عن تأثره بكلام رمّاح وارتاح بشكل كبير هذا هو الكلام اللي محتاج يسمعها -عند روح ومشاعر روح اللي طلعت وهي مبتسمة وبيدها لوحتها لقت مشاعر تصعد الدرج روح بحماس: مشاعر مشاعر رسمت الابتسامة من سمعت صوت روح الواضحة فيه الفرحة لفت عليها : روحها روح بابتسامة : ها كيف جسّار مشاعر ابتسمت : اللي يسمعك أول مره اشوفه انتي كيف شفتي رمّاح روح بحب: تدرين مشاعر كثر ما اشتغلت معه ما حطيت عيني بعينه ولا لمحته إلا طرف بس يا مشاعر لمحته تو واحس بموت من الغيرة واخاف احسد نفسي مشاعر ابتسمت براحة: الله يوفقكم ويسعدكم يارب روح بحماس: تعالي معي بفتح الهدية ادري انها لوحة بس بشوف وش هي مشاعر ابتسمت وهي تجاري روح ما تبي تكسر فرحتها : يلا تعالي نشوف وصلهم صوت شغف الراكض: وين وين انتي وياها انتظروني بجي أسمعكم روح وش هالرمّح اللي طلع من مجلس الحريم وش هالزين روح بقهر: شفتي يا مشاعر هذا أولها شغف بضحكة : يا غبية ولا شفته ولا ادري عنه بس سمعت كلامك قلت اجننك -في المجلس دخلوا رمّاح وسعود وهم يشوفون جسّار اللي كان سابقهم وراجع المجلس نطق صارم وهو يشوف ابتسامة رمّاح اللي انعكست على المجلس تاركه الكل يشاركه الابتسامة: اجل على بركة الله يا راجح نكلم الشيخ يعقد اليوم وبكره التلبيسة وأمور الحريم راجح لف لسعود : ها يا سعود موافقين سعود ناظر بجسّار يبي يستشف منه حاجة لكن وجه جسّار كان جامد : على بركة الله دام الجميع موافق صارم ابتسم : اجل عن اذنكم نكلم المملك -في منطقة ساري اللي كان يخطط هالمرة لضربة أقوى ساري بابتسامة واسعة : معناه جسّار ما اخذ الدرس اني قادر أوصل لعايلته راح يكون له عايله جديدة سحر هزت رأسها بالإيجاب: ايه بيتزوج على زوجته ساري رفع جواله وهو مبتسم بتشفي انتظر رد الطرف الثاني ونطق اول ما انفتح الخط : عبدالعزيز ابي رقم زوجة جسّار أم بنته عبدالعزيز : دقايق ويجيك سحر اللي استغلت انشغاله وتوجهت للدور الثاني وهي تتصل على الرقم اللي مسجلته بجوالها ثواني بسيطة ووصلها الصوت ....:آلو سحر بابتسامة غريبة : يا هلا وسهلا أم البارق كيف حالك شمايل باستغراب: اهلين العذر منك بس من معي سحر بابتسامة خبيثة: انا اللي منعت زواج ولدك من المطلقة شمايل بعدم فهم : اختي تكلمي مثل الناس ولا قفلت الخط سحر بخبث: لو ما أرسلت لمشاعر رسالة اطلب منها تختار جسّار عن ولدك ولا كان الحين ولدك متورط فيها شمايل بعدم اهتمام: وش المطلوب الحين ومين تكونين سحر بجدية : انتي مديرة مدرسة ثانوية صح شمايل بمسايره : صحيح مديرة مدرسة سحر بنفس الجدية: مقابل المعروف اللي سويته لك أبي أقابل بنت عندك بالمدرسة شمايل بمجاراة مثل ما يوصيها رعود اللي جالس قدامها ويسمع المكالمة من الأول : مين البنت؟ سحر بجمود: شغف رعود آل راجح الصدمة ارتسمت على وجه رعود قبل وجه شمايل اللي تداركت الموضوع : بصفتك مين؟ سحر بجمود : أمها -انتهى نلقاكم بإذن الله الأسبوع القادم استودعتكم الله حسابي بالانستقرام : @sahab_610 | ||||
|
| |
|
27-09-20, 08:34 PM
| #57 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الجزء الحادي والثلاثون * * تائه حتى أني من فرط التيه أغرق الكوارث تحيط المدى ولكن انتِ طوقي للنجاة * * شمايل بمجاراة مثل ما يوصيها رعود اللي جالس قدامها ويسمع المكالمة من الأول : مين البنت؟ سحر بجمود: شغف رعود آل راجح الصدمة ارتسمت على وجه رعود قبل وجه شمايل اللي تداركت الموضوع : بصفتك مين؟ سحر بجمود : أمها رعود اللي اشر لشمايل تكمل معها وما تقفل الخط ابد وركض للبارق في غرفته فتح الباب لكن البارق مو موجود شتم حظه وطلع جواله وهو يتصل على البارق رعود بغضب: وينك انت البارق بشرح: رحت المقر قاطعه رعود بعجله : راقب جوال أمك حالًا ابيك تحدد لي الموقع من الرقم وجرب تقول لي ما قدرت يا بارق جرب البارق بطاعة: ابشر بقفل الخط عشان قاطعه رعود وهو يقفل الخط وينزل لشمايل اللي كانت تكلم سحر شمايل ببرود: لا هلا ولا مرحبا باللي تركت بنتها وهجت سحر بسخرية: تركت بنتي وزوجي ما رحت هاجه بولدي عن زوجي خلينا ساكتين يا شمايل شمايل بثقة : لا تسكتين لا تكلمي على الأقل ما تركت ولدي وهو رضيع حتى لو تركت زوجي اللي تزوج علي سحر بعصبية : مو هذا موضوعنا بشوف شغف شمايل التفتت لرعود اللي نازل من الدرج مستعجل : مو شغف ظفرها حتى ظفرها ما تشوفينه ولا انتي متفضله علي بشيء لأني لو ما ابي مشاعر لولدي كنت اقدر أقول له لا تتزوجها وما يرفض لي طلب سحر بقهر: انتي الخسرانة يا شمايل لو ما خليتيني اشوف شغف انا ما اتصلت عليك هالوقت إلا وانا ادري رعود بشغله شمايل التفتت لرعود ثم نطقت : قلت لك تحلمين تشوفين شغف من وراي سواء رعود موجود أو مو موجود شغف دامها من ظهر رعود فهي بنتي وانتي ما يحق لك تنطقين وتقولين انك أمها وانا متأكدة لو كان بيد شغف كان محتك من حياتها كلها سحر بقهر: بشوفها يا شمايل بمساعدتك أو بدونها بشوفها شمايل بثقة : تبطين دام رعود والبارق هم سندها بعد الله تبطين سحر اللي سكرت الخط بقهر من ردود شمايل اللي جات جارحه لها أما شمايل اللي التفتت على رعود الجامد والمتكتف على الكنب ثم نطق رعود بحدة : ادعي يكون ولدك جاب خبرها شمايل اللي شبكت أصابعها بتوتر: رعود رعود رفع يده برفض لكلامها : كانت عندك فرص كثير تتكلمين فيها الحين ادعي ان البارق جايب معه شيء يخصهم شمايل بصوت عالي رافض عتاب رعود لها : ما علمتك ان شغف طالبتي عشان ما اوجع لك قلبك كل اللي اسويه عشانك يا رعود رعود بقهر وبصوت كاسيه الوجع : وش كنتي بتخسرين لو قلتي لي الكلمة اللي قلتيها لسحر قبل شوي وش كنتي بتخسرين لو قلتي دام شغف بنتك فهي بنتي كان ما عشت هالحسرة كان ضميتها بجناحي لين أموت مانيب عاجز أحميها شمايل بقهر : لا عاجز يا رعود شوف جسّار من عجزه سجل بنته باسم ولد عمه وانت تركت بنتك عند جدها انت وانا عارفين انك تحمي بنتك من اعداك اللي ما تعرفهم صعب البارق وهو البارق رجال بآخر العشرينات لا عنده معارف ولا أي احد يعرفه او يطلع معه لخوفك عليه تأكد إن عيشة شغف عند جدها أحسن لها مليون مرة من انها تعيش عندك شغف حيوية واجتماعية لو انا وانت ربيناها بتحبسها بالبيت يا رعود ليه بس رعود بغصة : أشوفها وانا مرتاح اشوف ابتسامتها ما أموت من الغبينة وانا اسمعها تقول لسعود أبوي ولا أموت من الشوق من اسمع صوتها حرّ بجوفي شغف يا سحر حر بجوفي ولا أدري اذا بتعذرني لو رجعت لها ولا لا عاشت 17 سنة بدوني بتختارني بباقي سنينها يا سحر ؟ سحر بثقة : يا رعود لما تعرف إن سنين عمرك راحت عشان تحميها ماراح ترفض جناحك شغف عاشت بدون أم ولا أب بترفضك لما تجي بحنيتك لها! ماراح ترفض اسألني وانا انولدت بدون أبو وكنت من صغري أشوف فيك الأب والصديق والأخ والجناح لو تجيها وانت الرعود من يرفض المطر يا رعود رعود زفر نفسه المكتوم والثقل على كتفه يزيد ويزيد يدري انه وسط لعبة خبيثة لكن ادراكه جاء متأخر : تتوقعين لو البارق كان له الخيار يختار أبوه بيختارني البارق اللي دخل للصالة وهو شاهد آخر كلامهم : البرق ما يجي بدون رعد يبه ارعد وببرق يا يبه جبت لك خبرهم رعود ابتسم هو يلف يده على عنق البارق اللي كان واقف وراه ويسحبه بخفة على الكنب وبتمرس كونه عسكري : والله اني عارف اني لو رحت مخلف وراي عاصفة البارق بألم مسح على عنقه : هذا وانا العاصفة بيكسر ضلوعي اجل لو انا سحابة صيف رعود ضحك : اترك عنك الكلام الفاضي بشّر البارق بفخر : خمن وش عرفت رعود بتمثيل للغضب : بتتكلم ولا كيف البارق اخذ نفس وبجدية : ساري الراشد ما لقيت عليه شيء إلا إنه هو وسحر كانوا بألمانيا قبل ثلاث أيام من الآن برحلة وحدة لكن عجزت القى صلة قرابة بينهم هذا واحد أما اثنين واللي هو عبدالعزيز جبت خبره بعد بس تكفى يبه بشرب ماء وبجي ترى جاي ركض اقسم بالله كل اللي عندي ساعتين رعود اخذ كاس المويا من قدامه وهو يعطيه البارق: اشرح بالتفصيل يالعاصفة البارق اخذ نفس بعد ما شرب المويا برشفة وحده : اول شيء قلت ما دام عبدالعزيز غامض وما نعرف إلا اسمه رحت المقر حقكم لأنه موجود هناك سألت ليث قال لي موجود رحت وانتظرته يشرب شيء عشان اخذ بصماته وأول ما وصلني كاس الشاي اخذت بصماته ورحت للقسم الجنائي وطلعت تاريخه كله والحين الصدمة توقع عبدالعزيز بفطنه و بجمود : عبدالعزيز آل هاشم البارق بصدمة: كيف عرفت رعود بتفكير يحاول يربط الأمور : اخو سحر كان بألمانيا وممنوع من الدخول للسعودية بسبب ملف سياسي ولا مرة شفته لكن وش علاقة سحر بساري البارق ابتسم : أما مكالمة أمي السبعه بنت السبع اللي بهدلت زوجتك بهدله على كيفك طلعت موقع الساحرة سحر نفس موقع خطف نجد -تسند براحة على الكنب- وهذا جهد ساعتين من البحث هذا اللي قدرت عليه رعود باس رأس البارق بافتخار: جعلك تسلم يا ابوي جعلك تسلم البارق اللي بعد راسه بصدمة وفز على حيله باس رأس رعود : حاشاك يبه اطلبني بس وتلقاني شمايل بابتسامة : روح يمه البارق روح ارتاح بغرفتك البارق توجه لأمه وهو يبوس رأسها : شوشو القلب تكفين حلليني ترى سجلت مكالمتك كلها عجبتيني يا أم البارق العبي بالساحرة شمايل ابتسمت وهي تضرب يده بخفة: لا تغتاب احد روح ارقد البارق بهمس لأمه: تكفين امسكي رعودك عني بنام ساعتين بس ساعتين طيب؟ شمايل غمزت له : روح نام قبل يغير رأيه البارق بعجله : تصبحون على خير يا وجيه الخير وانطلق بعجله لغرفته رعود بسخرية : يا مثبت العقل أي صبح اللي بنصبح فيه ناوي ينام لباكر شمايل بجدية: ارفق على الولد ذبحته من شغلك رعود ببرود: ما يحتاج اكرر كلامي يا شمايل تركها وطلع لحديقة بيته جلس على العشب وهو حافي يطرد الطاقة السلبية ويتنفس هواء نظيف بدأ يكتب على العشب الثلاث اسامي اللي بيده سحر و عبدالعزيز وساري ورسم خط متصل بين عبدالعزيز وسحر وصله صوت شمايل اللي جايبه له الشاهي : ابحث يا رعود في الناس اسأل الراشد عن ساري وتوصل رعود اخذ الشاهي وهو يشربه دفعة وحدة : صارم بيساعدني بالنقطة هذي ساري زوج بنته بس الحين هم عند أبوي بعد العشاء برسل له البارق شمايل بخوف : رعود بتودي ولدي لصارم اللي يظن انكم ذابحين ولده بتذبحني انت رعود ابتسم ثم رجع يهوجس : شفت صارم عند قبر الفهد و قال لي انه مصدق إني بريء بس محتاجين دليل شمايل وما زال الخوف مجتاحها : أخاف انه يتهيأ لك رعود غمض عيونه : ارتحت لما عرفت انه مصدقني متأكد من كلامي صح رأسي بينفجر من التفكير بس ما كان خيال يا شمايل شمايل ابتسمت والخوف لا زال مالي صدرها : ريح رأسك يا رعود رعود برفض : تدرين لو عبدالعزيز ورى موت الفهد إني ما اسامح نفسي ابد شمايل بمحاولة انها تبعد الشغل عن رعود مسكت رأسه وهي تدلكه بخفة : تدري إن شغف تشبهك رعود بابتسامة: كيف شمايل ضحكت بسخرية : كل يوم يمسكونها مهربة أكياس شاي بشنطتها رعود ضحك بعمق: راجحيه صغيرة شمايل هزت رأسها بضحك : تدري ما اقدر أهاوشها من أتذكر انها بنتك ومدمنة شاي مثلك رعود فتح عيونه بعد ما كان مغمضهم : جربي تهاوشين بنتي بس يا ويلكم خلوها تشرب شاهي ماهو ممنوع تشرب وتركز بحصصها شمايل ضحكت : حتى بالردود نفسها من نمسكها تقول هذا وقود المخ عشان اركز بحصصكم تربطوني من فراشي لين الظهر بحصص ومعلومات شلون افهم لازم اشحن رأسي ونعزز لبعض بعدين يا رعود ترى بغار منها وبحرمها من الشاهي رعود بضحكة : عشان كل يوم اسوق سطحه ونهرب لها شاهي خلوها تشحن مخها وش ضاركم شمايل بابتسامة : ما نهاوشها اذا بسببها بنشوف ضحك الرعد رعود ابتسم : تدرين كنا نقول انا والفهد الله يرحمه إننا بنجيب عيال كثير وبنسوي جيش من الصوارم والرواجح ونزوجهم بعض لكن شوفي القدر هو راح وما جاه الا جسّار وانا بروح ما عندي الا البارق وشغف وحتى شغف انحرمت منها شمايل ما زالت تدلك رأسه بشكل خفيف ومريح لأعصابه المشدودة : بعد عمر طويل يا رعود منت محروم شغف مصيرها بترجع لجناحك وحتى خذها تلميح مني سحر وساري بينهم ارتباط والأقرب انهم متزوجين رعود رجع يفكر بالموضوع: صحيح ممكن وقتها نكون فعلًا وصلنا لهم بس ليه الفهد وش العداوة اللي بينهم وبينه ما فيه رابط بينهم وبين الفهد شمايل بتفكير: اسأل صارم أكيد بتوصل لفكرة أو دافع لهم بقتل الفهد رعود بهدوء نزل يدها من على رأسه : وهذا اللي بيصير ان شاء الله هذا هو شمايل ابتسمت له : عسى ربي يوفقك لكل ما يحبه ويرضاه -مجلس آل راجح حضر الشيخ المسؤول عن عقد القران وبدأ يسرد خطبة بسيطة تناسب الموقف ثم نطق بجهورية : ولي أمر العروس وينه سعود : سم انا ولي أمرهم الشيخ اشر يمينه : تفضل انت والعريس الأول -رجع يشيك على دفتره – جسّار الفهد آل صارم جسّار فز وهو يعدل شماغه وجلس يسار الشيخ الشيخ بابتسامة ابتدأ بالنص القرآني : سبحان من ذكر في كتابه الكريم ومن آياته أن خلق لكم من أنفسكم أزواجًا لتسكنوا إليها وجعل بينكم مودةً ورحمة إن في ذلك لآيات لقومٍ يتفكرون صدق الله العظيم قل يا ابني سعود زوجتك ابنتي مشاعر على ما يرضي الله ويرضي رسوله وعلى مراد الله سعو بتكرار : زوجتك ابنتي مشاعر على ما يرضي الله ورسوله وعلى مراد الله الشيخ بابتسامة : قل يا جسّار قبلت جسّار : قبلت الشيخ ربت على كفوفهم : الشيخ بجهورية : الآن العروس تبصم على الجهاز عشان نوثق العقد بإذن الله ونبارك للعريس سعود برحابة : حياك الله ألحقني رفع جواله وهو يتصل على مشاعر بالطريق وهو خارج من المجلس مشاعر : هلا يبه سعود : البسي عباتك واطلعي لي عند الباب عشان تبصمين على عقد الزواج مشاعر اللي اجتاحها التوتر باللحظة هذي: ان شاء الله ثواني يبه روح بخوف: بتروحين تبصمين؟ مشاعر هزت رأسها بمحاولة لإخفاء التوتر وهي تلبس عباتها على الرغم من يدها الراجفة ونظرات شغف المبتسمة وروح المتوترة انتهت وهي تخرج للباب وتشوف أبوها بابتسامته مقابلها سعود اللي طلب من الشيخ يوقف ابعد عشان يكلم بنته : اسألك لآخر مرة يا مشاعر مقتنعة ولا لا ؟ يكفي تقولين لا وانا امنع كل شيء مشاعر بثقة مزيفة لكنها تعودت تغلف نفسها فيها : مقتنعة يبه سعود بامتعاض : على بركة الله اقرب يا شيخ الشيخ قرب وبيده الجهاز المخصص لبصمة العروس : انتي مشاعر سعود مشاعر برسمية : ايه نعم الشيخ بتأكيد : موافقة على جسّار آل صارم زوج لك على سنة الله ورسوله مشاعر اللي من وصل اسمه لأذنها تذكرت لقاءهم وكيف الجمود ساكن وجهه ومافيه من سماحة أبوها ولا جدها لكنها تذكرت ضحكته مع شغف وردت بشكل سريع وواثق: موافقة الشيخ مد الجهاز وهو يشغله : على بركة الله تفضلي ابصمي بيدك اليمين بالإبهام مشاعر مدت اصبعها وهي تبصمه على الجهاز المخصص لاستقبال البصمة الشيخ بابتسامة لسعود : ألف مبروك الله يجعلها زواجة العمر بس ترى المعرس موصيني أوصل الكلام هذا للعروس باسمه وده بعد اذن العروس يكون الزواج مستعجل بعد أسبوعين بالكثير سعود بصدمة : ما اتفقنا على كذا مشاعر بثقة : موافقة سعود لف عليها بصدمة من موافقتها السريعة بدون تفكير ما قدر يتكلم وهو يشهد دخولها للبيت وكأن الزواج عاتق على كتفها وطاح الشيخ بتهدئة للأوضاع : ما دام الاثنين موافقين يا أبو مشاعر خير البر عاجله ليه التأجيل وما هو شرط من المعرس طلب وتقدرون تتفاهمون عليه بعدين سعود بقهر: على بركة الله حياك الله يا شيخ توجهوا للمجلس وأعلن الشيخ موافقة مشاعر وبدأ استقبال التهاني جسّار توجه لسعود وهو يبوس رأسه : على البركة يا خالي سعود بقهر من بين اسنانه : الله لا يبارك بأبليس وأعوانه جسّار ابتسم وتركه وهو يتوجه لأجداده يسلم عليهم وبعد ما انتهت التبريكات نطق الشيخ : رمّاح عسّاف آل صارم تعال رمّاح وقف بطوله اللي ينافس فيه جسّار وجلس يسار الشيخ وسعود سعود براحة ابتسم عكس جلسته مع جسّار قبل شوي الحوار اللي كان بينه وبين رمّاح كبّره بعينه وعرف إنه الاختيار الصح لروح الشيخ بمزح : متذكر الكلام يا سعود سعود ابتسم : زوجتك ابنتي روح على ما يرضي الله ورسوله وعلى مراد الله رمّاح بآلية : قبلت والله امتلى المجلس بالضحك على حماس رمّاح الواضح حتى وقف الشيخ ورى سعود اللي وقف متوجه لروح اللي اكتفى انه يرسل لها رسالة تكون جاهزة لكن عند روح اللي عكس حماس رمّاح كانت متوترة ومشبكه أصابعها : شغف تكفين روحي بصمي عني شغف بضحك : خبلة انتي شدخلني إلا اذا تبيني اتزوج رمّاح بدالك روح بقهر: وجع ترى بصمة عادي مشاعر ابتسمت : عادي روح روحي بصمي وارجعي مافيها شيء انسي انه عقد زواج اعتبريه مذكرة اعتراض على قضية روح بخوف: وقفت قدام قاضي ورافعت عن جريمة قتل ما توترت كذا وش ذا وصلها اتصال سعود اللي يستعجلها بالخروج : ياربي ابوي وش اسوي شغف بملل: اللي يسمعها ما يقول انه سنتين وهي بتموت وتتزوجه الحين متوتره روح اخذت نفس بتهدئة وهي تلف حجابها : اشش روح عادي مافيها شيء تبصمين وترجعين وانتي زوجة رمّاح يلا يا روح وصلها صوت سعود اللي سمع كلامها : يلا يا روح خلصينا عاد روح بخوف همست : سمعني!! شغف بقهر دفتها للباب : استلمها بابا سعود هالغبية ذي سعود دخل بابتسامة : يلا يا حرم رمّاح خلصينا روح ابتسمت وهي تطلع للشيخ الشيخ ابتسم : موافقة يا بنتي على زواجك من رمّاح آل صارم روح طالعت ابوها بتوتر وهمست : وش أقول سعود ضحك بسخرية : قولي موافقة ولا لا روح بعدم استيعاب كررت وراه : موافقة ولا لا سعود ضحك بضحكة رنانة ما تنسمع غالبًا لكن هالمرة كان صداها واصل لمشاعر وشغف : يا روح يا بابا ركزي الشيخ يسألك موافقة ولا لا جاوبي ايجاب او نفي خلصينا ترى تعبت روح بتوتر نطقت : موافقة الشيخ ابتسم : على بركة الله يابو مشاعر مافيه شروط هالمرة بس تبصم البنت وننتهي سعود بتوجيه لروح : بصمي يا بابا بيدك اليمين بالابهام روح رفعت يدينها الثنتين وهي تحدد يدها اليمين وين ثم مدت ابهامها يا دوب لامست الجهاز وسحبت اصبعها الشيخ باستغراب : ابصمي عشان استقبل بصمتك سعود ابتسم وهو يمسك ابهامها ويساعدها تبصم : تمام كذا ؟ الشيخ ابتسم : بارك الله لهما وبارك عليهما وجمع بينهما على خير روح اللي اول ما سمعت الكلام تركتهم وهي تركض لداخل سعود لحق الشيخ وهو يرجع المجلس اول ما دخل توجه له رمّاح وهو يبوس رأسه سعود ابتسم بسخرية : اركد يمكن البنت ما وافقت منتظرني على الباب انت رمّاح ابتسم : بقول مبروك علي لأني واثق من موافقتها سعود حضنه تحت نظرات جسّار الغاضبة : الله يبارك لكم يا عمي وعقبال الفرحة الكبيرة والله الله على روحي يا رمّاح رمّاح بابتسامة متوترة أول ما لاحظ نظرات جسّار : بعيوني يا عم الله يبارك فيك راجح بفرحة : الحمدلله على البلاغ والتمام ألف مبروك جاته الردود متفرقة من صارم وجسّار ورمّاح اللي توجه له يبوس رأسه جسّار بهمس للشيخ : وافقت ؟ الشيخ هز رأسه بالتأكيد وابتسم جسّار وعرف الحين سبب عصبية سعود جسّار بجهورية : يا جماعة الخير بطلب من خالي سعود وجدي راجح إني أقدم زواجي خلال أسبوعين بالكثير راجح لف على سعود اللي بانت ملامح الغضب على وجهه : المواضيع هذي اترك الحريم بكره يحددونها بينهم وبين بعض حنا اللي علينا تممناه يا جسّار باقي التفاصيل على الحريم جسّار بابتسامة : ابشر صارم وقف وهو مستند على عصاته : اجل يلا عن اذنكم راجح شد يده وهو يجلسه : ما تطلعون بدون عشاء صارم برفض: خيرك واصل يا وجه الخير بس جيناكم بعجلة وبنطلع بعجلة راجح برفض وإصرار: لا والله ما تطلعون قم يا سعود استعجل بالعشاء سعود طلع من المجلس تلبية لطلب أبوه وهو يكلم المطعم المسؤول عن العشاء يستعجلون رمّاح همس لجسّار: ماهو من صالحك يا جسّار تعادي خالك خاصة وصار بينكم نسب لمتى هالمناورة معه جسّار بابتسامة ساخرة : ماهو طايقني وفر نصيحتك لنفسك دام علاقتكم بدت حلوه رمّاح برفض: انت مجنون فيه احد يكره ولد اخته الوحيدة ما يكرهك يكره تصرفاتك اللي بسببها فقد أخوه جسّار بإنهاء للنقاش: لا تفتح هالطاري يا رمّاح ماراح يتغير شيء رمّاح بقهر: دامه ماراح يتغير شيء ليه وافقت انه يحضر الزواج ! جسّار بثقة : من زمان انتظر المواجهة هذي وجاتني برجليها تتوقع برفضها ! رمّاح بقهر: وعشان كذا قدمت زواجك صح ما فكرت بزوجتك ولا بنتك كيف توصل لهم الموضوع وما فكرت برأي البنت كل هذا عشان تواجه رعود ! جسّار بثقة ابتسم وهو يتذكر لقاهم : رعود سبب والسبب الثاني احتفظ فيه لنفسي أما الأمور اللي ذكرتها اتركها علي رمّاح هز رأسه بيأس : الله يستر منك -ببيت عزّام آل صارم كان اللقاء بين نبض وفاتن نبض بحماس: تدرين إن جسّار بيتزوج ثانيه ! فاتن اللي منشغلة بترتيب سريرها والخداديات: من صغري أخاف منه و من خوفي منه أخاف حتى اني أتكلم مع بنته احسه جامد وحياته مافيها روح غامض مره فجأة تزوج هبه وفجأه بيتزوج عليها وكل ما أتذكر إنه خلى جدي يعتذر له أخاف منه زيادة معقولة جدي يعتذر من واحد من أحفاده نبض بحماس: ايه مو جدي اجبر جسّار يتزوج هبه وخيره بين رضاه وزواجه من هبه جسّار قال بختار رضاك وبتزوج اللي تبي لكن بتعيش وانت تدور رضاي وفعلًا كمل ثلاث شهور ما بينه وبين جدي إلا السلام وجدي قدامنا يتشفق عليه فاتن بتخمين: أتوقع إنه يحبه عشانه ولد عمي الفهد الوحيد واللي باقي منه نبض بنفس حماسها قامت تساعد فاتن بالترتيب: مو بس كذا قايد يقول إنه يشبه عمي الفهد نسخة منه بالشكل تدرين احس ودي اشوف عمي الفهد فاتن بعدم اهتمام: أتوقع ابوي عنده صور كثير لعمي الله يرحمه لأنهم كانوا يخيمون مع بعض وكان أقرب واحد لأبوي نبض بصدمة: صدق ابي اشوفه يا فاتن فاتن ابتسمت على حماسها : اذا جاء ابوي قولي له عادي ما يقول شيء بس مخبيهم عن جدي وجسّار انتي عادي تشوفين بالعكس يتسلى بدال ما يوصف لي الصورة انتي تشوفينها نبض حست بحساسية فاتن بالموضوع هذا : ما ابي اشوف الصورة بعيوني ابي اشوفها بعيون عمي عزّام ابي اسمع منه هو تفاصيل الصورة مثل ما يسوي معك فاتن ابتسمت والحين تذكرت : نبض بسألك نبض مسكت يدها : اكيد سألي فاتن اللي تركت يدها الثانية فوق كف نبض بحرص : ما تكذبين علي يا نبض نبض بتأكيد : من متى اكذب عليك يا فاتن سألي شفيك فاتن بتردد : كنتي موجودة لما تعبت صح نبض بتردد : ايه موجودة فاتن حست بالتردد اللي بصوتها : نبض قلتي انك بتصارحيني ترى للحين انا ما سألت نبض رجعت لثقتها لأنها تدري إن فاتن تعرف من صوتها كل شيء: يلا اسألي طيب صايرة فضولية اليوم فاتن بتردد : مين اللي عطاني العلاج يا نبض نبض اللي ما توقعت هالسؤال سكتت وما حست إلا بفاتن وهي تسحب منها الخدادية اللي بقت بيدها : جاوبيني يا نبض نبض برفض: لا ما اقدر اجاوبك يا فاتن انسي فاتن بقهر: ليه محد يجاوبني انا ادري انه رجال بس مين قولوا لي بس عشاني ما اشوف ما يعني اني أكون غشيمة عن الأمور اللي تدور حولي نبض بتملص: ما ادري يا فاتن اسألي احد غيري فاتن بقهر : كنتي موجودة يعني الرجال اللي كان موجود محرم لك وماهو واحد من عمامي يا نبض واحد من اخوانك صح ؟ نبض بوهقة مالها إلا تنطق الصراحة : رايد يا فاتن فاتن بقهر: بأي حق تدخلونه علي ما كنتي قادرة انتي تعطيني العلاج لو هو قايد قلت دكتور لكن رايد من يكون رايد عشان يتكشف علي نبض بقهر من فاتن : فاتن اهدي ترى عطاك علاجك بس لا تكشف ولا شيء فاتن بقهر رمت الفازة اللي جنبها : ليه هو ليه مو أحد ثاني نبض راحت لها كتفتها بهدوء عشان ما تتأذى : اهدي فاتن تكفين أهدي ترى رايد محرم لك والله فاتن بعصبية تحاول تفك نفسها من نبض : كيف محرم لا هو اخوي ولا ابوي ولا قاطعتها نبض بسرعة عشان تهدى وما تجيها نوبة الصرع ومافيه أحد يساعدها : زوجك رايد زوجك يا فاتن ارتخت بجسمها على نبض وأعصابها ارتخت بصدمة : كيف!! -بيت سيّاف أم أوراد : ها يا أوراد فكرتي ولا باقي ابوك قال لي اسألك أجواد بصدمة : يمه وين ترى توهم أمس خاطبين اتركوها تفكر يوه أم أوراد بعصبية : انتي اسكتي شفناك وانتي رافضه كايد وخبصتينا والحين مثل السمن على العسل اسكتي انا اكلم اختك الكبيرة أجواد بخجل : يوه وبس كل المواضيع تلف وتدور وتلقاني أم أوراد أطلقت نظرتها الغاضبة لأجواد وأجواد اللي حطت يدها على فمها قاصده الصمت أم أوراد : ها يمه أوراد أوراد بعد تفكير طويل من أمس لليوم نطقت بخجل: موافقة يمه أم أوراد بفرحة : ايه يمه ايه هذا بنتي العاقلة بروح اتصل على أبوك ابلغه أجواد اللي اول ما طلعت أمها نطقت : مجنونة انتي ليه وافقتي وانتي تحبين قايد أوراد بمنطقية : قلت لك قبل الحب مو كل شيء و دام قايد ما يفكر فيني انا بفكر بنفسي واللي متقدم لي مافيه شيء ينعاب ليه ما أوافق أجواد بقهر : يا غبية انتي حتى اسمه ما تعرفينه كيف توافقين أوراد وقفت وهي تحاول تنهي الموضوع: تكفي شهادة جدي وابوي وش المهم باسمه أجواد بقهر تتكلم بصوت عالي قاصده يوصل صوتها لأوراد اللي تصعد الدرج بهروب من أجواد : غبية يا أوراد غبية بتأخذين شخص ما تحبينه وبعدين تتوقعين بتعيشين سعيدة يعني أوراد همست لنفسها وهي تصعد الدرج : لا تسمعينها يا أوراد لا تسمعينها انتي اخترتي الصح لا تسمعينها -بجناح هبه كانت تكلم دكتورتها مستقلة عدم وجود جسّار : دكتورة انا للحين ما عرفت سبب الوهن اللي احس فيه أحس بخمول فظيع بجسمي واحيان كثير تصاحبني دوخه الدكتورة : مدام هبه انا بلغتك ان جسمك يرفض العلاج اللي تستخدمينه و أكيد إن هذي أعراضه الجانبية وقفي العلاج فورًا هبه بقهر: ما اقدر أوقفه احس بطني يتقطع الدكتورة برفض: كل اللي فيك التهابات بسيطة ما تستدعي المضادات القوية وعلاجات الحمل اللي تأخذينها الألم اللي تحسين فيه هو وهم ولو ما وقفتي الحبوب فورًا راح اضطر أبلغ زوجك هبه سكرت السماعة بعصبية وهي تحاوط بطنها بيدها وتهمس بصوت منخفض : الكل يقول إنك مو موجود بس انت تسمعني صح إني ما كنت أبيك أخاف ما اهتم فيك أخاف تكون مثل نجد بس الحين انا ابيك ابقى هينا لا تروح هم ما يشوفونك ابقى لا تروح كل هذا كان تحت مسامع الشخص اللي مشاركها الغرفة بدون معرفتها نجد بخوف : ماما انتي تمام هبه غمضت عيونها بندم : تعالي ماما انا بخير نجد تركتها بخوف وهي تطلع من الغرفة تركض لغرفة جدتها نوره بخوف من ملامحها المخطوفة : بسم الله عليك نجد شفيك نجد بخوف: ماما تكلم البيبي هو يسمعها ؟ نوره بصدمة وهي اللي تعرف ان هبه ماهي حامل بس استشكل عليها الوضع ردت على نجد بهدوء: ايه ايه يسمعها نجد بزعل : ليه تقول ما ابي تصير مثل نجد شفيني انا نوره عقدت حواجبها : من يقوله أكيد انتي سمعتي غلط هي تبيه يصير مثلك بس انتي ما سمعتي زين نجد هزت رأسها بتأكيد: ايه يمكن اصلًا هو لازم يصير مثلي انا الكبيرة نوره مسحت على رأسها بهدوء : انتي الكبيرة والعاقلة بس يمه اللي سمعتيه لا تقولينه لأحد سر نجد بحماس:الله سر جديد نوره باستغراب : ليه وش السر القديم يا نجد نجد بتفكير : لا ما يصلح أقول لك سر نوره بمجاراة : لا عادي الأسرار تنقال للجدات بس نجد بحماس: جد ! يعني اقدر أقول لك نوره : ايه تقدرين قولي نجد بتفكير: شفتي لما اخذوني لمكان بعيد انا شفت سوبر مان عطاني سر محد يعرفه إلا انا وهو وولده نوره بصدمة: من يكون سوبر مان تقصدين ابوك انتي ولا مين تقصدين نجد بهمس باذن نوره : لا اقصد عمي سامي اللي مو اسمه سامي صديق بابا اللي انقذني هو وولده بارق نوره بشك : وش اسمه يا نجد نجد بهمس : رعود بس ترى سر لا تعلمين أحد -انتهى نلقاكم على خير الأسبوع القادم حسابي الانستقرام @sahab_610 | ||||
|
| |
|
02-10-20, 02:19 AM
| #60 | |||||||||
| اقتباس:
| |||||||||
|
| |
|
| أدوات الموضوع | |
| انواع عرض الموضوع | |
|
|
114Likes
العرض العادي
